عبق الوجد الجزء التاسع

من تأليف Soukaina Ahnani
2021

محتوى القصة

 رواية عبق الوجد

مسحات وجهها كاتشهق بالبكا وخدات من عندها كاس العاصير بارد ترد بيه الروح وزهيرة قدامها كاتحك حاجبها ومخنزرة فيها

الشيف زهيرة: شوية دابة

حركات راسها ومسحات فمها بكم الطابلية: هادشي اللي وقع.. صافي خديت طاكسي ورجعت فحالي للدار

تنهدات كاتحرك راسها بلا حول وبعدها قالت: ايوا ابنتي شغانگولك ..قبح الله وجهك ولاكان عندك شي عقل رانا مانكسابوش ..وااااش السيد مزوج ..دااير معاك خير من باب الإنسانية وتي ردييتيه ليه ببووم زوييين وغادة كاتقلبي على المصايب برجليك

ردت كاترمش وعينيها بالدموع حمرين: انا ماقصدت والو ..كان يسحابلي غانرجعو كيف كنا قبل ولا على الأقل تبقا بيناتنا معرفة زوينة

ردت: افييين غاترجعي فيين تسحابي راسك فالباهاماس .. شتي هاد السيد واخة ماتانعرفوش عز عليا، والله العظيم وكون طحتي فشي جلاخة لازگلك اليوم هاهو معاك كصديق وغدا توليو فمومو كايمشي

خرجات عينيها: كيفااش !!

ردت: حللي دوك الودنين وسمعي مايفيدك الكيلووخة .. الدنيا دقات ولعابي سمعتي ..فاش تتاكلي الدق ومكاينفعك فوالو تتزيد على والديك حيت راسك قااصح وتتكلخي ..نتي لااااش خارجة من داركم وهازة معاك خوك وكاادبة على فاميلتك كلها فقضية زواجك ؟؟ بااش تقرااي وتخدمي وتكوني دراع لراسك بلا مايهزك حد ولا باش تبداك المراهقة وهاكيني هاكاوا .. السييد النهار اللول دوا وشرح لااش تتقلبي بين الحفااري على شي حاجة مكايناش ..وااش صعابت علك دخليها لرااسك السيد تزوج ودار حيااتو غدا ولا بعدو تسمعيه دار الولاد ونتي تيتي نيني وبكي ياك

زادو طاحو دموعها ونزلات راسها كاتبكي وتسمع لكلامها ..بقد ماهو قاصح وكايحرد ليها على الضبرة ماقادراش تگول عليه غالط ولا خاطئ

الشيف زهيرة: بااك فين نسيتييه ..ربع شهوور ديال الزواج وعمرك رجعتي عندوو ماازال.. وخوك علااش حاطاه فمدرسة خااصة وتتشوفيه غير من الليل لليل ؟ وااش بااش تخدمي على رااسك ونهاار تشوفيه تهزي لييه الراس ويگول رانا والد بنت بمياات راجل ..ولا بااش يشوفك كي الشارفة كلك تكاامش ماهازة تااازيفك مقاد، وكلو على ود من .. على رااجل مزوج

ردت بصوت نغنن بالبكا: أنا غير ...

قاطعاتها بحدة: اابلا ماتبداي تخوري عليا يرحم باك بااينة للعما شعندك لدااخل من جيهتو غير بلا ماتزيدي تكدبي على راسك.. ومن هنا نگولك ابنتي، ياغاتنسايه علك ودوري لحياتك تشوفي شنو خاصها وتعتقي لابااقي مايتعتق ..ولا شي نهار يلقاوك فشي قنت ميتة غير بالغبينة والخناين سمعتي ..ولااكنتي كاتشوفي غيير رااسك وتفكري فيه رااه ورااك مسؤولية.. ورااك باك ومك وخووك عاااد رااسك، هادو فيين رميتيهم ونتي كاتجاراي لكازا؟؟ ..فيين كان عقلك ديك الساعة داابة عااد خدمتيه


عاااد بديتي تندبي وتفيقي على رااسك؟ ويا سبحان الله ربع شهور دازت ونتي مزوجة وتلت شهور وهو مزوج عااد فقهتي بيها ؟؟..ايوااا بااز هادا مانگووول

تدق الباب وطل شاب من العاملين فالمطبخ وقال: شيف محتاجينك عافاك

ردت بصرامة:: هاانا سد وراك داك الباب

رد: اوكي شيف

خرج وسدو ونسيمة غير كاتنخصص وتمسح وجهها

الشيف زهيرة: سمعي نگولك ..قاصح حسن من كدااب، اللهم دخلي هاد الهضرة لدماغك وتتقبلي الغلط اللي درتي ولا غاتولي بحال هاديك اللي عطشانة وجاية تحفر بير فالصحرا ..عالخر لقات راسها غارقة لا ما لقاتو ولا حياتها اللي قبل رجعات ..گلسي مع راسك وفكري فحياتك كي بغيتيها تمشي

ردت كاتبكي: ماعرفتش كيفاش وليت هاكة هءهءهء بغيت ولا كرهت محمد كانت عندو ديما قيمة فحياتي وقادر يأتر عليها بزافءهءهء

ردت: الراجل والزواج ابنتي ماشي هدف ..هاادو مرحلة كاتجي فوااحد الوقت من حياتك واللي كايكون مكتبها لك هو الله ..لاكان فمكتابك بلا ماتفوتي حتا العتبة ديال الدار غاايجي هو حتا بين ايديك ..والى مكانش الله يعوضك بما حسن ماالنا غانعواجو ..الهدف هو خدمتك واستقلااليتك وطموحك ..نتي كيفاش كاتشوفي راسك من هنا لواحد العام عامين عشر سنين گااع ..ياا إما تابعة الخوا الخاوي وكلا مرة طيبي عينيك بالدموع وتنخصصي انا ماعندي زهر ماعندي زهر.. يامرا بمية راجل هازة راسك واللي وراك ومامحتاجة لحد يهزك ..فهمتي؟؟

حركات راسها وعينيها حانياهم تتبكي وتسمع

الشيف زهيرة:: ايوا يالله "ناضت وجبدات ليگاتها تلبسهم" نوضي دابة سيري لداركم ..خودي ليك هاد العشية عطلة حتال غدا ورجعي وفكري فهادشي اللي گلت لك

مسحات دموعها وناضت: لا صافي انا قادرة ن..

قاطعاتها: قاادرة على اااش طلعي ليا السكر ..سيري قبل ماتقلبي ليا هااد الريسطو ونزدق شااعلة فك العافية

خرجات مخنزرة وخلاتها واقفة كاتتنخصص ماقادراش تحبس الدموع ..لبسات حوايجها بالزربة هزات ساكها وخرجات متوجهة للدار نيشان

مكننزة على راسها وحابسة البكية والحرقة ..حتا دخلات مع الدار وگلسات فوق اول كرسي تتنهد ومخلياهم يسيلو ومع راسها واخدة حوار

"راسك الى نتا مالمتيهاش شكون هادة اللي مهتم بيك لدرجة يضيع وقتو وجهدو ويجي يلومك ويضرب ليك اخطاءك قدام وجهك نيشان ..الى نتا مادرتيش پوس لحياتك وشفتي فين المشكل شنو خاص تزيد وشنو خاص تحيد، شكون هادة اللي عندو داك التأتير القوي عليك ولا اللي غايعرفك معرفة قوية كتر ماكاتعرف نتا راسك ويگولك افلان راك مهرس من هنا وهنا صيب هنا وهنا
الى نتا مابدلتيش راسك ومازينتيهاش كيف متمني تشوفها ..كون اكيد عمر بنادم يبدل تعاملو معاك .. كلشي منك كايبدا ..كلشي بيدك نتي ..وكلشي فيدها دابة، ودموعها ماهم إلا دليل على وقع كلمات جارحة صارحات بيهم راسها ..وحطاتهم قدام عينيها مباشرة


