كان الفستان فاللون موف غامق يديه طايحين على الكتاف مبيينهوم و طويل بالسميطة ديالو ستايل بسيط و لون جميل...
بنان:واش هدا نيت؟؟علاه ماشي بسيط؟؟
عذراء:انا عجبني حمقنييي تنموت على الموف خص غير نطلعو على كتافي و غيجي هو هداك
بنان تنهدات:مادام عجبك فخوديه
عذراء:اووه شكراا
بنان:من فضلك ممكن تديها تقييسو
البنت:اكيد تفضلي معايا مادموزيل
عذراء:شنو قالت؟؟
بنان:سيري معاها تقييسيه
مشات عذراء مع البنت لواحد غرفة خاصة و وراتها فين تدخل حتى تلبس الفستان..دخلات و حييدات حوايجها كاملين و لبساتو على جسدها..خرجات عند البنت لي كانت هازة واحد الكرة اسفنجية عامرة بالفنيتات و بدات تتقاد ليها و ترقعو ليها تما على شكل جسمها حتى سالات...
تقابلات عذراء مع مرايا طويلة تما و بدات ابتسامتها تتبان تدريجيا اول مرة تحس براسها لابسة شي حاجة غالية و راقية بالفعل احساس جديد تتعيشو وحدة بحالها من الطبقة المتوسطة...من بعدما شبعات تحنزيز فراسها لي فرحانة بيه تلفتات عند البنت مبتسمة دايرة ليها إشارة قبول بتحريك راسها بالإيجاب...حتى هي ردات بابتسامة لطيفة و قالت ليها تمشي تبدل تاني فهمات غير بالاشارات اما لفرونسي الله يجيب...مشات حتى حييداتو و خدات عبار الطول لي غتقاد باش يجيها هو هداك..خرجو من تما لعند بنان لي كانت جالسة تتسنا...
بنان:امضرا؟جاك مزيان؟
عذراء فرحانة:واييه زوين زوين غنديه هو
بنان:اوكي على خاطرك
البنت دات الفستان حتى نقصو منو الطول و دارو عليه تعديلات خفيفة تناسب شكل جسم عذراء و رجعات ل لاكيس فيديها الفستان المسدود عليه فبلاستيكتو الخاصة....جبدات بنان كارط بونكيغ ديالها و خلصات الثمن ديالو لي كان بااااهض و لي مرضاتش ليه الكوافورة البال من كترة ماعمات ليها فرحتها بيه عينيها...خرجو من تما و دازو شراو الحذاء و الحقيبة لي غيجيو مواتيين معاه لي كانو من اختيار بنان..ختمو هاد الشوبينغ بغداء فواحد المطعم تيقدم الأكل الفرنسي و رجعو للفندق...
فالمغرب و بالضبط فمكتب برناس لي كان جالس كيف العادة قهيوة و الخدمة حتى تسمع الدقان..قال تفضل و دخلات نواهل هازة ملف...
نواهل:موسيو جبت ليك بعض التقارير لي قدرات تمدني بيهوم الصديقة ديالي من باريس
برناس:ااه شكرا على مجهودك نواهل حطيهوم ليا هنا
حطات الملف فوق الطبلة و ستأذنات سادة الباب موراها...حط برناس الستيلو فوق المكتب و هز الملف تيقلب فيه..جا نيشان مع صورة عذراء مصورة بعيد بالفستان الأحمر و يديها طالعة بديك لابوز ديال باي باي و عنوان كبير فوقها بالفرنسية "دخول مفاجئ: اول عارضة قصيرة تدخل منصة أسبوع الموضة ب باريس و التي اذهلت الحضور باطلالتها و حيويتها"
برناس:عارضة قصيرة؟ من امتى ولاو يديروهوم؟؟(حقق فالتصويرة مزيان)معرفتش تنحس شفت هاد الملامح من قبل
تكا على الكرسي و شد راسو:الله يهديك ا برناس فين غتشوف وحدة من باريس افف
حط التقرير و سد عليه فالملف و رجع لخدمتو...
نرجعو لعند الكوافورة لي مجايبة ل الدنيا خبار و جاالسة فبيتها و تيليفونها فيديها..مدوزة مكالمة و تتسنى جوابها...
لوليا:الووو على السلامة ملي قدرت نسمع صوتتك فييين غبرتتيي
عذراء: وا الخدمة ا ماما متنسايش راني جيت نخدم ماشي نضور(ا تبارك الله على الموضفة)
قطعات عذراء و لاحت تيليفونها فوق الناموسية..مشات حلات الشرجم و بقات تشوف و تمنضر و برج ايفل تيبان ليها من تما..سهات مبتسمة فهاد الأجواء المريحة و ميعكر هاد الجو غير تذكر الموعد...خرجات عينيها بدهشة فاش تفكراتو و ناري شنو غتدير..الراس فالراس مع مول الشركة؟؟هادي لي عمرها دارتها فالحسبان ابدااا و قطعااا..شغتقول معاه؟؟فاش غيدويو ا عيباد الله؟؟؟
عذراء تتحاول تدرب على اش غتقول:احممم مستر قوس شكرا على دعوتك و انا فرحانة بقدومي اليوم
عذراء:والااا اشمن فرحة!!احمم المهم نعاود
عذراء:احمم مستر قوس شكرا على دعوتك...نوريك حلقة واحد الانمي غتعجبك على حسابي
عذراء:والااااا اويلييي الأنمي لااا بعد مني حالياا يااا هوس الأوطااكو(شدات راسها) الله ياربي شغنقول معاه..صافي غنحاول نبقا ساكتة و نخلي ليه هو المجال ديال الكلام..احم صافي مشات و نبقا نجاوب على قد السؤال..صافي مزيان هكا مزيان برافو عليك ا راسي لقيتي الحل(غنشوفو🙄)
سمعات الدقان و مشات حلات لقاتها بنان...
بنان دخلات:كلشي هو هداك؟؟
عذراء:اه كلشي محطوط خصني نعرف غير اشمن وقيتة بعدا
بنان:8 د العشية
عذراء:اويلي على العشاء ف 8 د العشية علاه ماشي بكري؟؟
بنان:لا عادي اغلبية الناس تيتعشاو بكري هنا المهم حنا ماشي سوقنا فالعشاء ولا الغداء المهم موعد
عذراء:دابا انا غادة لموعد مفاجئ هاكا راني باقة ممصدقاش و الله
بنان:نادرا فاش تنشوف مستر قوس تيعرض على شي وحدة بنفسو ناااادرا حيت ببساطة هوما لي تيجيو تيعرضو نفوسهوم عليه و نتي راك محظوظة و معارفاش بقيمة هاد الحظ لي عندك راه الى مشيتي حتى ترسختي فبالو ممكن تكوني المرافقة ديالو و من موراها(غمزاتها) الحبيبة ديالو
عذراء غير سمعات الحب و هي تزيير على يديها:الحب لا! اويلي على الحب! انا و مول الشركة؟؟ و الحب؟؟نتي معارفاش خطر الحالة ديالي!
بنان:و علاه شنو فيها؟ زعمة باغية تقولي اختلاف الأبراج؟ انا ممدخلاش داكشي لدماغي رغم انه انطون حتى هو من نفس برجي و تزوجنا بالعادة ديال زواج البرج من نفس برجو الا انه كون كان نفس انطون من برج ماشي نفس برجي كنت مغنترددش ولو لحظة نتزوج بيه
عذراء:المشكلة ديالي هي انه انا تطبقات عليا العادة الثانية
بنان بدهشة:لا! متقوليش ليا تخطبتي لولد عمك!!
عذراء:تماما و هدا هو المشكل ديالي الكبير انه رغم انها خطوبة فقط الا انه التقاليد و العادات رابطاني معاه
بنان:نتي متتبغيهش! و هادشي باين! كون كنتي تتبغيه كون رفضتي و عطيتيني السبب ماشي تبغي ترفضي خوفا من عائلتك يعني هو مساوي عندك والو!
عذراء:هو عزيز عليا ولكن باش نكون مرتو ولا حبيبتو ولا شي حاجة فوق الصداقة ولا الأخوة..ميمكنش...
عذراء:غيجي واحد النهار غنسالي فيه هادشي ولكن ماشي فهاد الضروف
بنان:المهم لي غنقولو ليك هو عيشي حياتك و متفكري فحتاشي واحد حيت مرة وحدة لي غتعيشي ايوا ستاغليها محدك صغيرة
عذراء:وي عندك الحق المهم سمحي ليا غنمشي نرتاح شوية باش نوض نوجد راسي
بنان:واخا الى خصاتك شي حاجة علميني غنهبط دابا
عذراء:اوكي
خرجات بنان و تكات عذراء فوق الناموسية ساهية فالسقف و افكار كتيرة مخربقين فدماغها..ولكن حاليا همها الوحيد هو كيفاش غادي يدوز هاد العشاء...
⏳بعد مرور ساعات⏳
فاقت عذراء من النعاس بعدما سدات لالارم لي كانت محققاها..ناضت تتمسح وجهها جبدات ملابسها الداخلية و كولون و ديباردو من الباليزة..دخلات ل الدوش حتى دوشات..نشفات شعرها مزيان بالسيشوار..نشفات داتها و دهناتها بلباديلوشن..لبسات حوايجها و مشات تتمشا ببطىء حتى قربات من الفستان لي شرات ليها بنان و لي ختارتو هي من بين جميع الفساتين باش يكون هو مرافقها لهاد السهرة..هزاتو من الماريو لي كان معلق فيه و بدات تتشوف فيه شحال..شافت فالساعة كانت 6:35 فقررات توجد راسها على خاطرها..لبساتو و جلسات فالبيرو تما..جبدات دوزانها و بدات تتأپليكي المكياج ديالها لوجهها و فدماغها راسمة اللوك لي غيجي مع اطلالتها و لون فستانها...
