_تيقول ليك الله ينجيك من جايات ! دائما فمجلس ديالو حديثو تيكون عن مستقبل هو : نخدم ، نتزوج ، نولد !! كان الكل تيضحك عليه حتى هجرو ليهم بفعلتو ، ماشي دائما البنات لي تيكون فكرهم محصور مع زواج بل حتى دراري ودليل يوسف ،عند وصولهم شي جلس بطموبيل شي واقف مع الجار الإخواني، لي هو من الناس للا شاف بنتو غير ضحكت يكولها حرام ! ضحك عورة يعني شخص واضح و باين لا يناقش ولا يتفاهم ، و بنتو هاد للحظة متبرية منها الى غاية الحل لي طارحو
الاب : ( مربع يديه مخنزر ) على وجهك الحاج ! و ماتسالني حلوف الا يا باباها من عندي الزنقة
نبيل : الله يهديك الحاج ! المسالة ماتتوصلش لديك درجة! دراري مزال صغار
فاروق: ( وقف تيهز فيديه ) آشريف ؟ واش عينك تقى الله فابنتك و لا هضرتنا سالات ؟
الاب : انا الحل وحيد لي عندي هو تعقد عليه الله يعرض لها سلامة
فاروق: ( شاف فنبيل مطول ورجع خنزر فيه ) سولتي خويا الا كان بلاصتك ؟ نا و خويا واحد ، ها سمية عندك سير سول علينا باش تعرف جواب لي نعطيك دبا راه هو لي خدامين بيه! ابناتنا الا لقيناهم فهاد حالة تنهزهم بسنانا او فبلاصتك انا لقى ابنتي مع برهوش مانعطيهاش ليه ولكن منين اانا ماشي بلاصتك هانت سيدي قضي الغرض
نبيل: ( حنى راسو شاد فيه ) الحاج ! ولدي مزال مااشد حتى ديبلوك ديالو ، او هو الهبال الخوت ، القضية راه ماتحتاجش هاد زربة
الاب : ( رجع داير يديه موراه و هز راسو تابث ) هدا الحل لي عندي ! البنت تعقدو عليها و الا صغار دبا يكبرو و يتحملو مسؤولياتهم انا ماعنديش بنات لي يصولوني بوليس
فاروق: من لاخر ! دخلها دارك ولا تخليها فزنقة !؟
الاب : لقائنا عند عدول ! ديو الكلبة معاكم
...نقاش عقيم ! كاين احد آباء تيحسبو بناتهم معصومين من خطأ مثل نوع الاب هالة عندهم المراة من دار راجلها و من دار راجلها للقبر ! دخل دارو و يوسف نزل وهيا تابعاه تتبكي بغات تبعو لكن حبسها يوسف لانه سمع كولشي ، ناضت تتبطي و تصرخ ، نبيل حل باب دخلو وقفو فديك جردة خرجت اسماء زاينة ! بخلعة حتى تيشوفو البنت معاهم تتبكي
اسماء : رجعتو !؟ علاش شدوه ؟
نبيل: ( هز يديه بلاحول ) هاهو سوليه !
...دخول والبنت داخلة معاهم تتبكي تالفة ، تجمعو فداك صالون بدا فاروق يعاود و خديجة داخلة تتسمع و زاينة عينها مع بنت و عين مع اسماء ، الخير لي تيصدم هو يوسف ايتزوج الباقي مايهمش
اسماء : ااااه ؟ الزواج !!! اويلي تسطيتي ؟
فاروق : ( وقف خارج ) هدا راه يسطي بلاد !
اسماء: ( وقف عليه محلفة ) اولد حرام هضر ؟ شمن زواج ؟ ( هزت يديه تتخبط فيه هو هطاه ضهرو ) اويلي غير صبااااااح طالب مني ربعيمة ؟ اااااشمن زوااااااج
اسماء : هاد هضرة كولوها لانت لاهو ! البنت ترجع دارهم هو تعاود ليه تربيه من جديد !
