من بعدما وزعات عذراء طبقة البرايمر فوجه العارضة مشات مقابلة مع التستيفة ديال لفاوندايشنز حتى هزات لي غيجي مع بشرتها و هزات بيوتي بلاندر و بدات توزع طبقة الفاوندايشن فوجه العارضة حتى سالات دازت لكنسيلير..لكونتورين..لوس باودر..لحجبان..حتى سالاتهوم عاد جبدات واحد اللصاق لصقاتو ليها فجنب عينيها و بدات تتقاد فالأيشادو ليكان سموكي خدا ليها شوية د الوقت فلبليندين كانت هازة فرشاتها مركزة بحال شي فنانة تترسم فلوحتها الفنية كان عملها هادئ و سلسل ولكن حاولات تدمج دغيا بسبب الوقت القليل حتى سالات حييدات اللصاق و دارت ايلاينر عريض و قادات ليها قنت العين(عين القطة)دارت ليها الرموش الاصطناعية دازت دغيا لهايلايتر.. لبلاشر و العكر لي كان احمر غااامق بقات تقاد و تصوب حتى سالات و رشات ليها وجهها بالمايكاب فيكسر...و بسرعة اسهل تسريحة فكرات فيها فهاد اللحظة جمعات ليها شعرها دغيا و طلعاتو لفوق قادات ليها الشفنجة و جمعاتها بفيليلات كحلين صغار كانو تما و من القدام خرجات ليها جوج خصلات و جبداتهوم بشوية حتى بقاو باينين و هي ترجع اللور تتشوف فاللوحة الفنية ديالها لي رسمات(وجه العارضة)حتى تمات داخلة شيارا تتصفق بحال الشاف موحى:بقات ليكوم 5 دقايق
عذراء مشات تأكدات ياك منسات شي حاجة و تأكدات اما لخرين شي سالا شي باقي مقاتل مع شعر العارضة حتى سالا الوقت و حبسو...
شيارا:صافي سالا الوقت جمعو يديكوم
مشات شيارا تدوز على العارضات و كل واحد تتشوف فشنو دار بالتفاصيل و لي كملات منو تتمشي عند لاخور و تتعطي فملاحظاتها حتى وصلات عند الكوافورة لي كانت مبتسمة بتوتر تتحك فيديها بحالا تتسخن فيهوم و العارضة جالسة بحال شي مسطرة ضهرها مقاد حتى قربات شيارا تتفحص التفاصيل و الدقة ديال العمل عجبها المايكاب حيت بالفعل جررررريء و بيين ملامح العارضة واااضحين و حتى التيكنيك زوينة و التسريحة طلعات مواتية...
شيارا:خدمتك زوينة و حتى العارضة باينة عجبها الحال
عذراء طلات على العارضة لي دايرة بحال شي صنم متيتحركش لا لا نيت عاجبها الحال معرفات فين شافتها...
شيارا:تيبان ليا عندك موهبة و خبرة بسيطة فهاد المجال و خاصك بعد الحوايج بساط تدققي فيهوم مستقبلا
عذراء:غنحاول نعطي كتر ما عندي
شيارا:مزيان
بعدات منها و مشات وقفات مقابلة معاهوم جميع...
شيارا:كلكوم بدعتو و حاولتو تعطيو معندكوم و كتر فهاد التيست ولكن للأسف الشركة بغات 3 فقط من هاد المجال و انا غادي نختار...
شييرات على واحد البنت بصبعها:نتي...و نتا(شييرات على واحد المبنت)
تحرك صبعها من المبنت حتى ستقر نيشان جيهة عذراء:و نتي....
برج العذراء: هاد البرج لي هو برج بطلتنا و كيفما قلت ليكوم انه عائلتها كاملها هي عائلة برج العذراء.. ولكن كي درت ليها؟ تنتمنى تقراو كلامي مزيان باش تفهمو...
كيفما كلكوم عارفين كل برج و العادات و التقاليد ديالو و كل برج و الأيام لي تتحددو...بالنسبة لبرج العذراء هو الوحيد من بين جميع الأبراج كاملين لي تيتزاوج من نفس البرج ديالو اكرر و اعيد من نفس البرج ديالو ماشي من نفس العائلة ديالو غادي تقولو ليا و علاش عائلة عذراء كلهوم مزوجين بيناتهوم؟ الجواب هو انه عائلتها معارفين حتاشي عائلة ديال برج العذراء خرى لي يتزوجو منها داكشي علاش لجئو للعادة الثانية و لي هي زواج الأقارب...و بخصوص كيفاش العائلة كلها مزيودة فنفس ايام برج العذراء الجواب هو انه تيتابعو خطة فوقت الإباضة لي تتخلي الجنين يتولد بين 23 شهر 8 و 23 شهر 9 ماشي مهم اينا نهار ولا اينا شهر فيهوم المهم يكون بيناتهوم و هاد الطريقة مطبقة على الأبراج كاملين حتى لي تيتزاوجو من ابراج محددة خرى تيختارو اينا برج منهوم لي غيولدو متلا كيفما شفنا مع رواء انه برج الأسد تيتزاوج مع برج الثور يعني متلا الى تزوجات رواء لي هي الأسد ب الشخص لي هو الثور وقت الإباضة و الجماع غادي يختارو اينا برج فيهوم لي غيهزو الجنين و يتزاد فيه واش الأسد ولا الثور...
و أخيرا لحد الآن عرفنا غير تزاوج برج العذراء و التزاوج بين برج الثور و برج الأسد و مستقبلا غنشوفو عادات و تزواج ابراج خرى و الى مفهمتوش اي حاجة على القصة كيف ديما خليو ليا تعليقكوم راه تنجاوب كلشي و دابا نرجعو للقصة💜
عذراء حلات فيها فمها حاطة يد على صدرها:ك كيفاش؟؟اناا؟
شيارا:اه نتيا تنتمنى من لخرين لي محالفهومش الحظ انه يتفضلو
الاخرين خرجو واحد ينطح لاخور كان ليجاي غير يتفلا و كاينة لي بقا فيها الحال حيت مشافتش التيتيز مول الشركة حتى بقاو غير الثلاثة لي منهوم الكوافورة...
شيارا:تبعوني
بقات غادة و هوما تابعينها حتى خرجات من تما حتى دخلات من واحد الباب لي اتاضح انه بيرو...مشات جلسات فيه و حركات ليهوم يديها زعمة تفضلو...جلسو تما فوق الفوتوي...
شيارا:قبل منبدا ابتداءا من اليوم نتوما عمال فهاد الشركة من الآن فصاعدا نتوما خدامين معانا يعني خصكوم تعلمو لشي حوايج و حوايج خرين غادي تعرفوهوم مع مرور الوقت و اول حاجة تعرفوها انه انا هي المكلفة بقسم المايكاب كاملو يعني انا المسؤولة عليكوم و على خدمتكوم و اي حاجة وقعات ولا غتوقع توصلني انا ولا السكريتيرة ديالي فغيابي مفهوم؟
الكل:مفهوم
شيارا:مزيان بالنسبة لخدمتكوم غتكون تديرو لمايكاب ل العارضات فالأول انا لي غادي نعزل معامن نحطكوم من بعد فتوسعكوم فخدمتكوم غادي يتعرفو عليكوم العارضات و يمكن انه تجي عندي شي وحدة تبغي واحد فيكوم يكون المايكاب ارتيست ديالها و لي يرافقها ديما هادشي بالطبع تيكون مع لي طوب مودلز ديال الشركة و هادشي تيزيدكوم امتيازات عندنا حيت متتبقاوش مجرد مايكاب ارتيستس عاديين و انما مترسمين مع عارضة مشهورة اما حاليا غادي تخدمو مع العارضات العاديات لي غيكونو من اختياري انا
عذراء:بغيت نسولك
شيارا:سولي
عذراء:و شنو بالنسبة لأوقات العمل؟
شيارا:شركتنا معندهاش وقت عمل محدد من غير البداية اما النهاية ممحددينش بحيث انه هاد الضومين ضومين لي هو تقريبا عشوائي و ديما خارجين حاجات و مفاجئات من الجنب الشركة تتحل مع 7 د الصباح و اوقات العمل تيبداو مع 8:30
عذراء:يعني و الى بغينا نرجعو ل الدار؟؟
شيارا:مكاين لاش حتى تسالي شغلك قاعة الأكل موجودة و كاينة حتى الكافيتيريا
عذراء تتندب فداخلها اويلي واش هادي معارفاش بلي عندها واحد الثلاثة ديال الوزراء فالدار الى فتي 8 ديال العشية برا يديروك فمختفون....
