الحب أقوى من أي إتفاق الجزء 16

وصلو قدام لكلينيك مراد هبط كيدير فلخطوة جوج ومريام وراه .. عقلو ممتقبلش نادية تنزل ولدو ولا بنتو فحال معندو حق فيهم بجوج.....كيفاش طاوعها قلبها وخاطرها ديرها تم داخل يجري و يقلب بعينيه عالله تبان ليه ...شفايفو كيترعدو وعينيه بحال لبركان شاعلين .. مشا للاستقبال يسول و الهضرة تلفات لييه وقف قدامهم و وجهو غيطرطق من لعصااب ولا حممر ومزير على يديه بلاما يحس

مراد لي جا على فمو قالو بلا ما يفكر ~..... ختي مراتي جات هنا لعندكم فين نلقاها ؟؟

- كتهضر معاه لبنت لي تما بلباقة و كتحاول تشرح ليه ~.... اشنو سميتها ؟؟ واش جات تولد ولا شنو ؟؟

نقزات مريام من وراه و جاوباتها ~...سميتها نا دية و متبعة عند طبيبة *** فين المكتب ديالها الله يخليك ؟؟

~غتمشي الالة حتى لآخر ديال كولوار اول مكتب على ليسر

مراد غير سمع نعت و طار من حداها يجري

موقف حتى حل على طبيبة الباب وخبطو على جهدو كيقلب بعينيه مبانتش ليه فلحظة ركابيه فشل وعرووقو تزيرو وقفات طبيبة مخلووعة ومعصبة فنفس الوقت .......

~ شكون نتا اسيدي اش هاد دخلة ؟؟..

مريام بغات تهدن ملقات كيف دير ليه !

مراد مبقاش كيشوف قدامو رد سؤال بخوه وهو كيضرب على لبيرو ~ .. فييييين مرتييي ؟؟ واااااش سيبة لي بغات تقتل تجي لعندكم ....زاد فحدة صوتو وغوت... فين مرتيييي لي جات هاد صباح دير عندك لكورطاج !؟؟؟

~ واش مدموزيل نادية

حركات ليها مريام راسها باه وهي تكمل ...نفهم بلي نتا اب البيبي ..خنزرت فيه وقالت باحتقار .. هي فآخر لحظة تراجعات وطلع عندها لقلب عليك و ملي اسيدي حارقك الحال سير عتارف بلولد راه رجلة ماشي بالغوات ....

مراد مفهمش اش كتقصد بكلامها بغى يمشي ليها جراتو مريام ولات تلعن فراسها لاش جايباه غيدير شي كارثة ...~هاديك راه مرتي ابنادمة و كنقسم بلي خلقني و كون نزلتيه حتى نتبعك ليه ونسد هاد زبل

مريام فرحات ملي سمعت كلام طبيبة جبدات تلفون تااصل بنادية تشوف فين كاينة اما طبيبة غير سمعت بلي راجلها حسات بدنيا ضارت بيها ، كانت غتجبد على راسها مشاكيل ، خنزر فيها وخرج ومريام وراه بعد معتاذرت من الدكتورة ...كان في الكولوار كيمشي ويجي وهي كدوز تليفون بقى كيصوني شحال عاد جوبات

نادية بصوت باكي ~ مقدرتش امريام نديرها مقدرتش ، بالفم ساهلة جاتني ولكن بالفعل قاصحة وبزاف

مريام حسات بتبوريشة فذاتها من كلامها ~ فينك نتي دابا نجي لعندك

نادية كانت قدام لبحر~ انا غنصيفط ليك موقع

قطعت معاها ووصلها مساج رجعت تليفونها لصاك هزات راسها لقاتو واقف قدامها كيف قباض رواع ومغدد ~ فينهااا ؟؟

مريام بتساؤل ~ علاش ناوي تمشي عندها فهاد الحالة ؟؟ شوف مراد متندمنيش حيت قلت ليك اش كاين

مراد زير على يديها ~ مريااام خليني معاك مزيان وقولي ليا فين هي

هو زكيري حتى هي كثر منو ميمكنش تلاقيهم وهو فهاد الحالة ، خافت تكحال كثر ماهيا كحلة بيناتهم ويكبر المشكل داكشي علاش فضلات تمشي هي لولة تا تولي نادية شوية وتمهد ليها بلي مراد عرف وخافت وضطرت تخبرو ....كان تليفونها كيصوني مداتهاش فيه حدها نترت ايدها منو وقالت ~ انا ل خليني معاك مزياانة امراد... بدل ساعة بختها تا تبرد ودوي معاها ديك ساع متكملش على ما بيها

قالت هضرتها وعطاتو بظهر ومشات معاجبها حال وهو كثر منها ،ركبت سيارتها ومشات لعندها فين كانت مبعدتش بزااف كانت قريبة شوية قل من ربع ساعة وكانت تماا فلاكوط جنب لبحر

مريام بلاصت طوميبلتها و هبطات مشات عندها بانت ليه جالسة فطوموبيلتها و مرجعة راسها على لكوسان و مغمضة عينيها دقات جوج دقات فزاج لي من جيهتها حلات نادية عينيها وخرجات عندها عنقاتها وزيرات عليها .. كانت محتاجة لهاد تعنيقة

مريام معنقاها و كتهضر ~ااااه يا ختي احسن ما درتي ، فرحت لييييك ..بعدت عليها وقالت... هااادي هي نادية لي كنعرف متصوريييش قداش فرحانة و اخيرا غيجي لي يقول لي طاطا و يلعب مع كمال

نادية تنهدات وتكات على طوموبيل ~ مقدرتش اختي نفرط فيه واخا مزال معرفت كيف ندير نوقف فوجه ماما ولكن مقدرتش هادا ولدي خفت نندم خفت يحاسبني لهيه خفت ربي يعاقبني ومنبقاش نولد..

مريام شدات ليها وجهها بين يديها و كتحاول تزيد تقويها ~ ..... احسن حاجة درتي وخالتي قدما عكسات غترطاب معندهاش منك عشرة متخافيش كلشي غيتقاد مع الوقت ..والايام غتنسيك كلشي واكبر دليل هانو قدامك كي كنت وكيف وليت... داكشي لي دزت منو مشفتي فيه حتى ربع راك كلشي حضرتي ليه معاود ليك حد و هااانا قدامك وقفت من جديد قوى من لول ، نتي الحمد لله مدرتيش شي حاجة خايبة مزوجة وحملتي في الحلال

نادية مسحت على وجهها لي كان صبر بالعيا ~معرفت فين نرد راس واش نلقاها من ماما ولا من مراد

مريام حسات بقلبها ضرب ملي ذكرات سميتو ...تقوليها ولا تسكت وتخليه تا يواجها ، كيف قررات تعاود ليها شنو وقع وهما يسمعو صوت خطوات مقربين ليهم وهو بشحمو ولحمو وقف قدامهم ...بدا كيصفق وكيشوفيها بحقد ~ معندي ميتسالك كتصدميني فيك نهار على خوه

هزات عينيها فيه معلية حاجب ومنزلة خوه كتشوفيه بدون ردة فعل من كلامو فهمات بلي عارف ، دورات راسها لعند مريام لقاتها كتشوف فيها باعتذار

~عارفاك غتقلقي مني ولكن مكانش عندي حل اخور بغيت نوقفك على شنو كنتي غديري داكشي علاش مشيت لعندو بلا خبارك كنتمنى تسمحي ليا

جات مريام وسطهم كتحاول تهدن الوضع ...اما هو دار يدو وراه كيكالمي راسو باش ميجندخهاش ..لسانها متبري منها وجوابها على نابها ~ ونتي باشمن حق غادا باغا تنزلي داك الولد، وباشمن خق انا مفخباري والو

نادية كتبعد في مريام من قدامها وغادا مقربة منو ~ نهار تكون راجل ودير فعايلهم تعالا حاسبني

مع كملات كلمتها محس براسو حتى هز يدو تال فوق ونزل عليها الحنك حتى رعفت ، مرضاش تنقص منو قدام مريام ديجا مغدد عليها ومعصباه بفعايلها وزاد كملات بكلامها ..حلت مريام فمها ودفعاتو من صدرو كتغوت ~ واش مريييض فرااسك ولا شنوووو ، اش درتي

دارت تشوف نادية لقاتها شادة حنكها وكارزة على سنانها، عكاتها بلش تمسح وبدات كتسول فيها ولش لاباس وهي مكتجاوبش عينيها عليه اما عينيه هو بداو كيتكساو بندم ، حس براسو تسرع ومكانش خاصو يديرها ولكن ستفزاتو

وعات على راسها وهي تقول بتهديد ~ غندمك امراد على هادشي وعقل ، بغيتي نادية تاع شحال هادي انا غنوريها ليك تاع بصح

بعدت مريام من طريقها بلاما تدويها وطلعت في طوموبيل وكسيرات من تما

جالس ف لبيرو كيحاول يوصل لمريام.. من صباح وهو كيتاصل بيها و مكتجاوبش كيقطع و يعاود يدوز رقمها كيبقا يصوني يصوني حتى كتشدو العلبة صوتية حط تلفون و بقا كيضرب بصباعو فوق رجليه و دغيا قندش ولا من والو يتعصب و الحاجة لي داخلة فيها مريام كيركبوه جنون ..

فراس جالس قدامو هاز وراقيه كيشوف واش هما هادوك ~.... باقا مكتجاوبش ؟؟؟

زيدان كيحك لحيتو و جاوبو بلا ما يكتر معاه الهضرة .

فراس مدهم ليه لوراق يشوفهم ~..راه كلشي واجد خاصها غير ميريام تحضر وتسني

زيدان سمعو قال سميتها حرفية و هز فيه عينيه لي كاانو قرطاس عليه ~ مدموزيل مريااااام كتسمع

فراس تقاد في الجلسة ~ خرجات بعفوية مقصدتش

زيدان هز سوارتو وتليفونو وناض ~ ملي نسينيو في لوراق غنعيط ليه جي قادهم ، ملي تخرج سد وراك لباب !!

خرج وخلاه جالس تما متبع ليه لعين كيفاش على كلمة تقلب ...اما زيدان كان قاضب حواجبو وغادي مرفوع في طريق بالو عندها علاش مكتجاوبش ...مريام فدوك الاثناء كان واقفة مواجهة مع مراد وكتلوم فيه وتعاتب علا تصرف لي دار ~ فاش جيت دقيت بابك كنت مترجية فيك تقاد امورك معاها ، توقف حداها وتكون فجنبها ماشي تضربها

مراد كيعض في شفايفو ويصوط ~ متحكمتش فراسو ضربتها ولي عطى الله عطاه وتاهيا راه غا تاع عصى مسمعتيهااش

مريام ~ تقول لي قالت متهزش يدك عليها ولكن كلشي بسبابي مكانش خاصني نجي لعندك

بغات تمشي وعتارض طريقها ~ فين غتكون مشات

مريام بحدة ~ باش غنعرف انا،مراد خليني نمشي بحالي وسير شوف شنو دير معاعا مباقاش ندخل

خلاتو ومشات كيفكر في حريرتو وفاهر كلام قالت ليه شنو تكون غترفع عليه دعوة طلاق داكشي لي جا فبالي وحطو احتمال كبير اما هي فكانت في ايغجونص هاكداك بدمها وكتدوي مع طبيبة قدامها ~ عفاك بغيتك تكتبي ليا حتى شهادة طبية ، بغيت نديكلاري براجلي هو لي دار فيا هاد الحالة وانا حاملة

نادية طريق على طولها وهي تحلف حتى تندمو باش عمرو يفكر يهز يديه على شي مرا زهرها ليوم تسارا على الاطباء اشكال و انواع ...هبطات حاطة كلينيكس على نيفها لي كان مزال كيقطر بدم بانت ليها عيادة طب عام و طلعات لقات دنيا خاوية دخلات بعدما سجلات المعلومات عند المساعدة ....طبيبة كانت في الخمسينات من عمرها شافتها فديك الحالة و بدات تسولها خايفة عليها حيت نادية كان وجهها صفر و مزال مواكلاش و زادت بتصرفيقة و كملات الباهية ...

~ طبيبة كتسول باش تقدر تعرف سبب دم لي كان باين ~..... واش طحتي و لا رعفتي ؟؟

نادية لاحت لكلينيكس و خدات واحد آخر من صاكها كتجاوب و مرضيااش ~....... لا ضربني راجلي و انا حاملة و بغيت ندير شهادة طبية باش نديكلاري بيه

دكتورة بتاسمات و شدات من عندها لمشوار و بدات كتمسح ليها و كتهضر ~~ غير تهدني بعدا و قولي لي واش مولف يضربك ؟؟؟ ...

