شهوة ملاكم الجزء 21

هناء :اماما ديكشي راه قديم نتي حاسبتي دراري على شي حاجة لي وقعات قبل حتى مايتزادو هوما راكي غير كتخربي معرفتك فين غتوصلي بهاد الحقد ديالك ..

راه بزاف هادشي و الله .. شوفي هاد المرة غنوقف مع خويا .. البنت مزيانة خليهوم يعيشو حياتهوم براكة متنكديها عليهوم نساي الماضي و فتحي صفحة جديدة ..راه ولادك كبرو و عياو يبقاو يديروليك فالخاطر

كنزة :انا بغيت ليهوم غير مصلاحتهوم

هناء: مصلاحتهوم راهوم عارفينها.. معتز المراهق لي ضغطتي عليه و خيرتيه بين سخط ورضا و تخلا على ايمان مبقاش ..ولدك كبر و فهم و قادر يختار لي يسلكو و اديب طول عمرو شخصيتو قوية و محاربة .. راه تزوجها و جا يعلمك ماشي حتى يشاورك يعني دابا مكاين لاش تشري العداوة مع ولادك حاولي تكسبيهوم من جديد راه و الله لعقلو عليك ..

تحرك اركان رجع هبط لتحت مور محس بلي فاي لحضة ممكن يخرجو .. تلاقا مع الخدامة طالعة .. علمها بلي عيط ليه المحامي ديال محمد شافعي .. طلبات منو يطلع معاها لفوق مور معلماتو بلي راهم كيساينوه..

غير دخل لقاهوم كيساينو كان واضح على محمد المرض و تعب ..

دخل اركان كيشوف فمحمد مكرهش يخليه يعيش نفس ديكشي لي عاشو يخليه يدوق من نفس الكاس ..

جر كرسي كلس كيشوف فيه التعب واضح عليه

محمد شاف فالمحامي طلب منو يخرج ...

اركان : ممكن نعرف شنو لي خلاك تبغي تشوفني ..

محمد : على ضروري خاص يكون شي سبب ..

اركان : مكنضنش جامعة بيناتنا شي حاجة لي غنهضرو فيها

محمد : عارفك مزيان كتكرهني و من حقك انا و كاره راسي

اركان : مغنكرش مكنبغيكش مي فنفس الوقت مبقيتش حاقد عليك بحال اللول ...

محمد : من حقك بسبابي الام ديالك ماتت انا لي مقدرتش نحميها .. بسبابي وليتي يتيم واخا هاد سنوات كاملة حاولت نوقف جنبك و نكون معاك مقدرتش نعوضك

اركان ( باستهزاء) : قول حاولتي تسكت ضميرك .. حيت غطيتي على اجرام مرتك

محمد : مضنيتش كنزة غتفكر تقتلها

اركان (بحقد بهمس ) :و كون دارتها مكنتوش غتكونو عايشين دابا ..

محمد:درت المستحيل باش نحميها بغيتها من كل قلبي

اركان : عليها فاش عرفتيها حاملة طلبتي منها طيحو

محمد : كانت كنزة عرفات بزواجي منها و كانت حتى هي حاملة باديب .. كنت بغيت غير نرتب الامور .. كنتي نتا صغير و هي حاملة و علاقتنا تكشفات .. الحمل مكانش فوقتو..

اركان : عليها صفتيني لداخلية باش تحيدني من طريق ميبقاش ولد مرتك عائق و دير لي بغيتي فالاخير لويتيلها يديها بيا ..

محمد :كنت خايف عليها كنت باغي نهربها واخا فالاخير قررنا نحتافضو بالبيبي و فاش بغيت نهربها(باسف و ندم ) وقع لي وقع

اركان (ضحك بمرارة) : مرتك مصيفطا لي يقتلها و من زهرها هربات منهوم و ياريت كون ما هرباتش

محمد : كنزة عرفات تلعبها .. استغلات اني كنت مسافر و عرفات بلاصة لي كنت مخبيها فيها كانت كان اني معاها و قررات تقتلنا بجوج ..

قاطعو : من زهرك مكنتيش و كانت الوليدة بحدها ..

محمد : يا ريت كن كنت يا ريت كون قدرت نحميها

اركان :كون كنتي كتبغيها مكنتيش غتخلا عليها.. كنتي غتعطيها قيمة و تعتارف بيها و لا نسيت ( ضحك بمرارة) حيت هي شيخة ماشي من مستواك

محمد : نت عارف مزيان دوار مكانوش غيقبلو

قاطعو : خفتي على بلاصتك .. خفتي يحرموك من الورت مكانوش غيتقبلو زواجك على لالة كنزة بنت الاكابر و باش مبدلها بشيخة معروفة فدوار

محمد :كنت باقي صغير

قاطعو : بسبابك تحرمت من الواليدة بسبابك حياتنا تدمرات

محمد : حاولت نحميها

قاطعو اركان : لي ضرني مخديتيلهاش حقها .. ضمصتي القضية بحال ماشي مرتك هاديك لي تغتاصبات بحالي ماشي هي لي تكرفصو عليها حتى طاح ليها لبيبي ..

شفتي حالتها وصلات لموت واخا هكاك كملتي حياتك عادي .. باش ترضي ضميرك خليتيهوم يتبناوني باش نعيش مزيان .. فاش نفعو الفلوس فاش نفعو الاملاك ها انا خدمت و تعبت ووصلت لكن فالمقابل بسبابك خسرت اغلى حاجة ..

محمد : سمحليا ولدي مقدرتش ندير والو

اركان : عمري كنت ولدك و عمرك حسبتيني بحال ولادك .. لي ضرني انو عرفتي شنو وقع و سكتي

محمد : ربي كان عالم معرفت حتى كان فات الفوت ولو بغيت ناخد حقها حتى حد مكان غيوقف معاي و يتيقني مكانش عندي دليل و لا كنزة و لا عائلتها يدهوم واصلين

اركان: واخا هكاك محاولتيش تقلب و تبحث دغيا نسيتي الموضوع .. كون بصح كنتي تبغيها مغاديش تسكت

محمد : شنو كنتي باغي مني ندير كنزة كانت عرفات بلي خلات ولد و كانت شاكة بلي نتا ولدي و شحال من مرة هدداتني بيك و بغات تبعك لماماك .. كانت دارسا خطواتها و عارفا شكادير.. لي وقع وقع و حتى لو كون تبت بلي كنزة هي سبب فموتها مكنت غنستافد والو بلعكس كانت غتبعد عليا ولادي .. و كان ممكن تاديك .. واخا نت ماشي ولدي لكن ربي لي عالم شحال كنت كنعزك بحالك بحالهوم

اركان : واخا هكاك نت غير قالوليك ماتت جمعتي الموضوع

محمد : راه صفطاتلي الفيديو بعيني شفتهوم كيغتاصبوها بعيني شفتها مليوحة فالارض كلها دمايات راه انا براسي مرضت و تصدمت ماكانش ساهل عليا نشوف المرا لي كنبغي ميتا قدام عيني .. هربت من كلشي وليت مركز غير فالخدمة حتى من الدار قليل فين كنت كنجي .. كل نهار كنحلم بيها .. حتى من قبرها مخليت فين قلبت ملقيتش .. كنزة ضمصات كلشي مقدرتش نوصل لحتى حاجة

اركان : مكاينش و عمرك تلقاه

محمد : قلبي محروق و عمري نسيتها بغيتها من قلبي لدرجة بنيت ليها قبر خاوي بسميتها ..

اركان : لو كان قلبتي و بحثي مزيان كنتي غتكتاشف انو مماتتش

محمد (بصدمة) :كيفاااااااااش مامتتش..

اركان : الوليدة باقا عايشا

محمد مقدرش يهضر صدمة كانت قوية ممتيقش شنو كيسمع كيفاش باقا عايشا كيفاش مماتتش كيفاش هاد الاعوام كاملة و هو عايش فكدبة

محمد( بصعوبة نطق ) : فييينها و كيفاش حتى بقات عايشا

اركان ( تنهد) : كنزة كانت باغا غير تبعدها عليك و توهمك انو ماتت .. مور لي وقع لاحتها فواحد لمصحة بصعوبة باش قدرت نوصل ليها.. تقربت من معتز باش قدرت نكون قريب من عائلتكوم.. قدرت نعرف اليد ليمنية ديال كنزة .. كان شيفور ديالها هو لي كان كياخد من عندها الاوامر.. من خلالو وصلت ليها ...

