الشيفور شاف فقوس من المراية د الطونوبيل تيتسنا الاشارة ديالو..حرك ليه راسو يشوف هاد الكوافورة فين غتديهوم...ديمارا الشيفور تاني و الكوافورة تنعت ليه بصبعها رجعات منو مول الطاكسي و قوس غير تيراقبها تيسقي عينيه فيها و هي ممنتابهاش ليه..دازت مدة د الوقت حتى وصلو لواحد المنطقة مغبرة كلها تراب و ربيع مقطوع هنا و لهيه كاين واحد السور مخرمز كولو بالكتبة و الرسومات و بخط واضح مكتوب "ممنوع رمي الأزبال و البول" خاتمينها ب "و شكرا" و رغم هادشي لايحين الزبل تحت تما و الربيع ناض تما غير بالماء الأصفر..تبعد شوية من داك السور كاينين القهاوي مصافين وحدة حدا لوخرا حالف كل واحد يحرم الرزق على لاخور الطبالي على برا شي تيتفرج فالداخل شي مشمس حاضي الطونوبيلات لي دايزين و الدخان فكل مكان...حتى بانت ليهوم حديدة طويلة بيضة تتشعل مبلاصية أواااه شكون مولاها و فين تلفات بيه الوقت حتى تركن هنا؟؟؟...
الشيفور:واش هنا ا ميس؟؟
عذراء فرحانة:اييه هنا هنا شكرا
الشيفور تصدم فين جابتهوم هادي! ضرب الطم و هبط حل الباب لقوس و ليها...غير هبط قوس و ياريت ماهبطش ولا السييد بحالا تحط فعالم اخور هادشي جديد عليه بزاف لفين جابتو هادي؟؟؟ضار عندها لقاها واقفة حداه تتسناه يسبق زعمة راه هو لي عارضها لا ا حبيبتي نتي لي وليتي عارضاه لهاد الخلا دابا...
عذراء لاحظات الصمت ديالو:مستر؟
قوس ضار عندها:شهادشي؟؟؟
عذراء تتنعت ليه:شفتي هاداك لي جا فلافان هو لي موالفة ناكل عندو انا و صاحبتي و حتى ختي مرة مرة
قوس:فين المطعم؟؟فين البنايااات؟؟اش هادشي؟؟(السيد باقي مصدوم)
عذراء:المطعم هو هاداك راه نعتو ليك بصبعي الى سمحتي تفضل معايا انا متأكدة غيعجبك المذاق
قوس:كيفاش تنبان ليك انا؟؟
عذراء هبطات حجبانها:واش معجبكش اختياري؟
قوس:شنو هاد المكان واش محاساش بحجم القذارة المحيطة بهنا!!
عذراء:هادي راها فرصة فين تدوق الطاجين حيت قلتي متتعرفوش(راك غير تتكب الما على الرملة ا قوس)
قوس:نذوقو فشي ريسطو متخصص ماشي هنا!!
عذراء بان القلق على وجهها مالو هدا معجبوش مطعم العزمي ياكل كراوعو على طواجنو...
عذراء:واخا تدير ليا بخاطري؟
قوس بانت ليه تقلقات و لاحظ الحماس لي كان باين على وجهها من قبل فهاد اللحظة بالضبط بدا تيحس بشوييية ديال التأنيب من جيهتها و فنفس الوقت الغرور ديالو بارك تيضغط فيه و تيمنعو يمشي ولكن كان واحد السييد اخور جالس تيتفرج فالتأنيب و الغرور تيدابزو و هو ينوض خرج فيهوم دقة وحدة و هاد السييد هو الإعجاب....
قوس:وااش متأكدة باغية تاكلي هنا؟؟
عذراء طلعات فيه راسها ممفاكاش:اااه
قوس:اوكي
عذراء ممصدقاش:غناكلو فيه؟؟؟
قوس:ياك هادشي لي بغيتي؟؟
عذراء:اييه ههه شكرا بزاف فرحتيني
قوس استغرب من هاد المخلوق العجيب لي فرحاتها غير الماكلة و فين مكان منحط بحال هدا!!
الشيفور واقف مستغرب واش غير دابا سمع موافقة السيد ديالو لي تزاد و عاش حياتو كلها فسويسرا و من عائلة غنية بزااف غيتغداا فهاد المكان!!!!
قوس شاف فالشيفور:بقا نتا هنايا
الشيفور حدر راسو و الكوافورة سبقات و قوس غادي بجنبها السييد مورااااااق واش ولد شكون و شكون...بقاو دايزين قدام ديك الطبقة تيبان ليهوم راجل لابس مزيااان و مهييب و حداه نص ميترو متيتز دايرين بحال الفيل و النملة حتى وصلو للمقهى..الطواجن مصافين فوق الفاخر بحالا شادين النوبة و شي تيشوي هناا و شي تياكل شي تيتسنا فماكلتو و السرباية تيسربيو الناس و الغوات ديال الطلبيات و الدخااخن يا الدخااخن خلاصة القول اجواء شعبية بامتياز...
شافهوم السرباي بانو ليه ناس لا علاقة مع الناس لخرين من لباسهوم مشا عندهوم ديريكت...
السرباي:اش حب الخاطر؟؟
قوس بقا ساكت عاطي الكلمة للكوافورة لي جايباه لهنا...
عذراء:شي بلاصة نقية الله يحفظك
السرباي شاف فالضخامة لي حداها و تعجب تيبان ليه بحالا موضر ممكن سكتات ليهوم الطونوبيل ولا شي حاجة و لكن لي بان ليه انه كليان صحيح...
السرباي:واخا مدام تفضلي معايا
عذراء خرجات فيه عينيها الخضرين:مادموزيل
السرباي سبق مسمعهاش و تبعاتو و قوس غير غادي ساكت حتى يشوف كيف غيسالي هاد العجب...
طلعو فالدروج كان المكان تما خاوي شوية و على الأقل نقي على التحت..داهوم لواحد الطبلة تطل على لاطيراس قادوه بالخشب...جلسو و الكوافورة عاجبها الحال تتحيي الذكرايات...
السرباي:اش حب الخاطر؟؟
عذراء عطاوها الميكرو:دخلتو لحم المعزي جديد؟
السرباي:ايه باقي جديد غير هاد الصباح دبحو الجزار
عذراء:بغيت منو جوج طويجنات مع شلاضة المعتادة و الموناضة(شافت فقوس) بغيتي هاواي ولا كوكا؟ يمكن غتبغي كوكا ياك؟
قوس غير تيشوف الصراحة معرف باش يجاوب حيت ببساطة هرباتو ليه هاد الكوافورة كتافا بتحريك يديه:خودي لي بغيتي راك نتي لي عارضاني دابا
عذراء بتاسمات بخجل:ههه(شافت فالسرباي) جيب واحد بومس و كوكا
السرباي قييد كلشي:واخاا شوية و يوجدو خودو راحتكوم
مشا السرباي و الكوافورة تقادات فالجلسة:كيف جاك المطعم؟(قصدك المقهى😑)
قوس:معرفت منقول ليك
عذراء:فاش غدوق الطاجين غادي تشكرني من بعد انا عارفة
قوس:تنتمنى هادشي
عذراء:انا راه متأكدة و الله عارفاك ممرتاحش هنا ولكن صبرتي على قبلي(حشمات)
قوس تتزيد تجذبو بهاد الحشمة لي تتزيدها كيوتنس على كيوتنس:دابا غير قولي ليا شنو لي عاجبك فهاد المكان؟
قوس:زيت ارگان؟ واش تتكال؟ على حد علمي هو زيت تجميلي
عذراء:اه تتكال مع الخبز و تدار ل طواجن و شي اكلات المهم تضيف واحد البنة استثنائية
قوس:امم اوكي
بقاو فواحد الجو من السكات هو تيشوف فيها و هي تتشوف فلاطيراس حتى جا السرباي حط الطويجنات الصغار قدام قوس و الثاني قدام عذراء..جاب الخبز و شلاضة د ماطيشة بالبصلة و الموناضة و قرعة د الما مع الكيسان...حل ليهوم الطويجنات و دا معاه غطاياتهوم...
قوس هنا استغرب اول مرة يشوف طاجين بحكم انه متعطاتش ليه فرصة يتعرف على ثقافة بلادو لي خدا منها غير اللغة الأم فقط غتعرفو من بعد علاش...اما واحد الوحش فبدا يتوحم و يتشها تما الريحة طالعة زوينة بزاف تشهي اي واحد شوية و ريوگها يسيلو..قطعات الخبز و بدات تفرق فيه فوق الطبلة و قوس تيتفرج فيها بحالا تتفرق الكارطة ولا الرامي حتى سالات هزات طرفها و قطعات منو شوية و غمسات فالطاجين...
