حلات عنيها بتتاقل و شعا كيضرب فيها و ساعة كتصوني حدا راسها ..بإنزعاج ملحوض على ملامحها فاقت سكتات ساعة و رجعات تكات كدور فبلاصتها..تفكرات تليفون ديالها وهي تنوض بسرعة هزاتو بان ليها طافي دارتو يتشارجة وعنيها كيدورو فراسها ..حاطة ضفرها بين سنانها كتعضو بخفة و كتفكر ما دارت البارح في سهوة ديالها تحل لبيت ديال لغرفة ديالها...
سومية :من نتي فايقة علاش مكتقوليش نعام من كنعيط عليك...
اريج : ما سمعتكش اماما ..علاش بغيتيني بعدا....
سومية : ديري عليك شي حاجة و خرجي جيبي ليا الخبز و دوزي لقهوى عند باك يعطيك فلوس تقضية ....
اريج لبسات كلاكيطتها تمشات قدام مها كتجر فرجليها و كتسوط : اففف ا ماما شحال و انا كنقولك يدير ليك بابا كونط فالبنكة و يدير ليك لكارط متحتاجيش كاع تبقاي تسخريني كل صباح ....
سومية : معنديش مع داك تخربيق انا لا مقصتش لفلوس بيدي ما كنرتاحش....
اريج : وقولي مولفة تزقرمي و تشيطي تحت منك اما لدرتيهم فالبنكة ريال لخرجات يوصلوها لواليد...
سومية خنزرات فيها : شتك شادة معايا كلمة بكلمة اتنوضي تسخري ليا لا .....
اريج هزات كرواسة : خليني غير نفطر بعدا ياااء ديما كديري ليا هاد لحالة نكير على صباح ....
سومية جلسات فوق طبلة قدامها كطلع فيها عنيها و كترجع تهبطهم حاطة يديها على حنكها : شفتك غير غادة و كتطوالي و تعمري قبل عمرك...."صغرات عنيها "..يكما كتشربي شي حاجة بلا خباري...
اريج : لكان شي حاجة غير من مك سيري سوليها هي اش كتوكل فيا غير تخلط ليا فلحليب و تعطيني ولا مشربتوش نهاري كحل مع المدلك ...
سومية : اوا لكان غير داكشي مزيان كلنا شربناه غير نتي بان فيك قبل الوقت ...
سومية : هداك غير حليب صويا مخلط مع حب رشاد مزيان لبنات بزاف كيقاد ليهم لهرمونات و دغيا كيطلعهم و ينقص ليهم شعر من لحمهم.....
اريج : اممم و كنقول مالي ما تزغبت قول مك كتوجدني من دابا ....
سومية : هههه أصلا جيتي كتشبهي لخالتك لا فشعر ولا فبيوضية لحم وخا داك شعر خرجتي عليه بديك تصبيغة لحارة ولكن جات معاك وخا انا كان عاجبني لون لكحل فين ما كنشوفو كتجيني غير هاجر ولكن دابا من صبغتيه مشا منو داك سر....
اريج هزات خسلة من شعرها طويل فايت لمؤخرة ديالتها ..حركاتو بين صبعها معوجة فمها ...: ماما بصح انا كنشبه لخالتي....
سومية هزات كاس اتاي : فشي حوايج نقول غير نتي و فشي حوايج لا....
اريج بقات كدور فكاسها بتردد عاد نطقات :مثلا لكان شي واحد كان كيبغي خالتي واش يقدر يبغيني انا حيت كيشوف خالتي فيا ....
سومية حطات يديها فوق طبلة مربعة كتفكر : هو صراحة كان كاع ولاد لعائلة و جيران كيبغيوها ولكن هي كانت مخرجة فيهم لمرار تا كرهو راسهم و وخا يشبهوك ليها ميقدروش يبغيوك بحالها
اريج مزيرة على لكاس بين يديها نطقات بشوي : ولا كان فعلا كيبغيها بزاف...
سومية: لكان واحد فعلا كيبيغها بزاف لدرجة انه وخا عارفها مزوجة مزال قلبو متعلق فيها هنا يقدر يستغل أي وحدة كتشبه لهديك لي كيبغيها قلبو... .."هزات عنيها فبنتها"....علاش كتسولي نتي فهادشي....
اريج حركات راسها يمين و شمال :والو غير جاني فراس وقلت نسولك ....
سومية جمعات لوقفة هازة صينية : اوا نوضي تصخري ليا و متعطليش و دوزي نيشن لدار جداك اتلقايني تم ندوز معاها هاد نهار...
اريج حطات راسها على طبلة : تاني دار جدة و نكيرها ...
سومية : وصافي تا نتي شدي معاها لخاطر راها موحشة بنتها ضل نهار و مطال تبكي عليها....
اريج : انا كنجلس معاها غير نص نهار و راسي كيتقلب باز ديك مرت خالي مسكينة كيف حالتها معاها ....
سومية : مرت خويا مأدبة وعارفة كيف تعامل مع ماما و زيد خويا منهي من لواليدة على مراتو وهي وخا واعرة متهرسش كلمتو حيت عارفاه يخرج هو ومراتو و يخلي ليها دار خاوية تبقى منها لحيوط....
جمعات الوقفة خلات مها تشقى بوحدها بدون ما تهز كاس معاها كيف عادتها ... دخلات دوش غسلات حالتها وقدات وجها بالكريمات عاد خرجات كتشعل ..لبسات كسيوة صيفية حد ركبة بسميطات مع صندالة صبع ..خلات شعرها متحرر على ضهرها وهزات تليفون ديالها شعلاتو بقات كتبقشش فيه وهي دخل عندو سيفطات ليه ميساج و طفاتو حطاتو فصاكها ...خرجات بتخبية على ماماها باش متغوتش ليها على لبس ....فور ما خرجات تنهدات بجهد ولبرد ديال صباح كيضرب فيها..تمشات فزنقتهم عاجبها راسها و تايقة فنفسها...حاسة غير هي لي كاينة وتا حد ما بحالها .....
خارج من لباب لخلفي ديال لفيلا لابس حوايج ديال دار عاديين...توجه نيشن لمحمية ديال لحيونات سرح عينو مزيان وهو يكمش حجبانو من شاف سبع دايرينه فقفص...توجه لمسؤولين تم مخنزر ...
سمير : شكون عطاكم الحق تخرجو سبع من لمحمية ديالو ....
واحد من لمسؤولين تخلع ما عرف منين خرج ليه بتوتر نطق : سسسس سي عصام هو لي عطانة لإدن ....
سمير ساخط عاض فمو من لتحت : سي عصاام وخا ها حنا انشوفو ...
هز تليفون يعيط على عصام وهو يبان ليه ميساج ديالها ساط بجهد دخل يشوف شنو مسيفطة..زاد كمش حجبانو وقرا حرف بحرف ...
"لا ترى محبوبة قلبك في...فأنا وحدي لا اشبه أحدا... ولا اشبه من سكنت قلبك "..
زاد كمش حجبانو كتر عاض فمو من جناب....دور يدو على راسو ساط بجهد وخرج من جهة ديال ميساجات بلا ما يرد ولا يتاصل بيها ..نيشن دوز نمرة ديال عصام....
عصام بصوت تقيل : اممم..
سمير : خويا عصام واش نتا لي عطيتي لإدن يخرجو سبع من لمحمية ....
عصام بعد مدة نطق : قلب شكون ورا هادشي..."قطع عليه"
رجع سمير تليفون لجيبو ..و توجه مخنزر لداك لمسِؤول شدو من كول القميجة : سي عصام اولد لق"""...بنت ليك كنرضع صبعي هنا حسن لحسك وبلا ما نفرج فيك عباد الله و نهرسك من شي قنت جيني نيشن شكون قالك دير هادشي....
لمسؤول بخوف : والله اسيدي ما عرفت هي قالت ليا سي عصام لي طلب هادشي....
سمير زاد خنزر كتر : شكوون هادي لي طلباتك ....
لمسؤول كيقفقف : انسة مايا هي لي قالتها ليا لبارح و علماتني نخرجو هاد صباح ....
سمير طلقو من بين يدو وهز حجبانو بجوج فيه : فين غادين ديوه .....
لمسؤول : معرفتش اسيدي هي علماتنا لبارح و جابت لينا لوراق موقعين باسم سي عصام باش نخرجوه وقالت هاد لعشية اترسل رجال لياخدوه من لمحمية....
سيمر تم نيت عاود تاصل بعصام قال ليه كل ما وقع وكان من عصام الصمت المميت خلى رعدة طلع مع سمير بلا ما يحس...
سمير : خويا عصام ن....
عصام قاطعةو: اجي دي هاجر و حاتم .."سكت مدة عاد نطق "...لمغرب ....
