وصلو لمدينة فاس ..فين تزاد وتربى وكبر ..مدينتو ومدينة جدودو بربعة ....فضل يمشيو لاوطيل يجلسو فيه وختار واحد من اشهرهم تماا....ترجل هو اللول من طموبيل وأول حاجة دارها حل لباب على كمال وهزو لعندو كان ناعس حطو على صدرو وايديه كطبطب على ظهرو ...مشى لجهة مريام لي انفوا نزلت ضرب فيها شوم وصهد لمدينة لي عندها عزيزة ومتنساهاش حيت منها لقات ذاتها وتبدلات وحياتها تغيرات...غمضت عينيها وحلتهم كتنهد مرتااحة ...حتى تحجبت عليها الشمس بطولتو وقف قدامها وقال باستفسار ~ مشيييناا ؟؟
هزات ليه راسها باه وهو يشدهها من ايدها بحال بنية صغيرة وجرها وراه...دخل الاستقبال كيحيد النظاظر من فوق عينو ويحنزز بحدة قال لمكلفة تما ~ بغيت شي سويت يكون كبير وفيه ايصباص للبيبي " اشار ليها برلسو لكمال "
- مرحباا اموسيوو بقا معايا دقيقة !
اسمو كان معروف تما ما مرة ما زوج نزل عندهم ملي كيجي زيارة لفاس قليل فين كيمشي لدارهم حيث مكاين لي مقابلها....دخلو لسويت لي كان بلدي على حقو وطريقو وكبير
مريام حلات عينيها كتكتاشف مبهورة بديكورات لي فيه اما هو حط كمال فوق ناموسية و حيد سبادري لي كان لابس غسل وجهو و تشبح حداه...دار يديه فوق جبهتو وغمض ....اما لالة زينة البنات ستغلات نعاسو ودخلات لحمام تغسل وتوضى باش تصلي وهي تفاجئ بليغيگل لي هبطات عليها بلاما تحس حلت فمها وبدات تندب ملي تفكرت بلي مجايبة معاها والو
كيف غدير واشمن سبة تقوليه باش تخرج تاخد لي خصهاا ...مزال مرجعت زعمات عليه ...غسلت وديبانات بليكوش لي كتستعمل لكمال وهي تخرج
لعندو كانو عينيه على لباب كيتسناها تخرج ، نعاسو خفيف وزادت طيراتو ليه وهي غادا جايا عليه تالفة باستفهام قال ~ ماالك ؟؟
توثرت وبدات تدور فعينيها بلاما تجاوب تا رجع زاد من حدة صوتو ~ امااااالك
بدون شعور خشات ايديها بشعرها كتلعب فيه وقالت بلاما تشوف جهتو ~ كيخصني ناخد شي حاجة هبطات عليا لغيچل ومدايراش بحساابي
دوز لسانو على سنانو ورمقها بنظرة مفهمتهاش وهو ينووض كيلبس فرجليه ~ شنو كتستعملي
جوباتو محرجة ~ لي جبتي بحال بحال ....
قالتها وخشات راسها في صاك كتقلب فيه متنفست الصعداء تا خرج .......
ناضت كتوجد ماكلة لولدها علاما يجي زيدان وملي كملت عيطات للعائلة وطمنتهم بلي وصلو على اخير....سالات معاهم ومشات طلات على لمدينة من البالكو لي كاين وسط سويت ....بقات جهد ساعة بوحدها عاد سمعات لباب كيتحل كانت مزال جالسة فيه طالقة شعرها وواخدة راحتها اطلالتهم كانت معزولة كتشوف في فراغ مكاين قدامهم لا بني لا والو زيادة على انهم في طابق اللخر ...غير حسات بيه وهي دور...هز ليها راسو بمعني اجي ودخل لبيت نزل بلاستيكات فوق ناموسية ومشى رجع تكاا وقال وهو مسند ظهرو على الكادر ...~شوفي واش داكشي هو هداك ولا لا ...
حلات لقات لي لانجيت وماا تاع الوضوء وفوطات صحية من نوع Carefree وشي تخربيق لكمال ، تشكراتو بابتسامة خجولة وهزات لي غتحتاج ودخلت الحمام.....عمرات البانواغ وتخشات فيه ، دوشت على خاطرها وريحات عظامها لبست حوايجها تما لي كانت حاطاهم فيه قبل تفاديا لاي اصطدام بيه ....بيجامة عبارة عن كولون حد ركبة ولفوقي ديالو نص كم....نشفت شعرها بالفوطة وخرجت ...حس بالباب تحل وهو يسكانيها ببطئ كيطلع فيها وينزل كيفاش واقفة على صباع رجليها وگدامها حمرين ...مفاتنها معزولين وشعرها كيقطر وجهها مزنگ وشفايفها كيشهيو...ناض بلا هواه قرب لعندها بوثيرة ثقيلة خلات ايدها يترعدو ...خدا الفوطة لي كانت هازاها بيدها دارها ليها على راسها وقال بعدما طبع قبل جنب فمها ~نشفي شعرك
بلعات ريقها وبقات صافنة فيه ...كل لمسة منو كتشللها على لحركة ...ابتسامتو الجدابة وشخصيتو المتميزة ورجوليتو الطاغية كتاثر فيها بزااف ....حركت ليه راسها ببهلان وبدات تنشف شعرها اما هو دخل لدوش يخوي عليه لما باش يحس براسو اون فوغم
بعد ما نشف شعرها سرحاتو وخلاتو مطلوق ،رطبات وجهها وشفايفها ودارت ماكياج شبه باين ومن وراها خدات لون حمر فاتح طلات بيه ظفيرات ايدها ورجليها مجات فين تنشف تا فاق كمال كيبكي حرگو جووع ...ربعات رجليها فوق ناموسية عاطية ظهرها للحمام وخشات وجهها فيه كتبوس وتهر وتدوي معاه بصوت طفولي ~ جااااك جوووع مامي هاا ؟؟ فينا جوييعااات ، بغينااا ناكلوو
هي كتضحك وواحد ساهي فيها وحاضي تفاصيل جسمها الممشوق ...زادت زيانيت على كيف تفارقو ...كان خارج مسفح كي طرزان لابس غير سورط رجليه داير عليها بانضة مزيرة ليه عليها من جهة ركبة حتى التحت....لاح الفوطة لي كان دايرها على راسو وقرب لناموسية جلس ورا مريام كرشو لاصقة على ظهرها تحنى باس كمال وملب هز راسو باسها هي في اسفل عنقهاا بعدما بااعد شعرها.....
عضات على شفايفها بوستو دارت فيها العجب.....حسات بيه كيضور ايديه على كرشها وكيقربها منو تكات ظهرها على كرشو وهزات كمال حطاتو على فخاضها كيلعبو معاه بزوج ...مرة هي لي تبوسو مرة هو لي يبوس وهو فرحان و كيغاغي ويلعب بيديه عطاتو رضاعة كتوكل فيه ومزالها على نفس الوضعية ....زيدان واخد راحتو وايديه معليها حكام كتقيس فين بغات ملكو الخاص وتا حد مغيحاسبو...اما هي عينيها على صغير وقلبها كيرفرف مع لكبير
نزل عينو لكمال حاضي ملامح وجهو وهو ينطق بصوت خشن ~اول نهار شفتو بغيتو يكون ولدي ، فرحت بزااف ..مد يدو لحنيكاتو كيلعب فيهم ،مقبول وكيخليك تبغيه
مربام عينيها عليه مدمعين ~ تا انا اول شفتو درتو بحال ولدي ومقدرتش نتخلى عليه ....تنهدت بضيم ملي رجعات ليها اسطوانتها معاه ...
بدون تردد قال ~ فين هما والديه لحقيقيين مكينينش
مريام كتلعب ليه فشعرو وعينيها كيلمعو بدموع ، سؤال ديالو رجعها لالم حسات بيه عام ونص وكثر ، بلعت ريقها وقالت مضيومة ~ هو معندو حد ، عندو غير الله وانا ، والديه ماتو
ناض تقابل معاها وضيق عينيه بمعنى كنسمع ...
صعيب عليها تدوي في هاد الموضوع.. نهار حطات كمال بين ايديها عطات وعد لراسها بلي الكل غيعرفو ولدها وغتجنب تقول قصتو الحقيقية بالحق زيدان هادا من حقو يعرف معندها متخبي عليه...بدات تمسح بايديها على شعرو رطيطب كان كيرضع وايديه دخلات تحت تريكو لي لابسة كيلعب كيف ديما ملي كيبغي ينعس كيتلاها فاي حاجة ~ بابااه دكمال كان صاحب جيمس رااجلي مات بكسيدة قبل منمشي انا لمغرب كان مزوج مغربية خلاها واحلة فروحها جيمس مقدرش يفووتها كان كيمشي يطلل عليها ويشوف شنو خصها وملي تزوجنا وعاود ليا عزات عليا وعرضتها واحد نهار لدار ومن تما وليت انا وياها صحابات
فداك الوقت كنت مازمة ومحتاجة اي حاجة تعمر عليا وقتي وتونسني وتخفف عليا وصلتها وقت الولادة وقتارحنا عليها تبقى عندنا فدار مكان عندها لا حنين لا رحيم فكرتني فراسي وحطات ليا الملح على جرحي وكيف انا ربي حط في طريقي جيمس حم لي عاوني فداك الوقت تا انا ربي حطني في طريقها درتها بحال ختي مكناش كنفكرو فحتى حاجة من غير لبيبي لي جاي فطريق ، فكرنا ليه فسمية بزوج كنت كنمشي معاها عند طبيبة نراقبو حالتو شرينا ليه حوايج
حمد لله وقوفي معاها كان فائدتو عليا كثر منها...نهار كان وقت ولادتها كنت مخلوعة كثر منهاابيدي وجدت ليها حوايج لي غتدي...غادا انا وياها في طريق وكتقوليا مريام نتي لي عندي فهاد دنيا انا ربيت يتيمة وراجلي كان كلشي ليا... هو مشى وخلاني ونتي ربي عوضني بيك وبهاد لوليد لفكرشي انا فرحانة بيكم معايا ...بدات تبكي بلاما تحس وبتاثر قالت....دخلت معاها هي كتوجع وانا شادة ليها فيديها بلاما تحس كانت كتوصيني على لبيبي كلشي كان مزيان ولدات وشافتو وباستو حطاتو ليا في يدي وامنتتي عليه ونعسات ومبقاتش فاقت..هء هء هء...جاتها ايموغاجي حادة ومقدروش يعتقوها ....حتى قلت شمس شرقات في وجهي ورجعات غربات ...حتى قلت دنيا ضحكتني ورجعت بكاتني ....ماتت وخلات ليا ولدها بين يدي امانة مقدرتش نخليه ..قلت يمكن ها هو ساروت سعادتي والحمد لله داكشي لي كان....نزلت راسها باستو فجبهتو......تبنيناه ودرتو على سميتنا انا وجيمس قلت حتى الا مولدناش مهم كاين ولد جامعنا بزوج...
حسات بيه وقف من حداها كيزفر وهي تجمع راسها ، نسات بلي لي قدامها زيدان المغيار ~ مهم هادي هي قصتو كنتمنى متخرجش من هنا حيت مبغيتش غدا ولا بعدو يسمعها من شي حد ويتاثر
صلى صلاتو وبقى جالس على برا داير يديه على ركابيه قدما بقى فيه كمال قد ما قتلاتو كيفاش كتدوي على جيمس وباش ميقوولش ليها شي كلمة ختار سكات ...بقى شحال
كيحاول يحلل كلمة حتى الا مولدناش مهم كاين ولد جامعنا مبغاش يسولها كبرياائو مخلاهش..مباغيش يسمع قصتها مع شريكو لي مشات لعندو....راسو كيتزير عليه وكيتشوك ملي كيفكر وكيتخيل بلي كانو مزوجين وعايشين مع بعضياتهم عايمين
بقى كيستغفر الله شحال عاد ناض وصى ليهم على لغدا يطلعوه ...كلاو بزوج بيهم فصمت خلاتو على راحتو تاوكان يهضم شنو سمع عارفاه علاش مقلق كتبقى هاديك حياتها وهاكداك عاشتها
ومغتزوقهاش ليه باش يسمعها كيف بغى ...نقب شوية وناض بلاما يشوفيها قال ~ لبسي عليك باش نخرجو تاخدي لي خااصك
مريام شافت فيه بحدة ~ قبل منخرجو بغيت ندوي معاك
باستفسار قالت ~ شنو واقع ، عاد كنتي ناشط مالك ؟؟
زيدان بلل حلقو ~ مكاين واالو متحكريش
جا يمشي شداتو من يدو ~ بغيت نحكر قول مالك ...شاف ليها فيديها لي مزيرة عليه ، كان كيعض فكو من لداخل بجهالة وبلاما يحس ..مبغاش يدوي خاف ميختارش لكلام لمزيان ويصدق قايل شي حاحة نادم عليها...شافت سكاتو طول وهي توقف مقابلة معاه كتجبر بخاطرو ~ عمري بغيت جيمس وعمري كرهتو ، داك سيد فضلو عليا كبير ، كان عارف قلبي ماشي معاه وبغاني كان عارف عمري مغنقبل نولد معاه وبغاني ..صحيح علاقتنا كانت عادية كاي رجل ...قبل متكملها حط صبعو على فمها ~ حد هنا وحبسي باراكا ناوية تصووطي ليا لعرووق ولا ماااااااالك
خرجات فيه عينيهاا وقالت ببراءة ~ علاش شنو قلت
طوا لساانو كيتحلف عليها بعينيه ~ كديريها بلعاني امريام ، جمع على قبضة يديه مغدد ...عرفتي العافية لي شاعلة فيا دابا ولا لا ...عرفتي شناهيا نسمع من مرتي لي كنبغي هاد الهضرة
معرفات تفرح لهضرتو " مرتي لي كنبغي "...ولا تقلق لتقليقتو ....بحدة نطق جااعر ~ صافي نساي عليا داكشي لي فات متبقايش تعاوديه انا غنكمل معاه من نهار وقفنا نهار كنت انا وياك فافران من تما بضبط حيت بنسبة ليا تما حياتي دارت بوووز وهانا غنرجع نكملهااا مفاهمييين
بابتسامة حطات ايدها على صدرو وقالت بحنية ~ صافي مفاهمين ، مقصدتش شي حاجة...تنهداات من قلبها وقالت مترددة...اناا عمري مبغيت ولا غنبغيي غييرك ازيداان
بكلمات شعلاتو وبكلمة وحدة طفاتو ...كان حاط ايديه على جنابو وكيشوفيها كيفاش مخشية فيه بلاهواه نسا كلشي ودور يديه عليها معنقها خشاها فصدرو كتبقى مريام قلبو البنت لي هرست كبرياء زيدان لخليفي ووراتو شنو هو الحب وخلاتو يغير رأيو فيه ويفكر في زواج .