الحياة لا تستمر .. إلا بالتجاوزات
تجاوز اخطاءك ..تجاوز ندمك .. تجاوز خوفك وهلعك في السابق ..تجاوز هزيمتك وطيش افكارك
تجاوز بعض الأشخاص حتا إن لزم الأمر ..
المهم أن تجعل للحياة استمرارية ..وتتجاوز عما سبق


على اتر نسمات الهوا اللي من البالكو داخلين ..رائحة كيك الليمون وقهوة المعطرة ..ونغمات اغنية غير مفهومة تتدندن فشفاهها بين الحين والآخر وهي تتحرك فالكوزينة بأريحية. .. لابسة دجين زرق وشوميز شيبية بكمام طوال وشعرها بباندة جامعاه ..حلات الفران وبسربيتة جبدات المول ديال الكيك اللي ريحتو انتاشرات فالدار والعمارة ككل .. بسمة رضى على وجهها المنور ترسمات وهي كاتسد الفران ..حطاتها فطبسيل بعدها قطعات منها قطع وهزات القهوة والحليب لبلاصة ليفوطوي ..حطاتهم على طبيلة الزاج الصغيرة ووقفات كاتشوف شنو خاص وفنفس الوقت كاتعيط

نسيمة: عمر ..عمااار ..اجي احبيبي تفطر واش هادا كلو لبس

خرج هاز كاسكيطة فيدو حاني عينيه وكايرمش ..زاد طولا وزادت حالتو فالتطور والتحسن الأفضل ..شافت فيه ولقات صدايف قاميجتو مسدودين بطريقة غير مرتبة هي ضحك وقالت

نسيمة: تعالا البوگوص تفطر من بعد نقاد لك ديك الشوميز، انا غانجيب لك الكونفليكس واخة

رد بلا كايحرك عينيه بجمود فالارض وصوتو تابت ماعالي ممنخافظ: بغيت گلاص ..بغيت گلاص

ردت: نشريه ليك وحنا خارجين

دخلات للكوزينة جابت ليه جبانية الكونفليكس، حطاتها على الطبلة فين بارك كاياكل الكيك وگلسات قدامو كاتكب لراسها القهوة ودوي

نسيمة: ايوا اسي عمر ..اليوم فين بغيتينا نمشيو

رمش فالطبلة ورد بعد تفكير: زو .. نمشيو زوو

وفمها عامر جاوبات: عاوتاني حديقة الحيوان، هاد المشية والرجعة للرباط كل حد ماطلعاتش لك فراسك

رد: زوو ..زوو

نسيمة: عرفتي شنو "شربات من قهوتها وقالت" غانمشيو اليوم نطلو على بابا بعدا ..ومن بعد نديك لواحد لپارك غزال شفتو البارح فالانسغرام، صافي؟

رد: بابا ..بابا!

بسمات: اييه بابا الغزال ديالي ..توحشتيه؟

سكت كايحرك عينيه فكل بلاصة وكمل ماكلتو من بعد .. وهي ببسمة قلبات عينيها التلفازة وشعلاتها على فلم دوز بيه فطورها ..

الشعر طوال وزاد تموج ..وجهها صافي وعينيها براقين وعسوليتهم تاخد العقل.. أما البسمة الشفايف حاجة خرا .. قدامها عمر اللي من غير طولو ولا كايتحاور وينطق ..كلام قليل وتعبير منعدم لكن كايعرف يخرج كلمات مختالجين داخلو


مسحات فمها بسربيتة ومسحات ليه حتا هو قائلة

نسيمة: يالله سير لبس سبرديلتك انا نجيب ساكي ونجي

ناض متاجه للپلاكار حدا الباب وهي للبيت ديالهم، هزات پوشيط سوداء طويلة دارت فيها تليفونها وبزطام صغير عاد توجهات عندو


تحنات سدات ليه السيور ورتبات ليه صدايف الشوميز ..بعدها وقفات قدام المرايا اللي فالمراح كاتشوف فراسها من الفوق للتحت وتقاد شعرها ..ستيل مختلف على اللي كانت دايرة ..مشاو الكساوي وجا بدلهم الدجين ومشا الزيف اللي كانت غير تتحطو فوق الراس تنافق بيه راسها، وكيف بغات دابة ولات بالحرف الواحد ..بسمات برضى ونزلات عينيها لعمر مادة ليه ايدها

نسيمة: يالله زييد

شد فيها ومع الباب خرجو ..سداتو بالساروت وطلعات فالاسنسور نازلين للتحت وكيف شافها العساس وقف ببسمة عريضة بشوشة وهي نطقات بلباقة

نسيمة: با الراضي صباح الخير

رد: صباح النور ابنتي ..سي عمر شنو خبارك هههه

شافت فخوها كاضحك: فرحان حيت خارجين نفوجو.. ياك اعمر

عمر: غان، غانمشيو لزوو..زوو

الراضي: ايوا الله يديكم على خير رد البال لختك ههه

نسيمة: اميين ههه، با الراضي عافاك المعلم علاش وصيتك البارح داك الشوفو فقصني ديال بصح

رد: كوني هانية ابنتي وصيت لك على واحد الراجل راه قرب يوصل.. ماتجي ترجعي للدار حتا تلقاي كلشي مقاد

نسيمة: هنيتيني والله شكرا بزاف "حلات بزطامها جبدات منو شي بركة ومداتها ليه" نهارك مبروك

العساس: الله يخلف عليك ابنتي

سدات الپوشيط وكملات طريقها شادة فيد خوها وخارجين للشاريع ولمحطة الطاكسيات مباشرة..خدات طاكسي كورصة مبركاه حداها وعينيها على الطريق حتا صونا تليفونها، جبداتو و ببسمة عريضة جاوبات

نسيمة: وي عزيزة ........ لا حنا غادين عند بابا بعدا..فاش نخرج من عندو نتلاقاو فالپارك اللي حدا مدرسة النور عرفتيه ........ غير گوليها للشيفور وهو غايعرف .....
.. صافي الزين، يالله بسلامة ههه

قطعات تزامنا مع الطاكسي اللي حبس قدام السجن ..خلصات ونزلات فحالها هي وعمر ولحانوت فالجنب متوجهين وهي كاتهضر معاه بهدوء

نسيمة: ناخدو لبابا شي حاجة؟ تدي ليه شي لعبة زوينة يااك احبيبي؟

كايرمش فجنابو وعينيه حانيهم: بابا ..بابا

نسيمة: اييه بابا هههه اجي نشوفو شغاناخدو


خدات تقديتها المعهودة من المحل وعطات لعمر بيسكوي يتلاها بيه بعدها مشاو متلجهين للمدخل ..حطات المشتريات فبلاصتها ودخلات لمكان الإنتظار، جلسات متوترة عينيها على الباب مصوبين وإحساس غريب كايلازمها فكل مرة كاتجي تشوف باها عبد الله


تحل الباب والسجناء بالنظام كايخرجو واحد ورا واحد وهي عينيها بالدموع ترققو فكل مرة شافت وجه غير وجه باها ..حتا بان ليها خارج بسورڤيت سوداء وپانطوفة فرجليه.. محسن اللحية ومقاد حالتو والبسمة اللي طالما تعودات عليها مرسومة على وجهو

ناضت بلا ماتحس ولحظنو جرات

نسيمة: وباابا خءهءهء

زيرها عندو ساد عينيه المدمعين وناطق بحنية: توحشتك ابنتي ..توحشتك

حيدات من حظنو كاتمسح عينيها ببسمة سرور

نسيمة: حتا أنا..هاد الشهر داز عندي كحل مللي ماشفتكس فيه وحتا عمر بغا يشوفك

حيدات من قدامو ورجعات لمكانها مبسمة، وهو وجه عينيه المرققين بالدموع على عمر ..مسحهم بسرعة وتوجه بارك قدامو وبحنية وهدوء نطق