قوس مستغرب:اش تديري؟؟
عذراء طلعات راسها خرجها من اجوائها الحميمية مع الطاجين:شنو درت؟
قوس:فين الموس و الفورشيط؟؟فين الطبسيل؟؟
عذراء:اااه علاه مفراسكش؟؟الطاجين تيتكال هكدا(عاودات نفس العملية تاني)
قوس:شوفي يديك توسخو بيه!
عذراء:راه عادي غنغسلهوم من بعد
قوس:ميمكنش ليا ناكل هاكا و فين السرباي يكب لينا المشروب؟؟
عذراء طلعات فيه عينيها:اشمن مشروب؟ واش بومس؟ راها موناضة هادي ماشي مشروب(تتمتم) ويلي مالي وجه الشراب
قوس:راني عرفت قصدي المشروب الغازي!
عذراء:اااه ههه متديش عليا اه و السرباي مغيرجعش حتى نساليو صبر نكب ليك
هزات عذراء القرعة و بدات تحل حلفات متحل ليها حيت يديها كانو ميدمين خداها منها قوس و جبد سريبتة صغيرة مطرزة ب B بالذهبي من جيب الفيستة ديالو مسح بيها داك ليدام لي خلات فبلاصة البوشونة و حلها دغيا...حل القرعة الثانية و طييراتهوم ليه بدات تتكب...
عذراء:عرفتي متتعجبنيش كوكا معرفتش علاش قاصحة ولكن عندك بومس و هاواي و حتى فاانطة ااه و شويبس ولكن د الحامض تيحمقوني ولكن بومس تتبقا الطوب عرفتي فاش كنت صغيرة منشربهاش و نييتي صافية ضروري مندير فيها سكرانة ههه
قوس:هه سكرانة كاع؟علاش اصلا متتشربيش؟(لقاتو بعدا)
عذراء:راه الشراب حرام زائد ماشي مزيان المرأة تشرب راه خايب غتهلك صحتها و غادي تولي صورتها فاسدة فالمجتمع
قوس حيت انسان متفتح متحضر معارفش العقلية المغربية المخموجة فا بالنسبة ليه هادشي ممنوش:مكايناش شي امرأة مصادفتهاش متتشربش نتي اول وحدة متتشربيش
عذراء:اه ايوا كل واحد كيف داير..شفتك مقستيش ماكلتك؟
قوس:معرفتش كيفاش غناكلو!
عذراء قطعات شوية من خبزها و ناضت من الكرسي حتى غمسات فالطويجنة ديالو و مداتها ليه:هاك حطها كولها دابا
قوس:مبغيتش يدي توسخ
عذراء:و كيفاش غتاكل؟؟
قوس:قولي ليهوم يجيبو طبسيل و فورشيط الى بغيتي ناكل
عذراء حطات ديك الدغمة و ناضت طلات مكاينش السرباي يمكن هبط لتحت و رجعات لعندو:مكاينش وا صافي(قلبات الهضرة دغيا) غير شوف كيف دير
قوس:راني ممولفش هاد طريقة الأكل
عذراء:مافيها باس تجرب شي حاجة جديدة
قوس حس بالضغط ديالها عليه:صافي براكة!
عذراء جلسات طالع ليها الدم هدا مالو داير بحال شي دري صغير رجعات تتاكل و تتحاول متشوفش فيه حيت عصبها اما هو تيدوز غير ديك كوكا و تيشوف فيها تتاكل بطريقة بحالا بزز...
قوس:مالك؟؟
عذراء:مادام درتي ليا خاطري علاش متكملش على خيرك؟معطيتيه حتى فرصة باش تدوقو
قوس:وافقت ندوق ولكن مكانش يتصحابلي تيتكال هاكا
عذراء غمسات و قرباتها من فمو:دوق دابا يديك مغيتوسخوش
قوس تيشوف فيها باستغراب واش هادي ناوية توكلو ولا؟ و هي فنفس الوقت مزال مطلعات معاها باقة معصبة...و بنضراتهوم المتبادلة زعم و كلاها من يديها...و هو يتصدم من المذاق البنين ديالو...
قوس مضغ حتى كمل:بغيت وحدة خرى
عذراء فرحانة:شفتي قلت ليك غيعجبك
قوس:وكليني مرة خرى
عذراء:ها؟ نوكلك؟
قوس:اه كيفما درتي دابا
عذراء عاد حسات بلي وكلاتو و بيديها! مكانتش حاسة بسبب الفشوش ديالو لي زاد على حدو و هي معندهاش مع هادشي..حدرات راسها غارقة فخجلها و هو متعجب مالها تاني...
عذراء من بعد هادشي كاملو ليداز عاد تفكرات هضرة بنان:كيفاش داز العرض ديال باريس؟
قوس استغرب حيت اول مرة تسولو على العمل:داز مزيان اغلبية التصاميم تباعو
عذراء:مزيااان و اشمن مصممة تهزات؟
قوس:نيكوليتا لي شرفات الشركة هاد العام
عذراء معارفاش اشمن نيكوليتا ولا الكوطليطة المهم متخليهش يخرج على السطر:ا ااه مزيان متشوقة نعرف الصيحة لي غتقدمها الشركة فهاد الصيف الجاي
قوس شرب من كاسو:كاينين بزاف ديال الاقتراحات ولكن الأهم بغينا نركزو على الأريحية فاللبس هاد السنة
عذراء:اه اه متافقة معاك
قوس:و نتي كيف غادة مع العارضة بنان؟
عذراء بتاسمات عزيزة عليها ديك السييدة:مرتاحة و بزااف انسانة ضريفة بزااف و متواضعة و الله فرحتي كبييرة حيت جمعني القدر بوحدة بحالها
قوس تيشوف فيها كيفاش تتعبر بيديها و عينيها لي تيلمعو ماشي غير كلماتها و انما جسدها كاملو تيعبر على المحبة ل بنان...
قوس:هادشي واضح
عذراء:وي بزاف الله يكتر من مثالها
قوس:هي و زوجها انطون دايرين بصمتهوم فالشركة و انا براسي تنعتز بعملائي لي تيخدمو بشغف
عذراء:بحالي و الله انا دخلت لهاد المجال غير باش نخلي بصمتي فيه انا تنعشق المايكاب من صغري كنت تنتفرج ف جويل فMBC و كنت متبعة داك برنامج لمسات قديييم ف دوزيم و بزاف من بعدها فاش درت تيلي وليت نتفرج فيوتوب شوية انسطا من بعد قريت عامين فمدرسة الحلاقة انا و ختي خدمت من بعد فالصالون حتال النهار لي درتو اعلان
قوس دوز كاع الكاسيطة و وقف عند الاعلان:كيفاش حتى تعرفتي على الاعلان؟؟
قوس:اه مزيان تنتمنى ليك التوفيق كيف قلت ليك انا تنعتز بالعملاء لي تيخدمو بشغف و حب لهاد المجال
عذراء حدرات راسها بخجل:ربي خليك
قوس شاف فساعة يدو:تنظن جا وقت رجوعنا
عذراء:ا ااه شبعت
قوس:فين غنخلص؟
عذراء:فلتحت فين كاينة لاكيس
ناضو بجوج و هبطو لي سمع لاكيس يقول ديال المول هي غير بليصة بحال لي عند مول الحانوت تعجب قوس لي كان عاد جابد بصطامو يخلص بلكارط...
عذراء طلعات فيه راسها:بالكاش ا مستر
قوس حل جيب من البسطام و بدا يجبد فالفلوس بحالا كانو مصلوحين حيت قليل بزااف فاش تيستعمل الكاش...خلص و رد ليه هاداك الصرف ولكن متسوقش خلاه بلاصتو و زاد اما الكوافورة مشات بجنبو عاجبها الحال عمرات كرشها حتى شبعات...رجعو لفين كاينة الليمو و الانضار تابعينهوم حتى حل ليهوم الشيفور و ركبو راجعين ل الشركة....
بعد مدة ديال الطريق الليمو تپاركات فالباركينغ الأرضي ديال الشركة و هبطو...
عذراء:شكرا بزاف على العراضة
قوس:راني قلت ليك مبقيتش عارضك نتي لي عرضتيني
عذراء:هه الى كتاب ان شاء الله نرجع ليك العراضة
(لا لا لا الله يرحم باك غتديه لشي سناك هاد المرة!)
