الأجنحة المنكسرة الجزء 12

2020

محتوى القصة

رواية الأجنحة المنكسرة

ساط من مناخرو كرز على يديه بعصبية ..
شاف ف نريمان لقاها حاطة راسها على زاج ساهية دخل لداخل وقف طوموبيل. حلات الباب وخرجات تعرض ليها شد فيها وقال :

جهاد : طلعي بحالك الفوق انا شوية ونجي
نريمان : بتعب ) فين غتمشي؟
جهاد : انا غنخرج دابا ونرجع غير طلعي..
حركات راسها بالايجاب يلاه زادت جوج خطوات شافتو خرج بلا طوموبيل.. رجعات بغات تخرج وهوا يوقفها عباس

عباس : اجي ابنتي فين ماشا رجعي بحالك ؟
نريمان : لا غير نطل

عباس : لا رجعي راه معاه شي راجل برا

سمعات راجل برا وهيا ترجع بلور : اااه واخاا انا نطلع بحالي.

تبع ليها العين حتا طلعات ورجع جلس فالكرسي ديالو..

خرج مغزف ملقاش طوموبيلتها بقاا كيضور عينيه.. ورجع بحالو طلع عندها لقاها كتبدل حوايجها..
حيد تجاكيط ديالو رماها فوق الكرسي جلس مشبك يديه شافت فيه باستغراب .. قربات لعندو وقالت : مالك اجهاد

جهاد : الصمت
نريمان : ياك لباس قولي
جهاد : تنهد ) ملقيت منقولك . يلاه انا غندخل ندوش باش نخرج عندي خدمة كنحس براسي عيان مكرهتش غير نعس بفففف

ناض معصب حيد حوايجو ودخل الحمام فحين جالسة هيا كتحس براسها بحالا متقلة عليه وعيا منها ..
لبسات حوايجها القطنية وتقيشرات دالصوف ودخلات لفراشها ساهية فالبالكون.. حتا خرج حسات بيه كيبدل حوايجو مضوراتش وجهها. سمعاتو هز السوارت وقال : هانا مشيت اي حاجة صوني علياا صافي.
ضارت عندو وحركات راسها : واخا صافي الله يعاونك..

خرج وهيا تنوض كطلل من البالكون. كاس لابس سروال دجين اسود مع كبوط غليض دالصوف فاللون احمر غامق ومونطو اسود وصبادري اسود شافتو طلع فالطوموبيل وخرج.. بقات متبعة ليه العين وهيا كتشوفو غادي مع الشارع حتا مبقاش كيبان رجعات لبلاصتها. هزات البيسي ديالها كتقلب فيه حلات الفيس بوك ديالها فيه لقات مجموعة كبيرة من المسجااات وطلبات الصداقة وبزاف د التعاليق حول جوج صور لي كانت حاطة وهيا فالامارات وصورة ليها وهيا ف تركيا دخلات تقرا تعاليق وتخلي اعجاب لناس وترد عليهم.. حسات بالفرح نوعا ماا..
مشات لطلبات بدات كتقبل غير البنات وكتحذف الرجال..
دخلات المسجات لائحة طويلة دخلات تجاوب غير لي كتعرفهم.. اولهم ابتسام لي لقات بزاف د مسجات مصيفطة ليها كتسول على احوالها وكتطلب نمرتها باش يتواصلو فالواتساب..
وهناء لي حتا هيا مصيفطة ليها ولكن مبغاتش تدخل وتقرا مسجاتها. داني حتا هوا كان مصوني عليها ومصيفط ليها مسجات وامين لي مكانتش كتجاوب على مسجاتو ملي كانت مزال فالامارات .. لقات العديد من بنات لي كانت خدامة معاهم عند نجود.. لقات مسج اثر فضولها ودخلات ليه باللغة الخليجية

.... عفااك الا شفتي مسج ديالي جاوبيني ولا هضري معايا هادي نمرتي..
معرفاتش ديالمن داك الحساب ولكن حسات بلي شي حد كيعرفها...
سمعات صوني حطات البيسي وناضت طلات من البالكون. لقات عباس واقف ومعاه بنت
عيطات ليه من بالكون وقالت : عباس شكون؟

عباس : هاد بنت كتسول عليك

نريمان : باستغرااب ) علياا انا ؟

تقدمات البنت جوج خطوات

وقالت : عفاك واخاا تهبطي نهضر معاك؟ ضروري عفااك..
حركات راسها ومشات لبسات بينوارها طويل. وقدات الزيف ديالها وهبطات فالدروج..

شاف فيها عباس بتشكيك..
بعد عليها ودوز نمرة صونى على جهاد..
خرجات عندها نريمان بوجه شاحب الغيام والريح شافت فالبنت وقالت : نعام كتعرفيني؟

شافت فيها ديك البنت بعيون كيلمعو كتشوف فملامح وجهها راسمة ابتسامة فرح توترات وهيا كتشوف فيها..

عودات سولاتها نريمان باستغراب : شنو ؟ علاش كتسولي عليااا؟

سرطات ريقها بعدم التصديق : وووو. واش... دابا نتي نريمان ؟؟؟

نريمان : اه اناا علاش؟
البنت : بدهشة ) حلفي بالله هادي نتي؟؟
نريمان : شكون نتي؟
البنت : اااااا... اااانااا.. اا اناا ختك انريمان خخخ ختك

نريمان : بصدمة ) ختي؟ ختي انا؟ انا معنديش ختي واش كتفلاي عليا؟؟؟
البنت : لا والله مكنت..( تنهدات ) فلة عليك وااا

شدات فيها بغاات تعنقها وهيا تنتر نريمان يديها منها
نريمان : بغضب ) متشديييش فياااا شكون نتي وشكون مصيفطك؟؟ انا معنديش ختي

البنت : لا اقسم بالله الا انا ختك انريمان ان ختتك وماماك حتااا هيا هاهياا بغات تشوفك عفاك راه كتر من 15 يوم وحنا كنقلبو عليك ه...
قطعاها عباس شد فيها ودفعها
عباس : خرجي من هنااا باركة من كذوب خرجي ها مول دار عيط على بوليس دابا غيكونو هناا
دفعاتو كتغوت : بعديي مني جيت نشوف ختي. ( كتغوت ) نريمااان مامااا براا بغات تشوفك عفااااك خليها تشوفك عفاااك اختي راا..
زاد دفعها عباس خرجات وشد الباب كدق بالجهد وتغوت..


خلات نريمان جامدة فبلاصتها

ماهيا الا دقائق قليلة كانو البوليس وجهاد جاو دخل بالزربة لقى نريمان جالسة فالجردة كيحاول عباس يدخلها ولكن مكتهضر ما كتكلم غير حاذرة راسها وساكتة كتشوف فالارض..
شد فيها لقا يديها بحالا مخشبين نفس كتخرجها بصعوبة شد فوجهها بيديه بجوج وهيا فصدمة
جهاد : نريمان مالك ..؟؟؟ جاااوبيني.. هضري !! مالك


حركات راسها بالنفي وناضت دخلات لداخل بخطوات بطيئة..
خلاها ورجع لعند بوليسي كيهضر معاه
جهاد : ديماا كتجي لهناا وكنلقى طوموبيلتها واقفة حدا داري حذرتها ما مرة ماا جوج ولكن ديما كتجي واليوم جات حتا لداري ..

خداو اقوال ديالو ومشاو تبعها جهاد لقاها ناعسة على فوطوي وعينيها كيشوفو فنقطة وحدة حاط يديه على وجهها كيشوف فيها بالآسى
جهاد : كون يحساب ليا غيطرا هادشي مكنتش نجيبك المغرب كاع،
معرفتش شنو ندير باش نخرجك من هادشي

شدات عينيها .. كتحس بغصة فقلبها مرداتش عليه وبقات على نفس الحال
جهاد : نسافرو لشي بلاصة ؟ فين تبغي تمشي؟

حركات راسها بالنفي
جهاد : علاش ياك نتي كيعجبك تسافري غير قوليلي تبغي نديك فينما كنتي غتلقاي راحتك نديك غير قوليلي.
ناضت سمحات فيه وطلعات لبيتها تخشات فبلاصتها حيدات المخدة من تحت راسها ودارها فوق منها
طلع موراها لقاها كتبكي بهيستيرية شد فيها كيحاول يسكتها ويصبرها وهيا مغير كتزيد ترعد كيحس بقلبها كيضرب بالجهد وصدرها كيطلع وينزل. عنقها بكل ما فقوتو وبقاا معاها ليل كامل

صباح الحال ناضت بعينيها منفوخين كتحلهم بصعوبة لقاتو فايق كيلبس حوايجو..

جهاد : صباح الخير انا عاد كنت غنفيقك احبيبة شوية دابا..
حركات راسها بالايجاب وقالت : فين غتمشي
جهاد : غنمشي الخدمة وغنرجع بالزربة حيت غنمشيو لكازا اليوم عندك الحصة مع ياسمين

حركات راسها وقالت : واخا انا نتسناك حتا تجي،..
قرب لعندها طبع قبلة على جبينها : يلاه رجعي تنعسي وملي نجي عاد نخرجو ونفطرو برا اوك راه مزال الحال وشتااء كطيح. رجعي تنعسي..

حركات راسها وشدات عينيها.. حسات بيه خرج وسد الباب وهيا تنوض شادة فمها يديها كيترعدو كتحس بالدنيا كضور بيها. كتحس بقلبها عاطيها الحريق
رجليها فاشلين. هيا فاشلة حياتها فاشلة لا سعادة ولا راحة ولا بال هاني. معندهاش الزهر هيا فهاد الدنيا جات بغلط وغتكمل حياتها بغلط ونهايتها غتكون غلط. دخلات الحمام توضات وخرجات وهيا كترعد لوات شان على راسها وبدات كتصلي وهيا جالسة فالارض مقدارش توقف مقدراش تحرك مقدراتش حتا تصلي. هزات يديها وقالت : ياربي تسمحلي على هادشي ولكن عييت. عييت اربي ومعندي حل عييت اربي هازة فقلبي وعييت نصبر وعييت نقول هادشي غنساه وحياتي غتكون مزيانة وغنكون بحال الناس ولكن اربي حياتي مبقاا فيها ميتشاف. انا اربي عيييت عييييت وعيت عفاك احبيبي ربي سمحلي سمحلي عفاااااك امولاي سمحلي ولكن مبقاا عندي حتا حل كاع بيبان تسدو فوجهي.
ناضت لبسات مونطو فوق بيجامتها. مشات المجر هزات الفلوس. وهبطات كتجري مشات تحل الباب وهوا يوقفها عباس حطات يديها على كرشها وقالت : كضرني كرشي خاصني نشري فنيد
عباس : غنمشي معاك
نريمان : لا لا جهاد مغاديش يبغي غير جلس اناا دابا وانا جيت انا غنمشي غا لهاد فرمسيان لي حدانا..
عباس : واخا ابنتي الله يشافيك.
حل ليها الباب وخرجات مشات كتجري. معرفات فين تمشي كيبانو ليها غا الفيلات والشوارع كبااار. بقاات غادة وكضور موراها كتحاول تعقل على منين جات. بدات كتسول ناس على دغوڭغي حتا نعتوه ليه بعيد بقات غادة وكتسول حتا دخلات لعندو وهيا كترعد سنانها كيتقرقبو لقات شي راجل واقف كيشري. خلاتو حتا كمل وقربات لعند بائع
.. شنو خصك؟
نريمان : بتوتر ) عندي... و.. ع.. عندي فيران فالدار.. وب. ... وبغيت كينة
شاف فيها وقال : معنديس مبقيناش كنبيعوها
نريمان : علاش؟ وانا شنو ندير لفيران لي عندي

... بتشكيك ) شوفي ابنتي راه ممنوعة وانا منقدرش نعطيها ليك
نريمان : واخا وعطيني شي دواء اخور شنو ندير ليهم؟

حس بلي كلامها بصح وقال : غنعطيك كينة وحدة ديريها ليهم فالطحين ولا فمطيشة وراه غيموتو صافي

نريمان : اه صافي الله يرحم والديك
مدها ليها فميكة خلصاتو رد عليها الصرف خلاتو ومشات كطير. معرفاتش راسها منين جات بقات كضور دخل من هنا وتخرج من هنا وشتاء خيط من سماء حتا وصلات لدار حل ليها عباس ودخلات كطير مشات الكوزينة..


هزات كاس عمراتو بالماء وهيا كترعد حطات كاس قدامها حلات ديك الميكة وكبات ديك الكينة فالماا حطات يديها على لورنيا كتبكي داتها كلها كترعد حانية راسها كتشوف فداك الكاس هزاتو ورجعت حطاتو ورجعات بالور ..

دخل بسرعة على رجليه وقال : فين هيا واش دخلات؟
عباس : اه راها دخلات مقدرتش ندخل لعندها..

دخل بالزربة غير سمعاتو وهيا وهيا تفزع شافت فداك الكاس بغات تحيدو. سمعها فالكوزينة ودخل لعندها بالزربة وقفات خبات داك الكاس مور ضهرها

خرج عينيه فيها بعصبية وقال :

شكااااين لاش خرجتي؟؟؟؟؟؟ فين مشيتييي..!!!!!

شافت فيه بخوف قلبها غيسكت وهوا كيزيد يقرب لعندها

نريمان : بخوف ) ووو والو والو غيي.... غ غ. .. غير خرجت وصافي

شافها واقفة يديها مور ضهرها زاد قرب
جهاد : شنوو مخبية؟؟؟ شنووو فيديك

نريمان : ووو والو اجهاد ووووالو. معندي والو

ساط بكل عصبية شدها من ذراعها دافعها لقى داك الكاس محطوط خرج فيها عينيه حوومر..
ورماه بضهر يدو جا مشتت فالأرض شدها من عنقها لسقها مع ثلاجة

جهاد : واااااااش غتحمقييينيييي ولا مال اصلك. امك واش غير صبرت ليك بزاااااف ودابا مغير كتزيدي فيه ؟؟؟؟؟


بغات تنتر من يدو وهوا يجمعها معاها بتسرفيقة حتا داخت شدات فجنب وجهها كتبكي وهوا غير مكيزيد يزير عليها

جهاد : واش غنبقى نحمق راسي معاك !! ولا شنو بقاليك غا لكينة لقيتيها حل؟؟؟
شربيه يلاه موتي زيدي لهلا يردك غتجهلينيي ولا مال اصلك

بغات تنتر من يديه مرة خرا كترعد وتبكي وهوا يشدها من شعرها

جهاد : راه مفيااا لي نبقى نحمق راسي معاك. غتقادي معايا وتبعي دواك وتبعي حصص دالعلاج ديالك هوا هداك مغاديش ديري هادشي غادي نوريك وجه تاني لي عمرك مشفتيه سمعتيني؟؟؟


نريمان : اهننن انااا عيييت اجهاد عيييت عيت من كلشي اناا مغادي ينفعني لا دواء اهئ اهئ اهئ
ولا طبيب انااا غنحمااااق غنتسطى غطرا ليااا شي حاجة اجهاااد غنموووت

جهاد : اصلاااا نتي مسطيااااا وغتصطيني معاك اش ناقصك؟؟؟ كاع حلول بغيت نديرهم معاك .. قلتليك فينماا بغيتي نديك قلتليك لي كتشوفيها غتريحك نديرهاا معاك وانت صافي هضرة جوج بغيت نموت؟؟؟
علاش غتموتي علاش؟؟ على امك ؟؟ على باك ؟؟! على طسيلتك لي مفيها حتا منفعة؟ شكون هادا لي غيستاهل تبكي عليه هااا؟ شكون هادا لي غيستاهل تموتي على قبلو؟ شكون هادا لي غيتجرء ويوصلك لهاد الدل لي نتي فيه شكون ؟؟؟؟

طاحت فالأرض حاطة راسها على ركابيها كتبكي وهوا عند راسها كيغوت بحر جهدو..

جهاد : نوضي تعقدي من الأرض راه اخر ايامي اناا لي غنولي مسطي بسبابك نتي. بلحق ديفوو ماشي فيك ديفوو فيااا انا.
نوضي تڭعدي من الأرض راه مغاديش نعاود معاك الهضرة

ناضت كتشهق طلعات لبيتها وشدات عليها لحق عليها لقاها مكمشة فالمانطة حاطة مخدة على راسها نترها ليها من فوق راسها
جهاد : دابا علاش كتبكي علاش؟؟ بغيت غا نعرف علاش؟؟؟؟
كيبان ليااا نتي مخااصكش طبيب نفسي.
نتي خاصك اناا ..
اناا لي غادي نحديهم ليك ونواطيييك مزيااان تبرهيييش..
سمع تليفون كيصوني جبدو وحل البالكون خرج يجاوب..

جهاد : ببرود ) صافاا.. نو ممساليش،
قلت ليك ممساليش اليوم حتا لمن بعد. بفف واش اليوم؟
اوك صافي انا غنشوف.

دار يشوف نريمان لقاها مزال مغطية وجهها. قلب عينيه وكمل كلامو

جهاد : صافي واخا

اوك..

