نفخات بضيق وربعات ايديها: ايوا يجمع عينيه من اللول، هادي حريتي نلبس اللي بغيت ماسوق حد فيا
رد: هاد العقلية تاع حريتي مداخلش فيها اللبس.. فدارك اه ولكن هادي حياة عامة كاتخرجي عند الباشاار يشوفيك منهم اللي بعقلو منهم اللي مريض فراسو ومنهم اللي خاصو غير السبة وزيد وزيد.. الى جيتي تتعاملي مع كل واحد فيهم نتي اللي غاتتعقدي فحياتك ومن هاد المرجعية ديال حريتي نلبس اللي بغيت حتا هو غايگولك حريتي نشوف فينما بغيت ونگول اللي بغيت
ردت: ايوا شنو نتغطا باش نرضيهم متلا ؟
تنهد وخفف صوتو: باش ترضي راسك وتعطي قيمة لراسك .. كاين فرق
خنزرات فيه: هي أنا ماعندي قيمة واللباس هو اللي غايديرها ليا؟
رد كايتنهد: نسيمة الله يهديك فهمي المعنى اللي بغيت نوصل..
رد بهدوء: حتا نساليو هضرتها عاد نوقف، واحلي معايا دماغك وخلينا نقادو هاد الموضوع.. انا ماشي ماگلتش لك ماتلبسيش ماتاخديش حريتك، وفنفس الوقت ماشي تغطاي بشنخة ولا ديري النقاب گاع ولكن كاين فرق بين شي حاجة اللي هي ديالك نتي خاصة بيك وممفروض حتا واحد يشوفها.. وبين حريتي هي نوري كلشي ونبان ونتسفح
زفرات وقالت: انا ماكنلبسش على قبل أي واحد إنما على قبل رااسي واخا
شاف فيها بنص عين ورجع ركز قدامو: واخا الالة نديرو راسنا تيقناك.. ونگولو واحد اللبسة معينة عجباتك واش ضروري تعجب بنادم مكاتعرفيهش أصلا ومعارفة حتا دماغو شنو فيه، تقدري تلبسيها فدارك وعادي.. برا لبسي مستور وأنيق فنفس الوقت شتي حتا اللباس اللي عندنا فالمحل كاتلقاي هاداك الطويل والمغطي غلا بجوج مرات من القصير اللي هوما دايرينو عصري وموضة وماعرفت شنو.. فهميتيني
سكتات مربعة ايديها وهو تنهد ووقف قدام باب العمارة: يالله الالة هاحنا حبسنا
رد بهدوء: لا راك فهمتي من هاد الناحية عارفك كاتقشعيها طايرة "خنزرات وهو ابتاسم وقال كايشوف فساعتو" على العموم.. من الأحسن طلعي تجيبي ليا وتائقك دابة باش نقاد أمور العقد
جبدات عينيها: ماشي زربتي؟
رد: ونتعطلو علاش
زفرات وحلات الباب داخلة فحالها فحين هو نزل ووقف قدام اللوطو كايتسناها ويوزع عينيه على الشارع
نعيش كالبحر بالعمق والشفافية !..؛
أعماقنا .. كأعماقه .. !؛
ولا يُجيد فهمنا إلا من غاص به..؛
هكذا يكون حال أرواحنا ..؛
سهلة، ممتنعة ..واضحة .. وغامضة
ولا يُدركها .. إلا من يريد إدراكها بصمت
دخلات مع الدار كاتلهت سدات الباب ونطقات عزيزة اللي واقفة فالكوزينة كاتحط الغدا
داتها عزيزة لبيتها ونسيمة جبدات پيجامة بيتية لبساتها فوق الدوني والشورط وتوجهات لبيت عمر تنوضو يتغدا
..........
