تخيطات الدقة وتحطات ليها فاصمة وخرجوها من المستعجلات لبيت مشروك مع الناس ودخلو عندها خواتاتعا وامها لقاوها فحتل يرثى لها وكانت محتاجاهم فجنبها تبكي عليهم .. شافو الفاصمة فحنكها ماقدروش يتقبلوها بالخصوص امها لطمات وجهها بشدة وبدات ضرب فراسها بالفقصة حتى طاحت فالارض . اما خواتاتها بقاو يسولو شكون ضربها حتى قالت ليهم شكون وتما هزات حفصة التيليفون ديال سوار تاصلات بلاللة غيثة كتغوت
- صافي .. تهنيتو ... ... راه الحمااااار دعبد الحق تعرض لسوار ضربها بزيزار فوجها راها فسييطاااار .. اوييييلي خسر ليها وجهها ولد لحراااااام .. اويلي شبغا عندنا حسبي الله ونعم الوكيل ... حسبي الله ونعم الوكيل خرج علينا وعلى حياتنا الله ياخد الحق ..
كانت اثنائها لاللة غيثة فالدار على السجادة بالعباية كتصلي فاش سمعات الخبر ونزل عليها بحال الرعد ناضت وقفات تالفة كتفتف وتهضر بوحدها ونزلات هازة عبايتها وتجر فصندالتها وتعيط
- عبد الحق ... عبد الحااااق ... فاطنة ... فاااطنة .. ااافاطنة
خرجات فاطنة هازنة راسها باقا كية الدار مابرداش ويالاه جابوها من السبيطار كتسول شنو كاين
لاللة غيثة : فيت عبد الحق .. اش دار اويلي ضرب للبنت وجهها خسرو ليها ... اااش دار مسخوط الواليدين ... اويلي اللي ماعندو هم تولدو ليه حمارتو ! بغا الحبس ... هاهوا غيمشي ليه ..
ساجد: كفاش ضربها فوجهها !! فين هواااا فين كاين ( كيعيط بصوت مرتفع) عبد الحااااق ... عبد الحااااق
لاللة غيثة : فييين هوا عبد الحق .. يعلم الله فين زاد .. زيد نشوفو البنت بعدا راه الوجه هادا ماشي اللعب .
خرج كيجري حل لمو الباب طلعات وطلع بسرعة ديمارا السيارة كيطير لسبيطار اللي مشاو ليه ، اما فاطنة بقات واقفة كتشوف فيهم حتى مشاو وقالت
عبر عليها ... خليها
وصلو كيطيرو ودخلو كيجريو كيسولو على سوار في حين هي كتبكي من الساعة اللي خرجات فيها مابغاتش تسكت حتى حمارو عينيها وكل شوية ضرب راسها وتبدا تركل ماقدراتش تقبل شنو وقع ليها وكل شوية يجي الطبيب كيجري فاش كيسمع غواتها .. دخلات لاللة غيثة مخلوعة لقاتها فديك الوضعية وساجد موراها زادو تخلعو وكملاتها لاللة زينب اللي وقفات على رجليها حيدات الشال على راسها وهزات يديها فشلانة كتبكي ودعي
- حسبي الله ونعم الوكيل ... حسبي الله ونعم الوكيل اش بغا عند بنتي ... ااااش بغاااااا عند بنتييييي رزاها فوجهها وهي صغيرة ... خسر ليها وجهها على مزيناتها كي الوردة الف واحد يتمناااها ... ...ياربي راني كنتشوط كون معايا ... ياربي راه كبدتي كتحرق
لاللة غيثة : شنو اللي وقع اشنو طراااا ... اشنو وقع قولو لينا غير شنو وقع
خرجات حفصة من الجنب مخرجة عينيها
- اشنو وقع ... هاااا شنو وقع ... هااا وجههل مشاااا .. ها عبد الحق ديالكم تعرضها ليها فالقيسارية عي وماما وشرط ليها وجهها ... اشنو غنديرو دابا ... اشنو غدير الوجه اللي تشوف بيه مشااااا
- ابنتي .. لباس عليك ابنتي لباس .. لاحولة ولا قوة الا بالله العلي العضيم مداش هاد الموصيبة
اما ساجد شاف الحالة ماشي طبيعية والمندبة ما قربش خرج كيقلب على الطبيب جابو وتعرف عليه وطلب يشوف الحالة ديالها بعينو وطلبو من الكل يخرج باش ميشوفوش الضربة ويطيح شي واحد فيهم بكريز تما .. خرج الكل بقات غير حفصة مع سوار اللي شادة فيها وماعندها كي دير ليها تخليها بوحدها وهي فحالة هستيرية من البكى .. قرب ساجد عاقد حجبانو كيتأسف للوضع بغا يشوف لاكن بدات دفع وتغوت وراسها كيتمايل بتعب البكا والغوات وهوا كيعضر معاها ويسايس
- مغندير والو ... ماتخفايش غنشوف غير الجرحة كي دايرة ... رساي ماتخافيش
الطبيب: خلي الدكتور يشوف الحالة الى بغيتي تبراي... البكا ماعندو باش يفيدك كتهلكي راسك صافي
شدات ليها حفصة يديها وقرب بشوية شد ليها فكها وهي كتنخصص وتشهق وعينيها كيتلسقو بالبكى بغات تسخف وحيد الفاصمة بشوية ومع التحييدة حل عينيه مخلوع فالجرح قدو قداش منفوخ بزاف والخياطة اللي دارو ليها ديال تكاشط نيت .. رد الفاصمة بسرعة وقال كيهدئ من روعها
- ماشي شي ضربة ... غير جرحة دغيا تبرا
حفصة: بصح غير جرحة ؟
ساجد : لالا دغيا غتبرا بحال الى مكان والو ..
خرج لبرا مع الطبيب سول على وقت العملية وقتاش داز لقاها دازن بنص ساعة وطلب ينقلوها للكلينيك على السريع فحالة طارئة ودخلو عندها هزوها بسرعة فسيارة اسعاف وامها تابعاها ركبات معاها كتجري وطلب ساجد يعتق ليها بنتها حتى قربات تبوس ليه يدو وهوا كيحاول يطمنها وعلى عجلة من امره طلع فالسيارة تبع الاسعاف وخواتاتها طلعو معاه هما ومو بلا عقل وبلا عراضة
دخلات للكلينيك كيجريو بيها تعرضو ليها الاطباء ومنهم عفراء اللي وقفات قدام ساجد وهو داخل كيجري
- دكتور نتكلف انا ؟؟؟ انا نقدر نتكلف العملية بسيطة
رد على عجلة : لا انا غنتكلف ... دخل بسرعة كيغسل يديه ويعقم والممرضات كيتجاراو وجدو الادوات ولبسو ليه اليكات فيديه ونعسو سوار وهي كتنخصص ولاول مرة كتشوف فيه بترجي قائلة
- عفاك رد ليا وجههي كيف كان ... عفاك رجع ليا وجهي الله يخليك ماماك اللي عزيزة عليك
بدات تبكي وهوا مركز كيحيد ليها الفاصمة بشوية وكيطلب منها تسكت متحركش حنكها وعقلو كامل مع الجرح .. فسخ الخياطة كلها قبل ميتلم الجرح وبدا يعقم وينضف وهي ناعسة قالبة وجهها جنب على حنكها وكتهضر
- مكنحس بوالو .. واش كبير؟؟
- رد بتركيز : قلت ليك صغير ومغاديش يبان ... متهضريش راه داير ليك البنج
هزات يدها بغات تقيس وشد ليها يدعا هبطو
- لا ماتقيسيش بيدك ... صافي انا قريب نسالي
سد ليها الجرح بالليزر سدة رقيقة بحال الشعرة والممرضات حاضيين مع يديها حتى سالا العملية وغطاها بفاصمة وجمع وطوا ووقف حداها كيحيد الليكات
- متهضريش دابا اوك ... خلي اللحم يتجمع ومتحركيش لسانك من لداخل جهة الجرحة ... كولشي غيكون مزيان
ابتسم كيشوف فيها مطولا وقال: غيرجع بحال الاول غير متلعبيش فيها بيدك ... وماتخلعي ما واااالو كولشي غادي يرجع احسن من الاول
خرج من الغرفة لقا مو كتسناه واقفة وطمنها وقال
- الحمد لله جبناها فالوقت .. الخياطة لي دارو ليها ماشي ديال اللحم ديال الصبابط وجاب الله جات فالوقا عاودنا ليها كولشي .. دابا حاجة وحدة اللي غادي نقول منعاودهاش الواليدة .. عبد الحق مانعاودش نشوفو كيدور عندي فالدار .. مو بغات تبقا مرحبا هوا مانشوفش وجهه .. الى شفتو منعاودش ليك شنو نقدر تدير معاه (تعصب) هادشي اللي اللي دار راه مكيدارش وماشي راجل والله ما ماراجل
لاللة غيثة : فين عبد الحق .. راه مشات معا وخوتها يديكلاريوه بيه
رد : يستاهل .. الى شدوه يستاهل .. مالنااا فالغابة !!! القوي ياكل الضعيف!! نضرب انا البنت للوجه نخلي فيها عاهة مستديمة باش نرد حقي ؟؟ .. هاهوا ضربها اشمن حق جع ليه ؟؟ رجعات شي دار ؟؟ رجعات شي حاجة ؟؟ خرج على راسو صافي
لاللة غيثة : راه بحال خوك ماتبغيش ليه الحبس .. وحتى عي مانبغييش ليها هادشي اللي وقع ليها بقات فيا الزغبية
رد بغضب: واخا يكون خويا خصو يتعاقب ... مكنضربوش بالزيزوار وجوه الناس ... ونخليو حياتهم كلها عداب ويعيشو بعاهة مستديمة .. اش هاد التخلف والجهل مابغاش يسالي ... زيزواروالوالدة زيزوار .. دابا اللي ناض ضرب واستقوى يحال هاكا كتردوه راجل .. هادا راه حيوااان .. الحيوااان اللي كيتصرف بهاد الطريقة .. اما الرجال بزاااف عليه .. بزااف باش يوصل ليهم ويكون بحالهم ويفكر بحالهم ... هادشي اللي خلاه مادار والو فحياتو من بدايتو وهوا هاكا وغيسالي هاكا..... اشنو ندير .. نوض نخسر لبنت الناس وجهها باش مابتقاش فيا الشمتة ونرد حقي... اشمن حق رجع ؟ رجع شي حق ؟ رجعات شي خاجة؟ ااالو خصر ليها الوجه دابا غتبقا فيها شرطة عمرها تحيد ... وماشي حشوومة عليه ... وحرام عليه كااع يخلي البنت معيبة بديك الضربة تحشم تشوف وجهها فالمرايا ..
