نيار:و انا نيار ختك كانت معانا غير خرجات من ساحتنا و بداو يخرجو رجليها الشواري
رفيف:ههه عارفاها راسها قاصح
سديم:الحفل بدا ولكن العرض قالو مغيبدا حتال 12دليل
نيار:يمكن هدا اول عرض تحضري ليه ا رفيف؟
رفيف:ا ااه اول عرض
عذراء:انا لي جريتها تجي معايا اما كاعما بغات
سديم:الناس بداو تيدخلو
نيار:بانو ليا صحاب لكومبليات و صحابات هيلو مستر و بونجوغ مدام
عذراء:هههه ايوا راه هادي ساحتهوم حنا غير خدامين عند بحالهوم
نيار:ديك البينينة بوحدها لي متواضعة فهاد الزمر كاملو
سديم:اه مدام بنان ضريفة
عذراء:اكيد الله يعمرها دار
تسمع عزف الآلات الموسيقية جاي من واحد القنت فالقاعة..ضارت رفيف بانت ليها فرقة تتعزف...
رفيف:هادشي راقي اخوتي ههه
سديم:خصك تشوفي حفل الإفتتاح عاودو ليا عليه شي حاجة صداااع
نيار:اجيو ناخدو شي حاجة منشربو شحفت بالهضرة
مشاو لفين كاين البوفي و خداو عصائر بدل الخمر و جلسو فواحد الجليسة تما بالفوتويات...
فنفس الوقت كانت نواهل داخلة حتى هي لابسة فستان بيض بلا سميطات واصل لحد الركبة مع حقيبة يد بسمطة طويلة فيها شي معدات و الكاميرة ديالها معلقة فعنقها..طلعات راسها بان ليها الملصق لي فيه صورة عذراء و هي تقرا سميتها غير بانت ليها مفتاح استغربات حيت نفس الكنية ديال برناس..قالت ممكن صدفة و مشات تشوف الوجوه المرموقة لي جاو للحفل باش تاخد ليهوم صور...
داز الوقت و عذراء مع لخرين باقي جالسين تما خالقينها و عاطيينها لضحك و النشاط ضاربين الرقي و البريستيج مع الحيط...
سديم:هههه ناري طبت اجيو نتمشاو شوية
نيار:انا نيت كنت بغيت نقولها ولكن ماسخيتش بالجماعة
مشات عذراء خرجات من القاعة حتى شدات السانسور لطواليت حيت ماعارفاش واش كاينة فهاد الطابق...
عند قوس لي لاح فوق حوايجو الفيستة لي ضايرة عليها القصة كاملها ايه الفيستة الكاشفة لي تصبنات و تقادات حتى تحييد منها التيد و تعطرات بعطرو الفاخر..كان واقف مع رجال اعمال هازين كؤوسهوم لي عامرة حتال النص بالمشروبات تيتبادلو اطراف الحديث بخصوص الخدمة و المشاريع حتى تمات جاية جلنار لعندو..استأذنات منو يعطيها دقيقة من وقتو و ضار لعندها...
جلنار:مستر العرض غيبدا دابا
قوس:اوكي
جلنار:نعطيهوم الإذن ديالك باش يعلمو الناس؟؟
قوس:اه
حركات ليه راسها و هي تحط يديها على ميكرو صغير معلق فودنها:علمي الناس يمشيو لقاعة العرض...
قوس:علمي شي واحد يجيب عذراء لفين غنكون جالس
جلنار بلعات ريقها بالفقصة:كيفاش ا مستر؟
قوس:سيري عيطي على عذراء!
جلنار:و ولكن انا ماعرفتش فين كاينة
قوس:شوفي مع كاميرات المراقبة يشوفو مكانها فالقاعة ولا شي حاجة!
ضار راجع لهضرتو مع رجال الأعمال مخليها تتغزز فسنانها و تزيير فيديها بعصبية ولكن سرعان ماتفكرات العرض لي غيبدا دابا سرعات من خطواتها تقلب على هاد الكوافورة لي مخربقة دماغ مول الشركة حتى تيقلب عليها ديما..في حين انه الكوافورة خوات المزيودة و رجعات لعند عصابتها حتى بداو تيسمعو...سيداتي سادتي المرجو الحضور الى القاعة المجاورة حيث سوف يقام العرض...تقالت ب 5 ديال اللغات..الفرنسية..الألمانية..الإنجليزية..المغربية و العربية الفصحى...
عذراء:اينا قاعة تاني؟؟
رفيف:ماعرفتش
سديم:راه كاينة قاعة فلافان ديال هادي
نيار:هاد الشركة دايرة بحال شي متاهة و الله كل مرة خارجين لينا بشي باب ولا بشي بلاصة
عذراء:اجيو نشوفو بانو ليا الناس غاديين لديك الجهة
يالاه غتسبق عذراء حتى تتوقف عليها سلوم الشفارة ديال جلنار طلعات فيها عذراء راسها قداش طويلة عليها:اش كاين اتا شوية ماتدخلي فيا؟
جلنار غتموت بالسم:مستر قوس بغاك دابا
سديم و نيار شافو فبعضياتهوم باستغراب...
عذراء:فين كاين؟
جلنار:سبق للقاعة تحركي قدامي ييخ
رفيف تدخلات شادة عذراء من كتافها:نتي مالكي تتهزي و تحطي عليها؟
عذراء حطات يديها على جنابها:هييوااا يا لالة راه ختي هادي حدك تما
جلنار:تفكينا منك نتي بعدا بقات لينا غير ختك زيدي قدامي راه تيتسنا فيك
عذراء شافت فسديم و نيار لي مستغربين:سمحو ليا غنمشي دابا
جرات رفيف و مشاو تابعين جلنار...
سديم شافت فنيار:وجهها لي تحط فالغلاف و الرعاية ديال الصيحة الربيعية و دابا مستر قوس لي هو مول هادشي كاملو معييط ليها لعندو؟لا هادشي بزاف
نيار:انا بديت تنشك ياكما *حبات ليه راسها
سديم:اويلييي!!!زعمة؟؟ ميمكنش مانضنش هي ماشي من النوع الخفيف
نيار:و شنو متلا؟؟راه صحاب الشركات معروفين تيشوف شي وحدة تيتيزة و يبقا عليها بال*وا و الفلوس
سديم:مابغيتش نفكرو فيها بالخايب
نيار:زيدي قدامي كاع نشوفو حنا اش باغيها غير من بعيد
دخلو البنات مع جلنار للقاعة لي كانت عبارة على منصة عرض الأزياء طوييييلة و فالجناب ديالها كاينين بزاف ديال الكراسا كحلين و الدنيا كلها مضوية...قلبات جلنار بعينيها على قوس فين كاين بان ليها فواحد القنت جالس و حداه فابيو...
جلنار ضارت لعندهوم مفقوصة:هاهواك تما
خلاتهوم و مشات شدات كرسي فالصف لاخور...
عذراء:ا اااه هاهواك ديك الزرافة مانعتاتش لينا فين
شدات فرفيف و دازو بين الصفوفا لي نصهوم خاوي حيت باقي تيدخلو الناس و النص لاخور راه كل واحد شاد بلاصتو حتى وقفات على قوس هي و ختها...
عذراء بابتسامة:هانا جيت
رفيف شافت ففابيو و وشوشات ليها:بعدا مابيهش
فابيو طلع راسو فيها مافهم والو...
قوس بتاسم فاش شافها:My Beauty (جمالي)
عذراء:ههه تنقدم ليك ختي رفيف
رفيف تتشوف فقوس و ففابيو:ك كيفاش زعمة؟؟
عذراء:هدا هو (جمعات صباعها بجوج) "صاحبي" كيفما سميتيه
رفيف بصدمة:كيفاش!!!هدا كاملو؟؟!
قوس شاف فيها باستغراب و فابيو مافاهم اصلا اش تتقول...
عذراء:اويلي اصاحبتي مالي غنكذب
قوس شدها من يديها:جلسي خليت ليك بلاصة هنا
عذراء شافت فرفيف لي كانت مطلعة حاجبها تتشوف فيديهوم المشادين:احمم رفيف جلسي عافا ختي من بعد و ديري لي عجبك فيا
جلسات عذراء حدا قوس و رفيف بقات تتشوف فين غتجلس حتى ناض فابيو من بلاصتو:(بالإنجليزية)جلسي هنا ميس
رفيف بتاسمات ليه دغيا و جلسات:شكراا
جلس حداها فابيو و هي تستغرب و وشوشات لعذراء لي حداها:اويلي مال هدا ناض ليا و جلس حدايا
عذراء:ماعرفتش سوليه
رفيف حتى هي على نيتها:علاش نضتي و جيتي جلستي حدايا؟
فابيو مافهم حتى حاجة حيت دوات بالمغربية:مافهمتكش
رفيف وشوشات تاني لعذراء:واش هاد المرض ماشي مغريبي؟
عذراء:لا راه سويسري دوي معاه بلونگلي ا السطل
رفيف رجعات شافت فيه و بدات تتفتف و تحاول تفكر الإنجليزية لي قرات من التاسعة للباك يالاه ماركبات جملة مفيدة:احمم قلت ليك علاش نضتي خليتي ليا بلاصتك و جيتي نيت جلستي حدايا
فابيو:فكرت انه غتبغي تجلسي حدا ختك
رفيف عاد طلعات معاها:ا ااه هيهي
قوس:العرض غيبدا دابا تنتمنى يعجبك
عذراء مبتسمة و شافت فيه بواحد اللمعة فعينيها:اكيد غيعجبني شكرا بزاف
قوس حط يدو على حنكها و جرو بشوية:I'm In Love With your eyes (وقعت في غرام عيونك)
عذراء حشمات فبلاصتها مغطية وجهها بيديها في حين رفيف غير تتعوج ففمها و هي تتسمع فهضرتهوم...
