ابتسمات سعاد وزادت هيا اللولة ونريمان موراها لباب الصالون .. وقفو قداك باب خشبي كبير مكتوب عليه JOUDIA .. بركات سعاد على صونيت وتوخرات اللور وهيا تحل ليها فتاة فعمر العشرينات لابسة سروال د جين ومن الفوق دايرة طبلية حمراء واصلة تحت خصرها وفضهرها شعار خاص بصالون جوديا واسم ديالها.
.... وي لالة مرحبا
سعاد : كاينة جوديا هنا؟ راني دايرة معاهاا
....اه وي مرحبا دخلي تسنايها راها مزال ماا جات..
ابتسامات سعاد فوجهها وكذالك نريمان دخلو لداخل حالين فمهم فروعة المنضر ماشي كا آي صالون لا من ناحية المطريال ولا من ديكور ولا من صالة الاستقبال ولا من البيرو وصور كبرى فالجدار مصورة جوديا مع بعض الفنانين وصور خرين وهيا كتخدم لناس وصور عروس الخ والكاميرات فكل جهة وجوج تلفازات كبار معلقين فالحيط كيبانو فيهم . ودرج كبير كيطلع لطابق ثاني
كل وحدة بدات كتعطي تبرير وجوديا غير كتشوف فيهم حتا سكتو وهيا تقول كتشالي بيديها لي فيها كونطاكط د طوموبيل وتليفون : اخر مرة ..كتسمعوو كاملين بيكم هادا اخر إنضار نعطيكم مرة خرا الباب ..
اليوم غتجي عندنا واحد فنانة معروفة اليوم عندها الحنة ديالها وغدا العرس غتجي اليوم هيا وعائلتها كلهم بخواتاتها وبنات خالتها وصحباتها المهم العدد ديالهم شي 17 .. نقولها ونعاود بغيتكم الدقة فالخدمة وعنداااكم تحرقو شعر شي وحدة
ولا تنتفو شي وحدة ولي غتخدمو ليها الدفرين بغيت داكشي يحمر الوجه بحال ديما.. انا راكم عارفيني غنخدم العروسة اليوم حنتها غنخدم ليها من الشعر المكياج الخ. اما نتوما غتكلفو بالعائلة بيدما نكمل انا مفهووم؟
الجميع : مفهوم
فرقات عليهم كل وحدة وشنو غادي دير من غير نريمان لي خلاتها لسعاد تعاونها حيت غتخدم مشيطات الشعر ومكياج خفيف اذن خصها لي يساعدها....
كل وحدة شدات بلاصتها اما جوديا رجعات البيرو ديالها وهيا تبعها سعاد وشدات الباب. بقاو البنات كيشوفو فيها ويهضرو عليها اما نريمان جلسات فالطرف متحركاتش.. وهيا تسمع هيا والبنات صوت جوديا لي كتهضر بالجهد
جوديا : صافي اسعاد لي فات مات انا طويت الصفحة ونسيت داكشي راه غير نتي لي كتعاودي تفكريني فيه.. بغيتي تخدمي هانا عيطتليك بيناتنا الخدمة وصافي داكوغ؟
ردات عليها سعاد بصوت خافت وخرجات رجعات لبلاصتها وجهها حمر مراضيااش بنات كيشوفو فيها ديك شوفة..
جوديا جالسة كتهضر مع العروسة وبنات كيقشبو بيناتهم اما نريمان غير حالة فمها وممتيقاش راسها انها جالسة مع فنانة مشهورة وعائلتها غير مبتاسمة وعاجبها الحال وشادة كاس عصير فيديها كترشف منو شوية وترجع تحطو..
طلعات بالزربة وعاد ما زادها التوتو. دخلات لصالة متوسطة فيها مرايا كبيرة بالضواو وطبلة طويلة فيها جميع انواع المكياج وكرسي ذهبي جالسة عليه العروسة لابسة تكشيطة خضراء منبتة من راسها لرجليها بالعقيق حر ذهبي ومضمة الذهب متكية راسها على الكرسي وجوديا كدير ليها العداسات ونريمان واقفة جنبها قدام طبلة كتشوف جوديا كيفاش كتخدم ومبتاسمة فوجه العروسة.
تحشمات جوديا مع العروسة ميحسابش ليها ان البنت معارفة حتا بودر كيف داير كانت كتقول انهاا معلمة وعارفة كلشي ..
حركات راسها وشداتو من عندها وبدات كتكمل الخدمة .. وكل مرة تقول لنريمان مدي لياا هداك وكتوريها بيديها حتا كملات المكياج.. وبدات فالشعر ونريمان كتمد ليها وتشد من عندها بالزربة
بدات كتعمل ليها تسريحة شعر خفيفة ونريمان كتشوف كيف كدير ليها حتا حفضااتها ..
بعدما كملات الشعر عطات جوديا لنريمان سوارت وقالت : فتحي ليا ديك لا بيترين جبدي ليا منها جيل لي فالغوز. جبداتو حطاتو ليها على طبلة وبدات كتخدم ليها دفيرات يدين والرجلين حتا كملات ليها
... الله يعطيك الصحة وخلاص
جوديا : هه عجبك راسك بعدا؟
... وي بزاف فغيمون منيفيك.
جوديا : هه مغسي حبيبة مرحبا..
جلسو كيتهاودو ونريمان جالسة حداهم كتسمع لحديثهم
... ايوا ومن بعد هاد سنين د الحوب هاحنا تزوجنا دابا ههه
جوديا : تبارك الله الله يدوم ليك احبيبة
... اميين ايوا كيف دايرين بعدا كتاكيت
جوديا : هه هاهوما غيشيبوني قبل الوقت كنشوف راسي فالمراايا وكنقول ناري شفت ههه
... اويلي على شرفتي لواه نتي مزال باينة فالعشرينات
خرجات العروسة وهوما كيزغرتو عليها وناضت جوديا كتخدم لعائلة لاخرا لي عاد جات..
ونريمان مسعداها ومسعفاها معاها وغير حاذرة الراس... كملات ومشات كتشوف عائلة العروسة لي كملو مكياج وشعر وكراو من عندها لبيسات وتكاشط .. لبسو وهيا كتقادد ليهم.. وعينيها مع مكياج لي دايرين البنات كتشوف عنداك يكون شي حاجة ناقصة.
دخلات لبيرو ديالها جمعات حوايجها وهزات صاكها وخرجات. لعندهم عطات لكل وحدة حسابها وحتا من نريمان عطاتها 200 درهم .. كانت فقط كتمد ليها وتشد من عندها واقفة حداها الا حتاجت شي حاجة.
جوديا : يلاه البنات غدا عوتاني راه عندناا خدمة بزاف. ابتسام جنات نتوما غتبقاو هنا فالصالون وسعاد وصباح واميمة غيمشيو معايا العرس. غدا مور العصر خصنا نكونو عند الناس..
لقاو صناك كبير على الشارع دخلو ليه وطلبات سعاد جوج د سندويتشات وقرعة دالمونادا.. كلاو وخلصو ورجعو لصالون.. سدات الباب وطلعات لبيت لي غينعسو فيه يلاه نريمان كتفرش بلاصتها وهيا توقف عليها سعاد : شحال عطاتك دالفلوس
هزات عينيها وقالت : 200 درهم علاش
سعاد : مدات يديها) اريها لهنا
نريمان : وانااا؟
سعاد : شنو نتي يا مشفتيش راسك جايا لهناا بالفلوس وغترجعي بالفلوس ولا الكار وقيلة جابك فابور!!!
نريمان : وانا من صباح واناا واقفة معاها ومناخد حتا ريال
نريمان : هيا قالت لياا نجي معاهااا اما انا معجبنيش هاد الخدمة بغيت نقرا وصافي
جوديا : امم وعلاش مكتقرايش كون راكي دابا فقرايتك راه مكاين لا عطلة لا عواشر!!
سكتاات نريمان كتشوف فالأرض مقدرات تقول والو وهيا تقول جوديا : كتبزز عليك يااك
هزات عينيها فيهاا وحركات راسها بالايجاب
جوديا : امم ايوا عاوديلي مالها معاك!!
رفضات نريمان تكلم فالاول خايفة من سعاد ولكن طمناتها جوديا ان الهضرة غتبقى بيناتهم..
عودات ليها نريمان كلشي من الصفر وجوديا مأثرة معاها كتسمع ليها حتا طلعو العروسة وبداو كيخدمو ليها المكياج ثاني مع لبسة اخرا. وجوديا مزال كتسول نريمان وهيا كتجاوبها. حتا العروسة تأثرات بزاف وتأسفاات لحالة لي فيها نريمان..
