تمضي الأيام وبطلتنا في أحسن الأحوال ...مريام تاع شحال هادي ماشي هي تاع دابا ....نسات الانتقام ونسات لحوايج الخايبة لي دازو في حياتها ..ولات متفائلة كثر ومتسامحة اكثر ...دوزات سيمانة وبين عينيها الحلمة لي شافت فيها باها فداك المقام و الاحساس لي حسات بيه تمنات لو كان و تعيش ديك لحظة و لكن قدر الله كيتصرف .... فاقت هاد صباح لبسات لباس دار و فيقات ولدها لي مبقا عندها حتى شي شغل من غيرو فيقاتو و لبساتو حواييج نقيين و هبطات هازاه و هو مخشي فيها و معنقها قدما قربات لكوزينة و ريحة المسمن عاطية فدار دخلات مبتاسمة صبحات على مها لي كانت مشمرة و واقفة توجد في الفطور كانت كطيب فآخر وحدة من المقلة احساس الأم فدار بمال دنيا و ما فيها... نزهة عارفة كمال يموووت فيه و على قبلو فايقة طيب فيه ...بدا يتراما على جداه و مريام تحبس فيه على ما غسلات يديها بركاتو فكرسي و عاونات مها وجدات صينية و شخرات اتاي و جلسو يفطرو وكيضحكو حتى تجبد موضوع الحاج كمال و خوتو لي ملي مات عمرهم سولو فيهم و لا عرفو أحوالهم ...
نزهة كتبرد لكمال صغير اتاي ~...وملي كان باك في الحياة خطوتهم كانت قلييلة في المناسبات والا جاو كان بيناتهم غير تلفون عمك عمر تبارك الله راه موثق و عمك صالح راه عندو شركة كبيرة ديال الخشب و عمك لاخر مشات لي سميتو هداك الاستاذ
مريام كتفكر سميتو~.... اااه عمي عبد الله ياك !!
نزهة طاح عليها العجب ~... هواااا هداك استاذ هو لي كان درويش غير الوقت لي لهاتو مع وليداتو ... و اش فكرك فيهم ابنيتي ياك نهار مات باك وجاو ومشاو كحلتي بلعما و مكحلتيش بيهم
مريام جاوبات بلا ما تشوف فيها....~ لوقت حناتا اماما..وليام كتبدل.. ديك ساعة يمكن كان الجرح جديد و معرفتش اش كنقول ... باقا عاقلة فين ساكنين اماما ؟؟
نزهة سنييين مشافتهم صعاب عليها تفكر ~.... لمخفت نسا عمك عمر باقي في لفيلا لي كاينة فطريق جديدة...و عمك صالح معاقلاش بضبط فين كاين عاقلة غير على عمك الاستاذ ياربي تبتني مزال ساكن فدارو لقديمة ف لحي
مريام نااضت غسلات يديها ~... مزيان اماما انا غنجمع لكوزينة بلخف ونمشيو لعندهم نشم فيهم ريحة المرحوم و نصيلو الرحم و نجيو
نزهة مبقات فهمت فبنتها والو كتقول ليها غير واخا ولي بان ليك مكتسول لا علاش ولا كيفاش ~ ايه ابنتي نديرو الأجر و يفرح باك فقبرو
نزهة هزات كمال داتو غسلات لي كيف دخل لحمام عمر حالتو بلما مبقاش يريح لي بانت ليه يجرها شهمها مسكينة خرج حااالتو طلعاتو بدلات ليه و مريام طلعات لقاتو كيبدل و عرياان من لفوق بدات كضحك عليه خلاتو كيلبس و مشات هزات لبسة جديدة ملي شرات كانت كسوة طويلة بلكاب ديالها كيتلبس حتى هو طويل و جلست حداهم فناموسية
مريام كتجبد ليه لكمام و تخاصم عليه ~...ياك كنقول ليك ملي تكون تلبس شد لكمام اه واش كنهضر ولا مكنهضرش
غوبشات فيه و كملات كلامها ... غير سيري اماما لبسي و انا غنكمل لهاد الخايب
نزهة باستو ~وليييدي زويين زويين الله يحفظو لي
مريام سلات مع ولدها و لبساتو سباطو و حتى هي كملات لبسها قدات فولارها و لبسات ميني بوط و هبطات لطوموبيل كتسنى نزهة
قدام حي شعبي وقفات طوموبيلتها ونزلات.. كلشي حاضيها ويشوف فيها شكون هادي وعندمن جات...تبعتها نزهة ل تخالطو عليها الديور ودروبة جاوها كيتشابهو مبقات عارف اشمن باب ديالهم عيات تحقق ووالو ...قصدت مريام جماعة ديال دراري صغار كيلعبو قربت عند واحد فيهم شداتو من كتافو وقالت ~ الله يرضي عليك عارف فين كاينة دار الاستاذ بالحاج ؟؟
وشكون ميعرفوش الاستاذ ديال العربية لي كان مخرجها من لكبير وصغير ...غا قالت سميتو وبداو ينعتو ليها كانت قبالة بابو نيت ...هزات عينيها في لدار وتنهدات....عمها ومعارفة عليه والو معارفة ولادو ولا مجمعة مع بناتو تقدر تشوفو في زنقة ومتعقلش عليه وهو كذلك....الله يرحمك ابابا ويغفر ليك
قالت هاد الكلمة وقصدات باب الدار صونات وتسنات يجوبوها جات حداها مها لي كانت هازة كمال ناعس فيدها ..حتى جاوبهم صوت بنت صغيرة كيقول ~ شكون
مريام ~ قريب كاين عمي عبد الله
- اه كاين شكون بغاه ..بضيم جوبات ~ قوليه بنت خوك كمال
حطات لاباراي وتقطع الحس تا كيسمعو صوت خطوات ثقال كيقربو لباب لي تحل بعد دقايق قلال وبان من وراه راجل بلحيتو طويلة شوية وعامرة شيب كان متوسط البينة وتجاعيد بداو يكسيو وجهو ...ملامحو مغرابش عليها .. توحشات تشوفهم نفس العينين ونفس النظرة قرب منها بابتسامة عريضة وقال ~ بنت خويااا
حب مراد لنادية مفيهش شك رغم الخلافات لي بيناتهم هو عاد مكيزيد يتعلق بيها و يموت عليها
وهي واخا دافعة عليه كبير ودايرة فيها عزة نفسي ومباغاكش وطلقني كتموت فيه .... حالها حال اي مرا متقبلاتش علاقتو ب أميمة و الغيرة عماتها و الوحم كمل عليها حتى مبقات حملات تشوف فيه ... كيعيا يتاصل و يصيفط لميساجات و نادية مكتجاوبش كل مرة تقول مع نفسها مزال خاصو يتعلم و تندمو على تصرفيقة لي عطاها ..... كتحاول تلاهي راسها بالخدمة باش متفكرش فيه حيت العقل الا كدب و قال مبغاهش القلب كيجاوب بلي باغيه و كيموت فيه.... بقات خدامة حتى فات وقت الغدا حسات بجوع و عكزات تخرج تغدا ... حيدات نضاضرها و بدات كتجبد و تسرح فظهرها يله بغات تصيفط على ما تاكل حتى سمعات دقان هزات راسها مستغربة و كتسنا تشوف شكون غيدخل كانت المساعدة كتعلمها بلي شي سيدة بغات تشوفها فشي قضية نادية خرجات لهوا من فمها كطرد بيه تعب لي كتحس بيه و عطاتها الاذن دخلها ....دخلات شابة فمقتبل العمر في لثلاثينات لابسة جلابة سخونة ديال لبرد قصيرة حد ركبة مع صباط طالون و دايرة نضاضر شوف نادية بابتسامة استقبلاتها و خلاتها تجلس سلمو على بعضياتهم بليد و تعارفو و بلا مقدمات سيدة هضرات
السيدة بصوت مرتجف~.... عفاك الاستاذة بغيت نرفع قضية طلاق و بغيت نعرف شنو خاصني ندير
نادية حالها حال اي محامي طرحت عليها سؤال ~ .... و شنو سبب لي خلاك طلبي طلاق ؟؟
السيدة حيدات نضاضر و خلات نادية تشوف سبب بعينيها ~.... هانتي ا استاذة ها سبب قدامك و هادشي ماشي اول مرة ...مرة يضربني بلسانو ودابا هز ايدو وانا مبقيتش قادرة نصبر بغيت نطلق بأي شكل من الأشكال مكرهتش ليوم قبل من غدا
نادية تصدمات من داكشي لي شافت كانت عينيها زرگة .. للحظة سهات و كيف كملات سيدة هضرتها بدات كتستفسر ....~ شنو سبب لي خلاه يدير هاكا واش مدمن ؟؟
السيدة بدات كضور فعينيها ~...... لا مكيدير والو مكيشرب ما تيكمي غير لحظة تناقشنا فيها هز يديه
نادية كتزيد تستفسر و تفكرات نصيحة طبيبة لي دارت ليها شهادة طبية نهار صرفقها مراد ~.... ولكن الازواج عادي يتناقشو الا كتبغيه و كيبغيك ملي يكون معصب بدلي ساعة بختها حتى يبرد باينة حتى نتي لسانك مافيه عضم جيب يا فم قول الحياة كتبغي شوية صبر شوية منك و شوية منو سيري نفخي عليه ريشك شوية حتى يجي يصالحك و تبعي نصيحتي و مغيبقاش يهز يديه ..والا هزها مرة اخرا علميني ديك ساع نفكك منو بيدي
السيدة بكلام نادية بردات ولونات ليها دنيا بعدما كانت كحلة مكدبش الحبيب المصطفى الكلمة الطيبة ليها أثر كبير في النفوس ..
~~~~~~~~~~~~~
مراد شافها مكتجاوبش على تلفوناتو و الميساجات عارفها مزال مقلقة و محاملاش تشوف وجهو هاد صباح عس على نادية حتى مشات الخدمة و قررر يمشي عند عيشة فكاكت لوحايل كيفما خلاتها تزوج بيه نهار لول رجع عندها تحل ليه هاد المشكل مع بنتها شاف راسو وقف و تقاداو ليه معاها هبط من طوموبيل و قصد الباب كيدق تسنا شوية و حلات عيشة الباب كيبان ليها مراد جا عوتاني و لكن هاد المرة ماشي بوحدو جا و جاب معاه .....
جا وجاب معاه أميمة لي غير حلات الباب عايشة وتلفات وجابت ليها تمام وخلات عقلها يتزعز من بلاصتو شكون هادي واش هاد الذرة دخل على بنتي
مراد مد يد سلم عليها باحترام ~ خالتي لاباس عليك ....بخير
عايشة عينيها على اميمة مخرجة فيها عينيها ~ منين غيجي الخير ، غا داك نهار جاي صادمني باقي مزوج ببنتي وحاملة منك شنو جاي دابا توريني ضرتها
الله يهديك اخالتي اشمن ضرة و انا ما تفاكيت حتى مع بنتك نزيد تانية هادي اميمة صديقتي وختي وجبتها تعرف عليك
عايشة طلعتها ونزلتها وعبرتها مزيان وركزت على الوسط ~ تبارك الله ..دخلو مرحبا بيكم
دخلاتهم ودخلات ...كانو جالسين شي يشوف شي اطاجين الحوت حتى نقزات اميمة لي كانت مقادا ومصايبة حيت كان عندها ميدار ~ متشرفة بيك اخالتي ، كتشبهي لنادية بزاف
كيقولو الفقيه لي نتسناو براكتو دخل لجامع ببلغتو عيشة بنص عزين كتشوف فيها مقواتوش ليها تقول هاد اميمة دايرين ليها ديار لي شافها متسرطات ليه ....و راه بنتي على لمن بغيتيها تشبه
سرطت ريقها وكمدتها عرفت راسها معندها زهر لا مع لبنت لا مع مها ...كملت عايشة على كلامها وقالت لمراد ~ امتا ولات عندك ختك ، ياك والديك ولدوك غا نتا اولدي ولا انا نسيت
اميمة بابتسامة رجعات شعرها اللور ~ خليك من هاد الهضرة الحاجة ونهضرو في المفيد وعلاش جينا
عايشة ربعات ايديها وقالت ~ انا كنسمع
اميمة ~ مزال مبغا يهديك الله وتشوفي من حال هاد زوج
عايشة مخرجة عينيها ~ قبل خاصني نعرف بنتي مالها معاك شنو لي خلاها تقلب عليك وتكره لعيشة حداك
مراد معندوش مع الكذوب وفيه فيه واخا يكون غالط ~ الغيرة هي سباب المشكيل
عايشة شافت نيشان في اميمة وقالت ~ وبسيف عندها الحق متغير
اميمة كتدوي بمغربيتها لمزوقة ~ انا الحاجة مراد راه خويا لي مولداتوش ليا مي ، نهار جيت لمغرب جيت على ودو باش نرجعو هو وبنتك
عايشة ~ ايوا هانتي درتي لعكس ، لي بغات ترجع راجل مع مرتو غضور حداه بهاد الحالة نتي غتفقصي لمرا ماشي غتحزريها وسمحي ليا عليها كلمة قالت في خاطرها هازة مهاز قلب بنتي بسيف مطلب طلاق
أميمة كتشوف نواظرها لعامرين شيب وكتصبر راسها مرا قد مها دات وجابت في زمان مدرسة قديمة مغديرش راسها فيها اكيد لعيالات لكبار عقليتهم هاكدا كتكون وهادشي فاش غيفكرو تنهدت وربعت ايدها وقالت ~ شوفي اخالتي عائشة لبسي ولا شكلي متحكميش عليه قبل متعاشريني ، شحال من بيضة من برا كتكون بيضة وزوينة وغير تحليها كتلقايها خامجة والعكس صحيح ...يعني اش لبست ولا كيف تصرفت ماشي هما شنو درت ...معرفتش علاش نادية خدات مني موقف قبل متعرفني
عايشة دارت رجل على رجل بنخوة وقال ~ ديك ساع عرفيها على راسك تقربي منها هي وبعدي من راجلها !!
