عند ايمان متكيا مقدراش تنوض هادي سيمانة و عصام و معتز كيحاولو معاها غير ترجع الخدمة.. لكن ديما كتجاوبهوم بنفس الهضرة .. مقداش نتحرك.. معندي خاطر .. بغيت غير نعس ..
يلاه تقلبات كتحاول تنعس سمعات طيل كيصوني.. غير طلات لقاتو معتز.. تنهدات بملل كل نهار كيعيطلها و نفس الهضرة كتعاود واش معوالاش ترجعي..
ناضت غسلات وجها لاحت عليها شال على راسها و هبطات.. غير وصلات لباب لعمارة تفكرات إلى شافوها الجيران شنو غيقولو عليها .. مرة ارملة صغيرة مزال حتا منشف قبر راجلها ها هيا خارجة و مع راجل من الفوق.. كرهات حياتها و كرهات المجتمع..
طلات من الباب كتشوف واش شيحد كيطل من شي سرجم و لا واش شيحد واقف برا... غير بانتلها دنيا خاويا تسلتات كتجري ركبات فطوموبيل كتنهش
ايمان :تحرك تحرك دغيا قبل ميشوفني شيحد...
عند معتز كان ساهي كيفكر حتا كيسمع الباب تحلات و تردزات و ايمان كتنهش بحالي كانت فالمارطون..
معتز كيشوف فيها ببيجمة غوز بارد و شال بيض مليوح بعشوئية فوق راسها و شعرها زعر خارج منو.. غير سمع هضرتها خرج عينو من هاد المخلوقة لي حداه
معتز : مالك على حالك واش كانو جاريين عليك
ايمان: وا تحرك دغيا قبل ميشوفني شي حد
معتز : والى شافوك شغيوقع كاع مالنا شنو كنديرو راه غير غندوبو
ايمان (بتوسل ) :الله يخليك بعد غير منهنا و نهضرو فاش بغيتي..
تنهد معتز مفاهمش مالها على هاد الخوف كامل بحالي دايرين جريمة و هو كان نيتو غير يدوي معاها و يقنعها ترجع.. حيت كيشوفو إلى بقات هاكا غدخل فاكتئاب..
غير شافتهوم بعدو على الدار عاد تنهدات براحة ...
ضارت كتشوف فمعتز
ايمان :اخر مرة تبقا تجي حدا دار واش هبلتي واش معارفش وضعيتي شحال حساسة .. راه هكا غتخلقلي مشاكل راني ارملة عرفتي شنو هيا ارملة و باقي مفاتت العدة و خارجا مع راجل
معتز : عقلية خاوية منيتك باقي لي كيفكر هكا.. بون اصلن كون مجيتش مكنتيش غتخرجي و كون مهددتكش مكنتيش غتهبطي يعني كلشي من شر اعمالك
معتز : واش عاجباك هاد الحالة .. عاجبك راسك كتقتلي فراسك نهار على خوه.. سيد مات الله يرحمو ربي مزال يعوضك
ايمان (بدات كتبكي ) : راه بنتي لي ماتت بنتي انا .. علاش مكتحسوش بيا علاش
وقف معتز طوموبيل اونفاص مع لبحر..
معتز : كلشي حاس بيك .. راه عارفين ماشي ساهل هادشي لي كيدوز عليك .. كرم ربي بغاه.. و بنتك مكانتش ديال دنيا
ايمان (بحرقة ) : الله ياخد فيه الحق عمري نسمحليه.. كون تبت فطريق كاع منخسر بنتي.. بسبابو طرا هادشي
معتز : كلشي مكاتيب سيد مات ف دار الحق .. قولي الله يرحمو
ايمان (بعصبية ) : لهلى يرحمو انا معندي عيت مندير فالخاطر على حساب خاطري الحاجة الزوينة لي كانت مفرحاني هيا بنتي.. كنت كنحاول نصلح حياتي و نكون نعمة زوجة.. لكن هو كان تابع مو غير تدوي معاه كيترفع كيتقلب
معتز : نتي ختاريتيه ياك فضلتيه عليا من نهار اللول واخا قتلك متزوجيش بيه درتي لي فراسك من النهار اللول كان باين ماشي راجل
ايمان (عصبها كتر ): بلا متجبد ضواصا القدام حيت بحالك بحالو .. نتا سبب ... حتا منا سمعتي كلام ماماك و ختاريتي ديك طريق .. و اصلن كنا صغار مراهقين .. و انا نسيت ديكشي فلا داعي نجبدوه.. اصلن انا و ياك مكان كيجمعنا والو..
معتز : مجبدتوش و مكاين باش نجبدو حنا نسينا الماضي و كلها دار حياتو.. و دابا ميمكنش نشوفك كتغرقي و مندويش.. راه خاصك ترجعي لحياتك..
النعاس و الاكتئاب معندو فاش يفيدك و البوسط ديالك باقي كيساينك.. راه ديك مروة ركبات فيا الاعصاب ..
ايمان : مغنرجعش مقدراش امعتز ماشي الخطري راه هاد الكلسة معاك و الهضرة براسها واخدا مني جهد مقدراش .. باغا غير نعس باغا غير نرتاح .. حاسا بطاقة سلبية كضور بيا
معتز طول فيها شوفة : عرفت شنو لي غيخليك ترتاحي.. (ديمارا طموبيل غادي )انا عارف فين نديك ..
ايمان : كيفاش فين غادين.. معتز دير عقلك و رضني بحالي ... خليت دارنا خارجين إلى رجعو و ملقاونيش غيتخلعو
عند أديب اليوم بدا تداريب ... كان بخوكغام شاغجي نيت .. حاس براسو كاع ديك التدريبات لي كانو فالمغريب غير اللعب .. ملي بدا مكاين غير القاصح... شي لي مخليه معندوش الوقت كاع لا يفكر لا حتا حاجا.. عقلو كولو مع التدريبات.. كيوجدوه لأول مقابلة عندو .. هيا لي غتحدد مصيرو يا يزيد القدام يا يرجع فحالو...
هاد المرة اصرارو على نجاه قوي و ممستاعدش يكرر اغلاط الماضي.. يكفي الفرص لي ضيع قبل..
---
عند اشراق كي العادة كانت الوجهة الشركة ..غير دخلات تلاقات مع عصام فالباب..
اشراق: صباح نور
عصام : صباح الخير كيبقيتي
اشراق :الحمدالله ،فين غبرتي مبقيتيش كتبان ..
عصام : اغلبية كنخدم من دار.. دويتي مع ايمان اليوم ..
اشراق : لا باقي صونيتلها صباح مجوباتش .. قلت حتا نخرج و ندوز عندها ..
عصام : مشكيلة كنضن خاصها شي كوتش و لا طبيب نفسي .. حالتها معجباتنيش..
اشراق :مكنضنش حيت ولات كتهضر و كتعبر غير مينين فرغات و ناضت لماين كرم جوباتها راه مزيان ..
عصام:الله يرحمو واخا مدار فيها ميصلاح
اشراق : اودي شي مرات كندمو حتا كيفوت الفوت ..
(بتردد باغا تسول و مقدراتش ترددات )
عصام : كيبقات مينة شحال مسولتك عليها..
اشراق : لاباس عليها مبقا والو و تحيد الكبص.. فكرتيني نيت خاصني نمشي عند رضا معرفت كيطرا مرجعش صونا من ديك نهار
عصام :اصلن مبقالو حتا شي سبب لي يخليه يعيطليك... غير خوي راسك منو ركزي على حياتك ..
عصام (ببرود) : مكاين لاش دويت معاه انا قبل .. اصلن مور آخر مشكل ديال فيديو و تصاوركوم لي كانو تنشرو خاف على راسو .. دونك بلا متجبدي ضواصا لقدام .. عيشي حياتك و نساي
اشراق (باستغراب ): زعما بسهولة قبل
عصام: راه ديك تصاور يديوه الحبس ابنتي .. راه غير قانوني ديكشي لي كيدير ميمكنش يبقا خدام حيت حطو عليه البوليس..
اشراق:اه فهمت .. ( بتردد ) حقا بغيت نسولك
عصام (عايق بيها باغا تسول على أديب غير من طريقة باش كتفرك يديها و متوترة ): راه لاباس عليه ... كيوجد لشي مقابلة.. نصيحة عيشي حياتك و خليه يعيش حياتو .. يكفي شنو دوزتو على بعضياتكوم.. و يكفي الأدى لي وصلو منك
اشراق( استغربات ): كيفااااش واش قالك شيحاجا ...
