مهدي عول على احمد .. حطو فراسو وقدام عينيه وقدم ليه عرفة للفيرمة كخماس من بعد ما تعرضو لواحد من الخماسة دلفيرما وعرضو عليه يهزوه ويصرفو عليه وعلى عائلتو اللي عايشة فديك العروبية مقابل يجلس فدارو بالسبة ديال المرض ويدخل بلاصتو عرفة كواحد من عائلتو يخدم على بيدمن يبرا ويرجع لخدمتو .. وكانت طبعا خطة محكمة تمكن فيها عرفة من دخول الفيرمة فهيأة خماس
واخا مابينو وبين تاخماست حتى علاقة لاكن على قبلو صاحبو مهدي اللي خيرو سابق عليه صبر ودوز داك النهار فالشمس دايخ وكيسلت من الخدمة وتمارة حتى تعاشات لعشية وخرج من الفيرمة سخفان لقا مهدي فالطموبيل جالس كيتسناه . طلع حداه كيسوط وحيد واحد الكاسكيطة مغبرة على راسو وقال
- اصاحبي تمااارة ... يكون فعوان الخماسة واحق الرب
مهدي : شتي الخدمة ديال بصح ... ماشي جالس طالق رجليك فالقهوة نهار كامل ومخلص من لفوق غا حيت جيرو .. مهم اش تما؟
عرفة : ولد ل*** كيتعامل مع الناس بحال العبيد ... حالتو لديلمو المقنف وجوووع جوووع اصاحبي ماعرفتش انا فين كيحط الفلوس ... وا حبة دمطيشة خماجت نوض عليها حيحة قالك كنتو تحيدوها قبل ماضربها الشمس وتخماج ... تفووو كيقول ليا شي راس نهبط على مو بالعتلة راس تا ينسا اللي خلقو
مهدي : وكي دايرة الفيرمة من لداخل ؟
عرفة : بفففففف... مق**** بالجهد ... عرفتي قداش اصاحبي ... جنانات تبارك الله ديال الليمون ... عرفتي الليمون كيداير وا سكاار ضربت واحد الليمونة اش غنقول ليك ... وااعر ... جنانات التفاااح فتيي كل تفاحة قداش... والارض نقا من حياتي اصاحبي ريحة التراب نقية .. انا حساب لبا الفيرمة غا ديال السكنة وشوية ديال الخضرة فالاول... قول السيد ضارب يدو فيها بايع شاري الكاميو كيدخل يهز البصلة والديسير .. الخوخ العنب ... كولشي كولشي كيبيع ويخرج فالسلعة ... الكوارا ديال البكر شي 18 لبكرة هولاندية عندو والماكن ديال الحليب فواحد البيت بوحدو ... عرفتي شحال ديال الحليب كيخرج فالنهار ... وابزااف الخير اصاحبي ... كوري ديال الدجاج تاهوا مربيين فيه الدجاج والبيض على الجهد ... وافيييرما اصاحبي ديال بصح راه كبيرة من لداخل عرفتي ضهرها ضارب تا لماعرت فين ... واحد الارض تما ضربت عليها خاوية قدها قداش ... اما الزرع والفول الحمص الزيتون .. الخير واحق الرب تا لخير ... البط الوز عاااد الدار فين ساكن هوا قدها قداش عايش فيها هوا ومرتو ... وديك مرتو واحد الق*** دخلت للكوزينة من باب ديال برا درت راسي كنقلب عليه زعما وهزيت كاس ديال الماء جيت نشرب وقفات عليا قالت ليا حط داك الكاس راه البير ورد فيه تا تشبع ... لقيت واحد الشبكة ديال لكركاع واقداااش اصاحبي محطوطة تما ... والى شفتيه هوا تقول غا شي واحد كيسعا ومرتو كتر منو ماباينش غليهم لخير
ضحك مهدي بسخرية: عليها شانت ولد ل**** صافي قال وصلت ... بلاااتي على مو
عرفة : دابا شنو ؟ فوقاش لبلان
مهدي: فين شادها هوا دابا ؟
عرفة: خرج مشا يوصل شي تخربيق ويرجع
مهدي: مزيان مهم انا كنتسنا جواد يوصل .. نتا سير غبر تا توصل وقيتك
جلس مهدي فالطموبيل بوحدو هوا وجواد بالليل على جنب الطريق في حين عرفة خرج مشا .. الطريق مضلمة وديقة فيها الشجر .. بانت ليهوم الطموبيل جايا مضوية ونزلو بالزراوط وقفو ليها قدامها وباش تحجب الرؤية عند احمد اللي كيشوف القطاطعية قدامو ضربوه ببيضة للزاج ولسوء حضو بغا يمسحها بادات السيارة لاكن البيضاء عاد مازادت حجبات الرؤية اكثر قدامو لان البيض نيىء مكيتمسحش بسهولة واضطر يوقف ، ومع الوقفة هبطو على الطموبيل بالضرب فالامام هرسو ليها الزاج كامل واحمد كيترعد لداخل بلخلعة .. الليل والوحدة ولخلاء يقدر يقتلوه ولا يشرحوه وميسيق ليه حتى واحد الخبار .
اكتفاو بكسر الزجاج ديال الطموبيل بلا ميبانو ليه وبدم بارد خلاوه بلا اضواء وطلعو فالطموبيل مشاو بحالهم وبقا هوا كيغوت بوحدو فالضلمة والموت دالخلعة داخلاه . كابوس او حلم خايب ممكن يفزع اي واحد تعرض ليه . وحل ماقدرش يخرج من الطموبيل وبقا كيشوف فجنابو ويترعد كيتسنا شي واحد يدوز من ديك الطريق يعتقو ويعاونو ، ماهي غير 10 دقايق من مور الحدث حتى عرفة من تما وسمع صوت كيغوت ويعيط
احمد : وا الشريييف ... وا الشرييييف واااا السيييي
مشا عرفة كيجري مخلوع طل عليه لقاه احمد وقال
- السي احمد هادا!!! باك لاباس
رد احمد كيترعد بالخلعة : عاوني الله يرحم الواليدين ... عاوني عاوني راه الزاج تزلع عليا
رد احمد فدهشة : اش وااقه ايك واش درتي شي كسيدة ؟ شنو وقع اش هادشي!!
احمد: تعرضو ليا ولاد الحرام... تعرضو ليا الكفرة بالله الله ياخد فيهم الخق
حل عليه عرفة الباب خرجو من تما وقال: واعندك الزهر لقيتيني غادي نشري شي كارو فهاد الليل تقطع عليا راسي .. اما راه مكاينش اللي يدوز من هنا فهاد الوقت
احمد : ماشتهوومش ماعرفت شكوون ولاكن غيكونو غير واحد ولاد لحرااام (رد بغضب) انا غنصبح فلكوميسارية نديكلاري بيهم نسيفطهم فين يترباو
وصلو احمد للفيرمة كامل كيترعد بالخلعة ماقدرش ينسا اللي وقع ليه ودخل معاها فالسيفة دولاد الناس وحالتو حالة حتى هوا اللي شافو يقول عليه بصح خماس .. للدار واشمنك يا دار قدها قداش فراشها رفيع الاصلاح والتيساع مابتمناه اوي واحد فحياتو .. جلس فوق واحد الفوطوي ديال الجلد فالجنب سخفان وبدا يغوت بغضب كيرد الحر على المرى اللي ماجايبة للدنيا خبار ويعيط
- لمياااااااء... وا لميااااااا.... لمياااااا
نزلات كتجري مع الدروج لابسة بيجامة بلدية فالمنضر وجامعة شعرها وصندالة فرجلها لقاتو كيقفقف وناض ليها كيغوت
- فيييينك من الصباااح وانا كنعيط ليك ... فييين كنتي
تدخل عرفة بهدوء: غير بشوية راه كانت ناعسة وصافي الوقت ماشي ديال لغوات ... برد برد السي احمد ونعل الشيطان
ردت لمياء مخلوعة : عاد سمعتك مالك ياك لاباس اش وقع ؟
احمد: سيري جيبي ليا نشرب تنعسي ماتنوضي الله يعطيك الغراق
مشات كتجري ساكتة جابت القرعة حطاتها ليه وبقات واقفة كتشوف مافهمات والو ... اما عرفة كانت الفرصة ديالو فين يقرب من احمد وهادا هوا الوقت المناسب .. جلس كيواسيه وسهر معاه ديك الليلة وهوا فخاطرو كيسب ويلعن فيه ماكرهش يرجع لصورتو الحقيقيقة ويعطيه شي قتلة اللي تبرد ليه على القلب .. لاكن الضرب مايجيب نتيجة هادي خصها ضربة قاتلة متنوضش العجاج . ضيع وقتو معاه جالس واحمد راسو مزير عطاه عرفة يكمي وبدا يعاود ليه على مشكلتو مع المهدي
عرفة : واشغادي نقول ليك ... المشكل الى كنتي بصح هرستي الطموبيل فكها معاهم حبيا حساااان ليك من هاد المشاكل وتخرج بقتيلة فاللخر
مهدي: واسير اصاحبي بدل الساعة باخرى اشمن جميلة ماتجبدهاش كاع واخا نعيط ليها دير راسك مكتسمعش
عرفة : ونتا عاطيها قتلة وفاكينكم ما مرة ماجوج والحرب نايضة وشديتي ليا دابا فهادي لعفو
مهدي بغيض: وماتجبدش جميلة اصاحبي واش تصعرني ولا!