لاللة زينب مشات ديكلارات وماهي عير يوماين تشد عبد الحق جبدوه من تحت الارض مو ساقت الخبار فالدار ولدها تشد طاحت على رجلين لاللة غيثة كتبكي بغات تبوسهم ليها .. فالاول كانت لاللة غيثة ضد فاطنة .. لاكن من بعد ما طاحت على رجليها ماقدراتش ماتعاونهاش .. تنهدات باسى ومشات عند ساجد للبيرو لقاتو مشغول وجلسات فوق الكرسي
- لاللة غيثة : الله يرضي عليك اولدي شوف كي دير ليه خرجو من تما ... راه مو غادي تحماق الله رضي عليك
رد بصرامة: ماعندي منشوف وماعندي مانخرج انا ماشي رئيس ... انا طبيب وانا براسي الى درت شي زبلة ميعقلوش عليا
رد : انا ماعندي مندير ... الى عندك شي حل اريه نطبقو
بقات لاللة غيثة كتفكر شوبة وقالت : علاش مانعوضوهاش على اللي وقع .. ولا عرفتي شنو ... نتكلف بيها انا نداوي ليها وجهها وندير ليها تجميل .. نجيبها عندي لهنا كاع ونتكلف بيها والى اقتضى الحال نسيفطها لبرى تما دير عنلية التجميل . اش قلتي ؟
رد : عارفة العملية شحال غادي تكلفك ؟؟ خرجي الوالدة سوق هادشي علاش عزيز عليك الصدع ... كن قلتي نعاونوها دير عملية ترجع كيف كانت وناخدو معاهت حسنة سمعتك ... مي باش تنازل ليه لا
ردت : راه مو طاحت ليا على رجلي بغات تبوسهم .. الكبدة صعيييبة اولدي
ساجد : وا اللي عجبك ديريه
ردت بتردد : وشنو بانليك .. نتكفل بيها ونجيبها عندي .. غدا تخرج من السبيطار نجسبها عندي ونقنعها تنتزل ليه.
ساجد اللي بان ليك دريري
ل عيثة: صافي هادشي اللي غندير .. نجيبها هنا ونتهاا فيها ونعالجها
ساجد : بشرط .. يخويو عليا انا الدار صافي عييت من مشاكلهم
لاللة غاطنة: صافي كون عمرك تشوفهم .. الله يرضي عليك اولدي مضاعتش تريتي ليك
لاللة غيثة رتاحت نسبيا من رد ساجد ورجعات للكلينيك عند سوار خبراتها هي وامها وبعد شد ورد مع سوار قبلات وشافت مصلحتها اولا ... الوجه اللي كتكتساب مشا والاهم من كلشي تردو .. وشنو غتستافد الى رفضات عرض لاللة غيثة ... اكيد هي اللي ضايعة انا عبد الحق الى دخل للحبس غادي يخرج وشحال كاع غيعطيوه 3 سنين !! غيخرج وغدوز عمرها كامل مشوهة وحتى واحد ميشوف فيها ولا خدمة تقبل عليها لا ناس يعذروها ومنين مادازت يبقا الكل يشةف فيها وغبقا حياتها كلها متبوعة بالعينين وحتى من البوليس غيشوفو فيها شوفة ناقصة الى دعاتها شي جارة على سلك ديال النشير وغتبقا مشبوهة وهي ماعندهاش استعداد لهادشي كامل .
واقفات على العرض بشرط .. طلق منو فأقرب وقت وماتبقاش تشوفو لا هوا لا مو مادامها معاهم فالفيلا .. وفاش تخرج من تما يضبرو راسهم . لاللة غيثة شافت حتى عيات ووافقات وخرجاتها تكفلات بيها وداتها للفيلا . رجعات اخيرا سوار للفيلا والفاصمة على وجهها .. سرحات عينيها مزيان وجلسات فطرف الكنبة كتشوف ساهية .. لاحس فاطنة كاين ولا حس عبد الحق ... الراحة ! اخيرا حسات بالراحة فديك الدار وحتى الغرفة اللي كانت فيها فالاول رفضاتها طلبات غرفة اخرى جديدة وكانت هاد الغرفة اللي عطاتها لاللة غيثة لاسقة مع غرفة ساجد وعندهم شرفات ملاسقين كيطلو على الجردة .. جلسات فوق الناموسية كدور عينيها فالبيت ومريم معاها كتمنضر وقالت
- ناري كتشرطي ... جايبينك ومكبرين بيك وكتشرطي على البيت من الفوق .
سوار: بزز منهم ... مالهم جايبييني حبا فيا ... وزايدون التنازل اللي درت لداك الكلب راه ساوي اكثر من هادشي ... ضاربني لوجهي مخسرو ليا ... وزايدني خدمة من لفوق وهم وسييطارات وعمليات ماكنتش ضاربة ليهم لحساب ومنتشرطش! راه خاصهم يعطيوني تعويض على هادشي ويقادو ليا وجهي اللي خسر بلا تناول بلا حتى حاجة .. اما هما هما راه دايرين هادشي على قبل التنازل
مريم : قولي ليها تخليني نجلس معاك هنا
هزات سوار كتفها: جلسي
مريم : واقولي ليها تخليني
دخلات لاللة غيثة بابتسامة ؛ ماخصك والو ابنتي؟
سوار: شكرا اخالتي غيثة ... بغيت غير نقول ليك واش تقدر مريم تبقا معايا؟ الى جات على خاطرك
لاللة غيثة : اهممهم.. تبقا معاك مكاين حتى مشكل
سوار: غنجلسو بجوج فهاد البيت ... عفاك بغيت نسولك... فوقاش نقدر ندير العملية ؟
لاللة غيثة : الطبيب قالك حتى تبرا الطبقة الفوقانية عاد تقدري ديريها
سوار: واخا شكرا
خرجات وبقات سوار مع مريم كيستفو الحوايج وهبطات لاللة غيثة لتحت لقات دينا يالاه وصلات جارة باليزتها وداخلة عنقاتها وجلسو كيهضرو ويتعاوظو على السفر
- دينا : فين ساجد .. توحشتو
لاللة غيثة: فلكلينيك ابنتي ... عرفتي وقعات واحد الكارثة ....
عاودات لاللة غيثة كلشي لدينا اللي كانت مخلوعة لاكن فالاخير ماعجبهاش الحال وقالت
- تبقا هي وختها هنااا! وعلاش متبقاش فدارهم وتما تعالج علاش جبتيها لهنا .. لا وزايدة جايبها ختها !... هاد الدار اماما ولات عندك بحال لاوتيل ..الناس كيستاغلوك ونتي عاجبك الحال .. بزااف هادشي!!!!