دوز ليه الملف قارن حجبانو قال: المهم شوف كيف دير.. غدا ضروري يكون واجد
أنور بقا حال فيه فمو وعلى كرسيه متكي: لدابة والله مافهمت كيدرتي ليها
رد كايحك جنب لحيتو بمباغتة: كانلعبو هنا ولا شنو
رد: لا امون شاف اللعب خليتيه لينا حنااا الله ينعل بو الفم اللي مازال يخبر عليك هههه حگرناك ساعة من الليلة اللولة ضربتي الضربة ماعندي مانتسالك
بابتسامة قال وهو كاينوض من الكرسي: قضي لينا الغاراض علاش وصيتك والله يسامح ..تهلا
أنور: تعالا غاتشرب شي قهيوة بعدا
رد: شربها غانتا
خرج من الكوميسارية دار نظاظرو الكحلين وركب فسيارتو .. هز التليفون دوز رقم ودارو فودنو كايتسنا حتا رد عليه صوت بنت
-نعام اسي اليوسفي
رد: آية.. دخلي فين بدلات البنت اللي كانت معايا غاتلقاي تما واحد الكسوة بيضة.. طلعيها البيرو ديالي عافاك
ردت: واخا اسيدي كون هاني
قرن حجبانو وقال: عمي جا
ردت: لا مازال
رد: الى جا علميني.. في امان الله
قطع وديمارا مركز مع الطريق ومية مطرقة فالراس كادور
....
فات هاد النهار ودا أحدات جداد على حياتها ..جا بلاصتو الليل المظلم وكيف العادة غير حطات راسها على المخدة بدات تعاود بلاناتها وترجع السينتة اللور..
فكرات فاللي دارتو واش صح ولا غلط، غاتندم ولا غاتستافد منو إيجابيا
بقات دور على حلقات متكررة وتعاود تستاشر نفسها.. واش الزواج من واحد بحال محمد غايخلي فحياتها اتر قوي ولاغايمر مرور الكرام بحال ولد عمها؟ بجوج نفس الاسم ونفس العمر.. لكن لا الكراكطير والا طريقة الهضرة والتفكير ولا التأتير و الرجولة ماكايتشابهو فيها.. واحد مر وفات رغم النغصة اللي عيشها فيها.. والتاني جاهلة مصيرها معاه.. فقط اللي عارفة ومتأكدة منو هو واحد بحال محمد مغايدوش عابر سبيل على حياتها.. بلا ماياخد منها شي حاجة
...
سدات عينيها مع أدان الفجر وغاصت فنوع عميق بعد تفكير أعمق .. طلع الصباح وعلى صوت الدقان حلات عينيها المعمشين بالنعاس وشافت خيال عزيزة داخل..
على وجهها بسمة صفرة و قوة الهضرة جاية من الصالون كافرزاتش ديال من بالظبط
عزيزة: لالة نسيييمة..لالة نسيمة كاتسمعيني؟
تقلبات على ضهرها مكمشة عينيها وبالنعاس مبوقة: شنو هاد االصداع؟
ردت: بالالة رآه الطنااس هادي وجاونا الضياف.. نوضي دغيا راگلت ليهم دخلتي دوشي باش مايسحابوكش باقا ناعسة حتال هاد الوقت
اللي ساوي التمن وعاطي للعين ولا كايبان ليها ماليه قيمة وهاداك اللي كاتقلب عليه بالظبط مكاينش فدارها من الأساس..
جاتها البكية بالغدايد ومعرفات مالها باغة تقاد وتزوق كما يجب فنهار بحال هادا.. مشات من بالها راه زواج زائف حدو فترة ويمر ولسق بلاصتو أنه عرسها هادا تجربة خرا من حياتها باغة تستمتع بيها وخاصها فأحلى حلة تبان.. وباش توصل لديك الحلة ولات فماهي ومالونها وفكها يامن وحلتيها
حطات عزيزة پلاطو خر من الحلوة فوق الطبلة الخشبية ديال الصالون والعائلة عليه مجموعة..
جايين كلهم بجلالب ملبوسين غير اللون والشكل كايختالف من لداخل بقمصانهم.. مكاين غير الفاخر تاع الزاز نعاماس سلعة مادورش فالسوق وماتلقاش منها إلا عند عائلة اليوسفي مالِكي سوق التوب بحدافرو..
حتا من حياة تزيزات على الحالة وجابوها معاهم على أساس وحدة من العائلة..
هوما تايقشبو مع الغالية اللي بالفرحة فمها محلول كل مرة تزغرت وتصلي على النبي.. وحورية ساهية كاتشوف فعمر اللي كايرمي الكرة لنسومة وهي تتدوي معاه بدون إجابة منو فقط مبتاسم ببراءة وهدوء سبحال الخالق
لايطو گفضات على يديها حيدات الجلابة وبقات بقميس مطلعاه للمضمة حتا بدا يبان السروال القندريسي وناضت ورا عزيزة تتعاونها فنصيب الغدا و معتابرة راسها من مالين الدار
تحل باب الحمام وخرجات منو لالة ومالي وتقرقيب السطالي.. أنتكات على الحالة ومن قفطان جوهرة اللي كان جاها كادو عاوتاني لبسات.. لون وردي بارد وخياطة فردية مخصوصة ليها، تغلفات تلت شهور هادي وماكتاب تتحل تال نهار خطبتها منو هو بالدات وياللقدر
قبل ماتفوت عتبة الصالون قادات شعرها بتوتر وماطات شفايفها عاد دخلات مبتاسمة والحمشة اللي نزلات عليها فاش شافتهم مجموعين على الحتيت زادها سر وحلاوو..
