سوار ماشي من النوع اللي كيبين احساسه .. لاكن كتجيها فالصحة الى تراكمات عليها الضغوطات ... ناضت من المرضة اللي طاحت فيها اسبوع .. اسبوع ماخرجاتش فيه من اللبيت وحتى عبد الحق مكيدورش بيها خايف من الصدع والمشاكيل حيت مابقا ليه فين يزيد ونبهاته لاللة غيثة اخر مرة .
خرجات من البيت لابسة سورفيت من السورفيتات اللي كانو عندها فدارهم واللي كتلبس .. سورفيت كحلة عبارة على تيشورط بسروالها مايلة من الكتف وصندالة مزغبة .. الريحة كتعطعط منها والشعر مطلوق جمب ... حاطة مورد خدود وشفاه وريسيل وقلم كحل بحال العادة .. الشفار كثار والتقة بالنفس والنفخة .. النفخة حداتها ليها فاطنة فاش شافتها نازلة ومشات عندها دافعة الصدر وللمؤخرة اللور كتهز وتحط خرجات فيها عينيها وقالت بصوت مرتفع كالعادة خلات ساجد اللي جالس فالجردة بعيد يتلفت جهتهم بحدة صوتها . . صوتها من المكروهات اللي فالفيلا عند سوار حيت ديما مشوهاها ومبهدلاها ومسمعة عندها الناس ..
بقات سوار واقفة جنب غير مطلع وتهبط فيه ببرود وبلا مترد عليه مشات بشوية عليها وخلاتو داير يدو على جنبو وكيشوف جهة ساجد بغيرة مارضاش مرتو تمشي قدامو هاكا ... مشا جرها من يدها بقوة ومو لاسقاه وقال بصوت قوي كيبين الحدة والخشونة والرجولة
- هضاااارت معااااك طلعي لبييييتك
مع هزات راسها وصبعها كتحدرو مع هضر ساجد من برا حيت قراب ليه بيناتهم زاج وقال كيطقطق على الطبلة
- هييء هيييء هيي.. شهاد الصدع
حمر فيهم وهما يسكتو وزادت سوار تعالات كتهضر معاه من فوق نيفها وقالت
- ااخر مرة تمد عليا يدك ... ولا غنديك فين تربا سمعتي
- ختو ! نقطع دراعي من السنسول الى كنتي نيت ختو ... قالك الليمون .
دينا باستغراب كتشوف فيه : واش بصح مرات عبد الحق!
ساجد :وشنو اللي غريب
دينا : فشكل ... ماجاوش مع بعضياتهم ... هوا فشكل وهي كتبان فشكل
تلفت ساجد شاف فيها وقال : كفاش هي فشكل ؟
دينا : هي زويييونة وكتبان كلاص ... ولا غير كيبان ليا
رد : شوفي عينيك شنو كيشوفو
دينا: بصح كنهضر .. ماقدراش نتيق بلي عبدالحق مزوج وحدة بحال هادي ... ميمكنش ... شي حاجة ماشي طبيعية ... وكتبان هي مولات الدار ... بنتو ليا مضسرين ليبيخسونيل هنا بزاف وكل واحد كيدير اللي بغا
لاللة غيثة فلكوزينة : يالاه يالاه ..يالاه راه معطلين ... هاظ الحفلة الى مدرتهاش غدا مغاديش نديرها .. كل مرة تخرج ليا حاجة من الجنب وتعطلني ... وحاجة اخرى ... مابغيت حتى واحد يقول لدينا باللي راه كنديرو ليها حفل تخرج .. بغيت ندير ليها مفاجأة ... وايااكم شي واحد يقول ليها دايرين ليك حفلة
خرجات من لكوزينة طالعة وتلاقات سوار فالدروج ووقفاتها قاىلة
- سوار... راه دايرين حفلة لبنتي دينا ... نجحات و مابغيت حتى واحد يقول ليها صافي ... بغيت نخليها ليها مفاجأة
سوار: عبد الحق كيقول ليا ماتقوليش لا للاللة غيثة... اللي قالتك ديريها ... كوني هانية
لاللة غيثة: والله يرضي عليك لبسي شوية مستور باش ماديريش المشاكيل راسك ... راه جات فاطنة كتشكا ليا وانا مابغيتش ندخل
سوار: هي اللولة الاللة غيثة ميكون غير خاطرك
طلعات سوار كتجري كتقلب على شنو تلبس مالقات حتى حاجة صالحة للخروج من غير واحد اللبسة عبارة على قميجة عصرية بيضاء مستيلية واسعة طويلة لبساتها مع سروال قهوي فاتح وبالغينة مستيلية وهزات صاك قهوي جات فنة وتفتح ليها وجهها .. طلقات شعرها البوكلي وعمرات عنقها بسنتسل ذهبية بطريقة مستيلية ويديها وودنيها وحطات مكياج خفيف وخرجات بشوية عليها نزلات كدور عينيها سالتة بهدوء والراس مهزوز باش ماتشوفهاش لاللة فاطنة وطلق عليها حلقها ... طلاقات عبد الحق فالباب مدخل السخرة غير شافها كحالو عينيه لاكن زربات عليه وقالت بعجرفة وهدوء
ردت لاللة غيثة: كانو كيجيو بالعشرة بالعشرين ولاكن غير على الطمع ... اللي يطمع ليك فزينك واللي يطمع ليك فرزقك ... والمرحون كان عندو الخير والخمير كان شاد المرسى كاملة وكولشي كان طامع فيا ... وانا كان عندي ساجد صغير... وماولدتو حتى داز عليا الويل لكحل وشحال دالعمليات وشحال دالدويات وشحال دالاطباء .. نمشي لفرنسا نمشي لميريكان نمشي لالمانيا ماخليت مادرت وبأذن الله ربي استجب ونجحات ليا واحد العملية وولدتو وكنت خايفة عليه وخايفة نتزوج شي مسخوط يضيعني فولدي ... وماكانوش ولاد الناس ابنتي ... قلااااال فهاظ الوقت فين تلقاي ولد الناس ... فين تلقاي الراجل ديال الصح والدراع والكلمة ويحن فيك ويبغيك ... ماشي فيه الغوات والعضرة الخاوية ويعرض عليك صدرو وقوتو يخرجها فيك
ابتسمت سوار وقالت: ولاكن تبارك الله ساجد ربيتيه احسن تربية
تنهدات لاللة غيثة: ايوا درت اللي عليا انا والمرحوم والكمال على الله ... صدق لي وماخرجش مفلس كنحمد الله ونشكرو ... درنا المجهود ديالنا واكثر ودعيت الله يصلحو ليا .. هوا اللي عوضني على المرحوم وصبرني وهوا الفرحة ديالي ابنتي ... كنتمنى من سيدي ربي يجيب يلاقيه بشي بنت الناس بحال وجهك حتى هي تصبر عليه وتصبر معاه .. الزواج مسؤولية وخصو الصبر وبنات اليوم كيخلعوني وخايفة دور بيه شي بنت لحرام وتبعدو عليا
تنهدات لاللة غيثة: كنتمناو من الله يدير اللي فيه الخير... انا درت اللي عليا واكثر وعلى حسب ماكيبان لي ماشي زعما شي واحد اللي خفيف وغير كيزطم ... والله واعلم ثاني
سوار ان شاء الله ميكون غير لخير ماتخافيش
وصلو بمحل ديال المجوهرات كبير واستقبلهم البائع والباعا اللي معاه بالحلوى والعصير وجلسو لاللة غيثة كيرحبو بيها وجبدو ليها اجمل المجوهرات الدارجة على الموضة من ذهب ودياموند وبقات كتعزل وتخير وكتجرب فيد سوار اللي جالسة وعينيها كيبرقو بريق فرحانة بيديها والمجوهرات اللي زادوها جمالية ورقة .. من براسلي لبراسلي وسوار ساهية كدوز يدها على المجوهرات اللي لابسة وكتشوف فالمراية بتمعن ورقة عايشة الدور .. فسهوة منها قالت لاللة غيثة
- صافي هادا اللي ناخد
لاكن سوار ماسمعاتش الهضرة وبقات كتبتسم مع راسها فالمراية ودوز يدها على كتفها ووجهها بالبراسلي اللي لابسة حتى بدات لاللة غيثة كتفيق فيها عاد استوعبات
- سوار: هااه...
