هادشي لي دارت ميجيش نقطة في بحر شنو صرف فيها هو ....هو لعب عليها اما هي مطالبة غا بحقها ...خرجاات بالمهل من شركة لي شافيها تخنزر فيه سمعات تليفونها كيصوني جبداتو من صاك كانت نادية لي بقى راسها ضارها وخاصها تعرف شنو وقع معاها جوبات وهي غادا قاصدة الباركينغ ~. ضرك راسك ازين !!
نادية كانت شادة طريق وحداها عايشة ~. بحال داكشي ، شنو درتي، اش وقع !!
مريام حلات طوموبيلتها وطلعات ~. درت لي خاصو يدار ، وقفت عليه بحال قباض رواح گاع لوان دازو في وجهو ...لاحت صاكها لور وقالت بسخرية ...وكيف ديماا لخليفي لواعر لي مكيرضاش ول حاس براسو وديما هازو لفوق متقبلهاش وقال لمحاميه تافق معاها باش ننهيو شراكا
نادية عوجات فمها ~. ايوا وشنو بان ليك نتي !!
مريام كانت كتدوي ومركزة مع طريق ~ كيفاش شنو بان ليا !! زعمة راه هضرنا ، انا معندي غرض بيه غرضي بشركة بغى يفضي مها هاد شراكة يخرج منها ونعوضو ،سي نو معندنا فاش نتفاهمو
وغير شوية دالوقت وكانت قدام دارهم لقديمة لجامعة لكاع الذكريات الزوينين والخايبين ليها مع مراد.... حلات باب طوموبيل ونزلات ومقدراتش تزيد خطوة وحدة حدها ركزات شوفتها قدام باب الدار وسهات فيه وتفكرت نهار كان كيوقف ويوصلها لخدمتها ولا غيرتو على لبسها ملي كتخرج لعندو وكيرجعها تبدلو، كلشي رجع ليها وتفكراتو بحالا وقع غير لبارح ابتاسمت بحسرة على راسها وكون رجع بيها الزمان لور مكانتش غادي تغلط وتخلي راجلها يضيع من بين ايدها وهو معندو ذنب غير مشى في رجلين ..نغزتها مها ل حلات باب دار وجرتها باش تحرك وهي واقفة بحال الجثة كلشي عارف وكلشي حاس بحبها الكبير لمراد ولكن كلشي ساكت وحتى واحد معندو الجرأة يهضر ولا يقول شي كلمة ولا حتى يجبدو معاها الموضوع باش مايجرحوهاش اكثر ...
هزت رجليها بخطوات ثقال وتمت داخلة حتى كيلفت انتباهها بوات ليتغ محلولة وفيها شلا وراق مشات هزتهم كاملين وغادية داخلة وكتقرا فيهم ... شي ديال ضو والما شي ديال ضريبة شي ديال البنكة بقاو زوج في ايدها ما حلاتهم حتى ذخلت لداخل وجلسات على الفوطوي كانت وحدة منهم استدعاء من المحكمة غير حلتها وهي تصدم
ملي قرات "دعوى طلاق من مراد بن زين "
فاش قررات تجي لدار كانت منتاظرة وكلها أمل انفوا توصل يعرفها رجعات ويوقف عليها ويطلبها ويرغبها وتدفع عليه كبير من فوق خاطرها كيف ديما ...حيت هادا هو مراد لي عرفات مراد ل مولفة عليه ديما تابعها وكيجري وراها ....جامي توقعات تلقاه مصيفط ليها استدعاء بطلاق ويقرر ينهي زواجهم لي مزال مبداا
حسات برجليها خواو عليها وهي شادة لورقة فيدها اما قلبها قرب يخرج من بلاصتو ...بقوة الصدمة فقدت كاع حواسها ..ماماها كانت حداها كتدوي معاها مجوبتهاش فداك الوقت كانت في حوار مع نفسها ..
-زعمة باغي يتزوج ولا صافي كلشي سلا ؟؟ واش مبقى والو بيني وبينو هادي هي النهاية ؟؟ مقدرتش تقبل فكرة الطلاق ابدا شدات على سلم تاع الدروج ,بزز باش قدرت تطلع نفسها تخنقت وروحها ضاقت عليها وصلت لبيتها لي كان مهزوز فراشو وغير رمات اولى خطواتها سدت الباب عليها بساروت ولاحت كلشي من ايدها وهبطت على طولتها مع الحيط منهارة ودموعها على حنكها رسمو طريقهم ،حبست شهقاتها بايدها وهي كتنخصص شحال كانت خايفة من هاد النهار يجي وهاهو جا صافي قرر يسالي كلشي حيث مبقاش باغيها, مبقاش باغي يربط اسمو باسمها ،نعست في الارض كتبكي وتشهق مكرهتش تغوت بأعلى صوتها وتقول عيت عيت ومبقيتش قادرة نستحمل و طاقتي سالات مكرهتش تخرج دبا تقلب عليه وتعنقو وتقوليه انا بغيتك احبيبي صافي اجي ونبداو من اللول ...ولكن واش هو مزال باغي ؟؟ ...مدام قرر يطلق الا ان وحدة تانية دخلت بيناتهم وقدرت تنسيه فيها وفي حبها وشحال قدو يستنى فوحدة صداتو ومن ديما حتاقراتو
وهي كتبكي نطقت جملة بمرارة كتعبر داكشي ل في قلبها
~ياه يا مراد شنو هاد الحالة ل وصلنا ليها الله ياخد الحق في ل كان سباب الله ياخد الحق في لكان سباب ..
