عرس محمد زياد ترك للعائلة ذكرى جميلة في الأذهان والجميع رجع منه ونفسيته مرتاحة، مرت الايام ، وكان موضوع الخطوبة هو الشغل الشاغل لنبيل و براء لي رجوعو يكون اليوم رسمي لبوسط ديالي مزال فانتظار الرد ، اما نبيل كان مرة يأجل ! مرة يتزير خاطرو و يميك ، مرة هاهو مع اسماء و افكارها شي نهار يقتلوه ولا راه مع يوسف متبعو من بعيد ، هز يديه تيلمح الوقت كأنها تأخرت شوية ! مع الدخول مدرسي دوز لها البيرمي و خدا لهم سيارة صغيرة مرة عندها مرة عند زكرياء مهنيهم من طرونسبور ! ناض نزل تحت و دخل عند الوازنة قبل راسها
نبيل: الواليدة شوية؟
الوازنة : الحمد لله اولدي ! حمد الله
نبيل: داكشي ماكاين الواليدة ! ( دوز مكالمة ليها للحظات دون رد و رجع اتصل بزكرياء ) الو
زكريا: آبابا!
نيبل: تعطلتو آولدي ؟
زكريا: ماتعطلناش الواليد! راه دازت عندي نعمة جايين في طريق هي تقيصها واحد خيتنا ونوضاتها معاها
نبيل: ( وقف ) فين ختك دبا ؟ وقعت لكم شي حاجة؟
زكريا: ( شد راسه ) ماقاصنا والو الواليد ! واحد خبيشة صافي غير نعمة الله يهديها ضربت البنت
نبيل: ( هز سوارت خارج و اسماء نازلة تابعاه سمعت هضرتو ) فين نتما ؟
زكريا : حدا الدار الواليد غير فرومبوان
...خرج على رجليه ، عارف نعمة من صغرها تتعامل بحدة والا تعصبت اكثر ! خطوات قليلة هو يلمحهم جوقة مجموعة على والو
نعمة: سيري لا تقصريييش ! ضارباني ونازلة تتجابه يلعن....
...سمعت صوتو و دورت وجها ! تدخل تيتكاطلم مع البنت ، شاف الضربة وفهم القضية وأن الحادثة وقعات بسبب السرعة ، اعتذرت البنت و طلبت من نيبل انه تحمل مسؤولية اصلاح السيارة لكن بكلام زكرياء قرر يسامح ، ركبو في السيارة راجعين وهيا غير تتسوط ! حوايجها ماحاملاهمش ، دخلو لقاو اسماء مخلوعة تتفحصهم
نيبل : الصوكان قبل كولشي هو تربية !!
اسماء: مالهم!؟ فهموني
زكريا: ماوقع والو اماما ! واحد بنت قاصت طموبيل! نزلنا نشوفو قضية صدقت مشادة مع نعمة
نعمة: ( بصوت غاضب ) تشد فيا؟ انا حبل ؟ من دورة هيا تتقلب على جوا من جنب ، شديت ليمن ديالي عطيتها الطريق ! بقات في الرومبوان لاصقة فيا تا زيرها طروطوار هيا تقلب عندي؟ يلعن.....
نبيل: ( هز حجبانه بلاحول ) حتى نتي شدي يديك ! ونقصي من العصبية ما عمرك تمدي ايدك على الناس..
اسماء : ( بيد فحنكها ) آويلي على البنت رجعت مشرملة
زكريا : هيا بدات تتفرتت بالهضرة
نيبل : انت مول عقل اصاحبي !
