أولاد الوازنة الجزء 98

حلات عينيها على صوت اذان الضهر .. وذنيها كيصفرو عليها و ذاتها منملة .. تحسسات جبهتها بيدها و نزلاتها لخذوذها تا هوما، مكانتش حرارتها عالية فحال الليلة اللي سبقاتها .. صراحة امير معاها جابتليها السخانة و سهتاتها .. مع رجعات فحالها من موعدهم شربات الدوا دالسخانة و نعسات مع العشية دالبارح عاد توگضات .. ناضت عاقدة حواجبها و كلام امير معاها كايتردد فذماغها، لحد الان مامتيقاش! مقادراش تستوعب و مزال ماعطاتوش جواب نهائي .. دخلات للحمام مكاتقشعش قدامها غادة غير گود و كاتصرط فريقها مجبدة عينيها فالفراغ .. كل شوية كاتعطي لراسها شي تصرفيقة خفيفة على الله تتوگض و تخرج من حالة الصدمة اللي داخلالها

ماحسات بنفسها غي كاضحك و تخوي فالما على وجهها و كاتمتم

نور: واللهيلا قالك باغي يتزوج (السخانة غادة و كاطلع معاها) اش ندير دابا؟ شنو قلتليه البارح ابعدا مخي تلحس؟ اشنو دابا نخرج عندهم و نقولهم ولد سفير سابق بغا يتزوج بيا (شداتها الضحكة و ماقداتش تحبسها طلقاتها مسموعة شادة على كرشها) اووووف شحال كايضر فالراس الزواج

تحنحنات كاتشوف فالمراية، بالزز باش حابسة ضحكتها و كاتفكر فالحوار اللي دار بينو و بينها اول ماوصلها لبلاصة قريبة شوية للدرب، فنفس الوقت منطقة قليل فين كايدوزو منها الناس باش مايشوفها حد و يبقاو يشورو عليها

🔙🔙🔙

امير: (شاف فيها اول ماحبس الطموبيل و هي حاطة يدها على خذها ساهية كاتفصل و تخيط) استاذة نور! مزال مالقيتي جوابك؟

نور: (شافت فيه مضهرة و تبسمات ببلاهة) يا خويا واللهما خبيتو عليك

امير: (طول فيها الشوفة بجدية و فنفس الوقت ابتسامة خفيفة مزينة وجهه) اذن شنو نفهم؟

نور: (تحنحنات قلبها كايدق و يعاود تالفة، يديها كاتسرحهم و تعاود تزيرهم و حلقها شاحف) امممم الري و الشوار يبقى لواليديا، تا ندوي معاهم و نشوف شنو يقولوليا و نجاوبك، حاليا مانقدرش نقوليك تا حاجة

امير: (تبسم) مزيان هذا النيت اللي باغي .. خبريهم و اذا تافقتو خبريني نجيب واليديا تانا

صرطات ريقها من جديد كاطلع و تنزل فيه و قربات عندو بشووية كادوي بحذر عينيها كايدورو

نور: متأكد من هاد الشي اخويا؟ مكاتفلاش

دور وجهه للجهة الثانية كايضحك فخاطره و رجع شاف فيها بجدية

امير: ناوي الحلال معاك ابنت الناس و من الاحسن حيدي ديك خويا ماعندها معنى!!

🔚🔚🔚

خرجات من الحمام بعدما كملات روتينها الصباحي و الهضرة مع راسها .. لقات مها جالسة فالصالون بعدما كملات شقاها، الدار كاتشعل كاتوقف عليها بيديها و ماتجلس حتى تشوف گاع الركاني كايلمعو

نور: (بابتسامة) كاين شي فطور الواليدة؟

الام: (شافت فيها بنص عين) هادي ساعة الفطور؟ كنتي فغيبوبة ابنتي!! فاش كنا كانفطرو الصباح عييت ندق عليك و نتي غاطسة

نور: غا كنت عيانة شوية و السخانة شداتني (تنهدات كاتشوف فيها و تدور الهضرة فعقلها، المقدمات ماتعرفلهمش و النيت تا هي مافيها ماتجبد فالهضرة، فولة واحلة فحلقها و بغات تبزقها) ماما ماقلتليكش جاو فيا الخطاب؟

الام: (شافت فيها معلية حاجب و جاوباتها بالطنز) واايلي؟ شكون ولد شي وزير؟

نور: (من نيتها) لا سفير

الام: اهاه و فوقاش جايين؟

نور: راني جايا نتشاور معاك نديرو معاهم النهار!

