الحب أقوى من أي إتفاق الجزء 20

نفس المصحة ولكن ماشي نفس الغرفة ..هاد المرة شامبرر مغاير على لي كان فيه..هذا ڤي آي بي تحلو تفهى فيه ومتقولش جا فكلينيك فيه بيت نعاس وجليسة بتلفازة لزوار وكوزينة صغيرة مع دوش اخر مكاين مجهز بكل ما يخطر على البال

اطلالتو كانت كتفتح النفس وكتريح البال هادشي كلو غير باش سي زيدان يبقى على خاطرو ويتكالماا ...بطلب من طبيبة وبأمر من مراد نتقل ليه

باش يكمل فيه الايام لي بقاو ليه ..ليوم هو نهار الخامس ليه ورا ما فاق ...بدا حصص الترويض الطبي لي كيدوزو عليه ثقال بحيث متقبلش انو يولي ف هاد الحال ...نساا انو قضاء الله وقدره قوى منا ومنو ...سالا من ترويض لي كيستنزفو طاقة وجهد تكى على سريرو عيان رجليه مزال ضارينو أما ايديه شوية ، كان لابس سيرفيت جديدة شراها ليه مراد على قياسو حيت حوايجو ولاو كيجيوه عراض ...على راسو داير طاگية سخونة مدفي بيها ..عوناتو مينة حتى مسح وجهوو وكلى شوية ورجع تما...أيامو في سبيطار ولاو كيبانو ليه كحلين مافيهم ميتشاف ، غا مجبد ومكينفع مكيضر على حساب مفهومو، صعيب لشخص حركي وامتيف يشد لفراش....تحل الباب ودخلت اية كتجري لعندو وكتنده عليه بلهفة وفرحة ~ عمووووووووو انا جيييت !!....بغات تلاح عليه وهي تشدها مينة ~ بشوية ابنتي عمك مريض

اية هزات كتافها بطفولية وبنبرة حزن قالت ~ باقي فيك ديدي اعمو زيدان ،مزال مصحيتي

مد ايدو لمينة وقال ~ حطيها حدايا الواليدة ...داكشي لي دارت باسها وبغج حناكها وهو كيقول ~ شفتك جيتي رااسك عندي كبرتي زعمة ووليتي تعولي على راسك

خشات راسها وسط كتافها وبدات تضحك وتلعب بشعرها ~ سبقتهم اعمو باش نشوفك انا اللولة

تحل الباب ودخلت هناء كتنهج ونصر عقلو خاارج وصاعر كيف شافها تما كان غيطير عليها يضربها ~ علاااش كطيييري علااش ...منعو زيدان يقرب منها ~ حيد يدك على لبنت مالها اش دارت گاع....جوبتو هناء لي كانت كتاخد انفاسها فوق الفوطوي ~ اش غنقوليك اخويا غير وقفت طوموبيل حلت الباب ونزلت متسناتناش عقلي بغى يخرج وانا تابعاها نجري خفت غا توضر ولا يديها شي حد

اية بصوت باكي ~ انا عاقلة على بيتو اماما منتوضرش

غمض زيدان عينو لخوك بمعنى صافي ميك وخلي عليك البنت وداكشي لي كاين دوزوها ليها ونساو وبقاو عليها تا نشطت وطلقت منها الخلعة لي ركبتها من باها ...كانو كيدويو ويتناقشو وهي كتجبد ليه في الرسمات لي قادات ليه وتعلق في الحيط متبع ليها عينو وكيتبسم وعاجبو الحال كلها كتجي لعندو كتفوج عليه

بقاو ساعة من الزمن هما وياه قبل ميجي طبيب النفسي ويضطرو يخرجو....كانت هادي هي جلستو الثالتة فهاد الاسبوع ..لجلسة لي كيخوي فيها قلبو وكيقول گاع لي ضارو ...خلاوه معاه وخرجو على برا ....نصر دا مرتو وبنتو ومشى لشركة اما مينة كانت هازة تسبيح في يديها وجالسة وقدامها كويس تاع اتاي ...تحل لباب من جديد وكان هاد المرة مراد لي جاي ومجايش خاوي ..هاز ومحمل

كاع داكشي لي كيعجب صاحبو جايبو ومنساش مو الروحية بان ليه باب للغرفة مطرق عرف عندو شي جلسة ومشى ريح ليه حدا مينة ودار شرع ايديه وكب ليه كويس يرد بيه لمجاج ...قال بمزح~ شي جلسة مغلقة عندو ، مدخل شراب بعدا ولا نمشي نجيبو ليه...ضربتو لراسو وستغفرت الله ~ الله يهديك يا هاد الولد راه عندو طبيب النفسي ...مراد حط الكاس ونطق ~ لي سمعكم يقول مريض فعقلو ،ساعاتو لله شحال عزيز عليهم هاد الاطباء يزيدو فيه ،سيد تخنق وريح عقلو دغيا ردوه مريض ....كتفات تحرك ليك راسها بمعنى لا حول ولا قوة الا بالله وفمها خدام كيسبح ...بقى مرة يلعب بتليفون مرة يطل من شرجم مرة يدخل لكوزينة مرة يمشي حدا باب يتصنط حتى سالات الحصة وخرج الطبيب لي كانت باينة على وجهو معاجبو حال مشى ريح وستفسرت مينة على حالة ولدها كيف ولات وهو يقول ~ معندي منخبي عليك الحاجة انا خاايف لا يرجع ينتاكس

مينة بخوف ~ علاش اوليدي شنو خلاك تقول هاكا ،حنا دايرين معاه كثر من جهدنا

طبيب دوا انطلاقا من كلامو معاه ، حس من جلستهم انو زيدان كيقلب على شي خبار على محبوبتو وفكل مرة كيبغي يسمع شي حاجة عليها وهما جامعين وطاوين كأنها مكايناش وفنفس الوقت خايف يسول ويزيد يتازم الا عرفها مبقاتش ليه ..قاليهم بصريح العبارة ~ هادشي هو مكافيهش باغي شي حاجة اخراا

فهم مراد لشنو كيلمح وهو يتدخل وقال ~ ممكن نقوليه بلي لبنت ل كان كيبغي فسخات خطوبتها ومتزوجااتش

بتاسم وقاليه بتاكيد بحكم عارف القصة ~ اكيد شنو كتسنى لدابا

مراد ~ صافي كوون هاني هاد الموضوع عندي

وداكشي لي كاان في حوار شيق لكل من زيدان ومراد نطق هاد الاخير وقال ~ مريام متزوجاتش اخويااا !!

خرج عينيه ممتيقش شنو سمع ...عافر تا تقاد في الجلسة مزياان وقال باستفهام ~ عاود شنو قلتي مسمعتش ...ضرب على كتفو مراد وحرك ليه راسو من لفوق لتحت وقاليه ~ مرياام فسخاات الخطبة ،مكملش زواجهااا...يعني اصحبي طريقك خاوية ...لمعو عينيه ورجع ليهم البريق لي غاب مكرهش ينوض داابا ويمشي لعندها يشبكها بيه قبل مطير من بين يديه من جديد ..قال ملهووف ~ مرااد كيخصني نخرج من هناااا

حمر مراد عينيه فيه ~ معندك فين غادي الا موقفتي على رجليك ...سمعنر اصحيبي نقوليك الا بغيتي تخرج دير حصص الترويض لي كل مرة مأجل ها مرة معصب على الممرضة مرة مجري عليها ..ولي شوية وساعف معاهم وديك ساع انا نخرجك بيدي من هنا ...ضغط على كتفو ،يله اخويا الله يرضي عليك بغيتك معايااا واقف فجنبي فالعرس ميحلاش ليا بلا بيك ...حرك ليه زيدان راسو بمعنى كون هاني وهو كلو أمل ورغبة باش يبدا من اللول ويحارب راسو ومرضو ولشنو وصل ويرجع يوقف على رجليه ويولي حسن من قبل

من داك نهار وهو ضاغط على نفسو في ترويض وكلو عزيمة انو يرجع يتمشى حالتو النفسية تحسنات وهادشي بان على وجهو ...بنيتو الجسدية مزال متكتاسبات ولكن كلشي مع الوقت كيتقاد ،الاهم انو ولا

عارف اش باغي و طريقو وضاحت قدام عينيه باغي محبوبتو ليييه و غيدير اي حاجة على قبلها ... و الحاجة الاولى هي ينوض صحيح فصيح كمل الترويض ديالو وولا كيديرو تلاتة المرات في الاسبوع حتى قرر الطبيب الفزيائي ديالو انو ينوضو على رجليه و يخليه وسط جوج حديدات شاد فيهم ومعاه زوج فرمليات معونينو ...كان كيتمشى حاط يديه على زوج حديدات يحرك رجل ويثقل لوخرا بنت مكالياه من هنا ولوخرا من لهيه ...ومراد من بعيد كيفيلمي فيه كيف عاقد حجبانو ووجهو عرقان لابس لباس خفيف وضاغط على يديه بعزم باش يولي مزيااان

نادية من ديما حلمها دير عرس كلاس ويبقى فالبال ، وكانت عينها على متعهد حفلات معروف وغير شكون وشكون كيجيو عندو ،كان كيوقف على العرس وكيقومو من تمر والحليب حتال تقطاع الحلوة بصدفة عرفاتو صاحب مراد كان كيسهر في الكلوب عندو حتى ولاو صحاب ....ملي عرفتها وهي تابخاه فراسو ولاصقاه باش يديها لعندو وبحكم ظروف لي كان كيدوز منها زيدان والخاطر لي كان هارب ليه في مرضو والوقت لي مكانش عندو كل مرة كان كيقول ليها ليوم غدا ليوم غدا وكينسى...تقلقت منو وهزت في خاطرها عليه وتاهيا ميكات كيدوي معاها وكتجوبو بنص كلمة محكرش وكان كيدير عين ميكةة عارف لافوت فيه وتشطن عليها فوقت محتاجاه فيه ولكن حجتو أقوى ...