دخل ساجد فديك اللحضة سمع دينا كتهضر بالجهد وقال
- مالكم ... وصلتي على السلامة
ناضت سلمات عليه من الوجه وقالت : عاجبك هادشي اللي كدير فيه ماما!!! هاد الدار رداتها بحال المحطة ... (شافت فيها) راكي مساكناش بوحدك راه ساكنين معاك حتى حنا ... كيفاش غادي نتحركو والبراني معانا (شافت فساجد) بزااف فغيمون بزاف وزايدة جايبة معاها ختها... لا حسن تجيب عائلتها كلها ونخرجو حنا نخليو ليهم الفيلا يديرو اللي بغاو وهاكا ياخدو راحتهم اكثر
ونهار جديد وحياة جديدة ... واحداث جديدة فالفيلا ... مريم فرحانة وعاجبها الحال لقات فين تصور روتيناتها ورجعات كل يوم تصور فيديو جديد والنهار كامل وهي هازة تيليفون .. اما سوار متبقاتش كتبان معاها عكس الاول .. كانت كتبان فالفيديوهات حتى رجعو الناس كيطالبوها تفتح قناة ومابغاتش.. ماشي ستيلها وماعندها خاطر .. تبان مع مريم حاجة لاكن هم التصوير المونطاج والتدقيق حاجة اخرى وهي ماقادتش عليها . وجدو الفطور بجوج راسهم بلا ميطلبو حتى واحد وقادو الطبلة فالجردة تحت واحد المضلة كبيرة تقليدية من القصب والفوطويات باج وجلسو كيفطرو ومريم كتصور في حين جالسة دينا لداخل فالفيلا هي وساجد كتفطر وتشوف فيهم من مور الزاج وتنفخ .. اما ساجد شاد تيليفون كيحتسي القهوةدى ولا على بالو حتى قالت بنرفزة
ماردش عليها وناض كيسوط هز سوارتو ومشا خرج من الباب لاخر وبقات دينا جالسة على نار كتشوف فيهم في حين جالسة مريم كتسول فسوار
-مريم : هي قولي هادشي كامل ديال داك ساجد اللي جا معاه النهار الاول!!!! وهوا ولد الحرام قالك ديالو
سوار: ايييه ... وداك ساجد نهار شفتو انا اول مرة غسلتو بالمعيور فاللخر طلع طبيب .. مابقاش عندي الوجه باش نشوف فيه ودابا اللي زاد تشرط مابقاوش عندي العينين كاع
مريم : ياختي على زهر!!!.. ومالو معفر ودافع كبير مابغاش حتى يهضر معايا ديك النهار
- سوار : راه طرا واحد البلان عاد شرحتو لماما حتى هي داخت ... كان قال لمو خطبي ليا سوار وعيطات لماما غير فتيلي ماتلاقاوش وانا متبغيتش حساب ليا غير صياد فالاول ... شفتي على زهر عندي
مريم : وماما ماعارفاهش طبيب
سوار: باش غتعرف راه عاد عرفات وشرحت ليها شنو كيدير فالمرسى... كيموت على الصيد ونهار يصيد الحوت لكبير هاداك هوا النهار الكبير عندو ... ماماه قالت ليا فاش كيشد شي عطلة كيدخل للبحر مع البحارا لكبار اللي كيجلسو فقلب البحر شهر 15 ليوم كيصيدو الروكان والحوت لكبير
مريم: ايوا وهوا ماخاطب دابت ما والو
بقات سوار كضور عينيها وقالت : شنو ؟؟ وعلاش كتسولي!!! خاطب .. خطب واحد خيتي طبيبة غير نسايه
وقفات عليهم دينا دايرة يدها على جمبها
- شوف الله يخليك ... جمعي داك تيليفون مانشوفكش كتصوري هنا سمعتي ... ولا غادي نهرسو ليك
تصدمات مريم بقات غير كدور فعينيها وسوار جالسة كتشرب العصير وكتشوف فيها ببرودة حتى مشات وقالت
- نوضي صوري .. ولا عرفتي اري نصور انا نيت اصلا كنقلب على السبة منين ندوز لهاد خيتي
دينا بغات طرطق فاش شافتهم رجعو كيصورو لاكن ماهضراتش دارت راسها مشافتش باش تبقا عندها الهبةة.. اما هما جمعو الفطور ونقاو دينا ردوها نقية كما لقاوها ومشاو الكوزينة لقاو سناء ومعاها امرى اخرى كبيرة كيوجدو لغدا وبدات مريم تصور وتهضر فالكامرة على توجاد الغدا حتى جات دينا وطيرات ليها تيليفون من يدها ضرباتو مع الارض وبقات مريم كتشوف ماقدرات دير حتى حاجة وهي فدار الناس وطلعات عند سوار كتبكي وتشهق على تيليفونها الوحيد اللي شرات بلكريدي حتى نفخات ليها قلبها ووقفات سوار قاىلة
- جلسي هنا هانا جايا .
لاحت عليها بينوار خفيف وخرجات مشات هازة راسها مباشرة حلات باب البيت على دينا لقاتها متكية بديباردور وصدرها مدلي والشورط دايرة لايف كتهضر وضحك عاجبها الحال.. تصدمات من دخول سوار عليها اللي مشات خدات تيليفون حيدات الايف ووقفات ربعات يديها كتشوف فيها
- تبارك الله عليك ... كيحساب راسك واعرة.... مهرسة تيليفون لختي و كتغوتي ... بغيتي نحد ليك عياقتك
دينا : كوااا!!! شنو كتقولي خرجي عليا
ناضت دينا بغضب بغات تهاجم سوار لاكن سوار تحداتها وهزات صبعها كتشوف فيها من فوق نيفها قائلة
- وايااااك .. وايااااك تزعمي ... غندمك على النهار اللي عرفتيني فيه... يا الكسولة... ساقطة ومعاودة فكندا وجايبة كدبة قدها قداش وكتهزي من الفوق!!
رجعات دينا اللور وقالت : نعام ؟؟ اش كتخربقي
ابتسمت سوار وقالت: قلت ليك غادي نحد ليك عياقتك ... لوريقة ديالك اماما .. يادلوعة ديال الطرد .. راها عندي .. فالحفظ والصون ... وماحدك نتي ضريفة وكتسمعي الهضرة غادي تبقا مخبية ... والى قالك راسك ديري لبسالة غادي تخرج ديك لوريقة وتمشي لحبيب القلب ساااجدوو.. اللي حاسبك بحال ختو ونتي مكالية فيه .. غادي يتصدم فيه لا هوا لا ماماك ... غيتصدم فلكدوب ودرجة النفاق والتزوير اللي وصلتي ليها .. وغادي يبدا رحلة البحث على شنو كنتي كديري فكندا .. وفين كنخسري لفلوس .. وغادي يبقا يهبش .. يهبش.. يهبش حتى يجبد الحنش.
سوار: اولا .. قبل منخرج محتاجة شحال من حاجة ... (كدور فالبيت ) محتاجة شي حوايج ... وشي روايح اووغيجينال ... وعشرالاف درهم باش ختي تشري تيليفون جديد حسن من هاداك اللي هرستي ليها
دينا : ماعنديش عشرالاف درهم .. خرجي عليااا
مشات سوار كدور ببروة وتعزل فالحوايج اللي فدريسينغ ودينا تابعاها كترعد من العصبية .. الدريسينغ بحال شي متجر نص الحوايج بالتيكيتة عزلات منهم سوار اللي بغات وهزات اللي تشهات ومشات كدور على الروايح وترش وتهز وجات خارجة
حلات الباب لقات مريم حاطة ودنها كتسنط وغير حلات سوار الباب مشات كتجري هربات وتبعاتها سوار كتنهج بغضب دخلات لقاتها جالسة كدور فعينيها ولاحت لحوايج وقالت
كتسنطي!!!... شنو سمعتي؟؟ ... وا دوي شنو سمعتي
مريم : واش هي طردوها وكتقول ليهم نجحت
سوار: ونتي مالك باغا نردك عند ماما ونجيب حفصة ... اش داك تسنطي علينا
مريم : واغير كنسول مالكي ...
سوار: تعاودي تبعيني تسنطي عليا نسيفطك عند ماما .
جلسات سوار كتقلب
فالتيليفون وتمسح وتقرا الميساجات لقات الغرايب والعجايب بقات غير حاللة فمها ومسحات كولشي وعطات تيليفون لختها وجمعات النوضة . ومن ساعتها وهي كتحرق فالدم لدينا .. منين مادازت تأمر فيها ودينا كتجمع ليها ومالقات ليها جهد منين دوز ليها . اما سوار واخا الضربة فالوجه الثقة فالنفس مامشات وديما حاضرة .. رجعات دينا فبن ما تشري شي حاجة جديدة تخبيها حيت الى قشعاتها سوار كتمشي تحيدها ليها قدام عينيها وتلبس وتفركس ودوز قدامها كتحرق ليها فالدم بلعاني.. رجعات دينا بحال الضيفة كتشوف وتسكت وحتى مع ساجد عاطياه تيقار حيت فين ما تشوف سوار دايزة ولا جالسة حداهم ولا كتشوف فيهم كتكمش وتجمع راسها حيت عارفاها عايقة بيها وكل مرة تحشي ليها هضرة . تواحد النهار.. دخل ساجد للدار ومعاه عفراء ..شاد ليها فيدها وضاهر ان العلاقة بيناتهم طورات . كانت لاللة زينب غايبة على الدار ومشات دوز شي يامات عند ختها وخلات دينا وسوار فالدار . اما مريم هزات حوايجها ومشات مع صحابتها تسافر ودير الاشهارات لوتيلات .
