الدينيرو الجزء 15

من بعد ما راوغات في الطرقان و الشوارع و تأكدت ما خلات حتى دليل وراها ، خدات طاكسي من جديد مباشرة لشقته .. هبطات كاسكيطتها مزيان و طلعات للطابق المقصود ، تتدق و تتعاود حتى خرج عندها طافج ، صدره عريان غير بسروال السيرڤيط ، مفزوع و مصدوم و نطق بدهشة

الطبيب النفسي : أماااني !!

أماني دفعاته و دخلات ، متوترة متلبكة ، سد الباب و تبعها مستغرب من مجيئها في هاد الليل .

ط.النفسي : أماني صافا ؟ واقعة شي حاجة ؟؟

أماني لاحت المحفظة و حيدات الكاسكيطة و ترمات في حضنه منفجرة بالبكاء ، كاتحس بالضعف وقلة الحيلة ... مشوشة الذهن ، مكتفية بالدموع كدواء للجروح ..

خلاها تبكي على راحتها حتى توقفات من تلقاء راسها و دخلها للصالون جلسها و مشا لبس حوايجه و جاب كأس الماء و رجع لعندها عطاها تشرب و جلس فوق الطبلة مقابل معاها تينتاظرها تتكلم

أماني (تتمسح دموعها و تتهضر بصوت باكي ) : ما تشوفش فيا هكا (زاد تبت فيها الشوفة هبطات عينيها ) صافي رجعت على هضرتك ..

ط. النفسي : ما رجعتي عليها حتى فقدتي الأهلية حتى ما بقاتش كلمتك دايزة و ما بقاش عندك الحق في راسك و في إتخاد قراراتك ..

أماني (تتشوف فيه بترجي ) : و لكن حنا صحاااب ..

ط. النفسي : ولو نكونو أصدقاء هذا ما تيعنيش ندير واجبي كطبيب مع مريضة عندي ...

أماني (بتوسل) : عفاااك آ صماد ، بغيت نبعد عليه بغيت نفسيتي ترتاح بغيت بصح نتعالج منه ..

عبد الصمد (تيتنهد) : شرعا و قانونا هو لي مسؤول عليك ، ما نقدرش نخدم من راسي غير حيت نتي عزيزة عندي و زيادة راجلك ماشي شوية في البلاد بسهولة يوصل ليك و بلاما نهضرو على ولدو لي في كرشك ، ماشي من حقك تعيشيه في الرعب عليه.. يقدر يمرض فيها ..

أماني (بجدية) : أخبار ولدو دائما توصلو و لكن بطريقتي ، ما يعرفش فين أنا

عبد الصمد : و لكن علاااش ؟؟

أماني (عاودات ليه آخر الأحداث بالتفاصيل ): وصلت واحد المرحلة هاد الحب و لا تيضرني ، بدل فيا كلشي ، تنحس بالضعف ، تنحس بالناس تيشفقو عليا .. ماشي هادي هي الحياة لي بغيت ، ما عمر هادشي كان ضمن أحلامي .. تنحس بالضياع ، فقدت ثقتي في راسي و ليت تنشوفو غير هو، هو رقم واحد في حياتي ، حياتي تمركزات عليه ، وليت مصدر إزعاج بالنسبة ليه ، تنحس براسي وليت تنخقو ، تنحس بيه مجبر على العلاقة ، بديت تنقتانع ربما ما تيبغينيش ..

عبد الصمد : غادي نسولك نتي السبب في حادثة إكرام ؟

أماني : (غرغرو عينيها ) علاااش كاملين شاكين فيا ؟

عبد الصمد (بجدية) : حاجة طبيعية نشكو فيك ، الشك ديالنا ما جاش من فراغ ، الشك ديالنا تبنى على گاع داكشي لي درتي ، حاجة طبيعية تكوني في نظرنا أول متهمة .. (حدرات عينيها و هو يتنهد ) شنو في بالك دبا ؟

أماني : ندخل نتعالج في لا كلينيك كيف قلتي ..

عبد الصمد : البيبي غادي يبقى ؟

أماني (زيرات على بطنها ) : وي البيبي غادي يبقى حتى يتزاد و نشوفو على خير يا ربي ..

عبد الصمد : عارفة ما كاينش شي علاج في هاد الحالة ، غادي نعطيوك غير بعض المهدئات الخفيفة لي ما تضرش البيبي و نبعدو على نفسيتك الحاجة لي توترك و تخليك تخرجي على طوعك حتى تولدي .. ما يمكنش ندخل معاك في العلاج النفسي الحاد حيت للأسف حتى النفسية و تفاعلتها عندها تأثير على الجنين ..

أماني (بارتياح) : عاارفة ، أنا موافقة على كلشي ، المهم ما نضرش ولدي و ما نضرش ناس ، (بحزن ) أنا ماشي خايبة أنا أم ..

عبد الصمد : شنو مصير علاقتك مع همام ؟

أماني (تتمسح نيفها و تتهضر ): ما عرفتش ، ما قادرا ناخد حتى قرار حاليا ، تنحس براسي مضغوطة ...

عبد الصمد (جمع الوقفة ) : نعسي نتي دبا في الصالون و رتاحي ، غدا نمشيو المستشفى و نحجز ليك غرفة ..

أماني (شدات ليه في إيديه ) : لا نمشيو دبا قبل ما يبداو تقلاب ويعرفوني عندك

عبد الصمد : بسهولة يعرفوك عندي واش نتي غالطة ؟

أماني (بتوتر) : المهم نتا آخر واحد يقدرو يشكو فيه و حتى الى قلبو في الطريق ما يوصلوش لعندك الا لاجاو عندك شخصيا ، حيت آخر حاجة كانت بيني و بينه ما بغيتش نمشي لوپيطال ، يقدرو يشكو فيك و لكن ماشي دبا يقدر حتى لغدا حتى تهدا الوقت و يرجعو عقولهم ..

عبد الصمد : هاد الشارع و هاد الموبل لي أنا فيه كله كاميرات ما عندكش كيفاش ، غير يرجعو لهاد نهار غادي تباني ليهم

أماني (وقفات) : وي عرفت داكشي علاش غادي تعطيني ورقة باش ندخل لوپيطال و أنا نتسناك تما و نتا تصرف عادي كيف ديما للكابيني للوپيطال و الى سولوك عليا قولهم جات و مشات و ما عرفتي عليا واااو و ما عمرك تهضر عليا في تيليفون ..

عبد الصمد : دونك غادي دخلي أوپيطال بريفي ، الدولة غادي يحققو بزاف في الهوية و ما يشدوكش بزاف الوقت

أماني (مشات هزات المحفظة و عطاتها ليه ) هادو فلوس خليهم عندك خلص بهم مصاريفي و خود حتى نتا خلاصك و نهار نحتاج شي حاجة نعلمك ..