على برا الغرفة كانت جالسة بنان تدوي فالتيليفون و ملامح البرود باينة على وجهها لي كان ساهي فنقطة وحدة:وي بغيت تاخد ليهوم صور..دبر راسك منخافش عليك..بطريقة احترافية و قريبة بغيت لابوز تكون ضاحكة بغيت يبان الإعجاب فالصورة..وي نعول عليك بغيت هاد الليلة مزال يوصلوني..ههه مزيان
قطعات و ابتسامة شر مرسومة على شفتيها سرعان متسمع حلان باب غرفة عذراء ختافات هاد الإبتسامة و تقلبات لصمت...
عذراء خرجات لابسة الفستان و فيديها الطالون مقادة وجهها بمايكاب موف زوييين بيين جمالها بشكل اخور...
بنان ناضت لعندها:وااو طلعتي زويينة
عذراء:هه شكرا ولكن الطالون عالي و ممولفاهش تيبان ليا غنلبس شي حاجة خرى
بنان:اويلي باغية تخسري اطلالة السهرة ديريه فالسيارة حتى تقربي و لبسيه صبري بيه غير حتى تجلسي فالطاولة
عذراء:غنحاول واخا غير على وجهك حيت نتي لي ختاريتيه ليا
بنان:و فين الصاك؟؟
عذراء:فلداخل راه باقي مكملت
بنان:اجي جلسي هنا راه شوية يجي ريكا يقاد ليك شعرك
عذراء:وايلي؟؟و انا لي غادة بيه هاكا مطلوق
بنان:والا خصو يكون مجموع المهم ريكا ايقاد ليك كلشي
جلسات عذراء قدام الكوافوز تتشوف انعكاسها فالمرايا:زعمة هادشي مقاد؟؟انا تاييقة فراسي متتعرفيش شنو تحت راس هادو لي لباس عليهوم
بنان:نتي حاولي تبييني ليه غير الجانب الزوين ديالك و كلشي غيدوز بيخير
عذراء لمعو عينيها:نوريه الجانب الزوين فيا؟
بنان خافت تدير شي مونتيف:ا ا ااه ولكن بطريقة مرزنة ماشي العفوي لا منصحكش
عذراء:صافي كوني هانية
دخل ريكا جايب ماتريالو سلم معاهوم و بدا تيخدم فشعر عذراء..سرحو ليها و قاد ليها مشيطة بسيطة و فنفس الوقت راقية مع اكسيسوار زيين بيه شعرها...شافت فيها بنان بابتسامة و مشات جبدات واحد العطر من عطورها الفاخرة و رشاتو عليها...
بنان:و بهاكا تتكون اللمسة الأخيرة مكتملة راك وااااو
عذراء تتبتاسم عاجبها اللوك ديال شعرها اول مرة يتقاد ليها هكا موالفاه ديما مطلوق:طانكيوو ريكاا
ريكاا بتاسم مطلع خنافرو:بصحتك جيتي غزالة
عذراء:واش صافي؟؟؟يعني صافي غنمشي؟؟
بنان:السيارة تتسنا فيك التحت(قربات منها و حطات يديها على كتافها و تحنات لعندها) عذراء...
عذراء طلعات فيها راسها باستغراب:نعام؟
بنان:بغيتك تدوخي مستر قوس..بغيتك تاخدي عقلو
عذراء:ك كيفاش؟؟؟
بنان:شوفي عقلي مزيان على كلامي و ديريه فدماغك عرفتي مثلنا المغريبي لي تيقول النهار لول تيموت المش بغيتك طبقيه نتي
عذراء:وا مدام راني ماشي د هادشي و ديجا قلتها ليك زائد انا لا علاقة بالحب
بنان:حتى انا كنت بحالك فواحد المرحلة ولكن فاش لقيت الرجل المناسب دق ليه قلبي بلا منحس
عذراء بخوف:بلا متحسي؟؟انا مبغيتش هادشي
بنان حاسة تتكب الما على الرملة:المهم نتي دابا غير سيري ستمتعي بوقتك و هضرتي باقي غترجعي عليها
عذراء شافت الوقت كانت 7:15...
عذراء:غنمشي نهز صاكي و نوجدو الوقت هادي
بنان:شوفي ديري لتيليفون سيلونسيو راه ماشي من اللائق يصوني ليك وسط موعد اوكي؟
عذراء:انا غنطفي بوه كاع امتى غير يسالي هاد الموعد
بنان:ههه المهم بالتوفيق انا نيت عندي موعد مع انطون
عذراء:و شكون غيقاد ليك؟؟
بنان:ههه راسي زائد نسيتي انه راجلي و منحتاجش نتقاد لديك الدرجة ديجا عارفني و شايفني فجميع حالاتي
عذراء:اه عندك الحق المهم غنمشي نوجد
بنان:سيري راه غيهبط معاك ريكا لفين كاينة السيارة
دخلات عذراء حتى جابت الصاك لاحت فيه تيليفونها لي طفاتو و وريقاتها و بسطامها الدنيا و الزمان هادي متعرف اش يوقع..هزات طالونها فيديها حتال تما و تلبسو..هبطات مع ريكا حتال فين كانت مبلاصية طونوبيل فخمة من نوع ميرسيديس طويلة فلكحل..خرج الشيفور حتى حل ليها الباب..دخلات و احساس غريب راكبها داخليا مع الخلعة..بلعات ريقها و ديماراو من تما...
فنفس الوقت كان قوس حتى هو راكب فسيارتو الفاخرة صايگ بنفسو هاد المرة حيت ديجا حافظ طرقان باريس ماشي بحال المغرب مزال مولف و ضروري من الشيفور...بقا غادي و بلا هواه عقلو بدا تيفكر فالحلة لي غتجي بيها من مورا ديك الحلة الحمراء المشتعلة..ممكن لون اخر تينبض بالحياة؟ ولا لون تيبث الهدوء؟ ولا تيبعت الرقة؟..كمل صوگانو و فنفس الوقت السيارة لي فيها الكوافورة تتقرب من المطعم...
وقفات السيارة قدام واحد من ضمن افخم المطاعم فباريس و لي هو Le Jules Verne و لي تيتواجد فالطابق الثاني من برج ايفل و لي تيقدم الأكل الفرنسي...هبط السائق حتى حل ليها الباب و هبطات لابسة طالونها و صاكها فيديها تتفحص المكان بعينيها كون هادشي جديد عليها...
السائق بالانجليزية:تفضلي معايا ميس
دخلو للداخل دايزين السيكوريتي لي كان واقف تما..طلعو فالسانسور شحال تيطلعو و الدنيا تتبان ليها غادة و تتصغار و هي طالعة فسانسور برج ايفل..حتى وصلو و داها حتال الطاولة لي كانت ديجا مريزيرفية...السائق نساحب و الكوافورة جلسات تتمنظر الدنيا كلها منورة بالضو بواحد الشكل جميل بزااف سهات تاني فالمنضر عاجبها الحال حتى بدات تتسمع صوت شاريو مجرور ستغربات منين غيكون جاي صوت الشاريو حتى بدات تتسمع معاه خطوات حذاء ماشية بكل ثقة..طلعات راسها لقاتو قوس جاي و حداه خادم جار طاولة حديدية بروايضها عامر فوقها بالورد الأحمر و بيناتهوم علبة بيضاء معقودة ب بابييون كحلة..بلعات ريقها و قلبها غيوقف فبلاصتو..عاد قدرات تصدق بعينيها بجوج..هاهوا قدامها داباا بشحمه و لحمه لا هادشي حقيقة...اما قوس فكان غادي جاي و فقرارة نفسو خمن انه غيكون اللوك حيوي بحال اخر مرة ولكن تفاجأ شوية من البساطة ديالو ولكن فنفس الوقت عينيه تيشوفو زهرة ارجوان متفتحة و عبقها بدا تيحوم فالمكان...بقاو لثواني معدودة من تبادل النضرات لبعضياتهوم..هو تيسقي عيونو فجمالها المميز و شكلها الجذاب و حركاتها العفوية و هي باقة تتأكد انه رب عملها و صاحب الشركة لي خدامة فيها هو لي قدامها دابا..حتى تم جاي السرباي لي كسر هاد الأجواء...
السرباي وقف مسمر فبلاصتو كان فرنسي:موسيو...
قوس حرك ليه راسو و نساحب فهم انه مزال مغيجي...
اما الكوافورة باقة مبلقة فيه عينيها خايفة معرفاتش شنو تقول...
لا هادي بالفعل ملاحظاتش هاد الجردة الحمرة كاملها لي جايب ليها...
قوس شيير بيديه بجوج بحالا تيقدم شي حاجة:هادو ورود حمراء هديتي المتواضعة مناسبة ل الطلة الحمراء لي كنتي عليها لبارح
عذراء ناضت:هادو ديالي؟
قوس:اه
عذراء قربات من الباقات هزات وحدة ناري غطاتها كاملها قداش كبيرة..رجعات حطاتها و فرحتها متتوصفش اول مرة يجيها ورد كادو فحياتها صدقات جاياها جردة...
عذراء بابتسامة:شكراا مسترر من كرمك تقدم ليا هاد الهدية
قوس:ولكن ماشي غير هاد الورد لي هدية
عذراء:واش بالكروسة..اح قصدت واش كاينة شي حاجة خرى؟؟
قوس:طلي فلداخل
طلات عذراء و هي تبان ليها العلبة مشات دغيا هزاتها و شافت فقوس ديك النضرة واش غير نحلها و هو يحرك ليها راسو بالإيجاب..جرات الربطة السوداء و حلاتو..كان داك الورق الخاص بلف الملابس ملصقين الجزء الفوقاني و التحتاني بواحد الطابع ديال الشركة..جراتو حتى تكشف و الصدمة انه كان الفستان الأحمر نفسو لي لبسات للعرض!!!
