جلنار مصدومة..كيفاش؟؟؟؟الصيحة على هاد الفيستة؟؟ و من الفوق غيلبسها؟؟؟لا هادشي بزااف هادشي فاات الحدود!!!ولكن شنو عندها مادير تحمد ربها و تشكرو حيت دازت غير هكا...
جلنار:اوكي مستر غنمشي دابا ندوي مع جميع المصممين و نجمعهوم فقاعة الإجتماعات
قوس حرك ليها يدو تنصارف معندو خاطر يشوف حتى فوجهها فنفس الوقت كانت روبين هابطة فالسانسور تتبكي عينيها كاملين سايلين بالكحل و الماسكارا حتى وقفات فطابق العارضات و بقات غادة جارة رجليها ميمكنش ليها تخلي هاد الفرع و هي لي عاندات باها باش تجي للمغرب رغم انه مكانتش باغا هي براسها و محاملاهش ولكن فينما غيمشي قوس غتبعو بقات غادية ببطئ حتى تفكرات فاش نطق بسمييتها قدامهااا يعني البرهووشة مشات شكات عليه و فلبلاصة دوك الملامح الحزينة نقالبو لسم و واحد الغضب فعينيها سرعات من خطواتها حتى وقفات قدام غرفة بنان و بقات تدق بالجهد...فلداخل كانت عذراء تتقاد فشي مكياج و بنان تتوريها شي برودوييات حتى سمعو الدقان المجهد شافو فبعضياتهوم باستغراب و هي تنوض بنان حلات..دخلات روبين دافعاها و هي توقف عذراء بدهشة...
عذراء:واش كنتي تتسنايه يسمح ليك ولا يمييك على لي درتي ليا؟؟
روبين:طلعتي مسااهلااش ياااك لاعبة دور الضحية اممم ولكن متفرحيييش بزاااف جااو قبل منك فين تباااني نتي لا فزييينك ولا طوولك لي لاصق على لارض و حييدتهووم من طريقييي كأنهم عمرهووم كانو فحياااتو و متفرحييش بهاد الانتصار و نوصييك حضي راسك مزياااان حيت الحرررب بدااات و نتي معارفاااش خطوورة الموقع ديااالك فيهااا و ميغرركش موقع المساااند دياالك(قصدات بنان) حيت حتى هوو موجدة ليييه حقو غييير نساالي منك نتيي و ندوز ليهااا
بنان:كلام كبير من عقل صغير سيري سيري راه يالاه يكفيك الوقت فين تجمعي بوالزك و تودعي دوك الجوجات لي معاك
روبين زييرات على يديها:غادي نمشي ااه ولكن باقي غادي نرجع عقلو مزيان على كلامي عقلو مزياان
خرجات روبين ضاربة بالباب و عذراء تنهدات شادة راسها...
عذراء:واش مغتبعدش علينا هادي راه عييقات نيييت
بنان:خلينا منها انا و تصدمت فاش بعدها قوس كاع من هنا متوقعتهاش
عذراء:بعدا صدق انسان عادل و مضلمنيش
بنان:لا من ديك الناحية ماتخافيش جلسي جلسي غتلقايها دابا تتخوي سمها فالجوجات لي معاها
يالاه جلسات عذراء و هو يتسمع الدقان فالباب...
بنان:اووه متقوليش ليا رجعات ياكما طاح ليها هنا رمشها الاصطناعي
عذراء على نييتها تتقلب بعينيها فوق لارض:مبان ليا والو
بنان:ههه غير تنضحك
حلات لباب و هي تلقا راجل لابس لباس الشركة الرسمي مد ليها الدعوة و مشا...
عذراء حطات صبعها على صدرها باستغراب:ليا انا؟؟؟.....
بنان بفرحة مداتها ليها:وايه ا لهبيلة هاكي شوفي حليهاا دغيااا
شداتها من عندها عذراء و بدات تقرا عليها حتى سالات و خرجات فيها عينيها:نااااريييييي!!!!
بنان مصدومة:بحضوووور ترف!!!!
عذراء:شكون ترف؟؟؟
بنان:ترف هي خت قووووس
عذراء:ناري اش درت معاه هو بقا ليا غير ختو ناري غتكون شي مسمومة انا حاسة بهادشي
بنان:فالحقيقة ماشي مسمومة غير هو عاجبها زينها بزاف يعني شغنقولك امم متكبرة شوية مع مغرورة ولكن قلبها بيض
عذراء:امييمتيي شغنديير و ل الداااار سلكتهااا معااه فبراا بقا فالدار و مزاال داروو باش يدير فيا مابغا؟؟
بنان:وا بنادم سمعيني غنعاودها ليك تاني السييد الى بغا يدير معاك شي حاجة مغيبززهاااااااش عليك
عذراء بتوتر:ولكن الدار اصاحبتي؟؟اميمتي
بنان شادة راسها: افف غتحرقي ليا دماغي غنوحلو تاني غير اش تلبسي
عذراء:مبغيت حتى حاجة نمشي هكا نيت هو شايفني ديجا هكا
بنان بزز باش حابسة غضبها جلسات و جمعات صباع يديها تتشرح ليها بالهداوة:شوفي هو شافك بهكا حيت راكي فالخدمة سمعتي يعني عادي اما دابا راه عرض عليك يعني من الاداب و الصوااب و الاناقة و الأنوثة ديالك (تتحرك فيديها)كا بنت انك تدوشي و تعطريي و تلبسيي حويجاات لهاد المناسبة و المجوهراات و ميكااب زوين..موراال طاالع(سدات عينيها و حركات راسها)واش فهمتي؟؟
عذراء:ا ااه فهمت غير هو راك عارفة معندي منلبس و مبغيتكش تاني تشري ليا تنحس براسي حمل ثقيل عليك
بنان:مالي هازاك فوق كتافي هزي داك الصاك و تبعيني اليوم عندي خاوي مكاينة حتى حاجة هاد المرة بغيتك تطلعي بوومب سمعتي
عذراء:الله يهديك اسميتك راه انا معنديش مع الزواق بزاف
بنان:قلت ليك غنطلعك بومب يعني بومب غتسكتي و تمشاي قدامي نتي معارفاش عائلة قوس راه يهزوك من صباع رجليك لراسك و ترف انيقة بزاف و الى بغينا نكسبوها لصفنا خصك تعجبيها تأكدي غادي تكسبي سند قوي بزاف
عذراء:و مالي انا على هادشي كاملو؟؟هدا راه سميتو تبلحيس و لحيس كابة و انا ماشي من هاد النوع
بنان:غتشييبيني هزي صاكك و تبعيني فقط الهضرة معاك غتخرجنا فشي حوايج غنقي ليك ودنيك عليهوم مزيان
عذراء هزات صاكها:وا صافي متعصبيش اجيي وا اجيي
بنان سبقات:سربي راه الوقت تيطير و نتي محاساش بهادشي
فلبيرو ديال رئيس التحرير لمجلة الأبراج كان برناس جالس شاد راسو لي تيضرو هادي ايام منعسش فيهوم مزيان غير تيخمم و ينبر التعب باين على وجهو من خلال الهالات لي بانو تحت عينيه...
رئال:للأسف الفلوس لي كنت جامع دفعتهوم فديك البارطمة لي قلت ليك و لي شاط ليا مكافيش لقاعة الأفراح غنديروه غير قدام باب دارنا
رسيل هبطات حجبانها معجبهاش الحال ولكن مبغاتش تبيين ليه:ااه واخا
رئال حس بيها:نتي عارفة انه الإمكانية ديالي محدودة و شكون بحالنا الى تزوجنا و لقينا دار انا مبغيتش نسكنو مع واليديا
رسيل:وي عارفة غير هو حلم كل بنت فليلة عرسها انها تكون أسطورية
رئال:كيفما قلتي هو حلم و الحلم تيبقا حلم الواقع ديالي انه معنديش الامكانية تنتمنى نقدر ندير هادشي فسبوع ولدنا ولا بنتنا مستقبلا
رسيل بتاسمات:ان شاء الله
فالصالون عند رفيف كانت تتقاد فضفار واحد البنت و مرام فالبابيليز لوحدة...
