توجهات لبيتو لقاتو جالس فوق النموسية و جلسات حداه كتشوف فيه الحزن
عشق:(ابتاسمات) دابا أنقدر نجي لبيتك بلا مانهز لهم يشوفنا شيواحد
جسور: تمنيت كون رضاو علينا
عشق: عمرهم ماغادي يتقبلونا بجوج
جسور: دابا سخطو علينا
عشق: أينساو
جسور: من بعد هاد شوهة لي درنا موحال ينساو
عشق نتا عارف طريقي فيها جمر و نتا تمشيتي عليه برغبتك
جسور: عااارف اعشق (ناض) ولكن بغيت الوليدة تسمحلي
عشق: طول ما انا معاك هي ماغاديش تسمحلك نتا عارفها مكتحملنيش
جسور: شنو الحل؟
عشق: الحل هو نصبرو و الامور بوحدها اتقاد
جسور: اشمن امور غادي تقاد؟ راه كولهم كيجمعو حوايجهم باش اخويو لقصر
عشق:على خاطرهم انا ماكنتش باغا نوصلو لهاد لماصل
جسور: (تنهد) اووف رتاحي اتكوني عييتي
خرج و خلاها كتشوف فلباب، خدات جزء صغير من راحتها لكن الجزء الاكبر ماخداتوش، أما فجهة اخرى كان وصل هو وياها لفيلا صغيرة، هبط و شد ليها فيديها و خلاو شيفور يجيب ليهم حوايجهم غير دخل و حيد لفيست ديالو بتعب و هي كتشوف فيه
مانفال: نزار
نزار: همم؟
مانفال: واش صافي ماغانعاودوش نمشيو للقصر
نزار: هنا حياتنا دابا
مانفال: مابغيتكش تبعد على وليديك
نزار: من الافضل نبعدو باش كولشي يرتاح
مانفال: واش غادي ترتاح نتا؟
نزار:(قرب منها عنقها) نتي هي راحتي
مانفال: كنبغييك
نزار: حتى انا (باسها فجبهتها) طلعي لبيت لفوق و رتاحي و كنواعدك بحياة زوينة احبيبتي
...كان كل واحد فبيتو كيجمع حوايجو باش يخرجو من لقصر و عينيهم باقي فيهم دموع و الحزن، مامتيقينش بلي لفرحة لي عاشوها للحظات تحولات لمأسآة ، هبطو لتحت و الخدم مهبطين ليهم ليفاليز ديالهم، حتى شاف نيار ف سارة
نيار: واش شفق نعسات؟
سارة: ماقدرتش ندخل عندها
نيار: انا نشوفها (طلع لعندها و ماوقف حتى وصل لبيتها و دق ماجاوباتوش عاد حل لباب) شفق (دخل عندها كيشوفها ناعسة بكسوة العرس و زاد قرب منها) يالاه ابنتي غادي نخرجو من هاد لقصر (مكتجاوبوش و هو زاد القلق ديالو و قرب منها ) شفق (كيزعزعها و كون ماشي حرك جسمها ماغاديش ليه يدها لي قطعات شرايينها و ختارت الانتحار وسيلة ارحم من هاد العذاب لي عاشت فيه، صدمة و لخوف شعر بيهم و هو كيشوف دمايات و كيحرك فيها باش تفيق) شفق لاااا ابنتي علااااش درتي هاكا علاااش (هزها بسرعة و خرجها من لبيت و كولشي كيشوف فيهم و مصدومين)
سارة: (كتبكي و تغوت) شفق ماااااالها
نيار: مااااغانخليكش تمووتي لاااا
….كانت عشق كتشوف ف شفق و قطرات دمائها اكتاسحو لقصر ماتصدماتش حيت نتاحرات و مادامها كانت باغا ليها لموت من ديما ف ماحزناتش عكس جسور لي لام راسو فهاد لحظة حيت تسبب بألم عمرو ماغايبرا، دخلوها لطوموبيل و مشاو و بقات العائلة فداك لقصر كتسنى خبر عن حالة شفق، و هاكا صبح صباح جديد بلا ماينعسو و بلا مايحسو بالفرحة لي كانو كينتاظروها، فلكلينيك كان واقف نيار مع طبيب و كيهضرو و سارة جالسة فلكرسي و حاطة يديها تحت ذقنها، سالا هضرتو مع طبيب و توجه لعندها جلس حداها
نيار: هي دابا مزيان
سارة:(طيحات دموع من عينيها) كانت اتموت
نيار:(ضمها) ماغاتموتش حنا معاها
سارة: شعور ديالها كنفهمو بزااااف هي ماغاااديش تنسا انيار
نيار: حنا معاها و انوقفو فجنبها ماتفكريش هاكا
سارة: من الأفضل نبعدوها منهنا
نيار: غادي نبعدو (ناض و كيشوف ف شفق من زاج ناعسة و يدها فيها فاصمة و منظرها هادئ )
أما فلقصر كانت جالسة شيماء بوحدها فصالة و كتخمم و تلوم فراسها حيت هي واحد من الاسباب لي آذات بيهم شفق، خاطرها ضراتها و كون كان شي حل ديرو كون دارتو، قرب منها جسور بندم و جلس على ركابيه كيتوسل ليها
عشق: الليعاونك (بعداتلو من طريق و مشا فخطرة و هي متبعالو لعين حتى غبر)
