شهوة ملاكم الجزء السابع

بقاو اشراق كتغني بكل حب و احساس.. و عينيها فعينيه.. غير سلات ابتاسمات ليه ابتسامة خفيفة .. كتحاول تلخص بيها كاع ديكشي باش كتحس و هيا براسها مفهماهش ..

بداو كاملين كيصفقو علييها و سيف كيصفر...

ايمان(باعجاب) : صوتك واعر حمقني

هناء: عجبني بزااف كيدخل القلب برافو عليك

أركان(بغزل) : كان كيسحابلي غير عينيك لي كيسلبو الواحد صدق حتى صوتك كيخطف القلب

غزل اركان خلا اشراق تزنك بالحشمة.. علات عينيها فأديب لقاتو عطاهوم بضهر..

حدرات اشراق عينيها على اثر هضرة أركان و نطقات بحشمة : شكرا على المجاملة

اركان : قلت غير لي كين(بمزاح) كلك على بعضك حيلو

سيف : صراحة خطير.. مفكرتيش تشاركي فشي مسابقة.. انا متأكد غتمشي بعيد

اروى : وي بصح صوتك زوين مي مسلبنيش.. حيت بالنسبة لي صوت بيبو ديالي احلى صوت..

دخلات كوثر محملاش أروى: وابعدا هوما عندهوم صوت زوين.. كيت لي غير كيدوي كيصدع فلودنين

اروى : ايكسيوزمي دويتي معاي

دخلات اشراق حيت شافت كوثر معصبة خاصها غير معامن تشعل..

اشراق (بررود) : كلها و دوقو و ممحتجاكش تشكري صوتي حيت مكيهمنيش رأيك

تدخل عصام حيت باليه هضرت اشراق غتزيد تشعل البلان ..

عصام : هناء شنو لعبة لي قلتيلنا

ايمان : اه ا هناء شرحيلينا اللعبة..

هناء : بون لعبة كلشي كيعرفها.. اكسيو فيغيطي

مروة (بحماس) : اه نبداو كتعجبني

هناء(هزات القرعة ) : وي دبا نبداو اللعب ..

كوثر : اه نبداو ..

اروى: بلاتي بلاتي نعيط لأديب يجي يلعب معانا مجاتش يبقا بوحدو..

هناء: انا نعيطليه

اروى زربات عليها: غير خليك انا نوض نعيطليه ..

نقزات اشراق: غير خليك إلى جيتي تنوضي غتنوضي قوم و ايمان حاملة مجاتش.. انا فطرف قريبة

معتز (باستهزاء) : خليو مولات طرف تكلمو

اركان خنزر فيه و دوا بشوية باش يسمعو غير معتز

اركان :من ايمتى كدوي مع البنات هكا

معتز :من ايمتى كتدخل فهضرتي (غمزو)

اركان : منغمتنيش هضرتك(غمزو) رد بالك

معتز : ياكما طحتي

اركان :مالها بير

--

عند أديب... مشات عندو اشراق .. لقاتو ساهي كيشوف جيهت بيسين..

اشراق (حنحنات ) : ادييب

أديب: وي

اشراق : اجي تلعب معانا.. كلشي كيساينك

أديب: غير سيري مغنجيش

اشراق : حشومة غير اجي

أديب(بعصبية مكيبينش) : واقيلا راني دويت معاك ..

اشراق : راه بلاصتك كتبقا ناقصة.. غير اجي ..(بحزن) اصلن مبقالك والو و تمشي .. على الأقل استغل هاد الوقت معانا..

اديب: على اساس كيهمك وجودي.. براكة عليك غير ناس لي كتسلبيلهوم لعقل..

يلاه جات تجاوبو.. لقات اروى قلزات وسطهوم..

اروى : شفتكوم تعطلتو جيت نشوف علاش مجيتوش..

اشراق: لقيتينا جاين ..

أديب: غير سيرو انا عفيوني ..

قربات منو اروى حطات ايديها فوق صدرو كتلعب برؤوس أصابعها ...شي لي خلا اشراق تحل عينيها بصدمة من وقاحتها.. زيرات على يدها كتسنا تشوف رد فعلو

عند أديب لي محملش تصرف اروى حيت حس بلي كديرها بلعاني..

هبط يديها: مراشقاليش ا اروى غير سيرو

كملات هضرتها بدلع: عفاك كنطلبك يلاه ونسنا متخليناش بوحدنا.. شوف راه غنحرش عليك هناء و نديرو مضاهرة ...

أديب: اروى عفاك معندي gانة

حطات ايديها على حنكو و قالت: ممفاكاش معاك تا تجي

هبط ليها ايديها : صافي غير سيرو انا جاي ..

بقات اشراق كتشوف فيهم و الجنون راكبينها كيفاش كتقيس فيه كيف بغات ... منين جابت هاد الجرأة كاملة .. ميمكنش تكون هادي مجرد صديقة طفولة شحال متشاوفو ... بالنسبة ليها تا وحدة من غيرها ما من حقها تقرب ليه...وخا بان ممرتاحش و معجبوش الحال و بعدها و لكن ماخاصهاش تقرب ليه.. مخاصوش يسمح ليها تمادا..

بقات كتفكر و تعاود..علاش تعصبات علاش مكتحملش شي وحدة تقرب منو.. علاش كتعصب فاش كتشوفها معاه..

خنزرات اشراق فاديب و حلفات تاتخليه يدوق من نفس الكاس..زادت من حداه مبقاتش شافت فيه..

هناء: اووو أديب جيتي دونك دابا نبداو ...

دورات هناء القرعة و جات فسيف و أروى

سيف: اكسيو او فيغيطي؟؟

اروى: فيغيطي؟

سيف: كاين شي شخص فحياتك دبا؟

اروى: مكاينش و لكن.... ( شافت فاديب و قالت) القلب عامر

عصااام : اووووه ضاااع من يدي تيتيز.. و انا لي كنت عاد ناوي..

مروة(محملاتش هضرتو ) : سكتنا خلينا نلعبو

همسات اشراق لكوثر: كتقلب عليا نوض ليها هدي و الله

كوثر: برديي و نتي مالك

خنزرات فيها اشراق و قالت

دور سيف القرعة و جات فهناء و معتز ...