رفيف:هي قلتي اختي ختك طلعو ليها غير فعام؟
البنت:ااه ا ختي طلعو ليها دغيا ولكن بالحق راجلها عندو الجنسية
رفيف:افف هو معندوش الجنسية
البنت:ايوا شغنقول ليك هادشي ولا فيه الزيار بزاف دابا و غيكون صعيب تطلعي خصوصا الى معندوش الجنسية حيت هادشي تيدير فرق
رفيف حنات راسها تتبرد ليها فضفارها:صبرت حتى عييت و الله مبقا والو ل 3 سنين
البنت:كاين لي بقا ليه كتر ولكن داكشي تاني تيكون زهر و ارزاق
رفيف:المهم انشوف باش غيسالي هادشي الى تعطل مزال غيجي بزز منو يدير ليا عرسي و داري و ماسوقيش فيه راني وليت ضحكة بسبابو بين العائلة مرة يقول ليا الوراق مرة صبري نجمعو عرسنا مع عرس ختي أوو بزاف
البنت:قولي ليا واخا غنفوت الحدود ديالي ولكن غنقول ليك و سمحي ليا انا مرتاحيتش ليه
رفيف طلعات فيها راسها تتنفي براسها:لا لا بليز متقوليش ليا ديك الفكرة
البنت:ديري جميع الاحتمالات فدماغك
رفيف:مبغيتش ندير داك الاحتمال فراسي لا الشمتة لا لا
البنت:انا غير قلت ليك و حتى واحد معالم لي فالنفوس من غير هداك لي خلقهوم
رفيف سالات ليها ضفارها:تبارك الله طلعو مزيانين
البنت ناضت:خدمة متقونة كيف العادة
رفيف:شكرا ليك
مشات معاها ل لاكيس و خلصات مخلية واحد الحزن مخبي فوجه رفيف محاس بيه حد...
فمحل Dior الماركة الفرنسية المعروفة كانت عذراء واقفة لابسة سروال كحل مشدود بسمطة بيج مدخلة فيه بودي بيج و لايحة عليهوم مونطو بيض طويل محلول و فوق كتفها معلقة الحقيبة..قدامها بنان مولات اللوك هي لي ختارتو ليها و لبساتها على دوقها...
بنان:زوييييينة
عذراء تتشوف راسها فالمرايا الكبيرة:منكدبش عليك حتى انا عجبني ههه
بنان:اكيد غيعجبك هدا هو الستيل الداارج الكلاااس يااا الكلاااس
عذراء:خفت غير نرونهوم راك عارفة الماكلة و كدا
بنان:ياكما نشري ليك الرياگة؟؟حدري معايا عقلك
عذراء:اوكي صافي
بنان دوات مع البنت لي تما:حييدي ليها عفاك ليتيكت ديال الأثمنة و كلشي
البنت:اوكي مدام
حييدات البنت ليتيكيت و قادات الحوايج لعذراء...
بنان:زيدي معايا نخلص
مشاو حتى خلصات بنان و خرجو من تما...
عذراء:واقيلة الوقت هادي ياكي؟
بنان:لباس ملي وليتي تحسي بالوقت لي تيدوز
ركبو فالسيارة د الشركة الخاصة ب بنان و رجعو...
فقاعة الإجتماعات كانو المصممين رجال و نساء مستفين جالسين و قوس واقف عليهوم و حداه مجسم ملبسينو الفيستة...
قوس:بغيت الوان هاد الفيستة يكونو فالصيحة الربيعية كل واحد عندو الحق يدخل الوان يناسبو الستايل ديالو فالتصميم و ابداعو ولكن لي بغيتو يكون طاغي هو هاد اللون و حتى القماش يكون هدا!
مصممة:واخا مستر ولكن الى سمحتي ليا واش ديك الفيستة ماشي كاشفة؟
قوس:ايه بغيتكوم تخرجو على المألوف و تديرو صيحة بألوان كاشفة ممزوجة بألوان تعطيها الحياة واش مفهوم؟؟
الكل:مفهووم
قوس:كيفما قلت التركيز على هاد المثال لي عندكوم غادي نقول للعمال يحطوه فقاعة العمل باش كلشي ياخد عليه نضرة
مصمم:اوكي مستر اليوم غنبدا فالتصميم
قوس:جميع التصاميم تسيفط لجلنار غنقلبهوم كاملين فصل الربيع على الأبواب و الأسواق قريبا غتستقبل صيحة شركة Bens-Naht الإستثنائية(قصدك الكوافورية🙄)
جلنار واقفة تما مصدومة مسكينة باقة ممصدقاش الكلام لي تيقولو سي قوس حتى سالا الإجتماع و كل واحد بدا ينساحب لخدمتو...
خرج قوس من تما و هز تيليفونو من الجيب:الو..وجد السيارة شوية و غنهبطو(قطع)
فنفس الوقت كاينة الكوافورة فغرفة بنان قادات لراسها مكياج خفيف زادت عليه غير تكحيلة من مدمع العين حتال نهاية العين و واحد العكر ماط فلون نيود...
بنان بدات ترش فالريحة دايرة بحال هادوك لي تيوقفو عليك بالمرشة فالعراسات...
بنان:صافي كلشي هو هداك غطلقي تاني شعرك؟؟
عذراء:اه خليه على راحتو متنحملش نجمعو
بنان:اوكي على خاطرك
تسمع الدقان فالباب..حلات عذراء لقاتو نفس الراجل لي داها داك النهار..ضارت عند بنان و قالت ليها سيري سيري..خرجات عذراء معاه و هي تطل بنان لقات روبين و خناثة و ليڨيا جايات و هي تخرج تابعة عذراء...
الثلاثة وقفو فاش لتاقطو ودنيهوم كلام بنان الأخير...
بنان:يالاه سيري ضروك تعطلي
مشات عذراء مع الرجل و هي تم بنان راجعة غير ضارت لقاتهوم واقفات بحالا تيتسالوها الكرا...
روبين شدات بنان من ذراعها:شنو قلتي دابا؟؟؟
بنان جرات ذراعها:كيفما سمعتي عذراء غادية دابا لعند مستر قوس و مدام ترف و لدارو(ضغطات عليها)عارض عليها
ليڨيا مفهماتش: مدام ترف؟؟؟
خناثة بالفرنسية:من بعد و نشرح ليك اش قالت(قلباتها مغربية) علاه من امتى مدام ترف خلات سويسرا و جات لهنا؟؟
بنان:سوليها انا لي فراسي قلتو ااه ولا عرفتو شنو سولو جلنار راه هي لي سيفطات الدعوة هههه
روبين:متديوش عليها بغات غير تطلق سمها
بنان:صوني على جلنار(هزات يديها بغباء) انا معارفة والووو
مشات بنان لبيتها تضحك اما دوك الثلاثة ملامحهوم تخربقو روبين قلبها غيخرج من بلاصتو مشات بالزربة دخلات لبيتها و تبعوها الجوجات لخرين..جبدات الفيكس و صونات على جلنار هاد الأخيرة لي كانت غارقة فالخدمة حتى سمعات للفيكس و جاوبات...
جلنار:الوو؟؟
روبين:قولي ليااا
جلنار عوجات عينيها:(افف الصباح لله) نعام ا مادموزيل؟؟
روبين:واش بصاح قوس عرض على البرهوشة؟؟و واش ترف كاينة فالمغرب؟؟
السماعة طاحت من يد روبين و الدنيا بدات تضور بيها...
جلنار:الوو الوو؟؟ اففف(سدات الخط)
بقات روبين شادة راسها لي تيدور لثواني و هي تسخف...
ليڨيا و خناثة غووتو:روووووبييييييين!!!!!!!!!
اما الكوافورة فا كانت تتمشا فالباركينغ الأرضي د الشركة و حداها الراجل ساكت حتى بان ليها قوس واقف حاولات تفادا تشوف فيه حيت باقة تتفكر فديك البوسة..لمحها هو كيف جاية لعندو عينيه تيشوفو امرأة اعمال راقية جميلة معروضة لدارو..بتاسم ابتسامتو الخفيفة فوجهها فاش وقفات قدامو...
