هاي هاي هاي على زايد !! قلت غتكون سميتو شي علي شي احمد شي محمد .. زايد ! مو كتنت كتوحم على شي خليجي ولا شي طبيب ولدها سعودي هه.. ماعلينا طرا ليا العجب اللي سول فيا يكون توحشني زعما ولا علاش كيسول فيا اشنو الغرض ديالو .. يدوز الوقت بيا ؟؟ والله منتيق فهادشي .
جمعت حوايجي وشوانطي و سالات العطلة عندي بغيت نرجع بحالي نرجع ممتلكاتي و نخدم على راسي . كنحس براسي محدودة .. ماكرهتش ندير شي قهوة ونسد عليا داك الصالون فيه غير المشاكيل والصدع . الى ميك عليا هاد زايد مابقاش كيدور بيا غادي نقدر تدير شي من حاجة.. دابا هوا عارف شنو وقع بالضبط وتستر عليا يعني ما فضحنيش وماطمعش . اصلا شنو غيستافد الى فضحني غادي ياخدو ليا الفلوس ويخليوني وحتى شيكاية ما كاينة ضدي .
شديت الطيارة للمغرب واول حاجة تفقدتها هي فلوسي .. بما ان الخطر تحيد نقدر ندير فلوسي فالبنكة . ماعرفتش واش نقدر نتيق فزايد فقضية الصرف اللي كترمضني كل شوية خاصني نصرف والى بقيت هاكا غادي نحصل شي نهار .
رتاحيت من السفر وعيطت لصحباتي نخرجو وتلاقينا فلعشية درنا كافي مجموعين .. قولها وضحك عليها .. الصحابات نعمة ولاكن الى شركتي معاهم اسرارك كيولي نقمة . وانا من سارة حلفت منشارك اسراري ولا مشاكيلي مع شي وحدة ... صافي خليت العلاقة محدودة فإطار الضحك والخروج والنشاط يفوجو عليا ونفوج عليهم اما باش نعاود ليهم ونخليهم يعرفو عليا كلشي لا ، من النهار الاول كدبت عليهم قلت ليهم حنا لباس علينا وعندنا الورث ورثنا فجدي وصافي ماعطيتهم حتى حاجة اخرى عليا وخليت بيناتنا الاحترام والحدود وحتى هما فشكل مكيرضاوش ونفسهم عالية وبخداميهم ورزقهم ميتسلفو مني منتسلف منهم .
سكينة . ايمان . فدوى .. عطيت لكل وحدة الكادو ديالها اللي جبت ليها معايا وجلست نستاشر معاهم فقضية القهوى . .عجباتهم الفكرة بداو كيحاولو يقنعوني ندير كافي 100% نساء وخفت ماتمشاش ليا .. من بعد عرفت باللي ديك 100%نساء غير هضرة حيت مينكنش يجيو كليكة بنات وواولاد ونقولو ليهم يدخلو غير البنات . عطاوني مثال ووراوني التصاور ديال واحد الكافي بحال داك الشكل وعجباتني الفكرة وبديت نخمم .. البرد وفصل الشتاء هادا الوقت اللي نوجد فيه قهوى احلامي يالاه توجد فالصيف . لقيت البنات عندهم خبر زوين .. واحد الصديق من الكليكة عندو العرس ملي سولت شكون قالو ليا داك المسخوط اللي عاد طلق المرى وكان فرحان نهار الاول .. وامسخوط نيت يالاه مطلق عاود بغا يتزوج ولاهيلا هوا اللي عبر . عارض علينا كاملين وفاش شعلت النمرة ديال المغرب لقيتو معيط ليا وتاصلت بيه باركت ليه وووصاني نحضر معاهم ، قلت ليه زعما جيتي حتى للبرد عاد باغي تعرس قالك مكيصبرش على البرد القارس وامسخوط هاذا .
كنت محتاجة بحال هاد العراسية نفوج فيها .. رجعت كنعيا من تفواج كيخصني فاش نفوج على راسي من عيا التفواج ههه يالاه جايا من السفر منقلب على سفر اخر نرتاح فيه ولاهيلا زوينة هادي .
درت مع البنات نخرجو نشريو ليه كلدو دالعرس ومشينا كندورو تفارضنا وشرينا ليه بلازما كبيرة وسيفطناها قبل العرس لعندو للدار قالك غيديرها فبيت النعاس هه سعداتو بصحابو انا قبل فاش كنت مزلوطة مالقيت حتى لي يشريلي شارجور ودابا لفلوس كتلاقيك بالفلوس والزلط كيلاقيك بالزلط .
الليلة اللي قبل العرس خرجنا نشوفو شنو نلبسو .. كنتي معروضة مشكيلة كنتي مولات العرس مشكيلة .. ها التكشيطة ها الصندالة ها خاصني ها خاصني .. اول مرة نحضر شي عرس مور الترفيحة .. كنت من قبل كنمشي للقصارية كنكري تكشيطة ب 100 درهم ولا 150 حالتها كلها منتوفة والسقلي مدلي وصندالة ب 70 درهم ونجي بحالي وكتكري ليك ديك التكشيطة بحال الى عاطياك كلوتها وهي كاملة مشرشمة بحال الى لبسوها المشاش وريحة العرق كتولول منها . هاد المرة مشيت مع البنات عند واحد الستيليست معروفة المحل كيعيط يا ليل يا عين كتلبس غير الفنانات . دخلنا نشوفو التكاشط مكاين غير الف درهم لفوق ولاكن الى قلتي تكشيطة تكشيطة نييت لا من ناحية الالوان ولا العقيق ولا الخدمة ولا كلشي . تفكرت راسي فاش كنت كنمشي نحضر وفرحانة بديك الدربالة اللي كنكري وفوق هادشي حاضيا معاها لا تقطع وتقولي مولاتها شارياها بستين الف خلصيها ليا .. وهي حتى ستين ريال ماتعطيهاش فيها . ختاريت وحدة كتحمق والبنات حتى هما ومشينا بحالنا .. دزت للصالون عندي لقيت الروينة .. كنغبر غير شوية كيديرو مابغاو فيه هادا علاش طلع ليا فراسي هوا ومشاكيلو بغيت نبدل الحرفة فخطرة. درت حمام وصاوبتي دفاري ومشيت رتاحيت حتى للغد ليه فالصباح ووجدت راسي ودرت مكياج خفيف .. كيعجبني الايلاينر كيجبد ليا عيني .. ماكترتش درت داكشي خفيف ونقي وصاوبت شعري بوكلي طلقتو وعكر ولبست تكشيطة كانت فالزيتي ومطروزة بالالوان بحال شي لوحة وعامرة بالعقيق والمضمة ديالها زوينة مذهبة .. درت معاه ذهب اونسومبل رومي وساعة فاليد وكنقول ياكما كترت .. كنشوف شي وحدين كيعلقو الذهب اللي عندهم كامل كيجيبي ليا الردان .. راس مالهم كامل كيلبسوه باش يقولو الناس راه عندهم الذهب .. مرت الذهايبي اللي راجلها كيبيع الذهب ومكديرش ديك الفضيحة .
خرجت مشيت للقاعة وسطاسيونيت قدامها كنتسنا البنات يتجمعو باش ندخلو والناس داخلين حتى عمرات القاعة بقينا غير حنا .. بانو ليا صحاب زايد داخلين خارجين كيكميو على على برا الا هوا اللي ما بانش ليا .. ميمكنش مايجيش لعرس صاحبو اويلي !
وصلو البنات ونزلنا دخلنا للقاعة .. شافونا دراري وهما يفرحو ولاد الحرام جابو ليا الكراسة وجمعونا معاهم فالطبلة وجلسنا كنضحكو حتى هضرات ايمان وسولاتهم على زايد قالو ليها غيجي .. كنت محتاجة شي واحد يسول بلاصتي نعرف واش جاي ولا مجايش شحال هادي ماشفتو . لاكن اللي متوقعتش نشوفو ولا يكون حاضر هي صاحبتو .. جات مع شي بنت ودخلات جات سلمات علينا وجلسات وقالت كتفرنس
- زايد مزال ماجا
هضر صاحبو وقال: غيجي
طرا ليا العجب كفاش هاد صاحبتو معارفاش واش يجي ولا لا هي اول وحدة خاصها تكون عارفة . المهم دخلات العروسة ونضنا استقبلناها وشدينا فلعريس حرشنا بيه وحتى هوا مقطع الاوراق.. درنا ليه الفيشطة فعرسو وحيحنا العائلة بقات غير كنشوف وجالسين طايح عليهم الضيم بحال الى جايين يعزيز الله يخليها قاعدة .. مكاينش اللي كيدير الركشة فالعرس من غير صحاب العريس وصحبات العروسة واخا لعروسة فاللخر كتقلب عليهم وتكتب زوجي قرة عيني وضربها بغبرة . الحاصول درنا ليه الباركو وعجيو الحال وهزوه صحابو فالسما وبقينا جالسين ناشطين من بلاصينا حتى قربو يحطو العشا وهوا يدخل زايد .. ااودي يا ودي شداني نعرف هاد الاخ .. ضارب الكوستيم واللحية والشعر كيبريو عطاوه بالعين مع الباب حتى كان غيدخل فيه واحد السرباي بالبلاطو ديال العصير ورجع اللور هرب عليه وجا عندنا
سلم علينا كاملين من الوجه حتى لعندي ومد ليا يدو وقال
- على السلامة ..
دغيا قلب وجهه ومشا جلس بين صحابو خلاني غير كنشوف مصدومة وحتى ايمان بقات معجبة وقالت لي تحت نيفها
- اويلي مالو على هاد الفرشة سلم على كلشي من الوجه ونتي زعما حاجة!
