أحييني بشوقك الجزء 28

مرت الايام وتوالات.. يوم يجر لعندو يوم وأسبوع تابعو أسبوع والاحوال تاتغير..

تلماات القلوب.. تصفات الخواطر ومعاها هدات النفوس وارتااحت..

مر شهر بالتمام والكمال.. وجااب معاه فصل لصيف بشمسو الحارة و البهجة والمسرة..

شهر السفر والتفوااج، شهر العطل والراحة والأهم شهر الاعراس والمناسبات السعيدة..

لكن أحلاهم عند عائلة اليوسفي هو عرس مولات القلب الطيب والروح الصافية.. عزيزة ..عروس ولعند حبيبها قريبة تزف ..

مولفة هي اللي تاتوقف على هاد المسائل وتاتفهم فيهاا كتر من احد.. مولفاها بطبيعة انها عزيز عليها تساعد كل عروس فمدينتها فاس لكنها هاد المرة التوتر لاازمها ومتاتعرف منين دوز كلما جبد ليها شي واحد حس زوااجها أو دكرو ليها أنور..

هوما بالمعنى العادي بااش يزيلو التوتر ويرخفو فيها النفس.. وهو بالمعنى الساافل كليا مع أنو متاتفهمش النص من كلاامو لكن قلبها حاسسها أن معانيه ماشادينش طريق زاگية وفيهم إن..

....

ككل صبااح جديد..

تفتح البااب ودخل العساس هااز قفات من التقدية اللي طلباتهم نسيمة، حطهم فباب الكوزينة وخرج كيف دخل ..دخلات نسيمة من البالكو طلات عليهم وفيهم بدات تقلب.. لابسة شوميز بيج خاشياها وسط صاية بنية من الجلد حد الركبة وسبيبيط پلا..

شعرها وصل لنص ضهرهاا وقهوة كحلة فايدها تاتستجد منها نشااطها الصباحي..

حطات الكاس فلاڤابو وجرات التقدية لفوق الطبلة.. خلاتها تما وبدات تقاد فنجان آخر من القهوة على طريقتها الخاصة..

حطاتها فبلاطو صغير لما وجدات وهزاتو طالعة بيه الفوق ولبيتهم دخلاات موسعة بسمتها فورما شافتو على السرير نااعس وعلات حتا صوتهاا كاضحك عليه

نسيمة: اااصباااح الخييير.. الصباح طلع المعگااز

حطاات القهوة ورماتو بمخدة صغيرة حتا قلب وجهو مهدود والنعاس شاد فيه بقوة.. فتحاات ستائر الغرفة مخلية نور سيدي ربي يسطع عليهاا وينورها..

قلب وجهو مرة خراا كاينين وعلى الشميشة هربو جلسات حدات تاتمرر ايدها على ضهرو العاري وبضحكة مشرقة نطقات

نسيمة: حبيبوو.. وانوض خلااص راه غاتعطل على خدمتك ..محمد.. كووكوو

مد ايدو جرهاا راميها حدااه وعليها لواا ايدو كايستنشق عبق رقبتها ومكمل نعااسو برنة ضحكاتهاا

نسيمة: ههه وااش هبلتي راه التسعوود هاادي ايمتاا ناوي تفييق

ببحة خشنة نطق بلا مايفتح عينيه: عييتيني الباارح خليني نرتااح

ضحكاات من قلبها وعليه تاتلوا: هههه باااز لوجهك بااز ..هههه نوض لشغاالك وخليني نوض لشغالي حتاا انااا

رد: حتاا انا شغل

ردت: هي لاااانضتي

بااس رقبتها بقوة وعليها تقلب حاال نص عينو وملامحو ناعسة: ااش هاد الحلاوة تاني على الصباح

تعوجاات بأنتوية وقالت: اصلا اناا ديما حلوة شووف نتاا عينيهم ماالهم

نزل عليها كايتنهد: فيهم الجلالة الحب.. الله يعطيهم العماا

هرباات وجهها عليه غاطرطق بالضحك: ههه نوض تفطر

رد بهيام: مانبداش بيك حسن

ردت: غايطلع لييك السكاار هههه

فشش صوتو وعليها زاد نزل كايبوس ويلعق فينما حب وبغا: فياا السكاار وبااغي حلوتي ..عطينيي حلوتيي

تلواات كاضحك ومنينها مرة ايدو كاتزيد تعلي صوتها وتردد: ههههه محممد.. وااصااافي ههههه حشووومة مي الغالية غاتكون فااقت هههههه اووهههههه

تحل عليهم الباب هي دفعو عليها بسرعة وتجمعاات تاتسد صدايف الشوميز الي فتح وتقاد الصاية اللي طلع..

قلب وجهو كاايزفر لقا نسومة عند الباب واقفة ببيجامة نومها ومعنقة دبدوب ابيض صغير..مازال شاد فيها النعاس وفيهم تاترمش مترددة انها تدخل

نسيمة: صباح النووور حبيبتي

تبسم ليهاا بحنية عااد ضحكاات وتمات عندو جااية تاتجري

سي محمد: تعالي نكملو نعاسنا تعالي عند بااباا الزين دياالي

ترمات حداه معصورة فحظنو ونسيمة بتدمر قالت: اشمن نعااس بقاا فهاد الوقت بااغي تخسر للبنت پروگرامهاا..

نسومة تعالي عندي احبيبتي وخلي باابا ينووض اجي نلبسو حويجااتنا ونديرو حليب بالشكلاط اجي عندي اااجي

هزاتها بحناان وراما بصعوبة طلقات من محمد وبدات فيها تبوس وتمرر يدها الناعمة على خدها المسند فحظنها بأريحية

نسيمة: نمشييو نلبسو لباس الأميرة يااك.. ونشربو حليبة بالشكلاط وحلويات ..ياك الحبيبة دياالي

سي محمد: قهيوة ديالي هادييك؟؟

شافت فيه: آه وانوض خلاص

جبد اديه كسلان: مديها ليا عافاك

بعناد: نووض هزهاا وباراكة من العگز

بدات تجبد الفراش بيد وحدة وتقادو وهو ناض كايتفوه ماجاوبهاش حدو هز الكاس وتليفونو باسها بخفة ففمها ودخل البالكو فحين هي خرجات من البيت لغرفة نسومة..

دخلاتها بالضحك والكلام الزين والمعسل.. حطاتها على سريرها كاتغير ليها پيجامتها بحوايج الخروج وكلما شافتها باغة تكور تنعس تاتبدا برجيلاتها تبوس وتفيق ..

سدات ليها السالوبيط البني فوق بودي بيج وحطات ليها بونية خيط بيضة فشعرها البندقي الناعم...

نفس ألوان لباسهاا ناسقاتهم مع بعضهم حتاا تواتاو بزوجات.. هزاتها ناازلة بيها للتحت لقات الغالية فافت وفالكوزينة واقفة تاتقاد التقيدة وبين شفاهها تاتسبح لله الواحد الاحد

نسيمة: صبااح الخير حبيبتي

باستها وهي تبسمات ببشاشة: صبااح النور يارينات البنااات.. ماشاءالله عليكم اشهاد النشااط تاني على الصباح

نسيمة: ههه لهلا يخطيك علينا امي الغالية.. خلي انااا غانقاادهم علك

ردت بامتناع: لا لا ابنتي غير خليني نيت باغة فااش نتلها

تبسمات: واخا اللي بغيتي

الغالية: سي محمد فاق

شعلات على الما وبركات نسومة على الطبلة : خليتو عاد كايشرب قهوتو تعطل شوية اليوم، مي الغالية مشهية شي حاجة خاصة فالفطور؟

الغالية: اللي درتيها زينة ابنتي

ردت: ندير المحراش اليوم؟

ردت: ياودي اللي عجبك عارفة مايحتاجش نوصي تباارك الله حجاب الله ..صباعك شهد ابنتي شهد

ضكات بخجل: امي الغالية تاتحشميني ههههه

عزيزة: صباح الخير عليكم

ضارو لعندهاا بزوج ونسيمة بميوعة نطقات:

لالة العروسة صباح النور.. كيف صبحتي

توردو خدودهاا من لقب العروس وقالت بصوتها الخافت: عادي الالة الحمد لله

نسيمة: ماشاء الله الوجه منور والعينين تايبرييو هههه علم الله فااش تاضلو توشوشو بالليالي نتي وهادااك بغيت غانفهم

سرطات ريقهاا حشمااانة وفيهم تاضور عينيهاا ماعارفة ماتقول: ا ا انااا.. والو

ردت كاتلوي راسها وضحك؛ احياانا هههه

غوبشات فيها الغالية وقالت: ابعدي من البنت باراكة ماتحشميهااا

نسيمة: كانفهمها امي الغالية ويلي.. هاانتي اعزوزتي سمعي مزيان.. شفتي الزوااج رااه ليه سبع ياام ديال الشهد شهوة منهم.. لعقي وطلقي ليا راسك للنشاط حتاا تگهمي..

