الحب أقوى من أي إتفاق الجزء 13

وقف قدام لبحر خارج لمدينة بكلمترات كثيرة ..حل طوموبيل نزل وتسناها تبعو بانت ليه مزال جالسة ومطولة وباغا تزيد تقصح راسهاا ، رجع لطوموبيل مد يدو لبواط ايكون تحت نظراتها كانت كتسنى فيه شنو بغى يدير حتى بان ليها هز باكية الگارو وبريكة عاد تنفست بأريحية ...عطا وجهو لبحر وظهرو ليها وشعل ليه گاروو يكميه ويفك بيه عروق راسو لي تعگدو ...لاحو باقي فيه النص عفط عليه وساط مخرج الدخان من جوفو ..

قضب حواجبو وحل ليها لباب بنفاذ صبر بدون مينطق كيتسنى فيها تنزل

كانت كتشوف قدامها بلاما تعيرو تا اهتمام دايراه مكاينش شيء لي عصبو وخلاه يشدها من دراعها ويخرجها صحة ...عينيها كانو خارجين ممصدقاش شنو كيدير ومنين جاب الجرأة ..

انفوا حطات رجليها على الارض وتبتتهم جرات ايدها منو ودفعاتو واخا بدون جدوى بقى واقف متزحزحش وزاد زير عليه

مريام مخنزرة فيه ~. شنوو خصكك ؟؟ اش باغي مني مزااال

زيدان طلق منها ودار يديه وراه جامعهم حتى خرجو عروقو ،دوا تحت من سنانو وقال بصوت غليض ~ كيخصنااا نهضرو ؟؟

تمات راجعة لور وضحكة استهزاء وسخرية مرسومة على وجهها ...جا ظهرها على طوموبيل لي تسندات عليها مربعة يديها كطلع فيه وتنزل وقالت وهي كتشير بصبعها ليهم بزوج ~ نهضرو وأنا ويااك ياك ...ايوا سمعني نقوليك...ضغطت على لهضرة ...لكلام بيناتنا سالا شحال هادا وحطينا نقطة نهاية معندنا فاش ندويو دابا !!

زيدان متحكم فراسو ،عارف بلي مكحلها معاها ومن حقها گاع متشوف فيه ولا تدوي معاه ولكن قلبو حارقو وبالو ممهنيش ،باغي يرتااح ~. أرون ولد شكون ؟؟

كانت متوقعاها منو بنسبة كبيرة عرفاتو غيشك وغيتهيأ شي حوايج مكاينينش...قربت لعندو شوية وقالت بثقة واخا كارهة تشوف ليه فخليقتو ~. صافي هادشي لاش جايبي حتال هنا ومعذب وحالتك حالة كون سولتيني منخلي گاع بالك مشطون. غير رتاح كماال بااه رااجل ماشي شمااتة ...ختمت كلامها بابتسامة جانبية لي شعلاتو وخلاتو يهز يدو قداام وجهها كان غيعطيها وتراجع ، عض على فكو من لدااخل وقال بحدة ~. قااااديي فمك حسن ليك

مريام حركت راسها بتساؤل مخرجة فيه عيهيها ~. ولا شنوو ؟؟ غتضربني....مدات ليه حنكها ، هاك هاك صرفقني الا كنتي غتبرد ..ولا عرفتي شنووو عندي ليك حل وااعر ..ضيقت عينيها وقالت بقلب محروق.. نشر لفيديو وتصاور لي خديتي ليا معاك علقهم في شانطي ولا لوحهم يشوفوهم ناس ويشهروهم حيت صااافي حيااتي ساالات مبقى فيها ميتقاد ولا عندي كي رباح كي لخطية ...

زيدان شاف فعينيها لي كانو كيبريو ، كان متاكد منها بلي واقعة ليها شي حاجة قال بصوت خافت ~. بغيت نعرف غير مالك امريام شنو عندك ؟؟

تنهدات بصوت مسموع ودوات بنبرة صوت زايدة ...مااشي شغلك !! شفتي واخا نكون كنموت نتااا ماشي شغلك حيت مبقاش عندك الخق تسولني هاد سؤاال

زيدان قرب منها بغى ياخد يدها عندو وهي تبعد عليه ونزلت راسها لتحت وقالت بعتاب وبحرق نطقت ~شنو باغي مني ازيدااااااان!! ....واش مكفاكش لي درتي فيااا

شنووو باقي باغي مزال ،خليني عليك عفاك ومتبقاش تفكرني فشنو درتي حيت والحمد للله قدرت بجهد الله وجيمس انني ننسى ونتجاوز ...

ونتمنى حتى نتا تكون قدرتي ، قدرتي ترضي كبريائك من بعد ماا نفدتي انتقامك

قدرتي ترتاح وتعيش هاني مهني وتطفي الحرقة لي كانت شاعلة فيك بعد مشعلتها فيا ؟؟

سكتات شوية كتسناه يجاوب ..لكن جوابو كان هو سكات عطاها بظهرو وضار كيمسح على رقبتو

يا ريت كون واجهها وقاليها انا مقدرتش ، وبلي كيتعذب وبلي تزادتو حرقة فوق حرقة والا كانت هي نسات ولعافية لي كانت في قلبها وطفات ورجعات رماد هو نارو عاد مازادت شعلات وولا كيعاني كثر من قبل

كبريائو كيف ديما منعوو يقول شي كلمة بقى عاطيها بظهرو مقادرش يشوف ليها في عينيها حيت شاف راسو فيهم شحال كان مسخ واناني ومتعدي

وشحال كانت بريئة وساذجة حتى ضحك عليها ، مسح على شعرو وضار لعندها وهي تزيد تعطيه وتعذبو بعد ما قالت بصوت باكي ~كيف حال الضمير ديالك ، واش مرتااح مكيلومكش ، مكيأنبكش ، مكيقولش ليك علاش ضحكتي على ديك البنت وضيعتي حياتها ومستقبلهاا ....ااه نسيت نتا اصلا معندكش الضميير

زيدان جمع فمو وعض عليه كان كيشوف في جنبو وقال ~. باراكاا امريام

مريام مسحت دمعتها قبل متشق طريقها على حنكها ~. غير الهضرة ومتحملتيش تسمعهاا وانا مفكرتيش واش غنقدر نتحمل داكشي لي درتي فيا هاا ؟؟ علاش ازيداان شنو كان ذنبي ولا غير حيت بابا الله يرحمو كان كيبغي عمتك وخلاها

زيدان قاطعها مبغاش يزيد يسمع~. فاش غتفيد دابا هاد الهضرة

هزت راسها ~. فهادي نتافق معاك معندها متفيد الهضرة دابا حيت تا حاجة مغتغير ،ولكن محتاجة نقولها ونسمعها ليك خاصك تعرف شحال كنتي خايب ومتسواش وبلي تستاهل اي كلمة كنقولها ليك ممزياناش ،

ياكما بنت ليك ازيدان رجعت وواقفة قدامك على رجلي راني مزيان ههه لا لا لداخل ربي لي عالم بيه ، ولا دماار ومرقع بسباب داك لماضي لمغيس ليطليتيني بيه ولي كنعاني منو لدابا..تنهدات هازة حجبانها .....ولكن نستاهل درتها بيدي مغصبتينيش

مقدرش يزيد يصبر ويمنع راسو انو يعتاذر منهاا صوتها المجروح حطمو اما هضرتها ذبحاتو وكانت عقاب قاسي ليه بلاما يتردد قال بأسف ~. عيني كانو معميين انا عارف واخا نبرر تا نعياا مكانش خاصني ندير لي درت ...بففف صاط بسخط وقال وهو كيغوت وكشاكشو خارجين ....كنعتاذر على كلشي امريام ،وخاصك تعرفي بلي تا انا كنتعذب واكثر منك ، تا ليلة مقدرت نعيشها مرتااح من ورا داك نهار ، حياتي ولات عذااب

مريام وصلها مساج في تليفونها خلاها متسمعش شنو قال من ورا حياتو ولات عذاب. هزاتو كانت فيه صورة لولدها ومها فاش كانو في الجردة ومكتوب تحت منها " ننتظر الوقت المناسب "

طيحات تليفون من ايدهاا ،كانت كترعد مبقاتش قادة تزيد تستحمل وتعيش في تهديدات وفهاد الخوف لي ولا مسيطر على حياتها ..مبقاتش قادة تسنى نهار لي غيجي وتخرم فيه فواحد منهم ...حطات ايدها على وجها وبدات تبكي رد ليها لبال ونزل يهز تليفون وهي تسبقو ليه ودفعاتو بالغوات وقالت ~

بعد مني بعد منيي ومتعتاذر مني ماا تعاود ليا زابور حياتك حيت اخر حاجة تتهمني هي اعتذارك ولاشنو تتحس ولاشنو عندك حيث لي تنعيش اناااااا كثر وكبر خليني عليك مع همي

وغمي وخليني نزيد نتعذب

بغات تطلع وهو يشدها من دراعها مزوج مزير عليها ممخليهاش فين تحرك ~ معندك فين تمشي امريام تا تسمعيني

مريام تارت عليها وغوتات ~. معندي منسمع منك وعمري غنسمح ليك .وجهها سرد بدموع ولميساج بين عينيها كتقرا فيه ...بسبااابك نتاا انا كنعيش اسوء ايام حيااتي ..بسبابك ممكن نتحرم من احسن حاجة طرات ليا ورا معرفتك ولي هي ولديي

خطف تليفون من يدها مانعها تقرب ليه ، في ايكخون كانت تصويرتها هي ارون معنقهاه وضحكة معمرة وجههم ..بدون استئذان دخل لمساجات وقرا لي قرات زير على تليفون

وسب فخاطرو ،كان عارف القضية مغاديش تخرج طريفة ~. شكوون هادو ؟؟

مريام بعتاب ~. ونتا شغلك ، اش خصك فيهم

زيدان معصب كيدوي ~ راني دويت معاك ...نطقت بالخف ~. تانا جوبتك ولا عرفتي شكون هادو ، هادو وحدين بحالك مكيخاف س الله وعندهم حياة ناس زبالة كيتحكمو فيها كيف بغاو

بالمختصر قال حيت عارفها مغتخرجش الهضرة وتفتح ليه قلبها وتبدا تعاود ليه ~. هادو لي قتلو جيمس يااك

لفتات وجهها لعندو متعجبة كيفاش عرف هادشي لي كاين فخبارها هي والمحامي وماماها ونادية ~. كيفاااش !!