مارضيتش طلعات معايا السخونية وهربات ليا الضحكة وقلت ليها : يسلم باش مابغا شكون حاشاها ليه تل نتي
دورت وجهي كنبرد على راسي وتزنكت بفيت نطرطق وجاتني مع العشا كان فيا الجوع وتسدات ليا الشهية .. نضت من الطبلة قبل منتفرش حسيت براسي تخنقت ودخلت مع الدخلة جاتني البكية وتقجيت ماعرفتش علاش وقع ليا هاكاك وبديت كنعرق ... ماكرهتش نمشي بحالي وبغيت نمشي كرهت داك المجمع وخرجت من القاعة مشيت جلست فالطموبيل وسديت عليا وبعدت شوية على القاعة ووقفت حالة السرجم كنتنفس .. مارضيييتش ماتوقعتهاش ودابا غيشوفني غبرت غادي يقول طلعات معايا ومابغيتش نبين ليه والمشكلة راني مخنوقة بغيت غير تفوتني هاد الحالة بعدا نتفش.. ماقدرتش نصبر كنهضر غير بوحدي حتى لقيت راسي كنبكي وفين ما نبكي كنحس براسي ماعندي وهر ما عندي والو وعلاش انا من دون الناس علاش.. فاش تفشيت ومسحت عيني بديت كنقول مع راسي علاش كنبغي نبان ضحية قدام نفسي وانا مالي من دون النا اش ناقصني واشنو اللي ماعنديش.. علاش كنخلط الاحداث .. علاش بصفة عامة عزيز علينا نتغبنو ونكدبو على راسنا ونبانو ضحايا ونكترو من الدراما . سمعت تيليفون كيصوني وطلقت عيني جيهة القاعة بانو ليا البنات برا كيقلو عليا وفتحت الخط جاوبت قالو ليا راه كيتسناوني راه حطو العشا وديماريت الطموبيل قربت للقاعة وقاديت مكياجي ونزلت بقاو كيسولوني فين مشيت ودخلنا كانو حاطين البسطيلة .. جلست وماشفتش فكمارتو وهوا راشقة ليه هوا وصحابو ماعرفت اش كيقولو .. كانت هدى حتى هي جالسة وكتجمع مع واحد من صحابو وكل واحد معامن كيهضر .. كليت شوية دالبسطيلة دازت ليا بزز وحطو الشوا ماقدرتش عليه وجلست مضيومة .. نوضونا نتصورو ونضت بزز ورجعت جلست كنضحك غير من فوق الحلق حتى قرب يسالي العرس وهزيت صاكي قلت ليهم غنمشي بحالي
ماكليت فخاطري ما حضرت فخاطري وهوا حراام واش شاف جيهتي ما بانت ليه تكشيطة زيتية ما بان ليه شعر زعر ولا دفار مصاوبين وعينين زورق ولا حتى حاجة من الجهود اللي درت وحتى الضحكة البيضاء مابتتش عييت نحل فمي مداهاش فيا كاع زاد فقصني .. صافي هادا لله وزدت فيه لصلا اشنو بيني وبين هاد المخلوق نعطيه التيساع انا .. البلاصة اللي يكون فيها منكونش انا كااع ومنجيش وخليه يتقلى فسمو .. شدوني ماخلاونيش نمشي وبقاو عليا جلسي جلسي وجلست درت ليهم خاطرهم وساكتة .. هضرات سكينة بالضحك قالت ليهم
- غدا الويكاند علاش منديروش شي بلان .
هضر جواد صديق الشلة وقال: ااحنا غدا غادين لافران الى كتاب
ايمان: بصح ! شكون نتوما؟؟
جواد: حنا بثلاتة ( زايد جواد -ناصر)
سكينة : واش غاديين عندكم شي شغل ولا غل غاديين
نغزتها وقلت : خليهم اصاحبتي يقدر عندهم بلانهم بوحدهم بغاو يمشيو ليه غتحرموها عليهم
ضحك ناصر وقال: دايرين مع الشيخات ... مع البرد والثلج هما اللي كينفعو حدا شي كانون
بقاو الدراري كيضحكو وسكينة كتأكد: واش بصح غاديين مع الشيخات
شافت فزايد وحرك ليها راسه بالنفي وقال: كيتفلا عليك مكاين لا شيخات لا والو
ايمان : ايوا مللي مكاين لا شيخات لا والو نمشيو معاكم ياك البنات
هضرت وقلت: انا غدا غادية لمراكش غير بصحتكم
كلشي شاف فيا وهز ناصر حاجبو فيا وقال: ااه الناس ديال مراكش .. مامساليينش لينا
حسيت بناصر تنفخ وهز قنانفو ومعاودتش هضر جيهتي .. زعما فضلتي مراكش علينا ايوا بالزعط .. نمدت كاع اللي قلت ليهم مراكش وسكت خليتهم كيهضرو وحسينا بالدراري بغاو يمشيو بوحدهم بلا بينا غير كيتهربو دخلو ليا الشك ... واش بغاو يرتاحو منا ولا دايرين مع شي بنات اخرين ولا كفاش!
خليتهم كيتناقشو ونضت هزيت صاكي سلمت على صحاباتي والدراري حتى هما من الوجه حتى وصلت لزايد ومديت ليه يدو بغيت نرد ليه القمعة اللي دار ليا وهوا ينتر ليا يدي مارضاش وجرني سلمت عليه من حنكي وانا كنسوط وخرجت مشيت بحالي وخليت هدى معاهم .. هدى كتعرفهم قبل منا ولاكن جاتني فشكل مؤخرا هي وزياد واش مابقاوش كما كانو ولا كفاش مافهمتش . مشيت بحالي للدار حيدت حوايجي وطحت نعست حتى فيقني التيليفون مع 12 كانت واحد الرعدة فالزنقة ديال الشتا
فيقاتني سكينة بنت الحرام من النعاس زربانة وقالت ليا
لسق فينا ناصر ومابغيناش نتردعو ومشينا معصبين بان لينا جواد حتى هوا لحق عليه من المرايا ومشاو رجعو بجوج
سكينة : اااخر مرة باقي نديرو معاهم شي بلان ولا شي لعبة صافي يمشيو يت****
مشينا للدار اللي كرينا معصبين بقا ناصر وجواد كل شوية يعيطو مجاوبانهمش و دازت عندنا الليلة كحلة كلها هضرة غير عليهم عيينا نقلبو ليهم على عذر مالقيناهش . الصباح مشينا نلعبو السكي فالتلج وكانت الدنيا عامرة ... مللي نزلت وواحد لاسقني وانا هاربة وتابعني كيزلق قدامي باش نجي فوق منو حتى عصبني باغي يتصاحب بزز .. جات عندي سكينة كتجري هازة تيليغون وقالت لينا
ضحكني وقلت ليه: نمشيو معاكم !! مغنمشيش معاكم انا .. الى بغات سكينة وايمان يمشيو يمشيو انا مغنمشيش بلا متحاول
هز يدو : بلا منحاول..
رديت : بلا متحاول
رد ببرودة: على خاطرك
عطاني بضهرو ومشا بقيت واقفة مربعة يدي كنغلي فبلاصتي وكنتسنا فسكينة حتى جات عندي قالت ليا راه تسامحو بيناتهم ودوك البنات اصلا كانو مدوزين بيهم الوقت وماشي بنات ديورهم غير ديال المصالح .. جاتني الضحكة حيت اصلا اشنو الفرق بيناتنا حنا ودوك البنات فهاد الحالة ... صافي قتانعت باللي خاصني نعطيهم التيساع و طلبت من سكينة ترجعني للدار ورداتني وجلست كان فيها شوميني بقيت جالسة حداه وشادة تيليفون حلفت حلفة قطعية منتلاقا بيهم ولا نخرج معاهم حتى داز داك الويكاند ورجعت بحالي للدار وانا مريضة حاسة براسي مسخسخة ومهدود وشي حاجة ناقصاني وخاصني شي حاجة وعقلي مرفوع ... حاسة براسي عييت وماعنديش الجهد والمورال حتى لشي حاجة .. سديت عليا فالدار حتى البنات مابقيتش كنتلاقاهم واخا كيعيطو ليا مكنمشيش ... بغيت ندير علاقة مع شي واحد باش نخرج من هاد الكآبة اللي انا فيها لاكن مالقيتش الشخص المناسب .
بعد فترة من الاعتكاف خرجت اخيرا وكان الجو بارد ... هزيت صاكي درت فيه تيليفوني ووراقي اللي كنحتاج وكارط ناسيونال ومشيت نطل على دارنا ... دوزت معاهم ديك العشية وتعشيت معاهم وشدوني نبات حتى صبح الحال ودزت للبنكة كانو خاصيني شي فلوس وخرجت 3 ديال المليون عطاوها ليا فغلاف وخرجت ركبت فطموبيل راجعة للدار .. كنت شارية فتجزئات جداد بعاد على الرواج وحتى قربت للدار وهوا يخرج ليا واحد قدامي شديت عليه الفران وطاح ليا قدام الطموبيل .. خرجت بالخلعة نشوف واش قصتو وهما يخرجو ليا واحد الجوج من الجناب هزو عليا جنوية وكان اسوء نهار فحياتي اللي عمرو يتنسا ليا .. هزيت يدي كنقول ليهم خودو لي بغييتو ما تقيصونيش وكشطوني خداو ليا كاع داكشي اللي لابسة فالذهب والصاك اللي فطموبيل والفلوس وكشطو ليا الطموبيل وضربوها هرسو ليا الزاج وشدني واحد ضربني وعطاني قتلة ديال العصا وهربو خلاوني طايحة تما كنتلوى حتى جات واحد الطموبيل دايزة وقفات ليا وكان فيها راجل ومرتو هزوني كيجريو بيا للسبيطار
مشيت للسبيطار واكلة قتلة ديال الكلاب ومهرسة من يدي وجلست تما يوماين لا تيليفون لا والو ومابغيتش نخلع مالين الدار وبقيت حتى فاتني الحال وخرجت مشيت لداري وهزيت واحد تيليفون قديم ديالي شعلتو وعيطت لصحاباتي جاو كيجريو عندي وقفو معايا اما طموبيلتي داوها للفوريان عاد مشيت جبتها انا وسكينة وصاكتها ايمان .. كانو عضامي مفتوكين.. بكيت حتى شبعت ماعرفتش اشمن دنب درت فحياتي حتى يطرا ليا هادشي ... كولشي الا الصحة تجي فين مابغات وماتجيش فالعضام ... النفس ماكنتش كنقدر نتنفس بقوة ما صدري كيضرني وبقاو عليا البنات نعيطو لزايد نقولوها ليه مابغيتش .. انا كنهرب منو ونزيد نعيط ليه قلت ليهم غنمشي نديكلاري راسي ولاكن حتى يفوتني الحال شوية وفعلا فاش قدرت نوقف نيشان عاد نضت لبست واحد الكسوة كحلة خفيفة ديال الخيط مجموعة وليبة موص كحلة وليبوط ودرت عليا مونطو قهوي على كتافي وطلقت شعري ودرت بيرية كحلة ونضاضر ومشيت مع سكينة للكوميسارية نشكي بهادشي اللي طرا ليا .. كنت عارفة غادي نتلاقا زيد تما حيت ديك الدائرة فين كاين هوا ومابغيتش يشوفني بحال الطلابة والدائرة كبيرة الى ماتلاقيتوش هوا غنتلاقا واحد من معارفي يتشفا فيا .
وصلت وسكينة شادة فيا وطلعت بغيت نقدم شكاية ويدي مهرسة دخلوني عند واحد البوليسي تما بديت نعاود ليه وسكينة واقفة برا فالكولوار حتى شوية تمات داخلة هي وزيد دورت وجهي لقيتو مورايا كان سيفيل مكيلبسش اللبسة غير تريكو كول v ودجين استغرب فاش لقاني تما لقاو عطاه داك البوليسي التحية وشار ليا بصبعو قالي
- اجي نتي .. اجي معايا
نضت مشيت موراه حانية راسي جاتني البكية حسيت بالحكرة وعلى سبة كنت غنبكي ساعة ضحكني دزنا حدا واحد جوج شماكرية جالسين فوق واحد الكرسي طويل ديال الخشب بالمينوط وواحد فيهم راسو كيطوش منهم الدم ... داز حداهم زيد لقا واحد طالق رجليه وعطاه واحد الصلية للحنك والودن وضربو لرجليه قاليه
- جمع عليا فراقشك جالس فخزانة ..
