البنت فاش كتكون معمرها كحلات عينيها وخا تزينهم بماسكارا او ايلاينر او قلم لكن فاش كتكحل اول مرة الكحل العربي عندو ميزة خاااصة لعين عندو لمسة وحدها ميميزها تاحاجة من باقي مستحضرات التجميل ...الكحل العربي اذا زين بيه العين عطاها جمال خاص عربي وخاصة اذا كان لونها غير حتى العين سوداء كيميزها ويعطيها جمال خاص ....ف كيف لوحدة اول مرة ديرو وعينيها لونهم عسلي ...قيل ....اذا تكحلت
البيضاء جاورت القمر ...
مشات وخدودها حمرا وشفافيها كتعض فيه بتوثر …
عيناكِ سيدتي رمزُ البراءةِ
عيناكِ سيدتي رمزُ البراءةِ والعفويه
عيناكِ.؟ نعم!! انتي يا صاحبة العيونِ العسليه
يا من بجمالها لم أرى اي فتاةٍ ولا صبيه
يا من تملُكينَ خدوداً بنفحاتٍ ورديه
يا من يغارُ الورد منكِ ومن انفاسُكِ. الزكيه
انتي وعيناكِ وجهكِ وشفتاكِ النديه
صورةٌ من صور الجمال الابديه
يا ساحرةٓ القلوبِ يا زهرةً مخمليه
كتبتُ فيكي شعري ونظمتُ قصيدةً غزليه ،،
عنوانها انتي يا صاحبة العيونِ العسليه(مقتبس)
مع الدخلة لقاو العيالات كل الي كتعرف شي وحدة جلسات حداها فالطبلة هالي دايرة شال على لكرسي تسوليها تقوليك عامر وهي راه شاداه لولدها عندو شهرين ...كانت بنية
مصاوبة قدام دار العرس مزوقة والطوابل مفرقين بكراسا ملبسينهم ومزوقينهم ...كل طابلة هي اصلا كتهز تمنة تال عشرة ناس لكن كانو فيها ازيد من عشرين وحدة كل وحدة جايبة معاها جوج ثلاثة ناهيك على البراهش ...جوج بنيات يلاه قدو ...وبعيد بشوي كاين بنية فيها رجال وفيها الجوق المكون من فرقة فيها الي كيغني بكامنجة ديالو ووراه دراري كل عندو الة موسيقية ....مع الدخلة
لفتو الانضار بدخولهم بستة مقادين وباينة فيهم الاناقة والرقي وحتى الاحترام والوقار ...حتى تلقات ليهم جدة العروسة وامها ...
فاطنة "لابسة قفطان بيض وشال بيض ودايرة طابلية الي عطاتها شي زرورة تشدها تخزنها تم هههه " : مرحباااا بلالة يامنة مرحبا بال الحاج رمسيس ...زيدو مرحبا طابلتكم موجودة ...
يامنة : الله يكبر بيك اللا فاطنة ...
وصلاتهم حتى لطابلتهم جات معزولة شوي وجلسو كل فكرسيها وحداهم شي عيالات وحدة حاملة كرشها لفمها ووحدة هازا ولدها فايدها عندو عامين حاطاه فوق طابلة ....
مينة : كل الي عندها احسن قفطان لبساتو هههه
سارة : وماشتيش الي عندها عصير الصابون جبداتو و سنسلة المصحف قد سخط ...
نوار : اشناهو عصير الصابون ههههه ...
نجوى : هو واحد دمليج عريض هااز الوزن كيقولو ليه عصير صابون هنا يا كيديروه يتباهاو بيه فالعرس يا خازنين فلوسهم فيه يعني لا تحزو كيبيعوه ...
يسرى : هادشي ماشي غي فالعروبية حتى فالمدينة الناس كتخزن فلوسها فالذهب ولكن دابا ولات البنكة خبي فيها فلوسك ونتي مرتاحة ...
مينة : وايه ولكن ضروري متشري ذهب ...
يسرى : نوار درتي سنسلتك الي واخذ ليك باباك ؟
نوار : مكنحيدهاش اماما ديما فعنقي درت حلقاتي وگورميطي وخاتمي حتى يسالي العرس ونحيدهم معنديش مع هادشي كيثقلني ..."هي كتهضر حتى نتفها داك الوليد من شعرها " اااي ..."ضارت لعندو لقاتو كيضحك في حنكو غمازات محفورين وجوج سنات لفوق وجوج لتحت ...شهيب ...." وييينووو
دابا اشنو درتي ؟
هو : اغغ هههههههه و وينة ...
نوار : اشنو ؟
ماماه : قاليك زوينة هههه تبارك الله ...نتناسبو ؟
سارة : صااافي الي بداوه لاخرين كملو ا علي ولد المصدي ...."ولد المصدي عندهم فدوار كيعرفوه ومكنينها عليه بضحك حيث شمش رجعات لونو قهوي مصدي وهو اصلا سمر كمل والوليد شابه لمو شهبة ...." صافي ....
وكيف عادة كل دار وكل عرس وعلى حسب المستطاع وحسب مالين العرس اش كيديرو وكل وتقاليد البلاد ومالين العرس ....بدا الجوق كيسخن ويبدا شوي بشوي ها اغنية مطلوقة حتى يتجمعو ناس ...دخلو بنات العرس هما الي كيسربيو ....هالي بغات الما هالي بغات كاس زايد ....العيالات هالي بقفطان عاد مخيطاه هالي مزال عروسة جديدة جالسة بقفطان ولا تكشيطة من دهازها وحدا عدوزتها ولويساتها ...هالي ب كسوة عاد مخيطاها ودايرة شال ضهرها عريان زعما بنيتات صغار فرحانين دارهم دايرين ليهم الخرقة حيث بدات تعطي لعين وتكبر وكاينة الي مدايراهش وعادي...
يسرى"جبدات من صاكها نشاشة فرداتها وبدات تنش " : اووو مزموط هنا ياختي ...
يامنة "تاهي جبدات نشاشتها " : واييه صهد شهر سبعة هذا عولي على الحرارة ...
نوار : غا نشي نشي ...امتا دخل كوثر بغيت نشوفها كيف ولات ....
ما هي الا ساعة حتى بدا الجوق كيغني اول الاغاني باش يبدا طرح يحمى ...حتى ناضو شي وحدينات مع اول نغمة نقزو وبداو هاك بلاك وتبعوهم البنات كل كتباهى بشطحتها هالي تركز هالي بدات تلوز فديك المؤخرة ...وشي شطيح كيديرو هالي تبرد الغدايد هالي كتشطح بالعقل باش تعجب فلانة لولدها هالي متبتة خلاص باش يقولو متبتة هادي الي نبغي لولدي ...حتى تمات جايا فنيدة هي وبنتها مريم تاهما لابسين وفرحانين يسلمو عالعيالات هالي تبارك ليها سلامة ولدها الي جا حتى قشعات يامنة وهي تم جايا ....
فنيدة : مرحبااا ب زينين العيالات ...
يامنة ؛ اهلا فنيدة ...مريم بنتي لباس عليك ...
مريم : الحمد لله اخالتي ...
فنيدة "شافت فيسرى ومينة ويسرى اكثرية تتشبه ليها نوار شوي مهم شبه واضح " : مرت لوسك هادي ولا ...
فنيدة : و ما كرهنا ماكرهنا ويني كلشي بالمكتاب ...الله يجبر ابنتي الله يجبر "على رجلها "
يسرى : اميين امين ...
مشات فنيدة حدا العيالات حتى جرتها واحد الوحدة فحال بركات على البوطونة حتى مشات الوسط وبدات تشطح وتشتف وكثيييير شي من ذكرو عبد الغني فالغنا ....وهي تشدها دقة وحدة ماسلات حتى خلات كلشي ميت بالضحك ...