عبد الله: ولدي عمر ..توحشتي باباك اولدي ؟

سكت وبارتباك كايحرك بؤبؤ عينيه جنابو ..حتا طبع عبد الله قبلة على راسو وقال

عبد الله: باباك ماتصورش شحال توحشك وشحال متمني يشوفك البطل ديالي

ردت نسيمة كاضحك: حتا هو هههه فاش كانرجعو للدار كايبقا يعاود هضرتك بوحدو

شاف فيها مبسم: شوية بشوية كايحاول يهضر

نسيمة: الحمد لله..دابة جاية لشي تلت سنين وهو فديك المدرسة بعدا تعلم يلبس حوايجو لراسو وحتا الهضرة بدات تخرج ليه، واخة كايبغي يقلد بزاف والحاجة إلى سمعها وجاتو غريبة كايبدا يعاودها هههه

رد: الله يرضي عليكم ويخليكم ليا ابنتي..نتي وخوك هوما الأمل اللي بقا عندي فهاد الدنيا


تجمعو فعينيها الدموع ونطقات بخنقة وغصة فحلقها

نسيمة ماتگولش هاكة ابابا.. إن شاء الله غاتخرج أنا متأكدة وحاسة باللي قريب بزاف

عبد الله: ردي البال لخوك وماماك ابنتي.. نتي الوحيدة اللي كانتيق فيها وعارفك غاتگدي بيهم

زيرات على ايدو بتأكيد: كون هاني ابابا فعينيا بجوج ،حتا نتا رد البال لراسك وارتاح من جيهتنا شوية هءهؤهءهء

حرك راسو متنهد بأسى: إن شاء الله ابنتي، إن شاء الله ..راجلك شنو كايعاود مازال برا

جرات ايدها كاتمسح وجهها من الدموع ودور عينيها

نسيمة: آه ..يمكن هاد السيمانة غايرجع هاكة گال ليا

كمش حجبانو وقال: طول بزاف، عساه خير.. ياك بعدا نتي مخاصك والو

ردت: كون هاني مخاصنا حتا خير.. مصروفي كامل كايوصلي وديما كايصوني يسول عليا انا وعمر وحتا بعد المرات كايجي سيمانة يشوفنا ويرجع لخدمتو

عبد الله: ايوا الله يسهل عليه واخة خاصو يلقا شي حل لخدمتو

حنحنات: إن شاء الله ..

رن جرس إنتهاء الزيارة ..حبسات البكا بزز وتعانقات معاه آخر مرة هي وعمر تحت كلمات رضاتو عليها وتوصياتو على خوها وعلى حورية

هزات بوشيط كاتنخصص وعمر مزير على ايدها وهوما خارجين ..مع فاتت الباب وتطليعة عينها شافتو ..بغضب قلبات عينيها ورجعات اللور بالزربة جارة عمر حداها وكاطل على سيارتو من ورا الحيط وعلى سنانها مزيرة

نسيمة: على لسقة تفووو

بقات مدة واقفة تتنفخ وطل ووالو واش بغا يتحرك من تما .. حتا بان ليها طاكسي وقف قدامها وقف كيف نزلات المرا اللي كانت راكبة فيه، غطات وجهها بالپوشيط وجرات عمر بالزربة وركبات ناطقة بسرعة

نسيمة: عاافاك پارك مدرسة النور

.....: واخة الالة

ديمارا وهي براحة تنهدات، قلبات وجهها للزاجة اللي اللور لقاتو باقي فبلاصتو كايتسنا ماربما تخرج ..عاد شافت قدامها مخنزرة بحدة وتتعض شفتها بعصبية


قدام پارك كبير مقسم لمراكز عديدة ومخصص للعائلات،
وقفات الطاكسي ونزلات منو نسيمة حاطة التليفون فودنها وعينيها تايقلبو على عزيزة، لمحاتها هازة يديها بجوج كاتشير عليها وقطعات كاضحك داخلة هي وعمر للمطعم مبعدة على صداع الدراري الصغار والهاراج، عزيزة هزات ساكها وبجلابتها الخزية مع فولار بيج تابعاها من اللور حتا دخلو وبركو فطبلة معزولة عاد سلمات عليها كاضحك

عزيزة: توحشتك يالالة بحالا شهر هادي ماشفتك هههه

ردت: ياك العفريتة حگلك كاتجي عندي ههه

عزيزة: وانا كرهت الالة غااسكتي سيد الحاج ولا غير هاز شوكتو للسما خاصو غير يسمع سميتك كايولي كلو يهتهت بالاعصاب

ميقات: مسكييين بقا فيا

نطق عمر: ا ا انمشيو زوو

ضحكات عزيزة حتال ودنيها وقالت: بصح الالة غانعاودو نمشيو لحديقة الحيوان

نسيمة: لا ياختي مافيا اللي يعاود يطلع للرباط طلعات ليا فراسي.. شوية وندخلو يلعب مع الوليدات منها نيت يتخالط معاهم شوية

وقف عليهم السيرڤور وببسمة قالت

نسيمة: حليب بالشكلاط وواحد لجو بارد "شافت فعزيزة" نتي شنو تاخدي

عزيزة: عصير لاڤوكا ههه

نسيمة: وعاصير افوكا بفروي سيك

حنا راسو ومشا وهي نفخات وهزات الما حداها شربات منو وقالت: ماما شنو خبارها

عزيزة: باقة هي هي غادة مع الدنيا وصافي " تفكرات شي حاجة وبسرعة قالت" وييلي يالالة قلعي الباارح شكون جا لحدا الدار

طلعات حاجب: شكون

ردت كاتويل براسها: سيدي كمال، عرفتي يالالة مللي شفتو ركابيا فشلو عليا بستة وستين كشيفة تمنصت ليه

خرجات فيها عينيها: يااكما عطيتيه العنوان فيين ساكنة راه كانعرفك

عزيزة: ويلي يالالة مالي حماقيت.. انا خفتو غير لايبقا يقلب علك ولا يشوفو الحاج شي نهار

ردت باستهزاء: ولد مو عااد دابة تفكر نسيمة ..راه قدام الحبس كايتشوا فالشموشات خليت ليه الله هو وديك الشارفة تاع مو

شهقات: وييلي شاافك

ردت بهدوء: لا، وعمرو يحلم بشوفتي مازال، هاد تلت شهور عاد بنت ليه الله يغبر لبوه الشقف


حط ليهم السيرڤور طلبياتهم ومشا مخليهم مكملين حديتهم

عزيزةة انا الالة گلت ليه باللي راك مزوجة ويعطيك بالتيساع ساعة اللي فيه شي فيه گاليا بغا غير يهضر معاك

مدات لعمر كاس الحليب بالشكلاط ونطقات: والله لاكانت ليه وجهي هو اللخر عمرو يحلم يشوفو "شافت فيها مصغرة عينيها" ونتي هاودني منك لا تمشي تزلگ لك شي كلمة ماهياش راللي نديرو فك مانعاودوش

عزيزة: وانا الالة لاش تمنصت منو غاحيت عارفة لساني مافيه تيقة اللهم ماندويش گاع

نسيمة: ايوا ربطي "هزات كاسها كاتشرب منو" ناقصيني مشاكيل يزيدني بهمو حتا هو

عزيزة: احگا الالة نسيمة واش سيدي محمد بااقي ماصونا علك

حركات راسها بالنفي وعقدات حجبانها بسهوة: شي حاجة ماشي هي هاديك كاتوقع ..من نهار مشا مابانت خبارو دازت تلت سنين دابة

خفظات صوتها: انا الالة ديك السيمانة سمعت الحاج كايتغاوت مع لالة فاطمة على هاد الموضوع، گاليها ولدك خرج عليا خسرت عليه فلوس صحيحة وشريت ليه الدار فين ساكنة ديك خيتي ومن بعد طج مابقا بان

طلعات حاجب: گولي هاكاااك.. يعني الدار الحاج هو اللي شراها ؟

عزيزة: هاادشي اللي سمعت

ردت: واللهيلا بنادم مافيه تيقة.. كنت نسحابو راجل ساعة طلع من سلالة مو خصايل الغدر لاسقين ليهم فالدم، كونما خدمتي كون مت بالجوع انا وخويا وكون بركتو من المدرسة شحال هادي

