- كي لقيتيه ؟ كي داير ؟ لاباس عليه؟ ايوا هانتي مشيتي اش وقع هانتي شفتيه وشافك وشاف وليداتو ... مالكي ماديري عقلك وتصبري مع راجلك وتشدي فيه كما هوا شاد فيك ...
شلا هضرة قالتها مينة وهي داخلة هازة معاها الدراري ناعسين ... اما جميلة من ساعتها وهي ساكتة وساهيا وعينيها ضاحكين وغير كتفكر ... وقت قصير دوزاتو معاه لاكن مفعولو قوي خلاها عليها اثار وحنين تمنات لو تزادهم شوية دالوقت وخا غير نبقا جالسة حداه فصمت . تنهدية مور تنهيدة ومينة غادية جايا عاجبها الحال .. هزات تيليفون تاصلات بياسين اللي غبر مابقاش بان وجلسات تجمع
- ايوا فين غبرتي ؟؟؟ داك الدري ماتجيبوش لينا نشوفوه ؟ ... هاحنا فالفيرمة ... ويلي على غادي طلقو ؟ علاش ياك لاباس؟ ... والولد؟ ... ايوا صافي ماعندك مادير بيها لا هيا لامها حسن ليك ... وا دوز لينا داك الدري ولا هضر معاها تجيبو نشوفوه .. ماخلاتنا نجيو مابغات تجيبو... الله يعاون (قطعات كدور راسها ) اودي ينعل بوها تزويجة ... هادي اخرت اللعب الخاسر مع البراهش.
تنصص الليل فالفيرمة وكل واحد دخل لبيتو ينعس ... هاد المرة مينة نعسات حداها حفايدها اللي كانو كيلعبو حتى طاحو عليها فسابع نومة .. اما جميلة استغلت الوضع والهدوء والجو الزوين وخرجات برا للجردة جلسات مقابلة مع لابسسين كتشوف فتيايفون وتسنا مسج .. او ربما يصوني .. اللقاء ديالهم اكيد غادي يخليه يفكر يصوني ليها ويسمع صوتها .. بقات كتسنا واحاسها كيقول ليها غيصوني حتى فجاة قفزات من صوت المسج وطلات لقاتو هوا ... احساسها ماخيبهاش وحلات المسج قراتو وقلبها كيضرب كأنهم يالاه تعرفو على بعضياتهم
- نعستي؟؟
ردت فالحين : لاباقي
تسنات الرد وتعطل عليها بزاف ... اكيد غيجاوب ..ربما بغا يهضر معاها .. تسنا شوية مافيها باس .. الحماس والشوق خلاها كتسنا حتى بدات تفقد الامل وسهرانة تحت الكمرة بوحدها فالاخير بدات تدي وتجيب بتفكيرها .. يمكن طفا تيليفون ؟ يمكن نعس .. شنو دير باش تأكد انه مابغاش يهضر؟ شنو زعما ماعندو غرض ؟ ياك عنقها وباسها فاش مشات عندو اذا توحشها ! وشنو دابا اللي خلاه ميعيطش؟ كما هي متحمسة تهضر معاه من بعد داك اللقاء حتىهوا خاص يكون متحمس واكثر كاع باش يهضر معاها .. كلاوها يديها وصونات عليه لقات تيليفون كيصوني .. كانت ناوية تصوني وتقطع حيت متأكدة غتكون يدو على القرص ، لاكن مللي بقا كيصوني خلاتو حتى قرب يقطع وفاجأها بالرد بصوت شحال ماسمعاتو وتوحشات تسمعو
قطعات والسخانة طالعة معاها صدمها كرهات والصبع اللي صونا عليه .. طير ليها النعاس بديك المكالمة وباتت الليل كولو فايقة كتفكر وفينما تفكر المكالمة يسخن عليها الحال ويعراق ليها الضهر والصدر .. سهرات فالجردة بوحدها جااسة حتى بدا النهار يطلع وحلف النعاس مايجيها ... علاش اصلا سيفط ليها مسج كيسول واش نعستي ؟ سؤال اصلا كيطرحوه اللي باغين شي حاجة من موراه! مللي ماباغي منها والو علاش اصلا كيسولها ! حسابها غيهضر معاها ويشكي عليها ولا يقول ليها شي كلمة زوينة ساعة طير عليها النعاس فخطرة و كيهضر عاجبو راسو ولا ماعندو سوق فيها ؟ ... حتى هي حمارة ماتسواش اللي معيطة ليه .
بقات تفكر مادازتش عليها الراحة .. شنو بغات وعلاياش كتقلب الله واعلم !
طلعات لبيتها كتلوم فراسها شوية عاوتاني تقلب ليها الجو كأنها ماشي هي كانت تلوم راسها ودخلتت لبيت مينة سرقات تيليفون بشوية وخرجات من تما كتسلت لبيتها وصونات ليه من جديد تشوف واش فايق ولا ناعس .. حطات تيلي على ودنها وااصهدة طالعة خايفة يعيق وبدات تسنط ليه .. صونا جوج مرات وشدها فالرنة الثالثة ورد
- الو الواليدة...
غرسات سنانها فشفايفها حيت صوتو ماشي ديال شي واحد كان ناعس وصوت الدراري مجمعين بيناتهم كيتسمع بشوية مع موسيقى ديال الراي مطلوقة فداك الصباح اللي يالاه طالع .. قطعات الحس وخلاتو كيردد الو ورجعات قطعات ومشات حطاتو حدا مينة كتجري وهربات .. يالاه بغات ترد الباب سمعاتو كيصوني حداها وطلات بنص عين على مينة اللي هزات الراس مضهشرة كتفتف وردات بصوت تقيل
- الو المهدي؟؟ ... ها ؟ ماصونيتش؟ ... ياك لاباس؟ .. فاش والو باس ونتا كتصوني عليا دابا ؟ .... كنت ناعسة علاش؟ ... (تنهدات) غا قفزني وقولي فاللخر لا والو مكاين والو ... الله يرضي عليك دنيا واخرة ... تصبح على خير
وصل النهار ديال الزيارة من جديد ... واخا ميينة توحشات تشوف ولدها ولاكن ملي شافت جميلة كتوجد هادي يوماين وتقاد .. ها الحمام ها الصالون ها و محنححنة غير بوحدها كتقلب شنو تلبس وتلبس لولادها خلاتها تمشي بوحدها على الله وعسا تصلح الاوضاع بيناتهم ومايوقع لا طلاق ولا والو احسن ليها ولولدها اللي من مارتاحت منو وعليه حتى تزوج .
وصلات للحبس كالعادة ودخلات بكسوة طويلة فيها الفرافر والدونتيل والشعر مطلوق... المكياج والروايح والدفار مصبوغين .. ملبسة ولادها وفرحانة باغا غير فوقاش تجلس حداه واخا اخر مرة ماهضروش لاكن كان الحوار بالعيون كيحكي كلشي وكانت المتعة فديك الجلسة كبيرة واخا وسط الجدران .
سبقاتو للطاولة هي اللولة جلسات كتفرج فالناس وضحك حتى خرج عندها من واحد الباب واقف فيه بوليسي .. لاكن من الشوفة ديالزو بان ليها متمر وغير كيميع فعينيه بحال الى خارج بزز .. جمعات الضحكة حين داك وحسات بالوضع ماشي هوا هاداك ... تقدم ويدو فجيبو فسروال السورفيت وكاسكيط كااعادة تقول جالس فأوطيل .. الحوايج ديما جداد .. النقا .. والريحة كتفوح .. ابتسم فوجه ولادو بحب وهزهم هما اللولين فرحان بيهم وتلفت شاف فيها بتكبر وقال
- فين ... سافا
تلفات من طريقتو الجديدة فالتعامل معاها واللي بعيدة كل البعد على تعامله معاها المرة الفايتة وردت بمجاملة كأنه مكاين والو
- الحمد لله
جلس كيلعب شوية مع الوليدات كأنها مكيناش وهي غير ساكتة وكتنفخ وتسوط بحال الى غير مسخرة .. لمن صايبات داك الشعر ولبسات ديك الكسوة وقادات وجات للبوليس لي تما ولا للحباسة ؟ علاش ماقال حتى كلمة ؟ علاش ملاحضش التغيير ؟ علاش متغزل بحتى حرف .. ياك عاد بعت ليها مسج كيعبر فيه ويقول باللي القلب منساهاش؟! ولا صافي برد تسرطات ليه زعما ؟
بقات هاكاك حتى نعسات صوفيا وشداتها عندها عنقاتها وبقا هوا ملهي مع صفوان حتى نعس ليه فيدو وتكا على صدرو وبقا ساكت كيشوف قدامو ببرود تام .. فجءة تلفت بقا كيطلع ويهبط فيها بنص عين وقال
- بغيتي تعيشي حياتك كما بغيتي ؟ باغا طلقي صافي؟؟
هزات راسها فصمت بكبرياء خبات الاحساس الحقيقي قدام دوك النضرات اللي كيدير فيها ... نسات قضية الطلاق والمحكمة حتى زعزها وخلعها فنفس الوقت خافت من شي رد فعل واخا متأكدة ميقدرش يطلقها و عارفاه كيبغيها وديما كيتودد ليها فمستحيل يقبل على فكرة الطلاق. بقات ساكتة وندمات اللي مالغاتش اادعوة وفنفس الوقت عندها كبرياء وعزة نفس كتبان واخا تكون غالطة .. المهم السداجة والغباء كتخليهم جانبا ومترضاش لراسها ديك الشوفة الناقصة اللي دار فيها .