قطع المكالمة ورجع لعندها خاشي يديه فالجيب

جهاد : نوضي تحركي
نريمان : بصوت مغنغن ) فين غنوض
جهاد : غنخرجو نوضي توجدي راسك وبدلي هاد الحالة ونتي بحالا كانت عندك ڭنازة.
نريمان : مبغيتش نخرج بغيت نعس
جهاد : مكاينش نعاس غنخرجو وملي نرجعو نعسي حتا تشبعي نوضي
مرداتش عليه. جر المانطة من عليها حتا عراها
جهاد : مكنحملللش نبقى نعاود فالهضرة.
نوضي دخلي الدوش وقادي راسك ناضت مغبنة لبسات صندالتها ناضت بغا تمشي لطواليط وهوا يشدها من يديها.

جهاد : كنقسم ليك بالله وعودتي تفكري ديري شي موصيبة بحال لي درتي اليوم قسما بالله حتا ندمك على نهار لي تزاديتي فيه.

شافت فيه بعينين مدمعين : انا اصلا نادمة كون غا متزاديتش جهاد لي فياا كافيني عفاااك متزيدنيش
نترات يديها منو ودخلات الحمام
شد عينيه مكره. جلس على طرف الفراش جابد تليفون كيقرا المسجات لي كيجيوه من عند سمية كترجاه باش تشوفها..
كتب ليها مسج طويل شرح ليها الحالة لي كدوز منها. وحذرها متعاودش تجي ولا تحاول تقرب منها.
رجع ناض قرب لطواليط كيتصنت سمع الماء مطلوق بغا يحل البوانيي لقاه مسدود
ورجع باللور هبط اللتحت..


طلقات الدوش هابط عليها ماء سخون جلسات على كرسي حاذرة راسها الأرض كتشهق. سمعاتو دق عليها مجوباتوش وبقات على نفس الوضعية..

بقات هكاك حتا رجع مرة خرا دق عليها سمعاتو قال : شنو كديري ؟

ردات عليه بصوت كيشهق ) كندوش
وقفات دارت شومبوان بدات تغسل شعرها والجسم ديالها كملات وبقات تحت الرشاش حتا حسات بالجسم ديالها دافى وترخى..
شللات وناضت لبسات بينوارها طويل وفوطة ملوية على راسها حلات الباب شافتو هز فيها عينيه ورجع هبطهم بالزربة..

دخلات لدريسينغ جبدات حوايجها بدات بملابس داخلية. وملابس قطنية سروال أسود وكبوط بيض بالسميطة ديالو مع شال اسود جبدات ليبوط قصير وخرجات لقاتو مزال جالس.
شاف فيها بنص عين وناض لبس جاكيط ديالو وناض وقف حداها

جهاد : قادي راسك راه بابا عيط لياا غنمشيو عندو كملي وهبطي انا كنتسناك.
شافتو هبط مشات لقدام المرايا . جلسات على كرسي هزات فوندوتن دارتها فوجهها وبدات كتقاد دارت كحل خفيف مع عكر ماط لبسات ليبوط ديالها هزات صاكها وهبطات لقاتو ديمارا طوموبيل. خرجات لعندو طلعات حداه وخرجو..
صمت مهضرش وحتا هيا.. وقف طوموبيل فالجنب خدا كاطو حطو لور ورجع ديمارا حتا وصلو الدار
كان ف استقبالهم باه ومراتو بعناق حار ستقبل جهاد
جهاد : هادي مراتي نريمان

الأب : اهلا اهلا اهلا مرحبااا ببنتي
تقدمات لعندو سلم عليها بوجهو طبطب على كتفها.
سلم جهاد على مرت باه بيديه

_ مرحبا بيك جهاد كيف داير؟
جهاد : بخير مدام زهرا مغسي

سلمات على نريمان وقالت : مرحباا تفضلو دخلو

دخلو لصالون عصري كبير هابطين 4 ثريات مزيين والسقف مزين بالخشب المنقوش اثات الفخم رقة والجمالية جلسات نريمان حدا جهاد
وباه ومراتو قبالتهم .. ضيفهم احسن ضيافة حتا من جهاد دخل محاملش الوضع.. حيت اخر مرة كان شاف فيها باه كان طرا بيناتهم خصام كبير خلاه مدة 3 سنين ميشوفوش بعضياتهم. حتا من مرات باه.
لي مباغيش حتا يهز فيها العين رحبات بيه وكتهضر معاه واخا كيجاوبها ناقص.
عجبو الحال معاهم دوزو العشية ديالهم يلاه بغاو يرجعو بحالهم حلف باه حتا يتعشاو مجموعين برا ..
وداكشي لي كان وافق حيت قال مزيان حتا لنريمان تبدل الجو
تعشاو فجو دافي ف احد المطاعم الكبرى فمدينة الرباط..
رجعو لدار فوقت متأخر
بدلات حوايجها ودخلات لفراشها.
حتا هوا بدل حوايجو ونعس عاطين لبعضياتهم بالضهر. بجوجهم فايقين بجوج مكرهوش يكونو معنقيين بعضياتهم وفرحانين كيتفرجو فشي فيلم اولا كيدوزو الوقت بشي لعبة شدات عينيها بضيق مكرهااتش يضور عندها يشد فيها ويعنقها حسات بنفسها ديالها كتزير عليها من جديد
ناضت هزات حبة من مهدءات لي عطاتها ياسمين شرباتهاا شدات عينيها حتا داها النعاس.
صباح فيقها حتا ناضت

جهاد : نوضي لبسي حوايجك غنخرجو

مسولاتوش فين غتمشي ناضت دخلات الحمام لبسات وجدات راسها وهبطات لعندو..
كان على موعد مع الطبيب نفسي لي دخل عندو جهاد هوا اللول بقات نريمان ف قاعة استقبال حتا خرج لعندها
جهاد : يلاه نوضي دخلي

حركات راسها وناضت دخلات بخطوات بطيئة.
حلات الباب بشوية هز راسو ببتسامة وقال : مرحباا تفضلي
دخلات ودخل موراها جهاد جلس فالقنت بعيد عليهم

سدات الباب مساعدة ديالو
كان طبيب متقدم فالسن شعرو ابيض ابتسامة مكتفارقش وجهو.

الطبيب : تفضلي جلسي.
جلسات على كرسي ناض من كرسي د بيرو وجلس قبالتها فالكرسي ..
الطبيب : اااااااياياي. مرحبا بيك
نريمان : شكرا
الطبيب : الوغ انا سميتي عبد الصمد طبيب نفسي ومرحبا بيك عندي
نريمان : شكرا بزاف
الطبيب : الوغ شنو اسم ونسب ديالك
نريمان : نريمان الوهابي
الطبيب : امم الوهابي اوك.. شحال فعمرك نريمان؟
نريمان : قول عندي 20 عام
الطبيب : داكوغ، مستوى دراسي ديالك؟
نريمان : سيزيام
الطبيب : اهمم اوك..

شاد ستيلو فيدو اي كلمة. خرجاتها كيكتبها. حط ستيلو وقال : عاودي كيف دازت الطفولة دنريمان؟ كيفاش كانت عايشة ؟

رجعها اللور وهيا كتفكر كلماا دازت منو. قالت ودموع فعينيها

نريمان : طفولة خايبة بزاف وصعيبة
الطبيب : اهاه عوديليها بالتفصيل شنو هوما الصعوبات لي دازو فيها. ومن اينا ناحية. وشكون كان سبب د هاد الصعوبات ؟
عاوديلي بالتفصيل من فضلك يلاه انا كنسمع ليك

خدات نفس عميق وقالت : كبرت بلا والدين. مع جداتي وعمتي وكانو هوما سبب باش عشت حياة صعيبة.
كان عندي خويا معاق.. ومن صغري ف 7 سنين بديت نصاوب شغل دار نخمل نجمع نصبن واخا مكنعرفش ، كنت كنبغي نخرج نلعب وملي كنت كنخرج كانت عمتي كتجيب موس ولا معلقة كتحميه على بوطة و..

سكتات كتمسح دموعها وتشهق ..
كملات وقالت : وكتلسقو ليا فيدي ولا فالجسم ديالي ومكنتش كنعرف نبدل ليكوش لخويا وكانت كتقولي بزز منك تبدلي ليه واش انا غنبدل ليه خنز ديالو. كان كيعز عليا خويا ملي كنت كنشوفو هابط ومريض كنت بزز نبدل ليه واخا مكنعرفش . كانت كتعطيني نعجن وندي الخبز الفران ويلا الخبز مجاش مزيان كتشد السمطة وتبدا تضرب فياا فوجهي فلحمي. تعطيني صابون نصبن بيدي ويلا مخرجوش الحوايج هداك النهار غناكل قتلة دالعصى وغنبقى بالجوع. حياتي كلها كانت ..

سكتات كتبكي مد ليها كلينيكس مسحات دموعها بعد لحضة وكملات
ديما... كانت كتعطيني الماكلة بايتة ..حامضة مبقاتش صالحة تكال اولا شياطة ، كتجيب لي تشهاتها كنشم انا غا ريحتها ومتقوليش هاكي ليك ولا عطي لخوك..


كانت تمشي البحر وتمشي تسارا ومتخلي فين تمشي وتخليني انا فالدار تعطيني تصبين ولا تخمال .
عمرني شفت البحر ولا خرجت الجردة ولا لعبت فالزنقة ولا جلست فشي بلاصة عامة بحال الناس حتا انا عمرني عرفت المدينة لي ساكنة فيها.
عمرني لبست حوايج بحال الناس ولا فرحت براسي.
كانو يمشيو العرس وانا كنتفرج غير من السطح.
كانو كيجيبو الماكلة معاهم وميقولوش ليا هاكي شوية..
كان كيوصل وقت القراية مكانتش كتبغي تخليني نقرا. وبزز وبطليب والرغبة ونبوس ليها رجليها باش كنمشي

قطعها : وكتوبة ولوازم د القراية هيا كانت كتشريهم ليك؟
نريمان : لا ماشي هيا ناس محسنين.
كانو ميجيبو ليا الكتوبة والحوايج والفلوس .
كانت كتدي هيا الفلوس وتختار الحوايج لي عجبوها تديهم وتعطيني خرين

الطبيب : سبب ديال هادشي؟ علاش كانت كتعامل معاك بهاد الطريقة؟
نريمان : بينها وبين بابا مشكيل كبير كان سرق ليها الفلوس وقبل من هادشي كانو فعداوة معرفتش داكشي بيناتهم المهم على شي ورث ولا معرفتش.
هادا هوا سبب ديما كانت كتحلف كتقول لياا داكشي لي دارو فيااا باك نخرجو منك فلوسي نخرجها منك.
-----
كان حوار طويل واخا كملات حصة ديالها.. بقا كيسولها وهيا كتجاوب على اسئلتو..

الطبيب : ببتسامة ) نكتفيو بهاد القدر اوك؟ حتا نكملو من فالحصة جاية.
نريمان : اوك شكرا
ناض جهاد من بلاصتو خرجها رجعت جلست فصالة استقبال ورجع هوا عند الطبيب

الطبيب : علاش مجبتيهاش من قبل
جهاد : هادشي عاد بدا كيبان

الطبيب : لا هادشي كانت ساكتة عليه كانت كتجمع البيئة لي كبرات فيها وضروف قاصية خلاتها هاكا
جهاد : دابا مفهمتش مزال انا هادشي مدخلش ليا راسي علاش قبل الزواج مكانش كيطرا ليها هادشي؟ واش غير حيت عاد عرفات واليديها

طبيب : نفاخة كتكون صغيرة وكنبداو نفخو فيها
نفخو فيها
نفخو فيها
حتا كتكبر وملي كتكبر مجرد إبرة صغيرة كنقيصوها بيها كتفرڭع
هكاك الانسان كيجمع بزاف وكيوصل لواحد المرحلة مبقااش قادر يسكت ولا يصبر ولا يتحمل هادشي

جهاد : بغيت نزيد نفهم الحالة ديالها دكتور؟
ممكن تزيد تشرحلي

الطبيب شوف باش نوضح ليك كتر مسيو جهاد
حنا كا بشر خلقنا الله عندنا ظل ديالنا ياك؟ ومريض اكتئاب راه عندو ظل اسود فحياتو
كل واحد شنو كيسميه. كاين لي كيسميه كلب اسود ولا ضباب اسود. ولا ظل اسود وكتختالف الاسماء طبعا اكتئاب كيخليك
كتفقذ لذة ديال الشعور بكلشي . الماكلة مكتحسش بالمذاق ديالها ومافيكش الجوع نهائيا
واش هيا كتاكل ؟
حرك راسو بالنفي : قليل بزاف واغلبية مكتاكلش
الطبيب : وي نوغمال حيت اصلا مكتحسش بالمذاق داكل كلشي باسل كيجيها كتفقذ لذة ديال الشعور بكلشي الماكلة مكتحسش بالمذاق ديالها والشهية كتكون مشدودة نهائيا
وغتكون مكتقدرش تنعس. وحتا الا نعسات غتنعس شوية. وتفيق. ويقدر يكون العكس تقدر تنعس كتر من لازم هادو كيكونو حتا هوما من اعراض اكتئاب الحاد
دابا هيا كتشوف الحياة بلا هدف. الا حنا ناس طبيعين كنشوفو عندنا اهداف مثلا واحلام وشي حوايج خاصنا نحققهم مريض الاكتئاب راه معندوش هدف بصفة نهائية هاد المريض راه ديما فحياتو عندو 2% بحال تليفون ديما كيحس براسو غيتطفى دغيا وديك 2% كتبقى عايشة معاه طوال فترة مرضية ديالو. وبهادشي كيزيد يمرض وافكار انتحارية كتزيد عندو يوم بعد يوم

شاف فيه جهاد بصدمة : كانت كتجيني غير بحالا كتزيد فيه مكنتش عارف هادشي واصل حتا لهاد الدرجة

الطبيب : الخطورة د هاد المرض امسيو جهاد اغلب الناس مكيعرفوها حتا كيفوت الفوت

والزوجة ديالك راها بحالا كانت ماشا فالبحر هيا كتزيد تمشي وهيا كتزيد تغرق هيا كتزيد وهيا كتزيد تغرق
حتا غرقات وتغلغلات فهمتي؟

الحالة نفسية ديالها اخطر مما كتصور هيا كتشوف العالم بلون رمادي يعني دنيا كحلة فوجهها كيف كنقولو

اكتئاب كيخليها تحس بالعزلة بحالا بوحدها فهاد الدنيا وممعاها حد
كتعيش حالة استسلام كامل كتشد فوجها كل ابواب الأمل

اي حاجة كدوز دابا فحياتها كتكون ليها مصدر للقلق

الصداقة. الحب. السفر. والخدمة . الحياة بصفة عامة

كتشوفها جانب المظلم فحيااتها . وحتا الناس لي محيطة بيها مثلا نتا

هيا كتعيش صدمة مور صدمة ودابا حتا الا شافت الام ديالها وهيا فهاد الضروف مريضة غتزاد عليها صدمة خرا . ف من احسن تبقى بعيدة عليها فهاد الفترة

ونزيدك راها معرضة فاي لحضة لسكتة قلبية او جلطة دماغية او انتحار

راه اغلب الواليدين جاو لعندي وكانو ولادهم ديما سادين عليهم وديماا ساكتين يحساب ليهم ان ولادهم عايشين عادي. ولكن حتا تصدمو ان ولادهم
ماتو بجلطة دماغية او شربو عقاقير سامة ونتاحرو من سرجم وكاين لي شنق راسو فغرفة نوم ديالو او فحمام. وهادشي لي كنعاود ليك ناس جاو عندي عاشوه..

شاف فيه جهاد بصدمة ملقى ميزيد
الطبيب : فهمتيني؟
جهاد : وي

الطبيب : هاد المرض ممعاهش اللعب واصعب حاجة هوا الكتمان انسان لي مكيخرجش داكشي لي فقلبو بحال الزوجة ديالك ولكن دابا الكاس عمر مبقا عندو فين يزيد داكشي علاش وصلات لهاد المرحلة

حط يديه على راسو مكانش متوقع غيسمع هادشي
تنهد ممتيقش
جهاد : وشنو المعمول دابا

الطبيب : غتاخد دواء بانتظام وحصص علاج النفسي و الرياضة . وخاصك تراقبها فهاد الفترة بزاف

وقف جهاد : اوك دكتور
(مد يديه ) مغسي بوكو دكتور
الطبيب : اڤيك بليزيغ موحبا مسيو جهاد
خرج لقاها جالسة فبلاصتها كتشوف فالناس ساهية


طلعات حداه فالطوموبيل، شاف فيها بالآسى وقال

يلاه نبدلو الجو شوية فين تبغي تمشي ؟
شافت فيه وحركات راسها بالنفي : مبغيتش نخرج بغيت نرجع غير لدار .

جهاد : غير شوية احبيبة نجلسو فشي كافي ومن بعد الا بغيتي نرجعو لدار؟

نريمان : واخاا
حطات راسها على باب طوموبيل ساهية فالزاج..

دخلو لمقهى طلعو لطابق الثاني جلسو فالطبلة لي كطل على البحر .
حط يديه على يديها الباردين كيدفي فيهم
جهاد : مال زين ديالي ساكت؟ همم ؟ غضبانة علياا؟

حركات راسها بالنفي وهيا كتشوف فالبحر بقات على نفسية الوضعية،،
مبغاش يضغط عليها خلاها على خاطرها ..
الصمت كان هوا سيد موقف كاع الاحاسيس تخلطو عليه معرفش شنو يقدر يدير،،،
مهزاتش كاسها المحطوط حداها ولا شافت حتا فالطبلة اش محطوط فيها..
شافت فيه بتعب : جهاد ديني لدار بغيت نعس..
جهاد : واخاا يلاه..
رجعها طلعات لبيتها دخلات ففراشها مكرهاتش متخرجش منو..
جلس جهاد فالجردة وعباس كيشوف فيه بنص عين مزعمش يسولو شنو كاين..
بعد تردد قرب لعندو سولو وبدا كيعاود ليه جهاد..