عزيزة: وقفو معاك دعاوي الوالدين أما كون علم الله شغايوقع

نسيمة: طال الزمان ولا قصار غادي يبان..ديك الساعة الله يعاونني ويعاونو حدي غانهز خويا وماما والله يعاون


عزيزة: ولفين

هزات كتافها بعفوية: نشوف شي دار فالنواحي ديال المطعم، المهم يكونو قراب ليا ولمدرسة عمر

عزيزة: ايوا الالة شغانگولك ..الله يسهل عليك وينقي طريقك من الشوك

بسمات وعينيها فلحظة لمعو ببريق أمل: امين ..ياربي كلشي يمشي كيف بغيت ونحقق داكشي اللي كانطمح ليه حتا أنا.. عرفتي اعزيزة فاش كانشوف الشيف زهيرة شادة مطعم على قدو ومسيرة عشرين واحد تحت يدها، وعندها ڤيلا قد الخلا وطموبيلة آخر ماخرج واللبس اللي كاتلبس ااشمنك البس، والله إلى البكية كاتشدني كانولي نخدم بيدي ورجلي باغة غير حتا انا شي نهار نلقا الفرصة وندير الپيسري ديالي وداري بوحدي وطموبيلتي هههه تخيلي نولي نصوگ لراسي ونبدا نوصلك للدار ونجيبك ههههه

ردت كاتتبسم: ولا ماجات معاك تي معامن تجي الالة ههههه

تنهدات من أعماقها والبسمة من وجهها كاتمحا: ماكرهتش نتهنا من گاع هاد المصايب اللي دايرين بيا..وكلشي بسباب داك الشيبة العاصية

عزيزة: سيد الحاج الالة موحاال تهناي منو ..بعدا را اليوم ولا غدا تلقايه قدامك شي صبر مابقا عندو

سكتات شوية وبعدها قالت: انا اللي غانمشي عندو بلا مايحتاج يجي ..ومنها نيت عمر يشوف ماما شوية

خرجات عينيها بخوف: ولا نااض الصداع الاالة؟؟ راه على نقشة البارح تزايد معاه سيدي نيزار فالهضرة كانو غايقلبو علينا الدار ولاو كيالفار والمش

ردت بحقد: ماكرهتش واحد يتيري فلاخر نتهنا منهم دقة وحدة يااربي " جبدات بزطامها خلصات وناضت " زيدي يالله ماحدو باقي فالدار

عزيزة: حتا لالة حورية غاتكون توحشاتكم

عمر: زوو.. مشيو لزووو

نسيمة: واخا احبيبي ارا نمسح لك فمك

مسحات ليه وجهو اللي رون بالشكلاط وكول الشوميز وشدات فيه خارجين من المطعم ..ولدارهم متوجهة



حلات عزيزة الباب ودخلات هي ونسيمة وراها، شادة فعمر وداخلين للدار وعينيها على حيوطها كادور وتتفكر.. دكريات ودكريات اغلبهم مر، والقليل فقط حلو

★وستبقى الندوب المخبأة برفق في قلبي
شاهدة على التعاسة اللي أحسست بها تحت انظارك يا جدران
حتا لو اعتُدر مني .. لن يجبرها ألف اعتدار★

عزيزة: زيدي الالة دخلي انا غانعطيك لك على لالة حورية

ردا: لا بلاش انا غانطلع عندها.. شوفي ليا نتي واش الحاج الفوق

ردت قبل ماتمشي: واخة الالة

طلعات مع الدروج ونسيمة دخلات للكوزينة اولا وببسمة مرحة عنقات لايطو حتا قفزاتها وبدات ضحك

نسيمة: هانا جيييت هههه

ضارت عندها حالة عينيها والفرحة منهم كاتقطر

لايطو: الحبيبة ديالي هههه "عنقاتها عندها" توحشتك ابنتي توحشتك

نسيمة: حتا أنا ادادا ماتصوريش شحال

-باستها فخدودها بجوج وعيونها بالدموع كايقطرو: يااك بعدا لاباس عليك عايشة مزيان

نسيمة: مللي ننقي كادعي معايا راه مناقصني والو " عنقاتها مرة خرا وقالت" هههه أنا طالعة نشوف ماما هاهو عمر معاك

نطق عمر فجأة مغوبش: ر ردي البال لخوك وماماك ا ب اب ابنتي..ن نتي الوحيدة اللي كانتيق فيها وعا عا عا عارفك غاتگدي بيهم

لايطو: ههه شكايگول

دمعو عينيها وردت: تفكر الهضرة ديال بابا وكايعاودها هههه

لا يطو: شفتوه اليوم، شكايعاود مسكين

تنهدات: الحمد لله راه كايسلك

لا يطو: الله يطلق سراحو ابنتي ويفرحنا بشوفتو مرة أخرى

ردت: اميين ..انا طالعة عند ماما ياك فبيتها

تنهدات بحزن: بحال ديما ابنتي النعاس وصافي



عقدات حجبانها بغير رضى وهي طالعة عندها الفوق ولبيتها المعلوم ..حلات الباب وريحة الصهد مزموتة والنعاس ضرباتها للوجه ..زفرات كابحة غضبها ودخلات مخليا الباب محلول كايدخل الضو ويهوي البيت، وهي ضارت للجيهة فين ناعسة وبركات جنبها بهدوء كادوز على راسها الشايب بهم الدنيا وجرحها، حتا فتحات عينيها المكمشين والهالات تحتهم وشافتها مبتاسمة ليها برقة

حورية: نسيمة؟

ردت والبسمة كاترسم على شفايفها: ماما الحبيبة

ناضت تترمش وكيف تأكدات باللي هي فعلا عنقاتها بحر جهدها كاتبكي وتنخصص ونسيمة مزيراها عندها وتبوس على راسها وايديها

نسيمة: توحشتك بزاف اماما..انا وعمر جينا نشوفوك اليوم توحشنااك بزاف

حيدات منها كاتمسح دموعها وبصوتها المبحوح قالت

حورية: شفتي باباك اليوم؟

تنهدات وقالت: آه شفتو..هو بيخير الحمدلله وكايسلم عليك

حركات راسها بالنفي: باباك كايتعدب..البارح حلمت بيه كايتخنق هءهءهء شفت الدم غايخرج من نيفووو كايگول ليا عتقيينيءهءهءهءه

شدات ايديها اللي كايترعدو وقالت بحدة: هااد الوسواس حيديه من باالك بابا بييخير حالتو مزيانة وقريب غادي يرجع لينا..نتي اماما اللي شاغلة بالي وحالتك مابقاتش هي هااديك وااش كاتسوفي كيف وليتي؟؟؟ لايطو اللي قد مك وكاتباني كبر منها والهضرة مابقاتش كاتتفرز من فمك گااع، هاكة بغيتي بابا يلقاك فاش يخرج

حركات راسها بسرعة: ا انا بيخير بييخير..غير ماشربتش الدوا "حلات المجر حداها جبداتو هي تحيدو ليها نسيمة"

نسيمة: الدوا بلا فطور كايمرض ..نوضي را عمر بغا يشوفك بدلي هاد الحاالة وديري شي ريحة زوينة، بلاتي نجبد لك پيجامة نقية

ناصت لپلاكارها كاتقلب وهي نطقات مهدودة ولا طاقة ليها

حورية: كون غير طلعتيه ليا لهنا مافيا مايهبط

تنهدات وهي كاتقلب بين الحوايج: ولفتي العزلة اماما..مابقيت عرفت شنو ندير معاك

حورية: ا ب باك سول عليا؟ .. ءء؟. ..گ گال عليا شي حاجة؟

زفرات بضيق ساكتة وتعلات تجر ليها فوطة نقية من الطاج الفوقي لكن طاح منو صندوق خشبي منقوش تفتح وطاح منو شي دهب وبرا مطوية بلا جوا