زيدان ~ كيف سمعتي ، عرفت بلي جيمس تقتل حيت كان باغي يسلم ولي قتلوه عائلتو وهما لي غيكونو تابعينك على قبل الولد

باش ياخدوه يربيوه كيف بغاو

مريام بعصبية قاطعاتو ~. هاداك ولدي ومغنخلي تا حد يدييه مني واخا نعرف نموووت ، شفتي علاش قلت ليك معندك لاش تعتاذر مني ،حيت مغتفيدني ديك سمحي ليا ديالك فوالو ، مغتقدر تغير قرار بانني تغربت وخليت بلادي ومشيت لفرنسا ، ولا تغير المصير المجهول لي كيتسناني ولي باين عنوانو

بشهقة وتنهيدة قالت ~. ااااه الخليفي خسرتي ليا حيااتي

كانت هادي النقطة لي زادت فيضات ليه الكاس ،مكرهش ترجع بيه ليام اللور وميقربش منهاا گاع ولا يتلاقاها ، نطق بثقة وباصرار وقاليهاا وهو كيشوف فعينيها ~. كيف خسرتها غنرجع نقادها

مريام طلعت بلاصتها بعد مقالت ليه وهي كتمسح دموعها ~ بيني وبينك ليام والا وصلتي ديك ساع لوذنك عضهاا

سد عليه باب طوموبيل وتوجه لمكان القيادة وديمارا غادي في طريق عاقدهم وهي كتاكل في شنايفها حداه وعلى قلبها محطوطة صخرة ومثقلة عليها وخانقاها ومانعة ريق يدوز ليها ....لخوف لي عمرو ركبها ولات حاسة بيه من جهة من ورا شنو كيوصلها اما لي حداها وهضرتو اخر همها واخا خوات لي فجعبتها ليه وقالت وسمعاتو خل وذنين وعرفات منو بلي ندمان على فعلتو لدرجة عتاذر منها واخا هاكداك تا كلمة ملي قال مشفعت ليه عندها

حيت لي عطا الله عطاه داكشي مغيبدل والو في حياتها تخربات وكحالت ومبقى فيها ميتقاد من غير الا طرات شي معجزة وربي شاف من حالها ...هزات تليفونها وعيطات لنزهة لي لقاتها على اعصابها كانت غتعيط ليها ~. الو ماما كيف دايرين

نزهة بخوف ~. بنتي أرون مريض شوية ، كان كيلعب شوية سخف ليا ومبقاش باغي يلعب غا متكي

مريام حطات ايدها على قلبها ~. كيفااااش شنو كتقولي ماااالو

ياربي الا كنت دايرة ذنب في حياتي وكنخلص فيه كنحمدك وكنشكرك عليه هء هء نستاهل ولكن الا ولدي الا ولدي بغيتها فيا ماشي فيه

ولات نزهة كتصبر فيها من تليفون ~. تعوذي من الشيطان ابنتي مغيكون عندو والو ،مهم جي عندي نديوه طبيب

مريام كتمسح في عينيها ولكن القلب شكون يمسح دموعو ؟؟ ~. صافي انا جاايا في طريق نلقاك واجدة

زيدان عينو مع طريق ومعاها غير شافها سالات وهو يسولها باغي يطمئن ~. شنو واقع مالو الولد ؟؟

مريام بدون شعور دات وجابت معاه في الهضرة ~ معرفتش معرفتش ، ماما قالت ليا سخف ومبقاش باغي يلعب ليها وغير مرخي

زيدان زاد في السرعة ~ متخافيش مغيكون عندو والو

مقدرش يبرد.خاطرها حيت كانت كتشوى من لداخل وبالها مشطون مكرهات طير وتكون عندو كل مرة تقوليه عفاك زيد شوية فسرعة مفكراتش راه راكبة مع عدوها ولا سباب مشاكيلها همها الوحيد هو ارون

وصلو قدام دارها خرجات كتجري قطعات شانطي وحلات باب دار لقات نزهة مركباه مشات لعندو كتبوس فيه وهو فاشل ~. مالو اماما ياكما طاح ومشفتيهش

نزهة غادين قاصدين لباب~. لا ابنتي كان قدام عيني كيلعب فيى الارض تا تلوى

مريام كتمسح على شعرو ~. واخا واخا ياربي ميكون فيه والو ياك اماما ...ارون ولدي شوفيا انا جيت

دري مكانش هنا وهادشي زاد خلعها خرجو على برا لقات زيدان باقي واقف مقدراتش تعارض ولا تسنى طاكسي غمضات عينيها وركبات معاه نزهة بقات غير كتشوف ..مسافة طريق وكانو في اقرب مصحة

حلات عين وختها باقا مسدودة ،فات لحال وهي عاد نايضة حاسة براسها مدگدگة وعيانة.....كانت عريانة ملابسة والو وشعرها مطلووق لحوايج مزال فين ترماو ضورات وجهها ملقاتش مراد حدااهاا

تگعدات شوية وتكات على لكادر ديال الناموسية جارة عليها ليزار تستر راسها ...كانت مزنگة وطايح عليها سر الحب وعينيها ضاحكين بالغرام اما قلبهاا كيرفرف ملي كتفكر شنو دوزات فوق هاد سرير العشق..مرة مرة تفلت منها ابتسامة وتنهد بحب وهي كتفكر ليلتها لولة مع راجلهاا لي دازت كيف توقعات وبغات واخا تبعكات وجابت فشووشها عليه كان عجبها لحال...

سمعات صوتو في الحمام كان كيغني بصوتو ل كيخلع باينة فيه راشقة ليه وعلاش لا وهو مدوز ليلة من اروع ميكون مع حب حياتو وحلالو....هزات تليفونها تشوف شحال ساعة وهي تلقى مكالمات من عائشة مسمعتهمش،

ضربتها لفيقة مزيان وتوگضاات ودارت ليها مها طن في راس ورجعات لمود الواقع ....ناضت من فوق الناموسية وخدات بينوار ديالها لبساتو ،جمعت شعرها لفوق عاد دوزت الاتصال لماماها ..كتاكل في ظفارها خايفة صوتها يفرشهاا وتعيق بيها ولا تخرج شي كلمة ماهياش

عائشة بالغوات ~. عاد تفكرتي عندك أم وقلتي نعيط ليها ها ؟ شحفت بتعياط من صباح الله وانا نصوني فين كنتي حاطا داك الشقف ....مخلاتش ليها الفرصة فين تدوي ولا تبرر

نادية كتعض في شفايفها وتمشي وتجي في لبيت بتوتر ~. حم غاا سمعيني بعدا نقوليك فين كنت مالك تفرگعتي عليا !!

عايشة ~. هاني كنسمع قولي

نادية جلسات على طرف السرير ، وحاولت تقاد صوتها لي باينة فيه باح بنعاس ~. كانت عندي شي خدمة على صباح وخليت تليفون فصاك ومع دايرة ليه سيلونس مسمعتوش

عائشة بتشكيك ~ وشناهيا هاد الخدمة لي تباتي برا دار على قبلها طالعة في نهار تالت ومخلياني فراديةة

نادية قلبها بدا يضرب ،تحكمت فراسها وحاولت تهضر ميقنة ~ شي حاجة كتخص مريام ، مبقاش ليا بزااف ونرجع لدار

سمعات باب دوش تحل مجات فين دور تدير ليه اشارة باش يسكت حتى سبقها وقال~. علاش لبستي حوايجك احبيبتي مالك زربانة ؟؟

نادية بدات تعض على فمها وتنذب في حناكها وكتوريه تليفون ،وكتدير ليها اشارة باش يسك قرب منهاو بهمس قال شكون وهي غارقة في حوايجها وربي ل عالم بيها ، بدات تكحب ~. مهم ماما نخليك

عائشة بغات تكذب وذنيهاا ولكن مقدراتش ~. شكون كاين معاك ؟؟ سمعت صوت شي راجل

نادية كتحك اسفل عنقها والصهد شادها ~. اه اه راه غير تلفازة هادي

بحال البيجي تسول وتعاود ~. عاد قلتي ليا نتي خارجة على شي شغل ، ديتي معاك تلفازة ولا شنو

نادية غمضت عينيها وحلتهم معصبة عارفة عايشة ماشي من نوع لي تضحك عليه وتدوخوو بالهضرة ~. ايه لا راه ساليت وانا دابا في القهوة

هي كتكذب ومراد متكي على لحيط وكيخنزر فيها معاجبوش هاد لحزاق

عائشة هازة حاجب ومنزلة خوه ~. ايوا لعجب لقهاوي شفتهم تمسخو من لكرة والافلام لوثائقية ولاو يحطو افلام مكسيكية حبيبتي ومنعرف شنو اش هاد قلة لحيا ؟؟

نادية تزيد كلمة تفضح فقررات تنهي معاها الهضرة ~. يالاه اماما حبيبتي نخليك انا غنوض دابا نرجع لاوطيل نرتااح وندوي معاك فقت بكري ليوم

عائشة ~. واخا ابنت كرشي سيري سيري خدمتك اولى

قطعت معاها ولاحت تليفون منفاجرة على مراد ~. شنوو درتي امراد واش مقدرتيش تسكت شويية تا نسالي هاهيا عاقت بيا

مراد رفع يدو بغضب ~. كيفاش عاقت بيك مالك كاينة مع صاحبك ولا شنوو ، واش غنبداو تاني من لول انادية واش ولفتيها ولا شنو راني رااجلك رااجلك

مبغاتش تبدا نهارها معاه بنگير بعد مدوزو ليلة غير گاع ليالي قربت منو ودورات ايدها على خصرو باغا تقنعو بتلحليح حيت هادشي لي غينفع معاه ~. مراااد

خاصك تعرف واحد الحاجة

مراد بعدها شوية عليه وهز ليها تشوفيه ~ شنو هي الالة ، قولي نسمع !!