...حلات عينيها على ضو الشمس كتسمع صوت الآلات فوذنها و الممرضة كتهضر معاها ، صباح جديد مكتاب ليها مازال تعيشو فهاد الدنيا لي مخبية ليها بزاف ، ماكانتش كتستوعب شيحاجا حتى خرجات الممرضة و دخلات سارة عندها جلسات حداها و باستها فجبهتها
سارة: عارفة بلي هادشي لي كدوزي منو صعيب و عارفة احساس الخذلان كيف داير حيت فاش كنت قدك حتى انا ختاريت الانتحار باش نهرب من الالم لي كنت كنحس بيه ولكن الحياة راه زوينة و راه كتسناك باش تعيشيها و كلما دزتي من امتحان كتولي قوية كثر من قبل
عشق:(متكية على لحيط) راه ماشي انا لي قلتلها تنتاحر
سارة: مافيا لي يهضر معاك ولا نشوف وجهك
خلود:(هبطات هي و ارتورو من لفوق) خالتي كيبقات شفق
سارة: الله اصاوب
خلود: أنا انرجع لداري
أماني: علاش ابنتي اتمشي؟
خلود: هاكا حسن
ارتورو: احم نوصلك ؟
خلود: اه الى جات على خاطرك
….سلمات عليهم و خرجات و خرج ارتورو معاها ركبو طوموبيل و مشاو، أما سارة مشات جلسات و جلسو معاها كل من شيماء و أماني و هبة و بقات عشق كتشوف فيهم من بعيد حتى فجأة بدا إنطلاق النار لزجاج النوافد و بداو كيغوتو و هبطو للأرض شادين فراسهم و عشق مطرطقة عينيها و غوتات بأعلى صوت،
عشق: تحركوووو للقبو داااااابا
في المغرب …
شمس مضوية و لجو زوين ، داك لقصر لي بطابع روماني ماتبدلش هادي 20 عام رغم انه تحرق الا ان ماليه رجعو رمموه و قادوه، مدة و هو فطوموبيل بعينيه لخوضر كيشوف فقصرهم شفايفو الرقاق جمع بيهم لكارو و شعلو كيكميه و يدو الاخرى كيدوزها على لحيتو السوداء و قارم حجبانو، حنحن بصوتو الخشن و هبط شيفور بسرعة حلو لباب و نزل رما لكارو رغم انه مانترش منو بزاف، ملابس رسمية مطراسية على بنيتو الضخمة و المفتولة ، قاد لكول على عنقو لي فيه وشم تنين و دخل ببطء لقصرهم و كلما كيقرب كيبطء الخطوات و صوت صباطو عاطية نوع من الرعب فهاد الاجواء، إستقبلاتو بابتسامة و عينيها كيبريو بلفرحة لابسة كندورة مغربية و طالقة شعرها
...خلاها و طلع لبيت ختو بلا استئذان دخل لقاها ناعسة فبلاصتها و لبيت نقية مافيها حتى فوضى، مشا حل ريدو باش ادخل نور و جلس فكرسي حاط رجل على رجل و كيشوف فلبيت ، أما هي جات تقلب و هي تحل عينيها لخوضر و ماتجي غير فعينيه كيحسابلها كتحلم و ناضت كتأكد
نيروز: (بلا مايشوف فيها) بونجوغ مادموازيل نجلاء تبغي تفطري لتحت و لا نجيبولك لفطور لبيتك
نجلاء:(لبولة على شوية طلقها و كتبتاسم بزز ) خويا هه جيتي
نيروز:(ناض و حس بيها كمشات ليزار بيديها و كيهضر ببرود) عندك خمسة دقايق باش تهبطي (قبل مايمشي عاود شاف فيها) فين هو داك لبرهوش؟
نجلاء: (كترجف) ما ماشفتوش سيمانة
نيروز: ليوم اتشوفيه (جبد تيليفونو و دار اتصال) بغيت لفلوس اتسحبو من لكونط ديال ربيع اخنوش (قطع و شاف فيها) بقات عندك ثلاثة دقايق (خرج)
...ثلاثة دقايق ماعرفات تمشي دخل لطواليط ولا دوش ولا تلبس حيت عارفة الى فاتت الوقت غادي يكحل معاها سوايع ، هبط هو و شاف ف زمرد واقفة حدا علي كتقادلو لكرافاطا باقي كيشوف فيهم داك لحب المتبادل لبعضياتهم و لي عمرو نقص واخا دازو سنين، ضار علي عندو متبت و مبتاسم و نطق بكل لهفة
علي: ولد قلبي (فتح دراعيه و توجه عندو عنقو عناق رجولي)
نيروز: (مابادلوش العناق) كون سمعك ربيع أيتقلق عاوتاني شهراين فشي قرينة كحلة
علي: ماشي لخاطري ربي حنن قلبي عليك (ابتسامة)
زمرد: بغيتي تقول حنن قلبنا عليه (ضمات علي)
نيروز:(باسلو يدو) الله اطول فعمرك
نجلاء:(هبطات كتعكل و كتلهث بجرا) ماتعطلتش وصلت فلوقت
نيروز: (كيخنزر فيها) مانسيتيش شيحاجا؟
نجلاء:(كتفكر شنو نسات عاد سرات معاها) اااه (هربات باست يد باها و يد مها)
زمرد: كتبوسي يدي غا فاش كيجي نيروز
نجلاء: (كتغبن) كنسى
علي:(ضمها) بعدولي من بنتي
نيروز:(قلب عينيه) لفشوش تاني
...مشا توجه للطبلة و جلس مترأسها و حداه زمرد و علي متقابلين و نجلاء حدا علي و بداو كياكلو فصمت
نيروز:(بصوت منخفض) كيدرتي مع لقراية انجلاء