قوس:زادك الكلاس جمال على جمالك
عذراء حدرات راسها بخجل تتحرك فرجليها بتوتر:ش شكرا
قوس:تفضلي
حل الشيفور الباب لعذراء و حتى لقوس و ديماراو....
وصلات الطونوبيل قدام الباب الداخلي ديال الفيلا الفخمة ديال قوس كانت عذراء حالة فمها فيها هادشي متتشوفو وحدة بحالها غير فالأحلام و دابا قدامها حقيقة..هبط الشيفور حل ليهوم الباب و هبطو كانو الخدم مستفين كالعادة و عذراء غير تتشوف...دازهوم قوس و هي دازت قالت السلام مبتسمة حتى واحد مارد عليها كلشي لحق خدمتو..بقات مستغربة و تمشات جنب قوس لي عارف الطريق اما هي غتتلف بهاد الفخامة...
حتى دخلو ل الصالة لي كانت فيها طاولة كبيرة بالكراسي ديالها الكتار...
جات الخدامة عند عذراء كانت ألمانية:الى سمحتي ليا انسة ممكن تعطيني حقيبتك و معطفك
عذراء طلعات فيها راسها مفاهماش:شنو؟
قوس:قالت ليك عطيها المونطو ديالك و صاكك
عذراء:ااه اه(مدات ليها الصاك)هاكي(حييدات المونطو) و هاكي شكرا
هبطات ترف من الدروج بشوية عليها لابسة سروال بيض مزيير مدخلة فيه بودي بالصديفات فالبلومارين طالقة شعرها متوسط الطول...
بقات عذراء تتشوف فيها بإعجاب جاتها زوينة بزاف...
قوس:تنقدم ليك الأخت ديالي ترف
ترف جات وقفات قدام عذراء:على سلامتك ا خويا
قوس:هادي عذراء ا ترف
عذراء مدات يديها مبتسمة:متشرفة بمعرفتك ا مدام
ترف متتحملش تسمع ديك مدام:قولي ليا(صافحاتها) غير ترف بلا ديك مدام
عذراء:ا اااه واخا
الخدامات دخلو بداو تيحطو الماكلة فوق الطبلة و يستفو فالماعن...
عذراء ضارت دغيا نيفها لتاقط ريحة مألوفة و هي تصدم فاش شافت الطاجين:الطاجين؟
ترف:قولي ليا ا عذراء شنو طبيعة العلاقة لي تتجمعك بخويا؟؟....
عذراء طلعات فيها راسها عاد كانت غتغمس و هي تطلق من طرف د الخبز بدهشة...
قوس حط الفورشيط ديالو و طلع راسو ف ترف لي تتسنا جواب عذراء...
قوس:شنو هاد السؤال ا ترف؟؟
ترف: ههه لا والو غير بغيت نشد شوية فعذراء
عذراء حدرات راسها كملات مكلتها لباس دازت على خير...
اما قوس خنزر ف ترف و رجع تياكل اما هي هجرات ضحكتها و تحنات على طبسيلها...داز الأكل فجو من الصمت..فقط صوت الأواني لي تيتسمع حتى سالاو...
ترف:احمم التحلية انا لي وقفت عليهوم حتى قادووها
عذراء هزات راسها بابتسامة:ربي خليك
حركات ترف يديها للخدم لي جمعو الأواني و نضفو الطاولة...
من بعد تمو جايين بالحلويات و القهوة تحطو فوق الطاولة و هي تحل عذراء فمها فالحلويات لي كانو مزوقين بواحد الطريقة جد راااقية شي حاجة عمرهاا شاافتها فحيااتها...
عذراء:زوينيين بزااف بحال هادو نبغي غير نشوف فيهوم ههه
ترف:هه تحف فنية صالحة للأكل طباخين خويا من بين افضل الطباخين لي مكاينينش فأي مكان
عذراء شافت فقوس دغيا و رجعات شافت فترف:هه هادشي واضح
قوس حرك يدو للخادمة و هي تقرب هازة واحد الوعاء بحال كاسرونة صغيرة فالنحاسي كبات منو القهوة فواحد الفنجان منقوش بالفضة...و حطات قدامو طبق زجاجي ديال الحلويات التركية المرافقة لهاد القهوة لي كانت نكهتها مزيج من التوت و البيستاش...
سالات الخدامة و تقدمات جيهة ترف هازة إبريق فيه القهوة كحلة كبات ليها ففنجانها..حطاتو و هزات إبريق اخور فيه غير الحليب السخون و كبات ليها فيه جابت لي تيحطو فيها السكر و لاحت ليها جوج مكعبات صغار ديجا عارفة القياس لي تتبغيه و حركاتها بالمعلقة هادشي كاملو تحت انضار عذراء لي باقة مندهشة فهاد الطاولة الجميلة...
عذراء متشوقة تذوق القهوة التركية حركات ليه راسها ب اه و هو يآمر الخدامة لي كباتها ليها و حطات ليها قدامها دوك الحليوات...
شربات عذراء القهوة و هي تجيها مرة و حطاتها جامعة فمها...
ترف:هه كولي هو الأول قطعة الحلوى عاد دوزيها بيها حلاوتها تما فين كاينة فكرتيني فخويا فاش داقها اول مرة فاش مشينا لتركيا هههه
قوس:خصك ديما تجبدي هاد السيرة لشي واحد
ترف:ههه وا غير تنضحك
عذراء هزات الحليوة و دوزات بيها القهوة و بالفعل مذاقها ولا احلى بتاسمات فوجه ترف و شافت فقوس لي تيشرب ديالو بهدوء...
ترف تتشوف فيها و بتاسمات بشوية تتبان ليها واحد الانسة غارقة فالإعجاب طلع قوس راسو و هي تحني عذراء راسها فحلوتها و ترف زادت وسعات ابتسامتها...
ترف ناضت:سمحو ليا غنمشي للحمام
مشات ترف تضحك من لتحت و خلاتهوم جالسين بوحدهوم...
عذراء بتوتر:ق قول ليا ا مستر
قوس:تنسمعك
عذراء:علاش درتي الفيستة فالصيحة الربيعية؟(حدرات راسها)تتبقى فيستة خسرتها و صافي
قوس:و انا بغيت نرفع من قيمتها
طلعات عذراء راسها فيه بقات تتشوف فيه شحال و حتى هو ماشي من العاجزين بقاو لثواني تيتبادلو شوفاتهوم حتى حدرات عذراء راسها بخجل متقدرش تطول كتر من هكا..اما قوس هز فنجانو و شرب رشفة مراقبها تتلعب بصباعها بتوتر...
حطات عذراء الحلوة و مشات معاهوم حتى دخلو فواحد الباب زجاجي كبير محلول و الخدم تابعينهوم بالأواني حتى خرجو فواحد المكان واسع بزاااف فيه اثاث ديال الجرادي و طبلة كبيرة بكراساها و لابيسين كبير و الدنيا كلها خضرة و عامرة بالربيع و النباتات...
جلسو فوق الفوتويات و حطو الخدم الماعن فوق الطبلة تما و وقفو بعيد الى بغاو شي حاجة...
حط قوس القهوة ديالو فوق الطبلة و ناض داير يديه فجيوبو:تبعيني
عذراء ناضت تتمشا بجنبو و خلاو ترف تتشرب فقهوتها بابتسامة...بقاو غاديين فواحد الطريق معلوم بالحجر حتى دخلو فواحد المكان زايد خضورية على لاتيراس كان عامر بالربيع و الورود و فالوسط كان محطوط تمثال كبير خشبي على شكل 3 3 ديال الناس واقفين حدا بعضياتهوم...من بعد هاد التمثال كاين طريق اخور لي فيه كانو الورود المزروعة..بقات عذراء تتشوف تما بدهشة مكان زوييين بزاااف...
