واقفة وسط جماعة بلباسها المعتاد لي كياخد لعقل شادة فيدها كمال لي كبر شوية وهازة بنية مزال صغيرة كتضحك معاها وكتعيط على نزهة ~ ماما عفاك جيبي ليا نشرب شحفانة
بقات كتسنى وكتلعب مع وليداتها حتى حسات بخيال وراها وايد ثقيلة تحطت على كتفها دورات وجهها وضحكات كان زيدان لي جاي وهاز فيديه كاس لحيب مدو ليها كان بلباس تقليدي لي ديجا شافتو فيه فعرس مراد....نفس تصفيفة شعر ونفس الابتسامة ل سحراتها
قرب لعندها ومد ليها كاس جهة فمها شربهاا بنفسو وملي كمل باس راس مريام وقال ~ الله يخليك ليا ...ونزل هز كمال باسو هو ولبنيتة وقال تاني ~ الله يصلحكم ليا
فاقت من الحلمة على صوت اذان لفجر ...فاقت مرتاحة وفرحانة من شنو شافت مشات توضات وصلات فرضها ودعات كيف ديما نعاس مبقاش جاا بغات امتى يصبح الحال وتعاود لنزهة وبالفعل على طبلة لفطور روات ليها الحلمة لي حللاتها ماماها بلي بشرى خير والحليب في الحلم زوين ....
وصل وقت لي غيمشيو فيه لحزام ....ناضت لبسات حوايجها بتوثر كانت معارفة كيفاش تصرف ولا شنو تقول لمو ملي تشوفها عليها ضغط كبير بزااف وتا حد محاس بيها...وصلات لدار خالتها ولي تصرفو معاها عادي حتى واحد مجبد لموضوع سيغتو نادية مخلياها على خاطرها...بداو كيجيو نسا لي معروضين لسبعيام ولا لحزام ومن بينهم مينة وهناء ...دخلو وجلسو بترحيب من الكل ، مريام مشات جلسات سلمات عليهم وتصرفات عادي واخا ربي لي عالم بيها من لداخل ، جمعو جميع وضحكو وشطحو ونشطو بدون متجبد ليها مينة الموضوع كانت مأجلاه تا تعزل هي وياها وداكشي لي كان ورا صلاة العصر لي صلاوها مجموعين فبيت معزول خلات لالة مينة تا خرجو نسا وبقات غير هي ومريام لي كانت كتزول لباس الصلاة من فوق لحمها بقات كتشوفيها وتصلي على النبي كيف كتحمق بزين كانت كيف لغزاال وااقفة قدامها بكامل سرها واناقتها الفورمة مطراسية والطولية مواتية ...خلاتها حتى سالات واشارت ليها تجي تجلس بجنبهاا ...شدات فيدها وقال وهي كتطبطب عليها بحنان ~
مريام بنتي تمنيت وربي مخيبنيش ،انا طول عمري وانا تنطلب الله يرزق زيدان زوجة صالحة ترد بيه وشد بيديه وتقاد ليه المايلة، كنت تنزاوك فلحبيب ربي يعطيه لي تهدن امرو وتستر سروا وتكون داك النسمة لي تبرد صهدو وداك الدفا لي يسخن بردوا وفعلا ربي رزقك ليه وليا
انا عارفة ومتأكدة بلي لي دارو ولدي ميقبلو لاعقل و ميدوز حتى فملة، واخا نهضر ونعاود
ونقول ونشعر عمرني مغادي نمحي ولا نسي لي دار ،ولكن نقدر نضمن ليك حاجة وحدة ولدي تيبغيك وتيتسطا عليك وبسباب مدار فيك والوقت لي عرف راكي اتزوجي تلف وداخ ومبقا عارف ميدير بقا ساكت ولام داك الشي فقلبو حتا طاح وتهد بعد َكان جبل لاريح تهزو ولا شمس دوبو.....مريم ابنتي ولدي ربي خدا ليك حقك فيه متني ومتلت شاف الموت وربي كتب ليه عمر جديد يقدر حيث باقي اتكوني ليه فالنصيب ولا حيث باغيه يعرف ان الله حق ان الله قادر فلحظة يجعلوا من المغادرين ولي مغاديش نرجعوا نشوفهم، كيف قلت ليك ربي لطف وحن فيا وشاف فيا
حيث منكدبش عليك
كن مشا ليا زيدان كان توقع ليا شي حاجة...زيدان هو اول فرحة ليا، ويقدر كاع ضو عينيا، ولادتوا كانت فاتحة خير علينا وطلتوا كانت عندي هي طلوع الشمس
رغم انو كان بير وعمر سروا عرفوا حد واخا كان قاصح وشخصية قوية، الى انو حنين وطيب قلبو كبير زدت تأكدت منين مرض ومنين قالي الطبيب بلي المشكل نفساني كثر ماهو عضوي ديك الساعة فاش جيت عندكم وطلبت منك السماح، وديك الوقت عرفت كية ولدي ودقتوا لي كواتو وشهماتو
منكدبش عليك فوسط داك المشاكل والازمة تأكدت بلي زيدان دوقو ملكي نهار طاح طاح واقف نهار بغا بغا زين أدب اخلاق سمعة، واهم شئ انسانة محبوبة تشوفها دخل لخاطر اي واحد يتمناها ...مريم ابنتي انقولك ونعاود انا تنطلبك وتنزاوك فيك حني فيه ورقي عليه وبردي العافية لي شاعلة فيه صبرتي وربي كافاك انقوليك زيدي فعملك وكملي خيرك وقبلي بيه وخلينا نفرحوا ونجمعوا هاد الشمل الله يرضي عليك ويرزقك لي تمنيتي
مريام كانت غير حانية راسها كتصنط ليها وكتبكي اثرت فيها هضرة أم زيدان خلاتها حتى سالات وخدات ايدها بين يديها وقبلتها من برا ولداخل وقالت ليها~ لي قلتي عليه هو لي غادي يكون اخالتي ،ولنفرض كاع مكنتش سامحت زيدان من قبل
على ود طيبتك وصراحتك وطيبوبيتك بالاخص غادي نسامحوا... شهدي من اليوم حتا لغدا يوم القيامة انا مسامحاه
قد بعد السما على الارض انا قابلاه يكون راجلي وحبيبي وسندي فالدنيا بعد بابا الله يرحمه.
" شهدي من اليوم حتا لغدا يوم القيامة انا مسامحاه قد بعد السما على الارض انا قابلاه يكون راجلي وحبيبي وسندي فالدنيا بعد بابا الله يرحمه "
فرحة مينة كانت كبيرة بعد مسمعات هاد الهضرة منها رتاح قلبها وجبل لي كان محطوط على كتفها زال ..فتحت ذراعها وضماتها لعندها كتعنق فيها وتبوس وتحمد الله وتشكرو في السر والعلن حيت رزقها بمرت ولد متساامحة وقلبها بيض مكتعرف لا حقد لا غبينة
عيشة ونزهة كانو على برا وشهدو على هاد الاحداث ماماها فرحات واخا فرحتها ناقصة ملي كتفكر بلي غتفرق بنتها اما عيشة كتزغرت وتعاود فرحة ليها كفرحتها لبنتها ...
~~~
كان كيتسنا مخلوع ومهموم وخايف يسمع كلمة لا مقابلاش ..سمع نصر الدين غيمشي يجيبهم وهو يسبقو لطوموبيل ركب لقدام كون كان يقدر يسوق كون سبقو وطار قبل الوقت حيت مبقاش قادر يستنى كثر وصلو لدار عيشة نزل زيدان وفيدو عگاز كيستند عليه ...خرج عندهم مراد وتعاقر معاهم يدخلو مبغاوش بقاو مجمعين ومينة لداخل كتسلم وكتوادع مع ناس رافقتها مريام للباب ~ يله ابنتي تهلاي فراسك وقريب غنشووفك ان شاء الله
مريام معنقاها ~ كون غير بقيتو شوية مزال الحال
مينة ~ مكرهتش ولكن اش ندير مع هادو لي لتحت جاوني بزوج ماشي غا واحد
تعمدات تقولها ليها وتعلمها بالفن بلي راه كاين لتحت ...مريام قلبها بدا يضرب تبسمات ليها وضربت طم توادعو هادوك خرجو وهي بقات ورا الباب كتشوف من زاج كيفاش واقف متكي على العكاز بدا يكسب صحتو شويو داير كاسكيط على راسو ولابس سيرفيت كيدوي بالعبار بانت ليه مو جايا هي ومرت خوه عطى طريق لهاد الاخيرة وباس لمو راسها وعنقها ...دخلت مريام زربانة ملي بان ليها مراد راجع اما زيدان بانت ليه هناء غتركب اللور وهو يطلب منها تجلس حدا رجلها بحجة باغي يسرح رجليه وهو باغي غير يتسوق لخبار ويطمن قلبو ويسمع جواب لي كيستناه
مينة بتبسيمة ~ايه اولدي نشطنا وفوجنا الله يكثر لفراح ..رد عليها وقال ~ شكون كاين !!
سمعو نصر وغمز هناء وضحكو بزوج عاقو بيه باغي يسول فيها همس ليها عند وذنها وقال ~ سيد مشطون ...جوباتو هناء بابتسامة ~ ومزروب
عيا يقلقل فيها وهي عايقة بيه وماعطياش شي جواب مسگد ولا باش ينقي سنانو .....ساط منرڤز وخلقو ضاق عليه ممولفش بهادشي وصلو لدار
كل واحد مشى لبيتو وهو بقى مقنزع تما وسط السيجور مربع ايديه وتيخمم ، واش تكون رفضات وحشمات مو تقوليه ؟ واش باقا حاقدة عليه ؟ وعلاش ياك تبدل وندم واهم شي خلص المقابل ديال داك الشي ...
مينة لمحاتو من بعيد جالس بوحدو خافت عليه حيث بانت عليه تقليقة ،مشات حداه وجلست بجنبو ~ مالك اولدي شنو مقلقك
بدون شعور قال ~ علاش مريم مقبلاتش ،شنو واش قلبها باقي موجع مني ولا صافي نساتني مفهمتش ...