الأضواء تطفات مخلية المكان فالظلام كلشي كان مسنط فكرسيه الا الكوافورة لي نقزات على قوس خايفة:ناري ياكما تقطع الضو
قوس ضور يدو مورا ضهرها:لا راه غيبدا العرض دابا
شعل الضو ديال المنصة فقط و الباقي بقا مظلم متيبانوش وجوه الناس لي فالصفوف فقط رجليهوم لي ضارب فيهوم شوية ديال ضوء المنصة..تطلقات الموسيقى ديال عروض الأزياء و تمات داخلة اول عارضة بفستان طويل بألوان ربيعية مع الإحتفاظ بلون الفيستة لي مبازيين عليه..تقدمات بخطواتها للقدام و كل مرة تتوقف و تعطيهوم بوز تبرز الفستان اكتر بدا تيتسمع الفلاش ديال الصحفيين لي جاو يحضرو الحفل حتى سالات و دخلات عارضة خرى...
رفيف وشوشات لعذراء:اربي واش هادو دابا حوايج ولا شراوط جاب ليا الله بحالا تنشوف حوايج حليمة الهبيلة هي بعدا معدورة مسكينة عايشة غير فالزنقة و هادو ياختي ماناقصهوم حتى خير
عذراء بشوية:راه اختي حدايا مول الشركة زعمة حتى نرجعو لدار و قولي ليا لي بغيتي
رفيف بشوية:امم صاحبك ياختي انا باقة مصدومة لا زعمة مامصدقاش
عذراء:واش لهاد الدرجة تنبان خايبة ولا؟
رفيف:شكون قال عليك خايبة؟انا مكنتش عارفة ذوقك فالرجال داكشي علاش بسبب حماقك و هبالك رسمت صورة خرى فبالي عليه
عذراء:لا اختي السيد بعقلو راه مول الشركة زعمة الله يهديك اسميتك
رفيف:شوفي هادي لي عاد دخلات جاتني بحال ديك الكسوة لي كنتي عمتي بيها فالبحر العام الفايت و كشفات ليك بالشمس
عذراء:متفكرينيش كملات عليها الواليدة و دارت منها شراوط للخبز
رفيف حبسات الضحكة بفمها:و داكشي لي شاط منها دارت منو سريبتة تتمسح بيها الماعن
عذراء:خليني
قوس شد ليها فيديها و باليد الثانية جر ليها راسها و حطو عند صدرو:المشاهدة هكا احسن
عذراء مصدومة من تصرفو الجريء قدام بزاف ديال الناس زائد ختها لي حداها كونما هاد الظلام موصيبة كحلة...
رفيف مع الضلام ماشافت والو و رجعات شافت قدامها فالعارضات لي غاديين جايين..هكاك داز العرض عذراء مخشية فقوس تيتفرجو و رفيف و فابيو ساكتين حتى خرجو العارضات كاملين لي دازو تيضورو على حواف المنصة وحدة مورا لوخرا حتى تمو خارجين المصممين ديال جميع التصاميم لي لابسينهوم العارضات..كل عارضة شدات يد المصمم ولا المصممة لي صممات الفستان لي لابسة و بداو تيتمشاو للقدام ناضو الصحفيين تيصورو شي وحدين قربو كاع للمنصة باش يصورو...
قوس شاف فعذراء:دابا غيشعلو الضو
عذراء بعدات منو دغيا و تقادات فالكرسي ديالها:احمم واخا
الضواو شعلو و العارضات بمصمميهوم بداو تينساحبو لداخل و الصحفيين المصورين تيصورو...
رفيف شافت فعذراء:صافي سالا هادشي؟
عذراء:هادشي لي بان ليا
فابيو شاف فقوس و دوا بالألمانية:مستر قبل مانمشي بغيتي شي حاجة؟
قوس بالألمانية:لا شكرا يمكن ليك تمشي
رفيف وشوشات لعذراء:اويلي باش داويين هادو؟
عذراء:الألمانية حتى انا بحالك مافاهمة حتى زفتة
فابيو:ليلة سعيدة مستر (شاف ف عذراء و قلبها انجليزية) ليلة سعيدة ميس ادرا
عذراء بابتسامة:طهلا فراسك مستر
فابيو شاف فرفيف:و حتى نتي ميس
رفيف بابتسامة:شكرا
مشا فابيو و تبعوه ناس خرين لي بداو تينوضو من كراساهوم شافتهوم عذراء و هي تنوض من الكرسي ديالها و وقفات قدام قوس...
عذراء:غنمشي لدار دابا شكرا مرة خرى على هاد لجيست
قوس ناض حتى هو:العفو واخا Good Night My Honey (ليلة سعيدة عسلي)
عذراء بتاسمات بحشمة تيدلعها قدام ختها عاين باين في حين انه فالصف لي مقابل معاهوم كانت كاميرة مصوبة عليهوم تتلتاقط فالصور...
نواهل تتصور و تشوف فشاشة الكاميرا و تعاود تصور تاني:جاتني ديك البنت بحال لي فالغلاف ديال الصيحة
نواهل خدات صورة خرى:شحال قلبت عليها نستجوبها بحال لخرين و مالقيتهاش لعجب
جمعات الكاميرا و قرباتها من وجهها تتفحص فشاشتها:موسيو قوس(تتزومي) مبتاسم ليها لعجب نادرا فاش تيبتاسم(دوزات التصاور لخرين)علاش عقلي تيقول ليا بلي كاينة شي حاجة بيناتهوم؟
نواهل طلعات راسها مالقاتهومش:اووه عاد كنت باغية الى ساليت التصاور نستجوبهوم
على برا كانت عذراء غادية وسط الناس وحداها ختها رفيف حتى سمعات لتيليفونها تيصوني...
عذراء جاوبات من بعدما شافت المتصلة:الوو
بنان:فين كاينين؟
عذراء:عاد خرجنا من ديك القاعة
بنان:هبطو لقدام الشركة تما فين كاينة نفس الطونوبيلة لي جابتكوم
عذراء:صافي شكرا بزاف
بنان:بونوي مهمتي سالات(قطعات)
عذراء رجعات تيلي لصاكها:ياختي هاد بنان كونما هي واهلي واهلي
رفيف:صراحة ضريفة ولكن حسساتني بواحد الخوف فواحد اللحظة
عذراء ضغطات على السانسور:اويلي ههه علاش الخوف؟
رفيف:معرفتش ولكن قالت ليا الى انا بصاح فصفك خصني نتقبل وجود صاحبك فحياتك قالتها بواحد الطريقة بحالا تتهددني
عذراء دخلات لسانسور و تبعاتها رفيف:ههه هي هكاك دايرة و هكاك تدوي انسانة حذرة بزاف و ضاربة لحساب لخطواتها
رفيف:المهم قلت غير رأيي
السانسور هبط بيهوم حتال الطابق الأول و تما فين خرجو حتال برا الشركة فين تتسناهوم الطونوبيلة...
رفيف:نسينا ا الموصيبة مابدلنا حوايجنا
عذراء:ماشي مشكل اصلا حتى واحد مغيكون فايق حتال بيتنا و نبدلو
حلات عذراء الباب و طلعات هي و ختها شافهوم الشيفور من المرايا و ديمارا مرجعهوم لدارهوم...
بعد مدة من الطريق حطهوم قدام دربهوم و مشا..شافو فبعضياتهوم دايرات بحالا مليوحين من شي عرس و تمو داخلين مع الدرب حاضيين جنابهوم الدنيا تتصفر و كلشي ناعس و ساد عليه فدارو الا هاد الجنون لي سهرانين لدابا...وقفو قدام باب دارهوم و كل وحدة حييدات لي لابسة فرجليها و بعد لحظات تجبد الساروت و دخلاتو عذراء فالباب بشوية حتى ضوراتو بالعرض البطيء حتى تحل و دخلو على صباع رجليهوم حتى سدو الباب تاني بشوية...كانت الدنيا مظلمة و هي تجبد رفيف تيليفونها و خدمات بيه البيل طلعو مع الدروج على صباع رجليهوم حتال لبيتهوم و سدو عليهوم تيرضو فالنفس ممصدقينش انهم خرجو سهرو و رجعو سالمين غانمين بلا مايلاحظ حتى واحد هادشي...
رفيف طفات البيل و شعلات الضو ديال البيت:ياختي ممصدقاش انه درناها
عذراء تتحيد فالكسوة: و تشوفي انا ناري الفرحة
رفيف فكات شعرها و بدلات حوايجها:الأجواء شحال مختلفين تما
رفيف بدات تتمسح وجهها حتى هي:سبحان الله و صافي اجي بعدا شفتك غتنعسي بدوك الطوانگ و السلسلة حييدي داكشي ا الهبيلة
عذراء:وا غير بشوية عليك راه غير بغيت نمسح كمارتي هي لولة
رفيف سالات و تخشات ففراشها:الله ياختي الله عضامي تهلكو
عذراء حييدات مجوهراتها:انا نييت
هزات عذراء تيلي ديالها باش تحقق لالارم و هي تلقا ميساج ديال بنان فيه "بلا ماتجي غدا رتاحي كانت ليلة طويلة" فرحات بزااف و شافت نيشان فرفيف لي عاد تتوسد تنعس:ناري قالت ليا بنان مانجيش غدااا و نرتاح صافي شراهاا النعااس
رفيف:غنفيقو خامرات بجوج و الواليدة غتخاصم اجي داك الضو لي خلينا شكون غايطفيه
عذراء:طفيه نتي مافيا لي ينوض
رفيف:انا لي تكيت لولة نوضي طفيه نتي
عذراء:وا ياك انا لي عرضتك للحفلة!
رفيف:اش جاب دابا الحفلة للهضرة نوضي باش نعسو
ناضت عذراء بالنفخة حتى طفاتو و تخشات ففراشها..سدات عينيها و هي تفكر اخر صورة لتاقطاتها ذاكرتها لقوس..بتاسمات و بقات تتفكر فيه حتى داها النعاس...
