حبي لك ياا عزيزي اخد مني كل شيء ...وجعلني التقط ما سقط منك من أنانية وعدوانية ونرجسية باختصار صرت انا ما كنت انت عليه من سوء وبلا اتفاق مسبق....!!
~~~~ الحب أقوى من أي إتفاق ~~~~~~~
الضربة اللي ما تقسم ظهرك تقوّيك، والصدمة اللي ما تقتلك تفيقك وتوعّيك وتحل ليك عينيك.....كل وحدة فينا دازت من أزمات مزفتة وكلها وكيف واجهاتها ووكيفاش تقبلاتها كاينة لي كتضعف وكطيح الارض وكتستسلم دغيا وكاينة لي كترجع حسن من اول وكتقدر توقف من جديد على رجلييها وكتغلب على زمان وعلى بنادم واخا كتكون مهرسة مية هرسة ومافيها ميتشااف من لداخل ولكن مكتبينش وهادا حال مريام لي ل دازت منو ماشي قليل وتا وحدة متقدر تغلب عليه بساهل منها هي وجبد ولكن الوقت كتداوي واخا كتخلي الأثر...
ماشي ساهل تبغي شي حد ويكون في عينيك الدنيا ومافيها وتكوني كتعطيه بظهرك ونتي مرتاحة حيت عارفاه امانك وفي اللخر يطعنك ويغدرك ويحگرك بهاد المفهوم باش يبرد خاطرو يديرك لا شيء بعد معطيتيه كلشي ، يلوحك على طريق وميتلفتش وراه يكون سباب فأنك تفقدي بااك وتغربي في بلادات نااس بلاما تشوفي ورااك ..يكون سبب حتى يرجع قلبك كحل ويقتل شي حاجة سميتها الحب في حيااتك بمرة ويخطف الضحكة من فمك ...كنظن هادا كان درس قاسي عليها ومتيحانو داز صعيب وواعر بحيت خلاها تستغرق عامين وكثر باش تنقزو وتتغلب عليه ...
دارت سينيال على ليمن وبراكات طموبيل جنب طريق ،تليفونها كان كيصوني ومن نغمتو عرفات شكون كيعيط ليها وشكون من غيرها ختها وصاحبتهاا وكلشي عندها نادية لي وقفات معاها وقفة رجال ومفرقتهاش ....سكتات الموسيقى وجوبات بعد مزولات نظاظر من عينيهاا ورداتهم فوق شعرهاا ~. ندووش !! مالك لحقتي توحشيني
مريام قاطعتها ~. لا لا انا لي محتافلة مالك نسيتي شنوو ليووم ؟؟
نادية شافت في تليفون ورجعت جوبات وهي كتنهد ~ اممم وانا نفهم يالله سيري منعطلكش تا تسالي وندويو
مريام بابتسامة ~. واخا احبيبتي بسلامةة
قطعات معاها ورجعات نظاظرر على عينيها وكسيرات موقفت تال قدام اشهر صالون في مدينة نيس ،كيصاوب فيه غير شكون وشكون غير شافها سكيريتي جا كيجري لعندها ياخد الطوموبيل ، حلات الباب وهزات صاكها ونزلات كتمختر كانت لابسة كسوة فوق الركبة بنواغ مع كعب عالي ولايحة عليها مونطو گرونة مخلياه محلول شعرها كيف ديما مطلوق غادا وترجع زغيباتو اللور ، كتهز رجل وتحط ختها ريحتها سابقاها ومن شكلها باينة عليها بوكو حبة ، تحل باب الصالون وغير حطات رجليها فيه سمعت غوتة بسميتها خلات كلشي يضور يشووف فيهاا
-" جاي كينقز و المقص في يديه الا حسبتيه على رجال غتسمى عيب في حقهم اما الا تصنف مع العيالات قليلة فحقناا " ...مييييييريييييي !!
ميريام حيداات نظاراتها خشاتهم في صاك ومونطوها عطاتو لبنت علقاتو عاد عنقااتو " ... لووووليييي شيغي توحشتك !!
- " لاح المقص وضار عند وحدة من المساعدات ديالو جرها من شعرها وتكلم معاها بالفرنسية~ ... نتي كملي لهاديك وردي بالك راه افريقيا اليوم تهرس علينا الصالون وترمتي مقادة على تمارة عيييت ...
"عنق مريام لي كانت كضحك وهذا حالها ملي كتحط رجليها عندو كيفوج عليها وكيفكرها فبلادهاا بحكم مغربي ، تم غادي يلوي في مسعوودة لي لاصقة مكايناش ويشالي بايديه كيرحب بيها حتى وصلو لغرفة خاصة ~ حط قدامها شكلاط متنوع وقال ...غبرتي اصحبتي ويلي يومين مشفتك
مريام حطات صاكها فوق طبلة وتقادات في الجلسة وقالت ~. ايوا ها انا هنا يالله وريني حنة يديك
- غمزها وعض على فمو بصياعة ~. شي ليلة غووج هادي مافيهاش هههه "قوس عينيه وصفق بيدو متحمس وطلق حلقو بضحكة بحالو وقال ~ أمري كي بغيتي طلعي اليوم !!
مريام وقفات ومشات لقدام لمراايا ودوات بثقة وهي كتشووف فراسهاا ~ لي يليق بمدام مريام جيمس
-" خيب سيفتو وعض على صبعو كيدوي مغبن " اووف اصحبتي تستاهلي واحد شباب
مريام ضارت لعندو مخنزرة فيه ~ شنو كنقووليك !!
- أفأفا كيحرك فراسو وقال ~ صافي جلسي جلسي نجبد ليك دوك العينين وهما تكمشو بقوة مكتخنزي
ضرباتو على كتفو وجلست اما هوو طلق اغنية شيك شووك ولوا عليه حزام رقص مرة يلوز ليها مرة يقلد ليها ... وكيف بغات و تشهات قاد ليها غير كمل وهي توقف كتشوف في المراايا بنظرة باردة ، من ساسها لراسها مافيها تا غلطة الجسم منحوت ومقاد وجات عليه الكسوة من داكشي اما الماكياج لي فوجهها زاد بين زينهاا ويخليك تبقى غير تشووف فيها ، شعرها كان مموج بشكل خطيير ...عطات لمرايا بظهرها ومدارت تا ردة فعل كتافات تقول ~. صافي مزياان
- بدا يولول ~. كيفاش مزيان ، اويلاي على مزيان من صباح وانا نحرك فصبعاني بحال شيتة الرساام وفلخر تقولي مزيان فين هي واعر مقود صاروخي كيهبل، واش كلمات زوينين معندكش في القاموس
مريام بغير نفس ~. بلاما تحكر ، شافت في ساعتها وقالت خاصني نمشي غنتعطل وغيكون جيمس كيستناني
- شدها من خصرهاا وقال بترجي ~. شنو عندكم ليووم راه ضرني راسي !!
مريام تنهداات وعلى وجها شبح ابتسامة ~. عيد زواجناا ليوم كملنا عامين
خرجات من صالون كيف دخلات تزادت عليها حاجة وحدة وهي صباغة لوجه لي محركات فيها والو كانت تفرح الا عكرات ولا تقادات وتزوقات ودابا ولا كلشي كيبان ليها زايد ناقص وكيف كان كيف لاا ...جاب ليها سيد طوموبيل تال عندهاا ضورات معاه وطلعاات بحالها والوجهة هاد المرة داارهاا ، شعلات لموسيقة وغادا وكتدندن معاها مرة مرة تهز عينيها في لمرايا تشوفيهم وترجع تركز مع طريق ، نص ساعة وكانت قدام لڤيلا لي جمعات شملها هي ومها لمدة عامين كانت كبيرة وكتشبع لعين غزالة من برا ومن لداخل كتسطي ، نزلات من طوموبيل وتمات داخلة بشوية عليها ، تلاقات ليها الخدامة في الباب خدات من عندها الصاك والمونطو
مريام تكلمات معاها بلغتهم ~. فين ماما !!
- جالسة في جردة امدام
حركات ليها راسها وتمات غادا كتمشى بانوثة صوت كعبها العالي كان كفيل يعلم الام بوصول بنتها لقاتها مضورة وجهها كتسنا فيها
- نزهة ~ بنتي لحبيبة جيتي طلعتي غزالة الله يحجبك !! تحنات لعندها باستها فحنكهاا وجلسات حداها في جليسة عصرية قدام لبيسين ~. عادي ماشي شي حاجة كيف ديما وصافي قولي ليا فين هو أروون واش ناعس
مريام حطات راسها على كتف مها وقالت بحب ~. لهلا يخطيك عليا اميمتي من غييرك معرت شنو كنت غندير !!
نزهة هزات ايدها كتدوز على شعر بنتها بحنان وكتبوس فراسها ~ الله يلاقيك مع حسن منك ابنتي والله يرضي عليك
على اثر هاد الكلمة وقفات وقالت هربانة من حداا نزهة ~. انا غادا نوجد راسي قبل ميجي جيمس
واخا هربات وخوات لبلاد ودازت اعوام وشهور وايام ،مزال اي كلمة واخا تكون عن غير قصد كتأثر فيها ، اي اغنية ولا حدث شافتو قدامها كيفكرها فما داز عليها حسسات راسها بذنب وهزات مسؤولية شنو وقع ليها ولباها على كتافها حيت هي لي رخصات راسها وعطات قلبها ل واحد مكيستاهلوش ، جرحها جا لداخل وواخا ترمم بقى عايب حيت مكاين مصعيب من جرح القلب ، حلات باب بيت نعاس ودخلات ليه كان كبير ومتيسع لاصال دوبان كانت لداخل وديرسينغ تاهيا لحوايج بالهبل والماكيااج غير مزلع اما الاكسيسوار شي ينسيك شي وهادشي كلو هي مفارق معاها واالو ومقاد نفسيتها تاا شوية واخا تبان قدام بنادم ضاحكة وضاربة دنيا بركلة وممسوقاش ولكن ما خفي كان اعظم ...