فنيدة : واا تبارك الله على ولدي وتبارك الله على دار رمسيس من طرف تال طرف ....هاااادي فخاطر العروسة وامها ....ماتنساااااش اسي الجوق تغني لينا على ولاد دوار وشبان دوار من كبيرهم لصغيرهم ....غني ليا حتى على فحم العينين ..."مفراسها را عطا ل ولدها لعين ههه "
مع الغنا دخلات العروسة بالصلاة والسلام ونگافات وراها مغطين وجهها بالفوال واللبسة بيضا باش داخلة ...شدات ام داك الوليد فايد نوار ...العقبة ليك ابنتي ..."شافت ف مينة " العقبة ليكم بما حسن منكم ...
يسرى : امييين لهلا يخطيك ...
داز الوقت ودازو ثلاثة لبسات ...ووصلات الوقيتة الي يتحط فيها العشا كانت الساعة تقريبا تسعود الليل ...تعشاو بالدجاج محمر وتبعوه السفة والديسير ...والموناضة فكل طابلة ثلاثة القراعي ...قامو بالعرس والمعروضين كما يجب وخا بنادم كثيييير وطبعا كل واش جايبة معاها ...جمعو الطوابل ....
يسرى "شافت واحد المراة جالسة فنفس طبلة ومقابلة معاها ...وجهها مبدل باقي صغيرة فعمرها " : بنتي كتحسي بوجع ؟
يسرى : اويلي حي وتولدك داداك واش هبلتي اول ولدة ليك هادي باينة من كرشك وجهك ...ابنتي ولدي فسبيطار ...
هي : وراجلي مكاينش ف طاليان وانا جيت مع خالتي "حداها عگوزتها " ...
عگوزتها : تولدها جداها راجلها مايبغيها تولد عند طبيب موصي من لهيه ...
يسرى : اوييييلي حي اخالتي واش هبلتو باقي صغيرة وتولدها وحدة معندها مقارياش هادشي ؟ اااايه كاع ناس زمان ولدو غا فديور ولكن راها عاد ولدتها لولة وباقي صغيرة ووجهها مكبشر بالخير ونتي عارفاها فاي لحضة تولد جايباها لعرس ؟ هادشي راه خطير ...
يسرى : نورة بنتي الى حسيتي بزحمة يعني تجاهد عليك الوجع وشي حاجة مزيراك من تحت قوليها ليا نديك وانا نولدك عار الله متولدكش جداك راكي بكرة فالولادة وباقي صغيرة ...الله ياخالتي هاهي "شافت فيامنة " ولدات ياسين وهي بنت سطاش كانت غاتموت هي وياه كون ما عتقتها ...وغير شافيهم الله …
يامنة : جا الله من جيهتي ورسل ليا بنت الناس ...راها باقي صغيرة على تولدها قابلة ...
العگوزة : الله يكتر خيركم ابنتي ولدي واعر هو الي مبغاش طبيب يولدها هذا الله معاه ...ملي نتي طبيبة جابك الله الله يرضي عليك ...
جلسات يسرى وهي كتشوف فديك البنت باقي طفلة وكرشها لفمها كتحسر على هادشي مزال عاد قايلة بسم الله ربطوها براجل فين قرايتها فين طموحها ...حاضياها كيفاش كتغمض عينيها مرة مرة ومزيويناتها باقي بريئة ...حتى قاطع سهوتها صوت النگافة وضارت شافت لوسط لقاتهم حاطين طبگ فيه جوج قوالب سكار وبدات ...
النگافة : نبداو بسم الله فالغرامة ...هااادي "فايدها خمسين درهم " الف ريال زرورة كرت الحوسين ...وهااادي ميات درهم من عند سمحمد ولد تاغر ....هادي الالة العروسة وامها ...عشرالاف ريال من عند ولد بومحمدي ...هادو باكية ديال كيسان ب كاسهم الكبير تاع العصير الااااااالة كوثر "العروسة " من عند فاطنة بنت المهدي ...هااادي مانطا باييير مضوبلة ديال شمااال من الفنيدق من عند كريمة بنت المحجوب ...وهاادي الف درهم ف جوا الالة العروسة وسي سامي من عند لالة سعاد ...زيييد مرحبا
هي كل منطقة واش كدير لكن فهاد المنطقة فهاد دوار عندهم الغرامة كتجي نكافة تدير داكشي الي ذكرت والي جاب شي حاجة كتقولها باش العروسة تعرف شكون الي جاب ومقامها قداش عندهم ...
نگافة : الالة فراش صالون ديال دارك كلو هااا فلوسو فجوا ابنتي من عند لالة يامنة بنت الحاج رمسيس ...وهادي سنسلة ذهب عيار ربعة وعشرين من عند يسرى مرت ولد رمسيس سيي يوسف و الف درهم من بنتهم مينة "حيث خدامة زررات من عندها اما نوار دخلات مع مها وباها حيث مزال كتقرا " ...ذكرات سارة ونجوى اما الدراري ياسين وباه هادوك ورجال كانو بينهم وبين العريس رجال مع بعضياتهم ...
سالاو الغرامة وبدا الجوق يغني وصلات وقيتة الحلوة واتاي ...الحلوة كانت مشكلة عادية فقط الي زايدة عليها هي انهم دارو البريوات باللوز ...اما الباقي كلشي دواز اتاي ومنهم غريبة السميدة وحتى واحد الغريبة كدار بالحمرة وهو دقيق الحمر ...(صحية هاد غريبة لناس الي عندهم المعدة ) ...وبدا الجوق ثاني ....فهاد اللحضة كانو الدراري خارجين قراب الخزانة شوي كيسمعو لجوق ...كانو سكايرية تما ممقربينش ليهم جيهة فيرما ياسين مكيعنب حد قاطعها فيهم هههههه ....
واقف يوسف وصهيب و ايساف والحبيب واشرف كيسمعو لجوق ...
تقريبا المنتصف ديال ليل ...هو اغلب عراس الدوار كيديرو بنهار لكن الاغلبية ساحقة كيبغيو ليل خصوووصا الى كانو شياخ او الجوق ...العيالات بداو يتفرقو بكرييييي باش يخليو ساحة لرجال مع الجوق وصحاب العريس ...فطابلتهم جات ام العروسة ...
ام العروسة : يامنة متنساوش غذا فالعشية غاتكون الهدية باش نديو فطور كوثر لدار ختي الي فجيهة الواد ...
يامنة : ضروري زعما هههه
ام العروس : وضروري جيتي كملي معانا تدير الحزام ...
يامنة : هههه ومن هنا لحزام منعرف واش نبقى هنا يكون خير ..."شافت فيسرى " تبغي تمشي معانا لفطور ؟
يسرى : نمشيييو علاش لا جينا غانفوجو ...
يامنة : ان شاء الله يصبح ويفتح ...
نوار "صونا ليها تيليفون شافت لقاتو رقم صاحبتها وصال كتعيط فالواتس حيث نوار لاحت صورة فسطوري لابسة تكشيطة " : الو ...
نوار : ااه صافي دابا نقول لبابا يسول ليا ..."قطعات معاها جات ضور حتى حبسات على صوت هضرة شي عيالات ..
وراها بنت عم ياسين عمو يوسف الي ف ازرو ...ايييه هي صغيرة خطباتها فنيدة لولدها ومبغاوش درية ضهر ليا مزال كتقرا ...
جاي فطريق فداك الليل من مراكش كان مع فؤاد حتى تعشاو وجلسو بجوج راس فراس عطاه اخر اخبار اسامة واخباره هو نيت فاخر لقاء ليه مع مدير البنك ...بقاو شوية مورا العشا حتى طلع فؤاد ينعس وياسين فضل يرجع ...جاي
وطالق الموسيقى فطوموبيل حتى وصلات اغنية شهلة العياني ...جات بين عينيه عينيها المكحلين كيف بينو زينهم وشمس الغروب كيف سنات فيهم عطاتهم رونق خاص ...دوز بايدو على قرفادته مرورا بلحيتو حتى دوز بصبعو على شفايفو ...ساهيبافكاره الي كتخبط وتمشي وتجي حتى لقا راسو كيدوز على صدره ...بحركة لا اراديا ...طلق
سينيال وضار لبيست الي كتدي لدوار ودخل من جيهة لاخرا باش ميتصادفش كع العرس وجا الباب لفيرما لور دخل سيارة وضرب دورة حتى ركنها لقدام ونزل منها ...جاي ويحل فصدافي القميجة الي لابس مع صهد برا حتى دخل كيحل فصدافي الكمايم ....حتى جاه ميساج ...جبدو من جيبو وشعلو لقاه من نمرة جديدة ....