طلعات عذراء راسها بالعرض البطيء متفاجئة:هدا الفستان لي لبست البارح؟
قوس:وي الفستان لي كان غيتحط مع الفساتين ديال داك العرض و لي كان غيتعرض معاهوم للبيع تيرجع ليك دابا
عذراء بدهشة:هادشي كتير عليا ا موسيو(وا شدي و سكتي😒)
قوس جلس و حتاهي جلسات و العلبة باقة بين يديها...
قوس:دابا ولا هدية حيت لي درتيه لأجل العارضة بنان كان موقف شجاع منك و تحدي..و انا ممتن لهادشي
سدات عذراء العلبة و حطاتها على جنب فوق الطاولة اما الخادم انساحب جار معاه الورد الأحمر حتى يمشيو...
عذراء طلعات راسها و فنفس الوقت تتهرب عينيها من عينيه:عذراء ا مستر
قوس:عذراء؟ اول مرة نسمع بهاد الإسم
عذراء:اا ااه هه
قوس جبد الموني تيقراه...
عذراء شافتو و هي تدير بحالو..جبداتو غير بانت ليها الفرونسي و هي تكمش عينيها ولكن سرعان مبانت ليها ترجمة الانجليزية تحت من الفرنسية طلقات التكميشة و بدات تقرا..و واهيا ناري ها الحلوف ها الشراب..بلعات ريقها و بنص عين شافت فقوس لي كان منزل راسو تيقرا الموني بهدوء حتى حس بالمراقبة طلع راسو و هي حدراتو دغيا حاسة بخجل كبير و تتقول فخاطرها:ناري غيتصحاب ليه حالة فيه فمي و انا الميمة بغيت نعرف غير اش ختار باش نختارو...رجع قوس تاني تيقرا حتى قرر شغيطلب و هو يطلع فيها راسو شابك يدو لقاها باقة شادة داك الموني تترعد عليه بحالا شادة الكراسة و تتحفظ الإملاء...
قوس:ميس ساليتي؟
عذراء تتفتف:ل لا مزال..عرفتي شنو انا غنختار هاد الطبق
قوس هز يدو و رجعها لمكانها و هاهوا جاي السرباي باش ياخد الطلبات..خدا ديال قوس من المقبلات و الطبق الرئيسي و التحلية اما الكوافورة حدها وراتو غير واحد الطبق تما...
قوس:مغاتاخديش مقبلات ولا تحلية؟؟
عذراء:ا ؟ علاه نقدر ناخد كتر من طبق؟
قوس:وي
عذراء تدوي مع السرباي بالانجليزية:احمم بغيت نفس المقبلات و و هاد التحلية ديال الشكلاط
السرباي:و شنو بالنسبة للمشروب؟
قوس:بغيت شامباين
السرباي كتب:و المادموزيل؟
عذراء:ك كيفاش؟واش الشراب؟
قوس:واش متتشربيش؟
عذراء:لا لا جيب ليا غير شي فانطا الى كاينة تما(مالك فسناك ا بنت العبد)
السرباي:دوماج مادموزيل معندناش يمكن ليك تختاري واحد من قائمة العصائر الإستثنائية لي تنقدموها
قلبات الصفحة ديال الموني و هي تختار عصير التوت نيت بحال لي فطرات بيه مافيها ميحرق دماغها مجرد التفكير فهادشي تيخليها فقمة توترها...السرباي خدا الطلبات مخلي قوس مستغرب منها من غير تصرفاتها الغريبة بالنسبة ليه الا انه امرأة متتشربش جاتو عجب هادي اول مرة يقابل فيها شي وحدة هكاك...
عذراء حادرة راسها بخجل من نضراتو ليها تتخليها حشمانة بلا هواها...
قوس تيشوف قدامو بنت زوينة حشمانة غير بوحدها عكس لي موالفو الجرأة و الكلام متيساليش ولكن هادي غير ساكتة و حادرة راسها بحالا غياكلها..فقرر يكسر هاد الصمت و يخرجها من ديك القوقعة لي حابسة فيها راسها...
قوس:شنو تديري فحياتك؟
عذراء:ا اانا خدامة مايكاب ارتيست فشركتك
قوس:امم مايكاب ارتيست و دابا على حد علمي حتاضناتك العارضة بنان عندها؟
عذراء:ايه مستر وليت مايكاب ارتيست الخاصة بيها
قوس:مزيان هادشي تيعني انك ترقيتي فظرف وجيز بزاف
عذراء:ايوا لهلا يحاشم(تتهرب عينيها تاني)
السرباي جا حط المقبلات و هي تصدم اش هادشي جايب ليها! خضيرات بحال ديال كسكسو فزليفة؟؟...هز السرباي صوص بيضة و بدا تيكبها ليهوم فوق ديك الخضرة و نساحب..جا موراه نيشان سرباي اخور هاز صينية فيها كاس خاوي و قرعة شامباين و كاس عصير التوت..حط العصير قدام الكوافورة و الكاس قدام قوس و بدا تيكب ليه تحت انظار الكوافورة لي تتشوف الشراب اول مرة تيتكب قدام عينيها بقات ساهية معاه حتى سالا و هي ترجع لحريرة لي قدامها...ضربات تاني طليلة على قوس لي هز الموس و الفرشيط تياكل بيه..اما هي قالت مع راسها هادشي ماشي ديالي بانت ليها معلقة تما هي لي هزات و غرفات بيها ديك الخضرة بحال لاگلاص صدقات بنينة غير شكلها لي محفزهاش تاكل(تريكة السناكات)
هز قوس رشفة من مشروبو و رجع حطو:تيبان ليا واقيلة هدا اول موعد ليك؟
عذراء:ا ااه هه
قوس:امم ولكن جسدك كان موصل حاجات خرين
عذراء بتسائل:مفهمتكش ا مستر؟؟
قوس:تنقصد جسمك
عذراء:مالو؟
قوس شاف فيها بثمالة(تعبير مجازي ماشي سكران):مثير
عذراء تصدمات:ك كي كيفاش(هبطات راسها تتمتم بشوية) اويلي على هضرة عيب حشومة...
قوس سرح يديه حتى حطها فوق يدها الباردة مخليها تقشعر من الحرارة لي حاسة بيها فراحتو..طلعات راسها بالزربة فيه و ملامحها متتبشرش بالخير و فنفس الوقت الطرد بدا تيضور ليها فدماغها فحاولات ترولاكسا...
قوس بتاسم بمكر:شنو؟كنتي غادي تقاومي؟
عذراء هربات يدها من يدو:مالك تبدلتي هاكا خليك زوين(الأسلوب الكوافوري)
قوس:مالكي كلك متوترة؟؟تنظن راك جاية برضاك و ممبزز عليك حتى واحد تجي
عذراء تتلون قدامو بالفعل كلامو صحيح ولكن ميتجاوزش حدودو:ا ا انا يتصحابلي يعني ع عراضة و صافيي...
قوس ضحك:ههه علاه كاينة شي حاجة بدون مقابل؟....
عذراء:كيفاش ا مستر المقابل؟؟
قوس:انا بطبعي تنعشق الأشياء الجميلة و خصوصا الى كانت فنفس الوقت لطيفة
عذراء: باغي تقصد زعمة انه دابا تنبان ليك مجرد شيء فقط؟
قوس:فالحقيقة نتي اكتر من نعتابرك مجرد شيء..(تيسقي فيها عينيه) شي حاجة فيك سبيسيال هي لي مخلياني متبع معاك الكلام لحد الان
عذراء بدات تتحس بالاختناق و شعور تيقول ليها انه الأمور مغتدوزش على خير فا ناضت قدام الأنضار ديالو..هزات صاكها و قررات تنساحب فهدوء محدهوم باقي مدارو فالطاجين ميتحرق..النوضة لي دارت خلات قوس يعقد حجبانو..ناض هو بدورو هادي شنو تيقول ليها راسها تنوض باغية تخرج وسط العشاء قدامو و فالحضرة ديالو بلا كلام بلا استأذان..اما الكوافورة غير شافتو ناض حتى هو بداك الطول و العرض ساد ليها الطريق..عنقات صاكها عندها مبلقة عينيها فيه والخوف بدا تيشدها ضارت يمين و يسار بوحدهوم لي تيضورو تما و حتى من لي خدامين مساليين شغالهوم..بلعات ريقها و قلبها تيطلع و يهبط لا هادي هي لخرى ليها ياكما ناوي هدا يغتاصبها هنا؟؟...شدها قوس من دراعها مهبط وجهو لوجهها حيت قصيرة بزاف مقارنة بيه...
عذراء تتجر يديها من يدو ولكن كانت قبضتو قوية:طلق مني تنظن مبقا عندنا علاياش ندويو
قوس:و لفين يحساب ليك غادة ليه؟؟راه الشيفور لي جابك مكاينش و انا الوحيد لي غيرجعك (بتاسم باستفزاز) يعني؟
عذراء بعدات وجهها منو و خوفها زاد كتافات بالصمت حيت طاح ليها على تمامها الى هو الوحيد لي قادر يرجعها للفندق فمعندها غير تضرب الطم و تسكت حتال ديك الوقيتة...
قوس:شفتك ساكتة؟
عذراء بعدات منو و رجعات جالسة و فالداخل ديالها تتحس بالخنقة و شوية غتجيها البكية من الخوف لي بدا تيتغلغل فجميع انحاء جسدها..انها تكون مع واحد غريب بالنسبة ليها شي حاجة اول مرة توقع ليها و متطيح غير فهاد النوعية لي ستفزاتها...