هناء: اكسيو او فيغيطي

معتز: اكسيو

هناء: اممممم اك.....اطط نفكر.......نوض دير ثلاثين طراكسيو دبا

معتز: دبا؟؟؟

هناء : اه

ناض معتز و نفد لي عليه و رجعو جلسو و دورو القرعة و جات فعصام و إشراق و عصام لي خاص اسول و ختارت فيغيطي

عصام: أكبر غلط درتي؟؟

بقات اشراق ساكتة لمدة و نطقات كشخص بدون روح: معرفت قيمتو حتا فات الفوت ... و بسبابي ضاع من بين يدي ..

لبنات كاملين : اوووووووه

عصام(باغي يأكد شكوكو): شكون؟؟

اشراق: عندك الحق فسؤال واحد ( و مدات ايديها دورات القرعة )

جات فيها و فأديب

اشراق : اكسيو او فيغيطي

أديب: فيغيطي

اشراق: شنو الحاجة لي ممكن تخليك تراجع على سفر

أديب: حتا حاجة قرار و خديتو

دور اديب القرعة جات هد المرة فإيمان و مروة

ايمان: اكسيو او فيغيطي؟؟

مروة: فيغيطي

ايمان: تقدري شي نهار تزعمي و تجي الخطوة الاولى منك لشي شخص كتبغيه و تعتارفي ليه ؟؟

تزنكات مروة و حاولات ما امكن تبين راسها عادي و قالت: معرفتش...مزال موصلت لهد نيفو فحياتي..... مي يمكن نقدر نبين إعجابي مي باش نزعم و نفرض راسي جامي ...

دورات مروة القرعة و جات فسيف و كوثر

سيف : اكسيو فيغيطي

كوثر : فيغيطي

سيف : شنو احسن حاجا طرات معاك

كوثر (بحب درعات اشراق لي كانت كالسا حداها ) : تعرفت على اشراق .. كانت احسن حاجا

شافت فيها اشراق بحب و كتافات تبتاسم ليها..

دورات كوثر القرعة و جات فمعتز و اركان..

معتز :اكسيو و لا فيغيطي ..

اركان : نبدلو شويا من فيغيطي غنختار اكسيو

معتز (بشر ) : بوس اشراق

كلشي طرطق عينو فمعتز.. لدرجة كوثر مشعراتش براسها و طلقات واحد ضحكة دشيخات نيت..

اروى(بحماس صفقات) : اووووه تحدي واعر خسارة مجاش فيا مع حبيب قلبي

هناء خنزرات فأروى باش تسكت

اشراق محملاتش انو داروها تحدي يلاه جات ترد عليه حتا كتصدم من اركان لي ناض وقف قاصدها

اشراق(وقفات بعصبية ) : باااااركة راني ماشي لعبة باش ديروني تحدي.. اللعب فيه و فيه.. هادي ولات ضسارة ماشي لعب..

اركان : كالما غير تهدني.. راه كنت غنبوسك غير فراسك ..غير باش نفد الحكم و صافي .. دونك متخديهاش بحساسية

اشراق: جداك انا باش تبوسلي راسي ... اش بيني و بينك.. هاد اللعب دوالو مكنحملوش

عصام: تهدنو تهدنو..

اروى : بي كول.. راه غير لعبة هادي مقصد والو

هناء : معتز مكانش عليك دير هكا.. راحنا فالمغريب ماشي لوغوب

اروى :على عقلية شحال قديمة ..

كوثر : مالها كيف جاتك عقليتنا

تدخل عصام قبل متزبلها اروى و تنوض روينة

عصام : صافي موقع والو

اشراق وقفات: تصبحو على خير غنطلع نعس

اركان شد فيدها: واش تقلقتي كنعتادر

اشراق: مكاين لاش دنب ماشي ديالك..

هناء :متقلقيش راه غير لعبة كلسي نكملو

اشراق: لا عيت غنطلع نعس

كوتر :حتا انا

أديب ناض: تصبحو على خير

ايمان: ساينوني حتا انا عيت

عيطات مروة لأديب

مروة : اديب صبر عرفاك مطلعش بغيتك

اديب (باستغراب) : بغيتي شيحاجة

مروة (بتوتر ) :عصام اجي حتا نتا... بغيت ندوي معاكوم(شافت فلخرين كيشوفو فيهوم) على انفراد...

اديب: وخا...واش دبا؟؟

مروة : وي ضروري موضوع ميتأجلش

عصام : واخا يلاه نمشيو و نهضرو فطريق..

أديب: إلى مكانش ضروري خلي لغدا

مروة :سي ضروري تعرفو

عصام: شنو واقع؟

مروة: نكلسو فالقهوة و نهضرو

.....

عند كوثر غادا و كترعد بالبرد و كتحاول تسخن راسها بايديها...بقات معطلة كتساين ايمان.. حتا يطلعو بجوج مي ايمان تعطلات كانت داويا مع راجلها فطيل

بقات على داك الحال حتا حسات بشي حاجة تحطات فوق كتفها ...

هزات راسها و لقاتو سيف لي دار عليها تجاكيتو

كوثر(بتاسمات): شكرا

سيف: العفو....مرة جايا لبسي مزيان

كوثر بابتسامة: مكانش كيصحاب ليا ايكون البرد بزاف.....المهم شكرا

رد ليها الابتسامة و بقاو غادين

----

عند الباقي تفرق المجمع كلها مشا لبيتو يرتاح

---

عند معتز و ياسمين

غير دخلات و مشات نيشان تبدل حوايجها...كتحس براسها كيضرها باغا غير تنعس... هاد ايام محساش براسها مزيانة.. معندها خاطر و ديما فيها نعاس.. و حالتها حالة.. كتحس براسها مسخسخة...

غير دخلات مشات لكوافوز باش تمسح المايك اب ديالها و معتز واقف موراها كيبدل...

معتز: سالي و اجي باغيك هد الليلة

ياسمين: معتز عيانة و الله خلي لمن بعد.. حاسا براسي ماشي حتا لتما..

معتز(بعصبية ) : كنآمرك ماشي كنشاورك

دارت شافت فيه و قالت بترجي: و الله حتا مريضة عفاك رحمني هد الليلة مقاداش.. حاسا بخاطري مروع..