بعد ساعتين كانو راكبين في طوموبيل بزوج بيهم مبتاسمين للحياة و لطريق جديدة غيبداو فيها بزوج ومعاهم ولد صغير...وقفات مريام جنب برج فاس بامر من زيدان جابها تقدى كاع لي بغات ، كان جار بكمال بوسيط بيد وشاد فيها بيد تانية لابس كجول وداير شكارة جنب اما هي لابسة كسيوة انيقة كيف ديما ولايحها الذرة على راسها وصاك صغير هازة فيه تليفونها....دخلو لمحل لبلدي لي حطات عليها ايديها كياخدها ليها ...خظات جليلبات واجدين وزوج قفطان وتكشيطة مخزنية دايزها لكلام ...منساش شيلان لي كيمشيو مع البلدي ...خرجو من تما ومشى خدا ليها باك شانيل تاع ريحة على ذوقو من ديما كانت كتعجبو ملي كديرها ...وكذلك ريحة من si
وريحة من gerlinn و وسبابط le boutain ...
Sac Chanel و Valentino
و انسومبل soire م Yves Saint Laurent
خرجو من تما قلبها كينقز بالفرحة مهامهاش شنو شرات حيت عمرها حرمت راسها من شي حاجة قد ما هامها اهتمامو وسخائو معاها ...دازو على محل مجوهرات عصرية هاد المرة بغا ليها شي حاجة تكون موديغن ديجا كانو وصاهم قبل ميجي كيف دخل وشافو صاحب المحل ستقبلو في لباب ستقبال حار ورحب بيهم جلسات في الفوطوي وهو حداها جالس نص جلسة وكلعب مع كمال بينما جابو طلبية ديالو ولي كانت عبارة عن اونسومبل فيه كولي بالبراسلي والخاتم وتاج رقييق وفنيون ...شافتو وحلات فمها بقات غا كتشوف باستغراب ...لمحات توصيل مكتوب عليه اسمها..ميلات راسها لزيدان وقالت بشوية ~ هادشيي بزااف عليك
رفع حاجبو ونطق ~ عجبك ؟؟
مريام كانت هازاه بين ايديها كتشوف فيه ~ غزال كيحمق
زيدان هز راسو ~ هذا هو المهم ،بصحتك
الحب هو احساس، مشاعر، ثقة، غيرة، خوف، رعاية، اشتياق، و اهتمام هاد الاخير لي كيعطيه زيدان بلا حساب ..كان مهتم بيها وبأدق تفاصيلها ...مكبر فيها حتى حاجة ...كون طلبات الغابر يوجدو ليها....هي كانت فرحانة والارض مهازاهاش وهي كتمشى معاه محملين دهازهم ...دازو حدا بوتيك فيه كل ما يخص للانجغي محسات براسها حتى وقفها ~ تعالي معايا
جرها ممزاگلش ~ بغيتهم على ذوقي ...دخلت عينيها في الارض مقاداش تهزهم عكسو كان كيختار بعينيه براحة جات عندو لڤوندوز لي تما باش تعاونو
- مرحبا سيدي شنو حب لخاطر
هز ليها صبعو كيوريها شنو تجيب ليه ..~ لاطاي اكس ال....دار شاف في مريام وقال باستفسار ~ ياك احبيبة ؟
جوباتو بعينيها ودارت راسها ملاهية مع زيف كتصاوب فيه
كانو دي شوميز دونوي اخر مكاين لوينات فاتحين توب حرير كيزلق على لحم جابتهم لعندو حطتهم قدامهم ..
زيدان ~ عجبووك ؟؟
مريام كتدوي تحت منها حاسة بصهد~ صافي ازيدااان مزياانين
بابتسامة جانبية وقف جات لبنت جمعاتهم ليه وزاد شي ملابس داخلية بالوان مختلفة خلص وخرجوو ..بقاو من بلاصة لبلاصة حتى خداو گاع داكشي لي غيخص حتى من عود قماري وسرغينة شراوه...حتى عيات وتهدت وخممات ليه عاد جراتو من ايديه وبزز قنعاتو يمشيو كان مزال باغي يتقداا ...نزلو البارگينغ غادين يهزو طوموبيل حتى كيسمع زيدان صوت ذكوري كيعيط عليه ، وقف ولتافت لمصدر الصوت واذا به كيتفاجئ بصديق الطفولة والدراسة واقف قدامو كان هو ومرتو
تكروازاو في طريق داز حداه زيدان ومردش لبال لكن هو لا عينيه غا كيضور و صاحبو اكيد مغيخفاش عليه واخا لقاءاتهم نقاطعو شوية ولكن مزال كيسولو فبعض في تليفون ...قرب منو رشيد فاتح ذراعو وكيضحك ~ زيداااان لخليفي عندتا فااس وانا مسايقش لخبار
تلاح عليه وتعانقو برجولية
زيدان بابتسامة ~ كيف داير ابا رشيد هاني
رشيد ~ الله يحفظك ليا ، اش كدير هنا بلا خبااري ، غا علم اصاحبي نديرو معاك صواب
نقزاات مراتو لي لحقت عليه ~ وتا دابا مزال الحال فين دير معاه صواب اولاا
رشيد شدها من خصرها ~ هادي كااينةة ...شاف فزيدان وقال ~ نعرفك على بشرى لمدام وهذا زيدان صاحبي قديم من اياام ليسي
بشرى مدت ايدها ليه ~ متشرفين سي زيداان ...
شافت جهة مريام لي كانت شادا كمال فيديها ومبعدة لتيساع ~ لمدام ديالك هاديك
ضار لعند مريام اشار ليها براسو تجي لعندهم غير وقفت حداه وهو يتماطا عليه كمال هزو وباسو وعرفهم عليهم على اساس مرتوو وولدو
نرجعو العلاقة ومنها لعيالات يتعرفو على بعضيااتهم ..
بشرى ~ والله ايلا مزيانة غتنورونا ...تانا مكرهتش تكون عندي صاحبتي فكازا
مريام بتاسمت ليها ~ مرحبا بيك فاي وقت نزلتي لعندناا
رشيد حرك زيدان ~ دابا اش قلناا ؟؟
زيدان تنهد ~ يكون خير بيناتنا تليفون
جوايه عشرة دليل ..كان ظلام على برا وسويت لداخل شبه مضوي...كمال ناعس فبلاصتو ومريام غسلات وبدلات حوايجها ببيجامة ستان بالبينوار ديالها ...طلقات شعرها ودارت عكر خفيف وخرجات لعندو..كان جالس في البالكو ..راخي ظهرو بأريحية على الكرسي ومسرح رجليه على طبلة ..داير ايديه ورا عنقو ومغمض عينيه ..كيحس براسو مرتاح وبالو هاني حتى حاجة مشغلاه لي بغاها قلبو هاهي حداه
حس بيها دخلات لعندو وهو يحل عينيه بشوية ، تبع ليها العين حتى جلست قبالتو في كرسي كتشوف في المدينة وكتشتنشق هوا نقي...
زيدان بصوت خشن ~ كتعجبك فاس ؟؟
مريام قفزات ~ هاا ، اه عزيزة عندي .....حرك ليها راسو كيتأمل زينها وطريقتها في الهضرة وجلستها وجسمها كلشي عندها فبلاصتو وبعبارو ...تنهد وقال ~ اش بان ليك غدا نمشيو لعراضة ولا نتحجج بشي حاجة ؟؟
مريام هزات كتافها ~ نمشيو علاش لا ....بشبه ابتسامة رد عليها ~ واخا الالة مريام كلامك هو لي غيكون...رجعو لسكات من جديد كل واحد فيهم فين كيشووف زيدان مرة مرة يحط ايديه على ركبتو ويغمض عبنيه بألم...ردات ليه البال وهي تنطق بخوف ~ عطاتك صداع يااك ، انا نمشي نجيب ليك مساج وندلكها ليك شوية
ناضت بالخف مخلاتوش يجاوبها ولا يمنعها ...خداتو من لبيت وجات لعندو ..جلسات قدامو فوق طبلة خدات رجليه حطاتها على فخدها گفظات كمايمها وباشرت بالمساج
كان حاضيها وتالف بيها وعاجباه حنيتها وخوفها عليه واهتمامها...عجبو الحال وجابت ليه نعاس وفيقات رجوليتو بنسبة ليه لمسة منها بحال المااص كيضربو ...غمض عينيه بشدةةة وطوا رجليه جامعها لعندو وقال بأمر~ صااافي باراكااا !!
بدات كضحك ~ لي سمعك يقوول شهر فارقاكم وانا غا ليوم وصلت هنا ، منديش عليك معصباك لكريشة ،كيف دير حبيب ولا حبيبت خالتو ما زال مبغيتو تشووفو شنو عندك
مراد بصياعة ~ يله شدو الهمة اختي مريام وتعاندو معانا تانتوما وجيبو شي ولد ولا بنية يكبرو مجموعين
زيدان بحدة ~ تيسر تيسرر اصحبي سير تنعس دوخك نعاس
قطع عليه ولاح تليفون على طبلة ورجع يديه فين كان حاطها على خصر عرووستو ...شدتها القفقافة وبغات تنوض من عليه وهو يرجعها ~ فين بسلامة ؟؟
مريام تحججت ~ غير عييت وبغيت نتكى ومنها منتقلش عليك
جرها لعندو بيديه بزوج منقها من كرشها وراميها على صدرو ~ نعسي بين يدييي
بلعات ريقها ورخات راسها على صدرو كتسمع صوت انفاسو ودقاتو وكتشم ريحتو ..احساس رائع....وراحة ولا اروع شحال قلبات عليها واخيرا لقاتها
صبح الحال حل عينيه على اجمل صورة ..مريام ناعسة على كرشها حداه وشعرها مليوح على ظهرهاا...ناض من بلاصتو بلاما يدير لحس ...ليل كلو وهي حالة عينيهاا بسباب لوجع ...دخل توضى وخرج يصلي...مشى يطل على كمال لقاه كيلعب فبلاصتو هزو غسل ليه وجهوو وقاد ليه فطورو هو وياه في جلسة لي كاينة خارج لبيت ...كانت تلفازة شاعلة وهو كيخربق في تليفون والولد فوق رجليه كيلعب...داز وقت قصير عاد فاقت بان ليها ظلام كمشات عينيها وهزت تليفون كتشووف شحال سااعة لقات فايتة العشرة...جمعت الوقفة مخلوعة واول حاجة تفكرتها كمال غيكون فاق وفيه جوع ..خرجت حفيانة كتقلب ووجها منفووخ....كتعيط باسم زيداان بصوت رقيق حتى لقاتهم في وجهها ...سمعها كتعيط عليه وهزو وناض يشوف ماالها...ضحكاات ومدت ايدها خداتو من عندو باستو في حنكو وعنقو ~ ثباااح الخير كبيدة ديالي ، فقتي اماامي
زيدان كان واقف مسرح يدييه وكيشووف فيها هاز حاجبوو ...شافت ملامح وجهوو وهي تضحك فهمت مالو حطت ايدها على تي شيرت لي لابس جراتو منو بقوة وباستو فحنكو وقالت بصوت خافت ~ صبااح الخيرر
فك غوباشتو وجرها من خصرهاا وباسهاا من فمها ~ صباح النور ،وليتي شووية
عضات على شفايفها وحركت راسها باه ~ حسن من البارح ...حم فطرتو ولا مزال
زيداان مسح على لحيتو كيتكسل ~ كمال فطر انا مزال ....خادو من عندها ومشى خدا تليفون ..انا نعيط يطلعو لينا الفطور بينما وجدتي راسك باش نمشييو عند صااحبي راه فرع ليا مخي بتعياط فينكم
مريام ~ واخا مغنتعطلش
دخلات لدوش دارت روتينها الصباحي وخرجات لقاتهم طلعو لفطور خداوه على السريع وخرجو ....والوجهة حي بريستيجياا فين كااينة لبتي فيلا ديال رشيد ومرتو لي كانو كيتسناوهم ومامخلين مموجدين ...بنسبة ليه نهار كبير هذا لي يجي لعندو زيدان عاارفو خطوتو ثقيلة وكيبان كيف لهلال وحيت خيرو سابق وديما مكبر بيه حتى هو بغى يردها لييه ...فطريقهم خدااو حلوة گلاصي بلاباط اماند ولي ماكاغون وشكلاط مستحيل يجيي طوييل ....لقاوهم واقفين قدام الباب كيتسناو...بشرى لابسة كسوة حد الركبة وراجلها لباس كجول عادي..اما مريام كانت لابسة لبس محجبان انيق وعلى فصالتها وزيدان لبس عادي
تسالمو رجال مع بعض ونساا تا هو ...مدت بشرى ايدها لويدان سلمات عليه ..رشيد بغى يمد ايدو يسلم على مريام وهو يشدها من عندو زيدان ~ لمدام مكتسلمش على الرجال ..متحجبة !!
