هبطات عذراء لمقر عملها و لايحة كاع داك الكلام لي سمعاتو مورا ضهرها ميمكنش لوحدة بحال هاديك تزعزع عرش تقتها بنفسها..لقات نيار تما و حتى سديم معاه...
عذراء:نيار كيف بقيتي دابا لباس؟
نيار:وي لباس شكرا
عذراء:تشوشنا عليك اخويا
نيار:ربي خليك ازين
سديم:عذراء فين كنتي شحال تسنيناك
عذراء:والو كنت فالطواليت راك عارفة
سديم:اه وي المهم راه شيارا بغات تجمعنا مع العارضات لي غنقادو ليهوم فعرض باريس
عذراء حطات صاكها فبلاصتو:اوكي
ناضو بتلاتة و خرجو تيتسناو على برا حتى خرجات شيارا تبعوها كاملين حتى دخلو لقسم العارضات و فواحد القاعة كبيرة تما كانو مجموعين لي ميكاب ارتيستس كاملين د الشركة و بزاف ديال العارضات...
شيارا كانت هازة طابليت فيديها و موراها واحد الطابلو كبير فيه صور العارضات:كل واحد عندو 3 العارضات لي غيقاد ليهوم غنعييط على كل ميكاب ارتيست و من موراه 3 الأسماء ديال العارضات لي غادي يقاد ليهوم و يجيو يقفو حداه ولا حداها اوكي؟
الكل حرك ليها راسو و تمات العملية لي ستغرقات نص ساعة غير باش يتستف كلشي...
شيارا:صافي كلشي مزيان فالأوراق و كلشي كاينين أسمائكم حدا اسماء العارضات باش ملي نمشيو كلشي يكون مرتب و بالنسبة ل اللوك و كلشي غادي تعرفوه فالنهار لي غنهبطو لتما يعني قبل العرض...و دابا يمكن ليكوم تفضلو توجدو لي باقي خصو يوجد و تنعطيكوم هاد الأيام كراحة استعدادا ل السفر و العرض باش كلشي يكون مستعد نفسيا و جسديا..يمكن ليكوم تفضلو...
خرجو كاملين من تما و عذراء فرحانة حيت غادي تقدر ترتاح و توجد على خاطرها..اول حاجة دارتها مشات جبدات ديك الباليزة الخاصة بالمايكاب ارتيستس قادات كاع لي غتحتاجو و تأكدات و عاودات تفحصات كلشي..سداتها و حطاتها فبلاصتها و هزات صاكها جبدات منو التيلي ديالها...
عذراء:الو رواء
رواء بشوية:اش كاين ا لموصيبة راني خدامة
عذراء:جوايه ديك 6 دوزي عندي ل الدار عفاك و جيبي ليا معاك ديك الباليزة الصغيرة ديالك
رواء:اويلي ا بنت الحرام صافي غاديريها مزال؟
عذراء:وايه راني داوية من نييتي(دخلات فالسانسور)المهم دوزي عندي ل الدار فديك الوقيتة واخا؟؟
رواء:واخا الله يحدر معاك السلامة
عذراء:و متنسايش الباليزة
رواء:اوكي اوكي
قطعات عذراء و خرجات باش تشد الطاكسي ترجع لدارهوم نيت وقت الغدا هادي...
عند قوس لي كان سالا الخدمة ديالو عاد هز التيلي ديالو و هو يلمح الفيستة لي باقة مطوية محطوطة و ريحة التيد عاطية...
هزها و هي طيح منها ورقة صغيرة مقطوعة من الدفتر مكتوبة فيها "Thank You" كمشها و لاحها فوق المكتب جات طايحة فالداخل ديال لي تيتحطو فيه الستيلوات..شاف فالفيستة لقاها مبقاتش بديك الجودة لي كانت عليها و حتى اللون بهات شوية و هو يحطها و عييط على السكريتيرة لي جات طايرة...
السكريتيرة:وي مستر؟
قوس:هزي عليا هادشي و لوحيه
السكريتيرة:فين نلوحو مستر؟
قوس:فينما بغيتي ممساليش دابا
خرج عاقد حجبانو عندو موعد تيتسناه و ممساليش ل التفاصيل الخاوية...اما السكريتيرة قربات حتى هزات الفيستة قهراتها ريحة التيد..خدات السانسور و حطاتها فالمكان المخصص بالحوايج ديال المصممين لي تقطعو ولا وقعات ليهوم شي حاجة و سدات عليها تما...
فالمكتب ديال رئيس التحرير كان برناس جالس شاد قهوة كحلة و فيديه فيتر حمر تيدير بيه علامات و دوائر فواحد الجريدة حتى دخلات عليه الصحفية نواهل...
نواهل:موسيو عندي ليك اخبار
برناس طلع راسو:وي نواهل؟
نواهل هازة ملف:توصلت من الصحفي ثابت انه العرض السنوي ديال باريس غادي تمشي ليه شركة Bens-Naht حتى هاد العام
برناس:ولكن حنا ميمكنش لينا نمشيو
نواهل:وي عارفة ولكن غادي نربط اتصال مع واحد المجلة فرنسية غادي تقدر تمدني واحد الصديقة ديالي صحفية فيها بالمعلومات
برناس:مزيان غادي نحطوهوم فالجانب الخاص بالموضة فالجريدة
نواهل:اوكي موسيو
برناس:يمكن ليك تفضلي
خرجات نواهل و فنفس الوقت برناس عاد تفكر واحد الحاجة...
برناس:عذراء!!
جبد التيلي ديالو و صونا عليها...
كانت عذراء عاد تغدات و يالاه تكات فوق ناموسييتها باش تفرج ليها فالحلقة ديال واحد الأنيم حتى تيصوني عليها برناس كمشات تعابير وجهها بشنو بغا هدا و جاوباتو باستغراب...
عذراء:الو؟؟
برناس:لباس عليك؟
عذراء:وي الحمد الله ياكما واقعة شي حاجة؟؟
برناس:لا كلشي هو هداك غير بغيت نسولك غتكوني سمعتي بعرض باريس فالخدمة ياكي؟
برناس:وي عارف واش مستحيل تمشي بغيت غير نطمأن من هاد القضية و صافي
عذراء:لا غير كون هاني
برناس:اوكي نخليك دابا طهلاي فراسك
عذراء:حتى نتا
قطعات عليه وقلبها كان تيضرب نسات كاع انه برناس ممكن يعرف بالتفاصيل ديال هادشي ولكن نفضات الافكار السلبية باش ميأثروش على نفسييتها...
داز الوقت و وصلات الوقيتة لي دارت فيها عذراء مع رواء لي جات ضاربة الجلابة تستر قدام عائلة الكوافورة...عذراء سمعاتها دخلات و هي طلعها ديريكت لبيتها...
عذراء:شكون حل ليك؟
رواء:ماماك لي بانت ليا شفتك اليوم كاينة فالدار بكري
عذراء:راه عطاوني هاد ليامات روبو باش نوجدو ل التسافيرة جبتي الباليزة..مزياان
رواء:قولي ليا شنو غتدي بعدا تلبسيه تما؟
عذراء:غندي جوج بيجامات حيت غنبقا تما غير يوماين و الكيلوطات و السوتيانات ضروري اصلا ايوا و شنو مزال بعدا الجاكيت غنلبسها من هنا ممكن يكون تما بارد على المغرب ايوا و شنو مزال امم....
ناضت عذراء حتى وصلات رواء على برا ودعاتها و رجعات لبيتها...
طاح الظلام و وصل الليل و عائلة عذراء تعشات و كل واحد دخل لفراشو و فالغرفة ديال واليدين عذراء يالاه جلس جلوان باش يتكا فوق الناموسية و هي تدخل عليه لوليا...
لوليا:ياودي فهمني راه غير ايامات و ترجع البنت تحضر لفرحة صاحبتها نسيتي شحال دوزات عندنا رواء فاش درنا الخطبة ديال عذراء و شحال عاونات مسيكينة
جلوان:اممم عقلت ولكن شحال غتبقا تما؟؟
لوليا:ديك 3 ايام 4 ايام
جلوان:علاه ماشي بزاف ا لوليا؟؟
لوليا:منخصروش ليها خاطرها ايوا عفاك قليل فاش تنطلبك
جلوان شاف حتى عيا:واخا ا لالة واخا
لوليا فرحات جلسات حداه و باستو فراسو:الله يخليك ليا
جلوان تيشوف فالأرض و تيخمم:امين..امين..
دازو ليام و عذراء وجدات الباليزة لي غتمشي بيها و عطاتها ل رواء هي و الباليزة ديال المكياج داتهوم لدارهوم باش ميعيقوش بيها..من بعد مشات خدات الباسبور ديالها لي خرج و وجدات كاع وراقها فبسطامها لكارط بونكيغ..الكارط ناسيونال..و الباسبور كلشي هو هداك و فرحتها كبيرة حيت خطتها نجحات و قدرات لوليا تقنع باها باش تمشي...
💥💥اليوم الموعود💥💥
فاقت عذراء بكريييي وجدات راسها و هبطات فطرات مع عائلتها..و كل واحد مشا لخدمتو من غير رفيف...
لوليا قلبها تيضرب:بنتي تنتمنى تمشي و ترجعي على خير الى وصلتي صوني علينا عفاك
عذراء:اكيد ا ماما متخافيش
رفيف عنقاتها:متخافيش ركزي فخدمتك حنا هنا و غنتكلفو
عذراء تأثرات اول مرة تفارق دارهوم:سمحو ليا بزااف ولكن هادشي لي جابتو الوقت
تعانقو عناق حار و تفارقو متوادعين...خرجات عذراء هازة الصاك ديالها فيديها و قلبها تيضرب و خطواتها فتسارع حتى بدات تتجري باغة توصل دغيا لعند رواء...بعد مدة ديال الطريق ماشي طويلة بزاف هاهيا واقفة قدام دار رواء تتلهث و تدق...
رواء حلات ليها و جبدات الباليزات حطاتهوم قدام الباب...
رواء:الموصيبة تنتمنا هادشي يدوز على خير
عذراء عنقاتها:شكرا بزااف
رواء مزييرة عليها:سيري ا عذراء و مضوريش حققي الحلم ديالك
عذراء:اكيد اصاحبتي اكييد
تعانقو و تسالمو و مشات عذراء شدات الطاكسي لي غتديها للمطار تما فين تتسنا فيها شيارا...
بعد مدة من الطريق الطاكسي وقفات قدام المطار خلصاتو و هبطات جارة بوالزها و فكتفها معلق صاكها..حتى دخلات لقات شيارا واقفة و معاها لي ميكاب ارتيستس لخرين بلبوالز ديالهوم و كلشي...