سكت مطولا كأنه باغي يقول شي حاجة و كيطل مرة مرة على صفوان يشوف فيه ورجع شاف فيها بصرامة براادة وقال
- فكرتي ... قررتي !! ... ماشي تعطلتي باش طلبيه ؟ ... عام كامل ونتي كتفكري عاد بان ليك شنو باغا
دورات وجهها ساكتة وحابساها .. متقدرش تقول ليه لا يالاه فكرت ... يالاه طفات عليا الشمعة... اشنو اصلا غتقول غير كتبان ديك البنت السادجة اللي اصلا مكتحملش وفضلات تبقا ساكتة محتافضة بكبريائها واخا فالداخل ديالها كاين عكس داكشي اللي كتوريه . القلب مخلوع كيضرب والصهد جاها بدات تعراق .. ولاكن حتى واحد ماحاس بهاد المشاعر غيرها .. كلشي كيشوف صورة اخرى لوحدة مكتنازلش على حقها ومكضعافش ومن اقوى النساء
تسنا الرد وقال: مالكي سكتي؟؟ .... (شاف قدامو ) صافي بغيتي الحرية ؟؟؟ .. (شاف فيها) من حقك ... اصلا خمس سنين مجبدة صعيبة دوز ياك ... ولا ساكتة خايفة نشنق عليك نقول ليك لاااا وانا كنبغيك وانا مانعرف ونموت ما نطلقك وديك الهضرة ... (هز حاجبو) اااصلا اجميلة لاجينا نشوفو ... مابقات بيناتنا عشرة... راه عماين وانا مزوج ومامزوش ... عام ضربتو هنا عمرك جيتي طليتي تشوفيني تا كي وليت ... وصبااارت معاك فاش كنتي حاملة ... ورجعنا بحال الخوت ومابقيتيش مسوقة ... وانا هادشي طلع ليا فراسي كنت كنتسناك تجي باش نهضرو نيشااان فهادشي ... دابا رافعة عليا دعوة حيت عارفة راسك غطلقي بيه فيه ..
هوا كيهضر وهي كترعد فبلاصتها من لداخل اللون تخطف فوجهها والقلب والكتاف طاحو ماتوقعاتش تسمع اللي كتسمع .. عيات ساكتة فاللخر بدات ترمش بتوثر وعقادات حواجبها وقالت
- نتا داكشي اللي كيهمك اصلا ... مللي مابقاش داكشي حتى نتا مليتي ومكان لا حب لا والو
ضحك بسخرية قدامو وقال : داكشي اللي كيهمني! (هز حاجبو فيها ) وراه الحب هوا داكشي .. مكانش داكشي كوراه مشيت تزوجت بخويا انا كاع اش جابني عندك وحالف ليك منقرب شي وحدة ... ونتي ميكيتي وعيقتي وزدتي فيه ... واش بعقلك ؟؟ واش بعقلك ابنت الناس ولا مالقيتي ماتقولي ؟؟ اش غيجمعني بيك من غير الفراش ولولاد .. عاد اجي نشوفو شي حاجة اخرى ... بلا منزيدو نهضرو على عام ديال الغيبة وماعمرك جيتي طليتي
شافت فيه عاقدة حجبانها بحذر وشك وهوا كيحول فعينيه من مكان لاخر وقال
- جاا عندي المحامي هاد الصباح دوا معايا بلخاطر على لطلاق ... واش نطلق ولا منطلقش ولا نسني قدام السلطة بزز مني ... لويتي ليا دراعي وعارفة راسك غتاخدي طلاقك وانا هنا ماعندي مندير ولا كي ندير ... ومللي ابنت الناس وصلنا لهادشي كاااامل ... مابقا فهادشي ميتطلبق ولا ميتلسق .. سيري الله يعاونك .. والله يسهل عليك ... ورقتك راه سنيتها ليك الصبااااح وبخااطري والخلع ديالك هانتي ديتيه ... ولادي تجيبهم ليا الواليدة حتى يحن الله ... تزوجي ولا متزوجيش ولا سيري لداك السويد ديالك ... بشرط ولادي غيبقاو مع الواليدة وماعندكش الحق تخرجيهم ومديكلاري بيهم .. الى وصلتيهم للمطار مغتلومي غير راسك ... ومتقوليش هادا فلحبس راه ميقدر يدير والو ... سيري عيشي الله يعاونك راكي مطلقة
تزلزلات بيها الارض وهي كتسمع مابقاش كتحس بالناس واصواتهم لدرجة النفس تقطعات فيها وتصدمات صدمة العمر فهمدي ... اييه مهدي! شكون كان يقول غيجي شي نهار ويرجع هاكاك وكيهضر هاكاك .. مكدبش اللي قال الحبس كيرشي العضومة .. وهاد المرة تعاون البعد والحبس على مهدي رشاو ليه القلب حتى مابقاش يتفائل من بعد ماكان اكثر واحد كيتفائل واكثر واحد كيشدها منين خفافت .. اما جميلة اللسان تقال والعقل غاب بقات كتشوف فيه وتقول واش هوا ولا ماشي هوا ؟؟ مستحيل يكون هادا مهدي اللي كيبغيها ويموت عليها .. على الاقل كان يعيط ليها ولا يأجل بنهار حتى يهضر معاها؟ شنو زعما يكون تصدم حتى هوا فديك اللحضة وشد ديك الورقة سنا عليها بحر الفقصة وجلس حتى برد فيه الدم وراجع الاحداث من الاول عاد خرج عندها بداك البرود ... عاد بان ليه اش يقول وشنو ميقولش .. شافت فيه آخر شوفة والدموع مجرين فعينيها مابغاش تبينهم وهزات ولادها خرجات .. اما هوا من بعد ماباس كل واحد فيهم وقلب وجهه مشافاش فيها ودخل مشا بحالو خلاها مرفوعة بين السما والارض.. المشية تلفات ليها وباغا غير تجلس بوحدها تبكي تريح دوك العينين اللي عياو صابرين والو .. فالاخير طلقاتهم ومشات كتبكي وتنخصص والناس كيشوفو فيها وهي تالفة كدور بلاصتها ... خرجات من الحبس دايخة طلعات فالطموبيل حطاتهم بلايصهم اللور وجلسات لقدام كتبكي ماقادراش تيق .. مقادراش تقلبها .. الفرحة تقلبات لحزن شديد وصدنة كبيرة بغات تفرقها مع شي واحد وتهضر .. عيطات لمينة لقات الخط مشغول.. حيت مينة براسها كانت جالسة فالدار مابيها ماعليها حتى صونا ليها مهدي فديك الاثناء وخرجات من الحمام كطرطق المسكة ردات ويدها على جنبعا
مهدي: واطلقتها الصبااح وهي اللي بغات الطلاق ... صافي الله يعاونا ويعاونها ...
مينة بجنون: كفاش الله يعاونا ويعاونها واش غير اجي وطلق واش تسطيتي ولا مالك
رد : وصاافي دابا اصلا كي طلقتها كي خليتيها هي هي ماعندي باش نفعها وماعندها باش تنفعني...