حيت غيير غايفوتو دوك السبعيام مكاين غالهندية الهندية الهندية وبشوكهاا مازال

الغالية: ويلي تي بعدي عالبنت اش هااد الكلام

جاوباات والضحك مسيطر على كلامها: وماالي كدبت حشوومة نخبيو على البنت هههه

عزيزة رمشاات تاتستوعب كلامها وبغرابة نطقات: واش الهندية ضروري خاصكم تاكلوها ورا سبعياام؟؟؟ انا ماعزيزااش علياا وحتا الشهدية متانحملهاش

طولات فيها الشوفة وطرطقات كااضحك فحين الغالية فلتات ليها البسمة وقالت:

دوزي ابنتي تبركي هاديك رااه غير تطنز عليك هههه.. غانمشي نصلي اعود بالله من الشيطان الرجيم هه‍ههه

خرجاات مخليا عزيزة بااركة و تاترمش بغرابة فنسيمة اللي عينيها دمعو من فرط الضحك ونسومة غير تاتشوف فيها بفم مفتوح

عزيزة: وااش قلت شي حاجة تاضحك الالة

ردت بصعوبة: نتي هههه هاادي و مافهمتيهاش هههه الشي لآخر كيغاديري ليه هههه

فركات صبعانها بتوتر ونسيمة ضحكاات حتا تفشاات عاد بدات تكمل توجاد الفطور وكل دقيقة تكركر وفيها تشوف بنص عين

عزيزة: لالة نسيمة

ردت: نعاام الحب هههه

عزيزة: كيغانديير فداكشي

ردت: اينا داكشي

عزيزة: وادااكشي الالة.. داكشي اللي كايديرو هادوك المزوجين

طلعات حواجبها: اااه داكشي هههه حبيب القلب ماقالش ولا كيفاش

نفخاات بضيق: مااعرفتش.. واقيلة قال، غير انا كلامو متانفهموش شي كايدخل ليا لراسي شي لااا

نسيمة: ايوا بالسيف اختي ونتي لافيس.. لاگروپات واطساپ.. لاصحابات معامن تناقشي.. كيبغيتي تعرفي اختي؟ وفاش كانجي نهضر معااك فهاد الأمور تاتنوضي حمرة بحالا مانعرف شنو قلت

زفرات بحزن: واصافي الالة راه والله حتا تلفت وليت هاازة الهم لهادشي بالليل وبالنهاار.. ماعارفة لامنين نبداا والا منين نسالي

ردت : احياانا عرفتي فاش تاتوصلي لليلة الحمرااء.. واخا تكوني حاافظة كلشي وعارفااه غاتلفي فالتطبيقي غاتلفي ههه خصوصا لاطحتي مع شي واحد خبرة.. غايتلف مك على القبلة منين جات

رمشات قارنة حواجبها بتساؤل: وعلاه سي انور خبرة

ردت: لا لا اختي مسكين حتا هو بحاالك معارف واالو گااع

نفخاات هازة الهم: ايوا هو ماعارفش وانا معارفاش كيغاندييرو ليهاا

نسيمة: مشكييلة صااافي

عزيزة: اوووف اشداني لشي زوااج گااع انااا

شدات راسها دايخة وهازة هم ماعارفة منين تبداه والا منين تساليه ونسيمة عليها كاضور مرة تقااد الفطور ومرة طلق الفراجة للضحك كلما شافت وجهها المهموم والحزين

نسيمة: واهازاها منين تقالت نييت

تنهدات: هادشي خااصني ندوي مع سي أنور فيه ياك الالة

ردت: اااه خااصك تصاارحيه قولي ليه سيير تعلم اناا رآه خبز ربي فطبگو لامااحيدتيش لياا الصدفة ديال السرواال والله لاحيدتها

حركات عينيها بخوفة: لا لا نحيدهااا لرااسي.. ولكن كيفاش يمشي يتعلم

گلسات تاتشرح من نيتها: يتعلم زعماا فشي وحدة اولا عاااد يطبق فيك نتي

خرجو عينيها وبلا ماتحس وقفات: كيفااش.. باغة غير تعصبيني يااك الالة

نسيمة: ويلي انااا.. بالعمااا اختي

ردت: ايوا كيفاش يتعلم فشي وحدة علاه انا ماشي خطيبتو

ردت: وازعما مسكين باش حتاا هو يعرف

علات صوتها والبكية شداتها: بلاا مايعرف والله ويقرب لشي وحدة حتاااا

حبسات الضحكة بزز وقالت: حتا ااش؟

غوبشات كتر: انا عاارفة ودابة ندوي معااه فهادشي

خرجات عينيها مأيداها: بصح النهاار اللول يمووت المش قوولي ليه يجمع قشاوشو رااه ولااا راجل المراا دابة

بعدم فهم: علاش مال قشااوشو الالة؟

وقفات: ماعرفت سوليه هههه.. زيدي زيدي نتي غاتقتليني غير بالضحك هههه

........

تحط الفطور وعليه العائلة تجمعات من كبيرها لصغيرهاا.. من غير الابن البكر للعم عبد الجليل ..

دوزو الللقمات بالسكات بحال ديما حد مايهضر مع حد حتا سالاو وكلها لشغالو ناض من غير سي محمد اللي بارك كايشرب بنتو الحليب ديالهاا ونسيمة غادة جاية قدامو تاتجمع الطبلة هي وعزيزة

حط الكاس مسح ليها فمهاا وطلع راسو كايعيط

سي محمد: نسيمة.. نسييمة

خرجات عندو هازة پلاطو فين تجمع ماتبقى من الأواني

نسيمة: عيطتي عليا

رد: آه زيدي نخرجو اليوم، نوريك شي حاجة

بسمات: فين غانمشييو ؟

رد: غير زيدي وتعرفي فين

نسيمة: واخا احبيبي نطلع غير نبدل حوايجي ونرجع دغيا دغيا

طلع فلبسها وهبط: وابلا مانوصيك

نسيمة: هههه واخا

بااستو فحنكو حتا ضحك وتبشرات ملامحو عاد طلعات تاتزب لبيتهاا مخلية عزيزة تكمل وهو ناض خاارج لسيارتو.. نسومة بدات بايديها تاتلعب فرحانة فاش عرفاتو غايخرجهاا وهو معاها كايضحك ويتلف الوقت بينا نزلاات نسيمة

.....

جبدات جلابة خفيفة باللون الازرق ملكي مع طالون متلت من الامام وشعرها خلاتو مطلوق على راحتو..

رشات پارفان ورا ودنيها وخدات پوشيط فلون السفيفة السوداء ديال الجلابة وخرجات من بيتهاا نازلة لعندو..

ركبات وعطاها نسومة تهزها: يالله شدي

نسيمة: وافين غادين

ديمارا بعدما خدا ايدها عندو: دابة تعرفي

وقف فالجنب والشارع راقي مكتض بالسيارات مع سلسلة من البوتيكات والمطاعم فكل طرف..

حل الباب نزل وهي مصغرة عينيها وتاتشوف المكان ماغريبش عليهاا بتاتا

فتح ليها هبطاات واولماا طلعات عينيها توسعو وتفتح حتا فمها مبهوضة ومبهورة فالپاتيسري اللي قدامهاا

..جواانبو زهرية اللون مع بابين من الزجاج الغير قابل للكسر واللي على شكل مرآة وفالجنااب فيوزات كباار مزخرفة وبالليل كايشعلو.. فوقو لافتة كبيرة خالية من الاسم لكن جوانبها مزهرة بورود مصطنعة وردية وبيضاء

خلاها على خاطرها تاتشووف والرعدة قابطة قلبهاا من شدة الحماس والفرح.. شافت فيه بعيون تاتبري وقالت

نسيمة: وااش الپيسري دياالي هاداا يااك

شدها كايضحك وللباب غادي بيها: زيدي تشوفي كيف ولاا

عنقات ايدو بسعادة ونسومة فايدها حاضية الطوموبيلات هاوحدة غادة هاوحدة جاية

نسيمة: نااريبلي نسيتييه ههههه

رد بابتسامة لعينيها: علاش انا نقدر ننسا شي حاجة متعلقة بيك؟ الاشغال سالاو البارح وكنت كل نهار كانسول فين وصلو ونجي نطل عليه بنفسي..دابة كلشي تقاد حتا من الماطيريال ديال المطبخ ولاطيرات وداكشي جبتو.. بقا خاصاه غير السمية.. ونتي

ضحكاات بحمااس غايقتلها: واااحلو نشووف

غوبش: اري شي بوسة

جبدات فيه عينيها: محمد ويلي

رد: لدااخل الساافلة ماشي هنا

نسيمة: ههه ايوا فتح هههه نسومتي مستاعدة نشووفو المطلع

شافت فيها كاضحك بتلعتم: آآااه

نسيمة: يخليلي الحلااوة ههه

فتحو وحيد ليها تدخل: يالله بسم الله دخلي برجلك ليمنا

نسيمة: هههه بسم الله

خطات اولى الخطوات للداخل وهي تاتردد البسملة..

غير بدات تشوف فيه وتسكانيه بعينيها بدات الابتسامة كاتختاافي وعيون نسوومة كاايتوسعو باعجاب وقاالت مدهووشة

نسومة:واااو پيينك ههههه باابااا شووف پيينك

نسيمة نطقات بصدمة: اويلي شنو هاادشي

سد ليها فمها والابتسامة على وجهو: الموت كاضور ااحبيبتي

ردت: شنو هاااادا!؟؟؟

قوص حواجبو: شنو ..ماالو ماعجبكش

قالت باغة تبكي: ماال ليزاكسيسواار والطواابل والكونطواار والديكورات غوز ..اويلي والورد والززرابي حتاا هومااا ااويلي

رد بجدية: پاتيسري نسائية هاكاا خاص تكوون.. فكرت مساكن فالطالباات أو شي صحابات هاكا محجبات ولا منقبات گاع لابغاو يخرجو لشي مطعم ياخدو فيها راحتهم يجيو لهادي.. كاين مشروع بحاال هادا فالقنيطرة قلت حتا فالاناسي نديرو واحد غايتمشا ليك من دااكشي "شافها كاطلع النفس مصدومة فيه وقال" حبيبة ياك لاباس

ردت كاتلهت دايخة ومدات ليه نسومة: شداتني السخفة شد غانطيح البنت

غززات سنانها مفقوصة وفيه شاافت: بغيت ليك حبة.. ولكن الهضرة ماشي هنا احبيبي بلاا مانفرج فيك النااس

قرن حواجبو بعصبية: بااغاه مخلط متلااا ؟؟ ديك المرة لقيت وااحد مصرقك هاد المرة شنوو ..سحابليك نسييت

ردت باندفاع: ونتااا دااك المحل عندك دييني متلاا.. يااااك كلووووو عيااالات هاكاااا هاكااا بحااال النمل عمري دويييت؟؟؟ عمري قلت ليييك شي حااااجة

رد: انااا خدمتي مع العيالااات وحتا الرجاال ..وعندي شكوون يتكلف بييهم كانبقااا فالبيرو ديالي مقاابل السلعة والحسااباات.. مااشي بحاالك پاتيسريي

وسعات عينيها بتفاجأ كاضحك: اهااا دابة وليتي تاضحك على خدمتي يااك الشريف؟

رد: فين ضحكت انااا گلت..