ضحكت اميمة وقالت ~ عند بالك مدرتهاش نهار كنبغي نتقرب منها كتبعد هي وفضلت نخليها على خاطرها اما راجلها بزز منك ومنها راه خويا ...خلاصة الكلام اخالتي لي بغيت نقوليك الا كنت انا هي سباب المشكيل فراه جلاسي هنا مبقى فيه قدما فات
خنزر فيها مراد بغى يتدخل وهي توقفو وقالت ~راك عارف الخدمة وحياتي لهيه ماشي هنا .وعاد انا ماشي بنت لحرام ولا منسواش لي غنبغي ليك خلا عشك وهو عاد كيتبنى ...جايكم بيبي صغير خاصو يعيش تحت جناح باه ومو ...شافت عايشة وقالت ...متخليش يعيش عيشة ليتتم ووالديه في الحيااة
عيشة هضرات بالمعقول حيت حسات براسها هي سبب رئيسي حتى بنتها معايشاش مع راجلها ~.... و انا هاديك بنتي الا مغتكونش مرتاحة معندها ما دير بهاد زواج كون خلاها تيق فيه متخليهش و ترجع عندي
مراد راسو بدا يتبخ وصبر علاين يتقادا ~ بنتك الا خلاتني سباب هي نتي ماشي انا ، وكون مكانتش مرتاحة ومباغانيش مغتبقاش على ذمتي عامين على قدها ...هي مقلقة عليا شوية وكان والا عرفاتك راضية علينا بزوج تاهي غترضى وغتنسى كلشي ....مد يدو لعايشة وقال ...اش قلتي الحاجة ؟؟
الأم تقصاح حتى تعيا و فلخر تحن و تبغي تشوف ولادها فرحانين ستسلمات ليهم وقالت ~ يكون خير الا على بنتي انا كنعرف ليها وعمر ولدكم يعيش بعيد عليكم هادشي الا هي باغاك
اميمة نقزات ~ راه باغاه وكتموت عليه وباينة من شوفاتها
ليه
عايشة حطات ايدها على حنكها ~ ايوا ونتي مباغيك حد مباغا حد نزوجوك تانتي ونتهناو عليك ونهنيو الناس
حلفو عليها ودارو سبة باش ينوضو ومعامن هما ...ميمكنش تدخل لدار عيشة وتخرج بلاما تاخد صوابك ...وداكشي لي كان شربو معاها دكة من ايديها دايزها لكلام وودعوها على امل ترجع لمياه لمجاريها
فقلب صالون مغربي مصاوب على حقو وطريقو كانت مريام جالسة مع عمها لي كان كيشبه باها بزااف..تعرفت على مرتو و وليداتو لي جالسين حداه لبنت لكبيرة عندها لعام لخر فلماستر و صغيرة عندها سنة اولى طب ومرت ولدو البكر ... بقاو كيهضرو و يسولو على أحوال بعضياتهم و عمها مكيركزش فيها ولا فمها غير الا ضحك مع ولدها لي مزال صغير و معارف والو
-العم عبد الله مد يديه لولدها كيلعب معاه ~.... شنو سميت ابابا !!؟
مريام بدات كتطلق معاه ،كتظوي ومرة مرة تنزل عينيهاةالارض بالحشمة ~.... سيميتو كمال اعمي ...هزاتو و عطاتو ليه يجلس عندو
عبد الله باسو و حطو فوق رجليه ~ .. على سميت لعزيز خويا، الله يرحمو فهاد نهار الكل قال آمين....هزات عينيها بان ليها مد يديه ومسح دمعتو
مريام بعينين دامعة ~ هادي هي سنة الحياة اعمي الحمد لله لله ما اعطى ولله ما اخد
عبد الله حرك ليها راسو ~ ....والنعم بالله ابنتي
نطقت نزهة وقالت ~ كيف دايرين لخوت اسي عبد الله شي خبار عليهم
جوبها وقال وبالكاد تسمع صوتو ~ كلها ومشاغلو الالة راك عارفة ولكن كندويو فتليفون ولله الحمد ...كمل وهو كيحس بتانيب الضمير وبنوع من التقصير ....انا عارف راسي مقصر من نهار مات خويا و تفرق الورث مبقيت سولت و لا جيت شفتكم كيف بقيتو مزال
مريام قاطعاتو وقالت~ ...عمي لي فات ماات و هداك شرع الله محللو وشطنة دنيا لاهاتنا كاملين ماشي غير نتا راه مفروض من صغير يسول على الكبير و هانا جيت ليوم غير باش نشوفكم و نصل الرحم والا شفتك بحالا شفت باا
عبد الله فرح بكلامها لي خير دليل على خلقهاا وتربيتها ~ .....الله يرضي عليك ، ومرحبا بيك نهار كبير هذا لجيتي شفتي عمك محدو باقي في الحياة
مريام بابتسامة ~بطولة عمرك اعمي تفرح بوليداتك و نشوفك حاج إن شاء الله
مرت عمها مشات تشوف لغدا فين وصل و دات معاها لبنات يعاونوها بعد ما نزلو اتاي ودوازو وهما فرحانين ببنت عمهم لي عمر جات الفرصة فين يشوفوها و يتعرفو عليها
عبد الله بابتسامة خارجة من القلب ...~ الله يصلحك ابنتي ان شاء الله شكون كره داك المقام
مريام ~و كلشي عند الله قريب معرفتي ربي اش مكتب لينا من هنا الغدا
صلاو الظهر وتجمعو على لغدا ومسخاتش بعمها ولا اسرتو ...عجبها كيف كيتعامل مع بناتو وكيفاش مكيخبيش حبو ليهم لمسات فيه شحال حنين ومتفهم وكيتصنط ويناقش ...
كيعاملهم فحال الا خواتاتو ماشي بناتو وما كيدير الحاجة حتى ياخد شوارهم علاقة لي تحلم بيها اي بنت مع باها سالا لغدا و تجمعات طبلة و نفاردات مريام بعمها من جديد بعيد على الكل ...كانت جالسة هي وياه في سيجور بطلب منها ...ترددات بزاف قبل متفاتح معاه الموضوع خافتو يتقلق ويحسها قللات منو وهادشي لي مباغاش~ عمي انا قاصداك والمقصود الله وكنتمنى متردنيش خايبة
عبد الله باذان صاغية قال ~ اعوذ بالله من الشيطان الرجيم ...الا كانت شي حاجة في مقدوري مرحبا ابنتي على الراس والعين
مريام تنهدات وحسات بالحسرة وهي كتدوي ولكن طلقات لعنان لراسها .. لي قدامها من لحمها ودمها ماشي شي حد غريب ~ انا اعمي عشت حياتي كلها بعيدة على الله درت ذنوب ورتاكبت اخطاء كبيرة لدرجة نعاس مبقيتش كنشوفو...
من جديد لي تصالحت مع ذاتي وبغيت نقاد من نفسي وحلمت راسي انني زرت داك المقام انا وبابا الله يواليه برحمة الله
فكرت بزاف وهاد الحلمة عمرها مشات من عيني وبقات تكرر وقلت علاش لا منمشيش عمرة وتكون بداية خير ليا ان شاء الله
عبد الله ربت على كتفها وقال ~ احسن مفكرتي فيه ابنتي مكاين ما حسن من داك المكان تكون بداية جديدة في حيااتك سيري ابنتي الله يسهل ليك
مريام ~ غادا نمشي وهاد الايام وبما ان الحج مزال بعيد قررت نمشي عمرة وكيف كتعرف غيخصني محرم ومكرهتكش تكون نتا ، بغيتك نتا تكون هو الاب ديالي لي شفت في الحلم ومضرب حسبة لحتى حاجة ...بغى يدوي ويعارض حساتها من ملامح وجهو ولكن مخلاتش ليه الفرصة
الا كان عزيز عليك خوك بصح وعتبرتيني بحال بنتك كيف كتقول ليا متقولش لا ، غنكون فرحانة بزاف وغنحس براسي غادا بالواليد لداك لمكان متحرمش نفسك وتحرمني معاك
عبد الله رفع حواجبو وقال بصوت خافت ~ اش غنقول ليك ابنتي انا في نيتي نمشي كنت كنتسنى غير لبنيات يخدمو ويستقرو راك عارفة مزال كيقراو
مريام قاطعاتو وخدات ايدو شداتها بين ايدها ~ انا بنتك وانا بغيت نديك واش ماشي من حقي وصلي على النبي وقول اللهم يسر
عبد الله كيشابك ايديه بتوثر وكيمسح لعرق ~ فاجئتيني ابنتي صراحة ما في بالي گاع زعمة ..تلف مبقى عارف ميقول قدام كلامها ...
مريام ~ ربي سخرني ليك وسخرك ليا تا انا راه مابين عمامي كاملين قلبي جابني هناا وختاريتك نتا تمشي معايا متعارضش وتكبر راسك قول ان شاء الله وخليها كيف كتبها الله
حنى راس وقال ~ لا اله الا الله محمد رسول الله ، لي درتيها مرحبا بيها
بالفرحة تلاحت عنقاتو بلاما تحس وهي غطير من بلاصتها غراضها لي جات على ودو تيسر وهادشي لي تمنات ~ صافي ان شاء الله ، عندك باسبور ياك ...
عبد الله ~ كاين موجود مصوبو شي عامين دابا
مريام بابتسامة ~ صافي عطيه ليا باش نبدا نوجد لوريقات وعطيني نمرتك نبقاو على تواصل وهادشي يبقى بيني وبينك بين بنت وباها
طبطب على ظهرها وقال ~ الله يرضي عليك والله يصلحك ويرحم من رباك
من ورا لقائها بعائشة تفارقت مع مراد ومشات تقضي اشغالها ...دازت للمحكمة هي اللولة باش تقاد شي وراق غيدوزو ليها عن طريق المحكمة ... وصلات الباركينغ بلاصات طموبيلتها وهبطات كتمختر مكاينش لي مدازتش من حداه و مكيتبعهاااش ..بعينو ... دخلات و قدات شغلهااا وعلاش جات وهي راجعة لسيارتها وعلى وذنها ايربوذز متبعة خدمتهااا ... غادة و تتهضر بيديها ومرة مرة توقف وتشرح و تكمل غافلة على شاب كيف وقف بطموبيلتو وقفات بييه الدنيا كيف شافهااا ... حط يديها على الشرجم و صباعو على فمو و حاضيها كيف كتهضر و كيفاش كتحرك ... و لي قتلو هي فورمتهااا و الشعر لي نازل عليها زاد خربقووو ... حل باب سيارتو فاش فكر انو غتمشي ليه من يديه و مباقيش يشووفها قصدهااا كيجري تا شدها من يديها
فراس شد غير قلبو ~.. كاين مشكيل هناااا هناااا ...كيقولها وتيضرب على قلبو
اميمة نترت يديها منو ~... كحز ليييه و هضر باحترام الشريف
فراس جبد تليفونو من جيبو ومدو ليها ~.. شووفي مغنطولوش الهضرة قيدي ليا رقم تليفونك وخليني ندخل عندي مقابلة خاصني نترافع عليها ... سينو نتبعك و نخلي السيد يغرق في الحبس و تهزي ذنبووو ...اش بان ليك ..نهى كلامو مع غمزة
اميمة تلسمات من كلامو وكيفاش هضر خدات التليفون من يديه و قيدات رقمها و عطاتو بالضهر ~اديووووووس
فراس عاض على فمو ~سيمتيييي فرااااااس
اميمة كتلعب بشعرها ~ متشرفيييين اسي المحامي
فراس ~وشنو سميت الغزالة و لا نخلي ليك غير الغزالة
أميمة ~ كنعشق سيميتي لي هي اميييييمة
ركبات في طموبيلتها و كسيرات مخلية راجل بطولو وبعرضو عاض على فمو و شاد في قلبو
فراس كيهضر على راسو ~ ... و شهاد الطيحة من الشوفة الاولى لي طرات ليك ابا فراس اودييييي
نادية من نهار هضرت مع مها و علماتها بزواجها من مراد و إحساس الخوف بدا كيتلاشا نهار على خوه ولي خلاها رتاحت كتر فاش كتلقا عينيها فعنيين عايشة مكتشوفش فيهم نظرة عتاب بلعكس كتشوف فيها نظرة حب أم لبنتها هاد الأم لي جمعات وطوات الموضوع بحالا عمرها عرفات شي حاجة ولا بنتها دارت شي حاجة ورا ظهرها و كل مرة تسولها شنو تشهات طيب ليها ... نادية ماكلتها نقصات على كيف كان بان فيها الوحم لي جاها صعيب ريحة طياب كرهاتو ولات عايشة غير بلي صلاد و حتى الخدمة مبقاتش قادة تخدمها كتمشي نص نهار والا كملاتو ....