☀️فلغد ليه☀️
فاقت لوليا حتى قادات الفطور و جلسات تتسنا فعذراء تنوض لخدمتها حتى بانت ليها ولات 9:30 و هو يدخلها الشك..ناضت حتى حلات البيت بشوية و بانو ليها صحابات السهرة ملويات فالمانطات بحال الكريب..قربات من عذراء حتى وقفات عليها و بدات تتفيقها...
عذراء حلات عينيها بشوية ضارها راسها و كلها دايخة:م ما..ما؟
لوليا:واش ماغادياش لخدمتك؟
عذراء:لا راه سيفطات ليا الباطرونة ميساج قالت ليا بلا مانجي ليوم
لوليا:و علاش ماعلمتينيش و انا فايقة بكري نصوب ليك فالفطور
عذراء:راه نسيت و داني النعاس عافاك ا ماما خليني نعس
لوليا:خوتك ناعسين ختك ناعسة خمرو نتوما لمن بغات
خرجات لوليا و سدات الباب اما عذراء رجعات نعسات فالبلاصة...
فلبيرو ديال برناس كان هاد الأخير جالس مقابل خدمتو و تيشرب قهوتو الصباحية حتى سمع الدقان فالباب...
برناس: تفضل
دخلات نواهل تتبتاسم و حركات ليه راسها:صباح الخير موسيو
برناس طلع راسو:صباح الخير نواهل كيف داز الحفل؟
نواهل سدات الباب و وقفات عليه:داز زوين موسيو واخا للأسف ماقدرتش نستجوب موسيو قوس بنسليمان ولكن خديت صور لي ممكن تحط و تسبب شوية ديال الضجة
برناس:اينا صور؟
نواهل حييدات الكاميرا ديالها لي كانت معلقة فعنقها و حلاتها:صورتو هو و واحد البنت و شكيت انه ممكن تكون بيناتهوم شي حاجة راك عارف ا موسيو المشاهير و العلاقات خصوصا شخصية مرموقة بحالو غادي يكون فضول كبير عند الناس شكون غتكون شريكة حياتو
برناس:وريني نشوف
نواهل جبدات ليه التصويرة و عطاتو الكاميرا:خديتهوم فاش تسالا العرض
برناس يالاه شدها من عندها و قربها لعندو يشوف التصويرة حتى تيتصدم بوجه مؤلوووف...
نواهل لاحظات السكات ديالو و هي تحنا بدات تدوز بصبعها:راني خديت ليهوم بزاف يمكن ليك تختار اينا وحدة فيهوم لي تجي مع السبق الصحفي
برناس يديه بداو تيترعدو مزيير على الكاميرا تتبان ليه عذراء واقفة هي و قوس ضاحكين و هو لي خطيبها منخلاه و عاطياه داك وجه الحبس ديال ماحاملاكش..اش هاد التناقض و علاش هي اصلا واقفة معاه؟؟؟هو المدير و هي مجرد مايكاب ارتيست مايمكنش تكون صدفة!و شنو تدير اصلا فداك الحفل لي كان فنصاصات الليل!!
نواهل:موسيو؟..مالك؟
برناس حاول يتمالك اعصابو لا ميمكنش يتسرع خصو مايظلمهاش..طلع راسو فنواهل المستغربة:عندك شي معلومات على البنت لي معاه؟
نواهل:سميتها عذراء مفتاح و هي الراعية ديال الصيحة الربيعية ديال البارح
برناس شد فراسو بصدمة:كيفاااش الراااعية؟؟؟و هي كانت خدامة غير فصالون!!!
نواهل تخلعات من صوتو المرتفع:واش من عائلتك ا موسيو؟؟انا فاش شفت كنيتها قلت ممكن صدفة ولكن كلامك تيبين ليا العكس
برناس شلا افكار تيضورو فراسو:هااادي رااها خطيبتي!
نواهل بصدمة:خ خ خطيبتك؟
برناس:خلي ليا الكاميرا ديالك
نواهل:م ممكن يكون سوء تفاهم ا موسيو واش هي خدامة فالشركة؟؟؟
برناس غيتفرقع راسو ماقادرش يجاوب على حتاشي اسئلة:خليني بوحدي دابا!
نواهل:ا اوكي موسيو
خرجات بخطوات متسارعة بواحد الحزن باين فوجهها حاسة بألم فقلبها..تسمع الباب تسد و هو يرجع هز الكاميرا تيضور فالتصاور و تيشوف السعادة مرسومة على وجه خطيبتو ولكن بفضل رجل اخر ماشي هو..حط يديه على ذقنو تيحاول ما امكن مايتعصبش و مايخليش الأفكار السلبية تسيطر عليه و يفكر فيها بالخايب ولكن مالقا حتاشي حاجة لي تبيين ليه هادشي كاع الأجواء تتبين مدى مصداقية ظنونو..ناض من على الكرسي و حل الشرجم..جبد گارو شعلو و بقا ساهي فالدخان لي خارج من فمو غارق فتفكيرو...
فقدام الليسي..كانت واقفة ديالا مسندة على الحيط و حداها رامي مسند حتى هو و موطورو مبلاصيه قدامو...
رامي:امتى عندكوم الباك؟؟
ديالا:الشهر الجاي نيت
رامي:مراجعة ليه شي حاجة بعدا؟
ديالا:راني تنحاول ها السوايع ها ختي رسيل و ها القسم
رامي:بغيت نعرف غير شنو غاتديري بهاد الباك دابا؟
ديالا:انا بغيت ندفع باش نقرا الإعلام خويا برناس غيعاوني انا حلمي نكون مقدمة برامج
رامي شاف فيها بتخنزيرة:باش لمك لي يسوا و لي مايسوااش يشووف فيككك اااا!!!
ديالا بخوف:راه تيشوفوني فالزنقة نيت و زايدون علاه اش فيها راني غنبقا غير نعطيهوم فالأخبار
رامي:فاش غنتزوجو مكايناش الخدمة سمعتي انا خدام و قاد بيك!
ديالا:ولكن انا هدا حلم بالنسبة ليا انا عارفاك خدام و كدا ولكن هدا راه حلم تفهمني ماتحطمنيش قنعت مالين الدار غير حيت خويا خدام فمجال الصحافة و ضمني ليهوم ولكن باش نتا لي خطيبي تحطمني هكا حشومة عليك
رامي:هضرة وحدة لي كاينة و مابغيتش نعاودها!
ديالا غرغرو عينيها:نخليك غيتسمع الجرس دابا
رامي شدها من يدها و زيير عليها:هاد الخرجات متنحملهوومش و جمعي عليا خناينك!
ديالا عاد ما زادو دموعها تيهبطو بعدما كانو متحجرين فعينيها:مابقيت عارفة ماندير معاك ماعرفتش واش تديرها بلعاني ولا شنو
عذراء:ماما داك برناس عاد صونا عليا و بغا يدوي معايا فشي حاجة مهمة قال ليك
لوليا:مالو هدا تاني ياك غير لبارح كنا عندهوم و تافقو على كلشي؟؟
رفيف:قلت ليها دابا مغتقدو لارض
عذراء:غنشوف اش بغا و نرجع دغيا
لوليا:واخا متعطليش رجعي قبل لغدا
عذراء:واخا ماما
مشات عذراء حتى لاحت جلابتها على بيجامتها و هزات صويكها صغير فيه بسطامها و سوارت الدار و تيليفونها الإحتياط واجب..حتى سمعات صوت طونوبيلة مبلاصية قدام الباب...
رفيف:يمكن راه جا
حلات عذراء الباب لقاتو هو لي مبلاصي تلفتات عند مها حتى قالت ليها بسلامة و حلات الباب اللوراني حتى جلسات...
شافها برناس من المرايا تفكر فالبلاصة ديك الضحكة المرسومة على وجهها فالتصاور هاد الضحكة لي حرماتو منها بهاد الوجه العابس لي مورياه دابا...
ديمارا من تما بلا مايدوي معاها اما هي كتر منو مامسوقاش ابدا باغية تعرفو غير اش باغي و تگعد ترجع لدارهوم....
فالدار ديال عائلة برناس كانت رسيل جالسة تتفرج فالتلفزة فلتحت كاينة غير بوحدها هي و دواني هاد الأخيرة لي كانت فبيتها جابدة واحد الصندوق خشبي بإبتسامة عامر مجوهرات و فضة قديمة...سداتو و مشات حتى حلات بيت رسيل ضورات راسها فيه و هي تدخل ديريكت للماريو ديالها...
دواني:معرفتش واش داك القفطان البيض باقي قدها ولا خصني نزيد شي قفطان بيض فالحساب باش يتفصل
حلات الماريو و بدات تتقلب فين غتكون طواتو بنتها حتى بدات تتحسس شي حاجة قاصحة وسط من شي حوايج..دخلات يديها بيناتهوم تتقلب حتى جبداتها و كانت الصدمة فاش داكشي لي جبدات كان اختبار الحمل!
ضوراتو و بدات تقلب فيه بيديها لي تيترعدو بجوج ممصدقاش اجابية الحمل لي واضحة و باينة من خلال جوج شراطيه الحمرين لي باقي متبتين فيه..شنو تيدير اختبار حمل فبيت بنتها العزبة؟؟أو بالأحرى لي تظنها هي انها عزبة!و من الفوق إيجابي! ضارت بيها الدنيا فهاد اللحظة و تمنات يكون هادشي غير شي مزاح ولا شي غلط المهم ميكونش ديال وحدة من بناتها!...
طلعات رسيل مع الدروج بعدما طفات التلفزة..وصلات للكولوار فين كاينة غرفتها حتى تتفاجأ ب بابها المحلول..دخلات و هي تلقا مها عاطياها بالضهر و واقفة هازة شي حاجة فيديها...
رسيل:ماما؟؟
دواني ضارت عندها بملامحها المخربقة لي من هول الصدمة ماعرفات باش تحس...