مسحات دموعها مصبرة راسها براسهاا حيت كلشي منها، هي لي زرعات وجا وقت لحصاد
~~~
جالس في قهيوة قدام لبحر قدامو طبيلة متولة وعليها فطور كيشهي لي مهزش منو دغمة حدو عاصر على قهوة كحلة ...لابس سروال توب بنواغ مع صباط بنواغ وقميجة بيضة محلولين صدايفها الفوقانيين ، شعرو مرجعو اللور بعشوائية ، ساعة فخمة ذهبية فيديه عاطية للعين ،سنسلة النقرة رجالية غليضة مزينة عنقو ومنساوش خاتم كتوسطو حجرة كحلة كان في سبابتو ...رمى عينيه لساعتو بان ليه وصل لحال ، جبد بزطامو حاسب وخرج بحالو ، باقي هو هو مراد طولة وتجريدة وزين ولعينين لفالتين ..ل دازت من حداه يعبرها بعينيها ويطول فيها الشوفة ، وحدة يغمزها ولخرا يسبل ليها وهاهي غادا ..ركب طموبيلتو وشد طريقو للمطار
واقف قدام المطار داير يديه وراه... نضاضرو على عينيه حاجب بيهم الشمس ...كان عاطي لعين البنت لي مشى وجات عليه تحنزز فيه ...دنيا كانت بلان شي كيجري مشات عليه الطيارة و شي حط رحالو في البلاد و معانق مع الحباب ودموع لفرحة هوادة تجري ... مدازش بزاف الوقت وهو كيستنى حتى بانت ليه جايا تزكك بمشيتها وتلاوح بشعرها الطويل لي واصل لخصرها ، بقى شحال حاضيها ومبتاسم وحال ذراعو حتى وصلت حداه و تلاحت عليه بتعنيقة وعينيها لكبار كيبريو بالفرحة ~ مرحبا بيا عندك الحب !! توحشتك بزاااف
مراد شادها من خصرها ومقابل وجهو مع وجها ~ اححح وعلى الحب من فمك مباشرة و شحال توحشتهااا ... شدها من يدها كيضور فيها و عاض على فمو وكيصفر ... اش هادشي اسيدي ربي، دابا خاصني معاك الحجر والمرود و يدي يخدمووو بالكروشيات و لي شاف نتقب لمو عينيه
ضحكات تا تغمضو عينيها و تنهدات براحة ~ ااااه امراد اااه من نهار مشيتي رجعت حسيت بالغربة من جديد وبسانتوريني خوات عليا فمرة
مراد باسها في شعرها ~. عائلتك اناا لي ف مغرب مفاهمين
كانو غادين خارجين معانقين مكاينش لي داز من حداهم و مصلاش على النبي جاو مع بعض هو غزال وهي ربي عطاها من كل شي و مخصصها من حتى حاجة ..
مراد بتريگيل ~ هانتي لي قلت ليك وتقول واش نتمشى معاك بيخير تانتي مالقيتي ما تلبسي احبي راه المغرب هذا ماشي اليونان
.زيرات عليه من خصرو و مكملة على طريقها ~ ...معندي مناش نخاف معايا حبيبي السبع
مراد باس ليها يديها وكمل طريقو حتى وصلو الطموبيل ركبها هي الاولى عاد طلع لبلاصتو وقبل ميديماري دار لعندها وقال~ اش بان ليك نمشيو نتغداو عاد نديك ترتاحي
- شدات ليه في يديه ~والله احبيبي مكرهت نرتاح كليت في الطيارة شوف ليا غير شي اوطيل نمشي ليه نحط راسي
مراد خنزر فيها ~ كيفاش اوطيل داوية بالمعقول ، الالة انا معنديش لمرأة لي تجلس في الأوطيلات نتي غتجلسي معايا في الدار وأصلا مافيا ميبقى بالي مشغول بيك لهما حدايا وقدام عيني
- بدات تضحك ~. دير فيا لي بغيتي ، انا جيت لعندك وعلى قبلك و الوعد لي وعدتك بيه غنوفيه واحد منهم اني نزلت المغرب و الثاني هاحنا خدامين عليه
مراد بسرمحة غوت ~ ... ماي ميمو الحب
قبل سنة في اليونان وبالضبط ف سانتوريني بعد ميأس مراد ميقلب عليها ويستناها ترد عقلها لبلاصتو ، عيى ومل ونفذ صبرو الشيء لي خلاه يلوح كلشي وراه ويمشي سياحة لهاد البلاد سعيدة جلس فيها ما يقارب تلت اشهر تماا تلاقا بأميمة فواحد من لي نايت ..كانت من اصول مغربية وعايشة فليونان ..علاقتهم في الاول كانت سطحية حتى بداو يتلاقاو نهار مور تاني ولقى راسو كيعاود ليها كلشي عليه حتى من نادية والحب لي كيكن ليها في قلبو ولي مقدرش ينسااه .تطورات علاقتهم و صداقتهم وولا كيعتابرها ختو وقفات معاه وقدرات تخرجو من الحالة لي كان فيهاا والاهم انها ضغطات عليه باش ميتخلاش على لي كيبغي بسهوولة وهذا كان احدى الاسباب لي خلاها تجي عندو للمغرب
~~~
وصلو لدار ، خلاها وخرج يجيب لغداا مجات فين تبدل وتقاد حوايجها حتى رجع ..خرجات لعندو ببيجامة بيتية عوناتو تا حطو الغدا فوق الطبلة وجلسو يتفكرو الايام الخوالي ل دوزوها بزوج حتى قادهم لحديث ليها .