قاطعاتو مغزفة: صاافي عرفتي شنو.. لهيه نتفااهمو لهييه

زاد خنزر ونسومة قارمة فمها وفيهم مركزة وتاتشوف فينما يهضر شي حد ضور ليه وتبع شنو كايقول

سي محمد: كيفااش نتفااهمو فاش بالسلاامة

ردت: على الشوار الي متاتشااورنيش ..وااش انا قلت لييك باغاه نساائي ؟؟؟ سولتيني

سي محمد: اذاا بااغاه رجاالي.. لاقوليهاا ليااا فوجهي نيشااان بااغة الرجال هنا داخلين خارجين ونتي تاطيبي ليهم وتوجدي ليههم مايحنجرو مااحشمتييش

ردت: ايييواااا هاادي هي خدمتي اسيدي عجباتك هوكااك ماعجباتكش ضبر رااسك

خلااتو وزادت مع الطريق كتتبرگم وتغزز سنانها بالفقصة..

خدات أول طاكسي جاها فالطريق عطاتو العنوان بالغوات حتا تفعفع من بلاصتو وكسييرااا بلا ماايحس وهي ربعات ايديها وصدرها طاالع هابط معصبة غير مع راسها ..

لحظات وكان موصلها للڤيلا اللي ماكانتش بعيدة بزاف على الشاريع.. خلصاتو وهبطاات داخلة للفييلا وللكوزينة دخلات تشرب وتبرد عافيتها بالما

شافت فيها عزيزة اللي كانت باركة على طاولة المطبخ تاتقطع الخضرة للغدا وقالت مبسمة بهدوء

عزيزة: على السلامة الالة.. كيدازت الخرجة

ردت مغزفة: كي الزفت

قلقلات داك الكاس كاامل وبركات حداها كاتغلي ومخنزة فالحيط اللي قدامها

عزيزة: علاش مالكم الالة ياك لاباس؟

شافت فيها تاضحك بالفقصة: لا لا واالو

.غاالپاتيسري اللي طوول عمري وانا تانحلم بيها وكنت جاامعة ليه فلوس صحيحة نييت.. ناض الالة سي السيد منو لرااسو وبلا مايشاورني ردهااا پاتيسري ومقهى نسائية

غوبشات بعدم فهم: كيفااش نسائية؟

ردت: دياال العيالات

عزيزة: علاه كاينين قهااوي تاع العيالات بوحدهم

بنفرة قالت: ماانعرف لييه.. انا بعدا فقصني فقصني فقصني

عزيزة: غير بشوية الالة بلا ماتعصبي رااسك

نسيمة: ومن فوقها هو عندو محل عامر غيير بالعيالات هالصفرة من هناا هالبيضة من لهيه هالسمرة من هناااك.. عمري دوييت؟ عمري تشكيييك ولا شي حاجة؟

رمشات بحزن فالخضرة اللي تاتقطع وقالت: تانا الالة.. ديك الخطرة فاش مشيت عند سي أنور باش ندي ليه وراق العقد لقيت الكوميسارية عامرة بزاف بالعيالات واكتريتهم معمرات وجهوههم بقوة الماكياج

ردت كاتحلف وعينيها قدامها: اناا دايرة فيه التقة وسااكتة واخا مربج وسط العيالات كانقول ماعلييش خلييه لا حشوومة ندوي

ردت: بصح هاديك خدمتو مسكين ..واخا بقيت غاكانشوووف فيهم وماعجبنيش الحال يبقا غادي جاي حداهظ

نسيمة: ولكن غير تاتوصل لنسيمة لااا.. الرجاال الالة ممنووع.. غير هو بلااتي يجي تانا العيالاات ممنوع مالو غاهو اللي يحكم

حركات راسها بالنفي: لا لا انا مانقدرش الالة ويلي حشوومة.. زعما نقولها ليه يبغي؟

ناضت كاتنفخ: نطلع ندوش فقصني فقصني

ناضت بدورها تاتمسح ايديها: انا غانمشي نصوني علييه

ردت: علامن تادوي

ردت: سي أنور الالة

زفرات: شوية ونهبط نكمل عليك هادشي

زفرات: شوية ونهبط نكمل عليك هادشي

بغيت غير نبرد شوية.. حتا عمر ماصونيتش عليه گاع هاد الصباح كونراه تقلق علياا تاني

عزيزة: غايكون قرب يجي من المدرسة الالة ..حتال الجوج قبل مايرجع تاني و اتاصلي بيه

ردت: داكشي اللي غاندير..

طلعات وعزيزة بلا عگز هزات تليفونها وخرجات للجردة بركات على الجليسة اللي تما ودوزات رقم تليفونو..

تسنا بارتباك حتا تفتح الخط وجاها صوتو الخشن وقوة الضجيج حداه

انور: فين الحب

عزيزة: ا سي أنور شنو خبارك

رد: هاانية ملي سمعنا صوتك الزين ديالي.. نتي شنو خبارك

نزلات عينيها كاتحنحن: الحمد لله.. ا واش نتا فالخدمة

انور: آه فالبيرو الزين محتاجة شي حاجة

ردت: لا لا.. ا بغيت نسولك على واحد الموضوع مهم

قرن حواجبو بجدية: اها واخا تانجي العشية وندويو

ردت بسرعة: لا لا فالتليفون حسن.. لاشفتك كاتلف ليا الهضرة والله

ضحك حال فمو وقال: ههههه سوولي الحب خودي راحتك

سرطات ريقها بتوتر: دابة.. نتا دابة متاتعرف والو فداكشي.. وحتا انا بحالك والو غير سامعة شي حاجة من عند البنات اللي تايتزوجو وكانديو ليهم الصباح.. كيغانديرو باش حتا نولدو

قرن حواجبو مستغرب: واهي الصرااحة بالرب ماقشعت شي وزة فهادشي اللي قلتي

عزيزة: دابة دااكشي....

انور: ايينا داكشي ؟؟

ردت: واداكشي اللي تادير المراا وراجلها

زاد فقرن حواجبو: عزيزة تادوي على الک*ا يمكن يااك

زيرات فمها بخجل وخدودها توردو: ممممممم

بسم بمباغتة وعلى كرسيه تسرح واخد راحتو فالبركة: اها ماالو الحب ..دوي دوي ماتحشميش موضوع مهم هاداا مهم بزااف گاع

بتردد نطقات: ا ا دابة نتا متاتعرفش بحالي..ياك؟

رد: مكانعرفش لآش

ردت: داكشي

طلع حاجب: شكون گالها ليك بالسلامة

عزيزة: و واغير قول واش بصح ولا لا

ضحك باستهزاء: لااا احبي نتي اللولة اللي غانجرب فيك وايني فااهم شكايدار هههه

ردت بأسى: ولكن أنا ماعارفاش

رد: انا نعلم حبي.. نوريها الطلوع والهبوط والصفارة وكوجااكة.. كلشي بالخوشيباات غير ارتاحي ليا

عزيزة: شنو هادو؟؟؟

رد: داكشي

عزيزة؛ شمن داكشي

رد: الک*اا

بعدم استوعاب لكلامو قالت: علاه فيه الصفارة والكوجاك؟

انور: كلو حلو العمر خااصك غير تسني ديك الورقة وكانواعدك المشية عدك غاتبدل

تزعزع قلبها بخوف: علااش

انور: بالفرحة احبي الفرحة هههه

ميلات رأسها بأسى وصوتها مغبن: سي أنور والله حتا هاد الاياام كلها فاش تاتهضر معايا متانفهم واالو من كلامك

طلع حاجبو كايضحك: واايلي حلفي

ردت: والله.. دابة الصفارة والمصاصة اشمن علاقة عندها بكلامناا مافهمتش

رد: واراه الحلاوة هي فأنك ماقشعتي تاوزة هههه

غتبشاات بحزن: هي غانبقاا ماعارفااش

أنور: ندوزو للتطبيقي احبي ونعلمك كلشي لاازربة على صلااح.. يالله تهلاي

تنهدات: الله يعاونك اسي أنور

قطعات معاه والتشويش مسيطر على تفكيرها من كلامو اللي مافهمت فيه ..

دخلات للكوزينة لقات نسيمة تاتنصب الغدا وهازة شعرها الفازگ بقراسة صغيرة.. لابسة پيجامة بيضة دو پييس سروال مقطن مع بودي حد السرة والپينوار ديالها حطاتو فوق الكرسي تحسبا لايدخل العم أو ولدو باش تلبسو

نسيمة: امضرا دويتي معاه

ردات تليفونها لمكانو: آه.. نعاونك

نسيمة: لا احبيبتي ..غدا غاندوزو انا ويااك للسپا ندورو بالحالة ونديو معانا حتا مي الغالية وماما.. ايوا من تما للطريطور نشوفو الأمور فين وصلات

ردت : واخا الالة اللي بان ليك

تنهدات قائلة: تلت ايام فحياتك العزوبية احنينتي استمتعي.. قبل مايولي يدير اللي عجبو.. مايشااورك ..ماايدير برأيك ..مايسولك فيه ااصلا ولا يعبرك

باستغراب: سي أنور؟

شتفت فيها متعجبة من الكلمة: هاد سي أنور ايمتاا ناوية تحيديها بالسلامة

هزات كتفها: ماعرفتش ..ولفتها الالة

نسيمة: واحاولي حااولي من دابة ..