سي ياسين رمسيس نتمنى نتلاقاو فضروف غير نتمنى تدير وقت وتلاقا بيا باش نشرح ليك بالي معارف والو على خوك ميمكنش نديرها ب عشير دراسة وخا معمرنا تفاهمنا ...بلا شك عرفتيني عيسى المنصوري وحيث عارفك مكتجاوبش على نماري الي مكتعرفش ...
ياسين "كزز سنانو كل مكيسمع سميته كيبغي ينطح راسو من كترة مكيعصبو وخصوصا هو سباب فالي وصل ليه خوه ...يلاه بغا يبدا يعرعر حتى سمع صوت انين وبكا خفيف ...زاد عقد غوباشتو وتم تابع صوت حتى لقاها فواحد القنيتة فدروج جالسة وجامعة رجليها عندها ودايرة ايدها على خدها ..." : نوار ؟
دايرة ايدها على خدها ودموعها دايزين ...جالسة بتكشيطتها الذهبية وضهرها من لور كيتنخصص مع بكيتها ...كتبكي بالحس حتى مشا لعندها مخلوع عليها معارفش مالها واش بيها وعلاش كتبكي هاكاك ...حط ايدو على كتفها وضار شاف فيها لقا كحل عينيها هابط مع دموع ....
نوار "شحااال وهي كتجمع فالكلمات باش تقول عاد نطقات بكلام متقطع " : الي سمعو من صغره وهو كيعاني من كاااع جوايه ...وزاد كملها بالي سمع دابا "هزات كتافها " اصلا هادشي الي كاين اهى وخاصني نتقبلو ....
ياسين "تنهد عليها عزات عليه وماشي معاها بالخاطر باش تقوليه وتفرغ " : وشنو سمعتي "حط ايدو على شعرها دوز عليه بشوي " ...
نوار "باقي حاطا راسها على الحايط رجعات بيها الذاكرة لفين سمعات دوك العيالات " ...
-وتي راه خطبتها فانيدة لولدها درية مبغاوش دارهم ومبغاتش تتقرا وممولفاش على عيشة العروبية ...
-وتي لا "نقزات واحد البنت اسمها عزيزة " ...وراه البنت كنعرفها بنت لوس يامنة ام ياسين ...راه ماشي غير مهرسة ورا درية عرجة رجلها ناقصة قالتها ليا سامية قالتها ديك المرة فالحنة ...تي تعرفها فنيدة عرجة والله لا دخلت عليها هاديك راه تبغي بنت كاملة مكمولة قاليك ...وشكون يبغي عروسة ناقصة من شي قنت …
ياسين "كزز على سنانو كون لقا منيني يدوز لخرا كامل يشعل فيه العافية كمش على ايدو حتى برزو عروق ايديه ...غمض عينيه وضور وجهو لجيهة لاخرى حتى كان غايطرطق عنقو جمع نفس وطلقها فحال زفييير ...ورجع رخا ايديه وتحنى عندها غير ملامح ديالو لبشاشة وتقبل معاها ...خذا وجهها بين ايديه مهبطة عينيها ...وشفاهها تحتية مرخية وبين حجبانها داير خطوط حزينة ...." : ششش
نوار سمعي شنو غانقوليك ....غانعاودها ليك ماعليش ...مشكيل رجليك هي ميزة وهبة عطاها ليك الله سبحانه باش تميزي عليهم ...تواحد فينا مكامل والدليل انا الي كنشوف فيك هاني عندي كلشي كلشي درتو بعرق كتافي لكن ربي عاطيني ضيق الخاطر كنتعصب ونضرب ...وهادي ماشي ميزة هادي سوء طبع فيا شي مرات كتنفع وشي مرات خايبة وكتجرح ....
الهضرة الي سمعتي دليل على غيرتهم انك تختاريتي من بين بنات الدوار كاملين وبغاتك لولدها درتي الي هما كاملان وعقلهم ناقص بالتفكير العوج … ماشي عيب نتي عطيتيها جوابك وعزيتي راسك جا منك الرفض شحال من مرة ومجاش منهم الرفض عطيتي لراسك قيمة ومعطاهاش ليك حد ...رجلك عندها حل عملية بسيطة وترجعي تمشاي عادي
مغاديش نقوليك كي ناس حيث ماشي كلشي كامل كاين الي عندو عيب مقادر حتى ينوض من فراشو كاين الي ربي عطاه اعاقة العقل تا الهضرة ميعرف يهضرها ...اما نتي عندك ميزات الي نتي مشايفاهمش وكتخرجيهم بطبعك وعفويتك والكيوتنيس الي فيك امفششة البنات فعيني ....
نوار "هزات فيه عينيها مجلخين بالكحل وحمرين بدموع ..."
ياسين : مادامك بنت يوسف رمسيس ومن عائلة رمسيس عمر ولد ادم مينعت فيك بالخايب ومادامك بنت عم ياسين راكي ورا ضهر يحميك وميخلي شعرة تقاس فيك وديما شانك مرفوع والعز مقامك والدل مقام الي قلل منك ...وخا ؟
نوار جاوباتو براسها وهي تمسح دموعها بطرف كمايمها ...
ياسين "ممنعش راسو انه يقرب ويحط شفايفو على جبهتها بقبلة حنينة حست بيها داافية خلات ذاتها تقشعر ...وقلبها يضرب لكن ماشي كثر من قلبه هو ..."
كيف ما قال هو صعيب علينا نكونو كاملين فالكمال لله وحده ...تاواحد فينا ماكامل ضروري نقص فاي حاجة كانت ...نوار عندها نقص فاعاقة فرجليها وعندها نقص انها دغيا كيبقا فيها الحال ...فحالتها هي عندها عملية ومتابعة وترجع تمشى عادي جدا لكن شنو الي مخليها الان مدارتش هاد العملية وهي دارهم ميسورين ماديا ومعنويا كيدعمو بعضياتهم فالشدة والحلوة ...شنو الان الي مخليها حتى لدابا مدارتهاش ....
نوار كيف قال ياسين دارت الي بنات الدوار كاملات وزينات مداروهش لكنهم ناقصات فكريا البعض منهم لا للتعميم ...وهادشي خاصها ترد ليه البال وتلاحض الصفات زوينة الي خلاوها تغلب لا اراديا على اعاقتها البسيطة ...
ياسين : اجي حيدي من هنا ...
نوار "شافت فيه بمعنى خليني " ...
ياسين : شنو هضرت ؟ يلاه نوضي اجي بعدا من هنا ...دخلي دابا يجيو يشوفوك بهاد المنضر تجيبيها فالوالدين بهمك كتر من راسك عليك ...حسن ميشوفوكش خاطرهم يمرض كتر منك
نوضها من ديك البلاصة شدها من دراعها وتم غادي بيها بشوي حتى وصلها لصالون وجلسها جاب ليها مخدة حطيها حط ليها رجلها المهرسة فوق منها حتى تقادت ....وناض مشا لطواليط الي تما حل بلاكار الي فيه الاسعافات وخذا منها باكية دوليبران ومشا لكوزينة جاب قرعة وكاس ومشا جلس حداها وهادشي كلو وهي حادرة راسها وساهية في الهضرة الي قال والبوسة الي باسها رجعات فيقات شوي من احاسيسها بقربو ليها ولكن مزال كتكذب ودارة احتياط انه مكاين والى من جهتها باش متصدمش ...
