إقتصاص الجزء 12

عند رباب ..

بعد الأخبار لي سمعت على أسيل و نهى مابقاتش كذوق طعم النوم كل ساعة تصوني لواحد فولادها ماكترتاح حتى تسمع صوتهم ، بعد أسابيع الوحدة لي دوزتها فدار محمد العباسي واخا كانو مهلين فيها لكن الحياة بلا ولادها لا أساس لها ، اليوم و أخيرا راجعين بعد طول غياب داكشي علاش وجدت راسها و طلبت من الشيفور يوصلها للڤيلا ..

فور ما وصلت بدات فتحضير ألذ المأكولات و أشهى العصائر و طلبت من الخدامة تعاونها فالتحضيرات و تجهيزات بيت الجلاس لإستقبالهم أحسن استقبال و للإحتفاء بالجنين الجديد ..

ماحستش بالوقت كيفاش طار و قربت ساعة وصولهم ، سمعت صوت الجرس و طارت باتجاه الباب حلاتو لقات أسيل واقفة قبالتها مبتسمة جرتها بدون سابق إنذار و ضمتها بقوة بلاما تحس بالدموع لي بداو كيتسللو لخدوها ..

رباب : هئ هئ هئ خلعتيني عليك بزاف ابنتي ..

أسيل : ( مسحت على ظهرها بحنان ) خالتي الحبيبة صافي أنا بيخير ..

زكرياء : الوليدة براكة من البكاوات صافي ..

أسيل : ( كتمسح لبها فدموعها ) تهدني كلشي فات ..

رباب : (هزت عينيها فالبقية لي واقفين كيشوفو ) توحشتكم كاملين ..

نهى : سمحي لينا خليناك بوحدك ..

رباب : ( عنقتها بقوة ) الحمد لله على سلامتك ياك مدار ليك والو ؟! ..

نهى : لا ماتخافيش اخالتي انا بيخير ..

رباب : (ابتسمت لناصر ) مبروك عليك ، الله يجيبو لينا على خير ..

ناصر : ربي يخليك الله يبارك فيك ..

مياسين : ( قربت مبتسمة و عنقاتها ) خالتي نتي لاباس عليك ..

رباب : ملي نتوما بيخير فأكيد حتى انا غنكون بيخير اوليداتي ..

راؤول : دخلو ماتبقاوش واقفين هنا ..

دخلو كاملين للداخل بعدما سالاو لقاو الطبلة مجهزة بداكشي كيشهي و كان فيهم الجوع دخلو فيه طول و عرض مع بعض الطرائف و الأحاديث المضحكة بينهم عاطية جو زوين ..

رباب : ( لمحت الخاتم فيد مياسين كيلمع شافت فأمجد و رجعت شافت فيها) مياسين هداك خاتم خطوبة ولا غير جاب ليا الله ..

مياسين : ( شافت فالخاتم و رسمت ابتسامة ساحرة ) اه اخالتي مع هادشي لي وقع نسينا ماقلناش ليك (رمشت عينيها فأمجد ) أمجد طلب مني الزواج ..

رباب : ( عينيها لمعو بالفرحة ) بصصصصحح !! مبرووك عليكم اوليداتي فرحت ليكم بزاف ..

مياسين : ربي يخليك اخالتي ..

نهى انسحبت بسرعة و دخلت للحمام كتتقيا ردات گاع داكشي لي كالتو حست بشي يد هزت ليها الشعر من على وجها و يد أخرى كطبطب على ظهرها بحنان ..

سالات و غسلت وجهها بسرعة مد ليها فوطة مسحت عاد شافت فيه ..

ناصر : (طبع قبلة على جبينها ) شوية لاباس ؟! ..

نهى : (هزت ليه راسها بايجاب ) انا بيخير ..

ناصر : (ضمها لحضنو مبتسم ) الصبر هادشي غيفوت ..

نهى : (ابتسمت هي الاخرى حاسة بقلبها غيطير بالفرحة ) المهم هو يجي على خير و نشدو بين يديا (بعدت و شافت فعينيه ) ناصر انا فرحانة بزاف ..

ناصر : (هز يدها باسها ) هادشي لي بغيت ..