عصام : مقالي والو غير تهناي ... ماشي أديب لي يجمع بواحد خور ...مي راسي عرفت بلي نتي لي شعلتي العافيا.. و نتي سبب فالحالة لي وصل ليها..
(تنهد) اشراق غندوي معاك بصراحة خليه يعيش حياتو خليه يبني مستقبلو.. ديك دري راه بزاف عليه هادشي لي عاش .. خليوه يرتاح.. انا اول واحد كنت معارض سفر ديالو مي نهار مشيت نجيب طوموبيلتو و بحت و رجعت سولت ناس لي عاونوكوم تما عرفت شنو وقع ... كان خاصني ضروري نسد الموضوع قبل متوصل البوليس و يشوفو سبب الحريق لي وقع.. تما فيه واجهت أديب و ملي سكت مقال لا اه لا لا عرفت بلي نتي سبب..
اشراق جات تدوي و قاطعها
عصام : مباغيش نعرف و مغنقولكش علاش درتي هكاك و مغنسولكش شنو بيناتكوم .. حيت هادشي كيخصكوم بجوج.. لكن طلب واحد ا إشراق.. متقلبيش عليه .. متواصليش معاه.. خليه يبني مستقبلو.. متكونيش أنانية.. علاقتكوم معندهاش مستقبل... متقلقيش مني مي مصلاحتو كتهمني كتر .. يكفيه لي جا من عندك... يكفيه بسبابك انساحب من المسابقة و تغرب من بلادو.. فالله يخليك بعدي عليه و عيشي حياتك و خليه يعيش حياتو...
مشا عصام مخلي اشراق مصدومة بلاصتها.. مضناتوش غيدوي معاها بهاد طريقة.. عارفا بلي كل كلمة قالها عندو صح فيها .. و بلي هضرتو كاملة معقولة هيا اداتو بزاف و حتا هو اداها.. لكن هيا كتر بسبابها خسر الحلم ديالو..
بقات واقفا ساهيا حتا حسات بشي حد موراها مع ضارت لقات ياسمين .. كتبان عيانا بزاف وجها صفر..
اشراق (مستغربة من الحالة ديالها ):ياسمين نتي لاباس
جملة قالها بعفوية لكن خلات ايمان تحي عليها المواجيع و يرجعوليها كاع الاحداث ديال ديك نهار .. شي لي خلاها تكمش و تبدا تبكي فصمت..
معتز مرضش البال لشنو قال حتا شافها صقرات غير دار شاف فيها لقا كتبكي وجها كلو حمر.. عزات عليه ..
وقف طوموبيل فجنب.. حيد صمطا ديالو و ديالها.. و جرها لعندو حضنها كيطبط عليها..
ايمان غير جرها.. زادت فالبكا كتشهق.. كانت محتاجة تخرج شنو فداخل ديالها.. الحضن ديالو كان بحال البلسم لي تحط فوق لجراح... مشعراتش حتا بقات كتبكي و تشهق.. خلاها على خاطرها.. مدوا متكلم كتفى انو يطبطب عليها.. مخليها على راحتها.. حتا حس بيها ترخات.. فاش طل عليها لقاها نعسات...
هز يدو كيمسح دموع لي بقاو... قاد ليها راسها بشوية مور مهبط الكرسي ديالها... قادها عليه .. و حيد لافيسط ديالو غطاها بيها..
--
عند ياسمين
غير وصلات لكلينيك.. فاقت سخفانة و الحريق كيقطع فيها .. لدرجة كتغوت بلحريق..
طارو عندها مدخلينها لقاعة الفحص .. بقات اشراق و عصام كيساينو .. مروة مقدراتش تجي حيت معتز مكاينش و متقدرش تخلي البوسط خاوي.. بقات كتحاول تعيطليه لكن بلا فائدة .. خلاتليه دي ميساج باش غير يهز طيل يعيط ليها ضروري ..
--
عند أديب... خدا بوز باش يرتاح و عاد يكمل.. مباغي يفكر بوالو من الغير المقابلة لي مبقاش ليها بزاف .. خاصو يتدرب مزيان حيت الخصم ديالو ماشي شي خصم ساهل.. و بالنسبة ليه هاد المقابلة غتحدد مصيرو يا يربح و يتفتحوليه الابواب.. يا يخسر و يرجع فحالو.. و هو دابا ممستعدش يرجع و يعاود من 0 ..
مع حل القرعة كيشرب.. يلاه على راسو و يتصعق بشنو كيشوف.. ميمكنش تكون هيا جنون طلعوليه.. حاس براسو مخنوق بوجودها غير لاصقا فيه .. لاح ديك القرعة وقف .. غير وصلات حداه جرها من يدها كيدوي بعصبية ..
أديب:شنو كديري هنا واش باغيا تحمقيني.. واش مريضا فمخك .. كي درتي حتا دخلوك.. ياكما عطيتيتيهوم سميتي (طلق منها غادي جاي..) واش مريضا فمخك..
غير ضار و هوما يخرجو عينيه.. اكيد هادي غادي تجيب اخرتو.. ملي مقتلاتوش اشراق عادي اكيد غتقتلو غير بلفقايص.. شافها حيدات القبية لي كانت لابسة بقات غير بديباغدوغ قصير.. حيدات سروال حداه بقات بكيليوط حنات هزات صاكها جبدات منو شورط كحل ايلاصتيك ديال رياضة.. هزات بانضا و جمعات شعرها ...
أديب بدأ كيضحك غادي جاي بلاصتو مقدرش يشد الضحكة.. كيضحك و يشوف فيها و يرجع يضحك..
أديب(بسيف قادر يشد ضحكة ) :لا و الله حتا ضحكتيني كنتفكر فصغرك مكنتيش تقدري حتا دافعي على راسك .. لا و زوينة دابا بهاد الفورمة و ضفار (شد فيدها كيشوف فيهوم و يوريهوم ليها )بهادو صبيعات كتدربيهوم... طلق منها كيضحك عقلو مبغاش يتقبلها..
كارلوس(مستغرب ) :علاش واش مكنتيش عارف... اروى معروفة فالنادي ديالنا عمرها خسرات شي مقابلة.. و مؤخرا ولات فقط كدرب فئات صغار..
اديب (مصدوم ):لا ميمكنش.. واش بصح
تمشات اروى جيهت ليكون كانو معلقين هزاتهوم.. قصدات الحلبة.. علات الحبل و دخلات
اروى : يلاه اجي نشوفو فين وصلتي فتداريب ...
كارلوس(كيضحك ): القطة الشرسة رجعات.. اليوم يتهرسو ضفارك و تبقاي تبكي تاني ..
اروى : يخلصهوملي أديب مور ميخسر .
أديب(ضحك ضحكة تهكم) : عير حلمي و إلى خسرتي شنو تخلصي
اروى : العشا
بقا أديب كيضحك لبس لي كون ديالو و طلع ناوي يخليها تعطي جهدها يشوف مهراتها فين واصلين ...
كانت متمكنة لدرجة صدماتو متوقعهاش غتكون بهاد الاحترافية..اليوم كتاشف فيها جانب اخر.. خلاها حتا عطات جهدها كامل عاد هجم شي لي خلاه يربحها بسهولة..
اروى (بدلال) : حشومة عليك بريستيجي ضاع
أديب (كيضحك): وجدي راسك طيبي لعشا
اروى : نو ناكلو برا
أديب: وتقولي نتي لي غطيبي خاطيني ماكلة دزنقة
اروى : اصلن غشيتي.. خليتيني حتا بديت نعيا و هجمتي
أديب: معندي مندير ليك حمدي الله مخليتكش تخسري من اللول ..
كارلوس:اروى تقبلي الهزيمة...
اروى : راه غير شحال هادي مدربت بلاتي عليك غنرضهاليك ساعت الخير اسي أديب...
عند ياسمين ..
غير خرج طبيب تلقاتليه اشراق و عصام ..
عصام :وي دكتور شنو عندها
اشراق: كيبقات دابا
دكتور : الحمدالله قدرنا نوقفو النزيف و الجنين باقي حي لحد ساعة لكن وضعو خطير
عصام و اشراق دقة وحدة قاطعوه: جنيييين
عصام :واش ياسمين حاملة
دكتور : وي حاملة
عصام : وشنو سبب نزيف و كي بقات دابا
دكتور :المدام كتعاطى المخدرات شي لي خلى البنية ديالها ضعيفة.. زائد سوء تغدية .. عندها نقص حاد فالفيتامينات و لانيمي ...
