في عالم بحال ديالنا غير هو هاد العالم هو عالم الأبراج كل عائلة و رمز برجها و تقاليدها و عاداتها و فعالم الأبراج العشق و الحب ليه قواعد و ضوابط معندكش الحق توقع فحب شي واحد من اختيارك حيت ببساطة هدا دور عائلتك أو بالأحرى واليديك واش غيكون شي حب؟؟واش غترضا العائلات؟؟واش غتخرق القوانين الصارمة لي دامت و ستمرات سنين و سنيين؟؟...
البطلة♍:شخصية مرحة و مفعمة بالحيوية تتحب الحياة و الإستمتاع بيها بجميع جوانبها، كيوت و حمقة بامتياز.
البطل♐:عالم اخوور تيعرف فقط الجدية و العمل، قاصح و حدودي مع الغريب و شخصية خرى مع القريب.
و انطلاقا من القصة غتعرفو عليهوم اكتر✨✨
واش غتلاقا الجدية باللامبالاة؟؟؟واش غيتلاقا المرح بالقوة؟؟؟واش غتكسر القوانين و التقاليد؟؟
🚫🚫ملاحضة جد مهمة عارفة الأبراج ممنهومش هدا مجرد خيال 🚫🚫
عندما يلتقي الواقع بالخيال...♍عَذْرَاءْ و قَوْسْ♐
فالمغرب و فواحد من المنازل المغربية العادية تفتح الباب و تسمعو الزغاريت ديال العيالات مستقبلات هاد المرأة لي داخلة و هازة معاها شي حاجة فيديها ملوية فكاشة غوز مقطنة تيتبيين انها رضيعة تابعها راجل ثلاثيني هاز شاكوش و صاك صغير غوز وقفات عليهوم واحد المرأة كبيرة فالعمر و موراها افراد العائلة و الدراري الصغار تيتجاراو هنا و لهيه..المرأة كان باين على ملامحها التعب و الإرهاق جلسات ترتاح هازة بنتها حديثة الولادة فحضنها تبعاتها المرأة الكبيرة فالعمر و جلسات حداها و تبعوها شي عيالات خرين و بنات من العائلة تيباركو و يعاودو و يهزو فالبنيتة يضوروها بيناتهوم حتى شافوها و شبعوها بوسان عاد رضوها لمها...
العجوز خداتها من حضن مها برفق و قابلاتها مع وجهها مبتسمة تتشم فريحتها الطفولية الزوينة و تتلعب معاها حتى دخل راجل كبير فالعمر تمو تابعينو رجال خرين منهوم الثلاثيني لي هو اب الرضيعة و جلسو معاهوم...
الرجل الكبير مد يدو حتى خدا الرضيعة مبتسم فرحان بحفيدتو الجديدة...
المرأة العجوز:ايوا تنتسناو غير قرارك ا الحاج شغنسميو ل البنيتة؟
الحاج بتاسم:ايوا ا لالة سلافا قررت نسميوها عذراء
الكل بتاسم عاجبو الإسم...
الحاج شاف فواحد من ولادو:جلوان(اب عذراء) قرب اولدي و حتى نتا ا ولدي رجاح
الرجال بجوج جلسو حدا الأب ديالهوم...
الحاج:و كيفما كلشي عارف فتقاليدنا و عادتنا اليوم غتم الخطوبة ديال عذراء
جلوان:و بشكون ا الوليد؟
الحاج بتاسم و عينيه على واحد الدري كان تيلعب مع الدراري لخرين تكون عندو 8 سنين..الكل شافو فين تيشوف و فهمو قصدو...
رجاح(اب برناس):برناس اجي ا ولدي لهنا
الولد حط لعبة السيارة فالأرض و تم جاي عند باه...
الحاج مد ليه يدو و الولد شدو و بابتسامة حط الحاج يد الولد فوق يد الرضيعة الصغيرة...
الحاج:ابتداءا من اليوم هادي الخطيبة ديالك ا ولدي برناس
الولد مفهم والو مجرد طفل باقي تيلعب باقي تينقز و الحاج بارك عليه هادي خطيبتك و شكون الخطيبة مجرد رضيعة عاد حلات عينيها فهاد الدنيا!
برناس اكتفى بتحريكو لراسو ب اه مفاهم والو مسكين اما الكل بتاسم بفرح عاجبهوم الحال...
العيالات طلقوها بتزغريتة اما الحاج مد الرضيعة لجدتها "سلافا" و هو يشد برناس من يدو و جلسو بيناتهوم...سلافا هزات عذراء و دارتها بين احضان برناس مكالياها بيديها من التحت اما هو تيشوف كتلة طرية تتحرك ملاك فوق الأرض بلبيستها الوردية و تتحرك فعينيها و يديها غير تيخبشو فوجهها مد صبعو و حطو فراحة يديها و هي تشدو بقبضتها الصغيرة...
سلافا مبتسمة:هادي خطيبتك عذراء ملي غتكبرو غتزوجو ان شاء الله ا ولدي
برناس طلع راسو فيها و رجع شاف فعذراء مبتسم:خطيبتي؟
⌛بـــــعــــــد 22 عـــــــام⌛
فواحد من الأحياء الشعبية النقية كان واحد الصالون كولو گرياج على برا عاد تيبان ليك من مورا داك الگرياج صور بنات دايرين الماكياج و مقادين الشعر بحال عارضات الأزياء ملصقين فالزاج و فالبلاكة لي لفوق مكتوبة بطريقة ايطاليك "صالون العذراوتين" الباب الحديدي كان محلول و كاشف على الباب الزجاجي ديال الصالون لي ملصقة فيه "مفتوح" و من لداخل دايزة عليه خامية مغطية على لي كاين فالداخل..الحس كان مقطوع حتى بدا تيتقرقب واحد الطالون فالشارع بقات غادية مولاتو حتى دخلات غير تحل لباب و حطات رجليها تسمع التخرشيش ديال الجرس تيعلن على دخول كليانة جديدة فاش تسمع طلات واحد البنت سميمرة من واحد الباب سابقها شعرها الطويل لي كان فالقهوي غامق غادي للكحل مبتسمة و عينيها دايرة ليهوم ليلونتي لابسة طابلية بيضة خاشية فيها يديها و غادة جاية عند الكليانة...
البنت:مرحبا بيك ا لالة مرحبا و الف مرحبا زيدي اجي لهنا جلسي(تتشيير ليها بيديها فواحد الفوتوي)
الكليانة جلسات غتكون عندها ديك 26عام:كاينة رفيف؟
البنت مبتسمة:كاينة غير عذراء هاد الساعة اما رفيف عندها غراض اش حب الخاطر؟؟
الكليانة:امم كنت معولة على رفيف نعديو بيك نتي المهم بغيت نصوب ضفاري بغيت ندير الجل
عذراء:اهاه واخا اجي معايا لهنا
جراتها حتال واحد الكوان كانت فيه طبيلة بيضة مستطيلة بجوج كراسة بيضين واسعين شوية و فوق الطبيلة لي كان سطحها زجاجي كاينة الماكينة ديال الضفار و شي ادوات خرى...جلسات الكليانة و جلسات عذراء حلات المجر و جبدات واحد الكاتالوگ حلاتو كانو فيه ضفار اصطناعيين ملصقين فجميع الألوان و حطاتو قدامها...
عذراء:ختاري اشمن لون بغيتي
الكليانة حطات صبعها على لبيج:بغيت هاد البيج شي حاجة سامبل و الشكل ديال الظفر بغيت طويل و ماشي مسنن بغيتو يكون مقطع پلا
عذراء جمعات الكاتالوگ مبتسمة:واخا ختي
جبدات واحد السريبتة بحال الفوطة و فرشاتها فوق الطبلة:حطي يديك هنا
عذراء جبدات مقص الضفار و بدات تقطعهوم ليها:مشات لعند الدونتيس(كمشات عينيها بحال المسكينة)ضراتها واحد الضرسة مشكيت عليك اختي مخلات فانيد مخلات قرنفل ماخلات هاد الصباغة ديال الضفار نيت و مقضااش فيها
الكليانة:اه مسكينة الله يشافي
سالات ليها تقطاع و جبدات واحد الماكينة بحال القلم و خيطها بحال ديال الفيكس كولو مكريبي و بدات تحك ليها بيها ضفارها من الفوق:واش باغية غير بيج سامبل؟ مغتزيديش زواقات؟
الكليانة:امم حتى تسالي و نقولك
بقات عذراء تتصوب ليها فضفارها صبغاتهوم ليها بالجل و لصقات ليها الضفار لي كانو شفافين بحال شي بلاستيك و دخلاتهوم ليها فالماكينة لي كانت تضوي بضو زرق حتى كملات عاد بدات تصبغ و تقاد فيهوم باللون البيج...
الكليانة عاجبها الحال:تبارك الله عليك عرفتي شنو زيدي ليا هنا قلييبات حمرين فهاد الظفر و فهادا
عذراء مبتسمة:واخاا
جبدات عذراء بلاستيكة تتلصق فيها شكل القلوبة لصقاتها فوق الضفار و بدات تصبغ بالحمر حتى سالات و النتيجة مرضية بزاف فرحات بيها الكليانة...
عذراء: واش عايشة عادي؟؟كيفاش تديري تحكي بيهوم؟؟تهزي بيهوم الحاجة؟؟و لي دار ليا الزوبعة فدماغي كيفاش تتستنجاي بيهوم فالطواليت؟لا لا لا انا مرة وحدة قداتهوم ليا ختي رفيف مبقيتش عاودتهوم اويلي شوية كنت نبقا بلا بكارة حتى لبوشونتي اختي لا لا لا
الكليانة مخرجة فيها عينيها ناضت نوضة وحدة:اويلي صافا با واش بعقلك؟
عذراء ناضت:وراه من نييتي تندوي زعمة قلت نسول مجرب
الكليانة جبدات بسطامها و مداتلها واحد الزرقة:هاكي و مرة خرى صلحي اسلوبك هدا ماشي اسلوب د الكليان
الكليانة غادة ماشية بتعفار و عذراء شدات الزرقة خشاتها ف جيبها و تبعاتها:وا لالة واا لالة اويلي شنو قلت
تبعاتها حتى خرجت من الصالون و بقات واقفة قدامو شادة جبهتها:اناري مال هادي بحالا قلت ليها راني كنت تن*فت بيهوم باااز
يالاه بغات تدخل حتى تحطات طاكسي حمرة قدام الشانطي هبطات منها واحد البنت رقيقة سميمرة مضورة على فمها الزيف بحال المومياء خلصات لمول الطاكسي و تمات قاصداها...