رشيد بضحك هز ليها راسوو ~ اه ومعليش نسلم براسي ، مرحباا بيك الالة نهار كبير هذا...
مريام ~ الله يبارك فيك
عنق زيدان من كتافو ودخلو ~ والله ايلا توحشت الجلسة معاك اصااحبي
بشرى بعدما عطاتها مريام شنو جابو ~ مرحبا بيك ففاس ،ان شاء الله تكون عجبااتك
مريام شادة كمال من ايدو ~ الله يكبر بيك ، ديما كنجي ليها ماشي اول مرة
جلسو في صالون مجموعين ...شوية جات الخدامة سربات طبلة من العصير والحلوة ......مريام كانت كتهز عين وتحط ختها جالسة ممرتاحاش سيغتو مكتعرف حد ...اما زيدان هاد المرة خدا راحتو مع صاحبوو شد فيا نشد فيك
ضحك رشيد وقال موجه هضرتو لمريام ~ بغيت غير نعرف كيفاش قنعتيه يتزوج بييك ....خاصك تعرفي بلي في ياماتو كان كيشووف غا لفووق ولبنات فلافاك هما لي كانو كيجييو يقوولو ليه تصااحب معانا...كان استاذ في لقمييع هاادي يبكيها هادي ينهزرها حتى فقدت فيه الامل ونيست وقلت موحال يلقى لي تقبل ليه على طبعو بالحق براڤو عليك غتكوني صبارة حتى صبرتي معاه
جوباتو بلاما تشووفيه ~ بالعكس زيدان لي تزوجت بيه مافيهش هاد صفاات لي قلتي
رشيد بشك قاليه ~ تكون تبدلتي زعمة اصحبي ، لا لامنييقش ؟؟
نقزاات مرتوو كتدوي وتشووف في كمال ~ فووقاش تزوجتو ولدتوو ...تبارك الله يكون عندو عامين ....نقز زيدان هو لي جاوبهاا ~ ما زال مكملها قرييب
بشرى بابتسامة~ الله يخليييه لييكم
مريام ~ امييين
بقاو مجمعين غير رشيد ومرتو لي كيدويو ويعاودو على ايام زمان ...زيدان مرة مرة يعقب على شي حاجة اما مريام كانت غير كتصنط ليهم وكتضحك ....وصل لغدا لي وصاو عليه من عند تريتور فااسي معروف كانت اكلة المنطقة ترييد باللحم معسل ومزوق باللوز
تغدااو في جو غالب عليه الضحك والمناوشاات وحلاو على برا في الجردة ...ناضو رجال يدويو مع بعضياتهم على خدمة مخلين عيالات براحتهم
بشرى ~ فين تعرفتو على بعض ، تزوجتو زواج تقليدي ولا عن حب
مريام ~ كان استاذي ومن بعد مدير ديالي ودابا ولا رااجليي ...
يعني زواجي منو معندو تا علاقة بالفلوس ...بشرى ~ اه ايواا مزيان...عنداك تقلقي مني حنا غير داوين ....مريام بابتسامة ~ لا عادي
بغات امتى تنوض مدخلتش ليها لخاطرها...كانت ثقيلة على لقلب وكتدخل فلي مكيعنيهاش....عيات تشوف جهة زيدان بغاتو غير يشوف فيها تشير ليه باش يتحركوو ووالو حتى قربت طرطق وعقلها تنفخ بقوة الاسئلة عاد بان ليهاا جااي
بشرى ~ ايوا مجوبتينيش شنو جاايين ديرو ففاس يكمى شي شهر عسل جديد ؟
هزات عينيها شافت فيها ...مبغاتش تقولها علاش جاو وفنفس الوقت مبغاتش تطيح في الكذب
شافت تا عيات وقالت ~ بحاال دااكشيي
بشرى تنهدات ~ سعداااتك يااختي تبارك الله الرجال لي كيعرفوو في رومانسية قالتها وشافت في زيدان ...ميقت فيها مريام وحضااتها كيفاش كتشووف فيه وغير وصل حداهم زيدان وهي توقف بلاما تحس ~ نمشييو
رشيد بحركة بيدو ~ اماالكم زربانين نهار مازال طويل
زيدان حقق في عينيها بانت ليه ممرتاحاش وهو يقول ~ الله يجعل البركة مرة اخرا....هز كمال عندو ومد يدو سلم على رشيد~ تهلى فراسك وبيناتنا تليفون
رشيد ~ اكييد ومتنسانيش تمشي وتغبر
سلمو على بعضياتهم وخرجو ...غير طلعت مريام لطوموبيل تنهدات بصوت مرتافع ..شافيها بنص عين وقالت متسائل ~ شنو وقع ؟؟
زيداان كيحك فجبهتو ~ ويي يله نرتاحو باش غداا نشدو طريق فصباح ، ياك كلشي تشرا مبقى خاص والو ...
مريام ~ صافي كلشيي هو هاداك
زيدان شاف قدامو ~ على بركة الله
الاياام لي جابو معاهم لفاس سالاو ...ولشنو بغاو خداو...ولدهازهم تقداو...رجعو لكازا فين كانت لالة مينة ونزهة واقفين فغيابهم على كلشي من تريتور تال نگافة بأمر من زيداان ...العرس شااغلو وخاصو يتم باش يتهنى ويرتاح...دازو ايام ل قبل من العرس طايرة في توجاد ..مريام لزمات دارهم...وقليل فين كتشوفو وتاهو كان مشغوول شوية....حوايجها وجدو وتوابها تخيطو ...مها مخلات مشرات ليها لفطور وعدوزتها برعاتها لدفووع ....كلشي كاان واجد خاص غير يوصل نهار لي غيتقام فيه العرس ويتهز علام الفرح وتخرج فيه مريام عروسة من دار باها لداار رااجلها
كأي عرووسة قبل من يوم العمر كتبغي تهلى فراسهاا ...وصفة لشعر ووحدة لوجه لاصيغ ليميش و...و...و.....شغلت راسها حتى الوقت دغيا داز محساتش بيه وسط لحباب والنشااط.....كانت تنعس معطلة وتفيق معطلة.......بحال ليوم ستحلات النعسة ومشاات كتحلم وعاجبها الحال مكمدة في ليزار وهي تسمع صووت تليفون ، متقدرش متجاوبش وهي عارفة شكون غير. من رنة لي دايرة...مدت ايديها هزات تلفون وجاوبات عينيها مغمضين ~... االوو
زيدان كان صايك و كيهضر ~ .... مدام !! مزال ناعسة ولا شنو ؟؟
مريام سمعت صوتو و توكضات ~.. لا لا فايقة صافا كلشي بخير؟ ؟
مريام ناضت من حدا كمال بشوية باش ميفيقش و سولاتو ~ .... علاش فين غنمشيو ؟؟
زيدان...~هبطي و فطريق غتعرفي يله طلقي راسك
قطع و خلاها تمشي تغسل و تلبس بزربة هزات لي غتحتاج و قبل ما تخرج وصات مها على كمال لقات كيتسناها قدام الدار بطوموبيل رياضية وهو لي كان صايگ هاد المرة...شافها و غمزها مبتاسم و هي الحشمة لي ولات فيها معاه معرفت منين جاتها سلمات عليها و ريحتو تغلغلات معاها خلات نبضات قلبها كتزيد ضرب ...كانمقرب منها و بنظرات عاشق تكلم ~ .... واش ضروري من هاد العرس ..دوز يدو على خدها بثقالة وقال بعينين معسلين...توحشتك !!
قلبها سكت و معرفات باش تجاوب بقات غير كتشوف فعينيه بعدت عليه شوية و سولات بصوت شبه مسموع " .... مقلتيش لي فين غنمشي؟
مجوبهاش رجع ديمارا طوموبيل و تحركو لفين غادي و تساؤلات كتيرة كضور فراسها مبدات كتجمع خيوط هاد المشوار حتى وقفات طوموبيل امام المقبرة لي تدفن فيها باها هبط زيدان كيعرج شوية برجليه و هبطات مريام بلا ما تكلم سرطات ريقها و عينيها على الباب تفكرات ليام لي كانت تجي تزورو و تبكي حتى تشبع و تمشي زيدان شافها ساهية و حنحن باش تشوف فيه ضارت لجهتو بابتسامة باهتة و مد ليها يدو باش تشد فيه .. لقاها باردة عرفها متوترة و يمكن سيناريوو رجعات تفكراتو تنهدات و هو زير على يديها و دخلو كانت هي لي غادا بيه ..
رجليها صاگوها بلاما تحس ...وبعينيها مغمضين مشاات تال عند القبر ...قبر باها ودارو جديدة فكل مرة كتزورو كتبكي بحال اول مرة مات....طلقات من زيدان ومشات لعند راسو حطات ايدها على حروف اسمو وبدات تبكي وعينيها حمارو
خلاها على خاطرها كترجم شوقها بدمووع وكتنقي ليه قبرو وترشو بالماا وتغسلو.....تفكرات ملي كانت كتعطيه يغسل يدو...ولا ملي كانت كتخوي عليه لما على راسو ملي كيحسن .....قرب حداها زيداان وحط ايدو على كتافهاا وقفها حداه مسندها عليه راسها على صدرو وكيمسح على وجهها من دموع ...معارف ميقوول حدو حس براسو باغي يجي معاها يزورو باها وهي على ذمتو...لبنت لي رماها عند رجليه من عامين هاهو معنقها وكيواسيها عند رجلييه بعد عامين.....هزات راسها عينيها منفوخين بالبكا وقالت بصوت مضيووم
مريام ~ بابا ، انا تاني جييت لعندك وغنبقى ديما نجي أنا عارفاك كتسمعني وكتسوفني وتوحشتيني كيف ما توحشتك ..مسحات دموعها وكملات....انا ليوم مجيتش بوحدي جيت مع راجلي لي قسمو ربي فسما قبل الأرض
زيدان غير واقف ساكت و كيسمع ...سيد لي قطعت لبحور على ود باش منتلاقاش معاه ولكن ربي رجع جمعناا ومبغاش يفرق شملنا....الراجل لي انا متاكدة كون كنت باقي في الحياة غتبغي دير يدك فيديه بعدما تشوف قداش كيبغيني...لي فات مات ابابا والمسامح كريم ..انا غلطت وتعلمت درس وبديت صفحة جديدة من الاول ...وتاهو ندمان وطلب مني سمااحة ودابا تزوجها وقرب عرسناا...كنتمنى تكون فرحان ليا كيف انا فرحاانة ...وتكون راضي عليااا ...كيفما ماما راضية ...عمري غنسااك وغنبقى نعاود لولادي عليك ونجيبهم يزورو قبرك ...لله يرحمم ابابا والله يلاقيني معاك في جنات النعيم ياارب خلاها حتى سالات كلامها بلا ما يقاطعها و جلس قفازي و قرا القرآن على روحو و ختم بالدعاء
زيارتهم اقبر كمال سالات لكن زبارتهم المقبرة مازالا...ميمكنش يجي تال هنا وميدوش لعندو ختو..وصاحبتو ..وعمتو..وكلشي..ميمكنش ميجيش لعند صبااح
لي باقي موتها مأتر عليه ولكن عرف و تيقن بعد مدة بلي داكشي مكتاب و المكتوب ممنو هروب زار قبرها و دعا معاها واخا صباح مولداتش ربي سخر ليها زيدان يكون الإبن و الاخ صالح يدعي ليها
طبعو سكوتي ولي فقلبو صعيب يوحي بيه..جلس عند رجليها قفازي كيقيس ترابهاا ويدعي معاها فسرو....وهي تنطق مريام بتاثر ~كنت كنتمنى نشوفها و نتعرف عليها و متأكدة كانت غتكون علاقتنا زوينة أنا وياها و غتفرح لينا ولكن هي فبلاصة حسن من هنا واميد غتكون فرحانة.....بهاد الكلمات نقزت دمعة من عين زيدان لي مسحها قبل ما تنزل...ووقف كيشووف في سما وكيحرك فراسو متاثرر
و نطق بصوت مقطع الله ي يرحمها....
