الحب أقوى من أي إتفاق الجزء 14

من عند مريام داز شرب ليه كويسات ومشا بيه دماغو للايام الخوالي لي دوز مع صاحبو وخوه وعشيرو مراد ،تفكر دوك ليام وعقد غوباشتو وزاد كطاح ليه المورال كثر ما هو طايح ،كيفاش فلحظة غضب ضربو لا هادا لا داك صداقة شحال من عام ونساو فرمشة عين ايام زوينة دوزوها وخايبة مافيها ميتشاف تاهيا عاشوها ، كوارث وقعو فيها وطرائف دازو منها، كيفاش كان كل واحد ظهر لاخور وحميتو في غيابو وحضورو وكيفاش ولاو دابا غراب واحد مكيعرف تاني ولا شنو واقع ليه بالحق دوام الحال من المحال تا حاجة مكتبقى كيف كانت ساس راسو من هادشي وهز سوارتو وغبر من تم بعدما خلص ...عقل كان كيقوليه قصد سمر تخلوى وتلف زهى ونشط وراس كيقووليه فين هي لگانة ديال هادشي كامل صونا ليه تليفونو بنمرتها كيف ديما وكيف عادتها وفنفس الوقت كتعيط ليه مستنياه بلا متيأي يجيها وتملي عينيها بشوفتو وتسمع صوتو لكن طفى تليفونو وبدل وجهتو لاخر دقيقة لدارو ينعس اول موصل وقبل ميطلع لبيت سمع صوت بكاء ديال الام مينة جاي من الصالون تردد قبل ميمشي لعندها مكيبغيش يجلس حداها وهو شارب واخا مكيتقلش فيه حتى كيفقد الوعي بالحق كيبان عليه في هضرتو ومن عينيه لي كيتسدو

لكن صوتها ضرو في قلبو بلا هواه رجليه قادوه ليها كانت جالسة وفيديها تسبيح

كتسبح ودموع عينيها مسابقين مع حركات ايدها كتبكي وتمسح وتقول ولطاش نشفو ، خدا طبلة صغيرة جلس عليها بلا ميدخل بشنو فرجلو وقال وهو منزل عينيه الارض ~. الواليدة الله يهديك لبكى واش غيفيدو ؟؟ ،غيرجع ليه عقلو ؟؟ صافي لي وقع وقع دابا !!

مسحات بقايا دموعها من طرف عينيها وقال بصوت مضيوم ~. هادشي كلو عارفاه بالحق بزز مني ماشي ساهلة عليا ، كنلوم راسي وكنقول كون مخليتوش يخرج من لباب واخا نعرف نربطو بسناسل حدايا وميتحركش گعما يوقع هادشي كامل

زيدان كيطرق في صباعو ~. هادي هضرة خاوية دابا ، الاهم راه كيتعالج ونتمناو يولي بخير

جمعات الوقفة وتمات جايا لعندو شال مدوراه على راسها شعرها مكايبانش كانت بلبسة الصلا وجها منور وصافي ، قربات حداه وجلسات في سداري مقابل معاه ~ معرفتيش شنو طرا معاه واش وصلو لهاد الحالة

خدا يدو وسط ايدها كيطبطب على ظهرها ~. اش غيكون گاع ، باينة كمل فلوسو قمر بيهم ولا خسرهم ولا شفروه وضربووه ...مهم نتي دابا هادشي معندك علاش تعرفيه نوضي رتاحي ليك ودعي معاه يولي بخير وهو غيعاود ليك كلشي ..ختم كلامو ببوس فكف يدهاا وقال ...يالله الواليدة !!

امينة برضى ~ ان شاء الله اولدي , وانا راضية عليك سول مرت خوط وبنت وشوف اش خاصهم راه عالم بيهم غير الله واخا مكتبينش

زيدان هز ليها راسو بالايجاب ~. لي بغيتيه غيوقع غا تهناي

بابتسامة رضى ناضت هي وياه وصلها لبيتهاا ودخل تاهو تلاح كاو معاقلش على راسو

شنو غدير بالها معاه مقدراتش تخليه فديك الحالة واخا معرت شنو يوقع غتمشي لعندو وملي يصبح يفتح واخا كانت غادا في طريق وطلب مها متعيقش بيها خاصها دير حل لهاد المهزلة حيت طولات ونغصات عليها حياتها وفرحتها ، عطات لراسها شحنة امل وقالت ان شاء الله كلشي غيتقاد وغيتصاوب وكملات على طريقها قبل متوصل لدار دازت على مطعم خدات ليه لماكلة عاد مشات لعندو

كيف وصلت بلاصات طموبيلتها بزربة وطلعت كتجري للدار ،جبدت سوارتها وحلت الباب كان سكاات دخلت الكوزينة حطات داكشي لجابت في طبسيل تعطيه ياكل باش الدواء ميأثرش عليه ،قادانو ودخلت لبيت نعاس كان ناعس وماحاس بوالو ،شافت فيه ونظرة الحزن باينة في عينيها وضعو المها بزاف خلا قلبها يتعصر على حالتو خصوصا انها اول مرة تشوفو في ديك الحالة طاح عليها الظيم ،قربت ليه حطات داكشي من ايدها فوق الطبلة دزاج كانت تما،رفعت ايدها لوجهو وبدات كتلمس فيه بشوياا كان عرقان وسخون هبطت باستو بحنان عاد بدات كتهمس ليه بشويا باش يفيق وياكل ~ مررراد حبيبي نووض ،مراد نوض تااكل

جوبها وهو مقادرش يدوي غير كيتمتم في الهضرة ~ ممممقددررش اناادية ..بقات عليه حتى فااق بزز وعطاتو كلى ،باغي غير يغمض عينيه وينعس ،حيدت داكشي من حداه ورجعت لعندو بعدما قادت حالتها وعطرت راسها من اول وجديد من حاجاتها لي مخلية عندو ... عاد نعست حداه تخشات فيه حطات راسها فوق صدرو وعنقاتو ،استنشقت ريحتو بحب وغمضت عينيها وهي كتستمتع بقربو ليها ،حاسة براحة وهي بين ايديه ،طلعت راسها لجهة وذنو وتكلمت بهمس ونطقت بحب كلمة لقدرت تزعزع كيانو الرجولي ~ كنبغيك امراد

كيف نطقتها وهي تهبط بشفايفها على عنقو باستو بوسات طوال باغة توصل ليه من خلالهم خوفها واهتمامها بيه عاد دازت لشفايفو طبعت عليهم حتى هما بوسات دافين وحنان...كانت كتفصل البوسة وتعبر على داكشي لكتحس بيه من جهتو ماشي غير فعلا حتى قولا ~ كنبغيك امراد كون تعرف باش حسيت فاش قالو ليا راك في سبيطار قلبي حسيت بيه وقف ،اخر مرة تكون مريض وتخبي عليا اخر مرة ،انا عارفة راسي مقصرة من جهتك وعارف انك صابر والله حتي كنبغي نقول لماما كلشي ونتهنى ولكن شي حاجة كتمنعني معرفتش ولكن لعارفة حاليا انني مبقيتش قادرة نعيش بلا بيك بغيت غير امتى نتجمع انا وياك تحت سقف واحد

رجعت باستو مرة اخرى

كان كيتجاوب معاها وكيسمع ليها ولكن جهد باش يتكلم ماكانش ..بقات هكاك حتى حسات بيه نعس عاد نعست وهي معنقاه وضماه ليها خايفة عليه وبزاف

في حبك اشتاقك رغما عن قلبي.... وأهيم بك رغما عن عقلي !

فاقت على ايدو كدوز على وجهها وكتلمس في حناكها ، كانت ايد حرشة رجولية تلاتها قبلة تحطات على فمها حسساتها بدغدغة خلاتها تبورش في بلاصتها حلات عينيها على جمال عينيه

كان ناعس على جنبو وحاضيها وهي وسط ديك البيجامة لي كانت سخونة شعرهاا مزلع فوق المخدة ونص في صدرها خارج ريحتها كتدخل مع الجيوب الانفية وكتستقر فيهم

كيف شافتو بتاسمت وقالت وهي كدور عينيها على وجهو بإطمئنان ~ كيف بقيتي شوية

مراد كيحيد الشعر من على وجهاا وكيدوي ~. بغيت غا نصبح عليك بحال هاكدا كل نهار وعمري نمرض مزال

دورات ايدها على عنقو بتنهيدة خارجة من القلب كانت كثر منو تاهيا هادشي لي متمنية غا تكون معاه وحداه هانية ومرتاحة ~. قريب ان شاء الله في اقرب فرصة غندوي مع ماما تانا مبقيتش قادرة نبعد كثر

طبعت قبلة خفيفة على فمو وهي ترجع بلور مخسرة ملامح وجهها وسادة نيفها ~. نوض نوض امراد لدوش فيك ريحة لمرض

مكانش من العاگزين طوا يديه بخلاف زول تريكو ولاحو وهو كيشم في راسو ~. ولكن عيان مدگدك مافيه لي يحرك شي ايد

جمعت الوقفة وتمات غادا سابقاه كتزكك عليه في المشية لي كانت كلها انثوية رجلياتها حفيانين وبيضين ومنقين مزيناهم صباغة بالگرونة وخلخال رقيق ...حلات باب الدوش لي كان وسط البيت ودخلات توجدو ليه اما هو قصد تليفونو لي كان كيصوني في جيب سرواال

عند اميمة صبحت على الخدمة قدامها لبيسي ومدورة بيها لوراق ،وكاس القهوة اكسبريسو فيدها حاسة براسها غيتشق بالخدمة بالحق معندها مدير كتبغي توقف على كلشي وتتوالا شغالها بوحدها ، طول حياتها مها بعيدة عليها اما باها بغاه الله وداه ، حطات لي فيديها وخدات ليها بوز حطت ايدها بزوج ورا عنقها كتماصي فيه حسات بيه تشنج ، حتى ترخفت عاد هزت تليفون تسول في مراد لي بقى بالها معاه ومغابش عليه ، هزات تليفونها ودوزات ليه الخط وتاهو غير شاف نمرتها جاوب مبتاسم سيغ بلاص

اميمة وقفات قدام الشرجم وشعرها وقف معاها على طولتو كان مسبسب وكحل لابسة سيرفيت موبرة عازلاها كاملة كتبان من داكشي ~. مراد كيف بقيتي الغزال ديالي شوية

بصوت مدعدع جاوب كان جالس على طرف سرير ~ هاني اميمو حمد لله خوك سبع ، فينك نتي خارجة تاني ؟؟

اميمة قاطعاتو كتهز راسها بنفي ~. جيست هوم هاد الساعة عندي شي خدمة بغيت نحيدها

مراد ~ وجدي ليا راسك نخرجو نفطرو جميع على برا ، ملي نقرر لبلاصة نصيفط ليك لوكيشن

اميمة وافقات ~. اوك تهلا احبيبي نتشاوفو

قطع معاها وهو كيضحك ميمو بنسبة ليه شي حاجة عزيزة بزاف في الوقت لي كان سافر وعاطيها لشراب وديعان تا شوية ويمشي ليه لعقل هي لي وقفت معاه وشدات بيديه وبقات معاه حتى قدر يدوز من ديك ليام الكحلة ويتجاوزها بقات معاه ليل ونهار ساراتو ونساتو ومخلاتوش يكره نادية واول مقرر يرجع لمغرب شجعاتو وحلفات بلي غتنزل وتصالحهم داكشي علاش حاطها في مكانة خاصة

قطع معاها كيضحك هز عينو وهو يلقى نادية حاطة يدها على جنبها ومتكية على باب الحمام حاضياه

نادية مضيقة عينيها وكتسول ~. شكوون اميمة تاني !! بالحق باينة هي غير من عينيك ل كيضحكو قبل فمك

مراد غادي مقرب ليها ~. وا شريفة تي فوتي عليك البنت وعطيها بتيساع شنوو دارت ليك گاع ،واش هي تجي منك ونتي تجي عليها!!