نادية ميقات ~ أول مرة و آخر مرة ليه

طبيبة كتبتاسم و كتهضر ~ملي أول مرة المسامح كريم حاولو تهضرو .. هادي راه غير تصرفيقة ماشي شي ضرب راه كيقولو ضرب الحبيب زي أكل زبيب

نادية جوبتها معصبة ~..... اشمن زبيب الله يهديك لي سمعك ما يقولش راك طبيبة لي هز يدو مرة يهزها مرة أخرى ،اللهم نحشها ليه من جذر قبل ميطولها

طبيبة كتحاول تبردها و تخليها تراجع جلسات مقابلة معاها و كتحتت فيها فحال شي أم ~..... شوفي غنهضر معاك فحال بنتي الا كتبغيه دوزيها ليه هاد المرة باينة درتي شي حاجة حتى مد يدو عليك

نادية جاوباتها و هي مزال مصممة على قرارها ~... ماشي حيت درت علاش يهز يديه

طبيبة ~المهم فكري قبل ما تندمي راك فمقام بنتي و بغيت ليك غير الخير غنصاوب ليك شهادة طبية و فكري قبل ما ديري اي تصرف و فكري ابنتي فولدكم ترضاي تدخلي باه لحبس

جالسة و كتسمع لعقل كيقول ليها شدي شهادة طبية و نيشان لبوسط لبوليس باش عمرو يعاود مزال.. فوسط تفكيرها صونا تلفونها هزات لقات مريام و رجعاتو لصاك محاملاش تجاوب و تهضر معاها

رجعاتو لصاك مخلياه يصوني خدات شهادة طبية و خرجات ركبات فطموبيلتها و مشات و عقلها خدام... كلام طبيبة معاها خلاها تهدن شوية و تعرف بلي راه حتى هي غلطات حتى وصلات لعند لبوليس و قلبات الدورة مشات لدارهم ترتاح من هاد النهار لي كان ثقيييل و مشحون عتابراتو أصعب نهار يدوز فحياتها .. دخلات و طلعات نيشان لبيتها ترتاح و تخلي دماغها يفكر مزيان

~~~

مريام شافتها مجوباتش من بعد اتصلات كتيييرة منها هزات راسها و مشات عندها تشوفها و تطمأن عليها عرفاتها مقلقة منها بغات طيب خاطرها خصوصا فهاد الفترة من الحمل بغات تحاول تراضيها و دير ليها خاطرها وصلات لعندهم لدار لقات غير خالتها سلمات عليها وعلى نادية سولاتها ..

عائشةهازة تسبيحها و كترحب بمريام ~ .... و غير دخلي بعدا شربي شي حاجة و طلعي عندها جات شي نص ساعة دابا كنت كنصلي بانت لي مهياش خليتها ترتاح

مريام وهي طالعة في الدروج ~ مرة أخرى اخالتي حبيبتي غنطلع نشوفها و نمشي عندي شي خدمة مرة أخرى إن شاء الله و نشرب معاك شي كويس دلقهوة

بتاسمات و مشات بخطى سريعة لبيت نادية بقات كدق و نادية كتسمع و مبغاش تحل خاطرها هاز من جيهتها وبزاف .. بقات مريام دقايق طوال بلا فايدة و هبطات تبدل ساعة بختها عرفتها تعمدت متحلش داكشي علاش خلاتها على راحتها ورجعات بحالها...نهار داز عندها حالتو ،عيات وتفقصات ، وجهها باين عليه التعب وفمها نشف والنعمة مذاقتهاش حاسة براسها غطيح بجوع ، كانت مركزة بزز في صوگان موصلت حتى غفر ليها الله ، وهي كتقرب لقدام دارها بانت ليها طوموبيل مغريباش عليها دخلها الشك وتسائلات شنو غيكون جاي يدير هنا واش هو ولا شي حد تاني

اش هاد الصباح لي مزال مبغى يسالي ...هاكداا كانت ردة فعلها ملي تاكدت من ماتريكيل سيارتو وعرفاتو هو

~~~

عند زيدان لي مفكرش زوج المرات قبل ميديماري ويمشي لعندها لدار ، غادي صايگ برزانة واخا باينة من وجهو معصب وشي حاجة شاغلاه مرة مرة يدوز نمرتها وكيف العادة كيصوني بلاما تجاوب ،

تنرفز ديال بصح ودخلو شك بلي مبغاش تدوي معاه ،كسيرة تال الاخر ومشى طاير باغي غير امتى يوصل لدارهم ...سمع تليفونو كيصوني هزو بلهفة عند بالو هي ساعة خاب ضنو وخيب سيفتو ملي لقى اسم سمر ....تنهد وهو كيشوف نمرتها واتصالاتها لي لا تعد ولا تحصى ،قطع رجلو من عندها وخلاها كي الراس المقطوع

عودها عليه وعلقها فشباكو وخلاها تحلم بيه وتسناه في ليالي تحت ضو شموعها مونسة هي ودموعها بالحق هذا هو زيدان مكيعرفش لحتى حاجة من غير يعذب لواحد معاه

ويتفرج فيه من بعيد ، قطع عليها وحط ايدو على ذقنوو مكمل طريقو على نفس الوضعية حتى وصل براكا قدام دار بانت ليه طوموبيلتها مكايناش تما وهو يعصر قدام الباب تكى الكوسان وحل صدايف الفوقانيين دالقميجة وجلس يتسنى فيها

وقت قليل وبانت ليه طوموبيلتها جايا من زاجة تاع الجنب تقاد في الجلسة وبدا يقاد في حوايجو ..حل طوموبيل ونزل تكى عليها كيتسنى فيها حتى تبلاصي على خاطرها ، كانت كتقول بينها وبين راسها ندخل ونخليه واقف تما منخل شوية قالت لا مجاتش تنهدت بقلة حلية معارفة مدير مع هاد تريكة لي عرفات في حياتها ، جرت رجليها بثقالة حتى وصلات لعندو وعلى وجهة ملامح مستفسرة وقالت بصوت عيان ~ ياك لاباس ؟؟

زيدان بصوت خشن وباح ~ فين كنتي ؟؟

ضحكت باستهزاء وردت عليه بسخرية ~ كيهمك تعرف فين كنت ولا ؟؟

عض على فمو وقال وهو كيشير لطوموبيلتو ~ طلعي بغيت ندوي معاك ..راسها كان يبس من الحجر قالت بزگير وهي كتستعد تعطيه بظهر ~ عيانة اموسيو زيدان ونهاري ماشي هو هاداك بغيت نطلع نرتاح

مجات فين تكملها حتى حسات بيدو على ذراعها جرهاا حتى قربت منو تفافات بقات غا كضور في عينيه وتحنحن ~ احم احم طلق مني

زيدان بصوت مكالمي قدما قدر ~ قلت ليك طلعي ندويو وسيري الله يعرضك السلامة

نثر ايديها وهي كتشوف في البالكون لتكون نزهة كطل ساطت بصوت مسموع وقالت ~ قول شنو عندك على الواقف وخليني نتيسر ..

شدها من معصمها وزير عليه وجرها معاه ركبها صحة وطرق عليها عاد ركب هو شنو كيدير ولا علاش كيديرو معارفش

غادا حداه كطرطر عليه وتغوت مد يدو وشعل دويسك ديالو نتي سبابي وسباب بلايا وغادي كيتصنط ليه وجاه على گانتو وسباب بلاه راه حداه مكرهش يعفط ويزيد معاها لشي قنت غير هما بزوج بيهم مكرهش يمسح ليها ذكرياتها الخايبة معاه ،ولايني ميمكنش ..دور وجهو ليها بان ليه وجهها حمر بقمة العصاب خلاها تزيد تعصب موقف حتى بعدو شوية عاد سكت طوموبيل وحيد سمطة وضور وجهو كيشوف فيها

مريام بالغوات ~ شنو بغيتي تقوليا انا كتسمع

زيدان كان مبرد ~ علاش مكنتيش كتجاوبي في تليفون

مريام قالت باش تفقصو ~ جا فبالي منجاوبش كاين شي مشكيل

خنزر فيها وقال شفت راسك قصاح و كترت فييك الهضرة ديك ساع جاوبي قولي امسيو زمر نسالي و نتاصل بيك

حطت ايدها على حنكها مفاهمة فيه والو ربعت ايدها وقالت بانتفاضة ~ موسيو زيدان كاين منقضيو

ميل راسو وبقى غير كيشوف فيها ، علاش جابها هنا هو براسو معارفش ملقاش من غير انو يقوليها

زيدان ~ فلوسك واجدة مزال باغا تبيعي ولا بدلتي رايك

مريام بفرحة ~ معندي علاش غنبدل رأي..شافت ساعتها وقالت ..ورا لغداا نتلاقاو في الشركة ونكملو اجراءات البيع

زيدان سمع صوت تليفونو كيصوني معاروش اهتمام ~ واخا نمشيو نتغداو

مريام ميقت فيه ملي سمعت شنو قال ،اشمن غدا ولا عشا وعلاش كيدوي شافت فيه وردت ببرود ~ سير قضي الا عندك ما يتقضا متنساش بلي جامعانا غير الخدمة انا نتغدا و نجي لشركة نقادو أمور لخدمة

زيدان هز فيها حاجبو وقال بقنفاحة ~ .. و حتى انا الالة معارضش عليك عتابريه غداء عمل ... ممساليش نضيع الوقت و نتسناك

ديمارا طومبيل متسناهاش تجاوبو و حتى هي ملقات متقول ليه شافتو زمطها مشات معاه فوق خاطرها صايك و عينيه مع طريق ..وتليفون مزال كيصوني وشكون من غيرها سمر لي كون تعرف عنوان دارهم تمشي ليه ، شافت مريام فتليفون وبانت ليها السمية وهي وقالت ~ جاوب لبنت عقلها غيخرج !!

شافيها بنص عين وقال بحدة~ شكات عليك ، ممساليش ليها

مريام سباتو في خاطرها وهزات لهم لهاد البنت ومناش غدوز معاه حيت بان ليها ما زال هو هو متبدل فيه والو من غير سيفتو لي تزادت جاذبية ...

لحظات و وقف حدا ريسطو كانو كيجيو ليه أيام كانو مع بعضياتهم تفكرات لبلاصة و مع راسها معرفاتش لاش جابها لهنا واش صدفة ولا متعمدها ولا لشنو باغي يوصل ضور وجهو لقاها ساااكتة و كتشوف مباين عليها حتى ردة فعل لا فرحانة ولا معصبة تصنعت البرود والداخل ربي لي عالم بيه

زيدان كان كيبلاصي ~الا ممرتاحاش نبدلو لبلاصة

مريام شافت فيه بكل هدوء و جاوباتو ~.. معنديش مشكيل كااع لبلايص عندي فحال فحال

هبطات بكل ما فيها من أنوثة و سابقاه داخلة و هو وراها كيتمشى بنخوة ورجولية كان مكان هادئ و رومانسي و عائلي خلاها ختارت طابلة جرات لكرسي و جلسات و حطات حداها صاكها و حتى هو جر كرسيه و تقابل معاها بقا كيشوف فيها نظراتو فيهم حسرة انو خسرها و مزال معرفش كيفاش يصلح لي تهرس للحظة تفكر ايامو معاها و احساس الندم تغلغل لقلبو اما هي قلبها كيضرب وضرها وذاكرتها رجعت بيهاا لسنوات قبل

~~~

داخلة معاه وفجنبو وقلبها غيخرج من بلاصتو لنفس ريسطو يتعشاو كانت معلقة فذراعو بحال البنت للصغيرة وكتلعب بشعرها حاسة براسها فوق سحاب وتا حد مقدها لدرجة كضحك بوحدها وهادي هي حالتها ملي كتكون فجنبو

كانت كتحس بيه هو فرحتها لي كانت ناقصة في حياتها وهو شخص لي لقات فيه عائلتها كاملة وعوضها على كلشي

جلسات جنبو كاين لايح دراعو على كتافها معنقها وهاز فيديه لمينيو كيشوفو بزوج وكيقرا عليها كل وجبة وشنو مجرب وشنو زوين ولي لا ، مكانتش مركزة مع كلامو وشنو كان كيقول على قد مكانت مركزة على ايديه واحساسها لي مكانش كيتوصف ، طلب ليها بارادتها على ذوقو وخدا حتى ليه طبق السمك مشكل ومنوع مع شلايض

مريام معاقرة معاه كتنقي فيه ظفار لي ملصقة عنكشوها وملقات كيف دير صاطت بلا شعوور ~. بفف

رد ليها البال ومد يدو لطبق ديالها وبلاما يتكلم بدا ينقي ويحط ليها...واخا كان قليل لكلام معاها كان مهتم بادق تفاصيلها كان كيعاملها كطفلة وكالأنثى الناضجة هادشي شوية من بزاف لحوايج لي خلات مريام تبغيه من قلبها وتعلق فيه ...