الام: (ضرباتها لكتفها تا تنخضات) جالسة كاطنزي عليا مكاتحشميش، تگعدي سيري جيبي الملاوي راهم فالكوزينة، لا بردو سخنيهم و فطري

نور: (كاتشوف فيها من تحت لتحت) و ماجاوبتينيش

الام: واش كاتفلاي عليا و باغاني نجاوبك، نوضي تگعدي، بقالك غا ولد السفير؟ فين يشوفك!!

نور: باه سفير السابق و هو دكتور دونتيست اماما .. البارح فتح معايا الموضوع و قلتليه تا نفكر و نتشاور مع واليديا!

الام: (شداتها الضحكة) وااااسيري تلعبي مع گراناتك .. السخانة اللي جاتك شداتك عليا

نور: وا واللهيما كانكذب عليك اماما .. كانقوليك اللي كاين

الام: سيري بعدي مني غانشير عليك بشي صندالة

نور: و علاش ماتقتيش فيا دابا راني كانقول الصراحة

الام: (طولات فيها الشوفة، حتى حركات راسها بلا) لا لا لا لا شي كاميرا خفية هادي مافيها شك!

نور: (غلباتها الضحكة) تانا شكيت فاللول هههههه ولكن راه صدق ولد الناس ظريف باغي المعقول

الام: (حطات يدها على حنكها بنفس حركتها مللي كاتلف و دوات مصغرة فيها عينيها) حلفي بالله

نور: حق الله اماما

الام: قولي حق الله تا جاي فيك عريس طبيب و باه سفير!

نور: حق الله تا جاي فيا عريس طبيب و باه كان سفير

الام: (عطات لراسها تصرفيقة خفيفة) اشداك تعلقي فين تفلقي ابنتي!! ماجبتيه استاذ .. ماجبتي شي موظف بدارو و طموبيلتو و عااااديييي فحالنا فحالو، منقزة نيييشان عند ولد سفير؟

نور: (كاتبلق فيها عينيها) هادشي اللي عطى الله اماما

الام: هادشي اللي عطى الله؟ يشويييني فيييك!! نوضي نوووضي تگعدي سيري تفطري و تا تصحصحي مزيان عاد اجي عاوديليا هاد الهضرة، تا نتأكد واش هادو فعايل السخانة و لا شي تنوعيرة جديدة جايباهاليا

نور غلباتها الضحكة من ردة فعل ماماها .. ناضت كاضحك غادة للكوزينة خلاتها متبعاها بعينيها كاتمتم

-ولد سفير؟ فين تعرفو بعدا، لا لا لا هادشي فشكل ....

فطرات و رجعات جنب مها، شي كايشوف فشي .. مها فحالا كاتسولها بعينيها واش داكشي بصح و هي كاتأكدلها بعينيها .. تا سمعو صوت رجولي القى عليهم السلام و دخل

شافو ناحيته كان اخ نور .. غير شافتو تحنحنات و قادات جلستها كاتغمز مها

نور: (بهمس) قوليهاليه دغيا دغيا

الام: (خرجات فيها عينيها) سكتينا من الطيارة

الاخ: (جلس معاهم بعدما باس لمو راسها و هي كاتغامز مع نور) اشنو مالكم كاتغمزو؟؟

نور: (شافت فيه ضاربة الطم كاتحرك راسها بالايجاب)