ديك الركلة اللي عطاه لرجليه جمعهم بجوج كانت غطيحو من فوق الكرسي .. ناري الكوميسارية علام غا المشاكيل والكوارث المركز ديال المصائب مكتخواش .. هادا ضرب هادا قتل هادا سرق. وصلنا لواحد البيرو قالي دخلي جلسي تما وبقا هوا واقف مع واحد البوليسي كيهضرو وانا وسكينة جالسين حتى دخل جلس فالبيرو كانت موراه واحد الرايا قدها قداش ديال المغرب واقفة ومابغاش يسالي كل شوية داخل عندو بوليسي بااز ليه .. الستريس والاعصاب وعاد الاجرام .. دخلو ليه واحد بالمينوط كان تعدى على شي راجل كبير عندو طاكسي وهاد مسخوط الواليدين عندو تريبورطور . بقا كيبكي عليه ما درتهاش بلعاني الشاف راه ماقصتوش الشاف وهوا يخزر فيه وشاف فيه باشمأزاز وقال
.- غنبقا خدام غا معاك نتا ... هبطوه لتحت تا نسالي
رد لاخر: الشاف راه الحكرة والله تا محكور
هز زايد واحد طاسة ديال ستلوات ضربو بيها للوجه حتى بقا فيا داك الحلوف وداوه وبلا منشعر قلت ليه
- مسكين غا بشوية عليه
شافيا بصرامة وقال: بقا فيك تمشي تونسيه ؟
سكت وكرهت القمع ومايجي منو فين ما تكون شي حاجة داخلة فيها زايد كتزاد معايا الزايد كنمرض ونتعصب.
قال لواحد يسد الباب وبقينا غير حنا .. تكا اللور على الكرسي ودار يدو على فمو وقال
- شنو وقع ؟؟
تفكرت عضامي وما طرا ليا وبديت كنعاود ليه من الاول حتى وصلت للحضة اللي حسيت فيها بالحكرة وتضربت وبديت كنبكي ووريتو فين كليتها وعطيتو وراق السبيطار وكلشي و خليتو كيشوف .. بقا كيسولني وانا كنجاوب وجابو ليا القرعة دالماء وعطيتو سمية دالبنك اللي تيريت منو . اودي لهلا يخطي علينا معارف الصراحة .. ديك الساعة سيفط على السيكيريتي جابوه وقالي سيري ترتاحي حتى نعيط ليك ونضت خرجت ولاكن بقا فيا الحال .. مابقيت فيه ما بين ليا شفقة على داكشي اللي وقع ليا ! كاع صحابو ساقو الخبار سولو فيا وانا باقا الخلعة ما مشات مني .. جلست فالدار تقريبا سيمانة ومعيطش ليا ما سولش فيا حتى لواحد النهار جاني اتصال جاوبت وانا نقفز كان هوا .. قالي دوزي للدائرة ونضت لبست سروال رمادي سورفيت وكابيتشو يديه طوال وعراض و طاقية وطلقت شعري .. منين مادزت تابعني التحراش والطموبيل مزال مفردكة مابقاش عندي الخاطر لحتى حاجة وجاتني فوبيا من السياقة بوحدي رجلي ولاو كيفشلو ليا .. شديت طاكسي صغير ومشيت لمركز الشرطة هبطوني لتحت لواحد البيت فيه سرجم طويل ديال الزاج وحيط من موراه فيه الضوء ودخلت لقيتو جالس فوق واحد البيرو كحل لابس قميجة بيضاء ورجلو فوق واحد الكرسي حداه ومتكي بيدو على ركبتو كيتسناني .. غير دخلت هز فيا عينيه وشار ليا لواحد الكرسي جلست وقال
- كي بقيتي شوية ؟؟
حركت راسي وجلست مجموعة شادة يدي .. كان حداه واحد الانترفون برك فيه وقال
- دخلو ليا هادوك
دخلو مور داك الزواج واحد الرباعة ديال الشلاهبية وقفو مصافين وقالي
- شوفي فهادو مزياان .. واش تعقلي على شي واحد فيهم ... مكيشوفك حتى واحد والزاجة فيمي اوكي .. نتي كتشوفيهم هما لا بلا متخافي .
وقفت كنشوف وكنحقق فيهم وغير جات عيني على واحد وهما يتكمشو عضامي والحريق فضهري مشا وجا وقلت ليه كنترعد
حليت الباب طلعت قبل ميقول ليا على خاطرك وسكت كتسناه يعاود يعرضني على الغدا حتى جاه اتصال وفتح الخط كيهضر ويضحك مع مو .. وفاش قطع قالي وهوا ساهي بواحد الابتسامة فالاتيليفون
- نسيييت .. ليوم الجمعة ... الواليدة مسكينة معيطة ليا على كسكسو
حليت عيني وحتى انا تشهيت كسكسو ونسيت باللي الجمعة وقلت ليه
- سعداتك حتى انا نسيت اليوم الجمعة كنت دايرة شوارما فالدار دابا غندوز لشي سناك ناخد كسكسو
تلفت شاف فيا وقال: يالاه تغداي معايا مرحبا بيك
بقيت ساكتة وحشمت نمشي معاه لدارهم وماجات لا بلعربية ولا بفرونسي وقلت ليه
- لالا بلاش بالصحة ...
رد وهوا كيشوف قدامو : الدنيا هاانيا .. كاين غير انا والواليدة صافي
عيط لمو قاليها تصاوب ليه طبسيل وفهمها باللي معاه الزايد لاكن ماقال ليها لا بنت ولا ولد وقطع بقينا غاديين حتى دخلنا لواحد المجمع ديال الفيلات كبار دوك الفيلات بلدين شوية باينة قدام ووقف طموبيل على الباب فالشارع وبدا يكلاكصوني على العساس فتح ليه الباب ونزل دخل خلاني جالسة .. كنسمع الهضرة والغوات والبراهش كيتجاراو لداخل حيت خلا الباب محلول عاد رجع كينقز فالدروج هاز واحد الطاجين فيدو مغطي خطو اللور وطلع حدايا قلت ليه
- ماماك مسكينة دايرة ليك الخاطر
ضحك وقال: الواليدة .. مسكينة درويشة ماتقولش ليا لا
رديت : فين غنديوه للغابة ؟
ضحك عليا وقال : الغابة !.. هانا غنوريك فين غنديوه
ديمارا طموبيل غير تما فداك المجمع وكان مجمع كبير ضربنا شي ربعة ديال الشانطيات كندورو وسط دوك الفيلات حتى وصلنا لواحد الفيلا جات شوكة الدخلة ديالها متلثة والبني ديالها جديد كلها بالعود من برا فالقهوي والكحل كاملة والزاج والربيع باين حديد وشي نخيلات حدا الباب على الشارع .. كان العساس جار التيو كيفزك الارض بالماء ويرشها ويرش الشارع اللي حداها وقالي نزلي .
نزلت ساكتة خلا الطموبيل برا واقفة على الطروطوار قدام الحيط ديال الفيلا وهز الطاجين ودخل كانت الارض مفزكة شوية وريحة التراب فازك شحال زوينة والشجر كيقطر بالماء .. كان العساس يالاه رواها والدنيا نقية والربيع والخضورة بين الباب الدخلاني والباب اللي على برا وكلها موديرن كتحمق وجات طويلة مستطيلة عندها البالكونات كبار بزاج كحل . دخلنا لقينا واحد المرى حادكة تما كدور فالدار والنقا النقا النقااا ريحة النقااا كتشعل مينكنش شحال نقية دارو وشحال زوينة ... بسيطة فالديكور ومافيهاش قوة الزواق بزاااف وخاوية ومتيسعة لاكن فيها اللوحات الفنية بكثرة ... مافيهاش الفراش بزاف فيها صال مونجي زوينة وفوطويات كبار مدورين الوسط وواحد التلفازة شادة الحيط كله مافيها فيترينا ولا والو غير تيلي بوحدو فالحيط والطبلة الوسط وعندو النص ديال الفيلا اللي من جهة الالخرجة ديال الجردة واحد الجزء مجنب فيه لابيسين شاد جزء من لداخل مغطي وخارج طويل حتى للجردة .. جا نصو مغطي نصو معري زوين وحداه فالجهة الاخرى واحد الجلسة بالفوطويات حدا الزواج الل فاصل بينو وبين الجردة .. ماعندو لا قوة لفراش ولا زرابي .. حتى الرخام مدايروش داير الخشب فالارض قهوي غامق ماط والحيوط عامرين بالطابلوات .. باين عزيز عليه الفن التشكيلي ولاكن ماشي اي فن .. واخد النوع ديال اللوحات معبرة والالوان متناسقة مع بعضها فجميع اللوحات . كان عندو الدروج ديال الزاج الوسط كيطلعو لفوق وشي ممرات فالجناب كل واحد فين كيدي واهم حاجة ريحة الدار ... وهاد الريحة ديال الدار كنشمها فيه شي مرات مللي مكيكونش داير الريحة ... ريحة فننة مزيج ديال الروايح مخلطة فالدار عطاو واحد الريحة سرية زوينة كتبعت الراحة والهدوء والاسترخاء .. عجباتني دارو بزااف حماقيت عليها وعلى الستيل ديالها ورتاحيت ماسخيتش نخرج منها .. انا كن عندي هاد الدار منمشيش نجلس فالقهزى ونخرج كما كيدير هوا .
طلع زربان لفوق كيحل صدايق القميجة وقالي على عجلة
- خوظي راحتك انا شوية ونجي
جلست كندور فعيني .. ماكرهتش حتى انا بحال هاد الفيلا ولاكن عندي عوائق ... شنو غنقول لدارنا .. منين جاوني الفلوس.. كدبت عليهم قلت ليهم الصالون كيصرق عليا وشارية كلشي كريدي... ولاكن منين غنقول ليهم جاني باش شريت فيلا .. خويا يعرف شنو وقع يمشي عليا الحبس ولا يقتلني باش ياخد كلشي ، حياتي عذاب واخا ترفحت ماقادراتش نتصرف فالفلوس .. الصرف من جهة والعائلة من جهة ... وخاصني نمشي على قدي دقة دقة وفيلا بحال هادي فبوسكورة كطل على الكولف خاصها الزبابل ديال الفلوس . بإمكاني نشريها ولاكن شنو المبرر اللي نعطي ... مكاينش غادي نوض عليا النحل .
حطات لينا ديك الحادكة كسكسو وكان كيشهي مصاوباه مو على حقو وطريقه باين عزيز عليها ولدها مهلية فيه .. قلت بسم بالله وقلت ليه
- قتلاتني الماكلة ديال الزنقة .. كطلع فالراس
رد وهوا كياكل معايا وقال: منقدرش ناكل على برا الواليدة كيبقا فيها الحال .. يوميا لغدا معاها واخا نكون خدام كتسناني حتى نجي مسكينة
استغربت وقلت: وعلاش كيبقا فيها الحال الى كليتي برا
رد بعفوية: هي هاكاك مكتبغيش ناكل فشي بلاصة وكطيب بيدها ديما .. كتنوض الصباح كتعيط ليا عارفاني كنوض بكري كتسولني شنو دير للغدا ولا شنو دير فالفطور .... كندوز حتى للدار نفطر معاها عاد كنمشي
رديت : ويومياااا هادشي
رد : يوميييا .. كنلقاها كتسنا .. الا الى كنت مسافر من غير هاد العذر مكتقبل حتى عذر اخر .. لعشا مكنتعشاش غير بعد المرات كندير شي حاجة خفيفة هنا عارفاني مكنتعشاش ..كلشي فالخدمة عارفني كنمشي عند الواليدة يوميا هادا تخيتمو ميمكنش يتبدل
خرجات من فمي على غفلة : والى تزوجتي كي غادير !!!!