جر قوس لكرسي حتى هو و جلس..فنفس الوقت هاهوا السرباي جاي جيهتهوم ب الأطباق الرئيسية..حط لكل واحد الطبق ديالو قدامو..هبطات عذراء عينيها تتشوف فجوج طريفات ديال اللحم و شي حاجة فوقهوم بحال الوريدة جمعات فمها بالشكل ديال اش ا وا هادشي..اما قوس هز الموس و الفرشيط و بدا تيقطع فالأكل ديالو و يدوزو برشفة من المشروب...
عذراء حادرة راسها لثواني تتحاول تركب جملة مفيدة:واش يمكن الى كلينا ترجعني للفندق؟
قوس طلع فيها راسو لقاها بحالا تدوي مع طبسيلها:واش زربانة ولا؟
عذراء بتوتر:غدا تابعاني الخدمة و تنفيق بكري...
قوس:الخدمة راها قدامك دابا
عذراء زييرات على يديها:راني داوية بجدية...
قوس مطلع حاجب:و مالي شنو قلت؟راني رب الخدمة يعني انا هي الخدمة شخصيا بالنسبة ليك انا لي تنتحكم فشنو تديري
عذراء:بغيت نسولك
قوس شرب رشفة:وي؟
عذراء:شنو اساس هاد الموعد؟ علاش انا هنا اصلا؟
قوس بجدية: ببساطة حيت فاش تتعجبني شي حاجة خصني نكتاشفها و دابا قولي ليا شنو السبب ديال هاد البرود لي تنشوفو فعينيك؟؟
عذراء:ا انا..انا ممولفاش بهاد الوضع
قوس حط الموس و الفرشيط و شبك يديه ببعضياتهوم:نفس الشيء لي بغيت نقولو
قوس جابت ليه الضحكة:ههه تحرش؟ لا بالفعل امرك غريب و بزاف انا مدحتك و مدحت جمالك و نتي معاجبكش الحال
عذراء:انا ماشي داك النوع د البنات لي تتعرف
قوس:هادشي فيه نوعية؟
عذراء:ببساطة اوساط عيشنا مختلفة ولكن الى سمحتي مبغيتش يوقع هادشي تاني(تتقولها بالخوف)
قوس بغرور:انا متنبززش راسي على حتاشي وحدة هوما اصلا لي تيجيو لعندي و ممحتاجش نعذب راسي
عذراء:ا اه مزيان(تحنات على طبسيلها)
قوس رجع تياكل و فقرارة نفسو تيقول اش هادشي تيشوف ولا تيسمع تتبان ليه البنت بحال شي وحدة من كوكب اخور مبغات لا مدح لا تغزل اش هاد المخلوق العجيب؟؟ف اخر ايامو قوس بنسليمان يترفض بطريقة فنية من طرف شي وحدة و من شكون وحدة خدامة عندو؟؟نفس الشيء مع الكوافورة ساهية فطبسيلها و بالفرشيط تتلعب فيه بحالا تطلع العمارات و فنفسها تتقول غير امتى يسالي هاد الموعد المزفت من بعدو عمرها ضور بساحتو مزال...سالا قوس الأكل اما الكوافورة كيفما باقي محطوط غير شتتات ليه الديكور بديك الفرشيط حتى ولا بحال داك اللحم د الطاجين الى خليتيه حتى برد كيف تيكون..جا السرباي حتى جمع الأطباق و تم راجع بالتحلية ديالهوم..حطهوم و مشا...الكوافورة فاش شافت الحلوة كانت معولة على شي طرف كبير ولا شي حاجة ساعة جابو ليها بزيقة فطبسيل علاش هاد الناس عندهوم كلشي مصغر؟؟...هزات المعلقة الصغيرة الخاصة بالحلويات و ليگلاص..و بدات تتقلب تاكل فيها اما قوس بدا تيطلع ليه هاد الصمت فالراس معرفش اش غيقول ليها المشكلة مبغاتش لي يدوي معاها بحميمية اذن فاش غيدويو؟؟حتى من الخدمة ولا المشاريع مسولاتوش عليهوم بحال غيرها..والو مجرد بنت غريبة محطوطة قدامو غتموت من خجلها و خوفها رغم جمالها و حلاوتها الا انه هاد التجاهل ديالها ديرونجاه فراسو و مع غرور رجل برج القوس كملات فاش تلاقا مع برودة دم انثى برج العذراء...
عذراء سالات اكل التحلية و هزات فيه راسها:واخا نمشيو؟
قوس ناض:تبعيني
ناضت عذراء صاكها فيدها و اليد تانية هازة بيها علبة الفستان يتصحاب ليكوم نساتها؟ولاهيلا...خرجو من تما الحساب ديجا مدفوع من قبل...ضغط على السانسور و بقا هابط بيهوم..هو واقف داير يديه فجيوبو تيتسناه ينزل و هي موراه عاطياه شوية د المساحة و تتشوف غير فصباطو لي تيلمع...بقاو فداك الصمت حتى هبط السانسور و خرج قوس اللحظة لي غتخرج فيها الكوافورة تابعاه فقدات توازنها بسبب الطالون و متجي غير طايحة على ضهر قوس معنقاه بيديها هاد الأخير لي نداهش فاش حس بالشدة ديالها الصاك و العلبة كانو مليوحين فالأرض و الكوافورة عاد بدات تستوعب الأمر قلبها بدا تيضرب حاساه غيخرج من بلاصتو و وجهها ولا حمر بحال ماطيشة...شدها قوس من كتافها و ضار عندها لقاها حادرة راسها و لسانها تسرط...
قوس:واش تعكلتي؟
عذراء تحنات حتى جمعات اغراضها من الأرض حركات ليه غير راسها ب اه...هبط قوس عينيه لداك الطالون لي لابسة و فهم البلان اصلا الكوافورة لصقاتو ليها غير بنان اش جابها لشي طالون تريكة السبرديلات...قرب منها قوس حتى تحنا لعندها و هي تتشوف فيه اش غيصنع حتى تتحس براسها تهزات فالسما هي و اغراضها و يديه وحدة مورا ركابيها و الثانية مكالية ضهرها...عذراء طلعات راسها مخرجة فيه عينيها و رجيلاتها طالعين فالهوا و هو غادي بيها مخرجها من تما...
عذراء مصدومة:(و و و وااش هدااا هزني غير عاد داباااا؟؟؟؟؟؟؟)
عذراء:ح حطنيي ع علاش هازني
قوس شاف فيها بجدية:ياك الطالون لي لاحك؟
عذراء بلعات ريقها: ا ااه
قوس:ايوا تهدني حتى نوصلو ل الطونوبيل ليطييحك تاني
سكتات عذراء و فنفس الوقت حاسة بإحساس غرييب بزااف..القرب ديالهوم دار فيها واحد التوتر و دابا هاهيا بين احضانو كااع ولكن رغم هادشي حسات بدفئ فشكل..واحد الدفئ لي اول مرة تحسو جيهة شي راجل و لي وحدة بحالها كابرة وسط من اب و خوت متيعرفوش لهاد الحوايج معارفاهش..العنف و الزيار هو الوسيلة ديالهوم لي كانو و لازالو تيوصلو بيها ديك الحماية..عمرها عقلات على راسها حسات بهاد الاهتمام..غريبة و بزاف انه غير حيت تعكلات بسبب الطالون هزها كاع..زائد ريحتو الرجولية لي بدات تطلع مع نيفها لي كملات ليها الباقي و لواحد اللحظة انثى العذراء بدأت بالإحساس بالراحة وسط احضان رجل القوس..هادشي لي خلاها تغمض عينيها...
اما قوس بقا هازها جاتو صغيرة بسبب طولها مقارنة بالنخلات لي موالف و رغم انه متيشوفش فيها الا انه عارفها خايفة غير من يديه لي حسو بجسمها لي تيترعد بشوية..وصل فين مپاركية الطونوبيل ديالو..هبط عينيه لعندها لقاها سادة عينيها و داك الأيشادو الموف شحال تيبان زوين عليهوم..بقا لثواني ساهي فجمالها الهادئ و ريحة عطر بنان بدات تطلع حتى ستنشقها..الكوافورة لي كانت سادة عينيها فاش حسات بخطواتو وقفو حلاتهوم دغيا تشوف فين داها لقاتو مقابل معاها و تيتمنضر...
عذراء حدراتهوم دغيا بخجل و كلها حمرة و قلبها تيضرب:غ غ غير حط حطني دابا
قوس هبطها حتى وقفات على رجليها و جبد ريموط حتى حل الطونوبيل..الكوافورة حيت لا رقي لا فخامة دغيا حلات لراسها و ركبات فاللور...طلع حاجبو و جلس فبلاصتو و دخل الساروت حتى ديمارات الطونوبيل...
ضورات وجهها لعند الزاج تيبانو ليها الطونوبيلات تيدوزو اما هو حاضيها من المرايا مرة يشوف فالطريق مرة فيها..اما هي تتحاول تجاهلو حيت لي داز عليها فالعشاء كان كافي...بقاو غاديين فداك الصمت و حتى هو مدواش معاها حتى وصلو قدام الفندق...خرج من الطونوبيلة لقاها سبقاتو خارجة و فيديها الصاك و العلبة...قرب منها حتى شد يديها تحت انظارها المندهشة حتى قربها لفمو باش يبوسها و انفاسو ضاربة عليها و هي تجرها مخلوعة..طلع فيها راسو عاقد حجبانو و بواحد الگغيماس ديال مال هاد الخرا تاني؟
عذراء بتوتر:ش شكراا على الدعوة مستررر شكراا نخلييك
قوس حرك ليها غير راسو طلع ليه المرض فهاد اللحظة...تم جاي السيكوريتي عطاه الريموط باش يپاركي الطونوبيل و دخل للفندق..اما الكوافورة غير شافتو دخل عاد قدرات ترتاح..دخلات حتى هي و مع الدخلة حييدات داك الطالون تما هازاه حتى هو فيديها و بقات غادية تما حفيانة ممسوقاش للبشار حتى طلعات لغرفتها...غير دخلات لقات بنان عاسة عليها...
