فلبيرو ديال برناس...كان جالس و فيديه الجريدة لي تلاحت هاد الصباح تيشوف واش كلشي هو هاداك..سالا و حطها على جنب و جبد تيليفونو..بقا شحال تيفكر و متردد واش يتاصل ولا لا...دوز النمرة ديال عذراء ولكن مخدماتش هادشي لي خلاه مستغرب..عاود تاني جوج مرات و تأكد انه مخداماش هادشي لي ولد فيه الشك..دخل للواتساب لقاها ماشي بزاف باش كانت حالة فقرر يدوز ابيل واتساب...
عند عذراء لي سالات جميع باليزتها و مقادة كلشي حتى تتسمع تيليفونها تيصوني..مشات طلات عليه غير شافت سمية برناس و هي تركبها الخلعة تقول تيشوفها دابا من ديك لابيل..مخصنيش نجاوب ليه لا مخصنيش..هادشي لي تتقولو فخاطرها ولكن فنفس الوقت ممكن الى مجاوباتش يشك فيهاا و ماقادة على حتاشي مشاكل مغتجيش حتال اخر نهار و تزبلها و بيديها لي تيترعدو هزات التيلي..بلعات ريقها و جاوبات...
عذراء:لا لا هيهي ياربي السلامة غير راني دابا فدار صاحبتي تتوجد لخطبتها
برناس:ا ااه وي..المهم بغيت غير نسول فيك
عذراء:يسول فيك لخير كيف دايرة العائلة صافا؟؟
برناس:كلشي بيخير شوية غنسد المكتب و نمشي ل الدار
عذراء:اه مزيان ايوا رتاح ليك
برناس:راحتي معاك
عذراء:نعام؟
برناس:لا والو المهم منعطلكش على صاحبتك بسلامة
عذراء:واخا بسلامة
طز فيك علاه الكوافورة عارفاك حتى واش عايش..لاحت تيليفونها و حطات يديها على قلبها:واهيا ناري شوية كنت نفضح راسي براسي
تسمع الدقان و دخلات بنان موجدة راسها...
بنان:وجدتي صافي؟؟
عذراء:اه كلشي مستف و مقاد
بنان:اوكي صبري راه الخدم تيهبطو دابا باليزاتي يرجعو و يهبطو حتى ديالك
عذراء:واخاا
بنان:عذراء مالك؟ عتابريني ختك الكبيرة و قولي ليا اش وقع؟
عذراء:راه قلت والو
بنان بتاسمات:🙂
عذراء:عرض عليا مستر قوس للغدا
بنان:كنت عارفة هاد الوجه لي غيطلق لسانك ايوا و رفضتي ياكي؟
عذراء:اييه رفضت
بنان:ايوا هاكا(قلزات ليها) 🖕
عذراء مصدومة:اين البريستيج انا لا اراه؟؟
بنان:البريستيج معاك نتي يروح بوحدو غير سكتينا و زيدي قدامي يخ عليك لي موالف شي حاجة موالفها
عذراء:اففف
جرات عذراء بوالزها حتى جاو الخدم و هبطوهوم...
بنان:السيارة تتسنا فينا فالتحت جيبي صاكك و يالاه نستغلو هاد شوية د الوقت لي بقا لينا بينما وصلات وقت الطيارة
مشات عذراء جابت صاكها و قادات مسائلها فيه و خرجات هي و بنان...
من بعد ساعات و فمطار باريس...
كانت عذراء مع بنان و تيم و ريكا تيتسناو فالطائرة ديالهوم دفعو لباگاج و كلشي...
"تسريع الأحداث"
من بعد مدة ديال الانتظار طلعو ل الطائرة..بنان حدا عذراء و لخرين حدا بعضياتهوم...و من بعد جميع الإجراءات اللازمة الطائرة و اخيرا قلعات من الأراضي الفرنسية رجوعا للأراضي المغربية..شافت عذراء فالشرجم تتبان ليها الطيارة غادة طالعة و الأضواء غاديين و تيبانو نقط مضيئة حسات باحساس غريب رغم انه مدة قصيرة لي دوزات هنايا ولكن كانت كافية تخلي ذكرايات و احداث كتيرة تطفل على حياتها..كانو هاد 3 ايام كاملهوم من افضل الأيام لي دوزات فحياتها رغم كاع لي وقع فيهوم سوا مع روبين ولا قوس الأهم هو انه هي تحت رعاية و حماية انسانة من بلادها و كانت واحد النهار من مستواها الإجتماعي و من الفوق مزيانة..حلمها لي كان مستحيل ولا حقيقة و هاهيا دابا مع عارضة مشهورة لا بل الثانية على صعيد الشركة كاملها بالفعل تنقيزة كبيرة لمايكاب ارتيست مبتدئة ولكن فنفس الوقت تتهز موهبة فجعبتها و شغفها بهاد الضومين هوما لي دفعو بيها لقدام ولكن واش غادي تحقق مرادها؟ ولا هدا مجرد هدوء ما قبل العاصفة؟...
فشركة قوس لي كان نصها خاوي بحكم الأغلبية مشا لعرض باريس..بلاصات سيارة الشركة الخاصة ب بنان و هبطات منها هي و عذراء و فريقها من بعد رحلتهوم من باريس الى المغرب...
عذراء:مدام واش تقدري تقولي ل الشيفور يوصلني لدارنا؟؟
بنان:من دابا؟؟
عذراء:راه 12 د الليل هادي غنمشي عند صاحبتي نبات عندها
بنان:هانية هانية المهم مادام غتمشي معايا اذن نمشيو لدار ديريكت احسن مفيا اصلا لي يجي لشي شركة
عذراء:احسن قرار
ودعو ريكا و تيم لي مشاو و طلعو هوما فالسيارة مرة اخرى باش يشدو الطريق لشقة بنان...
بعد مدة من الطريق دخلات الطونوبيل فحي راقي و غير طونوبيلات الفريع لي تيضورو فيه و صحاب الخاريج..حتى بلاصات قدام واحد العمارة شامخة...
هبطو بجوجات و هبط الشيفور حتى جبد بوالزهوم وحدة وحدة..قربات بنان من الباب لي فيه ازرار رقمية باش تكتب الكود باش يتحل الباب..دخلات الكود و لباب تحل تلقائيا..دخل الشيفور لبوالز و طلعو فالسانسور حتى وقفو فالطابق لي تتواجد فيه الشقة..جرو لبوالز و مشا الشيفور..جبدات بنان الساروت..حلاتها و دخلو...
دخلات عذراء حالة فمها كانت شقة فخمة و واااسعة كانت متخييلاها بحال داكشي د السكن الاقتصادي لي تيبيينو فاشهارات الرمضان ولكن طلع العكس...
بنان:اجي نوريك غرفة الضيوف مخلياها سوكور غير لبحال هاد المواقف
تبعاتها عذراء جارة باكاجها حتى دخلاتها لواحد البيت متوسط المساحة بسرير و ماريو و شرجم كبير شوية مع ديكورات عطاتو رونق جميل...
بنان:خودي راحتك انا غنمشي ندوش الى بغيتي دوشي حتى نتي راه كلشي فالدوش
عذراء مبتسمة:شكرا بزاف ا مداام راك ضريفة و بزااف
بتاسمات بنان:غنعاودها ليك تاني ضريفة غير مع لي ضرييف ههه
و نصارفات تاخد ليها دوشها...جلسات عذراء فوق الناموسية و بقات ساهية فالحيوط..اول حاجة غاديرها غدا هي غتمشي ل الصالون عند رفيف و انسب وقت ترجع فيه لدارهوم هو فاش تيقرب يودن الظهر متيكون حتى واحد من الوزراء فالدار...خطتها مدروسة مزيان و طريقها مرسووم و بهاكا غتكون كملات رحلتها لباريس بنجاح...
🌞فالصباح الباكر🌞
فاقت عذراء بكري..ناضت بشعرها المخبل تتحك راسها حتى دخلات لطواليت و قادات فيها حالتها..بدلات حوايجها و خرجات لقات بنان تتحط فالفطور داكشي كولو جايباه من برا حتى من القهوة...
بنان:صباح الخير
عذراء:صباح النور مدام كيف صبحتي؟
بنان جلسات:لباس و نتي؟ زيدي جلسي تفطري
عذراء جلسات قدامها:هاد الخير تيشهي ههه
بنان:الله يخلف على المخبازات و الباتيسريات
عذراء:ولاهيلا (عضات فبتيبانة) الى فطرت غنمشي اوكي مدام؟
بنان شربات رشفة من القهوة:واخا حضي راسك مزيان
عذراء:لا متخافيش
بنان:هاد 4ايام لي بقات و لي كان من المفترض نكونو مدوزينها فباريس ولكن للأسف بسبب الضربة لي فضهري منقدرش نقدم العروض داكشي علاش رتاحي فيهوم و حاولي تأقلمي تاني مع الوضع بينما رجعات الشركة كيف كانت مع اكتمال عدد موظفيها
عذراء:اووه شكراا بالفعل محتااجة لفترة راحة غير داك الستريس راه لاح مني الكيلويات ههه
بنان:من حقك ترتاحي بينما برات الضربة ديالي تماما
كلاو فطورهوم و قادات عذراء بوالزها..هبطاتهوم ل الشيفور حتى قادهوم فالكوفر..ودعات بنان و انطالقات شادة الطريق لصالون ختها رفيف...