تحنات تجمعهم عاقدة حجبانها حتا لقات حورية هزات الوراق كاتفتف رداتهم بالزربة للصندوق ودارتو وراها قائلة

حورية: ع علاش تاطيري علاااش انا گلت ليك جبدي ليا شي حاجة

وقفات مطلعة حاجب وبنبرة باردة قالت: شنو داكشي مخبية وراك؟


ردت كاتنهج: واالو

ردت: دياي ياك ..من الشوفة اللولة عرفتي شنو طاح فبالي؟

سرطات ريقها مخنزرة وبتمرد قالت: راااك تجوجتي ودرتي دارك علاااش يكتب ليك البرياات ءءء؟ وحتاا هو تزوووج اللي عطا الله عطااه وولات عندو بنت شبغيتي بييه

حلات عينيها متفاجأة وفمها تلجم.. سكتات لحظة غير تتشوف فيها نظرات غريبة والأغرب هو الشي اللي جتاحها وبخطوات بطيئة قربات ليها وقالت

نسيمة: البرا اللي كتب ليا؟ نتي اللي هزيتيها!!! بغيييت غيييييير "سكتات مزيرة على فمها وكاتحاول تكبح عصبيتها قدامها..زفرات بقوة وقالت حافظة صوتها " علاش خديتيها ..علااش تاديري شي حواايج بلا معنى اماامااا علاااش

نزلو دموعها وهي تتشوف فيها بجمود وشفايفها كايترعدو: بغيتك تعيشي مرتااحة ..و وماتكونيش بحالي

ردت بغضب: اناااا عمري نكووون بحااالك عممممري "زيرات سنانها كاتنهج وضورات وجهها بسخط "

فحين حورية ببسمة خفيفة والدموع فعينيها قالت: أنا كانعرفك، عارفة شنو حاسة.. عارفة ماعمري كنت لك ام وعمرك لقيتي فيا شي حاجة بغيتيها هءهءهء ولكن مك هااكة دايرة
وتيقيني ابنتي راجلك هو اللي غايهزك من هنا ويبعدك على هاد الدياب، و ومعاه غاتعيشي فرحانة.. انا حاسة بهادشي وحتا خوك غايعيش كيف بغا

نطقات بلا ماتشوف فيها: ونتي؟

ردت مبتاسمة: غانتسنا باباك حتا يرجع ليا مرة خرا.. مابقا قدما فات

زيرات عينيها حابسة دموعها ينزلو وشافت فيها سااكتة مطولا
.. نظرة خالية من أمل أنها تحس بيها شي نهار ولا تفهم شنو عندها وشنو باغة

زيرات فكها وقبل ماتخرج من البيت حيدلت ليها الرسالة من يدها ونزلات لتحت متجاهلة مناداتها ..طوات الرسالة ودارتها فالجيب اللوراني، مسحات عينيها من اتر الدموع وبدات تاخد نفس تهدئ من روعها قبل ماتكمل طريقها للطابق الفوقي وبالظبط للمكتب ديال جدها


دقات خفيفة وجاها الرد بصوتو الخشن: دخل

دورات الپواتي وحلات الباب داخلة و على وجها مرسوم حزن واسى.. من الشوفة اللولة ليها ناض مخنزر شاد فسلهامو وشوفتها معاجباه

سي عبد الكبير: تي شجاابك هنا..مخليا دارك وجااية هن شكااين ياك لاباس

تنهدات وعينيها ماحتاجتش ترطبهم بالدموع بفضل الموقف اللي عاد خرجات منو وبقاو كايبانو مغبونين

نسيمة: جدي انا جيت نشوف ماما، وندوي معاك فواحد الموضوع

بنبرة غاضبة رد: گلللسي، جابك الله نيت كنت جااي عدك

گلسات قدامو وبصوتها المنخفظ نطقات: ياك لاباس اجدي

رد: مالابااس واالو.. دااك الرااجل عدك فيين غبر بالسلامة ؟؟؟ هاادة هو الزواج عدكم، نتسنااوكم تفرحونا وتكبرو بينا بشي حفييد ونتوما غير حاصليين تلت سنيين على گدهاا شكتو ديرو فييها

تنهدات بحزن: علاش انا كرهت اجدي ندير الولاد .. النهار كامل وأنا غير فالدار لا شغل لاوالو وزادني هو اللي بات ماصبح

نهض فيها وكايشير بايدو مغدد:: وعلاااش ماگلتيهاش ليااا مللي عاد مشا.. مخليااني حتااا داازت تلت سنيين عاد ساايق الخبااار

حنات راسها ساكتة وهو العافية تتبخ من نيوفو وعينيه جمرة شاعلين.. حتا حلهم فيها كي الشيطان وقال

سي عبد الكبير: يااكما عدكم شي مشكيل حتا ماولدتوش؟ لاكانت شي حاجة گوليها ليا رانا جدك ونلقا ليكم الحل واخة يكون فلوروپ

بارتباك ردت: ل لا لا اجدي مكاين تا مشكيل ..غير هاد الغبرة ديال سي محمد شاطناني، ماعرفت مالو واقلة عندو شي حاجة

قرن حجبانو: شعدو

رمشات مترددة ورجعات نطقات: و والله اعلم..يمكن مسافرش لفرانسا.. انا گلت واقلة فمراكش

فك حجبانو: مراكش؟ شغاايدير فمراكش

ردت: هادشي اللي سمعتو گال واحد النهار.. يقدر يكون عندو شي مشكيل تاع الفلوس تما

فجأة سكت الحاج قارنهم وساهي تايفكر يضرب اخماس فأسداس ويحك لحيتو .. وهي كي المضيومة ناضا وقالت

نسيمة: انا غانمشي اجدي، عافاك لاكانت شي خبار علمني

ضارت تخرج وملامحها رجعو للجدية.. كيف حلات الباب تلاقات مع كمارة عزيزة كاتتصنط خنزرات فيها وسداتو

نسيمة: القاعييدة هي القاعيدة بااز

حلت عينيها بصدمة: وااش سيدي محمد بصح مامشاش لفرانسا

شافت حواليها وجراتها من يدها ناطقة تحت سنانها: زيدي قداامي الشوهة زيدي



هبطو للكوزينة لقات عمر هاز تليفونها كايصور بيه ولا يطو كاتجمع العدس فخنيشة.. گلسو ساكتات حتا سداتها وقالت

لا يطو: انا غاننزلها لبيت الخزين ونرجع عندك ابنتي

بابتسامة قالت: واخا ادادا

مشات نازلة للتحت ومخلياهم بجوجات الراس فالراس ..مع غبرات قربات عندها عزيزة بفضول وقالت

عزيزة: يالالة واش داكشي اللي گلتي لسيد الحاج بصح

ردت مطلعة حاجب: كون خرج سيدك الحاج ولقاك كاتسنطي حدا الباب ديك الساعة لافكيتك هاوجهي

فركات ايديها بارتباك: و وغير خفتو لايغوت عليك ولا يتصادع معاك

ردت: كاديريهم قد راسك اعزيزة وتبداي تلوي فدوك العينين "سمعات تليفونها كايصوني وناضت حيداتو لعمر" ارا احبيبي نشوف شكون

قرات السمية وبجدية ردت: الو شيف .......... الحمد لله كلشي هو هاداك ........... "عقدات حجبانها" ياك لاباس؟ ................... واخة اشاف التمنية نكون تما ............. بسلامة

قطعات عاقدة حجبانها ورجعات التيليفون لعمر

عزيزة: ياك لاباس الالة

ردت: لا والو " گلسات قدامها " بغاتني فشي موضوع غدا خاصني نمشي بكري للخدمة

عزيزة: آاه ايوا الله ييسر ليك

ردت: امين "تنهدات وحجبانها معقودين بقلق، شافت فيها بتهكم وقالت بصوت شبه هادئ" بغيت نسولك، بصح محمد تزاد عندو ولد؟

بتوتر هربات عينيها ونطقات' ب بنت الالة

ردت: ايمتا هادشي؟

قربات ليها راسها: يالالة شلا ماوقع فهاد التلت سنين كت باغة نگولك ولكن نتي گلتي ليا مابقيت بغيت نعرف عليهم والو.. داابة كيشتي داك ولد عمو اللي كان....

