مابقاوش قادرين يشدو ضحكة تفركعو عليه بالضحك و المنظر لي هو فيه ريماس مشات لساحة ديال تدريب مامسوقاش ليهم و تبعها أسوار و هادا هو العقاب لي كان موجد ليه ... عقاب نفسي مرمد ليه كرامتو قدام كاع صحابو دار ليه الذل و الإهانة ايوا و دابا اراك لواحد شهر لقاو فاش يهضرو و فيمن يشدو
أسوار : رتاحيتي فالبذلة جديدة؟
ريماس : وي رتاحيت فيها هادي حسن من اللول .. كانت عبارة على سروال ديال العسكر بحال ديال أرسلان فزيتي ديال الپارا مع تيشورت كحل و بروطكال كحل جاوها مقودين
أسوار : هادشي لي بغيت ، كي كاتحسي براسك دابا شوية؟
ريماس : ( ضارت لعندو ) راني بيخير غير تهنا ماشي ضعيفة تا لديك درجة ... شد لها وجهها بين يديه و بدا كايشوف لها فعينيها
أسوار : ( بصوت حنين ) ايفا
ريماس : ( كاتشوف فيه ) وي اسوار
أسوار : عارفك ماكاتبغينيش و عارف راسي زربت عليك و يقدر لحد ساعة مامتقبلاش هاد العلاقة ولكن لي خاصك تعرفي من نهار شفتك جذباتني ليك شي حاجة ماشي تشوفيني كانتعامل معاك هاكا و تقولي عندي نفس تعامل مع باقي الجنود و تيقي بيا عمرني حاشيتها لشي جندية ولا شفت فجيهتها حتى جيتي نتي و عمرني خليت شي جندية خليت شي جندية تدخل لمجموعة 1 حتى شفتك ( عاود شاف لها فعينيها ) إيفا كانبغيك و نهار على نهار كانزيد نبغيك ( بتاسم ابتسامة ساحرة و ضار لجهة لاخرا ) عمرني تخيلت غانقولها لشي وحدة هههه
ريماس : ( بقات غير كاترمش )
أسوار : عاطيك الوقت الكامل و حتى انا مازربانش
أرسلان : ( بإستهزاء ) على صباح؟!! كنتو تقدرو تسناو حتى الليل بحال البارح ( غمز ريماس ) ولا لا ا إيفا؟!
أسوار : ( باس لها جبهتها ) سيري لبلاصتك و غانشوف شي حل باش ماتبقايش هنا
ريماس : ( بإبتسامة ) واخا ... مشات لبلاصتها و كل مرة تلفت تشوف فأرسلان هي كاتخنزر فيه و هو كايبادلها بنظرات غريبة مشات لبلاصتها و وقفات ... بداو بالنشيد الوطني و هو حاضيها واش حتى هي مشاركة ولا لا و فعلا حتى هي كانت مشاركة
ريماس : ( فنفسها ) باغي غا منين يدوز ليا بففف مشكييلة لابقيت معاه فنفس المجموعة ... سالاو النشيد و عطاهم اشارة باش يجريو هاد المرة بوحدهم اما هو بقا فبلاصتو متبع ريماس بعينيه و كايتسنا أبراهام اش غايقول
أبراهام : ميستر أرسلان
أرسلان : ( مد يديه ) ضوسي ديالها
أبراهام : ( كايشوف فيه بتوتر ) احم ميستر ارسلان
أرسلان : حتى هو جاك صعيب باش تلقاه!!!
أبراهام : ماشي هاكاك ا ميستر ارسلان ولكن احم فاش وصيتهم يجيبو لينا المعلومات ديال السمية لي عطيتينا للأسف احم بغيت نقول ( توتر ) احم
مالك : للأسف لقاو المعلومات تحذفو
أرسلان : ( بهدوء ) الأيبي ديال لي مسحهم؟!
مالك : حتى هو ماقدروش يلقاوه ا ميستر أرسلان
أرسلان : ( بإبتسامة لا توحي بالخير ) الموقع ديالو!!
مالك : ( شاف فأبراهام بشفقة )
أبراهام : ( تنهد و نطق ) ميستر أرسلان هادا لي مسح المعلومات صدق ذكي و كان مخبع الأيبي ديالو بطريقة ذكية بزاف و إحتمال كبير يكون هرس حتى الجهاز لي ستخدمو
مالك : حيت كون خبع الموقع كانو دراري غادي غادي يعرفوه واخا هكاك .. قرب لعند أبراهام بخطوات بطيئة و حط يديه على كتفو بقا كايدوز عليه
أرسلان : ( بهدوء ) عارف المكانة لي عاطيك ياك!!
أبراهام : ( حاني راسو ) وي ميستر أرسلان و كاندير المستحيل باش نكون كانستهالها
أرسلان : و حيت نتا من أحسن رجالي حاول تقلل من بحال هاد الأغلاط ، المرة اللولة دازت و تانية دازت لك ( بعد عليه شوية ) المرة جاية مانضمنش لك خلاه و اقف هو و مالك و مشا لجهة المجموعات باش يبداو تدريب
مالك : خصك تزيد ترد البال ا صاحبي كون غير خليتيني نعاونك بحال لي موالفين ماكنتيش غاتتحط فبحال هاد الموقف
أبراهام : ( ساخط ) قلب عليا حتى نتا
مالك : بغيت غير نفهم اش وقع لك مؤخرا
أبراهام : ا صاحبي راه ماواقع والو راك كاتشوف كانديرو لي فجهدنا خاص نعيط لدوك الحمير نشوف واش لقاو داك الكلب ديال البارح
♚ تبعوه لنفس ساحة ديال تدريب و حلو لهم الحراس الباب مع تحلات الباب تحلو فامهم معاها فهاد تدريب جديد لي دار ليهم ...
كانت نفس ساحة ولكن هاد المرة ماكانوش فيا سياجات بالعكس كانت خاااوية ولكن الأرض لي كانت مبدلة كانت كااملة حجر ، داك الحجر القاسي كاين لي فهم و كاين لي بقا غا مبرق عيتو كايحاول يفهم
ريماس : و انا نفهم علاش مأكدين علينا باش نجيو بتيشورطات الحمد الله لي ماعطاوناش شي شورط بفففف ... و حتى هو بحالا سمعها ... عطا اشارة لرجالو و بعد لحظات بداو كاينقلو شي كراطن و أرسلان واقف عليهم داير يديه مور ضهرو ... كلشي بقا كايشوف مستغرب
أرسلان : كل واحد يهز واحد يلبسو و يرجع عندكم 5 دقايق و يا وييل لي تعطل فيكم
الكل : حاضر ميستر أرسلان ... مشات هزات شورط و هي طالع لها الخز للراس على هاد تداريب غادا و كاتنكر
ريماس : مالي انا على هاد الخراا كامل و هاد تجرجير كامل من اللول منين جيت لهنا كون مشيت ديريكت نقلب بوحدي على داكشي لي جيت عليه كاع مانتمرمد هاد تمرميدة مرة مضروبة بالقرطاس مرة غادا من تحت العافية مرة مخنوقة شهاد الخرا يضور يضور و يجي لعندي بحالا قاتلا ليه واليديه وا بزاااااف ... وصلات للطواليطات شادة معاهم نوبة كان عليهم صفوفة ديال نوبة ساطت و مشات لبيتها تبدل مع حلات الباب لقات دراري محيدين سراول كايبدلو غمضات عينيها بيديها بزربة
***** : وا ها نتي كاتشوفي سي ارسلان اش قال 5 دقايق خاص نكونو تم و طواليطات عليهم صفوفة
ريماس : صافي صافي خرجو دغيا بغيت نبدل
***** : غا حلي عينيك سالينا ... شافت فيهم اش كانو لابسين هزات حاجب و عاودات نزلات واحد
ريماس : غاتخرجو هاكا؟؟؟؟ ... كانو لابسين شورط كحل قصير فوق الفخض و من الفوق مالابسين والو
***** : هادشي لي قالينا سي ارسلان و قالينا مانلبسو حتى حاجة من غيرهم
ريماس : بفففف صافي خرجو خليوني نبدل ... خرجو و حلات ديك البلاستيكة كاتشوف ياكما تا هي باغيينها تخرج بصدرها عريان حلاتها بزربة لقات شورط كحل بحال ديالهم و ضوني فالكحل
ريماس : لا لا مزياااان البارح قالك عيب و هنا ماشي بيت الدعارة باش نخرج هاكا و اليوم عاطيينا هادشي واضفاك ... شافت فساعة لقات مشا الحال و بقاو 2 دقايق حيدات حوايجها و لبسات ضوني و داك الميني شورط جاوها مزيرين و برزو لها المؤخرة و صدر خلاو سيقانها المبرونزيين من عند الله يبانو دارت الكاسكيطة و ها هي سالات كان جسدها رياضي بإمتياز سيقانها مخدومين و كلشي مخدوم ... خرجات من البيت
أسوار : إيفا تسناي
ريماس : أسوار ... بقا كايطلعها و يهبطها و نظرات الإعجاب باينين فعينو شوية عقد حجبانو
أسوار : ناويا تتدربي هاكا؟؟؟
ريماس : ( ساطت ) الأوامر ديال سي أرسلان و مانقدرش نخالفو حيت غايعاقب
أسوار : ( عاقد حجبانو ) واخا زيدي مي ماتحركيش من حدايا ... شدها من يديها و مشاو باغا تفلت يديها ولكن كان مزير عليها ... وصلو لتما كايبان لك كلشي مزبط دايرين بحال الإنسان البدائي فزمانو وصلو لتما و الأنظار تحولو ليهم دراري هادشي لي حاضيين غير تطلاع و تهباط .. كلشي بقا كايطلعها و يهبطها بنظرات شهوة ماحملاتش راسها
أسوار : ( معصب ) قااااابلو تدرييييبكم ولا نجي نتقب لمكم عينيكم ... كان واقف هاز فيديه شي تصاور جابهم لي أبراهام سمع الغوات ديال أسوار و هز عينيه شافهم ب2 طلعها من راسها و بقا هابط بعينيه كايدوز لها سكانير ترسمات إبتسامة جانبية على محياه عطا تصاور لمالك و مشا لعندهم ...
وقف حداهم و خشا يديه فجيبو تجاهل وجود خوه لي كاين و عينيه مفيكسيين غير فريماس ... هضر معاها
أرسلان : ( بإبتسامة جانبية ) زهرك خايب ماعنديش مع شياطة ( عاود سكاناها ) كون راك دابا من تحتي ولكن دوماج ... هاد الكلمات كانو كفيلين باش يفيضو كأس الغضب ديال أسوار تعصب و عروووقو غايخرجو من بلاصتهم اما الأنسة ريماس هاديك حالة خاااااصة ماقدراتش تزيد تصبر مابقاتش مسوقة واش يقتلها ولا يخليها نطرات يديها من يدين أسوار و يلاه بغات تغوت على ارسلان سبقها أسوار
أسوار : ( بالغوات ) أرسلااااااان تجااااوزتي كل حدودك اخرررر مرة تعاود تهضر مع خطيييبتي بهاد طرييقة ... كان ارسلان كالعادة عكس أسوار كايجاوب بكل برودة و مامعصبش نهائيا الشيئ لي خلا ريماس تزيد تتعصب
أرسلان : ( بهدوء ) طلب مني سماحة ... زاد تعصب من برودو و هز يديه كايهدد فأرسلان
أسوار : ( بالغواات ) إلا إيفا ا أرسلااااااان إلا إيفا كون متأكد ماغانعقل لا على أخوة والا على دم لي داااايز فعرقونا فهمتيييييي ... ماجا فين يكملها حتى لقا أرسلان هاز عليه الفردي و موجهو ليه كان فأتم الإستعداد باش يتيري فيه فنفس اللحظة حتى أسوار جبد الفردي ديالو و وجهو لأرسلان جا أبراهام و حتى هو وجه الفردي ناحية راس أسوار و ملامح الغضب مرسومين على وجهو و مالك وجه الفردي ديالو ناحية راس ديال ريماس كاع الجنود و القياد بقاو مصدومين من هادشي لي واقع دابا أبراهام كان دمو كايغلي على أسوار حيت هاز الفردي فوجه أرسلان أما مالك كان مصدوم لواحد الدرجة كبييرة حيت أرسلان و أسوار واخا كترو الخلافات ديالهم فهاد شهورة اللخرين ولكن عمر وصلات بيهم فأنهم يهزو سلاح على بعضياتهم و عمر وصلات بأسوار يغوت فوجه أرسلان بالأحرى عمرهم ناضو حتى ضاربو مع بعضياتهم و دابا ها هما واحد هاز سلاح على واحد و واحد مستاعد يقتل لاخر و بسباب من؟ بسبب بنت ... عطاهم الإشارة باش ينزلو سلاحهم و يخليوه بينو و بين خوه
أسوار : ( بعصبية ) إييييفا غادي تفووووتهااا علييك و مانعاااودش نشوفك كاتمسها و لو بكلمة فهمتيييي
أرسلان : ( بملامح خالية من أي تعبير ) خفض صوتك
أسوار : أخرررر مرة نلقاك كاضوور بيها حيت مابقيييتش غانسكت ليك و فينما بغات توصل توصل
أرسلان : ماغاتخفضش صوتك!! ... جهز سلاح ديالو و وجهو لجهة أسوار صبعو بدا كايتحرك للزناد كإستعداد باش يتيري فيه شوية دار بناقص و ميل راسو شوية
أسوار : قتلنيي كانتسنااااك
أرسلان : قلتي بغيتي نفوتها؟! بشرط
أسوار : كانسمع
أرسلان : *************
♚♚
من مور ديك الحادثة لي عاد وقعات كلشي ولا داير اطونسيو و راد البال لايغلط شي غلط بدون قصد يأدي بحياتو ... واش هو خوه و ماحنش فيه بقا غير يحن فيهم القياد بقاو غير معجبين حيت طوال مدة تدريب حتى واحد من الجنود ماقال لا أي ولا أح و حتى واحد ماغلط واخا كانو كايرجعو حالتهم حالة ولكن عاارفين السبب بيان سيغ ماغايغلطوش و أرسلان واقف عليهم ... و اخيرا جات نوبتها من مور ماداز قوم ديال عباد الله بدات كاتجهز راسها هي و 9 ديال الأشخاص و عقلها ماشي معاها ... نعسات على كرشها و عطاهم أرسلان الإشارة باش يبداو بداو كايزحفو و داك الحجر كايحرد لهم ركابي و الكرش و اليدين ماوصلو لجهة لاخرا حتى غفر لهم ربي جميع الذنوب عاودو رجعو باش يزحفو لنقطة البداية و اخيرا ها هما سالاو تدريبهم و جات نوبة ديال المتدربين لاخرين بقاو غاديين هاكاك 10 مور 10 هي غير وصلات لقات أسوار كايتسناها و عاقد حجبانو غير شافتو بتاسمات عاودات شافت فأرسلان لقاتو ماكايشوفش فيها نهائيا مشات لجهة أسوار
ريماس : علاش ماتغديتيش؟
أسوار : باراكا عليا غير تغداي نتي كليتي مزيان؟
ريماس : وي كليت الشكر للرب
أسوار : زيدي معايا لعند دكتور يداوي لك الجروح باش مايتعفنوش
ريماس : أسوار
أسوار : وي إيفا
ريماس : ( بإبتسامة ) شكرا ...