~~~

خرجات من دوامة الماضي على صوتو هزت عينيها فيه لقاتو حاط يديه بزوج على لحيتو وكيشوف فيها بتفحص وبنظرة فشكل وجديدة عليها

تنهدات وهي كتشوف فيه وكتقول ياريت كون مطلعش منك هادشي كامل وهو كيقول في نفسو ياريت لو خديت گومة ومسحت كلشي لي درت ليك من بالك......قاطع صمتهم نادل لي جا يشوف طلباتهم قيدها بسرعة و مشا خلاهم يهضرو في الموضوع لي جاو على ودو زيدان خرج من جيب فيست شيك ومدو ليها مسدود ~هدو فلوسك خاص غير نسنيو الوراق هاكا غيكون المشكل سالا و عائلة جيمس مبقات عندهم حتى حجة

مريام شدات شيك و حلاتو شافت المبلغ رجعات سداتو و حطاتو حداها يلاه بغات تجاوبو كان نادل وقف و كينزل في مقبلات

مريام بنصف ابتسامة ~ ... اوا مبروك عليك اسي زيدان من ليوم عندك حق لجميع صلاحيات في الشركة

زيدان مجاوبهاش حدو قال بلا خاطر ~ بون ابيتي

تحط لغدا في جو اقل من العادي بدات كتاكل هي و ياه فصمت تااام غير صوت فرشيط و لموس لي مسموع عندهم ،كيف ديما اول مسالا هو ... رجع بلور متكي على الكرسي وكيشرب في كاس لما اما هي كانت كتاكل وعارفة كل دغمة فين غادا بيها متسوقاتش ليه او بالاحرى مبغاتش تهز عينيها وتشوفيه حيت حسات بيه مراقبها

سالاو غداهم ناضو من تما وهاد المرة الوجهة لشركة و مريام غير تغدات و حسات بلعيا نعار داز عندها ماعب بزاف ..طلعات لطوموبيل و رجعات راسها حاطاه على لكوسان زيدان دور لفولون و كسيرا لشركة صايك و مرة مرة يخطف فيها شوفة .. كيلقاها مغمضة عينيها و لعيا باين عليها ....تم غادي ناقص سرعتو مكايس عليها حتى وصلو ...سكت طوموبيل في الباركينغ ووقف طوموبيلتو وتكى حاضيها ، عارف وحاس بلي الا مشات حتى باعت ليه غتقلال حججو بانو يسوفها معارفش شنو يدير ولا اشمن خطوة يخطي معاها حيوطهاا متان ومبقاش سااهلة يتجاوزهم ...خلات عينيها فعينيه لقاتو حاضيهاا قاد كول لافيست ديالو وتقادت هي في الجلسة وقالت كتقاد في نبرة صوتها ~ حم محسيتش براسي حتى نعست

هز راسو من فوق لتحت وقال ~ مشينا

سبقت هي لولة وهو وراها ونيشان للمكتب ديالو زيدان حيد لفيست علقها فلكرسي ديالو و جلس مريام قدامو جلسات كتحس براسها ضارها

زيدان جبد الملف و حطو قدامو هز تلفون و سولها ... تشربي شي حاجة؟ ؟؟

مريام بغات غير تسالي هاد الهم و تمشي ~.... لا غير عطيني لوراق بغيت نمشي

زيدان طلب ليه قهوة قاصحة و مد ليها الملف حلاتو لقاتهم وراق البيع عليهم توقيعاتو بقاو خاص غير توقيعها بان ليها ستيلو ديالو الخاص به هزاتو و بدات في توقيع غير سالات سدات الملف و رجعاتو ليه وهي كتبتاسم لسخرية القدر

تفكرت اول مرة دخلات لهاد شركة من ورا مجات من فرنسا كيفاش كانت جايا بتحدي ومقابلاش بالهزيمة ،كيفاش وقفات في وجه زيدان وحلفات حتى تنتاقم منو .. شكون قال مريام شي نهار غتبيع نصيبها و لزيدان.... نهار لول جات واقفة معاه ضد وباغا تبين نجاحها و تحدا شخص لي كان واحد نهار أستاذها و بغاتو و لكن ماشي أي حاجة خططنا ليها كنوصولو ليها نتي كتقولي غندير و ندير و الأقدار و المكاتيب حتى هي كدير

مريام جمعات لوقفة بابتسامة مدات يديها سلمات عليه و هنئاتو مرة أخرى ~ مبروك عليك اموسيو زيدان ، نتا الأحق بهاد الشركة ...كان حاط مرفقو على ركابيه وكيشوف معندو ميقوول

نهات هضرتها بنخليك وخرجات غادا لمكتبها تجمع لي خاص دخلات كتشوف اش خاصها تهز هزات شي كتوبة ديالها و شي رسومات و تصاميم حطاتهم قدامها و هزات تلفون دوات مع سكرتيرة تجيب ليها كارطونة دقايق حتى سمعات دقان كانت سكرتيرة جايبة ليها كارطونة خاصين بشركات و استأذنات منها و خرجات بقات كتجمع حتى سمعات ثاني صوت لباب كان يسحابليها غير هي راجعة عندها ولكن صوت رجولي سولها

زيدان مغوبش و كيراقبها اش كدير ~..... اش كديري

مريام مهزاتش فيه عينيها ~ شوفة عينيك كنجمع لي خاصني باش نمشي تقريبا شركة ديالك و نصييب ولدي غنحل ليه حساب و فلوسو يتحطو تما والا كانت شي حاجة ضرورية ندوي مع المحامي

زيدان سولها معصب ~ وعلاش هاد شي كامل شكون دوا معاك وقاليك سيري

مريام وقفات مقابلة معاه ~ قالها ليا راسي ، موسيو زيدان ...تنهدت وكملت كلامها ..اول مرة حطيت رجلي فهاد شركة كمتدربة كانت عندي رغبة والشغف ولكن هادشي دابا مبقاش مات فياا كنجي هنا فوق من خاطري معندي علاش نشد بوسط مكنستحقوش ، دماغ ديال الخدمة مبقاش عندي كاين محسن مني لهاد البوسط

داكشي علاش الانسب انني نديميسيوني

تسناتو يجاوب ولكن بقى ساكت ملامح وجهو لي كانو كيجاوبو عليه دغيا تشكرف ووجهو تعصر وبان عليه لعصاب جمع قبضة يديه وقال وهو مزير على سنانو ~ ديري لي بان ليك

خرج وخلاها على خاطرها غادي جاي في لبيرو ديالو اما هي كملت جميع ومنساتش تصاور ولدها وماماها كملات وخرجات مع الباب بلاما تلفت دازت على مكتب ديالو دورات وجهها جهة شرجم لقاتو حاضيها وهي تهز ليه راسها بوداع غير دورت وجهها وهي تسمع صوت شي حاجة تهرست كان قدامو كاس القهوة ضربو حتى طارو شقوفو كيشوفها غادة و مقادش يقوليها بقاي راه غير نشوفك فكل مرة كافيني مشات غبرات عامين و رجعات قال يمكن كاين أمل يصلح لي فات و لكن دابا هاهي مشات و عمرها غترجع غير إلا جمعاتهم صدفة فشي بلاصة

بقا متبع ليها العين وحس بشي حاجة منو تبعاتها كان كيتمنى تبقا و تخدم و تحقق حلم لي تعبات عليه هادي سنين و يسافرو بجوج و يزيدو بالشركة لقدام كلامها كان فحال الملح لي كيتحط على الجرح كيشوفها طفات فين الحماس ديال هادي شحال و فكل مرة كيرجع لراسو لومة حيث هو سباب ناض هز لافيست و خرج خابط لباب وراه و تبعها

نازل في لاسانسير مگفض ايديه وحاطها على خصرو باينة فيه كاعي بغى غير امتى يتحل داك الباب ....كان ضاغط على زر الارضي متقبلش تمشي هاكداك وتخلى على حلمها بسهولة... تحط سلاحها وترفع رايتها قبل من الوقت...اول حاجة لفتت انتباهو فيها شحال هادي هي شجاعتها وتمردها على راسها حس ب فرق شاسع بين مريام ديال شحال هادي وتاع دابا

انفوا تحل لباب خرج منو وعينيه كتقلب عليها بانت ليه كتسد في الكوفر ..صاط باعلى صووتو ومشى لعندها معصب وممحكمش في لسانو ~ بغيت غا نعرف شنو كديري ، اش هاد تخربيق ؟؟

مريام ربعات يديها ووجوباتو ببرود ~ كندير لي خاصو يدار ، اشمن تخربيق داوي عليه ومعجبكش ، ياك من اول كان فنيتك تشري من عندي واخا انا مبغيتش ايوا كيخصك تفرح لي بغيتيه اخيرا وصلتي ليه

جمع قبضة يديه وقرب منها حتى لصقت على طوموبيل ~ كنت باغي نشري من عندك ، كنت مباغيش نشووفك قدامي ولكن دابا لاا دابا ...

مريام قاطعاتو مباغاش تسمع شي حاجة فات عليها لفوت ...بعداتو عليها بيديها وتمات غادا جهة الباب ~ موسيو زيدان وقت هاد الهضرة مشى من زمان يا رحمان، معندها باش غتفيدني دابا ومغتاثرش فيا ...برضايا بغيت نخلي هاد الخدمة وماشي بزز عليا وكرد جميل ليك على وقفتك لي وقفتي معايا جنب ليهود وباش متبقى تسالني منتسالك فضلت نبيع حصتي ليك وماشي لواحد تاتي مفاهمين ...يله نخليك دابا كيخصني نمشي

ركبات بلاما تزيد طول معاه في الهضرة حيت غير غيخوي الما في الرملة وكلامو مبقاش كيأثر فيها ، تحركت من تما مرتاحة وبالها هاني وهو خلاتو وراها هايج وفايض مكرهش يهرس يشخشخ غير يبرد ...ماشي هادشي لي كان كيسعى ليه ..واخا حاول يحل ليها شوية من مشاكيلها ولكن كان طامع فما كثر ، كان طامع فيها تغفر ليه وتسمح ليه يزيد يتقرب منها يكملو على لي كانو بداوه ولا يعاودو من اول معندوش مشكيل مكانش متوقع غتجي في نهار وتبيع حصتها بسهولة وتزيد خلفة والدليل نظرة تحدي لي جات راسمة عليه اول مرة ودابا تبخراات ...رجع لبيرو بلا خاطر وبلا گانة والخدمة مبقاتش عندو نفس ليها اما هي مشات قصدات دارهاوطريقها بدات كتوضاح قدامها ، لقات نزهة الام الحنونة والاذن الصاغية والسند لي بقى ليها فهاد الدنيا ولي مقابلة ليها ولدها وحاطاه فعينيها فغيبتها باركة تلعب هي وياه ...كانت واقفة بعيدة عليه وفاتحة ليه يديها وكتستمتع بيه وهو كيخطي خطوات صغيرة ومتعثرة لعندها دخلات مريام على هاد الصورة بقات مقابلاهم من بعيد وكضحك وحاسة بجبل كان محطوط على كتافها وأخيرا نزاح

بدات تحل عينيها لقات البيت مظلم والدنيا صاقلة شافت ساعة كان علاين المغرب غير تغدات وجبدات عليه معقلتش على راسها ...ناضت من فوق ناموسية تدخل توضى وتصلي لعصر لي فات عليها بعدما كملات نزلات لتحت لقات نزهة في الكوزينة وكمال حداها كيبقشش تحنات باستو وهزاتو مجلساه على ركابيها وهو باغي يقمش ويتماطى ينزل ويلعب بيديه بحال لوليدات لي فسنو

نزهة حطات شنو فيدها ودارتو لعندها وقالت ~ وا جبدتي عليه نيت مبغيت گاع نفيقك عرفتك عيانة

مريام كتاوب وتلعب فشعر ارون ~ شي عيا حسيت بيه ، موعيت گاع براسي تال دابا

نزهة بابتسامة حنينة ~ ايوا مزيان رتاحي ليك ابنتي

مريام حطات كمال الارض فين كان ووقفات حدا نزهة ~ ماما راني بعت حصتي فشركة لزيدان ، يعني من ليوم مبقيتش غنمشي لخدمة نصيب ارون غيوصلو شهريا وانا ملي نرتاح غنشوف شنو ندير

طبطبت ليها نزهة على ظهرها وقالت ~ لي تسلكك وتريحك ديريها وانا معاك فيها

مريام باست ليها ايدها ~ الله يخليك ليا وميحرمنيش منك ...

رجعات لبلاصتها كتلعب في تليفون تواصلت مع موسيو جاك وتافقت معاه باش تصيفط ليه لفلوس يعطيهم لعائلة جيمس وداكشي لي كان حتى تفكرت نادية... تستاذن من مها وخرجات على برا كتعيط ليها

صونات ما مرة ما زوج ما تلاتة عرفتها مبغاتش تدوي معاها تنهدت وهي غادا جايا فديك الجردة وكتلوم فراسها على تسرعها سيغتو عارفة عقلية نادية كيف دايرة

نيتها مكانتش تزيد تدمر علاقتهم كانت بغات لي يردعها ويخليها تغير قرار لي كانت باغا تاخد ....هزات تليفونها ودخلات لواتساب سجلات اوديو مفاده

"انا عارفاك مقلقة مني حيت قلتها لمراد ولكن خفت تنزلي لبيبي ويجي واحد النهار وتندمي وتقولي ليا علاش موقفتينيش داكشي علاش قلتهت ليه هو حيت بوحدو لي قادر عليك، سمحي ليا الا قلقتك ودرت شي حاجة ورا ضهرك "

صيفطاتو وبقات كل مرة تدخل تشوفها واش قراتو

وبالفعل قراتو ومجوبتهاش خلاتها على خاطرها ومازادتش ضغطات عليها حتى تبرد وهي بروحها غتقلب عليها

وهما على طابلة لعشا نطقات مريام وقالت لنزهة ~ ماما وجدي راسك من هنا يوماين غنسافرو

نزهة حلات حواجبها باستفسار مفاهمة والو منين جا هاد سفر ~ لفين ابنتي ياك لاباس ولعواشر علاين

مريام كتوكل كمال ~ والو باس اماما ، غير بغيت نمشيو نرتاحو فشي مدينة ملي جينا لمغرب مسافرنا ومال لعواشر اش غيغيرو كيف هنا كيف مدينة اخرا

نزهة بابتسامة رضى مسايراها~ واخا الله يرضي عليك نيت نفوجو شوية وكمال يبدل لحيووط ميبقاش محبوس في الدار

مريام بدات تهر فيه وهو مبين على سنانو~ ياك اماما ،نسافرو يااك هاا دوي

نزهة ~ شحال غنجلسو باش ندير بحسابي في لحوايج

مريام ~ يقدر شهر يقدر قل حنا ولگانة والجو كيف داير مهم هزي لي قديتي عليه راه كلشي فسوق موجود