حلات سنسلة ديال كسوتها وحيدتها هزات ملابس داخلية جداد لبستهم ولاحت عليها بينوار وخرجات من بيتها لبيت حداها ،كان غالب عليه لون زرق عامر العاب وكاع لي كيخص دراري صغار دخلات على صباع رجليها بلاما تشعل الضو غادا كتسلت باش متفيقوش قربات من سريرو وتحنات لعندو باستو في عنقو وتكات حداه كاشم ريحتوو "أرون " احسن حاجة وقعات في حيااتها فهاد المدة ولدها لي كتسطى عليه ولي تقيسيها فعينيها ومتقيسيهاش فيه بسبابو عرفات معنى امومة وحست بقيمة الواليدين...
حسات بدقات خفاف في الباب هزات عينيها كانت لخدامة لي جايا وجايبة معاها تليفونها ل كان كيصوني باست ولدها وناضت من حداه بعد مقاداتو وسدات عليه لباب ~ الو
- مريام حبيبتي موجودة
مريام دخلات لبيتها ~. قدامي عشرة دقايق گاع
- وااخا انا كنستناك في طوموبيل على برااا
قطعات معاه وهزات كسوتها كانت بلون لحمر ومعرية من جهة صدر جايا نازلة على لحمها تال لتحت قادات لي تخربق في شعرها ووجها وهزات بوشيط ديال سهرة فيدها ونزلات
سلمات على نزهة وخرجات من لباب بان ليها جيمس واقف متكي على طوموبيل وهاز فيديه الورد كان لابس كومبلي بنواغ مع قميجة بيضة قربات منوو مبتاسمة مد يدو شد فيديها وباسها فيهاا ~. نهار على نهار كنزيد نبغيك
مريام تنهداات بصوت مسموع وطبعات قبلة على خدو ~. تا نتا جيتي زوين
حل ليها لباب بلباقة ومد ليها الورد وقال ~. كنتمنى يعجبك !
تشكرااتو بعينيها وركبات ، ركب حداها ديمارا طوموبيل وشابك يدو مع يدهااا وغاادين في سكاات
جيمس سر، رجل اعمال يهودي الاصل خانز فلوس سنو مباينش عليه لولا شيبات لي مغطين شعرو وتجاعيد لي بداو يبانو على وجهو يتصنف ضمن شباب ،جسمو رياضي ما طويل ما قصير ما غليظ ما رقيق مهلي فراسو وفصحتو ،جنتلماان بزيادة وكيقدر لمراا ويتهلى فيها داير مريام ونزهة فعينيه وممخصصهم من حتى حاجة ومن اول محطو رجليهم في فرنسااا وقف معاهم من جميع النواحي
جالسين في ريسطو غالي كانو كيتعشاو على ضوء الشموع هو كان فرحان وهي عادي عندها بحال بحال تا حاجة مبقات تخلي قلبها يضرب بالفرحةة ولا تعمر عينيهاا ، حط فورشيط وجبد من جيبو بوااطاا حمراا مربعة حلها وحطها قدام عينيها كان عقد ماسي بحلقات والخاتم ديالو مدو ليها وقال ~ كل عام وحنا مع بعض يا احسن حاجة وقعات في حياتي
مريام هزات لبواطا كتشوف فيها ، وشدات في يديه راسمة ضحكة ~. شكرا بزاااف الله يخليك لينا ياربي
جيمس حنحن وقال ~. مزال عندي ليك كادو اخور
مريام قوسات حجبانها وقالت بتساؤل ~. شنوو هوو ؟؟
جيمس زير على ايدها ~. بغيت نمشيو للمغرب
تفافات وطلعات معاها صهدة تملصات منو بتوثر وهزات لما شرباتو ~ كيفاش نمشيو المغرب يمكن دوينا فهادشي
جيمس قاطعها ~. انا مزال مكملت كلامي ، رغبتك حتارمتهاا ، انا مغاديش على ودوشي حاجة ، لا انا غادي حيت بغيت "شد يدها من جديد ونطق بحب ....بغيت ندخل لإسلام ونبدل اسمي تما وبغيتك تكوني معايا
صدمها بشنو كيقول مكانتش متوقعاها بمرة عمرها فاتحاتو فهاد الموضوع ولا حكرات عليه عارفة زواجها منو حرام ولكن ظروفها كانو قوا منها جوباتو فرحانة ~. فرحتيني بزاااف اجيمس واش متاكد من هاد الشي لي بغيتي ديرو
جيمس ~. وبزااف انا دويت مع عائلة هنا وعطيتهم قراري واخا عارضو ولكن انا عارف شنو بغيت ، وخاصك تعرفي بلي هادشي كنديرو على قبلك نتي
سكتات شوية حتى حرك ايدها وقال ~. مجوبتينيش شنو قلتي
مريام كتحك ورا عنقها ~. فاش ؟؟
جيمس هز ايدها باسهاا وبقى حاطها على صدرو ~. امتى نمشيو لمغرب
يقوليها تلاحي في البحر تتلاح الا انو تمشي لمغرب ...على قد معزيزة عليها بلادها على قد مكارهة تحط رجليها فيها ، بالها كيصور ليها بلي غير غتمشي كلشي غيبقى يشوفيها وينعت فيها ويقول هادي هي لي تفلى عليها حبيبها ولاحها ،
من غير انها ممستعداش حاليا تتلاقى مع حتى وجه يفكرها فشنو وقع ...بدات تمرر صبيعاتها على جبهتها وكتفكر ~. متقدرش تمشي راسك
عنقهاا فرحاان وناشط ، كملو عشاهم شوية وجابو ليهم حلوة قطعها هو اما هي خسرات ليها الجلسة ، تحججات براسها ضرها وناضو
قبل ميديماري طوموبيل جبدات من صاكها كادو مداتو ليه حتى هي مفكراه كيف مفكرها .. كانت گورميط فيها اول احرف من اسمهم هما بثلاتة ،جيمس مريام ارون ~. كنتمنى تعجبك
مد يدو ليها لبستها ليها ونزل لفمها باسهاا فيه وقال ~. كنبغيك بزااف
كانت شادا في يدو هو جالس مايل مقابل معاها عاظي ظهرو لشرجم ، كيدوز ايدو على شعرها وكيسمع لكلامها فرمشة عين وقفات قدامهم طوموبيل ونزلو منها رجال مسلحين تيراو فيه وهربوو
طاح عليهااا غارق فدمو مهزش الراس اما هي بقوة الصدمة مبقاتش قادرة تتحرك
واقفة في الكولوار ديال لكلينيك كلها دمايات ،ايديها كانو كيترعدو وفمها حتى هو... رجليها فاشلين والخلعة شاداها هادشي لي عاشتو هاد لعشية كانت كتشوفو غير فتلفازة
وعمرهاا ظنات انها تعيشو في الواقع ...فرمشة عين طرا هادشي غير من ساعة كانت اي وحدة تمنى بلاصتهاا ودابا كتطلب ربي يشوف من حالها...
جلسات في كرسي كان تما حاطة يديها لي عامرين دم على راسهاا كتدعي في سرها ميوقع ليه والو
صوت تليفونها كان كيصوني هزاتو كانت نزهة شافتهم تعطلو وعيطات تسول فيهم ، ترددات مريام بزاف قبل متجاوبهاا مبغاتش تشغل بالها فهاد ليل ولكن موصيبة كبيرة بحال هادي مكتخباش ، جوبتها بصوت بااكي ~. الو هء ماما !!