أميمة بتساؤل ~. قلتي ليا مخلية داارها كيف غدير تشوفها
مراد دفع كارتونة البيتزا من قدامو وقال وهو داير يديه ورا راسو ~. ليوم رجعات لدارها
أميمة بغمزة ~. هاكدا نبغيك عارف اخبارهاا
مراد بضيق ~. بزز مني ، بغيت ننساها ومقدرتش ..انا عارف بلي تاهيا كتبغيني ومكرهتنيش حيت كون كان العكس كون طلقات مني شحال هادي انا لي عارفها عفريتةة ولكن شي حاجة مانعاها عليا
أميمة هزات حجبانها متاسفة ~. موقفها صعييب ،انا بانليا من هادشي كامل نتوما اكثر زوج متضررين حيت معندكم دخل ، مهم مبدئيا هي الا كتبغيك غدير شي مبادرة على قبلك ملي غتوصلها الورقة
مراد بتحذير ~ خايف غا نتبعك وتركب راسها ودير فيها عزة نفسي ولقاها قدامي في المحكمة تخلعني گاع
أميمة خرجات عينيها ~ لا لا ميمكنش ، انا كنقول لا ، شوف انا وعدتك شفتي غاا نادية غتكون ليك صافي هنينا
مراد جمع الوقفة زاعف كل ما كيفكر فهاد الموضوع ميخسر ليه لمود ~ مهم دار ديالك نعسي ، فيقي نوصي شطحي غا هي تكايسي على سقف لطيحيه على الجيران ، انا خارج
أميمة وقفات معاه متأبطة يدو ~. مغتدينيش معاك الخدمة
خرج وخلاها كتسارا في الدار ودور من قنت لقنت تا عيات ودخلات للبيت لي عطاها تنعس فيه
خاشية وجهها تحت الما كتغسل فيه وتبرد عليها ..خدات فوطة جديدة مسحاتو وخرجات كتجبد حوايجها من لباليزا ..مافيها لي يخرج ولا يتحرك الورقة فشلاتها ولكن متقدرش تقول لمريام لا ..بدلات عليها وغطات ذبولية وجهها بالماكيااج نزلات لتحت لقات مريام شادة لهضرة مع عائشة وكيدويو وغير لاحت عينيها وشافت فيها عرفات عندها شي حاجة
طول طريق خلاتها على خاطرها مبغاتش تجبد الهضرة حتى تقوليها هي ولكن مدواتش حدها دايرة ايدها على الشرجم وسارحة حتى فاض بيها لكاس وفرانات بجهد جنب طريق ~. شحال وانا كنستناك تقولي ليا مالك وتقولي واش نطقتي ، اي حاجة كتكون عندي ولو بسيطة كتلقايني قبل متبرد في خاطري كنقولها ليك ونتي والو
مريام ضربات على الڤولون ~. نتي لي ماالك عينيك منفوخين باكية حتى مقديتي شنو عندك ومخبياه عليا ومبغاش تقوليه
نادية تحكمات في دمعة بزز ~ مكاين والو اصحبتي تحركي حيدي من طريق
مريام بحدة ~. والله منتقلع من هنا تا تقولي ليا اش كاين راه ميمكنش نشوفك بهاد الحالة ومندويش يالله انا كنسمع اش كاين ؟؟
عرفات راسها مغتسلمش منها ومغتفاك معاها حتى تقوليها اش كاين داكشي علاش قررات تعاود ليها من اول للاخير
مريام مخرجة عينيها ~ يعني نتي ومراد مطلقتوش ؟؟
نادية حركات راسها بلاما تشوف فيها وقالت وهي كتبكي ~. لا غير كذبت عليكم
مريام جراتها لعندها معنقاها ~. سمحي ليا اختي كلشي بسبابي انا ..بعدات عليها حاطة يديها على فمها حاسة بلومة...دمرت حياتي وحياة ناس لي معايا ، بسبابي طرا ليكم هادشي
نادية كتمسح فدموعها~ مالك نتي !! واش نتي لي قلتي ليا سيري قولي ليه ديك الهضرة ولا تفرقي عليه
