الأجنحة المنكسرة الجزء الثالث

جلسو حدا بعضياتهم وانطلقاات رحلة...

نريمان فديك الوقيتة تخلطو عليها. الحزن.. والخوف .. وراس مشوش وعينيها مدمعين كتشوف راسها كتغادر المدينة لي تزادت فيها وكبرات فيها وعاشت جميع المأسي ديالهاا ودفنات فيهااا اعز ماا تملك فالدنيا..

.... مالك ابنتي ياك لباس

نريمان : لا والو باس

..... مال نيفك ياك شي باس مكاين

نريمان : غير واحد الحادث كان طرالي وصافي

.... امم ( كضورعينيها) وشحال غتبقااي فكازا

نريمان : معرفتش على حسب

..... واش غير مسارية ولا خدمة

نريمان : بنفاد الصبر) عاد غنقلب على خدمة الا لقيتها

...... واش كتقلب على خدمة!!

نريمان : بتنهيدة) اه ان شاء الله الا لقيت

.... وشنو بالك تخدمي عند واحد السيدة هيا كتشد بنات بزاف وكتفرقهم على الديور؟

ضارت عندها نريمان وقالت : نخدم فالديور؟؟

..... اه ياا وشنو حسن ليك

نريمان : لا لا الله يجازيك شكرا

..... وفين واليديك واش فكازا ولا فالحسيمة

...... الصمت

..... كيخليوك تسافري بوحدك بعدا؟

نريمان : ماتو شحال هادي اشريفة الله يهديك بلاما تعاودي تسولي مرة خرا

..... ايوا مفيها باس غا كنسولك

حركات ليها نريمان راسها وبقات ساكتة وحتا المرا معوداتش هضرات.

بقاات نريمان كتخمم وهيا كتشوف فالطريق حتا داها النعاس.. وصل الكار المحطة د ولاد زيان فكازا.

والشتاء خيط من السماء وناس كيجريو وطاكسيات قلال.

خرجات نريمان ولسقاات فالمرا خايفة من الجو د كازا والضلام لي طاح وهيا فالمحطة الدنيا عامرة وناس شي غادي شي جاي

.... ايوا غتشدي طاكسي ولا غيجيو موراك

نريمان : لا خصني نشد طاكسي نتي غتمشي دابا؟

.....اه هانا غنشد طاكسي

سرطات نريمان ريقها بزز وقالت : غنبقى بوحدي انا؟ جاني الخوف اهئ اهنننن

..... ايوا نتي قلتي عندك لي جاية تخدمي عندهم وسيري عندهم ايوا الدوزي بخير انا غنمشي وسيري حتا نتي عندااك تعطلي الليل هادا والوقت خايبة..

مقدراتش نريمان تزيد تقول لمرا شي حاجة شافتها شدات طاكسي ومشات وبقات هيا وسط الناس كضور . وقفات فجنب الطريطوار وشيرات لطاكسي وقف ليها وطلعات فيه.

...فين غتمشي

نريمان : مبقيتش عاقلة على عنوان ونسيت لاكارت فيزيت ولكن بغيت نمشي لواحد الصالون كبير دواحد السيدة سميتها جوديا صالون ديالها معروف

..... واش حماقيتي ولا وباش انا غنعرف صالون دالعيالات داكشي لي بقاالي الا معرفاااش نزلي بحالك.

نريمان : بخوف) لا منقدرش فين غنزل فهاد الليل!! منقدرش عفاااك حاول تديني لداك الصالون انا مزاوكة.

.... وااااا فهمي العربية راه انااا معارفش هاد صالون فين جااا شمن بلاصة واش انا غنبقى ندور معاك كازا كلها حتا نلقى ليك نتي هاد الصالون

نريمان : عفااك الشريف الله يسهل عليك راني جيت من الحسيمة ومعرفاش هاد المدينة جيت على شي خدمة لهناا لداك الصالون وبقيت حاصلة الله يجازيك الا ماا حاول تسول

...... اوف لا حولة ولا قوة الا بالله مع هاد القوم..

كن كانت غا لادريسة منوحلووش بففف.

اتصل بسائق الأجرة صديق ديالو وعارف كازا مزيااان سولو على صالون وعطاه الجواب ومشاا نيشان شاد الطريق حتا وصلو لصالون لمعو عينين نريمان فرحات ملي لقاتو بان ليها الضواو شاعلين فالطابق الأول والثاني وكيبانو ناس كيتحركو من خلف الريرو...

مدات لمول طاكسي 50 درهم وخرجات

..... هييه واجي لهنااا ها الصرف

نريمان : لا بلاش الله يجازيك غا دعي معاياا

خلاتو وزادت لباب الصالون وقلبها كيضرب ف 100 والخلعة شداها.. صونات فالباب فتحات ليها بنت واحد البنت عقلات عليها نريمان وابتسامات فوجهها

نريمان : ابتساااام كيف دايرة؟

..... باستغراب) واش نريمان ؟

حركات راسها بالايجاب وتسالمو.. دخلاات نريمان لداخل وهيا كتسول على احوال. لقات كليان مزال تماا والبنات كلهم خدامين.

مشات ابتسام لواحد الكليانة كانت كتخدم ليها وقفات حداها نريمان وهوما كيهضرو..

نريمان : قوليلي اختي فين جوديا واش كاينة هنا؟

ابتسام : لا والو اختي راه شي 3 شهور وهيا مسافرة

نريمان : بصدمة) بصح؟؟؟ وايمتا غتجي واش مغاديش تجي ولا شنو!

ابتسام : معرفتش صراحة مكتقول ليناا والو. متبعة معانا غير الخدمة دكليان وصافي كتاصل بيناا مرة مرة

نريمان : ناريي اختي مشكيلة هادي

ابتسام : علاش ياك لباس مالك!!

نريمان : جيت ياختي من الحسيمة لعندها باش نهضر معاها محتاجاها بزاف عندي شي ضروف خايبة وجيت قصداهااا . عطيني عفاااك نمرتهاا..

ابتسام : شغادي نقولك ممنوع شي حد يصوني عليها هيا دابا راها ف تونس مع راجلها وهيا مكتبغي حتا واحد فيناا يصوني عليها عندها رقم خاص بالخدمة كتاصل بينا فيه ملي كتكون شي حاجة على خدمة

نريمان : ياختي هيا كانت عطاتني لاكرت فيزيت ديالها ومشااتلي ودابا كيفاش غندير نهضر معاها.

ابتسام : صراحة معرفتش والله منقدر نساعدك بوالو..

بقات نريمان مركزة فنقطة واحدة والبنت كتخدم لكليانة. تنهدااات تنهيدة حارة وفنفسها كتقول انا عارفة راسي معندي زهر فوالو طبيعي ولفت فينمااا مشيت نحس تابعني.

.

سمعات صوني تليفون د وحدة من كلياانات جوبات وكتهضر بكل احترام.

... كيف بقيتي نتي مزيانة والوليدات؟ ايوا الحمدالله.... بارك الله فيك صالون عندك غزال..... وحتا بنات فنين..... اه كملت دابا غنمشي... شكرا الله يعطيك صحة..

فديك الأثناء ضارت نريمان بسرعة البرق شافت السيدة كتهضر فالتليفون عرفااتها انها كتهضر مع جودياا..

.... الله يعطيك صحة اختي جوديا حتا نتي تهلاي لياا فراسك.

مشات عندها نريمان بالزربة وكتطلب منها انها تهضر معاها.

.... جوديا ها شي بنت بغات تهضر معاك... اوك حبيبة

عطاتها التليفون وهيا ترد نريمان بصوت حنون حشمانة ..

نريمان : الو لالة جوديا كيف دايرة

جوديا : صافاا ونتي شكون معايا بعدا؟..

نريمان : انا نريمان كنت جيت عندك انا وسعاد وكنتي عطيتيني نمرتك.

جوديا : نريمان ؟ شكون نريمان!!!

نريمان : كانت خدامة معاك شي وحدة سميتها سعاد وكنت جيت معاها فاش خدمتي ل...

قبل متكمل كلامها ردات عليها جوديا :

اااااه ااااه عقلت عليك نتي لباس مالين دار

نريمان : الحمد الله. عفاك بغيت نهضر معاك واخا تعطيني نمرتك راه محتجاااك دابا فهاد الساعة

جوديا : ياك لباس ؟

نريمان : واخا تعطيني نمرتك بغيت نهضر معاك دابا عفاك

جوديا : اكي اناا نصيفطها فمسج قيديها ومسحيها من هاد تليفون دابا اوك.. راه مكنعطيش نمرتي لاي واحد..

نريمان : لا لا كوني هانية والله

جوديا : خليلي مسج يلاه بسلامة..

قطعات المكالمة وفالبلاصة وصل المسج..

شعلات نريمان تليفونهاا وهيا تفاجئ بعدد الرسائل وبواط ڤوكال..

من عند امين ومرات عمها وعمها وحتا من وصال.

قيدات نمرة بالزربة ومسحاتها من تليفون السيدة ومداتو ليها..

جلسات فطرف الفوطوي وبدات كتكتب الرسالة لجوديا فالواتساب... والبنات كيتغامزو عليهاا

سلام عليكم. انا بصراحة محتجاك بزاف وملقيت حد وفكرت غير نتي لي تقدري تساعديني. نتي عارفة الوضع لي كنت كندوز منو والضغوطات من عند العائلة كنت عاودت ليك كلشي. ملي رجعت لدار مع ديك السيدة لي هيا عمتي دوزات عليا، اشد العذاب متخيليش شنو دارت فيا خرجات ليا على حياتي وبسبابها خويا مات وبقيت بوحدي بسبابها ضعت ومبقى عندي حد اصلا مكان عندي حد من نهار اللول ودابا مصير ديالي هوا الزنقة عفاااك كنترجاااك لوجه الله متخلينيش عفاااك خدميني عندك انا عارفة راسي ممعلمااش وخاصني الوقت باش نتعلم ولكن والله حتا محتاجة لخدمة ومحتاجة فين نسكن عفااك متخلينيش لوجه وليداتك عفااك كنتمنى تعاونيني واخا نخدم بلا ريال بلا جوج ندير ميناج اي حاجة تقوليهالي واخا بلا فلوس والله مخصني حتا درهم غير هوا نلقى فين ناكل ونعس باركة ولاهيلا باركة صافي..

رسلات ليها مسج وجلسات كتسنى الرد .. وبنات حداها كيقلبو عينيهم ويشوفو فيها غا من التحت التحت.. وهيا مرفووعة كتخمم غا ف جوديا شنو غتقول ليها..

دازت ساعة...

وجوج سوايع وهيا مخلوعة ومتوترة وبنات قنطو منها كيقولو مصاب غا ايمتا تخرج.

شنو جالسة كدير هناا...

واش غتبقى غير مقابلاناا.

الهضرة كتراات وجلسو كيهضرو بصوت مرتفع ويحشيو ليها الهضرة الساعة 9:00 د ليل. واخير كليانة كتصبغ شعرها مزال ليها غا شوية تغسلو وغيشدو الصالون...

نريمان ريق النشف فحلقها كتشوف مصيرها الزنقة تبات فيها. شافت فالواتساب لقات جوديا شافت المسج ديالها ولكن مرداتش عليها زادت خافت كتر وتوتراااات كتبات مسج اخر ويديها كيترعوا

نريمان : عفاااك جوبيني راني دابا فالصالون ديالك والبنات غيخرجو وانا غنبات فالزنقة عفااااك رحميني لوجه الله راه قلبي غيسكت.

صيفطات المسج وطلعات ليها غا شرطة وحدة. وبقاات كتسنى ايمتاا يوصل المسج وتشوفو ولكن بقاا هكاك.

كانو شي بنات جالسين مكونكطين وحدة كتغسل الكليانة وهوا يصوني تليفون ابتسام وردات عليها بالزربة : وي لالة جوديا .. اهاه هاهيا هنا... فين؟ اوك واخاا.. لا لا ماشي مشكيل... صافي ديك ساعة نرد، عليك باشما كاين.. اوك كوني هانية واخا بسلامة.

كملات ابتسام شغلها ونريمان مزال كتصيفط فالرسائل وراسها غيتفرڭع علاش متجوبهاش ماشي مشكيل، تقولها لا ولا معنديش خدمة ولكن ماشي تشوف المسج ومتردش عليها.. بقاا فيها الحال بزاف لبسو بناات حوايجهم وخرجو بقات غير نريمان وابتسام واحد البنت . كملو الكليانة ومشات بحالها وناضت نريمان بخيبة آمل هزات حوايجها بغات تخرج قبل ميخرجها شي حد ولا يجرحها بكلامو وهيا توقفها ابتسام : صبري انريمان انا جايا غنلبس حوايجي.

حركات نريمان راسها وبقات واقفة فبلاصتها..

..... ابتسام نمشي ولا نتسناك؟

ابتسام : لا لا غير سيري انا جات مورايا بنت خالتي غنمشي انا وياها.

ودعاتهم البنت وخرجت وهيا تجي ابتسام بالزربة وقالت : راه جوديا وصاتني عليك وقالتلي بلاما تعرف حتا شي بنت المهم نتي متهضري حدا حد.

نريمان : بلهفة) بصح؟ ايمتا وصاتك علياا انا صيفطليها مجوباتنيش

ابتسام : المهم راه وصاتني صونات علياا وقالت لياا نديك معايا مهم كوني هانية

ابتسمات نريمان فرحات حيت واخاا مرداتش الا وراه وصات عليها . لبسات ابتسام حوايجها وجمعات الصالون حيدات كاع بريزات وخرجو بجوجهم شدات الباب ومشاو مجمعين..

ابتسام : راه مخصكش تبقااي تسولي بزاف فالصالون راه كاميرات وهيا مراقبة كلشي مخصنااش نبقااو كنهضرو ونقصي من اسئلة

نريمان : بصح ؟ وعلاش هادشي

ابتسام : راه القصة طويلة واخا انا معرفاااش بزاف

نريمان : علاش شنو كاين مالها واش عندها شي مشكيل!

ابتسام : اييه مشاكيل هوما راجلها واحد التونسي فشكل مزيرها بزاف ومانع عليها واتساب والهضرة مع ناس ومكيخليهاش تخدم محكم فيها بزاف وهيا كتبغييييه لواحد الدرجة كبيرة ايوا بزاف دالحوايج انا معرفااهومش مهم هيا كتعيش وضع مزير الا صونات كتصوني غا على الخدمة اجي واش عطاتك واتساب ديالها ياك!

نريمان : اه عطاتولي فيه صيفط ليها مسج..

ابتسام : العجب معمر شي وحدة فيناا عطاتها نمرتها الخاصة. وهكاك يا ختي متقدرش تجاوبك الله يحسن عوانها وصافي.

شدو الطاكسي ومشاو حتا وصلو لواحد العمارة فحي هادئ.. خلصات ابتسام الطاكسي ودخلات العمارة ونريمان موراها مخلوعة..

دخلو المصعد ونريمان بقات كتشوف فيهاا وقالت بخوف : عنداك ابتسام ديريلي شي حاجة ولا يكون هنا شي راجل

ابتسام : هههههههه ضحكتيني اشمن راجل الله يهديك. حتا دابا ماشي مشكيل الا بغيتي ترجعي فحالك رجعي مغنشدكش. بركات على الزر وهوا يطلع المصعب خافت نريمان حيت اول مرة تكب فيه شدات ف ابتسام وقالت : معندي فين نمشي، انا غير قلت ليك وصافي يا ختي ممولفاش وكنموت غا بالخلعة

ابتسام : بلا مبالات ) حتا نتي راه عادي خص الانسان يقصح قلبو الا كان باغي يعيش.

خرجو من المصعد ودخلو فواحد الكلوار حلات ابتسام بالسوارت وصوت بنات لداخل والقهقهات دخلات ابتسام ونريمان موراها

كانو 4 بنات لابسين لباس فاضح واخدين راحتهم والشيشة حداهم والباكيات د الڭارو ومشروبات كحولية على الطبلة وبعض عصائر ومأكولات السريعة..

حطات ابتسام سوارت وحيدات المونطو ديالها وضارت عند نريمان

ابتسام : دخلي مرحبا.. بنات هادي نريمان جات من الريف مهم منبغي حتا وحدة تخصر ليها الخاطر...

تكلمات وحدة كتبخ دخان الشيشة من فمها وقالت : مرحبا بلي جاا وجاب عندك شي راجل ريفي غزال مجبد مڭلضم احاح نعيشو الرومنسية مرحباا معندكش لا لا اختي ممعناش غا رجعي فحالك ههههه

ضحكات نريمان وبقات ساكتة. جلسات حداهم

وكدالك ابتسام جلسات قبالتها هزات كارو شعلاتو وقالت : متبقاوش تقجرو عليها بزاف عندااك يطير ليهاا

البنت 1 : شناهوا يطير ليها؟

شافت ف نريمان وقالت : يطيرلك اصحيبة

نريمان : لا لا ههه

البنت 1 : ايوا قوليهاا لهادالاخت منين نتي بعدا

نريمان : الحسيمة

البنت 2 : الحسيمة ! اممم وكيعاودو فيهاا رجال ديال بصح وغا صحاب لعاقة هاا لي من هولاندا ها لي من بلجيكااا فرنساا وروافى اختي هوماا رجال

البنت 1 : وشنو الأخت معندكش شي خوك تزوجيناا بيه زعمة؟

نريمان : بحزن) خويا واحد لي كان عندي مات

البنت 2 : مسكين الله يرحمو كلنا ليها

البنت 3 : ههخخخخخخخ شوفو ياسمين مسكينة الله يقوي ايمانك الحاجة

نريمان : هههه

ابتسام : مكتسااليوش نتوما علاام والله

البنت 2 : ودابا هاد الضيفة لي جبتي والو سوقها خاوي كيف والو لي مجابت ليناا حتا راجل زعمة معندكش شي ولد، خالتك ولد عمك تفوبري علينا بيه ههههه...

