الأجنحة المنكسرة الجزء السادس

رجعات معاه لدار فرحانة وحشماانة..

حطات داكشي فبيت نعاس ورجعت خرجت لقاتو واقف ف بالكون دالكوزينة كيهضر فتليفون وريحة الڭارو داخلة...

رجعات باللور جلسات فوق الفطوي عينيها مع تلفازة وكتخطف شوفااتو جيهتو وترجع ضور وجهها

دخل عندها وقال : لي بغيتيها فالكوزينة انا غنخرج دابا

نريمان : غتجي فليل

جهاد: وعلاش هاد السؤال

نريمان : بتردد) والو غير كنخاف بوحدي فالليل وكنسولك

جهاد : امم معرفت ، يلاه الله يعاون

خرج وسد باب اما هيا حيدات شال ديالها وفسخات شعرهاا وناضت كتجبد دخلات لبيت نعاس جبدات دوك الحوايج حيذات لي لابسة وبدات كتقيص حوايج لوخرين وقفات قدام المرايا كتشوف فراسها باعجااب. جاا لون مع وجهها وعطاهاا جمالية وطاح عليها السر ..

حيداتها فالبلاصة ورجعاتها لميكتها حتا دوش عاد تبدل.. سمعات تليفون كيصوني وخرجات لقات امين..

نريمان : اهلا امين كيف داير لباس عليك

امين : ببرود) بخير زعمة حتا لهاد الدرجة قلبتي علياا وجهك كنقول دابا تسول فياا دابا تهضر معايا ولكن ابنت العموم كيبانلي غير درتي الفلوس قلبتي وجههك ومبقيتيش راضية بياا ياك.

نريمان : اويلي امين واش من نيتك شهاد الهضرة كنقول

امين : كنقول غير لي كاين ملي مشيتي الامارات نسيتي كلشي مبقيتي عاقلة على حد. المهم ابنت عمي انا كنتمنااالك غا الفرحة والسعادة

نريمان : بالآسى) امين الله يهديك راه منسيت حد واخاا ندير ملايير اناا ماشي من داك النوع نتقلب شنو غيتزاد فيااا كاع. راه غير الضروف لي كنعيش فيها لهلا يوريك

امين : اااه ضروف! ضروف كتجي غا فوجهي اناا شي حد اخور عندك الوقت ليه واناا لاا

نريمان : بففف معرفتش كيف غندير نهضر معاك المهم قول لي بغيتي. انا مكنتبدل على حد ومكنقلب وجهي على حد. بالعكس كنبقى كيفمااا انااا واخاا منعرف فين نوصل امين نتاا بهاد الهضرة كتزيد تجرحني

امين : اك الالة اك انا اصلااا مغنعاوش نبرزطك كوني هانية.

قطع المكالمة فوجهها.. حيدات تليفون من وذنها ورماتو على فراش.

بقات حاطة يديها على راسها كتخمم واحلة وتالفة كتحس براسها غير غادية فطريق مكتصفيش فيهاا ربحة ولا ذبحة....

دوزات نهارهااا فدار غير مع تليفون وتلفازة.. حتا طاح الضلام وناضت الكوزينة كتفتف مدير غالبهاا الجوع ولكن مقدراش تزعم وتدخل توجد بحالا دارهاا. جبدات دجاج وبدات كتقلب على عطرية باش طيب لي بانت ليها كتحطها حداها... طيبات دجاج ودارت معاه فريت. حطات راسها كلات شوية. وخلات بالزايد لجهاد...

بقات كتفرج حتا قرب الفجر يأذن توضات وتسنات الفجر صلاة وبقات جالسة على سجادة حتا غلبهاا النعاس ودخلات البيت نعسات.

مفاقت حتا فاتت الضهر...

اول حاجة دارتها هيا ناضت طل واش جهاد جاا ولا لا.. ملقاتوش ومشات لباب بغات تفتحو لقاتو ساد عليهاا . مشات لطواليط غسلات لحمها بالصابون توضات وخرجات على رأس صبعاانها حتا لبيت نعاس لبساات ديك بيجامة لي ختارت. وحوايجها لي كانت لابسة صبناتهم وخرجاتهم لبالكون نشراتهم.

صلاة الضهر ودخلات الكوزينة قلبات الماكلة لقاتها باقة كيفماا هيا. عرفات انه مجااش ڭاع..

سخنااتها وبيها تغدات..

دوزات نهارهاا كامل فالدار حتا طاح الضلام عاد دخل.. يلاه شافتو جرات شانها كتلويه على راسها شافها ولكن دار راسو مردش البال.

جهاد : سلام

نريمان : وعليكم سلام ..

الصمت

دخل لبيت وسد، عليه بقاات مراقبة الباب ايمتا غيخرج حتا دازت ساعة. عاد خرج لابس حوايج خرين.. د دار وريحة شمبوان عاطية منو فوطة على عنقو كيمسح بيها جلس قدامها كيعمر كاس دماء وقال : لباس عليك

نريمان : الحمد الله

جهاد : هضرتي مع ديك السيدة

نريمان : اه هضرت معاها قبيلة قالت لياا غدا غتكون هنا مور الضهر

جهاد : امم

جالسة متوترة وهواا قبالتهاا كيشوف فالتلفازة حاط يديه على ركابيه مشبكهم وعاقد حجبانو كيشوف.. وهيا متوترة بزاااااف والخوف شادهااا كتشوف فيه غير من التحت لتحت. بقاو على داك الوضع هيا شدات التليفون باش تلف بيه غير كتبرك معرفااش راسها حتا شنو متخربق. المهم متبقااش مركزة معاه اماا هواا شاد تليكومند فيدو كيتفرج مشافش فيها..

جهاد : راه 8:30 دابا ديري شي حاجة كوليها

نريمان : واخاا شنو خاصك نصاوب ليك؟

جهاد : شنو؟ انا مخصني والو

نريمان : نديرلك معايا تعشى

جهاد : لا انا مكنتعشاش غير بصحة..

ناضت دازت من حداه وقلبها كيضرب دخلات الكوزينة مقدراش تركز اش غدير شنو غادي طيب وهوا جالس قبالتها عينيه مع تلفاازة..

جبدات كفتة قصماتها هزات منها واحد جزء طيباتو مع لاصوص والبيض. خلاتو كيتقلا وجبدات العيش ( الخبز) سخناتو هزات عينيها تشوف ف جهاد لقاتو كيشوف فيهاااا. طلعاات معاهااا السهدة ابتسمات فوجههو بحياء وفالبلاصة قلب عينيه ورجع كيشوف فالتلفازة. حسات بالحرج وندمات حتا علاش هزاات عينيها وشافت فيه...

حطات الماكلة وخرجات غادييا جيهت الطبلة ورجليها كيرجعو باللور..

حطاتو فالطبلة وقالت وهيا كترعد : اا ام نوض تاكل

جهاد : غير بصحة.

نريمان : غير شوية غير ذوق

جهاد: باينة زوين الله يعطيك الصحة ولكن مكنتعشاااش كنبغي نباات خفيف.

نريمان : لي بغيتي.

مدات يديها كتاكل حشمات ومقدراتش تاكل وهوا قبالتها يلاه كلات جوج دغمات ورجعات اللور. هزاتو وداتو الكوزينة .

ضور فيها عينيه وقال : مالك؟

نريمان : لا والو

جهاد : وعلاش متعشيتيش!

نريمان : بتردد) غير مجاتنيش ناكل بوحدي وصافي

جهاد : وعلاش!! يلاه جيبيه اري ناكلوه معاك

ابتسمات ورجعات حطاتو فوق الطبلة. ناض كيتقادد فالجلسة ومد يديه

جهاد : الله يعطيك

نريمان : امين مزيان ؟

جهاد : برافو تكوني كتعرفي طيبي

نريمان : بصحة وراحة...

كلات معاه شوية وعينيهاا كيضورو ويديها كيترعدو مقدراش تحكم فراسهاا كتحس بالتوتر غالب عليها. متهناات حتا توخر اللور ناض غسل يديه. جمعات هيا داكشي دخلاتو الكوزينة غسلات مواعن ومشاات البيت عاد ردات النفس. خلاتو متكي كيتفرج. وجلسات قدام البالكون كتهضر مع جوديا بالميساجات.

نريمان : لا متخافيش علياا

جوديا : شوفي راه عندي تيقة فيك انريمان وراني حسباااك ختي الصغيرة وراني سبق ليااا وقلت ليك كانت عندي ختي فالسن ديالك وعزيزة عليااا كتر من نفسي وكانت كتحس بياااا ونهار ماتت بكسيدة قبالت عيني من تماا وانا مريضة واناا حسبتك هيا ديك ختي راه كنت كنخاف عليهااااا لدرجة متوصفش وسبحان الله بلاصتها بحالا عمرتيهااا نتي. وداك الفراغ لي كان عندي خديتيه نتي

نريمان : هادشي انا عرفااه مزيان وراه بلامااا نحلف ليك الا نتي معمرني حسبتك استاذة ديالي ولا شي معرفة ولا شي وحدة دارت فيااا خير لا بالعكس كنت كنشوفك ختي لي معنديش.. صراحة كنغيير ملي كنشوف بنات عندهم خواتاااتهم وانا معنديش ولكن نتي ربي لي عالم اختي العزيزة.

جوديا : وردي البال راسك.. نريمان عنداااك ضيعي راسك وبالخصوص فديك البلاد راه صعيبة ..

نريمان : الله يستر المهم اناا رادة بال دابا متخمييش ومتشغليش بالك

جوديا : يلاه تصبحي على خير غدااا نتشاااوفو اكبيدة بيزوو.

نريمان : ان شاء الله حتا نتي اختي الغالية ❤️

. رجعات خرجات لقاتو شاد تليفون ف يديو هزات صلاية صلاة العشاا ورجعاات دازت من حداه وقالت : يلاه تصبح على خير

شاف فيها وقال : تصبحي على خير

ابتسمات فوجهو ودخلات ردات الباب وتخشاات فالفراش. هازة تليفون طالعة هابطة ملقاات حتا حااجة مزيانة. مشات البحث.. قلبات على فيس بوك د ريم نهار د عرسهاا كانت كتسمع نريمان حوارهم هيا ونجود وسمعاتها ملي عطاتها اسم د كونت ديالها. . طلع ليها ودخلات كتبقشش. كتشوف تصاورها فالمغرب وأمريكا وفرنسا وتوركياا واعجابات فايتييين الألف.. وتعاليق بلا قياس. دخلات نريمان للإعجابات لي عند ريم كتقلب على فيس بوك د جهاد بقاات طالعة كتقلب حتا شحفااات ملقااتوش. مشات لتصااور خرين كتقلب ملقاااتش. طلع ليها د ماجد ودخلات ليه كتقلب ملقااتش. بقات كتقلب فالمنشورت حتا لقات منشور عندو اكثر من عامين. كاتب عليه

happy birthday bro 😉

وداير ليه طاغ...

دخلات بلهفة كتقلب لقاتو حاط صور كثييرة مع ناس بزاف وشخصياات معروفة.. لابسين أحدث تصاميم ديالو

مصور معاهم

حلات فمهاا بدهشة كتقلب بين تصاوروو والمنشورات لي حاط.. اغلب صور ديالو دارت ليهم الحفظ. خلاتهم عندها كل مرة ترجع تشوف فيهم.. حطات تليفون وناضت كتسلت شققات باب وخرجات راسهاا كطل بشوية لقاتو حاط بيسي قبالتو كيهضر ابيل فيديو بلغة الانجليزية تفقصاات حيت مكتفهمهاااش. ورجعات لبلاصتها ومرة مرة تمشي طل الفضول قتلها.. حطات راسها على المخدة كتشوف ف تصاورو حتا داها نعاس..

🌿 أصبح الملك لله 🌿

حلات عينيها لقاات شميشة داخلة قلبات على تليفون لقاتو محطوط حداها على طبلة.. هزااتو شافت ساعة لقات 11 د صباح... جمعات شعرها لي كان مشتت وخرجات يلاه خرجات وهوا يهز فيها عينيه كان جالس فوق الفطوي كيشرب القهوة وبيسي فحجرو لابس تيشورط فالڭري وشورط فالأسود. طاوي رجل وطالق رجل خراا.

تفكرات راسها بلي خرجات بلا شال رجعات لبساااتو بالزربة وخرجات كتقادد فيه.

نريمان : صباح الخير كي صبحتي لباس

جهاد : الحمد الله

حنات راسها ومشات لطواليط توضات ومشات تصلي.. شافها كملات وقال : يلاه لبسي حوايجم باش نخرجو

نريمان : واخاا

دخلات لبسات بالزربة وخرجات عندو لقاتو كيشد سيور د صبادري. خرجو هوا وياهاا فطرو برا كيف عادة. وعينيه مع ساعة

جهاد : من دابا ساعة غتكون هنا

نريمان : بخوف) مصاب نجود تبغي تعطيني وراقي

جهاد : يكون خير. المهم هادشي يدير ليك العقل مرة خراا ديها فراسك ومتدخليش راسك فشي حاجة نتي بعيدة عليهااا.

نريمان : راه مدرت والوو هاد مشكيل غا تسلط عليااا بحال شي دعوة هوا لي كان كل مرة يصوني علياا

جهاد : المهم دابا فات الفوت خصك نتي وهاد جوديا تمشيو عندهاا وتهضرو معاهااا ونتي شرحي ليهاا اش كاين باش تفهم.

نريمان : غنحاول نفهمهاا ونشرح ليهاا هادشي ومصااب غا تسمع. لياا

جهاد : اوك يلاه نمشيو غنوصلو معاها نيشان..

يلاه بغا ينوض وهيا تشدو من يدو وقالت : دابا غير نسولك الله يسهل عليك . صراحة كنتعجب بزاف من تصرف ديالك معايا. درتي فيا خير عمرني نسااه وقفتي معايا واحتارمتيني وعطيتيني بيتك وقفتي معايا ودابا هانتا داييني حتا المطار عندها زعمة علاش درتي معايا هاكا

ابتاسم بسخرية وقال : نتي ماشي اللولة ولا أخرة اناا حياتي كلها لي لقيتو فطريقي كنوقف معاه وعااااادي في سبيل الله مبغيت من بنادم والو. وممحتاج بنادم يعطيني والو ويلا درت شي حاجة مكنتسناااش المقابل. وميجيكش هادشي عجب حيت كاين ناس كتاار مني.

نريمان : بفخر) صراحة ربي لي غادي يجازيك والله العظيم الا فرحت بزاف ملي وقفتي معايا ولقيتك ولد ناس اماا شي حد اخور نكون عندو فدار وو..

جهاد : الا بغيت اناا شي حاجة مغااديش نجي عندك نتي لي مضروبة فيك حتا العضم خليك لي فيك كااافيك عطااا الله فمن نشوف يلاه نمشيو.

تبعااتو وعينيها كيلمعو حسات بالآمان معاه وفرحات حيت الله حطو فطريقهااا باش يعاونها.

ديمارا طوموبيل وهوا سايڭ غادي كيشوف قدامو امماا هيا عينيهاا معاه كدير راسها كتشوف فالطريق وهيا كتخطف شوفات منو. حتا وصلو المطار وبقاو جالسين فالطوموبيل. حتا شافتهاا نريمان خارجة كتجر بليزة صغيرة فيديهاا. ضارت عندو لهفة وقالت : هاهياااا اجهاد هيا هادي.