قاطعاتو: علاه دابا الزواج فيه نفعني نفعك ؟؟؟ مارعيتووو لدوك لوليدات ما فكرتو ليهم مااا... ها؟
رد: وانتي كتشوفيني ضارب خمض سنين هنا ضرسة على ختها وغنخرج نلقاهم كبرو وكتقولي ليا كدا فكدا... صافي الله يعاونها بغات طلاق هاهيا شداتو ... بغات تزوج ولا تخرج ولا تمشي شي بلاصة ولادي غيبقاو عندك ... بغات تبقا معاهم مرحبا اما باش تديهم لشي ولد لكلبة يتكرفس ليا على ولدي وبنتي ولا تديهم للسويد تغبرهم لا ... انا هامني دابا ولادي بجوج وسالينا اما هي تمشي تعاود راسها بنادم نكار الخير ومافديلمها خير وماصدقاتش ... ماجاتش تشوفني قلنا هانيا ... ضربنا العام والسيدة صافي مامسوقاش ماقلنا والو ... دابا جايا باغا طلاق وتمشي تتت.... تا انا مابقيتش حامل ديلمها كاااع وماتجيش عندي ومنشوفهاش وولادي راه كنحط عليهم براكي صحاح باش يدخلوهم ليا نشوفهم ... جيبي ليا ولادي وصافي سدي هاد السوجي ماباغيش نسمعك شي نهار كتهضري ليا عليها ولا كتجبديها سالينا
مينة بقات غير مصدومة تلفات ليها الهضرة وجاتها البكية ... صافي حملات المسؤولية راسها وكفاش دير تفكها والى مافكاتها ماترتاح ما تهنا مادوق طعم الراحة ... يطلقو لابغاو ولا الى حرارت العشرة بيناتم
. ولا كن تكون السبب فطلاقهم هاداك هوا الهم والغم عندها بعينيه .. بلعات ريقها وقالت
- اااانا اولدي انااا .. انا اللي دابزت معاها وبقينا مني منك وقلت ليها من غدا يجيب لالاك ومارضاتش ومشات رفعات ديك الدعوة ... راه غير تعصبات وصافي وراه كانت جايا وراشقة ليها ... غير الشيطان اولدي الله ينعلو ويخزيه دخل بيناتكم
رد بعصبية: شوفي ماتقولي ليا لا شيطان لا تالعبة دابا ... نتي عصبتيها جات خرجاتهم فيا والسيدة اصلا كتقلب على السبة... مزيان اللي جات من عندها باش منتسماش ضلمتها ولا تعديت عليها وباش تا انا نبقا هاني مع مخي ... خلييتها على خاطرها وهاهيا جابتها بيديها وا خليها دابا ... هاديك السيدة مابقات لا كتجيني ولا كتهمني .. بيني وبينها وليدات عليا بالاحترام والتيقار نبقاو مزيانين ... بغات طلاق تعيش الحياة ماقدراتش تصبر .. هاهوا تمشي تبخر بيه ... انا براكة عليا هاد الحبس اللي انا فيه كنصبح عليه صباح وعشية وحتى واحد ماحاس بيا ومزاال قدامي لخير والبركة.... هي بقات فيك؟؟؟ هي راها برا كتكمل فحياتها ... يبقا فيك ولدك اللي جالس بين ربعة ديال لحيوط واقف مكيدير والو والعمر كيزيد وخمس سنين من حياتي مغتعطيها ليا لا نتي ولا هي... ولا بقيتي تجي من جهتها مغتبقايش تسمعي صوتي ومغنبقايش تا تشوفي وجهي الله يعاون .
وصلات للفيرمة عينيها حومر ومهبطة راسها .. دخلات مع الباب ودخلات البوسيط فيه الاطفال ناعسين .. مشات نيشان دازت حدا مينة اللي جالسة فالصالون مصدومة متبعة ليها العين فصمت وتيليفون مرمي حداها . خلات البوسيط لتحت وطلعات للبيت بدات تجمع حوايجها وحوايج ولادها والدموع كينزلو .. وقفات الباليزة تخرج وهي توقف عليها مينة مصدومة قاىلة
وشكووون يسكت صوفيا اللي واخا صغيرة مكتعرفش كتغضب وتعز فيها اي حاجة دارو ليها ولو معلقة سبقوها لصفوان عليها هي . حمات السوق بالبكا مابغاتش تسكت وكطل على جميلة اللور وتشوف فيها بنضرات كتشق الصدر وترجع تقلب وجهها كتبكي مللي مكتلقا حتى رد فعل . صبرات جميلة حتى شبعات قالبة وجهها فاللخر مدات يديها وطارت عليها صوفيا كتبكي لسقات ليها على حوايجها وشعره كتنخصص وتكات بيها اللور معنقاها بقوة وخاشية وجهها فيها وفحوايجها وبداو يبكيو بجوج الطريق كاملة ومينة لقدام شادة راسها وكتخمم حنى وصلو
وصلات لدارها مأزمة وحطات صوفيا ناعسة فوق الناموسية بكسوتها وصبيبيط ابيض في حين فاق صفوان وشداتو مينة عندها باش متغوتش عليه حتى هوا .. لاكن بحال كل مرة كتخرج عصبيتها فشي واحد فيهم كيتنادم معاها اشد الندم وخصوصا صوفيا اللي عندها معاها قصة ومشاعر من نهار تزادت ... كتحس براسها ديما مقصرة من جيهتها .. يمكن حيت بقا فيها الحال على داكشي اللي دارت والبكا اللي بكاتو فاش عرفات عندها البنات .. زائد البكا اللي بكاتو ليها فاش يالاه تزادت وكأنها مابغاش تزاد حتى هي .. والبكا اللي بكاتو .. البزولة اللي نفرات ... اشياء كثيرة كيحركو العاطفة دجميلة ويخليوها تشبك الاحداث مع المشاعر وكتخرج بنتيجة انها مقصرة من جهتها واي غضب كتجي صوفيا فطريقو بالصدفة دائما . تحنات عليها معنقاها وهي ناعسة وبدات تبوس فيديها ورجليها ندمانة على كل ما صدر منها من غضب .. فاللخر بدات كتبكي وتأسف فخاطرها وطلب السماحة من صوفيا حيت عارفة ماعندهم دنب لا هي ولا خوها .. دنبهم الوحيد طاحو فواليدين مراض نفسيين .. مكتأبين .. عايشين فجو اسود بالكآبة لو لا مينة اللي كضحك ودير الخاطر وتلعب .. حنان الام كيغيب كثر من اللي كيبان .. وعطف الاب غايب فمرة .. هادا فحد داتو نقص كبير عندهم كيحسو بيه واخا مكيفهموش .. بالرغم من انهم اطفال صغار مكيعرفوش لاكن مكيعنيش انهم خاليين من المشاعر .. على العكس.. مشاعرهم اقوى من انهم يفهمو بالعقل ... واصدق بكثير من انهم يستوعبو ويفكرو .. وجميلة حاسة ببنتها وكفاش كتحس تاهيا .. عارفاها صغيرة ماعندها عقل لاكن كتحس بالنقص غير فشوفاتها مللي كيكون صفوان كيرضع البزولة عن قرب وهي شادة الرضاعة .
ما حد الوضع كيتأزم والانسان كيزيد يولف عليه .. ولاكن اسوأ القرارات اللي كتوقع فحياتنا وكتقدر تقلبها هي القرارات اللي كتخاد فوقت الغضب...كندمو عليها طول لحياة وكتأثر على نفسيتنا بشكل سلبي ... والضد عمرو جاب نتيجة اجابية ديما كيجيب النتائج السلبية وتابعاهم المشاكيل من لفوق .. قرار الطلاق د حميلة فلحضة غضب خلاها تندم حيت ينفع الندم اخا متأكدة مليون فالمية واحساسها كيقول ليها باللي حتى مهدي تاخد القرار فلحضة غضب ... ربما حتى هوا فاش شاف الورقة وقعها بلا ميفكر ضد فيها وحتى هوا يقدر يكون ندمان .. فكرات وفكرات وقررات تقلب على الجواب .. تشوف من بعد مايكون برد حتى هوا واش غادي يتراجع منو راسو .. شهر كافي باش يبرد ويتجمد ليه الراس وهنا تقدر تعرف صدق وحقيقة مشاعره .