فديك اللحضة صونى تليفون نريمان غير شافت الاسم وهواا يتخطف لون وجهها.

البنت 2 : ها الحوب كيصوني هههه

البنت 1 : جاوبي جاوبي تي را هاااانيااااا ابنت ناس

قطعات نريمان ويديها كيترعدو وعود صونى وقطعات عليه

البنت 3 : اواه علاش كتقطعي تي جاااوبي مالك

نريمان : لا لا ماشي مهم ماشي شي حاجة م...

مكملاتش هضرتها وهوا يعاود يصوني تليفون خطفاتو ليها البنت لي جالسة حداها وفتحات الخط وكبرات الصوت . كلهم لزمو الصمت كيسمعو الصوت ديالو وهوا كيتكلم بالريفية.. عطات البنت انريمان تليفون وقلبها كيزدح وردات عليه.

نريمان : شنو امين؟

امين : فينك دابا نتي فين مشيتي وعلاش طافية تليفون؟

نريمان : والو امين مهم سمحولي بزاف حيت برزطتكم وشديتوني عندكم الله يخلف عليكم

امين : بعصبية) نريمان شنو هاد الهضرة ياك كنا بخير علاش خرجتي من الدار وفين مشيتي وفينك دابا راه تشوشناا عليك

هيا كتسمع لكلامو وبنات كيقولو ليها بهمس هضري بالعربية باش نفهموك وهيا كتحرك ليهم راسها بالايجاب وبقات كتهضر معاه بالريفية..

نريمان : امين معندكم علاش تسولو فيا الله يجازيكم بالخير مهم تهلا فراسك بزاف وسمحليا حيت كنت معذباك معايا الله يفرحك فحياتك كنتمنى توصل لدوك احلام..

امين : شمن فرحة الله يهديك واش نتي خليتيلي راسي غيطير من بلاصتو معرفتك حية ولا ميتة وفين عطيتي راس راه 3 ايام منعست واجي تشوفي دابا الشقيقة لي شداني والمرض وطاح لياا طونسيو

نريمان : وعلاش هادشي كامل راه عادي انا خرجت مبغيتش نبرزطكم وصافي

البنت 2 : بهمس) وهضرووووووو بالعربية نفهموووومك بففف

نريمان : بالعربية) ودابا صافي مطرا والو سمحو لياا

رد عليها حتا هوا بالعربية مخلطة مع ريفية : ياك كيرضيك دابا هاد الحالة لي وصلتيني ليهاا عاجبك الحال ونتي ممسوقاش

نريمان : الله يهديك اينا حالة

امين : فين نتي دابا بعدا نجي موراك

نريمان : لا امين انا مغنرجعش لديك الدار

امين : وفينك بعداا دابااا وجاوبييي ولا باغاا تسطينيييييي

البنت 1 : يااا ختي مخلوع عليها الله يجيب لي يتخلع عليناا حتا حناا

نريمان : انا فكازا دابا

امين : فكازا؟؟؟؟ واش بصح ولا كتفلاي!

نريمان : معندي علاش نتفلا عليك انا فكازا يلاه جيت اليوم

امين : وكيفاش مشيتي وفين بقيتي هاد اليومين وعلاش تليفون كان طافي وعلاش مقلتيليش غنخرج .. ( كيلهت) وعلاش مصيفطتيليش مسج بعداا غا نفهم شنو كاين واش مخممتيش ليااا كيف غنكون حرام عليك هادشي لي درتي

البنت 3 : يا ختي حق الله الا بغيتوووو شوو كي كتعفر عليه بااااز لوجهك

البنت 2 : مكتعرفش حتا تهضر السيدة غيحماق عليهاا وهيا دافعة عليه كبير

نريمان : امين تهلا فراسك وراك خويااا العزيز الغالي متصورش محبتك ق..

قطعها بغوات وقال : واااااا اناا مخوووووكش ماشيييي خووووك ومعمرنيي غنكون خوووك وفهمييييهااااااا فهميييها دخليها راسك.

بقاا فيها الحال حيت هيا نيتها قشكل وهوا نيتو فشكل. قطعاات المكالمة وخلات تليفون فوضع " الطائرة " بقاو شاديين فيهاا البنات وهيا كتبتاسم غا بزز فوجههم. حتا تكلمات وحدة فيهم وقالت : مال ني اختي ياك لباس

نريمان : لا غا واحد الحادث كان طرالي ودابا ضارني نيفي

البنت : مم ايوا ميكون باس

ابتسام : شديتو فالهضرة مبغيتوش طلقوو واش خليتو شي عشااا بعدا ولا

البنت : مزال متعشينا راه واحد طاجين كيطيب منعاودلكش..

جلسو كيتهاوذو مع بعضياتهم ويقشبو ونريمان حداهم غير كتشوف فالبنات لي كيكميو وخرين شادين شيشة تخنقاات بالريحة وهكاك بقات صابرة حداهم وهوما مقصرين حتا تعشاااو وشدو جمامع حتا قرب الفجر يطلع عاد نعسو اما نريمان كانت نعسات حداهم من قبل فبلاصة لي جالسة فيها نيت جالسة متكية بيديها وناعسة معذبة...

فيقااتها ابتسام ودخلاتها معاها لبيت ..

فصباح فاقت نريمان حلات عينيها بصعوبة من شدة التعب د السفر قلبات وراقها لقاتهم كيفماا هوما مناقصة منهم حتا حاجة وحتا حوايجها كلشي فبلاصتو. ناضت خرجات لقات الصالة مزال محطوط فوقهم داك الطاجين والمشروبات وباقيا الطعام ودنيا مرونة والمخاد فالارض..

جلسات كتخمم ضروري خاصها دير شي حاجة ومتبقااش غير جالسة اذن تنوض تغسل المواعن باش تعجب البنات ويخليوها معاها بلا مشاكيل.

هزات داكشي وبدات تقلب على الكوزينة دخلات ليها داكشي وهزات شيفون مسحات الطبلة الزجاجية ورجعات الكوزينة كتغسل مواعن بشوية كتحاول متقرقبش باش متنوضش البنات.. جمعات صغيرة على كبيرة كلشي تغسل وتنقى ولابابو تمسح ردات الما يطيب وبدات كتوجد فالفطور.. وكتقلب شنو كاين باش تحطو ستفات على الطبلة وجلسات حداها كبات اتاي وكلات شوية وبقات كتسنى هاهوماا غيفيقو دابا غينوضو.. حتا وصلات 12 عاد شافت ابتسام فاقت غسلاو وجهها وجلسات حداها كتسولها شكون دار الفطور

نريمان : انا وجدتو صباح وبرد وعاود سخنت اتاي وبرد

ابتسام : كينوضو هادو كعطلييين حتا كترشاق ليهم بعدا الله يعطيك الصحة واخاا مكاانش ضروري حيت حنا هنا عندناا سيستيم ديال النوبة كل واحد يدير نوبتو.

فطرات ابتسام وناضت بدلات حوايجها وقالت : يلاه انريمان خصنا نمشيو لصالون.

ناضت بالزربة مشات الطواليط بدلاات حوايجهاا وخرجات هيا وابتسام

نريمان : اجي بنات ميمشيوش ليا لحوايجي راني خليتهم فبيتك

ابتسام : لا لا كوني هانية مكيهزو والو

وصلو لصالون وبداو فالميناج. تعاونو بجوج ليهم حتا كملو وبدات كيتجمع والكليان كيجي وهوما كيرحبو بيهم ابتسام والبنات كيخدمو وانريمان واقفة حداها كتشوف كتعلم...

قربات ليها ابتسام وقالت : المهم انا وصيتك شوفي فيا كيفاش كنخدم باش تعلمي دغياا..

حركات نريمان راسها وبقاات واقفة حداهاا كتشوفها كيف كتصبغ لكليانة... ومن بعد كيفاش دوشاات ليها وخدمات ليها الشعر وخدمات لكليناات اخرين ونريمان كتشوف حتا فهماات مزيان..

خرجو تغداو برا خلصات ابتسام ورجعو الصالون.. داز نهار متعب وخرجو بحالهم مع 10 د ليل. ونريمان لاسقة ف ابتسام خايفة من الليل والضلام ومن المجهول حيت متعرف اش يطرالك فهاد الدنياا... شدو طاكسي ورجعو لدار لقاو جوج بنات تماا شاديين شيشة والهضرة والجمامع والضحك.

حيدات نريمان صباطها دخلات سلمات عليهم وجلسات فالطرف خوافة. وابتسام ترمات على الفراش وطلقات يديها بجوج وهوما كيسمعو الهضرة د بنات بجوج.

البنت 1: ويييه ليلة كلهااا ويلاه عاطيني 2700 درهم وقالي دابا نكملك ولاد حرام حتا هوما رجعو كيتشطرو

البنت 2 : ايوا نتي بعداا 2700 اماا شوفي انا لي غير 1000 درهم بففف اناا مكرهتش نخرج على برا كون درت متت لباس هاد سواعدة رجعو كفس من هاد نماذج لي عندناا.

البنت 1 : سيري مع شي واحد ولد بلاد يخرجهاا منك ويرميلك 50 درهم اماا هادو بعداا كيف ماا كانت الحال تخلصي بعداا الكراا وتلبسي وتاكلي وتعيشي.

شافت ابتسام فنريمان لقاتها كتشوف فتلفازة وجهها مزير حمر.. فهماتهم علاش كيهضرو وهيا لي ممولفاااش بهاد الكلام وهاد الوضع وبنات كيهضرو عادي ويدخلو فالتفاصيل ويخصو الكلام من السمطة التحت.

ناضت من حداهم نريمان ومشات كتخلف لطواليط ..

شافت فيهم ابتسام وقالت : وصافي ازمرر جمعو علينااا هاد الفلاشاات متبقااوش تعاودو حدا البنت وهيا صغيرة مخصهاش تسمع هادشي

البنت 1 : هههههه صغيرة؟ كنا قدهاا عشنااا وشفنا ماشي غا سمعنا عادي الحوب نهضرو كيف بغينا الا معجبهاا حال تبدل

ابتسام : هييه راه مجاتش عندك راهاا معايا وفبيتي ومعندكش الحق تقولي شي حاجة.

البنت 2 : شووو مالكم غدابزو ولا وزدتو فيه غدابزو على هاد البنت...

ناضت ابتسام بدلات حوايجها ودخلات الكوزينة توجد العشاء حيت النوبة فيها..

رجعات نريمان لبلاصتهاا حداهم وهوماا كيبخو عليها الدخان

البنت 1 : وفين كي دوز الزين نهارو؟

نريمان : بخجل) لباس مزيان

البنت 2 : امضرا داك حبيب القلب دلبارح مصوناش هههه عز عليناا مسكين

البنت 2 : ههه ولاهيلا خلاتو بلاكة حرام عليك مسكين موحشك ونتي قمعاه

نريمان : لا هداك غير ولد عمي مبيني وبينو والو وكيسولني فين اناا

البنت : امم ههه وهديك الهضرة ماشي ديال ولد عمي واش معانا حنا راه عادي بيناتنا غا قولي وخرجي ماا فقلبك

نريمان : لا مكاين والو والو.

حدرات راسها معرفاا متقول ليهم وجالسة غير بزز وسطهم كتحس براسها ممرتحااش نهاائيا. ناضت مشات الكوزينة عند ابتسام لقاتها كتوجد العشاء.

وبدات كتعاونها وتغسل معاها المواعن لي محطوطين تما.

تعشاو مجموعين وبنات شاديين فنريمان خملات الطبلة وجمعات الروينة .

حسات برلسها غلبها نعاس ودخلات لبيت لقات ابتسام متكية لابسة تيشورط د خيوط وشادة تليفون فيديها كتكتب مسج.. حطات نريمان راسها على المخدة وشدات حتا هيا تليفونها شافت بزاف د مسجات ومكالمات الفائتة من عند امين مجوبااتش ومشات صيفطاات مسج طويل لهناء كتسول على حالها وحال عائلة وكتشكرها على الخير لي دارت فيها والمساعدة ديالها معاها..

حطات تليفون تحت راسها وبقات كتشوف ف ابتسام. ضارت عندها ابتسام وقالت : مالك كتشوفي فيا؟

نريمان : والو.. واش معندكش واليدين؟ علاش ساكنة هنا مع هاد البنات

..

حطات ابتسام تليفون وتلفتات عند نريمان وهيا حاطة راسها على المخدة وقالت : عندي واليدين ديالي هوما فالرباط وانا هنا خدامة وكاريا مع بنات!

نريمان : مكتمشيش لداركم تشوفيهم

سكتات ابتسام شوية وشافت ف نريمان وقالت : لا هادي عامين مشفتهم وصراحة مكرهتش نشوفهم ولكن ميمكنش..

مبغاتش نريمان تزيد تسولها خلات الهضرة معاها هكاك.. هضرو شوية فالخدمة ونعسو بجوجهم..

فاليوم الموالي.. فاقت نريمان على ضحكات بنات حلات عينيها لقات ابتسام مزال ناعسة كانت باب مشققة ناضت نريمان كتسلت حتا لباب وهبطات عينيها كطلل على بنات لي عاد دخلو لباسهم فااضح صدرهم خارج ومؤخرتهم البارز وهوماا جالسين كيكميو ويضحكو كانت ساعة 7 صباح..

جلسو بنات كيعاودو على ليلتهم الحميمية لي دوزو مع خليجيين والفلوس لي عطاوهم شادينهم كيحسبو وبنات خرين لي باينتين فدار حتا هوما كيعاودو... نريمان قلبها بقاا كيزدح ولحمها تبورشات وهيا كتسمع الهضرة غير من السمطة لتحت كيعاودو بيناتهم خافت بزاااف ورجعات لبلاصتها تكمشااات بقاات هكاك حتا سمعات حسهم تقطع.. مقدراتش تنوض ولا تحرك بقاات هكاك حتا فاقت ابتسام يلاه تحركات ونريمان تنوض حتا هياا.

ابتسام : زين صباح الخير

نريمان : صباح الخير اختي

ابتسام : اييي عضااامي مفصليين علياا متصوريش مكرهتش يا ختي شي مساج..

نريمان : هه

ابتسام : وقيلة بنات جاو انا محسيتش بيهم!!

نريمان : اه جاو سمعتهم كيهضرو فالصباح ( بهمس) دابا هادو فين كيمشيو شنو كيديرو..!

شافت فيها ابتسام وقالت وهيا كضور عينيهاا : ايوا راه باينة شنو كيديرو كيمشيو يضبرو على راسهم مع خليجيين وڭور راكي عارفة كل ليلة مع واحد راه كيصورو زبابل دالفلوس..

سكتات نريمان وابتسام ناضت مشات لطواليط وتبعاتهااا نريمان وعينيها مع صالة لقاتها خاوية وبنات كل وحدة شدات بيتهاا. غسلت نريمان وجهها ومشات وجدات الفطور هيا وابتسام.. فطرو وهوماا جماعين. كتسول ابتسام نريمان على حالها وعلاش جات الكازا واش مكيناش خدمة فبلادهم..

قررات نريمان تعاود ليها كلشي باش حتا ابتسام تفهمهاا وتوضح ليها الصورة بين عينيهاا.

ابتسام : صدمتيني والله شفتي الدنياا كيف مكفسة صراحة قليل فاش تعطيك لي باغي.. عرفتي شنو انريمان. انا كنت كنبغي واحد السيد هوا من الشمال وشحال انا وياه مصاحبين وشحال كليت العصى من دارناا ملي كنت كندير سبة باش نمشي نشوفو وديما كنت كن.... المهم كنا كنديرو انا وياه علاقة ومن بعد حملت منو ايوا واليدية ملي عرفو جرا علياا بابا وملقيت حد من غير جوديا وملي ولدت عطيت لداك السيد ولدو ومن تما مشفتو ولا شافني ومن تما مرجعت لدارنا وكنت كل مرة كنمشي، مع واحد غير باش نجمع الفلوس د كرا ومناكل حياة صعيبة بزاف

نريمان : بصدمة) ودابا نتي والدة؟ / عندك ولد! بصح..

ابتسام : وييه اختي اودي عشناا لي معاشو حد وشفنااا لي مشاافو حد نتي مزال بحال شي بيبي صغير معرفاااش دابا الدنيا تخليك عينيك يلاه نمشي الصالون قنت فهاد الدار...

ناضو لبيت لبسو حوايجهم ومشاو الصالون. بقاو مجمعين كل وحدة تعاود على راسها. حتا جاو كليان وهاد المرة ابتسام عطات لنريمان هيا لتصبغ لكيانة لاول مرة. تبعات نريمان جميع النصائح لي عطاتها ابتسااام ووراتهاا كيف تغسل وكيف تنشف وتخدم بالسيشوار مزيااان. وداكشي لي دارت نريمان وتوفقااات فيه. فرحات الكليانة وحتا نريمان فرحات فالداخل ديالهاا خدماات لسيدة خرا واخاا يديهاا تقيييييلة بزاف الا وخدمتهاا متقونة..