خرجات كتجري تعانقو بيناتهم اماا جهاد بقااا فالطوموبيل

جوديا : شوف الزين رجعااات كتحمق ايوا الحمد الله فسلامتك ملي قاديتي نويف هه

نريمان : الله يسلمك صراحة عمرني نسااا خير لي درتيه فيااا والله.

جوديا : هاا خير فين خرجنااا رجعناا لي داز ولي كناا ساترينه هاحنااا فين وصلنااا... زيدي من بعد نهضرو

جات لعندو نريمان وجوديا. خرج سلم عليها وقالت وهيا مبتااسمة فوجهو : شكرا بزاف اسي جهاد على هاد الوقفة ديالك

جهاد : العفو مدام جودياا درت الواجب

جوديا : واخاا قوليااا نتا وقفتي معاها وانا قلت ليك حسبها بحالا كارية عندك وو..

قطعهاا وقال : الالة اناا درت خير لله سمعتي لله مبغيت لا خلاصك ولا مجاملة المهم الأمانة ديالك هاهيا حداك.

جوديا : الله يجازيك وشكرا بزاف يلاه انريمان نمشيو

شافت فيه نريمان ومدات ليه تليفون اي كان عطاها

نريمان : ها تليفون ديالك شكرااا بزاف حيت عطيتيني نديباني بيه مهم فيه شي تصاور ديك ساعة مسحهم الا بغيتي.

جهاد: خليه عندك ممحتاجووش بصحتك المهم الله يفك اموركم على خير وفرصة سعيدة

جوديا : شكرا بزاف الله يعاونك

طلع فالطوموبيل وفالبلاصة ديمارا ومشاااا اما جوديا شدات طاكسي هيا ونريمان ومشاو لدار نجود . حيت سبق لجوديا جات الامارات ومشاات لعندهم لدارهم وعارفاهم فين ساكنين..

نريمان : واش هضرتي معاها؟

جوديا : راه السيدة طاحت بانهيار عصبي وصونيت عليها حاوبني ولدهااا ومن بعد ملي رجعوها لدار مخلاتش ليااا بالمعيور وكلام لي ميتقال شفتي انريمااان على غيسة طحت فيها

نريمان : انا تصدمت ملي قاليااا داكشي والله متيقتش قلت هادا وقيلة غا كيكذب علياا

جوديا : ايييه نتي معارفة والو داكشي لي عاود ليك راه غا شوية من بزاف. المهم نفكو حريرة بعدا مع هادي وعاد نهضرو..

نزلهم طاكسي حدا ڤيلا د نجود. صونات جوديا فالباب حل ليها العساس. غير شاف نريمان وهوا يخنزر فيهم.

جودياا : فين نجود بغيناا نهضرو معاها..

جوبهم باللكنة خليجية) مبغات تشوف حد هيا دابا مريضة وو

دفعتو جوديا ودخلات وهوا تابعهاا كيغوت ونريمان جنبها حتا خرجات الخادمة وعائلة د نجود كيجريو ملي سمعو عساس كيغوت.

كانت متكية فبيتهااا حتا سمعات الصداع وناضت حتا هيا كطل حلات البالكون جات عينيها فعين جوديا وخرجات كتجري هبطات فالدروج مغزفة وعينيها حومررر.

شافها باباها خارجة فديك حالة عصب شد فيهااا وهيا كتنتر منو

نجود : شنوو بغيتيييي مني؟؟ شنو بغيتو مني العااااااهرااااات شنو بغيتو مني القواداااااات علاش جااااين عنديييي باغييين تقتلووووني خرجوووو عليااااااااااا

حولاات جوديا تهضر بشوية وقالت : جينااا نهضرو معاك ونشرحو ليك لي كاين ماشي جينااا نتقاااااتلو

قطعااها نجود لي مزال كتقاوم جهد باها وامها باش تنتر من يديهم وقالت : شنو غادي تقوليليي، هاااا شنوووووو جاية تقوليلي باااااش جايااا تصدمينيييي واش مكفاااكش هادشي درتي فياااا واش مكفااااكش سرقتي مني راجلييييي بات ولاديييي واش مكفاااكش هاد الحالة لي وصلتوني ليهاااا مكفاااكش الفساااد لي كنتي كتفسدي مع راااجلي بقااات ليك غا هاد العاهرة تصيفطيهاااالي باش تقلب راجلي عليييااا هادي هياااا الصحبة؟؟ / هاااا هادي هيا الأخوة اجودياااا هادي هيا المعزة لي كاااانت بيناتناااا دغيااا طعنتيني دغيااااا سرقتي مني راجلي وخنتيني معاه واخااا عرفاه راجلي.

جوديا : جمعي فمك وعرفييي راسك اش كتقولي منسمحش ليك تهيني او طيح من كرامتي اناا فدارك وكنحتااارمك على وجه واليديك

نجود : ههههههههههعه وااااناري اجيييو اجييييو تسمعو قالت كتحتااارمني فاش حتارمتيني فااااش؟ فالطعنة لي طعنتيني ولا فالكذوب لي عيشتيني فاش العاهرة الموسخنة المعفووونة فاااش فاااش دويي قولي فاااااش

تنترات من يديه باهااا وامها وقربات عند جوديا واقفة فوجهها وباها كيجر فيهااا وهيا كتدفع فيه.

نجود : نتي موسخة نتي عبارة عن مزبلة نتي ا....

مكملاتش هضرتهااا حتا جاتها تسرفيقة الوجه جات طايحة فالأرض وجودياااا فوق منهاا

واليديهااا كيجرو فجوديا وباها كيهددها يعيط البوليس...

شداتها من ذقنهااا وقالت وهيا كتغوت بالجهد : العاهرة والموسخة هياااا نتي انااا بزاف عليك انااا اشرف منك انااا عمرني مبغيت نضرك اولاااا نشتت ليك الشمل داك الشماااتة د راجلك هواا لي ضحك عليااااااا وهوااا لعب بينااا بجوج نتي قنت واناا فقنت وبجوج بينااا كيوصينااا عندااك نصيفطو تصاور لبعضياااتنااا عقلتي ولا لااا مكااانش كيقولك عنداااك تصيفطي تصاور لصحباااتك وبالخصوص جوديا حيت مكنتيقش فيهااا؟ ونتي بحال البهلة تايقة فيهه؟؟ هكاك كان معايا انااا. ولكن انااا كان باغيني ونتي مكاانش باغيك ولكن ابنت ناس ملي عرفت هادشي كوووووولوو

مبغيتش نشتت ليك الشمل ومبغيتش نضيعك فواحد نتي كتموووتي عليه واخااا هوااا ميستااااهلش داك الحوب. شنوووو ندير فنضرك ديك ساعة ؟ شنووو ندير نجي نقولك انا وراجلك كنا مصاحبين وحملت منوووو فين كنااا غنوصلو ؟ كانت نهاية غتكون مكفسة ولكن ماشي بحال هاد نهاية ديال داباااا. ولكن اناا فكرت بالعقل وقلت معليش ضيعني وخلاني حاملة وانا مزال كنقراا وصغيرة وكنخاف واليدين ديالي واخا عاطينيي الحرية ولكن يسمعو هادشي يذبحوني ااااه يذبحوووني ويدفنووني وميسييق ليااا حد الخبار. قلت معليش نكمدهااا فقلبي المهم نتي منضيعش ليك زواجك ونخليك ضايعة براكة نضيع غيييير انااا عرفتي الويل لي شفت ولا لا ؟

رخات منها جوديااا وناضت ام نجود كتوقف بنتها واب ديالها كيغوت على جوديا تخرج بحالهاا. غوتات عليهم نجود وقالت : صاااافي خليونااااااا دخلووووو بحالكم خليوناااا بناااتناااا. ماماااااا هضرت معاكم بابا دخل بحااالك.

دخلو وخلاوهم بجوج نجود كتمسح دموعهااا وكتشق وجوديا حتا هيا

نجود : كن كنت بصح صحبتك كنتي غتقولهاالي ومكنتش غنخليني عايشة هاكاا. اناا راجلي هاجرني فالفراش فالهضرة ف اي حاجة. مكنعيش بحال العيالات طول هاد المدة د زواج وحنااا فالمشاااكيل وديماا كنحس بيه كيخوني وكان كيخوووني معاك اجوديااا وهادشي متنكريييهش كاين ولا لا...

تصدمات جوديا من كلام نجود ونريمان موراهم كتسمع مصدومة.

نجود : راجلي مشااا حتا المغرب عندك ومعرفت شحال دوزتو مع بعضيااتكم وشنو درتو . نتي مخنتينيش غا مرة نتي طعنتيني بزااااف دالمرات اجوديااا

جوديا : مطعنتكش وهادا لي كيوصل ليك الخبار انا عرفااه انجود اه بصح فهد جاا عندي المغرب وبغاا يشوف ولدو ولكن اناا مبغيتش وبقااا حاضيني حتا دخلت لدار وتبعني ملقااش ولدو حيت كنت مخليااه مع ماما وديك الليلة

......بفففففف...... طرا لي مكنتش بغيتو يوقع بيناتنا انا وفهد...

نجود : شنو تمااا شنووو اهئ اهئ اهئ اهئ هضرررر شنوو كمل زيد. بايتين مع بعضياااتكم ياك بايتين فالجو حميمي عاجبك راجلي ياك ههه ملقيتيش بحالو واخا دزتي على رجال كلهم مكفاااوكش رجعتي لراجلي عوتاني ملقيتيش بحالو ياك هههههههه مزوجة ابنت قحاب وتابعة راجلي مزوجة وعندك راجل وبولادك وكتخوني مع راجلي ههه لا نتي بزاف..

كرزات جوديا على سنانهاا وشدات نجود من عنقهاا وقالت : الماضي وفات واناا مزال كنكفر على ذنوبي لحد الآن ونتي معنكدش الحق تحااسبيني كيفماا نتي بغيتيه حتا انااا كنت كنبغيه وكنموت عليه. وديك الليلة هواا لي شدني بزز مني واخاا عييت نقاوم ولكن فلاخر كنبقى شخص ضعيف مقدرتش عليه ودوزت اكفس ليلة معاه وندمت ندمتتتتتتت

نجود : نتي واخاا ديري لي درتي عمرك مغادي تربحي ولا غادي توفقي هانا فين قلتهاا ليك نتي احقر مما كنت كنتخيل وعمرني نسمح ليك كتسمعيييي؟ عمرني اجوديااا نسمح ليك..

جوديا : خصك تشوفي راسك راسك نتي هههه شوفي كمارتك كي دايرة. كوميم اناا مزوجة بواحد بغاني وانا حاملة وعشت معاه مزياان واخاا مكيخلينيش نخدم ومعنديش حرية كافية ولكن هوا بغاني وقبلني كيفماا انا.

لي خلقني قادر عليااا وقادر يمحي ليااا ذنوبي كلهاااا. وهاناا كنكفر على ذنوبي انجود. اناا داكشي بغيت نساه اناا دابا كنحاول ندير الخير ف اي واحد ونصح اي واحد ميطيحش فالغلط ديالي ولي بيني وبين الله معندك دخل فيه نتي. المهم كنطلبو ونرغبو يسمحلي ونتي عيشي فهاد الحقد لي فقلبك. كنااا صحاب ولعب بينا واحد الكلب وكانت نهايتناا مقودة اناا وياك المهم هناا كتسالي علاقتناااا ولهلا باش تسمحيلي حيت مضلمتكش ومكنتش عارفة بلي مزوج بيك انااا مغضرتش بييييك انا مطعنتكش اناااا مآديتكش اناا اصلا مبغيتش نشتت

ليك الشمل ديالك. هادي هيا هضرتي تفهميهااا متفهميهاااش ضبري لمخك. اري ليااا دابا وراق بنت نمشيو بحالنا

نجود : شنوو ؟ وراق اينا وراق؟

جوديا : بعصب) متبقااااايش تمرضيني انجود اري باسبور والوراق دالبنت

نجود : ايوا ياا الحبيبة جيتو معطلين لقيتيني حرقتهم

جوديا : اويلي على حرقتيهم واش شوية لباس اري ليااا وراق البنت ولا مغادي يعجبك حال

نجود : شنو فجهك مااا ديري كاع ورينيييي هانااا قدامك . راكي فدارناا وفبلادنااا تقلبي عليااا تلقااايني والله حتا نغرقك فالحباسااات نتي وهاد صطاجيراا لي عندك ولي مصيفطااهاا لياا ودخلتهااا لقلب داري ولعبتو عليااا

جوديا : شتي نتي مريضة وبلا شخصية مغاديش نزيد نتجااادل معاك كتر من هاكااا. عطيني وراق البنت

نجود : معنديييش قلت ليك راني حرقتهم

جوديا : اويلي واش باغا تسطينيي اش داك تحرقييييهم وعلاااش البنت اش دارت ليك.

نجود: خرجووو عليا من دارناااااا يلاه خرجووو وعمرني نشوف وجهكم خررررررجوووو علياااا

جوديا : بصرامة) نجود اري وراق البنت وباسبور ديالهاا واش عندك شي عقللل ولا لا اري اصحبتي لبنت وراقيها راه خصناا نرجعو بحالناا

نجود : قلت ليك مبقااااوش عندي قلت ليك حرقتهم مبفيتيش تيق سوقك هداك.

شافت فيها نريمان بعيون مدمعة وصدرهاا كيطلع وينزل وقالت : حرام عليك انا شنو درت ليك انا باش آذيتك دغياا حكمتي عليااا. وكذبتيني شنو ربحتي دابا الا خليتيني هنا مشردة حرام عليك

نجود : نتي بلامااا تهضري حيت نتي حسابك معايا هوا الاخير ومزال مصفيت حسابي معاكم.

قطعاتها جوديا وقالت بعصبية : لي فجهدك عملو مكنخااافش من تهديدات ديالك وفوق هادشي نتي غير كتهضر حيت بكل بساطة متقدر تعمل والو ههه

نجود : خرجووو عليااااا خرجووو

نريمان : اهئ اهئ اهئ اهئ. عفاااك اهئ اهئ اهئ رديلييي وراقياا عفاك هئ هئ انااا مزاوكة فيك هئ هئ هئ كنترجاااك رجعيهم ليااا.

نجود : لباااااااب كتسمعو لباب

جوديا : ههه مسكينة كتبقاااي فيااا سبحان الله كنتي عزيزة وغالية ودابا بينتي لياااا انك متستااهل ديك المحبة. زيد انريمان يلاه نمشيو

نريمان : اهئ اهئ اهئ ووراااقي ديالي هئ هئ واش غنبقى هنا ضايعة شنو نديييير شنوووو

جوديا : غنحاولو نلقاااو شي حل يلاه نمشيوو صافي غا سكتي

نجود : يلاه الباب تفووو

مرداتش عليها جوديا وخرجات هيا ونريمان لبرا..

جوديا : صافي براكة من البكاا دابا نلقاااو شي حل....

نريمااان وصافي سكتي دابا نلقااو شي حل براكة متبكي..،

نريمان : حرقااات ليااا وراقي ديالي هئ هئ هئ الفرحة لي فرحتهاا تنكدااات ليااا. انا عارفة راسي اهئ اهئ اهئ معندي زهرررر معنديش اناا عارفة راسي عمر فرحتي متكمل اهئ اهئ اهئ. كرهت هاد العيشة كرهت راسي اناا كاع

جوديا : بففف موصيبة هادي ..

نريمان وصافي غنلقااو شي حل غااا سكتي اوكي ؟ يلاه صافي سكتي..