بغى يبدا يصعر وهي توقفو مو وشداتو من ايدو هدناتو ~ مالك اولدي تتخيط وتفصل غير بوحدك ،شكون قال ليك مقبلاتش وايلا منساتش من حقها ،تهدن اولدي َبرد الحر لي فيك ، انا يله جايا نسولك شنو باغي دير فالخطبة
قالت كلامها وضحكت مخلياه مبهوض مفاهم والو ...ضيق دوك العينين وبرم دوك الحجبان وهو يقول ليها ~ مينة !! رسي معايا وباركة من الملاغة راك عارفاني معنديش مع الضحك
بصدمة بدا يضحك بجهد كيف لهبيل ~ يعني قبلات والله ايلا قبلات ..
عصر مو لعندو بصدرو وبدا يضحك الضحكة لي عمرها شافتها ولا تمعنت فيها مزيان ..كان كيبوس فيها ويعاود هو فرحان وهي فرحانة ليه وتفاجات فاش شافت ضحكتوا ..طلق منها وهبط الارض مفورصي على رجليه ومحاسش بالالم مكذبوش ل قالو الحب تيداوي وتينسي الجراح بدون شعور سجد شكر لله سبحانه فلا مرد الا لله عز وجل
طلق منها وهبط الأرض مفورصي على رجليه ومحاسش بالالم مكذبوش ل قالو الحب تيداوي وتينسي الجراج ..بدون شعور سجد شكر لله سبحانه فلا مردَّ إلا لله عز وجل ...فرحة ولدها كانت من فرحتها حطات لالة مينة ايدها على قلبها لي كان كيضرب وبقات تدعي الله يسر الأمور وتداومها فرحة فحياتهم..عوناتو رجع لبلاصتو وهي كتسول فرجليه ساس راسو بمعني خليك من رجلي وقال ~ دابا شنو خص وشنو نديرو واش فيكسات تاريخ باش نمشيو عندهم ...طبطبت على كتافو وقالت ~ بسم الله عليك اولدي غير بشوية وداكشي راه كيكون بتاويل والاصول غدا نهضر مع نزهة وندوي معاها في نهار لي مناسبها نمشيو فيه
باس على جبهتها ووقف ~ واخا الواليدة لي بان ليك ، سكت شوية وقال مضيق عينيه وكيخرج انفاس حارة ..لهلا يخطيك عليا ...
جوباتو بعينيها ومشى ...كان طالع بشوية عليه لبيتو وهي متبعة ليه لعين كتشوف فيه واخا كتافو عراض ورجوليتو طاغية الا انو قدر الحب يهد حيلو ويسوسو ويخليه بحال دري صغير مهموم ومسالي..
سبحان من يبتها فشان ويصبحها فشان بعد مكان غا جالس ويخمم ويتنهد كل مرة ملي كيتفكرها والحزن مخيم عليه دابا وجهو مع قلبو تفاجاو والمورال طلع ...جلس فوق لبيرو كيشوف في تصاورها وحاط يدو على ذقنو مصبرش وهو بعيد عليها وفات وقت طويل بلاما يدي ويجيب معاها في الهضرة هز تليفون وجبد نمرتها
لي خداها لمراد ايام كان فسبيطار بلاما يعيق ولي من داك نهار وهو كيبغي يصوني فيها وكيتردد معندوش لوجه ومعارفش شنو يقوليها وحتى دابا مزال متردد سد التليفون وحطو فوق لبيرو وسند ظهرو على الكرسي وصبر راسو بمبقى قد ما فات بقى غير لقليل وتولي مرتو على سنة الله ورسووله
اما هي احاسيسها لي تدفنو من جهتو وماتو رجعو حياو ونار لي كانت شاعلة من فعايلو طفاها السماح ...رجع قلبها كيدق من جديد ورجع كتسهى وبالها كيمشي ليه ورجعات كتحلم فايام لي غتجمعها بيه
كيف صبح الحال وطلع نهار هزات مينة تليفونها وعيطات لنزهة تعلمها بلي غدوز لعندها فلعشية وداكشي لي كاين ...ورا صلاة العصر لبسات جلابتها وتعطرت بالعود وخرجت هي وهناء لي كانت لابسة لباس عصري ، زوين في مينة مسبقة مرت ولدها قدامها ومتخطيش لخطوة بلا بيها تقاتلت تقاتيل باش تزينا فعين ولدها نصر والحمد نجحات ولشنو بغات وصلات ...
شدو طاكسي صغير ومشاو بحكم مكان حد من ولادها فدار ...فطريقهم دازو على باتيسري معروف خداو حلوى مخلطة بين مالح والحلو وقصدو دار زينة لعريسات ..لقاو في استقبالهم نزهة حلات عليهم لباب كانت لابسة گندورة بالگرونة ولايحة عليها شال ...بابتسامة بشوشة وكلام حلو ستقبلاتهم ورحبت بيهم دخلو لصالون فين كانت مريام موجدة طبلة مشكلة لقهوة ولحليب واتاي معطر بدوازو
مكبرة بيهم وفرحانة لمجيتهم جلسو جميع وجمعو ودوزو كيسانهم ودواو في مواضيع مختالفة عاد هضرة على سباب مجيتهم ...نطقت مينة وقالت ~ لالة نزهة يمكن عرفتيني علاش جيت لعندك ؟؟
حطات لكاس في صينية وجوبت ~ مرحبا بيك فأي وقت ممحتاجاش سباب باش تجي ...ناضت سلمات عليها مينة بحب فرحانة بكلامها ~ الله يكبر بيك وهذا المضنون فيك الحاجة
هادشي علاش انا مكرهتش ليوم قبل غدا نتناسب معاك ونوليو عائلة وحدة ان شاء الله ....شافت في مريام لي منزلة راسها الارض بحشمة...لموافقة لي كنا نتسناو من عند بنتي مريام وعطاتها لينا ومبقى لينا غير نجيو ونجيبو حبابنا ونرشمو بنتكم لولدنا باش كلشي يكون بالقاعدة والتاويل
اشمن نهار يناسبكم الالة نزهة ؟؟
نزهة شافت فبنتها تشوف جوابها لقاتها سر طالعها ومقاداش تهز عينيها ~ ايوا تسناي عليا نشاور عمها عبد الله ان شاء الله نشوف يوم يناسبو ونرد عليك
مينة زربانة باغا تمشي مطرقة مسمارها ~ خير البر عاجله ، هي الا نضتي سولتيه دابا
جوبتها مريام بخجل ~ واخا اخالتي انا نمشي نعيط ليه
ضحكات ليها مينة ورضات عليها وخدات من عندها كمال الصغير هزاتو بين رجليها كتلعب معاه اما مريام طلعت لبيت ايدها كيترعدو وكتصوط حشمانة من عمها شنو غتقوليه ، عاد خبراتو بخطبتها لولة تفسخات شنو تقوليه دابا لولد لي هربت من مغرب على قبلو ولي مقبلش باا فلول راني غنتزوجو وبغيتك تحضر ويطلبني من عندك
توكلات على الله وصونات عليه ...عبد الله شاف نمرتها وتبسم وقال ~ اهلا اهلا بنتي مريااام لاباس عليك !!
بللات حلقها بريقها وجوباتو~ عمي !! كيف داير توحشتك
عبد الله ~ الحمد لله ابنتي خاصني غا نظر منك
مريام ~ والله حتى حشمانة منك غبرت عليك بالحق غير مدرسة ودار وكمال واخا هادشي ماشي عذر ليا
عبد الله بقلب كبير قال ~ ساعة لله ابنتي ،لوقت لي تعيطي فيه هو هداك عليه ، كيف دايرة لواليدة وولدي صغير ...جوباتو بالحمد لله وقالت داخلة في موضوع نيشان ~ عمي بغيت نتشاور معاك فشي حاجة
تقاد في الجلسة وناض من حدا ولادو باش يدوي ويسمع على خاطرو ~ الله ياودي ابنتي ياك شي باس مكاين ؟؟
حشمات منو ومعرفت كيف تبدا ،بقات شحال تلوي في لسانها عاد نطقت~....الى عقلتي اعمي على الهضرة لي عاودت ليك نهار دقيت بابك لاول مرة ،كنت عاودت ليك على مشكل لي وقع ليا مع داك سيد
عبد الله حرك راسو ~ ايه ابنتي عقلت عقلت ...تنهدات وقالت ~ ايوا اعمي مكاين منخبي عليك جا وجاب عائلتو وطلبو سماح ودابا طالب وراغب فيا قدام ناسي وأهلي و على سنة الله ورسولة و قلت بحكم مقامك من مقام الواليد تجي توقف معايا وتكون فجنبي
عبد الله بتهاني قال ~ مرحبا ابنتي على راسي وعينيا راك بحال وحدة من بناتي
ترددات عاد قالت ليك ~ شنو رأيك نتا اعمي عبد الله في الموضوع ، نور طريقي وتبتني
عبد الله ~ كيقولك ابنتي لي مزوج في السما قبل الارض ونتوما الى مكتابين لبعضياتكم راه مكاينش لي يفرقكم ...من نبرة صوتك كتباني ليا راضية على هاد زواج وانا منزيدك غير الخير ...كيقوليك اذا عزمت فتوكل على الله ديري يقينك فيه وان شاء الله مغتخافي مغتخيبي ...داكشي لي فات ووقع معاكم لا نتي لا هو غير متيحان ربي ختابركم بيه قولي بسم الله راه قالك لي هرب للزواج هرب لله و طاعته و الله يكبرنا في طاعتو يا رحمان يا رحيم ... نهار تنوي ابنتي وتحددو نهار لي غيجيو فيه عيطي ليا تلقايني عندك تما !!
مريام ~كلامك خلاني نرتاح و نتيقن في اشنو باغا لهلا يخطيك عليا اعمي
عبد الله ... الله يجعل كلشي مبارك مسعود والله يدير ليك ل فيه الخير و يرزقك بلي كيخاف فيك الله تهلاي في راسك ابنت الغالي حتى نشوفك ونفرح بيك..