شيارا شافت لاليست:تنضن كلشي حاضر دابا..تبعوني
تبعوها داخلين و الناس غاديين جايين شي عاد حطاتو الطيارة و هابط لبلادو و شي تيتسنا يمتا غير توصل الرحلة ديالو و الناس انواع و اشكال و من مختلف الجنسيات غير اغلبيتهوم بطبيعة الحاال مغاربة..وقفو قدام البلاصة فين تتكون المراقبة و غاديين واحد تابع لاخور..تيحطو هو الاول بوالزهوم تيدوزو عاد تيجبدو واحد الصفيحة تيديرو فيها الأغراض لخرين و بالخصوص الالكترونيات و اي حاجة تقدر تصوني و كانو واقفين جوج راجل و امرأة هوما لي مكلفين بالتقلاب عن طريق اللمس وصلات نوبة الكوافورة لي تعلمات غير من لي دازو قبل منها حطات ليهوم بوالزها و صاكها دازو فاش بغات دوز هي صونات الالة كاع لي كانو تما واش شافو فيها..جات عندها المرأة و بدات تتقلب فيها و هي تلقا عندها واحد درهم غملات بالما و التصبين لاصقة فجيبها ملبسات هاد السروال من شحال هادي..دوزوها تاني فالالة و مصوناتش و تأكدو انه الدرهم الغاملة هي السبب عطاتها ليها المرأة و دازت هازة باكاجها و شيارا تتحرك راسهاا ب لا حول...حتى سالاو جميع الاجرائات ديالهوم و دفعو الباكاج ديالهوم و جلسو تيتسناو امتى غيطلعو ل الطيارة...
دازت شي ساعة تيتسناو تما عاد قدرو يطلعو ل الطيارة كانت تما واقفة المضيفة تترحب بيهوم مبتسمة...
عذراء:نيار فين غتجلس؟؟
نيار جبد لبيي ديالو:انا فهاد المقعد و نتي؟
عذراء شافت رقمها صدق جالس حداها:حداك
نيار دخل بغا يجلس و هي تسبقو:بغيت نجلس حدا الشرجم
نيار دار ليها خاطرها و جلس الوسط...أما سديم كانت جالسة فالصف الأمامي...الكل جلسو..الطيارة كانت صغيرة شوية و كاع لي فيها هوما لي مايكاب ارتيستس ديال شركة قوس و المسؤولة عليهوم شيارا و بطبيعة الحال المضيفات و المضيفين...
من بعدما كلشي تقاد و وراتهوم المضيفة اهمية حزام الأمان و كيفاش تيتقاد و كيفاش تتدار كمامة الأكسجين..الجاكيتات الخاصة...دازت تتأكد من الأحزمة واش مقادة حتى سالات و دازو دقائق و بدات الطائرة تتستاعد ل الصعود...
فالوقت لي كانت الطيارة غادة مكسيرية باش طلع الكوافورة حيت كانت فجهة مؤخرة الطائرة بدات تتهزهز بحالا راكبة ف عود مفهمات حتى وزة حدها خرجات عينيها تتبلع ريقها و بلا متحس نزلات على نيار لي كان تيقرا الموني ديال الطائرة قفزاتو محس غير بشدة مزييرة...
نيار:اويلي مالك!!
عذراء تتبلع ريقها:الطيارة تهزاات تهزااات
ضارت شافت دغيااا فالشرجم بدات تتبان ليها الطيارة طالعة و غادة تتبعد على الأرض بلعات تاني ريقها مخرجة عينيها و قلبها تيضرب تيضرب غيخرج من بلاصتو عاد ستوعبات انه كلشي بصاح و اييه هاهيا خوات البلاد كاع ماشي غير المدينة...
نيار بقا تيشوف حتى عيا فيديه المشدودة و هو يمييك خلاها هاد السييد واخا بعكاك الا انه بشي طريقة ربانية تيتفهم الكوافورة فبحال هاد المواقف...من بعد دقائق ديال تخراج العينين و استيعاب الوضع عاد رخات يديها من يدو و فرشات رجليها حتى قاصت رجلين لي قدامها عاد جمعاتهوم تاني نسات راسها يتصحاب ليها بحال الطونوبيل..جمعات يديها عندها و قلبات نصف جسمها لعند الشرجم تتراقب الغيوم البيضاء كيفاش تيبانو بحال غزل البنات الأبيض..بتاسمات حيت المنضر عجبها بزااف و الديور و الأراضي بداو تيبانو ليها بحال كيفما فالخريطة ديال الجغرافيا..بقات ساهية فالمنضر و مستمتعة محسات براسها غير حتى داتها عينيها بديك الوضعية...
فالطائرة الخاصة برجال الأعمال كان قوس جالس كيف العادة بوحدو هاد السييد تيميل للعزلة و عزيز عليه يعطي وقت كبير لنفسو مع راسو ممسوقش للبشار لي ضاير حداه يكونو رجال اعمال ولا لي كانو..شاف فالساعة اليدوية الفاخرة ديالو باقي الحال عاد دازت ساعة على اقلاع الطائرة و باقي سويعة خرى و شي حاجة باش يوصل فالوقت قرر انه يرتاح لديك الوقيتة...
من بعد مدة ديال الطريق بداو تيدوزو المضيفات بالأكل لي بغا شي حاجة تيعطيوها ليه غير هو الحساب على الشركة ماشي الخدامين(لميكاب ارتيستس) لي ناعس راه ناعس و لي فايق راه ضروري طلب ليه شي حاجة فاش قربات تجي المضيفة جيهة نيار شاف فالكوافورة بانت ليه ناعسة بحال المسكينة و مبغاش يفييقها فقرر ياخد ليها معاه عارفها غيضرها الجوع الى فاقت..تقدمات عندو المضيفة بابتسامتها الجميلة حتى طلب منها شنو بغا بالفرنسية..خدا سندويتش بارد ديال الدجاج مع مشروب غازي و نفس الحاجة لي خدا ليه خدا لعذراء..جبد ديك الصفيحة لي تتكون قدام ضهر الكرسي لي قبالتو و حط فيها الماكلة و بدا تياكل ليه و مرة مرة يضرب طليلة على الكوافورة واش باقة عايشة حتى بدات تتحك عينيها...
عذراء عينيها حمرين مناعساش مزيان:فين انا؟؟
نيار دوز الدغمة:بسم الله عليك الطيارة
تقادات تتمسح وجهها بيديها و تقاد فشعرها المطلوق..هزات عينيها فيه باقة دايخة بالنعاس:تتاكل؟
نيار:لا تنشطح نوضي غسلي وجهك و يديك و اجي تاكلي توگضي لتدخلي للعرض خامرة بالنعاس!
عذراء:واش هادو ديالي؟؟
نيار:و ديالمن مالي غنضرب هادشي بوحدي
عذراء شافت فيه ديك الشوفة ديال ممصدقاش:متصورتش يحن فيا شي واحد متنعرفوش شفتي نتا قلال بحالك و الله
نيار عض فخبزو:تتقطعي القلب
هزات عذراء السندويتش و بدات تاكل فيه و دوز بالمونادة تدوي و فمها عامر شي فهمو نيار شي مفهموش المهم ضربات داك السندويش و غرغات ديك الموناضة حتى شبعات عاد بدات تتحس بالبولة...
عذراء:واهيا ناري غيخصني نحبسها حتى نوصلو
نيار:راه كاينة الطواليت فالبلاصة لي دخلنا منها نيت فين كانت واقفة المضيفة فاش ستقبلاتنا
عذراء:وايلي! و زعمة فين غيكون تيخرج داكشي لي تنديرو؟؟اويلي غيطلق هاكا مع السما؟؟
نيار حط الموناضة و شد وجهو:نوضي الى غتخراي خرااي و متفرعيش ليا *ري!!
حييدات عذراء الحزام من خصرها و ناضت غادة فداك الممر لي كان مزيير شوية و الطيارة تتحرك تضطر باش تشد فشي كرسي باش تشد توازنها حتى دخلات ل الطواليت و سدات عليها...
بعدما قضات حاجتها و نقات راسها طلعات حوايجها و بدات تتقلب فين الزر ديال لاشاس حتى بان ليها فالحيط ضغطات عليه و هي تقفز مخلوعة بسبب قوة صوت الشفط ديالو حطات يديها على قلبها حيت متوقعاتش ديك القوة و تقابلات مع المرايا تتغسل فيديها و وجهها حتى سالات نشفات بالبابيي تما و خرجات تاني دازت من ديك الطوالة حتى جلسات...
نيار:علاش ضاربة داك الطريق كاملو و الطواليت غير حدانا هنا
عذراء:المهم انا غنسد عينيا شوية تاني حتى نقربو نوصلو
نيار:راه مبقا والو توگضي غتفيقي خاسرة تاني
جبدات عذراء تيليفونها من الصاك شدات الويفي و هوما يطلعو ليها ليزابيل ديال رفيف و حتى لوليا تخلعات خلات ليهوم ميساج فيه انها بيخير و دخلات للفايس تتشوف بوسطات و ها طرولات مرة ضحك مرة تحبسها حتى تسمعات انه قربو يوصلو و بداو يضويو الأزرار ديال الحزام..ضورات عليها الحزام ديالها و زييرات عليه شوية و فلداخل ديالها تدعي..شوية الطيارة بدات تتهبط شوية بشوية حتى بداو الركاب تيحسو بهاد الهبوط و هنا كرش الكوافورة بدات تتمخض و جاها داك الاحساس ديال الطلعة فاش تتحسي بكرشك طالعة هابطة هه و من موراه جا الاحساس المشهور نعم انها التقية...نيار حداها عرفها غتبدا تقية خرج فيها عينيه و بزربة بزربة حط يديه على فمها باش متقياش المشكلة مكاينش حتى الوقت فين تنوض حيت الطيارة تتهبط و خص كلشي يلصق فبلاصتو...هي بقات مخرجة فيه عينيها غتقيا و مبغاتش دوزها و هو تيزيير عليها متندافعش و ترون الدنيا و بسرعة ميتفكر غير الطاگية لي جاب معاه على حساب البرد الى كان تما جبدها دغيا من صاكو و عطاها ليها هي فاش فرغات كاع داكشي لي كلات و الناس مستغربين منين جاي صوت التقية حتى سالات و فرغات على خاطرها لاح ليها كلينيكس تما و عينيه على الطويگية بقات فيه تتعطعط بالتقية...مسحات فمها ولاحت الكلينيكس فوسط التقية فداخل الطاگية...
نيار:وكلت عليك الله!!!!
الطيارة بدات تتهبط حتى هبطات و بدات تتمشا بسرعة فوق الشانطي الخاص ليها فالمطار و هنا كاع الركاب بداو تيصفقو حيت البيلوط هبطهوم بطريقة احترافية ماشي مهزهزة...الكوافورة سمعات التصفاق و هي تبدا تحرك فراسها مستغربة:مال هادو؟؟؟
نيار معصب:تيصفقو ليك حيت تقييتي نوضي من تما الله ينعل حسك
عذراء:و ا مالك نصبنها ليك الى بغيتي
نيار:نيشان الطارو!!!