لاللة غيثة : غناخد هاداك عطيني البراسلي
سوار: و.. نعطيك البراسلي ولاكن...
بدات تمتم والبائع كيحيدو من يدها ويشكر فيه وسوار متبعة ليه لعين وبريق عينيها كيشع من حبها وعشقها للاسوارة اللي جات على يدها كتحمق وضافت رقة وجمال ليدها ونعومتها .. كتماتها فصدرها وماسخاتش بيه لاكن ماشي فالنصيب وخصها ديما تفكر شكون هي وشكون دينا اللي كتقارن راسها بيها .
خدات لاللة غيثة البراسلي فعلبة راقية وخرجو كيتمشاو ومن باب الصواب شرات لاللة غيثة فستان لسوار من المتجر اللي شرات منو لدينا ورجعو مع بعضياتهم لاكن سوار عجبها فستان دينا اكثر.. ماشي حيت غالي ولازوين وانما حيت تشرا لدينا شخصيا وهادا علاش بدلات الفساتين من صاك لصاط فالسيارة وشدات صاكها عندها حتى وصلو للفيلا
هاكي .. هادا خديتو ليك باش نخرجو نتعشاو ليوم مجموعين فشي بلاصة... يالاه سيري وجدي راسك والى بغيتي نعيط ليك على لكوافور يجي يصايب ليك هنا نعيط ليك عليه .. دينا واخا صافي .. انا غادي نخرج دابا نقضي شي غرض ونجي والى جا قوليه يستنا
لاللة غيثة : صافي ابنتي ماتعطليش
طلعات سوار لبيتها وسدات عليها من بعد ماصلحو ليها الباب وجبدات الكسوة كتقيسها مع المرايا باعجاب حتى سمعات الدقان وبسرعة مشات خبات الفستان وفتحات الباب لقات فاطنة بالطابلية والعكسة ونواضرها خارجين كتخنزر فيها
- شوفي...عنداك تمشي تنزلي لهاد الحفلة اللي دايرين هاودني منك ... الى دوزت ليك اللبسة المعرية والخرجة اللي خرجتي بلا خباري مغاديش ندوز ليك شي حاجة اخرى مزال ... ايوا جمعي راسك راكي فتي الحدود ديالك ... بلاصتك فلكوزينة وتعاوني مع راجلك على الزمان ماشي تعاوني نتي والزمان عليه
بقات سوار ساكتة وغير كتشوف بنضرات باردة حتى سالات فاطنة هضرتها عاد قالت
- صافي ... ميكون غير خاطرك .. المهم غندخل ندوش دابا الى ماحليتش عرفيني فالدوش
فاطنة : هاد الباب ميبقاش يتسد سمعتي ... اخر مرة تعاودي تسديه وهاني علمتك
كانت هضرت فاطنة هاد المرة وشوفاتها كيخلعو .. لاكن ماحركو حتى شعرة فسوار بلعكس غير خرجات بقات سوار كضحك وتقول
- ايوا هاحنا غنشوفو جهدك .
هزات الفستان وخرجات كدور فالفيلا لقات لاللة غيثة واقفة مع الكوافور كتوريه فين يطلع ومشات بسرعة وقفات عليها وجبدات الفستان قائلة
تنهدات لاللة غيثة بعفوية وقالت: صافي صافي دابا ماشي مشكل بحال بحال انا عندي غير ماتعيق بوالو هادا الفضل باش تجي المفاجأة زوينة
ابتسمت سوار وبدات تشوف فالكوافور طالع مع الدروج وتبعاتو هازة راسها .. شارت ليه بصبعها كطلع وتهبط فيه وقالت
- نتا هوا الكوافووغ ..... تبعني
داتو معاها للبيت وسدات الباب بلا ماضرب حساب لحتى واحد واستغلت فرصة انهم مشطوطين كيوجدو للحفلى فالسر وملهيين وجلسات كتشرط على لكوافور يصواب ليها وهي دايرة رجل على رجل قدام المرايا
وصلات دينا مع انتهاء سوار من التجميل لاكن غطات شعرها وخرجات تشوف فين وصلو وشنو طاري وواش شي واحد انتابه ليها .. تصادفات مع دينا طالعة فالدروج وطالع ليها الدم زدحات وقالت بعصبية
- حيدي من الطريق واش مكتشوفيش .. بقا لنا غير لخدمات نتزاحمو معاهم حتى هما
مشات وخلات سوار واقفة فبلاصتها ووجها حمر مزنك كتغلي فبلاصتها وتبعاتها باش تجاوبها لاكن دينا زدخات الباب بالجهد بغضب. وقفات سوار حدا الباب كترعد وتغزز سنانها ماقدراتش تبلع الهضرة لاكن سمعات صوت دينا كيغوت لداخل وحطات ودنها على تقبة الساروت كتسنط
قامت الحفلة ودينا فالبيت كتقاد وتصايب على اساس معروضة للعشا .. لبسات الفستان الاحمر فيه فتحة فالجنب والصندالة والمكياح والشعر وعاجبها راسها وفرحانة بيه حتى دقات عليها لاللة غيثة بكسوة طويلة والحجاب فرحانة بيها ونزلوها دارو ليها مفاجأة لتحت فالجردة وعارضين الناس والاصدقاء وفاطنة بواحد القفطان خفيف والصابو عبد الحق باقي هوا هوا ميعرف يلبس ولا يمشي ولا يهضر وميعرف حوايج الخدمة والسخرة من حوايج الحفلة واخا حفلة خفيفة لاكن حس الجديد ماعندوش غير غادي جاي بدوك الحوايج . شوية جا ساجد بدجينز وقميجة بيضاء محلولة من الصدر والسنسلة فلعنق كيضحك عنق دينا كيبارك ليها النجاح وهي فرحانة ماقاداها فرحة وكتعنقو قدام صحاباتها اللي حاطين عليه العين وغادية معاه جايا معاه شادة ليه فاليد ... فجأة بين دوك الحضور خرجات سوار كتمشى بالعرض البطيء.. لابسة فرجلها صباط ذهبي والكسوة البرونز اللي كانت غتلبس دينا ... طويلة محلولة من الوسط بحال شكل بينوار الفصالة حتى للصدر ومن اليدين بحال القميجة وتوبها ناعمم حريري وخفيفة سامبل بلا زواق لاكن راقية وزادت ليها سوار جمال بخصلات شعرها الذهبية اللي صايباتو سامبل هاد المرة وجاها رائع .. فاتنة ومثال حي للمراة الحقيقية شكلا ومضهرا .. مكياج خفيف جدا كانها ماحاطاش فقط مامع شفاه خفيف وماسكارت حمرة للخدود .. سنسلة غليضة و قصيرة على الدروة ديال العنق وساعة يدوية وتيليفونها فيدها وجايا بهطى بطيئة لفتات انتباه الحضور كاملين واخا تعمدات تكون عادية ومتكرتش من الزواق فقط تكون فالمستوى .. لاكن مع ذلك الشيء الخفيف ودوقها الرفيع جدبات الحضور بما فيهم ساجد اللي كان جالس فوق كنبة كيهضر مع الرجال وقطع الحوار بقا متبع ليها العين حتى جا عبد الحق كيعثر فجلايلو ويسوط جرها من يدها حتى كانت غطيح ودخلها لداخل كيجرها وهي كتنتر يدها وداها حدا الكوزينة كيترعد عليها ويغوت
دورات اسماء وجهها فين كتنعت سوار وكان ساجد اللي واقف تما كيهضر مع مو وقالت
- بصاااح ! هاداك هوا راجلك !!! مبروووك اختي
سوار: مدام سوار
ابتسمت ليها ومشات فالجردة كتسرح عينيها شافت السربيات اللي جابو كاملين كيعرفوها وشافت اسماء كتشوش معاهم فكل مرة وتوريهم عرفاتهم كيهضرو عليها وباش تبت الكذبة مشات جهة ساجد فغفلة من الكل وهوا كيهضر فتيليفون ووقفات قدامو قاىلة
- الله يخليك امسيو ساجد بغيت ..