ضحك وقال: هاداك هوا النهار لحكل عند الواليدة ههه
صدمني: علاش النهار الكحل! اي ام كتمنى تزوج ولادها
رد : الا الواليدة مكتبغيش اللي يجبد ليها موضوع الزواج وماباغينش نتزوج ..اصلا الزواج فيه غير المشاكيل ... كيكون بنادم هاني كينوض يجيب الصدع لراسو
رديت : بلعكس راه الزواج كيجيو معاه الوليدات والاستقرار
رد كأنه مقتانع وقال ببرودة: الاستقرار هوا تبقا ديال راسك لا تابع لا متبوع .. فين هوا الاستقرار الى كنتي عايش مع وحدة فدار وحدة متقدرش كاع تاخد راحتك فحتى حاجة وتابعاك فين مشيتي فين جيتي هاهيا غضبات هاهيا خصها تمشي خصها تجي ..
بقيت ساكتة وشاف فيها مطولا وقال : ونتي علاش بقيتي حتى لدابا ماتزوجتيش؟
هزيت كتفي: انا مابغاش اصلا نتزوج ... غير نصحتك بالاستقرار اما انا مكنفكرش نتزوج بمرة ...
رد باستغراب: علاش؟
هزيت كتفي: حتى انا بحالك .. مابغيتش نشرك حياتي مع شي واحد ونبقا متبوعة
رد عليا وقال: ولاكن متقارنيش راسك بالرجال ... المرى راه وقتها محدود غيجي واحد الوقت تندمي ماعندك فين ترجعي .. اما الراجل واخا يكبر يفوت ربعين عام وقتما بغا يتزوج ويولد غيقول بسم الله ... والعقليات كيتبدلو دداكشي اللي كنبغيوه ليوم مكنبقاوش باغينو غدا
بقيت ساكتة شوية كنفكر وقلت ليه: يقدر الى تفاهمت مع شي واحد نتزوجو ... ندير شي وليد ولا بنيتة والى متفاهمناش نطلقو
رد : الطلاق كيهرس الدراري الصغار فكري لمصلاحت ولادك .. ماشي مصلاحتك حيت مغتوليش بوحدك اللي عندك الحق تختاري ... ولادك من بعد غادي يختارو عندمن يبقاو وتربيتهم ماشي ساهلة... الواليد كان مطلق الواليدة من مور ما ولداتني كنت صغير وكنحس بالنقص وعلى قبل هادشي ضحات الواليدة وضحى الواليد ورجعو حيت وصلت لواحد الحالة وليت فيها عدواني وضايع ومعارفش السبب ... من بعد فاش رجعو تجمعو عاد بديت كنرجع بنادم... (صغر عينيه فيا وقال ) بنت زويونة بحالك زعما ماعندها فراس احلام ولا ..واالو..
جاتني الضحكة وقلت ليه: عندي ال سعود ديالي ههه
بدا كيضحك وقال: عرفتك كتكدبي .. مكاين لا ال سعود ولا ال فرعون بغيتي تستري على الفلوس
رد بهدوء : دقة دقة مالك مزروبة ... غيير بشوية عليك .. بداي بعدا ديري شي بروجي اللي يدخل ليك الفلوس ولا شركة حتى الى تصرفتي فيهم مادخليش للناس الشك .. بيني النجاح ديالك فالتسيير وشوية بشوية حتى ديري كاع داكشي اللي باغا ديري
رديت: دابا انا عندي واحد الفكرة فراسي ولاكن خايفة.. قلت نسد داك الصالون ونشري شي محل ولا شي حاجة ندير فيه كافي
رد : ماتفكريش تشري من دابا الملك يقدر يمشي ليك الى تحل الضوسي ولا جات شكاية ضدك... علاش مافكرتيش دخلي شريكة مع شي واحد تبداي معاه
فكرة زوينة ولاكن معامن ؟ مكنعرف حتى واحد
رد بعفوية: انا نعطيك المحل راه عندي واحد غير مسدود مداير فيه تا حاجة .. وفموقع زوين وكبير تجيك فيه كافي تما زوينة
هز حاجبو مصدوم وقال: هي كن شريتها ليه وحيدت ليك دوك الفلوس باش تخافي مزياان
بقيت ساكتة وبعدت فكرة الشراكة معاه حيت ماشي ديال المفاهمة منقدرش نغامر معاه وانا كل شوية كنغضب وكنغبر والشراكة مغتخلينيش نغبر الى شي نهار دابزنا . بدلنا الموضوع وكنا سالينا الغدا ونضنا حيت كان عندو مايدار ووصلني للدار وقبل منزل عرضني للعشا على حساب السبت اللي هوا غدا ومارفضتش قلت ليه نشاء الله وسلمت عليه من الوجه ونزلت فحالي كنفكر فيه وحرام واش بغا يتمحا ليا من بالي .. بقيت كنقلب ونقيس شنو نلبس للعشا وفين غيعرض عليا ووجدت شنو نلبس وبديت نستاعد نفسيا لهاد لعشا اللي غيجي موراه العجب المتعجب مع هاد الاخ
لغد ليه السبت ماخرجتش وماعيطتش حتى تعاشات لعشية عاد عيط ليا قالي غندوز عليك مع 8 ..ايوا من ديك الساعة وانا نوجد .. خرجت للصالون قاديت الحالة ورجعت للدار وحدت راسي حتى حتى عيط ليا ونزلت لقيتو جالس لابس سروال ديال التوب وقميجة والطموبيل سخونة لداخل .. شافني بقا حال فمو كنت لابسة غوب سامبل بيضاء وصندالة ومونطو فرو ابيض حتى للركبة وشعري بوكلي فالجنب .. دايرة ايلاينر وعكر احمر ودفاري بالاحمر وليزاكسيسوار جيت كنحمممق بكل معنى الكلمة .. هزيت صاك ارميس قهوي صغير فيدي والريحة وطلعت حداه سلمت عليه من الوجه ودرت عقلي حيت السيد قمايعي وانا مافيا اللي يتعرض لشي قمعة وانا بحال الاميرة واجبني راسي
الطريق كلها وانا ساكتة ... كنت كنتمنى نعيش ولو غير شوية من داكشي اللي كنت كشوف فالفيديو كليبات .. دوك الاضواء ودوك السهرات ودوك الجلسات فالطموبيل بالليل وهما لابسين فساتين .. كانو كيحمقوني دوك العراضات ديال البورجوازيين وكياخدو ليا العقل .. هاد الدنيا خاصها الفلوس بصحيح العبارة ، لا فلوس لا حياة ميقول ليا حتى واحد حقا الكرامة هي كلشي.. والله وماكانو فجيبك الفلوس اللي يحافضو ليك على الكرامة حتى يجيو مالين الحبة يزطمو عليك نتا وكرامتك . فرق كبير بين دابا وبين قبل .. عاد عرفت علاش اللي لباس عليهم كيدمرو باش يزيدو يديرو لباس .. حيت الحياة اللي عايشينها هما ماشي هي اللي كنعيشوها حنا .. شكون قال شي نهار غادي نتعشى فشيراطون وانا سنتك عبد العالي كان كيجيني غالي .. ربع دجاجة ب 25 درهم فاش كنجي نخلصها كندم علاش كليتها .
وصلنا لاوتيل شيراطون وكان ناقصني الايتيكيت والقواعد ديالو .. مي واخا هاكاك تعلمت شوية من الافلام والنسلسلات التركية غير هوا بحال هاد اللباس وهاد البلايص خاص الواحد يكون عارف الخلفة الصغيرة كي يدير يحطها ... حيت جيتي برجلك للطبقة الراقية ماجابك حتى واحد اذا التازم بالقواعد ديالهم ولا خليك فالاسفل ودير اللي بغيتي .
فتح ليا الباب نزلت وشد ليا فيدي ... ديك الشدة فاليد شحال زوينة احسن من ديك الشدة فالودن كنتفكرها كتجيني البكية ماكرهتش يتمحى داكشي اللي داز كامل حيت بمجرد مكنتفكر الماضي كيفشل ليا البرستيج .
دخلت شادة ليه فيدو وماعارفة والو لا منين ندور ولا منين ندوز والسيد باينة فيه مولف داني نيشان للمطعم وكيدنا النادل للطبلة ديالنا كانت مكتوبة عليها محجوز .. جلسنا وكانت الدنيا خاوية والموسيقى هادئة والضلام غير الشمع اللي مضوي تما وفين ماكان الزاج كيبان كيبرق .. لقيت تما واحد المغنية جالسة مع واحد كتعشى وبديت نقلدها ونتقاد بحالها ... يالاه تقاديت فالجلسة وانا نفشل حيت لقيت الموني كامل بالفرونشي ومافيهش التصاور وانا مولفة ناكل بالتصاور مكنقراش كاع السمية واخا تكون بالعربية .. حصلة هادي وزايد ماحلش الموني كان عارف اشنو باغي ماشي بحالي معارفاش شنو كيقدمو تما .. شنو غادي نقول ليه عطيني ربع الدجاج بالروز مشرمل وماتنساش ليا الفريت والكيتشوب والمايونيز !.. مشكيلة هادي وغرقت فديك الصفحة كنقرا مافهمت واالو حتى كحز عندي زايد طل عليا وقالي
- مابان ليك والو ؟؟
اودي على مابان ليا والو واش عشرين طبق هنا ومابان والو راه انا اللي مكنقشع والو وماضربتش حساب لهادي اما كن نشيت قلبت على شي طبق فقوقل نجيبو فراسي بلا منبقا نتفتف .. مالقيت منقول وانا ونقول
ماعرفتش الصراحة ماعنديش مع الطبخ وماعارفاش شنو الاطباق اللي حاطين هنا .