داك نهار كانت جالسة فدار بحكم توجادها للعرس مبقاتش كتلقى الوقت للخدمة غير هازة تليفون وكتشوف في لبيسات للحنة لي غتكون ليلة قبل ...كتقلب من صفحة لصفحة حتى صونا لباب

سمعت صوت عيشة قالت ليها ~ غير جلسي انا غنحل غتكون غير مريام

وبالفعل كانت مريام هي وكمال شاداه من يديه غا شاف عيشة تماطا ليها وبدا يفرنس ..سلمات على خاالتها ودخلت كتدوي وتسول ~ كيف دايرين مع شي توجاد وفين وصلتو ؟؟

عيشة هازة كمال عندها وغادين لفين جالسة نادية ~ خلي داك الجمل راگد ومتفيقيهش بالحق جابك الله تجلسي تعونينا ودير معايا يدك هاديك راه مرفووع عليها القلم

ميقت فيها نادية لي وصلو لعندها وقالت ~ علاش لي مرفوع ليا القلم ، هاد الساعة باقا بعقلي ومحضراااه

حركت راسها بشكل دائري وقالت ~ امنين ابنيتي منين ، فين هي مك امريام ؟؟

مريام حلت الزيف ~ شوية تجي انا كنت بكمال عند طبيب سنينات دايرين ليه حالة ومرض وخفت عليه ...قالت بتساؤل وعينيها كيقلبو ...مراد مكاينش غا نحيد الزيف ؟؟

غير سمعت سميتو قلبت عينيها وميلت فمها بمعنى معرفتش ...وهي تهز ليها مريام حاجبها وكتضحك ~ امالك مخاصمين تاني ؟؟

قالت عيشة وهي واقفة ~ باز لداك دري معاها يحسن عوانو قهراتو ...هزت يديها كتزاوگ...ها لعار رخفي عليه ونتي قاجاه سيد محليتو لخدمة ولا لسبيطار وزايداه نتي بشغل لعيالات

نادية بعصاب ~ صافي اماما قلبي سيرة ...جوبتها بنفاخة ~ نمشي نكمل لغدا حسن ليا حيت غنصدق ناتفاك

مشات عيشة وخلاتها منها لمريام ~ شنو واقع ماالكم ؟؟

نادية تنهدات وبدات تدوي دايرة فيها فگعانة ~ غا بوحدي اصحبتي لي كنطير ونزل تگول عرسي انا وهو لا ، ميت مكاينش هنا ..نكونو دايرين نمشيو بلاصة ينسى ولا يخليني نستنى طلع ليا دم وكون ما ناس لي فخبارهم هادشي ندير بناقص

مريام ~ نعلي شيطان اصحبتي هادشي تاع لعروسة نتي قلبي ونتي ختاري اش بغيتي بيه هو وزايدون مغاديش يتشغل على لفاضي ضروري غتكون شي حاجة مهمة

ناظية ~وشكون من غيرو زيدان وليت نغير منو ، كون وقع ليا انا ما وقع ليه موحال يدير عليا مراد هادشي

على ذكر سيرتو بلعات ريقها وجا فبالها لكلام لي قال مراد ،بغيت لما ومريام

منعات راسها صحة انها متمشيش لعندو ومتزوروش بالها كان مشوش عليه بلا قياس...شحال من مرة كتبغي تعيط تسول فيه وكتحشم ودير بناقص ...الحاجة الوحيدة لي كانت مصبراها بلي ولا شوية وكيتحسن ....حركتها نادية من رجليها ~ افين سرحتي اشريفة ، فيه ياك

كانت عايقة بيها وبزاف حيت واخا تخبي هي ردة فعلها ملي كتجبد سميتو كتفضحها

غيرت الموضوع وقالت ~ نوض نشووف كمال اش كيدير شفتو قطع الحس

دارت بيه السبة وناضت من حداها اما ولدها عارفاه مع عيشة رادا ليه البال ، مشات لعندها لقاتها عاطياه دانون كياكل فيه بقات كدوي هي وخالتها على امور العرس تا سمعات صوت نادية كينادي عليها ~ تلهيت معاك بالهضرة ونسيتها

عيشة بدات تضحك ~ واسيري دابا تيري فيك راه ولات على سبة

رجعت لعندها وجلست هي وياها يتشاورو ويختارو في لقفيطان لي يليق ولي لا ، داز بيهم الوقت جات نزهة لي تخشات مع ختها في الكوزينة كلها علاش كيدوي حتى وصلت وقيتة لغدا ...سمعو سوارت كيحلو الباب لاحت مريام شال على راسها دغيا وتقادت في الجلسة وهاهو دخل مراد غير شاافها وفرح بمجيتها هي ولدها سلم عليها براسو وباس نادية في حنكها واخا نافخة وجلس حداهم حاط كمال على رجليه ~عاش من شافك نهار كبير هادا

مريام بابتسامة ~ نتا لي غابر اما انا ديما هنا ....هز ليها راسو وقال ~ راك عاارفة شطنة لي كانت عندي بالحق دابا الحمد لله

من باب صواب سولاتو وقالت ~ حم كيف بقى بعدا شوية !!

مراد بفرحة ~ بخير حالتو نهار على نهار كتحسن ، ولا شوية كيوقف على رجليه ، نقص من العصبية ، وقطع لبلية وزيد وزيد

هو كيدوي وهي مبغاتوش يحبس كانت حادرة راسها وكتسنط وفقرارة نفسها فرحت ليه وبزااف ...دور راسو لنادية بانت ليه خاشية راسها فتليفون ودايرة فيها معلاباليش بيه وهو يضربها بخفة وقال ~ امالنا ؟؟

عطاتو مَشِي ونخلاتو ، بمزاح قالت مريام ~ شنو درتي ليها اصگع ؟؟

قوس حواجبو وهو يتفكر هز كمال تا وقف وجبد تليفون عطاه ليها ....كان ديجا تكلم مع صااحبو ولي رسل ليه كاتالوغ تاع تزيين في واتساب باش يختارو على تسااع ....مدو ليها وقال ~ راني گعما نااسيك غا كوني هانية ، ختاري لي عجبك !!

فرحت ومبينتش خداتو من عندو زعمة غا دايرة ليه الخاطر ...بقات كتشووف ديكور بخوه اما هو هز كمال وخرج هو وياه .....بقات مع مريام يشوفو كل تصويرة على حدة حتى سالات وبداو يقررو

مريام ~ انا عجبني ديكور لي في لڤيولي ودوغي عاطي للعين

نادية باستفهام ~ اشمن واحد ،مدات ليها تليفون وريه ليا ؟؟

خداتو من عندها ودخلت لگالغي وكيف فتحاتو بانت ليها تصويرة مريض واقف بزز على رجليه بمساعدة طبيبة ...قلبها بدا يضرب وبلاما تحس بركات على الفيديو وهي تفاجئ بزيدان

قلبها بغى يسكت ووجها تزنگ وسخن ايديها عرقو وبداو يترعدو خرجات فيه عينيها ومتيقتش بلي زيدان هذا ...تبدل وحناكو دخلو... قلبها وجعها عليه وهادشي جامي تمناتو ليه ...بقات شحال حاضياه توحشاتو وهادشي مقادراش تنكرو حيت قوة مشاعرها لي عندها ليه بدات ترجع تبان وطغات على كمية الحقد لي تولدت زمان ليه

جو سبيطار لي مكانش حاملو تهنى منو بعدما تعاون مع الاطباء لي اشادو بتحسن حاالتو وقررو يخليوه يكمل ترويض ودواه فداار ....من غير هادشي كان كيحاول يتغلب على المشكل ديال الادمان وتيتعاون مع رااسو باش ميوليش ليه مرة اخرا رغم الالم ورغبة لي كان كيحس بيها ...ونفعاتو تاا الخدمة لي ولا مراقبها عن بعد من بيتو غيرت من نفسيتو ...كان كيحضى باهتمام لكل حتى من اية غا مخشية فيه مفايتاهش ومراد صباح وعشية حداه ..على ذكر هاد الاخير تجهيزاتو هو ونادية للعرس مازال متواصلة وصل الوقت ومبقى والو ، المتعهد لي عجبها شداتو والضياف تعرضو

وهاهي اليوم خارجة مع مريام باش يختارو لبيسات ديال لعرس من الدخلة حتال الخرجة كانت فرحانة بزااف حيث داك الشي لي كانت كتحلم بيه هاهو كيتحقق قدام عينيها

شنو بان ليك امريام هاد لقفيطين للحنة !! زوين ياك ؟؟ عاطي للعين ...بعيون معجبة جوبتها ~ غيجيك غزاال ما شاء الله

- كاين حتى بالگروونة الالة تبغي تشووفيه تاهو طوندوس وكياخدوه ناس بزاف

بنفي حركات ليها نادية راسها وجوبت ~ بغيت داكشي تقليدي ديال زمان وبغيت برزة لحنة تكون بالخضر الملكي

- يعني ختاري هذا ! تبغي تقيسيه

جوباتها بلا ~ مافيا لي يقيس اكيد غيكون على قيلسي وزايدون نتي غتقادييه باش يجي مواتي

دارت شافت في مريام ~ ختاري شنو تلبسي

بدات كتشوف في لقفيطان لي مشكلين واحد ينسيك فتاني كلها وفصالتو ،كانو كيفتنو ويديو لعقل الا عقلها هي لي كان مجلي فقنت اخور ، كتختار وهازة فخاطرها مرة تفكر لبنات لي كانو دايرين بيه مرة يبقى فيها راسها وتمنى تاهي كون كانت فبلاصة نادية وتفرح من قلبها وتزوج بلي كتبغي ومرة تفكر حالتو وصحتو لي كانت هابطة وتمنى كون معاشوش داك المشاكيل كوراها مسانداه وواقفة فجنبو