جلسو فقهيوة كتطل على لبحر خداو ليهم گلاص تبردو بيه وقيدو شنو خاصهم ...وغير رتاحو ناضت مينة مشمرة على ذراعها وواقفة على شغلها بيدها توجد كلشي على تيساع ...اول حاجة بدات بيها هي الذهب مشات عند معرفة قديمة عندهم ففاس وحال محلات هنا فكازا فينما تبغي شي حاجة تقصدو ذهبو حر ودايزو لكلام....شافت شلا نواع وحط قدامها لي مزوق ولي بلاش
مينة كتشوف فواحد طقم مضيقة عينيها ممعمرش ليها لعين ~ شريف العلوي !! غير هادشي لي كاين ولا ؟؟
- شنو خاصك بالضبط الحاجة
مينة ~ اش غنقوولك اولدي هاد شي لخفيف وديال بنات ليوم معمرش ليا لعين ، بغيت شي دبالج ولا نبالة بلا حجر تكون غليضة ولا شي سرتلة ....هادشي غادا نرشم بيه مرات ولدي وبغيتو كيعمر العين
ويكون ديال تكبيرة ....
- مطلبتي غير الموجود ...دخل جبد ليا نبالة غليضة وثقيلة من لداخل ..شافتها وعجبتها هزتها فيدها وقالت لهناء ~ كيف جاتك ابنتي زوينة تعجبها زعمة !!
داكشي لي كان عبرها وقاليها ثمت ومعودتهاش معاه جمعها في بواطة حمرة و وخدا روسي يقيد في ~ اشمن اسم تكتب فيه الحاجة
مينة قالت فرحانة ~كتب اوليدي ، مريام لخليفي ....
جهد ولا عندها مضووبل والمورال طاالع ولعيا محساتش بيه ...من ديما كتحلم بهاد نهار لي تخطب فيه لولدها وهاهو جاا ...جايا لربعين عام من نهار شداتو بين يديها وهي كتطلب الله يخليها بصحيحتها ويطول في عمرها حتى تعمر ليه الدار كيف كيقولو والحمد لله ربي حياها تا شافت هاد نهار
مينة بنت دار لكبيرة ،ربات فلعز وحاجتها ماشي ديالها داكشي علاش بغات تفرح بمرت ولدها وتكبر بيها وهادشي عندهم عادة ففاس رباو عليها من جدودها لوالا....بعدما شرات النبالة شدات فيد هناء وخرجو هادي كانت غير لبدية والخير مزال ...
دخلو عند محل كيبيع ثواب خدات توب جلابة وجوهرة اخر مكاين فسوق لعروستها ومنساتش نزهة وعيشة خدات ليهم حتى هما تفاصل جلالب ....زادت شيلان وبلاغي وثوب جلابة رجالية وطاگية لعم مريام برعات عروستها جديدة ومنساتش حتى لقديمة بقات عليها حتى خدات ثوب
هناء ~ بلاش اخالتي خليك غير مع مريام خيرك سابق عليا
غمزتها تسكت وقالت ليها ~ كيقووليك لبالي لا تفرط فيه نتي وياها عندي فكفة وحدة وزايدون انا تشهيت هاد توب ليك نشوفك لابساك ديريني ماماك وهديتو ليك تقولي ليها لا
رجعو تشادو وبقاو من بلاصة لبلاصة لي كيتشرا على تيساع خداتو ولي كيتشرا فنهارو وصات عليه ،مدخلو لداار حتى ظلام الحال ..لقاو زيدان جالس في الجردة كيلعب في تليفون غير شاف مو جايا وحطو
وتقاد في الجلسة ، خدات هناء من عندها داكشي لي كانت هازا ودخلات مخلياهم على خاطرهم...
مينة جبدات لبواطة لي كانت في صاكها مداتها ليه يشووفها ...حلها ولي عجبو كثر وطير عقلو كثر من نبالة اسمو لي مكتوب جنب اسمها مريام لخليفي ..بتاسم بلا ميحس وتنهد براحة ممتيقش راسو
وصل نهار الموعود ، النهار لي تسنيناه حنا ، ولي حلمات بيه عروستنا ، ول عانا وقاصا حتى وصل ليه عريسنا ...نهار لميلود الكل كان فرحان بالعيد الا عائلة لخليفي وبلحاج الفرحة عندهم على زوج المرات
فرحة العيد وفرحة الخطوبة ....قدام دار زيدان كانو حبابو وناسو المقربين ولي جاو خصيصا من فاس على ودو مكبرين بيه وواقفين معاه فنهارو الكل لابس تقليدي وهذا كان امر من لالة مينة بغات داكشي يكون مأصل وعلى حقو وطريقو وديال ناس زمان ، نسا بتكاشط ورجال بجبادور ....
هازين طيافر صغار كلها وباش عامر واحد فيه تفاصل وتاني بيجامات واحد لشيلان ولاخور صنادل ولبلاغي منساتش لماكياج وكوفغ ريحة ايفسان لوغو ، واحد صغير كانت هازاه مينة فيديها مزين بثوب حرير منقوش عليه اسم زيدان ومريام بصم الحر مع تاريخ اليوم لي غادين فيه... كان فيه بواطة نبالة وخاتم مارياج لي خداه زيدان على ذوقو ..بلاطو تمر المجهول ...والگركاع في بلاطو بوحدو مع اللوز....لحليب والزهر ...سرغينة والحنة والعود لقماري والمسك الحر ...هادشي كلو وقفت عليه مينة حتى جاها من قلب فاس العريقة ،
صوت الزغاريد تسمع والصلاة على النبي الحبيب موقفاتش ...تم جاي مولاي سلطان لابس جبادور بالبيج شعرو مرجعو اللور ومطراسيه من جناب اما اللحية مخليها مهملة كيف ديما ....كيخطوي مسند على عگاز لي ولا مرافقو في ايامو الاخيرة ...جاي فرحان من الداخل وهو كيتلقى التهاني واخا ملامح وجهوو كانو عاديين ولكن هذا هو زيدان لي فقلبو صعيب يوحي بيه
قدام من والا ...عيون مينة دازو بدموع الفرحة بلاما تحس الامنية لي كانت عندها في الحياة كتحقق قدام عينيها واخيرا شافت ولدها سلطان زمانو قربات لعندو عنقاتو وقرات عليه المعوذتين وهو بدورو باس يديها وراسها بقوة فضلها كبير عندو كون ما هي مكانش يقدر يتجمع مع المرا لي بغاها قلبو ...ذنبو كان كبير وبفضل الله ومساعدة مو ولين قلب مريام كيحس براسو تولد من جديد ووصل لي بغى
سيارة نصر الدين كانت في المقدمة ركَّب مو ومرتو ولعريس حداه لي جاي موريه طريق ووراه العائلة المقربة تابعينو ...وصلو وكلشي بدا كينزل ويصلي على النبي من غيرو هو بقى شحال متكي على الكوسان وكيتفكر ايام لي كان كيعس فيهم حدا بابهم من اول مرة تلاقاها تال اخر يوم خلاها ....شكون يقول زيدان لخليفي ل اول منظرتها عينو محملهاش يجيب حبابو وناسو ولعند بابها طالب فيها راغب تكون مرتو وشريكة حياتو
حل لباب ونزل بشوية عليه مدات ليه مو العگاز ديالو خداه من عندها ومشى حداها معنقها من كتافها كانت قصر منو راسها مخشي في صدرو تحنى باسهاا فجبهتها وهي بادلاتو البوسة فكتفو
جا حداهم نصر الدين من جنب تاني ودارو مهم بيناتهم وخداو تصيورات وسط صلاة والسلام ..كانو عمو واحد وشي زوج خوالو وعيالاتهم وولاد عمامو كيصورو وفرحانين ولفقيه معزول على نسى وواقف بعيد كيتسنى فيهم تا يدخلو
تحل باب دار مريام وتم جاي مراد كيجري لعندهم وكيصفر ويغوت بتريگيل كعادتو وقف قبالة زيدان لي خنزر فيه وبدا يدوي معاه تحت سنانو ~ اماالناا اصااحبي جالسين عندك لهيه !!
مراد بتقشاب حل ذراعو وقال ~ مدوييش معايا اخويا ليوم راني خووو لعريييس ...جاوبو بلا حول ولا قوة الا بالله وتعانقو برجوليه ووقف حدااه كيقاد فجبادورو ...تمو غادين قاصدين لباب كلشي غادي بشوية عليه على ود زيدان لي كان سابقهم مع مو ....وقفو قدام دار فين تعرضات ليهم كل من عيشة ونزهة ونادية وبنات عم مريام هازين الزهر والورد وكيرشو ويرميو عليهم وكيرحبو بيهم ...بدون شعور حدر راسو الارض وشد فصبع مو وزير عليها كاسيه الخجل ...شافت فيه مينة ونزلات راسها لايديها لي مزير عليها وتفكرات طفولتو وقت كان يتحرج ويقبط فيها
بتاسمات وطمناتو بيديها وزيرات عليه بمعنى انا معاك ...تسالمو بيناتهم ونطقت مينة وقالت ~ جاايين قاصدين ضايف الله
عيشة ونزهة ~ مرحباا بلي جا وجاااو دخلو ...