عذراء:واااو وا حديقة عندك د الورود
قوس:هادي صغيرة مقارنة بلي عندي فسويسرا
عذراء:سعداتك ههه
قوس تقدم جيهة واحد المجموعة من الورود الحمراء حتى قطف وحدة و عطاها ليها فاش شداتها مفلتش يديه بقا شاد الوردة مع يد عذراء حتى طلعات فيه راسها باستغراب و هو يطلق من يديها و تحنا لعندها حتى حطها ليها فشعرها فجنب وذنيها و هي تتشوف فيه بواحد النضرات فشكل نفس الشيء معاه نضراتو الإعجابية غادة و تتزيد خصوصا و الشمس ضاربة فعينيها الخضرين لي زايدينها جمااال اليد باش حط الوردة رجع حطها على حنكها و تحنا حتى باسها فيه....
و بهمس قال فوذنيها:الورد الأحمر تيفكرني فظهورك فعرض باريس
قشعر جسد عذراء من البوسة و زاد كمل عليها بهاد الهمس شوية و غدوب ليه بين يديه ولكن ميمكنش ليها ضميرها اكيد مغيخليهاش!!!بعدات منو بشوية غارقة فخجلهاا بغات تدوي ولكن الكلمات تسرطو ليها..قرب منها قوس و دوز صباعو داخل شعرها الرطب...
قوس:مالكي؟
عذراء:ع ع عف عفاك مت مت متقيسنيش هاكا مستر
قوس:علاه معاجبكش الحال؟
عذراء حدرات راسها مبعدة منو:لا
قوس:امم اوكي(عطاها بضهرو)ساليتي من استكشاف الحديقة؟
تمشا و هي بجنبو فنفس الوقت كانت ترف فالداخل فواحد الصالة سادة عليها هي و واحد الخدامة...
ترف:هي قلتي باسها فحنكها؟ و حط ليها وردة فشعرها؟
الخدامة حادرة راسها:اه ا سيدتي
ترف بتاسمات:امم مثير للإهتمام صافي سيري لخدمتك و هاد الهضرة متخرجش من فمك!
الخدامة:غير تهناي سيدتي
نصارفات الخدامة مخلية ترف تتفكر و هي ترجع ل لاتيراس ملقاتهومش قالت يمكن باقيين فالحديقة حتى بانو ليها جايين...
ترف:كيف جاتك الحديقة ا عذراء؟
عذراء حركات ليها راسها:ز زوينة
ترف:اووه جاتك الوريدة الحمرة فنة ههه
عذراء بخجل:حتى نتي فنة
ترف رجعات شعرها للور بثقة:اكيد انا فنة ههه
قوس:غنمشيو دابا باقي تابعاني الخدمة
عذراء:ا ااه و حتى انا غتكون تتسنا فيا مدام بنان
ترف:ام ااه مزيان على كل تشرفت بمعرفتك ا عذراء دوزي عندنا مرة خرى
عذراء:ش شكرا ا م... ا ترف هه راكي ضريفة
ترف:اوه شكرا على كلامك عارفة راسي سكر
قوس:تفضلي ا عذراء
سلمات عذراء مع ترف و خرجات حتى لبساتها الخادمة المونطو و عطاتها حقيبتها..لقاو الشيفور واجد و رجعو للشركة مخليين ترف واقفة قدام الباب حتى مشاو...
فالشركة و فغرفة روبين كانو شي رجال لابسين اللباس الرسمي د الشركة تيهبطو شي بوالز و روبين واقفة بتخنزيرتها ممتقبلاش فكرة انها تمشي لسويسرا و دابا كملو عليها فاش ساقت الخبار ديال عراضة قوس و البرهوشة فاش سالاو هبطات فالسانسور هي و ليڨيا و خناثة لي غير ساكتين من فاش فاقت من السخفة و هي ساكتة و هادشي مخليهوم مخلوعين عليها حتى هبطو لطابق الإستقبال كانت سيارة تتسناها تما و تيطلعو فيها بوالزها...فنفس الوقت قوس قال لشيفور يحبس قدام الشركة عاد يدي هو بوحدو السيارة لباركينغ دار لي قالو ليه و بلاصا قدام الشركة..هبط و حل ليهوم الباب و خرجات الكوافورة و قوس ميجي هاد الديكور غير قدام روبين لي تصدمات و الجوجات لي معاها تصدمو شادينها بجوجات....
و بسرعة جروها من تما حتى دخلو ل السيارة و سدو عليهوم..دفعاتهوم روبين و لصقات مع الزاج ديال الطونوبيل تيبانو ليها عاطيينها بضهرهوم و داخلين مع الشركة شحال قراب من بعضياتهوم..بداو تيهبطو دموعها وحدة تابعة لوخرا و قلبها تيتقطع من الداخل صعيب بزاف تشوف واحد الانسان بغاتو من صغرها مع وحدة خرى لي لا علاقة بيه لا فالمستوى ولا فالأسلوب و هي ممديهاش فيها ولا عاطيها حتاشي قيمة فوق بنت صاحب باه من موراها كانو ليڨيا و خناثة تيشوفو فيها بحزن عشرتهوم بثلاثة قديمة و عارفين مزيان احساس روبين دابا كيف داير...
شافت خناثة فالشيفور:تحرك
خدم الشيفور السيارة و ديماراها بيهوم من تما و باقي عينين روبين مفيكسيين فالزاج عنقوها صحاباتها من اللور محاولين يهدنوها ولو غير شوية..ضورات عنقها لعندهوم و عينيها المدمعين حمرين...
روبين:كونو متأكدين غنرجع و انتقامي غيكون عسير!
بتاسمو ليها محركين ليها راسهوم ب اه...
خناثة/ليڨيا:اكيد غيكون هادشي...
بعدما فتارقو قوس و عذراء فطابق الإستقبال طلعات عذراء لعند بنان لي كانت متحمسة لرجوعها...
رفيف:عندااااك تم عنداااك تخسريها فشي حاجة لا علاقة
عذراء:لا متخافيش انا حالفة اليوم نفرح مالين الدار
رفيف ناضت:غير الله يحفظ معاك وصافي صبري نجيب صاكي
ناضت رفيف جابت صاكها و خرجو حتى سدات الصالون و شدو طاكسي....
داز الوقت و سالا برناس خدمتو..رجع لدارهوم و كلا كاسكروط مع عائلتو...
برناس:الواليد الواليدة...
دواني و رجاح طلعو راسهوم باستغراب:نعام ا ولدي؟
برناس:بغيتكوم تدويو مع عمي جلوان و خالتي لوليا على ود عرسي انا و بنتهوم عذراء
دواني:ولكن اولدي جداك سلافا مزال معطاتكوم الإشارة زائد انه ختك رسيل لي قربات تزوج
برناس:بغيت تعطا كلمة ولا وعد من مورا عرس رسيل يتدار عرسنا داري واجدة و فرشتها هاد العام بقا غير لي تعمرها
رجاح:صبرتي ا ولدي هاد المدة كاملها مالك دابا زربان؟؟
برناس:مزرباناش انا غير تنشوف غادي و تنكبر و مزال متزوجت
ديالا(اخت برناس):خويا عندو الحق شحال قدني نتسنا نكون عمة
رجاح خنزر فيها و تجمعات سادة فمها...
رسيل:تنتمنى يتيسرو اموركوم ا خويا
دواني:المهم غدا ان شاء الله غنمشي ندوي مع لوليا بعدا
رجاح:و انا غندوي مع جلوان
برناس:صافي مزيان(ناض باس راس مو و باه)الله يخليكوم ليا
دواني:امين اولدي الصبر باش تيتحلو الأمور و راك عارف حالة عمك جلوان وخدمتو لي ماشي تابتة مرة خدام مرة لا الله يحسن العوان
برناس:انا ا الوليدة متنتسنا من حد يعطيني غنوقف على كلشي بجيبي
رسيل:هي غتدير ليا شي كادو زوين ياك ا خويا
برناس:اكييد غندير لأميرة خوها كادو زوين
رسيل ضحكات عاجبها الحال:ربي خلييك
ديالا:ياااك و اناا مكااين حتاشي كاادو ولا نتسنااا حتى نكمل حتى انا 18عام العام الجاي؟؟
برناس:هه حتى نتي مناسيكش
رجاح ناض:هاني غادي عند الحاج مصعب
دواني:واخاا
خرج رجاح و ناض حتى برناس:غنطلع لبيتي
طلع برناس و خلا خواتاتو و مو فالصالون..و فكرة الزواج متبتة فدماغو الى هي ممسوقاش ليه فا هو مسوق لهاد العلاقة و باغيها تسالي بالزواج و مغيخلي حتى حاجة تمنعو من هادشي....