ياسين "دار دوليبران فالكاس فيه الما وتسنى حتى تشتش وكمل عاد هزو ومدو ليها " : شربي هذا ...وهاد رجل تبقى هاكا متبقايش تحركي من هنا سمعتيني ...
نوار "شربات الكاس وحطاتو " : شكرا بزااف ...
ياسين : علاش ؟
نوار : على الهضرة الي قلتي ليا ...
ياسين : هاديك الهضرة كتخرج من فمي لناس الي كتهمني ...
نوار "هزات فيه عينيها يلاه بغات تنطق حتى تمات داخلة يسرى ويامنة جايين مخلوعين ومعاهم يوسف ودراري يحساب ليهم توضرات حتى لقاوها معاه فالصالون ..."
ياسين : رجليك "بغا يضمص الهضرة متقوليهم والو " ...بقيتي كتفورصي عليها حتى جبتي لراسك صداعها ...مابيها والو ...باش ترجع عندكم مقدراتش لقيتها فطريق وجبتها لهنا ...نوار ماشي صغيرة تشطني عليها هي فحمايتي فهاد البلاد مكاين الي يوصلها ...
يامنة : لا لا من ناحية توضر قلتها ليها ميخافوش هنا ...
ايساف : ها ؟ اه هاني لا حنا مزال خارجين شوي ..."تحنى باش يبوس راسها حتى شدو ياسين من دراعو زير عليه " احح تا بشوي اناري مالك اصحبي اي صباعك حفرتي ليا دراعي ..."خرج فيه عينيه وهو يقلب دورة وزاد لحق على لاخرين حتى يوسف خرج باش تبدل عاد يدخل يشوفها ...
وشحال قد الواحد يكابر ويحارب فالاحاسيس فالاخير هي الي كتغلب عليه كيما كانت وكتخرج شحال قدك يا ياسين تعافر فالاخير مبقيتيش كتشوف غيرها هي فبالك وتفكيرك سيطرات عليه حتى وليتي تنطق بكلام هي سبابو ...نوار مفششة البنات فعينيه هو ...ياسين قليل تعبير عن ما بداخله لكن كثير الافعال باش يبين الاحساس ديالو لداك شخصي الي اجتاح كيانه ...
شمس جديدة فالدوار من بعد ليلة العرس سالا بكري بالنسبة لعيالات وكل مشات فحالها ناشطة وهالي تعيب فالعرس والعروسة وامها وهالي تعيب فالتنضيم والي تشكر وعجباتها العروسة هادي هي حال الاعراس المغربية ...حلات عينيها على لمسات من صبيعات ام حنون ام غير امها وشكون من غير محنة يامنة عليها من بعد يسرى ...
يامنة : بنتي فيقي ....
نوار "شحال حتى توضحات ليها الشوفة ونطقات بصوت باح بنعاس " : صباح الخير خالتو ...
يامنة : صباح النوور حنينة ...يلاه نوضي تمشي معانا ...
ابتاسمات ليها وهي تنوض بشوي مشات تغسل وجدات ليها شنو وراتها كسيوة بوردو فيها وريدات فالابيض نص كم طويلة وسبرديلا بيضة رجعات من دوش لبساتهم (طبعا غير فردة سبرديلا وحدة ) ومشطات شعرها ضفراتو ليها ...رطبات فمها ودارت احمر شفايف بارد لونو رشات بارفانها الفاني المفضل عندها والي عزيز عليها حيث هدية من باباها فاول ما ولات كتستحق هدايا الصبايا (يعني فاش كبرات وولات تقدر دير ريحة ديال بنات كبار وبلغات اول هدية خذاها ليها من تم عجباتها وهي الي كدير وهي الي كياخذها ليها ديما هو )...
لقات يامنة عند الباب كتهضر فالتيليفون مع فؤاد ...
يامنة : شوي يجي ياسين دابا ونخرجو ...
فؤاد : قضيو الغراض الى ساليت نشوفكم ماسهلش الله تغرب الشمس ملقانا ...
يامنة : وخا ان شاء الله ..شربتي دوا ديالك ياك ...
فؤاد : الي عندو يامنة ينسى !!
يامنة : الا ههههه
فؤاد : تهلاي ليا فراسك ...
قطع معاها وهي ضور عند نوار الي كانت حداها غير وقفات سمعو صوت السيارة جايا كان هو جاي خرج ايدو من شرجم شير ليهم داير نضاضرو ووقف خرج من سيارة بحطة جديدة هاد المرة قميجة كحلة نص كم مبينة وشامو الي فدراعو ...وسروال فصالة كحل مقاد كيف ديما شعر الكثيف لور راجع بجيل ..مشا حل باب السيارة لور حتى تمات جايا شادا فيها يامنة خذا من عندها العكاز ودخلو لداخل جنبها ...
ياسين : صباح الخير ...
نوار "بخجل مبتاسمة " : ص صباح الخير ...
ياسين : شوية ليوم ؟
نوار : اممم اه شوية الحمد لله ...
ياسين : هادشي الي بغيت ...
دخلات بغات تغرق فحوايجها مصدومة من طريقة هضرتو الي غاديا وكتبدل وغادي وكيزين كلامو معاها بشكل غير طبيعي ...ركبات يامنة وركب هو وانطالقو فاتجاه مراكش الحمراء الي ماهي الا نصف ساعة حتى لقاتهم فيها ....
خذا طريق اخرى ومشا واحد المسافة حتى وقف قدام centre d'addictologie اي مصحة الادمان لعلاج الادمان ب مراكش السملالية ...ووقف ...هز الفرانامان وحل سانتيغ ضار شاف فيامنة ...
ياسين : غيير هضرت مع طبيب تشوفيه شوي وخرجي متعطليش ماشي فصالح ديالو وخا صحتو تقريبا مزيانة ...
يامنة : منتعطلش غييير شوفة فيه نهضر معاه منقول والو غير نشم ريحته ونخرج عند وعدي اولدي كون هاني ...
ياسين "قبط ايدها وباس كفوفها " : غير فوجي ليا فنفسك ميخصني خير ...نزلي ..."ضار شاف فنوار " ...بقاي هنا ندخلها ونجي عندك ..
نوار "بابتسامة خفيفة " : اوووك ...
نزلات يامنة وضارت شدات ليه فدراعو متأبطاهم حتى دخلها عيط لطبيب فتيليفون وخبرو فين كاين بطلب منو خصصو واحد طبلة فجردة تما حتى دخلو شوي وجلسات فالكرسي ...خلاها وصا عليها ومشا بقا مع نوار متبقاش وحدها ...
يامنة "بقات جالسة على اعصابها كضرب بصباعها فوق طبلة بتوثر حتى تحطات ايد على كتفها هزات راسها وهي تنوض على وقفتها دارت ايدها على فمها ...ضعاااف على كي مشا شعرو طوال على تحسينة الي دار ليه ولحية الهي ناضت لابس سورفيت نص كم فالبيض والكحل ..." : يااا ولدي حنيني "تلاح عليها عنقها حتى زيرات على دراعو وكمششششااات فيهم ..."
اسامة"بصوت بغا يبكي " : حناانتيييي ...
عنقاته وعنقها عناق شي خمسة دقايق ولا اكثر وهما معانقييين هو كيحيد شوقه لمو وهي كتحيد شوقها بشوفة ولدها ....تقريبا شهر وهو بعيد عليها ...الايام دازت وهي كل ليلة تبات تبكي بالحس ودعي يسر امره ويتشافا ويرجع ليها بيخير ...الكبدة صعيبة والى تضررات اصعب وميعرف بهادشي غير الواليدين والي غايجرب الكبدة وحرها ...
اسامة "ابتاسم وسط دمعتو مسحها بالخف " : هههه ضروري راني مكناكلش ماكلة الحنانة الي كتغلضني ..
يامنة : هههه ترجع ان شاء الله وتاكل تا تعيا ...