محمد كيحاول ينوض بلهفة ممتيقش شنو كيسمع: ديني عندها بغيت نشوفها ديني ديني

اركان : مكنضنش فكرة مزيانة .. الوليدة تعرضت لصدمة مكدويش كاع .. مكتجاوبش مع المحيط ديالها

محمد ( دموع تجمعو فعينيه) :غير ديني واخا نشوفها غير من بعيد

دار اركان جا خارج : نتسناك لتحت

---

عند سيف كان كيبوسها بحب حتى حس بدموعها بعد مخلوع عليها

سيف :مالكي علاش كتبكي

كوثر زيرات على يدها بعصبية كتحاول تكتم شهقات ديالها: نت احقر انسان عرفتو فحياتي ..

تنترات منو جات داخلا مخلياه واقف مصدوم معارفش كيفاش يتصرف .. يلاه جا خارج بحالو و هو يسمعها كتعيط ليه

كوثر(ببكاء) : متمشيش (كتشهق ) عافاك

سيف ديك شوية دلعقل لي عندو غطيروليه عاد عايراتو و دابا كتقوليه متمشيش .. كيشوفها كتقرب منو مفهم والو حتى حس بيها ترجمات فحضنو كتبكي و تشهق مزيرة عليه .. كيحس بدموعها فوق كتفو.. تنهد خربقاتو .. عارف عندها مشاكل و اضطرابات نفسية لكن ميزاجيتها و انفصامها مقدرش يفهمو..

بعدات كوثر عليه حاسة براسها عيانا باغا غير تنعس ... مفهماتش كيفاش قدرات تخرج ديك الهضرة من فمها.. عرفات راسها قالت شي حاجة عكس ديكشي لي باغاه..

كوثر(بسيف باش كتنطق) : كنعتدر مقصدش

سيف (بجدية) : لا نتي لي سمحيلي مكانش عليا ندير هكاك على العموم مغتكررش

كوثر ( تغررو الدموع فعينيها) : واش حتى نت غتمشي و تخليني

سيف : تصرفاتك و كلامك لي كيخليو ناس يبعدو منك .. لسانك سليط مكتعرفيش تعاملي .. كاملين عندنا عيوب .. و حتى حد مكامل لكن طريقة باش كنتصرفو مع الناس خاص نراعيو مشاعرهوم

كوثر :انا

قاطعها: شنو نتي كوثر راه بصح كتعجبيني و كنحس من جيهتك شي حاجة و لكن نتي كتترجمي تصرفاتي على اساس كنستغلك و المشكل معندي فاش نستغلك..

بستك حيت حسيت اني باغي نوصليك شحال من حاجة مقادرش نعبر عليها لكن نتي دغيا خرجتي العيب و الاشكال كنبغي نساحب كتزيدي تشبتي كتر .. راه انا حرت معاك

كوثر ( كتبكي ) : معرفتش حاسة بالدنيا كحالت فعيني حتى حاجة ممقادة .. مكرهتش نعس و نفيق لقا راسي كنحلم .. حاسة براسي عيشا فدوامة.. (بدات كتشهق)

سيف : كوثر حالتك صعيبة خليتي الاكتئاب يسيطر عليك .. عارف لي عشتيه ماشي ساهل لكن راه جا الوقت لي تشوفي حياتك لي تعالجي من العقد ديالك ..

كوثر(وقفات بهستيرية) : انا ممريضاش ..ممريضاش .. علاش مصر تخليني مريضة .. انا غير تعصبت .. اه تعصبت و صاف.. (رجعات كتبكي) شفتيه هرب و مشا و عصام اه عصام تزوج و مرتو حاملة .. تا اشراق دات اديب (بهستيرية ) اه و تزوجو نساوني انا مبقيتش فحياتهوم.. مشاو و نت حتى نت غتمشي تقدر تديك ايمان لا ايمان معتز ( شافت فعينيه ) لا تديك طبيبة اه هي ( كتحرك راسها بزربة) حتى نتا غتخليني اه تا عصام باسني و مشا و نتا بستاني اه غتمشي بحالو .. كلكوم غتمشيو انا غنبقا بوحدي .. انا غنموت .. حتى حد مكيبغيني اه غنبقا بوحدي

سيف مصدوم من حالتها.. عمرو تصور ديك البنت لي شاف اول مرة كضحك و كدافع بقوة واقفة جنب صحبتها و بطيبة قلبها.. وحبها لناس و لخير تولي حالتها هكا .. .

بانتليه دخلات فواحد لهستيرية شوية و تادي راسها طار جرها لعندو متبتها ... بدات كتبكي بجهد و تفركل ليه بين يديه.. تخلع بالمعقول بالمعقول.. حتى باش يديها لطبيب حالتها مكتسمحش يخرجها بوحدو.. مغيقدرش يتحكم فطموبيل و فيها .. لكن لي تاكد منو انو كوثر خاصها علاج نفسي فاسرع وقت ..

---

عند اديب راسو غينفاجر .. باغي غير يعرف شواقع مع اشراق .. ممسوق لا لتحقيق و لا لاروى.. عارف راسو غيخرج .. و خوه ميخليه حتى نهار تما .. و عارف راسو مدار والو و عاد ناوي يدير .. غير دخل عندو المحامي ..

وقف كيسولو

اديب : شنو وقع .. شفتي اشراق فينها كيف راها

محامي :تهدن الامور مزيانة .. غيساليو معاها تحقيق و ياخدو اقوالها فقضيتك حيت كانت حاضرا و ديك ساعة تخرج ..

اديب :و ديك zوا مل شنو بلانهوم راه عقلي وقف مفهمتش والو ...

محامي : باها كانت عندو شي وكالة قديمة زورها و

حطو فلوس لعادل باش ضمس القضية و زوجهوم.. الحاجة المزيانة هو انو نتوما زواجكوم كان قبل شي لي بطل زواجهوم ..

اديب ( بعصبية ):اشمن زواجهوم اسي راه مراتي هادي واش على خر يامي نهار فكرت نتزوج زوجولي مرتي و هي على دمة ديالي الحماق هادا

محامي : تهدن باها صدق واحد مخروض كبير المشكل هو كيقول انو اشراق متفاهما معاه .. من زهرنا اشراق ديك الوقت كانت فداخلة و تصاور كيتبتو ديك شي .. طالبت بسجل المكالمات باش نتبتو انو مصوناتليه اشراق بحتى نمرة خرا ..

اديب : دابا الخلاصة شغايوقع

محامي : غيديوزو على يد وكيل الملك .. مدام ديالك مبغاتش ترفع دعوة لكن الحق العام غيتابعهوم بتهمة التزوير و النصب .. حتى من العادل راه اعتاقلوه ..

اديب: بغيت الشماااااااااا يت يغرقو فالحبس بغيتهوم ميطلعوش منو

محامي: مع الاسف فهاد الحالة القانون ديالنا كيحكم مابين عاماين تال 5 سنين و الغرامة المالية زيد عمر صدق مطور .. نسب كلشي لاب ديالها على اساس مكان عارف والو.. و بالنسبة للموافقة زوجة ممزوراش .. اما العادل غيمشي فيها نيت لقليلة 10 سنين تال 20 عام ...

اديب وقف دافع الكرسي لور غادي جاي كيغلي بالاعصاب ..

اديب :موتو غيكون على يدي ...

محامي : تهدن خلينا نفكو حريرتك.. خليت معتز غيتكلف بالشهود و لي كامرة .. مع الاسف غدوز هاد ليلة هنا حتى يسالي تحقيق ..

عند اركان يلاه جا هابط كيسمعو غوات هناء ..

اركان : شنو واقع ...

هناء : خويا اديب و اشراق شدوهوم فالحبس

اركان : كيييييفااااااااش

هناء : حتى انا مفهمتش صونالي عصام قالي اجي باش نعطي الاقوال ديالي .. اروى رفعات دعوة بالاعتداء

اركان :و اشرااااق لاش (عاق براسو ) زعما واش هي لي ضرباتها

هناء : معرفتش مال اشراق.. معااارفاش شنو واقع خاص نعلم ماما و نمشيو ..