فلاكوط و مع هاد الشميسة و الجو الزوين كانو الناس تيجريو ولا تيمارسو رياضاتهوم ولا شادين ليهوم قهيوة أو فطور كبداية يوم نشيط و فواحد من مقاهي داك المكان كان جالس رئال فواحد الطاولة شاد فطور بلدي مع رسيل لي شادة فطور امريكي...
رئال:شحال الجو زوين اليوم داكشي علاش قررت نفطرو اليوم هنا ههه
رسيل حادرة راسها بخجل:وي عندك الحق انا فينما ديتيني زوين غير حيت نتا معايا
رئال بتاسم و شد ليها فيديها الرقيقة مقارنة بديالو:انا فرحان بزاف حيت و اخيرا غادي نقدرو نتزوجو و نكملو حياتنا فواحد الدار
رئال:يدوز هاد السبوع لي قالت الوليدة و ديك الساعة نتوكلو على الله
رسيل:يكون خير المهم الخواطر متراضية
رئال طلع يديها و باسها:تنبغيك
رسيل:و حتى انا
وقفات السيارة قدام الصالون كانت الدنيا خاوية تتصفر..هبط الشيفور حتى هبط ليها بوالزها..هبطات حتى هي هازة صاكها..شكراتو و ديمارا...بقات غادة تتجر فالباليزات حتى وقفات قدام الباب حلاتو و دخلات..تسمع الجرس و هي طلع رفيف راسها ظنا انها شي كليانة ولكن تصدمات فاش شافت عذراء...
عذراء لي كانت فرحانة صدقات حتى هي مصدومة فاش شافت خطيبة خوها ضرغام تماا...
عذراء:مرام؟؟؟!!!
مرام:عذراء؟
رفيف هبطات عينيها دغيا للبواالز و هي تشدهوم من عندها بتوتر...
مرام:لباس عليك كلشي بيخير؟
عذراء:لبااس و نتي و العائلة؟
مرام:كلشي بيخير(حاضية مع رفيف لي مدخلة لبوالز)بحالا حطك المطار ههه
عذراء:راني 4ايام و بايتة عند صاحبتي ياكما بغيتيني ندوز 4ايام بكيلوط واحد؟
عذراء جلسات:شغنقول ليك العياا ولكن تستاهل ضربي عليها تمارة
رفيف فهمات المعنى الحقيقي ديال كلامها:اااه ايوا الله يسخر ياربي..فراسك بلي جاو عندنا لبارح خالتي دواني و رسيل
عذراء:وايلي علاش؟؟
مرام:غيتزوج رئال ب رسيل حيت صافي كملات 18عام
رفيف:ولكن هادشي حتى يدوز واحد السبوع ديال العائلة
عذراء:اخبار جديدة هادو!
رفيف:اييه و خصنا نحضرو الى مفخباركش
عذراء:ولكن انا خدامة منقدرش نحضر
رفيف:منعرف شوفي مع الوليدة قالت كلشي خصو يمشي
مرام:غنتجمعو تاني تما بحال ايام زمان
رفيف:هه اييه بصاح المهم ا عذراء(غمزاتها بالخف) غير سيري نتي ل الدار
عذراء جمعات الوقفة:ايه كنت غنمشي قلت غير زعمة ندويو شوية هو الاول
مرام:اه مزيان
عذراء هزات صاكها:يالاه نتلاقاو فوقت الغدا
رفيف:واخا
مشات عذراء خارجة و فراسها تتقول اش تدير هادي هنا صبحنا على الله حتال العائلة معندهاش معاهوم و قلييييل لي تتعطيه وقت فيهوم..بقات غادة فالشارع حتى دخلات مع دربهوم و دقات فدارهوم..حلات ليها لوليا لي غير شافتها غرغرو عينيها بحالا مشافتهاش عام...
عنقاتها عذراء:مامااا هاني جييت
لوليا دخلاتها و سدات الباب:ياكما تعدا عليك شي واحد ولا حگرك تما؟ و كيف داز داكشي؟؟
عذراء تدير ليها إشارة بيديها و عينيها زعمة واش كاينين الوزراء...
لوليا:علاه كون كانو نسولك؟؟اجي اجي
دخلو ل الصالون و جلساتها...
عذراء:عرفتي ا لوليدة متصورتش حلمي يتحقق بهاد السرعة
لوليا:شنوو عاودي ليا
عذراء:عرفتي واحد العارضة معروفة فالشركة وليت خدامة عندها شخصيا ههه
لوليا:وايييلي!!
عذراء:ااييه ا ماما و عرفتي ضرييفة مسكينة و حتى هي مغريبية
لوليا:ايوا ا بنتي شوفي ربي فين لاح ليك رزقك
عذراء:وايه ههه فرحانة بزااف و حتى هي مرتاحة لخدمتي تنضن ا ماما حياتي بدات تنور
طلعات عذراء لبيتها هي و ختها..سدات عليها و بدات تضور عينيها فالحيوط رغم انه ماشي بزاف لي داز ولكن هاد الغرفة تتعتابرها جزء منها و عندها مكانة خاصة فقلبها..جبدات بيجامة من الماريو..لبساتها و تخشات ففراشها...
داز الوقت و وصلات وقت الغدا و عائلة عذراء تجمعو فالطبلة...
جلوان:على السلامة ا عذراء
عذراء:الله يسلمك ا لوليد هه
لوليا:احم ديك الساعة صونات عليا دواني
رفيف:ياك لباس ا ماما؟
لوليا:قالت ليا بلي مي سلافا بدلات التاريخ و قررات السبوع يكون غدا ماشي السيمانة الجاية
جلوان:لي دارتها الواليدة هي لي كاينة
عذراء:ااه ايوا الله يسخر
لوليا:اميين المهم غنصوني على ضرغام ولا رئال يطرگو معاهوم قوالب السكار و شي حويجات منديو
رفيف:غيخصنا نشريو الكادو ا الوليدة ولا لا؟
لوليا:غنشوف باك الى غيضور معايا
جلوان حط الخبز:شحال بغيتي؟
لوليا:ايوا باشما سخاك الله
جلوان جبد واحد الزرقة من جيبو:هادشي لي عندي هاد الساعة
شداتها من عندو لوليا قانعة بيها..داز كلشي قدام رفيف و عذراء لي بجوجاتهوم عارفين انه 200درهم مجايبة حتى كاشة صحيحة للبيبي! فهاد اللحظة حسو بالفقر..اه الفقر! رغم انه معندهومش و مخاصهومش ولكن ديما تيتزييرو و خصوصا فبحال هكا امهوم كاسبة غير خاتم زواجها و سنيسلة داروها ليها واليديها فاش تزوجات باهوم و واحد الدبليج فقط..عمرها فرحات براسها بحال العيالات لخرين..فقررات كل وحدة فداخلها انها الى سهل عليها الله مغتخليش عائلتها هكا!...تغداو فواحد النوع من الصمت حتى سالاو..طلع جلوان ينعس و رفيف تتغسل فالماعن و عذراء تتشللهوم ليها...
لوليا واقفة عليهوم تتفكر:دابا معرفتش منشري بهاد الفلوس و حتى التشطار موحال يقضي
عذراء تتشلل كاس:شوفي ا ماما انا عندي واحد 250درهم خازناها نعطيها ليك و حمري وجهك بين العيالات
رفيف:حتى انا ا ماما غنعطيك واحد 100درهم هي لي بقات عندي فاش تقديت السلعة
عذراء:صافيي و بهاكا غتشري الكادو و نتي مرتاحة
لوليا متأثرة:لهلا يخطيكوم عليا ا بناتي مبغيتش نطلب ضرغام ولا رئال حيت تيوجدو حتى هوما يبنيو حياتهوم و يديرو دويرتهوم ولكن الحمد الله ربي عطاني شي بنات لي فمقام الف رجل
حطو بجوجات داكشي من يديهوم و عنقوها هازين يديهوم لي تيقطرو بالما و الصابون...
لوليا:الله يخلينا مجموعين ديما هاكا
عذراء/رفيف:امين
سالاو دوك الميعنات و تجمعات الكوزينة..اما لوليا مشات ترتاح...