و الجنين وضعو خطير .. منكدبش عليكوم .. مي وجدو راسكوم لأي حاجا لانو كنعاني من ارتفاع حاد فضغط دم ..
عصام(مصدوم ) : واش متاكد ادكتور بلي كتعاطا يقدر يكون وقع شي غلط
الدكتور : عودنا التحاليل جوج مرات.. مع الأسف مكاينش خطأ
اشراق : و شنو الحل
دكتور : خاص ضروري تدخل سريع .. غنخليوها تحت المراقبة باش نعرفو درجة الادمان لي وصلات ليها... وواش الام متشبتة بالجنين و عندها ارادة باش تحافض عليه و لا لا ...خاصكوم توقفو معاها بالأخص نتا خاص تقوم بدورك كزوج و كأب
عصام :لا لا لا ماشي ولدي زعما ماشي مرتي (ضرب على جبهتو بالتلفة ) راجلها عاد جاي مقدرناش نعلموه
دكتور :اه داكوغ لي نوصيكوم خاص تبعد من التوتر و اهم حاجة خاص نفسيتها تكون مزيانة المرحلة جايا غتكون صعيبة بزاف بالأخص مور 48h غتبغي تعاطى و فاس مغتلقاش غتصعاب حالتها كتر.. على العموم غير يجي راجلها غنشرحليه كلشي .. و نشوفو العلاج لي خاص نتبعو
عصام : ضاكوغ دكتور كون هاني .. غير يجي نعلمك..
مشا طبيب مخليهوم مصدومين حتا حد مكان كيتوقع بلي ياسمين كتعاطى ...
عند معتز ..
غادي سايك راشقاليه مراهش فهاد العالم.. طالق موسيقى هادية مرة مرة كيضور يشوف فايمان و يضحك غير بوحدو ..
غير وصلو حبس طوموبيل .. دار جيهت ايمان كيدوز يدو على حنكها كيفيقها..
معتز : ناري شحال نعاسك تقيل.. وا ايمان فيقي..
تنهد مكانش بغا يزعزعها و لكن مخلاتلو حتا حل.. غير حركها و هيا تنوض قافزا مخلوعة
معتز : بشوية عليك غير انا
ايمان فايقا مبوقة: اويلي واش نعست محسيتش
معتز : نعستي و شخرتي كاع..
ايمان : تفو كيديرهالي دوا
معتز (متفاجأ) :اشمن دوا
ايمان (بتوتر ) :اه والو غير لي خرجولي بالطبيب مور عملية
مع دارت مع خرجو عينيها.. ضحكات بحال شي بنيتة صغيرة ... كانت مدينة ملاهي السندباد
معتز : باقا عاقلة
ايمان : على انا نقدر نسا
معتز :اخر مرة جينا هنا كان نهار قبل من عرسك
ايمان (دموع هبطو) :كان احسن نهار دوزتو فحياتي
معتز : هبطي
ايمان : اويلي بهاد الحالة
معتز : مالها حالتك فنة
هبطا معتز .. مشا حل ليها الباب.. هبطات كتقاد شال فوق راسها..
ايمان : معتز هادشي لي كندير راه غلط و الله مخاصنيش نكون معاك .. مخاصنيش نخرج .. مخاصنيش نحتاك بشي راجل.. راه عيب
معتز: نساي كلشي و عيشي لحضة..
مد ليها يدو باش تشد فيه .. شافت فيه شحال و زادت مخليا يدو بلاكة
ايمان : سمحليا اخويا مكنشدش فالرجال
معتز (كيضحك):ياختي باز ممشيتي حتا رضيتي الصرف
ايمان (كضحك) :حشومة يبقا عندي..
معتز : مكتنسايش
ايمان : (كضحك ) : تفكرت ديك نهار
#فلاش باك #
ايمان : معتز سربي ارى يدك باش ندخلو دغيا خاص نستاغلو هاد النهار
معتز (كيضحك زاد خلاها بلاكة طالقا يدها): لا ختي سمحيلي مكنشدش فلبنات
#نهاية الفلاش#
دخلات ايمان و معتز كيضحكو ..و عينيها كيتساراو.. حاسا براسها جات المكان لي كتنتامي ليه .. مسوقاتش لناس لي كيشوفو فيها حيت جايا بالبيجامة.. حلفات حتا تستاغل النهار و تحاول متفكرش بزاف .. كانو اصوات دراري صغار كيجريو و يغوتو... مكرهاتش كون رجعات قدهوم الهم الوحيد هو تلعب و تخرج و دور..
شافها معتز ساهيا جرها من يدها مشاو خداو لي تيكي و بدات رحلتهوم فعالم الالعاب فعالم السندباد...
عند مروة عيات تصوني على معتز لكن مقدراتش توصليه.. صونات على عصام بغات تعرف وضع ياسمين شي لي صدمها فاش عرفاتها كتعاطى و انو حاملة..
متنكرش انو بقات فيها واخا مكانتش بيناتهوم شي صلة او علاقة ..
---
عند أديب كمل تدريب ديالو مور ممشات اروى تقاد الامور ديالها مع الإدارة باش ترجع تدرب الكروب ديالها .. غير سالات سمعات طيل كيصوني شافت بلي هناء .. متصوقاتش ليها.. سكتاتو بكل برودة ..
اروى : مزال نوبتك جايا غير بلاتي عليك...
----
داز نهار و كلها فاش كيخمم.. اشراق بقات نهار كامل مع ياسمين كتسناها نفيق..علمات كوثر بشنو وقع باش متساينهاش ...
عصام عيا يعيط لمعتز ووالو..شي لي خلاه يعيط لاركان يسول على معتز واش معاه.. هاد الأخير لي قاليه انو مشافوش اليوم كاع...
---
عند معتز
عايش الحياة مع ايمان ضحك ديالهوم كيتسمع من بعيد... مخلاو حتا لعبة ملعبوهاش... رجعو ايام الطفولة و المراهقة.. ايمان غوتات ضحكات بكات حسات براسها بديك الغوات فرغات كاع الطاقة سلبية لدرجة مرضاتش البال لوقت لي فات...
غير شافت بدا كيضلام الحال عاد عاقت بلي راه نهار كامل و هيا برا.. عرفات بلي راه زبلاتها نيت و اجاب مفكها من مها..
ايمان (لخلعة شاداها ):ناري مشيت فيها اليوم ماما دبحني اويلي نهار كامل و انا برا كيفاش محسيتش ياك قلنا مور الغدا نرجعو.. كيفاش بقينا حتا لهاد الوقت
معتز (كيضحك عليها ) : نتي بقيتي عليا نزيد غير عادي غير هادي ... المشكل كيف غاديري دخلي هاد نونوس لي ربحنا
دارت كتشوف مرة فنونوس مرة فمعتز و طرطقات بضحك: اولي اليوم تاكل عليا كسكسو
هبطات ايمان كضحك لي شافها ميقولش هادي لي خرجات و الدموع فعينيها.. بقا واقف كيتسناها حتا دخلات عاد كسيرا لكلينيك مدوز لابيل لعصام..
معتز :شنو واقع
عصام ؛فين غابر نهار كامل كنعيطو مخلينا فين قلبنا عليك
معتز :هاني دابا شنو واقع
عصام: اجي و تعرف الهضرة ماشي فتيل
قطع عليه حيت عارفو مغيحبسش من الاسئلة
عند معتز غير وصل دخل لقاهوم واقفين ..
معتز: شواقع فينها ياسمين
عصام : رآها لداخل معاها طبيب
معتز خاف يكونو عاقو بيها كتعاطى: مالها شنو عندها
مروة :مبروك عليك غتولي اب
كلمة اب بقات كتعاود فودنو كيفاش غيولي اب واش ياسمين حاملة .. ميمكنش ياك واخدين الاحتياط ياك كتاخد لابيلول.. تكون بغات تقولبو بلعاني.. مي هيا لي رافضا فكرة دراري و مبغاتش تولد.. و من الفوق كتعاطى كيفاش غيعيش هاد بيبي و ايلى عاش اشمن اب و ام غيلقا... اب ممسوقش و ام مدمنة. حاس دنيا كضور بيه مقادرش يفكر. حاس بعقلو حبس..
معتز :كييييييييفاش غنولي اب واش كضحكو معاي إلى كضحكو ماشي وقت الضحك هدا
كلشي استغربو من حالتو كانو متوقعين غيفرح... لكن واضح العكس .. مقدروش يجبدو موضوع الادمان..