مريام شدات ليه فيديه وقالت ~ اميييين الله يرحمهم اجمعين ...حرك ليها راسها وقال ~ يله نمشييو
في دار طوم و جيري مراد و نادية هاد الاخيرة ل جالسة قبالتو و كرشها لفمها كتفشش عليه و شاد ليها الخاطر جالسين على طبلة لفطور راس فراس وكلني نوكلك بوسة من هنا و كلمة زوينة من لهيه شوية تا صونا ليه تليفون ...لاحت شنو فيظعا وعينيها تفيكساو عليه كتسناه يجاوب تشوف شكون غيعيط ليه على صباح...ثقل شوية حتى كمل دغمة لي ففمو وعي تنطق بالغواات ~ جااوب اش كتسنى
خنزر فيها قالب وجهو وجاوب بصوت حرش ~ عاد طفااات عليك شمعة وتفكرتيي خوووك
اميمة بضحكة مسموعة ~ خويا ديما فالبال عمرو يتنسى...راك عارفني من قنت لقنت الا لقيت لوقت لكرشي لاباس ، نتا صافا واحد نادية اش كتعاود ؟؟
شاف فنادية لي حاطة ايدها على حناكها وقال بطنز ~ ولات قد البوطة الا منوضتها متنوضش
خنزرت فيه وهزت طبسيل عامر شوية وتزف بيه عليه كون ما ايدو لي شدتهاا ...
اميمة ~ مراد عيط ليك بلش نعلمك غتكون لعشية فدار
جاوب بإستغراب ~ اه علاش
اميمة صيفطت بوسة في الهواا لفراس لي كان مقابل معاها وعينيه ذايبين وميتين عليها وقالت بتبعكيك~ جاايين شي ناس بغاو يطلبوني منك ...اش قلتي موافق ولا نردووهم قالتها بضحك بغات تشوف ردة فعل فراس لي بان ليها خنزر وعلى اعصابو
عيات تهرب من زواج ماشي غا واحد طلبها وماشي ربعة ...گاع صناف بغاوها بالحق تا حد مقدر يقنعها من غيرو هو...من نهار تلاقاتو ومن دخلة لي دار ليها وكيفاش لصقها تما دخل لدماغ...وواخا طلب منها زواج كان شرطها ليه تعيش معاه قبل وتشوف واش غيتفاهمو بزوج ولا لا وديك ساع تقرر بالحق مخلا ليها متقول...فراس بغاها لشخصها ولزينها ولانوثها المتفجرة جابت ليه تمام بكلشي فيهاا...دماغها عامر وفاش مدوا معاها كتناقشو زيادة على شخصيتها الحاضرة ..مكاينش محسن منها تكون شريكة حيااتو...عاشت هي وياه فداار ..تعصبت عليه وتغنجت قدامو ..تقلقو من بعد ودوزو وقات زوينة ولقاو بلي معندهم هروب من بعضهم....وحيت هي بلا عائلة قررات يطلبها من مراد لي حسباتو كلشي ومن عند عايشة .....
خداو فطور في بلاصة زوينة و خاوية نوعا ما لكوان فين جالسين فيه غير هو وهي ...كان جالسة فجنبو ولايح ايدو على كتافها هاز طاس قهوة كيشرب منو مرة مرة...اما هي كتشوف في البحر وكتشم ريحتو عجبتها الجلسة...كانت ساهية محست بيه حتى هبط راسو لعند راسها وضربها بخفة ~ شكووون هاد الكيداار لي كتفكري فيه
مريام بابتسامة شافت فيه وقالت ~ متعااايرووش
بعيوون معسلة جاوب ~ علاش
بدات كضحك وبحشمة ردت ~ واا صاافي
حط كاسو كيبتاسم وشافيها وقال بجدية ~ خدييت واحد داار باش نعيشو فيها بوحدنا وتكوني على راحتك
حركات ليه راسها بنفي وهو مزال كيدوي ~ لا ازيداان انا مبغيتش نبعدو عليهم ،عييت من العيشة بوحدي باغا تا انا العائلة والجمااعة
شد شالها لي بدا يطير مع ريح قادو ولاحو ورا ظهرها كيحزم فيه ~ مغنكونوش بووحدنا غتكون معانا ماماك مغاديش نخليوها رااسها
مريام ~ وخااالتي مفكرتيش فيهاا ...بابتسامة جانبية قال ~ وعلاه انا غنسى لواليدة، انا غادي نشوف راحتها وشنو بغات واش تبغي تبقى معايا انا ولا مع خوياا نصر
شاافها سكتت وهو يحط صبعو على حنكها كيمرر عليه ~ مال لفنون.....ضحكت بلهلا يتبتو ليها وقالت كتهز كتافها بحال بنت صغيرة لي كدلع على باها ~ والو غير حتى قلت كمال غيلقى معامن يلعب وماما معامن توانس وانا معامن نخرج ...كملت كلامها وتنهدت ولكن خساارة
طريقتها فالهضرة وكيفاش كتلعب بملامحها بطفولية خلاتو يطبع قبلة على حنكها ميتسوقش هو فين خلاها غارقة في حوايجها...عض على فكو وقال بلسان ثقيل ~ واخا الالة نشووفو ليها تخرييجة ، نوضي نمشيو نوصلك ونتيسر لخدمتي راني بديت نننن
خرجت عينيها وناضت بالخف شادة صاكها شانقة عليه وعينيها الارض...خلص حق لفطوور وجرها من ايدها معنقهاا قاصدين طموبيل
~~~~~~~في المساء~~~~~~~~~~~
كانت عيشة فرحانة ووغا كضحك ،تحماق و تسطى على تحضار لعراضات ...واخا مشغولة مع ختها بعرس مريام انفوا عيط ليها مراد وقاليها شنو كاين جات كتجري ... وجدات كل شي والحاجة لي خصتها مراد كيجيبها ليها ... ماشي بزاف ديال الوقت تا دقات اميمة الباب وفي يديها فراس و ماماه...مرأة كلاص ولابسة عصري وكتمشي بتاويل شعر مطلوق ولايحة شال عليه ديكور...طالون قدو قداش هازة فيدها گاطو وفرلس الشكلاط... حل عليهم مراد الباب سلم ورحب بيهم وجر اميمة من اللور
مراد بهمس قال ~ خوك انا ياك غير قولي ليا واش مزربتيش ؟
اميمة ضحكات ودوات ليه في وذنيه ~...وتقول خدا ليك الورث السلامة باينة في عينيك مكتحملوش
مراد بتمياق ~ضرتي العالم كولو و بان ليك غا هاد فار الدگيگ
اميمة بحدة ~مراد راه ملقيتش حسن منو يبغيني و يخاف عليا و صبر عليا بزاف واش في راسك هادي المرة العاشرة ولا كثر وهو كيطلب مني الزواج عاد قبلت
تبعوهم الصالون في جو مضحك ،لقاو عيشة تلقات ليهم ترحب وتعاود ودغيا طلقات على ام فراس نزلت نادية دارت حقها من صواب وجلسو مجمعين واكلين شاربين حتى نطقت ام فراس
- ايوا الالة عيشة بعد ما كلينا وضحكنا ندخلو في الموضووع...ولدي بغا بنتك وهي بغاتو وكنتسناو غير رأيكم
عيشة تكلمات كانها بنتها ~اش غنقوليك هادي بنتنا وعندنا غا وحيدة واخا هبيلة وديما هازة صاكها ومسافرة ولكن بنت بمية راجل وفينما حطيتيها تحمر لوجه ..والى مفاهمة هي وولدك منزيدكم انا غير الخير
مراد نقز في وسط الكلام ووجه هضرتو لفراس ~ ...خاصو غا يتهلى فيها، منبغيش نسمعها شي نهار بكات ولا تحطات عليها اليد اما شي حاجة اخرى هي قادة بيييها و كثر
اميمة بعد ما سمعات كلامهم هبطو دموعها بلا متحس حسات براسها وسط عائلتها ماشي ناس غراب هزات يد عيشة وباستها ليها ... وبدورها عيشة عنقتها ورضات عليها وتمنات ليها الخير
فراس ضحك و شاف فيه ~ ... قلبي وحياتي هاديك ا مراد كون هاني ..."\ غمزو مراد و عاودها ليه فراس ... اما نادية لي كانت متقلة و الهرمونات لاعبين عليها حاضياهم وتبكي غير سالاو و ضربتها ليهم بتزغريتة ... ضار عندها مراد كيشوف
مراد ... وصوتك شحال حار اختي
نادية قرصاتو من دراعو تا عض على شفتو ~.. تعاود تنمر عليا نصفيها ليك
اميمة ناضت لعندها و عنقاتها وشدات ليها في كرشها ~... هاد البيبي وقتاش غنشوفوه
نادية كتنهج ~غير سكتي مبقا ليا والو
حنحن فراس حتى شافت فيه و غمزها باس تبعو وداكشي لي كاين اما مراد شافهم وضار عند نادية .~شوفي الناس غاديين يدوقو الريق نوضي احبيبتي تبعيني الكوزينة
نادية خنزرت فيه ~ هنينا حتى لبيتك ...
فراس غير خرجات عندو اميمة و طار عليها معنقها من اللور ~واخيرا يا ربي واخيرا غتكوني ليا... ضارت عندو شدات ليه في وجهو ~..كنبغيييييك المسطي
فراس ~وانا كنموت علييييك .. هبطت لفمو وباشرت بالقبلة ومشى معاها مفاقو غير على حس صوت مراد كيحنحن من بعيد كيعلم بلي جاي جهتهم عاارف اش تم
عند عائلة لخليفي جمعهم زيدان ورا لعشاا باش يدوي معاهم طلب كلشي يكون حاضر مركز على خوه ومرتوو ....كانو جالسين في جردة على برا لالة مينة لوسط وولادها ضايرين بيها كل واحد من جنب وهناء حدا راجلهاا....نطق زيدان كيلعب في التليفون ~بغيتكم تعرفو بلي خديت واحد الدار كنت نااوي نجلس فيها انا ومريام ان شاء الله ورا لعرس ونخلي ليكم دار هنا باش تبقااو مرتااحين ..
باقي مكملش كلامو وحال مينة تغير شافت فيه بعينين مدمعة يله غدوي وهو يوقفها بيدو ~ غا خليني اميمتي نكمل وديك ساع قولي لي عجبك...ربعات ايديها وشافت في الارض بانكسار...خدا ايدها باسها وشابكها بين ايديه وكمل كلامو.....~كنت ناوي الا بغات الواليدة نديها تعيش معايا ورجعت دورتها فدماغي باش منكونش اناني وكنفكر غا فراسي قلت نخليها هي تختار واش تبقى هنا معاك اخويا ولا عندي ولا مرة هنا مرة لهيه
مينة مقدراتش تصبر~ وعلاش هادشي كامل ، علاش اللمة لي كنت كنحلم بيها حياتي كاملة تحرمني منها ، واش بنتي مريام قلقناها فشي حاجة
زيدان ~ حاشة الواليدة مريام مقالتش هاكدا وهي بحالك بغاتنا نبقاو مجموعين داكشي علاش كنقوليك انا كنت باغي ومن بعد قررت بلي غنبقى هنا فهاد دار ولكن الا بغا خويا نصر وختي هنااء حيت كيف كتعرفو غتجي ام مريام تعيش معانا وعائلة غتكبر معرفتش انا يقدر شي حد فيكم ميكونش مرتاح اللهم نشاوركم ...مهم الا بغيتي اخويا تبقا عايش معانا هنا راه دارك هادي ولا بغيتي دار لي خديت نعطيها ليك تستقر فيها معنديش مشكيل لي بغيتي
نصر دين فينما عاش هو هداك ولكن مقدرش يهضر تا يعرف قرار هناء ويشاورهاا....جر زيدان مو ووقف بعد ماقاليه ~ حنا لداخل دويو وقولو لينا شنو كاين
خلا ليهم مساحة فين يدويو ، شافت فيه هناء وحرك ليها راسو بمعنى شنو رايك وهي تنطق ~
اخر حاجة نفكر فيها هي اني نسكن بعيد على خالتي
انا تحرمت من حنان الولدين ومتعة الاخت ويستحيل نحرم راسي منهم من بعد ملقيتهم وبلخصووص منين زيدان تزَوج مريم لي تنحسها ختي ماشي سلفتي
وزيدون نهار كان المشكل ديالك انصر عمرهم حسسوني بغيابك وداروني بين عينهم حتا من زيدان واخا قليل الهدرة ولكن كان واقف على الشادة والفادة وتيوصي خالتي عليا ديما مغنجيش دابا وغنبغي نعزل عليهم كيفما نتا راجلي وانا مرتك هما عائلتنا ومكاين محسن منها ومن جماعتها ولادنا يكبرو بزوج ولا مرض شي حد فينا يسيق ليه لاخور لخبار نعيدو بزوج ونتوانسو جميع ....شافت في نصر لي كان عاجبو الحال وقالت حاطة ايدها على ركبتو ...غير خليناا معاهم
حلات عينيها على نور الشمس ...بانت ليها سما صافية والجو زوين ....ناضت كتكسل وكلها همة ونشاط طلات بانو ليها لفراخ كيصفرو ويطيرو فرحانين ليها وكيغنيو...ضحكات مبينة على سنانها كان قلبها مفاجي وبالهاا هاني واسعد ايام حياتها هي هادي ...غسلت ولبست قفطان خفيف مع بليغة عالية شوية طلقات شعرها ورشات عطرها ونزلات لتحت ...لاول مرة ومن شحال هادي دارهم عامرة ها خالتها ونادية ومرت عمها وبناتها ومها وشي نسا من عائلتها البعيدة..كلشي جاي يدير يديه في حنة لعروس ويكرم النفقة لي غيطليو معاها العزبات في الحمام....كيطبلو ويغنيو يصفقو ويشطحو ويزغرتو ..دارو بيها لبنات وداروها وسطهم كيشطحو بيها وتاهيا معاهم نزهة فرحتها كبيرة وگاع لي حلمات ديرو ليها من وهي في اللفة هاهي كتحقق فيه وكتشووفو بعينيها ...فطرو وتغداو ووصل وقت الگوطي ..وجدات الحرشة ومسمن واشمنك ياا رزة القاضي...كلشي تسربى على طبلة كيتسناو غير لالة مينة ام لعريس وهناء ويتكبو الكيسان..نسا مكاين غير قولها وضحك عليها ...بدلات عروستنا قفطينها بفراشة بدوغي طلقات شعرها وكحلات عينيها وسر لعريسات جاا معاها...جلسات الوسط ولي شافها يمدحها ويتغزل بزينها وهي تليفون فيديها مرة مرة توصلها برية وتجاوب بختها حتى غبرات عليها مها تليفون بحجة حشومة وعيب وعطي لناس صوابهم ....تحل الباب وجات مينة وهناء ومجاوش خاوين لايدين ...جايين وجايبين معاهم ما الذ وطااب شغل الدار ....حطوهم في طبلة ولي كلشي رد ليه الباب هو طاس تاع الفضة والمكب ديالو بكل لوازم الحمام لي كانت جاايباه معاها لمرت ولدهاا ...سلمات عليها ومداتو ليها وقالت
مينة ~ ان شاء الله حمام لهنا وربح ، تخدميهم بصحة وطولة لعمر ودوام الفرح ان شاء الله
طبطبت على يديها معارفاش باش تجازي هاد العدوزة لي عطاها الله ~ لهلا يخطيك عليا ياربي فحيااتك يخليك ويديمك تاج فوق راسنااا ان شاء الله
نزهة بترحيب ~ حيدو جلالبكم وخودو راحتكم مكاين حد غا نسا بيناتنا مرحبا بيكم ..مينة معودتهاش معاها معندناش مع كثرة تبوزيق ~ هانا اختي لحبيبة مبقاش بيناتنا ترحيب ولينا عائلة وربي شااهد ...ردات البال لنادية لي عاد جلست كتنهج كانت على برا كتدوي في تليفون مشات لعندنا حطات ايدها على كرشها كتدوي باطمئنان ~ كيف دايرة ابنتي مع شي ثقل ، ان شاء الله تكوني لاباس
نادية بضيق نفس مقادة طلع ولا تنزل هاد شهورة عذبوها ~ حمد لله اخالتي الله يسمح لينا من الوالدين ...