سدات على الطاجين وضارت تكمل الشي لاخر وعزيزة تاتحاول تساعدها

.....

نزل الليل وتناص وورا العشا كلها طلع لبيتو يرتاح..

نسيمة فبيت نسومة متكية على سريرها تاتقرا ليها قصة بصوتها الحنون والناعم ودوز ايدها على ضهرها وهي تاتأوب مع كل حرف بسبب التعب اللي عاشتو اليوم..

نسيمة: دلفت الى الغرفة وهي تردد.. امل اين انتِ. د، هاقد وصلت يا عزيزتي..

لمعت عيناه من هول مارأى وسقطت الحقيبة من يدك لترتطم بالأرض بشدة..

شافت فيها بنص عين لقاتها نعساات وراحت في سبات.. باستها وغطاتها مزيان بملاية خفيفة وردية ناضت من حداها تاتفوه خرجات من البيت فاتجاه غرفتها ودخلات معاه تزامنا مع خروجو هو من الحمام بصدر عاري وشورط قطني قصير مبين الپروطيز فرجلو..

طلعات نيفها للسنا وهو فيها كايخنزر منينما دازت وتجاهلها ضرو فراسو وخلاه غير تاينهج

تسرح كل واحد بلاصتو وكعادة عند سي محمد لو شنوما كان ماخاصش تعطيه ضهرها ومن اللازم وجهها يكون قدام وجهو واضح.. دارت راسها ناعسة وهو بقا حال عينيه فيها ويشوف.. الشوف مايبرد جوف وعضامو بداو ياكلوه..

عينيه على الشوميز اللي لابسة تاتسارا وشحاال واتاها الكحل ..واش ديما فاش تاتلبسو تايطلع معاها هاكا ولا غير دابة وهي مانعة عليه نفسها؟

الغضبة تاتخلي النفس مشتاقة واللهفة حارقة.. القلب كايزدح والعين متاتعيااش من الشوفة وهي بيه حااسة وكل مرة تلوا على فراشها بأنتوية وليه تقرب ..

تحيد الغطا عليها عمدا لكن بلا مايحس وتهمهم بصوتها الرقيق ومن تنهيداتو تاتعرف لفين وصل بيه الصبر، حتا مابقا ليه صبر

..ناض بارك جر التيشورت نصلو ورماه فالجنب رجع تكا ملاسق معاها وكايتحاك ونفسو الدافية فعنقها كاتلفح..

حطات ايدها على صدرو استشعرت ملمسو العاري وحيداتها فاتحة عيونها نص فتحة وبحرج مزيف قالت

نسيمة: سمحلياا ماشفتكش

بغات ضور وجرها مقرب عندها وجهو وبهمس نطق كاينزل العين لشفايفها

سي محمد: كيفاش سمح ليا.. راه واقلة راجلك انا الحبيبة ديالي

ميقاات بميوعة وصوتها مغنج: سمح ليا اسي راجلي.. طلق مني دابة بغيت نعس

خشا وجهو فعنقها ثملاان وشرع فتقبيلها بحنية: وانا اللي توحشتك.. شنو ندير

شرب الويزة وحيد علياا لهيه

رد بلهفة: باغيك

بغات تبعد غضبانة وهو زاد زيرها عندو: يبغيك الخير واحيد مني باغة ننعس

طلع فيها عينيه منيمهم وصوتو يادوب يتسمع: ماال حبيبتي مقلقة علياا

نسيمة: لا ..علاش درتي ليا شي حاجة

رد: واصاافي الحبيبة ديالي واش انا غانبغي ليك الحاجة اللي ضرك؟

ردت بنبرة معاتبة: نتا قاعيدتك هي قاعيدتك المشكل كيفما كان تاتفوتو بحالا رآه بسييط وعاادي.. ماعارفش شحال هو كبير بالنسبة ليا

اناا

تنهد وقال ساد عينيه: نسيمة هاد الأمر مافيهش نقاش.. بغيتي تخدمي واخا ماختالفناش ولكن حس الراجل مانشوفوش تماا وإلا مكااينة خدمة

تجمعو فعينيها الدمووع ورجعات اللور كاتنخصص: علااش.. يااك النهاار الاول كنتي عاارف خدمتي كيف داايرة علاش دابة كادير ليا هاكدااا.. صبرت وسكتت من البداية ديال زوااجنا وتانقول خليه هو يتكلف ماادام عاارفني كيف دايرة وعاارف شنو بااغة، جيتي تاال دابة وتاتقولي هاد الكلام

رد: داتبة غير فهميني شنوو الفرق يااك الپاتيسري نساائية وغااتكوني نتي الشييف شنوو تغير

ردت باندفاع: شااورتيني؟؟ ولا غير حيت شريتيه بفلوسك عطيتي لرااسك الحق دير فيه مابغيتي ؟

سي محمد: الپاتيسري دياالك ومن غدا نحولو فسميتك ولكن احبيبة..

قاطعاتو: ولكن كادير اللي بغيتي.. بابا اللي شهور وأنا كاانوجد ليه الخدمة ونطمعو فيها شنو نقووليه؟ ولا ياكما ندخلو للقهوة ديال العيالاات

سي محمد: بابااك فكرت فييه وغانقلب ليه على ماحسن غير تهنااي الالة ..حتا ايلا ماعجباتوش الخدمة اللي غانلقا ليه غانخدمو معااياا ونحطو فالبلاصة اللي كان فيها عمي نتي عارفة اصلا كانقلب على شكون يگابل ليا لاكيست

ردت مغوبشة: وانا هادشي اللي مابغاش امحمد باش نتفاداو المشاكل من هنا للقدام مع عمك وعائلتك كاملة، مااكاندويش عليك نتا بالضبط ولكن من الأفضل يخدم معايا انا اللي بنتو بحال كيفما گلت ليه ..جيتي نتا خرجتي ليا هاد الپاتيسري النسائية من الجنب علاش شكون قالك انا باغة نسائية

بسم جارها لحظنو وخدا ايدها بحنية كايلطف الجو ويحزرها

سي محمد: واصافي احبيبتي ديري ليا خاطري غير هاد المرة.. واش بان ليك اناا غانخلي شي ولد المرا يدوق شي شهيوة من هاد الصبيعاات ..بغيتيني نحمااق

هزات كتفها مقلقة: حمااق

رد كايضحك: ومانبقاش فيك

ردت: نتا رااك تحمق قبيلة وتجيك قليلة

باسها ففروة رأسها ونزل باتجاه رقبتها وهي البسمة بدات تبان على شفايفها واخا عيات فيها تحبس

سي محمد: باراكة تحماقي عليا غير نتي هاداك هو الرباح ههه

ردت: ممم دوخني تااني بهاد الهضرة

ضحك ورا مادارها تحتو وعينيه بشهوة فيها تعسلو: كاانموت عليك المدوخاتي

مد يدو للضو طفاه وتحت جنااح الرغبات طار وطيرها وراه ..

صبح الصباح وصبحات نسيمة مع لالة العروسة وحورية فالسپا كايتقادو وعلى الحالة يفوجو..

من السوان فيزاج للماسكات للماساج وللحمام مع لاسير من الف الى الهمزة تاشعرة مابقات فيهم كادور .. خرجو كايبريو والضحكة مطلوقة كلماا ضربو طلة على مشية عزيزة المفرگة بحال البطريق ولا جلدها حمر كايبري لكن المنطقة الحساسة ماقدراتش تصبر عليها وكل دقيقة تهرنن.. بركو فالصالون يقادو الشعر كل وحدة خدات كرسي وطلبات اش بغاات

نسيمة: عزوزتي.. بالصحة الكبيدة

ردت بنبرة خفيفة وحالة رجلبها فالبركة باش الحريق يخفاف: الله يعطيك الصحة الالة

نسيمة: داابة تولفي الحبيبة.. ياك اماما

ردت حورية: ايييه دابة يجيك عاادي..غير هو لافوت منك تي اللي عمرك حيدتي الشعر من تماا كونراه غايجيك ساهل

نسيمة: لا لا بالعكس اش بغات تحيدو ..هاهي دابة ديك البلاصة لقات لونها من لون لحمها ماكحلة مازرگة والغازواغ تاتخرج عليها وصافي ايلا ماعرفتيش ليهاا

ردت الكوافورة الي تاتصيب ليها وضحك على حديتهم: عرفتو كون غير ديرو البنت دير الليزر غاتهنا منو فخطرة

عزيزة: ناااري الزوااج صعييب الالة

حورية: يااتي لاسير ودارت فيك هاد الحالة الصح شنو غاديري فيه

ردت نسيمة كاضحك وهي وسطهم حماارت: غاتعاود تسخف هههه تسحابيني ماعقتش بيك ديك المرة را غير طمرت وصافي

خرجو عينيها وفيها شافت: شنووو ..ويلي وسي محمد

ردت: ماانعرف.. المهم كايوصي على خطيبك مايجيش عندنا للڤيلا صاحبو وعارفو شكايسوا هههه