وقبل ماتكمل كلامها قلبات عينيها بحال الى جاتها الدوخة وشدات فيه وحتى هوا تفاجأ من الموقف قطع تيليفون وشد ليها فيدها كيسول اشوواقع ولاكن سدات عينيها وقالت
دينا: ايوا طلعي تنعسي شنو كديري هنا ... هنا غير العائلة والصحاب ... يالاه سيري
وقفات سوار كتزفر من مناخرها تفاديا لأي مشكل وبعدات على الجردة فبلاصة منفردة وجبدات الورقة اللي خدات وقالت
- هانا غنوريك الاللاهم دينا
حطات الورقة فوق طبلة صوراتها ورسلاتها لدينا من بعد ما خدات نمرتها من تيليفون لاللة غيثة فاش كانت تصوني ليها منو قدامها وكتبات ليها مسج خفيف ضريف بالفرنسية "مبروك النجاح ... ومالقيتش شي كادو احسن من هادا نرسلو ليك احبيبة "
رسلاتو ومشات وقفات فباب من بيبان الفيلا اللي محلولين على الجردة كتشوف فدينا وهي كتقطع الحلوى فرحانة وهزات تيليفون باش تصور ومن موراه قرات الرسالة وتبدلو ملامحها وسوار واقفة ومخبية الضحكة كتراقبها .. هزات دينا عينيها كتشوف فالحضور وتشك فكل واحد فيهم واستأذنات بسرعة مشات كتجري للبيت كتقلب بجنون فاللخر وصلها مسج مكتوب عليه " بلا ماتقلبي ... وبلا ماديري شي حركة ... والا غادي تمشي الصورة لتيليفون خوك العزيز ساجد وماماك العزيزة غيثة " تبلوكات دينا وصفار وجهها ورجعات للجردة كتشوف فجنابها وخايفة وتشك فالناس وتحول النضر من واحد لواحد .. جراتها لاللة غيثة حدت الطبلة فرحانة وجبدات البراسلي دارتو ليها فيدها كتبارك ليها ودينا مرفوعة كتشوف فيهم وعينيها كيشطحو بالخلعة ماقدراتش تفرح ولا خلات فرحتهل تكمل . تم تم وصلها مسج " البراسلي غادي تحطيه وسط الطبقة اللولة ديالحلوى بلا ميشوفك حتى واحد ... والا هاد الليلة غادي تفضحي وفضيحتك غتكون كبيرة وسط الناس ووسط عائلتك "
دينا داخت كتشوف فالبراسلي وهدية امها ليها اللي ماخصهاش تفرط فيها ... بقات مترددة باغا تبكي وحيداتو من يدها كتشوف يمين يسار وخشاتو وسط لاكريم فالطبقة السفلية وعينيها كيدورو بين الناس ومن بعد وصلها مسج اخر " تبارك الله عليك ... كتخافي ومتحشمي .. ولاكن هاكا يكونو البنات المربيات الناجحات فحياتهم ... شفتك كتشوفي فالناس وتقلبي عليا ... انا غير تحت رجليك ... انا خيالك الى غيبقا تابعك فين ما حطيتي رجلك "
دينا كرمات بلاصتها ماتحركاتش والخلعة قابطاها اما سوار تحركات بكل هدوء وبرود مور مادخلو الحلوى ومشات مباشرة للكوزينة جبدات البراسلي وخرجات من باب الجردة في حين وصلات دينا كتجري للكوزينة تابعة الحلوى ولقات غير بلاصتو خاوية وبقات كتشوف فالخدامين تما لاكن ماقدرات تسول حتى واحد خوفا من صاحب دعوتها كيون واحد منهم ويشوهها
سالات الحفلة لصالح سوار وطلعات لبيتها سدات عليها وجبدات البراسلي دارتو فرحانة بيه وكتعض على شفايفها بإعجاب وسعادة .. تمتعات بيه قدر الامكان وخباتو ومشات تسرحات فالحمام سرحات عضيماتها وترخات حتى حسات براسها حيدات الستريس وخرجات لبسات سوميج دو نوي فالبرونز ونشفات شعرها وعطراتو وعطرات لحمها ودهناتو وريحات فراشها بريحة خفيفة حتى هوا وقاداتو ... متولة وكتبغي النضام والنضافة ودواقة كانو ناقصينها فقط الفلوس اما هي شحال من حاجة فراسها وكانت كتمنى ديرها وطول عمرها كتمنى تولي لباس عليها ودير لفلوس وتبرع راسها . .ترخات شوية كتوجد راسها تنعس حتى دقات عليها فاطنة ودخلات عندها كطل هازة كاس ديال اللويزة فيدها وقالت
عطاتها فاطنة الكاس وناضت سوار لاحت عليها بينوار طويل خداتو وسدات موراها الباب وجلسات فالشرفة كتشرب على كانتها ... شوية بدات تحس بالدوخة والدوار وفرمشت عين شكات فاللويزة وففاطنة والحلمة اللي حلمات وبسرعة وهي كتكابر مشات جهة الباب حلاتو بغات تخرج لاكن حسات بشي واحد شادو من برى وهنا قلبها بدا يزدح بغا يخرج من بلاصتو كتشوف الحلمة ديالها كتحقق والوقت باش تعتق راسها ماعندهاش اذا اللي حلماتو غادي يوقع ... بدون تفكير او سابق انذار والارض مدور بيها وحيط كيرميها لحيط خرجات للشرفة ودلات راسها والدوخة شاداها تلاحت من الطبقة الثانية للارض مباشرة طيحة وحدة هزات الفيلا كلها فنص الليل
تشعلو الاضواء وكلشي هبط كيجري اما عبد الحق الكافر بالله اللي خطط لهادشي هوا ومو هرب وخرج بقات غير مو بيناتهم مخلوعة ماضناتش توصل بيها الدرجة تلوح راسها من الشرفة .. لاكن سوار شافت ان الهبط من الشرفة اهون من الاغتصاب اللي ممكن يلوث جسدها وتفكيرها وحياتها مدى الحياة الى بقات حية نزلات لاللة غيثة كتجري على صراخ الخادمات وخرج ساجد من بيتو كيجري ودينا حتى هي عبطو لتحت لقاوها طايحة فوق الارض ولحسن الحض ماجاتش على الرخام جات على لكازو والربيع ديال الجردة والارض هزات عليها شوية الدقة لاكن كانت غايبة مكتحرك فيها حتى رجل
هزها ساجد داها للطموبيل بسرعة ولاللة غيثة تالفة كتقلب على شالها تمشي معاه اما لاللة فاطنة صفارت مابغاتش تمشي وحتى واحد ماداها فيعا وكلشي تهول .
وصلات للكلينيك ودخلات للانعاش ومعاها ساجد وطبيب اخر كان فالكلينيك شاد الحراسة فقسم المستعجلات كيسول مالها وشنو وقع ليها وساجد زربان يخربق فدوك الالات ويهضر مع الطبيب والفرمليات برموز طبية وهما كيركبو ليها اجهزة فنيفها ويديها بسرعة .