قربات 8 د العشية و هاهيا واحد الطاكسي مبلاصية قدام دار عذراء هاد الأخيرة لي هبطات هي و رفيف هازين كترة الميكات و مول الطاكسي هبط حتى بدا يهبط ليهوم ميكات خرين من الكوفر و شي كراطن حتى ستف داكشي قدام دارهوم خلصوه و مشا...سرسرات عذراء و قلبها غيطير بالفرحة و حداها رفيف حتى هي فرحانة بحالها حتى حلات ليهوم لوليا لي تصدمات...
دخلات لوليا موكلة امرها لله تتسنا ف اش غيقولو ليها اما هوما دخلو داكشي شي هزوه شي غير جروه حتى خواو قدام الباب و سدوه....
لوليا غير تتشوف و تيبان ليها من الميكات ها التقدية ها الديسير و شي حاجات خرين...
رفيف:كاين با بعدا؟
لوليا:مشا عند الحاج مصعب
عذراء شدات فيد لوليا:المهممم ا مامااا اليوم شديت اول خلصة ليا و تقديت لدار
لوليا:ويلي يا بنتي فرقعتي الخلصة ديالك فهادشي كاملو
عذراء:لا ا ماما راه شاط ليا نصها اجي اجي نجلسو
جلسات لوليا مستغربة اشمن شيط فالنص و هي جابت ليها اسواق السلام حتال الدار..جلسات حداهوم رفيف حتى هي و بدات عذراء تترعد بالفرحة جابدة صاكها لي حلاتو تحت انضار لوليا لي تتسنا اش غتجبد ليها تما..جبدات منو عذراء بواطة حمرة د الموبر متوسطة الحجم و مداتها ل لوليا...
عذراء:هاكي حليها
حلات لوليا البواطة و هي تحط يديها على فمها و عينيها بداو يغرغرو..كانت فيها سنسلة د الذهب غليضة و معلق فيها المصحف و حداها دبليج د الذهب منقوش ستايلو زوين و مناسب لعمر لوليا...
لوليا:و واش هادو ليا انا؟
عذراء:و علاه ديال من ههه ديالك ا ماما قييسيهوم بعدا
رفيف لي كانت مربعة يديها فهاد المشهد الدرامي:و انا لا تعنيقة لا بوسة غير تقلت بدوك الميكات و صافي
لوليا ضحكاتها:هه اجي ا الموصيبة لهنا
رفيف ناضت جلسات حداها و عنقاتهوم لوليا بجوجات:نتوما بناتي لي عندي و بغيتكوم تبقاو ديما هكا و نبقاو ديما هكا حتى حاجة كيفما كانت متفرقناش
عذراء:متخافيش ا ماما مكاينة حتى حاجة تقدر تفرقنا
رفيف:اكيييد
لوليا:واخا(مسحات دموعها) غنمشي نصوب العشا دابا
عذراء:واخا نبدلو حوايجنا و نعاونوك....
بعدما تعشاو عائلة عذراء و كل واحد سد عليه فبيتو كانت لوليا فبيتها قدام مرايتها حاطة السلسلة على عنقها و تتشوف انعكاسها حتى دخل جلوان...
جلوان مستغرب:منين جاك هادشي؟
لوليا فرحانة:بنتي عذراء شراتها ليها ف اول خلصة ليها
جلوان:علاه شحال مخلصة باش تشري ليك سلسلة بحال هكا؟
لوليا:معرفتش ولكن ديك الشركة كبيييرة و ناسها لباس عليهوم
جلوان تكا فوق الناموسية:اممم..كنت باغي ندوي ليك عليها نيت
لوليا جلسات فوق الناموسية بجنبو:على عذراء؟
جلوان:ااه هاد العشية فاش مشيت عند الحاج مصعب تلاقيت عندو حتى خويا رجاح و مشينا للقهوة بجوج
لوليا:اهاه؟؟
جلوان:و دوا معايا بخصوص زواج بنتنا بولدو برناس
لوليا:و شنو قال؟
جلوان:قال ليك ا لالة ولدو واجد حتى من الدار فرشها و بغا نعطيوه الكلمة باش مورا عرس رئال و رسيل يضربو لاكط
لوليا هزات حجبانها:هادشي مي سلافا لي تتقررو!
جلوان:اه قلتها ليه ولكن ولدو ممقتانعش بهادشي
لوليا:اشمن ممقتانعش واش تسطا ولا شنو مي سلافا هي كلشي و الى مجاش امر منها مكاين حتاشي زواج!!
جلوان:عارف و حتى هو عارف و كلهوم عارفين المهم قال ليا غدا غتجي عندنا دواني
لوليا:تنضن وضحتي ليه ليكاين مكاين لاش حتى دواني تعاود ليا نفس الهضرة
جلوان:المهم ضييفيها و عطيها وقتها حتى تمشي غنعس دابا سدي معاك داك الضو
تغطا و عطاها بالضهر اما هي شافت قدامها بملامح عدم رضى ميمكنش يتحكمو ليها فزواج بنتها بهاد الطريقة ضروري خص يكون شي حل لهادشي....
☀️فالغد ليه☀️
فاقت عذراء فطرات مع عائلتها و كل واحد مشا لخدمتو الا هي و لوليا لي بقاو فالدار...فا مادام اليوم عندها روبو قررات تخمل واحد البيت عندها معشش من عام الفيل..طلعات و سدات عليها و مشات لمجر ديال كوافوزها و بدات تجبد الميخالة لي عندها فهاد المجر شي حاجات كاعما معروفة شنو هي و المكياج شي مهرس شي داز تاريخو خوات كاع داكشي فميكة كحلة و بدات تمسح فالمجر حتى قاداتو و دازت للماريو ديالها الحوايج كلهوم ملويين و مدكسين بحالا مدابزين بدات تجبد و تلوح فوق الناموسية حتى لمحات العلبة ديال الفستان الأحمر لي كان سبابها فالتقرب من قوس لاحت لي فيديها و تقدمات حتى جبداتو..حلاتو و هزات الفستان تتشوف فيه و ابتسامة إعجاب ترسمات على فمها جاو من موراها ذكراياتها معاه حتال الذكرى الأخيرة لي هي البوسة و الوردة..حطات يديها على حنكها تتحاول تفكر داك الاحساس هو ماشي بحال البوسة ديال الحنك ديال السلام مع العيالات..مختلف بزاف احاسيس كتيرة وصلاتها فديك البوسة و حتى فاش حط يدو على شعرها اهتمام عمرها شعرات بيه اتجاه اي رجل ولكن اكيد هدا ماشي اي رجل انه رجل برج القوس الإندفاعي في الحب...حطات داك الفستان تتبتاسم غير بوحدها و بلا متحس بدات تتسائل شغيكون تيدير دابا؟؟؟....