جلس حداه عباس وقال : مزيان تبعو ليها مع طبيب نفسي، وانا نعطيك علاج اخر غيفيدها مزيان وبزاف دناس عطاهم نتيجة

هز فيه جهاد راسو وقال : وشنو هوا هاد العلاج؟
عباس : علاج بالقرآن كاين واحد شيخ مشهور بزاف هوا هنا نيت ساكن فالرباط وكنسمعو كيكون حتا فراديو كيجي نهار الجمعة وبزاف دناس كيجيو عندو دير اولدي السبب والكمال لله

جهاد : واخا وعندك نمرتو؟ ولا كتعرفو
عباس : اليوم نجيبلك نمرتو غا كون هاني.

جهاد : تنهد ) عباس مراتك شنو كدير؟
عباس : خدامة فسبيطار قابلة
جهاد : ومكتعرفش شي حد فعائلة باغي يخدم شي مرا ولا شي بنت
عباس : فاش يخدم؟
جهاد : ميناج هنا ديال الدار ومنها ترد البال حتا لمراتي ملي نخرج انا
عباس : وكون هاني من هاد الناحية. انا غنقول لبنتي تجي راها غا جالسة فدار هيا تجي لهنا

جهاد : ايوا صافي مزيانة ليك ولينا فقاش تجيبها؟
عباس : من غدا الا بغيتي
جهاد : شحال فعمرها؟
عباس : 26 عام
جهاد : صافي غدا جيبها معاك. انا اليوم عندي بزاف دالخدمة هنا وخاصني نمشي لكازا وهكاك مغاديش هانتا كتشوف ضروري خاصني نبقى معاها

عباس : دابا اولدي يجازيك الله نتا واقف مع مراتك وربي غيوقف معاك قلالو ولاد ناس بحالك.
جهاد : يلاه سير تغدا نتا دابا وديك ساعة رجع
عباس : واخا اولدي ايوا الله يفرج عليكم..
خلاه جالس تما ومشا بحالو..
ناض طلع عندها لقاها شادة عينيها ماهيا ناعسة ماهيا فايقة

تحنى لعندها وقال : نوجد احبيبة ديالي شي حاجة ؟

حلات عينيها وهيا كتحرك راسها بالنفي : لا بغيت غا نعس ومقدراش نعس
جهاد : شربتي دواء لي خرج ليك الطبيب؟
نريمان : لا مزال
جهاد : ايوا هانتي شفتي راه خصك تشربي دواك باش تقدري تنعسي ..
حل القرعة كب ليها الما وعطاها كينة شرباتها ورجعات تكات..

بقا كيدوز يدو على وجهها وعلى راسها لي ملوية عليه شال. تحل عينيها وترجع تسدهم بعياء. بقات هكاك حتا نعسات..
داز الوقت تقيل عند جهاد وهوا غير جالس مقابل تلفازة اولا بيسي..
يهبط لتحت ويرجع يطلع الفوق وجد عشاء لاصوب دالخضر مع كفتة مشوية وصلاد عادية. حطهم على الطبلة وطلع لعندها لقاها فايقة.
جهاد : كبيدة ديالي ( باسها على راسها) نوضي احبيبة نتعشاو اتا وياك
نريمان : مخصنيش
جهاد : نو غتنوضي وغنتعشاااو انا وياك ومتقوليش ليااا لا مخصنيش ضروري تنوضي

نريمان : بصوت تقيل ) والله مافياا الجوع غير هبط تعشى انا مبغيتش دابا

جهاد : الا مغاديش تاكلي معايا حتا اناا مغاديش ناكلو وغنلوحو. انا بغيتك تونسيني يلاه نوضي عفااك
شدها من يديها حتا وقفات دخل معاها الحمام غسلات وجهها. وهبطها لتحت.
جلسو حدا بعضياتهم فالكراساا..
جهاد : يلاه كولي
هزت معلقة كضورها فلاصوب وهوا مراقبها.
شربات معلقة اللولة ثانية وتوخرات براسها اللور..

نريمان : مكنحسش براسي حتا شنو كناكل غير خليني اجهاد عفاك نعس
ناضت من على كرسي طلعات بحالها شربات الدواء وتكات فبلاصتها كتبكي باغا غير ايمتا يوصل الوقت لي تخرج منو من هاد الحالة وتهنى..

صباح الحال ، دخل عباس هوا وبنتو لابسة جلابة عادية حمرا شال فوق راسهاا حمر وصباط كحل وصاك صغير فيديهاا.
كان جهاد فالجردة هاز فنجان ديالو دالقهوة كيتمشى وكيشرب. شافهم دخلو واتاجهو جهتو..

عباس : صباح الخير سي جهاد
جهاد : صباح الخير صبحتو
عباس : الحمد الله هادي هيا بنتي غا قوليها شنو دير وديرو..

جهاد : واخا اجي معايا
دخلات موراه مع باها وراها الكوزينة وبلايص لي غادي تنضف عطاها المهمة لي خاصها تقوم بيها.
طلع لعند نريمان لقاها ناعسة.
باسها فجبينها وهز لافيست ديالو.
دخل عند بنت عباس لكوزينة وقال : قال باك شنو كاين ياك؟ على مشكيل د مراتي
البنت : اه قالي
جهاد : اوك راها ناعسة الفوق ردي البال عفاك معاها ويلا فاقت عطيها تفطر وعطيها دوااها صافي ؟
البنت : اه واخا كون هاني
حرك راسو بالايجاب وخرج مشا الخدمة..


سمعات تليفون كيصوني حلات عينيها بصعوبة حاسة بعضامها مفصلين عليها. هزات تليفون لقات نمرة د جهاد..

نريمان : بصوت نعسان ) الو
جهاد : حبيبة مزال ناعسة؟
نريمان : اه فقت قبيلة ورجعت نعست
جهاد : كيف صبحات غزالة ديالي شوية؟

نريمان : الحمد الله
جهاد : المهم انا فالخدمة راه بنت عباس فدار جات الصباح هبطي احبيبة فطري وشربي دواك باش ملي نجي نخرجو اوك ؟

نريمان : انا غنوض دابا
جهاد : اوك يلاه نخليك تهلاي فراسك.
قطعات المكالمة شافت فالساعة لقات وحدة د نهار..
ناضت بصداع فالراس دخلات الحمام جلسات فالبانيو طالقة الماء سخون كترخي عضامها فيه.
بدلات حوايجها شربات الدواء ورجعات لبلاصتها مخرجاتش منها حتا سمعات الدقان فالباب.

ناضت كتمشى بزز. حلات الباب ابتسمات البنت فوجهها وقالت : سلام اختي انا بنت عباس اجي تهبطي تغداي انا وجدت الغدا

نريمان : لا مخصنيش غير هبطي

البنت : قالي راجلك ضروري تهبطي تاكلي وتشربي الدواء راه عاد صونى على با

نريمان : واختي انا مخصنيش ناكل دواء هانا غنشربو صافي هبطي خليني غنعس.
شدات الباب ورجعات لبلاصتها. حتا رجع جهاد فالليل بزز هبطها تعشات هيا وياه كانت بنت العباس مشات بحالها..
كلات بزز وناضت رجعات لبيتها.
هضر جهاد مع عباس عطاه نمرة دالشيخ لي قاليه.
اتصل بيه خدا معاه موعد وفاليوم موالي كان عندها حصة مع طبيب نفسي. وفعشية داها جهاد لعند داك الشيخ..

جلس جهاد كيف عادة بعيد عليهم وكيسمع الحوار لي كيضور بيناتهم. كان شيخ راجل كبير لحيتو الطويلة بيضاء وجه ديالو منور.. استقبلهم فالبيت ديالو وبدا الحوار ديالو مع نريمان..

كان حوار طويل خلا نريمان ترتاح وتصنت ليه بكل جوارحها من اول حصة خلاها مشوقة وكتسنى غير ايمتا تجي الحصة لي جاية باش تكمل معاه،

داز شهر وهيا متبعة مع طبيب نفسي ومع الشيخ..
ديما فدار وغير سادة عليها فالبيت وناعسة كترفض الخروج او الهضرة حتا من تليفون ديما غير محطوط مكتهضر مع حد..

معندها الرغبة فحتا حاجة لا فالهضرة ولا الماكلة ولا تشوف الضوء ديما مغطية راسها وكتفضل العزلة..

علاقتها بجهاد بدات كتنقص الهضرة رجعات قليلة بيناتهم ، مكيخرجوش من غير الحصص لي كتمشي ليهم وترجع لبيتها،

وحتا هوا مبقاش كيعمر بزاف ديما فالخدمة وبعد المرات حتا فليل مكيجيش ،، فصباح كتنوض كتلقى غير بلاصتو خاوية

داز الشهر ثاني بدات حالتها كتحسن شوية كتخرج من بيتها وتجلس فالجردة.
اولا كتخرج تمشى بوحدها وعباس كيتبعهاا حتا كترجع لدار..
جالسة حاطة راسها على راسها ساهية كتخمم دخل جهاد وبلاما تحس بيه بقات ساهية حتا سمعاتو كيعاود الهضرة

جهاد : واش كتسمعيني؟
نريمان : هاااا شنو قلتي؟

تنهد بعصبية : والو مقلت حتا حاجة
خلاها وطلع لبيتو بعد دقائق رجع هبط ، شافتو مشا الكوزينة وناضت لعندو
نريمان : تعطلتي 12 دابا وانا خفت بوحدي علاش رجعتي كتعطل ومكتجيش؟

قال بلاما يشوف فيها : مكنساليش
نريمان : واش الخدمة؟
جهاد : الصمت

مجوبهاش خلاتو وطلعات بحالها لبيت تعشى وبقا كيتفرج حتا وصلات 3 دليل عاد طلع لبيتو تخشى فبلاصتو وعطاها بالضهر كانت مزال فايقة ..
ضارت لعندو حطات يديها على ضهرو وخشاتها تحت باطو قربات عندو حتا بدات انفاسها كتضرب فضهرو..
سرط ريقو وبقا على نفس الوضعية متحركش شافها زادت قلبات وعنقاتو من كرشو حس بتبوريشة طالعة معاه استسلم ليها وضار لعندها بكل حب..


ضار لعندها بكل حب دوز يدو مع الجسم ديالها شدها من خصرها ضوء خافت وجو هادئ.. كيشوف فعينيها بحب وشوق مقدرش بتمالك نفسو محسش براسو حتا قرب لشفايفها كيقبل بيهم. بعد لحضة حس بيها كتجاوب معاه. واخا الجسم ديالها كيطلع وينزل والخوف مسيطر عليها من الداخل ديالها باغي تكمل هاد العلاقة باش ترضيه وترجع المياه لمجاريها ومن جهة خرا الخوف مسيطر عليها. انسجمات معاه فالاول واستسلمات ليه كليا ولكن فاش بغا يقوم بعملية ايلاج مقدراتش وجمعات رجليها ولكن بركات على راسها ومعرضااتوش واخا فالداخل ديالها مزيرة حاسة ب اعضاء مهبل مشدودين الشيئ لي خلاها توجع بزاااف طيلة الممارسة مقدرش يحبس راسو حتا وصل لمبتغاه وسخفات ليه بين يديه.. طاح جنبها كينهج جرها لعندو عنقها .. كيبوس ليها فجبهتها وارجاء وجهها..

صباح الحال لابسة بيجامة قطنية واقفة حدا المراية خدودها موردة هازة سيشوار كتنشف فشعرهاا...
خرج من الدوش وقرب لعندها
وقف مور ضهرها شادها فكرشها

نريمان : لبس حوايجك هاهوا غيضربك البرد
شافيها فالمرايا : همم خفتي علياا؟
ضارت عندو كتشوف فيه وفصدرو العاري : جلس نشف ليك شعرك
جهاد : هه هيا اللولة
جلس على كرسي ملوي غا الفوطة ومطريال كيبان تحت الفوطة بالخصوص ملي كيحرك رجليه..
شتتات النضر كتنشف ليه شعرو شدها من خصرها وجلسها عليه

جهاد : كيف بقات الحبيبة ديالي؟
نريمان : بدلع ) مزيانة
جهاد : باش حسيتي لبارح؟
نريمان : بخجل) باش؟
جهاد : امم وباش فنضرك. ( غمزها )
نريمان : بتوتر ) مم.. م. مزال مااا كنقدرش نتا عارف شنو كيطرالي

جهاد : وي عارف ومع الوقت هادشي مغاديش يبقى ، هانا كنشوف صحتك بدات كتحس وكترجعي حسن من لي كنتي

نريمان : اه الحمد الله ونوض لبس حوايجك
ناضت من عليه بغا يشدها وهيا تهرب ليه
جهاد : واااخا عليك واخا هانا كنجمع ليك

ضحكات وقالت : واخا زيد جمع هه
جهاد : ياااك واخا وعنداك تبداي ترغبي وطلبي فيااا هاهيا ياك حكمتي على راسك.

نريمان : اااه غير سير تبدل هه

دخل لدريسينغ وهوا مزال كيهضر وهيا كتنشف شعرها. لبسات مونطو وسروال دجين وحنات كتلبس صبادري ديالها.
خرجو طلعو فالطوموبيل وهوما كيقشبو مع بعضياتهم...
دوزات الحصة من الطبيب نفسي ورجعو بحالهم..
وقف طوموبيل وشاف فيها

جهاد : انا غنمشي الخدمة دابا . ونتي ديري شي حاجة تلاهاي فشي حاجة متبقايش غير جالسة كتخممي سمعتي شنو قال ليك ياك..
نريمان : اه واخا صافي
جهاد : يلاه طلعي بحالك..
شافت فيه بغات تقوليه شي حاجة ومقدراتش.
بقاات ساكتة شاف فيها بتساؤل

جهاد : بغيتي تقوليلي شي حاجة
نريمان : لا صافي يلاه بسلامة عليك.
قرب عندها باسها من خدها.
خرجات من طوموبيل. ودخلات لداخل لقات بنت عباس فالكوزينة كطيب الغدا طالقة موسيقى
دخلات عندها جلسات على كرسي
نريمان : هه ناشطة مع راسك
البنت : وييه اختي صراحة مكنرتاح غا هنا والله. فدارنا واحد خويا لا خدمة لا ردمة كيقيل مقابل غا تلفازة يحرق عليك متطلقي موسيقى ما تفرجي فيلم متخرجي كنت انا وياه كنقيلو نتقاتلو
نريمان : سبق ليك تزوجتي؟
البنت : لا اختي دواو فياا عائلة ومكتابش
نريمان : ايوا كل واحد وشنو ربي مكتب ليه فرزقو. نتوما عندكم داركم ياك؟
البنت : لا غير كاريين
نريمان : امم ايوا ربي كبير دابا يرزقكم من عندو شنو مطيبة لغدا
البنت : طاجين دالحوب لي قلت ليك لبارح
نريمان : اااه ايوا الله يعطيك الصحة. عرفتي انا طبيب قالي ضروري تبقاي ديري شي حاجة فدار وعييت منخمم ومعرفتش

البنت : ربي حمام ههه
نريمان : اويلي هه لا يهربولي..
بقات كتخمم شوية وهيا تقول : عرفتي شنو غنولي نغرس محابق والورد وداكشي شنو قلتي؟
البنت : اهاه حتا هادي فكرة مزيانة والله انا معاك فيها
نريمان : حتا يجي جهاد ونقولهالو وديك ساعة نقولو يبقى يخليني نخرج انا وياك
البنت : اه قوليها ليه ونبقاو نخرجو انا وياك..
بقات مجمعة مع البنت تغداو بجوج بيهم.
وبقاو مجمعين كيتفرجو .. شدات تليفون ديالها ودخلات الانستغرام لي من مدة طويلة مدخلات ليه لا هوا ولا فيس لي لقات فيهم عرام دالميساجات. دخلات تقرا لقات كاع ناس لي كتعرف مصيفطين ليها وكيطلبو ليها نمرة. مجوباتهمش وفضلات حتا تهضر مع جهاد عاد تعطيها ليهم..

بقات كتخمم فالموضوع لي غتقول لجهاد ومترددة واش غيوافق ولا لا.. واش هاد قرار لي هيا خدات مزيان ولا لا.
فالليل وبعدما دخل وجلسو يتعشاو كتبغي تهضر وترجع تسكت حس بيها. وقال بجدية : قولي انريمان داكشي لي باغل تقولي راني حاس بيك ومتقوليش ليا مكاين والو..

بعد تردد وهوا كيراقب ملامح وجهها قالت : اا.. جهاد بغيت... نن.. بغيت اجهاد نشوف ماما غير مرة وحدة ... غير نعرفها وصافي! شنو قلتي؟


هز حاجبو مصدوم من هضرتها : واش من نيتك كتهضري؟؟
واش غنعاودو نرجعو لنقطة الصفر..
نريمان : بخوف ) علاش؟

تنهد دوز يديه على وجهو وقال : ديك المرأة مغاديش تشوفيها وماشي وقتو باش تشوفيها ، نتي دابا خاصك تبعدي على اي حاجة غادي تزيد تمرضك وتزيد تكمل عليك واش مشفتيش الحالة لي وصلتي ليها؟؟

سكتات حاذرة راسها الأرض..
سكت كيسوط بعصبية
هزات عينيها شافت فيه وقالت : انا بغيت نشوفها اجهاد غير مرة وحدة نعرفها شكون هيا ونعرف علاش خلاتني وفين كانت وصافي عفاك

جهاد : راه مغاديش تقدري تشوفيها فهميني حالتك نفسية فهاد الفترة صعيبة بزاف،، اوك من بعد ملي ترتاحي الا بغيتي ديك ساعة شوفيها..