قوس بتاسم:هه اوكي
عذراء:من بعد اذنك غنمشي دابا
حرك ليها قوس يديه و طلعات ل السانسور بقا ساهي معاها حتى مشات ريحتها باقة تضور تما شاف فالساعة ديالو و شد سانسورو الخاص...طلعات عذراء ل الطبقة الخاصة بالعارضات الطوب د الشركة لقات بنان واقفة عند الاستقبال تضحك مع واحد الزرافة زعرة و الألمانية غير تتشاير غير شافت عذراء و هي تفاجأ قلباتها دغيا مغربية...
بنان:عذراااء جيتي!!
عذراء مشات تتجري لعندها بخفة و باينة عليها الفرحة:اييه ههه
هزات بنان راسها و هي تبان ليها روبين خارجة من غرفتها و هي تقول بصوت عالي شوية:كيداز موعدك مع مستر قوس ههه؟؟
روبين تهزو حجبانها و تقلشو ودنيها و بخطواتها المتسارعة جات لعندهوم:عاودي شنو قلتي!!!....
بنان طلعات حاجبها:شنو يتصحاب ليك راسك داخلة هاكا علينا؟؟
روبين حمرات فيها عينيها:كيفاااش اشمن موعددد؟!!!!
عذراء طلعات فيها راسها:واش نتي عاد مزايدة فيه؟؟
روبين خرجات فيها عينيها:دوييي ا القزمة واااش خرجتييي مع قوسسس!!!!
عذراء نيشان:اه خرجت انا وياه
روبين حلات فمها بصدمة و بنان بتاسمات بنصر لي بغاتو وصلات ليه...
بنان:مالك مصدومة؟ واش تتسنايه ياخد اذنك متلا؟؟زائد انه ماشي اول مرة يخرج معاها مستر قوس ههه اووه ولاو يتشاوفو بزاف اووه شحال كيووت
عذراء مخنزرة تتقاد فحوايجها:واش هادي مريضة ولا مالها؟؟واش انا درت شي حاجة ياك هو لي باغي
بنان بتاسمات:متخافيش راك غادة مزيان هاد التصرف ديالها تيدل على انك فرقعتي ليها مرارتهاا
عذراء:الله يجعلها تفرقع كاملها تفو حشاك على سلعة
بنان:غير تهدني و زيدي نمشيو لغرفتي
اما روبين فا كانت طالعة ل الطابق الخاص بقوس..وقف السانسور و خرجات ماشية ديريكت جهة السكريتيرة لي شافتها و وقفات بدهشة...
السكريتيرة:مادموزيل روبين؟؟
روبين غتفرقع حدها جراتها لواحد القاعة تما خاوية فيها اثاث ديال الجلوس و عامرة ديكورات و خزانات كتب...
روبين حابسة البكية غتفرقع:قولي ليا واش بصاح قوس خرج مع شي وحدة ليوم؟؟
السكريتيرة عقدات حجبانها فاش فكراتها:وي مادموزيل
روبين هنا صافي جابو ليها التمام:قوولييي ليا سمييتهااا!!
السكريتيرة حتى هي محاملاهاش نطقات بالسم:عذراء مفتاح
روبين:علاااش هااد صحاابات برج العذرااء مصاااائب نزلوو على حياااتيي بحاالها بحال بناان ماركة وحدة!!
السكريتيرة عارفة مزيان انه هاد الزرافة مشاركاها فإعجابها بقوس و عارفة بزاف د الحوايج كونها السكرتيرة ديالو ولكن فنفس الوقت كاين واحد العامل مشترك كبير بيناتهوم هاد الساعة و لي هو الكره ديالهوم لعذراء..و للحظات من الصمت طاحت فبالها فكرة جهنمية لي غتقدر تهرس بيها جناح انثى رقيقة بحال عذراء و بابتسامة شريرة شافت فروبين لي كانت ساهية تتخطط فداك الراس...
السكريتيرة:مادموزيل اجي جلسي عندي ليك واحد الحاجة...
فالصالون ديال رفيف كانت واقفة هاد الأخيرة تتقاد لبروشينغ لواحد الكليانة و صوت السيشوار طالع حتى تسمع الدقان فالزاج ديال الباب..مرام لي كانت فالداخل تتغسل ف فراشي المكياج حطات داكشي و خرجات تتهبط فكمام كسوتها...
رفيف بلغوات باش تسمعها:عفاك شوفي شكون دق
مرام:واخا
خرجات مرام و هي تصدم فاش لقات ضرغام...
ضرغام:السلام عليكم ياكما شفتي شي جن؟؟
مرام بتوتر:لا لا لباس عليك؟؟
ضرغام تيحنزز فيها بلا ميعيق شحال تتبان زوينة:لباس حمد الله جيت غير نشوف ياكما خاصاكوم شي حاجة
مرام:لا لا ربي خليك كلشي موجود
ضرغام حرك ليها راسو:اوكي طهلاي فراسك
عطاها بضهرو عاد خلا ابتسامة خفيفة ترسم على وجهو جا بغا غير يتفقد احوالها و يشوفها كيف دايرة حيت قليل فاش تيشوفها و حتى داك التواصل فالتيليفون بيناتهوم قليل و بزااف كمل طريقو راجع ل الدار و هي دخلات لصالون...لقات رفيف سالات للكليانة و بدات تدهن ليها شعرها بواحد الزيت خاص من بعد السيشوار حتى سالات ليها..مشات جيهة لاكيس حتى خلصات و مشات...
رفيف:شكون لي جا ا مرام؟؟
مرام:ضرغام سول واش خاصانا شي حاجة و مشا
رفيف باستغراب:لعجب مموالفاش ليه(صغرات عينيها فمرام) صافي عاد فهمت
مرام:شنو؟؟
رفيف:هه والو والو...
نرجعو لعند عذراء لي بدلات حوايجها و دابا تتقاد المايكاب لبنان للجلسة التصويرية مع المجلة فالغرفة الخاصة فقسم التصوير...
عذراء:صاافي هاني ساليت
بنان ناضت:صافي كلشي هو هاداك خصني نخرج لمكان التصوير دابا
عذراء:واخا انا غنتسناك هنا
خرجات بنان و عذراء جبدات تيليفونها و بقات غير فلفايسبوك مرة تضحك مرة تحبسها حتى رجعات بنان تاني...
بنان:مسحي ليا المايكاب باش نمشي نلبس اللبسة الثانية
عذراء:اوكي
جبدات عذراء القطن و ديماكيون د العينين و الوجه حتى مسحاتو ليها و نقاتو مزيان و هي تمشي لغرفة الأزياء كاينة واحد المرأة تما لبساتها و رجعات عند عذراء لي دارت ليها مايكاب مختلف على لي قبل منو و هكدا دازت الجلسة التصويرية ب 4 ديال اللبسات...سالاو من تما و لبسات بنان حوايجها و طلعو للغرفة...
عذراء:دابا سالات خدمتي لليوم ا مدام ياك؟
بنان:اه صافي حتال غدا
عذراء:صافي مزيان الى سمحتي ليا بغيت نهبط للكافيتيريا ناخد شي حاجة
بنان:اوكي على راحتك
هزات عذراء صاكها و خرجات من الغرفة بعدما تسالمات مع بنان...
مشات عذراء لسانسور و شي عينين غير مراقبينها تما..يالاه ضغطات على البوطون و هي تحس بشي واحد واقف موراها..تلفتات لقاتها امرأة طويلة باينة من العارضات..دخلو هي وياها لسانسور و هبط بيهوم للكافيتيريا تفرقو و عذراء مشات لعند البوفي و هي خدات ليها طاولة فين تكمل المراقبة ديالها...
خدات عذراء واحد سموثي د الفواكه و سندويتش بالخضر و مشات شدات ليها طبلة و حطات لبلاطو ديالها فوقها...
عذراء:ولاهيلا الخدمة تتجيب الجوع الحمد الله كاين ميتكال هنا
بقات تتاكل و تدوز بالعصير حتى سالات و مسحات فمها بكلينيكس...ناضت حتى لاحت داكشي فالمكان المخصص بالنفايات و حطات الطبق و الكاس فالمكان المخصص ليهوم باش من بعد يتهزو يتغسلو فغسالة الماعن الكبيرة...يالاه ضارت غادة تمشي تضرب طليلة عند نيار و سديم و هي تحس بشي واحد قاصها فكتفها ضارت باستغراب لقاتها نفس البنت...