نادية مخرجة عينيها~. تجي مني لا باينة باينة واش لبارح عرفاتك مريض لاش داتك سبيطار ديك ساع تعيط ليا تعلمني من حقي ولا لا

مراد باس حنكها ودوا مكالمي ~ راك كثر مني عارفة بلي اول حاجة كنديرها ملي كنلقى شي حد مصاب كنسعفو

نادية ضحكات بطنز ~. لا اسيدي كنعلم السلطات المختصة لي هي انا مرتكككك هي لولة

دخل الحمام كيحيد في حوايجو ويدوي حاس بيها غا الغيرة لي لاعبة عليها ومخلياها تقول هاكداك ~. مرتي وحبيبتي وبنتي وشاريك وباغبك وكنتسطى عليك ..كمل به

خيبة ..ولكن اش كنلقى من عندك غا تخبية وعنداك يشوفونا ...جرها من يديها دخلها وسد الحمام ...ورغم ذلك صابر حيت كنبغيك واها يعني غا فوتي لبنت مقايساك بوالو نتي لي مشكلة بوحدك معاها

نادية قالبة وجها وكتدوي مغبنة ~. ياك انا

مراد خشى وجهو في عنقها ~. خلي صباحنا يدوز حسن من الليل

نعلت شيطان ولجمت لسانها واخا مكرهتش تبقى تدوي وتطرطر عليه تال صباح فوتها بعد منها متخرجش معاها مدويش نتا وياها لكن ميكات حيدات لفوقاني ديال بيجامة مخلياه تالف وعينيه تابعينها فين مشات،توكض وصحصح مزيان وهو كيشوف حلالو قدام عينيه ، نسا لحمام وكالاها مع لاڤابو وترفعو بزوج هو موحشها وهي كثر منو

وقفت في باركينج دشركة نزلت من طوموبيل باناقتها المعتادة هاد المرة كانت جامعة شعرها لفوق خدات صاكها وتمات غادا كتشوف قدامها وقفت تسنى في سانسور يهبط وهي تحس بخيال شخص وقف وراها دارت مخلوعة على سبة ولات دغيا كتنوى وكتعتاقد الاسوء بسيف لي داز عليها ماشي ساهل ،سرعان مرتاحنت ملي شافت فراس

محامي زيدان كان مسكسف على الحالة مرجع شعرو وصففو اللور لابس بذلة سودا هاز محفظة من نوع الجيد بلكحل حذاء ديالو كان كيلمع بحال وجهو الزعر بتاسم ملي دارت لعندو ومد يديه ليها وقال ~ مدام مريام صافا عاش من شافك !!

مريام بابتسامة صفرا بادلاتو التحية ودغية خطفات ايدها من وسط يدو وجوبتات مكتفية ب ~. الحمد لله

نزل المصعد وطلعو بزوج واقف فجنبها وهضرة نادية عليه طاحت ليها فبالها

مخلوض ويديه طايلة ومكيناش شي قضية مخسرهاش ..دورت وجهها وشافت فيه وجهو كيوحي بلي عايق وفايق ومن نوع صعيب ماشي ساهل

لغات شنو جا فبالها ورجعات شافت قدامها حتى وصلو تحل لباب وعطاها الطريق هي الاولى هزت ليه راسها كشكر ومشات نيشان لمكتب ديالها

الجديد كان في اخر الرواق بيرو زيدان وفي الحجم صغر منو ولكن حجبها كان منضم وكيتوسطو مكتب انثوي زوين حاطا عليه صورة لارون بوحدو وصورة ليها معاه ولوخرا معاهم حتى نزهة

هزتها شافت فيها وبتاسمت وهي كتفكر ايامه الزوينة بثلاتة قبل متزعج راحتها سكرتيرة ل دقت في الباب ودخلات ~. مدام مريام ، من هنا ربع ساعة عندك اجتماع مع موسيو زيدان في لبيرو ديالو

هزات ليها راسها بالايجاب ~. واخا شكرا شوية ونمشي

من ورا ربع ساعة بالضبط مشات لبيرو لعندو كان هو وفراس جالسين على بيرو غير شافها اشار ليها بيديه وقال وهو حاني راسو كيشوف في لوراق ~. دخلي !!

دخلت وسدت لباب ،تمشات تال عندها وصوت كعبها لعالي منغم لمكان جلسات في كرسي قبالتو وقالت باستفسار ~. ياك لاباس

زيدان هز راسو فيها وقال بجدية ~. كيخص نمشيو لفرنساا من هنا يومين ترشحنا لصفقة العمر مع اكبر شركات تصميم وميمكنش نشركوها

مريام دارت رجل على ختها وجوبتو بعدم فهم ~ سيرو شنو لمشكيل علاش كتشاور معايا

زيدان ضيق عينيه وقال ~ ماشي سيرو غادي نمشيو ،شركة فيها انا ونتي ماشي انا بوحدي دونك حضور ديالك اجباري تاهو

شركة فيها انا ونتي ماشي انا بوحدي دونك حضور ديالك اجباري تاهو

هزت فيه حاجبها كتخنز على طريقتو دالهضرة وهزان ليد ملي كيدوي وهي تنطق ببرود دم عكس ثوران لي كان فيه وقالت ~ انا اموسيو زيدان مسؤولة على ولد صغيير ميمكنش ليا نسافر ونخليه ورايا ؟؟ الا كان غير على امضاء ديالي ندير ليك وكالة كيف كان مكلفك جيمس وتكلف بالامور الادارية تماا علاما تجي

قال بامتناع وناض من فوق البيرو ~. مموافقش ، كيف انا واقف على خدمة تانتي توقفي عليها هادي هي شراكة عجبك مرحبا معجبكش بيعي وانا نشري من عندك

كان عينو يضغط عليها بهاد الطريقة ويخليها تمشي معاه وربي كبير ، تزنگات وحسات بسخونية شدتها بالحق جوابها كان على طرف لسانها ~. ايوا اسيدي انا معاجبانيش گاع هاد الشركة لي غنمشيو تال عندهم نسنيو معاهم شكون هما

قاطعها المحامي فراس لي كيحل محفظتو بمكر وجبد منها ملف حطو قدامها ~. لي قدامك معلومات عليها من اول متحلات تال دابا كنظن مبقى عندك اعتراض قراي وشوفي شحال كبيرة وعندها صيت عالي وانا متاكد بلي مغترفضيش من غير الا كان سبب اخر لرفض ديالك

مجوبتوش على هضرتو ،هزت لملف وناضت من حداهم منفخة خاصها وقت تفكر ~. من بعد وتعرفو جوابي

خرجات طالع ليها دم سببها واضح هي رافضة تماما تخلي ولدها ومها وراها من خوفها عليهم وعاد خافت على راسها تمشي برجليها لعندهم

لاحت الملف فوق لبيرو وتكات على الكرسي كتفكر وقلبها كيضرب مسبق الخلعة حتى تحل عليها الباب بلا اذن

كان هو مخسر سيفتو باغي معامن دخل وسد لباب بنترة تا تسمع صداه خلاها غا مخرجة عينيها فيه ~. اسييي فين داخل مدرم ؟؟

زيدان بالغوات ~. واش جايا هنا تخدمي ولا ديري عليا عرض الازياء

عضت على فكها من لداخل وخلاتو يخرج كشاكشو كيف بغى تا تعصب وخبط على لبيرو ~. راني معاك داوي

وقفت قدامو وقالت بحدة مواعياش على راسها ~. واش باغي ترجعني لبلاد لي هربت منهاا صحةة واش انا كون كان عيني نرجع ليها لاش غنخليها ...

الا ستغلو فرصة انا مشيت ودارو شي حاجة لولدي ولا ليا وانا تم غيعجبك الحال وتهنى ياك

جاوب كارز على سنانو ~. وانا شكندير لي نخليهم يتعرضو ليك

عطاتو بظهرها كتحرك راسها باسى ،كلامو معنى ليها والو ومبقاش كيفرحها اطلاقا شنو عندو ميدير وهو لي كان سباب ولاح لفتيلة نهار لول تا شعلت فيها وعافيتها مزال كتحرقها لدابا ....رجع قال وهو غادي ناحيتها...~راني قلت ليك الا كان غير هاد المشكل انا لي غنفكك منو وبمرة غير تيقي بيا

دارت لعندو وقالت لايتهزاء وهو كتشوفيه بنظرات استحقار ~. باغيني مزال نرجع نتيق فيك هااء قداش طلبتيها !!

حس براسو كيخوي لما في رملة معاها مقصحة راسها وبزاف وتبدلات على مريام المتسامحة لي كان كياكلها هي وحوايجها بكلمة وحدة ورجعت وحدة قاصحة وذات طبع صعيب...كتفى يقول بأمر ~. وجديي رااسك يومين ونمشيو

فمطار محمد الخامس واقف زيدان لابس كوستيم ولايح عليه مونطو تروا كار بالكحل ، مقاد شعرو بطريقة رجولية لحيتو لكثيفة كانت مرتبة بطريقة مهملة ، حداه فراس كان جاي معاه يوصلو مقدرش يمشي معاهم لالتزامو بشي خدمة ، نطقق وقال هاد الاخير وهو عينو على لباب ~. واش متاكد مدام مريام جايا ؟؟

زيدان شاف فساعتو قاضب حواجبو وقال ~ باقي لحال مزال تجي !!

باقي مكملها حتى كيلمحها داخلة بمشية منخوية لي شافها من بعيد يقول مخصها تا خير ومرتاحة وهي القلب عالم بيه غا مولاه

كانت لابسة كلاس جينز بزرق مع قميجة نواغ ومونطو حد ركبة بالبوردو صباط عالي بنواغ وصاك صغير هازاه فيدها وجارا قدامها شانطة متوسطة ..شعرها الذهبي كان مطلوق ووجها كان بمكيااج نهاري خفيف كأنها مديراهش وقفت حداهم بعدما رمات سلام

فراس موجه كلامو ليها ~. حتى قلت مغتجييش !!