غير سمعت صوت بنتها ناضت من فوق سرير خايفة ~. بنتي مالك كتبكي اش واقع فينكم علاش تعطلتو ؟
مريام متحكماتش في راسها بدات تبكي بصوت مسموع ~. ماما انا في كلينيك تلقاو ليا شي رجال وضربو جيمس بالقرطاس دعي معاه اماما دعي معاه ميموتش
مريام ناضت من فوق الكرسي كتمشى فداك الممر وتمسح في شعرها ~. هء انا مافيا والو ولكن جيمس حالتو مكتبشر بالخير ، معرفتش شكون هما وشنو بغاو عندو هء هء الا وقعات ليه شي حاجة نتسطى فيها
مريام بصوت مرتاافع ~ لا لا معندك فين تجي بقاي تما متخليش أروون بوحدوو عفااك ، لحد الان معرفناش شكون هادو وشنو بغاو انا عيطت لمحامي تاع جيمس وهو جاي لعندي ونتي سدو عليكم تما وردي لبال لولدي ولراسك عفاااك
قطعات مع مها كتعض على شفايفها ودموعها دايزين بلا صوت مكرهاتش يكون هادشي لي وقع ليها كابوس وتفيق منو
الجهد لي تلقى بيه صدمة اخرا باقا مرباتوش ...سمعات صوت خطاوي ثقال وراها ضارت خايفة وسرعان مرتاحت ملي لقاتو جاك المحامي ديال جيمس ..قرب منها حاط يدو على كتافها بمواساة ونطق بلغتهم ~ ان شاء الله يولي بخير ، نتي صافا موقع ليك والو
مريام حركات ليه راسها يمعنى مافيها والو وقال ~ شكون هاد الناس اموسيو واش راجلي عندو شي مشكيل مع شي حد واش عندك فكرة على هادو لي بغاو يقتلووه
جاك جرها من ايدها كيهدن فيها ~. جلسي بعدا ورتاحي امدام " مد ليها قرعة الما كانت معاه " هاكي شربي... بللات ريقها وهزات راسها فيه ~. انا كنسمعك واش عارف شي حاجة
جاك جلس حدااه حاط يدو على محفظة ديالو ~. موسيو جيمس كان قاليا بلي بغى يدخل لاسلام وبلي " قرب حداها ودوا بصوت يسمعوه هما بزوج " دوا مع عائلتو فهادشي وخدا قرار
مريام قاطعاتو كتهز راسها ~ اه هادشي انا فخباري غير قبيلة فاش كنا كنتعشاو عاد قالها ليا
جاك نطق متاكد ~ غيكونو هما لي بغاو يصفيوها ليه كيف كتعرفي الطائفة مكتبغي تا واحد يخرج من ديانتهم
مريام وجها رجع صفر ~. شنو كتقول واش لهاد الدرجة عائلتو تسمح فيه وتبغي تقتلو
جاك بهمس ~. دوي غير بشوية هادي راه ليهود شنو عند بالك حناا في المغرب كلشي عندهم ممكن ومباح
عودات ليه شنو وقع بالضبط ملي خرجو من لمطعم حتى وصلو لسبيطار وهو ينقز شرطي اخور وقال ~ مجاكش هادشي غريب ، يعني من هضرتك كنفهم معندكمش اعداء وهادو لي قتلو راجلك جاو متقصدينوو شكون غيكونو مثلاا ؟؟
ناضت من فوق لكرسي ودوات معاه بحدة ~. كنظن هادي خدمتكم ونتوما لي خاصكم تعرفو شكون هادو لي بغاو يقتلوووه وانا لي خاصني نسولك هاد الاسئلة ماشي نتا لي تسولهم ليا
وقفها المحامي وقال ~. معاكم المحامي جاك ** كيخصكم تقدرو حالة مدام مريام جيمس لي دازت منو ماشي ساهل وهذا لي لداخل راه راجلها وأب ولدها
- اكيد متفهمين لي وقع "شافيها وقال ". ان شاء الله تسمعي خبار مزيانة عليه الا وصلنا لاي حاجة غنعلموك
كتافات تهز ليه راسها وتعطيه بالظهر حالتها عالم بيها غير الله وزايدينها بسين وجيم كأنها هي لي قاتلة
- مدام جيمس من رأيي سيري لدار بدلي حوايجك ورتاحي انا نبقى هنا
قاطعاتو بامتناع ~. لا لا مغنمشيش لدار انا غادا غير لحمام نغسل يدي ووجهي ونرجع
وقت قليل ورجعات لعندو بعد مغسلات ...رجعو جلسو تما ودازو ساعات ودقايق ومشى ليل وطلع الصباح عاد خرج طبيب عرقان ، تلاقات ليه كيف خرج من لبلوك وقالت ~. دكتور كيف بقى راجلي واش مزيان ياك موقع ليه والو
- عمليتو كانت صعيبة قدرنا نخرجو ليه لقرطاس بلا مضاعفات ودابا كيرتاح حالتو نسبيا مستقرة
مريام شدات ليه فيديه بلا وعي منها ~ يعني غيولي بخير
- طبطب على كتفها ~ اكيد هادشي لي كنتمناو
قبل ميمشي قالت بترجي ~ عفاك ادكتور ممكن ندخل لعندو غير شوية ونخرج
هز ليها راسو موافق ~. واخا بالحق متعطليش
دخلات لعندو بعد ملبسات لباس طبي كان ناعس على كرشو ومعلقين ليه سيرومات وكلو خيوطة حال فمو ووجهو صفر فمو بيض بحال شعرو دارت لعند وجهو وتقابلات معاه جالسة على ركابيها ، هزات ايدو بين يديها وباستها وطاحو دموعهاا وحدة مور التانية شافت فيه شحال ونهارت ~هء هء جيمس متموتش تانتا وتخلينا انا وولدنا مزال محتاجينك اجيمس ، هء ه ، الا كنتي بصح كتبغيني خاصك تحل عينيك وتصح وتبقى معانا "عنقات ايديه وهزات راسها فيه وجهها كان سارد بدموع وعينيها حمرين حاسة براسها غيتفاجر " غير فيق وانا موافقة نزلو المغرب ونديرو لي بغيتي ، عارفة راسي مقدرتش نبغيك كيف كتبغيني ولكن معزتك عندي كبيرة منقدرش نشوف حياتي بلا بيك نتا وليتي كلشي بعد موت بابا اجيمس صعيب عليا نشوفك فهاد الحالة ، هء هء عفاك اجيمس على قبلي انا وأرون حنا مزال مكبرناهش ومدخلناهش لمدرسة " زيرات على يديه " مزال محتاجاك اجيمس متخلينيااش
مسكتاتش من لبكى وهي كتشوف فيه مكتوب عليها الحزن ومتهناش في حياتها قبل عامين نفس المنظر تقريبا وقع معاها وعاشتو ،فبحال هاد الغرفة وفسرير بحال هذا لي كتشوفيه كان ناعس الاب ديالها كمال بالحاج ، التاجر لي كانت خدمتو عندو بدنيا ولي فضلها عليها شحال من مرة ياما تعصبات منو وتقلقات ولكن كيبقى باها متبغيش تشوفو مريض ولا كيتألم ،حكمات عليها ظروف وتجبرات بلا هواها انو يطيح بين يديهاا ويلتاقك انفاسو الاخيرة قدام عينيهاا
قبل عامين في مصحة خاصة كان متكي على الناموسية صدرو عريان وحاطين على قلبو سماعات ،كانت حالتو الصحية متدهورة بزااف دخلات عندو مريام محطمة وكتشفي لعدو قربات منو وهزات يدو عنقاتها وقالت بضعف ~ بابا كيف وليتي ، هء هء سمح ليا ابابا بسبابي وصلتي لهاد الحالة كون تبعتك من اول ميوقعش ليك هاكدا هء هء " كتبوس في يديه وتبكي "..الا وقعات ليك شي حاجة عمري نسمح لراسي عمريي ...حسات بيد حنينة تحطات على ايدها علات عينيها لي كانت منزلاهم الارض وقالت بلهفة ~. بابا فقتي قوليا باش كتحس شوية انا نمشي نعيط لطبيب !!
حسات بيه زير على يدها وقال بصوت عيان ~ مريام بنتي !
سمعيني ، كان كيدوي ويستراح ...انا انا ابنتي بغيتك تسمح ي لياا مكنتش عارف بلي نتي لي غتخلصي داكشي لي درت شحال هادي ، هء هء " بدا يبكي بحال لمرا "...باك ماشي خايب ابنتي ، انا مضحكتش على صباح ، انا ك كنت كنبغييها وكانت كلشي في حياتي ولكن با با ابنتي خيرني بينها وبين الخدمة وحيت كنبغيها مب مبغيتش نعيشها في العذاب وانا معندي حتى فرنك داكشي علاش خليتها تشوف حيااتها ، كون كان يصحابليا بلي غادي " رجع كيبكي ملي تفكر شنو قاليه زيدان وبلي تسطات ونتاحرات "....كون مخليتهاش ابنتي ، اناا سباب ابنتي انا ....بغا يتجبد عندها ياخد ايدها يبوسها وهي تنوض عنقاتو وقالت ~ صافي سكت ابابا متلومش رااسك هادشي مكتاب ، عمري غا نكرهك نتا با عارف شنو هيا بابا ، دير لي درتي ويوقع ليا لي بغى يوقع بسبابك مغاداش نلومك
باستو فراسو بقوة وفحناكو بزوج وكملات ...ان شاء الله غتولي بخير وغنتخطاو هادشي كامل وغنسااااوه متخاافش ...
مسحات دموعو وشافت في عينيه لي كانو ممتنين ليها وكانت هاديك اخر نظرة ليه في الحياة ومااات ..صدمة كانت قاصحة وبزاف عليها كيفاش مات وهو عاد كان كيدوي معاها وتسامحت معاه وباستو كيفاش مبقاش غيكون في الوجود ..شركات بالله فديك اللحظة ومتقبلاتش بالمرة ان الموت حق
خرجات من بحر الماضي المؤلم لي مواجو هلكوها عينيها كانو منفوخين وحمرين ... لباب تحل ودخلات معاه ممرضة لي كتطلب منها تخرج ...ناضت بقوى فاشلة بعد مدوزات ايدها على راسو متحصرة على حالتو عاد خرجات، لقات جاك مزال كيستناها في بلاصتو وغير طلات عليه وقف قدامها وقال ..الا طمنتي عليه يالله نوصلك لدار رتاحي شوية ورجعي
معتارضاتش كانت عيانة بزااف وعاد توحشات ولدها باغا تشوفو ركبات معاه في طوموبيل وحطات راسها على الزاج وكلها أمل يفيق ويولي حسن من قبل
ناعس على كرشو راسو دايرو تحت المخدة وناشر رجليه على ناموسية مكاينش هنا ، لابس شورط والفوق عريان ، البيت مظلم ودنيا صاقلة فيه ، لاح يديه مجابها غير فوق شعر مسبسب حل عينيه مقندش وعاقدهم كيف ديماا ، قوس حواجبو وسب وهو كيشوفها ناعسة حداه صدرها عريان وفخاضها باينين ..تلاح على ظهرو داير سديه وراه وبشووفة قاصحة قال وهو كيململ فيها برجليه ~. هييييه فيقي
فاقت كتكسل وتاوب وغير جات عينيها فعينيه طلعات فوق صدرو وباستو في حنكو ~. حبيبي صباح الخير
بلا نفس جاوب ~. شحال فساعة دابا وكيف درت بقيت هناا
- تقلتي لبارح في شراب ومخليتكش تمشي ...لوات عليها ليزار ووقفات ...شنو مشهي لفطور نوجد ليك
زيداان بأمر ~. اري ليا تليفون راه فسروال وقادي ليا كاس القهوة كحلةة نخرج من دوش نلقاها
هزو شاف شحال ساعة وشكون معيط ليه ورجع حطو متاجه للحمام ، باقي هو هو مغيرات فيه الوقت والو من لداخل لقميع والنفخة الزايدة هما نفسهم اما من براا زاد عمر ولحيتوو كثرات تحت عينيه كحال بزااف وبسيف وهو ولا عاطيها غير لكاس والقرعةة والگارو وسهير ، دخل تحت الرشاشة خوا عليه الماا ، صحصح مزيان وخرج كيلبس في حوايجو ، حس بيدها تحطات على خصرو وبفمها طبع بوسة على ظهرو ...عض على شفايفو ساخط وضار لعندها مشربن شادها من يدها ومزير عليها
~. هاد تصرفات تاع لخرا صبح عليهم الحال ، انا ماشي راجلك ونتي ماشي مرتي ...ملي نكون عاقل طولي طريق بيني وبينك وملي نبان ليك فوت ديري لي بغيتي
- مشات گلسات على طرف الناموسية خاطرها خاسر كل متقرب منو خطوة فليل غير يصبح عليهم لحال يبعدها منو اميال ~ تالين غنبقاو على هاد الحال ، انا مبغيتكش تقرب مني غير ونتا مدوخ بغيتك تحس بيا حتى ونتا فايق
هز حاجبو فيها وقال باستهزاء ~.كتسولي تالين !! هاء عمرو يجي داك نهار غا تهنااي والا بقيتي تحكري بزااف غنهنييك من مجيتي فخطرة
ناضت لعندو بزربة وشدات فيدو ~. صافي دير لي ترتاح فيه وداري محلولة ليك وقت لي بغيتي وغنبقى نستناك غير تهنى
عطاها بظهرو وقال ~ فيناهي القهوة
- على برا انا نبدل وجايا وراك
خرج من بيت نعاس لصالون لي كان بحال مزبلة قراعي شراب وطفيات الگارو معمرين الطبلة تقاطع مزال مزلعين الدنياا .منظر مكانش جديد عليه بالعكس ولف يشوفو ، ولات هاد الدار بمثابة بار ليه كل ليلة كيقصدو من ورا نهارو تاع الخدمة ......هز كاسو شرب منو ووقف قدام الشرجم يضرب فيه البرد باش يصحصح مجا فين يكملو تا خرجاات لابسة عليها حوايج لخروج ، قربات منو وقالت بترجي ~ واخا توصلني في طريقك لسوبر مارشي باغا نتقدى شي حاجة
لعشية حط كاسو وهز تليفونو وسوارتو وقال ~ يالله تبعيني
غادين فسيارة من نوع رانج كحلة هو سايق وهي حداه كان حاط مرفقو على شرجم وغادي منغم على اغنية الشاب خالد لي ولات عندو ادمان
ونتي سبابي وسباب بلاية يا وعدي يااا ، وعلى جالك راني نسووفري وااه
حطات يديها على حنكها وقالت ليه بصوت مسموع ~. شكون هادي لي كتسوفري على ودها من ديما كنسمع هاد الاغنية كنبغي نسولك وكنخاف ؟؟
زيدان فرانا الطوموبيل وقال بصوت حاد ~ كون كنتي كتخافي متسوليش ...جبد من بزطام خدا منو وريقات حطهم ليها فيدها وقال ~ هبطييي !!