قاطعاتها سادة عينيها: صاافي سكتي، تشهيت شي نهاار نسولك سؤال وتجاوبيني بلا جريدة

ردت: ا آه الالة عندو بنت

ردت: ايوا گوليها من اللول "ناضت" عمر.. اجي احبيبي نمشيو

حلات عينيها: غادة دابة الالة بقاي حتا تتغداي

ردت: لا غادة غير نتعطل وغدا عندي الخدمة بزاف.. سلمي على لا يطو والى ساليتي شوية دوزي عندي صافي؟

ردت: واخة الالة كوني هانية


نسيمة: عمر يالله احبيبي اجي

شد فيدها وهزات تليف نها والپوشيط خارجين من الكوزينة حتا نطق عمر

عمر: نمشيو لزوو

تنهدات: لا احبيبي عيانة اليوم..مرة خرا ونديك صافي

سكت وحلات الباب تخرج ساعة لقات قدامها نزار عاد داخل هي تحبس بلاصتها تتشوف فيه ..تغير كليا على اللي كان، شعرو صلع كامل هو واللحية رقاق جسمو وواحد الرجل عندو كاتعرج ..خنزرات فيه رغم الخوف اللي تخلل فيها من نظراتو المظلمة ودازت بالزربة جارة عممر وكاتنهج.. كيف دارت مع الدورة بدات تزرب كتر وتشوف وراها بخوف ووجه صفر حتا تلاقات مع أول طاكسي وطلعات مبركة عمر حداها وتتلهت .. عطاتو العنوان لحظات وقدام العمارة حبس

نزلات وطلعات للدار نيشان مطرقة وراها الباب بالساقطة والساروت عاد ارتاح بالها وهدا قلبها من الخفقان

جبدات لعمر الكاميرا ديالو عطاتها ليه هي دخلات للحمام وغسلات وجهها وعنقها العرقان بما بارد ... ماحدها باقي ماتهنات من بعض أفراد عائلتها عمرها تعرف الراحة ولا ترتاح ..ماحدها باقة بلاصتها ماعندها استقلالية ولا فلوس صحيحة يعاونوها تغبر راسها هي وخوها عمرها تكون بديك الشجاعة وتوقف قدامهم بتقة كبيرة شي نهار

زفرات من أعماقها وطلقات شعرها البني الطويل على راحتو، حيدات الشوميز بقات بديباردو اسود سميطات خفاف ودجين
..دخلات لكوزينتها وبدات تجبد المكونات باش توجد الغدا وفنفس الوقت كاتخمم وتفكر لحياتها، اللي داز واللي باقي جاي
..قطعات لاداند والبصلة والربيع خلطاتهم بيدها مع بعضهم وفمقلة دارت الزيت رومية ولاحتهم يتشحرو، هزات معلقة خشبية كاتحركهم ودماغها بلا ماتحس رجع بيها لنهار بدا الشك ياكلها.. نهار عرفات خاصها تجمع راسها براسها قبل مايهجمو عليها الدياب اللي دايرين بيها وتولي الله كريم

🎬فلاش باك🎬

دخلات لخدمتها ببسمة خفيفة تبدا بيها نهار جديد ونظرات ابتسام الناقصة متبعينها.. حيدات حوايجها ولبسات لباس الخدمة وطاقية على راسها .. عاد حلات الباب تخرج ووقفات بلاصتها قارنة حجبانها فورما لتاقطو ودنيها كلمة "گالك فرانسا لاواه النوييرج هههههه جاية تتعيق علينا بحالا ماعرت شكون هي



....: مسخوووطة نتي بالله.. كيدرتي حتا قشعتيه

ضحكات بغرور مطلعة حاجب: مالنا كلنلعو هنا.. ياختي السيد مانكدبش عليك من الشوفة اللولة ضرب ديلمي عالشعا و أصلا مكانحملش ديك خيتي تاع مرتو و حلفت تانديه ليها هههه وانا نبدا نهبش عليه هنا ولهيه

....: اييوا

ردت: هههه ايوا بالفقصة مانعست ديك الليلة ..السيد طلع جارين عليه من ديك فرانسا شي خمس سنين هادي بسباب الفساد وجا للمغرب يخدم فالتق******

......: هييييه يااختي مابايتاش فيه

ولد الق**** طلع بحالنا بحالو كايقلب شكون يك*** وتاهو يكوز ويتلوز هههههه راه دابة ساكن غافمراكش حال تما واحد البار ديال هادشي وهو القو*** ديالهم.. ولايني عامر مشاكيل على ماسمعت حيت شريكو خوا بيه وطير ليه فلوس

.....: وهانتي لك على تريكة ادومة ههههه

ابتسام: ايوا شتييي هههههه بقاات فيا غاديك مرتو مسكينة كوراها كاتعدي بخيزو خخخخخ

حلات الباب وبهدوء خرجات منو ..ضربو الطم وحدة غمزات لخرا ورجعو لخدمتهم مرة مرة تتشدهم الضحكة وهي كاتتشوا وتدورها فدماغها.. تعيا تخمم وتعاود مافهمات من تلميحهم على محمد والو سوى انو جراو عليه من فرانسا وكاين فمراكش ، هادشي هيجها من الداخل وخلا حساباتها يتعاودو من الأول

ماعرفات كيف سالات داك النهار وخرجات من المطعم تتزير يدها وطلقها حتا بانت ليها خارجة كادوي فالتليفون وصوت ضحكها عاالي كايتسمع منين ومنين ..مشات ليها و نيشان لشعرها مهبطاها منوو.. لاحت الساك وغدايد المصروف اللي بزز باش كاتكافا معاه وهضرتها عليها وشوفاتها گاع هاد الشهورة، خرجاتهم فيها كاملين حتا جاو الناس يفارقوهم عااد بعدات كاااتنهج وخلاتها طالقة حلوقها بالبكا والنحيب

🎬عودة🎬

كبات داكشي فطباسل وفوق الطبلة حطاتو هو والخبز والعاصير وفنفس الوقت كاتعيط لخوها

نسيمة: عمر .. عماار اجي احبيبي تتغدا


دازو سوايع ليل الليل وظلام الحال
..فالبالكو ديال الكوزينة وفوق كرسي خشبي كانت باركة بپيجامتها وبين ايديها الرسالة اللي خدات من مها ..شوفاتها ساهيين
وبالتقالة تترمش ..ماتنكرش باللي نخزة فقلبها كاضرب كلما تفكراتو، شرارة خفيفة كاتسراها كلما سمعات على سيرتو ولا غير اسمو، عساك رسالة كاتبها بخط ايديه وحروفها كايعنيوها غير هي ..

بضعف طلعات راسها للسما وعينيها كايبريو، خدات نفس نعشات ييه ريتها وناضت حفيانة فاتجاه بيتها، لقات عمر ناعس كيفما خلاتو طلعات عليه الغطا وتمشات للپلاكارها بالحس.. حلاتو وشافت فالبرا اخر مرة كاتأكد على قرارها ..وصلات لنقطة صعيبة، عانات باش توقف فيها وعانات باش ترجع أحلامها اللي حلماتهم واحد النهار واللي خططات ليهم ..مع كل هادا ماتنكرش ضعفها باش الموضوع كايتعلق بالقلب ..رجفات برهفة وقبل ماترجع على قرارها دارتها وسط صندوق خشبي وسداتو، حتال نهار تحس براسها باغة تقراها،
خبات الصندوق ورا الحوايج سدات الپلاكار ووسط فراشها رجعات تخشات، معنقة عمر لحظنها وساهية فالسرجم كاطيب نعاسها شوية بشوية حتا تغمضو عينيها

................