اسامة "قبط ايديها وخشا وجهو فيهم كيشم ريحتهم ويغمض عينيه " : من هاد اليدين عمري نشبع عمري .."قطرات دمعة من عينو عليهم حسات بيها يامنة ..."
يامنة : اساامة عاافا ولدي متقهرنيش ...خوك كيوصي ويعاود الى بكيت مغانبقاش نشوفك ...عافاك سكت اولدي انا راضية عليك دير الي دير غير شد همتك ورجع ليا...
اسامة : كوني هانية غانرجع حسن من الي بغيتي ...سمحي ليا والله مكان لخاطري مبغيييتهاش لراسي والي عطا الله عطاه ...باش نقولها حفت ومرضيتش ...ولد فؤاد يتبلى خايبة فحق بويا خاايبة ..
يامنة : شش الي فات مات ...ياك دابا مزيان احنينة ...
خلاها كتسنى فيه وخرج كيزرب لعند نوار فالسيارة دخل لقاها شادة تيليفونها وكتسمع بالكيت ...غير حل الباب ودخل وهي تشوف فيه ابتاسمت وحدرات راسها مقدرات تهزو فيه ...
ياسين "حاضيها من مراية السيارة كيفاش حادرة راسها وصباعها كيفاش كيتحركو ببصمة الهاتف ...وشفايفها كيفاش كتعضهم بتوتر باش ميبقاوش يترعدو والحركات العفوية الي كدير من خجلها ...حتى ضار وحط ايدو على معصمها باش تشوف فيه حبسات الاغنية وشافت فيه دغيا وخطفات نضرها لهيه " : شنو التاريخ باش تحيدي الباندة ؟
نوار : اخر السيمانة الماجية ...
ياسين : مزيان ...عجباتك الفيرما ...
نوار : بزاااف كلشي فيها زوين مكتملش منها ...
ياسين : تقدري تعيشي فيها حياتك كلها الى بغيتي ...
نوار "هزات كتافها " : نقدر لكن قرايتي الى غانزيد نتبع شي حاجة اخرى كلشي عندي ففاس ...اما نقدر اي حاجة مع الوقت كتولفها...
ياسين : نوار علاش مدرتيش عملية لرجلك ؟
نوار "حدرات عينيها بحزن " : حيث كنخاف ...
ياسين "كمش حجبانو " : من اش ؟
نوار : من العملية عندي فوبيا جوج مرات حاولت نديرها فاش كيجيو يديرو ليا البنج كيطلع ليا طونسيو بالخلعة ...حيث العملية عرفتها كيفاش كتكون خفت منها مقدرتش حاولت جوج مرات وكان خطر عليا حتى مبقيتش درتها ...
ياسين : وعلاش مدرتيهاش ملي كنتي صغيرة ...
نوار : فاش عرفو نوع العملية هي كيهرسو ليا العضم ويديرو حلقات فركبتي وهاد تقنية هي الي خاصاني كيقولو ليها اليزاروف كيدخلو سلوكة فاش كيهرس طبيب العضم ومن بعد عشر ايام العصم كيبدا يتجبر وياخذ طول الي بغاو حتى كيوصل لطول رجلي لاخرا وتقاد ... بابا مقدرش خاف ديك الوقت وكنت كنبكي بزاف يعني ثلاثة المرات ...
ياسين : فهمت ...المشكيل الي عندك هو نفسك ممتصالحاش معايها معندكش الثقة لا فراسك لا فالله سبحانه وتعالى ...ماعليش مشكيلتك عادية ماشي شي اعاقة الي تخليك تفقدي الامل خاصك غير العزيمة ويكون الخير ...
ياسين "هاد الحركة كتخليه سارح فيها كتصرف بحال وليدات صغار وخا هضرتها زوينة وكتشرح من نيتها وعندها الخاطر لناس لكن لراسها معندهاش مسكينة ...محسش براسو حتى هز صبعو ودوزو على عينيها مسحهم ليها من دمعة الي كانت على الطرف ...وحط كفو على حنكها " : عينيك خاصهم لمعة الفرحة ماشي لمعة القرحة انوارة البنات ...
نوار "خرجات عينيها من بلاثتهم بسرعة ورجعتهم حناكها حس بيهم طابو وسط كف ايدو ...حتى تفافات وبضربات قلبها زادو ضاعفو حس بيهم من صبعو صغير الي تحط على وريدها ..." : احم اه وخا صافي ...
سالات يامنة مع اسامة حتى عيط ليها ياسين باش تخرج معطلاتوش سلمات عليه ورضات عليه وهي تخرج لقاتو واقف قدام سيارة متكي كيكمي فالگارو شافها ولاحو عسف عليه طفاه وضار حل ليها ودخلو ديمارا سيارة ومشاو نيشان … خرج بيهم شوي على مراكش وطلع بيهم لاوريكا باس يتغذاو تما ويبدلو الجو ...دخلو لواحد القهوة جنب الواد مبردة تما ...صونا تيليفونو ...
ياسين "خلاهم جالسين فطبلة كيشوفو فمناضر الرحمن الطبيعية .." : يوسف
يوسف : تا مشيتو لمراكش ...
ياسين : اش بان ليك ...
يوسف : شافتو ؟
ياسين : شافتو ...حنا فاوريكا دابا
يوسف : اارسول الله ..."ضار شاف فيسرى " وتي راهم فاوريكا ...
ياسين" عارف شنو بغات حيث اخر مرة فاش خرجات هي ويوسف وهو عرفها عزيز عليها شوا فحالو تاهو ...خلاهم ومشا طلب ليهم الغذا ورجع مشا بعد شوي جبد الكارو وتقابل مع الطبيعة كيكمي وشوف وفنفس الوقت تفكيرو ساهي ويخمم وبالو مااا هاني ...حتى كمل ورجع حداهم جلس شد تيليفونو كيشوف فيه ..."
يامنة : فؤاد قاليك تانشوفوه فالعشية لهيه ...
ياسين : عندو ميقضي حسن ليه يتدها صباح كان كيجري شحال ما جرا ...
يامنة : غير نرجعو ويرجع لاصال ثاني الي فالدار ولامارش لكن مشكيل عندو مشية لموسكو خاصني نمشي معاه ...
ياسين "هز فيها عينيه " : وايلي ...
يامنة : والله ...عندو شي خدمة ..
ياسين : متعطلوش فالرجعة ...
يامنة : ونشوفو على حسب خدمته ...
ياسين : حاولو وصافي ..."شوي حتى جابو ليهم الغذا مشكيل مشاوي وكفتة كطليط جوج صواني كبار عامرين بشلايض ماركان وسلاد الخضرة مصلوقة والروز وطون ومايونيز وصينيك اتاي مشحر كيف طلبو ...وموناضة كبيرة لنوار ديال كوكا ...
يامنة "قربات لياسين حتى عنقها حاضين نوار غاديا بشوي كتعكز حتى وقات كتصور ...وتضحك فاوديو فواتساب مع البنات الي كيقراو معاها وخا هي ماشي صحبة معاهم معندهاش شي صديقة قريبة من غير ختها مينة ولا امها ...
يامنة : ياسين خاصنا شوي ونمشيو دايرين مع ام العروسة على قبل الفطور غايديوه فالعشية مورا العصر ...
ياسين "شاف ساعته وهز عينيه كيسوف بعيد ..." : وخا هي دابا نتحركو ...
يامنة : مالك ساهي ،..
ياسين : ساهي وما ساهي كنفكر اميمتي من نهار حطيت رجلي هنا فبلادي هاد المرة تغيرت حياتي والي وقع وكيوقع وشلااا اميمتي ...
ياسين "باس راسها ونطق " : تحركو فيا حاجات الى درتهم غاتكون فالحرام لاقرب الناس ليا الي مخاصش يدارو ليهم ..."زعما بداو فيه شي تصرفات ديال فينما يقرب كيحس براسو باغي اكثر من بوسة كا مثال باش نوصل المعنى " هادشي علاش نفكر…ونتصرف ...الحلال الي مصدعاني بيه قرب وجدي راسك ...