نادية حطات ايدها على صدرو كان عريان وبدات كتدي صباعها وتجيبهم عليه وتدوي باغا تكالميه وتاثر فيه ~. ماما عند بالها انا وياك مطلقين ، وماشي غير هي گاع العائلة من غير مريام لي عاد عرفتك مؤخرا

حيد ايدو من وجهها وخنزر فيها مخرج عينيه بصدمة ~. كيفااش قلتي ليهم طلقنااا !!

نادية جمعات ايدها قدامها وقالت بندم ~. اه ضطريت نكذب عليهم ، ضغطو عليا بزااف

مبقيت عارفة لمن نعطي الحق واش ليهم ولا لقلبي ، قلت ليهم بلي طلقناا وبلي نتا شفتي حياتك وتا انا

مراد دوا بسخرية ~ طنز هو هذا ودابا شنوو غتهربي وتسكتي معايا ولا غنبداو نتلاقاو بحال براهش ديال اعدادي ولا نمشي نعاود نتزوج بيك ونطلب ورغب فيك من جديد

نادية شابكت ايدها مع يدو وطلعات على صباع رجليها باستو من حناكو بزوج كتحزر فيه~ عطيني شوية لوقت امراد نحاول نقنع ماما حيت هي المهمة عندي فيهم كاملين

مراد زفر بسخط وبعد يدو منها ~. تقنعي مك قتال انا ولا حبايسي انا هاد لخرا ديالك مبغاش يدخل ليا الراس ، كنخلقها نهار معاك لغد ليه كتقلب عندي دنيا ملتها سفاها على علاها معرفت اش هاد لخراا ،

شاف فيها بنفاذ صبر ~. عرفتي شنو ديري لي بغيتي مبقاش هامني

مشى لباليزة كياخد في حوايجو وكيلبس وهي كتشوف فيه ودمعة فطرف فعينيها ، من نهار عرفتو ولات تبكي كثر مضحك ، قالت بعتاب وبصوت باكي ~. ياك هادشي منسوا عندك في هاد صباح ، ماشي هي هادي الكلمة لي كنت كتتسنى منك امراد ، مقدرتيش هادشي لي درت على ودك جاي كتقوليا ديري لي بغيتي هادي هي توقف معايا وتبقى فجنبي تا نخرجو من هاد مشكيل بزوج دغيا لحتي عليا كلشي

مراد لاح سبرديلة من يدو بزعف وقال ~ لمشكل نتي طيحتي راسك فيه ..ونتي لي باغا تعطيه كبر من حجمو انا من دابا مستعد نمشي عند ماماك ندوي معاها ونديك قدامها حيت بشرع والقانون نتي مرتي وتا حد مغيمنعك عليا

نادية ~. وانا مبغاش نخسرها امراد باغا نمهد ليها نرجع نحببها فيك

مراد بالغوات كشاكسو خارجين ~ علاه انا شنو درت گاع مالي ومال هادشي لي وقع ، راه نتي سباب كون نهار لول كنتي فصفي غنوقعوش فهادشي نتي لي عطيتيهم الفرصة فين يهضرو

نادية ضيقت عينيها~. دابا شنوو ،غنضاربو على صباح على والو

مراد كان كيلبس في تريكوه ~. على والو هادشي كلو ووالو في بلادك

نادية تمات جايا لعندو وكتدوي بشوية ~. تيق بيا امراد غنقاد كلشي غير عطيني لوقت

طمر مجاوبهاش كان جالس على طرف ناموسية كيلبس في سبرديلتو ...جلسات وراه وعنقاتو من ظهرو حاطا راسها عليه ~. وصافي متبقاش كااعي

طلعات شوية لعنقو وبدات تبوس فيه ~. واا صافي مجاتش نتخاصمو ليوم

نجحات فأنها تفك تغوبيشة لي عقد ، دار لعندها كيشوف في وجها عاض على فموو وبقلة حيلة قال ~. بزز مني نصبر معندي مندير داارها ليا هاد لقلب

تبسمات وعنقاتو مخشية فيه هزها من خصرها حطها على رجليه وهمس في وذنهاا حتى تبورشت ~. دابا هاكداك عذبتيني وخليتيني نلبس حوايجي مغدد وهانا وغنصدق محيدهم تاني

نادية بجرأة بدات كطلع ليه تريكو ~. متعذبش انا نحيدهم ليك

وصلو قدام المصحة نزلات مريام بعقل مرفوع هي ونزهة دخلو كيجريو ، زيدان ممنعش راسو انو يتبعهم تا هو بالو تشطن على لولد صغير ، دخلو لاستقبال وكأي مصحة خاصة حط لفلوس عاد نشوفو مالك ..

وقف مع كلمة خلصي الالة بعدا وعطيني لبيانات وهو يجهل على لبنت لي تما ، خبط على كونطوار وغوت تا كلشي دار كيشوف فيه ~. وااش هادا ايغجوونص ولا بنكةة ، لولد جايبينو معاقلش ونتي جالسة كتدوي ف لخوا لخاوي عتقوه بعدا !! ونشوفو لفلوس

- انا كندير غير خدمتي اسيدي

هز يدو بنرفزة ~. هادي هي لكلمة لي حفظوكم

نوض ليهم لبلبة تماا مريام الهضرة كانت واخلة ليها همها غير ولدها ،تدخل طبيب من بعد سكوندار وداو لولد يسعفوه ودخلات كتجري هي ونزهة معاه ماباغاش تخليه

- حطو على لباياص كيقلب لين عينيه ~ شنو وقع ليه بضبط ؟؟

نزهة بخوف ~. والو جالس كيلعب تاا لوى حدايا مبقيت عارفة مالو

- تكلم مع المساعدة ديالو ~. حيدي ليه ليكوش !!

سبقتها مريام كتحل لولدها في حوايجو وكتستفسر ~. علاش شنوو واقع

- والو امدام متخلعيش غير فحص روتيني

زولات ليه سروالو وليكوش وهي تصدم وكانت غطيح على وقفتها ، كانت كلها عامرة دم كثيير، ايديها بدا يرجفو وقلبها غيخرج من بلاصتو مقدراتش تبقى تشوف

شنوو هادشي اويلي مالو ولديي

نزهة كانت كثر منها تصدمت من لي شافت مقدراتش تنطق

مريام كتحرك ليه في وجهو وكتبكي وحهو صفار ووفمو ولا بيض ~. ارون شوف فيا اماما

- كانت لفرملية كتحاول تبعد فيها وهي والو معاقلاش على راسها ~. تهدني الالة وخلينا نديرو خدمتنا

شاف حتى عيا وخرجهم على برا، كان زيدان كيتسنا فيهم غير تحل لباب وبانت ليه كتبكي ومقاداش توقف على طولتها مشى لعندهم شدها من ذراعها وقال بتساؤل ~. شنو كااين اش عندو

مريام مكانت عاقلة شنو كدير ولا معامن هي واقفة ولا فيمن شادة ~. ولدي مغيموتش ياك

نزهة خداتها من ايدو داتها تجلس وجلست جنبها معنقاها ~. متخافيش ابنتي مغيوقع ليه والو ، شدي فراسك شوية

مريام كتنخصص ~. الا هو منقدرش باراكا علياا مبقاش عندي فين نزيد

بقا كيسمع من بعيد معاودش قرب ناحيتهم ، كل مرة يهز عينو لباب يتسنى شي حد يخرج تا تنفخ وهو يخرج على برا كمى ليه گارو حس براسو محتاجو عاد رجع دخل ،مع وقف تحل لباب خرج طبيب لي ناضت لعندو مريام كتجري ~. امضرا ادكتور كيف بقى ولدي مالو مناش داك دم

- كانت زربان ~ بغيت نعرف شنو اخر حاجة كلا

مريام شافت فنزهة كتسناها تجاوب هاد الاخيرة لي هزات راسها وقالت ~. شرب لحليب ديالو ، ايوا وبدأ يلعب ومرة مرة كان كيجي ينقب من لحمص ولفول كنت صالقاهم ومطيباهم ليا

- مم اوك مهم ولدك الالة خسر ليه دم ديالو داكشي علاش شفتي داك دم في ليكوش داز ليه مع بيبي وهاد المرض اسمو تجرثم الدم وكيكون وراثي

اما من الام ولاب

بدات كتبكي وهي يقاطعها ~. مداام واش عارفة اشمن فصيلة دم عندو كيخصنا نسعفووه دغيا

مريام حرجات راسها ليه بالايجاب ~ اه اه عندو +O

نزلت هاد الكلمة على مسامع زيدااان وخلاتو مصدوم وغير كيشوف فيها.