نبيل : فيت ترجع؟ راه اباها تبرا منها ، بسبب ولدك لي هازها معاه شدوهم بوليس
الوازنة: الفقصة هادي
زكريا : وقفتي على حدك ؟
اسماء : براااااكة عليا ! بنت تمشي دير لها شهادة طبية ترجعاها لوالديها ، انا ولدي مزال صغير
فاروق : ( دخل على كلامها ) اسماء ! راه هضرة كلناها ، ولدك لي مخرج بنت من الدارهم و مخرجها لخلا
اسماء : اسيدي يسمحو لنا ولدنا يمضي معاهم التزام ! انا ولدي مزال صغير ماعندو عقل
فاروق : ( اشار لها جتب بصبعو ) هاهو سيري عند اخواني جاركم كوليها ليه ! راه تبرا من بنت ومن هادشي كامل ولدك هوو لي ضبر عليها
اسماء : ( حلت عينيها فيه ) غادي بنت جيران ؟ شكون بنت اخواني ، ( طارت عليه تتعضو ) اويلي بغى يقتلي اعنننن
نبيل : ( جرها بصعوبة ) صافي ! كبر على ضرب و الغوات ! الهضرة من صغرو ماتتخدمش معاه ، لي فراسو راه فراسو
يوسف : ( تيحك فعضة شاف نعمة طلعت فوق وزكريا ) صمت
فاروق : وقفتي على حدك ؟ وااا سمع مني معقول ؟ شتي على وجه بناتنا ديك اختك لي فوق و بنات عمك ماغاديش نظلمو ديك بنت لي برا و نخرجوها زنقة ، هاد العقد ايتحط و نوض كفض على ذراعك شوف فين تكري و ماتاكل نهار دير هاد شي اجي خود مراتك
اسماء : ( بجنون ) تخرج عليا !! هاد بنت تخررررج عليا ! ولدي مزال صغير
نبيل : ( جلس تهلك ) واش ماتتفهميش ؟ ولدك باغيها
اسماء: ولدي صغير ، ضحكت عليه
فاروق : نوص تكعد زيد معايا
يوسف : وهالة ؟
اسماء دورة لي دور لقات فاز هيا تهزو تشير عليه جاب الله شافها وخوا لها ، تسمع شااااخ من جديد الكل دخل ! يفكو وهيا تتهز و تضرب ، فاروق هزو وخرج و بنت بقات فجردة تتبكي و تعاود واسماء حلفت لادخلت عليها غير خديجة هزاتها داتها دارها و الفيلا عند اسماء تقلبت سفاها على علاها بغوات ، الكل ساق الاخبار فعائلة ، عمامو ماعجبهم حال ، نوصير داخل هو زياد و مغيث تيتواصل بتلفون هما طلعو بيتهم ( نبيل و اسماء )
نبيل: ( دور وجهو متنهد ) كنت حاااس! كنت عااارفو ماغاديش ييجبها لبرا ، القراية مامسوق ليها ، تهضر معاه يبقى عليك وخ ! واخة ، شي وخ ماتنشوف ، البلية عارفو مشى لها و قطعت عليه فلوس ، القراية راه اخبارة متبعينها ، مامضسرهم على فلوس مامخلس ناقصهم حتى حاجة ، هدا الله خرج ناقص فالعقل طارت معزو بغا يتزوج ، راكي غير تتهلكي صحتك
اسماء: ( بدموع ) من صغرو معذبني ! من صغرو هو داي فكوراث ، ينوض مدخل عليا بنت ؟ راه انا ماشي امك ؟ انا راه غير مع جنابي مجنونة
اسماء: واش زواج هو داك سيمانا اولى ؟ راه مسؤولية انا بغيتو يقرا و يخدم و يوصل بحال ولاد عمو تما يتزوج ولا يجلس ، انا ابنتي لي هيا روحي ماتنتفاهم معاها ! بقات ليا عير عروسة؟
نبيل: مابغيتيهاش !؟
اسماء: مابغيتهاش ! الا بغاها هو الله يعاونو معاها ، طونسيون فيا الاعصاب فيا ! بقى ليا غير العروسة تزيدني ، اوو فين نسكنها ؟ جوج بيوت الفوق راه واحد نعمة لاخر ديالو هو خوه ، وتحت بيت خالتي و بيت ضياف ! انا اولادي اولى بالعروسة ! و راحة عكوزني اولى ماغاديش نعطيهم داك بيت غادي وجاي عليهم