مريام ~. كنتمنى مندمش على هاد المشية...شافت في زيدان كانها كتحملو المسؤوولية الا وقعات ليها شي حاجة ، فهمها طاير وطمنها بكلامو ~. كلشي غيكون هو هاداك داركم هنا درتها تحت الحراسة ولهيه انا كاين

قالت بصوت خافت بالحق سمعها~. هادشي مناش خايفة

ضرب فيها تخنزيرة خلاها ضورت وجهها بلا هواها

خممات الف خطرة وخطرة قبل متوافق تجي معاهم في الاخير قتانعات بلي الا مكتابة شي حاجة غتوقع ولو بعد حين شحال قدها تبقى هربانة ومخبية خاصها تواجه وتبين بلي مخايفاش منهم ،نادية مقدراتش تجي معاها خدمتها كثيرة عاد مسؤولياتها ولاو كثر اما ارون ونزهة ستودعاتهم الله وطمنات شوية بالحراس لي كلف زيدان يحرسو الدار

فتارقو مع فراس ودخلو لبوابة العبور بعد مكملو اجرائات السفر كانت غادية سابقى زيدان ماباغاش تمشي معاه في نفس الطريق

نافخة عليه وهو غا حاضيها وميك عليها لاول مرة وبعد فراق دام اكثر من عامين غترجع تسافر هي وياه راس فراس ويجلسو مع بعضياتهم وقت كثر ،

هو من ملامح وجهو باينة مرتاح وعاجبو لحال عكسها هي لي خايفة هاد السفرة تجبد عليها لبلا ونحل و تصدق خاينة قلبها لي حلفت ليه بلي عمرها مزال تاذيه ...لحسن حظو وسوء حضها جلسات حداه في طيارة وغدوز حداه وفجنبو تقريبا تلاتة دسوايع

تفكرات نهار كانت نازلة هي ومها وشحال كانت كتوعد وكتسنى لقائهم شكون يقول غتمشي معاه لنفس لبلاد لي دفنت فيها ذكرياتهم بزوج موقف صعيب متحسدش عليه ...جلست جهة شرجم وهو حداها عنقها عنزاتو وهي كتشوف في جهة تانية مضورة وجههة عليه محست غير بيدو على ركبتها

جالسة فبيتها وسط دارهم من نهار باتت مع مراد ملي كان مريض مبقاتش دوزت شي ليلة معاه كيتلقاو بنهار وترجع فحالها عائشة ولات كتحسب ليها الخرجات وفين مشات ومنين جات ، كانت حاطة راسها على الوسادة حاسة بيه ثقيل كيمشي معاها ويجي ناضت صحة لحمام غسلات وجهها بان ليها صفر وعينيها ذابلين فمها باسل ومعدة حاسة بيها ماشي تال تما شاداها تبوريشة وذاتها محيطمة لبسات بينوار ديالها وتقاشر بغات تنزل لتحت معندها گانة لخدمة ومقاداش تخرج من الدار مشية غا شي حاجة باردة صونا تليفونها كان مراد جوتو بصوت ناعس وثقيل وقالت ~ الوو

مراد عاصر على قهوة كيشرب فيها غير سمع صوتها حط الكاس وقال~. مال صوتك ؟؟

نادية شدات راسها بين يديها كان كيزدح ~. والو غا ضربني لبرد لبارح دوشت بليل يمكن جبتها فراسي

عقد غوباشتو وقال مشطون لبال ~ وجدي راسك انا نجي نديك لطبيب

فاطعاتو بامتناع ~. لا لا ويلي فين غتجي عادي گريب وغدوز انا غنخرج ناخد شي حاجة من فاغماصي

مراد بانفعال ~ والا گريب عادية ميشوفكش طبيب تاخدي دوا معندك فين تمشي كوني تسمعي انا جاي

نادية كتدوي معاه بسياسة ~. مراد صافي مافيا لي يتعاقر اناوياك، غنشرب دوا غنصح الا جيت نخرج غنبدا في لونكيط تاع الحاجة وانا فغنى عليه هاد الساعة

خبط سوارتو مع طبلة وقال باستسلام ~. واخا ، خلي تليفونك شاعل مرة مرة نعيط ليك

قطعت معاه وهزت تليفون في ايدها ونزلت لتحت كان عائشة موجدة لفطور وناصبة حداها لغدا مشمرة على دراعها خاطرها تشهى رفيسة وعرات على يديها لمسمن كملاتو وروى فوق البوطة كيطيب ريحة الحلبة والعدس كتعطي من لويل لويل غا دارت نادية رجلها في كوزينة وهي تحط ايدها على نيفها وقالت مخسرة ملامحها ~. اش هاد الريحة اماما ؟؟

حكات داكشي لي فيديها ودارت لعندها كتشوف في وجها وطلع فبها وتنزل وتحقق ~. كيفاش اشنو هادشي ، من امتى مكتبغيش رفيسة ؟؟

نادية حطات ايدها على قلبها بدون شعور غا سكتي اماما تقلت لبارح في لعشى حاسة بمعدتي ضاراني ...قصدت عائشة لعطرية خدات كامون لبلدي ومدات ليها معلقة عامرة بيه وكاس لماا ~. هاكي شربي غيفووتك لحال

نادية حطات تليفون فوق بوطاجي ودارت لمها لخاطر عارفاها كتحكر وغير وصل داكشي لحلقها ضربتها بجرية لحمام

عائشة باستغراب ~.اربي مال هاد البنت.. جات تبعها سمعات تليفون كيصوني دارت نظاظرها لي كانو فوق راسها تشوف شكون وهي تعقد ستة في ستعود وطلعتها الشاربونة

محسات غير بيدو على ركبتها ، لمسة ايدو خلاتها دور لعندو قافزة ..ضيق عينيه وقال وهو كيشوف فيها ~. متخافيش ،حم بامر تكلم ... قادي لاسانتيغ ديالك !!

جوبتو بعينيها وخدات السمطة كتقاد فيها بنثرة وهي قالبة وجهها وكتدوي فخاطرهاا بهادشي لي كان ناقصها غا يجلس حداها وقريب منها ، تكات على الكرسي وغمضات عينيها مبغاش تشوف فيه گاع ولكن شنو دير لعطرو الرجولي لي لصق فيهاا ولي كيفكرها فبزااف دالحوايج

فكرها فاول يوم ليه في مدرسة وباول قمعة خدات منو وباول لمسة وقبلة تفكرت نهار سافرت معاه ونهار هربت هي وياه وختمت تفكيرها منهدة وهي كتفكر اخر لقاء نهار طنعها وجابها على اساس يخطبها وصدق شوهها هادشي كلو فيقاتو حيت عمرها نساتو

فلآ يُوجَدْ شَيئاً بِـ مُسمَى نِسيآنْ طَالمَـا تُوجَدْ تلكَ الذّكريَآتْ عَلى قَيد الحَيآةْ

بعد تلاتة الساعات من الطيران حطت الطائرة واخيرا في مدينة باريس ، مدينة الاحلام والموضة والمشاهير والفن والعشاق

كان الجو بارد ودنيا مضببة نزلو من طيارة لقاو طوموبيل كتسناهم ركبت هي وياه كانت مخشية في جلايلها كتقفقف مكتقدش على البرد فمها زراق وحناكها تزنگو سنانها كانو كيتراقصو اشار زيدان لشيفور وتكلم معاه باللغة الفرنسة باش يخدم لاكليم عاد حس بيها رجعت فيها النفس

كان وقت لغدا قرر بلاما يسولها يمشيو لاوطيل هو لول يرتاحو بعداا عاد يخرجو يتغداو هادشي كلو كان كيتشاور فيه مع دماغو وقفو قدام اوطيل غزال وكبير وماشي اي حد كيفما كان كيحجز فيه ، نزل زيدان كيقاد في كاشكول على عنقو ويحك في ايديه مع بعضياتهم عينيه كانو حمرين وهي كثر منو دخلو جنب بعضياتهم نيشان للاستقبال وكيف العادة هو لي تكلم وصدمها ملي حجز جناح على قدو ليهم بزوج ...مريام معجبهاش لحال خنزرت فيه وجراتو من يدو ودوات معصبة ~. ياكما تخربقتي ولبرد فعوض ميفقك تلفك ، راه جايين على خدمة ماشي شهر العسل هذا !!

خنزر فيها معاجبو حال من هضرتها وقال وهو ضاغط على سنانو ~. حسبيه كيف بغيتي وضغطي على راسك شوية وستحمليني هادشي دايرو على قبلك !!

سمعات تليفون كيصوني دارت نظاظرها لي كانو فوق راسها تشوف شكون وهي تعقد ستة تسعود وطلعتها الشاربونة ..كان فراس لي مدخلاه باسم محامي زيدان ،دارت شرع ايدها وقطعت عليه تبعت ناظية لقاتها خارجة من حمام وجهها معصور وكتمسح في فمها وهي تلبقها ~. لي بانت ليك تخشيها فداك الفم وغا لعفن تخلي طياب دار وتاكلي ليا فزناقي تا طيبتي ديك لمعدة طلعي لبسي نديك لطبيب

تلاحت على لفوطوي فاشلة وقالت بنفي ~. معندي فين نمشي اماما مالها اول مرة ضرني غا خليني نولي شوية نمشي ناخد دوا من صيدلية ونشربو ..

مجوبتهاش تسناتها تا رتاحت وسترجعات نفسها وهي تنطق ~. شكون هاد محامي زيدان لي كيعيط ليك شنو مزال باغا من داك الگنس ولي يجي منو

خنزرت فيها نادية بلا خاطر ~. اس وصلك لتيليفوني اماما

بالغوات قالت عائشة وهي غادا لكوزينة تشوف لبوطة ~. كان كيصووني شنو منشوفش شكون

ناضت بلا هواها مكابرة تا تبعتها خداتو منين خلاتو قلبها بدا يضرب في كرشها كون عيط مراد شنو كانت غتقول ليها ، دارت سيلونس وقالت بعتاب بعدما خشاتو في جيبها ~. ماما داك سيد جامعاني بيه الخدمة لا غير ، مبنت ليك عارضة عليه ولا عارض عليا

عائشة بأمر~. تا ديك الخدمة معندك مديري بيها الله

جهدها كان مسالي مافيها لي دخل معاها فجدال خاوي تحججات بصيدلية وطلعت لبيتها لاحت عليها كاب وخرجت تاخد دوا

غادا جارة رجليها كانت عيانة ووجها صفر شكت غير في دوش سبابها حتى ضربها البرد وخلى حالتها ترجع هاكدا ،وصلت لفاغماسي دخلت ليه لقات لبنت كتعرفها من زمان سلمات عليها وسولت في احوالها عاد قالت ليها اش عندها ~ ها يومين كنت دوشت وخرجت ضربني ابرد نهار علي نهار كنحس براسي فاشلة كثر ،تا من المعدة ضاراني ل كليتها نرجعها اما راس مبقيتش قادرة نهزو باغة غير نعس كنحس بعظامي عيانين كلشي فياا فاشل ،عتقيني بشي دوا يكون ايفيكاص لهادشي مكنحملش نشد لفراش

كانن كتشوف فيها السيدة بنظرة متفحصة لوجها وذاتها وهي تسولها بشك~ واش مزوجة ؟؟

جوبتها نادية بتردد ~اه .