نريمان : بخوف ) بغيت نشوفها دابا راه مستاعدة نشوفها ومتخاافش مغيطرالي والو والله

شاف فيها مطولا عاقد حجبانوو.. حرك راسو بالايجاب ورجع كيكمل مكلتو،
سكات معوداتش هضرات خوفا منو يغوت عليها اولا يرفض متشوفهاش..
وحتا هوا سكت كمل ماكلتو وطلع لبيتو خلاها بوحدها التحت جمعات الطبلة هزات تليفونها وجلسات فصالة كتخمم طالعة هابطة فالانستغرام بلاما تجاوب على مسجات لي كيجيوها ،،
داز الوقت وطلعات لبيت كان مزال فايق دخلات لبلاصتها وسقرات حتا داها نعاس.
صباح ناضت لقات غير بلاصتو.. توضات وصلات وهبطات عند البنت لقاتها كتسيق. مشات الكوزينة فطرات ورجعات كتعاونها تسيق معاها وتمسح. حتا كملو
نريمان : الله عيت شحال هادي مدرت شغل كنحس براسي تقاليت بزاف
البنت : انا ياختي ديما عندي الشقة ليل ونهار ولفت هه
نريمان : حتا اناا دوزتو ورجع علياا بالعياء ها كاس قدامي ومكنقدرش نهزو..

تفكرات الغرس وهيا تقول : ااااه نسيت مقلتش لجهاد نخرجو على ود نشريو داك الغرس لي قلت ليك. واش هبط فطر ؟

البنت : انا ملي جيت لقيتو مع با فالجردة ولقيتو دار قهوة راسو
نريمان : امم صبري انصوني عليه نقوليه نخرجو

هزات تليفونها طلعات نمرتو صونات عليه..
نريمان : الو جهاد
جهاد : وي حبيبة صافا؟
نريمان : الحمد الله فينك خدام ؟.
جهاد : وي راني فكازا غدا عندنا واحد المهرجان وراني خدام دابا

نريمان : اه واخا الله يعاونك.
جهاد بغيت نخرج انا سميرة

جهاد : شناهواا فين غتمشيو؟؟
نريمان : بغيت غا نشري الورد والغرس نغرسو هنا فالجردة باش نتلاهاا شوية وصافي

جهاد : اوك واخا ملي تكوني خارجة صوني عليا ابيل فيديو

نريمان : باستغراب ) واخا صافي

جهاد : المجر فيه الفلوس الا كنتي غتاخدي شي حاجة كود 79307 اوك
نريمان : صافي واخا يلاه بلاتي ونصوني عليك

قطعات : شافت فسميرة ) يلاه لبسي حوايجك انا نطلع لبس حوايجي ونخرجو
سميرة : انا غنلس غا جلابتي دابا نكون واجدة..

طلعات لبيتها لبسات تريكو شتوي فالزيتي واصل تحت خصرها مع مونطو كحل وسروال دجين شال كحل منقط بالزيتي وصبادري كحلة. صاك محرفة بيها دارت غير كريم مرطب
مشات المجر دارت الكود كانت الفلوس مستفة تما فجيهة واوراق ديالو الشخصية فجنب اخر..
جبدات 300 درهم وهبطات لعند سميرة لقاتها واقفة فالباب كتسناها.
شدو الباب وخرجو.
دارت ليزيكوتور فوذنيها وصونات عليه ابيل فيديو جوبها فالبلاصة ببتسامة خافتة .
داير السنتيم على عنقو وستيلو فوق وذنو وناس حداه كتمشي وتجي
مهضراتش وحتا هوا مهضرش حط تليفون موقفو على بيرو كيشوف فيها وخدام وهيا غادة فالطريق وشادة تليفون فيديها..

شار بيديه توريه شكون حداها ضورات كاميرة شوية بانت ليه سميرة حرك راسو وكمل فصالتو. دراري حداه شي واقف شي كيسولو وهيا كتشوف فيه مشغول وكيهضر ويشرح مع دراري..

خرجو لشارع رئيسي ..
شدو طاكسي لسوق وهيا مزال شادة تليفون فيديها..
مرة مرة يهز عينيه يشوفها ويرجع يكمل خدمتو..
حتا وصلو السوق والزحام والغوات قربات عندها سميرة وقالت : حيدي تليفون راه يقدر يسرقو ليك شي شفار ..
خافت نريمان وهيا تشوف فتليفون قربات ليزيكوتور لفمها وعيطات ليه
نريمان : جهاد؟
هز عينيه فيها : وي
نريمان : خاصني نقطع بلاتي نصوني عليك..
مسمعاتوش شنو قال من قوة الصداع قطعات وخبات التليفون فصاك..
دخلو مشاو كيقلبو على جهة لي فيها الغرس وقفو على عيلات كيبيعو نقيلات وزريعة. بدات كتسولها نريمان هادي شنو هيا وشنو كدير وهادي شنو كتعطي واش فيها ريحة زوينة.
خدات بزاف ديال زريعات وديال نقلات د الغرس. شرات من عندهم حتا تراب هزاتو هيا وسميرة وداوه حتا لطاكسي خداو حتا محابق فين يغرسو طلعات اللور عاد جبدات تليفون لقاتو مصوني عليها ما مرة ما جوج.. عودات صونات عليه وهوا يغوت عليها
جهاد : علاش قطعتي؟؟
نريمان : راه ديك البلاصة خفت يسرقولي فيها تليفون
سكت وخلا الخط محلول. بقاو هكاك حتا وصلات لدار عاد قطع المكالمة..

حسات براسها محمسة.. بدلات حوايجها بالزربة وهبطات خرجات لجردة .
، سميرة كطيب الغدا وهيا كتحفر بمسحة صغير ( آدات الحفر ) فجنات الجردة الصغيرة لي فوسطها لابيسين مربع.. كتغرس وتسقي وتمشي المحابق دير فيهم حتا هوما التراب ودير فيهم الزريعة وتسقي. تغداو هيا وسميرة ورجعات خرجات تكمل. عجبها الحال وحسات براحة.. حتا طاح الضلام صونى عليها جهاد ابيل فيديو

وهوا مزال فالخدمة.. جالسة فصالة بوحدها
جهاد : سميرة مشات؟
نريمان : لا عاد غيديها باها
جهاد : انا هاد الليلة مغاديش نجي هانتي كتشوفي مزالين خدامين والوقت ضيق عندناا غير هاد الليلة وغدا للمعرض راه مغاديش نقدر نجي حتا لغدا . انا غنصوني على عباس تبقى بنتو معاك مونساك بيدماا نرجع..
نريمان : واخا صافي
قطع المكالمة .. وعاود رجع صونا عليها ابيل فيديو ..

جهاد : انا هضرت معاه راه غتبقة معاك
نريمان : واخا ونتا شنو كدير دابا..
هز ليها توب كيكرش فيه : كنصاوب هادا باش نعطيه لولد يخيطو هادشي جانا مزروب اول مرة توقعلي

نريمان : نجي نعاونك ؟

غمزها ) مكرهتش

بقات شادة تليفون كتهضر معاه وهوا خدام حتا قطع مكالمة..
وسميرة جالسة قبالتها كتفرج..
دوزات ليلتها مملة حتا نعاس مبغاش يجيها.. شربات دواها وبقات كتحاول تنعس حتا قرب الفجر يوذن عاد غفات صباح صبح كيصوني عليها جهاد. علمها تمشي الحصة مع طبيب النفسي. مشات معاها سميرة دوزات الحصة ديالها. ورجعات لدار كتكمل على الغرس تقادو وتسقيه.
فالعشية طلبات من جهاد يخليها تخرج، بزز باش خلاها بشرط تبقى دايرة ابيل فيديو وداكشي لي كان خرجاتها سميرة كيتسراو فسونطر ڤيل جلسو فكافي مطولوش فيه ورجعو لدار..
الجو مبرد هادئ فصل الربيع دخل..
جالسة نريمان فالجردة هيا سميرة شادة تليفون فيديها كتشوف فالمسجات لي جاوها..

كتجاوب عليهم من عند ابتسام لي بغات تشوفها وبغات تجي عندها لدار. وحتا من جنات لي رجعات المغرب وبغات يطلقاو هيا وياها..

هناء لي كتصيفط ليها عرام د مساجات دخلات قراتهم ومجوبتهاش. وجوبات جونة بقاو مجمعين هيا وياها اخر اخبار انها خرجات من عند نجود ومبقاتش معاها وطلبات منها تجي عندها المغرب تخدم معاها فالدار ولا دير اي حاجة مهم متبقاش متشردة بلا خدمة وبلا مسكن ،
قررات غير يجي جهاد وتهضر معاه فهاد الموضوع ،

طاح الضلام وزاد برد الجو دخلو بحالهم تعشاو وطلعات لبيتها تنعس بعدما وصلات 12 دليل..

حتا غفات وحسات بشي حد كيبوسها حلات عينيها وهيا تلقااه معنقها كيبوس فيها ابتساماات وناضت عنقاتو بضورها..
نريمان : توحشتك
جهاد : حتا انااا ازين ديالي صافا؟
نريمان : اه الحمد الله وانت؟
جهاد : اوسي حبيبة
تخشا حداها كيوريها تصاور وفيديوات ويعاود ليها كان عيان حال عينيه غا بزز..
جهاد : انعسو دابا وغدا نهضرو
نريمان : واخا تصبح على خير..
نعسات ليه على يدو وهوا معنقها..
صباح الحال، حلات عينيها لقاتو مزال ناعس.. دخلات الحمام غسلات لحمها توضات وخرجات تصلي. ورجعات دخلات حداه فالفراش كدوز يديها على وجهو حل واحد العين وجرها لعندو

نريمان : ونوض انا توحشتك غتبقى غير ناعس؟
جهاد : انا غنوض احبيبة ديالي، شحال فساعة؟
نريمان : دابا 11
شد عينيه ويديه معنقينها وقال ببرود : امم راه ماماك جاية فالطريق هضرت معاها لبارح

ناضت بالزربة جلسات جسمها كيترعد وعينيها كيلمعو مقدراش تحكم فراسها : شش ش نو بصصصصح ؟ ماما جاية؟؟

هز حاجبو شاف فطريقة هضرتها وملامحها لي تغيرو فجأة
جهاد : مالك؟
نريمان : لااا لا.. وو.. ووو ووالووو والو ماماا جاية؟؟؟

جهاد : ويييه جاية شوفي مبغيتش ندم حيت عيطت ليها وقلت ليها اجي شوفي بنتك .. منبغيكش ضعافي حداها منبغيكش تبداي تبكي وتغوتي قلتي مستاعدة وهانتي قدي بيها

حسات براسها مخلوعة ولكن بغات تقوي راسها : لا صافي متخافش

ناض بعصية رمى الغطى وقال : ومتخااافش عوتاتي يجينا شي انهيار عصبي ولا شي موصيبة وقولي متخااافش.
دخل الحمام خلا الباب محلول. ناضت بالزربة كتمشي وتجي تالفة معرفاتش شنو دير تخلطو عليها احاسيس. خرج من حمام كيمسح وجهو. شافت فيه وقال

وفقاش غتوصل واش غتجي لهنا لدار ؟
جهاد : لا غتشوفيها فكافي
حركات راسها بفهم وسكتات..
شاف فالساعة ومشا يبدل حوايجو.. جلسات على طرف دالفراش. تشدات ليها الشهية تلفات افكارها تشوشو.. كتخايل اللقاء كيف غيكون.. واش غتقدر تشوفها وتهضر معاها ولا العكس..

خرج جهاد كيشد فصدايف القميحة بيضاء شاف فيها ساهية وقال : لبسي حوايجك باش نخرجو راه غتكون وصلات لرباط..
حركات راسها وناضت بالزربة مشات تشوف شنو تلبس ، مقدراش تحكم فراسها كترعد كلها كحس باحساس غريب بزاف .. لبسات وخرجات قدام المرايا قدات وجهها شوية وهبطات لعندو لقاتو كيضور فصالة كيشوف فالجردة هاز فنجان د القهوة دفيديه.
نريمان : هانا كملت
جهاد : مغاديش تفطري؟
نريمان : لا مبغيتش وو. وااش وصلات؟
جهاد : غتكون وصلات يلاه نمشيو.
خرجات معاه طلعات فالطوموبيل وخرجو كان الجو بارد وغيام يديها جامدين وصبعانها كيترعدو كتشوف فالطريق وتعاود تشوف فجهاد..

نريمان : بخوف ) جهاد خيفانة "
جهاد : نرجعو لدار؟
نريمان : لاا صافي غير كمل.
وقف حدا كفيتيريا على شارع وبقا كيضور عينيه..
نريمان : بارتباك ) واش هيا هنا؟؟؟؟
جهاد : وي هنا ،
بقا كيضور عينيه كيشوف واش كاينة طوموبيلتها مبانتش ليه. اما نريمان لي شافتها خرجات من كافي كتقول فنفسها هيا هادي ماما وكيبقى قلبها كيضرب بالجهد ..
هز تليفونو صونى عليها جوباتو فالحين..

جهاد : فينك؟
سمية : انا وصلت انا موراك

قطع وشاف فالمرايا لي على برا. ضار لعند نريمان لي عينيها مع ناس لي خارجين من كافي حاسبة ماماها غتخرج من تما..

جهاد : هاهيا وصلات
وقفات طوموبيل بعيدة عليهم وجهاد كيشوف فيها

هبطات عينيها وشداتهم.. حسات بالخوف، والجسم كيترعد عينين مدمعين احساس لا أحد فالدنيا يقدر يتخيلو او يقدر يحس بيه من غيرهااا " قلبها كيضرب ف 100„
شدها وقال : مالك؟ مبغيتيش تشوفيها؟
حلات عينيها ودموع هابطين. حركات راسها : لا بغيت نشوفها

حل الطوموبيل شاف سمية خارجة من طوموبيلتها وجاية جيهتهم، هزات نريمان عينيها ورجعات هبطاتهم دغيا كتبكي
ربع جهاد يديه شاف سمية مشات كتجري لطوموبيل حلاتها وترمات على نريمان بكل قوتها
( مشهد حقيقي 100% ) جراتها برا كتعنق فيها قبل متشوف ملامح وجهها ولا نريمان شافت وجهها البكا معمر عينيها .. حتا هيا تجوبات مع الأم ديالها وعنقاتهاا بكل قوتها هزاتها سمية وبقات كضور بيها وتبوس بعدات عليها شافت فوجهها هزات نريمان عينيها اول مرة فحياتها تشوف وجه ماماها ورجعو تعانقو. ويعاودو يبعدو يشوفو فملامح بعضياتهم ويتعانقو. كاع ناس لي تما دايزين وكيشوفو ومع بالهم غير عائلة كانو بعاد على بعضياتهم وعاد تشاوفو ولكن معلى بالهمش بلي بنت عاد كتشوف امها لي ولداتها لأول مرة..

بقات معنقاها لمدة طويلة وكدوز يديها على ضهرها بحنان .
ضور جهاد راسو شاف بنت سمية واقفة من بعيد كتشوف فيهم وتبكي.
دار ليها اشارة براسو تمشي حتا هيا..
قربات بخطوات مسرعة وترمات على ضهر نريمان معنقاها. ضارت عندها نريمان وتعانقو بجوجهم . كان احساس مخلط بين الحزن والفرح والشوق دسنين طويلة..
رجعات جراتها سمية كتعنق فيها وتبوس شداتها من وجهها بيديها بجوج كتشوف فملامح وجهها والدموعها لي هابطين حاريين : بنتي حبيبة ديالي

اول مرة تسمع كلمة بنتي لي عمرها مسمعاتها وكانت متعطشة تسمعها مع امها..
هبطات راسها بحزن كتبكي كاع المواجع ومآسي تذكراتهم
عنقاتها سمية بجهد وقالت : ابنتي الحبيبة كنت غنحماااااق كنت غندير فراسي شي موصيبة كون مشفتكش بنتي. الله ياربي على راحة الله ياربي وحمدتك وشكرتك رجعتيلي بنتي.
قرب لعندهم جهاد وقال : جلسو لداخل وهضرو متبقاوش هنا

حركات سمية راسها بالايجاب شادة نريمان معنقاها من ضهرها دخلو المقهى وهيا كل مرة تبوس فنريمان وتعاود وتعنق فيها دخلو.
كان جهاد فطبلة بعيد جبد كارو خشاه فمو كيشوف فيهم..