مريام ~. واخا منقولش ليك انا هما غيقولو انا عارفة ماماك متخليكش مزوجة بيه وعارفة لعائلة كيف دايرة
نادية قاطعتها ~. تا انا لقيتها تسلكني كون بغيت نوقف في وجههم نديرها ولكن ركبت راسي وها انا كنخلص ...تنهدات حاسة بقلبها غيطرطق...مقدرتش ننساه امريام ، ممشاش من بالي كنحلم بيه في ليل ونتخايلو بالنهار ، متقبلتش يبغي يتفرق عليها
مريام ~ تلاقاي معاه ودويو كلشي عندو حل ولا انا نعيط ليه
نادية حطات يدها على الشرجم ~. لا واياك تدوي معاه خليه صافي بعد غدا عندنا المحكمة ونشوفو ديك سااع اش غيوقع ...خدات قرعة الما من صاكها شربتهاا وكبات شوية على وجهها ....تحركي من هنا راه واقفين فطريق
خارج يتغدا ويكمل شي شغل مع استاذ احمد حتى دخلو قدامو بلاما يردو ليه لبال الحالة كيف ديما مقادة وروايح تعطعط هي جلست وهو عينو لصقت عندها ....عوج فمو باستهزاء وهو كيشوفيها كتعكر اكره حركة عندو هي هادي وغير شافت فيه عگد حواجبو وطرطق عينيه فيها
مريام خنزرت وهزت نيفها مرجعة شعرها وراها ~ ...هو وباقي كيفما هو تخنزير عاطيه عشرة لضس تقولي مالك الارض
نادية ميقت ~ ...حتى نتي عيشي حياتك وعطيه مشي
مريام هزات حاجبها فيها وقالت ~هي الا طاوعتي قلبك و شفتي مول دقاتو فين كاين
بناسمت ليك وقالت بلباقة ~. هادي نمرتي عيط ليا ونتافقو على وقت مناسبنا بزوج نتلاقاو فيه وندويو
أحمد حط الكارت فيزيت في جيبو وتشكرها ~. شكرا ليك بزااف وبصحة غداكم مسبقا
قالها ومشى وهاد الاخد والرد كان تحت انظار الرجل العصبي
ل مكرهش ينوض يشدها من دراعها يخوي بيها لمدينة ويعرف اش تحت راسها...رجع المحامي لعندو كولو عرقان من القمعة لي خدا يشرب عليها دوا الفار و متسرطش ليييه ...غير جلس في الكرسي نزل عليه بأسئلتو
أحمد كيمسح على وجهو ~معطاتنيش حتى لفرصة نهضر معاها سكتتني قبل منبدا بالحق خديت نمرة استاذة نادية غنتافق انا وياها
زيدان غير سمع كلامو ناض معصب و بلا يشعر قلب طبلة خاوية قدامو ومشا ليها فين جالسة ~....شريفة !! هادشي راه سميتو لعب لبراهش تتسمعي ولا لا... " هز صبعو قدام عينيها كتحذير " ... عرفي راسك اش كديري ولا ميعجبكش لحال
مريام متهزت فيها حتى شعرة ولا تعصبت ،تكات على ضهر الكرسي مربعة يديها و نطقات " ...قلتي اش عندك ياك ، يالاه سير خلص داك الكرسي راه بان ليا تهرس وخليني نتغدا
زيدان بعصبية ~ ... مريااااااام
مريام زفرات باعلى صوت ووقفات لعند وجهو وقالت ضاغطة على سنانها " ...سميتي مدام مريام جيمس حتارم راسك شوية ، انا هنا ماشي خدامة عندك ولا كنقرا باش تهز وتعلي صوتك عليا
جمع قبضة يديه وزير على فكو حتى بانو عروق وجهو وقال بصوت خشن ~. عندك الزهرر جيتيني مراااااا
مريام حطات يديها على جنابها بتحدي كطلع وتنزل فيه ~ اوووه مدييرش ليا دابا فيها مكتقاواش على النساا ...بحدة كثر منو ...حتى منكونوش دافنينو بزوج
نادية هزات صيكانهم ووقفات كتجر في مريام ~. صافي يا لاه نمشيو فحالناا عطا الله لبلايص مكاينش غا هنا !!