رسيل تخلعات من ملامح مها و هي تهبط عينيها ل اش هازة حتى تيبان ليها اول اختبار حمل ليها ايجابي خباتو كتذكار وسط من حوايجها حتى تزوج و تلحق دارها ولا دابا بين يدين الأم ديالها لي ماعارفاش بعلاقتها المحرمة بخطيبها و لي خلفات من موراها ثمرة فكرشها...
دواني حطات يديها على قلبها بحرقة و دموعها محبسوش:كبددتيي غدرااات بيااا كبدددتييي لاحت كاااع لي علمتهاااا مورااا ضهرهااا اناا معندييش البنااات لي يعطييو راسهووم بغيت نعرف غييير فين زربااانة و نتييي اصلا غتزوجييي بيييه ا عيباااد الله و حتى هو! كان يتصحابليااا بعقلوو ولكن طلعتوو بجووج متتحشموووش معبرتووناااش و درتو لي عجبكووووم
رسيل:عفااك ا ماما متقوليش هكا و الله ما فكرنا هكا
دواني:الله ياااربي الله علاااش تجااازينييي بهكااا شنووو درت حتى بنتييي ترخصص رااسهااا هكااا (شافت فيها) نتي معارفاااش انه ديك الكرش كرش الحرام!
رسيل غطات كرشها بيديها و نفات الأمر براسها:لاااا متقوليششش هاكااا اناا و رئال غنتزوجووو ماتديريش هاد الحالة كلهااا واا مامااا راه غيتزوج بيا و نولد عااادي علاش هكااا؟؟؟
دواني ناضت و شافت فيها بكره:برهوشة بحالك مغتعرفش الثقة لي عطيتها مغتعرفش المكانة لي كانت فيها مغتعرفش فين كنت حاطاها مغتعرفش شحاال فرررحت و تباااهيت بيها قدااام العيالااات (شداتها البكية) مرمدتيي وجهي و وجه باااك فالأرض مرمدتيييه انااا هاد الولد مغنعتابروش حفيدي!
رسيل طاحت على ركابيها و شداتها من رجليها تتبكي:ماتديرييش فيااا هكا ا ماماااا لاااا ماتقوووليش هكاااا تقبلت تقولي عليه ولد الحرام ولكن ماشي حفييدك لا ا ماماا لااا اهئ اههههئ
دواني:بعدييي منييي بعديييي بناااتيي ماااشيي رخييييصاات(تدفع فيها برجليها)
رسيل مزييرة على رجليها:لااا مغنطلللقكش مامااا سمعييينيييي
دواني تحنات تتحيد يديها على رجليها بقوة ولكن هي حالفة ماتطلقها حتى جمعاتها معاها بواحد التصرفيقة خلاتها مصدومة...
دواني:عندك الزهر مي سلافا لي منظمة العرس و تحضيراتو قربو يكملو اماا كوون جات عليا كون نسيفطك لييه هكاااك مكاااين لا عرررس لا زمرررر!!!!
خرجات من الغرفة خابطة الباب من موراها مخلية رسيل تتلوا فالأرض و منفجرة بالبكا:اهئ اهئ ماااااامااا اهئئئ.....
بلاصا برناس طونوبيلتو فالبارك و هبط..هبطات عذراء حتى هي و تمشات موراه و هو غادي قدامها حتى دخلو للقهوة بان ليها طلع مع الدروج عرفاتو باغي يبقاو بوحدهوم حيت الطبقة الفوقانية من القهوة غالبا تتكون خاوية..تبعاتو حتى طلعات و بالفعل كان ظنها فمحلو..جلس برناس فواحد الطبلة و جرات كرسي قدامو..طلع السرباي و وقف عليهوم ياخد طلباتهوم برناس خدا قهوة غير باش يتسما خداها و يجلسو اما عذراء رفضات مابغات تاخد حتى حاجة...
عذراء ربعات يديها:يمكن ليك دابا تقول ليا لاش جايبني لهنا و شنو هاد الموضوع المهم؟؟
برناس جبد الكاميرا و حطها قدامها:حلي هادي
عذراء باستغراب:كيفاش؟
برناس:فاش غتحليها غتعرفي
عذراء جرات الكاميرا لعندها و حلاتها:منين تيخدم هادشي؟
برناس جرها لعندو و ضغط حتى خرجو التصاور و قلب الكاميرا لعندها..عذراء غير شافت الصورة قلبها وقف و عينيها خرجو و لونها تخطف ميمكننننش!! كيدار ليهاااا هداااا كيفاااش حتى تصورااات بعداا هي و قووووس فديك اللحظة..الصدمة كانت قوية عليها خلاتها مكوانسية اما برناس ربع يديه هاز حاجبو تيتسنا فكلامها اما ردة فعلها بيينات كلشي...
برناس:ايوا؟
عذراء هزات فيه عينيها و حاولات تمالك راسها ميمكنش ليها تخليه يدير ماا بغاا:كيفاش ايوا؟
برناس:شنو داكشي لي شفتي؟؟
عذراء ربعات يديها و طلعات حاجبها حتى هي دافعة جبهتها اما رجليها فشلو من الترعيدة و صباعها تيشطحو غير بوحدهوم كونما ربعات يديها:تنشوف واحد المايكاب ارتيست دوات معاها مدير عملها
برناس:واش نتي عارفة اشنو تتقولي ولا؟ اشنو غيقول معااك مديييرك لي اصلااا مكااااينش شي وااحد لي بحاالك يقدر يدوي معاه بلا حتاشي موعد و حتى داك الموعد متحلميش تشديه!!
عذراء:لاش تتلمح دابا؟؟؟واش ماندويش مع الناس؟؟؟
برناس:مابقاتش فتدوي بقاات فالطريقة لي داوين بيهااا هو ضااحك و نتي ضاحكة!! و انا اخر واحد تضحكي ليه!!!
عذراء عقدات حجبانها:لا مزيان تبارك الله بغيتيني نعبس فوجهو باش يتري عليااا
برناس:و قضية انك راعية الصيحة الربيعية شنو جاب مايكاب ارتيست للأزيااااء بل رااااعية د صيحة!!!
عذراء بلعات ريقها و بقات لثواني ساكتة حتى طاحت عليها واحد الكذبة:بخصووص داكشي العارضة لي خدامة عندها هي لي توسطاات ليااا مع واحد المصممة فالشركة عطييتها واحد الفكرة باش تقاد بيهاا واحد الكسوة صدقات تشاركاتها معاها كانو غيحطو سمية العارضة ولكن هي رفضات و قالت ليهوم انه الفكرة ديالي
برناس كمش عينو فيها هادشي ممكن يكون حقيقي ولكن صعيب عليه يتقبل شي حاجة دابا:و كيفاش قضية حضور حفل فنصاصااات الليل؟؟؟؟؟
عذراء هنا خرجات فيه عينيها:ا سيديي ماااشي سوووقكك نتااا خطيبيييي بالإسم واش سمعتي بالإسمممم فقط ماراااجلي ماحتى شي حاجة باش تبداا تسوول فيا و تدير لياا لونكييط و هاد التصاور لي جاايب واش بنت لييك بايساااه؟معنقاااه؟شادة ليه فيدو؟؟؟لااا!!!اذن اش هاد التهامات كاملين زائد منين ججاااوك اصلا؟؟؟اااه ولا ياكما تتجسس عليا؟امممم شكون دابا لي منو لافوووط؟؟؟؟
برناس انداهش من كيفاش ضوراتها ليه هو:كيفاااش اش تتقولي نتيي اشمن تنتجسس عليك صحفية فالمجلة لي تصادفاات مع هادشيي و صوراتكوووم!!
عذراء:اااه و نساات حتى واحد ختي رفيف ماشدااتهاش راه هي لي لابسة الحمر(هزات الكاميرا و عطاتها ليه)شفتيهاا؟؟دابا انااا غنجييب ختي للحفل و غتكوون معايااا و هي عارفة مزيااان بلي انا مخطووبة و تضن فياااا هكا؟؟؟كون كااان لي تيضووور فدمااغك كاين مغنجيبهاااش تحضر للحفل!!!
برناس تيشوف فالطوف بالفعل كانت معاها رفيف لي مالاحظهاش من كترة ماتصوبو انظارو فقط على عذراء و قوس...
عذراء ناضت هزات صويكها:صافي هادشي لي غتقول ليا؟؟
برناس:نتي دابا تتقولي ليا انه هاد الضحك عادي؟؟؟
عذراء:لا كان تيعاود ليا النكت عرفتي شنو الله يعاونك مامعاك هضرة
ضارت غادية حتى هبطات مع دروج القهوة اما هو هز الكاميرا دغيا و تبعها حتى خرجات و حسات بشي واحد جرها...
عذراء ضارت:شنو بغيتي؟؟؟
برناس:زيدي نوصلك لداركوم
عذراء:طلق مني و خليني عليك
برناس:اي واحد كان غيتصرف هكا و كتر نتي راكي خطيبتي و عرسنااا قرب!
عذراء خنزرات فيه واحد التخنزيرة ماكرهاتش كون داك الفم يتقطع قبل ماينطق بالنصف الثاني من الجملة لي نطق بيها...
برناس:زيدي معايا و متقصحيش راسك
عذراء:انا بغيت نفهم غير علاش كلكوم دايرين هكاا مكاينش الله يحفظ لي يتيق فيااا شنوو فيها الى كنت الراعية لشي صيحة؟؟ و شنو فيها الى وقفت مع مول الشركة بحال الناس؟؟و شنو فيها الى حضرت لحفل بحال العمال لخرين؟؟ علاش مكبر الموضوووع علاشششش؟؟؟
برناس تلف مابقا عارف مايشد خلاتو يشك فلي شافوه عينيه و تييقو عقلو و هنا بداو افكار عذراء تيتسللو و يمحيو دوك الأفكار ديالو لي خدا عليها...
عذراء:مالك ساكت يالاه جاوب!!
برناس:زيدي نوصلك لدار
عذراء:غنشد طاكسي صافي سالينا الهضرة
برناس:سمحي ليا ماقصدتش نقلقك ولا شي حاجة ولكن راه اي واحد غيدير هكا
عذراء هزات كتافها مامسوقاش:و انا مالي؟
برناس:متنحملش تعامليني بهاد البرود!