قالت الكوافورة: هي خطيبك كايطير

ردت عزيزة على قد فهامتها: لاختي خدام مع البوليس

نسيمة: ههههه

الكوافورة: اييوا ياختي الله يكون فعوانك.. البوليس قااصحين وشدااد عليك بالصبر ولكن الى لقيتي ليه الكود سعدااتك بييه

عزيزة: فاش قاصحين اختي مافهمتش

ردت نسيمة: زعما صحااح بزااف "حولات عينيها للكوافورة وقالت بصوت منخفظ" اختي غاتخلعني لينا البنت حتا طج ليلة الدخلة متاتشوفيهاش كيكاترعد

الكوافورة: هههه ايسكيوزمي الزين غاضاحكة

نسيمة : واتهلاو لينا فلالة العرووسة

ردت المسؤولة عليهم؛ هاااحنا امدام اليوسفي اللي حبات خاطرها نديروه حتا من ضفارها غانردوهم كايشعلو.. ايمتا العرس بعدا؟

عزوزة: بعد غدا اختي.. ماشي زربنا الالة

ردت نسيمة بطنز: تاتسوليني اناا هههه واحربووش تقوليها لخطيبك لاماا يسنيك على ديك الورقة بزز منك ويديك وراه بلا عرس بلا سيدي زكري.. اللهم تبتي ماحدو صابر

عزيزة: واانا غااقلت

نسيمة: تانا غااقلت هههه

كملونا كلامهم ضحك وتقشاب وقصارة نسائية ..قضاو نص النهار تماا حتا من الغدا طلبوه اومپورطي وكلاو تماا نيت..

خرجو وحدة ورا وحدة الزين كايقطر رغم أنهم ديما مقادات بحكم نسيمة عزيز عليها تقاد حالتها وديما دور بيها فالسپا على الأقل مرة فالشهر وضروري من الوناسة بمها وعزيزة

.....

وصلو للڤيلا مع غروب الشمس غير هي وعزيزة فقط مها لدارها رجعات..

لقاو الغالية بصينية اتاي والحلاوي فوق الطبلة تاتسنااهم هي وفيروز اللي تاتقلب عينيها وتميق لكن صوتها متايخرجش وحد متايتكلم معاها ..

الغالية: على سلاامتكم ههه ايوا فوجتو

دخلو كايسلمو عليها ونسيمة قالت: بقات بلاصتك قدااش امي الغالية كون غير قبلتي تمشي معانا

ردت كاضحك: اش بغيت ابنتي داكشي فهاد العمر الله يهديك ههه باراكة غير نتوما اللي تابعكم لمن تزوقو

عزيزة: اناا الالة غانمشي نرتاح شوية

ردت مبسمة: واخاا احبيبتي سيري .. مي الغالية محمد الفوق؟

ردت ببشاشة: ايه ابنتي عاد وصل وطلع يطل على بنتو..

بركان فجنبها كاترتاح: ايوا صافي حتا ينزل.. سخفت هههه

الغالية: هااكااسك ريحي فيك النفس راه غدا غايدوز علينا طويييل وعامر

نسيمة: دويتي مع الطريطور ياك امي؟

بركو على صينية اتاي كايتكلمو فموضوع العرس ويتناقشو فيه حتا نزل سي محمد بملابس بيتية هاز بنتو و سابقاه ريحتو مخلطة بباندوش وشعرو بفزوگيتو رادو اللور

حنحن بصوتو الخشن ومن الباب قال: السلام عليكم

ردو عليه كلهم ونسيمة ناضت تهز من عندو نسومة والضحكة ففمها

نسيمة: الحبيبة ديالي توحشتيني ياااك ههه

بنص تبسيمة طلعها وقال: بالصحة

ردت بخجل: الله يعطيك الصحة

جلسات جنبو والغالية كبات ليه كاس اتاي: خود اولدي ..كون غير اتاصلتي بأنور حتا هو يجي شحال هادي ماشفناه

نسيمة: غير قرب العرس هو يغبر ههه

رد بجدية: مبرزط مع الخدمة الحاجة باش يلقا كيفاش ياخد كونجي ..الله يحسن العوان

نسيمة: امين

الغالية: ايوا اولدي الله يسهل عليه يسهل عليه ماصعاب

رد: اميين

شاف فزوجتو المصون سكاناها بشوفة خاترة وتحنا عند ودنها قائل بينو وبينها

سي محمد: لالة زينة وزادها نور الحمام

ضحكات عاضة على شفايفها: قول تبارك الله ههه

رد: تبارك الله

تبسمات فصمت وهو عينيه كافيين يوصلو الكلام اللي بين وسط قلبو محبوس

..البركة حداها حلات وكل مرة ينزل شفايفو وبيناتهم يدوي وفيها يتغزل حتا تفلت ليها الضحيكة وتقلب عليه وجهها بخجل والغالية هازا نسومة ومبتاسمة برضى فالشوفة فيهم..

نزلات عزيزة سلمات بفمها وبدات فالطبلة كاتجمع .. وقفات نسيمة تاتساعدها نقاو اللي خاص يتنقا وفالكوزينة بركو كايوجدو العشا ومونسات بالكلام والحتيت

نسيمة: غير رخفي النفس وماتهزيهاش منين تقالت كلشي غايدوز هو هاداك

ردت ببال مشوش: هاني راخفاها الالة.. واخا ماشي لخاطري

تبسماات وبنبرة حنينة نطقات كاطمأنها: عااادي، كلنا دزنا من هاد المرحلة وهاحنا توالفناا احبيبتي

عزيزة: يكون خير الالة ..بغيت نسولك

نسيمة: ههه سولي

ردت بفضول: شحال ونتي مزوجة دابة

صغرات عينيها تاتحسب: جاية لشي ربع شهور خمسة ههه علاش

ردت: مفاهمة بزاف نتي وسي محمد؟

تنهدات براحة من أعماقها: الحمد لله ..النقاشات ولابد منهم ولكن الحمدلله كانقادو امورنا ..عاد بدينا

عزيزة: وتتبغيه

نسيمة: معلوم ههه علاه عاد غانعرفو ههه .. محمد راه كان سند حقيقي فحياتي ومن الصغر.. ودابا زدت تعلقت بيه كتر وكتر

بسمات بأمل: الله يخليكم لبعضياتكم الالة.. ياربي حتا انا حياتي تكون فحالكم

نسيمة: لا اعزيزة، نتي ليك حياتك الخاصة ومشاكلك الخاصة وحنا مختالفين عليك عمرك تقارني بين حياتك وحياة شي واحد آخر، كلها وشنو عطااه الله وكيفاش كايتصرف مع داك البلاء.. اللي خاص يكون بحال بحال هو الصبر والعقلانية فالتصرف.. يعني تخدمي عقلك وماتخليش للشيطان منين يدوز ليك نتي وراجلك

ردت: الله ينجينا الالة

نسيمة: ايوا هاكااك، راه كلما عطا واحد فيهم ضهرو للاخر تاتخليو للمشاكل والخلافات فين تكبر.. هادي سي محمد كان قالها ليا

عزيزة: انا خايفة الالة غير سي انور مايكون بصح باغيني للزواج.. أولا انا مانقدش بيه

ردت: ياك قصد الباب وجاك نيشان؟ ايوا راه كلشي واضح ..وعرفتي ايلا كان متاقي فيك وجه الله راه ماعندك مناش تخافي .. شوفي غير انا

الشهراين اللولة من زواجنا بان فيها العجب ..وهو خدام فخدمة عامرة غير بالعيالات واخا حتا الرجال كاينين ولكن النسبة الأكبر نساء، وغير الشوفة فيهم تخليك تسها

عزيزة: ولايني سي محمد معروف عليه مكايسلمش مع عيالات و ماكايهز فيهم حتا العين ايلا بغا يهضر

نسيمة: عاارفة.. وواخا هاكاك مشيت عندو شحال مرة على غفلة وكاندير السبة بأي حاجة باش نشوف التعامل ديالو كيف داير ..لكن لقيتو بصح ماكايهزش العين، باش مايتغرش ويزين ليه الشيطان شي فعلة اللي حرام.. واخا هاكاك بقاز الوسواس مسيطر عليا.. وليت كانقلب تليفونو نقلبو فين مشا فين جا نمرض فراسي ودمااغي غير هاكاك وبلا واالو

ردت بحزن: ولكن علاش الالة واش متاتعرفيش سي محمد كيف داير؟

تنهدات: فالزواج تتعيشي شعور اخر اعزيزة.. عرفتي گااع المشاكل اللي فايت سمعتي من فم هادي وهادي تايرجعو عليك وتقولي ياكما هاد الفعلة غايديرها معايا راجلي.. ياكما حتا هو كايدوي مع شي وحدة فالواطساب بحال راجل فلانة.. ياكما كاتب عليها سمية راجل بحال راجل فرتانة.. ياكما داير علاقة مع شي وحدة وكايشي عندها بحال راجل هاديك لخرا

ياكما ياكما ياكما..

بوحدك تاتمرضي ولاقدر الله بأفعالك نتي تادخلي ليه لدماغو افكار الخيانة وتوريه كيفاش يدير بلاماتعيقي براسك.. ديك الساعة وفكرها يامن وحلتيهااا

عزيزة: الله يحفظ

نسيمة: اييه.. وايني مول النية عمرو يخسر.. سيري بهاد النية اللي فيك اعزيزة وعمممرك تهزي شي حاجة من حوايجو على أساس تقلبي على شي حاجة نتي ماباغاش اصلااا تعرفيهاا..