عرفة : هاهوا غادي ... ينعل بو الحبس .
خرج مشا وتفكر مهدي جميلة قال نعيط وعيط ردات عليه بميوعة
- شنووو؟
مهدي: مال مك ؟ صابحة خاسرة
جميلة: واشنو بغيتي ؟
مهدي بغيض : دابا مال ل*** دمك عاوتاني تبدل ليك اللون مالكي على الهضرة
ردت : شنو قلت اصلا دابا شنو بغيتي؟
مهدي بغضب شديد: عاد لبارح كنتي فوق السلك عايشة لحياة ودابا صابحة مغيرة ... سيري ت*** (قطع عليها) تصعر ديلمي عاوتاني هاد بنت ل*** تفو
تنصص الليل وجاب معاه المشاكيل ... الوقت عند مهدي محدود وصبرو قليل ، والوقت اللي يضيع مكاينش والدم دغيا كيطلع ليه ..ماحدو حاط احمد فالراس ممكاينش وقت للتفلية .. باغي يسالي اللعب فأقرب وقت باش يتهنا ويرتاح ويشوف حوايج اخرى .
خوات الفيرما كل واحد مشا لدارو فين يبات واحمد فبيتو مع مرتو ناعس بحال الحيوان .. غرضو يفرغ كبتو والمرأة عندو ديال الدار والشهوات وتربي الاولاد واخا ماعندو ولاد .. تاكل وتشرب وتسكت والى هضرات ينوض يغوت ويقول " مالك اش خاصك" يلوح عشرين درهم ويقول كنصرف عليك .. يشوف الزين برا خاسر على راسو لفلوس ويرجع عندها يعيفها ويقول لالياتك زينات وزوينات ونتي حالتك ماشي حالة العيالات .. حابسها فالدار متعرف اش واقع فالدنيا .. نهار بغا يتزوج من لعروبية ختارتها ليه مو ... مرى اللي تصلاح للزواج ... والدار والاولاد ... باش الراجل يعيش هاني معاها وهي تعيش هانية ولا عانية ماكيهمش . ولاكن مع الاسف اللي بحال لمياء هاكا كتشوف الزواج حتى هي عينها مغمضين .. كما شافت مها خوتها المحيط فين عايشة مشات على نفس الريتم .. مبدئها وطموحها فالزواج فقط بحال قراناتها ... الدوار كامل كيهضر على الزواج بنتي تزوجات بنتي تخطبات والمخيرة فالبنات كطلب الله وتسنا وتمنا فوقاش يحن عليها الله تزوج حتى هي واخا باقا حتى ماوصلات السن القانوني .. ولمياء وحدة منهم عقلية ديال المرأة الدار ... طيع الراجل وتجلس فالدار ماتقولش لا ... تحشم وتحني الراس والراجل اللي دارها جات معاه تشوف وتسكت وتقول راجل انا مرى خاصني نقوم بداري براجلي نسهر على راحتو نصبر للعداب والمحنة ونخلي الناس ديما يضربو بيا المثل الاعلى... مرى قادة وديال الزماان ... نشنت بإنجازي كوني مرة صبارة .. دراع ماضي وحارة ولاللى مولاتي ... نهز الراجلعلى كفوف الراحة .. ميهمش كفاش داير اللي كيهم هوا انني مزوجة ومرات الراجل .. انجاز نفتاخر بيه ونهز راسي فوسط الناس بكبرياء ومنخلي لحتى واحد يحل فمو . مانردش الهضرة ونسمع الكلام ونحني الراس .. حيت المرى ديال الزمان هاكا خاصها تكون ومتخلي لحتى واحد فين يهضر .. واخا ناكل لعصى نصبر ... نسمع الهضرة نصبر ... نشوف الخيانة نصبر .. وهادشي كامل غادي نتجازا عليه فاش نسمع العيالات كيهضرو ويقولو تبااارك الله عليها حارة وصباارة ومرى ديال الدار وجامعة شملها .. لاللة مولاتي ماتخلي عشها يتفتت وضحك فيها عباد الله . غير هادي كتخليها تنسا العداب الاليم والمعانات وتحس براسها لاللة العيالات حتى وحدة ماتجي قدامها .
سالا المعاشرة عرقان من التراب لعندها ولحمو مالح بالعرق .. طاح حداها سخفان وتقلب عطاها بالضهر وقال بلسان ملوي من التعب
- غطيني غطيني .
غطاتو فرحانة فنضرها هادشي اللي كاين .. وهادا هوا الزواج وعند راسها هي الفاهمة وهي العارفة حتى واحد مايوريها ولا يفهمها ولا يقدر يبدل ليها طريقة تفكيرها . ناضت هازة راسها شانتة كتشوف ودخلات للدوش توضات ورجعات نعسات حداه ساكتة والارض ماكافياها فالهزة .. شكون بحالها هي اللي مزوجة كيت اللي باقا بلا زواج.. اما الراجل بحال احمد فعندو مبدا واحد ... الصرامة والحكام على المرى ... ميضسرهاش عليه وميضحكش معاها كتر من لقياس ولا يمدحها والا صافي مشات رجولتو وطاحت قيمتو وضسر عليه المرة اللي هي اصلا ضلعة عوجة الا مزير معاها متقاد
طلع مهدي فالطموبيل مشا بحالو ورجع عرفة للبيت اللي عاطيينو تما كيبات فيه ... دخل جلس حتى زندات مزيان ونعس كيتسنا الغوات .. كان معاه واحد اخر فالبيت كيبات معاه ناعس .. دخلو الدخان وناض مفزوع خرج كيجري يشوف شنو واقع لقا النادر كيتحرق والعافية كطرطق ورجع يجري فيق عرفة اللي اصلا فايق كيتسناه ينوض .. ناضو كيجريو والغوات والصدع والقيامة ناضت ... اللي خدامين تما كولشي جا يجري والناس اللي فديور حداهم ساكنين دخلو يجريو ونزل احمد حفيان مخلوع كيشوف اش واقع بان ليه جبل ديال العافية كياكل فالنادر وغادي كيقرب جهة الجنان ديال الزيتون والى وصل غيمشي الجنان كامل .. دخلو الحماق والخلعة وبدا يغوت ويمشي ويجي ... كولشي بدا يجيب فالماء ودورو الموطور ديال البير بدا يطلع الماء ويطفيو العافية .. كانت عافية احمد وهوا كيشوف النادر كيتكال حارقة جدا . اما الحرقة ديال بصح هي فاش صبح الحال وصبح كلشي جالس فوق الحجر ساهي كيشوف فالرماد فالنادر واحمد شاد راسو كيمشي ويجي باغي يسطا ... روحو غطلع بالخلعة و الحرقة على اللي ضاع .. بقا غادي جاي يولول فداك الصباح يديه مور ضهرو كيكمد الحرقة وعرفة جالس فوق واحد الحجرة شاعل كارو ساكت طايح عله الضيم حتى جا فلاح من الفلاحة كيجري ويغوت بالبوط ويتعكل فالحجر
- والسي حمد .. واااا السي احمددد و اعتق ط ااو ... وااا عتق عتق السي حمد الخيل مشااات واااااااك واااك الخيل مشات ووواااعتق هاااو
كولشي مشا يجري للاسطبل ... حلو الباب لقاو غير خيل واحد اللي واقف كياكل اما الغرف لخرين خاويين .. هنا كلات الباهية لاحمد بغا يحماق .. التبن كلاتو العافية والاسطبل خوا ... بحال الهبيل بدا يجري ويقلب ويسول الخماسة واش خرجو الخيل ... بدا يضرب فخادو ومشا يجري لواحد البيكوب ديال لحديد مقزدرة كيوصلو فيها السلعة وطلع تابعو عرفة كيرد ليه عقلو ... مشا بجنابتو للكوميسارية كيجري ودخل باغي يطيح ليهم كيندب ويجدب ويشكي عليهم .