سمير بقى كيرمش ما فهم والو وخا هكاك نطق : وخا من هنا ساعتين نكون عندك ....
رجع تليفون لجيبو كيسوط وكيدور لكلام فراسو عارف شي حاجة كدور وغير من عصام لي رسلو مع صباح لمحمية يشوف اش واقع فيها عرف كاين شي لعبة ماشي هي هديك وغير عصام لي عارفها....
دخل كيحك فراسو طالع لبيتو وهو يجي مع لالة لياقوت نيشن حلات فمها تهضر و هو يدور بسرعة هبط من دروج مخنزر خلاها كتغوت بسميتو ...خرج من لفيلا كاملة توجه لسيارتو ركب وتاصل بأسماء ....
سمير : غير بصحة ختي بغيت غير نطلبك طلعي لبيتي جيبي لي شي حوايج عاديين ديال لخروج ماشي لخدمة و لمجر لي حدا ناموسيتي فين حاط لوراق جيبي لي باصبور ديالي و لكرطات لي معاه....
اسماء: ياك لباس واش عندك شي خدمة تاني...
سمير: والو غير عصام قال لي ندي هاجر وحاتم لمغرب....
اسماء : كفااش..صبر صبر تا انا نجيب وراقي ونمشي معاكم..
سمير تنهد بشوي : ختي اسماء نتي اتبغي تمشي مع مك وانا هاد ساعة راكي عارفة جيبي ليا غير لي وصيتك عليه صافي...
اسماء: شفتي اماما سخونية راس فين كا توصل مولاها ها عصام من نهار خرج ما عاود رجع ولا تاصل و سمير تا هو اففف ما درتي فيها مايصلح اماما ...
الياقوت حاطة يديها على جنب راسها بقات ساكتة ما عرفات ما تقول....شافت اسماء تا عيات ....
اسماء: مابقى عدنا ما نديرو هنا ..نوضي وجدي راسك نشدو طيارة نرجعو لديورنا...
الياقوت هزات راسها : و ولدي...
اسماء: خلي ولدك تا يتفش و يرجع عندك ها هو ايرسل مراتو لمغرب اوا خدمي داك راس عندك وتهلاي فيها وفكريها فلي نساتو وعامليها بحال بنتك و طلبي منها سماحة و ديك ساعة ولدك هو لي ايجي يبوس ليك يديك بجوج .. وداك ليتيم لي حررتيها فيه مسكين طلبي منو تا هو سماحة راه خونا و عزيز عدنا وعصام من نهار مات باه وهو لاقي عليه صهد من كلشي ولي شافها يعطيها ليه عصام و فلخر تنوضي نتي تخرجي لعيب مجاتش اماما و الله ..
طلعات لبيت سمير خلات الياقوت غير كدور فعيونها وكل مرة تمسح دمعة من طرف عنيها قلبها طايب على ولدها لي من نهار خرج ماجات عينو فعنيها حتى من سمير غير شافها وهو يقلب دورة عرفات جرحاتو ولكن مضناتش يدير هكذا من يشوفها....
دخلات لقهوى كتلعب بشعرها مشات نيشن عند باها لي جالس فطبلة مع جدها سلمات عليهم فرحانة و جلسات بيناتهم كضحك ...
اريج : وينو على جدي زين... ناس يكبرو ونتا غير كتصغار...
حميد هز راسو كيضحك : الله يخلف عليك ابنتي نتي بعدا كتعرفي حسن من ديك هتلر لي عندي فدار ...
كمال شاف فبنتو كيلعب ليها فشعرها : بنتي اش جابك عندي مع صباح وليوم لحد هو لي عندك ترتاحي فيه ...
اريج حطات راسها على كتفو : شفتي اش دايرة ليا مراتك راسلاني مع هاد صباح قالك بغات فلوس تقضية ....
كمال تنهد و مزادش الهضرة دخل يدو فجيبو جبد لفلوس وحطها فيدين بنتو : ها هما غير يا ربي تسكت و متقولش مقدونيش تاني...
اريج هزات لفلوس كتحسب فيهم : اوا نتا لي طالق لحبل اكاميلتي اما نهار لول يموت لمش ....
سي حميد هز راسو كيضحك شار لنسيبو لي تاهو كيدور فراسو بكلام بنتو ما لقى ما يقول ...
اريج حطات لفلوس فصاكها و هزات فيهم حجبانها : شنو زعمة مكاين ضيافة لا عصير لا كريب لا طاغت لا والو ....
شير كمال لخدام عندو يجيب ليها كل لي بغات و هي ساهية بيناتهم كتهضر عادي مرة ضحك مرة تغوبش كتبان بنت عمرها مفششة من باها وعاجبها راسها غير مهتمة بالأعين لي مرة مرة كيتوجهو ليها وهي دات جمال بريء وفنفس الوقت خلاب اما شعرها طويل خلى كل من يراه يسحر به من شدة لمعانه وجماله ......
فطبلة بعيد منهم كيجلس شاب وجوج من صحابو عنيهم على اريج من دخلات وهما مراقبينها...
تكلم واحد فيهم كينغز لي حداه:عماد هديك ماشي هي ديك لبنت لي جات لحفلة عيد ميلادك...
تكلم تاني : انا من لور قلت هي ولكن وجها كيبانو ليا ملامحها ماشي بحال داك نهار...
الاول خرج عينو: واش فلوس هدوك لي خدات من داك راجل...
التاني ضحك من جنب: وراه باين القضية من كلام صحاباتها ديك نهار سيدة هازة خنافرها علينا لسما تقول هنا نبات وهي مدورة عليها غير شارف على خوه....
دورو عنيهم لعماد لي مزال عنيه على اريج وفالفلوس لي كتحسب ...تزير بزاف فطريقة لي كتهضر بيها معاهم و ضحك و كيف كانت كتهضر معاه و منفخة عليه وهو تابعها ....
عض فمو من لحت بجهد و صاحبو حداها كيشوفو فبعضهم و يرجعو يشوفو فيه سكتو تا هما من لقاوه ساكت....
شافها خارجة وهو يتبعها تم نيت معصب....
اريج هزات تليفون دخلات لعند سمير لقاتو قرا لميساج و مردش عليها...عضات فمها من جنب موركة على تليفون تم نيت صونات عليه....
فور ما تحل الخط اتنطق وهي تجرها يد بجهد خبطاتها مع الحيط ،غوتات بجهد من تقصحات خرجات عنيها بصدمة فعماد لي كينهج قدامها....
اريج بتلعتم : عماد....
عماد جرها من دراعها خبطها مع صدرو: شنو زعمة قدامي كدير عليا الملاك طاهر ومعاهم كتحسبي لفلوس الكلبة....
اريج خرجات عنيها فيه ما فاهمة والو : طلاااق مني نتا واش حماقيتي اش بيني و بينك اخويا...
عماد زير على الكف ديالها بجهد: بزااف على كلبة بحالك نكون خوها كنت كنصحابك مختالفة عليهم ساعة كلكم طين وحدة تابعين غير لفلوس.
..
اريج مخنزرة نترات يديها منو و مزال تليفون بين يديها والخط دايز: نتبع لفلوس ولا لي بغيت نتا اش دخلك كاع ابنادم فيا .."دفعاتو كارهة" ...يخخخ تفو عنداك تصحاب دوزت انا وياك جوج كلمات تبقى تحكم فيا راني ماشي من هدوك لي دزتي عليهم...
هز يدو كافر عليها ضربها بطرشة تا تزلع ريقها و دم خرج كيجرجر من نيفها شداتها دوخة و بزربة حنكها حمار و دموع هبطو كيسرسبو من عنيها...خشا يدو فشعرها لواه بين يدو صرخات بألم...
عماد عينو حومر كيسوط من نيفو حدا وجها: هدوووك لالياتك المصخة لي كندوز بيهم اما نتي لي جا يمسح فيك رجليه .. ."هز صبعو فوجها بتحدير"...مزال تباني قدام عيني نحفر لوالديك قبرك تم نيت....
اريج كتبكي بحال لبنت صغيرة مقصحة و دم مبغاش يحبس من نيفها : اييي هئ اهئ قصحتيني طلقني اهئ طلاااق شعري..اش عملت ليك انا كاع الحمار....
كيف نطقات لحمار تغمضو ليه عنيه عليها مبقاش كيشعر بنفسهو خلطها بين يديه فين ماجات يدو كيعطي وهي كتغوت ربي لي خلقها وحيت جات فزنقة خاوية ماكاين لي يسمعها....
عماد من تحت سنانو عاود جرها بجهد من شعرها جرجرها فالارض كلها تحردات من رجليها : انا حمار ابنت الق"" ليوم نقتل مك ..انا ضحكي عليا البرهوشة حاسبة راسك مطورة اديريني فصبعك بداك تعامل لي تعاملتيه معايا ...