الطيارة رصات فبلاصتها فالمطار و بداو تيبانو الخدامين فالمطار تيهبطو فالبوالز فالمكان المخصص باش يديوهوم يتحطو فالمكان لي غيشدوهوم منو...سالات المضيفة كلامها و بداو الركاب تيحييدو فصماتيهوم و تينوضو يهزو صيكانهوم ولا لي هز معاه باليزتو الصغيرة تيهبطها من الخزانة الصغيرة لي تتحل فوق مكانو..ناضت الكوافورة هازة صاكها تتدافع هي و الناس و فيديها ديك الطويگية حتى دخلات لطواليت خشاتها فالبلاصة ديال الأوراق المستعملة..غسلات يديها..شللات فمها و خرجات من تما...
فاش خرجات لقات المضيفات بجوج واقفات مبتاسمات تيودعو الركاب و تيشكروهوم حركات ليهوم راسها مبتسمة و هبطات مع داك الدروج لي حاطين لقات نيار واقف مربع يديه و مطلع حاجبو و حداه سديم تتقفقف بالبرد تتسخن راسها بيديها..الكوافورة حتى خرجات و هبطات عاد طفات عليها الشمعة و بدات تحس بالبرد تخشاو بجوجات فنيار لي ضابط راسو بزز عليهوم باقي تيفكر فالطاگية ديالو لي خسراتها ليه الكوافورة حتى بانت ليهوم شيارا غادة فوسط البرد عادي السييدة موالفاه اصلا عمرها كولو مدوزاه ف اوروبا..جمعاتهوم كاملين تاني و بقاو تابعينها على شكل صف اما عذراء تتشوف هنا و لهيه بعينيها و تتقول فدماغها هادي هي فرنسا؟؟واش تنتمشى دابا على تراب فرنسا؟؟؟واهيا باريس!!
بقاو غاديين حتى دخلو عاد حسو بالدفئ ديال الداخل هبطو تابعين شيارا حتى هبطو لمكان لي تيتلاحو فيه البوالز ديالهوم بقاو واقفين تيتسناو تما و لي بانت ليه ديالو واش هزها حتى سالاو كاملين و خرجو كانو تما طونوبيلات كبار خاصين بالشركة...
شيارا:كل 5 يطلعو فسيارة راه كاملين بالشيفور و كلشي غادي يوصلو لبلاصة وحدة و لي هي الفندق
مشاو الثلاثة حتى طلعو مع وحدة و تبعوهوم جوج خرين و نفس الشيء مع المايكاب ارتيستس الخرين طلعو و كلشي ركب اما شيارا طلعات فواحد السيارة خرى و ديماراو...
ففندق Sofitel لي تيتعتابر من ضمن افخم و ارقى الفنادق لي فباريس و بالضبط فواحد من الممرات ديالو كانت غادة روبين تتعوج و كيف العادة فيمينها و يسارها ليڨيا و خناثة و موراهوم كاينين الخدم ديال الفندق جارين البوالز ديالهوم و معاهوم لميكاب ارتيستس الخاصين بدوك الثلاثة و مصففي الشعر و المصور الخاص ديال كل وحدة فيهوم فاش وصلو قدام الغرف حيت كانو حدا بعضياتهوم كيف العادة الخدم كل باب و دخلو اغراض كل وحدة فيهوم للغرفة ديالها...
روبين بالألمانية:نتوما يمكن ليكوم ترتاحو من بعد حتى نعييط عليكوم و اجيو
نساحبو في هدوء اما ليڨيا دارت اشارة لديالها و دخلو لغرفتها اما الخدم ديال الفندق مشاو...
خناثة بالألمانية:روبين صبري نمشي معاك
روبين:مغترتاحيش؟؟
خناثة:راه ضروك تجي ليڨيا(ضارت) و حتى نتوما غير سيرو
نساحبو حتى هوما و دخلو بجوجات لغرفة روبين...
حلات روبين الباب و كيف دخلات بان ليها فوق الطبلة بوكي كبييير ديال الورد تقدمات هزاتو متجاهلة الهدايا الخرين لي من ماركات عالمية معروفة...
روبين:غيكون قوس لي سيفطووو
هزات لبطاقة لي كانت فيه ولكن كانت دعوة لحضور العرض لي منظماه شركة L'Oréal حطات البوكي معاجبهاش الحال و جلسات بزعف كان عندها امل يكون قوس مفكرها ولكن خاب ظنها..اما خناثة جلسات حاطة رجل على رجل تتسنا فليڨيا...
هاد الأخيرة لي كانت جالسة مع المايكاب ارتيست ديالها لي كان رجل شاب و مصففة الشعر ديالها كانت امرأة سمراء...قبالتهوم كان المصور الخاص تيلتاقط صور و هوما مبتاسمين تتبان ليڨيا قدامهوم بحال العملاقة بسبب طولها زائد مكملاها بالطالون لي لابسة...
ليڨيا بالفرنسية:خصني نلوحهوم دابا فانسطا ههه يمكن ليكوم تفضلو حتى نعييط عليكوم اوكي
نصارفو حتى هوما بهدوء اما هي شافت فانعكاسها فالمراية بنضرتها المغرورة و تمشات بشموخ حتى دقات على غرفة روبين و دخلات...
اما عند الكوافورة كانت عاد داخلة للفندق تتمنضر و الخدم غاديين ببوالزها هي و لخرين...
شيارا:لي ديجا موالفين بهاد الرحلات فالشركة الأولى يشدو بطاقاتهوم فالاستقبال و يطلعو لغرفهوم
كاع لي كانو تما واش تشتتو شاطو منهوم غير الثلاثي لي عاد لتاحق للفرع المغربي الجديد...
شيارا:مزيان..تبعوني
تبعوها حتى خدات ليهوم البطاقات ديالهوم من الإستقبال و طلعو فالسانسور حتال واحد الطابق و خرجو تابعينها...حتى وقفات قدام واحد الغرفة...
شيارا:الغرف ديالكوم مشروكين يعني بجوج ناموسيات و كل واحد و اغراضو باش تعرفو مسبقا..هادي غرفة نيار مع شريكو و نتوما تبعوني لفين كاينين البنات
عذراء:و بوالزنا؟؟
شيارا:غتلقاوهوم حطوهوم الخدم فالغرف
خلاو نيار تما و بقاو غاديات فنفس الصف نيت حتى دخلو مع واحد الباب زجاجي كبير و فلداخل ديالو وراتهوم شيارا غرفهوم سديم دخلات مع وحدة و عذراء مع وحدة خرى و بهاكا و اخيرا غتقدر ترتاح من بعدما امنات على وصول لميكاب ارتيستس لي مكلفة بيهوم كاملين...
حلات عذراء لباب و دخلات..كانت الغرفة كبيرة بجوج ناموسيات مفرقين جليسة بالفوتويات صغيرة حدا الشرجم.. الحمام و جوج بيروات متميزة بطابع خشبي و رخامي و الوان تتقتاصر على مزيج بين الأسود..الأبيض..الموطارد و الأخضر..بقات غادة و تتقرب بانو ليها بوالزها محطوطين قدام ناموسييتها..تقدمات جيهتهوم تتسائل علاش الغرفة خاوية و فين شريكتها فيها؟؟..جلسات فوق الناموسية و تبومبات عليها بمؤخرتها و هي تلاح على ضهرها مستمتعة بنعومة السرير حتى تسمع الباب تحل و هي تنوض قافزة...دخلات بنت شقراء عينيها زرقين..متوسطة الطول و سدات الباب موراها..عذراء قشعاتها غتكون گاورية و هي تقول ليها هيلو..الشقراء تجاهلاتها و مشات ديريكت دخلات سادة عليها فالحمام...
عذراء كانت مستغربة و تتقول مع راسها مال هاد الخرية على هاد التعفار الخاوي؟حتى هي عندها واحد النفس حلفات متجبدها مزال..جبدات تيليفونها و دخلات لقائمة الويفي و لقات ديال الفندق شداتو و هوما يبداو يطلعو ميساجات مها و ختها و رواء..تنهدات و دوزات المكالمة لرفيف...
كانت رفيف جالسة فالصالون تتستف شي برودويات عاد دخلاتهوم جداد حتى تتسمع تيليفونها تيصوني..عوجات سيفتها ظنا منها انه سنمار و ناضت باش تقطع عليه ميبرزطهاش حتى تتشوف سمية "عذراء" و هي تجاوب فالبلاصة...
عذراء متكية تدوي بيديها:بيخير اختي بيخير راني فلوطيل دابا لي شادين لينا غنرتاح شوية بينما وصلات وقت الخدمة
رفيف:ياكما دختي فالطيارة ولا تقييتي؟؟كيف كان شعورك؟؟
عذراء:داز كلشي بيخير و على خير علمي معاك الوليدة و قولي ليها بنتك فايادي امينة غنقطع دابا باش نرتاح صافي حبي
رفيف:واخا طهلاي بزاف من بعد و صوني تسمع الوليدة صوتك
عذراء:واخا صافي
قطعات عذراء و لاحت تيليفونها فوق الناموسية لي كان مدلي فوقها شعرها الطويل هزات عينيها تتمنضر فالسقف و تحسب شحال من نقشة فيه محسات حتى داتها عينها...
بعد نص ساعة بالضبط بدا تيصوني الفيكس ديال الغرفة لي ناعسة فيها عذراء..دازو دقائق و والا رد حتى تسمع باب الدوش تحل خرجات منو الشقراء لايحة عليها بينوار شافت بنضرة اشمئزاز فعذراء الناعسة بحوايجها فوق الناموسية و جاوبات على الفيكس...
الشقراء بالفرنسية:الو
شيارا:كورالي؟
الشقراء:وي مدام؟
شيارا بالفرنسية:كاينة معاك عذراء دابا؟
كورالي بتسائل: ادرا؟؟
شيارا:وي دوزيها ليا
كورالي فهمات انه قصدات شريكتها فالغرفة:اوكي مدام
تقدمات كورالي جيهة المييت(عذراء) و بجوج صبيعات بدات تتفيقها..عذراء جابت ليها الحكة بدات تحك فالبلاصة فين نغزاتها و والو فقررات تحركها حيت شيارا تتسنى...بعد ثواني من التحريك فاقت عذراء مهلوكة مطلعة راسها و عينيها تيتسدو بتعب...
كورالي مطلعة حجبانها:مدام شيارا بغااتك
عذراء مفهمات والو حدها قشعات غير سمية شيارا و هى تنوض دايخة حتى جاوبات...
شيارا:واحد العارضة مقدراتش تجي المايكاب ارتيست الخاصة بيها ملحقاتش على الطيارة و بغات البديل ربع ساعة نكون عندك نلقاك واجدة نتي و ماتريالك!
عذراء توگضات:اوكي مدام
غير قطعات مشات تتجري واهيا ناري ربع ساعة و هي ممدوشة ممبدلة حوايجها..حلات الباليزة ديالها تحت انضار كورالي المتكبرة و دغيا جبدات سروال كوير مع تريكو طويل شوية مخطط بالبيض و الكحل و جاكيت كحلة قطنية كحلة على حساب البرد..هزات الملابس الداخلية مكمشين فيديها و الملابس الخرى و مشات تتجري بيهوم للدوش...و لحسن الحظ كان كلشي موجود لبرودويات..الفوطات..لبينوارات و السيشوار..حييدات حوايجها دغيا جمعات شعرها و دوزات غير ب باندوش على جسمها غير تحييد ريحة العرق..شللات و بسرعة مسحات بالفوطة و لبسات حوايجها كاملين شافت فالوقت بقا شوية قررات تقاد فيه مكياج وجهها المعتاد فاش سالات طلقات شعرها و دوزات عليه بالمشطة دغيا غير باش يبان مسرح و لحسن حظها ديجا الباليزة ديال الخدمة مقادة من قبل هزاتها و هزات صاكها عاد بدات تتسمع الدقان..لبسات بالغينتها دغيا و حلات كانت شيارا واقفة...