جوديا : عرفتي هادو خاصهم الحبس بجوج. وتخايلي معايا سعاد جات عندي اول مرة بغات تزيد تعلم عندي ميك اب ارتيست وداكشي، جديد يلاه دخلات بدات علياا انا عندي ولاد خويا جوج سامح فيهم باهم وانا لي، كنوكلهم وانا لي كنقري، البنت وانا لي كنلسهم وانا وانا وانا تعاطفت معاها وعلمتهاا بلا فلوس والله بلا ريال بلا جوج وكنت كنعطيها كتر من خلاصها وكنت مهلياا فيهاا ولكن خرج منها العجب عودت ليها اسراري وخرجاتهم مع البنات داكشي لي دارت بلاماا نعاود ليكم خليت ليها الله. وحتا فهاد الخدمة راها اتصلات بياا وعيات تطلب مني نردها ومحتاجة الخدمة وكتقولي حقى ولاد خوياا معندي منوكلهم.
وعرفتي شنو وحق الله انريمان الا جيبتها تخدم غير على قبلك وقبل خوك نتوما لي كتعزو علياا يحساب ليا بصح هيا كدير هادشي على قبلكم ساعة هيا غير كتستاغل الضعف ديالكم تفوو
نريمان : حتا ناس كانو كيجيبو لينا حوايج تديهم لينا. فلوس تديهم اي حاجة حتا من ليكوش د خويا كانت كتطمع فيه وتهزو عادي
جوديا : تفو انا كانت طايحة من عيني ودابا زادت طاحت كتر يخخخخ بنادم بحال هاكا غا مناقص منو..
كملو العروسة وهبطوها بلبسة خرا وجوديا ونريمان مزال كيهضرو وهيا دخل عليهم سعاد.. شافت فيها جوديا ببرود وقالت : سعاد شنو بغيتي !
سعاد : عينيها مع نريمان لي جالسة ) لا والو غير جيت نشوفك الا كنتي محتاجاني فشي حاجة.
جوديا : لا والو غير سيري الا حتاجيتك غنعيط ليك ..
خرجات سعاد وعينيها مع نريمان سدات موراها الباب وهيا تقول نريمان : واخا نطلب منك واحد الطليبة الا بغيتي!
جوديا : وي بيان سيير ؟
نريمان : واخا تعطيني تليفونك نصوني على بنت عمي نسولها على خويا كيف بقاا
جوديا : اه، طبعا
مدات ليها تليفون وهيا كتحاول تذكر نمرة د وصال. اتصلات برقم لقات نمرة غالطة وعودات رقم اخر عاد جوباتها وصال. ناضت لسرجم كتهضر وجوديا على نفس الوضعية دايرة رجل على رجل كتشوف فيها كيفاش كتهضر..
نريمان : انا نريمان كيف بقا خويا اختي وصال
وصال : لباس عليه ولكن راه مقلق اختي بزز باش كياكل وغير دموع هابطين توحشتك ياا ختي..
حطات يديها على عينيها كتمسح دموع لي نازلين وقالت : حتا انا توحشتو راه عقلي مرفوع اختي كنفكر غير فيه وحتا ملي كنعس كيجيني ف منامي فين هوا حداك بغيت نسمع صوتو
وصال : اه هاهوا حدايا. حداك صداع انريمان بزاف
نريمان : اه راني فواحد العرس وموسيقى مجهدة
وصال : واخاا يلاه هاا خوك..
سمعات صوتو مبحوح وهوا كيخرج اسمهااا بصعووبة كيحاول يهضر معاها اما هيا زيرات على تليفون كتهضر معاه وتمسح عينيها...
وجوديا لي كتشوف فيها تأثرات بالوضع لي كتشوف قبالت عينيها وحتا هيا كتسمع صوت زياد لي كيحاول يهضر بصعوبة مسحات جوج دمعات نزلو من عينيها
حوار كان طويل ومأثر جامع نريمان وجوديا فبيت العروسة لي كملو ليها جميع اللباسي وخرجوها بالكسوا البيضاء تعشاو بنات وحتا نريمان عمرات كرشها من طارط د العروس والحلويات على اشكال والمشروبات والمشويات والبسطيلات والمحمر كل ما تشتهي الأنفس.
توادعو مع العروسة مشات فحالها وجوديا هبطات شانطات ديالها بعدما جمعات جميع المطريال بمساعدة نريمان طلعو فالطوموبيل ورجعو لصالون كانت ديك ساعة 3:00 د ليل دخلو مطريال وسعاد طلعت الكساوي لطابق ثاني وهيا تجبد جوديا 1000 درهم عطاتها لنريمان وقالت : عارفة ماشي شي مساعدة كبيرة ولكن قضي بيها ويلا حتاجيتيني. ( جبدات لاكارت فيزيت ديالها عطاتها ليها ) ها نمرتي هنا اتصلي بياا صافي.
نريمان : لا لا انا مغنشدش منك هاد، فلوس معرقتش بيهم باش ناخدهم غا هكاك.
جوديا : قلت ليك شدي هيا شدي
نريمان : لا لا منقدرش راه غتاخدهم ليا عمتي راه حتا فلوس لي عطيتيني لبارح خداتها
تصدمات جوديا ملي سمعات هادشي. وبززات عليها تشدهم منها وقالت : خبيهم وملي تبغي شي حاجة خوديها راسك متقوليش ليها راني عطيتك..
شداتهم منها وهيا حشمانة. خدابتهم فستيان ديالها. هبطات سعاد مبتاسمة فوجه جوديا تودعات معاهم ومشات فحالها اما سعاد ونريمان وبنات لوخرين طلعو لفوق كل وحدة شداات بلاصتها ونعسو..
كانت سعاد كتخدم لشي وحدة شعرها بعدما كملات ليها ومشات السيدة بحالها جوديا كانت واقفة كتشوف فيها مربعة يديها غمزات نريمان ومشات عند سعاد وقالت : سعاد صافي يمكن ليك تمشي مبقيتش محتاجاك
سعاد : ولكن قلتي لياا غنخدم معاك هاد السيمانا فالشوتينغ وتخدمي على البوم وعندك جوج عراس بغيتيني نمشي معاك.
بقات سعاد مصدومة فيها كتحاول معاها تزيد تخليها ولكن جوديا رفضات وقالت : فلوس لي عطيتك زايدة هاديك دالبنت لي عوناتنا حتا هيا الله يهنيك.
استغربات من تصرف د جوديا مبقالها مدير طلعات جمعات حوايجها وهبطات هيا ونريمان مشات تجيب صباطها من البيت لي كيبدلو فيه بنات وهيا تقول جوديا لنريمان : مهم الا حتاجيتيني صوني عليا.
طلعو فيه وشدو طريق راجعيين لحسيمة سعاد داها النعاس اما نريمان بقات فايقة ساهية فالطريق كتخمم كيف غيكون مصيرها من بعد هاد الرجعة.. واش غتغيير حياتها للأحسن ولا غتزيد تسوء واش غتضحك ليها الدنيا ولا غتزيد تكحال فعينيها..
وصلو فساعة متأخرة من الليل باتو فالقهوة دالمحطة الجو بارد ودنيا مخلطة جاها نريمان الخوف من الوجووه لي كتشوف قبالت عينيها كيخلعو محساش بالآمان واخا معاها سعاد. كتشوف حتا الا جرها شي حد سعاد مغتحنش فيها غتخليها وتزيد..
بقات كدعي فنفسها وهيا كتقفقف بالبرد. حتا صباح الصباح والمحطة زادت عمرت
عاد خرجو شدو طاكسي ورجعو لدار مع الدخلة شمو ريحة د القهوة.
اكيد فضيلة كطيب فطور شافتهم داخلين وهيا تعجب.
فضيلة : اهياا مالكم جراو عليكم ولا
سلمات عليها سعاد وجلسات فالطرف سداري وقالت : قلبي عليااا امي راه مفيااا لي نهضر خليني عليك
فضيلة : علاش هضري قوليلي اش كاين شنو طرا
سعاد : بالغوات) هاديك ق** د جودياا عرفتي ملي مشيت وهيا مجرجراني مع البنات مرمداتني فالارض كل مرة تغوت عليااا حاسباا راسها منعرف شنوو ولكن قسمت فمي بالله لا خليتها فيها غا بلاتي.
خرجات نريمان من طواليط كتمسح يديها بالفوطة سلمات على جداتها يلاه حطات صاكها وهيا تنوض ليها : اجي نتي لهنااا شنو كانت كتقول ليك. شنو كنتو كتوشوشوو موراياا علاش شاديين عليكم البيت فاش كنتو كتهضرو.