الام: (تحنحنات و شافت فيه) ختك اولدي جاو فيها شي خطاب و قالتهاليا

الاخ: (شاف فنور بجدية) شكون هذا و منين كاتعرفيه؟

نور: (قادات جلستها كاتشوف فيه متبتة و مرزنة) كنت تعارفت عليه فالفيسبوك فواحد المناقشة على القراية، و بقات هضرتنا فداك المجال هو كان ففرانسا .. راه دونتيست .. دابا فاش جا للمغرب قال باغي يخطبني (قالت كلامها مزنگة كاتلعب فصباع يديها و هو كايتمعن فكلامها .. بدوره عارف ختو بعقلها و عندها غير نيشان)

سكت مدة كايدور كلامها فراسو حتى قاد جلسته كايتحنحن و قال بجدية

الاخ: اشغانگوليك انا؟ تا تشاوري مع باك هو الكبير و تافقو عاد نشوفو فهادشي انا ماعندي مانقول

الام: (دارت يد على يد كاتشوف فالركاني و تدوي) ولو وافق باها اولدي! الدار مواجداش خاص نصبغو و نبدلو الطلامط و هاد الزربية قدامت .. الناس اللي غايجيو باينة غاتكون عينهم عامرة مانحشموش براسنا

الاخ: (شاف فيها بجدية) الواليدة بلا هاد الهضرة، لا كانو من هاد النوع غير بلا مايجيو .. هوما باغيين المعقول معانا حنا و مع بنتنا غايتناسبو معانا ماشي مع القش دالدار .. (شاف فنور) اختي اللي بغاك ايبغيك كيفما نتي ماتحتاجيش تبدلي و تصبغي و تلمطي باش تباني قدامو .. بعدا واش هاد السيد من داك النوع اللي كايشوف غير من الفوق ولا كيفاش؟؟

نور: لا لا بالعكس، السيد محترم و ظريف و مؤدب ماشي من داك النوع اللي لاباس عليهم كايشوفو شي حد قل منهم كايقللو منو، بالعكس .. مزيان و مصواب و باينة تا عائلتو هكاك مدام مربي بهاد الطريقة!

الاخ: (بهدوء) ايوا لا كان هكا مزيان، المهم تا يجي الواليد و تشاورو معاه، انا غانمشي نرتاح شوية

الام: سير الله يرضي عليك اولدي (ناض مشى لبيتو و هي تشوف فبنتها كاتميق) ظريف و مؤدب و محتارم دغيا دركتي تعرفي طينتو

نور: غير تشوفيه يبانلك هادشي تا نتي راه سيماهم على وجوههم

الام: اممم ايوا تا يجي باك و نشوفو فهادشي .. نوض تانا نشوف داك الغدا فين وصل

نور : ( دارت يديها على حنكها ) الا صونا عليا اش نقوليه ؟

الام : ( تتنهد ) هادشي ابنتي عندكم مزروب ! هو باباك ماعندو مايقول ، شكون كره معقول للبناتو ؟ ولكن ابنتي واش حنا قد هاد الناس ؟

نور : ( ماعجبهاش حال ) مالنا اماما ؟ قريتونا ربيتونا و صلتونا بقات ليا شي وظيف وصافي

الام : الله يرضي عليكم ! مفتخرة بيكم كولكم ، غير هو ابنتي راه حنا غير المغاربة و تنبغيو نكبرة بالواحد و نبانو فاحست صورة

نور: ديري لي قال ليك خويا ! انا الا شفت لي ماعجبني ولا قللو منا الله يسهل عليهم مع سهمهم ! انا كن ما الولد عاجبني و مقتنعة مانجيبوش الدار

الام : يدير الله خير ..

...نور طبق اصل عن امها ! لا فالشبه ولا فالطبع ، ضحوكيات و نشوطيات ، نور من نوع لي والديهم رباوهم و ضربو عليهم تمارة من القليل كبرهم ! وجدو الغدا و جا الاب و جلسو افتتحو الموضوع من غير نور لي حشمت ماجلساتش ، و الاب رحب بيهم و خلا الام تكلف و فنفس الوقت ربطت الخط بامير

امير : الو نور

نور: وي ! لباس عليك كي بقيتي

امير : حمد الله ! اتصلتي هاد وقت شي حاجة اولا ؟

نور: راه اخبرت مالين الدار عليك او وافقو !