عذراء:نتا لي جبتيه لراسك و دابا سير خليني عليك الله يرحم الواليدين
ضارت عطاتو بالضهر غادية تتزرب فخطواتها تشد شي طاكسي ترجعها لدارهوم اما هو بقا شحال متردد واش يتبعها ولا لا حتى شاف فساعة يدو و بان ليه شحال فيها عرف انه خصو يرجع لمكتبو مايمكنش يخلي عملو كل هاد المدة...اما هي بقات غادية و يديها على قلبها لي غيخرج من بلاصتو من الخلعة ممصدقاش راسها انها خلاتو يشك فراسو بكلامها ولكن الأهم من هادشي كاملو هو هاد القضية ديال انه صحافيين فالمجلة فاش خدام حضرو للحفل عمرها توقعات ولا كان فالحسبان انه غيوقع ليها هكا شي نهار..بانت ليها واحد الطاكسي و شييرات ليها...
عذراء تنهدات:الحمد لله العشرة ديالي مع بنان خرجات بشي نتيجة اما كون بلت فسروالي....
فشركة Bens-Naht للأزياء...
كان قوس جالس فالبيرو ديالو و قدامو محلول البيسي ديالو الخاص تيدوز فصور عذراء لي لتاقطوهوم فريق التصوير قبل الحفل و ابتسامة اعجاب مرسومة على وجهو..تعابيرها و نضراتها مختلفين فكل تصويرة و هادشي تيبيين عدم ارتياحها فوقت التقاط الصور..تفكر كيف كانو قراب من بعضياتهوم لبارح و كيفاش فرحات بهاد الصيحة الربيعية لي جات مع عيونها الخضراء الجميلة و هو يحس بإحساس ممفسرش فالداخل ديالو...
قوس بابتسامة:نهار على نهار كنزيد نتعجب بيها اكتر
نرجعو لعند عذراء لي حطاتها الطاكسي فدربهوم و رجعات لدارهوم قبل الغداء...
رفيف طلات من الكوزينة:امضرا شنو بغا؟؟
عذراء غمزاتها:والو غير دوا على العرس و التوجاد ديالو
لوليا خرجات من الصالون:داكشي ماسوقوش فيه انا و مو و مي سلافا لي مكلفين بهادشي
عذراء حيدات جلابتها: ممكن يتبدل هاد الموضوع؟
لوليا:دوزي جلسي تنتسناو غير فباك يدخل نتغداو
عذراء:واخا نعلق جلابتي و نرجع...
فلبيرو ديال برناس كان جالس هاد الأخير غارق فتفكيرو بخصوص لي قالتو ليه عذراء..مايمكنش هادشي ! كيفاش حتى خلاتو يشك فراسو و انه دار ليها شي حاجة خايبة؟؟..و حتى واخا هكاك مايمكنش شي واحد بمكانة قوس يطيح مع بنت بحالها فقيرة عليه و ماشي من مستواه..اكيد لا مغتكونش علاقة بيناتهوم غير نار الغيرة عمات ليه عينيه...
بقا تيخمم حتى سمع الدقان فالباب..سمح بالدخول و هي تدخل نواهل حادرة راسها...
نواهل:موسيو طلبتيني
برناس:هزي الكاميرا ديالك و مسحي جميع الصور لي فيها ديال عذراء مع موسيو بنسليمان و حطي غير ديال الشخصيات الأخرى لي كانو فالحفل
نواهل قربات حتى هزات الكاميرا ديالها و رجعات خطوة للوراء:واخا موسيو بغيتي شي حاجة خرى؟
برناس حدر راسو على شي وراق:لا يمكن ليك تفضلي
حدرات نواهل راسها و خرجات سادة الباب من موراها..بقات غادية حتى دخلات للبيرو ديالها و جلسات جابدة الكاميرا ديالها قدامها حتى كليكات على صورة من الصور لي لتاقطات لعذراء مع قوس واقفين متبادلين الضحكة لبعضياتهوم..بقات تتشوف و تحقق حتى قالت...
عذراء حدرات راسها:و شنو فيها انا على الأقل متنافقش
رفيف:ها لي قلنا واش نتي تتحلمي ولا مالك؟ راه مايمكنش ليك ا عيباد الله تزوجي شي واحد ماشي من نفس برجك وا سمعييي
عذراء:مابغيتش نسمع انا عييت مانسمع فعيباد الله هاد المرة غنسمع لقلبي و عقلي غنسمع لراسي
رواء ساكتة غير تتشوف فيها و تشوف فرفيف...
رفيف:راه و الله ماراكي عارفة قداش خطيرة هاد الهضرة لي تتخرجي من فمك
عذراء:ماشي حيت سنمار تتبغيه و دخلتو فعلاقة حب تيعني انه حتى انا غندير بحالك مع داك الشمع ديال برناس!
رفيف:ماتجبديش سميتو كرهت هاد الزواج غير بسبب التعطال ديالو
رواء:تهدنوو بليييز عذراء واش بصاح لي تتقوليه؟؟؟
عذراء:اه فين عمرني دويت على شي حب من قبل؟
رواء:انا يتصحابلي تضحكي الحد الآن عمرني سمعت ولا شفت شي واحد تزوج من شي برج ماشي لي خصو يتزاوج معاه رفيف عندها الحق ولكن نتي كبيرة فكري بعقلك
عذراء:انا فكرت بعقلي و فكرت بقلبي مايمكنش ليا نتزوج ببرناس ابدا و ابداا و داك العرس مغنحضرش ليه ابدا
رفيف:ههه ناوية تهربي لعندو و من بعد يقضي منك الغاراض و ديك الساعة مكاين لي يقبلك حتى من داك الفرناس غتلقاي جدة سلافا لبقات ليه شي وحدة باش تستر فضيحتك
عذراء:ماشي سوقي تزوج ليه لي بغات انا مابغيتش نفقد قوس تيقولو الحب تيجي مرة وحدة و انا مابغيتش نضييعو!
رفيف:و تتسمي دابا هدا حب؟؟(قربات منها و طلعات حجبانها) الحب هو يجي دابا قدام العالم و يقول باغيك لزواج قدام مي و با و حتى ديك جدة سلافا ديك الساعة انا براسي نديكوم عند العدول!
عذراء:كوني هانية نهار فاش نوصلو لهادشي غادي يجي و يتزوج بيا! قوس ماشي خواف و كون كان تيديها فهادشي ديال العادات كاعما يبغيني حبيبتو و عمرو سولني على برجي!
رواء:هادشي تيبيين حاجة وحدة انه ممكن يكون باغي يتفلا عليك
عذراء:عفااك ا رواء نتي ماعارفاش قوس كيف داير بلا متضلميه بهضرتك انا عمرني شككت فداك خطيبك ولا قلت ليك شي حاجة اجي بعدا شنو سميتو؟
رفيف شدات راسها و رواء تنهدات:سميتو أديب زعمة و الله متتبدلي
عذراء:المهم أديب مالي عمرني حرشتك عليه؟؟؟ماتبقاوش تحكمو على بنادم (نييشات على رفيف بصبعها)نتي نيت براسك تصدمتي فاش شفتيه و قلتي ماتصورتيهش هكا
رفيف:ايه دويت على الشكل اما العقل ربي لي عالم اش تيضور فيه
عذراء: واخا تبدلو الموضوع و تخليوني حتى نتوما ندير لي بغيت فحياتي؟
رفيف:شوفي نقول ليك انا غنخليك اختي غااانخليك عومي بحرك غنساندك و نكون معاك كأخت ياكي غندير الواجب ديالي ولكن نهار عرسك و نهار تفيقي من الحلمة ماتبكيش عليا
رواء:ماعرفت مانقول غنكتافي انا بالمشاهدة فقط و نشوف فين غتوصلو بهاد العلاقة نتي وياه
عذراء تنهدات و بتاسمات:شكرا على التفهم
فواحد الكافي كان جالس سنمار و واحد الشاب فطاولة و أكواب القهوة قدامهوم تيتبادلو اطراف الحديث...
الشاب:ماصدقتش انك بصاح فالمغرب كنت واخد فكرة حتال الصيف ساعة غفلتيني
سنمار:ماشي لخاطري و الله غير سمعت الواليدة مريضة جيت تنجري حتى الروتور ماقطعتوش
الشاب:و دابا كيف بقات مسكينة؟
سنمار:لباس عليها دابا..المهم ا خويا أديب نتا صاحبي من زمان و عارف شحال من حاجة عليا
أديب:غير قول انا تنسمعك
سنمار:فالحقيقة معنديش الفلوس الكافيين باش نقطع الروتور بغيتك تسلفني حتى نرجعهوم ليك
سنمار شرب رشفة من القهوة:نتا عارف مزيان انه خليت ناتالي بوحدها فالدار و خصني نرجع
أديب:مابغيتش نجبد هاد الموضوع ولكن و واش شفتي خطيبتك؟
سنمار تنهد:وي شفتها ولكن كيف ديما كترة النگير و الهضرة على الزواج ههه كيف العادة مهاوشة عليه
أديب شبك صباعو مع بعضياتهوم:مزال مغتصارحها بعلاقتك مع ناتالي؟
سنمار:بليز مابغيتش ندوي فهادشي
أديب:اوكي على راحتك...
طاح الليل و الظلام خييم على بيوت شخصيات قصتنا..و بينما عذراء ناعسة عيون فدار اخرى ماناعسينش..برناس لي تيفكر و يحاول ينفي شكوكو..رسيل لي فزگات وسادتها بالدموع على كلام مها و دواني لي باقة مصدومة حلف النعاس لاجاها...
☀️فالغد ليه☀️
و فغرفة بنان لي تتواجد فشركة Bens-Naht للأزياء...