طلعات هناء تعلم كنزة .. بقا اركان مكمش عينيه.. فاهم البلان هو بصح باغي ينتقم و يخليهوم يعانيو لكن ماشي لدرجة يخرج ليه على مستقبلو و يشوف واحد كتسلب ليه البرائة ديالو... و هو مضلوم..

تنهد معرف شنو يدير من واحد ناحية كنزة غيتشوا قلبها على ولدها و تعيش الالم نفسي لكن شنو دنب اديب .. حيت ولدها خاصو يعاني .. خاصو يضمرو باش مو تعاقب ..

سها كيفكر حتى تسمع محمد كيهضر و باين مفراسو والو ..

محمد : ولدي يلاه نمشيو

اركان : كنضن بلاش راه

قاطعو : الله يخليك يلاه مبغيت نسمع حتى عتراض

اركان (باغي يقوليه على اديب ):راه ولدك

قاطعو : ا ولدي زيد دغيا يكفي كتر من 25 عام و انا قلبي محروق

تنهد اركان حاس براسو معارف شنو يدير قرار صعيب خاص ياخدو يا يسكت و يحرق قلب كنزة و يكون نتاقم منها يا تبان الحقيقة و هكا غيضيع كاع لي كان كيطمح ليه ..

تحرك هو و محمد قاصدين لكلينك فين كاينا ام اركان ..

---

ففاس و بالضبط فالحي فين ساكنة كريمة .. كانت كالسا كتنقي دجاج هي و شي عيالات من الحومة حتى كتسمع دقان مجهد قفزها..

كريمة (غادة كتمسح يدها ): امالنا على هاد دقان تقول كتسالو لكرا

جميلة : وافتحي ا بنت كرشي تشوفي الفضيحة لي واقعا

كريمة (خلعاتها حلات الباب بزربة ) : شواقع ياك لاباس

جميلة (بفقصة ) : دارها ولد الكلبببببة مقرو فيه حجابات مقرو فيه سحاحر ساعة ربي لقاهاليه

كريمة : اشكون هادا شواقع

جميلة : ياو سيرتنا ولات على كل لسان .. على ماشي راك توجدي لعرس لعدوا

كريمة (عصباتها) : دوي مقاد شواقع..

جميلة : ياو عميمير جاب عليك ضرة

كريمة: شننااااااهو

جميلة:اييه و نزيدك راه فالحبيبيس مشا تزوجها بتزوير .. الحومة كاملة صاقت لخبار.. لي ماشي عتاقلو عبد السلام العدول المخرويض

كريمة : ضربات على صدها : امي شكاتقولي واش

متاكدة و شكون هادي

جميلة : شكون من غيرها لفعة داشراق

كريمة :كييييييييييفااااااااااش اشراق

جميلة : طلعي لبسي جلابتك درت مع ولد حادة غيدينا لكازا نشوفو هاد لحريرة

كريمة ممتيقاش شنو كتسمع يعني ديك التقدية و صداقة كانو على ود زواج.. وقفات جامدة فبلاصة كتمنى ميكونش لي فبالها صحيح .. الى كان تزوج خاصو الموافقة .. وقفات مصدومة كتلاقي الاحداث .. طلع مع لبلان ديال دار ..

جميلة : وا فيقي معاي طلعي تحركي

جميلة : ضحك عليا ا مي عمر المبهلل ضحك عليا

جميلة : ماشي وقت البهلان ديالك زيدي قدامي نمشيو نغرقوه نوريه شنو هي يتزوج عليك بلا خبارك

كريمة :ضحك عليا بيدي سميت على الموافقة و انا معارفاش ..

جميلة :اويلي كيفاااش سنيتي

كريمة : سنيت عليها على اساس وراق دار باش يوليو فسميتي .. بالفرحة مقريتش الوراق علاش سنيت

بديك الفقصة طارت عليها جميلة كضرب و تقرص حتى سمعو الغوات و جاو كيفرقو...

----

عند اشراق غير سلاو معاها تحقيق خرجات لقاتهوم كيساينوها..

عصام: شنو كلشي هو هداك ..

اشراق : اه كلشي مقاد عطيت اقوالي .. سولوني و جاوبت بديكشي لي وقع

عصام : مزيان راهوم كياخدو اقوال مروة .. خاص هضرتنا تكون بحال بحال ..

اشراق : لي وقع قلتو كيف ما هو

عصام : وي احسن حاجة كوني هانيا غيخرج

اشراق(بتعب : حتى زواجنا مفرحناش بيه

ايمان(بغات تخفف عليها ) : نتي بعدا تزوجني و كليتي لحلوة اما انا لا زواج لا حلوة

عصام (ضحكاتو): مبقيتيش تحشمي وا باز

شافت اشراق جيهت معتز و مشات قاصداه لقاتو كيهضر فطيل مع معارفو ..غير شافها قطع ..

معتز : اشراق متخافيش زواجك من عمر باطل كلشي غيتقاد

اشراق ( بتعب ):مكيهمنيش ديكشي بغيت نعرف اديب امتى غيخرج

معتز : اليوم صعيب يخرج .. غنحاولو باش نعطيو كفالة و يخرج فصباح .. مشكل اروى عرفات تغرقو بالمزيان .. و خدمات حتى معارفها مي كوني هانيا الى طول غدا غير علاما ندفعو الادلة ..

اشراق ( تنهدات بتعب ) : ان شاء الله يكون خير

(بتردد ) معتز

معتز : وي شي حاجة

اشراق : بغيت منك واحد طلب كنتمنى مترفضوش.

معتز :وي شنو ياك لاباس

اشراق: بغيت ندوي مع محمد

معتز ( باستغراب ) :اب ديالك

اشراق : تماما .. الا قدرتي تخليهوم يخليوني ندخل

معتز (تنهد):واش متاكدة

هزات ليه راسها ..

معتز :واخا غنحاول.. انا نشوف المحامي و رد عليك ..

رجعات عند ايمان لقات عصام و مروة باقين مجموعين .. شافت مروة باين فيها عيانة ديال بصح

اشراق : مروة كون غير مشيتي رتاحيتي شوفي حالتك كيف وليتي

عصام : عينا فيها مبغاتش

مروة ( بابتسامة) : راني مزيانة الى موقفناش مع بعضياتنا فهاد ضروف علاش حنا عائلة

اشراق ( بابتسامة) : لهلا يخطيك

ايمان : شتك كدوي مع معتز واش وقعات شي حاجة

اشراق : طلبتو باش يخليني ندوي مع محمد

عصام ( باستغراب ) :باك

اشراق: مع الاسف

مروة : واش قادرا دوي معاه .. كنضن كون غير اجلتيها

اشراق : بلعكس هادا احسن وقت .. اصلا تعطلت باش نقوليه هاد الهضرة ..

ايمان : يا صحبتي غير غتفقصي راسك

قاطعهوم معتز : اشراق اجي

مشات عندو اشراق... حاسة بالطاقة ديالها مشات .. باغا غير ترتاح مطلباش كتر .. حتى كتقول ضحكات ليها دنيا و غتعيش بعيد على مشاكل .. حتى كيتولدو من جديد .. هادي هي دنيا حتى حد مكامل و كل واحد عالم بيه غير ربي ... شحال من واحد كنقولو سعداتو عايش الحياة و ديما ناشط و هو ربي لي عالم بيه ..

وصلات عندو لقاتو واقف مع المحامي ..

معتز : عندك 10 دقايق

تحركات اشراق داخلة حاسة بلحمه كلها مبورشة ..

اصعب حاجة تشوف باك لي ولدك... الاب ديالك فالحبس و شنو السبب بغا يغرقك .. بيدو بغا يدمرك و دار المستحيل باش يشوفك كتعاني ..

اشراق غادا كتلوح رجلها و القلب ديالها كيضرب .. حاسة بشعور فشكل ... واحد القوة و الشجاعة حاسة بيها.. يمكن حيت اشراق ديال اليوم ماشي هي اشراق بنت 18 عام ... هبطات معا البوليسي و المحامي فواحد دروج موقفو حتى وصلو حدى قاعة تحقيق ..

غير تحل الباب عينيها تغرغرو.. مكرهاتش يكون هادشي غير حلم و ميكونش باها تما .. مكرهاتش كون قدرات تلاح فعنقو و يعوضو على كلشي .. مقدراتش تقوليه شحال تمنات علاقتهوم تكون كاي بنت و اب ديالها .. يكون سند و الدرع الحامي ..