نجلاء:(هبطات راسها) مزيان اخويا
نيروز: هاد الأيام مابقيتيش كتمشي
نجلاء: راك عارف لقراية فلافاك مانحتاجش نمشي
نيروز: غدا سيري
نجلاء: (بتعب) مااافياااش
زمرد: صافي راه هضر معاك خوك قالك سيري هي سيري
علي: (كيشوف فنيروز) ماقالتش ليك بلي تعرفات على واحد شخص؟
نيروز:(حط لموس و لفورشيط من يدو) شكون هادا ؟
نجلاء:(حشمات) سميتو عمر رايسي كنت كنتسناك تجي باش نعاودلك عليه بغا يجي يتعرف عليكم حتى هو عندو شركة ديال الاستراد و التصدير و ساكن هنا يعني ماغاديش نخوي لبلاد
نيروز: (هز حاجبو و بنرفزة) شحال فعمرو ؟ و فين عرفتيه؟
نجلاء: فعمرو 27 و تلاقيت بيه صدفة فشركة عند بابا
علي: اه راه عاوداتلي كولشي
نيروز: شحال من مرة تلاقيتيه؟
نجلاء: (بلعات ريقها) حتى مرة كنا كنهضرو غير فتيليفون
نيروز: فكريني فسميتو؟
نجلاء: عمر رايسي
نيروز: (ابتاسم) إنا لله وإنا إليه راجعون مات لبارح مقتول الله ارزقك صبر ( مسح فمو وناض لعندها باسها فراسها و هي مصدومة من لخبر و مصدومة كثر حيت كانت فخبارو و ذبانة الى زنزنات كتكون فخبارو )
علي: (متأثر ) مسكين علاش قتلوه
نيروز: عندو اعمال مشبوهة و هاكا كانت نهايتو
زمرد: (بحزن) نجلاء ماديريش فبالك ابنتي
نجلاء:(عينيها مغرغرين بدموع) عادي
نيروز:(رجع باسها فراسها و همسلها حدا وذنها) انا ماشي مكلخ لي تبقاي تخرجي معاه ليبواط و تقوليلي كتهضرو فتيليفون راه من نهار شفتيه فشركة اول مرة راه وصلني لخبار (تهز و خلاها حشمانة اتغرق فحوايجها)
دخل ساخط للقصر بخطوات بطيئة ولكن ملامحو باين فيهم عصبية لابس تيشرط و سروال دجين و عينيه لخوضر رجعو حومر بقلة نعاس و شراب و لكماية، حاط يديه فجيبيو و بقا كيشوف فيهم و موجه هضرتو ل علي
ربيع: شكون بلوكا ليكارط غيشي ديالي؟
زمرد:(ضارت عندو) ربييع ولدي فين كنتي
ربيع: (كيغوت) واااش انا ماشي واحد من هاد العائلة ماعنديش الحق فلفلوس
علي: مافخباريش الى تبلوكاو
ربيع: الى مااااعارفش نتا شكون بلا يعرف
نيروز:(كيقاد ف صدايف كمامو و نطق ببرود) نزل نبرة صوتك
ربيع:(زاد فصوتو) مكنهضرش معاااااك
نيروز:(متوجه لعندو بلا مايشوف فيه ووقف قدامو) ليكارط غيشي ماتبلوكاوش انا لي سحبت ليك لفلوس
ربيع: بأشمن حق
نيروز: سؤال طرحو على نفسك بأشمن حق غادي يبقاو عندك دوك لفلوس
ربيع: (باستفزاز) حيت انا الابن الشرعي
نيروز:(شاف فيه) الابن الشرعي كيديها فقرايتو باش منهنا عام هو لي أيشد شركات باه و يحيد عليه لحمل ،الابن الشرعي ماشي هو لي كيبات فلبيران و مصاحب مع لوسخ
ربيع: ماعندكش لحق
نيروز:(غوت بأعلى صوتو لدرجة ربيع تزعزع و نجلاء زادت فلبكا) الابن الشرعييييي مااااااشي هو لي كيحمل بنت و كيسمح فيها
ربيع: كتغبر حتى كترشق ليك و كترجع كتخربق لينا حياتنا
نيروز: عندك حل واحد يا ترجل يا موت ماعندناش حنا شمايت
ربيع:(تخطاه) الوليييد هضر معاه راه ماشي معقول يحيد ليا لفلوس
علي: تفاهم مع نيروز أنا رميتلو لكورة
نيروز: من ليوم ماكاينش لفلوس كاين لقراية و الدار و ديك ضسارة نساها عليك
ربيع: عائلة آخر الزمان (خطاهم بقلة حيلة و مشا لبيتو)
زمرد: (إبتاسمات) دابا رتاحيت
علي: كيغبر و كيجي يحل المشاكيل فدقيقة
زمرد: هادا هو ولدي هه
نيروز: الوضع استاقر دابا اذن انمشي
زمرد: فيييين (ناضت عندو) اتغبر عاوتاني
نيروز: عندي خدمة
علي: ولدي جلس شوية معانا
زمرد: اه على قبلي ماتخصرش ليا لخاطر
نيروز: (شد فيديها) ماعاشش هادا لي يخصرلك الخاطر لكن كون ماشي مهمة ماغاديش نمشي
علي: فين هاد لخدمة؟
نيروز: أفغانستان
زمرد: الله اوفقك و يحميك
علي: ماطولش لغيبة هاد لمرة راه تشوشت عليك
نيروز: (بالفارسية) در امان خدا (في أمان الله)
...خرج من بعد ماطمن بلي سيطر على وضع و رجع الاستقرار للقصر،حل ليه شيفور لباب طوموبيل و ركب و نطالقو فإتجاه الطائرة...