جيتو نيشان لا داعي لاحراج وماشي عيب منعرفش شي حاجة حيت انا ماشي طباخة ولا قارية على داكشي .. صافي حاطين سمية يحطو لينا شنو فيها ولا تصويرة ماشي يخليوني نحلل وخايفة بحال الى جايا ندوز الباك
جا النادل وسولتو على شنو كاين بدا كيشرح ليا بالفرونسي داكشي وانا نسخط حيت مزال ماوصلت السطاج ديال المطاعم فالسونطر انا مزالة فالرياضة والنوادي . فهمت شوية وتوكلت على الله طلبت وحطو لينا العشا تعشينا وبدينا كنهضرو .. عاودت ليه على حياتي شوية.. حياتي اللي مافيها مايتعاود كلها قلة مايدار .. سولتو علاش ختار يكون محقق ولا يدخل للبوليس اصلا ودرت راسي معارفاش لا واش لباس عليهم ولالا قالي كان كيعجبوه الافلام البوليسية من الصغر وكيبغي داك العالم وبقا متشبت بيه حتى كبر وميقدرش يسمح فيه واخا ميدان صعيب وخايب وكله مخاطرات لاكن رجع جزء من حياته ومن شخصيته ومكيتخيلش راسه فشي خدمة اخرى .. وقالي مابغاش يدير شي حاجة اخرى بخال مشاريع خاصة حيت اصلا ممنوع عليهم وثانيا ماعندوش الخاطر والوقت لشي حاجة اخرى والنهار لكبير عنده هوا فاش كيشدو شي مجرم ولا قتال وكيبرد فيه الهوايش حيت طالعين ليه فراسه وفاش كيشوف شي منضر ولا كريساج فالزنقة كيتمنى يشدو يقتلو ومكيحنش فيهم حيت ماشي ديال المحنة وداك النوع كيكون متجرد من المشاعر وكيتمسكن فاش كيطيحو فيديهم . سولته على هدى بقا ساكت مطولا فاللخر قالي باللي كانت غتكون بيناتهم شي حاجة ومابقاوش وسالاو داك الفيلم ديالهم ودابا كيهضر معاها عادي ومعندو حتى شي علاقة .. سولني واش كنعرف شي واحد ماشي واش عمرني عرفت شي واحد حيت فاش قلت ليه عمرني عرفت شي واحد بقا كيضحك وماعاود سولني كاع
سالا العشا وشربنا موراه شوية دالشروب هه ... هوا اللي شرب شي حاجة ديال الشراب انا شربت ماء غازي هضمت بيه ودرت عقلي والحمد لله ما تقمعت ما قمعتو ونضنا خرجنا فحالنا وغادية كنسول راسي اشنو نوع العلاقة اللي جامعاني معاه لحد الساعة مامفهوماش.. وصلني للدار ووقف باش نزل... هزيت صاكي ومديت ليه حنكي بابتسامة نسلم عليه وشكرتو على العشا.. سلم عليا من الوجه وبين ليا نوع العلاقة من خلال بوسة صغيرة باسها ففمي حتى رجعت زرقة ونزلت درت ليه باي باي وطلعت كنضحك بوحدي بحال الحمقة .. دخلت للدار وهزيت رجلي للسما زاوطت داك الصباط ولحت المونطو والصاك ومشيت نقزت على الناموسية عنقت واحد المخدة كنششم فيها ريحته واخا مافيهاش وبديت نتخايل فرحانة ... حسيت بالسما هازاني وقلبي كيفرفر كأنني اسعد وحدة على وجه الكرة الارضية .. ماكنتش عارفة شنو هي الحياة حتى باسني زايد عاد حسيت بطعم الحياة وحسيت براسي عايشة.. احساس لا مثيل له السعادة الحقيقية المتكاملة... ماكنتش كنحس بالاعضاء ديالي واش كاينين من قبل دابا كلشي فيا كيشطح .. النعاس متبغاش يجيني بقيت كنتقلب من جهة لجهة ويدي على فمي باقا تبوريشة ديال موسطاشه تحت نيفي .. بزز باش داني النعاس والصباح غير فقت مع حليت عيني بان ليا قدامي ورجعات السعادة والفرحة ليا والنشاط والحماس وكل حاجة زوينة فهاد الدنيا ... صوتا التيليفون طليت نشوف شكون كان هوا .. قفزت جيت جالسة وكنترعد باغا نجاوب دغيا قبل ميقطع ولا ميعاودش يصوني وفتحت الخط بالزربة جاوبتو وفرحت مللي سمعت صوته وهوا كيسول كي صبحت وكنتكسل عليه .. لاكن صدمني فاش قال ليا غيمشي يسافر خمسطاش ليوم خدمة بالليل وبغا يجلس معايا شوية قبل مايمشي .. يااه على زهر ! ... شحال وهوا عنا حتى تباسينا عاد جاتو الخدمة فجهة اخرى تفو... عنداك غير يمشي ومايعاود لا يسول فيا ولا يحاشيه ليا غنمرض ومابغاش نفرط فهاد السعادة ونرجع للتعاسة وتساعتي هاد المرة غتكون مرررة
قطعت معاه ونضت بالزربة دوشت باش نتأكد من راسي نقية مية فالمية ونتيق فراسي و لبست جاكيطة بيضاء مزغبة من القب ودجين وسبرديلة وهزيت صاكي وطربوشة ونزلت كان كيتسناني حدا الباب وطلعت فرحانة سلمت عليه وجلست .. سولني واش فطرت قلت ليه لا وكانت الوحدة ونص ديك الساعة وقالي مشا فطر عند مو عاد خرج بقيت كنضحك .. ماعرفتش علاش فين مايقول ليا غنتغدا مع مي ولا نفطر معاها كيتجيني الضحكة .. سعداتو مرضي مو ماشي بحالي كنكره نمشي لدارنا كنحس فيها بواحد الطاقة سلبية كنبغي غير فوقاش نخرج من تما .. النكير النكير والهضرة اوووف مابقيتش كنتحملها . داني لواحد الكافي زوينة من الخشب وكانت الشتا خيط من السما والنهار والضوء شاعل فالكافي لداخل .. جلسنا فواحد الكوان مقنت كامل من الخشب حتى الطبلة من الخشب والحيوط ديالها مدلية واحد الحبل من السقف فيه بولة .. ستيل جبلي وااعر وفوطويات رطبين فالخزي وقدامنا زاجة مغطية الخارج والشتا كتصب كان الجو زوين رمنسي بامتياز .. جلس حدايا ولاح يدو مور ضهري .. طلبت حليب بالشكلاط وكريب بالمكسرات والشكلاط وهوا خدا نص نص وحط باكية ديال الكارو حداه كيكمي ... مكانتش عندي الشهية الصراحة ولا جاتني على الماكلة.. ماعرفت مالي كنفرح كتسد ليا الشهية كنتعصب كيجيني القلوت العصبي والمعدة كتكنزز كما درت وحلة يخخ ... الطبسيل كيشهي والحليب بالشكلاط سخون وانا ماعنديش منين ندوزو . باغا فير يعنقني ونبقاونتفرج فديك الشتا كطيح ونشم ريحة الكارو خارجة من فمو بحال الياسمين والريحة اللي داير داكشي دافي كيكمد العضام .. بقا عليا كولي كولي وانا كناكل بزز .. قالي ماكلتك قليلة قلت ليه فخاطري لهلا يوريك شحال كنت كناكل قبل منعرفك
ماعرفت داك الفطور منين داز ليا لقيت راسي شادة شوكولا شو فيدي ومتكية على كتفه ويدو ورا ضهري والسكات كنتفرج فداك الشتا اللي كطيح .. يعطيوني مليار باش نوض من تما منوضش .. السخونية اللي كنحس بيها والهدوء والطمأنينة واخا يجي با يوقف عليا نبقا بلاصتي ... يشوف اللي بغا يشوف ويحضي اللي بغا يحضي المهم انا مكنشوفش البشار كنشوف غير السعادة وقلبي معنقو ومطمأن صافي ... دوزنا وقت طويل هاكاك السكات راضية بداكشي ومرتاحة .. بغيت نسولو اشمن غرض عندو فهاد السفر لاكن درت بناقص من الاسئلة اصلا كنخاف يدور فيا يقول ليا ماشي شغلك اللهم بناقص.. مزال مامضاسراش معاه باش نبقا نبلبل بحال الببغاء ونسول. المهم طولنا الجلسة والحد مكاين حد .. طفيت التيليفون مابغيت حتى قمقوم ينغصها عليا وصحباتي غادي يعيطو ليا باش نخرجو كاملين وماعندي كي نظير ليهم ومابغيتش نخرج معاهم .. جا وقت الغدا طلبت الباسطا بلاصوص وكفتة وهوا عيط لمو قاليها مغايجيش تخليليه من داكشي اللي دارت وطلب ليه بلا ميكست مع العواصر مع السلاد وتغدينا وبقينا تما حتى تعاشات العشية ونضنا مشينا بطموبيل قدام البحر وجلسنا .. تلفت عندي وقالي..
غتمشي معاهم الى عيطو ليك لشي بلان ؟
قلت ليه: شكون؟
رد : شكون من غيرهم علاش نتي عندي اقسام ؟
استغربت : واش البنات ؟
رد : كنهضر على البنات والدراري الى عيطو ليك واش غتخرجي معاهم
حركت ليه راسي بالايجاب وبقينا جالسين ، عنقني وبدينا كنتجمعو شوية بدينا نتقاربو حتى دخلنا فالبوسان ونسيت راسي وسميتي تخشعت وعجبني نتباس .. ماشي اول مرة فحياتي غادي نتباس فايت بيا شبعت بوسان مع راسي مامرة ماجوج وشبعت مصاحبات وبحال هاد المسخوط مكاينش .. كاع اللي عرفت فحياتي ماعندهمش البنة واللذة وميوصلوهش فالكاريزمة وبواس كيعرف يعيش اللحضة وكيعرف يبوس وطريقته مختاااالفة لا يشبه احدا. .. اخيب حاجة توقع ليك هي تكون مجرب كتعرف الاختلاف وكتعرف اللي كيعرف واللي مكيعرفش واللي عندو واللي معندوش .. ماشي بحال مللي كتكوني رمانة مغمضة اول واحد قرب ليك كتقولي مابحالو حد واخا يكون ميخلط الخنونة مع الدفال .. انا جربت العجب وديت وجبت عرفت الفرق وفرق شااااسع
شبكناها بالمعقول فالطموبيل حتى حيد الجاكيطة وجانا الصهد تقول جايين من الصحرا شحفانين .. كن ماصونات ليه مو ديك اللحضة وتراجع يعلم الله فين كنا غنوصلو وحتى انا مابغيتش نضيع الزردة وشفت الربيع ماشفت الحافة تقول كنت كنتسنا فديك اللحضة وخفت ماتعاودش .. الله يدومها محبة ياربي. جاوب مو اللي خرجات ليا فعودي من النهار الاول وقطعاتها فيا ماخلاتني حتى نطفي الشوق .
صافي من بعد فاش قطعنا البوسان رجعنا لعقلنا ورجعت لبلاصتي تكمشت وعاد جاتني الحشمة والحيا اما قبل شديتو من رقبتو تقول كنعرفه هادي عشرين عام وفعلا كنحس براسي كنعرفه من شحال هادي . شاف فيا كيضحك وقالي نوصلك وقلت ليه واخا .