صونات بالليل بنمرة خاصة وهي فالبيت متكية باغا تعرف وتوضع حد لمشاعرها الملخبطة وبدات تسنا الرد ... فتح الخط وسمعات صوتو كيردد الو .. الو .. قطعات بسرعة وقلبها كيضرب مقادراش تستوعب انه طليقها ومابقاش زوجها ... بل على عكس باقا كتحس بيه قريب وجزء كبير من حياتها بمشاكلو وافراحو واحزانو اللي شاركات معاه سواء بارادتها او بزز منها . ابتسمت قالت ممكن يعرفني ويبين ليا حتى هوا او توحشني كما توحشتو .. عاودات صونات ليه ورد هاد المرة مباشرة بصوت جدي وحاد
تصدمات حتى تزير ليها الراس من الصدمة وعاد مكتزيد تصدم فيه وقباحتو وكتقارن بين قبل وبعد .. حتى باش تستوعب هاد التغيير ماقداتش ... ياك صافي برد على الاقل كان يهضر معاها هضرة زوينة ياك كان كيبغيها وضحى على قبلها وماخلا مادار .. وهادشي اللي حرق قلبها حتى رجع رماد هما الذكرايات وكفاش كان ... كأن مهدي اللي كانت كتعرف مشا وعمرو يرجع .. وشحال حنات ليه وماكرهاتش يرجع كيف كان .. فين الحب .. فين الحنان .. فين الفشوش.. كلشي رجع ذكرى واصبحت فواقع جديد ... واقع بمشاعر ملوثة .. واقع مريض وجديد وبقاو الذكريات فقط والحسرة على دوك الايام وعلى مهدي اللي كان حبيب وصديق وسند فنفس الوقت .. لاكن ربحات منو حاجة زوينة لاتقدر بثمن .. وهما دوك الوليدات اللي كالاو الفراغ ديالو وكانو العكاز اللي تكات عليه باش تجاوزات ازمة الطلاق اللي كانت اصعب مرحلة مرات منها وتقبلات الوضع الجديد .. جوابو فتيليفون خلاها تقطع يديها على نمرتو وتمنات لو رجعات بيها الايام اللور وماصونات ما طلات جيهتو .. كانت غتبقا بقيمتها قدام نفسها وقدامو .. لاكن الاتصال غير مزاد طيح من قيمتها قدامو وقدام نفسها وكرهات ديك الذكرى رجعات فين ماتفكرها كيصهد عليها الجو وتخنق كارهة الساعة فاش صونات ليه وسمعها اللي عمرها سمعاتو منو
موعد الزيارة كالعادة ومينة واجدة وموجدة لوليدات حتى هما .. اما جميلة فخرجات لابسة سورفيت معاها حتى للتحت حطاتهم ليها فطموبيل اللور وقالت
دورات جميلة وجهها كتنفخ : وصافي دبا سيري مشا الحال
ديمارات مينة غادية وكتعيط من السرجم : واتسناي تا نجي نمشي معاك ... ماتمشي فين
دارت جميلة يدها على جنبها كتنفخ وتحرك راسها بالايجاب حتى غيرات مينة وهي تشد موراها طاكسي صغير داها حتى للحانوت ودخلات كتسرح عينيها موحشة القصارية والمحل ... طلعات الريدو ودخلات شعلات الضوء ضرباتها ريحة الجلد والغمولة وبدات دور فبلاصتها دايخة .. موديلات قدام فات الفوت عليهم ..شي غمل شي باقي كما هوا ... كان الاتصال بينها وبين خديجة الل كانت معاها دائم بحيث كانت خديجة واخا خرجات من عندها كتسول فيها مرة مرة .. تفكراتها جميلة وتاصلات بيها على الله تكون كاينة باش يرجعو يستأنفو العمل وفعلا طلع ليها الزهر مع خديجة ولقاتها يالاه جلسات من واحد الخدمة ولتاحقات بيها كتجري فرحانة تخدم معاها وبداو مباشرة فتخمال .. خرجو كلشي وبداو المسح وتنضيف من لفوق للتحت .
فالزيارة جلسات مينة كتجمع هي ومهدي وهوا شاد ولادو جالسين عندو .. شيئا فشيئا بداو يولفو عليه حتى رجعو يعطيو ليه "بابا" ويبكيو عليه .. اسعد نهار فحياتو هوا النهار اللي كيجيو عندو ويلعبو معاه .. يكيوجدوه نفسيا لبداية اسبوع جديدة وانتضار الزيارة القادمة . فديك الاثناء كانت نفس البنت وهاد المرة بوحدها فزيارة خوها فنفس الطاولة كتسناه يدخل وكتشوف فمهدي بنص عين .. لاكن هاد المرة مختالفة على المرات اللي فاتو .. بدون حجاب ... بشعر اسود رطب مطلوق وادافر .. حاطة عدسات ولابسة لباس عصري ومجوهرات ومكياج متقون كأنها محترفة .. كضحك بشوية مع كل حركة داروها الاطفال بعفوية ومتبعاهم بعينيها وسنان بيضين كيشعلو شعيل .. تبدلات تماما على اللي كانت من قبل وبلطافة تلفتات حداها فالصاك جبدات شكلاطة وناضت بابتسامة وعفوية عندهم فاجآتو بالوقفة عليهم وقالت بصوت فيه رنة باحة ولطيف والريحة فايحة جدابة وهي كتعطيهم الشكلاط
- الله يصلح ... الله يحفضهم ليكم
بابتسمامة وسرور بقا كيشوف فيها مهدي ورد باعجاب
- شكرا اختي الله يحفضك
شد من عندها صفوان الشكلاط وباستو فيدو هوا وصوفيا ومشات بلاصتها جلسات كتسنا خوها بينما مينة جالسة ومعاجبهاش الحال كتسوط وتنفخ وخصوصا فاش شافت عينيه كيمشيو لتما كل شوية وناضت تمشي بحالها وكتشوف بنص عين فيها .
عنق ولادو وباسهم وبقا واقف متبع ليهم العين حتى خرجات مينة وتنهد كيقلب فجيبو .. جبد ورقة مربعة صغيرة وشاف فالبنت بابتسامة وحط الورقة فوق الطبلة ودخل .. مباشرة من بعد ما دخل ناضت بسرعة بسعادة خدات الورقة ورجعات بلاصتها حلاتها لقات فيها رقم الهاتف مكتوب تحت منو" مهدي" يالاه بغات ضحك وتفرح وهوا يجلس خوها قدامها وجمعاتها بسرعة كتفتف خباتها
خرجات مينة معصبة حيدات ليهم داك الشكلاط لاحتو وطلعات فالجموبيل ديالو اللي حاط ليهم سايقة وكتصوني على جميلة حتى جاوبات وقالت بدون مقدمات
- جلسي لياااا نتي ديري رجل على رجل هااا راجلك غيديوه ليك من وسط الحبس ونتي جالسة
ردات جميلة من مكبر الصوت قاىلة : انا وياه طلقنا الله يعاونو .. يديوه ولا يخليوه
مينة: حساب ليك كنكدب عليه ؟؟ والله لعضيييم حتى راه غيدوه ليك من وسط الحبس وعقلي على هاد الهضرة ودابا تشوفي ... بلاصة ما تنعلي الشيطان .. وضحكي ... وتهزي ولادك تمشي عندو وتجلسي تهضري معاه وتوقلي ليه غيير صبر ... غير هادي وبالهداوة يحس بيك معاه وتصالحو وتجمعو ولادكم ... نتي لاااا .. هزي شووكتك للسمااا وتنفخي حتى طرطقي وخلي وخدة اخرى هي اللي ضحك وهي اللي تفاجيها عليه وتحفر بلاصتها حتى طيرو ليك ميعقل لا عليك ولا عليا ولا على ولادو وهانتي دابا تقولي مينة قالتها
مينة : اييه!!! وهاد الدراري مساكن ؟ ماشتيش الى داتو وولادت معاه ونسااا ولادو فخطرة .. فيمن غتجي؟ فيهم اللى غيكبرو بلا باهم
بقات جميلة ساكتة شوية وقالت : والى كان باغي يدير كما دار باه راه ماعندو قلب وماعندهم مايديرو بيه اصلا
مينة: باه!! لااااالا ماتقوليش ليا بحال باه ... ولدي راااجل ... من صغرو وهوا هازني لاهوا لا خوه بزاااف على باهم باش يكون بحالهم عيفة الرجال .. انا صبرت على ولادي ماشي على باهم ... وزايدون نتي الى صبرتي راه غتصبري على ولادك وباهم حيت كما كان الحال فيه الخايب وفيه الزوين ... وعاد هوا كيمووت ويحيى على ولادو وكان معاك مزيان وقلبو كبير بلا متقارنيه بداك الجيفة الله يعطيه موصيبة