دخلو للقبو بسرعة نفسهم كيطلع و يهبط و صوت رصاص كيسمعوه على برا، ضارت لعندهم كتشوف فيهم و هي تغوت
عشق: فييين شيماء
أماني: اويلي واش مادخلاتش معانا
عشق: زهر لمكوز هو هادا أنا غادي نخرج نشوفها ياكما ماتت
سارة:(شداتها) تبتي راك حاملة
عشق: من إمتى كتلعبي ضور الجدة الحنونة؟
سارة: عشق راه مكنضحكش
عشق: الى مامشيتش جبتها ايتقلق جسور مني
خرجات من القبو كتسلت باش مايشوفها حد و كتسمع خطوات مغايرة على صحاب دار هاكا تأكدات بلي كاين العدو، من جهة اخرى إطلاق النار حبس….كانت مخبعة مع الحيط و هزات فاز دلورد و غير قرب منها شخص مول الخطوات ضرباتو بالفاز حتى سخف و هزاتلو لفردي و مشات كتسلت و تقلب بعينيها على شيماء ، خرجات للصالة بثبات باغا غير تشوف شكون هادا لي تجرأ و زعم لكن منين شافتو قدامها ماستغرباتش
عشق: تايغر
تايغر: (كيشوف فيها بعصبية ) مبروك
عشق: هاكا كيقولو ناس مبروك؟
تايغر: كديري غير لي فراسك؟ هضرتي مكتاخديهاش بمحمل الجد
عشق: هز كلابك عليا منهنا و خرجت
تايغر: جيت نديك مااااشي باش نرجع منين جيت
عشق: انا دابا مزوجة و ماغادي نخاطر ب حتى 0،01 فالمية بسمعة ديالي (وجهات لفردي قبالتو)
تايغر: اممم رجالي محاوطين لقصر
عشق: ماغاديش تجرأ تقتلني
تايغر ماشي نتي ولكن هي انقتلها (عطا اشارة لأحد رجالو و جاب شيماء كيجرجرها و هي كتبكي)
عشق: طلق منها مادخلهاش بيناتنا
تايغر: كنت ناوي نقتلها و لكن طاحت عليا فكرة حسن
عشق: الى ماطلقتيهاش غادي نتيري فيك
تايغر: جربي ديريها و اتموت فلبلاصة
عشق:(هبطات لفردي) عاهرة خارجالي فعووودي
تايغر: فتاة مطيعة يالاه قدامي
عشق:(رمات لفردي و خرجات معاه شوية كتشوفهم جايبين شيماء) بغيييتيني أنا هي لاش جايبها
تايغر: قلتلك بغيت نلعب لعبة زيدي و تفرجي
فاقت كتكسل و كتشوف فجنبها مالقاتوش، ناضت و شافتو كيلبس حوايجو بزربة و هي تكمش تعابير وجهها
مانفال: نزار مالك
نزار:(كيتفتف) شفق فلكلينيك قالولي نتاحرات
مانفال: اويلي إش كتقول (ناضت لعندو) واش هي بيخير
نزار: ماااعارفش لي انا عارفو بلي انا سباب انااا
مانفال: لا انزار ماتقولش هاكا
نزار: علاه ماشي انا لي ضيعت ليها ليلة عرسها
مانفال:(شداتو من وجهو) لا كون مادرتيش هاكا كانت اتعيش تعيسة طول عمرها
نزار: خصني نمشي نشوفها
مانفال: انمشيو بجوج ولكن قبل يالاه نمشيو للقصر نطمنو عليهم
نزار: واخا لبسي دغيا انا لتحت كنتسناك
….مشا هبط و هي لبسات دغيا و تبعاتو ركبو فطوموبيل و نطالقو اتجاه لقصر، و كلما كيقربو كيتصدمو بالجثث دليكارد و دمايات و زاج مهرس و لبوليس محاوطين لقصر، هبطو دغيا من طوموبيل و دخلو ف ذهول
نزار: الوليدة
سارة: نزااار (عنقاتو كتبكي)
نزار: شنو وقع
نيار: (بتوتر) رجال تايغر هجمو على لقصر و خداو عشق و شيماء
قصي:(كيمشي و يجي) كنصوووني على جسور مكيجاوبش
نزار: انا جيت على حساب شفق حتى كنتصدم بهادشي
نيار: شفق مزيانة
نزار: خصنا نلقاو عشق
نيار: نزار رجع لهنا ماتخليناش فهاد الوضع
نزار: خرجت غير باش مايزيدوش لمشاكيل
سارة: ولدي هانتا كتشوف خواتاتك وحدة فلكلينيك ووحدة مخطوفة و حاملة من لفوق بقا نتا
مانفال: نزار وليديك عندهم الحق خلينا نرجعو و نبقاو فجنبهم
نزار: واخا
وصلو لمكان منعزل كأنهم أيدخلو لوسط الجبل لكن كان نفق طويل و نهايتو كاين باب دخلو لتماك و مغمضين ليهم عينيهم و فوسط داك المكان الخاوي لي كيشبه بحال لكاراج كانو سناسل و قيود كل وحدة خداوها لحيط و كتفوها
شيماء: شنووو كديرو طلقو مني إهئ اهئ
عشق: تايغر باراكا من هاد لعب
تايغر: مازال ماكنلعبو ابب (توجه لعندها و حيد ليها لعصابة من عينيها)