عبد الصمد : غادي تخرجي في هاد الليل ؟

أماني : وي غادي نمشي شي أوطيل ، صباح نمشي ندير فحص للحمل ، ما عمرني درته (تتشوف في بطنها) و نخلي باباه يرتاح عليه من بعد ديركت تلقاني في لوپيطال ..

عبد الصمد تيفكر بعمق ساهي

أماني : عفاااك آ صماد ما تسايرنيش على قد عقلي و تخليني حتى نخرج و طبق معايا إجراءات حالة مرضية ، الله يخليك ما بقاش عندي على من نحط الراس ولا فمن نثيق ، فيا ما يمشي عند آي طبيب مدام فلوسي في جيبي و لكن بغيت طبيب عندو ضمير مهني، بغيت طبيب تيضرب بيه المثل و ناجح عالميا و معترف بيه ، عفاااك ما تخويش بيا نتا آخر واحد متأملة منه يعاملني على أساس أني أماني ، أماني الانسانة الشخصية العاقلة و الواعية ماشي المريضة النفسية لي كولشي فقد فيها الثقة وأي حاجة وقعات راها من نحت راسها المتهم بريئ حتى تثبت ادانته ..

عبد الصمد(بتأسف) : ما عنديش الحق (تيفكر) على الأقل يبقا على علم بولده ، ما شفتيش شنو دار عليه عندي و شنو درجة تعلقه بيه ، ما نداويش حالة و نمرض حالة

أماني (تتحرك راسها بسرعة ) : كون هاني من هاد الناحية ..

كتب ليها ورقة و سلم عليها و غادرت ..

خارج من الدوش لابس سروال سيرفيط و تريكو سخيخن و تينشف شعرو ساهي .. استلقى فوق السرير ، مركز في نقطة وحدة و هي صورة اخته .. طاقته استنزفات من كثرة الإصابات .. مصاب بسهم التفكير ، بالوحدة و بالعديد من خيبات الأمل و و و و كل ما هو سيء.. عقله و أحاسيسه محاصرة فقط بالألم و الخدلان .. بدا تيفقذ قوته رويدا رويدا و عدّاء الرغبة في المقاومة بدا تينخافظ تدريجيا، فقد جميع الإشارات لي ممكن تخليه يغير نظرته على واقعه ..

وسط ضجيج أفكاره سمع الدقان ، عطى أمر بالدخول و قاد مخدته جلس و هو مسرح رجليه و طاويهم وحدة فوق وحدة في السرير و حط مخدة صغيرة فوق حجره ..

همام (تيشوف فيهم و تيتفوه ، دخلو ثلاثة الملتمين مختلفين البنية و لكن لباس موحد ، أسود في أسود من راسهم حتى للرجليهم قبل نطق بتعب ) : جنوني في الهضرة لي تتعاود آ رعدة ..

الرعدة (تيضحك في سره ) : جاتني عيب يطلعو بلاما نونسهم ، ماشي صواب

ما حس غير بالملتم لي في جانبه ، ضربه برجليه ضربة قوية للركبة حتى تطوى طاح على ركابيه و بحركة خفيفة لوا دراعه حتى طاح صدره على الأرض و ركبة مزيراه فوق ظهره و ايديه مهزوزة غادي تقطع من شدة الألم ما قادرش يتحرك غير تينين باش طلقه

همام (ابتاسم بحزن ، تيبقاو هاد الناس هما الناس لي ديما واقفين معاه حتى للآخر نفس ، بدون حساب ) : ها ياسمينتي تقادك ليا ، وليتي شاهمني ..

ياسمينة (حكماه تحتها ) : ما فهمتش هدا آش باقي تيدير عندك هنا !!؟

الرعدة (بمزاح تيغوت ) : لقاتني تنبغيها و تنمووت عليها ، مخليها دير فيا ما بغااات ، على الله تحن ..

ملتم الآخر واقف تابت و في صمت غير تيراقب

همام (حاط اديه فوق المخدة و تيهضر ) : طلق ليا من نسيبي يشكم بيا عند مرتي ..

ياسمينة (طلقات منه تتضحك ) : هههه آش دار المسخووط ؟

الرعدة وقف تيدور في اديه

همام (بمزاح) : مرتي ولات ختووو و أنا وليت غير راااجل ختووو ، طحت مع طبوو... ن مو في كروة ميتة ما عقلش عليا (رجع تيشوف في الملتم الصامت) ما تسلميش علياا !! .. (الرعدة يلاه بغا يهضر و هو يزفر في وجهو) خررج تق٠٠د عليا نتا و الباطرونة هأنا نشوف خدمتها ..

ياسمينة (خارجة هي و الرعدة و تتهضر ) : دوز ليها لونطخوتيان و جوبني ، خدمتها زوينة بزاف و نقية غادي تعجبك ، على حسابي .. (خرجو و سدو الباب )

همام (تيشوف ليها في عينيها و هي تتشوف في نقطة فوق من راسه و مركزة عليها ، نطق بأمر ) : حيدي الماسك !!

الملثمة(هزات عينيها ، ضربات على الكاميرات و نطقات بصوت تابت ) : الكاميرات ؟

همام (ابتاسم ) : بيان ، الماسك ما يتحيدش في أي ظرف كان، في الخدمة راك تتديره تسالي وقت الخدمة تخرجي تعيشي حياتك طبيعية ، ديري لي بغيتي و ما عندك مناش تخافي ، لا عليك لا على عائلتك حيت هنا ما يكون حتى واحد تيعرفك، و لكن دبا حيديه و خليني نشوف مريومتي ما عقلتش عليك مزيااان دغيا كبرتي !! نهار هزيتك كانت عندك عشرة السنين عند بالي راك باقة صغيرة ..

مريم (حيداته مبتاسة ، ظافرة شعرها المصبوغ بالأشقر بإحكام مزيراه ، حتى خصلة ما تتلعب و بدون مكياج و نطقت بتبات ) : أنا ديما عاقلة عليك و ما عمري نسا اليد لي تمدات ليا واحد نهار لي بقيت فيه بوحدي و ما طلقاتش مني و بقات واقفة معايا حتى ليوم .. و مشرف عليا و على بزاف الناس

همام (بادلها الابتسامة ) : كنت باغيك تمشي بعيد في قرايتك ، يكوون احسن ليك من هادشي

مريم (برزانة) : بالعكس كنت نتمنى نوصل لهادشي و نخدم معاك و نعاونك وخ غير شوية ، عطيتنا نختارو لي بغينا و نتا كنتي دائما توقف معانا في آي حاجة بغيناها بلا مقابل و أنا بكامل إرادتي ختاريت هاد المهنة و تنحس براسي تنعطي فيها بزاف

همام (بتساؤل ) : وخ، كولي شنو لاحظتي مني دخلتي للفيلا ؟؟

مريم (بجدية) : مع الدخلة بان ليا حموم لاسق في الحيط ديال البرومي إيطاج يعني شعلات عندكم العافية غير مؤخرا ، فاش دخلت بان ليا شي واحد كان ناعس في صالون غير هاد العشية ، ما يمكنش فيلا قد السخط و بأتاتها و ديكوراتها و ما يترتبش صالون ، في الأرض حدا الصالون كاينن طباعي رجلين مجرورين ، شي دفة و لا شي زلگة ، الأرضية كلها تتبري كاين غير هاد الطباعي يعيني غير هاد العشية كانو جوج الناس في الڤيلا و

همام (قاطعها بنفس نبرتها ) : مزيااان ، أجي دبا ريحي حدايا و عطيني ودينيك ..