الكل دخل لقعر دار لي كانت مصاوبة ومتولة تحطو طيافر في طبلة زاج كانت تماا معاظة طيفور لي كان فيد مينة بقات هازاه ، استقبل عبد الله الرجال وداهم لصالون صغير اما نسى مشاو صالون اخور مقابل معاه ....كيف جلسو سرباو ليهم لحليب معطر بزهر والتمر معمر ، عند رجال كان كلشي ساكت وكيشوف فشي من غير عبد الله لي كيردد على فمو ~ مرخبا بيكم مرحبا بيكم ...نقز مراد وقال بعدما حط ايديه على ركبة زيدان ~ الحاج عبد الله هذا خويا وصاحبي وعريسناا سي زيدان ...شاف فزيدان وقال ~ وهذا عم مريام وبمثابة باها والواصي عليها ...جاوبو زيدان وهو كيهز راسو من فوق لتحت ~ مرحبا متشرفين اسي عبد الله
عبد الله مشابك ايديه وحاني راسو بادب ~ شرف ليا اولدي مرحبا بيك وبطريق لي جابتك
النسا كانو كيديو ويجيبو في الهضرة مينة عرفات عائلتها على نزهة وعيشة ونزهة كذلك وبالمثل...تحطو صواني وكبرو بمينة وعطاوها تعمر اتاي فاسي وهما مكاين غير قوولها وضحك وراها ... نادية غا شادة سداري رجليها تنفخو مبقات قادرة لا تزيد لا توقف ...زوج نسا شدتهم نزهة هما لي كيشقاو على لعيالات وزوج رجال على رجال...الوقت لي مينة كانت كتعمر اتاي ...سي عبد الله هو لي كان مكلف برجال ومراد مقرد حداه باغي يعرف كيف كيعمر اتاي مقشب وخالق جو ...اما زيدان كان متكي على ضهرو وحاضي كل واحد وشنو كيدير وشنو كيقول كيتسنى غير وقتاش يشوفها وطيح عينو عليها مرة مرة خوه وصاحبو يتوشوسو عليه غير يهز راسو فيهم يضربو طم ...
شربو اتاي ودواو على كلشي وعلاش جاو مجبدوش حسو...زيدان صبرو تقادا ممولفش بكثرة اللغى هز تليفونو وصيفط مساج لمراد فيه ~ واش الموضووع علاش جينا مغتدويوش فيه ولا شنو ؟؟
قراه مراد وحبس الضحك ، سكح كاسو وحطو وقال بصوت مسموع شوية ~ سي لفقيه ، توكل على الله وفتاتح الموضوع لي جينا على قبلو... تقاد لفقيه في الجلسة وقال موجه هضرتو لعبد الله ~ الله عز وجل قال فكتابه الحكيم
- قال يا معشر الشباب من استطاع منكم الباءة فليتزوج ..الزواج هو ارتباط بين مسلم ومسلمة بنية العفاف والكفاف وتحقيقا لأوامر الله ورسوله ومن اسسه الاختياار بحيت قال رسولنا الكريم تنكح المرأة لأربع ..لمالها ولحسبها وجمالها ودينها ....وحنا الحمد لله ولدنا شاف في بنتكم اسي عبد الله جميع هاد الشروط ...المال مندويوش عليه اما الحسب والجمال باين من وجوهكم ودين على حد معرفتي بلي ملتزمة وزارت بيت الله وكتخافو يعني مغاديش يلقى حسن منها زوجة صالحة وأم لوليداتو وشريكة حياتو في المستقبل هادشي الا قبلتو علينا
عبد الله عجبو الحال هز عينو فزيدان وقال ~ مغاديش نلقاو حسن منو ليها على مشفت وسمعت بلي ولدي زيدان باغيها وشاريها وهادشي كاافي وموفي حاجة وحدة نقولها ليه قدامكم خاصو يعرف بلي غادي ياخد جوهرة ناذرة ،بنت بالف راجل ، صبارة وقلبها بيض ،تكرفصات ودمرات يعني يحافظ عليها ويعرف بقيمتها ،يديرها فعينيه ووسادة تحط راسها عليه.. يكون ليها الاخ لي معندهاش والاب لي منو تحرمات والزوج الصالح لي يكون عكازها في دنيا وتكون ليه ساروت الجنة ان شاء الله
النسا بدورهم جالسين ويجيبو في الهضرة ويديو مينة دور وتعتاذر وتقول ~ سمحو لينا شقيناكم وعذبناكم معانا
نزهة كانت جالسة حداها ~ الله ياودي مرحبا بيكم عذابكم راحة الالة مينة متقوليش هاد الهضرة راه غنوليو عائلة
مينة شدت ليها فيديها ~ هادشي لي بغيت نسمع منك الملحة وطعام تشاركنها ، عرفتينا وعرفناك وكيف جيتك داك نهار وطلبت بنتك منك قدام ولادي ، هانا قدام هاد ناس لي فيهم عائلتي صغيرة وعائلتك كنرجع نقوليك انا باغا بنتك مريام لولدي البكر تكون عروستو والسند في الحياة وان شاء الله لي بغاتها هي لي غتكون وكلامها كبير ومسموع تطلب وتشرط كيف بغات لي ثقالت عليكم خفافت علينا باذن الله
نزهة بفرحة ورضى ~ الله يكبر بيك ويبارك فيك وحتى حنا ملقاوش حسن منكم وبالخصوص منلقاش فضل منك عكوزة ليها
مينة ~ ونتي فضلو الحبيبة ، مهم كيبقى صداق تا يدوي فيه بزوج ويتافقو بيناتهم
نزهة ~ انا لي يتهلى ليا فبنتي ويفرحها عينيا نعطيهم ليه ،كون كان جائز انا نعطي صداق على قبلها ، غير هي لي عندي وانا من بعد ما داز عليها لهلا يجعلو فال نبغيها غا تعيش فرحانة وهانية ومرتاحة لبال
قالت ليها مينة ~ نحطوها فعينينا والرمش لي يهب عليها نقطعو باباه حنا گاع
ناضت عيشة هازة بلاطو الحلوة كدورو على الناس ~ دوزو كيسانكم حديث ومغزل كي كيقولو ...سخنو كيسانهم وشربوهم وهي تنطق مينة من جديدة ~ ايوا كنظن رجال دواو في المعقول واتاي وشربناه دابا مكرهناش نشوفو عروستنا
نزهة جمعت الوقفة ~ مطلبتو غير الموجود ..خرجات على برا وعيطت على عمها عرفات منو بلي تافقو وبلي باغيها ولي طلباتو يحضرو ليها
كانت جالسة فبيتها فوق جمر ، واخا كانت عارفة بلي مغاديش يشوفها ويشوف شعرها لكن الفرحة لي كتحس بيها خلاتها تمشي لكوافورة تصايب شعرها وقدات وجهها على حقو وطريقو لبسات قفطان من ديما مشهياه يجي عليها ...كان نوع بروكار بالفضي برشمة هابطة من كتفو ليمن لجهة الصدر وواصلة لظهر بحزامو رقيق من جهة الخصر وجاي من لتحت كلوش عازلها شوية من لفوق لكن ممبينش مفاتنها من لتحت حيت عارفة غتكون دنيا عامرة ومخلطة
مرافقاه بصاندال عالية بلون الحجاب ..وردي بارد لي كاين في رشمات ....قبل متنزل لتحت كانت مقابلة مع لمرايا وكتشوف وكتفكر كيفاش ربي كبير قدر يعوض بكاها ضحكة وقرحتها فرحة وخلاها تنسى كلشي وتفكر غير فنهار لي غيتسد عليها هي وزيدان باب واحد توثرات وجلسات فوق ناموسية وهي كتفكر في ولدها لي مشطونة عليه بزاف واش غيتقبلو ويديرو ولدو ويقبل بيه يعيش معاهم ولا لا ..هزات تليفونها ودخلات الواتساب فين كتراسل مع نادية لي كتوصل ليها بالحرف وكتصور ليها شنو كيديرو وتسجل شنو كيقولو ..وحتى بنات عمها ل كانو مكلفين بكمال كل مرة وحدة فيهم طلع عندها توريها شنو كاين ...تحل عليها لباب ودخلات بنت عمها لبكر كتصلي على نبي بشوية وكتقول ~ طلعتي كتحمقي ما شاء الله جيتو مواتين ، عرفت راسك غيضرك وانا نخون ليك تصيورات فاش يله وصلو وركزت ليك على لعريس ..
حطات قبالتها تليفون وزومات ليها على زيدان وبدات توريها من بعيد ~ واخا داير العگاز زوين اختي وباينة فيه ثقيل ورزين
بلاما تحس ولا تشعر قالت ليه بلهفة ~ لا ماشي ديما كيدير العگاز غير حيت كان مريض وعيان معاون بيه
بدات تعاود ليها عليه وهي تدارك الموضوع وحشمات ...شوية لحگو عليها بنات عمها لوخرين جايين بامر من نزهة باش ينزلوها ...وداكشي لي كان داروها وسط منهم وهبطوها بالصلاة والسلام ....زيدان بدون شعور وغير سمع زغاريت قلبو تهز من بلاصتو وهز عينيه بانت ليه من بعيد من شوية شق تاع الخامية نازلة كالبدر منورة ديك اللحظة سهى و نعازل على العالم وبقى حاضيها غير هي كيشوف فيها بدون ميرمش حتى غبرات عليه ...دخلات لعند لعيالات لكيصليو على نبي وقفات مينة قربت منها وقالت ~ اللهم صلي عليك ارسول الله ، العين لي شافتك ومصلاتش على النبي الحبيب تفلق ان شاء الله ...بغيت ربي يحفظ كيف حفظ اللسان بين سنان ..وبغيت ربي ينجيك كيفما نجا سيدنا ابراهيم من النار وبغيت ربي يديرك عزيزة ويقويك كيفما قوة يوسف عليه السلام
مينة ودعواتها خلات كلشي حال فمو وكيشوف وكاين لي دمعو عينيه بالفرحة وتاثر ...شافو فعينين مينة عدوزة كتبغي ولدها وكتموت على لي كيبغي ولدها ..مريم بعيون دامعة شدات فيدها وباستهم ليها بزوج وباست ليها جبينها ومينة بدورها عنقااتها ...وراها سلمت على خالتها وعنقات مها لي قرات الحزن في شوفاتها ...صعيبة عليها وماشي ساهل بنتها وصاكها لي دايراها في كتافها غتزوج وتخوي عليها دار ..كانت يدها وظهرها ورااجل الدار لي كتقضى وتجيب ليها ...نزهة مكتعرف لا سوق لا حانوت لا هادي نقصت وهادي باقا... من نهار مات المرحوم عوضاتو مريام وكانت بنت الوقت وبنت مها لي مخلاتها مخصوصة لوالو...