عذراء قشعاتها:اويلي رفيف؟مالك على هاد الحالة دايرة بحال شي مومياء غير لعينين لي تيطلو منك
رفيف حركات حاجبها زعمة تبعيني و دخلو ل الصالون...
دخلات رفيف و جلسات فوق الفوتوي و عذراء جرات كرسي جلسات قبالتها...
عذراء:امضرا؟؟شنو قالك الطبيب
رفيف تدوي بالإشارات بحال شي زيزونة...
عذراء:وا دوي مفهمت والو
رفيف جبدات تيلي من الصاك و كتبات فيه و مداتو ليها...
عذراء تتقرا:حييد ليك الضرسة؟؟
رفيف حركات راسها ب اه معوجة عينيها...
عذراء حطات رجل فوق رجل مكمشة جبهتها:اااه ايوا عرفتي شنو سيري ل الدار رتاحي انا راه قايمة بالواجب غير سيري
رفيف حركات راسها ب لا...
عذراء:نتي تعرفي صباح زين هدا ضربت فيه واحد الزرقة
رفيف حطات يد فخصرها و يد ماداها تتحركها زعمة اري لهنا...عذراء كمشات وجهها مرجعة راسها اللور و مدخلة شفاها التحتانية بحال الدراري الصغار:وا حرام عليك اصاحبتي هادي خدمتي و تمارة عرق يديا و تجي ترزيني فيهوم
رفيف خصها ضروري تدوي حتال منقاشة فلوسها و فلوس عذراء ضروري من اما الإشارات و التيلي مغينفعو بوالو معاها حييدات ديك الفاصمة ديال الزيف على فمها و بدات تدوي فمها معوج باقي شاد فيه البنج:اريي راه بغيت نزيدها على لي غنعطي ل الدونتيست
عذراء:وا ياك خلصتيه؟
رفيف:مكملتش ليه الفلوس راه حييد ليا الضرسة
عذراء جبدات الزرقة من جيبها و مداتها ليها:افففف كنت ناوية غير نقصيو بيهوم انا و رواء
رفيف:نتي و ديك رواء حاضيين غير السناكات الريال متيسخنش بلاصتو فجيوبكوم
عذراء:ياكاااا ولكن فاش تنعرضوك متتقوليش لا
رفيف تضور فعينيها:ايوا ها نتيجة سناكاتكووم حلفاات الضرسة بنت الكلبة لاخلاتني نعس البارح حتى شبعت بكاا
عذراء:هدا غير درس اختي فاش محمدتيش ربي على الوقت لي كنتي تطحني فيه و تزيدي مكنتيش رافدة لهم لواحد الضرسة كانت مسكينة معذبة تتبجغ و تقاد ليك فالماكلة باش تدوز ليك مع المعدة ايييه ا لياااام
رفيف تتشوف فهاد وجه وجع التراب لي بدات تألف فقصة حزينة بطلتها الضرسة المحييدة:بديتي تاني؟وليت تنشك بلي السبب ديال وحم ماما على بويا عمر هدا هو النتيجة ديالو
عذراء:علاه شنو قلت نتوما لي متتفهمونيش نتوما لي ماشي متفتحين عقولكوم باقة منحاصرة مع الخبز و اتاي
رفيف:على اساس نتي تتفطري ب بلاتو اميريكان؟ نوضي تهزي نوضي
عذراء تضحك:ههه راني عارفة غير الضرسة لي دارتها ليك اما ختي قلبها حنين نتسناك حتى يرجع ليك عقلك
عذراء خرجات فيها عينيها:حتال الأنيم و حدك تماا هااااه
رفيف سدات عينيها و نعسات عرفاتها الى مشيتي حتى دويتي ليها على الأنيم غتولي كاسيطة مسروطة...عذراء جلسات بنفخة و جلسات دارت ليكيت و جبدات تفرج فحلقة من حلقات واحد الأنيم متبعاه بقات حلقة تابعة لوخرا حتى داز الوقت و وصلات 1 طلعات راسها فالماگانة المعلقة الوقت هي هادي قلبات وجهها فين ناعسة رفيف و ناضت تتفييق فيها...
رفيف تتكسل:صافي وصلات 1؟
عذراء:ااه سربي وقت الغدا هادي و الوليد قرب يدخل ل الدار
ناضت رفيف بالزربة و ضورات الزيف على فمها بحال شي كاشكول و شعرها القهوي المفتوح مجموع سفنجة هزات صاكها:واخا زيدي سدي
حييدات عذراء الطابلية حطاتها و هزات صاكها:زيدي
خرجو بجوجات سدات عذراء لباب و لباب د الگرياج و هبطات الريدو د الگاراج سورتاتو بالقفل و مشاو غاديين لدارهوم لي كانت فنفس السيكتور نيت...
بقاو لبنات غاديات فالشارع فوق التروطوار و الطونوبيلات غاديين جايين حتى دخلو مع واحد الدريبة غاديين و ريحة المرقى ضاربة حيت وقيتة الغدا هادي حتى وقفو قدام باب واحد الدار كان منقوش فيه رمز برج العذراء "♍" لي تيبيين انه الساكنة ديال هاد الدار عائلة تتنتامي لبرج العذراء..دقو جوج دقات حتى تيتحل الباب كانت امرأة أربعينية بيضة ملامحها زوينة لابسة بيجامة د الدار..البنات باسو راسها و دخلو لايحين صيكانهوم فوق السدادر...
عذراء:شميت ريحة المرقة من راس الدرب
رفيف تدوي من تحت الزيف:مفيا مياكل حتى يفوتني هادشي
لوليا(الأم ديالهوم):غير صبرو يجي باكوم من الجامع و ناكلو مجموعين
عذراء:واخا غنمشي نبدل حوايجي و نهبط
رفيف:حتى انا
هزات عذراء صاكها و طلعات لفوق و تبعاتها رفيف حتى دخلو لواحد لبيت فيه جوج ناموسيات غير هو عندو باب واحد ولكن كيف مقسم بحالا جوج بيوتا تيبين عالم كل وحدة منهوم كيف مختلف الجهة ديال عذراء كانت جهة فيها ناموسية بكوفرلي عادي مع وسادات و عامر فوقو نونوسات ديال شخصيات انمي و هيلو كيتي كما انه الحيط كاملو فيه صور ديال انمي معلقين و وحدة خرى مكتوب فيها "اليابان" تيبيين قداش هاد البنت مبلية بالأنمي و دولة اليابان و فجهة رفيف تتبين قداش ستيلها بسيط بحيث كان كوفرلي كولو بيض بوساداتو و كتافات فتزيين الحائط غير بمراية متوسطة و فلارض محطوط گيتار حدا الناموسية...و قدام هاد الناموسيات كاين ماريو كبير قاسمينو على جوج كل وحدة و بلاصتها...عذراء حطات صاكها و حلات ماريو جبدات منو بيجامة سروال و تيشورت لبساتها و جمعات شعرها اما رفيف غير بدلات تخشات فناموسييتها...
عذراء:واش نقول لماما تخبي ليك شوية؟
رفيف خرجات غير يديها من لغطا و حركاتها ب اه...
عذراء لبسات بانطوفتها:واخااا
هبطات لتحت مشات جلسات شادة التلفزة حتى سمعات باها دخل كان هاز معاه جوج خنشات ديال الديسير ناضت دغيا مشات حتى باست راسو و شدات من عندو...كان راجل خمسيني سمر و باينة من ملامحو انه انسان صارم...
جلوان:الله يرضي عليك ابنتي
لوليا خرجات تتمسح يديها:على سلامتك
جلوان جلس:الله يسلمك الشمس حارة اليوم
عذراء حطات الديسير و جات جلسات:ايه ا بابا بصاح
جلوان:فيناهيا رفيف؟
عذراء:راها ناعسة مريضة
جلوان:اه الله يشافي
لوليا:راني خبيت ليها حقها غنحط لغدا دابا
جلوان:فين ضرغام و رئال؟ غيتغداو تاني فالخدمة؟
لوليا:ايه كيف العادة
جلوان ناض يغسل يديه:واخا حطي داك الغدا
تغداو بتلاتاهوم على ديك المريقة جمعات عذراء الطبلة يالاه بغات تسلت و هي توقف عليها لوليا...
لوليا:علاه اش تديري بالسلامة ياك غير جالسة فداك الصالون؟ما مريضة ما عيانة
عذراء:واخاا هاهياا
لوليا:ايوا الله يرضي عليك ا بنييتي هكا نبغيك راه خصك تكوني حادگة علاه شنو غتديري نهار تزوجي ب برناس؟
عذراء غير جبدات ليها الزواج من برناس شداتها القفقافة حساسة من هاد الموضوع مجاوباتهاش مشات ديريكت تتغسل فالماعن اما لوليا خلاتها على خاطرها حيت هادي سيرتها وقتما جبدات ليها حس الزواج...
دازت العشية عادية و دابا وصلات وقيتة لي غتسد فيها عذراء الصالون...سداتو و رجعات لدارهوم لقات مها موجدة كاسكروط جلسو عليه هي و رفيف لي بدات تحس بخير اما جلوان و خوتها غابر ليهوم الأثر حتى تسمع الدقان فالباب...
عذراء ناضت:انا نمشي نحل
قطعات طرف ديال الخبز و مشات تتغزز فيه يونسها فالطريق كيف حلات الباب لقات برناس داك الدري الصغير لي كان هازها بين دراعو دابا ولا شاب وسيم عاد داخل فالتلاتينات كان مبلاصي طونوبيلتو قدام دارهوم تيتسنا يتحل لباب حتى حلات خطيبتو و حبيبة قلبو لي غير شافها بتاسم بلا هواه...
برناس:عذراء لباس؟
عذراء رضات عليه بابتسامتها المعهودة:برناس؟زيد زيد دخل نيت تلاقيتينا تناكلو كاسكروط
برناس هبط و دخل اما هي سبقاتو و سد الباب موراها...
لوليا:شكون لي جا؟
عذراء جلسات تتاكل:برناس ا ماما
برناس دخل حشمان شوية حيت مكاينش عمو و ولاد عمو:لباس ا خالتي لوليا و نتي ا رفيف؟
رفيف:لباس ا ولد عمي جلس تاكل
لوليا:زيد ا ولدي بسم الله
برناس مشا غسل يديه فلافابو كان نيت حداه و حييد صباتو و جلس..كبات ليه لوليا كوييس د اتاي و جلسو على داك كاسكروط...