شدو طاكسي ومشاو لغيسطو جلسات نريمان كتبكي وجوديا حاطة يديها على جبهتها

جوديا : بففف نريمان وصااافي سكتينااا عفااك . شوفي اناا غنحاول نلقى الحل اوك اناا غنصوني على جهاد

هزات فيها نريمان عينيها كتنخصص وقالت : شنو غتقولي ليه شنو غيدير..

جوديا : صبري هانا غنصوني عليه دابا.. ونشوف واش يبغي.

هزات تليفون اتصلات بيه مجوبهااش ورجعات حطات تليفون

جوديا : مكيجااوبش السيد برزطناااه هاحناا زدناا وحلناا

نريمان : وشنو غنديرو!

جوديا : معرفت نتي بعداا فينماا تحركتي معايا خااصك وراق ديالك غير الأوطيل هواا لاخر الا مشيتي ليه معندك حل.

نريمان : بحزن) جهاد كان مخليني عندو غا بزز ومقال باش تهنى ملي خرجت من عندو مغاديش يجاوب

جوديا : شفتي عل....

مكملاتش هضرتها شافت تليفون كيصوني هزاتو بالزربة وقالت : هواا ولاهيلا هوااا ...

الو جهاد

جهاد : وي صافا

جوديا : الحمد الله ااا. امم بغيت نهضر معاك عفااك

جهاد : وي مرحبا

جوديا : واخااا. الا قدرتي تجي لعندناا ل....... محتاجة نهضر معاك ضروري محتاااجاااك عفاااك

جهاد : امم المهم عندي شي خدمة ضرورية نكملها ونجي

جوديا : اوك واخاا لهلا يخطيك حنا غنتسناااوك

جهاد : اك

قطعات المكالمة وخرجات تنهيدة حااارة : هاهواا غيجي

نريمان : على الله يلقى معانا شي حل .

جوديا : نتمناااو.

بقاو جالسين تما كيتهااودو ساعة وساعتيين وثلاتة حتا عياااو وطابو بالجلاس.. عاد دخل عندهم غادي جيهتهم وقفات جوديا سلمات عليه هيا ونريمان. شاف عينيها حومر وقال : مالك انريمان ياك لباس

جوديا : مبغاااتش نجود تعطيهاا وراقيهاا وهانتااا كتشوف على حالة فيها.

جهاد : معكسة هاد السيدة عوتاني.

حط ليه نادل قهوة شرب منها رشفه وقال : هاناا قوليلي فاش محتجاااني!

جوديا : صراحة معرفتش منين نبدا ليك برزطنااااك معانا بزاف فهاد الفترة

جهاد : هانياا ماشي، مشكيل الا قدرت نساعدكم راه مغااديش نتردد.

جوديا : مهم نريمان معندهاااش الوراق وهيا فهاد بلاد ضايعة غير فين تبات هيا لاخراا معندهااش فين. كناا معوليين غنمشيو فحالناا مور ماا نصفيو امور مع هاد السيدة ولكن هياا تعكساات واناا وحلت معاهااا وبغيتك نتا دخل بيناتنااا عفاك تهضر معاهااا راه قالت الوراق حرقاااتهم واش دابا هادي عندهااا شي عقل ولا كتفلااا علينا.

جهاد : غير تخربيق متقدرش تحرقهم اولا ترميهم غير كتهضر

جوديا : هياا بصح فيهاا غير الهضرة من ديماا ماشي غا دابا

جهاد : دابا بغيتيني نهضر معاها ياك.

جوديا : اه الا قدرتي عفاااك وتلقى ليناا شي حل الله يسهل عليك.

جهاد : كوني هانية انا عطاتني لاكارت فيزيت ديالها غنديرو انا وياهاا شي وقيتة غدا نطلقااو وباش مااا كان نرد عليك.

جوديا : شكرا بزاااف عمرني نسااا خير.

نريمان : سمح ليااا بزاف اجهاد

جهاد : معليش مفيهاا باس .. نريمان مسخيتيش وقيلة باغا تزيدي عندي شي ايامات ههه

نريمان : بحياء) ههههه

جوديا : ههه عجبها الحال حتا هياا

جهاد : مرحبااا. بون نتعشاو اون سومبل ؟

جوديا : اهاه مرحبا ونزيدو نتعرفو عليك عن قرب هه...

جهاد : ايه مرحبااا

جلسو فجو هادئ كيتعشااو .. وجوديا كتعاود على مسار حياتهاا وجهاد فورشيط فيديو كياكل وكيتصنت ليها اماا نريمان حضيااهم غير كيف كيديرو ياكلو ويقطعو بالموس. حيت اول مرة تجلس فغيسطو معروف كيجلسو فيه غير ناس راقيين وناس لي من طبقة علياا. عينيها غا مع لي داخل والخارج وناس كيف كياكلو وكيف كيهضرو باحترام وصوت منخفض.. وكذالك النموذج لي جالسة معاهم جوديا وجهاد. كيهضرو وشي كيسمع لشي وابتسامة على وجهوهم وهيا حالة فمها فجهاد باعجااب

جوديا : وانت؟ طبعا الا بغيتي كتجيني الهضرة ديالك فشكل عربية مخلطة مع الانجليزية المهم عربية ديالك موضحاش مزيان وقيلة مكبرتيش فالمغرب ياك

جهاد : وي اناا مكبرتش فالمغرب خلاقيت ف امريكا وعشت بين السويد والمانيا ولندن.. الجو فالعائلة كانو كيهضرو بالعربية وكيقريوها لينا فدار . ڤوالا هادشي لي كاين. دومين ديالي قريتو صدفة حيت ماشي هوا لي كنت داير فبالي فينالمون هوا لي رتاحيت فيه ولقيت فيه راسي

جوديا : وتبارك الله عندك شهرة كبيرة بزاف وناس كيعجبهم تصاميم ديالك معندي منقول فيك الله يعطيك الصحة. اذن تبغي نتعاملو اناا وياك؟ انا غادي نصور البوم دالعرايس هاد العام وبغيت ناخد من عندك كوليكسيون جديدة ديالك.

جهاد : اڤيك بليزيغ ايمتاا مبغيتي اجي عندي

جوديا : بارك الله فيك ان شاء اكيد نبقااو على تواصل.

تعشااو وناضو خرجو من تماا. قررات جوديا تمشي الاوطيل وجهاد رجع هوا ونريمان لدار..

طلع هوا اللول وهيا جنبو شداهاا الرعدة والخوف...

حل الباب ودخلات لقااتها باقا كيفماا هياا.

حط سوارت وحيد تجاكيط ديالو رماها على الفراش وقال : غتنعسي؟

نريمان : اه .... لااا لا ....معرفتش

جهاد : اوك خودي راحتك. المهم اناا عيان شوية غنعس دابا

نريمان : صافي واخاا تصبح على خير

جهاد : حتا نتياا.. المهم هااا بيت راه باقي كيفماا هوا نعسي فيه

نريمان : صافي واخااا ☺️

دخل لبيت اخر جنب البيت ديالو وشد لباب اما هيا دخلات لبيت لقات دوك بيجاماات محطوطين فالجنب كيفماا خلاتهم...

بدلات حوايجهاا وحطات قميجتها زيتية طويلة وسروال د جين لي من نهار لي خرجات من عند نجود وهيا لبسااهم. لبساات بيجامااا ومشات الطواليط توضاات ومشات صلات. طفات الضواو من غير المصاابيح الضوئية خلاتهم مشعولين.. ودخلات البيت. هزات تليفون ودخلات لفيس ديالو لقاتو حاط صورة جديد ليه كاتب عليهاا

" Don t lose hope ,

You never know what tomorrow will come "

JIHAD ✨.

فالبلاصة مشات ترجمااتها وطلعات ليهاا

- لاتــفــــقـــــد الأمـــل ,

أنـــت لاتعلم ابداً ماسيأتي غداً ❤️✨.

دخلات لقات التعاليق بكثره اغلبهم أجااانب معلقيين ليه على صورتو وهوا مخلي ليهم قلب..

دوزات الوقت كولو وهيااا غير فبروفيلو تشوف تصاور جداد والقدام. حتا داهاا نعاس.

مع 4 د صباح ضرباتها الفيقة كتحس براسهاا بحالا بايلة فسروالهاا ناضت مخلوعة شعلات الضو وهيا مفرقة رجليهاا لقاات طباعي ديال الدم فالفراش وفسروالهااا عامر حطات يديها على خدهاا كتولو مصدومة وحريق ف اسفل كرشها كيقطع بالحريق..

كتحس براسهاا مقادرة دير والو يديهاا كيترعدووو

جرات الفراش الأرض جمعاتو لقات الفراش لي تحت منو حتا هوا مطبع حيداتو حتا هواا جمعاتهم والقلب ديالها غيخرج من بلاصتو بقوة الخلعة والوساااوس تجمعوو عليها.

حلات الباب بشوية لقاات الهدوء خرجات كتسلت مشات لطواليط حيدات سروالها حطاتو فالجنب وطلقاات الماا كتغسل فخااضهاا ويديهاا كتقيس الفرج ديالها وعينيها كيضورو والخلعة قتلاهاا.. شدات الماا وهزات داك سروال حطاتو ف سطل وكبات عليه الماا وحريق غير كيزييد يجهااد عليهاا مكتقدرش حتا تزيد ولا توقف كتحس برجليهاا فاشلين عليهاا والدوخة شداها. حسات بالدم كيهبط معاها هزات عينيها لقات فوطة صغيرة معلقة فالحيط طواتهاا على 4 ودارتهاا تحت منها. هزات فوطة كبيرة لواتها عليهاا ومشات لبيت كتجر رجليها شادة فكرشهااا..

لبسات بيجاما لاخراا وتكمشاات فوق الفراش شادة فكرشهاا ومزيرة على عينيهاا. مقدرااش تصبر

بقاات على ديك الوضعية كتخمم كيفاش غتصبن هاد الفراش لي مطبع واش غتشعل المكينة فنص ليل؟ ولا تصبنهم بيديهاا وهيا مقدراش حتا تزيد. وسروالهاا لي مزال فطواليط الا لقاه جهاد...

رجعت ناضت بصعوبة مشات لطواليط وشعرهاا مخربق هابط على عينيهاا وعروقاات هابطة معاها خوات ديك الماا. مقدراتش تمشي تهز صابون هزات غا شمبوان وبدات كتحك بيديها وتشلل عصراتو ومشات البالكون نشراتو فيه. ورجعات البيت حلات الماريو لقات غير حوايج جهاد شي معلق وشي مطوي كتقلب على باش تغطي الفراش بيدما يصبح الحال ويخليها جهاد بوحدها وتصبن دوك الحوايج.

رجعات تكمشااات فبلاصتهاا كاازة على سنانهاا وشادة فكرشهاا ورجليهاا كيترعدوو... بقاات هكاك حتا غفاات ورجعات ضرباتها الفيقة مع 7 دصباح ناضت مخلوعة حطات يديها موراهاا لقات الفزاڭ خرج على سروال ناضت بالجري كتبكي حيت معندهاا متلبس. لقات حتا تيشورت ديالهاا تقاصت من اللور... شدات فراسها مخلوعة وشهااد النهار المزفت لي طاحت فيه..

حلات ماريو ديال جهاد لقات حوايجو حلات ومشات لبلاكار اخر حلاتو لقات فيه تقاشرو فجهة وملابس داخلية ديالو فجهة خراا..

هزات جوج تقاشر. وخرجات مع الباب كتسلت يلاه وصلات الطواليط وهيا تعاود ترجع لبيت كتخمم اش غتلبس وحوايجها لاخرين موسخين وسروال فازڭ... لقات بينوار ديالو هزاتو ومشات لطواليط. شدات عليها وحيدات حوايجها كاملين لقات تيشورت حتا هيا مسخة.. وسروال خارج عليه فزاك. حيداتهم وبقات غير بسوتياان. شافت فيهم لقااتهم موسخين من الجناب. بالسيف اسبوع وهيا لابسااهم... حيداتهم حتا هوماا وطلقاات الرشااش. فزكااات شعرهااا مزياان وغسلات لحمهاا كلو بالمااا سخون والحريق كان فاتهاا شوية.. نشفات بفوطة وطوات دوك تقاشر دارتهم معاها ولبساات بينوار ديالو جاها تحت الركبة .. شلااات دوك الحوايج صبنتهم غير بيديهاا ودوك تقاشر حتا كيكونو غيفلتو ليها وكتعاود تقاددهم بيديها. حتا كملات وخرجات كتسلت داتهم نشراتهم ورجعات لبيت شدات عليها. هزات شورط ديالو لبساتو باش ميبقااوش يفلتولهاا دوك تقاشر وتخشاات فالفراش شادة اطراف بينوار بيديهاا وصدرهاا صغير كيمشي ويجي فيه بالخصوص ملي كتحرك...

بقات متكية كتفكر هاد الليلة الكحلة لي دوزات حتا داهاا نعاس...

وقف قدام الباب كيعيط بسمتهاا بشوية مجوبااتوش. شرب قهوتو ورجع عيط ليهاا مجوبااتوش. حل بوانيي دالباب بشوية ودخل راسو لقاهاا مكمسة فالمانطة وشعرهاا هابط على عينيهاا.

وقف فالباب كيعيط ليها بشوية حتا حلات عينيها بصعوبة

جهاد : واش عيانة؟؟

نريمان : اه عندي الحريق بزاف

جهاد : واش نديك الطبيب؟ نوضي يلاه نديك

نريمان : لا شوية ويفوتني الحال.

جهاد : راني داير انا ونجود غنشوفها وحتا جوديا غتجي عندنااا باش نصفيو هاد القضية المهم نتي رتاحي بلاماا تمشي

نريمان : صافي واخاا لي بغيتي...

بعد 3 ساعات وهيا ناعسة طاح الغطاا فالارض.. تقلبااات على جهة خرا تعراو فخااضها حتا بان سليب د جهاد لي لابسة وتحل بينوار على صدرهاا كيبان نص فيه خارج

كان طالع فالمصعد هوا وجوديا قال

: غتكون مزال ناعسة خليتهاا عيانة بزاف معرفتش مالهاا ومقدرتش نقرب ليهاا

جوديا : اناا نشوف مالهاا

فديك الأثنااء جوج د ناس حلو باب د جهاد ودخلو لداخل

آسيا : غيكون وقيلة مزال ناعس

ريهام : ههه سيري دخلي حمحمي اماما عنداك يكون بلا حوايج ههه

آسيا : ههه حطي ديك شي تما درناهاا ليه مفاجئة مغيعرف راسو. باش تبلاا...

مشات لباب بيت نعاس حلات البيت وهيا تلقى نريمان ناعسة ناشرة يديهاا وفخااضها معريين وصدرهاا خارج باين نص فيه.

خرجات عينيها بصدمة وقالت : اوييييلي شكون نتييي؟؟؟؟؟؟

ريهام : ماماا شنو كاين!!

دخلات ريهام موراهاا كتجري بالطالون لقات نريمان حالة عينيها تعباانين باين عليهم العياء والمرض شادة اطراف بينوار بيديهاا كتشوف فيهم حتا هياا مصدومة.

تحل الباب ودخل معاه جهاد وجوديا داخلة حشماانة. شافتو ريهام وهيا تقول : جهااد خويااا !!

جهاد : شكديرو هناا؟

آسيا : شنو كنديرو هنااا ؟؟؟؟ هادي لي شنو كدير هناااا فبيتك مدخل لدارك غير بنات زناقي!!!