نزهة ~ ان شاء الله ابنتي

في مدينة إفران المعروفة بسويسرا المغرب أقل ما يقال عنها جذابة بمعنى الكلمة كتسحر كل من جا ليها طابعها الهاادئ و و طبيعتها المتميزة كتخليك متسخاش تمشي منها واخا بردها القارص ناس كيجيو ليها من كل بلاصة ودولة ، فينما ضرتي فيها كتلقى عائلات مع بعض عرسان او كليكات جايين يدوزو امتع لحظاتهم تما...داخل قهوة معروفة فالمدينة جالسة مريام و مها و ولدها كيفطرو ومستمتعين بالجو ،محطوط قدامهم زيت زيتون و زيتون مشكل و خبز شعير و كراواصون شوكولا لكمال لي حالتو كلها عمرات بيه و براد أتاي مشحر بشيبة كتكبو نزهة فلكيسان و مع البرد كيجيب جوع فطرو مزيياان و بقاو كيتمنضرو فجبال الاطلس ..الجو كان بارد كلشي مكبط وداير طرابش صوفية على راسو ارون حنيكاتو ونيفو تزنگو كان جالس في بوسيت قبالة مريام لي هزاتو لعندها بعد ممسحات ليه حالتو وخشاتو فيها كانو سنيناتو كيتراقصو بالبرد كيلعب ويضحك وعاجبو لحال خشات ليه وجهو في عنقها ودورات عليه بكاب كانت لايحاه على كتافها وبدات تطبطب عليه يسخن وفنفس للوقت كتدي وتجيب في الهضرة مع نزهة لي من وجهها باينة عليها الراحة النفسية

هزات تلفون من صاك لي من نهار شدات طريق سفر طفاتو مولات شعلات حتى هاد نهار جايا لسيمانة حلاتو تشوف شكون متاصل دخلات لواتساب و مشات لميساجاتها مع نادية لقات الاوديو ديالها هو لخر و مجاوباتهاش عليه خلاتها حتى تبرد و غتهضر معاها دقايق و وصلوها ميساجات من مراد مفادو كيطلبها دخل بخيط بيض بينو و بين مرتو لي طافيا عليه تلفون ولا حتى الا صونا مكتجاوبوش مريام قرات و جاوباتو

" غير خليني بعيدة معندي فين ندخل حلو مشاكلكم و انا منزيدكم غير الخير بين راجل و مراتو مخاص يدخل حتى حد "

ردات لبال بلاصة مساجات كانت نمرة زيدان شاداه العلبة الصوتية تنهدات ورجعت طفات تلفونها و حطاتو فصاك هكا احسن ليها كملات كاس ديال أتاي لي لقاتو برد

مريام بدات كتحس براسها نوعا ما بدات ترتاح وخا دماغها كيوصل ليل كيخدم وكيفكر في شلا حوايج هادشي ممنعهاش انها تخوي راسها وتحس بطعم سفرتها باش تبدل الجو و تغير نفسيتها تنهدات و هضرات مع مها ...

مريام كتبوس في أرون وكتدوي ~..ماما لحبيبة ليوم إن شاء الله نطلعو لفاس اش بان ليك ؟؟

نزهة فحال اي ام بغات غير بنتها تكون مرتاحة لي قالتها صلاة نبي عليها ~ .. اييه ابنتي شايلاه امولاي دريس نمشيو لفاس زوينة مشهية نيت الحلوة الفيلالية

مريام كتقاد لولدها طاكية و كضحك معاه ~.... اوا صافي غير نتغداو و نرجعو لأوطيل نجمعو حوايجنا و نتحركو فلعشية نباتو تماا

دوزو ساعات كيضورو في المدينة حتى أذن عليهم الظهر و هما خارجين كيكتاشفو مناطق المعروفة في إفران .... سالاو لمساريا و رجعو غير وصلو لأوطيلدخلو يرتاحو و حطو كمال لي كان نعس فطريق و نزهة في تلفون كتهضر مع ختها و كتسول على أحوالها و مريام

دخلات توضات و صلات و سولات مها واش يتغداو ؟ حركات ليها راسها بالايجاب تاصلات بسيرفيس يطلعو ليهم لغدا لحظات حتى وصلهم طاجين بلدي لشخصين بالبرقوق و مزوق بلوز مرفوق بشلاضة و عصير الليمون الولد تمنا ليهم شهية طيبة و مشا نزهة قطعات مع عيشة و لحقات بمريام باش يتغداو بداو ياكلو حتى تفكرات مريام راه مزال مخداتش ريزرفاسيون ...

مريام حطات فورشيط و ناضت جابت تلفون ~.... نسيييت مدرتش ريزرفاسيون ديال الاوطيل شعلات تلفون تسناتو يتأكتيفا حتى جاها اتصال من زيدان وبحركة خاكئة منها قبلت الابيل مبقات عارفة تقطع عليه ولا شنو دير

زيدان بصوت خشنن ~ مرياااام فيييينك ؟؟

صوتو الحرش والرجولي وصوت انفاسو المجهدة وتنفسو لغير منتظم خلاوها توقف وتبعد على مها تمشي لجهة شرجم ترددات قبل متجاوب ، زلة ايدها هي لي دارتها ليها اما تقطع عليه حيت معندها متقوليه ..كتبغي تهرب منو كيتبعها ولا فارض راسو عليها بزز وفينما مشات كيفكرها فيه هاد الالحاح لي ولا فيه مبقاتش محتاجات كانت متعطشة ليه هادا شحال اما دابا ولا زايد ناقص عندها ...دارت يديها ورا عنقها كتحك فيه بتوثر وقالت بصوت واثق ~ موسيو زيداان ،ياك لاباس كاين شي مشكل !!؟

كان خاصو غا هاد الكلمة ويطرطق وغير سمعها منها مكرهش يخرج ليها من تليفون سيمانة وهو قالب دنيا عليها من نهار خلات شركة باغي يرجع يتلاقا معاها ويدويو ويغير ليها رأيها و غبرت مشا لعندها لدار ما مرة ما زوج والو ملقاهاش ، حس براسو وصل لطريق مسدود وبلي عاد خسرها من جديد ، فور مسمع كلمة موسيو زيدان لي خارجة بغيض من فمها زير على قبظة يديه وقال بصوت كاعي ~

موسيو ولا زبل ، بالغوات ...نتي هي مشكلتي لي مشكلت ليا حياااتي

خرجات عينيها وعضات على شفايفة بعفوية وهي كتسمع ليه كتخيل منظر ديالو كيف غيكون اكيد وجهو حمار وعروقو خرجو ومضيق عينيه وكيرجع شعرو اللور وكيهز في ايديه ...افافت وقالت ببرد ~ شنو بغيتي ؟

وعلاش كتعيط وفاش مشكلتك

سمعاتو ضرب شي حاجة حتى طاحت وكيسوط بصوت عالي وهي تضرب طم بقات كتسمع غير شهيق وزفير لي كيدير فيه طال سكات وهي تعاود تهضر وهاد المرة بصوت خافت مضيقة على عينيها تقول خايفة يرجع يتقنبل على وجهها ~ الوو

زيدان بدون شعور ~ عيتيني معاك امريام ودفعتيني الثمن غالي باراكا صافي الا بغيتي غير تسمعيها مني هانا كنقولها ندمت على شنو درت فيك ندمت حيت ضيعتك من يدي و....

قطعت على وجهو مبغااش مزال تزيد تسمع ، قلبها بدا كيضرب حطات ايدها عليه باغا تسكتو ولا تهدي دقاتو ، خافت عليه من الهضرة لي سمعات خافتو ليرجع يضعف وتولي شي مدارتو خافت يرجع يمرض بواحد اسمو زيدان

طفات تليفونها دغيا وحطات على كوافوز ورجعة لطبلة لغدا لي بقوة مكانت مشهية تاكل منها بقوة متسدت ليها شهية ومبقى عندها منين يدوز

غادين شادين الطريق وعقلها فاتصال زيدان وكلامو ليها ل خربقها فمخها وغتبدا تشطن معاه وهادشي ل مغاداش تسمح بيه ،مدات ايدها لراديو شعلاتو وشغلات راسها بالهضرة مع نزهة كتدوي في اي حاجة وكتهضر على لي جا على بالها الاهم انو متفكرش ، بعد مدة متوسطة من الطريق وصلو لمدينة فاس المدينة العلمية العريقة وبالضبط لواحد من احسن اوطيلات تما ديجا ريزيرفات قبل متوصل بتليفون نزهة لقات غرفهم واجدين طلعو ليهم نزهة كانت عيانة وارون كان ناعس اما مريام عينيها مغسولين خلاتهم تما وخرجاات تلهي راسها

بقات كضور و كتكتاشف أسواق فاس لي معروفين كيبعيو اي حاجة تقليدية و بيد المعلم لي كطيح عليها عينيها وكتعجبها كتشري ليها منها و لمها وخدات سوفونير لخالتها و نادية بقات هكاك حتى ضلام عليها تاجهات لطوموبيلتها وييديها عاامرين حلات لكوفر و حطات لحوايج لي شرات بغات تركب ترجع حتى سمعت صوت الأذان لي كيف كتسمع الله أكبر كتعرف بلي الله أكبر من كل شيء سدات طومبيل و هزات من صاكها شال لي ولا ديما معاها لبساتو و تاجهاات لمسجد فاطنة الفهرية تأدي فريضتها كان مسجد كبير وعريق دخلات و الاخوات متقدمين صفوف باش يستاعدو للصلاة ... دقايق سمعو الامام بصوت خاشع كيقول استووا.. تراصوا...اعتدلوا ساووا بين المناكب ...ساووا بين الأقدام و قام صلاة المغرب .... غير سالا بدات حصة الذكر و قراءة القرآن لي كتمتد من المغرب حتى العشاء ... مريام فهاد اللحظة زاد تخشعها و مشات جلسات بعيد على نسا و بقات كتسمع للأخت كتعطي درس و قلبها كيترعد من لداخل إحساس بالذنب متملكها كتشوف شحال كانت بعيدة على طريق الله بقات كتسمع و كتشوف نور الايمان لي باين على وجه الاخت و ابتسامتها البشوشة وكيفاش كتعطي الدرس بكل حب و كتبين على أن الاسلام دين يسر مريام بلا ما تحس نزلات دمعة على خدها

معرفاتش شنو سبب هاد دموع احساس غريب جا فجأة تفكرات الرؤيات لي كانت كتشوف و منغصين عليها حياتها واخا واضبات على صلاتها و الا مرة مرة كتجيها حلمة لي كطير عليها نعاس قبل ما تجي لفاس شافت راسها فبيت مظلم مفيهش ضو .. كتقلب على لباب مكتلقاهش بغات تخرج مقدراتش

الاخت ختمات الدرس بترتيل سورة نوور كان صوتها شجي يريح نفس وحنين خلا مريام تشهق بالبكا سيدة رضات ليها لبال و بقات حتى سالات الدعاء و ناضت عندها بخطوات تابتة ووجه يشع بالجمال ، ستأذت من مريام عاد جلست حداها بعد مربعات رجليها وقالت بصوت هادئ ~ السلام وعليكم ورحمه الله وبركاته اختي

مريام مسحات دموعها بطراف صباعها وجوبتها وهي كتشوف في الارض ~ وعليكم السلام

- ردات ليها البال كيفاش مخبية وجهها عليها ومدرقة عينيها لي عامرين دموع ~ معندك مناش تحشمي ، حنا عبد ضعيف

قدام صعوبات الحياة كنبكيو كثر مكنضحكو ودموعنا ماشي ضعف منا بالعكس شفاء وعلاج الروح ، كنجيو لبيت الله طامعين فرحمتو سبحانه و ربي كيقبل عبادو الحمد لله حنا هنا خواتات كنعاونو بعضياتنا و كلشي ليه حل بإذن الله ..شنو همك وشنو عندك حلي ليا قلبك والا قدرت نساعدك علاش لا ؟؟

مريام رتاحت لكلامها و قالت علاش لا يقدر تلقا حل لهاد الكوابيس لي كتشوف عندها بدات كتعاود ليها على الحلم لي كل مرة كيجيوو فشكل الاخت كتسمع ليها و علامات لحيرة و الاستغراب واضحين عليها

هزات حواجبها وقالت بتساؤل ~ اش سماك الله بعدا

جوبتها بابتسامة ~ سميتي مريام

مريم هزات راسها وقالت ~ عاشت الأسامي وانا مريم ، مزوجة أختي

منين تبدا وشنو تقول ، قررات متخبي والو ودعاتها فيد الخالق وبما انهم فبيت الله قررات تخوي شنو فجعبتها وتخرج مرتاحة بحصرة ردات عليها وقالت ~ أرملة

الله يرحمو كلنا غنموتو الدوام لله بقات كدعي معاه يكون من أهل الجنة مع الصالحين الاخت كدير الدعاء و هي معرفاش ان راجل مريام يهودي ماشي مسلم و هادشي لي خلا مريام تسولها

مريام خايفة و مترددة ~ ختي ، هل يجوز دعاء بالرحمة لغير مسلم ؟؟

مريم بابتسامة وضحات ليها ...~ لا يجوز ...