شاف فيها بنظرات كلها حب باس لها راسها كمل طريقو و هو شاد لها يديها من الوقيتة لي هضر فيها مع أرسلان و هو ماشي هو هاداك و باينا فيه معصب مشاو لعند دكتور داوا لها الجروح و عاودو رجعو للساحة ... داز نهار ممل عندها حيت سالات تدريبها قبيييلا ... لحد ساعة راه غير كايعرفهم بالتداريب باش من بعد عاد غايوليو يتدربو عليهم بشكل يومي و كل نهار غايكونو فيه 2 ديال تدريبات قاسية و 3 عاديين ... وصل الليل و كالعادة كلشي مهلوك مشات كاطير للبيت هزات حوايجها و سبقاتهم للطواليط قبل ماتشد نوبة تاني
♚ كان جالس فمكتبو فيديه صور و عينيه فالبيسي كايتفرج فواحد الفيديو و قدامو أبراهام و مالك
مالك : صدقات مطورة على الجواسيس لي سيفطو لينا من قبل باش تسافر من المغرب للبرازيل عاد تشد طيارة من البرازيل للإسرائيل ماكناش متوقعينها
أبراهام : انا من اللول كان عندي واحد شك صغير فيها ولكن دابا زاد توضح ... بلاتي نشرح لكم اش وقع منين قالو لأرسلان بلي مالقاو والو هو دار إتصالاتو و فظرف 5 دقايق عرف بلي ريماس سافرات ف2 رحلات من المغرب لإسرائيل و بسبب لقطات كاميرات المراقبة لي فالمطارات لي فالمغرب و لي فالبرازيل قدر يعرف بلي ريماس فعلا جاسوسة حيت فالفيديو ديال كاميرات المراقبة لي فالمغرب صورو سي راضي و سي مصطفى و جاد و ريماس و جهاد و فالبرازيل كانو لقطات ليها هي و جهاد
أرسلان : باقي حي؟!
أبراهام : وي ميستر أرسلان باقي حي ولكن بالجروح لي عندو ماكانظنش غايفوت سيمانة
أبراهام : ( بإبتسامة خبيثة ) كان ساهل بزاف نجيبو المعلومات عليها و خصوصا داك القوم بجوج ريالات يقدرو يبيعو بلادهم
أرسلان : باقا شي حاجة!!
أبراهام : قدرنا نعرفو شكون لي تجرأ و ضربك فديك ليلة ا ميستر ارسلان
مالك : فاش طلع ضو بانو لينا زطمات صغار ديال رجلين فالغابة و درنا لهم مقارنة مع رجلين ديال صبابط ديال كاع لي فالمقر و احم
أرسلان : كمل؟ مالك : احم طلعو خطاوي ديك الجاسوسة ولكن لي مابغاش يتفهم لي كيفاش خرجات من تما ... كانو مرسومين على ملامحو صدمة على الجرأة ديالها عارفها زاااعمة بزاف ولكن باش توصل بيها ضربو عمرو توقعها
أرسلان : الحلبة ديال الملاكمة واجدة؟
مالك : وي ميستر أرسلان و حتى اسوار كاين تما كايتسناك و القياد و الحراس كلهم تما
أرسلان : امم مزيان ... ناض من تما توجه لحلبة الملاكمة و تبعو أبراهام و مالك دخلو لتما و كلشي حنا راسو ... نطر تيشورت و بقا غير بسروال ديال البارا دخل للحلبة و عينيه على الخصم ديالو و لي كان شكون من غيرو خوه أسوار حتى هو نطر تيشورت ديالو و كان فأتم الإستعداد ساد صمت فالصالة و كلشي مترقب بعينيه
أرسلان : ( بملامح ممحية ) ضربني ... ماترددش و ماتعطلش وجه لأرسلان لكمة ولكن تفاداها و رجعها ليه ب2 لكمات متتالية و رجع لبلاصتو هاز يديه قدامو بحال الملاكمين
أرسلان : ( بإستهزاء ) هادشي لي عندك؟ كانظن غاتكون غالية عليك كتر من هاكا ولا لا ا خويا العزيز
أسوار : ( بعصبية ) اعععععععع سكككككت ... ضربو بضربة جات فحنكو و ناض أرسلان ضربو بضربة و تفاداها ولكن ضربة تانية جاتو فالنيف هرساتو ليه أرسلان : الحب كايضعف ا خويا العزيز شتي حالتك كي ولات؟! ... تهز أسوار تا للسما و جا باش يهبط على أرسلان لكن فالدقيقة الأخيرة أرسلان تفاداه شي لي خلا أسوار يطيح للأرض ولكن هادشي ماخلاهش يحبس حيت غفل أرسلان وبغا يجمعو بنص واخا هادشي ماكاينش فقوانين الملاكمة لكن أرسلان غفلو و ستاغل الفرصة انه طايح فالأرض و تهز تا للسما باش ينزل عليه و يحكمو فالأرض ولكن ماشي هادشي لي كان حيت أسوار جمع الوقفة دغيا
أسوار : كانبغيييييها سمعتيييي كانبغييي إيفااااا أرسلان : ماتنساش فاش غانربح غاتخليني مني ليها أسوار : فأحلااااامك اععععع ... ضربو بكروشية جابها ليه فالحنك تاني لكن أرسلان ماعطلوش ردهم ليه بطريبل ضربة مور ضربة مور ضربة زادو فوتيرة الضرب و ولات مباراة دموية عنييفة و حتى واحد مامقصر فيهم من جهدو و خصوصا انهم عندهم نفس القوة الجسمانية و نفس الضخامة فكان صعييب يتغلب شي واحد فيهم
أرسلان : الأحلام الهواية ديالك ا خويا العزيز ولا نسيتي ... بقاو كايضاربو ضربة فيا ضربة فيك القياد و الحراس كل واحد كايشجع واحد و كاين كاع لي ناض كايتخاطر بالفلوس شكون غايربح
أسوار : بلااا ماتحلم نتخلى عليييها و انا لي غانربح اعععععع .. ضربو ضربة اخرى لكن ارسلان تفادها و بغا يحسم هادشي بضربة القاضية مشا حتى للطرف ديال الحلبة و جا كايجري نزل بضربة خاايبة على أسوار الشيئ لي خلا أسوار يطيح اللرض تسمعو تصفيقات من عند القياد و الحراس و مالك أبراهام ، جابو ليه فوطة يمسح بيها وجهو حيت حتى واحد منهم مافلت بجوجهم وجههم ولا عامر دمايات
أرسلان : هزوها و سبقوني لهيه ماتقيسوهاش حتى نجي
أبراهام : حاضر ميستر ارسلان
مالك : واخا هادشي لي دارت كانشفق عليها فأش غايجرا لها 😂
أبراهام : انا بغيت نغزززز بسنااااني
مالك : زيد زيد نمشيو احح عليك ا ايفا ولا نقولو ريماس نيت ...
و هادا هو شرط لي كان عند أرسلان
#Flash_Back
أرسلان : قلتي بغيتي نفوتها؟! بشرط
أسوار : كانسمع
أرسلان : ( بإبتسامة جانبية ) الليلة من مور ماينعس كلشي غانديرو انا وياك مباراة فالملاكمة بدون حكم و بدون قوانين
أسوار : و شنو الهدف ديالها؟؟
أرسلان : ( شاف فريماس ) ماعندك مايدار!! ماغاتمشيش تبداي تدريب ولا كاتسناي نطلبها منك؟
ريماس : ( بغيض ) واااخا
أبراهام : غا تقادي فمك مع سي أرسلان ولا نهرسو لك؟؟؟؟ ... مشات من تما و أبراهام ماكرهش يتيري فيها ماكايحملش لي يقلل الإحترام على أرسلان
أسوار : ايلا ربحتك غاتفوووتها عليك و ماتعاوش ضور بساحتها و ماتتدخلش فينا نهائيا
أرسلان : و ايلا ربحت انا و بطبيعة الحال هادشي لي غايوقع غانديها معايا
أسوار : ( بعصبية ) اش كاتخرببببق نتا؟؟؟؟؟
أرسلان : مابغيتيش ماعنديش مشكل نقتلها دابا و ماعندي مانخسر
أسوار : ( بعصبية ) موااافق ولكن كون متأكد ماغاديش نخليك تأذيها ا أرسلان كاتفهم
أرسلان : النتيجة ديال الليلة لي غاتحكم ... مشا و خلاه كايغلي بلاصتو
#العودة_من_الفلاش_باك
تحنا و جلس جلسة القرفصاء و عينيه على أسوار لي كان مقنت فأرض الحلبة و ماكايرمشش باين فعينيه الغضب و الحقد و الإنكسار هو فاش كايعطي كلمة ماكايخلفش بيها و هادشي كاينطابق على أفراد عائلة روتشيلد كلهم أرسلان : ( كايشوف فخوه ) هادشي لمصلاحتك
أرسلان : نساها عليك غايكون حسن .. ناض من بلاصتو و تم خارج حتى وقفاتو هضرت أسوار ولكن ماضارش لعندو
أسوار : عقلللل مزيان ا أرسلان على هادشي لي كادير فخوك صغيير باغي تسلبني حب حياااتي و البنت الوحييدة لي قدرات تدخل لقلبي عقللل مزياااان حيت غايجي وقت و غاتندم و غايجي وقت لي غايطرا لك نفس شي لي درتي
أرسلان : حتى نكون مكلخ بحالك ... كمل طريقو و خلا أسوار محطم
♔ عند ريماس ♔
مؤخرا ولات كاترتاح لأسوار متغاضية عن ديانتو ولكن إهتمامو الدائم بها خلاها ترتاح ليه و اليوم فاش شافتو مبدل و كايفكر بحالا شاغلاه شي حاجة بغات تفهم علاش داكشي علاش خدمات ديك الميكروات لي فالمكاتب باش تفهم اش واقع ... تسمعات هضرة فمكتب أديب
أديب : فخبارك اليوم غاتكون مباراة بين سي أرسلان و أسوار؟؟
أوري : لا ماتقولهاش مايمكنش
أديب : هادشي لي قاليا أسوار و فاش سولتو مابغاش يقوليا علاش ولكن انا متأكد هادشي على ود إيفا
أوري : ديك البنت ماعندها زهر مسكينة حتى هي ماطاحت غا فأسوار
أديب : تصدمت فاش هزو على بعضياتهم سلاح ماكنتش متوقعها نهائيا عمر طاح لي فالبال غادي يجي نهار لي يبغيو فيه واحد يقتل تاني
أصهب : ( لي كان غير ساكت ) من نهار جات لهنا و لي عمرو وقع فهاد سنين كاملة لي كنت كاندرب فيهم وقع فهاد 3 شهور لي جات فيهم
أديم : صراحة ماكدبتيش ولكن ماشي ذنبها أصهب : انا سمعت بلي الإتفاق لي بينو و بين خوه هو لي ربح غايديها
أديب : مافهمتش
أصهب : يعني لا ربح أسوار يعني سي ارسلان غايمشي و ماغايعاودش يضور بجهتها
إسحاق : وا حتى انا لاحظت نيييت كي حاط عليها سي أرسلان
أديب : ولا ربح سي أرسلان؟
أصهب : غادي يديها معاه و فين؟ ماعرفتش
أوري : بقات فيا ماتستاهلش
أصهب : مهم نوض نوض نتحركو مابقا والو و يبداو ... تصدمات من هادشي لي سمعات و قلبها بدا كايضرب فتسعين بحالا كاتسابق مع هشام كروج مامتيقاش اش كاتسمع معدتها تلوات عليها حيت عارفة ايلا داها غايصفيها لها دابا عاد فهمات مال اسوار مقلق زاد بقا فيها الحال على هادشي لي دارت معاه ... بقات كاتسنط من ميكرو لميكرو شوية تصدمات بشنو سمعات كان صوت أرسلان ولكن ياك هي ماحطاتش الميكرو تما حيت أسوار كان جا فدقيقة اللخرة لي بغات تحط الميكرو فيه تفكرات بلي فاش جا كانت لاحتو بالخلعة ولكن ماكانتش متوقعة غايبقا خدام ... بدات كاتسنط لهضرة أرسلان و أبراهام و مالك و مع كل كلمة كايتقبط لها قلبها رجليها فشلو عليها كيفاش دابا؟؟؟؟ صافي تفرشات؟؟؟؟؟ صافي عاقو بيها؟؟؟؟
ريماس : لا لا لا لا مانقدرش نزيد دقيقة هنا ايلا تسنيت حتى لمور المباراة اكيد غايقتلوني ... يلاه ناضت باش توجد راسها بزربة شوية تحل الباب ...