مريم (حيدات صباطها و جلسات حداه مربعة رجليها عندها و نطقت بتساؤل ) : عندي الحق نسول ؟؟

همام (بمزاح ) : نوغمالمون تنعطي غير سؤال واحد و لكن نتي ليوم خودي راحتك ، شبعي ليا دماغك و ما تخليهش مبرزط و خويه ليا حيت محتاجو ..

مريم (بتبات) : واش ما تتشوفنيش صغيرة ، واش تتشوف فيا قادرة على المسؤولية ؟

همام (مركز فيها الشوفة و تيهضر بنبرة هادئة) : داكشي لي عشتي مني تزاديتي حتى كملتي عشرة السنين كافي يبني شخصيتك الناضجة و عاد كملتي في المدرسة لي حطيتك فيها و مع ياسمينة هادشي كامل كفاني ناخد عليك فكرة، أنا فاش گلت صغيرة ما قصدتش عقلك حيت و نتي صغيرة كبراتك الوقت ، قصدت بيها باقي ما خديتش الصحة ديال شي وحدة كبيرة عند بالي باقي ديك البنت الصغيرة و كلشي فيها صغير ..

مريم (بتفهم ) : قالت ليا الباطرونة نتا ما تتآمنش بالعنصر النسوي في الفريق ديالك و معاك غير بنت وحدة و حيت تتعرفها و مدوزة معااك بزااف داكشي علاااش !! و حنا تتدربنا غير للمساعدات و التفتيش العام .. علاش ليوم نتا بغيتي ندخل معاك نخدم معاك نتا شخصيا ..

همام (تيضحك) : ههه مزال نتحاسبو آ ياسمينتي !! (رجع متبت معاها ) ماشي ما تنآمش ، خدمتي مريضة ، أعصاب الدنيا ، يقدر ليوم حي غدا مقتوول ، تنشوفها خدمة ماشي ديال البناات ، البنات ما تخلقوش للهاد ويل الكحل (يتأسف) و لكن مرتي حناتة ، أنا نحلف و هي تضرب في حلوووفي و خلاتني نحتاااج بنت تخدم معايا و ماشي آي بنت ، مريوومة أصغر بنية عندي ..

مريم (ابتاسمت ) : جامي نسا فاش ما بغيتش نمشي معاك و بديتي ترطب معايا بمريوومة ..

همام (ضحك ليها ) : و مع نتي كنتي تتعرفي للرطوبية ، كلتي ليا سير گولها للقطوط دياولك ما دوخش عليا على بهاد الهضرة ههه

مريم (تنهدت) : العقل لي ما كانش .. عرفتي آ همام خيرك مغطيني من ساسي حتى للراسي ، الله يقدرني نعاونك .. غير قول ليا شنو ممكن ندير و فاش محتاجني

همام (بجدية ) : محتاج عقل خاوي يفكر غير فهادشي لي نعطيه و يحلل و يخدم عليه، محتاج عقل امراة تفكيرها يكون قريب للتفكير مرتي .. حيت مرتي دبا ما عندها والو من غير الفلوس ، و حتى نتي ما غادي نعطيك والو من غير الفلوس باش تقلبي عليها ، غادي تهبطي عند الرعدة غادي يعطيك آي معلومة تحتاجي تعرفيها ، خدمي بالليل بالنهار لي بغيتي نتي حرة كلشي ديالك، غادي نوقف الدراري دياولي كاملين على التقالب ، غير تنخربقووو ، غادي تبقاي غير نتي وياها هي مخبية و نتي تتقلبي عليها .. مفهوووم ؟؟

مريم (تتلبس الماسك ديالها ) : مفهووم ..

همام (جمع الوقفة ) : نعول عليك ، مرتي حاملة ، و بالي كلو معاها ، يكفيني تجيبي ليا خبارها ..

مريم (بتبات ) : كون هااني ، الله يتبت حملها و يفرحكم بيه ..

همام (حط اديه على كتفها و نطق) : غادي تاخدي ليوم السلااا٠٠ح ديالك ، نتمنى تكوني قدو ..

مريم (طبطات على ايديه) : غير ارتاح نتا دبا ، ما تشوفني حتى نجيب ليك خبار تفرح ..

خرجات و سدات الباب و هو رجع للسرير تيحاول يستسلم للنوم ، تيهيئ في نفسه لي جاي

◾️◾️◾️◾️◾️◾️◾️◾️

تتفحص هاتفها بعدم تصديق ، فعلا هو و جميع الصفحات تيهضرو عليه و على قبلته الفرنسية ، طاح هاتفها من إيديها و هي تترعد ، عينيها مزرقة، بحر الدقة بسرعة تنفخات ، حتى الدموع رجعو تيحرقوها ، تتحس بالضعف ، بالانكسار ، بالاختناق ، بالضياع .. و من أوسخ الأحاسيس لي تتحس بيه هو الشفقة على حالها ..

لبسات مونطوها و بانطوفتها و خرجات طويلة وسط عتمة الليل ، البكاء هو ريفقها الحالي و المعبر الوحيد على مشاعرها .. الحزن و الحيرة و عدم التصديق أنها فعلا خرجات على حياتها بهاد القرار و رجعات على هضرة الأم الغالية، فضلات سخط مها على قبل رجل ما قدرش يهز زلة لسانها و يعذرها ، فضلات تعاكس لي هزاتها سنين بحب و وديه و كانت ديما تتعطيها من كلشي بدون ملل على قبل رااجل هانها أمام الملأ ..

فين تمشي دبا !! لمن تعطي الرااس !! ترجع عند رااجل ضربها و خانها في أول مشكل ، ترجع و تحني الراس و ترضى بأمر الواقع و تحمل نتيجة قراراتها ، ترضى بهاد العيشة للراسها .. ما حسات براسها غير موقفة طاكسي و عطاته عنوان أمها ، أملها الوحيد من بعد الله ..