زادت دخلات ...غير تسد الباب تلاقاو العينين .. نضرات حنين مقابل مع نضرات السخط و العصبية

محمد : المسخوطة جيتي

اشراق (كتحاول تقوي راسها و مضعافش) : هاني جيت ..

محمد : شفتي فعايلك لاياش وصلونا على اخر يامي نتجرجر فالحباسات .. الله ينعل نهار لي تولدي فيه .. مسخوطة و غتبقاي مسخوطة .. وحدة مسخة صلكوطة كنت باغي نصلح العفن لي درتي كنت باغي نرض منك مرا و نص ساعة الوسخ يبقا غير وسخ ..

اشراق : عشت الويل تضربت و تهانيت و بالعافية تحرقت .. عشت لمرار و كرامتي تهانت ... وليت بحال الخدامة .. كاع قرايتي مشات فالخاوي ... كانو هوما لي كيفهمو.. هوما لي كيعرفو.. شحال من مرة سبوني و عارفني.. صبرت و هضرتك نفدت .. عام كامل و انا كنقول اليوم غيتبدو اليوم ربي غيفرج عليا ... تقهرت شحال من مرة شكيت عليكوم شحال من مرة طلبت منكوم ترحموني.. حتى حد مسمعلي و نهار قررت تسنيتك توقف معاي .. تسنيتك تكون قد لقب الاب ...

محمد ( بعصبية) : ماعندناش المرا لي طلق كتولي غير شياطة لشمااااا يت

اشراق : طلاق حللو ربي .. و ها انا اليوم ديت سيدو

محمد ملقا ميقول بقا غير كيتفنفن : اخرتو يسمح فيك .. لي طلقات مرة طلق 10

قاطعاتو (بحدة) : هضرة خاوية .. كيبقا ديكشي مكتاب .. كنشوف راحتي و لو ملقيتش راحتي معاه نساحب .. حيت كتهمني راحتي و كرامتي و الزواج و الطلاق غير مكاتيب..

محمد : هضرة خاوية المرا اخرتها دارها

اشراق ( بتبات) :دارها اه لكن مستقبلها استقلالها قرايتها هو اساس قوتها.. المرا بخدمتها كتكون حرة كتكون قوية.. الراجل كيولي جزء من حياتها ماشي هو كل حياتها ..

محمد : كايبقا الراجل كيستر المرا

اشراق : علاش غيسترها.. مستقلة بداتها مكتعنيش خارجة طريق بلعكس كتعني وحدا حاربات و وصلات

محمد : هضرة ديال بنات زنقة

قاطعاتو : كون كنت بنت زنقة منكملش قرايتي

.. منوصلش تال اطاليا و نتزوج بواحد من عائلة شافعي ..

اشراق (تنهدات) : مجيتش باش ندي و نجيب معاك فالهضرة .. كتبقا الراجل لي ولدني و لو شنو دير و تغلط فيا كتبقا معزتك كبيرة .. هاد المسخة دبنتك غدير ليك المحامي .. نت حاولتي تغرقني انا غنحاول نخرجك واخا صعيب حيت على مفهمت كاع الادلة ضدك .. عماك طمع و الجشع و مفكرتيش انو ممكن طيح فالحفرة لي كتحفر ..

محمد(غير سمع اطاليا و عائلة شافعي بدا كيرطب ) :كنت باغي نشوفك فدارك متبقايش شفاية لي يسوا و لي ميسواش

اشراق : رضيتيني شفاية نهار جيت عندك و رضيتيني نهار ضربتيني و سبيتيني حدى باب المحكمة .. نهار قتليك بابا انا كنتعدب و خسرتي عليا كلمة انا بنتي ماتت و دفنتها..

محمد(بتمتيل) :كنت باغي ليك غير الخير واش كاين شي اب يبغي يشوف ولادو معدب

اشراق (ضحكات بمرارة) : بصراحة خاصني نشكر حيت كون كنتي نعم الاب مكنتش غنوصل لهادشي مكنتش غنكون بحال هكا كنت غنبقا ديك اشراق المدلولة

محمد : نهار ديري ولادك غتفهميني

اشراق(ضحكات باستهزاء) : كون مكنتش كنعرفك غنتيق هاد ضرافات لي ولات فيك... راني حافضاك اسي محمد .. بلا منكترو فالهضرة ( تنهدات) غنوقف معاك و نحاول نخرجك منهنا لكن عندي شرط ..

محمد علا فيها حاجبو .. كيشوف البنت لي كانت متقدرش تهضر ها هي اليوم كتحاسبو و تشرط عليه .. مينكرش استغرب فقوتها و شجاعتها.. تبدلات و بصح زمان بدلها ...

شافتو اشراق ساكت و كيشوف فيها و هي تكمل هضرتها : بغيت تخلي ختي تجي تعيش معاي .. مبغيتهاش تبقا معاك

هضرتها جابتليه ضحك .. معرف شنو يقولها واش يقولها راها هربات و تبعاتك و لا يقولها معرفش فينها و لا يقولها البنت صغيرة دارت جنحين و طارت .. بقا كيشوف كيحاول يستغل الموقف .. كيفكر و يعاود قبل ماينطق..

محمد : و شنو مقابل

حلات عينيها مستغربة فيه لهاد درجة صدق كيحماق على الفلوس لهاد درجة مزال زايد فيه

اشراق ( بلا مبالاة) : حريتك

محمد : بلا منضحكو على بعضياتنا دويت مع المحامي يستحيل نخرج بسهولة ..

اشراق :ملي عارفها راه خاص توافق بلا مقابل .. حيت كيف وافقتي كيف لا غنجيب ختي عندي ..

محمد : نتي عارفا انو شحال ما دوزت غنقدر نخرج و نكد عليكوم حياتكوم

اشراق :متكونش تايق فراسك بزاف بناتك صغار لي ربيتي فالقمع ماشي هوما ديال دابا .. متنساش انو مبقات ليك حتى سلطة علينا

جات نايضا : فكر مزيان الحفرة لي حفرتي هانتا طحتي فيها و بلاصة متكون معزز مكرم فدارك غتلاوح فالحباسات

محمد (وقف كيغوت مرضاش ) :كلشي من تحت راسك ا اللفعة منهار تزاديتي ماشفت نهار البيض سيري الله يكحل عيشتك الله يجعلك تعيشي لمرار الله يعطيك لعداب كلكوم بحال بحال كاملين صلكوطات ناس ولدو البنات و انا ولدت لخلا ..

اشراق (كتضاهر بالبرود و الداخل عالم بيه غير الله ) :الله يهديك ...

كلمة زادت شعلات فيه العوافي كون لقا يحرقها حية ..

خرجات مخلياه كيغوت حاس بقلبو غيسكت بالفقصة .. صوتو كيتسمع من بعيد .. طلع ليه الضغط شي لي خلاه يطيح شاد على قلبو حاس بالنفس كتقطع فيه ..

---

عند اشراق غير خرجات طلعات لفوق حاسة براسها مخنوقة.. كتحاول متنزل حتى دمعة عليه ... كيبقا باها.. كايبقا راجل لي حلات عليه عينيها.. صعيب تشوفو محبوس صعيب تواجه معاه و تدوي بحدة معاه .. هاد المواجهة خدات منها بزاف .. استنزفات طاقتها و قوتها .. تنهدات خرجات نيشان لبرا خلات لبنات مخلوعين عليها تبعوها.. كتحاول دخل الهوا لصدرها.. حاسة بالعافية شاعلة فيها .. كتفكر نضراتو لي كانو كلهوم حقد و قسوة كتزيد تخنق ..

شفتها ايمان فديك الحالة عيطات لعصام كان واقف كيدو مع محامي ..

ايمان : عصام جيب معاك شي قرعة ديال الما

مروة(بخوف) : كيف كتحسي شوية

اشراق(كتحاول تبقا صابرة و كتكافح مطيح حتى دمعة) : مزيان الحمدالله .. متخافيش(بابتسامة ) فينو معتز بغيتو..