عذراء:يعني خصني نكون هنا من 8:30 حتال الوقت لي نسالي فيه خدمتي و هاد الوقت لي معارفاهش اصلا امتى يسالي؟
شيارا:تماما
عذراء رجعات تتندب تاني فداخلها:(اويلي اوحدي انااري شغندير شغنقوول لمالين الدار ميمكنش يقبلو ليا هاد الخدمة و اصلا الوليد مشرط عليا الوقت ميفوتش 8 و هادي دايراه ليا انفينيتي)
شيارا جبدات 3 ديال الوراق و مداتهوم ليهوم:هادو هوما عقود العمل قراو مزيان و وقعو(حطات ليهوم ستيلوات)راني ديجا موقعة و موقع صاحب الشركة و المنادجر ديالو
عذراء قرات العقد مزيان لي كانو فيه قوانين الشركة من احترام الزملاء و الوقت و عدم التأخر و بزاف د الحوايج قرات مزيان و هي توقع تتبلع ريقها عارفة راسها انها غتزبلها مع عائلتها ولكن معندها غير تصبر هادي فرصة ذهبية لا تعوض انه تخدم مع شركة كبيرة لي شافت منها بصيص موهبة و لي مع الوقت غادي تكبار ليها معاهوم و الى تعرفات عليها شي عارضة مشهورة كاع صافي غادي تطلع للقمة...كملات التوقيع و مداتو لشيارا لي شداتو منها بابتسامة...وقعو الجوج لخرين حتاهوما و شداتها عندهوم و جمعات داكشي فملف...
شيارا:غدا غادي يكونو واجدين ليكارط ديال العمل ديالكوم لي غادي تكون عندكوم و تبقاو معلقينها فعنقكوم بحال ديالي(وراتها ليهوم)باش اي عامل فالشركة يتعرف عليكوم و يعرفكوم من اينا قسم جايين و تحت اشراف شكون حيت الشركة كبيرة بزاف و غير القسم الخاص بينا غتلفو فيه ولكن مع المدة غادي تحفظو الأماكن
عذراء معرفات واش تقول ليها معنديش ولا تسكت لتشوه راسها...
شيارا:هادشي غادي يتم مع المنادجر ديال مستر قوس ا انسة ماشي معايا
البنت:اه اوكي
عذراء:(شكون هاد مستر قوس تاني؟؟)
شيارا:اليوم غادي غير ندير ليكوم جولة فقسم المايكاب و فمكان العمل ديالكوم ولكن غدا غيبدا العمل
البنت:واخاا
شيارا:الى سمحتو تفضلو على برا ندوز مكالمة و نجي باش نبداو
ناضو خلاوها و خرجو على برا اما هي هزات الفيكس و ضورات النمرة...
شيارا بالألمانية:الو مستر فابيو
فابيو بالألمانية:وي؟
شيارا:غادي نسيفط ليك دابا البيانات ديال الثلاثة لي تقبلو عندي ليوم فالبيسي باش غدا يوجدو ليكارط ديال العمل ديالهوم و حتى باش يكمل التسجيل ديالهوم كامل عندنا من ناحية الراتب و الخلاص
فابيو:واخا
قطع عليها اما هي حلات البيسي تسيفط ليه داكشي...على برا كانو جالسين دوك الثلاثة فوق فوتوي تما كبير و الكوافورة مبعدة عليهوم شوية تتشوف فالحيوطا و الطابلوات المعلقين و تتقول فدماغها لعالم الله بشحال تشراو مإڨيتية الوجود ديال دوك الجوج واخا تشوفوها هبيلة و لسانها سابقها الا انه انثى برج العذراء تتبقى انثى حدودية فالأول من ناحية الصداقات و متتيقش فالواحد دغيا...
البنت لي تقبلات معاها كانت جالسة فهدوء جابدة تيليفونها حتى كتبات فيه ميساج و سيفطاتو..رجعاتو لصاكها و سداتو تتسنا فشيارا تخرج اما المبنت شاد وجهوو يشوف هنا و لهيه...البنت كانت جالسة حداه و مزعماتش دوي معاه و هي تكحاز حتى قربات من عذراء لي كانت ساهية فواحد اللوحة مدابزة تعرف فين الراس و فين الرجلين ديال الرجل لي مرسوم فيها حتى حسات بشي حاجة تحطات حداها طلعات راسها لقاتها البنت لي كانت معاهوم حادرة راسها و مرة مرة تشوف قدامها و باينة عليها انها انسانة خجولة متسوقاتش عذراء لداك القرب قالت ممكن مرتاحتش و معاهوم داك المبنت و فضلات تقرب من بنت بحالها...
البنت:احمم...
عذراء طلعات راسها:دويتي معايا؟
البنت شافت فيها و مدات يديها:ا انا سديم
عذراء صافحاتها:و انا عذراء
سديم: تيبان ليا راك من عائلة برج العذراء ياكي؟غير من التسمية هه
عذراء:اه هه
سديم:و انا من عائلة برج الحوت
عذراء:سمعت من قبل انه أبراجنا بجوج موافقين هه
سديم:ااه حتى انا سمعت هادشي من جدة
عذراء:هه مزيان تشرفت بمعرفتك نتي اول وحدة نتعرف عليها من برج الحوت
رمز برج الحوت هو هدا "♊" و المواليد ديالو من 19فبراير الى 20مارس...
سديم:حتى انا نتي اول وحدة من برج العذراء شرف ليا
عذراء بتاسمات فوجهها و رجعات تتشوف قدامها اما سديم حدرات عينيها تتلعب بصباعها حتى خرجات شيارا...
شيارا:تفضلو معايا...
ناضو مشاو تبعوها و هي غادة و تدوي بيديها لي تيتحركو دخلاتهوم و ضوراتهوم فالقسم ديال المايكاب كاملو و وراتهوم كل حاجة ديالاش و حاجات خرين خلاتهوم لمستقبل حتى يتعرفو عليهوم حتى كملات و رجعاتهوم لنقطة البداية...
شيارا:تنتمنى تكونو فهمتو مزيان و عقلتو على اغلب الحوايج
عذراء:غدا نبداو ديريكت الخدمة؟
شيارا:اه راه ديجا قلتها
عذراء:اه واخا
شيارا شافت ساعة يديها:المهم 12 هادي و وقت الغداء وصل غنمشي نهبط نتغدا غدا نشوفكوم يمكن ليكوم تمشيو دابا
عذراء فرحات حيت عياات من الضوران حتى سخفات مع شيارا فاش كانت تتوريهوم...مشات شيارا خلاتهوم اما هوما بقاو تما...
سديم:نشوفك غدا ان شاء الله عذراء
عذراء دارت ليها باي باي مبتسمة:طهلاي
هبطات سديم مع الدروج و تبعها المبنت اما عذراء مشات تتقلب على سانسور بان ليها واحد كليكات على لبوطونة ديالو و بقات شحال تتسنا والو يمكن واحل ليهوم فالفوق طلات على السانسور الثاني لي حداه كان معزول ضغطات على البوطونة و هو يتحل ليها فرحات دخلات و تقابلات مع الأزرار بان ليها الزر لي فيه الطبقة التحتانية ضغطات عليه يالاه تسد السانسور و هي تحس بيه بدا تيطلع ماشي تينزل و استغربات..قوس كان فالفوق خاشي يدو فجيوبو تيتسنا فالسانسور ديالو الخاص يطلع باش يهبط يتغدا فشي ريسطو حتى طلع و غير تحل بابو متجي عينو غير فالكوافورة لي كانت فيه....