دخلو دراري كيجريو فكوه من فوق اريج لي بزز باش كتنفس بضربة لي عطاها لكرشها زواها....صحابو كفرو عليه...
-وااش حمااقيتي شهااد لحالة لي داير فالبنت...
عماد كيدور و يدفع باغي يرجع يقتلها و صحابو كيجروه وهو عاد كيزيد يعرعر حاس بشمتا وماعمر شي بنت لمرا شمتاتو....
- صااافي اعماد حبس البنت اتمووت لينا فيدينا ..
هز تليفون يعيط لإسعاف وهو ياخدو منو عماد ضربو مع الحيط شتتو...
عماد : خرجووو من هاد صوووق ما يدخل تا قواد بيني و بينها...
اريج هزات راسها كلها دم جمعات رجليها لعندها كلها كترعد و تبكي .. بألم نطقات: انا ممم مادرت ليك والو....
عماد تم غادي عندها كافر ودراري جروه لجيه وهو كيخوي ليهم من جيه عصبهم....
-وا حباااس المرض اااش بينك و بينها كاع دير هاد لحالة فيها...
عماد ضرب يدو لصدرو:اناااااا لي عارف فخرجووو من هاد سووق وخليني بيني و بينها...
-واش من نيتك كتهضر البنت ما دارت ليك والو اصلا نتا لي تابعها من لول...
توجه صاحبو تاني عند اريج لي كترعد: ختي واش نديك لصبيطار....
اريج دورات راسها يمين وشمال مخلوعة:لا ديني لدارنا...."بغا يجرها وهي تبعد منو كترعد" ...لا نمشي راسي....
بعد منها دري ورجع خنزر فعماد لي مزال وجهو حمر كيسوط...فلحضة صمت شهقات بصوت مرتفع ...كلهم دورو عنيها ليها وهي مخرجة عنيها فالهاتف و يديها كترعد كتر...حطات يديها على تليفون عنيها خارجين و قلبها داير عاصفة داخل قفصها الصدري ..بخوف نطقات...
اريج : سسس سمير...
سمير بصوت كيخلع: هاني جاي....
قطع الخط وبقا فقط صوت "بييب بييب بييب" كتسمعو بخوف....
بألم وقفات وكل داتها دم حالتها حالة..ببطئ رجعات لقهوى عند باها كتبحت عن ملجئ من العاصفة لي خلقات بيديها...
حطات يديها على كرشها بألم في لمكان لي ركلها فيه عماد....تنفسها قلال و ضبابة غلفات عنيها...دنيا كلها دارت بيها طاحت على وقفتها فاقدة الوعي امام المقهى ديال باها لي غير شافها بديك الحالة تهز قلبو لسما وتم غادي كيجري عندها بحال لهبيل و في فمو غير كلمة "بنتي"...
في قاعة الإنتضار في المطار ..جالسة فوق كرسي كدور فعويناتها فأرجاء لمكان بدون فهم...وقف قدامها عصام حط يدو على خدها بلطف كيداعبها ...
عصام : مالكي...
هاجر بعيون متسائلة: فين غادي نمشيو....
حاتم جلس حداها مبتاسم: انمشيو لمغرب اماما نلعبو تم كيف ديما....
هاجر: وعلاش مقلتوهاش ليا .....
حاتم شاف فباباه لي ساكت بقى كيدور فعنيه وهو يتبسم و عنيه كيبريو : انمشيو نشوفو لوطيل ديالك ...
عصام تنهد بشوي من شافها شادة لهضرة مع حاتم على الوطيل...هز قرعة ديال لما ومد ليها كينة شرباتهم وهي كضحك ....
هاجر عنيها كيبريو : اتخليني نمشي لدارنا ياك .....
عصام شد ليها فيديها : غادي نرسلك تجلسي معاهم ....
ديك الابتسامة لي كانت مرسومة على ملامحها ببطئ ختفات ونطقات بصوت متردد: اااا اترسلني ؟؟؟
عصام شاف فيها بصمت و طول شوفة تا ولاو حناكها يحمارو عاد نطق : مغاديش نمشي معاك ....
قبل ما يكمل كلامو طارت على يديه مزيرة عليه و قلبها كيضرب بجهد ...خرج من صوتها فقط : اننننننن....
هاجر بدون شعور دموع تكونو فعنيها : خليني معاك عافك تا تسالي و نمشيو بجوج ....
عصام برقة كيهضر معاها : منقدرش عندي مشاكل فالخدمة خاصني نحلهم ..ياك قلتي ليا توحشتي والديك و خوتك هاني انرسلك ليهم بقاي معاهم تا نرجع ....
هاجر هبطات ليها دمعة سخونة على خدها و شفاه ديالها سفلى كترجف بقات غير كتشوف فيه بدون رد ..بألم شاف فيها عرفها غادي دير هادشي من يقول ليها مغاديش نمشي معاك .....مسح ليها دمعة بلطف ....
عصام : علاش كتبكي ....
هاجر بتنخصيصة كطلع مع صوتها نطقات : اتخليني....
غمض عينو بجهد بالكلمة لي خرجات ...جلس حداها وجرها عندو جلسها فوق حجرو.. قاد ليها زيف من لقدام كيلعب فيديها ..حط جبهتو فوق جبهتها و كيهضر غير بشوي هي بوحدها لي كتسمع كلامو ....
عصام: معمري نقدر ..درتها مرة و مزال لأن كتحرق فيا و عمري نعاودها وخا يوقع لي يوقع....كلمة "نخليك" مكيناش بيناتنا انا بزز مني راسلك حيت خدمة لي تبعاني صعيبة ومنقدرش نبقى معاك ..وخا تجلسي هنا انا مغاديش نكون ونتي مزال مريضة خاص لي يقابلك بزز مني ازلزالي راسلك عند والديك حيت ما عنديش خيار اخر ...وانا مغديش نخليك بزاف لأني ما قدرش على فراقك كتر ....
هاجر بعيون كيتلئلئو: مغاديش تخليني ياك ....
عصام حرك راسو يمين و شمال : لا و معمري نديرها ..."تبسم بشوي وهمس ليها حدا ودنها بغى يبدل الموضوع"....من نجي نلقاك موجدة ليا راسك.....
هاجر شافت فيه بدون فهم : كفاش؟؟؟؟....
عصام بقى كيشوف فيها عاض فمو من لتحت وهو يغمزها عاد سرات معاها الكلمة ولات حمرة و كتهرب عنيه منو ....حط يدو على طرف خدها ونطق بالمهل ....
عصام :تهلاي فراسك و سمعي الهضرة منبغيش نسمع عليك شي حاجة ماشي هي هديك من نرجع .....
هاجر شافت فيه بنص عين: ندير لي عليا ولكن منضمنكش وانا غادة عند هتلر....
حط راسو على راسها كيضحك من نيتو على جوابها وخا ليل كامل وهو كيوصي فسي حميد عليها و يديرو ليها الخاطر ويعطيوها لي بغات لكن كيف قالت هي ما نضمنكش وانا غادة عند هتلر...
جمع الوقفة و نوضها معاه من شاف الوقت ديال طيارة هو دابا....قرب ليهم سمير هاز لوراق و ملامحو ممفرزينش شافو عصام و ميك ما هضرش.......
جرها بشوي لجهة ديال لبوابة فين ايتفارق هو وياها.. نزل عند ولدو حط يدو فوق شعرو كيلعب فيه ...
عصام : كون راجلك و تهلا فماماك تا نرجع ....
حاتم عنقو بجهد وهضر فودن باه: كون هاني ما نخلي لي يسرقها منا ....
هز فيه عصام حجبانو بينما حاتم تكلم من نيتو خلى عصام مبتاسم .....وقف كيشوف الأنتى لي حداه بشعور غريب مكيتفسرش ...حاجة مهمة ما اتبقاش فحياتو ..جاه شعور الوحدة لي حس بيه طول الوقت وهما مفارقين ...شعور الحرمان و العداب لي دوزو عام كامل...شعور ان بنت قلبو ما غاديش تبقى قربو ..ما يبقاش يشوفها كل صباح و يسمع لكلامها لي يخلي عقلو يطير ...
دور يدو على خسرها طلعها عندو معنقها بكل حميمية و شغف..حط راسو على عنقها كيشم ريحتها بصوت مسموع...دورات يدو على عنقو بجهد مخليا مشاعرها هي لي تحكم فيها ..
المشاعر لي تملوكها فهاد اللحضة بين الحزن والم الفراق ولو انها نسات كل لحضاتها معاه الا وهاد الايام لي دوزات معاه ولفاتو كتر من القياس و الحب لي مزال كينبض فقلبها ليه رغم انها معرفاش معنى هاد المشاعر لي كيملكوها تجاه عصام الا انها عارفة حاجة وحدة ..انها مراتو وهو راجلها....