ياسين "تنهد " : مبغيناش ندخلو فالحرام بغينا نديرو الحلال ...نويت الزواج على سنة الله الحنانة ...هذا الجهد واقيلة ...
طبعا كلام مفاجئ صدر منو هو شخصيا الي عاد مكاملش شهر باش قال مزال بعيد شوي على زواج ...لكن كيف كنقولو حنا غييير كنقول والنصيب كيدير خدمته هي ديالو ...شكون قال تبدل فكرته ؟ طبعا هو ماشي من النوع الي كيقول معندي مندير بزواج ...لااا هو شخص نقولو اكثر ميول للبلدي ...نهار يحس براسو باغي زواج مكيترددش مدام نطقها الا ودرس وفكر ومزال كيدرس غي الحاجة الي فيه مكيعطيكش راس الخيط حتى كيقوليك شنو كاين ....شخص فحال عندو وعاطيه ربي دراع وقاري وصل فين بغا ومزال كيطور فراسو شنو الي يمنعو ميفكرش فالزواج …شنو تحت راسك ااا ياسين رمسيس…
يامنة "فاجئها لا بل صدمها بقات كتشوف فيه بلا مترمش بدوك العينين الخضرين عندها " : ياسييين !!...
ياسين : هاديك وقت وهادي وقت نتي عارفاني مكنقول الحاجة حتى كنعرفها ونتاكد منها ...
يامنة : وشنو الي خلاك تحس انك غاطيح فالحرام وبغيتي زواج ...شي علاقة هادي ؟
ياسين : دوزنا ودزنا من هادشي معمري طمعت شي وحدة ولا عطيتها وعد من ديما انا عقلي شرقي باغي الحلال نيشان حتى نكون عارف راسي قاد بمرتي الي غانتزوج بيها ونتيسر وهاني قلت ليك نويت لا بغا الله ...شنو المشكيل ...
يامنة "حطات ايدها على حنكو فرحانة ماقداها فرحة " : ياااا ولدي الحبيب وشحال تسنيت هاد نهار حتى شكيت عمرك متزوج من ديما ماجل ولا رافض ولا ساد الموضوع احسن خبر خذيت فحياتي من بعد نا بشرني ربي بولادتك ورجوع صحة فؤاد ...
ياسين : على هاد الفرحة ندير الي يدار باش نشوفها فعينيك ...
نوار : مغانمشيوش باش نمشيو نحضرو لهدية الي قلتي ليا ...
ياسين : مابقاش عاجبك هنا ...
نوار "بخجل عفوي ": اههنه لا لا بالعكس واعر هنا عجبني بزاف بعدا غيرت الجو وفوجت لهلا يخطيك ...غير بغيت نشوف داك الجو قبل منرجعو فحالنا ...
يامنة : افين ترجعي فحالك ...
ياسين : فين ترجعي ،
نوار "لولبات عينيها فيهم " : هاا قبل منرجع فحالي لازرو ...
ياسين : حتى الفيرما فحالك "حك لحيتو قبل مينطقو كان سبق هو " ...يلاه تحركو نمشيو ...
خلص الغذا ورجعو لطوموبيل ركبو وانطالق بيهم لدوار ...مسافة الطريق حتى كانو مع اذن العصر بمدة ...لقاو الكل كاين حتى من يسرى كاينة كانت واقفة هي ويوسف كيهضرو ويشوفو تما وصهيب معاهم هو وسارة وولدهم اما نجوى مشات لدارهم ...
يوسف "نزلات نوار وجات لعندو عنقاتو بجنب " : اخر المصران وليتي شتك تسافري دوري بلا بيا اش تما ناوية الغدر ...
نوار : اوو فلتي عليك واحد جوج صينيات تاع شوا كطليط وكفتة من داااكشي فاوريكا ...
فالبيت المجاور كانو جالسين كل من يامنة ويسرى وسارة ونجود الي كيبدلو اما يامنة فضلت تبقا بهادوك الي جات بيهم حتى صونا ليها فؤاد باش طلع عندو لفوق بحكم جا وطلع نيشان ...
يامنة : انا نطلع عند فؤاد ونهبط بينما كملتو توجادكم ...طلعات هي عند فؤاد تشوفو وهما بقاو يوجدو راسهم باش يحضرو لهدية ويمشيو معاها وخا فالعشية كانت معطلة كيسميوها فطور العروسة ...قدام الباب فديك الجليسة ...فاش بغات تدخل لقاتو واقف هو ومبنة ومضور وجهو عليها ....
نوار : العزي تاعي مالك ...
اشرف : الصمت ...
نوار "شافت فمينة " : مالو ؟
مينة : هههه مقلق منك مخاصم معاك ...
نوار : وعلاااش اخويا اش درت ليك ...
اشرف : الصمت ...
نوار : غاتبقا طلع ليا ف vu قول مالك اش كاين ...
اشرف هز راسو لسما وضورو لهيه كيمص فالحامض ويرمش فعينيه وهي ما فهمت والو كتشوف فاختها الي شرعت ليها ايديها وشيرت ليها ليه زعما منك ليه ودخلات تاهي لحقات عليهم باش تبدل حوايجها ...ومشات هي جلسات حداه ...
اشرف : اختييي مامنخلكش انما الواحد مزيان يعرف قدر نفسه ويجمع راسو ...مادرتي والو ...
نوار : اش تتقول يا… كيفاش الواحد يعرف راسه ...واهضر ازمر ...
اشرف : قاليييييك واحد المثل ...من عاشر قوما اربعين ليلة صار منهم ...
نوار : انا جلست غا سيمانة هاد ساعة باقي ليا ربعة سيمانات تقريبا ونقفل ربعين ونولي منهم 🙄
اشرف"ضار خنزر فيها بدوك العينين البيضين " : ايوى الله يمسخك نتي راه غا يومين وليتي منهم عارفة البقرة امتا تولد وحتى منين كتولد "كيعد ليها بصباعو " وحتى كيفاش تا حملت ...
نوار "تزنگت " : غااااا يسمعك ياسين ولا بابا ولا شي حد فعمامي يا مك تاتاكلها فجلدك ...الله يمسخك ...
اشرف : علاش سبقتي ياسين هو اللول عليهم مالك ما قلتي فؤاد الوليد ...
نوار : مافهمتش ...حيث هو مول شي هنا …
اشرف "خبط ليها كتفها تا غوتت " : ابليميييييين تا وليتي من هاد المكان عاجبك وعجباتك سكنى وعاجبك تعامل ياسين معاك الغذاااااااااااارة الغذارة ...وليتي تمشي تسافري لاوريكا بلا بيا ؟ نزيد يومين تبلوكيني من واتساب وفيس وجيهة الي فيها انا تخويها "ربع ايديه " كانت عندي عشيرتي هاهي غاا سافرت تبدلت اما الى تزوجت تبلوكيييني ...
نوار "قربات ليه وحطات راسها على كتفو " : والله منصيب نفوت خويا والله الى غير فقت لقيت خالتو عند راسي قالت ليا خرجتو ويلاه معانا ما فخباري واالو والله ...
اشرف : تعيطي فتيليفون ....قولي لداك فحم العينين يتسناني ولا لا راه خويا الكبير هذاك ...اش نقول قاليك المثل الحبيب حبيب والديب ديب و القهوة تبدل كي يتزاد عليها الحليب و اللي فيه مرض الغدر مااا يداويييه طبيب...
نوار"هزات فيه راسها " : المعنى "صغرات فيه عينيها "
اشرف : غديديييرة ماشي بعيد تزوجي فرمشة عيني وقولي اه حقا كلشي جا على غفلة ...