بغيتي تبقااي مهنية.. ديها فراسك وفمسؤوليااتك والواجبات ديالك ودارك.. الشي لاخر خليه على الله راه كما تدين تدان.. والشيطان تايحضر خاصو غير بيمن يبداا، ماتعطيهش شنو بغا حيت فالاول والاخير المرض غايرجع عليك نتي

تنهداات كاتفكر فكلامها وقالت: إن شاء الله الالة.. الله يقدرني نفرحو والله ييسر لينا

بابتسامة: امييين ..نوض اناا نغسل هادشي ياك الديسير وااجد؟

هذه الحياة.. لم تأتي على مزاج أحد

‏سنعيشها بحلوها و مرها ..سعادتها وحزنها

‏ .. لذلك لا تؤلموا أحدا

‏ فكل القلوب مليئة، بما يكفيها

......

إشراقة شمس جديدة.. نورات على ڤيلة اليوسفي وبيها بداو مرحلة جديدة من تنايا احدات عائلتهم..

وسط الدروج وقفات الغالية ورا مكانت هابطة منهم بقميص مورد طويل ومضمة مدهبة مع فولار بيض والضحكة مزينة ملامحها العجوز..

ضرباتها بزغروتة طوييلة وصلات حتال عند نسيمة اللي قدام مراية بيتها واقفة تاتلبس حلقات مدهبين..

قفطان احمر طويل مطرز بالاسود وعلى خصرها مضمة باأحجار براقة غالب عليها اللون الاسود ..طالون بيج متلت من القدام وماكياج خفيف مبين النظارة اللي فوجهها وشعرها خلاتو مسرح ومطلوق للوراء.. خرجات من البيت هازة ساك اسود طويل وقفطانها من الامام دخلات لبيت نسومة بابتسامة مشرقة، لقات سي محمد بالكومپلي الاسود تاعو هازها ورا مالبسها قفطانها وفالتليفون كايهضر الشي اللي خلاها تخفظ صوتها وتقول كاضحك

نسيمة: هاني جييت ههه ياكما تعطلت عليكم

نسومة مدات عندها ايديها كاضحك: ههه نسيييمة

شاف فيها بنص عينو وهبطهم طوول على جسدها.. خدات من عندو نسومة غمزاتو كاضحك وخرجات مخلياه يكمل المكالمة ديالو ورا ماتبع خيالها حتا غابت على شوفتو وحنحن بصوت خشن

سي محمد: ايوا شدرنا دابة نتلاقاو تماا؟

رد أنور: صافي مشاات. ياك نعول عليك الكوافور على حسابك

رد: اودي غازيد حتال نهار العرس عاد غاتبدا تقلب على فين تحسن

تنهد وزاد كسيرا فالطريق: مية مطرقة فالراس غاخليها عالله وصافي

سي محمد: ديك الساعة اجلو حتا تفك امورك

رد بعفوية: بغيتي يطرطق فيا شي عرق حابس *** غير بزز وتاتگوليا اجلو

رد: ههه لا حول ولا قوة إلا بالله

قطع معااه ونزل هاز الفيسط فايدو.. لقاهم قدام الطموبيلة واقفات فتح ليهم الباب الغالية حداه ونسيمة ركبات اللور.. ديمارا مبسم وقال

سي محمد: للصالون نيشاان ياك

الغالية: آه اولدي نطلو على لالة العروسة واش وجدات ههه. نتا سير جيب صاحبك ومن تما ندوزو للقاعة

نسيمة: غاتكون مازااال ماسالات

الغالية: ياك صونيتي عليها؟

ردت كاضحك: من قبيلة وانا شادة معاها الهضرة فيما دارو ليها شي عجب تاتمسحو حتاا نهضت فيها عاد خلاتهم يديرو خدمتهم ..أما كون عولت عليها غاتقوليهم يديرو ليها غااالكحل وصافي حيد هههه

الغالية: هههه الله يحجبهاا وييسر ليها يااربي

نسيمة: امييين، تستاهل كل الخير مسكيينة.. حتا راجلها عاطيها الحرية دير اللي حبات خاطرها وتفرح بليلتها كيف بغاات.. واخاا طلي وجهها كامل

ميقات وهو طلع فيها الشوفة من المرايا فاهم المعنى عليه وبلا عگز جاوب

سي محمد: مزيان نيت اللي فكرتيني.. نعلمك من هنا كيفما شفتك تبقاي تزيدي شي حاجة فداك الوجه نتفاهم معاك

غوبشات بانزعاج: الله يستر لا عرسي لا عرس ختي حشومة عليك

طلع حاجب؛ هي كنتي نااوية امدام وانا خسرت ليك التخطيط

ردت: كون كنت ناوية گاع مانلبس فالفيلا من الاول نقولك غاادة نوجد فالصالون مع عزيزة وديك الساعة ندير ماابغيت

الغالية: أستغفر الله العظيم

رد بعصبية: اهااا وفااش نلقااك راسمة ليا طعريجة فداك الوجه حتا انا غاندير مابغيت

ردت: لا شديتيني قبل مانوصل للقاعة غير ديير

الغالية: ياودي الله يهديكم واش غاتخاسمو على شوية السبايغ

جاوباتها نسيمة كاتغبن: ماخلاتيش نديرو فعرسي ودابة تاني مابغااش فعرس ختي ماشي حشومة امي الغالية

سي محمد: فات حشومة لهيه وماغاديريهش بلا مانتنيرڤاو على الصباح

ردت ونسومة فايدها تاتشوف فيها بفم مفتوح وضحك على خصومتهم

نسيمة: لا غير تنيرڤا خاصااك ليا غير السلة انا عارفة

الغالية: لا حول ولا قوه الا بالله غالي بغا يطلع معااكم.. سي محمد اولدي شنو فيها ايلا....

قاطعها بإصرار على كلامو: مكاينش نقاش الحاجة المكياج غايجبد ليا غير المشااكل سكتت على الشعر وعلى هاد اللون اللي لابسة باراكة ماتزيدش فيه

نسيمة: شفتي امي الغالية شنو تايدير ليااا

سي محمد: لااا هي لااا

ردت باندفاع: گعلاااا نييت انا اللي مابااغاش

سي محمد: وااهاني دويت

قلبات عليه وجهها وهو ركز فالطريق حتا وصلهم لباب الصالون.. نزلات الغالية كاتستغفر الله بغات تفتح نسيمة البااب لكن سدو وعندها ضار مطلع حاجب ونطق بصوتو الخشن

سي محمد: اش قلت ؟

نفخات بضيق: وافهمناا اوووف حل هاد الباب

رد: اووففف؟؟

نسيمة: واصافي حل الباب

بسم: اري شي بوسة بعدا

غززات سنانها قائلة: فهاد للحظة ماكرهتش نتلاح على ديك اللحية و ننتفها ليك زغبة زغبة

حكها بايدو مصغر عينيه: لقيتيني نيت عاد غاندوز عند الكوافور هي واقلة نطيرهاا حسن

خرجات عينيها وهزات فيه صبعها بتهديد: حربوووش وتحسنهاا.. والله وديرها امحمد حتااا وجهي ماتبقاش تشوفو شهر حتا تعاود تنوض

ضحك: السلامة ياااربي ياك عاد بغيتي تنتفيها الطوندوز حسن

نسيمة: رااه دويت والله وحسنتيه حتا نتفاهم معااك.. حل الباب

سي محمد: هاهو حاالو غابشوية

ردت: هاني دويت والله يعميها ليك

هبطات سادة الباب وللصالون دخلات عند عزيزة والغالية وباقي الكوافوراات تماا

نسيمة: واحد السلام عليكم

ردو عليها وعزيزة بابتسامة شافت فيها من المراياا

عزيزة: كنت كانتسناك الالة تعطلتي عليا

نسيمة: سمحي ليا احبيبتي ..فين وصلتو شفت وجهك بااقي ماساليتوه ههه

جاوباتها الكوافورة اللي تاتقاد ليها: سالينا الشعر وشدة الفولار دابة المكيااج اللي بقا وغير شي ساعة ونساليوه

نسيمة: خودو راحتكم المهم النتيجة طلع زوينة هههه.. مي الغالية دوزي يقادو ليك حتا نتي

الغالية: لا لا ابنتي اش بغيتو هههه غير بالصحة خليتو ليكم

نسيمة: اللي بغات خاطرك

بركات مسرحة الرجلين وتتقاد فالمراية وجاتها وحدة من الكوافورة من اللور تاتمشط ليها شعرها وبابتسامة نطقات

الكوافورة: ايوا امدام اليوسفي شنو حب الخااطر

ردت بعد تفكير: واهي فالصراحة شعري بغيتو هااكة مسرح ..ولكن بالنسبة لوجهي بغيت شي ميكاپ زوين عافاك يجيني مع القفطان

راك عارفة

ردت: بغيتي شي حاجة مضخمة ولا غير خفيف

نسيمة: لا لا مضخمة نيت عافاك

ردت: ايااه هي اللولة ههه

ضحكات الغالية فسرها تتردد لا حول ونسيمة بريق من العناد ترسم فبؤبؤ عيونها وتطلقات للكوافورة دير مابغاات

عزيزة: سي أنور غايجي لهنا هو اللول يااك الالة

ردت: آه غايجي هو ومحمد.. خليتهم مشاو للدار يمكن عاد غايحسنو ويقادو حالتهم حتا هوما

ردت: هي غايتعطلو؟

نسيمة: تسحابيهم بحالنا.. هادوك نص ساعة تايوجدو فيها كلشي من الدوش للبس للتأنتيك هههه حنا اللي مكانحشموش

الكوافورة: العروسة اختي هي اللي تفشش وتعطل لاكانت غاتسالي فربعة السوايع دير تمنية

عزيزة: ويلي على تمنية وايلا مابقاش بااغي

ضحكو مجموعين وردت عليها احد الكوافورات: ههههه يفرط فالحلوة مالو حماااق

نسيمة: لا لا هادي هي اللي مايديرش سي الكوميسير غير تهنااي ههههه

....