داز مخليهوم مصدومين.. حل البال لي كانو واقفين قرابين ليها .. غير دخل و هو يتصعق بصوت لي سمع ... صوت لي خلى لحمو يتبورش .. كانو صوت دقات قلب الجنين.. بلا هواه زاد دخل كيحاول يتأكد من شنو كيسمع.. بقا غادي حتا وقف حدا ياسمين لي مكنتش اقل صدمة منو ... دموعها كيهبطو ممتيقاش شنو كيوقع..
دكتور ضار شاف فمعتز: كنتوقع نتا هو الاب.. بون كيف شرحت لمدام حالة ديال جنين ممستقراش اي حاجة ممكن تأثر عليه .. خاص تبقاي تحت المراقبة .. مخصهاش تحرك.. الجنين فأي لحضة ممكن يموت .. خاص ضروري تولي تاكل و تعاون بالفيطامين... ممنوع تعصب و لا تاخد اي نوع ديال مخدرات..
معتز عينيه غير على شاشة كيشوف بحال نقطة كتحرك.. هز يدو كيشير ليها: واش هدا ولدي لي كيتحرك ياك ولدي انا
طبيب : (ضحك على حالة معتز لي باين تالف ) : وي ولدك ولدك نتا
بون غنخليكوم دابا تهضرو.. غير تسالي اجي ندوي معاك مزال خاص نقتارح عليك لعلاج لي خاص نتبعوه...
خرج طبيب بقا معتز ساهي فنقطة وحدة..
جات الممرضة مسحات لياسمين كرشها من جيل ديكوكغافي.. و خرجات
بقات ياسمين كتشهق حتا نعسات بفعل المهدئات لي عطاوها..
خرج معتز قاصد طبيب .. غير دخل لقاه كيساينو
معتز : وي دكتور شنو الوضع
طبيب : مغنكدبش عليك توقع اي حاجا.. ممكن فأي لحضة يطيح.. متابتش مزيان.. مي واخا هكاك كيبالي متشبت بالحياة.. تابعنا مشوار طويل و اي وقت كيدوز راه فصالحنا خاص غير نعرفو نتصرفو.. معرفتش واش كنتي عارف و لا لا و لكن مدام ديالك كتعاطى.. شي لي أثر على الصحة ديالها و المناعة و صحة ديال الجنين ..
الحاجا المزيانا انو نقدرو نعتقو الجنين بحكم باقي الأسابيع الاولى مضررش بالمخدرات اي مكنضنش يكون تشوه خلقي و لاكن هادشي غنتاكدو منو مور الاسبوع 10 مهم .. لي بغيت نوضحليك .. حاليا مدام ياسمين غتمر بحالة صعيبة و بزاف خاص الدعم ديالكوم و بالأخص نتا.. على مفهمت مزال مكتقبلش فكرة تكون ام بسبب انو خايفة تفقد الجنين أو متكونش ام صالحة ...
حنا هنا بضورنا غنخليوها تحت المراقبة 24h و اتصلت بصديق طبيب خاص فحالات الادمان هكا غتقدرو نصقو مبين مشكل الادمان و مشكل عدم ثباث الجنين .. لي نصحك انو نستاعنو بشي طبيب نفساني يعاونا حيت فاش غتبدا مرحلة المعالجة اكيد خاص تدخل سريع ... اليوم عطيناها مهدئات مي منقدروش نزيدو نعطيوها حيت ممكن يضرو الجنين.. بون كنتمناو انو تستاجب و تكون عندها رغبة فالعلاج و الى غنضطرو نحيدو الجنين باش نعطيوها العلاج اللازم
معتز مصدوم من الهضرة لي كيقوليه.. : شوف دير اي حاجا بانتليك مناسبة (تنهد ) مي بغيت الجنين يعيش.. مستعد نكون اب مزيان و ندير اي حاجا على ودو
طبيب :خاص تكون زوج مزيان اولا و توقف معاها و عاد نشوفو دورك كاب
تنهد معتز خارج غنحاول كنواعدك...
غير خرجو لقا هناء ختو جات .. طارت عنقاتو ..
هناء (بفرحة ) :مبروك عليك .. فرحت بزاف إنشاء الله غتجاوز هاد المرحلة و تعالج
معتز (بحدة ) : مبغيت حتا حد يعرف هادشي ( خنزر فيهوم )حتا حد سمعتوني.. هاد الفترة حساسة .. مي غنتجاوزوها..
اشراق: مبروك عليك و الله يتبث حملها.. من جيهتي انا معندي لمن نقول ..
مروة : كون هاني و اي حاجا حتاجيتيها حنا هنا
عصام :متحتاجش توصي حنا كلنا معاك
هناء: متخممش.. اصل كنزة و بابا مسافرين برا لبلاد تقدر تجيبها عندي حسن متبقا بوحدها
معتز :غنبقا هنا تحت المراقبة و انا غنكون معاها.. بون سيرو رتاحو مشا لحال مكاين لاش تبقاو شكرا على وقفتكوم معاي .. حقا باش منساش غدا ايمان غنرجع مبغيتهاش تعرف .. هضرتنا تبقا هنا
مروة (مستغربة ) : مالك ياك لاباس .. دارت كتشوف فيه ركب بلا ميجاوبها .. شافت طموبيلتها لي محطوطة.. تأكدات انو مسدودة مزيان.. و ركبات
مروة : فين نمشيو
عصام كتافا يهيبط الكرسو و تكا مغمض عينيه حاس براسو عيان باغي غير يرتاح..
عصام : سيري حدا لبحر
مزادتش هضرات كتر .. طلقات اغنية كالم و نقصات فصوت.. و زادت غادا موقفات غير حدا جرف..
غير حبسات حل عينيه.. كيباليه لبحر هايج و المواج كيضربو فصخر..
ترددات مروة فالاول قبل متمد يدها لشعرو و بقات كدير حركات على شكل مساج شي لي خلاه يرتاح و تنهد تنهيدة طويلة و هز عينو شاف فيها....لقاها كتشوف فيه بحيرة و باينة شاغل بالها و باغا تعرف مالو
رجع استاقر بنظرو للقدام و نطق ..
عصام : كنوصلو لواحد الحد كنعياو من كلشي .. كنبغيو غير نرتاحو...كلشي تخلط عليا و الماضي رجع من جديد حيا.... الحد الان معارفش معنى العائلة.. من واليديا ماتو و خلاوني صغير ..بقيت مع جداتي موراها ماتت..
موراها فين تربيت مع اديب و معتز غير حيت كان الاب ديالي صاحب محمد الشافعي.. عمري حسيت بيهوم كيعاملوني بحال ولادهوم واخا هكاك بيناتنا حنا دراري كانت علاقة خاصة بالأخص انا و أديب مكناش كنتفارقو.. دخلت لمدرسة داخلية.. تاني فتاقدت الحنان.. تما كانو غير الأوامر خاص يتنفدو.. مرتاحيت حتا رجعت عشت بوحدي.. و الباقي راكي عارفاه.. من ديما كنت ضاحك ناشط ضارب الدنيا بركلة.. كنت عايش الحياة طول و عرض عمري فكرت فالاستقرار ..
ديما عايش و مولاها ربي.. كلشي كان مسمي عليا زهواني... بوبنات.. لدرجة فاش وقعت لاكسيدو و شفت كرم و ايمان فديك الحالة تصدمت فكرت انو كان ممكن انا لي نكون بلاصتهوم...حيت الموت مكتعلمش و موت الغفلة كاينة... كان ممكن انا لي نموت بلاصت كرم... باشمن وجه كنت غالاقي ربي... بواحد كل ليلة بايت مع وحدة.. بواحد ممصوقش غير عايش و صاف .. مداير حتا حاجا مزيانة فحياتي..
مروة انا عيييت الوقت كيطير مبغيتش يجي نهار لي نموت و انا معارفش معنى العائلة معارفش الحنان معارفش معنى الحب . معنى شخص فحياتك يخاف عليك و الى تعطلتي يتشطن عليك و الى مجاوبتيهش يبقا بالو معاك.. بغيت نجرب نعيش هاني و نحس بالحنان لي هادي سنين و انا مفتاقدو عيت بزاف و باغي رتاح...
مروة :ماشي ساهل هادشي لي عشناه بالأخص موت كرم كلشي اثر عليه .. الحياة فرمشة عين ممكن تخطفنا.. هادشي علاش خاصنا نعرفو نستاغلوها ..