نبيل : ( حط يدو على حنكو ) دبا صافي! كما كلت لي وقع ! وقع
اسماء : ( هزت راسها تتشوف فيه ) فين غادي ؟
نبيل: ماعندي فين نمشي! نزل نشوف الواليدة ؛ نص حياتنا مهربين عليها الفقصة هاد براهش تيحطوها لها فحجرها
اسماء : كن كنتي تعطيهم العصا لي تتعطيني من تقادو
نبيل : من جذر عقلك ؟ نتي ماشي العصا لي قداتك ، الزمان لي قادك اما انا راه الا مسمحت لك ماعندك فين تنعسي دمي تتفوريه ليا
اسماء : ( خنزرت فيه ) ااه انا هيا لي مانسواش ، و زيد يوسف شابهني ، ونا مو زبايل
نبيل : انا ماكلتش ! الولد راه ولدنا ! ماغاديش رميه ، ماشي شفت ويل عليهم نهار عطاهم ليا الله نرميهم
اسماء : عرفتي اش دير !؟ هانت ها ولدك ، زوجو جيبو سكنو و صرف عليه ! انا خاوياها ليك ، حتى انا حمد الله عندي ولدي يحن فيا و يسمع ليا كلامي و الله يرحم مرحوم على ديك دويرة لي خلا ليا
نبيل: جاك الحماق ! الله يهديك راه تتقسموني على جوج
أسماء : لا خويا ولدك اول ! انا غير هبيلة والا ماسمحتي ليا ماعندي فين نعس
نبيل : تتقلبي على صداع ! ماباغيش نعلي صوتي ودنيا عامرة تحت !
اسماء : وعلاش عليك ؟ انا خاويااهااا ليك ...
...طارت معزة !! عيا معها ولكن شافها تترعد باعصاب هو ينزل خلاها سد الباب تاسمعها تتحلو بضوبل ! هازة صاكها و نزلت هو مشى جلس حدا نوصير حاط يدو على فمو !
زاينة: فين غادة ؟
اسماء: ساعة الله ! هانتي مع خالتي ، زكريا زيد معايا
...تغرغرو دموعها و شافت نوصير لي بتسم ليها و زياد لي بقات فيه وتحشت فنبيل قاطعة حس ! ماهيا جاتها للبكية ولا كلام ..
_مرت تلاتة ايام !! بليلها بصباحها ! زاينة معاها الوازنة مابقات عطلة مابقى صبر ! و خديجة عندها هالة و تتحاول توصل لحل ما ، واسماء يوميا جاي نبيل ولا بغات ترجع ، اما نعمة كانت عارفة اسماء خدات زكريا لان نبيل مستحيل يخليهم بجوج فقط ، فهاد مدة مشات عندها لكن ماحملت لا دار فطوش ولا ديك حومة بقوة صداع فضلت دارهم ، اما عريس غفلة تلتيام هو واكل ناعس شارب فلابيركاد ، الا كان عمو خدام راه فبيرو كان غادي دار راه مخليه فبرطمة مخزن قوف لابيركاد قتلو غير برد ...سمعو لي عمرو سمعو ولكن كما قال نبيل راسو فيه كارطون هدفو هو يتزوج هالة ..وفاس سمع من خوه راهم فدار جدتهم تقلق شوية ، الحومة لي ماتتنعس لا ليل لا نهار ، وقفت بسيارتها نازلة معاها زياد اما دراري صغار خلاتهم مع نوصير، دقت حتى فتحت لهم الباب طلعو ، بعد تحية و صينية آتاي دخلو فحوار
اسماء : بقات خالتي مع نوصير ؟
زاينة: اه ! حتى راجلك راه تما ، عيقتي اصاحبتي والله الا بقى فيا
زكريا: هانتي اخالتي غدا قرايا هضري معاها ترجع وختي بوحدها
اسماء: واش انا هاد ختك مرات اباها ؟ راه كن ديتها باك مايبغيش يخلينا بوحدنا !