معتز(كان جاي و سمعها ) : وي اشراق بغيتيني

اشراق: تقدر توكليه محامي نشوفو هاد الحريرة فين غتخرج مبغيتوش يدوز اخر ايامو مع المجرمين و المحابسية ربي يخلصو

معتز : غير تهناي .. راه فاش جا طلب مني اديب ندير ليه محامي كوني هانيا راه غير مبغيناش نبانو فصورة .. غنشوفو ليه شي حل كيف ما كان الحال كيبقا الاب ديالك

اشراق(تنهدات) بقات ساكتا كتشوف كيفاش اديب براسو غارق و فكر لباها .. كيفاش السيد لي اداه و خروض و مخلا مدار ها هو وقف معاه و فكرليه فعز ازمة ديالو .. مندماتش حيت بغاتو و ختارتو الراجل لي تكمل معاه حياتها .. ديما كيفكر ليها و يراعي ليها .. (ابتسمات بحب حتى غرغرو عينيها)

ايمان (معصبة ): صراحة سمحيلي لكن اب بحالو يستاهل هادشي لي يجراليه

نغزاتها مروة باش تسكت حيت كيف ما كان الحال كيبقا باها..

معتز : على العموم بلا منكترو الهضرة .. معندكوم متبقاو ديرو هنا (شاف فعصام ) دي لبنات و سيرو لدار ..

اشراق : معندي فين نمشي بغيت نبقا حتى يخرج اديب

معتز ( بحدة ) : معندكوم مديرو هنا .. اديب غدا عاد نشوفو شنو غيديرو معاه... عصام ديهوم لعندك لدار ..

عصام : اه كون هاني .. (شاف فاشراق ) معندكوم لاش تبقاو ..

حتى حد مقدر يزيد يهضر .. مروة نيت كانت عيانة .. اشراق لعشية كاملة و كرشها عاطيها لحريق .. مكان فيها ميزيد يتعاند

يلاه جاو باش يركبو و هناء و كنزة وصلو ..

كنزة(كتغوت غادا جيهت اشراق ) : من نهار شفناك مشفنا الربح

معتز (بحدة ) :الوليدة هنينا اشراق معندها دخل

هناء :شنو واقع فينو اديب

معتز :اروى تهماتو انو بالاعتداء و الضرب

هناء : كيييفاش ميمكنش .. ياك معندهاش دليل علاش شدوه .. و كيفاش اعتداء شهاد روينة

كنزة : كلشي بسبابها .. كون ما ديك الشيخة كاع ميقج اروى و يضربها باش تشكي بيه

هناء ( بحدة ) :ماما سكتينا

معتز (خنزر فكنزة) : سيدة مطورة راها ناعسة فكلينيك على مفهمت لعباتها صح ... ضرباتو بشهادة طبية فيها 21 يوم عليها عتاقلوه..

هناء :و شنو دابا واش غيبقا تما ..

معتز : دابا هو مدار والو مخلانيش ندوي معاها تنازل قالك فينما بغات توصل توصل و مدام دارت هاكا الا و عندها شي هدف و تقدر تبتازو

كنزة : عطيني فين كاينة انا ندوي معاها

معتز (خنزر فيها) : رجعو الدار حنا قادين بشغلنا يا ويل تمشي شي وحدة فيكوم دوي معاها ..

هناء : كون هاني ا خويا .. غير متعصبش

دار معتز غمز عصام باش يمشيو ..

تحركو ركبو بقات ايمان واقفا طلبات من عصام يتسناها..مشات قاصدا معتز .. غير شافها جايا عندو زاد لعندها مخلي كنزة غتاكلهوم بعينيها

ايمان : معتز

معتز : وي حبيبة

ايمان : تبغي نبقا معاك

معتز (باس راسها) :غير سيري نسالي شي شغال و نعيطليك واخا ..

ايمان : صاف واخا انا نتسناك تعيطلي ..

----

عند سيف بقا مع كوثر كيحاول يهدنها بقات كتبكي حتى سخفات .. استغل الفرصة دوز نيم واحد طبيبة نفسية من معارفو فرباط .. حكالها على نفسية ديال كوثر شي لي خلاها طلب منو يجيبها فاقرب وقت و يرد معاها البال حيت تقدر تحاول تنتاحر ..

بقا ساهي كيشوف فيها كتبان بريئة قاسات و عانات... شخصيتها هشة ممبنياش على صح لي شافها عاشت و عاشرات اشكال و انواع ناس يقول هادي نزقة مبروضا عارفا دنيا و تسلك راسها لكن غير تعاشرها تعرفها شحال هشيشة .. و نفسيتها مضمرة محتاجة لحنان محتاجة لي يعطف عليها و يبغيها و يحن فيها ..

تنهد قرب لحداها تحنا كيدوز يديه على شعرها...

سيف : غندير كلشي على ودك باش تبراي كنواعدك غنعوضك على كلشي ..

----

عند اشراق ...غير وصلو جهاد عليها الحريق .. و لا عاطيها حتى لضهر .. شاداها سخفة و حاسة بالطونسيو طاح ليها ..

ايمان (شافتها مكمشة عينيها) : مالكي واش كضرك شي حاجة

اشراق (بالم ) :كرشي كتقطع باحريق و حتى ضهري.. عرفتي حاسة بودني كيصفرو

ايمان : صبري هاحنا وصلنا لدار نطلعو و ديري شوية ديال زعتر يقدر البرد يكون ضربك ياكما لي غيكل

اشراق : لا لا معرفتش عمري حسيت بهاد الحريق حتى من ليغيكل فاش كانت كتجي مكنتش كنحس بيها ... هادشي حريق مجهد

ايمان شدات فيها دخلو لدار.. وراتهوم مروة بيت لضياف يرتاحو .. مشا طلب ليهوم عصام الماكلة ..

عند اشراق غير دخلات كلسات جهاد عليها لحريق نيت .. كتحس بشي حاجة هابطة معاها .. مقدراتش تبقا كالسا كتحس بحال المواس طالعين معاها.. غير وقفات و هوما يخرجو عينين ايمان ..

ايمان: اشرااااق

دارت عندها اشراق كتلوى بلحريق (بسيف باش هضرات) : نعام

ايمان : دم ..

اشراق(بتضمر) : متقوليهاش ..تفو ملقات امتى تجي شهراين و هي معطلة دابا عاد بالها تهبط

ايمان : واش موالفا كتعطل ليك

اشراق (بالم): اه ديما حتى فاش قبل فاش كنت صغيرة كانت كتعطل .. لكن مكتجينيش بلحريق دابا لحريق نيت

ايمان : راه لي داز ماشي ساهل شربتي البرد نيت و زيد الاعصاب بسيف متعطل و تجيك بلحريق

اشراق : بصح لبرد ديما خلاتها خالتي مينة غير حالا ليه الباب بحال زاوية (تنهدات بحزن ) توحشتها بزاف و الله

ايمان : شنو نقول انا دارنا غير طيل كيعياو فيا نرجع مبغيتش

اشراق: كون ما هدشي لي وقع كنت غادي نمشي نشوفها.. مشكل دوك ناس لي خدمات عندهوم شوية مبعكين.. ديما مكتقدرش تهضر فراحتها..

ايمان : اشراق صراحة انا فكرت فشي حاجة و معرفتش

اشراق (كتحس بلحريق فكرشها ) : غا دوي واخا دابا عقلي غير مع لحريق

ايمان :صبري نشوف مروة تعطيك شي دوى و نجبليك حوايج دوشي و عاد نهضرو

اشراق ( بالم) : سيري سيري و جيبيلي شي حاجة سخونة

ايمان :انا نجيبليك القرفة زوينة ميبقالكش لحريق ...

مشات ايمان جابتلبها دوا و الحوايج من عند مروة ..

بقات كضحك عليها ايمان حيت جاوها مزيرين بحكم اشراق عامرا على مروة ..

اشراق : ضحكي ضحكي نتي لي جات معاك

ايمان : لا راه عندك زهر لي كانت شارية بيجامة دلحوامل بعدا جات معاك

اشراق : وييه موريحة ماشي بحال ديك اللولة مبغات لطلع

ايمان(كطنز عليها) : نهار تحملي خاصك يفصلوليك لحوايج

اشراق : حمدت الله لي جاتني لي غيكل كنت خايفة و بيني و بينك مع هاد المشاكل غنولي نشرب لكينة مزال ماشي وقت دراري .. حتا براسنا باقي مستقرينا

ايمان (بجدية ): مديري والو حتى تشاوريه يحصلها عندك تصدقو فمشاكل..