سعاد جاها الصعر عليها بقات كطلع ليها حوايجها حتا عراتها وكتدخل يديها فسدرها ملقات والو وبدات كتزيد ضرب فيها وتقول : فين خبعتيهم هضري قوولي نطقي ولا نهارك ميدوز على خير...
نريمان : وراه معنديش قلبيني كولي راه معندي حتا ريال فين غنخبعهم فنضرك
بزقات ليها سعاد فوجهها وقالت : عرفتي شنو اكبر غلط درت هوا ديتك معاياا اما كون مديتكش كون راني فوق بخير وجه النحس فين ماا مشيتي نحسك تابعك.
دخلات سعاد لبيتها زدحات الباب ونريمان ناضت من الارض جمعات الوقفة كتمسح دموعها
وجداتها فوق راسها كتنڭر ..
خلاتها كتهضر بوحدها ودخلات لطواليط شداات عليها الباب طلقات الما ومشات لواحد الكيس كيحكو بيه معلق فالحيط جبدات منو 1000 درهم كانت حطاتها فيه قبل مدخل عندهم.. خشااتها فصدرها بالزربة وطلعاات فالدرج كتجري لقات رشيدة كطل عليهم من الفوق عنقاتهاا نريمان بقوة ودخلات معاها لدار.
رشيدة : اويلي هادو شدوك من باب بالعصى اش درتي
نريمان : لمرا لي مشينا عندها عطاتني شي فلوس عوناتني بيهم وعمتي بغات تديهم لياا قتلاتني عصى عليهم
رشيدة : اويلي وداتهم ليك!!!!
نريمان : لا لا راه خبعتهم فالطواليط كيف دخلت مشافوهمش عندي.
وقفات سعاد مخرجة عينيها وقالت : والله لا دخل هناا تماا يبقى اشمن ربح عندي اناا يبقى هوا مركن ليا فالبيت
نريمان : كي كييفاش ولكن خويااا !! خاصني ضروري نهبطو ونقابلو
سعاد : هضرت هضرة وحدة متجيهش ليااا هنا..
طلعات نريمان لعند رشيدة كتبكي وتعاود ليها.
رشيد : اااف لا حول ولا قوة الا بالله. شغادي نقولك ابنتي نتي عارفة لي كاين عمك ملي كنتو صغار مكانش المسؤول عليكم ومكانش قادر يهزكم والعداوا لي كانت بينو وبين باباك خلاتو ميشوفش حتا فيكم ونتوما صغار واخا هكاك مأداكمش وكان ديما كيقولي الله يدير ليهم شي تويل. مكرهتش ابنتي تجي تجلسي معانا ولي كتب الله ناكلوه مجموعين ولكن هانتي عارفة ديما عمك كيقولي بعدي لياا من صداع انا باغي غير تيقار وراكي عرفاه خدمتو على قد الحال والضيق غا سمحي لينا ابنتي.
حركات نريمان راسها وقالت : ودابا فين غناخد زياد شنو غندير دابا.. فديك الأثناء دخل عم نريمان سلمات عليه وجلسات فطرف حشمانة منو وهيا تجبد معاه رشيدة الموضوع بقاا ساكت كيخمم وقال فالأخير. ماشي مشكيل خليو دري هنا
فرحات رشيدة وهيا كتشوف ف نريمان لي حتا هيا مبتاسمة واخا كانت خيفانة عمها ميبغيش يخلي خوها عندو.
ولكن بمشيئة الله بغا.
بدلات لزياد وكلاتو تغداو معاهم ورجعات هبطات لتحت بقات جالسة معاهم كتشوف ف التلفازة وبالها مع خوهاا اش يكون كيدير واش ناعس ؟ ياكما فيه الجوع ؟ يكون نعس معذب؟ يكون خاصو يبدل ليكوش راسها ترون وهيا كتخمم فيه حتا وصل الليل وناضت وجدات العشاا .
تعشاو وبقاو مقصرين حتا ناضت سعاد دخلات لبيتها سدات عليها ونريمان دخلات لبيتها وبقات كطل من شقة دالباب حتا شافت جداتها مشات تنعس فبلاصتها. بقات كتسنى واحد ربع ساعة حتا تطمئنات انهم نعسو عاد خرجات كتسلت طلعات فالدرج بالحفى. لقات وصال وامين مزال كيتفرجو ومناڭرين على تليكومند. سولاتهم على زياد قال امين : بدلت ليه اختي وراه نعس كوني هانية.
شافت فيها نريمان وسرعان مقلبات عينيها وقالت : اه كنبغيه بزاف وصراحة هواا لي عاطيني القوة وصابرة على قبلو خوياا مسكين .
وصال : ولا اصاحبتي انا كنهضر ليك على شي حبيب القلب زعمة تكون عندك علاقة مع شي حد كتبغيه ويبغيك. ضروري غيكون عندك هه كاع بنات دابا كيبغيو يعمرو فراغ لي عندهم ويكون فحياتهم شي شخص بيناتهم حب قوي.
تنهدات نريمان وقالت : لا اختي معنديش مع دوك العلاقاات ومعمرني نفكر ندخل فشي علاقة مع شي حد. كاع ذكورا بحال بحال حتا واحد فيهم ميصلاح.
وصال : ولواه دابا يا الحبيبة تولي تبغي شي حد ويدوخ ليك قلبك وتولي كتفكري فيه غير هوا ويبغيك ويتزوج بيك
نريمان : والله اختي الا قلبي بارد من هاد الناحية مغاديش تيقي بيا ولكن هادشي دالحب والزواج اااااااااااخر همي اصلا حس رجال كيجيبولي خنقة والله.
انا مباغاا يدخل حتا راجل فحياتي غنبقى عايشة غا على قبل خويا وصافي..
فرحات بزاف وقالت ليه : شوف عفااك انا تايقة فيك عنداك تقول لشي حد اناا شريت شي تليفون
امين : واش هادشي فيه الوصايا نعلي شيطان يلاه نخليك الله يعاونك.
هبط كيجري مع الدرج وهيا كملات نشير وقلبها كيفرفر من الداخل فرحانة غيكون عندها تليفون ديالها لأول مرة مشوقة ايمتاا تجي العشية ويرجع امين ويشريه ليهاا وتشدو بين يديها كملات على شغلها طللاات على زياد لقااتو ناعس ومشات طلبات من مرات عمها تعطيها الفلوس لي خبات عندها عطاتهم ليها خباتهم فصدرها وهبطات بحالها كتسنى امين حتا دخل شافتو طلع لفوق من بعد ساعة سمعاتو هابط فالدروج ناضت بالزربة جمعات الزبل وقالت لجداتها : يما انا غنخرج هاد السطل راه عمر
فضيلة : اجي جيبي معاك نص كيلو د شعريا نديروها لعشاا عطاتها فلوس وخرجات السطل مقاتلة معاه.
لقات امين واقف فراس الدرب كيتسناها هز معاها السطل خواه وقال : يلاه تمشي معايا وختاريه راسك الا بغيتي
نريمان : لا غنتعطل انا غنمشي نتسخر من الحانوت ونرجع دغيا غير سير نتا .. جبدات الفلوس عطاتهم ليه ومشات تسخر ورجعات لدار كطيب العشا تعشاو وبقاو مقصرين كيف العادة . دخلات نريمان لبيتها وسعاد وامها دخلو ينعسو..
خرجات كتسلت فالضلام طلعات فالدرج لقاتو واقف كيتسناها عطاه ليها بكرطونتو وقال بصوت خافت : راه شريت ليك حتا كارطة هاهيا تما فديك كرطونة راه شريت ليك تليفون تقضي بيه وصافي اما الا بغيتي شي حاجة مزيان راه الف درهم متشريلك والو . خديتو لك ب 900 درهم وشريت ليك كارطة وها الصرف
نريمان : واخا شكراا بزاف اخويااا غير دي هاد الفلوس هادو د صخرتك
امين : اشدي فلوس شغادي تعطيني.
عودات شكراتو وهبطات بحالها. دخلات لطواليط شعلات الضو وبدات كتحل فيه وتشوف مبيهش واخا صغير فرحات بيه ركبات ليه الكارطة حطاتو وبقات كتشوف كيفاش تخلص من ديك الكرطونة.. جلسات كتقطع فيها طريفات صغار رماتهم فالقادوس خوات عليهم الما حتا مشاو عاد تهنات جمعات داكشي ورجعات لبيتها كتسلت حطات راسها على المخدة وهيا كتشعل التليفون وعينيها كيلمعو بدات كتجرب فيه دخل من هنا وتخرج من هنا حتا عياات وغلبها النعاس. جابت واحد طرف التوب لواتو على تليفون وشارج وحلات المخدة ديالها خشاتهم فيه وسط الصوف ونعسات..