خرجو من تما و رجعو لأماكنهم ، كانو كلهم كيشوفو فيهم شحال فرحانين و عينيهم كيلمعو ، أمجد سهى لبرهة كيتخيل يكون عندو بنت و لا ولد من مياسين حتا هو و يدير عائلة صغيرة تعوض داك النقص لي عندو ..

كلهم عندهم نقص و ماغيكتمل إلا بإكتمال كل فرد من هاد العائلة الصغيرة لي كونتها ليهم الحياة لعلها كانت تعويض بالرغم من انه ماكافيش لكن الأهم انه جمعهم و فرحهم ..

زكرياء : (همس لأسيل ) حتى انا بغيت شي بجغوط فالقريب العاجل ..

أسيل : (ابتسمت مبعدة عليه حيت دغدغها فوذنها ) ماشي دابا انا راه باقة بجغوطة ..

رباب : ( سمعتها و بدات كضحك ) ههههه ولاهيلا ..

مياسين : أنا غنطلع ننعس عيت ..

راؤول : اه ارتاحوا باش غذا نمشيو للشركة ..

رباب : مزال عاد جيتو اشمن شركة ..

أمجد : لا سي راؤول عندو الحق هاد الشي طول بزاف لازم نساليوه فأقرب وقت ..

أقبل صباح جديد بأحداث جديدة ..

ناض أمجد فالصباح الباكر قبل ما يفيقو كاملين لبس حوايجو ووجد راسو عاد خرج وهو مصمم أنه يوضع حد لهادشي ، بعد تفكير عميق طول الليل توصل لفكرة لي ماجاتش على بالو قبل و ما عارفش واش غتوصلو لشي حاجة ولا لا لكنو متأكد غيلقى طرف خيط ولا شي معلومة ولو تكون صغيرة ..

نزل بلاما يحس عليه شي حد ركب فلوطو و انطلق ، متوجه مباشرة لوجهتو لي كانت هي المستشفى لي مات فيه الأب ديالو ..

مسافة الطريق و كان تما نزل كيزرب فخطواتو و دخل مباشرة كيشول على مكتب المدير ..

أمجد : بغيت نشوفو ضروري ..

م : سمح ليا و لكن دابا مايمكنش ..

أمجد : (غمض عينيه كيحاول يضبط اعصابو ) لا يمكن قولي ليه بلي المسألة جادة ..

م : هو مشغول حاليا و ماباغي يشوف حتى واحد دابا ..

أمجد : (زفر بالجهد ) سمعيييي ..

قاطعو صوت تيلي ديالها كيصوني هزاتو حطاتو على وذنها و بقات كتسمع ..

م : (وجهت كلامها لأمجد ) تسنى هنا .. ( دخلت بسرعة لعندو ) وي سيدي ..

المدير : شنو واقع ؟! ..

م : واحد الولد على برا مابغاش يمشي مصر انه يشوفك ..

المدير : شكون هذا ؟! و شنو بغا !! ياكما من صحاب الدعم ..

م : لا ماكنظنش ، سميتو أمجد الشافعي و قال بلي باغي يهضر معاك ضروري ..

المدير : (سمع سميتو تعابير وجهو تبدلو ) قلتي الشافعي ..

م : ( هزت راسها بايجاب ) اه ..

المدير : (وقف بسرعة ) متأكدة ؟! ..

م : (رجعت خطوة خايفة من نظراتو ) اه متأكدة اسي عماد قالها بفمو ..

سكت لبرهة و رجعت بيه الذاكرة ديالو للور ..

#فلاش________باك_______..

كان ناعس على فراش الموت يحتضر و يدو كترجف فيد ولدو لي كيبكي و قلبو محروق على باه ماقادرش يستوعب فكرة انه يكمل بلا بيه ، بعدما ولى لوپيطال ديالهم من أشهر المستشفيات فالمدينة ..

رشيد : (نطق بصعوبة ) ماتبكيش اولدي ماقادرش نشوفك فهاد الحالة ..

عماد : حتى أنا الواليد ماقادرش نشوفك هاكا ماتمشيش و تخلينا مزال محتاجينك ..