متكية فوق الناموسية كتقلب على الراحة لي مبقاتش لقات ، كانت ملوية في بينوار وعلى شعرها فوطة ..حاطة يدها على حنكها وكتخمم فيوحياتها لي مبغاتش تقاد..سمعات لبواني تحلات هزات راسها بانت ليها نزهةة داخلة وفيديها بلاطو تاع الماكلةة ...جايا قلبها ضارها بزاف على بنتها وراجلها ملي عودات ليها عرفت شنو وقع ليهم.....غاضها حالها وهي كتشوفيها تا كتجي تفرح وكتخطف الفرحة من قلبها وتحط بلاصتها القرح ... حطات ل فيديها فوق الطبلة وقربات عندها جلسات حداها بلاما تكلم كتافات تحل ذراعها وتخشيها في حضنهاا كتطبطب عليها بيديها بعض المرات كنكونو محتاجين غير لي يعنقها بلا قوة هضرة
فحضن واحد صادق يعطي مشاعر اقوى من الف كلمة ذات معنى
وشكون من غير نزهة لي غتقدمو ليها كتبقى هادي بنتها وصاحبتها وكبدتها ...على قد ماعينين مريام ولاو بحر غاارق الا انو ماماها عوامة ماهرة كتعرف تعوم فيهم وكتعرف شنو مخبى وسط منهم
كانت كتدوز على شعرها ولوخرا معنقاها وكتبكي بلا دموع بقاو مدة طويلة على داك الحالة حتى تكسر الصمت من عند مريام لي كتدوي بقلب مدمي ~. ماما شنو درت في حيااتي خايب ،!! ياك عَمّر قلبي كان كحل وعمرني كرهت شي حد، كيف كنبغي لخير ليا كنبغيه لكلشي ، علاش انا لي يوقع معايا هادشي
علاش انا لي نتخلى على حلمي ونتجرح علاش انا لي نتغرب على بلادي ودابا ملي بديت شوية بشوية كنوقف على رجليا تجي هاد الموصيبة تشللهم ليا ....غطات وجهها بيديها وبدات تبكي ....عرفتي الا وقعات لجيمس شي حاجة انا مشييييت
نزهة تقادات في الجلسة وجات مقابلة معاها حيدات ليه ايدها من على وجها وتكلمات بحنية كتقويها وتصبرها ومتخليهاش تضعف ~. الله يهديك ابنتي متقوليش هاد الهضرة نتي قوى من لي كتعرفي ، ياك قلتي ليا خليتي جيمس مزيان.. ايوا صافي حيدي هاد التفكير لخايب من دماغك وان شاء الله مغيكون غير الخير ..وتا الا وقع الاسوء ماشي نهاية العالم نتي مريام مرضية واليديها لي ستحملتي بزاف وغتزيدي تستحملي منبغيش مزال نسمع منك هاد شي " جرتها من ايدها"...نوضي كولي ليك شوية ورتاحي
مريام ناضت من بلاصتها ~. لا لا اشمن راحة كتدوي عليها كيخصني نمشي لسبيطار منخليهش بوحدو .." بتساؤل ". ارون فاق ولا مزال ؟
مريام حطات ايدها على قلبها متنهدة~. اخخ على ولدي مسكين، انا نبدل ونمشي نطل عليه قبل منخرج
نزهة بتساؤل ~ تبغيني نمشي معاك لسبيطار ....قالت لا رافضة تماما الفكرة ~ معندك فين تمشي لحد الان انا معارفاش هادو لي وصلوه لهاد الحالة واش غيرجعو ولا لا
نزهة باستها فراسها وقالت ~ كلشي غيتقاد ان شاء الله ابنتي نخليك تبدلي "هزات ايديها بأمر وقالت " وقبل متخرجي كوولي شي حاجة كتسمعي
مريام هزات راسها مع ابتسامة فوق الخاطر ~. واخا اماما كوني هانيا
تسد الباب ورجعات حطات شنو فيديها وجلسات على سرير فاشلة ومعندها خاطر تفكرات تليفونها لي كان فشارج ناضت لقات مساجات واتصال واتساب من نادية ملي كانت كتدوش ، تقادات في الجلسة وعيطات ليها وتاهية تليفون كان فيدها جوبات سيغ بلاص
جالسة في سيجور قدامها كاس القهوة وفيديها تليفون طالعة نازلة فصفخات ...ماشي غير مريام لي حياتها تقلبات سفاها على علاها لا حتى نادية مسلماتش من شنو وقع ...من نهار لواقعة قطعات صلتها بمراد تا من سكنة والخدمة خلات كلشي وغبرات ليها الاثر ، مزال على ذمتو مطلقاتش منو وممحسوباش على لمزوجين ،
لامتو فشنو وقع لمريام بصفتو صاحب زيدان عند بالها عارف شنو كان غيوقع وخبى ربطات سرعة زواجها منو بگاع لي طرا وفهمات لي بغات ،ظلمات راسها وظلماتو معاها رحلات من كازا وتحولات لمحمدية لبلاصة تا حد معارفها فيها وحتى من لبيرو خواتو وخلات خدمتها مع زيدان وبعداات على المحاماة فخطرة كرهات كلشي وطلع ليها فراس ، لامت راسها بزاف حيت هي لي عرفاتهم بزوح وهي لي زينات لبنت خالتها وعونتها تا هربات معاه تانيب ضمير قتلها واخا تا واحد محسسها بيه ولكن نفسها قتلاتها لدرجة ولات مدوزة وقتها غير هي وعائشة راس فراس مرة كي لبنت مع مها ومرة كي لعدوزة ومرات لولد مرة كتخشى فبيتها ومرة قدام تلفازة ولا شادة لكتوبة بحال دابا كانت كتفطر وتفرج في اخبار بعد معيات متصوني على مريام كيف هزات تليفونها طل على صفحتها على لفايس لي كانت دايراها باسم مستعار وهو يصوني تليفون
نادية بعتاب ~ افينك ابنتي من صباح وانا نصوني ومعبرتينيش
مريام دخلات نيشان في الموضوع بلا احم ولا سلام ~ نادية جيمس بغاو يقتلوه ودابا هو ناعس في كلينيك
قفزات من فوق الفوطوي وغوتات ~. كيفاااااااش وشكون هادو
عودات ليها شنو وقع معاهم ومخبات والو جوبتها نادية وكلامها كان من كلام لمحامي ~ غيكونو هما راه ليهود ولاد لحراام وكيف ولا دابا واش شوية فينك نتي واش عندو ؟؟
نادية كتوصي فيها حيت هادشي مكيبشرش بالخير ~. سمعيني الا دارزها مرة يديروها تا عشرين متخليهش راسو واخا تعرفي تجيبي حراسة اختي وحتى نتوما ردو ليكم لبال وانا غنشوف شي ڤُول من هنا لغدا ونكون عندك
مريام برفض ~. لا اصحبتي متبرزطيش راسك بيا ونتي عندك مليون مطرقة
نادية تنهدات بضيم ~. اش عندي اصحبتي غاا دار والتلفازة ، كنت جايا نيت مهم انا الا كثرت يومين ونكون عندك
مريام لاحت الفوطة من فوق راسها حتى تدلا شعرها لي طوال وناضت ~. واخا اختي انا
تعلق اتصالها مع نادية ودخلات ليها على الخط مكالمة من نمرة معارفاهاش جوبات فالحين وسمعات اخر واسوء حاجة كانت باغا تسمعها ~ مدام جيمس معاك مصحة ** بغينا نقولو ليك موسيو جيمس تزاد عليه الحال ومقدرناش نديرو شي حاجة كنتأسفو منك بزااف وباسم المصحة كنعزييوك
كلام بنسبة ليهم ولفو يقولوه ولكن بنسبة ليها طاح عليها بحال صاعقة بردات في بلاصتها وجمدات وعرفات بلي لي جاي في حياتها ماشي ساهل
دازت اكثر من سيمانة على موت جيمس لي متقبلاتوش بساهل ، بقى فيها بزاف وخلا عليها فراغ كبير ... كانت جالسة غير هي وماماها ونادية لي جات فور مسمعات خبار موتو ، مكاين لي جا طل عليهم ولا عزاهم ، وقف معاها المحامي تا دفناتو ورجعات فحالها حتى عائلتو متسوقو ليه ، بلاد الغربة خايبة مكتفرح فيها كيف موالف ولا كتحزن كيف ناس كلشي عندهم باسل ومعندو حتى طعم ..