زياد: ( جبد تلفون براء دار ليه طيارة ) الصبر مرات اعمي يوسف راكم عارفينو
اسماء : علامن نصبر اولد شلحة ؟ شتي لا اباك لا عماماكم حتى وصلو تلاتين عام و صرف عاد تزوجو ، هادشي حتى جمعو راسهم
زاينة : علاش ماتتجاوبيش خديجة؟
اسماء : اش آتقولي خديجة !؟
زاينة: خاصك تفهمي ! راه بنت غير مكدمة مع يوسف ! راها برأسها خرج لها على حياتها اباها تبرا منها
اسماء: نتي تتقولي هاد هضرة !؟ انا من حقي ندافع على اولادي ونشوف لي يصلاح ليهم وخ العالم يكون ضدي ! انا ولدي مزال صغير و شتي كن نوافقو فهاد زواج ونضحك ليه ؟ غدا نولي نفرق مع هاد عروسة المصروف ، هاد فلوس حمام ها للبيجامات ها جلالب و تولد و يقول لك راكم باغيين سبعو وهزو و حطو نتوما ! نتما تتهضرو بدافع عاطفة بقات فيكم البنت احقا مادارتش بيديها ؟ انا مملزوماش آختي بالبنت ! ماولدتها ماتنعرف طاسيلتها ، العار و العيب على اباها لي راماها لزنقة ، زعما آيشد ولدي بهاد الزواج ، كن نيت كنت مانسواش نشدها عندي ردها خدامة ونخرج فيها هاد جنون ورجعها جفاف تما كولي اباها يبان عندي ! تما محيث مكدمة من هضرت قبل ماشي تاطاح الفاس فراس ..
زاينة: انا ماقلتش هكا !
اسماء : ( تتمص شفايفها ) لا سمحولي ! عارفاكم كلكم بقاات فيكم بنت وقولتو اسماء حاقدة ! ولكن انا لي يزيدني الهم و نفس زايدة مابقيتش فيكم ؟ علاه عندي غير هو نغامر معاه ! ها خوه مزال تيقرا و مستقبل قدامو راها اختو فدار مزالة تتقرا و ريحة البشر ماتتبغيه و ديما مريضة ! لا انا اندخل هاد عروسة زيزونة ؟ ماتهضر ما تكلم ؟ ماغادي يتجبد صداع ؟ الا كااانت كاااااع مأصلة ففعايلها راها مع ولدي ماغادي تعيش فخير ! وغادي نشوف لي يضرني ونوض نجدب ! ونا اختي جذبت لي عطا الله ، ضربت تمارة صغيرة وندمت عليها و هانا قدامك تنضرب على العين و الشعا ها طولة ها لاطاي ولكن كولي تنفيبري بالاعصاب ! تانا بغيت نزوجو بالهمة وشان و ندير لهاد عروسة فين تجي وتكون نفسيتي متقبلاها ! ماشي يدخلها عليا بالفقايص
زاينة : ( تحسرت بقوة ) اوا راه غدا يعقدو ! هو راه تلتيام فلابريكاد مع فاروق ، راه مهلوك ماقدر احد لا يتدخل لا يهضر
اسماء : يضبر راسو ! الا يعقد يهز راسو ، ويضبر راسو ، انا ماغاديش نغير حياتي على ودو هو !