بعد 3 ايام. جالسة نريمان فالصالون كتهضر ف مكالمة مع هناء وهيا كتعاود ليها على حالها فكازا وانها عايشة بخير صونى تليفون نريمان وهيا تقول : قطعي قطعي اهناء شي حد كيصوني علياا ..

فتحات الخط وهوا يجاوبها امين وقال : فينك انريمان

نريمان : انا فالصالون علاش امين

امين : ايناا صالون فين كاين

نريمان : ووصافي راه قلت ليك عفااك بلاما تبقى تصوني عليااا خليني عليك ومتبقااش تسولني

امين : نريمان انا فكازا وبغيت نشوفك دابا فينك نجي عندك

نريمان : شناهوا نتا فكازاا ايمتا جيتي وعندمن جيتييي؟

امين : جيت نشوفك قوليلي في نجي عنداك.

عطاتو العنوان د صالون وبقات جالسة على اعصاابها وابتسام كتشوف فيهاا وضحك...

حتا وصل دق عليهم فالباب وهيا تنوض نريمان بالزربة وحلات ليه الباب..

حلات ليه الباب وعينيه كيلمعو ملي شافها مدات ليه يديها سلم عليها وقال : خصنا نهضرو

ضارت نريمان شافت ف ابتسام وقالت ليها : ابتسام انا خارجة غير هنا وغنرجع..

حركات ليها راسها ...

خرجات نريمان وشدات موراها الباب وامين جنبها داير يديه فالجيب وساكت. بعدو شوية وهوا يضور عندها تقابل معاها

نريمان : شنو بغيتي امين! علاش جيتي لهناا واش عندك شي خدمة ولا شنو

امين : تنهد ) اه عندي الخدمة وخدمتي هيا نشوفك ونعرفك فين كاينة ومعامن .. علاش هربتي من الدار شكون عاونك باش جيتي لهناا ومنين جاوك الفلوس!! علاش خليتيناا مشوشين عليك

نريمان : امين انا مبقاش عاجبني الوضع فالدار عمي بحالا جالسة ليه على قلبو ومرات عمي بزز باش كتخرج هضرة معايا وصال كل مرة تخشي لياا الهضرة.. نتوما شفتو حالتي وعارفين اش داز علياا ملي شفت راسي وليت زايدة وبلي عمي لي ديراه هواا بابا حتا هوا متقلة عليه فكرت نخرج ارض الله واسعة وعريضة

امين : راك مدرتي فيهاا ميصلاح راه بابا ماشي بحال لي نتي كتخايلي نعلي شيطان ورجعي معايا راه مشوشين عليك

نريمان : امين صافي اناا بغيت نبعد بغيت نرتاح الا رجعت لدار غنزيد نمرض ريحت خوياا مزال فديك الدار ومزال خيالو بين عيني ( ببكاء) راه عايشة غا بزز والله يا امين الا كنبزز على نفسي باش نعيش ومنمرضش معرفش هادشي فين غيوصلني ولكن هاناا ماشا نتا عارف راسك شحال عندي عزيز وعارف راسك بلي كنحسبك خوياااا ديال بصح بحال زياد الله يرحمو ول..

قطعها بصوت مبحوح وقال : اناا ماشي خوك شوفي انا سمحت ف لافاك وجيت لهاد كازا المهم غنقلب على خدمة وهاناا معاك حتا انا مغاديش نرجع لديك الدار. المهم انا معاك هناا عطيتك وعد عمرني نخليك وانا على عهدي..

ابتسمات بخجل وشدات فيديه بقوة وقالت: مصاب كون كنتي خويا ديال بصح نلقاااك حدايا ونخوي عليك قلبي وتحس بياا.

حيد يديه وهوا عاقد حجبانو وقالت : وااا بنت ناس راه انا ماشي خووك ولكن اناا معاك سمعتي فاي وقت وف اي لحضة اناا معاك ولكن مرة خراا منعاودش نسمع هاد خويااا كان عندك اخ واحد الله يرحمو

نريمان : مالك تقلقتي؟

امين : وصافي زيدي نرجع معاك لمحل

نريمان : لا غير سير انا غن....

امين : وزيدي قدامي

وصلهاا حتا باب صالون دخلات ودارت ليه باي باي. شدات الباب وبقاا هوا واقف شوية فجنب الصالون عاد مشاا فحالو..

فديك وقيتة قربات ابتسام من نريمان كتسولهاا ونريمان كتجاوب.

ابتسام : واش كتبغيه ؟

نريمان : خرجات فيها عينيها ) لا لااا راه كبرنا انا وياه فدار وحدة راه بحال خوياا هوا كنبقى فيه وكيبغي يعاوني

ابتسام : امم ههه اسبحان الله ومشفتيش هوا مسكين سامح فالريف وجاي حتا لهنا على قبلك صراحة سعداتك

نريمان : اش سعداتي راه هوا مبغاش يكمل قرايتو وجا يخدم زعمة هوا غيضرب هاد الطريق كلها غا على ودي هه

ابتسام : ايوا معرفت هه دابا كلشي يبان خخ

ضحكات نريمان وفنفسها كتقول ابتسام غير كتخربق حيت هيا كتشوف امين خوهااا واقرب واحد ليها فالعائلة فقط..

داز اسبوع ونريمان بدات كتخدم واخاا يديها مزال تقال فالخدمة وابتسام واقفة على راسها كتوريها وحاضية معاها.. كانت نريمان كتصبغ لواحد الكليانة سمعو صونيت فالباب فتحات وحدة من البنات وجات لعند نريمان وقالت : شي حد كيسول فيك هاهوا برا

خرجات نريمان عينيها وقالت : شكون؟

البنت : قال سميتو امين هاهوا كيتسناك براا.

كملات لكليانة شعرها جمعاتو ليها لفرق بالزربة وحيدات ليڭات من، يديها وخرجات عندو سلمات عليه

نريمان : امين لباس؟

امين : يلاه نخرجو شوية الا بغيتي

نريمان : ممسالياش راني كنخدم لشي كليان

امين : وايمتا غتسالي ليهم نرجع موراك

نريمان : راه كنسالي معطلة بعدالمرات حتا 10

خرج عينيه فيها وقال : شناهوا حتا 10 رجعتي زوفري دخلي حتا لنص ليل شهاد الوقت واش معليك حكااام

نريمان : وانت مالك حياتي هادي ندخل فقااش مبغيت ومتغوتش علياا وناس لداخل

امين : غنغوت هاد خدمة د قلة الحياء مناقص منها المراا خصها المغرب تكون فدار ماشي بحال رجال نص ليل وهيا مزال كضور

نريمان : واش نتا سوقك فيااا سير فحالك امين ومرة خراا متعاودش تجي لهناا راه الصالون خاص غا بالنساء والكاميرات فوق راسنا متبقااش لباب وتوقف

امين : ايييه ميحسابش لياااحيدي دوك شراوط ويلاه معايا

نريمان : فين غنمشي معاك واش تسطيتي!!

امين : زيدي يلاه معندك مديري بهاد الخدمة

شدات عليه نريمان الباب فوجهو ودخلات باغاا تبكي وهوا كيصوني ويعاود يدق.. شافت ابتسام ف نريمان لي وجهها حمرر ومشات نيشان لباب خرجات عينيها ف امين وهوا باغي يدخل هاجم.. هدداتو ابتسام بالبوليس عاد مشاا فحالو وهوا كيتحلف ..

دخلات ابتسام لقات نريمان كتبكي فصمت طبطبات على كتفهاا وقالت : صافي هاهواا مشا بحالو مالو معاك بعدا

نريمان : راه بغا نخرج من الخدمة كيتحكم فياا بحالا هوا لي والدني

ابتسام : راه كيبغيك وقيلة داكشي علاش جاتو الغيرة

نريمان : اش غادي يبغيني هادا مكيبغي حد باغي غا يحكم فيااا خلا ختو لي كان كيقيل يضربها وجاا لياا باغي يحكمني حتا اناا بلحق اناا لي منسواش اناا لي فياا الديفو اش داني نعطيك عنوان ونخليه يجي عندي

ابتسام : صافي ازين صافي ميبقاش فيك الحال نوضي نكملو خدمتناا نوضي غسلي شعر لسيدة يلاه..

غسلات الشعر الكليانة وعقلها مشوش وخايفة من امين كملو خدمتهم وخرجو كيف العادة يلاه بغاو يشدو طاكسي وهوا يشدها امين من دراعها بقوة وقال : زيدي قدامي لا مزيان تبارك الله نصايص ليل عاد خارجة

نريمان : بعد مني فرقني عليك انا مع صحبتي ماشي بوحدي خليني عليك

ابتسام : وبعد منها نتا اش دخلك فيهاا

امين : نتي بعداا المقزبة سدي فمك مهضرك حد كنهضر مع نريمان

نريمان : امين معندكش الحق تحكم فيااا واخير مرة تعرض لياا ولا تهضر معاياا كتفهم اناا مكنجيك مااا متجيني بعد مني مبيناتناا والو

زاد جرها من يديها وابتساام كتحاول تفرق بيناتهم وهيا تنطق نريمان : بعدددددد مني ولا والله حتا نقتل راسي بعددددددددد منيييي فرقنيييي عل واااش بغيتووووووو تسطيووووني بعدووووو مني قهرتوني بع غغغغغغغغغغغغ

طاحت فالارض وعينيها تقلبو والكشكوشة خارجة من فمها يديها بحالا تعوجو وهيا كتفرطط فالارض تجمعات الجوقة عليهم وامين قلبو غيسكت من الخلعة وابتسام كتهزز فيها تحاول تفيقهاا وهيا كتاصل بالاسعاف.

وقف واحد راجل كبير بسياتو وقال : طلعوها طلعوهاا نديوها لطبيب واش نتوما عاد غتبقااو تسناو اسعاف حتا توصل..

طلعوها فالطوموبيل وابتسام وامين كيتناڭرو بيناتهم حتا وصلوها لطبيب..

حلات عينيها بتقالة لقات راسها فغرفة كبيرة بوحدها يلاه بغات تنوض وهيا، تشوف الطبيب دخل...

فحصها وقال : الحالة ديالك الصحية على قدهاا خصك تبع دواك ومتجاهديش فراسك وبعدي على اي حاجة تعصبك . تبارك الله مزال صغيرة والحياة قدامك سمعتي. غتباتي هاد ليلة وغدا صباح غتخرجي

امين : هادشي لي بغيتو غا تخرجو عليهاا اش داكم توريوهاا شي خدمة

ابتسام : وانت مالك اشمن حريق فيك شنو كتجيهاا خوهاا راجلهاا صاحبهاا باهاا ادخل سوق راسك

امين : انت لي دخلي سوق راسك وبعدي من بنات ناس .. نتوما مفلسين متفلسوش بنات ناس معاكم

ابتسام : اممم الله ينفعناا براكتك مسكين كتخاف عليها

خرج الطبيب لعندهم لقاهم قالبين دنيا طمنهم على حالتها وعلمهم بلي صباح غتخرج... يلاه بغات ابتسام دخل تبات معاها وهوا يوقفها

امين : اناا لي غنبات معاها غا سيري فحالك

ابتسام : واااايني وحلة معاك نتاا مالك داخل لسوق عيالات اسير الا عندك شي شغل سير تقضيييه ونتاا مقابلني سيرر.

دخلات لعندهاا وهياا كتسوط اما هوا بقاا جالس على الكرسي . تما دوز ليلتو فيه اما ابتسام غير دخلات دهشرات بالنعاس وخوات ليها نريمان، بلاصة حداها نعسو فيها بجوجهم حتا صباح الصباح بدلات حوايجها وخرجو لقاو امين واقف حدا راسهم. يلاه شاف نريمان وهوا يقرب عندها يطمن على حالها..

مدتهاش فيه خلص هوا ديك الليلة وخدا ورقة دالخروج. وتبعهم برا لقاهم غاديين مع طريطوار. مشا لعندهم كيجري

امين : صبري انريمان انا نشريلك دوا دابا ونجيبولك

نريمان : متشريليش غنشريه راسي

امين : متقصحيش راسك عفااك اناا غنجيبولك دابا ها فرماسيان

ابتساام : واش نتا مكتفهمش العربية ولا مالك وسير فحالك دوا حنا غنشريوه غير سير الله يعاونك

امين : وشكون هضرك نتي سوقك ونتي دايرة فحال العقرب غا لي دواا تعطيه تففف

ابتسام : تفوو منك بنادم معندو شغل

يلاه بغا امين يقطع الشانطي وهوا يشوف ابتسام وقفات طاكسي وهوا يرجع وركب معاهم

ابتسام : فين غادي سير فحالك

نريمان : واش مكتفهمش فين غادي حنا غاديين لدار

امين : وحتا انا غادي معاكم لدار

ابتساام : وبناادم شحال لسقة

امين : نتي بعداا غا سدي فمك والله حتا ندمك على هادشي بنت كانت طرانكيل غا وصلات عندكم ونتوماا تبدلوها.

طريق كلهاا وهوماا كيتناكرو ومول طاكسي حال فمو فيهم حتا وصلو جبدات ابتسام 20 درهم تخلص وهوا يزرب امين ومد ليه الفلوس قطع حسابو ورد ليه الصرف وتبع نريمان وابتسام لي شافهم داخلين العمارة تبعهم ودخل معاهم لاسانسور وهيا تخرج فيه ابتسام ععينيها : وسير اصاحبي بحالك واش مكتفهمش فين غتمشي فين غدخل راه غا بنات لفوق واش غدخل وسطهم !

امين : حتا نشوف بعدا نريمان فين غدخل وعندمن ومعامن عاد نمشي

ابتسام : شتي نتااا مريض فعقلك سير داوا الا نفع معاك شي دواء بعدااا بنادم مسالي مع قبوو بقيتي غا نتا فالشروط..

امين : نتي داك الفم خاص لي يهرسولك شكون بعدا هضرك وشكون داهاا فيك

نريمان : واش مغاديش تنعل الشيطان وتمشي راه هنا غا البنات.

تحل السانسور وخرج امين معاهم تابعهم

امين : خصني نعرف بعدا فين غتمشي ومعامن ساكنة عاد نمشي.

حلات ابتسام الباب وبقات واقفة فوجهو : دابا جاي هاجم عليناا حتا لدار باغي نعيط ليك البوليس ياك وسير فحالك حسن ليك

خرجو جوج بنات كيجريو فتحو باب وشافو امين واقف خرج فيهم عينو كيطلع ويهبط فيهم. صدرهم خارج وجنابهم وكرشهم باينة والوشام فيديهم

شد فيد نريمان وقال : زيدي الله يحرق بوووك عايشة مع هادو ابنت الكلب وخاصك نسكت عاجبينك هاد قلال الحيااء.

تكلمات وحدة فدوك البنات وهيا كتمايل جيهتو وقالت : اووه عندناا ضيف هناا اممم مرحبااا دخل اش حاب الخاطر كلشي موووووجوووود

خرجات فيها ابتسام عينيها دفعاتها لداخل

نريمان : وبعدددد منييي واش مكتفهمش واش باغي ندير فراسي شي موصيبة امين فرقنييي عليك بعدددد مني

امين : بنبرة صوت حنونة) الله يهديك واش غتعيشي مع هادو راه هاد نماذج مكتعرفيهمش زيدي انريمان يلاه معايا عفاك الله يهديك.

نترات يديها ودخلات شافت فيه ابتسام يلاه بغات دخل وهوا يشد فيديها بقوة : والله وطرا ليها شي حاجة هااا وذني منك

ابتسام : سير سير مسالي مع قبك

نترات يديها دخلات وزدحات الباب. اماا امين خلا سانسور وهبط فالدروج كيجري..

دخلات نريمان لبيت والبنات كيسولوها مالك وشنو طراا وابتسام حداهم كتبدل حوايجهااا شوية سمعات صونيت فالباب مشات مغزفة تحل وهيا تلقى غير الدوا محطوط فباب ومكااين حد هزاتو ودخلات حطاتو على الطبلة

ابتساام : خدا ليك الدواا..

البنت : اويلي شنو طرا ياكما ***

خرجات نريمان فيها عينيهاا وخلات ابتسام كتهضر ف بلاصتها

ابتسام : راه بنت مريضة ومتبعة دواهاا اش هاد الهضرة عوتاني

البنت : ايوا معرفت انا شفتكم لبارح مجيتوش قلت وقيلة مشيتو ت ***

ابتسام : واش تسطيتي سكتي اياسمين براكة من الهضرة بزاف..

دخلات نريمان لبيت د ابتسام حيدات حوايجهاا وتكات تماا. دخلات عندها ابتسام وقالت : نوضي تفطري بعداا كولي شوية وعاد نعسي

نريمان : لا مخصنيش اختي غنعس غا شوية

خلاتها ابتسام وخرجات اماا نريمان شعلات تليفون ديالها.. وبقات كتهضر مع هناء وتعاود ليها اش طرا وامين لي غير تابعهااا... ومرة مرة دخل الفيس بوك تشوف اش كاين حتا بدا تليفون كيصوني ب اسمو " امين " وهيا طفيه وخشاتو تحت المخدة بقات كضور فبلاصتهاا حتا داهاا نعاس..