صبح صباح دوشات باش تفيق مزيان لبسات و خرجات شادة طريق طبيبة نيشان تكتب ليها شي فيتامينات شادا نوبة و كل مرة تسمع تلفون يصوني تجبد تلقاه مراد مصبح عليها بتعياط تقول بايت يحلم بيها فكل مرة يتاصل تقطع عليه صدعها و هي تطفي عليه تلفون حتى بدات تسب و تلعن فيه فخاطرها دخلات زعفانة عند طبيبة لي كيف دخلات عندها و هي ضحك تسالمو و جلسات ترتاح من دوخة لي كانت شاداها هضرو فمواضيع مختلفة حتى هضرت نادية علاش جاية ...
نادية ...~جيت على ود دوخة مكتمشيش مني و حتى الماكلة نقصات مبقات عندي لخاطر لحتى حاجة
طبيبة كتسمع ليها باهتمام ~ شوفي طبيعي هادشي انادية غير حاولي ترتاحي نقصي من ضغط كيفما كان خدمة ولا فدار غنعطيك واحد لفيتامينات و دوا يكون فيه الحديد على ود لبيبي خودي كونجي و نتابهي لماكلتك ضروري تاكلي انا غنكتب ليك هاد طريطمون و من ورا شهر رجعي عندي
خدات الورقة و مشات زربانة حيت كانت الخدمة مزال كتسناها ركبات طوموبيلتها و كتحس بالسخفة... كتفكر اش غتاكل و حتى حاجة مجات فبالها بقات غادة حتى لقات راسها قدام المكتب طلعات و دخلات لبيرو لقات مراد حاط رجل على رجل و كيتسناها غير شافتو و شدات بوانيي و مفاتش معاه جوج كلمات خرجتهم بزز
نادية فوق قلبها ~خرج من هنا و عمرك مزااال نشوفك قدامي
مراد جاي مطول بالو و متوقع تصرفها هو غرضو يصلح الأمور و تجي البادرة من عندو ناض لعندها جرها جيهتو سد عليهم الباب ~ الله يهديك انادية هاد قصوحية راس معندها فاش تنفعنا خلينا نهضرو و نصلحو الأمور متنسايش راه مبقيناش بوحدنا حتى الا مفكرتيش فيا فكري فولدنا لي جاي
كيدوي وقريب منها وهي مدورة وجهها عليه ومزيرة على فمها ومغمضة عينيها مباغى تا كلمة من كلماتو تاثر عليها ولا تضعف قدامها ...
نادية هازة كواريها لسما دايرة فيها مدخلاتش هضرتو لمخها بلش تخرجها ~..... شوف امراد هاد جوج كلمات لي حافظ مغيزيدو مغينقصو من الاحسن تجمع خطاويك و تخرج راه محاملاش نشوف كمارتك و أجي قبل ما تمشي دي معاك هاد الورقة باش كل واحد يشوف حياتو حبيا انا مبغيت من عندك حتى فرنك بغيت غير تيساع
تمشات من قدامو جهة البيرو جبدات ورقة طلاق من لمجر ومداتها ليه وغير حطاتها بين صباعو شقها قدام عينيها ~هداك طلاق هو لعمرو كان الا كان سميتك نادية انا لكرابة مراد
"حل لباب و كمل كلامو" ... لفطور لي كتبغي فوق لبيرو كولي مزيان وتعلاي فراسك شوية بنتي ليا صفرة وبديتي تخيابي
غير هو لي كيعرف ليها وكيجيب ليها تمام بكلمة قالها بضحك خلاها تشك فراسها وتفقد ثقتها بنفسها ساطت بصوت مسموع ومشات ريحات فوق لبيرو وجيوبها الانفية سارية معاهم ريحة لذيذة فايحة من شنو قدامها ، عيات تكبح نفسها ولكن مقدراتش مدات ايديها وحلات صاشي كان فطور على حقو وطريقو وگاطو من لي كتبغي ، گفضات على ايديها وبدات كتاكل وكتبنن معاقت براسها حتى كملات كلشي
رخات راسها على الكرسي كتلتاقك انفاسها وهي طيح فبالها مريام شافت ساعة ودارتها فيد الله ويا تلقاه شاعل يا تكون طفاتو..وقفات قدام الشرجم حاطة تليفون على وذنها وكتاكل في ظفارها ...ضحكات بالفرحة ملي سمعتو كيصوني وزادت فرحت كثر ملي سمعت صوتها ~ الو مريام عند بالي طفيتي تليفون ؟؟
مريام بابتسامة ~ ان شاء الله حتى نتي تهلاي فراسك وفلبيبي ورخفي على مراد شوية ميستاهلش لي كديري فيه
نادية قلبات الهضرة ~ متنساينيش من دعاء
مريام بخفة دم ~ الله يعطيك عقل احبيبتي يله نخليك وصلت للمطار بسلامة
إلى حيث موطن الروح وسكناها، إلى حيث الأنوار الساطعة من بيت الله الحرام، إلى الحجر الأسود والركن وزمزم والصفا والمروة والمقام ..كانت غادا مريام بقلب خاشع ووجه بشوش ايديها فيد عمها لي شافهم من بعيد يحلف بلي بنت والاب ديالها ماشي زوج مشاركهم غير دم فقط وتشاوفو زوج لمرات فهاد سنين كاملة.....تيسرات ليها الامور باش تعتامر في احسن مكان ف العالم ،وبلاصة أي واحد كيخلم يجي ليها الفرحة والضحكة مرسومة على وجهها واخا كتبان ناقصة من جهة الأم ديالها لي أصرات تبقى في المغرب بحجة كمال الصغير وتعب السفر عليه على أمل يمشيو من جديد فالقريب ان شاء الله...داخلين من بوابة المسافرين دنيا عامر تلاقاو برفقائهم فرحلة الرجال بلباس الإحرام ونساا بجلالب ومختلفة ، مريام كانت لابسة كسوة فلبيج مع شال طويل مغطي ظهرها عينيها كيبريو هزات تليفونها طمنات على ماماها ونشرات في صفحتها المجهولة
لا أقول وداعاً ولكن إلى لقاء يجمعنا بعد عودتي إن شاء الله من زيارة بيت الله العتيق... سأجعل كتاب الله لي رفيق وأذكر ربي مع كل زفير وشهيق وقبل ما أنام ولما أفيق وأطهر قلبي ولساني بذكر ربي عند كل ضيق.....طفات تليفونها وخشاتو في صاك وهي كلها اذان صاغية لتعليمات المسؤول عن الوكالة لي غيرافقهم .....
فنفس المكان كان داخل زيدان من بوابة كبار الشخصيات باناقة ورجولة عاطية للعين .....هز عينيه فالساعة كانت لعشرة دصباح هاد الوقت لي فكرو بذكرى فتاقد مولاها ...جا فبالو نهار تقلق عليها حيت تعطلات عليه زوج دقايق وعيات تحزر فيه وتعنق فيه باش يفك غوباشتو ...بتاسم تلقائيا ابتسامة زادتو جمال لكن سرعان مجمعها وخنزر وهو كيتفكر غيبتها عليه عرفها رجعات وحاول ما مرة ما زوج يتلاقاها لكن بدون جدوى ...كمل على طريقو كيشوف نيشان كيف غضور عينيه وهي تبان ليه صورتها قدامو معنقة راجل كبير فسن وكتصور هي وياه
بقى واقف فبلاصتو كيتحقق منها واخا كانت بعيدة عليه ميمكنش ميقدرش يميزها ... مجا فين يتأكد حتى كانت غبرات من قدام عينيه بحالا عمرها كانتكمل اجرائات ديالو وبحكم معارف لي عندو هنا توجه عند مسؤول تما باش يتاكد ليه ويتحقق انها مريم قلبو هاديك
زيدان كيدوي مضيق على عينيه ~ بغيتك تاكد ليا واش كاين هاد الاسم مع ناس لي مسافرين ليوم ولا لا ...كتب سميتها في ورقة ومدها ليه
مشى ريح في صالة انتظار ڤ اي بي خاصة برجال الأعمال حاط رجليه على ركابيه وكيحرك فيهم بزربة وبعصبية مقدرش يصبر ولا يستنى باغي دغيا يعرف واش لي شاغلة قلبو هي لي شاف ولا غير كان كيحلم ...غمض عينيه مزير عليهم وجاات بيناتهم صورتها بلباسها المحتشم لي زادها نورها ووثاها ...طول عمرو كتلفت انتباهو لمرا لمستورة كثر من لمعرية عزيز عليه لحشمة والعفة وهادشي الا تلاقاو ليه فمريام غتكون نهايتو على ايدها..مقدرش يصبر وقف وخرج على برا فداك الكولوار كيمشي ويجي حتى جاه تليفون ~ وي موسيو زيدان هي هاديك مريام بلحاج ، لقيتها مع المعتمرين غادا هي والعم ديالها عبد الله بلحاج
ورحلتهم هادا هو وقتها
تصمر فبلاصتو معرف واش يزيد ولا يوقف حس بصهد و نفس لكرافاطة و مية سؤال جاو فبالو معرفش ليهم جواب صدمة خلات كارت مير ديال عقلو تخربق مكرهش يمشي لعندها و حتى الا مشى معارف اش غيقول ليها....فرح ليها وصعر على حضو حيت معندو كيف يدير يدوز ليها ولا كيف يدير يدوي معاها ، سمع نداء رحلتو وزفر بجهد وقال ~ صيفط ليا وقت لي غترجع فيه بالضبط وساعة فميساج ...قطع عليه تليفون وسرح فبحر ذكرياتو .