فالشركة كان قوس جالس فلبيرو ديالو قدامو لبيسي ديالو تيشوف فشي تصاميم نموذجية و لكن عقلو مهزوز مكاينش فهاد العالم فقط صبعو لي تيتنقل بين ليباج اما هو تفكيرو غارق فالكوافورة و العراضة ديال البارح..عمرو عرض شي وحدة لدارو لي فالمغرب يعني هي اول وحدة تزورها..تفكر عينيها الخضرين و الشمس ضاربة فيهوم و فاش حط ليها الوردة فشعرها شحال جات معاها و زادتها جمال ملامحها و حركاتها كلهوم ميمكنش ليه ينكر انه مترسخين فدماغو و كلما تيتفكرها تيحس بشي حاجة زوينة فداخلو ولكن واش حتى هي تتحس بنفس الأحاسيس من جيهتو؟؟ولا مجبرة تواكب افعالو حيت تيبقا رب عملها و مدير الشركة؟؟..سد البيسي و جبد واحد الورقة ديجا مطبوعة فيها الكتبة دخل صباعو فهاديك لي تيكونو فيها الستيلووات و هو يتحسس ورقة صغيرة فيها..استغرب و هو يجبد الستيلو حطو و جبدها حتى هي كانت ورقة مكمشة..حلها و لقا فيها "Thank You" و لدقائق معدودة عاد تفكرها ديالاش! هادي لي كان لقاها فالفيستة فاش جابتها ليه عذراء..بقا شحال شادها بين يديه و ابتسامة خفيفة بانت على فمو فاش تفكرها تاني..طوا الورقة بطريقة مقادة و حطها فالمجر ديال البيرو ديالو و رجع هز الستيلو يكمل خدمتو....
فسويسرا غنتعمقو فالطرقان و ندوزو من الأماكن العامة حتى نخرجو على المدينة شوية تنلقاو قدامنا واحد المكان شاسع مبني فوقو قصر يجريو فيه الخيول و فالجردة ديال هاد القصر كانت جالسة امرأة خمسينية رشيقة تتحتاسي فنجان قهوتها شعرها اشقر قصير و عينيها زرقين وسط من هدوئها تسمعو خطوات هابطين مع الدروج و الخدامات غاديين جايين تينضفو فلي جات فيديهوم..حتى هبطات بنت طويلة باقة ب بيجامتها القصيرة د النعاس وجهها مافيه قطرة مكياج و باين فيه العيا...
روبين بالألمانية:فين ماما؟
الخدامة قربات منها حادرة راسها:فلاتيراس ا ميس
دازتها روبين و مشات لفين قالت ليها حتى وقفات عليها و جلسات فالكرسي لي مقابل معاها..المرأة بهدوء حطات فنجانها و طلعات راسها فبنتها لي جات لبارح من المغرب معلماتهوم مهضراتهوم و زايدة رافضة تدوي مع حتى واحد...
ليندرا(أم روبين) بالألمانية:تهدنتي دابا؟
روبين:مكانتش عندي الگانة ندوي مع حتى واحد
ليندرا:شنو وقع؟؟
روبين:قوس سيفطني لفرع سويسرا
ليندرا باستغراب:و علاش؟شنو السبب؟
روبين:مافيا ميعاود داكشي حيت بغيت نساه
ليندرا هزات فنجانها:ولكن لي فهمتو انه عاقبك فاش رجعك لفرع سويسرا
روبين زييرات على يديها:هادشي ماغاديش يطول غنرجع فأقرب وقت ممكن
ليندرا:و شنو غادي ديري؟؟
روبين:معرفتش عقلي مخربق حاليا ولكن تنواعدك غنرجع و بقوة....
بعدما سالات عذراء جميع بيتها رجعات كل حاجة لبلاصتها و لي غيترما تجمع فالميكة و تلاح...
لبسات عذراء جلابتها و هزات تيليفونها فيديها:ماما غنمشي عند رفيف فالصالون
لوليا من الكوزينة:واخا و رجعو فوقت الغدا
سدات عذراء الباب و خرجات غادة مع الشانطي حتى وصلات قدام الصالون دخلات لقات مرام جالسة هازة تيلي و رفيف تتقاد فحجبان واحد الكليانة...
هزات رفيف راسها:جييتي
عذراء جلسات:اه جييت ياكما نعاونك فشي حاجة
رفيف:لا لا
مرام جمعات تيلي دغيا و هزات راسها فعذراء:عذراء لباس؟
عذراء:بيخير و نتي؟
مرام:لباس هه
عذراء:ايوا كيف جاتك الخدمة هنا
مرام:زوينة حسن بعدا من الگعدة فالدار
عذراء:امم مزيان
حطات عذراء رجل على رجل مسندة يديها على واحد الوسادة و عاطية لمرام بفخضها...
مرام تتشوف فرفيف لي تتقاد للمرأة و هي ترجع شافت فعذراء:و علاقتك كيف غادة مع برناس؟
عذراء طلعات فيها حاجبها:اش هاد السؤال؟؟
مرام:متفهمينيش غلط بغيت غير زعمة نتقربو من بعضياتنا
عذراء:نتقربو من بعضياتنا اه ولكن اش جاب برناس ليا؟؟
مرام:راه خطيبك زعمة
عذراء تيديرونجيها تفكر انه خطيبها:مرة خرى متسولينيش عليه
رفيف ناضت:زيدي زيدي جلسي تنقول لمك منبقاش نسرح ليك شعرك راه طويل تيعذبني ولكن تنرجع نقادو
عذراء:ا سبحان الله اسميتك راه شعرك طول من ديالي و تدوي
مرام عوجات عينيها دارو ليها القوق فالراس...
رفيف:زيدي جلسي دابا و سكتينا
جلسات عذراء و رفيف جبدات السيشوار....
فمكتب برناس كان واقف تيستف شي ملفات فواحد الرف حتى تسمع الدقان قال تفضل و دخل واحد الصحفي...
برناس:تنسمعك
الصحفي:وصلني واحد الخبر على واحد الممثل تنضن غيدير ضجة
برناس:شنو هو؟
الصحفي:لبارح صوروه شي ناس فواحد البار سكران
برناس:اشمن ضجة غيدير هادشي كلشي تيمشي للبار و يسكر
الصحفي:هادشي غيأثر على السمعة ديالو كممثل
برناس:هدا ماشي سبب مقنع و الخبر ميستاهلش يدير ضجة
الصحفي:اوكي موسيو
برناس:يمكن ليك تفضل
الصحفي نساحب و سد موراه الباب اما برناس جلس فالبيرو ديالو و هو يبان ليه تيليفونو كتر من سيمانة دابا و مزال ماصونات عليه حتال فين غتمدد هاد الفراغ لي فعلاقتهوم ولكن الحب متيشاورش عفط على الكرامة ديالو و هز التيلي مصوني عليها...فنفس الوقت فالصالون كان صوت السيشوار عالي و ريحة التسراح عاطية حتى بدا يصوني تيلي د عذراء لي كانت حاطاه فوق الفوتوي..مرام سمعاتو حيت حداها و هو يبان ليها برناس تيصوني...
مرام:رفيف تيلي د ختك تيصوني
رفيف تتسرح فشعر عذراء مسمعاتهاش مزيان:كيفاش؟؟
مرام رفعات صوتها:تيليييفووون ختك تيصوووني
رفيف وقفات السيشوار:تيليفونك تيصوني
ناضت عذراء حتى شافت المتصل و هي تزعف زمر صافي كون يتصحاب ليها هو كاعما تنوض قطعات عليه دارت لتيلي سيلونسيو و رجعات لبلاصتها...
رفيف:ياك لباس؟؟
عذراء:والو كملي ليا
شعلات رفيف السيشوار تاني و بدات تسرح ليها فشعرها و محاسينش بمرام لي جالسة متسائلة شنو سبب توتر علاقة هاد الجوج؟؟....
فلفيلا ديال قوس كان هاد الأخير تيتغدا مع ختو ترف...
ترف:اش بان ليك نعرضو عذراء لشي عشاء محدني مزالة فالمغرب؟؟
قوس طلع فيها راسو:بان ليا عجباتك؟
ترف:رتاحيت ليها باينة فيها ضريفة و تصرفاتها تيبيينو انها انسانة تليق تكون بجنب خويا ههه
قوس بتاسم من كلامها:تضني هادشي؟ولا متأكدة منو؟
ترف:ههه منقدرش نقول متأكدة حيت اول لقاء بيني و بينها ولكن شوف نتا لي غتكون شفتيها شحال من مرة
قوس:عذراء بنت مزيانة و هادشي حتى واحد مقادر ينكرو
ترف:ايه و انا منهوم عرفتي شنو انا لي غنعرضها بنفسي
قوس:خودي راحتك بحالي بحالك
ترف بتاسمات:شكرا....