قوس عقد حجبانو و تمشا لعندها مزيير على يديه اما هي شادة صاكها مفهماتش اش وقع حتى طالعة لعندو...
قوس:شنو تديري نتي هنا؟؟
عذراء تتبان قدامو بحال بنتو:ك كيفاش شتندير؟
قوس:هاد السانسور خاص ا لالة شتديري فيه نتي؟؟
عذراء مطلعة راسها فيه حيت طويل:ضغطت على واحد و مبغاش يخدم و انا نجرب هدا و تحل ليا(تتحنزز فيه)بلاتي بلاتي نتا لي شفتك هاد الصباح
قوس عاد تفكرها و بلعكس عاد مزادت عصباتو:واش لي بديتيه الصباح ناوية تكمليه دابا؟!!
قوس شدها من ذراعها و خرجها ولاهيلا متغوتش عليا..جرها حتى خرجات و وقفها قدام السانسور ديال عمال الشركة ضغط على الزر و تحل و لاحها فيه بدفعة خفيفة...
قوس:مرة خرى قبل مدخلي لشي شركة بحال هادي سولي شنو لي مسموح بيه ولا لا و متبقايش ضوري ليا هنايا بحال شي دبانة
عذراء مرضاتش:متبقاش تقيصني دوي غير بفمك ماشي بيديك
قوس ضغط على السانسور حتى هبطها ليصدق مطلعها معاها هي لي بقات ليها فلحساب اما هي عنقات صاكها عندها تتنفخ و تسوط مرضاتش على هاد الموقف مالها شنو دارت بغات غير تخرج لدارهوم و تلاقات تاني مع هاد المزمر لي تيتهز عليها بحالا الشركة ديالو(احم راها ديالو نيت🙄)وقف السانسور و هبطات تتقرقب بصباطها تما حتى خرجات لقدام الشركة تشد شي طاكسي تهزها لدارهوم اما قوس هبط فالسانسور ديالو جبد تيليفونو يعلم السائق يوجد السيارة و هو يبدا يشم عطر نسائي فيد السترة ديالو..عقد حجبانو و تفكر الشدة لي كان شادها فدراعها صبحات عليه مع الصباح و ختماتها دابا فالسانسور و هاهوا العطر ديالها لي لصق بغا يكمل الباقي...السائق جاوب على المكالمة و علمو يوجد السيارة و قطع و فلداخل ديالو تيتمنى انه عمرو يتلاقا ب بحال هاد الماركة فحياتو...
على برا كانت عذراء واقفة و شعرها تيديه الريح تتسنا فشي طاكسي ولكن مبانت حتى وحدة غالبا غيكونو الأغلبية مشاو يتغداو حتى هوما جبدات تيليفونها و اول واحد فكرات تزف ليه هاد الأخبار المفرحة و شكون من غيرو الشخص لي كان ليه الفضل..برناس...
كان برناس جالس فلبيرو تيتفحص شي ملفات مع واحد الصحفي حتى سمع صوت تيليفونو هزو شاف نمرة عذراء و هو يشيير ل الصحفي بيديه لي فهمو و خرج ساد الباب موراه...
برناس تقاد فالجلسة مبتسم:سلام عذراء
عذراء مبتسمة:برناس لباس عليك؟
برناس غير تيسمع صوتها هكا قريب من ودنو تيقشعر:اه بيخير و نتي؟
عذراء:لباس انا قدام الشركة دابا تنتسنا فالطاكسي بغيت غير نقول ليك بلي تقبلت فالشركة ههه
برناس شاف فالساعة:عندي وقيتة خاوية دابا فاش نتغدا اش بان ليك نجيبك و نمشيو نتغداو فشي بلاصة؟؟
عذراء:ولكن مالين الدار مفراسهوم والو
برناس:علميهوم
عذراء:خفت لوليد يتعصب راك عارف حنا راه غير مخطوبين
برناس:انا مبغيتش ليك المشاكل و فنفس الوقت بغيت نخرجو بجوج ولو غير مرة وحدة بحال كاع المخطوبين
عذراء تضور فعينيها بانت ليها واحد الحديدة اخر ماكاين غادة دايزة من حداها بقات متبعاها بعينيها تتمنضر اي حاجة زوينة تتلفت انتباه هاد البنت و فلداخل ديال هاد السيارة كان قوس تيشوف فالزاج و السائق سايق بيه حتى تتبان ليه الكوافورة تتحنزز فالطونوبيل سد عينيه بتعب و حلهوم و فراسو تيقول واش هادي مزال مغتغبر قدامو فينما يضور يلقاها اختفت بين انضارو من بعد ما زاد السائق من تما اما هو رجع تيتمضر من الزاج...
برناس:الو عذراء؟
عذراء:ا ااه انا معاك عرفتي شنو خليها مرة خرى واخا؟
برناس:اوكي
قطع عليها معاجبوش الحال اما هي بقات تما تيديها الريح حتى جات طاكسي و رجعاتها لدارهوم...
فالدار ديال عذراء كانت قريبة الوحدة و هاد الوقيتة هي فاش تتغدا فيها مع ختها و واليديها اما خوتها تيتغداو فالخدمة...
رفيف دخلات لدار بعدما سدات الصالون:الوليدة
خرجات لوليا حتى تسالمو و جلسات حاطة صاكها حداها...
رفيف:مزال مرجعات عذراء؟
لوليا:لا مزال حتى ماصونات ماوالو
رفيف:حتى انا مصوناتش عليا
تسمع الدقان و هي تمشي تحل لوليا لقات عذراء واقفة قدام الباب...
عذراء دخلات معنقة لوليا:قبلووني ا ماما قبلونني
رفيف سمعات الصداع عرفاتها هي:وايلى متقوليهاش؟؟
عذراء:و علاه حگرتيني ولا شنوو
لوليا فرحانة:الحمد الله الحمد الله
عذراء جلسات:فيا الجوووع ناري من 8:30هادي
لوليا:سيرو بدلو بينما جا باكوم و ناكلو مجموعين
عذراء طلعات و تبعاتها رفيف حتى سدو بيتهوم...
رفيف:كيف داز داكشي؟
عذراء:وا زويييين اختي زوييين ناري و الشركة قداش واخا تلعبي فيها ماطش وا ميطشاااان كبيييييرة
رفيف:ايوا مبروك عليك تتسالينا الزردة
عذراء:ان شاء الله اول خلصة ليا نخرجكوم فيها نتي و رواء
رفيف:هه ان شاء الله
بدلات عذراء حوايجها ب بيجامة ديال الدار و هبطات هي و رفيف...دخل جلوان و هو يلقاها جالسة...ناضو بجوج حتى سلمو عليه...
جلوان:ايوا امضرا كيف داز داكشي؟؟
عذراء:عجباتهوم خدمتي ا لوليد قالو ليا من غدا تخدمي
جلوان:مزيان ا بنتي مزيان و مقالوش ليك معاياش غتخدمي و معاياش تسالي؟؟
عذراء بقات ضور فعينيها و بدات تبلع فريقها السؤال لي تمنات متسمعو هاهوا محطوط قدامها ميمكنش تقول ليه بلي الخدمة وقت انتهائها غير محدد حيت متأكدة مليووون فالمية مغيخليهاااااش....