برناس:فين عمي جلوان و رئال و ضرغام؟
لوليا:عمك معرفتو فين خرج حدو صونا ليه شي واحد و خرج ايوا ولاد عمك باقة شاداهوم الخدمة
برناس:اه مزيان(طلع و هبط عينيه فعذراء لي تتاكل)و نتي ا عذراء كيف داز نهارك فالصالون؟
عذراء طلعات فيه عينيها:كيف العادة صوب لهادي و هكا ههه
الوقت غادي و تيطير و لوقيتة فاش عائلة عذراء تعشات بلي قسم الله و كل واحد فيهوم فرقها نعس فبلاصتو كاينين ناس من طبقات اعلى منهوم عاد تتحلا ليهوم الجلسة...
🇨🇭ف سويسرا🇨🇭
فواحد من افخر الفنادق المعروفة فيها و بالضبط فليطاج ديال المطعم...كان غادي تيتمشا بخطواتو الثقال لي تتبين الثقة ديالو فنفسو الكبيرة و ريحتو الرجولية الفخمة سابقاه تتعلن على دخول واحد من ضمن كبار أصحاب الطبقة البرجوازية و صوت اخور بدا تيدخل فإيقاع هاد الفخامة لي كان بحال ديال شاريو مجرور...
كان المطعم خاوي تماما و موسيقى خفيفة لي معزوفة فيه بالبيانو حتى بدات تتبان ليه امرأة جالسة فطاولة تتسنا غير شافتو ناضت بفرحة اما هو ديك الصرامة لي كانت على وجهو تطلقات شوية لإبتسامة خفيفة على فمو...
الحوار باللغة الألمانية:
المرأة مدات يديها لي صافحها:اهلا ب مستر قوس بنسليمان شرفتيني بتلبية دعوتي
قوس حرك ليها راسو و باقي ديك الإبتسامة و مع تبارك الله الطول و العرض كان مغطي ديك الطاولة الحديدية لي كانت موراه هي و الخدام لي كان جارها..ضور نصف جسمو للوراء باش تبان الطاولة و دوا بيديه...
قوس بنبرتو المخلطة بين القصوحية و الجدية:سمعت انه الورد الأبيض تيعجبك
ضارت هي طلات لقات الطاولة عامرة بالورد الأبيض ليكان فديپاكي خاصين بيه مبيينو قداش راقي..عجبها الحال و خصوصا انه معروف على قوس بنسليمان انه سخي بزاف الى تعلق الأمر بالهدايا...
المرأة:شكرا بزاف عجبوني
قوس حرك يدو ل الخدام باش يديهوم ليها لسيارتها اما هو جلس فكرسي قدامها...
فاش جلس تم جاي واحد النادل بدا تيكب فالخمر و تيحط ليهوم و بقا واقف بعيد شوية باش ميتطفلش على كلامهوم..
المرأة شافت فالنادل غمزاتو و هو يحرك ليها راسو و مشا و هو يجي واحد جايب الأطباق لي طلباتهوم...
النادل حط الأطباق لي كانت مزيينة بطريقة راقية تتشهي الواحد ياكلها بلا هواه...
قوس فهم البلان:تنظن طلبتي ليا على دوقك ا ميس ليزل
ليزل ضحكات بشوية:ههه عندي تطلع على ذوقك مستر قوس
قوس هبط عينو على الطبق:امم مزيان
ليزل بدات تتاكل و تدوي:سمعت على قضية الفرع الجديد فبلادك الأصلية المغرب
قوس طلع راسو فيها بجدية:اه قررت و اخيرا نتاقل لبلادي
ليزل بضحكة اغراء:امم زعمة و مغتدينيش معاك ههه؟
قوس كلا قضمة بالفورشيط:شنو لي غيخلي مصممة ازياء معروفة على الصعيد السويسري انها تخلي بلادها و تخدم بلاد شخص اخور؟
ليزل بجرأة:نتا ماشي شخص اخور و راك عارف(غمزاتو)
قوس شرب رشفة من كأسو:شنو سبب دعوتك ليا؟
ليزل:احم السبب هو انه بغيت شراكة معاك..بغيت موهبتي تنتاقل لشركتك
قوس بقا لثواني ساكت و نطق بصرامة:لا ا ميس ليزل
ليزل بصدمة:لا؟
قوس هز منديل و مسح فمو بكل رقي: نتي ديجا عارفة انه عندي كمية المصممين و المصممات الكافية فالشركة
ليزل شداتو من يدو و اليد الثانية تتلمس ليه فدراعو تتحاول تغريه زعمة:غير شوف كيف دير راه كاين المقابل راك عارف(غمزاتو)
قوس شداتو الضحكة فداخلو حيت هاد الحركات حفظهوم و هادي ماشي اول وحدة تبغي طلع على ضهرو..نتر دراعها بابتسامة خفيفة:ماشي هاد المرة
ناض قوس من الطبلة و هي تتشوف فيه غتاكلو بعينيها لي تيقطرو بالسم...
قوس ميل راسو على جنب:شكرا على الدعوة
و عطاها بضهرو غادي بكل شموخ خارج و هي غارقة ففقايصها...
"اصحاب برج العذراء هما من مواليد 23 غشت الى 23 شتنبر"
☀️فالصباح☀️
و فواحد البيرو كانو فوقو ملفات واحد فوق واحد مستفين على جنب و حداهوم كاينين الأقلام و الستيلوات و طوابع و فالوسط محطوطة لافتة مكتوب فيها "رئيس التحرير" و تحت منها مكتوب اسم "برناس مفتاح"
كان برناس جالس فلبيرو ديالو داير نضاضرو د الشوف تيتفحص واحد المقال صحفي و تيدير عليه لمساتو الأخيرة باش يسيفطو ل سكرتير التحرير يكمل عليه بخدمتو حتى تسمع الدقان فلباب..و بلا ميتململ من خدمتو قال دخل و هي تم داخلة واحد البنت شابة هازة ملف فيديها و من وجهها باينين ملامح اللهفة...
الصحفية:موسيو برنااس موسيوو برناس
برناس طلع فيها راسو:اش واقع؟؟
الصحفية:عندي اخباااار مهمة خصهااا تحط فأول صفحة من الجريدة كاااع
برناس تقاد فجلسة:و شنو هو هاد الخبر المهم؟؟
الصحفية حلات الملف و حدرات عينيها تتقرا:اليوم غادي يشهد على افتتاح الفرع الجديد و الثاني ل رجل الأعمال المعروف قوس بنسليمان و لي هو صاحب شركة الأزياء المعروفة Bens-Naht
برناس:كملي
الصحفية:و الجريدة السويسرية لي دارت هاد الخبر قالت انه غادي يعطي فرص شغل لولاد و بنات بلادو لي مهتمين و حاصلين على ديبلومات فهاد الضومين
برناس بحماس:مزيان! سمعت من قبل بهاد الكنية فشي سبق صحفي فواحد المجلة فرنسية الكترونية خصنا ضروري نحطو هاد الخبر ف الجريدة!!
الصحفية:اكييد موسيوو
برناس:امتى غيجي هو؟؟
الصحفية:اليوم موسيو حيت اليوم كيف قلت غيكون الإفتتاح
برناس:صافي مزيااان معرفتيش معاياش؟؟
الصحفية:بلعشية غادي تنزل الطائرة لي ستقلها و بالضبط مع 3 و بالليل مع منتصف الليل غيبدا الإفتتاح مع حضور مجموعة من الشخصيات المعروفة و البارزة فهاد المجال و رجال أعمال مرموقين
برناس هز الفيكس و ضور النمرة ل السكرتيرة:الووو لتين غتدوي دابا مع فريق الصحفيين المصورين بغيتهوم يكونو فقدام المطار تيتسناو ف قوس بنسليمان حتى يهبط و يلتاقطو الصور و فريق الإستجواب حتى هو بغيت مقال كامل و مكمول بصورو و كلشي!! غادي نسيفط ليك المعلومات و كلشي مع نواهل(الصحفية)..اوكي(قطع)
الصحفية:تنستأذن منك دابا نمشي عندها موسيو
برناس:واخا ولكن قبل متمشي خلي عندي نسخة من المقال لي جبتي
الصحفية حطاتو ليه فوق البيرو:وي موسيو ديجا أمبريميتو من قبل و عندي نسخ عليه
برناس:واخا يمكن ليك تفضلي
خرجات الصحفية اما برناس جر عندو المقال و بقا تيشوف فيه و فراسو خص هاد السبق الصحفي يطلع...
نخليو برناس مع خدمتو و نرجعو عند الكوافورة ديالنا...
عذراء كانت جالسة فوق الفوتوي تتبرد فضفارها فانتظار شي كليانة اما رفيف جالسة فمكان الإستقبال عند لاكيس لي هي لي مكلفة بيه حتى تمات داخلة واحد البنت مطلعة حاجبها و تتمشا بكل ثقة فالنفس و باين التكبر على وجهها شعرها مكريپي قهوي مخلط بخصلات شهبين و عينيها قهويين ضاربة كسيوة فلگري سميطات قصيرة حد الركبة مع مكياج خفيف فوجها برز ملامحها الزوينة...
عذراء طلعات راسها و هي توسع ابتسامتها:هاااء!! رواااءييييي
رواء كاع داك التكبر و الغرور لي كان فملامحها تطلق فاش شافت عذراء ولات وحدة خرى تعانقو و تسالمو و جلسو تيكيكيو...
رواء هي من عائلة برج الأسد و صديقة عذراء من الصغر.
رمز برج الأسد هو هدا "♌" و المواليد ديالو من 22يوليوز الى 23 غشت
رفيف وقفات عليها عاقدة حجبانها:ياك 100 مرة تنقولك متجيش بهاد التقزاب عندنا ل الصالون و الى جاب الله جا الوليد ولا خوتي و شافوك!!
رواء:و حتى انا غنعاودها ليك مليون مرة علاه مال الكليانات لي تيجيو عندكوم؟؟
رفيف:هادوك كليانات مشغلناش فيهوم ولكن نتي راك صاحبة هاد بويا عمر لي حداك و ديما داخلة خارجة عندنا!!