الانسان فاش كيخسرك و كيندم كيتفكر أدق التفاصيل فيك محسش براسو حتى لقا ذاكرتو كتسترجع أول مرة شافها طريقة لبسها و مكياجها لي كانت كتموت عليه وكتستفزو بيه تفكر طموحها الكبير لي كان باين عليها .. تفكر كيفاش داز الوقت بزربة و رجعات تحداتو في الشركة و ففترة قصيرة باعت نصيبها و كيفاش ولات باغا غير ترتاح باغي يعرف سبب لي خلاها هاكا تغير حيت فرق كبيييير بين مريام د لبارح و مريام ديال ليوم ....مريام لي كسبات راحة لبال عكسو هو لي جنى البكاء على الأطلال معرفش بلي الانتقام هادي هي نتيجتو ياخد العذاب مضاعف تأنيب الضمير و عذاب القلب حيت حبو ليها شمعة فقلبو عمرها طفات ندم على ما دار و كيتمنى طرا شي معجزة و ترجع ليه ....صورتها بالحجاب خلا قلبو يفز و يزيد يغرق فحبو ليها ويصمم ويقسم بلي خلقو حتى غتكون ليه وبأي ثمن
نادية خرجات بكري من الخدمة ومشات لدار باغا غير تحط راسها تنعس و ترتاح هاد سيمانة بدا كيجيها نعاس بلا قياس جات جايبة معاها دوا كلات علاش قدات و شربات دواها و نعسااات عيشة شافتها غرقات فنعاسها و بدات كتوجد لضيافة ليل... دخلات لكوزينة فين مرقدة لحم بليقامتو ودجاج بعطريتو وبدات تقاد وتقول اش نسيت خاطرها بغى دجاج مبخر وبسطيلة دجاج كيف كيبغي مراد ومكين ما حسن منهم اطباق يتحطو لضياف وتفرح بيهم...جات سيدة لي كتعاونها في شقا دار دغيا جمعتها وسيقتها وعونتها في كوزينة في تستاف وغسيل لماعن دات حقها معاها ومشات
وصل الوقت ... وقت لي غيجيو فيه ضيافها طلعت بدلات عليها بالخف لبسات گندورة ولاحت شال على راسها هزات مبيخرة وعود لقماري ونزلت تبخر بيه وتشالي وفمها موقفش بدعاء و طلب ربي يدوز كلشي بخير و على خير...لي شافها يقول خطاب جايين يخطبو بنتها ولا ليلة عرسهاا... ريحة لبخور وصل لبيت نادية و فيقها من عز نومها بدات تحل عينيها مخسرة سيفتها كتحاول تعرف اش طاري ناضت دايخة كتجر فرجليها كيف حلات باب بيتها صرفقتها ريحة العود مجهدة هبطات تشوف اش عندها حتى طالقة لبخور فهاد ليل لقاتها حاطاه على رخامة كتهضر مع شي حد فتلفون و معرفاتش شكون كتسمعها كتقول غير مرحبا حنا كنتسناوكم و هادشي خلا نادية تزيد تستغرب
نادية بعيون متسائلة كتسول حيت معارفاش شكون جاي كتهضر و تفوه ~..... ماما اش هادشي كلو لي شافك يقول جاي عندنا الخطابة
عيشة معلماتهاش و بغات تحطها أمام أمر الواقع عارفاها و متأكدة مغتقبلهمش يجيو ~..... سيري طلعي بدلي عليك و هبطي جايين عندنا شي ناس طلقي راسك راه قربو يدخلو
نادية هزات حاجبها كتستفسر ~ ..... و شكون هاد الناس لي جايين و نتي معلمتينيش... حكات شعرها و رجعاتو ورا ودنها وقالت ~ انا معندي خاطر نشوف حد غير ستقبليهم نتي غنطلع نكمل نعاسي
عيشة رمات كلامها بحدة مشات معندهاش مع لفشوش لخاوي ~..... سيري لبسي طلقيني وجلسي مع ناس على ما عمرت أتاي مغنبقاش غادا جايا راسي بحالا معندي بنات
نادية بقات واقفة معاجبها لحال محاملة تشوف حد طلعت بزز منها لبسات لي لقات و جمعات شعرها حسات بالبرد لاحت عليها كاب غطات بيه كتافها.... بدات هابطة و كتسمع الهضرة فقاع دار كان مراد داخل هو و أميمة بكل أناقتها هازة فيديها بواط د شكلاط و هو جايب معاه بوكي د لورد و و الحلوى صواغي سلمو على عيشة و ستقبلتهم بابتسامة من القلب هاد المرة دخلو لصالون وجلسو .. اما نادية هابطة مدايراش الحس و مركزة مع صوت رجالي لي كتسمع و متأكدة بلي هاد صوت مخافيش عليها باغا تكدب راسها و تقول ياااربي ميكونش هو ونكون باقا ناعسة وكنحلم ولا كنتخايل ...الهضرة كلها تسرطت ليها وهي كتشوف فيه جالس مانتك على الحاجة ولببس كيف جاا معاه واميمة حداه كيبانو غا كوبل ومواتين شيء لي زاد عصبها نزلت عينيها لحالتها لقات راسها مهشكرة بغات ترجع على طريقها لبيتها تبدل ساعة لي عطى اللع عطاه عينين مراد لمتلهفة ولي كانو كيقلبو عليها ملي دخل شافوها وهي كتسرق شوفات من قنت لحيط ...قال بصوت خشن وشبه ابتسامة مزينة وجهو ~ نادية
هزات راسها فيه وجات عينيها فعينيه هو ضااحك وهي عاقداهم ....ضحكت ليها اميمة وبحالا ضحكت للحيط ...تمات داخلة نادية نافخة ريشها رمات سلام بينها وبين راسها وجلسات حداا عيشة لي نغزتها وقالت بصوت مسموع ~ اويلي ابنتي سيري سلمي مالك باقي قالبك نعاس نهار
حشمتها وملقات مدير ناضت سلمات على اميمة ومدات ايدها لمراد لي وقف ملقي ليها مكرهش يعنقها مدت ليه طراف صباعها وسرعان مخطفتها منو تنهد وريح بحالو وقال فخاطرو بالمهل يتكال بودنجال ...
أميمة لابسة جلابة مخزنية بالحمر ومطرزة بذهبي وطالقة سالف اكسيسورات خفيفة مزيينين اديها وعنقها ومكياج اخف مواتي وجهها ~ لاباس عليك انادية مبروك عليكم البيبي ان شاء الله يجي بسلامة ويكون من ذرية الصالحة
نادية بدون متشوف فيها ~ امين لعقبة ليك
حنحنت عايشة وناضت معاجبها حال من تصرفات بنتها وهضرتها لي بالگرام قالت بزعف ~ اجي معايا انادية ومشات
دخلت لكوزينة متكية على البوطاجي ومعلية حواجبها لسماا كتسنى فيها تجي ...تبعتها كتجر في رجليها ومن عينيها لي دغيا حمارو عرفت طرح ماهواش
عائشة كتهضر تحت سنانها ليسمعوها ~ كون كنتي تاع لعصى نعاود ليك ترابي ابنت كرشي....نادية قالت بعتاب ~ ياك لاباس علاش بسلامة وزايدون علاش معيطة عليهم وانا اخر من يعلم اماما
عائشة شدتها من ذراعها مزيرة عليها ~ اش هاد الاستقبال لي دايرة لناس جايا مقردة حدايا بلاما تسلمي وهازا قنانفك سما تقولي قاتلين ليك ولا ملاقين فين يمشيو وعلاش غنتشاور معاك نسيتي بلي هاداك راه راااجلك ونتي مرتو
نادية حطات ايدها على جنبها ~ ماما ا سبحان مبدل الأحوال ياك هاد مراد هو لي كنتي غتقطعيني من الحالة المدنية على ودو ...زادت زيرت عليها حتى تاوهات ...اي وعتيني
عائشة ~ كنت غنقطعك من الحالة المدنية نهار كنتي مخففة وبوحدك ماشي تا كتسناي نتي وياه ولد ولا بنت ..وزايدون دويت معاه والله غفور الرحيم...ونقولو هو داير علاش ولبنت لي برانية اش دارت ليك كتسول فيك ونتي كتدوي نافخة ريشك
واقف خاشي يديه فجيابو وكيشوف فمدينة بروكسيل من ورا الزاج مضيق عينيه....كان داخل أفخم جناح فأحسن اوطيل فهاد لمدينة....كيرتاح من تعب النهار والسفر والاجتماع لي عقد فيه صفقة العمر ول غتطبع اسم شركتو للعالمية....شحال وهو كيتسنى فهاد نهار وواخا عقلو مكانش معاه حيت مشى مع محبوبة قلبو الا انها كانت هي دافع والشخص لي مفارقش عينيه وهو وسط الاجتماع
داز كلشي كيف بغى وتمنى ،قدر يحصد انبهار الشركة لي غيعقد معاها و لي عجبتهم طريقة خدمتو وكيفاش واثق فراسو
وهادشي مخافيش على زيدان لخليفي كيعرف ليه وبارع فيه ....حل صدفة لافيست ومشى كب ليه كاس وريح راخي عظامو فوق فوطوي والبال مشغول بيها وبشنو كدير وففاش كتفكر وواش قلبها صفى جيهتو ولا مزال كحل ...واش كتفكر فيه ولا نساتو فخطرة مزال كتبغيه ولا حقدات عليه
قلبو معذب وبيدو عذبو هز تليفونو ودخل لگالغي ل فين وفين كيدخل ليه ،كان كيمنع راسو يدخل لديك الجهة ولكن دابا بزز منو ممحيداش من بين عينيه ضرباتو على شعى ومخلياه جالس فبلاصتو تالف ومرفوع وكتبان ليه بين كل جغمة وجغمة بحال لقمرة لي مضوية كحولية قلبو حط لكاس فوق طبلة وحل تصويرة اللولة ليهم
في جنب بعض في ناموسية عض على شفايفو وتنهد بصوت مرفووع ...ضيق عينيه وزوما على تصويرتها كيشوف فيها بتمعن وحب وشوق دوز تصاورهم بزوج كانو عينيها كيبانو فرحاانين ولامعين وهي معاه ...اللمعة لي ختافات منهم من نهار خلاها بحال شياطة تاع زبل مبقى عندو بيها غرض ....زير على يديه معصب من راسو سد تليفونو ولاحو مقدرش يشوف كثر ...دار يديه تحت راسو وحاول يغمض عينيه باغي يشغل راسو لي يدور يدور ويرجع ليها بحالا كيعاقبو ...بلاما يحس رجع هز تليفونو ودوز نمرتها عندو امل يلقاه شاعل ولا يسمع نبرة صوتها واخا تقول غا الو وتقطع عليه ...ولكن لقى غير العلبة الصوتية
نادية حطات صينية و جلسات بزز منها دير صواب شافت بلي كيفما كان الحال راه ضياف فدارها جالسة و ساكتة و عينيها فالأرض مبغاش تشوف فيهم عكس مراد لي عينيه محيدوش من عليها... جات عيشة هازة الحلوى حطاتها و رحبات بيهم و مشات حتى هي جلسات على يمينها نادية و على ليسر كاين مراد و حداه أميمة دوزو كيسانهم و كلشي ساكت حتى هضر مراد موجه كلامو لعيشة عارفها هي لي غتصنط ليه ...
مراد بدا كلامو بلا تقديم ~ ..... خالتي انا جيت ليوم و ناوي نصفي نفوس انا غلطت فحق نادية وانا مقادرش نزيد نعيش بعيد عليها جيت باش نطلب منها سماحة قدامك و لي طلبتها تحضر واخا تكون روحي مرخيصاش فيها
مرا هضر و قال لي فقلبو قدام كلشي واخا نادية دافعة كبير ولكن داخلها فرحان أميمة دخلات باش قلب نادية يرتاح من جيهتها ..~~ انا معتابراكم خوتي وملي عرفت مراد وهو كيهضر غير عليك طرا سوء تفاهم انا جيت حتى لداركم باش نصلحوه و إن شاء الله الا رحبتو بي نكون فرد من العائلة كيفما كتعرفي انا غير بوحدي هنا شنو قلتي ؟؟
نادية كتشوف و ساكتة عيشة جاوبات فبلاصت بنتها لي مزال مبغات تنعل شيطان ~~ مرحبا بك ابنتي في أي وقت
نادية مخنزرة و جاوبات بلعبار ~... انا معندي ما يتقال الا نتا ساهل تنسى انا لا وراه هضرتي قلتها ليك صباح
دارت شافت فيها عيشة مضيقة عينيها~ اشمن هضرة قلتيها سمعيها ليا تا انا نعرفها
نادية شافت في ماماها وقالت جايبة فشوشها عليهم ~ باغا نطلق
مراد تنهد متوقعش جوابها و اميمة تحسرات و تعجبات على هاد قصوحية راس عيشة غرقت فحوايجها و ضارت عندها مكفضة على يديها
عيشة لبقات بنتها على داك لسان لي كيقطر كي سم ~ طلقي !!؟ واش زواج عندك ساهل وطلاق تاهو بحالو... يكما باك الله يرحمو كان سميتو الفريدو وانا ماريا كلارا ...ديري ليا هنا عيشة لميكسيك بغيتو وبغاني حگا طلقنا حگا لاعمرنا تفارقنا شوية انا حاملة شوية مبغيتوش...صباط هو ولا كسوة فعايل المراهقات معنديش معاهم ...بزوج بيكم غتسمعووني مزيان وكلامي سيف عليكم
انا مكنفكر لا ليك نتي لي بنتي ولا ليك نتا... نتا وياها مشاكلكم ضبرو معاها انا كنشوف مصير داك الولد ولا بنت لي مزال متزاد شنو ذنبو يجي لقى باه و مو مفارقين غير حيت وحدة سخن عليها راسها وعجبتها قضية انا غضبانة ...