زكريا : قسم الحاج تلهيت فيه مع واحد سيد تنشوفو الضربة ضرت عندهم لقيتها جمعت معاها
اسماء : حطي ديك طموبيل شي نهار تقتلي شي احد
نعمة: مال بنادم يخلعني ؟ نخلي البشار يتهز عليا ؟ و الله لادوزتها ليها
نبيل: ( بحدة ) نعماااااا
_نزلت راسها تتبرد اعصابها ! من تما واضح انها تلتزم الصمت اش جاب مايكلمها ، طلعت بيتها عاقداهم بقوة ، تلفون تيرن شافت اسم براء و رسلت مساج و رجعت دخلت الحمام تتغسل يديها ووجها تتبرد راسها و تتلعن فخاطرها
نعمة : ( وقفت تتشوف وجها ) عندها زهر كان معايا داك الخواف دخويا اما والله تركعها
...اما تحت كان نبيل تيخاصم ! حطت اسماء الكوتي و تاهيا تتخاصم ، نفخو لزكريا راسه ناض طلع لبيتو ! اما الوازنة فهي فبيتها متكية
اسماء: انت مضسرها ! يوسف لي داير زبايل تاتجي عليه! هيا لي معصبة داير لها خاطرها و لي مسكين درويش و سكوتي تططجو من بلاصته
نيبل: غادي نشد معها ضد ؟ صافي جبداتها و
عطاتها علاش تتقلب
اسماء:ماشابهة فبراني ؟ شابهة فيك كان ياويل لي هضرك فطريق ولا قربك بوليس و نوضتيها معاهم
نبيل : كاان ! طلقي من العكس مع نعمة !
اسماء: ( تتاكد بحروف ) آببنتتي !
نيبل: ابنتك جاوها الخطاب
اسماء: ( هزت مخدة ضرباته ) موالف ضحك معايا ؟
نيبل: ( بعيون مبتسمة ) ابداا !
اسماء: نوض نخرجو نمشيو عند اختي خديجة نقولو لها على سلامة براء
نيبل: كولي براء ارجع ؟
اسماء: ااه ! خديجة اختي فرحانة
نبيل : ( بجدية ) ورا هو لي خطب نعمة
اسماء: ( تدهشت ) صمت
نيبل: من عرس زياد وفاروق فتح معايا الموضوع! غير نعمة كانو عندها امتحانات آجلت الهرة ، ولكن دبا جات الوقت فين نهضرو فيه
اسماء: ( قلبها تيضرب تيضرب ) واش تتضحك ؟
نبيل: ( وقف حاني راسه ) والا ! فين عمرني ضحكت معاك
اسماء: ( وقفت مقابلاه ) والله تندخل نكولها لخالتي؟
نبيل: خلي الواليدة في التيقار ! شوفي مع بنتك ايلا قبلت عاد كوليها الواليدة
_مني منك ! مني منك هيا وياه ، ماخرج يصلي المغرب حتى اكد ليها و اتلكم معاها، ولي زاد اكد لها صحة الموضوع هو الفرحة الواضحة على محيا نبيل وهو خارج ! اما اسماء جلست تتحس حنوكها ايطرطقو بالسخونية ! قلبها تيضرب و نفسها تاضياق ، نزل زكريا تيتكلم معاها كانت مرفوعة و لي شاغل بالها ؟
_ابنتي بغيتها تقرا!
_آويلي انا تزوجت على سبعطاعش ابنتي يطيرها لي على تسعطاعش ؟
_اناري حي ويلي امي فين ارد الراس!
_الراس غالبا تتردو فصغرها على نوصير ولا خديجة ! لكن نوصير بلاصاتو زاينة و خديجة منهم جايها الصهد ، تلوات في البينوار خارجة متجهة للفيلا عند زاينة هيا خارجة ويوسف داخل تيضحك دارت ليه بيديها اجي و تم جاي شدت فيديه جاراه موراها ، باب زاينة ديما مفتوح مع اولادها ، دفعاتو طلعت و يوسف معاها، دخلت عليهم في الصالون ، و كي داير داك صالون ؟ عمر مزلع الكتوبة ! بلال مزلع الألعاب وهيا جالسة شادة بريز فيديها
اسماء : السلام المرأة
زاينة : سلام ! يوسف اولدي جابك الله بحال درهم حلال ، مولينكس حبسات
يوسف: آري نشوف
..دخلو الكوزينة و يوسف بدا يقاد فالماكينة و أسماء جلست فكرسي و زاينة مرة مع يوسف مرة تتشوف فيها
زاينة : مالكي؟
اسماء: راها مايلة ليا ( شافت فيوسف ) و الله و تخرج هاد الهضرة يا حتى نسخط عليك
يوسف: ( حبس عن حركة تيشوف فيها ) لاش جايباني ؟ كنت غادي نشوف الميمة و نزيد خلفة