بتاسمت ليها عاد نطقت ~ بحال والو تكوني حاملة !!

نزلت عليها هاد الكلمة بحال الصاعقة ، كانت مستبعده هاد الاحتمال من تفكيرها ومحطاهش حتى بواحد في لمية فمخيلتها ..معرفت باش تجاوبها بقات غير كتشوف فيها حتى عودت سولتها مرة اخرا~ امتى اخر مرة جاتك الدورة ؟؟

سؤال كان عادي ولكن عند نادية لا بقات ط مدة عاد نطقت ~ شهر تكون دبا ، بتوثر واش متاكدة هاد الاعراض لفيا ديال الحمل ؟؟

ردت عليها بعدما خدات اختبار الحمل وحطاتو قدامها~ كلشي ممكن جربي هذا بعدا الا مكان والو عاد نقدر نعطيك دوا

خلصتها بزربة وخرجت بلاما تقول حتى كلمة واحدة

خباتو في جيبها ودخلت لدار شاداها الدوخة من هاد الهضرة ، كانت دايرة احتياطها صحيح مكتشربش الفنيد ولكن كانو عارفين شنو كيديرو كيفاش غتكون حملت لا لا اكيد مكاين والو غا برد عادي هادشي باش قنعت راسها .. تلقات ليها عائشة في الباب ~ شفتك جيتي خاوية فيناهو دوا

نادية غادا هربانة ~. لقيتها سادا اماما ، انا غنطلع نعس شوية فبيتي يمكن نرتاح ويفوتني لحال ....عائشة

بالغوات باش تسمعها ~ ايوا وهاد لقصرية نجلس عليها راسي

نادية كتدوي وهي طالعة في دروج ~. مقاداش اماما غا خلي ليا

دخلت لبيت وسدات عليها بساروت شافت ضو شعل فتليفونها هزاتو كان مراد مقدراتش تجاوبو صوتها كيترعد تخشات في بلاصتها وتغطات كتطلب في خاطرها ملي تحل عينيها تولي بخير وميكون لا حمل لا والو

دخلات لسويت لي خداو كان كبير دايرة بحال برطمة صغيرة فيها بيوت نعاس كل وا معزول على تاني سيجور واحد وميني بار ودوش ،دخلات قدامو ختارت احسن بيت فيهم ودخلت ليه بعدما قال ~. بدلي ورتاحي من دابا شوية نخرجو نتغداو

قال كلامو ومشى من حداها مخلاهاش تجاوب جرت باليزتها باش تبدل ...واخا الحال مبرد على برا لكليمة كانت مسخنة ليهم القضية ، حيدات لمونطو لاحت السباط وبقات كضور بحوايجها حفيانة تمشي وتجي من قنت لقنت هزات بينوار ولاتروس ديالها وتمات غادا قاصدة لحمام

من ورا نص ساعة كانت لابسة كسوة حمرة لاصقة عليها وعند الركبة مع بوتين عالين ومونطو نواغ شعرها كانت طالقاه اما هو كان مقاد الحالة وكيف عادتو كيبان عاطي للعين لي شاف شكلو وملامح وجهو يعطيه الجنسية الفرنسية خرجت من شامبر ديالها لقاتو جالس في الفوطوي داير رجل على ختها وهاز فيدو كاس يسخن بيه ملامح وجهو كانو مرتاحيين وباينة فيه ترونكيل ولكن شكون خلاك بدون مقدمات قالت بصوت رقيق وسبقاتو ~. انا واجدة

شرب كاسو دقة وحدة وناض كيقاد في مونطو دجلد لي كان لابس ...تم غادي كيتمشى فجنبها بهيبة ورجولية شوفاتو قاصحين ومكيضحكش كيشوف غا نيشان عكسها هي غادا وضور وتلفت خرجو على برا لقى سيارة رياضية وصى عليها كتسناه قدام لوطيل ركب وركبات حداه ونطالق

مريام بتساؤل ~. امتى غنقضيو الغرض لي جينا عليه ؟؟

زيدان متسوقش ليها ~. فين تبغي تاكلي

تنهدات قالبة وجهها لجهة الشرجم تاهيا مجوباتوش ، بقات شحال وهي كتستمتع بشوارع باريس وكتشوف في العشاق كيف فرحانين ، هزات تليفونها ودوزات اتصال بالكاميرا لنزهة وهي متلهفة تشوفهم جوبتها ديك ساع طانت كتسنى مكالمة ديالها لقات في حضنها ارون لي غير شافها من تليفون بدا يتماطى يمشي عندها ...دوات بعينين دامعين ~. شحال توحشتوو !!ولديي ها ماما

هي كتدوي وزيدان كيسرق شوفات فيه وشبه ابتسامة دغيا ترسمات على فمو ....مرة يشوف في طريق مرة فيه مرة فيها كيفاش كتدوي مع ولدها وكيفاش متلهفة عليه حتى قطعت... نزلو قدام مطعم راقي خاص بالاكل الفرنسي كان جو لداخل رومانسي شموع في عز النهار وموسيقى خفيفة ،عطاو مونطو لشخص لي كان في استقبال عاد مشاو لطبيلة لي كانت مزينة بشكل راقي ، قبل متجلس مريام ستأذنت تغسل يديها وهي خارجة من حمام حسات بشي يد جرتها بقوة ورجعت دخلتها لداخل وسدت الباب مكاليها عليه بغات تغوت حسات بيدو حطها على فمها كااتم شهقاتها

تكوني قوية قلبك قاصح مشجعة ومكتخافيش لكن انفوا يسد عليك شي حد لباب وتكوني غير نتي وياه الراس فراس غيتقاداو ليك ...كلشي جاها على غفلة كانت في امان الله غادا راجعة لبلاصتها حتى كتشوف راسها مكالية والباب مطرق عليها حسات برجليها فشلو قلبها بدا كيضرب بجهد

نفس تحبسات فيها بسباب يدو لي تحطت على فمها كاتمة غواتها بغات تدفعو مقدراش طويل وعالي وجهو كيخلع وكلو وشام صلع وعينيه زرقين وجهو بلق باينة فيه من هنا ..بدات كضور فعينيها وكتركل فبلاصتها بغات تفك منو وهو يخبطها مع الباب حتى تقصحت

عض على فمو وجبد من جيب دسروال لور موس صغير بدا كيدوز فيه على وجهها باستفزاز

من جبهتها لحكنها كيهبط لعنقها ومرة لجنبها صدرها كان كيطلع وكينزل بزربة من الخلعة ولات كلها عرقانها لموت كانت كتشوفها قدامها

مضناتش تكون اخرتها هاكدا وموتها فحمام وعلى يد يهودي ،كانت متوقعة يكون مصيفطينو غير هما حيت مكتعرف حد وممعادية مع حد اما كون بغى يشفرها غيبدا بسنسلة ل فعنقها و كون بغى يتعدى عليها مغيتسناش هاد الوقت كلو ولكن هو كان مصمم يمارس عليها اسلوب ترهيب لي نجح فيه ..قدر يخلعها ويخطف اللون من وجهها رجعات صفرة مافيهاش نقطة دم تجري عينيها كانت كتحرك فيهم بزربة وايدها كيترعدو

حط لموس على عنقها وبضبط على بلاصة النبض وقال بصوت كيبعت الخوف في النفس كان كيتكلم بالفرنسية وبشوية عليه مثقل في هضرتو وكيورك على كل حرف ~ ستغلي الايام لي بقات ليك في الحيااة ومتنسايش ملي تودعي تبلغي سلامنا لجيمس

بدات كتشهق وعينيها عمرو دموع باغا تغوت وملاقيا كيف دير كتحاول تفك منو ومقدراتش هزات ايدها وهي تحطها على لموس بغات تحيدو ليه وهو يجر تا تجرحت فكفها

وقال ~ متزربيش على عمرك

مقدرش يكمل كلامو كان شي حد كيحل في لباب ..زير على فكها بقوة ونطق بتهديد ~ فلتي هاد المرة ولكن متفرحيش حنا عاد بديناا تهلاي فولدنا تا يجي لبين يدينا

نقز من شرجم وخرج كيجري خلاها طايحة الارض شادة فيديها لي كتقطر بدم مقدراتش مزال تبقى واقفة

ضريب فالباب تجهد شوية كتسمع صوت زيدان كيغوت بسميتها عقلو كان خارج على برا ملي شافها تعطلت ولباب مسورت كيف بغا يهرسو وهي توقف وحلاتو

قرب منها بخوف وعينيه على ايدها لي كانت شاداها ~. شنو وقعع شكون دار فيك هادشي

مجوباتوش بقات غا كتبكي ومصدومة خلاها واقفة ودخل يقلب في حمام ملقى حد طل من شرجم لقى يدو وريح رجع ساخط ومعصب شدها من خصرها وخرجها من تم جلسها على كرسي حاول يفهم منها شنو وقع لكن حدها نكقت يالله نمشيو من هنا !!

بدا يغوت ويسب على لمسؤول ~. كيفاش هادشي كلو يوقع ، واش لي جا كيدخل

- تهدن اموسيو حنا لكاميرات مدايرينهمش في حمامات

زيدان بالغوات ~ والأمن حتى هو مكاينش برا مطعم واش كدخلو من والا

شافها وقفات وقربت منو بصوت باكي جراتو من يدو ~. زيدان ديني عفاك صافي لي وقع وقع

مقدراتش مزال تبقى تما خرج معاها معاجبو حال واخا مكرهش يريب عليهم دنيا ولكن هي اهم فديك اللحظة من اي حاجة غادين راجعين لأوطيل هي مكمشة في بلاصتها وهو مرة يشوف في طريق مرة فيها ، نزل راسو لايدها بانت ليه مزيرة عليها وهو يمد يدو وهزها كيشوف فيها مضيق عينيه نثرتها وقالت بنبرة صوت طافية ~ ماشي شي حاجة گغاف

قال بحدة وهو كيشوف فيها ~. شنو قاليك !!