مع تحلات الباب تنفضات من بلاصتها و خبعات بزربة داك تخربيق من تحت المخدة ديالها
أسوار : ( بقلق ) إيفا مالك؟؟؟
ريماس : لا لا والو ... مشا لجهتها بخطوات ثابتة جلس حداها فالباياص و شد لها يديها لي كانو كايرجفو
أسوار : ( عاقد حجبانو ) واش عصبك شي حد؟؟
ريماس : ( بضحكة مخرجاها غا بزز ) ههه لا والو ماقلقني حد
ريماس : لا لا راني بيخير ماتشوش عليا خاصني غير نرتاح و غانولي بيخير
أسوار : ( بعصبية ) شوفي يديك كي كايرجفووو شوفي راسك كي كاتعرقي و كاتقولي ليا راك بيخير قلت لك غانمشيو هي غانمشيو دكتور ماشي فقندهار باش تعكزي عليه ها هو غير حدانا ماشي حتى يتزاد عليك الحال عاد نبدا نندم زيدي قدامي
ريماس : هه صافي غا نسا عافاك راني بيخير هانتا
أسوار : غادي ترتاحي انا غانقولهم يجيبو لك كاس ديال الحليب و غير نسالي شي غرض غانجيب طبيب معايا نشوفو اش عندك مايمكنش نخليك فهاد الحالة
ريماس : صافي واخا
أسوار : مهم هاني غادي شي ساعتين و نرجع لعندك ( شد راسها بين يديه ) كانواعدك عمرني نزيد نسمح لشي حد يقلقك ... باس لها راسها و تم نايض ولكن وقفاتو يديها
ريماس : ( بندم ) أسوار
أسوار : حياتي مالك واش محتاجة لشي حاجة؟؟ ... بدون سابق إنذار عنقاتو و زيرات عليه كان كتعبير على الإعتذار ديالها ليه حيت ماشي هو لي يستاهل دير فيه هاكا فنظرها خوه لي كان خاصها تلعب بيه ولكن واش غير اجي ولعب بأرسلان .. أسوار ب2 كلمات كاتضحك عليه ولكن أرسلان الا خسرات عليه قامووس ديال الكلمات الكاذبة و كانت بيناتهم كلمة وحدة لي صحيحة غادي يجبد ديك الكلمة من وسطهم ... حس بالفرحة منين عنقاتو و زاد زير عليها كأنه باغي يشبع منها
ريماس : ( تنهدات ) واخا .. ناض خرج من تما و يلاه خرح من الباب ناضت كاطير سداتها و بدات كاتجمع المعدات ديالها كاااملين فصاكادو صغير ... سمعات دقان فالباب عرفاتو شكون و مشات حلات الباب كان جندي هاز بلاطو فيه كاس ديال الحليب و كاس ديال الما و سوندويش سيفطو أسوار خدات من عندو داكشي و عاودات سدات الباب ناضت باش تبدل حوايجها لبسات سروال سورفيط فالكحل لاصق من ديباردو كحل و قبية واسعة فالكحل و فرجلين لبسات سبرديلا خفيفة فالكحل ... هي لبسات الكحل عن قصد حيت فالليل كايساعدها تتخفا شوية ... هبطات على داك الكاس ديال الحليب و تأكدات بلي ماخلات حتى شي حاجة من المعدات تما .. شهدات و قرات جميع سور القصيرة لي حافضاهم و خرجات من الباب و توجهات نيشان للمطعم ديال المعسكر كان خاوي مشات هزات البيدو ديال زيت باش كايطيبو حلاتو و خوات فيه دوا ديال نعاس فينما بانت لها شي طنجرة ولا شي حاجة سائلة خواتو فيها باش لاغد ليه فاش يكونو كايقلبو عليها يتعرقلو مع الموصيبة لي غاتوقع مع الجنود ... خرجات من تما بسليتة و ركبات ميكرو من تحت طبلة لي كايجلسو فيها القياد عاوتاني توجهات لساحة المحظورة لي مخصصة للتدريب من زهرها كانو الحراس هادش نهار كايتفرجو فالمباراة تسلقات الباب و ركبات كاميرا فواحد القنت مخبع مزياان عاوتاني مشات للساحة العادية و ركبات كاميرا فواحد القنت ماباينش نهائيا عاودات طلعات للسطاح باش تركب الكاميرا حيت غالبا كايكون ارسلان تما مع أبراهام و مالك ركبات الميكرو من تحت الكرسي يلاه بغات تمشي شوية بانت لها شي حاجة كاتلمع فالأرض حنات الى ركابيها باش تهزو لقاتو الخاتم الجمجمي ديال أرسلان هزاتو و هبطات كاتجري غادا و كاتلفت موراها عندها زهررر منين هاد نهار ملهيين جبدات طورنوفيس و تعلقات فالأشجار بحال المرة الفايتة و اخييرا ها هي خرجات ..
نقزات و مشات كاتجري فجهة الغابة و ماعاوداتش تلفتات موراها
♚ فالمعسكر ♚
من مور ماتحسمات المباراة بفوز أرسلان تفرق المجمع و رجعو الحراس لبلايصهم و القياد لغرفهم خرج أبراهام و مالك فإتجاه الغرفة ديال ريماس باش يديوها معاهم كيما أمرهم أرسلان ولكن من مور مادخلو للبيت ديالها مالقاوهاش
أبراهام : فين غاتكون مشات هاد خيتي؟؟
مالك : تقدر تكون فالمطعم زيد نشوفو ... مشاو للمطعم مالقاوهاش بدا كايدخلهم شك و مشاو للطواليطات كايجريو و مالقاوهاش
أبراهام : هرباااااااات بنت القح***
مالك : شهاااد زهر ... تقلب المعسكر سفاه على علاه ولا أثر ليها مشا أبراهام لعند أرسلان باش يعلمو بالهروب ديالها بينما مالك عطا الأوامر للحراس باش يطلقو جرس الإنذار تطلق جرس الإنذار و تشعلو ضواو فالمعسكر كامل تفرقو القياد و هما هازين سلاح ديالهم كايفرعو البيبان ديال كل غرفة فالمعسكر و كايقلبو .. كلشي ناض مفزوع خرج للساحة
أصهب : مووووصيبة ا صاااحبي
أديب : اش واقع؟؟؟؟
أصهب : إيفا هربات من المعسكر
أديب : ( بصدمة ) كيفاش؟؟؟؟؟
أصهب : بفففف اليوم يتردم علينا هاد المعسكر
مالك : ( بالغوات ) خرجوووو قلبو عليها غاتكون مزال مابعدااات سربييييو دغيا
♚ عند ارسلان ♚
أرسلان : ( ببرود ) و نتوما اش كنتو كاديرو!!
أبراهام : ميستر أرسلان نتا بنفسك لي قلتي لي نكون الفوق باش مايتوقع حتى فوضى ... غلغل صبعانو بين خصلات شعرو الأسود و عاود حط يديه قدامو بغا يلعب بالخاتم ديالو كالعادة لكن تفاجئ منين مالقاهش عقد حجبانو شوية و بدا كايقلب عليه قلب فجيبو مالقاهش ناض من بلاصتو كايقلب عليه شافو أبراهام كايقلب و سولو
أبراهام : ميستر أرسلان واش تلفات ليك شي حاجة نقلب لك عليها؟
أرسلان : الخاتم ديالي مالقيتوش
أبراهام : واش الخاتم ديال العائلة الملكي؟؟؟
أرسلان : ( بملامح خالية من التعابير ) خلي مالك يتكلف باش يلقاها و سير قلب لي على الخاتم يكون من تحت الأرض جيبو يكون من فوق الأرض جيبو
أبراهام : واخا ا سي أرسلان ... خرج من تما لعند مالك
مالك : اش قالك ميستر أرسلان؟؟؟
أبراهام : ( عاقد حجبانو ) خرجو بداو بالبحث عليها نتا و رجال ماغاتكونش بعدات كالعادة راك عارف ماترجع حتى تكون معاك باش نتفاداو المشاكل
مالك : و نتا ماغاتمشيش معانا؟؟
أبراهام : عندي شي حاجة مهمة كتر منها الخاتم الملكي ديال سي أرسلان توضر و نتا عارف داك الخاتم اش كايعني ليه
مالك : بفففف مشكلة مور مشكلة مهم تهلا لاكان شي جديد عيط لي ... خرج من تما هو و رجال .. تفرقو فالغابة و كل 2 منهم مشاو فجهة كايتسمع فالغابة غير صوت الكلاب و ضواو كايتضربو هنا و لهيه كاين لي غادي على رجليه و كاين منهم لي غاديين بالماطر مخارج الغابة كلهم حاصروهم
♔ عند ريماس♔
من مور مانقزات ما دخلات للغابة عطات رجليها للريح و مابقاتش ضارت موراها كاتجري بأقصى جهدها كاتحاول تلقا طريق تخرج منها فأسرع وقت بقات كاتجري و ماعارفا فين كاتجري شادة طريق وحدة شوية سمعات صوت جرس الإنذار عرفاتهم عرفوها هربات زادت فالوتيرة ديال جري ديالها قطعات مسافة طويييلة ديال الجري و هنا فين نفعوها تسخينات لي كانو كايديرو لهم حيت كون ماكانو هما كون ماغاتلقاش هاد سوفل باش تجري كيلوميترات بدات كاتسمع صوت الماطر من بعيد زاد توترها و ضربات قلبها تضاعفو وصلات لواحد جهة فيها شجر متشابك شوية صوت الماطر كايزيد يقرب ماقدراتش تيق كيفاش قدرو يلحقو عليها كاتشوف طريق لي مزال قدامها ولكن ماكايبان لها والو بسبب ظلام لي مكتاسح الغابة و زيد عليها كثافة شجر كاتشوف لازادت كملات جري غادي تتشد دغيا داكشي لاش قررات تبقى هنا حتى للصباح عاد يبان لها فين تمشي ، حيدات صاكادو ديالها بزربة و جبدات منو واحد البلاستيكة فيها البارود .. حكاتو مع لحمها و مع شعرها و وجهها بحال المرة الفايتة فاش غطات ريحة ديالها بتراب هزات ساكادو فضهرها ، خربقات الأثر ديال الخطوات ديالها باش ماتقتارفش نفس الخطأ لي وصلها لهنا .. هزات راسها كاتقلب على أعلى شجرة بانت لها لقات وحدة فجنبها و بدون تردد بدات كاتسلقها بإحترافية و بسرعة صوت الماطر قرب و هي وصلات للنص فشجرة .. كملات و ماحبسات حتى لواحد الجذع كان مغطي بالوراق مزيااان و باش مزيان كانت الشجرة محفورة من تما و فيها حفرة تقدر تخبع ريماس ايلا تطوات و هادشي لي دارت فعلا .. جمعات رجليها عندها و تخشات و قطعات الحس شوية سمعات صوت الماطر وقف
الحارس 1 : هنا فين حبس الأثر
الحارس 2 : اكيد غاتكون غير هنا ماعندها فين تمشي ... بداو كايهزو راسهم و كايقلبو بالمصباح اليدوي و فوقما كايتضرب فجهتها كاتزيد تتكمش وسط ديك الحفرة
الحارس 1 : نتا سير من هنا و انا غانمشي من هنا مابان لي واالو هنا
الحارس 2 : نطلاقاو فالمخرج اللول ديال الغابة ... حتى تحركو من تما عاد طلقات نفس قررات تبقا تما و غير يطلع ضو و تكمل طريقها ...
هاد القرار لي دارت يقدر يقولو عليه بعض الناس غباء حيت كون كملات طريقها غادي تقدر تزيد تبعد و ماتتشدش ولا غاتلقا لي يعاونها ولكن هاد تفكير غلط فغلط ... حيت هي عارفة مزيان معامن كاتعامل و مشات على المقولة ديال لاتلفتي شد اللرض باش ماتزيدش تلف و هي هادشي لي دارت شدات لرض ولكن ماشي غير حيت ماعرفات فين تمشي مي هي دارت هاكا لأسباب كتيرة أول واحد هو دابا الليل يعني ايلا مشات كملات فطريق غاتزيد غير تتلف و شكون عرف ترجع من نقطة البداية حيت المسافة لي جراتها ماشي مسافة قصيرة ضربات كيلوميترات على رجليها ولكن مالقات حتى نتيجة يعني من هنا ستنتجات بلي كاتمشي فحلقة دائرية و معروف بلي الغابة لابغيتي تخرج منها خاصك ماتمشيش فطريق مستقيمة حيت غير ماغاتزيد تبعد و هي لابغات تجنب هادشي خاصها صباح و زيد عليها الحيونات المفترسة لي كاينين تما اكيد ماتبغيش تكون اخرتها جثة ينقبها الغراب و السبب الثالث رجال أرسلان لي كايدورو فالغابة و هي ماقادراش تعرف فين كاينين حيت ماكايبانش الأثر من غير لاسمعات صوت عاد تقدر تعرفهم .. شكون من لها مايكونوش مخبعين و كايتسناوها دوز؟ و اهم سبب هو خاصها تنعس ضروري باش غدا يكون عندها جهد الكافي و يكون تركيز باش تقدر تخرج من هنا ... بقات مكمشة فداك الجذع و طورنوفيسات فيديها ، نعسات ولكن كالعادة نعاسها خفييف بزاف لدرجة كاتسمع غير شي صوت ديال الحركة كاتفيق دازو من تما ماطر خرين و دازو رجال بالكلاب و داز مالك و رجال خرين و اكيد شافتهم شي لي خلاها تقدر تعرف بلي العدد ديال رجال لي كايقلبو عليها ماشي قليل و من حسن حظها قدرات تعرف بلي مخارج الغابة محاصرين .. دازت ليلة طوييلة عند ريماس ولكن قدرات ترتاح شوية .. غير بان لها ضو ديال صباح بدا كايطلع هبطاه من تما و عاودات طلات البارود لذاتها و هزات كمام يديها ضورات عينيها على الغابة دابا عاد توضحات ليها مزيان ... كان شجر ديالها عااالي و خضر و مغطي و فشي بلايص كاين ربيع مشوك كثيف خدات نفس عميق و بدات فعملية البحث على مخرج خدات إتجاه و مشات فيه حواسها كلهم مأكتيفيين دابا ... حاسة قبل ماتسلك أي إتجاه كادرسو مزيااان واش غايسلكها دايرا خطة فبالها و كاتتمنا انها تنجح كملات طريقها و ضربات كيلوميترات على رجليها و حس رجال ماكاين لهم أثر ضحكات بخبث حيت الخطة ديال البارح نجحات و بالتالي العدد ديال رجال لي كايقلبو عليها نقص حيت ضروري خاصهم يكونو فالمعسكر من مور روينة لي دارت لهم تما حيت من مور مافطرو الجنود و القياد و الحراس لي كانو باقيين فالمعسكر ... كلشي فقد الوعي بسبب المنوم لي دارتو لهم فالماكلة و بالتالي دعوة ترونات فالمعسكر و حضورهم كان ضروري و بطبيعة الحال حتى مالك لي ذكي فهاد رجال ... غايكون مشا يتفقد الأمور و دابا ها هي خدات بالأكتر شي نص نهار تتحرك فيه كيما بغات و خاصها تستاغلو فالمفيد و ماتحبسش المشي بيان سيغ ماخافيش عليها العواقب لي كايتسناوها على هادشي لي دارت ايلا تشدات ولكن غادير جهودها كاملين باش تخرج من هنا سالمة غانمة .. سمعات صوت الكلاب قريب و بدلات الإتجاه مشات كاتجري كاتحاول تبعد عليهم بقدر الإمكان صوت الكلاب موراها ولي باين هو انهم تابعينها بدا القرطاس كايتضرب و هي كاتحاول تفلت منهم بأي طريقة
الحارس 1 : وقفييييييييييي
الحارس 2 : وقفي حسن لك ماعندك فين تهربيي
الحارس 3 : انا غانمشي نتعرض لها من لهيه و نتا من لهيه و نتا من لهيه و الكلاب نطلقوهم يتبعوها من هنا ماخاصهاش تهرب منا
الحارس 1 : شنو قالك سي مالك؟ نجيبوها سالمة ولا ماشي ضروري؟؟؟
الحارس 3 : سي أرسلان قاليه يا تجيبها حية يا يجيب ليه راسها ماشي مهم يعني يا نشدوها حية يا نشدوها ميتة
الحارس : يلاه نتفرقو دغيا ... تفرقو و عطاو للكلاب يشمو اخر حاجة كانت لابساها و طلقوهم عليها يتبعوها ولكن لي ماعارفينش انها خافية ريحتها يعني الكلاب ماغايقدروش يتعرفو على ريحة ديالها و هاد نقطة كانت فصالحها ، ضارت تشوفهم فين وصلو لقاتهم تفرقو و ايلا كملات طريقها و هربات 100% غاتتشد حيت باينا دايرين عليها خطة داكشي علاش حتى هي رسمات خطة فبالها و بدات فتنفيذها بقات كاتشوف واش كاين شي حد هاز شي حاجة من حوايجها و فعلا لقاتو و مشات للجهة لي غا يدوز منها و نزيد نفكركم بلي راها سااابقاهم ... رجعات صاكادو للقدام و هزات حجرة تقيلة شوية خشاتها فيه ضارت كاتدرس الخطوات ديالو و منين غايدوز مشات كاتتعلق فواحد شجرة عارفاه غايدوز منها 100% ...