جالسين في الصالون كانت هازة ولدها فيديها كيلعب برجليه لابسة لبس عادي وجامعة شعرها لفوق وجها صفر وتحت عينيها كحلين من لعيا مبقات عارفة مدير
هزات ليه راسها ومشات ..دخل لعندهم موسيو جاك مكرفط كيف ديما سلم وجلس ~ كيف بقيتي امدام شوية دابا
مريام حطات ايدها على رجليها وقالت بدون متشوف فيه ~ في اسوء حالاتي ، شنو تشرب ااستاذ
جاك بامتناع ~ مكاين لاش عندي شي خدمة غير جيت بغيت نعلمك بشي حاجة دارها شي جيمس قبل ميموت
مريام شافت في نادية باستغراب وتقادو بزوجهم في الجلسة كيسمعو ليه ~. موسيو جيمس قبل ميموت كتب ليك كلشي في سميتك نتي وأرون ، كان حاس بلي غتوقع ليه شي حاجة الا سلم داكشي علاش كتب ليك گاع لي كيملك بيع وشرا لا لي هنا ولا لي فالمغرب
مريام مسحات على وجها كتسرط في ريقها ~ شنو غندير بهادشي الا مكانش هو اموسيو جاك ، انا وليت خايفة بزاف واش فنظرك هادو لي قتلوه ميقتلونيش انا وولدي
جاك قاطعها ~ مزال مكملتش ليك كلامي ...حركات ليه راسها باش يكمل .....هو كان وصاني نقوليك بلي الا وقعات ليه شي حاجة باش ترجعي لمغرب معندك مديري هنا ،" جبد من محفظتو برا مدها ليها "...وهاد الرسالة خلاها ليك معايا
شداتها فيديها مزيرة عليها وقالت ليه ~. بشنو تنصحني
جاك بلا تزواق الهضرة ~ معندك مديري هنا رجعي لبلادك حسن ليك الا مكانش على قبلك فعلى قبل ولدك
مريام نزلات راسها لتحت شاداه بيديها كتحس بنواضرها كيزدحو كلشي غيتضرب ليها في زيرو ولي غبرات عليه عامين مشا فخبر كان بحالا كبات لما في الرملة ...حسات بيه وقف وهي تهز فيه راسها متشكراه ~
شكرا بزاف عذبتك معايا
جاك سلم عليها ~ مرحبا ، الا حتاجيتي اي حاجة انا هنا ، مهم فكري واي خرار تاخدتيه غنكون واقف معاك فيه
مريام بابتسامة ~. شكرا بزاف لهلا يخطيك
مشى وخلا وراه جبل محطوط على كتافها هزات عينيها في نادية وحركات ليها راسها بمعنى اش بان ليك ~ معندك مديري هنا امريام ..هاكدا كان جواب نادية ...وقفات مريام خاشية يديها في جيبها دماغها حبس بقوة التفكير
شوية وقفات وقالت ~. واش نقدر زعمة
نادية بحقد نطقات ~ علاش لي متقدريش ، نتي خاصك تواجهي ماشي تهربي ..صافي اصحبتي لي عطا الله عطاه وداكشي دفنتيه مع باك مكاين لاش تفكري فيه مريام رفعات حاجبها فيها وقالت ~. الا وقفت قدامو وشفتو مرة اخرا مغاديش ننسى علاش جيت هناا وغنرجع نفكر نرجع ليه الصاع صاعين، معاملة جيمس وقفتني فداك الوقت على لي فبالي واخا راه عمري نسمح لراسي اني درتو طريق باش ننتاقم
~~ وصمات من الماضي ~~
اصعب مرحلة تكون عاشتها مريام في حياتها هي ملي تغدرات ومات باها تما حسات بالبيبان تسدو في وجها والدنيا ولات كحلة في عينيها تأزمات لا هي ولا لي دايرين بيهاا ولات حاقدة على راسها اول شي قبل من بنادم الابتسامة تمسحات بمرة وليل ونهار تخلطو ليهاا ...كانت كيف المومياء تحركيهاا معاك فينما مشيتي متقول لا اه لا لا ....في يوم شدتها نادية من ايدها وموقفو حتال دار لي عندهم في لمحمدية... مقدرتش تستحمل حالة بنت خالتها ولا حتي تشوف فيها كتذوب قدامها لامت راسها قبل ما تلوم مريام ل عطات قلبها بلما تحس وعطات شرفها بخاطرها ....كان ليل ودنيا ظلام في الايام لعادية ميقدوش يصوگو في هاد الحالة ولكن في ديك ليام لقلب كان قاصح والخوف مكاينش .. وصلو لدار جوايه ثالثة تاع الصباح نزلت نادية هي لولة عاد دارت عند مريام تخرجها لكانت حالتها تشفي العدو وتبرد الحرب مكتهضر مكتكلم عينها بيضين وغير كتشوف جاتها صدمة قوية بزاف وحتى عقلها مقدرش يستوعبها ومبغاش ..جراتها من دراعها وخرجتها ..ذخلو و قادات نادية حوايجهم وحطات ليهم شي تخربيق تقداوه في الطريق وجلسو فوق الفوتاي بعد مبدلو عليهم وحدة كتشوف في الفراغ ولوخرا كتشوف فيها
نادية بأسى~سمعني ابنت خالتي غادي نعطيكً واحد نصيحة من ذهب وتقي بيا عمرك غادي تألمي مرة اخرى من الحب ..الحب امريام كيتكون من اربعة الفصول كاين الخريف وهذا اصعب واحد فيهم كتدبلي وراقك كيطيحو كتولي صفرة وشعر يطيح وتفقدي كلشي صحتك قرايتك وحتى حياتك حيث واحد قدر يذخل في اكتئاب وينتاحر بلاما يحس وكلشب هادشي مغاديش يرجع ليك ...ومن وراه كيجي فصل شتا جو كيكون بارد بحال هكاك كتولي نتي باردة المشاعر وكتفقدي متعة الحب كتكوني ك الجثة عايشة ومعيشاش وحتى وكتجيبها غير في راسك حيت مني كتبردي كتفقدي طعم تاع سعادة والفرحة كيولي يجيك كلشي ساهل ..ندوزو الفصل الصيف كيكون جو فيه حار وشمس سخونة هذا الحالة بضبط اخيب حالة تجيك حيت قلبك كيكون گايد وذاتك شاعلة لعافية فيها وعقلك سخون بالافكار وكتجيك فكرة الانتقام وهنا مكتبقايش عارفة راحة البال شناهيا حيث كل ما كتزيد الفكرة تجي في بالك بزاف كل ما لحرارة كطلع معاك كثر ووهاد الفصل بذات مكتعرف راسك واش غادي تغلب ولا غادي تخسر فيه ونجيو لاخر واحد وهو الربيع شفتي ل عرف كيفاش يوصل لهاد الفصل غادي يربح بزاف منهم حب جديد وحياة جديدة ومستقبل جديد حيث فصل الربيع معروف بالورد والشجرة كتنبت من جديد وأهم حاجة هي انه مني تنبتي من جديد يرجع ليك مرة اخرى وهنا كتعرفي واش تخاليه يقطفك مرة اخرى ولا تعطيه بشوكك ..وهادي حالتك امريام وانتي ختاري اش بغيتي فصل الصيف ولا فصل الربيع ..