عذراء دخلات سادة الباب موراها:صباح الخير
بنان لي كانت لابسة نضاضرها و جالسة فكرسي هازة طابليت:صباح النور الزين اجي جلسي جلسي
بنان عينيها على الشاشة لي ضارب الضو ديالها فنضاضرها:الأغلبية ماخدموش البارح على ود داك العيا راه كانت سهرة ههه
عذراء:اه عندك الحق ايوا شنو عندنا مانديرو اليوم؟
بنان:اليوم عندي جلسة تصويرية من بعد الغدا مكاين والو بالصباح
عذراء:ااه واخا
بنان:كيدايرة ختك رفيف لباس عليها بعدا؟
عذراء بتاسمات:ههه لباس عليها ربي خليك
بنان:مزيان عرفتي لقيتيني تنفكر نيت فواحد الحاجة و الصراحة معرفتش
عذراء تقادات فالجلسة:شنو هي؟
بنان حطات الطابليت و شافت فيها:هادشي بخصوص ختك رفيف
عذراء:مالها ختي؟
بنان:فاش جات باش تحضر للحفل ذكرات انها سدات الصالون ديالها
عذراء:وي و لبارح أكدات انها عمرها غتحلو مزال فاش رجعنا من الخرجة عطات للواليد سوارتو
بنان بتاسمات:و هادشي بالضبط لي بغيت نبدا منو موضوعي
عذراء باستغراب:اينا موضوع؟؟
بنان:انا لاحظت غير من المايكاب لي دارت لراسها و كيفاش تعاملات معاه بديك الطريقة الذكية لي وفرات بيها وقت انه عندها موهبة بحالك نتي تماما و قلت مع راسي حرام تضيع ولا لا؟
عذراء:عندك الحق ختي رفيف تتحماق على هاد الضومين بحالي نيت و قرات الحلاقة بحب ولكن هي سدات على هادشي فاش تخلات على الصالون
بنان:و شكون جبد حس شي صالون دابا؟انا تنشوف بعيد خلينا من الصالون
عذراء:كيفاش زعمة؟
بنان:انا بغيت ختك تدير حتى هي بلاصتها فهاد الشركة
عذراء بصدمة:كيفاش!
بنان:وي كيفما سمعتي
عذراء:ولكن و الى مابغاتش؟فالحقيقة فكرة زوينة بزاف غفلت عليها گاع انا
بنان:ايوا شفتي دابا عرفتي شنو غتديري غادي تصوني عليها توجد راسها و نطرگوها نشربو قهيوة على برا
عذراء شافت فالساعة:العشرة هادي تنضن غتكون فايقة
بنان ناضت تتقاد فحوايجها:ايوا صوني عليها
ناضت حتى هزات تيليفونها و صونات على رفيف هاد الأخيرة لي كانت جالسة تتفطر...
رفيف:اش واقع ياكما...؟؟؟
عذراء قاطعاتها:لا لا مدام بنان قالت ليا بغات تعرضك لقهوة
رفيف:فهاد الوقيتة؟؟
عذراء:لبسي حوايجك دابا غنجيو نطرگوك(قطعات)
رفيف شافت فتيليفونها باستغراب:مال هادو
بنان:اش قالت ليك؟
عذراء:غتمشي دابا توجد راسها
بنان هزات صاكها: اوكي غنعييط لشيفور دابا...
بينما عذراء و بنان خارجين كان قوس جالس فالبيرو ديالو و فيدو واحد الدعوة فالأخضر ملكي غامق مختومة بطابع ذهبي.. كان حادر عينيه تيقرا فيها و معاه فابيو جالس فوق الفوتوي تيتسناه يسالي من القراءة...
قوس حط الدعوة و شبك يديه ببعضياتهوم: تقريبا شهرين هادي باش حلات شركتي فرعها فالمغرب و دابا شركة Limae حتى هي صراحة معرفتش فاش تيفكر موريتز ويبير
فابيو:تنظن انه حيت المغرب دولة معروفة بسياحتها و مناطقها الجميلة
قوس:ولكن بعد شهرين فقط من افتتاح شركتي! انا و نتا عارفين مزيان كيف داير موريتز
فابيو:وي عارف ا مستر سمح ليا ولكن واش غتقبل الدعوة؟
قوس:اكيد خصني نحضر
فابيو:اوكي مستر
فواحد الكافي راقية بجنب البحر..كانت عذراء و بنان و رفيف داخلين حتى شدو طاولة و خداو طلباتهوم...
بنان:وي عذراء فهاد الشهر عاد غيوصلها صالير خدمتها كا مايكاب ارتيست خاصة بعارضة هداك لي خداتو كان نتاج عملها بقسم المايكاب ارتيست
رفيف بتردد:ولكن واش زعمة هانية؟انا بصراحة ماعنديش خبرة غير الصالون و كدا...
عذراء قاطعاتها:و مالي انا؟؟ياك براسي ماكنتش عارفة فين غادية ههه و هاني فين وصلت
رفيف:بصراحة كيف صدقات ليك نتي تيشجعني نقبل هاد العرض
بنان:الى بغيتي تعتامدي على راسك و تبني حياتك تنصحك ماتفلتيش هاد الفرصة
رفيف:واخا غنشوف التجربة كيف غتكون
عذراء:يعني قبلتي؟؟
رفيف:نتوكلو على الله
عذراء بحماس:ناااري غنخدموو تاااني بجووج فبلاصة وحدة
بنان بتاسمات:هكا نبغيك و هكا خص تكون انثى العذراء قوية و مستقلة بذاتها
رفيف حركات ليها راسها ب اه:عندك الحق حتالاش غنبقا تحت مى و با
بنان:هه تماما
عذراء شربات من العصير:تيقيني غتعجبك التجربة بزاف
رفيف:تنتمنى هادشي
فمقر جريدة الأبراج كانت نواهل جالسة فالبيرو ديالها قدام البيسي لي كانت مفيكسية عليه تتشوف فمجلة سويسرية غلافها فيه وحدة من صور عذراء لي تخداو ليها فالجلسة التصويرية مقربين وجهها اكتر و هنا سنحات الفرصة لنواهل تحقق فيها و تدقق فملامحها ابتداءا من عينيها لي فالأخضر مفتوح مرورا لشفاهها لي كانو تيلمعو بالگلوص...
نواهل بنضرة حزينة:شحال زوينة
ضورات خصلة من شعرها فصبعها بتوتر:زوينة عليا...
نواهل غرغرو عينيها:بسيف يتعلق بيها هكا
وقفات عليها صاحبتها الصحفية قمر:فين داك الملف؟(لاحظات اللمعان لي فعينيها)نواهل؟تتبكي؟
نواهل تنهدات براحة خافت يكون صورها شي صحفي مع قوس من غيرها:المهم نسالي خدمتي و ندوي معاك
قمر قربات منها حتى حطات صبعها فقنت عين نواهل: مسحي الماسكارا سالت ليك من هنا شوية و (حطات صبعها فجبهتها) براكة ماتحضي فخطيبة موسيو برناس
نواهل وسعات عينيها بصدمة و قمر مشات مخلياها قلبها تيضرب من علمها بهادشي...
فدار عائلة برناس كانت رسيل مخشية فالمانطة ديالها ناعسة و تحت عينيها باين منفوخ من كترة البكا لي بكاتو فليلة البارح حتى تحل عليها الباب و دخلات دواني تتفيق فيها...
رسيل قفزات مخلوعة:اش ك كااين؟؟؟
دواني مخنزرة فيها:نووضي مييي سلافااا جات باش نشوفوو فين وصل الخيااط فحوايجك
رسيل جرات الغطا بعينيها لي غرغرو:مافياش جيبو ليا لي بغيتو امتى غير يدوز هاد العرس
دواني:بسيف تبغيه امتى غير يدوز و نتي داكشي لي تيوخروه الناس سبقتيه!
رسيل سكتات ماعرفاتش باش تجاوبها...
دواني:نوضي تگعدي مافيا مايعاود الهضرة
خرجات دواني من البيت عاد ناضت رسيل بتثاقل حتى تبعاتها...
فالليسي لي تتقرا فيه ديالا كانت هاد الأخيرة عاد خارجة مع 11 هي و صحاباتها حتى وقف عليها واحد الدري تيقرا معاها...
الدري بابتسامة:ديالا
ديالا تتشوف حولها بتوتر:ش شنو بغيتي ا مصعب
مصعب:ممكن تسلفي ليا دفتر اللغة العربية سيمانة هادي ماجيت و بغيت نقل الدروس لي فاتوني
ديالا:وعلاش جيتي لعندي غير انا كاينين بنات خرين فالقسم ولا لا؟
مصعب بتاسم بخجل فجأة صحاباتها خرجو عينيهوم نيشان مورا مصعب كان جاي موطور و مايكون مولاه غير رامي...
ديالا غير شافتو جاي قاصدهوم قلبها ضرب حتى قالت غيخرج من بلاصتو و قدامها مصعب لي مافاهم والو..وقف رامي الموطور ديالو و مشا ليهوم بلا مقدمات معرف مصعب باش تبلا حتى حس براسو جاتو ضربة فالوجه لاحتو فالأرض..هز رامي راسو ف ديالا لي تكمشات خايفة منو حتى جمعها معاها بتصرفيقة خلاتها تلاح على صاحبتها لي شداتها...
رامي تيغوت:داباااا ا ال*حبةة اناااا جاااي باااش نديييك لداااركووم و وااقفة ليااا مع ال*واااامل
مصعب ناض من الأرض:واش السييبة هادي ب اشمن حق تحط عليا يديييك؟؟؟؟
رامي مشا شدو من لكول:اااش داااك توقففف معاااهاااا
مصعب تيدفع فيه:طلللق منييي اش تتجيهااا بعداا
رامي غوت ليه فوجهو بحال شي مجعور:خطيييييبهااااااا
مصعب خرج عينيه فديالا لي شادة حنكها تتبكي و صاحبتها معنقاها:طللق مني صاافي ربح بخطيبتك
رامي دفعو شوية مايطيح على ضهرو و تم جاي لعند ديالا لي شافتو جاي و هي طلق من صاحبتها و ضرباتها بالجرا رامي شافها تتجري ضربها بجرية حتى هو تابعها حتى شدها من شعرها المطلوق بقوة خلاتها تغوت بالألم و بديك الجرة ردخها مع الحيط حتى حسات بضهرها تقسم...