زاينة : لا حبيي جلس صاوب ليا الماكينة ! ( شافت في اسماء ) واهضري ؟
اسماء : ( بتوتر و خوف و حرارة ) ماشفتيش لاجودان خطب نعمة لبراء ؟
يوسف: ( حس بضو ضربو من البريز ) الحافظ الله
_زاينة جاها الفوفغيغ والا بغات تسكت من ضحك ! ضحك ضحك وتشوف في أسماء وتعاود ضحك ! مع هي بيضة رجعت حمرا ! تنزل حتى لتحت بشدة الضحك و ترجع طلع تقلب على الأوكسجين وهيا تاضحك و اسماء تتفقص
زاينة: سمحيلي ولكن راه لااقدر ههههه الله ياختي ولد لاجودان كامل ؟
زاينة: فهميني ! واش لاجودان لي خطب دراري ولا براء لي باغي البنت
اسماء: لا براء ! كالك الالة من صغر وهو باغيها ، و تسنى حتى شدات الباك و ماعندوش مشكل تكمل قرايتها ولا تخدم مايحبسهاش على حتى وحدة منهم
_يوسف حرك راسه على هاديك من الصغر
زاينة: اوا شتي بعدا ؟ اوا الالة الله يسخر
اسماء: اش اش الله يسخر ؟ واش عارفة شكون خديجة؟ التاويل و الصواب و الاصل و المفضل، شكون كان يوقف في افراحنا و ينصحنا و يزيد بينا من غير اختي خديجة؟ نوض انا نتحشم معاها نعطيها نعمة، وشكون هاد نعمة؟ ( تتحسي بصوابعها و تتطويهم ) ماتهز كاس من طبلة ؟ ما اتسلم ؟ ماتشبعك هضرة ؟ ما تحمر لك وجهك في العراضات قدام الناس ؟ غير الصباح! صباح ضربت بنت علاش تقيسها بدون قصد بطموبيل
زاينة : آاسماء ! ولادنا كلها كي داير ! زياد انا غير خوتو ! كلها وعقليتو ، واش نتي لي عرضتي عليهم البنت ؟ راه الولد لي بغاها ، انا نفرح ليك و لنعمة ! فاروق حقاني و ختي خديجة القلب الكبير و العقل المرزن تاعت قلبنا كاملين و تاتجري غير فالخير
اسماء: واش انا عيبت عليهم؟ راه العيب فابنتي ! واش هاد بنت تفيق طيب و تعجن ؟ ابنتي تجلس بالجوع و تاكل الكتوبة ! فينك ارؤيا مولات التاويل ولا جنى الضحوكية ؟ ما بانت لهم غير المعقدة د ابنتي
زاينة: باز لك تتشوفي ابنتك هاكا واش عارفة راسك اش تاتقولي! انا نعمة مشاء الله تمنيت كن ولدت بحالها ، ديما من اوائل في المدرسة و تتقرا مزيان راسمة مستقبلها الله يسر لها وفوق هادشي كامل راها مؤدبة وحشومية وماكاتجبد حد شادة تيقارها وعمر شي حد جاء يقولك شفتها لا هنا ولا هنا اش بغيتي كثر من هادشي...
منزل راسه تيسمع ليهم وهما فخضم كلامهم و نطق كما عادتو بين ضحك و الجد
يوسف : تي عطي البنت تزوج واش المخزن معاه للعب
اسماء: نوض خرج عليا
زاينة: خلي عليك الولد ! اخر مرة جريتي عليه خرج جاك مزوج
يوسف: ( حرك لها بوالله ايلا ) هاد المرة نجيب لها الخطاب للدار قبل الوقت ! اسمعي مني آاسوم ، شتي ديك بنتك لي تتبان لك معقدة؟ ولد لاجودان عاجباه ! داك الفطور و الصواب و العراضات ؟ حنا ماشي هما نتما حنا جيل وانتوما جيل خلي البنت تزوج و تعيش حياتها كي بغاتها هي...
اسماء: شمن حياة الله يمسخك
يوسف: لادعيش ! لادعيش! نعمة باغة تسافر ، باغة تخرج ودخل ! باغة تكتشف ! هادشي ماغاديش تشوفو لا معاك لا مع الحاج ! خلي البنت تزوج
_كملو حوارهم ، اسماء في أعماقها كاينة واحد الفرحة خفيفة مثل فرحة نبيل، ابنتهم تزوج ولد خديجة، بالنسبة لأسماء احسن الناس و نيبل خوه عارف معدنو ، كملت الليلة كلها على صدر نبيل، تهضر و تعاود وهو داير لها خاطرها
نبيل : دبا من هادشي كلو ؟ امتى تهضري مع نعمة ؟
اسماء: خاصك تكون معايا
نيبل: ( قرب فمها قبلها ) ديما معاك ! تعطلت على خويا شوية !