قتلها تفكير وتخمام ستغفرت الله ودعات معاه وحاولات تبث راسها ومتخليش شي حاجة تنغص عليها فرحتها ببنت خالتها

"حنيو لالة حنة وحناني لالة لعرووسة بجاه العالي .....حنيو لالة حنة وحناني لالة لعرووسة بجاه العالي "

وصل نهار لحنة ل بغاتو عيشة يكون بحال زمان بتاويل والقاعدة وتحميرة لوجه ....عرووستنا كانت كيف شمعة مضوية كتفتن بداك لقفطان لخضر ..مادا يديها كتحني وعزبات شادين وراها صف ...دنيا عامرة بالحباب والصحاب ...زغاريد محبسوش وعلام لفرح معلق في دخلة الباب ....كلشي واجد وكلشي كاين وكيتسنى دفوع يوصل ...واقفة عيشة كترحب بناسها وضيافها لي جاو يشاركوها فرحتها لابسة تكشيطة بيضة ولايحة عليها شال مزينة راسها بذهب ووجها بالكحل وهي زينة وداكشي زادها جمال فكتافها وفجنبها نزهة لي مشمرة على ذراعها وواقفة وقفة راجل مع ختها كاشوف لي ناقص ولي خاصو يتحط وواش كلشي مرتااح

اماا مريام الزين الفتان كانت لابسة فراشة بلون فاتح وعلى راسها شال وجهها فيه مكياج خفيف حتى تقربي ليها عاد تلاحظيه كانت كطير من بلاصة لبلاصة تدي هادي وتجيب لوخرا وعينيها على بنت خالتها لتحتاج شي حاحة وبالها مع تليفون كتسنى فمراد يصووني ...

سمعتهم كيعيطو عليها ودخلات لصالون لي مطرطق عيالات نص فيهم ناشطين وربع حاضين شكون هادي وشكون ديك ...قربت من نادية لي وجهها كان مخبي بشبكة بدوغي ، سالات النقيش وبغات مريام تحني وراها داكشي علاش عيطت ليها كيقولو فال زين ...جلست حداها وختارت شكيلات خفاف زينات بيهم يديها من لفوق كيف سالات صونا تليفونها كان مراد كيعلم بوصولو ، سكتو الموسيقى وخرجو تعرضو لدفووع هازين لمراش والورد مرحبين بضياف الله.....كان لابس جبادور بالخضر ملكي وهاز فيديه الورد فجنبو ليمن مينة لي هازا صندوقة عامرة باكسيسوارات من الذهب وعلى يسارو اميمة هازا طيفور مشكل ...فرحتو باينة على وجهو ، صلاة على نبي مكايناش لبنت لي مشافتو ومحلاتش فمها فيه زوين قلبا وقالبا واتاه البلدي ورزانة لي رزن جات غا معاه ...من غير مينة و اميمة لي طارت ونزلت ولغات لي قدامها ولي وراها وجات تحضر لنهار خوها وتكون معاه فرجاال كان نصر الدين ومراتو هنااء وبنتهم

هادي هي عائلتو وناسو لي فرحان بوجودهم جنبو ...تلاقات ليه عيشة باستو فجبهتو وباسها فيديها عزيز عليها بحال ولدها ومخيراه على بنتها رحبت بيه وبناس لي جايين معاه دخل وتبعوه دقايقية ولهزازة ل كانو منشطين لجو

شي كيشطح شي كيشالي بيديه مراد تقدم لعند نادية هز ليها شبكة باسها وجلس في جنبها اما اميمة وعيشة تشادو وبدااو غنيها وشطح عليها ..كلشي ناشط من غير وحدة لي عينيها كيقلبو على زيدان جاتها عجب كلشي يجي الا هو فلخر قنعات راسها بلي هو مريض مغاديش يجي زيد عليه معندوش مع المناسبات وكثرة الجوقة .....تحطو طيافر فقلب الصالون لي كان مقادين على حقهم وطريقم من لحوايج داخلية حتال شكلاط ...خداو تصيورات مجموعين شطحو ونشطو وملي سالاو تعزلو رجال فصالون بوحدهم ونسا بقاو بوحدهم مكملين على شطيحهم

الاجواء كانت كيف تمنات نادية ، كلشي ضاحك ناشط ومكبرة بيهم عيشة وفرحانة لمجيتهم... شعبي عند لعيالات خدام والامداح عند الرجال وذن لعشا وناضو رجال لبلاصة موقرة باش يصليو ..مراد بانت ليه مريام واقفة جاا لعندها مسرع وقال بطلب ~ ختي مريام شوفي ليا شي كرسي يصلي عليه زيدان مبغيتش نخرج نقلب حدا لعيالات

خرجت عينيها وتصمكات كيفاش زيدان امتى جا وفيناهو وعلاش مشافتوش ، بقات مكوانسية فبلاصتها حتى عاود عيط عليها تاني ~ واا مريام وااش سمعتيني ..بارتباك قالت ~ هاا اه واخا تسنى انا جاايا ...مشات كتقلب ومرفووعة لقات كرسي في الكولوار خداتو وعطاتو ليه تبعات ليه لعين فين مشى بانو ليها تعزلو في بيت مصافين غادين يصليو ، بدون شعور قلبها تحكم في رجليها وخرجات لجردة كتسلت لبلاصة مقابلة معاهم بدات كتطل من بعيد وكتبهون حتى بان ليها داخل بشوية وشاد فخوه بلاما يبين بلي مستند عليه ...حلت فمها ونسات راسها وبقات كتشوف فيه ولاول مرة غتشوفو بالبلدي لي واخا ضعاف واتاه ...ملامح المرض كانو باينين عليه ، موعاتش على راسها وبقات نابتة تما حاضياه وكتشوف فيه كيفاش مخشع في صلاة على جنبو ليمن خوه وفليسر مراد فرحات ليه بزاف حيت بدا يصلي وتصدمت كثر ملي شافتو مقدرش يسجد كون ما الكرسي ..بقى فيها بزااف وندمت ل دعات فيه فلحظة الضعف وهي عارفة بلي دعوة المظلوم مستجاابة ....بدون ملل بقات مقابلاهم حتى كملو حسات بفرحة المُراهِقة مريام نهار بغات زيدان

بانو ليها غادين راجعين لصالون عاد وعات على راسها ودخلات حتى هي حتى كتفاجئ بيهم جالسين فواحد لجليسة ومعاهم أميمة لي اول مرة غتشوف زيدان وتعرف عليه ...كانت جالسة في جنب مراد وشادا فيه بهضرتها وكتدوي مخاطبة زيدان بعفوية ~ الحمد لله على سلامتك ،عرفتي مراد شوية ويلبس عليك لبيض غا حفظك الله ووقفتي على رجليك اما تعداد راه دارو عليك

بدا يضحك شي لي نكرا مريام لي كانت مقابلاهم من بعيد ~ ل شاف الوقفة يقول هنا لبات ، زواج وتزوج لولاد وتاهما ف طريق اما لعقل الله يجيب

مراد بتخنزيرة ~ صااافي هادشي لي بغيتي هانتي جبدتيه دابا ..جوباتو وهي لايحة ايديها معنقاه~ غا كنضحك معاك اخويا ، هادشي من عزتك ليه لي انا شاهدة عليها كان كيعاود ليا عليك نتا ونادية كثر من راسو

بدا يحك مراد لحيتو بعياقة زعمة وهي كتضحك اما زيدان عينيه مزاگينش ، يدورو يدورو ويمشيو لبلاصة النسا يشوف واش غتبان ليه فخباروش بلي وقفات حتى طابت وقلبها تشوى وتحرگات وطلعات للبيت زااعفة

{ وتبقى الغيره هى الطاغيه فى مملكه الحب }

كانت في لبيت لفوق كتمشي وتجي وكيجي على الذهن ديالها شكلو وهو كيضحك وكيدوي مع اميمة قلبها تعصر وحسات بخيبة أمل.. كانت كتسنى هاد نهار على الجمر بغات امتى تشوفو قدامها وتدوي معاه لدرجة رتبات الهضرة لي غتقوليه في بالها ..كانت مخلوعة كثر من نادية لي في البرزةوهي كتسنى فيه يدخل مع الباب ويجيو عينيها فعينيه تشوف ردة فعلو وتعرف شحال توحشها من نظراتو...بقى فيها راسها وهي كتشوف فيه كيدوي ويضحك وممسوقش واش كاينة ولا لا وهي عينيها كانو كيقلبو غير عليه ....هدنت راسهاا وحيدات ديك البدعية لي لابسة وجبدت قفطان زوين بالحمر ومنبت بذهبي بدلات لفولار وزادت اكسسوارات والماكياج لي كان شبه مخفي بيناتو ...

شافت في المرايا وعجبها راسها وبزاف گاع...هزات جلايها بغات تنزل وهو يبان ليها ولدها بدا يفيق ...هزاتو غسلت ليه ولبساتو جابادور نفس اللون ديالها وباش ميعطلهاش فدروج هزاتو بين يديها تا نزلت لتحت عاد حطاتو الارض وقادت راسها وشدت من ايديه وتمات غادا هي وياه وتتضحك معاه ~ وينو على ورلدي ، فيك جوع نمشيو عند لميمة تاكل

دايرة فيها ممسوقاش والدنيا ربيع والجو بديع بلعاني باش تثثير الانتباه وتقوليه تا انا ممدياهاش فيك ....الجلسة كانت قريبة لدروج فوسط حوارهم الممتع والمضحك سمع صوت ولد صغير دور وجهو بزربة وبلاما يحس ...تفيكسا فبلاصتو وهو كيشوف في مريام قلبو لي نازلة بنخوة وجهها كيف الملاك والحمر واتاها وزادها جمال وضرو فقلبو ....ضغطات على راسها ومتلفتاتش ليه اما هو عينيه مفلتوهاش ..تمات غادا لجهة الصالون تحط كمال لماماها ..

