رئال معنقها و تيهدن فيها: تهدني حتى واحد مغيفرقنا على بنتنا انا عارف اش غندييير سيري لطواليت دابا و كولي مزياان باش ترضعيها بنتناا غتكمل نموها فبلاصة خرى و تكوون بين يديناا!!!
هزات فيه عينيها المدمعين بأمل و باس ليها جبهتها بإطمئنان بعدات منو محركة راسها بالموافقة كونها تايقة فيه بزااف حيت عمرو طييح بشي كلمة عطاها ليها..ثقتها فيه كبيييرة و هدا كان من بين الاسباب طبعا حتى سلماتو نفسها قبل الزواج..دخلات للطواليت و هو هز دوك الوراق و خرج من تما يوقع على اجرائات المغادرة...
فسويسرا كانت عذراء واقفة فالدريسينغ ديال جناحهم هي و قوس لاوية عليها الفوطة بعدما خدات دوش صباحي حتى حسات بيديه الدافيين تحطو فوق كتيفاتها العريانين...
قوس تحنا لمستواها حتى حط شفاهو على رقبتها الناعمة طابع بوسة خفيفة و بعد تيشوف فيها من المرايا لي قدامهم لقاها تتلون بالخجل و شاداها هر...
قوس: شنو باقي لي معطلك My flower ؟
عذراء حنحنات و دارت لعندو: قلتي بلي غيجيو عائلتك مجموعين هاد المرة عندنا للغداء يعني حتى باك داكشي علاش حرت اش غنلبس ماعرفتش علاش راني حاسة بلي المناسبة رسمية بزاف غير بوجودو
قوس بتاسم مدوز اصابعو على شعرها: لا ماشي ضروري لبسي لي مرتاحة فيه
عذراء بتاسمات: واخاا
باسها فوق راسها و خرج مخليها تاخد راحتها...
عذراء شافت فإنعكاسها: ياربي يدوز كلشي على خير و يصفاو الخواطر مابقيتش قادرة نستحمل احساس انه زواجي محرم لهاد الدرجة!...
فلتحت كانت لوليا بقفطانها التقليدي و طلتها المغربية مع رفيف و ضرغام و جلوان جالسين تيشربو فأتاي و الحلوة...
لوليا باينة الفرحة على وجهها: حمد الله كلشي غيكون مقاد دابا
جلوان: ماتنسايش الواليدة لي مخليينها ماعارفة والو
رفيف: دابا عذراء تزوجات و واليديها و واليدين راجلها موافقين دابا على هاد الزواج جدة خصها غير تقبل الأمر الواقع فقط
جلوان: و سهلتيها؟ سهلتي انسانة اجيال و اجيال و هي تتزوج بالعادات و واقفة على هاد الشغل تجي فدقيقة تقبل ليك حفيدتها تزوج ببرج مخالف لبرج عادتنا؟
رفيف: ماسهلت والو ا بابا غير هو جدة غتغضب حتى تعيا فاللخر تتبقا ولدها و عذراء حفيدتها و كيفما نتوما وقفتو معاها و فهمتوها مزال حتى هي غيجي واحد النهار تعرف فيه انه هادشي مامنوش
لوليا شافت فضرغام لي ساكت ساهي فكاسو: احم ولدي مالك؟
ضرغام هز فيها راسو: لا والو ا الواليدة غير تنتسنا امتى نساليو من سيرة زواج عذراء باش ندوز الكونجي لي جيت على قبلو
لوليا حطات كاسها: واخا ولدي تقدر تجي معايا ندويو شوية
ضرغام حط كاسو باستغراب و ناض تابعها: واخا
رفيف شافت فيهم باستغراب حتى خرجو ل لاطيراس و رجعات شافت فباها: احم بابا غنوض نشوف عذراء تعطلات من الفطور ماهبطاتش
جلوان حرك ليها غير راسو و ناضت طالعة مع الدروج فنفس الوقت دخل قوس لداك الصالون لقا غير جلوان بوحدو لي جالس...
قوس: مستر؟بوحدك؟
جلوان: هانتا تتشوف كلشي عندو مايدار
قوس: مابقا والو يجي الواليد و ندويو على الامور لي بغيتي
جلوان: واخا
فجأة تسمع تيليفون جلوان تيصوني لي هزو مجاوب باستغراب...
جلوان: الو رئال ياك لباس طليتي على الدار؟
رئال تيشوف فرسيل لي مكمشة فمانطة تترضع فبنتهم: ااه طليت عليها البارح غير هو كاينة واحد الحاجة بغيتك تعرفها و عفاك قبل مانقولها تسمعني مزيان
ضرغام: نتي عارفة مزيان قداش كنت معول نتزوج و شحال وجدت و خدمت باش ماتخصها حتى حاجة باش فلخر تطلع رخيصة بيران!
لوليا: ولكن ماشي انا لي ختاريتها ليك اصلا فالاول! شوف خوتك قدااش فرحانين فحياتهم حيت كلهم تزوجوو برضاياا!! رسيل انا هي لي ختاريتها لرئال فاش كانو صغار! فابيو انا لي زدت زعمت رفيف تزوج بيه! قوس انا لي خليت باك يعطيه فرصة!! واش شفتيهم ندمانين؟؟؟لا!! بالعكس فرحاانين و احسن من الااوول!!!
ضرغام: تنعتارف انه هادشي واضح و كلامك صحيح ولكن انا تضررت فعلاقة سابقة ليا و مامستعادش ابدا باش نبدا وحدة خرى!
لوليا: نفس الشيء مع ترف! حتى هي مسكينة عاشت التكرفيص و ضييعات شبابها مع واحد الشارف بسبب هاد العادات و التقاليد! عذبهااا فوقما تصور و عذاابها لا يقارن ابدا بلي وقع ليك! هي مطلقة و نتا فسختي خطوبتك و بجوجكم نتوما الضحايا فعلاقاتكم السابقة انا برأيي غتكونو احسن كوبل و غتفهمو بعضياتكم بزااف زائد انكم قد قد نيت فالعمر
ضرغام بقا ساكت شحال و نطق: ولكن واش هي عارفة بعدا بهادشي؟
لوليا: قلتها لمها و قالت غتفاتحها بالموضوع حتى هي خصنا غير نساليو من حريرة ختك باش حتى نتا نشوفك فرحان ا ولدي(ناضت حطات يديها على كتافو بترجي)عطي فرصة لراسك اولدي عفاك انا ماماك و الأم تتحس و تتكون عارفة سعادة و راحة وليداتها فين كاينة واش عاجبك الحال نشوف خوتك كاملين فرحانين فحياتهم و دايرين عائلاتهم الا نتا باقي شاد ليا فتجربة فاشلة؟عفاك ا ولدي سمع مني و دوي مع ترف راه مسكينة حتى هي باغية غير شي ولد الناس لي يقدرها
ضرغام بقا شحال تيشوف فيها حتى تنهد بعمق: واخاا غندير بخاطرك
لوليا بتاسمات بلمعة فعينيها: الله يرضي عليك اولدي هكاا نبغييك ههه و دابا يالاه ندخلو عند باك يعرف بلي وافقتي
ضرغام: واش فراسو حتى هو؟
لوليا: اكييد و علاه غنزوجك بلا خبارو ههه
دخلو للصالون مرة خرى ولكن هاد المرة لقاو الجو مشحوون بين جلوان و متصل على الخط...
جلوان عاقد حجبانو: و دابا رجاح و دواني فراسهم؟؟
رئال: اه فراسهم
جلوان شد راسو: واش زعمة مكاانش فيكم لي يصبر حتى تزوجو ولا شنوو؟؟؟واخاا حنا قلنا راك ولدنا مغتفلاش على البنت و واليديها؟؟؟
رئال: راني عارف بلي صعيب تقبلوها ولكن راه هدا هو الواقع انا و رسيل غلطنا فعينيكم اه ولكن راه الغلط اصلا تصلح فاش حنا مزوجين و دابا عندنا بنتنا لي هي حفيدتكم غير هو بكري على حسب مدة عرسنا
جلوان: نساليو من ختك و نجيو نفكو حريرتك حتى نتا!
رئال: لا انا لي غنجي مايمكنش ليا نبقا هنا غيحييدو ليا البنت حيت تزادت فشهر برج الحمل!
جلوان: ها لي قلنا! عندك الزهر مابقيناش مسوقين لهاد العادات دابا ولكن الواليدة...!!
رئال: حتى هي فراسها...
جلوان بصدمة: كيفاش!!!
رئال: ااه لدابا مانطقات بحتى حاجة جاتني بحالا مصدومة
جلوان: يااربييي ترزقني الصبر معاكم!!!
رئال: مهم قول لعذراء تسيفط ليا نمرة قوس باش يرجعنا مرة اخرى خصنا نخويو البلاد مانقدرش نخليهم ياخدو ليا البنت بسبب سبب تافه بحال هدا!
لوليا: عاد تنقولو سالينا من موصيبة تتخرج لينا وحدة خرى!
ضرغام: قمة التهور!!!
جلوان تنهد: جاب الله غيعاونهم قوس اما ماكنتش عارف شغندير الى حييدو ليه بنتو!
لوليا: ايوا الله يخلي لينا نسيبنا العزيز قلتها ليكم من النهار الاول داك الراجل ولد الناس
ضرغام: مهم انا عندي مايدار
انساحب قبل مايسمع كلامهم...
جلوان: اش قال ليك بخصوص داكشي؟
لوليا: وافق
جلوان: تتقاد هنا و تتعواج من لهيه...
فالمغرب..كانت نواهل واقفة بكسيوتها القصيرة فالكوزينة تتوجد الفطور لبرناس لي كان لابس حوايجو باش يمشي للخدمة..ستفات كلشي فوق الطبلة و جلسات قدامو...
برناس رشف من القهوة: الله يعطيك الصحة بنينة
نواهل بتاسمات: ربي خلييك
برناس حط الفنجان تيتفحصها بعينيه: موضوع الواليدة و الملاقية ديالكم شاغل ليا بالي الصراحة
نواهل هبطات حجبانها بقلق: كيفاش زعمة واش مابغيتيش فاش جات ولا ماعجبكش الحال فاش ماعقلتش عليها؟؟راه ا برناس حتى هي ماعقلاتش علياا حيت مادوينااش كاع فالسبيطاار فاش تضربتي شكون داها فشي هضرة ديك الساعة كنا غير تنشوفو حاالتك الحرجة و تنتمنااو تخرج منها على خيير حتى من الوقيتة لي كنت تنجي لعندك نزورك ماكنتش تنلقاهم...
نواهل تتلتاقط انفاسها بعد ديك الهضرة كلها: راك عارف مابغيتش المشاكل حاليا تنتمنى غير يعاملوني بحال عروستهم ماشي شي وحدة رخيصة لصقات فولدهم
برناس: هدا ماشي غلطك و مغنسمح لحتى واحد يقول عليك رخيصة! انا لي عارفك هادشي علاش مابغيت حتى واحد ينقص منك! نتي دابا مرتي و وليتي نواهل مفتاح خاصك تفهمي هادشي!
نواهل غرغرو عينيها بتأثر و حطات يديها على يدو: شكرا بزاف على كلامك تيرييحني
برناس حدر عينيه تيشوف فيديها المحطوطة فوق يدو و هو يشدها: انا نسيت الماضي ا نواهل باغي غير نكون فرحان عيواض نشوف انه علاقتنا غلط شفتها انها هدية من القدر باش نبدا من اول و جديد القدر لي سيفطك ليا رغم انك كنتي طول الوقت بجنبي فالوقيتة لي مكان فيها حتى واحد
نواهل لمعو عينيها: الله يخليك ليا
برناس بتاسم: و يخليك ليا
حدرات عينيها فطاولة الفطور تتاكل بواحد الفرحة فعينيها نفس الشيء معاه بالفعل كان واقع فحب عذراء بحال الأعمى بسبب خطوبتهم من الصغر ولكن هادشي لي بدا تيحسو مع نواهل و الجو لي خالقاه فدارو فشكل صدق من قال انه الحب الحقيقي هو لي تيبدا مورا الزواج ديك الساعة عاد تيعرف الواحد شكون لي غيصبر ليه على سلبياتو شكون غيوقف معاه فمحيانو و الأهم شكون غيتقبلو و يبغيه بكامل عيوبو...
سالاو داك الفطور و ناض هاز حقيبتو يتوجه لعملو..ناضت تبعاتو بخطواتها الخفيفة لعند الباب و قبل مايودعها بادرات كاسرة الجدار لي بيناتهم بتعنيقة...
نواهل حاطة راسها على صدرو بابتسامة: الله يعاونك
برناس مبادلها العناق بابتسامة: و حتى نتي العشية غنشوف ندوي مع الواليدة بخصوص مجيتها و واش تقبلو الموضوع ولا مزال
نواهل: واخاا...
ربت على ظهرها بشوية و انساحب مخليها واقفة عند الباب مراقباه حتى طلع لطونوبيلتو و غبر قدام انضارها...
نواهل تنهدات: امتى يجي النهار لي نسمع منك كلمة "تنبغيك"....
بينما فدار عائلة برناس كان الجو مقلوووب..دواني لي مانعسات ماشافتو و رجاح لي خرج الصباح بكري ماعرفاتو فين زاد..هبطات ديالا من بيتها تتقلب على مها حتى لقاتها عاقدة راسها بالزيف و جالسة فالصالون...
ديالا جلسات حداها بقلق: ماما...