اسماء : هانا انوصيك تبقى تكولهم من بعد شوفو مع اسماء ولا كدا ؟ انا خويا ماعارافاش ، خلي اختي خديجة تكلف
نبيل: سبقتي الأحداث وصافي! نشوفو نعمة هي الاولى ومن بعد كولشي ساهل
اسماء : راها سالات الامتحانات
نيبل: ( تيتفوه ) الله ينجحها ياربي....
_منذ الابد الى الازل موضوع زواج عند أي عائلة تيخلق توتر و القيل و القال و بين الفرحة و البهجة ، كان اليوم الجمعة مع عطلة بدات ، كما روتين معتمد ، نبيل تيفيق بكري تيدوش و يتعطر للعيد مومنين ، نفس الوقت اسماء تتغسل الوازنة و تلبسها و تقادها ، على طبلة الفطور جالسين تيفطرو و نعمة معاهم تتقيس للضغظ للوازنة
نعمة : هو هداك الميمة
الوازنة : يرضي عليك الحبيبة
_اسماء شداها سخانة و غير تتشوف فيها ! طلعت بيتها تشوف كتوباتها و اسماء طلعت الكوزينة توجد الطعام و بلوتوت فوذتها على خط مع زاينة ..دووودوودوو ..دوودووو حتى اذن ظهر ودخل نبيل و زكريا بدات تسقي الكصعة و تجمعو تاني ، تتحس بالجو متوتر و الوحيدة لي ماكايناش هنا هيا نعمة ! لكن الواضح ليهم اما الباطن شكل آخر، دخلت بيتها جاوبات لانه صدعها باتصلات
براء : ( برود ) هاد هضرة كوليها ! سيري الله يعاونك انا مع الحنانة تندورو
_اقطع الخط ! بغا يكولها راني شاد عندي دليل هادي ربع سنين! ناعسة عندي بستك وعاودت ونتي ناعسة ساعة خاف منها لانه متيقن شخصيتها قوية تقدر تقلب ضدو ، يلاه جلست هو يدق الباب ودخل نبيل موراه اسماء ، ابدا نظرتو لها لم تتغير ، دائما بين عيونو الصغيرة ذكية ، شحال فصغرها كانت تجيب ليه صلاية الصلاة و صندلة و بدات تكبر رجعت تغسل ليه بعد مرات طموبيل و ديما تفلونو تحطو فشارج ، مسائل صغيرة لكن عندو كبيرة ! طفلة كبرت و كما كان شكو شخصيتها قوية معتمدة تعلى نفسها، جلسو معاها و بداو حوار بسيط وغادي يتاخد مجرى اخر و اسماء دموع فعينيها
نيبل : مهم آبابا ! قلتها فغيبتك تنكررها فحضرتك ! القرار تيبقى ليك
نعمة: ( بجدية و نظرة قوية ) بخصوص آش ؟
نبيل : ولد عمك طلبك للزواج
نعمة : نتما موافقين؟ تتشوفو مصلحتي فهاد زواج؟
اسماء: شرط عليه باباك تقراي وتخدمي الا بغيتي
نعمة: الا بغيت !؟ هداك حقي ، قرايتي و خدمتي هما نعمة ، عمرني فحياتي فكرت نتنازل على حقي لاي كان
_فعلا الموافقة تعطت و الاخبار وصلت لاجودان ! من لاجودان لعند مغيث ، و من اسماء لزاينة و من زاينة لنوصير و هيا غادة بين احفاد والخوت ،الفرحة فرحتين ،خديجة فرحانة بولدها و تتوجد وتعاود و رؤيا بتلفون وتعاود اما اسماء شادة قنت حدا الوازنة تتفكر منين تبدا هاد الخطبة و شنو تكول و كفاش تهضر
أولاد الوازنة الجزء 131
محتوى القصة
التنقل بين الأجزاء