بدون شعور بتاسم وبقى متبع ليها العين ومزير على فكو من الداخل ..ردو ليه البال فين كيشوف وهو يدوي مراد بطنز شاد فيه ~ ياك لاباس اسي زيدان تالفة ليك شي حاجة وكتقلب عليها ولا عجباتك صباغة لي في صالون

اميمة ونصر بداو يضحكو ..دار لعندهم جامع وطاوي الضحكة ورمق مراد بشووفة مجهدة فكراتو فيام زمان وخلاتو يقول ~ اهلا وسهلا بسي زيدان لي كنعرفو توحشنااك !!

زيدان بحدة قال ~ طمر اولدي بلا تفرفير قبل منرعفك ونوريك صباغة وصالون كيف دايرين

نصر الدين هز راسو لسقف وبدا يحسب في المربعات لفي الگبص خايف يتقمع اما اميمة قلبتها ضحك وعطاتو سلام البوليس

دخلات جلسات حدا نادية وهي ربي لي عالم بيها مفقوصة عليه وغيرانة ومع ذالك ممبيناش دايرة ضحكة صفرة ومطمرة وعينين مينة بغاو ياكلوها ...وصل وقت لعشى وهي تنوض توقف مع خالتها ومها لي واقفين على تريتور وطابلة لي تحطت فيها شي طبق يمشيو يرحبو بناسها ..تمات خارجة من الكوزينة وهي تبان ليها ام زيدان جايا هازا بواطا وتالفة كتقلب ~ سلام خاصك شي حاجة اخالتي !!؟

مينة جوبتها بالضحكة وفتحات ذراعها عنقتها ~ بنتي مريام كيف داايرة ، من قبيلة كنقلب باش نسلم عليك ملقيتكش ...بادلاتها الابتسامة والحشمة غالباها ~ كنت لفوق كنبدل لولدي ، كيف درتي الحاجة وعلى سلامت ولدك

مينة بامتنان جوبات ~ الله يسلمك ولهلا يوريك شر في وليدك وانا حمد لله ملي شفت وجوه لحباب بحالكم

مريام ~ الله يكبر بيك ، شفتك كتقلبي خاصاك شي حاجة

وراتها لبواطة ~ بغيت نسخن لولدي زيدان هاد العشاا ونسربيه ليه راك عارفة مع دوا وريجيم لي عاطينو ماكلتو بوحدها الله ينجيك

بترحيب قالت ~ مرحبا اخالتي انا نكلف ليك وحدة في البنات

عيطات مريام لوحدة من خدامات لي جايين يعااونو عيشة عطاتهم لبواطا يسخنو ويتكلفو اما مينة باستاذان قالت لمريام ~ نمشي نشوف شي بيت خاوي نديه ياكل فيه راك عارفة ناس مكيساليوش من الهضرة يشوفو ماكلتو معزولة يبقاو يسولو ويتأسفو ومع هو عندو صبر والخاطر كملات

بابتسامة نطقت~ اجي معايا

داتها للبيت لي صلاو فيه رجال قبيلة ولي كان خاوي ومطرف تشكرتها مينة وبقات شاداها بالهضرة ويضحكو منها ومريام تجاوبها بابتسامة من هنا حتى كملو حديثهم بصورة تذكارية خداها ليهم سرباي بتليفون امينة ~ سيري رتاحي اخالتي انا الا سخن عشاه نجيبو تال هنا

مينة ~ الله يرضي عليك هذا المضنون فيك ..صافي تكلفي انا نكلمو يجي بعدا

هزات ليها مريام راسها ومشات طايرة وبالخف بحال الفراشة وتا اميمة مشات لصالون ل خرجات منو زيدان غادا مجمعة هي وياه تا وصلاتو للبيت ودارت سبة غتمشي تغسل يدها وترجع ليه وخلاتو ومشات

جلس مقابل طابلو قدامو كيشوفيه وراخي ظهرو على لوسادة عينيه مضيقين وكيحك فلحيتو لي بدات تنوض حتى دخلت عليه اجمل لوحة شااف ومغيشوفش غيرها فحياتو ...دخلات حادرة راسها حطات ليه الماكلة فوق الطبلة وبتلفة والقلب لي كان يضرب شوية ويسكت معرفت متقول من غير تشبك ايد بايد وتقول بارتباك ~ حم ، زيدان صافا ،كيف بقيتو شوية ، ميكون باس عندك نتمناو من الله ترجع كيف كنتي

بقات كدوي وهو مكيسكع تا كلمة ملي قالت غير حال فيها فمو وكيشوف بهيام ...بدون شعور مدات ايدها لايديه خافت عليه تكون وقعت ليه شي حاجة سيغتو شافتو منطقش بدات تحرك فيه من مرفقو وكتقول ~ زيدان !! زيدااان ..زيدااااان

لمسة ايدها كهرباتو نزل عينيه ناعسين كيشوف ايدها فين محطوطة وهي تعض على شفايفها بدون شعور وبغات تحيدها من عليه وهو يشدها قبل متزولها وداعب صباع ايديها وقال بخشوونة ~ نعام اقلب ورووح زيدان ...توحشت نسمع هاد زيدان ، كون عرفت هاد المرضة غترد ليا هاد صوت لوذنية ونسمع سميتي من فمك كون شحال هادي مرضت

تحرجات وتزنگت ومعرفت متدير بقات غير تحنحن تما ...قال بصوت خشن ~ شحال واتاتك الحشمة وخدودك توردو وشحال واتاك القفطان و......

شحال واتاتك الحشمة وخدودك توردو وشحال واتاك القفطان والحجاب زادك نور ووقار ...بتنهيدة قال وهو متحكم في ايدها لي باغا تسلتها من قبضة يديه ~ مريام قاصيت بلا بيك ومازال كنقاصي حني فيا وشوفي من حال قلبي ل مبقات تحلى ليه تا حاجة غيرك

كان كيدوي بثقالة وعينيه ناعسين.....هزي عينيك وفولي شي كلمة كوني حين مني وعفي وسامحي ونساي متخلينيش معذبك بلا بيك

كان كيدةي وكيتسنى اشارة منها ولا شي كلمة تبعث فيه الروح ولا ردة فعل ترد ليه الامل من جهتها ... ملقات متقول وذنيها تصمكو ووجها تزير وكان غيطرطق بدات تخرج وتدخل فالهضرة حدها قالت ليه بعد منثرت ايدها منو ~ على سلامتك والله يشافيك

خلاتو ومشات هربانة كتقيص ايدها ومرة مرة تهزها لنيفها تشم ريحتو لي كانت كتعجبها

دخلات لحمام وطرقات عليها كتنهج وكطلع وتنزل النفس صحة حلات الما تغسل وتنش بيه على وجها وكل ما كتفكر شنو قاليها كترجع تطلع معاها سخونية

سمحات في ولدها ونساتو من حمام طلعات غبرات في البيت تا خوات دنيا وكلها مشى لدارو مبقاتش قادرة تشوف فعينيه ولا تسمع كلامو لي ما زال كياثر فيها كيف دير لي متحس بحتى حاجة وهو كان كلشي فحياتها كانت كتموت عليه وعلى كلامو القاصح فما بالك شنو كتسمع منو دابا ، كتبقى انثى وعندها نقص من جهة الحب فحياتها كتبقى عندها قلب ومشاعر وكتحس وتحسس من كلمة وتاثر فيها همسة ولمسة وواخا تعيا تقوى غتضعاف

فطريقهم للفيلا غادين مجمعين وكيضحكو نصر صايگ ومرتو حداه اما زيدان متكي على كتف مو وجالس هو وياها لور ...هزات تليفونها ومداتو ليه توريه تصيورات لي خدات وهي متعمدة توريها ليه ...من تصويرة لتصويرة حتى وصلات ليها غير شافها تگعد وخدا تليفون كيشوف بتحقيق وملامح وجهو مبشورين وعينيه وقلبو كيضحكو

علاش لا وكيشوف احباب قلبو مع بعض بلاما يحس قال لنزهة بصوت هايم ~ كيف جااتك !!