رواء:اففف خليني عليك
عذراء:و صافي ا رفيف مديريش فيها حتى نتي فقيهة راك بخبيزتك و حتى انا بخبيزتي
رفيف:اففف انا فوتو غير الصالون و ديك الساعة تعراو كاع نتوما فالزنقة
عذراء:واخا و داك ولد صاحب باك لي من عائلة برج الثور اش غاديري معاه؟
رمز برج الثور هو هدا "♉" و المواليد ديالو من 20 أبريل الى 21 ماي
رواء:منعرف راه مزال مجاو يخطبو
عذراء:تنتمنى ليك غير الخير اصاحبتي
رواء:شكرا ليك ا حبيبتي ايوا المهم جيت غير نطل عليك
عذراء:جلسي مزال اصاحبتي
رواء:حتال العشية و ندوز عندك ل الدار
عذراء:واخا على خاطرك
ناضت رواء تسالمات معاها و خرجات اما عذراء رجعات جلسات حتى تمات داخلة كليانة جديدة و هي تنوض مبتسمة...
عذراء:مرحبا لالة اش حب الخاطر؟
الكليانة:جيت على قبل بروشينگ
عذراء:واخا اجي معايا لهنا...
رمز برج القوس هو هدا "♐" و المواليد ديالو من 22 نونبر الى 21 دجنبر
فالسما و بالضبط فالطائرة الخاصة برجال الأعمال لي جاي فيها قوس لبلادو...كان هاد الأخير جالس فهدوء و تيشوف جدول مواعيدو مع الشخصيات لي كاينين فالمغرب حتى وقفات عليه المضيفة تدوي بالإنجليزية...
المضيفة:تبغي شي حاجة مستر؟
قوس طلع فيها عينيه:لا شكرا
المضيفة حركات ليه راسها مبتسمة:الى حتاجيتي اي حاجة ضغط على هاد الزر و غنجي عندك
قوس حرك ليها راسو و هي مشات بحال هاد الكلام المتكرر مطييبو فدماغو من كترة التنقل و اللقاءات و عروض ازياء لي تتقام فمختلف بقاع العالم باغي غير يتصنت لعظامو حتى يوصل على خير حيت فكرة انه حل فرع فبلادو الأصلية مخلياه متحمس بزااف..هز واحد الكتاب تما و بدا تيقرا فيه يتلف الوقت بينما تسالاو هاد السويعات لي تيفصلوه على بلادو...
⏳بعد مرور مدة من الوقت⏳
و قدام المطار كانو الصحافة مجموعين فيه بحال الذبان واقفين تيتسناو فسيادة قوس بنسليمان يهبط..كانو حتى جرائد خرى و مجلات خاصة بالموضة و مجلات نسائية بكاميراتهوم و ميكرواتهوم و الات تسجيلهوم حتى تم خارج قوس و فيمينو و شمالو جوج ديال لباديگاردز مگلضمين دايرين نضاضر كحلين مخلية ملامح وجههوم غير معروفة و ببذلاتهوم السوداء ماشيين حاضيين سيدهوم اكيد اه حيت الصحافة فبحال هاد المقالات الصحفية تيجهلو و ممكن توصل حتال المساس بالشخص المستجوب داكشي علاش لازم من الإحتياط...
قوس غادي و هوما يبداو جايين جيهتو الصحفيين المصورين عاطيينو شوية ديال المساحة باش ياخدو صورة و فلاش الكاميرات ضارب بحال الشعا عليه و مجموعة خرى جاية تتسابق لعندو هازين ميكروواتهوم و الكاميرات باش يستجوبوه غير شافوهوم لباديگاردز واحد جا لقدام ماد يدو ليهوم و الثاني حاضي ضهر قوس...
نواهل(الصحفية لي شفنا مع برناس)سبقات حتى هي اصلا من الصباح تتسنا حتى وقفات عليه مادة ميكرو ديالها:موسيو قوس بنسليمان جريدة الأبراج تترحب بيك فبلادك
قوس وقف هاز فيها عينو و جاوبها بالمغربية:شكرا
نواهل:الى سمحتي موسيو سمعت انه غتعطي فرص عمل ل المغاربة الحاصلين على شواهد فهاد المجال
قوس تيتكلم بصرامة:اكيد قلت هادشي و انا عند كلامي
نواهل مديرونجية تيدفعو فيها صحفيين خرين بغاو يستجوبو حتى هوما:و بخصوص الإنتقال واش غيكون دائم ولا فقط مؤقت؟
قوس:هادشي باقي خدام عليه الأهم دابا تدشن الشركة لي عاد تبنات هنا
نواهل:و شنو هوما المشاريع المستقبلية لي باغي تدير....
قبل متكمل هضرتها محسات مسكينة غير بدفعة و الحشد شد بلاصتها تيستجوبوه طلع ليها الدم و مقدراتش توصلو تكمل المقال ديالها ولكن معندها مادير هدا هو مجال الصحافة الى معندكش العضام صحاح و الجبهة صحيحة و الله لا كليتي طرف د الخبز....
بعدما سالا قوس من استجواب صحفي اخور دازهوم حيت ممساليش لكترة الهضرة باقي تابعو الإفتتاح بالليل و خصو يرتاح و يوجد..اما هوما كيفما تتعرفو الصحافة راسهوم قاصح بقاو تابعينو حتى وصل قدام سيارة ليمو بيضة محلول بابها و السائق واقف تيتسنا قدامها بقاو المصورين فالتقاط الصور حتى دخل قوس ل السيارة و سد عليه السائق الباب اما لباديگاردز مشاو فطونوبيل خرى...
فلداخل ديال الليمو لي كان فخم بزااف جلس قوس و جبد التيليفون ديالو اخر مكاين فالتيليفونات و دوز مكالمة اما السائق ديمارا بدون مينطق بحتاشي كلمة ديجا كاع المعلومات فراسو...
اما عند عذراء لي كاينة فالصالون بعدما تغدات و استرحات...كانت تتقاد فاللمسات الأخيرة فمايكاب واحد البنت معروضة لواحد العرس..سالات ليها و هي ترجع شوية اللور تتشوف فيها بابتسامة...
البنت حلات عينيها دغيا و هي تشوف فالمراية لي حلات فيها فمها و هي ضور شافت فعذراء و رجعات شافت تاني فانعكاسها فالمراية...
البنت:ويلي واش انا هادي؟؟زوين بزاااف
عذراء فرحاتها:بصحتك ا حبيبة تستاهلي
البنت تتشوف فراسها و تتفرنس عجبها الحال:ما شاء الله على خدمتك راك موهبة ضائعة
عذراء:ههه حاجة عادية الواحد ملي تيبغي شي خدمة تيحاول يعطي فيها جهدو كامل
البنت:وي بصاح و انا من ليوم وقتما عندي شي عراضة نتي الاولى
عذراء بحماس:بصاح ربي خليك ا ختي
البنت:اكييد اكييد
رفيف كانت واقفة عند لاكيس تتسمع لهاد الإعجاب تيتشاير تتسنا فالكليانة تخلصها...
البنت:شكرا مرة خرى
مشات لبنت عند رفيف مداتليها لفلوس...
رفيف مبتسمة:مرحبا مرة خرى
البنت:اكيد ازين(خرجات فحالها)
رفيف جمعات الفلوس فلاكيس و سدات عليهوم...
عذراء:ياختي توحشت العراسات و الله جبدات عليا هاد البنت المواجيع
رفيف:ايوا اش تتسناي هاهواك برناس قولي ليه غير بغيت العرس و غيطلعو ليك
عذراء خرجات فيها عينيها تتفتف:ل لاا
رفيف عوجات عينيها:زعمة راك كبرتي 22عام هادي باش مخطوبة و هو وصل 30عام حتال امتى؟
عذراء:تدوي! و نتي لي عندك 23عام و باقي متزوجتيش
رفيف:انا راه معكسين ليا الوراق الضوسي باقي معلق مع هاد الخراوات ديال فرنسا زائد ديك العوجة ديال اخت سنمار لي بغاو يجمعو عرسنا فنهار واحد
عذراء:و علاش قبلتي اصلا؟
رفيف:بحالا سولوني اصلا..ايوا جربي تعارضي الواليد
عذراء تتهرب عينيها بالخوف:الله ينجيني
رفيف:ايوا تركني لارض الى بغيتي لحمك يشد لون واحد
عذراء طلعات فيها عينيها:فيا الجوع
رفيف:تتعرفي تبدلي المواضيع غير بكرشك مهم شوية و نسدو وقت كاسكروط نيت هادي
عذراء جلسات:واخاا...
وصل الليل و ساعة منتصف الليل بدات تدق فالمكان...
و فمكان بعيد على الطبقة الفقيرة و المتوسطة مكان مديور فقط ل اصحاب الطبقة البرجوازية و الغنية...كانت شركة كبيرة بزاااااف مفرشة قدامها السجادة الحمراء تتمتد من بابها الرئيسي حتال الحافة ديال الشانطي فين تيتحطو الطونوبيلات ديال المدعويين و فالجناب كاينين حواجز محددة المكان لي غيدوزو منو و من مورا دوك الحواجز كاين حشد كبير مدكس د الصحافة لي تيتسناو فرصتهوم باش يلتاقطو فالصور حتى تمات جاية نفس الليمو لي جات هزات قوس من المطار هبط منها هاد الأخير لي كان لابس قميجة فالأزرق المفتوح مزييرة على عضلاتو البارزة و سروال گري و فيدو ساعة من افخر الأنواع تم غادي بكل شموخ كيف العادة و الصحفيين تيصوورو و صوت التقاط الصور غير تيتشاير بقا غادي قوس فوق ديك السجادة الحمراء حتى وقف قدام الباب الرئيسي و هنا بداو تيبانو الشخصيات المرموقة جاين واحد مورا لاخور بسياراتهوم الفاخرة و الحلة ديالهوم الفخمة سوا نسا سوا رجال لي حطاتو سيارتو متيدوزش فوق ديك تابي غوج حتى تيشبع مع راسو فلاشات ديال الكاميرات عادي تيمشي يسلم على قوس حتى وقفات واحد السيارة هبط السائق حتى حل الباب و هي تحط واحد الرجل بيضة فوق الأرض بطالون كحل تيبري كولو احجار الماسية صغيرة و هي تخرج واحد مولاتي الزرافة قداش فالطول لابسة فستان ازرق غامق كولو تيبري بحال الموزون رادة شعرها الأسود المطلوق للور و مكياج متقون فوجهها و حلقات ماشيين مع الفستان فودنيها تحطو جوج رجلين خرين من نفس السيارة وحدة بشرتها داكنة و الثانية بيضة هبطو جوج بنات حتاهوما قداش فالطول قد الأولى نيت وحدة شهبة جامعة شعرها الأشقر القصير و لابسة فستان كحل مع الذهبي قصير و طالون ذهبي و يديها كلهوم عامرين بخواتم من الأحجار الكريمة...مولات البشرة الداكنة طالقة شعرها الاسود و لابسة كسوة گرونا بلا كمام قصيرة و من لتحت دايرة بحال شي اوراق وردة مع مكياج صاارخ فوجهها...الصحافة فاش شافوهوم مكاين غير تشاااخ تشاااخ و الصور غير تيتشايرو و هوما غاديات بكل غرور و ثقة باين التكبر من عينيهوم و شحال عاجبهوم راسهوم تيتبوزاو قدام الكاميرات حتى سالاو و تمو طالعات فالدريجات حتى وصلو قدام قوس و هنا بتلاتاهوم طلقوها بابتسامة...