ديري عقلك راك ماشي مزال صغيرة وقراراتك كوني مسؤوولة عليهم ياك بفمك وقفتي فوجهي وشكرتي ليا هاد ولد الناس وباركة عليا هو ماشي ذنبو ومدار والو ايوا غتحملي گاع العواقب ونهار يدير شي حاجة لي تستاهل متبقايش معاه مغاديش نخليك على ذمتو ودابا لي نطولوه غنقصروه ....غنديرو نهار من ورا متجي بنت خالتك من العمرة ديري لبيسات وتشنعي راك تزوجتي حيت اساس الزواااج هو الاشهار ..قالتها بتحكار...تصورو تصيورات ونعرضو على لحباب وصحاب ولباب يوسع من كتافكم تي وياه متساليني غا نجمع ليك حوايجك ودردبي مع راجلك وتكبرو دماغكم بزوج بلا خوا لخاوي
اميمة ناضت باست ليها راسها وقالت ~ الله يعطيك الصحة اخالتي على هاد الكلام هذا هو المعقوول
نادية كاتمة بكيتها مرضااش عيشة تصبنها وتنشرها حداهم...غيات تدير لعز لراسها وجات مها حداتهم ليها هي عارفة راسها زادت فيه ولكن بنسبة ليها حتى هو يستاهل حيت عاد مكتشوفو متشبت بداكشي لي كيشكل ليها مصدر ازعاج وهو اميمة
تسلتات من حداهم مقجوجة وقبل متكمل الخطوة قالت عيشة بحدة ~ فين غادا ؟؟
بغى يتبعها مراد واشارت ليه براسها باش يجلس تا مشات عاد قالت ليه ~ غا خليها تنفخ تا تعيا وتفش تربيت يدي وانا عارفاها....وتانتا سمعني قدام هاد البنت ربي عطاني شلا ولاد ولكن نادية راه بووحدها راه عينيا بزوج ..نمضغها ومنسرطهاش....راه ماشي شايطة عليا باش نعطيها ليك ...نشوف عليك اقل حاجة متبقاش ليك مرا انا واخا كنت رافضة هاد شي من لول ولكن داكشي فاتني دابا ولحريرة لي درتوها نتوما بيديكم انا لي خاصني نجمعها وراكم....تهلى فيها وديرها فعينيك وكون راجل معاها وعليها وقدامها ووراها وملي نقوليك كون راجل ماشي بهزان لايدين ولا شي حاجة اخرا الرجلة رااه بذرااع والمواقف كتسمعني
مراد زادت كبرات فعينيه عيشة هز ليها راسو بالايجاب محتارم كلامها لي على قلبو بحال لعسل ~ مقلتي عيب
جلسو شوية ورجعت نظمت ليهم نادية لي طول لجلسة ساكتة تحط لعشى لي شكرت فيه اميمة وعودات عجبها طياب عيشة وحمقها وتاهيا مخلات مدارت عليها اما عصافير لحب وحدة كتشوف فيه تحت عينيها وقلبها كيفرفر واخا ممبيناش ليه بالمرة وهو كيشوف فيها بلعلالي ومقدرش يهزها من حدا مها ويمشي هو وياها لشي قنت ويسد عليها حتى تلين ساعا شغيدير فهتلر تاع عايشة
مريام وصلات لمدينة رسول الله و قلبها زاد رتاح نزلات من عينيها دمعة اشتياق احساس عجيب لا يووصف حساتو... تمشي العالم كااامل و كيبقى مكان خااص مختلف في مكة المكرمة و كان اول شيء داروه بعد ما وصلو الفندق لي كان قريب لكعبة و كيطل عليها صلاة المغرب كانت اول فريضة تصليها مريام فهاد الأرض السعيدة عمها رافق الرجال و هي مشات مع النساء
بدلات عليها وخوات راسها وعقلها وعمراتو غير بالايمان وقصدات المسجد تصلي ...دنيا عامرا عيالات من مختلف الاجناس لمنقبة والمحتجبة السمراء والبيضاء
دخلو المسجد الحرام صلاو فيه أول فريضة كلشي متخشع مع الإمام لي كان صوتو شجي يخليك فروحانية مع رب الكون سبحانه وتعالى و نتا كتمعن في الآيات لي كيقرا و هادشي لي كانت محتاجة ليه مريام
كانت محتاجة صلاة ودعاء باش تقرب منهم للخالق ...حسات بباها ايكون مرتاح فقبرو وهادشي لي مخليها تكون فرحانة واخا عندها غصة وتنهيدة فقلبها ....كانت جالسة فالحرم تتسبح وساهية فملكوت الله حتى كتسمع صوت كيعيط
زيدان....زيدان..قلبها تهز من بلاصتو وتفكرت سيرتو....كانت أم كتعيط لولدها ،بلاما تحس دارت شافت فيه ورجعت شافت قدامها بزربة ..رجعت سمعت....زيدان حبيبي تعال ....تفكرت من جديد مرة كانت معاه في طوموبيل كتشطح على ديسك تعال تعال ...تعوذات من الشيطان الرجيم وناضت تصلي زوج ركعات ...وكيف سلمات سمعت اية
" وان تعفوا اقرب للتقوى "
تاجهت للقبلة حاطا ايدها على قلبها وقالت بصوت مسموع
"ياربي اجعل قلبي مسامحا لينا لا يكره أحد قلت لأنك تحب العفو فانا اليوم عفوت عنه قلت و قولك حق ادعوني أستجب لكم اللهم إنك عفو تحب العفو فاعف عنا ، يااارب سامحه واغفر له ......ستمرات في دعائها بلاما تحس قلبها كان ضارها من جيهتو حيت غير تناساتو ماشي نساتو ...قلبها رجع زوين نسات الاذية وفضلت تقوى الله سبحانه وهادي هي حلاوة الإيمان واستشعارها الحب والقرب من الله.
الندم باب الحياء، والحياء باب التوبة
دازو ايام زيدان أعوام... بعد مرجع من السفر حاول يركز في خدمتو واخا عقلو كيخونو ويفكرو في مريام قلبو ،كيحاول وراها يركز بيه يرجعو لطريق ويديها غير على الخدمة لدرجة فينما كان يخدم ويشغل راسو يبدا فشركة ويكمل فدار ....هاد نهار جالس لابس نضاضرو كيشوف فتصاميم مختلفة و يختار وبلا ما يشعر جات فبالو صورة مريام الاخيرة ....نفض صورتها مغمض عينيه بقوة وقال " ركز فخدمتك ركززز يخدمتك " ... لحظات من الوقت و سمع مو كتنادي عليه يجي يتعشا سد الحاسوب و بدا يطرطق عنقو حس بيه تعنز و ناض مشا ل طبلة جلس حدا مو و مقابلة معاه بنت خوه و حداها ماماها لي كانت كتخوي لكل واحد الحريرة فزلافتو مينة عندها العيد نهار يجلس يتغدا ولا يتعشا معاها حيت مولفاه ديما خارج وسهران ليل...الا هاد ليام ستغربات ليه وفنفس الوقت فرحات.. بدا كلشي كيتعشا و كلشي ساكت هادي قاعدتهم حتى تسمع صوت مينة لي كسرت هاد الصمت و بغات تفتح نقاش عائلي عيات وهي مأجلاه
مينة كأي ام باغا تفرح بولادها وتهنى وهما مع عيالاتهم....نصر الدين ولله الحمد امورو تقادات اما زيدان بير غارق صعيب توصل لمااه ...قلبها من جهتو ضارها مكرهتش تهنى عليه وتهز ولادو ، ربعين ودخل ليها والشيب هاهو ساير يغطي يشعرو...وهو مزال مبغى يعمر الدار على قولتها فينما تبغي تفاتحو فهاد الموضوع يسد عليها الباب قبل مدق ....يا اما كان ينوض ويخليها ولا يقلب الهضرة ومزال مقنطات ....هزت ايدها وحطتها على كتافو مطبطبة عليه وقالت بعيون لامعين ~ ..ولدي وعمارة داري ،فرحتي اللولة ومومو عينية ..... حط لمعلقة ومال لجهتها مضيق عينيه بايس ايدها بزوج وقايل ~ ميمتي لحنينة ، نتي هي عمارة الدار وبركتهاا الله يخليك لينا
مينة بفرحة ~ ويخليك ليا ونفرح بيك ونهز وليداتك بين يديا ...قالت بعيون متلهفة مكرهتش تسمع منو لي يفرح قلبها بزيادة.....مزال منويتي اولدي تزوج ؟؟...كيف كتشوف لعمر كيجري ، وبديت نهرم وخفت نموت قبل منفرح بيك
تنهد والقلب عالم بيه غا مولاه قال بعد مباس جبينها ~ الله ينجيك الوليدة ، مزال صغيرة وعاد قلتي بسم الله فدنيا ،نهار يكتب الله شي حاحة غتكون
عرفتو غا كيسايرها وداكشي حساتو من طريقتو دالهضرة ،باينة عليه ماهواش وشي حاجة ضاراه وخا كيبان مكالمي وتابث الارض ولكن جبال ثقال محطوطين ليه على لكتاف ...سدت على موضوع ونهات هضرة بلمسة حنينة دوزتها على وجهو ودعات معاه ~ الله يفرحني بشووفتك فأحسن حال
بتاسم ليها بقهرة ورجع كيتعشى بلا شهية ...هناء عجبوها وبقات غير كتشوف فيهم وتبتاسم مكرهتش يفرحو بيه و ينساو هاد الايام لي دازت عليهم كحلة و دخل الفرحة لدار ...ولكن هو الوحيد لي متعرفش شنو كيضور ليه فراس وما تقدرش تفوت معاه الخط داير بينو وبينها جدار وسور عالي
سالاو لعشى وجلسو في صالون مو وهناء معاقرين مع اية لي تبكي وتنوح وهو مرفوع مكاينش معاهم شحال عاد رد لبال ..شاف في بنت خوه بانت ليه كاعية ومدلية شفايفها معاجبها حال وكتغبن ...هز راسو لمو وقال بتساؤل ~ ماالها ؟؟
مينة كتقاد في زيفها ~ مقلقة اسيدي حيت مغتمشيش لحفلة لي دايرينها ليهم في المدرسة
هناء ~ غدا مغنكون لا انا لا خالتي غادين عند نصر وغيخص شكون يديها ويجيبها غنتبرزطو داكشي علاش مغتمشيش...جرتها لعندها كتحزر فيها ...تمشي معانا نشوفو باباك يا توحشتو
وقف قدام باب دار بطوموبيل ، كتبان ليه اميرة صغيرة لابسة كسوة بيضة وطالقة شعرها والفرحة باينة عليها جايا كتجري لعندو ،
ترجل من طوموبيلتو كيبتاسم تحت منو مشى لباب لور حلو ليها بلش طلع وهو يحس بايدها دارت على رجليه وكتعاتب فيه بصوتها طفولي وكتقول ~ عمو زيدان تعطلتي عليا ،غيكونو بدااو حفلة
حس بقلبو كيضرب هز ايدو متردد وحطها على شعرها كإعتذار منو ليهاا بلاما ينطق بتا كلمة ....جات مينة لعندها لي غا كتشوف وحايرة كيفاش غيتعامل معاها زيداان هاد نص نهار وهو عمرو هز دري صغير فيدو ولا لعب معاه
لا شرا ليه ولا خرجو حدودي مع الكبير وصغير ولي فقلبو قليل فين يتقال على لسانو....هز راسو لمو ومشى لبلاصتو ركب وسد لباب ...مينة ركبت اية وقادات ليها سمطة ووودعتها بحب كاي جدة وحفيدتها ونطالقو
في اتجاه الحفلة...ايادي صغيرة وراه كانو كيصفقو وشعورات كيتلاوحو برائة صغر. لي مكاينش بحالا ،حاضيها من زاجة وكيبتاسم تصرفاتها ربطهم بمريم قلبو كانت هاكدا معاه على طبيعتها وممتصنعاش دايرة كيف لولاد صغار
لي حسات بيه كديرو ..نطقت اية وقالت وهي كتقلب فعينيها ~ عمو كي جيت ،جا معايا لماكيااج
فالاول كلشي جاه صعيب وسؤالها اصعب معرف شنو يقوليها ولا فهم شنو بغات ولكن غير تفكر طباع مريم لي فكرتو فيها يتهدن وحاول يتعامل معاها بحالها داير ليها الخاطر...قال ~ جيتي زوينة... فكرتيني فواحد الاميرة
اية عقلها مشا نيشان لقصص للاميرات ،اما هو تفكيرو وروحو مشى لمريم قلبو لي سلبات عقلو وقلبات سفاه على علاه. وخلات روحوا معلقة فبحور الدكريات لا هو قدر يوصل لبر الامان ولا غرق فماضي ودفنو بقا عايش على سطح بحر حبوا ليها لي هيجوا
رجعاتو اية لارض الواقع وقالت وعينيها كيبريو ~ عمو حبيبي ملي نرجعو من الحفلة ونبغي ننعس اتعاود ليا قصة الأميرة
كتفى بصمت وكجواب...كانو وصلو لمدرسة فداك الوقت دنيا عامرة ووليدات صغار داخلين مع ولديهم ..حس براسو متوثر ،اول مرة يحضر لهادشي وهو من نوع معندوش مع صغار والصداع والموسيقى والمهرجين ،كلشي مخلط حيد لافيست وحل لبار لبنيتة لنزلت طايرة بلفرحة مدت ايدها ليه تحرج وتزير وغير شاف ضحكتها برد
وصلها عند لباب باش تدخل ويسلت من تما وهي تزير عليه وقالت بترجي ولبكية فطرف عينيها ~ عمو دخل معايا عفاك مغتشوفنيش وانا كنشطح
بلع ريقو وحس براسو ضعيف قدامها نزل لمستوى ديالها وقال بصوت خشن ومكالمي ~ عندي خدمة تسالي وتلقايني كنتسناك على برا ...حس بفرحتها لي كانت جايا بيها تلاشات وجات فبلاصتها تقليلة بصوت مغبن بدات تدوي ~ صحاباتي كاين باباهم وماماهم ،وانا بابا عمرو جا معايا غيبقاو يضحكو عليا حيت انا بوحدي ...