زياد: ومرات عمي راه ولو دارها قد راسو ماتقطعوش الدم معاه
اسماء: انا ولدي تنهضر على راسي ! شتي انا هاد الاب لبنت كن كان يفكر بعدا ؟ يفكر غير فمستقبلها الا كانت مزالة تتقرا ! صحابو ولدي يقريها ليه ؟ ياك هاد جيل كلو تيهضر و يخرج و يتصاحب ؟ اوا آسيدي بنتك ما مقيوسة مادايرا كارثة ؟ شدها نت تربي حنا ربيو ! نخطبوها كاع وخليها عندك راها بنتك زعما ؟ ونهار يوجد هاد يوسف و يخدم انا بيدي نخطبها ليه ( شافت زكريا ) ولكن حمد الله ها هو لمرضي مايحرمنيش من ديك للحظة ولا تاهو تبعو يقولها ليا دبا نيت
زكريا : ( جرها عنقها قبل راسها ) مايكون غير خاطرك اماما !
_مسحت دموعها و زاينة كدالك بكات معاها ! الانسان عمرو كان ملاك ! و اسماء من اصلو ماشي ديك انسانة مثالية و ظرافتها لاعلاقة ليها بتجربة لي خرجت منها من الحياة مسيرة بيها حياتها ، تتشوف زواج يوسف من جانب لي تعيشو هيا ! ماشي من جانب الناس، لي يشوفو فقط بنت مظلومة و اسماء خاصها تكون كما عرفوها ظريفة وتمثل فيلم اسود وابيض ! لا الناس يهزو معاها مسؤولية ولا يعيشو معاها ! دوزو ديك عشية ، والصباح الاثنين تلاقاو فالمحكمة دازت بنت امام قاضي لأنها قاصر و اباها بحال شي احد يتخلص من زبالة ، العشية عقدو ! خديجة تاني داتها معاها زاينة و يوسف رجعو تاني فاروق اما اسماء حتى ليل رجعت دارها ساكتة كان شيئا لم يكن ..
نبيل: ( دخل بيت) على سلامة !
اسماء : ( برود ) يسلمك توحشتيني ؟
نبيل : الا معايا تنتوحشك كفاش نكون نتي خاوية الدار و الفراش
_الانسان فسن شباب هو تيدوز بمراحل و تجارب يتعب بتفكير المستقبل سؤال لي تيتطرح :
_فاش نكبر كفاش نكون ؟ عقليتي تبدل ؟
_اسماء صغرها كان متعة مع وحدتها وخالقة عالم لراسها و شبابها كان كارثة مع زواجها لي يوميا تتعلم منو حاجة و على قول نبيل الزمان قادها ؛ كبرت و نضجت و تعلمت و رجعت مستقلة و سيدة لها وجود بمشروعها اما الحب وعلاقتها مع نبيل ماتتكبرش مزال نفس شغف ، لهدا فهاد للحظة وهيا تتفكر ، لقات رأسها أنها فعلا كبرت فعقليتها دليل قرارات صارمة لي تتحد اما شيخ شباب فراه محكوم من طرف لاجودان
_يوسف جيب قهوة
_يوسف شوف معاك جردة الفيلا
_يوسف غسل طموبيل ! يوسف غدا خمسو صباح نزل تعاون خدامة
_اتعب هو يتحايل عليه نوصير يجيبو يخدم فالكراج لكن فاروق عارف وصير صاحب يوسف و يخوي ليه الما فرملة ، اما البنت راها حالسة معززة مكرمة مع خديجة و الخير جيد تتكمل الباك ديالها لانها نفس سن مع نعمة و نبيل متكلف بمصاريفها لانها تتقرا بريفي و حكم صارم هو ان فاروق يشم ليه ريحة مقرب لها يفنيه ! داير معاه يكري يخدم يجي ياخدها اما مصروفة راه تيتقاتل معاه..