شيارا:يالاه دغيا
خرجات عذراء جارة الباليزة و صاكها فكتفها و شعرها مواكب سرعة مشيها:نسولك ا مدام؟؟
شيارا حتى هي تتمشا بالزربة على غير عادتها:وي؟
عذراء:علاش ختاريتيني انا و مختاريتيش ديك الصفريتة لي معايا؟ياك حتى هي مايكاب ارتيست؟
شيارا وقفات ضغطات على السانسور:العارضة مبغاتهاش و مبغاتش ليا شحال من وحدة و واحد حتى وريتك ليها فاش عرفاتك من عائلة برج العذراء بحالها و مغربية طلباتك مني
عذراء بصدمة:من برج العذراء؟؟؟؟
شيارا:ايه من برج العذراء
تحل السانسور..و دخلو...
عذراء:ناري تحمست دابا!!
شيارا:هه تنظن اول مرة تقابلي شي واحد من نفس برجك و ماشي من عائلتك ياكي؟؟
عذراء:واييه راه هدا انجاااز بالنسبة ليااا عمرني صاادفت شي واحد حتى و ففترتي الدراسية كاملها معرفتش علاش
شيارا:يمكن حيت تيكونو عائلات متفرقين
عذراء:معرفتش ولكن هادي تجربة جديدة تاني و انا متشوقة ليها ههه
حبس السانسور و تحل على الطابق لي كانو غرفو مريزيرڨيين للعارضات نفسو الطابق لي فيه روبين و الثنائي لاخور...تقدمات شيارا حتى دقات فالباب و عذراء تتسنا شادة باليزتها بين يديها حتى تسمعات تفضل...
دخلات شيارا و عذراء تبعاتها غير بان ليها لداخل تصدمات كانت متوقعة شي غرفة بحال ديالها هي و ديك كورالي ولكن كانت عكس توقعها كانت بحال ديال روبين نيت غير الأثاث لي مختلف كانت تتبان ليها بحال شي بارطمة صغيرة...
شيارا:مدام بنان هاهيا عذراء
كانت امرأة شابة رقيقة شعرها و عينيها قهويين و الطول منعاودش ليكوم كيف العادة سلوم🤣..
عذراء:(مدام؟واش هادي مزوجة؟ و ويلي على بنان هه بنانة🤣)
بنان تقدمات سلمات على عذراء باليد:بنت برجي هه
عذراء صافحاتها و عينيها تيلمعو:ايه هي انا
بنان شييرات ليها بيديها تجلس...
شيارا:انا غادية دابا الى وقعات اي حاجة علميني اوكي؟
بنان:اوكي
خرجات شيارا اما عذراء جلسات تتمنضر فالبيت و ديكوراتو الراقية بالفعل هاد الفندق راقي بامتياز...
بنان جلسات فوق فوتوي قدامها:تشربي شي حاجة؟
عذراء مبتسمة:لا شكرا
بنان شبكات يديها:اوكي..المهم غتكوني عارفة القصة من شيارا على المايكاب ارتيست ديالي لي مجاتش و كلشي
عذراء:ااه فراسي فراسي
بنان:بغيتك تقادي ليا مايكاب يكون اللوك ديالو ترابي و يبيين ملامحي و فنفس الوقت يبان طبيعي حيت غادي ناخد صور فالشارع و مبغيتش شي حاجة مبهرجة
عذراء:اكيد اكيد (حلات باليزتها)
بنان ناضت و جلسات فالكرسي ديال الكوافوز و هو يتسمع الدقان...
بنان:غيكون مصفف الشعر ديالي..تفضل
تم داخل واحد المعوج جار باليزتو و مناخرو فالسما...
بنان بالفرنسية:على سلامتك ريكا
حط الدوزان ديالو و تسالم معاها بالوجه و عذراء وسطهوم تتقاد دوزانها...
بنان:خصنا نسربيو باش يشيط الوقت مبغيتش نضييع عرض L'Oréal
عذراء:ااه واش دوا معايا؟؟ راه معنديش مع الفرونسي و الله
بنان بالفرنسية:دوي معاها بالانجليزية
ريكا قلبها لونگلي و هي تشد معاه عذراء الخط...شرح ليها كيفاش ينساجم عملهوم بجوج بحيث هو يقاد شعر بنان و فنفس الوقت هي تقاد ليها المكياج و داكشي لي وقع مكاملاش نص ساعة بنان ولات واجدة بقا ليها غير لباسها و الاهم انه عجبها اللوك لي دارت ليها عذراء...لبسات حوايجها دغيا و هبطو معاها فالسانسور ل السيارة لي تتسناهوم تما و ليكاين فيها الشيفور و المصور الخاص ب بنان...ركبو كاملين و ديماراو...
فوسط شوارع باريس كانت السيارة غادة و عذراء متكية على الزاج تتفرج فالناس لي تيدوزو و فالمباني لي باقي شادة داك الستيل الفرنسي القديم كلشي مختالف بالنسبة ليها و حداها جالسة بنان دايرة رجل على رجل تتراقب جدول هاد الأسبوع لي غادي دوزو فباريس و العروض لي غادي تحضرهوم ولا تقدمهوم و بقية فريقها حتاهوم كل واحد مسنط لعضامو...
بنان طلعات راسها:وقف هنا هنا
عذراء لي كانت ساهية فبرا تفاجأت فاش وقفات السيارة...
المصور هبط حل لباب و هبطات بنان هازة صويكها فيديها و تبعوها لخرين اما لكوافورة باقة جالسة تما تتسناهوم يرجعو..حتى رجعات عندها بنان...
بنان:عذراء؟مغتهبطيش؟؟
عذراء:ا علاه ضروري؟؟ ياك حتى تبغيني نقاد ليك مكياجك ولا نعدلو؟
بنان:مبغيتيش تصوري حتى نتي ولا تضوري؟
عذراء:ا الضوران؟صافي واخا
جرات صاكها فيديها و هبطات غادة مع بنان تتبان بحال بنتها...
بنان بالفرنسية:تيم اجي لهنا
الناس تيدوزو ممسوقينش عارفينها غتكون عارضة حيت هدا حدث سنوي مهم فباريس سميتو بأسبوع عرض ازياء باريس و لي تيتكون من بزاف ديال العروض لي تينضموهوم شركات عالمية كبيرة بحال شانيل و لوريال الخ...و من بين هاد الشركات تتشارك ديما شركة قوس سوا فالحضور سوا فالعروض...
المصور و لي هو تيم تقدم هاز كاميرتو لي اخر مكاين فالكاميرات تتبوزا بنان قدامو و تيتبوزا معاها باش ياخد ليها صور باحترافية و دقة عالية حتى سالاو و دارت ليهوم الاشارة بيديها زعمة ينساحبو...عذراء حيت جديدة مفهماتش قصدها بقات واقفة تاني بحال الحيط حتى جروها و دخلو ل الطونوبيل...
بنان داوية مع الشيفور بالفرنسية:عرفتي شنو دينا عند برج ايفل العام الفايت ممشيتش ليه
الشيفور:اوكي مدام
عذراء فاش سمعاتو لمعو عينيها يااه برج ايفل غتشوفو بعينيها دابا و قدامها كيف واقف(بحالا بنادم)
بنان:اول مرة تجي لباريس ياكي؟؟
عذراء:ا ااه اول مرة هه
بنان:مزيان غادي تضوري حتى نتي غنقول ل تيم ياخد ليك صورة تذكارية مع برج ايفل
عذراء:اووه شكرا بزااف
بنان:العفو نتي اول مغربية تعامل معايا شحال زوين تكون مع شي واحد من بلادك
عذراء:اه بصاح انا من الفرع المغربي و لتاحقت يالاه شهر دابا تقريبا
بنان:اه مزيان حتى انا نتاقلت للفرع المغربي و عاجباني الخدمة فيه بحال بحال تقريبا غير هو الدولة مبدلة ههه
عذراء:اه بصاح ايوا لهلا يحاشم بيناتنا
بنان:صراحة رتاحيت ليك و لخدمتك معرفتش دخلتي لقلبي
عذراء:ههه بهاد السرعة؟؟
بنان:وي معاك بصاح من غير انه عندنا نفس البرج الا انه هضرتك و تصرفاتك ماشي مصطنعة و تنحس بكلامك حقيقي متتكدبيش و هاد المواصفات بالضبط اي واحد غادي يجدبوه حيت فهاد الزمن و خصوصا هاد الضومين قليل تلقاي بحالك
عذراء:عندك الحق و هادشي عشتو ليوم نيت مع شريكتي فالغرفة قلت ليها هيلو رضات عليا بتنخزيرة و نخلاتني ولكن حتى انا حتال كرامتي منخليهاش تقيص منها شبر
بنان:المهم انا من هادشي كاملو قررت مع راسي دابا واحد الحاجة
عذراء:شنو هي؟؟
بنان:بغيتك تخدمي عندي
عذراء بصدمة:واش داوية من نييتك نيت؟؟راني غير مبتدئة فهاد العالم و نتي باينة فيك عارضة ماشي عادية
بنان:من غير طيبة قلبك الواضحة من ردود فعلك الا انه خدمتك زوينة و حاسة انه تتبغي هادشي و متديريهش كهدف ل الشهرة ولا الفلوس و انما حبا لهاد الحاجة انا حسيت بهادشي غير من طريقتك فعمل المكياج على وجهي
عذراء:وي عندك الحق تنحماق على شي حاجة سميتها المكياج و الشعر ولكن ا مدام انا مغنكونش قادرة نبقا نسافر معاك فينما مشيتي
بنان:و علاش؟راه هادشي على حساب الشركة
عذراء:امور عائلية فهمتي
بنان:ميمكنش! و كيفاش قدرتي تسافري لباريس دابا الى مقادراش تبقاي تسافري؟؟
هنا جابت لعذراء التمام حيت بالفعل الى هادشي كاين كيدارت حتى سافرات لهنا؟؟...
عذراء:المهم شوفي انا بسبب حبي لهاد الضومين تنغامر بزاف يمكن نقول ليك تنغامر بحياتي داكشي علاش تنتمنى تقدري ضروفي
حدرات عذراء راسها تتفكر ياك الحلم ديالها هو هدا؟؟شنو قالت لمها و ختها قبل متسافر؟؟ياك بغات تشوف مكياجها فعارضة مشهورة و تفرح بيه و بيها؟؟هاهوا حلمها جا حتى لعند رجليها و معطلهاش! علاش حتى فأبسط احلامها تفكر فضروفها ولا عائلتها؟؟...