ديمارا الطموبيل شاد ليا فيدي حتى وصلت وسلمت عليه باسني حدا فمي ونزلت كنطير مشيت كنقز للدار وطلعت بديت كنقز بوحدي كي االحمقة ونطير وغادية جايا جاني الحماس نطوي الماريو ونرتب الدار وخيالي مراهش معايا بقا معاه .. الجاكيطة اللي كنت لابسة علقتها وكل شوية نمشي عندها نشمها بقات ريحته لاسقة فيها ... الرعدة شداني ميمكنش على احساس راه لا يقااوم ... السيد خطير خطير ومكيتصنعش ماشي بحال واحد الخراي عرفتو كيقول ليا الى ماعجباتكش شي حاجة قوليها نبدلها ... تفووو كنتفكر بحال هادشي كيضرني القلون العصبي اللي فجنبي . لاااا علاقة لزياد مع دوك الكمامر اللي عرفت .. عندهم نفس الفم نفس اليدين ولاكن الفن والاحترافية والتعامل والو مكاينش ومكانتش عارفة هادشي حتى تعرفت على زايد عاد عرفت الفرق بين راجل وراجل . كان طرا ليا واحد البلان مع جوج صخاباتي كانت وحدة فيهم تصاحبات مع واحد وكتجي تعاود لينا عليه وتشكر فيه وتوصفو كتخلينا حالين فمنا ماكرهناش حتى حنا نجربو .. كان اول واحد تصاحب معاه وكان كيشرشمها ويدفع عليها كبير وهي كايبان ليها غير هوا وكضل توصفو حتى تزعطنا فيه وناضت صاحبتي الثانية طيراتو ليها غير بهاد التعاويد اللي كتعاود وتصاحبات معاه على اساس راه مابحالو حد حتى هربات جات كتجري قالت ليا حالتو جووع اش عجبها فيه يعطيها موصيبة ميعرف حتى يهضر مايعرف يشد فيد مايعرف يغمز مافيهش حس الرجولة والفحولة والحروشية عاد فهمت وعقت عمرني نتيق شي وحدة تجي تهضر فتجربتها الاولى مع شي قمقوم .. لا والمصيبة هي كيبان ليها مابحالو حد وهوا غير حمار كيحساب ليه راسو عود . اما زايد قلعتو .. والله تاقلعتو من النهار الاول عرفته عندو وفيدو .. وليت كنشوف الراجل كنطيرو فالسما وكنت كنقول من قبل انا موحال يقنعني شي واحد ولا نقتانع حتى جا اللي قطع فيا الاقناع والاقتناع والقناعة حطها ليا قدام نيفي وراني الشغل على حقه وطريقه والنصيبة الكحلة اجا ما فكو معايا وانا كنت كنقول مانلقاش اللي يقنعني ودابا ماعندي جهد باش نبدا رحلة البحث من جديد وشوف تشوف واش نلقا بحالو ولالا .. الفرصة كتعطا مرة وحدة وانا منقدرش نخليه لوحدة اخرى ونضيع النعمة من بين يدي ولو على جتثي
شعلت التيليفون لقيت البنات كيصوني عليا سولوني فين كنت قلت ليهم مريضة وبقاو عليا خرجي نتلاقو وخرجت مشيت جلست معاهم فكافي وجلسو كيتغامزو عليا وانا كنشوف فيهم فاللخر جيتهم نيشان قلت ليهم مالكم كتغامزو قالو ليا شفناك الصباح فالكافي نتي وزايد وكتقولي لينا مريضة . ماعجبهمش الحال وحتى انا جيتهم مللخر قلت ليهم تصاحبنا انا وياه . حسيت بيهم بحال الى غارو بحال الى تقرسو حيت انا تشد ليا وهما ماتشد ليهم حتى خيال راجل . قالت سكينة
- راه غيدوز بيك الةقت ويمشي عند بنت عشرين عام راه ولاد الحرام هاكا كيديرو كشوفو شي وحدة بنت ثلاتين عام عارفينها محروقة على الزواج كيجيوها من نقطة ضعفها ويلوحوها
ضحكاتني وقلت ليها : اولا غيير سيدي ومولاي اللي يقد على وحدة كبيرة ... انا لبراهش جوج كلمات يطيحوهم وانا مامحروقاش على الزواج .. كندوز الوقت ونعيش حياتي والى ماقدرش عليا غير يمشي عند بنت عشرين عام هي اللي تليق ليه
نينيني السم والحقد ياربي السلامة ... كتحسسني بحال الى صافي تكمششت ودرت ستين عام وانا مزالة فعز شبابي مجبدة وشهوة مني الف واحد يتمناني فين تبان شي ينت العشرينات... بقات فالعشرينات ولا ربعينات ! بقات فالبنة فين كاينة وفين رتاح القلب . السسم .. ولاكن خليتها كتهضر اللي فيها كافيها .. عياو يدورو بيه ماداهاش فيهم وماعجبهمش الحال حيت مغيبقاوش يشوفوني بزااف .. وزايدون هدى فلعشرينات وهزها وطلقها بين ليلة ونهار ماعقلش عليها .. ايوا شكون دابا اللي واعرة بنت ثلاتين ولا بنت العشرين !
خليتهم كينفخو وجلست كنشرب قهوتي حتى طاح الليل ومشيت فحالي للدار تعشيت وتكيت كنفكر فزايد .. نعيط ليه ولا منعيطش ليه .. حشومة خاصني نعيط نسول فيه واش وصل ولا ماوصلش مانديرش راسي مكنفهمش
تاصلت بيه وفتح الخط قالي: كي طرا وجرا عيطتي تسولي فيا ؟
ضحكت وقلت ليه: عيجت نسول كي وصلتي ... وواش وصلتي
رد عليا : وصلت ... اشنو درتي هاد العشية ؟
رديت : خرجت مع البنات درنا كافي وصافي
رد : مزيان ... وشنو غاديري غدا؟..
رديت : ماعرفتش مهم مكاين مايدار ..
سمعت شي واحد كيعيط ليه صوت راجل وقالي: يالاه تا نعيط ليك نسالي شي حاجة ونتاصل بيك
رديت : واخا الله يعاونك
قطع ومن موراها درت فيلم كنتفرج وكنتسنا يعيط .. قالي نسالي نعيط ليك مي ماعيطش .. بقيت كنتسنا حتى شبعت ولقيت راسي فلغد ليه والشمس ساطعة والطناش ضربات وهوا ماتاصلش .. تعصبت وضاع ليا المورال والنهار وهوا ماعيطش ليا كاع .. مشيت جلست فالصالون وحياتي رجع ليها الملل من جديد .
ماحاشاهش ليا وحلفت مانعيط ليه ولا نسول فيه واخا فيا البكية وماقادراش نصبر .. كل ليلة كنطلق اغنية بينا معاد ديال عمر دياب وكنجلس نتسنط ليها حتى كنبدا نبكي غير بوحدي .. مجرد اتصال دار فيا هاد الحالة .. بقيت على ديك المرضة والاكتآب سيمانة وكنتشوط ونقول فراسي واش يكون عارف بشنو كيدوز عليا .. دابا هوا اصلا باش غيعرف ... كوراه كيقول هانيا والسما صافيا ويالاه تعارفنا مغاديش نكون كنتشروط ونتغبن .. باش غيعرفني باش كوراه كيقول مرتاحة ناعسة مكنتسناش يعيط كاع .. او بزاف على هاد التعطال !
بقيت كنتسنا والو وكنحاول نتلف باش ما كان غير باش منبقاش كنفكر فيه . وليت غير ساهية والشهية مسدودة ويديا كياكلوني لالا شاعلة فيهم العافية غير شادة تيليفون وكنشوف فسميتو وباغا نصوني عليه ... فكرت ندير واحد القضية وصونيت عليه بمنمرة مختالفة وماكيجاوبش ... لاكن من بعد نص ساعة صونا وفديك النمرة اللي صونيت ليه بيها وماجاوبتوش وماعارفش اصلا باللي انا اللي مصونيا ليه . الفقصة هي علاش صونا على هاد النمرة ومكلفوش راسو يصوني ليا انا اللي نشرني ربع ايام بلا ميسول فيا ! زادت هاد القضية ازماتني وقلت صافي يمكن قلب عليا وجهه .. هاد الافكار زادو مرضوني ينعل بو شي حب كياكل فيك بحال السرطان ومكيبراش كيتكالما بقرب الحبيب وصافي
بقيت على ديك الحالة كنتقططع ربي اللي عالم بيا .. بنادم تقدر تجسه فشكل يوقع ليا هادشي وانا ماشي بزاف باش عرفتو .. لاكن الحب مكيعرف لا وقت لا مكان وانا نهار الاول عرفت راسي الى دخلت معاه فعلاقة غادي نتشرشم والمشكل ماكنتش نقدر نرفض واخا عارفة غندفع الثمن كبير ولاكن ماكنتش نقدر نرفض العلاقة .. ممكن نتشوط ونبكي ونتقطع ونشرب السم ونموت كاع لاكن عمرو مايحلم يشوفني على حالتي الحقيقية ويشوف شنو كيدوز عليا ولا نبين ليه واخا غير شوية من هادشي واخا نموت وانا كنتعدب .. وحتى واحد مغادي يعرف حقيقة مشاعري من غيري انا وضميري . صبرت صبرت وماعطيتش ليه ومابينتش ليه وكل مرة كنصبر فيها كنودي اكثر .. انا كنشوف راسي خاسرة خاسرة فهاد العلاقة اللي يالاه بدات .. لاكن اللهم نكون خاسرة بنفشي وعزتي ولا خاسرة وبالدل التدلديل .
درت خير فراسي مشيت للحمام غسلت دنوبي وفتحت لون شعري حيت ليغاسين طلعو وتزوقت شوية وقلت غنمشي ندير شوبينغ .. مشيت انا وسكينة المسيمية .. بعد المرات كتكوني عارفة صحباتك حاسدينك وفنفس الوقت كتبقاي مصاحبة معاهم حيت كيولي جزء من حياتك وروتينك واخا يكون هاد الجزء سلبي .
شريت حوايج جداد ديال البرد ودخلت ل بيمكي كنقيس شي جاكيطات ديال لكوير قصار جابهم جداد وخليت تيليفون عند سكينة اللي جالسة كتسناني .. حتى شريت وساليت وخديت تيليفوني من عندها طليت عليه وانا نلقا جوج ديال المكالمات من عند زايد بدون رد .. خفق قلبي وطار مللي عيط ليا وقلت لسكينة علاش ماعيطتيش ليا قالت ليا ماسمعتوش ! باااز كان فيدها ودايرا ليه صونيت بحال صفارة الانذار غير باش مللي يصوني زايد نسمعو . ولاكن من الخير نيت نغضب شوية حتى هوا ماحاشاهش ليا سيمانة هادي وفاش يصوني نوض نجاوبو كنطير !
بقاو ميضحكو وانا مشاركة معاهم الضحك بزز وقلبي كيزدح فاللخر نضت ماقدرتش نزيد نجلس وخرجت مشيت بحالي للدار وطلقت ديك الاغنية كنتسنط ليها ونتغبن بوحدي وكل شوية نطل على نمرتو .. واش نعيط .. مانعيطش .. قلت دابا يعاود يعيط مي والو .. ليون غدا ونهار يجر نهار حتى دازت مدة السفر اللي عطاني وهنا تأزمت حيت غيكون رجع وماسولش فيا ... علاش كيدير هاكا علاش .. علاش هاد التمياك كله واش هاكا كان كيدير مع هدى!! باااز ليها الى كان ميدير معاها بحال هاكا راه التعديب والموت البطيء قلة الاهتمام والاهمال فالحب والعلاقة .. هادا راه سرطان كيعددب ماشي حب .. نمرض بأي مرض ونعالجو ولا هاد العذاب النفسي اللي ماله لا مهدئ ولا دوا من غير النعاس .