دواني هزات فيها راسها: نعام؟
ديالا بلعات ريقها: شغنديرو دابا؟؟
دواني: لي تداار تداار ماعندنا مانديرو مزال
ديالا تتلعب بأصابعها المتوترة: انا متفهمة غضبكم كأي واليدين ولكن على الأقل ا ماما من جهة خرى راهم مزوجين مابقا عندنا الحق نقولو والو
دواني: وااراااه عرفناااا وا مابقاتش فهااادشي بقااات فباااينة للعمى شبعو ضورااان قبل الزواج!!!ماكان فيهم مايصبر؟؟؟
ديالا: داكشي بعيد عليا غير بغيت نخفف الامور قدر الإمكان و صافي ولكن ا ماما واش غنبقاو هاكا؟ مابغيتيش تشوفي حفيدتك؟ مابغيتيش تشوفي بنتك كيف بقات؟
دواني غرغرو عينيها: بغييت و بزاااف ولكن باك شغندير معاه باش ينسا؟ الليل كاملو ماناعساهش تنتفكر غير وجهو فاش عرف و كيفاش انساحب!
ديالا عنقاتها: ماتبكيش ا ماما كلشي غيكون بيخير بابا مع الوقت غينسا واخا غير على قبل ديك الملائكة لي ماذنبها والوو فهادشي
وصلات وقت الغذاء لاقية العائلة كلها مجموعة على هاد الطاولة المزوقة بأشهى المأكولات و ألذ العصائر و المقبلات..كانو الخدم غاديين جايين تيحطو ليهم لي بغاو فالتباصل و يكبو ليهم فالكيسان حتى كلشي خدا لي بغا و هنا بدا شي يشوف فشي خصوصا تليد لي اول مرة يجلس فطاولة وحدة مع زوجة ابنو و عائلتها هادشي لي كان كافي يخليها غارقة فتوترها و خوفها كونها عمرها شافت منو الزوين غير الغوات و الاعصاب و رفضو لهاد الزواج بشكل نهائي و تام!...
تليد هز راسو و حنحن تيشوف فالعائلة كاملها من الراس حتال الراس نفس الشيء معاهم كلشي شاف فيه تيتسنا فكلامو...
تليد: احم انا اليوم هنا حاضر جامع العائلات بجوج على هاد الطاولة باش نبداو صفحة جديدة و نكونو قادة الجيل الموالي من عالم الأبراج...
فابيين بابتسامة: بهاكا كلشي غيكون مقاد و حتى واحد مغيبقا هاز فخاطرو من جهة لاخور
قوس شاف فتليد: انا عارف لي كاين هضرتك موجهة لعذراء و عائلتها
تليد تنهد و شاف فعذراء لي مبرقة عينيها فيه: تنعتاذر على سوء الفهم لي وقع و على معاملتي الغير اللائقة معاك من قبل
عذراء بتوتر: م م ماشي مشكل
جلوان تدخل: حتى حنا كنا بحالكم رافضين هاد الفكرة اشد الرفض ولكن الى عطيتي فرصة و وقت للتعمق فالأمور و طريقة سيرها غتلقا انه هدا اكبر ظلم تقدر تحط فيه ولادك
تليد هبط حجبانو بقلق تيشوف فترف متفكر زواجها بسام لي خرب ليها حياتها و لي كان هو لي مبززو عليها: عندك الحق داكشي علاش خاص بزاف د الامور تصلح
لوليا: احم على كل تنظن قضية عذراء و قوس باينة..وليداتنا تزوجو و فرحاانين فحياتهم دابا نركزو على لي جاي و نمهدو لفرحة جديدة
تليد شاف فترف و ضرغام: اكيد حتى هاد الموضوع جايين ليه ولكن ضروري نتهناو من الاول
قوس: حنا عايشين بيخير و متنفكروش ابدا فالهم لي كنتو هازينو ابدا و مجتمع الابراج جا الوقت لي يتبدل و تبدل حتى نظرة حكامو للوضع لي غادي فيه
عذراء بهدوء: بصاح مايمكنش ابدا يكون كلشي راضي على هاد الوضع اكيد كاينين بزاف د الناس كانو بحالي ساكتين و خايفين من العواقب و العائلة
فابيين: زواجكم غيحل بزاف د البيبان المسدودين و حنا معاكم كدعم باش يتحقق هادشي
عذراء شافت فيها: نتي اكتر ا ترف تنتمنى ليك افضل و احسن الايام من هنا للقدام
ترف شافت فضرغام لي حس بأنضارها و طلع راسو تلاقاو عيونو نيشان مع عيونها الرمادية اللامعة لي تيتفحصوه عن قرب بشكل لاإرادي عمرها تعمقات اكتر ولا زادت فيه فوق شوفة وحدة ولكن فاش عاودات ليها امها على زواجهم عاد حلات عينيها تشوف هاد الشاب لي ناوي يتقدم ليها الى تفاهمو طبعا...
ضرغام بقا غير ساكت ماعرف مايقول اصلا واليديه لي باغيين و هو عمرو دوا مع هاد المرأة...
عذراء ولات غير تضور راسها بيناتهم مافهمات والو شافت فرفيف لي كانت تضحك غير من التحت تيبان ليها خوها غرق فمولات العيون الرمادية بلا هواه حتى بدات العائلة تكسر هاد الحاجز لي كانو غيمهدو ليه ساعة الولاد قامو بالواجب...
جلوان: احم دابا غندويو على ولدي ضرغام و بنتكم ترف
تليد شاف فيها: بنتي..الى كنتي مرتاحة لهادشي و تايقة فباباك هاد المرة يمكن ليك تفضلي مع ضرغام و تناقشو فالموضوع اهم حاجة عندنا نتوما تختارو بعضياتكم حنا هاد المرة غير موجهين فقط..شنو قلتي فهادشي؟
ترف حركات راسها بالموافقة..لوليا غمزات ضرغام لي ناض و ناضت ترف حتى هي تيشوفو فبعض...
فابيين: الحديقة مجهزة و الخدم حطو فيها التحلية ليكم تفضلو لتما
دارو بكلامها و تمشاو بجنب بعض ولكن متباعدين و عاطيين شوية د المسافة بيناتهم مخليين العائلة تيشوفو فيهم بابتسامة و شي تيغمز شي حاسين بلي غيتولد كوبل جديد...
وصلات دواني قدام دار سلافا..دقات جوج دقات و هو يتحل الباب كانت الخدامة بملامح متتبشرش بالخير ابدا...
دواني: كاينة مي سلافا؟
الخادمة: ايه ا لالة كاينة فبيتها
تفضلات دواني داخلة للدار ديريكت لغرفة سلافا لي لقاتها مكمشة فوق ناموسيتها باقة بحوايج البارح...
دواني قربات منها بحذر تترمقها بنضرات متفحصة و تتسنا منها شي ردة فعل خايبة على اكتشافها لحمل بل ولادة بنتها حتى طلعات فيها عينيها بدون نطق ولا كلمة...
دواني بتوتر: م مي سلافا؟؟
سلافا بقات غير مبلوكية متدوي متتكلم عيات معاها دواني تدوي ولكن والو حتى قررات هاد الأخيرة تهبط تستفسر من الخادمة اش واقع...
الخادمة:ماعرفتش ا لالة راه من فاش جابها سي رئال البارح و هي على ديك الحالة حدي ديتها لبيتها صافي
دواني: الله ياربي صبري نصوني داباا عليه نديوها لسبيطار حالتها متتبشرش بالخير
الخادمة حدرات راسها و مشات تكمل شغالاتها بينما دواني صونات على رئال لي كان تيوجد بوالزو هو و رسيل باش الليلة يكونو فسويسرا عند العائلة حتى سمع تيليفونو تيصوني...
رسيل: شكون تيصوني؟
رئال: ماماك
رسيل بلعات ريقها: ج جاوبها
جاوب رئال و عاودات ليه دواني كلشي شاف حتى عيا و قرر يديو سلافا لعند الطبيب كيف قالت..ودع رسيل و بنتهم و هز سوارتو خارج لعندها...
فالليل..فواحد البناية ضخمة و بالضبط فواحد الطابق منها عبارة على استوديو كان الجمهور واجد معمر المكان و الإضاءات جد واضحة و منيرة و المقدم واجد بالبدلة ديالو تيتفحص الميكرو ديالو حتى بدا العد العكسي و الكاميرات تصوبو كاملين جيهتو...
المقدم بالألمانية: سيداتي سادتي مرحبا بكم في حلقة جديدة من برنامجكم مشاهير الأبراج..اليوم ضيوف حلقتنا هوما كوبل اثار الجدل فالسوشل ميديا بل فالعالم كاملو بزواجو المسمى "بالمحرم" فتقاليد و عادات ابراجنا الإثنا عشر تحداو كلشي و قررو يبيينو للكل انه الحب منفصل على اعرافنا ولكن واش هادشي صحيح ولا كاينين اسباب مخفية؟؟رحبو معايا بمستر قوس بنسليمان و زوجته ميسز عذراء بنسليمان...
تمو داخلين عذراء و قوس شادين فيدين بعضياتهم تيبتاسمو باين قداش مواتيين مع بعض هادشي لي خلا وشوشة الجمهور تعلا حيت بالطبع الواحد كيفاش كيبان فالواقع ماشي هو كيفاش تيبان فالمجلات أو الصور..بعد التصفيقات الحارة و الترحيب جلسو فوق فوتوي حدا المقدم...
المقدم: سمعت انه ميسز بنسليمان متتقنش اللغة الألمانية فوجدت الأسئلة و الحوارات كاملين بالإنجليزية باش يسهال الحوار(شاف فالكاميرا) و حتى للناس لي غيتفرجو فهاد الحلقة من بلدان اخرى نظرا لضيوفها مثيري الجدل(بتاسم)
قوس: شكرا على الإستضافة
عذراء تتلعب بأصابعها المتوترة حتى حسات بيد قوس شداتها فيديها تيطمأنها انه كلشي غيدوز على خير بلمستو...
المقدم هز كارت من كارتاتو لي فيهم الأسئلة: تنظن انه خاص نبداو ياك الى سمحتو؟
الجمهور تيصفق بحرارة و تيهتف دليلا على الموافقة متشوقين بزااف لهاد الكوبل كاين فيهم كاع لي جاي من دولة اخرى باش يحضر ليهم على المباشر...
قوس بكل ثقة: تفضل
المقدم: اول حاجة هاد الأسئلة مطروحة من طرف الجمهور ماشي انا ولا طاقم البرنامج فتنتمنى تكونو متفهمين..نبداو بأول سؤال لي هو كيفاش تعرفتي على ميسز عذراء؟...
قوس قبل مايجاوب شبك يدو مع يديها بابتسامة تيسترجع ذكرى زوينة فحياتو: عذراء كانت خدامة فالشركة ديالي الفرع المغربي من بعد اول ظهور ليها فحياتي كان فعرض باريس بواحد الإطلالة حمراء خلاتني نبغي نشوفها فموعد بدون تردد
عذراء مبتسمة بتوتر:(اويلي واش لدابا ماعقلش على اللقاء المدرم و السانسور عند بالو شايفني اول مرة فباريس)
المقدم: موعد جد رومانسي و فمدينة العشاق باريس! كيفاش كانت ردة فعلك ا ميسز و نتي تتلقاي دعوة لموعد مع صاحب الشركة لي خدامة فيها؟
عذراء بحشمة: الصراحة ماكنتش باغية فالاول ولكن تلقيت الدعم من واحد الصديقة هي لي زعماتني و قالت انه مافيها والو بحكم التفكير المحافظ لي تربيت عليه ماسمحش ليا نخرج مع راجل غريب عليا ولكن (بتاسمات) بفضلها قابلت شريك عمري لي كنت تنحلم بيه طول حياتي
قوس باس يديها لي شادها برقة وسط انضار الكل لي كان اغلبيتهم متأثر بهاد الاهتمام الكبيير لي موجهينو هاد الكوبل لبعضياتهم شحال تيبانو كيوووت بهاد الرومانسية...
المقدم: احم ولكن وصلاتنا اخبار من مصادر موثوقة انه فاش كنتي مع مستر بنسليمان كنتي فنفس الوقت مخطوبة لولد عمك
عذراء تبدلو ملامحها و اختفت ابتسامتها: مكانتش خطوبة عن حب! كنت مجبرة و بزز مني لي من برج العذراء فقط غيعرفو خطوبتنا كيفاش تتم مكانش عندي الاختيار ابدا!
المقدم: يس بالفعل ولكن علاش نتي هي الوحيدة لي رفضتي؟علاش نتي الوحيدة لي خرقتي القوانين؟(تيقرا فالكارت)خوتك كاملين و العائلة راضيين بالشركاء ديالهم لي تختارو ليهم الا نتي! شنو السبب لي مخلي عذراء مفتاح سابقا تمرد على العادات و التقاليد!؟
عذراء عقدات حجبانها: حيت مايمكنش ليا نتزوج بواحد متنبغيهش!!! (لمحات خاتم الزواج لي فصبعو) قول ليا نتاا واش مزوج عن حب؟؟؟اولا على الاقل وقعتي فحب زوجتك من بعد الزواج لي دبروه ليكم؟؟؟واش مرتاح معاها فحياتك؟؟أو هي مرتاحة معاك؟؟؟واش تقدر تشوف ليهاا فعينيهاا و قلبك يضرررب؟؟؟!!!
المقدم اندااهش و تلعثم فالكلام: ا نا....
الجمهور فذهول تيتسناو شي جواب من المقدم...
قوس: تنظن لي قالتو مرتي مامتوفرش ا مستر
المقدم بلع ريقو و بابتسامة توتر شاف فالكاميرا: اعزائنا المشاهدين فااصل و نواااصل(تقطع البث و بان الإشهار)
ناض المقدم بلا حتى شي كلمة مستأذن يمشي للحمام و جاو جوج بنات بزي الطاقم هازين قراعي د الماء و شي لعيبات يتأكدو من الميكروات و المايكاب د عذراء واش كلشي هو هاداك...
قوس: ماتاخديش الأمور بعصبية هو ماعليه غير يقدم و يكون الناطق الرسمي للجمهور و الناس لي فالخفاء باغيين يحطمو هاد العلاقة و يبيينو انه زواج التقاليد هو الأفضل
عذراء هزات فيه عينيها بتحدي: غير بلاتي فالبث الجاي غنسالي هادشي حيت بزااااف هاد النظام خصو يتلغااا!!!...