رشيد : الأعمار بيد الله اولدي خاصك تصبر و تكمل على قبل خوتك و مك ..

عماد : (نزل راسو كيمسح دموعو لي مابغاوش يحبسو ) ماغنصبرش الواليد ماغنصبرش ..

رشيد : (كيكح بهيسترية ) كح كح كح سمعني ..

عماد : ( مد ليه الما شرب ) شرب بشوية عليك ..

رشيد : ( شرب و شاف فيه ) انا عارف انك قدها و خليت عائلتي فأيدي أمينة خليتهم مع خوهم الرؤوف بيهم و لي غيحن عليهم و يتهلى فيهم و مايفرقش بيناتهم و لكن كح كح كح ...

عماد : (مزال كيشوف فيه ) ولكن ؟ ..

رشيد : و لكن أنا مامرتاحش اولدي كح كح ضميري كيأنبني بزاااف اولدي ..

عماد : ( رمش عينيه بعدم فهم ) علاش كتقول هاكا ..

رشيد : انا درت واحد الذنب كبييير اولدي لا يغتفر ..

عماد : (بصدمة ) اش كتقول الواليد شنو درتي ؟! ..

رشيد : كان عندنا واحد السيد فلوپيطال سميتو "يعقوب الشافعي" كنت كنعرفو شخصيا و كنعرف باه و عائلتو كان مريض و دار عملية ، جاتو جلطة فالدماغ و لكن قدرو ينقذوه و نجحت العملية (سكت شوية و بدا كيكح عاود ) من موراها جات عندي واحد السيدة من عائلتو و عطاتني مبلغ كبير مقابل باش تدخل عندو و حنا فداك الوقت كنا كندوزو من أزمة كبيرة ماقدرتش نرفض ، دخلتها من مورا العملية بشي دقائق ، كانو عائلتو كيتسناوه قدام الباب على نار كان عندو زوج وليدات صغيورين و زوينين كيبكيو (بدا كيبكي هو الآخر ) حرمتهم من بااااهم انا السبب انا السبب ..

عماد : ( رخة من يد باه مصدوم ) كيفاش ؟! اش كتقول نتا !! ..

رشيد : هي هي اولدي لي اتفقت مع المساعدة ديالي دارت ليه سم خطير ماعرفتش منين جابتو و لكن ماكينش فالبلاد و ماكيبانش فالجسم نهائيا و أنا هئ هئ أنا غطيت على داكشي ماكان عندي حتى خيار انا السبب انا لي دخلتهم اضطريت نسكت الطبيب بالفلوس و كل شخص شارك فديك العملية هئ سمح ليا اولدي ماكان عندي حتى خيار آخر ..

عماد : (كيحرك راسو بلا ) مستحيل مستحيييل تكون نتا هو بااا مستحيل ..

رشيد : كح كح كح كح سمح ليا اولدي الله يخليك بغيت منك حاجة وحدة قلب على ولادو و قولهم الحقيقة كيفاش مات باهم الله يخليك قولهم الحقيقة قولهم الحقيقة ا عماد ..

#نهاية_______الفلاش_____باك..

سهى عماد كيتفكر آخر جملة سمع من عند باه و المدير السابق للمشفى رشيد قبل ما يفارق الحياة ، اسم يعقوب الشافعي بقى كيتردد لمسامعو سنين طويلة بحيث عمرو نساه و لا خرج من بالو كأنو باه مات و لصق فيه داك الذنب ..

بحث عليهم حتى عيا و مالقاهمش كيف غيلقاهم ؟! و هو ماعارف والو من غير نسبهم و الحاجة الوحيدة لي توصل ليها ان عائلة الشافعي قطعت بيهم العلاقة و انو ماخاصش يثيق فيهم ، حس برجليه فشلو عليه و جلس مراقب يديه لي كيرجفو ..

م : سي عماد واش نتا بيخير ؟! ..

عماد : ( هز كاس الما شرب منو و هز فيها راسو ) دخليه ..

م : كيفاش ؟! ..

عماد : (بعصبية ) قلت ليك دخليه واش ماكتسمعيش ..

رمقاتو باستغراب قبل ما تخرج عند أمجد لي واقف على أعصابو و شاد فيديه تيلي لي كيصوني بنمرة مياسين ..