دارت باش ترجع تكمل مسيح المايك اب ديالها و بلاما ترد البال فاش دارت دفعات باغفان ديالو و طاحت الارض تهرسات

معتز بعصبية: شنوووو درتيي أ ال79بة

ياسمين(بخوف) : مششفتهاش والله مشفتهاش.. مدرتهاش بلعاني

قرب ليها شدها من شعرها جرها وقفها و زير ليها على فكها و نطق: هرستيها بلعاني ياك...درتيها بلعاني

ياسمين:( الدموع تحجرو فعينيها) لا و اللهما بلعاني راني عيانة و الله و مرديتش البال سمح ليا

معتز: زير عليها .. ا79حبة عرفتي هاد ريحة ساويا كتر منك نتي

ياسمين(طرطقات عليه ) : بااااركة علاش كدير ليا هكا علاشش....صافي مبقيتش قادرة هاد العيشة ( بدات كتجهد فصوتها) خليني عليك و خليني نعيش حياااتييييي بععد منييييي....مكنبغيكش انااا مكننحمللكشششششش... طلقني مبقيتش حاملاك

مع اخر كلمة محسات براسها حتا جاتها تصرفيقة من عندو و مد ايدو لعنقها خنقها...

فجهة اخرى عند عصام و اديب و مروة

مشاو لكافي الاوطيل لقاوهو سدو..

طلعو لغرفة أديب باش ادويو على خاطرهم

اديب: كنسمعك

مروة: المهم بغيت ندوي ليكم على دوك الاخبار لي كانو تنشرو عليكم قبل.....مور ما طلب مني عصام نقلب و نعرف شكون.....عرفت الخبر منين تنشر و عرفت شكون نشرو لول...الا مشينا واجهناه اكيد مغاديش اعتارف باش كاين و انلقاو معاه شوية المشاكل..

.مهم هد الايام كلها بقيت حاضياه و مكلفة ناس معايا باش نشوفو اي حاجة كديرها و واش فيه التخلويض.. و شكون دافعو..

اديب(قاطعها) : دبا من هدشي شنو كاين؟ و شكون هدا؟حيت مبقاش كيهمني

مروة: انا جاياك للموضوع...المهم فاش تعلن على الحفل عرفتو ضروري غادي اجي باش استاغل الفرصة حيت كلشي عارف راك جاي...هو جا و انا كنت فالاول حاضياه و راضا ليه البال و لكن فوحد اللحظة غفلت عليه مبقاش بان ليا و فنفس الوقت نتا مكنتيش.. و فنفس الوقت اشراق مكانتش..(بتوتر)

أديب: كملي طلقينا ا مروة.. راني عيان باغي نعس

مروة : مهم قلبت عليكم حتا نتوما ملقيتكمش...خرجت برا قلبت و والو...صاف رجعت بحالي .. حتا اليوم وصلوني تصاور .. (بتردد) المهم تبعكم و صوركم بزوج

عصام (بصدمة ) :هوا و من ؟؟واش مع إشراق؟؟

بقات مروة ساكتا ..جبدات تيليفونها و وراتو تصاور

بقا أديب كيشوف مصدوم و فنفس الوقت معصب معاجبو حال بحالا ناقصو هم ... و محملش انو مروة و عصام يعرفو

رجع ليها طيليفون و قال: كيفاش وصلك هدشي و باش عرفتيه؟؟

مروة: كنعرف ناس خدامين معاه و عاونوني باش نقدر نهاكي ليه البيسي ديالو حيت اكيد ايدوزوهوم ليه...اليوم بحكم انا سافرت خليت لي مكلف باش احضي...و هدشي لي وقع نيت حول تصاور للبيسي ديالو ..

اديب: كملي

مروة: موراها صيفط التصاور لايمايل لشي واحد...قلبنا عليه و عرفنا شكون و راه نمرتو عندنا....المهم هدا مصيفطو داك الراجل لي خدينا نمرتو....انا عرفت شكون و التصاور راه مغاديش اتنشرو و لكن خاصك تشوف شي حل ماشي تبقا كل مرة واحد مصورك..

عصام : شكون هادا

مروة (بخوف ):واحد ملي كتعرفوهوم..راه ميخدمك غير لي قريب ليك

عصام(مصدوم ):متقوليش معتز

مروة: لا لا حتا انا شكيت فيه مي ماشي هو

مسح اديب على وجهو و قال: اصلا انا غادي لبرا مبقا عندو ما يصور من عندي.. غير النمرة صيفطيها ليا غير نعرف شكون هدا لي دايرني فبالو

مروة: راه معانا نيت هنا

أديب: مبغيتش نعرف دابا.. مبغيتش شي حاجة تشغلي بالي .. مبغيتش نعمر راسي بتفاهات

فنفس اللحظة كانت واقفة مور الباب لي خلاوه مردود كتسمع لحديثهم كامل...

و غير عرفات بلي هضرتهم سالات بعدات مشات كتجري للبيتها..

غير سالاو طلب أديب منهوم يخليوه يرتاح... بغا يبقا عصام يدوي معاه لكن رفض بحجة عيان و يأجلو الهضرة لغدا..

غير خرجو حس براسو مخنوق محامل تحاجة كلشي ضدو.. تاحاجة ممقادة

تخنق فالبيت و خرج للبالكو.. يضرب فيه لهوا ...

بقا كشوف ساهي فيه مرة فالواد و مرة السما كفكر... و كيضرس خطواتو.. و شنو خاصو يدير .. كيحاول يرتب افكار...الدورة لي ايدور ايلقاها فلبالكو لي جنبو كتشوف فيه و غير حصلها شافتو قلبات وجهها دغيا..

ضحك على هبالها و نطق بصوت مسموع ليها: اشراق

دارت عندو و دارت ليه براسها شنو

اديب: عندك ثلاثة دقايق نلقاك قدام الباب اللورني

اشراق: كيفاش؟؟ زعما علاش

أديب: بقات جوج دقايق

اشراق: واعلاش؟؟

مجاوبهاش و خرج من البالكو خلاها واقفة كتنسا فيه اجاوبها ..

شوية دخلات حتا هي و لبسات عليها كاب من للرد و لبسات فرجليها صندالة بلا و هبطات

....

غير وصلات للتحت و يلاه بغات تخرج حتا سمعات سميتها ... من زهرها كان اركان تما...

اركان: اشراق

دارت لجيهتو و تقدم لعندها و قال: مزال منعستي

اشراق: لا مزال

اركان: كنت طالع لعندك

طرطقات فيه عينيها: و علاش بسلامة

اركان: بغيت غير نعتادر منك على قبيلة.. مكان قصدي والو..