صباح نفس الروتين شغل دار والصالون فعشية وكتسنى غير ايمتا يجي الليل باش تجبد تليفون
ولفات تليفون رجع بالنسبة ليها هوا الصديق وهوا المؤنس الوحيد ليها. بالخصوص ملي دخلات لمواقع التواصل ورجع عندها حتا هيا حساب على الفيس بوك..
حاطة وردة ذابلة سوداء فبروفيل ديالها ،،
وكتفاعل مع منشورات لي فالمجموعات ومع اصدقاء لي قبلاتهم عندها. وكذالك حتا هيا دوك الخواطر لي كانت كتكتب فكتاب ديالها رجعات كتكتبهم وتحطهم فالصفحة الخاصة بيها وجميع ناس كيتفاعلو معاها..
فكل مرة ملي كطلع تشوف زياد كتصور معاه وهيا مبتاسمة وتخبي تليفون الا شافت شي حد جاي.
حتا امين مقال حتا كلمة خلا داكشي بينو وبينها.
فكل مرة ملي كتكون جنب زياد كتوريه تصاورهم وتوريه تليفون وتحط ليه صبعو فالشاشة وهوا فرحان والريوڭ هابطين مع فمو
كتشوف فيه نريمان بالآسى وكتقول فنفسها يريت لو كان بصحيحتو كون راه خرج ولا راه كيهضر معاها ولا كيلعبو ..
قلبات على فيس بوك د هناء ملقاتوش عيات متذكر شنو كانت دايرة ومعقلاتش.
طلبات الصداقة كيكثرو يوما كتقبل فقط البنات ودراري كتحذفهم ويلا لقات شي مسج من عند شي ولد مباشرة البلوك..
دازو ايام وشهور وهيا ديما مخبعة تليفونها فبيتها واخا كانت عمتها كدخل ليه وجداتها كيبقشوهاا معمرهم لقاو تليفون حيت ديما كانت كتخبيه فالمخدة ديالها .. دازت 7 شهور ونريمان كتخدم مع سعاد ف صالون مرة الحراكة مضورة مرة ميتة ريال مكتشوفوش من عند سعاد من غير نڭير والغوات والضرب . ديما مبردة غدايدها فنريمان..
كان رمضان وسعاد فالبيت كتحسب الفلوس مكاين غا زرقة فوق الزرقة كتستفهم فالمجر شداتو بالساروت وخرجات جلسات فالصالة حدا ولدها لي كيبلغ من العمر 15 سنة شاد تليكومند مغنزر فتلفازة وبنتها لي عندها 12 سنة شادة طابليط فيديها قالت فضيلة وهيا كتشوف فالولد : وشتي اودي مزيان بعدا ملي جيتي دوز رمضان مع معانا داك المسخوط عمركم علينا حتا...
قطع كلامها وهوا مخرج عينيه فيها : باباا ماشي مسخووط مالك ساخطة عليه نتي كتسرفي عليه ولا مسكناه فابور!
فضيلة : شناهوا شفتك كتجاوب معايا نتا قد جدر فخدي وكترد علياا الهضرة لا مزياااان تبارك الله.
سعاد : امي غتسكتينا ولا لااا. انا بمشقة الأنفس باش رجعو عندي ولادي مشفتيش اش دوزت عليهم يهديك الله خليناا نعيشوو هانيين..
خرجات نريمان من الكوزينة هازة سوبيرة د الحريرة حطاتها فالجنب ورجعات الكوزينة تسخر وتحط ملي ميصبح الله الصباح وهيا واقفة كتشقى وطيب..
آذنات المغرب فطروا وهوما متبعيين البرامج الرمضانية حتا كملو وناضت نريمان تجمع الطبلة...
دخلات كتغسل المواعن وهوا يتبعها ولد سعاد مد يدو لابابو كيغسل يديه عمر فمو بالما وتفل على المواعن لي محطوطين تما
جعرات سعاد اكثر من قياس رجعو فيها عشرة شدات نريمان وبدات كتخبط فيها وهيا كتردد : بنت سوووووق بنت ق *** منين جاوك الفلوووس منيييين هاااا دوي شكون عطااااك هاد الفلووووس منين جايبة هاد تليفون
وهيا كتندب ليها فوجهها وتجر ليها فشعرهاا بطريقة وحشية خافت فضيلة وقربات عند سعاد كتفك البنت لي كيشوفوها النفس غتقطع فيها كذالك ولد سعاد قرب عند مو كيجر فيهاا بكل ما فجهدو باش تبعد على نريماان . رجعات فضيلة كتجر سعاد وترغب وتزاوك فيها وهيا دفعها سعاد حتاا جات على ضهرهاا
خرج ولد سعاد كيجري حل باب لناس باش يدخلو يعتقو الروح..
كان زياد فديك اللحضة كيحرك الزر دالكرسي خرج بشوية على وسط الدار وهوا كيسمع صوت ختو كيقطع القلب..
شداات سعاد نريمان من شعرها وزدحاتها على وجهها بكل قوة مع الحيط حتا تسمع "طراق"
والدمايات هابطين مع نيفها بغزارة
فديك الأثناء تسمع صوت مجهد تلطخ مع الدروج وهابط كيتكركب كلشي طلع كيجري لقاو الكرسي المتحرك د زياد هابط كيتكركب مع الدروج وزياد كولو دمايات..
اتركوني لوحدي لا أريد أحد. سأعيش كما كنت سابقا انا " اللقيطة " الوحيدة المجروحة الحزينة والكئيبة اتركوني ابكي لوحدي فراقني الغالي قطعة من قلبي ذهبت ولن تعود لمن سأعيش الآن؟ لمن! اتركوني ابكي لوحدي لا أريد تعاطف احد لا اريد ان اسمع صوت احد .. تركت لكم الدنيا لم اعد اشتهي سوى الموت لم اعد اتمنى سوى نوم عميق جوار اخي.. اخي هل تسمعوني! اين انت! يا قطعة من قلبي انني في امس الحاجة لك انني "بأجنحة منكسرة" يااا اخي ارحمني . انني اختنق قلبي يتمزق لم اعد استطيع تحمل فراقك فقط اريد نوم جوارك اخي.
جالسة على ناموسية جامعة رجليها عندها لابسة جلابة بيضاء وزيف طويل على راسها مجموع بطريقة عشوائية وفاصمة على نيفها . كتشوف فنقطة وحدة فالأرض مكتحركش عينيها وجهها الشاحب لي مزال علامات الضرب والجرح مرسومين عليه ..
دخلات رشيدة هازة سينية فيها زلافة د الصوبة وشوية د الكفتة مشوية حطاتهم حداها على نموسية وجلسات جنبها.
كتدوز يديها على راسها جراتها عندها كتبوس فيها وقالت : حبيبة ديالي اجي تعشاي كولي شوية عفااك متخليناش نتشواو عليك حتا نتي الله يرضي عليك ابنتي.
مرداتش عليهاا وبقات على نفس الوضعية رجعات تكلمات رشيدة وقالت : نريمان مكتاب الله ابنتي وسعاد هاهيا غتربى على هادشي لي دارت وخوك ابنتي بغاه الله وداه الحمد الله على اي حال ماشي حنا لي بغينا ليه هادشي ولكن القدر دالله واش حنا نعارضوه.. كولي ابنتي عفاك الله يرضي عليك متخليناش نتشواو عليك حتا نتي الله يرضي عليك..
مرداتش عليها نريمان وناضت رشيدة خرجات برا كتردد فمها لا حول ولا قوة الا بالله.
جلسات حدا الزوج ديالها واولادها وقالت : عوتاني مبغاتش تاكل كتر من شهراين وهيا فهاد الحالة مور موت خوها مسكين وبزز باش تاكل معرفت اخرت هاد البنت كي غتكون..
تكلم عمها وقال لولدو : واش سهلتي طبيب نفسي . انا هادشي فكرت فيه ولكن منين غنجيب باش نخلص ليهاا الحصص .
امين : انا غنشوف صحابي راه غيعونونا عندهم واحد، الجمعية د اعمال خيرية غنطلب منهم يساعدو نريمان اولا هوماا يتكلفو بالحالة ديالها بلاما يعطيونا حتا ريال.
رشيدة : الله يرضي عليك اولدي بعدا نعتقوها مسكينة كتقطع فالقلب حسبنا الله ونعم الوكيل فلي كان حيلة وسباب... نديو فيها آجر بعدا
وصال : ودابا شحال حكمو عليها ابابا
قال وهوا فالتلفازة : 4 شهور
رشيدة : قليلة فحقها تستاهل ملي خلاقو هاد وليدات وهيا مدوزة عليهم المرار دعيناها الله
شافت فيها الزوج ديالها وقال وهوا عاقد حجبانو : صافي قلبو علينا الهضرة ونتوما تفطرو بيها وتغداو بيها وتعشاو بيهاا مالنااا سكتو ولا نوضو تنعسو.