فاقت بحريق الراس واللحم مقطع فيهاا. شافت فالساعة لقات 5 دخلات العشية ناضت مخلوعة كتشوف فجنابهاا. رمات الغطاا وخرجات لبرا لقاات مكاين حد وبدات كتقلب فالبيوت كلشي خارج.

دخلات الكوزينة حلات الثلاجة لقاتها عامرة وفالقاع كاين مشروبات كحولية مستفيين مع عصاائر والمشروبات الغازية. هزات واحد كسرونة لقات فيها بقاية ديال دجاج محمر مع الفريت.

خرجاتو سخناتو وداكشي لي كلات مقدرات تقرب لحتا شي حاجة خوفاا انهم يغوتو عليهاا ولا يقولولهاا علاش هزيتي.. كلات تما واقفة وهيا حاسة براسهاا مزال عياانة واقفة غير بزز. شربات دواهاا وشمرات على يديها غسلات دوك المواعن لي تما كلهم خلات الدنيا كتشعل وخرجات برا كتشطب وتجمع الروينة حتا كملات غسلات يديها وجناب وجهها وهيا كتشوف وجهها فالمرايا حيدات الفاصمة كتشوف نيفها لي عوج خااارج لجنب مقدراتش تبقى هكاك بلاما دير الفاصمة ودارتها بالزربة وهيا كتحصر على حال لي هياا فيه.. شعلات تلفازة وجلسات كتقلب وتفرج حتا حتا وصلات 8 د ليل وناضت الكوزينة بدات كتقلب شنو كاين تما هزات بطاطة وبدات تقشر فيها حتا كملاتها وبدات كتقلي لقات الكفتة جبداتها شرملاتهاا وبدات تحك مطيشة وتكور وتحط وفنفس الوقت تقطع الخص كدير شلاضة..

وجدات ليهم طاجين د كفتة وفريت وشلايض فطبيسلات كانت مزال مسلات وهوا يبداو البنات يدخلو لقاوهاا فالكوزينة كتوجد جلسو حداهاا كينقبو فالفريت وهوما كيكميو ويبخو فالسماا

البنت 1 : كتعرفي طيبي معندي منسالك

البنت 2 : حنا 28 عام ومكنعرفو لوالو هه

البنت 1: نتي بعدا غا سكتي هادي بعدا مرا ديال زمان هه

البنت 2 : حتا حناا يا حبيبة اش ناقصنا غا الطياب الحبيب ديالي غيجيب ليا خدااااااامة

البنت 1 : داك ساعة غيتزعط فالخدامة ويخليك ههههه

نريمان : هههه

البنت 1 : اولا انريمان

نريمان : هه لا حاشة

البنت 2 : ياا ختي كتموتي بالسم ياالطيف

خرجو لصالة كيتجمعو ونريمان جالسة حداهم مكتهضر حتا كيهضروهاا وكتجااوب غير بالقياس حشمانة منهم وفنفس الوقت خايفة. دخلات ابتسام وبنات خرين وتعشااو مجموعين فجو الضحك وتقشاااب والمعاودة فوجو على نريمان وحتا هيا عجبها الحال..

دازت ايام وامين ديماا معرض ل نريمان فطريق او يجي عندها حتا لعمارة ولا صالون وابتساام خارجة فيه هيا وياه كلمة بكلمة ..بدات كتولف شوية الجو مع البنات ورجعت تقريبا هيا كدير شغل دار كامل باش متخلي لحتا شي وحدة متقول حتا من حوايجهم كتهزهم وتصبنهم فالمكينة كيجيو ليقااوهم مطويين. وحتا من الصالون بدات كطلق يديها وكتخدم لكليان امور بسيطة وملي مكيكون حتا شي واحد كتبدا توري لنريمان مشيطات خفاف هادشي ب امر من جوديا لي متبعة معاهم وكتسول على نريمان فكل وقت..

النفسية بدات كتحسن وكتحاول تنسى كل ماا داز عليها واخا لي داز محفووور فقلبهاا عمروو يتنسى..

كل ليلة قبل متنعس كتجي بين عينيها صورة زياد لي فنفسها كدعي الله

وكتمنى لو يجي فمنامها شي ليلة وتشوفوو. ديما ف اي وقت كتفكرو كتبكي عليه وغير كتبداا تفكر فيه او تشوف تصاورو كتنهاار بالبكا.

كانت فالصالون خدامة هيا والبنات حتا سمعو صوت طوموبيل وقف حدا الباب شوية تحل الباب وهيا دخل جوديا كتهضر فالتليفون .

غير شافتها نريمان لمعو عينيها من الفرحة ..

وهيا دير ليها جوديا اشارة براسها زعمة تبعيني..

حطات نريمان من يديها سيشوار ومشات لعندها لبيرو ديالها وابتسام عينيها معاها حتا دخلات وشدات الباب ..

يلاه دخلات لقات جوديا كتشوف فيهاا وهيا عاقدة حجبانها قربات عندها نريمان سلمات عليهاا وهيا تعنقها جوديا..

جوديا : جلسي انريمان، كيف بقيتي شوية

ابتسمااات بحياء وقالت : الحمد الله على سلامتك توحشنااك

جوديا : هه ياك بارك الله فيك عادجيت هاد يومين كنت فتونس مع راجلي ومشيت الفرانسا وعاد جيت

نريمان : على سلامتك نورتي الصالون

طولات جوديا فيها الشوفة وقالت : مال وجهك انريمان ياك لباس اش طرالك!!

نريمان : وقعولي بزاف دالحوايج وجهي ضاع لياا وحتا مستقبلي وجيت قصدااك تعاونيني تخليني غير معاك نعاونك مهم نبقى مأمنة عندك..

جوديا : بحزن) هضرييي خرجي لي فقلبك عاوديلي وقوليلي اش طرالك حيدي ديك فاصمة نشوف مالك..

حيدااتها نريمان فاصمة .. وجوديا حطات يديها على فمها مصدوووومة : اويليييي شكون دار فيك هادالحالة!!!

شافت فيها نريمان وعينيها مغرغريين وقالت : سعاد...

بدات كتعاود ليهاا وجوديا كتمسح دموعها بحزن كبير

جوديا : دابا خوك ماات؟ لاااميمكنش.. انا شفت كيفاش كنتي متشبتة بيه ومقدراش تفاارقي عليه بففف لا حول ولا قوة الا بالله.

حطات جودياا يديها على راسها وهيا متكية بيديها على البيرو ونريمان كتعاود ليهاا بصوت متقطع، حتا كملات الهضرة

جوديا : هادي خصهااا المؤبد هاديك خاصهااا اناا كن مرمردت اصل امهاا مزياان وندمتهااا على نهااار لي تزادت فيه

نريمان : منسمحش ليها لا ف دنيا ولا ف اخيرة ضيعاتني فصغري وفقرايتي وحياتي كلهاا.

جوديا : عرفتي شنو ملي كنتو عندي نتي وياهاا هناا راه لقيتها هازة لي واحد اكسيسوار ديال عرايس غالي وهزات لياا مكياج دوريجين غالي.. وصورات لياا لباسي وتصوراات حتا هيا وبرطاجات هادشي فالفيس البوك وكتقول لناس هادشي ديالها. حتاا صورولي شي بنات لباس ديالي وقالولي راه لقيناا شي وحدة ليحاه.. فديك ليلة بلوكيت ليهاا كونت ديالها. شفتي دخلتهاا لمحل ديالي وأمنتهاا واستغلات الفرصة باش تصور فالصالون ديالي وتبان على ضهري..

حلات نريمان فمهاا بصدمة وبقات غير كتشوف ملقاات متقول...

جوديا : شوفي اش غنقولك مرحبا بيك عندي انا تغذرت بزاف من ناس ونتي بغيت نتيق فيك ولكن متخيبيش تقتي. انا غنعلمك من الصفر وغنعطيك الديبلوم ديالك وغنزيدك فورماسيون من عندي بلا ريال بلا جوج انا زيانات كيجيو يديرو عندي فورمااسيون مهم غنعلمك مزيان حتا توقفي على رجلك غير هوا بقااي معايا بالوجه لي شفتك بيه اول مرة..

نريمان : منقدرش نجاوبك ولكن الايام توريك . عمرني نخيب ضنك فيااا وانا معاك فين ماابغيتي

جوديا : اوك المهم يكون خير عيطي لياا على ابتسااام نهضر معاها..

ناضت عيطات لابتسام دخلات سلمات على جوديا وجلسو بجوجهم قبالتها

جوديا : كيف غادية مع الخدمة !

ابتسام : صافااا هاحنا ماشين واي حاجة كنعلمك بيها

جوديا : امم اوك.

المهم من غدا غنبدا نعلم نريمان حتا تشد الخدمة مزياان وغتولي تخدمي نتي وياهااا. سمعيتي اما بنات لوخرين غنعطيهم حسابهم والله يعاونهم حيت شفت مزيان غا كيجيو يتخبعو عندي هناا .

ابتسام : واخاا الالة مرحبا

ناضو بنات خرجو وهيا تعيط جوديا ل بتسام رجعات عندها جلسات حداها

جوديا : طلبت منك تخلي نريمان معاك مهم ..

جبدات فلوس حداها بدات كتحسبهم وقالت : هاكي هادو حيت خليتيهاا معاك وعلمتيهاا..

ابتسام : لا ماشي مشكيل راه انا ولفتهاا وصراحة مفيهاش تبرزيط بالعكس لقيت فيها غا الخير معندك علاش تخلصيني راه خيرك سابق.

جوديا : شديهم بغيتي تقصمي معاها سوقك هداااك بغيتي تخليهم ليك نتي تعرفي..

شداتهم ابتسام من عندها ورجعات لخدمتهاا. حتا كملو شغلهم ورجعو بحالهم لدار ..

يلاه دخلات نريمان بدلات حوايجها وهيا تبعها ابتسام وشدات الباب.. ومدات ليها الفلوس قصمات معاهاا فالنص..

شافت فيها نريمان وقالت : ديلاش هادو ؟

ابتسام : خوديهم تكساي بيهم وشري لي محتاجة

نريمان : لا بلاش غير خليهم عندك حسبي بلي كارية معاك بلاما تعطيهم لياا

ابتسام : اه غتبقااي تخلصي الكرا ولكن ماشي دابا المهم شدي هادو

بززاتهم عليهم شداتهم من عندها..

وخبعاتهم مع الفلوس لي شاطو ليها من فلوس هناء..

طيبات ليهم العشاء تعشاو مجموعين . وبقااو مقصرين شحال ونريمان شادة تليفون كتهضر مع هناء وامين...

صيفطاات ليها جوديا مسج فالواتساب وقالت ليها : نريمان غدا تكوني عندي مع 12 . متعطليش

تحمسات ملي قرات المسج ورجعاات كتسنى غا ايمتاا يجي الصبااح

حطات راسها على المخدة وهيا شادة تليفون كتشوف أمين مزال كيكتب ليها مسجات ويصيفط

امين : واش فهمتي راه كازا هادي والجو ديالهم ماشي هوا ديالنا ..

معندك مديري بهاد دومين انريمان

ياك قلتي خصك تكملي قرايتك وتولي طبيبة فين هوا داك الحلم وانا كنت مستاعد نعاونك واخا نخدم فاش مكان المهم نتي تقراي وتحققي داكشي لي باغا

نريمان نعلي الشيطان ومتبقايش مع دوك البنات..

مجوبااتوش على مسجات ديالو وكتبات ليه : المهم نتا فين ساكن ومعامن واش خدام ولا غير مساري هنا.

امين : انا كريت واحد البيت مع واحد مرا كبيرة ساكنة بوحدها ولادها مزوجين . ايوا صراحة انسانة طيبة لي وجداتها تجيبلي منها وانا كنتسخر ليها ونعاونها الا كنت مسالي وعاد بديت خدمة فواحد المعمل د بونج مهم منبقااش جالس

نريمان : كون غير كملتي قرايتك ودرتي شي حاجة

امين : مبقااش عندي الغراض فالقرايا صراحة مهم نساي. قوليلي انريمان نقدرو نخرجو غدا اناا وياك!

نريمان : غدا؟ معرفتش غدا غنبدا القرايا وموحال واش يكون عندي الوقت خاوي

امين : عفاك حاولي واخاا غير ساعة مهم نشوفك فيها ونجلسو على راحتناا بلاما كل مرة نجي لديك عمارة ولا لصالون

نريمان : واخا ديك ساعة نرد عليك. نخليك دابا خاصني نعس خصني نفيق غدا بكري..

امين : واخاا ردي البال راسك عفاك غدا نتشاوفو..

خلات ليه قلب بيض🤍

وشدات تليفون

حطاتو تحت مخدتها..

دخلات ابتسام حتا هياا متعوبة تخشاات فبلاصتها وعيا تقول ليها نريمان : ابتسام واخا تخرجي معايا غدا نشري شي بيجامة نلبسها فدار ونشري شي حاجة نبقى نخرج بها..

ابتسام : مزيان لي قلتيهالي حتا انا كنت غدا خصني نخرج نتقداا شي حوايج وتخربيق كلشي تسلالي.

نريمان : ووو وجوديا قالت لياا غدا مع 12 خاصني نكون عندها فالصالون..

ضارت ابتسام عندها شافت فيها وقالت : علاش؟

نريمان : معرفتش وقيلة غتبدا تعلمني داكشي لي قالت لياا..

ضورات ابتسام وجهها وهيا كتشوف فالتليفون وقالت : امم الله يوفق..

نريمان : امين يلاه تصبحي، على خير..

حركات ليها ابتسام رااسها. اما نريمان بقاات شادة عينيهاا حتا داهاا النعاس. فصباح بكري فاقت دخلات الكوزينة صوبات الفطور ومشات نوضاات ابتسام فطرو بجوجهم وخرجو مشاو القيصرية لقاوهم يلاه كيفتحو... وبداو كيشوفو الحوايج ويعزلو ويقيصو بيناتهم. شرات نريمان جوج كسيوات دالخروج مستورين وفنفس الوقت انقيين بالفولار ديالهم وكتحاول تقتاصد على الفلوس. لقات البيجامات غالييين وبقاو كيضورو حتا خدات ابتسام لي خاصها ومشات لسوق شعبي.. دخلو كيعزلو بيجامات لقاوهم 60 درهم لوحدة شرات نريمان جوج وشرات معاهم ديودوغون مع ريحة صغيرة وصاك صغير عندو يدو بحال سنسلة طويلة لبسااتو كيجي محرف .. وصباط ب 120 درهم وخلات شوية دالفلوس تقضي بيهم مرا خرا. رجعو لدار وكانت 12:30 .. لبسات نريمان حوايجهاا بالزربة وخرجات هيا وابتسام غاديين لصالون. نيت ابتسام هاديك هيا ساعة لس خصها تكون تماا حيت الكليان متعرفو فقاش يجي.

يلاه بغات ابتسام ضور ساروت فالباب لقااتو مفتوح دخلو لقاو جوديا فالبيرو كتهضر فالتليفون.. مشات ابتسام تبدل حوايجهاا فالبيت خاص بملابس خدمة.. اما نريمان مشات نيشان وقفات فباب د بيرو ودقات جوج دقات بيديها. هزات جوديا فيها عينيها ودارت ليها اشارة بيديها دخل.

جلسات قبالتها حادرة راسها . قطعات جوديا المكالمة وهيا تقول : فين هاد تعطيلة الوحدة هادي والزيادة

نريمان : سمحيلي بزااف راه غير مشيت انا وابتسام خديت شي حويجات حيت مكان عندي منلبس داكشي علاش تعطلت..

جوديا : امم طلعي الفوق اناا جايا وقولي حتا ابتساام طلع معاك ومزيان ملي جات حتا هيا ومتعطلاااش

مشات نريمان عيطات ل ابتسااام وطلعو بجوج بيهم بقاو واقفين تما حتا طلعات عندهم جوديا عاد حلات باب د البيت الخاص بها وكل مستلزماات العروس وجميع ادوات التجميلية وطبلة طويلة محطوطين فيها جميع المكياج غير الماركة...

بمرايا مزينينها بولات مشعولين

جوديا : جلسي ابتسام فيك غنبدا نوري لنريمان باش تفهم مزيان..

جلسات ابتسام وبدات جوديا كتوريها من الصفر المكيااج وكيفاش تخدم وتقنياات السهلة ونريمان غير كتشوف فيها متبعة معاها خطوة بخطوة..

خصصات جوديا جوج سوايع يوميا لنريمان من 12 ل 2 .. تعلمهاا ومن مكياجها الخاص..

عجباتها الحصة اللولة واخاا صعيبة وكتقول فنفسهاا عمرهاااا تعلم حيت هيا اصلا مكانتش باغا هاد الدومين من اول وهادشي صعيب عليها ومغاديش تفهم ليه...

من بعد الحصة لي دوزات هبطو لتحت هيا وابتساام والكليان بدا كيدخل شي كيعربن لعرس شي باغي يصبغ شعرو وشي معروض باغي يصاوب شعر والمكياج. بقاات جوديا الفوق والكليان كيطلع لعندها كتخدم ليه اما نريمان لابسة طبلية خاصة بالخدمة ودايرة ليڭات على يديها وشادة شيتة كتصبغ شعر لواحد البنت...