امير : ( حك حاجبو ) واش داك آختي ؟

نور: ( خرجت عينيها ) شنو ؟

امير: ههههه صافي بلا ماتشدك حالة تاني ! انشاء الله نحددو موعد و نتصل بيك ووالله يسر لينا

نور : ( تلبكت ) امير ياك واثق من هاد الخطوة ؟

امير : اكثر من اي وقت انور ! غير ريحي نفسيتك كولشي يدوز انشاء الله على مايرام ، غير هو كنت باغي نطلب منك واحد الطلب و مردد

نور: آشمن طلب؟

امير: اول ماعجبني فيك هو حجابك و التزامك ! كل مرة تنتاكد انك نسانة مثل مظهر مثل جوهر ! ماكرهتش تزيدي من التزامك و تلبسي للباس شرعي

نور : ( سكتات تتفكر ) انا لباسي طويل حمد الله

امير : عارف ! ولكن ماكرهتش تلبسي داك اللباس

نور: دبا هدا طلب و لا الشرط ؟

امير: الطلب انور !

نور: مانواعدك بوالو خليها الوقت

امير : خودي وقتك انور ! نتحدد مع الواليد ونتصل بيك و خبري عائلتك

...لي هبيل وفيه العرق هبال لا جناح عليه !! داك الفنيدق خيطو كامل تيقلب على قهوى تتسربي قهوة كحلة ولا لقاها ! فاخير دخل جلس فقهوة و طلق رجليه تيتمنظر فطالع و نازل بشاريع معروف تا خلط عليه خوه

يوسف: الا عاودت شديت طريقكم راني ماشي القباج

زكريا: ( هز يديه سرباي طلب عصير ) هاد شمال مقناط

يوسف: ( متبع شي بنات ) ضرب ليك على زين و الفسورية العايلات اصاحبي

زكريا : ( دور وجهو ممتنع نظر ) مريض وحق الرب

يوسف: نوض نجيب نمرة ؟

زكريا: لاش تتعاودها ليا ؟،

يوسف: صافي باينة ماعجباتكش ! ( طلعها تتشوف فيه ) حشمانة و هبيلة

زكريا: شنو دارت بايير ؟

يوسف: ( قلب اتجاه تاني ) الله يعطي دلمهم العذاب ! واش ديك مك مزال مع اتواب ؟

زكريا: ( حرك ليه راسو ) مزال

يوسف: شتي انا نهار نتزوج ؟ كولها تكولي نسافر ؟ لا غير كولهاااا ! ( تيضرب فطبلة ) بربي لاااا ..

زكريا: ( بنظرة باردة ) ابوحدك اصاحبي

يوسف: مالي انا نتسنى بنادم عاد يمرضني ؟ اودي ما تماش وصافي

زكريا: ( هز تلفون تيلعب ) شفتي زياد جا البارح

يوسف: هداك لي جات معاه ! باسبورو فيديه و رزقة فجيبو و جالس يتسركل ليا ، اجي اش دير هاد العام ؟

زكريا: ديران الله ! نكمل لافاك

يوسف : تكمل لافاك ؟ لافااااك ( تيحرك يديه ) اش تبع اصاحبي؟

زكريا: شعبة ديالي اصاحبي ! وانت ؟

يوسف : داكشي علاش تافقنا ! داكشي لس نمشي فيه ، اوفبيطي تقني كهربائي نضربها بشي تزويجة ونجمع و ونطوي

زكريا: مسالي قبك اصاحبي ! شمن زواج

يوسف: صافي شبعت قحاب ! غير هو خاصني نطيح على شي بنت دارهم دريرة و داكشي

زكريا : ياك ؟

يوسف: مالي نجيبها بشعكاكتها نبقاو ديري زيف ماديري زيف ؟ من اول جيبها بزيف وجلابة و تولد ! كل عام ولد انا نسمي ! الحاج يسمي و تا اسوم تمسي

زكريا: يوسف ؟ تتضرب شي نتيرات زعما ؟

يوسف: مالي نحشم منك ؟ ولا تشريه ليا نت ؟ دبا المعقول رجع ملاغة

زكريا: شووو اخا لله يحفظك ! سد عليا ماتهضرنيش افكار الكيلو لاروب

يوسف: ( تيضحك ) يلاه نهبطو نضربوها بشي عومة !