عذراء:شنو؟
البنت:يمكن ليك تفضلي معايا
عذراء حاضية جنابها:لفيين؟؟
البنت:السكريتيرة جلنار طالباك
عذراء طلعات حاجبها معرفاتش فين سمعات هاد السمية من قبل ولكن معندها مادير خصها تشوف اش بغاتها:اوكي
طلعو فالسانسور حتال واحد الطابق لي ماشي غريب على عذراء حيت كانت جات ليه من قبل هي و شيارا...
عذراء:فيناهيا؟؟
البنت:قدام ديك الغرفة
مشات عذراء لتما مالقات حتى واحد و زاد استغرابها تلفتات ملقاتش ديك البنت و هنا بدات تتحس بشي حاجة غريبة واقعة هنا..فجأة تسمع صوت الباب لي واقفة قدامو تحل بطريقة أوتوماتيكية و هي تسمع صوت امرأة قالت "دخلي"
عذراء مزييرة على صاكها:شكون نتي!!
المرأة:دخلي الى بغيتي تعرفي
عذراء قربات من الباب و شافت يمينها و يسارها كاينين العملاء يعني الى كان شي قالب غتغوت فا زعمات و دخلات..تسد الباب تاني و هي تبان ليها جلنار و روبين...
عذراء مفاهمة والو:اش بغيتوو؟؟؟
روبين قربات منها و هي رجعات خطوة للور:عرفتي علاش جبناك لهنا؟؟
روبين دارت اشارة لجلنار و جبدات الفيستة من تما و جابتها قدام عذراء...
روبين:و اكيد غتكوني عقلتي على هادي ياك؟؟
عذراء تتشوف الفيستة لي صبناتها بيديها و رجعاتها ليه فهاد المكان لي بحال المخزن:شنو تدير هادي هنا؟؟
روبين ضحكات بشر:ههههه واش يتصحاب ليك قوس غيلبس هاد الشرويطة؟؟ راك غالطة و بزاف و اففف اش هاد الريحة بعدا فيها
جلنار:و تشوفي ا مادموزيل كيفاش عطاها ليا لاحها ليا هاكا و قال ليا دي عليا هادشي
عذراء تتسمع لكلامهوم لي بدا تيجرح المشاعر ديالها و الاكتر هو فاش دكرات الطريقة لي تعامل بيها مع الفيستة لي صبناتها ليه بيديها و كانت فرحانة ترجعها ليه حيت كبر فعينيها فاش دار معاها داك الموقف الرجولي...
روبين:شفتك سكتي و شوية غتبكي ههههههههه
عذراء جمعات قوتها و شهقات واحد الشهقة ديال الاستفزاز:كيفاش؟؟نبكي؟(نفاجرات بالضحك) ههههههههه ويلي ويلي علاش نبكي؟؟واش هاد الهضرة تتقولوها على واحد خرجني تغدينا على برا غير سويعات هادي من قبل
جلنار شافت فروبين لي بدات تتعصب...
روبين:واش سمعتي مزيان اش قلت ليك؟؟راه هاد الشرويطة لايحها هنا فهاد المكان المخصص بالملابس لي مبقاتش عندها حتاشي قيمة فالشركة
جلنار:يعني باختصار فاش رجعتيها ليه مبقاتش بديك القيمة لي كانت عليها يا الهبيلة هههه
عذراء ربي لي عالم بيها من الداخل باش تتحس ولكن مبغاتش تبيين ليهوم ولو ذرة ضعف:ولكن نسيتو واحد الحاجة على الأقل بعدا خليتو حييدها من جسمو حتى حطها على جسمي و فوق هادشي قال ليا(جمعات فمها على شكل بوسة و مييلات راسها و رمشات بعينيها و بصوت طفولي) واش نتي بيخير ا ميس؟ اووه على اهتمااام هههه
عذراء:دابا واش انا لي وليت رخيصة وا عيباد الله راه هو لي تيجي عندي هانتي سولي هادي لي معاك غير هاد الصباح بهدلها واحد التبهديلة و من الفوق طلبات مني السماحة حيت حاولات تخرجني من الطابق ديالو الخاص حيت دار معايا نجي لعندو هاهيا سوليها
جلنار بلعات ريقها و روبين ضارت لعندها و السم تيقطر من عينيها...
روبين:واش هادشي صحيح؟؟؟
جلنار:ا ااه
روبين دفعااتها شوية متجي طايحة كون ما شدات فراسها:كيفاااش حتى مقلتيهااااش ليا؟؟؟؟
جلنار:مادموزيل روبين حتارمي راسك و مرة خرى مدفعينيش!
عذراء:خلينيي علييك ا بنااادم واش تتفهمي الى فيك الفز دوي مع مووولااااه وا عطينييي بتيييساع
روبين شداتها من كتافها:انا لي تنآمر هنااا ماشي نتي ولا هي سمعتييي نتي وحدة رخييصة و متتسوااش طماااعة باغية غير الفلوووس غادي تفااارقي مع قوووس ولا غادي نوصل معاك مواصل اسوء من هادشي!!!
عذراء:التهديدات ديالك كوليهوم و هاد الهضرة قوليها لقوس ماشي ليا انا وا بنادم راه هو لي تابعني ماشي انا لي تابعاه و زايدون كون بغاك كاعما يبقا يخرج معايا انا
هزات روبين يديها و عطاتها طرشة نيشان فحنكها خلات عذراء مصدومة و حتى جلنار...
روبين:منشووفكش مزاااال قداااااميييي
عذراء حتاال هناا صافي وصلات لنقطة لي فييضات الكاس وصلات لتصرفيق كاع دابا توريها...
جلنار:صاافي سيريي دابا الى عندك شي خدمة
عذراء دفعات روبين و فنفس الوقت تتحاول تحبس دموعها لي مبقا والو و يهبطو:اششش يتصحااب ليك راااسك تطرشينيييي اششش!!!!(تدفع فيها) دوييييي
روبين تتشد ليها فيديها و عذراء ممفاكاش باقة تدفع...
عذراء:شكووون نتي طرشيييينيييي جاااوبييي
روبين:الى مبعدتيش من قوس غادي نعاود ليك وحدة خرى!!
جلنار بدهشة:صااافي خرجييي(ضغطات على زر الباب لي تحل)
عذراء هزات صاكها:عقلي مزيان على هاد الطرشة عقلي مزيان
خرجات عذراء من داك المكان و كاع ديك الثقة و السم و كلشيي ختافاا و بانو تعابير وجهها المستعدة للبكاء بقات غادية بخطواتها المتسارعة و دموعها تيهبطو وحدة مورا لوخرا و قلبها تيضرب بالجهد جاوها كومة احاسيس فخطرة وحدة اولهم الحگرة حيت هي من طبقة متدنية على طبقة روبين..الألم من الطرشة..الوحدة حيت ضوروها تما و مكان معاها حتى واحد..الضعف حيت مقدراتش تدافع على راسها..الصدمة من لي تلات بيه الفيستة ولكن لي طاغي عليهوم كاملين حاليا هو الخذلان لي حسات بيه جهة تعامل قوس مع الفيستة..هي ماشي غبية باش تصدق كلمات روبين المسمومة و لي اكيد تتقولهوم غير باش تكسرها و تنتاقم منها ولكن لي باقي متسرطش ليها و مبغاتش تنسااه هو كيفاش قالت جلنار عطاها قوس الفيستة..نفاجرات عذراء بالدموع و زادت فسرعة خطواتها حتى دخلات ل السانسور و بدات غير تتكليكي فبوطوناتو بغات غير تخرج من تما حاسة بالخنقة و الزمت بغات غير تبعد و صافي...
فنفس الوقت كان قوس فمكان الاستقبال الخاص بيه و بالضبط واقف عند بيرو السكريتيرة لي كان معييط ليها من الفيكس ولكن مجاوباتش فا استغرب و خرج يتفقد الوضع ولكن تفاجأ انه ملقاهاش فمكانها...حتى بان ليه السانسور طلع و شي واحد فيه عاد عقد حجبانو تيتسنا فتبريراتها حتى تيتفاجأ بعذراء لي خرجات منو مدرمة يتصحاب ليها لتحت...غير شافت قوس و هي تزاد وتيرة بكائها هادشي لي خلاه ينداهش مال هادي؟؟..تمات جاية عندو تتجري و الدموع مغطيين عينيها حتى ولا شوفها مضبب بسبابهوم:اهئ اهئ....متر(مستر)
قوس:مالكي اش واقع؟؟؟
عذراء تدخل و تخرج فالهضرة:لفييستةة اهئ اهئ
قوس:اشمن فيستة مفهمتش كلامك؟؟
عذراء بدات غير تتبكي تما و تتنخصص...