سلمات باليد على ناس لي فصالة وجلسات حدا عگوزتها وشبه ابتسامة مرسومة على وجهها وحناكها مزنگين بالسر والحشمة
تسربى لعشى لي كان مشكل كيشبع العين قبل الكرش ...من مقبلة حتال الديسير ...كانو كياكلو ومينة غا حاضية مريام وتقطع ليها وتقوليها كولي وتمدح فيها وفزينها قدام ناس ~ تبارك الله عاد عرفت ولدي علاش كان رافض زواج ...عمرو تلاقى قبل بوحدة كتشبه لبنتي مريام
- نطقات وحدة من عائلتها وقالت ~ تبارك الله وصلاة على نبي خدا زين الحاجة ...الله يتاويهم للخير ..جوبتها مينة بفخر ~ الله يبارك فيك الحاجة ويفرحك بوليداتك
تعشاو في اجواء عائلية مكانوش حاسين براسهم غراب في ضيافة نزهة بالعكس ترحب وتعاود بيهم والا سكتات هي تنطق عايشة ...بعدما كملو لعشى جاا عبد الله وستأذن من نزهة بلي غيتحولو رجال لعندهم لصالة باش يدويو ويرصيو الامور....مريام حسات بالخلعة وحدرات عينيها الارض
خايفة تهزهم ويتصوبو لجهتو
بدات كتحس بصالة بدات كتعمر ورجال كيدخلو كانت شادة مشوار مطروز فيديها زيرات عليه تحيد بيه توثر لي كتحس بيه كأنه غريب عليها ولا عمرها شافتو وهادا هو لقائهم الاول ...نطق لفقيه لي جا معاهم وقال بحكمة كيف عادتو ~
الواجب راه تقام وحمد لله الرضى باينة على وجوهكم بقى لينا غير نقراو الفاتحة ديالهم رسميا حيث بلا بيها مكاين والو..
نزهة مقدرتش تدوي خافت يخونوها دموعها ، جوباتو عيشة وقالت بدون متشوف فيه ~ مرحبا كلامك هو لكبير
كلشي هز يديه وعم الصمت مكان كيتسمع والو من غير صوت رجاال كيقراو في الفاتحة وتمتمة النسا اما مريام صوت قلبها طغى على لسانها
وعينيها تغرغرو وتفكرات اول شوفة واول مرة قلبها دق فيه لزيدان كانت امنيتها كأي بنت كتبغي شي حد ومتعلقة بيه ، كتحلم يكون هو لفارس لي يجي يخطبها وتجمع بيه ....بغات وتمنات ودعات ل بحال هاد نهار لكن لي مرات منو خلاها كفرات وكحلات قلبها وسداتو وحلفات ليه لرجعات لكن ربي حنتها وعرفات في الاخير بلي انا اريد وانت تريد وربي يفعل ما يريد
تسمعت صدق مولانا العظيم وكلمة مبروك الله يكمل عليكم بالخير بلاما تحس هزات عينيها لقاتو حاضيها وكيشوف وكيتهد مرتااح ...هربات نظراتها لجهة تانية وهو ينطق لفقيه ورجع قال ~ ودابا مافيها باس العرسان يجلسو مع بعض ويديو ويزگيو الامور تحت ما يسمى بالنظرة الشرعية
كلشي دارت ليه حساب تال هادي لا ، اما هو جاتو على الگانة وكان طالب عليها وقف هو لول مشات مينة لجنبو ترافقو تال لصالة فين كانو رجال وناضت نزهة عند مريام نوضتها وشدات فيديها ومشات معاه حتى وصلتها ...خلاوهم بزوج راس فراس غير هي وياه
جلسات مبعدة عليه ومقاداش تشوف فيه كانت مرفوعة ومرتابكة .. كتلعب بداك طرز لفداك زويف ل هازة ،دقات قلبها متسابقين ومخربقين وانفاسها ماشي منتاظمين.....اما هو مكانش مصدق عينيه ولا متيق راسو بنسبة ليه هاد اللحظة كانت حلم صعيب تحقيقو ..لي بغاها قلبو جالسة قدامو تقرات فاتحتهم وقريب تولي مرتو وشريكة حياتو....سمعات صوتو دافئ وهو كيقول ~ مريام لاباس عليك .....؟؟
جوباتو بلاما تشوف فيه ~ حمد لله ،ونتا كيف بقيتي بخير ؟؟
وهو تايه في تفاصيلها ~ حمد لله وليت مزيان....بترجي قال~ ممكن تهزي فيا عينيك نشوفهم...!!.تجمدو ملامح وجهها ولمسات الشوق في صوتو ...طلعات عينيها فيه بشوية ...ابتسمت العيون قبل من الافواه وتلامست قلوبهم قبل من ايديهم ....عم الصمت وبقات حرب النظرات بيناتهم مطولة ...شافت في لمعان عينيه تألقها وجمالها وشاف في نظرتها وملامحها حبها ليه لي رجع حيا من جديد...هربت عينيها بارتباك وخجل مجات فين تدور وجهها حتى حسات بايدو الدافية تحطات على ذقنها وقال بصوت خشن ~ شوفي فيا متهربيش مني ؟؟ ....هزت عينيها ببرائة وشافت فيه وهو ينزل ايديه وقال ~ سميتي زيدان لخليفي ، مهندس ،السن كنفضل نقول 38 حيت اخر عامين معشتهمش كيف تمنيت...عندي مساوئ وعندي محاسن كيبقى الكمال لله ، كنت كنكمي وكنسكر وگاع لمبيقات كنعرفهم لكن بفضل الله وشي ظروف خايبة لا داعي لي ذكرها ثبت وعرفت طريق الصحيح ..انا ليوم جيت طالب وراغب باغي نتزوج بيك على سنة الله ورسوله ولي بغيتيها ان شاء الله هي لي غتكون
حنات راسها بابتسامة وجاوبات ~ انا سميتي مريام فعمري سبعة وعشرين سنة أرملة وعندي ولد طالع في عامين وعلى ذكرو غنقوليك بلي هو شرطي الوحيد.. الا بغيتي يكمل هاد زواج ...حرك ليها راسو باهتمام وضيق عينيه باغي يعرف شنو غتقول كان خايف يكون شرطها قاسي عليه نطقت وهي كتشوف فيه بجدية ~ ولدي انا كلشي فحياتو ما عندو لا عائلة لا اهل من غيري انا فيا مو وباه وعمتو وخالتو وكلشي بنسبة ليه..وراك نتا من ناس لقلال لي عارفين هادشي ... داكشي علاش غنقوليك انا ميمكنش ليا نعيش بعيد عليه ولا يتفرق عليا ونخليه..بغيتيه يعيش معانا غنكون راضية وموافقة على هاد الزواج مقبلتيش
خافت ولون الاحمر تصبغ في حناكها لي كانو غيطرطقو بللت حلقها وقالت بصوت مبحوح بالكاد سمعو ~ صافي هذا هو شرط لي عندي اما الباقي مكيهمنيش
قالتها ووقفات كأنها كتقوليه بلي تقادات الهضرة ، اصلا حشمانة من راسها وهب عارفة گاع ل على برا بالهم معاهم ....كيف بغى يوقف ومع طول الجلسة ضراتو رجليه ...حسات بيه من ملامح وجهو لي تغيرو بلي مقادرش يفورصي عليها ...بلاما تحس ولا تفكر كثر مشات حداه ومدات ليه راحة ايديها وقالت~ تسند عليا
ميل راسو لعندها وبتاسم ليها وحط كف يديه فوق كف ايدها وتمو خارجين مشادين .... انفوا شافوهم خارجين بداو يصليو على النبي هزو عينيهم فبعض فنفس الوقت ومراد لي كان واقف مقابل معاهم اغتنم هاد الفرصة وخدا ليهم صورة وهما العين في العين والايد على الايد
ويبقى الحب أقوى من أي شيء
مشاعر متدفقة من جهتهم بزوج ، كانو كيشوفو فبعض بهيام كل واحد فيهم كيشوف راسو في عيون تاني ، زيدان حبو لكبير ليها واضح وباين مزال مريام الخجل غالب عليها...شافت في مراد وميلت ليه راسها باش يجي يعونو وتمشي لبلاصتها دار راسو مكيفهمش.....ملقات مدير من غير انهم يكملو طريق بزوج يدهم فيد بعض على صوت الزغاريد والصلوات على النبي المتعالية
مينة هزات لورد لي فطيفور وبدات ترمي عليهم وكتبكي بالفرحة دارو ليهم بلاصة في جنب بعض ايد مريام كانت كترعد وقلبها كيرفرف
وحاساه غيخرج من بلاصتو ...جا لعندها كمال كيجري تخشى في حضنها محسات غير بزيدان هزو باسو ودارو فوق رجليه
كيضحك معاه ويلعب وكمال عاجبو الحال ...بقات كتشوف فيهم نسخة طبق الاصل نفس زرقة العيون ورسمتها
نفس لون شعر.....نفس الطباع وتقليقة خدا ليهم مراد صورة وكمال بيناتهم كانو ضاحكين للكاميرة كيبانو لايقين لبعضيااتهم ....وهو كيشوف في تصاور لي خدا وكيضحك ما حس غير بنادية جات وراه كدوي تحت سنانها ~ شفتك داير فيها مصور ، ومخليني مثقلة بولدك ولا بنتك ومتفكرتينيش
شدها من خصرها ممسوق لحتى واحد ~ تبغي نهزو فكرشي واحد شوية تا ترتاحي.....دقة خفيفة جاتو لكتف وقالت مغوبشة ~ كتريگل عليا ؟!