م : تفضل دخل عندو ..

أمجد : ( تنهد و دخل ) السلام عليكم ..

عماد : و عليكم السلام تفضل ..

أمجد : كنعتذر على هاد الازعاج و لكن كون ماكنتش المسألة ضرورية ماكنتش غنجي ..

عماد : ( حرك ليه راسو بمعنى شنو ) ماشي مشكل ..

أمجد : عارف هادشي لي غنقوليك غيجيك غريب شوية و لكن بالنسبة ليا شي حاجة مهمة (حرك عينيه بتوتر ) قبل شي ٢٠ عام تقريبا توفى الواليد ديالي هنا فهاد السبيطار كانت جاتو جلطة دماغية و مات واش ممكن ترجع للأرشيف و تعطيني التقرير الطبي ديالو و حالة الوفاة بغيت كلشي المعلومات لي كتتعلق بيه ..

عماد : سي يعقوب الشافعي ياك ..

أمجد : (استغرب ) كتعرفو ..

عماد : سي أمجد حتى انا هادشي لي غنقوليك ثقيل بزاف و صعب استيعابو و لكن بغيت نقول ليك الحقيقة و نتهنى من هاد الذنب لي على العاتق ديالي ..

أمجد : ( تقاد فالجلسة ) مافهمتش ..

عماد : عرفتي شنو هي آخر كلمة قالها ليا الواليد قبل ما يموت قلب على ولادو و قول ليهم الحقيقة ، قالها و مشى و انا اضطريت نحمل راسي المسؤولية و نهز الذنب كأنني أنا مولاه .. ( بداو كينزلو دموعو دون شعور و سكت )

أمجد : ( بعد تفكير عميق و هو كيشوف فيه ، بلع ريقو و زير على قبضة يدو ) الواليد مات مقتول ياك ..

عماد : ( هز فيه عينيه لي رجعو حومر و بدا كيعاود ليه داكشي لي قال باه بالتفصيل ) ......... من بعد ماقال ليا هادشي أنا ماعرفتش شنو غندير من جهة موت الواليد من جهة عائلتي لي مدمرة و من جهة نتوما ، واخا هكاك قلبت و ما استسلمتش لمدة عامين دون جدوى فالتالي سلمت امري لله و طلبتو تلاقينا الصدفة و ها نتا جيتي برجليك حتال عندي ..

أمجد : ( بعدما بلع صدمتو و استجمع قواه ) ماقالش ليك شكون هاد السيدة ..

عماد : (حرك راسو بلا ) قال بلي من عائلتك ..

أمجد : المساعدة ديالو كانت عارفة شي حاجة ..

عماد : اه قال بلي اتفقت معاها ..

أمجد : ( هز راسو بايجاب ) امممم اذن غتكون كتعرفها ..

عماد : ( حرك يدو ) غالبا ..

أمجد : نتا ماعارفش فين كاينة هاد المساعدة ديالو ماتت ولا مزال حية ..

عماد : لا كنظن مزال حية بلاتي نقلب ليك على العنوان .. ( دخل لپيسي كيقلب و هز ورقة صغيرة كتب فيها العنوان ) الى كانت مزال هنا فهذا هو عنوانها ..

أمجد : ( خدا من عندو الورقة مبتسم ) شكرا بزاف .. ( عطاه بالظهر و بدا خارج )

عماد : (قبل ما يخرج نطق موقفو ) أمجد ..

أمجد : ( دار معلي حاجبو ) ...

عماد : الله يخليك ممكن تسامح الواليد على هادشي لي دار ..

أمجد : ( طول فيه الشوفة و نطق ) الله يسامح ..

كمل طريقو لبرا و عينيه على ديك الورقة لي فيدو ، ركب فلوطو و انطلق ..

مياسين بعدما فاقت من النعاس و دارت روتينها اليومي لبست حوايجها ووجدت راسها عاد توجهت لغرفة أمجد باش تفيقو ، دقت ماجاها حتا رد و هي تحل الباب و دخلت مالقات حتى واحد و الكامة مقادة دليل على انه فاق من عادتو ماكيخليش فراشو مخربق ، جبدت تيلي كتصوني ليه ماكيجاوبش ..