عذراء:(انا انسانة بالغة و واعية و قارية و عارفة شنو تندير حلمي قدامي و مغنقولش ليه لا ولا نعطيه بضهري! مالي هبيلة!)
بنان:شنو قلتي دابا؟
عذراء طلعات فيها راسها:انا قابلة نخدم عندك
بنان بتاسمات:هادشي لي بغيت
جبدات التيليفون ديالها و دوزات النمرة ل المنادجر ديالها...
بنان بالألمانية:شوف لغي ليا الكونطرا بيني و بين ماريان..ايه لغيها..صافي مبقاتش عاجباني خدمتها زائد واش انا ديما غنصبر لتعطالها؟؟...وي لقيت البديل(تتشوف فعذراء المصنطة لعضامها)وي خدمتها زوينة اكيد كون ما كانت تستاهل منلغيش كونطرا قديمة على قبلها..وي ملي يسالي هاد الأسبوع بغيت توجد كونطرا ديالي معاها..تواصل مع شيارا هي لي مكلفة بيها...اوكي باي(قطعات)
بنان:صافي كلشي هو هاداك دابا نتيا وليتي محسوبة عليا من دابا
عذراء:صافي صافي بهاد البساطة؟؟
بنان:اكيد مالي تنلعب هنا ههه المهم تنقدم ليك الفريق ديالنا خصك تعرفي عليهوم حيت اهم حاجة عندي انا نشوف فريقي منساجم
عذراء:اه حتى انا واخا متنزعمش فالاول
بنان:هدا مصفف الشعر ريكا و هدا المصور تيم و هداك الشيفور سيمون
عذراء بالإنجليزية:متشرفة بيكوم
بتاسم ليها الشيفور من الزاجة ديال الطونوبيل و نفس الشيء مع لخرين...
بنان بالفرنسية:و هادي عذراء
بتلاتاهوم بداو تيبجغو فسمييتها جاتهوم صعيبة و عذراء مبتسمة بتوتر تتسمع فسميتها تتاكل العصى عند الگور...
بنان:ههه قولو ليها ادرا هكا اسهل
كاملهوم قالو اااه عاد طفات عليهوم الشمعة و رحبو بيها...
بنان:عذراء معندهاش مع الفرنسية و يمكن حتى الألمانية ياكي؟
عذراء:الانجليزية و العربية لي تنكساب ههه
بنان:اوكي غيكونو حواراتنا بالانجليزية باش تفهم حتى عذراء نساو الفرونسي
حركو ليها راسهوم موافقين...و هاكا داز النهار عند الكوافورة شبعات ضوران و تصاور حتى من بعض البوتيكات ضارتهوم و شرات ليها بنان شحال من حاجة عجباتها من بعد مشاو تغداو على برا عاد رجعو للفندق...
فالفندق و بالضبط فغرفة روبين كانت جالسة هاد الأخيرة فوق واحد الكرسي و فيديها تيليفونها و ابتسامة مكر مرسومة على شفتيها قدامها فالفوتوي الكبير جالسين ليڨيا و خناثة متسائلين فداخلهوم شنو سبب هاد الابتسامة لي متيشوفوها الا و غتكون شي حاجة ماشي هي هاديك واقعة بسببها...
روبين:قربو
ناضو من تما و جلسو فيمينها و يسارها...طلو على التيلي كانت محادثة مع شخص مجهول فالواتساب...
روبين:شفتو هاد الصباط؟
ليڨيا:مالو؟؟
روبين:هدا هو لي غادي تلبس بنان لعرض L'Oréal الليلة
خناثة بتاسمات بشر:هههه لا متقوليهاش؟؟
روبين بابتسامة:ههه ايه تقالت و تدارت هههه
ليڨيا حتى هي ضاحكة:ههه وايلي هي ليوم تدوز الليلة فالسبيطار؟؟
روبين:تنتمنى العمر كولو ههه
خناثة:و بهاكا غنكونو حنا الأولين تاني فهاد العرض ههه
روبين ناضت و تقابلات مع المراية تتقاد فخصلات شعرها:اكيد الليلة غادي تكون ديالنا و الأيام الماجية حتى هوما...
فطابق الإستقبال عاد دخلات بنان و عذراء و البقية و موراهوم خدم الفندق هازين مشترياتهوم...ضغطو على السانسور و طلعو للغرفة...
بنان داخلة عيانة:حطوهوم غير تما
حطو الخدم الأغراض و خرجو...
عذراء جلسات عيات رجليها تحفاو:وا نهاار هو
بنان:هادشي غير بداية ههه باقي قدامنا بزاف
تيم:غنمشي نرتاح فغرفتي
بنان:غير سيرو رتاحو انا نيت خصني نتكا شوية بينما وصل وقت العرض
نساحب تيم المصور و مصفف الشعر ريكا..
عذراء ناضت:انا نيت غنمشي معاياش غيكون العرض؟
بنان:مع 7 د العشية و بعدا فين غتمشي؟
عذراء:لغرفتي
بنان:اغراضك طلعوهوم الخدم لهنايا طلبت هادشي من شيارا فميساج
عذراء:و علاش؟؟
بنان:لميكاب ارتيست ديالي ديما تتكون معايا و حتى ريكا غير فاش تزوجت مبقاش تينعس معايا فنفس الغرفة
عذراء:ك كيفاش؟كان تينعس معاك؟
بنان شدات جبهتها:والا راه كاينين غرف فالداخل ولكن هاد الغرفة فيها غير وحدة و حمام اجي نوريك
تبعاتها حتى حلات واحد الباب كانت غرفة صغيرة بسرير و بيرو و ماريو فيها شرجم تيطل على برا...
بنان:هادي هي غرفتك و تما فين كاينين اغراضك
عذراء:وا متصورتش تكون واسعة هكا لدرجة فيها غرفة خرى!
بنان:فهمتي دابا اويلي رضيتيني تنعس مع ريكا باز ليك هههه و بعدا ريكا ديال النعاس راه بحالو بحالنا
عذراء:هههه ولاهيلا سمحي ليا غير الصدمة و صافي
بنان:المهم هادي غرفتك خودي راحتك
عذراء:شكرا بزاف بالفعل نتي انسانة ضريفة
بنان بتاسمات:ضريفة معاك حيت حتى نتي ضريفة ههه يالاه هاني مشيت نرتاح
خرجات بنان سادة الباب موراها اما عذراء جلسات فوق الناموسية تتبتاسم بوحدها كان هاد النهار من اجمل الايام لي دوزاتهوم فحياتها ضارت و كلات و تشرا ليها حاجات زوينين عاشتهوم فيه مع انسانة اول مرة تعرفها بالفعل هاد الدنيا صغيرة و اي حاجة توقعها منها...حييدات حوايجها و لبسات بيجامتها و نعسات ترتاح حتى هي...
وصلات 5:30 و الكوافورة باقة ناعسة مجايبة ل الدنيا خبار حتى تسمع الدقان فباب غرفتها..ولا جواب و هو يتحل الباب كانت بنان مشات نيشان فييقات عذراء...
بنان:عذراء نوضي..عذراء
عذراء تگعدات تتحك عينيها:بنان؟
بنان:مساء الخير نوضي راه يالاه فاش نوجدو هادي
عذراء ناضت:اوكي غنمشي لطواليت و نغسل وجهي و هانا معاك
بنان:اوكي راني تنتسناك على برا
خرجات بنان اما عذراء مشات لحمام حتى قضات المسائل ديالها و خرجات بدلات حوايجها بواحد الكسوة طويلة فالكحل مع بالغينة بيضة خلات شعرها مطلوق و مدارت والو لوجهها خلاتو طبيعي..دارت حقيبة الخصر الخاصة بيها فخصرها..هزات صاكها و جرات الباليزة د دوزانها..حتى خرجات عند بنان لي كانت واقفة لابسة فستان قصير على شكل مونطو فالأحمر و امرأة كبيرة فالعمر تتسد ليها الأزرار ديالو باينة هي المكلفة بالملابس و ريكا واقف هاز سشوارو تيتسناها تسالي...
بنان:سربي ا عذراء يالاه يكفينا الوقت
قربات منها عذراء بالزربة و بدات تجبد فالماتريال فوق الكوافوز:اشمن لووك بغيتي هاد المرة؟؟
سالات المرأة من تلبيسها و خرجات...جلسات دغيا فكرسي الكوافوز...
بنان:بغيت الأيشادو يكون خفيف و اللمسة لي بغيتها تعطي صرخة لهاد اللوك هي العكر حمر و يكون ماط
عذراء:واخا
بدا ريكا تيقاد فشعر بنان و يسرح فيه و فنفس الوقت عذراء تتقاد ليها فالمكياج حتى سالاو و ولات واجدة...
بنان:كلشي هو هداك الا الطالون لي غنلبس الليلة مزال مسيفطوه ليا
عذراء:باقي لوقت يالاه 6:30
بنان:اويلي على يالاه 6:30 راه خصنا نكونو تماك جمعي ماتريالك غنقول ليهوم يسيفطوه ليا لتما
جمعات عذراء ماطريالها فباليزة و خرجو من تما ل السيارة لي كانت تتسناهوم فالتحت...
فطابق عالي من طبقات هاد الفندق الراقي و من بين وحدة من غرفو الأكتر فخامة كان قوس تيسد فصدايف القاميجة ديالو معلن على لمساتو الأخيرة فالاطلالة ديالو لهاد الليلة..حط الساعة اليدوية ديالو الفخمة و هز عطرو الرجولي رشو..تقابل مع المراية بنضراتو المتفاخرة معروف على رجل برج القوس انه تيحب نفسو و غرورو ماليه حدود..فجأة تسمع الدقان فالغرفة ولكن مستغربش حيت قرب يبدا العرض الأول فهاد السيمانة..قال تفضل و تحل الباب من بعد سدانو بدا تيتسمع تقرقيب طالون بطريقة خفيفة و عاطية فنفس الوقت نغمة واثقة..ضار لقا امامو امرأة رشيقة فاتنة لابسة فستان اخضر مبيين شكل جسمها و وجهها مقاد بمايكاب احترافي...
طلع قوس حجبانو متسائل حيت عمرو شافها و هي تقدم جيهتو و مدات ليه بطاقة مذهبة..شدها منها لقاها رسالة..حييد الختم لي عليها ليكان ديال الفندق و بدا تيقرا فخاطرو...
نزل البطاقة و تقابل معاها و هي عاطياه ديك الإبتسامة تتسناه يقرب منها ولا يدير شي ردة فعل..تقدم جيهتها و شدها من طرف حنكها بشوية بصبعو و قابل وجهها مع وجهو صافي قالت هادي هي البوسة و من بعدها الفراش(السييد عاد لابس صافابا؟)...
قوس:يمكن ليك ترجعي مرة خرى دابا ممساليش
المرأة ولات بحالا ضربها فداك الحنك ماشي شادو دوزاتها ب بليع الريق مخرجة عينيها و تتحاول تخبي صدمتها متوقعاتوش صارم فالعمل لهاد الدرجة..وحدة بحالها تينقضو عليها و هو مأجل الرفاهية...كتافات بحنيان الراس و نساحبات اما هو خرج مطلع راسو كيف العادة متيشوفش الأرض...