كروازات رجليها على شجرة و حكماتهم معاها باش تشد راسها هزات الحجرة و بقات كاتتسناه يدوز من تما غير بان لها دايز نقزات عليه و ضرباتو بقوة بديك الحجرة لراسو ضربة خايبة نيت حتى غاب ... حيدات ليه القاميجة ديالها من يديه بزربة و كل مرة كاضور تشوف واش جايين .. حاولات تلبسها ليه ولكن ماجاتش قدو داكشي علاش ضطرات تلويها لو على راسو و تعقدها باش ماتتفكش ، خشات 2 صبعان ففمها و بدات كاتصفر للكلاب باش يجيو غير شافتهم جايين كايجريو و كل كلب قدو قداش يشدوها يفرسوها هربات و خلات داك خونا منو ليهم و عارفة بلي بهاد طريقة 100% غاتكسب شوية ديال الوقت باش تهرب ... مشاو الكلاب كايجريو لجهتو متبعين ريحة لي خلاوهم يشموها و ريوكهم سايلين وصلو لحداه و بداو كايعضوه و ينبحو شي لي خلا دوك 2 لاخرين يجيو طايرين حيت يسحابلهم بلي الكلاب لقاوها ولكن بسبب شجر و البلايص لي كايتشابهو ماوصلو لعندهم الا بعد ربع شاعة حتى تصدمو من داكشي لي شافو كانو الكلاب كاينهشو فصاحبهم و ماشي فريماس .. عرفو راسهم تقولبو بتاعربية تاعرابت تخورو تخويرة سانك سانك حيت عطاوها الوقت لي تهرب فيه ... من مور داكشي لي دارت و عرقلات لهم التحرك ديالهم ضرباتها بجرية و ماعاوداتش ضارت موراها وصلات لواحد جهة و ولات كاتشوف ضو مضروب فواحد جهة بزاايد بداه كاتمشا بخطوات بطيئة حيت لي عارفة هو رجال محاصرين المخارج ديال الغابة و هادا لاكان مخرج مافيهاش شك غايكون محاصر زادت نتابهات كتر لخطواتها بقات كاتقرب من تما خطوة بخطوة و حس رجال ماكاينش تما ستغربات شوية زادت خرجات ولكن تصدمات فأش شافت حيت هاداك ماكانش مخرج ولكن كانت واحد الباحة خاااوية و مافيهاش شجر زادت قربات و مستعدة لأي حاجة تقدر تخرج لها لقات واحد الجرف تما عاااالي بزاف و لي مشا حتى طاح من تما موحال يلقاو مايتجمع فيه ولكن فنفس الوقت ايلا بغات تخرج من الغابة الحل الوحيد هو تدخل للغابة تانية لي كايطل عليها داك الجرف حيت مستحيل تكون تما الحراسة بدات كاتفكر اش دير
♚ عند أرسلان ♚
أرسلان : شفتي الكلاخ ديالك فين وصلنا!!
أسوار : ( بعينين مليئة بالغضب ) فينها؟؟؟؟؟؟؟؟؟ ... جمع يديه قدامو و نطق بكل هدوء
أرسلان : دابا غير خرج هاد سوق خليني مني ليها
أبراهام : ميستر أرسلان القياد مزال ما فاق حتى واحد فيهم ... دوز أسوار يديه على وجهو و ضربها مع الحيط كايلعن راسو و يلعن قلبو و يلعن الغباء لي نزل عليه فهاد الفترة كيفاش تقولب كيفاش بنت 20 عام قدرات ديرها بيه مارضاش و خصوصا دابا بان قدام خوه بحال الكانبو
أسوار : ( بغضب ) غاطيح فيدي غانخليها تلعن ساعة لي تزاااااادت فييييييها
أسوار : ( معصب ) بغيييت غير نفهم كيفاش مبرد حتى لهاد درجة؟؟؟؟؟ واش ماشفتييييش روينة لي وقعات فالمعسكر؟؟؟؟؟؟ واش ماعارفش بلي الأسرار ديالنا يقدرو يتسربو فأي لحظة؟؟؟؟
أرسلان : هادشي كان عليك تفكر فيه قبل ماتمتل الدور ديال روميو خرج من المكتب خليني نرتاح ... خرج من تما و دمو كايفور
أبراهام : ميستر أرسلان عندي ليك شي خبار
أرسلان : كانسمع
أبراهام : بالنسبة للخاتم ديالك الخبار تأكدات بلي هو مع ديك الجاسوسة
أرسلان : هادا هو الخبار؟! جايب لي حاجة عارفها!! ( رجع ضهرو اللور تكا على الكرسي و ربع يديه ) شنو وقع لك مؤخرا؟!
أبراهام : والو ا ميستر ارسلان
أرسلان : و مالك تكلختي؟!
أبراهام : سمحلي ا ميستر أرسلان
أرسلان : أبراهام دير عقلك و ركز
أبراهام : حاضر ميستر أرسلان
مالك : ميستر أرسلان وصلاتني خبار جديدة
أرسلان : هضر
مالك : رجالنا شافو ديك الجاسوسة فالجهة الشرقية ديال الغابة و حاليا راهم كايقلبو عليها تما
أرسلان : مزيان
أبراهام : ميستر أرسلان خاصنا نزيدو الحراس حيت مابقاوش بزاف فالغابة من مور الكارثة لي وقعات هنا
أرسلان : مزال ماجاو؟!
أبراهام : لا راهم فطريق ا ميستر أرسلان
أرسلان : خليو عينيكم على اسوار و اي خطوة دارها قولوها لي ، داك القوا* فينو دابا؟
أبراهام : فقصر تعذيب ا ميستر أرسلان
أرسلان : مزيان ... ناض من تما و خرج
مالك : خاصك دير شي حاجة باش ترجع ثقة سي أرسلان بيك ا صاحبي
أبراهام : واش كاتشوفني كانلعب؟؟؟ هاد سنين كاملة لي خدمت فيها مع ميستر أرسلان عمرني رتاكبت شي غلط
مالك : و مالك دابا؟؟؟ اش واقع لك؟؟؟
أبراهام : راك كاتشوف كلشي قدام عينيك كاندير كتر من جهدي ولكن هاد خيتي لي خرجات لي من جنب هي سباب فكلشي و كون اكيد موتها غايكون على يدي مادام ميستر أرسلان عطانا الإذن باش نقتلوها إلا و موتها غايكون على يدي
مالك : و اش غادير فقضية الخاتم؟؟
أبراهام : فاش غاطيح فيدي غايطيح فيدي حتى الخاتم
مالك : هادي هي الفرصة باش ترجع ثقة سي أرسلان فيك ...
#بعد_أسبوع
الحارس 1 : سي إسوار اجي شوف اش لقينا ... مشا بزربة يتحقق من شنو لقاو تصدم من شنو لقا و قلبو ضرو كايتمنا مايكونش داكشي لي فبالو صحيح ولكن لحد ساعة كاع هادشي لي كايشوف كايدل بلي فعلا وقعات لها شي حاجة الكاسكيط العسكرية ديالها لي لقاوها حدا الجرف .. حوايجها لي معلقين فالجذع لي فالجرف
أسوار : ( بالغوات ) نزل جيب لي داكشي لي تما بزربة يلاااه طلق راسك
الحارس 1 : ( كايتفتف ) ولكن ا سي أسوار الجرف خطير ولا هبطت غا.. .. قاطعو بنبرة حادة
أسوار : ( بالغوات ) تنزل ولا نزلك؟؟؟؟؟
الحارس1 : ( حنا راسو ) حاضر سي أسوار ... اش باقي عندو مايقول؟ عندو 2 اختيارات يا غاينزل بخاطرو و يحاول ما امكن مايجيش لتحت يا يتسنا أسوار يدفعو و اكيد غايجي لتحت تحنا على ركابيه باش يحاول ينزل بدا كايحط رجليه و يعاود يهزها يحطها و يعاود يهزها .. بقا غادي جاي و كايتمنا مايكونش داكشي لي فبالو واقع لها نسا الحقد و الغضب و الوعود لي توعد لها بيهم كايتمنا غير مايوقع لها والو شاف فداك الحارس عصبوو بالمعقول مشا لعندو و عينيه مرسوم فيهم شرارات الغضب .. شدو من دراعو
الحارس : سي اسوار سي اسوار عافاك انا مزاوك ماتلوحنيش
اسوار : ( بنفاذ صبر ) هاني شادك باش ماطيحش سربي خلااااص ... تسحابليه بلي اسوار باغي يلوحو ولكن صدمو بالفعل لي دار هو شدو من دراعو غير باش مايطيحش كون كان أرسلان بلاصة اسوار كون راه كركبو برجليه من داك الجرف ... بقا كايتجبد حتى وصل لديك جهة فين معلقة شي حاجن كحلة ... هزها و جبدو اسوار لعندو بحركة وحدة ، حيد ليه داكشي من يديه و دفعو للجهة تانية بقا كايحقق فديك الفوقية كانت فعلا ديال ريماس هادا مقاسها كلشي كايقول بلي هي ماتت غيابها 3 ايااام قلبو فيها إسرائيل شبر بشبر قلبو المطارات ماخلاو حتى قنت كو كانت إبرة كو تلقااات ولكن لا اثر ليها هادو حوايجها ولكن هو مامتيقش هادشي مابغاتش دخل ليه لعقلو ... بقا راجع باللور حتى تزدح مع لوطو ديالو هز راسو للسما و دار يديه من مور راسو غمض عينيه باغي يتسطا فين مشات علاش غبرات بغاها غير ترجع و هو يحميها ترجع و مايخلي تا حاجة تأذيها باقي كايبغيها واخا عرفها جاسوسة باقي كايبغيها واخا عرفها مسلمة كايبغيها واخا عرف اصلها هو فعلا كان غاضب عليها ولكن القلب لي كايبغي ماكايحقدش نهار على نهار و هو كايشوفها غايبة كايزيد قلبو يتزير عليه بغا يوصل لها قبل أرسلان بأي طريقة غايعاقبها على شنو دارت ماشي ماغايعاقبهاش حيت لي دارتو فيه ماتقبلوش ولكن فنفس الوقت عقابو بيان سيغ ماغايكونش بحال عقاب أرسلان لي بدل رأيو و قاليهم جيبوها لي حية
أسوار : عيطو على باقي رجال و علموهم يتبعونا غانهبطو نقلبو لتحت
الحارس : حاضر ميستر أسوار
♚ فمكان أخر ♚
فغرفة واسعة حيوطها مصبوغين بلون الدم القاتم مافيهاش سراجم كايتوسطها مصباح فسقف ضو ديالو خافت كاينا طبلة طويلة فيها معدات غريبة ولكن باين لاياش صالحين كانو فيها 2 اشخاص واحد عاطي بضهرو و كايطوي الكمام ديال القاميجة لي كانت فاللون الأسود و كايدندن مع راسو كايبان رااشقا ليه و فالجهة الثانية من الغرفة كان واقف شخص اخر و مربوط مع واحد العمود حديدي عريان ولابس غير الكالسو لحمو مزوق بضرب و الجرح مختلف الجروح ... جروح سطحية و جروح عميقة و مع ذلك كان واقف و هاز راسو ولكن ماشي لخاطرو باش هاز راسو حيت كانت سمطة كحلة ضايرا على عنقو و فيها خنجر مزدوج ... يعني عندو 2 جوايه حادين وحدة من الفوق و وحدة من لتحت و ايلا مشا حتى حنا راسو لتحت الخنجر غادي يدخل ليه فصدرو و يتقب ليه من تحت الفك ديالو شهر و هو تما بجوع كايعتقوه مرة فنهار بجغمة ديال الما .. ماشي شفقة عليه ولكن باش يزيد يعيش
غير فك ليه الحبال طاح للأرض ، تحنا شوية لعندو و شدو من عنقو و بقا جارو موراه .. مقدار الألم لي كايحس بيه ماعالم بيه غير الله داك الخنجر تغرس من تحت الفك ديال جاد و تقبو بسبب يد أرسلان لي مزير عليه فديك جهة و جارو .. وصل لواحد السرير حديدي هزو من عنقو حتى بقاو رجليه كايلعبو فالهوا كايشوف فيه و يبتاسم ابتسامة غريبة كاتدخل رعب للنفوس زدحو مع داك الباياص و بدا كايربط ليه يديه كل يد فجهة و كل رجل فجهة
جاد : خ خ خليني نمشي
أرسلان : سخيتي بيا دغيا!! ( مشا لجهة طاولة بدا كايخربق تما و كايهضر ) نلعبو لعبة؟ ... رجع لجهتو و هو هاز فيديه قفص فيه 5 ديال الفيران
جاد : ( بتلعثم ) اش ب ب بغيتي دير؟؟؟؟؟؟ طلقنيييي خليني نمشيييي
أرسلان : ( هبط شنايفو ) عارف المسلمين عزيز عليهم الخير و يطاوعك قلبك تخلي هاد الفيران بجوع!! ( عاود رسم إبتسامة خبيثة و ماتسناهش يجاوبو ) كنت عارف قلبك كبير ... حطهم من فوق كرش جاد و حيد الغطا تحتاني ديال القفص و خلاهم منهم لكرش جاد بداو كاينبشو و يخبشو و يقضمو من لحمو كايحس بكرشو كايمشي منها طرف بطرف بيان سيغ حيت الفيران لي حط من فوق كرشو جوعوهم أسابيع ... تسمعو صرخات جاد فالقصر كاامل كايغوت بأعلى صوت بسبب الألم لي كايحسو ، باش يفتارسك حيوان مفترس و نتا حي راه 2 عضات ولا 3 ولا كاع 5 و كاتموت و ترتاح ولكن باش يفتارسوك 5 فيران و نتا حي و كاتحس بمصارنك قربو يوصلو لهم كاتحس بكرشك كايمشي منها طرف بطرف اجزاء صغار تيقو بيا هاداك راه العذاب الأليم .. كل مازاد غوت كل مازاد ارسلان بتاسم مقابلو بنظرات باااردة كأنو كايستمتع بمشاهدة الفيلم المفضل ديالو .. قاطعو صونيط ديال طيلي كان أبراهام لي تاصل