فالمغرب كانت دواني فدار رئال و رسيل شادة حفيدتها بين يديها بعينيها المغرغرين هادي اول حفيدة ليهااا عمرها توقعات تجي من بنتها كانت ديما تتخيل اول حفيد يجي من ولدها الكبير برناس ولكن الاقدار هوما هادو..و هي تتشوف فهاد الوجه الملائكي و تشم فريحتها الناعمة نسات كلشي كأنه هاد البنيتة شي دواء جا يشفي هاد الهموم كاملين لي طاحو دقة وحدة على العائلة فنفس الوقت رسيل واقفة عليها مبتسمة فرحانة بزاف حيت مها على الأقل ماعاتباتهاش ولا لامتها بالعكس فاش جابها رئال بقات غير تسول على صحتها و توريها شنو تاكل باش ترجع صحتها و بقات غير شادة فالحفيدة ماباغياش تطلقها...
دواني هزات فيها راسها: فكراتني فيك فاش ولدتك كنتي اول بنيتة ليا...
رسيل جلسات حداها حاطة يديها على كتفها: و باقة بنيتك ا ماما
دواني بتأثر: ماكنتش باغية غير تجي البنت بهاد الطريقة و صافيي اماا انا عمرني كرهتتك (ببكاء) كيفاش اصلاا غتكره الأم وليداتهااا اهئ
رسيل عنقاتها تتبكي: ماتصوريش قداش رييحتيني فاش عرفتك ماكرهتينيشش اهئ عاد داباا فهمتك و حسييت بييك فاش ولدت بنتي اكيييد مغنخليهااش فاش تكبر تعاود غلطيي مغنخليهااش تخييب ظني و ظن باهاا اهئ
دواني: ختو هي لي خرجات عليه حتى جابها ولدي فصحتو!!
رسيل: ماما حنا هنا باش نساو الماضي و عذراء ماشي بنت خايبة ماتنسايش راه تتبقا لوستي و عمة بنتي خصك تشوفي قداش كانت فرحانة مع قوس لي بفضلو دابا بنتنا مغيحييدوهاش لينا و غيأمن لينا بلاصة لي نعيشو فيها تما بينما لقينا الحل!
دواني غير تتحرك فراسها: المهم نتي دابا نوجدو راسنا باقي تيتسنانا باك حتى هو...
فقصر عائلة بنسليمان كانت ترف جالسة فغرفتها تتبتاسم بوحدها كلما تتفكر الحوار لي دار بينها و بين ضرغام هاد الصباح...
"فلاش باك"
فحديقة قصر قوس كانت ترف جالسة بلباقة فلاطيراس تتاكل فالتحلية و ضرغام جالس قدامها...
ترف حطات الفنجان بابتسامة: تنظن نبداو بالتعارف احسن..احم معاك ترف بنسليمان مايكاب ارتيست معروفة..سويسرية من أصول مغربية و...(بعد ثواني من الصمت) مطلقة
ضرغام بجدية: ضرغام مفتاح..خدام فشركة خاصة بالسيارات مغربي قح و فاسخ خطوبة...
ترف: تنحس براسي بحالة فتعارف سن المراهقة..ماتفهمش غلط ماشي تنصغر من تعارفنا و انما(حذرات راسها بحزن) كونك قدي فالعمر خلاني نحس بهاد التعارف لي تحرمت منو فداك السن باش نكون الزوجة الجاهزة لطليقي..فكرة انني تنتعارف على شاب قدي لي ممكن يكون زوجي مخلية احاسيس قديمة تحيا فيا من جديد
ضرغام: كان فرق العمر بيناتكم كبير لهاد الدرجة؟
ترف: اه..انا 30عام و هو فأوائل الخمسينات
ضرغام هز حاجبو باستغراب: بزااف!!
ترف زييرات على يديها: ولكن عالم الابراج ماعارفش هادشي و حتى واليديا..كنت غير بنت عاد بادية فالحياة حطوها بين السخط و الرضا
ضرغام فهاد اللحظة تفكر تاني كلام مرام فاش قالت ليه انه بزز منها تخطبات ليه و مكانتش باغية حتى علاقة اصلا من الاول!!..: و شنو بخصوص هاد اللقاء؟؟؟ياكما حتى هو بزز؟!!(بتردد) مابغيتش ابداا يتعاود نفس السيناريو و نكون لي غيرتابط بالبنت لي تبزز عليها هادشي!!
ترف طلعات راسها: لا لا مكاين حتاشي بزز هاد المرة بالعكس واليديا خلاوني على راحتي كونما ماماك لي تقدمات و قتارحات هادشي على ماما ماكنتش ابدا دايرة شي زواج فدماغي من بعد سنين من العذاب و الإهانة
ضرغام: بصراحة حتى انا ماكنتش داير ابدا شي زواج فدماغي بعد ديك التجربة الفاشلة...
ترف: و شنو لي خلاك تزعم؟
ضرغام شاف فكاسو و طلع فيها راسو تيشوف فعينيها لي تيتسناو الإجابة: بغيت نشوف هاد المرة البنت لي غنوافق عليها و انا شاب قادر عليها كيفاش غتكون علاقتنا ماشي داك الدري الصغير لي غير عييطو ليه و ربطوه ببنت صغيرة ماعارفين والو...
ترف بتاسمات: حتى انا طول عمري كنت تنتمنا نواعد شاب قدي و نعيشو الحياة على قدنا و قد عقليتنا لقيت راسي وسط حبس لي كبرني بلا وقت..بغيت نعيش لي بقا من حياتي بحيوية ماشي يتفرضو عليا حوايج اكبر من سني فارس احلامي كان ديما داك الشاب لي بحال فلين اللص لي قتاحم البرج لي عايشة فيه الأميرة ريبانزل..بفضلو عرفات الحياة الخارجية و خرجها من داك الحبس رغم انه كانت موفرة ليها امها المزيفة كلشي فالداخل و حارماها من الخارج ولكن الحب و الحياة كانت مفتقرة ليهم و عاشتهم معاه هو فمغامرتهم..كنت بحال ريبانزل عايشة فقصر و كلشي متوفر الا الحياة و الحب...
ضرغام تنهد: ماعارفش هاد القصة ولكن من كلامك وليت عارف مزيان لي بغيتيه
ترف ضحكات بتوتر: هه عارفة يمكن جيتك تندوي بحال شي درية صغيرة عذرني متندويش هاكا الا مع الناس لي قراب ليا قدما البنت تتكبر الا و الطفلة لي عايشة فداخلها متتموتش ولكن انا قتلوها بيديهم...
ضرغام بقا شحال ساكت و نطق بواحد الثقة فعينيه: الى تفاهمنا اكتر غنحييها مرة اخرى!
ترف شافت فيه بعينيها لي لمعو حاطة يديها على فمها: واش بصاح؟؟
ضرغام: اكيد!
ترف بتأثر: عمر شي شخص قال ليا هاد الكلام (بتاسمات فوجهو) فكرتيني فعذراء واخا هكاك تتشابهو شوية هادشي تيبيين التربية الوحيدة لي تلقيتوها من طرف ميسز لوليا
ضرغام: بعد هاد الكلام معاك بديت تنآمن بإختيار الأم لي دوات عليه...
ترف ضحكات بعفوية: هههه هي وافقتي؟
ضرغام حنحن بجدية: احم اه...
ترف مييلات راسها بفرحة: ماتديش عليا غير ماعرفتش منين جاتني هاد الفرحة المفاجئة راه قلت ليك المراهقة المتأخرة
ضرغام بشكل مباشر: انا ماشي شخص تيزوق فالهضرة ولا تيعرف يخبي لي تيحس بيه داكشي علاش غنقول ليك بشكل مباشر انني رتاحيت معاك!
ترف بإعجاب: حتى انااا
ضرغام ناض: هي نوضو نوصلو الموافقة للعائلات حاس بيهم غيخرجو لينا من الزاج
ترف لمحات الريدو من الداخل تحرك باينة كان شي واحد تما واقف مراقبهم و دغيا تخبا: ههه عندك الحق...
عذراء: تنعتاذر على المقاطعة ولكن بغيت نوجه واحد الكلام!
المقدم: تفضلي ا ميسز
عذراء شافت فقوس لي وافق بعينيه و هي تجمع قوتها نايضة قدام الكل لي مافهمو والو...
عذراء: برااكة من هاد الأسئلة راه كلشي وااضح و بااين علاقتي انا و قوس مافيها لا مصلحة ولا مضرة حنا فقط جوج ديال الناس بغاو بعضياتهم وسط من مجتمع متيرحمش حتال امتى غتبقاو مغمضين عينيكم على هاد الحقيقة؟؟؟حتال امتى غتبقاو ساكتيين و راضيين على هاد الظلم!!!
المقدم شاف فالكاميرات بتوتر: احمم ميسز الى كان ممكن تجلسي نكملو الحلقة...
عذراء قاطعاتو: هادي هي الحلقة!!! مايمكنش نكون انا الوحيدة فهاد العالم كاملو لي مابغاتش خطيبها السابق و حاولات تفك منو! غير انا لقيت الشريك لي ضحا على قبلي و تقبلني كيفما انااا اما البقية لااا غير اناا تشجعت و تحدييت عائلتي على قبلوو و صبررت للضررب و الإهانة باش نكون معااه!! صبرت لأفكار عائلتوو و كيفاش كان باه تيكرهنيي!!و على صبري تجازيت بحب عمرو غيتعوض وليت فرحاانة اكتر من اي فرحة فحياتي كلها!!! شنو لي ناقصكم حتى نتوماا تعيشو نفس الحاجة؟؟؟ماداام بنت بسييطة و من طبقة متوسطة بحاالي قدراات توصل لهادشي؟؟ شنوو لي خاصكم نتوماا؟؟؟!!!
الجمهور كانو فحالة صدمة ماتوقعوش ابدا هاد الجرأة كاملها و الصراحة فالكلام اما المقدم قرب يديرهم فحوايجو بحكم انها تتقول كلام لي داخل حتى فسياسة البلداان بحكم انه عادات الابراج و حكمهم شامل العالم كاملوو واش ماخافتش على راسها؟؟ماخافتش ابدا من العواقب؟؟؟...
ناض قوس شد فيديها و وجه انضارو للكل بجدية: حنا ماجيناش مخليين اعمالنا باش نجاوبو على أسئلة صبيانية بحال هادي لي عايش الحب و عارف معناه قادر يشوفو فالناس الخرين داكشي علاش نتوما مامتييقينش هادشي و جاتكم علاقتنا غريبة بل وصلتو تلقبوها بالمحرمة!! ولكن فالأخير تيبقا فاقد الشيء لا يعطيه!
عذراء: كيفما حنا قدرنا نديرو هادشي حتى نتوما قادرين و اكترر ماتبيعوش قلوبكم و مشاعركم على قبل رضا العائلات و الأبراج نتوما بشر بكيان تستاهلو تعيشو فسعادة و تختارو بنفسكم شريك حياتكم مستقبل ولادكم و الاجيال القادمة على رقبتكم نتوما دابا و نتوما بيديكم لي غتسلموهم المشعل لي غينور طريقهم! واش غتكملو على هاد الظلم ولا غيطلع فجر جديد! الإختيار بين يديكم...
شافت فقوس لي فهم قصدها و انساحبو من تما خارجين مخليين الكل فصدمة ماشي غير المقدم و الجمهور و الطاقم بل حتى الناس لخرين لي شاهدو الحلقة على المباشر منهم نواهل لي كانت جالسة فالصالون تتفرج فيهم فالسيت الخاص بالقناة حتى انقالب البرنامج لخطاب عذراء لي تتوجه فيه رسالة واضحة وضوح الشمس لتوقيف نظام الابراج!...
نواهل بدهشة: ماقنعاتش بزواجها فقط باغية تبدل العالم كاملو!!!
برناس لي كان خدام فالبيسي حداها ماعارفش فاش تتفرج: شنو قصدك؟
نواهل: عذراء!! استاضفوهم فواحد البرنامج سويسري و قلباتو كاملوو بكلامها اكيد الحكام مغيسكتووش على هادشي!!
برناس: و نتي شنو بان ليك؟
نواهل: اكيد باين..انا لي طول عمري كنت باغية واحد من برج اخور...
برناس: كيفاش؟
نواهل خرجات عينيها بدهشة عاد عاقت بكلامها لي زلق: و و والوو مهم الله يعاونهم و صافي بايينين عايشيين بيخيير...
برناس بقا تيشوف فيها شحال: نواهل..مافيها باس تعبري على لي تتحسي بيه عمرني غنحسسك فشكل
نواهل بخجل: القضية ماشي هكاك...
برناس: و شنو؟
نواهل: القضية انك متتبادلنيش نفس الشعور داكشي علاش تنفضل نسكت و نخليهم لراسي
برناس حط البيسي و قرب منها حتى هزات فيه عينيها باستغراب..حط يدو على خدها و شفايفو فوق شفايفها حتى طبع قبلة فيهم: اهم حاجة انني تنحس بالراحة بجنبك و انني فوسط الخدمة تنتفكرك و عارف مخلي انسانة فالدار تتسنا فيا غير امتى نرجع و تسولني على نهاري كيف داز و تهتم بيا و باش تنحس نتي لي كنت محتاجاه طول هاد الوقت ا نواهل ياريت كون حليت عينيا من الاول
نواهل غرغرو عينيها: هدا هو الحب حيت حتى انا واقع معايا نفس الشيء غير هو بالزايد...
برناس: الى كان هدا هو الحب الحقيقي فأنا..(شد خصلة من شعرها)معجب بيك بزاف...
نواهل عنقاتو: حتى اناا
فجأة تيليفون برناس بدا تيصوني..بعد من نواهل باستغراب و هزو لقا نمرة ماماه...
حركات ليه راسها بالموافقة و مشات تلوح عليها حوايجها دغيا هادشي غريب بزاف ماتوقعاتش ابدا تم دعوتها لدارهم لي رافضينها زعمة تقبلوها و مستعدين يتقبلو اختلاف برجها عليهم؟؟؟...