بقاا تليفون د نريمان كيڤيبري ف جيبها حتا عيااا مسمعاااتوش.

مشات تغسل شعر الكليانة وهوا يصوني باب حلات ابتسام وهيا تلقى امين واقف لابس سروال دجين مع تريكو بالعنق وكوير...

شافتو ابتسام وهيا تقول : شكاين لاش جاي لهنى

امين : جيت نشوف سيادتكم واش خاصكم شي حاجة. علاش غنجي فنضرك ؟ جيت عند نريمان دايرين اناا وياها نخرجو

ابتسام : راهاا مشغولة مع الكليانة كتغسل ليهاا شعرها ودابا مولات الشي هناا ميمكنش تخرج

امين : شفتي نتي غا كتجي لكمارتي تعكسي الامور سيري عيطي لنريمان الله يرضي عليك سيري

ابتسام : هيا دابا نتا مكتفهمش الهضرة وقلت ليك السيدة مشغولة ممساالياش،

امين : اهاه وبالسلامة نتي مساليااا ليااا ياك.

تنهدات ابتسام بنفاذ الصبر ردات الباب ودخلات تعيط ليهاا لقاتها كتنشف الشعر الكليانة وقفات قدامهاا عاقدة حجبانها وقالت : هداك اللسقة عوتاني جاا راه فالباب قالك داير معاك تخرجو

نريمان : اويلي فقاش جاا قوليليه منقدرش نخرج دابا مشغولين

ابتسام : سيري اختي نتي قوليهاا ليه اناا مفياا منتجاادل معاه

مشات نريمان لعندو حلات الباب لقااتو واقف عاطي بالضهر غير سمع الباب ضار لعندها.

نريمان : امين كيف داير لباس

امين : قلنا غنخرجو اليوم

نريمان : اه ولكن معنديش كيف ندير دابا مولات الشي هناا وناس بزاف منقدرش نخرج

امين : وزعمة تافقنااا ولا؟؟ واناا خليت شغلي وجيت لعندك ونتي متقدريش تعطيني ساعة نخرجو فيها شوية ..!!

نريمان : شوف مرا خرا والله حتا نخرجو غير منكونش خدامة..

زرب عليها وقال : غنخرجو هاد ليلة ملي تسالي صيفطيلي مسج نجي موراك ونخرجو

حركات راسهاا وقالت : صافي واخا..

رجعات كملات لكليانة شعرها ومشات لعند ابتسام لي خدامة لناس خرين..

نريمان : بتردد) ابتسام امين قالي نخرجو فالليل وانا اختي منقدرش نمشي معاه بوحدي.

ابتسام : وانا شغندير ليك! ولد عمك سيري خرجي نتي وياه مفيها والو

نريمان : لا منقدرش اختي يلاه معايا نتي عفاك

خرجات فيها عينيها وقالت : واناا لاش هوا باغي يخرج معاك راس فراس وانا ندخل بيناتكم

نريمان : الا اينا راس فراس راه غنخرجو غير شوية ونرجعو

ابتسام : لا لااا اختي اناا معندي فين نمشي

نريمان : وعفااك الله يعطيك ماا تمنى يلاه معايا انا كنخااف منقدرش نخرج معاه..

ابتسام : منعرف مهم حتا نساليو ونشوفو شنو كاين. .

كملو الخدمة مع 8 ومع الشتاء والبرد كتكون الخدمة فالصالونات قليلة ولكن صالون جوديا كتكون فيه الخدمة محركة.. خرجو بحالهم ونريمان كتشوف ف ابتسام باغا تهضر ومترددة .. وقفو فالطريطوار كتشير لطاكسي وهيا تقول نريمان : وو ماا غاديش نخرجوو ! امين صونا عليا ومسمعتوش !

ابتسام : ايوا نمشيو لبسو حوايجنااا ونقادو حالتنا ولا غنمشيو هاكاا

طلعو فالطاكسي ومشاو لدار دخلات نريمان لبسات حوايجها بالزربة وحرفات بالصاك لي شرات شافت راسها فالمرايا .. كلشي فيها مقاد وملامحها الجميلة من غير نيفها لي باين عوج واخا دايرة ليه الفاصمة ..

بقاا فيها الحال وغلبوها دموعهاا جلسات فطرف كتحصر على حالها وشنو غدير باش يرجع وجهها كيف كان..

حتا دخلات ابتسام لقاتها جالسة فطرف فراش دايرة يديها بجوج على جبهتها..

قربات عندها كتشوف فيها بتسااؤل

ابتسام : مالك انريمان علاش كتبكي

ردات عليها بصوت متقطع

نريمان : محملاا ش نشوو ف وجههيي هاكاا تعقدت مبقييتش قادرة نشوف حتا فالمراياا .

ابتسام : بحزن) عارفة وحاسة بيك ولكن مديريش فبالك هادشي خصوو غا الفلوس وتمشي ديري عملية تجميل ويرجع ليك نيفك كيف كان وحسن خاص غا الفلووس

شافت فيها نريمان ودموع فعينيها..

نريمان : ونرجع كيف كنت زعمة!

ابتساام : اييه وحسن كاع غا هوا خصك فلوس صحييحة ملااااييين يا الحبيبة ملاااين

جالسة فبلاصتها كتخمم واش يقدر يجي واحد الوقت يرجع وجهها كيف كان. واش تقدر تخدم وتجمع الفلوس وايمتاا هادشي شي 10 سنين؟ اولا يمكن كتر...

فيقها من سهوها اتصال امين هزات تليفون ردات عليه وهيا كتشوف ف ابتسام جالسة حدا مراية كتقااد المكيااج

نريمان : اه حنا فدار .. لا خرجنا بكري.. واخا صافي

قطعات المكالمة وقالت : هاهوا جاي فالطريق كملتي

ابتساام : امم تقريبا ساليت

نريمان : صافي براكة من المكياج حنا غنخرجو غير نضورو شوية وصافي..

ابتساام : شناهوا ومالي غنخرج سفراا بحالا خارجة من سبيطار حتا نتي.

كملو وخرجو هبطو فالسانسور ونريمان عينيها مع ابتسام لي لابسة سروال دالجلد مزير مع تريكو رهيف وتجاكيط فوق منو مع ليبوط طالع حتا لركبة وشعر مبوكلي..

خرجو برا شاديين فبعضياتهم لقاو امين واقف تما يلاه شافهم وهوا يعقد حجبانو كيطلع ويهبط ف ابتساام..

ابتسام : عوجات فمها) شكاين مالناا

امين : ونتي فين غادا

ابتسام : غاداا مع صحبتي عندك شي ماانع

شاف فنريمان لي غير حادرة عينيها وتم زايد قدامهم وهوما موراه ضحكات ابتسام وقالت : هههههه فكرتينا فالواليد كان كيزيد قدامناا ويخلينا حنا موراه ولا حنا قدامو وهواا مورانا

امين : بصح ميحسابش ليااا ايوا اناا كنت خارج انا وبنت عمي ولكن ملي كاين الزايد معندي فين نزيد..

ابتسام : عزيتي علياا ولكن هانتا كتشوف منقدرش نخليهاا تخرج بوحدها فهاد نص الليل وكحل الراس مفيه تيقة

طلع حاجبو فيها مجوبهاش وقال لنريمان : فين تبغي تمشي !

نريمان : معرفتش شوف نتا فينماا بغيتي

ابتسام : ديناا اصاحبي لشي غيسطو نتعشااو فيه

امين : تبغي تمشي انريمان؟

نريمان : لا بلاش غير خلينا نتمشااو دابا

قربات نريمان عند ابتسام وقالت : وعنداك ميكونش عندو الفلوس مكاين لاش نحشموه

ابتسام : مسكينة كتخمم ليه الحب يا ودي..

ضار عندهم امين وقف وقال : غنشدو طاكسي

ابتسام : حسن مغادير

قلب عينو شدو طاكسي ودخلو لمقهى شدو بلايصهم وقال لنريمان : شنو تشربي انريمان

هزات فيه عينيها بحياء أول مرة فحياتهاا غدخل القهوة وقالت : لي بغيتي معرفتش

قلب عينيه عند ابتسام معوج فمو

امين : وانت اشريفة

ابتسام : شناهوا ؟؟ شريفة انا لالة ابتساام اسي وبغيت كابوتشينو

خدا نادل طلبيات ومشا ..

بقا امين كيضور عينيه كيحاول يشتت النضر ميشوفش فيهم ونريمان عاجبها الحال وحاسة براحة واخا متوترة شوية..

حطو ليها عصير شربات منو رشفة وهوا يقول امين لي هاز كاس دالقهوة فيدو : بالريفية) وصال جاوها الخطاب

نريمان : بصح مغاديش تكمل القرايا؟

امين : الوليد مبغاش راكي عرفاه كي داير كيقولك معندناا بنات لي يقراو

نريمان : وهاد السيد هيا كتعرفو ولا..

قطعها بالزربة وقال : صاحب الوليد هما فالناضور ولدو عايش ف اسبانيا

بقات ابتسام كتشوف فيهم بجوج وهيا عاقدة حجبانها وامين كيعاود ليهاا ويشرب رشفه من القهوة..

ابتسام : متعرفوش تهضرو بالعربية ولا كتهضرو فيااا

نريمان : لا لا راه كيعاود لياا غير على عائلة

ابتسام : ايوا هضرو عادي ولا خايفين نخرج ليكم شي هضرة بففف

امين : راه قلت ليها غير ختي غتخطب هادشي لي كاين الشريفة وزايدون امور عائلية بحال عرفتي بحال معرفتيش

ابتسام : ناري هاد ولد عمك ومكيهضر انريمان معرفتش كيف كنتي قادرة تعيشي معاهم

امين : ونتي مالك معجبكش الحال خليناا بوحدناا..

ناضت ابتسام معجبهاش الحال هزات صاكها وهيا تنوض نريمان مخرجة عينيهاا شداتهاا

نريمان : فين غاديااا

ابتسام : ايوا هانتي كتسمعي هضرة دولد عمك خليني غنمشي بحالي

نريمان : لا غنمشيو بجوج الا كنتي غتمشي

امين : والشريفة يا نتي تشدي فيناا عادي حنا ندويو معاك تنفخي

مرداتش عليه رجعات جلسات فبلاصتها وهوا شاد الضحكة ونريمان كضور عينيها فيهم..

شدات الشتاء خيط من السماء وبقاو جالسين كيتسناوهاا تحبس حتا مشاا الحال عاد شدو طاكسي رجعهم لدار. حتا دخلو بحالهم عاد رجع بحالو

ابتسام : ناري هاد ولد عمك شحال لسقة وليني بوقووص هه

نريمان : ههه اه صراحة ضريف هوا لس عاوني وقف معايا واخا ماماه معجبهاش الحال فالايامات التالية ملي كانت متشوفو كيخرجني وحتا ختو ولكن هواا مخلانيش.

ابتسام : ايوا علاش متزوجيش بيه كيبان لياا هوا الوحيد لي يقدر يبغيك ويحافض عليك.

نريمان : نتزوج بيه؟؟ ههه مستحيل اناا اخر حاجة كنفكر فيها هيا الزواج. ماشي غير من امين من اي واحد فهاد الدنيا اماا هوا بحال خوياا وغيبقاا خوياا ديماا

ابتسام : علاش زعمة مكتفكرييش تكون عندك شي غولاسيون مع شي حد!

نريمان : معمرهاا مغتكون وبصراحة نتي مزال معرفااانيش انا من الداخل ديالي كارهة حس الرجال فمرا واخاا ممدوزش فحياتي ولكن من احس ميدخل حياتي حد.

ابتسام : امم دابا تبدل ليك هاد النضرة وتولي تبغي شي حد هههه وتقولي نريمان قالت خخ

نريمان : ايوا هاناا هانتي ههه

بدلو حوايجهم وخرجو تعشاو مع البنات . دخلات نريمان لبلاصتها يلاه حطات راسها على المخدة غفاات...

فصباح مشمش.. فاقت نريمان كانت كلشي ناعس اول حاجة دارتها دخلات الحمام دوشاات طلقاات عضامها مزيان.. نشفات شعرهاا بسيشوار د ابتسام ومشات الكوزينة وجدات الفطور فطرات وجمعات الروينة ومشات بدلات حوايجهاا فيقاات ابتسام بشوية..

علماتها بلي غتمشي لصالون .. خلاتها ناعسة و خرجات لاول مرة بوحدها

شدات طاكسي حتا وقفات ف باب صالون لقات جوديا تماا هيا والصديقة ديالها.. سلمات عليهم نريمان وبقات جالسة معاهم .. حتا مشات الصديقة ديالهاا وبدات معاهاا فالحصة ثانية.. وراتها دروس جديدة وعطاتها كتاب تقيد فيها انواع الصبايغ وطريقة د الصباغة وكل ماا يخص الشعر.. دازو شهراين ايام عادية روتينية عند نريمان. من الصالون لدار ومرة مرة تخرج هيا وامين وابتساام.. ولفاات الخدمة ورجعات متحمسة باش تعلم كتر عجبها الدومين ورجعات كتمنى غير ايمتا تشد ديبلوم . جوديا دارت معاها كتر من المجهود كتعلمهاا من القلب ونريمان أذن صاغية. متبعة معاها خطوة بخطوة.. ونشيطة فخدمتها ورجعات ضخوكية مع الكليان ولاو كيبغيوهاا وكيختاروها هيا لي تخدم ليهم. وحتا من الفيس بوك ديالها رجعات كتهز تصاور صالون جوديا والزينات لي دارت للفنانين وخدمة دكليان وكتحطهم فالفيس بوك دير ليهم اشهار وناس كيصيفطو ليها ويسولوها فين جاا وكيسولوها على الاثمنة..

اما هيا وثكتهضر مع ناس بكل احترام وكتقدم ليهم صالون وتجاوب على تسائلاتهم. رجعات كتجيب كليااانات جداد.. وجوديا عجبها الحال وفرحات كتر.. واخا صالونها معروف وكيجيو ليه غير شكون وشكون ولكن هادي اول وحدة دير ليها اشهار وتجيب لكلياناات لصالون عكس بنات لوخرين كانو كيديرو اشهار لصالون ولكن كيخدمو راسهم ويجمعو الفلوس حسي مسي.

كان معربن واحد العرس كبير فمدينة طنجة وعلمات جوديا نريمان بلي غتمشي معاهاا وهيا لي غتخدم معاها. وداكشي لي كان فداك اليوم فصباح لبسات نريمان حوايجها وجدات راسها. وخرجات يلاه بغات تشد طاكسي وهيا تشوف جوديا واقفة فالباب بسيارتها كتسناها.. مشات جيهتها ببتسامة حلات باب طوموبيل سلمات عليهاا ومشاو وابتسام من فوق فالشرجم كطلل وعاقدة حجبانها.

نريمان : واش غنمشيو لصالون ولا غنمشي دابا لطنجة.

جوديا : نيشان لطنجة راه سبقوناا دراري داو الحوايج وحنا نمشيو بشوية علينا ..

طريق كلها وهوما مجمعين جوديا لقات راحتهاا لأول مرة كتعاود لنريمان على حياتها وهمومهاا ومشااكيل لي كدوز منها ونريمان غير كتصنت ليها .

جوديا : هه صراحة محسبتكش خدامة عندي درتك ختي الصغيرة والله رجعتي عندي عزيزة بزاف

نريمان : انا يمكن كتر منك وكتر ماا تتصوري حيت، لقيتك واقفة فجنبي من نهار اللول ومسمحتيش فياا وعطيتيني فرصة فهاد الحياة عمرني نسا خير

جوديا : وهكاك اناا عمرني ندم على تقة لي درت فيك..

حبسو فالطريق تغداو طبلة عامرة من أشهى المأكولات.. بقات نريمان كتاكل فوق النفس واخاا حشمانة مكتبغيش تاكل فشي بلاصة فيها ناس بزاف ولكن الجوع كان غالبها.. وصلو قبل المغرب للقصر المقيم فيه العرس وبداو نيشان فالخدمة ونريمان حالة فمها اول مرة تشوف قصر كيف داير. قاعة افراح معمرهاا شافت بحالهاا. جهزو العروسة وهبطوها النكاافات وجوديا موراهم كتصور بالتليفون ديالها اما نريمان فالبيت كتخدم البنات شعر والمكياج خفيف.. وكتحاول تزرب باش تصاوب لناس خرين لي كيتسناو وفنفس الوقت تمشي تعاون جوديا ملي يطلعو العروسة..

كملو حتا 3 د ليل دخلو ليهم من أشهى وألذ المؤكولات يلاه داقت جوديا شوية وتوخرات خلات نريمان كتاكل.

نريمان : كولي شوية مفيكش جوع

جوديا : فليل كنقطع ماكلة كناخد غير تفاحة اولا كاس د للحليب وصافي غير كولي نتي بصحتك

نريمان : وهزي دي لوليداتك شوية مساكن غيراعيوك

جوديا : ههههههه لا لا معندنااش حنا داكشي ولادي فشكل ميتسنااو مني حتا حاجة اصلا عندي دراري كيبغيو غير الحلوة وسقاطة اماا هاد الماكلة مكيبغيوهاش وبالخصوص طياب فدار

نريمان : وصراحة مكينش محسن من الواحد، ياكل الحاجة ديال دار بعدا يعرف شنو فيها..