مرت الساعات بسرعة..

وقفات سيارة سي محمد قدام باب الصالون ووراها سيارة انور مزوقة على أتم وجه، نزلو بجوج بحالا بجوج بيهم عرسان مأنتكين على الحالة وكايضربو على الشعاا..

الكومپلي يا فخامتاه التحسينة مقادة واللحية مطراسية الوقفة همة وشاان والنخوة يا سلام..

غير فولة ومقسمة على جوج أناقة وفخامة وحدا بعضهم وقفو كايقادو صدايف الشوميز ويتناوهم يخرجو

انور: شاداني الخلعة الساط مانعرف ماال ****

رد عليه محمد ببرود: غادي للحبس برجليك وفمك محلول من الفوق.. اش بغيتي يشدك الروماتيزم

نطق كايأكد عليه: العدول وصل بعدا ياك ؟

رد: كلشي هو هاداك غير ارتاح ..واخا كان عليكم تفضيو هاد الموضوع يوماين قبل العرس كلا يسني وهالعقد عندك مهنيين من جيهتو

رد كايزفر والرعدة شاداه: ماغانصبرش الساط مغانصبرش

سي محمد: عارف راسك سلگوط

أنور: عارف *** سلگوك.. بحالا تعطلو لا؟

رد: داكشي علاش سماوها عروسة..غير تسناا باقي ماغاتخرش دابة

أنور: نكمي شي گوارو ؟

طلع فيه حاجب: تبت لا؟

أنور: عاود صوني عااود

رد: باش تعاود تقطع عليا بحال اللول ياك ..تبت هاهوما غايخرجو مالها غاتهرب

أنور: هاهو ساكت..تاوالله تانكمي گوارو

خنزر فيه: أنور

ضار ممسوقش ليه فتح الطوموبيل وهز منها باكية وبريكة ..سي محمد ضار مقابل معاه معاجبو حال

سي محمد: وااش من نيتك باغي تخسر الح*** كامل

عاد بغا يشعلو هو يتفتح الباب بلا مايشعر جمد متبت فيه الشوفة ..تلجم لسانو مع خروجهم وعينيه كايطلعو فحبيبتو وينزلو ومحمد كدالك ضار بفضول حتا نطقو بزوج بنبرة صدمة وعيون مجبدة على واسعها

انور: عزيزة ؟؟

سي محمد: نسيمة؟؟

بقفطان ملكي بيج ومدهب تألقات لالة العروس.. فولار ابيض حريري بشدة خفيفة ونازل بشكل مائل لكتفها اليمين مع طالون ابيض عالي قليلا وتحت القفطان مخبي، عيونها للأسفل محدورة بخجل والماكياج الناعم زادها جمالا وجاذبية

.. عكس نسيمة اللي بانت أنثوية اكتر وغير أحمر الشفاه بلون دم الغزال اللي على شفايفها قادر يزلزل ويزعزع صلابة قلوب الرجال أو تجبيدة الكحل فعيونها بندقية من نوع آخر

.. سي محمد بقا غير كايشوف تصدم وماتوقع لا أنها تعاند و دير عكس كلامو والا أنها طلع بهاد المنظر.. رمشة من عينيها فيه قتلاتو وحيااتو وشعلات بركان من النااس فصدرو

أنور لاح دغيا داك الگارو عفس عليه كايفرنس ولعندها توجه.. خدا ايدها بحنية مرفوع والضحكة من عينيه بغات تخرج لكن عزيزة ماقدراتش طلع فيه الشوفة مكتافية فقط بابتسامة خفيفة ومتوترة من شدة الحشمة اللي ركباتها

الغالية بدات تصلي على النبي مع الكوافورات اللي خرجو يطلو وهو كايتحسس اصابع يديها الناعمة وعينيه فعينيهااا مباشرة معلقة

الغالية: الله يجعل كلشي مباارك ومسعود.. الله ييسر ليكم ماصعااب والله ينقي طريقهم من الشوك ومن ولاد وبنات الحرام.. رووووووووووري

نسيمة: مبروك عليكم اخوياا

.. مبروك الحبيبة ديالي ههه

ضارت بشعرها للجنب هي تلاقا مع عيونو الصقرية وهاد المرة مخنزر.. غاشافت فيه هو يتم جاي جيهتها مغزف سلتات بالزربة من داك الجنب عطات نسومة للغالية وشدات فعزيزة تتعاونها زعما طلع للطموبيل وتاتحاول تجاهلو

نسيمة: انا غانهز ليك طراف القفطان احبيبة

سي محمد: نسيمة زيدي قدامي

تبسمات ليه ببرود: لا لا غانركب مع عزيزة

زير سنانو ونطق: نسييمة.. زبييدييي قداامي

ردت بنفس طريقتو: غانركب مع عزييزة الحبيب ديالي سير نتا مع مي الغالية ماتعطلووش انا غانركب مع صاحبتي

أنور: هانية اختي غير سيري عاحنا ورااكم

فتحات عزيزة فمها ناطقة بصوت خجول يدوب يتسمع: ا غ غير خليها اسي أنور تبقا حسن نيت باش تونسنا

نسيمة: آه بصح نيت نونسكم فالطريق

طلع صوتو مغزف والغالية بسرعة جات حابساه: غاااتزيدي ولا نجي نزيدك

الغالية: ااويلي أستغفر الله العظيم.. مافيها بااس اولدي خليها مع ختهاا داابة نص ساعة وهاهي حدااك

نسيمة: طلعي طلعي احبيبتي.. الله يعاونكم

ركبات حداها وسدات بسرعة الباب خلات أنور غاكايشوف وشحاال كرهها فهاد اللحظة.. زفؤ ضار شاف فمحمد دار ليه تهلا بايدو وزاد طلع مديمااري مع الطريق ..

الغالية: حنا ماغانمشيوش ؟

زفر وفتح ليها طلع : لا حول ولا قوة إلا بالله

خبط الباب وركب حداها عفط عفطة وحدة حتا تحكو الروايض مع الطريق والتخنزيرة تاتزيد تعقد بين حواجبو

الغالية: الله ياولدي محمد خلعتي ليا البنت فييدي بشوية عليك واه

زاد كسيرا مغزف وماعاجبو حال: هااد الحالة عجباتك الحاجة ..انا نقوول حااجة وهي ديير العكس

خففات صوتها تتبرد السوق: واااشنو فيهاا مسكينة ايلا داارت شوية الماكيااج كلشي داايرو إلا هي حشومة

رد كايلهت بالفقصة: الدنياا مخلطة وزاادتهااا بتخلاط ديك الكمااارة..سكتت على اللبس على الشعر حتاا طغاات.. ولكن أنا اللي كانبوو مخليها فالصاالون اماا لسقهاا حداايااا من اللول رجلي ورجلهااا

الغالية: واحتا حنا شحااال درنا ديال المكياج العيالات راه...

قاطعها مكمل: العنااد كوكان بناادم عارف الله اودي

الغالية: ايوا شغانقولك لا حول ولا قوة إلا بالله

سكتات وهو غير كايزفر مكسيري وطاير فالطريق حتا وصلو قدام القاعة فين المفروض يتقام العرس..

قاعة أفراح فخمة وعاطية للعين .. لقاو حورية و لايطو قدام الباب مع التمر والحليب والدقايقية والنگافات تايتسناوهم..

نزلو العرسان بالزعارت والصلاة على النبي كلاو التمر وشربو الحليب ويدو على ايدها ماتهزاتش حتا دخلو للقاعة و بالضبط لأحد الغرف الجانبية أولا

..نسيمة هزات نسومة فحظنها تتحاما بيها وجنب الطريق تاتمشي لازاد سي محمد من هنا طير من لهيه يمشي من لهيه دور للجيهة لخرا تشها غير يشدها لكن بحال الزواق تاطير وتاتزيد تعصبو..

بركو فجلسة خاصة بيهم والورد فوق الطبلة الفاصلة بينهم وبين العدول وغير اقرب الناس ليهم فقط اللي كانو فالغرفة مع جوج نگافات وحدة فكل جهة

العدول: بسم الله الرحمن الرحيم.. أنور الخالدي ..قابل اولدي بعزيزة بنت عبد الرحمن الوداي.. زوجة ليك على سنة الله ورسله

رد: قا.. احممم "حنحن ولكحة شداتو.. طبطب سي محمد على كتفو وعطاه شرب روا جفاف حلقو عاد نطق بصوت الكوميسير

أنور: قاابل الشريف

العدول: عزيزة بنت عبد الرحمن الوداي.. قابلة ابنتي بأنور الخالدي زوج ليك على سنة الله ورسله

سرطات ريقها وبصوت هامس نطقال: قابلة

العدول: ماسمعناكش ابنتي

رفعات صوتها قليلا: قابلة اسيدي

العدول: على بركة الله.. البطاقة الوطنية ديالكم

نسيمة جبدات ديال عزيزة من ساكها وأنور جبد بزطامو هزها منو ومدوها ليه..

قيد المعلومات الخاصة ردها ليهم وعطاهم الكتاب يسنيو واحد ورا التاني ..بزوج شداتهم رعشة من الاحاسيس فديك اللحظة.. سعادة وتوتر مختلط مع التخوف من المستقبل والتشوق ليه

العدول: سيادنا الله يجعل كلشي مباارك ومسعود بالبنين والبنون إن شاء الله

طلعو النگافات الصلاة والسلام على رسول الله بصوت حااد قوي وعاالي والكل غادي معاهم حتا ختموها بزغريتة وخرجو تابعين العرسان للقاعة ..