سهى و طلق راسو في الهضرة ناسي الناس لي ضايرين بيه ، شد ليها يديها و حطها جيهة قلبو ~.. وانا نقدر نطنز على مت ولدي و عمارة داري و دفى فراشي
نادية .تتشوف في فمها لي تتعض في فمها يتجمعو و تترخي في يديها من يديه ~ ... مراد اويلي جهلتي طلق مني كل شي كيشوف ...شمت ريحتو ~ ... اممم ريحتك
مراد ~الله يا ربي اش غاندير في هاد اممم .....جوبت تحت سنانها ~وتا طلق شوهتينا ويلي دير عقلك
مراد طلق منها وشاف في زيدان لي لقاه تايشوف فييه ومصغر عينيه ..حنحن و نضف حلقو وشير ليه وقال بهمس ~ ... احم الله يجعل كل شي مبارك و مسعود
ناضت مينة وقالت قدام جماعة ~ ايوا اسيادنا مريام دابا راه ولات عرووستي في الاصل ودين وللتقاليد راه ترشمات لولدي وولات ديالو ، داكشي علاش والا جات على خاطرك اسي عبد الله نلبسووهم لخواتم شنو قلتي ؟؟
عبد الله مهزش فيها لعين ~ مقلتي تا كلمة العيب ، لي بان ليكم ديروه ....دارت شافت في نزهة حركات ليها راسها بمعنى واخا ...
جابو ليهم بلاطو فيه لحليب وتمر وبواطات لخواتم لي جاو مع خطبة وقبل ميتركبو لخواتم جات مينة قدام ناس وقالت ~ كيفما ولدي غيرشمك تكوني مرتو ،حتى انا غنرشم عروستي ...حلات لبواطة وقالت وهي كتضحك ~ ومتديش على خالتك دقة قديمة معنديش مع زواق ل خرج دابا عزيز عليا لقديم
مينة ~ الله يطول عمرك عليها كلمة ...قربت من مريام وهزات لكم تاع قفطان وركبات ليها نبالة لي جاتها كتحمق مع بيوضية ايديها باستها وقالت وهي معنقاها ~ غنديرك بنتي وفعينيا ولي ثقالت عليك خفافت عليا وعمرك تسمعي مني كلمة تغيرك ولا تضرك ونطلب من الله ديريني بحال ميمتك وتعزيني كيف معزتها
مريام زيرات عليها وقالت ~ كلامك غيكون فوق راسي ومعزتك كيف مي واحترامك واجب عليا ورضاتك من رضاة الله وواليديا
مينة بعدت عليها كتمسح في دموعها ~ الله يرضي عليك ابنتي
كملات معاها وقف زيدان لي كانو عاجبينو بزوج ..وقفها كترعد بين ايديه وحشمانة اما هو تفصل على العالم ومبقى كيسمع تا حاجة حدو كيشوف فيها وعاجبااه وهي متوثرة وكتضور فعينيها يمين وشمال مدت ليه مينة لخاتم ، وخدا ايدها رقااق وزير عليهم وطبطب بمعنى تهدني كان كيركب الخاتم ومرة مرة يهز عينو فيها يتامل زينها وحشمتها لي جابو ليه تمام ..تاهيا بدورها خدات ايدو كتفتف ولبساتو خاتمو بزربة ونزلت عينيها الارض عند بالها تفكت ...محسات غير بيديه بزوج شدو في كف يديها وبفمو كيقرب من جبينها باش يطبع قبلتو ، حط فمو على جبهتها وغمض عينيه ونسى راسو عليها....
حط فمو على جبهتها وغمض عينيه ونسى راسو عليها ، واخييرا فاز بمريام قلبو ، عانا ونتاصر في معركتو معاها وقدر يكسبها من جديد ، رجفة ايديها وصوت انفاسها الغير منتظمة خلاوه يتاكد بلي مازال عندو تاثير عليها وبلي حبو مخبي فشي بلاصة في قلبها ..شفايفها كانو كيترعدو حاسة بتبوريشة شاداها وبصهد فيها احاسيس متدفقة تعرمو عليها فور ما حط فمو على جبهتها قلبها تهز و تحط غمضت عينيها و التنهيدة طالعة معاها وروحها غتهزق وقلبها كينبض باسم زيدان ..الشخص لي بغاتو اول مشافتو لفت انتباهها برجوليتو وشخصيتو وتمناتو ودعات يكون من نصيبها وهاهو هاد النهار جا وكتاب وغتولي ليه حرمو ومرتو خرجات ضحكة خفيفة من فمهاا بلا متحس ولا تعشر وما الحب الا للحبيب الاول ... جات في وذنها كلمة المزوجين في السما لا فراق ليهم في الارض و هي تحل عينيها وشافت في خالتها عيشة لي كانت حاطة يديها على قلبها و طلقتها بتزغريتة خلات زيدان حنحن وشد في يد مريام لي كانت غارقة بيها الدنيا ... تعالات الصلاة على النبي وصوت مينة بدعاوي الخير ليهم قرب فمو على وذنها وتكلم ..
زيدان ~مدام مريام الخليفي مبروك علينا ...
تمتمت بصوت خافت ..تحنى بوذنو عند فمها حيت مسمعش وقال ~ شنو قلتي ؟؟
مريام بابتسامة ~ الله يبارك لينا
كمش عينيه وهز ليها راسو كيشوف فيها حتى حشمها جات حداه مو سلم عليها وباس راسها وفنفس الوقت سلمات على مها وباست على راسها نزهة عينيها كانو كيبريو بدموع وشهقة واحلة ليها في الحلق مسخاتش ببنتها وفنفس الوقت فرحانة ليها حيت حمد لله غتزوج بلي كتبغيه وغترتاح بعد گاع لي داز عليها ، حتى كانت يأسات وندبت حضها وكواتها في قلبها وسكتات وهي كتشوف بنات من سنها كيتزوجو رجال من سنهم وكيفرحو براسهم ويديرو نهارهم...وهي غا كتكمد في قلبها وكتدعي في سرها ربي يعوض بنتها بما حسن ...مساهلش عليها تشوف وحيدتها تزوجت براجل كبر منها باش تستر براسها لا هي فرحت ولا نقشت ولا في العمارية تهزت مساهلش عليعا تشوفها ترملت فسن صغيرة وتحملت مسؤولية ولد في وقت لي خاصها هي شكون يكون مسؤول عليها ..ولكن الحمد لله ربي كبير مكيتخلى على حد
قرب حداها زيدان خدا يدها وباس راسها وقال بكلمات مطمئنة ~ لواليدة بنتك غتكون فوق راسي وجوهرة وسط قلبي متخافيش ، ان شاء الله عمر نهار الخايب متشووفو وعمري نمنعها عليه ولا نمنعك عليها بلاصتك معانا معززة مكرمة ، غنكون ولدك ماشي نسيبك ومقامك وبلاصتك كي الوالدة ديالي
دموع لالة نزهة كان خاصهم غير علاش ينزلو وورا كلام زيدان متحكماتش فيه بْكَات وبَكَاتْ لحضور وهادي هي الام مكاتبغي تا حاجة من غير تفرح لكبدتها و تاخد لي تمناه قلبها وهي متأكدة من هادشي وعارفة بلي زيدان غيصونها ويديرها بعينيه وبلي بنتها كتبغيه وعينيها شاهدين على هادشي من دموع ل بكاو بسباب نار عشقها ليه... قطعو الحلوة وكمل نهارهم و الناس المعروضة كلا مشا لدارو بقاو غير العرسان وعائلااتهم المقربة مجمعين قولها وضحك عليها بجو مراد لي مكيخلاش من الكوارث مرة يقول كلمة على حقها مرة يلوحها يغرق فيها جمل و نادية تغمض عينيها و تسدهم وتقوليه غا سكت راك زلگتي ...
وقفت مينة لي اشار لينا زيدان براسو باش تنوض ~ مسخيناش بيكم ولا بحديثكم وجماعتكم لوقت داز وكيخصنا نمشيو
نزهة شدتها من ايدها وقالت بترجي ~ ربي الا مجلسي مازال الحال ، اتاي كيعاود يعمر نجلسو من جديد على صينيتنا ونعقلو على كيسانا
مينة بنفي حركت راسها ~ ايام الله طويلة وميبقى يفرقني انا وياك غا نعاس ، غا خلينا نمشيو زيدان ولدي خاصو يرتاح بان ليا عياا
هزت مريام عينيها فيه كان مقابل معاها وصحيح علامات الارق بانو عليه ، وقف وخدا. عگاز شدو بيديه وتم قاصد الباب سابقهم وعينيه الارض ،وصل حداها ووقف شافيها وقال ~ ممكن ندوي معاك
حركت ليه راسها بواخا وقف تسناها خلاها حتى سبقاتو غادا قدامو وهو وراها عينيه في الارض ، وقفت في الخرجة الصالون مبعدة على الهضرة والضحك ، جا قدامها حاط ايديه بزوج على العگاز وكيشوف فيها وفيديها لي كتطرطق فيهم وفعينيها لي كضورهم ~ كمال نعس
مريام بتوثر ~ ها ؟؟ اه نعس قبيلة عيا بلعب ....حرك راسو وقال ~ مزياان ، مهم بغيت نقوليك وجدي راسك هاد ليومين غندوز عليك باش نوجدو وراق العقد ..نمرتك ديجا عندي ملي نصوني جاوبي ...كمش عينيه وقال بخشونة وبصوت مبحوح مفاهمين....جوبتو كتهز راسها بحال درية صغيرة~ صافي وواخا مفاااهمييين
ميل راسو ونطق ~ تصبحي على خير ، قوليهم انا على برا
زيدان شافيها اش لابسة وفي وجهها لي مزوق واخا داكشي خفيف ولكن فعينيه كتبان ليه كتسحر وزينها كيفتن ~ غير خليك لبرد على برا ودنيا مخلطة
مريام ~ واخا لي بغيتي
هز ليها راسو ومشى وهي بقات متبعة ليه لعين وكتشوفيه وممصدقاش واش هي فعلم ولا حلم
بقات واقفة كتشوف فيه بابتسامة خفية مربعة ايدها ممتيقاش نفسها واش فحلم ولا فعلم ، نفس الشخص لي بغات نفس النظرة نفس الغيرة ونفس نبرة الصوت... متبدلات منو تاحاجة من غير صحتو لي قلالت شوية وعلى الرغم من العكاز لي مسند عليه مازال خطواتو رجولية ..دار لعندهاا على غفلة لقاها صافنة فيه خرجت عينيها وتوردو حنيكاتها ، بارتباك عطاتو بظهرها بغات تدخل وهي تسمع اسمها ~ مرياام ..تسمرت بلاصتها وقلبها بدا يضرب كانها اول مرة تسمعو ...ضارت لعندو كتشوف فيه ببرائة وعاضة على شنيفاتها وهو يقول ليها ~ تصبحي على خير
بقات شحال ساهية قبل متهز ليه راسها وتغمض عينيها وتجاوبو بصوت رنان ~ تصبح فراحة الله
قالتها وهربت من قدام عينو بابتسامة جانبية خرح عند خوه لي كان متكي على طوموبيل مشى حداه كيتفوه بعياء ..نطق نصر الدين وحط ايديه على كتفو ~ الله يكمل عليك بالخير اخوياا ...هز ليه زيدان راسو بشكر وقال ~ اميين
رجع قاليه ~ كتبان ليا عيتي ،طلع لطوموبيل شد بلاصتك حتى يخرجو
وهو كيحل لباب قاليه مع اشارة بيديه ~ عيط عيط عليهم الا مفكرتيهم ميخرجوش
فدوك الاثناء كانت مريام دخلات لعندهم لقاتهم كيتوادعو قالت ليهم ~ راه زيدان على براا كيتسناكم
هناء كتشوف تليفونها لي كيصوني ~ يله اخالتي ها نصر كيعيط ...مراد غير بانت ليه مريام دخلات خرج لعند دراري يجمع معاهم قبل ميمشيو اما مينة سلمات على كلشي ووصلات تال عند مريام وعنقتها وقالت ~ وجدي وريقاتك ابنتي باش هاد ليام تدفعوهم لعدول
كلشي مشى حتى من مراد جر نادية ومشاو يرتاحو من غير عيشة لي اصرت عليها نزهة تبقى مونساها منها يجمعو شوية ككل عائلة مغربية من ورا اي لامة كيبقاو دويو في ادق التفاصيل ....