كان نهار زاهي فاش دخل ساجد مع عفراء مشادين كيضحكو ... جلسات كتبومبا فوق الفوطوي وتلوح فشعرها عاجبها الحال دايرة رجل فوق رجل وساجد حداها جالس مرة مرة يعنقها ويجرها عندو كيضحك وهي كتلوى فرحانة حتى ضرباتهم رعدة من عينين سوار اللي شافتهم من لفوق ونزلات كتعوج دارت راسها دايزة قدامهم .. رمقاتها عفراء وتلفتات شافت فيها قائلة
- سوار ... كيبقا وجهك ؟
ابتسمت سوار وشافت فساجد بنص عين قائلة
- الحمد لله شوية .. نتي صافا؟
عفراء : سافا .. قالي ساجد باللي غيتكفل بيك وبالعلاج ديالك .. مزيان ان شاء الله يرجع ليك وجهك كيف كان
حركات راسها : ان شاء الله
ساجد : يالاه ... مشينا
ناضت وقفات : اوك ههه
دخلو للكوزينة بجوج كانه كانو متافقين يطيبو بجوج .. طل ساجد على الثلاجة كيشوف شنو فيها وبدا يجبد وهي كتبعكك بيديها وتشد فلحوت بصبعانها في حين رجعات سوار طلعات وحلات الباب على دينا عصباتها
سوار: جبت ليك واحد البريكول
دينا : ماتبقااااايش درمي بحال البغل على بيتي
سوار: شوفي .. ساجد جاب واحد القردة معاه ودخلو لكوزينة يحداكو ... داخل كيعنق فيعا بقا ليه شوية يبوسها ... نزلي وخرجيها ولا شوفي كي ديري ليها ديك خيتي ماكدخلش ليا لخاطري ... حرمي عليهم الطياب ولا شنقي راسك المهم ميفرحوش بيه .
اما عفراء بغات تسخف جلسات فوق واحد الكرسي كتشهق وتبكي وترعد وسوار كتسوط عليها وساجد كيبرد ليها دراعها .. تحنا القرفصاء على ركابيه كيعاونها وسوار كتمد ليه ودينا وكتشوف فيهم بميوعة حتى سالاو ولاحت عليها غطا غطاتها وخرجو من الكوزينة
عفراء : نمشي ... غادي نمشي صافي وصلني اساجد
ساجد : اوك دقيقة نلبس حوايجي ونجي
طلع كيجري يبدل وبقات هي جالسة كتشوف قدامها فصمت وسوار كدور بيها .. كي بقيتي واش بردتي وهي كتنفخ معصبة
-عفراء : صافي جمعي يديك الله يخليك ماتقيسي فيا ...
سوار: غير كنسولوك مالكي
عفراء: ماتسوليني منسولك ... شكرا
نزل ساجد وناضت خرجات معاها معصبة حتى للطموبيل ركبات وقالت
عفراء : متأكدة بغات حرقاتني ... رجع سولها هي تقول ليك علاش... انا ماعرفتش علاش . الممهم هي بلعاني حرقاتني وسوار حسيت بيها ماحملاتنيش واحساسي مكيخيبنيش... حسيت بيهم مابغاونيش نجي واخر مرة غادي نجي... كن مشينا لدارك لخرى احسن تما كنرتاح .. قلت ليك نمشيو ليها قلتي ليا نجيو لفيلا .. ها الفيلا .. حتى باش نبدل مالقيتش
جلسات سوار ودينا كل وحدة فقنت فالجردة كيشوفو فنقطة وحدة حتى قالت سوار
- يمكن ناوي مع هاد عفراء المعقول
دينا : ماعرفتش اول مرة نشوفها... اجي واش نتي كتبغي ساجد
شافت فيها سوار هازة راسها : انا كنبغي نعيش... مكنبغي لا ساجد ... لا غيرو ... ومعنديش مع الحب اصلا ... عندي شمتة وحدة بغيت نرجعها وصافي .
دينا: اشمن شمتة؟
سوار : واحد الشمتة ... غير تهناي مكينبغيش السيك ساجد .. واخا هوا الصراحة راجل الله مرها دار ... ولاكن انا مكنبغيهش ...يرد ليا وجهي كيف كان والله يعرضو السلامة
دينا : وعلاش كديري هادشي كامل
سوار: بغيت نرد اعتبار لراسي ... اعتبار وليس اكثر... ونتي بلا متبقاي تسناي فساجد ... من الاحسن شوفي ليك شي واحد اخر ... كيحسبك بحال ختو وفكرة تكون بيناتكم شي حاجة مستبعدة ... غادي غير تفضحي راسك على والو وصافي .. اللهم خلي مكانتك فعينيه وفعينين ماماك زوينة ونساي عليك ساجد
دينا: سبحان الله اللي شافك كتهضري هاكا ميقولش راكي لفعة مقطرة ... غير قولي الصراحة ماكرهتيش كون تزوجك ساجد
سوار: فواحد الوقت اه .. ماكرهتش... مي دابا ملي عندي دار .. وعندي حريتي ... ناقصيني شوية ديال لفلوس ... وعمرني نطوف لا بساجد لا بغيرو ... (تنهدات ساهية ) انا ادينا مكنقلبش على الحب .. وعلى الزواج ... وعلى الاولاد ... لالالا... انا كنحلم بشي طموبيل طويلة... كونط فالبانكة .. ليمارك ... الشوبينغ ... السفر من بلاد لبلاد ... ناكل اللي تشهيتها .. ليزوطيل .. الحياة والسعادة هي هادي ... ونعيش الحب اه .. ولاكن نتزوج لا .. والى شهيت الاولاد ... نتبنى شي وليد ولا بنية ... هادا هوا الحلم ديالي وهادي هي الحياة عندي ...
اللحضة اللي كانت كتهضر فيها سوار كان ساجد واقف كيسمع لكلامها حتى سالات وضارت لقاتو موراها وجمعات الحلم والضحكة ودورات وجهها طلعات بسرعة للبيت
تلفت جهة دينا بصرامة اللي وقفات كتفتف وقال : اش داكشي درتي لبنت حرقتي ليها يدها كاملة فين كانو عينيك
سوار: اااه .. ولاكن ماشي حتى لهاد الدرجة .. بغيتو يعاااود يجي عندي يطلبني على الزواج ونقول ليه لا سمح ليا وغير بالادب ... منها نبان مربية ومنها نبين ليه بلي كي طبيب كي حوات الله يرزق غا الصحة والسلامة .... انا مابغيت والو ... نهار يعاود يجي ونرفضو ونرد دم وجهي عاد غنحيدو من بالي ونعيش مرااحة
دينا: مافهمت والو . . شنو كتخربقي
سوار: اصلا كن كنتي كتفهمي كنتي كتفهمي كن نجحتي فقرايتك . دابا ديها غا فراسك وسوسي عليك ساجد قبل ماتحشمي براسك ... هوا كن كان حاسبك شي حاجة كان غيبين ليك ... مي هوا حاسبك بحال ختو عمر فكرة ختو متحيديها ليه من مخو مستحيل وغادي تحشمي راسك معاه ... ودابا نوووضي ديني خلصي عليا شي عمام وشب مساج عضامي طايحين عليا باغا نترخا
هزات دينا حاجبها : قالك سخونية خايبة ليك على وجهك
سوار: المساج غزااال ونشلل بالبارد غا نوضي .. الى ماعندكش دردربي عندو يعطيك كارط كيشي ديالو واقفين عليها نيت
جا النهار اللي غتبدا فيه سوار اوا عملية تجميل .. وكما قال ليها الطبيب .. ماخاصكش غير وحدة .. خاصك بزاف فيهم عمليات تجميل عميقة خاصهم تخذير وفيهم عمليات خفيفة كتطلب جلسات فقط . اول عملية غتبدا بيها هي عملية كبير فيها تخذير .. وجدات راسها نفسيا ورافقتها لاللة غيثة و لاللة زينب للمستشفى لقاو ساجد واقف مع الطبيب كيهضرو فكلينيك خاص بالتجميل في حين دخلو الممرضات سوار لغرفة العمليات ولبسوها ملابس العملية ونعسوها .. دخل طبيب البننج حط بيها بنج كلي وبدات تحسب من واحد لعشرة وعينيها كيغيبو وكتبان ليها السورة دساجد مضببة واقف مع الطبيب فوق راسها كيتسناو تغيب والاضواء والممرضات حتى غابت .