صبح الصباح وساجد باقي فالكلينيك كيدور بسروال سورفيت وتيسورط كوحل وخرج عند مو اللي بقات سهرانة مخلوعة كتسنى داها معاها للبيرو ديالو .. كان بيرو كبير بزاف فيه رفوف كثيرة وطاولة للاجتماعات واردع كثيرة ديال النجحات والتفوق فالمهنة ديالو ... تكات على فوطوي ديال الجلد بني وطلب ليها الفطور وجلس معاها شاد مجموعة اوراق فيدو وقال
شنو اللي خلاها ترمي راسها من البالكون ... وحاجة اخرى مابعاتش تفهم ليا ... كانت شاربةةشب محصر
وقف تكا على البيرو مربع يديه وقال : كنت باغي نهضر معاك على هادشي ديالهم ... شوفي مع عبد الحق باللاتي هي احسن يجمع راسو .. صافي دابا تزوج ... يخرج يسكن ويدي مرتو معاه .. ماعندها حتى معنى يبقا بمرتو فالفيلا ... وانا هادشي اللي بان ليا .. مكنجريش عليهم مي صافي الواحد يتحمل مسؤوليتو وقبرو فالدنيا خاصو يديرو ويستقر فيه ويجمع راسو
قاطعها: الله يهديك الحاجة اشمن معندوش راه هوا مابغاش يجمع راسو مرخيي ... شوفي الى جمع شي حاجة فهاد المدة وبغا يشري شي دار .. نعاونوه يشريها ويستقر ولا هاد الحالة
لاللة غيثة : والله ماعرفت اشنو ندير .. ولا كيفاش نهضر معاه
مشا ساجد جهة الزاج ديال الكلينيك فالبيرو اللي كيطل على الشارع وقال
- الوقت كتبدل دابا .. هوا تزوج ومرتو غتبغي تعيش بوحدها ودير اللي بغات... وانا الى تزوجت واش غيبقا هل ويخرج على مراتي وهي طالعة نازلة عريانة ... ولا خصها ضاروري تتغطى وتخنق راسها باش ميشوفش فيها ... وا لا الحاجة راه كاين شي حوايج خاصهم يتوضحو ومابقيناش صغار كما كنا وكل واحد خاصو يبني حياتو ومستقبلو ويستقر...... (تنهد) شوفي معاه والا غنهضر معاه انا ونعاونوه يشري شي دار ويدي ليها مرتو
مهرسة ومدكدكة وعضامها تقال .. الجبص على عنقها ويدها وكتحل عينيها بزز ومها وخواتاتها كيدورو بيها ... سلمات عليهم لاللة غيثة وطمناتهم وجات عينها على رانيا اللي كانت معاهم وبقات كتشوف فيها باعجاب بلا ماتهضر معاها حتى دخل عليهم ساجد فجأة بلباس الاطباء... سروال اخضر وتيشورط ديالو وعلى مزويناتو بقاو خواتاتها كاملين كيشوفو فيه باعجاب وهوا واقف حدا سوار بجدية وقال
تنهد كيشوف فيها وقال بابتسامة : نهار غنبغي نتزوج انا اللي غنجيبها الوالدة ..
لاللة غيثة : ايوا مالها رانيا شنو بيها ؟ انا عجباتني وحطيت عليها عيني من نهار العرس
رد : راه الزواج هادا الوالدة ... مابغيت نتزوج وصاافي غير حيت خاصني مرى واولاد ... بشوية ... مكهرتش شي وحدة اللي تكون قراية وواعية وبنت عائلة .. تعرف تربي لوليدات وتعرف تهضر ونتفاهم معاها ... اما البنات غير جيب وزوج من طرف لا .
لاللة غيثة : هي حاط عينيك على شي وحدة غير قول خخه
بقا كيشوف فيها غالباه ضحكة وقال : كاين كاين ...
لاللة غيثة: بصح!!! وشكون؟؟؟
رد : فالصراحة ماهضرتش معاها ... كتبان ليا ذكية وبنت الناس
لاللة عيثة: وشكون هادي وريها ليا !!!
ساجد : طبيبة عاد جات للكلينيك.. باها محامي كبير وامها عندها مدرسة خاصة ومديرة جمعية لا للعنف ضد المرأة
لاللة غيثة: تباااارك الله ... ايوا ضاروري توريها ليا ... غير نرجعو للكلينيك وريها لي
رد بالايجاب كيضحك: ان شاء الله.
رجعات للالة غيثة مع ساجد للكلينيك وعينيها غير كيدورو وكتقلب بعينيها .. طلعات معاه للبيرو وكتسول حتى فجأة جات ليها العروسة برجليها ودقات الباب ودخلات .. كانت بنت غاية فالجمال ... عوينات عسلية كبار وبشرة بيضاء وخدود وردية... حاطة ملمع شفاه وشعرها اسةد ناعم جامعاه بمقبط ولابسة وزرة بيضاء بسروالها والسناطات على عنقها وابتسامة بيضاء متحمسة فالخدمة وكترمش من الخجل باينة عاد تخرجات وبدات مباشرة فالكلينيك .. لقات السلام ومشات عند ساجد مدات ليه شي وراق كتوريه
لاللة غيثة: حتى يجي شي واحد يديها كما دارو ليك مع اللولة
هز راسو كيضحك وقال : الى كانت فالنصيب ... حتى واحد ميديها .
نزلات لاللة غيثة من عندو كضحك من بعد ما ودعاتو وخرج هوا من البيرو مشا طلب عفراء هي تفصح المريض بلاصتو ودخلها عند سوار اللي كانت متكية بوحدها من بعد ما مشاو عائلتها وخوا البيت ووقف حداها بجدية وقال
- شوية ؟
حركات ىاسها بالايجاب مغمضة عينيها وشافت فعفراء وهي دايرة يديها فالجيب .. شار ليها ساجد تتفضل وجبدات الصناطة وبدات دوزها على صدر سوار
عفراء: كحي ...
سوار: كح كح ....
عفراء: ديري بحال الى وحلات ليك شي حاجة بغيتي تخرجيها
بقات سوار كتزحر بزز وعفراء كتسنط من بعد قلبات ليها عينيها ورجعات اللور كتهضر مع ساجد غير بيناتهم كتقول ليه شنو كاين والحوار كامل فرنسية وخرجو كيهضرو وخلاو سوار كأي مريض ناعسة وكتشوف غير بعينيها
فالفيلا دخلات سوار مريضة كتمشي على رجليها وطلعات لبيتها ومعاها امها وختها حفصة .. اما فاطنة غير كتسايس ودايرة احتياطها .. جلسوها وعاونوها في حين جالس ساجد لتحت مع عبد الحق كيهضرو
ساجد: عندي واحد صاحب مقاول ... بنا مؤخرا شي برطمات زوينين وكبار فحي فيه كلشي .. مدرسة .. حمام مارشي جامع.. كولشي ... علاش ماتشريش شي برطمة وتستقر فيها نتا ومرتك وتاخدو راحتكم ... ماكتفكرش تستاقر؟؟
رجع عبد الحق اللو تكا على يدو وقال كيهز كتفو: الاالا لالا ماعندي ماندير بشي دار ولا والو غا خلينا مستورين
هز سساجد حاجبو وقال : باغي تبقا هاكا؟ ماعندكش اصاحبي لا طموح لا مستقبل باغي تبنيه ! شفتك كااع مكتفكر لمستقبالك ومستقبل اولادك .. من نهار عرفتك ونتا باقي كما نتا ماتحركتيش من بلاصتك
عبد الحق: اهااكا مرتاح والله مافيا اللي نصدع راسي لا بشنو غيوقع ولا شنو غادي يطرا
ساجد: تحرك اصاحبي ياللاه انا نعاونك تاخد دار ... جبد الى جامع شي حاجة نكمل ليك اللي باقي ودي مرتك خليها تاخد راحتها فدارها
عبد الحق: الا كنتي غتعاوني غا غطيهم ليا حب واقف عليهم .. انا الدار وداكشي بلاش والله .. هاكا مرتاح
ساجد : الى كنتي غتاخد الدار مرحبا ماكنتيش غتاخدها صافي نسا الموضوع ... غير هوا خاصك تقلب على سكنة ولا شي حاجة حيت الدار غادي تعمر قريب وخاصك تقلب على السكنة ..
سوار: بصح .. ماعندي علاش نكدب... اشنو غادي نربح الى كدبت .. وشنو اللي غادي يخلي وحدة ترمي راسها من شي طبقة الى ماكنتش عندها سبب كبير بحال هادا شنو اللي غادي يخليني نضحي بعمري من غير هادشي... ونتي الوحيدة اللي كنعاود ليها مشاكيلي وكنرتاح ليها
لاللة غيثة بقات غير حالة فمها ومصدومة شحال عاد قالت: وعلاش غيبغي يدخل عليك راجل غريب هوا وفاطنة؟؟؟
سوار: قلت ليه طلقني... مابقيتش قادة على هاد العيشة ... عطيني براتي نمشي فحالي .. مابغاش .. قلت ليه غادي نفضحك ونقول ليهم ماشي راجل... وتافق هوا ومو باش نوموني ويدخلو عليا راجل ويحملوني... ديك الساعة منقدرش انا نقول ماشي ديالو ... حيت غنتسما كنخونو ويحصلوني وماعندي منها حتى خرجة .
حلات لاللة غيثة عينيها مصدومة وقالت : وقال ليا ساجد راه شربات منوم !!!... قلت انا علاش قول على هادشي !!! اويلي انا عندي عصابة فالدار .. هادشي كامل قادين عليه وانا عندي البنت باقا عزبة فالدار ومخليا عليها الداخل والخارج !!!