كترو الصدمات وكترو الازمات والقلب مابقاش يتحمل حتى مابقاش يستقبل فكل مرة خبار جديدة ... الفضيحة واخا شافتها جميلة وبقا فيها الحال لاكن ماشي بدرجة تتأزم وتمرض ويطير ليها النعاس ... بلعكس هي براسها كتاشفات باللي ولات عندها مناعة قوية ضد الازمات والصدمات وماحساتش بشي ضربة موجعة بقدر ما تعجبات فيهم وفتفكيرهم اللي داهم حتى للصحافة كاع وخرجات فصيحتهم للرأي العام .. عادي ومن بعد .. فضيحتهم اصلا كانت سايقة ليها العائلة الخبار وعارفين الحقيقة فماحشماتش ولا خجلات مللي قالوه قدام الناس بلعكس جلسات تكمشات كتفرج وغبرات على الانستاغرام مابقاتش كتحط فيه ورجعات حديث الساعة ... قنبلة وانفاجرات الكل كيهضر عليهم ويبارطاجي وبلا مجهود لقات راسها كولشي كيعرفها وكولشي كيهضر عليها لا داخل الوطن او خارج الوطن ... كلشي كيسب ويعاير الا من رحم ربي ... حتى واحد معارف الحقيقة والصحافة كتسابق على الاخبار وكل مرة خارجة الصالحة ولا ولدها كتهضر مع صحافة فشكل والدنيا تقلبات فمواقع التواصل الاجتماعي.. شكون هاد جميلة ؟ فين حساب هاد جميلة... رجعو تصاورها كيتنشرو وحتى لفيدو اللي حطات الوحيد فقنانها تجبد وتفرجات فيه نسبة كبيرة من الناس .. المعيور والشبان والغريب فالامر حساباتها كيطلعو فالمتابعة ... الصفحات الكبار رجعو متابعين اخبارها وياريت تحط غير كلمة كتلقاها تنشرات لان الكل كيتسنا الرد وكيتسناها تخرج تهضر... الصحافة كل مرة داخلة تجري وتقلب عليها باش تستجوبها لاكن هي رفضات تهضر و بدلت الملاحقة من جديد .. جبدو دارها فين ساكنة ومحلها اللي كتبيع فيه وكتلقاهم كيتسناوها فالباب وهي مخبية ورافضة تهضر.. الصالحة غير مكتزيد تهضر والصحافة تابعة الفضايح كل مرة ناشرين ليهم فيديو جديد .. الهضرة كثيرة والمشاهدات طالعين .. اه شنو ؟ بنت ومها !!! شكون هاد البنت ؟ انشوفو هاد البنت ... حتى لقات راسها فاسبوع مشهورة فالمغرب كامل باقصى سرعة والسوق حامي كولشي باغي يعرف التتمة ويسمعها كتهضر .. رجعات كتخرج حشمانة وتسوط فاللخر دارت بناقص جلسات فالدار مابقاتش كتخرج وحصلات مينة فالواجهة ولات الى بغات تخرج غير تقدا كتلقا صحافي مقنت كيصورها وماكتحس براسها حتى كتلقا راسها منشورة فالصفحات هادشي الى ماوقفوهاش . تركنات حدا جميلة فالدار واحد العشية كتهضر فتيليفون مع مهدي على ديك القضية اللي شاملة عدة قضايا وكيوصيها تخرج تهضر دافع على راسها مايبقاوش مخبيين بحال الى سارقين . لاكن هما رفضو وجلسو كيفكرو فصمت ويشوفو فاراء الناس فجأة صغرات مينة عينيها وقالت
مينة: راه عاد قطعت معاه قالك الى ماهضرتوش غيبدا التحقيق فدوك الاملاك عاوتاني ويقدرو يطيرو ليكم كولشي
حلات جميلة عينيها: اويلي!!!
مينة : ااايه وماتعرفي راه قضية رأي عام وكلشي مضامن مع مك ... شوفي الصحافة كفاش كتجارا على لفضايح ... علاش ماتهضريش فالقناة دياالك نتي ماتهضريش مع الصحافة ماحد كولشي كيقلب على الجواب وعباد الله دخل عندك لحساباتك نتي وتربحي يا لهبيلة ماشي تربح الصحافة على ضهرك
سهات جميلة كتفكر : وعااندي واحد الفيدو ماعرفت فين راه فاش هجمو عليا كيهرسو الباب
مينة بصراخ: واحطيييييه اش كتسنااااي حطيه ودوي جاب الله لفضيحة وتقضحنا اللهم نديرو مادرو كاع الناس وربحو الزبابل دلفلوس .. خلي الضحافة طرطق بالفقصة دابا صافي شهروك غا هضري كولشي يدخل يجري يتفرج
وجدات ااكاميرة وحطاتها قدامها وجمعات شعرها باش تبان للناس ومينة حداها جالسة مكتبانش شادة دراري الصغار وصوتهم كيتسمع وخلاتها كتهضر وتشرح ... فيدو فيه نص ساعة نشراتو وربعات يديها كتشوف شنو يوقع وتجمع هي ومينة
مينة: كن وريتيهم الادلة والاوراق وكولشي
جميلة: مابغيتش نبين حتى حاجة باش مرة اخرى الى هضرت يتيقو بلا ادلة.. انا عارفة دابا مغاديش يتيقو وخليت الادلة حتى للفيديو الثاني ونحط ليهم شوية وكل مرة نحط شوية مانعاودش كلشي فدقة وحدة
تنهدات مينة بميوعة : وعلاش بغينا نتشهرو غير باش نجيبوه مسكد فين دابا غيشوفني هاد الراجل المهم ويعرفني
بقات جميلة غير مصدومة وقالت : وولادك ! يبغيو ليك!
ردت بنفور: يمشيو يخراو .. كبرتهم تكرفست عليهم صافي يعطيوني تيساع يخليوني نشوف حياتي .. والله وجا شي راجل مسكد مانعقل عليهم اييوااا صافي ... غا بلاتي دابا تشوفي الى مدخلت لاصال ندير الرياضة وهاد الكرش الى مابغاتش دخل غنمشي نقطعها ونهني مخي ونلبس العصري براكة عليا من الجلالب .. كن ما لغلض والله منلبسهم ... الكرش اللي فاقصاني غنخشي باباها ولا نقطعها
كترت الهم كضحك .. اللي شافهم ففضيحة قد لخلا واللي شافهم كيضحكو على نفس الفضيحة تقول ماشي فضيحتهم وماشي شوهتهم.. وبصراحة الفضيحة مكتسما فضيحة حتى كيكون عندك معامن تفضح وعائلة ضارب ليها الحساب من الشوهة ومن كلام الناس .. ساعتها مكترضاش وكتلقا لي يلومك ويحاسبك ويشوف فيك شوفة ناقصة .. اما بحال مينة وجميلة فبجوج بحال بحال ... لا عائلة مسكدة لا من يحاسبهم على شنو دارو وشنو مادراو ... كيبقا فقط البراني فمهازينش ليه الهم ولا فايقين ليه واللي بغا يهضر يهضر وضاربين الدنيا بركلة .. جلسو كيتفرجو فالفيدو اللي فيه جميلة كتشكي وترد على بعض الحقائق المدكورة وكتحاول تكسب الناس لصفها واخا زايدين ناقصين عندها يقولو اللي بغاو حتى واحد مكيجيها وكيبقاو فقد ناس .. مرتاحة من جهة عاىلتها حين عارفين الحقيقة وعاشو معاها الضروف وواحد كيفسر لاخر شنو واقع وحتى واحد ماجا ضدها .. كلشي فصفها وهادشي كافيها ولعلا يقلب فالبشار . لولا تركيزها على قناتها فأخر لحضة وخوفا من مشاكيل طلوع ولهبوط على الاملاك لما حطات توضيح ولما اضطرت باش تشرح ولاكانت مكملة حياتها وسط القيل والقال اللي طلع ليها فراسها حتى مابقاتش كتسوق ليه لامن بعيد لا من قريب.
الفيديو دازت عليه نص .. مجرد نص ساعة لقاتو منشور فجميع الصفحات ... لقطات منو منشورة عبر المواقع وعدد المشاهدة كيتزاد تحت عنوان " ضربت مي وبغيت ندخلها للحبس وها الدليل " عنوان جلب المشاهدة بكثرة كانه اعتراف فالاخير لقاو توضيح قصير ماشبعهمش ابدا .. تعمدات حتى هي تقول كلام قليل باش يالاه يحللوه ويناقشوه ويلقاو ليه الجهد والوقت وخبات باقي الكلام باش تبدا تقطر ليهم شوية بشوية وتخليهم متحمسين يعرفو المزيد ومتشبعش فضولهم حتى يقنعو وينساحبو. القناة قدام عينيها هي ومينة كيضحكو ويشوفو العدد كيطلع فليلة وحدة والمشاهدة قربات للمليون فديك الليلة فقط .