قوس طلع راسو حتى هو فاش شافهوم بتاسم ابتسامة خفيفة:روبين..ليڨيا..خناثة
روبين(مولات الفستان الأزرق)غير سمعاتو نطق سميتها و هي تهمش الجوجات لي معاها خلاتهوم غير تيشوفو فبعضياتهوم و وقفات حداه:قوس...
قوس:لباس عليك؟
روبين مبتسمة:اه لباس و نتا؟؟
قوس:بيخير رتاحيتي شوية من السفر؟
روبين:وي رتاحيت متصورش قداش فرحانة و انا هنا و معاك و قدام الفرع الجديد لي سنين هادي و تيتبنا و أخيرا كمل
قوس بابتسامة خفيفة:استمتعي بالحفلة
روبين:اكيد
عطاها قوس بالضهر تيدوي مع رجال اعمال تما و هنا دوك جوجات جروها مبعدين شوية...
ليڨيا بلفرونسي:شهادشي مزال حتى مبدينا بلوس اش تتقولو مفهمت والو
خناثة جاوباتها بلفرونسي:مجرد بروتوكول ماديريش فراسك لي ضحكني هو نادرا فاش تدوي بالمغربية ا روبين(طلعات حاجبها المسموم)ياك كنتي مراضياش بأصلك ولا الى تعلق الأمر بقوس غادي تعلمي حتى ل البردقيزية(حطات يديها على فمها تضحك ضحكة المسمومات)ههه
روبين حمرات فيها عينيها لي تيخرج منهوم السم:سدي فمك دابا و خلي يدوز هاد الإفتتاح على خير
ليڨيا تتشوف فالأجواء:صافي سكتو نتوما عارفين بلي الصحفيين باغيين غير الإشاعات و كون ما كنا الطوب الثلاثة ديال عارضات شركة Bens-Naht مكناش نحلمو نجيو للفرع الجديد
خناثة و روبين جمعو الوقفة و ضارو تيبتاسمو بتصنع للكاميرات...
روبين تتنتامي لعائلة برج العقرب و هدا هو الرمز ديالو "♏" و المواليد ديالو من 23 أكتوبر الى 22 نونبر..اصلها مغربي و مزيودة ف سويسرا بحال قوس.
ليڨيا تتنتامي لعائلة برج الجدي و هدا هو الرمز ديالو "♑" و المواليد ديالو من 21 دجنبر الى 19 يناير..اصلها فرنسي و كابرة فسويسرا.
خناثة تتنتامي لعائلة برج السرطان و هدا هو الرمز ديالو "♋" و المواليد ديالو من 21 يونيو الى 22يوليوز..اصلها مغربي و حتى هي كابرة فسويسرا.
و بتلاتاهوم تيتعتابرو الطوب عارضات ديال شركة قوس تشوفهوم تقول صحابات ولكن من الداخل مكاين غير راسي يا راسي فاش تيتلاقا سم العقرب و لدغة السرطان و ضربة الجدي تيعطيونا هاد التلاتي الكارثي...
نرجعو للإفتتاح لي كان غيبدا دابا..تم جاي واحد الخدام جايب معاه ميكرو فيديه تبعو واحد اخور هاز فيدو مقص كبير مذهب وقفو قدام قوس و مدو ليه داكشي فيديه..شدو و قرب الميكرو من فمو...
قوس متضورش الضحكة فوجهو:غندوي بالإنجليزية باش جميع الحضور يفهمو..تنقدم شكر خاص لجميع الناس لي جاو يحضرو الإفتتاح ديال الفرع الجديد لشركة الأزياء Bens-Naht الليلة باقة طويلة و الإحتفال باقي طويل استمتعو..
الكل بدا تيصفق فرحان..عطا قوس لميكرو ل ليجابو و هو يشد داك المقص الكبير بجوج يدين حتى قطع الشريط الأحمر لي تيفصل الباب الرئيسي على لداخل و هنا تطلقو العاب نارية فالسما كتشييد لهاد البداية و تمو داخلين للداخل...
الكل دخل من غير الصحفيين لي رضوهوم لباديگاردز من الدخلة د الباب...
الطبقة التحتية لي هي الدخلة ديال الباب الرئيسي د الشركة كانت خياااال مجهزة لإفتتاح اليوم و لي كانت عبارة على جوج صفوفا ديال طاولات مستطيلين غاديين مع الجنب ديال الحيوط و فالجهة الأمامية ديال هاد الطاولات كاينة مساحة خاوية و فوق دوك الطاولات كانو الطباسل..الكيسان..المواس..الفرشيطات و مزيينين ب ديبوكي د الورود و الشموع و قدام هاد المكان فالجنب كانو مستفين تستيفة ديال الخدم و الخادمات لي غادي يسربيو الناس هاد الليلة و حداهوم طوالة ديال لبوفي ديال اشهى المأكولات و الذ الحلويات و اجمل التحليات و اكيد منساوش اجود انواع الخمور لي تضوموندات خصيصا لهاد الافتتاح و ل الطبقة المرموقة لي جاية ليه...
و فواحد المكان مخصص بعيد شوية على هنا كانت فرقة تتعزف بالكمان و البيانو كاستقبال لأذان المدعوين لي عاد داخلين تيتمنضرو و تيستكشفو...
الخدامين و الخدامات كل واحد مشا شاد كوبل ولا مجموعة من المدعويين تيوريهوم اماكنهوم و تيديوهوم يصووبو ليهوم كراساهوم حتى تيجلسو مع ابتسامة و ترحيب...
روبين تمات جاية تتعوج حتى وقفات على قوس:قوس..
قوس ضار شاف فيها تيتسناها اش بغات...
روبين:فين غتجلس؟؟
قوس:و علاش هاد السؤال؟
روبين:امم بغيت نجلس حداك(وجهها صحيح)
قوس بانت ليه غتبدا تاني فالحركات ديالها الخاويين و هو ممساليش لتخربيقها خصوصا و انه هادي ليلة مميزة بالنسبة ليه:غنجلس مع رجال اعمال خودي شي بلاصة من بعد الأكل غادي يبدا العرض
روبين مبغاتش:اوكي
قوس عطاها بضهرو و مشا حتى جلس فالطاولة مع رجال الأعمال و الخدم خدامين تيسربيو و لي قال ليهوم شي حاجة واش جابوها ليه و خدم خرين خدامين تيكبو و يفرقو فكؤوس الخمر و على حسب كل نوعية لي باغيها المدعو أو المدعوة...دازت ديك المأدبة تحت انغام صوت العزف حتى كلاو و تجمعو الطاولات و تنقاو كإستعداد لتقديم التحلية....
من بعد تقديم التحلية ل الضيوف حبس العزف ديال الفرقة و الأضواء لي كانو خافتين شوية ضواو بشكل ساطع فالأبيض مسلطين و مركزين اكتر على المكان الخاوي لي قدام كل طاولة و هنا دخلات فرقة خرى..فرقة لي بدات فالعزف هزات ودنين المدعوين من جو الهدوء و الدردشة ل جو الصمت و الحماس ل لي جاي و هنا دخلات واحد العارضة طويييلة و رقيقة شقراء لابسة لباس مخلط بين الحضارة الهندية مع لمسة مغربية غادة و الضحكة متتزورش وجهها ملامحها جامدة غادة و كلها تتهز من الأرض بمشية متوازنة و واثقة هازة صاك فيديها و مزيينة بمجوهرات مرافقة ل لباسها بقات غادة تتمشا و كل شوية تتوقف و دير بوز و تاني توقف و دير بوز مختلفة على لوخرا حتى سالات و ضارت مع الجهة المعاكسة و رجعات منين دخلات و نفس الشيء مع عارضات و عارضين خرين حتى سالا العرض و بداو تيتجمعو كاملين لي دازو مشكلين صف قدو قداش من جميع الجهتين و الناس تيصفقو و هي تخرج المصممة لي صممات جميع الأزياء لي لابسين شادة يد لواحد العارضة و لابسة طالون قدو قداش و رغم هادشي مقدراتش توصل لطول العارضة و غادية ضاحكة تتشير باليد الثانية اما العارضة وجهها متيتململش بحالا فيه الموت..حتى وصلات قدام الناس و بقات تحيي فيهوم بيديها فرحانة و عاجبينها ازيائها و الموسيقى المعزوفة باقة خدامة و هنا بدا انسحاب العارضات مع مصممتهم لي تدير باي باي ل المدعويين..غادية معاهوم و فنفس الوقت الموسيقى غادية و تتنقص معاهوم حتى حبسات معلنة على انتهاء هاد العرض...
☀️فالصباح الباكر☀️
كان طالع برناس فالدروج غادي للمكتب ديالو حتى تيلقا الصحفية نواهل تيديها النعاس قدامو و عينيها فيهوم الهالات السوداء من التحت...
برناس:نواهل؟؟
نواهل توگضات فاش شافتو:موسيو انا وجدت المقال
برناس حل لبيرو بالساروت:دخلي
دخلو و سدو الباب موراهوم..برناس جلس فلبيرو و هي مدات ليه الملف
برناس:كلشي موجود؟
نواهل:اه موسيو هادي الحصيلة ديالي انا و الفريق الصحفي لي مشا كاملين
برناس حل الملف:مزيان (تيقرا فخاطرو)امم هي خبر فرص العمل صحيح
نواهل:اكيد موسيو و راه كتبت ليك تما السيت ديال الشركة لي فيه المعلومات الكاملة بخصوص هاد الموضوع
برناس:اوكي نقرا هادشي و نجمع لخرين باش يتوضعو اللمسات الأخيرة باش تنشر الجريدة
نواهل:واخاا موسيو
خرجات نواهل اما برناس دفع بالكرسي حتى تحركو الروايض ديالو و حل لبيسي ديالو جبد الورقة لي فيها السيت و كتبو خرجات ليه الصفحة الأولية باللغة الألمانية بحكم انها اللغة الرائجة فسويسرا و هو يبدلها ل الفرنسية و بدا تيقلب حتى لقا اللائحة لي فيها المتطلبات المهنية لي باغية الشركة..جبد ورقة و ستيلو و بدا تيكتبهوم باش يتضافو للمقال لي غيتحط ف الجريدة حتى وصل لواحد السطر و هو يبقا لدقائق تيقرا بتمعن شوية جبد التيليفون ديالو من الحقيبة ديالو و دوز النمرة...