- درت فيك التقة وعاودت ليك شنو كيوقع ... ماديريش شي فضيحة مابغيتش نضر راسي... صبري حتى بردي عاد فكري.. وبلا متقولي هادشي اللي مسيو ساجد حتى نشوفو شي ححل
ابتسمت ليها سوار ومشات خلاتها جالسة دخلات لكةزينة لقات فاطنة وعبد الحق كيهضرو معاجبهمش الحال وسمعات الحوار كامل ..
عبد الخق: وقالك خاصني نخوي من الدار يالاه .. بغا يتزوج ويجيب المرى وانا مالي!!!
فاطنة: وشنو درتي غتمشيو
عبد الحق: وا غادي نشوفو بعدا هاد الدار... وانا ماجامع حتى ريال ... شنو نقوليه ؟ شريها ليا نتا؟
تنهدات فاطنة قائلة: انا غادي نعطيك داكشي اللي جمعت من شحال هادي خبيتهم لدواير الزمان .. عندي واحد 30 مليون يزيدك عليها وشري الدار
عيد الحق: هااا ساكتة على الفلوس ومابغاش تقولي ليا
فاطنة : وا خليتهم لدواير الزمان هوا وشي دهيب نبيعو تا هوا وخود شي دويرة كبيرة وزوينة كااع
سوار تبنجات فاش سمعات حس الزواج وعينيها خرجو لاكن تمالكات نفسها ومشات بعدات جهة الدروج كتفكر وترمش حتى خرج عبد الحق وتبعاتو للجردة بالزربة عيطات ليه وقفاتو وهوا كور فعينيه من الفعلة اللي دار وقالت
- غادي ندير راسي ماطرا لي والو .. واخا شوف شنو درتي ليا وماجيتيش تهضر معايا باللاتي هي احسن ... انا عييت من الصدع اعبد الحق ... بغيت نرتاح ونستاقر وندير وليدات حتى انا ... ولاللة غيثة عاد دابا هضرات معايا قالت ليا غادي نعطيك شي بركة ديري بيها مشروع نتي وراجلك ولاكن خرجو من الفيلا حيت ولدها غادي يتزوج ... قلت ليها صافي اللي بغيتي وحتى انا بغيت نخرج من هنا ونديرو مشروع انا ونتا ولا نعطيك باش دير مشروع ومانبقاوش خدامين عندهم ... ولاكن ترجل معايا الى بغيتي نبقا معاك ويكون زواجنا حقيقي
عبد الحق بقا غير مصدوم وسوار طلقات عليه حلاوة لسانها وفنها فالكلام حتى خلاتو كيحلم ويرسم ويتخايل وقالت
دابا ماعلينا غير نخرجو فأقرب وقت ونسكنو بوحدنا ونفرشو دارنا ونمشيو ليها ... حنى الفيلا كتجبد لينا غير الصدع ... انا عييت وملليت بغيت غا نرتاح
عبد الحق : ومغاديش تبقاي كتهربي زعما ...
سوار: دابا انا اللي طالبة نسكن معاك بعيد على هنا ماشي نتا ... وغادي نكونو مزوجين بحالنا بحال غيرنا .. ولاكن حتى نرحلو لدارنا ..
كلات ليه الدماغ وخلاتو رجع عند ساجد وقبل بالعرض وتم الاتفاق ... جبد عبد الحق فلوسو كاملين وفلوس مو ومشا كيشوف الدار ودا معاه سوار تختار وهوا فرحان ... ختارت احسن برطمة واغلاهم ونزلو يتكاتبو لاكن وقفاتو سوار قدام النوطير وقالت
- عبد الحق... هاد الدار داري ... ياك غديرها فسميتي .. والمشروع نديرو فسميتك
عبد الحق: الااا .. اش كتقولي
سوار: عبد الحق بلا متشوهنا دابا قدام الناس صافي من بعد ونتفاهمو .. يالاه غير قضي..
زربات عليه ودوخاتو حتى خدات الدار وباقي لفلوس على حسب ساجد يدوزهم للمقاول مباشرة لحسابه
رجعات للفيلا وعبد الحق كينكر على شنو طرا وهي كتسايس بنرفزة دابا نردها ليك دابا نردها ليك .. خلاتو برا ودخلات تلاقات مع ساجد حدا الدروج نازل وضرباتو بكتفها كأنها دفعاتو بغضب وطلعات كتجري خلاتو غير كيشوف ومشات مباشرة عند لاللة غيثة وقفات عليها وقالت
- خالتي غيثة : عفاك عاونيني نطلق وناخد حقي منو ..
وقفات لاللة غيثة وقالت : غير بشوية عليك ... مالكي على هاد الزربة
سوار: انا عييت بغيت نرتاح .. بغيت نطلق..
لاللة غيثة: اييوا شفتي اشنو قلت ليك .. الصبر راه كيضبر. وقفتي دابا على هضرتي
سوار: بغيت نطلق الاللة غيثة ... عاونيني عفاك
لاللة غيثة حارت وبقات واقفة حتى دخل عندها ساجد للبيت لقاها دايخة وسولها وبدات تشكي عليه
- سوار جات عندي بغات طلق من عبد الحق وقالت ليا عاونيني
لاللة غيثة: ايوا توحشات البلاد خليها تسارا شوية ..رد البال راسك اولدي ... اااه قلت علاش منعرضش على عفراء تغدا معانا غدا ؟ شنو قلتي؟ منها تهضر معاها وتتعارفو
رد : اللي بان ليك مزيان ديريه ... انا ماعنديش مشكل
خرج من البيت مشا وسوار رجعات لبيتها بدات فجميع الحوايج ديالها بغضب خصوصا فاش سمعات بزواج ساجد... بقا الموضوع ديالو كيدور فراسها وسدات على راسها فبيتها ماخرجات ماكلات ماشربات حتى للغد ليه فيقها دقان عبد الحق كيفرنس وقال
- ويالاه ردي ليا الدار راه ماقلتش للواليدة درتها فسميتك تموت ليا... سربي .. وكون غا ما هضرتيش دوختيني وزربتيني
ضحكات بضحكة صفراء مقرفة وقالت : ههممم صافي واخا غير نسالي شي شغل ونمشي معاك ... ماشي دابا المهم صبر عليا... وحسن ماتقولها لحتى واحد مك غيبقا فيها الحال بزاف وتمرض ليك ... الى قلتيها لشي واحد غادي يوصلها لمك اللهم خليها بيناتنا
بجوج كلمات زربات على عبد الحق .. وحتى هوا ماعندو ما يدير من غير يصبر ويدير الخاطر والا فهوت اللي ضايع وضايع ضايع فكلتا الحالتين .
صبح الحال وصبحات سوار كدور فالفيلا .. دخلات للكوزينة لقاتهم كيوجدو الغدا .. وهاد المرة كان معاهم تريتور كيوجد الشيء اللي دخل لسوار الشك .. بقات كدور مالقات معامن تهضر وسولات اسماء ليمن الغظا قالت ليها شي ضياف جايين واكتفت . خرجات من الكوزينة تلاقات ساجد داخل يالاه جا من الصيد لاكن حيد التكرفيس فالبابور بحال ديما وكياخد معاه شي حاجة خفيفة يبدل بيها على بيدمن يوصل للدار ودخل لابس دجينز وتيشورط وبلغة ديال الجلد خضرا وزربات كيشوف فالساعة ... مشافش جهتها واخا تعمدات دوو حداه لاكن طلع حاني راسو كيجري تلاقا مو فالدروج وقال على عجلة
- انا غندوش ونهبط
لاللى غيثة: وصلو الضياف اولدي هاهما داخلين .