وقف على طولتو حط يدو على خصرو وهي حداه لاصقة فيه مبغاش تحرك ،كيشوف صحاباتها كيدوزو من حداها وكيشرو عليها لي معاها باباها ولي مها ،عزات عليه يخليها تدخل بوحدها بحال لمقطوعة من شجرة ...نفسو لحارة خلاتو بلاما يحس شد فيدها وتم داخل مخنزر كيكتاشف لمكان وتيقلب بعينيه ويشوف لمدرسة حتى تمات جايا عندو لمديرة كترحب بيه وتعاود حيت عارفاه شكون ومزيان گاع ،قدمت ليه بطاقة البرنامج ووراتو طابلة ديالو لي كانت مقابلة مع المنصة باش يشوف بنت خوه مزيان حيت مشاركة في رقصات.......تقدم وكلس حطوو ليه ميشرب و كلس تيسمع لاية لي تتوريه فلانة وفرتلانة وناضت بلا عگز جابت ليه صحباتها عرفاتهم على عمها وهي فرحانة وتتنقز وتسولو من هنا وتعاود تجبد ليه هادي من هنا حتى جات الاستادة...مدت ايدها سلمات على زيدان وباست اية وقالت وهي كتشوف فيه ~ هذا هو باباك ااية
اية وهي كتحيد شعر على عينيها ~ لا هادا عمو زيدان
- مع ابتسامة قالت~ متشرفين موسيو زيدان
هز ليها راسو ودات اية ومشات باش توجدها للرقصة لي تشارك فيها
تبعها بعينيه حتى مشى وبقى تم جالس داير رجل على ختها قربات منو المديرة وجلسات حداه ~ شرف لينا تنورنا في مدرستنا اموسيو لخليفي
زيدان تقاد في الجلسة وقال بلاما يشوف فيها ~ مرحباا ، كيف غادا بنت خويا
- بافتخار قالت ~ ماشاء الله عليها اكيد غتورث الذكاء منكم
ان شاء الله نشوفوها مهندسة كبيرة بحال العم ديالها
زيدان كيدوي بلگرام معندوش مع دي وجيب في الهضرة ~ نشوفوها هي شنو بغات ....
- اكيد ، سكتت شوية وقالت ..احم مكرهتش الا كان عندك شي وقيت ورا حفلة ندوي معاك عنظي واحد البقعة ومكرهتش نبني عليها فرع اخور لهاد المدرسة وبغيتك نتا تكلف
زيدان وقف ~ ليوم خويتو من خدمة تال من بعد
نساحب من حداها لقنت معزول جبد گارو يكمي وعينيه ساهين فبراءة الدراري وكيفكر بينو وبين راسو كيفاش عمرو فكر انو يتقرب منهم وعلاش كان حارم راسو من متعة صحبتهم...نغزو قلبو وتفكر ارون وشحال تمنى يكون من صلبو ورجع تفكر نهار كانت مريام بين يدو وجا فتفكيرو كون خلاها تحمل كون راها رجعات ليه بلا هواها...تعود من الشيطان وتفكر وصلة اية لي غتبدا عفس على الكارو ورجع كلس بلاصتو
كلس فبلاصتو حتى كيتفاجئ بواحد من المدراء التقنيين ديال الشركة ديالو جا لعندو ~ اهلا سي زيدان متوقعتش نشوفك هنا ....زيدان مد ليه وقال ~ هانتا شفتيني اش وقع ، جلس جلس !!
جلس حداه وعرف منو بلي بنت. حتى هي مشاركة وتقدر تكون صديقة بنت خوه...لقى لي يونسو ويجيب معاه الوقت حتى بدات الرقصة ، گاع لي فصالة صقلو وعينيهم تحولو للمنصة حتو هو رخى ظهرو على الكرسي وبدا كيشوف باهتمام وتيحاول يعرف اش يدير....شاف كلشي جبد تليفون وبدا يصور فولادو ودار بحالها ...جبد تليفونو كيفيلمي وكيركز على بنت خوه لي كتصرف بلباقة وكل مرة تشير ليه وتسيفط ليه بوسة ضحك بلا هواه وتفكر مريامتو وهادي نسخة مصغرة عليها،شير ليها وكمل على تصاور حتى داز الوقت وسالات الحفلة وسالا صبرو وراسو ضرو وبنت خوه مزال ماسلات جموع واللعب مع صحاباتها ...مشى لعندها وهزها من وسط منهم وهي كلها نشاط وحيوية مبغاتش تسكت نفخات ليه راسو بالهضرة ورغم ذلك غير تيضحك وتيجاوب على اسئلتنا ل خلاوه يكتاشف عالم الاصفال والحدود ديالو
وهو فطريق سايق تاصلات بيه مينة لي عقلها بقى عندو عارفة صبرو قليل مع دراري ،طمئنها عليه وعرف بلي باقين عند نصر ، قلب الطريق ومشى لعندهم ممستعدش يزيد ساعتين اخرين معاها مزال جاهل ف دراري ، دخل عندهم شاد فيها وشادة فيديه والايد الاخرة فيها هدايا الحفل، تعجبو حيت جايين ضاكحين وتنهدات موو وهي كتشووفيه تمنات كون كانت عندو شي بنية ولا وليد لي تزين ليه حياتو " المال والبنون زينة الحياة الدنيا " ...ولكن معندها كيف دير ليه ،صعيب تفرض عليه شي حاجة مباغيهاش ...جلس في الكرسي بعيد عليهم واية غير كاسيطة وكتعاود گاع لي دوزات ..دخل لتليفونو وصيفط لمو تصاورها وفيديوات تاعها ..وقبل ميخرج رجع تيشوف تصويرة مريام بالخف تيستمد منها قوتوا علاما ربي يحن فيه وترجع لعندو
دازو ايام وأيام شوق مريام لعائلتها وولدها زاد وقلبها من جهة فراقهم كان بحال البركان الهائج .....وفنفس الوقت لقات التصالح مع روحها بعلاقتها مع لي خلقها ...سفرها لبيت العتيق نفعها بزاف وغير نفسيتها وطهر قلبها وزادها ايمان واكثر شي ملي تسامحات مع زيدان ولات بينها وبين نفسها طامعة فدرجة التقوى لي وعد الله بيه العافين عن الناس ...كانت اكثر واحسن ايام دازو عندها بعد حبها لزيدان لي مصرة انها تقمعو وتخبيه ومتعطيش فرصة لشيطان قلبنا يطغى ويستحضر المحضور ....ايامها كانو روعة فرحات فيهم واستوعبات انها فقربها من لي خلقها بمال الدنيا
داير صاكها قدامها ومتشوقة تمشي تشري هدايا العمرة ،تم جاي الحاج عبد الله كيف ولات تعيط ليه ،زادت قربات منو وبغاتو لطيبة قلبو كان كيعاملها بحال بنتو وكثر وتا هيا حسات راسها جنب باها....خشات ايدها في ذراعو وقالت ~ منين نبداو اعمي ؟؟
عبد الله خاشي واحد الايد في جيبو شاد بيه بزطامو ليمشي ليه مع زحام ويتشفر وتابعو شلا حوايج موصينو عليهم بناتو ...~ ندورو ابنتي نسولو على اتمنة هنا راه دقان لبرا
قالت ميكون غا خاطرك وكبرات بيه قصدو محلات لبخور والعبايات وتواب من طراز العالي....وهادي عادا لي كيمشي لداك لمقام خاص يجي ويجيب منو ، مريام كتعزل وتحط ليها ولمها ولخالتها ومنساتش ولدها خدات بزايد باش اي حبيب وقريب تعطيه الباروك على وعسى يكون من زائرين ....
عبد الله كان جابد تليفونو كيدوي مع بناتو لي صوتاو يسولو فيه وغا شافوه في محل العبايات بداو يختارو ويتشرطو وفلوسو على قد جيبو
قال بضحك وهو كيمسح لعرق على جبينو ~ اه اه اه نتوما لبنات مكتقنعوش ،هادشي مكاينش غا هنا تال تما ونعطيكم وخودوه
كان كيف قبل بنفس شكل ونفس طريقة لباس مدات منو الاعوام لي دازو عليه لا حق لا باطل مشرفش باقي شاد فراسو ومهلي فيه ، لابس ومقاد وتسبيح كيف ديما فيديه متخلاش عليه...هز حواجبو وقال ممصدقش عينيه ~. صدق من قال صدفة خير من الف ميعاد ..دارت شافت فعمها لي مفاهم والو وقالت ليه ~ كنقدم ليك اعمي الحاج عدنان صاحب بابا الله يرحمو
عبد الله تفكو ملامح وجهو ومد ليه ايديه ~ اهلان اهلان بصاحب خويا ، لاباس عليك اسيدي ، سبحان الله فين كتاب لينا نتلاقاو
عدنان شابك يديه وقال ~ فاحسن مكان ، كيف داير اسيدي كتشبه لللمرحوم الله يواليه برحمتو
عبد الله جاوب متاثر ~ امين ياربي خطانا ولكن ربي بغاه
عدنان عينو على مريام وكيدوي متيقش الحلة الجديدة لي ولات فيها ،كانت فقلبو ودابا زادت تحفرت ~ كان من احسن ناس ولد كرم ودار لكبيرة سوق بلا بيه مبقى يسوى والو ، كان صاحبي وخويا وكنا غنتناسبو
مريام نزلت راسها الارض هربانة من شوفاتو لي مكتحملش ومكرهتش تهرب تا من كلامها لي معندها مدير بيه ....جاوب عبد الله وقال ~ كنتو غتناسبو مفهمتش ؟؟
عدنان هز راسو ~ ايه خطبت لالة لبنات لالة مريام ولكن خطفاتو لموت وداتو ومكملش داكشي ، زيدو زيدو نمشيو نتغداو وندويو على خاطرنا نهار كبير هذا
عبد الله دور وجهو لمريام بانت ليه ماشي على برجها فهمها ومبغاش يخرجها ~ لقيتينا زربانين خاصنا نتقداو حيت ايامنا سالاو هنا
عدنان باسى حيت عاد جا ~ امتى راجعين ؟؟
عبد الله ~ بعد غدا ان شاء الله
عدنان جبد تليفونو ~ طريق سلامة ان شاء الله ...مدو لعبد الله وقال ~ قيد ليا نمرتك نعوضو هاد نهار ونتفكر بيك خويا وصاحبي وحبيبي
بقلب رحب قيد نمرتو وتوادع معاه ، ومشاو وهو مساخيش بمريام لي مشبعاتوش هضرة وكلام
~~~~
وصل نهار رجوعهم وكانو بزاف دناس تيتسانوهم امها لي فرحانة بنتها، دار عمها فرحانين بباهم، نادية ومها لي فخورين بقرار مريم والبداية لي ختارت، واخيرا العاشق التلفان سي زيدان لي كان تيتسنا رجوعها على احر من الجمر سيرتوا انها جمعات ليه حب وتبن، ضرافة وحشومية وكملاتها بالسترة دابا ولاتتبان ليه فين مكان، حتا انو تجرأ وشرا ليها شال من النوع الغالي، وتيخطط ويبلاني كيفاش يقرب ويرجعها ليه ويرهنها بيه، واقف قدام زاج فالبيرو ديالو تيتاكد من وجود اسمها على لائحة المسافير الراجعين لديار المغربية ،فرح وتبسم رجعات بيه ايام المراهقة لي حتا هي مدوزهاش استشعر وتيتوقع اللقاء وشنو ايقول وكيفاش ايبدا وقال وواعد راسو بلي ايرجعها وربي كبير
تجهزات ووجدات شوانطها....وجمعات وراقها حتى هما ، بريق فعينيها كيبان من ويل لويل ، فرحتها ما عاطياها لحد ،لي بغاتو بفضل الله وصلات ليه ...جات لهاد لمكان كتقلب على راحة وهاهيا غادا بيها ، كتحس براسها تولدت من جديد تصالحت مع راسها وبغاتو بعيوبو ومحاسنو...تصالحت مع الماضي ديالها ومبقاش ضارها في خاطرها وحشمانة منو ..لي وقع وقع ولي داز فات ومات وهي بنت ليوم غتنسى كلشي وتعيش بقلب مؤمن نفس مطمئنة وقناعة ورضى وتقرب من الخالق سبحانه وتعالى .....