اشراق : اكي.. غير مرة جايا متخليش بنادم يسيرك خدم عقلك

اركان (تحرج) : حنا عندنا عادي.. بون كنعتادر مرة خرى .. (بتسائل) شفتك خارجة فليل فين غادا

اشراق: غير تخنقت الفوق و قلت نهبط نشم شوية الهوا....و نيت عندي شي حوايج خاص نفكر فيهوم قلت اللهم نتكونسوطرا التحت الهدوء

اركان شاف فيها مستغرب : على فالبيت كاين صداع

اشراق : علاش عندك شي مانع إلى خرجت

اركان: لا لا بلعكس إلى بغيتي نقدر نبقا معاك نهضرو كتر

اشراق : لا لا بغيت نبقا بوحدي تصبح على خير

مشات اشراق متسناتوش يجاوب خلاتو بلاكة .. يكفي عطلها

....

اديب فاش تعطلات عليه اشراق رجع باش يشوفها علاش تعطلات مع غادي ادخل مع غادي اشوفها واقفة معاه كدوي...طلع ليه الدم و تم راجع بحالو...من زهرها شافتو هي فديك اللحظة و زربات على اركان و مشات غير فاتو.. بقات كتجري حتا لحقات عليه..

اشراق: فين غادي؟

اديب: علاش كيهمك.. ؟؟

اشراق: راه غير اركان عطلني بغا

(قاطعها) اديب: مسوقيش ...المهم تصبحي على خير

اشراق: اديب علاش كدير هكا دبا....واش مهبطني باش دير ليا هكا و راه غير عتادر مني و صاف..

تنهد و قال ليها: وخا يلاه..

سبقها و تبعاتو اشراق ....هز اديب مانطة صغيرة كانت محطوطة فوق رولاكس ..

اشراق : عرفتي مكرهتش نعووم.. هاد الجو غير دلعومان

مجاوبهاش أديب حدو جرها من يدها... و حط المانجو...بقاو غادين .... حتى ضارو من جيهة تانيا ديال لوطيل .. موقفو غير قدام بيسين ... شافتو كيحيد حوايجو استغربات...

اشراق(عينيها خرجو بصدمة) : اديب شنو كدير ... راك باقي محروق

مجوبهاش حدو مشا تسوطا فالما..

مشات كطل عليه حيت مبقاش كيبان ليها..

يلاه غتعيط عليه و هوا يطلع من تحت الما..

اديب : اشراق هبطي

اشراق: اويلي لا.. يمشي يشوفنا شي حد

أديب: هبطي

تنهدات اشراق دارت كتشوف فجنابها.. بالها كلشي ساقر..

اشراق: ملبساش مايو دلعومان

أديب: ياك بغيتي تعومي فازي..

حيدات اشراق حوايجها تحت نضرات أديب... بقات غير بدوبيس..

اشراق(بتوتر ) : مكنعرفش نعوم

مسح أديب و جهو و طلع لعندها.. جرها من يدها مدخلها معاه..غير قاسها الما بدات كترجف بالبرد

اشراق:بااارد

أديب: غير تفزكي غتولفي عليه

اشراق(فهماتو غلط ): هااا شنو قلتي

أديب جرها مدخلها.. كتقفقف غير بوحدها...

غير رجليها مبقاوش كيقيصو الارض.. شدات فيه شدة لعما فضلمة... شدها أديب من جيهت خصرها متبتها باش متغرقش

اشراق : أديب عنداك نغرق ..

أديب: راني شادكي غير رخفي راسك.. متخفيش

اشراق كتشوف فعينيه تايها فيهوم محساتش حتى خرجات الهضرة من فمها: مختيفاش نغرق فالما.. خايفا إلى نغرق فيك كتر

أديب(تفاجأ من هضرتها.. دار راسو مسمعهاش ) : شنو قلتي

اشراق(عاقت براسها ) : امتى اتمشي؟

اديب: مبقاش بزاف

تنهدات اشراق و قالت: سمح ليا على اي حاجة درتها معاك خايبة

ابتاسم اديب: نساي عيشي الحضة و نساي لي فات

دقات قلبها بداو كتسارعو و السخونية بدات كطلع معاها و هو مكانش اقل منها... اجسامهوم قراب بزاف .. اشراق كتشوف فعينيه غارقا فيهوم.. كتسائل علاش حتا كنكونو غنفقدو الحاجة عاد كنعرفو بحقها و عاد كنبغيو نتشبتو بيها.. علاش مكنعرفو قيمة الأشخاص حتى كنقربو نفقدوهوم ...

كحزها أديب جيهت لحافة دلابيسين حتا قدرات تحط رجلها فالارض ... جا وقف حداها بجوجهوم كيشوفو فالنجوم لي مزنين سما و ضوء القمر ضارب فيهوم.. هدوء و سلام حاسين بيه.. مدة و هوما كيتأملو فيهوم... مكسر ديك الهدوء غير اشراق

اشراق : أديب

أديب: وي اشراق

اشراق : غادي نتوحشك ...

غير سمع هضرتها مد ايدو لذقنها هز ليها راسها حتا شافت فيه... دموع مجموعين فعينيها... غير كتفكر هيا سباب باش غيمشي و انو مغتعاودش تشوفو كتحس بقلبها كيضرها بزااف

عند أديب نفس الاحساس .. حاس براسو مقادرش يبعد ولكن خاص يمشي .. كيفكر تا لو بقا اشمن حياة ممكن يقدم ليها.. واش غيتبع فلوس باه لي مكتجي منها غير المصائب .. يبقا معاها يضمرلها حياتها..كتر مهيا مضمرة.... هو دابا مقادرش يكون حتى براسو مغيقدرش يكون بيها.. اكيد مغيرضاش تكون معاه و تبقا خدامة كتشطح.. رجولتو متسمحلوش.. معندهومش مستقبل بجوج.. و لو يحاول يهدم كاع الماضي مغيقدرش يمحي الاثار ديالو.. هو كيفكر لبعيد.. إلى غير يبقا و ينكد عليها حياتها و يجرجرها معاه مكاين لاش.. حتا من دارو باعها باش يفك ليها مشكل رضا.. غير باش تبقى هانيا و تبعد من ديك طريق لي هو راجل و مبغاش يمشي فيها..