مريام بدات كتبرك على صباعها بتوثر وقالت ~ انا كنت مزوجة يهودي

مريم ~ استغفر الله العلي العظيم ولا حول ولا قوة الا بالله

علاش اختي مكنتيش عارفة بلي الزواج بغير المسلم حرام في الدين ،لقوله عز وجل .."ولا تنكحوا المشركين حتى يؤمنوا ولعبد مؤمن خير من مشرك ولو أعجبكم"

مريام معرفات متقول ~... كان غيسلم غير الموت لي خطفاتو و جات ظروف مخلاتنيش نفكر

انا عارفة راسي درت ذنب وعارفة راسي غالطة وهادا هو سبب لبكى ديالي انا من مدة مبقيتش كنعس كيف ناس وليت كل ليلة كنشوف حلم كيخليني نوض من وراه عرقانة وخايفة

حركت ليها مريم راسها وعطاتها الاشارة باش تعاود ليها وداكشي لي كان ، بدات مريام باول حلم شافت لاخره

حركات ليها راسها وعطاتها الاشارة باش تعاود ليها وتفتح ليها قلبها وتقول ما ضارها وداكشي لي كان بدات مريام من اول حلمة لاخرها وموقفاتش هنا عودات ليها حتى على علاقتها الغير الشرعية بزيدان وشنو دار فيها وموت الاب ديالها وكيفاش حتى تزوجات بجيمس وتبنيها لارون وكيفاش حتى رجعات هنا كلشي حطاتو ليها كما هو مخبات والو

مريم كتسمع ومصدومة بقات فيها وعزات عليها ... ~لا حول ولا قوة الا بالله العظيم ، هادشي لي دزتي منو ماشي ساهل اكيد غلطتي ولكن باب التوبة ديما مفتوحة فوجه التائب ،كتري من الصدقات على قول حبيبنا محمد صلى الله عليه وسلم تطفئ غضب الرب وان شاء الله غنشتشير استاذي لي هو الاب ديالي باش نقدر نساعدك بشي حل و تكون توبتك نصوحة ان شاء الله وربي لا يرد عبد بغا يتوب ،وقبل من هادشي تمسكي بدينك كما ينبغي و كتري من أذكار النوم و غتمشي هاد الكوابيس بإذن الله

مريام متلهفة ~ امتى ممكن نرجع لعندك

مريم طبطبت على كتفها ~ غدا باذن الله وان شاء الله غيكون خير

"الله اكبر الله اكبر " ...تسمع اذان العشااء ، ستأذنت مريم من مريام ورجععات لبلاصتها بعد مكانت بعد الله سبحانه سبب فانو عقل مريام يتنوور وقلبها يصفى ، بقات في المسجد حتى صلاة صلاة العشاء عاد رجعات الاوطيل باغا غير تسد عينيها وتحلها ويوصل لغد دغيا

كانت بحالا دوزات امتحان وكتسنى علامتو ...وبالفعل الغد ليه وفنفس الوقت رجعات مريام هاد المرة لابسة عباية ودايرة على راسها شال طويل نازل على كتافها وجهها كان طفولي ومافيهش حس الماكياج دخلات المسجد كتقلب بعينيها على مريم لقاتها جالسة كتحدت النساء كيف عادتها هاد المرة جلساات معاهم ماشي بعيدة عليهم بعدما لقات السلام وحضرت معاهم الدرس

ختموها بدعاء عاد استأذنو من النساء وخداو خصوصيتهم ،مريام كانت فترقب باغا تسمع جوابها من مريم حاساها هي النور لي غينور طريقها وغيمد ليها حبل النجاة

جلسات مع مريم على انفراد كتسنا تسمع منها كلام لي يكون طرف الخيط و بيه غتنسج طريقها

مريم باشرت في الحديث مخلاتهاش تسنا كتر ~....انا استاشرت مع الأب ديالي و كلامو كان

انا استشرت مع الأب ديالي وكلامو كان كلو دعاء ليك بالهداية والصراط المستقيم وقاليا نقوليك هاد زوج كلمات لا يغير الله ما بي قوم حتى يغيرو ما في انفسهم يعني البدايات المزيانة تتبدا منين نتا تتبدل نفسك للاحسن وكتمتنع على شيء الخطأ لي كنتي كدير فكري مزيان وعطي انطلاقة لراسك من شي بلاصة غترتاحي فيها وات شاء الله غيكون كل خير ، بالخق متنسايش أنك تواضبي على صلاتك في وقتها و قبل ما تنعسي تقراي أذكار النوم و تستعيني بقيام الليل هكا غتكوني في ذمة الله و يقبلك الله قبول حسن أختي ..

مريام بتاسمت ليها بامتنان وشكر فعلا سفرتها لهاد المدينة نفعتنا وبزاف ..صلاة لعشا وودعات الأخت مريم وخرجات كلها تفاءل بغدا ،كانت غادا كتبتاسم كأنها تولدات من جديد شدات طريقها متجهة لأوطيل

عند احباب قلبها لقات نزهة شادا قدامها ارون كتراري بيه بلش ينعس خداتو من عندها نعساتو وتعشااو عاد كل وحدة تخشات فبيتها نزهة نعسات ديك ساع اما مريام ليلها مزال طويل ، دخلات توضات وبالحرف كيف قالت ليها مريم دارت قرات ما تيسر من القران واكيد منساتش سورة النور وتلاتها باذكار المساء حتى فات نص ليل عاد ناضت جددات الوضوء وتوجهات للقبلة صلاة ركعات للخالق بخشووع وملي سالات هزات كفوفها لسماا وقالت

~ياربي معنديش لمن نمشي من غيرك انت ربي و انا عبدك ماض في حكمك عدل في قضاؤك أسألك بكل اسم هو لك سميت به نفسك أو أنزلته في كتابك أو علمته أحدا من خلقك أو استأثرت به في علم الغيب عندك أن تجعل القرآن ربيع قلبي و نور صدري وجلاء حزني وذهاب همي .... يااارب انت أعلم بحالي اقبل توبتي و تجاوز عني واغفر لي ....بدات تبكي بصوت شبه مسموع ..يارب انا عارفة راسي عصيتك بزواجي وبافعالي ،تلهيت فدنيا ونسيت الاخرة يارب تجاوز عني واجعل ما مضى عفوا منك وقادمي خيرا وهداية منك يا رحمان يا رحيم ..

ستمرات في دعائها بصوت مترجي وباكي لازيد من نصف ساعة حتى حسات براحة نفسية نزلات عليها عاد ناضت طوات صلايتها وتخشات في لفراش بعبايتها على جنبها ليمن وغفاااات

ولأول مرة تشوف الأب ديالها في الحلم بعد موتو ..شافت راسها هي وياه غادا فجنبو كانت لابسة عباية وشال طويل محتشمة بيه وهو في جنبها لابس لباس الاحرام كيشع بالبياض وكيطوفو على الكعبة ..الجو كان زوين وصافي وكيبعث بطمأنينة كترد الروح ...شوية كتشوف راسها جالسة وهو قدامها ساد تسبيح فيديه وداير طاگية بيضة ولحيتو عامرة شيب ،كان ماسك فيديها بحنان وكيتكلم بصوت بعث فيها الأمان ~ كل عام ابنتي نبقاو تجيو هنا ، مكاين ما حسن من بيت الله والتقرب منو ، المرة جاايا تجب معانا ماماك وحفيدي بلش حتى هما يغسلو عظامهم ويشوفو هاد لمكان

مريام باست يديه وقالت ~ واخا ابابا لي بغيتيها غتكون

دوز ايدو على شعرها وقال ~ لي بغيت انا ابنتي هو تنساي لي فات و تبداي من جديد لي جا لهاد المكان خاص قلبو يخرج نقي فحال دري صغير عامر بالحب و الأمان مافيه لا كره و لا حقد كيف ربي سامح ليك و عطاك فرصة حتى نتي خاصك ديري نفس الشيء خاصك تسامحي باش تقدري تعيشي ..باسها في جبهتها طلق منها وناض يكمل المناسك بوحدو و كلمة وحدة كيعاودها وهو غادي... ساامحي ابنتي و غترتاحي .... سامحي ابنتي الله يرضي عليك

حلات عينيها قلبها كيضرب ، تحسسات شعرها وجبهتها فين بلسها لمسة يدو حسات بيها بصح ماشي حلم ،حسات بطيفو قريب منها وبدفئ حضنو مزال محتويها بدات كتبكي تلقائيا وكتردد ~بابا هء هء علاش مشيتي وخليتيني ابابا هء هء توحشتك بزاااف هء هء

قالت هاد الجملة وهي حاطةة راسها على الوسادة لي عمرات دموع ورجعت نعسات بسلام

أصبحنا وأصبح الملك لله

شرقات شمس صباح جديد على نادية ل من بعد تفكييير طويييل قررات تحيد مراد من بالها و تخرجو من قلبها صافي عتابراتو كتاب و قطعات صفاحيه ودارتو فحالا عمرو ما كان و هادشي ما صعيبش عليها غشاشة الحب لي كانت معميا ليها لعينين محاتها و بدات تشوف حياتها فيها مها و ولدها لي مزال مجاش لدنيا تجربتها في الحب الفاشلة علماتها و عطاتها درس خلاتها ترجع توقف على رجليها ... فاقت و هي كتجبد فبلاصتها بقات شحال فبلاصتها على ممشات منها دوخة الوحم و ناضت غسلات و قدات حاجتها و خرجات تشوف ما تلبس بان ليها الجو مغيم من شرجم لبسات تريكو بيض خفيف شوية فيه لكول مع دجين مخشي فيه و ليبوط ميني طالون لاحت عليها مونكو حد الركبة وقفات قدام لمرايا قادات حالتها كيف مولفة و كتفكر بلي هادا هو الوقت المناسب باش مها تعرف كلشي شحال قدها ما تخبي ،غتقوليها شنو مخبية عليها وتخلي الكرة عندها ..دارت مكياج خفيف وخرجات كتقرقب بطالونها داير لحس فدار غادة جيهة لباب ...

عيشة حطات آخر طبسيل على طبلة و بنتها سولات ~.... مغتفطريش ابنيتي ؟

نادية كتجبد سوارت طوموبيل من صاكها ~.. لا اماما والله ما قادة ،يجيني جوع و نفطر في لخدمة يلاه بسلامة حتى لعشية و نشوفك ..جات غادية و رجعات .. راه بغيت نهضر معاك فموضوع مهم متمشي فين

عيشة باستغراااب ~... خبار الخير ابنتي ؟؟

ناديةشافت ساعتها و جاوبتها ~ .... حتى لعشية اماما دابا تعطلت

مشات و خلات دماغ عيشة حاير اش غيكون هاد الموضوع ... كيف خرجات نادية ضرب فيها برد صباح غادة لفين حاطة طومبيلتها ومطرطقة عينيها حتى وقف عليها مراد حالتو حالة وباين باقي بلا نعاس قطع عليها طريق و بلا سلام هضر

مرادعاقد حواجبو و كيهضر~ ..خاصنا نهضرو انادية، جرها من ايدها وقال يله معايا خلينا نتفاهمو

نادية نترات يديها منو مقصحة معاه الهضرة ~ .. اااااااخر مرة تحط يديك عليا ،خنزرت فيه وقالت انا و ياك مبقاش عندنا فاش نهضرو سير نساني عليك انا راه حيدتك من باليو حتى حاجة ديالك مبقات عندي و حتى هداك طلاق لي كنت كنتبعك عليه باش ميكونش ليوم انا غنوقف عليه حتى يكمل وكل واحد فينا يشد طريقو

مراد حتى كلمة ملي قالتها مبغات تصرط ليه~... واش طحتي على راسك انادية و بديتي تسطاي ولا شنو ؟؟؟

نادية بابتسامة استهزاء~ .... طحت عليه و عقلي رجع لبلاصتو اولد ناس

مراد بعصبية ~ طلاق هو لي مغيكونش

جوباتو ببرود ~ عادي حتى الا مطلقتيش بخاطرك انا لي غنخلعك بسيف عليك ويديك فوق راسك يله ختار و دابا ضيعتي لي وقتي بزاف حيد من قدامي

دفعاتو بيديها حيداتو من طريقها و مشات ركبات فطوموبيلتها و خلاتو وراه مصدوم ممستوعبش الهضرة لي قالت ليه

في فيلا عائلة لخليفي لكاالم و سكات ام زيدان و هناء كيوجدو شي شهيوات لنصر الدين غاديين بيها من بعد ما تحسنات حالتو ولات حسن من لول و زيدان صابح كيضور فدار اول مرة تكون ليه في تاريخ و مساار حياتو المهنية ميمشيش الخدمة في الأيام العادية ماشي يوم عطلة ما عيد و لكن محملش يمشي معندو ليها كانة ولا خاطر جالس صيفط شي ايميلات كانو مهمين و خبط لبيسي ماشي سدو ... هبط لقا مو صبح عليها و جلس حداها كيسول على خوه كيف ولات حالتو لي من نهار دخل المصحة عمرو شافو و هادشي لي عكر قلب مينة كتشوف كيفاش قلب زيدان قصاح على خوه وهو فحنيتو مفحالو حد واخا مكيبينش ..

مينة عارفة طبعو صعيب ولكن معجبهاش الحال ميسولش فخوه ..~... شوف اولدي ربي عطاني جوج عوينات هما باش كنشوف ليك وحدة و لخوك تانية و دابا اولدي الا عندي شي خاطر عندك طلع لبس و يله معانا شوفو نصر

زيدان معكس ومعندوش لگانة~... الواليدة ولدك هو لي ختار طريقو و وصلاتو لفين كاين داابا وبلا ماتحاكيني معاه لي عليا درتو بقيت نقلب عليه تا لقيتو ودابا منك ليه

الحاجة وقفات وكلام ولدها معاجبهاش ~معرفت فين غادي بهاد قصوحية راس وهاد الطبع صعيب لي ولا غالب عليك ،واش باغين تفقصوني واش بغيتوني نهار نموت فقبري منتهاش عليكم ،واخا اولدي دير لي بان ليك....مشات و خلاتو غير كيشوف هضرتها كيف سيف على رقبتو خلاتو يجمع الوقفة و يطلع يبدل عليه بلهلا يطريه ليه ويمشي بزز منو معاهم ...