اما مهدي ولف النعسة حدا جميلة ونسا دارو .. مابقاش يرتاح غير وسط فراشها وريحة بيتها ووناستها الزوينة والخايبة كما بغات تكون ساعتها المهم يبات تما حداها .. ادمان جديد كيفقد راحتو الى فقدو .. ولف وسادتها ومابقاش كيقدر ينعس فبلاصة اخرى . صبحات كتنكر وتنفخ وتسوط من الحكام الزايد .. لابسة بينوار ابيض قصير وجالسة حدا المراية دايرة يدها على خدها .. الزغب فرجليها والموسطاش .. مابقاتش عاطية اهمية لمنضرها قدامها .. ربما الملل خلاها تهمل نفسها معاه .. مابقاش هامها كيفاش كيشوفها .. زويتة ولا خايبة ... كل همها هوا يبعد منها يخليها دير مابغات وتعيش حياتها بلا عراقيل . اما هوا بلى العكس ديالها تماما ... داير مجهود باش يرضيها ومايخليها تشوف فجهة اخرى .. واهم حاجة عاطيها فيها الجهد فكل وقت وحين هوا الجنس .. كيتسائل مع راسو على شنو اللي مخليها كتنفر ؟ وشنو اللي مخليها معصبة طول الوقت وكتتهرب ... دائما كيمشي عقلو للجنس .. واش معاجبهاش؟ مكيرضيهاش ... مكيعرفش ليها؟ .. مايمكنش هي كتنسا راسها تا كتبدا تبكي فاللخر ... كتكهم حتى مكتبقاش قادرة تزيد ... والاهم انها هي اللي كتميل ليه فاش كيجي ويجلس حداها وهي اللي كتقلب عليه ... وفاش كتاخد ما بغات وتبرد كتقلب وجهها وتنفخ حتى كيتعصب
قال وهوا متكي كيشوف فيها بغيض ويدو تحت راسو
- مالكي دابا اش وقع ؟
ردت ويدها على خدها شادة تيليفون كتشوف شنو واقع فالدنيا
- بغيت نتفارقو
هز عينو فالسقف كيسوط مجاوبهاش وهي معصبة كتلعب فالهاتف
- صافي طلعتي ليا فراسي مابقيتش كاع انا باغا نتصاحب ... بغيت نبقا غا بوحدي ... فين ما دخلت نلقاك .. مشبت فايسبوك لقاك مشيت انستغرام لقاك كل مرة طالع من جهة .. طلعتي ليا فراسي اوووف
مهدي : الصمت
جميلة: نحط اللي بغيت ونمشي فين بغيت نتا ماشي شغلك
مهدي: هادشي كامل على تركيا اللي فارعة ليا ك*** بيها الليل كامل!... صافي باغا تمشي نمشيو غا صبري نسالي شي حاجة
رد : من نهار بديت معاك واحق الرب عمرني مع مشيت مع شي ***** .. نتي راه فيك عشرة
جميلة: امم .. نتا بعدا واحد الكدااااب كاع ميتيق فيك الواحد .. المهم انا دابا كنقول ليك غييير سييير
رد بسخرية: نتسناك تا تعطيني لاوكي نتي تاااايقة فراسك ! لا بغيت نمشي راه غنمشي كاع مغنتشاور معاك
جميلة باستفزاز: واسير يالاه ... سير حساب ليك غيبقا فيا الحال كيتك (دورات وجهها بعجرفة) عطيني غي تيقار ياربي تزعط فشي وحدة وتنساني عليك
ناض جلس جامع يديه حدا رجليه وقال بغيض: دابا مال مك علاياش كتقلبي ؟ شحال ما عطيتك شي قتلة
ردت باستفزاز : سير سير
خلاها كتهضر بوحدها وناض لوا عليه الفوطة مشا يجاوب عرفة فالتيليفون .. بقات متبعاه حتى خرج وسرحات رجليها كتشوف فالزغب وطلات على كرصونها من لداخل وعضات شنايفها
- هيييه ويلي ويلي !!
خرجات من الدار مدوشة هي وياه كل واحد هاز خنافرو .. طلبات منو يوصلها للصالون وحطها فالباب دخلات نيشان نتفات الحالة كاملة خصوصا من بعد ماقرات مسج هشام وبغات تلاقا بيه .. شهوتها تلبس شي كسوة وخاصها تقاد الحالة باش تعطي للعين وتبان احسن وحدة عرفهم هشام .. علاش ؟ واش تحدب بين نفسها او تكبر وعجرفة او اعجاب بهشام اللي رجع كيطالب كل نهار يشوفها وهي كترفض خوفا من مهدي اللي حاضيها مؤخرا بخال ضلها .
لبسات حوايجها وخرجات من الصالون شدات طاكسي للدار هزات حوايجها اللي تلبس وصاكها ورجعات نزلات شدات طاكسي صغير من الباب وهي معصبة مولفة الطموبيل وماراضياش طلبها من مهدي .. وحتى هوا خلاها على رجليها بلعاني باش يحد ليها الدوران والخرجة بالليل اللي مزالة حاصلة ليه فالحلق بحال الشوكة .
وصل الموعد ولبسات كسيوة حد الركبة.. طلقات الشعر ولبسات حداء رياضي مرصع بالاحجار والمكياج والروايح ومشات مع غروب الشمس كتمايل عاجبها الحال خرجات من القيصارية لقات سيارتو فالدورة مع الشارع اللي نعتات ليه والدنيا عامرة كولشي خارج .. طلعات حداه بابتسامة ولباقة سلمات عليه بالوجه وكتشوف لاكلاص فاللباس وقالت بأعجاب
- تعطلت عليك ؟
رد بابتسامة : لا ماشي مشكل .
زادت الطموبيل مشات لمقهى بعيد فبوزنيقة وجلسات بابتسامة معاه كتشرب العاصير وتشوف فيه بإعجاب وضحك بخجل وهوا كيمدح فيها .. شد ليها فيدها فوق الطبلة كيهضر ويعبر وهزها باسها بلطف .. حسات براسها ملكة الكون وزاد اعجابها بهشام اكثر ولباقته وبدات تميل ليه من خلال تعامله معاها .
اثنائها كان مهدي فالمقهى جالس كيسمع لعرفة وهوا كيعاود ليه على اللي وقع .. خرج هوا وياه فالطموبيل يوصلو للفيرمة يكمل شغلو وفطريقهم تصادفو مع بيكوب خارجة من الطريق راكب فيها احمد ومرتو حداه وقال عرفة بسرعة
رجع دغيا دغيا مرتو جايا مع الشيفور رجع اللور غتقشعنا
بسرعة رجع مهدي اللور قلب الدورة ووقف فالجنب فطريق اخرى حتى دازو وهبط عينيه شاف فيهم بتركيز وقال
- فين غادين ؟
عرفة: ماعرفتش... فين كااع غيمشيو
ديمارا مهدي السيارة بسرعة تبع البيكوب اللي عامرة غبرة و حالتها بالخدمة وقال
- مرتو هاديك ؟ متأكد
عرفة: متأكد اصاحبي علاش تابعهم ؟
مهدي: صافي غا زيد نشوف فين غادين
كان مهدي كيعني شنو كيقول وطاح فراسو فجأة خطة شيطانية من خطط الشيطان وتبع البيكوب حتى وصلات للمدينة ووقفات قدام عيادة طبية ونزلات منها لمياء بعجرفة .. مرت الراجل زعما .. لابسة جلابة وصابو وجامعة الشعر سفنجة وطلعات مع الدروج .. نزل مهدي بسرعة خلا عرفة غير كيشوف ودخل للعمارة كيجري تبعها .. تلفات ليه ماعرفش فين مشات ليه ..بقا طالع نازل كيقلب حتى سمع شي واحد نازل وطل بين الدروج شافها نازلة وطلع كيجري دخل فيها دخلة خايبة حتى طاحت كتغوت على يدها وتلفت بسرعة عندها ورجع كيجري شد فيها مخلوع وقال
- سمحي ليا واش تقصحتي ... سمحي ليا كنت زربان
ردت بعجرفة: مكتشوفش قدامك شوف شنو درتي ليا فيدي
مهدي: سمحي ليا مارديتش البال جلسي جلسي انشوف يدك
جلسات فوق الدرجة شادة يدها كتكمدها وهوا شاد ليها فيها كيسرحها وقال باغي يضحكها
- صافي ماوقع والو هاهيا تسرحات ... وايلي تا انا عور هاد الزين كامل وماشفتوش ... خاااصني نمشي ندير نضاضر
حشمات وبدات ضحك وقالت : ماشي مشكل صافي
رد بابتسامة مثيرة: لالا مشكل ... واش انا مطيحك ونمشي نخليك هاكا ... هاد الفن كولو ونخليه مجاتش
بقات غير كتشوف فيه وترمش ودورات وجهها حشمانة عجبها كلامو وكملها باس ديك البلاصة اللي كضرها وقال بنفس الابتسامة
- شوفي واش باقا ضرك
دارت يدها على فمها حشمانة : لااا ههه
هز عينو ساهي فيها : سبحان الله بحال الى فايت شايفك فشي بلاصة ... ماشي نتي اللي ساكنة فالفيرمة جهة البراج ؟
قالت بارتباك وخوف : هاااه ؟؟؟ لالا
رد : لا نتي انا فايت شايفك تما .. راه عندنا الفيرمة غير حداكم وشحال من مرة كنشوفك مع باك ومكنزعمش نهضر معاك ... باك ياك هاداك اللي كيكون معتك ديما
مارضاتش يقول على راجلها باك وبدات تبلع ريقها وقالت والصهد طالع معاها وقالت
- اه ... ا اا ابا
مهدي شد ليها يدها : كنت حاس ... (خرج لسانو باعجاب كيحلون فعينيه ) عرفتي اش درتي فيا ... عرفتي راك هبلتيني من نهار شفتك وانا باغي غير كفاش ندوي معاك (هبط راسو ) عرفتي شنو .. انا تبعتك من تما لهنا شفتك دخلتي لهاد العمارة وبلعاني دخلت فيك .. ولاكن عور والله تا عور ماحسابش ليا غنقصحك (عاود باس يدها) خفت غير تفلتي عاوتاني ونبقا نقلب ونطل باش نشوفك
السيدة حشمات رجعات تحمار وتصفار عمرها سمعات بحال داك الكلام الزين ... كان يبان ليها احمد راجل وسيد الرجال فجأة وفدماغها قارناتو وبدات دير الفرق .. اييه يا الرجال ... قول كاين الرجال فالدنيا.