مينة ~ يتربى فعزك ان شاء الله ، تفرحي بيه ويكون من عباد الله الصالحين ...جاوبتها عيشة بتعنيقة ~ لهلا يخطيك الحبيبة عقببال متشوفي حفايدك الماجيين...
مينة عنقات هنااء ~ ايوا مكاين ميتخبى ونتوما ماشي برانيين ان شاء الله لحفيد التاني جاايني في طريق ...بفرحة باينة فعينيها ...بنتي هناء حاملة عقبال عند مريام ياربي نفرح بحمالتها....تطلقو زغاريت وكلشي كيبارك للجدة والام ويهنيهم
مريام بابتسامة ~ مبروك عليك ازينن
هناء دايرة ايدها على ظهر مريام كتطبطب ~ اميين اختي عقبال متخاوي كمال ان شاء الله ....
مريام شافت فيه كان كيلعب في طوموبيلتو راكب عليها يمشي ويجي وفرحان وعاجباه جماعة ~ اميين احبيبتي
سالات جماعة الفرح والعشية دغيا دازت...تجمعو غير على النشاط فرحانين بالعروسة وبلامتها....قبل متنوض مينةة وهناء يمشيو قالت ليهم نزهة ~ ايوا غدا ان شاء الله جيو صباح تمشيو معانا لحمام
مينة حركات راسها بنفي ~ منصيبش راك عارفة دفوع كيخص لي يوقف عليه ميدركنيش الوقت مازال هناء نصيفطها ليكم
نزهة ~ وا صلي على نبي الحاجة كلشي غيكون هو هاداك الحمام غنمشيو ليه على صباح كمدو عظامكم ورجعو فطرو معانا وديك سااع تيسرو مكاين لي يشدك تا تجيني نتي ودفووع
مينة ملقات متقول ~ واخا ان شاء الله يكون خيير..شافت فهناء وقالت ...ديري بالك مع تليفون ابنتي ليصونيو ومنسمعوهمش
صوونا تليفون هناء وقالت ~ عمرو طويل اخالتي هاهو نصر جا...وقفات كتسلم ~ خليت ليك الراحة اختي نزهة رتاحي ليك شوية غدا تابعنا نهار طويل ...
نزهة بادلتها السلام ~ ان شاء الله فرحتي كبيرة نوقف بلي كان ان شاء الله
مينة خدات صاكها وعينيها كيقلبو على مريام هاد الاخيرة لي حاسة شي حاجة عندها ناقصة بلا تليفونها ، عارفة عقل زيدان غيكون خارج عليها دابا معرفات ماماها فين حطاتو وملقات كيف دير تسولها حدا نااس...جات لعندها مينة وهناء سلمو عليها ومشاو وبقات هي حدا نادية كيشوفو في تصاور لي خدااو ....
على برا كان نصر الدين وزيدان لي جاي معاه حجبانو معقودين وعلى سبة طالع ليه دم ومعارفش علاش...انفوا خرجت مو وهناء وهو ينزل من طوموبيل تلقى ليها وقال ~ لواليدةة واخا دخلتي كلمتي ليا مرياام ....هناء فهماتو واخا مبيناتش حيت قالت ليها مريام بلي معندهاش تليفون غيكون تبرزط ...نطقت هي قبل وقال ~ انا غنكلمها ليك اخوويا
دخلات لعندها لقاتها حانية راسها على تليفون وشعرها مغطي وجهها محسات غير بيد هناء تحطات عليه هزات راسها بلستفسار ~ مالكم ؟؟
لمعو عينيها وبدات تقاد في شعرها وتسرح فيه بصباعها قادات حوايجها ولاحت شال بطريقة مهملة على شعرها عند بالها كاين غير زيدان على برا وغير هو لي جاا...خرجاات بخفة كتزرب كان كيشوف في تليفونو حس بخيالها وبطيفها وهو يهز راسو وتفكو ملامح وجهوو
طلعها ونزلها من رجلها لراسها وهي كتشوفيه وكترمش كتسنى فيه ينطق ...ستوعى وهو يشوف شعرهاا خاارج من زيف وجرها من ايدها معاه لبلاصة مطرفة وقال بحدة ~ لاش خارجة هاكدا !!
مريام ~ غير قالت ليا هناء بغيتيني لحت عليا شال وخرجت باش منتعطلش عليك عند بالي غير نتا لي كاين...
زيدان فمو كيدوي وايديه كيخشيو فزغبات لي مزال خارجين ~ تليفونك فين هو ربعة سوايع وانا كنعيط
حدرت راسها مجوباتوش وهو يهزو من ذقنها وقال ~ شفت هاد ليام طوالت هادشي مبقى گاع بغى يسالي ، شاد راسي بزز مكنشوفكش يرضيك هادشي
مريام بحب ~ بغيتيني تا دابا ندخل نجمع باليزتي ونخرج معاك منقولش لا ..بحشمة وعينين في للارض كملت...رضاك هو كلشي
حط ايدو بزوج على حناكها وقرب منها وطبع قبلة في جبينها ~ منحرمكش من شي حاجة بغيتيهاا ، نصبررر معندي مندير مهم تكوني فرحاانة
مرياام ~ بزااااااااف
قالتها وحس بيها طالعة من القلب..
شد ليها فيدها ورجعها لباب وقال بامر وتحذير ~ سيري دخلي وهزيي تليفونك مفاهمييين ...هزات ليه راسها بالايجاب ومشاات ..
صباح الحمام ونهار الحنا فاقت لالة لبنات على صلاة والسلام والعزبات مجموعين في بيتها كيصفقو ويزغرتو....ضحكات وناضت قلبها كيضرب ايامها فهاد لبيت معدودة ووسادتها الخالية قربات تعمر ...لقات نزهة موجدة ليها قميص جوهرة في لبيج فاتح مع شال بنفس اللون وسلهام...غسلات وصلات ولبساتهم ونزلات لعندهم كملو لي بداوه لفوق دردكو حتى عياو عاد فطرو فطور خفيف وتسناو حتى جات مينة وهناء وتيسرو للحمام....كان خاوي ومافيه تا حد ..كراتو نزهة خصيصا لبنتها ولحبابها....جايين وجايبين معاهم الورد البلدي في طبگ ولحنة مخلطة في طاسة نحاس وصابون البلدي تاهو في طاسة نحاس ومرشات ما ورد والبيض وشمع لي هازينو لبنات ... عاد شمع ل مضوي من دخلة دالحمام حتال فين غتجلس لعروس
دخلو للحمام صالا تانية جلسو فيها لعيالات لمزوجات بيما فيهن هناء ونادية ...والصالة الاولى جلست فيها لعروسة والعويتقات ومكانش شي حد براني من غير بنات عمهاا ....حطو سطل لفضة لي عمر قدامها بالما....ذهنو ليها طيابات لحمها وباادرو في حكان طرافها من لفلوق لتحت زوج محامين عليها
وهي كتهز ايد وتحط ختها لابسة لبس حمام محتشم رغم كلشي منساتش دينها حكو فين بغات وهي وكملات ما تبقى ..ملي سالات دهنو ليها لحمها بنفقة تااع لحم وشعرر لي مدگوگين ف جدة ....
اما عند عند لعيالات كانو ناشطين كيغنيو ويضحكو عيشة بقات مقابلة دار وكمال مجاتش...نادية حكات ايد وسخفات عيطات على طيابة كملات ليها وغسلات ليها شعرها وخرجاتت جاا مراد داتها لدار تبدل .....اما عروستنا ولي معاها بقاو كثر من ساعة حتى سالازدو على خاطرهم...خرجات بيضو كتشعل كيف قالب السكر ولحناك مزنگين بحال دم لغزاال دهنات باندوش وتشللات وناضت مع طيابات لي جلسووها على كرسي مقابلة مع القبلة ودرو عليها لبنات ليزاار بيض وبداي يكبو عليها لما وبالضبط سبعة سطولا
بما يسمى تقبيبة لعرووسة ووقفات وجلسات تلاتة لمرات داعين الله معاها يوفقها في حيااتها الزوجية وهما كيعشقو على سيد النبي وملي سالاو لواو عليها ليزاار وعنقووها كاملين باش يتبعوها في الزواج ...