الويكاند والكافي ديال الدراري معروفة فين كيجلسو ديما .. عيطت للبنات باش نخرجو وكنت كنتمنى نلقا زايد فالكافي منها نشوفو منها نعرف اشنو كاين من ردة فعله .
خرجنا ومشينا للكافي لاكن من بعد ما عيطات سكينة على ناصر قاليها راهم فالكافي بحال ديما ومشينا .. كنت لابسة كاليتشو كحل فيه كتابة بالابيض صغيرة وفيست ديال الكوير كحلة وطاقية ديال الصوف مستلة ودجين وسبرديلة طالعة على السروال ... هاد الستيل كيجي معايا ومع فورمتي . درت نضاضر مضببين ديال الشتا ومربعين كبار وخليت شعري مطلوق والريحة والصاك ديال برادا ودخلت لقيتهم جالسين فبلاصتهم بحال ديما وزايد معاهم شاد الكارو فيدو وغيرهما بوحدهم كيشربو قهوة .. كان مستل جالس داير طاقية كحلة واللحية كحلة وتريكو كحل ديال الخيط رقيق ودجين ومخزز ولاكن بوكوص وجات معاه ودواق كيسالي معايا راه ميمكنش هاد الاخ قد ما هوا مسرار قد ما حاس براسه وعاز راسه وكيعصبني .
مشينا سلمنا عليهم وجيت نسلم بقا كيدير فيا شي شوفات وقلب عينيه بحال الى مكيعرفنيش .. جلست انا وبقاو كيتجمعو ومن بعد عشرة دقايق على جلوسنا ناض هز سوارتو ونضاضره وبغا يمشي
غير مابغاش يفرطنا وينوض فاش يالاه جلسنا خلانا حتى ولفنا عاد ناض .. مافهمتش مالو وماعجبنيش الحال حيت مافهمتش هاد التغيير .. قبل ميمشي كان معايا مزيان غير مشا تقلب وبحال الى مكيعرفنيش ! واخا يكون مسحور مايبانش فيه السحور بحال هاكا هاد الزمر مالو على هاد النفاخة !! كيشكنني بحال الى دايرة شي حاجة . غير خرج مع الباب وانا نوض تبعتو لبرا وقفتو حدا باب طموبيلتو وعيط ليه دار عندي بواحد البرود وقلت ليه
- على السلامة !! ... ياكما كنت معاك فطنجة ومافخباريش!!
شاف فيا بسخرية وقال: نعام !!
عقدتهم فيه وقلت ليه: شنو كاين مالك ملون ؟
رد الباب وسرح عينيه فجهة اخرى كيتنهد وقال : شنو كاين ؟؟ ... نسولك نتي شنو كاين ؟
مشكيلة شكون غيفك هاد سوء تفاهم . دابا .. غنبداو من الاتصال وحنا جايين حتى نشوفو شكون الغالط من شكون اللي مغالطش.
درت يدي على جنبي وقلت ليه : مالك على هاد الفعايل ياك لباس... واقعة شي حاجة وانا مافخباريش ولا شنو؟
رد ببرودة: شوفي راسك نتي ...
رديت : انا مالي؟؟ الى عندك شي حاجة قولها
رد ببرودة : انا ماعندي والو سيري رجعي كملي قهوتك
بغا يطلع للطموبيل وانا وقفو عصبني وقلت هادي اخر مرة غادي نهضرة والى اقتضا الحال غادي نمشي ندرق زلافتي فمرة من هاد البلاد الى كنت غنتشرشم بحال هاكا .. وقفتو وقلت ليه
- شفتي هادي .. (مسحتها) هاهي .. رتاح دابا يالاه عمرك مغتعاود تشوف هاد الوجه لا هنا ولا فبلاصة اخرى .
مسحتها وخليتو ومشيت منغلي والبكية فعيني حاسة براسي فنطرطق وباغا نغوت باغا نتشتت ولا نموت كاع ونتهنا شداني نعرفو ولا نعرف خليقتو حتى وليت كنعيش هاد اللعنة وهاد المرض كاع
صافي ساليت معاه الموت ولا هاد المرض غنمشي للدار نشرب دوا نعس وفوق ما نفيق نعاود نشري الدوا ونرجع نعس .. ولفو ليه البرهوشات لحيس الكابا يحساب ليه انا منهم غادي نتغبن عليه ونطيح ليه عند رجليه ولا نتبعو كما كانت كدير هدى .. مزال غالط فيا مزال معارفنيش اش كنسوا نشطحو ونشطح عشرة بحالو شكون ما بغاو يكونو واخا ننتاحر من بعده . زدت كنغزل ونتحلف ماعرفتش اشمن اتجاه نشد كنشوف تبان ليا طاكسي نطلع فيها حتى شوية سمعت " شمياااء" تهزيت وتحطيت ولاكن ماضرتش مورايا خليتو كيعيط حتى جا جرني من يدي وقفني وقالي
- دايرة راسك صمكة
جريت يدي وتزنكت .. انا مع بيضاء فبشرتي دغيا كيحمارو ليا حناكي ونيفي تقول قرساتني نحلة فيه وكتبان فيا النفخة بالزربة
عصبني وغوت عليه كما كيغوت ومحمر فيا وقلت ليه: ونتا باش عرفتيني مشيت ولا مامشييييتش ولا شنو اللي وقع اصلااااا ... وسيمانة ماحاشيتيهش ليا حتى داز الويكاند فالويكاند ..
قاطعني: عيطت ليك دو فواا مجاوبتيش شوفي فين كنتي نتي
ردت بعصبية : كنت كنشري الحوايج كنقيسهم ماسمعتوش كان عند سكسنة فيدها حتى هي ماسمعاتوش
بسخرية : اهاااه وفاش لقيتي لابيل ديالي علاش ماعيطتيش ؟؟ ولا ماكنتيش مساليا مكانش عندك الوقت الوقت عندك للقهاوي للتجمعات
ربعت يدي وقلبت وجههي: كن بغيتي تسول فيا ماتجلسش حتى دوز سيمانة عاااد تعيط ليا . انا اللي زايدة ناقصة هنا ... وقلتي ليا قطعي نعيط فين مشيتي ديك الساعة
نفض يديه بملل وقال : شوفي شوفي بلل مانبقلو بلابلابلا .. عاارفة الطبيعة ديال الخدمة ديالي وفاش كيكون عندي تحقيق مكنهزش معايا تيليفون ومكنساليش هي مليون ودزتي من هادشي وشفتييه بعينيك ... وبلا منبقا نشرح ونبرر ليك شنو كنت كندير فطنجة حيت ماشي شغلك فهادشي .. براكة عليك تعرفي حاجة وحدة .. خدمتي مريضة وحساسة الى ماعيطش راني مشغوول وفشي حاجة اهم من نهز تيليفون ونعيط ليك لا نتي ولا غيرك .. خمسطاش ليوم لا نعاس لا نم فالتحقيق مع البزناسة 24 على ربعة وعشرين ساعة ونتي كتشري الشراااوط وتنفخي ... يالاه تتتت.... سيري فين كنتي باغا تمشي
قلب وجهه كينفخ ويسوط خلاني واقفة مشا طلع فالطموبيل وزدح داك الباب تا كان غايطير وحك الروايض تا تكلو مع الارض ومشا معصب
طلعت فطاكسي ونفاجرت بالبكا حتى بقا مول طاكسي كيقول ليا نعلي الشيطان .. وصلت وطلعت للدار مشيت نيشان كنرض حتى مابقيتش قادرة كنحس بمعدتي فوق قلبي وكل خمسة دقايق كنرض حتى صافي مابقيتش قدرت نزيد شي تقيا اخرى ومواكلة والو وغنخسف بالجوع وماحاساش بيه كاع .. مشيت للفرمسيان عطاتني واحد السيرو يحبس ليا التقيا وخديت واحد بيتزا طلعتها عضيت منها عضة هبطات بزز غير باش نشرب السسيرو وجلست طلقت الاغنية وبديت كنبكي حتى نشفت من البكا .. البنات كيعيطو ليا وانا والو ماقادراش نجاوب حتى واحد حتى دقات واحد الجارة مسكينة عليا الله يعمرها دار قالت ليا سمعتك كترضي فمسارنك من الصباح ياكما كليتي شي حاجة ندويك للطبيب .. قلت ليها لا راني مريضة وعندي الاعصاب فالمعدة وراه الصحة على قد الحال غير معدية على راسي .. لقات عيني حومر بالبكا وكانت مرى كبيرة ولاكن غادية مع الوقت وولادها مزوجين تبارك الله .. بقات كتسولني مالي وكنت عل سبة خاصني شي واحد نفضفض ليه وخويت عليها قلبي فقصتها معايا وبدات تواسيني ... جراتني بزز مني عندها للدار كانت مطيبة لغدا ودايرة البيض ديال الحوت مقلي كانت اول مرة ندوقو فحياتي وكان رطب بنين هوا اللي قدر يدوز ليا .. شافتني كناكل صاوبات ليا طبسيل اخر غير باش ناكل ولقيت راحتي عندها فالدار .. فهماتني وحسات بيا وبقات كتهضر معايا حتى فاتني الحال شوية وشربت الدوا وبقيت جالسة معاها مابغيتش نرجع للدار ونجلس بوحدي .. اما تيليفوني زاوطتو ووصاتني منعيطش ليه ولا نحاول حيت غيشدني من يدي اللي كضرني وغادي نتمرمد كتر من هاد التمرميدة اللي انا فيها وغادي يشرشمني وعمرو مايقدر يبغيني ولا يديرني فبالو .. كانت حتى دايا وجايبة فالزمان وعندها غير لعزارا عارفة عقليتهم وكتوصيني وتعاود باش نبقا جامعة راسي وكتحلف وتعطي لقلبها حتى غيعيط ليا غير انا منعيط ما نسول ما ندير حتى حركة وحبدا الى ضربتها بشي غبرة فاعلة تاركة نخليه كيسول فين غبرت وشنو درت وقالت ليا ولابد غادي يفكر فيك مستحيل مايفكرش فيك وميفكرش فشنو طرا .. اما الى عيطت ليه غنطفي الفضول والشك والتنازل مكيجيب حتى نتيجة حيت الحاجة اللي كنتبعوها كتهرب منا والى عيطت ليه غادي نخسرو ونخسر معاه كرامتي وصورتي وغيقلب الاتجاه لجهة اخرى . واخا حلفت مانهضر معاه لاكن تمنيت يعيط ونرجعو ولاكن ماشي على حساب كرامتي ولا بالدل .. وحتى الى رجعت بالدل غنكون رجعت رجعة وهمية اللي غادي تبخر دغيا ونرجع عالة لا قيمة لا نفس ويبقا ينفخ عليا ولا يسوسني فمرة
صبرت واخا الصبر غالي بزاف كنخلص ثمنه من صحتي ونفسيتي لاكن صبرت ومابقات عندي شهية ولا نفس لحتى حاجة ... جلست واحد الليلة كنتفرج فيوتوب وبانت ليا وحدة مشات للمالديف ومكانش عندي فكرة السفر نهائيا ... مافهمتش انا اش قضيت بهاد الفلوس؟ اش درت بيهم اللي مكنصرفهمش على راسي وعلى مستقبلي .. خاصها تكون عندي دابا شي بي ام ولا مرسديس كتنطح ونكون كندور من بلاد لبلاد ونصرف على راسي برزقي .. فكرت فختي اللي صغر مني بعماين ومخطوبة و مكنتفكرها بحتى حاجة وبقات فيا حيت نسيتها ومشات ليا من بالي عيطت ليها قلت ليها نمشيو للمالديف خرات عليا بالضحك وماتيقاتش .. قلت ليها انا نتكلف بالمصاريف وماتاقتش بيا وخليتها حتى شريت تذاكر الطيارة وهضرت معاها ابيل فيديو وريتها ليها تصدمات وقلت ليها نخرجو نشريو حوايج السفر .. فاش قالتها لخطيبها قالت ليه غنسافر انا وختي مابغاش قالها السفر مننوع وفاش سمع المالديف كفر عليها قال ليها داكشي اللي بقا ليك غير المالديف . ماعجبهاش الحال قلل منها وقلت ليها صافي جلسي بلا ماديري المشاكيل لراسك لاكن هي ماتسوقاتش ليه قالت ليا واش هوا غيديني المالديف !! ... نمشي ومولاها ربي . زطمات ليه فكلمتو وخلاتو ولسقاتني بغات تمشي وخرجنا شرينا الحوايج اللي خصنا وقلت ليها فلوس الصالون وحقا كيدخل ليا وهوا مكيدخل تا لعبة ديما خاوي والبنات هاربين ليا وانا تابعاهم بالمعيور . ماما وبابا ماعجبهمش الحال ختي تسافر وماتسمعش كلام خطيبها ونوضناها كاملين فاللخر حطات ليهم ختي الخاتم قالت ليهم هادا اللي يدير ليا هاد الخدمة بناقص منو مابغيت زواج ردو ليه خاتمو . فالاول حرمو علينا السفر ولاكن قنعت ماما قلت ليها غنمشي تركيا نتقدا قنعي بابا وراه المحل خاصو السلعة .. والو مابغاتش فاللخر قلت ليها غنحل حانوت ديال الحوايج ديال تركيا وخاصني نمشي نتقدا السلعة عاد قتانعو .. اربي شحال كيبغيو لكدوب.. مالهم من الاول مايخليونا نديرو اللي بغينا كيمشيو غير بالكدوب .