جلسات نريمان فكرسي كتمسح دموعها وسمية قبالتها كتشوف فملامح وجهها وتفاصيلها. كتطلع فيها وتهبط باعجاب . هزات يديها حطاتها على يدين نريمان شداتها بقوة
سمية : تبارك الله على بنتي كتحمق اححح والكية لي فقلبي معالم بيها غير الله
نريمان : الصمت
سمية : كيف دايرة ابنتي لباس عليك؟
نريمان : الصمت
سمية : فرحت ملي قالي راجلك نجي نشوفك كنت قطعت ياسي فمرا شحال توحشتك وشحال قلبت عليك وربي لي عالم..
هزات نريمان عينيها شافت فجهة خرا بلاما تشوف لسمية فوجهها

وقالت : بغيت نعرف علاش خليتيني؟ علاش سمحتي فجوج ولاد وزدتي!! علاش مرجعتيش تقلبي على ولادك؟؟

شافت فيها فمها كيرعد : ولا وقيلة معنكدش الكبدة عليهم؟

شدات سمية عينيها بحزن كتحرك راسها بالنفي : بالعكس ابنتي بالعكس انا راه كنت مشوية عليكم ولكن الضروف لي كنت عايشة فيها ربي لي عالم مكرهتش كن حتا انا جامعة وليداتي وكنشوفهم كيكبرو قبالت عيني ولكن مقدرش ، مقدرتش ابنتي

قطعاتها بحدة : شنو هاد الضروف لي غتخليك تسمحي فيهم؟ هااا؟
سمية : شوفي انريمان راه انا مبغيتش نسمح فيك انا نحمد الله لي مشنقش راسي مع ديك مجحومة د فضيلة وبنتها وباك عرفتي شنو دوزو عليااا؟ راه شفت معاهم الويل ابنتي راه ماشي لخاطري وحتا با الله يرحمو كون تشوفي اش دوز عليا حتا هوا، محسوش بيا ومحنوش فيا. بغيت نهزكم ونرجع لدارنا مبغاش با قالي خلي ليه ولادو واجي بوحدك. وانا ابنتي مقدرت نبقى مع فضيلة مقدرت نرجع لدارنا بلا ولادي. وكيف طلقت جاب ليا با راجل نتزوج بيه مراتو ميتة وعندو الولاد عوتاني شوفني الويل

نريمان : انا كن كنت منك غنهزهم ونغبر منشوف لا با ولا راجل ونربي ولادي بعاد المهم منفرطش فيهم
سمية : غير كتهضري اما كن كنتي فالبلاصتي قسما بالله متصبري دقيقة وحدة. راه كانت عندي 18 عام وكنت كنخاف غا من خيالي مكنتش قادرة نخرج ونهز دراري ونمشي. فكري بعقلك فين غنمشي؟ شكون غيدخلني لدارو بجوج ولاد. شكون غيخدمني وانا معندي لا ديبلوم لا حرفة وحتا قرايا خارجة من خامس ابتدائي مكنعرف والو. وهانا مشيت وخدمت كاع شكون غيهز ليا دراري. راه مغاديش تقدري تحسي بيا وبداكشي لي داز عليا. هادشي لي كدوزي منو نتي حتا انا دزت منو حتا انا عشتو وشفت الويل.

ردات عليها نريمان وهيا كتشوف فيها بحزن : وعلاش ملي تزوجتي مجيتيش تشوفينا ولا على اقل تعتقينا واش فخبارك بعدا ولدك مات ولا

حركات راسها سمية بحزن حطات يديها على وجهها كتبكي كتبغي تهضر ولكن مكتقدرش بقاو بجوج بيهم مسحات دموعها بالزربة : عارفة مات ملي جيت نقلب عليكم قالولي مات وقالولي نتي خرجتي من دار. عرفتي شنو طرالي كتر من 20 يوم وانا فسبيطار مرضت . فين غنقلب عليك وكيف غندير مع الكية دالولد لي مات

نريمان : وعلاش مجيتيش تشوفينا قبل ؟


سمية : انا ملي تزوجت داني اسبانيا وفرحت من واحد الجهة. قلت مزيان ندير وراق ديالي ونطلق منو ونجي نديكم من تما وندير ليكم وراق هاكا درت فبالي ولكن طرا العكس. مدار ليا لا وراق لا والو ومكنعرفش اللغة وديما حابسني فالدار حتا ولدت ختك
شافت نريمان ف اختها لي حتا هيا كتبكي كانت عامرة شوية شعرها بوكلي اشقر لابسة دجين مع تريكو قصير هابط على كتاف وتجاكيط دجين..
قربات لعندها اختها بكرسي ديالها عنقو بعضيااتهم بحب وسمية كتشوف فيهم..
سمية : وتما حسيت براسي نيت حصلت عندي البنت ومزال معنديش لغة قليلة بزاف ومعنديش فين نمشي وكنا ساكنين غا فيلاج خارج على مدينة. عوتاني مور عامين حملت بخوك

نريمان : بشوق ) فين هوا؟

سمية : راه مزال فتطوان حنا رجعنا ساكنين فتطوان.
ملي ولدت خوك رجعت كناكل العصى ويجي سكران ويمشي مع بنات قهرني فصحتي ولكن شنو ندير؟ عوتاني نخلي دراري ونخرج؟ وفين غنمشي فبلاد الناس!!!!

صبرت وصافي ومن تما ما جيت حتا درت وراق ديالي وهكاك مجيتش مخلانيش راه بلاما نعاود ليك الويل لي كنت عيشاه معاه وراه ابنتي ماشي لخاطري ومعالم على حالي غا الله

هوا كان ديما كيهبط المغرب ويطلع وانا مكانش كيخليني وملي كنت كنعاود لواليدين ديالي كانو كيقولو ليا هربي ليه واجي ولكن كيف غندير عندهم هربي واجي ساهلة بالفم.
مرض با ومخلانيش نجي نشوفو ومات ومخلانيش نجي نعزي فيه وناضت المقاتلة بيناتنا وكاين كيخرجني فنص ليل لزنقة ويشد على خوتك كيقولي معندي مندير بيك خليلي غا ولادي وسيري نجي لالاك..
ابنتي راه هزيت فقلبي لي مهزو حد..
مرضات امي ودارت جوج عمليات وكانت وصلات الموت ومخلانيش نجي نشوفهم ايوا هادي 9 سنين

مرض هوا ونضت انا لي نخدم ونقري دراري وحتا مات هادي عامين عاد هبطت المغرب وجاو ولادو خداو كلشي من غير داكشي لي كنت خازنة انا
وهبطت بحالي دابا ساكنة فتطوان وكيف جيت وصلت المغرب نزلنا من الباطو وشديت الطريق من طنجة نيشان الحسيمة
قبل منمشي نشوف حتا امي مشيت لدار باك باش نشوفكم تما تصدمت ملي سمعت خوك مات ونتي خرجتي من دار من تما نيشان هزوني لسبيطار وديك مرات عمك حرام واش بغات تقولي فين نتي حتا هيا تبدلات ومبقاتش كيف كانت كتقولي خلي البنت عليك فالتيقار بحالا نتي ماشي بنتي. كون ما جارة صحبتي القديمة لي شافتي جيت نسول عليك وعطيتها نمرتي تصوني عليا ملي تجي كون مزال مشفتك.

نريمان : وشكون قالك انا هنا فالرباط ؟ وباش عرفتي جهاد

سمية : ربي بغاني نشوفك وبغانا نطلقاو مرات امين قالت ليا عندها انستغرام دجهاد وحاط حتا نمرتو دالخدمة. وهيا لي نفعاتني باش صونيت عليه وصلت ليك

نريمان : الصمت
سمية : سمحيلي ابنتي ربي شاهد مالخاطري اما كون صبت كن هزيتك بسناني ولكن ربي غالب سمحيلي عفاك، وهانا معاك نعوضك على كل ما فاتك. كنواعدك امام الله حتا نعوضك ابنتي نتي غير قوليلي شنو تبغي وانااا نموت معاك عفااك غير سمحيلي.
حطات يديها بجوج على يدين نريمان شاداهم بقوة كترجاها.
جرات نريمان يديها كتشوف فيها بحزن
نريمان : واخا الله يسامح ليك دنيا واخره

وقفات وقالت : تهلاي فراسك بزاف عفاك انا كنت بغيت نشوفك وهانا شفتك وحتا نتي شفتيني ولكن هادي اول مرة واخر مرة نطلقاو بسلامة عليك

وقفات سمية بالزربة شدات فيها من يديها كاع لي فقهوة كيشوفو فيهم
سمية : بخوف ) ماشي حتا قلت لقيتك وتعاودي تمشي ميمكنش انريمان ميمكنش تخليني هاكا. منقدرش نعاود نتفارق معاك

نريمان : وانا منقدرش نشوفك مرة خرا خليني نمشي بحالي

هضرات ختها لي دموع هابطين من عينيها شدات فيديها : عفاك اختي متمشيش بغيناك تبقاي معانا ونعاودو نشوفوك شوفي حالة ماما كيف دايرة غتحماق عليك
شافت فيها نريمان وكلمة اختي كتردد فوذنها ..
نريمان : سمحولي ولكن منقدرش
( شافت فسمية ) تهلاي فراسك ويلا بصح كتهمك مصلاحتي خليني عفاااك ومتعاوديش تسولي عليا
خلاتهم واقفين عقلهم غيخرج ومشات برا خرجات مع باب.. كان جهاد خرج طلع لطوموبيل شافها جاية رمى ڭارو وحل ليها الباب من الداخل. طلعات حداه منهارة بالبكا ترمات عليه كتبكي،


ساط بعصبية وعنقها
جهاد : شششت صافي . ياك نتي لي بغيتي تشوفيها ولا علاش كتبكي دابا

شاف سمية خارجة مع الباب وهوا يديماري الطوموبيل بالزربة وضار زاد مع الطريق

جهاد : وصافي سكتي شنو قلتو؟ باش كتحسي دابا
ناضت من على كتافو كتمسح دموعها وهوا كيشوف فيها ويشوف فالطريق..

نريمان : بصوت متقطع ) حسيت براحة ملي شفتها. ولكن مبغيتش نعاود نشوفها مرة خرا

حرك راسو وقال : هادشي ضروري منو مغاديش تعاودي تشوفيها واخا يكون لي كان

نريمان : فرحت ملي شفتها ولكن معرفتش مكرهتش نزيد نبقى معاها وفنفس الوقت مبغيتش نبقى حسيت باحساس فشكل

جهاد : صافي احبيبة نساي دابا المهم فكري فراسك وصحتك، اوك؟ فكري فعلاقتنا فكري فحياتنا هيا لي خاصنا نفكرو فيها دابا. صافي عيينا من مشاكيل وعيينا من سلبيات والهموم دابا بغينا نخرجو نعطيو وقت لحياتنا نعطيو فرصة تطور علاقتنا اوك حبيبة؟؟

حركات راسها بالايجاب وهوا مشبك يديه مع يديها.
رجعو لدار مشات الحمام غسلات وجهها وجلسات فصالة دايرة يديها على وجهها. بدل حوايجو وهبط لعندها
جهاد : صافا؟ شوية دابا

نريمان : اه الحمد الله
جهاد : ونوضي نفطرو برا سميرة غتخرج لينا الفطور

نريمان : واخا انا نبدل حوايجي ونتبعك..
جهاد : اوك
هز تليفون خرج وهيا طلعات لبسات حوايجها بيجامة قطنية فلون السماء وشال لواتو عشوائي وهبطات لعندو جلسات قبالتو فجو مبرد كيفطروا..

جهاد : مالك ساهية؟
نريمان : لا والو
جهاد : سمعي شغادي نقوليك وهادشي ديريه فبالك وسطري عليه،،
انا ديما كنقوليك حيدي سلبيات من راسك .
مع دابا نتي متبعة مع طبيب نفسي راه غادية فتحسن وهادشي لي بغينا . ( بحدة ) نريمان علاقتنا كترجع باللور ورجعات مملة بزاف وهادشي ماشي فصالحنا كنتمنى متهاونيش بزاف ومتوليش غا كتخمي فالسلبيات والقديم وناسية علاقتنا والهضرة لي نقولها ليك هيا لي خاصها تكون ماشي كنبزز عليك ولا كنحكم فيك ولكن انا عارف مصلاحتك وعارف شنو كيضور فهاد الدنيا اوك؟؟

حركات راسها بالايجاب وهيا كتشوف فالطبلة
جهاد : بغيت من دابا الفوق منشوفش الدموع ومنشوفش وتعاوني مع طبيب نفسي باش تقدري تعالجي وحالتك تصح اوك؟

نريمان : واخا صافي
كلات شوية وهوما ساكتين وناضت مشات لمحابق ديالها طل عليهم وتسقيهم وهوا جالس مراقبها شنو كدير،، دخل بحالو لصالة كيتفرج هوا جالس لداخل وهيا جالسة برا كتخمم فهضرتو..
اتصلات سمية بجهاد قطع عليها وعودات صونات وقطع عليها وصيفطات ليه مسج

سمية : راه معندكش الحق تحرمني من بنتي وتكرها فياا، انا عرفاك نتا ضاغط عليها بزاف ونتا لي كتحرشها باش متشوفنيش ياك؟؟؟ حرام عليك هادشي لي كدير واش مكتحسش بيا وبحالتي كيف دايرة حرام عليك خليني نزيد نشوف بنتي قبل منرجع بحالي لتطوان انا غنتسناك تجاوبني وجاوبني دابا..

وهوا مزال كيقرا مسج صونات عليه وقطعات. دخل لمسج وجاوبها

جهاد : الا مبغاتش تشوفك من حقها واخر مرة تعاودي تصوني علياا واجب راه درتو معاك. اما كون جات عليك عمرك متشوفيها يلاه سيري منعاودش نشوف نمرتك طالعة عندي

صيفط ليها وجوباتو فالحين : وشكون نتا بسلامة باش تمنعني نشوف بنتي؟ راه غتندم وبنتي غنعاود نشوفها بغيتي ولا كرهتي

عقد حجبانو بعصبية وكتب ليها مسج بالزربة : شكون انا؟ اجي نوريك شكون انا الا مزال مكتعرفينيش.. سيري تقودي

بلوكاها من واتساب ومن نمرة وبلوكا تليفون متصوني عليه حتا شي نمرة ممعروفاش..
ورمى تليفون حداه..
وقف قبالت الزاج كيشوف فالنريمان فالجردة كتحفر وترمي بذرة فالجناب بقى ساهي فيها مطولا ورجع لبلاصتو..

جمعاتهم طبلة دالعشاء بعدما مشات سميرة بقاو غير بجوج بيهم كيتعشاو.. حاني راسو كيشوف فطبسيل وقال :.من دابا يومين غتجي ماما وغتجي ريم معاها
نريمان : بصح؟ مرحبا بيهم توحشتهم بزاف
جهاد : حتا هوما المهم انا وصيتك ضحكي وهضري عادي اوك؟

حركات راسها بفهم.. حسات بيه بحالا كيقصى عليها خلاها وخرج جلس فالجردة ناضت حتا هيا طلعات بحالها وقفات حدا باب بيت نعاس ورجعات هبطات خرجات لعندو لقاتو كيكمي غير شافها وهوا يقول

جهاد: دخلي بحالك الجو بارد
قربات لعندو جلسات حداه وحطات راسها على صدرو معنقاه طفى كارو وعنقها حتا هوا
جهاد : يلاه ندخلو بحالنا البرد بزاف
نريمان : لا غير خليني بغيت نبقى هنا
جر غطى لي كان مطوي على فوطوي تغطاو بيه وبقاو جالسين تما بجوجهم ساكتين هزات راسها شافت فيه لقاتو متكي شاد عينيه
نريمان: جهاد
حل عينيه وقال : وي؟
نريمان : واخا ندخل نمرة دصحباتي فالواتساب ؟ كيبغيو يهضرو معايا ومعندهمش نمرتي

جهاد : بحدة ) معندك مديري بصحباات ومعندهم باش ينفعوك مكاين لاش

نريمان : علاش شنو فيها الا هضرت مع بنات علاش مبغيتيش؟ علاش اجهاد كتزير عليا هاكا ؟
سكت مطولا وقال : اوك واخا ولكن منبغيش تخلويض ويلا شي بنت ماشي حتا لتما هانا فين كنوصيك

نريمان : وانا عندي بنات عاديين الا بغيتي نعطيك مسجات قراهم ولا الا هضرت ابيل تكون حدايا

جهاد : اوك صافي

نريمان : وو.. و واحد صحبتي بغات تجي عندي وو.. و.. ولا نطلقاو برا الا مبغيش تجي عندي لدار واخا نشوفها؟ كانت خدامة معايا ملي كنت مع جوديا واخا نشوفها الا بغيتي نتا تكون معايا نشوفها غير شوية وصافي؟؟


حرك راسو بالايجاب
جهاد : واخا

شافت فيه بفرح باستو من حنكو وعنقااتو..
نريمان : جهاد كنحماق عليك

هز حاجبو وقال : شنو؟
نريمان : ههه كنحماق عليك.
تمخشات فيه حاطة راسها على صدرو كتصنت لدقات قلبو

جهاد : امم باينة كتحماقي عليا

نريمان : بتساؤل ) علاش غنكذب عليك؟

قلب عينيه خرج تنهيدة حط راسو على فوطوي وغمض عينيه خلاها كتشوف فيه
وفملامح وجهو لحيتو شعرو عويناتو يديه عنقو سرطات ريقها
وقربات لعندو حطات يديها على كتافتو زيدات شفايفها لجنب شفايفو طبعات قبلة وهزات راسها شافت فيه لقاتو مزال على نفس الوضعية نفسو سخونة كتخرج..
كتشوف عينيه المشدودين بؤبؤ عينك كيتحرك،،
عودات طبعاات قبلة اخرة على فمو هاد مرة طولاتها وتما حل عينيه
هز يديه شدها من شعرها بكل قوتو حتا تأوهات من شدة الوجع

جهاد : كتقلبي علياا تجعريني فهاد الليل هاااا؟؟؟

نريمان : هههه لا لا عفااك بشوية

جهاد : مكاينش احبيبة بشوية

جرها على ركابيه فرق رجليها فوق منو وهوا كيلتاهم فشفايفهاا بشراصة دخل يديه فخصلات شعرها وشدهم بقوة حتا حسات بشعرها غيتقلع من بلاصتو كتسمع غا تأوهاتهم وكتحس غا بالوجع فشفايفها لي غيتقلعو من بلاصتهم ومن توتو ديالها لي ضرها بقوة الاحتكاك وصدرها لي شاد فيه..
حسات بالخوف جاها جهاد ماشي هوا لي كتعرف هادا واحد اخور من قوة شحال جامع ليها

نريمان : جهاد ندخلو بعدا لداخل البرد

هزها بين يديه دخلها لداخل باغا تفلت منو ولكن حاكمها دخل لصالة وجلس فوق الفوطوي وهيا مزال فوق منو كترعد. نتر ليها الحوايج ديالها كلهم بالزربة رماهم فالأرض ..
بعد ساعة
كمل على قبلاتو ليها خلاها كلها مطبعة صدرها عنقها شفايفها خلاها مبقاتش قادرة تزيد كتحس بتحتها طايب رجليها مقدراش توقف بيهم فاشلين اللحم مقطع فيها.
هزها وطلعها لفوق وهوا كينهج العرق هابط عليه
كتحس بدقات قلبو قوية،،

صباح جو مشمس واخا الحال مبرد فصل الربيع ومزال شتاء مرة مرة كتنقط..