بغات تعكس ليها وترفض ولكن نادية كانت مصرة ، دقايق قليلة وكانو في طوموبيل كيسترجعو سينتا مرة يتعصبو مرة يضحكو اماا هو حاسب وخرج بحالو نهارو خسر وراسو ضرو ولكن هادشي مكيجي والو قدام ايامو الجايا لي مافيها غير فريع لمخ
داز داك نهار باش معطى الله ومتفاكاتش مريام حتى تغداو على برا ومن وراها رجعو لدار هاد الاخيرة بعد مجابو في طريقهم عائشة باش تونس نزهة حيت مريام كان في بالها شي حاجة
جالسين في البيت كيدويو ورتناقشو في الخدمة حتى وقفات لايحة المخدة وقالت ~ نوضي نوضي نمشيو نسهرو فشي بلاصة ...عطاتها بظهرها ولاحتها ولي ليها ليها...ولا نمشيو لنايت كلوب عند مراد
مريام قربات حداها محاولة تقنعها ~. سمعيني تخبية معندها باش تفيدك ، وزايدون حنا غادين نسهرو مغادينش نشوفوه كاين فرق
في نفسها كانت باغا وبزاف گاع ،توحشات صوتو زصورتو وتعصيبتو وخفة دمو داكشي علاش وافقات ليها ولكن حتى تبعكات عليها شوية
نادية ~. صافي صافي موافقة ولكن حواجي في ظار لش نلبس
مريام ناضت فرحانة حيت مكرهتش تلاقيهم ويسالي هاد المشكيل لي ماليه معنى ~. حلي ماريو وختاري لي عجبك قدي قدك ولي كتجيني غتجيك
داخلين لبار نادية كانت في ابهى حلة ،ختارت احسن حاجة عند مريام ولبستها اما الماكياج كانت متفننة فيه وركزت فيه بزاف بحال قضية مهمة وخاصها دراسة من كل الجوانب داكشي لدارت درست وجهها وبينت كل بلاصة مزيان عينيها حواجبها شفارها خدودها واخيرا شفايفها لكانو كيلمعو ومنفوخين بشكل اخاد ..شبكت ايدها مع ايد مريام وزيرت عليها كتستمد منها القوة وااعزيمة لمشاو ليها فور مزطمت في البار غير تلحليح مريام وشوقها الغلاب ليه هما لخلاوها تاخد هاد الخطوة ل كانت عندها صعيبة وبزاف حيث نظرة من مراد قادرة تخربق ليها براميتغ ديال حياتها كاملة ..محساتش براسها ولا ناس ولا حتى كيف دخلت .. حيت تفكيرها كان مشغول بملي غتلاقى بيه وبشنو غتكون ردة فعلو كيفاش غادي يتصرف معاها وهي كذلك دقايق دازو عندها بحال الاعوام وهي كتفكر مع راسها ...قدر يلفت انتباهها هي ومريام التغيير لي ولا ف لبار ، ولا كلاص اكثر من قبل وكلشي فيه تبدل وتجدد من أول وجديد ساحة الرقص،الطبالي، الاضائة، الكونطوار
مزيام صفرت باعجاب وتكلمت وهي منباهرة بجمالية المكان.~
واااو هادشي غزاااال والله الا هاد مراد عفريت عندو دوق !!
جوبتها نادية وهي كتشوف في لبار ومعوجة سفتها~ ومالو حتى ميكون عندو الذوق وهو ختارني
.ابتسم عاد نطقت ~ لا لا هادي عندك ابنت خالتي !!
جلسو بزوجات في مكان مخصص لصحاب لڤي ايبي ناس لكلاس وصحاب لحبة....مريام كتشطح وتشالي بايدها اما نادية عينها غير كيدوورو بحال الزوااق كل قنت كتقلب فيه اما ساحة الرقص حفظات دوك لكينقزو فيها ...جاها الاحباط وعرفت مغاديش تشوفو مدة ساعتين وهما گالسين وهو مابان ليه الاثر بقات هكاك حتى فشلت ، عيات معاها مريام تنوض تشطح تبدل الجو شوية مابغاتش ناضت مريام بوحدها وهي بقات جالسة كتشوف حسات بالحزن خيم على ملامحها ، فجأة طفاوو الضواااو وتسمع لغوااات بزاااف شدات على قلبها مخلوعة مزال كدور في راسها وتقلب على مريام حتى تسمع صوت موسيقى مجهدة وشي حد هابط من الفوق
كان شي حد هابط من لفوق
لساحة الرقص وضواو كثار ضاربين كأنو عرض في السينما بقات غير كتشوف ومستغربة من أجواء المكان لكانت كلها حماس وطاقة وغوات وكل واحد اش كيدير لملل مكاينش حسو من غيرها هي مكونة بحال موكة في القنت حسات براسها بحال شي شارفة دات وجابت في ليام