فوسط الغيبوبةةبدا صوت تقيل جاي من بعيد لاللة زينب كيعيط
- سوااار ... سواااررر
الهضرة مخربقة بحال صوت الحمام والصوت جاي وكيقرب حتى تقب ليها سفق ودنيها فيقها من الغيبوبةةوحلات عينيها بزز عرقانة فالسقف لقاتو مقشر والبولة مدلية لوسط وبدات دور عينيها فالدار وتكتاشف المكان وناضت بسرعة جلسات لقات راسها فبلاصتها اللي كتنعس فيها ديما مخلوعة وكتشوف
- فين انا!!!... شكندير هنااا؟؟؟ ماما!!!
لاللة زينب : انوووضي تكعدي راه الحوت طارو بيه الناس ونتي باقا خامرة... نوضي سيري تسخري مشا الحال فوقاش غنديرو هاد الغدا هادا؟
حطات يدها على حنكها مصدومة لقاتو صحيح فصيح : وجههي !!!...فين الجرحة؟؟ ... فين ساجد ؟ .... الدار! الفيلا!!!... ميمكنش !! واش غير كنحلم !... اويلي كنحلم !!!
ماعرفات تبكي اللي طلع كلشي حلم لا دار لا فيلا لا والو ولا تفرح اللي خرجات بوجهها صحيح فصيح وبدات تردد وتشوف فالدار
- عفراء!!!... دينااا! .. لاللة غيثة... فاطنة... عبد الحق!!!... هادو كاملين غير فالحلمة !!!... مكاين زواج
. مكاين والو !!!(ابتسمت ) الحمد لله ياربي .... الحمد لله ياربي غير كنحلم ... غير كنحلم حمدتك يا ربي وشكرتك .
سوار هنا عرفات بزاف ديال لحوايج ... صحيح انها عاشت فالحلمة بشخصيتها الحقيقية وكل ما كانت كمتمناه شافتو فالحلم .. وكانت كارهة عيشتهم المكرفصة .. لاكن من بعد ما عاشت كاع هاد الاحداث دركت ان الخير فحياتها البسيطة ... وسط خواتاتها وامها ولقمة الحلال الدائمة ... ماشي وسط الفلوس ووسط الغنى اللي ممكن يكون فيه شر ليها هي .. عرفات ان الفلوس فاش كتجي كتجيب معاها المشاكل ولا بد ... الغنى والثروة كياخد راحة البال والطمئنينة .. والسكينة اللي كانت عايشة فيهم تبخرو ... وجاو مكانهم الفلوس ... المشاكل ... الهم والغم والديق فالصدر ... من بعد ماقارنات احساسها حاليا واحساسا كفاش كان فالحلم ... هنا ختارت حياتها البسيطة ... وقالت اللهم حياتي البسيطة وراحة بالي .. ولا الفلوس اللي داقتهم وداقت مرارهم معاهم وعايشوها فكابوس .. عرفات ان الغنى الحقيقي هوا القناعة ... هوا الرضى والقبول بما عطاها الله ... كتشفت نعم الله عليها من خلال هاد الحلم .. كتشفت ان الله رزقها وجهه تحلم بيه اي وحدة .. وعائلة واخوة يتمناهم اي واحد .. و أم اللي يحلم بيها اي واحد كتشفت ان عندها عائلة عايشة فالصفى والنية .. ماشي فالكدوب والنفاق ... واخا الحياة قاصية ومحتاجين بزااف .. لاكن اكتفت وقالت
- ياربي رزقنا على قد النفع .
وناضت سوار وحدة اخرى وخلات سوار الخبيثة فالحلم ... ودعات شخصيتها اللي كتشفت انها تسببت ليها فخسائر كبيرة اكثر من الفوائد .. الحلم خلا قلب سوار يفيق وينبض من بعد ما كان ميث ... خلاها تحس بأسرتها ... بدفأهم .. حنانهم ... الحياة البسيطة اللي عايشينها والضحكة الدائمة على وجههم واللي انعدمت فداك الكابوس ..رغم قساوة الحياة .. رزقهم ربي راحة البال ... والضحك والسعادة اللي مدايقش منها واحد عندو الفلوس وكينعس فوق لحرير مهموم ومغموم وراسو عامر بالمشاكل والضحكة ماعندها منين دوز
ناضت وقفات كتنفس الصعداء ووجها حمر وبابتسامة مشات للمراية اللي فحمامهم شافت وجهها لقاتو صحيح فصيح مزنك مافيه حتى حاجة ودوزات يدها عليه بابتسامة وغسلات وجهها وجمعات شعرها .. لبسات جلابتها السوداء وصندالتها ومشات للكوزينة اللي كانت عبارة عن رفوفو مايلة قديمة هازين عرام ديال لماعن وبوطاجي بالخامية مدرق الربوج اللي جامعين وثلاجة متوسطة بيضاء مصدية من برى .. لاكن وسط داك الفقر اللي فديك لكوزينة واقفة امها طالقة الراديو معلقاه فالسرجم كتسنط للموسيقى و كدندن بابتسامة
سوار: اري باش نجيب لحوت
لاللة زينب: غاسيري قوليه قالت ليك ماما عطيها واحد نص كيلو حتى دوزهم ليك راه ماعندهاش دابا ... غادي يعطيه ليك غا سيري ميقول ليك والو
خرجات سوار مع الباب خلات خواتاتها شي ناعس شي يالاه كينوض وشؤ فاق وطلع الكواش للسطح .. مشات هازة جلابتها فالجنب وكتجر صندالتها وخصلات من شعرها الاشقر المحموع عشوائي مدلية على جبهتها وعنقها وبدات تفكر شنو اللي خلاها تحلم هاد الحلم!!! واش حيت بقا عقلها مع الصياد من اخر مرة فالاسبوع اللي فات فاش غسل ليها رجلها من الغيس!!... يمكن!! يمكن حيت داك لوجيسيت خلا عقلها معلق حتى حلمات بيه وبهاد الاحداث كلها .. ولاكن حمدات الله اللي كلشي طلع مجرد حلم حيت الحلم خلاها تتجرد من الانسانية ومن عواطفها و مبادئها اللي اصلا كانو كيموتو شيئا فشيئا بسبب الفقر حتى جا هاد الحلم فالوقت المناسب خلاها تراجع حسااباتها وحييا فيها جميع الصفات النبيلة اللي كانت كتموت فيها تدريجيا
وصلات للمرسى واجوائها الترويجية.. الصيادة والبحارة يالاه وصلو والصنادق كتخرج كتبري بالحوت .. الزحام والبياعة والشرايا مدابزين والتجمعات ديال الرجال فكل جهة .. وفجهة اخرى عيالات كيبيعو سيكوك واقفين وكاين اللي كتبيع السندويتشات فكرارس... جو شعبي بابتمياز كيميزو منضر المطاعم الشعبية المقابلة مع المرسى اللي كتشوي الحوت بالدخاخن و والكراسا دالميكة لداخل وعلى برا والصيادة وحتى الناس العاديين جالسين تما .. اخر الاسبوع المرسى كتكون ناشطة وزاهية والدنيا مروجة .
مشات للبلاصة اللي كيحط فيها الصياد ورباعتو و وقفات كتسول لقات غير الرايس عيسى اللي ديما كتلقاه معاهم وشي دراري معاه ووقفات بابتسامة كتسول
- مكاينش داك الدري كيكون هنا ديما ؟؟
رد الرايس وهوا حالتو بالماء والبوط وقال
- سي محمد ؟؟؟ رااه ابنتي فين جالس
تلفتات جهة المطاعم لقاتو جالس مع شي رجال اخرين صيادة كيضحكو بالبوط بحال ديما ودجينز فازك والتيشورط سماطي وشعرو فازك .. بحال كما كتشوفو ديما بنفس الفورمة والبنية ديالو كياكل الحوت مشوي ومحطوط قدامهم انواع الحوت طرية ... تعمدات تشوفو هوا شخصيا وتهضر معاه ومادوزش مرور الكرام ومشات عندو وقفات بعيدة كتشيير حتى شافها واحد من الصيادة ونخزو دار عندها
. تفاجأ مللي شافها مبتاسمة حيت دائما كتجي معبسة ومخنزرة وماحاملاش تحط رجلها تما وناض عندها من بعد ما مسح يديه وقف قدامها بابتسامة وهي كضحك وتفكر الحلم اللي جمعهم .. تذكرات انه ماعارف والو على الحلم وانها غتبان حمقة بداك الضحك وجمعات راسها وقالت بابتسامة حشمانة
- قالت ليك ماما عطيها شي نص كيلو مخلط ... حتى دوز ليك الفلوس
رد بابتسامة وكيضحك : مرحبا ... اجي مرحبا بيك دخلي نشاركو الطعام
فرح بتلبية الدعوة وسبقها بسرعة قاد ليها كرسي وهي كدور بجنابها حشمانة وجلسات في حين ناضو الصيادة اللي معاه خلاوهم وجلسات كتشوف وتشهى جامعة يديها وزاد هوا طلب ليها الحوت وقال
- شنو بغيتي اخر ... مرحبا بيك متحشميش
ردت بخجل: لا شكرا ... صافي
حط ليها الخير والخمير قدامها وبدات تاكل وتقشر حشمانة حتى شوية جا صياد اخر جلس حداها كيفرنس بغا يدخلهم دخلة هبل تربح وخزر فيه الصياد بواحد العين وقال
- تهز اصاحبي راه كيعيطو ليك
رد : وا عييت .. نرتاحو غا شوية
رد الصياد : واتهز العود واش نعاوها معاك
دورات وجهها كضحك وتقارن بين الصياد اللي فالحلمة واللي قدامها وهوا كيشوف فيها بنص عين مللي جلسات وهي كضحك وقالت
- اشنو سميتك بعدا؟؟
رد فرحان : سي محمد ... ونتي؟؟
ردت بنعومة : سوار
رد : سميتك زوينة تبارك الله ... كي دايرة الوالدة ديالك صافا عليها
هزات حاجبها كضحك باستغراب وتردد فنفسها ها هاي على صافا !!!... ماشي بعيد يكون مثقف وقاري ... مالو الصياد ضاروري يكون جاهل
ابتسمت وقالت: صافا الحمد لله ... تعطلت عليها وهي كتسنى الحوت ...