كيعض ليها فشفايفها ونيفها وهيا كتخصر سيفتها حساب ليها كتحلم ناضت مخلوعة لقاتو متكي بيديه جيهتها

جهاد : صباح الورد كبيدة ديالي
شافت فراسها لقات مغطية بالمانطة وملابسة والو عاد طلعات معاه الشي لي داز لبارح جرات لغطى لصدرها وقالت : صباح نور
خشا يدو تحت راسها كيشوف فيها بشهوة
جهاد : كيف صبحات غزالة ديالي
نريمان : بدلع ) خليني نعس كلشي كيضرني
جهاد : ههههههه وباقي عندك الوجه لي تهضري بيه؟ وباز
نريمان : علاش مالي شنو درت؟؟

جهاد : لا مدرتي والو غا عايشين انا وياك بحال صاحبي ولا بحال خوت وفينما نقرب ليك تعوجي سيفتك واش من نيتك؟ مراتي وفحلال ومعندها حتا شي عضر ومخلياني!!

نريمان : هئ ومالنا كل نهار غن...

جهاد : لا ماشي كل نهار

نتر داك الغطى رماه من عليها
بعد ساعتين
نريمان : اههننن وصافي خليني نوض
جهاد : لا باش تعاودي تحاسبي معايا
نريمان : وعفاك خليني نوض ندوش راه الصبح والضهر والعصر غتوذن ومزال مصليت

جهاد : الله الله ايمان قوي باز على وجهك هههههه ومقالكش الله ديها فراجلك شوية عطيه حقوو وتهلاي فيه وحني عليه امم راه مسكين كتعذب

ضحكات من طريقتو معاها فالهضرة كيهضر وكيمسكن
نريمان : ودابا خليني نوض ههه

رمى رجلو عليها ويدو جرها لعندو
جهاد : مزال الحال حتا توذن المغرب

حسات براسها مزيرة غتفلت ليها
نريمان : وخاصني نمشي لطواليط خليني نوض
جهاد : اوك
هز عليها رجليها وخشا راسو فالمخدة ضربها بنعسة جرات فوطة لواتها عليها ودخلات بالزربة الطواليط..

داز الوقت جالسة على كرسي قبالت المرايا كتنشف شعرها وهازة تليفون فيديها وكتنوض فيه
نريمان : ونوض اجهاد عفاك
جهاد : قوليلها حتا لغدا قوليلها من بعد
نريمان : ولا هيا دابا راها خرجات الا فيك نعاس انا نشد طاكسي ونمشي نشوفها
هز راسو من على مخدة مخصر سيفتو
جهاد : قلناا ليك انا غنديك مكاينش تخرجي بوحدك

سكتات مغوبشة كتكمل على شعرها لواتو سفنجة شافتو ناض ودخل الحمام قربات لمرايا كتشوف عنقها وصدرها كيف ولا فمها لي تنفخ ..
دخلات لدريسينغ لبسات تريكو قهوي حد الركبة شتوي مع سروال دجين وصبادري بيضاء
رجعات لقاتو كيبدل عليه شافت فيه بنص عين وجلسات حدا المرايا كتلبس ساعتها

جهاد : بزعفة ) فين غتشوفيها؟
نريمان : فديك القهوة لي قلت ليك
جهاد : وزيدي يلاه
ناض هبط وتبعاتو نسات الصاك ورجعات من دروج هزاتو ومشات المرايا تشوف حالتها ورجعات هبطات لعندو لقاتو ديمارا طوموبيل خارج على باب كيهضر مع عباس
جهاد : يلاه هاحنا نتسناوها..
طلعات حداه شافتو كيتسنى
نريمان : شنو كتسنى؟
جهاد : سميرة تبقى معاك

حركات راسها وضورات وجهها كتنهد. حتا طلعات لور عاد خرج..


وقف طوموبيل حدا القهوة وقال : وفين هيا؟

هزات تليفون كتصيفط ليها مسج تسولها .
ضار عندها عاقد حجبانو : غنبقاة نتسناوها هنا ولا شنو؟
نريمان : وصبر راه معرفتش مزال مجوباتني
جهاد : بفففف.
خرج يديه من باب الطوموبيل كيشوف
وهيا كتخطف منو شوفة بنص عين وترجع تشوف فالتليفون شافتها كتكتب
ابتسام : هانا احبيبة وصلت هانا خارجة من طاكسي.

شافت فيه ) هاهيا وصلات قالتلي خارجة من طاكسي.

ضور عينيه كيشوف بانت ليه مرا هابطة من طاكسي شادة ولد فيديها
جهاد : واش هاديك؟
نريمان : بفرح ) اااه هيااا ولاهيلا هيا، انا غنهبط
جهاد : متعطليش دغيا ورجعو
نريمان : صافي واخا.
هبطات وهوا يقول لسميرة : ردي البال عنداك يمشيو لشي بلاصة
سميرة : لا لا كون هاني.
بقا متبع ليها العين شافهم طلقاو وتعانقو بشوق ونريمان كتبوس فالوليد. تبعااتهم سميرة شافهم داخلين لكافي عاد ديمارا ومشاا.

ابتسام : ياااا ختي وشحال توحشتتك نهار كبير هادا لي طلاقينا فييه
نريمان : اه حتا اناا والله توحشتك وتوحشت داك الجو
ابتسام : ايوا مبروك عليك الزواج فرحت ليك شوفي تبارك الله كيف رجعتي غزالة ومسرارة جا مع الزواج

نريمان : بخجل ) حتا انا فرحت ليك ملي تزوجتي وتجمعتي مع ولدك.
ابتسام : ايييه ياختي دازت علينا شنو نشربو بعدا راه عندناا بزاف منعاودو هههه غنشحفو..
دازت جوج ساعات وهوماا كيعاودو شي كيعاود همو لشي. حتا فشو قلبهم
كانت 4 مرة كيصوني فيها جهاد ابيل فيديو .

ابتسام : ياختي مالو كل مرة يصوني بزاف او
نريمان : ديما هاكا فينما مشيت يصوني ويعاود دابا قالي سيري، لدار
ابتسام : لواه حنا عاد زيانت الجلسة ههه وعاد نزيدو نهضرو ونتي غتمشي ايوا قوليلي حاملة ؟
نريمان : بخجل ) لاااا محملاش مزال
ابتسام : همم ايوا خصكي تولدي باش تشدي الراجل الوقت خيابت يا حبيبة طير ليك بيه شي وحدة خصكي ديري دراري

هضرات سميرة فبلاصة نريمان : راه واخا يكونو عندو جوج عيلات و8 دالولاد راه لي عينو زايغة راه زايغة متشديه بوالو

ابتسام : وييه عندك الحق ولكن انا قلت ليها هاكا باش تشد راجلها عندها وملي دير دراري راه مغيبقاش هاكا مزير عليها وزامتها بالعكس غيعطيها حريتها ماشي بحال دابا لي شافك يقول مزال بنيتة وممزوجة ما والو

نريمان : وشنو غندير باش نحمل
ابتسام : كتشربي الكينة؟
نريمان : لاا
ابتسام : اه ومزال محملتي؟ ايوا كاين لي كيتعطل
سكتات نريمان مرداتش عليها

سميرة : هاهيا مزال الحال عاد 20 عام خليها تزيد تمتع وتفرح بشبابها اما دراري كيجيو غا يشيبو

ابتسام : وييه نيت عندك الحق. اجي هاي هاي ناس مشاو لتركيا كاعما وريتيني تصاور العفريتة وتصاور العرس
نريمان : هه هاهوماا انا نرريهم ليك.
دوزو ساعة ونص خرا وهوما جالسين كيتعاودو حتا طاح الضلام.
صونا جهاد لقاها مزال مدخلات مبغاش يسد فمو من قوة الهضرة والغوات.
تودعات هيا وابتسام وشدو طاكسي رجعو لدار.
سميرة : وحتا نتي نسيتي راسك كاع
نريمان : بغضب ) وهانا بقيت فدار شنو غندير كاع غا الجلاس راه طلع لياا فراسي بفف

خلاتها وطلعات لبيتها بدلات ورجعت هبطت جالسة فصالة حتا دخل معصب مهضرهاش طلع نيشان لبيتو..
هزات تليفونها وخرجات جلسات فالجردة كتميساجا مع ابتسام وتعاود ليها وهيا كتبكي على غوات والهضرة لي سمع ليها وزايد داخل معصب. بدات كتواسيها وتقوليها صافي هضري معاه متنخليهش واسيه جمعاتهم طبلة دالعشا بعدما مشات سميرة بحالها ..كلا بالزعفة وناض طلع لبيتو بقات تما بوحدها كتهضر مع ابتسام وجنات كتشكي عليهم زيار ومعاملة قاصية ديالو معاها حتا وصلات 1 دليل عاد طلعات تخشات فبلاصتها وسقرات
صباح سمعات دقات فالباب ناضت لقات غير بلاصتو مشات حلات الباب لقات سميرة
سميرة : صباح الخير . راه عندك حصة اليوم مع طبيب
نريمان : اه نسيت صبحت ناعسة جهاد خرج؟
سميرة : اه خرج بكري يلاه نمشيو باش منتعطلوش.

دازت الحصة وخرجو ،، شافتو مصوناش عليها شافت ف سميرة وقالت : اناا عيت وقنت فدار يلاه نبدلو الجو
سميرة : وقوليهالو بعدا
نريمان : مغادي نقولو والو خليه غا الهضرة راه غيهضر وغيغوت سوا خرجت ولا بقيت

شدات طاكسي مشاو القيساريات كيتسراو فيهم ولي عجباتها كتشريها دازو لمطعم لي تشهاوها كلاوها خلصات .وخرجو كيتمشاو على رجليهم مخلاو فين مشاو حتا طابو رجليهم شدو طاكسي ورجعو لدار يلاه دخلو وهوا يخرج عباس عينو فبنتو بعدما دخلات نريمان
عباس : فين كنتو الضلام غيطيح ونتوما عاد جااين
سميرة : ايوا بغات تخرج تسارا شنو غنقوليها لا انا غا تابعة

عباس : وراجلها لي جاا وجهو حمر معصب ليلة ليلتها كحلة معاه غا الله يحضر السلامة

سميرة : اويلي واش هوا جاا؟
عباس : ايييه راه لداخل..
دخلات ومع دخلة دالباب شافتو جالس فصالة عاقد حجبانو كيشوف فتليفون.


شافتو وهيا تفزع رجعات خطوة اللور
شاف فيها ورجع قلب عينيه
حسات بقلبها غيخرج من بلاصتو بقوة ما كيضرب ميحسابش ليها غيجي بكري وهوا مولف يجي معطل ،،
نريمان : جهاد؟
جهاد : الصمت
نريمان : خرجت شوية انا وسميرة قنت فدار وو قلت نبدل الجو شوية
جهاد : الصمت
نريمان : علاش مكتجاوبنيش ! كنهضر معاك اجهاد
بقى على نفس الوضعية مكيهضرش
نريمان : دابا علاش قاطع معايا الهضرة شنو درت؟ شنو فيها لبارح الا بقيت مع صحبتي مجمعين ونتا مخليتي فياا غا لي نسيتي فاش غلطت انا؟

زير على سنانو كيسوط، مردش عليها
خلاتو وطلعاات بحالها غير كتبكي وتمسح خنايفها خرجات لبالكون طلاات لقات طوموبيلتو مكيناش عرفاتو خرج.
مباتش فدار وحتا لاغدا مجاش حتا طاح الضلام عاد دخلو جوج طوموبيلات سمعات صوت دراري صغار مشات طل شافت مدام اسيا بمونطو ديالها ونضرات سوداء فالعين شادة شعرها بجبادة وخصلاتو هابطين مع وجهها وريم ودراري داخلين شدات فقلبها لي كيضرب دخلات غسلات وجهها وهيا تسمع الباب كيدق مشات تفتح لقات سميرة

سميرة : راه عكوزتك وبنتها جاو
نريمان : صافي هبطي انا جاية..
رجعات مسحات وجهها دارت كريم ديالها كحلات عينيها مع عكر خفيف وبيجامة سخونة غوزية مع بانطوفة ديالها. وهبطات لعندهم لقاتهم جالسين فالصالة الكبيرة شافتها ريم وهيا تنوض بالزربة عنقو بعضياتهم مشافش جهتها جهاد ولا على عينو شيئ لي لاحضاتو آسيا.
قربات لعندها نريمان حنات عليها عنقاتها كتبوس فيها بمعزة كبيرة خلات آسيا غير كتشوف جلسات جنبها
نريمان : خالتي مرحبا بيك على سلامتكم
آسيا : شكرا الله يسلمك نتي لباس؟
نريمان : شوية الحمد الله كيف دايرة ريهام ماجد وليداتهم كلشي مزيان
آسيا : ايواااا الحمد الله. كيف غادية مع حصص ديالك كتحسي بتحسن ؟
نريمان : اه مزيان شوية على لي كنت
آسيا : امم وحيدي هاد شال على راسك زعمة راك فدار

شافت فجهاد بتوتر شاف فيها وقلب عينيه
نريمان : ااا لا عادي ولفت دابا نحيدو
آسيا : بفف ايوا شلا مولفتي خانقة راسك بيه بزاف على هادشي
جهاد : صافي اماما قلبي الموضوع بغات تغطي راسها خليها

ريم : ايوا كيف دايرين ولفتي انريمان كيف داير معاك جهاد ههه
شافت فيه مدهاش فيها : مزيان الحمد الله
جهاد : اجي عند حبيبو اجي احييي..
هز ولد ريم بين يديه وناض خرج برا
آسيا : بتساؤل ) حاملة؟
نريمان : لا مزال
آسيا : ايوا وشنو كتسناي؟ مكتشوفيهش كيف كيحماق على وليدات وشحال ونتوما مزوجين زعمة
نريمان : الصمت
آسيا : مخبية شي حاجة؟
نريمان : هاااا؟ لا مكااين والو
آسيا : امم ومالك خانقة راسك بشال حيديه
ريم : ماما خليها عليك اويلي هههه
آسيا : والعجب انوض نشوف جهاد خليكم مجمعين
خرجات بطالونها كتقرقب جلسات حداها ريم كتموت بالضحك
ريم : صبري مع ماما راها هاكا دايرة عزيز عليها تبقشيش هههه
نريمان : ههه لا عادي نتي بخير عاوديلي شخبارك
ريم : نتي لي خاصك تعاوديلي، كيف دايرة وشنو جديدكم؟

تنصص الليل وهوما مجمعين وسميرة معاهم كتصخر وتحط ليهم ونريمان كتعاونها هيا وريم والوليدات كيلعبو حدا لابسين
تعشاو وآسيا حاضية تصرفات جهاد مع نريمان لي مكيهزش فيها عينيه
دوزو ليلتهم شي مكيهضر مع شي بجوجهم قالبين ضهرهم

صباح بعدما فطرو وخرج مشا لخدمة شافت فيها آسيا وقالت : شنو طاري بيناتكم؟ علاش مكتهضروش!!
نريمان : هاا؟ لا كنهضرو
آسيا : غتوريني انا فولدي؟ قلت ليك طارية بيناتكم شي حاجة شنو كاين؟؟

سكتات للحضة وقالت : معرفتش مالو ديما معصب ومباغينيش نخرج . ويلا خرجت يبدا يصوني عليا ابيل فيديو كيخليني نحس براسي بحالا منعرف شنو غندير كيشك فيا وانا ديما غا الدار تقهرت وعييت كنبغي نبدل الجو ولا نخرج بوحدي ولكن هوا مكيتيقش
آسيا : هادا السبب؟
نريمان : بحزن ) اه هادشي لي كاين كنهضر معاه ومكيديهاش فيا
ريم : حبيبة هوا هكاك داير غيكون غير كيخاف عليك وصافي
نريمان : وراه كتخرج البنت معايا معندو لاش يخاف زعمة ماشي بوحدي غير هوا معصب بوحدو وكيبغي يبرد فياا