مدة ديال الطريق ما حساتش بيها ، مرفوعة حتى لقات راسها أمام العمارة ، شافت في السائق و تتهضر بصوت باكي ، بطفولي ، ظاهر على ملامحها صغر سنها

ريم : عفااك آ سيدي تسناني هنا أنا نهبط ليك الفلوس ..

السائق (شفق على وضعها ) : وخ آ بنتي أنا نستناك

هبطات و لكن في الباب منعها حارس العمارة من الدخول ..

ريم (تتبكي و عينيها مسدودين ، حالة مزرية) : اهئ اهئ عفاك خليني نطلع عند ماما ، لاش تتحبس فيا ؟؟

حارس : الله يهديك آ بنتي ، لالة سميرة قالت لينا ديك البنت و راجلها ما يدخلوش عليا ..؟

ريم (بقلب متحطم) : ماما غير تتهضر إلى قلتي ليها بنتك ريم جات للعندك و في هاد الليل تهبط تجري عندي اهئ اهئ

حارس ما لقاش شي حل غير أنه يصوني عليها في الهاتف الداخلي للبوابة

سميرة(ناضت مفزوعة جوبت) : شكووون ؟؟

حارس : لالة سميرة سمحي ليا فيقتك ، هادي ريم ابنتك بغاات تطلع عندك

ريم (بترجي بنبرة ضعيفة مرهقة ) : ماااماااا

سميرة (بلعات ريقها و هضرت بتبات ) : ما عندي بنات أنا آ سي حميد ، عندي ولد واحد رااه في الغربة ، آخر مرة تفيقني في هاد الليل

حطات الهاتف و تقطع الاتصال و كل كلمة سمعات على ودنيها تغرسات بعنف٠٠ بألم في قلبها ..

الحارس بعدها على العمارة و هي مخطوفة ، فيقها غير كلاكسون السائق تتشهق .. مشات للعنده بدون تفكير و حيدات خاتمها من صبعها و عطاته ليه

ريم (بوجع و نبرة خافتة تترعد ) : خود آ سيدي هدا ، سمح ليا ما عنديش منين نخلصك

السائق( تنهد) : لا حول و لا قوة إلا بالله ، الله يسامح آ بنتي خلي خاتمك عندك

كسيرا و خلاها جامدة في مكانها لا حول و لا قوة لها

تضحيات الأم لا تحصى ، لا تنتظر المقابل ، لا تتدمر من عطائها لأبنائها .. بمجرد ما حطات السماعة حسات بغصة قوية في قلبها من جيهة ابنتها ، ما قدراتش تتخلى على كبدتها ، ما لقات راسها غير لابسة جلابيتها و هابطة عندها .. ممكن البنت تخطئ ، تعصى ، تخالف ، تتمرد على واليديها و و و .. ولكن تتبقى الأم تمارس طبيعتها في الأمومة تعفو و تسامح و تصحح و تتغافل و تشري راحة قلب روحها ..

تتهبط ما تتلقاهاش ، تتسول بخوف في حارس الباب ، قلبها تيخفق ، ما كاملاش جوج دقايق باش ناداتها و لبات ندائها ..

سميرة : فين مشااات البنت !! الله يا ربي الله

حارس الباب : دازت من هنا آ لالة سميرة .. غير دبا ..

سميرة(مشات تتجري ، دارت من جميع الجوانب ، لا حس و لا أثر ، رجعات تتحس بقلبها فيه السخفة و تتهضر مع الحارس ) : تقول الأرض بلعاتها .. يعلم الله بحالها !!

ح. الباب : كان وجهها كامل عامر ضرابي و غير تتبكي ..

سميرة فجأة تخيلات صوت في وذنيها ، صراخ بنتها القوي و في عينيها كتخيل غير منظرها و هي تتضرب بعنف٠٠ف بدون رحمة و دمها سايل ، ما قدراتش تتمالك نفسها و نزلات بضربات قويين على جنابها و تتهضر بهستيرية

_لهلا توريني باااس في بنتي حبيبتي يا ربي ، راك عااالم يا ربي ما نقدر نشوف الضر في وحيدتي .. (خواو بيها رجليها و طاحت في الأرض ) الله ياخد الحق في لي كان سباااب ..

حارس الباب (تينوض فيها ) : نعلي الشيطان آ لالة سميرة .. عيطي ليها و شوفيها فين مشات ..

سميرة (وقفات بالسيف و طلعات تتعتر في جلايلها ، ما عرفاتش اشمن قوة وصلاتها للدارها ، هزات هاتفها تترعد و دوزات الخط ، تتنتاظر الاجابة ، تتاصل و تعاود ختى تفتح الخط مطقات مباشرة) : 📞 ريم بنتي !!

أمجد (فاق من غرق نعاس ، كيف وصل للڤيلا تلاح نعس ، فيقاته غير رنة الهاتف المتكررة ، بصوت تقيل و بتساؤل ) : 📞 لالة سميرة ؟؟

سميرة (الخوف و الأعصاب ) : فييين بنتي آ الحيوااان !! تضرب في بنت صغيرة يا قليل ترابي (بصوت عالي) ، فيييين بنتي ؟؟؟

أمجد (جمع الوفقة عريااان ، تيقلب في الأنحاء بعينيه و تيحاول يستوعب شنو داير بيه ، تصعق و هو تيشوف في روداينا تتلبس في حوايجها مبتاسمة و تتهضر بصوت عالي ) : ما كايناااش بنتك آ خالتي ..

سميرة (بغيض ) : عيييفة الرجاااال آ المووسخ ..

قطعات هزات بزطامها و خرجات ، رجليها و فين داوها و تتدعي في خاطرها بالخير ..

بمجرد ما قطعات أمجد نزل الهاتف يتأكد من أن الخط تقطع حتى ارتجف جسده من داكشي لي شاف في الصفحة لي طلعات في شاشة هاتفها ، كانت آخر حاجة شافت ، تيقرا و تيشوف في صدمة ، تغلغل بالحزن و الندم الشديد و هو هز عينيه فيها مبتاسمة بمكر ، منبع حركاتها المنحطة لي تتدير أمامه ، هبط تيلبس في حوايجه المرمين في الأرض و زفر بصوت مرتافع و في قوته دبحة حلق ..

أمجد : تهززززي تقووو٠دي يا بنت الق77بة ، حساااابي مع zaaaa ٠٠امل بووك هو التااالي ..

يلاه بغااات تنطق و هو يشدها من دراعها ب٠٠عنف٠ف ، و جرها بقووة ، و هي تتتغوت

روداينا (تتجر ذراعها ) : هبلتيييي و لاااا مااالك ؟؟ طللق سحابك كاينة سيييبا في البلااااد ..