عذراء:ق ق قالو ليا تنبداو مع 8:30 و تنساليو مع...تيساليو مع 8 و الغدا و الماكلة عندهوم
جلوان:8:30 حتال 8 د العشية ماشي بزاف؟
عذراء:ر راه ا لوليد الصالير طالع داكشي علاش
جلوان:شحال الصالير؟
عذراء:مزال مداروه معايا
جلوان:واخا حطي داك الغدا ا لوليا
لوليا تمات داخلة هازة طاجين و عينيها فعينين عذراء بنتها و تربية يديها و عارفاها امتى تتكذب و امتى لا...حطات الطاجين و بداو تياكلو اما عذراء عاد قدرات تنفس و تدوز ليها النعمة و اخيرا قدرات تسكت باها و الهم ديال هادشي حييداتو فوق كتافها ناسية انه الطرف الثاني شغدير معاه الى شدها لفوق 8 د العشية...
من بعد ما تغداو كاملين و تجمعات الطبلة و الكوزينة جرات لوليا عذراء للفوق و رفيف عايقة بيهوم و عارفة اش واقع تبعاتهوم حتى سدو لبيت...
لوليا:دوي شنو مخبية؟
عذراء:ك كيفاش شنو مخبية؟؟
لوليا:راه ماشي باك هدا راه مك لي حملات بيك و تعصرات عليك هادي!
لوليا:احساس الأم زائد الطريقة باش دويتي قالت العكس
رفيف:عذراء غير قولي متخافيش كيفما كانت ماما مغتوصلش لدرجة بابا تيقي بيا
عذراء تتشوف فيها بعيون المسكينة:نتوما مغتفهموش هادشي و غتوقفو فطريقي
لوليا:طريق شنوو؟؟؟؟
رفيف:الله يهديك اشمن طريق داوية عليه!
عذراء زييرات على يديها:نتي ختي الوحيدة و نتي ماما لي عندي انا بغيت السند ديالكوم و بغيتكوم بجنبي
لوليا:اش تتقولي انا ديما معاك شهاد الهضرة؟؟
رفيف:مالك خوفتيني ممولفاش ليك هاد الجدية؟؟؟
عذراء شافت فيهوم شحال عاد دوات:عندك الحق ا ماما و احساسك كان فمحلو انا كذبت على بابا...التوقيت كان غالط و الشركة قالت انه مكاينش وقت محدد لي غنسالي فيه....
لوليا:كيفاش؟؟؟
رفيف كانت عارفة هادشي غير من احساسها و متفاجآتش بحال مها حيت عارفة عقل الكوافورة كيفاش تيفكر...
عذراء تتفتف:ع ع عفاك ا ماما انا بغيتك توقفي معايا و حتى نتي ا رفيف نتوما لي عندي فهاد الدنيا
لوليا:فاش غنعاونك ا لموصيبة؟؟
عذراء:بغيتك تستري عليا و متوصليش ل بابا و خوتي على التوقيت عفاك ا ماما هدا حلم بالنسبة ليا الشركة فخمة بزااف و هاد الفرصة نادرا مغتجي عند وحدة بحالي و مبغيتش نفوتها انا مطامعة لا فصاليرهوم ولا مكانتهوم انا بغيت غير نشوف مكياجي محطوط على وحدة مشهورة و فرحانة بيه هداك هو الفضل عندي
رفيف:و بغيتي منا انه نتسترو عليك ياكي؟
لوليا:واش عارفة اش تتقولي و الى ساق لينا باك الخبار؟؟و الى عاقو بينا خوتك؟؟
عذراء:عفاكوم غير فهاد اللحظة بينما ولفت الخدمة و عرفت كيفاش نتصرف
لوليا بقات شحال تتفكر و تنهدات:غير مؤقتا من بعد متعرفيني منعرفك منك لباك
عذراء عنقاتها بفرحة:نتي احلى ام فالعالم شكرا ماما شكرا
رفيف:الله يخرج هادشي ديالك على خير و صافي...
☀️فالصباح الباكر☀️
و فالشركة ديال قوس...و فالطبقة التحتانية كان المنادجر فابيو واقف خاشي يدو فجيوبو تيتسنا فقوس حتى بان ليه عاد داخل تيدوي فتيليفونو باللغة الألمانية عاقد حجبانو كيف العادة..المنادجر بقا واقف بعيد باش ميتطفلش على المكالمة ديالو حتى سالا و مشا عندو...
فابيو:لا ا مستر بغيت غير التوقيع ديالك على الأوراق لي تتبين انه الخدامين الجدد غادي يوصلهوم الراتب
قوس:اوكي تبعني للبيرو ديالي...
مشا قوس سبق طلع فسانسورو الخاص و تبعو فابيو فالسانسور الخاص بالعمال حتى وقف عندو لقا السكريتيرة جالسة فبلاصتها ناضت حتى لقات تحيتها عليه مبتسمة اما هو رد عليها بتحريك راسو...حل البيرو و دار الاشارة لفابيو لي كان واقف تيتسنا الاذن منو حتى شافو و دخلو سادين عليهوم الباب...
قوس جلس فلبيرو ديالو:شنو بالنسبة لقسم تصميم الأزياء؟ كاينين عمال جداد؟
فابيو:كاينين مستر دوزو لبارح التيست حتى هوما و هزينا منهوم 4 فقط
قوس:و بالنسبة لقسم المايكاب ارتيستس؟
فابيو:تواصلت لبارح مع شيارا و عزلات منهوم 3
قوس:مزيان تنضن هادشي كافي فهاد الأقسام بجوج و العارضات؟
فابيو:تقبلو جوج فقط مستر حيت ديجا جايبين معانا كمية وفيرة من الشركة فسويسرا
قوس:المهم هو واش سالينا من قضية طلب العمل؟؟
فابيو:اه مستر كلشي هو هداك اليوم غيوجدو البطاقات ديالهوم
قوس:مزيان الى كملتي يمكن ليك تفضل
فابيو حدر راسو و خرج ساد الباب موراه...
اما الكوافورة كانت عاد جاية لابسة سبرديلة كحلة مع سروال دجين و تيشرت كحل مزوق وسطو هازة صاكها و غادية حتى وقفات قدام السانسور ديال العمال لباس هاد المرة تعلمات من غلطها ضغطات على رقم 3 لي طلعها ل الطابق الخاص بالعمل ديالها مشات دقات دقة خفيفة و مباشرة حلات موراها الباب لقات سديم جالسة تتحسب فشحال من علبة بودر كاينة تما و المبنت جالس تيقاد فشعرو قدام المراية...
عذراء مجاهاش فشكل كونها انسانة تتموت على شي حاجة سميتها المكياج و الفاشن و كيفما كلشي عارف انه اغلبية الوجوه المبصومة فهاد الضومين هوما الرجال المبنتين...
عذراء:ااه صافي مزيان يتصحابلي جات و انا مزال مجيت
المبنت مد ليها يدو تتشعل بالعناية:انا نيار
عذراء صافحاتو:و انا عذراء
سديم:من اينا برج نتا نيار؟
نيار ضار عندها مطلع حاجبو:برج الحمل
رمز برج الحمل هو هدا "♈" و المواليد ديالو من 20مارس الى 21ابريل
عذراء:مزيان متشرفين انا من برج العذراء
نيار:متشرفين
شيارا تمات داخلة:نتوما هنا؟
سديم:اه مدام
شيارا:صباح الخير بعدا اجيو معايا للمكتب ديالي
مشاو معاها للمكتب جلسو فوق الفوتوي...
شيارا:جبدو ليا شي صورة ديالكوم فتيليفوناتكوم ومدوهوم ليا
الثلاثة جبدو تيليفوناتهوم و دارو بلي قالت و علامات الاستغراب مرسومة على وجههوم...
هزات شيارا تيليفون د سديم ضغطات فيه على واحد الحاجة حتى كونيكطاتو مع واحد الآلة صغيرة فوق لبيرو دخلات لبلاصة الصور و ضغطات على الصورة لي ختارت سديم و ما هي الا ثواني و بدات خارجة من ديك الآلة مخلياهوم مدهوشين! دارت نفس الشيء مع صورة عذراء و نيار حتى خرجاتهوم دخلاتهوم فليكارط ديالهوم و هي تجبد الستيلو...