عصام ضار كيشوف فيها : مروة انا مبقيتش قادر نعيش بوحدي.. مبغيتش يجي نهار و ندم علاش حتا انا مدرتش عائلة .. مبغيتش نبقا مفتاقد الحب و الحنان.. بغيت نعرف معنى تكون عندك أسرة لي تبغيك و تحن عليك (شد فيدها ) مروة تقبلي تزوجي بيا ؟
عرفتو احساس تكون باغي شي حاجة و كتحلم توصل ليها و حتى تبدا تقتانع انو ماشي من نصيب و عقلك يبقا يتقبل فكرة انو ديك الحاجة عمرها تكون ليك و بين ليلة و نهار يتبدل كلشي .. يولي الحلم حقيقة ...
هادشي لي وقع لمروة كلمة تزوجي بيا بقات كتعاود فودنها معرفات تبكي و لا ضحك ..مقدراتش تقبل هضرتو واخا كان باين عليه الجدية و انو مكيضحكش..
بقات كتشوف فيه و عقلها رافض يتقبل شنو سمعو ودنيها.. حاسا براسها فاي لحضة ممكن تبكي فأي لحضة ممكن يخونوها دموعها.. حولات تجمع راسها و تجمع الكلمات باش تقدر تجاوبو..
مروة كتحاول تخفي مشاعرها هزات يدها كدوزها على لحيتو: عصام نتا دابا ماشي فوضع باش تاخد قرار .. غير ضغوطات لي مخلياك تقول هكا ...
جر يدها باسها من كف ديالها : مروة انا فكامل قواي العقلية و عارف مزيان شنو كنقول و قراري خديتو حيت متاكد منو ..و من ديك نهار و انا كنفكر فيه.
مروة : علاش انا بضبط واش غير حيت فكرتي فالاستقرار..شنو لي خلاك تختارني..علاش انا ماشي وحدة خرى..
عصام : حنانك و عقليتك و حشوميتك و طيبة قلبك و اهم حاجة حبك ليا هو لي خلاني نكون متاكد من قراري.. خاصني مرة لي تكون ديال زمان .. لي تقبل بيا كيفما انا.. لي تفهمني..لي تكون صديقتي قبل من مرتي.. لمرى لي نرتاح ليها.. لي نأمنها لي نحس بيها و تحس بيا .. لي بصح كتبغيني بدون مقابل ..
غنقولك كون تصاحبنا و شفتك درجة ساهلة مكنتش غنفكر نتزوج بيه ..حسبيها كيف بغيتي مي البنت لي نتصاحب معاها مستحيل ندخلها لداري و تكون مامات ولادي ... و نتي لقيت فيك كاع ديكشي لي بغيت..
مروة : شنو نفهم من هضرتك
عصام قرب كتر لعندها وجها فوجهو كتحس بانفاسو سخان فوجها: فهمي حاجة وحدة انا باغيك و مقتانع بيك و غنعاود نسولك واش قابلة تزوجي بيا...
بقات مروة كتشوف فعينيه.. حاسا براسها كتحلم خايفة يكون هادشي كامل غير حلم و غتفيق منو..خايفة يكون مجرد وهم.. كتحاول تستوعب بلي راه بصح عصام ..الراجل لي كانت كتبغي عن بعد .. الراجل لي عمرو عطاها امال عمرو بين ليها اعجابو..
عمرها ضنات انو غتجمعهوم شي حاجة ..ها هو اليوم جا كيطلب منها زواج .. كيطلب منها تكمل حياتها معاه.. تكون ليه و يكون ليها .. يلاه بغات تجاوبو حتا كتشوفو قرب و حط شنايفو فوق شنايفها داخل معاها فقبلة حنينة.. كيشرح فيها كاع ديكشي باش كيحس.. كاع المشاعر لي عندو ..
مروة محسات براسها حتا دموع بداو كيهبطو.. كانت اول قبلة ليها فحياتها.. كانت ديما كتمنى انو الشخص لي يحضى بيها يكون ملك قلبها.. ديما كانت كتخيل كيفاش غتكون اول قبلة ليها.. لكن فالواقع فاقت كاع التوقعات...
عصام لي غير شافها غدوي .. خاف ترفض حيت من اسئلتها حس بيها مترددة.. متيقاش فقرارو.. عارفها كتبغيه.. لكن متأكد انو مروة كتخدم عقلها بزاف .. كتلغي مشاعرها و احاسيسها بالأخص فالقرارات المصيرية..
خاف انو جوابها يكون التردد و لا رفض هادشي علاش قرر يدير خطوة لي ممكن تأثر على عقلها و تلغيه من الوجود..
كان عايش اللحضة حتا حس بدموع ديالها شي لي خلاه يرجع اللور مستغرب خايف يكون زرب عليها خايف تكون هادالخطوة لي دار تضربليه كولشي ف 0..
عند مروة غير شافت تعابير وجهو فاش بعد جابليها ضحك لدرجة مقدراتش تشد ضحكة ...
ضحك عصام من جوابها هز يدو كيرد شعرها مور ودنيها: انا خايب محشمتيش.. هاد زين كامل رضيتيه خايب
مروة : خايب و بزاف
مخلاهاش تزيد تدوي جرها كتر لعندو داخل هو وياها فقبلة لي تجاوبات معاه هاد المرة كتحاول تسايرو و دير بحالو
عصام : هااح حلوة
مروة : كنتي مولف غا بل الباسل
عصام ضحك على هضرتها: مكدبتيش.. حط راسو فوق راسها.. مزال كنتسنى جوابك ..
مروة :خاصك تسنى بزاف
عصام : مبقيتش قادر.. باغي نتزوجو اليوم قبل غدا ..
مروة : معندنا علاش نزربو.. اصلن باقي خاصنا لوقت لشحال من حاجة.. و عاد خاص تجي تخطبني من دارنا و خاص نساينو حتا يرجعو عائلتي ...
عصام (بجدية ) : مروة غنتزوج بيك نتي ماشي بعائلتك.. مغنبقاش نساين انا حتا يجيو.. ديك تخربيق لاخور باقي عليه الوقت نديروه ايمتى مبغيتي ..
مروة : منقدرش نتزوج بلا عائلتي خاص ضروري حتا يوافقو ..
عصام (بدا كيتعصب ): نتي عارفا مزيان باك كيف داير و عزيز عليه المضاهر ماشي عاد غنعرفوه. و هو راه كيعرفني من شحال هادي .. و إلى على ماماك مكنضنش غتعارض..
مروة (كتحاول تبرد حيت شافتو تعصب ) : عصام كالم حنا كنتناقشو ماشي كنتعصبو.. راه اي بنت كتبغي تفرح براسها
عصام (تنهد ): مقلتش العكس.. نتي عارفة مزيان معنديش عائلة كاين انا بوحدي.. حتى من أديب لي يمشي معاي مكاينش.. بغيتي تفرحي براسك معنديش مشكيل .. نتزوجو و نقادو على خاطرنا.. يحضرو كاع لي كنعرفو.. دابا إلى ساينا حتا يجيو داركوم خاص ضروري يمشي معاي شي حد .. و انا ممستعدش دابا نقول لشي حد يلاه معاه .. و حتى من كنزة و محمد مكاينينش..
مروة : و شنو نديرو ا عصام راه مفيها والو ...واخا تجي يوحدك معليش
عصام(كيحاول ميتعصبش عليها) : متحمقينيش... (شد فوجها ) شوفي نتي علميهوم بلي غنتزوجو و فاش يجيو نقادو على خاطرنا.. معنديش لعقل لي نبقا نساين .. راعي غير ضروف ايمان و معتز مجاتش عاد مات راجلها نوضو حنا نعرسو..
تنهدات مروة معرفات مدير بالأخص مكتحملش يزرب عليها شي حد .. فاهما الموقف ديالو .. حسات بلي مراضيش يمشي بوحدو.. يمكن خايف باها ميقبلش لمجرد معندوش عائلة و كبر فداخلية...
تنهدات كتشوف فيه مغمض عينيه مخنزر.. ولفاتو ديما ضاحك.. متنكرش كتبغيه و باغا تكون معاه .. لكن فنفس الوقت بغا كلشي يكون على اصولو.. عارفا مزيان عائلتها كتموت فالمضاهر و مغيقبلوش انهوم يتزوجو دغيا بلا متكون فترة خطوبة .. متأكدة انهوم غيضغطو عليه و يحكرو بزاف..