بقا كيشوف فيها لدرجة وتروها نضراتو... هز يدو بعدليها شعر على عينيها

و قرب شفايفو لشفايفها و قبلها قبلة حنينة...روى عطشو بيها...

قبلة عندها العديد من المعاني...القبلة لي تقول للسان سكن خليني انا ندوي.. قبلة لي كتوصل لقلب.. كتلخص كاع ديكشي لي كيحس بيه و مقادرش يعتارف بيه.. حب لي دق قلوبهوم بدون استأذان.. لي تخلق مور مشاكل و صراعات..

هزها شوية قربها ليه اكثر و انساجمو فقبتهم اكثر ..

قبلة خلات كل واحد فيهم كيعبر فيها على مشاعرو....فصلها أديب و دوز لسانو على شفتها السفلية و بعد و رجع حط راسها على صدرو و عنقها...

اشراق محساتش براسها حتا بدات كتبكي.. حاسا براسها مغاتعاودش تشوفو.. حاسا بلي هادي هيا نهاية.. نهاية الراقصة و الملاكم قلبها ضارها بزاف .. و أديب كتر منها.. حاس بنفس احساسها.. حاس براسو مخنوق.. حاس براسو غيفقد جزء منو منو..

تنهد هزليها راسها مسح دموعها و باسها فراسها... حركة صغيرة خلات قلب اشراق يتهز من بلاصتو.. قبلة الجبين فوضعية بحال هادي كتعني بزاف...

تحرك اديب من جنبها غطس كيحاول يبرد النار لي شاعلة فيه.. بقا شحال كيعوم تحت لما و اشراق ساهيا فيه..

طلع أديب جرها من يديها.. هزها و دورات رجليها على الخصر ديالو بقا غادي كيعوم بيها.. حاس بيها مرخية و مرتاحة.. كيحاولو ما امكن يستمتعو بهاد اللحضات .. و يخلقو ذكريات زوينة.. تفاداو يجبدو اي موضوع لي ممكن يعكر الجو ديالو.. بقاو على هاد لحال حتى وقف أديب فوسط لابيسين..

بقا شحال كيشوف فيها.. غارق فوسط عينيها لي سحروه من اول ليلة شافها..

أديب(بحب ) : حتا انا غنتوحشك

كلمة ممكن تجينا عادية تقال .. لكن بالنسبة ليلهوم كانت مخبية مشاعر.. مشاعر دافنينها بجوج مقادرينش يعبرو عليها... مقدرينش يتقبلوها..

ابتسمات اشراق بحب حيت متوقعاتوش يقولها ليها..

بلا شعور دموعها هبطو شي لي خلاه يحط شنايفو مستقبلهوم رافض يخليهوم يختالطو بالما... حركة بورشاتها.. خلات قلبها كيضرب بجهد .. حاسا بيه فأي لحضة ممكن يسكت.. بغفلة منو .. باسها و فنفس الوقت غطس معاها تحت الما بلا ميفصل القبلة .. كانت هاد المرة قبلة فرنسية تحت الماء.... مطلق منها حتا حس بيها مبقاتش قادرة تنفس... عاد طلعها

غير طلعو جرها مخرجها موراه... هز الفوطة لوها فيها من البرد... خدا فوطة خرا كانت محطوطة تما .. هزها و بدا كينشف ليها شعرها...

تصرفاتو عادية لكن عند اشراق لي مفتاقدة الحب و الحنان كانو كبار بزااااف.. .

تنهدات كتحاول تعيش اللحظة كيفما قاليها ..

أديب لبسي حوايج و يلاه ..

حيداتليه اشراق الفوطة من يديه و تقلبات كتنشفليه الما من لحمو..

اشراق: خاص ضروري دير دوا..

أديب: بقاي هنا انا راجع غنبدل دغيا و نجي..

اشراق : واخا..

طلع أديب بخطوات كبار موقف غير قدام بيتو.. دخل ديريكت بدل حوايجو بزربة و هز بواطة حمرة حشاها فجيبو...

هبط لقاها لبسات حوايها..

أديب(باستغراب ك : لبستيهوم على الفازكين عنداك تمرضي

اشراق : لا راه طلعت موراك بدلت لي فازكين....

جرها أديب بلا ميجاوبها.. هز مانطة كانت تما.. دارها عليهوم بجوج...

اشراق: مغتنسانيش ياك

ابتاسم اديب و حط ايدو على دراعها و قربها عنقها من الجنب...زادت تخشات فيه و بقاو غادين بزوج على ديك الحالة

وسط السكون والهدوء، كيتسمع غير صوت حشرة الليل ، خدا يديها بين يديه غادي بيها والسكوت تالتهما،خاشيها فحضنو.. موقفو غير حدا مرجوحة ، فاللأبيض معلقة ومربوطة بين جوج ديال الشجرات ، كيتدلا فوق منها واحد الرواق فالبيض ، بجال الوشاح، ضايرين بيها فوانيس شاعل فيهم الشمع ، وكانو محطوطين حتى على الارض ،فوق المرجوحة كانو محطوطين مخيدات الصغار، او واحد الكاشميرة صغيرة ، قاد دوك المخيدات، وتكا بكل راحة ، شافها مزال واقفة ومتوترة ..

- مناوياش تكلسي ؟

إشراق (كتشوف فيه بحب ): همممم

- أذيب ..(مخلاهاش تكمل كلامها ، جرها لعندو ، تكاها وحط راسها على صدرو ، يد دايرها تحت راسو ويدو ديارها تحت راسها ، وكيلعب بصباعو فدراعها وكيشوف فنجوم ، وفدوك الحشرات الصغار لي مجموعين على الضو لي طالع من دوك الفوانيس) ...

اشراق فهد اللحظة الفرحة لي حاسة بيها من زمان محساتها.. واحد راحة حاسة بيها لأول مرة فحياتها.. يمكن حيت اول مرة غدوق طعم الحب .. طعم السعادة .. طعم تكون مع شخص مستاعد تبيع العالم غير باش تبقا معاه.. حاسة بآمان مكرهاتش تبقا هكا حياتها كاملة..

بقاو على داك الحال و الصمت هو سيد الموقق لانهم كيحسسو ان الكلام معندو معنا....

غفات اشراق وسط احضانو و غفا هو بدورور راضي على اخر ذكرى عندو منها...