رفيف:بوالزك راه حطيتهوم ليك فتحت الدروج مشافهومش بعدا الواليد
نساحب فابيو مخلي قوس ساهي و تيقول مع راسو...اللعب د البراهش ماشي عليا و تنظن انها ختارت الشخص الغلط لي تلعب معاه!...
☀️فاليوم التالي☀️
و بعدما فطرات عذراء و عائلتها قادو كلشي لي غيديو فالطونوبيل العادية ديال جلوان...
لوليا:واش قاديتي قوالب السكار لي عطيتك ا عذراء؟
عذراء:اه ا ماما كلشي هو هداك
لوليا:رفيف فيناهوا الكادو فين حطيتيه؟؟
رفيف:هاهوا ا ماما فداك القنت من الكوفر
جلوان:صافي واش واجدين؟؟
لوليا:صافي كلشي واجد زيدو تركبو
ركبو عذراء و رفيف فاللور و جلوان و لوليا القدام...
شدو الطريق بعدما ضبطو أمورهوم كاملين ديماراو....
من بعد طريق طويلة شوية وقفات الطونوبيل قدام واحد الدار كبيرة تطل على الشانطي هبطو كاملين..لوليا مشات سرسرات و هوما حلو لكوفر تيهبطو لي جابوه...
حلات واحد المرأة شابة هي اخت المرأة الوالدة...بقاو فالسلامات و الترحيب حتى دخلو و دخلو معاهوم داكشي لاخور...
المرأة:مرحبااا و الف مرحباااا غيبة طويلة هادي ا لوليا
لوليا:ايه ا الحبيبة ايوا شغاديري الدنيا و الزمان
المرأة:و البنيات ما شاء الله قداش كبرو
لوليا:اييه ربي يحفظهوم
المرأة:مرحبااا مرحبااا اجيو اجيو هنا فين كاينين العيالات و الرجال فالفوق ا سي جلوان
جلوان:بغيت نشوف الوليدة هو الأول عاد نطلع عندهوم
بقاو داخلين و عذراء حاضية جنابها معندهاش مع العائلة بزاف و فنفس الوقت تتعطي الضحكة العادية...حتى دخلو لواحد الصالون كبييير كان عامر بالعيالات لي من ضمنهوم دواني و بناتها و فالوسط ديالو كانت امرأة كبيرة فالعمر ولكن باقة شادة فراسها بقفطانها و شعرها الشايب مجموع بداك الفيليل لكبير فيه عقيق...
مشا جلوان حتى باس يديها و راسها و نفس الشيء مع لوليا اما رفيف و عذراء بقاو واقفين تيتسناو يسلمو رغم انهم معاقلينش عليها مزيان حيت نااادرا فاش تتجي لعندهوم و مشافوها من فاش كانو صغارات...
تنحا جلوان و لوليا و تقدمو عذراء و رفيف يسلمو..ستقبلاتهوم الجدة سلافا بأحضانها فماكان عندهوم غير يعنقوها...
سلافا:دازت مدة طويلة مشفت حفيداتي بنات ولدي جلوان ما شاء الله كبرتوو
رفيف:ربي خليك ا جدة
سلافا حركات ليهوم يديها و جلسو الا جلوان لي نساحب عند الرجال...
سلافا:ايوا اليوم جمعتكوم كاملين باش نحضرو لسبوع اصال لي ولدات لينا قمر ما شاء الله
كلشي بدا يقول تبارك الله و يدعيو مع البنت و امها...
سلافا:و كيفما راكوم عارفين العادة ديالنا تتنص على انه بنت اصال اليوم غتكون الخطوبة ديالها
هنا ضارت عذراء شافت فيها مصدومة...في حين انه كلشي بدا يصفق...
سلافا:كلشي عارف انه من ملي مات الحاج الله يرحمو تمررات ليا هاد المهمة بشكل كلي و دابا وحدة فيكوم تنوض تعييط على اصال من البيت تجيب بنتها و تمشي تعييط على شي دري صغير من وليداتنا لي تيلعبو فالسطاح...
ناضت المرأة لي دخلات لوليا و بناتها حتى مشات عييطات على اصال لي تمات داخلة بشوية عليها لابسة قفيطين و راسها معقود بزيف حياتي و لايحة عليه زيف تيبرق و شي مجوهرات مزيينة بيهوم يديها و عنقها باين عليها العيااا رغم انه غطاتو بالمكياج..و فيديها كانت الرضيعة ملوية فالكاشة ديالها...حتى دارو ليها بلاصة حدا الجدة سلافا لي هزات من عندها الرضيعة بابتسامة...
سلافا:ما شاء الله ربي يحفظها
تمات راجعة المرأة جايبة معاها واحد البرهوش تكون عندو 6 سنين خنونتو و نازلة بقا غير يخطبو ليه غير شافتو مو و هي تشوف ف سلافا...
حركات سلافا راسها للأم لي شدات ولدها و جاو جلسو حداها...
سلافا:الخطيب و مو حاضرين و الخطيبة و مها حاضرات فين الأباء؟؟
الأم:كاينين مع الرجال ا مي سلافا
سلافا:سيفطو لي يعييط ليهوم
مشاو حتى عييطو عليهوم و جلسو حتى هوما تما دارو ليهوم بلاصة...
سلافا:الكل مجموع دابا اذن نبداو..شنو غتسميو البنت؟؟
الأب: بغيت نسميها هتان
الأم:لا تيماء
سلافا:متافقتوش على الاسم من قبل؟؟
الأب: لا ا مي سلافا
سلافا:شنو غنسميوها؟؟
الأب تنازل:نديرو الخاطر لمها
سلافا:اذن غنسميوها تيماء ما شاء الله
شدات يد الطفل برفق و حطاتها على الرضيعة...
سلافا مبتسمة:من اليوم هادي خطيبتك ا ولدي
الولد مفاهم حتى حاجة غير تيشوف و تيتسنا غير امتى يرجع يلعب مع الدراري...هزات سلافا الرضيعة و حطاتها بين احضان الطفل مكالياها...
سلافا:هادي خطيبتك تيماء
فنفس الوقت الفيلم كاملو داز قدام عينين عذراء لي معجبهااش الحال ابداا لأول مرة تحضر العادة د عائلتها أو بالاحرى برجها لي نفسها جمعاتها هي و برناس سرعان ماطاح هاد الأخير فبالها و كيفاش تخطبو بداو تيبانو ليها لي قدامها هوما هي و برناس فاش كانو صغار فهاد اللحظة قلبها بدا تيضرها و عينيها بداو تيغرغرو كيفاش عطاتهوم خاطرهوم يديرو خطوبة بحال هاادي و هي عاد خارجة من كرش مها و هو معارفش حتى حاجة باقي دري غير تيلعب..جمعات الوقفة خارجة من تما مقدراتش تستحمل المشهد مزال..طلعات فيها رفيف و لوليا راسهوم ب مالكي قالت ليهوم بغات تمشي ل الطواليت..ناضت المرأة حتى وراتها ليها..دخلات و سدات عليها و عاد قدرات تستسلم لمشاعرها و تخلي دموعها يهبطو..ألمها الداخلي حتى واحد مغيحس بيه من لي كاينين فداك المكان انك تربط بواحد بزز عليك! و رغم الوقت لي داز و كبر السن دابا الا انه عمر تبدلات حتاشي حاجة و هدا بحد داتو اغتصاب لمشاعرها كأنثى....
بقات شحال تتبكي حتى قدرات تخرج داكشي لي فلداخل ديالها هادشي لي عطاها واحد النوع من الراحة داخليا..غسلات وجهها بالماء تتحاول تغطي الحمورية لي فيه و فنفس الوقت تبرد بشرتها لي رتافعات حرارتها بسبب البكا...مسحات بالفوطة و خدات نفس عميق و خرجات من تما تتحاول تفادا التقاء عينيها بعينين الناس حتى رجعات جلسات حدا مها و ختها...
رفيف تتوشوش من التحت:مالكي؟؟
عذراء بشوية:و والوو
كلشي رجع لبلاصتو و الأم رجعات لغرفتها مع بنتها و الرجال رجعو لبلايصهوم فالفوق...
سلافا مخاطبة واحد البنت:قولي ليهوم يدخلو داك الغدا
البنت ناضت و هي ترجع تابعينها شي عيالات هازين طباسل الدجاج محمر و الموناضة و الخبز...زادو طبلة وحدة خرى و تجمعو العيالات على دوك جوج طبالي حتى جات لي تتغسل ليدين..غسلو كاملين و بداو تياكلو الا عذراء لي غير تتنقب معندها خاطر لحتى شي ماكلة من بعد داك المنضر لي شافتو ديال الخطوبة...سالاو داك الدجاج و جابو اللحم بالبرقوق من بعدو الديسير كلاو الناس حتى شبعو و بدا اللعب و الغنا و الشطيح...