شيارا:نتي شنو اسمك الكامل؟
عذراء:سميتي عذراء مفتاح
شيارا كتباتها:و نتي؟
سديم:سميتي سديم الحولقي
شيارا كتباتها:و نتا؟
نيار:نيار غيلوان
شيارا كتباتها و مدات ليهوم ليكارط:هاكو هادو ليكارط ديالكوم ابتداءا من اليوم كيفما تحطو رجلكوم فالشركة يتعلقو فعنقكوم راني كتبت سمياتكوم فيهوم
شدوهوم عندها و علقوهوم فعنقهوم ديك الساعة نيت...
شيارا:صافي مزيان بقا غير شي أمور خصكوم تقادوها مع المنادجر فقط
عذراء:امور بحالاش؟
شيارا:لكونط بونكيغ
عذراء بدات تبلع ريقها فاش جبداتو ليها و هي تسكت...
شيارا:المهم اليوم عندنا جلسة تصوير مع واحد المجلة غادي يتحطو فيها تصاميم واحد المصممة عندنا فالشركة و بغيتكوم تكلفو بدوك العارضات
شيارا ناضت:تبعوني
تبعوها حتى وقفات فالبلاصة الخاصة بالماكياج...
شيارا:ك مايكاب ارتيست خدامة ولا خدام فهاد الشركة خاص تكون ديما مستعد لأي حاجة و اي وقت حيت كيفما قلت ليكوم من قبل هدا ضومين مليئ بالمفاجآت و باش يتم هادشي(جبدات حقيبة) كل واحد فيكوم غادي تكون عندو حقيبتو الخاصة و لي اول حاجة خصها تضمنها هو مرطب البشرة و باش تفاداو كترة المرطبات غادي تاخدو مرطب جميع انواع البشرة(حطاتو فالحقيبة)من بعد البرايمر هدا غيخصكوم تاخدو فيه ديال البشرة الدهنية و الحساسة و الجافة و حتى العادية نفس الشيء ل الفاوندايشن اضافة لواحد للبشرة الداكنة و المتوسطة و المفتوحة(حطاتهوم فالحقيبة)و حاجة خرى ضرورية هي كريم التفتيح و التغميق ديال الفاوندايشن هدا ضروري بزاف باش تقادوه تماما مع لون بشرة العارضة و غيمكنكوم تلعبو بهاد التلاتة كيفما بغيتو و اكيد من بعد هادشي ضروري من مزيل مكياج الوجه و العيون و القطن ديال الوجه و عيدان الاذن و بالنسبة لپاليت ديما تكون عندكوم صاحبة الألوان الترابية حيت تيتواتاو مع اي لووك و پاليت خرى ديال الألوان الجريئة و الفاقعة نفس الشيء ل العكورا ركزو على النيود اكتر و كمية قليلة جريئة متل الأحمر..البوردو..البني....
بقات شيارا تتنصحهوم و توريهوم كل حاجة بأدق تفاصيلها حتى قادات ديك الحقيبة و امراتهوم يقادو بحالها...بعدما قادو بحالها اتباعا لنصائح شيارا لي خلات مساحة ابداع للعمال من اختيار الماركات و الألوان و الكمية حتى كملو و كل واحد هز حقيبتو...
شيارا:مزيان و دابا بقات اللمسة الأخيرة ديال كل مايكاب ارتيست
مشات جبدات تلاتة حقائب جلدية سوداء هزات الشيتات ديال الميكاب و قاداتهوم فيهوم بتلاتة و كل وحدة ضوراتها فخصر كل واحد فيهوم و قاداتها...
شيارا:دابا سالينا هدا هو المظهر ديال الأرتيستس لي بغيت نشوفو و دابا تبعوني لمكان التصوير
خرجو من تما كاملو و دخلو فبلاصة خرى مكتوب فوق البلاكة ديال بابها "قسم التصوير" كان المكان عاامر بالصور المعلقة و كيف العادة اثاث فاخر بقاو تيشوفو بعينيهوم حتى دقات شيارا فواحد الباب و تحل...دخلات و تبعوها...
كان المكان مشارجي بزاف غير تدخل ليه عينيك تيوقفو يستوعبو فين كاينين...كان عااامر بالآلات الخاصة بالتصوير و الإضاءة فكل مكان و كل مكان تصوير معزول على لاخوور غير بالشكل و الألوان و كل فريق مكلف بكل مكان كانو مصورين و عارضات نيت فوسط عملهوم...عذراء بقات تتشوف لفتات انتباهها واحد العارضة لابسة لباس الباليه و تتلعب مع واحد الكلب و المصورين تيصورو بتاسمات حيت تيعجبوها الكلاب...دخلات شيارا مورا المكان لي كاينين فيه و هي ترجع شيرات ليهوم يتبعوها و داكشي لي دارو و هوما يلقاو تما 3 ديال العارضات جالسات و المكان كان بحال شي صالون صغير...
شيارا:هدا هو المكان المخصص للمايكاب فهاد القاعة ديال التصوير
عذراء بدهشة:علاه ماشي قسم التصوير كاملو هدا؟؟
شيارا ضحكات من عفويتها:هه لا هادي مجرد غرفة من غرفو المهم كيفما تتشوفو العارضات لابسات ديجا و مقادات الشعر بغيتكوم تجيبو ليهوم اللوك لي يجي مواتي مع اللبسة و الشعر كل واحد يحط لماتيريال ديالو فمكانو و بداو النوبة ديالهوم غتجي مورا هادوك لي شفتو تيتصورو على برا
التلاثة دارو بكلامها كل واحد مشا عند العارضة المكلف بيها و حطو ماتريالهوم...حلات عذراء حقيبتها و بدات تستف فالمكياج و فنفس الوقت تتفكر فاللوك لي غيجي مع العارضة حتى سمعات سمييتها و ضارت...
سديم هازة مجلة كاينة تما:واااو عذراء
عذراء:نعام؟
سديم جات عندها و صبعها فوق غلاف المجلة:تمنيت كون شفتو مباشرة ولكن حتى غلاف المجلة مابيهاش غنديها معايا ههه
عذراء متعجبة:كيفاش شكون هدا؟
سديم قابلاتها مع وجهها:هدا هو مول الشركة لي خدامين فيها
عذراء بقات تتحنزز فصورة قوس كان واقف مصور بكل جنتلمانية مخلطة بالغرور ديالو فصفحة المجلة عاد قدرات تفكرو و متفكر غير اللقاء المدرم و السانسور و كلشي شافت فسديم مخرجة فيها عينيها لي تيبرقو بالعدسات:قلتي هدا هو مول الشركة؟؟؟....
سديم:ايه هو هدا
عذراء بلعات ريقها و عاد قدرات دابا تجمع قطع الأحجية لي عطاوها الفكرة العامة...
عذراء:(كيفاش ملاحظتش هادشي؟واحد عندو طبقة مخصصة ليه..بيرو ديالو فاااخرر..عندو سكريتيرة..سانسور خاص..حتى من البدلة ديالو و مضهرو تيبيين انه مستواه عالي كيفاش ملاحظتش هادشي كيفاااش؟؟)
سديم تتشوف فيها ساهية و الوانها تيتبدلو:عذراء؟ ياكما مريضة؟؟
عذراء بتوتر:ل لا لا والو
عطاتها بضهرها فلبلاصة و رجعات تتخرشش و تقلب فالحقيبة و تستف و افكارها مخربقين ولكن فكرة وحدة تضور ليها فدماغها هي كون طردها و هي مزال حتى مسخنات بلاصتها عندهوم و فهاد اللحظة بالضبط قررات انه عمرها تضور بساحتو مزال ولا تحاديه مقادة على حتاشي مشاكل و بالخصوص مع الباطرون داكشي لي بقا...حاولات تنسا هادشي بابتسامة توتر فوجه العارضة لي كانت مستلقية على كرسي مجايبة لدنيا خبار او بالأحرى ممسوقاش باغية غير تطبق عملها...