هزات آسيا حاجبها وقالت : ولدي مغاديش يبرد فيك غا هكاك شوفي نتي اش كديري وفين كتمشي كون مشافش عليك شي حاجة ماشي حتا لتما مغاديش يدير معاك هادشي كولو باينة دايرة شي حاجة

نريمان : بحزن ) علاش اخالتي فين غنمشي فنضرك وشنو غندير كاع؟
ريم : ماما راه من حقها تخرج

آسيا : سكتي نتي اريم انا لي عارفة ولدي ضروري شاف عليها الناقص باش كيصوني ابيل فيديو ومكيخليهاش تخرج

نريمان : اويلي اخالتي شنو درت؟؟ شهاد الباطل كتحطي علياا!
آسيا : شناهوااااا؟ كنحط عليك الباطل ؟ هه مزيان لا مزيان تبارك الله
حسات بيديها كيترعدو ودموع تغرغرو فعينيها ناضت من حداهم وطلعات لبيتها كتجري

جلسات فالارض كتبكي وتنخطط حسات بالقهرة والضغط معرفاش كيفاش تصرف ولا كيفاش دافع على راسها . هزات تليفونها ومشات لبالكون صونات على ابتسام كتبكي وتعاود ليها بحرقة دوزات نهارها فالبيت كل مرة تجي عندها ريم ترغب فيها تهبط تغدا وتهبط تجلس معاهم وحرام واش بغات. غير كتبكي مكمشة فبلاصتها. وصل جهاد فالليل سمعات طوموبيل دخلات ناضت غسلات وجهها بالزربة وجلسات فطرف الفراش كتسنى يطلع لعندها شافتو مطلعش وحسات بآسيا غتكون كتعاود ليه


سمعات الدقان ومشات بالزربة تحل لقات سميرة
نريمان : شنو ؟
سميرة : قالك راجلك هبطي تعشاي
حركات راسها بالايجاب وبقات واقفة فالباب مقدراش تهبط رجعات لبلاصتها وتكمشات فيها حتا سمعات الباب تحل، وخطوات جاية جيهتها
ريم : حبيبة ديالي نوضي تعشاي
هزات عينيها وقالت : لا مخصنيش غير بصحتكم
ريم : اويلي ونوضي ومديريش فخاطرك ماما هكاك دايرة خليها تقول لي بغات ونوضي خلاص تهبطي تعشاااي راه كيتسناوك ونوضي
جراتها من يديها هبطو لتحت شافت جهاد جر ليها كرسي حداه بلاما يضور يشوف فيها جلسات ومدات يديها كتعشى معاهم وعينيها فالارض كتسمعهم كيجمعو ويهضرو ويضحكو بيناتهم وهيا غير ساكتة..
جمعات مع سميرة طبلة وطلعات لبيتها كتميساجا مع بنات وتعاود ليهم
جنات 💬 : وحتا نتي ازفت كتمرضي شديه اصحبتي عندك غا بالفراش وتعلمي كي ديري ليه راه كيشوفو غا فالقحاب ونتي عندو فدار هكاك خصك تكوني حسن ميمشي ليهم . واصلا راه كيمشي ليهم زعمة هاد المدة كاملة غيكون صبر من معاك غا هكاك ؟ ههه سوليني انا نقولك رجال يا حبيبة مراتهم غا كتولد كتبدا تفشش حقى متقيصنيش متقربش لياا ايوا سيد ضروري غيمشي يشوف شكون تعطيه بفف

نريمان 💬 : اويلي بصح؟ زعمة ديك ايام لي مجاش يكون كان مع شي وحدة ؟
جنات 💬 : اييه ونحلف ليك عليها واش بعقلك نتي هه

نريمان 💬 : vu

جنات 💬 : واش فهمتي الزمر؟ راه عادي كاع رجال مزوجين وغيشوفو فالزنقة دابا نتي تحلوني على ديلمو وعرفي كي تشديه صعريه نتي كاع وغتشوفي كيف غيولي معاك تقوليليه طيرني فالسماء يطيرك هههه
نريمان : صافي واخا انا غنشوف كيف نتصالح معاه بعدا وديك ساعة نشوف شنو كاين
( مشاهد حقيقية )
خرجات من كنفيرسسيون دجنات ودخلات لعند ابتسام كتجاوبها على مسجات ديالها سمعات تليفون كيفيبري مسج مور مسج.
رجعات لعند جنات لقاتها مصيفطة ليها روابط دالجروبات +18
جنات 💬 : دخلي لهناا غتولي محتارفة ههه تعلمي وردي علياا الأخبار.
ترددات فاللول ولكن من بعد دخلات ليها صيفطات طلب الانضمام..
نريمان 💬 : واخا صافي انا صيفط ليهم ديك ساعة نشوف ملي يقبلوني.
سمعات خطوات طالعين فالدروج قطعات الصوت لتليفون طفاتو من جنب خشاتو بالزربة تحت مخدة ودارت راسها ناعسة
شد الباب دخل الحمام كتحس بيه غادي جاي فالبيت خرج البالكون كتشم ريحة دالكارو داخلة حلات عينيها شافتو واقف عاطيها بالضهر جبدات تليفون بشوية طفاتو. وشدات عينيها حسات بيه دخل لبلاصتو وتقلب لجهة خرا..
دازت 3 ايام والحال مزال كيف هوا كتهضر معاه مرة يجاوبها مرة يخليها بلاكة وحتا من آسيا غير نڭير ملي كيكونو خارجين. حيدي زيف علاش لابسة هادي؟ حيدي هادي ها لي تلبسي تقادي زيدي مكياج راه مباينش. ضحكي مالك غا مغوبشة بحالا خارجة من الحبس.

الهضرة مكتسلاش من صباح حتا ليل كتسمع نفس الموال. كل ليلة ملي كتطلع لبيتها كدخل تقلب تشوف فداك الجروبات وتشوف منشورات الناس كل وحدة وشنو حاطة كاين لي حاطة تصاوها ف كازينو فوضع حميمي كاين لي حاطة تصاوها فالفراش مع صحبها كل وحدة كتعاود تجربتها اللولة وكل وحدة كتعطيهم تجريباتها وكيفاش طيحي راجل الخ..

مكاين غا تخصار الهضرة من سمطة لتحت ..
كتحاول تزعم تهضر معاه وتصلح القضية بيناتهم ولكن فالاخير كتراجع،،
دازت ايام مكاين غا السفر آسيا ديما هازة طوموبيلتها وخارجة تبدل الجو مع ريم ونريمان ودراري ها كازا عند خوتها ها المحمدية ها جديدة ها مكناس ها فاس دازت 10 ايام وهوما مسافرين عاد رجعو لرباط
كانت الهضرة بين جهاد ونريمان فهاد الفترة ناقصة كيهضرو غير بالميساجات او مكالمة جوج مرات فنهار او مرة وحدة..

وفديك الليلة بعدما رجعو من السفر وتعشاو خلاتهم جالسين مجمعين وطلعات لبيتها خدات دوش وعطرات الجسم ديالها لبسات شوميز حريري اسود فوق جسم ابيض ناعم طلقات شعرها وحطات عكر خفيف مع ايلاينر جبدات العوينات وقفات قدام المرايا الكبيرة لي فالديسينغ كتشوف راسها جات مغرية ومختالفة عجبها الحال خرجات لبيت نعاس رشات ريحة وجلسات شادة تليفون فيديها وكتسناه ايمتا يطلع كتشوفو كيطلع اون لاين فالواتساب ويرجع يخرج صيفطات ليه مسج
نريمان : جهاد مغاديش تطلع؟

رد عليها فالحين
جهاد : مزال علاش؟

ترددات وكتبات : توحشتك بزااااف طلع لعندي

شاف المسج ديالها بان ليها قراه ولكن مردش عليها شافتو خرج من الواتساب يحساب ليها طالع بقات كتسناه دازت نص ساعة عودات صيفطات ليه
نريمان : مغاديش تجاوبني؟
فديك الوقيتة حل الباب حتا تفزعات من بلاصتها
جهاد : هانا شنو؟

عينيه تفيكساو عليها كيشوفها جالسة بسيقانها معريين وفتحة لي كتبان من بينوار جات سكسي

دخل شد الباب وناضت لعندو
وقفات حداه شدات فيديه وهوا عاقد حجبانو
جهاد : مالك؟
نريمان : بصوت حنون ) توحشتك بزاف
جهاد : بسخرية ) هه من نيتك؟
نريمان : علاش مالي
نتر يديه من يديها وزاد كيحيد تيشورط
نريمان : مالك معايا اجهاد علاش كدير ليا هاكا؟
ضار عندها معصب بصدرو عاري
جهاد : شنو درت ليك؟ هااا شنو!! كيف بنت ليك اناا معاك؟ ياك بغيتي تخرجي بغيتي تبدلي الجو منعتك ؟ ياك خليتك ديري لي بغيتي ايوا فين المشكيل؟؟

نريمان : واش حيت سافرت مع خالتي وريم؟ ياك قلت ليك واش تخليني نمشي قلتي ليا سير فين كاين المشكيل؟

جهاد : اهاه مكاين حتا مشكيل وبدلي ساعة بخراا مفيا لي يهضر
بغا يضور وهيا تشدو من يدو وقفات فوجهو

نريمان : لا مغاديش نبدل هاد ساعة

نريمان : ديما قاطع هضرتي وكتهضر معايا غا بزز وديما معصب عليا وتغوت عليا علاش هادشي ؟ فين غلطت معاك شنو درت ليك

دفعها حتا كانت غطيح

خرج فيها عينيه الحومر بكل عصبية :
فخبارك انا ندمت حيت تزوجت بيك كن غا بغينا صحاب كن راحنا بخير من نهار تزوجنا وحنا كنرجعو باللور وعييت صابر كنقول دابا تبدل..

دابا تشافى وترجع حسن ..

دابا دير محاولة ولكن لي فراسك فراسك.
صحباتك كديري معاهم محاولات باش تخرحي وطلقاو وتشاوفو. تخرجي بلا خباري وتسراي بلاما تعلميني فالدار عيشييين فالزمت معرفتش راسي واش انا مع مراتي ولا مع صاحبي فدار!! نقرب ليك متبغيش وتبداي عليا بالاعضار دابا كملتيها غا قالت ليك الوليدة نسافرو قلتي ليه اه. وجيت ولقيتك متحمسة باش تسافري زعمة مخممتيش هاد راجل غيبقى بوحدو ؟
علاش هوا اصلا مزوج!!
ملي مراتو غتخليه هاد 10 ايام وحتا ترشق ليها وعاد ترجع.

ودابا شنو زعمة مقادة ليااا؟ ( بسخرية ) هه بلاش
سمح فيها خلاها واقفة مصدومة دخل الحمام وزدح الباب فوجهها

من أسوء الليالي لي عاشت خرج وخلاها غتحماق فبيتها كترعد وتبكي بهيستيرية
سمعات ريم وآسيا صداعهم ولكن مبغاوش يطلعو حتا شافو جهاد هابط فالدروج معصب طلع فطوموبيلتو وخرج.
طلعو لعندها حاولو يفهمو شنو كاين معنقاها ريم كتسكت فيها عطاوها دواها وبقاو معاها وآسيا كتزنزن فوق راسها فلاخر خلاتهم وهبطات بحالها.
تنصص ليل وهيا مزال على نفس الحالة خلاتها ريم وهبطات تنعس ولادها.
مبغاش يصبح الصبح على نريمان لي حالتها حالة كتحس براسها معليها حتا ذنب وعادي جدا هادشي وكتحس غير ضلمها

فصباح كيخرجو شوانط آسيا وريم لي غادي يغادرو المغرب ونريمان من البالكون كطل عليهم طلعات عندها ريم تودعات هيا وياها وحولات تصبرها وتنصحها ترجع امور هيا وجهاد حسن من لي كانت..
هبطات سلمات على آسيا كان جهاد واقف مع ماماه.. طلعو فالطوموبيل ومشاو بحالهم
وفديك وقيتة حتا هوا طلع فالطوموبيل وخرج

دازو ايام وعلاقة كتزيد تموت نهار على نهار وحتا من الفراش مبقاوش كيشركوه. وحتا دار مبقاش كيجي ليها جهاد قليل
حولات تصلح علاقتهم حولات تصيفط ليه وتصوني عليه ولكن مكيجاوبش كتحاول تقلب على حلول من عند ابتسام وجنات لي كتعاود ليهم كلشي وكتحسبهم هوما لي باغيين ليها الخير وكيعاونوها..
كانت فبيتها كتميساجا مع بنات حتا وصلوها مسجات جنات واحد مور اخور
دخلات تشوف لقات عرام دالفيديوات وقصص وكيفاش طيحي راجل وكدا كدا.. مسحات ديك الفيديوهات وصيفطات ليها مسج

نريمان 💬 : جنات متبقايش تصيفطي لياا هاد فيديوااات راه مخصنيش نبقى نشوف هادشي

جنات 💬 : سيري تقودي اصلا نتي شنو كتفهني وتفرجي وشوفي وتعلمي ليبوزيسبون باش تخليه كيشوف غا فيك وفعوض متغبني علينا ها ماا ديري تلقايه راه مطيحاااه شي قحبة ونتي بقاي حالة فمك
عودات صيفطات ليها 5 فيديوات واحد مور لاخور وكل واحد طويل نريمان غير كتقرا مسجاتها بركات على فيديوات باش تمسحهم.
وفديك اللحضة طرا لي مكانش فالحسبان شافت الباب تحلات ودخل جهاد مغلغل خلا بولة تهبط فسروالها من شدة الخوف

جهاد : اري داك التليفون لهناا

نريمان : شش شنو لاش بغييييتيه؟
جهاد : قلت ليك اريه لهنااا معامن كتقيل كتهضر؟؟ ليل ونهار ونتي اون لاين؟؟؟؟ اري نشوف معامن كتهضر
نريمان : بخوف ) والله اجهاد الا غير بناات
شدها من ذراعها مخرج فيها عينيه نتر ليها تليفون وهيا غيسكت ليها القلب بين يديه..

جهاد : حلي الكود
نريمان : بترجي ) لاااا اجهاد لااا عفاك لاااا

غرس دفارو فذراعها بقوة عينيه حومر
جهاد : قلت ليك ديري الكود هادشي بزاف معامن هاد الهضرة كلها؟؟ هااا معامن ليل ونهار ونتي كتميسجاااي. قلت ليك ديري الكود

نريمان : بخوف : والله العظيم الا غير البنات اجهاد معامن غنهضر انا كاع

جهاد : هاد بنات بغيت نشوفهم بعيني يلاه حلي نشوف

قلت ليك حلي متزيديش تصعريني
ولا اقسم بالله حتا ندير معاك شي كارثة فهاد نص ليل حلي


نريمان : منقدرش اجهااد منقدرش شنو باغي تشوف وااااش مكتيقش فياا اهئ اهئ اهئ

جهاد : هنااا غنشوف واش غنتيق فيك ولا لا حلي الكود والله لا عاودت الهضرة معاك

مد ليها التليفون وهيا كترعد كتحرك راسها بالنفي
نريمان : جهاد غير خليني نشرح ليك را..
مكملاتش هضرتها شدها من شعرها حتا طرطقو زغباتها فيديه غوتات لربي لي خلقها وهوا كيدي ويجيب فيها

جهاد : متجهلينييييش كتر من هاكا هاد الصحبات بغيت نشوفهم بعيني بزاف على هاد الصحاب لي ليل ونهار. ونتي كتهضري معاهم شنو كيعطيوك هااا؟

الحديث النبوي ولا كيقريوك الحزب!!!!!
ليل كولو ونتي كتهضري وتصبحي كتهضري وريني نشوف هاد البنات ولا هاد زوامل راه مغنعاودش الهضرة صبرت ليك بزاااف ونتي تزيدي ترخاااي حلي الكود ولا صباحك ميطلع فيه شمس

سروالها فزڭ من قوة الخلعة حالتها كلها كترعد داخت بها الدنيا
سمع غوتهم عباس من التحت وطلع كيجري خايف الروح طيح بقا واقف فالدروج خاف يدخل عليهم معرف شنو يدير

عاود جهاد زير عليها بحدة : حلي الكود
شدات تليفون بين يديها كيترعدو دارت ليه الكود وهيا غتسخف شدو فيدو داخل نيشان الواتساب كيقرا بالزربة محادثة بينها وبين ابتسام وهيا كتحاول تفلت من يديه باغا غا تهرب غير كتهرنن
شاف فيها بقرف كاز على سنانو ڤيبرا تليفون بين يديه خرج من عند ابتسام ولقى مسج من عندك جنات مصيفطا جوج ڤيديوات خرين ومسج
جنات 💬 : وفين الخرا مشيتي اجي هاك اححح تمتعي لياا مع راسك وردي علياا الخبار ههههه

تما جهاد تبلوكا آخر حاجة كان كيتصورها هيا هادي وهوا كيشوف فيديوات بورنو لي واصلين لمراتو.
كانت الشكوك ديالو ان نريمان غتكون كتعرف شي راجل اخر اولا رجعات كتهضر مع امين وكتبات ساهرة تجمع معاه هادشي لي خلاه يصعر ومرضاش. ولكن مكاانش يحساب ليه غيتصدم بهاد الميساجات وهاد الفيديوهات دخل كيشوف فيديوات وكيدوزهم بالزربة واحد مور واحد .
شافها كترعد حادرة راسها الأرض وكتشهق مغطية وجهها بيديها بجوج ..
هز تليفون قبالت وجهها
مخرج عينيه حومر بحالا عاصر فيهم الدم
جهاد : هادا ابنت القحبة فاش كتفرج هاا؟؟؟؟
هادو هوماا الصحابات الخانزة لي كتهضريلي عليهم ( بالغوات ) هلااااااااا؟ سلكوطة من سلاكط الكبار ودايرة ليااا فيها شريفة عفيفة؟؟
حتا اسرارها معاودين لهاد القحاب؟؟

رمى تليفون فالأرض وجمعها معاها بتسرفيقة اللولة وثانية بكل قوتو شد شعرها مرمدها فالأرض وهيا كتغوت لربي لي خلقها كتفرطط فيديه حتا من الصوت مشا ليها باش تزيد ترجاه

طلع عباس كيجري ودخل عليهم كيشد جهاد كيحاول يفكوو

عباس : لا اولدي لا مراتك هادي نعل الشيطاااان رخي هانتا غتقتلها.