بنان:امضرااا كيفاش داز داكشي؟؟؟
عذراء بدهشة:منعستيش؟؟
بنان:لا قلت حتى تجي(لمحات العلبة) اووه هدية اكيد اكيد مستر قوس معروف غير بالسخاء و الهدايا
عذراء جلسات حداها و تتمحكك فرجليها مع بعضياتهوم:غير سكتييي هادي و التووبة
بنان:اويلي مالكي؟؟؟
عذراء عاودات ليها كلشي...
بنان:اويلي ا لموصيبة راه قصد يمدحك ماشي قالها ليك بحال دوك المغاربة المكبوتين لي تتعرفي
عذراء:واخا نيت ميقولهاش ليا
بنان:اويلييي معامن انااا اوييلي سيري تنعسي سيري
عذراء ناضت:هي الأولى اصلا عيييت
مشات عذراء طالع ليها الدم حتى سدات عليها فغرفتها شعلات الضو و هي تفاجئ بالورد الأحمر محطوط عندها فالبيت...
حطات داكشي لي فيديها و مشات هزات وحدة منو شماتها اول مرة تشم ريحة الورد الحقيقي..كانت سادة عينيها لثواني حتى حلاتهوم و كانت ريحتها بالنسبة ليها زوينة..حطاتها و مشات حتى بدلات حوايجها غسلات رجليها و مسحات داك المكياج..فكات المشيطة عاد بدات تتحس بيخير موالفة غير المطلوق...تكات فوق ناموسييتها و بدات تتسترجع الأحداث ديال هاد العشاء حتال ديك اللقطة ديال الهزة تما فين بدات تتلون غير بوحدها و تقاد فشعرها(الله يستر)واحد الاحراج كبير شادها...من بعد صراع كبير بين عقلها حاولات تحبس تفكيرها باش تنعس حتى داها النعاس....
🌞فالصباح الباكر🌞
فنفس الصف لي فيه غرفة بنان و بالضبط فغرفة روبين..فاقت هاد الأخيرة تتكسل و ناضت بشوية عليها حتى دخلات للحمام..قضات حاجتها و بدات فروتينها للعناية اليومي حتى سالات و رجعات تاني بخطواتها البطيئة لمكان السرير حتى لمحات واحد الجوا تلاح تحت الباب..عقدات حجبانها باستغراب و تحنات حتى هزاتو مكانش فيه حتاشي اسم..زادت استغربات ولكن الفضول شدها و ضروري خصها تعرف شنو لي فلداخل...حلاتو و هي تلقا صور..جبداتهوم و هنا الصدمة!!!
و بلا متحس طاحت على ركابيها بقوة على الأرض يد شادة الصورة و الثانية على فمها و عينيها بدات فيهوم لمعة الدموع حتى ولاو مغرغرين...
روبين:ق ق قوس...ش شكوون هاديك لي معااه
كانت الصورة الاولى لقوس مع عذراء فاش كان حاط يدو على يديها و الثانية فاش كان هازها بين ذراعو...
روبين:لا هادشي ميمكنش لاااا ميمكنششش
ناضت دغيا من الأرض و لبسات عليها بينوارها..خرجات و الجوا فيديها و اليد الثانية فيها الصور حتى وقفات على غرفة ليڨيا لي كانت حداها..بقات تدق حتى حلات ليها كانت عاد تدير مكياجها عين فيها الماسكارا و الثانية لا...
ليڨيا:روبيين؟؟؟
روبين دخلات دافعاها و تبعاتها ليڨيا سادة الباب مفاهمة والو...
ليڨيا:اش كااين مالكيي؟؟؟
روبين تترعد عليها و يديها شدهوم بوتفتاااف:شوفيييييي(مدات ليها كلشي فيديها)
ليڨيا شدات الصور غير شافتهوم تصدمات حتى هي بقات غير مخرجة عينيها فروبين لي بدات تتبكي...
روبين:اهئ اهئ شكوووون شكوووون شوفي غير اش لاااااااابسة وحدة رخيييييصة فموعد مع قووووس
ليڨيا تتحاول تحقق فملامحها:بحالا شفتها فشي بلاصة من قبل
روبين:فين غتكونييي شفتييي الرخيييصة فييين؟؟؟
ليڨيا:معرفتش ا روبين عفااك تهدني صبري نعييط ل ناتا(خناثة)
روبين:شغنديير اهئ اهئ حتى تنقول تنتهنا من هادي و تتخرج ليا وحدة خرى من الجنب
ليڨيا:صافي متبكيش حنا غنلقاو الحل كيف العادة
روبين:اشمننن حللللل شوفي كيف هاااازها شوووفي يديه على يديهاااااا
ليڨيا عاد نتابهات ل الكتبة لي كانت فلداخل ديال الجوا كانت بالعربية:شوفي شنو مكتوب هنا هادشي مكتوب بالعربية
روبين خطفات منها الجوا و قراتو كانت العبارة لي فيه "مرة خرى عرفي معامن تلعبي"
كمشات روبين الجوا فيديهااا بغضبببب و شي سم تيقطر من عينيهاااا:بناااااااااااااااااااااان
فنفس الوقت كانت بنان جالسة فالمطعم ديال الفندق..فطورها قدامها و فيديها فنجان تتشرب قهوتها الصباحية و بضحكة شريرة:غتكون دابا شافت الهدية هه....
اما فغرفة قوس لي كان فايق بكري كيف العادة..كان جالس تياكل ففطورو من بعدما دار تمارينو الرياضية الصباحية..سالا الماكلة ديالو و ناض حتى جلس فالبيرو..جبد لبيسي ديالو و بدا تيتفقد الايمايل ديالو و متجي فبالو غير الكوافورة فاش هزها بين يديه..تفكر الأيشادو لي فوق عينيها..جمالها فاش كانت هادئة..كاع اللقطات واش رجعو ليه فذاكرتو و فلداخل ديالو مكرهش كون زاد مزال بقا معاها ولكن علاه خلاتو الكوافورة و هي غير سايرة تقمع يا متقمع حتى طلعات ليه السكار..سد البيسي و ناض خارج من الغرفة ديالو يبدل الجو...
اما عند الكوافورة فكانت عاد فايقة ناضت حتى قادات حالتها و خرجات لقات غرفة بنان خاوية فقررات تعتامد على راسها و تهبط طبر فطورها..رجعات لغرفتها..لبسات حوايجها و جلسات حتى قادات مكياجها لي كان خفيف غير زادت هاد المرة شوية ديال لبلاشر لي زاد بيين لكيوتنس فوجهها...خرجات من تما و تبعات الطريق حتال السانسور حتى وصلات للطابق الأول و ميبان ليها غير قوس خارج من السانسور لي حداها غادي خارج..قشعاتو و دغيا زربات فخطواتها تتخبي وجهها بشعرها حتى تساطحات مع شي حد...
بنان:عذراء؟؟
عذراء طلعات فيها راسها:مداام؟؟؟
بنان:عاد كنت جاية للغرفة رتاحيتي شوية؟
عذراء:اييه شكرا
بنان:اجي نوريك فين تاخدي فطورك
جراتها بنان و بقات غادة بيها تيبانو بحال الفيلة و النملة حتى وقفاتها قدام البوفي ديال الفطور...
بنان:هزي لي بغيتي و فاش تسالي رجعي للغرفة حيت عندي واحد الهضرة منقول ليك
عذراء:ياربي السلامة شنو؟
بنان:حتى تفطري و نقول ليك
عذراء:واخاا
مشات بنان مخلية عذراء غتموت من الفضول..هزات بلاطو و خدات فطورها و مشات جلسات فواحد الطبلة قدام الزاج تيبان كلشي على برا الناس تيدوزو و الطونوبيلات غاديين جايين..بقات تتاكل ففطورها و تشوف فالناس حتى كملاتو و رجعات طلعات للغرفة...دقات و حلات ليها بنان و جلسو...
عذراء:شنو غتقولي ليا؟انا تنسمعك
بنان:الليلة كاينة طيارتنا غنرجعو للمغرب
عذراء:بصاااح صااافي سالينااا؟؟
بنان:للأسف بسبب الضربة لي فضهري منقدرش نحضر للعروض لخرين
عذراء:هدا كولو زهر عندي!
بنان:ياكي!
عذراء:احمم داوية على غنرجع لدارنا فالوقت
بنان:المهم جمعي باليزتك الليلة غتكون مع 9 د الليل خصنا نكونو فالمطار مع 8
عذراء:واخاا مدام
فالغرفة ديال ليڨيا كانت باقة روبين تما و حتى خناثة جات...
ليڨيا:وي ناتا عندها الحق خصنا نقتلو الفار قبل ميكبر! كيفما حييدنا لي كانو قبل منها
روبين ناضت:غندمممك ا بنااان نتي وياهااا غير بلاااتي!!!
فالمغرب كانت رفيف فالصالون جالسة فوق الكرسي و قدامها بنت محجبة جالسة فوق الفوتوي مقابلة معاها...