اشراق (كتشرب القرفة و دوي ) : اديب مغيتقبلش فكرة الكينة غيقولك حنا متزوجين علاش منولدوش و انا باقي ممستعداش

ايمان: ناقشو الموضوع مديريش من راسك

اشراق: يكون خير.. قوليلي شنو الفكرة لي فبالك ..

ايمان : مهم هي قصة طويلة نختاصرهاليك .. قررت نتبنا بنيتا

اشراق (باستغراب) : كيفاش و شنو سبب هاد قرار و معتز موافق

بقات كتعاودليها ايمان قصة جنى من اللول حتى لتالي ..

اشراق : اه عليها كل مرة كنتي كدوي فطيل دابا فهمت

ايمان : وي واحد بنوتا فنة يا اشراق عرفتي تشوفيها تبغيها مبغيتهاش تعدب بغيت نعوضها و تعوضني على لي فات

اشراق (بجدية ) : غنهضر و ميبقاش فيك الحال مي واش كتشوفي راسك مستعدة لهاد المسؤولية .. بالاخص جنى مريضة خاصها رعاية خاصة و علاقتك لمعتز واش مغديش تضرر و نتي متنسايش دابا اكيد غترجعي لخدمتك و حياتك غتبدل مسؤولياتك غيكتارو البنت غتحتاج وقت تحتاج لحنان ماشي الفلوس هوما كلشي ها انا كبرت وسط واليديا و الحنان والو مكاينش

ايمان:فكرت فهادشي كامل معتز قالي يفكر باقي مدويناش مع هادشي لي وقع مصلاحش بالنسبة لجنى فكرت فواحد شخص هو لي يقدر يعاوني و نأمنها عليه

اشراق(باندفاع) : قولي اي واحد الا كوثر حيت هي براسها خاصها تشوف حياتها و متقدرش على مسؤولية

ايمان : اويلي منيتك كوثر متخليش معاها حتى قطة ..ماشي عاد بنتي (تنهدات ) نكملك و عاد ندويو عليها ..

اشراق خنزات فايمان حيت دوات على كوثر بديك طريقة ..

ايمان (تنهدات) :بلا متخنزري فيا مي منكدبش عليك طلعاتلي فراسي مهم نساي نكملك بكترت معاودتيلي على مينة و فاش شفتها زادت دخلات لخاطري فكرت بلاصة متبقا مع دوك ناس تجي تعيش معاي و هكا تكلف غير بجنى تقابلها .. هي اكثر وحدة غنقدر نأمن على جنى عندها

اشراق : ايمان راه صاحبتي هاديك مهم (ضحكات بفرح ) : حلفي حتى بغيتي مينة فكرة واعرة و حتى هي انا متاكدة غتوافق

ايمان : كنتمنى .. عرفتي دويت مع مديرة الميتم كنتسنى غير معتز باش ندفع الطلب

اشراق : كيفاش غادي دفعيه بحدك خليو حتى تزوجو و دفعوه بجوج

ايمان ( باحراج ): بوحدي حسن راكي عارفا مع ضروف و هادشي يعلم الله واش غادي نتزوج و لا لا

اشراق : كيفاش واش مدويتوش فالموضوع

ايمان (غرغرو عينيها) : لا مقالي والو و ملمحليش زعما كيقول خاصنا نتجمعو مي زواج مجبدوش

اشراق ( حاولات تدارك الموقف) : واعادي ميجبدوش ياسمين عاد ماتت و زيد تلهيتو بزواجنا و مشكل لي طرا يعني راه غير تقاد امور اكيد غيدوي معاك

ايمان (تنهدات):معرفتش بصراحة كنت كنتوقع فعرسكوم يطلب يدي و لا غير يعرض عليا زواج .. مقلتش غنتزوجو دابا مي على الاقل متبقاش يدي خاوية

اشراق ( كتحاول تبدل الموضوع ) : شوفي الى بقا فيك الخاتم لي شرا ها هو ديه

ايمان شافت فيها بديك شوفا ديال منيتك .. : حشمت نجاوبك

اشراق : ا ايمان حتى ضروف ممساعداش غير صبري راكي كتشوفي كيجري مع خوه باش يخرجو من الحبس هاحنا تزوجنا و المصائب نزلو بحال شتا

ايمان (ندمات علاش دوات ) :صافي نساي متديش عليا

اشراق : مدي مدي ديك طيل نصوني لكوثر عيقنا كاع عليها ملي جينا مدويت معاها غيكون بقا فيها الحال تقولك غير تقلبت عليها

ايمان ( بعصبية ) : نهضر و لا نسكت

اشراق(خنزرات ): شواقع دوي

ايمان وقفات كدوي مفقوصة : كوثر تبدلات من نهار عصام تزوج و سيدة هزيتي و حدة و حطيتي وحدة لدرجة فلعزا مشات لعند مروة عرفتي خلاتها كترعد كون ما سيف تدخل كون كبر الموضوع و سيدة حاملة و راكي شايفا الوضعية ديالها

اشراق : كيييفاش شنو دارت

بقات ايمان كتعاود ليها لبلان بديطاي

اشراق (معجبهاش لبلان) : ايمتى طرا هادشي و علاش مفراسيش

ايمان : انا عرفت ديك نهار نيت مروة طاح ليها طونسيو شحال و حنا معاها و نتي كانت بغات تقولهاليك مخليتهاش و نزيدك كون غير بقات هنا ..

سيدة على ود عرسك بقيت نعيط و نعاود لقيت طيل طافي و حتى فاش مشيت نجيب لوراق من دار ملقيتهاش و صونيت مشدليش واخا هكاك صفطت ليها تصاور و لي فيديو فتالي مخسراتش حتى كلمة شافتهوم معطيات مسولات ما حتى حاجة ..

اشراق : حتى انا صفطت ليها مجاوباتنيش و صونيت ووالو .. ( بخوف) عنداك تكون واقعا معاها شي حاجة اصحبتي حتا انا غلطت مسولتش فيها تلهيت

ايمان : راه هي خاص تسول واش نتي غارقا حتى لودنيك شغاتسولي و كون غير كانت كتجاوب كنصوني مكاتجاوبش و كنصيفط فواتساب والو منكدبش عليك طلعاتلي فراسي بهاد تصرفات

اشراق (بحدة ): ايمان كوثر بصح غلطات مع مروة مي راه الحب لي عما ليها عينيها .. كلنا كنا عارفين كوثر كتبغيه و متنسايش هو باسها و عطاها امل

ايمان ( بحدة ) : سيد تزوج و عايش حياتو مرتو حاملة علاش تنكدها عليهوم

اشراق (بصوت عالي ): راه هو لي جا لعندها و هو مزوج كيشكي عليها هو عطاها امل

ايمان : اشمن امل سيد كيقولها راني تزوجت راه خاص تجمع راسها باز لي كدافعي عليها هي دابا حتى حنا نعضرو اروى متقوليش عليها كتحاول تخطفليك راجل

اشراق ( بعصبية ) :متقارنيش كوثر ماشي بحال اروى كوثر خوات ليهوم طريق و كتحاول تنساه

ايمان: معندهاش حق دوي مع مروة و تفقصها

اشراق :هي اه غلطات فهادي و اي واحد ممكن يغلط

ايمان ( جنناتها): اشراق باراكا راه نتي بهاد فشوشك خليتيها تمادا مفهمتش كيفاش كدافعي عليها ديك سيدة مريضة بالحقد و الغيرة و السم خاصها تعالج و دليل مبروك مقالتهالك

اشراق(بعصبية) : مدويش عليها بلخايب كتبقا صحبتي معندكش الحق تغلطي فيها.. يقدر عندها ضروف راه مفروض عليك تعلميها قبل مديري و لا تخططي شي حاجة واخا كانت مفاجاة .. فاش عرفتي كان خاصك تقوليهالها دابا بسبابك غتكون تقلقات عليها مكاتجاوبش

دابا غتكون خدات مني موقف.. (ضربات فراسها) كيفاش مرضيتش لبال و تلهيت

ايمان وقفات مصدومة فهضرتها .. واش منيتها كتعاتبها علاش محضراتش كوثر و كدافع عليها ....