تنهدات كتشوف فيه ... غمضات عينيها و خدات نفس طويل قررات ديرها فيد الله .. و متفكرش بزاف .. اهم حاجة سعادة ديالها .. و عصام هو الراجل لي كانت كتمنى تكمل معاه حياتها..
تحنات حطات راسها حدا عنقو ..شي لي خلاه يزيرها كتر عندو حاضنها كتر .. بلا شعور باستو من عنقو و همسات فودنو: ايمتى نقادو لوراق..
عصام تنهد براحة اخيرا رحماتو كان خايف تعقد الامور...
دور وجهو لعندها باسها من نيفها و حط راسو فوق راسها: كنت خايف متوافقيش
مروة (بضحكة كلها حب ) :على شكون قالك وافقت
عصام ( عضها من نيفها):بسيف عليك (بجدية ) :غدا نمشيو ناخدو موعد و نجمعو لوراق ..
مروة حلات عينيها بصدمة: بهاد سرعة
عصام : مكرهتش نتزوجو دابا قبل من غدا
مروة : ياكما خفتيني نغير رأي و تبقا بلا زواج حتا وحدة متقبل بيك .
عصام (ضحك ): لا من ديك ناحية مخايفش عطا الله البنات راه انا لي مقابلش بيهوم
عند اشراق صونات لكوثر علماتها باش تجيب ليها حوايجها ..كانت موجداهوم قبل..
موراها دخلات لاصال لقات سيدة مولات شي تما كتساينها.. سلمات عليها اشراق.. عودات وراتها لاصال لي كانت كبيرة فيها الفوقي و سفلي.. مجهزة باحدث التجهيزات و لي مطرييل.. اي حاجة قلبتي عليها تلقايها.. عندها جوج بيبان واحد كيدي لصالون لي تابع لاصال... وواحد ل بيسين كبير مغطات.. و عاد بلاصة خاصة بالمساج و الصونا ... فالجيهة لخرى كانت كفيتيرية صغيرة ...
القاعة كانت تصميمها اروبي..متسخايش تخرجي منها..
دخلات اشراق و مريم (مولات لاصال) لواحد قاعة كبيرة وواسعة فيها جوج دلي باف كبار.. و كلها مرايات..
مريم :هادي هيا البلاصة الخاصة بالرقص.. فالصباح كيكونو افواج ديال بنات صغار لي كيتعلمو البالي.. لعشية غتكون ليك .. ختاري الوقت لي يناسبك و قسمي ليكروب كيف بغيتي..
اشراق: ضاكوغ ندير لي هوم غير الرقص الشرقي ياك
مريم:تماما
اشراق : صاف كوني هانيا
مريم : فوالا ها البيسي قادي الموسيقى علاما يجيو...
اشراق (ضحكات ) : غا حلمي عصام لي كنت معولة عليه راه بسيف باش كيقرا عليا سلام مور مساق لخبار لدكشي لي طرا مع اديب ..ايوا صونيت لكريم نقلقل سوق قالي لي بوسط عامرين و بلي فامكاني نبقا سطاج مي خدمة لا ..
كوثر:مديريش فبالك عصام يمشي يw9د و الخدمة بداي دفعي سيفيات يجيب الله
تلقات اغنية على اقاع الدربوكة و بدات معاهوم اول درس بالرقص الشرقي..
عند كوتر رجعات لدار بقات شحال كتشوف فطيل دإشراق.. هزاتو .. دخلات ل غيبيغطواغ اول سمية طلعات هيا أديب .. بقات شحال كتشوف فيها.. عقل كيقولها ديرها و عقل كيقولها لا .. بقات كتمشي و تجي حتا بالها طيل غيطفا.. طارت دارتو فشارج و بقات حاضياه..
كوثر : خاص نتصرف ميمكنش نبقا كنتفرج فيهوم..
ناضت دوشات مخليا طيل كيتشارجا.. طول وقت دوش كتفكر فالخطوة لي باغا دير .. غير خرجات لبسات حوايجها.. حمدات الله لي اشراق باقي مجات ...
تنهدات كتجمع الشجاعة و الجرأة لي كتملك.. تنهدات و دارتها فيد الله ..
---
عند أديب غير سالاو تدريب خرج هو اروى دازو على سوبيغ مغشي خداو ديكشي لي خاصهوم .. اول مرة كيرد البال بلي عندهوم نقط مشتركة.. ديما كان كيخلي بينهوم مسافة حيت خاف إلى بصح تكون كتبغيه و يجرحها.. اليوم قدر يتعرف عليها كتر و يتطلق معاها بالأخص مور معرف انها كول و عفوية و حتا من كارلوس كتعنب عليه..
فهم بلي تركيبتها هكاك دايرا و قرر ميحكمش عليها من الماضي و مدام دابا ساكنين بجوج و غيكونو فنفس بلاصة دونك مكاينش لاش دوك لحزازات..
غير دخلو مشات اروى كتستف ديكشي لي شراو..
اروى : كون غير خليتينا خدينا لعشا من غيستو. ناري راه مغنعرفش انا نطيب ديكشي لي نتا باغي ونخاف ميجيش لديد و نبقاو بجوع ...
أديب(كيضحك عليها ) :عولنا عليك بكري ابنتي.. بقيتي فيا ... صاف غنجي نعاونك ... ما فيا لي يبات بلا عشا...
اروى(كضحك) : اودي كون مكنتي نتا كون راني فريستو كناكل ..
أديب(كيضحك) : حسن عوان هاد راجل لي غيديك غيقتلو غير جوع
بقا أديب كيقاد معاها و يوريها شنو ندير... مع مرة يهضرو فالملاكمة.. مرة يهضرو على الطفولة مهم كل مرة جابدين موضوع جديد.. و اروى كتفادا دوي على العلاقات و لا تجبد شيحد من المغريب.. حتا من هناء مدواتش عليها..
أديب: قادي هادشي لي بقا و صاوبي العصير انا ندخل بالخف ندوش و نجي
أديب: لا نديرو شي فلم حسن ...سالي ديكشي و قلبي معاك على شي واحد يكون ناضي..
اروى:صاف ..سي بون بصحة
دخل أديب يدوش يحيد عليه لعيا غير خرج قشع طيل ديالو كيصوني.. فالاول استغرب انو نمرة دلمغريب..
عند اشراق .. سالات الحصة لي دازت زوينة حسات براسها نشطات معاهوم... غير رجعات لدار مع دخلات لبيت قشعات كوثر هازا طيل ديالها.. يلاه غتسولها شنو كدير ... شافت كوثر قفزات غير بوحدها فاش شافتها..
بتلفة كوثر بلاصت متقطع لابيل قاصت هو باغلوغ و فنفس الوقت تحل الخط و تسمع صوت أديب ..
أديب: الو وي شكون معايا..
اروى(كتعيط ) :بيبو إلى ساليتي دوش لبس عليك و اجي ... لعشا راه واجد و ختاريت... و حتا العصير لي بغيتي راه قاديتو و كتر ليك لافوكا و لوز كيفما كتبغي.. و لقيت فيلم واعر ..
خرجات اشراق مخليا كوثر تيقتلها الندم.. ندمات كاع علاش عبئات و فكرات تصوني لاديب .. كانت بغات غير توصليه نمرت اشراق و منها نيت تحاول تجمع بيناتهوم.. مبغاتش تشوف صاحبتها كتعدب ... ساعة نطابق عليها المثل جا يبوسو عورو..
غير شافتها خارجا من دار فليل .. مشات كتجري تلحق عليها ..
كوثر :فين غادا واش حمقة ليل هادا دخلي بحالك ..
اشراق : (وقفاتها بيدها) متبعينيش يكفي لي جا منعندك الله يخلف عليك
كوثر (كتبكي ) : اشراق انا..
اشراق(نفاجرات) :نتي شنو نتي شنو .. نتي طفيتي اخر شمعة كانت مضوية فحياتي.. كان عندي امل تبخر.. كنت كنتسنا يجي نهار لي يرجع .. مكنتش باغا نتقبل فكرة انو مشا معاها .. كنت كنقول غير صدفة.. كنت كنكدب عقلي و نتيق الاوهام.. جيتي نتي زدحتيهالي فوجهي.. بودني سمعتهوم.. دابا تأكدت ولكن عرفتي هادي احسن حاجا طرات .. حيت انا لي حمارة مكنتعلمش .. عطيتو قيمة .. ينعل جد الحب لي جيب الدل .. شكون بغا يكون كاع غا w9اد محطوط..