عذراء كانت غادة فالطريق مع رفيف يحلو الصالون في امان الله حتى تيصوني تيليفونها..شافت فيها رفيف باستغراب زعمة شكون غيصوني عليك مع هاد النبوري عذراء هزات كتافها زعمة معرفتش..جبدات تيليفونها لقاتو برناس و هي تجاوب...
عذراء:الو برناس؟
برناس بتاسم فاش سمع صوتها:عذراء لباس عليك؟
عذراء:اه لباس و نتا؟ياك لباس؟شفتك مصوني على النبوري؟
برناس:لا لا خير ان شاء الله شفت واحد الحاجة و انا نتفكرك و صونيت فالبلاصة محدي عاقل
عذراء:الله يسمعنا خبار الخير..تنسمعك
برناس عينيه على البيسي:قولي ليا عندك ديبلوم تيتبت انه تتمارسي مجال التجميل؟
عذراء:برناس معارفش قداش متحكمين فينا مالين الدار بلوس غنقولها ل الوليدة و هي تكلف و بليز حتى نتي عاونيني عمري للوليدة راسها غير بالزوين على هاد الخدمة عفاك اختي
رفيف تتشوف فيها و هي تتشوف فيها بواحد الوجه بريء و تترجاها بعينيها حتى شدات راسها:اوكي اوكييي غنعاونك
عذراء طارت عليها بتعنيقة:كنت عارفة كنت عارفة نتي راك ختي الحبيبة ختي الوحيدة
رفيف:واخا صافي ولكن شوفي الوليدة فقط فوق الوليدة متدخلينيش
عذراء جلسات:لا لا غير تهناي اجي لهنا ندخل ل السيت
رفيف جلسات حداها:اوكي زيدي نشوفو كاع
عذراء بعدما ترجمات الصفحة للإنجليزية دخلات لفين كاين طلب العمل و لقات الأسئلة بالإختيارات:شوفي هنا
رفيف تتقرا:اويلي على باسبور
عذراء:اهيا ناري هادشي فيه الباسبورات انا معنديش
رفيف:ضغطي على معنديش
عذراء ضغطات عليها:طالبين الإيمايل و رقم البطاقة الوطنية و الإسم العائلي و الشخصي و النمرة د تيليفون
رفيف:عمري داكشي
عذراء عمرات كاع المعلومات الشخصية ديالها لي طلبوها ليها مع الميول ديالها و الديبلوم لي عندها و لي معندهاش راه دارت بلي غير متوفر صافي سالات و كليكات على زر "إرسال" و تم هادشي بنجاح...
عذراء:صافي ساليت صافيي
رفيف:ايوا الله يسخر هادشي لي غنقول ليك
عذراء تتشوف فالسقف:اميين امييين
النهار داز عادي كيف ديما فالصالون وصل الليل....
فالدار ديال عذراء كانت لوليا تتوجد فالعشا و عذراء و رفيف واقفين قدام باب الكوزينة...حتى زعمات عذراء و مشات عندها
عذراء عاودات ليها كلشي من مكالمة برناس ل الطلب لي دفعاتو...
لوليا:هاويلييي يا المسخوطة بلا خبار باك
عذراء تتسكت فيها:وا لا ا لوليدة وا فهمي راه غير دفعت شكون قال ايقبلوني باش عرفتي وا صافي احمييمتك العصى لا لحمي عزيز
رفيف شافت هاد القفقافة غير غتزبلها و هي تدخل:وا الوليدة راه زعمة برناس خطيبها و ولد عائلتنا لي سيفط ليها كون ما بغا ليها الخير و عارفها خدمة مزيانة مغيحطش مرتو المستقبلية تما
لوليا حاسة بكولة سبيسيال فيديها متيتحركوش حتى بدات تشم ريحة شي حاجة تحرقات خرجات عينيها لقاتو الطاجين دفعات عذراء و حلاتو كبات ليه لما دغيا تعتق لي بقا فيه...غير ضارت و هي تهز الصندلة غير شافوها ضربوها بجرية اما الصندلة جات فالحيط...
لوليا:واخا على والديكوم هربتو شوية كنتو تخليونا بلا عشا و ديك الساعة تشوفي الخدمة...
بعدما تعشات عائلة عذراء كل واحد دخل لبيتو و تخشا ففراشو...
فغرفة نوم لوليا و جلوان...
كان جلوان تيبدل حوايجو ينعس و لوليا متكية فوق الناموسية تتخطط و تبلاني كيفاش غتجبد ليه الموضوع حتى سالا و تكا حداها...
جلوان:مغتطفيش داك الضو؟
لوليا: احمم جلوان
جلوان:اش كاين تاني؟
لوليا:خبار الخير
جلوان:شنو؟
لوليا:ليوم جات عندي عذراء و قالت ليا واحد الهضرة
جلوان عقد حجبانو:اشمن هضرة تاني؟؟
لوليا:غير تهدن كيف قلت ليك خبارك الخير
جلوان سكت تيتسنا فخبارها...
لوليا:احم المهم قالت ليا بلي طبر ليها برناس على واحد الخديمة فواحد الشركة
جلوان خرج فيها عينيه:كيفاش!!!
لوليا تتهدن فيه:وا غير خليني نكمل ليك
جلوان:و مالها الخديمة لي راها فيها صافي زاغت بغات الشركات ياك داك الصالون كاريه ليهوم بعرق كتافي
لوليا:البنت حشمانة تجي تقولها ليك و حتى برناس قال ليها تيقلبو نيت على بحالها الخدمة لي تدريها فالصالون غتديرها عندهوم نيت و راه الصالير طالع(شكون جبد شي صالير)
جلوان:و فين كاينة هاد الشركة؟؟و واش الناس مزيانين؟
لوليا:راك عارف برناس تبارك الله ماشاء الله عليه شحال ذكي و قاري حتى وصل لداك المنصب لي فيه و مغيحطش مرتو المستقبلية فبلاصة خايبة البنية تتسنا غير الموافقة ديالك نتا
جلوان بقا شحال تيفكر:واخا ا لالة ولكن هادشي الى فيه فوق 8 د العشية غنقلب الزمر
لوليا بتاسمات:لا غير كون هاني
فغرفة عذراء و رفيف الضو كان طافي و الظلام عاطي حتى...
عذراء بشوية:رفيييف
رفيف:امممممم
عذراء:زعمة غتحن فيا الوليدة و تجبد الموضوع مع الوليد؟
رفيف صوتها ثقيل بالنعاس:منعرف
عذراء بقات ساكتة تاني شحال و نطقات:رفيييف
رفيف:اممم
عذراء:تظني غيقبلوني؟ شفتهوم مطلبوش الباك يعني هادشي محتاج غير ل التجربة ماشي القراية
رفيف تقلبات باغية غير ترجع تنعس:اه
عذراء:حلف النعاس لاجاني
رفيف عصباتها:سدي فمك و عينيك و خليني نعس انا لي حالف يجيني
عذراء تكمشات فالمانطة ديالها و جبدات التيلي نقصات ليه الضو دارت ليكيت و بقات تفرج فالأنمي حتى داها النعاس بلا متحس...
☀️فالصباح الباكر☀️
بدات تتحل عذراء عينيها شوية بشوية تتبان ليها شي حاجة جالسة عند رجليها رجعات بدات تحل فيهوم تاني و الرؤية بدات توضاح ليها حتى وسعات عينيها بدهشة...
عذراء:ماماااا!!!
لوليا:نوضي تگعدي
عذراء:لفين اش واقع؟
لوليا:باك بغا يدوي معاك
عذراء شداتها لقفقافة حتال باها ولا خوتها ممعاهومش اللعب:ناري شنو درت و الله مدرت والو
لوليا:تهزي غسلي وجهك و هبطي راه حتى ضرغام و رئال حاضرين
عذراء هنا فشلو ليها الركابي:اويلي بثلاثاهوم على الصباح
لوليا:ميكون غير الخير متعطليش
خرجات لوليا اما عذراء مشات دغيا قادات حالتها بالزربة و قلبها تيضرب بالخلعة هبطات للتحت و فكل درجة تينبض معاها قلبها بخوف حتى وصلات ل الصالون فين لقاتهوم مجموعين على الفطور كانت حتى رفيف وسط منهوم عاد هزات كاس اتاي لفمها و هي تشوف الموصيبة داخلة و هي تحطو خافت بلاصتها...جلوان و خوتها طلعو عينيهوم فيها و هي تجلس دغيا بعيد شوية كإحتياط تحسبا لأي ردة فعل خايبة...
جلوان حط يديه فوق السداري تيربت:اجي لهنا
عذراء بخوف:ن ن نعام ا الوليد تنسمعك من هنا نيت
جلوان خنزر فيها و هي تهز دغيا و جلسات حداه لي ليها ليها حتال العصا تصبر ليها و غدوز المهم متجيش فالوجه...
جلوان:هي طبر ليك برناس على خدمة جديدة
عذراء بلعات ريقها:اا ااه
ضرغام لي كان دو بنية ضخمة طلع راسو مخنزر:كيفاش خدمة جديدة؟
رئال لي باين فيه دريويش شوية:مفراسي والو؟
جلوان هز يديه و هوما يقطعو الحس:لبارح لي قالتها ليا مكوم
عذراء تتقفقف:اييه ا لوليد قال ليا راه شركة جديدة عاد حلات فالمغرب و بغات لي يخدم ليهوم هادشي نيت لي تندير فالصالون قال ليا ناس مزيانين و باغيين يخدمو ولاد البلاد(بدينا فالكدوب)
جلوان:اممم و مقالش ليك معاياش تتبدا الخدمة و معاياش تتسالي؟
عذراء:ل لاا
جلوان:رئال ضور النمرة لبرناس دابا سولوو
رئال جبد تيليفونو بقا تيصوني ولكن برناس مجاوبش...