ايمان ( دموع تجمعو فعينيها ): مكانتش فراسي.. معتز لي دار كلشي انا حتى لصباح لي غنسافرو عاد عرفت (فلتات ليها شهقة ) مقصدتش نخاصمك مع صاحبتك.. راه حتى انا عزيزة عليا غير شي لي وقع معجبنيش

دارت جات خارجة من البيت مكتشوف والو بدموع لي تجمعو ليها فعينيها.. عصبية اشراق و غواتها عليها و كيفاش جات مع كوثر و لامتها خلاوها تحس براسها مكتسوا والو و انو هي الشخص الخيب لي كيحاول يفرق بين جوج صحابات

اشراق غمضات عينيها بندم عرفات راسها غير خربقات فالهضرة .. ناضت جرات ايمان مخلاتهاش تخرج واقفا ليها فالباب ..

اشراق (تنهدات) : سمحيلي مقصدتش متديش عليا راكي كتشوفي حالتي معصبة غير بوحدي

ايمان ( هبطو دموعها) : انا عارفا كوثر عزيزة عليك و صاحبتك و عندها معزة خاصة مي راه بصح غلطات الى نتي عندك عادي متباركش ليك و تفرح معاك انا ضرني خاطري حيت بصح الى صحابات خاص الى نتي مسولتيش هي تسول .. و دابا هانتي فالمشاكل شكون ساقليك لخبار

اشراق (تنهدات):كوثر فشكل دايرا.. حساسة بزاف و دغيا كتقلق .. راه ماشي ساهل ديكشي لي عاشتو .. منقدرش نحكم عليها غير حيت مجاوباتش تقدر تكون واقعا معاها شي حاجة ..

تخطاتها ايمان مشات قاصدا طيل ديال اشراق هزاتو مداتو ليها..

ايمان : صونيلها دابا نيت

---

عند سيف .. طلب لعشا قادو فوق طبلة عاد مشا كيفيق فيها .. حيت عرفها نعسات مور منتاضم التنفس ديالها ..

سيف : كوثر كوكي فيقي (كيدوز يدو بحنية عليها)

كتحل عينيها كتحس بداتها كلها مدكدكة كلشي كيحرقها اعصابها متشنجين..

سيف : كيف بقيتي

كوثر : الحمدالله ( غرغرو عينيها) شكرا بزاف على كلشي

سيف ( بحنان) : نوضي تاكلي خاص نهضرو انا وياك ..

كوثر (بارتباك) : فاش

سيف : كولي و نهضرو

يلاه جات نايضا سمعات طيل كيصوني ... تحركات قصداتو غير طلعات ليها اشراق ضحكات بمرارة .. بقا واقف كيشوف فيها سيف ..

كوثر ( ببرود) :عاد طفات عليها شمعة ..

سيف(باستغراب) : شكون واش اشراق

كوثر : هي

سيف : جاوبيها انا نجيب العصير نسيتو و نتي دوي معاها ..

كوثر: معندي منقول لها فات وقت الهضرة

سيف : دوي باش ترتاحي و نيت ديكشي لي ضارك قوليه متبقايش مخبيا فقلبك ..

كوثر : معرفتش و الله

اشراق :كوثر لاباس عليك فين راكي كنعيطوليك مكتجاوبيش

كوثر (ضحكات بمرارة) : عاد تفكرتيني .. صباح الخير .. دابا عاد طفات عليك شمعة

اشراق : علاش كتقولي هكا راه عيطتليك شحال من مرة مجاوبتيش

كوثر : لاش معيطا باش تقولي راكي تزوجتي بلي زعما مبقيتيش ديال راسك ايوا مبروك عليك هانتي وليتي من عائلة شافعي

اشراق ( مصدومة من هضرتها) : كوثر لاش كدوي بحال هكا

كوثر ( انفجارات عليها) :شنو باغاني نقوليك شنو تزوجتي معلمتي محسبتيني باراكا عليك غير ايمان و مروة .. فتالي خاسرين عليا دي فيديو و تصاور زيديهوم فراسك دابا عاد تفكرتيني مقلتيش ديك كلبة دكوتر نسول فيها

اشراق ( دموع كيهبطو) : كوثر راه كانت مفاجاة عارفا راسي تشغلت عليك مي راه عندي ضروف كون تعرفي شنو واقع معاي تعضريني

قاطعتها كوثر : مكيهمنيش من اليوم غنولي نتعامل كيف كتعاملي .. اصلا نتي لقيتي البديل مبقيناش قد المقام ..

اشراق : ا كوثر يهديك الله خليني

قاطعتها كوثر :نخليك دابا لقيتيني مشغولة

قطعات مخليا اشراق مصدومة فيها ...

---

عند غسان كان فدار بضبط فالبيرو كيخدم حتى سمع دقان .. غير عطا الادن تحل الباب دخلات سارة

سارة : غسان واحد دقيقة

غسان ( بابتسامة) : دقيقة كيف والو نعطيك 10

سارة ( بابتسامة ): بغيت ندوي معاك

غسان : على اشراق ياك

سارة : اه (بحزن) طولات

غسان : دغيا سخيتي بينا ياك

سارة : لا و الله مهكاك راه غير توحشتها متشوقة نتلاقاها

غسان: راه عاد علموني بلي وصلات لكازا دونك غدا ان شاء الله نعيطل ليها .. كوني هانيا

سارة ( متحمسة) : غدا ياك غدا

غسان ( بابتسامة ) : غدا ان شاء الله

سارة (بفرحة بحال شي بنوتة صغيوة):متشوقة بزاف و الله ..

غسان: بالمناسبة اشراق تزوجات

سارة( باستغراب ): كيفاش واش بصح امتى

غسان : البارح هي قصة طويلة لي عارف انو كانو كيبغيو بعضياتهوم و حنا جمعناهوم

سارة : كيفاش نتوما

غسان : انا و خوه درنا ليهوم مفاجاة و زوجناهوم

حنات راسها بحزن : مكرهتش كون كنت حاضرا

غسان : كانت مفاجاة و اكيد مزال غيحتافلو و نحضرو نيت تكون عاوداتليك قصة حبهوم

سارة : متخيلش شحال متشوقة لقاء د غدا

قاطعهوم دخول غفران ..

غفران : نتوما هنا مجمعين و مخلييني بوحدي

سارة ( باحراج) : لا راه غير سولتو على ختي

غسان (كيضحك) :شفتي قاطعتينا ا لالة غفران كنا كنتفاهمو على صداق و زواج و ضيعتي لينا كلشي

سارة(خرجات فيه عينيها) : غسان

غفران : و الله يعطيك العقل اولدي هادشي لي غنقوليك

غسان : سارة سيري لبسي نخرجك تفوجي ملي جيتي و نتي غير دار تجي ختك تقولينا متهليناش فيك

سارة (بارتباك):دابا مشا الحال لا

غفران : سيري سيري راه معاك غسان معندك مناش تخافي

سارة : متمشيش معانا

غفران : شنو غندير وسطكم انا راه شرفت و عيت غا سيرو بصحة ..

سارة :معرفتش

غسان :وادغيا قبل ميسد كلشي نبقاو بلا عشا ..

خرجات سارة طلعات تبدل حوايجها ..

غفران (بحب ) : الله يسرليك و يفرحك اولدي ..

---

عند اروى كتصوني و تعاود لاركان مبغاش يجاوبها ملي وصلها ميساج ديالو و هي كتقفقف معرفات مدير .. كل شوية كتصوني و تعاود عارفاه الى قال شي حاجة غيديرها ..

عند اركان غير خرج مع محمد موقف غير حدا كلينيك .. مع دخلة تلاقا الطبيب المكلف بحالة ماماه سول عليها و على الحالة ديالها ساعة مكاينش تغيير .. طلب منو باش يسمح ليهوم يشوفوها ..

مشات معاهوم لممرضة خاصة وصلاتهوم.. غير تحل الباب .. تحلو عينين محمد معاهوم.. كيشوفها عاطيا بضهر حاس بقلبو كيضرب رجليه كيرجفو ممتيقش عينيه .. المرا الوحيدة لي بغا من قلبو و ختارها ها هي اليوم عايشا و كيشوفها قدامو .. زاد كيلوح رجليه حاس بطريق طوالي غير وقف حداها علات راسها فيه مجرد مشافتو خرجو عينيها و دموع هبطو ..

محمد ( دموع فعينو) : كلثوم

بلا شعور شهقات كتبكي كلها كترعد ..

اركان كان واقف فالباب مقادرش يتيق عينيه اول مرة الام ديالو كدير شي رد فعل او كتبكي .. ديما كان كيحاول يهضر معاها حتى فاش شافتو اول مرة مكانش شي رد فعل كاع .. لدرجة كيعيا يحاول مكتستاجبش..