فجناح عذراء و قوس بعدما رجعو و رتاحو من ديك المقابلة..كانت عذراء متكية فوق الناموسية بملابس نومها المخملية و قوس جالس فوق الكرسي تيقرا فواحد الكتاب قبل ماينعس...
عذراء تلفتات شافت فيه تضور عينيها بعدما ضورات سيناريو هضرتها فالبرنامج كاملها عاضة شفتهاا بدوك الشوفات د شي وحدة دارت شي موصيبة: بصراحة زدت فيه شوية ياك؟...
قوس هز عينيه من الكتاب: بصراحة..فبرنامج و قدام العالم كلامك كان جريء ولكن فنفس الوقت صحيح سو بالنسبة ليا فمحلو
عذراء جلسات تترد شعرها لي سابقها اللور: مغنمشيش للحبس ياك؟؟(تتشوف فيه بخوف)
قوس حط الكتاب فوق طاولة على جنب و ناض جلس حداها شادها من ذراعيها: و شكون هدا لي غيتجرأ غير يحط يدو على مرتي؟
عذراء بتوتر: ماعرف..فتش حيت القضية فيها الحكام لي عمر شي واحد تجرأ عليهم
قوس حط يدو على حنكها بإطمئنان: ممكن تلقاي الحكام براسهم اغلبيتهم ماراضيينش بهاد الوضع غير ساكتين مكملين على ورث اجدادهم لي لقاو راسهم حالين عينيهم عليه
عذراء: بصاح عندك الحق تنتمنى يشوفو كلامي بشكل ايجابي بحال كيف وصلتو و طرحتو من قلبي ماشي يشوفوه كتمرد ولا عصيان حيت حتى واحد ماعندو الحق ابدا يبزز على لاخور زواج أو مشاعر غير متبادلة!!
قوس باسها فراسها: كلامك كولو تيبيين مدى طيبة قلبكMy love..بغيتي الكل يعيش و يحس بالسعادة لي كتاشفتيها فاش وليتي مع الشخص لي ختاريتيه بنفسك و بغيتيه
عذراء بتاسمات بواحد اللمعة فعينيها: تمامااا
قوس تحنا حتى خدا قبلة من شفاهها: I love you
عذراء بابتسامة: I love you too
فدار عائلة برناس..وصل هاد الأخير هو و نواهل لقا الكل مجموعين تما..و معاهم حتى رسيل و رئال هادشي لي خلاه مستغرب علاش معييطين حتى على ختو و راجلها فهاد الوقت؟؟؟...
اول وحدين هزو عينيهم تيطلعو و يهبطو فنواهل كانو رجاح و رسيل و رئال هوما لي بقاو مزال ماشافوها...
ديالا ناضت مبتسمة بتوتر من هاد الجو الغريب لي جامعهم كاملين فبلاصة وحدة: ختي نواهل لباس عليك اجيو جلسو هنا
نواهل حركات ليها غير راسها اما عينيها دخلو فالأرض حشماانة بزااااف و قلبها غيخرج من بلاصتو بالخوف..جرها برناس بشوية و جلسو فالصالون معاهم...
دواني: المهم مغنطولوش الهضرة كلشي عارف اش واقع و كيفاش الدنيا مقلوبة بيناتنا...
رئال: انا لي بغيتو من هادشي كاملو هو عمي رجاح مايحملش المسؤولية لرسيل حيت انا لي تنتحمل المسؤولية د هادشي!
برناس باستغراب: اينا مسؤولية؟
رسيل ضورات عينيها غارقة فصمتها...
دواني تنهدات: ختك صدقات طول الوقت حاملة و دابا ولدات بنتها...
برناس بصدمة: كيفاااش؟؟؟!!!
رئال: ها لي قلنا! وا علموه من قبل ماشي يتصدم وسط الصلح!!
نواهل استغربت شوف سبحان الله الدنيا قداش دوارة مابغاوهاش و مارضاوش بيها فاش ولدهم بغاها واخا غلط معاها صدقات بنتهم دايرة نفس الفعلة بل اكتر حمل و ولادة!!...
رجاح تنهد: ربي عطاك بنية باش تعرفني باش حسيت فاش عرفت بفعلتكم!!
رئال: عاارف مزيااان و اناا مستعد نربيهااا و نخرجها من هاد العاداات و تختار لي بغاتو فاش تكبرر نتاا عارف كونما التفاهم لي بيني و بين بنتك و قداش تنبغيها ماكنتش ابداا غنستمر معاها واخا خطبوها ليا من الصغر كنت ندير بحال خويا ضرغاام و الجدة غتلقا ليا البديل!! ولكن انا ماتفليتش على بنتك وصلت معاهاا لدوك المواصل حيت تنبغيهاا!!!
رجاح: واش البغيان عندكم نتوماا يا هاد الجيل هو هاداك؟؟؟!!!هادااك راه عندنا حناا العيييب و العاااار!
رئال: مافهمتتش انا فيين المشكللل و انا مزووج بيها؟!ولا دابا عااد عرفتييها ياك ولدك دار نفس الحاجة علاش ماغوتيش و تحاسبتي معاه؟؟
دواني تدخلات: هاد الحوار بان ليا ماغادي لحتاشي صلح برناس اه غلط ولكن البنت ماشي بحال الولد هو سترها و ضمسو القضية...
رئال قاطعها: ااه و انا ولد الحرام رميت بنتكم فالزنقة ولا؟؟؟؟(حط يدو على صدرو) راني مزوج بيهاا مراااتييي و اصلاا مابقات عندكم كلمة عليهااا دابااا جيناا نديرو الصوااب حيت عائلة و مابغييتهاش تبقا تبكي عليا حيت مخاصميين معاهاا بسبب فعلة فالماااضي!!!
برناس عاد استوعب الأمر فاش سمع بما فيه الكفاية: الواليد الى باقي ماراضيش على الوضع قولها باش نمشيو باقي تابعاني خدمتي غدا بكري
رجاح زيير على يدو: انا عارف مزيان انه كلكم تزوجتو و صلحتو اغلاطكم بداك الزواج ولكن صعييب صعييب احساس التربية و السنين كاملة لي سهرنا عليهم يمشيو هكاك!!!
رسيل و اخيرا قدرات تدوي قدامو: ب بابااا عفاك عارفة ماعنديش الحق ندوي معاك بعد لي عرفتيه ولكن على قبل حفييدتك على قبلهااا سمح لياا كنت صغييرة و طاايشة و مافكرتش فالعوااقب تبرمجت على انه رئال راجلي من الصغر هادشي لي عما ليا عينيااا كون ماكانوش هاد العادات كان الأمر غيختالف ماكنتش غنتعلق بييه لديك الدرجة لي تخليني نوصل لداكشي..(غرغرو عينيها) عفااك طيارتنااا قرباات وقتها و مابغيتش نخلي عقلي معااك قلبيي محروووق اهئ اهئ
رجاح سكت و دواني تتشوف فيه و تطلب و ترغب بعينيها: برناس مابقيتي قلتي عليه والو حيت راجل و قد بمرتو ولكن بنتك حتى هي راه تزوجات براجل لي قد بيها هي و بنتها كلنا تنغلطو ا رجاح كلنا درنا اغلاط و ربي سامحنا عليهم شكون نتا باش ماتسامحش وليدات اليوم؟...
دواني بقلق: بنتي نوضي دابا سيري مع راجلك باباك مع الوقت غيولف اهم حاجة انه باقي تيشوفك بنتو باقي معتابرك من دمو و عائلتو نوضي ا بنتي الله يرضي عليك
ديالا و نواهل غير تيشوفو فبعضياتهم...
و اخيرا ناضت رسيل بمساعدة من رئال..مشات دواني جابت الحفيدة لي كانو حاطينها فغرفة تما ناعسة مداتها ليها ماساخياش بيها و رجعات اللور تتشوف فيهم...
رسيل: هادي هي ديم..ديم مفتاح الحفيدة الأولى ديالك ا بابا شوفها و عطيها مباركتك كجد هادشي كافي بالنسبة ليا اهم حاجة عندي ماتكرههاش بسبب فعلة مها...
رجاح بقا شحال ساكت عاد مد يديه بجوج بدون كلمة..قربات منو رسيل مادة ليه الرضيعة حتى شدها كانت ناعسة متل الملاك ماسايقاش مسكينة الخبار للدنيا المقلوبة عليها..كتلة من بيااض و نقاء ماعارفاش شنو هو الكره و الغضب و كاع الأحاسيس الخايبة...
دواني بتاسمات: شحال زوينة ربي يحفظها ليناا
برناس بقا ساهي تيشوف فيها واش هادي هي بنت ختو؟؟هادي هي لي ردات منو خال دابا! هادي هي لي تيعاتبو واليديها على ولادتها؟؟ماشي حشومة بعد الشوفة فهاد الملاك يحملو شي مسؤولية لبعض؟! بعد داك الزواج و كلشي عاد بان ليهم العار؟؟ ولكن لي بقا فيه اكتر هو القدر كيفاش تلعب هو واخا ماضحكش على نواهل و بالعكس سترها ولكن لي دارو لبنت الناس صدق تدار لختو!...
برناس: واخا نهزها حتى انا؟؟
رسيل شافت فيه: اكييد ا خويا اكييد خال واحد لي عندهاا مابغيتش نخسرو حتى هو
برناس طمأنها بعينيه: مغتخسر حتى واحد ابدا ولا لا ا الواليد؟
رجاح لي كان ساهي نقز: ا اه..ربي يحفظها (حدر عينيه) ياريت ماتزادتش بهاد الطريقة
دواني: هكا تكتب ليها تزاد ماعندنا مانقولو
مدها رجاح لبرناس لي ماعرفش ابدا كيفاش يهزها حتى تدخلات نواهل مكالياها بيديها معاه: خ خ خوتي فاش كانو صغار كنت انا لي تنهزهم و ربيتهم حتى كبرو
دواني: داكشي علاش...
برناس بتاسم بدون شعور: ماكرهتش بحالها
نواهل حشمااات و ولات كلها حمرررة ويليي باغيي منهاا وليداات و قايلها قداامهم!!!...
رسيل: حتى اناا بصراحة تواتيتو بزااف نتي و خويا صدق تيعرف يختار بوحدو هه
نواهل حركات ليها راسها بخجل و قبل ماتدور رسيل شافت فرجاح..حدرات عينيها بحزن و تبعات رئال لي ماعاجبوش الحال ابدا جاه رجاح كبر الموضوع بزاااف عكس باه جلوان لي خدا منو الأمر دقائق باش يتقبلو هو و العائلة..ماعارفش ابدا انه مجتمعنا الذكوري متيرحمش ابدا من جهة البنت و تيدعمو و يقدسو الولد...
دواني و ديالا تبعوهم حتال عتبة الباب: طريق السلامة ا بنتي
كانت هادي اول محاولة صلح بطريقة غير مباشرة من طرف هاد الأب لبنتوو بطريقتو الخاصة بلا مايسامحها بشكل كلي و تاني بلا مايقسو على الضحية لي هي الحفيدة مسكينة و بنتو المتهورة ايضا..اكيد مع الوقت غيتقبل بشكل كامل و غيتنسا هادشي باش يكون ذكرى غابرة فالماضي..ركبو فالطونوبيل بعدما ودعوهم و شدو الطريق للمطار فين تتسناهم طائرة قوس الخاصة توصلهم لسويسرا عندهم...
دواني: راها هي الصحفية لي وقفات معاه فاش كان فالسبيطار
رجاح شد راسو: الذاكرة ولات ضعيفة
دواني: شحال فرحت فاش خرجتي من الحالة لي كنتي عليها البارح
رجاح: مع الوقت كلشي غيرجع كيف كان...
دواني تنهدات: جوج وليدات تهنيت فيهم دابا بقات عندي بنية وحدة
ديالا: لي غتخدم ان شاء الله فاش تقرا و تشد ديبلومها انا الزواج مابغيتوش بغيت غير فاش تكبرو ماتخصكم حتى حاجة
دواني بتأثر: دخلي دخليي دابا غنبكيي و انا تنسمع هاد الكلام من بنت 17عام
فنفس الوقت فالطونوبيل د رئال...
رسيل بقلق: علاش ماجبدتيش لا نتا لا ماما موضوع الجدة سلافا قدام لخرين؟؟
رئال صايك و راد البال مع الطريق: حتى نوصلو غنعلم الواليد ديك الساعة هو يتكلف يعلم خوتو و لي بغا ماشفتيش باك كيف دار لينا و نزيدووه موو حتى هي لي اصلا بسببنا تسرطات ليها الهضرة؟؟؟
رسيل حدرات راسها: بصاح عندك الحق....
فلغد ليه...
كانو العائلة مجموعين على النبوري فالصالون مع رئال و رسيل لي وصلو لبارح فليل مزال ولكن دخلو ديريكت للغرفة لي تعطات ليهم حيت كلشي كان ناعس و أجلو لقائهم بالعائلة حتال الصباح...
لوليا هازة الحفيدة بواحد الفرحة: ربي يحفظهاا و ينجييها من كل شرر يااربي شوف الزين د جداه ههه
رسيل حداها تتشوف فيهم بواحد اللمعة فعينيها لي تأثرو و شوية لي بقا ليهم يدمعو: هادشي تيعني ليا بزاف ا خالتي...
لوليا شافت فيها: شنو قصدك؟
رسيل: قصدي معاملتك الزوينة لبنتي من قلبك
لوليا: اويلي اش تتقولي نتي راه حفيدتيي هادي دمي و لحميي من كبييدتيي معلوووم اش كنتي متوقعة متلا؟؟
رسيل شداتها البكية: بسبب ديك الغلطة زعمة(حطات يديها على فمها)
لوليا: صافي ا بنتي ماتبكيش داكشي فات و انا و جلوان دوينا فهادشي بيناتنا اهم حاجة تكونو مزيانين الى جيتي تشوفي راكم مزوجين مابقا عند حد الحق يقول شي حاجة
رسيل: ااه ولكن واليديا بقا فيهم الحال
لوليا: دابا ينساو مع الوقت قدماا تنغلطوو ديما غيسامحوناا ماديريش فبالك و ديها فالصغيورة تشبع و تكبر هدا هو شغلك دابا
رسيل مسحات دموعها: شكرا بزاف على كلامك رييحني
فنفس الوقت على جنب كانو واقفين كل من جلوان و رئال بملامح جدية وسط من حديثهم الخافت...