أمجد (صرخ بأعلى صوت ، حتى حست باهتزاز جدران المنزل ) : برب العااالي لا بقاااات عندي و جدي kaaa ٠ررك البزييييم ..

أمجد حل الباااب و جرها حتى الباب رئيسي للحديقة و دفعاها جات طايحة على ركابيها

ردخ الباب و طلع تيجري تيقلب على تليفونه، كلشي مرون ، كلشي مزلع أمام أنظاره و ما قدرش يلقاه ، فقد تركيزه تماما .. شد في راسه تيرجف و يتنهد حتى لقاه وبسرعة دوز الخط ..

غير سمع ألو بسرعة نطق

أمجد : 📞خووويا حسااام ، عتق الق77بة ديال بنت المالكي ضربااات بيا طرر في الرتييلة ...

حسام (ناض قافز من سريره ، نهاره كامل بين العزاية ، زفر بأعصاب ) : عاااودها لkaaررك دبا آ المردااا

قطع الخط في وجهه و كمل لباس حوايجه و خرج ..

"بعد أسبوع"

داخل للداره يرتاح بعد تعب العمل .. من الباب تيغوت بأعلى صوت

حسام : كااااين شي حد هناااا ؟؟

الخادمة (خرجات من المطبخ تتجري ) : سي حسام لباس ؟ بغيتي شي حاجة ؟

حسام (تيحيد حوايجه و تيهضر ) : تبعيني ديري ليا شي مسااااج ديال المحترفييين ، سي كاميها مسخسخ ديال بصح ..

الخادمة (بامتناع) : لا سي حسام ، لالة وهيبة ما تبغيش ، قالت ليا ما نبقاش ندخل عندك لا شوومپغ ..

حسام (شدها من قرفادتها ): شكوون رااجل في الداااار أنا ولا لالاك بعرررة !!

الخادمة (تتجر) : الله يهديك آ سي حسام ، نتفداو المشاكيل ، عاد بدات تقاد الأمور عندكم ..

حسام (طلق منها تيهضر معصب ) : عارفة نهار كامل و أنا محني على بيسي ، العصب ديال عنقي تطوى ، فين هي هاد لالاك وهيبة ما تجي حتى يتقطع فيا ..

الخادمة : المهم أنا غير نفد الهضرة لي تقالت ..

حسام (هز فيها حواجبو ) : يااك !! إيوا الى ما طلعتيش من هنا 15 دقيقة بينما دوشت غادي نصيفطك فحالك ..

الخادمة (بنية) : لا سي حسام لي بغيتي نديروووه

حسام ابتاسم بمكر و طلع خدا دوش و لبس حوايجو تيعط عليها بأعلى صوت حتى طلعات تتجري للعنده غير حس بيها تلااح فوق السرير على بطنه عاري من الجزء العلوي و لابس سروال سيرفيط ..

الخادمة(دخلات) : باش نديرو ليك !

حسام (ناعس) : شوفي شي حاجة عند وهيبة !

الخادمة : لا ما تبغيش ..

حسام (بعصبية) : واش تجهليني ، سربي باغي نعس ..

خدات أول كريمة طاحت عليها و حطاتها في اديها و هبطات تتماسي ليه جنب عنقه و تتدلك بعناية و هو تيتآوه ، تيحس بألم خفيف في مكان تشنج العصب..

حسام : اممم وركي شوية (متبعاااه ) آه ه ه تما تما ، العززز ...

الخادمة (بتساؤل ) : تزيدني شوية الفلوس على قبل المساج ؟

حسام (بدا تيحس نوعا ما بالارتياح ) : تستاهلي ، كلشي ديالك .. بااازي على ديك البلاصة فين حاطة صبعك الكبيييير .. واااااااااه تماااا ..

الخادمة : ما تشوفش ليا شي صاحبك باغي يتزوج آ سي حساام ؟؟

حسام (ببرود) : بربي لا عطيتك لشي قوو٠٠ااد ، مالكي شايطة عليا ..

الخادمة (زادت وركات عليه ) : بغيت نشوف ولادي آ سي حسام !!

حسام (بمزاح) : شهوتك في الولاد أنا نعطيهم ليك ، فينما تبغي تولدي جي للعندي

ما جات في تجوب حتى حسو بصوت قرطاسة دازت من حداهم شتات الفيوزة ، ناضو بجوج قافزين تيشوفو في جنابهم ما فاهمين والو ..

حسام (رجع الخدامة ورا ظهر و تيهضر بتبات) : هبل عندك الضمير آ وهيبة !! القرطاااس في الداار !!

وهيبة (رجعات السلاااح ورا ظهرها و نطقت بهدوء ) : أنا شنو گلت ؟.

خادمة (بخوف) : سي حسام قال ليا نصيفطك فحالك الى ما درتيش ليا مساج ..

وهيبة (ببرود) : نخرج من الدوش ما نلقاكش باقة تتدوري عندي في الدار ما نشوفش وجهك مزاال !!

حسام (عقد حواجبه ) : آش تتخوري منال ما تخرجش من الدااار !!

وهيبة (ربعات ايديها تتشوف فيه ) : هي أنا لي نخرج ؟

حسام (بجدية) : مالكي على هاد الحالة ! فحالا ما تتعرفيش البنت من زمان ..

وهيبة (بسخرية) : وي تنعرفهااا مزياان ، كلشي نتا درتييه معاها بقا غااااا ..

حسام (بعصبية) : تخصري الهضرة نقووو٠٠د معاااك السوايع

منال (تملكها الخوف و نطقت بتساؤل ) : بقى غاااا شنو ؟؟

وهيبة (ابتاسمت ) : غااا يحو٠يك

حسام ضرب الكوافوز برجليه ما زادش الهضرة و لبس قبيته مباشرة على اللحم و جر منال من ايديها مصدومة ما متيقاش الكلمة لي سمعات ، غرقات في حوايجها و تزنگات من شدة الخجل و دموعها على وشك الهبوط ..

دخلها للبيتها تيبرد روحه بالسيف و نطق بأمر

حسام : جمعي حوايجك ..

منال (نزلات دموعها ) : صافي تصيفطوني !! ما درت واالو أنا !! خليوني معااكم غير حتى نضبر على شي رااجل آ سي حساام

حسام (تيبرد ) : غنعااود جدها في تراابي ، صبري عليا .. أنا نسخن طموبيل طلقي راااسك ..

خرج للسيارته و دوز مكالمة مدة قليلة تفتح الخط ..

همام 📞: آش كاين آ كاميها ؟

حسام 📞: البنت لي تتعاونا في الدار ، تخدم عندك شي يامات ؟

همام (تيحيد حوايجه التعب نال منه ) 📞: اش وقع؟

حسام 📞: المراة عندي ٠ze٠مل عليها الضمير ..

همام 📞: هبطها عند الرعدة يشوف ليها شي بلاصة تشدها ..