لاحت الجدية وراها وتحررات من كلمة محامية وعاشت معاهم اللحظة ناضت توجهت لساحة الرقص لعند مريام ل جراتها من ايدها وبداو يشطحو كانت اغنية مصرية ونادية كتعرف تتمايل غير مكتبغيش تبين ، طلع ليها الادرينالين وبدات على وحدة ونص اما عرض لكان خدام من شوية كان مراد مع اميمة باغي يفرح بيها ويعيش هو وياها التسطية كان سباب تعرفهم هو الرقص داكشي علاش نزلو بزوج وسط داك لغوات والتصفار وكلشي عاجباه اميمة لداخلة تزكك ليهم بفرمتها المثيرة كانت لبسة كسيوة هابطة تال تحت ومعرية من لفوق ومبينة المفاتن وعازلاهم .. كلشي حال فمو فيها بنات وولاد وعاد شعر لكحل الطويل طالقاه من وراها وزايدها نغزة اما من شافت الاعجاب فعيون الناس تزادو فيها شلا نغزات وولات تقول يا أرضي نهدي معليكي قدي
مريام ونادية كانو خالقين الجو غير بيناتهم كيضحكو سيغتو نادية ل رجعتها هاد الأجواء لأيام الكلية وبالضبط قبل ما تدخل في حالة اكتئاب وتبني شخصيتها الصارمة قبل كانت ضاحكة ناشطة وتلقاها هي لولة وسط لهيلالة ..سالات الأغنية ولموسيقى تبدلت للغربي وهي تبدا اميمة عرضها كلشي حل فمو فيها ومراد غادي معاها في الخط لشافهم يقول مصاحبين وبيناتهم حب كبير غير النظرة لكانو كيشوفو فيها بعضياتهم تخلي بنادم يقول عشق كبير جامعهم ماشي صداقة ،كلشي كان ملهي مع العرض الا لبنات ناشطات بيناتهم حتى سخفو وبداو يخربقو ..وهي تنطق مريام وكتنهج وكتغوت باش تسمعها ~ اف عيت يا ختي جوبتها نادية لكانت كثر منها ~ سوفل والو مبقاش عندي يالاه نريحو .كانو غادين حتى كتلفت انتباه مريام اميمة خصوصا رقصها لي كان خطير .دارت لعند نادية واشارت ليها بيدها وقالت~ شفتي سوفل ولفورمة كيف ديرة اما تلواز داكشي مجهد
مزال مكملتش جملتها حتى كتشوف مراد شابك ايدو مع ايدها وجابها لعندو مكملين شطيحهم والضحكة لمزينة وجهو خلان قلب نادية يتوقف على النبض
شافت مريام نفس المنظر غمضت عينها بآسى ضارت تعتق الموقف لقات بنت خالتها مصدومة وهي تجرها غادية بيها يخرجو احسن ليهم نادية احساس رهيب حساتو ف ديك اللحظة حتى شرحو صعيب يتوصف صدمة مع ألم مع حزن مع أسى مع حصرة مع انهيار يليها انكسار ...كلشي تجمع عليها ، كيفاش تحكمت في الدمعة معرفتش ، تصدمت وسكتت وواخا كتهضر معاها مريام مقدراتش تجاوبها حيت كيف غادي تنطق غادي تفركع قدامها بلبكا .وصلو لطبلة لكانو جالسين فيها هزات صاكها وصاك نادية وتمت غادية ولكن هاد الاخيرة مبغاتش تمشي باغة تجلس وتشوف باغى تعرف نوع العلاقة باغا تعرف اشنو بيناتهم يمكن باغى تلقى اعذار واخا تكون وهمية مهم هو تصبر راسها ومتفقدش جزء من عقلها ل قريب يطير
سالاو شطيحهم وبنادم كيصفق ليهم ونظرات الاعجاب من كل بلاصة مطلعاهم بزوج الا نظرة نادية كان فيها انكسار كبير....عنقها من خصرها وتم جاي هو وياها كيضحكو وناشطين بزوج بيهم .وكيدوي في وذنها باش تسمعو مزيان هو مصندل وهي كثر منو وتلاقاو بزوج
- مراد~ تي اش هادشي !! تبسمت ليه حتى تغمضو عينيها الصغار عاد تكلمت بفرحة ولهفة~ كنموووت على الشطيح وتلووواز احح منقولش ليك ماالك نسيتي ايام سانتوريني
-مراد بطنز ~ اححح اش بغيت ليا كون غير كنت ديال راسي وقلبي موال ديالي منفلتكش وبقاي تلوي ليا فيها حتال لصباح
كيقتلها بضحك خصوصا كلامو لمقزدر لي دات عليه ،زاد عنقها مزيان وخشاها فيه كيتمازحو وغادي قاصد الطبلة لي موجدين ليهم حتى كتبان ليه
نادية اجمل ما شاف قلبو لبنت لي بغى ولي من المستحيل تجي فبلاصتها وحدة اخرا كيفما بغات تكون...لبنت لي جرجراتو ولاها وخلاتو يحفي صباطو بهاد المعنى عليها ..مرتو وحبيبتو ولمرا لي حلم وتمنى يكمل معاها حياتو ومزاال
كانت ساهية قدامها مكتشووفش فيه حس بضو ضربو وبدون شعور حيد ايدو من فوق اميمة ورجليه خداوه لعندها ..