صبحات الصباح طلات على العدد لقات مليون وسبعمية والصحافة كتراسلها وهي ميكة على كولشي .. بعض القنوات لقاوها فرصة يناقشو موضوعها باش تزاد المشاهدة ... كاين اللي جا ضدها وكاين اللي جا فصفها واصبحت حديث الساعة بامتياز
جميلة: الو السلام عليكم ... بغيتك تسيفط ليا داك الفيديو اللي كنت سيفطت ليك مابقاش عندي ديال التهجم اللي كانو هجمو عليا فالدار
مهدي: اشمن فيديو؟؟؟ ديال مك وخوك؟
جميلة: اه هاداك راه بغيتو محتاجاه
رد : راه فالدار بقا فتيليفون لاخر فكارط ميموار فالدار سيري غتلقايه تما
ردت : فبيت النعاس؟
رد: ااه فالمجر ولا ماعرفت فالماريو مابقيتش عاقل
ردت : واخا شكرا
رد : اش كيديرو دراري
ردت : والو كيلعبو
رد : يالاه بسلامة
ردت : بسلامة
شافت فيها مينة باشمأزاز : ماتعرفي تهضري ماتعرفي تزمري .. كتهضري بحال شي عسكري ... مكاين لا لاباس لا بيخير لا كي دايرة الصحيحة ... تسولي شوية وتدي وتجيبي فالهضرة عااااد جيه للفيدو ولا الزمر... وفاش قال ليك كي هما الدراري قولي ليه ديك الساعة توحشووك وبغاو يشوفوك وبلاصتك خاوية ... شوية من هنا شوية من هنا كي كيديرو الناس ماشي دخلي فيه كي تران
خرجات هي ومينة يجيبو الفيدو ودخلو للدار .. لقات ذكرايات كثيرة كتسناها فالباب عاشت وسطهم كتفكر ايام الحمل فديك لدار وهي كتقلب مع مينة على تيليفون .. من مجر لمجر ومن رف لرف وحوايجو مطوين وريحتو كدور تما بقات جميلة غير ساهية وساكتة حتى عيطات ليها مينة وهي كتحل رقة فيدها وتشوف فيها باستغراب
- جميلة اجي شوفي ليا هاد الورقة ديالاش !
مشات جميلة شداتها كتهجا الفرنسية وفهمات منها باللي من عند شي طبيب نفسي ومكتوبة عليها سمية مهدي ولاكن ماعرفاتش المرض شنو هوا وشرحات شوية لمينة ... تلفتات مينة اللور وراها عرام ديال الاوراق كاملين من عند الطبيب ديال الادوية وشي ادوية تما وكينات مخبيين عياو يتهجاو مافهمو والو فاللخر هزو واحد لوغدونونس وشي دوايات من تما وهزو تيليفون وكارط ميموار اللي فيه وخرجو من الدار كيتسألو بيناتهم على داك الدوا ودوك الاوراق والتحاليل اللي لقاو .. وقفو قدام صيدلية ودخلو كيسولو وحطو الدواء هوا الاول .. قراه الصيدلاني وقال
- هادا الدواء ديال النعاس ... مجهد هاد الدوا كيخرج بطلب من عند الطبيب
مينة : وهاد الدوايات هادو؟
الصيدلاني: هادو مهدئات ولاكن قوية و ادوية بحال ديال تخدير ... منين جبتو هادشي ؟
جميلة تخلعات ماعرفاتش اش كيديرو عندو دوك الدويات وبقات مصدومة وخلوعة هي ومينة .. عطاوه شي وراق قراهم وقال
- هادو الاوراق ديال الدويات من عند الطبيب ... وهادو تحاليل الدم ...
رد كيقرا الورقة: هادا شي حد كان مدمن مخضرات ومتبع مع هاد الدكتور هوا اللي خرج ليه هاد الادوية ... وكان كيعاني من اضطرابات نفسية حادة وادمان خطير وهاد الادوية خطيرة الى حصلو عندك غادي تمشي فيها للحبس الله يستر حيت كيخرجو بإذن من الطبيب والورقة ديالهم خاصة بيهم .. ولاكن هادشي قديم التاريخ ديال هاد الاوراق قديم
مينة : شحاال!! واش قديم بزااف
الصيدلاني: شي عماين تقريبا واخر وحدة فيها تاريخ قبل عام . كيجيكم هاد السيد ؟
الصيدلاني: لا مكاينش ولا واحد الدوا هنا كيدل على ان الازمة النفسية اللي كان كيمر منها ديك الساعة واللي كان كياخد فيها هاد القاصح خفافت ... قبل عام خرج ليه الطبيب واحد الدوا ناقص مفعول وهاد الدوا كيخرج للي صافي تجاوزو ديك المرحلة الخطيرة ديال الاطرابات والازمات .. كيبدل الطبيب ينقص ليهم لادوس .. جمعي هاد الاوراق وهاد الدوايات رميهم ماخصهمش يحصلو عندك الاللة
مينة: لالا نرميهم دابا نيت هاك رميهم عندك فشي سلة اش غيديرو عندي ... الله يرحم الواليدين .. الله يعاون
جمعات وراقها وخلات ليه الدويات وخرجات بحالها
احيانا كنشوفو ناس ضاحكين كنحسدوهم على ديك الضحكة وعلى ديك السعادة اللي كنشوفوهم عايشينها .. ولو طلينا على حياتهم واسرارهم المخفية لتصدمنا وتراجعنا وختارينا حياتنا بدلا من حياتهم وعذابهم اللي كيعيشو ورا ديك الضحكة وداك النشاط وداك التفاؤل اللي كيخبي حقيقة مرة وعذاب قهاار .. فعينينا كيبانو اسعد ناس على وجه الارض .. كنشوفوهم كفاش مفعمون بالحيوية والنشاط وهما نفسهم كيدخلو البهجة والسرور على قلوب الي كيبيغو ، كنوقوهم خاليين من المشاكل مللي كيقدمو لينا يد المساعدة ويخرجونا من مشاكلنا وهم ماعندهم حتى مشكل فحياتهم ... حياتهم صافية وضاحكين للدنيا ... كنحسدو ديك الحياة ومعارفينش اشمو مخبي وراها ... كنكرهو حياتنا حيت حنا حيت حنا عكسهم هما ... اللي كنعيشوه كيبان علينا ومكيخليش الضحكة تبان على وجهنا وكنرجعو نتمناو نكونو بلاصة داك الشخص ونعيشو السعادة اللي عايش ونضحكو الضحك اللي ضاحك . مهدي واحد من دوك الناس ... كلشي كان كيشوفو فالقمة ... صحابو .. جيرانو ... عائلتو ... حتى امو وزوجته .. كان كيبان ليهم فرحان حيت فعلا كان كيضحك وناشط ومشاركهم مشاكلهم وعمرهم تشاركو معاه مشاكلو حيت عمرو بين ليهم شي مشكل ... كان عايش ضروف صعبة مشاكل كبيرة فدوامة بوحدو معالم عليها حتى واحد ... اضطرابات نفسية خطيرة كانت من الممكن تصفي بيه للجنون كما وقع مع شحال من شاب صبح غادي فالزنقة بين ليلة ونهار بلا عقل .. كان كيقاوم مرض خطير واللي هوا الادمان ... الادمان الي فشل شحال من واحد يتجاوزه .. وادمان مهدي كبر معاه من الصغر فكان صعيب عليه يبرا بسهولة وكان العلاج اصعب بكثير وخاصو طاقة وقوة وقدرة هائلة باش يكسر داك الجدار ويدوز منتصر ... ادوية قوية واغلبهم كيخرجوهم للحمقا باش يبقاو مهدنين وساكتين وكان وكيأثر بشكل قوي على الدماغ ... حالة مهدي مختالفة وادمانه ما ليه فالدم . . با يقطع واحد المخدر اللي كبر بيه وتعايش مع الدات ديالو حتى رجع جزء منو كان خاصو الصبر ... كان خاصو الوقت .. كان خاصو يتحمل تقلبات الدماغ ويصبر لاوجاع دماغية كثيرة اللي كانت كتحكم ليه فالجهاز العصبي بشكل سلبي وحاد والجهاز العصبي اثر ليه ليه على دقات القلب والقلب جبد ليه مشاكل اخرى فالتنفس وهي غادية حتى رجع كيتنقل من طبيب لطبيب ومن تخطيط لتخطيط ومن تحليلة لتحليلة ومن شبكة لشبكة ناهيك على الامراض النفسية اللي كان رئيسها الطبيب النفسي المختص فالادمان اللي جبد ليه خلية من المشاكل والتراكمات اللي مكانش مهدي متوقعها ومكانش داري بخطورة الادمان اللي كان فيه وصعوبة العلاج ورحلته الطويلة . قصة مألمة كانت ورا داك الضحك وورا دوك النشاطات اللي كان الجميع كيشوفو عايشها وحاسدو عليها وكانت كتجيهم كلمة " قطع البلية " كلمة ساهلة ويقدرو لو كانو بلاصتو يقطعوها .. لاكن كان كيضحك فخاطرو حيت لو فعلا كانو بلاصتو لا خرجو يضربو بالحجر ولا ماكانو يتحملو نوبات الجهاز العصبي وحريق الراس اللي كانو ينوضو عليه ويخليوه يهيج ويفور كأنهم موجات كهربائية كيهدنها دواء حاد ويخليه يبان طبيعي في حين الدات كتاكل العصا تحت تأثير المهدئ اللي مكيخليه يحس بوالو وكيطفي ليه الدماغ.