عذراء فودن لوليا:ماما صافي نمشيو؟
لوليا:صبري غير شوية مزال
رفيف:حتى انا ا ماما راك عارفة خدامة غدا
لوليا:راه باكوم مزال مبان ليه الأثر باقي عند الرجال
عذراء:نصوني على ضرغام ولا رئال؟
لوليا:لا غيكونو مزال فالخدمة
دواني جات لعندهوم:لبنات مالكوم جالسات غير هنا نوضو تشطحو مع البنات ههه
لوليا:احم عذراء مسكينة عيانة مافيها ميشطح
دواني:شنو بيك ا بنتي؟
عذراء:غير العيا ا خالتي مشكيت عليك
دواني:الله يشافيك ا بنتي واقيلة اللعابات مصدعينك؟
عذراء:بحال الى علمك الله هه
دواني:ايوا عرفتي شنو غنعييط ل برناس يديك لداركوم
عذراء:لا اخاالتي تجيبيه من خدمتو لا لا
دواني:راه كاين فالفوق عند الرجال هه
لوليا:يتصحابلي غيكون فالخدمة؟
دواني:لا راه جريتو يجيبنا بطونوبيلتو ههه
رفيف:ا ااه مزيان(تتشوف فلوليا)
لوليا:واش متأكدة باغية تمشي لدار دابا؟؟
عذراء:ا ااه ا ماما
دواني:دابا نمشي نعييط عليه
مشات دواني مخلية رفيف غير تتشوف فمها و ختها...
بعد دقائق رجعات...
دواني:راه كاين على برا ا بنتي
عذراء هزات صاكها الصغير:واخا اخالتي شكرا
شافت فلوليا لي حركات ليها راسها عطاتها سوارت الدار و خرجات..لقات برناس واقف قدام الطونوبيل ديالو غير شافها جاية لعندو بتاسم...
برناس:عذراء..
عذراء طلعات فيه راسها بتعب:برناس..لباس؟
برناس بخوف:مالك؟؟واش مريضة؟؟
عذراء:لا غير ضارني راسي شوية مشكيت عليك
برناس:زيدي نوصلك لداركوم خصك الراحة
حل برناس الطونوبيل بالريموط و دخلات عذراء جلسات فاللور...
طلع حتى هو للقدام و ديمارا...
برناس:ياكما بغيتي نطرگو لفرماسيان على قبل الدوا؟؟
عذراء:لا لا شكرا غنرتاح غير شوية غيمشي هادشي
برناس:واخا على خاطرك
دازو دقائق من الصمت هي ساكتة تتشوف فالزاج و هو ساكت مراقبها من المرايا...
برناس:شفتي الخطوبة لي دارو؟
هنا عذراء قفزات بشوية من سهوها كأنه حيا فيها داك الشعور مرة خرى...
برناس:قلت شي حاجة غلط؟
عذراء:لا ولكن هادشي ديرونجاني
برناس باستغراب:باش ديرونجاك؟؟
عذراء:راك عارف و اكيد باين قصدي
برناس:معارفش و تنتمنى انك تشرحي ليا
عذراء:دابا شنو احساس دوك الجوج اطفال الى كبرو فرأيك؟
برناس:معرفتش ولكن غيكبرو و مع الوقت غيولفو و غتجي واحد المرحلة غيتزوجو و يولدو كيفما وقع مع واليدينا و اجدادنا من الاول حتال الجدة سلافا
عذراء:قول ليا ا برناس
برناس:تنسمعك
عذراء:باش حسيتي نهار ستوعبتي انه نتا فالأصل مخطوب بيا من الصغر و لازم انك تزوجني مستقبلا؟
برناس:حسيت ب احساس زوين
عذراء بدهشة:كيفاش؟شنو لي زوين فهادشي؟
برناس وقف الطونوبيل جنب الشانطي و شاف فالمرايا مخاطبها منها...
برناس:شنو باغية توصلي ليه بهضرتك ا عذراء؟؟
عذراء:لي بغيت نوصلو انه هادشي ممنوش!
برناس:كيفاش ممنوش؟؟واش تتناقشي فالعادات و الأصول د برجك؟؟لا انا لا نتيا لا غيرنا من برج العذراء ملزووم انه يطبق القوانين بالسكات!
عذراء:و انا ماشي هاد النوع بالضبط الى سكتت فارااه سكتت حيت خايفة من بااا!!!
برناس بدهشة:كيفاش؟؟؟
عذراء فاقدة اعصابها:اييه اناا ممقتانعااش بطريقة الزوااج ديال برجي و مبغيتووش!!..حيت هادشي بحد داتو قمع لمشاعري و احساسي كأنثى!!علاش هوما لي يتحكمو فالقلب ديالي!!علاش خصني نسكت و نبغي لي بغاوه هوما!!!علاش خصني نتبع هضرتهوم هوماا؟؟انا شنو اصلي من هاد الوجود؟؟؟علاش خصني نطيع الأواامر بحدران الراااس علااش خصنيي نقمع رغبااتي و طمووحاااتي باااش عائلة مفتااااح تكووون راضية علياااا!!!!
برناس مصدوم فيها تتبان ليه من المرايا ماشي عذراء البنت الطييبة الهادئة لي موالف بل قنبلة موقوتة منفجرة!!
عذراء قلبات وجهها جيهة الزاج و سكتات...برناس بقا لدقائق تيشوف فيها و هضرتها باقة تضرب فودنيه و تتعاود بحال الصدى..بالنسبة ليه هادشي راه صدمة حياتو انه يسمع كلام جارح مباشر بحال هدا من خطيبتو لي بغاها من قلبو من صغرو و كان عندو أمل كبير بلي واحد النهار غادي تقبل هادشي و يتزوجو بحال كاع المخطوبين من عائلتهوم..ديمارا من تما فصمت و فراسو تيضربو شلا افكار..مادام هي ممقتانعاش بهاد الزواج علاش سكتات فاش سولها؟؟..
كتافا بالتركيز على الطريق ليصدق مكمل سهو و يدير شي كسيدة ولكن فنفس الوقت ميمكنش يدوز هادشي هاكا ضروري غادي يتصرف و يعرف الجواب حيت حتى هو ميمكنش ليه يضغط على كرامتو كتر من هاكا...
من بعدما دازت مدة ديال الطريق و الجو الصامت المخييم فسيارة برناس و اخيرا وصل درب عذراء قبل ميبلاصي الطونوبيل خرجات منها و خسرات عليه شكرا باردة و دخلات ل الدار بعدما حلاتها بالساروت...شاف حتى عيا و هو يديماري من تما يرجع للسبوع...
طلعات عذراء لغرفتها و ردخات الباب..لاحت الصاك و تلاحت فوق ناموسييتها مغطية وجهها بيديها بغات تبكي ولكن مبغاوش يخرجو بغات طرطق ولكن مقدراتش بغات تفرغ فشي حاجة ولكن مكايناش...فجأة سمعات تيليفونها تيصوني...فلول متسوقاتش ابدا ولكن فاش قطع و عاود صونا قالت ممكن حاجة مهمة حيت ممولفاش شي حد يصوني عليها بزاف..هزاتو و هي تلقا صاحبتها رواء..بعد ثواني من التردد قررات انها تجاوب...
عذراء:الوو
رواء:ايتهااااا ال*حبااااء نااااري جيتي من باريس و مقلتيي لياا والووو
عذراء:غير ملحقتش يالاه رتاحيت شوية
رواء:سمعيييني سمعييينييي
عذراء:مالكي ممولفاش ليك هاد الحماس الا الى كانت شي هميزة ولا تخفيض؟؟
رواء:وااا داك صاحب بابا لي قلت ليك من شحال هادي من عائلة برج الثور جاو ليووووماااا
رواء:وايه متصوريش قداش فرحانة عجبني ياختي و الله و حتى هو محييدش عينيه عليا باينة عجبتو هههه
عذراء:سعداتك غتزوجي بشي واحد عاجبك و غتبغيه مستقبلا
رواء تبخر داك الحماس ديالها و خفضات من صوتها:عذراء؟ واش تاني؟
عذراء:ليوم تفرقعت عليه و عالله يفهم راسو
رواء:شنو درتي ا الموصيبة!!
عذراء عاودات ليها كلشي...