دار قشع ممرضة دايزا طلب منها تعيط لطبيب ..

محمد مقدرش يبقا بلاصتو .. جرها حضنها عندو شي لي خلاها تبكي و تشهق لدرجة خلعات اركان..

محمد (كيبوسها فراسها حاضنها عندو ) : سمحيلي سمحيلي كان كيصحابلي متي سمحيلي مقدرتش نحميك و نحمي ولدنا سمحيلي حيت مكنتش فالوقت لي حتاجيتيني فيه

كلثوم لارد فقط كتبكي ..

دخل طبيب .. غير شافها كاتبكي جر اركان مخرجو

اركان : شواقع

طبيب : خليهوم بجوج احسن حاجة وقعات تقدر تقول انو دابا كاين تحسن غير مجرد بكات و دارت رد فعل راه مزيان بتساؤل شكون هادا

اركان: الحمدالله غير لي دارت رد فعل ( تنهد ) راجلها هداك

طبيب : اه لي كنتي عاودتي لي عليه .. احسن حاجة لي خديتي قرار بحال هادا و جبتيه معاك ..

اركان : زعما تقدر تهضر

طبيب : الام ديالك كانت داخلة فصدمة و عندها مشكل نفسي يعني فاي لحضة ممكن ترجع لطبيعتها اكيد مع المتابعة النفسية و الجلسات .. غير هو من الافضل خاص زوج ديالها كل خطرة يدير محاولة يهضر و يتواصل معاها ..

اركان (ضغط على يديه بعصبية ) : واخا ان شاء الله سمحلي غنمشي نشوفهم..

رجع اركان لعندهوم يلاه جا داخل بقاو كيوصلوه لي ابيل من عند اروى .. تجاهلهوم و خسر عليها ميساج واحد ..

---

عند مروة غير دخلات لدار مقدرات دير والو رجليها تنفخو بالوقوف حاسة براسها عيانة باغا غير ترتاح حتى من دوش مقدراتش دخل .... رجع عصام لقاها باقا على حالها..تحنا هزها على غفلة حتى خلعها ..

مروة (بدلع) : غير خليني و الله حتى عيانة

عصام : شووو انا ندوش لبنوتي صغيورة

مروة (كضحك) : دغيا رديتيني بنوتك..

عصام : بنوتي و مرتي و صحبتي و حبيبة ديالي كلشي فيك نتي

مروة (غرغرو عينيها) :توحشتك

عصام :كون تشوفي انا كنت عوال نرتاحو و نرجعو نسافرو بجوج مي هانتي كتشوفي ضروف

مروة : ماشي مشكل كلشي يتعوض ..

حطها فجنب كيحيد ليها حوايجها و كل مرة كيخطف قبلة مرة فمها فمرة عنقها مخلا حتى بلاصة بلاش ..

غير وصل ل دو بيس مقدرش يصبر رجع هزها مخرجها..

مروة ( كضحك): حطيني عصام و الله مقادرا

عصام :شحطها لطرمتها... باغانا نضيعو الما على والو اجي بعدا نديرو علاش ندوشو

مروة : خلي غير لغدا نكون رتاحيت

عصام :و تسخاي بحبيبك يبات معدب

مروة ( بت79بين) : اينا واحد فيهوم (غمزاتو)الى نت نسخا الى هو منسخاش

عصام (ضحكاتو) : بنت لحرام باغاني نولي نغير حتى من كبالتي

مروة (كضحك) :واكلشي على رضاه حشومة الملائكة يباتو يلعنوني

ضحك عصام حتى تسدو عينيه : اللهم قوي إيمانك

مخلاهاش تجاوب خدا شنايفها كيلتاهم فيهوم و يتبنن كأنو شحال مبقا داقهوم.. واخد راحتو كيتسارا بيديه مخلاش شي قنت مقاسوش و لا حافض نقط ضعفها .. كيخليها دوب و تسيح بين يديه .. حتى كتولي تلوى تحتو و طلبو يرحمها و يريحها..

بحكم مروة كانت عيانة مبغاش يفورصي عليها.. غير سالاو هزها مرخية دخلها لدوش كيعاملها بحال شي بنوتا صغيرة خايف عليها.. .

عند كوثر غير قطعات كلسات فالارض كتبكي .. عمرها تخيلات غيجي نهار و علاقتهوم توصل لهاد المنحى عمرها تخيلات انو اشراق غيدخلو ناس جداد لحياتها و تنساها..

اشراق حالتها مكانتش قل من كوثر مصدومة من هضرتها و طريقتها..معطاتهاش حتى فرصة باش تهضر و دافع على راسها .. دغيا حكمات عليها ..

بقات مصدومة كتبكي و هضرت كوثر كتعاود فودنها...

كلشي تجمع عليها زواجها لي مفرحاتش بيه راجلها لي فلحبس و صاحبتها لي خسراتها .. بقات كتبكي خلات ايمان كتفقص فبلاصتها..

ايمان (بعصبية ) :وقفتي دابا على هضرتي واشدي على قلبك ..

اشراق(بدات كتبكي ) :مدرت والو انا معطاتنيش حتى فرصة نشرح ليها .. مخلاتنيش حتى نهضر دغيا حكمات عليا دغيا رضاتني مسوقتش ليها و مبقيتش حاسباها.. كيفاش عطاها خاطرها تشك فالصحبة ديالنا كيفاش قدرات تفكر فيا هكا ..

ايمان :وا الزمر لاش كتبكي راكي مغالطاش واش نتي كتعلمي الغيب راه كون بصح صحبتك مغاديش تقلق..

اشراق : انا خسرتها ا إيمان.. خسرت صاحبتي ..

ايمان (تنهدات) : دابا تصالحو سوء تفاهم و غيتحل

اشراق : مسمعتيش الهضرة لي قاتلي هي كيصحاب ليها بدلتها .. كيصحاب ليها نسيتوني فيها انا عمري نفوتها كتبقا صحبتي و ختي

ايمان : نعلي شيطان راه غير تلقايها معصبة صافي غير تهدني غدا فاش تعرف شنو واقع غتندم على ديك الهضرة ...

نوضي من الارض اجي تكاي رتاحي .. انا غنوجد راسي غيجي عندي معتز مي الى بغيتي نقدر نبقا معاك

اشراق (كتمسح دموعها) : لا غير سيري انا غنعس نرتاح شوية .. حاسة براسي كيضرني ..

احيانا كلمة او تصرف صغير ممكن تجرحنا بلا سبب ... بالاخص الى كانت ديك الكلمة من شخص عزيز عليك شخص لي ختاريتيه من وسط بزاف ديال الناس .. شحال من وحدة فينا عندها صحبتها الشخص الوحيد لي كتيق فيه من بعد واليديها .. كتعتابريها نصفك التاني كتكون مخبأ اسرارك .. شخص لي كتهديه ليك الحياة .. محبتها كتكون خاصة كتشاركو شي حوايج كتيرة .. الوحيدة لي كتقدري دوي معاها بعفوية بلا متخافي تقلق .. لي كتسامحيها قبل مطلب السماحة.. لي ميقدرش يدوز نهار بلا مدويو و الى غير غبرات كتحسي بنقص كبير

علاقة كوثر و اشراق كانت مميزة جمعاتهوم الضروف و خلاتهوم يحطو راس عند راس .. كل وحدة عوضات ديك النقص الحنان لي عندها بلخرى.. لا اشراق كانت تقدر تفوت كوثر و لا كوثر تفوت اشراق .. و حتى فاش قررات اشراق تغير حياتها اول حاجة فكرات فيها هي كوثر ..

هادشي لي خلا زواج اشراق مقدراتش تقبلو كوثر بغض النظر على الاضطراب النفسي لي كتعيشو بسباب ضروف الا انو بالنسبة ليها باش صحبتها تزوج و متحضرش متكونش معاها جاتها قاصحا و لو يكونو جميع الاعدار مغتقبلهوم.. غير مجرد كانو اشخاص خرين مع اشراق و هي لا كانت كافيا تخليها تقهر و تحس بلي صحبتها تبدلات و فضلات اشخاص خرين عليها .. و لو جينا نحكمو لا اشراق غالطة و لا كوثر غالطة كلها كيشوف الموضوع من جيهتو.. .

يتبع...