الكحل فعينيها الكبار غامازااد كبرهن وزادهم فتنة على جمال، عكر وردي ففمها الكرزي الصغير وسلسلة رقيقة دالدهب بخميسة كاتبري فعنقها كاتلعب مع خلخالها فالرجل ليسرا..
شاافتها الغالية وناضت تترغزر هي ولايطو وحدة جاتها من هنا والتانية من لهيه
الغالية: صلااااا والسلااام على رسوول الله.. الى الجااه الى جاا سيدنا محمد.. الله معاااا الجاه العالي ..
كملاتها لايطو بزغروتة الغدايد وهي حشمانة وسطهم.. فيروز شادة تيقارها غير تتشوف وطلع النفس بزز اما حياة ساكتة تتنهد وحورية عينيها دمعو فصمت وحتاباش تنوض ماقدراتش..
زيراتها عندها: حتا انا يالمرضية..الدار ظلامت عندي بلا بيك الحمد لله كتب ليا الله فين ننشوفك مرة خرا
قالت عزيزة كاضحك: كتاب لك تشوفيها عرووسة گاع
لا يطو: ماشاء الله، أنا قلبي كان حااسسني باللي هاد الولد شارب علك البحر ههه
عزيزة: غالبحر وسكتي الا يطو
خنزرات فيها نسيمة تسكت ولايطو شبعات غاضحك فوجهها اللي زاد حمار
نسيمة: صافي نساو علينا هاد الهضرة، گولي ليا نتي كي درتي بعدا بعد دوك الخبار واش باقة باغة تبقاي ففاس؟
تنهدات: واش غانگولك ابنتي.. قبل ماتصوني علينا لالة الغالية باش نجيو كنت كانخمم نرجع لبلاد واليديا.. الله يجعل البركة، وليت فديك الدار غير كاندور ويضربوني الحيوط من نهار مشيتي تاحاجة مابقات كيكانت
عزيزة: علاه فين لالة فاطمة
نطقات حياة اللي شادة معاهم الحتيت: على ماسمعت تشللات مسكينة ورا داكشي اللي وقع فولادها بجوج
لايطو: ايوا داكشي علاش جا خوها وداها لعندو.. بقا عمك لاخر سي عادل مرة يجي مرة لا وخلاص دابة فاش تشد الحاج ولا هو اللي مسير كلشي وكل مرة مدخخل وحدة فشكل ..هادي تشرق هادي تغرب تاعييت وتهديت نيت
خنزرات نسيمة بغل: من تريكة حادة معلوم يخرج هاكاك
عزيزة: دابة هو قد سي عبد الجليل فالعمر عوض يشد فالصلا والدين متبع العيالات حشومة والله
لايطو: أنا ابنتي مابقيتش قادة على شي تبرزيط .. الحمد لله جمعت شي فليسات غانرجع لدار واليديا الله يرحمهم نصلحها ونسنك تم.. وداكشي اللي شاط نزرع بيه شي حاجة فالأرض اللي ورا الدار اللي صورتو نعيش بيه تايدي مول الأمانة امانتو
شدات فيديها بأسى وقالت برجاء: وعلاش ماتبقايش معايا ادادا.. خلي ديك الدار يربحو بيها واجي بقاي معايا هنا والله مايخسك شي خير
ببسمة حنونة ردت: لا يالحبيبة مانصيبش.. المرا بلا ولاد بلاوتاد هادا حالها.. كايضربوها الحيوط حتا تصدا ومايبقا ليها فين تزيد الضربة ولا علامن تحط الراس، تتبغي تبقا غير هي وراسها حتا يوصل أجلها فالدنيا.. ولايني نتي ربي جازاك بونعم الرجل.. انا شفت عينيه كيكايبريو فاش كنا جايين فالطريق ولالة الغالية تتشكرك قدامنا وكيفاش غير تتجبد سميتك كايتبسمو بوحدهم
ردت عزيزة شادة الضحكة بالحشمة: ومللي حليت عليهم الباب مسكين كان يسحابو غايلقاك نتي.. غاحشم أما يدخل علك نيشان للحمام ههههه