وقف بسرعة شاف موراه وقال: ياكما عطلتك وبغيتي تمشي؟
ناضت وقفات مهبطة عينيها بغرور: اممم .. راه تعطلت
دار ليها الطريق مابغاش يزيد فالهضرة اكثر وهادي فحد داتها تقنية كتخلي الواحد يطمع فالمزيد راسو .
قال كيطلع ويهبط فيها باعجاب: تهلاي فراسك
جمعات الضحكة وبينات الوجه الصارم زعما وتمات نازلة وهوا كيشوف فمشيتها كتلوى بلعاني وتقاد شناتف شعرها من الجناب .. يالاه بغات دور قال
بدا يصوني وهي مكتجاوبش حتى صعر وتعصب ونزل ساخط مشا للمحل مباشرة .. رجع متأكد من اتصالاتو .. الى مجاوباتوش كيعرف خارجة ولا كدير شي حاجة . وصل عرفة للفيرمة ومشا للمحل دخل كيشوف واستغرب من وجود خديجة وحتى هي استغربات من دخوله للمحل .. كانت كدور وترتب حاضية السلعة والمنضر وكل شوية تمسح الصبابط وتلمعهم حتى دخل عليها كيدور عينيه فالمحل وقالت بابتسامة
- بغيتي شي حاجة اشريف؟
قال عاقد حواجبو ووقف وسط المحل يديه على جناب السمطة
- فين جميلة؟
ردت خديجة : خرجات واش بغيتيها؟
مهدي: وقتاش خرجات؟
خديجة: شي ساعة تقريبا
هز راسو كيجمع النفس وساط بغضب وقال
- مقالتش ليك فين مشات ؟
خديجة: لا اسيدي مقالتش ليا
عاض شنايفو كيزفر بحرقة عرفها غتكون خرجة ... بقا يدور فالمحل ويشوف الجديد ودخل لاكيس ضرب الكود وتحلات ليه شاف شنو فيها لقاها خاوية وقال بصرامة
- عاد بديتي معاها ؟
خديجة : اه يالاه بديت
سد ديك لاكيس وقال : عيطي ليها سوليها فين كاينة
خديجة: منقدرش نعيط اسيدي عيط ليها .. انا خدامة على طرف دلخبز وصافي
مهدي : صوني وصافي شوفي واش تجاوب
بقات خديجة مترردة مابغاش تخلق المشاكسل او تكون سبب فشي مشكل وفنفس الوقت حشمات من طلب مهدي وصونات وقطعات حيت متافقة هي جميلة غير تفيبي عليها بلا مضيع الصولد ديالها .. فلحين صونات ليها جميلة وقال كيشوف فيها بصرامة
- جاوبيها سوليها واش مغتجيش ولا على ثمن شي حاجة
بقات خديجة غير كتشوف فهاد الحصلة اللي خشات راسها فيها وفهمات باللي مهدي كيبحث عليها وردت قائلة
- الو ختي جميلة
جميلة: الو نعام ؟
خديجة : غير بغيت نعرف واش غتجي ولا نسد المحل ونمشي
جميلة: لا غير سدي وسيري انا غنتعطل
خديجة: واخا بسلامة (قطعات)
مهدي: فاش خرجات شنو كانت لابسة؟
خديجة : ماعرفت اسيدي ماشفتش
شعلات النار فمهدي من جديد وتعقدو حواجبو حتى دخل واحد فواحد وجلس مهدود لاحولة ليه ولا قوة مهبط راسو على تيليفون وسط البوتيك كيحاول يصوني ويعاود وراسو كيدي ويجيب .. قلبو واكلو .. باينة كدير شي حاجة من موراه .. شنو جالسة كدير فهاد الوقت؟ فين مخشية ؟ عقلو كيصورها ليه فصور كتضرم النار فصدرو وماقدرش يبقا جالس معارفهاش فين هي .. وقف على خديجة كيسير بصبعو وقال
عيطي ليها دااابااا .. عيطي قولي ليها اجي دابا جا مهدي قلب الدنيا كيتسناك
خديجة: غير عفيني الله يرحم ليك الواليدين
مهدي: بلااا منهرس وندكدك وتعيطي بزز منك عليها واعيطي حسن ماتكبر
جبدات جديجة تيليفون في حيرة صونات ليها وردت قائلة
- ختي جميلة راه الدنيا مقلوبة جا واحد سميتو مهدي قلب الدنيا كيقلب عليك
قطعات وكولشي سمعو مهدي ودخل معاه بحال السم وخرج من المحل وقف على برا شعل كارو وبقا غادي جاي فالشارع كيكمي ويدو كترعد بوحدها . اما هي رجعات للكرسي من بعد ما قطعات وهزات الصاك فيدها والبزطام فاليد لخرى بالتلفة وخشات فيه التيليفون وقالت بارتباك
- خاصني نرجع دااابا يالاه نمشيو
وقف هشام بعلامة استفهام: قلنا غنسهرو انسومبل شنو اللي وقع ؟
جميلة : مرة اخرى دابا خاصني ضارةري نرجع يالاه عافاك
مشات للطموبيل كتجري ركبات سابقاه وطلع حداه ديمارا السيارة وهي كل شوية تعيط لخديجة وتسول على الاحوال حتى وصلات للمدينة طلبات منو يحطها حدا محل ديال الملابس والبيجامات وسلمات عليه بسرعة ونزلات كتجري خلاتو ودخلات للحانوت هزات بيجامات من طرف وملابس داخلية ومشات لاكيس تخلص بسرعة وضربات الصاك تجبد الفلوس لقات راسها نسات البزطام فالطموبيل وبدات تقلب وسط الصاك والجياب على الله تلقا شي حاجة وطلعات من تما 400 درهم خلصات بيها اغراضها وخرجات شدات طاكسي مباشرة للقصارية حطها فالباب ونزلات هازة الصيكان ديال الاغراض لقاتو واقف كيمشي ويجي والدنيا عامرة والشارع مزدحم .. جايا جهتو وهوا ميطلع ويهبط فيها .. يالاه وصلات هز يدو للسما وعطاها تسرفيقة حتى كولشي ضار عندهم كيتفرج .. اما هي مارضاتش ومشات كتجري دخلات للمحل وخديجة مصدومة .. تبعها طلع وراها فالدروج وهي تلوح دوك الصيكان والحوايج وبدات تغوت
لاحت دوك الحوايج مقطعين كتبكي وتنخصص ودخلات للحمام زدحات عليها الباب خلاتو واقف كيشوف ... جلس بأسى وندم على الطرشة اللي عطاها ... وفعلا كانت طرشة خايبة وفوقها شوهة وفضيحة .. بقا كيشوف فلحوايج مشتتين والملابس الداخلية مرمية وهبط راسو نادم .. الشك غيخرج عليه وغادي يسطيه .. احساسه كيقول ليه كتعرف شي واحد ولاكن ماحصل عليها حتى حاجة ... ماشاف عليها حتى حاجة .. واش ضلمها ؟ اكيد ضلمها حيت ماشاف عليها والو .. يمكن غرضها تعيش حياتها وهوا خنقها .. يمكن بغات حريتها وهوا مزير عليها بحال باها حتى كرهاتو . بقا يدي ويجيب ويفكر ويخمم ساهي ... اما هي قطعات الحس فالحمام وبقات كتشوف فوجهها وتبرد بالماء وتسوط حسات بيه ندم وداكشي الي بغات .. جهد الضرب ماعندهاش ولاكن ضرب باسلوب اخر تقدر عليه . يكفي الندم اللي غياكلو دابا ويقلق راحتو ومن بعد فاش يرجع يتسامح عاد غادي توريه الضرب .