دخلات جوديا كتجري لقاات نريمان كتجر فداك البينوار. اماا جهاد مدخلش بقااا واقف برااا ...

آسياا : زيدي اريهاام نمشيو بحالنااا زيدي ندمت علاش جييت كاع

جهاد : شكااااين شواااقع

آسيا : شواقع؟ هادي لي عريااانة عندك هنااا شكدير

دخل مغزف شاف نريمان كتجر ف البينوار واسيا خارجة مع الباب هيا وريهام. تبعهم معصب وزدح الباب اما نريمان محسااتش براسهاا حتا جمعات معاها جوديا بتسرفيقة جابتها طايحة على فراش دايخة.

جوديا : ميحساابش لياا غطلعي هاكاا ونتي عافية تحت التبن كضربي غاا من التحت لتحت

نريمان : والله مااا درت شي حاجة اويلي اهئ اهئ اهئ راني مريضة من البارح

جوديا : ايوا على سلامتك تهنيتي فيك الدود لقاااك نية وجايبك هناا ونتي جابك الحال

نريمان : والله ماا دار لياا شي حاجة ولا درت انا شي حاجة راه ليل كولو واناا مريضة ودمايات هابطين مني.

ضوراات جوديا عينيها لقاات فراش مجموع فالارض مشات حلاتو لقاتو مطبع وهياا تخرج فيهاا عينيها : انااا كنرضع فصبعي اناااااا ياااك. نوضي نوضي لبسي حوايج الله يجعلك تلبسي عااافية تحرقك ونتهناااا منك من نهار عرفتك واناا غاا فالكوارث معاك انا من وحدة لاخرا.

ناضت ناريمان كترعد وكتبكي وقالت وهيا كتنخصص بعصبية : بعدي مني دابااا اناا رجعت كنكذب عليك. واش هوا الا كان دار لياا شي حاجة غيخليييك دخلي لدار واناا هاكااا. ولا يخلي اموو دخل وتشوفني هاكاا اناا بايتة القصااااص ديال الحريق دايز معايا والدمايات فضت حوايجي كاملين توسخو كنت غنعيط ليك فنص ليل تجي عندي ومبغيتش نخلعك. حرام عليك عااارفة راسي معندي زهر والله معندي شي زهر وقدمااا فرحت قدمااا تنكد عليااا. وزيدوون طبيب كاين يلاه نمشي معاك دابا وتأكدي حرااام عليك ضلمينيي هاكاا وتقولي فيااا لي مفيااااش وربي راه كيشوف حسبيا الله ونعم الوكيل...

شداتها جوديا من ذراعها وجراتها لعندهاا عنقااتها : صاافيي ششش سكتي سمحيلي راه غير كنخاااف عليك وكنخاف عندااك شي حد يتفلا عليك ونتي تيقي بيه صافي تيقتك سمحيلي. يلاه لبسي حوايجك اناا نتسنااك تخرجي

مجوبتهااش نريمان مشات البالكون لقات حوايج مزال منشفوو هزات سوتيااان ديالهاا واخاا مزال باردين رجعات لبيت لبساتهم ولبسات قميجتهاا وسروالها دجين. ولوات الشان على راسها وهزات داك الفراش داتو الطواليط تصبنو.

فحين جهاد مع مدام آسيا فالسيارة هوا وريهام كيتجادلو

آسيا : زعمة انااا ديماا كنرغبك اولدي تزوج اولدي بغيت نفرح بيك اولدي دير وليداتك متبقاش غا ساكن بوحدك وانت لي فراسك فراسك ها خوك ماجد تبارك الله بولدو ختك صغيرة هاهيا تزوجاات وانت شنو واش الحياة واقفة على وحدة ولا جوج. تبارك الله بعقلك وكتفهم كلشي.

جهاد : بصرامة) ومن بعد حياتي هادي انااا لي كنقرر فيهاا واش نتزوج ولا لاا ماشي نتي غتجي تحكمي عليااا بزز مني نتزوج راه امبوسيبل هادشي

آسيا : يااااك اسيدي وتجيب بنات لدار زعمة مفيهاا والو ولا قولي هادشي ورتييه من باك هه

جهاد : ماما متعصبينيش كتر مااا اناا معصب وراكي كتعرفيني كيف داير تيقي متيقيش سوقك هداك انا مغاديش نبقااا نحلف ليك. هاديك البنت راه ولدك ماجد هوا لي فاللول لسقهاا ليااا تبقاا عندي حيت مشااو ليها الوراق ومعندهاا فين تمشي دونك اناا راكي عرفااني مغاديش نخليهاا فالزنقة وجبتهاا لدار ومبيني وبينهاا غا الخير والاحسان وداك الشي لي شفتي قبالت عينك ممنوووو والوو وداكشي لي كيضور ليك فراس مكينش كااااع. السيدة اصلاا مريضة ولا منعرف مالهااا اناا مدخلش عندها كاع وهادشي علاش جبت صحبتهاا تشوف مالها..

آسياا : ههههههههه شهاد الروينة؟ مالك كدخل وتخرج فالهضرة واش اناا حمارة باغينيي نتيق هاد الهضرة ونكذب عيني..

ساط من مناخرو بعصبية وقال : مولف اناا كنكذب عليك؟ الالة متيقيش ومرة خراا متجيش عندي كااع الا مكنتيش غتعيطي فالتليفون وتعلمي

دازو الدموع بين رموش عينيهاا وهيا كتشوفو كيهضر بعصبية

آسيا : مغاديش نعاود نجي هئ اهئ اهئ غير بقااا هاني.

جهاد : احسن مااا غادي ديري بلااش

خرج من طوموبيلتهاا وزدح الباب وطلع لدار. لقاا نريمان فالطواليط كتصبن كانت شادة عليها الباب دخل ودار لجوديا علامة استفهاام بمعنى شنو واقع...

شافتو معصب وقفاات قبالتو وقالت : نريمان مريضة شوية المهم حنا غنمشيو دابا اناا غنقلب على شي بلاصة خراا سمحلياا بزاف بزاااف على هاد الحالة لي وصلنااك ليهاا مع عائلة

جهاد : واش خاصهاا طبيب. نديوهااا لطبيب؟

جوديا : معرفتش المهم اناا غنشوف معاها

جهاد : شنو كدير دابا

جوديا : احم.. ااا كتصبن واحد غطاا

جهاد : وعلاش كتصبن اناا قلت ليهاا تصبن لياااا؟

جوديا : شوف عفااك مبغيناااش نعصبووك اناا عرفااك مقلق بزاف وعارف هاد الحالة لي دارت ليك نريمان مفيهاا ميصلاح.

ولكن راه جاتها الدورة شهرية وقيلة مجهدة وتوسخ ليها الفراش وتوسخو حوايجهااا هادا علاش .

حرك راسو بفهم مجوبهااش

خرجات نريمان غير شافتو وهيا ترجع باللور مشات عندها جوديا شدات من عندها السطل وداتو لبالكون نشرات معاها فراش. ورجعو دخلو لقاوه جالس شاد تليفون فيديو...

جوديا : المهم اسي جهاد معرفتش كيفاش غنهضر معاك ولكن سمح ليناا بزاف

جهاد : وعلاش هادشي عادي مطراا والو. نريمان شوية دابا.

حركات راسها وجهها حمر بحال مطيشة : شوية الحمد، الله

جهاد : تمشي لطبيب؟

نريمان : لا لا مكاين لاش شكرا بزاف الله يرحم والديك...

جوديا : يلاه نخليوك دابا غ..

قطعها وقال : واش اناا جريت عليها بنت غتبقى هنااا حتا نشوفو مع هادي شنو غيكون

جوديا : حنا مبغينااش نبرزطووك ولا نديرو ليك شي مشااكيل.

جهاد : بالعكس مكاين حتا شي مشكيل.

صونى تليفون د جودياا شافت النمرة وهيا تجاوب : واخاا صافي شوية ونتشاوفو مرحباا..

شافت فيهم وقالت : اناا غنمشي دابا دايرة مع شي اصدقااء قدام غنشوفهم. وديك ساعة باش مكان نهضرو اسي جهاد..

جهاد : ضروري ديك ساعة نقولك اش كاين..

سلمات على نريمان وخرجاات بقااو بجوج هوا شاد تليفون وهيا جالسة قبالتو حشماانة كتسناه غير ايمتاا يهضر وميبقاااش ساكت . هز عينو فيها وقال : رتاحيتي شوية

نريمان : اه دابا مزيان

جهاد : نوضي نعسي رتاحي خودي راحتك

نريمان : لا بلاش مفياش نعاس. واش طلاقيتو نجود شنو درتو معاها.

جهاد : وي طلاقيناهاا ولكن مبغاتش تهضر مع جودياا وبدات كتغوت. مهم عاود صونيت عليهاا وقلت ليك نطلقااو غير انا ويااك .. بون هاد عشية غنشوفها

نريمان : وعلى الله مكرهتشي يرطاب قلبها شوية وتحن فياا متخلينيش هاكا.

جهاد : يكون خير.

المهم انا غنخرج دابا عندي شي شغل باش من بعد نطلقااو انا وياها وديك ساعة نقولك شنو كاين.

نريمان : صافي واخاا.

ابتسماات بحيااء وناض هز سوارتو وخرج...

عاد حست براحة شعلات تليفون لقات أنس مصوني عليها.. ومصيفط ليها مسج..

أنس : هاي هايهاااي. ناس الالة مشاو الاماراات ومبقااوش معبريناا ههه صافي حليت ليك عينيك عطيتك فكرة فين تمشي ونتي تقلبي كمارتك. اصلا قحاب بحالك هوماا لي مزرعيين حسابلك تماا غطفريييه تررررر يا ودي يبقااو يتناوبو عليك واحد مور واحد هههههه ايوا منخاااافوش عليك تيتيزة غضبري الكليااان منخااافش عليك غير هواا الحبيبة طلبي التمن. وعقلي على هاد الهضرة لي غنقولك طال الزمان ولا قصار غتجي بين يدي وديك التعفيرة ديالك لي درتي معاياا من نهار اللول والله حتا ندمك عليهاا حاسبة راسك مالكة الجماال ولا منعرف لأصل بوك متخمييش هاد تعنطيزة اناا لي غنقطعهااا ليك وراني غير حداك ههه بحال والو تلقاايني من دوك لي غيدوزو عندك الحلاوة اك اكبيدة يلاه تقوديي..

حلات فمها بصدمة ممتيقااش اش كتقرا أنس؟؟ لا واش اناا لي مصيفط ليااا هادشي ؟ اويلي انس مصيفط ليااا هاد مسج أخر واحد كنت نضن فيه هادشي اويلي كيفاش حدايا؟ يكون عارفني هناا اولا يكون شافني ملي دخلت لهنااا ؟ كيفاااش الله ياربي وشهاد الموصيبة اويلي..

طاح ليها تليفون من يديها شدات فراسها كتبكي الخوف والخلعة شدوهااا وعينيها مع الباب كتخاف يدخل عليهااا سرطااات ريقهاا بزز وهيا كتمسح دموعهاا تالفة حاسة براسهاا مرفوع اش هاد مسج لي زاد كمل على ماا بيها. تكمشاات فبلاصتها كطلب الله غير ايمتااا يدخل جهاد...

دازت ساعة نزل جهاد من السيارة ديالو ودخل كيحيد نضاضر ديالو لقاها جالسة كتشرب قهوتهاا. ابتساماات فوجهو بلطافة وقفاات سلمات عليه ورجعت جلست..

حوار بيناتهم ضاير بالانجليزية..

بحكم عربيتو قليلة ومكيفهمهااش مزيان وكذالك هياا...

جهاد : كي بقيتي شوية

نجود : اي الحمد الله

جهاد : المهم اناا بغيت نهضر معاك فالموضوع د نريماان وجودياا باش نصفيو هاد القضية فمراا..

نجود : تفضل واخاا انااا عارفة حقيقة هيااا هادي لي فبالي وانهم كذبو عليااا وبغاااو يلعبو بياا...

جهاد : نتي إنسانة بعقلك وكنتي عارفة راجلك ولا؟ شوفي حلي عينيك مزيااان اولا نهضرو على البنت

قطعاتو نجود وقالت :

انا الخادمة ديالي قالت لياا شتفتهم خارجين بجوج.. الا كان هياا صادقة علاش غادي تخرج مع راجلي ؟ وعلاش متقولهاش ليااا؟ وعلاش متصااارحنيش وعلاش تخليني غافلة على هاد الامور ؟

جهاد : اوك متافق معاك. ولكن بنت مزال صغيرة راه 18 وقيلة عندهااا وهيااا قالت بلي راجلك قاليها بغيت نهضر معاك فشي امور و...

قطعاتو وقالت : كذابة الا بغاا يهضر معاها غيهضر معاها فدار اش داهاا تخرج معاه. شوف جهااد كنضن نتا لي خصك تحل عنيك حنا ماشي براهش نتيقو هضرة مكدخلش لعقل هه خرجو اذن كاين شي حاجة ويمكن حناا كاع مااعرفينهااا ومقالوهاش لينااا وو..

قطعهاا هوا بعصبية وقال : سمعيني لقينااهاااا هاحنااا غنصفيو هاد القضية هااد الليلة باش كلشي يتوضح. اري ليااا نمرة د هاد راجلك..

عطاتو النمرة بزعفة محملااش تشوف وجهو..

ناض من حداها اتصل بيه وطلب منو انه يجي وغتكون جوديا حتا هياا باش يصفيو هاد القضية...

رفض انه يجي فالأول ولكن من بعد ما عرف ان جودياا حتا هياا غتجي وافق..

رجع صونى على جوديا وطلب منها انهاا تجي حتا هياا...

رجع لبلاصتو خدا قهوة كيشرب فيهاا وساكت

نجود : شنو كاين علامن صونيتي؟

جهاد : سمعيني طليقك غيجي وجوديا غتجي دابا غديري عقلك الغوات وصداع بلاش منو. دابا غتجلسو بحال ناس وتفااهمو وفلاخر الالة قرري ديري لي بغيتي

نجود : انا مبغ....

قطعها بعصبية : وقلناا ليك صافي بزز منك غتشوفيهم بجوج بفف.

سكتات ضورات وجهها لجهة خرا كتمسح دمعات نازلين من عينيها..

اما هوا عاقد حجبانو كيشوف فتليفون..

دازت ساعة وصل فيها فهد شاف نجود جالسة قالبة وجهها سلم على جهاد وجلس فالطبلة حتا هوا قالب وجهو.. بعد ربع ساعة دخلات نجود غير شافت فهد وهوا يتخطف لون وجهها كذالك هواا..

وجهاد لاحض هادشي فوجههم...

قالت سلام وجلسات معاهم..

شبك جهاد يديه كيشوف فالطبلة من بعد هز راسو فيهم وقال :

المشكيل بيناتكم مرون ها نتوما تجمعتو باش نفضيو هاد الامور

نجود : وهديك لوخراا فينااا هيا حتا هياا خصها تكون هناا...

جهاد : هديك بعيدة على هاد الموضوع.. وزيدون راهاا مريضة بزاف .. يلاه هضري هاا طليقك كيسمع وهاا جوديا كتسمع خليوناا نفكرو هادشي خلاص.

هزات حاجبها بكل تقة وقالت : طايقي مكانش راجل وصحبتي لي كنت بصح حسباهاا صحبتي طلعاات اكبر قحبة على وجه الأرض.