حشموها بيناتهم وبدات غير دور عينيها وتردد بحرج: واصاافي صافي زدتو فيه
خرجات من العمارة داز من حداها العساس حتا هو هاز كراطن فيدو وسي محمد محني على الكوفر كايقاد فشي سيكان تما حتا وقفات عليه يد هازة بيه القفطان حتا بان خلخالها الرقيق ويد حااطاها على الشمس والتغوبيشة بين حجبانها قالت
نسيمة: على السلامة.. كاين فاش نعاونك
رد مشغول: لا بقات غير هادي
..جبد الساشية وشاف صدفة جنبو، قشع الخلخال كايبري مع الشمس وسط رجلها الناعمة وگدمها حمر، نيم فيهم عينيه قارن حجبانو وهي كاتهضر وتصغرر عينيها فالشمس
نسيمة: بعدا علاش البارح معلمتينيش باللي ماما غاتجي؟؟ عرفتي شناهية نلقاهم قدامي على الصباح دخت وماعرفت حتا شنو نلبس
سد الكوفر ومد ليها تشد الميكا بديك ليد وعاد تطلق القميس على رجلها وقال كايتنهد
سي محمد: لا راكي لابسة تبارك الله دخلي على الشمس دخلي
تبعاتو مغوبشة وقالت: واجاوب
رد: كون شعلتي تليفونك كنتي غاتعرفي.. زايدون جا على غفلة والحاجة اللي زربات من راسها انا ماسوقيش
نفخات ضاربة الطم وهو بالمهل بطأ خطاويه حتا سبقات، بدا يرمي عينو جيهة رجليها وبلا مايفطن كايحك تحت ودنو وكل مرة يحنحن .. حتا نطق منغم بخطاويها الأنتوية ومقرب جنبها: واتاك الخلخال
غوبشات بلا ماتشوف جيهتو وقالت كاتخفي بسمتها: عارفة
بسم وقال: واتاك القفطان
زيرات فمها لاضحك وفاتتو داخلة للدار.. فحين هو تنهد من أعماقو ودخل للصالون بابتسامة مخفية ناطق بصوت عالي
سي محمد: السلام عليكم
قوية كالحرب..
ناعمة كالسلام ..
رقيقة كالياسمين..
عنيدة كالقدر
عاقلة كالمنطق..
مجنونة كالتاريخ
وعظيمة.. كمقاتل شجاع يدافع عن أرضه ...!
أما هو.. فقد جاءها حنوناً بشكل مفرط، وكأنه يعتذر عن كل من تسبب بأذيتها
جاء ليصلح ما كُسر.. ليحيي ما مات بداخلها من فطر خيببات الأمل
جاء ليثمل من وجدها .. ولحييها بشوقك
"أحييني بشوقك"
تعالات الزغارت فدار نسيمة ومن باب العمارة تسمعهم، العائلة كلها باركة فالصالون من غير لايطو والغالية وحياة اللي ناضو كايوجدو اللي خاصو يتوجد.. الابتسامات فكل جيهة منها الصادقة بنية صافية ومنها المزيفة بقلب مضيق مخنوق..
والاهم عــندو من كل هادا هو شوفتها قدامو باركة جنب مها وعلى ثغرها بسمة خفيفة كاتحاول تخفيها بسبب خجلها المفرط
جانب آخر منها بعيد على العناد والتقزدير اللي لمسهم فشخصيتها، جانب رعش قلبو وشوك زغب لحمو، الحشمة والخدود موردين وشفايفها اللي كل مرة تلعب بيهم خلات عينيه يدبالو بحال السكران كايطلع النفس تقيييل ويحاول يقلب عليها عينيه على وعسى يخفف نبضات قلبو..
فحين هي مطلعاتش فيه الشوفة أبدا رغم أنو كايبان ليها من الپلاطو النحاسي كيفاش كايشوف فيها.. ديك النظرة اللي الكل لاحظها وفسرهم تمناو يكون فحياتهم حب بهاد الشكل، هي تغاضات عليها وقلبات عينيها فمرة.. مـاافكرات لا علاش والا كيفاش فقط زاطمة على قلبها وكل مرة ترمش حواليها..