بعد منها كيحاول يبتاسم ليها رغم ان ملامحو المتألمة كتخونو...قرصها فخدها برقة....
عصام : تهلاي فراسك...
حركات راسها ..شدها حاتم من يديها و بشوي توجه هو وياها لخروج...بقا سمير واقف حدا عصام لي دور عينو شاف فيه مزيان عاد نطق...
عصام: عينيك ما تغيبش عليها....
سمير:كون هاني....
تبع هاجر من لور وهو يعيط ليه عصام دار عندو و بصوت كيخلع نطق...
عصام: ما تخونش تيقتي بيك....
سمير هبط عينو لأرض:ما عمري نخونها....
فور ما وصلات لخروج دورات عنيها لعصام لي مزال واقف فبلاصتو كيشوف فيها....بقاو كيشوفو فبعض بصمت وفور ما جرها حاتم ختفات من امامو..مباشرة طلعات لطائرة خاصة فيها ست مقاعد و جوج مضيفات....
هاجر بان عليها توتر لكن حاتم بسلامتو واخد بلاصت باه معاها..جلسها حداه ودار ليها سمطة و كيشرح ليها كل حاجة بتفصيل....شد ليها يديها بجهد من شافها مخلوعة...
حاتم: ماتخافيش اماما هاني معاك....
هاجر تنفسات بجهد لكن فورا عنيها بداو كيتلصقو و نعاس غزا ملامحها بسرعة نعسات وميلات راسها لكرسي...
حاتم : كونان واش بابا عطا ماما شي حاجة نعساتها....
سمير هز راسو لهاجر: اصلا هي ديما كتشرب لكينة حيت كدوخ..."وقف حداها "...نوض جلس نتا فبلاصتي وخليني نجلس هنا حداها ما اتعرفش تعامل معاها وهي ناعسة...
حاتم شاف فيه ورجع شاف فماماه ..جرها عندو دور يدو صغيورين على راسها : انقابل ماما راسي...
شاف فيه سمير تبسم من جنب ورجع جلس بحالي جالس على شوك ...طفا تليفون ودور راسو جات عينو نيشن مع هاجر لي ناعسة بملامح هادئة و بعض شعيرات خارجة من زيف كتلامس وجنتاها بنعومة....
بدون شعور تهز قلبو بين ضلوعو كيعصف بالمنضر لي قدامو....هز يدو مسحور ..لامس صبعو خدها عاد وعى بنفسو ،بسرعة جبد يدو لعندو ..دور راسو لجهة لخرا هارب منها ..بألم حط يدو فوق قلبو الهائج و بصمت قلعات طائرة ليفارق الزوج زوجته مرة تانية.....
واقف امام زجاج خاشي يدو فجيبو وعينو متبع اتر الطائرة لي مشات فيها محبوبتو الغالية....وقفو حداه مجموعة من رجال ونطق واحد فيهم ..
-سي عصام بن جلول....
عصام دور عينو فيهم ببرود: شنو واقع ؟؟؟....
راجل هز ورقة امام اعين عصام: سي بن جلول انت موقوف بتهمت استعمال السلطة الممنوحة ليك في تهريب المخدرات ...
عصام زاد كمش حجبانو كتر ..خدا الورقة قراها ورجعها ليه ببرود دخل فيهم و زاد ويدو فجيبو مخنزر ..غادي قدامهم بحال شي سبع ما خايف من والو .. تابعينه من وراه كيشوفو فبعض ما فاهمين والو فقط سؤال كيدور ليهم فراسهم....
"واش هادي كاملة فيه شجاعة ؟؟ او حيت يدو واصلة لدرجة فاتت القانون ؟؟؟"...
ركب فسيارتو وعنيه حمرين ولي فراسو ما عارفو حد من غيرو بسرعة ديمارة طونوبيل طاير...وصل لمركز شرطة بلاصة طونوبيل ودخل نيشن لعند شاف وبحكم عارفينه ما حبسو تا واحد....
جيمس لي كان وجهو صفر بسرعة جمع الوقفة من شاف عصام دخل عليه : عصااام شهادشي سمعت...
عصام جلس فوق كرسي مفرق رجليه رخف كرفاط وحل جوج صدايف لقدام و تخنزيرة مختفاتش من وجهو..بعصبية ضرب يدو مع طبلة : انااا لي جيت نسولك اجيمس شهادشي راسل ليا ....
جيمس هو اب سام صاحب حاتم و بينو وبين عصام صداقة قوية ...تنهد بجهد وجلس فلكرسي قبالت عصام : هادشي وصلنا ليوم مع 5 ديال صباح شي واحد علم بيك بأن البضاعة لي جايا فالباطو بإسم شركة ديالك محمولة بمخدر الهيروبن.....
عصام خرج عينو فيه بينما جيمس تنهد بحسرة : وللأسف هادشي كاين و حاليا البضاعة ديالك محبوسة عدنا ..."هز يدو بجوج"...القضية خرجات من يدي وتوجهات لناس كبر مني.....
عصام فدوامة صدمة ديالو كيحلل كلام جيمس حرف بحرف....
جيمس شافو ساكت وحيت عصام من نوع الكتوم و الجامد تا حاجة مكتبان على ملامحو الجامدة خلا جيمس ما فاهم والو فيه تا من تعابيرو ممقروؤينش فقط عبنو لي كيتحركو ....عرف ما عندو ما يبقى يلوي فلكلام مع شخصية عصام وهو ينطق نيشن بدون نفاق...
جيمس: عصام مع كامل لأسف التهمة تابتة عليك ..حاولت ما امكن ما يخرجش الخبر لإعلام ولكن لا ملقيتيش حل صورة شركة ديالك اتضرر ونتا اتضرر كتر ..تجارة بالمخدرات حكم ديالو صعيب خصوصا لكان واحد بحالك عندو سلطة فيدو..."حط يدو على كتف عصام"..تايق ماشي نتا مول هادشي ولكن كل الادلة كيوجهو صبعهم ليك....
عصام بقى صامت بحال شي بركان خامد ولا حرف نطقو او حتى رد فعل جسدي عملو ...
دخلات عندهم فرقة متكون من تلات اشخاص ونطق واحد فيهم....
-سي عصام من حقك تطلب المحامي ديالك و تلتازم الصمت ....
قربو ليه جوج رجال بغاو يديرو ليه المينوط وهو يمنعهم جيمس مخرج عينو فيهم...
جيمس:واش عارفين شكوووون هذا....
-جيمس القانون هو هذا نسا عليك صحبة فهاد الوقت ..
عصام جمع الوقفة ومزال صمت المميت من طرفو ...وقف بنضرات سودوية وجهو جيمس لغرفة لي ايحققو معاه فيها و الفرقة تابعين من وراه كلهم عارفين عصام بحكم بزاف المرات كيتلاقو بيه و خصوصا هو عندو علاقة صداقة قوية مع شاف ديالهم ...
فور ما وصل لباب ديال الغرفة..تجمد فمكانو وعقلو لي كان كل الوقت كيدور و كيحلل فكل لي جرا...
بهاد جمود وردة فعل جسدو واضح لقى راس الخيط...تبسم من جنب وما بين سنانو نطق اسم لي ما دكروش طول هاد خمس سنوات و مطاحش ليه فالبال...
عصام بغضب مكبوت : ميار....
جلس فوق كرسي امام طبلة متوسطة لقاعة وقدامو جالس قائد ديال لفرقة لي من عنيه حامل نضرة اسف بحكم هو عصام بيناتهم صداقة قوية.....
عصام بدون ما يرد على كلام جيمس نطق بصوت مسموع: دي رجالك وقلب فالمحمية..."هز صبعو كأنه تفكر حاجة"...ماشي المحمية كاملة فقط لحيوانات لي ايخرجو هاد ليلة من المحمية...."بهدوء حط ضهرو على لكرسي داير رجل فوق رجل والبرودة كاسية ملامحو الغاضبة"...عندكم ساعة ونص....
جيمس بقا غير كيشوف فمكانو كيتبادل نضراتو مع كارل لي جالس امام عصام...
كارل:عصام واش كلامك كيعني انك قابل تهمة لي موجهة ليك....
عصام مجوبوش وانما جاه نيشن: دي رجالك تم وحسن ديرو احتيطاتكم غادي يكونو مسلحين...
كارل ما فاهم والو دار اشارة لفرقة ديالو تحرك وهو جمع الوقفة كيشوف فعصام بتسائل: كنتي عارف هادشي ايوقع ....
عصام ببرود نطق : كنت متوقع غير المحمية مضنيتش توصل يديهم تالشركة ديالي ولكن.....
كارل طلق ودنو عارف عصام من كيهضر فالمهم وكلامو ماشي من فراغ : ولكن شنو ؟؟؟؟..