حسام 📞: العزز راه عندي عزيزة..

همام 📞: صافي غير الدعوة ، مرتك هي اللولة..

حسام 📞: يحفظك نتشاوفو ..

همام (قطع و هو يسمع الدقان في غرفته ، نطق بصوت عالي ) : دخل (وسع عينيه بتفاؤل في الملتم لي فتح الباب و مطق مباشرة ) هي شي خبااار تفرح ؟

مريم (بصوت ثابت) : خبار تفرح و تريح قلبك المشطون عليهم

عطاته علبة متوسطة الحجم كانت في إيديها .. شدها من عندها مباشرة حلها ، لقا هاتف ذكي و ملف كرطوني صغير أبيض و مكتوب عليه (coucou papa homamouu) ، لحمه تبورش و قلبه رجع تيخفق بسرعة ، جلس فوق السرير ما قدرش يوقف مزال، إحساس غريب و جميل انتابه.. الفرحة و الحماس غمرو قلبه مجموعة من الاحاسيس المختلفة .. حل الملف لقا صور إيكوگرافية للجنين ، ابتاسم وهو تيشوف ابنه ، شكله فحال شي موزة صغيرة و هي في الأصل عظمة العمود الفقري و في كل صورة مكتوب من تحتها تعليق ..

‏_papa عندي سبعة أسابيع و أربعة أيام

‏_papa أنا مزال صغير عندي غير رأس و كرش و ديل

‏_papa قالت لي مامي ماشي مشكل الأسبوع تمنية يخرجو إيدي و رجلي و يبانو مزيان و نقدر نسمع

‏_papa يمكن أنا بنوتة ، شوف هاد الصورة شكات فيها مامي و مون دوكتوغ ، مازال ما بانش پيپي ديالي و لكن شافو الرحم ديالي بدا تيتكون

‏_papa إلى كنت بنت تسميني على ميمة الله يرحمها حيت مامي قالت ليا نتا تتبغي ميما بزااف قالها ليها عزيزي الرعدة

‏_papa ما ضحكش عليا أنا عاد فيا ثلاثة سونتيم و ربعة گرااام هههه

‏_papa ما تخافش عليا أنا بخير ، تلقى كلشي في تقرير ، جوتيم بوكو papa ، تفرج في أول فيديو ديالي بيزووو

أجمل إحساس توصل لشي حاجة نتا مستنيها ومتمنيها من زمان ، قلبه تيبكي ، آه تيبكي من شدة السعادة ، تيبكي من الفرح اللامنتهي لي ملئ كيانه... قشعريرة رهيبة سرات مع ذاته ، احساس فاق الحب ..

كأنه فعلا هضر مع بنته و سمع صوتها و حس بيها و تعلق بروحها وخ هي بعيدة عليه ، مصدق أن الخطاب المكتوب هي لي كتباته و مصدق أنها هي بنفسها لي تتطمأنو وتريح بالو..

حل التيليفون تيتفرج من أول لحظة تتطلع في تيشورط ديالها فوق سرير الفحص و تتكشف على بطنها متبتة الكاميرة ، مرة في الشاشة و مرة على بطنها و الطبيب حاط الجهاز على أسفل بطنها و تيتحرك مع المادة اللزجة بسهولة و تيتسمع صوتها و صوت الطبيب تيتناقشو و من صوتها ظاهرة عليها الفرحة...

أماني (تتضحك) : شوف القلب قريب يكمل النمو دياله ههه (بأمر) طلع شوية (بلهفة) حتى الفم هههه

الطبيب : رحم عندك صغير ، خمسة سونتيم آ صاحبتي ..

أماني (مركزة مع الشاشة) : الفتيح ينادي !

الطبيب : على حسب و صافي

أماني (بلهفة) : زيد في صوت نسمعو صوت قلبها ..

(الطبيب لبا رغبتها و تنهدت مطمأنة ) كلشي مزيان الحمد لله

الطبيب: تهلاي في راسك ، ماكلة صحية و بعدي على ستريس ونوصيك الراحة ثم الراحة ..

بغى يحيد الجهاز و هي تشدو باليد لي ما هزاش بيها الهاتف و تتضحك

أماني : ما سخيتش بيها خلي شوية ..

حتى هو مركز مع شاشة الهاتف حتى تقطع الڤيديو و تقطعات معاه أنفاسه

في هذه اللحظات تمنى لو أنها كانت بجنبه بحال أي ثنائي طبيعي تمنى يحضن بطنها و يتفاعل مع بنته و يسمعها صوته ، تمنى يحسسها بدفئه كأب ، يفيق الصباح و هو أول واحد يقول ليها صباح النور تمنى يستمتع معاها بشهور الحمل ويعيش معاها المرحلة لحظة بلحظة ويشهد على جميع التغيرات لي غادي تطرأ على الجسد ديالها ويشوف داك المخلوق الصغير وهو تايكبر داخل أحشائها.. يأس وتعب من جراء هاد البعد ، أسبوع مر عليه كشهور و ليالي .. بسرعة تغيرات ملامحه ، عقد حواجبه و الغضب تملكه .. رجع كلشي العلبة و غلقها و وقف و ذاته كلها تترعد...

مريم (بلعات ريقها ، تتحاول تحافظ على صلابتها ) : علااااش تقلقتي ؟

همام (بأمر و بحدة ) : أجي نگوول ليك علااااش ..

بمجرد ما رمات الخطوة و قربات لعنده ، نزل عليها بقبضة يده القوية للوجه جابها طايحة للأرض مسرحة ، زعزع ملامحها و زفر بصوت قوي

همام : مررررتي آ ال...قلاا٠٠وي ما يقلبهااااش طبيب !! ما يحطش عليها ايديه .. لا هي لا بنتي (بصوت عالي ) فهمتي ؟؟؟

مريم تتحس بالفك تهرس حتى باش تجوب ما قدراتش جمعات الوقفة حادرة الراس

همام (بتساؤل) : خرج شنو عندك نشوووفو بلاااان هادشي منين جااا و فين يوصلنا؟؟ (حاول يتهدن و نطق بصوت هادئ) آ مريومتي ..

واقفة معجبة ، هادشي جديد عليها ، بصح مرت من تدريبات قاسية و مهيئة جسديا و نفسيا و لكن ما تخيلتش ممكن يضربها بلاما تغلط ، ممكن يضربها غير حيت ما عرفتش علاش مقلق ، ابتاسمت في سرها على هاد الخدمة و حنحنت صوتها و هضرت بجدية ..