عبد الله جر باليزتو لي جا بيها وقال ~ واجدة ابنتي شوانطك موجودين ...؟؟كيشوفيها بانو ليه مضوبلين على ثلاتة داكشي كثير قال مندهش...هادشي بزاف موحال يطلعوه ليك
مريام جرت وحدة صغيرة حطاتها حداه وقالت ~ هادي تاعك اعمي ،ديها لوليدات وفرحهم كيف فرحتيني بمجيتك معايا ...
عبد الله حشم من راسو وقال بصوت خافت ~ الله يهديك ابنتي مريم اش كديري؟!
مريام قربت منو وقال مصممة ~ معندي مدرت هادشي هدية لولاد عمي وعمي ومراتو شنو فيها.....بغات تضغط عليه من وثر الحساس وقالت ...الا كان سيد الخلق قبل الهدية نتا غترفضها
عبدالله قال ~ عليه افضل الصلوات، الله يرضي عليك ابنتي ويسر امرك ويجعلك في كل خطوة سلام ، ويجعل توبتك نصوحة يارب وتكون اول زيارة ليك وماشي اخرها
دعاويه كانو خارجين من القلب ودخلو لقلب مريام نيشان باست يديه باحترام وخرجو نظمو لبقية لمشاركين في رحلة قصدو المطار ...انفوا وصلو ووقفو كيقادو الاجراءات وهي تتفاجئ بعدنان واقف فنفس الصف ،رحلتو كانت معاها فنفس الطيارة ، مقدرس يبقى تما من ورا مشافها ستعمل معارفو وحر على نفس رحلتها عارف هاظ الفرصة الوحيدة لي باقا قدامو وطمع راسو بلي مكتاب ليهم يرجعو بزوج ...حتى مد ايدو يسلم عليها وهو يتفكر بلي مبقاتش كتسلم وهو يجمع ايديه وقال ~ لالا مريام
مريام منزلة راسها الارض ~ وعليكم السلام ، اش كدير هنا
عدنان غياكلها بعيتيه وقلبو كيضرب بحال مراهقين ~ كاين شي مشكل في خدمة وضطريت ننزل على ودو .....هزات حجبانها فيه مصدومة من كلامو ومقدرتش تسكت ~ ونتا فنيتك جاي العمرة خاصك تكملها خدمة يوقع فيها لي يوقع تسنى
قال بتوثر ~ لا لا انا جاي هنا على ود شي سلعة وكان ...
هزات راسها بالايجاب وعطاتو بالظهر كتسنى فعمها لي كان كيطبع لباسبور ...
وصل وقت رحلة الكل توجه لطيارة كانت غادا قدامو هي وعمها شادة فيه ممفارقاهش وهو وراها كيسقي عينيه بزينها
شدات بلاصتها وعمها حداها من جهة الشرجم ، حتى كتفاجئ بيه من جديد جاي جالس حداها معرفتها صدفة ولا متقصدة قال بابتسامة ~ ربي كيبغيني على هاد لحساب
مداتهاش فيه سكتات وعمها جوبو باش كدير هنا ساعة سعيدة هادي ،شد بلاصتو جنبها وطمر كيبلاني باش يجبد معاها الهضرة ،طال سكات حتى بدات كتقلع الطيارة سي عبد الله ومع دوخة مقدرش يصبر شرب دوا ونعس.....وهي بقات معاه مصبرة راسها للاسئلتو حتى لقات راسها نساجمات معاه في الهضرة
عدنان بحزن ~ شحال كنتي عزيزة على لمرحوم وكيعاود عليك ديما وفرحان بيك وكنظن فرحتو دابا غتكون كبيرة وهو كيشوفك بشكلك جديد
مريام تنهدات متاترة بكلامو تفكرات باها لي توحشاتو وشتاقت لصوتو وضحكتو ووقت لي كيخاصم عليه ، من نهار خطاها ما لقات بحال واخا مكانش مهلي فيها بحنانو ولكن مكانش كيفوتها وحس كان بدنيا عندها ~ الله يرحمو نتمنى يكون مفتاخر بيا ويسمح ليا ...قالتها بصوت خافت وحزين مع دمعة سبقت كلامها ..
عدنان بغى يزيد يجبد معاها الهضرة حيت لفرصة لي عندو دابا مغتعوضش مرة اخرا ~ شنو الشعائر الدينية لي كديري
عدنان تحمس ~ واا عليه ضربي هادشي على حسابي تانا ناخد معاك شوية الاجر
تشكراتو وطمرات بلاصتها بلاما تبقى تدوي بغات امتى توصل وتشوف ولدها وتعنقو وتشم ريحتو توحشتو بزاف ولي كان مصبرها هنا المناسك لي كدير وانشغالها بيهم ..توحشت نزهة و بلاصتها بقات كبيرة بلا بيها سيغتو عمرها تفرقت معاها لهاد الوقت كامل ، تنهدات وتكات على ظهرها مغمضة عينيها حتى داها نعاس وعينيه حداها كيشوفو فيها بنص
شهر دغيا داز ودازو معاه احسن الاوقات لي دوزات في البيت العتيق وفأطهر البقاء ....وكيف كيقولو البراني عقووبتو لبلادو ... خرجت من بوابة المطار لي دخلات منها كتقلب على راحة نفسية والحمد لله لقاتها خارجة دافعة لباكاج ومعاها عمها خارجين زربانين وكيقلبو بعينيهم على حبابهم واهلهم وعزوتهم وناسهم لي توحشووهم ...خرجو على برا حتى كتشوف مريام نزهة لابسة جلابة بالكاكي وشادة فيديها ارون لي تعلم يتمشى شوية تاهو ملبساه ومقادا ليه ، كاينة عايشة وحتى نادية هازين فيديهم التمر والحليب وكيتسناو الحاجة مريام لي غير شافتهم مقداتش تصبر خلات داكشي وراها وتمات غادا كتجري فاتجاه كمال صغير لي طلقات منو نزهة باش يمشي عند مو ...شافها وعرفها وتم غادي لعندها كيفركل بيديه ويضحك ،بلاما تحس بدات تبكي وجلسات على ركابيها حالة ليه ذراعها كتضحك وتبكي فنفس الوقت ...عنقها وعنقاتو كتبوس فيه بجهالة وتشم فريحتو ~ احح احح ولدي حبيبي توحشتك...ببوسة حارة في الحنك قالت وهي كتشوف ليه فوجهو...متوحشتينيش اماما ها دوي ...
هزاتو ووقفت لقات مها جايا لعندها تعانقو بحب كيحيدو وحشهم من بعض ~ كيف دايرة اماما توحشتك بزااف
نزهة كتبكي بفرحة ~ عاد وليت بخير ملي شفتك على خير ، كيف دايرة نتي اضو عينيا ...بعدتها عليها كتشووف في وجهاا...ضعافيتي شوية لاا
مريام كتبوس فيها وتضحك ~ غير من جهة فراقكم ضعافيت اما مسخيت نجي
مشات سلمات وعنقات نادية وخالتها وكمال مزال كارم عليها توحشها وعرفها وتاهيا مسخاتش طلقو ...سلمو على عبد الله وسولو على احوالو بقاو مجمعين معاه حتى كيبانو ليا ولادو ومرتو وصلو تلاحو عليه وطالت المباركات وسؤال على الحال والاحوال ....عيشة مدات صينية لحليب ونزهة مدت تمر ~ هاكو شربو ان شاء الله تكون زيارة مقبولة ولهلا تحرم اي زاحد من داك لمقام
- جوبتها زوجة عبد الله ~ اللهم امين ...زيدو يله معانا الدار نكملو فرحتنا بيهم لهيه
نزهة ~ نتوما لي ربي ما يله
بقاو مني منك في الاخير كل واحد قصد دارو ، توادعات مريام مع عمها بالبكا ولفات عليه هاد الايام بزاف كان ليها نعم المحرم والونيس رغم مشق وتعب السفر عمرها شافت منو ولا سمعة كلمة جرحتها ولا غيرت خاطرها كان صاحب الكلمة الطيبة وفم بلا عار كيف كيقولو ،وتا هو نفس الشيء مريام بنسبة ليه كانت البنت المرضية المطيعة لي اي اب يحلم تكون بنتو باخلاقها
مريام باست يديه وعنقاتو ~ خيرك عمري نساه واجرك عند الله كبير ، بفضلك لقيت راحتي النفسية اعمي شحال متشكرتك منوفيك حقك
باسها فجبينها وقال ~ قلبك بيض وربي كيبغيك لي خلا اجرك ان شاء الله يكون عندو عظيم ، تهلاي فراسك ابنتي رتاحي وجي عند عمك ،داري هي دارك تانية وبابها مفتوح فوجهك ديما
مريام بابتسامة خجولة ~ واخا اعمي هادي غير البداية ان شاء الله
توادعت معاه هو مشى وهي قصدت طوموبيل نادية كانت مها طلعات شوانط وركبو بغات تركب هي تسمع عدنان جاي كيعيط عليها ~ ياك لاباس اسي عدنان ..قالت مريام
عدنان شاف كمال الصغير ومفهم والو ومقدرش يسول بانت ليه نزهة وهو يلقي عليها تحية وعرفتو وممعرفاتو ... مد لمريام تليفونو وقال ~ قيدي ليا نمرتك على ود برنامج حفظ القران باش نعلمك بالوقت وفين كاين ملي ندوي مع ناس
مقدراتش تقمعو ولا تقول لا ، قصدو شريف ونبيل داكشي علاش حضرت راس وقيدتها بطيب خاطر ومدات ليه تليفون ،فمو كان مشرع وفرحتو فديك الوقت معاطيها الحد ..