غسلات وجهها وجمعات شعرها كتنخصص وتسكت ماباغاش ضعاف قدام راسها والنتخصيص يطلع بزز ... جمعات الشعر كوب شوفال بان وجهها كامل وحلات الباب خرجات مالقاتوش .. شافت فلحوايج مزالين مشتتين وهزات الكسوة جبدات الهاتف الثاني اللي دايرة بين لحمها والشورط اللي لابسة شعلاتو وتاصلات بهشام
حطات جميلة يدها على وجهها : والو ماشي حاجة ... باينة ؟!
خديجة : تنبلات !!!
زفرات بحقد : الله يعطيه موصيبة
سيفطات خديجة تقلب ليها على الثلج وجابتو وتكات على لاكيس بيديها كتكمد حنكها حتى فيبرا تيليفون ومشات حاضية جنابها لا تخرج فيه .. عينيها كيشوفو فالناس اللي شافو الطرشة وماراضياش .. ضارت مور القصارية عند هشام وطلعات بسرعة عاطاه بالحنك البارد ماباغاش تشوف فيه وقالت
- سمح ليا عدبتك
هشام : ماشي مشكل .. هاهوا باقي فبلاصتو .. (بثقة فالنفس وتقالة فالكلام ) راه خديت منو واحد 1500 درهم طاحت الواليدة على غفلة وديتها لكلينيك وماكنتش هاز معايا .. حتى نعطيها ليك
تصدمات وحلات بزطامها كأنها كلات طرشة اخرى ، قلبات البزطام لقات فيه 500 درهم اللي باقا لاكن ماقدراتش تستوعب كفاش قدر يحل البزطام ويشوف شنو فيه !...كفاش عطاتو نفسو يحل بزطامها ؟ ولو انه تزير مثلا مالقاش الوقت يتيري علاش يمد يدو لبزطامها ويحلو يشوف شنو فيه ؟ بلعات ريقها ماعجبهاش الحال وبغات تبين باللي حتى ديك 1500 درهم ماشي شي حاجة بالنسبة ليها وباللي نيفو طالع عندها على دوك الفلوس وميسواو عندها والو وقالت
- ماشي مشكل ... غير هوا مكنبغيش اللي يحل ليا صاكي ولا بزطامي حتى يتشاور معايا .
رد بعجرفة هاز حاجبو : بغيتي نمشي نتيريها دابا نتيريها
ردت بلباقة وصرامة : لا بلاش مواقفاش عليها . بسلامة
حلات الباب نزلات كتسوط وتنفخ .. مابيهاش الفلوس .. بيها الشمتة اللي تشمتات والوقت اللي عطات لواحد صدق فالاخير مستواه طايح على اللي كانت راسمة فبالها .. وبما انه طاح فحتى هي طاحت قيمتها قدام نفسها وكرهات راسها اللي عطاتو وقت وبان مستواها من مستوى هشام الدنيء .. دارت مقارنة فراسها بينو وبين مهدي وبدات تردد
- بقات فلفرونسي .. بقات فالعياقة والنفخة بااز
رجعات ندمانة للمحل والمشهد كيتكرر ان عينيها وهي مصدومة ... مستحيل هشام ينزل لهاد المستوى !! مستحيل !!! اكثر حاجة فقصاتها هي يدو اللي تمدات و النفخة باش كيهضر .. بدات تلوم راسها اللي ماجاوباتش وما وراتوش مستواه ولامت اكثر نفسها على اللي دارت مع مهدي من غدع .. مهدي اللي كيهز من جيبو ويمد ليها لبزطامها بلا ميتحاسب ولا يتعفر بل عن طيب خاطر وفرحان وضاحك .. طلعات للاعلى لقات خديجة جمعات الحوايج اللي قطعات فصاك وحطاتهم فالجنب .. جلسات حداهم وحلات الصاك وتذكرات فعلتها اللئيمة وبصيرتها اللي كانت معمية وبدات تراجع نفسها بينها وبين ضميرها .. تذكرات صورتو فاش جبدات ليه الحوايج وملامح وجهه اللي تهبدلو وصدق كلامها .. او يمكن من خبو ليها حتى هوا تعمات ليه البصيرة ... بقا فيها وأنبها ضميرها خصوصا مللي مزادش معاها الهضرة وخرجات مالقاتوش .. فين غيكون مشا؟ اكيد لاحت ليه كلام بحال السم وخلاتو .. هادا جزائو فعلا اللي ماد ليها يد المساعدة بالرغم من كلامو وعصبيتو عليها .
رجعات فحالها للدار طايح عليها الضيم .. هشام باع راسو بثمن 1500 درهم وهي شرات بداك الثمن حقيقتو اللي حبطاتها وخيبات ضنها وبينات ليها على شخصيتو مستواه الحقيقي .. فنضرها اي راجل مد يدو لفلوس امراة فماشي راجل ابدا .. بحالو بحال احمد وبحال رشيد مستوى واحد .
جلسات بوحدها فالدار كتلوم فراسها . بقا فيها الحال على الحالة اللي دارت لمهدي والطرشة لي ملات وبسبب واحد بحال خوها .. بدم بارد مد يدو على ديالها وكيقولها بكبرياء وغرور.. الغرور هوا يجمع يدو .. ميندش يدو لبزطامها او يحلو ولو انه يكون فارغ .. هادا فحدث عدم احترام ولايمثل الرجولة في شيء . مشا الزواق ومشا كلشي بسبب اللي دار ورجعات لمهدي كتفكر فوضعها معاه وكتعيط ليه فتيليفون وهوا مكيجاوبش .. جاتها البكية وشدات واحد المخدة عنقاتها وهي جالسة ندمانة كدمع بوحدها وعقلها كيعاود ليها على كل خيرة دارها مهدي من الاول للاخير وضميرها كيزيد يأنبها حتى بدات تنخصص بوحدها وتصوني .. صونات لمينة كتسول كالعادة وما عطاتها خبار بلعكس زادت خلعاتها فاش سمعات صوتها كتبكي وبدات تسول واختصرت ليعا جميلة باختصار انه مجرد خلاف وقطعات فالاخير ورجعات كتصوني ليه وتعاود وفكل مرة كتفشل المحاولة كتزيد تأزم حتى تشد ليها الخط لاكن ماجاوبش بقا ساكت وهي كتنخصص فصمت وبصوت متقطع كتردد
تفاجآة وحلات عينيها وناضت بسرعة بنفس لباسها لاحت عليها شال على كتافها من البرد ونزلات كتجري فالضلام وتقلب لقاتو متكي فطموبيل مدلي يدو من السرجم ومشات كتجري طلعات حداه وترمات عليه عنقاتو بقوة وبدات تبكي بهسترية
الليل طويل ومهدي وجميلة فالدو حدا البحر قصارين كالعادة .. الباطو الخشبي خاوي بقاو فيه غير هما جالسين .. هي متكية طالقة رجليها وهوا ناعس على دراعها معنقها بيديه من كرشها .. الغربي كيضرب فيه وهي كتلعب ليه فشعرو بحال شي دري صغير . حل عينيه بزز كيرمش بتعب وناض هوا وياها يمشيو بحالهم .. ركبو فالسيارة ومشاو لدارو باتو فيها والصباح صبح كل واحد غادي لشغلو .
نرجعو شوية باللور فالساعة فين كان ناعس عندها ومستحلي الجلسة . اثنائها فالفيرمة وبالليل حتى نعس احمد اللي الفقصة والحرقة بقات كطلع فيه وتهبط وكيتسنا من القانون يرد ليه حقو . خرجات فنصاص الليل لمياء بالبيجامة لايحة عليها واحد الكاب كتسلت بين الشجر والحجر حتى لبرا وبدات دور وتقلب .. فين يكون ؟ فين يكون كيتسناها ؟ قال ليها غيتسناها ديك الليلة يشوفها ولاكن فين غيكون ؟ بقات كدور فداك الليل وتسلت بلا خوف وتقلب وتسنى وتقول يقدر يجي ولا يبان نزيد نصبر ... صبرات حتى عيات حتى مابقا ليها جهد وتمات راجعة بحالها كتسوط وتردد بينها وبين راسها .. انا شنو اللي مخرجني فهاد الليل!! ويجي ولا ميجيش ولا يتسنا علاش خارجة واش ماعندي علاش نحشم ؟ شنو منوضني من الفراش عند واحد مكنعرفوش اصلا وبالليل !
حتى دخلات للبيت عاد وعات بشنو دارت .. مستغربة لراسها والتفيير اللي وقع فجاة .. علاش مشطونة وعلاش مقلقة وعلاش معصبة ؟ شنو الحاجة اللي تخليها تعصب ؟ حتى حاجة .. ولاكن علاش كتحس باحساس غريب ومقلقة غير بوحدها وكتنهد ! دايرة بالها معاه وهي مكتعرفوش !