♔ واقفة فطريق كاتحاول دير اوطو سطوب ولكن حتى واحد مابغا يوقف بسبب حالتها ديباردو تقطع و يديها تجردو وجهها ملامحو مغطيين بتراب سروال تقطع من جهة ركابي و ركابيها تحردو مابقا عندها جهد سيمانة و هي بجوع سيمانة و هي فالغابة الليل كادوزو معلقة فشجر و صباح كادوزو غير مشي ماخرجات من ديك الغابة غير ب66 كشيفة الجهد تقاضى لها و حتى حد مابغا يوقف لها بان لها واحد الكاميو جاي و مشات تلاحت فطريق و بقات كاتلوح بيديها .. كالعادة مانحتاجش نفكركم الحوار بالعبرية
ريماس : ( كاتلوح بيديها ) وقف عافاك وقف عااااااافاك غايقتلووووني
السائق : ( بالغوات ) حيدي من طريق ولا غاندوز فيك حيدي
ريماس :عافاك ا عمي هزني معاك وصلني غير خرجني من هنااا ايلا وصلو لي غايقتلوني
السائق : واش حماقيتي؟؟؟ حيدي من طريقي ولا غانعيط للبوليس
ريماس : ( حلات يديها ) يا تهزني يا قتلني ماغانحيدش و ماغانبقاش هناااااا حتى واحد مابغا يعاوني
السائق : ( بقلة حيلة ) طلعي ... مشات كاتجري لعندو و ركبات حداه سدات الباب .. كان رجل كبير فالعمر يكون فستينات
ريماس : شكرا بزاااف عمرني نسا خيرك
السائق : ماعرفتش كيفاش قدرت نطلع معايا شخص غريب نتمنا هادشي مايرجعش ليا بالندم
ريماس : ماغاتندمش تيق بيا الرب غايجازيك على هادشي لي درتي معايا
السائق : ( شاف فيها بنص عين ) من لهجتك بان ليا نتي ماشي من هنا
ريماس : وي ماشي من هنا انا ميريكانية الأصل و صراحة جيت انا و اصدقائي سياحة ولكن تلفت عليهم
السائق : و اش كنتي كاديري فالغابة؟؟
ريماس : جيت انا و صحابي سياحة ولكن توضرو عليا و انا توضرت فالغابة
السائق : و شكون دار فيك هاد الحالة؟ قلتي لي قبيلة شي حد تابعك و باغي يقتلك
ريماس : قطاع الطرق تعرضو لي و ماهربت منهم غير بزز( بغات تسد المحادثة ) كانعاود نشكرك على المعروف لي درتي معايا ... ساد الصمت قليلا و عاودات سولاتو
ريماس : لإينا مدينة غادي؟
السائق : غادي لتل ابيب عندي شي بضاعة خاصني نوصلها
ريماس : فنفسها ( بفففففف غادي للعاصمة مايمكنش تما غانحصل دغيا 100% ) اه فهمت واش ماغاديش دوز على شي مدن قبل منها؟
السائق : غاندوز على مدينة نتيفوت و نهاريا
ريماس : ايلا قدرتي عافاك حطني غير فمدينة نتيفوت
السائق : واش عندك شي حد تما؟؟؟ ( شافها شافت فيها بنظرات تساؤل ) ماتفهمينيش غلط ا بنتي نتي قلتي نتي سائحة هنا داكشي لاش سولت باش نعرف واش عندك فين تمشي ولا لا
السائق : اممم ... بقاو غاديين مدة حتى وصلو للمدينة .. حطها و شكراتو و يلاه بغات تخرج و هو يحبسها بهضرتو ...
أبراهام : ميستر أرسلان
أرسلان : كاين شي جديد عليها؟
أبراهام : عرفنا بلي راها خرجات من الغابة و ماشي بزاف باش خرجات حيت لقينا نقيطات ديال المازوط فطريق لي فجنب الغابة و اثار ديال روايض وقفو تما
أرسلان : تحققتو من كاميرات المراقبة لي تما؟!!
أبراهام : تحققنا منهم و فعلا بانت لينا طلعات فيها ولكن كاين مشكل هو رقم ديالها للأسف مابانش لينا ولكن راه درت طلب باش يجيو لينا اسماء كاع الشركات لي كايستعملو نوع ديال داك شاحنات و غدا غادي يوصلونا المعلومات ... دوز يديه على شعرو و هاد الحركة كايديرها غير فاش كايكون مزعوج شوية
أرسلان : ( بهدوء ) الشاحنة فإينا إتجاه كانت غادا؟!
أبراهام : كانت غادا فطريق تل أبيب
أرسلان : و علاش مامشيتوش تقلبو تما!! خاص حتى نهضر و نوريك خدمتك؟! ماعندي مايدار باش نبقا كانتسنا فيكم تال غدا؟! ... نعل راسو علاش مافكرش فيها
أبراهام : كانعتاذر ميستر أرسلان غانمشي اليوم برجلي نسول تما
أرسلان : خلي رجال يقلبو فالمدن و القريات لي غادوزو عليها
أبراهام : اوامرك ميستر أرسلان
أرسلان : شي جديد على اسوار؟
أبراهام : يلاه غايبداو غدا فالبحث فالغابة
أرسلان : مزيان ... قطع عليه و ضار لجهة مالك
مالك : ميستر ارسلان
أرسلان : ( ببرود ) تكلف بيهم ... ناض من بلاصتو و خرج من تما رجع لعند جاد
♔ عند ريماس ♔
جبد من عندو جاكيط و مدها لها
السائق : غطي بيها لحمك حيت هاد المدينة ناسها شوية متشددين و بهاد المنظر غاتواجهي مشاكل
ريماس : ( شداتها من عندو ) ميرسي ... لبسات جاكيطة و دارت القب خلاتو حتى مشا عاد شدات اتجاه باش تمشي فيه جبدات الميكرو حطاتو فودنيها و ما ان شغلاتو حتى تسمع صوت جهاد كايغوت
جهاد : ريماس فييييينك؟؟؟؟؟؟ خااااصك تهربي من تما فأسرع وقت جااد راه تششد
ريماس : كيفاااش ايمتا تشد؟؟؟؟؟ و كيفاش حتى تشد؟؟؟
جهاد : عاقو بيه بن المكلخ لاخووور حيت هرب من تما و دابا خاصك حتى نتي تهربي فأسرع وقت
ريماس : راني هربت و ساليت و دنيا مقلوبة عليا خاصني ضرووري نشوف فين نمشي
جهاد : فينك دابا؟؟؟؟
ريماس : بعدت من تما بزاااف راني فمدينة نتيفوت
جهاد : كي درتي حتى وصلتي لتم؟؟؟
ريماس : قصة طوييلة دابا فينك نتا؟؟؟
جهاد : بفففففف راك بعييدة عليا بزاف ولكن ماشي مشكيل شوفي حاولي تخبعي فمكان أمن غانحاول نوصل لعندك فأسرع وقت ماتهضري مع حد و ماتخلي حد يشوفك انا متأكد غايكونو كايقلبو عليك فكل بلاصة
جهاد : حاولي تلقاي شي طريقة مهم خاص نقطع باش يلاه نشد طريق و خلي المايك ديما عندك ماتبعديش عليه ... قطع و مشا يوجد راسو خلاها كاتتغدد تعصباات
ريماس : ( بعصبية ) هما لي وصلوني لهادشي كاامل و دابا كايقوليا غير شوفي كي ديري ... ضورات عينيها على المكان لي هي فيه فعلا كان فحال شي فيلاج ولكن ديور ديالو مبنيين بطريقة رائعة و الفوق ديال ديور بحال معظم منازل فرنسا بالقرمود ... حنات راسها و كملات طريقها كاتحاول تخوي داك القنت هو اللول و اول حاجة ديرها هي تغسل حالتها و تبدلها باش ماتكونش مصدر شك على الأقل واخا تبان غير بحال السكان المحليين ...
دخلات بين دروبة كاتشوف رجليها هازينها غا بزز كاتحس براسها شوية و طيح ماعرفات فين غاتغسل حالتها ماعرفات فين تمشي و تجي و فنفس الوقت مابغاتش تسول باش ماتخلي حتى اثر موراها كاتكابر باش تزيد تكمل ماشي من صالحها تزيد تتعطل بقات كادور و كاتقلب على الله تلقاها حيت هاديك هي الملجئ الأخير لي بقا لها و فنفس الوقت ماغايفكر حد يقلب عليها تما حيت بكل بساطة غايكون فنظرهم مستحيل تمشي لتما .. ماحاملاش تمشي ولا تدخل ليها ولكن للضرورة أحكام و بعد تقلاااب و ضوران و تخياط طرقان و اخيييرا لقات وحدة غير شافتها بحالا شافت بوابة النجاة واخا مابقا ليها جهد مشات كاتجري لجهتها حتى وصلات للباب الكبير ديالها .. كان مبنى كبيير كايشبه للكنيسة ولكن ماشي الكنيسة كانت البيعة ديال اليهود او نقدرو نقولو المعبد ديالهم ، مبنى متوسط العلو و قدامو كاين حوض صغير كايغسلو فيه المصلون يديهم قبل مايصليو اكيد ماغايلقاها حد هنا هي ماشي غير جات و ختارتو ولكن كانو أسباب عدة اول حاجة غادي تلقا فين تغسل حالتها براحتها تاني حاجة غادي تلقا حتى الحوايج لي كايجيبوهم المحسنين يعني غا تلقا ماتلبس و اكيد غايكونو بحال الحوايج ديال المحليين مما غايبعد عليها الشبهات و اهم حاجة كيف قلت لكم هاديك حاليا انسب مكان تتخبع فيه بينما جا جهاد ... طلات واش ماكاين حد فيها لقات غير البابا ديالهم مع شي ناس ولكن كان مشغول هادا حالو ساهل دغيا تفلت منو ... دخلات ليها كانت عبارة على صالة طويلة مستطيلة و الوسط ديالو كاين واحد دولاب مغطي بالستائر داير بحال التابوت تما فين كايخبعو اللفائف ديالهم لي هما اهم حاجة فالمعابد ديالهم و فالحيط كانت مرسومة نجمة داوود و حداه كاين الميمار فين كايوقف القارئ ديال توراة و عاد الكراسا لي كاينين من جوج جهات ... ماستغرباتش من المعبد الخاوي فهاد ساعة حيت من حسن حظها اليوم الثلاثاء و ماكايكونش عامر ... بدات كاتتسلت شوية بشوية باش مايحصلهاش و يجري عليها و خصوصا حالتها موسخة و هو اكيد ماغايبغيش يخليها تدخل حيت بالنسبة ليه غاتوسخ نظافة مكان مقدس ... و اخيرا وصلات لجهة الميمار لقات واحد الباب تما .. حلاتها بزربة و دخلات و عاودات سداتها بقات كاتحفص الغرفة كانت عبارة على مكتب باينا المكتب ديال البابا هادا ، فيه بيرو صغير محطوط عليه بعض اللفائف و كاينا مكتبة موراه عاامرة بالكتب و فالأرض كاينين كراطن مشات كاتجري بدات كاتحل فوحدة و فعلا لقات حوايج لأشخاص فمختلف الأعمار بقات كاتقلب على اش بغات حتى لقاتو كانت باب خرا تما حلاتها لقاتها ديال طواليط نيت ، رجعات الكراطن لبلاصتهم و دخلات تدوش بزربة قبل مايجي البابا ديالهم و يلقاها تما غاتولي فما هي وما لونها .. لقات سطيلة صغيرة و طلقات الما حيدات حوايجها و بدات كاتفرك فلحمها و شعرها و وجهها و الما كايهبط منها قطرااان كحل بقوة الوسخ و تراب و البارود شعرها كانت كاتحس بيه تعسل بقوة الوسخ .. كاتفرك و تعاود حتى رجع لونها الأصلي و صفا شعرها خوات شوية ديال الما باش تنظف تروبات و الوسخ لي نزل منها .. جمعات حوايج الوسخ كمشاتهم و يلاه جات تخرج من تما سمعات الباب تحل قطعات الحس و طلقات ودنيها عرفاتو هو لي دخل ... بقا كايضور تما شوية جلس فالبيرو
ريماس : صافيي كمالت ايمتا غاينوض هاد زمر بفففف ... سيد جالس و حاني راسو مشغول و هي مكوانسيا تما و طافية ضو دازت ساعة و هو مازال ماتحرك من بلاصتو ، و اخييرا جاها الفرج سمعات دقان فالباب ديالو شوية تسمع صوت ديال شي راجل كايهضر و تمو خارجين بجوج .. بقات تما حتى تأكدات بلي راه خرج عاد خرجات من تما .. خشات دوك الحوايج تا هما فالكراطن و تمات خارجة من تما كاطل واش كاين شي واحد فيهم ما بان لها حد توجهات لأخر كرسي كاين فالقاعة تقنتات مع الحيط و دارت القب ديالها جبدات داك ساكادو كاتشوف واش ماطاحت لها حتى حاجة بان لها الخاتم ديال أرسلان هزاتو و ترسمات إبتسامة خبيثة على شفتيها منين تفكرات الحديث لي سمعات على الخاتم و منين عرفات هاد الخاتم اش كايعني لأرسلان و لعائلتو .. هادا ابسط انتقام تقدر دير ليه على تصرفاتو معاها الفرصة جات حتى لبين يديها و بدات بإستاغلالها ...