عيشة ~ باينة فيهم ناس لخير والجود والكرم اختي وبنتك مغيخصها تا خير معاهم
بايجاب هزات ليها نزهة راسها ~ ودراري مربين ودايرين بحساب مينة بزاف اما هي حلوة حلوة كتبغي ولادها ولي شاف معاملتها لمرت ولدها يقولو بنت كرشها ماشي عروستها ...الله يجيبنا معاهم فصواب
مريام فلتت ليها ابتسامة لي عبرات على كلشي ~ لي بان ليكم بان ليا ..وقفت كتاوب ..نخليكم نمشي ننعس عييت ليومة تصبحو على خير
طلعت وخلاتهم يتغامزو عليها باينة على وجهها علامات رضى واللمعة لي مومو عينيها عمرهم شافوها حتال ليوم ، سدت عليها لبيت حيدت لقفطان ومسحت الماكياج وتخشات في بلاصتها كتبوس في ولدها وتغطيه وهو يوصلها مساج في واتساب
هزات تليفونها مع الحلة كطلع ليها نمرة مخافياش عليها متردداتش انها تقرا مساج لقات صورتها هي وياه مشادين وكيشوفو في بعض ..الصورة لي خدا ليهم مراد بلا ما تحس ضحكااات و حطات التليفون على قلبها ودعات الله و شكراتو حتى كان ليها من النصيب ... يا الله غترجع التليفون لبلاصتو وهو يوصلها ميساج جديد منو ~ مريم نعستي ...؟؟
مريام كتلعب في خصلة من شعرها وكتكتب ~ لا باقي يله تخشيت ففراشي
زيدان ~ كيف دازت الامور ،يكما عييتي ،سمحو لينا على تمارة ليوم عذبناكم
مريام ~ لا لا مرحبا مكاين تا عذاب
رجع صيفط ليها تصويرة ليهم ووسط منهم كمال وكاتب عليها ~ تصاور جاو زوينين !!
بقات شحال كتشوف فيهم بلمعة حب وهي تقوليه ~ وي زوينين بزااف
كان داير يديه ورا راسو ومركز مع تليفون ~ كمال مزال ناعس ،كاين حداك ؟؟
صوراتو كيف واخد نص في ناموسية وحال فمو معاقلش ~ هاهو مكاينش هناا عيا بزاف بلعب
حس بيها مزال ممطلوقلش في الهضرة وحشمانة خلاها على خاطرها ~ تصبحي على خير حتال غدا وندويو
ونتا من اهلو ~ جوباتو بيها وحطات تليفون فرحانة و الارض مهازاهاش و مرة مرة تشوف الخاتم لي فيديها وترجع لتصاور لي خداو ليه وليها...
بجوج بيهم تعذبو و تكرفسو حياتهم مكانتش ساهلة كان الكره و الحقد الخارجي فقط اما الداخل كيعلم بيه غير الله ... لا هو يقدر يبعد عليه العذراء لي كان اول واحد في حياتها ولا هي عبفت تسنى اول واحد بغاتو و سلمات ليه راسها ..دعات الله باش يغفر ليها و تبعد عليه و تنساه ويبرد حبها من جهتو لكن مقدراتش كيبقى الحب اقوى من اي شي
نعسات فرحانة ومرتاحة غير حطات عينيها على مخدة معقلات على راسها حتى اذن لفجر ...توضات وصلات وحمدات الله وشكراتو رجعت لبلاصتها هزت تليفون تشوف شحال ساعة لقات مساج منو فيه تناسيم الصباح وكاتب صباح الخير مع وردة
حساب بالفرحة جوبتو ديك ساع ~ صباح نور ، كي صبحتي كيف بقات رجليك
لوقت لي ساليت غنعلمك قبل مندوز عليك بلش توجدي راسك نخرجو نقادو امورنا
قالت ليه ~ صافي واخا ان شاء الله
جيبي معاك كمال يخرج معانا
هاد الكلمة خلاتها تفرح كثر كتبات ليه واخا وحطات تليفون وهي غطير بالفرحة حتى هي بغات ولدها يولف عليه ويلقى لي يخرجو ويتهلى فيه ، رجعات تنعس واخا طار عليها شحال وهي تگلب وتفكر وتحلم وتخايل عاد غايبات مدة قليلة وفاقت من جديد على يد ولدها على وجها كيفيق فيها
ناضت كتكسل مغمضة عين وحالة لوخرا ~ مالك اماما جاك جووع
كمال كيبكي وطالع فوق منها ~ مامي مامي كيقصد نزهة
ناضت على وعدها وسعدها هزاتو ونزلاتو الارض غادا وتدوي معاه ~ بغيتي مامي غتكون ناعسة اولدي اجي نغسل ليك وتفطر باش في لعشية نخلجو اماماتي
داز صباحها مغاير على صباحات كانت ناشطة وفرحانة وغا كتشوف فلمرايا وتغني وتليفون فيدها مزولاتوش ..كل مرة داخلة واتساب تشوف الا وصلها شي مساج ...دوشات ووجدات حوايج لي غتلبس على تيساع تقيس هادي وتحط هادي تقول اول مرة غتخرج هي وياه ...صونا تليفونها طارت عليه كان هاد المرة كيعيط طلع ليها اسم زيدان باش دخلاتو عضات على شفايفها بتوثر وجوباتو ~ الو
زيدان بخشونة ~ وجدي راسك عشرة دقايق تلقايني عندك
مريام حلات فمعا ومعرفت متقول من غير ~ صافي واخا
وصل قدام باب دار كلاصونا بطوموبيل خرجت لعندو نزهة لقاتو واقف حدا الباب سلم عليها وحنى راسو وتكلم ~ لاباس عليك الحاجة ؟؟ كي درتو مع روينتنا
نزهة جاوباتو بابتسامة رضى ~ مكاين لا روينة لا والو اولدي ! دخل زيد متبقاش قدام الباب
عارفهم غا عيالات فدار وعاد مزال مطيحو لعقد ناقصة يدخل لعندهم ،حرك راسو بنفي وقاليها ~ خاصنا نمشيو غير علميها بلي كنتسناها
هزات راسها بواخا وخلاتو على خاطرو
دخلت لعند مريام لقاتها نازلة في دروج وشادة فيدها كمال ، خداتو من عندها كتبوس فيه ~ كون غير خليتيه ابنتي غيعذبكم
مريام كتقاد شالها ~ هو لي قاليا جيبيه معاك ...