دارت يدها على حنكها كتخمم وجالسة كل مرة دور تشوف فاحمد ناعس حال فمو وتقلب وجهها .. اللي فيها مامهنيها وشي حاجة كتهزها من بلاصتها .. واش فضول ولا شنو ؟ خرجات مع الفجر كتقلب عاوتاني وتسلت وبدون جدوى ورجعات كتلوم فراسها من جديد .. طار النعاس ودارت بناقص كاع ومشات تشوف شغلها بمورال طايح .. كلشي كديرو بالنفخة .. دخلات للكوزينة حازمة راسها بزيف حياتي وكتقضي الشغل .. دخلو ليها كوربة ديال بطاطة وجلسات عندها كتستف وتحط فالارض .. الشقا فالفيرمة صعيب ماشي ساهل والاعمال كثيرة .. هزات واحد الشطابة خرجات كتشطب على برا وتنفخ ودور وتنقي جناب الدار حتى بانت ليها طاكسي داخلة ووقفات جهة باب الدار ونزلات منها الصالحة كالعادة بزز مقاتلة مع الارداف والحناني والهناني فيديها .. ملوية عليها الملحفة ديالها وفكل حركة كيتماوج الجسم ديالها يمين يسار الفوق ولتحت .. من خلال الحركات ديالها وملامح كتبان مجبدة ومرى ونص ومحزمة ميقدرش الواحد يزعم عليها . لاحت الملحف على كتفها وخرجات صاكها ووقفات دايرة يدها على حنبها وتسوط في حين رجع الطاكسي بحالو .. بان ليها ولد جاي هاز الفاس على ضهرو وسيرات ليها بيدها البيضا المطبزة واصابع يديها العامرة ومزوقة بالحنا وقالت بصرامة وخفة
- زيد هز لي الصاك دخلو لداخل
جالسة فالمحل متكية كتلعب فتيليفون وخديجة كتفرج فتلفازة .. كل وحدة شنو متبعة .. وحدة مسلسل وحدة حاضية صفحتها طالعة نازلة كتشوف الناس شنو لبسو ؟ فين مشاو ؟ فين جاو ؟ طاح عليها الضيم من الجلسات .. حتى هي بغات تمشي تسافر .. تصور وتحط بلخصوص انه رجعو عندها متابعين كبار منافسين ليها وحاضيينها شنو حطات شنو جديدها ... ناهيك على عدد المصالح اللي بغاو يربطو معاها علاقات صداقة .. ماعطاتش اهمية لشي صداقة اخرى من الحساب .. همها العروض اللي كتقتارح عليها باش تساعد نفسها حتى هي تزيد طلع وتشهر وتبيع منتوجات واخا سماو عليها مولات الحوايج اي بمعنى تسلط عليها الضوء وهي متستاعلش ومجرد بائعة ملابس .. لاكن هادشي مأثرش عليها بقدر ما زاد حمسها تقتاحم ميادين اخرى كعروض الازياء ووجه اشهاري لشي ماركة ديال المكياج علاش لا ؟ علاش مالها صعيبة عليها ؟ كما اقتاحم غيرها الميدان بلا شيء حتى هي دير بحالهم ولما لا حتى حاجة مابقات صعيبة .. كولشي خاصو جبهة قاصحة وهاهوا طلع ووصل لمبتغاه وخلا القيل والقال يقولو للي بغاو. تنهدات بعمق وجبدات تيليفون تاني ديالها كتلعب فيه .. تفكرات هشام والشمتة دلبارح اللي هداتها وهدات حتى مهدي معاها وبكات حتى شبعات .. سهات كتفكر وترجع الذاكرة للوراء فاش نزلات كتجري لقاتو جالس فبلاصتو كالعادة وحلات الباب عليه بسرعة وطلعات ترمات عليه عنقاتو كتبكي وتنخصص .. من غير الشمتة اللي تشمتات هناك اشياء اخرى كتخليو الانسان يبكي احيانا ويتأثر ويفيقو عليه المواجع وكيتكون ناقصة غير سبة فين يفرغ ديقتو ... و احيانا ممكن يبكي بدون سبب .. فقط لانه محتاج يبكي .. وفعلا كيبكي بحال المضلوم وفاش يسكت ويرتاح كيبقا يسول راسو شنو الحاجة اللي خلاتو يبكي بهاد الطريقة .. كيعيا يسول ومكيلقا جواب .. الجواب الوحيد هوا انه خاصو يبكي وصافي.
عنقها بقوة فصمت واسى .. هوا براسو ماعرفش سبب هاد البكاء كامل وهاد الدموع الغزيرة .. كيحاول يسول ويعرف وهي النفس كتقطع فيها وكتشهق وترعد بفمها ويديها ومناخرها كيسيلو بالماء .. وجهها تخلط وراسها سخن مابقاتش كتشعر .. المهم عندها تخرج داك الكم الهائل من المشاعر الحزينة فصدرها وداك البحر الهايج من الدموع اللي مقادراش تحبس واللي خانقها وواقف ليها فلحلق كيطلع ويهبط بحال المنشار
شد ليها وجهها بأسى كيشوف فيها فأضعف حالاتها .. حالة عمرو شافها فيها فحياتو خلاتو كيتسائل وندمان حتى هوا .. علاياش ندمان ؟ حتى هوا معارفش؟ حس براسو سبب مشاكلها وسبب دموعها الغزيرة
مهدي : واش على التسرفيقة اللي عطيتك ؟ واش على الشوهة كتبكي بحال هاكا
ماعندي زهر فهاد الدنيا ... انا ماعنديش الزهر ماعرفت علاش انا هاكا .. علاش بغيت غير نعرف علاش
تنهد كيزفر بأسى وحرقة ..ربما فهم سبب انفجارها وعنقها كيمسح على ضهرها وشعرها .. تقال ليه اللسان ماعرف مايقول فبحال هاد المواقف .. باش غيواسي وشنو يقول وباش غيعبر .. بقا كيتمتم فاللخر سكت وبدا يسمع ليها هي اللي كتفش قلبها عليه وعينيها غيخرجو من بلاصتهم بالبكا وتنفخو حتى تزيرو
- ماعنديش الزهر مع حتى واحد ... لا مع صحابات لا عائلة لا واااالووو... بنادم كيشوفك ضاحك كيحسدك ... كيشوفك لااابس ولا فرحان كيغير منك ... كن يعرف شنو فقلبك وشنو كتعيش مغاديش يحسدك كااااع تا على ديك الضحكة اللي كتخرج ... كتبغي تخرج كتبغي ضحك كتبغي تا نتا تعيش كتلقا كولشي كيعايرك كولشي كيشوف فيك شوفة فشكل ونتا من لداخل غطرطق وغتموت ... لا عائلة زوينة .. لا جيران زوييينين .. لا صحاب لا حتى حاجة ... مكتهضرش مكتقمعش بنادم كتشوف وتسكت .. كتحشم دور فشي واحد وكتراعي لمشاعر ديالو وكتشوف فيه كينافقك ويضحك ليك وكتقول خليييه وكتصرف فيه غييير لخير ...
قاطعها : دابا شنو واقع ليك قولي ليا شنو اللي وقع ( مسح ليها وجهها)
هبطات راسها فصمت كتنخصص وقالت : مامسكدة من حتى جهة ... كدير تنازلات مع الناس .. كتعطيهم كثر من قيمتهم وعلى قبل ديك الضحكة اللي كيديرو فوجهك كتحشم وتسكت ... وحدة ماصرفت فيها غييير الخير ... من نهار جيت وانا معاها بالنية فاللخر توصل لهضرة لمك ولخوتك .. اش ستافدات واش دابا غادي تربح من هادشي .. ووحدة كتقول صاحبتك طامعة فيك ونتا كتشوف السم فعينيها ومكتقول والو ... كتشوف وتسكت وتحشم بلاصتها و ..