عشق: غادي ندمك
تايغر: مازال اديري شيحاجا كثر من هادي (كيدوز يديه على وجهها) مشيتي تزوجتي بيه و مادتيهاش فهضرتي
عشق:(حيدات وجها من يدو) ماتقيسنيش
تايغر: اممم حيت وليتي مزوجة دابا
عشق: اه حيت مزوجة و حاملة
تايغر: قلتها و انعاودها الى ماكنتش أنا ماغايكونش شيواحد آخر من غيري
….كان جالس مع صخر و كيتعاودو هو وياه نفس لهضرة و سيناريو
صخر: صدمتينا اصاحبي
جسور: راه كنبغيها اصخر شنو بغيتيني ندير
صخر: سبحان الله حتى ليلة عرسك عاد كتاشفتيها
جسور: كون مشات عمرني انسمح لراسي و زيد عليها حاملة مني
صخر: و شفق مسكينة شنو ذنبها
جسور: دابا تلاقا مع لي يستاهلها
صخر: ولكن عمرها اتنسا اش وقع ليها
جسور: حتى واحد ماغادي ينسى
...هز تيليفون ديالو و لقاه ايطرطق بليزابيل من باه و استغرب
جسور: الوليد كان كيعيطلي
صخر: شنو بغا
جسور: ماعرفتش (كان ايعاود يصوني و هو طلعلو ابيل اخرى من رقم مجهول)
جاوب و هو كيسمع موسيقى على شكل تصفار استغرب و مافهم والو حتى حبس مول الصوت و بدا كيدوي
تايغر: شي مرات كنخسرو شيحاجة باش نربحو واحد لحاجا و شي مرات كتكلفنا ديك لحاجة الثمن غالي و هادشي على حساب القيمة ديالها و لكن نتا اجسور ربحتي واحد لحاجا كبيرة بلا ماتقاتل عليها او دفع مقابل ليها
جسور:(بعصبية) تاايغر
تايغر: تبريت منك و تبريت من ديابلا و ماسمعتوش مني و دابا جا لوقت فين تخلصو
جسور: شنوو كتقول
تايغر: مك غادي تموت ليوم قدام عينيك و ديابلا لي اتقتلها
جسور: اش كتخربق
تايغر: خطفتهم بجوج و اللعبة كالآتي الى ماقتلاتش عشق مك غادي نضطر نقتل وحدة فيهم و طبعا هادشي حسب الرغبة ديالك
جسور: قلبك كيغلي حيت تزوجت بيها
تايغر: الى ماكانتش ليا ماغاتكونش لغيري
جسور: تسالا لعبك اتايغر
تايغر: لعبتي عاد بدات (مشا قرب ل عشق ) دوي معاه
عشق: جسووور
جسور:(ضارت بيه دنيا كان كيحسابلو غير بغا يعصبو) عشق نتي مزيااااان
عشق: انا بيخير و مك حتى هي بيخير ولكن هاد *امل ماناويش على لخير
تايغر:(دار هوت باغلوغ) شنو قلتي اجسور نلعبو ولالا
جسور: تاااايغر اقسم بالله و تآذيهم
تايغر: ماشي أنا لي غادي نآذيهم راه نتا
جسور: طلقهم و خلينا نتفاااهمو
تايغر: غادي نتفاهمو هنا فاش تجي و لكن قبل سول ديابلا واش اتقتل مك ولالا
جسور: عشق ماتهوريش
عشق:(بلعات ريقها) انا عارفاه بلي بغا يجيبك لهنا باش اقتلك
جسور: عشق عفاااااك ماتآذيش الوليدة
عشق: مااااغانقيييسهاااش ولكن ماتجيش لهنا راااه كيلعب بينا
تايغر:(بعد ليها تيليفون من حداها) مكنلعبش بيكم أنا كنلعب معاكم (ابتاسم) شنو قلتي اجسور غادي تجي ولا نقتلهم
جسور: غاااادي نجي
تايغر: مزيااان تسنى حتى نعاود نصوني ليك و كنحذرك ماتهورش (قطع عليه و خرج من لكاراج)
تنهدات منين شافتو خرج و كرهات راسها حيت حاسة براسها ضعيفة و ماقادا دير والو راسها ايتفركع بقوة تفكير فولدها و فجسور فهاد الورطة لي راهم فيها، شافت فيها شيماء و هي كتبكي
شيماء: صافي هادشي لي عجبك هاحنا انموت
عشق: كون دخلتي للقبو دغيا كاع مانوصلو لهادشي
شيماء: لووومي راااسك دخلتي ولدي فلعبة موسخة
عشق: اوا خليني نقتلك باش مايجيش لهنا و يقتلو تايغر
شيماء: هو عمرو ماغادي يسمحلك
عشق: و هادا هو السبب الوحيد لي مابغيتش نقتلك على قبلو ولكن ماغاديش نعرض حياة ولدي للخطر
شيماء: فاش اتولديه اتعرفي شنو هي الامومة
عشق: فاش نولدو غادي نعطيه حرية الاختيار يتزوج لي بغا ماشي بحالك كتفرضي قراراتك عليه
شيماء: الام ديما كتبغي الافضل لولدها و أنا عمري تمنيت ليه وحدة بحالك
عشق: راه كيبغيني
شيماء: عارفة