رجع ليها نفس المشهد من جديد اما الخوف باقي نفسو مسيطر عليها ~. فلت ليوم مرة جايا يصفيها ليا

من ورا مكملت هاد الهضرة مقدرتش تصبر خشات وجهها بين يديها وبدات تبكي بصوت مسموع

تهز قلبو ملي سمعها حس بيها ضعيفة اما هي حسات براسها بوحدها ومكاينش لي غيعتقها ويكون معاها ومعندها لمن تشكي وشكون غيجي منها

وقف طوموبيل وساط بصوت مسموع حتى بغى يحط ايدو على ظهرها وتراجع ضاربها مع لفولون وقال بسخط ~. متبكييييش

معندهم ميديرو ليك

هزات فيه راسها بتعجب ~. بصاح يااك يمكن كان غكيضحك معايا ، عند بالك هاد الهضرة غتريحني بيها غا كون هاني انا عارفة حجم المشكيل لي واقعة فيه متبردش عليا

زيدان حيد السمطة ودار جنب مقابل معاها ~ ندوي وتسمعيني

مريام مسحات دموعها وربعات ايدها وقالت هازة حواجبها لسماا ~. انا كنسمع

كان كيدوي بيديه وحجبانو وملامحو ~. انا عارف المشكل تاعك من اول لاخر وعارف همهم شنو ولكن لي معارفاهش نتي بلي هادشي كلو غا تهديد وهضرة خاوية باغين يضغطو عليك بيها غرضهم ماشي يقتلوك باغين يتفاوضو معاك

مريام تلفات مبقات عارفة متشد ~ كيفاش يتفاوضو وهما كل مرة خارجين بحاجة مرة ماما ودابا انا ،واش تفاوض هما يخليوني نسمح في ولدي هادي هي لي مغتكونش واخا نعرف نموت ..هاداك راه ولدي اعباد الله .. كون غا نعرف معامن نهضر ونمشي لعنهم ونشرح ليهم عائلتو مكنعرفهاش وعمري شفتها ولا جات عندي ولا داني عندهم ،

زيدان نطق باخر حاجة ممكن تتوقعها ~ داكشي علاش انا جبتك برجليك هناا

خرجات فيه عينيها بعدم فهم ~ كيفااش ؟؟

-مكاين لا اجتماع لا خدمة لا شركة هادشي كلو درتو على ودك بغيت نهنيك من هاد المشكل بمرة

كيف بغات تسوط فيه وقفها بعينيه لي خرجهم فيها ~. تسنطي بعدا عاد دوي

...مغاديش نخليك تعيشي في ضغط حياتك كاملة وهما يحركوك كيف بغيتي اولا خااصهم يعرفو بلي لولد لي دايرين عليه هادشي كامل ماشي ولدهم هنااا غادي يخرجو من رونضتهم مزيان ونعرفو شنو بغاو بالضبط

مريام بانفعال ~ دابا نتا خليتيني سامحة فولدي وجايا هنا معاك وعلى شوية كانت غتصفى ليا وكتقول ليا هاكداك عيني فعينك جبتك برجليك عندهم

ضيقات عينيها فيه وقالت بتساؤل ~ دابا فهمت دابا نتا هامك الولد بغيتي تبتو ولدك باي شكل كان ياك

زيدان شاف قدامو ونطق ~ انا هامني تكملي حياتك مرتاحة ومتبقايش كارهاني

صعيب اموسيو زيدان صعيب قالتها في خاطرها وضربت الطم لاحظ سكاتها ورجع ديمارا طوموبيل..طريق كلها وهي كتفكر وتعاود خاصو يعرف كلشي عندو صح الا بغات تكمل حياتها مرتاحة خاصها تفضح السر لي خباتو على ناس كاملين واخا هادشي غيأثى على نفسيتها وغيسمعها هضرة ناس ولكن مقارنة مع اش واقع معاها غتكون اهون واقل ضرر ليها ، رجعو الاوطيل نفس ديال ماكلة مبقاتش دخلات لبيتها بدلات عليها الكسوة بسيرفيت ودعقمت ايدها وتلاحت فوق ناموسية غيبات فاقت على صوت طرقات في باب بيتها حلاتو لقات طبلة عامرة ماكلة حطها ليها ومشى دخلتها وسدات لباب نقبات شوية وهي تنوض بقات غادا جايا فداك البيت كتفكر وباغا تاخد قرار حتى كتبغي تخرج لعندو وكتراجع في لخر خدات نفس عميق وقررات تحدى راسها وتكون حسن منو خرجات على برا لقاتو هاز فيدو گارو كيكمي

مبدون مقدمات نطقت خلاتو هاز عينو فيها بتركيز~. أرون ماشي ولد جيمس !!

نتر من لگارو وساط دخان ووقف ~. عارف وكنت متأكد ...زاد نترة اخرة وهي تاخدو من يدو وطفاتو مخنزرة وقالت ~. وماشي حتى ولدك !!

مدار حتى رد فعل حافظ على الهدوء ديالو وعلى نفس ملامح لوجه وخلاها تكمل مقاطعهاش

يعني الا بغيتي دير شي دور بطولي وتبان عليا بيه باش نجي نقوليك راه ولدك وكنت حاملة بيه ملي كنت في مغرب وداكشي علاش ختارت نتزوج براجل كبر مني باش يسترني ونربي ولدي غاا نسى لولد ماشي ولد ليهود الاصليين ولا ولد ليهود تاع لمغرب ..

بثقة قالت ~أرون انا مربيااه ، كانت كتحرك راسها وكتدوي بتاثر ..انا عمري حملت ولا رضعت ولا ولدت انا غير ربيت ولكن حاسباه ولدي حيت هزيتو بين يدي كيف تزاد ...كان بامكاني نستغلك ونخليك طامع وغافل بالحق انا ماشي زيدان لخليفي ودابا نجيك من الاخير الا كنتي هاد المسرحية كاملة دايرها حيت كنتي شاك ولو واحد في لمية غتكون نتا باه انا قلت ليك لي كاين

متبقاش طامع ومتمني شي حاجة وفلخر تصدم انا قصرت عليك طريق معندك لاش ضيع وقتك على الخاوي غير خليني نعوم بحري

كملت كلامها ودخلات خلاتو وراها متبع ليها العين بملامح ممحية

يوم جديد واحداث جداد

اول مفاقت نادية هزات اختبار لي بيتاتو تحت راسها ودخلات لحمام خدات عينة من بولها وجربتها مدة قليلة وطلع النتيجة كانت فوسط لبيت كترعد وتعض في شفايفها بعصبية وتلعب بايدها ،حتى بانت النتيجة ل كانت ايجابية تسمرت في بلاصتها طلعو جووج خطوط حمرين اذن حاملة ،صدمة شدتها ،جلست فوق الناموسية مصدومة ،تخلطو عليها جميع الاحاسيس معرفت تخاف ولا تفرح ،رغم المشاكل لواقعة ليها مع مامها الا ان احساس الامومة قدر يربح في ديك اللحظة ،في الداخل ديالها بغات تفرح حيت غادي تولي ام من اارجل ل كتبغي بدات تتخايل الا عرف مراد كيف غادي تكون فرحتو ،نسات راسها ونسات كلشي وبقات كتفكر غير في لفشووش لغادي تفشش عليه وكيف غادي يعاملها خصوصا انها عارفاه كيموت على دراري الصغار وعزازين عليه بزاااف ،ضربتها الفيقة من احلامها الوردية على واقعها المر ،مني ذخلت عندها عايشة ،وهي تلوح الاختبار تحت الناموسية مع الخلعة والدعقة معرفت مدير ،شافت فيها وطلعت فحالتها باستغراب عاد نطقت بشك ~ مالك غير دخلت عندك وانتي تنقزي ياك لباس ..

ناذية كتفتف في لكلام ثوثر كان باين على وجها .. تكلمت بنبرة كتصطنع فيها انها بخير ~ لا لا غير كنت ساهية ومع دوا راخيني

اشنو بغيتي شي حاجة اماما.؟؟مبغاتش تحكر على الموضوع نطقت بصرامة~ نزلي التحت خالتك جات هي كمال غتجلس معانا تا تجي بنتها

نادية بزربة ناضت باغة تخرج من حداها قبل ما تفضح ،اما عايشة بقات غير كتشوف فيها وفي لبيت ل كلو مرون علي غير عادتو نادية عارفة عزيز عليها نظام وكيعجبها يكون بيتها مقاد

عايشة كتدوي مع راسها ~ اويلي بنتي مريضة وخدامة كيف دير الله يكون معاها ياربي والله يحفظها ..

كملت خطوتها لوسط بيت وبدات تجمع حوايج لنقية طواتها ولمسخة حيدتها ،وراق مليوحين جمعتهم قدات ناموسية قدات مخاد جات تقاد كوفرلي وهي ضرب بايدها نظاضرها وهما يطيحوو ،هبطت تجبدهم وهي تشوف شي حاجة بيضة تحت الناموسية جابت شطابة من الحمام وجرات داكشي حتى بان ليها الاختبار

عايشة واخا مرا كبيرة ولكن قارية وواعية وعارفة كل حاجة في الحياة من التقليدي حتال المعاصر،

وهذا عرفاتو ديال الحمل غير شافت جوج خطوط حمرين

تشلت على الحركة نطقت كلمة وحدة من فمها~ ااااااامييييييمممتيييي اشنووووو هااادشي ،عينيها وصلها لعقلها وعقلها وصلها لردة الفعل لكانت هي انها خبطت جنابها بلاما تحس ،صدمة خرجتها على طوعها ولات غير كتخبط في ايديها وتغوت وتلالي على عمرها ~ اوووووويلي اشنووو هادشي اعاااايشة ،اويلي على بنت لحرااااام حاملة ،نادية حاملة اعااايشة لاااا لاااا ،

جهد ولا جهدين هبطت في دروج كتغووووت وتعيط بسميتها ~ نااااااااادية ناااااادية

كيف وصلت لعندها وتقابلت معاها رمات الاختبار على وجها ونطقت بغوات~ اشنوووووو هاااادشي ابنت كررررشي ...؟؟حااملة ياك انادية حاملة ... هضري وقولي ليا غير صراحة حاملة ياك انا مزااووووووكة رحميني وجوبيني.