رفيف:عرفتي تصورت مغتقبليش ولكن صدمتيني فاش قبلتي ههه
البنت:ويلي على منقبلش نجي نعاون لوستي هههه
رفيف:هههه و يسمعك ضرغام انا ياختي معرفتش امتى تزوجي بيه و تبعديه علينا
مرام(خطيبة ضرغام):قرييب تنتسناو غير فالسكنة
رفيف:ايوا ان شاء الله المهم كيفما قلت ليك عذراء ولات خدامة فواحد الشركة و مبقاتش قادرة تعاوني داكشي علاش عييطت ليك حيت كنتي قريتي هادشي
مرام:وايه كنت غير تندوز بيه الوقت هه ولكن تشدات الحرفة
رفيف:هادشي لي بغيت المهم نتي الخلاص غنتناقشو عليه و داكشي على حساب الحركة تاني
مرام:اوكي الزين
نرجعو لباريس عند عذراء لي كانت جالسة فالغرفة تتجمع فحوايجها و تقاد فباليزتها و متفكر غير سيهوم قوس و الهزة ديالو..فقررات تحط داكشي من يديها و خرجات من تما..لقات بنان ملبقة ماسك لوجهها و تتقرا واحد المجلة...
قربات منها عذراء و جلسات حداها:احمم
بنان طلعات فيها عينيها و دوات غير بشوية حيت الماسك شاد وجهها:وي؟
عذراء تتلعب بصباعها و حادرة راسها:احم..قولي ليا
بنان:شنو؟؟
عذراء:واش..واش..مستر قوس عمرو هز شي وحدة من قبل؟؟
بنان حطات المجلة و تقادات فالجلسة:عاد طلعات معاك؟ عاد بديتي تفكري فهادشي؟
عذراء:احم المهم بغيت غير نسولك على هادشي لكي يطمأن قلبي
بنان:ياك قلتي ليا عمرك تقربي ليه ولا تشوفيه مزال؟ و قلتي ليا بلي باسل و تبسل عليك ولا تحرش بيك ولا منعرف ليك؟ شدي قنت واحد
عذراء:و دابا شنو قلت؟ لي يسمعك يقول مدياها فيه
بنان:لا لا ممدياهاش فيه ويلي بالعمى!
عذراء:ايه راه قلتها ليك
بنان بجدية:راك بديتي تخربقي شدي قنت واحد مبقيت فاهمة فيك والو واش عجبك مستر قوس ولا لا..واش باغياه ولا لا..واش رتاحيتي ليه ولا لا..ماشي تبقاي دخلي و تخرجي فالهضرة
عذراء:هادشي لي بقا ليا فالحساب ولاهيلا اش بغيتو المهم نساي
بنان:عذراء سمعيني مزيان راه هاد التبوهيل ديالك معندو فين يخرجك و مستر قوس راه ماشي ديال التبرهيش انا و الله حتى تصدمت فاش قلتي ليا صبر لكاع داك الهبال ديالك و هضرتك معرفتش واش وكلتيه التقاشر ولا منعرف
عذراء:لواه وكلتو السوتيانات هادشي لي بقا ليا فالحساب
بنان:قلتي لبارح هادي و التوبة ههه اويلي هادشي الى بغا يشوفك مرة خرى نتي راك حطمتي فرصة الرفاهية معاه بيديك
عذراء:انا شرفي اهم عندي من هادشي و ميمكنش ليا نطييح بيه على قبل جوج د ريال
بنان:دابا غير شكون جبد ليك الشرف؟؟؟زائد انه ولو كاع وصلتو لهاد المواصل مغيقيسكش الا و نتي باغا مالو حيوان!
عذراء:اربي شوفي فين تعمقنا و فين وصلات الهضرة سمحي ليا ولكن غنسدو هاد الموضوع
بنان:على راحتك انا غير قلت ليك حيت نتي معارفاش قداش راك محظوظة ولكن تيبقا اختيارك
فجأة تسمع الدقان فالباب...
بنان ناضت:صبري نمسح هاد الماسك و حلي
مشات بنان حتى غسلات وجهها و الباب محبسش من الدقان هي عارفة و متأكدة شكون هو لي تيدق و بشوية عليها مسحات وجهها بالفوطة الخاصة بيه حتى سالات عاد رجعات لعند عذراء لي مستغربة من الدقان لي مبغاش يحبس...
عذراء:صافي نحل؟
بنان:لا غير خليك جالسة
مشات بنان حلات لباب لقاتها روبين باقة ب بينوارها و حداها الجوجات لخرين بملامح متتبشرش بالخير...
بنان ببرود:اش كاين مالك باغية تلوحي الباب عليا
روبين دخلات دافعاها و تبعوها لخرين اما بنان سدات الباب ناوية على خزيت...
بنان قربات منها و قالت بالسم:م ت غ و ت ي ش ع ل يا (متغوتيش عليا)
روبين:شنو يتصحااب ليك راااسك ااا شكوون نتييي باش تسيفطي واحد الرخيييصة بحاالك تلصق ليا فقوووس اااا
بنان:هيييه حدك تمااا و منسمحش ليك تقووولي عليها رخيييصة!!!
الكوافورة مكمشة فوق الناموسية صاقلة مفاهماش اش واقع...
روبين:ااايه رخييصة و حتى نتييي رخيييصة نتييي فقيييرةة نتيييي بنت حييي شعبييي و كنتي غيير عااارضة قفااطن رخاااص نتييي والووووو متتقااارنيش بيياااااا انااااا تزاديت فعائلة غنييية انااااا حسن منكوووم كامليييين انااااااا......
تسمعات طراااااااخ خلاتها تجمع فمها و يدها تحط على حنكها...
بنان لي صرفقاتها بدات ترعد عليها:منسمحشششش ليككك تهينينيييي بالماااضي دياااالي!!!!!!!
عذراء مصدومة شادة وجهها و ليڨيا و خناثة حتاهوماا....
روبين عينيها بداو يغرغرو مرضاااتش اول مرة فحياااتها تصرفق و على يد شكوون وحدة بالنسبة ليها متستاهلش المكانة لي وصلات ليها...
روبين هزات عليها صبعها مزييرة على فمها على جهدها باش متبكيش:عقلي مزيااان على هاد الطرشة عقلييي مزيااان ا بناان
بنان:نتي لي بدييييتي سمعتتتتي نتيييي شنو درت ليك باش تسيفطي ليا طالووون لي غنلبس للعرض باش يطييحني كون تشللت ااا؟؟؟ هههههه ولكن الله يخلي ليا صحاب حسناتي هوما لي وصلوها ليا(جمعات الضحكة بجدية) الى نتي بنت عائلة غنية راك تزاديتي و لقيتي الخير موجود اما انا بعرق كتافي و بجبهتي باش وصلت لهنا و زيدون علاش اصلا وحدة من عائلة الفيلالي لي مناقصهوم حتى خير تولي عارضة؟ هههه مجاتكش غريبة؟ اووه لا زعمة حبا فهاد المهنة؟ ههههه نو نو نو هادي طريق باش تقربك من قوس لي من صغرك تتهتري بيه و لي جات وحدة فنهار خلاتو يهزها بين يديه بحال هكا(سرحات يديها بحالا هازة شي حاجة)اما نتي هزيتي الصبع هههههههههه
روبين هزات يديها حتال السما بغات تصرفقها و هي تدخل عذراء بيناتهوم بحال الحكم غير هو حكم قصير...
عذراء:علااامن داويين نتوما!!!!!
هبطو شافو فيها بجوجات...
بنان جراتها خباتها موراها بحاال بنتها:متدخليش ا عذراء
روبين:شكووون هادي؟؟؟
ليڨيا تطل عليها..هزات الصورة و مرة تشوف فيها و مرة تشوف فالكوافورة لي تطل من مورا بنان حتى نطقات...
ليڨيا:هي هاديك ا روبين!!!
روبين بدهشة:كيفاااش!!!
عذراء:كيفااش انا؟؟ مالكوم؟؟
بنان بلغوات:خرجو عليا من الغرفة ديااالي!!!
خناثة:مغنخرجو حتى نعرفو هادي شكوون
روبين تلاحت على يد عذراء و جراتها لعندها و السم تيتقطر من عينيها الخارجين:نتي هييي لي كنتتتتي مع قووووس!!!
عذراء مصدومة فهاد الوحش لي قدامها:ططلقيي منيييي راك وعتيينييييي
روبين تتحرك فيها بحال الخشخاشة د الدراري الصغار:دويييي جاااوبينيييي
بنان جرات عذراء لعندها و جات قدام روبين:متحطيييش يديك على المايكاااب ارتييييست دياللللي
روبين:اهاااه و مايكاب ارتيست ديالك مزاال!! فين ماريان مبقيتيش معاها؟؟ ولا ساليتي معاها باش تجيبي وحدة بحال هادي!!
بنان:هاد الوحدة بعدا لي تتشوفي قدرات ياختي تخلي مستر قوس مستمتع ولو غير شوية وسط هاد الأجواء المضغوطة د العروض عرفتي متصوريش داك الشعور لي جاه فاش شد ليها يدو ههههه شوية واقيلة مطلبها ل الزوااج هههههه
خناثة عارفة انه سلاح بنان هو الاستفزاز:متحلميش بهادشي لا نتي ولا هي عائلة بنسليمان او بالأحرى عائلة برج القوس تتزاوج من عائلة برج العقرب فقط و لي هو برج روبين
روبين عينيها غير على عذراء تتشوف هادي لي قدرات تخلي قوس يقيصها بهكاك فمكان عام...