عشق: منين عارفة علاش مازال متشبثة بقسوحية راسك
شيماء: حيييت عااارفاااك مكتبغيييهش و درتيه طريق لإنتقامك
عشق: شكووون قالهالك واش دخلتي لقلبي و شفتيه
شيماء: باراكا اعشق كلنا عارفين بلي مكتحمليش شفق و كتآذيها بأي طريقة
عشق: اه عندك الحق ولكن جسور عزيز عليا
شيماء: ولكن مكتبغيهش و عمرك ماغادي تبغي شيواحد فحياتك من غير راسك
عشق: أنا كنبغي ولدي
شيماء: ياريت مادخليهش فانتقامك و تخليه بعيد من صداع
….سكتات باش تنهي هاد الحديث، هدوء تسلل فالمكان و شمس غربات باش تعلن بداية الليل. بداية اللعنة، بداية سقوط الأقنعة، فغرفتها البيضاء كان واقف فوق راسها كيتمعن فيها و قلبو كيزدح كأنه أول مرة يشوفها قرب منها كيشوف لفاصمة لي ملوية على يدها بأسف، ناض و تحنى عندها طبع قبلة على جبينها و نطق بهمس
شهاب: تهلاي فروحك أنبقا فروسيا على جالك
...تهز و ابتاسم و ضار خرج مخليها ترتاح حيت مواعد نفسو ان ليام مازال اتلاقيهم….
أما جسور كان باقي عند صخر مرتابك و مشوش و فكرة تجيبو و فكرة تديه
صخر: شنو كتسنى اصاحبي خصنا نعلمو لمركز
جسور: لا اصخر ماغاديش نخاطر بيهم
صخر:على الأقل خص باك يعرف
جسور: حتى واحد ماغادي يعرف أنا انمشي
صخر: و الى كانت هادي خطة باش اقتلك؟
جسور: حياتي مكتهمنيش لي كيهمني هو مي و مرتي وولدي
صخر: راه كيلعب بيكم
جسور: و انا جاهز للعبة (جبد تيليفونو لي كان كيصوني بنفس نمرة و جاوب)
تايغر: خرج اتلقا طوموبيل كحلة ركب فيها (قطع)
جسور:(شاف فصخر) هاني مشيت
صخر: انمشي للقصر نقولها ليهم
جسور: اوك تافقنا
… دازت ساعة و دخل لعندهم مرة اخرى بخطوات بطيئة و فيديه لفردي ، كيشوف مرة فعشق مرة فشيماء و هوما بجوج كيشوفو فيه و متوقعين اي حاجا منو، نطق بصوت خشن
تايغر: رجالي مشاو اجيبو جسور
شيماء: بعد من ولديييي عطيه بتيقار
تايغر: كنت انعطيه بتيقار كون قتلاتك ديابلا
شيماء: واحد نهار غادي تشد و ديك ساعة حتى واحد مايرحمك
تايغر: منهنا لديك لوقت و فكريني (جا احد رجالو)
...سيدي راه وصل
تايغر: دخلوه
….دخلوه شادينو و هو غير شاف عشق و شيماء بغا يمشي لعندهم و هوما يشدوه
تايغر: ماشي بهاد سهولة اجسور خصك تختار وحدة فيهم
جسور: بغيتيني انا هاني جيت قتلني ولكن طلقهم
تايغر: انا بغيت ديابلا
جسور: ماتحلمش بيها صااافي تزوجاااات بيا
تايغر: نقدرو نطلقوها منك بكل سهولة
عشق: مااااغاااديش نطلق
تايغر: هادشي على حساب شكون فيكم ايختار
جسور: ماغاديش تقدر تقتل ديابلا نتا كتبغيها
تايغر: موتها حسن من حياتها
شيماء: جسور ختارها راها حاملة بولدك إهئ اهئ
جسور: الولييييدة ماتخافيش غادي تخرجو بجوجكم بيخير
تايغر: لا وحدة فيهم اتموت
جسور: تايغر خلينا نتفاهمو
تايغر: غادي نحسب حد 10 الى ماختاريتيش غادي نقتلهم بجوج
عشق: جسور (كتشوف فيه بيأس عارفة بلي هاد القرار صعيب)
جسور:(غمض عينيه على شوية يبكي و نطق بلغوات) مي مي كنختاااار مي
….تطلقات رصاصة فإتجاه عشق
صوت صرخة من الأعماق تردد صداها فأرجاء لكاراج، كان صوت الم و خيبة و كره و جميع الأحاسيس تجمعو ، عينيها فلحظة تغرغرو بدموع و بدات كترجف و تجمدات بلاصتها بزز باش قدرات ضور راسها لجنب و تشوف رصاصة جات حدا جنبها و ختارقات الحائط، رجعات كتشوف ف جسور لي طاح على ركابيه و كيشوف فيها و شيماء كتشوف فيهم و تبكي، ابتاسم تايغر و قرب من ديابلا
تايغر: هادا هو الراجل لي معولة عليه؟ همم؟ باعك فلمحة بصر نتي وولدو (كيفك ليها يديها و هي طاحت عليه رجليها فشلو عليها و كتشوف فالأرض بصدمة أما هو شدها و ضمها عندو و كيهمس ليها فوذنيها) سيري أديابلا الكادو ديالك غدا يوصلك (باسها فراسها و هي نترات راسها منو و ناضت كتمشى و تعكل و تمشي يمين و شمال، دازت من حداه و هو كيشوف فيها و كينادي عليها بحسرة)