رامي جا قدامها و شدها من السنسلة لي فعنقها:ياااك قلت لممممك الدرااااري لااااا
ديالا تتبكي بألم:طلللق منيي اهئ اهئ هو لي جا عندي بغا دفتر
رامي تم جاي ليها و هي تضربها بجرية بكامل سرعتها تتحاول تبعد من المدرسة و تدخل فالدروبا باش تتلف ليه اما هو مشا ركب فالموطور ديالو بواحد التعبير على وجهو ديال الى شدها غيضوبلهوم لمها ديمارا من تما مخلي لي يسوا و لي مايسواش مفرج ف فالفيلم لي صنعوه فدقائق اما هي جلسات فعتبة واحد الدار فواحد الدرب تتلتاقط أنفاسها لي تيتقطعو بسبب الجرا بدون توقف...
جبدات بسطامها من صاكها و مشات حاضية جنابها باش تشد طاكسي ترجعها لدارهوم....
فقدام الشركة بلاصات الطونوبيلة الخاصة ب بنان و هبط الشيفور حتى حل ليها هي و رفيف و عذراء..دخلو للداخل و دازو لسانسور حتى وقف بيهوم فالطابق الخاص بلمايكاب ارتيستس...
عذراء تتمنضر فالحيوط:ياااه شحال هادي ماجيت لهنا
بنان بتاسمات تتشوف فرفيف لي تتمنضر حالة فمها فديكورات الطابق لي كانو على اشكال المكياج و الأثاث الفخم:غتبقا تجي ليه ختك دابا
عذراء شافت فرفيف بفرحة و كملو طريقهوم حتى وقفو قدام لبيرو ديال شيارا..دقات بنان و سمعات "تفضل" من موراها دخلو بثلاثة...
طلعات شيارا راسها فيهوم و حركات يديها يتفضلو يجلسو...
شيارا بابتسامة:مدام بنان تيبان ليا مرتاحة مع المايكاب ارتيست ديالك
بنان لاحت شعرها للور:اكيد نتي عارفاني الى مارتاحيتش راه مغتزيد معايا دقيقة
شيارا:اكيد (هزات ستيلو تتلعب بيه) و ممكن الآنسة الثانية تشرفنا بمعرفتها
رفيف طلعات راسها و هي تجاوب عذراء:هادي ختي ا مدام
شيارا:امم كاين شوية د الشبه
بنان:كيفما قلت ليك هاد الصباح ف لابيل البنت عندها كفاءة و تنتمنى تشوفي هادشي حتى نتي
شيارا:ولكن خصها تدوز من الكونكور هو الأول
بنان:اكيد واش العارضة واجدة؟
شيارا ناضت:كلشي واجد تيتسنا غير فيكوم
بنان شافت فالبنات:اذن تفضلو
عذراء ناضت و رفيف طلعات راسها مافاهمة والو...
بنان حركات ليها راسها بإطمئنان:غادي دوزي من كونكور بسيط و هو تقادي لشي عارضة مدام شيارا بحكم كفائتها و خبرتها هي لي غتعرف واش نيت مؤهلة تخدمي فالشركة ولا لا
رفيف:اه واخا
شيارا:تفضلو معايا تسناوها هنا
رفيف:واش مغيدخلوش معايا؟؟
شيارا:لا غير نتي
عذراء جلسات:غير سيري اختي كلشي غيدوز بيخير
رفيف:واخا
دخلات رفيف مع شيارا و بنان جلسات حدا عذراء...
عذراء:انا متأكدة غيقبلوها
بنان:ديجا دويت مع شيارا و قالت انه تيقلبو على شي وحدة لي تسد فراغ بلاصتك فاش وليتي معايا حيت الى عقلتي فاش دوزتي الكونكور هزوك غير نتي و سديم و نيار حيت هاد العدد لي محتاجينو فقط حيت ديجا جايبين عملاء كتار من سويسرا
عذراء:اذن ختي غتقبل؟
بنان:الكفاءة هي لي تدوي ماشي حيت ناقصاهوم عاملة نن راه ديجا قالت ليا غير تلاهات مع شي عروض اما بغات يسيفطو الفرع السويسري شي وحدة
عذراء:تنتمنى انه يدوز على خير
فلداخل كانت رفيف حالة فمها فليمارك ديال المكياج غير الغالي و شي وحدين تتشوفهوم غير عند المشاهير ف انسطا...
شيارا:بغيتك تديري ليها كات كريس مايكاب
رفيف:شحال د الوقت؟
شيارا:غنعطيك ساعة ماتفوتيهاش هادشي الى كانت يدك ثقيلة فوق القياس اما الى عندك ماتقولي غتكمليه فقل
رفيف:اوكي
خرجات شيارا و خلات رفيف بوحدها تتجبد فالمايكاب و بدات فوجه العارضة لي كانت جالسة بحال شي مونيكة...
شيارا:علاه نهار الاول هاد المدة لي دوزتي؟ عطيتها ساعة
بنان:صافي مزيان حنا غنمشيو نحطو صيكاننا فغرفتي و نرجعو من بعد
شيارا:اوكي
دازت 40 دقيقة عاد سالات رفيف المايكاب للعارضة..رجعات خطوة للوراء تتشوف فتحفتها الفنية المرسومة على وجه العارضة و واش كلشي مقاد فبلاصتو حتى دخلات عليها شيارا...
شيارا:فين وصلتي؟
رفيف:لقيتيني عاد ساليت
شيارا قربات و عينيها تيحنززو فالعارضة:اممم فقل من ساعة هادي اول ملاحظة اجابية عليك
بنان واقفة موراهوم مبتسمة بثقة:كنت عارفة هادشي مرحبا بيك بيناتنا
رفيف:شكرا مداام
تسمع الباب تحل و هي تخرج شيارا:مادموزيل بقا ليك غير تقادي امورك مع منادجر مستر قوس
عذراء:ااااه الضرافااات تعامل معايا مزيان اول مرة
شيارا:المهم مرحبا بيك معانا غدا اجي مع 8:30 باش تعرفي خدمتك كيف غتكون(انصارفات)
رفيف:فين غنلقا انا دابا هاد المنادجر؟
بنان:اجي تبعيني
مشاو حتى طلعو فالسانسور لي وقفهوم فالطابق الخاص بليمانادجر...وقفات بنان على السكريتيرة داوية بالألمانية و حداها عذراء و رفيف مافاهمين والو حتى قالت لرفيف زيدي و نعتات ليها الباب...
رفيف زييرات على صاكها و مشات لفين نعتو ليها حتى وقفات قدام الباب لي كان مكتوب فيه "Manager Fabio Schmid" دقات رفيف و من موراها سمعات "تفضل" بالإنجليزية..حلات الباب و دخلات بارتباك حتى تيبان ليها راجل حاني راسو على شي وراق فاش حس بوجودها طلع راسو و هنا انداهشات...
فابيو:?Hello miss
رفيف بتوتر:ا اا نتاا لي كنتي حدايا فالحفل؟
فابيو باستغراب:مافهمتش اش قلتي؟
رفيف:اف ناري نسيت هاد المرض گاوري احمم(تتستجمع رصيديها الإنجليزي) انا جيت من طرف مدام شيارا
فابيو ضغط على كلافيي البيسي ديالو لقا شيارا مسيفطة ليه المعلومات كاملين:جلسي ا ميس
رفيف جلسات تطل على البيسي ديالو اما هو خدام تيطاپي فيه حتى سالا و طلع راسو فيها:عطيني الكونط بونكيغ ديالك
رفيف جبدات التيلي ديالها و مداتو ليه كتبو و قبل مايرد ليها التيلي لاحظ انه كان باللغة الفرنسية...
فابيو بالفرنسية:تنظن من الأفضل نقلبوها فرنسية
رفيف بتاسمات و طلقات الفرونسي لي عندها بحكم انها قراتها مزيان على قبل الوراق و فرنسا:ماكنتش عارفاك تتعرف للفرونسي كون عرفت من الاول كون هي باش دويت و هنيت راسي
فابيو:تتشبهي شوية ل ميس ادرا هه على كل الأمور تقادات بقات غير لكارت غتوجد غدا
رفيف:اوكي شكرا موسيو
فابيو:يمكن ليك تفضلي
رفيف ناضت حركات ليه راسها بابتسامة و خرجات لعند البنات اما هو حنا راسو على وراقو تيكمل فخدمتو بابتسامة على فمو....
عذراء مشات لعندها:صافي كلشي هو هاداك؟
رفيف بابتسامة:وي صافي
بنان:مع المدة غتحفظي أماكن عملك كيفما بدات ختك عذراء و تنتمنا مستقبلا شي عارضة من العارضات تشوف خدمتك و تديرك بجنبها
رفيف:شكرا على الدعم ديالك مدام
بنان:عادي ا الزين دابا تابعاني خدمتي الى بغيتي يمكن ليك تمشي معانا لقسم التصوير حتى نساليو الخدمة
رفيف:لا شكرا خصني نمشي لدار خليت الواليدة بوحدها و مقلت ليها والو على الخدمة
عذراء:صافي غير سيري يالاه تعلميها بينما رجعت انا
رفيف:واخا يالاه بسلامة
مشات عذراء مع بنان اما رفيف حلات السانسور و هبطها للتحت..شدات طاكسي و رجعات لدارهوم....
فواحد الشارع بعيد شوية على فين ساكنين عائلة عذراء كانت واحد الدار فواحد الدرب ب 3 ديال الطبقات و فغرفة من غرف هاد الدار كانت مرام طالقة شعرها الطويل و جالسة لابسة بيجامة طويلة فالشيبي و فيديها هازة التيلي ديالها حتى تتجيها مكالمة هاتفية شافت فالمتصل و عوجات فعينيها و بتنهيدة جاوباتو...