دوزو نهار كامل في مصحةة بزز باش عطاوهم لولد تا طمنو عليه وكتبوا ليه مضادات حيوية باش ينقيو ليه الجسم ديالو من المكروب وبعض الاكلات منعوهم عليه وبالاخص الفول ... اما زيدان مفارقهاش بقى معاهم حتى خرجو باش يوصلهم لدار عارفها بووحدها وممعاها حد ...كان غادي صاايگ ومطمر مكيدويش عينيه مرة مرة يتفيكساو في لمرايا حاضي ملامح أرون كان ناعس بين ايدين مريام حاطاه على صدرها وايدها على ظهرو مزيره عليه في جنبهاا نزهة لي كتحمد الله وتشكرو انو العاقبة خرجات بخير وردات ليه لبال وسعفوه اما يبقى ينزف حتى يمووت ، وصلهم حدا باب دار نزلت نزهة هي لولة بلاما تنطق بكلمةة حلات باب دار ودخلات عاد نزلات مريام بشوية عليها مكايسة على ولدها حل زيدان ونزل بدورو ضار لعندها وعينيه علىه

مريام بتعب صوتها بح نهار داز عندها مجبد وصعيب ~. شكراا بزااف عذبتك معااناا

زيدان حط ايديه على وجه ارون الطفولي لي كان فسابع نوبة ، تحنى لعندو وباسو في حنكو لي كان سخون ومزنگ مقدرتش تمنعو ولا تبعدو عليه هز راسو فيها وقال وهو غادي ~. تهلاي فيه !! وشربيه دواا في الوقت

شد طريق غادي وكيكمي وعقلو

رجع بيه لتاريخ لي تخلوى بمريام شحال كان ، بدا يحسب ويتحقق ، كان شاك ولكن هادشي لي وقع ليوم اگد ليه بلي مستحيل الولد يكون ولد جميس ويقدر يكون ولدوو

قبل سنوات طويلة وبالضبط من بعد متعلنو شراكتهم بزوج وبدااو خدامين ، قام زيدان بعمل خيري في شركة لفائدة بنك دم ...تبرعو لا هو لا لموضفين وحتى يمس معاهم بدمهم وكان سباق جيمس وزيداان

دازو هما لوالا باش يشجعو الموضفين

جيمس بحس فكااهي ~. اجي بعدا ياكما شربتي شي قريعة لبارح تصدق مسكر نااس ماشي عاتقهم

زيدان بابتسامة جانبية كان كيطوي كمام القميجة باش لبنت تاخد منو دم~ متخممش شووف غاا راسك نتاا ناش يشربو القهوة نتا تفطر بشامبانيا

جيمس حط راسو على لكرسي ومد يدو لممرضة حتى هو~. لا لا انا كنجي مغرب كنقلل من داكشي

- خدات لجيمس دم وقالت ~ ممكن نعرف فصيلة ديالك

جوبها وقال ~A+...ونتا اموسيو زيدان ..كان كيقاد في حوايجو ~. انا O+

بتاسمت ليهم وقيدات شغلها ،وقف جيمس كيشرب في كاس ليمون ~. ناس وااعرين خاصني نتصاحب معاك على هاد لحساب شي نهار نوقف عليك وتبرع ليا

زيدان طبطب على كتفو ~. اما انا خاصني نفر فيك حيت معندك لاش صالح ليا

بقى مترسخ ليه داك نهار مزيان فبالو حيت طول الجلسة وهما شادين فبعضياتهم على زمرة دم لي عندهم ، كيبغي يقنع راسو بلي ارون ماشي ولدو لكت كتوقع شي حاجة لي كتبت ليه لعكس وكتخربقو ...معرفش امتى وصل لدارو ولا كيفاش دار لطريق ، سمع تليفونو كيصوني هزو ولقاها سمر غتكون كتسناه وموحشاه ولكن لگانة باش يسهر ولا يمشي عندها مكايناش اطلاقا دماغو مبرزط وعقلو كيتبخ ..دخل لدار كيحيد في لافيست بانت ليه امينة جالسة في صالون كتسبح وهو يقرب منها باص على راسها وجلس حداها

امينة كدوز ايدعا على ظهرو ~ ولدي لاباس ؟؟....حرك ليها راسو بالايجاب وضيق عينيه فيها وقال بتساؤل ~. لواليدة واش كاين شي حد في العائلة عندو مشكل تجرثم الدم

ستغربات سؤال ديالو شافت فيه كتحاول تتفكر في اللخر قالت ~. لاا اولدي تا حد معندو هاد المرض علاش شنو واقع مالك ؟؟

زيدان رجع خاب ضنوو ~. غير سولتك متشغليش بالك ، وقف غادي لبيتو يدوش ويرتاح وهي توقفو ~. غتخرج اولدي ولا ندير بحسابك تعشى معانا

زيدان لايح لافيست على كتفو ومكمل على طريقو ~. غير تعشاو عندي شي خدمة خاصني نكملها الا بغيت شي حاجة غنزل ليها

طلع لبيتو دخل نيشان لدوش حيد عليه عياا نهار ، لبس شورط وبيل سماطي نشف شعرو مزياان وخلاه مخربق نازل على جبهتو نزل خدا ليه كاس للقهوة صيك وداز لبيرو ديالو كيقلب ..

كان عندو خيط واحد هو يكون شي حد غي عائلتو عندو نفس المرض لكن تبخر ، من قلبو باغي لولد يكون ولدو مزال مدخلتش لراسو بلي مريام قدرات دير عائلة مع راجل اخور وتنساه بحالا گعما كان في حيااتها

يكون كيبغيها ولا مجرد حب تملك وانانية منوو هادشي لي موال مواضحكش ، صونا ليه تليفون مبغاش يشوفيه گاع ضنا منو بلي سمر ، لكن الحاح المتصل لي عاود شحال من مرة خلاه يهزو ويشوف شكون رقم كان غريب

بدون شعور دوز الخط كان صوت رجولي حداه فوضى وغوات كثير ،شي كيغوت الدار بيضاء شي طنجة وكلها يلغي بلغاه

بزز باش قدر يسمع الووو

زيدان بلغوات ب ~.الو شكون معايا

- السلام وعليكم سيد الغزال الحال والاحوال شخباركم امولاي

زيدان ~ ولله لحمد شكون معايا

-الاعقلتي عليا نعطيك طرف ديال جبان لي كنتي تحبو وانتي باقي فتيوت

زيدان طلع لو زمر معندوش لگانة لصواب ولبهلان ~اسي قول شكون نتا راه معنديش وقت لتفلية

_هههه انت هو انت كيف لبرطال دلقبة يامولاي الشريف

انا سيدي الغالي لقرطبي لي كان جاركم زمان ايام العز فلمدينة فدرب بن سالم الدار لقاعية لي كان الاب ديالي رحمه لله كيبيع لمشاطي دلخشب وكنتي تجي نلعب انا وياك فلمخفية ونسرقو لخليع ههه لگيسي نهار كانو يخلعو ههههههه ايام امولاي

زيدان كيدور سينته عقلو دغيا ترسمات شبه ابتسامة على محياه فور متفكر دارهم لقديمة وجورة لقديمة وحومتهم دروب فاس ولمدينة لقديمة لي كان يخيطهم ~اهلا اهلا سيد لغالي شخبارك لحباب والجورة القديمة

الغالي ~يطول فعمر مولاي ويخليك بركة االاصل طيب

قولي اباحبيبي واحد الاخ فاينو اراضيه

زيدان حنحن ~حمد لاه ولكن لحد الان معندي عليه خبار غبر غبرة وحدة

الغالي ~شغنقولك ليوم ماشي بصدفة دايز لبوجلود نجيب شوية دسيما ورملة نرممم واحد لحويطات مسمعتي كلاتتهم لقطرة دلبرطال داخلااني لي فقاع دار عملتها رياض كيف كترعرف لمدينة مشات لگور

زيدان ساط بنفاد صبر وكيتسنط ليه معندو ميدير ~ايه ايه ومن بعد قول شنو كاين يرحم باك عندي ميتقدى

لغالي ~ايه ايه اسيدي مقلتي عيب ندخلو فالمفيد ،دزت من لمحطة لمحت طييف دايز بقيت متبع ليه لعيين حتى حققت فيه مزيان وانا نعرفو خاك ولكن لي شوشني امولاي لغزال هو فاش قربت لو تقول غي شمكار محطوط منسوط لحالة تشفي لعدا وشكلو تقول غي قطاطعي ماشي من عائلت لخليفي صحاب لهمة وشان فلمدينة

تقول غي بوهالي مخلخل ميعرف لا سمو ولا حسبو عيت نقلقل فيه وتقول واش عقل على شيحاجة كون غي شفتو لا يكون تقاس ولا لمسلمين... لقدية مخلطة ففاس وهو مسيكين دريوش كان باين يقيل فزناقي يطوطح

زيدان وخا قلبو قصاح عليه ولكن كيبقى خاه ومن كرش وحدة ~كيفاش واش متأكد خويا نصر الدين هاداك

لغالي ~ايه نعام اسيدي يرحم من رباك هو بشحمو ولحمو وشفتو بعويناتي لي ماش ياكلهم دود

زيدان قصد ماريو كيجبد حوايجو ~ قبط فيه عندك دير عليه عساس ولا عيط لبوليس لمهم متفلتوش

لغالي ~مرحبا ماعندي منقول امولاي نوقف عليه رقاص اش خاسر لمهم ليلة يبات معاي وغدا صبح معاي راه فلكيفان لي فلمقطع جيهة لمحطة طرقية تم كينعس ابا حبيبي وجهو ماشي تمرميد راه نعقل كان جدكم لله يواليه برحمة ولمغفرة كنت نتما لعزاز فلبايط ولكن قضاء وقدر راه ولاد من وحفايد من هما لي كيتكرفصو راه كيف قالو سيدانا لوالا طاح لحرير حتى ولاو يتهزو بيه لمقالي

زيدان كيحك في راسو ومسايس ~ الله يكبر بيك اخاي لمهم انا نحاول نشد طريق بليل والا تعطلت صباح هنا معاك خيرك ميتنساش

لغالي ~لله اودي لواجب لله ينعل نكار لخير راه جيران لخير ولمحبة انتما

قطع معاه ومشى يلبس عليه حوايجو ، اكيد فرح حيت سمع خبار على خوه من بعد عامين كيبقى من دم ميقدش يدوزو ،قرر ميقول لا مو ولا لهناء شي حاجة تا يتاكد بعينيه مبغاش يعطي امال فارغة منها نيت يعرف شنو جراا ليك وفين كان واخا القضية باينة ماشي تال تم

تا طاح الليل عاد خرجو من لبيت دوزو نهار كامل تما حب وغرام وزهو فلحلال تمو داخلين لريسطو تاع اوطيل مشادين اليد على اليد لي دازو من حداه يبقا حاضيهم باينة فيهم عرسان في ايامهم اللولة وباينة فيه كيبغيها من شوفات لي كيدير فيهاا ، ايدو كانت مزينة خاتم زواجو منها وتا ايدها كذلك ،ختارت خاتم ماسي انيق وخفيف جا مع صبعها وزينو

غادا كتلعب بشعرها فرحتها معاطياها لابسة كسوة طويلة شوية مع صندالة عاليجة وجهها كان فيه ماكياج قليل حلف عليها ودارت ليه خاطرو اما هو لابس على سجيتو سروال جينز مع قميجة وسبرديلة قشع أميمة جالسة في طبلة رجل على ختها وفخاصها باينين كتاكل بالعبار ومرة مرة تلوح شعرها ورا ظهرها ، جر نادية وقصدوها هاد الاخيرة غادا فوق خاطرها مبغاتش تمشي لعندها باغا تكون غير هي محط انظار مراد وتا وحدة اخرا

اميمة هزات عينيها على بغتة بان و ليها جايين فصورة عشاق وهي توقف حاطة ايدها على فمها وقالت بدهشة ~ ... فااااااينليييييييي ...مشات عنقات مراد لي تا هو بادلها العناق ... congratulations my mooo

مرادخربق ليها شعرها ~... شفتك فرحتي كثر منا حنا

اميمة عنقات حتى نادية و باركات ليها ~ ... اووفكوورص اييي سووو هابي فور يوو ان شاء الله بدوام يا ربي ...