تصدمات جميلة وتذكرات الوعد اللي قطع ليها باش يحاول ينقص شوية بشوية وهنا بدات تحط اعذار لكل تصرف من تصرفاته .. يكفي السواد اللي كان عايش ومكان مسودها على حتى واحد فيهم .. بعد تفكير عميق وفرحة مينة وبالعلاج ديالو وكلامها اللي كتردد كل مرة بالفرحة مفتاخرة بيه اثر على جميلة وخلاها تعذرو وتعذر اي رد فعل جا منو لا قديم لا جديد وقررات هاد المرة هي اللي تزورو بلاصة مينة وبوحدها ... تفكرسات باش تبان فأبهى حلة وتمشي تفاجأو و مستعدة لاي رد فعل كما كان منو وملتامسة ليه العذر مسبقا وهاد المرة هي اللي باغا تمد يد المساعدة واخا تضررات من ادمانه وتآدات لاكن القلب الابيض خلاها تقبل وضعها وتسامح .
لوك جديد ناعم وكيوت والابتسامة اللي نابعة من القلب طيحات عليها السر اكثر .. سبقات من مدير السجن هوا الاول استقبلها استقبال يليق بيها وجلسات قدامو قدمات ليه الاوراق اللي عندها وشرحات ليه الحالة ديالو على امل يتحول للمصحة يكمل العلاج وميختالطش بالمدمنين باش هاكا يقدر يتعالج، وحث فالملف ديالو وفاجأها برد مكانتش منتاضراه وقال
- مهدي الزاهي ... بلعكس راه فالمصحة هنا عندنا وكيتعالج من نهار دخل .. ومزال مكمل لعلاج ديالو والملف ديالو نقي .. حسن السلوك والاطباء هنا كيشهدو ليه باللي عندو عزيمة وارادة قوية وكيطالب بالعلاج بنفسو .. والمحامي ديالو نيت اللي قدم الملف الطبي ديالو ومباشرة تحول لمصحة السجناء هنا وراه غادي مزيان ومكمل .. علاش نتوما مافخباركمش؟
بقات كتشوف فيه بارتباك وضحكات كتحك فودنها وقالت : لالا ههه غير ضحك معانا قالينا رجع لديك البلاصة اللولة وصافي
مدير السجن : واضحك خايب هادا هه ... المهم راه غادي مزيان
ناضت وقفات كتفتف فرحانة مدات يدها سلمات كتشكر وتعاود وجمعات وراقها وهوا مكمش فاللبسة شارف كيشوف فيها باعجاب حتى خرجات ومشات كتجري وتشوف الساعة لقاعة الزيارة ودخلات كتجري لقاتو جالس كينفخ ويسوط ويتسنا مينة وفالطاولة الاخرى جالسة البنت اللي عرف تما هي ومها مع خوها كيهضرو معاه .. هز عينو شافها جايا فديك الكسوة كتجري فرحانة والملف فيدها ناسية راسها وطارت عليه بالفرحة عنقاتو بقوة كضحك وشدها بيديه من هضرها مفاهم والو وماعرفها منين خرجات ليه
رجعات وجهها اللور فرحانة وعاودات عنقاتو من الجهة الثانية بقوة .. الفرحة والتعنيقة والاشتياق ماسخاتش طلق منو ومقادراش توقف باغا طير .. اخيرا كاين امل .. اخيرا غادي يخرج .. ولاكن علاش مكيعاودش ليهم ومكيتشاركش معاهم خصوصباتو واخا هاد الخصوصيات كيهموهم حتى هما .. علاش ؟ بعدات راسها فرحانة وهوا مستغرب كيشوف فيها وشاف جهة الطاولة الثاني حتى هي بانت ليه البنت اللي عرف معصبة ومقلقة كتشوف فيهم بنص عين معاجبهاش الحال .. حلات ليه جميلة الملف بالفرحة وقالت
- لقيت الاوراق ديالك .. لقيت الدويات ... انا فرحااانة بزاااف متصورش قداش والله فرحت ليك وفرحت فاش قالو ليا كتعالج هنا وغادي تخرج ... علاش ماقلتي لينا ولانو تفرحنا ؟؟ هاا؟ ههه ولاهيلا احسن حاجة سمعت هاد النهار
طارت عليه عنقاتو وهبط ليها يديها بشوية شاف فيها بغيض وقال
- ونتي علا فرحااانة وعااجبك الحال ؟ شكون قالك اصلا انا مريض ولا فيا شي حاجة وعلاش كتقلبي وشنو باغا ؟
هزات كتفها : كاع مغندي عليك واها تهضر دابا حتى تشبع .. (ضحكات وتنهدات) المهم هوا تخرج من هنا عرفتي غادوز هاد شهراين طويييلة... ماكرهناش كن خرجتي فالعيد ونعيدو كااملين والله حتى صوفيا وصفوان غيبقاو يوميا يشوفوك وكيتوحشوك وكيعطيو بابا فالدار غير للخوا والله ... نااااري والله مامتيقاااا
جلس فوق الكرسي كيشوف فيها ساكت .. مارضاش يبان مريض ولا فيه شي عيب قدامها او ضعيف وقال كيشالي بدوك الاوراق
- اصلا هادو قدااااااام فاش كنت صغير ونتي مفهمتش لاياش باغا توصلي ... مللي جيتي جيتي جيبي ليا ولادي نشوفهم ماشي سيمانة وانا كنتسنا وجايا طويلة
ردت بهدوء والابتسامة على وجهها كتشوف فيه : شتي والله مكتجي معاك التقليقة... واخا تقول لي قلتي دابا مغنديش عليك .. غوت ولا عاير (هزات كتفها ) غير مللي غتخرج راه هاديك هي كلشي
قلب وجهه كيسوط وينفخ عاقد حجبانو وهي حداه كتشوف فيه .. كحزات عنقات ليه كتفو بسعادة وبعد بانزعاج شاف فيها
- نسيتي راسك ولا شنو؟؟؟ راه صافي سالينا شنو باغا مني دابا ؟
جمعات يديها كضحك وقالت : باغاك تخرج وترجع لولادك وتكبرهم على يدك ... ماشي مشكل واخا مابقاش عندك معايا ولاكن انا فرحت حيت غتخرج والله
بقا ساكت غلباتو فالهضرة مالقا باش يجاوب وغير كيشوف وقال كيبدل الموضوع بجدية
- شنو درتو مع الصحافة؟
هزات كتافها كضحك: والو تابعيني وانا هاربة هههه (حطات يديها على فمها ) اوييلي انا غنبقا كنضحك هاد النهار كي لحمقة تقول ماخصني خير ههههه
هزات صاكها والملف ودعاتو بتعنيقة اخرى ومشات بسرعة بقا واقف فبلاصتو غير كيشوف .. اما هي فاتت الباب ومشات لسيارة المرسيديس ديالو حلاتها وبغات طلع لاكن وقفات عليها فجأة نفس البنت بلباس جميل وانيق والشعر مطلوق حاطة سنسلة فعنقها من ذهب مكتوب عليها بالعربي اسم " وعد " وقالت
صدمة الكلام اللي سمعاتو وحرقته اكثر من صدمة علاقته الجديدة بوعد .. كانت تتقبل العلاقة الجديدة ولاكن تخرج من فمو بحال ديك الهضرة ابدا عمرها تخيلاتها وبلخصوص منو . دخلات على مينة كتبكي للدار خلعاتها خرجات من الحمام كطلع لكولون بزز وتابعاها للبيت كتسول
ياك لاباس ؟ ياك والو باس ؟ اش وقع ؟ ياك خرجتي صحة سلام !!