رد بتساؤل: شكون هادي اللي كتوصل الهضرة لداركم ؟
شهقات بحرقة كتبكي: هاديك اللي قدامي ... ماعمرني صرفت فيها العيب فحياتي وعااارفة مشاكيلي ... وماشي شي مشاكل عااادية ولا سااهلة راه غا الرمية اللي رماوني راه ماشي ساهلة .. تعيا تميك وتسنطح ولاكن راه والله مساهلة راه قلبك كيضرك وكيقطع وبلاصة ما تصلح ودخل بخيط ابيض كتوصل الشادة والفادة ليهم .. كنت حاسة بشي حاجة ماشي هي هاديك وكنعل شيطان ماباغاش نضلمها .. ولاكن فاش كتلقا راسك معاود ليها شي حوايج معارفهم حتى واحد و شي حوايج كيطراو فدارك معارفهم حتى واحد وكتشوفوهم غير هي وفاللخر تعيط ليك مك ولا ختك ولا خوك ويسبوك بيهم ... بووحدها اللي كتعرف عندي طموبيل .. بوحدها اللي كتعرف فوقاش مشيت نصايب شي ورقة .. وعلى نيتي كنت كنقول ليها غنمشي ندير ونفعل ونترك هما باش كيعرفو راني غدا فداك النهار بالضبط ولديك لبلاصة بالضبط .. ااااودي بزاااف ... وحدة قلت صاحبتي زعما فاللخر ... اودي بنادم ... نتا براااسك ... نتا براسك كنشووووف عليك شي حوايج وكنسكت وكطبق عليا حكام ماطبقتيه تا على راسك
رد ببرودة مسايرها: هاحنا غنتستاو هاد احلامك تا يتحققو على خاطرهم .. تا نولدو حنا كاع ويكبرو ولادنا ونتي تحققي شنو باغا عااد نسنيو على ديك الورقة .. باش حسن منا كريستيانو كااع ..بقيتي على خاطرك !
تنهدات كتذكر الليلة الماضية اللي ختموها فالباطو متكيين كيتسنطو لعضاهم وناضت كتقلب على شنو دير ... مالقات مادير طلعات لفوق وجبدات مكياجها وجلسات قدام المراية وحلات لايف لمتتبعيها فالانستا كتوريهم المكياج . اشمنك يا اخطاء .. اشمنك يا الوان ... وبكل ثقة فالنفس كتشرح وتبدع وتعلم الناس ... شي كيضحك على المكياط شي كيسبها وشي كيعايرها وشي كينصحها وشي قابل عليها كما هي ... كتقرا ودوز على وجه اللي كيشكروها حتى كملات وابتسمت ليه وودعاتهم وناضت غسلات وجهها . رجعات تكات بملل حتى بدات تحس بكرشها كتفرفر من لداخل .. حطات يدها على كرشها كتقلب وقالت كتشكي لخديجة
- فرعني لبرد ... كرشي كتخرخر
جلسات حداها خديجة بعفوية وقالت : شربي القرفة
جميلة: مسارني كيخرخرو بحال الى كيجري فيهم الماء ... شبعت برد مع راسي
غوت احمد وشار بصبعو : نوضي حيدي من هنا اش مجلسك معانا .. سيري كوزينتك تحركي (ناضت ) واضسرهاا تزيد معاك فالهضرة
شارت الصالحة بصبعها: هاد الخطية منحوسة... منحووووسة الله يخليها سلعة
قال كيكمل كلامو : وراااه ديكلارييييت ورفعت الدعوة عليهم ... وانا دابا غنشوف باش يواجبوني ... وانا خااايف غير لا يديرو ليا شي حاجة كفس (شد راسو) ويفديوها فيا ... شداني نضرب شي طموبيل شداااني كاع .. شداني نقييصها ها اللفعة شنو خرج منها ... جميلة اللي كتقولو درويشة شوووووف شنو خرج منها
الصالحة : ليهودية ... ولاكن غير بلاتي عليها ... الى ماجبتها كطلب وتزاوك مانيش صالحة
كانت اثنائها لمياء واقفة بالعكسة طالقة ودنها كتسنط مور الحيط .. شكون هاد جميلة ؟ تكون شي ختو كتعرف غير ايمان ولبنى وهاد جميلة منين خرجات ؟ وشنو قصتهم؟
كلاها الفضول بغات غير تعرف شنو كيدور بيناتهم وكتسمع للصالحة كتقول
- انا غادي نقاد ليها الضربة غير بلاتي ... (بحرقة كتحلف) الى ماخرجت منها داك الذهب اللي دات شنتيفة شنتيفة ... راني منسوا منصلاح ... دارت الدار ودارت الحانوت وتفرعنات ... مزياااان تبااارك الله ..
صغر عينو : هادي راه وراها شي واحد كيوريها شدير ... هاهيا بااعت وخرجات من باب واسع ... ورشيد دابا غرق فلكريدي وتعرمو عليه لكريديات ... داك شريكو حتى هوا ماعقلش عليه ... فالاول سنا ليه قاليه هز بسمية القهوى ودابا قاليه ماعندي باش نخلص ودابا راه واحل مابقا عندو مايدير وراه كيطير وينزل خايف غير لاتمشي ليه الدار والطموبيل اللي شحال ماخلص ليهم طريطة وكيخلص فالشيكات اللي مابغاو كاع يساليو .. زاد كملها عليه شريكو خرج السلعة جديدة وبقا عليه فالاول انا نتكلف انا نخلص حتى ترخف ورد ليا حتى خرجو السلعة ودار عليه قاليه خلص معايا ودابا كااع داكشي اللي كدخلو القهوى كيخلصو بيه الشيكات ومكايخد منها لا هادا ولا هادا حتى فلس ... وراه كيبكي قالي سلفني راه جاه انذار يا يخلص طريطارت يا يديو ليه الدار والطموبيل دابا موصيبة كحلة... دابت ليه كولها وغير حاطها ... خرجات علينا بنت الحرام وهي مفطحة وعايشة لحياة كتبيع وتشري
الصالحة بحرق: انا بغيت نشدها ... نششششدها ونضرب لواليدها شي نتفة حتى مانخلي فيها حتى زغبة... ولاكن المكحمة راه بيناتنا ها الجلسة مور لعيد لكبير ندخل والديها تربى فداك الحبس
دخلات للدار فشلانة فتسعود دالليل .. الملل قاتلها وقلة مايدار قاضية عليها .. جلسات على واحد الفوطوي طالقة رجليها وبدات تصوني لمهدي وتسناه يرد
جميلة: االو ...
مهدي: نعام؟ خرجتي؟
ردت بملل: قنطت شنجلس ندير فالدار
رد : وشنو باغا طيري؟ سيري عند مينة جلسي معاها
جميلة : كطنز عليا دابا
رد : وشنو بغيتي ههه شغندير ليك ؟ انا دابا مشغووول عندي مايدار .. جلسي شعلي تلفازة ولا ديري شي لعيبة تا نسالي ونجي
جميلة: اجي دابا نخرجو عفااك
رد : وامشغوول والله تا مشغول راه عندي مايدار .. نعيط ليك لمينة تجي تونسك
ودعاتو وجلسات كتفرج فاليوتوب قنطانة والملل قاهرها .. من وحدة لوحدة ومن فيديو لفيديو حتى بدات دور ليها فراسها فكرة تحل قناة .. وعلاش لا مال هادو اللي حالينها حسن منها ؟ على الاقل تحيد القنطة والوحدانية . عولات تبدا ودارتها ليها قلة مايدار وبدات تقلب وتبع المراحل حتى حلاتها وسماتها " جوليا جولي " .. اش دير مادير مشات لبيت النعاس جمعاتو بسرعة وقاداتو ولبسات واحد كولون كحل بحال الكولونات اللي كتخرج بيهم وتيشورط مايلة من الجنب على الكتف واسعة .. بانطوفة فرجلها وركزات على المضهر .. خلات وجهها طبيعي اكتفت بحمرة للوجنات وحمرة للشفاه طبيعية باش تبان طبيعية بدون مكياج ويبان الاحمرار والسر طبيعي .. وريبات الماريو ديالها كامل فالارض وجبدات تيليفون بدات تصور حطاها فواحد الجنب وكتهضر وتحرك حتى سالات وسخفات ..حساب ليها التصوير ساهل لاكن صدق اصعب من تصاور الانستاغرام .. جات تقطع وتمونطي وهي توحل ! ... كي غادير تحيد دوك اللقطات وباش غتحيدهم وخاصها درس ... عيات تشوف وتنهد فاللخر طلع ليها الدم وحطاتو هاكاك وكملاتها دارت ليه اشهار فانستا فحسابها باش يشوفوه الناس وجلسات كتسنا الاراء وتلعب برجلها
كان اثنائها مهدي حدا الفيرمة جالس فالطموبيل فالضلام بعيد كيتسنا عرفة يخرج ويجيب ليه الاخبار كالعادة .. جالس مابيه ماعليه شاد جوان وطالع نازل فتيليفون حتى كيبان ليه بوسط جديد لاحتو جميلة .. هز حاجبو كيطلب السلامة عنداك تكون حطات شي كارثة عاوتاني .. دخل يشوف لقا ليان جديد مكتوب عليه" مرحبا بيكم فقناتي " مشا نيشان لداك الليان دخل حتى لقا راسو فاليوتوب كيتفرج فيها وهي جالسة قدام الكامرة مربعة رجليها وسط الحوايج والصيكان فبيت النعاس كتهضر بابتسامة
- السلام عليكم لبنات كي دايرين لاباس عليكم .. معاكم جوليا جولي يوتوبوز جديدة وهادا اول فيديو ليا .. كنتمنا يعجبوكم لفيدوهات ديالي ودعموني باش نزيد نعطي اكثر .. المهم منطولش عليكم نخليكم تعرفو عليا من بعد من خلال الاسئلة ديالكم اللي غطرحو عليا ودابا اجيو معابا مجمع هاد البلاكار وحتا موانسين .