فيدها كاس القهوة اومپورطي، ضاربة دجين وزرق شوميز صفرة خفيفة على بشرتها الناعمة، شعر ساامپل على طولتو كايتحرك مع خطواتها التابتة والموزونة وهي داخلة مع المطعم ببسمة مشرقة وحيوية آسرة لكل من شاف جيهتها
حلات باب المطبخ ودخلات كاتتلقا الصباحيات وتجاوب بلطاقة ورقة وعينيها تايقلبو، حتا شافت فشاب خدام معاهم وقالت

نسيمة: منير..مابانتش لك الشيف

رد: راها الفوق اختي

ردت: واخة شكراً

رد: هانية

طلعات مع الدروج للطابق التاني فالمطعم ولباب معزول فالجنب توجهات، دقت دقات خفاف وتسنات حتا جاها الرد

....: دخل

طلات من الباب ببسمة وقالت: شيف..مسالية؟

شافت فيها وحطات الوراق اللي كانت هازة: دخلي انسيمة زيدي


دخلات وقدامها گلسات حاطة ساكها فوق طبلة الزاج وقالت بهدوء

نسيمة: وي شيف، البارح گلتي ليا الموضوع مهم

زهيرة هزات وراق من فوق المكتب وقالت بلا ماتشوف فيها: فعلا "ناضت من بلاصتها وگلسات فالكرسي قدامها حاطة ليها دوك الوراق قدام انظارها"

الشيف زهيرة: Art Cof.. هاد المطعم عاد شريتو فمدينة خرا وناوية نخليه خاص غير بالپاتيسخي.. جا فوقع زوين، درت ليه ديكور و فينيسيو زوينة ..بقات خاصة حاجة وحدة ..شيف يتكلف ليا بيه

رضات ضهرها ورا الكرسي ونسيمة طلعات فيها عينيها تاترمش و تتمتم: ا أنا.. و ولكن اشيف انا ماغانقدرش..

قاطعتها: نتي طموحة انسيمة.. والى بغيتي تقدري غاتقدري عارفة راسك قاصح ، زيد عليها الخلاص ديالك ربعة المرات ديال داكشي اللي كتاخدي هنا

حكات عنقها بتوتر: واخة هاكاك.. ماحاساش براسي مستعدة نسير پيسري على قدها مازال مكانعرفش

ردت' عندك الوقت تتعلمي.. غاناخد ڤاكونص يوماين بنتي الكبيرة غاتولد ومحتاجاني حداها

ببسمة خفيفة قالت: الله يفك وحايلها على خير

ردت: امين.. اللي بغيت منك هو تاخدي بلاصتي فهاد اليوماين.. ممكن تغلطي شي مرات وشي مرات دوخي وماتعرفي كيفاش تتصرفي.. ولكن غاتعلمي، كلنا من الاغلاط تعلمنا

سكتات كاتشوف فدوك الوراق وترمش بحيرة.. خطوة مربحة جات فوقتها وغاتوفر عليها بزاف ديال الطريق والجهد والفلوس، شافت فيها بعد تردد وواخة الخوف من التجربة مجتاحها زيرات راسها و قالت

نسيمة: واخة اشيف .. انا موافقة

بسمات وناضت رجعات لبلاصتها: كنت عارفاك غاتبغي، دابة باقي كانقاد فيه شي حوايج فالمطبخ، و بعد جوج سيمانات هاكاك وجدي راسك للسفر

هزات الوراق تتشوف فيهم: فين جا هاد المطعم؟

ردت: جا فكازا ..بالظبط شارع الاناسي


وسعات عينيها وقبل مادوي قاطعاتها زهيرة: عاارفة شغاتگولي "عقدات حجبانها " كازا راها طويلة وعريضة احتمال تشوفيه ويشوفك قليل بزاف ..وزايدون تلت سنين فاتت الله يجعل البركة شبغيتي فيه مازال

ردت: انا مادويتش عليه.. غير بغيت نتفادة المشاكل

شيف زهيرة: هادي فرصة ماغاتلقايش بحالها.. تستاهل تنوضي عليها المشاكل

شافت فالوراق مرة خرا.. زفرات وناضت مقطبة حجبانها

نسيمة: نفكر ونرد عليك

ردت: ماعليش.. غير هو فكري بعقلك باش تعرفي الإختيار الصح ومصلاحتك فين كاينة

حركات راسها: صباحك مبروك

خرجات نازلة مع الدروج وتتحك عنقها، عقلها تشوش ولنصفين تقسمات جزء باغي يقبل وجزء ممستعدش لخطوة بحال هادي

لبسات حوايج الخدمة والحظاش بجدية مرسومة بين حجبانها، للپوطاجي ديالها الخاص توجهات وقطعات أول ورقة شافت الطلبية وبدات فتحضيرها وعينها كل مرة على شغل واحد فيهم وكل مرة تهضر وتعلق على شي حاجة " نقص عليها كتر باش ماتقصاحش ..امين سربي يدييك طلق طلق طلق. .. العجينة مرخوفة بزاف زيدي تقليها ..برااڤو عليه زيد ليه شوية الصوص من الجناب .. حطي هادو على برا .. هاادة وجد هااك "

فمها وايديها مارصاوش طول ساعات العمل، منها شيف منها مراقب منها مصحح للأخطاء اللي تايديرو، حتا ضربات الربعة ونص عاد خرجات منها تنهيدة راحة ودخلات بدلات حوايجها وخرجات


★وصلات للدار حلات الباب ودخلات شادة عمر كاتزفر بعياء ورجليها بالحريق كايوزوزو..

بدلات حوايجها بديال الدار وبدلات لعمر حتا هو ..وجدات عشا خفيف دخلاتو لبيتهم وفوق الفراش كلاوه بجوج وبالعيا اللي فيها حطات الطباسل حداها مافيها اللي يعاود ينوض
زيرات عندها خوها وطاحت دودة مابقات طلعات الراس

دازو سوايع متعمقة فنعاسها والشمس يالله كاتگول بسم الله فالشروق، حتا صونا تليفونها على غفلة فيقها قافزة ومخسرة ملامحها للإنزعاج ..ضارت للمگانة وعينيها بالنعاس كايتلسقو لقاتها الخمسة ونص تاع الصباح خنزرات وهزات التليفون مجاوبة

نسيمة: االو "رمشات عاقدة حجبانها وناضت باركة" شنوو؟؟ ....... ااش وااقع ؟ عزيزة حبسي البكا باش نفرز كلامك.. بلاتي بلاتي

ناضت من حدا عمر باش ماتفيقوش وخرجات للمراح: دابة هضري مالك؟ .... "سكتات كاتسمع وشوية بشوية كاتوسع عينيها المدمعين مصدومة ووجهها تبدل فيه اللون ناطقة بشفايف كايرجفو" م مات !


" يا أيتها النفس المطمئنة ارجعي إلى ربك راضية مرضية فادخلي في عبادي وادخلي جنتي "

بقلوب مكوية بنار الفراق.. وعيون ظلامو فيهم دموع الالم وخنقة الصدر.. بوجه لونو ناشف فاقد جزء من الحياة وصوت ملجوم مابقا بغا يخرج

هادي كانت حالة الغالية اللي وسط صالون الڤيلا باركة، لابسة حق الله وشادة زيف بيض بين ليگاتها الببيضين كلما سالت دمعة من وجهها الشاحب تهزو بهدوء وتمسحها، حداها باركين العيالات كاييقراو القرآن ومن أول سداري لآخرو كلشي عامر شي يبكي وينوح شي يدعي ويصبر وشي ساكت ويسمع ..البيض ولا لباسها .. والظلمة ولات فعينيها.. مشا الباشير الزوج.. الرجل الحكيم ..مشا الحبيب الحنون ..مشا المغدور المظلوم وخلا وراه ناس بفراقو كاتشوا