رواء:ناري اش داك لشي سبوع اصلا متكون غير عينيهووم هادووك غيااكلوك تااني داكشي لي دوزوه على مك يدوز عليك و على رفيف غير بلاتي حتى هي غترجع ضارها راسها من العين
عذراء:اودي انا مبغيت لا نتزوج لا نزمر بغيت غير نتصنط لعضامي
رواء:مشكلة مع العادة ديال برجك و الله حنا برج الأسد خصنا نرتابطو ب برج الثور و الحمد الله جاب ليا الله واحد الثور على مزيناتو ههه راني فرحانة بزاف ولكن فاش سمعتك دابا طييرتيها مني اصاحبتي
عذراء:دابا شغندير ا رواء غير قولي ليا؟؟انا صافي طرطقت على برناس و صافي النضرة الخايبة خداها و عالله ميبغينيش مرتو مزال
رواء:متنضنش غيتفرق عليك بهاد السهولة حيت لي باين ليا انه السييد تيبغيك
عذراء:شنو الفائدة من البغيان الى كان من طرف واحد؟ هاداك ما بغيان ما والو انا تنسميه مضيعة الوقت لا اكتر
عذراء:واخا اختي شكرا بزاف و سمحي ليا مقلت ليك حتى مبروك فرعت ليك غير راسك بمشكلتي و خسرت ليك فرحتك
رواء:متقوليش هكاك اصاحبتي علاه لاش حنا صحابات رتاحي دابا و يصبح يفتح
عذراء:واخا طهلاي فراسك ا حبيبتي
رواء:نتي كتر بسلامة
قطعات عذراء و لاحت تيليفونها و نعسات...
بعد يومين من الروبو رجعو موضفين شركة Bens-Naht للأراضي المغربية من بعد انتهاء اسبوع الموضة بباريس و فالشركة كان قوس عاد داخل حتى تيلقا ليمانادجر غير مستفين تما..سبقهوم و تبعوه للبيرو ديالو...
من بعدما سالا معاهوم خدمتو طلب من السكريتيرة تقول لفابيو انه يدير لي قال ليه...
فركن المايكاب ارتيستس كانت سديم واقفة و نيار حداها كولو تيترطا و يتنفخ و يتفش عليها...
نيار:دابا غير قولي ليا انا صباعي عوااجو ها السمرة ها البيضة ها العزية واناري عييت و فنفس الوقت خصنا نصبحو فالخدمة
نيار تنهد:اففف بقات فالعارضات نتي مشفتيش واحد ال*امل تما بغا ينافسني زعمة راه هو حسن مني فالمايكاب ولكن هيهااات تم هيهااات مزال معرف *رو معامن
سديم شادة راسها و هو غير تيتشكا حتى دخلات الكوافورة مولات الزهر المدفق و النحس الملصق...غير شافوها مشاو طارو عليها...
نيار:فييين كنتييي لموووك يا الكلبة فيييين
سديم:اويلي ا عذراء شحال قلبنا عليك حتى مدام شيارا مقدرناش نسولوها بسبب كترة الخدمة
عذراء تتهدن فيهوم بيديها:غير تهدنو عافاكوم ريلاكس ريلاكس و بلا صياح ا نيار
نيار:كيفاش بلا صياااح و انا لمك كنت خايف عليك عارفك غير حالة *رك و ممخالطة فين!!
عذراء:اودي قصة طويلة المهم هو كلشي داز على خير و نتوما؟؟ كيف داز داكشي؟؟
نيار بحالا شعلاتو بشي بوطون بدا تاني تيتشكا عليها لي مقالوش لسديم فجرو على عذراء بقا عليها بهادي و بهدا و كيفاش قاد ليهوم و كيفاش طلعو حتى تسمعات طرطقة طالون فالغرفة...تلفتو كلهوم كانت شيارا...
شيارا جاية مبتسمة:عذراء؟
عذراء:صباح الخير مدام على سلامتك
شيارا:يسلمك..تفضلي معايا للبيرو ديالي
عذراء باستغراب:اوكي مدام
مشات معاها مخلية لخرين تيشوفو فيهوم...
دخلو للبيرو و بشوية عليها سدات الباب موراها و بخطواتها البطيئة تمشات حتى جلسات فالمكتب...
عذراء جلسات بملامح الاستفسار شغتكون بغات منها مديرة قسم عملها؟احتمال كبير يكون على باريس؟؟...
شيارا:اولا بغيتك تعرفي انه مغتبقايش خدامة هنا
عذراء بصدمة:كيفاش! انا مدرت والو ا مدام!
شيارا:خليني غير نكمل هضرتي بعدا!
عذراء بلعات ريقها محركة ليها راسها ب اه و خوف كبير متملكها...
شيارا:المهم(جبدات واحد الورقة من المجر) العارضة بنان ليوم سنات الكونطرا ديالها بينك و بينها بقات غير السينياتور ديالك نتي
عذراء عاد قدرات ترتاح:اا ااه هه
مدات ليها شيارا ستيلو:هاكي سني هنا
عذراء:بلاتي نقرا هو الاول اش كاين
شدات منها عذراء الستيلو حتى قرات لي مكتوب على خاطرها و اعلنات قبولها بهادشي انطلاقا من توقيعها عليه...
شيارا خدات الورقة:صافي مزيان نتي ابتداءا من اليوم المايكاب ارتيست ديال العارضة بنان بشكل رسمي غادي توصلك نسخة من الكونطرا غدا
عذراء:واخا مدام شكرا
شيارا:غنطلب من السكريتيرة ديالي توريك مكان عملك الجديد تحت اشراف العارضة بنان
عذراء:واش مغنبقاش مع سديم و نيار؟؟
شيارا:لا هوما خدامين فالشركة بشكل عام اما نتي دابا وليتي بشكل خاص خصك تلبي غير طلبات العارضة بنان بخصوص المايكاب
عذراء:اه اوكي
شيارا:ولكن قبل منسيفطك خصك هو الاول تمشي عند واحد الشخص اخور طالب يشوفك
عذراء باستغراب:شكون ا مدام؟
شيارا:مستر قوس...
عذراء بصدمة:كيفاش!!!
شيارا:وي اوسي ستغربت فالاول ولكن معندك غير تنوضي دابا و تمشي لعندو
عذراء:م م منقدرش ا مدام
شيارا بجدية:الى بغيتي الطرد فعلا حاولي تخالفي هاد الأمر
عذراء بلعات ريقها:و و واخا
شيارا:يمكن ليك تفضلي
ناضت عذراء من تما و القفقافة شاداها حتال مول الشركة ممعاهش اللعب..تفكرات اخر مرة شافتو فيها مكانش وجهو تيبشر بالخير فاش سمع منها رفض دعوة الغداء و دابا نقزات و هربات حتى عيات هاهيا مجرورة لعندو بزز منها غير على ود لخديمة تسخن بليصتها..خدات سانسور لعندو حتاال الطابق ديالو الخاص..السكريتيرة المسمومة كانت فوسط خدمتها حتى تتسمع شي خطوات طلعات راسها غير شافت عذراء كمشات عينيها بغضب...
عذراء غادة بحال الهبيلة نيشان لمكتب قوس ولات حافضة الطريق حتى تتوقف عليها رجلين الهندية...
عذراء طلعات فيها راسها:نعام؟؟
السكريتيرة:فين غادة ا لالة راني دويت معاك من قبل زعمة
عذراء بجدية ممسالياش للخرية:مستر قوس طالبني حييدي من طريقي!
السكريتيرة:كيفاش مستر قوس طالبك؟؟واش فاطرة ولا جاية صايمة؟؟مستر قوس مغيطلبش وحدة بحالك!
و هنا غيخدم سلاح انثى العذراء المشهور و لي هو البرود...
عذراء معلقة فيها عينيها:حيدي من قدامي!
السكريتيرة طلع ليها الدم كيفاش هادي متجاهلة كلامها كأنها مقالت والو؟ و بالسم شداتها من يديها تتجرها:زيدي هبطيي
عذراء تتنتر منها يديها:متدفعينييش دوي بفمك يديك خليهوم عندك!!!
فنفس الوقت كان قوس خدام فلداخل مابيه ماعليه حتى تيسمع شي صداع..طلع راسو و عقد حجبانو بعدم ارتياح..هادشي ممولفوش فالطابق ديالو اش واقع بالسلامة و غير هو و السكريتيرة لي كاينين فيه؟؟ناض من الكرسي و تمشا بخطواتو الثقيلة حتى حل الباب و هو يلقا السكريتيرة تتجر فعذراء ل السانسور....
عذراء:طلقيي منييي
السكريتيرة:متعانديييش!!
فجأة تسمع واحد الصوت بحالا عطاوه الميكرو مع تما واسع و فيه غير الأثاث تسمع الصدى ديال:جلناااااااااااار
هاد الصرخة كانت كافية انها تبث الرعب فنفس السكريتيرة لي ضارت بالعرض البطيء لعندو...كان واقف داير يدو فجيوبو و حاجبو طالع تيستفسر اش واقع بالملامح ديالو الغاضبة!!و بغرورو لي ماليه حدود بقا واقف تما تيتسنا منها هي تجي لعندو ماشي هو لي يمشي لعندها...