رد على عجلة : بلاتي بلاتي .. هانا جاي.. خليك تما ماتمشيش
مشا دخل وسط داك الزحام عمر ليها ميكة قدها قداش وسيفطها مع واحد الحوات فحومتهم من بعد ما سولها على الدار وعطاتو العنوان ورجع جلس حداها بابتسامة
- مرحبا .. نهار كبير هادا لاللة سوار
ردت كضحك : ههه كبير بوجودك
هبطات عينيها كتاكل فصمت وهوا كل شوية يشوف فيها حتى جمعات يديها باش متبسلش بغات تنوض وقالت
- الله يخلف .. شكرا ... خاصني نمشي
وقف معاها كيرمش ماخلاهاش تمشي وقال : بلاتي باقي الحال ...
سوار خاصني نمشي تعطلت على ماما
رد : واخا .. عطيني تعطيني نمرتك ؟
ردت بابتسامة كتحك ودنيها : اممم.. واخا ..قيد
رد : ماهازش تيليفون .. غير قولي انا غنعقل
ملاتها عليه ومشات بحالها كضحك وتعض صبعها مزال ماقادرة تستوعب ان ساجد طلع اسمه محمد وانه فعلا صياد ما طبيب ما حتى حاجة .. لاكن مافيها باس .. لخير فما اختاره الله ... ماشي ضاروري وحدة بوكوصة تكون مع واحد لاباس عليه غير حيت بوكوصة ... كاين الرجال اللي رجال طالعين على الصح بدراعهم ويعول عليهم الواحد ويعيشو المرى احسن عيشة ... احسن بالف درجة من الثري اللي ممكن يكونو فلوسو صنعو منو راجل فقط ... وبدون المال ميبقا يسوا والو .. واللي كيتزوج على الفلوس بحال اللي كيشري الحوت فالماء... حيت من الممكن يدير فاييت ويرجع لنقطة الصفر ... ومتلقا لا راجل تعول عليه ولا هوا بنفسو يقدر يصنع الفلوس لراسو ... وهنا كتكتاشف ان الفلوس اللي صانع الرجلة دالكارتون وبلا بيهم كيرجع الراجل ميسوى والو وميعرف حتى منين يبدا وكيرجع ضعيف حتى الدراع باش يحفر على راسو مكيلقاهش
وصلات للدار ومن بعد وصولها رن تيليفونها وخرجات للزنقة وقفات حدا واحد الحيط كتهضر حابسة الضحكة
- الو ..
رد : الو... سوار ؟
ردت : وي .. شكون معايا؟
رد : مع سي محمد ... لباس؟ كولشي مزيان؟
ردت : الحمد لله ... ونتا ؟
رد : الحمد لله ... قولي ليا عندك شي وقت فلعشية؟؟ بغيت نهضر معاك فشي حاجة؟
ردت : انا غير حدا المرسى ... غادي نهبط لتما حدا الشارع
رد : صافي يالاه .
قطعات وخرجات غادية والهضرة تابعاها حتى للشارع لقات طموبيل بيضاء من منوع ميكان بجوج بيبان وبقات كتشوف فيها ماتوقعاتش يجي فطموبيل فالمستوى ... نزل عندها بابتسامة السيد تسيف ... الحطة والدجينز والقميجة كما شافتو فالحلمة ... المكانة فاليد والشعر كيبري والسبرديلة ... والسنان نقيين بيضين عجبها الحال وزاد كملها فتح ليها الباب عاجبو الحال طلعات ولاحت شعرها اللور ... الروايح رجولية فالطموبيل يا سلام والسيارة جات مجموعة من لداخل وهوا حداها كيسوق بيد وحدة ويلعب بالطموبيل باحترافية كيطير .. بعد على المدينة ومشا لمقهى حدى البحر وجلسو لداخل فوق كنبات وجلسات حداه .. حط بكية مالبورو حمرا وتيليفون فوق الطبلة وتكا اللور كيشوف فيها ويردد
- مرحبا .. مرحبا .. نهار كبير هادا
ردت كضحك : ترحب بيك الجنة
من بعد ما حطو ليها عصير وليه قهوة كحلة وبدا كيتحاور معاها ويتعرف عليها اكثر ..
رد : هاد البلاد مكتخدمش... شحال ديال الديبلومات عندي محطوطين .. وسيونص فيزيك ووالو ... حتى كونكور ما كيجاوب
ردت فدهشة : تبارك الله عليك ...
رد : ايوا شغادير... السلاك وصافي ... مات الواليد مسكين خلا داك البابور شفت تا عييت ومشيت ليه .. من نهار بيدت مابقيتش مسوق لا لديبلومات لا كونكوغ
ردت فدهشة وابتسامة : البابور ديالك!!
رد : ديال الواليد الله يرحمو ... مات وخلاه كيصرف على عائلة
سوار : بصح!! شحال عندك دخوتك؟
رد : انا ... وثلاثة ديال خواتاتي .. وحدة مزوجة .. وحدة خدامة والصغيرة فلافاك تكون قدك .. والواليدة
سوار: تبارك الله الله يخليهم ليك
ابتاسم : ونتي؟
ردت : حتى حنى مات بابا وخلانا خمسة دالبنات .. ختي الكبيرة مخطوبة وخواتاتي لخرين كل وحدة شنو كدير .. وانا وكايتة ختي الصغيرة وماما .. غير حنا بابا ماخلاش لينا البابور ههه ..
بقات ساكتة وهوا كيشوف فيها خاف ترفض وقال متكي على ركابيه كيسطر فالزاج بالبريكة بسهوة منو وقال بجدية
- غادي نوضح معاك الامور باش تكوني على دراية بكلشي.... من ناحية السكنة ... انا يالاه شريت دار فليغيزيدونص الجداد اللي طلعو فالمدينة ... وغتسكني بوحدك والوالدة وخواتاتي مغاديش تلقاي معاهم المشاكيل وحتى واحد مغادي يوصلك بشي حاجة ماحدي انا كاين ... ونهار يتزوجو خواتاتي كاملين نجيب الوالدة تعيش معايا منقدرش نخليها بوحدها ومنقدرش نفرط فيها .. وحتى هي درويشة وباغا تزوجني ومكدخلش كاع فالمشاكيل والصدع
بقات ساكتة مطولا وقال : و ... و لخدمة ديالك ماشي غيسكي؟؟
رد : الاعمار بيد الله ... راهم الصيادة شرفو مابقاوش قادرين يوقفو .. وراهم اللي باقين صغار وداهم البحر ...
بقات جالسة وهزات راسها ساهية كتفكر وقال قاطع سهوتها
- كنواعدك (جر ليها يدها شدها بين يديه ) مغيخصك حتى خير معايا ... غتعيشي بحال الاميرة ... دارك فرشيها على دوقك ... بغيتي تسافري انا معاك .. بغيتي تخدمي مرحبا .. قنطتي بغيتي تعلمي شي صنعة على الراس والعين ... داركم مك خواتاتك على عيني وراسي حتى حاجة مغتخصهم ان شاء الله .. هادا وعد اسوار ... وانا منكدبش عليك ... باغي نتزوج بيك وماكتبان ليا حتى وحدة من غيرك ..