بنان بتاسمات عجبها الرد:البنت جاوباتك مالك تتفشي و تنفخي علينا؟؟
روبين غتفرقع:نتي لي شكوون بالسلااامة علااش يمشي عندك نتي وحدة رخييصة و طماااعة و باغية غير فلوووسو انا تنعرف بحااالك و مسخنوش بلاصتهوم نهار واحد معاااه
عذراء:واش نتي مريضة فعقلك ولا شنو؟؟واش لي معندها ميدار تجي لعندي انا؟؟راه الى مجمعتيش فمك تنقسم ليك بالله الى غتشوفي لي معمرك شفتيه يا الكيليمينية د جدريال و الرخص راك نتي لي بيينتيه واخا نعرف نقج راسي و منديرش هاد الحالة كاملها على ود بوركااابي على قلتهووم ياختي لاصقة فبنادم واحد باااز ليك انا حوايجي و تيطلعو ليا فراسي بقا غير بناادم ا نووضي تگعدي تماااا و ديري النفس راك غارقة فالدل حتال ودنيك معندكش زيرو د الكرامة ا بنت العبد
خناثة قربات منها بدهشة:اسلوب زنقااوي بامتياز فالهضرة!!
عذراء: ا ديك العزية المحروقة خناثة ولا خنثى مدوا معاك حد
خناثة تصدمات:اش هاااد التربية!!!!
ليڨيا قربات واخا مفهمات حتى حاجة حيت داويين بالمغربية:معرفتش اش عجب مستر قوس فبحالك
عذراء:شعر الكبالة تدوي سيري سيري راه مفهمت حتى حرف من لي قلتيه لفرونسي ديالك خليها عندك
بنان نفاجرات بالضحك:هههههههههههههه عطيهوووم ا عذرااء عطيييي هههههه
روبين قربات منها و شداتها من كمها:يااا البرهوووشة نااااقصاك التربية و انا لي غنعاودهااا ليييك
عذراء دفعاتها:راني قلت ليك متقيصينيييش!!!!
ليڨيا:روبين زيدي نمشييو حنا غنتكلفووو بطرييقتنااا
خناثة:متهبطييش للمستوى ديالها نتي اعلى من تقارني مع هاد المنحطة!
بنان تتصفق:يالاه يالاه برا برا الباب الباب ينادي ضرگو عليا زلايفكوم
روبين قربات حتال عند وجه عذراء:غير بلاتي حسابنا مزال مسالا عااد غيبداا
عطاتها بالضهر و خرجات تابعينها الثنائي لاخور رادخين بالباب موراهوم...
عذراء:دابا هاد الخرية علاش تتقلب؟؟؟
بنان:جلسي ا عذراء و نعاود ليك
عذراء جلسات تتسوط:زمرة صافي واش يتصحاب ليها حيت لباس عليها صافي!! رااه الريح يديها عالية بحال شي نخلة
بنان جلسات حداها:هاد الأخت لي شفتي سميتها روبين
عذراء:يييخ متستااهلش ديك السمية
بنان:هه علاش؟
عذراء:حيت سمية روبين لي فون بيس عزيزة عليا
بنان:مفهمتش شنو قلتي ولكن المهم هاد روبين عائلتها صديقة عائلة مستر قوس الأمهات ديالهوم بجوجات صحابات و حتى الآباء ديالهوم فسويسرا..و هي من صغرها تتبغيه و تتحلم تكون مرتو و بالخصوص انه عندها فرصة كبيرة حيت هي بنت برج العقرب لي هو البرج لي تيتزاوج منو برج القوس ولكن قوس عمرو مداها فيها ولا عطاها شي فرصة عكس هي لي تتحماق عليه
عذراء:و انا ماالي مشينا غير للعراضة ندوقو النعمة كيف دايرة صدقات محرراها علينا ييخ على سلعة
بنان:ولكن يا الهبيلة هادي كانت نييتك نتي اما نية مستر قوس نية خرى هو معجب بيك و هادشي حرقها مزيان فالداخل خصوصا انك مدرتي حتاشي مجهود اما هي مخلات مطلسات ولا ملبسات و والو
عذراء:اصلا غير تبرد راني عمرني غنضور حداه مزال
بنان:المشكلة انه روبين حطات عليك عينيها دابا و غتدير المستحيل تهنا منك لدرجة الطرد من الشركة كيفما دارت لبنات لي دازو قبلك ولكن متخافيش نتي تحت الحماية ديالي دابا
عذراء:لي فجهدها ديرو انا مخايفاش منها و الى سميتها مرأة تواجهني ماشي تلوا بحال اللفعة
بنان:هدا هو اسلوبها و هدا هو الأسلوب لي دارج فهاد الضومين باش تحافظ على الصورة ديالها يعني داكشي من التحت
عذراء:اممم حسي مسي اوكي
بنان:المهم نتي مديريش فراسك
عذراء:سمعتها قالت تصاور؟؟منين جاوها تصاورنا؟؟
بنان:بصراحة انا لي سيفطت تيم(المصور الخاص بيها) خداهوم ليكوم باش نرد ليها الصرف ديال الطيحة
عذراء:ولكن حرام عليك مقلتيهاش ليا!!
بنان:متخافيش راه مليوحين فالأرض تما و هوما ليكاينين و ولو ملاحتهومش كانت غتقطعهوم ولا شي حاجة بالسم يعني مغيشوفهوم حتى واحد لي غيجبد ليك المشاكل مع عائلتك
عذراء:الى هكدا ماشي مشكل المهم غير مرة خرى علميني بعدا
عذراء مشات جابت تيليفونها حتى عطاتها النمرة:المهم هاني غنمشي
خرجات عذراء من الغرفة و دخلات فالسانسور..تقابلات مع الأزرار ديالو و هي تبقا شحال متسائلة علاش هاد الكمية د البوطونات فيه و هي ضرب ليها فراسها و ميقول ليها غير اجي نلعبو فالسانسور سدات عينيها و ضغطات على واحد الزر..تسدو بيبان السانسور و بقات طالعة حتى وقف..تحل الباب و طلات مخرجة راسها كان مختلف على الطابق الأول و الطابق لي فيه غرفة بنان كان باين عليه الرقي و الفخامة اكتر منهوم من خلال الديكورات و الأثاث..خرجات الكوافورة من تما تتمنضر مبان ليها حتى واحد حتى خرجات فواحد البالكون كبير تما و حداه جليسة بالفوتويات و طبلة بكراساها...مشات حتى طلات منو كان الجو زوين بزاف و الشمس ضاربة على وجهها مبيينة لمعة عيونها...حطات يديها تما و تحنات تطل على لتحت..رجعات يد وحدة تحت حنكها و الثانية على البالكون مستمتعة بهاد الهدوء لي غادي تفتاقدو من بعد هاد الليلة..دازو دقائق من هاد التأمل حتى بدات تتحس بالكفاية ديالها و هي تخرج من تما كانت غادة دايزة مابيها ماعليها فنفس الوقت كانت دايزة على ممر الغرف و من بين هاد الغرف كانت غرفة قوس منهوم هاد الأخير لي حل الباب باش يهبط يتغدا فشي مطعم و ميحلو غير على الكوافورة لي دايزة..تخلعات حيت متوقعاتش الباب يتحل...
خرج قوس و جات عينو فعينها بدهشة:نتي!
عذراء تسرط لسانها بقات غير تفتف واش هي بغات تفك منو و الصدف تيجمعوها بيه...
قوس جا قدامها:شنو تديري هنا؟
عذراء تتفتف:مستر مستر...
قوس:راني غير سولتك
عذراء حدرات راسها:سمح لياا مغنعااودش سمح لياا
ضارت تمشي دغيا و هو يشدها بالزربة من دراعها...
قوس:فين غادة ا ميس بلا حتاشي تبرير؟
عذراء:راني كنت غير تنضور بينما وجد الغدا..زعمة بينما وصلات وقت الغدا
قوس:و فهاد الطابق؟؟راه ممنوع على لي مواخدينش فيه غرفة!
عذراء:انا تنعتاذر بغيت غير نمشي
قوس بقا تيشوف فيها شحال بانت ليه فلووك اخور كيوت و شبابي هاد السييدة بحال الحرباء كل مرة تلون ليه فشي شكل و هادشي بالذات لي زاد اعجابو بيها...
قوس:انا نيت غادي نتغدا
عذراء:ا ااه بالصحة هيهي نخليك ا مستر
قوس:و تنضن مافيها باس شي رفقة تحلي هاد الغداء
عذراء:ك كيفاش؟؟
قوس:انا عارضك للغداء....
عذراء خرجات فيه عينيها:كي كيفاش؟؟
قوس:مالك اش قلت تاني؟؟
عذراء بتوتر:ل ل لا لا سمح ليا منقدرش منقدرش
ضرباتها بجرية مخلياه واقف فبلاصتو مفهم حتى حاجة و فنفس الوقت الدم بدا تيطلع ليه..اش من عقل عند هادي لي واحد فبحال المكانة ديالو ترفض الدعوة ديالو و بهاد الطريقة مزال!!!زيير على يديه بعصبية و نساحب من تما...
اما الكوافورة كانت تتجري فالدروج بحالا تابعها شي شفار..تجري و ضور تجري و الضور حتى وصلات ل الطابق لي كاينة فيه غرفتها مع بنان...مشات ليه ديريكت و بقات تدق و تضور فعينيها بخوف..محل ليها حتى واحد اذن بنان فلتحت لحقات عليها و المشكلة انه ميمكنش ليها تهبط عندها حيت قوس عرضها للغدا يعني غادي يكون حتى هو تما..بقات تضور فراسها حتى مشات داخلة فواحد الممر لقات فيه جليسة..جلسات فوق الفوتوي تتنهد و تترجع الروح ديالها...
عذراء:اويلي على الغداا باقي داك العشاا واحل ليا هنااا
جبدات تيليفونها و هي تصوني على بنان...
بنان لي كانت جالسة فطاولة فمطعم الفندق تتسنا فالمسخوطة لي مبانتش ليها حتى بدا تيصوني تيليفونها...