نزهة باستو وحطاتو الارض ~ واخا ابنتي يله سيري متخليش راجل كيستنى ...شدت كمال من يدها وتمات خارجة قلبها كيضرب كتسمعو في وذنها ، احساسها فشكل ،فرحانة وخايفة ومتحمسة وملهوفة ..هذا زمان مخرجت معاه في موعد
هذا زمان مشافت فعينيه ودات وجابت معاه في هضرة كتخصهم هما بزوج ....خرجت على برا لقاتو متكي على طوموبيل لابس كاجول سروال دجين وقبية كحلة مع كاسكيط بيضة واديداس حتى هي فنفس اللون
اما لالة مولاتي كانت لابسة كسوة كحلة بليكرا هابطة حتال لتحت ولايحة عليها من لفوق دجاكيط دجين مع شال بيض وتاهيا اديداس بيضة وملبسة كمال صغير بحالها ،
كانو منسقين في اللبس لي شافهم يقولو متافقين ..شافت فيه وتبسمت حتى بانو حنيكاتها اما هو شافيها ودغيا نزل عينيه لجهة كمال ساعف حتى تحنى على ركابين جلس قفازي وحل ليه ذراعو باش يجي لعندو
ردات لبال لطوموبيل بان ليها شي حد اخور هو لي سايق ، كان شيفور شركة مكلفو زيدان يديه ويجيبو فين مبغى حتى تشافى رجليه ...قربت لعندهم ومدت ايدها وقالت ~ عطيه ليا ، متفورصيش على رجليك
ضار شافيها بنظرة مغايرة وحل باب اللور وقال بصوت خاافت ~ طلعي ؟؟....دارت شنو قال شدات بلاصتها وهو يمد ليها كمال بعد مباسو وسد لباب ..لوهلة كانت كتعتاقد بلي غيجلس حداهم لكن خاب ظنها وفنفس الوقت تنفست الصعداء ملي ركب لقدام حدا شيفور محتارم خصوصيتها
ومخليها على خاطرها...متنكرش بلي مكرهاتوش يجي حداها لكن فنفس الوقت خاصو يبقى بعيد عليها على اقل حتى يتكاتبو
كانت وراه حاضية طريق من زاج دايراها سبة شاغلة بالها وتفكيرها بيها وهو كان حاضيها من لمرايا لي حداه...كمال واقف على رجليها ومعنق الكوسان مد ليه زيدان ايديه شد فيها وبقى غادي كيلعب معاه ويبوس ..... تا وصلو ميل راسو واشار لشيفور يوقف هزات راسها تشوف فين هما بان ليها مكتب لعدول تنهدت بصوت مسموع ودعات الله يسر الامور ، اما هو حل لباب ونزل جهتها حل عليها وقال مضيق عينيه ..كان مركز فملامح وجهها باغي يعرف باش كتحس ، واش فرحانة ولا غا مسايراه وفوق من قلبها تابعاه ...بالحق من لمحة عينيها ورجفة يديها عرف بلي مزال باغاه ...حك على لحيتو ومد يدو وقال ~ عطيني ورااقك
جاوباتو ~ تبغي نمشي معاك
حرك ليها راسو بنفي ~ لا غير خليك هنا مرتاحة ندفهم ليه ونجي ...حلات صاكها وجبدت ليه وراق ،خداهم من عندها وقال لشيفور ~ شريف يله معايا
زيدان هو زيدان اش جا ميبدلو ...باش ميخليش الشيفور معاها في طوموبيل داه معاه ...بتاسمت على تصرف ديالو متنكرش هادشي لي جدبها ليه اول مرة ،شخصيتو ورجوليتو وغيرتو وتصرفاتو
طرق عليها ومشاو هزات تليفونها وعنقات ولدها وبقات كتسيلفا وكتصور وبلاما تحس كتدندن
حتى كيبان ليها راجع كيعرج سيغتو مكانش هاز لعگاز هاد المرة قلبها تهز بدون متحس انفوا حل لباب وطلع قربت عند وذنيه وقالت بلهفة ~ مالك واش ضراتك تبغي نرجعو
غمض عينيه ، نبرة صووتها بورشاتو سيغتو مقربة جهتو ..دار لعندها وجات عينو فعينيها لي كانو خايفين عليه ...مبقى قال والو سكت كيشوف فيها قبل ميبعد وستغفر فسرو طالب الله يصبرو حتى تولي حلالو ~ ماشي شي حاجة متشغليش بالك
وقفو قدام اكبر المحلات في كازا مختصة في دهاز لعريسات من لكبير لصغير ..تفاصل قفاطن ذهب ...دار زيدان كاسكيط على راسو ونزل حل باب جهة مريام خدا كمال من عندها وقاليها وهو كيقاد ليه شعرو ~ نزلي
مريام بارتباك قالت ~ اه واش ليوم احم باقي لحال ....ركز فيها شووفة ~ لخر ديال سيمانة غنديرو ضريب صداق قلت ليه قرب الموعد ، ربع حاجبو وكمل ..معندك تا مشكيل اولاا ؟؟ حركات راسها بنفي ~ لا لا لي بان ليك ..مدت ليه ايدها..عطيني نهزو عليك نتا باقي عيان ...
كيكره لي يفكرو في مرضو ولا عجزو بتغوبيشة جاوبها ~ غير خلييه يله مشيناا ....حركات ليه راسها بواخا وتمشات معاه غادا مسايرة خطواتو ...ومبقاتش ركزت ليه ولا رجعت قالت ليك ارا كمال نهزو حيث عرفاتو تقلق
دنيا كانت عامرة وكلشي خارج يشري لي بوحدها ولي مع مها ولا راجلها
لبياعة وشراية ضاربين ايديهم ..زيدان معندوش مع زحام ولكن على ودها كلشي يهون شاف دنيا مطرطقة بشار گرن حجبانو
وقاليها ~ جي قدامي ...وحيت هي عارفة طبعو وكيفاش داير دارت شنو بغى وبقات غادا قدامو وقريبة ليه ومرة مرة تلتافت ليه وتضحك مع ولدها وهو ينطق وسولها~ كتقداي من عند شي حد هنا ولا بحال بحال
مريام ~ نو مكنعرف حتى واحد
خرج تليفون من جيبو وعيط لمو يسولها ~ لواليدة انا في القسارية قولي ليا سيد لي كتقداي من عندو شنو سميتو
مينة ~ محلات الحاج ريان اولدي سلعتو مضمونة ، وهانتا نوصيك خليها تاخد لي ختار خاطرها ، حوايج لخطبة كانو على ذوقنا اما تاوع عرسها يكونو كيف بغات ولا عييتي خلي تا نمشي انا وياها...جاوبها ديك ساع بلا انا مزيان وانا لي غنتكلف ..
توادع معاها وقطع ، على الرغم انو معندوش مع هاد الاجواء ولكن داير سبة باش يدوز معاها وقت كثر..
غادا سابقاه وكتشوف وهو مضيق عينيه كيقرا فسمية لمحلات على وعسى يتصادف مع اسم لي قالت ليه مو..شوية كيسمع صوت كينادي باسم مريام ....
توقف على الحركة ..ضيق عينيه وبرم حجبانو ، ضار مخنزر يشوف شكون ...وهو يكحال عندو نهار وطلع ليه دم
بالمزيان ...هز كاسكيط شوية على راسو كيحقق فيه بان ليه عدنان عينيه على مريام
اما حتى زيدان مشافوش ...جمع قبضة يديه وعض على فكو من لداخل كيحاول يتكالما وشكون خلاك سيد زعم وتم جاي لعندها اما بنتها صفارت بلاصتها وحناكها لي كانو موردين تحبس منهم الدم وفمها بياض
بزوج بيهم واحد مكيحمل ثاني زيدان قبل گاع متكون على ذمتو ولا يجمعهم شي حب كان مكيتسرطش ليه عدنان وفاول لقاء هرس ليه نيفو اما دابا العلم الله شنو غيدير ليه وكيفاش غيتعامل معاه والواعرة هي الا عرفو بلي هو لي فات خطبها وكانو غيتزوجو...كان محزم لابس سروال وخاشي قميجة فيه هاز تسبيح وجاي يشلالي بيه فمو مشرع بضحكة وعينيه فالتين جاي قاصدها حتى قرب لعندها وهو يعتارض طريقو ووقف مخنزر فيه وقال بحدة ~ على فين ا ميخي !!
هز عدنان عينو رد ليه لبال شافو مخنزر ومحمر فيه وعرق جهة ناظرو كيضرب وراسم على جبهتو الله يقربلها....تلجم ليه لسانو مبقى عارف ميقول عند بالو كاينة بوحدها قال يسلم عليها ويشوف واش قلب مها لان عليه ساعة باينة غيندم ..طال سكات واشتدت حرب النظرات ...زير زيدان على ذراع عدنان وقاليه ~ باشمن حق تنطق سميت مرتي على فمك
صدمة حس بيها وصفعة قوية تعطاتو لگفا ...دغيا طارت وتزجت..زاد تاكد من كمال لي هازو زيدان بين يديه ...بلع ريقو ودوزها حارة فجوفو وقال وهو كيشوف فيها ~ الله يكمل عليك بالخير ، مكنتيش ليا في مكتاب معندي ...
غمض عينيه وسدهم بسخط ،مكانش باغي يوصل لهادشي واحد دماغ كيقوليه بقا تعطيه تا يسيل دمو ولكن ملي كيشوف الخوف فعينيها كيضعف ويضغط على نفسو لاحو من بين ايديه تا تخبط على رجاال وقال بتحذير ~ هاد لمرة دوزتها بزز مني ...لمرة جايا نسوس ليك فمك
دفع عباد الله بيديه وشدها من مرفقها وتم غادي ، تبعوه شي رجال تما ~ اشريف اشريف نعل شيطان وبرد دمك غيكون غا سوء تفاهم لحاج عدنان الله يعمرها سلعة ومعروف هنا في القيسارية نعل شيطان وتقدا اش خاصك
مجاوب حتى واحد ...غادي كيزرب وكيسوط صدرو كيطلع وينزل وراسو ضرو ووجهو كيبان معصور ..لقى شيفور كيكمي متكي على طوموبيل خنزر فيه حتى لاح لگارو بدون شعور ..حل ليها لباب طلعات وطلع هو وخبطو بنثرة مدواش معاها دماغو كيفصل ويخيط
اما هي حاطة يديها على قلبها لي مزال كيضرب خافت بلا قياس عيات متخيل كيف غيكون نهارها وجامي طاح ليها هادشي فبالها ...كانت كتراري بكمال فيدها لي نعس وحل فمو ، ضنات بلي غيرجعو بحالهم حتى كتشوف لوجهة مغايرة وكتلقى راسها قدام مطعم زوين كانو كيجيو ليه قبالة لبحر ...تنهدت فسرها وطلبات الله يدوز ما تبقى على خير....نزل هو لول وتاهيا تبعاتو ..قرب ليها كيشوف فكمال وكيمسح لعرق من على جبينو وهو يقول بدون ميشوف فيها ~ شنو قصدو بمكنتيش ليا في المكتاب وشكون عطاه الجرأة يعيط عليك بلا حشمة بسميتك وسط امة محمد
الحب أقوى من أي إتفاق الجزء 21
محتوى القصة
التنقل بين الأجزاء