(مسحات دموعها ) من اليوم مبقيتش ديك البنت لي كتعرفي .. ديك اشراق ماتت.. من اليوم غنمشي بمبدأ لي مفيه نفع دفع.. غنولي انا نستاغل.. الى شحال هادي كنت انا راقصة على حلبة المصارعة.. اليوم غنولي جمرة مشتعلة لي قربلي غيتحرق بلهيب ديالي ..
كوثر (كتبكي كتشوف حالة اشراق ):شوفي اشراق نتي دابا
قاطعتها بجدة: نتي بدات اخر مرة دخلي فيا.. اخر مرة .. هادا اخر تنبيه .. كلشي من تحت راسك .. شكون قالك عيطي.. واش انا حرت نعيط.. واش انا جاتني صعيبة .. ياك قتليك كرامتي متسمحليش و الى بغاني عارف كيفاش يوصلني.. نتي شنو درتي شطبتي بيا اللرض.. شوفي اخر مرة صوري بساحتي.. w9دي عليا حسن من9ود معاك سوايع...
خرجات اشراق معصبة.. زدحات الباب و خرجات.. معارفا فين تمشي و لا فين تجي بقات غادا كتمشا فليل .. لي يشوفها يقول هادي شنو مخرجها فهاد الليل و منين جابت هاد زعامة كاملة.. مخافت يتعرضلها شي حد و لا يتعدا عليها ..
بقات غادا ساهيا كتفكر فحياتها و كترتب افكارها.. خدات قرار مغترجعش فيه حلفات حتا تبدل.. حلفات حتا تقتل اشراق لبنت لي كتخدم احاسيسها و مشاعرها.. اليوم تولدات اشراق خرى .. اشراق لي غتحرق الرجال و تنتاقم لكل بنت عانات بسباب الحب ..
---
عند كوثر الخلعة غتقتلها.. خايفا توقع ليها شي خاجة .. معرفات واش تبعها و لا لا .. بقات كالسا فبلاصتها معارفا مدير .. دازت كتر من ساعة و باقي مرجعاتش ... بدا كيدخلها الخوف .. خافت تكون طرات ليها شي حاجة ..
مجات فبالها غير ايمان .. قالت تقدر تكون مشات عندها.. هزات طيل كتعيطلها ساعة مجوبتهاش.. زادت كملات عليها... بقات كتبكي و تلوم راسها.. كون غير متصرعاتش و عيطاتليه.. اولى على الاقل كون تأكدات بلي اشراق مزالة معطلة.. الندم كيقتل فيها.. كانت بغات غير تجمعهوم... صدقات مفرقاهوم كثر...
---
عند ايمان غير دخلات لقات مها غتاكل جنابها ..
مامات ايمان : اتباركالله جيتي بكري كون غير بتي ..مزال الحال
ايمان : ماما بلا متبداي خاصك تحمدي الله لي خرجت .. خليني راشقالي
ام ايمان : وراه ناس غيدويو فيك خارجة بوحدك ممعاك حد معرفناك فين زدتي.. مبغيتي تقولي معامن كنتي ..
ايمان (بجنون) : ناس ناس ناس قهرتيني بهاد ناس.. ا لالة مسوق حد فيا ماشغل حد واش باغيين تحمقوني واش باغيين تقتلوني وا رحموني شويا وراه بنتي لي ماتت .. قيلوني عليكوم.. خليوني نعيش .. واش حاسديني علاش خرجت .. ياك هو مات و بنتي ماتت مبقا جامعني بيه حتا حاجة.. مالكوم باغين تحمقوني.. (بدأت ايمان كتبكي و ضرب فراسها)
ام ايمان تخلعات شافتها كضرب فراسها و تغوت مشات كطير كتشدها ) : صاف ابنتي صاف موقع والو انا غير تخلعت عليك .. صاف ا بنتي ميكون غير خاطرك تهاني تهدني موقع والو .. بغيتي حتا دابا نخرجو نخرجو غير تهدني
ايمان : انااا عيت عيييت رحموني
ام ايمان :صاف نوضي نوضي ترتاحي..
بقات كتسايس معاها ندمات كاع علاش دوات.. نوضاتها من الارض .. شافتها ناضت مشات هزات نونوس لي جابت معاها.. كانت بغات تسولها عليه و تراجعات حالتها حالة حمدات الله لي باها مكاينش ..
---
عند اشراق غير خرجات بقات كتمشا.. حشات يدها فجيب من زهرها كتلقا لاكاغط فيزيت فيها نيم ديال اركان بقات شحال كتشوف فيها .. و رداتها بلاصتها..
قلبات جيابها لقات 100 درهم لي عندها فجيب ..
مشات جيهت طاكسيات.. بقات كتقلب واش تلقا شي راجل كبير تما.. طاحت عينيها على واحد الراجل مول طاكسي نيت ...
اشراق : نتا عارف هاد العنوان بعيد حتا حد مغيبغي يوصلني و نخاف على راسي.. ديرني بحال بنتك و دير فيا هاد الخير .. جبدات 100 درهم.. هاهيا ديها خود بيها العشا لوليداتك
تنهد مول طاكسي : طلعي طلعي
طلعات اشراق و طريق كلها كتفكر فلي جاي .. كرهات حياتها.. حاسا براسها عايشة ففراغ..مكرهاتش تنعس و تفيق تلقا راسها مزالة فدارهوم و صبح الحال ..
طول طريق و هيا ساهيا لدرجة محساتش امتى وصلات حتا هضر معاها مول طاكسي..
نزلات اشراق كتنهد.. بقات غادا حتا وصلات حدا دار .. كتمنى تلقاها فايقا.. يلاه جات دق حتا تحل الباب
الشريفة: تعطلتي كنت كنضن غتجي قبل
تصدمات اشراق من هاد المرة كل مرة كتصدمها ..
دخلات اشراق مجوباتهاش.. حيدات صباطها و تجبدات فوق سداري مغمضة عينيها..
هزات الشريفة يزار بيض غطاتها بيه..
كلسات حداها كتشوف فيها مغمضة عينيها و دموع كيهبطو
الشريفة : مشا ياك
اشراق : مشا
الشريفة : كتبكي عليه
اشراق : كنبكي على راسي
الشريفة : قتليك ديك نهار يا حاربي يا رجعي لور
اشراق : كان واخد قرارو مشا و داها معاه
الشريفة : ماشي اي حاجة كنشوفوها راها كاينة
اشراق : سمعتهوم بودني
الشريفة : يقدر تكوني فهمتي غلط
اشراق : مبقاش كيهمني
الشريفة :كون مكانش كيهمك كاع ماتجي فهاد ليل
اشراق :جيت نرتب افكاري
الشريفة :جيتي تخلي الماضي و تسدي عليه
اشراق : لماضي حرقتو جيت نحط رمادو
ناضت اشراق كلسات حيدات سنسلة لي عطاها اديب حطاتها فوق طبلة..
الشريفة: على اساس الى خليتيها هنا غتنسايه
اشراق : قصتنا سلات مخاص حتا حاجة تفكرني فيه
الشريفة : انا منك نخليها باش غير نشوفها تفكرني بشنو داز عليا
اشراق : منحتاحش نتفكر .. حيت كلشي مشا
الشريفة: شنو عوالة ديري
اشراق : غنبدل المدينة
الشريفة : ماشي حل حيت فينما كنتي غيكون معاك
اشراق : و لا من الماضي و ميستهلش نتفكرو
الشريفة :شنو جابك لعندي
اشراق : جيت عندك تشرحيلي الهضرة لي قلتيلي ديك نهار .. و علاش كنتي متاكدة بلي غنرجع
الشريفة: نهار يجي وقتها غنشرحهاليك..
اشراق :مغنرجعش مزال
الشريفة : باقي غترجعي..
اشراق :شنو مخليك متاكدة
الشريفة : الزمان كيعلم الانسان .. لي نقوليك عيشي حياتك و نساي الماضي ..
اشراق : الماضي مات و حياتي من غدا غتبدا
الشريفة :حضي من دياب لي ضايرين بيك .. تغفلي ياكلوك
اشراق : مبقا كيهمني والو ..
الشريفة : مزال طريق طويلة قدامكوم و مزال غتجمعو.. و غتقولو يا ريت متجمعنا
عند ياسمين غير كيفوت مفعول المهدئ كيرجع ليها الحريق كتبغي تموت راسها كيتشق عليها .. جا لوقت لي خاصها لادوز ديالها.. غير فاقت لقات معتز حداها.. لحمها كامل كياكلها..