نادية لسان ل يجوبها ولا لعقل ل يعطي ردة فعل جمد بقات غير كتململ في راسها بالاشارة لا ..عايشة فقدت اعصابها وبدات كطرش فيها وتقرص وتنتف وتغوات نزهة كتفك وارون كيبكي والحراس على برا لي حاو مرافقينها كيتسنطو ..لغوات ناض ودنيا ترونت كلشي تخلط ،عايشة دخلت في انهيار، تقبل بنتها حاملة وجابت ليها كرش هادي هي لمتكون تقتلها ومتقبلهاش ...جمعت الوقفة من فوقها من بعد ما تقدى جهدها وناضت بحال المسعورة مشات جابت جنوبة باغة دوز عليها بلاما تحس ،خيبة امل ل حسات بيها في ديك اللحظة عمرها حسات بيها ،صدمة كانت قوية عليها كأم خصوصا انها كانت كتيق في نادية تقة عمياء واخا تعير واخا تشك كتقول عارفة اش ولدت من كرشي ميمكنش غادي ديرها ~اليوووم اليوووم نقتلللك انا تجبي ليا كرش عايشة بنتها طلع قحبة ياك حليتي رجليك ياك جربتي ليا لحرام ياك ابنتي؟؟ بدات تخبط في صدرها.. قريتك وكبرتك وصلتك باش في اخر ايامي تشوهيني وتمرمضي ليا وجهي في الثراب هادشي باش كتجزيني ياك انادية ياك المحامية امولات لعقل ،اليوم نذبحك ونذفنك وحرام عليا الا مزال قلت عندي بنت ،بقات تغوت وتعير حتى جاتها هسترية ديال لغوات وبدات تضرب في راسها حتى طاحت على طولتها وبدات تناخض،نادية غير مكورة علي راسها وكتبكي ،مني شافت مها طاحت وفمها بياض قالت الموت هادي ناضت لعندها

وعايشة واخا الروح زاهقة ومخنوقة مبغاتهاش تقرب ليها ،نطقت نادية بكذب باغة غير مها تفيق من الحالة ل وصلت ليها ~ ماشي ديالي اماما غير ديال موكلة عندي والله اماما ما ديالي والله والله اماما ما ديالي واش عارفاني غادي نديرانا شي حاجة هاكة والله اماما والله اماما ..كتبكي وتشهق وتكذب على مها لموت تمناتها ولا هادشي يوقع باغا غير تفيق مها من هاد الحالة لي وصلتها ليها

عايشة طايحة الارض ونادية متكية عليها وتبكي ونزهة فوق راسهم معرفت باش تبلات وخايفة على ختها ...نوضت نادية ونطقت بالم ~ هاكي ابنتي سوارت الدار سيري ليها حتى تبرد ماماك وجي انا غادي نفهمها راه اختي وكنعرفها كثر منك ابنتي غا سيري دبا ..

خدات سورات وهزت تلفونها وخرجت كتجري ،اول واحد طاح في بالها هو رجلها دوزت نمرتو بزربة جاوبها ~ حبيبتي كيف بقيتي .

جوباتو وهي كتشهق وتبكي كلام كطلع فيه بزز ~ مم راااد .فييينننك جي عندي ..دباا انا حدا دار قطعت عليه كان جالس غير سمع صوتها وشهقاتها ،حس بروحو خرجت في ديك اللحظة معرف حتي مالها كيصوني ليها كتقطع عليه

ترون في دماغو واخيب لبلانات فكر فيهم

خرج كيجري ركب في طموبيلتو ديركت لدارهم ما وصل حتى كان هرب منو الدم بالخلعة عليها معرف اش واقع معاها.وقف حدا دارهم بانت ليه كالسة ومكمشة في بعضياتها ،نزل كيجري من طموبيل لعندها وقف عليها كتنفس مخربق ~ نادية ماااالكي اش واقع .غير سمعت صوتو هزت راسها فيه وهو يتصدم كان وجها عامر دمايات هبط لعندها بزربة كيقلب فيها وكيهضر في نفس الوقت~ شكووون دار فيك هادشي ،شكون حط يدو عليك... بدا يغوت ... قولي ليا شكون نخلي دار مو ،خدا راسها بين ايديه لكبار كيهدن فيها حيث كانت كترعد بين ايديه وخوف باين في عينيها اما حالتها كانت كتضر نيفها كيقطر بدم هو وفمها ووجهها صباع ماماها مزالين مصورين فيه واثارهم باين حمررر ومطراسي عينيها طايبين بكى وشعر كان مشعكك وعنق كلو مقموش معندها متقول بقات غير كتبكي وتنخصص جرها لعندو عنقها معرف ميدير حاس بايديه مربوطين هو شاك شكون غادي يكون من غير عائشة مكاين لي يقدر بضربها ،خلاها حتى بردت وتهدنت وقابلها معاه كيحاول يدوي بشوية ~ واش ماماك لي دارت فيك هاد الحالة

ختارت الصمت ل كان جوابها ، برم حواجبو معاجبو حال زير على ايديه بعصبية حتى برزو عروقهم وقال تحت من سنانو ~. انا غندخل عندها ندوي معاها هادشي بزاف ...تم غادي وهي تجرو من ايديه كترجاه مبغاتوش يزيد يكحلها عليها باراكا عليها غير هادشي ~. فين غادي امراد راني خليتها طايحة الارض عوجة وكتركل غا خالتي معاها مغنخليكش تدخل تكمل عليها

نطق منيرڤي ~ وعلاش هادشي كامل اش طرا ؟؟

مقدراتش تقوليه هادشي لي وقع وردة فعل عائشة خربقتها فضلات سكات وعضت على فمها وقالت بتعب~. غير صداع عادي كيف ديما يالله نمشيو لدار

مقنعوش كلامها ولكن هادي هي نادية الا مبغاتش تهضر متقدرش تخرج منها الهضرة بزز ركب طوموبيل وركبت حداه ، غير ديمارا وهي تصوني لخالتها قلبها وعقلها بقى فدار مع مها باقي واكلها خاطرها عليها غير سمعت الو وهي تدوي ملهوفة ~. كيف بقات اخالتي واش شوية فاقت

نزهة جالسة فوق الفوطوي وعلى ركابيها ارون فجنبها عايشة لي دايرة ايدها بزوج فوق راسها شادة بيهم نواظرها ~. لا فاقت ابنتي هاهي شوية متخافيش عليها ..بدات تغوت وتسمع ليها ~ متسول فيا منسول فيها

نزهة لامت ختها بعينيها ولالت لنادية ~. رتاحي نتي ومتجي تا نعيط ليك وغير كوني هانية كن جهة ماماك انا معاها

قطعت وتكات على شرجم ،حسات بمراد وقف طوموبيل دارت شافت فيه باستفسار لقاتو كياخد بابيي ومد يدو لوجهها كيمسح ليها بملامح معقودة بلاما يدوي

فاقت صباح بعد مغمضات ساعات قلال ليل كلو كتفكر مكانش ساهل عليها تقوليه ل حقيقة لشحال من واحد معارفهاش كلشي مفكر من غير نادية ومها وجيمس بلي ارون ولدها من صلبها هي وجيمس ولكن لا هاد الاخير واخا كون بقات عمرها كامل معاه عمرها تولد حيت كان عندو مشكيل داكشي علاش ربي حط فطريقها ارون لي رباتو بلاما ترددد كان هدية من الله ودوا قدر يشافي جراحهاا ويرمم بقايا روح لي تهرسات فيها... بغاتو كأنو ولدها وكانت ناوية تدفن هاد سر حتى تموت ولكن شاءت الاقدار يتعرفش كلشي مكانتش دايرة بحساب موت جيمس بديك طريقة ولا بحساب عائلتو لي تابعينها داكشي علاش شافت احسن حل تقول كلشي اللهم تجي فيها هي ..ناضت من بلاصتها تشوف شنو دير واش تنزل لمغرب ولا تبقى غسلات وجهها وخرجات على برا كانت متوقعة بنسبة كبيرة مغاديش تلقى زيدان حيت عرفاتو كيدير كلشي على قبل الولد ..مشات لبيتو بان ليها خاوي قبل متخرج منو وهي تصدم ملي بان ليها خارج من دوش لابس بينوار وشعرو كيقطر رجعت بلور مخرجة عينيها بصدمة اما هو نطق عادي وبتساؤل كان كيمسح على شعرو ~ ايدك شوية ؟؟

مجوباتوش ربعات ايدها وبقات تشوف فيه تاهو مكانش من العاگزين قرب منها وقال حيت عارف تفكيرها فين كان صاد~ داكشي لي قلتي لبارح متبقايش تعاوديه ارون ولدي وهادشي لي خاصو يكون وهادشي فمصلاحتك واخا

طبطب على ذراعها بعدما قال كلامو ودخل لبيت يبدل عليه خلاها حالة فمها مفاهمة والو من هضرتو

فطور فرنسي كان جامعهم بزوج في مطعم لوطيل ، كتاكل مستغربة من هاد السيد الغامض لي قدامها حتى كتقول فهماتو وولات تعرف اش تحت راسو وكتلقى راسها غالطة

كلو على بعضو مسألة صعيب فهمها كتاب مسدود متقدر تقرا حتى حرف من حروفو ، حتال لبارح كانت كتظن بلي باغي يعاونها على قبل لولد لي رجعو ولدو صحة وليوم تبت ليها لعكس بعدما لقاتو واقف قدام وجهها وماد يدو ليها باغي يخرجها من الحفرة لي طيحها فيها وهو اخر شخص كانت متمنية ولا باغا يعاونها ، بينها وبين راسها كتقول يمكن باغي يريح ضميرو باش يقدر يغمض عينيه في ليل مرتاح وينعس بلاما يبقى يلوم راسو فشنو دار فيها وبنسبة ليناا يمكن يكون هادشي كلو خاطئ ويكون قلبو بدا يحن ليها وبلا هواه كيدير هادشي ..

سالات فطورها ،هزات كاس قهوة مهرسة بين يديها وتكات ظهرها على الكرسي كتشوفيه من بين شفارها

كان هاز فيدو قهوة كحلة وجالس برجولية ملامح وجهو حادة كان مكمش عينيه في جورنال فرنسي فيدو كيقرا فيه باهتمام علاما تسالي ،ومرة مرة يرشف من قهوتو لي بدون سكر حس بيها حاضياه وهو يهز عينو على غفلة فيها حتى توثرت بقى كيشوف اما هي دورت عينيها لجهة لوخرا نزل شنو فيدو فوق طبلة وهز سوارت وقال بتساؤل ~ ساليتي فطورك ؟؟ نمشيو !!