تخوات الطبلة من الحلاوي والعواصر وتحطات عليها حلوة لاكريم بسمياتهم.. مع جوج زريفات صغار دالحليب ضايرين بكادر مدهب فپلاطو دهبي ملكي ماعرفاتو منين بعت والا شكون جابو..
تحط طبسيل من نفس الكوليكسيو وعليه هرم ديال التمر المعلك..
صوخرو عندها طبلة تانية وفيها تحطات علب ديال الدهب هدايا منو ليها.. وحدة عبارة على سلسلة دهبية تقيلة بأحجار زمردية فاللون الاخضر، بسرتلة ديالها وحوالق نفس اللون.. العلبة التانية سلسلة خفيفة شوية مع دبليج ضاير على شكل قوص مكايتسدش ودهبو سامپل معاه خاتمو وحلقات طوال..
التالتة عبارة على مضمة مربعة الشكل ووزنها من الشوفة يبان لك تقيل
الرابعة خلخال منفرد دهب بيض رقيق وزواقتو من الجناب ريش كايجي نازل على الگدم ونجيمة صغيرة كاتبري فالجنب
والخامسة ساعة يدوية من ماركة فخكة مشهورة وجاية معاها سرتلة نفس الشكل ..
تحلو عينين فيروز قبل من عينين نسيمة ماقدراتش تخفي حسدها وناضت بحجة الحمام، فحين الغالية ولايطو بداو يصليو على النبي ويسمي بالله..
الغالية: نوضي ابنتي زيدي ههه
ناضت عندها برقة تترمش ووقف حتا محمد كايسد صدفة الشوميز ويرمي عينو على خدودها الحمريين والغالية نطقات كاضحك وتحيد خاتمها دالمارياج من صبعها
الغالية: هادا ياحبيبتي عطاتو ليا حماتي.. ترات فعائلة اليوسفي وكايتعطا غير لعريسات العائلة من وحدة لوحدة.. كنت عطيتو لأم محمد الله يجدد عليها الرحمات وورا موتها رجع ليا "شافت فمحمد بابتسامة" فزواج سي محمد اللول ماقديتش نحيدو من صبعي.. ربي مكتبهاش وأنا ماسخيتش بيه، ولكن دابة بغيتو بعد موتي يكون فصبع البنت اللي سرقات لحفيدي قلبو واللي سرقات قلبي معاه هههه
بتوتر بالغ سرطات ريقها الناشف وقالت رافضة
نسيمة: ا الا امي الغالية مانقدرش.. هاد الخاتم ماشي ليا
الغالية: والى مكان لك لمن يكون؟.. هانتي غير خوديه والى ماعجبكش بدليه بشي واحد خر المهم خبيه عندك
ردت: ماشي ماعجبنيش بالعكس كايحمق والله.. ولكن خاتمك هادا ماقدرش
ماهزاتش فيه الشوفة وردت كاتقفقف: تسوخر لهيه خليني نتنفس
عرض ابتسامتو وتراجع اللور عاد تنفسات ورمقاتو بنظرة خفيفة .. لبساتو ليه بلا ماتقيسو وحيدات ببسمة صفرة..
نوضات الغالية حورية وبداو يحطوو ليهم الحليب التمر وعلب الدهب فالجنب... هز كاس شربها ومد ليها تمرة كلات منها الراس وحيدات.. شرباتو من الحليب حتا هي وخدا شوية من التمرة وعينو عليها فقط ماقدرش يزيحهم بتاتا..
عاوناتها الغالية حتا حيدات السلسة اللي لابسة ومدات لمحمد يلبسها من طقم الدهب اللي جاب ليها.. وقفات كاتبللل شفايفها وهو هز العقد وليها قلب حتا حسات بأنفاسو كاتلفح بشرتها وكيف لامس صبعو نعومة عنقها ارتاعشات وتبروشيتها حس بيها فلحمو وعلى اترها تنهد مطول عاد تسوخر اللور ..