ابتسمات جوديا وهيا كتشوف فالطبلة فحين فهد خرج عينيه فيها وقال : هاد السيدة اشرف منك وهادشي الالة علاش انا بغيتهاا وعجباااتني من دون كاع البنات ماشي بحالك نتي مسمووومة من داخل ديالك

مرضاااتش ومعجبهاش الحال ملي شافتو دافع عليها. شافت فجهاد وقالت وهيا كتبكي : شفتي شفتيي بعينك اهئ اهئ اهئ كيدافع عليها..

فهد : اه غندافع عليهاا حيت عاحبااني وحيت كنبغيهاا ومن بعد عندك شي اعتراض؟

نجود : بصدمة) ياااك اسيدي مزيااان وماشي حرام عليك اناا تلعبو بينااا

فهد : مكنش كنبغيك ومكنتش باغي نلعب عليك. ومكنش قادر نبغيك واخاا كنتي كتبغيني وبزاف ولكن هادشي لي كاين.

نجود : اهاه مزيااان برااافو برافوو اسيدي معندي منساالك. وبقيتو ساكتين هاد المدة كاملة باش تعيشوني فهاد الكذبة..

جوديا : حنا معيشنااكش فكذبة. الهضرة لي قلت ليك هيا لي كاينة وزيدوون حطي راسك فبلاصتي يلاه حطي راسك فالوضع لي كنت فيه. معرفااكش مزوجة بيه. وهوا عرف كيفاش يكذب علياا ويوهمني. وانا تقت بيه. ومن بعد ملي عرفت مقدرتش نقولك . حيت عرفااك غتقولي خديت ليك راجلك وووو وحسدتك وبلا بلا بزاف المهم لي عندي كولو قلتو ليك. مشكيلتك دابا بينك وبين هاد السيد.

جهاد : دابا علاش كنتي كتهضر مع نريمان ؟ وعلاش خرجتو نتا وياها وفين مشيتو؟

فهد : ملي قالت لياا نجود غتجي عندنااا شي بنت لدار رفضت ومكنتش باغي وقلت ليهاا حتا وحدة مدخل لداري. وملي قالت لياا راه صحبتي جوديا لي مصيفطاهاا وافقت بالزربة وقلت هيا لي غترجعني نتواصل مع جودياا من بعد مدة طويلة مشفتهااش وبغيت نشوف ولدي . وداكشي علاش طلبت منهاا نخرجو باش نهضرو وقلت ليهاا نشوف جوديا و... كمل كلامو وزاد قال : هادشي لي كاين مبيني وبين ديك البنت غا الخير وبالعكس هيا معونااتني بوالو ومبغااتش نطلق نجود ومبغاتش نرجع لجودياا.

جهاد : سمعني انجود؟

نجود : الصمت

جوديا : جهاد انا مغضرتهااش وعمرني نديرها ولكن تخمم غا بالعقل وتحط راسها فبلاصتي غتفهم هادشي وغتعرف انني كنت خايفة عليها. كيفماا هيا عندها وليداتها حتا انا عندي وليداتي وكيفماا هيا مبغاتش تفرقهم على باهم هكاك اناا كان خصني ولدي يعرف باه ويشوفو ولكن اناا لا حرمتو على ود نجود وبعدتوو فمرة باش يبقى معاهاا. المهم اناا هضرت بزاف هاد السيدة مبغاتش تفهم مبغااتش تيق شنو بغيتيني ندير ليهاا؟ صافي ضبر راسهاا انا معلياا حتا ذنب عليها..

جهاد : نجود هضري قولي شي حاجة على هادشي لي سمعتي...

نجود : الصمت

وقفات جوديا هزات صاكهاا وقالت : تصبحو على خير...

خرجات كتخلف بالزربة وفهد ناض خرج موراها .. بقا جهاد متبع ليهم العين وهيا حداه انهارت بالبكا..

جهاد : شفتي ؟ هوا كيبغيهاا وهادشي باين فهضرتو. خصك تحمدي الله صبح وعشية حيت بين ليك الحق وحيت حط نريمان فطريقك باش تعرفي لي كانو مخبعينه هادي سنين.. بنت ما دارت والو وحتا صحبتك ماا دارت والو. فكري بالعقل ماشي بالقلب. واش فنضرك هادا راجل يبكيو عليه ناس؟ دابا هاد الزين كولووو وهاد المستوى يبكي على واحد بحال هادا...؟ وشنو زادك غا العصب والمرض اولا!! شوفي عوينااتك ميستااهلوش هاد الدموع وهااد الفقصة نتي خاصك راجل لي يعرف قيمتك ويبغيك ديال بصح.. ودابا الالة مسحي دموعك سافري بدلي الجو تلهاااي فالخدمة متبقاايش غا بكااا وغبينة

كل كلمة كيخرجها على فمو كانت بحال دواء لنجود كيشفي جروح ديالهاا وكيهذنها بيهم. فرحات بكلماات الأخرين.. وعجبها الحال وشافت انه على حق بصح علاش تبكي على ودو وعلاش تمرض راسها على واحد مكيبغيهااش وهوا فالأصل ميستهلهااش.

كان حديثهم طويل بزاف حتا وصلات 11 د ليل..

توادعو هوا وياهاا وهيا تقول : شكرا بزاف حيت عونتيني وحتا نتاا فتحتي لياا عيني

جهاد : هانياا ها حنا اصدقاء

نجود : اكييد واناا موجودة حتا نتااا فاش ماا حتاجيتيني. المهم غدا ندوز ليك وراق نريمان راه محرقتهم ما والو كنت بغيت نخليهم عندي وصافي.

جهاد : حتا اناا عارف مزالين عندك وماشي ديالك تضيعي وحدة مذنبها والو. يلاه بسلامة عليك..

نجود : تصبح على خير..

مشات مبتاسمة وكذالك هوا. دخل لدار لقا نريمان ناعسة على فوطوي راسها معذب وجهها حمر وعينيها منفوخين قرب حداها جلس قرفصاء كيهزز فيها

جهاد : نريمان نريماااان.. نوضي

مقدراتش تفيق حركات راسها وهيا كتنخصص..

حيد تجاكيط ديالو وقرب عندها اكثر خشا يدو تحت منها وهزهاا دخلهاا لبيت نعاس حطاها وجر عليها الفراش وخرج شد الباب..

حلات عينيها لقات راسها مزيرة ناضت بالزربة لقات راسها فالفراش. كتسائل بينها وبين نفسهاا واش اناا دخلت ولا اويلي ياكماا دخلني هوااا ياكما هواا لي هزني.. حطات يدها على حنكهاا كضور عينيها بغات تخرج وهوا يبان ليها الضو مزال من شقة دباب مشعول. رجعت باللور، دخلات لطواليط لي فالبيت جنب بالكون ..

خرجات كتمسح يديها فحوايجها جمعات شعرها سفنجة ولوات عليها الزيف بغات تخرج وبقات مترددة. شافت فالساعة لقات 4:30 حلات لباب وخرجات لقاتو جالس مفرق رجليه لابس تيشورط فالابيض وشورط فالڭري وشعرو مخربق فازڭ. وبيسي على طبلة الزجاجية قبالتو. هز عينيها فيها ببتسامة

جهاد : مالك فقتي

نريمان : والو غير ضرباتني الفيقة

جهاد : اوك رجعي نعسي مزال الحال.

حركات راسها ورجعات دخلات حسات بيه بحالا معصب ومفيه لي يهضر جلسات على فراش كتفرد يديها دخلات الفيس بوك ديالو لقاتو محاط حتا حاجة..

مشات بدلات اسم د الفيس بوك باسم اخر وصيفطاات ليه انفيت .. وبقاات كتسنى ايمتاا يقبلهاا دازت ساعة وهيا هابطة طالعة فالفيس كتقرا منشورات الناس. ولي عندو شي مشكيل حاطو كتمشي تقراه كتلاهي الوقت بيدماا يقبلها... ناضت البالكون مسرحة عينيها فالمنضر الجميل وعينيهاا مع التليفون حتا غلبها النعاس

ودخلات لبلاصتها شادة تليفون فيديها حتا كيديها نعاس وتعاود تفيق...

فاقت فالصباح خرجات ملقاااتوش. مشات الكوزينة كبات كاس د عصير هبطات عليه دقة حدة وهيا تسمع الباب كيدق...

طلعات معاها سخانة والخوف اول واحد جاا فبالهاا هوا انس يقدر يكون جاا عندهاا؟ /

مشات لباب وقالت وهيا كترعد : شكوون ؟

جوباتها بنت من خلف الباب : حلي شكون نتي؟

طلات عليها نريمان من عين د باب لقات بنت واقفة... عرفااتها ريم وحلات ليهاا..

ريم : نريمان ؟ شنو كديري هناا؟

نريمان : دخلي اختي

دخلاتها بالزربة وشدات الباب وكل خوفهاا هوا انس يجي لعندهاا سكن فيها الرعب..

دخلات ريم بتعحب كتشوف فيهاا.. جلسات وقالت : دار خويا شنو كديري فيها انريمان!

نريمان : كيف دايرة نتي لباس

ريم : لباس لباس قوليلي

نريمان : متعصبيش عفااك راه طرا لياا واحد المشكيل و...

عودات ليهاا من اول حتا لاخر...

نريمان : ودابا هانا حصلت هنا فهاد بلاد وكون ماا خوك كون راني فالزنقة

ريم : بفهم) بفف مشكيلة هادي وعرفتي ماما شحال معصبة!! ايوا الله يفرج عليك هيا مفهمااتكش وصراحة بقيتي فياا والله

نريمان : انا قلت حتا نتي مغاديش تيقي بياا

ريم : بالعكس فهمتك ومزيان بعدا. ملي عاونك هوا مكاينش هنا؟

نريمان : عاد فقت ولقيتو خرج مكااينش

ريم : امم ايوا بعدا عندك الزهر معاه. اناا كان خارج فيااا

نريمان : بالعكس الله يعمرهاا دار. كيف دايرة نتي ولفتي شوية؟

ريم : صافا راكي عارفة الزواج هه زوين فاللول والأيام لاخر خصك الخااطر والمسؤولية.

نريمان : ايوا الله يعاونك اختي ويسهل عليك.

ريم : امين ازين ايوا نخليك دابا اناا جيت نشوفو باش نسلم عليه غدا عندي طيارة مسافرين اناا وراجلي لفرانسا ايوا وملقيتوش مرة خرا

نريمان : الله يديك على خير بصحتك اختي دابا نقولهالو ملي يجي. اجي عفاك نطلبك طليبة هضري مع ماماك وشرحي ليهاا هادشي لي عاودت ليك عفااك.

ريم : متخمميش ازين ديك ساعة نقولهاا ليها يلاه تهلاي فراسك..

بقاات بوحدها فدار مكاين ميداار ناضت هزت شيفونة وصابون وبدات كتمسح بيبان وطبالي وديكورات وتشطب وتجفف ضارت بالدار كتخمل فيها واخاا نقية.. وبدات كتوجد الماكلة واخا مكاينة لا خضرة ولا والو من غير شوية دجاج وكفتة وبعض فواكه وبطاطة هادشي لي لقاات .. طيبات الدجاج وخضراتو ببطاطة وشوية دالزيتون رماتو مور مطابت الماكلة.. مقلية على حقها وطريقهاا سمعات صوني ومشاات كطل لقات راجل واقف. خاافت

نريمان : شكوووون..

جوبها راجل من برا كيتكلم باللغة خليجية.. قالها بلي صيفطني جهاد. شقاات باب لقاتو هاز جوج كرطونات فيديو...

شداتهم منو.. ودخلت حلاتهم لقات واحد فيه بيتزاا ولاخر مملحات كيشهييو

خرجو عينيهاا والريوڭ دايزيين مع فمهاا ريحتهم كتشهي وبيتزا مزال سخونة.. مقدراتش تصبر مذوقش منهم. هزات وحدة كتاكلهاا واقفة مقرمشة من برا ومعمرة من الداخل بالجبن كتلدد فيهاا بغات تزيد خراا عينيها مبغاااتش تحيد منهم.. هزاتهاا وتبدات كتبنن فيهاا زادت ثالتة وسدات كرطونة بالزربة مقدرااش تبقى تشوف فيهم ومتااكلش.. حطاتهم فالكوزينة.. ومشات بدلات حوايجهاا لبسات بيجامتها الطويلة لي كان خدا ليها قدات الشال ديالهاا قبالت المرايا وبقات غادية جايااا كرشهاا كتغوت بالجوع. حتا تحل الباب ودخل مبتااسم.. شافت فيه بحياء وعينيها فرحانين : على سلامة

جهاد : مغسي

حط سوارتو ومشا يبدل حوايجو وهوا فالبيت لداخل كيهضر : تعشيتي!

نريمان : لا مزال

جهاد : هيا بغيتي تعشااي معايا امم

طلعات معاها السهدة وحمارو خدودهاا وهيا كتشوفو خارج كيهبط فالتيشورت ديالو.

نريمان : لا هه غير قلت حتا تجي وصافي.

جهاد : امم واخاا الالة..

مشاا غسل يدو وخرج كيمسح فالفوطة اماا هيا شعلات على ماكلة تسخن. قلبات على الخبز ملقاتوش ونسات بلي مكااينش دخل عندهاا الكوزينة جلس على كرسي كيشوف فيها

جهاد : شنو كطيبي؟

نريمان : طيبت دجاج وملقيتش الخبز هه

جهاد : وايلي وعلاش طيبتي هه مكاين لاش تعذبي راسك ونتي عيانة

نريمان : لا بالعكس ماشي مشكيل

جهاد : اوك الالة

مشاا التليفون هضر بالانجليزية.. مفهمااتوش ومسولاتوش...

شوية وهيا كتحط الماكلة وكتخمم واش غيكلوها بالمعالق صونى الباب وناض جهاد فتح. ورجع لعندها

جهاد : هاهيا الخبز

نريمان : شكون جابها ليك هه

جهاد : المخبزة لي لتحت صونيت عليهم..

حطات طبسيل فوق الطبلة لي فالكوزينة دجاج وبطاطة وزيتون فوق منهم حلات كرطونات بجوج وجلسات قبالتو.

جهاد : الله يعطيك صحة هادشي عندك زوين

نريمان : بصحتك

بدا كياكل وكيدير ليهاا اشارات بيدو 👍🏻 ..... 👌🏻...

نريمان : ههه واش عجبك؟

جهاد : حاجة تقليدية لي كتكون موجدة فدار بيان سير متعجب الله يعطيك الصحة..

كلاو مرة يهضرو مرة يسكتو اما هيا شافت المملحات مبقااتش عاقلة على شي بطاطة كتغمس شدق وتحطو فمهاا تلوي فيه. اماا هواا كلااا حتا شبع هز من كرطونة واحد مملحة وناض.

نريمان : مغتااكلش؟

جهاد : ايوا طبسيلك خواا شغادي نزيد هه

نريمان : وهادو لمن هه؟

جهاد : كوليهم نتي اناا صافي شبعت شكرا بزاف

غسل يدو حداها وخرج مشاا الصالون اماا هيا شدات داك كرطونة هادي تصلاح وحتا هادي تصلاح وحتااا هادي... انزيد غاا هادي وبراكة.... والله حتا نزيد غا هادي وصافي.... لا هادي باينة بنينة.. انشوف هادي باش معمرة ... باركة باش منعيقش

هزات طرف دالبيتزا كلاتو وزادت تاني. حسات براسها معدة تلوات بقوة التخلاط غتقياا...