ناضت وقفات وهوا يعقد حجبانو كيحاول يشوف البلاكار لاكن مابان ليه والو .. غير هي عاطياه بالضهر وكتحنا وتوقف باش تستف الصيكان وكل مرة يميل ليها البودي وتقادو وكتهضر وسخفانة والهضرة تالفة ليها
جميلة: المهم كما كتعرفو حنا كوولنا كندوخو فجميع الحوايج وكنحيرو وكيشد لينا اليد بزاف .. ولاكن باش ميشدش لينا اليد ...
قبل متكملها هبط عليها واحد الصاك تقيل على الراس من لفوق حطاتو عوج حتى شدات فراسها وهربات من قدام الكامرة وجلس هوا كيشوف ويتسناها تبان ... نص ساعة كاملة دازت فالفيدو وهوا فيه البلاكار فقط اللي كيبان .. بقا كيدوز باش يوصل لفين واصلة حتى بانت ليه رجعات بابتسامة وخجل ومزنكة وقالت قدام الكامرة بأنوثة
- طاح عليا الصاك ولاكن هاكا باش تعلمو ماتحطوش الصيكان فالرف الفوقاني حطو فالرف تحتاني .. غنهبطهم لحت حسن
- سخفت .. عرفتو الحوايج كيسخفو صافي خليهم من بعد نكملهم نمشيو نديرو روتيني المسائي حسن ..
هزات الكامرة غادية بيها ودايخة حتى للحمام وشعلات الضوء حطات تيليفون فواحد القنت ووقفات بكل تقة فالنفس وابتسامة وقالت
- انا ضاروري قبل منعس كندير هاد الروتين .. اول حاجة كنجمع شعري بفوطة واخا يكون ناشف
هبطات راسها لتحت جمعاتو بفوطة بيضاء وهزات راسها بابتسامة كتقلب بين دوك المساحيق اللي مستفة وهزات كوماج وراتو ليهم فالكامرة .. كان كولشي زوين والحمام رائع والديكور ديالو كيبان موراها راقي وهي زوينة حتى هضرات وقالت كتقرا عليهم المسحوق
- هادا كوماج بوغ لو فيزاج اي لي...لي (كتهجا ) اممم لابو سيك ... (شافت فالكامرة كتشرح) هادا اللي عندو وجهه ناااشف زعما ..كنت جبتو معايا من السويد
طلاتو لوجهها فرحات بيه مزيان قدام المرايا وغسلاتو ومسحات وجهها بفوطة وهزات واحد اخر كدهنو بالليل وقال كتوريهم وتقرا عليهم وهي عمرها فالاصل قرات شنو كتوب فقط عارفة لاياش كيصلاحو وغالبين فالثمن
جميلة : هادا كريم كمديرو قبل منعس (قلباتو كتقرا ) حتى بووغ .. بوغغغ .. لابو ..سيش .. (شافت فالكامرة ) حتى هوا ديال بشرة ناشفة وكيدل فالاعماق ويغدي البشرة ويرطبها حيت وجه كينشف مرة مرة .. داكشي على خسب الوجه (رجعات تقرا ) اباااز .. دو . دي ... دي .. (شافت فالكامرة ) مهم غنديرو صاااافي وغندير مرطب وصافي هاني ساليت
طلقات داكشي بسرعة وشافت فالكامرة بابتسامة : هادا هوا الروتين ديالي ديال ديما .. المهم الى عجبكم الفيديو ديرو ابوني ولايك وتعليق باش نزيييد نعطي اكثر .. وشكرا ليكم على المتابعة .. باي باااااي (دارت بيزو)
تنهد من بعد ماشاف الفيديو وقال : وشوووف لهاد بنت ل**** دابا علاش كتقلب؟ شداها ليوتوب باغا تشهر صحة (كيصوني)
متكية فالراش والحوايج موراها مشتتين وهي كتقرا التعاليق .. فيديو فيه ساعتاين نصو لكبير مصور المرايا خاوية والبلاكار خاوي وهي غابرة عاد كترجع تكمل على خاطرها .. والاهم ان المتابعين بقاو حاضيين الفيديو حتى سالا ونزلو عليها بالتعاليق .. كاين اللي كيضحك ويقول البنت عفوية وعلى نيتها وكاين اللي كيعاير ويسب ويجبد ليها الملة ويدعي بالكسيدة حتى صونا ليها تيلي وفتحات الخط
سكتات مقالت والو وقطعات معاه .. دخلات طل لقات الفيديو ديالها تهز فلكروبات وشي كيبارطاجي هنا شي لهيه والناس كيضحكو .. تزير عليها الحال شوية مللي شافت كولشي كيضحك عليها وكولشي كيهضر ويببارطاجي .. كولشي كيعاير لاكن الغريب فالامر هوا مللي مشات تمسح الفيدو ندمانة وكلام الناس الجارح أثر فيها لقات نسبة المشاهدة طلعات بسرعة البرق وعدد المتابعين كيزيد .. كتهبط الصفحة وفكل هبطة كتراقب عدد المتابعين كيطلع والمشاهدات وهي مصدومة مستغربة ! كفاش الناس كيعياروها ويضحكو وجايين يتابعوها ويتفرجو ؟؟ والموضوع كامل ضاير على الصاك اللي طاح عليها وطريقتها فالهضرة وهي كضحك حشمانة و الفرونسي المزعلكة ديالها . اكثر حاجة ضراتها هي اللغة اللي عيبو ليها وبقات كطلع وتهبط فيها ودارت فيها النفس تعلم على الاقل شي كليمات باش تحاور وتفهم وماتبقاش هاكاك .. صونا ليها فديك الاثناء تيليفون ابيل فيديو وفتحات لخط لمينة اللي طلعات ليها جالسة بوحدها فالدار قدامها طبسيل ديال الزريعة كتقشر فيه ولابسة بيجامة مقزبة من اليدين وشعرها مجموع بقراصة كضحك وقالت
مينة : الاااا يا لهبيلة خليه راه داكشي اللي بغاو الناس ... حتى ديري لخالتك مينة لاشهار للقناة ههههه
جميلة بتعجب: هااه!!
مينة : دايرة واحد القناة ديال الطبخ ولاكن ماتمشاتش فيه 69 واحد هادي ست شهور ...
جميلة : بصح !!! عطيني نشوف ؟
قالت مينة كتقشر الزريعة : فيها غير الطبخ عمرني بنت فيها ولاكن دابا غنبان مالها اش فيها كاااع
شدات جميلة الجموع مع مينة حتى سمعات الصونيت فالباب وقطعات معاها بداعي تدخل للطواليط ومشات حلات على مهدي اللي رجع عيان من الباب وهوا داخل كيحيد كاسكيطة قال
- غنمشي ندوش
مشا نيشان للحمام سد عليه خدا دوش ومشات هي بسرعة جمعات ديك الروينة ديال الحوايج لاحتهم فالماريو وجلسات كتلعب فتيليفون حتى رجع عندها بالفوطة كيمسح شعرو وطلع حداها لاح يدو ورا ضهرها عنقها وقال
- اش ديك الفضيحة درتي؟
ردت كضحك : راه عمرات ليا القناة بالناس .. وعيطات ليا ماماك قالت ليا راه حتى هي عندها قناة ديال الطبخ
تنهد كيقلب على البكية ديال المارو حداه وقال
- تلاقييييتو نتي وياها
جميلة: والله محساب ليا ماماك هاكاك عندها عقلية فشكل
مهدي: راه قلت ليك تلاقيييتو نتي وياها غا الله يحضر السلامة .
حيدات لكارو من فمو لاحتو وقالت : خلي عليك دابا هاد الزمر غادي غير تخنز البيت
جرها : واجي حيدي ليا القطعة الحب ديالي
جميلة : اممم .. فين كنتي بعدا؟
رد كيتنهد: واحق الرب الى هاد الغبرة على قبلك ... فين ما تشوفيني غاير عرفيني على قبلك .. يا اما على خوك وطموبيل اللي شخشخ ولا مع داك الكيدار درشيد
جميلة: فين وصلتي مع رشيد ؟
مهدي: رااااه مشا فيها ... صافي قالو ليه خلص ولا لحبس .. وراه كيرغب ويقلب اللي يسلفو
تكا عليها بالقبل حتى نسات راسها .. بعد تسخينات باشرو فالعملية لاكن بدات تغوت فكل مرة تكا عليها ولا زير عليها فالاخير ماقدراتش وشدات فكرشها كتغوت وتألم وتقلبات للجنب
جميلة الجزء 17
محتوى القصة
التنقل بين الأجزاء