فجهة المقابلة كان زيدان كيبلاصي فطوموبيل ...فجنبو على الكرسي بوكي من ارقى الورود وشال من اغلى الماركات
كيف وقف طوموبيلتو وبغى ينزل يقلب عليها واخا معارفش شنو يقول ليها حتى كيتصدم بيها واقفة مع عدنان لي عرفو مزيان ومنساهش عض فكو من لداخل وزير على يديه معصب وهو كيشوف فيها كيفاش كتدوي ومعاه وشدت تليفونو كتكتب فيه ....دخلو شك وهو يعيط لسيد لي كيعرف في مطار رجع تاكد ليه من اسم عدنان واش كان ضمن المسافرين ولقاه كاين ...زيدان تما تاكد بلي كانو بزوج يقدر رجعو لبعضياتهم ، دنيا كحالت فعينيه ،حط راسو على الفولون مصدوم بقى شحال باغي كيستوعب وكيلوم فراسو ...تا خوات دنيا ومشات هي عاد حرك طوموبيلتو موقف غير قدام خلا تيطل على لمدينة ولاول مرة غتخونو دمعتو وتنزل على مريم قلبو
حرك طوموبيلتو وقصد دار تيقلب على مو لي مولفاه جبل ميهزو ريح ...حل باب بيتها عينيه جغمة الدم وعروقو منفوخين ...لقاها تتسلم من الصلاة وهازة كفوفها لسما ، جلس حداها على ركابيه دموعو سايلة من همو ودقتو وكمل عليه حتى منظر مو لي تتدعي معاه ومع خوه فالجهر باش ربي يحفظهم ويخليهم ليها ...حسات عليه ونهات دعائها كيف بغات تنوض عندو تشوف مالو وهو يتلاح في حجرها معنقها من كرشها وكيبكي ...مينة حسات بولدها وعرفات بيه شي حاجة ولكن فضلات تخليه يخوي عاد تناقشو ،حطات ايدها على راسو وبدا كتقرا عليه وهو كيتنخصص بحال دري صغير ،عيا وتلف وملقى غير مو لي تعرف اش بيه قلبو عامر وخاطرو مهول والنفس الامارة بالسوء طغات عليه ،خلاتو حتى بكى وبرد وترخف عاد قالت ~ كيف ما كان همك كبير الله كبر منو نوصيك اولدي بدعاء واحد " ياهمي الصغير لي رب كبير " ....وقرب اولدي من اللي خلقك وطلبو مغاديش يتخلى عليه
كلامها طيح فبالو مريام علاش لتازمات ...عرف انها حطات رحيل وسمحات فكلشي ..زادتو مو كلمات وقالت ~ نوض توضى وحط جبهتك الأرض لي توحشاتها وسجد للخاقك بخشوع غادي تبان ليك نقطة لي نتا كتقلب عليها
والوقت لي تبغي تهضر انا نستناك ...مجاوبش حدو باس كرشها وناض باس ايديها وراسها ...خدات وجهو بين يديها ،باست عينيه بزوج ومسحات وجه وهبطات يديها لجهة قلبو وقالت ~ الله يبرد عليك وينجيك كيف فما برد على سيدنا ابراهيم اللهيب
هز ليها راسو وخرج من لبيت قصد نيشان دوش غسل الوضووء الاكبر مع نية الصلاة وملي كمل سجد للي خلقو وبقى كيستغفر وانفوا كمل ظلم بيتو ونعس دايرها فيد الله ...على الاقل استراح اما الراحة باقي طريقها طويل
تخشات ففراشها بعد نهار طويل عريض دوزاتو وسط لحباب ، هادي تعنق من هنا وهادي تحط ليها تاكل من هنا ، مها تبخر وخالتها ترقي ، تعاود ليهم على شنو دوزات وتوريهم شنو شرات تا داز نهار وجا فبلاصتو ليل
ناعسة فناموسيتها لابسة بيجامة نعاس وفوق من كرشها كمال ناعس مجايب لدنيا خبار ،كانت شادا تليفونها لاوية شال على راسها وكتقرا فسورة نور مع سالاتها وصلها مساج فيه ~ عمرة مقبولة ان شاء الله عدنان
قراتو وحطات تليفون ساهية وكتفكر ..كيفاش حتى تلاقاتو من ورا گاع هاد ليام وواش غير صدفة عابرة ولا قدرهم المكتوب
بغى يرجع يلاقيهم فبعضياتهم من جديد
تعوذات من الشيطان الرجيم وستغفرت الله وناضت قادات ولدها حداها فناموسية وطفات ضو وتخشات حداه خاشياه فيها وكتشم فريحتو لي كانت بمتابة مخدر خلاتها تنعس سيغ بلاص
صبح صباح جديد يوم جديد واحداث جديد
عند فراس لي كان جالس في البيرو و شاد البيسي قداموو و عينيه على صورتها منهار شافها في المحكمة وهي تتهرب عليه كتجاوبو فقط في التليفون خلاتو يتسطى وعقلو قرب يخرج ... حاط حداه قهيوتوو مرة مرة يجغم منها هز تليفونو و دوز ليها الخط وغير سمع صوتهاا حط يديه على قلبو وقال
فراس ~مو عيون كبار و المتلفاني حني فيا وخليني نشوفك
اميمة كانت شاداها الضحكة و تتوجد راسها غتخرج~... انا ممسالياش ا فارس
فراس بزعف ~ بغيتك غا تقولي سميتي صحيحة
اميمة بدلع ~ايه راه الحروف العربية عندي صعيبة by the way غنقطع حيت عندي ميتقدا
قطعات عليه الخط و هي كضحك ..عجبها كشكل و كشخصية حباتو كثر ... هي من النوع لي كتبغي الدري يكون في كلامو كيضحكها اكثر ميقوليها الكلام المعسول ... دارت بروگرام مع راسها بلي غتسالي الخدمة و تسيفط ليه يشوفها وداكشي لي كان بعد مطرقات گاع مسامر لي عندها ركبت في طموبيلتها وسيفطات ليه اللوكاليزاسيون فين غتكون ... اما هو غير شاف ميساجها و عرف مكانها طار طيرة وحدة لطموبيلتووو
دقائق معدودة و كان قدام ريسطووو بلاصا طموبيلتو و دخل لقاها حاطة بيسي قدامها و الايبربودز في وذنيها و قهيوتها قدامهااا مركزة في خدمتها حتى وقف عليها بطولتوو ... جر الكرسي و جلس قدامها حاط يديه على فمو و كيشوف فيها، عنظو مع العيالات وكيعرف كيفاش يجذبهم ليه شخصيتو حرايمية وتصرفاتو احترافية
اميمة .شافت فيه مصغرة عينيها كطلع فيه وتنزل ،حيدت داكشي من وذنها وسدت البسي وقالت~ ... ياك شوية لباس انتا ؟؟
فراس بتسبيل ~ غير كملي خدمتك وخليني كنشوف فيييك
اميمة هبطت راسها تضحك ~.. ساليت ساليت ، نتا لي حيد يديك على قلبك وطلب شنو بغيتي
فراس بصياعة ~ بغيتك غير نتي وما بغيت والو مزال من وراك
اميمة عوجت فمها ~ ناري شحال فيك من هادشي
" هزات يديها ندات على النادل و طلبت ليه نص نص ... هاني طلبت ليك شي حاجة ترجع ليك عقلك لراسك
فراس شد لأميمة في يديها و هضر ~.. تزوجي بيا
اميمة خرجت عينيها فيه ~ ... مفهمتش
فراس ..ااه قلتي عندك مشكيلة ديال العربية بلاتي ...مكانش من العاگزين ناض و تكى على ركابيه قدامها ورجع سولها ... ويل يو ماري مي
اميمة حلات فمها فيييه معرفت متقدم ولا توخر و الناس كتشوفيهم و شي كيصور و شي كيقوليها قبليييي بيه ~.. فراس وقف على رجليك ويلي الشوهة
فراس ~عاودي قولي ديك فراس غنطيح ليك هنا و غير خودي وقتك في التفكير غنبقى هكا تتجاوبي و ماشي مشكيل ركبتي نقطعو باباها من بعد
منين فاق وهو ساهي تيحاول يفكر ويدخل لراسو بانها صافي مشات من يديه ...ناض غسل وخرج لبالكون يكمي هبط جلس مع مو شوية خرج لجردة تا بلاصة مقداتو
هرب من تفكيرو بيها شوية لقى راسو رجع ليه ، كيفاش ضيعها وخلاها لواحد قد باها ، شنو يدير يتراجع يستسلم ، الارض ضاقت بيه ودنيا بانت ليه مظلمة فعينيه حتى سمع مو بصدفة دوات مع هناء وقالت ، مزال باقي الحال غير الواحد يتوكل على الله
كلامها لغير مقصود بيه حسو اعلان ولا جرس انذار كيقوليه نوض ومتفرطش فيها بساهل هي ليك ونتا ليها
طلع لبيتو ولبس لي كان ومن عادتو الاناقة والجمال ركب في طوموبيلتو وقصد دارها ووقف بحال العاشق الولهان لا هو قادر يدخل لعندها ولا يقرب منها
زفر باعلى صوت وحيد السمطة ونزل قرب لباب بغى يصوني وجمع يديه متراجع ومقادرش يواجه شنو غيقوليها ؟؟ رجع لطوموبيلتو ورجع ساهي وتيشوف فلفيلا ديالهم حتى كتبان ليه خارجة توصل شي ناس لبرا كانت كيف لملاك وسط من قفطان في البيج وحجاب لي زادها نور على نور نطق وقال بلا هواه ~ اللهم صلي على الحبيب المصطفى
سهى وفهى فيها كيشوف كأنها ملكو وديالو ، رد ليها لباب كيفاش سلمات على لعيالات وكيفاش شيرات وهزات راسها لرجال من بعيد باش متصافحهمش هنا خربقات ليه مخو ومحس على راسو تا نزل من طوموبيل ، كانت غادا داخلة لدار بعدما ودعتهم ومشاو حتى بان ليها هبط ووقف قدام طوموبيل شافت فيه وحدرات عينيها وهو يعيط ليها باسمها وجاي كيقرب
مريام تزنگات وطلعها سر ، قالت بصوت خافت وهي كتشوفيه وغالبة عليها الحشمة ~ نعام مالك اموسيو زيدان
غير كملتها زادتو الصاع صعين الطريقة باش هضرت والحشمة لي طغات عليها والسر لي كسا وجها ،حمقوه وتلفوه على كاع داكشي لي كان جاي عليه وداك مقدمة بن خلدون لي كان عازم تسامحو بيها ...بدا يعرق ويحنحن ويحاول يجمع كليمات باش يعرف ما يقدم وما يوخر ..وهو ينطق بعد اخر تحنحينة رطب بيها حلقو ودوز يدو على شعرو ~ احم جيت سولت بغيت نقول جيت عندك بغيت نبارك ليك العمرة !!
تبسمات بسحر وقالت ~ الله يبارك فيك
عارفة فنفسها متدوز عليه تا حاجة وخبارها فراسو من جهة فرحات واخا كتبغي تقمع راسها بلي كلشي سالا ومن جهة قالت اعوذ بالله من الشيطان الرجيم وستدرك الموقف وقالت ~ شكراا نخليك
كيف ضارت بغات تمشي وهي تسمع صوتو تيقول ~ الله يسامح امريام، هدا الله ايلا كنت انا اديتك وضريتك ودوزت عليك المحاين فكوني اكيدة ربي نتاقم ليك شر انتقام لا انا عارف نلقا راحتي لاف لفياق ولا فنعاس عيني حرمات تكحل بالنوم من نهار وقع لي وقع فوقت وفلحظة طيش وغضب ظنيت اني غادي نبرد حرقة عمتي ولكن لا غير زدت وقيد على وقيد وداك الحقد ولا عذاب
بتنهيدة ...مريام ،راني معارف لا حلاوة النعاس ولا دفا اللمة مع الحباب ..ليام ولات بحال بحال عندي ...حياتي ولات كفس ملي كانت رفيقي الكاس وونيسي الذكريات... حني وبردي هاد النار القايدة فجوفي وعتقيني لله راني قلتها وتنعاودها ليك ربي خدا ليك حقك تاني ومتني ، وزرع فقلبي حبك لي تمكن مني وشل حركتي وجه الله لي زرتي مقامو... الله ا مريام لي هو لي خلقنا، وتنعصاوه، ومع دالك غير تنطلبوه ونستغفروا ليه تيغفر لينا ويقبلنا فرحابو ...بغى يمد يدو يشد فدراعها يدورها عندو ومقدرش هيبتها ولات فشكل وخايف يوسخها بيديه ،قال مزير على سنانو ...ضوري عندي
تصدم من شنو كيسمع كيفاش كاع لي دوز عليها وسمحات ليه ولكن متعجبش هادي هي مريم قلبو القلب لحنين والبيض نقطة البيضة فقلبو لكحل .. كملات عليه ملي قالت تسنى هانا جايا ....دخلات لدار طالعة كتزرب لبيتها خدات من باليزة وحدة من العطور العربية الغالية لي شارياهم بلاما تعرف لمن خدات صلاية وتسبيح ودارتهم فبوشيط شيك ونزلت عندو لقاتو مزال واقف فين خلاتو مداتهم ليه وقالت ~هانتا اسيدي المسامحة وفوقها كادو !!
شدهم من عندها وهو تالف عينيه كيجولو وسط بحر عينيها وقال بصوت هايم فيها ~ قلبك كبير وداكشي علاش بغيتك
حنات راسها وهو يستدرك الموقف وقال ~ بلاتي تا انا عندي ليك شي حاجة
مشى تيجري لطوموبيل وخدا الكادو لي كان شرا ليها اما تا الورد راه ذبل بحالو ...رجع لعندها وقال ~ حتى انا نتمنى تقبلي مني هادي
مد ليها بوشيط لي غير شدتها وطلعت معاها ريحتو لي كانت كتحمقها وتعمد يرشها على شال باش يفكرها فيه ويقوليها انا كاين
الحب أقوى من أي إتفاق الجزء 17
محتوى القصة
التنقل بين الأجزاء