معتز :تهدني تهدني شويا و يجي طبيب
ياسمين (كتبكي كي الحمقة) : معتز مغنقدرش.. حاسا براسي غنموت.. راسي كيتشق لحمي كتاكلني.. معتز رحمني ندير لي بغيتي ..
معتز (بحنية ) : تكالماي.. شوفي فيا .. ياسمين شوفي فيا (شد فوجها ) انا معاك... غير مرحلة و غدوز.. على قبل ولدنا.. على قبل ولدنا خاصك تصبري
عيا يحاول يهدنا فتالي عيط لفرمليات جاو شدوها معاه و لحق عليهوم طبيب .. لي عيا يحاول يهدنها لكن بلا فائدة.. متهدنات حتا عطاوها مهدئ رخاها فلبلاصة .. خلاها تبقا تهلوس برا من عقلها..
طبيب : الى بقات على هاد الحالة مكنضنش الجنين غيعيش راه مخاصهاش تحرك كاع
معتز : و شنو الحل
طبيب : مع الاسف خاص نحيدوه.. و نبداو بالعلاج القاصح
اديب : انا الماضي نسيتو.. و خيخت منو .. سمحت فيه فالمغريب و بعدت باش نرتاح و نبدا من جديد.. منكرش محملتكش حيت جيتي معاي .. قلت هادي غتبقا لاصقا.. مبغيتش ديك مشاعر المراهقة لي كانو عندك يرجعو.. حيت انا ممستعدش نحمق راسي لا معاك لا معا غيرك .. عندي هدف و باغي نحققو و نركز عليه .. انا ماشي خايب و الى عاملتك بديك طريقة راه لمصلحتك
بدات اروى كضحك كتحاول تخبي توترها من الموقف : اديب انا راه نسيت عرفتي شحال من واحد بغيت موراك .. راه كيفما قلتي كان حب مراهقة و داز و نسيتو فاش كنتي ختاريتي ياسمين .. راه انا هكا دايرا وليت كول بحكم عشت هنا مدة طويلة.. حتا من عقليتي تفتحات.. و كون هاني راه كنتعامل معاك كصديقتك فقط يعني من هاد ناحية كون هاني ..
اديب : راه هادشي لي لاحضت بالاخص اليوم تعرفت على جانب خور منك .. و شفتك كيفاش تعاملتي مع كارلوس شي لي خلاني نرتاح و نبغي نفتحو صفحة جديدة و هادا سبب لي خلاني نكلس معاك و نضحك عادي فبغيت نحطو نقط على الحروف باش من بعد منطحوش فالمشاكل
اروى (كضحك بالفقصة) : اويلي لا كون هاني اصلن بيني و بينك حاسا براسي كنبغي واحد شخص و عليه حاطة لعين ..
اديب (كيضحك): حسن عوانو من دابا..( شد فيدها ) نتي بنت مزيانة و عزيزة عليا مبغيتش نخسر صداقتك بالاخص دابا حنا عيشين بجوج و كنخدمو فنفس بلاصة.. بغيت كلشي يكون واضح بيناتنا
هزات اروى مخدة ضرباتو بيها: ايوا الله يمسخك هادشي كامل مخليه فقلبك.. من اللول سولني ..ناري شحال وليتي نgار مكتقاداش.. كحز كحز خليني نتكا باغي نتفرج..
اروى كلسات: اديب واش بسبابها نساحبتي و جيتي لمغريب .. سمحتي فكلشي و هربتي
اديب ( لي هرب منو طاح فيه ) (كيطنز) : راه هربت منك نتي صدقتي تابعاني
اروى (بغا تعرف بصح واش كيبغيها) : احياني عليك gر gر شنو تما .. ياكما سرقاتليك لقلب و خلاتك محن
اديب (كيضحك) : لا باليا نتي لي محنة هاد ساعة .. يكما لعشا تقل عليك ووليتي كتهبرتي و تخايلي غير بوحدك ..
اروى : احياني عليك (كلسات كدوز يدها على لحيتو) : انا ديما هنا ايمتى ما حتاجيتي نهضرو انا موجودة.. (باستو فحنكو و ناضت)
جرها من يدها حتا طاحت عليه بقات كضحك.. رجعات كلسات حدات
اديب (بجدية) : كانت غلطة و صححتها متعمريش راسك بيا .. انا هنا جيت باش نفتح صفحة جديدة مبغيتش نتفكر لي وقع .. ديكشي خليتو تما .. كنتمنى تكون هادي اخر مرة نجبدو الهضرة على المغرب ..
اروى (بابتسامة ) : صاف كون هاني كن اليوم غنعيشو الحاضر و المستقبل..
(حلات يدها باش تحضنو ): بغيت نرجعو حسن من شحال هادي.. بغيت صداقتنا ترجع..
اديب (عنكش ليها شعرها ) و جرها حاضنها عندو.. اي حاجة حتاجيتيها انا موجود.. (كيضحك) مزال تقوليلي شكون تعيس الحظ لي خطف قلبك..
اروى : بزاف عليك راه مزغرتا عليه مو.. (دفعاتو )كحز كحز و نتا استحليتيها ناقصك حنان
بقا كيضحك اديب عليها: بعدي مني و نتي كي العلقة غير كتعلقي فيا..
اروى : تفرجنا بكري معاك نتا..
بقاو كيضحكو خدمو فيلم بقاو كيتفرجو مرة يهضرو.. مرة يضحكو.. حتا غلبهوم نعاس.. و كلها مشا لبيتو..
جا صباح جديد صباح لي غيقلب الموازين...
عند اشراق فاقت بكري خرجات.. خلات الشريفة ناعسة.. بقات شحال كتشوف فسنسلة.. ترددات فالاول باش تهزها.. لكن فالاخير هزاتها خباتها فجيبها.. و خرجات قصدات جارتهوم... طلبات من راجلها يوصلها وعاد تخلصو حيت مهزاش معاها.. من زهرها كان هو نيت غيهبط لمدينة وافق يوصلها بلا فلوس..
عند ياسمين دازت عندها ليلة كولها كوابيس كتفيق مخلوعة غير كتقفز.. غير كتحل عينها كتلقا معتز معاها كيطبطب عليها .. فهما مزيان انو كمدير هادشي على قبل ولدو اما حتا هيا عارفة مزيان بلي مكتهموش..
غير حلات عينها تشوف البيت كلو بالونات فلحمر وورد فكل جيها.. كيبانولها دي ساك من مركات عالمية .. شكولا من كاع الاشكال محطوطين.. عينيها خرجو فاش قشعات ماركتها المفضلة.. كتسد عينيها و كتحلهوم باغا تأكد بلي مكتحلمش.. دورات وجها لجيهة لخرى بالها معتز هاز فيدو لبسة ديال دراري صغار فلبيض
غير شافها فاقت زاد لعندها..
معتز (كيدوز يدو بحنية فوق شعرها) : صباح نور كيبقيتي
ياسمين عينيها غير على الحوايج لي محطوطين (بفرحة ) : واش هادشي كامل ديالي
معتز (بابتسامة) :كلشي ديالك و لي بغيتيها نجيبهاليك..
تنهد معتز حاس براسو داير فوق جهدو.. ناض دايها على قد عقلها.. كيهز فلي ساشي و يعطيها..
ياسمين غتهبل على الحوايج.. مشالها لنقطة ضعفها...
ياسمين (بلهفة ) : هادو كاملين ديالي مكنحلمش ياك
معتز شد فيدها باسها : كلشي ديالك غير رتاحي لي بغيتيها تجيك..
ياسمين : مغتحيدهومليش ياك
معتز : ياسمين نساي الماضي.. من دابا الفوق لي بغيتيها غتكون غنبداو صفحة جديدة .. غنعيشو و نضحيو على ود ولدنا.. غدير اي حاجة باش تكوني فرحانة .. غنبداو صفحة جديدة ... عارف راسي مكنتش الزوج المتالي مي عنحاول نكون اب ..
بقات ياسمين كتشوف فيه : زعما غنقدرو نجحو
معتز حط راسو على راسها : غنتعاونو على قبل ولدنا غنتبدلو..
عند اشراق غير وصلات لقات كوثر باقا فايقة الخلعة غتقتلها غير دخلات طارت لعندها
شهوة ملاكم الجزء التاسع
محتوى القصة
التنقل بين الأجزاء