مريم : الرعدة قال ليا فاش مشات اختي أماني نتا ما علمتيش گاع رجالك يقلبو عليها حيت مارضيتش تگول ليهم قلبو ليا على مرتي ، وخ تيقة و فحال خوتك نتا ما تعطيكش خاطرك و ما تقبلهاش على راسك ، عينتي غير شي رجااال و من بعد تراجعتي بمبدأ عقل واحد نعطيه عقل واحد ..

همام (بملل ) : اختاصري ..

مريم : أنا فكرت تقدر تكون دازت من حدا شي واحد من الدراري و جاته عادي و ماشي ضروري يقولها ليك و نتا ما يقولو ليك الحاجة تتسول عليها .. رجعت تنقلب في التقارير اليومية ديالكم ، فين مشيتو فين جيتو حتى للنهار لي كنتي موجد ليها مفاجئة تخطبها .. هديك الأرض سمعت ديالك و مأطرها و خاوية تتنزلو بيها بالباراشوووت و كاينة تما شومبغا وحدة و فيها طواليط تتبدلو فيها و لا تتحطو فيها ماطريال .. سمعت بلي دوزتو ليلة كاملة تما .. و البنات تيهتمو بهاد لي ديطاااي ، قلت تقدر تكون جات تما و لا شي حاجة دخلني الشك و فكرت فيها ، و حتى سيكيريتي كاين غير واحد تما و داخل بنيقة دياله حاضي غير من الكاميرات، حتى تبغي تهبط تما عاد تيتجمعو (تنهدت) حطيت احتمال ممكن ، و راسي عمر ، مهم مني تفرجت في تصاور البلاصة ، قلت نمشي نشووف على الله نلقى شي حاجة.. مشيت دخلت قلبت و أنا نلقى هاد البواطة .. حطاتها باش نتا الى جيتي شي مرة هاد البلاصة تلقاها و لا مني تجي فام د ميناج دير خدمتها تعلمك .. يعني مشات للبلاصة لي ساهل دخل ليها بلا شبوهات و توصل ليك الخبااار كيف بغات ..

همام (بتساؤل) : ديالمن التيليفون لي صورت بيه ؟

مريم : ديال نفس الطبيب لي مشات عنده .. قبل ما نبحت في تيليفون في ليكوگغافي لقيت اسم الطبيب و مشيت عنده استجوبته .. قال ليا هما صحاب من أيام الدراسة و جات عنده في نفس الليلة لي شعلات فيها العافية و فيقاته و سولاته واش عنده تليفون زايد و عطاه ليها و خلصاته و خرجو في داك ليل كونطرولاها و قالت ليه غادي يوصلو عندك و قول ليهم الحقيقة عادي

همام (عاقد حواجبه) : حتى هاد ال ze ب ما عارفش فين كاينة ، قدا معاها شنو بغات و مشات فحالها ما تتعرفو ما تيعرفها !!

مريم : وي .. بغاتك غير ترتاح من جيهة ولدكم و ما تبقاش مشغول و دارت هاد البلان ..

همام (تيتنهد) : و داااك الطبيب النفسي ديالها ..

مريم : مشات للعندو ديك الليلة هو اللول و خرجات و ما بقاتش رجعات .. مشات غير باش تسولو هادشي لي گاال ..

همام (صغر فيها عينيه ) : مشات باش تسولو !!!

مريم : في راسو شي حاجة وخ مبرد و ما تيتفاعلش و لكن مشكوك في أمرووو .. عينا عليه ، راه تيميش للكابيني للأپيطال عادي ..

همام(تيحك شعره و تيتنهد ) : مني في راسو العجينة عليها غير نيرد خاطري شوية من جيهتها ما نخافش ..

مريم : كاينة غير حدانا ، الكونطرول التاني ديالها تكون عندك خبارها فين كاينة إن شاء الله ..

همام (عطاها بالظهر غادي للدوش و تيهضر ) : الهضرة ما تتشبعش غا خرجي تقوو٠٠دي ..

مريم : تنحس بيك ما دايرش مجهوود بااش تلقاها ..

همام (رجع تيشوف فيها ) : شاري راحة مرتي ، براحتها بغات تبعد عليا ، إلى عرفت بلاصتها ما نضمنش روحي نشد رجلي عليها .. مخلها تلعب معاااك و أنا نبقا مرتاح عليها ..

مريم خرجات مستغربة و خلاته ..

◾️◾️◾️◾️◾️◾️

ناعسة في حضن أمها، مشعلين تلفاز .. ساهية وقلبها معمر بالطاقة السلبية ، الغبينة و الحزن مسيطرين على روحها ..

ريم (بصوت مشبع بالحزن ) : سمحتي ليا آ ماما ؟؟

سميرة (تنهدت) : أنا سمحت ليك نهار هبطت و مالقيتكش وخفت توقع ليك شي حاجة .. رجعت مسامحااك بغيت غير نشوفك على خير .. فاش لقيتك واقفة في جردة كلشي نسيتو و حمدت ربي و شكرتو ..

ريم (هبطو دموعها ) : ندمت آ ماما لي ما سمعتش للكلامك ، ندمت بزااف ..

سميرة (تتهدأ الجو و تتطلف معاها بحب) : ما تندمي وااالو إن شاء الله ، لي دازت على راس مزيانة ، الخايبة هي ما نتعلموش من لي داز .. هاد العام خوديه نتي غير راحة ارتاحي فيه و من بعد رجعي قرايتك و عطي الجهد ، الباك ديالك جديد و كلشي عندك فيه الحق و أنا معااك فلي احتاجيتيها و الشمااا٠٠تة لاااخوور القانون يفرق بيناتكم ، كلشي عند المحامي دبا .. ما تهزي الهم للوالو و ما تفكري في والو

ما جات فين تكمل جملتها حتى ناضت ريم تتجري للطواليط ، غلباتها الردة .. تتقيا و تتعاود تتحس بروحها غادي تزهق .. سميرة فشلو عليها رجليها ، النوضة لي تبعها ما قدراتش ، فكرة وحدة في بالها ..

ريم غسلات وجهها ، و تقابلت مع المراية ، لونها صفر و أتار كدمات الضرابي مزالين ظاهرين على وجهها .. تأسفت على وضعها و على حالها و خرجات لقات سميرة في الباب نطقت مباشرة بتساؤل ..

_لي غيكل دياولك معطليين !!

ريم (دورات راسها تتفكر ، فهمات المغزى من السؤال ، تتحاول تحسب بالأسابيع و الأحدات و شدات على فمها مزيرة عليه من هول الصدمة و تتهضر بصوت منخفض تحت يديها ) : جوج سيمانات دبا باش كان خاصهم يهبطو .. (بالدموع و صوت باكي) أنا حاااملة ..