بقات ساكتة وهوا شاد ليها فيدها وكل مرة دور وتشوف فيدها كفاش كيزير عليها فاش كيكون كيهضر وقالت بتردد
- ولاكن الخدمة ليك خالعاني وو.. كن خدمتي فشي وضيفة اخرى حسن ليك
رد بالنفي : ماباغي لا وضيفة لا والو .. صافي ولفت بوحدي حتى واحد مكيفهم عليا منقدرش نبدل ... مي ان شاء الله ناوي نحل واحد المحل فالمدينة ديال الحوت ... لقيتني يالاه تفاهمت مع مولاه ... غنحط تما الدراري اللي يقابلوه ... والى تمشا غادي نفتح وحدين اخرين وهي غادية ... احسن من شي وضيفة
ردت : وغادي تبقا دخل للبحر؟؟
رد كيضحك : البحر راهوا الروح .. جيبي شي بحال دابا قولي ليه ماتبقاش تمشي شوفي شنو غيقول ليك ... اللي مجرب البحر عمرو ينساه ... ماشي شي حاجة اللي ساهلة غير كيبان ليك ... والاعمار بيد الله مناش خايفة ؟
بقات ساكتة وهوا هاض على شنايفو كيتسنى فالاخير تنهدات وقالت
- غادي نفكر ونرد عليك
بقا كيشوف فيها باسى وقال: شنو اللي ماعجبكش نبدلو؟؟ ... شنو الحاجة اللي بغيتي تفكري فيها
ردت قائلة: هادا راه الزواج ... ضاروري خاصني ناخد وقتي ونفكر مزيان ... منقدرش نقول ليك شي كلمة ومن بعد نرجع فهضرتي
رد : اشنو اللي بان ليك ماشي هوا هاداك ؟... كنواعدك... حتى حاجة متخصك ... لا ماديا لا معنويا .. غير آمري
بقات ساكتة وقالت بتوثر : واخا ان شاء الله يكون خير .. غادي نفكر فهاد اليوماين ونرد عليك .
بقا ساكت وايدها فرأيها وجلسو بداو كيتجمعو وكتعاود ليه على حيتها وعلى عائلتها فالاخير ناضت طلعات حدا فالسيارة جبد ليها صاك ورقي اسود راقي مدو ليها وقال
- واحد الكادو خفيف كنتمنى يعجبك
شدات الصاك فدهشة بابتسامة وقالت : شكراا
رد : بالصحة والراحة
حطها نزلات ومشات كتجري وطل على الصاك تشوف شنو فيه لقات فيه ريحة سيني ووردة حمراء وات كضحك ودخلات للدار هازة داكشي .. مع الدخلة وقفات لاللة زينب سولاتها على شكون عطاها داكشي حتى خرجو البنات كيطلو بحال الفيران وبحال كل مرة كل وة منين جات شافو الريحة والوردة وبقاو يسولو عرفو الكادو من عند راجل.. وحتى سوار ماكدباتش جلسات وفاتحاتهم فالموضوع وعاودات ليهم كولشي من الاول للاخر على شنو دار بينها وبينو .. لاللة زينب عجبها الحال لسقات عليه لسقة وحد مابغاتش تفاك .. وحتى خواتاتها شجعوها وهي خايفة ومترددة اما لاللة زينب طلع ليها الدم كل شوية تنوض تنكر... والله ميقبل عليك شي واحد الفنيانة ... مالو شخاصو... والله متلقاي حسن منو .. هوا بعدا حسن منك ... رجعات بحال لعكوزة كتنكر وخواتاتها دايرين بيها كيشجعوها حتى اقتنعت والنهار الثاني تاصل بيها يعرف الرد ومن صوتو باين خايف وقالت ومها لاسقة ليها حتى تيليفون
- الو سي محمد ... فكرت فداكشي اللي قلتي ليا ...
رد : و .. وشنو قلتي؟
سوار : مرحبا بيكم .. هاك ماما بغات تهضر معاك
لاحت تيليفون لمها اللي كتهضر عاجبها الحال : الو اولدي .. الله يبارك فيك اولدي ... مرحبا بيكم مرحبا ... الدار داركم ... اييه كما كتقول نتا متلقاش حسن من سوار بنتي مرى حتى انا مانلقاوش حسن منك راجلك لبنتي ..مرحبا زالف مرحبا
بارتباك وتوثر وجدات لاللة سوار.. لبسات قفطان باج مطروز بالالوان وحزامو وطلقات الشعر والمكياج خفيف وبقات جالسة كتحسب الدقايق فين يوصلو الخطاب. كان معاهم عمها وخالها استقبلو الناس فاش وصلو في حين سوار جالسة دايرة رجل على رجل وكضحك وخواتها كل مرة تجي وحدة توصل ليها لخبار
حفصة : ياختي مامخلوعة مخايفة
سوار: شوية... ماعرفتش .. شي حاجة فشكل وصافي
حفصة انا نهار جاز الخطاب بلت فحوايجي
دورات سوار ىاسها كضحك وتقاد خصلات شعرها وقالت
- ايوا هاديك نتي البوالة ااهههأ
حفصة : بااز
مريم : راه جاو
سوار: بهدوء) شكون جا معاهم ؟ انا بغيت نعرف غير خواتاتو ومو كي دايرين
مريم : مو باينة فيها مزيانة .. جاو معاه غير جوج بنات وواحد الراجل كبير وواحد اخر تقريبا قدو
سوار: مكيهمني لا لوسات لا والو .. كتهمني غير مو وهوا خواتاتو التيقار هادشي اللي كنعرف .. وقالي حتى حاجة متوصلك هاحنا غنشوفو... نشوفو هاد الخطبة اش غيطرا فيها
حفصة: بقاي متبعة رانيا .. راه ماجيين فيها خطاب ما غادية تخطب سوقها خاوي وكطنز عليك ...
طلات لاللة زينب: سوار... يالاه زيدي خرجي عند الناس
خرجات مع خواتاها ودخلا للصالة بابتسامة كتشوف فيهم لقات جوج بنات غزالات جالسين بجليلبات ومعاهم امرأة كتشبه لاللة غيثة بزاف وكأنها هي .. بقلت سوار مصدومة كتشوف فيها حتى كانت غتقول ليها شفتك فالحلمة لاكن تداركت الموقف وسلمات على البنات اللي جاو ودازت لحماتها بدون شعور عنقاتها بقات الحمات كتشوف مستغربة وبادلاتها نفس العناق وسوار كضحك معاها وقالت بعفوية
- كي دايرة لباس عليك ؟؟
ردت المرأة : الحمد لله ابنتي .. ونتي لباس ..
سوار: بسعادة: الحمد لله
بقات كتشوف فيها مطولا والبنات مستغربين والكل مستغرب كفاش ستقبلاتها وكأنها كتعرفها من زمان .. كانت المرأة دايرة حجابها وجلابتها وجالسة ساكتة في حين دازت سوار سلمات على الراجل اللي الشيخ اللي جا معاهم وعلى الشاب اللي عمرها سبق ليها شافتو حتى هوا سلمات وجلسوها حدا سب محمد اللي نسات ماسلمات عليه وهوا معلق عينيه فيها باعجاب .. بقاو تبادل النضرات وسوار مستغربة للأم ديالو اللي شافت فالحلم واخا عمرها صادفاتها وعندها احساس وحب كلبر اتجاهها معالم بيه حتى واحد . بدا الحديث والتعارف وسي محمد ابتسم للام ديالو طبطب على بلاصة خاوية حداه مشات جلسات بابتسامة باينة عليها امرأة طيبية والطريقة والكياتة باش كتهضر عويناتها كيتسدو وحشومية .. جلسات حداه كتشوف فسوار وسوار بدورها كضحك معاها وتردد
- مالكي مكلخة ... صافي مزيان كاع اللي قال ديك مليون اصلا بداكشي باش كيمشيو كاع البنات .. وحتى مو عجبها الحال مللي هضرتو قدامها وعرفات الصداق غادي تقول من حقها ... ماطلباتش بزاف والبنت ماداخلاش على الطمع
تقرات الفاتحة وتحط اللي قسم الله ... ومع لاللة زينب طباخة محترفة حطات ليهم الماكلة من داكشي الرفيع مزوقة مقادة ورحبات بيهم وداز كلشي على احسن مايرام وخرجو الناس مشاو رايضين وبقا الاتصال بين سوار وسي محمد ومن ساعتها والحوت كيوصلهم للدارهم يوميا وحتى التقدية الاسبوعية كتوصلهم كل اسبوع بما فيها لحم ودجاج وخضرة وديسير وتدفق الخير والخمير على سوار وخواتاتها وفرحو بالعريس كاملين .. اما لاللة زينب تقيسيها فعينها ماتقيسيهاش فيه ولا تخرجي عليه كلمة خايبة ... نهار ومطال وهي تشكر فيه وتنكر علىسوا الى غير مارداتش فتيليفون ولا تعطلات ولا دخلو ليها للطواليط وهوا كيصوني .