رجعات باللور حاطة يديها على صدرها خايفة عندك ترد.. شربات شوية دما وناضت جمعات داكشي وكتغسل المواعن وهوا قبالتها حاذر راسو كيشوف ف تليفون...

خرجات جلساات قبالتو فالفوطوي شاعلين 2M.. كتفرج فالفيلم لي بادي وتليفون حداها. هزاتو لقات جهاد قبل طلب صداقة ديالها. توترااات وهيا حدااه كتحاول تخفي التوتر ديالها.

جهاد : فخبارك واحد القضية راه امور تقادات ونجود غتعطيو وراقيك.

فرحات ولمعو عينيها : بصح صافي محرقااتتهمش؟

جهاد : غير هضرة خاوية هاديك غدا غتجيبهم لياا كانت اليوم غتجي عندي وكان عندهاا شي شغل..

نريمان : الحمد الله واخيرااا رتاحيت...

وصلها مسج من عند جوديا دخلات قراتو : نريمان انا مبقيتش مرتاحة خصنا نمشيو بحالناا راه جهاد قالي بلي غتعطيك وراقيك صافي مبقاا ميدار

شافت المسج وهيا متلوفة معرفاات باش ترد عليها... شافت ف جهاد ورجعات شافت فالأرض.. مسخيااش تمشي ولفاات هاد المدينة وهاد الجو وملي تقدات امورهاا عاد غتمشي هيااا...!!

ناض جهاد دخل لبيت ورجع مشا لطواليط خرج شاف ف نريمان وقال : مشفتيش واحد الفوطة ديالي كانت هنا ؟

خرجات عينيها متلوفة ملقات متقوليه : لا معرفتش اااا ووو. وقي وقييلة غت تكووون غ غييي غيررر تمااا نجي نقلب معامعاك؟؟

جهاد : اناا ديما حاطها فبلاصتها وتماا كنلقااها كنمسح بيها وجهي!!

نريمان : ممم مماااا معرفتتتتش ماا مشفتهااش.وقي وقييلة تكون غا تماا اناا نجي نشوفهااا لك

ناضت باش تشوفها ليه وهوا يقول : صافي غير جلسي اناا نجبد وحدة خراا..

دخل لبيت جبد جوج فوطات وداهم حطهم فالطواليط غسل سنانو وخرج رجع لبلاصتو وهيا تنوض

نريمان : يلاه تصبح على خير

جهاد : حتا نتي تصبحي على خير..

دخلات يلاه شدات الباب وهيا تكاا على الحيط حتا هبطات معاه الأرض

نريمان : اففف الله ياربي على وحلة وملقاات هادي فقاش تجي بفف.

حيدات شال على راسها. وخرجات البالكون هازة تليفون فيديها.. شافتو اون لاين.. دخلات لرسائل كتبات ليه رسالة وقلبها كيضرب .

نريمان : سلام لباس عليك؟

صيفطات مسج وبقاات قارصة عليه كتسناه يجاوبها ساعة وساعتين و3 دازو وهوا مزال مجاوب وهيا كتفرج غا فالفيديوهات .. حتا صيفطات ليها جوديا : واش مغاديش تجاوبي؟ غدا انجي موراك. يلاه نشدو اوطيل بيدماا نمشيو.

جوباتها نريمان وقالت : وبحال بحال انا هناا مرتاحة حتا نكونو غنمشيو وقوليهالي

جوديا : شناهوااا ؟ نتي بداا كيدخلني فيك العجب شنو كاين تماا شواقع؟

نريمان : اويلي شغيكون. ودابا الا مشيت لاوطيل شحال خصك تخلصي ليلة علياا وعاد نتي

جوديا : لا لا نتي كاينة شي حاجة هادشي مصافيش عندك..

نريمان : وصافي غدا اجي مورايا انا غنعس دابا..

دخلات تشوف واش جوبها لقاتو ديكونيكطاا ومشافش المسج ديالها كاع..

دخلات لتصاور وعودات كتشوف فيهم من جديد.. وتقرا تعاليق وتشوف شكون لي كيهضر معاه وترجم لي مفهمااتوش.. جلسات على الفراش كتقول فنفسهاا مصاب كون ملقاوش وراق كون تحرقو بصح ولا ضاعوو مسخياااش تمشي ومقدراش تبقى.. ولفات وعجبها الجو ورتاحت مع جهاد ورجعات كتحس بيه قريب منها طاحو جوج دمعات من عينيها بحزن.. تكات على الفراش بزز باش داها نعاس. فصباح ناضت على صوني د جوديا.. حلات عينيها يلاه ناضت وهيا تسمع الباب تحل. قطعات عليها وخرجات. لقات جهاد دخل وفيدو شانطة ديالها

جهاد : ها حوايج ديالك وراقيك كلشي هنا كيف خليتيه.

فرحات بزاف : شكرا بزاف وسمحلي عمرني نساااا خيرك والله.. عاود تليفون ديالها صونى حلات الخط

جوديا : علاش كتقطعي ؟ فينك اناا جاية موراك نلقااك واجدة..

نريمان : صافي واخاا

قطعات المكالمة شافت ف جهاد بحزن : جوديا غتجي مورايا غنمشي صراحة ولفت هنا وعجبني الجو ونتا الله يعمرها سلعة سمح لياا بزاف عفااك

جهاد : نو بالعكس مرحباا بيك خودي راحتك حتا نتي عمرتي علياا واخاا من طبعي معزيزش علياا شي حد يكون معايا فدار كنبغي الكالم وناخد راحتي بلا صداع بلا والو مي نتي العكس. انا موجود الا حتاجيتيني مرحباا

طاحو دموع من عينيها وقلبات وجهها بالزربة قبل ميشوفهم جرات شانطة دخلاتها لداخل. خرجات البالكون كتبكي وتشهق مقدرااش تمشي محملاااش تخرج من على باب... سمعات تليفون كيصوني جوبات على جوديا لي قالت ليها كتسناهاا لتحت. لبسات حوايحهاا وهيا كتمسح فدموعها جمعاات كلشي حتا حوايج لي خدا ليها دارتهم فالشانطة وخرجات لقات جالس غير شافها وهوا ينوض : صافي سخيتي بينا هه

مقدراتش تصبر وتخبي دمعتها دغيا طلقات البكية كتنخصص. قرب عندها كيضحك عنقهاا زاد كمل عليها وهيا كتحس بالجسم ديالو الدافي وريحتو فايحة عاطية. حاسة براسها مهزوزة فالسمااء مكرهاااتش ميرخييش منهاا كاع طبطب عليها وقال : وحتا دابا فين هوا المشكيل ههه هانتي هناا معايا مرحبا بيك شنو غيوجد ليا طاجين هه. وصافي هئ؟؟ مالك على هاد بكاا..

نريمان : اهئ اهئ اهئ لا والو مكاين وااا وا والووو

جهاد : وقوليلي واش عندك شي، مشكيل علاش دابا كتبكي

نريمان : لا والو معندي حتا حااجة.

جهاد : ايوا صافي ساعاتو لله.

جرات شانطة ديالها وهوا موراهاا. خرج معاها شد من عندها شانطة وهبطو فالمصعد مد ليها لاكارت فيزيت ديالو كيوصيها الا بغات شي حاجة اولا تواصل معاه حتا وصلو لسفلي..

خرج لقاا جوديا جالسة فطاكسي.. خرجات سلمات على جهاد. شافت عينين نريمان لي حومر وكتنخصص وهيا تعقد حجبانها بتسااؤول ..

جهاد : يلاه نريمان بسلامة عليك

حركات راسها مقدراش تهضر. اما هوا طلع، فطوموبيلتو وزاد...

جوديا : شوفي نتي فيااا شكاين ؟ مالك على هاد بكا كامل واش واقعة شي حاجة وااهضري ازمررر

نريمان : ببكاء) مسخييتش نمشي ومبغيتش نرجع المغرب بغيت نبقى هنا

جوديا : وشنو عجبك فهنا ازيدي ترجعي ديري مستقبلك وتخدمي . اماا هنااا معندك مديري . غا لي عندو فلوس هاهواا كيجي سيااحة يبدل الجو اماا صحاب الزلط مطليقش ليهم هاد ارض زيدي نمشيو.

طلعو فالطاكسي ونريمان عينيها رجعو طايبين.. كتبكي فصمت.. دجعو الأوطيل حجزات ليها جوديا معاها فالبيت وطلعو يرتاحو.. تكمشات نريمان فالفراش وعينيها مع تليفون كتشوف واش جوبها..

قيدات نمرتو لي عطاها وكتباات ليه مسج مور مسج. فيه كلمات شكرا على داكشي لي دار معاهاا.

بقات قارصة على تليفون فينماا يجيها شي مسج تقول هواا لي صيفطو .. خرجات جوديا من الدوش لقاتها كتنخصص قربت لعندها وهيا عاقدة حجبانها ..

جوديا : غتقوليلي مالك دابا ولا؟؟

نريمان : بصوت متقطع) ما ما ملل مليش

جوديا : وعلاش هاد بكااا شكاين شنوو طاري متمرضينيش انريمان واش طاري شي حاجة واناا مفخباريش؟

نريمان : مكاين والو صافي خليني نعس..

جوديا : يلاه نخرجو نبدلو الجو نضورو ونشوفو الدنيا قبل منمشيو

نريمان : واخاا

جوديا : وهيا دابا نوض غسل هاد كمارة وقادد حالتك دوش باش تخفاااف متبقااش غا مرخية ولبس ويلاه ندوزو الوقت..

دارت تليفون يتشارجاا وناضت دخلات لدوش. دوشاات وبدلات حوايجها وخرجاات بخدود موردين لقات جوديا كملات اللبس وكدير مكياج خفيف..

وقفات حدا المرايا كتقادد شال ديالها وهيا توقف قبالتها جوديا كدهن ليها وجهها بكريم

نريمان : بلاش مكيعجبنيش

جوديا : بيني وجهك وبين زين ديالك وهزي راسك الفوق وتمتعي بشبابك وصحتك محدك مزال صغيرة مالك من دابا مغبنة

حطات ليها مكياج خفيف ريسيل مع عكر مبرد وكحل ابيض وسع ليها العين ديالهاا مع ايلينر جبد ليها العوينات.. قدات شالهاا بطريقة عشوائية جميلة..

شافت راسها فالمرايا وعجبهاا الحال وعجبها الزين ديالها لي عاد بان.. هزات تليفون وبقاات كتصور حتا عياات. خرجات هيا وجوديا شادين فيدين بعضياتهم كيتسراو فشوارع دبي دخلو المول خدات بعض الحاجياات تبقى ليهم ذكرى.. شرات جوديا لراسها لحوايج ولنريمان معاها.. تعشاو فريسطو كبير كيشوف ف مرينا دبي ناس مخلطين رجال ونساء ..

نريمان متشوف فالماكلة لي كتشهي عاجبها الجو وحتا هيا كتحاول تاكل بحال جوديا وتجلس مستقيمة بحالها وراسها مهزوز. وعينيها كل مرة مع تليفون حطات الشوكة من يديها.. ودخلات كتقلب فدوك تصاور لي تصورات هزات منهم وحدة ودارتهاا فالبروفيل وهيا مترددة تمسحهاا ولا تخليها. حطات تليفون وقلبها كيضرب. وجوديا كتشوف فيهاا بتساؤول : معامن كتهضري؟

نريمان : حتا واحد.

جوديا : امم رجعتي كتخبعي علياا ياك

نريمان : شنو غادي نخبع عليك بالعكس كلشي كنقولو ليك

جوديا : اييه الله اكبر . سمعي اش غنقولك اناا سر لي كان عندي وكنت مخبعاه هانتي كتشوف بعد هاد سنين هاهوا تفضح. اناا كنخاف غا تكوني مخبعة شي حاجة من مورايا فلاخر نعرف كلشي ومنقدر نساعدك بوالو.

نريمان : عقلتي على أنس؟ لي كنت قلت ليك بغا هوا يجيبني الامارات؟

جوديا : اه مالو

مدات ليها نريمان تليفون المحادثة لي بينها وبينو عطاتها تقرا دوك الميسجات. للحضة ابتسمات جوديا بسخرية وقالت : ههه تبرهيش دابا هادا خلعك؟ هادشي مناش كنخاف اناا وهادشي علاش كنوصيك تحضي راسك راه انريمان غلطة وحدة شتي غااا غلطة وحدة تقدري ديريها راه غتندمك على حياتك كلهااا سمعتيني؟ راه ضيعك فمرا داكشي علاش كنقولك ردي البال وخدمي عقلك وهانتي معايا نرجعو بحالناا وتخدمي وديري مستقبلك

نريمان : صافي ان شاء الله كلامك هوا لي غيكون

جوديا : اوك يلاه كملي عشاك..

بعدما كملو عشاهم فجو جميل يلاه خرجو بغاو ياخدو طاكسي وهوا يوقف عليهم شاب كيتكلم باللكنة الخليجية.. بغا يتعرف على جوديا وهيا تصنطح فيه وزادت مع طريق هياا ونريمان. شدو طاكسي رجعو لدار

نريمان : مسكين خلعتيه هههههه

جوديا : نتي طريق كلها ونتي كر كر كررر مالنااا شنو بغيتيني نتحل عليه نقوليه هانااا ليم تررر

نريمان : مسكين بقاا مصدوم

جوديا : هههه وطااالع لياا اناا فراسي داكشي اصلا هوا باين صغير علياا وباينة باه شي بوكو لعاقة كيصرف عليه وهوا كيتخير فالبنات لي تمشي معاه

نريمان : ولواه مضلميش عباد الله

جوديا : اسيرييي تنعسي هادو انا لي عرفااهم وشارباهم مشفتيش غا عينيه كيف كيضورو. اودي خليني ساكتة..

وصلها المسج وهيا دخل ليه فالبلاصة خلات جوديا كتهضر بوحدها. غير شافت مسج ديالو وهيا تبتاسم ويديها كيترعدوو..

💬 : Bonsoir Zeouina Çava! non pas de problme avec plaisir , Oh profile ♥😉

قرات مسج كمل عليها لي شاط بالغمزة فالبلاصة خرج من واتساب.. وهيا جوباتو وفراسها كتقول واش عجباتو تصويرة د بروفيل واش اناا عجبتو واش انا كنعجبو..

جوديا : اويلي اناا معامن كنهضر؟؟

شافت فجوديا ورجعات قلبات عينيها كتكمل كتابة د مسج خلات ليه جريدة قد السخط حتا كملاتها وصيفطاتو ليه..

نريمان : واا والو كنت غاا كنكتب واحد مسج.

جوديا : باز ولاهيلا باااز ..

بدلات جوديا حوايجها وخرجات البالكون كتهضر فالتليفون اما نريمان بقاات بحوايجها جالسة كتسناه يجاوبها.. دخل فديك اثناء صيفط ليها

: ⁉

شافتو وهيا تصيفط ليه : شنو واش مقريتيش؟

شافتو كيكتب وقلبها كيضربب بالجهد

💬 : Maarefesh NQera Arabia Ktebi En français 😁

عاد فهمات وبدات كتعاود ليه مسج من اللول بالفرنسية...

مشافووش. وبقات ليل على طولو كتسناه غا ايمتا يدخل يقراه ..