السكريتيرة:مس مس مستر قق قوس..انا انا غير بغيت نخرجها حيت معندهاش الحق تجي لطابقك الخاص
عذراء غير مبلقة عينيها بخوف هي و قفزها ماحساك هاد النخلة...
قوس حرك ليها راسو:تفقدي لائحة المواعيد
السكريتيرة طلقات من عذراء و مشات بخطوات متسارعة تتبلع فريقها حتى حلات البيسي..لقات فالصباح اسماء ليمانادجر لي كانو دازو فالاول و تحت من اسمائهوم كاين اسم عذراء...
السكريتيرة غتموت من الفقصة علاش غادي طلب السماحة من وحدة همجية و منحطة بحال هادي و بيديها لي تيتفتفو:سم سم سمحي سمحي ليا(خرجاتها بزز)
قوس:اخر مرة نشوفك تتعاملي بهاد الطريقة مع عمال الشركة سمعتي!!
السكريتيرة حدرات راسها:تنعتاذر ا مستر...
حرك يديه لعذراء:و نتي تبعيني...
بلعات عذراء ريقها تتشوفو سابق عاطيها بضهرو و بشوية بقات غادة و جسدها تيقفقف خايفة من الطرد و هي عاد قالت حلات ليها الدنيا و تحل ليها واحد الباب د الخير...
دخلات للبيرو لقاتو جلس فالكرسي ديالو..سدات الباب موراها و شبكات يديها مع بعض بحالا تتسخن فيهوم و عينيها فلارض...
قوس طلع فيها راسو لقاها لاصقة مع الباب و كلها خايفة...
قوس:عرفتي شنو درتي ياك؟
عذراء قلبها بدا تيضرب و باقة على نفس الوضعية...
قوس رفع من صوتو شوية:وااش عرفتي شنوو درتييي!!
عذراء كمشات عينيها و نزلات راسها بحالا مطاكية شي ضربة جاياها هادشي غير رفع عليها صوتو...
عذراء تتمتم:م مق مق مقصدتش و الله
قوس:قربي لهنا
عذراء تتحك يديها بتوتر:ل لفين؟؟
قوس:لعندي
عذراء:غ غير خليني هنا راني مرتاحة
قوس خبط راحة يديه مع البيرو حتى قفزات و بلا متشعر قربو رجيلاتها الخايفين جيهتو...
قوس:دابا شنو تنبان ليك انا؟؟
عذراء:ر راجل...
قوس:كيفاش تنبان ليك!! شنوو انا بالنسبة ليك!!
عذراء عينيها شوية غيطيحو فلارض من كترة ما حانية راسها:الشاف ديالي...
قوس:مزيان و داك التصرف لي درتي واش تيدار مع الشاف ديالك؟
عذراء:ل لا
قوس:اذن؟
عذراء طلعات فيه عينيها و فنفس الوقت مقاتلة تهبطهوم مموالفاش تشوف فشي راجل نيشان:س سمح ليا منعاودش
قوس بقا لثواني تيشوف فخضورية عينيها و نطق:اخر مرة نشوفك تتعاملي معايا بديك الطريقة سمعتي؟؟
قوس ناض و هي رجعات جوج خطوات للور:مالك خايفة مغاناكلكش
عذراء قلبها تيضرب:ل لفيين غنوجد؟؟
قوس:عقلتي على ديك دعوة الغداء؟ انا تندير ليها التجديد دابا
عذراء:ك كيفاش؟؟
قوس بصرامة:بمعنى اخور انه مزال متزادت ولا غتكون هادي لي ترفض قوس بنسليمان سمعتي! و دابا يمكن ليك تنصارفي
عذراء بقات شحال تتستوعب اش قال..بقات مراقباه بعينيها حتى رجع جلس فوق الكرسي ديالو..ديك الساعة جمعات الوقفة من تما و عقلها بدا يترون واش هي تتقول عمرها تضور بساحتو مزال و هو عاد متيزيد ترشق ليه عليها؟؟اش هاد العبث؟؟واش غير هي لي كاينة فهاد الدنيا؟؟..سدات الباب موراها و مشات حتى شدات السانسور تحت انضار السكريتيرة الحقودة لي غتاكلها بعينيها المسمومين...
فلبيرو ديال برناس كان هاد الأخير جالس تيشرب فقهوة كحلة على النبوري و التعب باين على وجهو مقدرش ينعس مزيان بسبب كلام الكوافورة...
جاب ليه واحد الصحفي واحد الخبر ولكن معطاش الأمر اهمية..انصارف الصحفي مخليه غارق فتفكيرو ضروري خصو شي حل ميمكنش يبقا هو وياها كيف هاكا يا ايما ترضى بالقدر ولا غيلجأ للوالدين!...
فالسانسور كانت عذراء هي و سكريتيرة شيارا هازة ماتريالها و صاكها...حتى توقفو فالطابق الخاص بالعارضات...شييرات السكريتيرة للمسؤولة فالاستقبال و بقات غادة حتى وقفات قدام واحد الغرفة مكتوب فبابها بطريقة ايطاليك راقية "بنان"
السكريتيرة:هادي هي غرفتها نخليك
مشات السكريتيرة اما عذراء دقات و هو يتحل ليها الباب...
بنان بداك الطول:اهلا عذراء(دارت ليها تدخل)
دخلات عذراء و سدات الباب...كانت الغرفة فخمة و راقية بكوافوز كبير فيه العجب د المايكاب...و علاقات الأزياء غير واقفين كلشي مستيلي...بقات عذراء تتمنضر فالغرفة...
بنان:يمكن ليك تجلسي
جلسات عذراء فوق الفوتوي و جلسات بنان قدامها...
بنان:ايوا رتاحيتي فهاد الأيامات؟
عذراء:ايه الحمد الله ا مدام شكرا و نتي كيف بقا ضهرك
بنان:مع المواضبة على لبوماد و الماساج ولا بيخير شكرا
عذراء:ايوا مزيان واش غنبدا الخدمة دابا؟؟
بنان:ههه راني دايرة ميكابي اش غتخدمي مزال
عذراء:و شغندير؟؟
بنان:اليوم عندي جلسة تصويرية مع واحد المجلة مشهورة و بغيت نغتانم الفرصة نبيين وجودي لي مبيينتوش فباريس
عذراء:اكيد و غادي نعاونك بصيفتي المايكاب ارتيست ديالك
بنان:ههه يا حلاوتك بب المهم مكاين ميدار دابا حتال ديك 12 و نهبطو لشي مطعم نتغداو بجوج
عذراء هنا بدات تتفتف ليها:ل ل لغداا؟؟
بنان باستغراب:ااه مالكي؟؟
عذراء:مستر قوس عارضني
بنان بدهشة:واااط!!! تاني ا الصگعة !!!
عذراء:قال ليا بلي زعمة بسبب الرفض ديال ديك الدعوة الاولى بديك الطريقة هاد المرة غنمشي بزز مني
بنان:ههه مرضاااااش حيت درتي ليه هكاك شفتي ياختي هاد الرجال واخا هكاك سرهوم غير النخال بلا هواهوم تيجريو موراك
عذراء:انا مبغيت حد يجري مورايا بغيت غير التيساع و الله
بنان فرحانة:ناري ا الصگعة مستر قوس حاطك فعقلو انا و تحمست بلاصتك هههه
عذراء:شنو لي تيحمس فهادشي؟؟لاح مني النص عاد طلب الدعوة زائد اسلوبو تيستفز و الله
بنان:عرفتي خصك تباني وااو تاني ههه
عذراء:لا بليز خليني كيفما انا نمشي نتغدا و نرجع
بنان:هاهيا كرشك بدات تدوي تاني سمعيني مزيان غنقولها ليك تاني راه الى تعاندتي معاه غادي غير تلقاي راسك يا ايما مطرودة ولا تيزيد يستفزك كيفما دار دابا هربتي منو فباريس صدق مصبح عليك هنا باش تعرفيه انه الى دار شي حاجة فدماغو راه ميتهنا حتى يطبقها يعني يا الانسة الفاضلة غادي تمشي معاه فخطو و نتي معليك غير تبرعي مع راسك ياك لي خايفة منو انه يقيسك؟ راه مغيقيسكش الى مبيينتيش ليه هادشي هو ماشي حيوان باش يتهجم عليك ولا يغتاصبك
عذراء:مشكلتي انه مبغيت حد واش فهمتيني
بنان:هدا ماشي حد هدا رب العمل ديالك تبعيني غير فهضرتي راني اكبر منك فالعمر و فالتجربة يعني سمعي نصيحتي
عذراء تنهدات:اوكي مدام بنان
بنان بتاسمات بانتصار حيت قنعاتها:و اول حاجة غنبداو بيها هي اللبسة لي غتلبسي للغداء...