جميلة من عادتها مكترضا تبكي قدام حتى واحد وكتحشم يشوفها شي واحد كتبكي شكون ما كان .. حتى مشاعرها كتخفيهم وهادا طبع متقدرش تحكم فيه .. لاكن المشاعر هاد المرة خرجات على السيطرة وكان صعيب تتحكم فيهم ، ومع ذلك وباش تاخد راحتها فصدمتها وبكائها قصدات البيت مباشرة حتى تبعاتها مينة كتسول وتلفتات بصراخ ردات عليها
- انا حمااااارة اللي مشيييت عندو .... فرحاانة وجالسة نضحك بحال الحمقة وهوا كيهرب عند بالي غير مقلق ومعصب ماديتش عليه .. ساعا هوا مساهلش عاااايش حياتو وضارب حسابات اخرى وانا حالة فمي كي شي بهيمة ودرت فراسي الضحك ودليت راسي (انفاجرات بالبكا)
مينة: اناااري يا ناااري عا بشوية قولي ليا اش وقع طيحتي مني النص.. اش طرا ياك لاباس ؟؟ وا هضري
- ندمت ندمت ندمت حتى مشيت ندممت ... ندمت وماعمرني نمشي بالنية مع شي واحد مرة اخرى شكون ما كان ... قلت راه محبوس .. راه مريض ... راه مقهور وكيدير مجهود ...درت بحساب الدراري حتى هما وبغيت نبدا معاه صفحة جديدة وعزيييز عليا وزاد عز عليا فاش عرفتو كيتعالج على قبلنا وعلى قبل ولادو ... حساب ليا كيدير هادشي على قبلنا وغير حنا اللي فبالو ... وجلست نهضر ونسايس وهوا كيصدني وانا دايرة ليه بحال الدري الصغير حسابني راه عندو غير حنا بوحدنا ... ساعا فاش خرجت جات وقفات عليا واحد الحمارة فالطموبيل بقات كتهضر (كتنخصص) بقات كتخربق ماتيقتهاش ...
انهارت جميلة حدا مينة بالبكا اما الاخيرة جلسات خداها كدوح بضهرها وتوط من مناخرها بالفقصة وعينيها كيشتتو النضر بتوثر وتردد
- زيد يالاه ... دابا هادي اللي دارت بيه اش بغات ؟ الزواج ؟ ماهواش وجه الزواج ؟ ... الفلوس؟ ... والله لاشافت منو الريال وانا عارفاه ا كيسوى الدرهم كيعرفو فين غادي ... شبغات منو وهي شافتو هاز ولادو كيلعب معاهم وباااينة من الطيارة ولادو غا من ديك بابا اللي كيعاودو ليه ... جات عطاتنا الشكلاط تا ولينا فكبيدة وا زييييدك .... من كبيييدة لحاجة اخرى ..
ردت جميلة ساكتة من بعد ما فشات قلبها وبردات وهزات خنافرها
- هوا اللي عطاها الطريق... كن دار فيها كن مشات بحالها وحشمات... وكن ماعجباتوش كاع ميبقا يشرح ليها بحال الى عمرو عرفني
دارت مينة يدها على دقنها كتنفخ وتسوط ساكتة مابغاتش تقول فيه شي كلمة دلعيب واخا خاطرها كيدعي فيه من لداخل بلا متسمع جميلة شكاتقول .. تنهدات وطيرات تيليفون من الصاك اللي كانت هازة مداتو ليها وقالت
- عيطي ليه قوليها ليه ..
لاحت جميلة تيليفون : منعيطش ... الى عاودت عيطت راني بنت لحرام
مداتو ليها مرة اخرى: عيطي ليه وهضري معاه بلعقل .... ماتكبي ماتشكي قولي ليه اللي كاين غير بلعقل ماتبينيش ليه كاااع بقا فيك الحال (ضربات فخدها) الحلوف .. فين مامشا يتمرغ ... هضري معاه حشمي باباه ... وانا ديك الساعة ... عااااد غنهضر وغنعجبك فيه غا بلاتي
ترددات جميلة فالاول لاكن يعد اصرار مينة كتزعمها وربطات ليها الخط رد ب آلو ... جمعات جميلة النفس كترمش فمينة بتوثر وجمعات القوة ديالها بتحريض مينة وقالت بصرامة وهدوء باش ما يجاوبهاش شي جواب ماهواش وفنفس الوقت تلوح عليه اللومة وردت بعقلانية وتباثة
- الو مهدي ...
رد : الو نعام؟
ردت : سمعني عفاك غنقول ليك جوج كلمات ... حنا كانت بيناتنا عشرة وملحة وطعام وتشاركنا الدم وبيناتنا وليدات ... كنت واحد الوقت مرتك وكنتي راجلي وكتاب الله تفارقنا ... كنحتارمك وكنقدرك واخا وقع بيناتنا الي وقع .. مهم كتبقى بابات ولادي وعليا بالاحترام ... عفاك كما انا كنحتارمك حتى نتا حتارمني ولو على الاقل فوجه ولادنا .. وخليني بعيدة على حياتك الشخصية وخلي بيناتنا التيقار
رد باستغراب وانزعاج: علاااش ياك لاباش مالنا على هاد الهضرة كاملة؟
ردت بنفس التباثة صابرة لجوابو وقالت
- مابغيتش نتعرض مرة اخرى لشي موقف بحال ديال اليوم من طرف شي وحدة ولا شي واحد من جيهتك ... انا بعيدة كل البعد على حياتك .. الله يخليك مابغيتش تعرض ليا مرة اخرى شي وحدة تصدعني وحتى انا مغنعاودش نوصل لداك الحبس ومغنعاودش نعيط فهاد النمرة من ليوم
ناضت من حداها كتنفخ وجميلة ساكتة كتخمم .. قطعات مينة الهضرة عاوتاني نهار كامل بحال عادتها وجميلة غير كتشوف فيها وتراجع السينتة واش قالت شي كلمة ماشي تا لهيه . ختموها كل وحدة مشات تنعس ويالاه حطات جميلة راسها على المخدة حدا ولادها بجوج وصلها مسج عبر الواتساب ودخلات طلات لقات اوديو من عند مهدي ... تفاجآت وترددات تحلو لاكن الفضول خلاها دخل با تعرف اشنو مسيفط وباش مجاوبها .. حلات لأوديو وتاضح انها مكالمة هاتفية بعتها ليها وطلقاتها كتسمع .. بعد لحضات من رنين الهاتف ردات بصوت لطيف
- مهدي مالك اشنو وقع ؟ انا اصلا ماعرفتش علاش كتهضر؟ واش طليقتك ؟
رد بنفس الغضب: *** علامن كنهضر يا بنت القحبة... واسمعي غضربي على هاد النمرة كترتو يا بنات ***** ونزيدك غتجي مرة اخرى ولا نشوف وجهك فالزيارة غنفش *** بوم واحسن ليك ماتعاوديش تباني هنا
ردت بارتباك وتوثر حتى بدات تبكي: انا مامشيتش هي جات عندي برا قالت ليا بعدي من راجل بولادو امهدي راه ماوصلتهاش علاش قلبتي هاد القلبة هادي بحال هاكا سمعتي منها غير هي وجيتي انا خويتي عليا كلشي
رد بغضب: فييين كتعرفك هي فيين؟؟؟؟ فين كنعرف ديلمك واش كاينة فوق الارض واش حساب **** دمدومة انا .. سيييري ابنت**** راك معارفاش ك*** معامن كدوي راه غنخسر على مك تيليفون يعطيو ز*** بوك قتلة دلعصا حدا داركم ... ااااش وصلك عندهاااااا دايرة فيها طااايبة ونزقة هاناااا سمعي شكيقول !!!! راه غاكندوز بيك الوقت **** الله ينعل *** بات حياة مك .. حيااااتي بعيدة عليك سمعتي ..بعييييدة ومت ولادي هاديك نيفووووو زايد عليك ال**** وصعيييب توصلي لداك السطاج ونتي غاااا***** فهمتي .... وديك الهضرة كااااااملة راه غا مطلعها عليك يالا دوري ت**** تعاودي تصوني عليا نخسر مك . (قطع)
جميلة الجزء 22
محتوى القصة
مينة بقات غير مصدومة تلفات ليها الهضرة وجاتها البكية ... صافي حملات المسؤولية راسها وكفاش دير تفكها والى مافكاتها ماترتاح ما تهنا مادوق طعم الراحة ... يطلقو لابغاو ولا الى حرارت العشرة بيناتم
موعد الزيارة كالعادة ومينة واجدة وموجدة لوليدات حتى هما .. اما جميلة فخرجات لابسة سورفيت معاها حتى للتحت حطاتهم ليها فطموبيل اللور وقالت
التنقل بين الأجزاء