نقدر نكون انا موصلتش للي وصلتي ليه ولكن تيقيني تا انا تعذبت بزااف وكلشي داز على عينيك وداكشي علاش خبرت عليك هادشي كامل حيت مبغيتكش تزيدي تتعذبي لي داز عليا فدوك الاعوام منبغيهمش ليك
مريام نطقات بألم مقاطعة كلامها ~ زيدان دافع على عمتو وانا شكون يدافع عليا ، زيدان حگرني انادية ونمووت ومنساش شنو دار فياا ، قلل مني وضحك علياا وزايدها مصورني "بدات كتضرب على وجهاا ملي كتفكر المنظر تاع تصاور لي شاف باهم "....زيداان دوز عليااا بمووس حااافي ومغنساهاش ليه اختي طول ما عشت
بدات تبكي بحرقة لي سمعها ولا شافها يبكي معاها تبكي وتنخصص والهضرة كيخرجو معاها شهقات ~. حتى حتى لوكان هء هء بابا دار فعمتو داكشي هء هء وانا مالي اختي ماالي هء هء شفتي كون قتلني وملعبش بقلبي ...انا انادية فهاد اللحظة محاسة لا ببرد لا بربيع لا بشتاا حاسة بالعافية هء لعافية شاعلة فداتي نفسي نفسي ولات كتحرقني هء هء
نادية دموعها تاهي دايزين قربت منها شادة ليها فيدها ~. غير قولي ليا شنوو يخليك تبردي وانا معاك فيك
مريام بغل شافت فيها وعينيها حمرين طرطقتهم ~ نشربو من نفس الكاس ....نوريه شكوون انااا ،بغيت نوقف على رجلي ونواجهو ونشوف فعينيه ونتحدااه بغيت لحب لي كان فقلبي ليه يرجع كره
نادية جمعات شعرها ومسحات دموعهم بزوج ~. وانا معاك اختي الا حگرگ انا هناااا صافي سكتي دابا ومسحي دموعك وحيدي عليا من لبكى وتعالي نهضروو في المفيد
من الأول كانو معولين على انتقام واسهل طريق كانت هي جيمس نهار قررات مريام تمشي لفرنسا مشات معاها نادية وعيطات لجيمس وتلاقات معاه بحجة جات زيارة وبغات تشوفو بحكم الخدمة والعلاقة المقربة لي جامعاهم فرح بزاف ومترددش وفرحتو تضاعفات ملي شاف مريام لتاني مرة
"كانو جالسين في ريسطو كيتعشاو عينيه تفيكساو لعند مريام لي كانت مضورة وجها وجالسة فوق قلبها اما نادية بقات غا داوية حتى نطق هو ~. فرحت بزااف ملي عودت شفتك اانسة مرة اخرة
جيمس تكا على الكرسي وتنهد براحة وعينيه كيلمعو بشوفتها ~. وي وبالضبط في اسانسور تاع الشركة لخليفي ، كنتي كتبكي ومقاداش توقفي ونزلت معاك تال بارگينغ ولكن مديتيهاش فيا وبقا فيا الحال
نادية بضحكة ~. ايواا هانتوما تكتاب ليكم تشاوفو مرة اخرة شفتي على صدفة
جيمس بابتسامة ~. واحسن صدفة وقعات معايا "
بدات بعشى وشوية فطور لغدا ومن وراها ولات تحجج نادية حتى بدات تخرج معاه مريام بوحدها ، عجباتو وصارحها في وجهها بلي بغى يتزوج بيها وهي باش تكون واضحة معاه قالت ليه علا علاقتها بزيدان من اول
"مريام خطفت ايدها من بين يديه وقالت ~ وملي وصلني لزواج خاصني نقوليك شي حاجة ؟؟
جيمس هز ليها راسو خايف ترفضو ~ وي انا كنسمع
مريام بصوت خافت ومنزلة راسها الارض ~. انا كنت على علاقة بشريكك زيدان ، مهم دوزنا فترة مع بعضيااتنا فاش كنت خدامة عندو في الشركة ومكملناش
جيمس شابك حجبانو ~. واش كتبغييه
مريام بحدة ~. كنت كنبغييييه ودابا لا ، انا قلت نقولها ليك حيت زمان الصغير منبغيش يجي شي نهار وتقوليا خبيت عليك
جيمس حط ايدو على ظهر ايديها ~. انا مكيهمنيش واش كنتي كتبغيه ولا شنو درتي قبل اهم حاجة عندي هي واش قلبك دابا خاوي
مريام باستهزاء ~ اودي قلبي انا مبقاش خدام
جيمس طب على ايدها ~. غيرجع على يدي ، ايوا شنو قلتي دابا سمعيني جوابك
مريام بلاما تردد ~. قابلة ولكن بشرط
جيمس ~. نتي غير أمري لي بغيتيها تحضر
مريام بشوفات حنان ~. مبغيتوش يعرف بلي تزوجنا خلي حياتنا بعيدة عليه عفااك"
قبل رغبتهاا وبالفعل زيدان عرف شريكو تزوج ولكن معرفش بيمن...زواجهم كان عادي وصحيح زواج على لوراق وزواج في الفراش كان راجلها لي وقف معاها دبصح وخلاها نهار على نهار تحيد من بالها فكرة الانتقاام وتفكر تأسس عائلة معاه وداكشي لي كاان
~~~ رجوع الى الحاضر ~~~
مريام ~ عمري نسمح لراسي اني درتو طريق بلش ننتاقم من شماتة تاع لخلا
نادية صاحت في وجهها ~. وتراجعتي اصحبتي عن قرارك من وراها وعشتي معاه احسن ايامك وحمد لله عندكم ولد معندو علاش يبقى فيك الحال عرفتي امتى تلومي راسك كون مقلتيش ليه على ل كان بين وبين داك زبل
"انا غندوي مع المحامي يبيع هادشي لي هناا حيت ونرجعو للمغرب وفخطرة "
هاكدا كان جوابها وهذا قرارها ولش غتندم عليه من بعد اه لا نعرفو في الاجواء الجاية
داخلة للمطار دافعة لبوسيت بولدها كانت لابسة ومقادة... وجهها مافيهش الماكيااج اما شعرها مطلوق على راحتو ، في جنبهاا نزهة لابسة جلابة مخزانية مع بلغة لايحة شال على راسها وهازة صويكها في ايدهاا......دفعات الباگاج وكملات الاجراءات كانت مرة تضحك مع أرون ومرة تدوي مع مها
عقلها مرفووع باغا تخرج من هنا سالمة غانمة ...باعت گاع لي بقا ليها من راجلها خلات غير برطمة حتى الا كتاب وطلعات تلقى فين تجلس ...سمعات نداء الرحلة قصدو البوابة وهي غادا هزات تليفونها كتعيط لنادية باش تاكد عليها بلي غتركب... هاد الاخيرة لي دوزات معاها ايام قليلة ونزلات للمغرب سابقاهم ،
ساعات قليلة لي باقا ليها وتودع فرنساا البلد لي جات ليه مدمرة على الاخر ...البلد لي تحيات فيه من جديد ولي ضمد جراحها ....ركبو في الطيارة شدو بلايصهم وغير مدة قليلة وقلعاات والوجهة مطار محمد الخامس
نزهة شدات في يديها وقالت ~ أحسن قرار ابنتي هو هادا ، هاديك هي بلادنا وتما كاينين عائلتناا ..سمعات تنهيدة خارجة من عند بنتها وقالت مكملة ....مديري فبالك تا حاجة فكري في ولدك وفراسك فقط نتي قدها ابنتي
مريام هبطات عينيها وشافت في أرون لي نعس باستوو فراسو ونطقت ~. ماما ولدي من ليوم غتولي سميتو كمال ماشي أرون ، انا نازلة على ودو بغيتو يعيش بعاداتنا وتقاليدنا ويتعلم ديننا داكشي علاش خاص نبدلو ليه لاسم
نزهة عجبها لحال~ لي درتيها انا معاك فيهاا .حطات يدها على ظهر لولد وقالت مدلعاه. .ويتي على ولد بنتي كمال صغيير
الله يحفظو ياربي
مريام ~. امين اماما
كانو ساكتين كثر ما دواو طول ...نزهة مزال متعودات تطير فوق السحاب اما مريام كانت اغلب الرحلة كتفكر
وكتاخد قرارات مع راسهاا .....داتها عينيها من كثرة لعيا مفاقت غير على صوت الموضيفة ل كترحب بيهم في الدياار المغربية
مكاين محسن من بلادك وهوا بلادك وناس بلادك وسطها كتحس بالانتماء وبالراحة وبعيد عليها كتحس براسك غريب وبلي كلشي كيشوف فيك ....واخيرا حطو رجليهم في مطار محمد الخامس هاد البلاصة لي مريام نهار ركبات منها كانو عينيها كيبكيو عكس دابا شوفاتهم حاارين ..كان وجهها دابل عكس داابا مورد ..كانت فاشلة اما فهاد اللحظة غير ضرب فيها البرد توگضات ووعات راسهاا
وعرفات بلي يامات لبكة وشمتة ناس فيها مشاات وجا لوقت باش قبل ميبكيها أي حد تبكي موو ...
لقاو في استقبالهم نادية و عايشة لي كانت فرحانة بشوفتهم قدامها حيث تليفون مكان كيبرد جوف ، تعانقو وتباوسو وبكاو بالفرحة قبل ميركبو في الطوموبيل ، كانو غادين مجمعين وكمال صغير مرة فيد عائشة مرة فيد نزهة مكان فاهم والو ، اما مريام راه حالة شرجم وكتشوف شوارع لي توحشات ولي جاوبها تبدلو على هادا شحال ، شوق لي كيبان في عينيها يخلي لي كيشوف فيها يقول بلي قرن وزمارة وهي مفارقة لمغرب ماشي غير عامين
فشركة لخليفي تخل الأسانسور وخرج منو زيدان هاز لافيست ديالو وداخل صاعر ...بدا بسكرتيرتو هي اللولة لي بانت ليه كتدوي في تليفون وتضحك عند بالها مزال مجا محسات غير بخبطات فوق البيرو حتى تهزو الاقلام لي تماا
زيدااان بالغوات ساط فيها ~. مكنخلصكش اناااا هنا باش تقصري ليا فتليفون ، بغيتي تجمعي وتضحكي هزي قجك وخرجي براااااا !!
زيدان شاف في بيروه وقال ~. عيطي ليا لأستاذ أحمد وقوليه كنستناه
- راه جا قبل متدخل بشوية اموسيو ، راه جالس في لبيرو لداخل كيستناك
ضرب فيها وزاد داخل..استاذ احمد هو محامي زيدان الجديد لي كلفو بگاع شغلو من ورا مفسخات معاه نادية العقد ...كان فعمر زيدان ضعيف شوية وشعرو كثيف .دخل لقاه جالس في بلاصة الاجتماعات وحاط قدامو ملفات غارق فيهم ومكاينش هنا محسش امتى وقف عليه زيدان لي قال بلا سلام ~شنو درتي اسي احمد قالها ومشى لبيروه علق لافيست على الكرسي وجلس كيحك على ذقنو بنرفزة
مشى لعندو وجلس قدامو وقال ~. معطانيش محامي موسيو جيمس راس الخيط
زيدان ضرب على لبيرو ~ كيفاش معطاكش راس لخيط ، واش حنا هنا كنبيعو لكبال ، راه شركة هادي وناس دافعين لينا فلوسهم خاصنا نخدمو ، شهر هادي من نهار مات وحنا معطلين يقولينا شكون ناب عليه واشنو قررو ولا نفضيو مو هاد زبل
احمد ~. كلامو قليل ومواضحش وفينما كنعيط مكيجاوبش وفهمتو بلي لوكالة لي كان كاتب ليك سي جيمس انفوا مات تلغات وبلي الخدمة واقفة
زيدان وقف من على الكرسي ~. متعودش ليا انا هاد الهضرة عطيني لمفيد ، عرفتي هاك ...جبد تليفون من جيبو ...
عيط ليه من عندي وأراه ليا ندوي معاه
دوز ليه الاتصال بقى مطول قبل ميجاوب حتى تنفخو عروق زيدان لي كان جالس على لبيرو على اعصابو غير دوا معاه وقال الو وهي ينفاجر عليه ~. هاد شي لي كديرو فيه اموسيو جاك ماشي تاع الناس لبروفيسيونيل ،
خدمتنا واقفة وكلشي واقف ونتا مباغي تفيدنا بوالو
جاك تأسف ليه ~. كنعتاذر اموسيو زيدان بالحق كنت كنقاد شي وراق لمدام لمرحوم حاليا هي وصلات لمغرب وانا غندوي معاها باش تافقو بزوج شنو غيوقع في شراكة لي كانت بينك وبين ..