سافرنا وشدينا الطيارة ما وصلنا حتى دخلات ليا قزيبتي فعضامي . ولاكن دوزنا تسافيرة ديال القلب وركبنا فطيارة بحرية وصلاتنا للجزيرة .. اشمنك يا هوا .. ويا ماكلة ويا صهد .. خليت البرد فالمغري جيت لقيت الصيف . صرفت على راسي حتى ماقديت وتبحرت حتى شبعت شديت لون برونز وااعر ولبست فالالوان حتى شبعت وسيفطت للبنات التصاور باش الى تلاقاو الطبقة يوصلوها ليهم وتوصل لداك السيهم زايد
من المالديف لتركيا دوزت فيها شهر كامل .. كان مزال خاصني نستجمع قوتي وطاقتي وماكنتش مستعدة نرجع للمغرب وانا مزال معزوزة .. فاش حسيت براسي استرجعن شوية ديال الطاقة اللي ضاعن مني رجعت للبلاد ورجعت وحدة ... نفسية مرتاحة نوعما .. قررت نصرف على راسي شوية وكانت شهوتي فطموبيل واعرة .. عطيت لختي طموبيلتي لقديمة و خديت انا مرسيديس جديدة كلاص زادتني ثقة فالنفس اكثر وبدلات ليا المورال .. من بعد قررت نتلاقا مع البنات ونبين ليهم باللي انا شخصية ماشي ضعيفة ونوريهم لجديد .. لاكن فاش جلسنا فالكافي ومن مور ما باركولي الطموبيل قالو ليا باللي زايد طاح مع شي بنت وبداو كيشكروها قدامي .. سميتو نزلات بحال السيف علة قلبي وفيقات عليا الاوجاع والزوينة هي كيهضرو بيناتهم وماسولوني واش تفارقنا ولا علاش ولا كفاش .. بقاو كيشكروها ومرضت اكثر فاش عرفتها طبيبة ماحملتهاش تكون طبيبة ولا احسن مني وجلسو كيشكرو فيها قارية متقفة ومرزنة وزوينة وجات معاه وجاو مع بعضياتهم .. ماسولتهمش بقيت ساكتة خليتهم كيهضرو وكنسمع حتى جاتني التقيا ونضت مشيت لطواليط شادة معدتي عرفت راسي تأثرت وغادي نهلك صحتي عاوتاني
تطعنت ... ماطعنيش انه طايح مع وة اخرى .. اللي طعني هوا انها طبيبة... طبيبيبة كن غير كانت مطنكة مايبقاش فيا الحال .. ولاكن حيت طبيبة وحنا عندنا الطبيب والطبيبة شي حاجة واخا يكون طبيب فاشل ولا مكلخ كيبقا طبيب مهما كان . فاش رجعت جلست معاهم لقيتهم بدلو الموضوع وسولوني كي دوزت السفر بديت نفوح عليهم ، خبر العلاقة ديال زايد مع الطبيبة خلاني نغير ونبدل الوجهة وقلت ليهم غادي نفتح بارا فارماسي كبيرة على الشارع الكبير ... ماعنديش الحق نفتح صيدلية وماعنديش العقل ديال القرايا .. بغيت نطلع النيفو اشمن قهوى ولا بار ... تكون عندك بارا فارماسي ماشي هي كافي حتى النيفو كيتختالف . وماشي اي بارا فارماسي غادي تكون كبيرة ونجيب ليها كاع البرودويات اللي مكاينينش واهم حاجة غنكبرها ونشوفها شي وحدة عندها ديبلوم نفتحها بسميتها وتخدم فيها . تفاجأو وبقاو عليا وااو احسن حاجة ... نبقاو ناخدو من عندك ... للابلابلا زعما انا واقفة على فلوسهم الى ماخداوش من عندي غندير فاييت ! بديت نفرنس معاهم ودوزنا ديك العشية كنعياقو على بعضياتنا ومشيت رجعت بحالي درست المشروع مزياان واخا ماعنديش فكرة .... سولت بزااف ديال الناس اللي عندهم داك المشروع وقلبت على المحل فالشارع اللي باغا واخا لقيت واحد وطالبين فيه خمسة ديال المليون للشهر للكرا . جاني غالي بزااف نعطيها كل شهر لاكن بغيت ندير شي حاجة اللي واعرة وفالشارع لكبير فسونطر فيل وعارفاه غيكلفني بزااف ديال الفلوس مي غادي نزعم والموقع مساعدني والمحل كبير بزاف 63 متر ونقدر ندير فيه الفوق السطوك. شفت المحل وعجبني عطيت فيه تسبيق 3 شهور باش يتصلح .. سديت الصالون وبعت الساروت ديالو وبعت كولشي عاد حسيت بالراحة .. كان زايدني هم ومكيدخل تا زفتة تهنيت منو وبديت نجهز البارافارماسي .. اكثر حاجة كتخلي لانسان يزيد لقدام هي فاش كيلقى معامن يتعاند ويشد الضد . ماكانتش عندي كاع فكرة البارافارماسي حتى عرفت ختنا طبيبة .. وباش نوصل النيفو ديالها ولا احسسن قررت نفتح هاد البروجي . واخا معاجبنيش الخال تبقا نعلق مستقبلي بالناس اللي دايرين بيا واللي كنكره ولاكن فيا شي حاجة مدفعني مكتخلينيش نفكر اكثر .
علقنا الرفوف وخدا ليا المحل الوقت تلاهيت فيه من هادي لهادي حتى ساليناه واصبح جاهز .. قاديت ليه وراقه ودرت فالاوراق شركة باش تعاوني فبزاف ديال الحوايج ... درت كونطابل خاص بيا يتكلف ليا بالاوراق وهادشي كامل عاوني فيه عمي هوا وراني شنو ندير بالحرف وقلت ليهم باللي هزيت كريدي وبقيت نخربق من هنا ومن هنا .. كنبات فعينيهم كابابل ومابحالي حد وطموحة وكيفتاخرو بيا .. وانا فالحقيقة واحد الفاشلة مابحالي حد ومدرمة وكنشد الضد ونشد العكس وكنضحي بزاف وديما دايراه دبحة ولا ربحة .
اخيرا وجد المحل بالزاج والرفوف والاضواء بحال شي فرناسيان كبيرة .. رسلت للشركات ديال البرودويات وبداو حتى هما كيرسلو ليا وخصصت كل كوان لماركة معينة بحال الثلاجات مستفين والضوء لداخل لاكن ماعندهمش البيبان .. وحتى كل مايخص الاطفال والرضع والزيوت الطبيعية وكل شيء و درت بيرو ديالي فالرف الفوقاني ودرت ليه الدروج وخصصت واحد الجناح بازالة الشعر والسوان وكل ما كيخص البشرة حيت هادشي اللي شفت البارات ديرين مؤخرا . وجبت واحد جوجات اللي كانو عندي فالصالون كيخدمو مزيان حطيتهم فداك الجناح وحطيت ربعة يبيعو ويشريو وعمرت البارا بالمساحيق اللي مرخصة ليها تباع وبديت نبحث فهادشي .. فالاول كنت خايفة ومخلوعة ومعارفاش لاكن تصدمت فراسي فاش لقيت راسي كنشد بالزربة ونفهم ونقلب وارتاحيت فهاد الميدان .. انا براسي محتاجة المساحيق وكنبغي شحال من حاجة مكنلقاهاش وقررت نبقا ندخلهم من برا اي حاجة سولوني عليها .
مع دخول الربيع علقنا البلاكة قدها قداش سميتها shama parapharmacie بالاخضر والقهوي وكان المحل من برا عنده جوج بيبان كبار حيت كانو 3 ديال الكراجات مشروكين جا باين من برا والزاج .. كلفني بزاف لا فرحت فاش ساليتو وقررت ندير افتتاح فالمستوى يدير بوم يوصل حتى للسفق ديال ودنين زايد باش يعرف باللي نسيتو ومابقا كيعني ليا حتى حاجة وباللي راني عايشة حياتي ومكملة فيها وماشي انا اللي نطيح عليه ونبكي عليه ونبقا تابعاه .. الى حلوها ليه لخرين غنسدها ليه انا
أنا وبعدي الطوفان الجزء الثاني
محتوى القصة
التنقل بين الأجزاء