الساعة 2:00 ليلا
ناعسة على جنبها وهيا كتنخصص وتنين ودموع هابطين مع عينيها وجسمها عرقااان جبهتهاا طالعة معاها السخانة وكترعد فبلاصتها. كتخرج صوت خافت من فمها كترددو : م تخلي نيييش اهئ اهئ اهئ ع فااااااك زي زيااااا د م تخ لينيييش ..
كان واقف جنبها أمين بملامح حزينة كيشوف فيها ويتحصر على الحالة لي وصلات ليه انسانة بغاها من قلبو منذ الطفولة كان ديما حتا هوا عندو حلم بسيط وبزاف انه يكمل قرايتو ويتوضف ويمشي يكري ويتزوج ب نريمان لي اصغر منو بعامين. كان ديما كيسمع غواتها كيشوف عذاب لي كدوز منو ولكن مكان قادر يدير حتا حاجة وشحال من مرة كان كيبغي يهبط يفكها ولكن كيحبسو باه وكيقوليه. وحنا مالنا سوقنا فيهم يضبرو راسهم...
واقف شاد فيديها كيتأمل ملامح وجهها البريئة اول مرة يقرب ليهاا كتر ويشوف جمالها لي مغطيه الارهاق والمرض وعلامات الضرب. كيتأمل فيها وعينيه مع وصال حاضي معاها عنداك تفيق واخا نعاسها تقييل ولكن خايف عنداك تفيق وتشوفو شاد ف نريمان. قرب ليها كتر حتا وصل لوجهها بغا يبوسها فحنكها وهوا يرجع اللور شد يديها بجوج بين يديه وطبع قبلة حنينة على يديها صغريوريين...
رجع لبلاصتو وهيا كتردد فوذنيه كلمة " خويا "دوز يديه على وجهو كيشوف فالأرض باغي يخرجها من هاد الحالة النفسية لي كدوز منها.. قرر انه يدير كل ما فجهدو باش تشافى وترجع صحتها حسن ملي كانت ويعوضهاا على كل ماا فاتهااا ويحقق ليها احلامها منعسش ديك الليلة
وقرر أنه ينوض يصلي ويدعي يشافيها ويخرجها من الحال لي هيا فيه..
حتا وذن الفجر صلا وزاد دعى الله تكون من نصيبو وتبغيه كيف كيبغيهاا هوا..
فصباح مشرق حالة نريمان عينيهاا مكتنوضش من بلاصتها غير البكا ونفسية مدمرة
دخلات عندها رشيدة كتنوض فياا باش تخرج تفطر معاهم
عياات متحز فيها ولكن غير كتحرك راسها بالنفي وكتمسح دموعها وهيا كتنخصص خرجات رشيدة برا وجلسات معاهم فطبلة د الفطور وامين كيتسناها اش غتقول
رشيدة : والو البنت الا بقات هاكاا غادي تموت ولا طرا ليها شي موصيبة بزاااف على هادشي بزااااااف
العم : مشكيلة هادي
امين : انا اليوم نشوف دوك صحابي ونرد عليكم فالليل.
خرج امين من دار عقلو مشوش مبغاش يمشي لافاك فصباح ومشا.. باغي يشوف مساعدة باش يداويها دغيا وترجع لصحتها حسن من لي كانت طلب مساعدة من اصدقاء ديالو وجمعو ليه شوية دالفلوس وحتا من الجمعية ساعدوه من بعد اسبوع دوزاتو نريمان فالغوات بليل كتنوضهم مخلوعين وتقياا غير الدم تزادت حالتها تضهورات كتر.
تخلعو عليها وامين نفسيتو مرضات مع نريمان..
بعد ليلة كحلة لي دوزاتها وهيا مريضة كيف صبح الحال خرجوها كتمشى بشوية شدو طاكسي وداوها لطبيب بعد الفحوصات وتحاليل تبين ان الدم محقون فشرايين القلب ..
خرج ليها دواء ووصاهم انها تبعو اومتجاهدش وما تعصبش ولا غادي تضطر حالتها تزيد تسوء وداك الساعة مينفع معاها لا دواء ولا عملية ..
تأسف الطبيب لحالتها وأكد عليهم ضروري تبع مع طبيب نفسي ف اقرب وقت..
وحتا فدار خاصهم يديرو معاها الخاطر ويسايسوو معاها حيت لي داز عليها ماشي قليل.
دوزات نريمان ايام وهيا كتبع الدواا ومزال مكتبغي تجلس مع حد باغا غا العزلة وسكات وكل مرة كتمشي لحصة عند طبيب نفسي كتبقى غير تبكي واخا كتبغي تهضر مكتقدرش ومكيبغيش حتا هوا بزيد يفورصي عليها حيت علموه بالحالة ديالها..
كل ليلة كيزورها أمين وهيا ناعسة ففراشها يطلل عليها ويرجع يخرج يمشي لبلاصتو ويبدا يخمم وفنفس الوقت خايف يخسرها..
فصباح جديد ناضت نريمان مع 6 صباح دخلات لطواليط دازت من حدا المرايا وهيا تعاود ترجع ليها كتشوف وجهها لي تغيرو ملامحها وكتشوف فالفاصمة لي على نيفها ..
رجعات خرجات بحالها تكمشات فبلاصتها ضورات عينيها لجهة وصال لقاتها ناعسة وهيا تنوض طلعاات بشوية لسطح وقلبها كيضرب الجو زوين وهادئ قربات من الصور د السطح وهيا طل على الزنقة بقاات ربع ساعة وهيا ساهية. شافت موراها مكاين حتا شي حد. هزات واحد سطل د صباغة د حديد خاوي كان محطوط تما.
حطاتو وقفات عليه كتشوف الزنقة وهيا ترمي يديهاا بجوج هزات رجل وخلات غير صبعان درجل فرق السطل الا تدفعات غير شوية غتجي فقاع الزنقة ..
رمات السطل برجليها ويلاه بغات ترمي راسها وهيا ترجع باللور جات مزدوحة على الأرض حتا تجردات من يديها ورجليها.
تكمشات فواقت القنت وخدودهااا حومر طايبين كتكلم بصوت متقطع خافت : ربي انا باغا نموت. عندي غير طلب واحد اربي والله منعاود نطلبك مرا خرا غير هادي وصافي يارب نموت ياربي نموت برضااك عارفة مخصنيش ندير هاكا ولكن عييييت تقهرت اربي تقهرت هانتا عالم بيااا حتا واحد مكيشوفني من غيرك حتا واحد ماا مطالع على قلبي من غيرك. علاش اربي متموتنيييش وداااااابا داباااا اربي داباااا ديتي مني خوياا ديني حتا اناااااااا اربي عفااااك ديني عفااااااك اخر طلب
زادت فالبكا والغوات وهيا طلع رشيدة وامين كيجريو لقاهم تما شدو فيها وهبطوهااا وامين شادها من اللور بلطافة. الحالة ديالها كتزيد تسوء كتر
حاولو معاهاا وملقاو جهد..
بقاو متبعين ليها مع الطبيب النفسي شهر وشهراين ودخلات فالشهر ثالت بدات الحالة ديالها شوية كتحسن. مبقاتش كتغوت بالليل حتا مع الدوايات وكل مرة غاديين بيها لعند طبيب كيطمنهم ان صحتها بدات ترجع كيف كانت.
رشيدة واخا حاسة بمسؤولية كبيرة عليهاا وعيااات مبقاتش قادرة تصبر واخا هكاك كتبرك على رااسها . توكلها وتهلى فيها وملي تخرج تشري ليها..
وحتا امين لي هاز مسؤولية ديال قرايا.
لافاك ومن القرايا يمشي يهز،
الصنادق فالسوق ولا يشري الخضرة رخيصة ويعاود فيها البيع باش يصور مصيرف. يوميا كيدخل ليها السقاطة شكالاط والحلوة ويسولها اش باغا وشنو محتاجة. رجع كيخرجها معاه يساريها واخا ناس الريف شوية قاصحيين معندهمش داك التحرر الاحترام والولد ميهزش عينو فباه هكاك طرا مع امين لي ديما كيتسنى باه حتا يخرج من دار عاد يخرج نريمان يديها لحدا البحر. ويساريها فالمدينة ويوكلها ماكلة دالزنقة لي عزيزة عليهاا ويشري ليها لاكلاص. ديما كان ميضرب تمارة ديال البيع ولا يهز الصنادق ولا يمشي يصبغ لشي ناس غير باش يصور داك المصيرف. ويخرجها يتهلى فيها..