بنان جاوبات:فين كاينة؟؟
عذراء:منقدرش نجي اختي غير تغداي بوحدك
بنان:اش وقع؟؟؟
عذراء:والو غير تسدات ليا الشهية حتال من بعد و ناكل شي حاجة
بنان:اوكي على خاطرك ايوا هبطي خودي كارط الغرفة باش تدخلي
عذراء:لا لا لا غير خليني هنا نيت
بنان مستغربة:العجب معجباتنيش حالتك غير ياربي السلامة
عذراء:المهم غنقطع دابا
قطعات عذراء مخلية بنان مستغربة من التصرف ديالها الغريب...
فالمغرب فدار عذراء و من بعدما تغداو عائلتها و دازو السوايع...تسمع الدقان فالباب كانت وقيتة العصر..ناضت لوليا حتى لبسات صندالتها د الميكة و حلات..كانت دواني(أم برناس) و معاها بنت مراهقة قصيرة و ملامحها باينة عليهوم البراءة...
دخلاتهوم لبيت الضياف لي كان مضور بصالون مغربي مسدود عليه غير الى جاو الناس..جلسو فوق السدادر و حطات دواني البلاستيكة لي جابت معاها فوق الطبلة...
لوليا:علاش عذبتي راسك
دواني:مكاين حتاشي عذاب ا حبيبتي
لوليا شافت فالبنت لي غير حشمانة حادرة راسها:رسيل؟ مالك ا بنتي حشمانة هاكا
رسيل:و والو ا خالتي لباس عليك و لبنات بيخير؟؟
لوليا:لباس ا بنتي..رفيف فالصالون و عذراء احم عند صاحبتها
دواني:اه مزيان
لوليا:علاش مجاتش معاكوم ديالا؟؟
دواني:خليتها فالدار باش الى جا رجاح(اب برناس) من الخدمة ولا برناس تصوب ليهوم كاسكروط اما مسكينة بغات تجي
لوليا:ااه ايوا مافيها باس مرة خرى سيفطيها لعندنا راه حتى لبنات تتعجبهوم ديك اللمة
دواني:ايه بصاح ايوا الدنيا داتنا اختي و حتى نتوما غبرتو
لوليا:راك عارفة مجاتش قووت خيطي بيطي و بنتي مخطوبة لولدك راك عارفة هضرة الناس
دواني:داكشي نيت علاش جيت ليوم
لوليا:الله يسمعنا خبار الخير
دواني شافت ف رسيل لي بدات تزنگ بوحدها و بابتسامة حطات يديها على كتفها:كيفما راكي عارفة انه بنتي رسيل مخطوبة لولدك رئال من الصغر و هاد العام لي قدرات تكمل 18عام يعني السن القانوني ديال الزواج يعني ان شاء الله قريب عرسهوم
لوليا بدهشة:ولكن هادشي مي سلافا لي تتقررو هي و رجاح لي هو اب رسيل و جلوان لي هو اب رئال
دواني:متخافيش كلشي فخبار مي سلافا غير راها مشغولة هاد ليامات حيت غيتقام السبوع ديال عائلتنا لي فشارع النجاح
لوليا:وايلي؟ مفخباري والو اختي
دواني:ايوا غير وجدي قوالب سكارك و الكادو يالاه غتوجديهوم لنهار السبوع
لوليا:و الله الى ايوا الله يكمل بالخير اختي حنا حتى وكان يدوز هادشي و نشوفو ان شاء الله امتى نوجدو العرس ياك ا رسيل
رسيل حدرات راسها كلها حمرة:اييه اخاالتي لي درتوها هي لي كاينة
مشات عذراء دخلات لغرفتها و سدات عليها..عاد قدرات تنهد بعمق..جلسات فوق الناموسية تترض شعرها ورا ودنيها و كلمات قوس تتردد فودنيها فاش طلب منها تغدا معاه..عطات لعقلها واحد متسع من التفكير..كيفاش تعرفات عليه اول مرة؟كان اللقاء المدرم و من بعدو السانسور و من بعدو ليغيگل و الفيستة لي بيين فيهوم عكس اعتقادها فاش سترها..و دابا 3 المرات..فالعرض..موعد العشاء و هاد الصدفة لي ناوي يرجعها موعد غذاء..هادشي ماشي من افعالها..انها تبقا ضور مع واحد متتجمعهوم حتاشي صلة من غير انها مخطوبة ولو غير بالفم يعني هي بينها و بين راسها ممخطوبة ما والو! عمرها مالت جيهة برناس ولا حسات بذرة اعجاب من جيهتو محساك شي حب ولا مشاعر..ولكن فاش تتفكر داك الاحساس لي حسات بيه فاش كانت بين احضان قوس شي حاجة جديدة بدات تتعرف عليها و تكتاشفها معرفاتش اش تيعني ولكن لي عارفاه انه احساس دافئ و تيبعث الراحة فنفسها..غير هو رغم هادشي كاملو خصها تبعد منو..من غير باها و خوتها الصعاب الا انه هوما من عالمين مختلفين هو غني و هي فقيرة مقارنة بيه..هو متفتح اكتر و هي منغلقة شوية و هادشي من غير شخصياتهوم المتناقضة..هزات راسها تتشوف فباقات الورود لي جاب ليها فالموعد مزيينين ليها الغرفة و بتنهيدة من اعماقها ناضت حتى هزات وحدة ستنشقات ريحتها مخلياها تسد عينيها و تمشات حتال قدام المرايا..بقات مقابلة مع انعكاسها فيها...
فغرفة قوس كان هاد الأخير جالس فالبالكون و قهيوة فيديه تيبرد بيها على اعصابو كل شوية تيجيه داك التصرف ديال الكوافورة فبالو حتى من الغدا حرماتو عليه...ولكن هادشي مغيدوزش هكاك هي مزال معرفات معامن تورطات..غرور رجل برج القوس و تكبرو ماليهوم حدود و مغتجيش واحد البرهوشة تشطحو على صبعها هاكا! ضروري من واحد النقاش معاها ولكن ماشي دابا حيت عندو امور اهم من هادشي و لي هي العمل ديالو و العرض لي غيتقام اليوم...
مرام:راه حشوومة و راك عارفة غيشوفني ضرغام تما و...(حشمانة)
رفيف:يا حليلي شكون حشمان من خويا ضرغام هههه ا تي زيدي قدامي راك بنت عمنا قبل متكوني خطيبتو
مرام:ا اه عندك الحق هه
رفيف:ايوا هي الى زدتي دابا قدامي
سدات رفيف الصالون و الگاراج ديالو و رجعو ل الدار...
فالدار ديالهوم كانت لوليا معمرة صينية اتاي و تتقاد فالكيسان..جلوان فالصالون شاد برنامج امودو معرفتش اشمن خلا تيشخصوها ليه تمايا..و فبيت الضياف كانو دواني و رسيل...
دخلات لوليا بصينية اتاي مبتسمة حتى حطاتها فوق الطبلة..ناضت رسيل كلها تتفتف:نعاونك ا خالتي؟؟
لوليا:لا ا بنتي غير جلسي ربي خليك بحالا عاونتيني
جلسات رسيل مهبطة راسها و تقنتات حدا مها..جابت لوليا شي بتيبان و شي خبز سخون جابو ليها واحد البرهوش من ولاد الجيران لي تيلعبو فالزنقة من الحانوت..حطات داك الخير مع الزيت و العسل و الفرماج..حتى بدا تيتسمع الدقان...
لوليا مشات حتى حلات و دخلو رفيف و مرام...
لوليا:راه كاينة هنا خالتك دواني و رسيل
رفيف:وايلي؟ شحال هادي مشفناهوم
لوليا:هاهوماك فبيت الضياف
سلمات مرام على لوليا:لباس اخالتي؟
لوليا:لباس ابنتي سيرو ل بيت الضياف عاد حطيت كاسكروط و نتي ا رفيف راه باك فالصالون حضي لسانك
مشات رفيف و تابعاها مرام حتى سلمو على جلوان و دخلو لبيت...سلمو معاهوم و جلسو حتى هوما شوية لحقات عليهوم لوليا و تجمعو على ديك الطبلة...
لوليا:هاكي دي لباك هاد طبيسيل و كاس د اتاي
رفيف ناضت فمها عامر بالخبز:واخا ا مي
مشات حتى داتهوم ليه و رجعات كملات كاسكروطها...
بقاو على الهضرة والو فقط هضور العيالات حتى حاجة ما سبيسيال حتى كملو داك كاسكروط...
دواني:ههه ايوا و رفيف مزال مغتدير لينا شي عراسية حتى هي
رفيف تخطف لون وجهها:ا راك عارفة خ خصني هو الأول يطلعني لفرنسا
لوليا تدخلات:هادي هي قضية الوراق تيتعطلو و ماشي غير هي بزاف د الناس دافعين ضواساهوم و لدابا متقبلوش
رفيف ناضت:سمحو ليا غنمشي نطلع نبدل عليا حوايجي
مرام:رفيف..
خرجات رفيف من البيت و طلعات لبيتها هي و عذراء..سدات عليها و تلاحت فوق ناموسييتها عينيها فيهوم حزن كبير و قلبها بدا تيضرها كيف كل مرة يبدا يجبد ليها شي واحد من العائلة مسألة لم الشمل ديالها هي و خطيبها سنمار..تقلبات متكية على جنبها و يديها تحت راسها ساهية فنقطة وحدة عينيها متيتململوش و عقلها بداو تيضورو فيه الأفكار السلبية لي تيجيو يزوروه كل مرة تيتجبد هاد الموضوع...شغادي تدير الى زاد هادشي عن حدو؟؟؟
عذراء وقوس الجزء الخامس
محتوى القصة
التنقل بين الأجزاء