قوس:اجي معايا للمكتب ديالي راه مفاهم والو من كلامك
جرها من كتافها حتى دخلو للمكتب...
قوس باقي واقف:اش واقع معاك؟؟
عذراء بدات تاني تدخل و تخرج فالهضرة و الشهقة و التنخصيص مخلاوهاش تدوي:ر رووو و و جلنااا... د دداا ونييي لل اهئ اهئ المخزززن اهئ
قوس:دوي راه مافهمتش حتاشي حرف من كلامك!!
عذراء شادة صدرها لي تيطلع و ينزل بالتنخصيص:م م مقاادراش ن ن ندويييي
قوس مفهم حتى زمرة من اش قالت كملاتها كاع فاش غطات وجهها صافي دايرة بحالا تدوي من شي بير...
قوس:حيدي يديك من وجهك و دوي معايا!
عذراء حييدات يديها من وجهها لي كولو فازك بالدموع و حمر حمر خصوصا عند حنيكاتها و نيفها..قوس بقا شحال تيشوف فيها ساهي فجمالها حتى و هي تتبكي زوينة فعينيه بدات تتعاود ولكن مسمعهاش عينيه تركزو فقط مع شنايفها الورديين لي تيلمعو بالدموع هادشي بحد داتو اغراااء ليه و هنا بدات غريزتو كرجل تتنشط فنفس الوقت عذراء باقة تدوي و تكتم البكية قرب منها قوس فوسط هضرتها حتى وقف قدامها و جرها لعندو حتى رتاطم صدرها مع صدرو القاصح مهبط راسو و مغمض عينيه محسات غير ب بوسة نيشان فشنايفها لي تلاصقو مع ديال قوس مسكتاها من الهضرة....
عذراء حلات عينيها على قدهوم و بدات تترمش بعدم تصديق تتشوف فقوس لي ساد عينيه تيقبل فشنايفها جاها واحد الاحساس جديد لي اول مرة تحسو..تتحس بيه تيجر فيهوم بواحد الطريقة فشكل عليها و لي معارفاهاش انثى عمرها جربات هادشي بحالها كأن عذرية شفاهها تتنتاهك من طرف شفاهو لي تتلتاهم فيها بحنية نفس الشيء مع يديه الكبار لي محاوطين جسدها الهزيل مقارنة بالبنية ديالو الضخمة بواحد الشدة كأنه باغي يتملك الجسم ديالها..واحد القرب حميمي بيناتهوم خلا احاسيسها تولد و تستشعر شعور دخيل على جسمها النقي..و للحظة كانت غتسد فيها عينيها تستسلم لحلاوة هاد اللحظة حتى تيفييقها ضميرها..لا ا عذراء نتي ماشي بنت هادشي!!فيناهيا عذراء لي حافظات على راسها ل الرجل لي غتبغي! و هنا حطات يديها بجوج على صدرو تتحاول تفك منو ولكن هو اقوى منها صدق حاكمها من جميع الجهات..بقات تدفع فيه و هو والو حاكمها و غارق فشهوتو حتى جمعات قوتها و دفعاتو بجهدها كاملو هادشي خلاه غير يفيق من عالمو اما مزعزعات فيه والو باقي فبلاصتو...طلق منها و هي عاد بدات تترد النفس خنقهااا..طلعات فيه راسها و عينيها غياكلوه فيهوم واحد الغضب و فنفس الوقت البكية رجعات تاني صافي كمل عليها:نتااا شنو يصحاب ليك راسك شهادشي درتي فيااا!!
قوس غير تيشوف فيها هو براسو معرفش امتى حتى قرب منها ولا باسها...
عذراء تتبكي:اناا ماشي بنت رخيييصة باش دير معايا هاادشي اهئ حرااام علييك حراام عليييكوم
هزات صاكها و تمات خارجة تتجري مخلياه هو براسو باقي تيستوعب اش وقع...
فالغرفة ديال بنان كانت جالسة تتقاد فخصلات شعرها حتى سمعات الدقان فالغرفة..ناضت حلات و هي تلقا واحد العارضة...
بنان بالألمانية:شنو؟
البنت تتبلع ريقها:مدام قالت ليا لانا انه ديك المايكاب ارتيست الجديدة ديالك كانت مع روبين و جلنار
بنان بدهشة:كيفااش؟؟ امتى و فين؟؟
البنت:فالمخزن ا مدام د الملابس الغير الصالحة للإستعمال شافوها العملاء خرجات من تما تتبكي
بنان تعصبات:كيفاااش!!!اش يتصحاااب ليهوم رااسهوووم
البنت:راه مبقاوش تما
بنان:فين كاينة روبين دابا؟؟؟
البنت:فغرفتها
خرجات بنان من غرفتها و مشات تدق على غرفة روبين شي دقاان شوية غتلوح عليها داك الباب...روبين لي كانت فالداخل بوحدها حيت شياطينها عندهوم جلسة تصويرية كانت تتسنا فيهوم حتى سمعات الدقان المجهد د بنان ناضت باستغراب شكون غيدق هاكا...حلات الباب و متجي غير فبنان لي غير حلات ليها لباب عطاتها بواحد التصرفيقة تسمعاات طرااااااخ حتى تصورو صباعها فحنك روبين....
دخلات بنان و سدات الباب موراها:ياااك قلت ليك عطيها بتيييساااااعع؟؟
روبين شادة حنكها مصدووومة:نتييي شنووو تديرييي!!!
بنان:شنووو درتيييي لعذراااء جاااوبييي!!
روبين غرغرو عينيها قصحاتها الطرشة:اش يتصحااااب ليك راااسك حتى طرشينيييي!!!
روبين:هييي لي بداااات هييي لي مبغاااتش تعطي تيسااااع لقووووس نتي وياااها ماركة وحدددة نتوما خطاافاااات الرجااال
بنان:اشمن خطافاااات الرجااال و اشمن راجل خطفت انااا؟؟ياكما تسطيتي؟؟؟وا جاوبي شنو درتي لعذرااااء!! شنو قلتي ليها حتى بكيتيهاااا؟؟؟
روبين بالسم:ديك البرهووووشة قليللة التربيية حطييتها فبلاااصتها و فمكاااانها المناااسب الفيستة ديال قوس لي فرحانة بيها فاش رجعاتها ليه لاحها فالمخزن و انا ستدرجتها لتما باش نورييهاااا اش تتسوااا عندو هي مجرد شرويييطةةةة خانزة لي غيبقا يضووور بيييهاااا و يقضييي فيهااا غراااضووو و يلوووحهااا كيفما لاح الفيييستةةة نتوما بحااال بحاااال رخاااصات بنات احياااء شعببية حطيتو رجلييكوم فعااالم ماشي ديااالكوووم نتي طلعتييي على ضهررر انطووون و هي بغات تطلللع على ضهررر قوووس استغلااااليااااات تنكرهكوووووم ا صحاابااااات برج العذرااااااء
بنان جمعات معاها بقوة فالحنك لاخور خلاتها تسكت مصدومة و بدات تترعد عليها:غتقطعييي حسككك ولا لسااااانك نقطعووو لييييك اخررر مرة تجبدييي سمييية راااجلي على فممممك و اخررر مرة تقربيييي من الماااايكاااااب ارتييييست دياااالي اخرررر مرة ا روبييييين اخررررر مرة ولا غااادي نورييييك اللعب ديااال بصااااح كيف داااااير!!!!
خرجات بنان ضاربة بالباب موراهاااا اما واحد الزرافة طاحت على ركابيها تتبكي و تنخصص حناكها بجوج تيوزوزو و حمرين بألم الطرشات:غيييير بلااااتي تنقسسسسم بلي خلقني يحتى تندموووو...