جلوان: دابا نتا راجع تتقول ليا مي فيها الزهايمر و ديتوها للسبيطار؟؟؟
رئال: ماشي سبيطار مركز خاص بالحالات بحالها ماتخافش ا الواليد وصيت عليها مزيان و غتلقا تما العناية المزيانة
جلوان شد راسو: ولكن عرفتي شنوو هي الواااليدة دياالك تمرض و يبعدوها عليك بهاد الطريقة؟؟؟
رئال تنهد: عارف مزياان ولكن ا الواليد جدة راه كبرات فالعمر بزااف و هادشي قالو الطبيب بلي بزاف د الناس فعمرها عادي يجيهم
جلوان: ماجاهاا حتى عرفات بمصايبنا! ماجاش بوحدو!! مهم خصني ضروري نرجع مايمكنش ليا نبقا هنا و نخليها بوحدهاا و منها نيت نتفاهم مع عمامك حتى هوماا نوصل ليهم هادشي
رئال: واخاا
فالفيلا ديال فابيو و رفيف كانت هاد الأخيرة تتناول وجبة الفطور مع ترف فجو هادئ بيناتهم بعدما ودعها فابيو بقبلة يمشي لخدمتو...
ترف بابتسامة: شكرا على الدعوة ماتوقعتهاش ابدا
رفيف بتاسمات: توقعي الكثير دابا ملي قبلتي تكوني خطيبة خويا
ترف بخجل: م مزال ماخطبني بشكل رسمي
رفيف: ههه ماعمرني توقعتك من النوع لي تيحشم تتبان فيك القوة و الجرأة خصوصا من ملامحك
ترف: عندك الحق خصوصا يكون عندي أب بحال تليد بنسليمان و عارضة سابقة واثقة من نفسها بحال فابيين بنسليمان هههه
رفيف: وي بصاح حتى التربية و الأصول عندهم دور ولكن نتي تاني مادازش عليك القليل
ترف: و هاني واقفة على رجلي رامية الماضي مورايا
رفيف: و المستقبل ضرغاامٌ ههه
ترف: احم واش عييطتي عليا نفطر معاك ولا تبقاي تذكريه كل مرة باش تشوفي ردة فعلي؟
رفيف شبكات صباعها: تيعجبني نشهد على الحب من بداياتو ههه خصووووصا واحد بحال ضرغام ناري مايمكنش وا حجررررة بغيت نشوفو ولو غير مرة وحدة فحياتي تيذوب
ترف ربعات يديها: هي باغية تستغليني فهادشي؟
رفيف: لا لا غير تنضحكو ولكن معاك بصاح بخصوص بغيت نشوفو مطييح كواريه الارض شحال د التعفارر و الحكام دوزها علينا انا و عذراء
ترف: ههه عاودي ليا على أخوتكم انا و قوس عمرنا دابزنا ولا تخاصمنا كانت أخوتنا فالصغر هادئة بحال دابا نيت
رفيف: ناااري مادوزتي لا أخوة لا حتى حاجة الى مادوزتييش الحرووب
ترف بتاسمات: متشوقة لسماع هاد الحروب ههه
بدات رفيف تتعاود ليها على الزبايل و المصايب د الصغر حتال المراهقة و ترف غير تضحك من الطرائف و المواقف عمرها تخييلات غتصادف ناس عفويين بحال هاكا بعيدا على تربية الأغنياء لي تلقاتها هي و قوس فصغرهم..حتى دخل ضرغام لي كان خارج مع النبوري يجري...
ترف رجعات خصلة من شعرها للوراء بخجل: هي غنبدا نزاحم هاد الرياضة
ضرغام ماتوقعش ابدا جوابها يكون هكا..بتاسم ابتسامة خافتة من صراحتها و كيفاش بيينات اهميتها كيف خاص تكون فحياتو كشريكة من الديبار: الى تفاهمنا و كمل كلشي بيناتنا بيخير اكيد غتكوني نتي الأولى...
ترف بلمعة فعينيها: اكييد...
فجأة رجعات رفيف و معاها خادمة هازة الفطور..حطاتو فوق الطبلة و انصارفات...
رفيف جرات كرسي حدا ضرغام: ايوا فطر ا خويا العزيز
ضرغام: كنت مبلاني ندوش هو الاول عاد الفطور
رفيف: ماشي مشكل حسن تاكل هو الاول احم ايوا حكا باقي غادي للمنطقة السياحية لي قلتي لفابيو لبارح بليل عليها؟
ضرغام هز كاس د الماء: ااه علاش؟
رفيف بابتسامة: اش بان ليك تمشيو نتا و ترف غتكون مخالطة اكتر راها بنت هاد البلاد حسن من تمشي بوحدك
رفيف: اكيد ترف احسن من شي GPS ولا لا ا خويا؟(حابسة الضحكة)
ضرغام شاف فترف: الى بغات ماعنديش مشكل
ترف: و واخا امتى؟
ضرغام: غنتغداو تما
رفيف تضحك من التحت و هي عاجبها الحال كيفاش لبقاتها ليه و قدرات تخلق اول موعد غرامي بيناتهم بطريقة غير مباشرة...
فالشركة ديال قوس كان هاد الأخير جالس فالبيرو ديالو تيشوف فالمواعيد ديالو بعدما فاق بكري قبل عذراء لي كانت ناعسة..تسمع الدقان فالباب و تم داخل فابيو بعدما اسمح ليه بالدخول...
فابيو: صباح الخير مستر..شفتي الجرائد و المواقع؟
قوس: مابغيتش نشوف حتى حاجة دابا وقتي اثمن من نضييعو على بحال هاد الأنواع لي مساليين يخلقو اخبار عليا انا و عذراء
فابيو جلس: القضية هاد المرة تذكرو فيها حكام عالم الابراج و نتا عارف مزيان قداش القضية مهمة و شكون هوما
قوس: شكون هوما؟! عائلات كبيرة تعطا ليهم الحكم قرون هادي بقاو متوارثينو و كل قارة عندها حاكمها الخاص و صافي!
فابيو: ميسز ادرا تتعتابر من قارة إفريقيا لي عندها حاكمها الخاص و نتا قارة أوروبا لي عندها حتى هي حاكمها الخاص بيها كيفاش غيتم هادشي؟
قوس: ماعرفتش ا فابيو عذراء جزء مني يعني كيفما غيتعاملو معايا بزز منهم يتعاملو معاها بنفس الطريقة ولا يعطيوها بالتيساع و لا انا ولا هي نادمين على اي كلمة قلناها فداك البرنامج!!
فابيو بلع ريقو: و الى شافو كلامكم كذنب؟
قوس بصرامة: متيهمنيش!
فابيو حدر راسو تيفكر فهاد الموصيبة...
💫💫عالم الأبراج متأسس على شكل طبقات حاكمة..الطبقة الأولى أو العليا تيحتلوها "الحكام" لي هوما عائلات ثقيلة و عريقة لي تاحدو و خلقو هاد العالم من الأول..كل حاكم تيحكم قارة على قدها بحكم الأبراج فقط عاد من بعدهم كاينين "الرؤساء" و لي هوما رؤساء ولا ملوك الدول لي تيحكموهم بالقانون و السياسة (بحال حنا فالواقع) عاد الطبقة الأخيرة لي هوما "المسؤولين" و طبعا اقرب مثال غنعطيه ليكم و غتفهمو بيه مزيان هي الجدة سلافا مهنتها و كيفاش متحكمة فعائلتها على قدها بالتزاوج و الخطوبة ملبية بهادشي حكم الحكام لي فوق منها و نيل رضاهم...(مانحتاجش نقول انه هادشي كاملو من خيالي ماشي واقعي ابدا هه)مهم ندوزو دابا للقصة و نرجعو لقصر قوس نشوفو عذراء و الضيفة لي جات لعندها...
فقصر قوس..كانت عذراء جالسة فصالون اخر من غير لي مجموعين فيه عائلتها و قدامها جالسة بنان حاطة رجل على رجل مضييفاها...
بنان: فاش شفت وجه المقدم كيفاش تبدل عرفت القضية كيفاش حماضت هههه
عذراء: تصحاب ليه بحال دوك المونيكات لي مولف يستاضف و داك البروطوكول الخاوي
بنان: ماعندي مايتسالك كانت جرأة كبيرة رغم الضجة لي خلفاتها
عذراء: عقلي مشوش الصراحة تنتسنا فردة فعل الحكام
بنان: تنتمنى يكون خير
عذراء: ايوا كيف دايرين الامور فالشركة؟؟
بنان: الامور ماشيين بيخير متابعة عروضي برفقة نيار و خدمتو لي نهار على نهار تتزيد تعجبني زائد حملي(حطات يدها على كرشها)متبعة مع طبيبتي الخاصة
بنان: ههه علاه مافخباركش؟ هزوها لا هي لا مها لشي مصحة نفسية فاش ساقو الخبار لخوها لي تحبس تيتداواو تما و متبعين علاج نفسي كمل ليهم سام على فقصة زواج قوس بيك
عذراء: ياربي السلامة هاد الناس لي لباس عليهم قداش قلوبهم هشيشة شحال طلعو و هبطو ولاد الجيران فالحباسات عمرني شفت شي مهوم مهزوزة لشي مصحة
بنان: ايوا ولاد الشعب قلبهم قاصح علاه كونما كنت بنت الشعب حكاتني الوقت مزيان قبل مانوصل لي انا عليه اليوم ماكنتش ابدا غنقد عليهم
عذراء: كان عندي الزهر فاش تلاقيت بيك..ليك الفضل الكبير فكاع لي وصلت ليه
بنان: تستاهلي كل خير كونما شفتك بنت الناس ماكنتش ابدا نضحي على قبلك
ناضت عذراء جلسات حداها معنقاها عناق أخوي حار كان ديما عندها شك فنوايا بنان من جيهتها و خوف كبير تكون تتستغلها ولكن صدق العكس تماما رغم شخصية بنان المعقدة و لي مايلة للشر و الخبث اكتر الا انه عندها جانب زوين كبير مخبياه فقط للناس لي يستاهلوها و لي يستاهلو جنبها و كانت عذراء منهم...
فالمغرب و بعدما تغداو العائلة د برناس مجموعين مع نواهل لي كانت متوترة بيناتهم و خايفة تسمع شي هضرة ماشي هي هاديك ولكن لحد الان معاملينها بشكل عادي...
ديالا بابتسامة: احم الى سالينا غنديك تشوفي بيتي و منها نيت ندويو شوية على الإعلام غتنفعيني بزاف فاش كنتي صحافية
نواهل حركات ليها راسها بابتسامة: واخاا
رجاح: احم تنحاولو نتأقلمو مع الوضع انا و دواني...
برناس: مابزز عليكم حد ا الواليد هادشي..ديجا دويت معاكم...
دواني: لي بغا يقولو باك بلي بغينا نبداو صفحة جديدة و نشوفو البنت من قلبها ماشي برجها
نواهل بتوتر: حتى انا بغيت نزيد نتعرف عليكم و نكونو عائلة وحدة...
دواني: شوية بشوية غنوصلو لهادشي غير زدتي تصادفتي مع مشاكل خرى داكشي علاش
رجاح: هي سكنتو فالدار لي كانت خاوية؟
برناس: اه دابا تفرشات و ولات ديال السكنة
دواني هزات البراد تتكب فأتاي بعدما حطات ديالا الصينية قدامها هي و شي حليوات و فاكية: تبارك الله الدار ولات مفرشة تتشعل و الذوق باين ديال العروسة
نواهل خرجات عينيها بدهشة فاش سمعات ديك العروسة...
برناس بتاسم عاجبو الحال: ااه هي لي ختارت كلشي و فرشاتها على ذوقها تيقولو بلي الدار بمثابة قصر و مملكة للزوجة داكشي علاش مازاحمتهاش فالديكور
رجاح: حنا الرجال ماعندناش الصبر لهادشي الى كاينة غير شي معاونة هز و حط صافي
برناس: ماكرهتش هاد المرة نتوما لي تشرفونا كاملين تزورونا و اكيد غنشوفو مع عائلة نواهل حتى هي تعرفو عليهم حتى هوما فالوقت المناسب
دواني: ان شاء الله يكون خير...
الكل مشغول بحياتو و نهارو ماسايقينش الخبار ابدا للروينة لي خلقاتها عذراء بهضرتها فداك البرنامج و الأثر الكبير لي خلفاتو على المجتمع فجميع بقاع العالم..كلام كان صريح و خارج من القلب ولكن فنفس الوقت جريء و وقح للأيادي لي متحكمة من الفوق..الحكام..بنت بسيطة قدرات بزواجها من شخصية غنية و مرموقة تحط رجليها بيناتهم و تدوي بديك الزعامة كاملها! داك نص ميترو كاملو قدرات تخلق هاد الصداع كاملو!! لي اصلا مزال ماساقت ليه الخبار براسها...
وصلات العشية و الحال بدا تيظلام..وسط من بوابة فيلا فابيو دخلات سيارة ترف لي كانت خارجة هي و ضرغام للمكان السياحي لي قال ليها عليه بعدما دوزو نهار ممتع ماحسوش فيه بالوقت ولا بالغرابة من بعضهم كونهم باقي فمرحلة التعارف بالعكس عمرهم المتطابق عامل اساسي كبير ساعد ففهمهم لبعض..ترف لي تتقلب على الشباب بحالها و ضرغام لي تيقلب على بنت الناس لي تفهمو...