صبح صباح جديد فاقت اشراق دايخة و هي مزال متكية كتحاول تستوعب فين هي.. و تعقل فينها ...تفكراتو و تفكرات شنو وقع ... ابتسمات كتحل عينها.. البارح قبل منعس خدات قرار باش متخليهش يمشي و تحاول دير المستحيل باش يبقا.. توكدات شوية...

يلاه استوعبات انو مكاينش حداها...بدا قلبها كيضرب... بدات كتعيطليه كتمنى ميكونش لي فبالها صحيح

إشراق: اديبب....اديييب.. اديييببب

كتعيط بدون جدوى و مكاين جواب

احساس خايب راودها و خايفة بزاف يكون مشا.. خافت تكون تعطلات.. كتقول ميمكنش يمشي بلاما تشوفو..

دورات عينيها على البلاصة لي هوما فيها و اول حاجة ردات ليها البال هو جوا بيض فجنب البالونص و بواطة حمرة فوق منو..

مشات بسرعة و الفرحة كتسلل لقلبها..

اشراق : هااح زما يكون موجدي مفاجأة..

هزات الجوا و حلاتو و لقات وسطو ورقة...

جبداتها و بدات كتقرا....اول كلمة قراتها عرفات شنو ممكن اتبعها...الدموع بداو كتجمعو فعينيها و بداو كغشيو عليها الرؤية...كتمسحهم باش ترجع تقرا و لكن كل مرة كهبطو كثر من لي قبل....

كتبكي بحرقة و مقادراش تستوعب....مغاداش تقدر تصبر بتاتا على فراقو....بدات كتشهق و عضات ايديها باش تكتمهم و تقدر تكمل القرايا...

كتحاول تستوعب الكلام لي مكتوب لكن لا قلبها و لا عقلها قادر يستوعب...

" فاش غتقراي هدشي غنكون مشيت... متبكيش.. دموعك غاليين و كيحرقو قلبي ... بغيتك تولفي فراقي..من الاول مكناش مكتابين لبعضياتنا...كنت كنتمنى لو كنا تلاقينا فظروف اخرى و وقت آخر... لكن ميمكنش نغيرو القدر ... كان مكتاب علينا نطلقاو و نعيشو كاع ديك الاحداث ...كنتي حاجة زوينة فحياتي بكاع مصايبها ... و غتبقاي دكرى زوينة..

سولتيني لبارح واش غنساك.. كوني اكيدة واخا عقلي و قلبي ينساوك.. اثار لي على لحمي كل نهار غتفكرني بيك..

مقدرتش نتراجع واخا كنت باغي نبقا حيت فات الفوت و انا و نتي ميمكنش نتجمعو فهاد ضروف ...حيت غير غنآذيو فبعضياتنا...كنفضل نخلي غير هد لي سوفينير ديالي معاك حسن ما يكونو حوايج خايبة بزاف.... على الأقل هادو غطاو على الماضي...

عندي طلبي وحيد منك.... راجعي الطريق لي غاديا فيه .. حافضي على نفسك.. لحمك كنز متخليش اي واحد يشوفها..

غلطك انك صححتي أخطاء بأخطاء كثر .. عارف ضروف حكمت عليك.... بعدي من المظاهر.. حيت ديك طريق ممسلكاش..

بغيتك تراجعي وتعرفي قيمة نفسك قبل مايفوت الفوت.. عارفك

عانيتي و قاصيتي و لكن حياتك دابا بايدك نتي...نتي لي عندك الحق تختاري كيفاش تكمليها...

بالنسبة ليلي خاصني نمشي نشوف حياتي بعيد على هنا حيت ممستافد والو...خاصني نمشي نقلب على راسي و نحقق حلمي...نتمنى حتا نتي تحققي دكشي لي كتمناي و مضعافيش..بغيتك تبقاي ديك اشراق القوية...حاربي و عيشي بشجاعة.. متخلي حتا حد يطغى عليك...

للاسف قصتنا سلات قبل متبدا

مكاين لاش نزيدو نجرحو بعضياتنا كثر و كثر....البعد أفضل حل لينا و لهدشي لي واقع بيناتنا...و الوقت غادي ينسيك كلشي...

تهلاي فراسك...كنتي و غتبقاي ذكرة زوينة..

بالمناسبة غتلقاي بواطة حمرة..خليها ذكرى مني ليك..حافضي عليها.. كنتمنى تعجبك..

أديب"

سالات القرايا و هي كتشهق و كتبكي بحرقة...مقادراش تيق بلي بصح مشا..كان عندها امل و لو صغيرر.... كانت ناوية تقنعو.. كانت باغاه ميمشيش...

نطقات بصوت باح وسط بكاها و مضمرة: عمر الوقت ما اينسيني فيك ....جرحك تحفر و عمرو يبرا... دخلتي قلبي و سكنتي روحي.. عدبتيني و عدبتك.. جرحتيني و جرحتك واخا هكاك حبيتك ...

من بعدما كملات الرسالة بالقرايا ، ودموع هابطين من عينيها بحال الشلال، كتحس بقلبها شاعلة فيه النار...

- هزات البواطة لي كانت محطوطة فلون الاحمر الفاقع ، بلا تردد حلاتها ، حسات بعقدة فحلقها، لي كان ناقصها كمل، شهقااات بالبكا، ماقداتش تصبر ، كان قدام عينيها سنسلة من الذهب الخالص ، كانت كتحمل شكل وردة الشمس، فيها خطوط بلون الذهب الأسود، تقيلة وحتى معناها تقيلة غير هزاتها طاحت ورقة صغيرة مكتوب فيها

- إشراق ، أنت الاشراقة الصباحية الأولى لي كتبعت من الشمس كدفينا وتفرحنا ..

كلمات زادت خلاتها تحرق كتر، علاش لا وهو شارح فيها سميتها، لي عمرها ردات ليها البال ولا عرفات بلي كتعني شعاع الشمس،

، كتبكي ودموعها وهابطة وكتقلب فيها، قلباتها بانت ليها واحد الكليك صغيرة ، بركات عليها وهي تحل من الوسط شي خلاها تشهق من داكشي لي شافت ، ݣلسات وهيا غير مكتزيد فوتيرة البكاء ، من الوسط كان شكل دائري مكتوب فيه you are my sunshine ، خداتها بين يديها وعنقاتها لقلبها بحال الى كتعنقو هو ..