فواحد الجردة كبيرة و خاوية كانت عذراء جالسة فوق واحد الكرسي فيها ساهية فالخضورية شعرها الطويل تيديه الريح و عينيها حمرين و طايبين بالبكا فيهوم واحد الحزن كبير غصة كبيرة واحلة ليها فحلقها و الحگرة تتاكل فيها متسرطش ليها لي وقع..بداو دموعها تيهبطو بلا متشهق ولا تنخصص صافي وصلات سطاج البرود فهاد الساعة ملامحها جامدين و الدموع غير تيهبطو بحالا مقطراهوم ماشي تيخرجو من عينيها..هزات يديها تتمسح نيفها لي فزگ بيهوم و هوما يلامسو صباعها شنايفها لي غير حسات بيهوم تفكرات نيشان داك الإحساس لي كان متملكهوم و للحظة لامت راسها علاااش كانت غتستسلم ليه؟!! علاش؟!! و هي لي عمر برناس لي خطيبها و مخلاتوش يتجاوز حدودو جا هدا فثانية خدا منها بوسة كاع من غير الهزة لي دار ليها فباريس و بزاف د الحوايج...تنهدات تنهيدة من اعماق قلبها خلات جسمها يرتاعش و دوزات يديها تحت عينيها لي حساتهوم تجرحو شوية من كترة البكا قررات تنوض تمشا شوية بينما ختافاو اثار البكاء و ترجع لدارهوم....
وصل الليل و قوس عاد سالا خدمتو بزز باش قدر يركز معاها فينما يشوف يتفكر غير البوسة و عذراء كيف كانت بين يديه المنظر ديالها الكيوت شحال هييجووو شحال هادي و هو غير صابر عليها ميمكنش لأي رجل تكون انثى رقيقة و مفعمة بالحياة و الحيوية زائد جمييلة بين يديه و ميتقربش منها هادشي من سابع المستحيلات من غير الى كان شي خلل فيه هادو تيتعتابرو حالة خاصة اما الرجل عامة فا هادي راه همزة و اشمن همزة رغم تنوع و اختلاف النساء لي عاشرهوم حياتو كاملها الا انه واحد بمكانتو و محصور فعالمو لي هو عالم الأثرياء عمرو صادف وحدة بحال عذراء لا من صراحتها ولا عفوييتها من غير جمالها و ملامحها اللطيفة بساطتها اترات فيه بشكل صادم..هز الحقيبة ديالو الخاصة بلابتوب الخاص بيه لي متيتفارقش معاه فيه كاع الحاجات المهمة المتعلقة بالعمل..هبط فالسانسور حتال الباركينغ د الشركة ديجا الليمو بشيفورها واجدين و ديمارا بيه للفيلا الكبيرة ديالو....
بعد مدة من الطريق بين الشركة و الفيلا وقفات الليمو قدام الباب الداخلي للفيلا و الخدم مستفين قدامو كيف العادة مستقبلين السييد ديالهوم و مالك هاد المكان كاملو...حط رجليه فوق الأرض بصباطو لي تيلمع و هبط تيتمشا بخطواتو الواثقة و حقيبتو فيدو حتى داز من حدا الخدم لي حانيين ريوسهوم..دخل للداخل و هوما يدخلو تابعينو و كل واحد رجع للمهمة ديالو...
بقا غادي داخل يالاه بغا يضور يطلع لغرفتو حتى تيسمع صوت انثوي ماشي غريب عليه خلاه يوقف مصدوم....
ضار دغيا و هو يلقا امرأة تلاتينية جميييلة طويييلة طايتها متوسطة مايلة لرق شوية لابسة سروال دجين مدخلة فيه بودي كحل و لايحة عليهوم فيستة كحلة ستيلها كلاس شعرها بني غامق مطلوق و مزيينة راسها بمجوهرات ذهبية راقية...
ترف جلسات:كلشي بيخير تنتسناو زيارتك لينا من نهار تحل الفرع المغربي و فرع سويسرا ناقصاه شي حاجة
قوس بثقة:وي عارف انه انا كلشي تما ولكن بديت تنولف على الفرع المغربي
ترف:صراحة الجو مختالف بزاف هنا حتى من الهواء تنحسو مختلف ههه
قوس:هكا وقع ليا اول مرة قولي ليا واش ضييفوك الخدم؟؟
ترف:نن مبغيت والو طلبت غير من الخدامة تقاد ليا غرفة و يطلعو ليا اغراضي (بابتسامة)انا راه جيت نونسك واحد السيمانة....
قوس:ااه مزيان رتاحي ليك غتكوني عيانة
ترف:اه عندك الحق شوية غنطلع
قوس ناض:اوكي نخليك غنمشي نرتاح حتى انا
مشا قوس طلع لغرفتو اما ترف بقات جالسة شوية و هي طلع حتى هي لغرفتها...
فغرفة قوس..حييد حوايجو ديال الخدمة و مشا دخل حتى دوش و لبس حوايجو السبورتيف لي موالف تيلبس فالدار..حتى طاحت واحد الفكرة فدماغو و هو يهز الفيكس د الغرفة ديالو و دوز المكالمة للخادم الخاص ديالو لي هو فنفس الوقت كبير خدم الكل فالفيلا..ما هي الا ثواني هاهوا واقف عليه كان رجل شارف شاد فراسو طوييل و رقيق بلباسو الرسمي الخاص لي تيبيين تمييزو على الخدم الخرين...
قوس:ااه و ركز على واحد الحاجة يكون تيعرف لطاجين باحترافية
كارل حدر راسو:اوكي مستر
قوس:و علم معاك الطباخين يحضرو الأكلات المفضلة عند ترف مبغيتش حتاشي غلط
كارل:اوامرك مستر
قوس:يمكن ليك تفضل
نساحب كارل حاني راسو داير يدو فصدرو و الأخرى مورا ضهرو تتبيين مدى الرقي ديالو فعملو حتى خرج ساد الباب موراه مخلي قوس تيفكر فالكوافورة و بلانها معاه...
☀️فالصباح الباكر☀️
كانت عذراء فالطاكسي لي حطاتها قدام الشركة خلصاتو و هبطات بعياء تحت عينيها منفوخ مغطياه غير بلكنسيلر(خافي الهالات)و عينيها ذابلين..جبدات بطاقتها و علقاتها فعنقها و تمات داخلة صاكها فيديها حتى طلعات لطابق الخاص بالعارضات و بقات غادة فلكولوار حتى وقفات قدام غرفة بنان...دقات دقان خفيف بعد ثواني تحل الباب...
بنان:على سلامتك دخلي دخلي
دخلات عذراء بلا متنطق بحتاشي كلمة و بنان سدات الباب موراها...
بنان:شحال صونيت عليك البارح والو مبغيتيش تجاوبيني
عذراء بصوت عيان:مفيا ميدوي مع شي واحد سمحي ليا
بنان:عاودي ليا اش وقع بالضبط ا عذراء؟؟
عذراء:تنظن واقيلة راك عارفة مادام راك مشوشة عليا
بنان:بغيت نسمع الكلام منك نتي
عذراء تنهدات و عاودات ليها كلشي من غير البوسة...
بنان:شوفي ليك الكلبات اش يتصحاب ليهوم راسهوم!!ولكن متخافيش غير بلاتي و حتى ديك الطرشة لي طرشاتك راه رضيتها ليها بالضوبل
عذراء بصدمة:طرشتيها؟؟
بنان:اييه هاديك مجرد وحدة فيها غير الفم راس مالها الطريش و تآمر فبنادم و انا حطيتها فبلاصتها باش تعلم مرة خرى متقربش لغيرها
عذراء تأثرات:عرفتي واحد الاحساس حسيتو فاش ضوروني بجوجات كنت بوحدي تما(غرغرو عينيها)مكان حتى واحد بجنبي
بنان تحنات و عنقاتها:انا بجنبك و مغنخليهاش توصل لي بغات هي بغات قوس حنا ا لالة غنحييدو ليها هاد قوس...
عذراء غير سمعات سميتو و هي تبعد من بنان بشوية...
بنان:مالكي؟؟
عذراء:على الذكر ديالو..لبارح فاش خرجت من عندهوم(معلقة فيها عينيها)
بنان تتسناها تكمل:وي كملي تنسمعك
عذراء:مشيت لسانسور بقيت غير تنضغط فدوك البوطونات باش نخرج ولكن بشي طريقة طلعت لعندو
بنان:اشمن بشي طريقة و نتي رونتي البوطونات!
عذراء:المهم و لقيتو واقف تما صاافي كمل عليا الباقي بقيت غير تنبكي دخلني لبيرو ديالو باش يعرف مالي ولكن ولكن....