هزات راسها بتساؤل وقالت ~. فين غنمشيو بسلامة ، ياك قلتي الخدمة والاجتماع غاا كذبة

وقف خلاها طرطر راسهاا لبس مونطوه وهز يدو بأمر ~ متبقايش تسولي بزاف ديري شنو كنقول ليك وغتربحي

سبقها وخلاها وراه ناضت بشوية عليها قادات حوايجها وسدات كاشمير لي لابسة عاد جات وراه ،غير خرجت من باب لوطيل ضرب فيها لبرد توگضت وتحلو عينيها خشات ايدها في جيابها ودخلات طوموبيل بهرولة

دخلت كتقفقف قادات لاسانتيغ تحت نظراتو المتفحصة عينيه مشاو نيشان ليدها والضربة لي خلات اثر واضح في كفها وزراقت مع البرد ~. مدرتيش ليها دوا ..قالها مضيق عينيه

شافت مريام في الجرحة بعدم اهتمام ~. حتى نتا بحال هاد الجرح كيف والو ماشي شي حاجة

نجحات تعصبو وتخليه يضغط على فكو من لداخل ،قالتها عند دون قصد ولكن فهمها طايرة حيت بصح جرح القلب صعيب يداوا ، كسيرة بزربة حتى تفافات من بلاصتها مخلوعة زيرات على يديها وهي كتشوفيه غادي طاير لوجهة معارفاهاش

غادي شاد الطريق ما نطق بحتى حرف و حتى هي سايراتو بغات تشوف هاد الحريرة فين غتسالي بيها لحظات حتى وقفاات طوموبيل فكافي فقلب عاصمة الانوار هبط كيسد صداف لمونطو حيت كان لبرد قاصح شوية وشتا كتنقط دخلو و هو سابقها مشا جلس فطابلة معزولة على ناس كان المكان دافي بفضل لكليمة.. مريام جلسات قدامو مربعة يديها باستغراب لاش جاو هنا وشكون غيقابلو معارفاش، كانت فكرة تديها و لخرا تجيبها حتى وقف عليهم جاك محامي جيمس ...باقي هو هو كيف ما خلاتو لقى تحية شي لي خلا مريام تصدم من شوفتو وقفات و نطقات اسمو مستغربة

مريام ~جااااك !!!

سلم عليها وبتاسم جالس حداها شاف فزيدان لي كانو ملامحو خاليين من التعبير كيشوف و ساكت حتى تكلم معاه .

جاك ~ كنضن نتا هو مسيو زيدان ؟؟!

زيدان بجلستو المعهودة وتكشيرتو الدائمة قال وهو كيطلع فيه وينزل ~هو هذا و نتا هو جاك ؟؟!

جاك حل صدفة لكوستيم باش يرتاح و جاوبو ~ متشرفين ، وي انا هو جاك محامي جيمس ودابا محامي مدام مريام

بتاسم زيدان باستهزاء وشير لناذل ،كل واحد فيهم خدا شنو بغى وغير تحطت الطلبية ديالهم ،قطع زيدان حديت كل من مريام وجاك لي كان على الاحوال والحال

تقاد زيدان في جلستو وقال ~ ندخلو ف الموضوع يكون أحسن، ..غلظ صوتو وقال بحدة بارم حجبانو وموجه هضرتو القاصحة لجاك ...اولا ل كنعرف ان المحامي الواعر هو ل كيخرج الموكل ديالو من المشاكل ماشي كيخليه غارق فيهم وكيسلت ... ناس ملي كتبدا الخدمة اسي جاك كتكملها ولالا ؟؟

جاك تكى على كاس الما شربو، استغرب من كلامو المستفز و نظراتو ~فحالاش امسيو زيدان ؟؟ مفهمتش شنو كتقصد؟؟

حط يدو على طابلةومريام غا كتشوف كيفاش كيلوم فيه ~ نتاا اكتر واحد عارف ليهود مغيدوزوش الموضوع بساهل ومغيسكتوش على داك الولد و مغيتهنااو حتى ياخدوه بأي ثمن واش جيمس قبل ما يفكر يدخل للاسلام معرفش بلي غيدخلها قبل منو في المشاكل هو ومحاروووش فيه لي من دمهم و لحمهم عاد غيفكرو ف "زير على يديه ومخرجش ديك كلمة مراتو لي واحلة ليه في زور وباقي مبغا يتقبلها " واش مفكرش فيها و في الولد شنو يطرا فيهم وراه؟!

زيدان كيهضر معصصب و كيحاول ميغوتش حيت المكااان فيه ناس مهمين كيتناقشو وناس كيكالميو راسهم ويديفولاو بموسيقى هااادئة مزينة المكان

شاف في مريام لي كانت كتسنى فيه يدوي يقول شي حاجة ورجع شاف في زيدان وبدا يدوي ومخيلتو رااجعة بيه لور ~ كلشي ضربنا ليه حساب كنت غير كنتسنى الوقت المناسب ...هز زيدان يديه بانفعال وقال ~. بمعنى !!

اما مريام حطات يديها على حنكها وكتسمع ليه وكتصدم

~~~

قبل موت جيمس باشهر قليلة كان جالس هوو جاك في المكتب ديالو و كيتكلمو فموضوع لي كان شاغل بال جيمس داك الوقت

جيمس بتحذير حط ملف فوق المكتب~ هاااد الورااق منبغيييش شي حد يعرف عليهم شي حاجة غيبقاو في الخزنة عندك وراك عارف تجبدهم في الوقت المناسب كيفماا وصيتك

كان جاك كيقرا في لوراق لي كتضم تحاليل طبية كتبين بلي لولد ماشي من جيمس ورسالة بخط يدو مع التوقيع ، سد الملف ونطق بتساؤل وملامح الحيرة تشكلو على محياه ~.متاكد من هادشي لي بغيتي ندير !!

جيمس بإصرار ~ مليون في مية خاصني نضمن متوقع لمريام تا حاجة ورايا ، واش نقدر نعول عليك ؟؟

جاك هز لملف ووقف ~ كون هاني ، الا وقعات شي حاجة من ل فبالك غيوصل هاد الملف للعائلة كيفما طلبتي

~~~

حطات ايدها على وجهها وعينيها مغرغيين متاثرة كيفاش كان كيفكر فيها هي كثر من راسو ، مهموش انو يقدر يموت قد مهمو من شنو غيوقع ليها وراه مسحات عينيها وبصوت خافت نطقت ~ هذا هو جيمس ديما كيفكر فيا

زير زيدان على يديه وتكلم ~ لوراق فين كاينين دابا

جاك ~ عندي في لبيرو

زيدان ~. وعلاش موصلوش ليد عائلتو حتال دابا شنو كتسنى ،قال من تحت سنانو واش عارف بلي لبارح كان ممكن تموت

شافيها جاك كيتسناها تاكد كلام زيدان ، هزات ليه راسها بالايحاب وبدات كتعاود ليه شنو وقع معاها من اول موصلات للمغرب حتال شنو وقع معاها ملي رجعت لفرنساا

جاك ~. علاش مقلتي ليا والو امدام مريام

مريام تنهدات ~ كنت كتقول نتسنى سحابة وغدوز ، وعاد ما مرة ما زوج تاصلت بيك ومكيشدش الخط

قاطع كلامها زيدان~ لمهم هاد الموضوع خاص يتسد ، عطيني لوراق نتكلف

جاك قال بنفي ~. كنفضل نكون وسيط كيف طلب موسيو جيمس علاقتي بالعائلة مزيانة كيعرفوني وكيتيقو بيا ،انا ليوم نحاول نتواصل معاهم ونرد عليكم

وقف زيدان ~ نتسنى اتصالك

حرك راسو لمريام باش تبعو وخرج خلاها وراه وقفات كتشكر في جيمس وتعاود حاسة نسبيا براحة وببصيص امل انها ممكن تخرج وتهنى من هاد المشكل لي ولا منغص عليها حياتها من جذر

فاقت على ترويعة شاداها ناضت كتجري من فوق ناموسية للحمام ،ستفرغت حتى مقدات صوتها وصل لمراد فغرق نعاس وخلاه يفيق مخلوع ناض من فوق ناموسية ومشى لعندها حفيان لقاها خاشية راسها في لافابو

وجهها معصور وعرقان شعرها هابط على وجهها وشي زغبات لاصقين وعينيها دامعين ، جا وراها شدها من خصرها كيدوز عليه بحنان بلاما يدوي ،غسلت وجهها فاشلة، ايديها مرخيين ورجليها مهازينهاش خدات فوطة كتمسح فيها وستاندت على مراد شاف تا عيا وهزها بين يديه تا وصلها لسرير قادها وغطاها وجلس جنبها ~ حالتك معاجبانيش انادية ، فطري وغنديك طبيب ميمكنش تبقاي هاكداك

نادية قالت باعتراض معنقة لمانطة ~ مكاين لاش راه قلت ليك غير تعصبت ليا لمعدة داكشي علاش ،دابا نولي شوية

غوبش فيها ودوا منرفز ~. نبقى نشوفك قدامي صفرة لاوية تا تولي شوية ، غنمشيو هي غنمشيو

بصوت مبوحط وفشوش خاوي جلست تدمع ليه ~. عيطت ليك تجي عندي تجيبني هنا نرتاح ماشي تا نتا تضغط عليا ، دير لي كتقوليك مرة وحدة راه قلت ليك انا بخير معندك مناش تخاف بغيت غا راحة البال

ملقى من غير انو يخليها على خاطرهاا ، باسها في جبهتها وناض لكوزينة يوجد لفطور ، قاد كلشي في بلاطو عصر ليمون صايب قهوة وحليب ،شكل بلاطو وزوقو وحط گاع لي فثلاجة ومعاهم وردة ،هزو بين يديه وتم داخل عليها لبيت برجولية يالله داتها عينيها حتى حسات بيه حظاها حلات عينيها على وجهو ونيفها على ريحتو لحليب لي جاتها زفرة ناضت كتجري تاني من جديد للحمام تحت نظراتو المستغربة ...شللات فمها وخرجات لعندو

مراد ~ واش هادشي كلو ديرو لمعدة !!