جلسو فوق الطبلة و اميمة كل شوية تبارك ليهم لما لا ومرادها لي كانت بغى هو هذا ... صونا تليفونها بلا متشوف شكون المتصل قطعات عليييه و ضارت عندهم " ... توو داي ام هااابي فور يوو اند اي دووو نوووت وانت اني برامبل تونايت ... " وقالت بحماس " ... ام سوو هابي

نادية ميقت وقالت فوق الخاطر معندهاش مع نفاق ~. ثانكيو ، بان ليا سبقتينا في لعشا ياكما غادا خارجة

اميمة تبسمت ليها بدلال ورجعت شعرها اللور ~. وي كيخصني نبروفيتي في الايام لي جيت فيها هنا

مسحت فمها ووقفات ~ مراد ممكن تجي بغيتك ...بعدت على الطبلة باش تدوي على خاطرهاا

جا لعندها وهو كيهز في يدو بتساؤل ~ اياك لاباس شفتك نضتي جلسي نتعساو كاملين

اميمة حسات بنادية ممرتاحاش فوجودها وباغا تبقى معا راجلها ~. نو انا ساليت وخارجة غير بغيت نقوليك انا كريت طوموبيل ومن غدا غنسافر نتسارا ، خليك مع ناظية وبروفيتي متقلقهاش نتلاقاو فكازا ان شاء الله

بغا يعارضها قاطعاتو ...صافي مراد دويت متخافش عليا راك عارفني

تعانقو بزوج بيهم متمنية ليه سعادة

مرت ايام ،سالا شهر العسل عند نادية ومراد وفاقت من گلبة الحب وتاتيرو عليها وحلات عينيها على الواقع لي كيتسناها مع عائشة الا مشات حتى ساقت ليها لخبار تنغص عليها فرحتها ،بزز باش قنعات مراد بلي غترجع لدارهم وتستقر تماا مؤقتا ومرة مرة تدوز عندو و بعد الحاح وغوات ومضاربة ومصالحة عاد حنى الراس واخا معجبوش الحال من هاد زواج ديال بلعاني ...اما زيدان تزاد معاه الزايد من ورا تسافيرة فاس لي جا ومجاش منها بوحدو جاب معاه خوه لي كان بعقلو ورجع متلفو مبقى عاقل على سميتو ولا على شانو واصلو ، حالتو تخلع لكبير قبل صغير وماء الحياة لي فوت فيه خربق ليه سلوكة ديال مخو مبقاو عارفين واش يعالجوه من الادمان ولا من فقدان الذاكرة لي بخرات ليه احداث كثر من تلاتين عام ...اما مريام خدات الحياة عندها مجراها العادي، بعدما كانت تنعس مهمومة وتصبح مخلوعة ...وسبب انها مبقات تلقات حتى تهديد من ورا اخر مرة رتاحت نفسيا شوية وقدرات تركز في خدمتهاا وترد لبال لارون لي صحتو تحسناات على قبل ونزهة ولات مقابلاه غا هو وعينيها مبقاتش تغفلهم عليه، كانت فوق ناموسية متكية ومنعسة ولدها على صدرها ونادية جالسة حداها كيديو ويجيبو في الهضرة لي ولات مركزة غا على عائلة جيمس،تكلمت نادية بصرامة وقالت ~ مريام دبا غادي تحلي معايا ذاك العقل وقوي راسك اصحبتي ايه متافقة معاك هما ماشي سكتو في خطرة غيرجعو يهددو ولكن متبينيش نقطة ضعفك مشكلتهم راه باينة همهم الوحيد هو ارون داكشي علاش باغين يخلعوك باش تعطيه ليهم ولكن راه ميقدوش ياديوه

مريام باست راس ولدها و زادت خشاتو فحظنها و بصوت منكسر جاوبات ~... ولدي هو نقطة ضعفي انادية منقدرش نتخايل توقع ليه شي حاجة ولا يبعد عليا حيت هاديك هي التالية لي غتكون ليا

"مع هاد لكلمة غرغرو عينيها و قلبها ضرها و صوتها تبدل " حرت مبقيت عارفة اش ندير كنحس براسي واقفة على حافة شي جبل و وصلت لآخر طريق عائلة جيمس مغيخليونيش نرتاح خاصهم يعرفو بلي هذا رااه ولدي مكيتسالو فيه وااالو

نادية كتسمع و مركزة مع كلامها كتشوف الخوف مسيطر عليها و غيخليهاا تحماق قبل الوقت باغا تقنعها بلي غير مكبرة الموضوع و هادشي غيجي شي و نهار و يسالي ~ ..... الموضوع ميستاهلش اصاحبتي خوي راسك هاهو ولدك بين يدييك و حنا معاك وتا حاجة مغتوقع ليك

مريام غير كتفكر تهديداتهم لون كيتخطف من و جهها ~..... يلاه فهمت شنو كيقصدو بفعايل ليهود ربي حياني حتى شفتهم بعنيا معاود ليا حد ،كنحس بيديا مربوطين و كنشوف راسي مقادرة ندير والو غير فكرة غياخدوه كتخليني مكنشوفش نعاس من نهار لكسيدة و هو كينعس حدايا كنبات نشوف فيه و حاضياه

شدات ليها فايدها ودوات بثقة~ سمعيني هادي ثاني نصيحة غادي نعطيها ليك ،الا بديتي الحرب بضعف غادي تكوني انتي لخاسرة تيقي في راسك وامني بلي حتى قوة في هذا العالم من صنع البشر تقدر تغلبك من غير قوة الخالق ، متعطيش طرف اخر الفرصة فين يغلبك ديما خدمي عقلك ونساي القلب كوني قوية وسيري بمبدأ غادي نحارب لاخر المطاف شنو فايدة هاد الجلسة وهاد الهضرة وهاد الخلعة كاملة حضري الاسوء ولمزيان قدام عينيك وولدك مغاديش يبعد عليك غنلقاو ليها حل اكيد

مريام حطات ارون في بلاصتو بعدما قاداتو وغطاتو وتقابلت مع نادية وقالت منهدة ~. الحل الوحيد لي بقى عندي هما يعرفو شنو مخبي و يعرفوو بلي ماشي ولدهم ولا من دمهم و لحمهم

نادية هزت فيها حواجبها وقالت بتاكيد ~. واش متاكدة من هادشي لي غديري ؟؟

مريام بنفس حركة الوجه ~. بان ليك كاين شي حل غيرو ، باش يبعدو مني ويعطيوني تيقار خاصهم يعرفو بلي ارون ماشي ولد جيمس واخا نعرف نخليهم يديو ADN

نادية بتحذير ~. هادشي غيجبد عليه بواب خايبة ..قاطعتها وقالت بتساؤل ~. وانا واجدة ليها ، حيت الاسوء راني عشتو باقا فيه شي حاجة مزال ؟؟

تسمع صوت تليفون كان تاع نادية هزاتو لقات نمرة مراد انفوا شافت سميتو سكتات ليه الحس ووبدات تحك شعرها بارتباك ووقفت ~. انا نجاوب ورجع عليك واخا شي خدمة مهمة

هزات ليها مريام راسها بالايجاب وخلاتها خارجة تجري وتسلت بحال شي مراهقة كتدوي مع صاحبها بتخبية على دارهم وعلى صاحبتها لي تاهيا مزال فدار غفلون ومصارحتهاش بلي تصالحو ، دخلات لبالكون وقالت بصوت خافت ~. لحبيب ديالي توحشتك

مراد كان جالس في بيرو ديالو في لبار مسخسخ وعيان وصوتو باح وغير تقيسيه ينفاجر ~ نادية عييت بهادشي ديالك ؟؟

نادية تنهدات بقلة حيلة مبقات عارفة منين تلقاها ~. مراد يمكن راه دوينا وشرحت ليك وطلبتك گاع قدرني

مراد بالغوات ~. وانا متقدرينيش ، عيان مريض مهلوك نظل ناعس مرفوع خايف نموت ولا شكون يجيب خباري بقبتي تنگري تا طفشتي اميمة ومشات خدات دار وجلست فيهاا وفي لخر فين لفين لي تجي لعندي دايراني بحال ريحة شحمة في شاقور وكتمسي تشوفيه فلعيد ولا لعواشر واعيقي شوية

رجعات شعرها اللور بيدها وتافافات عندو الحق جايا لربعيام مطلات عليه وسباب عايشة لي ولات كتحكر عليها ، مجوبتوش على شنو قال ردات لبال غير لصوتو وقالت بعتاب وحدة ~ واش شارب امراد

مراد بانفعال ~ مخرييييي كتسمعي ...قطع عليها ولاح تليفون تا تسخشخ مبقاتش فيه بياصة صحيحة

رجعات عيطات ووالو مكيشدش ليها عرفتو طلع ليه زعف وقالت غيكون طفاه وتقلق ،رجعات لبيت وهي تلاقا بمريام جايا لعندها ~. مالك اصحبتي واش شي مشكيل في الخدمة سمعتك كتغوتي

نادية كتاكل في شفايفها بتوتر ~. شوية وصافي خلصني نمشي ضروري ، غنرجع ندوي معاك وفكري قبل مديري داكشي لي فعقلك

مريام لي فراسها فراسها ~. ان شاء الله ، كون جلستي نتعشاو جميع !!