مياسين : ( باستغراب ) فين زاد هذا ؟!..

سدت الباب و نزلت لتحت لقاتهم مجموعين كيفطروا ابتسمو ليها جميعا و رحبو بيها فالطاولة ..

مياسين : أمجد فينهو ؟! ..

رباب : علاش مالو ماكينش لفوق !! ..

مياسين : لا مشيت لبيتو مالقيتوش و ماجاوبنيش فتيلي ..

راؤول : غيكون خرج فالصباح صافي دابا يرجع ..

مياسين : ( نزلت راسها كتبرگم بينها و بين نفسها ) علاش مايقولش ليا فين غادي ؟ فين ايكون مشى زعما !! ياكما مشى يتلاقا مع شي وحدة ؟ لا لا مايديرهاش ، ولا يديرها زعما ؟ (تنهدت بصوت مرتفع ) اوووف ..

نهى : ( كانت مراقباها و كتبتسم ) ماتخافيش مايديرهاش ..

مياسين هزت فيها عينيها موسعاهم كتقول مع راسها هادي كيفاش عرفات ياكما كتقرا ليا أفكاري ؟ ، كلهم شافو فيها و بداو كيضحكو ..

زكرياء : لا عنداك غيكون كيخونك نوضي قلبي عليه ..

أسيل : اتلقايه كيعيش الرومانسية فهاد البرد و مخليك نتي هاكا جامدة ههههه ..

ناصر : هههههه اسييل حشمي شوية ..

رباب : (شافت فمياسين لي غير جامعة شنايفها و كتخنزر فيهم و طبطبت عليها ) ههه خليو عليكم بنتي ، لا عنداك أمجد مايقدرش يديرها ..

مياسين : أنا عارفا مايقدرش ( هزت راسها ) اه غيكون عندو غير شي غرض مابغاش يقولو لينا ..

أسيل ماقدرتش تحبس الضحكة و انفرجت شادة كرشها و بداو تاني كيضحكو عليها ..

فالجهة الأخرى ..

نزل معاذ لابس كوستيم و هاز فيديه شي وراق متوجه للشركة باش يشوف فاش ممكن يعاونهم حيت الأمور غادة و كتتدهور ، فطريقو للخروج غيسمع التوشويش جاه فضول يعرف شكون هاد زوج لي كيتهامسو تما ..

خناثة : صافي مشينا فيها منين انجيبو ليهم هاد المبلغ ..

علي : الفكرة كانت ديالك نتي السبب اش دانا حنا نتعاملو مع شي مرابي و لا زبل فين عمرها كانت لينا و المبلغ خاصو يرجع بالفوائد من لفوق ..

خناثة : غتنوض روينة ا علي حتى حاجة مامشات كيفما كنا مخططين ليها خاصك تحضر معايا عقلك ..

علي : (صغر عينيه ) شنو بغيتي ديري ؟ ..

خناثة : خاصنا نضحكو عليهم و نحولو داكشي لي بقا عند سالم و بيان فسمياتنا نخليوه هو يفكها معاهم ..

علي : واش حماقيتي ؟! مستحيل نغدر با انا مستحيييل ..

خناثة : فييق معايا صافي عائلة گارسيا غيلقاو الفرصة اصلا من نهار جاو هاد العائلة تدمرت بقات ليهم ضربة و حنا عطيناهم الفرصة غيخليو عشتنا و يمشيو لأمريكا يكملو حياتهم لي خلاوها و يعيشو فسعادة و حنا ؟! حنا اش ايوقع فينا غنتشردو و غيلوحونا لزنقة غيردو لينا داكشي لي درنا ليهم ماغيرحموناش ..

علي : لا ا مي ماتقوليش ليا نخلي با و نهرب معاك لا ..

ابتسام : ( كانت كتسترق السمع من وراهم ) واش حماقيتووو نتوما اش هادشي كتقولو ؟! ..

علي : نتي شنو كديري هنا ا ابتسام !! ..

ابتسام : فين باغي تهرب فييييين ؟! بقيتي تابع مك حتى خرجتي علينا كنقوليك ديما ماتبقاش تسمع ليها ..