عذراء:كون غير خليتيني بهاد الحوايج
بنان:ياك قلنا تسمعي نصيحتي؟؟
عذراء:اووووكي
بنان:اذن هزي صاكك و تبعيني
عذراء:لفييين؟؟
بنان:غنديرو واحد الشوبينغ خفيف ضريف متخلعيش راه خصكي تلبسي حاجة خفيفة و فنفس الوقت راقية مغنديكش عند البراقات هههه
عذراء:دابا رتاحيت اختي
بنان هزات صاكها:يالاه غنصوني على الشيفور فالطريق
عذراء هزات صاكها:واخا
خرجو من تما و ميتلاقاو غير بالثلاثي المسموم...
روبين غير شافت عذراء طلعات حاجبها مجرد وجود هاد نص بنادم قدامها تيستفزها...
اما بنان فغادة مطلعة حتى هي حاجبها كأنه مكاينينش فالوجود هادشي لي خلاهوم يوقفو بتلاتاهوم تيخنزرو و يحنزو هزوهوم من حداهوم حتى حطوهوم فالسانسور غير بعينيهوم لي تيقطرو بالسم..عطاتهوم روبين بضهرها و كملات طريقها تتغدد كون عرفات بلي الكوافورة غادية دابا تقاد لموعد الغداء مع قوس كون تلاحت من الشرجم هه...دخلو لغرفة روبين المقر السري لجميع الخطط الجهنمية..حتى جلسو و نضراتهوم كلها حقد جيهة عذراء و بنان...
روبين:صافي تأكدت انه خدماااتها معاهاا لااا و مخليااها تجوول فكولواار العاارضااات الطووب فالشركة!!!
خناثة:اففف عمرنا تعاملنا مع بحال هاد الماركة مبغاتش تفهم راسها
ليڨيا:المشكل فين كاين هاد المرة انه بنان بجنبها و لي تتعتابر العارضة الثانية فالشركة من بعد روبين زائد سمعتها الجيدة بين الناس و لي كملها زواجها بالمصمم المعروف انطون!
روبين:النسب ديالي متيوقف حتاشي واحد قدامو!!!
خناثة:روبين..النسب ديالك ماشي كافي فهاد الحالات حيت كون كان مستر قوس انسان تيمشي على الطبقات ولا الانساب كون تزوج بيك من شحال هادي
ليڨيا:ناتا عندها الحق
روبين:دابا فكرو معايا الضربة لي غنبعدو بيها هادي لي تسلطات عليا
خناثة:انا تنرشح يشوف فيها مستر قوس شي تصرف ماشي هو هاداك يعني ياخد عليها نضرة خايبة
ليڨيا:ولكن هي ديجا اصلا كلها عيوب لباس ملي عطاها وقت بعدا
روبين:الفكرة زوينة ا خناثة ولكن خصها بلان متقون
خناثة:بصاح ولكن فنفس الوقت تاني كيف غنديرو ليها موحال تصدق بوجود بنان تحت حمايتها
ليڨيا:راه فينما نفكرو هكا تتجينا بنان واقفة فعودنا ديك المرأة مساهلاش!
خناثة:اه كون كتاشفنا هادشي قبل متولي مع بنان كون من شحال هادي ودعات الشركة
روبين:افكارنا ممنظنينش و بهاكا مغنقادو حتاشي بلان فالليل غنفكر مع راسي فشي حاجة لي تهنيني منها بمرة!
فالصالون كانت رفيف جالسة مع رواء لي حاطة رجل على رجل و مرام فلغرفة الصغيرة تتدير لواحد المرأة لاصير...
رواء:عرفتي التيتيز اختييي
رفيف:طبرتي عليها مزال ا المسخوطة طرتي حتى عييتي و طحتي مزال
رواء:بزز مني ا صاحبتي شكون لي ميشوفش الزين و ميدوبش المهم من هادشي كاملو حتى انا عجبتو ههه
رفيف:وي هدا هو الاهم حيت الى مكانش هو لي تيبغيك ولا تتعجبيه راه موصيبة
رواء:ايه بصاح ايوا و نتي شنو درتي مزال مع دا المسنمر؟
رفيف تنهدات:ها حنا تخاصمنا تاني و سيمانة مدويناش غبر و حتى انا سديت على مو
رواء:واش غتبقاو ديما هكا؟مصابرينش لبعضياتكوم و اتفه الاسباب تتخاصمو؟؟
رفيف:شغندير راه غير فكرة انه عامييين بل 3 سنييين دابا و انا باقة فهاد الخربة تتخليني نجن!!
رواء:راه عندك الحق ولكن تيقولو لي بغا العسل يصبر لقريص النحل
رفيف:نهشني النحل بالقريص حتى مخلا ليا عضم صحيح انا مليت و الله
رواء:ايوا شغنقول ليك اختي الصبر كملي فصبرك...
فواحد الشقة مكرية فواحد الحي كان خارج من الكوزينة هاز فيديه كاس ديال الما لابس شورط و فوقو عريان..دخل للغرفة لقاها واقفة عاد تتلبس فدوبياس ديالها و صدرها الصغير المسطح تيبان...
حطات الكاس من بعدما شربات و جرها حتى تلاحو فوق الناموسية معنقها و ضامها لعندو..حطات راسها فوق صدرو سادة عينيها براحة بالنسبة ليها هاد الإنسان لي معاها هو كلشي فحياتها...
رسيل بتاسمات بفرحة:بغيت شي بنيتة زوييونة تنحماق على الدراري الصغار
رئال:اكيد غتكون زويونة بحال ملاكي
رسيل بخجل تيعجبها الحال فاش تيقول ليها ملاكي:ولا ولييد بحالك غنعيشو فدار وحدة و مغنبقاوش نجيو لهنا
رئال:اكيد كلشي غيدوز بيخير انا عارف انه تسرعنا بزاف فاش مارسنا مع بعضياتنا هادي عامين قبل ولكن الاهم انك مقتانعة بهادشي و مبززتوش عليك
رسيل:اكيد لا مادام تنديرو مع الانسان لي تنبغي زائد انك غتزوج بيا فمافيها باس(اطونزيون ماديروش بحالها ها ودني منكوم👋)
رئال باسها فجبهتها:تنبغيك
رسيل:حتى انا حبيبي...
نرجعو لعند الكوافورة لي بدات تشحف تاني فبنان....
بنان:وا دي هدا اصاحبتي واش فيها الى بانو لكتيفات شوية راه يديك مغطيين
عذراء لي لابسة واحد الفستان طويل باليدين و فيه صدايف صغار اللون ديالو غوز بيبي...
عذراء:وا مغنلبسوش بهاد الكتاف الطايحين!
البنت لي خدامة فالمحال:انا نعدلهوم ليك ا مادموزيل
بنان شادة جبهتها:غير تصرفي حيت مغتنازلش على هادشي
قربات منها البنت حتى تحنات و بدات تقادو ليها و تسد فالصديفات حتى غطا ليها كتيفاتها...
عذراء تتشوف راسها فالمرايا لي كانت على شكل حيط فرحانة و عاجبها راسها...
بنان:ساليتي؟؟
عذراء تتقيص فالفستان و تدوز يديها على كرشها و عينيها فالمرايا:اييه زويين
بنان:غتلبسيه من هنا؟؟
عذراء:شحال هادي فالساعة؟؟
بنان:11:30
عذراء:باقي الوقت
بنان:اشمن باقي الوقت و المايكاب و الشعر!!
عذراء:خليني طبيعية!
بنان:عذراء🙂
عذراء تلفتات عند البنت:اوكي ختي غنديه
البنت:تفضلي معايا لغرفة تغيير الملابس ا مادموزيل
عذراء:لا شكرا غنلبسو من هنا
بنان:و تيكيت و الثمن لي معلق فيه!!
عذراء:ااه نسييت
البنت:صبري مادموزيل
جبدات واحد المقص صغير من جيب قاميجتها جيهة الصدر حتى قطعات ليها التيكيت و تأكدات من انه كلشي مزيان...
بنان:اوكي غنمشي نخلص نتي سبقي
عذراء:واش غتخلصي عليا تاني؟
بنان:عذراء! صافي سيري سبقي
مشات عذراء غادة بجلايل داك الفستان شحال جا معاها حتى ركبات..لحقات عليها بنان بعدما خلصات و رجعو ل الشركة...
من بعد مدة من الوقت وصلو و هاهوما رجعو لغرفة بنان...
بنان متحمسة:اجي لهنا اجي انا لي غنقاد ليك اليوم المايكاب
عذراء:غير خليني نقادو لراسي
بنان:غير اجي ديري ليا خاطري
تنهدات عذراء و جلسات فوق الكرسي اما بنان بدات تجبد فالمايكاب غير ليمارك الصحاح..بدات تلبق فوجه عذراء و مرة مرة تترجع عنقها للور باش تشوف كيفاش غادة حتى سالات ليها...