نادية كانت هزات صاكها من لبيت~. مرة اخرا هاهي ماما تعشا معاكم وشدوها تبات عفاك انا نسلت عليها عندي شي خدمة وغتبقى تحكر وفين ومعامن

عند بالها دارتها بمريام بهاد لكليمات وهي عاد دخلتها شك بالحق مبغاتش تحكر عليها وقنعات راسها بلي الا بغات تدوي غا تدوي راسها

في فيلا لخليفي كانت الحاجة مينة كتصلي و طلب الله يشوف من حالة ولدها و هناء جالسة فصالون و عقلها مرفوووع كتفكر فنصر الدين لي حالتو كانت متفرح لا عدو و لا حبيب ملامحو تبدلو و ضعااف من لويل لي كان يدير ، نسات اش كان دار ليها و المحنة لي دوز عليها ولمرار لي شربها... فاقت من سهوتها على صوت بكا ام زيدان وهي كتدعي وتناجي الله ربي يشافي ولدها و كبدتها و يرجع حسن من كيف كان ختمات الدعاء و جمعات صلايتها و مزال تنخصيصة شاداها جاتها فكبدتها وصبراتش

هناء قطعات ليها قلبها وعزات عليها~.. وا خالتي باركة عليييك الحمد لله مزال حي و ان شاء الله غيبرا و يرجع لينا بيخير

مينة ...~عمرييي ضنيت يجي شي نهار ولدي ينساني و ميعقلش عليييا وتلف سميتو ودماغو يمحي تصاورناا ، علاش خليتو خرج وعطاني بظهر علاش موقفتش في وجهو ومنعتو ياربي متمتحنيش فيه

هناء محسات بدموعها تا هبطو ليها ~... هدا متيحاان وخاصنا نصبرو ليه اخالتي، وراك سمعتي الطبيب عطانا امال بلي غيرجع لعقلو و يرجع حسن من قبل .

مينة صورة ولدها ممشاتش من قدام عينيها ...~كون غير جبناه لدار حنا نرضو ليه لبال حسن من جو سبيطار و ماكلتو لي دري صغير ميكلهاش

هناء طبطبت على كتفها كتجبر بخاطرها ~ تما حسن ليه في هاد الحالة من الدار بألف مرة عندو ادمان و خاصو دمو يتنقى ... خالتي ربي ملي كيبغي عبدو كيخليه يتفكرو ... ربي بغاه يفيق و يجرب الزنقة وشنو فيها دعي معاه اخالتي متعرفي يتوب من ورا هادشي ويرجع داك نصر لي متمنين

مينة هزات يديها تدعي و تطلب ~ ... كندعي ابنتي حتى الا لساني سكت قلبي كيدعي معاااه هو وامة محمد

وصلات لبار طايرة نازلة تقرقب بطالونها وراسمة على وجهها تقليقة وتغوبيشة دخلات من لباب كتقلب عليه بعينيها وملي مبانش ليها مشاات لبيرو بانو ليها بنات خدامين تما مجمعين ويتوشوشو وغير شافوها ضربو طم حيت ماشي اول مجية ليها عندو وعارفينهم بزوج قبل مدخل سمعات صوت بنت دوات وقالت ~ سي مراد مكاينش ، عيا شوية ومشى لسبيطار

نادية خرجات عينيها بخوف ، تخلعات عليه بزاف وهادشي بان على ملامح موجها وعلى نبرة صوتها ~. كيفاش اشمن سبيطار

- شي يومين دابا ماشي هو هاداك وليوم كثر توقف ، جات مدموزيل اميمة وملي شافتو هاكداك داتو