- شوية رجعات حلات يديها ، وجها كلو حمر وبيديها كيترعدو، هزاتها ولبساتها، وبصوت باكي نطقات :

- هادي هي بلاصتك حدا قلبي ..

----

ناضت رجعات لاوطيل.. غادا جسد بلا روح.. تلاقات عصام فالدخلة

شافها عصام حالتها حالة... باين فيها كتبكي..

عصام (شد فيدها ) : اجي تكلسي كتباني عيانة بزاف ..

اشراق ( بصوت مبحوح ) : مشا صافي مشا

عصام : خليه يدير مستقبلو إلى بقا هنا غير غيضيع..

ناضت اشراق عقلها فاهم هادشي لي واقع لكن قلبها مقادرش يتقبلو... عيا يعيطلها مسوقاتلوش او بالاحرى دماغ لي يستوعب مرفوع

طلعات لبيت لقات كوثر و ايمان و مروة مجموعين فالبيت .. غير شافو حاتها شهقو.. خافو تكون وقعاتليها شيحاجة ..

لبنات : مالكي اشراق شنو واقع

كوثر :شكون بكاك مالكي صفرة هاكا

ايمان : خلعتيني مالكي..

مروة جراتها كلساتها فوق ناموسية و حضناتها حيت فهمات من حالتها بلي أديب غيكون مشا.. و اكيد من تصاورهوم لي شافت كان واضح انو بيناتهوم شي حاجة ...

غير حضناتها و طبطبات عليها.. بحالي عطاتها ضو لخضر بدات كتبكي و تشهق.. شي لي خلا كوثر و ايمان مخلوعين كتر

كوثر : مالكي على هاد الحالة واش مات شي حد

اشراق(كتشهق ) : قلبي لي مات.. داه و مشا

ايمان ( مستغربة ) :شكون هادا على نتي كنتي كتعرفي شي حد

غمزاتها مروة باش تسكت .. كوثر فهمات لبلان .. كلسات من جنب لاخور ديال اشراق كطبطب عليها

كوثر : احسن قرار حسن ليك و ليه و الله خليه يبني مستقبلو و نتي ركزي على حياتك .. إلى بقيتو بجوج راه غير غضمرو بعضياتكوم

ايمان :فهموني شكون هادا

كوثر بهمس:أديب

ايمان (باستغراب ) :كيفااااش واش كانو بجوج.. زعما

قاطعتها اشراق : بغيت نبقا بوحدي ممكن ..

مروة جراتها خلاتها تكا فبلاصتها بقات شادة فيدها.. غمزات لبنات يخرجو..

ايمان:فهموني شنو واقع

مروة :كوثر انا نبقا معاها تكلفي .. متخليو حتا حد يحس لتحت..

خرجو لبنات خلاو مروة و اشراق بجوج

مروة : حاسا بيك مزيان .. اصعب شعور تبغي شي شخص لي نتي عارفة و متأكدة مغتقدريش تكوني ليه.. مغتقدروش تكونو بجوج..

اشراق :انا سبب باش مشا

مروة :لا ماشي نتي و كوني متأكدة انو أديب عندو أسباب قوية باش يمشي .. و فنضاري احسن حاجة .. راكي معارفاش شحال من واحد كيحفر عليه.. كون بقا غيعرض سمعة ديالو و ديالك لخطر.. كانو غيبقاو حتا يطيحوه فشي فخ اللهم هكا حسن..

كلسات اشراق : كيفاش مفهمتش

مروة :تعقلي على الخبر اللول.. متنشرش غير صدفة كان مقصود... و كون متدخلتش و تمسح و تكدب ديكشي كان ممكن يوقع مكفس و كان غيتحرم من الملاكمة... و فالحفل وقع نفس شي

اشراق (مصدومة ) :كيفاش شنو طرا

مروة (بتوتر ) : صوروكوم بجوج فالحفلة

طرطقات عينيها: كيفااااااش و ايمتى..

جبدات مروة طيل ديالها و راتها تصاورهوم و هوما كيتباسو خلات اشراق مصدومة غير كتشوف

مروة : هادشي علاش كنقولك احسن حاجا بعد

اشراق (بعصبية وقفات كتمشي و تجي فبلاصتها) : شكون هادو شكون مور هادشي و شنو غيستافدو

مروة ( يتبات ) :معرفتش مقدرناش نعرفو.. لي بغيت نوصليك مسحي دموعك.. دعي معاه ربي يسهل عليه و إلى كتبغيه تمنايليه التوفيق و خليه يعيش حياتو... دابا لي ديري قادي حالتك و متبنيش لتحت و تصرفي عادي مخاصهومش يحسو كاع..

تنهدات اشراق : الحب زوين و الفراق مصيبة..

مشات اشراق دوشات بالخف و بدلات حوايجها قاداتليها مروة ميك اب خفيف ركزات على عينيها باش تغطي اثار لبكا..

غير سالاو هبطو شافوهوم مجموعين دايرين بهناء كتبكي.. و اركان و عصام كيسكتوها..

معتز : بغيت غير نعرف لاش هاد الحالة كاملة .. سيد مشا يبني حياتو.. و غير حداك غمضي عينك هانتي حداه.. لي شوفك كتبكي يقول كنتي ضلي معاه 24h

خنزرات فيه هناء : راه بقا فيا غيتغرب بوحدو مكيعرف حد تما

معتز: واباز ياك مشات معا اروى.. و اروى مستاقرة هاد المدة تما ..و غيبقا معاها مالكي دايرة كنازة على والو

هناء :اروى غير مدة ديال خدمتها و صاف راه هوا ناوي يستقر فمرة ..

اركان :مالو دري صغير .. نعلي شيطان ...

سيف : صاف اهناء مواقع والو .. هادو غير الهرمونات لاعبين عليك...

عند اشراق لي كلمة مشا معا اروى بقات كتعاود فودنها..

كتحس براسها كزدح.. عقلها وقف مبغاش يتقبلها..

علاش اروى بضبط و علاش مقالهالهاش.. كتحس بالدنيا كضور بيها محسات على راسها حتا جات طايحة فالارض

عند البنات مشافوش مروة و اشراق فاش جاو.. مرضو البال حتا سمعو شي حاجة تزدحات فالارض.. مروة بقات مشوكية من الهضرة لي سمعات و تمنات كون اشراق مسمعاتهاش.. لدرجة فاش سخفاات اشراق بقات مروة مكوانسيا فبلاصتها..