الضحكة عاد رجعت لوجه مينة وهي غادا فجنب ولدها البكر تشوف ولدها صغير ، هناء واية لور غادين لعندو وممخلين ممصاوبين كل ساعة مينة تقول لمرت ولدها ديتي هادي عنداك تكوني نسيتي ليه هادي ..اما زيدان كانو غا مقدمينو من وجو باينة مطازة عليه حتى حاجة فهاد اللحظة حاجة وحدة ممكن تخلي المود عندو يتقاد وتكيف مزاجو من غير نثرة والكاس خاصو مريام شاغلة تفكيرو ولادرووگ لي سرا ليه مع لعروق وموحال يلقى ليه بديل

في مصحة لعلاج الادمان كان جالس بديك الگسدة لي عطاه الله ،ظهرو رجع وقف بعد مربى صحتو وبعد من الهم لكحل ،وعقلو لي كان تزعزع رجع لبلاصتو وعقل على شلا حوايج نساهم وندم بزاف على شنو كان كيدير ...شعرو غوفل ولحيتو ناضت تحت عينيه كحل بقوة سهير وصداع الراس واخا دوا مبقاش كيگر فيه ، وهدا حال المبلي...ساهل يتعاطى وصعيب يقطع.....ناض كيلبس في حوايجو وكيقاد فحالتو كان مقابل مع لمرايا مضارب مع شعرو حتى دخل عليه طبيب يشوف حالتو ولفين وصل

- سي نصر الدين شنو احوالك ليوم ؟؟

دار شافيه بزعف ~ اليز وبخير ولقيتيني كنلبس وخارج نشرب شي دكة ف قهيوتي تمشي معايا

بابتسامة قرب لعندو وقال ~ قريب قريب تشربها مبقى ليك قدما فات

مشى جلس فوق الكرسي لي كاين فقنت لبيت داير رجل على ختها وكيشوف في الارض محامل گاع يهز عينو حيت حفظ هاد الغرفة لي هو فيها بلاصة ببلاصة

بزز بلش خدا منو طبيب علاش جا وتبع حالتو ورجع خرج مخليه مع مخو وهمو ..لكن سرعان مرجعت ليه ضحكتو وطلع ليه لمورال ملي سمع صوت ميمتي لحنينة كيف مسميها جايا كتدوي مع طبيب و تسول على حالتو

وقف قدام لباب ملقي ليها وغير دخلت لعندو حل ذراعو بزوج وخشااها فيه كيبوس فراسها ~ لحنينة جيتي

مينة كتبوس في دراعو وعينيها مدمعين كتخشى فيه وترجع تقابلو معاها تفحص فيه وتقلب واش ناقصة منو شي بلاصة قلب الأم مبحاالو حد ~كيف داير اوليدي شفتك ضعافيتي على اخر مرة جيت عندك ممهلينش فيك ياك ....بعدها عليه بعد ما باس راسها وبدا يضحك ~ انا باغي نرجع لدار ونتي لي تهلاي فيا

مينة بفرحة ~ قريب اولدي هداك هو نهار لكبير ...بانت ليه هناء واقفة بعيد وفيدها اية لي كتنثر منها بغى تجي لعندو نزل الارض حاط ركابيه عليها ومد يدو لبنتو لي طلقتها مها من ايدها وجات لعندو تجري ترمات فحضنو ترفع هازها معاه يبوس فيعا ويضحك هو وياها ..

جات عندو هناء سلمات عليه بحال البرانية وتاهو مقدرش يعطيها لوجه جلسو معاه شوية اما تا زيدان كان مزال على برا كيكمي قبل ميدخل وتا مينة حاولات متجبدوش ليه تا يتفاجئ بمجيتو ....وهما في خضم السؤال على الحال والاحوال سمع صوت خطوات رجولية هز عينو جهة الباب بان ليه خوه لكبير ومسؤول العائلة داخل بهيبة طاغية وتكشيرة معتادة راسم على وجهو الله يجيب ليا معامن ، دخل عليهم لشامبر بعد مرمى سلام تحت صدمة نصر الدين لي متوقعش مجيبو بتاتا ، بلاما يحس وقف بضحكة فالتة من فمو وقرب لخوه وعانقو ،اما زيدان بقى منزل يديه شحال دالوقت قبل ميحطهم على ظهرو وبادلو العناق

طوالت الجلسة والهضرة كانت كثيرة من عند مينة وسكات كثر من عند زيدان حتى قطعو الحس عاد تقاد في جلسو هاد الأخير وقال ~ اش وصلك للحالة لي كنتي فيها ، شنو داك لفاس ولاحك وسط طرقانها

نصر الدين تقلبات عليه المواجيع وسينتا لي محاملش يتفكر جات قدام عينيه ، الشمتة مزال فيه كتطلع وتنزل كيفاش صحابو لي كانو تابعينو فينما مشى ويزينو ليه الحاجة ويلحسو ليه الگابة ، يديروها بيه ،يبقاو معاه تا يسوسوه من فلوسو وملي مبقى عندهم منفعة بيه ومبقاو غيصورو منو والو كلها عطاه ضهرو وقالو ليه الله يعاون

حكى لزيدان هاد شي من اول وجديد ، مستغربش حيت كان عارف طينتهم وياما حضرو منهم ولكن هو راسو قاصح مكانش كيسمع خلا ليهم الفرصة ينفخو ليه راسو ويعمروه على خوه ويطالب بفلوس مضارب گاع عليهم تمارة وهما غراضهم غير ينصبو عليه وياكلوهم ليه ويزيدوه ياخد حاجة بثمن مضوبل على تمنها الحقيقي ويضربو شي لاخور لجيبهم

مينة ~ صافي الله يرضي عليكم خليهم منهم لي خلقهم يمشيو فلوس ويجيو فلوس الا نتا اولدي كون مشيتي ليا متعوض ، حطات ايدها على راسو وقالت ~ معقلتيش على شكون ضربك

نصر الدين جاوبها كيطبطب على كتفها ~ هادوك غاا شماكرية جالسين في جناب طريق تلاقاو ليا طمعو بان ليهم لبس قالو راه كلو حبة وانا مكانش عندي درهم ، بقيت معاهم مني منك ضربوني لراس وخونو تليفون ومشاو ، هادشي لي عطى الله

بابتسامة رضى قالت ~ ميهمكش اولدي لي مشى يتخلف ، شافت فزيدان وقالت ~. ياك ازيدان المهم هو خوك عايش

شافيها زيدان قارن حجبانو وهز راسو بالايجاب جابر بخاطرها......سالات الهضرة والوقت وصل خرج زيدان هو اللول وتبعتو امينة متقصدة تخلي هناء وراها تدوي مع راجلها ويقادو امورهم كانت واقفة قدامو كطرطق فصباعها بتوثر اما هو كيحك فراسو ملاقي ميقول ، قدامو زوجو يبغيها اي راجل عندها حقها في زين وصبرات عليه بزاف واخا قلبو مرايمش ليها ولكن هي شارياه نطق بكلمة خلات قلبهاا كيضرب بزربة ونساتها شحال من خاجة خايبة دارها ليها ~ مبقى قد ما فات ونعوضك على كلشي ، تهلاي فراسك وفبنتنا

هناء بابتسامة ملقات متقول من قوة توثر لي شافها ميقول والدة معاه وشاركو فراس وهم وزهو شلا اعوام ~ وتا حنا غنتسناوك ، تهلى فراسك

فاقت معطلة وتا نزهة خلاتها على خاطرها تشبع نعاس ، حلات عينيها وبتاسمات ملي تفكرات باش حلمات حمدات ربي وشكراتو وناضت كتقلب على صندالة لبستها في رجليها وخرجات لعند مها كتضحك ~ صباح الخير عليكم ..باست أرون .. علاش مفيقتينيش اماما

نزهة حيدات نظاظر من عينيها وحطات تليفون ~ بنتي ليا مرتاحة مبغيتش نبرزطك ، راه خلينا ليك فطور

مريام طلات عليه ورجعات غطاتو ~ انا ندخل نغسل ونتوضى عاد نفطر

وداكشي لي كان مشات غسلات وتوضات صلاة زوج ركعات ضحى وجات تفطر وكتشوف في تلفزة ومرة مرة تمد دغمة لفم ارون وتداعب حنيكاتو ، ملي سالات جلسات على الكانابي برخوة وقالت ~ ماما وجدي راسك نمشيو نتغداو برا ونتقداو لي بغيتي باش نرجعو ان شاء الله عندي ميدار فكازا

كيف عادتها نزهة مكتعارضش قالت ليها ~ واخا ابنتي لي بغيتي

بعدما بدلو حوايجهم كانت نزهة بجلابة مخزنية بالبلومارين ومؤيام بسروال مع مونطو طويل ولايحة عليها شال ..عيطات مريام لخدمة الغرف طلع تقاد شامبر وخرجو يديرو جولة في مدينة فاس العريقة لمعرووفة بدباغة والحرف التقليدية ويتقداو من محالاتها لي عجبهم ...وهي معلية عينيها وكتشوف تار انتباهها محل كيخص لباس المتحجباات كل ما هو عصري طويل وانيق مع الفولار ديالو ..جرات نزهة ودخلو ليه تحت صدمة هاد الأخيرة لي مفهمات والو

- تكلمات لبنت لي مكلفة ~ مرحبا الالة اش حب الخاطر

- مريام حمرو وجنتيها وقالت بخجل ~ عفاك انا بغيت شي لبيسات للمحجبات يكونو راقيين

- مرحبا مطلبتي غير الموجود وصلت ليوم شي سلعة مزال جديدة انا نوريها ليك

نزهة قربات منها وقالت حدا وذنيها ~ لمن غادا بيهم ابنتي ؟؟

مريام بابتسامة ~ ليا اماما.

نادية محساتش بنهارها كيف داز بزربة نص تفكيرها كان في الخدمة و نص لاخر كيف غتكون مواجهتها مع ماماها واش عيشة غتقصح قلبها كيف مولفة ولا غتحن فبنتها الوحيدة و ديرها تحت جناحها... حطات طوموبيلتها و دخلات مفوضة أمرها لله عارفة الموضوع مساهلش ولكن خاص دير نهاية لهاد الفيلم لي عاشتو و كانت نهايتو حزينة بكات فيه و تعدبات كتر ما ضحكات ... دخلات وسمعات لحس فلكوزينة و قصداتها تشوف ،لقاتها مشغولة كتوجد لعشا وكطير من قنت لقنت مشمرة على دراعها وشادة راسهاا رمات عليها السلام و وقفات حدها ...

عيشة كتقطع فديسير~... على سلامة ~~ نادية هزات تفاح مقطع كلاتها وجوبت ...الله يسلمك الحبيبة كيف داز نهارك ؟؟

عيشة مكملة على شنو كدير ~ داز راسي فيه ضارني باغا نعرف فاش غدوي معايا وسيري بدلي عليك لعشا قريب يوجد و حتى انا غنصلي و نوجد طبلة باش ندويو

نادية تنفست بعمق كتشجع راسها ~ ... واخا اماما

حدرات راسها و طلعات لبيتها و دقات قلبها كيزيدو كطلب الله فخاطرها دوز الأمور بسلام .. هبطات و تعشاو و كلامهم قليل و نادية كتفكر باش غتبدا نفس كطلعها وتهبطها تقييلة خافت من ردة فعلها معرفتش كيف غيكون و هادشي خلاها تمهد ليها ماشي تجي و طلق لقنبولة فوجهها ...