سديم فاش شافت عذراء تصرفات هكاك قالت ممكن مريضة ولا شي حاجة و بابتسامة هزات المجلة حتى حطاتها فصاكها...نيار كان بدا تيقاد فالمكياج للعارضة ديالو لمح لي دارتو سديم و طلع فيها عينو و حاجبو...
نيار:رضيها لبلاصتها
سديم:و مالك نتا؟
نيار:هادي ماشي قاعيدة تتسرقي من الشركة؟!
سديم:اويلي على تنسرق راني خدامة هنا بلوس شوف شحال من وحدة محطوطة هنا شكون غيتسوق
نيار:ديك المجلة لي هزيتي راه على برا تيشريوها الناس بالفلوس يعني سرقة
سديم:ولكن راني خدامة لصالح الشركة عادي
نيار خنزر فيها و زاد كمل خدمتو اما هي هزات كتافها و مشات بادية خدمتها...
بعد وقت من العمل على وجه العارضة هزات پاليت فيها درجات اللون الأزرق مع البنفسجي دغيا قدات ليها لأيشادو ركبات ليها الرموش و زادت لمسة خاصة و هي كريستالات صغيرة لصقاتهوم ليها بالغراء الخاص بيهوم كملات ليها اللوك و نفس الشيء مع لخرين نيار لي سبق عاد سديم...
دخلات شيارا من بعد ما علموها انه جات نوبة تصوير دوك العارضات لي تكلفو بيهوم و هي تمشي عندهوم فاش شافت خدمتهوم عجبها لحال بزاف حيت فكل عارضة تتشوف لمسة خاصة و ابداع فني ديال كل مايكاب ارتيست...
شيارا:مزيااان عمل زوين و ابداع حاضر
عذراء فرحات فاش مدحات خدمتهوم...حركات شيارا راسها و هوما يقفو العارضات و خرجو للجلسة التصويرية...
عذراء:واش صافي؟
شيارا:لا باقيين عارضات خرين غير هو غيجيو بالعشية
سديم:يعني صافي سالات خدمتنا؟؟
شيارا:مسالاتش قلت عندكوم بالعشية عارضات خرين
نيار:اوكي مدام
عذراء:و دابا شغنديرو؟
شيارا:تاصل بيا المنادجر و قال ليا تحضرو عندو دابا نتوما لي بقيتو مسجلتوش معلوماتكوم على الراتب
عذراء:د دابا؟
شيارا:ايه دابا جمعو ماتريالكوم و خليوه فالقسم ديالنا و سيرو عندو
نيار:فين كاين؟
شيارا:فقسم الحسابات كاين فالطابق 7
سديم:اوكي مدام
جمعو ماتريالهوم رجعوه لبلاصتو و مشاو فسانسور واحد ل الطبقة 7...
وقف السانسور فالطبقة 7 لي من الحلة ديال الباب فيها تيتسمع صوت التيليفونات و المكالمات عالي و تقرقيب الصبابط و الطالونات غادي جاي شي هاز ملف شي هاز الدكسة ديال الوراق شي غادي مزروب تيدوي فالتيليفون باختصار كانت طبقة صاخبة عكس طبقة المايكاب و قسم التصوير...نيار بانت ليه السكريتيرة فالاستقبال مهبطة نضاضرها لي ضارب فيهوم الشعا ديال لبيسي و صباعها تيقرقبو فوق الكلافيي حتى وقفو عليها...
شافت فليكارط لي معلقين فعنقهوم و رجعات ضغطات على واحد لباج فلبيسي كانت بسمية فابيو لقاتهوم مستفين واحد مورا لاخور بتصاورهوم و سمياتهوم...
السكريتيرة:اه وي مدام شيارا خدات ليكوم موعد معاه
عذراء:باش عرفتي؟
السكريتيرة:كلشي قدامي..المهم موسيو فابيو تيتسنا فيكوم دابا رقم لبيرو ديالو هو 4 فهاد الممر
مشاو تبعو الممر لي نعتات ليهوم حتى وقفو قدام البيرو لي فيه النمرة 4 لي كان مكتوب فيه "Manager Fabio Schmid"
عذراء:سميتو مكتوبة فالباب
سديم:اه هو هدا
نيار بانت ليه بوطونة حدا الباب بحال السرسار و هو يضغط عليها تسمع سرسار خفيف من بعدها تحل الباب تلقائيا طلو بريوسهوم و هوما يبان ليهوم راجل واقف تيطل من الشرجم و الشمس ضاربة فالبيرو منور ضار لعندهوم و هو يدير ليهوم إشارة بيديه زعمة دخلو...دخلو و سدو لباب موراهوم...
فابيو جلس فلبيرو و هوما جلسو فوق فوتويات حدا بيروه...
فابيو بالإنجليزية:بلا شك نتوما ادرا(عذراء) نيار و ساديم(سديم)
عذراء بالإنجليزية:عذراء ماشي ادرا
فابيو:ادرا موفتاه؟
عذراء:عذراء مفتاح ا موسيو
فابيو:انا ماشي مغربي باش نطق اسمائكوم كيفما هي
عذراء عاد طلعات معاها:ا اااه سمح لي موسيو
فابيو:المهم دابا هو الغرض لي جيتو عليه يتم
نيار مد ليه ورقة:هدا هو كونط بونكيغ ديالي
سديم وركات عليه فتيليفونها و مداتو ليه:هاهوا ديالي
عذراء حداهوم تتلون عيباد الله كاملين حطو كونطاتهوم و هي كاعما كاسباه و يا حسرة نفس لاجينيغاسيون ديالها نيت...
فابيو مطلع حاجبو تيتسنا شي جواب حركي من الكوافورة ولكن والو صاقلة بلاصتها تتبلع فريقها و عينيها تيضورو...
فابيو:مادموزيل موفتاه!
عذراء قفزها:و وي موسيو؟
فابيو:فين الكونط بونكيغ ديالك؟
عذراء شافت فالجوج لي حداها و قالت لي ليها ليها:معنديش
فابيو بقا لثواني شحال تيشوف فيها كيفاش هاد الأخت بالغة و معندهاش كونط بونكيغ خاص بيها؟ (قال هكا حيت اكيد مولف السيستام الأوروبي اما كون عرف شحال من وحدة عندنا بحال الكوافورة نيت🤣)
فابيو تنهد:اوكي ملي تصوبيه دوزي لعندي و بأسرع وقت باش نساليو هادشي
عذراء بتاسمات ياه توقعات غيصبنها ساعة طلع متفهم مسكينة موالفة العصى و العنف عند الوزراء لي فالدار..حركات ليه راسها ب اه و جمعات يديها عندها مبتسمة...
فابيو حل لبيسي بورتابل ديالو و بقا تيكتب و يكليكي على ازرار الكلافيي حتى سالا...
فابيو:اوكي بالنسبة ل نيار و ساديم الأمور تقادات نتي فاش تخرجي خودي ليك موعد عند السكريتيرة باش ترجعي مرة خرى
عذراء:اوكي
فابيو:يمكن ليكوم تفضلو
هز نيار ورقتو و جمعات سديم تيليفونها و خرجو من تما...
فمبنى جريدة الأبراج لي خدام فيها برناس كان هاد الأخير تيشرب فالقهوة الكحلة ديالو بيد و الثانية تتقلب فالوراق عاقد حجبانو بحالا مدابز يلقا شي حاجة و نضاضرو د الشوف فعينيه حتى تفكر الستون ديال لبارح هاد عذراء مهبلاه فدماغو كيفاش كاع خوتو و خوتها مفاهمين مع ولاد عمهوم لي هوما شركاء حياتهوم عائلتو كلها مفاهمة مع بعضها الا هي هو مبغا لا يقيصها ولا يبوسها ولا يعنقها داكشي لحد الان متحملو حتى يديروه مورا الزواج ولكن ولو غير كلمة زوينة ولو غير ضحكة فوق مرتبة "ولد العم" و لو غير حاجة تتبين على الأقل اعجابها بيه هو عارف انه تخطبو بطريقة اجبارية ولكن هو فاش بلغ سن المراهقة ستوعب انه ديك البنية خطيبتو و مع مرور الوقت لقا راسو معجب بيها و محس براسو حتى ولا تيبغيها ولكن هي لا! خصو ضروري شي نهار يسولها ضروري شي نهار يواجهها و يعرف محلو فحياتها!...و فوسط داك التفكير المستفز حط القهوة بالجهد لي كانت شوية متكب على الوراق...