#Flash_Back
كانت جالسة كعادتها فطبلة مع القياد و أسوار كايتغداو و كايهضرو فمختلف المواضيع
أسوار : خاصو يتنقا راك عارف جدي فبحال هاد الأمور ماكايتفاهمش فيهم لاشافني هاملو غانصدقو فالمشاكل
أديب : سيفطو غير مع شي واحد من لي كارد راك عارف تداريب مزيرينا هاد اليامات و الوقت ماكاينش
أسوار : ( كايضحك ) ههههههه واش من نيتك؟ مانقدرش نخاطر و نسيفطو مع شي حد ، ماشي شي حاجة رخيصة لي غانسيفطها مع لي كان
أصهب : لهاد درجة مهم؟؟؟
أسوار : ( كايشوف فالخاتم ) و كتر كاع ، عندو قيمة كبيرة فالعائلة ديالنا لدرجة ايلا مشا حتى هملو شي واحد منا ولا طاح ليه جدي ماغايترددش باش يحرمو من الحقوق ديالو فالعائلة و الإرث تقدر تقول هاد الخاتم بحال الهوية ديال عائلة روتشيلد و ماكايكون غير عندهم بمجرد مايشوفوه عندك فهاد البلاد السعيدة كايعرفوك نتا منين كلشي كايولي محتارمك
أسوار : ( ضحك بإستهزاء ) حيت بكل بساطة الخاتم لي عندو هو كاينين منو غير 2 خواتم واحد عند جدي و واحد عند خويا داكشي علاش داير ما بغا تقدر تقول السلطة لي عندو نفسها السلطة لي عند جدي
أديم : و علاش حتى نتا ماتصوبش شي واحد بحالو؟
أسوار : هاداك الخاتم عطاه لو جدي و ماشي غير اجي و صوبو و حتى لا حاولت العواقب غاتكون وخيمة
أديب : يعني حتى واحد مايقدر يصوبهم؟؟
أسوار : كي قلت لك عواقب لي يحاول يقلد خواتم العائلة وخيمة
أديب : هادشي قاصح بزاااف وا بزااف نيت ايوا ولا ميستر أرسلان مشا لو الخاتم؟؟
أسوار : هاداك بالضبط هو لي عمر يمشي لو الخاتم كايحافض عليه كتر من اي حاجة و كل نهار كايسيفط أبراهام للقصر باش ينقيه ليه و يرجعو ، ايوا و فهاد اللحظة فاش كانو كايهضرو ماكانوش عارفين بلي ريماس كاتجمع المعلومات عندها حتى لنهار لي لقاتو طايح ماقدراتش تيق بلي هاد الفرصة جات تال بين يديها ترجع لو صاع صاعين دابا منين خدات الخاتم نتاقمات منو شر إنتقام بحالا خدات ليه الهوية ديالو و هادشي لي مخلي أرسلان مزال مامشا للقصر و نزيدكم لحد ساعة مزال حتى واحد ماعارف بلي أرسلان مشا ليه الخاتم من غير أبراهام و مالك و الأمر ديال الخاتم سري للغاية
#العودة_للحاضر
ردات الخاتم لبلاصتو و حطات راسها على الحيط كاتحس براسها دارت إنجااز عظيم ولكن مزاال خاصها تكمل شغلها و هادشي غايكمل فاش غايجي جهاد .. تفكرات خوتها توحشاتهم بزاف .. من نهار شافت كمارة أرسلان و هي ملهية غير معاه و حاضية غير معاه كرشها بدات كاتغرغر بجوع من داك الكاس ديال الحليب ديال ديك ليلة ماطاحت فكرشها نعمة عادي كانت متوقعاها حيت ماشي غير اجي و هرب من تما ، دابا المهم هو خاصها دير جهدها باش مايلقاوهاش حيت لامشاو حتى لقاوها مصيرها الموت الإعدام شنقا بالرصاص هادشي فاش فكرات هي حيت مزال ماعرفات توحش أرسلان لأي درجة واصل يقدر يسلخ لها لحمها و هي حية و مايرمش لو جفن بدات كاتفكر فإيلا تشدات شنو العقاب لي غايعاقبوها بيه طاحو عليها جميع الأفكار الخايبة دازو ساعتين 3 4 5 و مزال كاتسنا قنطات بزاف و جنابها طابو بالكلاس
♚ فمكان اخر ♚
جالس فلوطو ديالو كايطل من شرجم و كايدوز يديه على ذقن ديالو شوية تحلات الباب ديال لوطو
أبراهام : ميستر أرسلان قدرنا نلقاو الشاحنة و حتى السائق لي كان فيها
أرسلان : ( عطاه إشارة باش يكمل )
أبراهام : تهلينا فيه كالعادة و راه عتارف بلي فعلا لقا بنت خارجة من الغابة و وصلها هي نفسها ديك الجاسوسة حاليا راها فمدينة نتيفوت كيما توقعنا
أرسلان : ( هضر مع شيفور ) مدينة نتيفوت ... تحركات لوطو و ابراهام حدا أرسلان طيلي ماحطوش من يديه كايقطع مع هادا و يصوني لهادا يقطع مع هادا و يصوني لهادا حيت الأمر تعدا الحدود مابقاتش غير فهروب جندية ولكن ولات داخلة فيها التجسس و سرقة شي حاجة قيمة من واحد من افراد روتشيلد و هادي بالضبط كون يعرفها سي أصلان غاينوض القيااامة عليها فما بالك ايلا عرف بلي حفيدو تضرب من طرفها و ما بالك ايلا عرف بلي حاولات تستاغل حفيدو ثاني و زيد عليها ضربات جندي و روينة لي دارت لهم فالمعسكر قضية المنوم خلاصة القول عرفو كاع لي دارت و ضوصي ديالها ولا مشااارجي ...
جهاد : ريماس فينك؟؟؟
ريماس : نتا لي فينك؟؟؟ من صباح و انا كانتسناك
جهاد : صافي راني وصلت و نتي فينك باش نجي لعندك؟؟؟؟
ريماس : كاينا فمعبد ولكن ماعرفتش شنو سميتو.
جهاد : وصفيه ليا كي داير غانحاول نسول عليه بنادم
ريماس : علاش نتا بعدا كاتهضر العبرية؟؟
جهاد : دابا غير هضري ماعندناش الوقت ... خرجات من المعبد و بدات كاتوصف ليه وصف دقيق باش مايصدقش تالف
ريماس : حاول ماتعطلش عليا
جهاد : صافي ماتخافيش .. قطعو الإتصال دار القب ديالو و خرج من لوطو غادي و كايسول على اساس هو سائح و باغي يتعرف على ثقافة اليهود و ديانتهم و من زهرو لقا ناس مزيانين فديك المدينة و بقاو كاينعتو ليه ... كانت جالسة و كاتهزهز فرجلها كاتسناه بفارغ الصبر يوصل شوية سمعات الخطوات ديال الجري و الهضرة و اول سمية طاحت لها فودنيها هي سمية أبراهام دغيا عقلات عليه و كيفاش غاتنساه و هو اليد اليمنى ديال أرسلان هبطات بزربة تخبعات من تحت الكراسا و قطعات الحس
أبراهام : كيفاش مزال مالقيتوها؟؟؟؟؟؟ واش عارف ميستر أرسلان لا عرف اش غايدير فينا ولا لا
الكارد : مازال كانقلبو وا سي أبراهام ماعندها فين تمشي رجالنا مفرقين فالمدينة كاملة كانقلبو عليها كل قنت فالمدينة ... جمع معاه أبراهام بضربة للقرفادة
أبراهام : واش كاتفلا عليا؟؟؟؟؟ اليوووم خاص نلقاوها سوا كانت من تحت الأرض سوا كانت من فوقها تحرك من قداامي ... مشاو كملو طريقهم و فكرتها انها تتخبع فالمعبد كانت فكرة صائبة و كان عندها الحق فعلا ماقلبوش تما ... بدات كاتعيط لجهاد بصوت خافت فالميكرو
ريماس : ( بصوت خافت ) جهاااد جهااااد رد علياااا جهاااد اووووف فين مشيتي ... ماسمعاتش الرد الشئ لي خلاها تزيد تتخلع ياكما شدوه ... شوية تحل الباب ديال المعبد بقوة زادت تكمشات فبلاصتها و قطعات الحس مارتاحت حتى سمعات صوتو
جهاد : ريماس فييينك؟؟؟؟؟ ... خرجات من بلاصتها و مشات كاتجري لجهتو
ريماس : جهااد فيين تعطلتي سربي خلينا نخرجو من هنا راهم كايقلبووو علينا
جهاد : اش هاد الحوايج لاابسة؟؟؟ .. كانت لابسة سروال ديال توب ديال رجال واسع فزيتي مع سبرديلة كاشفة فالبيض و من الفوق تريكو ديال صوف واصل حتى للعنق فالبيض و جاكيطة واسعة فالكحل و طربوش كحل و دايرا القب على راسها ملابس رجالية
ريماس : و شنو بغيتيني نلبس؟؟؟؟ بغيتيهم يعيقو بيا دغيا؟؟؟ .. شد لها فدراعها و نطراتها منو بزعاف
جهاد : احسن مادرتي نيت باش مايعرفوكش مهم خلينا نخويو من هنا دغيا راني شفت الحالة برا كي دايرا تصاورك معلقين فكل قنت فالمدينة و زايدينها دايرين مكافئة على لي لقاك القضية تطورات و ولات خطيرة لحد ساعة ماعرفتش علاش هادشي كامل
ريماس : زيد نمشيو و باراكا من الهضرة ... هزات صاكادو دارتو فضهرها و عاد لبسات جاكيطة دارت القب و خرجو بجوج بقاو كايتمشاو بحالهم بحال اي شخص باش مايجيبوش ليهم شكوكات غادا و كاضور فعينيها تصدمات من شنو شافت فعلا كانت دميا مقلوبة عليها و لي كارد ديال أرسلان مشتتين فالمدينة تصاورها مشتتين و اكتر حاجة صدماتها هو المبلغ ديال المكافئة لي حاطين على لي لقاها .. دارت راسها كاتهضر مع جهاد و حتى هو مسايرها حتى وصلو اللوطو ركبو و ديمارا فاللول بشوية حتى بعدو من تما عاد كسيرا و عاد ريماس رتاحت
جهاد : و اخيييرا خرجنا من تما
ريماس : ماغانرتاح حتى نوصلو و شوف تشوف ايلا رتاحينا
جهاد : ماتخافيش من هاد ناحية المدينة لي انا فيها بعييدة من هنا و ماعندهم كي يديرو يعرفو بلي راك تما ولكن خاصك تشرحي لي كيفاش هاد روينة وعلاش قالبين عليك دنيا؟؟؟ المكافئة و رجال لي تما هادشي مادخلش ليا للدماغ واش دايرا شي مشكل؟؟
ريماس : حتى نوصلو و نعاود لك شنو كاين
جهاد : ( ضحك ) ههههه العجب والله تا العجب هادشي كاامل غير باش يلقاوك؟ عمرها كانت فتاريخ و عمرهم دارو هاد الحالة على شي جاسوس سيفطناه
ريماس : حيت انا ماشي هي هادوك لي سيفطتوها
جهاد : اممم ثقة فالنفس بعدا ا لالة
ريماس : بحال داكشي شوف حاول دوز من طرقان لي مافيهمش الكاميرات
جهاد : علاش؟؟
ريماس : كيفاش علاش؟؟؟ باش مايلقاوناش
جهاد : حتى لهاد درجة؟ ماكانظنش
ريماس : حتى لهاد درجة و كتر نتا راك ماكاتعرفش دوك ناس معامن كنت دوزت 3 شهور فالجحيم معاهم
جهاد : هههه يعني دابا انا فخطر حيت نتي معايا
ريماس : ( بإبتسامة عريضة ) ماتخافش حيت تا نتا كمارتك راها عندهم يعني كلنا فالهوا سوا ...