فالعشية وصلات وقيتة كاسكروط ناضت لوليا بعدما صلات العصر دارت اتاي يتشحر بشوية عليه فوق البوطة و مشات عجنات شي مسمنات..رفيف كاينة فالصالون و عذراء كانت ناعسة و دابا فاقت...
عذراء:الوليدة شفتك تتعجني المسمن جاي عندنا شي واحد للكاسكروط ولا؟؟
لوليا:غتجي خالتك دواني
عذراء:اممم شوفي حطي لي فيديك انا غنمشي لباتيسري نجيب شي بتيبان و شي حليوات
لوليا:طرگي ليا معاك حتى واحد الربطة د النعناع الله يرضي عليك
عذراء:واخا ماما
مشات عذراء لبسات جلابتها و هزات بسيطيمها الصغير حتى جابت لي خاصهوم و رجعات عاونات مها فالكوزينة حتى تسمع السرسار...
عذراء:انا نمشي نحل
مشات عذراء حلات لقات دواني و بناتها ديالا و رسيل...سلمات معاهوم بابتسامة و دخلاتهوم لبيت الضياف...دخلات عليهوم لوليا تتهبط كمام بيجامتها و جلسات بعدما سلمات معاهوم...
لوليا ناضت:بغاات تقوول بلي حتى نتشااوروو مع الجدة سلاافا
عذراء خنزرات فيهوم و خرجات تتجري من البيت طالعة فالدروج...
دواني:شنو بيها عمرني شفتها هكا؟؟
لوليا جلسات تتحاول تلطف الأجواء:راها غير مخاصمة مع رفيف و معصبة غير بوحدها متديش عليها الهضرة معانا حنا الكبار
دواني:عندك الحق
بقات عذراء تتجري فالدروج حتى طلعات لسطاح سدات عليها فالبيت تما و جلسات فوق السداري...بقات شحال ساهية فالأرض و افكارها مخربقين هادشي غادي و تيحماض عندها و زواجها غادي و تيخرج من الأوهام لأرض الواقع ميمكنش ليها تزوج بشي واحد ماهازة من جيهتو ولو ذرة وحدة د المشاعر ولو يكون تيبغيها هو..حلمها الثاني هو تلقا شريك حياتها لي تبغيه و يبغيها حب متبادل يفهمو بعضياتهوم يحسسها بالحماية ولكن كيف قلت هدا حلمها ولكن واقعها حاجة خرى ضحية لعادة برجها الصارمة..زواج الأقارب بالإجبار هادشي بحد داتو دار ليها الخنقة و حاسة بشي حاجة ثقيلة على قلبها بحال الحجرة خصها تدير شي حاجة خصها تحرك ولا كاع لي حلمات بيه غيتهدم بالعادات و التقاليد....
☀️فالصباح الباكر☀️
و فشركة Bens-Naht للأزياء...كان قوس جالس فالبيرو ديالو بعدما خرجو من عندو ليمانادجر ديالو لبارح كان اول يوم ميصادفش فيه عذراء ولا يشوفها بعدما كان تيشوفها على التوالي هاد ليامات رغم انه مااشي بزاف باش دخلات لحياتو الا انه انسانة غريبة شوية بحالها قدرات بهاد الغرابة تبصم صورتها عندو و ترسخها فذاكرتو يكفي انه تيحس براسو فعالم اخور معاها..ناض من البيرو ديالو حتى خرج من الباب داز من حدا جلنار لي هزات حجبانها باستغراب فين غيكون غادي فهاد الوقت المبكر؟؟...هبط قوس مع السانسور و فنفس الوقت كانت الكوافورة عاد طالعة وجهها عياان و شعرها مخربق جامعاه على شكل كودشوفال غير بالخف جارة رجليها حتى الفطور مكلاتوش بسبب لي وقع البارح...طلعات فالسانسور و ضغطات على زر طابق العارضات حتى طلعها لتما دخلات تتشوف فالأرض و وجهها مافيهش الحياة جاية بزز باش تخدم حتى تتحس براسها دخلات فشي حاجة قاصحة..طلعات راسها باستغراب حتى تيبان ليها قوس بطولو و عرضو لي شافها و استغرب حتى هو من وجهها الشاحب...
قوس:عذراء؟؟مال وجهك؟
عذراء بضحكة صفرة مبغاتش حتى شي اهتمام حاليا حيت غير على سبة و غتبكي ليه دابا:ل لاا مستر والووو صبااح الخير بعداا و ااه نهارك مبرووك
مشات غادة بزربة تفاداه حتى تتحس بيديه شداتها من ذراعها موقفاها...
قوس:مالكي!!
لي كانت فالإستقبال جالسة تتفرج و عذراء ضارت عندو منفجرة بالبكا السييد مفهم والو ولكن حاجة وحدة متأكد منها انه واقعة معاها شي حاجة...
شدها قوس من كتافها و هي غير تتبكي و تتمسح فدموعها شاف فليكاينة فالإستقبال:لغي الخدمة لي غتدير عذراء للعارضة بنان و جيبو ليها بديل
البنت حدرات راسها و بدات تكتب فالكلافيي...
قوس:اجي معايا
جرها بشوية من كتافها حتى دخلها معاه فالسانسور الخاص بيه تحت انضار البنت لي كانت مستغربة حيت اول مرة تشوفو مدخل شي واحد معاه حتى من ليمانادجر ديالو مداروهاش(كون تشوفي اللقاء المدرم لقاها وسطو😂)..ضغط على واحد الزر اما الكوافورة غير تتبكي قلبها عامر سنين هادي و دابا بغاو يفرقعوه ليها بهاد التزويجة المنحوسة...بقا السانسور طالع حتى دخلو لواحد الطابق كان خاوي من العملاء من غير فام دميناج لي تتنقي فيه يوميا..بقا غادي بيها و هي غير تتشوف بعينيها المدمعين هاد الساعة مهامهاش فين غادي بيها ولا اش تيدير باغية غير تنسا...
دخلو لواحد القاعة فيها الأثاث و نصها داير بحال المكتبة عامر بالرفوف...جلسها فوق واحد الفوتوي و جلس حداها...
قوس:و دابا قولي ليا مالك؟
عذراء:والو ماشي شي حاجة
قوس:ماشي شي حاجة و حالتك هاكا و مكملاها بالبكا؟؟
عذراء:حنا البنات هكا دايرين تتجيني هاد الحالة مرة مرة
قوس:احم انا..من الواجب ديالي نعرف مالك حيت تنعرفك!
عذراء ضحكات باستخفاف اش تيعرف عليها يالاه عارف غير سميتها و خدمتها فقط جمعات ديك الضحكة دغيا و شافت حولها كأنها فشي مكتبة من الأكاديميات الأوروبية لي تتشوف فالأفلام...
قوس:تنضن عندك شي ضغوطات فحياتك
عذراء:اي واحد عندو ضغوطات و تيعيش مرحلة بحالي ولا اكفس
قوس طلع ليها راسها بصباعو:واش مشكل فالخدمة؟؟
عذراء هربات عينيها:ل لا غير مع مالين الدار و صافي حاجة عائلية
قوس فهم و مادام اشياء عائلية فا ماشي من حقو يتدخل:اه فهمت...
عذراء تتلعب بصباعها بتوتر تتسناه يحيد صباعو من وجهها و والا بغا يفهم راسو هزات فيه عينيها لقاتو ساهي فيها...