زيدان بحدة ممخليعش يكمل هضراو ~. فأقرب فرصة معنديش الوقت لي نضيعو
قطع تليفون ولاحو فوق البيرو ، خدا قرعة الما شرب منها على الله يبرد عاد رجع لبلاصتوو يشوف خدمتو
احمد ~. تبغيني نتحرى على مدام جيمس سر وناخد نمرتها باش نتواصل معاها
زيدان بتنبيه ~. لااااا هي تقلب علينا ماشي حناا ، يالله سير شوف شغلك أستاذ واي جديد عيط ليا
ستاذن منو وخرج مخليه زيدان لايح راسو على الكرسي كان مشدود من عنقو وحاس بيه معنز، خدا من لمجر گارو وبريكا لي ولاو صحابو هاد الاعوام وكمى اول كمية ليه هاد صباح يحل بيها عينيه ....زيدان شخصيتو تكفسات على كيف كانت عاد مزاد تعصب ولا خاكرو مضيق كان عند بالو الا وصل لشنو بغى غيبرد وصدق كان لعكس
حلات دار باها ودخلات ، عيات فيها نادية تشري ليها شي دار اخرة وتخلي هاديك ولكن هي كانت مصممة بلي فين تزادت وكبرت وعاشت تا ولات عندها خمسة وعشرين عام غترجع تسكن ، واخا صعيبة عليها وبزااف ولكن هادي كخطوة دارتها باش تتحدى بيها رااسهااا .....طلقات تنهيدة طالعة من القلب وهي داخلة مع الكولوار كانت الدار كتشعل بنقى ومفرشة نادية وعائشة دارو لازم.....طاحو دموع من عينين نزهة ومريام حيت صعيب عليهم يدخلو لدار وميجيش فبالهم كمال ، كل بلاصة فيها كانت كتفكرهم فيه ...فوق طبلة فين كانو كياكلو مجموعين واخا بلا هضرة ، في صالون لي كان بعد المرات كيكون عامر بصحابو وصوت ضحكو خارج منو ، كل قنت كل زاوية كانو كيشوفوه فيها ...مسحات مريام دموعها فور مرمات عينيها لبلاصة لي كانت طايحة فيها اخرة مرة على رجليها وهي كتزاوك فزيداان ...تعاود قدامها لمشهد من جديد ومكرهاتش يرجع بيها لوقت اللور وتدفل عليه
قضبت حجبانها مخنزرة وقالت بشكر ~. عدبناكم اخالتي دار نقية تبارك الله عليكم
عائشة طبطبات على ظهرها ~. حنا عائلة هادشي هو لقليل ، غا نتوما ركبتو راسكم وكان اما جيو جلسو معانا گاع
مريام قالت بكل ثقة ~. وعلاش اخالتي وها الدار غا مسدودة نتوما جيو ونسونا
مريام كتنقب من زيتون ~. امم فكرتيني تانا قالها ليا....جبدات تليفون من جيبها... انا نعيط ليه ، دوزات رقمو من نمرتها المغربية لي خداتها في المطار وغير صونات جاوب ديك ساع ~ موسيو جاك حنا وصلنا
جاك ~. على سلامتكم امدام عاد لقيتيني غنعيط ليك
مريام ~. ياك كلشي هو هاداك
جاك ~. عيط ليا موسيو بلخليفي معصب على هاد تجرجيرة لي جرجرتو وقاليا باش ندوي معاك تديري معاه امتى تلاقاو باينة بلي معاجبوش لحال
مريام عوجبات سيفتها اول مسمعات سميتو خلاتو حتى كمل وقالت ~. يزيد يستنى مسالية ليه ، انا عاد وصلت وخاصني نرتاح بقى ليا غا هو ندير بحسبابو يعجبو الحال ولا يجلس
جاك مكان فاهم والو كيدير
لي كتقول ليه فقط ~. دابا شنو نقول لمحامي ديالو
مريام خشات ايدها فجيبها ونطقت وهي كتلعب فشعرها ~. قوليه مدام جيمس كتعطيك موعد من هنا ليومين مع العشرة غنكون عندهم في شركة
جاك ~. واخا كوني هانية امدام ،دابا نعلمو
مريام قبل ميقطع قالت ~. وكيف تافقنا ميعرفني لا شكون انا لا والو متعطيه تاا معلومة خلي تا نجلسو انا وياه اطابل ونتعارفو مزياان
مريام بابتسامة جانبية ~. ناوية نخدم عياتني جلسة الدار ومكاين ما حسن من شركة لخليفي نكون فيها الراس لكبيرة بعد مكنت متدربة ..ضربتها لكتافها ...ووجدي ليا راسك احبي غتكوني معايا ...
نادية فشلو عليها الايدين جلسات فين كانت جالسة مريام وقالت ~. ياختي جهد الخدمة مبقاش عندي
مريام ميقت فيها وقالت بتشكيك ~. كيفاش الجهد ديال الخدمة مبقاش عندك ولاا خايفة تلاقاي بيه
حسات بالضيم وحكات ليها على الضبرة ملي جبدات ليها سيرتو ، شحال مشافتو ومعرفات خبارو...فينما تجلس بينها وبين راسها دماغها يدور وتبدا تسول ..شنو غيكون كيدير وفين مشى يكون تبدل يكون نساني ولا كرهني ...الجرأة باش تمشي تسول عليه مبقاتش تدور تدور وتصبر راسها بلي مزال على ذمتو واخا بعاد وهي سباب فهاد البعد
~~~
"ليلة عشا ديال كمال بالحاج كانت نادية جالسة مع ناس في صالون حتى تم داخل مراد لابس لكلاس وعينيه كاسيهم الحزن ناضت لعندو قبل ميوصل لعندها ، سبقاتو لجردة وتبعهاا وغير بعدو على الناس غوتات في وجهو
~شنو مزال جاي دير هنا ياك دويت معاك ، لي بيناتنا ساالا وكيف تجمعنا نتفرقو
مراد جمع حواجبو معصب وقوات عليه بلا قياس ~ اخر هضرة عندك ؟؟
خرج هاز فقلبو وخلاها هازة فيه كثر منو ، موقفها كان صعب منو فديك اللحظة ، العائلة واولهم خوتها كلشي طلب منها تطلق منو حيت ببساطة صاحب زيدان وتاهيا كانت مسايراهم فديك الفترة الرأي ولكن نهار على نهار كانت كتراجع على القرار ديالها لدرجة خلات الدعوة معلقة لا هو حضر ولا هي خلعاتو وضطرات تكذب عليهم وتقول بلي طلقاات....وواخا بعدات لمدينة اخرة كانت كل نهار ولي دق في لباب كتقول هو لقاني وجا لعندي ستناتو بزاف وتوحشاتو وكبريائها كان قوى منها مقدراتش تمشي لعندو ولا تسول فيه "
مريام عاقت بيها كتهرب قررات تخليها على خاطرها شحال مسكتات غا يجب نهار تعاود ليها فيه ~. انا جاايا والله ايلا توحشتوو
تحمعو على كاس اتاي ودوازو من فاكية لمسمن كيكة لحلوة خبز دار زيتون زيت مكانوش مقصرين معاهم من جهدهم ، من وراها طلعو رتاحو ، خلاتهم نادية وخرجات تجيب بسطيلة الحوت لي كانت موصية عليها من برا ...رجعو تجمعو على لغدا وبقاو عاطينها من جديد لجموع تال اشمن وقت ، مسخاوش بيهم دوزو معاهم ديك الليل تال صباح عاد تيسرو هما اما مريام فوصات على طوموبيل كراتها وخرجات هي ومهاا وولدها يشريو شنو ناقص في الداار ويدورو شوية وهاكدا دازو دوك اليومين حتى وصل نهار الموعود ، نهار لي غتلاقا بيه بزيدان لخليفي
صبح الصباح فاقت مريام مع تمنية على صوت لعب وضحك تاع كمال صغير كان حداها ، حلات عينيها كتاوب وجات على احسن وجه ممكن تشوفو تحنات لعندو وغرقاتو بوساات وهو كيكركر حداها ~ فقتي اماما اه ، كتبوس فكرشو ..بغيتي تفطري كبيدة دياالي دوي اماما
أرون كيضحك مبين على سنيناتو لي ناضو وبزز كيخرج زوج حروف من فمو ~. ماما ،ما ما
تحل لباب ودخلات عليهم نزهة لي على القرص دايرة بالها مع ولد بنتها كثر من مو قربات منو باست ودوزات عليه طقوسها الصباحية من تشبشيب وتفشاح الخاوي وهزاتو وناضت ~ انا نديه نغسل ونبدل ليه ونفطرو ،لبسي عليك نتي وهبكي عندنا واخا !!