بنان:ولكن اش؟؟
عذراء بتلعثم:ب ب باااسنييي
بنان بصدمة حطات يديها على فمها مخرجة عينيها و ابتسامتها غادة و تتوساع حتى غوتات:اووووماااااايكااااااد باااااااسكك
عذراء:غيكون شي واحد سمعك بهاد لفوليم
بنان:وانااري باااااسك اصاحبتيييي كيفاش كان شعوورك غير قولي؟؟
عذراء:اشمن حماس انا راه تجرحو عينيا بالبكا مخليت ملبقت ليهوم شوية مندير البومادة الصفرة واحد الكنسيلير لي عتق الموقف كان معشش فصاكي اما كون قشعوني مالين الدار
بنان:دابا جا الدور ديالي ناري ا صاحبتي مستر قوس صافي طاح فيك طاااااح هههه
عذراء:اشمن طاح هادشي غتلقايه دارو مع شحال من وحدة
بنان:عاودي ليا كيفاش كانت طريقة البوسة
عذراء تتفكر كيفاش:حسيت بشنايفي تجرو و يديه شاديني و داكشي كان بالخاطر
بنان متبعة معاها:و كان ساد عينيه ولا حالهوم؟
عذراء:كان سادهوم
بنان غوتات:ااااااا😍😍😍😍😍😍😍😍😍😍😍😍
عذراء:مالك؟؟؟؟
بنان:قلبي الصغير لا يتحمل ناري القبلة كانت من القلب ا العفريتة
عذراء:علاه هادشي فيه الأنواع؟؟
بنان:اييه يعني كون كانت ديال التفلية ولا شي حاجة راه مكانش غيطلقك حتى يقضي غراضو
عذراء:الله ينجيني يشدوه حجارو
بنان:شوفي انا تنقول مع راسي مادام البوسة سالات بانسحابك و كدا ممكن يعييط عليك ليوم
عذراء:لا لا بليز منقدرش نشوف فيه مزال
بنان:واش خصني نضرب هاد الراس حتى تقادي نتي معارفاش فاش راك متورطة حنا راه فحرب و ف اي حاجة فائز واحد لي تيبقا و خصك نتي تضمني راسك تكوني هاد الفائز واش سمعتي ولا نجيب ليك الخوشايبات يالاه تفهمي؟؟
عذراء:اش غنفهم؟؟ وا حشومة عليك انا راه ماشي ديال هادشي!!
بنان:واش نعاودو نفس الهضرة؟؟ قولي ليا بعدا واحد الحاجة
عذراء:شنو؟؟
بنان:واش متيعجبكش زعمة ما حتى حاجة؟ ولو غير شويييية د شي حاجة؟
عذراء تتفكر:فالحقيقة..فالحقيقة اللبس ديالو زوين تيعجبني لكلاس و كدا..و و شنو مزال ااه اه لون عينيه حتى هوماا دايرين بحال لون الما ولا السما ااه و حتى طايتو زوينة
بنان:منسيتيش شلاغمو زينين؟ لحيتو مطراسية؟ تغوبيشتو المعهودة؟؟ وا تي نوووضي تمااا راك طايحة على زنافرك و مجايباش الخبار
عذراء بتوتر:لاا هادشي ميمكنشششش متنبغيييهشش
بنان:البغيان منعرف ولكن الاعجاب انا باصمة عليه من عندي وراه عادي ا صاحبتي عتارفي الاعجاب راه عادي متكونيش معقدة لهاد الدرجة
عذراء:ت ت تيعجبني؟ فكرتيني غير ف لاو لي ف ون بيس حتى هو تيعجبني
بنان:فاش تتبغي شي حاجة و عارفة راسك المستفيدة حييدي عليا الكرامة على جنب حتى ترجعي ليها فاش توصلي لي بغيتي
عذراء:واخا امتى غنبداو؟
بنان هزات الفيكس د غرفتها و بتاسمات:دابا نيت...
فنفس الوقت فبيرو ديال قوس كان هاد الأخير تيقاد فشي وراق حتى سالا و هز الفيكس متاصل بجلنار لي غير سمعاتو جاوبات فالبلاصة مغتنساش الانذار لي عطاها البارح على غيابها عن مكانها بدون سبب...
جلنار:وي مستر؟
قوس:بغيتك تقادي ليا واحد الدعوة
جلنار جبدات ورقة و ستيلو:تنسمعك موسيو
قوس:كتبي...ادعوكِ اليوم الى منزلي لتناول الغذاء معي رفقة اختي...
جلنار هزات حجبانها بشكون هادي تاني صباح الله:صافي ا مستر؟
قوس:اه صافي
جلنار:اوكي مستر غنقادها ولكن شنو سمية المدعوة؟
قوس:عذراء مفتاح.....
جلنار بصدمة:مسمعتكش مزيان ا مستر؟
قوس:قلت ليك عذراء مفتاح
جلنار كتبات السمية بالغدايد كانت غتقب الورقة: اوكي مستر
قطع قوس مخليها تتغدد كيفاش عارض للدارو و مزاال بوجود ختو على وحدة بحال الكوافورة؟؟ شنو لي مميزها؟؟و علاش طوول معاهاا هاكاا؟؟ هادشيي بزااف عراضات متتاليين و تيتشاوفو بزااف..ناضت غتموت بالفقصة حتى هزات الورقة و مشات لواحد الغرفة تما فين غتصوب الدعوة...فنفس الوقت كانت عذراء طالعة فالسانسور و فيديها شادة الفيستة و بنان واقفة حداها تتوصي...
بنان:متوتريش عاودي ليه لي قلت ليك و صافي
عذراء:واخاا
وقف السانسور فالطابق ديال قوس...
بنان:فين مشات هادي تاني؟؟
عذراء:منعرف ليها
بنان:ماسوقناش فيها هادي راه فرصة سيري انا غنكون جالسة هنا حتى تخرجي
عذراء:واخاا
مشات عذراء دقات دقان خفيف و هي تسمع تفضل..شييرات ليها بنان بتدخل و هي تحل الباي و سدات عليها...كان قوس خدام حتى طلع راسو و هو يتفاجأ كان تيتصحاب ليه بلي جلنار متوقعش انها تكون عذراء...
قوس:عذراء؟
عذراء بتوتر:مس مستر
قوس مزال ملاحض الفيستة:مالك؟
عذراء قربات منو حتى وقفات قدام البيرو:جيت عندك على قبل لي وقع لبارح فاش كنت تنبكي
قوس تفكر البوسة و حنحن:احم اه
عذراء:غنعاود ليك لي وقع ليا حتى وليت فديك الحالة
قوس:انا تنسمعك
عذراء:فاش ساليت الخدمة ديالي جات عندي واحد العارضة قالت ليا بلي بغاتني جلنار...
قوس طلعو حجبانو:جلنار؟؟ السكريتيرة ديالي؟؟
عذراء:اه و و..روبين..
قوس:روبيين؟؟؟
عذراء:اه ا مستر مشيت تبعتها حتى تنلقا راسي قدام المخزن ديال الملابس الغير صالحة للإستعمال قالو ليا دخلي و دخلت..(غرغرو عينيها) و هي توريني جلنار هاد الفيستة(هزاتها تتوريها ليه) و قالت ليا روبين انه انا مجرد شرويطة غادي تدير فيها مابغيتي و غتلوحها كيفما لحتي هاد الفيستة(تتبكي)قالو ليا كلام جرحني بزاف استهزئو بالفعل لي درت فاش صبنتها بيدي و كنت فرحانة نجيبها ليك على قبل الموقف الرجولي لي درتي معايا..و من بعد اهئ صرفقاتني...
قوس بدهشة:صرفقاتك!!
عذراء ببكاء:ااه صرفقاتني و قالت ليا انه انا رخيصة و فقيرة و بلي انا استغلالية..و هادشي كاملو غير حيت كانت باغية الفستان لي هديتيني فباريس كانت حاطة عليه عينيها
قوس غير تيسمع و مصدوم فلي تتقولو على السكريتيرة الخاصة ديالو و الابنة ديال صديق باه المقرب...ناض من المكتب ديالو حتى وقف عليها..حط يديه فوق كتفها و اليد الثانية هز بيها وجهها حتى تقابلو عينيه الزرقين مع عينيها الخضرين المدمعين و بصبعو دوز على تحت عينيها برقة ماسح ليها دموعها...
قوس:متبكيش هاد الموضوع خليه عليا
عذراء:بصاح؟
قوس:وي غير سيري دابا لخدمتك و قبل متمشي اري الفيستة
عذراء: ا؟؟ ولكن مكاين لاش؟
قوس:غير اريها
مدات ليه عذراء الفيستة مستغربة و استأذنات منو..غير خرجات و هو يزيير قبضة يديه بعصبية و ملامحو متتبشرش بالخير هو ماشي دري صغير باش وحدة بحال روبين تتعرف مصلاحتو و ماشي من حقها تعامل عملاء خرين بالخايب و دابا جا وقت طريقتو الخاصة فالتعامل مع بحال هاد الأمور....