رجعات ضهرها اللور و كملات هضرتها و هي كاتشوف فطريق
ريماس : ههه شنو يسحابلك غير انا لي غرقت؟! فنظرك ايلا لقاوك غادي تفلت؟ كيما شدو جاد غايشدوك
جهاد : ريماس شنو كاتقصدي؟ انا غير ضحكت معاك و راني عارف الخطورة لي حنا فيها
ريماس : ماقصدت والو غير بغيتها تكون فراسك باش لافكرتي تخليني هنا و تهرب
جهاد : ( بجدية ) واش من نيتك؟؟؟ كون بغيت نديرها ماغانجيش باش نحميك كون راني رجعت فيحالاتي للمغرب
ريماس : امم ... ساد الصمت لساعات هي ما هضراتو و هو ماهضرها هي كاتفكر فالخطوة التالية ديال إنتقامها و هو كايفكر كي يدير يخرج ريماس من هاد المشكل ... بعد 8 ساعات وصلو لمدينة الطيبة فين كان مخبع جهاد ... خلا اللوطو فباركينغ بعيد على دار بكيلوميترات و ضربوها على رجليهم للدار و هما باقيين متنكرين وصلو لواحد الحي ديال الطبقة المتوسطة ماشي راقي و ماشي فقير ... تقريبا فيه غير العمارات وصلو لواحد العمارة و ضربوها على رجليهم حتى للطبقة 10 على رجليهم حيت الأسانسور خاسر ... راه قلت لكم حي متوسط اش كاتسناو تلقاو زعما الأسانسور خدام ... ريماس وصلات غير للطبقة 4 و جلسات فدروج كاتلهت و كاطلع نفس بصعوبة
جهاد : ريماس مالك؟؟؟؟؟
ريماس : ( وقفات و تسندات مع الحيط ) غير جوع لي دارها لي ماديرش فبالك .. زادت باش تزيد طلع ولكن زلقات لها رجلها و ماجات فين طيح حتى شدها جهاد لقاها فقدات الوعي ديالها .. بسيف ماتفقدو سيمانة و هي بجوع و مع ذلك صابرة و مكابرة ولكن عيات ماتكابر صافي حتى مابقاتش قادرا ، بقا جهاد كايضرب لها فحناكها ضربات خفاف فحناكها باش تفيق
جهاد : ريماس فيقي ريماااس حليي عينيك ... هزها فضهرو باش ماتتقلش عليه بزاف و طلع فدروج كايحاول يوصل دغيا وصل للطبقة 8 عيا ، هو موالف كايطلع فيهم ولكن حيت دابا هاز ريماس دغيا عيا .. ضغط على راسو و زاد كمل كايطلع غا بزز حتى وصل للطبقة 10 حل الباب ديال الشقة كانت شقة بسيطة فيها وسط دار صغير و صالة صغيرة و 2 بيوت و دوش و كوزينة .. دخل و سدها برجليه مشا حط ريماس فواحد الكنبية فالصالة عاد قدر يتنفس براحتو قاس لها الحرارة لقاها عادية عرف بلي جوع لي غايكون دار لها هاكا و منين سخفات يعني راه مدة باش ماكلات .. مشا للكوزينة باش يوجد لها ماتاكل كانت تلاجة كاتصفر ولكن مع ذلك حاول يقضي غير بداكشي لي كاين معلبات و خبز طوست ...الخ حتى يخرج لسوبر مارشي و يشري اش خاص ، وجد لها الماكلة و حطها فبلاطو داها للصالون و بدا كايرش ريماس بالما باش تفيق حتى بدات كاتحل عينيها بشوية بشوية كاتبان لها دنيا كاضور
ريماس : شنو وقع لي
جهاد : سخفتي بسباب جوع نوضي تاكلي راك ماكليتي والو .. قادات جلستها و قرب لها البلاطو طاحت فداكشي عمى حتى من طباسل لحساتهم بقوة جوع سيمانة راه ماشي ساهلة
ريماس : هادشي لي كاين؟؟
جهاد : ههههههه وا انا قلت موحال تكملي هادشي كاع لي كان حطيتو
ريماس : سيمانة و انا بجوع هادشي ماكفانيش نهائيا
جهاد : صافي ا لالة شوية و نمشي لسوبر ماركيت نيت باش نشري ليك ماتلبسي و نجيب اش خاصنا
ريماس : ايوا هي دابا ، نتا ا سي راك سيمانة و نتا مرتاح ماشي بحالي انا لي سيمانة و انا كانبات بين لفاعي و دياب و ضبوعة
جهاد : ( ناض ) هاني غادي ولكن فاش نجي غاتعاودي لي كلشي
ريماس : واخا غا سير ... غير خرج من تما ناضت من بلاصتها كاتستكشف الشقة .. فوسط دار كان واحد البيانو قديم و كبير بقات كادوز عليه يديها من ديما كان البيانو العشق ديالها بقات كاتعزف فيه و بدون شعور يديها كايعزفو واحد اللحن لي مستحيل تنساه حيت هاداك اول لحن تعلماتو و كان اغلى شخص فحياتها هو لي علمو لها " الأب ديالها " يديها كايعزفو و عقلها كايسافر عبر ذكريات .. غير تفكرات بلي الأب ديالها مات و خلاها حبسات و مشات للغرف تتفقدهم أول غرفة كانت مصبوغة بالبيض مرتبة و بسيطة فيها سرير ديال شخصين مع الكوافوزات ديالو و خزانة فالحائط و شرجم كايطل على شارع سداتها و مشات للغرفة ثانية حتى هي كانت مصبوغة فالبيض ولكن مروونة فيها سرير ديال شخص واحد و كوافوز و خزانة فالحائط و بيرو حدا شرجم محطوط فيه 3 حواسيب مع معدات خرين و تيليفونات و فالأرض الخيوط ديال ضو كل واحد منين دايز و فواحد الحيط معلق فيه تصاور ديال تدريبات لي فالمعسكر ديال أمريكا و لي كانو فالأصل غير إختبارات .. ضحكات بإستهزاء على غباء جاد لي سيفط لجهاد هاد تخربيق و خرجات من تما تتفقد الكوزينة و دوش ..
♚ في المغرب
ساخط و كاعي صوتو كايتسمع حتى لخارج المكتب العملاء مافاهمينش علاش معصب حتى لهاد درجة
سي راضي : ( بالغوات ) علاااااااش ا مصطفى علااااااش؟؟؟؟؟ واش مابقاتش فييييك البنت؟؟؟؟؟ واش ماعندك ضمييييير؟؟؟؟؟
سي مصطفى : ( كايبرد طرح ) غير سمعني ا راضي خاصك تفهم الموضوع
سي راضي : اش غانفهم دوي؟؟؟؟؟ باغي تخرج على البنت هاااا؟؟؟؟؟ واش حماقييييتي؟؟؟؟ اش كنتي باغي تصنع بداك دوا؟؟؟؟؟ ( ضرب فالمكتب ) كون مالقيتوش فوق المكتب ديالك كنتي ناوي تخبي الموووضوع ياك
سي مصطفى : ا راضي تهدن هادشي لي درتو لمصلحة لوطن
سي راضي : اش غانتهدن؟؟؟؟؟؟ من ايمتا و حنا كانضحيو بحياة الإنسان فسبيل مصلحتنا؟؟؟؟؟ علم الله اش واقع للبنت سيماااااانة و الخبار ديالها مقطوعة ماعرفتها واش ميتة ولا حية ، هانيي كانحذرررك ا مصطفى قسما بالله و توقع للبنت شيييي حاجة حتى نريب عليك هاد المقر كون متأكد ماغانعقلش عليك .. خرج سي راضي من المكتب و خلا سي مصطفى غاياكل جنابو بالفقصة مارضاش انه يتبهدل قدام العملاء وي بصح عندو نفس المكانة ديال سي راضي ولكن فالمقر كلشي كايحتارم سي راضي ، شحال من مرة بهدلو على هاد الخسايل لي كايدير و شحال من مرة هددو بلي لاعاود دار شي بلان ماشي تا لتم غادي توصل الخبار للسلطات ولكن مع ذلك لي فراسو فراسو حتى كايقول راه تاب و كايعاود يدير لهم بلانات جداد و دابا لي وقع هو لقا عندو دوا لي كايعطي لريماس و هاداك نفس دوا لي كان عاود ليه جهاد عليه بلي لقاوه فدم ريماس و بحث و حلل و قدر يعرف علاش سي مصطفى كان كايعطيه لها
♔ عند ريماس ♔
دوشات و لبسات حوايجها فدوش نيت و خرجات و الفوطة فيديها كاتنشف شعرها شاف فيها جهاد بأسف
جهاد : ( بأسف ) عارف بلي تعرضتي لبزاف ديال الحوايج بسبابنا ولكن دابا يتعوض كلشي تيقي بيا كنت باغي ندير جهدي و ندير شي حيلة باش شعرك مايتقطعش ولكن كان فات الفوت
ريماس : أسفك خليه عندك شعري خسرتو و لي عطا الله عطاه ... ديما كاتقمعو و كايسرط فيها اصلا هو لي كايقلب عليها كايقول شي هضور لي لا المكان ولا زمان مناسبين ليهم يا كايكون فات الفوت يا كايقول شي هضرة فشي وقت و فمكان عامر مخاطر
جهاد : ( سرط القمعة ) دوزي تجلسي ترتاحي و عاودي لي اش وقع لك فكاع المدة لي كنتي فيها تما ... لوات الفوطة على راسها و دخلات للبيت تجيب صاكادو و مشات جلسات مقابلة معاه
ريماس : شنو بغيتي نعاود لك بالضبط؟؟
جهاد : واش كانو كايعاملوك مزيان؟؟ كي دوزتي 3 شهور تما؟ علاش هربتي و كيفاش هربتي؟؟؟ و كيفاش شافو حتى وجهي؟؟؟
ريماس : ( ضحكات من نيتها ) هههههههههه كترت الهم كاضحك من نيتك كاتسولني واش كايعاملوني مزيان؟؟؟ مسيفطيني لجهنم برجلي و حتى تدريب لي مدربيني لا علاقة كون ماعتامدتش على راسي و جمعت راسي معاهم و وليت لفعة بحالهم كون راني فالقبر هادي شحااال
جهاد : كيفاش اش كاتقصدي؟؟؟ عاودي لي ... طوات رجل و جلسات عليها و تكات ضهرها على الكنبية و هزات راسها عاد بدات كاتهضر ... عاودات ليه كيفاش شحال من مرة كانو غايعيقو بيها ... عاودات لو على الإختبارات لي دارو لهم و بلي هادوك ماشي تداريب .. عاودات لو على البذلات كاملين لي كايستخدمو ... عاودات على ارسلان و اسوار و عائلتهم و كيفاش هربات و المشاكل لي تسببات فيهم تما و تداريب لي دازت منهم ولكن بيان سيغ ماعاوداتش ليه كلشي .. مثلا الخاتم لي عندها ماعاوداتش ليه عليه و ماذكراتش سيرتو و انتقامها لي كاتخطط ليه ماذكراتش سيرتو ... بقا غير مصدوم فيها و فكل حاجة كاتقولها كايزيدو ملامح صدمة يترسمو على وجهو ماتوقعش نهااائيا يخرج منها هادشي كامل
ريماس : و مزال ما كملت ... جبدات المعدات لي عندها فساكادو و بدات كاتشوف فيه
جهاد : مال هادو؟؟
ريماس : قبل مانهرب غرست كاميرات فكل قنت فالمعسكر و وصلتهم بهاد الجهاز غايبقا يتسجل فيه كلشي ولكن باقي خاصك تبرونشيه مع البيسي باش تطلع لينا الصورة ( اشارت لجهاز اخر ) و هاد الجهاز كايوصل لينا الأصوات لي كايلتاقطوهم الميكروات لي غرست فالمكاتب ديالهم ولكن حتى هو خاصك تبرونشيه مع البيسي باش يبقا يطلع لينا كلشي ( دارت رجل على رجل ) ايوا و دابا تداريبهم ... خططهم ... هضرتهم و اي تحرك داروه غادي يوصلنا فنفس الثانية ... هز كاس ديال الما هبط عليه دقة وحدة باش يقدر يستوعب هادشي لي دارت ف3 شهور جابت معلومات خطيرة و رونات لهم القضية خلاتهم ملاهيين مع راسهم و نوضات حرب باردة بين الخوت حتى بغا واحد يقتل واحد و دابا بفضل داكشي لي دارت الأخبار غا تبدا توصلهم بالديطاي و و فهادشي كاااامل ستغرقات غير 3 شهور و نقزات عدة مراحل و الأهم و لي صدمووو هو انها دارت هادشي كااامل و فلتات منهم تسرط لو لسان و تسالات ليه الهضرة مابقا عارف مايقول
جهاد : ماعرفتش اش غانقول تصدمت ههه لا شي حاجة فووق صدمة ...