غير تسد الباب رجعات نعسات مفاقت حتال تمنية ونص ....ناضت بشوية عليها تهز ايد وتحط ختها مزاربها حد وعارفة اش كدير تقول متابعها والو ..اول حاجة جبداات حوايجها ومن وراها دخلات لدوش دارت روتينها الصبااحي كيف كل نهار ...لوات عليها بينوار ونشفات شعرها وسرحاتو لبسات دو بياس ونزلات تفطر
نزهة هزات راسها شافت في المگانة وتكلمات ~. قلتي ليا عندك شي اجتماع ابنتي مع العشرة ..راه غيدركك الوقت ونتي مزال هنا
مريام باست أرون من فمو مكرهاتش تاكلو وحلسات حداهم في طبلة ~. باقي الحال اماما ، لوقت لي مشيت
محكراتش عليها خلاتها دير لي يسلكها فطرات مزيان وعقلات عليه عاد طلعات لبيت تكمل شنو بدات... غسلات سنانها هما اللولين وجلسات قدام لمرايا تقاد وجهاا لي ديجا منقي وكيبري وبلا حتى نقطة مكياج كيبان غزال وزادت كملات ليه الباهية ،دارت داكشي خفيف وفنفس الوقت عاطي للعين لبسات شنو حطات فوق سرير وقبل من الوقت بنص ساعة كانت واجدة
بتاسمات برضى وكبرياء راضية على راسها ومظهرهاا ، فستان بسيد الألوان ، شعر مطلوق مغطي نصف ظهرها العاري ، كعب عالي لي زادها ثقة وانوثة ، اقل حاجة ممكن نقولو عليها انهاا خلابة ، عينان عسليتان واسعة ، شعر اشقر طويل ...كانت كتميز باطلالة اروبية بامتياز ناهيك على نظرتها الحادة المتمردة لي عاطياها بريق من نوع خاص ...رشات من عطرها وهزات صاكها ونزلات لتحت كتصور هي وارون الاجتماع كان علاين يبداا وهي ممسوقاش قبل متخرج وصات ماماها كيف ديما عليه
فحين واحد كان على اعصابو وغير تقيسيه يتفرگع ...جالس في مكتب ديالو وقدامو لمحامي مرة مرة يشوف في ساعتو ويخبط على لبيرو شاف تا عيا وناض زااعف كيسب ~. هاد المرض مجاياش رهناتنا هاكداك وخلاتني نأجل اجتماع لي عندي في شركة ...بخشونة شاف في احمد وقال بالغوات...واش هادي عي تسعود ها ؟؟
احمد غير كيضور في عينيه مبغاش ينقل ليك كلام لي قاليه لمحامي حرفيا بلي غتجي مع العشرة نقص من عندو وقال لي بغى خاف منو ليسوط فيه وداكشي نيت لي طاح فيه ~. غير صبر اموسيو مزال تجي ، تكون معرفاتش مقر الشركة ولا طريق عامرة
زيدان هز تليفون عيط لسكرتيرتو ~. جمعي ليا التيم من هنا عشرة دقايق غنبداو اجتماعنا ..رجع حط التليفون وقاليه ~. تضبر لمخاينها خدمتي غنكملها بسميتي تاوكان ترشق ليها وتجي ، خدمة ديال النم بالحق هادو هما لعيالات سوقهم خاوي !!
دوزات طريقها وهي صايگه بكل ثقة ومكتفكر فحتى حاجة بالها مرتاح وفرحانة حيت مبقاش ليها بزاف وتصعد على منصة الانتصار وتتلذذ بنظرات الشفقة والصدمة لي غتشووفها فعينيه ، تسنات هاد النهار بزااف وبغاتو يجي باش تشوف فعينيه وتقول ليه ها انا قدامك وداكشي لي درتي فيا مهزش فيا الشعرة بغاتو يحس بطعم الفشل ملي يشوفها قدامو وتبين ليه بلي الحب لي كانت هازاه من جهتو في قلبها لاحتو كيف دخلاتو ، وبلي ولات حسن ملي كانت معاه وبلي عقلها باقي فبلاصتو والا كانت خسرات باها راه ربحات بلاصتو ولدها ونفسها وكرامتها ...وصلات قدام لخليفي تيم هزات راسها في لبلاكة وضحكات باستهزاء وهي كتفكر اول مرة جات هنا وحطات رجليها وكيف كانت غتموت وتسطاجي وتاخد داك الديبلوم ...براكات الطوموبيل و
نزلات منها دايرة نظاراتها على عينيها ، كتمشى بثقة وشموخ رافعة راسها لفوق حيت فملكهاا ومجايا عند تا واحد دخلات مع الباب بلاما تحاشيها لحد ،غادا نيشان لبيروه عتارضات طريقها ل في استقبال موقفاها بحجة
- الالة فين غادا راه شركة هادي ماشي مول
" بالمهل هزات نظاظر على شعرها وطلعاتها من ساسها لراسها كتشوف فيها بنظراات حادة ، عاضة على فكها من لداخل وكتضحك باستهزاء
_ هو في الصراحة فكرة زوينة ، نقدر نرجع هاد شركة مول ونتي نديرك سيكيريتي في لباب "دفعتها بظهر ايدها معندهاش لوقت ليها " حيدي من قدامي ....خدات اسانسور مخلية سيدة مبلوكية معرفات باش تبلات ولا شكون هاد سيدة ومنين جابت هاد ثقة كاملة...
كملات على طريقها حيت معند حتى واحد الحق يوقف قدامها ....اقل من دقيقة كتفصلها باش تدخل وترمي عليهم القنبلة ، قبل متحل لباب عضات على فمها ودخلات بشمووخ
كانت صلبة ..قوية ...كالجبل ميهزها ريح وهي كتمشى وصوت الكعب العالي كيهز ارضية المكتب كلشي دار يشوف مصدر الصوت ...نظرات اعجاب ونظرات دهشة ونظرات انتصار ، كلهم ترسمو في وجه الحضور اما موسيو لخليفي كان محافظ على نفس جلستو مكلفش راسو يدور ولا يشوف شكوون دخل حدو نطق بالغوااات وكيخط على طبلة
_ منبغيش هاد الباب يتحل من بعد منسدو اناا ، اخر واحد كيدخل هو اناا ولي جا من ورايا يبقى براا
متسوقاتش ليه كأنو مدواش كملات على مسارها قاصدة رأس الطاولة قدامو ، غادية عاطياه بظهرها وكتمايل على لحن انفاسو ودقات قلبو لي كيتصارعو ، عقد حجبانو وحنحن بخشونة باش تعيرو اهتمام عند بالو في الاول بلي موضفة من الشركة لكن حل فمو وشرع عينيه فور متقابلات معاه وحطات صاكها على طبلة بنثرة وشافت فيه بحدة وقالت بصوتها الانثوي لي عيا يقلب عليه
- معاك مدام مريام جيمس ، نجي وقت لي بغيت وندخل ورا من بغيت !! تا حد منكم معندو الحق يعطيني الاوامر ولا يخبط عليا الطوابل ....جرات لكرسي وجلسات برقي وهي كتشوفيه مخرج عينيه فيها وكملات عليه وقالت ~ ومن ليوم هادي هي بلاصتي كيفي كيفك والحق لي عندك عندي اموسيو بلخليفي..كملات كلامها وشابكت ايدها كتشوف فجهة تانية مخالفة ليه حيت كارهة تشوف في كمارتو
يااه شحال توجعات ليل وبكاتو وسهراتو باش توصل لهاد التقكة انها تشوف في عينيه وميضربش قلبها ولا يهزها الحنين وتفشل قدامو وتضعاف ، شحال قاسات على قبل هاد اللحظة لي تشوف فيها فعينيه وتعتابرو كأيها الناس وقل منهم گاع ..تعذبات بزااف ولكن كلشي هان وهي كتشووف الفشل وتانيب الضمير والندم في وجهوو
مكانتش متوقع بتاتا شنو كيشوف قدامو كيفاش لبنت لي خلاها تعلق بيه وتسطى على تراب لي كيمشي عليه توقف قدامو من جديد وتلوح عليه كلام صمكو حس براسو العافية شاعلة فيه سيغتو ملي سمع كلمة مدام جيمس ، الشمتة خس بيها امتى وكيفاش دارو ليها معرفش ...ناض من بلاصتو مزير على يديه وخرج من حدااهم بلا حتى كلمة موقف تال برا الشركة
متسرطش ليه بالمرة هادشي لي وقع طول الوقفة كان كيحلل هضرتها وتعابير وجهها وكيفاش كتدوي ،كمى گارو وزاد خوه ووولد عمو ومبردش في للاخر ساط على حر من جهدو ورجع دخل مباغيش يبين كيفما كان الحل هو سباب فهادشي كامل ، حل باب لبيرو لقاها مجمعة مع موضفين تما وكتضحك ممسوقاش وقف داير ايد في جيبو ولوخرا تحت ذقنو ~. الاجتماع سالا لي عندو شي خدمة يمشي ليهاا !!
دارت رجل على ختها وجلسات تفرج فيه اش كيصنع ...نساحبو الموضفين واحد مور لاخور بقا غير هو وياها والمحامي قبل ميجلس تا المحامي خرجو ~. خرج ااستاذ على برا مباغيكش دابا
احمد جمع وراقيه وحمع معاهم الوقفة ~. انا في مكتب ديالي اموسيو
هز ليه راسو وبقى ساكت خلاه حتى سد لباب عاد تم جاي ليها كيدوي بسخرية ~. من امتى وليتي مدام جيمس ؟؟؟
طلعات فيه ونزلات مخنزرة ~ من زمان يا رحمان عندك شي مشكيل !!
زيدان جر الكرسي جلس حداه كيعض على فكو ~ هادي هي الطريق لي جاتك ساهلة
مريام ناضت شاعلة ~. موسيو لخليفي واش كتعرفني باش تدوي معايا فحياتي الشخصية ،انا بعدا مكنعرفكش !! ونتا ؟؟ ياكما, فايت شايفني ولا دينا وجبنا مع بعضياتنا في الهضرة ولا گاع تشاوفنا من قبل حيت انا معقلتش
هز حاجبو وقال بصوت قوي ~. ايااااااه مقلتي عيييب
ناض بخطوات ثقال مشى لبيروه خدا تليفون وطلب من سكرتيرة تكلم ليه المحامي لي دخل لعندهم ديك ساع ~. سي احمد تافق نتا ومدام جيمس على شنو خاصو يداار باش نفضيو هاد الشراكة
مريام هزات صاكها مقاطعة هضرتو ~. سي احمد الهضرة لي غتقوليا غنعطيك نمرة المحامي ديالي في المغرب قولها ليه ، معنديش الوقت نجلس ونتناقش معاك فيها عندي ميدار وممسالياش واخا ....وغير كون هاني لمبلغ لي بغيتوه انا موجودة نعطيه باش تولي هاد شركة باسم تيم بلحاج
بتاسمت ليه كانها مقالت والو وعطاتهم بظهرها وخرجات كيف دخلات مخلية العافية شاعلة في جوف واحد وراها غا هي سدات الباب نزل على البيرو كلو دگدگو مخلا فيه غير الكرسي ..احمد شاف القضية وطرح سخن خرج بلا حتى كلمة اما البركان الحامي مبردش حل لكرافاط وصدايف القميحة كيطلع النفس ونزلها بوحشية وگارن حجبانو
الحب أقوى من أي إتفاق الجزء الثامن (الفصل الثاني)
محتوى القصة
التنقل بين الأجزاء