اميمة شافت فين غادي وبانت ليها وعرفتها من تصاورها لكثيرة فتليفونو تنهدات وبتاسمت جنب وهي كتشووف فيهم
كان فداك الوقت وقف عليهم طلع عينيه وشافيها بحب كبير كان موهم راسو أنو عادي واخا يشوفها من بعد هاد المدة غادي يتبدل كلشي بالحق كان غالط بزاف حيت غير وجودها معاه في نفس لبلاصة خربقاتو وخلات قلبو ينقز من بلاصتو وبلما يحس ولا يشعر توجه لعندها باغي غير يشوف لون عينيها ولا يسمع نبرة صوتها لتوحشها ولا تصروفاتها لي مليهمش مثيل
-مراد ونطق وعينيه عندها ~ واحد السلام عليكم
مريام هزت عينها فيه بزربة اما نادية مكانتش قادرة تشوف فيه...
مريام حطاتو تليفونها لي كانت ملهية بيه فوق الطلبة وناضت عنقاتو ~. مراااد لابس عليك هاني !!
مرادعنقها وباس ليها راسها ~ الله يحفظك ليا الخوادرية ونتي بخيير ، والله حتى مزيان ملي شفتك على خير
مرفضش الطلب خصوصا انه باغي يعتذر منها واخا هو مدار والو ولكن بحكم انو بان في صورة خايبة والموقف ل حطو فيه زيدان كان مقود ...
بدا حديثو مع مريام وعينيه عليها واخا عقلو رافض يشوفيها ولكن سلطة القلب كانت أقوى في ديك اللحظة بلما يحس كيلقي راسو سها فيها ومخلي مريام كتعود اما اميمة طارت من بالو ...رغم انو توحشها ولكن مبغاش المبادرة تجي من عندو تبت راسو وشد فيه وخلاها هكاك سطل بلا تقريب
وتاهيا مدواتش وتا شوفة مشافتها فيه سيغتو ملي شافت تجاهلو ليها لحاجة لزادت حرقت روحها اكثر وكثر وخلاتها تختنق نفسها حسات بيها تزيرات ،ناضت من حداهم بزربة خرجت من تم
مراد شابك ايديه وقال برجولية ملاقي حواجبو ~ جاني راسي تعطلت عاد رفعت الدعوة حيت هي لي بغات لفراق ماشي انا
مريام هزات حاجبها ~ حط راسك بلاصتها راه ماشي ساهلة، العائلة كلها كانت ضدها فداك الوقت
مراد بحدة ~ وشكون يحط راسو بلاصتي ، واحد يديرها قد راسو وانا نخلص شنو ذنبي غير حيت كنت صااحبو
بانت ليه مريام قلبات وجهها وهو يشد ايدها وينطق ~. كنقسم برب الكعبة وكون كنت عارف هادشي لي فبالو من اول يا منخليه ولا نخليها مكفية عليك ولكن طلع شماتة وضربت عليه ميعرفني منعرفو
مريام تعجبات لكلامو كانت متلهفة باغا تعرف شنو وقع بيناتهم ولكن مبيناتش ~. شوف امراد علاقتك بزيدان مكتهمنيش قطعها ولا خليها هاداك راه كيبقى صاحبك وخوك
مراد بحرقة ~. كان عند بالي صحابي رجال ماشي شمايت يلعبو ببنات الناس
مريام وقفاتو ~ صافي داكشي فات وانا تجاوزتو
مراد طبطب على ايديها وقال ~ كان احسن اختي ميستاهلكش تستاهلي محسن منو
مريام بحسرة ~. لي نستاهلو مات وخلا ليا ولد
مراد ~ اش كتقولي ؟؟ شكون مات واشمن ولد
مريام تنهدات~. قصة طويلة وخاصني جلسة نيت مهم كخلاصة انا تزوجت وولدت ولد ومات راجلي من مدة قصيرة داكشي علاش رجعت المغرب
مراد تاسف لحالتها بزاف وبقات فيه ~ النصيب هو هادا اختي معندك مديري
مريام مزال مصرة ~. ولكن نتا بإمكانك تدير..!! زادت من نبرة صوتها ونطقات واكلها قلبها عليهم ... امراد نعل شيطان وحاول تصلح لي بيناتكم !!