خناثة : شوفي اديك الق**** غبري عليا من هنا احسن ما نبرد فيك غدايدي ..

ابتسام : علي سمعني مزيان ماتحاولش دير هادشي و إلا غادي نقولها لعمي سالم ، أنا عندي بنت وحدة ا علي ماغديش نخليها على ود مك ..

خناثة : لعنة الله عليك بنتك لختيها للعدو بيديك ..

ابتسام : بنتي مالحتهاش للعدو دفعتها للحياة لي كتستحقها ، العدو هو نتي اللفعة الشيطانة الوسواسة ملي جات و نتي كتنبشي باش تكرفسيها و أنا مستحيل نكرفسها ماعاش لي يكرفس ليا بنتي (ضحكت بصوت مرتفع ) كنت عارفة غيجي واحد النهار و غدي يجي لي يدمركم و زدت تأكدت فاش جات عائلة گارسيا ايوا عومي بحرك و خلي عليك عائلتي فالتيقار ..

علي : ابتسام سدي فمك ..

ابتسام : انا سادة فمي الله يطليك نتا وياها و لكن ماتنساش الى كانت هي لي قاتلة اسي علي حتى نتا غتجرك معاها ..

علي : كيفاش ؟! ..

خناثة : (وسعت عينيها و لون وجهها تخطف ) و شكون يأكد لينا بلي ماشي نتي لي قاتلة الجنية !! بغيتي تلصقيها فيا ..

ابتسام : هاد الهضرة ماواكلاش معايا (شافت فعلي ) انا ماغنخسرش بنتي ..

خناثة : ( ذبلت ملامحها بحزن مصطنع ) بنتكم خسرتوهاااا شحال هذا ، الوحيدة لي ممكن تنقذنا عطيناها ليهم ..

فهاد اللحظة معاد حط دوك الأوراق لي فيدو و خرج ركب فلوطو و انطلق بأقصى سرعتو لوجهة غير معلومة و فدماغو حاجة وحدة هي هاد الجملة "غيخليو عشتنا و يمشيو لأمريكا يكملو حياتهم لي خلاوها و يعيشو فسعادة" ..

ابتسام : انا راه حافظة داك الراس عندك شنو كيدور فيه ا خناثة ..

خناثة : ايوا ملي حافظة راسي اش فيه اذن عارفة انني باغة مصلحة العائلة ، بنتك راه تزوجت و لي عطى الله عطاه نهار غيفرتكونا و يدمرونا غيديها معاه و يزيد .. ايه !! و نتي ؟! شنو يحساب ليك غيديوك معاهم هههههههه والله يا مك تا ترجعي منين جيتي ..

ابتسام : ( بلعت ريقها ) ماكيهمش ..

خناثة : وايييه واييه حتى انا راني تيقتك ، ماعارفاكش شحال كتموتي على عووومااار ابنت الصفريطة ..

علي : (لاحظ انها كتراوغ باش تقول شي حاجة ) شنو بغيتي نديرو الواليدة من لخر ؟! ..

خناثة : ( شافت فيه بجدية ) غدي تجيب بنتك لصفك ساعتها لي قلتيها ليهم غيديروها ..

علي : و باش عرفتي هدشي نتي !! ..

خناثة : داك راس الحمار ديال ناصر ماغيقدرش يتفرق عليها غدي نغبروها و نطلبو فيها فلوس ..

ابتسام : نتي حماقيتي بغيتيني نخطف بنتي و نطلب فيها فدية !! ..

خناثة : (وجهت كلامها لعلي حيت عارفاه وذينة ) غدي نديوها لدار لي فالدوار هي اصلا ماغتعقلش عليها مزيان ، غتبقى تما حتى واحد ماغيآذيها غدي نطلبو فيها مبلغ صحيح باش نقذو راسنا الى بقى مايتنقذ و ملي غيوصلونا الفلوس غدي تمشي تخرجها من تما غتكون فعينيها نتا هو البطل و هادشي لي بغيتو ( شافت فابتسام ) ياك ؟! ..

ابتسام : (حركت راسها بلا ) علي ..

علي : (شاف فيها بجدية ) عيطي ليها ..

يتبع...