نضحكو ونفوجو ونساو همنا بمجرد منبدلو المدينة ولا نسافرو فينما كان غير نبدلو الحيوط الي كيفكرونا فالي داز علينا والي مزال غايدوز علينا والمشاكيل الي خليناها ورانا وجينا نساوها ولو غير شوي هاحنا قد ما جلسنا وبعدنا مرحوعنا لنقطة فين حبسنا وضمصنا مشكيلتنا مؤقتا حتى نرفهو على نفسنا ونخويو فين يعمر ثاني لانه الى بقينا هم على هم كيحمل الواد ويفيض وديك ساعة ماحنا عرفين شنو غايجرا وشنو غايوقع ...لهذا ايساف خذا ليه عطلة بفكرة من الياس وخوالو لاخرين باش ينفس على راسو من هاد المشكيلة الي طاح فيها حتى هو فلحضة طيش...واش مخبية ليك الايام يا مول الدم الشامي الفلسطيني والعرق المغربي الي كينبض فيك ....
فؤاد "من بعد ما هبطات يامنة ومشاو طلعو هما لفوق عندو ...داير ايدو على لحيتو وجالس ديك الجلسة رجولية بهيبتها ...كيشوف ويسمع شنو عرف ...ماهضرش " ...
ايساف "حادر راسو ..."
يوسف : دابا المشكيل اخويا هو انها قالت احم "حشم " هي مقاوماتوش غلبت عليها سخفة ومهم راك عارف ...
فؤاد : بحثو على اصلها ...
يوسف : طبعا وهاني عاد غانقولو ليكم هي بنت مراكش ...عائلتها مافحالهمش عندهم غير هي وماتو بقات غير هي لاوحتها ليام حتى جات لفاس سولت على البلاصة فين كتكون قالو ليا كتبغي غير متاكل وتلبس معمرها طلبت كتر ...كانت باغا تخدم تاحد مبغا يخدمها ...
فؤاد : ونتا اش بان ليك ...
ايساف : انا ناوي الحلال مع بنت الناس هي معندي مندير ليها خاصني نصارح ديك بنت الناس وهي نعطيها لفلوس ..."
محسش براسو حتى جاتو تصرفيقة الضو بان ليه ضرب جوج مرات ماحتال يهز راسو جاتو تاني وتالتة لاخرين مقدروش يتحركو ...بقا يعطيه فؤاد يعطيه وهو متحركش حتى طوش ليه دم من منخرو وكون ما ياسين تدخل وجرو كون بقا يعطيه تايبان ليه مقامو فين كاين ....
ياسين : الوليد تهدن ...
فؤاد "كزز على سنانو " : وهاديك بنت الحرااام ؟؟؟
ايساف "عطاه يوسف يمسح دمو اما صهيب دار ايدو على جبهتو وحدر راسو " ...
يوسف ؛ تهدن اخويا صحتك ...
فؤاد "هز صبعو " : الى هي ممزياناش حنا مزيانين عندنا بناتنا تاحنا يقدرو يغلطو يحفضنا الله ...لا ربي يبغي هادشي لا عبدو ...منبغيوش لبناتنا منبغيوش لبنات الناس تاهي دم ولحم ...
صهيب : احم ولكن اخويا هي كتقول كلشي برضاها تاهي بغات ...يعني قانونيا متعداش عليها الى مبغاش يصلح غلطو من حقو ...الغلط انه شرب هاهو كيتحمل نتيجة ...
ايساف "الصمت" ...
فؤاد "طلق من ياسين ومشا لايساف عطاه جوج طرشات اخرين وايساف مااهضرررش مهزش فيه العين كمش على ايديه على شكل بونية تا خرجو عروقو ووجهو تزنگ ...محمد الحبيب وقف من شاف المنضر حاضي غير باه لا يتعصب ويمرض .." : هادي لفمك الي تحل لحرام ...تربية واليديك مشات خلا ...شنوو ذنب داك السيد الي ولدك "
كيضرب على صدرو " حياااتو معرضها لخطر على قبلك نتا وخوك ...مك شافت الويل عليكم هي وياه باش توصل بيك لهاد قلة ترابي ...غلطتي صحح غلطك تزوج هاديك بنت الناس وسترها من بعد وطلقها ولا شوف اش دير ...ماتخليهاش عيب وميسوف فيها حد ...حتى هي بنت تسع
شهور ومها شافت الهم وولداتها كي ولداتك مك وخا تكون تاهي غالطة ...
ايساف "هز فيه عينيه " : كيفاش !!!
ياسين : الوليد عندو الصح هي غالطة ونتا غالط وخا برضاها كتبقى فمجتمعنا بنت ولومة كتمشي عليها هي ...الى عطيتيها لفلوس غاتبغي الي يسترها وبيني وبينك قليل الي يبغي بنت ماشي بنوت منك ومني وجبد الى جابتها ضروف والمكاتيب ديك ساعة الله واعلم ...هي وزهرها ....الى هي
ممزياناش ربي فاتح باب توبة تقدر توب على غلطها لكن شكون غايقبل عليها من بعد ؟ تاحد ...صحح غلطك تزوج بيها من بعد مدة عطيها براتها وعاونها تشوف حياتها ..الى تعاونا مع بنات الناس ربي غايجيب الي يشوف من حال بناتنا ...كما تدين تدان ...
فؤاد "صدرو كيطلع ويهبط ...هز صبعو وشير ليه " : السيمانة جايا جيبو البنت تعقد عليها وقبل من هادشي تفاهم مع الي نويتي معاها الحلال قبل وهضر معاها ..."ناض خلا ايساف صدرو تنفخ باغي يطرطق " ...
فالعادة عند كل عائلة وكل بلاد وكل قبيلة ...العروسة فاش كتروح عند راجلها الغد ليه كيجيبو ليها واليها يعني اهلها هدية كاين الهدية الي كتجي من العريس هاديك اسمها الدفوع كيجيبو فيه دهاز العروسة الي شارين ليها اهل العريس والعريس فيه كل ماتحتاجو من حوايج واستعمالات في حياتها زوجية دخل بيها جديدة ...وحتى البهيمة يعني حولي باقي حي …وكاين الفطور الي كتجيبو ام العروسة الي فيه كادويات او هدايا العروسة الي منهم شرات ليها امها والي جابو ليها الناس ( هاكا عندنا وماعرفت كل واش كيدير ) وفيه حتى الطياب ...طنجرة الروز بالحليب والقرفة وطنجرة عامرة بدغميرة الدجاج وطنجرة فيها دجاج محمر مفروق على دغميرة وطنجرة اللحم بالبرقوق كبااار حاطينهم فكروسة سايقها العود وكروسة لاخرا فيها الكشتريات او الهدايا ...جايين بالضرب والغنا عيالات بيناتهم حتى وصلو لدار العريس فين رايحة العروسة واستقبلوهم بزغاريت والمريشات فيهم ماء زهر وروايح ها ريفدور ها ريحة الخاريج ...
نوار "جالسين فصالون العيالات كانو غيي قلال ماشي كتار حتى قشعات صينية فيها قالب تاع سكر وفوق منو زيف فيه قطيرات دم " : ما ماما اش هذاك ...
يامنة : ههههه هذاك راه مسخ عندنا فهاد دوار ...داكشي ضروري يخرج ابنتي ماشي حيث توعتي ( انتي ايامنة ا سكتي لا نفكر مك فداك سطل الي نزل منك سيدي فؤاد ) ...
يسرى : كيختالف كاين البكارات انواع ايامنة على حسب كاين البكرة الي ماكينزل منها حتى دم ...
يامنة : هاداك المشكيل عندنا كيشكو فبناتهم شحال من بنت قتلها باها غير بسوء الفهم والجهل ...
جات العروسة بزغاريت لابسة قفطان بيض بلا حزام طالقة شعرها ولابسة بليغة بيضة ورجيلاتها منقوشين سلمات بايدها مدخلينها بزغاريت وصلاة وسلام وبداو يغنيو ويضربو بيناتهم ...شوي حتى هزات ام العروس الي صغر من يامنة ...