فمتحف Monnaie de Paris و لي تنظم فيه عرض L'Oréal كانت المنصة قداش فوسط المكان لي كان واسع و كبير و فالجانبين ديال المنصة كانو الكراسة لي جالسين فيهوم الناس و وسط منهوم كاينين العازفين هازين الاتهوم تيتسناو فافتتاح العرض و فالداخل ديال المتحف او بالأحرى مورا الباب ديال المنصة جو اخر تاني من المشاحنات بين العارضات لي غاديين جايين و لمايكاب ارتيستس شي تيقاد شي باقي تيقلب شي عمر الدنيا برشان الفيكساتور و من بين هاد المايكاب ارتيستس كانو سديم و نيار فجو مليء بالضغط من تجميل و انهاء المكياج...
سديم:فيناهيا عذراء مبانتش ليا؟؟
نيار:معرفتش حتى العارضات لي كان خصها تقاد ليهوم جات وحدة خرى داتهوم
سديم:وايلي؟زعمة تكون وقعات ليها شي حاجة؟
نيار:معرفتش تنتمنى تكون بيخير
اما عذراء فكانت عاد هابطة من الطونوبيل تابعة بنان لي كانت غادية زربانة حتى دخلو من الباب الخلفي ديال المتحف عاد قدرات ترتاح...
بنان:صافي كلشي مزيان خصني غير طالوني مزال مبان حتاشي خبار عليه
عذراء:معرفتش شغنقول ليك
فنفس البلاصة غير بعيد شوية كانت روبين واقفة بفستان بيض معري و مفتوق عند الرجل و مخدوم بالعقيق الأبيض جامعة شعرها على شكل مشيطة و مزيينة ودنيها بطوينگات هابطين كانت تدوي فالتيليفون و حداها ليڨيا بفستان اسود و ابيض قريب لستايل فستان روبين طالقة شعرها الأشقر و خناثة لابسة سروال ديال الفصالة بحالا شافراه لجدها مع فيست ديال الثوب و فيها الفرو خضر و شعرها دايرة ليه تموجات...
روبين:شوف ميوصلهاش الطالون حتى تقرب تمشي اوكي؟ ايه حتى توصل الوقت لي غتخرج فيه مبغيتش نخلي ليها الوقت فين تفكر(بتاسمات) هه اوكي(قطعات)
خناثة:امضرا؟؟
روبين:عتابروها مهرسة فرجليها هههه
شافو فيها و ضحكو ضحكتهوم المسمومة الشريرة...
افتتاح العرض بدا و الناس شدو كراساهوم و رجال الأعمال و مدراء الشركات حتاهوم كانو تما و منهوم قوس لي كان جالس و حداه المنادجر فابيو لي تيتعتابر اكتر منادجر تيتيق فيه..و حداه رجال اعمال خرين تيهمهوم هاد المجال حتى هوما يا ايما بحبيباتهوم ولا زوجاتهوم ولا النواب ديالهوم...
الافتتاح بدا بدقة الطبول ديال فرقة متكونة من الرجال داخلة تدق و تقرب من حواف المنصة و كل خطوة بدقة و نغمة حس الطبل لي تيتسمع كلشي صاقل مركز مع الافتتاح من بعد الدقان دخلات ديريكت عارضة تتمشى و تابعاها عارضة خرى..العارضة الأولى وصلات فلافان المنصة و بدات تدور و الثانية تابعاها و ها الثالثة و داكشي غير داخل تيخرج وحدة تابعة لوخرا... فنفس الوقت النوبة ديال بنان قربات و عذراء واقفة حداها جامعة يديها عندها...حتى تمات جاية وحدة هازة فيديها علبة مذهبة...
بنان بلهفة:هاهوااا جا
مشات شداتو عندها و حييدات ليكانت لابساه دغيا و لبسات هداك...الخطوة لي كانت غدير باش تقاد فبلاصتها جات زالقة و رجليها هربات بيها مخلياها طايحة طيحة قوية على ضهرها..كلشي داز بالزربة و عذراء مصدومة و حتى العارضات لخرين لي كانو تما لابسين تيتسناو...و بسرعة ندافعات عذراء باش طلعها نفس الشيء مع ريكا...ناضت بنان بزز مقدراتش توقف تتحس بألم كبير فضهرها و بالضبط فالعمود الفقري...
عذراء مخلوعة عليها:واش لباااس؟؟؟؟بنااان جاوبي
بنان تتألم فصمت تتحاول متخلعش لي معاها:ضهريي اهئ اهئ ضهريي اااي(غرغرو عينيها)اااي مقاادرااش نوقف
عذراء:شنو غاديري العرض هدااا ناري صبري عفااك حاوليي البنات لي كانو حدانا مشاااو
بنان تتألم مبقاش هامها حتاشي عرض:ريكااا صوني على الإسعاااف
عذراء:غير صبري مزاال ديري غير ضورة خفيفة و سيري ياك هاد العرض مهم بالنسبة ليك؟؟
بنان شداتها فيديها:مبقاش تيهمني تنحس بألم رهيب فضهري اهئ اهئ
عذراء:قولي ليا غير لمن نعييط شكون نعلم؟؟راني تالفة معرفت فين نصد و ممستحملاش نسمعك تتقصحي
بنان بدات تتحيد فالفستان خلات عذراء مصدومة لي شداتها من صدرها حابساها...
عذراء:اويليي!! تتعراي العارضات تيشوفووو!!!
بنان:ريكا عاوني ندخلو مع هاد الكولوار
عاونها ريكا من كتافها حتى دخلو مع واحد الكولوار و تما بدات تتحيد الفستان و هو عاطيها بضهرو...عذراء قدامهوم مصدومة تتبان ليها السييدة بدوبياس(اصلا هي عارضة موالفة تعرا قدام البشر و تدير جلسات تصويرية بملابس داخلية)
بنان مدات ليها الفستان:سيري بلاصتي ا عذراء هاد الفستان خصو يبان فالعرض ضروري حيت غتحسب على المصممة ديالو اااي(كاتمة الألم) ماشي مهم شكون يلبسو لمهم يتلبس ريكااا ديني من هناا مبقيتش غنتسناا الإسعااف!!!
هزها ريكا بين يديه واخا طويلة عليه ولكن صبر و خرجو من تما مخليين الكوافورة مصدومة و الفستان بين يديها...
ختافاو بنان و ريكا قدام انظار عذراء لي باقة حالة فمها مصدومة و كلمات متناثرة تضور فدماغها لي وقف لثواني تيستوعب شنو واقع حيت هادشي داز بواحد السرعة خيالية قدام عينيها..هبطات عينيها بالعرض البطيء ل يديها لي شادين الفستان و رجعات شافت حولها ها العارضات واقفين تيتسناو ها لي رجعو من العرض كلشي مرون قدام عينيها حتال واحد اللحظة عاد بدا عقلها تيستوعب الامر و بسرعة اندفاعية مشات تتجري بين الممرات تتقلب على شي غرفة حتى تيبانو ليها شي عارضات خرجو من وحدة بلا متفكر طارت حتى دخلات ليها و لقاتها بالفعل غرفة التبدال حييدات الكسوة ديالها و عرات على كولون كحل و ديباردو بيض كانت لابساهوم تحتها..لبسات الفستان عليهوم نيت لي جاها طويل حتال حد الركبة بحكم بنان اطول منها..سدات الصدايف ديالو و بالزربة بان ليها كوافوز كبير تما و فوقو شي مكياج مشات ليه ديريكت و بدات تلبق فالمكياج تتحاول تدير نفس اللوك لي دارتو لبنان حتى سالات بالزربة ختماتو بتعكيرة حمرة فاعلة تاركة و بدات تتقاد فشعرها الطويل المطلوق طلعات فشكل اخور حيت اللوك كان جريء و صارخ شوية..خرجات من تما تتجري جاية مورا العارضات لي تيدخلو قلبها غيخرج من بلاصتو و الخلعة راكباها فجسمها كاملو فهاد اللحظة متتفكر فحتى واحد فقط جملة وحدة لي تتعاود فراسها و هي "هاد الفستان خصو يتلبس و متيهمش شكون لي يلبسو" مع ترددات انين الم بنان لي دافعة بيها القدام...العارضات لي راجعين من العرض تيدوزو و لي شافتها واش خرجات عينيها باستغراب و كملات طريقها...العارضات لي قدامها بداو تيدخلو وحدة تابعة لوخرا و هي موراهوم تتبان بحال شي بنيتة مجلية ليها مها غير تضور و تقاد فشعرها من كترة التوتر...بدات تتقرب العارضة لي قدامها و هنا حاولات تفكر الحركات لي كانو تيديروهوم العارضات لي تتقاد ليهوم للجلسات التصويرية مع تذكر عروض الأزياء لي تفرجات فيهوم من قبل فالتلفزة و فالأخير قررات انها تميلونجي داكشي و الباقي على الله المهم هو الفستان راه ملبوس هي حاليا تتشوف راسها كمونيكة خصها توريهوم حوايجها و ترجع فقط..ولكن الأمر اكيد ماشي بهاد السهولة يا المونيكة هدا عرض من اضخم العروض لي تتقام فالسنة و لكن الكوافورة تتبقى ديما كوافورة...دخلات العارضة لي قدامها و هي تبعها تتمشى تتحاول تبيين ليهوم الثقة فمشييتها ولكن فالداخل ديالها كلها تتقفقف...الناس كانو غاديين مزيان متبعين مع العرض ها العارضة دخلات ايه مزيان حتى دخلات الكوافورة هنا جاتهوم صدمة مفاجئة عاد كانو مركزين مع واحد الطول و واحد الشموخ و هوما يهبطو راسهوم تيشوفو فنص ميترو حمر تيتمشا على رجليه...الكوافورة كانت حاطة يد على خصرها و لوخرا مطلعاها تتشيير بيها و ضاحكة اما هي راه غير الصدمة و الدهشة ديال الأنظار لي عليها لي خربقات ليها المشاعر...كملات مشييتها حتى وصلات للحافة ديال المنصة للقدام و بدات تدير ل الناس باي باي بيديها و عاطياهوم ديك الابتسامة ديالها الكيوت..الحضور من بعدما كانو واحد تيشوف فلاخور باستغراب حيت موالفين بعارضات رقاق طويلات و دابا تيشوفو قدامهوم وحدة قصيرة و مكملاها عامرة شوية قالو ممكن المصصمة بغات تعطي فرصة حتى ل وحدة قصيرة و انه بغات توصل بلي هاد الفستان الستيل ديالو غادي يجي حتى مع البنت القصيرة...بدات تتمشى و المصورين ممقصرينش فلاشاو ليها عينيها بالضو..بقات غادية غير مع الحافة بحال العقرب و يديها غير تتبدل فيهوم و تشيير ل الناس لي بدا تيعجبهوم الوضع و حسو انه مزيان يكون تغيير فالعرض بلاصة تعابير العارضات المييتة و الخالية من الأحاسيس بداو تيشوفو حيوية تتمشا على هاد المنصة...فنفس الوقت كان واحد الإنسان من بين جميع دوك الحضور بدا تيطلع ليه الزعف تيشوف قدامو وحدة قصيرة لابسة تصميم من تصاميم الشركة ديالو شكون هادي و شكون لي جابها ولا قربها لهاد الضومين؟؟؟حداه فابيو لي حتى هو مفاهم حتى حاجة...