مينة طبطبت على ايديه ~ تبارك الرحمان ،مضوية كيف لبلارة وقريبة للقلب ، الله يحفضها ويخليها لناس لي كيبغيوها

تكى ظهرو على الكوسان وقال بهمس اميييييين

وصل نهار لالة نادية لي شحال و هي تسناه ، فاقت كيف عادتها فيها الدوخة وغير كتقيا ومكمل عليها الستريس تقول اول نهار ليها معاه جات عندها عيشة تصلي على النبي و تزغرت... الواحد يصبح بالنبي و يتمنى في نهارو الخير و البراكة ... دخلت عليها لقاتها صفرا و تتنش على وجها

عيشة ..~مشات قلبت ليها راسها ... ياكما تتقياي ثاني ؟؟

نادية بتغبان ~ تقهرت تقهرت فين مراد شفتو گاع مكاين

عيشة ~فاق الصباح مشا يشوف الماكلة مع التريتور و داكشي لي وصيتيه عليييه .. ودابا نوضي ابنيتي دخلي دوشي و خرجي باش تقادي حالتك تمشيو بكري

نادية باست لما يديها ~.. لهلا يخطيك عليا لماما

برضى جوبتها ~الله يفرحك في حياتك ابنتي ... ويسهل تا على بنتي مريام ويجمعها مع لي بغى قلبها هي وگاع البنيتات يا رحمان يا رحيم

نادية ... أمين يا ربي اماما ... خرجت عيشة من عندها و نادية دخلت الدوش حيدت عليا الدوخة و حاولت متفركش فيها ... خرجت لقات الفطور حداها فطرت وشربت الڤيتامينات ديالهااا ومن بعد عيطات لمريام باش تجي قبل متجي لبنت لي غتماكي ليهم...الوقت طار وساعة ولات بحال دقيقة ووصل الوقت لي غيجيو فيه ضيااف

عيشة مشات هي ونزهة لي مركبة على ظهرها كمال لفيلا فين غيتقام العرس ...كانت جردة ديالها مزينة على حقها وطريقها من دخلة تال لداخل ،طوابل مزوقين والارضية كتشعل ،ضواو شعلو والجوق خدم نادية كانت باغا دير غا نهار صدقت فعرس لي كتمناه اي وحدة .....كلشي لابس وجايب لكادو وجاي فرحان ليها وباغي يشاركها في نهارها ....عيشة لابسة تكشيطة تقليدية بشمار كانت فلون الوردي قادات وجهها بلي كتعرف ومن عند الله سر طلعها كانها هي العروس اما نزهة لبسات ولد بنتها ولبسات حتى هي قفطان بيج مطرز بصقلي

كانو واقفين فباب القاعة كيستقبلو فناس بابتسامة وترحيب .....فطريق للعرس كان جاي زيدان وعائلتو كان لابس كومبلي نواغ ومقاد شعرو ولحيتو بطريقة جميلة ، كان فرحان وداير فبالو بلي خاصو يرجعها بلا موجب شرع ،بأمر منو مخدم خوه دويسك لي كيفكرو فيها وكيدندن معاه...مو مرة مرة تلفا وجهها ليه وتبتاسم فرحانة ومترجية من الله يكمل عليه ويتمم فرحتو بلي بغاها قلبو على خير وعقبال متحضر لعرسو ...وصلو لمكان الفرح ستقبلاتهم مينةة برحابة صدر ترحب وتعاود مشات معاهم حتى وصلتهم لطبلتهم ورجعات ...جلس حدا مو كيستنى مراد يوصل كان مقادرش يوقف ولا يبقى يتمشى بزاف ....ملي جلس وهو يهز فعينيه ويقلب بيهم عليها ومو حداه كتنغز فمرت ولدها وتضحك شافت تاعيات وقالت ليه ~ راه مريم غادي تجي مع العروس بلا متبقا تعنز فراسك

تصدم وحنى راسو كيقول ~ هنينااا الواليدة

خشى راسو فتليفونو متلف بيه لوقت حتى وقف عليه نصر ~ يله المعلم مراد على برا وبغاك تكون حداه

هز ليه راسو ودار تليفون فجيبو وناض كيسد في لافيست وتم خارج على برا بشوية عليه لقى مراد ونادية دايرين بيهم نكافات ومريام لي كانت معاهم كانت مقادة هبلاتو وجابت ليه تمام ، لابسة تكشيطة فازرق ملكي وشال في ذهبي مقادة وجهها خفيف ولابسة العالي ، كتلفت الانتباه وكلشي كيتبع ليها لعين ..شبك حواجبو وكمش عينيه كيشوف فيها وغيران من العيون لي كتشوف فيها

شبك حواجبو وكمش عينيه كيشوف فيها وغيران من العيون لي كتشوف فيها اما هي نزلت عويناتها الارض بالحشمة كتعض على شفايفها بلاما تحس مقاداش تشوف فيه ....العرسان وجدو وكانو واقفين شادين فيد بعض لعروسة بتكشيطة بيضة ولعريس بكوستار نواغ

قربت مريام من نادية وزيدان من مراد وقال ليهم ~ الله يكمل بالخير اختي نادية

الفرحة كانت غالباها ومغطية على اي مشاعر خايبة زاورتها جيهتو قالت بصوت غالب عليه الحماس ~ الله يبارك فيك شكرا

عقبة لعندك ان شاء الله ...قالها مراد وهو لايح يديه على كتافو معنقو ، تاهو مكرهش يفرح بصاحبو وخوه ويشوفو مزوج بالبنت لي كيبغي

دخلو بالصلاة على النبي الحبيب ، تعالات الزغاريد والانغام الموسيقية لي كترحب بالعرسان ..عيشة دمعتها على خدها نهار لي تسنات باش تفرح فيه ببنتها هاهو جا ...

دازو على طوابل ورحبو بالضيوف قبل ميمشيو للبرزة....

اجواء العرس المغربي باينة ومخافية على حد ....الاكل كيكون متنوع ومسربي على طول ليلة العمر من مملحات حتال ديسير ...اما العروس كتجول بلباسها گاع المدن المغربية ...وضيوف كيتنغمو وينشطو ويشطحو على جميع الالوان الغنائية

حتى حما لعرس وتمات داخلة اميمة تقرقب بطالونها وتلعب بشعرها مكانتش بوحدها كان معاها فراس شادا فيه من ذراعو وداخلة بابتسامة وبلمعة حب

لقات في استقبالها عيشة تعانقو بزوج وقالت ليها فوذنها ~ غبرتي تا غبرتي وجيتي بيدك عامرين

بضحكة عالية باستها بعفوية فحنها وجوبتها ~ مليت من الوحدانية قلت نعمر جهة ليسر

مينة وهي كتحرك راسها بمزح ~ سوليني انااااا عليهاا ديك الوحدة ،دخلي دخلي لطبلة فين كاين زيدان بلاصتكم تماا ...بترحيب قالت لفراس ~ مرحبا بيك اولدي وتهلى لينا فيها

فراس جر اميمة لعندو وشدها من خصرها ~ عينياا هادي متوصينيش ...

غادروها بابتسامة وقبل ميمشيو لطبلة دازو لعند مراد لي كان كيطلع وينزل في فراس من بعيد اما نادية كتقول فين شايفاه حتى قرب لعندها عاد خلات فمها بدهشة وقالت ~ الاستاذ فرااس

مد ليها ايدو وقال ~ مبروك عليك الاستاذة نادية ،صدفة زوينة هادي متجيش على البال

مراد ميل راسو ليها وقال ~ كتعرفو بعضياتكم ...

نقزات اميمة مستغلة الموسيقة لي طفات وبدات تعارف فيهم ~ فراس هذا خويا مراد، مراد هذا فراس لي عاودت ليك عليه ولي من الصدفة صدق هو محامي ديال زيدان

هز حواجبو وقال مندهش ~ واايلي !! مرحباا اسيدي

تجمعو شوية قبل ميمشيو لطبلة فين كاين زيدان ل تفاجئ حتى هو ...بعد سلام والكلام فراس تاسف لزيدان وقال ~ كيف كتحس براسك شوية ، بقيتي فيا اصحبي ملقيت باش نعاون ولكن حمد لله الاهم هو نتا دابا قدامنا

مبقاش عاجبو يدوي فشنو وقع كتفى يهز ليه راسو وقال مبدل الموضوع ~ امتا غتزوجو !!

اميمة لايحة ايدها على فراس ~ حتى نحيدوك نتا من طريق خليوني انا وفراس حنا لخرين ذوقو زواج وعودو لينا عليه عجبكم هاحنا معاكم معجبكمش مكاين لاش ...ختمت هضرتها بضحكة خلات مينة غا كضحك على خفة دمها ...

حطات ولدها لي نعس وراجعة نازلة لتحت هازا جلايها بايدها وكتشوف في دروج لطيح ....مع هزات عينيها شافتو قداامها ...ضرو فراسو صداع لي كاين على برا ودخل لداخل يتعزل فشي كوان حتى كتبان ليه بحال الحورية نازلة ، خربقت ليه دماغ ديالو ..شدها من شالها وتغزل فيها تاني وقال ~ نقول جا معاك القفطان ولا نتي لي زينتيه

بلعت ريقها وتمات غادا هربانة من حداه مزنكة وهو غير حاضيها ويتيضحك ...كان داخل رجع دار بناقص وخرج على برا فين الفرحة عامة وكلشي عاجبو لعرس...وصل وقت التصاور ..كانت نايضة مينة ونصر ومرتو لعند العرسان يتصورو معاهم حتى جرت لالة امينة مريام لي كانت دايزة من حداها شدتها عنقاتها وقالت ~

لقيتينا غنتصورو وميمكنش متصوريش معانا

بقات غا كضور في عينيها ملقات مدير حشمات وجاتها ناقصة ترفض هزات راسها بالايجاب ودارت ليها خاطرها ومشات معاها اما هو كان عاجبو لحال مو كتفهمو وكتحس بيه ....وصلو لبرزة وسلمو على لعرسان وبداو يتقادو باش ياخدو تصويرة ليهم جميع بقات مينة تحرگ حتى جابتهم بزوج جنب بعض لقاها من الجنة وناس مد يديه ودارها وراها شادها من جهة لحزام حتى شوية ويسكت ليها القلب ، بقوة مبقى يضرب مبقات سمعات والو محيلتها لعائلة ل كتشوف محيلتها لقربو منها ...مراد روا لبلان وعجبو لحاال لاح الهضرة ل فهمها هو وخوه وطلقوها بضحكة جات مشدودة في تصويرة ....غبرت وطارت من حداهم حشمانة وغارقة بيها الارض وهاربة من عينين مها ليها ...لعرس كلو وهي كتحس براسها مكتصرفش على سجيتها.....بغات تلف وناضت تصفق شوية مع بنات لعائلة وهي تشوفو واقف بعيد ومگرنن دورات وجهها بان ليها واحد من سرباية غارق شوفات فيها وهي تمشي تركن خافت للعرس يتقربل وعارفاه عندو داكشي كيف ضحك مطلق غوباشتو ورجع لبلاصتو حتى بانت ليه جلست وتبتات هزات تليفونها تشوف شحال ساعة وهي تلقى مساج من نمرة ممسجلهاش