نادية دمها بدا كيفور والخلعة ركبتها من صبع رجلها الصغيير، خرجات كتجري وتليفون على وذنها كتعيط ولبواط فوگال كتشدهاا سولت سيكيريتي حدا الباب على اقرب سبيطار وقصداتو بعد موراه ليهاا ....

~~~

كانو كيتعشااو في امان الله ارون فبيتو وعايشة ونزهة شادين نميمة في العائلة كيف ديما جابدين لعقود الراشية ، اما مريام نقبات شوية وناضت فحالها ماكلة ليل ضربت عليها شحال هادا طلعت لبيتها تخشى ترتاح تابعاها خدمة غداا وخاصها تركز فيها سمعت تليفونها كيصوني ،كان بقى فلبيت ولسوء حظها نسات مدارتش ليه سيلونس دخلات كتجري قبل ميفيق ليها للولد وبلاما تشوف نمرة ديريكت جوبات

مريام بصوت خافت ~. الوو

- نزلي عندي انا حدا لباب

واش غتخفى عليها نبرة صوتو اكيد لا ؟؟ شكون من غيرو ، كاسر كيانها وكبرياائها والشخص لي جاب لقلبها تمام وخلاه يعتازل الحب ،وهي عاد قالت فيه بسم الله ومزال تا مشبعت من حلاوتو دغيا دوقها مرارتو ...صوتو كان باح وفيه رنة غريبة جامي سمعتها

حنحنت معدلة من صوتها وايد ليسرا كتماصي اسفل عنقهاا بتعب ~. شنو جا دير هنا ؟؟

قال بإصرار وحدة وقطع بعد مكمل كلامو ~ كنتسناك نزلي ولا ندق عليك !!

تأفأفت معصبة معارفاش سبب هاد المجية لي على غفلة عمرها كانت ليه حتى وهو كيمثل عليها الحب عاد يجي دابا ، اكيد سبب الخدمة ولا شي حاجة مهمة ..هادشي لي قال ليها عقلها لاحت عليها مونطو ونزلت بلاحس ، وباش دوز لباب زنقة اكيد غتشوفها ماماها وعايشة لولة حالها ساهل وتانية فيها قوة البحث

مجبدين في صالون كل وحدة شادة سداري طافين عليهم دواو ومخلين تاع سيجور ، سمعو صوت خطاوي نازلة كعدات عايشة راسها حيت كانت مقابلة مع الباب بانت ليها مريام لابسة عليها وقاصداه ، هزات عينيها فساعة قبل مدوي كانت علاين العشرة ولي فتقادة تاع عائشة ونزهة الوقت تعطل ~. فين غادا ابنت ختي ، شتك حادرة راسك وقاصدة لباب خبار الخير ؟؟

قربات لعندهم وايديها خاشياهم في جيابها ~. غير موضف اخالتي من شركة جايب ليا شي وراق نسيتهم غنخرج ناخدهم من عندو

عائشة تكات راسهاا وقالت بأمر ~. ايه سيري خوديهم ودخلي ماهو وقت هادا لي يجيو فيه رجال لدار فيها غا العيالات حشوومة !!

طباع عائشة ولاو صعاب سيغتو ورا موقع لمريام ولات كتحكر على الكبيرة وصغيرة من ديماا ديكااتورية ودابا كملات

خرجات لعندو محاملاش راسها والموقف لي تحطات فيه بان ليها واقف بعيد ومتكي على طوموبيل والگارو فيديه باب الطوموبيل محلول وصوت موسيقى خافتة كيتسمع منو ، قربات لعندو كتزرب ووجها كاسيه ملامح الغضب ~. شنو بغييتي ، ولاش جاي ليا قدام دار

زيدان لاح الگارو بظفر يديه وقال وهو ميل راسو ~. ماشي اول مرة نديرها ، شحال وصلتك وشحال هزيتك من هنا شنو الفرق ؟؟

مريام ربعت ايديها ونطقات بصرامة وبصوت كتحاول ما امكن متعليهش ~. الفرق هو انني دابا مرااا أرملة وعندي ولد

زيدان قاطعهاا هاز يدوو قدام وجهها ~. وداك الولد هو علاش جاي انا هنااا !!

مريام هزات حاجب وحطات خوه كتشوف فيه بنظرات استفسار باغا تفهم شنو كيقصد ~. ايه ماالو شخصك فيه !؟

زيدان معندوش مع كثرت تزواق الهضرة ودخل ملهيه باش توصل لهنا جاها نيشاان ~. أنا متاگد بلي أرون ماشي ولد جيمس !!

تسمع صوت ضحكتهاا الساخرة من هضرتو ~. وشنو لي خلاك تتاكد بسلامة ، علاش لي مغاديش يكون ولدو، جيمس ماشي راجل مثلا ؟؟

جمع قبضة يديه عاض على فكو من لداخل محاول يكالمي راسو ويميديرش شي حاجة يندم عليها ، سكت شوية كيشوف في الارض بغضب قبل ميطلع عينو فعينيها ويقول بثقة ~. حيت لي كيبغي صعيب ينسى ويسلم راسو لراجل اخوور دغيااا

باغا تقنعيني بلي غير تفارقنا تزوجتي وحملتي !!

دفعاتو من صدرو بخفة وقالت مخرجة عينيها ~. هادشي بعيد عليك معندكش الحق تدخل فيه كتسمع ، وبلاتي نصحح ليك واحد الحاجة راه غالطة عندك حنا متفارقنااش ، نتا ضحكتي عليا ولحتيني برجليك وخليتيني شفايا وعلكة في لفام

داكشي لي كيحاول ينساه كترجع تفكرو بيه غض على شفايفو وقال صادمها ~. حيت كنت مكنسواش

مريام بتحدي ~. ومزال مكتسواش وغتبقى فعيني ديما مكتسواش

عطاتو بظهرها وكان سرع منها جرها لعندو بخفة تا لصقها فييه وقال بصوت عياان ~ مريااام سمحي ليا ونسااي

مريام طلعاتو ونزلاتو وقلبها متحركش جهتو وعطف عليه واخا غا شوية ،صافي جفر وقصاح ومبقاش كيحس مدات ايدها ليدو تا نترتها ليه من ذراعهاا وقالت بقسوة ~. شنو غادي ننسى باش ننسى وعلا شنو غنساامحك ، الا كان ضميرك مأنبك من جهتي وهو لي مخليك متنعسش وجايني لهنا فهاد ليل غير تهنا انا مسامحاك اسيدي بالحق واش لي فوق مني ومنك غيسامحك ؟؟

مسح على وجهو وساط باعلى صوتو لي سمعو يقول جبال ومحطوطين على كتافو وهم كبير خانق صدرو وهو همو الوحيد حاليا والشاغل بالو غير هي وشكون من غيرهاا

كملات على مابيه بعدما بعدات شوية اللور وقالت ~. ارون الا مكانش ولد جيمس راه ولدي انا ونتا معندك حق فيه كتسمع وداكشي لي كيضور فبالك غا محيه باراكا غا ليهود لي تابعيني عليه متخلينيش نتشغل بيك تا نتا لي فيا يكفيني

زيدان خشى يديه فجيبو وزفر وقال ~ دوك ليهود غنهنيك منهم وحياتك لي قلبتها ليك غنقاادها وعقلي على كلامي !!

ميقت فيه وجات تدوي وهو يقاطعها صوت من وراها لي نطق بصوت عالي~. مريااااام

دورات وجهها شافت في خالتها لي خرجات ب بيجامتها ، حجبانها عاقداهم ووجها مكيبشرش بالخير قربت لعندهم كطلع وتنزل فزيدان عاقلة عليه ومزيان گاع وتا تصاور الا نسات يفكروها بيه قصداتو نيشاات وقالت باندفاع ~. اش جااي دير هنااا ، مزال عندك لوجه

مريام جرتها من يدها ~. خالتي سكتي ليل هادا جيران غيسمعو. ...خنزرت فيها وقالت ~. كون كنتي دايرة بحساب هضرة ناس متوقفيش هاد الوقفة

بغى يدخل زيدان وهي تمنعو مريام بايديها محركة راسها بلا وقالت بعيون مترجية ~ صافي سير !!

عارفاها فمها كيطلق السخون وهو مكيتحكمش فراسو والعاقبة غتسالي في الكوميسارية اللهم تسلك ، ركب طوموبيلتو بنترة وزاد لي جا على ودو موصلش ليه كان باغي يهني ويرخ بالو صدق مخربقو وغير ما زاد شوش افكارو

دخلو لدار وعائشة كلامها كان كلو عتاب ~. هادشي لي كديري فيه ماشي هو هاداك ابنت ختي ، ياكما نسيتي اش دار فيك شنو موقفك مزال معاه ؟؟ اش باغي مني بنادم خاص دار بيه مرة وحدة

مريام كتحاول تفهمها وتشرح ليها ~. خالتي بيناتنا لخدمة لا اقل ولا اكثر واش انا مشتاقة نشوفو ؟؟

عائشة ~. شتي تا ديك الخدمة الله يلعن جد بوها الكلب الا كانت غتخليك تشوفي كمارتو ، والا كان بصح عينك تمحيه من حياتك عطاه الله ماديري ولكن معرفتش نتوما بنات ليوم عقلكم شنو كيدور فيه

نزهة غير كضور في عينيها من ديما ختها قاصحة وصارمة بزاف مقدرت تقول حتى كلمة قدامها ، ايه صحيح تاهيا مراضياش على هادشي ولكن كتبقى معندها متقول لبنتها غتوقف معاها وسلام

هزات ايدها بتحذير وقالت ~. حبسي معاه ومتضسريهش واخر مرة يجي لعندك هناايا ولا ديكلاري بيه بيناتكم الخدمة يبقى حدو لخدمة ...

سكتات مبغاتش تجاوب خالتها باش متعگرهاش اللهم سكات ~. اجي بعدا وديك خيتي تاهيا ياكما كتلاقا ليا تاهيا بداك خاينة ودير ليا سبة بالخدمة حيت هاد الحب لي جاها عليها هاد ليام بزااف ،... رمات عينيها لصالون كتقلب على تليفونها...نعيط ليها نشووف هاد عشاء العمل معامن

حيت هادشي تاعكم مبقاش عاجبني ، تبقى ضور ضور ودير ليا شي زبلة لي منعرف فين نضرگ بسبابها وجهي قدام الناس

هاد الكلمة كانت كفيلة تخلي قلب مريام يشعل بالعافية ويضرها خاطرها منها بزااف ، هادشي لي كانت كتفادا تسمعو ملي سافرات ، عطاتهم بظهرها وطلعات لبيتها قلبها كيبكي

وقفات قدام اقرب مصحة بانت ليها طوموبيل تاع مراد في لباركينغ تأكدات كاينين تم ، دخلات تجري قصدت لمستعجلات ..غادا كتقلب بعينيها وخايفة عليه حتى بان ليها خارج وحداه اميمة شادة فذراعو ومزيرة عليه وجهو كان حمر وعرقان عينيه ذابلين وكحلين باينة فيه من شكلو مريض ، قربت لعندو بخوف وبعيون مطمنة كتسول فيه ~. مراد ماالك، شنو عندك

مراد بلا خاطر ~. مريض بالقلب ومكرهتش نحيدو ملتو ونعيش بلا بيه

عرفاتو كيطنز عليها واخا مرضاتش قدام اميمة ولكن سرطتها حيت دابا ماشي وقت تشاد معاه ، مشاات حدااه من جهة تانية وشدات فيه وباش تبرد اميمة سوق قالت ~. طلعت ليه السخانة عندو التهاب في الحلق طبيب مخرج ليه شي دوا غير يشربو يولي شوية

نادية مدات يديها ليها باش تاخد اوغدونونص ~. صافي غير عطيني في طريقناا نشوف شي فاغماصي في الحراسة

كملات وقالت اميمة غير سيري نتي في طوموبيلت مراد ، غيمشي معايا وغنبقى معاه هاد ليلة نيت نقابلو

محملش يسمع هاد الكلمة هو باغي مرا لي تبقى معاه ديما ماشي وحدة تجي عندو يعيشو الحب وتمشي بحالها بحال اي عاهرة في الزنقة لاش تزوج الا كان غيعيش نفس الحياة لي هرب منها نطق بنفاذ صبر وقال ليها بأمر ~. رجعي لداركم انادية سيري تنعسي فات عليك الحال ،ممحتاجش لي يقابلني قاد براسي !!

نادية بالغوات ~. مرااااااااد

مراد شافيها محمر ~ شنووووووو ، مراد ولا زمرر

مدات اميمة ايديها لجيبو خدات سوارت منو قربات منو عنقاتو وشوشت في وذنيه قبل متقول ~. تصبحو على خير ، غدا ونعيط ليك تكون وليتي شوية

خلاتهم على راحتهم ومشات نادية كانت واقفة كتحرك في رجليها بعصبية اما هو تخطاها وركب طومبيلتها، هبط لكوسان وحط ايدو على جبهتو مغمض عينيه كيتسنط لعظامو ،حس بيها ركبات صوت انفاسها كيتسمعو تنفسها كان مخربق باينة واصلة لطوب ديمارات طوموبيل حاولت متدويش ولا تقول شي كلمة ولكن مقدرتش ~ شنوو قالت ليك في وذنك هاا وليتو تغامزو عليا