قوس مزيير على يديه:صوني دابا على المسؤولين
فابيو جبد التيلي ديالو من جيب الفيستة:اوكي مستر
دوز فابيو النمرة و دوا مع المسؤولين لي بداو تيعرقو مصدومين حتى واحد معندو حتاشي فكرة على شنو واقع و كيفاش حتى خرجات لتما..قطع عليهوم و شاف فقوس...
فابيو:مستر معندهوم حتاشي فكرة على اش واقع
طلع قوس راسو تيشوف فالكوافورة فرحانة تتحرك فيديها و تدير باي باي غادة تدخل من الباب و هو يوقف...
قوس بصرامة:تبعني انا لي غنشوف اش واقع بنفسي!
ناض قوس و تبعو فابيو لي باقي مستغرب...
فنفس الوقت لي ناض فيه قوس عاد دخلات روبين و تابعينها خناثة و ليڨيا من اللور و بكل غرور بداو تيتمشاو و نيوفهوم فالسما تيعرضو فالفساتين لي لابسين و لي غادي تشرا بأثمنة باهضة...حركات روبين عينيها و غير بالفن بدات تتقلب على قوس بين الحضور و والو مبانش ليها هادشي لي خلاها تستغرب بقلق..اما الكوافورة كان قلبها غيسكت بقات غير داخلة مع تما و يدها على صدرها و العارضات تيدوزو حداها حتى تمات جاية واحد المرأة كبيرة فالعمر شداتها من ذراعها...
المرأة بالفرنسية:زيدي دغيا خصك تبدليي
عذراء مفاهمة والو جاوباتها بالانجليزية:كيفاش؟؟
المرأة جاراها:(بالانجليزية)راه خصك تلبسي لبسة وحدة خرى زيدي
عذراء:راه ماشي انا بنان راه تغالطت ليك معاها
المرأة مسمعاتش منها جراتها مدخلاها لواحد الغرفة خاصة ديال الأزياء فنفس الوقت كان قوس تيتمشا فممر قريب من تما و حداه فابيو و واحد الشارف تيقفقف و جوج رجال خرين حتاهوما خايفين...
قوس بالفرنسية:دابا ا موسيو تايلور كيفاش حتى وحدة من عارضات الشركة ديالي قصيرة؟امم؟
المرأة هازة واحد الكسوة تتلمع كلها معرية:هدا ماشي اختيارك هاد الكسوة خصها تلبس
تايلور شاف فقوس بتوتر و هو يرجع دق تاني:مدااام حلي
حلات المرأة مخرجة غير راسها و هي تصدم فاش شافت المسؤول قدامها:م م موسيو
تايلور:واش كاينة العارضة القصيرة لي كانت لابسة فستان احمر معاك؟؟
المرأة:وي كاينة موسيو
المرأة حلات الباب مبيينة الكوافورة لي كانت باقة واقفة بديك الحالة غير شافت قوس و فابيو و هو يجمد ليها الما فالركابي...
عذراء تتفتف:مس مس مس مستر....
تايلور دخل:كيفاش حتى قدرتي تدخلي للعرض؟؟و شكون نتي؟؟
عذراء معطاتوش اعتبار اصلا مسپيكي عليها غير الفرونسي تما.. و هي ضورها دغيا فدماغها و قالت صافي فابيو! هو الضرييف لي تتعرف فديك الشركة هو لي غيفكها...
عذراء:م س مستر فابيو
فابيو طلع حجبانو باستغراب فين تتعرفو هادي؟(مقدرش يتعرف عليها بسبب اللوك)
عذراء تتشرح بيديها و داوية بالإنجليزية:مستر انا..انا...مدام بناان تهرسات فضهرهاا طااحت و هي لي كاانت غتلبس هاد الفستاان و انااا لبستو بلاصتهاا على ود المصممة و انااا مقصدتش حتى حاجة سمحوو ليااا
قوس كان تيشوف فواحد الإنسانة باين الخوف على وجهها و حركاتها و لغة جسدها فقمة توترها ولكن من غير هادشي كاملو قدام عينيه بنت جميلة تتنبض بالأنوثة و اللون الأحمر شحال عطاها واحد الشعلة و بيين فيها واحد الحيوية فحركاتها فالمنصة..فعفوييتها..فابتسامتها..فطريقة مشيها..فكلشي...
عذراء تتشوف غير ففابيو و متجاهلة نضرات قوس لي رصاص منييش عليها حسسها بواحد الخوف اكبر من لي كان ساكنها و فكرة الطرد فقط لي تضور فدماغها..اما فابيو فمعقلش عليها ابدا عيا ميفكر فين شافها والو..هز راسو فقوس لقاه ساهي تيتمنضر رجع شاف فيها و شاف فقوس..مرة فيه مرة فيها و لخرين واقفين ساكتين تيتسناو الكلمة ديال سي قوس لي كان ساهي فالكوافورة الخايفة...
فابيو:احمم مستر...
فاق قوس من سهو و فنفس اللحظة حاول ميبيينش قدام الكل و بلا مقدمات عطاهوم بضهرو و خرج من تما اما لخرين عاد قدرو يرتاحو...
فابيو تبعو:مستر شغنديرو معاها؟؟
قوس تيشوف قدامو و هو يحرك صبعو:خود ليا معاها موعد عشاء غدا
فابيو تصدم:واط؟؟
قوس:كيفما سمعتي
فابيو مزادش معاه الهضرة:اوكي موسيو
قوس:تواصل مع المنادجر ديال العارضة بنان ستفسر منو اش واقع راني ممساليش لهادشي المهم متخرجش للمنصة مزال
فابيو:اوكي مستر
كمل قوس طريقو راجع للعرض اما فابيو رجع لعند الكوافورة لي رجعات للعناد مع الشارفة حتى دخل عليهوم لقا المسؤول و لي معاه غبرو...
عذراء فاش شافتو بحالا شافت المنقذ ديالها مشات دغيا تخبات مورا ضهرو:مسترر بغيت نخرج من هنا عفااك
عذراء عاد تفكرات و بلعات ريقها:مس مستر شفت معاك مستر قوس كان معصب غيطردني ياك؟؟
فابيو:دابا وضاحت الأمور و حنا غنتواصلو مع المنادجر ديال العارضة بنان فاش غنحتاجو اقوالك غنعييطو عليك
عذراء: و واخا شكرا
سد عليها فابيو باب الطونوبيل و ديمارا الشيفور...اما هي تسندات مع الزاج تيبان ليها الضلام على برا و السما غايمة باينة غتكون ليلة ممطرة سهات فداك الجو و عاد بدات الكاسيطة تترجع اللور قدام عينيها من الطيحة د بنان حتال نضرات قوس الرصاصية بالفعل كان غيسكت ليها القلب كتر من خلعة العرض كون ما كان فابيو معاه...
اما سي قوس هو رجع لمكانو فالعرض جالس تيتفرج ولكن جسمو فقط لي جالس اما عقلو سافر تيسترجع لقطة خروج الكوافورة للمنصة و لقطات تحركاتها حتال اللقطة فين كانت قدامو بديك الإطلالة واخا كانت عادية الا انه داك المكياج بيين ملامحها فشكل اخور لي جذباتو هو بالخصوص..هادشي لي خلاه طلق ابتسامة خفيفة بلا ميحس و فنفس الوقت احساس فداخلو تيقول انه ماشي اول مرة يسمع فيه داك الصوت ولا يشوف فيه ديك الإنسانة..ولكن فالموعد غادي يعرف شكون هي بطريقتو الخاصة....
وقفات السيارة قدام الفندق..هبطات منها عذراء و دخلات..خدات ليها سانسور حتال الطابق لي كاينة فيه غرفتها هي و بنان و فداخلها تتمنى انها تكون بيخير...مشات بخطوات متسارعة حتى دقات فالغرفة و هو يتحل الباب...كان لي حلو رجل طويل و بنيتو ضخمة شوية شعرو اشقر و عينيه زرقين..
عذراء رجعات خطوة للوراء مفهماتش اش تيدير هدا هنا و هي تسمع صوت بنان فالداخل..الرجل تنحا ليها حتى دخلات لقاتها متكية على ناموسييتها ب بيجامة النعاس...
عذراء:مداام كيف بقيتييي؟؟؟
بنان باين التعب من وجهها:شوية دابا مشيت لسبيطار و بعدا ماشي شي حاجة خايبة غير الم الطيحة
عذراء:الحمد الله الحمد الله انا مفهمت حتى حاجة كيفاش حتى وقع هادشيي غير لبستيه و نتي تفقدي التوازن ديالك
بنان عاد نتابهات ليها بلي لابسة الفستان هادشي لي خلاها تبتاسم بشوية و حطات يديها على يد عذراء:شكرا بزاف ا عذراء متصورتش غادي تقبلي تخاطري براسك على قبلي بالفعل احساسي مخييبنيش و صدقتي انسانة صافية من الداخل
عذراء بتاسمات:هدا راه واجب و ميمكنش ليا نخييب شي واحد حط عليا الامل ديالو
بنان:ياكما قالو شي حاجة اكيد غيجيهوم دخولك غريب؟؟
عذراء:فالحقيقة جاو المسؤولين و على راسهوم مستر فابيو و مستر قوس
بنان بدهشة:مستر قوس بنفسو كاع!!
عذراء:اييه ناري و تعرفي شحال كان قلبي تيشطح قدامو
بنان:و ناري شنو قاال عاودي ليا
عذراء:منطق بحتاشي كلمة بقا شحال تيحنزز فيا ياختي بشي عينين كنت خايفاه غير يرمش يطلق عليا الرصاص و لكن عطانا بضهرو و زاد صافي و رجع مستر فابيو طمأني انه غيتواصلو مع المنادجر ديالك يعرفو منو مالك و الى غيحتاجو اقوالي غيعييطو ليا و صافي سيفطني مع واحد الشيفور و هاني حداك دابا
بنان:ناري ا صاحبتي مغامرة و اشمن مغامرة طرات اليوم
عذراء:ههه حتى نتي هادشي ولفتو ديما تابعيني المغامرات
بنان طلعاتها و هبطاتها بعينيها:بصراحة جاك الفستان زوين واخا جاك هابط ولكن الستايل هو هداك ههه و كملتيها بالمكياج ياختي زوينة
عذراء حشمانة:اربي؟؟
بنان:معاك بصاح راك زوينة..المهم نتي دابا ماديريش فبالك راه المنادجر ديالي فخبارو كلشي غيكون تفاهم مع فابيو دابا نتي سيري حييدي عليك الفستان و رضيه ليا باش نسيفطو للمصممة و رتاحي ليك
عذراء:اوكي حتى نتي رتاحي ليك
طلعات عذراء راسها و ضارت..قفزات فاش شافت الراجل لي حل ليها جالس ساكت بحال امانة سيدي ربي و فيديه تيلي ديالو تيقلب فيه...