لحضات رشيدة هاد المعاملة لي كيدير امين مع نريمان ومبغاتش تهضر غير ساكتة كتسناه يجي وتهضر هيا وياه على الانفراد...
جالسة حداها وصال كتكونيطااا وفنفس الوقت كتهضر بعصبية : انا كان خارج فياا غا بالعصى عمرو خرجني ولا شرا ليااا وهيا الالة عندها الزهر معاه وشتي سعداتهااا الله يعطيني من زهرهاا شوية. معرف هاد ولدك منين كيجيب بعدا دوك الفلوس ياك غاكيقرا وبا مكيعطيه ريال ايوا م.
امين : امي باش نجيك من الاخر وسمحيلياا حيت ممولفش نقولك بحال هاكا انا كنخاف على نريمان كتر من اي واحد والصراحة هيا راني كنبغيها ومكرهتش من اليوم نتزوج بيها وعاد نكمل قرايتي . بنت محتارمة وراكي عرفاها اماما بلاما نعودلك اناا.
رشيدة : شوف خوي راسك من زواج ديها فقرايتك وخدمتك راك مزال صغير اولدي
دخلات نريمان لبيت وهيا مقلقة من تصرف لي دارت وصال معاها. رجعت حساسة بزاف غير الا شفتي فيها تحس بالقهرة وبلي متقلة عليهم وغير مرغوب فيها معاهم وبلي قنطو منها
دخلات لطواليط وهيا دوز من حدا المرايا قرباات ليها وهيا كتشوف ملامح وجهها الذابلة والفاصمة لي دايرة على الأنف ديالها. حيداتها وهيا كتشوف فالأنف ديال المعوج وبلاصة د الخياطة كتبان رقيقة بحال شعراا. شدات ففمها وهيا كتبكي .كيف العادة ديما كتمشي تشوف نيفها لي من بعد الحادثة لي وقعات ليها وسببات ليها كسر فالأنف ديالها خلا وجهها بحالا مشوه تبدلو دوك الملامح الجميلة .. رجعات الفاصمة ديالها لي كتغطي بيها نيفها كولو..
رجعات لبلاصتها وهي مدمرة من الداخل ديالها غير كتبكي وفيلم لي عاشتو فديك ايام وفقدان خوها فاق ضميرها من جديد ورجعات للحالة لي كانت فيها غير كترعد والمشهد قبالت عينيها
🎬 #فلاش_باك
من شدة الحريق لي فيها خرجات بنيفها كيشرشر بالدم مفروع برا لقات الناس فالدروج مجوقين على زياد دخلات وصطهم كدفع فيهم وهيا ملهوفة باش تشوف خوهاا لقااتو فحالة لا توصف والدم مغطي وجههو وراسو .. حلات فمها وهيا كترعد وغوتااااات غوتة تسمعات لربي لي خلقها زياااااااااااااااااااااااااااااااااااااادددد
شافو الممرضات فبعضياتهم وهيا تقول وحدة فيهم : حبيبة صبري الله يرضي عليك وقوي ايمانك راه قدر الله تعالى
نريمان : بغيت خويااااااا فين خويااااااااااا عطيوني خويا نشوووووووف. غنمووووووت الا مشفتوشش والله حتا نموت
الممرضة : سمعيني عفاك صبري راسك
نريمان : اه نصبر راسي ولكن قوليلي فين خوياا فين غير قوليلي عفاك؟
الممرضة : واخا ولكن عفاك متغوتيش راه مكتاب الله ان لله وانا اليه راجعون خوك مات احبيبة صب..
قبل متكمل كلامها ناضت نريمان خارجة كتجري كتغوت وتنادي بالاسم ديالو خلات السبيطار كولو مصدوم ومأثرين بيها حسو انهاا متشبتة بيه كتر من قياس ومقدراش انها تخسرو شدوهاا بزز ورجعوها لبلاصتها وهيااا كتغوت لربي لي خلقها ضربو ليها شوكة حتا ترخات ..
جا عمها وامين لطبيب وخبروهم على الحالة ديالها طلبو منهم انهم يشوفوها واكدو بلي بغاو يشوفوها واخا رفضو حيت الحالة ديالها صعيبة وحرجة
تكلم عمها وقال : شوف اسيد الطبيب اليوم غنخرجو الولد ندفنوه راه الا محضراتش على موت خوها غتزيد، حالتها تسوء كتر غتقولك دفنتو خويا وانا مكيناش ويعلم الله اش يطرا فيهاا وراكم عارفين فخدمتكم انا بغيت نجي نخرجها غا تحضر بعدا على خوها ويحن الله ديك ساعة نردوها..
فديك الأثناء دخل الطبيب عند نريمان
كيشوف فيها ..
جلس جنبها وهيا مصدومة وكتبكي وترعد تكلم وقال وهوا متأسف على حالتها : نريمان سمعيني عفاااك كتبغي خوك ياك ! حنا مسلمين ياك! مؤمنين؟ كنرضااو بلي قسم لينا الله تعالى وعارفين ان كل حاجة كنعيشوها الا وربي هوا لي مكتبها لينا.. خوك توفى انريمان الله يرحموا ويووسع عليه تبغي تشوفي خوك فرحان فقبرو؟ ومرتاح؟ مخصكش تبقااي تبكي راه حتا هوا كيحس بيك شوفي تشجعي عفااك.. اليوم غيدفنوه وحنا مبغيناش نحرموك ونشدوك ومتشوفيش خوك قبل ميتدفن. الا كنتي باغا تشوفيه
حركات راسها بالايجاب بالزربة قبل ميكمل كلامو وقالت : اه اه اه غير وريوه لياااا فين خويااا فين
صبري راسك هوا راه رتاح من هاد الدنيا لي كلها غدر تخايلي راسك كتاب ليك ومرضتي بشي مرض لسمح الله ومبقيتيش تقدري توقفي كاع ونتي براسك خاصك لي يساعدك اولا كتاب عليك ومتي شكون ديك ساعة غيحن فخوك؟ شكون غيهزو ويكون بيه ؟ واش مخممتيش انه غيموت موت البطيئ بالجوع والمرض الخ! تبغي خوك يعيش هكاك !
نريمان بنتي الا بغيتي تشوفيه سيري توضااااي الله يرضي عليك واجي نوريوه ليه راه ابنتي مغسل الله يرضي عليك.
بزز منها دخلوها لطواليط، وهوما كيمسحو ليها عينيها ويوصيوها متبكيش تما حيت ممزياانش . خرجات موضية ومشات نيشان لجيهتو عراو ليها على وجهها يلاه شافتو وهيا تجيها بحال الصاعقة. مقدراتش تسكت ولا تصبر على فراقو كتشوفو بحال شي ملاك ناعس وجههو منور من عند الله.
خلاوها كتبوس فيه وتطفي شوقهاا لي ماا بغا يتطفى شدوهاا بزز منها وغطاوه. بعد صلاة العصر صلاو عليه وداوه دفنوه كانت أسوء ليلة فحياة نريمان لي حولات تنتاحر من السطح لولا لطف الله كون راهاا مشاات.
" المحكمة " بعد الجلسة الأخيرة حكمات المحكمة على سعاد ب 4 شهور حبس بتهمة الضرب والجرح..
وهادشي مريحش قلب نريمان وعلى عمها ورشيدة ولادها لي شنو هيا 4 شهور؟ كيف والو قدام سنين لي عاشتهم فالعذاب..
دخلات نريمان ف حالة إكتئاب حاد وحلتها تضهورات كتر دوزات شي ايام فسبيطار دالدولة لي كانت فيه .. وفديك الأيام كانو دارو ليها عملية على مستوى الأنف لي تصاب بكسر صعيب .. واخا بديك العملية الا وبقاا الأنف ديالها عوج
قرر عمها انه يتكلف بيها ويخليها عندو حتا يدير ليها الله مسلك دالخير. كان كيقول ماشي مشكيل عام عامين حتا 3 سنين تزوج وتمشي بحالها... داكشي علاش خلاها عندو واخا هوا حياتو كاملة مكانش قادر يتكفل بولاد خوه..
ملي تحكم على سعاد بالحبس غدرات امها الدار مرجعاتش ليها فمرا وبقات غير مشدودة . وحتا سعاد كملات أشهر دالحبس ومرجعاتش فمرا لا لدار ولا لصالون...
#العودة_إلى_الحاضر 🕯️
وهيا كتذكر الأحداث لي عاشتهم وقلبها مزير عليها هزات الدواء ديالها شربااتو وتكات على الفراش وصورة د زياد قبالت عينيها.. حلات المجر لي جنبها وجبداتها منها تليفونها لي ديما مطفي مرة مرة تشعلو غير باش تشوف صور خوها وتبقى تقلب فيهم وحدة بوحدة وهيا كتبكي وتذكر دوك ايام لي عاشتهم معاه..