رئال:متيجاوبش ا لوليد
جلوان:واخا ماشي مشكل مهم ملي يجي ولا يدوي معاك تاني نتي سوليه
خرجو الخوت بجوجهوم لخدمتهوم و هوما يتجمعو العناصر النسوية دابا بوحدهوم...
عذراء فرحانة:ياحليلييي هههه
لوليا:راه يدي و راسي انا لي غتبوسي ماشي د باك انا لي قنعتو
عذراء:نبوس ليك يا ماما نتي حتى رجليك(ركعات بغات تبوسهوم)
لوليا تضحك:اويلي يا لهبيلة لا هههه
رفيف عاد رجعات ليها الشهية و هزات كاسها د اتاي:ايوا يا ختي كنت غير تنتسنا شي مااااق فداك الوجه
عذراء جلسات حداها عاد بان ليها الفطور:انا نيت ولكن الحمد لله عهههه
لوليا:ايوا فطرو فطرو
رفيف:ليوم مغنحلوش بغيت نستاراحو شوية
عذراء:احسن نيت
لوليا:ايوا ملي هكا كل وحدة تنوض تجمع شغلها
بعدما سالاو رفيف و عذراء شغالهوم هزات عذراء تيليفونها و هي تلقا ايمايل جاها غير شافتو خرجات عينيها طلعات بالجرا سدات عليها فبيتهوم...
جلسات فوق الناموسية و كليكات عليه كان الرد ديال الشركة على الطلب باللغة الانجليزية كان مكتوب فيه انه تجي من بعد 3 ايام باش دوز كونكور الدخول مع عنوان الشركة و مكان الكونكور و الرمز ديالها ك مشتركة...
عذراء شافت فالسقف تدعي فخاطرها:الحمد الله يااربييي
جبدات النمرة ديال برناس بالزربة و صونات عليه...
برناس كان فخدمتو تيقلب فالبيسي حتى سمع تيليفونو تيصوني غير شاف عذراء جاوب...
عذراء بفرحة:الو برناااس
برناس مبتسم:عذراء لباس عليك؟
عذراء:اه لبااس ونتااا..عرفتي صحاب الشركة قالو ليا من بعد 3 ايام نجي ندوز الكونكور
برناس:اوه بصاح فرحت ليك
عذراء:الفضل تيرجع ليك و الله شكرا بزاف منساش خيرك ا ولد عمي
برناس مكرهش كون خاطباتو بطريقة شوية اعلى من ديك ولد عمي لي تيسمعها راه خطيبتو ولكن معامن كاين:تستاهلي تنتمنى ليك حظ موفق
عذراء:شكراا ليك نخليك غتكون خدام دابا منصدعكش هه
برناس:واخاا طهلااي فراسك
قطعات عذراء و تلاحت متكية فوق ناموسييتها و رجليها تتلعب بيهوم فالسما بفرحة...
فالشركة ديال قوس كان جالس هاد الأخير فلبيرو ديالو ليكان جد عملي و رااقي فتصميمو و ديكورو تيبين قداش مولاه عندو ذوق مميز و رجولي حتى تسمع الدقان فالباب...
قوس:دخل
تمات داخلة بنت شابة رقيقة لابسة طالون عالي مع لباس كلاس شعرها مطلوق و هازة فيديها ملف...
السكرتيرة:مستر قوس
قوس طلع راسو:وي؟
السكرتيرة:مجموعة من الناس سيفطو طلبات عمل فالسيت ديالنا و الماندجر جاوب كلشي على حسب أجوبتهوم و تقرر انه من بعد 3 ايام يتقام الكونكور
قوس:مزيان فاش تجاوبو بهاد السرعة باش يكتامل عمل الشركة
السكرتيرة:شفت الجرائد و المجلات ا مستر لي داعت بهاد الخبر بطبيعة الحال غيكون تجاوب سريع
قوس:مزيان يمكن ليك تفضلي الى ساليتي
السكرتيرة خرجات و سدات الباب موراها بهدوء مخلية قوس مكمل شغالو...
⏳بعد 3 ايام⏳
و ف6 د الصباح كان لحال باقي مظلم و الصقيل على برا و الناس كلهوم ناعسين الا واحد المخلوق عجيب مركن فالركينة ديال ناموسييتو و شاعل البيل ديال التيليفون تيتسنا فالشمس طلع هل عرفتم من هو هدا المخلوق؟
عذراء قلبها غيخرج من بلاصتو:مبقا والو مبقا والو اليوم الكونكور ناري وا ميمتي
ضورات عينيها لرفيف ناعسة بكل هدوء ضورات عينيها لباب مسدود و هي تنوض مطالعة مطالعة اللهم تنوض يالاه توجد للوقت مشات حتى غسلات وجهها و سنانها و رجعات حلات الماريو و التيلي باقي مشعول البيل ديالو حطاتو فوق الناموسية باش يعطي الضو فالبيت...بقات تقلب على شنو تلبس و والو حتى حاجة ملفتات انتباهها فقررات انه تلبس عادي مادام هدا مجرد كونكور لبسات تريكو خفيف فالگري قصير خشاتو فسروال دجين بلومارين و لاحت عليهوم مونطو كحل خفيف طويل حتى غطا المؤخرة مشطات شعرها و خلاتو مطلوق و جبدات تدير مكياجها لي كان عبارة على مكياج خفيف...سالات و هي تشوف الساعة قربات 7 صافي مزيان هادي لوقيتة نيت لي تتفيق فيها مها مشات هزات واحد مولاي الصاك عمراتو بكاع الماكياج لي عندها و تتقول فراسها انه هدا كونكور و الى تزرفات و ملقاوهاش واجدة و عولو عليها تجيب ادواتها(الماكياج)عمرات الصاك مزيان شوية مدازت حتال مكياج رفيف حتى هو غير تراجعات فآخر لحظة فاش لاحظات الثقل ديال الصاك لاحت فيه بسطامها و تيليفونها و هبطات لتحت تتمشا على صباع رجليها...
لوليا كانت عاد خارجة من الطواليت باغية تصلي حتى تتشوف قدامها هاد الموصيبة فايقة على النبوري تصدمات يالاه كان يتصحاب ليها شي شفار...
لوليا:اويلي فايقة مع النبوري!
عذراء:راه دارو معايا 9:30 د الصباح
لوليا:اويلي راه يالاه 7
عذراء:مدانيش النعاس ا ماما
لوليا:دوزي تركني حتى توصل الوقت
عذراء جلسات لايحة شاكوشها(صاكها)حداها:واخا هاني
لوليا:ملي توصل 8:30 ديك الساعة سيري
بقات عذراء جالسة تما بقا فيها غير النعاس لي منعساتوش ناضو خوتها فطرو و خرجو لخدمتهوم ناض جلوان حتى هو فطر و خرج ناضت رفيف باش تحل الصالون و عذراء باقة جالسة...
رفيف:واش نعستي موجدة راسك ولا شنو امتى فقتي؟
عذراء:متسولينيش(ناضت)ماما الوقت هادي
لوليا جات هازة زلافة صغيرة ديال الزبيب:هاكي ا بنتي
عذراء شداتو عندها:فكرتيني غير نهار مشيت لوطني ا ماما ههه يمكن هاد الكونكور حتى هو غيدوز فشي قاعة بحال هكاك
لوليا:الله يسخر ليك ا بنتي ياااربي
عذراء:اميين امييين يالاه هاني خارجة بسلامة
خرجات عذراء من الدار و بقات غادية مع الدرب حتى خرجات ل الشارع شدات طاكسي و وراتو العنوان و ديماراو...
بعد مدة ديال الطريق بقات غادة عذراء و الطريق تتطوال محساتش انها بدات تتبعد على المحيط ديالها حتى وقفات الطاكسي قدام الشركة خلصاتو و هبطات...
طلعات راسها و بقات حالة فمها ويلي هادي كلها شركة بانو ليها جوج سيكوريتي قدامها واقفين بحال الأصنام متيتحركوش و مشات ل عندهوم غير شافوها تحركو...
عذراء:واش هادي هي الشركة لي طالبة كوافورات للخدمة؟
السيكوريتي كان فرنسي جايبينو من الشركة لي فسويسرا مفهمهاش ولكن الثاني كان مغربي...
السيكوريتي:قصدك العمل ك مايكاب ارتيست؟
عذراء:ا ااه اه
السيكوريتي:وريني الرمز ديالك
عذراء جبدات تيليفونها و دخلات للإيمايل:هدا؟
السيكوريتي شافو و هو يجبد واحد الماكينة صغيرة من جيبو و حطها على تيليفون عذراء لي تعجبات حتى تسمعات "تيت" و ضوات بالأخضر:يمكن ليك تدخلي
دخلات عذراء مع الباب لي تحل تلقائيا فاش حطات رجليها حداه...و كان الداخل عالم اخور بالنسبة ليها بقات غير حالة فمها كانو تماثيل كبار عبارة على مواد تجميلية بحال لبودر..العكر..الريحة و حتى السشوار و فالجنب كاين مكان كبيييير ديال الإستقبال ولكن بحكم معارفاش هاد القضية تجاهلات تمشي ليه و حتى لي كانت جالسة تما مرضاتش ليها لبال..بقات غادة حالة فمها فالتواسع و الفخامة ديال الأثاث و الديكورات حتى بدا تيبان ليها الوقت قرب و هي تمشي تتقلب على شي دروج يديها ل القاعة لي فالإيمايل لي غيكون فيها الكونكور...بقات غادة بخطوات سريعة حتى بان ليها واحد السانسور كولو زاج مشات ليه ديريكت و هي تبقا شحال قدام ازرارو معرفاتش علاياش ضغط..جبدات تاني تيليفونها تشوف الإيمايل مبانش ليها حتاشي رقم..كان المكان عبارة على اسم و المشكلة معرفاتش فين كاين هاد الإسم هبطات عينيها تاني فالأزرار و هو يبان ليها واحد الزر ماشي بحال الأزرار الخرين كان مذهب و معندوش رقم فيه نجيمة مرسومة عليه و هي ضغط عليه لي ليها ليها و عالله يكون المكان لي بغات..تسد السانسور و بقا طالع شحاال و هي تتسنا حتى توقف فالطبقة لي ختارت و تحل تلقائيا و خرجات تتمنضر كان المكان فخمممم بزاااااف و كوحدة من الطبقة المتوسطة هادشي تتشوفو غير فالأفلام المكان كان عبارة على مكان استقبال لي ديكوراتو كانت متكونة من تماثيل و نباتات و الطابع كان رخامي و خشبي جذاب و مرييح و فالمكان لي مقابل مع تماك كان المكان المخصص ل السكرتيرة ولكن مكانتش فيه كان خاوي..بقات غادية عذراء تتمنضر حتى بان ليها واحد الباب و هي تمشي ليه ديريكت و اخيرا لقات القاعة د الكونكور غير حلات الباب و هو يطلع قوس و السكريتيرة لي كانت تتشرح ليه راسهوم.....