جوديا : وييه عندك الحق. المهم كولي نتي بصحتك انا نصوني على راجلي راه كيتسناني نصوني عليه.

ناضت جوديا وخلات نريمان كتاكل وتبنن. حتا كملات وخدات ديسير وجلسات شادة تليفون فيديها كطلع وتهبط فالفيس حتا رجعات جوديا وقالت : نمشيو؟

نريمان : نرجعو لكازا دابا

جوديا : لا غنمشيو الاوطيل نعسو نرتاحو بعدا بيدما تمشي العروسة لدارها ويجيبولنا الكسوة عاد نشدو طريق.. جمعو المطريال دالخدمة كامل هبطوه لطوموبيل. ومشاو نيشان الاوطيل حجزو بيت ليهم بجوج افرشة طرفو حالتهم وكل وحدة شدات بلاصتها جوديا فالبلاصة نعسات اماا نريمان بقات كطلل فالبالكون كتشوف المنضر الليلي والبحر والجو هادئ لتقطات بعض الصور. ورجعات لبلاصتها نعسات حتا 12 د نهار عاد فاقو هبطو بجوج بيهم لمقهى لي جنب الاوطيل فطرو تماا ومشاو لدار العروسة وقفو فالباب حتا خرجو ليهم الكسوة ورجعو بحالهم لكازا.. نريمان غلبهاا راسها بالحريق ونعسات اما جوديا بقاات سايقة وكتسمع الموسيقى ومرة مرة تهضر مع راجلهاا حتا وصلو لكازا.. وقفو فالصالون كانت تما ابتسام وبنت خرا خدامين وكليان موجود...

رجعو مطريال لبلاصتو وهيا دخل جوديا للبيرو وعيطات لنريمان تبعاتها... هزات شي فلوس وبداات كتحسب فيهم جمعاتهم ومداتهم لنريمان..

نريمان : ديلاش هادو!

جوديا : خدمتك ومجهود لي كديري راه كنرخي عليك كنشوفك اش غديري ولكن مكتخيبيش صراحة معندي منقولك وهادا حسابك

نريمان : ولكن نتي كتعطيني كتر من حقي وانا منستاهل غير لي خدمت فيه منقدرش نشد من عندك هاد فلوس كلهم عطيني غير باش نديباني ماشي ضروري تخلصيني فالخدمة كلها...

جوديا : شدي فلوسك وسيري دابا شدي وبلا هضرة راه نتي اكثر وحدة محتاجاهم... المهم سيري لدار ورتاحي حتا لغدا وعاد اجي خدمي فالصالون

شداتهم من عندهاا بخجل غير الزرقة فوق الزرقة..

خشاتهم فصاكها وخرجات عند ابتسام

نريمان : واخاا تعطيني اختي ساروت نرجع لدار

مجوبتهاش ابتسام وبقات خدامة شغلها. عودات طلبتو منها وهيا تجبدو من جيبها ورماتو ليها على كنطوار.. هزاتو نريمان بحزن معجبهاش التصرف د ابتسام معاها خرجات شدات طاكسي ومشات لدار.. دخلات نيشان لبيت وشدات عليها حلات المجر د الماريو بالساروت كانت عطاتو ليها ابتسام تخبي فيهم وراقها واي حاجة كتخصها.. جبدات منهم صندوق صغير. كانت كتخبي فيه فلوسها جبداتهم كلهم. حسباتهم كان مليون وزيادة فرحات بزاف وحمدات الله انها بدات كتجمع حطات هدف واحد فحياتها انها تجمع الفلوس واول حاجة ديرها هيا تشوف شي طبيب يدير ليها عملية تجميلية على نيفها باش يرجع كيف كان وميبقاش التشوه ومتبقااش تغطيه بالفاصمة...

جمعات داكشي كولو شدات عليه بالساروت ومشات الكوزينة وجدات العشاا وبقات جالسة تما حتا دخلات ابتسام. وهيا تنوض عندها نريمان ببتسامة : على سلامتك كيف بقيتي

ابتسام : مزيان

نزيمان : ابتسام مالك واش مقلقة مني؟ واش درت ليك شي حاجة خصرات خاطرك

شافت فيها عاقدة حجبانهاا ونيفها كيسوط وقالت بالجهد : زعمة نتي عطاتك الدنيا تخدمي وتجمعي الفلوس على ضهري انا وانا نخلص عليك الكرا ومسكناك فابور . شمن ربح الالة عندي فيك ياك عوناك خدمتي وقفتي على رجليك. خديتيلي بلاصتي عند جودياا درتي كلينات ديالك. ايوا شنو باقي اخور تجري عليا وقيلة من صالون ياك ذغيا كتقلبو وجوهكم وكتبغيو تربيو الكتااف على ضهر غيركم.. صافي درتي جوانح ايوا الالة شوفيلك شي سكنة خرا وخليناا خوت

حلات فمها نريمان كتشوف فيها بصدمة ممتيقاااش ان ابتسام كتخرج هاد الهضرة على فمها...

سكتات للحضة وقالت : متقلة عليك؟

انا عارفة راسي بسلت وبزاف وعرفاك شديتيني عندك ودرتي فياا خير ولكن انا مديتلكش بلاصتك عند جوديا نتي من نهار اللول كنتي غير فالصالون كتخليك فيه حيت كتيق فيك اماا انا طلباتني نمشي معاها العرس ومشيت عادي حيت وليت خدامة عندها وانا اي حاجة قالتها لياا خصني نفذها كيف انا كيف نتي وانا ..

اختي انا من دابا نجمع حوايجي ونخرج منعاودش نضيق عليك سمحيلي بزاف ...

دخلات نريمان لبيت بدات كتجمع حويجاتها فصاك صغير

وابتسام برا جالسة دموع مغرغرين ليها فعينيهاا وهيا شادة جبهتها بيديها وكتشوف فالارض .. مسحات دموعها وناضت بالزربة دخلات لعندها...

دخلات عندها لقاتها كتجمع حوايحها وهيا تنترهم من يديها وقالت : وصااافي ازمر ساعااتو الله انا كنت معصبة ومعرفت راسي اش كنقول

نريمان : لا صافي ماشي مشكيل اصلا انا كنت غنقولهاا ليك فهاد السيمانا كنت غنخرح الله يسهل عليك

ابتسام : نريمان متجهلينيش انا عرفاااك معندك فين تمشي وانا قلت ليك غا كنت معصبة ومعرفتش راسي حتا خرجت هادشي من فمي سمحيلي..

شداتها عنقاااتها وحتا نريمان عنقااتها

وقالت : وصافي حطي دوك الحوايج يلاه نخوجو نتعشاااو بنات مغاديش يجيو هاد ليلة راكي عرفاهم كل وحدة وفين غتبات..

نريمان : لا انا مخصنيش مفيااش الجوع غير سيري كولي نتي

ابتسام : وصافي اصاااحبتي زيدي يلاه ناكلو ونساي وسمحيلي.

خرجات نريمان هيا ويااها جلسو على طبلة شاعلين تلفازة كيتفرجو. ويتعشااو فصمت.. كلات نريمان جوج دغمات وقالت : تصبحي على خير اناا غنمشي نعس

ابتسام : كملي ماكلتك بعدااا

نريمان : لا صافي مخصنيش..

دخلات نريمان وردات موراها الباب اماا ابتسام ناضت ومشات نيشان وقفاات حدا باب البيت ورجعات باللور خلات حتا يصبح الحال عاد تهضر معاها..

صبح الحال.. البرد والشتاااء كتصب خيط من سماء واقفة نريمان حدا باب العمارة هازة صاكها فيديها كتسنى الشتاء تحبس وهيا تشوف الجارة لي كانت ساكنة قبالتهم خارجة لابسة مونطو ابتسمات فوجه نريمان وقالت صباح الخير

نريمان : صباح نور كيف صبحتي لباس كيف صبحو دراري

الجارة : يسقسي فيك الخير لباس فين غادة فهاد صباح

نريمان : مبقيتش ساكنة هنا غنمشي نقلب على شي سكنة خرا

الجارة : امم ايوا حسن مدرتي هادو مامعاهم عيشة كي شفتي ديماا مخيلينا بلا نعاس حتا فجر عاد كينعسو غوات والضحك وموصيبة رجعنا نشوفو رجال داخلين لهناا شي نهار نعيطو لبوليس يوقفولناا هاد المنكر

نريمان : بصدمة ) شناهواا رجاال ؟ لديك دار كيدخلو!

الجارة : ايييه ايوا غير هاد سيمانا انا خارجة والراجل خارج تصدمت

نريمان : اناا هادشي والله مااا فخباري حتا كتقوليه ليااا نتي والله مفراسي

الجارة : ايوا حضي راسك نخليك دابا شتاا فترات غنمشي المارشي.

نريمان: اجي نسولك بعداا الا كنتي عارفة

الجارة : اهاه قوليلي ياك لباس

نريمان : مكتعرفيش شي بيت وكوزينة صغارين يتكراو بغيت نسكن غير بوحدي ولكن بغيت شي حاجة رخيصة نقد عليها.

الجارة : وكاينة واحد صحبتي وراهاا سبحان الله قريبة لداك الصالون لي كتخدمي فيه ساكنة هيا وراجلها وليداتها وراه عندهاا شي سكنة خاوي الله وعلم

نريمان : متقدريش عفاك تشوفيليا معاها الا كانت باقا تكريهالي

الجارة : ايوا يلاه معايا المارشي ونصوني عليها فالطريق ونسولها قدامك ويلا كانت شي حاجة راه غتقولهالي..

مشاات معاها نريمان حتا لسوق. اتاصلو بالسيدة وعلماتهم بلي سكنة خاوية ويلا بغات نريمان تشوفها من هاد الوقيتة..

تقدات السيدة ورجعات معاها نريمان حتا لعمارة هازة معاها التقدية طلعاتها لدار ورجعات لعند نريمان لي بقات كتسناها لتحت ومشاو شدو طاكسي لعند ديك المرا..

كيف حلات ليهم بنتها الباب ضربات ريحة تباخر ودخاخن قالبة دنياا..

دخلو لعندها لقاوها فصالون معاها جوج عيالات وهيا جالسة كتشوف ليهم فالكارطة وتقول شنو كاين.

ونريمان مخرجة عنيها خيفانة ومصدووومة..

حتا كملات عاد تسالمو بيناتهم وعرفاتها ب نريمان وهيا تقول : شحال عندك ابنتي من عام :

نريمان : 17 عام

المرا : امم ونتي قادة بعدا بشي كرا

نريمان : اه ضروري بغيت نسكن بوحدي وبغيت آمان وبلاصة مرتاحة وصافي

المرا : ايوا داكشي لي بغيتي هوا لي عندي. غر راحة والكالم. ومكاااين لي يآديك. غاهوا فمك تسديه ومكتعرفيني مكنعرفك لي سولك على الشريفة لالة حنان قوليليه مكنعرفهااش. ايوا انا كنكري ب 700

نريمان : 700 ؟؟ لا غالية وانا منقدرش على هاد التمن

المرا : وعلاه شحال غتخلصيني فشهر راه فيها الماا والضو.

نريمان : وشنو فيها

المرا : بيت كبير وكوزينة وطواليط

نريمان : ومتنقصيليش شوية راه انا نهار كولو مغاديش نكون فدار غنجي معطلة ومعنديش مكينة د صابون ولا تلفازة يعني مغادي نهلك لا ضو ولا ماا صابون من سيمانا لسيمانا عاد نصبن

تكلمات الجارة وقالت : هاد بنت كانت ساكنة مع دوك قماقم لي قبالتي كي شتي رجال رجعو يدخلو لتما بلا حشمة بلا حياااء

تكلمات نريمان بالزربة هيا كتشوف فالمرا لي غتكري من عندها : اناا بعيدة على دوك بنات مكنعرفهمش كاع انا كنت ساكنة مع وحدة تما متفااهمناش وخرجت ولكن والله معمرني شفت شي راجل تما داخل. المهم دار الله خير ملي خرجت

المرا : امم ايوا حوتة كتخنز شواري حضيي عرضك كلنا عندناا بنات العفوو وخلاص.

جبدات سبسي طويل شعلاتو وبدات كتطفي ونريمان كتشوش بيديها وعينيها خارجين غلبلتها ريحة دالكيف..

المرا : ايوا يكون خير شوفي دار بعدا عجباتك غنخليهالك 600 درهم وهاد اخر تمن

شافت نريمان فالجارة لي جات معاها ورجعات شافت فالمرا وقالت :

واخا صافي مهم انا غنمشي دابا وغنجي حتا العشية بيدما نجيب شي بونجة فيدي وكاشة ..

جبدات ليها 600 درهم مداتهم ليها وعطاتها مرا ساروت طلعات معاها بنتها لسطح. نص مبني ونص بقاا غير سطح. حلات باب لقات طواليط صغيرة عادية على يدها د ليمن بالباب ديالها والبيت وقبالتو كوزينة صغيرة

شافتهم نريمان حطات حوايجها وبلجات بالسروت وهبطات هيا والبنت طلات على مرا وقالت : وصافي فعشية نجي الله يعاونك...

خرجات هيا والجارة وهيا تكمش ليها فيديها 100 درهم

شافت فيها وقالت : وهادي لاش

نريمان : حيت كن مكنتيش نتي كون راني مزال كنضور على كرا

الجارة : ايواا صافي شدي فلوسك عندك كلشي لوجه الله

نريمان : اييه عندك الحق ولكن نتي وقفتي معايا الله يجازيك بالخير

الجارة : اودي نبقااو جيران صراحة مشفت منك غا الخير ومآديتي حد انا غنبقى نجي عند لالة حنان ونشوفك ونتي مرحبا بيك ايمتا مبغيتي..

تودعو بجوج بيهم وكملات طريقها لي مزال جديدة عليها جاها الخوف من زناقي وقوة البشار لي غادي وجاي.. حتا دخلات لصالون

حلات ابتسام عينيها بزز وضبابة حاجبة ليها الشوف مسحات عينيها وضارت لقات غا بلاصة د نريمان خاوية تهزات من بلاصتها بالزربة لقات ورقة مطوية محطوطة على كوافوزة حلاتها لقات فيها 2000 درهم.

وكاتبة عليها " هاهوا الكرا وسمحيلي على كلشي "

شدات ابتسام فراسها بقوة وجلسات على طرف د الفراش حلات مجر ذ نريمان لقاتو خاوي و الساروت فيه وحوايحها مكينينش. بقاا فيهاا الحال بزاف حتا ولات كتبكي وتشهق وتندم فراسها علاش تخرج معاها العيب. نريمان لي من نهار دخلات لديك الدار وهيا كتشقى.

كانو كيشريو الخبز غير من الزنقة كانت هيا كتجيب طحين وتعجن فدار وديه فران وطيب ليهم الماكلة وتصبن ليهم حوايجهم لبنات كاملين وديما دار يلقاوها نقية واخا كتجي معطلة هيا وابتسام من صالون ضروري تخمل وتخلي النقاوة عاد تنعس ولي باغي شي حاجة مكاين غا نريمان . وهيا مكتقولش لا حيت كتشوف راسها ساكنة معاهم من المفروض دير داكشي وهوما براسهم كيقولولها حنا بغيناك غير طيبي لينا وهانتي عايشة معانا متخلصي لا ريال لا جوج.

ولقاتها فرصة مزيانة انها تجمع الفلوس باش تدير العملية على نيفها كانت كتحرم راسها من اي حاجة غير باش متخسرش الفلوس..

هزات ابتسام تليفون ديالها وبدات كتحاول تاصل بيها لقات بواط فوكال عرفات ان نريمان دايرة وضع " الطائرة " حيت اغلبية ديراه بالخصوص ملي كتبغي تنعس ولا تكون مشغولة.

جالسة هيا وجوديا كتزيدها دروس خرين على الشعر وكتوريها جميع التقطيعات ف ڤيديو مصور كتشرح ليها. ونريمان متبعة معاها مباغا تزكل حتا حاجة..

حتا كملات ودخلات ابتسام لصالون وهيا تشوف نريمان جالسة مع جوديا..

دخلات عندهم ونريمان قالبة وجهها.

سلمات على جوديا وشافت ف نريمان بنص عين وخرجات..

جوديا : فهمتي شوية على حساب تقطيعات د الشعر

نريمان : اه فهمت هادشي خاصني نراجعو ممكن تصيفطيلي الفيديو نعاود نشوفو

جوديا : اه واخاا هاهوا يوصلك دابا... يلاه نوضي وريني مجهودك اليوم انا مفتاخرة بيك.

ابتسمات نريمان على هاد الكلمة اخيرة لي قالت جوديا يلاه ناضت وصلات الباب وهيا تسمعها عيطات عليها تلفتات موراها وهيا تقول جوديا وهازة صبعها موجهاه جيهتها : سمعي هاد الكلمة مزيان وبقاي مفكراهااا. شفتي نتي غتمشي بعيييد وبعيد بزاف وانا متيقنة من هادشي لي كنقول..

تغرغرو عينين نريمان بالدموع. ومشات جيهت جوديا وهيا تعنقها بكل ما فجهدهاا وكذالك جوديا بكات معاها وشدات وجهها بيديها بجوج وقالت : اناا هنا معاك فاش محتاجيتيني ..