عصام زير على الفك ديالو: عقلتي خمس سنين هادي كان عندي مشكل فالمجوهرات لي كتوصلني مزورة....
كارل كمش حجبانو رجع داكرة ديالو لماضي ..حرك راسو بشوي: اه عاقل ولكن ما لقينا تا دليل ....
عصام كيحرك صبعو على لحيتو :كنضن عرفت شكون ورا هادشي؟؟؟..
كارل خرج عينو فيه :شكوون؟؟...
عصام شاف فساعة ديالو: الوقت كيضيع....
كارل تنهد بجهد خارج من لغرفة وهو يدور عند عصام : تبغي تمشي معانا....
فور ما نطق كلمتو جمع عصام الوقفة داز قدامهم كيف الاعصار كأنه كان كيتسنا كارل ينطق هاد لكلمة....تابعاه لفرقة بقيادة كارل ونائب ديالو جيمس وامامهم عصام لي كيهضر فتيليفونو بالألمانية...جيمس وكارل شافو فبعض كيهضرو غير بعنيهم وبمعرفتهم بعصام حاسين رد فعلو اتكون كارتية فهادا لي لاعب ورا ضهرو لأنهم بجوج تايقين ان عصام بعيد كل البعد انه يتاجر بالمخدرات ...
ولف و غربة...هادو هما مشاعر لي تملكو هاجر وهي وسط عائلتها لي كتعرفهم و مكتعرفهمش فنفس الوقت...
زمان لي نسات تغيرو فيه شلا حوايج فالعالم لي هي فيه....من كانت مع عصام مكانتش رادة لبال لهادشي أانه كان مقابلها وراد ليها لبال لصغيرة و لكبيرة حتى من دوا حافظ ليه وقتو ..بينما الان العائلة لي خاص تحس بيناتهم بالولف و الحنين لقات نفسها غريبة بين حبابها.....
حط جواد يدو على كتفها وهي تقفز من مكانها...كلهم حلو عنيهم فيها بينما هي شدات فحوايجها مزيرة...
جواد بحنية: صغيورة ديالي مالك قفزتي انا غير خوك...
هاجر حلات فمها و رجعات سداتو ..خوها لي فبالها غريب على الاخ لي قدامها...
سي عزيز جالس فجنبها حس بيها مزيرة وهو يعنقها من جنب: ما تبززجيش على راسك ابنتي ....
هاجر مسحات دمعة بضهر يديها : ولكن كلشي تبدل ما بقيت عارفة تا حد....ايوب كان صغير بزاف ودابا شوف كيف ولا ...
ايوب جالس فوق طبلة قدامها: وراه ضروري نتي فاقدة داكرة اختي راه حنا لي فعقلك كان من كان عندك 13 اما دابا راه نتي 23 وانا 20 عام راه ضروري ما نكبر و نتبدل علاش نتي ما شفتيش راسك شحال تبدلتي...
هاجر وجها ولا حمر حركات راسها بشوي: ااه شفت...
جواد: هانتي معانا دابا وسطنا وكلشي اتولفيه و يمكن كاع ترجع ليك داكرة بيناتنا علاش لا..."حط يدو فوق شعرها بحنية"..مهم رجعتي لينا بصحيحتك هادشي لي طلبينه اما حاجة خرا راه كتجي مع الوقت....
حليمة دخلات هازة صينية و وراها زاينة هازة بلاطو فيه لحلوى...شافت فحاتم لي جالس حدا ولدها ساهي فيه...حطات بلاطو فوق طبلة وقربات ليه مبتاسمة...
زاينة: حاتم بغيتي نفيقو يلعب معاك....
حاتم مبهوض: صغيور بزاااف...
زينة : هدو هما دراري صغار تا نتا كنتي بحال هكذا من تولدتي....
حاتم بقا كيشوف فتربية جاه بحال شي نونوس لصغر حجمو ...هبط من سداري مشا كيجري وقف قدام هاجر و عنيه كيبريو....
حاتم: ماما ولدي ليا تا انا خويا....
هاجر وجها بسرعة تصبغ بالحمر قدام باها وخوتها ..خرجات فيه عنيها باش يسكت وهو عاد زاد...
حاتم: عاافك قولي لبابا يجي خلاص يدير ليك وليد.."حط يدو على كرشها"...يكبر ليك هنا ....
هاجر شداتها دوخة بشدة الاحراج و الحشمة خشات راسها فالمخدة معوداتش هزاتو ...
حليمة شافت فسمير لي جالس حدا سي حميد ساكت غير كيسمع و مكيدخلش فالهضرة : سمح لينا حيت مقصرين في ضيافتك اولدي راه هادشي لي طاح علينا ما عرفنا منين نزل من هاجر لأريج الله يستر تقول غير عين و خرجات فينا...
سمير حرك راسو بشوي: مكاين لاش الالة حليمة ماشي اول مرة اندخل لدار...
زاينة مدات ليه كاس اتاي: وخا هكاك اخويا ضيافة واجبة لكن لعقل لي يدير تلف وخا سي عصام علمنا ول لبارح انكم اتجيو ...
سي حميد تنهد بجهد: حمدلله من دازت طريفة و البنت رجعات سالمة غانمة ....
هاجر مخنزرة: شمن طريفة احميد تا نتا الله يهديك شفتي البنت حالتها كيف دايرة انا يجي قدامي هاد لحمار لي دار فيها هاد لحالة نغزز والديه بسناني....
حليمة حطات يديها على راسها : ما خلينا فين جرينا درنا شكاية و كلشي هي قالت تعرضو ليها شي دراري مكتعرفهمش والبوليس قالك حقا ما حقا زنقة لي تعرضو ليها فيها خاوية تا حد ما شافهم....
سمير هز عينو بجهد مورك على الكاس لي بين يديه: شنو قلتي قالت.....
زاينة: قالت ما شفتهمش مسكينة و....
مزال كتهضر حتى تسمع صوت الكاس مهرس بين يدين سمير....هاجر بزربة شهقات مشات عندو كتنقز برجل وحدة...شدات ليه يديه مخرجة عنيها....
هاجر: نااري دم..
بغات تحيد ليه جاج من يدو وهو يشد ليها يديها بعدها بشوي...
هاجر مخسرة ملامحها بجرحة لي فيدو: لا ما بغيت والو غير شري ليك دوا لديك جرحة.....
حرك راسو وخرج من صالون مخنزر..هبط لتحت لبيت لي عطاوه ليه ينعس فيه بحكم عصام خبرهم انه ايبقى مع هاجر تا يرجع...
خرجو رجال كاملين خلاو لعيالات يهضرو بوحدهم...حليمة جرات بنتها لعندها....
حليمة مصغرة عنيها : شفتك حالتك حالة شهاد لقميش لي فيك...
هاجر هزات صاكها كتقلب فيه: كان فيا شحال هادي....
حليمة عارفة بنتها ما كتخرج حرف من فمها من كانت صغيرة وهي هكذا ...هبطات عنيها لصاك: اش كتقلبي تم...
هاجر : واحد كارطة عطاها ليا عصام قالي كنخرج منها لفلوس لي نحتاج....
حليمة حكات يديها : عطيني نشوف...
هاجر بعدات راسها منها كتشوف فيها بنص عين : حليييمة ما بغيتيش تبعدي منك هاد قاعدة ديال لهريف....
حليمة خرجات عنيها فيها: راني غير انخبيهم ليك و صافي....
هاجر: اييييه باش عمري نشوفهم ..لا اختي انا هادشي عطاه ليا راااجلي ما نعطيه لحد....
حليمة حطات يد فوق يد: ايييه وليتي تقوليها ليا فوجهي نيشن بلا حشمة تقول غير نتي لي مزوجة....
هاجر ضحكات تا بانو ليها دروس لعقل: ومالكي لقيتي بحالو .....
حليمة بقات غير كتشوف ما عرفات باش تجاوبها بينما زاينة كتموت بضحك عليهم.....
لابس سروال تجين زرق مزير على فخادو المطراسين مع تيشورط كري..داير نضارات ديال شمس و مخلي شعرو هابط على جبهتو...
خرج من دار هاجر و تمشى فالحومة بكل نخوة و رجولة ما كيلتف لتا شي حد و كلشي كيشوف فيه ويهبطو عنيهم و يطلعوها فيه...وهما لي عارفينه مزياان بحكم ولاد حومة وحدة وخبارو كانت دايعة بحماقو و ديعان ديالو فزناقي و شحال ضحكو عليه ..
ها هو ليوم نفس شخص كيتمشى قدامهم بأبهة حلة و وسامة لا نضير لها والهدوء لي ذاير بيه لي من دون وعي كتاسبو من عصام بحكم كان هو يدو ليمنة فكل اعمالو وكان كيحضر فكل الاجتمعات تا ولات شخصيتو كتميل لشخصية عصام شيئاً ما...