خرجات للباب كتسنى فحلتها الجميلة فأذا بالسيارة وقفات ونزلات منها عفراء الجميلة بأحدث ما كاين فالبلدي .. جلابة مطروزة مخزانية فالاصفر والطرز بالالوان فالاخضر والورونج والازرق فاتح وزخرفة عصرية جميلة مع بليغة وصاك فيدها والشعر مطلوق والنضارات الشمسة وهي اللي كانت كتسوق سيارة فاخرة حمراء من نوع " الفا روميو" .. لاكن منزلاتش بوحدها وانما جات معاها الام ديالها بسروال من توب وقميجة باردة فالاسود وكيومونو من الفوق طويل بلدي فالاسود منبت وحداء والشعر قصير كاري والنضارات ديال الشوف.. امراة راقية ومتولة سلمات على لاللة غيثة هي وعفراء ودخلو مع الباب وعفراء كتبتاسم وكانت حتى حاملة كمية من الانوثة وكتملك نضرات وعيون معبرة جميلة وبراقة .. استقبلاتهم لاالة غيثة فصالونها وسوار كطل من لفوق وتراقب في حين نزل ساجد بدجين جديد وقميجة رمادية والروايح كتعطعط والساعة فاليد والتسريحة مشا نيشان بابتسامة رحب بيهم ومد يدو للام هي اللولة سلم عليها عاد داز لعفراء اللي بدون شعور وقفات بادي ومدات ليه يدها ونسات انها ضيفة وماشي طبيبة عندو فالكلينيك تحتارمو فكل مرة دخل عندها وتوقف .. لاكن بقات فيها عادة وضحك وهوا كيسلم
جلس مقابل معاهم لايح يدو فوق المخاد بارتياح وفاتح رجليه كيشوف فيها وقال.
- حيدتي الخلعة شوية ؟
ردت كضحك ميلة راسها: هخه شوية ... شي شووية
سوار من لفوق كتفرج ماراضياش على الوضع وماصلاحش ليها كفاش تدخل ولا تقرب .. واي غلطة دارتها ممكن ساجد يتسيف عليها وهي مامستاعداش لشي صدع او كارثة بيناتهم .
بعد حوار طويل مع الحلوى واتاي ناض ساجد وقف طلب من عفراء تخرج معاه يتمشاو شوية وبخجل ماتوقعاتهاش منو ناضت من بعد ما دار ليها الطريق مشات قدامو وخرجو للجردة كيدورو وبعدو على الدار .. بقات عافراء ساكتة وحاسة بشي حاجة غريبة وانه ناوي على نية حيت ماشي عادي يعرض عليها من دون الاطباء وهي باقا جديدة .
دار يديه فجيابو وقال بابتسامة : عفراااء يا عفراااء ..شكون سماك هاد السمية
ردت بابتسامة : سماني بابا
رد : عندك شي خوتك ولا غير نتي؟
ردت: غير انا وصافي
ابتسم وقال: سميتك زوينة .. شحال عندك من عام؟
ردت: 24 سنة
ساجد: تبارك الله ... ومكتفكريش ديري التخصص ... احسن من الطب العام
ردت : بغيت ندير التخصص فمرض السرطان ..
رد : وعلاش بالضبط فمرض السرطان ؟
ردت بأسى : حيت خويا مات بالسرطان ... بغيت ندير التخصص فااسرطان وداكشي اللي ماقدرتش نديرو لخويا فاش كان محتاج اللي يوقف معاه .. نديرو مع ناس اخرين ... بقات فيا واحد الطاقة بغيت نفرغها
رد : مزيان .. الله يوفق ... ولاكن حيدي الخوف ... عملية بسيطة ماشي شي حاجة
ابتسمت وبدات تغني بأحساس في حين كانت سوار فبيتها واقفة ساهية من الشرجم كتخمم بأسى مربعية يديها .. هزات تيليفونها تاصلات بامها وجلسات فوق كرسي كتحدث
- الو ماما .... الحمد لله بغيت نقول ليك جمعو الرحيل غادي نرحلو من ديك الدار.... ااه غادي نمشيو لدار اخرى كبيرة ... واحسن من الدار اللي كنا ساكنين فيها ... غتكون عندنا كوزينة كبيرة والبلاكارات حتى حنا ... ومغاديش نبقاو ندرقو الماعن بالخامية... وغادي يكون عندنا الحمام زوين والفراش زوين ... غادي نبدا حياة جديدة ونخرجو من ديك الحومة المشرومة اللي ماعطاتنا والو .. وديك الدار غادي نبيعوها .. وشنو ماجابت لينا غادي نفرشو بيها الدار ونجهزو الكوزينة ونشريو ماعن جداد .... لا اماما داري خديتها ... حتى لمن بعد ونعاود ليك شنو كاين .. اه داري ههه.. فرحتي .. ياللاه جمعو الرحيل نمشيو نسكنو تما
قطعات لاللة زينب من دارها وهي عينسها كيبرقو بالفرحة ماقادراش تيق ... فرحة كبيرة بحال اللي كان كيتسنا شي حلم وتحقق والدار بالنسبة لاللة زينب شي حاجة كبيرة .. حيت دارها القديمة كانت حالتها وراجلها مجرد صياد مع الصيادة ... ماجهزها دار ماصلحها ما فرشها ... بلعكس عاد مازادش تكفسات بالبرودة دالبحر والغمولة وحيوطها تقشرو .. وعطاه الله خمسة دالبنات يالاه كان قادر يسترهم من الزنقة ويلبسهم شوية ويوكلهم ويشربهم .. اما من نهار مات وحياتهم تبدلات وعاد مازادت تكفسات ... رجعات لاللة زينب كتصاوب الحلوى وطيب فالعراسات باش تقدر توكل بناتها .. وواخا القهرة والفقر لاكن حياتهم زوينة بزاااف وديما ضاحكين وخالقين السعادة .. وعمرهم فكرو بطريقة سلبية ولا بكاو شي ليلة بسبب حالتهم المادية. كانو ديما يتجمعو على كسكس نهار الجمعة ويضحكو ويجبدو احداث من قاع الخابية.. وحتى لاللة زينب ماشي نكدية ..بلعكس ضحكوية وطالقاها تسرح .. ونهار كضيق بيهم كيتسلفو من عند الناس والجيران ويقضيو الغرض ويردو سلفهم من فاللوقت
خرجات كل وحدة من بيت كتجري تجمعو على لاللة زينب وهي كضحك فرحانة وكل وحدة منين كتسول وتجر فيها دوخوها حتى تنفضات وجلسات للارض كتغوت
لاللة زينب وحناكها مزنكين: سوار شرات الدار وغادي تدينا نسكنو فيها
نقزات مرج الزهور فوق السدادر : حلفي... حلفيييي غادي نرحلووووو حلفي اماما غادي نرحلو حلفي حتى شرات الدار
نقز الجميع : قولي والله .. حلفي غادي نرحلو من هنا .. حلفي حتى شراااااتها .. اري نعيط ليها ... ناري وتكون بصح غنحمااااق
بدات مرج الزهور كتنقز بالفرحة حتى بدات تبكي وهي الصغيرة فالبنات مسكينة كانت تشوف ديور الناس وديما تنكر على مها ترحلهم من تما حتى كتاب ليهم النهار اللي يبدلو حياتهم .. عنقات مرج الزهور امها وبدات تبكي بصوت مرتفع ولاللة زينب كتمسح ليها حتى غرغرو عينيها وبدات ضحك والبنات كيجرو بعضباتهم فرحانين كأنه العيد عندهم وناضو كيتجاراو كل وحدة شنو كتجمع .. انا حفصة هزات تيليفون ماتيقاتش هضرات مع سوار كتحلفها
حفصة : عنداكي تكوني دايرة شي مقلب مع مريم لماما باش تحطوه فاليوتوب ... هادشي مكيضحكوش فيه الناس ... واش بصح ؟؟؟ عندااااكي ... راه مسكينة بالفرحة بدات كتبكي .. ناري ويطلع مقلب والله حتى نصفيها ليك اسوار .... ومنين جاتك الدار يالاه ... حلفي بالله حتى كتبها ليك ... وعاحنا غنشوفو انا بعدا مانتيق حتى ندخل ليها . اختي راه ماعندنا قشاوش اللي نجمعو كل وحدة تجمع شراوطها وغادي نرحلو ليوم والله ميجلسو ليك هنا دابا ههه... جيبي الهونضة ... لالالا مامعطلينش صافي جمعنا الرحيل غا اجيو .. ههه واشنو يحساب ليك غادي يصبرو راه ناضو حداكو
نزلات سوار من البيت لابسة كسوة على شكل قميجة طويلة حتى لاارض بالحزام وصندالة خفيفة وجامعة شعرها عشوائي .. لا مكياج لا والو فقط واقي الشمس وبارفان وبلا متشاور مع حتى واحد اللي اصلا مابقاتش باغا تشوفهم .. حتى واحد مابقا كيدوز ليها من غير لاللة غيثة اللي كانت مشغولة مع الضيفة .