"متنسايش راسك راك معمرة والعرس مخلط عزارة خليك زوينة باش نبقى زوين "

قلبت عينيها وحطات تليفونها بنترة عرفاتو هو ،مبغاتش تجاوبو باش متخلقش رابط تواصل من جديد بيناتهم...كمل العرس بلش معطى الله ل فرحان فرحان ولي كيبكي من لفرح كيبكي ....اللبسة البيضة تلبسات والحلوة تقطعات ولعروسة ودعات ماماها ولشهر العسل مشاات

فدار زيدان رجعو من العرس كلشي مسخسخ ودخل نعس من غير مينة وزيدان ...كانت جالسة فبيت ولدها ل كان كيصلي لفجر فبلاصتو خلاتو حتى سالا وهي تقرر تدوي معاه ليوم قبل غدا... بكلام الرجال لاول مرة اتواجهو وغتقولو ليه ~ كان باك ديما كيقول واحد الكلمة اولدي ولي هي فرش وراقك ليا وها انا دابا تنقولها ليك شنو باغي من مريام حيث ميمكنش بعد گاع داكشي لي درتي فيها ودوزتي عليها تجي دابا ترجع تقول مكاين والو

تصدم من مو وتسائل كيفاش عرفات ووقتاش ..

لوقت فات على هاد شوفة ندم لي فعينيك ، عمري توقعتها منك اولدي ، معرت واش نعاتبك ولا نميك نقول شنو بغيتي من البنت وشنو دارت ليك ولا علاش تحاسب وحدة بذنب دارو واحد اخور وشكون نتا لي تحاسب ناس ولكن هضرتي واخا نبقى نعاود فيها تال صباح يمكن صافي لي عطا الله عطاه وغير غنخوي لما فرملة داكشي فات ودابا نشوفو لي جاي

هز حواجبو بتساؤل وقال ~ شنو كتقصدي الواليدة

مينة هزات صباعها بزوج ودوات قاصح ~ انخلي ليك يومين ايلا بصح نادم وباغي البنت وشاريها مرحبا ديرني فكتافط ورجع اللور وايلا مكتابتش ليك منتسماش اما ايلا كنتي باقي الريح صايط ليك في لغريريف غير سير اولدي قلب فين تكون ...ونسى واش عندك أم حيت بصح لي درتيه ميدوز بالما سخون ..هاد الهضرة لاول مرة تسمعها مني واخا كان خاص شحال هادي نقولها ليك

جمعت الوقف وهزات تسبيحها وقالت ~ نخليك تصلي وتسبح ومن هنا ليومين رد عليا

خرجات وخلاتو غير كيشوف بعينيه وكيحك فراسو عاارف بلي مو عندها الحق فكل كلمة وحرف نطقاتو

متسناش يدوزو يومين باش يفكر ويقرر واش باغيها ولا لا ، حيث هادي مريام محبوبة قلبو ولي ديما فبالو و كيتمنى يكمل معاها لي بقى من حياتو ...ورا صلاة لعشاء ديال نفس النهار تسنى حتى حس بمينة صلاة وكملات ومشى لعندها لبيت يدوي معاها لقاها مفرشة زربية وجالسة فوق منها مربعة رجليها وكتسبح جلسة كل يوم ..لفتات راسها ملي سمعات صوت دقان فلباب وشافتو كيتحل غير بان ليها وهي تشير ليها باش يدخل وداكشي لي كان ..جلس في الفوطوي قبالتها متكي ظهرو باش يرتاح وكيحرك فرجليه بتوثر

بحالا معارف ميقول ...راجل بقدو وبقامتو وبشيبو كيبان تالف ومعارف ميقدم ولا يوخر محكراتش عليه خلاتو حتى يدوي بخاطرو...سمعاتو تنهد بصوت مسموع هزات راسها بان ليها مشابك يديه ووكيشوف فيها غير تلاقات عينيه فعينيها وقال ~عارف داكشي لي درتو ماشي من شيم رجال ولكن متحكمتش فراسي ،كنت كل مكنشوفيها كيفاش ضاحكة وكتجبد باها وتعاود على حياتها كنتفكر صباح وداكشي ل كتعاني فيه

من نهار جات فطريقي وسمعت سميتها وانا كنحاول نبعد راسي عليها وغير مكنتجر ليها ....مننكرش فلول كان بين عيني حاجة وحدة نتفلى بيها ونزيد خلفة مع طريق تا يجيني باها يطلب ويزاوگ ويتدل ليا ولكن ملي تعرفنا وبغاتني بلاما نحس تا انا تعلقت فيهاا

رطب حلقو وكمل ~ كانت بحال دراري صغار قلبها بيض ونية كانت محتاجة لي يهتم فيها ويقول ليها كلام زوين حيت منسواش ستغليت نقط ضعفها ولعبت عليها مزيان حتى خليتها تشوفني غا اناا .... ولكن الواليدة واخا هاكداك مقدرتش كنت ملي كنحط راسي فليل شي حاجة كانت كتفيقني وتقول ليا نعل شيطان حاولت ما مرة ما زوج نقلب ونبعد عليها باش مناذيهاش وهي ل كانت كتجي تقلب عليا وترجع تبان قدامي وكتزيد تحكر على ضبرة تال نهار ماتت صباح صافي تما ظلامت دنيا فعيني وغاب القلب والعقل وضمير وحضر الشيطان حتى ووقع لي وقع

مينة كانت كتسبح وكتصنط ليه مزيان ....قال بصوت باين عليه لعيا ~ سولتيني الواليدة صباح وقلتي ليا الا كنتي مزال باغيها غير ديرني فكتافك ،ها انا كنقول ليك ديك لبنت كنت ومازال وغنبقى نبغيها ولكن خاايف حيت داكشي لي دوزت عليها موحال تقدر تنساه

مينة جمع تسبيح بيديها وجوباتو بتساؤل وقالت ~ نتا دابا اولدي مقتانع براسك غلطتي ومستاعد تطلب منها ومن عائلتها سمااح

قاليها ~ طلبتو منها ما مرة ما زوج وسمحات ليا ومستاعد نرجع نطلبو

مينة قاطعات كلامو ~ هادشي فراسي قالتو ليا وتا انا راه مشيت لعندهم وطلبت منهم مسامحة ومرجعاتنيش بلاش وهادشي علاش كبرات هاد البنت فعيني وحسيتها بنتي وبغيت نرجع ليها قيمتها قدام راسها وقدام عائلتها

حنى راسو وقال ~ لي درتيه الواليدة بسم الله

مينة طبطبت على يديه كانها كتخفف عليه تانيب وعذاب ضمير وقالت ~ والا عاليك غيكون كل خير غتوكلو على الله ونشاء الله تكون من مكتابك

دازو اياام قليلة ورا حوارهم بزوج ..مينة دوزتها فيهم كتفكر شنو دير وكيفاش تعاون ولدها حتى يتجمع مع البنت لي بغى وتقريبا عرفات راسها من رجليها..كانت جالسة في الصالون كتدوي مع هناء ومعاهم اية كتلعب مجموعين على الگوطي قولها وضحك عليها حتى صونا ليها تليفون هزاتو ووطلعت ليها سمية عيشة قالت الله يسمعنا خير وجوبتها بتاويل وصواب كيف عادتها ~ سلام وعليكم لالة عيشة لاباس عليك

عيشة كانت فداارها وشادا فيديها ورقة لتنسى شي حد~ لاباس الحاجة ونتي بخير كيف بقى وليدك

مينة وهي نايضة على برا باش تدوي براحة ~ الحمد لله يسول فيك الخير ونتي رتاحي شوية من عيا لعرس

تنهد وقالت ~ وحنا مازال نجريو فيه وداكشي علاش لقيتيني عيط ليك ، بغيت نقوليك مرحبا بيك نتي ومرت ولدك لسبعيام غنديرو ان شاء الله عندي فداار كيف عرفتي ختك عندها مع تقاليد وداكشي تاع زمان هو خاصو يكون جمعة وهما مسافرين غيجيو تال غدا فليل جمعة يرتاحو وسبت نقرقب عليها وديك ساع ترتاح

مينة بابتسامة ~ واخا الحاجة الله يكبر بيك ان شاء الله الله يكمل بالخير

عيشة ~ مرحبا بيك راك فمقام ام مراد يله خليت ليك الراحة

قطعات معاها ودخلات كتضحك...رجعات لبلاصتها مكملة جماعتها مع مرت ولدها حتى تم داخل نصر الدين لعينو زيدان معاه فشركة مساعد ديالو منها نيت يهز عليه شوية لحمل ...كان داخل بكري على غير عادتو باينة فيه عيان غير دخل سلم وتلاح حدا مو حاط راسو على كتفها ~ عييتي اولدي

نصر دين ساط بصوت مرفوع ~ ولدك ساسني ، كان مغيب وكنت هاز كلشي بوحدي ومكنتش كنعيا بحال هاد نهار لي رجع فيه هو لخدمة لحرب دوزها علينا كاملين هربت وخليتهم

بدات تضحك وتمسح على شعرو ~ الله يرضي عليه وشنو درتي ليا فداكشي لي وصيتك عليه

نصر باشارة لمرتو تكب ليه اتاي عاد جاوب مو ~ كوني هانية الواليدة نضيت ليك شغل نهار جمعة ناخدو من عند مولاه