الصينية فوق راسها وبدات تشطح بيه مع الاسف فبعض المناطق ماازال هادشي رغم انه هادشي كيبقى بين الراجل ومراتو لكن هما عادتهم باش كيحسو ان بنتهم رفعات راسهم وبقات محافضة على شرفها ...
اصباح صباح ماليه ...الملحة والسر عليه ...صباح صباح ماليه ...الملحة والسر عليه ...هاهو فوق راااسي لا تقولو ديال لفرماااسي ...هاهو فوق الثلاجة لا تقولو ديال دجاجة ...
نوار : اويلي شوهوها اماما ..."باقي مخلوعة من داك دم الي تتشوف " ...اننن بزاااف ...وزعما ...
كوثر : ههههه هاني قدامك عادي موقع والو معندك مناش تخافي ماشي غير تشوفي دم يحساب ليك قتلني ولا ضرني بالعكس حيث باغيني ودار بحساب الدم الي بيناتنا ...
مينة : ولد خالتك ياك .
كوثر : هههه اه ولد خالتي ...مزيان جيتي انوار. حيث غذا فالصباح يقدر نمشيو لكازا مبغاش نبقاو عندو الخدمة ...
نوار : بصح ...ايوى الله يديكم على خير ومبروك عليك ...
كوثر : ديري وعطيني نمرتك نبقا نهضر معاك متقطعيش والله الى دخلي لقلب حسيتك ختي ...
نوار : هههه ربي يخليك ...نعطيها ليك دابا نيت ...
اييوى عطاتها النمرة وداز الفطور بالضحك ونشاط والغنا ونوار دور دورة وطل على داك القالب الي فوقو سروال ويزيد اللون يهرب من وجهها وكتقول انا الي باغا زواج وهاني اش تيتسناني ....
مع اذان المغرب خرج فؤاد يصلي ومن تم طلع لمراكش تاني يبعد على تما بينما تهدن لان فعلة ايساف لا تغتفر انه رجع يشرب وارتاكب غلط حس بحال الى ولدو هو الي غلط ...هضرتو على صواب ومكينطقها حتى كيعرف ان الله حق وهو ديما مع الحق ولو على حسابو ...وكيف كيقول منتعداوش على الناس بلا موجب شرع ميجيش الي يتعذا علينا ...من تما خرج يبرد على راسو ويتهدن قالها ليامنة حتى رجعات من الفطور وعاود ليها ولكن هي ماجادلاتو ماقالت والو تكتمات على الامر حتى يرجع وتفهم ويقادو الامور ...
اما فهاد اللحضة واااحد العزي الهبيل عاد شداتو وجعة فكرشو ويضور ويلالي ...
نجود "غوتات تا طار ونزل " : نوووووض ا ليهودي شرب معلقة زيت لا نوض ليك ...وسير خرج ضرب دورة لور تايدور ليك زيت فكرشك…
اشرف : هنن صافي صافي تغوتيش امي هاني ...
يامنة : سارة متجيش دابا وصهيب مكاين لا هو لا يوسف كلهم طلعو لمراكش اما سارة ترسليا لباربة من دار تقادات كنديرها لفؤاد عصبر ولا شلاضة هي الي طلقو ...
خرج اشرف من الكوزينة شارب معيلقة زيت كاع وجهو مخسر ...وخرج مشا مورا لفيرما المصيبة نسا التيليفون باش يضوي ومعرفش منين يشعل ديجانكتور الي تما غادي ويتسلت ...ما زغبو الله بقا غادي تا عسف على ديل الكلبة باقي صغيرة ويااا ميمتي غا عسف عليها وهي دير واحد صوت بالخلعة وقف يابس ...
اشرف : يااربي تكون غا خريتي الي غوتت ...يااربي ..."طلق وذنيه حتى سمع صوت غرررر خعععععع ..." حتى طلقاتها الام بنبحة ما حس براسو تا طار لربي الي خلقو ونقز واحد تنقيزا وطلقها بغوتة ...
اشرف : اخويا راني بغيت نطير كنقلب على ضو لقيت الموت ...
ياسين : زيد زيد ...هاد قلة العقل الي فيك ماغتحيبها ليك فين راها مشات غا رجع ...
مشا يساين سبقو وهو شد كرشو الي بذات كتحرك باش يمشي لطواليط حيث زيت فاش كتشربيه خاصك تمشي وتجي باش يضور وتمشي لطواليط يسرحك من القبط حتى تشربي شي حاجة الي طلق ليك كرشك وترطبها ...
اشرف "داز من حداها كيخنزر بانت ليه جلست وحدرات راسها حيث شير ليها ياسين " : شفتي الكلبة بنت الكلب طاولي على سيادك اش تيوقع ليك ؟ "ضرب بدراعو ايدو فحال شكل هاهو غا هو بزق ليها (قلز ليها ) " ...شديييي ها متسواي هاكي الفقيرة تمُك ......
مشات يامنة لكوزينة هي ويسرى منها يطيبو منها مجمعين عيالات بيناتهم خلاو نجود دخلات تصلي العشا ومينة دخلات تكمل شي خدمة بزربة مع الفريق ديالها وتشوف ايمايلاتها ...اما نوار بقات مع اشرف الي كل مرة داخل لطواليط ندم مسكين على النهار الي كال فيه الهندية والخلعة تاع الكلبة باقي شادة فيه مسكين ...اما هي شدات تيليفونها ودخلات لانسطا كتشوف وتهضر مع البنات ...حتى خرجات مينة وهي تجلس معاها ...
نوار : باقي هذاك السروال الي شفت قبيةل بين عينيا ...
مينة : الجهل وصافي ...
نوار : وااويلي شوهوها ...ههههه قالت ليك حيث كيبغيها ما قصحهاش تعامل معاها مزياان ههه ضريفة كوثر بزاف ...
مينة : واييه تاهي تستاهل ...ونتي ومعامن لاقاك الله ...
نوار : ولد خالتها..."حدرات راسها " وكيبغيها من صغر ههه "ابتاسمت بحرقة باقي منساتش مسكينة مع المدة غادا وكتعايش " ...من دمها ..."تفكرات ديك بعد من دمك لا يطليك " هههه
مينة : هههه "مبغاتش تزيد تهضر حيث عارفاها خذات قرارها "....ابتي الله يجيب لينا تاحنا الي يتهلا فينا وميفورصيش علينا ويبغينا...واحد اشرف شفتو سمط ...
نوار "ناضت " : اح انا نشوفو ياكما خرج برا تاني بحرا تنفس من خلعة الكلبة ههههههه قتلني بالضحك ...بغيت نسرح وجلي من صباح وانا حطاها هاكا ...اجي نجلسو فجليسة الي برا مهوية ...اجي نوريك تصاور اوريكا ...
مشات مينة لبيت ونوار هزات عكازها ومشات حتى قربات توصل الباب ديال برا حتى لقاتو واقف فطوالة فضلام عاد هابط ولا كان هابط وسمعها اش قالت ولا الله اعلم ...
نوار: ياسين احم انا غانخرج قدام الباب ...
ياسين : مزيان ..."تمشات وتمشا هو حتى قرب لعندها وشد فكتفها بايدو " ...تسناي ...
نوار "وقفات على نيتها " : شنو ...
ياسين "هز خصلة من شعرها رجعها لور دوز بصبعو على حنكها بشوييي حتى هزات كتافها بتبوريشة خلات قلبها كيزدح ...هبط لوذنيها ونطق بصوت خفييييف وخا هكاك غليض وخشن فحال فحيح مجهد ..." : دقة دقة كيدخل صعيب شوي وخروجه حنيييين ...لا كان غاا معاك الله يطلينا بدمنا من راس حتى لجذر ...
"حنحن ومشا فحال مكاين والو وما خاصو تا خير هههه خلاها وراه بالدعقة بغات تمشي صدقت راجعة هههه "
نور الياسين الجزء الثامن
محتوى القصة
التنقل بين الأجزاء