قوس فاش سمع الباب تحل بدون اذن بدون دقان طلع ليه الدم شكون هادي ولا هادا لي يدخل عليه وسط عملو كيفاش تجرأ؟؟..فاش طلع راسو بانت ليه بنت شابة قصيرة واقفة عند الباب لابسة لباس عادي و باينة فيها البساطة من اللوك ديالها كان عارف انه بحال هاد التصرف غيجي غير من بحال هاد الأنواع لي كان متأكد انه غيجذبهوم عرض العمل وقف مطلع حاجبو و ملامح الغضب مرسومة فوجهو...
عذراء بان ليها بيرو قدااش و فيه جوج د الناس راجل و مراة و هي تبتاسم:اااه واقيلة جيت بكري الحمد الله بعدا متعطلتش(دخلات و سدات الباب موراها الآداب زعمة🤣)ياك هادي هي القاعة لي غندوز فيها الكونكور ديال الخدمة؟؟
السكرتيرة قربات منها بملامح غضب:شنو هاد الأسلوب كيفاش متهجمة على مكتب مستر قوس بلا دقان بلا اذن و من الفوق شنو تديري اصلا فالطبقة ديالو لي ممنوع على اي واحد يطلع ليها بدون اخد اذن مني ولا بدون علمو!!
قوس بغضب:كيفاش كونكور؟!اش تتخربقي نتيا و شنو هاد الأسلوب و الهمجية!!!
عذراء شافت فيه تيبان ليها راجل طوييل و عريض ضخامة فكرها غير فخوها ضرغام:اويلي كيفاش همجية انا يتصحاب ليا هادي القاعة لي غندوز فيها
جبدات تيلي ديالها من الصاك و كليكات على الإيمايل و مداتو ل السكرتيرة...
عذراء:هاكي شوفي
السكرتيرة شافت فالإيمايل و رجعات شافت فقوس مطلعة حجبانها زعمة اووه عاد فهمات:اجي معايا راك غالطة
عذراء:يعني ماشي هنا لي غندوز فيه الكونكور؟؟
السكرتيرة شافت فقوس:هادي وحدة من لي عييطنا ليهوم على ود تيست العمل مستر باينة تلفات حيت اول نهار ليها
قوس رجع جلس و باقي معصب:اوكي ديها لفين غيتقام هادشي
السكرتيرة:تفضلي معايا
عذراء:لفين؟؟
السكرتيرة:لفين كاين التيست
عذراء:اه واخا
السكرتيرة:من بعد اذنك مستر انا غنديها
قوس حرك ليها راسو و تعابير وجهو موضحة انه معاجبوش الموقف بغاها غير تغبر من قدامو و هي مشات جارة عذراء لي تتلفت حتى خرجو و سدو الباب موراهوم اما قوس متسرطش ليه هاد الموقف منين جاية هادي واش معارفاش شنو هي احترام الخصوصية زائد منطقة محضورة على العاملين فالشركة حاول ينسا الموقف و رجع كمل شغلو...
السكرتيرة غادة تتقرقب بداك الطالون طويلة و عذراء تتبان قد بنتها بداك الطول حتى دخلو لنفس السانسور و هي توريها واحد اللائحة ملصقة فحيط السانسور فوق الأزرار نيت...
السكرتيرة:كل رقم راه مكتوب اش كاين فالطابق ديالو
عذراء حلات عينيها لي فيهوم العدسات على جهدهوم:اويلييي مشفتهاااش
السكرتيرة:مرة خرى رضي البال و عودي تدقي قبل مادخلي راه التصرف لي درتي ممزيانش و بالخصوص راك انثى
عذراء:مالي اختي تنبان ليك راجل؟
السكرتيرة:افف معامن داوية مهم مرة خرى هادشي اكيد الى تقبلتي راه الطبقة 3 هي المخصصة ل لي مايكاب ارتيست و العارضات و تما فين غدوزي التيست دابا(حطات صبعها على اللائحة)هاهيا راه مكتوبة تحت رقم 3 الى تتعرفي للانجليزية
عذراء:اويلي تنحماق عليها و تندوي بيها
السكرتيرة غتشييبها ضغطات على رقم 3 و تسد السانسور عليهوم بقا غادي هابط حتى وقف فيها و تحل..خرجات السكريتيرة و تبعاتها عذراء تتمنضر تاني فالفخامة حتى وقفات قدام واحد الباب كبير بيض ضغطات على سرسار صغير حداه و هي تخرج واحد المرأة اربعينية ولكن شادة فراسها رقيقة و شعرها قهوي لابسة كلشي كحل و فالجنب ديال خصرها معلقة محفظة جلدية كحلة فيها فراشي المكياج مختلف الأحجام و الأشكال عامرة بيهوم و ادوات تجميلية اخرى دوات معاها السكريتيرة بالفرنسية و عذراء حداها فهمات شي شي لا حيت معندهاش مع لفرونسي حتى شافت فيها مولات الكحل مبتسمة و حركات راسها ل السكرتيرة لي مشات...
مولات الكحل بلفرونسي:اهلا انا سميتي شيارا و انا لي غادي ندوز ليك التيست
عذراء:ممكن تعربي؟ولا لونگلي سيلتوبلي
شيارا:ا ااه وي(عربية مبجغة) تفضلي
دخلو للمكان لي كانو فيه ناس خرين جاو بحالها يدوزو التيست كانو قلال و دراري و بنات...
شيارا مشات وقفات عليهوم و هزات لاليست:تنظن بلي كلكوم مجموعين
عذراء جلسات فوق الفوتوي قدو قداش مبعدة على لخرين و تتبحلق بانت ليها شاشة قدها قداااش فالحيط تيمشيو فيها صور العارضات و الاعلانات التجارية ديال الملابس و المنتجات التجميلية ديال الشركة بقات حالة فمها تتفرج السييدة يتصحاب ليها فالسينيما حتى...
شيارا:مادموزيل راني تندوي هنا
عذراء ضارت بدهشة:س سمحي ليا
شيارا:المهم التيست غيبدا دابا
فرقعات صبعها و هوما يدخلو عارضات من واحد الباب تيتمشاو نيوفهوم فالسما و متيشوفوش فالأرض طويلات بحال شي نخلات..عذراء طلعات راسها مخرجة عينيها واش هدا كولو طول عند بنت هادي راه ولات راجل!
شيارا مخاطبة العارضات بالألمانية:تفضلو
لي جاو يدوزو التيست وقفو و حتى عذراء لي تتقلب فعينيها مفاهماش...العارضات كل وحدة وقفات حدا كل واحد عذراء غير وقفات حداها ناري تتبان بحال النملة قدامها حيت قصيرة حسات بالعجب فهاد اللحظة...
شيارا:كل واحد فيكوم عندو عارضة دابا بغيتكوم تقادو ليهوم (تدوي بيديها)لووك جريء لووك بغيتها توصل فيه انها جريئة مثييرة قوييية بغيت هادشي نعرفو غير من مايكابها و تسريحة شعرها مفهوم؟
الكل:مفهوم
شيارا:مزيان..تفضلو معايا دابا
دخلات من واحد الباب و تبعوها كاملين غير دخلو بان ليهوم ممر كبييير و وااسع لارض ديالو عبارة على باليت كبيرة و طويلة ديال المايكاب ااه باليت!!عذراء و حتى لي جاو يدوزو معاها حلو فمهوم...بقاو تابعين شيارا حتى خرجو فواحد البلاصة واسعة كلها مرايات و فيها كراسي و المواد التجميلية و المعدات كانت بحال شي صالون فخم بزاااف
شيارا:هنا فين غادي تدوزو التيست و راه نفس المواد لي عند كلشي باش يكون تكافؤ عندكوم ساعة تقادو فيها المايكاب و الشعر و لي نال استحساني ابتداءا من اليوم غيخدم
الكل حركو ليها راسها ب اه هادي فرصة لا تعوض انك تخدم فشركة معروفة و فخمة بحال هادي!!
شيارا:نخليكوم دابا غنرجع ملي يوصل الوقت
خرجات شيارا و كل واحد مشا تيجري بالعارضة ديالو لكرسي باش يبداو الا واحد الأخت مشات حالة فمها ف المايكاب و غير ليمارك الغاليين....
عذراء عينيها خرجو:نااري عندهوم هدى بيوتي و حتى كااايلي و جيفري ستاار و ماااك نااري هادشي بزاف ناري الى ستعملتو و تهرس ليا ولا خسر ناري غنخلصو من جيبي
العارضة جلسات فوق الكرسي و دفعات بضهرها حتى هبط شوية و تكات بهدوء سادة عينيها تتسنا فالكوافورة تقاد ليها...
عذراء شافت فيها و فدماغها تتفكر:(ديك شيارا قالت لووك جريء يعني غندير ليها لوك سموكي بالقهوي و الكحل هو لي تيبيين الجرأة ديال العينين و حتى سحبة العين حتى هي ااااه و غندير ليها حتى تكحيلة عين القطة ااه حتى هي)
مشات عذراء مبتسمة حطات يديها على كتف العارضة لي حلات عينيها بهدوء و هي تفاجأ بواحد الأخت مبتسمة حدا وجهها...و هي تحرك ليها حجبانها و عينيها فدقة وحدة زعمة شنو...
عذراء مبتسمة:واخا نقيص ليك وجههك؟
العارضة بالألمانية:كيفاش؟
عذراء:مفهمتش اش قلتي؟انگليش بليز
العارضة بالانجليزية:اوكي شنو قلتي؟
عذراء بالإنجليزية:ممكن نقيص وجهك؟
العارضة عطاتها الموافقة براسها و سدات عينيها اما عذراء جبدات البرايمر و بدات تتدهن بيه وجهها باش يكوون طبقة تعزل بشرتها من الفاوندايشن و هادي خطوة مهمة...
قصة عذراء وقوس
محتوى القصة
التنقل بين الأجزاء