فديك الأثناء كانو عينين مراقبين من بعيد تعاطف جوديا والمحبة ديالهاا لنريمان. حساات براسها غتفقذ بلاصتها ولطالم تمنات لو كانت قريبة لجوديا كتر وكتهضر معاها كيف كتهضر مع نريمان وتعاونها وتوقف معاها..

خرجات نريمان ومشات لبلاصت طبلية ديالها وخرجات لعند كليانة كتلبي ليها الطلب ديالها وابتسامة خدامة لكليانة خرا وكتشوف ف نريمان غير من لتحت لتحت..

خدمات نريمان لجوج د نااس ومشات لعند جوديا وهيا كتفرك يديها مع بعضياااتهم. وقفات حداها وقالت : بغيت عفاك نطلب منك طليبة

جوديا : اهاه قولي ياك لباس

نريمان : لا والو باس غير بغيت نقولك واخا نمشي دابا حيت عندي شي شغل ضروري خصني نقضيه. غير اليوم وصافي الا جات على خاطرك.

جوديا : امم صافي واخاا سيري اجي بعدا شحال خدمتي اليوم!

نريمان : جوح د نساا لي خدمت ليهم ماشي شي حاجة خفيف وصافي..

مدات ليها جوديا 100 درهم رفضات تشدها ولكن اصرت عليهااا هزاتها ومشات بدلات حوايجها وخرجات على أنضار ابتسام لي غيااكلها خاطرها باغا تعرف فين مشات واش غترجع تبات فالصالون ولا فين غتمشي..

وصلات نريمان لواحد، المحل كبير كيبيعو فيه الأفرشة.. شرات من عندو جوج بونجات غلاض وبطانية ومخدة ومشات هزاهم كتقاتل معاهم حتا وصلاتهم لدار طلعاتهم لبيتها ورجعات هبطات خدات جافيل وسني كروا والتيد وشطابة ورجعات سيقاات وحكات الحيوط مزيااان والأرض خلات نقاوة والريحة دالخزامة دخلات حتا الكوزينة حكاتها وطواليط. حتا نشف البيت عاد دخلات ليه البونج يلاه بغات تفرشو وهيا طلع عندها بنت حنان هازة فيديها حصيرة وبطانية عادية

.... قالت ليك ماما فرشي هادو

نريمان : واخاا شكرا بزاف الله يجازيها بالخير

. رشقات ليها فرشات بيتها وحطات حوايجها. شداتو وخرجات لبرا كانت المغرب فايتة . شرات سندويتش وقرعة صغيرة د المونادا وباكية دالفروماج والحليب والخبز ورجعات لدار. تعشات بداك السندويتش كدوزو ب مونادا بيدماا تشارجاا تليفون وتكات على المخدة مكونكطية وعينيها كيضورو فالبيت غير تنصص الليل بدا كيدخلها الخوف لأول مرة غتنعس بوحدها دار جديدة عليها وسكااات تكمشات فالبطانية غطات راس ورجلين وبقات كتقفقف وتقرا قرآن فنفسها حتا داهاا النعاس..

فصباح فاقت حسات براسها شابعة نعاس ومرتاحة شافت الضو داخل والشميشة كتبان من شرجم..

ناضت حلاتو لقات نهار زوين ومبهج... غسلات وجهها فالكوزينة ودهنات الخبز بداك الفروماج دوزاتو بالحليب وخرجات لسطح كضور.. وكطلل فالزنقة وتشوف الأسطح د ناس رجعات لبيت حسبات الفلوس لقات راسها خصرات بزاف وقررات تجمع راسها من جديد وتزير وتقتاصد باش ترد لي صرفاتو..

لبسات حوايجها وخرجات شداات بابها وهبطات فالدروج لقات حنان مقاتلة هيا وبنتها مكااين غا المعيور الأم تقول كلمة وبنتها ترد عليها ب 10 ..

دارت راسها مسمعات والو وخرجات بحالها غادية بشوية عليها حتا وصلات لصالون .. دخلات لقات ابتسام جالسة على الكرسي دايرة رجل على رجل وشادة تليفون فيديها..

يلاه شافتها وهيا تنوض لعندها

نريمان : سلام

ابتسام : فين كنتي فين بايتة ؟ حسابلي هنا جيت بكري باش نهضر معاك وملقيتكش !!

نريمان : كريت واحد البيت واهانا ساكنة فيه

خرجات عينيها ابتسام وقالت : مالك وليتي على سبة يلاه هضرت معاك نفختي ومعجبك حال

نريمان : انا نفسي حااااارة ومنرضى بحتا واحد يعايرني ولا يبقى يزن علياا بشي خير دارو فياا عونتيني وقفتي معايا الله يجازيك بالخير وحتا دابا مطرا والو

ابتسام : بهداوة) نريمان طلقي ديك سكنة ورجعي معايا

نريمان : لا مغاديش نرجع صافي انا لقيت راحتي بوحدي مكاين لاش نضيق عليك ونزيدك بتقلي توكليني تشربيني تصرفي علياا

ابتسام : دابا قلبك كحل حتا لهاد الدرجة درتي من الحبة قبة

نريمان : قلت ليك نفسي حارة واناا هاكاا دايرة ابتسام صافي نساي الموضوع حسبي مطرا والو..

جبدات ابتسام فلوس من صاكها ومداتهم ليها

ابتسام : هادو فلوسك بغيت نرجعهم ليك وبراكة من تبرهيش حقى غتخلصيني فالكراا شدي.

شافت فيها نريمان بكل هدوء وقالت : هدوك ديالك على الخير لي درتي فياا

قطعاتها ابتسام بالغوات : متبقاااايش تمرضيني كتر مااا اناا مريضة راه تفقصت وندمت ومعجبنيش الحل ولكن عضريني انريمان

نريمان : وحتا انا مقلت ليك والو مغتديش نشدهم من عندك

ابتسام : اقسمت فمي بالله حتا تشديهم ولارجعتهم معايا صافي انا مبغاش نخسرك رطابي شوية وسمحيلي

عنقاتها نريمان وكذالك ابتسام بدلاتها العناق.

ابتسام : اجي نجلسو عاوديلي فين مشيتي فين غتسكني؟

نريمان : فواحد بيت كريت عند واحد المرا

ابتسام : ودابا صافي قررتي تبقاي معاهاا البنات سولوني عليك

نريمان : اه قررت نبقى ساكنة معاها صافي

ابتسام : نسيت مقلتلكش لبارح فليل جا امين لدار وسولني عليك وقلت ليه راك مع جوديا ونيت يحسابلي نتي معاها

نريمان : مزيان ملي قلتيليه هاكا مبغيتوش يعرف ساكنة فشي جهة خرا يولي جاي عندي حتا لتماا

دخلات جوديا هازة فيديها بواطة كبيرة. لقاتهم مجمعين سلمو عليهاا ومشات معاها البيرو حلات بواطة جبدات منهاا المملحات والحلويات. جلسو كياكلو ويهضرو فالخدمة. بدات نريمان حصة جديدة علماتها فيها جوديا ميك آب بجوج انواع.

دازت ايام تعلمات فيها نريمان واستفذاات بزاف وتطلقاات فالخدمة. تعمقااات فهاد الدومين ورجع كيعجبهاا وباغا تعطي فيه كتر..

بينها وبين امين غير مسجات قليل فين تشوفو . ولفات فالدار جديدة واخا ايام اللولة كانت كتخاف تبات بوحدها. ولكن مع الوقت رجعات كتحس بالراحة ومكترتاح حتا كدخل لدار ..

بينها وبين جارتها تيقاار ديما كتسمع صداعها مع راجلها ولادهاا والمعيور على الجهد ولكن مكدخلش فيهم. الا جات العين فالعين سلام سلام.. مكتعطيهاش فرصة فين تجمع او تعرف عليها..

كملات خدمتها والساعة 8 دليل. لبسات حوايجها يلاه بغات تخرج وهيا ترجع عند جوديا لبيرو..

جوديا: دخلي انريمان

نريمان : لالة جودياا محتجاك

هزات عينيها هبطات نضاضرها وشافت فيها بتساؤول وهيا شادة شي وراق فيديها : قوليلي شنو!

نريمان : بغيت ندير لكارط ولكن معرفاش فين غنمشي وشنو ندير وبغيتك تعاونيني نديرو حيت غنحتاجو وحتا نتي قلتيلي غنحتاجو على ود ديبلوم. وبغيت نديرو

جوديا : اهاه واخاا سيمانا الجاية يكون خير .

نريمان : واخاا صافي تصبحي على خير.

جوديا : بسلامة.

خرجات هيا وابتسام تفارقو برا كل وحدة فيهم شداات طاكسي.

نريمان واخا الدار قريبة شوية لصالون ولكن فليل ضروري طاكسي ويوصلها حتا لباب تفادياا لشي مشكيل او كريسااج والوقت خايبة..

وجد ليهاا لاكارت..

وبدات جوديا كتوجد ليهاا ديبلوم ديالها...

رمضان على ابواب حبسو الخدمة حتا 10 ايام الأخيرة عاد يرجعو..

صبحات نريمان ناعسة وناضت كتكسل ف بلاصتها حاسة بعضاامها مفصلين عليها. ناضت كيف العادة لبسات حوايجها وهزات سطولة ديالها وحوايج وهبطات كتجري فالدروج غادية لحمام. لقات حنان كتسيق الدروج

حنان : هاي هاي ناس صبحو مبكرين وضاحكين

نريمان : ونتي صبحتي حادكة معندي منسالك ههه

حنان : ايوا ضروري معروفة علياا النقى وتاويل هه ايوا فين غادة هيا شي تحميمة هادي

نريمان : اه غنمشي لحمام اليوم هانتي كتشوفي رمضان مزال ليه غير اليوم وغدا..

حنان : اييه ايوا الله يجيبو على خير. ايوا عرفتي شنو اليوم غتغداي معايا وشوفي متجيبيلي لا عضر ولا والو اليوم غدا عندي

نريمان : هه وصافي واخا ملي نرجع نجي عندك

حنان : ايوا راه حنا جيران قنطتي هبطي عندي بغيتي شي حاجة متحشميش

نريمان : ربي خليك يلاه هانا غنمشي قبل ميعمر الحمام

حنان : سيري سيري بصحة ورااحة

خرجات نريمان.

دازت شرات صابون البلدي ومشات الحمام دخلات لدوش بوحدها. دوشاات راسها وحكات راسهاا وتقتلات مع ضهرهاا كيف العادة كتحكو بوحدها نشفات ولبساات حوايجها خرجات كضوي. ورجعات لدار لقات حنان واقفة كتعاير هيا وبنتها كيف ديما.

نريمان : ياك لباس مالكم عوتاني!

حنان : هاد سلڭوطة غتسكت لياا القلب يلاه 14 عام وغطييير شي نهار تجيب لياا شي كرش د حرام دخلي دخلي بعدا متوقفيش فباب..

حطات نريمان سطولة فالدروج ودخلات لعندها كضور عينيها فالدار . جلسات فالطرف وحنان حداها مزال كتعاير هيا وبنتها

البنت : الالة حياتي هادي ومدخليش لياا فيها نتي سوقك ديما محشماني مع صحباتي وتخرجي فياا عينيك بحالا غا نتي لي والدة

حنان : واخا على واليديك الحرامية والله لا بقات ف ق ** د مك تجاوبي معاياا تقادو كتاااف ايييه هز فكرشك وربي ولد وفلاخر يطرطقو ليك مرارة

البنت : وشكون قالك ولدي نتي يا ملي كتكوني عايشة رومانسية وكتشلقمي معرفااش راسك غتهزي كروش ودابا كتخرجي فياا عينيك وتقولي وولدت وا زمرت ولا غا كتشوفي البنت دخلات عندناا كتبغي تبيني ليها بليي كتحكمي..

حالة فمها نريمان كتشوف فيهم بجوج مصدومة من البنت وكيفاش كتهضر مع امهاا

ناضت حنان شدات البنت من شعرهاا وجلسات تريش فيها وتشتف عليهاا فالارض ناضت نريمان كتفك بيناتهم وهوما مزال كيتعايرو.

عطات حنان لبنت بركلة وقالت : والله يا واليديك لا خليتها فيك هاداا معلموك الفيسبوك وافلام الله يقطع لوالديك الجدر.

توخرات نريمان اللور وقالت : حنان يلاه نخليك مرة خرا ان شاء الله

شداتها من يديها وقالت : افين غتمشي انا حالفة تغداي معايا دوزي تجلسي

نريمان : لا غير خليني مرة خرا و...

حنان : اوالله اا خرجتي دوزي حتا نتغداو ونتحتوو شوية

جلسات نريمان على الفراش يديها كيترعدو كتشوف فالبنت مكمشة على سداري كتشهق وتبكي وحنان دخلات الكوزينة كتعاير وتحلف فيها .

هزات البنت عينيها ف نريمان وقالت وهيا كتنخصص : شوفيي فياااا حنزييي الخراا كولينييي حسن .

هبطات نريمان عينيها الأرض شادة الضحكة وحنان كتخرج الماكلة.. حطات قصرية صغيرة د كسكسو وكيسان داللبن جلساات حدا نريمان كتهز لقيمات بيديهاا وترمي لفمها ونريمان كتهز بالمعلقة وتاكل

حنان : انوضي تاكلي والله لا حزرت فيك سمعتي تاكلي اجي مبغيتيش جلسي تم تهرنيي..

دخل ولد حنان مزال صغير 12 سنة.. لابس توني كولو موسخ والكورة فيديو رماا سبرديلة ومشات نيشان القصرية.

هبطات عليه حنان بونية وقالت : انوض اسلڭوط تغسل يديك نوض الله يعطيكم الجربة ولدت غااا الخلا مفيكن ربح لا نتوما لا بوكم. ناض ولد خوا على يدو الماا وزاد الطبلة وحتا البنت زادت كتاكل. وحنان كتقطع، اللحم وتزيد لنريمان. كيااكلو وينڭرو . توخرات نريمان اللور وحنان كتزيد ليهاا وتحلف عليها تاكل.

نريمان : صافي والله حتا شبعت الله يخلف عليك شحال مكليتو وداباا كليييت.

حنان : ايوا نوضو نعمرو شي كاس د اتاي

نريمان : لا والله الا بلاش مبغيتش بلاماا تعذبي

حنان : ادوزي تجلسي اش تابعك اش هاحنا مجمعيين.

توخرات بنتها اللور هازة تليفون فيديها. ولدهاا هز كورة وخرج كيجري . ناضت نريمان مع حنان كتخمل معاهاا الطبلة. وجدو اتاي وحطوه على طبلة كبات لنريمان كاس برزتو ومشات لبيت نعاس هزات شيشة وخرجاتها حطاتها بين رجليها وجلساات تسوط ونريمان مصدومة فيها مخرجة عينيها كتشوف فيها

.

وجهها سمر وشعرها حرش وفمها زرڭ وغليضة كيفها كيف بنتها وولدهاا.

نريمان : حنان يلاه نخليك صافي اناا غنطلع دابا

حنان : هانتي جالسة معاناا مالكي عندك القورع

نريمان : هه لا غير هوا غنمشي نرتاح شوية ولكن غنرجغ غنرجع عندك هاحنا ديما نتطلقااو ضروري...

سلتات منها غا بالكشايف هزات سطولاتها وطلعات كتجري

طلعات لدار حطات سطولة وجلسات كتنهد. فين مااا مشات مكتلقى ربح تكات فبلاصتها مكونكطية مع هناء كتعاود ليها اخر اخبار وشنو طرا وكذالك هناء كتعاود ليها اتصل بيها امين هضرات معاه شوية وباركو العواشر لبعضياتهم و قطعو المكالمة . الملل ملقات مدير اتصلات ببتسام

نريمان : شنو كديري! الا مساليا نخرجو شوية !

ابتسام : احسن مااغنديرو واخاا نطلقاو ويلاه نخرجو نفوجو على راسنا شوية. .

ناضت لبسات حوايجها وقدات حالتها ودارت الفاصمة لي ضروري منها ..

من نهار لي وقعات الواقعة دابا عام تذكرات الذكريات الحزينة والايام عصيبة لي دازت منها تنهدات ومسحات دموعها لي معرفاتش حتا كيف نزلو ملي تفكرات زياد... بقات ساهية للحضة ورجعات ناضت خرجات يلاه بغات تشد.طاكسي وهيا تصوني عليها ابتسام. دارو فين يطلقاو ومشات كتسناها. تسراو فالقيصرية والسوق الجو د رمضان كيف المعتاد شباكية فينماا مشيتي كيبيعوهاا وناس كيضربو ورقة د البسطيلة ومكاين غا شهيوات.

ابتسام : حتا لغدا ونخرجو نتقضاو دابا بغيت غا نفوج شوية

نريمان : اه داكشي لي كاين حتا لغدا. ابتسام بغيت نقولك شي حاجة ومعرفتش واش تبغي ولا لاا..

ابتسام : ياك لباس شنو هيا !

نريمان : شنو بان ليك تجي عندي ونسكنو انا وياك ونتعاونو ونتوانسو ولكن متغلطيش معايا بحال المرا خراا راه بقاا فيا الحال ومزال حتا لدابا مبغات تسرطلي. الا باغاا اجي

ابتسماات ابتسام بفرحة كبيرة وعنقااات نريمان وقالت : اه غنجي ومغاديش نفكر حيت انا براسي مبقيتش مرتاحة فديك الدار ومبقيتش كنتفاهموا انا وبنات وكنت كنفكر نشوف فين نكري بوحدي ولكن احسن حاجة هيا هيا.