بنان:اكيد مكاين محسن منو ياختي تيبيين الملامح و يبرزها بشكل جمالي و طبيعي
عذراء:عندك الحق المهم الشعر بليز خليه مطلوق مبغيتش يتجمع تاني غنتزمت
بنان:اوكيي و عنداك تنساي داك الصباط لي شرينا شغندير ليك مبغيتيش طالون
عذراء:طالووون! الله ينجيني عمرني نعاودها!
بنان جبدات الريحة و بدات ترش على عذراء:هاد الريحة تتحمقني ههه
عذراء تتكح:وا صافي ا مدام خنقتيني
بنان حبسات و حطاتها:قادي لمساتك الأخيرة
شافت عذراء فالمرايا و بدات تقاد بشعرها بيديها و فنفس الوقت هازة الهم كيفاش غيدوز هاد الغداء تاني....
سالات عذراء كلشي و ولات واجدة...
بنان:وجدتي قبل الوقت هكا نبغيك تكوني ديما منضبطة فمواعيدك
عذراء:بغيت غير امتى نرجع و الله داك السييد ديما تيستفزني من عند الله
بنان:المهم على الأقل عشت حتى شفت وحدة محاملاش مستر قوس
عذراء:ماشي محاملاهش انا بطبعي متنكرهش و متنحقدش غير هو انسان مزعج بالنسبة ليا و تلاقا معايا غارقة فهمومي معندي فين نزيدو حتى هو
بنان:عذراء خصك تعلمي عمرك و عمرك فحياتك تخلطي حياتك المهنية مع حياتك الشخصية حيت نتي اول واحد غيتضرر غير تحطي رجليك فهاد الشركة نساي عذراء لي جات من دارهوم و كوني عذراء الطموحة لي بغات توصل لي تتعشق هاد الضومين و بغات تخلي بصمتها فيه الى بقيتي هكا غادي غير تمرضي كتر و صافي حاولي تعيشي اللحظة راه شحال من وحدة تتمنى تكون بلاصتك دابا و نتي معارفاش اهمية هادشي و مستر قوس كون ما درتي بلاصتك فعقلو كون عاقبك بشي لعبة ماشي يعرض عليك تاني واش فهمتي؟ السييد راه مرتاح معاك و هاد النقطة خصك تستغليها مزيان
عذراء:عندك الحق بخصوص انه تنخلط بين حياتي الشخصية و المهنية ولكن كيفاش غنفرق بيناتهوم؟؟
بنان:كيف قلت ليك غير تدخلي ل الشركة نساي راسك واش جيتي من داركوم نساي اش قال ليك باك هاد الصباح ولا باش صبحو عليك خوتك اي حاجة اي حاجة سلبية نسايها و ديري قدامك انك هنا باش توصلي و حتى واحد مغيوقف قدامك
عذراء:و شنو علاقة هادشي بمستر قوس؟
بنان:مستر قوس بمتابة الطريق القصير لي غتوصلي عن طريقو لطموحك الى عرفتي كيفاش طبعا حاولي تجبدي معاه مواضيع دويو غير على الخدمة هو انسان ملتزم بخدمتو و مواظب عليها بشكل كبير السييد غيمشي معاك فالخط و حتى نتي مادام ماباغياش الكلام المعسول و الحميمي هدا موضوع غيعجبو و فنفس الوقت غترتاحي فالهضرة فيه حيت متيمسكش شخصيا
عذراء:شغنقول ليه على الخدمة انا ممولفاش نسول بحال هاد الأسئلة
بنان:متلا قولي ليه غير كيفاش داز عرض باريس و اشمن مصممة تختارت ولا شنو صيحة هاد السنة لي غتديرها الشركة مهم نتي دوي ليه غير على الموضة بدعي
عذراء رتاحت:صافي دابا مزيان رتاحيت
بنان:هكا نبغيك و متنسايش راه تيبقا رب العمل ديالك فالأخير
عذراء:واخا انا غندير بكلامك كيف قلتي هو رب العمل ديالي و انا خدامة عندو لا اكتر
بنان بتاسمات:اييه تماما هادي هي لاسيتوياسيون ديالكوم هكا دخليها لعقلك
عذراء بتاسمات:فراسك و الله حتى رتاحيت مبقاش ضميري تيأنبني
بنان:اشمن تأنيب حتى نتي نوضي من تما الوقت هادي
عذراء ناضت:قال ليا غير وجدي راسك معرفتش فين نتسنا؟
بنان:غيسيفط ليك شي واحد نتي لبسي بعدا الصباط و قادي الصاك باش الى جا تمشي معاه
عذراء:ايجي هو؟؟؟
بنان:واا لي غيسيفط
عذراء:اااه اااه
لبسات الصباط و قادات مسائلها كاملين شوية تسمع الدقان....
مشات بنان حلات لقاتو واحد الراجل لابس زي رسمي د الشركة و حاني راسو احتراما ليهوم ك سيدات...
الراجل:ميس عذراء مفتاح مستر قوس سيفطني نرافقك ل السيارة
بنان جرات عذراء لعندو:هاهيا
عذراء:انا هي عذراء
الراجل:اوكي ميس تفضلي معايا
بنان:طهلاي فراسك و متنسايش الثقة فالنفس
عذراء:كوني هانية
مشات عذراء مع الراجل حتى هبطو فالسانسور حتال البارك د السيارات و الدراجات النارية لي كاين فتحت بناية الشركة...بقات غادة معاه الدنيا تتصفر غير الحديدات الناضيين لي مصافين تما حس بنادم مقطوع كاع افلام الاختطاف و القتل واش دازو فدماغها و شي سيناريوهات لي عقلها هز المخيخ ديالو و هرب من كترة الدراما المغربية المخلطة مع الأمريكية...
حتى بدا تيبان ليها قوس واقف قدام سيارة الليمو تيدوي فالتيليفون..سمع تقرقيب الصباط ديالها و هو يتلفت لقا مخرجة الأفلام جاية قاصداه السييد لثواني سها فيها تيسقي عينيه فهاد الجمال الطبيعي لي زادت عليه بالمايكاب و هاد الفستان لي لايق على جسدها و بيين حروفو بشكل جميل ماشي فاضح ولا معييق جابت ليه التمام هادي كل مرة تلون ليه بشي سيفة ها الحمر ها الموف ها شكلها العادي و دابا بهاد غوز بيبي بيينات ليه الأنوثة ديالها بشكل اخر مزيج بين الكيوتنس و البساطة...اما عذراء رغم انها ممسوقاش ليه الا انه الستايل ديالو فاللباس مغتنكرش انه الستايل لي تيعجبها فالرجال..الستايل الكلاس تيجذب بزاف ديال البنات و تيعطي هيبة لمولاه غير طبيعية و هادي اول نقطة لاحظاتها عذراء دابا...بقا شي يحنزز فشي و الشيفور واقف و الراجل لي جا معاها واقف..حتى طفا قوس تيليفونو و دارو فالجيب و قرب منها...
عذراء طلعات فيه راسها تتهرب عينيها شحال تيبان طويل عليها...
قوس كان غيشد يديها يقبلها ولكن تفكر اخر مرة و هو يصافحها:جميلة كيف العادة
عذراء حشمات اول مرة يقول ليها شي راجل زوينة:ش شكرا مستر
الشيفور حل ليها الباب حيت هادي هي خدمتو و مشا يحل لقوس من الجهة لوخرا اما هي بقات واقفة مترددة واش تطلع ولا لا...
قوس:مالكي؟؟
عذراء لاحت رجليها لداخل:لا والو
دخلات و جلسات بقات حالة فمها تتمنضر ويلي دار هادي ولات مبقاتش طونوبيل...دخل قوس حتى هو جلس حداها و سد عليهوم الشيفور البيبان و طلع...
عذراء حدرات راسها من القرب ديالهوم هاكا حشمات و هو تيشوف فيها عجباتو بزاف حتى من داك الخجل لي باين من حركاتها و تعابير وجهها زايدها حلاوة اكتر...
قوس:مالكي بحالا خايفة؟
الشيفور ديمارا بخفة محسو كاع بالطونوبيل تحركات حتى خرجو لبرا و دخلات الشمس...
عذراء:لا والو غير هادشي جديد عليا و صافي هه
قوس:امم مزيان
عذراء:ه هي غنتغداو فشي بلاصة؟
قوس:اه
عذراء تفكرات الشمتة ديال عشاء باريس و دوك الأطباق و هي تنطق...
عذراء:تنعرف واحد البلاصة زوينة كلينا فيها من قبل انا و صاحبتي عرفتي تيصرعو الطواجن من داكشي
عذراء وقوس الجزء السادس
محتوى القصة
التنقل بين الأجزاء