خرجات مع الباب تلاقات ساجد وعفراء راجعين .. وقفات هازة راسها شافت فيهم وحتى هما وقفو بالخصوص عفراء حسباتها وحدة من العائلة وابتسمت .. حط ساجد يدو على كتفها وقال
.- يالاه ندخلو..
شاف فسوار بنص عين وغرور ودخلو في حين بقات هي واقفة كتشوف قدامها وتجمع النفس فصمت .. فالاخير ضحكات بسخرية ومشات مالقات اللي يوصلها وضرباتها جبدة مع الشجر على رجلها حتى للباب لكبير وخرجات كتقلب على طاكسي ومن طاكسي لهوندة ومشات للحي ديالهم ودخلات للدار لقاتها مقلوبة ومدابزين على القش اللي بغات تدي لاللة زينب لا كن رفضو البنات يديوه للدار الجديدة وطالبوها بشراء الجديد .. بابتسامة قاطعاتهم سوار
- غادي نبيعو هادي ونفرشو الدار الجديدة ... ناخدو دابا غير باش نقضيو
الكل مشا عندها كيجري ويسول وبداو يعنقوها بقوة من وحدة لوحدة ماقادرنيش يكتمو الفرحة ديالهم .. تهز الرحيل والحومة تجمعات ماسخاوش بلاللة زينب وحتى هي ودعاتهم بالبكى .. طلعو البنات ومعاهم سوار اللور مكركرين فالهوندة مع الرحيل كيتمايلو وامهم طلعات لقدام حتى للتجزئة الجديدة .. وتجزئة واشمن تجزئة هي .. قريبة للمدينة والباركين فلاكاف والاسانسور والدخلة والجرادي شاري تما غير المهندس والمقاول والموضف والمحامي وغير الناس الكلاص .. حلات ليهم سوار الباب كضحك فالطبقة الثالثة ودخلو للدار... عروسة ماشي دار ... الصالون الوسط كبير وفسيح بالسراجم شي حدا شي كبار وكولوار طويل وعريض جامع البيوت والحمامات بجوج ، عضات لاللة زينب على شنايفها شادة الضحكة وداخلة كتشوف والسعادة الغارمة على وجهها كتردد تبارك الله تبارك الله وتشوف السقف المنقوش بالخشب والصباغة كتبري والارض كتلمع .. مشات للكوزينة طلات كانت مجهزة بالبلاكارات ديالها والبوطة ديالها .. مجهزة مقادة غير دخل ميعناتها وتبدا ، وشحال فرحات بيها وبوسوعيتها والبالكونات ديالها .. شهوة منها كتبرد القلب وكتعوض السكنة المجيحة اللي كانو فيها . فيساع بداو يسيقو ويكرطو ويجففو وطلعو الرحيل ديالهم .. يالاه فرشو بيت صغير بالفراش اللي جابو وناموسية قديمة حطوها فواحد البيت هي والماريو وحوايجهم وماكينة دالصاوبون حالتها دخلوها للكوزينة وحجو ماعنهم صافي والباقي بقا خاوي وحتى تلفازة خاسرة ماجابوهاش . الماعن تخشاو كاملين فبلاكار واحد والباقي بقا خاوي .. كان خاصهم ماياكلو للغدا والجيب خاوي وحتى وحدة ماعندها .. وكما كانو كيديرو ديما كيتسلفو كانت لاللة زينب غترجع لحومتها تتسلف لاكن سوار منعاتها وطلبات الذهب ديالها لامها للي مخبية وجبداتو لاللة زينب بالصدع والغوات هي وسوار عليه مابغاتهاش تبيعو لاكن سوار خدات براسلي وطلبات من حفصة تمشي معاها وخرجو مشاو لقيسارية فالمدينة عطاتو للذهايبي ساوماتو عطاه فيها 2000 درهم .. ويالاه جبد الفلوس قال بلاتي نجربو وجربو مالقاهش ذهب وقال متفاجأ
- هادا اختي نقرة مشلل ماشي ذهب منين جاك!!!
خرجات عينيها اويييلي على نقرة !!! ذهب راه ذهب عرسي هادا
حفصة: اويييلي على نقرة !!!
هزات سوار تيليفون مخلوعة تاصلات بمريم طلبات منها تجيب الذهب الباقي لاكن جات لاللة زينب شخصيا خوفا تبيعو ولا تلفو مريم و تلاقاوها فالقيسارية لقات وجههم اصفر وبلا ميهضرو جروها عند الذاهيبي عطاوه الذهب قلبو لقاه كامل نقرة مشلل . وهنا طاحت سوار سخفات ولاللة زينب بدات ضرب فخادها وطلع الذهب ماشي ذهب .
اخرتها ناضت سوار شدات راسها وتقبلات الشمتة وطلبات من الذهايبي يعطيها ورقة مكتوب عليها كل حاجة بانها ماشي ذهب وبدات تصور فداكشي وامها حاطة يدها على فمها هي وحفصة وكيتحصرو على الشمتة .. خرجات سوار خاتمها دالزواج وعطاتو ليه قلبو لقاه ذهب وباعتو وخدات فلوسو وخرجات من تما فصمت شادة البكية . عنقاتها امها وحفصة كيصبروها
لاللة زينب: صافي ابنتي .. صافي يخلفو الله ... مايبقاش فيك الحال
سوار: شفتي ..شفتي امي معامن عايشين ... غير اولاد الحرام اللي دايرين بينا .. بالحق والله مادوز ليه طريفة
بفلوس الخاتم مشات هي وحفصة تقدات الخضرة دكسكسو واللبن ومشاو للدار فوروه وطيبوه وتجمعو عليه فوق واحد الكوافوز صغير خطاوه بواحد التلميطة ديال مخدة وتجمعو كيتغداو ويهضرو على الذهب حتى شوية بداو البنات كيضحكو عليها وعلى الشمتة وهي تخرج ليها الضحكة من نيفها
سوار: وانا فرحانة وطالقاه قدام العائلة .. شوفو زعما الذهب...
حفصة وهي كتكور: واديري الذهب مع راسك
سوار: غندير الديااامند هههه .
مرج الزهور: سوار عطيني 100 درهم نشري بيها واحد السبرديلة
سوار: ماعنديش دابا حتى نرجع .. يقدر غدا نرجع .. احم .. ماما انا صافي منقدرش نبقا تما غانجي ..الحومة اللي غيشوفوني ويهضرو فيا صافي رحلنا منها .. والعائلة يمشيو ينبكو اصلا حتى واحد مكيعطينا شي حاجة باش نديها فهضرتهم
لاللة زينب .. ايوا غير على هاد الشمتة غير طلقي ههه
سوار: ضحك عليا ولد لحرام .. ولاكن حتى هوا كتب ليا الدار .. وايمشي ينتاحر دابا .. شتي ديك مو هي اللي غتكون قالت ليه شري النقرة .. هوا دمدومة مو اللي كتوريه اش يدير ... هي اللي غتكون قالت ليه اوليدي متخسرش الفلوس دير ليها النقرة مغاتدي متجيب ... واااحد الحرامية ديك موو ... جاهلة وامية وحراامية .. المهم انا غانمشي دابا ونجي غدا ... ان شاء الله فاش نجي نمشيو نسافرو ... نمشيو نفوجو شوية فالشمال
- انا غادي نخرج ونخلي ليكم هاد الدار .. وولدك حتى هوا سيري قلبي ليه عروسة اخرى وضحكو عليها وشريو ليها الذهب مزور ..
فاطنة : هاا!!! اينا ذهب
سوار: هه .. سيري ضحكي على شي وحدة اخرى .. اما انا راه لاللاك سوار ... واااجرك على الله ... ومزال غادي نسكت ليك القلب .. واخرجي عليا ولا غادي نشوهك ...
خرجات فاطنة كتنكر وتتاصل بولدها في حين سوار جمعات حوايجها فالباليزة ونزلات كتجر فيها وفاطنة كنغوت على ولدها يجي .. خلاتها سوار ومشات حدا الباب لقات لاللة غيثة و ساجد داخلين .. وقفاتها لاللة عيثة كتسول اش واقع في حين سوار تلفتات موراها وقالت.
- هي تعاود ليك شنو كاين ... عندها بزااف مايتعاود ... والى بدات مغاديش تسالي ... وانا صافي عمرني منرجع لهاد الدار وعمركم تشوفو وجهي .. اما نتي الاللة عيثة... الله يعمرها دار ..شكرا بزاف على كولشي عمرني نسا خيرك ... غير حضي راسك .. راه اقرب الناس ليك كيضحك عليك .