ماشي ساهلة تبدا تخطط كيفاش تبني مستقبلك و تفكر تدير وليدات و تحلم بماماهم وفي لخر كلشي يتبخر ومايبقي والو ...مقدرتش نصبر جاتني صعيبة بزااف تهديت امريام و سباب بنت خالتك كتقولي لعائلة وقفات ضدها ...هي في الاصل محاربتش على قبلي و موقفتش معايا معطاتنيش فرصة نشرح ليها انا كنت مستعد نشدها من ايدها ونديها حتى لعندو وقدامها نضربو ونقطع علاقتي بيه كيف درت ولكن هي اشنو دارت في اول فرصة طلبت طلاق والواعرة رفعاتو ومن بعد اشنو باعت كلشي وغبرت من المدينة ومراد يعاود ل ...كان غيخسر الهضرة وهو يتراجع .. على اقل كانت تعطينا فرصة ونحطو نقاط على الحروف كنت ديك ساع غنعرف راسي من رجليا
رجع تكا على كاسو سالاه وقال ~ مكنحملش نهضر في هاد الموضوع ولكن مني تجبد دويت ...هز عينو فيها وقال قلبو عالم بيه الله قولي ليها من الاحسن نتفارقو وديك ساعة كل واحد يشد الطريق حيث انا عيت وحاربت ولكن لقيت راسي كنحارب غير بوحدي لهذا من احسن طلاق تشوف حياتها ونشوفها حتى انا
وقفت عليهم أميمة بضحكة مزينة وجهها حطات ايدها على كتف مراد وقالت ~. هلوووو
شد فايدها ووقف شادها من خصرها كيعرفهم على بعضياتهم ~ أميمة هادي مريام صديقة قديمة ، مريام هادي أميمة ممكن تقولي مجموع كلشي فيهاا
تسالمو بالايدين ونظمات ليهم جلسات جنب مراد اما مريام بالها كلو مع نادية هاد الاخيرة كانت على برا كتنفس بالجهد روحها ضاقت عليها والصهدة طلعات معاها ، عينيها عمرو دموع بزز باش حاكماهم معرفاش كيفاش سيطرت على راسها متعنقوش وماوتبوسوش وماتشمش ريحتو معرفاتش كيفاش صبرت روحها عليه، مقدرتش تزيد تجلس حداه وهي بحال لغريبة عليه وناضت اللهم تبعد وتحرقها عافية الحنين ولا تقرب ويقتلها نار تجاهل ،حطات ايدها علي قلبها وكمشتها عليه كتحاول تهدنو ولا تصبرو هاديك هي الوسيلة الوحيدة لقدرت تستعملها فديك اللحظة، بقات شحال كيضرب فيها هوا ليل مخلط مع هوا لبحر حسات بالراحة نسبيا واخا قلبها شاعل ونار الغيرة والشوق والحنين كلهم مجموعين فيه الا انها قدرت تحكم في العاصفة الرعدية القوية لكانت غادي ضرب وتشتت ليها كيانها وعزتها وكبريائها كإمرأة
...
رجعت لعندهم بعد حين واخا ماقدرتش ولكن قوة شخصيتها خلاتها تاخد هاد الخطوة من بعد ما عطات لنفسها وعد انها قادرة توقف قدامو وقادرة تشوف ليه في عينيه ماشي هادشي لغادي يضعفها،العزيمة هي كلشي خدات نفس قوي ورجعت لعندهم بان ليها مزال كالس مع مريام ولكن زاد عليهم الطرف ثالث وقفت وهي مترددة واش تمشي لعندهم ولا لا بالحق سرعان مغيرت رأيها ملي شافت أميمة رمات ايدها على عنق مراد ماشعرتش براسها امتى وقفت عليهم....ملامح وجهها كانو باردين عكس داكشي لفقلب قلبها ولي كان كيتهز ويتخبط بنار الغيرة كانت بحال البركان في الهيجان ديالو مصبرة راسها غير بعزة النفس اما يكون ليها تصرف تاني
وقفت حدا مراد شافت في اميمة شوفات حارين شيء لي خلا هاد الاخيرة تزيد تعنقو وتخشى فيه اما مراد دور ايدو عليها من خصرها تحت انظار نادية ...حركة كانت قوية خلات كيانها يتحطم لأجزاء .مني شافت المنظر بركت على راسها وبزز تكلمت وقدرت تخرج جوج كلمات ،~ سلام عليكم
جوبتها اميمة اما هو ردو كان هو التجاهل
حتى هي بدورها تجاهلاتو وتوجهت بلاصتها جلست مقابلة معاهم دارت رجل على ختها حتى بانو صيگانها ولاحت شعرها اللور حتى بان عنقها وبتاسمت لمريام بمعنى انا بخير.. طول الجلسة كان كتكلم مع مريام واميمة وهي غير ساكتة مرة مرة تنقب من تقاطع كانو محطوطين فوق الطبلة ولا تدندن مع اغاني لي عجبوها حتى بان ليها تلفونها لي كان فوق الطبلة شعل فيه الضو هزاتو وخرجات على برا تشوف شكون ، كان استاذ احمد عيط باش ياخد موعد للقاء .. اخر جملة بيناتهم نطقت بيها نادية ~ واخا غذا نتلقى معاك ونتفاهمو حيت بيناتنا شلا حوايج خاصنا نشرحوهم عاد ديك ساعة ناخدو خطوة مناسبة تكون في صالحنا بزوج اكي غذا ان شاء الله نتشاوفو بسلامة !!
قطعت معاه وجات دايرة وهي تضرب مع صدرو هزات عينيها فيه مخنزرة ودغيا فكات تغوبيشتها ملي شافت وجهو لحمر وزاد كمل عليها بنبرة صوتو لي كانت شاعلة وبلهلا يطريه ليه قال~ معامن كنتي كتهضري ؟؟
الحب أقوى من أي إتفاق الجزء التاسع
محتوى القصة
التنقل بين الأجزاء