برا الفيلا عمر بصف طوييل من الطموبيلات انواع ولوان حتا مابقا فين يزيدو.. الحباب من كل بلاصة جاو يعزيو واغلبهم جايين من فاس.. وسي محمد بتيشورت سوداء دجين اسود وكاسكيطة سوداء على راسو واقف كايتلقا التعازي، اسود فاسود والسواد تحت عينيه مرسوم كسواد عينيه المجروحين .. صوتو باح بارد مرة يدوي بيه مرة يكتافي بتحريكة تقيلة من راسو، بان ليه رجل أربعيني لابس جلابة بيضة والشيب فشعرو وجزء من لحيتو، جاي كايتلقا التعازي بدورو يرد حتا وقف قدامو وقال

عبد الجليل: صونيت عليهم اولدي.. شي نص ساعة و يجيبوه

حرك راسو متنهد ورد: التقدية علاش وصيت وصلات

رد: كون هاني سيفطت فيروز ديها للطيابات "طبطب بايدو على كتفو وقال متنهد" الله يرحمو.. ماعندنا مانديرو من غير الصبر، عارف الدقة قاصحة عليك وحتا الواليد كانت معزتك عندو كبيرة، الله يعوض محبتو صبر

رد ساهي: الله يرحمو ويغفر ليه

عبد الجليل: انا غانمشي نشوف الواليدة كيف بقات

حبسو بيدو نااطق بطلب: دواها عافاك ماتنساهش

رد: كون هاني

مشا وخلاه واقف بلاصتو والنااس تتقرب ليه تعزي وتجمع وتصبر وهو حس الخاطر مابقا عندو .. خرجات طاكسي صغيرة من الدورة ووقفات قدام باب الڤيلا، حول ليها عينيه فهدوء مصغرهم حتا تحل الباب وخرجات عزيزة كاتنتاحب بالبكا وعمر فيدها مفاهم والو

ركز شوفاتو على الباب وشافها حتا نزلات بجلابة كحلة وزيف على راسها محطوط شادة كلينيكس فيدها وكل مرة تحاول تحبس دموعها يزيدو ينزلو والخنقة فنيوفها، تبعها بعينيه وهوما داخلين للڤيلا حتا حبسات وضارت كادور عينيها العامرين دموع بين وجوه الرجال اللي واقفين وتقلب، لكن ماليه اتر

عزيزة: هءهءلالة انا غاندوز للكوزينة عند ختي حياة نشوف فاش نعاونها عاد نجي عند لالة الغالية

ردت بتحريكة من رأسها وشدات فعمر داخلين وللصالون متوجهة


مع دخولها وشوفت الغالية كيف الحزن حايمين عليها انهارت بالبكا وكملات على الدموع اللي طيحات فربعة السوايع ديال الطريق، طلقات عمر ومشات ليها محنية باست راسها ويديها وعنقاتها بحراارة تتصبر راسها وتصبرها..

تنهدات الغالية ووقفات بتعب مبادلاها العناق وتتحرك ايدها بهدوء على ضهرها ودوي بصوت عيان ماليها جهد

الغالية: ماتبكيش ابنتي..لينا الصبر

شافت فيها ووجهها بالدموع حالتو: الله يرحمو مسكينءهءهءهءه ماشفتو حتا الشوفة ولا طلبت منو السماحةءهءهءه

تنهدات وقالت: كان مسكين ديما كايجبدك فكلامو.. ربي نزل عليه العافية فهاد التلت سنين ناض لحرفتو ودار محلات كبار فالسواق حتا گلنا صافي صحتو رجعات كي كانت "كملات بصوت عيان" مكناش ابنتي حاطين فحسابنا باللي اجلو قرب، عاد ابارح كنا مجموعين كلنا كانضحكو حتا حط راسو على المخدة ودا مول الأمانة امانتو

مسحات وجهها تاترعد وشفايفها رجفانين: كان راجل مزيان، الله يجعل متواه الجنة يااربي هءهءهء

تنهدات: اميين

خرجات عندهم حياة حتا هي كحال الحاضرين نازل عليها الضيم، سلمات على نسيمة وقالت مصبراها

حياة: الله يرحمو ابنتي ويصبركم

ردت: ياربي آمين

حياة: لالة الغالية.. راه جابوه گالك سي محمد تعالي خرجي عندهم

شافتها نسيمة بحالا غاطيح وشداتها بالزربة مخلوعة: مي الغالية مالك

ردت بفم ناشف: مابقا عندي جهد

نسيمة: شدي فيا نخرجو بجوج

قبطات فيدها وحياة من الجيهة لخرا شداتها وتمو خارجات لبرا مع بعض العيالات..

لقاو سيارة نقل الموتى اللي كان فيها الباشير مكفن واقفة قدام الباب وحداها حفادو سي محمد ومروان اللي صغر منو بسنوات قليلة..وولدو الكبير عبد الجليل

قرباتها لباب السيارة و بزز باش حبسات دموعها هي والغالية والكية فقلبهم من فراق هاد الراجل ..حنية الجد عرفاتها معاه.. الصدر الحنون والمعلم الحكيم فكلامو.. المرح اللي ديما مضحكها والسخي اللي عمرو نساها فهداياه ..فراقو صعيب وصعقة ماتيقاتهاش لاهي لاكل من كانو يحبوه


تدفن الميت صلاو عليه دعاو وكلاو اللي قسم الله عاد كل واحد مشا لشغالو
ضلام الحال والعيالات اللي من العائلة القريبة فالصالون باركات كاين اللي غير ساكت تايخمم واللي كايوشوش ويجمع بالهمس

فالقنت گالسة نسيمة بهدوء شادة فيد الغالية وساهية قدامها.. بالمقابل معاها گالسة مريم شادة كلينيكس تتمسح بيه نيفها وحداها باركة خالتها ومها .. مرا شرانية من عينيها اللي غير تايضورو وعقودية حجبانها وكل مرة تتحرك بحالا فيها الحناش .. صبرات حتا عيات ونغزات بنتها قائلة بهمس

الدريسية: نوضي معايا للباب ندوي معاك خاصني نمشي

ردت تترمش بحرج حواليها: بقاي مازال اماما حشومة تخلي الناس

تحت سنانها جاوبات: عييت من الصباح وانا هنا صافي السيد مات الله يرحمو درنا الصواب وجينا.. نووضي قدااامي

ناضت معاها بانصياع والدريسية توجهات عند الغالية تودعها وبحزن مصطنع تحنات عليها تتبكي وتردد

الدريسية: الله يعوض محبتوو صبر اخيتي مشااا العزيز وخلانا مكويين

تنهدات وقالت: الله يرحمو ويوسع عليه ..بقاو معانا مازال

الدريسية: والله اخيتي مانصيبو راك عارفة الدرية عندي مازال تتقرا هي وخوها خاصها الصباح بكري تمشي لمدراستها

الغالية: ايوا الله يعاونكم اختي، سلمي على الدراري ومول الدار

الدريسية: مبلغ اخيتي الله يعاونك "شافت فنسيمة وبقات كاتحقق فيها بفضول قبل مادور وتبع بنتها وختها .. وصلو للباب خرجو لقامو وضارت ليها مصغرة عينيها وناطقة بشك

الدريسية: هاديك اللي باركة حداها بحالا فايت شتها فشي بلاصة لا؟

مريم: ه هاديك نسيمة جات تعزي هي وخدامتهم

وسااعو عينيها بصدمة وبلا ماتحس غوتات: اااويلس، داابة صحييبة رااجلك القدييمة بلااا حشمة بلاااا حية كاااتجي عدكم واانااا مافخباااريييش

مريم شافت وراها مخلوعة لايسمعهم شي حد و الخالة نطقات بصوت خافت: الدرييسية دوي بشوية راا غايسمعووك الناس، ومااصحيبتوش هااديك تي ماالكي تتكبري ليها الشااان

غوتات كتر: ويسمعوووني.. هاادي اللي مرات ولدهم داايرينها كي الپورتكلي ماراعااو ليها مااحتارموووها فاااش دخلو ديك الشاايطة لدارهم، وزادت ديك الشاارفة مبركااها حداها وقداام عينيا

مريم: مااما عاافاك سكتي رااه السيدة مزوووجة وتايعرفو عاائلتها واش يجريييو عليها؟؟؟

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.