رجع جلس فلبيرو ديالو و هز الفيكس...
فابيو:وي مستر؟
قوس:بغيتك تمشي دابا لغرفة كاميرات المراقبة و بالضبط ديال طابق الملابس و فمخزن الملابس الغير صالحة للإستعمال بغيتك تسيفط ليا المقطع كامل من فاش دخلات روبين و جلنار تما و فاش جات عذراء مفتاح من بعدهوم حتال فين خرجات من تما
فابيو مستغرب:اوكي مستر
قطع قوس و حط السماعة و رجع لخدمتو فانتظار لي طلبو من فابيو..رغم انه متييق عذراء الا انه هو انسان متيبغيش يضلم خصوصا انه الأمر متعلق بالسكريتيرة ديالو و بنت صديق باه و اكيد مغيدوزش هادشي ليهوم واخا يكونو كيفما بغاو يكونو...
فنفس الوقت فالخارج كانت عذراء مع بنان و جلنار غير تتشوف فالكوافورة شي شوفات...
جلنار:شنو تديري هنا تاني؟
عذراء:ماشي سوقك يالاه ا مدام
تمشات بنان حتى ضغطات على السانسور و دخلو تسنات حتى تسد عاد ضارت عند عذراء شاداها من كتافها...
بنان:درتي لي قلتوو لييك؟؟؟
عذراء:ااه بالحرف
بنان:بكيتي؟؟
عذراء:بكيت من نييتي ا ختي و الله
بنان:صاافي صاافي و شنو دااار؟
عذراء:احم مسح ليا دموعي بصبعو
بنان:اووه😍 ياختي شحاال تتعجبيه اهاه كملي
عذراء:المهم بان ليا تييق لكلام لاخور لي زدنا و حتى الفيستة خداها مني العجب
بنان:العجب هادي مضربتش ليها الحساب
عذراء:المهم الخطة واقيلة غتنجح
وقف السانسور فطابق العارضات...
بنان:سكتي دابا حتى ندخلو لبيتي...
بقاو غاديين حتى سدو عليهوم باب الغرفة...
عذراء:المهم دابا شغنديرو؟ و الى نكرات هاديك؟ولا قالت ليه تنكذبو؟؟
بنان:نتي مزال معرفتي مستر قوس واقيلة معندوش هو داك الهبال ديال راها العارضة الأولى ولا بنت صاحب باه ههه نن نن ا بب الخدمة هي الخدمة ولا تگعدي
عذراء:اه صافي حيت خايفة يدير بوجهها و انا تحشا ليا
بنان:واش انا غادي ندير هاد الخطة و عارفة غتضرب ليا فزيرو؟راني مدايراهاش الا و متأكدة انها غتنجح
عذراء تنهدات:اوكي تنتمنى هادشي...
فالمكتب ديال قوس كان تيشوف فالمقطع لي سيفط ليه فابيو غير هو كان بلا صوت حيت هكا تدارو الكاميرات اصلا باش كلام العملاء ميتسمعش يبان غير اش تيديرو...بقا قوس تيشوف فداك الفيلم الصامت حتى بانت ليه روبين فاش ضربات عذراء و هو يزيير على يديه بغضب شوية بانت ليه عذراء فاش تدفع فيها و حتى روبين تدفع تما فين حلات ليها جلنار الباب تخرج و مع هاد المقطع جا موراه فاش كانت تتجري و حتى ديال داخل السانسور..سد قوس البيسي ديالو بملامحو الصارمة و هو يهز الفيكس...
جلنار لي كانت تتعاود العكر لشنايفها حتى قفزها الفيكس لاحت العكر و جاوبات:وي مستر؟
قوس:عييطي على روبين و اجي معاها...
جلنار بلعات ريقها مخرجة عينيها:و و واخا مستر
قطع قوس و جمعات الوقفة بتوتر شوية رجعات تاني جلسات و هزات الفيكس تاني حتى صونات على روبين هاد الأخيرة لي كانت فغرفتها مع ليڨيا و خناثة تيقيصو شي ازياء...
روبين:شكون غيكون تيصوني؟؟
خناثة:معرفتش شوفي
قربات روبين من الفيكس و هي تجاوب:الو؟؟
جلنار بخوف:مادموزيل مستر قوس طالبك
روبين بتاسمات:قوس طالبني؟؟
جلنار:اه قال ليا تجي دابا دابا
روبين:اوكي دابا هاني جااية
قطعات عليها بحماس غطير فالفرحة و مشات دغيا تقابلات مع المرايا تتعاود تقاد مكياجها بالزربة و ترش فالروايح مخلية الجوجات لخرين مستغربين من تصرفاتها...
ليڨيا:اش واقع؟؟
روبين فرحانة:قووس قووس معييط عليا
خناثة:وايلي هوو لي عييط ليك شخصيا؟؟
روبين:اا جلنار لي قالت ليا بغاني (قادات حوايجها) المهم هانا غادة حطو داكشي حتى نرجع
ليڨيا:اوكي حتى تجي
خرجات روبين من الغرفة و مشات دغيا طلعات فالسانسور و قلبها تيقفز بالفرحة...حتى وصلات لطابق ديال قوس لقات جلنار غادية جاية بخوف و التوتر باين من مشييتها حتى دازتها روبين و مشات ديريكت دقات فالباب..لحقات عليها جلنار و قلبها غيخرج من بلاصتو الطريقة باش دوا معاها قوس متتبشرش بالخير هي حافظة اسلوب كلامو مزيان اكيد هادشي مغيدوزش على خير و هادي جاية ليها ضاحكة من الودن حتال لودن..تسمعات تفضل لي كانت بمتابة باب السعادة لروبين و باب الجحيم لجلنار..دخلو و سدات جلنار الباب موراها و جسمها تيترعد بلا هواه و فقرارة نفسها تتقول الى نجات بأعجوبة عمرها تسلك مع روبين شي طريق...
شبك قوس يدو ببعضياتهوم مطلع حجبانو و لثواني بقا تيشوف فيهوم حتى قلب لبيسي ديالو لجيهتهوم و ضغط على المقطع هنا الابتسامة ديال روبين ليكانت عريضة بدات تتنخفض بالعرض البطيء اما جلنار أكد ليها احساسها و زاد ارتعاش جسمها على قبل...سالا المقطع و نزلات الستارة على هاد الجوجات لي عرفو انه القضية حامضة..تقاد قوس فالجلسة ديالو و واحد البرود صارم على وجهو ياربي السلامة منو...
قوس:بعدما شفت هاد الشريط و ربطتو مع اقوال عذراء قررت شنو غندير معاكوم بجوجات
هز قوس يديه و هي تضرب جلنار الطم مخرجاتش حرف من فمها مزال...
قوس شاف فبرود فروبين:نتي غادي توجدي اليوم جواز سفرك و حقائبك المنادجر فابيو قطع ليك اقرب طائرة لسويسرا غترجعي للفرع السويسري
روبين بصدمة:ك كيفاش؟؟(شداتها البكية) لا ميمكنشش!!!عفاك ا قووس ميمكنشش انا عاد ولفت هنا
قوس ضاغط على كلامو:منعاودش كلامي (شيير لباب)لي قلتو يتطبق دابا
روبين:ولكن!!...
قوس سد عينيه بغضب تيشيير للباب و هي تحرك خرجات قبل ميدوز معاها لسطاج الثاني لي مبغاتش تشوفو اكيد...
غير سدات الباب هز عينيه فجلنار لي كانت خايفة غير من تفقد خدمتها...
قوس:و نتي غادي تنضمي ليا اجتماع دابا دابا مع جميع المصممين د الشركة من أولهوم لآخرهوم(هز الفيستة و لاحها عليها)
جلنار نقزات شادة الفيستة فيديها...
قوس:ديك الفيستة لي بين يديك الاجتماع غيكون عليهاا و الصيحة د فصل الربيع لي عقدنا من قبل غادي تلغاا و غادي نديرو صيحة مطابقة لهاد الفيستة و فاش غيتم هادشي ديك الشرويطة كيفما قلتي عليها انا لي غادي نلبسها مفهووم كلامي!!!!!
عذراء وقوس الجزء السابع
محتوى القصة
التنقل بين الأجزاء