بنان عاد لاحظات انه معرفاتهومش على بعضياتهوم:تنقدم ليك راجلي انطون
بنان:ههه لا هانية(قلباتها المانية) انطون هادي هي المايكاب ارتيست ديالي الجديدة
انطون طلع راسو و بتاسم فوجهها و باليد لي مشادش بيها التيلي صافحها...
عذراء بالإنجليزية:متشرفين
انطون بالإنجليزية:ليا الشرف
عذراء:احم المهم نخليكوم انا غنمشي للغرفة ديالي
بنان:اوكي متنسايش الفستان
عذراء:واخا
خلاتهوم و مشات دخلات للغرفة الداخلية لي هي غرفتها و تما عاد قدرات تنهد براحة..حييدات الفستان و حييدات معاه حوايجها كاملين..دخلات ل الدوش ضرباتها بواحد التدويشة حتى حييدات بيها كاع داك الستريس و نقات وجهها من المكياج..لبسات بيجامتها..خلات لبنان الفستان و رجعات تخشات ففراشها و نعسات....
☀️فالصباح الباكر☀️
كانت عذراء ناعسة مابيها ماعليها حتى تحل الباب و بدات تحس بشي واحد تيحرك و يفييق فيها..حلات عينيها بصعوبة عاد كانت وسط احلامها و هي تبدا تحس بهزة ارضية فييقاتها من نعاسها...
بنان:انا منعرف المهم مستر قوس بقيمتو و قامتو طالبك للعشاء و هادشي على لسان المنادجر ديالو الأكثر ثقة و قرب فابيو
عذراء:و فابيو مزال؟؟ واهيا ناري واهيااا سيدناااا
بنان:واا نوووضي معندكش الوقت!!
عذراء:فين غنوض ا عيباد الله فين غنووض؟؟و انا باقة معمشة ملوية كيف المسمنة فهاد المانطة عفاك غير شوية مزال راه تيبان ليا بحالا راني باقة فالحلم
بنان بدات تطلع ليها المرض:واش دابا انا بنت ليك وجه التفلية؟
عذراء بلعات ريقها:لا
بنان:ايوا تهزي!
عذراء ناضت تتهبط بيجامتها و شعرها طالع مرون:تاعت الله غير اش غندير دابا؟
بنان:سيري هو الاول غسلي وجهك و سنانك و جمعي داك الشعر عاد اجي عندي ندويو
عذراء تتفوه:اجي بعدا واش الألم مشا؟؟برا ضهرك؟
بنان:خديت مسكنات و دارو ليا واحد البومادة مع المساج تنحس براسي مزيان المهم قادرة نتمشا ولكن عندي صعوبة شوية نتكا على ضهري المهم سيري سيري وجدي خليني عليك دابا
دخلات عذراء للحمام حتى قادات حالتها و خرجات من الغرفة..لقات بنان جالسة فوق الكرسي..شييرات ليها بصبعها لواحد القنت:هاهوماك اغراضك تما(شييرات ل الناموسية) و هاهواك فطورك فوق تما فطري باش تعرفي شغنديرو
مشات عذراء جلسات فوق الناموسية كان الفطور تيشهي و شكلو تيخليك غير تشوف فيه خصوصا و تواجد جوج قطع بيسكوي فيه وحدة على شكل برج ايفل و الثانية على شكل زجاجة عطر..بدات عذراء تاكل و تدوز بعصير التوت حتى سالات و هي تمشي تهز التيلي ديالها طلات عليه لقات مكالمات كتيرة من مها و ختها و رواء خلات ليهوم اوديو تتطمأنهوم عليها و شافت ف بنان...
بنان:مزيان ساليتي..دابا سمعيني مزيان و حلي ودنيك
عذراء:هاني تنسمعك
بنان:نتي خصك تعرفي انك محظوظة و بزاف حيت قدرتي تخطفي انظار مستر قوس و غير بديك الاطلالة البسيطة في حين كاينين شي ناس عياو ميلبسو الحرير و يتزوقو بالألماس و مخداو شوفة منو...
عذراء:يعني؟
بنان:يعني راك عجبتيه
عذراء:اويلي على الإعجاب!!هادشي ماشي ديالي!!
بنان:على هاد الحساب غترفضي الدعوة؟؟
عذراء:و شنو عندي مندير؟عرفتي شناهيا موعد و مع راجل هادشي ماشي ديالي انا بنت دارنا
بنان مصدومة:لا لا ميمكنش! واش غير دابا تنشوف قدامي بنت رافضة دعوة مستر قوس لا نتي بزاف و الله
عذراء:راه يسيقو ليا واليديا الخبار غيدبحوني و يعلقوني
بنان:واش باقة هاد العقلية عند المغاربة؟؟
عذراء:و فوق ما تصوري اختي انا غير بنت حي شعبي و لقيت هاد الخديمة نحقق فيها واحد الحلم ليكان بالنسبة ليا مستحيل و فاش نزلات عليا هاد الفرصة قلت هاهوا غيولي ممكن متحرموهاش عليا
بنان:واش صافا با ؟راه الى رفضتي الدعوة متحلميش تبقاي فهاد الشركة حيت بكل بساطة غتعتابر اهانة فحق مالكها لي مكايناش شي بنت المرأة ملاحتش عليه راسها!
عذراء:اش هاد التفكير!
بنان:هدا هو اللوجيك نتي باقة جديدة فهاد الضومين حتى انا واحد النهار كنت بحالك بنت مغربية كانت خدامة عارضة عند واحد المصممة ديال القفاطن و لي عطاتها الحياة واحد الفرصة خلاتها تقابل واحد المصمم معروف و لي هو انطون لي ولا راجلي من بعد..بالفضل ديالو دخلت لهاد الشركة و بالمساعدة ديالو ترقيت فيها حتى وليت العارضة الثانية على صعيدها كاملو!
عذراء:دابا نتي تتحاولي تقنعيني نمشي؟
بنان:شوفي إلى تيهمك حلمك و تتهمك هاد الخدمة راك عارفة الجواب
عذراء:و الى قبلت مغيسيق ليا حتاشي واحد الخبار ياكي؟؟
بنان:شكون غيسيقو ليك؟ياك واليديك لي خايفة منهوم فالمغرب؟؟
عذراء تنهدات:واخا عرفتي شنو مافيها باس نمشي غير ناكل و نرجع ندوق غير الماكلة ديال لي لاباس عليهوم كيف دايرة(كل واحد و همو)
الجوجات لي معاها تيبتاسمو ممعبرينش القزمة لي حدا بنان...
بنان قربات منها مكمشة عينيها بواحد الطريقة ديال غير تتقلب على خزيت:عرفتي ا روبين و نعرف بلي عندك يد فهادشي تنقسم ليك بلي خلقني و لي خلقك حتى تعرفيني شكون
بنان:انا غير علمتك حيت ضربتي متتعلمش و متعرفيش امتى توصلك سو اطونسيون ا بنت بلادي..عذراء يالاه
مشاو دايزينهوم و هبطو فالسانسور اما روبين رجعات وجهها المسموم غطرطق هادي كيفاش دارت حتى دازت منها سالمة زائد انه سمعات بلي الفستان داز و لبساتو عارضة بديلة هادشي مكانش من ضمن مخططاتها!!تحركات من تما بنفضة و ظلالها تابعينها لغرفتها...
اما قوس بعدما فاق و صحصح مشا حتى ترينا ليه مع راسو فلاصال ديال الفندق فاش سالا دوش و خدا ليه ميلك شايك بالبروتين..جبد البيسي ديالو فوق الطاولة و الجو زوين الشميسة ضاربة فغرفتو و الدنيا كلها منورة..مرة يهز الكاس يشرب و يكمل تقرقيبو على ازرار الحاسوب المحمول...حتى سمع الدقان فالباب..حبس من الكتابة و قال تفضل...تم داخل فابيو...
فابيو:نهارك مبروك مستر
قوس:شكرا فابيو..ياكما كاين شي مشكل؟؟
فابيو:لا لا مستر كلشي هو هاداك بغيت نقول ليك غير بلي قالت ليا مدام شيارا انه البنت قبلات بالدعوة
هبط قوس راسو فالبيسي:اه مزيان..تأكد من الخدم يسيفطو الهدية لي طلبت للمطعم فالوقت المحدد مبغيتش التعطال
فابيو:لا مستر كون هاني
قوس:الى ساليتي يمكن ليك تفضل
خرج فابيو و رجع قوس لخدمتو للحظات حبس فاش تفكر داك اللوك الأحمر لي كانت عليه بقا لثواني تيجمع ملامحها تاني فدماغو كانت مرسومة بطريقة جميلة فذاكرتو..ولكن حاول ينسا قدامو دابا خدمة و خصو يكملها...
اما عند الكوافورة فكانت مع بنان فسونطر باريس وسط من البوتيكات و ليمارك غير الصحيحة على ختها...
بنان:ضروري خصك فستان سهرة
عذراء:شوفي الله يرحم باك ميكونش شي حاجة معرية ولا مشعشعة حاجة سامبل و زوينة
بنان:اجي نشوفو هاد البلاصة
دخلو لواحد البوتيك كان كبير و زبائنو باينين غير من الطبقة الراقية قلال و الحس متيضورش كلشي تيقلب غير بالصمت..جات عندهوم لي خدامة فيه مبتسمة باينة عليها فرانساوية لابسة زي العمل...
البنت:فاش نقدر نعاونكوم؟
بنان:بغيت لهاد البنت لي معايا شي حاجة جديدة ستاايل عاد دخل و بطبيعة الحال لي يجي معاها
البنت طلات على الكوافورة:شنو بغيتي بالضبط مادموزيل؟؟
عذراء تتشوف فبنان:شنو قالت؟؟
بنان:قالت ليك اش حب الخاطر
عذراء:ا ااه قولي ليها شي حاجة زوينة بشرط تكون مستورة
بنان:ممكن تدينا دابا نشوفو الفساتين؟؟
البنت سبقاتهوم و تبعوها حتى وقفو قدام واحد المكان كولو علاقات حديدية و الفساتين مقفولين فأكياسهوم البلاستيكية الخاصة..جرات واحد العلاقة منهوم و عرات على واحد 4 الفساتين تما مافيهوم ميتشاف...
عذراء:اش هادشي معجبنيش ناري على ذوق
بنان:يمكن ليك تورينا حاجة خرى؟؟
البنت مشات جابت علاقة وحدة خرى و تتوري للكوافورة لي مرضاتهاش حتاشي حاجة الى لقاتو معري تلقاه معجبهاش ستايل ديالو حتى جابت ليها عرمة خرى و واحد فيهوم هو جذب الإنتباه ديالها و قالت...
عذراء وقوس الجزء الرابع
محتوى القصة
التنقل بين الأجزاء