"بعد مرور شهر"

قبل ما تحبي ضروري تسولي راسك ؟

_كيفاش ممكن نحب ؟

_شكون نحب ؟

_و علااش نحب ؟

_و إمتى نحب ؟

_وإلى أي درجة ممكن نحب ؟

الى ما قدرتيش تفهمي هاد الأسئلة بعمق وبوعي و ما قدرتيش تجوبي عليهم ، يقدر يكون هاد الحب لي تتحسي بيه هو أكبر مرض في حياتك وهو أكبر مصادر ألآمك النفسية ..

أماني هاد المدة و هي في المستشفى حاولت مع طبيبها النفسي تبعد على التفكير السلبي و تكبح أوهامها و شكوكها في داتها ، بعدات كليا على سوء التعامل والتشاؤم والنظرة اليائسة تجاه الحياة و خصوصا حاولت تبعد على هوسها المرضي و المشاعر السلبية لي تسببات ليها في آلام و وجع نفسي لا يوصف ، حتى كرهت راسها و أفعالها ..

طبيبها كان حريص أنه يغير مفاهيمها فقط بالعقل لأنها كانت رافضة كليا الأدوية ، خوفا على صحة جنينها ، كانت مكتافية غير بالڤيطامينات لي محتاجة..

طبيبها فهمها و بدات تفهم الحب لا يمت للهوس بصلة ..

الحب لي تينبع من الانسان إلى كان مرض فهو ماشي حب ، و حرام نقولو عليه حب .. الحب دواء ، الحب هو لي تيعالج عِللنا ومشكلاتنا ومعاناتنا وآلامنا .. و و و ماشي العكس ..

زيادة و هي وسط المرضى حسات براحة عجيبة و طمأنينة و سكينة نزلات عليها من عند الله ، عكس داكشي لي كان في مخيلتها ، شافت البراءة الحية مع هاد الناس ، البراءة الحقيقية الغير مغشوشة ، شافت الابتسامة صادقة والتسامح والهدوء والراحة النفسية والكلمة الطيبة ..

هي بدورها كانت تتساعد المرضى بالنصيحة و تتضحك معاهم على أبسط الأشياء و تسمع ليهم ، نساوها همها و ادمانها كيف تتوصفه..

رغم أنها مدة قصيرة إلا و الفرحة رجعات للقلبها ، وتحققات شيئا ما الراحة النفسية لي كانت تتقلب عليها شهور و ما لقاتهاش تتحس بلي الداخل ديالها كيتصفى شوية بشوية..

ما تنكرش أن همام دائما تيزور أفكارها و مستوطن روحها لكن كل مرة عقلها الباطني تيحاول يقاوم و بمساعدة الأطباء تيقنعوها و يشغولها بما هو إجابي للنفسيتها .. ماشي ساهل و لكن يكفي أنها تتحاول و تتفاعل و تتستجوب للعلاج و تتبع النصائح و التعلمات بصدق و رغبة و تفاؤل ..

هاد الأسبوع الأخير كان أسبوع غير الأسابيع ، الطبيب النفسي عطاها iPod مسجل فيها بعض السور من القرآن الكريم و طلب منها تسمعهم في وقت فراغها كنوع من العلاج النفسي .. بسرعة خيالية يا سبحان الله انعكس عليها براحة البال وراحة الضمير، وصفاء النفس،وحُسْن الظن بالله، والثقة والطمأنينة ... رجعات تتحس بروحها طاهرة من دوك السلوكات العنيف٠٠فة و من دوك الأفكار الخبيتة لي تضر بيهم الناس، ما كدبوش لي قالو أن القرآن الكريم هو علاج للأمراض السيكوسوماتية.. ما تنكرش أنه عاونها بزاف تصالح مع ذاتها و تداوي جروحها و تقبل واقعها و في هاد الأسبوع عاونها بزاف تنتاصر على ما فيها من شهوات و أوهام ..

شهر و أسبوع ، ما ضيعت حتى نهار منهم و حتى دقيقة باش تتلقى الدعم من المرشدين النفسيين و التربويين و تكتاسب مناعة نفسية و إتزان نفسي بشكل ملحوظ .. مزال بنفس العزيمة و الاصرار أنها تتعالج و تتمنى من كل قلبها أنها مني تجي طفلتها للحياة تلقى الأم الصالحة ، الطيبة و السليمة لي تيتمنى كل طفل و هي نفسها في إنتظارها ...

وسط غرفة مربعة كلها بيضاء من صقف حائطها إلى أرضيتها ، ناعسة فوق سريرها و هو واقف عند راسها ، بيجامة قطنية بيضاء كم و طويلة حد ركبة ، بيجامة موحدة بالنسبة للمرضى نساء ، شعرها الاسود الفحمي مسرح على طولته في خديتها ،تتبان هادئة و الفرحة تتنبع من ملامحها ، حاضنة بطنها و غارقة في نومها ، ظاهر عليها مرتاحة .. حتى بدات تتسمع صوته تيفقها بهدوء..

عبد الصمد : أمااااني ، أماااااني

أماني (حلات عينيها بتقاتل ، تتشوف في لي أمامها ، ابتاسمت بود و هضرت بصوت باح غالبة عليه نبرة النوم ) : صمااااد جيتي !

عبد الصمد : (بتساؤل) قالو ليا ليوم ما خرجتيش من لا شومبغ !! واش عيانة ؟ تتضرك شي حاجة ؟ مقلقة ؟

أماني (ضحكات حتى تسدو عينيها و هي مزال في وضعيتها ) : لا بالعكس بخير و بزاااف گااع ، الحمد لله ، غير غلبني نعاس هاد النهار .. نفيق غير نشرب و نرجع نعس (تتضحك ) تقوول دووك ليام لي ما كنت نعسهم راني نوعضهم دبا ، كان تيسحابني الفلووس هما كلشي في الحياة ..

عبد الصمد (بابتسامة): إيوا الحمد لله كلشي من الخير ، نوضي كولي شوية بعدا عاد رجعي نعسي !

أماني (ناضت جلسات في مكانها تتقاد شعرهاو تتجمع فيه و تتهضر) : كملت شهر خاصني نمشي ندير كونطرول للبنتي و ندير تحاليل.. (بتساؤل) تخليني نخرج !

عبد الصمد (بتفهم ) : بكل فرح ، حنا معاك حتى تزاد بنتك على خير و نبداو مرحلة آخرة من العلاج إن شاء الله حتى تترجع المياه للمجاريها و ترجع أماني احسن من قبل ..

أماني وقفات مبتاسمة مرتاحة ، غير هزات رجليها تلبس بانطوفتها و هي تحس بشي حاجة هابطة من رحمها بسرعة ، ما حساتش حتى عرات على فخضها تتشوف في قطرات صغار من الد٠م، حمرين فاقع لونهم ، هابطين بالعرض البطيئ من الجانب ديال السليب ديالها ، على شكل دمعات ، تتهبط وحدة و تتبعها الأخرى ...

يتبع...