نادية باغا تهضر و حاسا بفمها نشف ~.... ماما بغيتك تسمعيني و بلا ما تقاطعيني و القرار لي خديتيه غنديرو ، عارفة هادشي لي غنقوليك غيطحني من عينيك وغتقولي كون غير مولدتهاش ولكن بزز مني انا معتارفة بالغلط ديالي ولي بغيتيها وحكمتي عليا بيها هي لي غتكون

عيشة كانت مبردة مربعة يديها ورافعة واحد الحاجب وكتصنط ~ غير هضري

نادية تنهدات و كملت كلامها~انا و مراد مطلقناش اماما ، انا باقا مرتو وعلى ذمتو عارفة راسي غلطت حيت كملت معاه وعارفاك غتقولي يا خسارة تربيتك فيا حتى انا كنقول كون غير تبعت كلامك و متبعتش قلبي و لكن دابا فات لفوت نتيجة قلة عقلي راه فكرشي حطات ايدها عليها وقالت .. انا حاملة

عضات عيشة على فمها وتگعدات شوية كارزة بيديها على صداري وايدها كترعد ~ ياااك ابنتي مفكرتيش فيا ، مفكرتيش فحالتي عامين ونتي تكذبي عليا

قفزت حداها نادية جالسة الارض وشاداها من ايدها وكتدوي بتحكير ~ سمعيني بعدا عاد حكمي اماما ، معنديش من غيرك لي غيفهمني انا ماشي عامين وانا معاه وكنكذب عليك كيف كتقولي ، انا عامين كنت فقط على ذمتو وغير مؤخرا نهار سافرت لمراكش تما رجعت انا وياه ووقع لي وقع ، كنت خايفة نصارحك وتبعدي عليا كنت باغا نقوليك راه انا مزال كنبغيه ومقدرتش ننساه ومتفهمينيش وتجري عليا ،بالحق ياريتني متت ومكملتش معاه

هزات راسها فيها كانت كتسنى منها شي تصرفيقة شي نتفة كلشي هيئات راسها ليك ، بالحق ماشي هادشي لي كان ..كانت عايشة مدورة وجهها مبعداه على بنتها ومخسرة ملامحها حدها كلمة وحدة كتقول

اش غنقول لناس اش غنقول لخوتك ..بدات تولول وتعدد .. غتخلي عيالاتهم فين يهضرو و يحلو فمهم حتى لودنين دوي انادية مفكرتيش فهادشي

نادية ممسوقة لحتى قمقوم الا وقفات معاها مها هاديك هي دنيتها و بقلب محروق من خوتها قالت~.... فين عمر شي واحد فيهم هز تليفون و تاصل قال نسول فيها و نعرف شنو خاصها كلها ملهي مع ولادو و شغالو و ناس و خوتي آاااخر همي اماما انا بغيتك غير نتي توقفي معايا و متخلينيش

دموع لي كتحاول تحبسهم طاحو بلا ما تحس ياك لحم الا خناز كيهزوه اعيشة

تا نتي متسمحيش فيا ، وزايدون متنسايش انا مزوجة وهاد الكرش راه درتها بالحلال ماشي الحرام

عيشة خنزرت فيها~ زواج قبل ميكون ورقة راه اشهاار كتسمعي ، غدا ولا بعدو ملي يشوفوك حاملة ونتي عمرهم سمعوك تزوجتي اش غنقول

نادية ~ كنت غنطيحو و متسيقيش لخبار و ندير فحال الا حتى حاجة مكانت وتا دابا الا كانت تريحك نديرها ...قالتها فوق قلبها وهي تحس بيد نزلت عليها لحنك ~ اه نزليه باش ربي يغضب عليك و هديك روح توقف ليك فباب الجنة كفري غلط بغلط وضيعي ريعان شبابي لي دوزت على قرايتك في زيرو ...بعدتها عليها وناضت بعدما كان هذا آخر جواب ليها مع نادية مشات وخلاتها مفاهمة والو واش مسامحاها و لا مقلقة منها و هازة فخاطرها من جيهتها

عيشة دخلات لبيتها و شعور الجدة حسات بيه معرفاتش كيفاش تسلل لقلبها و خلاها تبتاسم بوحدها من صباح حتى بدات كتخايلو كيبكي و هازاه تراري بيه يسكت نسات الغلط و فرحتها بحفيدها غفر لمو و شافت كيفاش زمان دغيا داز و بنتها صغيرة غتولي أم .....مشات هزات لبسات صغار لي خرجات شراتهم مع صباخ ملي كانت كتقدا وبالضبط من ورا مجا لعندها مراد.

بعد معطاتو نادية بظهر ومشات بقى وراها مصدوم وعاصر عروق يديه ،راسها داير كيف الحجرة ليابسة صعيب تلين وتنسى شاف وراه نيشان في دارها وملقى من غيرها اللهم صهد عايشة ولا نار مرتو مشا و مصمم يرجع عيشة لصفو دق و هو كيجمع و يرتب لكلام لي غيقول ليها وقابل باي ردة فعل من عندها مهم عندو يكسبها لصفو ضد نادية

تحل لباب و عيشة مصدومة من شخص لي واقف قدامها لسانها تربط و معرفات ما تقول ليه بغات تسد فوجهو لباب ولكن هي بنت دار لكبيرة وبابها مكيتسد في وجه حد حطات ايدها على جنابها وهزات راسها فيه كطلع وكتنزل كتسنى فيه يدوي ، قرب منها وطبع قبلة على جبينها وقال ~ خالتي عيشة لاباس عليك ؟؟!

مجوباتوش خلاتو وراها بلا ما يسمع منها كلمة... عارفها مقلقة منو قدما مقلقة من صاحبو واخا هو مداير علاش .. دخل و عندو أمل تفهمو و تسمح ليه على خطأ معندو فيه دخل ...سد لباب ولحق عليها لصالون فين كانت جالسة وملفتة وجهها عليه ..كان عارف نقطة ضعفها سبقها قبل متدوي وقال ~ تبغي ضيف الله ولا نرجع منين جيت

مكرهاتش طير فيه وتجري عليه ولكن قصد دارها ودق بابها المحبة تابثة وصواب يكون ماشي هي لي غتجري على ضيف الله من عندها ..بصوت خافت قالت جلس ورحبات بيه فوق من قلبها

مراد شابك يديه بتوثر وقال ~ الحاجة بغيت ...

عيشة جوابها على نابها قاكعاتو قايلة ~ ممعمرة ما حاجة مزايرة داك لمقام اش حب الخاطر ؟؟؟

مراد ~ فيك ما يسمع كلامي و تدي و تجيبي معايا فالهضرة و تسمعي مني حسن ما تسمعي من غيري...بتاسم فوق الخاطر..ولا صافي قلبك كحال من جيهتي و و محامل يشوف خيالي ياك نتي بلسانك قلتي لي نتا راك ولدي و انا مك ..فين مشى كلامك اخالتي عايشة ؟؟

عيشة قالت بانفعال ~ كون ولدي سكت على فعلة صاحبو وخلى بنت خالتو تگدمت ومشات في رجلين نسخط عليه ولا نقجو بيدي تا يخرجو عينيه

مراد مكالمي ~ تا دابا هانا قدامك ديري فيا لي بغيتي ولكن تا تسمعي عاد حكمي متاخديش ذنبي بالباطل

نهار شفت بنتك وبغيتها ودقيت بابك ومرديتيهاش في وجهي تما درتكم عائلتي لي مندوزهم ولا نفوتهم ، صاحبي لي كتقولي ليا عليه سكتي على شنو فبالو باش نحلف ليك بلي معارفش هاديك نيتو ودليل على كلامي عمري مزال كلامي جا مع كلامو ، شنو ذنبي انا فشنو دار

عيشة مخرجة عينيها ومطرطقاهم ~ ذنبك صاحبو

بتاسم بجنب وقال ~ كتلقايهم زوج خوت واحد كيصلي ويزكي وواحد كيبيع طروفة وعمر لول مكايحاسبوه بذنب الثاني ، لي كنعرف عليك مكظلمي حد وبهاد الهضرة لي كتقولي ظلمتيني وبزاف ...زيدان اه كان صاحبي وخويا وگاع عائلتي وبسبابو تعرفت على نادية وكنعرف عليه بزاف ومكيفارقنا غا نعاس وبعد مرات تا هو كنعسو في دارو ولا فداري ولكن عقلو انا مداخلش فيه وفاش كيفكر معارفوش ، علاه انا كون كان فبالي غينوي شر لمريام غنسكت ليه ...بلاما نكون كنبغي بنتك ولا ناوي معاها شي حاجة من جانب الرجلة مغنخليهش يتعدا على بنت بديك الطريقة ويلوحها يهديك الله الالة عايشة

عايشة عارفة كلامو على صح ولكن مراضياش تكون غالطة ~ دابا شنو بغيتي

مراد جلس فجنب سداري وقال ~ بغيتك ترطبي معايا باش ترطاب بنتك من جهتي بسبابك نادية مبقاتش باغا تكمل معايا و

قاطعات كلامو ~ بنتي لورقة لي كانت جامعاك نتا وياها قطعاتها شحال هادي

مراد ملقى كيفاش يوصلها ليها من غير هاد الطريقة ~ ديك الورقة عمرها تقطعات وعمري ننهي الصفة لي كتربطني بنادية ،مزال مرتي ومزالني راجلها لهاد ساعة...

عيشة خبطات على فخاضها من حر الصدمة ~ كيفاااش اويلي

عرفتها وقلتها ليها وكذبات عليا ، هادي هي تربيتي انادية تلعبي ورا ضهري

جا حداها بغى يهدنها غوتت عليه ولكن كان مصمم ~ دخلت عليك بوجه الله الا مسمعي معندك لاش تلومي فبنتك حيت مربية واحسن تربية ...تنتر منو وبعدات عليك كتعاير....متكونيش انانية وتفكري غا فهاد ناس اش غيقولو وتنسايها هي وقلبها لي عفطاتوعليه ، عامين مكنشوفها مكتشوفني تا رجعات مريام لمغرب عاد تلاقينا وفينما نبغي نقرب خطوة منها ونقادو الامور تهرب وتبعد مني وتفكر فيك نتي قبل راسها ، واش مبقاتش فيك بنتك وحالتها فين وصلات مبقاش فيك شبابها لي كيدوز شنو عاد غتلاقا بشي حد غيري وتبغيه وتزوج بيه ، عطيني غا خطأ واحد درتو يخليني نتفرق عليها ونبعد واش محشوماش تفارقي زوج كيبغيو بعضياتهم واش غتنعسي فليل مرتاحة وضميرك هاني وزوج كيتعذبو بسبابك ...وقف بدون شعور وقال بالغوات ....واش محشوماش تكوني سبب فإجهاض دري صغير جاي لدنيا غير حيت جداه رشقات ليها ومبغاتش باه ومو يكملو مع بعضيااتهم

عايشة حساتها بقلبها كيضرب من كلامو لخر طاحت على وقفتها فوق السداري كترمش بزربة

عايشة حسات بقلبها كيضرب من كلامو لخر ..طاحت على وقفتها فوق سداري كترمش بزربة وكتفتف ...فمها نشف وحسات براسها تزير طونسيو طلع ليها متقبلت هادشي كلو يطرا وهي مجايبة ليه خبار ...حلات الشال لي لاوية على عنقها باغا شوية لهوا يدخل لريتها وتنفس ...وجهها تزنگ وتم جاي بالما حسات براسها تصدمت في اقرب الناس ليها بنتها من كرشها ودمها ولحمها ~ هادشي كلو واقع وانا مفخباريش ...بنتي باقا مزوجة وحملت من لفوق وانا اخر من يعلم ...بدات تخبط في جنابها ...اشنو درت في حيااتي واش من ذنب رتاكبت لي نحصد هادشي ...فاش كنت خايبة معاك انادية لي ديري ليا هادشي ....هي تهلل وتنوح ومراد يمشي ويجي فداك صالون كيمسح على شعرو باغيها تسكت حيت بانت ليه زادت فيه شوية ...خرج مشى يجيب ليها كاس لما ورجع لعندها مدو ليها ~ نعلي شيطان الالة عيشة زعمة راه مؤمنة بالله واش بنتك دايرة هادشي في لحرام راه حنا مزوجين بعلمك زعمة

عايشة محاملاش تشوف في وجهو وفين هو جهد لي غيغوت عليه ولا يلومو تقادا~ شنو بغيتي عندي فهاد نهار قالتها بحدة

زفر بجهد مخرج الغضب ديالو وجلس فوق طبلة صغيرة تما مقابل معاها وملامحو معقودين ~ بغيتك تخلينا نعيشو حياتنا بخير متكونيش عقبة فطريق بنتك خلينا نربيو ولدنا بزوج

عايشة خنزرت فيه ~ مالي حابساكم ، راها عندك ديها متسالني غنجمع ليها حوايجها

مراد كيدوي بالحسنى ~ بنتك باغاك نتي ، مبغاش تكمل فهاد زواج ونتي مراضياش عليها يعني بسبابك غتحرميني ندير عائلة ونفرح بشوفة ولدي كيكبر قدامي ، بسبابك ولدي غيتحكم عليه يعيش بين اب وام مفارقين ....بغات تدوي وقاطعها...انا عارف بلي قلبك كبير ومغترضايش يوقع هادشي فكري مزيان بغيتك تعونيني باش نكونو عائلة وحدة انا ونادية ونتي ولبيبي لي جاي وانا عارف غتديري لي كيبان ليك مزياان نخليك دابا

قال هاد الكلام وباس على راسها ومشا

نوبة الغضب لي كانت شادا عايشة بدات كتلاشى وبدات كتفكر وكتخايل هاد الاسرة لي كيدوي عليها مراد كيف دايرة ، كان حلمها تشوف احفادها كيلعبو قدام عينيها ويعيطو ليها لميمة وواخا تحقق الحلم وتزادو عندها احفاد ولكن مجرباتش هاد الشعور حيت عاشو بعاد عليها...

طاح فبالها ختها نزهة وكيفاش كتكون فرحانة وولد بنتها بين يديها وتفكرات راسها شحال كانت كتحس بالنقص ملي كتشوف فيهم ...بنتها مدارتش شي حاجة خايبة ...نادية مزوجة وعلى ذمة راجل وهاد الولد ولا بنت عندو باه ناضت لبيتها عقل يديها وعقل يجيبها وفي اللخر طلبات من الله هو يوريها طريق المزيان

عيشة غلباتها العاطفة هاد المرة و خلات قلبها يتحكم بقات كتشوف فحويجات شحال صغار و تقلب فيهم و تعاود تقول عمرها حملات ولا ركبات .. فرحتها بحفيدها نساتها فشنو دارت بنتها مكدبوش لي قالو عز الولد ولد الولد حمدات الله على ما عطاها حطات شنو فيديها و ناضت توضات وصلاة ركعتي استخارة طلب و تضرع بين يدي الله ... نادية متحركاتش من بلاصتها بقات على طابلة العشا و كتحس براسها رتاحت وجبل من على كتافها حيداتو.. جاتها ريحة الماكلة و مقداتش تبقا جالسة حسات بقلبها تهز بزز ناضت حطات طباسل في الكوزينة و طلعات ترتاح دخلات جبدات حوايجها و مشات دوشاات وقفات تحت رشاشة و دماغها يفك و يحاجي كيفاش عيشة تصرفات بهداك البرود لي ماشي من عوايدها حتى بدات مع راسها كتدوي.. ~~لي شاف ماما قبل يقول نهار تعرف تدبحني واقفة شنو لي غيخليها تبرد فحال هكا كملات لغسيل و لبسات بينورها و خرجات نشفات حالتها و لبسات و لسؤالها ملقات جواب قفزها صوت تلفون مدات يديها خداتو ولقات مراد مصيفط ميساج و ملي مجوباتش صونا عليها شافت سميتو و ترددات باش تجاوب لآخر لحظة و قالت بنفاخة ~ ~ اش بغيتي؟؟ لاش معيط ؟!!