هناء باستفسار ~ شنو هو اخالتي

مينة ~ نهار جمعة وتعرفي وفرغي راسك حيت غاادين عند شي ناس

تعلم نصر وتعلمات هناء وهزات تليفون لمراد قالت ليه علاش ناوية وعجبو الحال وايدها في الموضوع وقال ليها انا معاك وفجنبك وقتارح يقولها لعيشة اما زيدان خلاتو تال ليلة قبل عاد دخلات عليه لبيت لقاتو يله شرب دوا وغينعس ~ كيف بقيتي اولدي شوية !!؟

تگعد وتقاد في الجلسة ~ حمد لله الواليدة حسن من قبل

مينة باستو فراسو ~ داكشي لي بغيت اولدي مهم جيت نقوليك وجد ليا راسك غدا قبل وقفة غنمشيو لدار مريام

برم حجبانو باستفسار بغى يدوي ويسولها فاش كتفكر مخلاتش ليه الفرصة ~ قول ان شاء الله اولدي كافية منك

باستسلام هز ليها راسو وقال ~ واخا الواليدة ان شاء الله شنو غيخص نجيبو

مينة ~ داكشي تكلفت فيه وجد ليا غا راسك

خرجات وخلاتو طاير عليه نعاس كيفكر وخايف يسمع كلمة لا مبغيتوش

نهار جمعة وقبل من الوقفة كانت كل من مينة وولادها بزوج نصر وزيدان ومرت ولدها هناء ومعاهم مراد قدام دار مريام كانت جاايا بيديها عامرين جاايبة حولي دايزو لكلام تدزي بيه لعار وجايبة معاها امام جامع صديق عائلة وكيجي للمرحوم راجلها ،فكرات حتى عيات ولقات بلي هادي انسب طريقة ...طريقة ناس زمان جدودنا لوالة فطليب سماح ورجوع لمياه لمجاريها...

تقدمات هي لولة لابسة جلابة مخزنية منخوية دقات باب دار وبقات كتسنى فالجواب على وجهها راسمة ابتسامة بشوشة وكتطلب فسرها مترجعش خايبة

حلات نزهة لباب وحلات معاه فمها معرفات باش تبلات هادشي مكانت حاسة بيه ومضناتوش بمرا ...جات حداها عيشة لي فخبارها كلشي ولكن مبغات تقول لختها والو بقات نزهة كتشوفيهم وكتشوف في الحولة لي شادو الگزار وموقفو فباب دار ..تلجم ليها لسان ومتلاتش قدرات تقول كلمة غا كتمتم تا سلام مخرجاتش مقادة تا دوات مينة ~ انا جيت فهاد الوقفة طالبة وراغبة في المسامحة لي غلب يعف ولي غلط يطلب السماح ... انا جيت دابا مقدمة ليك وجه الله وفكتافي وليداتي وهاد امام جامع صاحب المرحوم الا غاب باه هو بمتابة باه يكون شاهد خير علينا يفقهنا ويتوسط لينا ،

نزهة هزات ليها حواجبها بتساؤل بمعنى شنو مفهمتش

مينة ~ انا عارفة ولدي مداير فيها ميصلاح وواخا جيت عندكم طالبة المسامحة وسمحتو ليه ولكن دابا زدت طمعت كثر وبغيت بنتك تكون ليه وانا جيت دابا نطلبها على سنة الله ورسوله وقدام هاد الناس ، وااش ندخلو الالة نزهة ولا نرجعو ؟!

فدروج كانت نازلة مريام اول مسمعات صوت لباب شدات لقنت وبقات تصنط سمعات كلشي ... فشلات ومعرفت متقدم ولا توخر عضات على شفايفها كتاكل فيهم بتوثر وقلبها كيضرب كتحس بالخلعة وهادشي متوقعاتوش بالمرة ونزهة كانت كثر منها ملقات متقول من غير ~ اش غنقوليك حنا من عادتنا مكنرضوش لي واقف فبابنا غيىر هو باش تكون بنتي لولدك لي داز راه ماشي قليل الالة مينة وانا وربي شااهد عليا عمري ناقشت هاد الموضوع ولا بغيت ندوي فيه ونجبدو ماشي حيت غالبني وانما مكنبغيش نفتح لجراح ....حسات بيها مينة وقربت منها وشدت ليها فيديها مزيرة عليها ~ انا بنتي تجرحات الحاجة وتقصحات وعانات بزاف وفقدات باها وفبلادات ناس تغربات

نطق رجل دين لي كان فعمر يناهز ستين وقال ~ الله عز وجل كيقول فالكتاب الحكيم

{فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ}

الا سامحتي ابنتي اجرك عند الله كبير ، سمعت عليكم بلي راكم ناس مزيانين داكشي علاش جيت لعندكم ، نساي لي فات الالة وخلي هاد نهار يكون فاتحة خير والا كان هاد سيد ظلمكم متنسايش راه رجع من لموت وربي خدا حق بنتكم في دنيا قبل من اخرا وهو دابا جاي طالب في سماحكم وباغي بنتكم وكيف ما هيا تعذبات تاهو تعذب وتا انا هاد الهضرة اول مرة غنقولها وربي شاهد على ما اقول ...كان كيدوي بحكمة وراسو في الارض ~ قبل عامين وورا لي دار واحد مرة جاا لعندي لجامع وكان سكران دخل كيبكي وتالف وقال ...." انا ابا ضلمت واحد بنت الناس وضريتها وكنت سباب في موت باها واش ربي غيسامحني " بقى كيعاود فيها ويبكي وعاود ليا كلشي قلت ليه قلب عليها وصلح غلطك ان الله غفور رحيم وعلى ما اظن تما سافىتو ومبقاتش وتا دابا ابنتي كيف قبل عامين كيف لبارح كيف ليوم لغلط هو لي دارو وجاي يصلحو وكلو ندم وطمعانين تكونو صحاب لعقل

نقزات عيشة وحلات لباب ~ وصافي نعلي شيطان اختي وخلي الناس غا يدخلو بعدا

هزات مينة راسها بنفي ~ لا بلاتي الحاجة تقوليا واش بصح غتسمح وتخلي دم يكون بيناتنا ولا غير هضرة والسلام

نزهة قالت بستسلام ~ اش غنقوول ري والشوار تاع لبنت ماشي ديالي الا وافقات الله يكمل كلشي بالخير

ضحكات مينة وامرات لگزار يدوز على حولي ، فرحات من قلبها بنسبة ليها نزهة هي كلشي اما مريام شايفة فعينيها بلي باغا ولدها يعني غا ترتاح

حلو في وجههم بيبان دار سبق الامام ولالة مينة عاد تبعوها ولادها كلها وشنو قال من غير زيدان ل عينيه في الارض ومزير على يديه منرفز وحشمان من راسو ...

نصر الدين ~ ترحب بيك جنة الحاجة

هناء ~ دخلنا عليكم برزق وتيسير ان شاء الله اخالتي

نزهة كتبتاسم بترحيب ~ مرحبا بيكم اولادي ونهار كبير هذا ...

جلسو فنفص الصالون غير رجال فقنت ولعيالات فقنت باش يدويو على راحتهم

مينة ~ منكذبش عليك الالة نزهة انا قبل من لعرس ومن نهار قصدت بابك وتلاقيت ببنتي مريام وانا متمتياها تكون بنتي ماشي مرت ولدي ...ربي رزقني في الخلفة غير لولاد ولدت زوج والمرض غلبني وحبست ولكن ربي كبير عوضني فخلفة لبنات بمرت ولدي هناء مفضلتها قدامك وهادشي لي شفت في بنتي مريام تاهيا بغيتها تكون بنتي تانية ...كانت عندي وريدة حطات ايدها على رجل هناء وتبسمت ليها عاد كملت وانا طامعة فوريدة اخرا ان شاء الله

جوبتها عيشة ~ الله يجعل ليك فيهم الخير الحاجة وطول ليك فالعمر حتى تشوفي ولادهم ...اما نزهة تنهدااات من داخل وطاح عليها ضيم قالت بعيون باكية ~ نتي ربي عطاك زوج وليدات انا عندي غا بنية ولي هي مريام ...دايراها بنتي وختي وصاحبتي ، مات باها ولقيتها غا هي فكتافي

عيشة بمواساة عنقات ختها ~ وها انا اختي قدامك ولدت ربعة في الاخير كلها دار ولاد وحياة ،دار لبنات خالية طمي قلبك مهم غير طمني عليها مع لي يصوونها ويعيشها مرتاحة

مسحات دموعها وقالت بصوت خافت~ داكشي لي بغيت

قالت ليها مينة بكلمات مطمئنة~ الحاجة صلي على نبي

نزهة وعيشة ~ عليه افضل الصلاة والسلام

مينة ~ مغاداش نشكر ليك ولدي ونقوليك راه زين ومتلقايش حسن منو كلنا فينا عيوب وكلنا فينا محاسن الكمال لله وحده ولكن لي غادي نبصم ليك عليه بلي واخا گاع لي دار فيها راه باغيها وشااريها فلحظة طيش دار فعلتو ورجع وندم عليها والله يساامح ننساو لي فات ونديرو بلي تعارفنا ليوم وان شاء الله ميكون غا الخير

زيدان وذنيه كانت عندهم كلشي لي دار بيناتهم سمعو وحفظو ودارو حلقة في وذنو اما لالة زينة لبنات محبوبة قلبو وبطلتنا لغزالة بعدما مسمعات لي تقال طلعات لبيتها وحرتاتو حريت نسات گاع بلي كانت نازلة تاخد ماكلة ولدها رجعات لعندو وبقات عليه تا نعس بلا والو وعقلها مكانش معاها فرحانة ولكن فنفس الوقت خايفة ...ايدها كيترعدو وعرقو واخا كتعزو وباقا كتكن ليه الحب متقدرش تفرح بزواجها منو جاتها صعيبة وماساهلاش