جهاد : و علاش لي ماعيطتيش ليا فاش هربتي؟؟؟ كون عيطتي لي كون كاع مادزتي من هادشي كامل
ريماس : فديك الوقيتة ماكنتش قادة نخاطر براسي و نعيط لك ، شكون قاليا بلي نتا مامراقبش؟؟؟ على الاقل فاش خرجت من تما و وصلت للمدينة ديك ساعة حتى لاتبعوك عندي فين نهرب فالمدينة
جهاد : صراحة والله حتى بهرتيني لحد الساعة مزال مامتيق
ريماس : ( بإبتسامة جانبية ) هادي ريماس و أجرك عالله و مزال ماشفتي والو
جهاد : اش باقي غانشوف؟؟ المهمة ساليتيها ف3 شهور و جبتي شي حاجة ماكناش متوقعينها خاصنا نحتافلو بهاد الإنجاز ضروري
ريماس : مانحتافل حتى يوفي سيدكم مصطفى بوعدو و يرجع لي أملاكي و خوتي
جهاد : على هاد الحساب خاص نهضرو معاهم دابا نيت و نعلموهم بأخر الأخبار
ريماس : ( بجدية ) انا فاللول فاش قلتو لي غانجي لإسرائيل كانت عندي مخططات خرا و هي نلقا لي كان سبب فدوك القنابل فداك الحي نهار ماتو واليديا ولكن موراهت شوية بشوية بداك كاتتغير طريقة تفكيري حيت لقيت لابغيت ننتاقم لداكشي لي خداو مني خاصني ندمرهم تدمير ( كرزات على سنانها ) نخلي سميتي بحال العار مبصومة لهم فجبهتهم فهمتيييني؟؟؟؟ واخا نرجع للمغرب ماغاديش نحبس و هاد الحرب لي غادي تكون بينا و بينهم غانحارب فيييها غانديير لهم الإبااادة واخا نعرف نموت و انا كانقتل فيهم واحد بواحد المهم نموت و انا واخدة حق واليديا و حق خوتي لي ماعرفتش كي كايعاملهم داك الحقير و حقي انااا لي تمرمدت ( عاودات شافت فيه بجدية ) المعلومات لي عطيتك مانبغيش يتعطاو لمن ما كان حيت ماشي غامرت بحياتي باش القوا*ة يعطيوهم لهم بدم بااارد فهمتيني ياك؟؟؟ ... بغا يشد لها فيديها باش يطمنها
جهاد : المعلومات غايعرفهم غير الكروب لي تكلف بتدريبك
ريماس : جهاااد اخر مرررة تحط يديك عليا سواء بالقصد ولا بلا قصد هاد تصرفات ماكايعجبونيش و ماشي حيت ساكنين فدار وحدة و فبلاد غريبة يعني غادي يكونو هاد الإحتكاكات هاد تصرفاات طلعو لي فراسي ولا كان هاكا بنااقص نمشي نخرج نبات فزنقة و نحمي راسي كيما حميتو من قبل ... تمات نايضة بزعاف و شدها من يديها باش يوقفها غير خنزرات فيه و هو يطلقها
جهاد : ريماس جلسي عافاك ، ماتفهمينيش غلط و انا مانويت حتى حاجة خايبة والله القسم
ريماس : تقصد ولا ماتقصدش ، يديك جمعهم عندك
جهاد : كانواعدك هادي اخر مرة يصدر مني شي تصرف يقلقك
جهاد : دابا نيت .. مشا جاب البيسي و حطو فوق طبلة و هز طيلي عيط لسي راضي
سي راضي : ( بلهفة ) الو جهاد كاين شي خبار على ريماس؟؟؟؟
جهاد : سي راضي ريماس راها معايا دابا فأمان تحت حمايتي
سي راضي : الحمد الله و الشكر الله كيف راها و كي دارت خرجات من المعسكر؟؟؟؟ كلمها لي نهضر معاها
جهاد : ( بإبتسامة ) شوية و غا تهضر معاها و تفهم كلشي و تشوفها كاع المهم عيطت لك حيت عندنا ليكم خبار جديدة و كاتفرح
سي راضي : صافي فهمت ، راهم كلهم معايا نيت من غير مصطفى
جهاد : عيطو ليه حتى هو و حل سكايب باش نهضرو معاكم
سي راضي : تسنا واحد ل5 دقايق ... قطع و سيفط لي يعيط لسي مصطفى ماكملاتش 5 دقايق حتى تجمع كلشي كانو متشوقين يعرفو اش كاين
جهاد : واش صورة كاتبان واضحة عندكم؟؟؟
سي راضي : ( بعيون مليئة بالفرح ) بنتي ريماس لاباس عليك؟؟؟ واش تعداو عليك تما؟؟؟؟ كي كاتحسي براسك دابا؟؟؟
ريماس : ( بإبتسامة حنونة ) الحمد الله ا عمي راضي
مصطفى : بنتي ريماس شخبار داكشي لي سيفطناك عليه
ريماس : ( جمعات ضحكة ) ريماس فاش كادير شي حاجة فراسها كاتوصل لها و انا ما بنت حد
مصطفى : ( سرط القمعة ) هه عاودي لينا .. عاودات لهم نفس شي لي عاودات لجهاد مع إخفاء بعض الأحداث
ريماس : دابا غانقدرو نراقبو تحركاتهم عن قرب و هادشي لي كاين ... كلشي ضرب طم و بقاو ساكتين مدة شوية تسمعات تصفيقات سي راضي و تبعوه تصفيقات الكروب لي تكلف بتدريبها اما سيدهم مصطفى باقي فحالة صدمة حتى نغزو سي راضي
سي راضي : ( بثقة فالنفس ) بنتي ريماس ماكاينش بحالها و شي لي ماقدروش يديروه رجال بشلاغمهم دارتو هي انا فخووور بيك ا بنتي نتي راك فخر المغرب
سي مصطفى : بطبيعة الحال هادشي ماكانش غايكون لولا تدريباتنا ليك
ريماس : تدرييبات؟؟؟؟ واش هادوك تسميهم تدريبات؟؟؟؟ حشم على عرضك ا سي مصطفى و نتا بالضبط ماعندكش الحق تهضر عنداك يسحابلك راني ناعسة على ودني و ماوصلنيش الخبار للدوا لي عطيتيني قبل مانجي للهنا و عنداك يسحابلك ماعرفتش لاياش كنتي باغي توصل و هادوك تدريبات لي كاتهضر عليهم مايوصلوش للنص فالإختبارات لي دوزت فما بالك بتدريبات الحقييقية
سي مصطفى : ضرب طم ...
كلشي خنزر فسي مصطفى اما هو فهاد اللحظة ماكرهش يشرب من دمها على هاد زعامة لي كاتزعم عليه ديما
سي راضي : جاد فينو؟؟؟
جهاد : ( بأسف ) جاد تشد عندهم ولكن كانواعدك ماغانجيو حتى نجيبوه معانا
ريماس : لا جيني نيشان و قوليا باغي ننتاحرو ، واش باغينا نمشيو للموت برجلينا؟؟؟ كانقولك هما عندهم بنادم كايقتلوه بحال دبان و لأسباب تافهة و نتا كاتقوليا نرجعو ننقذوه ، اش غادي ننقذو فيه العضومة؟؟؟؟
سي راضي : ريماس عندها الحق المهم نتوما اجيو و من بعد غانسيفطو لي يتحقق واش باقي حي ولا قتلوه على العموم نهضرو فموضوع رجوعكم للمغرب ، خاص ترجعو فأقرب وقت حيت حاليا راكم فخطر تما و يقدرو يلقاوكم فأي وقت
جهاد : وي ولكن ماغانقدروش نسافرو بنفس الهويات لي جينا بيهم و خا يخصنا نتنكرو لابغينا نرجعو للمغرب
ريماس : شحال ديال الوقت باش نريكلو أمورنا؟؟؟
سي راضي : شي 2 سيمانات و يكون كلشي واجد غانسيفط لي يوصل لكم اوراق السفر و كاع لي غاتحتاجو
ريماس : من هنا لداك الوقت ماكانظنش خاصنا نبقاو على اتصال لتفادي اي مشكل غايوقع
سي راضي : و ماتخرجوش للزنقة الا لاكنتو متنكرين
جهاد : وي ضروري هادشي راه كانديروه
سي راضي : يلاه خلينا لكم راحة و نتا تهلا فيها راني مخليها عندك امانة مانبغيش طرا لها شي حاجة
جهاد : غير تهنا ا سي راضي
♚ فمكان أخر ♚
الكارد : ميستر أسوار اجي تشوف اش لقينا ... مشا كايجري يشوف اش كاين و كايتمنا يكون شي اثر لي يوصلو ليها ولكن غير وصل و شاف اش لقاو حس بقلبو تقسم على جوج طاح على ركابيه كايتحسس الجثة لي كان كانت كلها محروقة ايلا شعر لي مامحروقش و مليوحة حدا واحد الواد
الكارد : هادا نفس شعر البنت لي كانقلبو عليها
مالك : حتى من طولة و الفصالة نفسها لي كانت عند ريماس
مالك : ( حط يدو على كتف اسوار ) عارف ا ميستر اسوار بلي صعيب تتقبلها ولكن كاتبقا هادي هي الحقيقة لي مايمكنش ننكروها ، أبراهام قاليا بلي راه لقاوها و حرقوها و هاد الهضرة قلتها لك قبل مانلقاوها
أسوار : ( غوت بأعلى صوت ) أرسلااااااااااااااااااااااااان ... أعصابو نهارت ماقدرش يتحمل موت البنت الوحيدة لي بغاها و البنت الوحيدة لي كان قادر يتزوج بيها رغم صعوبات لي كاينين فكرة انها ماتت ماقدرش يتقبلها ناض بقا كايضرب فالأرض بيديه و كايغوت ماكفاهش داكشي و ناض كايضرب يديه مع شجرة لي كارد كايبغيو يحبسوه و هو غير مازايد .. الحقد لي حقد على ارسلان هاد المرة عمرو تخيل راسو انو غايحقد عليه تال درجة ، بعد مالك من تما و جبد طيلي دوز واحد رقم
مالك : ( بإبتسامة جانبية ) ميستر أرسلان صافي تكلفت بالموضوع و البحث ديالهم غايوقف
أرسلان : مزيان هاكا نبغيك .. قطع عليه مشا يكمل فداكشي لي كايدير بينما مالك مشا لعند سي اسوار و كايواسيه زعما ، نشرح لكم الخطة لي دارها مالك من مور ماقاليه ارسلان يتكلف بيهم مشا لواحد البار موالف كايكونو فيه العاهرات بقا مترقب حتى تبان شي وحدة بنفس فصالة ريماس و بعد طووول انتظار لقا وحدة كاتشبه لفصالتها شوية ، غراها بالفلوس و داها لعند الكوافورة لي عطاها صورة ريماس و قالها دير لديك خيتي نفس لاكوب و تصبغ شعر فنفس اللون و فعلا خرجات ليه داكشي كيما بغا و ووصا واحد من لي كارد يجيب شي حوايج ديال ريماس و من بعد هادشي كااامل دا ديك خيتي للغابة و حرقها بكل دم بارد من مور مالبس لها حوايج ريماس و هادشي ماوقفش غير هنا ، قدر يقنع أسوار بلي باغي يقلب معاه عليها و بلي غايعاونو و فعلا اسوار تاق و طاح فالفخ و الباقي راكم عارفينو ... دازو الأيام و تداريب رجعو بحال اللول ولكن أسوار و أرسلان مارجعوش للمعسكر نهائيا ، جاو 2 قياد جداد و ولا مالك هو لي مراقب تدريبات ، أسوار من داك نهار و هو غير فالقصر ماكايخرجش منو و هادشي عصب سي أصلان بزاف ولكن لحد ساعة مزال ماهضر معاه ، أرسلان و أبراهام خبارهم مقطوعة ، اما ريماس من نهار دخلات لديك الشقة و هي مقابلة غير البيسي لي كان كايبان فيه تداريب لي فالمعسكر ...
لاحظات غياب دوك جوج من المعسكر و هاد الغياب كان فمصلاحتها ، ذكاء أرسلان ماكاتستهانش بيه واخا هاد الهدوء لي كاين هاد الأيام ماطمنهاش حيت ماعارفاش تحركات ارسلان و الكلب ديالو ابراهام و اسوار ولكن مع ذلك ماتسوقاتش بزاف لهادشي
♔ فصالون مرون الكارطونات ديال البيتزا كل وحدة فين مليوحة و لي كانيط فالأرض جالسة تانية رجل و رجل طالقاها حداها سلة ديال عامرة وراق مكمشين و فيديها كاس ديال القهوة عينيها مركزين فالبيسي و قدامها جالس جهاد لي كان حتى هو مركز فالبيسي و فيدو كانيط مامسوقينش لديك المزبلة لي ولات فصالون
جهاد : امضرا فين وصلو؟؟؟
ريماس : داك الكلب ولا كايدير ليهم 3 تدريبات فنهار على مافهمت خاصو يسالي تداريب فهاد سيمانة و غادي يضاعفهم ل5 تداريب فنهار باش حتى هو غايمشي من المعسكر
جهاد : ولكن موحال يحفضوهم بهاد سرعة
ريماس : و حنا مالنا فيهم اصلا هو دابا غير كايوريهم تداريب باش من مور مايمشي غا يوليو يتدربو عليهم بشكل يومي
ريماس : بطبيعة الحال ، حيت ماكاينش تمييز تما بحال الولد بحال البنت ، بقاو ساكتين مدة و غير كايتفرجو فيهم و أي تدريب شافوه جديد كايحللوه و يكتبو عليه لاياش كايصلاح و كايخزنوه عندهم فواحد الذاكرة هو و الشرح باش دابا تقريبا قدرو يعرفو كاع تداريب ولكن دابا ناقصينهم 2 حوايج ، انواع السلاح لي غايخدمو بيهم فالحرب و الإستراتجية ديال الحرب لي غايمشيو عليها
جهاد : جاك جوع؟؟
ريماس : غادير فينا خير لانضتي وجدتي لينا شي حاجة خفيفة
جهاد : واخا شوية و راجع ... كان غادي حتى حبسو صوت الغوات ديالها
ريماس : جهااااااااااد اجي دغيااا اجي تشووووف ... مشا كايجري لجهتها كايشوف فالبيسي .. كانو شاحنات كبااااار مستفين قدام المعسكر و عليهم حراسة مشددة كتر من القياس
جهاد : شنو هادشي؟؟؟؟؟
ريماس : ماعرفتش خلينا نشوفو و غانفهمو ... زادو ركزو على شاشة حتى بانو لهم دوك شاحنات داخلين للمقر
جهاد : نتاقلي للكاميرا لاخرا بزربة بزربة قبل ماتفلت علينا شي حاجة
ريماس : ماتوترنيش تسنااا ... خدمو الكاميرا لي لداخل بانو ليهم الشاحنات غاديين لجهة الساحة ديال تدريب عاودات خدامات الكاميرا لي فديك الجهة بان لهم مالك و أبراهام و القياد مجموعين
جهاد : بلاتي بلاتي ماتقوليش ليااا
ريماس : ( تحلو عينيها ) الأسلحة لي غايستعملو فالحرررب يااااااااس يااااااس و اخيييييرا
ريماس : ماغادي نضمنوها حتى توصل هاد الذاكرة ليد سي راضي
جهاد : مابقا وااالو ا ريماس يومين و غانرجعو فيحالاتنا
ريماس : شششششش ها هما كايحلو البيبان ... تقدمو دوك لي كارد و بداو كايحلو البيبان ديال الشاحنات وحدة بوحدة بداو كايجبدو صنادق خشبية كباار و مسدودين فيهم نفس الشارة لي فالخاتم ديال أرسلان ، تقدم أبراهام و بدا كايحل صنادق و كايجبد الأسلحة كايوريهم للقياد كانو نفس الأسلحة لي ناويين يعتامدو عليها فالمغرب فالحرب ولكن مع ذلك داكشي كانو كايسجلوه
جهاد : انا بان ليا هادشي ماعندو حتى فائدة حيت نفس الأسلحة عندنا
ريماس : ( بحيرة ) مابقيت فاهمة والو
جهاد : شنو لي مافاهماش؟؟؟
ريماس : هاد الإحتياطات و الحذر و هاد الحراسة كاملة باش يحميو هادشي؟؟ و دوك تداريب المتطورة و البذلات المتطورة كلها و فاللخر يكون عندهم غير هاد الأسلحة؟؟؟؟
جهاد : شنو كاتقصدي؟؟؟
ريماس : لي كانقصد باقا شي حاجة ناقصة حيت مايمكنش يكون عندهم بذلات كاتحمي من صدمات القنابل و كاتحمي من القرطاس و زيد عليها مزودة بدخان مسيل للدموع و زيد و زيد و فاللخر تلقاهم معتامدين على هاد الأسلحة البدائية ( ضربات لها طن فراس
ريماس : بلاتي بلاتي بلاتي ... نقلات الكاميرا لجهة الباب و تما كانت صدمة جهاد ...
العميل الصهيوني والجاسوسة المغربية الجزء الخامس
محتوى القصة
التنقل بين الأجزاء