هبطو من الطونوبيل تحت انضار رفيف لي تطل عليهم من البالكون بالجرا فاش سمعات صوت الطونوبيل عرفاتو ماشي فابيو حيت باقي فالخدمة...
ضرغام واقف على ترف بديك القلدة و العضلات و هي قدامو ضامة يديها بابتسامة...
ضرغام: كان نهار زوين شكرا على الترجمة ديالك كانت احسن من نستعمل الإنجليزية ديالي القديمة
ترف مبتسمة: مابيناتناش وقتما بغيتي لي يترجم ليك انا موجودة ههه طبعا حاليا حيت مزال مارجعت لخدمتي
ضرغام بقا ساكت شحال تيفكر و هو ينطق بملامحو الجدية: تنظن هاد الاقتراح مناسب لينا بجوج..نتي مزال مارجعتي لخدمتك يعني عندك وقت فراغ و انا جاي سائح محتاج لشي واحد مترجم و عارف المنطقة...
ترف بقات شحال تتشوف فيه و قلبها تيضرب واش غير دابا بدا تيمهد للقائات مستقبلية بيناتهم بطريقة غير مباشرة؟؟؟...
ضرغام لي لاحظ سكوتها: الى بغيتي طبعا
ترف وافقات بتحريك راسها: موافقة ههه
ضرغام بتاسم جابد تيليفونو: اولا خاص يكون تواصل بيناتنا...
كانت رفيف باقة معلقة الفوق تتبركك بواحد الابتسامة عريضة على شفاهها تتشوف فخوها المتحجر تيتبادل النوامر مع زوجتو المستقبلية بكل طلاقة و أريحية بحال المراهقين شكون قال شي نهار غتشوف هاد الجانب من ضرغام لي كان غير مخبيه تيوريه فقط للأنثى الخاصة بيه و هادشي لي كتاشفاتو بعينيها مع ترف هاد المرأة لي تستاهل كل خير و شي ولد الناس لي يعوضها على العذاب و الضياع لي فات...
فقصر قوس...
و فغرفة رئال و رسيل لي مضورين البنيتة ديالهم بواحد الحب و الحنان...
رسيل: حبيبتي شوف كيف ناعسة ماجايبة للدنيا خبار
رئال شد فيديها: صافي ا حياتي مكاين لي غيقيسك نتي وياها و هادشي أكدو لينا قوس
رسيل: تظن بابا غيقبل بيا من بعد؟
رئال: مع الوقت غينسا راك تتبقاي بنتو بالنسبة ليا مستحيل نتخلا على ديم واخا تدير لي دارتو
رسيل تسندات على كتفو: الله يخليك ليا عمرك تخليتي عليا(غرغرو عينيها)رغم الطيش و كلشي طلعتي راجل معايا و داك رئال لي بغيتو من صغري و حليت عليه عينيا
رئال باس راسها و عنقها ضامها لحضنو: اكيد و غتبقاي ديما ديك الصغيورة لي تحفرات سميتها حدا سميتي عمر هادشي غيتبدل...
فغرفة خرى فالقصر...
كان جلوان جالس فالبالكون و لوليا تتصلي فداخل الغرفة..سالات صلاتها و ناضت لعندو بخطوات بطيئة لقاتو مهموم ماتحرك ماتزعزع حتى فاش جلسات حداه رامقاه بنضراتها المتفحصة...
لوليا: شاغلة ليك بالك ياك...
جلوان بلا مايشوف فيها: صونيت على الخوت(خوتو) واحد بواحد شي مشغول شي غارق حتى واحد ماسايق للدنيا خبار..مهوم لي كبراتهم و ضربات عليهم تمارة بلا ذاكرة فوسط مركز متتعرف فيه حد..واش غيكونو مهليين فيها تما؟ واش الى رجعنا و شافتنا غتعقل علينا؟؟؟كاينة شي أم غتنسا ولادها الى شافتهم قدام عينيها؟؟؟
لوليا شداتو فيديه: انا متفهمة الوضع ديالك و معاك فكاع الهضرة لي قلتيها ولكن دابا حنا فمرحلة حرجة ماجاتش نخليو رسيل و رئال و عذراء لي عاد تزوجات مك هاديك و من حقك تجري داباا لعندها و الى مشطون بزااف رجع و انا غنتكلف بوليداتنا هنا مغنخليهمش بوحدهم خصوصا بعد الروينة لي خرجات من فم عذراء وليت تنقول دابا غيوقف علينا شي واحد و يتحاسب معاها على الكلام لي قالتو
حرك ليها راسو و اكتفى فقط بالصمت حتى هي دارت بحالو و بقات غير بجنبو عارفاه و حافظة طبعو من خبرة سنين طويلة فهاد الزواج يكفي قربها منو احسن من ألف كلمة مواساة لي مغيبدلو حتى حاجة...
اما عند الكوافورة لي كانت تتمشا فالجردة مع قوس وسط الجو الهادئ و الأضواء المشتعلة تلقائيا منورة ديك الحديقة بحال شي قطعة من قصص ديزني الخيالية...
وصلو للأرجوحة المعلقة فأكبر شجرة مزروعة تما و جلسو بجوج...
عذراء: توحشتك بزاف اليوم لي رجعتي للخدمة حسيت بالفراغ واخا عائلتي معايا
قوس بتاسم: حتى انا نهار كاملو تنفكر فيك
عذراء حطات راسها على كتفو سادة عينيها: تنبغييك (بتنهيدة) بفضلك احلامي كاملين تحققو لقيت حب حياتي عشت معاه فسعادة و من الفوق برضى واليديا و عائلتي باقة مامصدقاش و عند بالي انني فحلم..حلم وردي لي عمرني نفيق منو
قوس شد يدها الصغيرة حتى تغلغلات وسط من يدو الضخمة بحنية: هادي حقيقة نسجناها بيدينا تييقيها ولا ياكما بغيتي نقرصك؟
عذراء: ههه لا لا اودي داتي غير على قد الحال
قوس: ماقصدتش داك القريص(قرب منها حتى لامس نيفو نيفها و عضها بشوية فشفاهها مخليها مخرجة فيه عينيها) قصدت هدا
عذراء هزات راسها فالسما المظلمة و لي منورها قمر بنجومو تتفكر فحريرتها زعمة يكون ماوقع والو و غطاو على سيرتها بحال كيف تيديرو فالسياسة؟ ولا الغد ليه مخبي ليها جني ثمار فعلتها؟...
فلغد ليه...
فالوقت لي الكوافورة باقة خامرة و ماجايبة للدنيا خبار الدنيا مقلوووبة فساحة المدينة..كانو قايمين مضاهرااات و اللافتات عالية مكتوب فيها باللغتين الألمانية و الإنجليزية " لا لزواج التقاليد..فل يسقط حكم الأبراج! " و البوليس تيردو فيهم و يمنعوهم من الحركة اكتر..هتافااات و اصوات عاالية صاارخة بحقهاا و متضاامنة مع الأجنبية لي دخلات اراضيهم تحت غطاء صاحب شركة الأزياء المعروفة قوس بنسليمان..البنت لي نطقات بكلام الشباب و بعض الشيوخ لي تزوجوو و عاناووو بسبب هاد الزواج و العادات الفاشلة لي حكمات عليهم بإعدام تحت سقف واحد مع انسان أو انسانة متيكنوش ليهم حتى ذرة مشاعر أو احاسيس..الحب لي شافوه فعينين هاد البنت لداك الرجل و فعينين داك الرجل لديك البنت زاد من شعلة الدفاع عن نفسهم و خرجهم من ظلمتهم و تعاستهم! علاش هوماا يعيشو السعااادة و هوما يتحرمو منها؟؟علاش هوما يعيشو قصة حب أسطورية تختمات بزفاف أسطوري تشييد قدام العائلة و الشخصيات البارزة فمجتمعهم بدون اي مشكلة!!...
سكوت لقرون و حكرة دامت سنوااات حتال هنا و حبس!! حتال فين غيبقاو ساكتين على حقهم الطبيعيي!!حتال فين غيشاهدو بعضياتهم تيتزاوجوو من غرباااء و تيشوفو احبائهم قدام عينيهم تزوجو بغرباء!! الى طاح هاد النظام الديكتاتوري اكيد غادي يحققو هادشي و الأجيال القادمة غيتهرسو سلاسل و قيود مستقبلهم باش يعيشو بكل حرية و يتزوجو لي بغاو!!...
فنفس الوقت فمكان بعيييد فوسط من قصر قدو قداش ضاير بيه سور و حراسة جد جد مشددة بكلاب الحراسة و الباديكاردز...
كانو مجموعين جميع حكام القارات السبع مضورين طاولة اجتماع طوييلة قدامهم شاشة كبييرة تتعرض لقطات من كل بقاع العالم على الروينة و المضاهرات لي نوضاتها الكوافورة بجوج كلماات خااوية لييهم الزيت و ليصانص على العافية لي كانت شاعلة فقلوبهم و غير ساكتين فاش شافو مثال حي طبق حلمهم لي كانت بمثابة النقطة لي فييضات الكاس...
حاكم أمريكا الشمالية: تنقول ليكم بلي هاد الأفارقة تيجيو منهم غير المصايب!! هاهيااا دابا هاد الإفريقية لي حطات رجليها فقارتك دارت مابغااات رونات عالم على قدووو!!!
حاكم اوروبا لي كان شخص هادئ مرزن: اللوم تيبقا على المواطن الأوروبي لي تزوج بيها و دخلها هو لي عطاها السلطة تنطق بداك الكلام بمكانتو لي خدات منها بزواجهم
حاكم أمريكا الجنوبية: تنظن الأمور غتحل غير بالهداوة بنت وحدة وسط من قارات و عالم على قدو اكيد مغتشكل حتى خطر
حاكم أستراليا: اكتر من هدا لي دارت؟؟؟؟
حاكم القطبية الجنوبية و حاكم آسيا غير ساكتين تيسمعو...
حاكم أمريكا الشمالية زيير على قبضتو بغضب: تنظن غيتم اللجوء الى الطرق القديمة و هي اعداامها اماااام الملأ تكون عبرة للآخرين!!!
حاكم أمريكا الجنوبية عقد حجبانو: الأمور متتحلش هاكا ولا نتوما ديما عنيفين! حيت هي أجنبية!!
حاكم أوروبا: الفعلة وقعات فوسط القارة ديالي يعني انا لي غنقرر مصيرها!
الحكام سكتو شي تيشوف فشي منتظرين قرارو لي غيتطبق فحق هاد المتمردة لي باغية تهدم توازن عالم الأبراج لي بناوه اجدادهم قرون هادي...
بعد ساعات قليلة من انتهاء الاجتماع...
فاقت عذراء بعدما سمعات منبه قوس لي ناض فالبلاصة كأنه مبرمج على توقيت عملو اكيد بحالو بحال اي رجل اعمال مقابل شغلو..حلات عينيها مزيان تتحك فيهم و هي تتشوفو نايض بصدرو العاري ماباغيش يفييقها حتى دخل للحمام و سد عليه..تقلبات للجهة الاخرى حتى هزات تيليفونها مكمشة عينيها من الضو د الشاشة ديالو فاش حلاتو..حكاتهم تاني و رجعات تكات على ضهرها تتقرا الرسائل لي وصلوها و اولهم رسالة بنان لي سيفطات ليها غير هاد الصباح..كليكات على الرسالة داخلة للمحادثة بيناتهم حتى لقات فيديوهات كليكات عليهم تتفرج تتسمع غير الغواات و الالمانية لي متتقشبل فيها حتى حاجة يالاه فهمات الانجليزية لي مليوحين كلماتها مرة مرة عاد لمحات اللافتات لي قرات فيهم ديك العبارة..خرجات عينيها بالدهشة لدرجة جلسات مابقاتش متكية تترد فشعرها اللور و يديها تيطابيو لبنان الرد بعدم تصديق..سالا قوس الدوش ديالو الصباحي و داز ديريكت للدريسينغ ماشايفش الزوجة ديالو شعالة العوافي و المضاهرات لي ناضت على النبوري...
لبس ملابس عملو الأنيقة الراقية كيف العادة و تعطر بعطرو الفاخر النادر يالاه تيقاد اكمام قميصو ماحس غير بيها واقفة عليه بداك الشعر المخبل و وجهها لي مزال ماغاسلاه تتوريه التيليفون...
قوس مطلع حجبانو باستغراب: عذراء؟ مالك؟
عذراء بتوتر: ش ش شوف نايضة القيااامة بسبب لي قلتووو
قوس شد من عندها التيليفون حتى تفرج فالفيديو و ردو ليها: توقعت يوقع بحال هادشي حاجة عادية مايمكنش عالم على قدو بعدد البشر لي فيه نكونو غير انا وياك بوحدنا الكوبل لي رافض التقاليد اكيد كاينين الملايين غير حادرين راسهم و ساكتين صابرين على حقهم
عذراء تتبحلق فيه بعينين المساخيط لي داروها قد فمهم و عاد طفات عليهم الشمعة: و و دابا هادشي زوين ولا خايب؟؟
قوس حط يدو على كتيفاتها تيطمأنها: بالنسبة ليا زوين حيت فييقتيهم من الوهم لي كانو عايشينو
عذراء عاد قدرات ترتاح شوية: واخا صبرر نرجع باش نهبط نفطرو بجوج
مشات جرات للحمام شحال كانت حابسة البولة الصباحية غير بالخوف كونما اجابية قوس و كلامو العقلاني كانت غتطلقهم فحوايجها الى قال العكس..غسلات حالتها و قادات شعرها و لبسات كسيوة طويلة صيفية..هبطات معاه بعدما علم الخدم يوجدو ليهم فطور خاص فلاطيراس و جلس فطر مع حبيبة قلبو و زوجتو قبل مايبدا عملو...