مجاوبهاش عطاها النخال مكان فيه لي يتصادع مع نادية معندوش جهدها فديك اللحظة ، محكرتش عليه حسات بيه عياان ، مدات ايدها لراسو وتحسسات وجهو كان مزال سخوون سمعت تنهيدتو لي خرجات بلا هواه كان محتاج شوية اهتمام منها ولكن باخلة بيه عليه ، قلبات على صيدلية بيرمانونص لقاتها في طريقها خدات منها دوا وقصدات دار مراد تلعب دور الزوجة وتقابل راجلها فمرضو يالله براكات طوموبيل وهي تشوف تليفونها كيصوني واسم باش مدخلة عائشة مجبد في شااشة

نادية هزاتو وخدمات الموسيقى عاد جوبات ~. الو ماما

عائشة طالقة وذنيها كتسمع~. فيييينك ابنت كرشي فيين ؟؟

نادية كتحاول تغوت وتبين بلي مكتسمعش ~. انا مع واحد لكليان اماما كنتافقو على خدمة وملي نسالي غنمشي لدار نبات غير نعسي ورتاحي متشطنيش عليا

بأمرر قالت ~. هاد الهضرة لي كتقولي فيها مبقاتش عاجباني داااابا تكوني عند خالتك انا كنتسناك حدا لباب !!

قطعت عليها وخلات عينيها وفمها مشرعين من هول الصدمة

دارت تشوف في مراد لقاتو كيطلع وينزل فيها مخنزر خلاها حتى كملت ونزل من طوموبيل رادخ عليها الباب

تلاقيها من مها ولا منو مبقاتش عارفة ،لمن تعطي الراس وخاكر من دير، حاسة بضغط كبير عليها ولامن يقدرها ، القلب باغي حاجة وظروف ضدها وخاصها تكون مسخوطة مها باش توصل لشنو باغا وهادشي لي متقدش عليها ...عايشة بنسبة ليها الاب قبل الام قدما شخصية نادية وطباعها صعاب كتجي تال عندها والا كانت حجرة كتفرتت قبالتها ...هزات الدوا وصاكها وتبعاتو عرفاتو تقلق من كلامها ولكن هادا مجا فبالها الاهم عندها انها معاه ولكن شنو غادي دير فلي كتسناها ، لحيرة تملكتها فديك اللحظة والتلفة شداتها طلعات تبعاتو لقاتو ساد الباب عليه، حلات بساروت لي عندها ودخلات... الدار حالتها ومقلوبة سفاها على علاها ولماعن تاع سيمانة فوق طبلة شراجم مسدودين وريحة النفس باقية فيها ، داخلة مضيقة عينيها وكتشوف معاجبها حال دخلات لبيت لقاتو كيبدل حوايجو وقالت بتساؤل ~. مراد واش لمرا لي كتجمع الدار مبقاتش كتجي ؟؟

تخطاها ومشى تخشى في فراسو عظامو طايحين عليه وذاتو طايبة مجوبهااش

ميكات عليه من جديد دايرة معاه فوق الخاطر ،حطات صاكها وهزات دوا شافت لي خاصها تعطيه قبل من الماكلة خدات كاس لما ودوبات فيه شي حبات تاع الفنيد وجلسات حداه كان مغمض عينيه ، بصوت خافت كتنادي عليه ~. مرااد هاك شرب دواك !!

تگعد وتكى على الكادر ديال الناموسية خداه من عندها بلاما يشوف في وجهها شربو دقة وحدة ، مد ليها الكاس ورجع جر عليه اللحاف ، حطات ايدها على شعرو لي كان عرقان بدات كتلعب ليه فيه ستحلاها وحس براحة ولكن كان مقلق منها وبزاف قال بصوت حاد ~. مكاين لاش تخلي ماماك تسنى غير سيري انا بخير !!

جمعت يديها عندها وقضبت حواجبها ~. اش هاد الهضرة كتدوي بيها معايا ممولفاش ليك ، شوف انا شنو كندير ونتا اش كتقول ؟؟

ستجمع قوتو وجلس رجل طاويها ولوخرا خلاها على راحتها عينيه كانو حمرين وحناكو سخان وغيطرطقو شعرو مخربق وصوتو مدعدع ~ هاد

شي لي سايرة ديري فيه دابا جاا معطل اشريفة كان خاصو يكون قبل ، وهاد الدار لي مقربلة مخاصهاش مرا تجي تجمعها وتمشي خاصها مولات الدار تكون فيها ديما

ومكاين لاش تكذبي على مك بسبابي خاصك ديري حل نهائي حنا مبقيناش صغار الا نتي عاجبك هاد اللعب انا طلع ليا في ك....

خرجت عينيها معصبة من كلامو لخاسر ،وقفت على طولتها وقالت بعتاب ~. واش كدوي مع وحدة من زنقة ولا كيفاش

مراد بالغوات ~. سيري بحالك انادية فهاد الساعة

وخليني ننعس متقابليني منقابلك ماشي اول مرة نمرض ونبقى بوحدي

تنهدات معگورة وهزات صاكها خرجات من عندو سدات عليه الباب ودخلات لكوزينة تشوف شنو فيها لقاتها كتصفر وهي تخرج فحالها ،اول حاجة خاصهاا تمشي عند عايشة عارفاها مغتهنى حتى تجيي ديمارات طوموبيل وقلعات طايرة بغات غير امتى توصل

غادا صايگة ومرفوعة ، دموعها على خدودها وملقات كيف دير ليهم لا هما لا مشكلتها لي وعرت فيها وخلاتها تندم على النهار لي سمحت فيه ،كون من الاول خرجات عينيها قدام عائلتها وقالت هو معندو دخل ومتزيدش تكبر الموضوع متوصلش لفين كاينة دابا ، قالت طلقت وهي مزال مرا مزوجة ومكملة حياتها كتقول راني خدامة وهي في حضن راجلها كذبة جرتها لختها حتى غرقات فيه وملقات مخرج منو...مسحات دموع من عينيها وصممات تدوي مع مها وتحاول تفهمها خاصها تعرف بلي راها رجعات ليه وتشرح ليها حكم القلب وشنو بغى خاطرها وبلي ساعة شيطان وندامة هي لي خرجت عليها

حطات طوموبيلتها ودخلات لدار قبل متصوني لقات عائشة في الباب غير سمعت طوموبيلتها خرجت وقفت عليها كيف العسكري ،نادية حطات ايدها على مخلوعة قلبها ضرب بجهد ديك الهيبة والخلعة لي كتحس بيها جهة ماماها صعيب تفسرها لراسها واش حيت عايشة قاصحة بزاف ولا واعرة ولا احترام معرفاتش ،تنفست بجهد وقالت~خلعتيني اماما بسم الله عليك مالك واقفة هناا ؟؟

عائشة كطلع فيها وتنزل معاجبها حال ~. كنتسنى واحد الزوفري عندي...بتساؤل قالت ...فين كنتي الالة وزينة لبنات ؟؟

هربات من قدامها دخلات مع الباب كتحك في راسها عارفة اي كلمة خرجت من فمها غتحسب عليها ~ فين غنكون اماما من غير الخدمة راه قلت ليك في تليفون

كانت جايا ولراها وكتحرك فراسها بمعنى احيااني عليك قالت بسخرية واستهزاء ~. لخدمة هاء، اش هاد الخدمة اختي لي وليتي تجلسي ليا عليها تال نصاصات ليل ولا تسافري على ودها بسيمانة وختهاا ، اسمعي هااه كنشم شي ريحة ماشي هي هاديك

نادية بلعت ريقها ومشات جلسات على طرف السداري مخرجة عينيها وكتقابح ~. اشمن ريحة اماما الله يهديك ليل هادا غتفيقيهم هضري بشوية ؟؟

عائشة حطات ايدها على جنها على الواقف ~. شتي داكشي تاع تراويغ خليه في المحكمة مديريهش عليا راه انا لي بالزاك ماشي نتي ....سمعت رجلين نازلين في دروج كانت نزهة لي سمعت هضرتهم وهبطات تشوف مالهم

نزهة كتاوب ~. ياك لاباس اختي مالكم

عائشة رفعات ايدها في وجه نادية بتحذير ~. زوج كلمات هاني غنقولهم ليك قدام خالتك، نحلف بحلوفي ونعرفك تتلاقاي معاه ميعجبك حال معايا جهتك تاع الحالة المدنية نقطعها ، ونقطع مها هاد الكبدة هبرة تبرى

كلام مها تخوا عليها كيف سم وخلاها مخرجة عينيها ~. شنو كتقولي اماما وعلامن كتهضري

عائشة ~.راك عارفاني علامن كندوي ماشي جيتي البارح غترديني مكلخة كلامي قلتو وا طلعي تنعس وداك قوة دخول ولخروج من ليوم مبقاتش عندي راك محامية وعارفة هاد القانون مداخلش عندي حيز التنفيذ

مشات وخلاتها وراها غا كتشوف وحالة فمها من ديما كلامها قاصح وكيخلي لاثر في الخاطر ،ناضت بحالها طلعت كتجري في الدروج دخلت لبيت عند مريام حلات الباب بعصبية وخبطاتو حتى قفز ارون لي كان في حضن مريام ،هاد للاخيرة كانت جالسة فوق ناموسية وعينيها دابلين بدموع وقلبها بحرقو الكلمة كيضرب بجهد ..ماشي بقى فيها الحال على خالتها ولا على لكلام ل خرجت من فمها ، هي عارفة معانتهاش بديك طريقة ولكن ل بقى فيها الحاا عليه ان هاديك هي الحقيقة وداكشي ل كاين واخا معرت شنو يطرا ..مسحت عينيها بزربة وتقبلت عند نادية كتدوي بشويا~ فين كنتي اصاحبتي ؟

جوبتها وهي معصبة~ فين غادي نكون امريام خدامة وزيدون انا ماشي صغيرة، ااااو واش فينما نخرج نلقاها من ورايا وبزاااف شوية تاع الحرية .

راه خاصها تفهم انني كبرت وقادرة نتحمل مسؤولية افعالي وتصرفاتي اف لخنقة هادي والله مبقات حياة ..مريام غير كتسمع ليها وعارفها كانت في شي قنت ودارت داك العصبية كاملة باش متلاحظش وتبقى تضغط عليها حيث باينة مبغاش تقول ليها فين كانت ،معودتش سولتها مرة اخرى اكتفت غير تنبهها وتنصحها كيف مكان الحال بنت خالتها وفي نفس الوقت ختها وصاحبتها مغاديش تبغي ليها الضرر ولا داكشي ل وقعات فيه يوقع معاها ..

مريام~ نادية ماماك من واحد الناحية راه عندها الحق راها عارفاك ماشي صغيرة ولا حيث باغة تخنقك انتي عارفة خالتي كتبغيك وكثر من خوتك اكيد خايفة عليك وقلبها كيبقى مشوش عليك ونتي بعيدة عليها وليل راه خايب بزاف معندك علاش تقلقي والا غواتات عليك غير من مصلاحتك لواليدين كيحسو بولادهم داكشي علاش..

وانتي عارفة الدنيا خيابت والذياب كثرو ردي بالك انادية وعندك يوقع ليك ماوقع ليا

حسات بتنأنيب الضمير حيث استنتجت من كلام مريام ان ماماها قالت ليها شي كلمة جرحتها بيها قربت لعندها وتحنات لعندها وجرتها عنقتها بحنان وباست شعرها ونطقت بحزن~ ماشي اول وحدة ولا اخر وحدة يوقع ليها داكشي وبلاما تبقاي تحصري على داكشي ل فات نسايه وركزي في ل جاي ،وماما مرة اخرى الا قالت ليك شي كلمة جاوبيها ماشي طلعي لبيتك وتسدي عليك خليها تعرف راه غلطات في حقك واخا ..باستها من شعرها .وجوبتها مريام بضحك~ اويلي انادية من نيتك نجاوب خالتي عايشة راه غير شويا كانت غادي تجمعني انا وماما في شي بيت وتكلس تعطينا ..تفركعت نادية بضحك على كلامها حيث عارفة ماماها قبيحة وواعرة وباقى صحيحة ديرهاوتفوتها ،مقدرتش تجوبها سخفت بضحك نطقت بزز~ لا لا مضربكش من نهار سلختني انا وياك فاش كنا صغارين ولغد ليه قالت ليك الالة وقف عليها باها في لمنام قال ليها متبقايش ضربي دراري صغار من تماك قالت ليك مبقيتش كنضرب على اساس جدي كان من صاليحين

ضحكو شويا وبدلو الغمة لكانت على قلبهم ،نادية مشات تبدل حوايجها وهي عقلها مع مراد حالتو خالعاها بزااف وقلبها مشطون عليه .معرفت كيف غادي دير لبست بجامتها وجات تخشات حدا مريام ل طلبت منها تنعس حداها مقدرتش ترفض طلبها ..نعسو بزوجات وارون بيناتهم غمضت عينها على اساس راها ناعسة دوزت نص ساعة حسات بمريام مشات بيها عينيها وهي تجمع الوقفة هزت صاكها وسورات طموبيل وناضت كتسلت من حداهم بشويااا

يتبع...