نرجعو لعند الكوافورة لي كانت جالسة فالمطعم ديال الشركة فطاولة مع سديم و نيار..كانت الماكلة محطوطة قدامهوم و تياكلو...
عذراء:بنين هاد الطبق تيبان ليا غيكون غالي حيت فيه قمرون
نيار:معرفتش مهم بنين
سديم:تنحماق على الحوت
عذراء:ناري حتى انا ههه اجي اويلي نتي برج الحوت و تتموتي على الحوت هههه
سديم:ولاهيلا هههه
قلبوها ضحك و نيار مطلع حجبانو بجوج على هاد التفاهة الحامضة...
نيار ملقا ميقول:شيارا مبانتش لياا
عذراء:علاه غتبقا غير مقابلانا
سديم:اه راه قالت لينا بلي هي رئيسة قسم المايكاب يعني المديرة ديالنا واش يتصحابليك غير حنا لي خدامين عندها
سديم:وي عادي انا نيت راه واخا نفس البرج ولكن ماشي نفس المواصفات و كدا
نيار:اكيد راه حتى عامل النهار تيبدل شحال من حاجة
عذراء:وي بصاح
سديم:المهم هو و اخيرا تلاقيت ب برج تيوافقني انطلاقا من العادات ديال قانون الأبراج ههه
عذراء:هه انا كتاشفت غير بنفسي انه برج الأسد لي هو د لبست فريند ديالي موافق مع برج العذراء غير من الصداقة ديالنا
نيار:انا بيني و بينكوم هاد القوانين ولا الزمر داخلين ليا من ودني و خارجين ليا من *ري
سديم:اويلي على تخسار الهضرة!
عذراء:ههه هانية انا موالفة تنخسر الهضرة مع ختي و صاحبتي نشوف شي حد اخور نسكت ههه و بخصوص هاد الموضوع ا نيار نفس الشيء معايا
سديم:شنو تتقولو نتوما! باغيين تخرجو علينا
نيار:مالنا اش قلنا كولي خبزك و سكتينا
عذراء:هدا موضوع طويل و مكان غير مناسب ممكن يطيح كلامنا فالأذن الغلط
سديم:المهم انا شبعت
نيار:بزعطة
عذراء:واش متتقاداوش؟
سديم:هو ياختيي هو
عذراء ناضت:غنمشي لطواليت عرفتو فين كاينة؟
نيار:بحالا بانت ليا لبلاكة ديالها مع ديك الضورة
مشات عذراء فين شيير ليها بانت ليها البلاكة ديال رمز حمام النساء مشات دخلات ليها قضات حاجتها..غسلات يديها و تقابلات مع المراية تتقاد خصلات شعرها المطلوق و بابتسامة سيفطات بوسة فالهوا لانعكاسها فالمرايا(هبيلة)و خرجات من تما...
سرعان ما تفكرات قضية لكونط جبدات تيليفونها من جيبها و هي ضور النمرة لشخص واحد فقط لي غيقدر يعاونها..نفس الشخص لي دخلها لهاد العالم هو لي غيساعدها...
برناس كان عاد تغدا و جاي راجع للبيرو ديالو حتى تيلقاها تتصوني تعقدو حجبانو بحالا تتقلب عليه نيت فهاد الساعة جاوبها مكليكي على الشاشة بزعف...
عذراء:الو برناس
برناس:وي عذراء؟
عذراء:بغيتك تعاوني فواحد الحاجة نتا الوحيد لي تقدر تعاوني
برناس طلع حجبانو شغيكون وقع معاها:مالك؟اش واقع؟
عذراء:بغيت نحل كونط بونكيغ
برناس عاد تفكر هو نيت نسا هاد القضية:ااه وي واخا امتى؟
عذراء:نقدر ناخذ الاذن من عند لباطرونة ديالي ليوم و نقول ليك
برناس:اوكي علميني حيت راك عارفة متتساليش خدمتي
عذراء:غنصوني عليك بسلامة
قطعات جامعة حجبانها بتسائل ضروري غتكون واقعة شي حاجة حسات فشكل من طريقة كلامو ليها ممتعوداش هاد الجدية فالنبرة ديالو عادة تيدوي بطريقة فيها نوع من الفرح ناضت هازة كتافها زعمة معارفاش مالو و علاه الكوافورة مسوقة رجعات عند دوك الجوج لقاتهوم تيتناگرو...
عذراء:غنمشي نقلب على شيارا بغيتها فقضية لكونط بونكيغ
نيار ناض:انا نيت راجع ممكن تكون تتقلب علينا
سديم:حتى انا غادية معاكوم
مشاو بتلاتة غاديين حتى هبطو فالسانسور لطبقة 3 و دخلو...
شيارا شداتها شوية د الدهشة فاش سمعات معندهاش و هي تختافي من وجهها باش تكمل ليها كلامها...
عذراء:المهم انا غادي نصوبو و نرجع عندو حيت ديجا خديت موعد عند السكريتيرة ديالو
شيارا:و شنو المشكل فهادشي؟؟
عذراء:بغيت غير ناخد اذنك نخرج دابا باش نمشي نصوبو
شيارا:اوكي مادام غرض تيخص الشركة غنخليك هاد المرة ولكن رجعي بالعشية
عذراء:شكرا بزاف مدام و حاجة خرى...
شيارا:شنو؟؟
عذراء:واش بصاح كاين عرض فباريس؟؟
شيارا:و شنو قلت ديك الساعة؟
عذراء تتحرك يديها بتوتر و نبرتها فيها نوع من التردد:م مدام
شيارا:اش واقع مفهمت فيك والو!
عذراء:انا منقدرش نمشي لباريس
شيارا شعلات لبيسي ديالها و بدات تتقرقب فالكلافيي حتى خرجات ليها واحد الصفحة:ميمكنش!
عذراء خرجات فيها عينيها:كيفاش ميمكنش؟؟
شيارا:العارضة لي غادي تقادي ليها غادية لهاد العرض!
عذراء غتشدها لبكية اويلي على باريس اويلي اش تتقول هادي ميمكنش..و فوسط تفكيرها متتخيل غير قتلة د الكلاب عند باها و خوتها مزال حتى مفكات قضية الوقت الغير المحدد زادوها دابا باريس ولا المرض...
عذراء:منقدرش نمشي
شيارا عقدات حجبانها:و علاش ا مادموزيل؟
عذراء:ح ح حيت معنديش باسبور
شيارا:ماشي مشكل باسبور حلو سيمانة و يوجد
عذراء تتندب فداخلها اش غتقول ليها دابا ميمكنش تقول ليها عائلتي مغتخلينيش حيت باين جوابها كيف غيكون..اش داك اصلا تدفعي لخدمة بحال هادي و ضومين بحال هدا...
شيارا:المهم فطريقك فاش تدفعي لكونط بونكيغ دفعي حتى للباسبور ديالك
عذراء ناضت بجنح مكسور حركات ليها راسها و خرجات شعرها مليوح على وجهها و تتفكر غير فجنازتها كيف غادوز الى ساقو واليديها الخبار لهاد الهضرة و عرفو ب اش تيوقع فهاد الشركة...بقات غادية و الحزن على وجهها متساطح غير مع شي واحد...
عذراء طلعات راسها على طولو كانت بنت طويييلة شعرها كحل و عينيها زرقين...