من بعد داك الفطور..ناض قوس و هي تابعاه كي شي مشيشة لاصقة فمولاها حتى وقف قدام سيارتو المركونة..ضار لعندها بايس راسها و شفاهها بابتسامة: من بعد الغداء عندي ليك واحد الحاجة
عذراء بتاسمات بحماس: شنو هي؟؟
قوس حط صبعو على نيفها: خصك تصبري
عذراء: واخاا متشوقة لهادشي و بالتوفيق فالخدمة
قربات منو معنقاه تودعو حتى فجأة ماحسو الا بخطوات كتييرة ضورووهم لرجال لابسين بدل عمرهم ماشافوهم بدل تدل على رتب عالية فسلم الأمن و الشرطة...
تقدم جيهتهم رجل من الشارة المميزة لي فكتفو تتبين انه اعلى من البقية حتى حييد نظاراتو السوداء القاتمة...
الرجل بالإنجليزية: ماغادي فين ا مستر بنسليمان نتا و الميسز غتمشيو معانا...
قوس عقد حجبانو و خشا عذراء فيه مضور ذراعو كلها عليها: لفين؟! و كيفاش حتى قدرتو تقتاحموو قصري!!!(بغضب) اش يتصحاب ليكم راااسكم!!!
الرجل جبد ورقة مدها ليه: عندنا تصريح من طرف الجهات العليا..حاكم قارتنا الأوروبية طالب حضورك نتا و الزوجة ديالك و تنظن مانحتاجش نقول السبب
قوس شد الورقة زيير عليها اما عذراء غتموت بالخلعة ناري اليوم غيديوها فين تكلاصاا ايواا ها لي يحل فمووو فبلاد القانوون و الحق...
الرجل: تفضلو معانا السيارة تتسناكم...
قوس: غنمشيو بديالي!
الرجل: لا ا مستر ماعندكش الحق فالإختيار ولا الشروط نتا و زوجتك دابا بين ايادي حاكمنا و مصيرها هو الوحيد لي عارفو
عذراء هزات فيه راسها بعينيها المغرغرين القضية حامضة يا الكوافورة: واش غيحبسووني؟؟؟(شادة فيه)مغتخلاش عليااا يااك؟؟
قوس تيهدنها: ماتخافيش مكاين لي غيقيسك و اي قرار غيقررو انا لي غنتحمل مسؤوليتو مستحيل نخليهم يقربو منك!!!...
شافت فيه بنضرات كلها أمل و ثقة اكيد غتسلم امرها ليه هو لي عمرو خييبها..هز راسو بنضرات متتبشرش بالخير فالرجل و البقية لي دارو ليهم الطريق فين كاينة السيارة لي غيركبو فيها..علم قوس فابيو بلي مغيجيش فميساج و علم كارل انه خارج مع عذراء باش مايتشطنوش عائلتها عليها..ركبو فالسيارة و ديماراو للمجهول...
بعد مدة طويلة من الطريق دازت و عذراء غير مخشية فقوس بالخوف ها زعامتها فين خرجاتها عالله غير مايحبسوهاش ولا شي حاجة..وقفات السيارة قدام بوابة حديدية ضخمة لقصر كبير معزول و خرجو الرجال لي جاو معاهم بقيادة الرجل الأعلى منهم رتبة..حل الشيفور الباب للضيوف المثيرين للجدل حتى هبطو و رافقهم الرجل بوحدو حتال البوابة الداخلية لي كان واقف فيها خادم الحاكم الخاص و المكلف بتسيير تنظيم هاد القصر كولو..حرك ليه الرجل راسو و انساحب بعدما نفد المهمة ديالو...
الخادم بكل رقي: حاكمنا تيتسناكم فالحديقة الملكية الخاصة تفضلو معايا...
رغم فعلة عذراء و نتيجتها الا انه مفروض عليهم يتعاملو معاها هي و قوس بهداوة بحكم مكانتو فالمجتمع اما كون كانت غير عذراء قبل ماتزوج بيه كانت المعاملة اكيد غتكون مختلفة و قاسية كيفما بغا حاكم أمريكا الشمالية لي من هضرتو بيين مدى عنصريتو للأجانب و كيفاش محتقرها كونها إفريقية..خلاصة القول الوجوه خدامة حتى مع لي اعلى منك تيدير بحسابك الى داير بلاصتك فالمجتمع...
داهم الخادم حتال عند حاكم اوروبا لي كان جالس تيحتاسي قهوتو بكل رقي جالس بوحدو فكامل أناقتو..انسان كبير فالعمر ولكن باقي شاد فصحيحتو..دار ليهم اشارة بيديه يجلسو داكشي لي دار قوس و الكوافورة جلسات بزز منها لاصقة فيه...
الحاكم خدا رشفة من فنجانو بشوية عليه حتى رشف و حطو قدامو: يمكن ليك تنصارف دابا...
انصارف الخادم بدون ولا كلمة مخلي الحاكم يتفحص فيهم...
الحاكم: هي نتي ادرا لي خربقات العالم كاملو؟
الكوافورة بلعات ريقها و زادت تخشات فقوس تطل عليه بدوك العينين د مادرت والو...
قوس برزانة و ثقة: مرتي ماخربقات حتى عالم عبرات على رأيها الخاص اما ديك الضجة و الفوضى خلفوها ناس و شعب على قدو!
الحاكم: كنت عارف بلي حبك الأعمى ليها و وقوفك بجنبها و امامها كدرع حامي هو لي خلا داك اللسان عندها يتمادا و تقول امور اكبر منها!
قوس عقد حجبانو: عذراء قالت الحق! ماعرفتش علاش حتى شي حاكم طول هاد السنوات مالاحظش انه كاين شي خلل فالنظام!
الحاكم صغر فيه عينيه: خليك فحدود مكانتك ا مستر بنسليمان!
عذراء بتوتر: و و ز زعمة نتا مامزوجش؟ عمرك تزعطتي فحياتك؟؟(تخبات مورا قوس)
الحاكم عقد حجبانو: انا ماشي هو المقدم لي احرجتيه امام الملأ ا ميسز! انا حاااكم هاد القارة كلها و كلامك ما هو الا وقاحة!!!
قوس: قصدك حقيقة! علاش انزاعجتي من كلامها؟؟
عذراء تتوشوش لقوس: يمكن فكرتو فالحب القديم...
الحاكم لي التاقط كلامها زيير على قبضة يدو: بأشمن حق تدوي عليا كأنك تتعرفيني و كأنني من مستواك!!!
عذراء: ماشي قضية المستوى و انما انا تندوي عليك كإنسان بقلب و أحاسيس و مشاعر..كلامي تيجرد اي واحد من مكانتو حيت فالأخير كلنا تنبقاو بشر غياكلو الدود و اكيد بحال اي بشري غتكون عشتي الحب من قبل أو تتعيشو دابا...
الحاكم تنهد بعمق: شنو لي غتعرفو متمردة بحالك على الحب!
عذراء شافت فقوس و رجعات شافت فيه بجدية: الحب بالنسبة ليا هو السعادة و انني فاش تنكون مع هاد الانسان متنبقا نفكر فحتى حاجة و هاد الدنيا متتبقا تسوا عندي والو!
قوس: يعني نتا و الحكام لخرين حرمتو عالم على قدو من عيش السعادة و حكمتو عليهم بكآبة مدى الحياة قييداتهم بقيود العادات و الإلتزام بها
الحاكم: نتوما ماعارفينش اش تتقولو!!!
عذراء: عارفين مزيااان و كون ماكنااش عارفين كاعما تكون تتشوف النتيجة دابا قدامك! نتا متتشوف الا غضب مكتوم لسنين انفجر كبركان عليكم اما انا كنت فقط ديك الشعلة لي شعلات وسط من ظلامهم حتى شافو النور!! اه انا متمردة تمردت على عائلتي لي ولدوني و صبرت على الضرب و الإهانة و فراقهم باش نكون مع هاد السييد!! علاش؟؟حيت تنبغيه!!
قوس عنقها بذراعو: داكشي علاش مرتي مادارت حتى حاجة خايبة لي غتعاقب عليها و الا غادي تلقاو كاملين غضب اكتر من الشعب حيت مساندينها و تيتمناو بحال علاقتنا
الحاكم بقا ساكت شحال تيفكر فكلامهم بزوج بصراحة كلام قوس منطقي الى مشاو حتى سجنو عذراء ولا دارو ليها شي حاجة الشعب غيزيد فالفوضى و هوما شحال قدهم يقمعو فيهم؟غيجي واحد النهار مغيقدووش عليهم لا هوما لا البوليس لي تيردو فيهم دابا يعني خاص شي حل لي يخليهم يوقفو ولكن الحل الوحيد لي متوفر هو انه يخضعو لرغبتهم و لي هي إسقاط حكم الأبراج و التقاليد!!...
الحاكم زيير على قبضة يدو: الأب ديالي الميت علمني من صغري انني مانبغيش و الحب حاجة تختارعات فقط للترفيه عن حياة الطبقة الأدنى منا..الأهم هو العقل لي غيسيير هاد النظام كاملوو و شريكة الحياة لي لابد منها لإستمرار النسل و السلالة..ولكن...
عذراء لي كانت متبعة معاه: بانت شي وحدة فحياتك و طحتي فيها؟؟
الحاكم شاف فيها: كانت ابنة رئيس حاكم دولة..و ماكانوش أبراجنا متوافقة...
عذراء هبطات حجبانها: و تخليتي عليها و تزوجتي لي موافقاك بحال اي واحد
قوس: يعني نتا براسك عشتي تجربة خايبة مع العادات و رغم هادشي عمرك حاولتي تبدل النظام!!
الحاكم: النظام مايمكنش ليا نبدلو بوحدي ضروري من موافقة الحكام لخرين كاملين و هادشي صعيب بزاف بل مستحيل حيت كل واحد و تفكيرو!...
عذراء: ولكن ماعمرك ما حاولتي و المحاولة احسن من هاد الحالة!
قوس: الى بصاح ندمتي على الماضي ديالك فراه مغتبغيهش يتعاود مع الأجيال القادمة!...
الحاكم: لأول مرة فحياتي نخاف من نتيجة شي حاجة حيت عارف قدااش التغيير غيكون هائل...
عذراء: جرب مغتخسر والو
قوس: بهاكا كلشي غيكون راضي و الفوضى غتوقف
الحاكم: غنفكر فهادشي
عذراء: يعني نتا فصفنا دابا؟؟
الحاكم: غنشوف هو الأول مع حاكم إفريقيا لي ماقدرش يحضر الإجتماع بسبب غضب حاكم أمريكا الشمالية..انا وياه على وفاق كبير زائد تيبقا حاكم القارة لي موجود فيها بلدكم الأصل عاد نشوف مع البقية
قوس: اهم حاجة دابا هي عذراء ماتشافش مذنبة على الأقل غير فأوروبا لي نتا حاكمها
الحاكم: ضامن ليك اوروبا ولكن شي قارة اخرى اكيد لا
عذراء بتاسمات تتشوف فقوس: شكون قال غيصدق ضريف ههه
الحاكم حنحن بجدية: كلشي على قبل الأجيال القادمة
عذراء بابتسامة: كلشي على قبلهم...
و هنا فين بدا حاكم اوروبا اول خطواتو و لي هي يوقف الفوضى فقارتو كلها..عذراء و قوس رجعو لقصرهم فرحانين بهاد التغيير الكبير لي غيشهدو العالم و لي كانت عذراء سبابو..تعقد اجتماع بين الحكام بجوج د اوروبا و إفريقيا و كيفما كان متوقع الحاكم الأوروبي وافق الإفريقي على عرضو و تصافحو موحدين قاراتهم بجوج هاهوا بمحاولتو كسب أول حاكم و دابا هو وياه غيتاحدو يكسبو البقية...
بعد أسبوع من الفوضى و المضاهرات تم عقد اجتماع ثاني شمل كل الحكام و تما فين تطرح إسقاط الحكم و انه مايبقا لا تزاوج بالأبراج لا والو اي واحد كيفما كان عندو الحق يتزوج بلي بغا و اكيد اول معارض كان حاكم أمريكا الشمالية..مايمكنش بعد هاد القرون كاملها نجيو نطييحو حكم عريق شمل العالم كاملو!! ولكن من الجهة الأخرى بعد براهين و حجج الإثنين الأخرين قدرو يقنعو البقية انه الشعب يأتي في المقدمة و الى ماحبسوش هادشي غتوقع موصيبة اكبر و ديك الساعة ماعندهم غير يستسلمو اللهم يكون كلشي منظم و متفق عليه...
وافقو كل من حكام آسيا..القطبية الجنوبية..أمريكا الجنوبية اما الشمالية و أستراليا باقي معاندين فالأخير جرو حاكم أستراليا لجيهتهم بسبب العدد الكبير لي وافق و بقا الأمريكي بوحدو مافاهم والو كيفاش حتى قبلو كاملين بدون اعتراض أو مشاكل هدا راه الهبااال!!...
حاكم أوروبا: نتا الوحيد لي بقيتي و قرارك مغيغيير حتى حاجة من غير قارتك الى مابغيتيش غتحكم على شعبك بالتعاسة و هوما غيحكمو عليك بالهلاك ملي غيشوفو جميع القارات الأخرى في سلام بعد إسقاط الحكم هادي فرصتك الى بغيتي تبان حاكم بمعنى الكلمة و تتبت ليهم شكون لي مسيير القارة لي عايشين فيها حتى الرؤساء وصلوني اخبار بلي نصهم متضامن مع الشعب!
حاكم أمريكا الشمالية مزيير على قبضة يدو: مايمكنش نقبل بهاد السهولة!!
حاكم إفريقيا: نتا تعرف المهم حنا غنتكلفو بقاراتنا...