غير شافوها سخفات.. طار سيف و اركان لعندها هزها..

طلع سيف بالخف جاب لاباغاي طونسو.. لقاهوم كيرشو عليها الما كيحاولو يفيقوها.. بقا هكاك.. حتا فاقت بشوية .. عبر ليها طونسيو لقاه طايح بزاف ..

اركان شافها كتحل عينيها: اشراق شويا دابا

كتافات تهز ليه راسها.. طلبليها سيف عصير

سيف :طونسيو طايح و باينا موكلاش عليها وقعلك هكا..

هناء (مسحات دموعها ) : اجيو نفطرو.. موراها بغيتو ديرو شيحاجة ديروها.. انا مبقا عندي خطر

اركان : صراحة حتا انا خاص نرجع طلعوليا شي بلانات.. خاص نرجع اليوم

معتز : اساسا اليوم غنرجعو حتا الجو بالي بدا كيتبدل ..

ايمان :دوا معاي كرم (راجلها ) شويا و يكون هنا .. ندوزو صباح و مور لغدا نرجعو فحالنا

عصام :على هاد لحساب نخليو لعشية و نرجعو كاملين..

مروة: اه حسن

ناضو فطرو موراها كلها فين مشا .. لبنات بقاو مجموعين كيحاولو ينسيو اشراق و لي طايح عليها ضيم.. كيحاولو يضحكوها.. و يفاجيو عليها..

عند ياسمين ممسوقاش دوزات ليلة كارثية مع معتز مرحمهاش كاع ... مرتاح حتى شافها سخفات.. صبحات مدكدكة و داتها كضرها باغا تبقا غير ناعسا...

عند ايمان فرحات حيت كرم وصل و بصعوبة قدرات تقنعو يلحق عيهوم.. كتحاول ما امكن طبق نصائح اشراق و تقرب منو كتر و دوز معاه و قت كتر ..

غير وصل عتادرات من لبنات و مشات معاه كتوريه لبلايص لي كينين...

اما دراري كلها فين مليوح.. كاين لي كيلعب بيليارضو كاين لي مجبد كيرتاح..

اما اركان كالس اونفاس مع لبنات هاز طابليت كيخدم و حاضي اشراق بنص عين.. حركاتها و طريقتها دالهضرة بحال شي بنيتة صغيرة كتخليه بلا هواه ساهي فيها... محس براسو حتا حل الكام و صورها.. و من زهرو قشعو معتز..

معتز : حصلتي

اركان (تفعفع مرضاش يشوفو) : امالنا منخافوش

معتز(بجدية ) : اركان غنسولك واش عينك فيها جاوبني اه لا

اركان : منيتك راه عاد عرفتها.. مهم كاين اعجاب خارجي و صاف..

معتز : انا نعطيك طريق باش دوز

اركان : كيفاش

معتز : سمعني هانتا ...............

----

جا الوقت لي غيرجعو فحالهوم... كانت رحلة زوينة عند البعض و البعض الاخر بقات ذكرى أليمة فقلوبهوم..

كلشي جمع حوايجو .. هبطو لتحت باش يركبو... فرقات عليهوم هناء تصويرة جماعية كانو داروها لبارح كذكرى تبقا عندهوم.. كل واحد خدا نسخة منها..

تفرقو تاني لي جاب شي طوموبيل رجع فيها.. لباقي ركبو فطخونصبوغ شركة من غير ايمان لي ركبات مع راجلها..

تحركو كاملين واحد مور واحد راجل ايمان فالمقدمة تابعو معتز و عاد شيفور..

هاد المرة مكانش نفس النشاط و الحماس.. راجعين ساكتين كلها كيفكر و ساهي فجيه..

الطريق صعيبة نوعا ما و من زهرهوم الجو تقلب و الشتا بدات كطيح.. و ضبابة ..الطريق كتزلق و إلى مكنتيش واعر فالصوكان و الطومبيل مقادة مشيتي فيها..

شتا جهادت

و الكار بدا كيلعب فطريق ..عند معتز قادر يسيطر على طوموبيل.. لكن كرم قدامو كيزيكزاكي عصبو.. كيشوفو مبغاش ينقص سرعة..

عند دراري شافو دعوة متماش طلبو من شفور يمشي غير بشوية حيت الطريق تزعلكات نيت و شتا جهادت بزاف.. و ضبابة غطات طريق..

معتز صعر: zااااا مل فين باغي يوصل شوف غادي كيطير و البنت معاه حاملة.. واش منيتو كيلعب فطريق .. دوخني معاه..

عند كرم و ايمان .. لي لخلعة و الاعصاب راكبينها

ايمان :نقص واش منيتك غادي تقلبنا هنا ..

كرم : متقلبيش الهضرة كندوي معاك جاوبيني.. مالكي مع مي .. غير قتلك تولدي عندها شعلتي .. باغا طيري غير بوحدك..

ايمان (بعصبية ): نولد فداري لي بغاني يجي عندي انا ماما براسها هيا غتجي لعندي

كرم : مك مك ديما مك.. على مال مي .. كاع لعيالات كيولدو عند ناسهوم غير نتي لي مريضا فمخك

ايمان (طلعلها زعاف كتغوت ): وا بنادم انا و ياها مكنتفاهموش كولها و افكارو ماماك كتفرض عليا رأيها و مكتقبلش هضرتي.. من نهار اللول محاملانيش.. مبغيتش يدوز نفاسي كحل زحل..

كرم محملش دوي على مو هكاك دار شاف فيها كيغوت ناسي طريق و شتا لي خيط من سما..

(كيغوت و كيشير بيديه ) ا المرض متصعرينيش غتولدي عند دارنا يغيتي و لا كرهتي

ايمان : يلاه جات تجاوبو كتقشع ضو ضرب فيهوم

غوتات حتى صوتها بح

ايمان : عندااااااااااااااااااااك

نهاية الفصل الأول ❤❤

راقصة على حلبة المصارعة

هاد الفصل فيه وقعو بزاف ديال الاحداث...

لكن دابا عاد غندخلو المشحر.. المقبلات سالاو..😈

ربطو الاحزمة ديالكوم باش نتاقلو من الفصل الأول ل فصل تاني .. فصل غيبانو فيه الحقائق.. فصل غنعيشو حب من نوع آخر... غنترفعو معاه لعالم تاني... 🔥

يتبع...