اللقاء الثاني من بعد الخطبة قررات تمشي تشري فيهم الخواتم ... خرجات معاها مريم تشوف لخواتم ووداز عليهم حدا باب الدار هزهم .. كانت لابسة كسوة طويلة نص كم محلولة من القدام لالصدايف ومشدودة بالحزام فالموطارد و طلقات شعرها وقدات المكياج والروايح والصاك و طلعات كضحك سلم عليها بالوجه وقال
- فين تمشي تشوفي الخواتم
تدخلات مريم : الشاوي هوا اللي عندو داكشي زوين
ومادراك ما الشاوي .. احسن ذهايبي عندهم فالمدينة ومعروف وحتى سوار عجبها الحال وهوا قبل مشا مباشرة عند الذهايبة وهي قدامو شادة فختها ... جلسو كاملين وسط المحل اللي داير بالذهب فوق فطويات فالخزي وبدا الذهايبي كيعرض عليهم طابلويات الخواتم ويعطيهم يشوفو هي وختها
سوار: بغيت غير شواحد رقيق يكون موديغن .. نديرو ديما منبقاش نحيدو
رد سي محمد بالتسامة : وراك غاديريه ديما .. نتي ناويا تحيديه
رد الذهايبي: لا.. هادا الدياموند الاللة... وبنات اليوم راه رجعو كيديروه .. رجع كيتمشا بزاف الديامونظ وكيجيو فيه شكيلات زوينين مكاينينش فالذهب
مريم سمعات الدياموند ورجعات اللور تكمشات .. اما سوار شداتو كتشوف فيه عجبها لاكن رجعات حطاتو وشافت جهة الخواتم العادية حتى تكلم سي محمد وقال
- سوار... شوفي الدياموند حسن
شافت فيه متفاجأة ورجعات هزات الطابلو فرحانة ومريم اكثر كأنها هي اللي غتشري وبدات تشوف وتقيس فصباعها اللي قادات ليهم الدفار وصبغاتهم وزوقاتهم جاو شهوة منهم مع الخاتم .. هزات واحد كبير شوية وقالت
- بحالو دايرة مريم فارس.. شحال هادا؟
الذهايبي : هاداك واصل 15000 الف درهم .. ولاكن الى عجبك ندير معاك الثمن
شافت فمريم مخرجة عينها بهمس : اويلي على 15000 الف درهم ... الصداق كامل فيه 10000درهم نضربو انا بخاتم ساوي 15000 الف . سرتلة
بغات تحيدو لاكن شد ليها سي محمد فيدها كيشوف وقال : عجبك
ردت كضحك بسخرية : غزال . وحتى ثمنو غزااال
سي محمد : صافي خوديه
دورات وجهها والضحكة عريضة على فمها شافت فمريم ورداتو لصبعها فرحانة بيه وناضو يمشيو ... مشا سي محمد دفع الثمن بالكارط كيشي وبقا واقف كيتسنى الكارط ديال الخاتم تخرج ليه وفنفس الوقت سرح عينيه جهة كورميطات رقاق ديال الذهب كيشوف وطلب وحدة منهم عجباتو وتلفت عنظ سوار اللي هازة يدها كتشوف الهاتم هي ومريم فرحانين وعيط ليها مشات وقفات حداه .. ركب ليها الكو ميط فيدها كيضحك وهي متسغربة و جاتها هي هاديك وقال
- بالصحة
بقات مصدومة ومريم يدها على فمها ساكتة كتشوف حتى رجعات سوار اللور كضحك وقالت
مريم : ياختي مايحنش فهاد اليتيمة واخا غير بحللاقة وحدة نعلقها فواحد الودن .. انا تابعاكم بحال العرابة ديالك
خرجات بيدها عامرة ماقاداها فرحة غير كتشالي ومريم لاسقة فيها
مريم : جاب ليك ربي دياموند فين يغبر قزديرك ياختي .. عيشي مع راسك ورشينا معاك حتى حنا مرة مرة
سوار: تانفزك بعدا عاد نرشك ههه
تلفت شاف فسوار كضحك مع ختها ومد يدو ليها شدات فيه وقال
- نمشيو نتغداو فشي بلاصة
سوار: اللي بغيتي
سي محمد : يالاه نمشيو.. منها نهضرو شوية
سوار واخا
اتاجهو لمقهى كبيرة وريسطو فنفس الوقت وجلسو طلبو الماكلة وسوار حدا سي محمد جالسة مايلة جيهته وهوا لايح يدو على الكرسي موراها
سي محمد: شنو بان ليك نديرو العقد هاد الشهر ..
سوار: ولاكن الا درناه غادي نمشي معاك ؟؟
رد كيضحك : ايوا اللي بان ليك !
سوار : انا بغيت لعرس ... تفرح فيه ماما وخواتاتي .. اول وحدة غتزوج وختي حفصة مابغاتش دير العرس...
رد بعفوية: صافي ديري العرس
ردت: ولاكن راه العرس خصو الوقت... خصو واحد العام ولا عماين باش يالاه نقدرو نديروه
سي محمد : صافي نديرو هاد العرس شوفي شنو باغا وفين باغا ديريه .. اما عام بزااف .. واحد اربع شهور وصافي
سوار: لالا ..راه زواج ليلة تدبيرو عام
سي محمد: لها مدبر حكيم صافي بداي توجدي واللي خاصك انا معاك ... النهار الاول قلت ليك ماتخصك حتى حاجة معايا . آمري يالاللة
بقات كضحك ماقادها فرحة وشافت فمريم لقاتها ملهية مع التصاور وسطوريات وحيت هي معروفة ومشهورة تمو جايين المتابعين ديالها حتى للقهوى وناضت سلتات بتخبية بلا فضيحة قدام سوار وخاطيبها بقات فالطواليط حاصلة حتى ناضو وخرجات ركبات معاهم وزادو خلفة مع الطريق.
سي محمد زرب على سوار ماقدرتش يتسنا كثر... وهي مزالة ماوجدات حتى حاجة ... دارها مزال ماتفرشات والعرس مزال ما وجدات ليه ... قررات تختاصر ومشات شدات تريتور بالقاعة ديالو وتكلف بكولشي من الاول حتى الاخير حتى من لجوق والمصور والدقايقية وعيساوة ... مشات شافت كولشي وختارت وقيسات اللباس وختارت شنو يديرو ليها فالماكلة والموسيقيين وخلاتو يتحاسب مع سي محمد ... بقا ليها الفراش.. واش يوجد فاربع شهور؟ بدات طير وتنزل من هادي لهادي... من فراش الدار لحويج لدهاز وخواتاتها نهار كامل وهما معاها كيجريو والجلابة اللي لبسوها ليوم كيلبسوها غدا ومكاين غير الجرا ... اما سي محمد دخل للبحر وخلاها جمعات الحساب عندها وبقا التوصال مع حماتها كتعلمها باي حاجة دارتها وتتواصل معاها حسب الطبالي والمدعويين وحتى الماكلة تافقو عليها مجموعين .. اما الحوايج خلاتهم حتى للاخير وهبطات لفاس شرات كولشي طالع وهنات راسها والباقي شي كومونداتو من ليسيت شي من القيساريات وشي مشات عليه لكازا للمول حتى جمعات دهازها وقرب العرس وخرج محمد من البحر وتلاقت ليه بالاحضان كمل معاها الباقي ومشا هوا وياها شراو بيت النعاس وفرشو الدار على دوقها وعمراتها كما بغات وتشهات وسدات عليها .
بالف هنية وهنية تهزات سوار فالعمارية عروسة كتفتن والعريس داخل معاها فرحان مقاداه فرحة ومو وخواتاتو دايرين بيه مدخلينها بالهيطة والزيطة للقاعة قدها قداش والورد مدلي من كل جهة ..العائلة الحضور الناس والحشد كلشي كيشطح .. نزلات وبرزات ونقشات وشطحات وتما ضربات العقد ودخل ليها دهازها فالطيافر وفوق منهم كوليي ديال الذهب وساعة يدوية وعاد الحوايج لعلك ترضا. بدلات المشاطي من المطلوق للمجموع والضحكة مكتفارقهاش.. اما مولاي السلطان من اللي دخل وهوا كيضحك حتى سالا العرس الاسطوري وقطعو الحلوى وطلعات سوار فالطموبيل بالكسوة البيضاء خلات خواتاتها وامها كيقطرو بالدموع والناس كتصبرهم ..
ودخلات لدارها اللي وجدو خواتاتها بالشمع والورد اخيرا وعمراتها بجوج وليدات .. بنية سماها محمد جنة والولد الثاني سماتو سوار ساجد وعاشت حياة عمرها كانت ناوية تعيشها معاه واخا حكمات عليه حكم خايب من الاول لاكن طلع راجل ونص معاها ومع عائلتها وقايم بيها وباسرتها على اكمل وجهه.. وكما وعد وفا ... حطها فوق رمشو عينيه هي والوليدات حتى رجعات كتهتر بيه فين مامشات واللي تزوجات من خواتاتها كتقوليها محمد هوا سيد الرجال والحمد لله اللي لقاني ربي بيه
انتهت 😘😘😘😘😘😘
تصنيف القصة
يرجى إختيار التصنيفات اللي يمكن يوصفو هاد القصة، التصنيفات كاتساعد بشكل كبير فتقسيم القصص وحتى لي كايقلب على قصة من نوع معين كايلقاها بسرعة.. (يمكن اختيار أكثر من تصنيف)
الصياد الجزء الثالث والأخير
محتوى القصة
التنقل بين الأجزاء