زاد لبسها السرتلة وخلا الحلقات بلاش والشي لاخر تسد وتحط على جنب، كيف سالاو وبدات الصلاة والسلام على النبي تخطاتهم نسيمة كاتسرط الريق بصعوبة هازة قفطانها وقالت ببسمة بزز باش رسماتها
بقاو كايهدنو فيها ويسميو بالله.. الغالية غمزات لايطو من تحت الدف هاد الاخيرة فهماتها وخرجات نيشان للتلفازة اللي وسط الدار.. شعلات القرآن على سورة البقرة وجهداتها كاتتبسم باش ماتخلع حد وتبين أنو للبركة فالخطوبة فقط.. لكن محمد قرن حجبانو حاس بشي حاجة ماهياش ووقف غادي للحمام بلا مايستاشر حد، دق وطلات عليه الغالية شافت عقودية حجبانو وعرفاتو مشوش هي تقول
الغالية: غيير الخلعة اولدي مكاين والو
رد بنبرة قلقة: گولي ليها تخرج عندي.. واش ردات ولا شنو؟
الغالية: غير تنغصات عليها معدتها ولايني راها كاترد النفس ماتشوش
زفر بقلة صبر وقال: الحاجة بلاتي نشوف
حل الباب ودخل لقاها واقفة حدا لاڤابو شادة لكاس بزز باش كاترد النفس وعزيزة شاداها..
زاد خنزر ومد ايديه لوجنتيها اللي صفارو ومشا منهم اللون الكرزي الي عاد كانو عينيه كايتغلو فيهم..
نطق بنبرة تابتة كايتخللها الخوف وقال: نسيمة مالك؟ كليتي شي حاجة ولا شنو
حركات راسها بلا ماتهضر تكاها عليه بحالا مدرعها وهي طالقة راسها على كتفو وتتمشي خطواتها بزز.. النعمة مطاحت فكرشها من الصباح زيد عليها تلخبط المشاعر داخلها والردان، كلهم خلاوها بلا طاقة كاتحرك غير بزز وفينما قادها تزيد.. حل باب بيتها والغالية وراه كاتقرا القرآن گلسها على السرير حتا تسرحات وغطاها بعيون باهتة لانو نظراتو المظلمة وكايزفر من أعماقو بقلق
كيف حطات راسها معاود هزاتو حتا فات العاصر وجات عزيزة كاتفيقها.. ناضت تترمش حواليها دايخة وتستفسر فشنو وقع وعزيزة تتشرح
عزيزة: من تما ونتي ناعسة دابة راه وصلات الخمسة
نسيمة: واش مشاو؟
ردت: آه مشاو وحتا الغدا غير قاصوه وزادو ..مهم أنا دخلت لك داكشي ديالك للپلاكار وراه سي محمد وصاك غير تفيقي صوني عليه
لقات الدنيا تنقات وكلشي تجمع لا الكوزينة لا الصالون وحتا مها ولا يطو دخلو لبيت عزيزة يديرو القيلولة ويرتاحو من عيا الطريق..
لولا خاتم الخطوبة فيدها تگول هادشي غير حلم وفاقت منو.. تنهدات وگلسات على السداري ساهية بوحدها وحالها ماهي حال.. كلما قربات المعقول وغرقات فيه كاتحس بشرارات على قلبها كاتمر وناقوص الخطر كايضرب.. خايفة الشي اللي عاشتو تلت سنين هادي يحيا وبنفس الطريقة يقتلها.. خايفة من مشاعرها اللي عيات ماتخبي وخايفة من نسيمة السادجة لاترجع.. ساعتها العااقبة مغادوش على خير مطلقا ويستحيل تنوض منها على خير
دخلات عندها عزيزة هازة تليفونها اللي كايصوني وقالت: لالة نسيمة شدي سي محمد كايصوني عليك
قوصات حجبانها: مالو اش بغا
ردت: يمكن بغا يسول فيك الالة.. هاكي
خداتو كاتزفر وردت: الو
رد نيشان: كيف بقيتي شوية؟ شربتي الدوا اللي سيفطت ليك
عنقاتها كاضحك وكلاو مجموعين والحتيت على الطبلة ضاير.. مرة يحشمو نسيمة ويدويو على شوفات سي محمد ليها.. مرة يجبدو عبد الله ولا الهدايا اللي جاتها وكيفاش كبر بيها مرة خرا يدويو على الحاج وجزاؤوو
.. قداو الوقت فالهضرة حتا تناص الليل تعشاو من البسطيلة واللحم اللي بقا وكلا ناض لبيتو ينعس