زكريا: واش دلمك كرشي دخل ظهري بجوع و تتكولي البحر

يوسف: تما نصيدو الحوت اصاحبي! شتي انت عندك قصر الافكار

زكريا: عندي ...( سكت مقطاعو هاتف ) الو بابا

نبيل: فين راكم؟! معاك خوك ؟

زكريا : اااه

نبيل: هبطو باركينج ..

..خلصو القهوة و نازلين بحالهم باركينج ،تاوصلو و لقاو نعمة قالبة وجها و اسماء تتنكر و نبيل عاقدهم ، ركبو كلهم متجهين المطعم ياكلو تانزلو مزال نفس الجو

اسماء : انا بغيت نفهم آش تجلس دير بوحدها؟

نعمة : انا ماقلتش ليك نجلس لوحدي؟ قلت نجلس مع خوتي حسن ما نبقى ندور فمحلات و ناس بزاف راسي ضرني

اسماء: اوا سفر هو حدا ! اليوم غادين خاصنا نتقضاو

نعمة: ماشي شغالي اماما ! آخر مرة نشد طريقكم

يوسف: تانتي الواليدة تتشدي فدوران ! بزاف

اسماء: انت يعطيك الحلاقم ! يعطيك السالمة الا ماسكتني ماكاين لي اخرج عليها قدك

زكريا: ( بتعب ) صافي اماما هابابا جاي

نبيل: ( جلس ) مزال ماكملتي غوات ؟ مانعرفوش هاد النعمة منين ادوز

اسماء: اولادك فيهم هضرة بزاف ! والدة البنت تونسني و دور معايا ماشي عزري دوار

نبيل : اها من بعد ؟ شنو نديرو لهاد البنت ؟

اسماء: عمر طريقها نشدها !

نبيل : صافي ! كلها يشد طريق ! انتي سافري راسك و هيا تسافر راسها وكلها يسافر راسو

اسماء: سيمانا وحنا معاهم ! البحر ! بحر ! خروج بليل ! انا عيت مليت نهار لي عندي نتقضاه كلهم جاهم قنط

نعمة: ( تتاكل ساكتة ) صمت

نبيل: ياك قضيتي الغرض !؟ وصافي

اسماء: ماصاااافيش !

...كملو داك الغدا و اسماء غير تتنتر ! حلفت تترجع للسوق تكمل ! ماتيهز هبالها غير نبيل! خلاهم فالقهوة مقابلة مع البحر ومشى معاها لا تمرضو تاني ! اما يوسف و زكريا تيتفرجو فالماتش وهيا يلاه رشقت لها على تلفون شعلاتوو بدات تقرا تتشوف تاطلع لها مساج براء

براء : على سلامة ! رجعتو

...حققت شوفة فالمساج و لكن دماغها قالها ماعندما كانة ليه ! رجعت طفاتو و رماتو فصاك بقات تتمنظر فالبحر و تتاكل لاكلاص ديالها

يوسف: هادو خاسرين خاسرين

زكريا : نتحاطو ؟!

نعمة: نبقاو غير هنا ؟

يوسف: لا نوضي سيري ضربي دورة

زكريا: جلسي لا تلفي كالك ضربي دورة

يوسف : نوض مع اختك دورها

زكريا : نوض انت نيت دورها

...شافت فيهم بجوج و رجعت شعلت تلفون و جاوبت على براء

نعمة : مزال ! ماعجبنيش حال هنا!

براء : ( بحب ) مادايرينش ليك الخاطر ؟ تاترجعي نخرجك واحد بلاصة زوينة

نعمة: ( عجبها حال ) فين هاد بلاصة؟

براء: تاترجعي احبيبة نوريها ليك !

يتبع...