على برا كانو طموبيلات كثار كيتسناوهم ولي صيفطهم زيدان بلش يقدوهم من بينهم سيارة نصر لي جا يدي مرتو ومو يله يوجدو لدفووع
جالسة فبيتها ترتاح من عيا لحمام طالقة شعرهاا ينشف ومرطبة وجهها ويديهاا ....حنيكاتها مزنگين والحمام بان عليها قدامها قرعة لما تكب وتشرب صونا ليها تليفون ابيل فيديو كان زيداان بقات كترمش بزربة قبل متجاوب وقلبها كيضرب هيبتو بوحدها جوبات حانية راسنا مكتشووفش فتليفون قالت الو وسمعاتو مجاوبش وهي تهز عينيها فشاشة لقاتو حاط تليفون قداامو ومتكي على الفوطووي مضيق عينيه وحاضيها لابس غير بيل سماطي وشورط ...شافت فيه وتلبكات بدات تمشط فشعرها ~ شفتك سااكت مالك
قال بصوت حرش ~ ممساليش كنشووفيك ...بتاسمت ليه وهزات عينيها كتشوفيه كان حاط ايدو على ذقنو قرب من تليفون وقال ~ بصحة الحمام
شفتك مزنگة يكما سلقوك
بدات تضحك ~ لا عادي غير سخونية وصافي
باستهزاء قال ~ دجاج الرومي هذا حالو ....كلمتو رجعها اللور نهار قالها ليها في لقاءاتها الاولى
سمعات صووت كيدق في الباب هزات التليفون بين يديها ودارت تشوف شكون ..كانت بنت عمها كتنادي عليه لغداا ~ واخا انا نازلة غير بدااو
- واخا ومتعطليش لمتلقاي والو وتبقاي بجوع ونهارك طويل
قكع وخلاها تبيض بيضة هنا ولوخرا لهيه فهمات من كلامو بلي بغاها ليوم وسلام وهي عارفة الا طلبها راجلها لبيت الزوجية متقدرش ترفض وتقول لا ..دارتها فيد الله ونزلات عندهم لتحت لقاتهم مطيبين دجاج كلات معاهم شوية وكان معدتها دارت عليها والفرحة سدت ليها الشهية وقت قليل وجات النگافة لي غتقاد ليها وغتلبسها النطااااع
وصلات النگافة بوجهها المبشور وبمطريالها المعهود تغدات معاهم وطلعات مع لالة العروسة لبيت باش تقادها على حقها وطريقها بالخصوص انو الحاجة نزهة بغات الحنة تقليدية ديال ايام زمان ..ايام الهمة وشان وقت لي كان العرس كيدوز مأصل وبتاويل...لبستها نطااع طلقت ليها شعرهاا وكتافات بخيط الريح والتاج فقط مكاينش من غير لكحل في الماكيااج لاحت عليها السلهام على كتافها وتسمعت ماشاء الله من النكافة بطريقة غريبة
اول مرة تشوف عروسة طالعة هماوية بلا مكياج قال وهي كتقرا عليها
-ربي يحجبك ابنيتي من عينين المحبة قبل من العينين اللي يحسدوك
كملات وغطات ليها وجها بالبرندك خظر مع دوغي وبالصلاة والسلام على رسول الله نزلوها للبرزة لي كانت بالاخضر الملكي مقادا على حقها وطريقها في قلب صالون ....بطبگ ديال لور وقوالب سكر والخليب والبيض وتمر والحنة ...لعيالات لابسين ومقادين واللعابات واجدين ...دخلوها بتعشاق على نبب وجلسووها
وفي البرزة نزهة وعيشة حصنوها من العين
بداو اللعبات بالغنى وعروستنا بدات بالحنة
خداو دمليج النقرة من عند مها وحطوه فوق قالب السكر فال خير كيما كيقولو
كملات ليها رجليها وحبست كيتسناو في الدفووع لي كان على برااا داار مريام الهزازة كيلعبو بيه.....طيافر نحاسيين اخر مكاين هازين فيهم لحوايج وماكياج وذهب زيادة على تمر والحليب والحنة والورد لي كان هازو زيداان ..هاد الاخير صلاة على نبي عليه لابس گاندورة همة وبخدمة اليد في الخضر الملكي مع بلغة بيضة ...جات معاه ومع وقفتو كيبان نخوة وخطفيه من وسط لعزارة غير هو....مقاد لحيتو وشعروو داير نظاظر على عينيه حاجب شمس ملامح وجهو كيف ديما ستة مع تسعود معندوش مع كثرة صداع ولكن على قبل ابتسامة من مريام قلبو ظااغط ومصبر راسو ...لي لداخل خرجو برا كلشي خرج يشوف دفوع بنت نزهة كيف غيكون ...عيشة ونزهة ونادية وعائلة عمها تلقاو ليهم بالمريشة الزهر ومليحة والحرمل ...اما عمها كان كيشوف من تيساع وعلى فمو كلمة اللهم باارك ...مينة ونصر وهناء كيشطحو ومكاين غا علق لهادا وزيد دااك فرحتهم كبيرة وهاد نهار مغيتعودش جاها دفوع تمناه اي عروسة دفوع كامل مكمول وذبيحة ماشاء الله احسن ماكاين في الزريبة خلاو الكل حال فمو فاللي جاها ولو على زيدان يجيب نص الدنيا ومتكفاها وحالف تيعوضها على اللي اذاها ....كان مرة مرة يحرك راسو لمراد لي جا معاه وكان في جنبو... بغاه يحبس ويسكتهم بالحق داك الاخير ميك دار راسو مكلخ ومكيفهمش...دخلو طيافر ومتحطو حتال قلب دار ...كانو غيدخلوهم على مريام ويدخلو رجال لاكن وقفهم مانع مع اي راجل ذكر كيف مكان يدخل لعندها عارفها معرية شعرها ..واخا كانت مغطيا و كيبانو غير رجليها لكن رفض .... مشات مينة لطبيقة هزات تميرة ولفم زيدان وصلات غير داقها وهيا تقوليه وارى البياض حط اللي جيبو كامل ودخل ديريكت لمحبوبتو همس في ودنها كلام خلا وجها غيطرطق تحت النقاب
همس في وذنهها كلام خلا وجهها غيطرطق من تحت النقاب
-زيدان بشبه ابتسامة وهضرة بالعباى ~ لانجري لي خديت ليك متنسايهمش !! ومكرهتش ل بالغوز
قالها وطمر كيبتاسم بخفة اما هي جاب الله وجهها مخبي اما تفرش راسها براسها ..حسات بالفراشات كيطيرو فكرشها...جات نگافة عرات وجهها وطلبت من لعريس يقبلها في جبينها...عينيها كان في الارض وايدها كارزة عليهم...بدون ميتسوق شابك ايدو مع ايدها وتسارا في وجهها كيف بغى الخاطر عاد وضع قبلتو لي كانت مطولة وقال بصوت خشن...~ اللهم بارك
حنحن كيسرح حلقو وتقاد في بلاصتو كيشوف بعينين...بان ليه كمال صغير عند وحدة من بنات العم هازاه لابس تاهو گاندورتو وشربيل ومقاد الحالة اشار ليها براسو تعطيه ليه وغير شافو بدا يضحك باسو زوج بوسات وحطو على رجلو ليسرة جنب مريام لي تحنات لعند راسو كتقبل فيه ~ ولدي توحشتك تشغلت عليك اماما
زيدان هز عينو فيها وقال ~ تشغلتي علينا بزوج ، بزااف هادشي
بصوت خافت ~ مبقى قد ماا فات ..كتفى يهز راسو ورجع شاف قدامو ..وكملو نقش ايديها وكلشي مبهوض فيها كيف طلعات العيون كبار والخدود كيف نوار ورجيلات لي زينتهم الحنة كيف ولات ... تعلاو تزغريتات والعونيات خدامات ومكاين غير الزرقات ....ولي عندو شي هليات يبانو عليه شبعو شطيح وفداك الوقت
نشفات الحنة ولازم تحيدها مها بدمليج النقرة وبحكم انو نزهة زوجها متوفي قرو يخليو نادية تحيد ليها ومتطيح حتى فرتية
وفعلا قشرتها وجمعتها في منديل خضر ومسحاتها ليها بالحليب والزهر
تدفعات الماكلة كسكسو بتفاية كلشي كان واكل ناشط فرحان وشبعان ....داز الوقت وظلام الحال ناس بداو كيمشيو مريام بدلات نطاع لي كانت لابسة بقفطان خفيف ورجعات جمعان دارت راسها نسات وهو يوصلها مساج من عند زيدان لي كان في صالة اخرا مع رجال ...كتب ليها وقال ~ وجدي رااسك باش نمشييو
ناضت كتقلب على مها بعينينا قالو ليها لفوق كتبدل لكمال طلعت لعندها لقاتها كتغسل ليه قالت ليها شنو كاين وبلي غتمشي مع زيدان لدار غدا من تما لقاعة ...نزهة كانت مؤيدة معارضتهاش ~ راجلك ابنتي سيري معاه ، ولدي خليه معايا تال غداا متشطنيش راسك بيك...راه باليزتك مجموعة فيه لي غتحتاجي شي لاخور نجيبو ليك معايا ....
مريام ~ واخا اماما
جمعت لي غتحتاج وقلبها كيضرب تقول اول مرة غيجمعهم فراس ولا كلمة ولمسة ...اهل زان كلهم مشاو بقى غير هو على برا كيتسناها في طوموبيل باش متحشمس وتبقا على راحتها ...نزلات بقفطانها زادت عليها غير شال طويل هازا شنطة صغيرة لي وصلتها ليها بنت كتعاونهم تال طوموبيل ودعتهم من بعيد وخرجات لعندوو ركبات معااه ....دار تقابل معاها وكيشووف ويعض على فكو وعينيه حمرين
دار تقابل معاها كيشوف ويعض على فكو وعينيه حمرين ...مد يدو لجهة حنكها تحسسو ~ غتكوني عييتي ليوم
بصوت تعب ~ ولابد من شوية لعياا ...قال بابتسامة خفيفة ورجولية فافاتها ~ هانتي غترتاحي...وهو كيديماري طوموبيل قال من جديد ~ صافي مشيناا
رمشات ليه بالايجاب بمعنى واخا
تحركوو وهما في طريق شافت فيه باطمئنان ~ ياكما رجليك ضراتك وتبغيني نصووگ ؟!
وهو مركز مع طريق ~ غير رتاحي انا غادي غير بشوية
سكت من ورا هاد الكلمة وعم الصمت غادين كيتمزكو بصدفة دازت اغنية لام كلثوم في راديو ..." اللي شفتو قبل متشوفك عينيا عمري ضااعع يحسدوك ازاي عليا "
حطات راسها على الكوسان كتشوفيه كيفاش مخرج ايدو من شرجم وغادي منساجم حواجبو ملاقين ومضيق عينيه ومرة مرة يحك لحيتو ...بلاما تحس شدات فيدو لي محطوطة على فخضو خداتها بين ايدها باستها وبقات حاطاها على قلبها...لي ملاه عليها دارتو بعفوية ...
برضى وهيام واعجاب بالحركة لي كانت على قلبو بحال لعسل بادلها القبلة في يدهاا وكمل طريق و فرحتو كبيرة بيها ومعارفش فين يحطها ولو قدر يفرش ليها الارض كلها ورد وقليلة فحقها..مزال كيجيه فدماغو كاع لي دارو ليها وكيزيد يندم حشمان منها ومبقى عارف كيفاش يتعامل معاها......طالت المسافة هي غادا طايرة بالفرحة وكتنهد وهو مرة مرة
يخطف شوفة على سريع فيها بانت ليه وجهها مزنگ بصهد سد الشرجم لي حداها وحل سقف طوموبيل ~ حيدي زيف الا بغيتي
معودتهاش معاه زولات الذرة من فوق راسها مخلية شعرها طايح على كتافها واطول زغبة عند خصرها .. مدة قليلة وستوعات وهي كتشوف فطريق ~ واش مغادينش لدار ؟؟ ماشي هي هادي طريق
وصلو الاوطيل معروف فكازا ديجا كان وصى نصر الدين حجز ليه فيه سويت روايال ...فضل يبراكي طوموبيل في باركينغ حسن من مدخل الرئيسي على ود القفطان لي لابسة وعازل صدرها ومفاتنها ومن تما خداو سانسور حتال استقبال....هز شنطة لي جابت معاها وصاكو لي كان في الكوفر عطاهم ل مكلف تما وشدها من يدها وتوجه بيها لبنت لي واقفة في استقبال ..
طلق من ايد مريام حتى جبد لاكارط ناسيونال حطها على كونطوار وحرك راسوو بمعنى ديري خدمتك !! ....انبهارها بيه وبالبلدي لي وتاه خلاوها حالة فمها كتشوف باعجاااب عينوها وملامح وجهها فضحوها وشعلو نار الغيرة فقلب انثى عاشقة وزوجة غيورة واقفة فجنبو
لعنوان واضح والمفهوم باين ، كان عايق بيها ودار راسو مردش لبال.. دوز ايدو على وجهو بيد والايد لوخرا شد بيها مريام من خصرها مزير عليه وقال بصوت خشن ~ زيدان لخليفي وحرمه...بأمر قال...عطيني كارت دو سويت ...!!
بدات كتقلب متوثرة ومرة مرة تسرح حلقها... فداك الوقت زيدان عطاها بظهر ..تقابل مع مريام باسها في حنكها حتى دغدغها بلحيتو بقى مشغول فتفاصيلها يقاد ليها شال منها يدخل زغبة خارجة من لهيه...حتى سمع صوت ~ مووسيو
دار شافيها رافع حاجبو بان ليه كارت فيدها خداها من عندها بلا شكر وطلعو ...
بعد زوج دقايق كانو في طابق التاني انفوا وقف حدا سويت ديالهم وقبل ميحلو قال ~ بغيت ندير معاك داكشي تاع الرومانسيه ونهزك ولكن الغالب الله... اشار لرجليه ..صحيحة على قد الحال
سمات الله ودخلات باليمنة وهي كتردد بصوت خافت " اللهم اذخلني مدخل صدق عند مليك مقتدر " ...قالتها وحيدات شال من على راسها كدور وتشوف فداك سويت لي كان كيهبل ومقاد وكيطل على كازا ....فوق طبلة كانو دي سناك لي طلعوه سيغڤيس بتوصية من نصر
من شيبس لمشروبات بلا الكول وفريز بشوكولا و...و..و..
وقفات مربعة يديها قدام لڤيوو الساحرة لي عجبتهاا وهي كتامل وكتشوف في ضواو لي عاطين نور لمدينة حسات بيدين زيدان على خصرها وكرشو لصقها مع ظهرها
باسها في عنقها وقال بصوت بورشها ~ نصليو زوج ركعات
دارت لعندو وعينيها فالارض ~ واخا بالحق ندوش قبل ...حرك ليها راسو بمعنى خودي راحتك وخلاتها مشاات ...حلات لڤاليز كتقلب على شنو تلبس وقلبها كيضرب لمعري قبل لمغطي بالحق راجلها وحلالها خدات دوبياس مع شوميز دونوي لي وصى عليه ...لاتروس ديال حمام ديالها...ودخلات....بالخف خداتوش شللات لحمها بلاما تقيس شعرها ضارت براسها واخا مناقصها والو...ملي سالات
لبسات لا نويزات لي كانت بالغوز فوشياا لي واتاها وجاها مع بياض وجهها تعطراات ذهنات لحمها وخرجت لعندو بحالا ..كان كيدوي فتليفون مردش ليها البال ..مشات خظات لبسة تاع شلا لي جايباها معاها ومكتخطاهاش لبستها وجلست فوق ناموسية كتلعب في تليفون على ما يسالي
مشات خدات لبسة الصلاة لي مكتخطاهاش وجلست فوق ناموسية كتلعب في تليفونها كتسناه حتى يسالي بقات كتشووف في تصاور من وحدة لوحدة حتى حساات بظلو قدامها هزات راسها فيه لقاتو داير ايديه وراه وحاضيها حركات ليه راسها بمعنى مالك وهو يجاوب وكيحك في گفاه ~ نصليييو
مريام وقفات ~ وااخاا
سبقها فرش الصلاية في اتجاه القبلة وهي وراه ...صلاو زوج ركعات بخشووع وتذرع ماا ان سلم زيدان دار لعندنا وحط ايدو فمقدمة راسها وقال
اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه
كمل دعائو وناجى الله باش تكون ليه الزوجة الصالحة ويكون ليها الزوج الصالح ...ملي سالا باسها في جبينها ووقف كيحيد في مگانتو وكيفسخ في حوايجو لي كان لابس ...كانت متوثرة وكتفرك في صباعها وتلوي في حوايجها محرجة عاق بيها وكمل دار راسو مفاهمش ...خداا فوطة ودخل دوش مخليها كتشوف في لمرااية ومضاربة مع راسها واش تحيد لبس صلا ولا لا ...