مزال مستمرة فالحصص مع الطبيب نفسي. وامين كيدير مجهود ديالو باش يوفر دوك الفلوس لي يخلص بيهم حصص العلاجية. شوية كتحسن صحتها وكتهدى نفسيتها واخا ماشي 100%. ملي كتكون مع المجمع د ناس كتكون بخير غير كتكون فعزلة بوحدها كيفيق ضميرها من جديد...
فكورنيش جنب البحر واقفة نريمان وأمين بعاد على بعضياتهم شوية.. هوا كيخطف شوفاات منها كل مرة وهيا عينيها غير مع البحر وناس الغاديين والجاايين غاديين جبد أمين تليفون ديالو وقال :
اا نريمان اااام وااخاا نديرو انا وياك شي سيلفي
نريمان : اه واخا
قرب منها شوية وهوا يهز تليفون ولتاقط صورة .. كان هوا فيها مبتاسم اما نريمان غير كتشوف وعينيها ملياانيين حزن..
فالدار رشيدة فالسطح كتنشر الحوايج وصال حداها كتهضر بكل عصبية : ولدك تفلس هاا كل مرة مخرجهاا يا لالة عاجبو الحال . وانااا انا لي ختو مكانش كيعتقني حتا بستيلو وهيا يشري ليهاا ويضحك ليها وانا ديما كان قاتلني عصى الا لقاني فالزنقة ولا معايا صحباتي واخا فدار
الأب : وشكون هادي بعدااا ؟ شوف براكة متفلا على بنات ناس وديهاا فقرايتك حسن لك براكة من تبرهيش ونتي دخلي سوق راسك لي فيناا كافيناا مفينا منزيدو صداع من الجنب.
يلاه نوضو تڭعدو.
عرفات نريمان ان وصال مبقاتش حملاها وعليها كانت كتهضر وكتغيير منها ومكيعجبهاش الحال ومضيقة عليهم فالدار وحسات ان رشيدة حتا هيا مبقاتش كيف كانت بالمحبة ديالها والحنان والعطف كيف كانت. رجعات كتشوف راسها متقلة عليهم كتر من القياس..
جلسات فطرف النموسية كتمسح دموعها وكتخمم فين تعطي راس وشمن باب الدق وشكون لي غادي يرحب بيها وشكون لي غادي يأويها ويتهلا فيها وفين غتجمع قوتها باش توقف على رجليها كتحس براسها مقادرة دير حتا شي خطوة عاجزة كليااا.. منعساتش ليل كولو .. وكتحاول تلف همومهاا فالفيس فمنتصف الليل صيفط ليها امين مسج فالفيس كتب فيه : نعساات الأمورة ولا مزال.
دازو أيام فدار عم نريمان لي نهار على نهار كتنقص ديك المحبة وداك اهتمام وداك العطف والحنان ودفئ الأسري لي كانت عايشة فيه نريمان طوال هاد الفترة لي كانت معاهم...
رجعات كتعيش اضطربات نفسية صعيبة الوحيد لي متبدلش عليهاا هوا امين كل ليلة يصيفط ليها ويسول فيهاا ويشارجي ليها تليفون ويقوليها دخلي يوتيوب تفرجي شي فيلم تلهاي فيه. كان كيصيفط ليها نكات باش ضحك او يعاود ليها شي قصة او شي موقف غير باش تناسى ونفسيتها تهذن ولكن يوم بعد يوم كتشوف هادشي غير كيتزاد....
بعدما تعشاو جالسة رشيدة وصال كيتفرجو فالفيلم وامين حداهم كيكتب ونريمان مربعة يديها جالسة شافت عمها كمل من الصلاة وجلس فالارض على الزربية طالق رجليه وشاد قرآن بيديها غيبدا يقرا وهيا توقف حدا راسو وقالت :
جوبها بعصبية وهيا تخرج من حداه حانية راسها وامين متبعها بعينيه معجبوش طريقة لي هضر بيها باه مع نريمان .. حط كتوبة وهز تليفون ديالو وصيفط ليها مسج لقاها سادة... بغا يدخل عندها ولكن ميقدرش.. بقى جالس تما حاضي باب غا ايمتا تخرج والو حتاا ضربات 12 ليل ودخلات وصال وشدات الباب قطع، ياسو صافي معندها خروج..
اما نريمان ملي دخلات لبيت وهيا كتبكي وتشهق راه القهرة لي كدوز منهاا لا توصف..
بردات على قلبها بالبكا.
وحلات المجر جبدات منو برا فيها اوراق دراسية ديالها وعقد الازدياد والحالة المدنية وكاع الاوراق لي خلاهم باها فالدار.
جابهم عمها من عند فضيلة قبل متخرج.
جمعات وريقات ديالها كلهم فميكة وزادت خشاتو فكيس د توب وحطاتهم تحت المخدة لي كتنعس عليها طفات تليفون ديالها ودارتو يتشارجا ونعسات..
حتا فاقت مع 3 دليل لقات تليفون 100% حيداتو من شارج وبقات فبلاصتها كتخمم فين تمشي هرب عليها نعاس حتا وذن الفجر وبدا يبهر الحال ناضت بشوية خرجات كتسلت دخلات لطواليط غسلات وجهها وقضات حاجتها ورجعات لبيت وصال كانت ف سابع نومة..
حيدات نريمان بيجاما د وصال وحطات ليها حوايجها كلهم لي كانت كتعطيها تبدل بيهم مصبنين ومطويين خلاتهم لها ولبسات بيجامتها قديمة ولبسات فوق منها مونطو لوات الزيف، على راسها ودارت القب ديالها حيت كانت الشتاااء والريح خيط من السماء. هزات الوراق ديالها لي كانت حطاتهم تحت المخدة وخرجات كتسلت حتا لباب دار هزات صباطها لي كان شراه ليها امين داير بحال ليبوط ديال شتاء لبساتو وهبطات فالدرج حتا وصلات لباب دالزنقة تلفتات كتشوف فباب جداتها واالذكرياات المريرة لي دوزت قبالت عينيها تنهدات وخرجات مع الباب شدااتو بشوية وعطات رجليها الخلفة والشتاء كطيح عليها.
حتا بعدات على دار غادييا فشوارع مدينة الحسيمة شوارعها خاويين ناس قلال لي كيجريو كيتخبااو من الشتاء وهيا غادييا مع جنب جنب كدرق.. للحضة ندمات علاش خرجات وبدا يدخلها الرعب فقلبهاا والداخل ديالها كيقولها هانتي خرجتي ايوا فين غتمشي ومن جهة خرا كيقولها غا كملي غا زيدي راسها مشوش ومتوترة كتر ولي داز من حداها كتخاف منو وتبعد..
حتا فترات الشتاء وجلسات فواحد الجردة كرسي ديالها فازڭ..
مسحاتو بيديها نشلات ديك الماا وجلسات كتدعي فنفسه ربي يعاونهاا تلقى شي حل واخاا كيبان ليهاا معندهاا فين تمشي.
لي كيدوز من حداها كيبقى يشوف فيها ويقول لا حول ولا قوة الا بالله كلشي حاسبها متشردة ملامح وجهها الذابلة وزيد عليها الفاصمة لي باقا فنيفها مبغاتش تحيدها حيت تعقدات من نيفها العوج رجعات كتفضل تغطيه بالفاصمة ومتخليهش يبان.. وملابسها سروال د بيجاما لي كيبان ومونطو باهت .. تحرجات من اعين الناس وناضت كتمشى بالزربة وعينيها فالأرض..
كل تفكيرها فين غتعطي الراس وشمن اتجاه تشد.. معندهاش عائلة ومعندهاش معارف ومعندهاش صديقات... شنو لا!! عندهااا هناء!
تفكرات هناء لي مع الضغوط والمرض والموت د اخوها خلاوها تنسى كلشي وتذكرات ملي كانت هناء، كتجي لعندها قدام الباب تسناها حتا تخرج ويمشيو المدرسة بجوج وملي يخرجو ترجع معاها وتقربها حتا الباب عاد ترجع بحالها تذكراات انها عندها صديقة مخلصة ووفية وكانت كتمنى ليها غير الخير وديما كانت، كتقوليها اجي عندنا لدار
وتذكرات ملي جاو يخطبوها ولكن هيا رفضات واخر كلمة قالت ليها هناء نسايني!!
تفكرات ديك الكلمة وهيا توقف بعدماا كانت متوجهها لدار د هناء لي كانت مشات ليها غير مرة وحدة فواحد نهار مجاش الأستاذ ومشات نريمان مع هناء لدار من تما بقات عاقلة...