نريمان : ايوا صافي مرحبا بيك.

ابتسام اناا دابا غنشوف شي طوموبيل تهز لياا حوايحي ومواعني وغدا، صباح نجيبهم

نريمان : ايوا صافي انا راه عندي بوطة صغيرة وشي طبيسلات مهم معنديش مواعن خصني عاد نشريهم غدا ونزيد الفراش

ابتسام : لا بلاش انا عندي لي كافييناا بلاماا تشري فراش كلشي كاين..

..تسراو وتعشاو برا ومشا كل واحد بحالو.

لغدا ابتسام جابت رحيل وفرشو البيت لي كان خاوي من غير حصيرة وجوج بونجات لي كانو فيه. قصمو داك البيت بريدو طويل خلاو مقعد فين يجلسو فيه سدادر وطبلة وتلفازة وجهة لخرا فيهاا نموسية كبيرة ينعسو عليها بجوج بيهم. ستفو المواعن وجهزو الكوزينة لي كانت خاوية. عاد بانت السكنة وعجباتهاا نريمان.. خرجو فالعشية تقداو كل ماا يحتاجوه ورجعو مهدودين طيبو عشاا بجوج بيهم. وجلسو كيتعشااو ويتفرجو..

ابتسام من، شدة العياء نعسات على سداري

. اما نريمان بقاات كتفرج فاليوتيوب حتا طلعو ليها محاضرات بخصوص الصلاة ودخلات تفرج فيهم. خلاوهاا تندم اشد الندم حيت كانت سامحة فالحبل لي كان رابط بينها وبين الله . ناضت والضيم طايح عليهاا المشاكيل والهموم دنيا نساوها ولهاوهاا على الطاعة.. توضات وكحزات طبلة لجنب وبدات كتصلي بهمس كملات ودعات لخالقها يتبتها على الصلاة ومتخطهااش .. هزات تليفون وبدات كتقلب على صور القرآن كتقرا فيهم بحكم معندهاش قرآن فدار.. وجدات الصحور ونوضات ابتسام يلاه كلات شوية ونعسات اماا نريمان بقاات فايقة حتا أذن الفجر. صلات ودخلات لبلاصتها حاطة لي زيكوتور فوذنيها كتسمع لمحضرات شعراوي وبعض العلماء الدين حتا داها نعاس..

داز رمضان مزيان معاونين مفاهمين واخاا كيتقلقو من بعضيااتهم ولكن سرعان ماا كيرجعو. حسو براسهم خوت ماشي اصدقاء ومتقدرش شي وحدة فيهم تفارق مع لوخرا...

ايام اخيرة ف رمضان غير الخدمة واجتهاااد كليان كان مطرطق الدنيا بالخصوص فالليلة اخيرة د رمضان كملو حتا 6 دصباح. عاد رجعو لدار.. كان طار ليهم النعاس واخا التعب غالبهم. وجدو اتاي والحلوة ورغيفات وكيكات غير بجوج بيهم مبرعين راسهم. فطرو وهزو تليفون كل وحدة كتصوني على حبابها تبارك ليهم العيد... نريمان خرجات لسطح اتصلات بعمها بركات عليه ولمرات عمها شحال وهيا كتهضر معاهم وهوما كيطلبوها تجي عندهم يشوفوها. قطعات المكالمة وهضرات مع هناء وامين ويعض اصدقاء ديالهاا. ورجعات لداخل بقاو مهاودين هيا وابتسام حتا نعسو..

جالسة كتصبغ دفرانها.. وكتشوف فنريمان لي هازة قرآن كتقرا بهمس طولات الشوفة فيها وقالت بحماس : نريمان شنو بانلك نمشيو لتركيا؟ نفوجو ونشوفو الدنيا كيعاودو عليها غزالة يلاه حتا حنا نخضرو عويناتنا ونضبرو شي راجل شبعااان لعاقة هههه

شدات قرإن حطاتو على صور صغير وقالت : صراحة فكرة زوينة ولكن انا منقدرش سيري الا بغيتي نتي

ابتسام : ونتي مالك متمشيش؟ ياك الحمد الله داز رمضان خدمناا فيه وفالصيف وهاحنا مزالين كتجمعي راسك وانا كنجمع راسي ايوا نمشيو نفوجو والرحيم الله ماشي غنديوه معانا لقبر..

نريمان : نتي كتشوفي ابتساام انا ريال لي كنشدو كنخزنو واخاا كيكون بالي فشي حاجة مكنشريهاش وكنحرم راسي منهاا. نتي كتشوفي وجهي انا معقدني والله مكنقدر ندوز من حدا المرايا نيفي تعوج وزيرلي على حنكي وعين ليسريا وعاطيني الحريق هانتي عاام دابا 8 شهور ومزال نيفي كيحرقني او الا قصتو كيعقرني ورجع عندي تنفس قليل راه بغيت غا ايمتا ندير عملية ويرجع وجهي حتا انا بحال كاع الناس وميبقاااوش يشوفو فياا ديك الشوفة واخا ديما دايرة فاصمة باين تشوه لي عندي

سكتات ابتسام للحضة وقالت : فهمتك الله يحسن عوانك هادشي لي غنقولك الوجه هوا كلشي فجسد انسان الله يشافيك احبيبتي وترجعي حسن ملي كنتي

نريمان : شكرا بزاف . راه امين صوناا علياا قبيلة ملي كنت خدامة لديك السيدة وقالي اليوم غيمشي الحسيمة ختو السيمانا لي جاية عندها العرس.

ابتسام : وانتي مغاديش تمشي لعرس بنت عمك ؟

نريمان : لا موحاال انا غندير شي وقيتة مور العرس نمشي نشوف عمي ومراتو وصافي واحد ساعة د مڭانة ونعاود نرجع بحالي

ابتسام : اوك مزياان 9 دابا نمشيو بحالنا؟

نريمان : يلاه نمشيو عوتاني غنلقااو التبااخر من باب

ابتسام : ههه عرفتي فياا الدودة باغا ندخل عند حنان تشوف لياا حتا اناا

نريمان : اش غتشوف الله يهدي بانت ليك هيا مطفراه تشوف غا راس بعدا

ابتسام : اودي داكشي كيزدق مشفتيش كاع ناس لي كيدخلو عندها كيقولو داكشي صحيح وكيجيبو ليها ناس خرين حيت دقتها يا ختي صحيحة

نريمان : تاااا نتي كتيقي بالخرايف راه ميعلم بالغيب غا الله تعالى اما هيا غا لي جات فمها تقولها.

شدو الصالون ورجعو بحالهم لدار فطاكسي..

بدلات نريمان حوايجها ودخلات الكوزينة توجد العشااا وابتساام كضور ليها مع جناابها

ابتسام : بترجي) خلينا نهبطو اصاحبتي نشوفو زهرناا

نريمان : ودوزي تجلسي شمن زهر راه غا كينصبو على عباد الله.

ابتساام : بففف وماا كتعقدي الامور اناا غنهبط نشوف

نريمان : ضبري راسك انا مسوقيش..

هبطات ابتسام . اما نريمان خلات عشاها كيطيب ومشات المقعد جلسات دوزات النمرة صونات على هناء.

هناء : ولاهيلا عاد كنت غنصوني عليك ههه يا ختي القلب على القلب

نريمان : ههه ايوا شفتي توحشتك بزاف يا هناء كيف بقيتي وكيف بقا موا دار والعزري كبر شي شوية ههه

هناء : هاهوا غادي مكتسمعيش غواتو اجي اولدي قول خالتو اجي

نريمان : ههه والو مزال مكيعرف يهضر

هناء : اه مزال غير كيسمع صوتك يا ختي كيجي كيحري لتليفون ملي مكنبغيش نعطيه ليه كينوض يغوت هه

نريمان : تبارك الله يحفضو ويخليه ليك اختي

هناء : يارب امين ونتي الفنون ديماا كتهربي كنقولك واش كاينة شي خطوبة واش كاين شي حبيب القلب مكتبغيش تجاوبيني ياااك هادي هيا الصحبة كتخبي عليا هه

نريمان : لاوالله مكنخبي عليك شي حاجة. لي كان كنعاودو ليك مكاين لا حبيب ولا صاحب هه راكي عرفاني مبااغى ندخل لحياتي حتا شي واحد وهاكاا حسن اصلا مبقااوش رجال

هناء : لا حبيبة لا لا مزاليين رجاال ههه غير نتي حلي عينيك مزيان راه بغيناا نشوفوك عروسة ونفرحو بيك

نريمان : واختي شغنقولك صراحة شحال من راجل بغا يتعرف وشحال من واحد جاا نيشاان باغي يخطب. اماا واحد ، هاهوا كل يوم يتبعني بخرشاشتو كيقولي باغي نخطب حقى تبعتك ولقيتك بنت ناس وسولت عليك وبغيت نتزوج بيك. اودي معندي مندير بشي راجل

هناء : امم ايوا وشنو رأيك ف خويا صراحة ملي كنتي مزال فداركم فالحسيمة وهواا باغيك وعجبتيه ومزال حتا لدابا

نريمان : هه ايوا هوا خاطب

هناء : اودي خطب وسالا وعاود خطب وسالا خوياا فشكل وزيدون بغاك نتي وديما كيسولني عليك شبان ليك تهضرو نتي ويلا تفاهمتو راه منلقااوش حسن منك..

سكتات نريمان للحضة ويلاه بغات تهضر وهوا يصوني ليها تليفون..

نريمان : هناء قطعي قطعي عفاااك راه عمي كيصوني علياا شوية ونعاودو نهضرو.

نريمان : الو عمي كيف داير كيف بقيتي نتا.. لباس هاحنا كنعديو. لهلا يخطيك حتا اتا توحشتكم بزاف والله. واخاا اريها لياا. الو مرت عمي كيف بقيتي. مزياانة الحمد الله. حتا انا بغيت نشوفكم والله. نعام هاناا الله يسمعناا خبار خير ..

مرات عمها : تبارك الله عليك ابنتي بعدا درتي مستقبلك ونفعتي راسك الله يرضي عليك. كي شفتي بنتي السيمانا لي جاية عندها العرس ايوا وبغينا نفرحو بيها العقبة لعندك ان شاء الله وبغيتك ابنتي نتي تزينلها فليلة عرسها. حسن منجيبو البراني وشحال ماا حسبتي عليناا نخلصوه واخا راكي عارفة لي كاين حنا على قد الحال وغنديرو العرس غا فالدار فسطح ايوا الا قدرتي تجي ومترديهاش ليناا فوجهنا..

ملقات نريمان باش تجاوبها اه فعلا هيا بديبلوم ديالها وكتخدم لجميع الكليان وكتساعد جوديا فالعرايسات وعارفة كلشي وشادة الخدمة مزيان ولكن هيا خدامة غير مع جوديا مزال معندهاش صالون ديالها والمطريال وكيف غدير تخدم ليهااا ضروري خصها تبداا كلشي من الزيرو. من نبرة صوت مرات عمها الحزينة كتعاود على الحالة لي كيدوزو منها والضروف القاصية وعاد مصاريف العرس ودهاز بنتها..

سكتات نريمان كتخمم شنو دير فهاد الحريرة وقالت بتردد : واا يكون خير امرات عمي

مرات العم : واش صافي صافي!! تقدري تجي نعول عليك ابنتي

نريمان : ان شاء الله انا غندير جهدي..

قطعاات المكالمة بعد شكر ودعاوي من عند مرات عمها. طلعات ابتسام من عند حنان راشقة ليهاا لقات نريمان كتشوف فنقطة وحدة وعقلهاا مرفوع.

ابتسام : اسبحان الله مالناا!

عودات ليها نريمان كلشي وقالت :

دابا اناا منين غنجيب ليهاا هادشي وعاد مصاريف المشي وشحال غتعطيني كاع بفف شتي شحال خايبة تعامل مع شي حد من عائلتك واخا كيشوف حالتك صعيبة كيزيد يفورصي عليك.

ابتسام : مشكيلة هادي وحتا جودياا الا بغيتي تهضري معاها مغاديش تبغي راكي عارفة لباسها غالي بزاف والمصممين لي كيخدموه ليها ماشي غاا العشوائي صراحة صعيبة هاد القضية.

حطات نريمان يديها على راسها فحيرة كتخمم. طاب العشاء يلاه كلات نريمان جوج دغمات ورجعات اللور عيات فيها ابتسام تاكل مبغاتش. تكات على الفراش كتفرج فالتلفازة وهوا يوصلها مسج مور مسج دفعة واحد.. هزات تليفون لقات نمرة ماشي د المغرب مصيفطة ليها مسج..

💬: سلام نريمان

💬: كيف بقيتي مزيانة؟ سمحيلي على هاد الدخلة

💬: الا كنتي مساليا نهضرو شوية الا معندك حتا شي مانع طبعا !!

شافت المسج وهيا ترد بالزربة : شكون معايا؟

شافت مسج ديالها بديك أثناء وقال

💬 : اناا خوها د هناء هيا لي عطاتني نمرتك وبغيت نهضرو شوية !

تنهدات بنفراد الصبر وكتبات ليه : مرحبا

بدا كيعرفها براسو وهيا غير كتقرا حتا كمل وجوباتو كذالك وعرفات براسها كان حوار فالحدود. ومطولاتش معاه كل همها دابا وتفكيرها هوا عرس وروينة ومنين غتبدا هادشي. رسائل امين لي مكيتسلاوش ومزال هوا هوا. يسولهاا فين مشيتي وعلاش تعطلتي وعلاش مكتجاوبيش دغيا. حتا تخنقاات من طريقة تعامل ديالو معاها..

صباح الحال وصبحو على الخدمة صالون عامر دوزو نهار متعب حتا ليل كيف عادة عادرجعو بحالهم لدار.. كان باقي للعرس 5 ايام..

وجوديا فالبيرو دخلات عندها نريمان ببتسامة جلسات قبالتها وقالت : جيت باش نهضر معاك فواحد الموضوع وتعطيني رايك

جوديا : بيااان سير قوليلي هانا!!

عودات ليها نريمان وضع ديال عمها وزواج بنتو وطلب مفاجئ د نريمان تخدم ليها فعرسها...

جوديا : صراحة معرفتش شنو نقولك انا براسي حيرتيني معاك. لي غنقولك هوا خصك مطريال بزاف وخصك لباسي ولي زاكسيسوار والمنصة ومااا هيا وماا لونهاا في حالة الا معندكش خصك تكريهم كلم. ويلا جيتي تكريهم شحال غيخلصووك كاع 5000 درهم 4000 درهم ؟؟؟ ايوا ديك الفلوس لي غيعطيوك هيا تمن الكرا اولا موحال تكفيك باش تكري داكشي. انا من عندي نعاونك بكسوة البيضاء عندي د عام لي فات مزال زوينة كنخدم بيها لناس لي معندهمش ومفحالهمش غنخليها ليك ف امااانتك ا نريمان تخدمي بيها لبنت عمك وترديهالي.

المهم فكري مزيان الا قررتي انك تمشي تزينيلها الله يسخر ليك مقدرتيش تراجعي من احسن حيت خصارة غترجع ليك نتي وشمن ربح عندك؟ المهم نتي تعرفي ونتي تقرري انا غير وجهتك..

خممتات نريمان بزاف وقررات فالأخير انها غتمشي تزينلها ومتردهاش فوجه عمها ومراتو كيف ماا كان الحال وقفو معاهاا حتا هوماا واحد الوقت...

خرجات القيصرية دخلات لمحلات بيع المكياج. دوزت نهارها غا فالشراا من امور د مكياج لشعر..حتا كملات كلشي. شرات راسها حويجات جداد وصاك جديد وشانطة جمعات فيها حوايجها وشانطة خرا مطرياال ديالها مشات عند جوديا عطاتها الكسوة البيضااء لي قالت غتخلي ليها تودعات مع جوديا وابتسام وشدات طاكسي وقفها ف باب تران هزات بكاجها قطعات الورقة وبقات كتسنى التران حتا جا. وشدات الطريق الحسيمة..

لقات امين كيتسناها سلمات عليه باليد وهز معاها طلعو فطاكسي وصلهم حتا لدار. دخلات حاذرة عينيها مبغاتش تشوف فالسفلي لي دوزات فيه الويل من حياتها. طلعاات بالجري لفوق بعناق حااار استقبلاتها مرات عمها ووصال وعمها جلسات معاهم كتشرب اتاي وكيهضرو على العرس.

نريمان : اناا نخرح انا ومرات عمي باش تختار لباسي لي غيعجبوها باش غدا نجيبهم

وصال : وانا منخرجش نشوف لي غنختار

مرات العم ؛ انا غنختار لبنتي اليوم الحناء ديالك وعائلة دابا غيجيو معندك فين تمشي..

خرجات نريمان هيا ومرات عمها مشات لمحل كبير كيبيعو فيه ويكريو. شافو لباسي وليزاكسيسوار وختارت وصال لي عجبوها دفعات ليها نريمان نص خلاص وخلات ليها لاكارت وقالت

نريمان : غدا نجي موراهم ان شاء الله ان

كملو من تما ومشاو لعند ممون الحفلات كرات من عندو كرسي دالبرزة ورجعو لدار.

يتبع...