روبين بغضب:بعدي مني واش متتشوفيش قدامك!
عذراء:سمحي ليا مكنتش رادة لبال
روبين زادت بحالها و مناخرها لفوق السما و عينيها كاعما تيشوفو فالأرض غادة و تتعوج حتى وقفات قدام البيرو ديال شيارا دقات من بعد تسمع تفضل و دخلات...
فنفس الوقت عذراء كانت تتشوف فهاد المنضر و معرفاتش شكون هاد الأخت و علاش جاية عند شيارا حاجة وحدة بانت ليها هي انه باينة مكانتها عالية غير من تحركاتها و لباسها هزات كتافها بعدم اكتراث و مشات لمكان عملها لقات سديم و نيار تيقادو فواحد الباليزة خاصة بالمايكاب...
عذراء بدهشة:اويلي اش تديرو؟؟
نيار:واش مسمعتيش شيارا شنو قالت؟
سديم:تنقادو فحقائب سفرنا
عذراء:غاديين نتوما لباريس؟؟؟؟
نيار:و اش فيها؟ منستاهلوش ولا؟
عذراء:لا لا غير هو واش مكاين لي يقول ليكوم والو؟
سديم:انا ماما ديجا فراسها انه الخدمة ممكن تكون فدول خرى
نيار:و انا اصلا معندي حد
عذراء:ا ااه مزيان مزيان ي ياكما نعاونكوم؟
نيار:واش مغتجمعيش ديالك؟
عذراء تضور فعينيها:ا ااه من بعد
سديم:حنا قربنا نساليو نيت
عذراء:منين خديتو ديك الباليزة؟
نيار:هاهياك محطوطة فلبلاصة ديالك
عذراء مشات لقات باليزة كحلة و من تصميمها باينة ماشي عادية بقات تتشوف فيها حتى هزاتها و خباتها فوحد القنت تما كيف محطوطة هزات صاكها و رجعات عندهوم...
عذراء:نخليكوم دابا غنمشي نقضي الغرض
نيار:اوكي بسلامة
سديم:طهلاي
مشات عذراء غادة و صاكها فيديها جبدات منو تيليفونها حتى صونات على برناس...
برناس:الوو؟
عذراء:راني خديت من عندها الاذن واخا نمشيو دابا؟
برناس:واخا غنمشي نطرگك دابا
قطعات عذراء و خرجات تتسنا على برا و ريح خفيف تيحرك فشعرها لي تيلعب فالريح مستمتعة بالجو المعتدل حتى دازت مدة ماطويلة ماقصيرة و ها طونوبيلة برناس مركنة قدام الشانطي...بان ليها و مشات بخطوات متسارعة حتى حلات الباب القدامي و جلسات تتقاد فخصلات شعرها الأمامية...
عذراء مبتسمة:سمح ليا عذبتك معايا
برناس:لا مابيناتناش المهم غنديك للبانكة لي حال فيها انا كونطي
عذراء:و واخاا
ديماراو من تما و مشااو للبانكة...
من بعدما قضاو الغراض فالبانكة و قدرات تحل عذراء كونط فيها..خرجو من تما...
عذراء:اش بان ليك نجلسو فشي بلاصة؟
برناس شاف فيها بدهشة واش نيت هي لي تدوي؟
عذراء:مالك؟
برناس:والو غير ممولفش ليك
عذراء:قلت نستغلو الوقت و صافي راك عارف نادرا متنكونو بوحدنا
برناس اكيد فهم هضرتها بالمقلوب و السيد صافي قال هاهيا بدات تتبين ليه شوية ديال المشاعر...
برناس بتاسم:فين بغيتي نمشيو؟
عذراء:فينما بغيتي تشهات ليا خاطري عصير الليمون
برناس:هه واخاا
حل برناس الطونوبيل..ركبو و ديماراو...
فالشركة و بعدما سالا قوس واحد الاجتماع مع مصممين الأزياء لي غيشاركو فالعرض ديال باريس هبط فسانسورو الخاص حتى طلع مع السيارة لي كانت تتسناه بشيفورها...و بعد مدة من الطريق بقات غادة السيارة فمجال منعزل على المدينة حتى وقفات قدام بوابة كبيييرة فيمينها و شمالها سووور عاالي...تحلات البوابة اوطوماتيكيا و دخلات السيارة غادة وسط من شانطي فلداخل نيت و الدنيا بحال الجنة كلها ربيع و ورود ملونة و التماثيل المنحوتة حتى تحلات البوابة الحديدية الداخلية و هنا بدات تتبان فيلا كبيرة بل قصر...بقات غادة السيارة حتى بلاصات قدام الباب الأمامي ديالها لي كان محلول و الخدم واقفين مستفين قدام الباب استقبالا لمالك المكان...هبط قوس بكل جنتلمانية و دخل مع الباب...فاش طلع مع الدروج الخدم كل واحد مشا لشغلو...
و فواحد الغرفة باثاثها الفاخر كان قوس واقف تيحييد فالساعة اليدوية ديالو لي تصميمها تيهضر على ثمنها الباهض حتى حطها و دخل لدريسينغ..بدا تيحييد فحوايجو و لبس سروال ديال السبور و لفوق بقا عريان خرج من الغرفة و بقا غادي فالممر حتى دخل لصالة الرياضة الخاصة بيه و عضلاتو البارزة تتبين قداش جسمو الرياضي جذاب...الموسيقى تشعلات تلقائيا و بدا فالتسخينات معلنا على طقوس من طقوسو لي تيرتاح فيها من بعد يوم من العمل....
نرجعو عند الكوافورة لي كانت جالسة مع برناس فمقهى راقي تتشرشف فعصير الليمون و البنة ديالو طالعة معاها بحال شي موحمة و برناس جالس قدامها تيتفرج فوحش من الوحوش لي تيبيينو فناصيونال جيوغرافيك بعنوان فتاة تفترس عصير البرتقال و قطعة الحلوى حتى كملات و مسحات فمها منساتوش بعدا...
عذراء:ههه سير الله يعطيك الخير كنت مشهية حلوة لاكريم من لبارح
برناس:هه بصحتك
عذراء:الله يعطيك الصحة ايوا
برناس:احم ايوا كيف دايرة مع الخدمة؟
عذراء:زوينة و الله مرتاحة فيها الله يفرحك نتا لي وريتيها ليا ههه
برناس:مزيان هادشي لي بغيت
عذراء:غير هو التوقيت لي عندهوم مخربق
برناس:كيفاش؟
عذراء عاد طلعات معاها:ا ا لا والوو
برناس: و قولي ليا ياكما تيتبسل عليك شي واحد تما؟
عذراء:اويلي شكون ايتبسل حتى نتا الدراري تما محسوبين نيت علينا
برناس:اه وي فهمت عرفت ديك الماركة
عذراء:اه هاديك
برناس:قولي ليا
عذراء طلعات راسها:شنو؟
برناس:امتى غنقررو عرسنا؟؟
عذراء خرجات فيه عينيها:ا اا هاد الهضرة واليدينا لي تيقرروها
برناس:واليديا باغيين غير امتى يفرحو بينا
عذراء:ا ااه و واليديا مزال
برناس: و نتي مباغاناش نتزوجو خلاص و نساليو هاد الضوران الخاوي؟
عذراء تتبرق فيه عينيها:ام انا لي داروها واليديا هي لي كاينة(اممم)
برناس كتم غضبو:واخاا مهم خصني نرجع دابا للخدمة
عذراء:غير سير انا غنشد طاكسي ل الدار
برناس ناض حتى خلص و خرج اما هي جاتها الفرصة باش تمشي تصوب الباسبور ديالها جبدات تيليفونها و ضورات النمرة ل رواء...
رواء لي كانت خدامة فواحد البوتيك د لحوايج كانت تتستف فشي سلعة بيخير و على خير حتى صونا تيليفونها و جاوبات...
عذراء وقوس الجزء الثاني
محتوى القصة
التنقل بين الأجزاء