جسور: عشق...عششق
تايغر:(شاف ف عشق حتى خرجات من لكاراج و نطق) مشات عشق و مشات ديابلا و باح مابقا والو
جسور: مااااااغااااادييييش تفلت منهاااا
تايغر: أنا ماشي مسؤول على اختيارك (عطا اشارة ل كارد يفتح لقيود لشيماء) وصل مادام شيماء لقصرها راه عيات بزاف هاد نهار
جسور: شنووو الهدف ديااااالك شنوو
تايغر:(تسنى حتى خرجو شيماء من الكاراج عاد نطق) الهدف هو ديما خصك تختار مك
جسور: و رغم هاااااكا أنا و ديابلا ماغانتفارقوش
تايغر: كان ممكن نقتلها ولكن ثمن حياتها و حياة مك نتا لي اتخلصها
جسور: مااااااغاادي نخلص والو
تايغر: جرب تعارضني و كنواعدك انقتل كل فرد ف عائلة سقراط
جسور: (كيخنزر فيه) شنووو مازال باغي؟
تايغر: ديابلا عمرها ماغاتسمح ليك على هاد نهار اذن حتى نتا فكر فعائلتك
جسور: (ناض من الأرض) مانقدرش نسمح فيييها
تايغر: راك سمحتي فيها و فات لفوت
جسور:(بنبرة مستسلمة) شنو اندير؟
بين الطرقان كتمشي بلا وجهة مازالة فحالة صدمة و غادا ، أسئلة كثيرة فبالها من بينهم واش بصح تزرفات و قدمات حياتها لشخص ماقدرهاش و السؤال الأهم واش كاين شيواحد فهاد الدنيا غادي يحطها فالمرتبة لولة أو لا عمرها اتلقاه، ختار مو و من حقو مابقاش فيها اختيارو قد مابقا فيها الاحساس لي حساتو ، عندها حاجا وحدة كتهتم بيها و لأول مرة يكون عندها شيء ديالها بوحدها و ماغاتشاركو مع حد لي هو جنينها و كان أيضيع منها….فجهة أخرى كانت هي وصلات للقصر و ماوقفاتش من لبكا غير هبطات كملات على رجليها للداخل و كلما كتقرب كتسمع صوت ناس كانو لبوليس معمرين لقصر و هي كتشوفهم و كتزيد فلبكا
شيماء: قصي إهئ اهئ
قصي:(لمحها و جا كيجري عندها) شيماااااء
شيماء: قصي إهئ اهئ (عنقاتو كتشهق)
قصي: نتييييي بيخيييير
شيماء: إهئ اهئ جسور بقا مع تايغر
قصي: و فييينو داابا (جارها بشوية حتى دخلو)
سارة: شيمااااء شنووو وقع فينها عشق
شيماء: ماعرفتش اهئ اهئ
سارة: كيفاااش ماعرفتيش
نيار: راااه تخطفات معاااك
شيماء: طلقها بحالها و ماااعرفتش فين مشات
نزار: علااااش طلقكم شنو ايستافد
صخر: و جسووور وااش بقا معااه مارجعش؟
قصي: بشوية خليييونا نفهمو اش كاااين
شيماء:(كتمسح دموعها بظهر يديها) هو داااار لعبة خااايبة
نيار: شنوو دار
شيماء: جاب جسور و عطاه الاختيار بيني و بين عشق ووحدة فينا اتموت
سارة: هو ختارك بطبيعة الحال ختارك (كتمسح دموعها بيديها) و عشق شنوو وقع ليييها
شيماء: ماقتلهاش ولكن ماعرفتش فينها إهئ اهئ
أماني: خصنا نقلبو عليها
عشق: (دخلات من باب لقصر و شادة فيه منبعد ماوصلاتها طاكسي و نطقات بكلمات متقطعة و وجهها شاحب) مايحتاجش..أنا ...هنا
أرتورو:(هرب لعندها و شدها دغيا) ديابلا
عشق: (كتشوف فيه مطولا و عينيها كيعمرو بدموع) شفتي زواج لي كيتبعو سخط أش كيوقعلو
أرتورو: ششش (بصرامة) ماتنزلييييش دمعة
نيار:(قرب منها شدها) اجي اجي جلسي
عشق:(نترات منو) والله مابقا فيا راسي قد مابقا فيا ولدي لي كنت انخسرووووو (بعدات منهم) نقتل على قبلو نتوما ماعارفينش اش كيعني ليا
شيماء:(ناضت عندها) عشق راه تحط فموقف صعيييب ماتحاسبيهش على شيحاجا فوق طاقتو
عشق: ماكنتش أنحااااسبو (غادا و كترجع بلور) بغيت غير شي مرة نكون أنا هي الشخص المفضل عند شيواااحد (قلباتها ضحك) ههههههههههههه نسيت الشيطان عمرو كان شخص مفضل
نزار: (كيشدها) عشق اجي غير رتااااحي
عشق: عرفتي شنو هي يفرط بولدوووو هاد لولد لي مرضت و تضربت و عانيت باش يبقا ليااااا