وخرجات خلات لاللة غيثة حاللى يديها مافاهمة والو ومشات دازت قدام ساجد اللي يالاه نازل من الطموبيل .. شافت فيه وهزات راسها ومشات كتجر مع الطريق ولاللة غيثة كتشير ليه
سمحات فيه ومشات كتجر خلات الطموبيل واقفة وخرجات شدات طاكسي مباشرة لدارهم
رجعات بحالها للدار عند خواتاتها وامها وبدات دور فالدار وتشوف لقات باللي ديك الدار اللي كانو فيها فيها بيت ومراح وكوزينة وحالتها موحال تفرش ليهم حتى ديك الصالة .. خاصهم شحال باش يعيشو كما بغاو ولاكن منين غتجيب باش يديرو داكشي كامل... الصيف والناس مسافرين الا هما بحال كل صيف .. بغات تسافر هي وعائلتها شوية ويشوفو الدنيا ومولاها ربي .
صبح الحال وصبحات رافعة دعوة ديال الطلاق . رجعات للدار ومشات جبدات البراسلي ديال الديامومند بقات كتشوف فيه شحال ورجعات خرجات داتو باعتو واللي شافها وهي جالسة كطلب ثمنو والطريقة باش كتهضر وكفاش جالسة يقول بنت وزير .. كتقن تقليد الاغنياء باحترافية ..خدات فلوسها وخرجات كدور مشات فالقيسارية بجلابة عرسها والبلغة والحالة مقادة والشعر مطلوق حيت مشات باعت البراسلي لبسات احسن ماعندها باش تبان كلاص وبدات بأمها هي اللولة شرات ليها بيجامة تلبسها وققرات تخرج عائلتها تصرف عليهم شوية ديال لفلوس باش يلقاو ميلبسو ويسافرو شوية للشمال . وهي خارجة من القيسارية جاها اتصال من رقم غريب وفتحات الخط سمعات صوتو وبسرعة عرفاتو وصدمها اتصالو وبقات واقفة مصمرة ... دقات قلبها بدات كتسارع ورجليها فشلو مكانتش متوقعة اتصاله ابدا ..
ساجد: الو سوار..
سوار: وي ..شكون معايا
رد : ساجد معاك ... بغيتك فواحد الموضوع ضاروري
سوار: اشمن موضوع؟؟
رد: غنتلاقاو وتعرفي .. فينك دابا ؟
عطاتو العنوان وطلبات الى بغا يجي عندها يجي لقهوى كما كيديرو الناس لكلاص ومشات جلسات فقهوى زوينة فالشارع دايرة رجل على رجل وطلبات عصير وبدات تلوي فشعرها وتقاد وجهها وهي كتشوف فكامرة التيليفون حتى وصل وجا عندها لابس دجيز وتيشورط كحلة ونضارات شمسية ... غير وصل جلس مباشرة ونتر النضارات وشاف فيها بحدة خلعها وقال
- تبارك الله عليك ... دااهية مع راسك
ردت باستغراب: شنوو؟؟ مالنا يام لباس
رد بغضب: الدار اللي ديتي لعبد لحق ورميتي مو فالسبيطار غترديها
بحدة ضرب فالطبلة حتى تلفتو كاع الناس وقال : الدار اللي ديتي دمرتت فيها مو ... وبلا حشمة بلا حيا زعما ديتيها وطالبة الطلاق.. (صغر عينيه فيها) شيطان فسيفة بنااادم
وقفات هازة صبعها فيه وقالت : جمع راسك ولا نوريك الشيطان .... الشياطين هما نتوما ... اشكون نتا اللي جاي تحاسبني على الدار
رد بغضب : رجعي للسيد رزقو هوا ومو ... (شاف فيها مطولا) اللي شافك يغلط فيك .
خرجات عينيها وقال : واش نتا شغلك ... انا بغيت نفهم مالك خاشي راسك فشي حاجة بعيدة ... واش ماعندك شغل تقابلو ؟
رد بغضب: دوك الناس اللي ضحكتي عليهم راه كيعنيوني ... ماشي خدامين عندي ... فتي الحدود ديالك الاللة ... واش مابقاتش فيك المرى اللي مرمية فالسبيطار بسببك ... عرق كتافها ديتيه ليها وكتنعسي مرتاحة ... (باحتقار) كن كنتي راجل كنت غندمك على هادشي .. ولاكن غيير مرى ..
قاطعاتو : غيير مرى... مالها مرى خضرة فوق الطعام!!!
رد تحت سنانو : طماااعة ... ومالقيتيش اللي يربيك
هزات يدها حتى للسما وعطاتها ليه للوجه خلات القهوة كلها مصدومة وقالت بغضب
- مربية احسن منننك .. وطماعة .. ااايه طمااعة باغا نعييش عائلتي بحال الناس . باغا واحد لباس عليه باش نخرج دارا من المزيرية والزلط ... وكن جاا شارف كن تزوجت بيه على قبل راااسي .. على قبل ماما وخواتاتي اللي كيتسلفو خبزة وكيتسلفو بطاطة ... داك الحوت اللي نتا كتصيد .. من نهار مات بابا مادقناه وكن ماكنتي كتعطيه لماما بلا متخلص منها ماكانش غادي يدخل عندنا للدار ... حيت ماشي بيدينا ... ماعندناش باش نصرفو وبابا كان غير صياااد ماخلا لينا والو ... ماشي بحالك نتا... شاد المرسى و طبيب والكلينيك والفلووس كتزلع مكتحسبش وجاي تحاسب معايا ... داك الحمار كدب عليا نهار الاول وبين ليا باللي غيعيشني احسن عيشة ... وفاللخر طلع كداب ماعندو حتى شقفة .. تبغيها لختك ! وضاحك عليا هوا ومو .. جابو ليا النقرة مشللة بالذهب وكيقولو ليا ذهب ... وديك مو اللفعة ... اللفعة اللي ماخلات مادارت فيا سول مك تقول ليك ... هادشي مقالوهش ليك قالو ليك غير شنو درت انا !!... وزايدون انا خديت الدار بخاطرو هوا بغا ماديت ليه والو
طرطقات فيه عينيها ومشات خلاتو واقف وخرجات مزيرة كتنهج ومخنوقة حتى بعدات وجلسات فوق طروطوار كتبكي وتلعن الحالة اللي وصلاتها لديك الحالة وبقا كلام ساجد كيطلع ويهبط فيها بحال المنشار ..
رجعات فحالها للدار للجو العائلي ديالهم ولاكن خاطرها مغيير . كلام ساجد بقا كيحفر فيها وكتحاول تعالج نفسها بنفسها وكتشوف عائلتها فرحانين مرتاحين وخواتاتها مدابزين على البيوت كل وحدة تجر من جهة لاكن مخليين بيت لسوار حتى وحدة مكدور بيه ومنهم راسهم خلاوه ليها وناضو كيتقاتلو على البيوت لخرين ... صبح الحال وخرجات لالة زينب هي وسوار يتقداو شنو خاصهم ومشاو للقيسارية كيدورو وسوار كتزيد امها تشري حتى تقداو وسالاو وفالخرجة سبقات سوار لاللة زينب بالميكات كتسناها على بيدمن تخرج من واحد العطار .. كانت واقفة بملل فالجنب حتى فجأة وقف عليها عبد الحق كينهج وعينيه كيدورو وقال ليها كيخرج فعينيه
- حصلتي ابنت ***** ... وهاكي.
هز يدو ضرب ليها حنكها ماحساتش براسها حتى والدمايات كتشرشر من حنكها وهبطات ليها على حوايجها وهي كتغوت ويدها على حنكها والناس تجمعو ولاللة زينب خرجات شافت الجماعة وبدات تقلب بعينيها على سوار وقلبها علمها قال ليها راها تما وسط الجماعة ودخلات طلات لقاتها طايحة فالارض كتنهج وعينيها مقلبوبين ووجهها بالدميايات مكيبانش وطاحت حداها ضربات فخدها وبدات تغوت لربي اللي خلقها ..البنت زويينة مشا خصر ليها وجهها مسكينة
الصياد الجزء الثاني
محتوى القصة
التنقل بين الأجزاء