وقت قليل وسمعات الباب تحل متعطلش خرج عريان لاوي غير فوطة على نصو تحتاني....وفوطة صغيرة فيدو كيمسح بيها شعرو ..ضيق عينو فيها وقال ~ مدي ليا لاتروس ديالي ...بايدين كيقفقفو مشاات لصاك لي جاب معاه عطاتو ليه خداا دواه شربو وهي مزال مسمرة بلاصتها بنفس اللبس حدها زولات الذرة وطلقات شعرها.....رفع حاجبو فيها باستفهام ونطق ~ غتبقاي مغلفة بهاد اللبس ؟؟
خلاها ومشى بنفس الحالة كيتعنگر بصدرو العريان وديك الفوطة لي لامشات حتى طاحت مريام يجيها شلل ...جلس فوق فوطوي شعل تلفازة وخلاها على خاطرهاا...نصلات عبايتهاا وقادات داك لانويزات لي غياكل من لحمها طرف ...رجعات رشات رشة من عطرهاا وزادت زعمات ودارت كريم ترطيب لفمها
ساطت بجهد وخدات نفس عميق وتمت غادا لعندو خارجة من للبيت تا تلقات بيه فلباب ...شافها تعطلت وجاي لعندها ...تبلوكا ووقف باغي يتيق عينيه ويقنع راسو بلي هادي لي قدامو مرتو وبالحلال
قرب منها وشد ليها يدها بزوج وقال بفحيح ~ سبحان لي خلقك ! صاااط ريح بصوت عالي وقال من جديد ...عامين وانا كنتسنى هاد النهار لي تكوني فيه حلالي ونتجمعو فبيت واحد .....عامين هادي وانا صمك مكنسمعش من غير كلامك اللخر لي قلتي ليا فداك نهار لكحل....عامين هادي وانا ضايع موضر ملاقيش راااحتي....
مريااام !!! اخر مرة غنبقى نجبد هاد الموضووع ، كنتمنى تكوني سمحتي ليا من قلبك ونسيتي لي فاات واخا صعيب ...كنتمنى منك تغفري لهاد العبد الضعيف لي عاد ولات لحياتو معنى بوجودك
وان شاء الله نقدر نسيك فكلشي ونكونو نعمة الزوج نكملك وتكمليني ويرزقنا الذرية الصالحة ..
كمل كلامو ومسح دموع الفرح لي كان في جنب عينيها ...هزات راسها كتشوفيه فيه ببريق وقالت ~ اميين ، الله يخليك ليا ..
زاد قرب منها وايديه على لحزام تاع لغوب لي لابسة وفمو على جبهتها كيقبل فيها ونزل لعويناتها بزووج كل وحدة طبع فيها بووسة خلات جسم مريام تصاب بالقشعريرة وتحس وهي بين ايديه انها متفجرة الانوثة
فاقت تحت باطو معنقاه وخاشية راسها فيه ...حلات عينيها ممتيقاش راسها واش فايقة ولا كتحلم ....حمدات الله وقد مشكراتو قليل على السعادة والراحة البال لي كتحس بيها دابا بعد اعوام حزن وغم
كان ناعس مرتااح فمو محلول شوية وصدرو عريان ،بقات كتشوف وساهية فيه ناضت وتقادات حاطة يدها على ذقنها وحنزات على خاطرها ....حطات ايدها على حجبانو لغلاض دازت لحيتو شفراانو شعررو مفلتات فيه تا حاجة ...كتبغيه وواخا حاولت تردم حبو فقلبها احاسيسها تغلبو عليها ورجع حيا من جديد....حبها ليه مكانش مراهقة ولا طيش عابر وسحابة ودايزة بغاتو بعقلها حيث فواحد الوقت ملا واحد الفراغ وعمر نقص كان فقلبها ...طبعت بوسة جنب فمو وتسلتت من حداه تدوش و تصلي لفجر...تحت من رشاشة استرجعت لحظاتهم الحميمية بزوج وكيفاش دوزو ليلتهم وكيفاش كان متلهف وفرحان بيها كانها اول مرة غتكون بين يديه
"ويبقى" الحلال اجمل
سمعت صوت الباب تحل دورات راسها كيبان ليها جاي لعندها كيتفوه ويتكسل ملابس والو عطاتو بظهرها هربانة من عينيه وهو يجي قدامها ..مصندل ومعندو علاش يحشم.....دوشو بزوج وخرجو صلاز وكملو على ما بدااو في ليل باش يوجدو راسهم للعرس... لي غيكون كاعلان لزواجهم
في كل حر ومر ربي عمرو يخليك و لا يفوتك ... ومريام وزيدان لي شافهم قبل كيف كانو كيف المش والفار ميقولش عليهم مكتابين لبعض.. ولكن عند الله حاجة خرى و الحمد الله على مكتاب علينا لمزوجين كيتزوجو فسما قبل الارض ..
وعلى انغام اغنية وراه ديتو راه ديتو ياللة على زينو دخلو العرسان بالصلاة و السلام و الزغاريت مينة و نزهة كل وحدة شادة نيفها وتبكي في قنت اما عيشة حلقها من النگافة فرحانة لبنت ختها وواقفة على لكبيرة وصغيرة...
كانت كيف وردة وسط جنان لابسة تكشيطة ملكية بالحمر ودايرة ذرة على راسهاا اكسسوارات وماكيااج جاو مع وجهها وفجنبها زيدان لابس لكلاس لي مكيواتيه غير هو داخلين شادين فيد بعض وكيشوفو في الحاضرين ...كلشي ناض ليهم كيصفق
خداو تصيورات على الواقف ...جات نزهة فجنب مريام ومينة فجنب زيدان عطاو رضى لولادهم وتصورو معاهم....وهي فطريقها للبرزة كانت شادة فماماها كتسول فيها ~ فين كمال ؟؟
نزهة ~ مع بنت عمك لبستو وقاديت ليه انا نجيبو ليك ابنتي...
رجعات ضحكات وجاوبت زيدان لي ستفسرها بغى يعرف مالها
يا الله غتجاوبو حتى تم داخل مراد كيشطح وفرحان لخوه ومدخل معاه عبيدات الرمى و محيح علاش لا وخوه وصاحبو من بعد گاع لي داز عليه و الموت لي رجع منها ها هو اليوم مع لي بغاها قلبو وفي البرزة ... نصر و فراس تبعو مراد مشادين مع الشطحة و كيحسبو حسابهاا ضارو بيهم العيالات ها لي كتشطح وها لي كتزغرت... دخلات و سطهم عيشة ومينة مشادين من يد ليد عاطيينها الشتيف و الهيت .....مريام كانت كتضحك عاجبها الحال وزيدان مكتعرفو كاعي ولا فرحان جا لعندو مراد كيجري جرو من بلاصتو يشطح معاهم ورفض لكن اصرار مراد خلاه يردخ ليه وينوض معاه داروه الوسط كيشطحو بيه وهو غير كيصفق ويشوف لتحت ...نضمو لبنات ونادية لي يله وصلات هي واميمة لي شادة فيها كرشها لفمها وكتحلف على لي سبقها وخلاها جايا تجر في رجليها... بقاو هاك على باباه و وعطي ليماه حتى سخفو ... اما عبيدات الرمى يغنيو على هاد الزين و يكملو اش سميت الزين لاخر جيبهم عمر و دارت غرامة صحيحة ... حلفو تا يطلعو عرس يبقى في الفام...مشات نادية جلسات هي واميمة عند مريام لخقت عليهم هناء لي كانت لابسة قفيطين كيفها كيف بنتها وطالعها سر واتاتاها لوحم باركو ليها وياخدو تصيورات معاها بقاو هاكداك حتى تهدو لعزارا وكلها رجع لبلاصتو....بان ليهم زيدان جاي وسط خوتو معنقينو بزوج وكيتمازحوو معاه
مراد ~ وجد ليا راسك للعمارية العشيير
زيدان بحدة ~ ركب فيها نتا ، داكشي لي بقى
مدات نادية ايدها لزيدان ~ مبروط عليك امولاي سلطان
جاوبها كيهز راسو من فوق لتحت ~ الله يبارك فيك اختي نااديية
خنزرت فيه ومشات لبلاصتها وهو تابعها كيضحك...رجع زيدان لبلاصتو وخدا ايد مريام دارها فوق ايدو...جابو ليها كمال لي غير شافتو حماقت عليه ...لابس وداير بابيو شافها وعرفها وتراما عليها بزز باش خداتو من عندها ماماها تا حد مساخي بتاني بالحق كان لازم تبدل لبسة تانية
طلعتهم النگافة يبدلو في بيت مخصص للعرسان غادا شادا ليها تكشيطة من اللور ولي معاها يصليو على النبي ....اللبسة تانية كانت بالبيج منبثة بالحجر مع ذرة فنفس اللون وتاج صغير كيزينو ليها وعقلها مرفوع ممتيقاش راسها ، فرحتها كبيرة باينة على وجها وعينيها... لدرجة لي شافتو تضحك معاه خرجات ثاني شادة في زيدان ل كان متألق بجبادور مخزانية عاطياه هبة اكثر و اكثر ... وقفو ليهم الناس ثاني ها لي كيصور وها لي مفتون بجمالهم و الكمية لي بيناتهم ...بالورد نزلو لتحت وسط القاعة فين واقفة نگافة وولادها بالعمارية تقدمو لعند مريام لي باشرت و طلعات ليها و مدات يديها لجيهت ولدها كمال ... جلساتو قدام رجليها وما هي الا ثانية حتى تهزات بلالة العروسة يا النوارة ... تتشير لحبابها وصحابها لي فرحانين لفرحها .....لعبو بيها مزيان وجات نوبة زيدان جات لعندو لمعلمة وعند بالها بحال گاع رجال بالحق صدمها قبل مدوي~ غير رجعي بلاما تكمل هضرتك مغاديش نطلع
دارت كتشوف امينة لي هزات ليها راسها بمعنى خليه على راحتو....جلستو فديك لبلاصة وصبر على كثرة طلع ونزل ولبس وصور انجاز عظيم بنسبة ليهم دارو لدرجة لي كيشوفو جالس مكيتيقش ....رجعو هزو لعروس مرة اخرا ولعريس كتفى يهز تليفونو وياخد ليها تصيورات معجب بيها
ومكيشوفش غيرها وسط لبنات ....لعرس مستمر بشطيح والرديح لي فيهم ...دايز شاخض وكلشي فرحان من لحضور تال لعريس ....بدلو لبسات من لبسة لعمارية للبسة لي غترحب بيها على ضيوف .....تحط لعشا ولي تكلف بيه اكبر تريتور فكازا جاا واجد من الف تال ياء ....