ديك الابتسامة لي كانت ديما مرسومة على ملامحو تحولات لجمود ... واقفين جماعة ديال عيالات مترأساهم فضيلة لي مزال لفضول و نميمة ما بغاو يساليو منها...
فضيلة: نتوما شفتو هادا كيف ولا ولالة....
-شفت اختي لي يقول كان حمق ودايع ما يتيق.....
فضيلة:اييه على سعاد زغبية شحال كانت ضرب فيه وتحرش عليه خوتو يقتلوه عصا وها هو دار شان لراسو وريال لحمر محال كتشوفو منو....
- اشمن ريال راه مزال كيحلبو فيه شفتي عرس خوتو هو لي خلص كلشي من جيبو تا لبس ديال لعروسات شراه هو وفلخر تا واحد فيهم ما عرض عليه .....
فضيلة: شفتهم يا ختي وشحال بقى فيا الحال عليه ولكن متخافيش عليه بنت لعسكري دارت معاه لي ميدار.....
فضيلة: وشوفي ليك زلزال ما بقات تا رجعاتو لبين يديها ومخلات لبنت لمرا تحلم بيه....
دودودودو ...هضرة تجيب هضرة مكيسكتوش ولمرا لي دازت دخل معاهم فالهضرة تا حشمو رجال لي كيدوزو من ديك زنقة و يبدلو طريق و عنيهم فالارض و هما ما بغاو يحشمو ادن لمغرب وهما مزال موضوعهم ما سالة ولا عمرو يسالي...
دخل لجهة زنقة لي فيها دارهم ..كيلعب بساروت بين صباعو عاض فمو من جناب....
وقف قدام بابهم ايدق وهو يسمع سميتو..دار عند شخص لي كيعيط ليه...بمجرد ما شافو تبسم وحيد نضرات ديالو..قرب ليه سلم عليه سلام عزيز...
سمير: با محمد لباس عليك...
با محمد: حمدلله اولدي كنتسناو وقتنا يسالي اما صحة مشات...
سمير: لواه ابا محمد مزال بصحتك و العمر طويل نشالله.....
با محمد: هادي اولدي هي دنيا ولا بد يجي نهار لي نفارقوها ...
سمير: ونعمة بالله ..."هز حجبانو "..با محمد واش باغي تقول سي حاجة....
با محمد ضحك ضحكة صفرة: والله اولدي ما بغيت نخرج العيب وداير غير بوجه باك الله يرحمو ولكن خوتك...
سمير: ياك لباس واش اداوك فشي حاجة....
با محمد: اولدي لكان غير الادية ندوزها ولكن خوتك كلاوني فرزقي كانو كياخدو مني سلعة و كيقولو قيدها تا لخر شهر وانا تايق بيهم ما نويتش يديرو ليا هاد تجرجيرة كاملة ..كون كانو فلوس قليلة نسامح ولكن راه سبعة لمليون ما يجمعها غير لفم وانا ما خليت ما رسلت ليهم وهما حلفو لا بغاو يخلصو وعلى وجه المرحوم ما دعيتهمش ....والله اولدي ما بغيت نقول ليك شي حاجة ولكن رزقي ورزق ولادي هادا....
سمير مزير على فكو نطق: حلالك ابا محمد وما قلتي عيب..انا دابا مهازش معايا هاد لفلوس ولا شيك ....
با محمد قاطعو: اولدي نتا بعيد من هاد سوق انا غير قلت باش تهضر معاهم يعطيوني رزقي...
سمير: رزقك ايوصل ابا محمد و ايوصل كامل...."شاف لحانوت" ..كتبقى حال تال لعشا...
با محمد: لا ملقيتينيش فيه اتلقاني غير فداري اولدي ونيت دوز شوف الحاجة حيت كتسول عليك بزاف....
سمير حرك راسو: مع جوايه لعشا تلقاني عندك وبرزقك كامل....
توادع مع راجل ورجع لباب دق بجهد مخنزر ...حلات ليه بنت سعاد مبهوضة....
دخل وهي تبعاه من لور كتطلع و تهبط فيه...كان كلشي جالس فصالون حتى دخل عليهم كيف ملك الموت .. خرجو عنيهم فيه و فحضورو لي ما ضرب ليه حد لحساب وهو كتر من ربع سنين ما جات وجهو مع وجوهم وغير تليفون لي بيناتهم...
جلس فوق صداري حط يدو فوق المخدة و يد مزال مزال فيها ساروت كيلعب فيه..دور عينو على عيالات خوتو لي ما كيعرف فيهم تا وحدة ولا عمرو شافهم ولا شافوه ... داز لخوتو واحد بواحد عاد ستقر على سعاد لي لون مخطوف من وجها..تبسم بجنب و نطق...
سمير: سلام مكيناش فبلادكم ولا دغيا نسيتو خوكم...
تعبير الصدمة مرسوم فوجه كل الحاضرين و فالبعض هناك حيرة....اول ما ستافق من صدمتو هو خوه لكبير لي وساعت الابتسامة ديالو جمع الوقفة غادي يعنقو ...
سعيد : واش خويا صغير هدا لي جا عدنا....
سمير رغم معصب الا ان احترامو لخوتو واجب رد عليهم سلام وهما كيضحكو وهو ساكت...شاف فعيالات خوتو لي وقفو يسلمو عليه من لوجه لكن كان منو يحرك ليهم راسو فقط هما و سعاد و رجع جلس .....دور عينو على دار لي عاش فيها طفولتو و شبابو ...شاف فسعاد لي مبهوضة بإبتسامة مزينة تفاصيل وجهو الخلابة .....
سمير :مِيمَة "مرت باه" مغاديش ضَيفيني....
فاقت من سهوتها بتلعتم : اللله اوليدي سمير هي لول.....
جمعات الوقفو دارت إشارة لعريسات يتبعوها و جرات حنان لي مزال ساهية فسمير ..كلهم مشاو الكوزينة خلاو لخوت بوحدهم جالسين فصالون ..
سمير ضحك بصخرية بديك "ولدي"لي نطقاتها سعاد وهي لي كان في فمها غير لحمق ...هز راسو فخوه لي قال ....
سعيد: كيف داير اخويا لباس عليك وكيف داير مع شي غربة ما بقيتيش كتبان كاع من نهار جنازت الواليد ...
سمير شابك يدو الوسط حاطهم فوق رجلو : علاش قلتو ليا اجي ولا توحشناك وما جيتش ...
مروان اخ المتوسط حط يدو على كتف سمير : ما بغيناش نشغلوك معانا ونتا كنتي متبع قرايتك و من بعد خدمتك اش ادير بينا حنا تا لعيطنا عليك اش غادي نزيدوك من غير صداعنا و مشاكلنا ....
سمير حك لحيتو بالمهل : و الفلوس..كنتو مسالين تسولو فيهم ....
سعيد : نتا ربي عطاك خدمة مديراش و الفلوس كيتشتتو فيديك كتفكرنا مرة مرة الله يرضي عليك و نيت جيتي فوقتك كنت معول نعيط عليك ...
دخلو لعيالات حطو كل ما لد و طاب فوق طبلة و سعاد بصينيتها جالسة كتكب فأتاي....
سعاد: اوا ولدي سمير كيف دايرا شي خدمة امورك هانية..."سمير حرك ليها راسو بصمت بينما هي طلعات و هبطات فيه بشك"...بنتي ليا درتي عقلك على سلامتك ....
سمير هز عينو كيشوف فيها مزيان تا تزيرات عاد نطق : الله يسلمك ...
سمير : حمدلله..."شاف فعيالات خوتو لي حاضينه تبسم ليه و رجع شاف فحنان "...شفتك مزال متزوجتي ما معولاش نفرحو بيك تا نتي ....
حنان وجها ولا حمر شافت فمها و فدراري حشمانة جمعات الوقفة هاربة من قدامهم بقى سمير متبع ليها لتار تا غبرات عاد تبسم بإستخفاف ورجع نضراتو لخوتو ...
سمير : شمن خدمة كنتو باغيني فيها .....
سعيد : اوا كبف ما كتعرف الواليد الله يرحمو و انا هو كبير ديال دار و كلامي من كلام الواليد....
سمير صغر عينو فيه : المعنى....
سعيد : المعنى هو راك كبرتي و العقل درتيه و الخدمة راك جمعتي فيها لي قسم الله دخل بحالاتك دير شي مشروع معانا و جلس بينتنا تزوج و دير لولاد ...
سميرضحك بزز منو بانت ليه حرف زين مزينة خدو : هي موجدين ليا المرا على هاد لحساب...
مروان : ها هي حنان تربات معانا و كنعرفوها مزيان و كتعرفها نتا نيت ما نلقاوش بحالها.....