نعسات جودياا ونريمان بقاو عينيها كيتلسقوو حتا كيديها نعاس وترجع تفيق كانت ساعة 3 دليل كتشوف واش صيفط ليها ولا لا حتا داها نعاس

حلات عينيها بصعوبة كتفيق فيهاا جوديا.. اول حاجة هيا ناضت كتقلب على تليفون ديالها فين مشاا. لقاتو طايح تحت الفراش. هزاتو لقاتو طافي ومزال ناعسة بالحوايج لي خرجات بيهم... دارت تليفون يتشارجاا وجلسات الأسطوانة د جوديا مالك شكاين علاش هادشي علاش مبدليتيش علاش منعستيش بكري عاوديلي اش طاري.... بلا بلا بلا...

هادشي مكيدخلش ليهاا لراس مكتسمعوش كاع. خلاتهاا كتهضر وناضت لطواليط تماا بدلات حوايجهاا. وتوضات وخرجات. صلات لقات الفطور جابوه ليهم لشومبر وجوديا كتفطر فالبالكون.. فطرو هيا وياها وناضو بدلو حوايجهم. وخرجو ونريمان عينيها مع تليفون. لقاتو مخلي ليها

💬 : ❤️❤️😍

بقا فيهاا الحال علاش مكتبش وجاوبهااا وعلاش دوك الأسطر كاملين زعمة مدهاااش فيهاا.

دوزات يوماين كتسناه يصيفط ليهاا ويهضر معاها خلاتو على خاطرو مبغاتش تبرزطو كيف قالت هيا... شافتو ديك الايام لا ليل لا نهار مكيدخلش الواتساب. ملي كيصبح الصباح وهيا داخلة لمحادثة بيناتهم مكتخرجش منهااا فمرا.. يوماين دازو فالشوبينغ والماساريااات.

عجبها الحال ولكن علامة الحزن باينين على وجهها. باغا غا ايمتا يهضر معاها.. فاليوم ثالت مبغاتش تخرج بقات غير فالدار. صونى تليفون د جوديا نلقاات نمرة د نجود... مبغاتش تجوبهاا قطعااات عليهاا ما مرة ما مرة مااا 10 حتا طفاات عليهاا تليفون.. فليل هيا كتهضر مع الزوج ديالها شافت التليفون كيصوني قطعات معاه المكالمة وجوبات.. غير سمعات نريمان سميتو كانت ف بلاصتها جالسة حاضية تليفون .

غير سمعات جوديا ذكرات سميتو وكتهضر معاه فالتليفون ناضت جلساات مقابلة معاهاا كتسولهاا بالاشارة شنو كاين. قطعات المكالمة بعدما كملات مع جهاد وقالت : بففف نجود بغات تشوفني ضروري معرفتش علاش المهم اناا غدا غنمشي نقطع البيي ومن بعد نشوف شنو كاين. نتي غدا جمعي حوايجك باش نوجدو راسناا نمشيو...

حركات نريمان راسها بحزن ودموع فعينيها...

تكمشات فبلاصتها كتكتب ليه مسج وترجع تمسحو معرفااش راسها حتا شنو كتكتب وترجع تمسح. نعساات جوديا وناضت نريمان كتسلت دخلات لطواليط توضات ولبسات عبايتها ديال الصلاة وخرجات البالكون بالحفى كتصلي قيام الليل وكتدعي بهمس يطرا شي عكس ومتمشييش يطرا اي حاجة مهم مترجعش مع جوديااا وترجع لعند جهاد..

بقات كدعي ليل كولو وهيا حاضية كل مرة ضور تشوف واش جوديا فاقت كطلب الله يمشيو ليها الوراق اولا طرا اي موصيبة المهم متمشيش. رجعات لبلاصتهاا كتدعي فنفسهاا وتبكي فصمت حتا داها نعاس. فصباح ملي فاقت لقات جوديا مكيناش. ناضت بالزربة كتقلب التليفون ملقات والو وهيا تصيفط ليه اوديو فيه صباح الخير وكيف صبحتي نتمنى تكون بخير.. بقات حاضية تليفون بعد ساعة جوبهاا حتا هواا بالاوديو.. صباح الفنون صاافا مغسي اي طوا.. جوبات فالبلاصة ولكن هوا خرج من واتساب ومعااودش دخل.. دخلات جوديا وجهها مخطوف غير شافتهاا نريمان وهيا تمشي لعندها تسولها شنو كاين...

جلسات فطرف الفراش كتنهد : دابا نتي تبغي تبقااي هناا؟

نريمان : اح مم م علاش!

جوديا : بحزن) نجود بغات تصلاح معايا المهم تفاهمنااا شرحناا الوضع والمشااكيل لي كانو بيناتنا فينالمون تفااهمنااا وتصاالحنا دابا رجعات الامور كيف كانت واخاا اناا مزال مجروحة منها بزاف ولكن اناا ماشي حقودة درتها ختي ماشي صحبتي ومبغااش نخسر هاد سنين المحبة المهم بغاتك تبقااي معاها نتي. تشدي ليها الصالون. هيا تبارك الله ميك اب ارتيست عالمية وعندهاا خدمة غزالة وبغات تدير ليك فورمسيون وتبقاااي خدامة عندهاا ومسيرة ليها صالون ديالها !!

نريمان : بفرح) بصح حلفي بغاات نبقاا معاها اه نبغيي نبقى هنااا والله حتاا نبقى ونخدم معاهااا بالفرحة والله ههه عجبني الحال. انا قلت ليك مبغاش نعاود نرجع المغرب..

شافت فيها جوديا مطولااا بحصره وقالت : ضبري راسك الالة انا من دابا لفوق معندي حتا دخل فيك ديري لي يغيتي حياتك هادي

نريمان : علاش مالك شنو درت اناا؟

جوديا : بسخرية) هه لا والو شنو غديري نتي حتا حاجة. قررتي دغيا؟ صافي بغيتي وافقتي؟ اوك الله يسخر ليك. واناا الله يجعل العمل ديالي لله

نريمان : علاش هاد الهضرة دابا واناا بغاتني نزيد نتعلم عندهاا ونخدم معاها علاش مبغيتيش نتي علاش بغيتي نرفض؟

جوديا : سمعي انريمان مفياا منهضر من دابا الفوق صافي خرجتي من بين يدي ضبري راسك ديري لي بغيتي انااا معندي حتا دخل ولو 1% فيك صافي الله يعرضك السلامة...

وقفات جوديا كتجمع حوايجها ونريمان حداها كتشوف فيها بحزن..

نريمان : دابا بغيت نفهم شنو غنرجع انا ندير فالمغرب معندي عائلة معندي حد. ياك نتي ديما كنتي كتقولي لياا ديري مستقبلك ديري علاش ترجعي وانا معاك

جوديا : الصمت

نريمان : ودابا ملي وافقت على هادشي علاش معجبكش الحال

جوديا : الصمت

نريمان : وقوليلي؟؟

قطعات جوديا الهضرة. جمعات باليزة ديالها حطاتها فالجنب. وخرجات.

مرجعات حتا الليل لقات نريمان ناعسة..

دخلات تكات فبلاصتها حتا صبح الحال..

يلاه بغات تقلب على جهة خرا وهيا تسمع تحركات جوديا ضورات راسها بالزربة لقات جوديا لبسات حوايجها وكتقاادد شعرها وبليزة حداهاا... وقفات وقالت : جوديا فين غتمشي ؟

جوديا : عندي واحد صحبتي نشوفها

نريمان : وانا نتسنااك هنا ولا نمشي معاك

جوديا : وعلاش غتمشي معايا ياك بغيتي نجود ايوا سيري عندهااا

نريمان : ودابا قوليلي فين مشكيل وعلاش معااجبكش الحال شرحيلي باش حتا انا نفهم ونعرف شنو كاين

ضارت عندها نجود مغزفة وقالت : نجود هيا لي وقفات معاك فالاول؟ هيا لي عوناتك وبغاك طلعلك هيا لي شدات بيدك هيا لي خافت عليك اناا طول هاد المدة باغا نوقف معاك توقفي على رجليك باش متسمحيش فيا وتزيد..

حتا انا كنت باغاك نتي لي تسييري صالون ديالي ويرجع ديالك حتا نتي وديري مستقبلك معاياا وتكوني تحت يدي .. تحت يدي عنيت بيها نتي لي تسيري لياا الامور كلها نتي تولي هيا جوديا الصالون ديالك وميخصك حتا خير. هاد الوقت كولو وانااا مكنتيق فحتا وحدة ومباغا نتيق فحتا وحدة وكاع بنات لي دازو كنت مرقباهم بالكاميرة من غيرك نتي حيت تايقة فيك. وكنقول عمرك تخيب تقة لي درت فيك. ولكن نتي الالة ف اول فرصة زدتي ومعقلتيش علياا هادا مسويت عندك جرحتيني بزاااف وانت اخر وحدة كنت نضن تسمح فيااا وتزيد...

نريمان : اناا والله مبغيت نجرحك ولا نخليك تقلقي مني غير فهميني انا قلت مع راسي نبقى هنا حسن منرجع عجبني الجو هنا ورتاحيت ( بحزن) صافي مبغيتيش اناا نرجع معاك معندي مندير هناا

جوديا : رجعي ولا جلسي مكيهمنيش بغيتي نجود!! سيري لعندها اولا تسنايها هاهيا غتجي موراك. جوديا حسبيهاا كاع ماا كانت فحياتك..

جرات الباليزا ديال خارجة وهيا تشد فيدييها نريمان بعيون مدمعة : عفااااك سمحيلي متقلقيش مني هانااا ضربيني عايريني غير متعصبييش عليا

نترات جوديا يديها وتمات خارجة : بعدييي مني متشدييش فياااا

نريمان : حرام عليك اهئ اهئ هدي هياا اناا ختك و

قطعاتها : مختييي مكنعرفك مكتعرفني سيري بعديي مني واااا رخي تفكي مني ..

تبعاتها نريمان حتا خرجو برا وجدويا كتنتر يديها منها.

نريمان : والله حتا نمشي معاك صافي انااا مزاوكة عفاااك مناقص والله منعاود نجرحك عفاااك نرجع معاك اناا مغنبقاااش هناا انا مبغيت لا نجود لا حتا والو صافي انرجع معااااك...

زادت نترات يديها جوديا ودخلات المصعد اماا نريمان بقات كتشوف فيها بندم شديد حتا تشد باب وهبطات جوديا..

رجعات لشومبر شدات عليها الباب وجلسات فالأرض كتبكي. عاد حسات براسها شنو قالت وعاد عرفات ان تصرف لي دارت مع جوديا جارح بزاف. حسات براسها انانية وحدة ناكرة للخير. هزات تليفون بالزربة كتصوني عليها مكتجااوبش..

صيفطات ليها مسجات واحد مور واحد والو مجوباش. عودات صونات عليها مجوباتش عودات دخلات الواتساب تصيفط ليها اوديو لقاتها بلوكاتهاا عودات صونات فالنمرة لقاتها طافية. شدات فجبهتهااا كتبكي بحرقة مقدراااش.. دوزات نهارهاا كولو تماا كتبكي وكتحاول تواصل معاها والو .. حتا صونى تليفون ديالها كان طاح الليل جوبات بصوت مغنغن..

نريمان : الو!

نجود : اهلا نريمان كيف حال اناا غنجي عندك دابا 5 دقائق نكون معاك كنضن قالت ليك جوديا شنو كاين..

بغات تقوليها لا مغاديش نمشي معاك ولكن سرعان ماا فكرات. شنو غيخلص عليها الاوطيل ومنين غتجيب فلوس معيشة وكيف غدير تصرف فبلاد معارفة عليها والو ومعندهاا فين تمشي ولا معارف لي يساعدوها ..

نريمان : اه واخا انا نلبس حوايحي.

ناضت جمعات حوايجها كلهم ولبسات عبايتها لوات شانهاا عشوائي وخرجات كتجر شانطة ديالها فديك اثناء كانت نجود فالاوطيل لقاتها نريمان واقفة مع السيدة لي فالاستقبال.. شافت فيها نجود وقالث : نمشيو

حركات نريمان راسها بالايجاب وخرجات هيا ونجود طلعات معاها فسيارتها ومشاو.

وقفات طوموبيل فالباركينغ. ف احد الإقامات نزلات نجود ومعاها نريمان طلعو لطابق 9 حلات نجود الباب ودخلات نريمان كتسمع صوت الرسوم المتحركة..

شافتها ميال وهيا تجي عند نريمان كتجري فاتحة يديها كذالك ولد نجود جاا يسلم عليها. حطات شانطة وهزات ميال كتبوس فياااا وتعنق.

كانت سكنة كبير ب أثاث فخم 2 صالونات كبار وغرف المعيشة مع صالة مونجي ومطبخ كبير وبيوت بعض منهم للأطفال ولخرين مشدودين...

نجود : تفضلي

جلسات نريمان هازة ميال فوق ركبتها كتبوس فيها مكتشوفش ف نجود كاع وحتا نجود عينيها غير فتلفازة وكتسمع لهضرة نريمان وميال..

خرجات خادمة من المطبخ هازة فيديها اتاي وقهوة وبعض الحلوياات.. مدات لنريمان اتاي شداتو من عندها ببتسامة.. وقالت نجود : جهزتي الغدا؟

جونة : ألحين رح يكون جاهز..

انصرفات الخادمة وضارت نجود عند نريمان

نجود : اجي ميال اجي ابنتي عندي خلي نريمان تاكل..

نريمان : لا غير خليها عندي

نجود : كولي بعدا وديك ساعة هزيهاا.

هزات اتاي كتشرب فيه وعينيها مع تلفازة وكضحك مع ولد نجود..

نجود : بتنهيدة) المهم سمحيلي على المشكيل لي وقع حنا كلنا تخربقناا ولكن من بعد فهمت جرحتك وضلمتك سمحيلي وباش نبين ليك حسن نيتي بغيتك تخدمي عندي ونزيد نعلمك حتا توصلي

نريمان : الصمت

نجود : كنحس براسي عييت من هاد الضومين رجعت باغا غير نرتاح ونهرب من هاد الحالة لي رجعت فيهاا بغيت نسافر انا ولادي نبعدو على كلشي. بغيت نتيق فيك انريمان ونكلفك بسوونطر بيوتي ديالي يكون فيدك نتي

نريمان : ولكن انا معارفة والو كيفاش غنتكلف بيه

نجود : كوني هانية غنعلمك مزياااان حتا تحسي براسك قادرة تسيري الامور ونعرفك على كاع لي كيخدمو عندي وداني واحد من دراري لي كنتيق فيهم وهوا براسو غيسااعدك ويوريك الا معرفتيش مهم نبدا معاك من بعد غدا.. ومن بعد سييري الامور نتي وهانتي بخلاصك وانا ناخد راحتي شنو قلتي؟

نريمان : معرفتش

نجود : فكري على خاطرك ومن بعد قوليلي شنو قررتي

كرمات راسها بالايجاب من بعد ما تعشااو دخلات نجود نريمان لواحد البيت فراش فالوسط باللون الأحمر والاسود... وجنبو جوج كوافوزاات فوق منهم مصابيح ضوئية.. وماريو أبيض وزربية صغيرة فالأسود فوق من الأرضية الخشبية فوق منها طبلة مربعة د زاج صغيرة وكرسي مريح

نجود : تفضلي هادا بيتك خودي راحتك

نريمان : شكرا بزاف ..

انصرفات نجود. كانت الحديث بينها وبين نريمان قليل .. شدات نريمان عليها الباب بدلات حوايجها وجلسات قدام البريز كتشارجي تليفون وكتحاول تصوني على جودياا. وحاضية جهاد شافتو مدخلش الواتساب فمرا صونات عليه مرة اللولة وثانية مجاوبش.