بقات واقفة فالشارع مقدراش تزيد خايفة تمشي وتجري عليها هناء .. بقات تالفة معرفات مدير وزادت كملت طريقها حتا لباب دارهم. ترددات وقربات صونات فالباب وسمعات صوت راجل كبير كيقول شكون من الداخل.. حل الباب وهوا يتكلم بالريفية :
Yaji ma thazouth khchi haja؟
نريمان : سلام عمي بغيت هناء واش كاين هنا!
دخل وعيط المرا ديالو هبطات كتجري.
غير شافت نريمان وهيا تعقل عليها سلمات عليها ورحبات بيها فدارهاا دخلاتها.
نريمان : بصح!! تبارك الله مزياان الله يسهل عليها ويكمل عليها بالخير هيا مبقااتش هنا
السيدة : امين ابنتي حتا نتي ربي يجيبلك ولد ناس لي يستاهلك. ايوا ولد خويا عجباتو وهضر معاها وحتا هيا بغات ايوا وزوجناهم بنت كلما تزوجات بكري كلما حسن ليها
نريمان : اه بصح عندك الحق
السيدة : لقيتيها عاد هضرات معايا راها جاية فالطريق جاها الوحم صعيب مكتبغيش تجلس فدارها ايوا كيف بقات يماك وعمتك مالين دار كلشي لباس
حركات نريمان راسها وقالت : غتعطل وقيلة ياك
السيدة : لا راها فالطريق شوية وتكون هنا.
ما هيا الا دقائق قليلة صونيت فالباب فتح باها دهناء سلمات عليه ويلاه دخلات لصالة وهيا تلقى نريمان سلمات عليها ورحبات بيها واخا باين القلق فوجهها وفنفس الوقت مصدومة من شكل نريمان كتشوف فوجهها تغيير واضح.. مبغاتش تسبق الأحداث وجدات ليهم ام هناء اتاي. وجلسو ياكلو ويهضرو فمواضيع عادية. حتا نطقات هناء وقالت : مالك وجهك انريمان معجبتينيش ياك لباس واش شي مشكيل،
حركات راسها بالنفي وبقات ساكتة وعينيهاا دايز فيهم دموع
هناء : لا لا هضري انريمان قولي مالك نتي باينة عندك شي حاجة عوديلنا مالك
.
شداتها هناء وامها كيحاولو معاها وهيا كتبكي بصمت حتا بدات كتعاود ليهم القصة من الأول حتا لأخيرة وعودات ليهم حتا ملي جاو يخطبوها هوما لي عكسوها. وخوفوها خلاتهم مصدومين ملي قالت ليهم بلي زياد مات وبلي من موراه عاشت سواد حياتها لي مزال حتا لدابا كتعيشو...
هناء : ناري وعرفتها فين والله حتا نقتلها ممسوخة لاخرااا شوفي كيف ردات ليك وجهك الله يعطيها العذاب وشنو هيا 4 شهور دالحبس تفووو هادشي كيمرض.
ودابا شنو ناوية ديري قوليلي شنو ناوية انريمان حنا صراحة كنا بغيناك لخويا وهانتي شفتي جيناا لعندكم ونتي معطيتيهش فرصة باش يتقرب ليك هوا كان غيعاون حتا خوك وانا كنت قلت ليه بلي نتي متشبتة بيه وبلي متقدريش تفارقيه وهوا وافق قالي غير تكون هيا بنت ناس وانا معاها ولكن نتي معطيتينا حتا فرصة بالزربة حكمتي
نريمان : انا مكنتش عارفة اختي هناء والضغط لي كنت عايشة فيه مغتقدريش تفهميه واخاا نشرح ليك صعيب تفهميه ركبو فياا الرعب ونتي عارفاني من هادا شحال شخصيتي ضعيفة ومكنقدرش ندافع على راسي واخا نشوف السيف على عنقي من ديما كنت باغا حتا اناا نكون بشخصية قوية وندافع على راسي ولكن راكي عرفاني اختي.
دوزو نهار كامل وهوما كيهضرو تغدات معاهم ودارت كسكروط معاهم . حصروها تبقى جالسة معاهم وافقات حيت اصلا معندهاش فين تمشي. طاح الليل
واب نريمان كيغوت على مراتو فبيت نعاس
الأب : وشكون عرفني بيها واش نصابة ولا غير كتكذب عليكم باش عرفتها انا كتقول الصح مدخلالي برانية لداري ونبيتها فداري مع ولادي واش تسطيتي غا حنا نعسو وهيا دخل عليناا لي يسوا ولي ميسوا يڭريسيناا باش نقولو حقى حنا درنا خير..
الأم : اويلي بنت معندهاا لا والي ولا تالي واش نرميوها لزنقة شمن عصابة الله يهديك واش تسطيتي ان بعض الضن اثم
بعد مجادلة كبيرة طلب منها تعطيه لاكارط ديالها او اوراق خاصة بيها لي كتبت الهوية ديالها. رفضات مراتو حيت مبغاتش تحرج نريمان. وخلاوها حتا نعساات وهزات ليها وراقيها لي معرفوش شنو فيهم. غير هزاتهم وداتهم لبيت نعاس يقلبوهم..
قلبو اوراقها والحالة المدنية لي عندها. هز الراجل تليفون وصور داكشي ومراتو حداه كتنڭر وتقوليه ينعل الشيطان. .
رجعاتهم لبلاصتهم كيف كانو ومشات لبيتها سدات الباب فديك أثناء كانت نريمان فايقة وسمعات لحوار ديالهم لي واخا كانو كيهضرو بشوية الا وفرزات منهم كلماات توضحات ليها الصورة ان الاب خايف على عائلتو شيئ طبيعي..
وشافت ملي الام هزات وراق ديالها وهيا شادة عينيها كتمثل انها ناعسة. وشافتها ملي رداتهم. امر طبيعي المهم نريمان مجراوش عليهاا وبيتوها عندهم واخاا هكاك. حمدات الله وشكراتو ولكن يوم الغد اش غيكون فيه وشنو مخبع لنريمان.
نعساات وهياا ممرتحاش كل مرة تفيق ممولفاش نعسة فدار من غير دارهم ومن غير بلاصتها .
تليفونها نهار كامل وهوا مطفي وكتقول غير غادي تشعلو غتلقى اتصال من عمها وامين ولكن هيا مبغاش تجاوب صافي دارو فيها خير. عونوها الله يجعل البركة الله يرحم من زار وخفف.
مهم تبقى الصورة ديالها نقية فعينيهم..
فصباح فاقت هيا اللولة وهناء ناعسة حداها. سمعات تخرشيش وهيا تشد عينيها. كانت ام هناء ناضت توجد الفطور. شمات ريحة القهوة واتاي بالنعناع والمسمن كيتسخن. وهيا كتعيط على هناء كتفيق فيها. ناضت هناء بصعوبة كتحس بعضاامها مفصلين عليهاا شافت فنريمان لقات عينيها مسدودين. يحساب ليهاا ناعسة وناضت لعند امها الكوزينة بقاو كيتهاودو ويضحكو. ونريمان كتسمع لكلامهم واش غيتهضرو عليها ولا لا..
ولكن مجبدوهاش من غير الأم قالت لبنتها سيري فيقي البنت تفطر..
وداكشي لي كان نوضات هناء نريمان وهيا كتعنق فيها وتبوس. جلسو كيفطرو مجموعين مم غير الاب د هناء لي فطر فالكوزينة وخرج..
نريمان : ايوا اختي ارض الله واسعة نمشي نقلب على رزقي حتا يحن الله
هناء : سمعي بلامااا تعصبيني واناا حاملة غتجلسي معاناا حتا نشوفو شي حل راه معندك فين تمشي فهاد الشتاا والبرد، ومكاين لي يدخلك ومكااينة حتا الخدمة باش ديباني مهم صبري شوية. فديك الأثناء دخل شاب متوسط القامة شعرو زعر وعينيه قهويين لابس مونطو كحل وسروال د جين وليبوط رجالي .. كان شبه امو وهناء. شافت فيه نريمان .. اه هواا هوا هادا لي كان جاا يخطبها ورفضات انها تزوج بيه غير شتف البراني فالدار وهوا يقول سلام عليكم ومشا الكوزينة وقال لختو الصغيرة بالريفية جيبيليا الفطور. ناضت داتليه الفطور. اما نريمان ناضت بغات توادع معاهم وهوماا يحبسوهاا
نريمان : ختي انا منبغيش نخلق ليكم شي مشاكيل.
مهم نتوما بيتوني عندكم هاد الليلة ايوا نطلقاو فساعة دالخير
الأجنحة المنكسرة الجزء الثاني
محتوى القصة
التنقل بين الأجزاء