سمير هز فيها حجبانو : حنان..."شاف فسعاد"..بنتك...."جمعهم كاملين فنضرة وحدة بتخنزيرة"...واش كضحكو عليا هنا ولا دايريني بيناتكم تفلية ....
سعيد : حااشة حنا بغينا غير مصلاحتك ...
سمير ضرب يدو مع طبلة تسيف عليهم كيف الحنش : مصلاحتي اسيدي انا لي انعرف ليها ولمرا لي اناخد انا لي انختارها ماشي تختاروها ليا نتوما ..لا نسيتو اش دارت فيا هاد حنان و مها ولا نتوما انا منسيتش ....
سعيد جمع الوقفة كيجمع فجلايلو : شفتك كتغوت فوجهي بلا حشمة بلا حية يكما درتي جنحين وباغي ديرهم فوقي ....
سمير مخنزر : انا ما بغيت نطلع فوق حد وجيت باش نقول ليكم حاجة وحدة دوك ريالات لي كتوصلكم كل شهر نساوها وضبرو لمخكم ديك ساعة ....
مروان ضرب كاسو مع طبلة : جلس لأرض نكملو معاك الهضرة بان لي تعاديتي من داك عصام تا ما بقيناش كنبانو ليك حنا ....
سمير بقى واقف كيشوف فيهم بصرامة : هو بعدا لقيت فيه لخير حسن منكم ....
تحل صمت بصوت صفعة لي تحطات على حنكو بجهد ...وجهو مايل مزير على يدو وكلو كيترعد بلأعصاب...دور عينو لسعيد لي صرفقو كيتنفس من نيفو هز فيه صبعو كيترعد ...
سمير : حمدلله كنشوف فيك وجه الواليد اما كانو ليوم ما يلقاو ما يجمعو فيك ...
سعيد بغى يعاودو جرو غير مروان : اجيي اجي ضربني نستااهل ..من بقى صغير يهز صبعو فوجه لكبير ما بقى حترام ....
سمير هز ساروت باغي يخرج ايطرطق ...حبس فباب صالة من سمع خوه ...
سعيد : تخرج من هاد لباب ما تبقى منا ما حنى منك و عمرك تحلم تاخد من الورت لي خلى با....
دار شاف فيه مزيان حل فمو يهضر ورجع سكت من سمع صوت بكى ديال طفل صغير ..شاف مرات خوه مشات كتجري لبيت خرجات منها وليد صغير و كتراري بيه باسم "محمد اسم الاب ديالو" ...بالعرض البطيئ شاف فخوه ....
سمير : طلبتي مني الفلوس و مخسرتهاش ليك فوجهك ..تزوجتي بلا ما تعرض غعيا و دوزتها ..ولدتي واخر واحد يعرف هو انا ....هاز سلعة من ناس بالملاين و مخايني انا نخلصها عليك..."صرط ريقو بألم "...عندكم صح داك لي كان جامعنا مات..."هبط راسو مزير"...الله يعاونكم فكلشي....
بسرعة خرج باغي ينفاجر...ناس كيوقفو يسلمو عليه وهو معايش معاهم كيدوز فيهم محاسش و طريق قدامو مضلمة بلأعصاب لي شدوه ...وصل لطونوبيل لي حاطها قدام دار عائلة هاجر ...حل لباب و بديك لعصبية رجع سدو بجهد ...حط يدو فوق من طونوبيل وحط فوقها راسو كيتنفس بجهد....سمع صوت حنين كيعيط عليه من لفوق هز راسو جات عينو نيشن مع هاجر لي كطل عليه...فنفس الوضعية لي هو فيه نطق...
سمير : مالكي ؟؟
هاجر : طلع علاش واقف تم ....
سمير : ونتي اش كديري تم ...
هاجر ضحكات بدلال: كنتفكر يامي .....
رغم الأعصاب و الألم لي فيه ضحك من نيتو وشاد معاها الخط هو لتحت وهي فالباركو ....
سمير : وتفكرتي شي بعدا ولا غير واقفة تم ....
هاجر : صراحة صراحة ما تفكرت والو جاني غير جوع ....
سمير حرك راسو : طلعي....
هاجر : فيييين ....
سمير : تاكلي و نرجعو .....
هاجر عضات طرف لسانها: تسنا هاني جايا بزربة ....
دخلات من لباركو غادة لبيتها كطير شافتها حليمة لي جالسة كتفرج ....
حليمة : اديك لعودة فيم غادة كطيري ....
هاجر : انخرج غير ناكل مع سمير و نرجع علاش كتسولي ....
حليمة كتكل فزريعة : وراجلك معيطش عليك .....
هاجر هزات كتافها : أصلا هو قالي عندو الخدمة مزيرة ممساليش ....
حليمة دورات راسها : سيري ابنتي سيري كاع دير الخفة فيك مشات ليك مع هاد ضربة ..."شافتها هابطة"...غير بشوي على رجليك اديك البغلة ...
دخلات لبيتها بغات دي معاها حاتم لقاتو ناعس فبلاصتو حال فمو نصف حلة و فوق منو الايباد ديالو ...هزاتها شافت اش كان كيدير لقاتو كيلعب لعاب لي خسراتهم ليه كاملين نهار عطاها تلعب ...رجعات حطاتها فوق كافوز و قدات ليه لفراش مزيان ...شافت راسها فالمرايا كانت لابسة غير بيجامة ديال دار مع بنطوفة و معكسة راسها ...هزات تليفونها و خرجات عندو هكاك كتنقز على رجل وحدة ....
متكي على طونوبيل كيبقشش فتليفونو تا بانت ليه خارجة هبط عينو و طلعها فيها كيضحك ...
سمير : اتمشي هكا ....
هاجر خنزرات فيه : علاه كيف جيتك .....
سمير جرها بشوي كيضحك : صراحة لا جراو علينا عرفي لبسك لي دارها ....
هاجر : نتا فين غادي بيا بسلامة ياك اديني غير عند حميد لي عدنا فدرب ....
سمير عاونها تجلس و رجع جلس حدها ديمارة طونوبيل كيشوف فيها : ياك باغية غير تعمري كرشك اوا صبري تا نوصلو و تعرفي فين ....
خرجو من زنقتهم و شدو طريق لسونطرفيل ديال العاصمة ...طول الوقت وهما شادين فبعضهم مرة يضحكو مرا يقلبوها سباط....وخا نسات لكن معاه كتحس براحة ماشي بحالي من كتكون مع عصام بداك ضغط و الحشمة كتلقى راسها ماشي فطبيعتها عكس دابا مع سمير دغيا لقات راحتها و طلق ليها لسان ولاكلمة منها كلمة منو واخدة راحتها فالكلام و ضحك.....
في غرفتها ناعسة فوق ناموسية وجها حالتو بضرب ....دايرة فاصمة ليديها حاطها فوق كرشها ..ساهية فتليفونها بصمت و شعرها مطلوق كامل فوق ناموسية مدهب بصباغة لي دارت ليه ....سمعات صوت الهضرة برا وهي تكمش حجبانها ..بزز منها وقفات مخسرة ملامحها بكرشها لي مزال كضرها بركيل ديال عماد...خرجات من غرفتها متوجهة لصالون لي فيه الهضرة...
حليمة جالسة كتهضر مع سومية ..خرجات عنيها من شافتها جايا ...
حليمة : وري وري مالكي نايضة من بلاصتك ونتي مريضة حالتك حالة ...
اريج جلسات حداها بضعف وتحت عنيها زرقين ..حطات راسها على كتف حليمة و نطقات بشوي...
اريج : توحشتك اجدة علاش ما جيتيش عندي...
حليمة عنقاتها عاجبها الحال : الله يا بنتي و مدارو فيك بغاو يرزيوني فيك و نتي مزال ما تشوفتي فهاد دنيا والو ..."باستها فراسها"...راكي عارفة خالتك جات و ما عارفة والو رادة ليها البال هي و الولد مبغيناش نتحشمو تاني مع راجلها وهو قبل ما يسيفطها كيوصي و يعاود ....
اريج بزز منها كتهضر بفمها لي مجروح : وفين هي دابا معودتش شفتها من جات عندي ول لبارح لصبيطار ...
حليمة شافت فسومية كضحك : هههه ابنتي شغادي نقولك خالتك تخلعات من شافتك كابرة و مرا تبارك الله راكي عارفة نسات كلشي ما بقات عارفة حد من تا من راجلها ما سولات ولا عيطات عليه كيف مولفة باينة عقلها مزال ما تقبل هادشي ..."مسحات دموعها"...بنيتي مسكينة خانتها صحيحتها ...