حطات تليفون معصبة..

هوا مكيبغيش يهضر معاياا واناا كنبرزطوو اناا حمارة حماااااارة... دابا انا علاش كنصيفط ليه هواا واش هواا تهنى مني واناا عاد كنزيد نفكرو فياا. خلات تليفون كيتشارجاا وناضت كضور فالبيت وتشوف عجبها وتكات على فراش كتشوف فالسقف وكتخمم ف كلام د نجود..

حتا قفزها صوت تليفون لي كيصوني. ناضت بلهفة شافت سميتو وقلبها كيضرب بالجهد ببتسامة عريضة فتحات الخط بالزربة..

ن : الو سلام عليكم

ج : سلام الفنون صاافا

ن لباس وانت لباس عليك كلشي بخير

ج : وي صافاا لقيت لابيل ديالك كنت مشغول مشفتوش

ن : اه صافي ماشي مشكيل

ج : وي هاناا بغيتي شي حاجة

ن : اه بغيتك تصوني عفاك على جوديا وتقوليها تهضر معايا ضروري عفااك..

ج : علاش نتي فينك؟

ن : مع نجود وراه كنصوني عليها وو... و. المهم غا قوليها عفاك تصوني عليا.

ج : داكوغ اناا نصيفط ليها مسج..

ن : شكراا بزاف عفااك سمحلي

ج : نو هانية يلاه بون نوي

قطع المكالمة وهيا شادة تليفون فيديهاا مبغاتوش يقطع وبغات تزيد تجبد معاه الهضرة وتعرف اخباروو..

دازت ربع ساعة وصلها مسج من عند جوديا : هاناا شكاين !

شافتو نريمان وهيا تجلس مربعة رجليها كتكتب : اجي موراياا نمشي معاك قسماا بالله مبقيت باغا والو صافي مخصنيش نبقى هناا غير اجي موراياا عفااك

جوديا : نريمان براكة متبقااي تمرضيني فراسي بغيتي تمشي سيري اناا قلت ليك م..

قطعاتهاا ). ولاااا نتي هياا كلشي متسمحييش فيااا هاكاا عفاااك انا خايفة بزاف ومقدراش نبقى مع نجود.

جوديا : مغاديش نأديك كون متأكدة المهم شوفي جلسي معاها

نريمان : لا مبغيتش نجلس غ..

قطعاتها) دابا اناا كنقولك جلسي معاها صافي انا بغيتك تبقااي معاهاا ومن بعد رجعي الا بغيتي ترجعي اماا دابا غير بقااي تما معاها حتا هياا محتاجة لي يوقف معاها حتا هيا راها معذبة ومريضة وباغا لي يكون معاهاا.

نريمان : لا مغاديش نبقى معاها ونتي مبغاااش وقلبك مغير علياا

جوديا : وزمرر هضرت معاك اناا ممغيرااش عليك صافي بقااي معاها هيا راها محتاجاك كتر مني وزيدون غتستافدي منهااا وغتزيد تعلمك كتر

نريمان : ونتي باغاا ياك ممقلقااش

جوديا : لاا ممقلقااش غير ديري عقلك ملي تجيك الفرصة استغليهاا متبقاايش تهاوني عليهاا

نريمان : صافي كوني هانية كنوااعد والله صافي اختي.

جوديا : يلاه تصبحي على خير اناا غدا غنسافر وبيناتنااا تليفون..

نريمان : واخاا الله يديك على خير سلميلي على ابتساام بزاف

حطات تليفون وناضت خرجات برا كتقلب على طواليط كان اضواء خافتة ف أجراء البيت مشعولين وسكات.. حلات باب لقات فيها الخادمة ناعسة غير شافت الباب تحل عليها ناضت مخلوعة..

نريمان : هادي غير اناا عفاك فين كاين طواليط.

ناضت وراتها طواليط ورجعات لبيتها اماا نريمان توضات ورجعات لبيتها صلات وبقاات حاضية تليفون طالعة هابطة فالفيس ديالو كتشوف شنو حط واش اون لاين...

دوزات شهر وهيا مع نجود قددات ليها وريقاتها باش تبقى معاها فالإمارات ..

ويوميا تمشي معاها لسونطر ديالها. عرفتها على جميع العاملين عندهاا وبدات كتعلمهاا لي مزال معرفاهش وتوريهاا تقنياات جديدة وميك اب ارتيست وشعر .. داز شهر صيفطات فيه مسجات كتار ل جهاد موصلوهش يلاه طلعات ليها شرطة وحدة تجننات تبغات تعرف اخبارو وفين مشاا وفين غبر ولكن بدون اي جدوى...

وحتا من الفيس كيطلع ليها بلي اون لاين مرة مرة ولكن مسج ديالها لي كانت مصيفطااا ليه لحد الأن مزال مشافوه...

دوزات شهر ثاني والثالت فهماات كلشي وبدات لغتهاا فالإماراتية كتسرح رجعات كتهضر بيها مع الجميع ولفاات مع العامليين وكلشي دخلات ليه الخاطر وبدات معاهم الخدمة وكلفااتها نجود هيا وداني لي غادي يسيرو المحل. .

ومن تماا جمعات حويجااتها وريقااتها وقررات انها تسافر لألمانيا مع وليداتها...

نجود : البيت ف أمانتك منخافش عليك عجباتني خدمتك وعجبني التعامل ديالك مع كليان ومع العمال واخاا فالاول كنت خايفة كنت كنقول محال واش تقد ولكن تباارك الله عليك. المهم جونة هاهيا معاك ونتي هاناا خرجتك ورييتك الدنيا ونتي عارفة دابا فين تمشي وفين تجي غير هوا متبعدييش

نريمان : صافي كوني هانية وشكرا حيت تقتي فياا اناا غنرد البال لكلشي بحالا نتي كاينة

نجود : اوك..

جبدات نجود من صاكها برا مداتها لنريمان..

نجود : هادو الا بغيتي تخرجي او تشري شي حاجة ومتخرجيش بوحك جونة معاك عنداك تلفي

ابتسمات بخجل : شكراا بزاف صافي عتابري راسك كاينة هناا غير بدلي الجو ورتاحي وكوني هانية ..

خرجات نجود جارة بليزتها. دخلات نريمات لبيتها حطات داك البرا فالمجر وخرجات مع نجود هازة ميال وجونة هازة شانطة اخرا.. هبطو معاها حتا لتحت توادعو معاها ديمارات الطوموبيل مشات عاد رجعات نريمان هيا وجونة لدار..

دخلات شدات عليها وقلبات داك البرا لقات فيها غير وراق مستفين وحدة فوق وحدة.. معرفاتهم حتا شحال حسباتهم ودخلات لواحد الجروب كتسول مغربيات شحال د الدرهم.. اغلبية جوبوها مليون و2000 درهم ..

رشقاات ليها وعجبها الحال.. جمعاتهم دارتهم فبلاكارات وشدات عليهم لبساات حوايجها وقدات حالتها خرجات لقات جونة كتجمع الدار ...

نريمان : يلاه انا غنخرج نتشاوفو فعشية

جونة : اوك الله معك..

هبطات ببتسامة ورشاقة شدات طاكسي دخلات لسونطر لقات داني كيصبغ لوحدة من كليانات لبناانياات. وقفات حداهم نريمان كتجمع مع داني واللبنانية حتا هيا شاركة معاهم الهضرة.. دخلو كلياات خرين ستقبلاتهم نريمان كتسول كل واحد شنو باغي. وكاين لي كيسولها على نجود عندهم ليهم ليها عروض. خبراتهم بلي بغات ترتاح وسفرات. دوزات نهارهاا فالخدمة وفعشية رجعات لدار بمرافقة داني لي وصلها بسيارتو.. دخلات دوشات لبسات ملابس الداخلية واقفة خدا خزانة الملابس كتشوف شنو تلبس. هزات بيجامة لي كان خدا ليها جهاد. لبسااتهاا كتشم ريحتهااا... وقفات حدا مرايا طالقة شعرهاا بشرة صافية خمرية وشعر اسود فوق الخصر بجسم جميل بعدما كان نحيف وغير العضومة لي كانو كيبانو فيها . نشفات شعرها ولواتو شداتو بقراصة وخرجات لعند جونة لقاتها طفات علب العشاا

جونة : نحط ليك تعشاي العشاا واجد.

نريمان : وحطي نتعشااو اناا وياك

جونة : لا غير خودي راحتك انا ناكل غير هنا

نريمان : بفف اودي حطي حطي ناكلو اناا وياك ملي تجي مولات الدار عاد كولي ديك ساعة حتا فطواليط.. راه بحالي بحالك كلناا ولاد 9 شهور.

جونة : ههه شكرا الله يجازيك.

حطات جونة العشاء ونريمان كتخرج معاها فوق طبلة جلسو على كراسة قبالت بعضياتهم وبداو كياكلو وجونة حشمانة اول مرة تجلس تما وتاكل فبلاصتهم.

نريمان : كولي ااا كولي مالك كتبنن اناا كنموت بالجوع كولي وغدا صباح نمشيو اناا توريني فين نمشي خصني نشوي الحوايج

جونة : واخاا

تعشاو ونريمان كتهضرهاا بزز وتدفع ليها تاكل كملو وجمعات جونة طبلة ونريمان دارت رجل على رجل كتفرج عيطات لجونة تجلس معاهاا جلسات وحطات نريمان راسها على رجليها. شوية وهوما كيتفرجو فيلم اجنبي وصل لنريمان مسج من عند جهاد ناضت بسرعة البرد من على جونة مخرجة عينيها كيلمعوو كتقراا مسج..

💬 : Nero Zeouina Ça Va. Aad Shefet Les Message Dioulek. MakenteSh Hena Kent mesafer l USA aad Jet had 2 jours Neti Ça Va?

دف دف دف دفف.. القلب كيضرب بالجهد فرحة وعينيهاا كيلمعوو حتا قربات تبكي من قوة الفرحة.. يديها كيترعو مقدراش تكتب مسج. دخلات لبيتها وشدات عليها وسجلات ليه اوديو فمها كيترعد..

نريمان : سلام لباس عليك كلشي بخير! على سلااامتك الحمد الله فسلامتك انا قلت وقيلة برزطتك ومبغيتيش تهضر معايااا. ولا دابزتي معايا ياك ههه قولي كيف داير نتا؟

صيفطات الاوديو وشافتو بالبلاصة قراه ورد عليها بلا تعطال حتا هوا فالأوديو : ندابز مع العالم كامل ونريمان لاا منقدرش صافااا بخير وانت؟ توحشتك

تحشو ركااابيها ودمعو عينيعاا جلسات فطرف الفراش كتقرا مسج وتعاااود ممتيقاالش واش بصح توحشني اويلي هوا قالي توحشني؟؟ مسحات دموع الفرحة وعودات سجلات ليهاا يد شادة بيها تليفون ويد حطاها على قلبها لي كيزدح..

نريمان : بحياء) حتا اناا توحشتك ووو صراحة صونيت عليك وبغيت نهضر معاك ولكن نمرتك كانت طافية حتا واتساب مخدامش.

كتب ليها مسج بعدماا سمع كلامها :

💬 : NQedar Nshoufek Daba?

زاد كمل عليها

نريمان : فين منقدرش نخرج دابا.

💬 : No nsoni appel Nshofek?

ناضت بالزربة قبالت المرايا هزات عكر دوزاتو بالخف على فمها ويد كتكتب بيها حروف غير كتبرك باش يطلع ليه بلي كتكتب ليه مسج وهيا غير كتلاهي باش تقادد وجهها. طلعاات شفار بالريسيل وصيفطات ليها مسج :

اه واخاا ماشي مشكيل..

صونى عليها فالبلاصة لوات شال على شعرهاا وجلسات كترعد وهياا كتحل الخط. ابتسماات بحياء وفمها مسدود. شافتو متكي ففراشو سنسلة رقيقة فعنقو وصدرو عاري كيشوف فيها ببتسامة خافته..

جهاد : نهار كبير هادا الالة

نريمان : الله يكبر بيك لباس عليك؟

جهاد : ويي الزيون انا بخير نتي كيف دايرة؟ زيانيتي

هبطات راسها حشمانة ودموع الفرحة دايزين مع عينيها بكلامو

جهاد : امم وقوليلي

نريمان : هاا شنو ؟

جهاد : فينك دابا شنو كديري فحياتك ؟ ياكما مديرونجيك ؟

نريمان : لا لا لاااا بالعكس بالعكس انا غير جالسة مكتبرزطنيش. انا مزال هناا فدبي خدامة مع نجود

جهاد : امم تصلحات الامور بيناتكم ؟

نريمان : اه بخير دابا الحمد الله وحسن كاع صراحة غير سوء تفاهم طرا وصافي

جهاد : اوك مزيان داكشي لي بغيناا

نريمان : باعجاب ) وانت سفرتي كيف داير الجو تما كانت عندك الخدمة ولا غير مشيتي ضاير...

جهاد : مزياان اناا مشيت خدمة . كاين شي جديد؟

نريمان : هه والو غير الروتين دابا غير الخدمة ودابا ونجود سفرات بغيت غير انا والسيدة لي مقابلة ليها الدار..

جهاد : امم واخا مزيان يلاه نخليك انا غنعس دابا تهلاي فراسك...

نريمان : واخا حتا نتا تهلا فراسك ..

غمزهاا وقطع المكالمة خلاهاا دايبة فبلاصتهاا معنقة تليفون ودوك الكلمات كيترددو فوذنيهاا عاجبها الحال احسن ليلة غتنعس فيهاا وهيا فقمة السعادة.. وصلوهاا جوج مسجات متابعين. غير شافت سميتو وهيا دخل بلهفة لقات جوج تصاور. ديالو وحدة مصور مع قرودة وهوا ناشر يديها فالجو وهوما معلقين فوق راسو وشي حداه وحدة اخرا قدامو جوج نمورا صغار ..

نريمان : اوووه كيحمقوو بصحتك مخفتيش منهم

جهاد : هههههه لا يلاه بسلامة عليك هانا مشيت.

خرج فالبلاصة من وااتساب عكسها هيا لي ليل كولو وهيا كتضور كلام لي قاليها فراسهاا. وتشوف فتصاور لي صيفط ليها.

فصباح ..

صبحات عليه صيفطاات ليه مسج. ولبسات حوايجها عبارة عن تريكو فالابيض وسولوبيط فال ڭري وشال فالقهوي وسمطة بصاكها صغير فالجنب فالقهوي وسبادري بيضاء...

خرجات هيا وجونة دخلو لمحالات كبار كتختار الحوايج. شرات صباط طالون وصندالة صالون وملابس جميلة ستيل جديد وشيلان فالالوان والاشكال .. وصيكان صغار شي تحرف بيه وشي كيجي بحال السمطة من الخصر...

منساتش جونة وشرات ليها كسوة دالخروج واخاا رفضات ولكن اصرت انهاا تاخدها ليها...

دازت لمحل اخر خدات بعض العطور ودازت لمحل اخر خدات بعض الاكسيسوارات. ودازت محل اخر خدات بعض مكياج .. هزات هيا نص وجونة هزات معاها نص لاخر...

وقفات حدا محل كبير كيبيعو فيه فساتين البيضاء للعروس وعطات لجونة تليفون تصورهاا...

فالبلاصة حطات الصورة فبروفيل د واتساب.. ورجعو لدار وهيا حاضية تليفون ..

يتبع...