شدها من شعرها كتجرجر بيها الارض وعباس كيشدو يحيد عليها ناض ودفع عباس بقوة حتا كان غيطيح

جهاد : خرررررررررج علياااااااااا بررااااااا تقوووود لا نتااا ولا غيرك

رجع شدو كيجرو : لااا اودي مراتك كلشي عندو حل الله يهديك هااا نتا غتقتها

جهاد : هادي اكبر بنت القحبة هاد المزمووووولة باغا صحااااب نوريها الصحابات شنو كيسوااااو ، سير اصاحبي خرج بيني وبينها.
شدو عباس بكل قوتو جرو من فوق منها ناضت بالزربة وهربات ليه هبطات كتجري
عباس : لا اولدي حشومة كلشي عندو حل الله يهديك

دفعو جهاد مع الحيط : ديها فكرك خرج سير تقود، عليااا يلاه خرج بحالك

وهبط كيجري ضور عينيه فالدار ملقهاااش لا فالكوزينة لا فالصالة لا صالون لا فالبيوت خرج برا كيقلب ويغوت تبعو عباس كيحاول يجرو وجهاد عروقو غيطرطقو وجهو رجع حمرر غير كيدفع فيه ويسب من السمطة لتحت..
داز على الجردة وحدا لابسين كيشوف ملقهاش بانت ليه مور الطوموبيل كتنخصص غادي جيهتها وهوا يتعرض ليه عباس وقفات مور عباس مخبعة

نريمان : جهااااد لاااا عفاااك عفاك غير خليني نهضررر معاك ونشرح ليك وغتفهمنييي جهاد قلبي غيسكت مضربنيش عفااك عمي عباس عتقي عفااك
شدات لعباس فقميجتو وهوا معرض لجهاد دفعو بيدو وشدها من موراها من يديها نترها حتا جات طايحة فالأرض على وجهها..
رجع عباس بغا يشد فيه وهوا يوقفو جهاد
جهاد : عباااس خرررررج فحااااللك حسن منخصر معاك

عباس : لا مغاديش نخرج بعد من البنت راه كلشي كيتحل بالعقل اولدي هانتاا غتقتلها و غتمشي الحبس الله يهديك

جهاد : بحدة ) مغنعاودش معاك الهضرة قلت ليك خرج بحالك هياااا خرج بحالك
شاف عباس فنريمان لي كترجاه بعينيها كترعد،
حاول يتبت جهاد ولكن غير زاد صعرو
بقات فيه نريمان وتمرميدة لي هيا فيها شعرها منتوف وجهها حمر وحوايجها مخربقين طايحة فالارض كتبكي بهيستيرية

خلاهم وخرج بحالو


جرها جهاد من يديها مدخلها لداخل زدحها مع الأرض وهيا كتفرطط بين يديه ،،

خلاها تمنى الموت ومتلحقهاش حس براسو جعر ومبقاش قادر يتحكم فعصبيتو ولا فالمشاعر ديالو خيبات ظن ديالو فيها

جمع بزرقة رماها فوجهها

جهاد : اخخخخختفووو كلكم بنات القحاب غتخرجي تقودي علياا عمرني نشوف خليقتك قدامي اناا لي زامل مزوج بوحدة بحالك،،

ضرب الڤاز كبير لي فالصالون حتا تشتت كولو ناضت بالزربة لحمها كلها زرقة توجات الباب تخرج وهوا يضور بالزربة شدها من يديها ودفعها جهت الدرج.

جهاد : طلللعي لفوق صعرتينييي الله ينعل اصلك غبري عليا كمارتك
طلعات كتشهق..
طالعة على يديها ورجليها حاسة بالموت داخلة عليها جلسات فالارض كتبكي وترعد طلع لعندها لقاها جالسة فالارض وهوا يخرج فيها عينيه

جهاد : نوضي تكعدي لبلاصتك وقطعي الحس نسمع صوتك نزيد نكمل على اصلك ابنت القحبة بحالك بحال امك وتريكتكم كلكم مزمووولين اخخختتفوووووو

دخلات لبلاصتها وهيا كتنخصص

جهاد : غتسدي فمك ولا لااااا معامن كنهضر منسمعععش حسك

سدات فمها بيديها وحطات المخدة على راسها كتحاول تقطع الحس ديالها . خلاها وهبط لتحت كتحس بالمعدة مقلوبة ليها ناضت بالزربة دايرة يديها على فمها استفرغااات كلشي حتا تجرحات ليها الحنجرة وهزات راسها كتنهج
رجعات لبلاصتها كتنخصص وتندم فراسها لي وصلها لهادشي. دوزات ليلة كحلة عدوك ومتمناها ليه.
حتا صباح الحال حلات عينيها بعدما غفات
سمعات الماء مطلوق فالحمام ناضت بعينيها منفوخين وجنب فمها زرق مفاصيلها كلهم مهلوكين ناضت كتسلت دخلات لدريسينغ هزات مونطو ديالها طويل لبساتو فوق ديك البيجامة مشات المجر حلاتو بشوية هزات منو الفلوس خشاتهم فالجيب وكضور عينيها كتقلب على تليفونها ملقاتوش مشات لماريو حلاتو هزات وراقها

سمعاتو شد الماء حسات بقلبها غيخرج.
هبطات كتسلت فالدروج لقات تليفون محطوط على طبلة دالصالة هزاتو وخرجات بالزربة مع الباب غادية فالطريطوار كتخلف وتشوف موراهاا واش تابعها
وتزيد فالسرعة اول طاكسي بان ليها شيرات وطلعات ليه.
بقا مول الطاكسي كل مرة يهز عينو فيها

.... واش تعرض ليك شي حد؟

نريمان : الصمت
.... وفين غتمشي بعدا؟

نريمان : منعرف غير بعدني شوية

.... وشنو واقع ليك؟

نريمان : والو اشريف موقع ليا حتا حاجة غا طحت
.... هادي كلها طيحة؟

مرداتش عليه هزات تليفونها دارت ليه (وضع طائرة ) وبقا طاكسي غادي حتا حسات براسها بعدات خرجات منو ومشات كتقلب على تليبوتيك صونات على ابتسام وطلبت منها تجي عندها دارو يطلقاو حدا كوميسرية ومشات نريمان كتقلب على هاد الكوميسرية فين جات ..
وقفات حداها مخبعة مور واحد الشجرة خايفة جهاد يدوز من تما ويشوفها دازت ساعة وهيا واقفة حتا طابو رجليها عاد وصلات عندها ابتسام مخلوعة هازة ولدها فيديها شافها نريمان وهيا تشير ليها
ابتسام : اويلي مالك على هاد الحالة شكون دار فيك هادشي

عودات ليها نريمان كلشي وهوما غاديين فالزناقي كتعاود وتبكي وطلبات منها تساعدها تبقى معاها شي ايامات تنهدات ابتسام

وقالت : والله معرفت اش نقولك موصيبة هادي وصافي يلاه مرحبا بيك غنديك لدارنا فيها تيساع نتي عافة حنا كاريين غا جوج بيوت وكوزينة دارنا فيها التيساع وماعندهم حتا مشكيل تبقاي معاهم ولكن ضروري تصالحو اصحبتي

نريمان : لا ابتسام لا صافي معمرني نرجع لعندو ناا كنت حاسة لبارح غطرا لياا شي حاجة كنت غنموت ولا غيسكت لياا القلب غا ربي وقف معايا

ابتسام : موصيبة ياختي ونتي كون مسحي مسجات علاش كتخليهم؟؟
نريمان : اهئ اهئ وراه ديما كنت كنمسح داكشي ولكن هيا ديما كانت كتصيفط لياا

ابتسام : بفف مشكيلة هادي عوتاني وزيدي ها طاكسي يلاه نمشيو..
طلعو فالطاكسي ومشاو لدار واليدين ابتسام ،،
باش يوافقو واليديها يخليوها معاهم اضطرات ابتسام تكذب وتقوليهم راجلها كيخونها وكيضربها الخ.. وهيا مقطوعة من شجرة ومعندها لاعائلة لا خدمة..

خلات نريمان مصدومة غا ساكتة ولكن معندها مدير هادا هوا الحال باش تبقى معاهم ..

~~

حاط تليفون فوذنيه كيهضر مغلغل لابس شورت قصير غادي جاي عروقو خارجين بقوة العصب : قلت ليك معرفتهااااش فين مشاااات ؟ واش مكتفهميش؟؟؟

ردات عليه بصوت مغنغن كتبكي : نتااا شنو درتي لبنتي هيا مغاديش تخرج من دار غير هكاك

قطعها : ماشي سوقك شنو طرا بيناتنا دابا غتجاوبيني واش هضرات معاك ؟؟ واش نتي جيتي ليها راها معندها فين تمشي

سمية : والله العظيم مجيت ولا ديتها ولا شفتها كاع حتا كتقولها لياا نتا دابا اويلي انا غنتسطى الا بنتي مرجعاتش لدار هاد الليلة يسكت ليا القلب

جهاد : عرفتي ونلقاك كذبتي وهيا معاك ولا نتي هنا فالرباط وكتنكر

قطعاتو كتبكي : شنو غدير كاع مالك غا مطلع شوكتك شكاين كنحتارمك متزيدش تهز عليااا قلت ليك معرفااااش وانا دابا فتطوان معندي عليها حتا خبار ومعنديش حتا نمرتها ولا هيا عندها نمرتي ولا عارفاني حتا فين ساكنة. سير عند بوليس هاد الليلة بنتي تبات فالدار انا دابا جاية لرباط

قطع عليها شد عينيه كاز على سنانو. طلع لبس حوايجو بالزربة وهبط كيجري خرج. اول حاجة داز لعند بوليس وبدا كيضور بطوموبيل كيشوف تبان ليه فشي بلاصة..


تعاطفو معاها ورحبو بيها 5 ايام وهيا معاهم مريضة مهلوكة غير كتبكي ليل ونهار مخلطة عليها كرشها كضرها وتقيا وراسها تقيل

ام ابتسام غير كتسوط وتحشي الهضرة شكات فيها غتكون مصاحبة مع شي حد وتكرفص عليها..
كل مرة تنڭر على ابتسام وتسولها فقاش غتمشي بحالها..
حسات نريمان بلي متقلة عليهم وباغيين غا ايمتا تمشي..

فديك الوقيتة تليفونها مطفي ليل ونهار ..
ابتسام اغلبية كدوز وقتها مع نريمان وقليل فين كتمشي، لدارها عند راجلها..

كانو جالسين بجوج فالسطح حطات ابتسام يديها على حنكها وقالت : ودابا صافي قررتي ترجعي لعندها؟؟

نريمان : اه غادي نرجع عندها حيت هيا بوحدها لي بغات ليا الخير وعوناتني وقفات معايا ودابا غنرجع لعندها نطلبها ونرغبها تخليني معاها مبغيت والو مبغيت لا خلاص لا حتا حاجة نشد ليها الخدمة كلها ندير معاها لي بغات غير تخليني معاها
ابتسام : غترجعي عوتاني لنقطة الصفر ازغبية
نريمان : بحزن ) معندي مندير
....

فصباح وصلات معاها حتا لكار تعانقو ودموع فعينيهم
ابتسام : ردي البال راسك عفاك
نريمان : دعي معايا راه ديما كنحس باخيرتي غتكون مكفسة

ابتسام : متقوليش هاكا دابا ربي يدير ليك تاويل دالخير والله غا صبري . ومكرهش صراحة كن رجعتي لراجلك وتصالحتو ولكن غترجعو انا عارفة وحاسة بهادشي
نريمان : موحال اختي يلاه الله يهنيك والله يجازيك على هادشي لي درتي معايا عمرني نسااا خيرك

ابتسام : متخمييش ربي كبير وانا معاك ديما..
تعانقو مرة خرا وطلعات نريمان فالكار بعد دقائق قلع والدموع فعينيها كتفكر نهار لي سفرات من الحسيمة لكازا كان هداك اكفس النهار
ولكن نهار داليوم اكفس منو بالضوبل .. الفيلم كيتعاود رجعات لنقطة الصفر كتخمم واش جوديا غدخلها ولا لا ويلا مبغاتش دخلها وتخدمها عندها فين غتمشي ؟؟ فين تعطي براس. فكرات ف امها تمشي لعندها ولكن مقدراتش بعد هاد السينين ديال التخلي عليها عاد تسول فيها وتمشي عندها؟؟

لا ميمكنش!!
واش ترجع لجهاد؟ اه مكرهااتش ولكن الوجه باش تشوف فيه معندهاش
واش تصوني على امين طلب مساعدة ديالو؟؟

لا ميمكنش!!
ترجع لدار عمها؟
لا حتا هيا ميمكنش
ايوا شنو وفين تمشي؟
معرفتش فين !!

غا بينها وبين راسها كتهضر حايرة تالفة معرفات فين تشد..
حسات بالدنيا داقت بيها شدات عينيها كتبكي فصمت حسات بمصارنها مقلوبين شدت فمها وناضت كتطلب ڭريسون يوقفو تخرج مقدراتش تصبر وطلقات تقيا فالكار حتا بداو ينڭروا عليها

عطاوها ناس كلينيكس مسحات داكشي عطاوها الماا غسلات وجهها وفمها ورجعات لبلاصتها شادة ميكة فيديها الا جاتها تقيا.. تقيا فيها..
محساتش بالطريق وبالوقت ايمتا داز
وصل الكار لكازا خرجات من محطة واقفة فالشارع وخايفة من ردة فعل جوديا ملي تشوفها

بعد اخد ورد بينها وبين نفسها شدات طاكسي عطاتو عنوان غادية وكتدعي فنفسها حتا وصل وقفها فالباب
خرجات كتشوف فالتغيير لي رجع فالصالون تبدل شكلو ديالو من برا بجريدة صغيرة ومحابق مزينين الباب..

توجات الباب لقاتو مفتوح مدوزين غا ريرو ديال عقيق بانو ليها البنات خدامين متصاافين فبلايصهم دخلات لعندهم كان تغير حتا فالصالون لداخل. شافتها وحدة من بنات طفات سيشوار ديالها وجات لعندها

البنت : وي ختي بغيتي شي حاجة ؟
نريمان : بخوف ) اه بغيت جوديا واش كاينة ؟
البنت : تسنايها شوية هاهيا دابا غتجي دايرة مع شي كليان.

حركات راسها بالايجاب وجلسات فالمقعد كضور عينيها وقلبها كيدق بالجهد.. أقل من نص ساعة
شافت جوديا دخلات ومعاها ولد هاز جوج كسوات دالعرائس كتوريه فين يحطهم

وقفات نريمان كترعد وقالت : جوديا؟
ضارت بسرعة البرد بانت ليها نريمان قدامها لابسة مونطو ديالها وجهها شاحب ملامح حزينة
زادت عندها عندها نريمان وترمات عليها عنقاتها

نريمان : توحشتك اختي توحشتك بزااااااااااف توحشتك اجودياا

بقات جوديا مصدومة يديها طايحين مقدراتش تعنقها

نريمان : سمحيلي عفاك سمحيلي اختي غلطت معاك سمحيلي ندمت كن غير بقيت معاك من اللول كون غير ممشيت لحتا بلاصة اهئ اهئ عفااك متخلينيش اجوديا عفاك

هزات راسها شافت فيها قلبات عينيها جوديا كتسوط
جوديا : مالك؟ شنو كاين
مال حالتك!!
نريمان : دابا نعاود ليك كلشي
جوديا : اجي معايا
زادت جوديا دخلات لبيرو ديالها لي رجع فالطابق الثاني طلعات معاها نريمان
جلسات جوديا على بيرو عينيها فالارض
جوديا : فقاش جيتي؟
نريمان : بحزن ) وقيلة 5 شهور وزيادة
سكتات للحضة وقالت : شنو باغا علاش جاية لعندي؟ انا مغادي نسولك لا مالك لا شنو عندك سبق ليا وقلتها ليك حياتك ديري فيها لي بغيتي كنت شحال هادي كندخل ولكن دابا لا. من لاخر لاش جايا وشنو باغا؟؟؟؟

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.