وصل وقت صلاة ناضو رجال كيصليو فجيه ولعيالات تاهما فجيه من بعد غمزات نزهة عيشة باش تعيط لمراد يجي لعندها ،ملي وصل تحنى وقالت ليه ~ خرج اولدي شوف لگزار فين وصل والا حيد كبدة جيب ليا باش نشعل لفاخر

جوبتها مينة لي سمعتهم كيتوشوشو وفهمتهم ~ دخلت عليك بالله الحاجة حنا مابينا لا شوا لا والو انا كفايا عليا لي دخلتينا لدارك ورحبتي بينا ،بغيت لي موجود عندك ناكلوه معاك وتعمدت نجي فهاد الوقيتة باش نشاركوك طعامك لي موجدة لراسك نتي

نزهة بنفي ~ لا لا الحاجة اش هاد الهضرة تجيبو لحولي ويتذبح قدامكم ومدوقوش منو خايبة لمعاودة

شدات فيدها مينة وقالت ~ صلي على نبي داك الخير انا هديتو قربان لله سبحانه وتعالى باش يبارك ليهم ويسخر

باش يبارك ليهم ويسخر الا وافقتي علينا وحمد لله من بعد الله نتي مخيبتنيش

نزهة ~ وجهك ماشي تاع تخيبة الحاجة وانا عن نفسي موافقة حيت مغاديش نلقى حسن منك عكوزة ليها اما تاهو ضحكات وكملت الله يهديك ...مهم غتخلي ليا الفرصة والوقت باش ندوي معاها ونعرف شنو فراسها

مينة ~ انا مكرهتش غدا ان شاء الله نلقى جوابي ملي نتلاقاو فدار لالة عيشة بغيت نفرح بيهم خلاص

نزهة حدرت راسها ~ ان شااء الله كلامك هو لكبير

ناضت عيشة هي وختها لكوزينة شعلو على كسكسو يفور وسگاو زوج قصارة دايزهم لكلام وحدة لرجال وتانية لعيالات كرمو ناس بلي موجود والحمد لله تا دار مخطاها رزق وغير كملو لغدا وكمل الجزار دبيحة ستاذنو ومشاو واخا عيات فيهم يجلسو يذوقو ولا يشيويو لكن مينة كانت مصرة على كلامها...

نزهة وعيشة كانو كيجمعو روينة لتحت وكيدويو في الموضوع لي خلا نزهة غاا كتشوف ومصدومة ومفاهماش شنو كيطرا حدها قالت لختها ~ شنو بالك اختي عيشة الا كنتي فبلاصتي اش ديري ؟؟

عيشة حطات شنو فيديها ومسحاتهم وقالت ~ انا الا جا عليا مينة راه الله يعمرها دار وتاهو منكذبش عليك بعد لي جرا ليه بقى فيا واخا صگع داكشي لي دارو ميتسامحش عليه ولكن شوفي راه ربي خدا ليها حقها في دنيا قبل لاخرا وعفى الله عمى سلف ونزيدك اختي ومنكذبش عليك بانت ليا بنتك باقا طايحة فيه وباغاه لدرجة عمري شفتها ضااحكة لا فزواجها لول ولا حناكها توردو نهار جاا داك صاحب الحاج يخطبها عكس نهار عرس نادية وملي شافتو كيفاش تلفات وتزنگات وتخبات يعني راه باقي الولد معشش ليها في القلب

عرفات كلام ختها على صح هزات ليها راسها وقالت مترجياها ~ يله معايا نطلعو ندويو معاها راه باينة سمعات كلشي طلعت قبيلة نشوف كمال لقيتها حالة لباب

عيشة حركات راسها بنفي ~ بنتك هاديك نتي لي غتجلسي معاها وتدوي نتي وياها وحطي نقط على الحروف انا تابعني شلا راك عارفة غدا شنو كااين ...

هو كيتناقشو تما ولي كيهمها الأمر ولي ضاير عليها الفيلم كانت دايخة بيها الارض معرفات شنو دير الحاجة الوحيدة لي تبتااتها توضات وصلاة الظهر ديالها وبقات شادة تسبيح وكتذكر الله وتدعي بلي فيه الخير يديرو ..مقدراتش تنزل لعندهم ولا تقول شي كلمة حيت قوة التفكير فلي فات الا لعب عليها غيخليها دير شي حاجة مهياش العقل كان غيقول ليها لي داز عليك ماشي قليل والقلب كيقول لي مدفون فيك حاجة كثيرة واخا فيه الخايب راه كاين فيه زين كلها يلغي باغاه جالسة فحرب بين عقلها وقلبها وملقاتش ما حسن من القبلة باش تفضي النزاع لي نايض وتدعي يتنور عقلهم وطريقها

بعدما تعشاو بلي قسم الله جمعات مريام طبلة وحطات طبسيل الديسير كياكلو فيه ...وولدها كيلعب حداهم وياكل شي فوق طبلة ونص في الارض ..نزهة غا كضور في عينيها وتشوفيها واش باينة عليها تقليقة ولا لفرحة ساعة مدات من ملامحها لا حق لا بطل نسات بلي مريام تعلمات تخبي لي كتحس بيه لداخل شافت حتى عيات وهي تفاتحها في الموضوع ~ مريام بنتي ندويو معاك دابا ولا تا ينعس كمال ..

- بعدات لموس على ولدها وقالت ~ غير قولي شنو عندك اماما كمال مزال عليه الحال

بدون مقدمات قالت ~ كنظن عرفتي لي وقع ليوم ، شنو بان ليك ابنتي وشنو ردك

مريام ربعات ايديها وقالت مهربة عينيها ~ اش كتقولي نتي ؟؟

نزهة ~ ايوا سمعيني ابنتي مزيان ...الا كان شي حد غيبغي ليك لخير فهاد الدنيا مغاديش يكون قدي انا فحياتي تمحنت وتعذبت ومكنتش بغيت يكون مكتوبك بحالي داكشي علاش عارضت زواجك من عدنان لا فحياة باك لا مؤخرا ...كنت كنطلب الله نهار قبل الليل ميكتبوش ليك وحمد لله دعوتي تقبلات ...وهادشي لي وقع ليوم عمري توقعتو ولا ضنيتو بعد لي جراا كامل وكنرجعو ونقولو لمكتاب يقدر ربي يكون مكتب ليك زيدان واخا گاع لي دار ...

لولد كيف شفتيه طلب سماح ما مرة ما زوج وايه نتي سمحتي ليه وعجبني الحال بزاف حيت عرفت بلي قلبك كبير وحمد لله ربي غيفيض نيتك بداك سماح وغيسهل عليك والا زدتي گاع قبلتي بيه وبغيتي تعيشي معاه حياتك راه مزيانة ابنتي حيت انا ام وحاسة بيك وكنشوف واحد القنت فقلبك مضرور من جهة حبك ليه حيت باقا باغاه وباقي معشش في قلبك ..

عضات على شفايفها وبدات تطرطق فيديها بلاما تحس ...شدات ليها مها فيهم وخداتهم بين ايدها وقالت ~عنداك يكون كيسحاب ليك ابنتي بلي عمري شفتك ونتي كتصلي وتطلبي الله يشافيه ولا عمري سمعتك ونتي كتنادي بسميتو فغرق نعاس ولا مشفتش الفرحة واللمعة فعينيك نهار عرفتيه فاق وقال سميتك ولا معقتش بيك ملي كنتي تسولي عليه مراد كيف بقى وواش تحسن... هادشي كلو داز على عيني داكشي علاش غنقوليك الا كنتي مازال كتبغيه ديري لازم ديالك والله يسخر ليك والا مكنتيش باغا قولي لناس جوابك والله يجيب ليه لي تنسيه فيك

بلعت مريام ريقها مقادراش ومعارفة باش تجاوب كتافات ترد عليها ب ~ لي فيه الخير يديرو الله

نزهة طبطبت على ايدها~ والنعم بالله انا منحتاجش نوريك ولا نفقهك حمد لله راك بعقلك ومعمرة وعارفة حسن مني فدين غير قبل متقولي اي قرار غادي نستشهد ليك بقصة هند

لي كانت في عهد الرسول صلى الله عليه وسلم قتلات حمزة بن عبد المطلب بسباب انو فغزوة قتل ليها باها وخوها ، وباش تنتاقم كرات عبد حبشي ودفعات ليه لمال باش يقتلو ويشق بطنو ويجبد ليها كبد ديالو يعطيه ليها ورغم گاع هادشي لي دارت نهار كتاب ليها الله انها تسلم سلمات وندمات وتسمحات واخا قاتلة روح ربي سامحها وقبلها في رحاب ديالو وراه من المبشرين بالجنة ...ايوا فين انا وفين نتي وفين حنا كاملين من هاد نعاس لي مننساوش ونسامحو انا رويت ليك ابنتي هاد القصة باش نوريك طريقك ونقزليك بلي هو واخا گاع داكشي لي دار فيك خايب يقدر يكون دار مزيان وربي يتجاوز عليه ويتقبل توبتو ....

شحال هادي كنت ابنتي غا تباعاك وموعيتكش فبزاف الحوايج حيت كنت مضغوطة وكانو ظروفي صعاب منبغيكش تعيشيهم ولكن دابا انا كنحاول على الاقل نوريك طريق سعادتك الا تاحت ليا وديك ساع غنكون اسعد ام فدنيا الا شفتك فرحانة باش حتى الا مت غنكون مهنية عليك

عنقاتها مريام بلاما تحس ملي جبدات عليها لموت ولفراق وهي مجرباه ~ الله ينجيك اماما ويخليك ليا منقدرش نعيش بلا بيك ..باست ليها راسها وكملت ...انا غنصلي صلاة استخارة هاد ليلة ولي فيه الخير يديرو الله

يتبع...