زيدان لزم بلاصتو وصبرو تقادا وعياا ومعندوش مع كثرة الانظار....كلا ديك الماكلة على عينيه ردات ليه مريام لبال وقربات منو كتسول فيه ~ واش مقلقاك شي حاجة ماالك ؟؟
قال في وذنها ~ صافي الله يجعل البركة امتى غنمشيو
مريام ~ بقات ليا غير لبسة البيضة ويسالي العرس
حرك ليها راسو وتكى ظهرو على الكرسي كيشووف ...وصل وقت ونهاية العرس قربت مشات مريام مع نگافة تلبس اخر لبسة اما زيدان خرج على براا لقاعة تا يعيطو ليه ...لبسوها لبسة بيضة محتشمة وطويلة مع طالون عالي بين انوثها ...وهاد المرة ستعملت الكولي لي خدا ليها زيدان من فاس مع الثاج ديالو...جددت الماكيااج وبقات شحال كتشوف فراسها وهي بثوب الابيض ...لاول مرة غتلبسو ..زواجها الاول كتافات بغوب عادية ..من ديما كانت كتحلم براسها لابسها وتا قالت جامي يتحقق هاد الحلم وربي ما نسااهاش
تحل الباب ودخل عمها لي كان لابس جلابة بيض وطاگية وبلغة على وجهو كيضرب نور وكيبان عليه الوقار قرب عندها وقال بتاثر وهو راضي عليها ~ الله يكمل عليك ابنتي ويرضي عليك ويتبث غرس
باست ايدييه ~ امييين اعمي لهلا يخطيك عليا
عبد الله ~ قبل منسلمك لراجلك ابنتي بغيت نقول ليك بلي زواج ميثاق غليظ ومؤسسة كبيرة غدخلي ليها وغتلقاي فيها عقبات..ماشي ديما غتكوني ضاحكة وماشي ديما غتكوني باكية ولكن بالصبر كلشي كيفووت
سمعيني ابنتي نقووليك
سمعيني ابنتي نقووليك رضى الزوج من رضى الله وهادشي نتي عارفاه وتبارك الله متعمقة فدين وواعية منحتاجش نفكرك بيه...انا متاكد ولدي زيدان غيديرك في عينيه ويتهلى فيه ولكن راه شيطان كاين وضروري كيحضر بعد المرات ويدخل بين زوج الا قدر الله وقع بينكم شي مشكل نبغيه ميفوتش بيتكم نتي وياه باش ميكبرش ،بالصبر يتحل كلشي كلامي هذا قلتو ليك كيف غنقلو بالحرف لوحدة من بناتي نهار يسر ليهم الله الامور...انا هنا في عوض باك ومرخيصاش عندي وبابي مفتوح ليك نكون في جنبك وندافع عليك ونوقف معاك فكلتى الحالات وهادشي دابا غا هضرة زايدة حيت انا متمني ليك وحاس بلي كاين وكيتسناك غير الخيير من هناا القداام
في الوقت لي مريام عاطية وذنها لعمها وكتسنط زيدان كان مع الام ديالو فلبيت كتقاد ليه بدلة لي لابس وتوصي ..هي عارفة ولدها كثر من اي واحد
مينة ~ دابا نتا دخلتي على حياة جديدة ومبقيتيش داك زيدان تاع راسك لي كيعطي لخدمة گاع وقتو ويدخل وقت ما بغى ويخرج ملي يقولها ليه راسو ولسانو معندو عليه لجاام...دابا اولدي ولا عند بيت وعائلة وولد وان شاء الله اخرين جايين في طريق ...نبغي تكون عائلتك في مقام الاول قبل كلشي...ونبغيك دير ديك بنت الناس فعينيك وتهلا فيها وعصبيتك نقص منها شوية معاها الله يرضي عليك ...تبارك الله ربي عطاك مرا تحطها على الجرح يبرا
بابتسامة مخفية شاف فمو مضيق عينيه ~ داك زيدان لي كتقولي ليا عليه الواليدة مشاا بدلاتو مريام وجابت بلاصتو زيدان تاني هو لي واقف قدامك
طبطبت على كتافو بافتخار ~ عارفة اولدي عارفة غير وكان نصيحة ما تقتل ماا تحيي مغتنقص منك
باس راسها وخداا منها رضى شاف في لمرايا وهز ايدو بزوج بمعنى ~ صافي هو هادااك
مينة عينيها لامعين ~ سييييد رجااااال
خدات نفس عميق ونزلت شادة فدراع عمها لي ملامح الفرح و الفخر والحشمة باينة عليه نزلو مع دروج على انغام موسيقية كلشي واقف وكيصفق كاين لي كيضحك واكيد عينين باكية تاهما وكاين لي كيلوح الورد في اخر الدرج كان واقف زيدان وفيدو كمال بزوج بيهم كيتسناو اجمل واهم مرأة في حياتهم مرياام ...البنت الصبورة المحبة القنوعة القوية ...ل شريط حياتها داز قدام عينيها وگاع العقبات لي دازت منهم رجعو ليها فديك اللحظة ...دموعها كانو نازلين معاها دموع الفرح والفرج بعد العناء واليسر بعد العسر ...بحب كتشوف شكون كيتسنا فيها ولدها وزوجها في الدنيا وفي الجنة هزات عينيها جهة نزهة لقات وجها غابر وسط دموع الفرحة وكتصفق من كل قلبها لبنتها وقلبهاا رتاااح عليييها وما اجمل قلب الأم ...
من يد العم ليد زيداان سلمها ليه بعد متعانقو بزوج وقال عبد الله بتاثر كبير ماسح دمعة من طرف عينيه ~ بارك الله لكما وجعل المودة بينكما ورزقكما الله الذرية الصالحة ويجعل الله بيتكما مسكنا قوياً على التقوى من الله ويوفقكما في حياتكما الزوجية
زيداان عنقو برجولي وتشكرو ....باعجاب وانبهار وهو كيشوف فيها كانت كيف النجمة المضوية وسط السما بديك لاغور لي كلها كتلمع ...نزلات راسها التحت بعدما تابطت ذراعو...تنهد بارتياااح ودخلو على مهل لوسط القاعة واطلالتهم تسر الناظرين والعينين غتاكلهم ودعاوات لوالدين معاهم ...رجع ركب ليها خواتم وبعد مجوهرات لي خداهم ليها ..جابو ليهم گاطو كبير وهاد المرة عليه صورهم بزوج بيهم كان محتافظ بيهم زيدان صور قديمة من ليامهم مع بعض واخرى جديدة معاهم كمال
قطعو الحلوة والعائلة مجموعة و كل واحد من جيه كيتصور معاهم باغين يخلدو هاد اليوم الكبير لي جمع كل من زيدان ومريام واكثر شاهدين على هادشي هما مراد ونادية لي رافقوهم على الحلوة والمرة وعاناو وقاصاو تاهما معاهم
وتبقى هادي هي الحياة بحلوها ومرهااا
اول ايام عيد الفطر ...وثالت عيد لمريام وزيدان وهما مع بعض...واول عيد لبنتهم " هداية "......جمعات زين مها وتخنزيرة باباها ....كتشوف في الحنة لي دارت ليها كل من نزهة ومينة فيديها ومحملتهاش بغات تحيدها وربي كبير....عياو يحزرو فيها ويتساعفو معاها ولا بغات تعطيهم طوع مسكتات تا مسحوها ليها ....كانو معيدين في الفيرمة لي جات خارج لمدينة ....الطبيعة ولهوا زين ونقي ....من ديما ومرة مرة كيهربو ليه يريحو دماغهم ....هناء ومريام كانو كيقادو في طبلة لفطور على براا ويحطو عليها لي شراو ووجدو ....نصر الدين كان مع بنتو اية لي كبرات وولات بعقلها تابعين امجد ولدو لي كيمشي ويجري ويطيح وينوض يوسخ حوايجو طبعو صعيب بحال باه شيبو قبل الوقت....وفي البيت لفوق كان زيدان لابس حطة بلدية بالزرق مقابل مع المرايا كيمشط في شعرو وفي جنبو كمال لي طالع فوق الكرسي تاهو بنفس اللبسة ونفس اللون وكيدير مدار باه ...فيه شبه كبير منو ...لعوينات كيف كيف وتا شووفات هما....لي دارو هذا يديرو داك...كمال تاثر بيه بزاف وحل عينيه عليه كيقوليه بابا وتا زيدان هاكداك معتابرو ولدو ومن صلبو ومعزتو كيف بنتو ....
سمعو صوت مريام تستعجل فيهم يهبطو باعصاب هادئة رش ريحة ليه و لولدو و ضار هزو من ذراعو حطو للارض تشادو وخرجو بزوج....في طريق كان جاي مراد كافر مكسيري حيت فاق معطل حداه اعصار مگرنة والا دوا تقربلها معاه ووراه في الكرسي لور عيشة لي شادة قلبها بيدها وتنسيم لي مكنزة على ايد جداها ....عيشة ~ اربي امراد غا خليهم اولدي يفطرو يخليو لينا غا لي شاط ...خفف اولدي سرعة غا تصيفطنا جملة ...مراد كيضحك ~ واايلي الواليدة خفتيي ، واش اول مرة تركبي معايا ...عيشة ميقت فيه ~ واخر مرة ان شاء الله
نادية خاص غير لي يبدا ليها كملات على ما بدات مها~. نقص نقص و نتا غتصيفطنا عند عزرائيل نهار لعيد "مراد ودنو لي من جيهتها تقول صمكة و كمل على صوكانو و حتى هو مكيحشم حتى يسمع صوتها رنان"
هضرات هاد المرة بلغوات حتى قفزت لبنت..... هبطنييي هنا أنا و مي و بنتي و نتا سير تسابق مع ريح ..سمع تنسيم كتبكي و نقص سرعة بلهلا يطريه ليه
دغيا وصلو وغير دخل مع الباب عطاها لكلاكصوون كلشي عرفهم وصلو ....كانو مجموعين على طبلة كيتسناو فيهم .....اول من نزلت عيشة كتنش على وجهها وكتحمد الله لي بارك ليها في عمرها واخر من لحق عليهم مراد ...زيدان شاف فساعتو وغمزو ~ شفتك دغيا وصلتي عاد قلتي ليا غنشدو طريق
واحد يمد لاخور وتشاركو مع بعضياتهم النعمة ....زيدان حاط هداية فوق رجليه يبوس فيها وكمال حداه من جهة ليمن ومريام من جهة ليسر حاط يديه على اسفل ظهرها خاشيها فيه معنقهاا وهي حناكها غيطرطقو بالحشمة ..نصر الدين هاز تليفونو كيتسيلفا مع عائلتو صغيرة ...اما نادية يله بردات شوية رجعات شعلات ملي صونا تليفون لمراد وكانت اميمة معاه في ابيل فيديو كرشها لفمها وحداها فراس
هزتها عيشة وخباتها عليها وقالت ~ حكيها في الحيط ابنتي عندااك ...نادية ~ فاتها لوحم اماما سيدة علاين تولد نيفها يعكيك لخبار تنفخ شد نص في وجهها...هي كتدوي ومريام كتضحك عليها عارفة صاحبتها لي فيها ميهنيها
مراد باغي يشد في نادية ~ مييموو متاكدة معندكش توام ؟؟ حرام اختي بحالك خاصها كل عام تولد لينا زريعتك غتطلع شابهاك زينة
سمع صوت فراس من بعيد ~ واخا ابااا مراد قول لي بغيتي
خلاتو نادية حتى قطع دار راسو مقال والو وهي متسرطاتش ليها
بردت غدايدها فبنتها ل كتراما مبغاتش تجلس لا عند مها ولا باها و محيحة بالغوات حتى هبطتها من فوق رجليها و خلاتها تهبط يشوفوها اش بغات كتمشا و ضحك حتى وصلات عند كمال و مدات فمها على شكل بوسة كلشي تعجب و تهز بضحك سيدة عاجبها سي كمال و هما ما سايقين خبار زهوانية فحال باها و راه قالوها من شبه أباه فما ظلم شافت فيه نادية وقالت بطنز ~ شفتي زريعتك اسيي مرااد كيف دايرة
مريام شافت ساعة فيد زيدان لقات وقت لحليب ديال هداية وصل و ناضت تصاوب ليها لبيبغون خلاتهم مجمعين و مشات لكوزينة محسات غير بايدين معنقينها من ظهرهاا ...ريحتو ولمستو عرفتها ومتحتاجش تدور تشوف شكون
مريام بابتسامة هادئة ~ ..... شتك خليتي ضياف و جيتي
زيدان باسها فخدها ~....أنا راه نخلي دنيا كلها على ودك ماشي غير ضياف
مريام هاد المرة بضحكة مسموعة ~ و زيد احبيبي نديو لبنتنا لحليب ديالها دابا تفضحنا
جات ماشية و سد عليها باب الكوزينة خلاها ضور فعينيها
جرها من يديها و قربها ليه و بقا يشوف فيها نضرات حب و عشق فبعض الاحيان نضرات تيكونو كافيين يعبرو كتر من الكلام
سمعو صوت كمال كيعيط ~ بابا ، ماما فينكم ؟؟
وهي تخرج مريام عينيها باستو بخفة فشفايفو كتصبيرة وحلات لباب تشوف ولدها ...لقاتو هاز ختو صغيرة مزير عليها من ظهرها ورجليها قراب للارض ...بدا كيضحك زيدان وقرب خداها من عندو ~ ولديي البطل ولا كيهز ختووو
كماال كيحك شعرو ~ كانت كتبكي وجبتها
مريام كتحرك لبيبغون باش تبرد ~ هاكا نبغيك اولدي دير بالك عليها ...
خرجو على برا زيدان حاط يدو على ظهر بنتو وكيدوي معاها ~ حبيبة بابا ، اميرة ديال ، اللب تاع بنياات
مريام كانت كتسنط ليه وعاجبها الحال عجباتها طريقة كيف كيتعامل زيدان مع ولادو كانت غالطة فيه وحكمات عليه قبل متعرفو وقالت انو من نوع لي مكيبوحش فحبو نسات بلي بيديها غيراتو
وكذاب اللي يقول الحب مكيبدلش
في جردة كان هاز مراد كاميرا كيصور في صغار ولكبار بان ليه خوه وصاحبو جااي وهو يصفر عليه وباشارة قاليه يوقف باش يصورهم...
حطات مريام بيبغون في الارض وخدات من عند زيدان هداية كتقاد ليها في قفيطن لي لابسة ولي كيشبه لقفطانها ماتشي ماتشي ...اما زيدان هز كمال بالگوشية وعنق مرتو بيديه ليمنى ومرة مرة كينزل يبوسهم بزوج ومراد كياخد ليهم صورة لذكرى ...صورة الا شفتيها من بعيد كتشووفها عاامرة حب وكتقول بلي هاد زوج معرفوش نهار الخايب وبلي حياتهم من نهار تلاقاو ببعضياتهم وهي وردية وبلي عمرهم تخاصمو ولا تفارقو ولا هجرو بعض ...لكن الحب يتجدد بالخصام ويبقى اجمل واقوى من اي اتفاق
الحب أقوى من أي إتفاق الجزء 23 والأخير
محتوى القصة
التنقل بين الأجزاء