لبسات پيجامة خفيفة حلات البالكو تتهوا البيت وجمعات شعرها للفوق.. دخلات وراها عزيزة بعدما نعسات عمر وجبدو بليزة حمرة صغيرة حطوها فوق السرير وحطو حداها الدهب اللي جاب وبعض التواب.. بركو على الجموع كايطويو ويسفتو فالڤاليو
عزيزة: امين، مسكينة والله حتا كاتبقا فيا.. من نهار خطاها سيدي عبد الله وهي اللور اللور،
حركات راسها متنهدة بحصرة: كانت كاتبغيه بزاف.. وداك الحب اللي كان ليها دوا فات القياس حتا ولا مرض آداها هي اللولة.. حنا معارفينش الوقت شتاتجيب ومعارفين هاد الإنسان واش غايبقا معانا ديما واش ربي مكتب شي حاجة خرا ..وهادشي اللي وقع لماما.. كايسحاب ليها دايم وغير هو اللي كاين وحتا فصراعاتها مع واليديه كانت تحت جناحو كاتتخبا.. حتا خطاها وولات غير تتبعد وضعاف نهار على نهار حتا طفات
عزيزة: الحاج الله يسمح ليه كان مدوزها عليها هو ولاحادة.. حتامن سميتها مكانوش يگولوها من غير الخادم بنت الخادم، انا فبلاصتها قلبي كايتقبط عاساك هي.. دابة ربي جازا كل واحد على قد فعايلو
حطاها من يدها القفطان وقالت تتنهد من أعماقها وساهية فيها: عرفتي واخا كاتبغيه بزاف وحتا هو بابا كايموت عليها .. وواخا واجه باه وأصلو على قبلها ورضا يسمع عليها الكلام ويصبر، عمري تمنيت بحال داك الحب.. لدابا واخا عمري گلتها لماما ولكن عمر حبها كان كايغويني وكنت متمنية بحالو، بالعكس
عزيزة: هي راه كانت تتبغيه مسكينة وواخا تسمع الهضرة كاتسكت غير باش ماتقلقوش
نسيمة: هادشي نيت اللي مكانش عاجبني وكنت ديما واكلة على قبلها العصا.. ماما طفات راسها وقتلاتو على قبل بابا.. كون فرضات راسها قدامو و دوات على حقها وواجهاتو.. كون گالت ليه مابغيتش نعيش هنا شوف ليا شي دار صغيرة مع بنتي وبقات متشبتة بقرارها وشخصيتها .. كوني متأكدة باللي بابا غايعاود يضحي على قبلها... وكونراه هو معانا دابة وعايشين مجموعين مخاصنا خير.. ماشي وولد مريض.. بنت تدهسات فحياتها.. المرا مرضات فنفسيتها والراجل مرمي فالحباسات
ردت عزيزة بحصرة: من جيهة الالة عندك الحق، ولايني هي هاكاك دايرة.. كنت باقا صغيرة فاش جيت خدامة عندكم وكانت تتجيني لالة حورية كيالوريدة ماتعيب حد ماتجبد حد وحتا الصداعات متتحملهمش
نسيمة: حتا الوردة اعزيزة باش تحمي راسها كاتنوض الشوك.. هي ولفاتهم يزطمو عليها بين رجليهمم وتسكت، والحاجة اللي تتولفها صعيب تحيدها منك.. علاش انا كانجاوب بنادم ديك الساعة.. حيت نيتو ماتعرفي شنو فيها يلوح ليك حشيان الهضرة ونتي حالة فمك وتتقولي واش عايرني واش غير هضر واش كايضحك.. الى مشيتي حتا ميكتي غايعاود ويعاود حتا تولفي عليه وشخصيتك بوحدها وشوية بشوية غاتبدا ضعاف حتا يسبك فوجهك وبالطاي طاي ونتي حالة فمك ماعندك ماتگولي
عزيزة: ربي كايخلص كل واحد على أفعالو الالة وهاهوما واحد واحد خداو جزاءهم
بسمات باستهزاء: حتال ايمتا.. حتا مرضو ليا مي وولات كاتبان ليها الدنيا كحلة وعاطياها غير للدوايات والنعاس.. وبا رماوه فالحباسات يخلص تمن فعايلهم المسخة.. ولا خويا اللي يتموه فواليديه وهوما باقين فالحياة؟ هه اما انا خلاص, عمر كيتهم ماتبرا فقلبي واخا نشوفهم كايتحرقو قدام عينيا "خدات نفس مرعد وعزيزة غير تتشوف بحزن مابقا ليها ماتگول" اودي.. سدي سدي ننعس كانتفكر هادشي راسي كايمرض عليا
أحييني بشوقك الجزء السادس
محتوى القصة
التنقل بين الأجزاء