فاروق: زعما انت ماتتعرفش نوصير تاني ؟ راه غير خصايلو ، و تمارة و القراية و عايش بوحدو و نطير ونزل تلقاه سابقني مدرسة عند مراتو كن ماحلفت خديجة كن دخلو الدار
مغيث : دبا انا راه معرفة ديالي قضا ليا غرض ! قالي يشد ديبلوم اليوم صباح يكون عندي يبدا خدمة
فاروق: هادشي فيه ترسام ولا كونطرا ؟
مغيث: وضروري ديك ست شهور اولى بحال سطاج ولكن راه مخلص ، يشوف تاني واش يعطي الا والو
فاروق: لا يعطي ! هداك سلوكة قرب ياكلهم ، انت هابط مغرب ؟
مغيث : ضروري توحشنا الواليدة و مرات امير قربت ولادتها ، و نقادو لخواطر ليوسف مع مرات نبيل هادشي راه ماعدناش اسي فاروق وصلنا قطيعة الدم
فاروق : انت دبا مداخلش فالعمق ! واش نزوج واحد بهنطقة و الخاطر و الحاج يفرتك ليه العش ؟
مغيث: ( مسح وجهو ) ولا تاني تالهادي الا ! اسماء راها كابرة معانا و ختنا صغيرة و مهلية فالواليدة
فاروق : الله يصاوب وصافي
مغيث : كولي نعمة شنو دارت فالباك ؟
فاروق : ( حك راسو ) وراها دوزات ولكن نقط والله ماعرفت فوقاش يخرجو ، دوزت هيا مرات يوسف
مغيث : بغيت نعرف نقطة اما نجاح تبارك الله راها ناجحة !
فاروق : داكشي لي كاين ! يلاه تهلا
...اقطع الخط ! تيشوف فتاريخ امامو ! الشهور مرت طايرة ، عاقد حواجبو حتى هز راسو بان ليه داخل وزاد ضعاف ، تيشوف راسو فيه نفس طولة و شوفة و كاريزما دق فالباب ووقف عندو بدون كلام بحضن رجولي طبطب عليه ورد قائل
فاروق : هاديك سترة على مك ! كول عاد طلقو سراحك ، ياك مرتاح ؟ امور هانية
براء : ( مسح وجهو ) لله الحمد ! فين يوسف؟
فاروق : ( هز راسو ) راه فوق ناعس فاق بكري سخرتو ! ( وقف تيهخبع سلاح ) مشينا ؟
براء : ( ببطى حط يديه فخضو ) فيك ماتسمعني !؟
فاروق : ( حرك ليه راسو وجلس ) اياه ! سمعنا الخير
براء : كل الخير ! ( حك راسو من حكة هز صوابعة متسائل ) نجيك نيشان ولا نضرب دورة ؟
فاروق : ( حقق فيه شوفة ) لا شد طوبيس ! اش عندك اولد البلارة ؟
براء : ( هز يديه باستلام ) غير باش تعرف ! راه مابقى ليا صبر ، ولي تيدار راه درتو ؛ و مزال مكمل فيه ولكن لقيت الحل هو نحطك بصورة انت راك تتبقى الواليد ! انا باغي نعمة من الحاج نبيل اخوك
فاروق: ( بقى على هيئتو متمر شوفة فيه هز راسو بافتخار ) بنت الحاج نبيل ؟
براء : اوا الخاطر بغى بنت العم !
فاروق : ( باستهزاء ) نوض تكعد نوض ! عمري كولو مع خويا مزيان ! شكون انت لي نخسر اخوة على ودك
براء : راه باغيها الواليد و خاوي على ود هاد هضرة خويا وكدا
فاروق : ( بنظرة تعني الباب ) سيرر زيد وعاود اخوي ! اولا بنت صغيرة ! زيد عليها ماغاديش تديها
براء: ( هز حواجبو ) ياك
فاروق: اوا نكذب عليك ! راكي ولدي وعارف احرك
براء : ( وقف ) اها وزيد عندك هادي ( سطر ليه فوق بيرو ) الا ماديتهاش انا؟ ايديها الله من غيري ماكاين ! الله يعاون
أولاد الوازنة الجزء 113
محتوى القصة
التنقل بين الأجزاء