عذراء جاتها الدهشة شوية و هي تحدرهوم بقلق و دوزات صباعها تحت عينيها المنفوخين:تتعجب فيا ياك هه؟
قوس فاق من السهو:كيفاش تنتعجب فيك؟؟
عذراء:حيت اول مرة تشوفني بلا مكياج
قوس حط يدو الثانية فحنكها:نتي زوينة سوا بالمايكاب سوا بلا بيه
عذراء طلعات فيه عينيها لي تقابلو مع عينيه و قلبها بدا تيضرب:ب ب بصاح هادشي؟؟؟
قوس بتاسم:ااه بصاح
عذراء بتاسمات:ش ش شكرا(حدرات عينيها)
قوس قرب منها حتى باسها فجبهتها مخليها مخرجة عينيها فالأرض و بيديه لي كانو شادين وجهها رجع ليها خصلات شعرها الخارجين ورا ودنها طلعات فيه راسها و عينيها الخضرين تيلمعو فزروقية عينيه حتى بدا مغناطيس الأحاسيس تيجذب افواههوم باش تلاقا ببعضياتها فجأة تسمع واحد الصوت من كرش الكوافورة نعم هادي هي نتيجة عدم اكل الفطور!!نعم كرشها زغرتات...
قوس هز حاجبو فيها:واش مفطرتيش؟؟
عذراء حشمات:ا ااه
قوس نوضها:زيدي تمشيي تفطري
عذراء:ل لا لا مستر شكراا
قوس خنزر فيها:باغية تخرجي على صحتك!(جرها)زيدي
عذراء غادة معاه مجرورة:مكاين لاش...
قوس ممديهاش فكلامها انسان بحالو منضبط فأكلو و حياتو مغيتقبلش هاد الإهمال لصحة خصوصا و انها كانت ناوية تخدم واش تتفلا هادي ولا شنو؟؟..ضغط على السانسور و فنفس الوقت جبد تيلي و صونا على الشيفور يوجد راسو...دقائق معدودة ولاو فالباركينغ و يديه باقة جار بيهوم الكوافورة من دراعها حتى وصلو لطونوبيل و حل الشيفور ليهوم الباب..دفعها بشوية من ضهرها حتى طلعات و طلع حتى هو...
قوس:دينا للمقهى لي فطرت فيه داك النهار
الشيفور ضور الساروت:حاضر مستر
عذراء تسندات مربعة يديها هاد السييد ولا يقرر فبلاصتها هي معندهاش الخاطر باش تفطر داكشي علاش مفطراتش ماشي حيت ملحقاتش تاكل..جبد قوس حزام السلامة يديرو لراسو و لاحظ انه الكوافورة مجبدة مناوياش تديرو عقد حجبانو و قرب منها..طلعات فيه راسها باستغراب اش ناوي يصنع هدا و بعينيه مراقباه تتبان ليها لحييتو من التحت كيفاش مقادة و مطراسية و ريحتو الرجولية الفخمة طالعة من ملابسو اشياء بسيطة لي قادرة تذوب اي انثى..حتى جبد الحزام من حداها و قادو ليها...
قوس:الحزام راه مهم
عذراء معقودة:احم غير نسيت
رجع قوس لبلاصتو و قاد ديالو:نتي متهورة من ناحية صحتك
عذراء هزات راسها لفوق:اودي...
قوس:امرك غريب مولفتكش هاكا
عذراء:واش ا مستر شفتيني غير شي مرات دغيا وليتي تقول ولفتيني هكا و هكا؟
قوس عاد عرف اش قال:هادشي عادي اي واحد تيولف دغيا الى رتاح لشي شخص
عذراء هبطات راسها:زعمة قصدك مرتاح معايا؟
قوس شاف قدامو:اه
عذراء بدا قلبها يضرب تاني و الحشمة بانت فوجهها و صباعها بداو يلعبو بتوتر تقطع حسها...
رجع قوس شاف فيها لقاها بحالا غتحول كلها متوترة...
قوس:و نتي؟
عذراء طلعات راسها:كيفاش و انا؟؟
قوس:واش مرتاحة معايا؟
عذراء بقات لثواني مبلوكية بسبب هاد السؤال المفاجئ و الغير متوقع باش غتجاوبو؟؟الراحة راه انواع واش قصدو الراحة من قربها الراحة معاه فالهضرة ولا الراحة النفسية ولا ولا....
عذراء عيواض يبسط ليها زاد تلفها اكتر ولكن حاجة وحدة لي عارفاها انه اهتمامو بيها وااضح بالنسبة ليها:فالحقيقة ااه
قوس:اه شنو؟
عذراء تتلعب بذيل شعرها بتوتر و عينيها فلارض:انا..انا مرتاحة..معاك
قوس بتاسم:هادشي لي بغيت
عذراء قلبات وجهها تتشوف فالزاج:و واش زعمة تنعجبك؟
قوس طلع حجبانو:اكيد تتعجبيني
عذراء حطات يديها على قلبها لي تيضرب معرفات باش تجاوبو فهاد اللحظة...
قوس:و نتي؟
عذراء بلعات ريقها لا ميمكنش تقول ليه حتى نتا تتعجبني لا نفسها و كبريائها كأنثى العذراء مغيخليهااش...
قوس:مالكي؟؟
عذراء عاطياه بضهرها حركات ليه غير راسها ب اه زعمة فهم راسك..اما هو فهم انها حشمانة و كتافات غير بالإيجاب بتحريك راسها...
بتاسم حيت اهم حاجة عندو هي الشعور يكون متبادل بيناتهوم خصوصا و انها متتعطيهش راس الخيط و اي حاجة كان تيديرها تتعارضها عكس هاد الأواخر لي بدات تطلق شوية معاه يعني بدات تتولف على وجودو فحياتها و هادشي بحد داتو تقدم كبير بيناتهوم..وقف الشيفور فسونطر المدينة الدنيا خاوية تقريبا شي قاري شي خدام و قليل لي غيجي لسونطر فهاد الوقت المبكر...حل ليهوم الشيفور و هبطو بجوج..هزات عذراء راسها كانو مستفين مقاهي راقية لي كانت غير تدوز من حداهوم هي و ختها ولا صاحبتها عمرها دخلات ليهوم بحكم ثمنهوم الغالي مافييقها من سهوها غير يد قوس لي شبكات يدها..هزات فيه راسها مصدومة اش تيدير هداا!!! والايني الزعامة هادي!! حاولات تحييد يديها ولكن كان حكمها غير هو ماشي بقوة بقاو غاديين تيتمشاو هي غارقة فخجلها حاسة بدفئ يديه تيتغلغل فيديها المشدودة و هو هاز راسو بغرور تيبانو بحال الأب و بنتو بحكم البنية ديالو الضخمة و طولو مقارنة بطولها القصير و بنيتها المتوسطة..حتى جلسو فلاطيراس...جا السرباي و طلب منو قوس يجيب فطور لشخص واحد و قهوة لراسو...
عذراء جالسة تتمنضر: زوينة هاد البلاصة بزاف كنا ديما تندوزو منها انا و ختي و صاحبتي عمرني زعمت ندخل ليها
قوس:تنضن دابا زعمتي
عذراء:شكرا مسبقا على هادشي
قوس:لا شكر على واجب
جا السرباي بالفطور لي كان متكون من اومليت..الخبز..الشوفان..الفواكه..و المرافقات...جا حدا عذراء تيستف ليها الأطباق قدامها و قوس حط ليه قهوتو و انصارف مخلي الكوافورة تتفتح ليها الشهية بفضل الريحة و التقديم...
قوس شرب رشفة من قهوتو قدامو حاليا منضر غيبقا غير يشوف فيه و يسقي عينيه منين مشافهاش لبارح...
يالاه بغات تهز الخبز باش تاكل الأومليت ولكن حشمات فاش تفكرات فاش قالت ليه بلي مبغاتش تفطر و هي تجمع يديها لعندها...
قوس استغرب:مالكي؟نقول ليه يبدلو؟؟
عذراء:لا لا ويلي تهلك النعمة غير هو (حدرات عينيها) حشمانة
عذراء فرحات ياااه تفهمها كان يتصحاب ليها بحال البراهش لي تتعرف غيضحك عليها ولا يردها كذابة ساعة عقلييتو هاربة(عاد عرفتي😑) و بابتسامة هزات الخبز و بدات تتاكل اما هو تيشرب قهوتو مراقبها بعينيه...
عذراء وقوس الجزء الثامن
محتوى القصة
التنقل بين الأجزاء