سومية : باركة من لبكا راني طبت بيه و الله العضيم جيتي اماما فوجي علينا شوي ونساي عليك البنت راجلها قايم ليها بكلشي ما عندك مناش تخافي دابا تعقل على كلشي و تحرر فيك العيشة كيف كانت زلزال ....
حليمة : اربي غير ترجع ولا بغات زلزال نوضو بباه ....
اريج حولات تبتاسم : قلتي جا معاها تا سمير...
سومية حطات يديها على جبهتها : فكرتيني فسمير حقا البارح جا يشوفك و من لقاني غير وحدي مبغاش يدخل قالي تا يعاود يرجع...
سومية : كنتي ناعسة ديك ساعة ما جايبة دنيا خبار ونيت هو لي جاب داك شكلاط لي عزيز عليك فطرتي بيه صباح راه ماشي باباك لي جابو ....
حليمة : ابعدا صدق راجل ما عندي ما نسالو راد لصغيرة و لكبيرة لهاجر تا من لوقت ديال دوا دايرو صونيت فتليفونو و دابا خرج يدورها شوي تشوف دنيا حيت قالك كلشي تبدل عليها...
اريج وجها ولا صفر : خرجو غير بجوج ....
حليمة : غير بجوج كان حاتم ناعس خلاتو معانا ...
هبطات راسها و جمعات الوقفة معوداتش هضرات ولا نطقات بحرف ..دخلات لبيتها مزيرة بيد كترعد هزات تليفونها دورات ليه لنمرتو حاطة تليفون على ودنها في صونية تانية قطع عليها الاتصال...بعدم تصديق شافت فتليفون و بدون شعور هبطو ليها دموع كيتسرسبو على طول حنكها..
فأفخم المطاعم المتواجدة فوسط المدينة ..بلاصة طونوبيل قدامها خرج هو لول والابتسامة مرسومة على ملامحو دغيا نساتو فداكشي لي دوز مع خوتو و بدلات ليه المورال تا ولا غير ضاحك....
حل لباب و مد يدو عاونها وتكاها عليه باش مدرهاش رجليها....خرجات عنيها فالمطعم...
هاجر: نتا فين جايبني....
سمير: غير دخلي غادي تعجبك...
هاجر شافت فحوايجها : معرفتيش تقولها ليا نلبس شي حاجة مگودة ..نتا مع راسك مفركس و انا دايرة كيف الهجالة لي طلقها راجلها بسبعة لولاد....
سمير هز راسو كيضحك مد ساروت لحارس يبلاصي طونوبيل و جرها معاه..داخلين و كلشي كيشوف فيهم و خصوصاً هاجر لي لابسة بيحامة وزاد كتعرج كملات صورة ...بالحشمة قرصات سمير بجهد تا غوت فبلاصتو.....
هاجر خبات وجها فدراعو : ناري مك تشوهت اولد لحرام....
سمير كيحك فالقرصة : تا واحد ما يخلص علينا ولا ايعطيونا فابور علاش اتحشمي....
غير سمعات كلامو وهي تهز راسها دافعة صدرها لقدام وسمير تابعها لقاتو هبيل كثر منها....
دخلو ريسطورو و الاعين كل الحضور توجهات ليهم...سمير لي زين و قلدة و هاجر لي حالتها حالة ....قرب ليهم سرباي وجهم لطبلة وناس كيوشوشو حداهم...طلقات هاجر ودنيها تسمع اش كيدور وهي تسمع وحدة قالت....
"مسكين باين اتكون كتوحم وملقات لي يطيب ليها وجابها تاكل هنا "...
وحدة حدها قالت " يا ربي شي راجل بحالو نبقى ليل و نهار نتوحم عليه "...
هاجر شافت فسمير بنص عين لي تا هو سمع الكلام لي داز...غمزها كيضحك....
سمير: اوا امراتي لعزيزة لي كتوحم اش مشهية ليا....
هاجر عوجات فمها كتعيبو : غير لي تشها خاطرك اراجلي لعزيز....
حمق و حمقة تلقاو بجوج دغيا تفاهمو و غير من العنين كيفهمو بعض...خدا سمير كل الاكل لي كتبغي و عزازين عليها....رجع شاف فيها كيشرب فالما...
سمير: وا بيني ليا ..." دور عينو لناس لي كيتسنطو عليهم و هضر بشوي"...متحشمينيش مع ناس.. ..
هاجر هزات راسها لسما : هانتا اتشوف بعنيك كاجول ديال المغرب اش كدير ....
حطو سرباية كل ما لد و طاب من الاكل ليطلب سمير ليحط يدو على حنكو متكي على طبلة كيشوف فيها و يهز حجبانو و يحطهم و هي كتشوف فيه غير من تحت رموشها.....
هزات من طبسيل داقت وهي تخسر سيفتها : اففففف شهادشي ما فيه ما يتكال بدلو ليا دابا....
سرباي مسكين ما عرف باش تبلا شاف فسمير لي هز كتافو بجوج ..
سمير: قالت ليكم بدلوه ليها بدلوه....
سرباية مساكن ولاو خدامين غير معاها وهي داخلة فدور كتر من لقياس خلات كاع لي فريسطورو ينساو ماكلتهم و يحضيوها غير هي....
"ناري مسكينة وحمها جا واعر بزااف"...
"باز لراجلها كيف مدوز معاها هاد الفترة"...
"ما شفتيش كيف كيضحك و عاجبو الحال تشرط كيف بغات"...
"حمدلله على مراتي و وحمها عمري نقول ليها زدتي فيه ولا نخسر ليها لخاطر "...
سمير حط يدو على جبهتو من كلام ناس و المسطية لي قدامو.... كيضحك من نيتو تا دازو عنيه بدموع....جرها من عنقها قربها عندو...
سمير: نقصي اشعيبية ولا ليوم يزاوطو طواسلنا برا بهاد الحالة لي درنا....
حط ليها سرباي الاكلة لي طلبات كينهج مسكين سخفان معول تاني يرجع طبسيل فاقد الامل منها...
هاجر: صافي هدا عجبني....
سرباي بكترة ما رفضات قطع الياس هز طبسيل راجع تا وقفو كاع الحضور مخرجين عنيهم فيه غوتو دقة وحدة خلعوه...
"عطيييي لمرا تاكل فيين غادي "...
سرباي مسكين ولا صفر رجع طبسيل حطو قدامها و غبر....الحضور عاد رتاحو و جلسو و كيحركو ليها راسهم مع كلمة " بصحتك "....
سمير حط وجهو بين دراعو ناعس فوق طبلة كيموت بضحك
لا هي تحشم ولا هو... مقزدرين كتر من القياس و تفاهم بيناتهم واضح ان العشرة طويلة و الولف حاضر ....
هز فورشيط يدوق من طبسيلو تا سمع واحد صوت خارج من حلقها كيطلع تبوريشة من لعضام....خرج فيها عينو وهي كتبنن فالماكلة..
سمير: شكاديري ...
هاجر عودات نفس الصوت سادة عنيها : اممممممم كنتبنن....
سمير شاف فالحضور جرها من يديها ولا حمر : سكتييي شوهتينا مع الناس ايقولو غير....
هاجر خرجات عنيها فيه : اش ايقولو..
سمير عض فمو بجهد ضحكاتو : والو غير بصحتك...
رجعات كتزيد فالفوليم و يخرج من فمها غير " اممممممم "....
هاجر صغرات عنيها : قبيلة كنتي صاعر مالك اش واقع يكما حبيبتك تفارقتي نتا وياها ....
سمير شرب من عصير مبتاسم :معنديش حبيبة؟؟؟...
هاجر هزات حجبانها: اوااه زين بحالك و مدور بيه تا وحدة ..."صغرات عنيها فيه ".... محاط عنيك تا على شي وحدة زعمة...
سمير عض فمو من لداخل: هاد ساعة حاط عيني غير عليك....
هاجر عيباتو : عارف حاط عينك عليا ..انا مكنهضرش عليا انا كنهضر على شي بنت كتبغيها نيت و متلا مقادرش تنساها تا مبقات تا شي بنت كتوصل لمقامها عندك...."صغرات عنيها ،"...كاين بحال هادي فقلبك ولا والو...
سمير كيشوف فيها و بنضرة حنينية حرك راسو : كاينة ....
هاجر : اوا وفين هيا ...
سمير حدر عينو و نطق بشوي:تـزوجــات...
هاجر حطات لمعلقة من يديها شافت فيه مبهوضة ونطقات بدون تردد: متستاهلكش ....
سمير ركز مع عيونها بجرح ضاهر فعيونو حرك راسو يمين و شمال: لا..انا لي مكنستهلهاش....
بصمت وعيونو فعيونها نطق في نفسه بألم..."احببتكِ بصمت و خسرتك جهراً"....
قلبان لا يلتقيان الجزء السادس
محتوى القصة
التنقل بين الأجزاء