مراد مبرد و مخدم دم انجليزي ~ بغيت نسول فمرتي يكما نسيتي؟

نادية عقلها في نعاس و خدام استغربات من طريقة هضرتو ، وتفكرات مجيتو صباح وهي تقول بتشكيك ~.. اجي بعدا دويتي مع ماما ؟

مراد ~...وتعطلت بزااف كان عليا نديرها شحال هادي

كانت جالسة و وقفات مخرجة عينيها ~ و هضرتي معاها و عاودتي ليها ها ؟؟ اشنو قلتي ليها ؟

مراد رجع هضر بجدية ~.... عاودت كلشي من نهار رجعتي نتي و مريام حتى الكارتة ديال كوغطاج لي كنتي باغا ديري

نادية جن زرق ركبها ~ .... و شكووووون كراااااك اخويا طلبتك قلت ليييك عاااوني و راه لي بيناااتنا سااالا اسيدي خويييني من دماغك واش عند بالك بهاد تبرهيييش غنرجع ليك راك كتحلم

مراد سمعها كتجعوق وبعد تلفون من على ودنييه مبرد~..... سيري حتى تبردي و نهضرو الحب و متبقايش تغوتي مبغيتش بنتي يخرج فيها الغوااات بحالك

قطع بلا ما يسمع جوابها خلاها كتاكل فجنابها ملقات جهد تخرج ليه من تلفون

وقت زيارتهم لفاس سالا هاد لمدينة لي عمرها غتنساها كانت عزيزة وتزادت معزتها...ناضت قبل مدير اي حاجة دخلات توضات وصلات عاد بدات كتلبس من لحوايج لي شرات لبسات صايا طويلة سخونة مع تريكو خشاتها فيها كانو في الكحل ولاحت عليهم كيمونو واصل تال لرجليه دارت حجاب ديالها وهي كيطير بالفرحة شعور فشكل ...بقلب مطمئن كانت كتشوف في لمرايا وفي الحجاب كيف جاها وسبحان من صورها وتبتها على الايمان وهداها وزين خلقها ،كانت اية في الجمال لوجه صافي مزينو ومنعاكس عليه بياض قلبها كتافات بواقي شمس مكيبانش دارتو وخرجات لعند نزهة لي غير شافتها بدات كتسمي الله وكتبارك في الرحمان

وتصلي على رسول الله وتحمد الله وتشكرو لي هدا ليها بنتها لطريق الصواب ..."الله يهدينا اجمعين "

مريام لمحات دموع نزهة ومبغاتش تبين قلبات الهضرة وقالت وهي كتقلب في صاكها ~ صافي واجدة اماما نمشيو ؟!

نزهة هزات مونطو كمال لبساتو ليه كابحة دموع فرحتها وبصوت باكي قالت ~ صافي ابنتي غا سبقينا هاحنا تابعينك !!

سبقاتهم حطات لباليزات فكوفر طوموبيل و رجعات طلبات ليهم لفطور و جلسات كتسناهم شافتهم هابطين و التاحقو بيها كملو فطورهم على خاطرهم و ناضو شدو طريقهم لكازا

مسافة طريق دازت عند ارون غنى وشطيح وتنقاز تا تهد عاد نعس دخلو لكازا مع وقينة لغدا نزهة كانت شادا لهضرة مع عايشة لي باغا غا لمن تحكي ومعندها من غير ختها ،اصرت عليهم يدوزو عليها هي لولة حيت في طريقهم يتغداو معاها عاد يمشيو وداكشي لي كان ....

في صالون لكبير جالسة عايشة قدامها صينية وفوق طبلة ممخلية ما حاطة تبارك وتعاود لمريام~ مبروك عليك ابنتي الله يتبتك السترة زينة

مريام بخجل ~ الله يبارك فيك اخالتي ...هزات عينيها لفوق وقالت ...نادية معاش غتجيى

عايشة تنهدات تنهيدة مخبية وراها شلا دموع ~ شوية تدخل وقتها هادا

عيشة جالسة مع ختها و بنت ختها عاطياهم صواب أتاي و طابلة عامرة بالحلوى و لوز و الكركاع و كاع لي تشها النفس حتى سمعو طالون نادية عرفوها جات سلمات عليهم عادي فحال مواقع والو و جلسات حدا خالتها و داخلها فرحان بشوفة مريام و بلباس جديد باغا تعنق و تبوس و دايرة فيها عيني فيه و يخ منو عيشة خلاتهم مجمعين و جرات معاها مريام لكوزينة تعرف منها اش طاري ووتزيد تفهم اش واقع

عيشة شادة فيد مريام و كتحلف فيها ~...... نحلفك بلي خلقك و هداك متكدبيش فلهضرة لي غتقولي ليا

مريام استغربات وحلفات لخالتها بلاما تعرف شنو ~..... والله اخالتي مغنكدب اش كاين ياك لباس ؟؟

عيشة ~كنتي عارفة بلي نادية حاملة و مطلقااتش من مراد

مريام هزات حاجبها بتساؤل ~ .. شكون قاليك هاد الهضرة ؟؟

عيشة بابتسامة سخرية ~ من فم بنتي سمعتها ا مريام و حتى مراد جا حتى لهنا باش يقولها ليا

مريام شافت راسها معندها علاش تنكرو قطعات وعد على راسها عمرها تكدب مزال وقالت ~ .. اه اخالتي هاد الهضرة كاينة تا انا عرفاها مؤخرا ولكن سمعيني مزيان ..مراد انا كنعرفو ولد ناس ومربي مدار تا حاجة خايبة في حقي فمكاين لاش نلوموه على والو حيت ماشي هو لي قال لصاحبو يدير فعلتو ...

عايشة خنزرت فيها ~ تانتي كتقولي هاد الهضرة

مريام ~ خيت هادا هو الصح هو راه عيبو لوحيد بغى بنتك من قلبو ومباغيش يكمل بلا بيها وراه حتى هيا كتبغيه واخا متكبرة عليه بالحق هي خايفة منك نتي متسمحيش ليه داكشي لاش خبات عليك وبقات بين نارين مقادات تمشي لعندو وتكمل معاه حياتها عادي ولا تبعد عليه ...شداتها من كتافها كتزاوگ ..صافي الله يسامح فلي فات راه الله غفور رحيم وزايدون انا نسيت داكشي مبقاش مأتر فيا خليهم يعيشو حياتهم و يربيو ولدهم بجوج ...راه نادية شوية وكانت غطيح الولد اخالتي يهديك الله

عايشة ضربت البوطاجي بيديها ~ باش ديك ساع نلحگها ليه...دابا قولي ليا مالهم بزوج شنو مشكيل

مريام بابتسامة عذبة ~ المشكيل غتعرفيه منها هي ماشي مني ، ونوصيك كوني من جهة مراد راه شهماتو ووحمها جاها عليه

عايشة تنهدات براحة ~ يكون خير

رجعو لصالون وهاد المرة مريام مشات جلسات حدا نادية بغات تاسف منها على شنو دارت واخا بدون قصد ~ باقا دافعة عليا كبير

نادية كتاكل في لوز ودايرة فيها مقلقة ~ بسبابك تصرفقت

بسبابك تصرفقت عمري ننساها ليه انا عمر شي واحد حط عليا يدو تا جا هو تصدمت اصحبتي ...

مريام حبست الضحكة ~ تستاهلي وكون كنتي فبلاصتو وبغى يقتل ولدك اش ديري ؟؟

نادية قلبت وجها وقالت ليها بهمس ~ فخبارك درت شهادة طبية وكنت غنصيفطو يتربى غا حنيت فيه وباقي هاد القلب لخارج عليا مايل ليه ....

مريام كتجاوبها بنفس النبرة ~...ااااه هي كتبغيه و مالك دافعة عليه كبير واش بغيتي تكبري لولد بلا باه خالتي لي كانت خالعاك راه عرفات و من همها تهنيتي راه الا مشا حتى غبر عمرك لبقيتي شديتيه و هانا علمتك باراكا طوفتيه وذوبتيه مسكين وميستاهلش هادشي مالك مجهدة اختي

نادية كملات كاسها وقالت بمكر ~ نربيه مزال شوية تاا يدير حل مع ديك موو هبر لي يضل دايع ليا معاها

مريام كتحرك راسها بنفي ~ ياختي باز مبقيت عارفة منين نشدك

ضربو طم وقالبو ملي شافو عايشة كتشوف فيهم

~~~~

قبل ميمشي لخدمة داز على دار مريام هي اللولة كيف كانت كيف بقات هي هي ريدوات هابطين وشراجم مطرقين ...عفط بجهد مخلي لغبارية نايضة وراه ومشى لخدمة بلا گانة ...شغلو مبقاش مديها فيه سلم كلشي لمهندسين معاه وهو كيشوف من بعيد حيت دماغو غير صالح للخدمة...طلب ليه كاس قهوة كحلة بلا سكر ودخل لبيرو واقف قبالة الشرجم كيكمي حتى كيدخل عليه فراس بعد مدق ~ مووسيو زيدان ياك لاباس عيطتي ليا خليت لخدمة وجيت لعندك ؟؟

زيدان طفى لگارو وشرب كاس لما جلس فوق الكرسي منخوي عاد جاوبو ~ شنو درتي فلي قلت ليك ، قدرتي تعرف فين هي ؟؟

فراس هز حواجبو وقال ~ عرفت من شي معرفة ليا بلي كانت جالسة في اوطيل في افران ولكن مبقاتش تما سافرت وفين معرفتش

عض على فكو من لداخل محدو كيسمع ليه وكيزيد يعض بعصبية ..كمل فراس على كلامو قايل..حاولت نتواصل مع جاك وندوخو بالهضرة باش نعرف منو شي حاجة تاهو قاليا من ورا مصيفطات ليه فلوس عائلة جيمس مبقاتش تواصلت معاه

هز يدو ليه باش يحبس مافيه ميزيد يسمع هضرة مغتفيدو بوالو قال بخشوونة ~ سير شوف خدمتك الا عرفتي شي حاجة علمني

ناض فراس خرج وخلاه بوحدو زير على يديه وقال تحت سنانو ~ فينك امريااام فيييييييييييييييييييينك

الحب الصعيب والفراق موصيبة ، توحشاتو ووحشو جاها صعيب ترددات قبل مدير هاد الخطوة ولكن مخلاش ليها البديل ، كان دائما كينبهها بلي هو لي غيجي لعندها وماشي لعكس مكان موريها لا عنوان دارو لا خدمتو بالحق لي عندو فمو ميتلف...لبسات احسن لبسة عندها دارت ماكياجها وتعطرات ...طلقات شعرها وخرجاات ...سولات على خدمتو وحيت معروف متلفاتش دخلات الشركة الاعين عليها كلشي كيطلع فيها وينزل شكون هادي وشنو بغات...مشات الإستقبال و سولات على لبيرو ديالو بلباسها الغالي و ريحة لي عاطية على أميال قالو راه يمكن كليانة و لا مستثمرة و جايا تشوف مسيو زيدان نعتو ليها و لعندو طلعات فرحانة تشوف حبيب القلب لي طول عليها لغيبة و بزعامة لي فيها دخلات بلا ما دق و طلب الإذن ...كان حاني راسو وشادو بين ايديه وغير سمع صوت طالون هز عينيه بزربة وكحل بلعمى ملي شفها...ناض بزعافة من فوق لكرسي وقال بصوت مسموع ~ واش مريضة في *** شنو جاايا ديري هنااا ؟؟

سمارة مولفة عصبيتو و كتسحاب تحلوينها غينفعها ~... جيت نشوفك قلت غتكون محتاج ليا احبيبي بضحكة مايعة لي ستفزاتو و خلاتو غيبخ دم

زيدان شدها من ذراعها ~واش كيسحابلك هاد الشركة حالها بار لي سخن عليه راسو يجي عندي هنا ملي مجاوبتكش عرفي بلي محاملش نشوف وجهك

سمر بعد منها وتبعتو ~ بغيت نعرف علاش قلبتي عليا وجهك ولا ياكما جات شي وحدة في بلاصتي نساتك فيا

زفر بجهد وقال كلام بحال سم ممراعي لحد ~ فين عمري تفكرتك باش ننساك ، نهار لول كلامي ليك كان واضح انا باغي نزهى ونتي باغا لفلوس وتلاقينا وقلت ليك وأكدت عليك بلي هاد عبد ربو متبغيه متقلبي عليه نهار انا نتفكرك غندق بابك ....علا صوتو وقال ...اري تليفونك

سمر بقلب مرعود ولكن عاجبها وهادشي لي حبات فيه طباعو الحادة ...مدات ليه تليفونها وجلست تشوف فيه ..خداه من عندها ودخل مسح نمرتو وقال ~ نمرتي ومسحتها باش متفرعيش ليا مخي ودابا سيري لدارك ممساليش ليك

سمر خدات تليفونها وردات عليه غضبانة ~ اش جا ممسحك من قلبي ازيدان

يتبع...