نادية جلست حابسة النفس مبغاش تزيد تشم روايح لي روعو خاطرها~. ودير مكثر ،كدوزها عليا ..حتى تفكر وجيب ليا شي سيرو واخا

هز ليها راسو باستسلام مكرهش يديها لطبيب گاع ويتهنى ولكن راسها قاصح والا قالت الحاجة مغترجعش فيها

نقبات من داكشي اما هو شرب قهوة وخرج يجيب ليها دوا وشنو خاص لدار ،رجعات لبلاصتها حاسة بارهاق باغا غا تحط راسها وتنعس متفيق تا ترتاح ،مدت ايديها لكوافوز لي جنب ناموسية خدات تليفونها كان محطوط عليه هزاتو ودوزت نمرة نزهة تسول على ماماها كيف صبحات

نزهة ~ الو بنتي

تقادات في الجلسة ~ خالتي لاباس ،كيف صبحات ماما شوية ياك ؟؟ واش مزال عيانة

نزهة ~ معندك مناش تخافي راه حسن من البارح غا نعسي على جنب الراحة

نادية ~ بغيت نجي عندها بالي مهنانيش عليها

نزهة قالت بامتناع ~ معندك فين تجي دابا ،راك كتعرفي عايشة كيف دايرة ايلا شعلات اش جا مطفاها ،خليها حتى تبرد فمها راه كيخرج غا سم مكاين لاش تسمعي شي كلمة تضرك ، والا كنتي مشوشة عليها غا رتاحي انا معاها مونساها ومونساني بينما نيت جات بنتي متخافي گاع

نادية بارتياح ~. واخا اخالتي كلامك هو لكبير تهلاي في راسك وفيها والا وقعات شي حاجة عيطي ليا ،اه قبل مننسى انا مجيتش لدار عندك جيت اوطيل خفت نبقى فدار كبيرة بوحدي

نزهة ~ واخا ابنتي لي بان ليك يالله منطولش عليك بسلامة

قطعت معاها وبدات كتلعب بشعرها وخاطرها مضيوم ،كتفكر الحمل وماماها وشنو وقع لبارح وكتزيد تازم مقدراتش تفرح كيف ناس لا بزواج لا بشنو فكرشها ، ولات كتقول بلي كتاب عليها تعيش منكدة فحياتها من نهار عقلت على راسها وهي معايشة نهار زين ولا رتاحت كيف عباد الله مرة بغات وصدق استغلالي وطماع كلاها لحم ورماها عظم ومرة بغات وتبغات ولكن الظروف والمشاكيل وقفو عقبة في طريقهم بزوج وفارقوهم ...نفسيتها كانت ف الحضيض واش من شنو وقع معاها ولا غير لوحم لاعب عليها معرفتش ، رجعت شعلت تليفونها لي كان مزال بين ايدها ودوزات نمرة مريام تسول فيها مجاتش تنساها وهي وسط هاد الظرووف لي كدوز منهاا

~~

فشوارع باريس غادي مرزن هاد المرة ،كيصوگ بشوية وهي كطل من شرجم مخرجة راسها منو واخا البرد ،كتشوف في ليكوبل مشادين وكيضحكو ولا معانقين وكيتباوسو صحيح من قال انها مكان حج لجميع العشاق

طلعات الزاج الشرجم ورجعات لبلاصتها دورت وجهها جهة زيدان لي كان كيشوف قدامو مركز مع طريق وكتقول بينها وبين نفسها كون موقعش لي وقع كيف غتكون حياتهم ،اكيد غتكون فرحانة وعندها شي بنت ولا ولد منو عايشين سعادة وكيف الناس مدوزة عطلة هي وياه في هاد المدينة وعلاش لا تاهيا تجي تعلق قفل الحب بحال گاع بنات جيلها لكن وقع لعكس

دازو يومين على وجودهم ف فرنساا اغلب الوقت كدوزو مع زيدان بسيف عليها ،واخا كيبقاو غا ساكتين مهم تكون قدام عينيه حتى يطرق المسمار لي ضاارو فراسو فخطرة ، كانت ربعة لعشية تغداو ودخلات لبيتها اما هو جالس قدام بيسي مقابل خدمتو علاما يوصل الوقت لي داير فيه مع جاك

هاد الاخير لي كان وسيط بينها وبين عائلة سرر ولي كيتسناوها من بعد ساعتين هادشي مكانش فخبارها مبغاش زيدان يشغل تفكيرهاويخليها مبرزطة ومخلوعة قرر حتى يكونو فطريقهم ويقوليها اش كاين .

سد لبيسي وحط نظاظرو فوق طبلة وهو كيتكسل وقف واول حاحة دارها وجد حوايجو لي غيلبس حطهم فوق ناموسية ودخل لدوش

غسل وخرج لبس حوايجو سروال بلو مارين كان من عشاق هاد اللون وقميجة في لبيض خشاها فسروال وهو كيسد في صدافي تحرك عندها لبيت كانت مطرقة عليها وصوت لحس مقطوع ضرب زوج ضربات خفاف

ووالو لا مجيب ، كانت ناعسة عرقانة وكيراودها حلم خايب جاب الغمة على قلبها

اخيب احساس انك تكوني باغا تشدي كتاب الله ويهرب من يديك ...ما مرة ما زوج تخلل حلمها صوت دقان مجهد في الباب فيقها من كابوسها المرعب حلات عينيها قلبها كيضرب ومخلوعة

ناضت كتستغفر وكتحمد الله وتشكرو بلي كانت غيركتحلم

مشات حلات لباب لقات زيدان في وجهها من ملامح وجهو باين مشطون قالت بتساؤل ~ شنو واقع ياك لاباس مالك ؟؟

زيدان شاف وجهها وعينيها وشعرها عرفها كانت ناعسة رجع بلور وتكلم وعطاها بظهر ~. وجدي راسك خارجيين داابا عندك قل من ساعة باش توجدي !!

تبعاتو كتنتر وما عاجبها حال ~. كيفاش نص ساعة واش كتامرني ولا شنو ، ياكما سكرتيرة عندك ولا شي حاجة فحال هاكدا ملي جيتي ونتا سيري اجي غنمشيو غنجيو !

زيدان طلعها ونزلها وهو كيحسبن ~ ساليتي يالاه ديري اش قلت ليك وباراكا من الهضؤة لخاوية لي معندنا بلش تنفع

تقابل مع المرايا كيكمل لبسو اما هي واخا تعبف تا تعيا عارفة راسها في لخر غتلصق فيه وتخرج حيت ولات خايفة تبقى بوحدها

غادين في طريق كان ساكت اما هيا شادا تليفون كتشوف في تصاور ارون وفيديواتو لي صيفطات ليها نزهة والابتسامة مرسومة على وجهها حتى نطق ~ عائلة سرر كيتسناونا دابا متخافيش !!

دورت وجهها لعندو لون تخطف من وجهها ~. علاش مقلتيهاش ليا ؟؟

زيدات كيشوف قدامو ~ هاهيا فخبارك دابا مكاين لاش نمشكلك من لبارح وزايدون تصرفي عادي انا معاك كلشي غيدوز هو هاداك

بصح خافت ولكن هضرتو وانا معاك لي قال حسستها بالامان واخا غير شوية ، تنهدات وبدات كتطرطق في صباعها بتوتر كل مرة تشوف تليفون وتسول واش قربو يوصلو حتى بان ليها بدا يبلاصي في طوموبيل دقات قلبها تسارعو وايديها حسات بيهم كيترعدو

كعائلة راجلها كانت كتشوفهم في تصاور فقط عمرها جلسات معاهم ولا جاو عندها ولا دوا ليها عليهم كانت بنسبة ليه هي كلشي فيها عائلتو واسرتو اولا بحكم البعد حيت مكانوش مستقريين في نفس مدينة جيمس تانية بحكم زواجو من مسلمة وهادي حاجة متقبلوهاش اطلاقا

نزل زيدان ووقف كيتسناها كانت مزال جالسة في بلاصتها كتفكر كيف دير تشوف فوجه ناس صفاوها لولدهم وبغاو يدوزو ليها شنو يضمنها ميديرو ليهم والو حتى حل عليها لباب ، جمعات قوتها وصاطت باعلى صوت خرجت ووقفت جنبو كتشوف قدامها فين هما بان ليها قهوة

فيها لفوق ولتحت خشات ايدها في جياب لمونطو لي كانت لابسة وقالت ~ واش جاك غيكون

زيدان ~ كاين لداخل غيكون معاهم

مريام بدات تعض في شفايفها ~ وشنو ضمنا ميكونوش دايرين لينا شي فخ ... قاطع كلامها وحط ايدو على ذراعها بطبطبة وقال ~. معندهم ميديرو سبق قلت ليك غرضهم ماشي يقتلوك غير ثقي فيا ويالاه

تحركات معاه كان داير نظارات شمسية على وجهو غادي بهبة وثقة قبل ميوصلو للباب ويطلعو فين كاين الحجز خدا يدها ودارها وسط دراعو وحرك ليها راسها بكلشي غيدوز مزيان حاس بيها مزيرة من ظفارها لي تغرسو في حوايجو بلاما تحس

جالسة فدارها و تخمم فهاد الموصيبة لي طاحت على راسها غير فكرة بنتها تجيب ولد من الحرام كتحس براسها مدبوحة بموس حافي عياات تنعل في الشيطان و لكن الله يلعنو و يخزيه ركب على دماغها و بدا يوسوس حتى ولات تهضر و تجاوب غير راسها لااا لا بنتي مديرهاش نادية مربياها مديرش شي حاجة فحال هادي لوجه صفاار و نقطة دم مكتجريش فيه ...واخا عيات نزهة تقنعها وطمنها بلي مكاينة حتى حاجة من داكشي لي كتفكر فيه ولايني البال مزال مهانيش وخاصها تتاكد ...صوت الباب كيتحل كانت نادية ل جايا لدارهم بعدما عيطت ليها خالتها وقالت ليها بلي مها بردات شوية وبلي بقات راسها تمشي لعندها ومنها نيت جايا معولة توضع حد لهاد المشاكل لي غير مغادة و كتعقد دخلات بان ليها الكالم و قالت طلع تبدل عليها و تهبط تهضر معاها بالعقل ومتبقاش تكذب عليها ولكن عيشة غير سمعات صوت سوارت و ناضت لعندها كتعيط ب اسمها وقفات قدامها دايرة عكفة بزيف حياتي و لابسة كندورة طويلة بلگرونة ملامح صرامة واضحة فتجاعيد وجهها نادية شافتها و رجعات جوج درجات لي طلعتهم ...

نادية بلعت ريقها~نعام ا ماما

عيشة سبقتها لصالون ~ اجي بغيت نهضر معاك..

نادية تبعتها و احساس الخوف سابقها بخطوة فين هي البنت لقوية لي متهزهاااش شعرة جا الحب خلاها تصرف بلا عقل استمرارها فزواج بلا خبار مها خلاها تغرق في المشاكل ما جات فين تستعقل حتى لقات لي عطا الله عطاااه ..

عيشة تنهدات و جلسات ~ عرفتك كبرتي و خدمتي و عولتي على راسك فشحال من حاجة ولكن ديري فبالك راك مزال تحت طوعي واخا ديري ربعين عام نبقا انا مك منحتاجش نقرييك هادشي متخلييش تقتي تهز فيك ..

كانت غير كتشوف مبقات عارفة باش تجاوب دوخا خلاتها تجلس قدامها و تزيد تسمع لكلام مها لي كان مر كي دفلة...بلا ما نفكرك فبنت جيران ديال دار القديمة فاش تزوجت بلا خبار مها و مشات دارت ري راسها اش طرا ليها ،تقطعات سميتها من الحالة المدنية وعائلتها عتابروها ماتت دازت سنين و البنت ولدات و ممشاوش و ما شافوش جيهتها ،ماتت مها ساخطة عليها وباها غاضب عليها متخلينيش انادية نتصرف تصرف كتر منها انا راه نسا بلي ولدتك و نقول راني دفنتك و ربي مرزقنيش بعد خوتك ونديرك فحال عمرك كنتي ..

نادية حسات بودنيهاا سخان ~ امالنا اماما على هاد الهضرة كاملة مالي اش درت !!

عائشة بتحذير ~مدرتي والو انا غير كنفكرك نهار ديري اش غيطرا

يتبع...