مرام بابتسامة:الوو
ضرغام ترسمات ابتسامة خفيفة على فمو فاش سمع صوتها لي ماسمعوش من شحال هادي:لباس عليك؟
مرام:لباس الحمد الله و نتا؟
ضرغام: بيخير سقت الخبار انه ختي رفيف صافي غتسد الصالون
ضرغام:مرام واش خاصاك شي حاجة؟ لفلوس لي عطيتك واش مكافيينش؟
مرام:لا لا شكرا غير القنطة فالدار و صافي
ضرغام:صبري حتى ان شاء الله فاش نتزوجو و ديك الساعة نساريك فينما بغيتي
مرام بتاسمات باستهزاء و هي تتشوف فالحيط:ربي خليك
ضرغام:المهم بغيت غير نسول فيك غنقطع دابا حيت غنرجع للخدمة
مرام:واخا بسلامة
قطعات عليه و لاحت التيليفون بالنفخة..تسمع الباب تحل و دخلات منو امرأة كبيرة فالعمر غليضة...
جنى:جمعي عليا ديك الشعكاكة و زيدي تعجني
مرام جبدات الباندة ديالها دغيا و بدات تتلوي فشعرها و تقاد فيه حتى ولا على شكل سفنجة...
جنى:زيدي راه سيفط خوك الصغير يجيب الخميرة من الحانوت
مرام ناضت معاها حتى هبطو و جبدات الگصعة تتعجن...
جنى:فاش تسالي نصبي الغدا و ديري بحساب حق مرت خوك راها تتوحم
مرام حادرة راسها تتعجن و مع كل عجنة تتزيد تضغط بحال شي لكمة كأنها تتفرغ اعصابها فديك العجينة..اما مها دخلات لواحد البيت تتفرج لايحة عليها الشقا كاملو....
فسويسرا كانت روبين جالسة فغرفتها شادة واحد المجلة بعلامات الصدمة و يديها كاملين تيترعدوو..كانت تتشوف فصور عذراء لي لتاقطوهوم فريق التصوير قبل الحفل شحال تتبان فيهوم كيوت و زوينة..قلبات الصفحات حتى رجعات للغلاف و بعصبية بدات تتشرگ فالمجلة و تقطع فيها...
روبين بالغواات:نهاااااييتتتتك غتكووووون على يديييييي مابقااا قدماااا فاااات غيييير صبريييييي!!!!!....
بعدما سالات عذراء خدمتها لليوم شافت فالساعة لي كانت تتشير ل 6 ديال العشية...
عذراء: داز نهار زوين ههه
بنان: وي اكيد مهم ماعندناش خدمة فالصباح ولكن الى بغيتي يمكن ليك تجي مع رفيف
عذراء:ضرووري بغيت نشوف خدمتها هنا ههه
بنان:عنداك غير لاتخرجو عقل شيارا
عذراء:لا هاديك مامعاها لعب ههه
بنان:يالاه ا بب نخليك
عذراء سلمات معاها:اوكيي
طلعات بنان فطونوبيلتها الخاصة اما عذراء شدات طاكسي و رجعات لدارهوم...
فدار برناس كان واحد الصمت رهيب فطبلة كاسكروط كلشي تياكل فصمت و حتى واحد متيدوي مع لاخور..حتى ناضو و بداو ينساحبو واحد تابع لاخور مخليين رسيل و ديالا تيجمعو فالماعن حتى سالاو و طلعات كل وحدة سدات عليها فبيتها...
فبيت ديالا...
جلسات ديالا فلبيرو ديالها و جبدات دفاترها تتراجع حتى بدا تيڨيبي تيليفونها وسط الوراق..جبداتو لقات المتصل رامي و هي تطفيه ميمكنش ليها تجاوبو حيت ببساطة طلع ليها فراسها زائد انها عندها امتحان البكالوريا لي خصها تشدو بنقطة مزيانة باش تحقق حلمها فدراسة الإعلام باش تولي مقدمة برامج...
ديالا زييرات على يديها:مايمكنش نخليه باقي يضرب فيا براكة يكفي لي كليتو من صغري عندو عمر بابا و خويا ماحطو عليا يديهوم و هو جا جمعهوم بجوج انا..انااا(بداو تيتطيحو دموعها على الدفتر) ااناا..(مسحات نيفها لي سال)غنحقق الحلم ديالي!...
فالجهة الأخرى كانت رسيل مكمشة فوق ناموسييتها تتقيص فكرشها و عقلها مهزوز صافي صورتها خسرات قدام مها و مايمكنش تصلحها ابدا ماعندها دابا غير تسايسها حتى تزوج...
رسيل: ديك الساعة فاش غنولد اكيد غتقبلو هي غير تتقول ليا هكاك باش تعذبني ماما مايمكنش تنكر حفيدها(تدوز على كرشها) ياك ا ولدي؟
ضورات يديها على كرشها بحنان و عينيها غرغرو:نتا ماشي ولد الحرام جداك غير كانت معصبة..فاش غتخرج لهاد الدنيا غتكون اول حفيد ليها(شهقات) مايمكنش تنكرك
فوسط داك الجو تحل الباب ديال غرفتها هادشي لي خلاها تقفز...
دواني دخلات و سدات عليهوم...
رسيل:م ماما؟؟
دواني:دويت اليوم مع مي سلافا
رسيل: ا اهاه؟؟
دواني هزات فيها راسها بتخنزيرة و بدون مقدمات:عرسك نتي و داك السلگوط غيكون بعد 3 ايام
رسيل بصدمة:ك كيفااااش؟؟؟؟؟
دواني:كيفما سمعتي ايوا دابا نعسي على جنب الراحة كلشي فسبيل تستري فضيحتك تفو ولا تربييتي ليك
خرجات و خبطات الباب بقوة...
رسيل باقة ممصدقاش لي سمعاتو واش تفرح حيت غتولي مع حبيبها و اخيرا فدار وحدة؟ ولا تحزن حيت غتفارق مها بهاد الطريقة؟...
رسيل: تنتمنى هادشي يدوز دغيا ديك الساعة (بتاسمات) غنكونو أسرة وحدة...
وصل الليل...
و بعدما كلشي تعشا و تخشا ففراشو جبدات عذراء التيلي ديالها و هي تلقا ميساج ديال قوس...
قوس: "تنتمنى يكون داز نهارك مزيان My Little One"
عذراء ذابت فبلاصتها بقات شحال غير تتبتاسم لتيليفون و قلبها تيضرب بالفرحة...
طلعات فيها رفيف راسها:الله يستر قال ليك تنبغيك ياك هه..تفاهة!
عذراء خرجات فيها عينيها لي تيبرقو بالعدسات:واش منعستيش؟؟
رفيف: و علاه خليتينا نعسو بهاد الضو نوضي طفيه
عذراء:علاش ماطفيتيهش اصلا
رفيف:نسييت ااه و حييدي دوك العدساات لاتنسايهوم تاني فعينيك بحال العام لي فات
عذراء جبدات بواطة صغيرة من المجر و خشات صبعها فعينيها حتى جبدات عدسة شفافة و حطاتها فيها نفس الشيء مع العين الثانية و هنا بدات تتبان ليها الرؤية مضببة شوية...
رفيف تنهدات:صبري نوض نطفيه غادي غير تعكلي تاني
عذراء تكمشات تتسد فعينيها و تحلهوم:راني ماشي عورة! غير الشوف ديالي لي ناقص
رفيف ناضت حتى طفات الضو و رجعات تكات:قلت ليك بقاي دايرة نضاضرك ولكن بغيتي العدسات ايوا شدي
عذراء:دابا مالكي اربي اش جاك على عدساتي؟
رفيف:والو غير واقيلة ليغيگل قربات تجيني و بديت تنتبرهش تاني
عذراء تجاهلات كلامها و رجعات قرات ميساج قوس للمرة الثانية مخلي سحر عليها كأن غيمة وردية تحوم حولها...
عذراء جاوباتو: "داز زوين بزاف ختي غتولي تخدم حتى هي فالشركة ههه"
فالفيلا ديال قوس كان هاد الأخير جالس فالبيرو ديالو تيتفقد شي حسابات حتى وصلو ميساج فتيليفونو..هزو و بتاسم فاش شاف ميساج حبيبتو...
عذراء كانت تتسنا فيه يجاوب حتى طلع ليها اونلاين غير شافتو خفق قلبها بفرحة و بقات تتسنا فالرد ديالو...
قوس: "مزيان غدا ماخدامش فالفترة الصباحية و بغيت نحلي صباحي بشي حاجة من غير العمل"
عذراء: "شنو هي؟"
قوس: "نتي"
عذراء حشمات فبلاصتها و غيير مع راسها ماعرفات باش تجاوبو و هي تسيفط ليه إيموجي حشمان "🙈"...
قوس بتاسم من ردة فعلها: "مع 8:00 نتلاقاو اوكي؟"
عذراء: "فين؟"
قوس: "فقدام الشركة"
عذراء: "اوكي"
قوس: "Sweet Dreams My Beauty"
عذراء: "Good Night❤️"
حققات عذراء لالارم ديال تيليفونها و تقلبات حتى نعسات على جنبها بواحد الإبتسامة..سدات عينيها مستسلمة لدقات قلبها لي تيبيينو مدى تفاعلها الكبير مع كلمات و غزل قوس و براحة تنهدات...
عذراء:(انا حاسة انه قوس هو الرجل المناسب ليا...)
فالبيت ديال واليدين عذراء...
لوليا:احم جلوان
جلوان:اممم شنو؟
لوليا:رفيف لقات ليها عذراء خدمة فنفس الشركة نيت
جلوان:كيفاش؟
لوليا:ايه راك شفتي عذراء كيف خدامة معاهوم و انا جاتني احسن باش يبقاو يمشيو بجوج
عذراء وقوس الجزء 12
محتوى القصة
التنقل بين الأجزاء