بعد هاد الإجتماع المهم توقفو جميع المضاهرات و هبطو كل اللافتات بعدما تم الإعلان فالوسائل الإعلامية على خبر قبول الحكام لمطالب شعبهم و إقتناعهم بعدم ضرورة هاد النظام الديكتاتوري..اول وحدة غيطير قلبها بالفرحة لدرجة هبطو دموعها كانت عذراء لي مامصدقاااش انه اضخم حلم حلماتو و لي كان مستحييييييل بالنسبة ليها يتحقق هاهوا تيتحقق قدام عينيها دابا بل بفضلها!!! ابتداءا من اليوم و من الآن فصاعدا مابقاااش التزاااوج بالأبراج و اي واحد يمكن ليه يتزوج لي بغااا!!! عنقات قوس بواحد الفرحة كبييرة حتى هو مبادلهااا فرحتها و ارتاح من واحد الناحية رغم انه مكانش مسوق يكفيه فقط زواجو بعذرائو ولكن مايكونش تاني الواحد أناني صدق زواجهم فتح أبواب لا تعد ولا تحصى لناس خرين لي غيقدرو دابا يعيشو بجنب شركائهم و يتزوجو بأحبائهم بدون صعاب و مشاكل....
بعد أشهر من سقوط حكم العادات و التقاليد بالأبراج...
فالمغرب...
فوسط النهار و الشمس مضوية الدنيا خرجات فإستراحة غذاء عملها بعدما خلات صديقتها المقربة فالصالون..مشات خدات ليها غداها من اقرب سناك ليهم و رجعات و فطريقها دازت من حدا تيليبوتيك لاصقة مع واحد السيبير و بتردد وقفات قدامها كيف العادة حايرة تدخل ولا لا..حتى قررات فالأخير تدخل..سدات عليها فوحدة منهم و هزات بسطامها جبدات الصرف دخلاتو و هنا حانت اللحظة الحاسمة لي غتطابي فيها الرقم...هزات اصبعها لي تيترعد حتى ركباتها و بدات تتسمع طووط طووط و التيليفون تيصوني حتى جاوبات امرأة كبيرة فالعمر غير سمعات صوتها قلبها غيوقف عن خفقانو حاساه غيخرج من بلاصتو...
المرأة: الووو الوووو....شهاد التفلية و التبرهيش؟؟؟شكون معايا؟؟؟
بقات تتسمع لكلامها حتى فالأخير حطات السماعة و خرجات من تما هازة غداها تتمسح عينيها لي غرغرو بالدموع...
مرام: مزال ماراني مستعدة ندوي معاك ا مي..مزال مامستعدة ندوي معاكم بعد هاد الغيبة كلها ولكن اهم حاجة انكم بيخير و حتى انا مرتاحة و أخيرا فحياتي بعدما كنتو مرونينها ليا...
فقدام كلية الصحافة و الإعلام كانو الطلاب شي خارج شي داخل و من بينهم كانت طالبة بشوشة ضاحكة مع صحاباتها لي مضورينها و خالقة اجوائها معاهم..الحيوية تتشع من ابتسامتها البريئة و نضراتها السعيدة مامصدقاش انها محققة حلمها و مكملة فمسيرتها حتى توصل لمهنة احلامها و تقدم البرامج كيف طول عمرها متخييلة..فنفس الوقت كان واقف من بعيد مسند مع الحيط و قدامو موطورو وقتما عندو وقت فراغ فوق الخدمة و الدار تيجي يشوفها و يسقي عويناتو بضحكتها لي عمرو كان سببها ديما تيشوفها ضاحكة بفضل ناس خرين اكيد و هو لي كان ديما تيأديها و معذبها كانت هاديك هي طريقتو فالتعبير عن حبو ليها طريقة مرضية خلاتو يفقدها للأبد...
رامي: باقي عندي أمل يجي النهار لي تسمحي ليا فيه و نرجعو احسن من كيف كنا ولكن مستقبلك أولى...
فواحد الحديقة كانت امرأة شابة ضاحكة تتلعب و تقهقه مع بنوتتها لي تتزعلل و دفع فيها بشوية فنفس الوقت الأب جاي هاز فيدو جوج ديال ليكلاص...
رسيل: شحال تيطيرو ليام غير داك النهار رجعنا للمغرب بعدما تلغا الحكم و قدرنا نفلتو من برج الحمل و تحياد البنت
رئال باسها فراسها و شاف فالبنت لي تضحك بابتسامة: قلت ليك تيقي بيا عمرني غنتخلا عليكم...
فواحد الدار كانت جالسة بكريشتها البارزة من الفستان دليلا على تواجدها فأشهر حملها الأخيرة..بابتسامتها الرقيقة المزينة شفاهها الوردية تطوي فحويجات صغار د البيبي..اي بياسة طواتها تدوز عليها تشمها هو الاول بالفرحة عاد تحطها فالمجر حتى دخل عليها حبيب قلبها...
برناس عنق نواهل من اللور حاط يديه على كريشتها: كيدايرين الأميرات ديالي؟؟
نواهل مبتسمة: لبااس عليناا متشوقة امتى يجيو واليديا عندنااا بعدما تقبلو زوااجنا فاش سقط الحكم ههه اه بعدا على سلامتك كيف داز نهارك فالخدمة؟؟
برناس: لباس دوزتوو و انا غارق فالتفكير فيكم و ليام القلال لي مابقاش ليهم بزاف باش نكونو أب و أم
نواهل: غتكون أحلى أب
برناس باسها فشفاهها بحب: و نتي غتكوني أرق و أجمل أم...
فمركز مرضى الزهايمر كانت جالسة فالحديقة فوق كرسي متحرك تيدي البرد فجلايل كسيوتها اما شعرها مجموع كيف عادتو متيتململش حداها فكرسي الحديقة كانو جالسين جلوان و لوليا لي ديما تيزوروها و يتفقدو احوالها قدرات حالتها تحسن و تعقل عليهم هوما و بعض الأفراد ولكن ماشي ديما...
جلوان: نضورك شوية ا الواليدة هنا؟
سلافا حركات ليه راسها: واخا
ناض جارها و حداه لوليا تيتمشاو بجنب بعض...
لوليا: اهم حاجة صحتها مزيانة اما العقل كلنا غيجي واحد النهار و مغنبقاو عاقلين على حتى حاجة...
فجزيرة لنكاوي المتواجدة بماليزيا..كانت رفيف متكية بكسيوتها الصيفية فوق الرملة لي مفرشة تحتها فوطة تتبرونزا و تشمس مع راسها حداها فابيو لي خدا ليه عطلة بعد الخدمة الكثيرررة المتراكمة يفوج فيها على راسو مع عائلتو الصغيرة..يدو فوق رجليها تيشوف فمايلي لي تتعوم و تخبط بالما عاجبها الحال بداك دوبياس بحال المونيكات...
فابيو مبتسم: شحال فرحانة مايلي بهاد الرحلة..سافرنا انا وياها لبزاف د البلايص ولكن عمرها كانت فرحانة لهاد الدرجة من فاش كانت مها عايشة
رفيف هبطات نضاضرها د الشمس و شافت فيه: غتكون طلقات همها دابا من جهة قضية "زوجة الأب" و تأكدات انه عمر غتاخد شي وحدة بلاصة المرحومة فقلبها و حياتها
فابيو تحنا تيشوف فعينيها بحب: تنحماق عليك و على قلبك لي حليتيه ليها بدون مقابل
رفيف حطات يديها على لحيتو: حتى انا تنحماق عليك نتا و على الفرصة لي تعطات ليا نعيش معاك احسن الأيام عيواض ندب و نبكي على زهري...
تحنا تيقبل فشفاهها بشغف حتى حسو بشي واحد جاي كانت مايلي جاية تتجري و كلها تتقطر بالمااا...
مايلي: نغيب دقيقة نلقاكم مباوسين
رفيف رجعات نضاضرها لعينيها: لي حسدنا يدير بحالنا
مايلي: ياااكي ياك قلتي لياا حتى واحد مايستاهلنيييش و ديك الهضرة
فابيو: ههه اكيد بنتي مغترتابطش بأي واحد و مايستاهلهاش لي كان
مايلي بابتسامة: زيدو رفعو ليا المعنويات ههه...
فسويسرا..و بالضبط فقصر عائلة بنسليمان كانو الواليدين مترأسين طاولة الغذاء و معاهم كل من ترف و ضرغام لي جا خصيصا يدوي معاهم فموضوع مهم...
تليد: شنو هاد الموضوع ا ضرغام؟
ضرغام: جيت ا موسيو نقول ليكم بصفتكم واليدين خطيبتي انني بعد هاد الأشهر لي دوزتهم معاها و لي تتعتابر فترة خطوبتنا قررت فيها قراري الحاسم
ترف هزات فيه عينيها حاطة الفورشيط بإهتمام...
تليد: ايه تفضل
فابيين: تنسمعوك
ضرغام: بغيت نحددو موعد العرس باش نرجع لبلادي الى سمحتو واليديا دويت معاهم و سلمو الأمر ليا ماعندهم حتى مشكل بقيتو نتوما
تليد بتاسم شاف ف فابيين و بنتو لي بدات الفرحة تتلمع فعويناتها باينة دوزات اشهر كلها حب و سعادة معاه...
تليد: اكيد غنقادو يومنا المناسب و فالقريب العاجل اهم حاجة سعادة بنتي و ابتسامتها لي مابقاتش تتفارقها بفضلك
ضرغام بتاسم تيشوف فحبيبتو و وافق بتحريك راسو للأب ديالها شحال مواتيين هاد الجوج لبعضياتهم بجوجهم عاناو و بجوجهم تجاوزو هاد المعاناة بعلاقتهم لي تبنات على قاعدة متينة اساسها التفاهم و الإحترام عاد الحب...
فشركة Bens-Naht كانت بنان جالسة فوسط جلسة تصويرية لغلاف مجلة بكامل أناقتها و بين يديها هازة بيبي صغيور ماشي بزاف باش تزاد حتى هو بكامل أناقتو و ملابسو الكيوت المتناسقة مع ملابسها هي..الكاميرات مصوبين عليهم تيلتاقطو فالصور فواحد الجو كيوت كلشي مضور داك البيبي لي خالق جو فشكل عليهم وسط العمل بحكم ماموالفينش بالوليدات الصغار تما..سالات الجلسة و ناضت هازة وليدها غادية لعند نيار لي كان واقف بحوايجو الغاليين و وجهو المقاد بانووو عليه فلوووس بنان حتى هو اكيد ماحدو خدام معاها بنيتو...
نيار بفرحة: إيلافوووو الصغيييووور
بنان بحذر: بشوية و نتاا غتاكلو زيد زيد غنموت بالجووع و باقي تابعني نرضعو
نيار غادي معاها كولو تيتعوج: وا صبري غير نشوفو التصاور لي دارو ليكم
بنان: وا غنمووت بالجوووع خليهممم
سبقاتو هازة ولدها لي حطاتو فلابوسيت ديالو جاراه و تبعها للكافيتيريا تاكل شي حاجة...
فقصر قوس كانت جالسة عذراء فواحد القاعة كبيرة فوق مقعد و قدامها امرأة مغربية باينة عليها أستاذة هازة فيتر تتكتب فالسبورة...
الأستاذة: المستر تيهمو أمرك بزاف ا ميسز باغيك تكوني واعية بالأمور و حتى واحد مايديرها بيك حيت مايمكنش يكون ديما معاك تيترجم ليك
عذراء: وا عررفت ولكن راهااا صعيييبة بغيت نعرف غير كيفاااش تعلمتي ليها نتيي!؟
الأستاذة: تعلمتها عن حب حيت بغيت نتعلمها اما نتي ا ميسز تتباني مبززة عليك و هادشي غيزيد يصعب الأمور
عذراء تنهدات: الله ياربي تصبرني مغنتعلم ليها حتى نشرف....
⌛بعد سنتين...⌛
و فقاعة الحفلات المتواجدة بشركة Bens-Naht اليوم مجموعين فيها الكل مع شخصيات مرموقة كتيييرة من عالم الأزياء و الموضة احتفالا بالثلاث سنوات لي كملاتها شركة The Virgo للمواد و المساحيق التجميلية الخاصة بعذراء هاد الأخيرة لي كانت فقمة الرقي و الجمال لابسة أحدث الفساتين و اندر المجوهرات بجنبها الجنتلمان لي داير ليها القيمة و حاطها فينما مشا حداه مثل جوهرة نادرة بكامل أناقتو الرجولية هاز بيد وحدة طفل فعمر السنة لابس كومبلي صغيور بحالو و بعويناتو الرماديين بحال د باه تيشوف فالحضور و الدنيا كيف عامرة..تسمعات الموسيقى لي تتعلن على الرقصة و هو يشوف فيها بابتسامة فهمات معناها..عييطات على امها بين الحضور حتى عطاتها الطفل و شدات فقوس حتى دخلو للوسط تيرقصو على أنغام الموسيقى و إيقاعها العذب مامسوقينش لحتى واحد كأنهم بوحدهم لي عايشين تما...
قوس بالألمانية: عيناك قطع أوراق ربيع قطف من الحدائق ليزيين أرجاء قصري
عذراء بالألمانية: لمستك درع حام يدفعني للأمام (شافت فولدهم من بعيد) و بفضلك أنجبت نائلا بعدما حصلت على أهدافي...(سمية ولدهم "نائل" و معناه الشخص الذي يحصل على أهدافه هكاك سماتو عذراء فاش تحققو احلامها و اهدافها كاملين✨)
💜💜النــــــــــــــــــهايــــــــــــــة💜💜
للكاتبة✒️: Victoria kaelin
قصة رضيعة ربط قدرها بالشخص الغلط كبرت و هي حالمة تنتظر المعجزة التي ستغيير قدرها الملعون و قد وصلتها على هيئة رجل أحبها و كان النور عندما انطفأت وسط الظلام و كان المنقذ عندما كانت الغريقة...
تصنيف القصة
يرجى إختيار التصنيفات اللي يمكن يوصفو هاد القصة، التصنيفات كاتساعد بشكل كبير فتقسيم القصص وحتى لي كايقلب على قصة من نوع معين كايلقاها بسرعة.. (يمكن اختيار أكثر من تصنيف)
عذراء وقوس الجزء 20 والأخير
محتوى القصة
التنقل بين الأجزاء