عاد نوات تباارك لختها ورفيقة دربها حتا تخطفات ليها نسومة من ايدها ضارت تشوف شكون لقاتو لسقها للغالية ماجات فين ترمش حتا كان زير عليها من كتفها ممشيها قداامو كأنهم غير تايتمشاو

سي محمد: بلا صدااع بلا روينة غااتزيدي قداامي وتسدي داك الفم

بدات تاتحاول تملص منو والخلعة شاداها: طلق مني اويلي غانمشي مع صاحبتي

رد: قداامي قلت

دخلها مع اقرب غرفة فطريقهم سد وراه الباب وحتا تلفتات عاد لقاتها بيت تبدال العروسة

..خنزر فيها بحدة حتا رجعات اللور كاترعد من لداخل لكن الجبهة هي الجبهة ونطق بصوت زعزع جدران الغرفة

سي محمد: اش هاااد الحاالة داايرة فرااسك وليتي شييخة وانا مافخبارييش

ردت مغوبشة وحاضية معاه كلما قرب عندها: علاة ماالي بالسلاامة اش درت

رد: هاااد الخيلوطة كااملة وتاتقولي اشدرت ااشمن لون بقاا مادخلتيهش تمااا

ردت: ايوا حاشاك گالا خيلوطة الماكيااج هادا ..ومن عينيك باانت شحال جا معااياا غير بلا مااتبدااا تعيب فيه

زير عينيه كايزفر وقال: شوفي بلا زيادة فالكلام بلا فريع الرااس غااتمسحي ديك الكمااارة دابة ولا والله لاخرجتي من هناا

وسعات فيه عينيها: اوييلي وااش باغي تشوهني امحمد كيفاش غاانمسحو

دار فجنابو كايقلب: عطا الله الشراوط المهم مسحي.. وتاال الدار عاااد نتفاهمو على هاد العناااد اللي مابغاش يتحيد منك غانتفاهمو مزياان

نسيمة: رس ختي هااداا ومن حقي ندير الماكيااج يااك مكااانلبسش الحجااب اصلا فين الماانع

رد مغزف وشرارة الغيرة فعينيه: لقيتيها مسلكااك ايوا حتا داك الحجاب غاديرييه ومن اليووم

خنزراات فيه: اياااه ماانديرش حتا النقااب لاا

رد: هاداك تال من بعد ونشوفو بلاانو داابة مسحي

نسيمة: محمد حرام عليك

بإصرار: مسسحي

تجمعو فعينيها الدموع وقالت مغبنة: لا نتاااا زدتي فيه حراام عليك عرسي اعبااد الله وماخليتينيش ندييرو وسكت دااابة عرس ختي كلشي فرحاان كايضحك ونتا بااغي تهجرها فيااا

رد: ساليتي؟ وامسحي

ردت بعنااد: ماماسحااش

سي محمد: نسيمة الله يرضي عليك بلا ماتزيدي تشعليني.. ديك الخيلوطة غاتمسح وداابة ايلا بغيتي تحضري لهاد العرس.. مابغيتيش سوقك هادااك

نسيمة: وامانقدرش نمسحو رااه مااط

غوت بنفاد صبر: ماااط فيزيك سيوونك غاتمحسيه ولااا نجي نمسحو ليك انااا

ردت: والله متايتمسح رااه ماط زعما خااصاه 24 ساعة عاااد ممكن يتحيد

جمد كايشوف فيها بشك وضار هز فولار وتم جاي ليها كايتحلف: ناري ويطلع كلامك بصح قفرتيهااا

بدا بالعكر اللي جننو بكترة مازال برز شكل شفايفها ولونو القااتل خلاه يتشهاا كتر مايتعصب.. ترما عليه بعدما صبرو تقاداا مباشر بقبل عنيفة ملتهفة حاولات تسايرو فيهم وتمتص غضبو من خلالهم ..حيد كايدوز عليهم لسانو ورجع مررد عليهم الفولار لكن ماتحيدش.. سرطات ريقها وهو خنزر ورجع جرب بقوة حتا غوتات ورجعات اللور مخنزرة فيه

نسيمة: لااا غيير جيب كاغيط حرش وطيرهم گااع نتاا

تم جاي ليها مكره وهي راجعة اللور بخوف: وااش من نيتك شهاااد العجب حاااطة

نسيمة: رااه قلت ليك ماتايتحيدش ااش ندير

رد: درتبها بلعااني يااك!؟؟

خرجات عينيها بدهول: وعلااش غانديرهاا بلعاني اناا برااسي ماعرفت حتاا سالاات الكوافورة عاد قالتها ..وگاع العراسات كايديرو هاد الماكياج باش مايتخسرش ليهم مع الماكلة العرق هادشي علاش دارتو ليا هاكااا

سكت كايشوف فيها وبرووودة من الاعصاب طلعات معااه حتا تلف مالقاا مايدير..

خبط داك الفولار مع الأرض وضرب برجلو الطبلة حتااا نزااحت على طريقو وقلب نسيمة قفز لكن حر التخنزيرة اللي راسم خلاتها ماتقدرش تقرب جيهتو

..برك حادر الراس كايفكر وهي ساقلة فقنت البيت حتا بدا الباب كايتدق..

ناض مخنزر فتحو فوجه الغالية وبنبرة مشوشة قالت

الغالية: سي محمد فين غابرين اولدي ساعة وانا كانتسناكم؟

رد: ياك لاباس

جات نسيمة من وراه تاتغمزها: مي الغالية عيطات عليا عزيزة يااك

ضار ليها مخنزر: غاتكمشي ولا نزاوطك من داك السرجم

الغالية: ارجوع الله اولدي حشوومة والبنت موحشة تشوف ختها والعرس هادااا

نسيمة: بغاني نبقاا هنا امي الغالية

الغالية: اويلي على تبقاي هناا.. حشومة اولدي وصاحبك اللي من قبيلة وهو يسول فيك..وااا الله يرضي عليك مافوتها غير هاد المرة دير ليا غير خاطري الله يرضي عليك

قلب وجهو كايزفر ويردد بنرڤسة: استغفر الله العظيم.. زيييدي..ولكن تزعزعي من حدااياا ولا تشوفي فشي حد هضرة خراا

نسييمة: مانشطحش؟

قلب وجهو للعصبية: دخلي مكااين خرووج دخلي هنا غاااتقااي حتا يسالي العرس

ردت بسرعة: صافي صافي غاانبقاا حدااك والله مانتحرك

الغالية: واطفيو الغضب الله يرضي عليكم واش جايين نفرحو ولا ندابزو

رد مغزف: شكون خلااك الحاجة شكون.. زيدي قداامي

سبقااتتو ساكتة و فالغالية لاسقة وهو طالق الغوباشة وطالعة ليه النقشة للسطح..

برك حداها بحالا بارك على الشوك باغي غير ايمتاا ينوض وهي فجنبو تاتشوفيه بنص عين وتاتحاول ماضحكش لكن عاق بيهاا ونطق كايتحلف

سي محمد: غير ضحكي داابة ضحكي الحساب من بعد

ردت مغبنة صوتها: واصافي الحبيب ديالي شوية الماكياج شنو فيها

شاف فيها معصب: شوية الماكياج؟؟ بيناتنا امداام كاديريه خفيف عمري شفت فدوك الشنايف حس الحمورية هااكا.. ودابة قدام الناس طليتيه

رمشات بتتاقل كاقلب على ماتقول: واراه واخا يبان ليك هاكاا را غيشوية

حقق فشفايفها الشوفة مصغر عينيه: شداك اللون بعدا؟

ردت: عاد جابتو الكوافورة گاع ماعندي وكونما كان من لون القفطان مانزعمش عليه

رد: وشنو سميتو

بسمات زااعمة تزيد تدوي: من هودا بيوتي نيت خرجو كوليكسيو زوينة غير بهاد الالوان التقال

سي محمد: وفيهم هاد اللون

حركات راسها تاتماطي فمها قدامو: مممم.. عجبك يااك؟

قلب وجهو مطلع حاجب: مخيبوو

ردت: هههه ولاش تاتسول

سي محمد: بغييت..حيدي عليا ماتشديش ليا ايدي

قلبات شفايفها وزادت مقربة عندو: واصافي امحمد اووف

رد: رااه غانوريك اووف شناهي

نسيمة: وماتبقاش مقلق عليا عافااك نتا عارفني مانقدرش على تقليقتك

رد: داكشي علاش كاديريهم غير الزوينة على ختهااا

طبعات على حنكو الملتحي قبلة عميقة وبصوت حنين نطقات: واصافي احبيبي أول وآخر مرة .. من اليوم والله الحاجة اللي مازال تقلقك مانحاديها

قاد البركة وبطرف عينو شاف جيهتها: ممم بصح

نسيمة: واعافاك الحبيب ديالي.. حياتي.. عمري.. نور عوينااتي

تنهد وشاف فيها: كاتقلبي علياا نتكيك على هاد الطبلة لا

عضات على شفاهها بجرأة ونطقات: خلي حتا يخرجو الناس ونتيك عليها انا نيت

طلع حاجب والسكورية بدات تبان فعينيه متيق كلامهاا.. رجعات بضهرها اللور كاضحك وبصوت متقطع قالت

نسيمة؛ هههههويلي غير ضااحكة ااويلي هههههههه

رد: مكانعرفش الضحك فهادشي انا هنا لاسق حتا يخرجوو

ردت كاضحك: وااحلم رااغاا كانضحك معااك ههههه

سي محمد: هاحنا غانشووفو.. نجربو نيت الكاليطي ديال داك الماط وااش تنفع معاياا ولا لا

نسيمة: ماسوقيش انا غير ضااحكة

شااف الوقت فسااعة اليد ديالو: مابقا والو نيت

يتبع...