سارة: عفاااك ابنتي اجي غير قربي لعندي
عشق:(كتشوف ف الأرض) ماشي ذنبي الى عجباتني شيحاجا و بغيتها تكون ديالي و ماشي ذنبي الى كانت الطريقة الوحيدة باش ناخدها هي نآذيكم (شافت ف أرتورو) قول ليهم شحال من مرة سمحت فحقي عااااااااااود لييييييهم (كتغوت و بدات كتبكي) و دابا لأول مرة بغيت شيحاجا و كيحاسبوني عليها
نيار:(تصدم منين شافها كتبكي و تشهق) بنتي
عشق: أنا ما بنت حد ما خت حد ما مرات حد انا ديااال راسي ديما بووووووحدي
أرتورو: (عنقها) عارف جرحك و لكن تحكمي فراسك ماشي وقتو باش تعريه
عشق: لااااا لبارح شحال و هوما كيهضرووو و مانطقتش مادافعتش و لكن والله العظيم ماتستاهلو حتى تعرفووو شيحااااجا
قصي: شوفي جسور ديالك ماحيدناهلكش اصلا خديتيه بالخاطر و بزز علييينا غير ماديريش هاكا
عشق:(مازال كتبكي ) مايستاهلنيش و انا عارفاه مايستاااااهلش هادشي لي درت (ابتاسمات فوجه شيماء) راه ولدك لي مايستاهلنيش ماشي العكس و دابا توقفو على هضرتي
أرتورو: تهدني
عشق: ( كتمشي و تجي بلاصتها ) أنا بيخير أنا بيييييخير
نيار:(قرب منها و شدها من وجهها) حتى وااااحد فهااااد دنيا بما فيهم أنا مايستاهل تبكي عليييه ولفتك قوية بقاي قوية
عشق: (كتشوف فيه) حييت ولفتيني قوية قلتي هادي ماعندها قلب اجي نحرمها من الحنان و الاهتمام
عشق: حتى أنا انكون أم و هاد لولد لي فكرشييي ماااابغيييتش نخسرووووو حيت هو لي عندي والله حتى نبغيه و نحميه و واخا مكنعرفش شنو هو الحنان غادي نتقاتل و نعطيه ليه (كتنهج)
نيار: اااه نتي أتكوني أفضل أم (كيمسحلها دموعها) ماشي عيب تخافي و ماشي عيب ضعفي
عشق: لعيب هو مانوضش من جديد
نيار: تمااااما.
عشق: (غمضات عينيها و كتحس بدوخة و كتهضر بشوية) أنا معايا ولدي معااايا ولدي
ارتورو:(شدها و هي تسخف فيديه) دياابلاااا
نيار: خودها لبيتها ترتاح راها عيانة (هزها ارتورو و خداها)
سارة: ولكن عمرها كانت هاكا اهئ اهئ
نيار: (جلس فالكرسي) كتقرب من اي حاجا أتآذيها
قصي: نيار أنا غادي نهضر مع جسوور
نيار: و فينو دابا
أماني: (كتشوف برا) و الشمس قربات تشرق
هبة: عمي ليوم شفق غادي تخرج من لكلينيك
نيار:(تنهد و ناض) عارف أنمشي نجيبها
سارة: أنمشي معاك
قصي:(كيصوني ليه تيليفون) الو جسووور فينك ...اوك نتا بيخير؟ اه اه راه كاينين هنا اوك نتا غير اجي باش نهضرو صاف (قطع)
شيماء: فيين هو؟
قصي: دابا يجي
نيار: رتاحو نتوما الله ادير لي فيها لخير (خرج و تبعاتو سارة)
حلات عينيها على ضو نهار يوم جديد فحياتها خصها تنسى لي فات و تبدا من جديد ، دخلات عندها الممرضة كتعلمها بلي ليوم أتخرج و شدات ليها فيديها عاوناتها تلبس حوايجها و عطاتها نصائح تبعهم، دخل عندها كل من نيار و سارة و فوجههم ابتسامة و هي قابلاتهم بالابتسامة ايضا
نيار: بنتي و نور عينيا (عنقها)
شفق: بابا
نيار: دغيا سخيتي بيا ابنتي
شفق: ماشي هاكا عارفة راسي غلطت
سارة: (عنقاتها حتى هي) حنا مانقدروش نسمحو فيك ماتعاوديهاش
شفق: غلطة و ماغاتكررش
نيار: اوا يالاه
شفق:(بارتباك) مابغيتش نرجع للقصر
سارة: باش ترتاحي ابنتي
نيار: و تهضري مع عشق
شفق: علاش؟ علاش انهضر معاها
نيار: أنا مابقيتش حامل هاد الوضع مابغيتكمش تتفرقوو
سارة: باباك عندو الحق و عشق دابا حاملة ماكنتيش غادي ترضاي تزوجي براجل كيبغي ختك و حاملة منو
شفق: أنا ماتقلقتش منها
سارة: اوا يالاه ابنتي نمشيو
….خرجو من لكلينيك و توجهو للقصر ، و فنفس لقصر دخل هو بخطوات بطيئة و ملامحو حزينة و تقابل مع عائلتو كيشوف فيهم و هوما كيشوفو فيه
امرأة تدخن الرجال الجزء 18
محتوى القصة
التنقل بين الأجزاء