امرأة تدخن الرجال الجزء 31 (الفصل السادس)

ساهية كتشوف فالارض و العرق هبط ليها من جبهتها حطات يدها مور عنقها و شافت فالمقدمة مبتاسمة

شفق: من داك لوقت حتى لدابا عمرني شفت شهاب

المقدمة: خان الوعد؟

شفق: و انا بقيت محافظة عليه

المقدمة: 8 سنين مدة طويلة؟

شفق: كنقول مع راسي ياريت بقيت فالجزائر و مارجعتش

المقدمة: لكن علاش؟ كان لابد شيواحد اوقف ختك على حدها

شفق: خسرت قدامها بالرغم من انني ربحت و لكن خسرت

المقدمة: لهاد الدرجة كتحسي بتأنيب الضمير

شفق: لهاد الدرجة ماكرهتش نقول ليها سمحيلي حيت آذيتك

المقدمة: طيبة قلبك ضراتك ؟

شفق: اشمن طيبة و انا تعماو عينيا

المقدمة: متلهفة نعرف شنو ضمانة لي عطات الديابلا لتايغر

شفق: ضمانة ضمراتها هي و هيولا

المقدمة: هيولا ماحماهاش كيما مولف؟

شفق: دار المستحيل على قبلها و باقي كيدير

المقدمة: و هي ؟

شفق: مالقاتش ليه الجهد

المقدمة: علاش رجعتي لحياتهم اشفق؟

شفق: رجعت نبين الحقائق و نشربها من نفس الكاس

المقدمة: كاس القهرة

شفق: نسيت بلي ديابلا عمر شيواحد غلبها؟

المقدمة: و لكن قلتي بلي ربحتي؟

شفق: كنت انربح كون مادارتش لي دارتو؟

المقدمة:( بلهفة) شنو دارت؟

شفق: فعلة عمرها اتنساها عائلة سقراط و عائلة اخنوش و عائلة يزيد (باستهزاء) و علامن كنضحك روسيا كاملها ماغاتنساش شنو دارت عشق و كلنا شاهدين

المقدمة:(ابتاسمات) قوية

شفق: قوتها تحولات لجنون

المقدمة: كلشي فحق الحب مباح

شفق: واخا تنكر لكن نيروز دارت المستحيل باش تكون ليه بوحدو

المقدمة: الحب الصامت

شفق: الحب الجارح

المقدمة: كيفاش؟

شفق: أشياء تطاردٌها وأخرى تٌمسك بتلابيب ذاكرِتها أشياء تٌلقي عليها السلام وأخرى تٌدير لها ظهرَها أشياء تودٌّ لو أنك قتلتها لكنّك كلّما صادفتَها أردتها قتيلة

الفصل السادس: سطوع الحقد الدفين ⚖🪞

...داخلة مع الباب ضامة ولدها عندها و كتسمع لغواتو...كتشوف فيه كيفاش صاعر و زمرد لسانها تعقد و ماقدراتش تهضر و هي تدخل دغيا و نطقات

عشق: نيروز

نيروز:(ضار لعندها و ديك العصبية كتلاشا شوية بشوية...مشا عندها وقف قدامها بخوف) فييين كنتي؟

عشق:(كتحاشا تشوف فيه) قنطت و خرجت

نيروز: وااااش تسووووطيتي فمخك كيحسااابلك برا فيه الامان؟؟؟ و كون وقعاتلك شيحاااجا

عشق: (بنرفزة هاربة منو ) صافي بعد مني (سمعاتو كينادي ليييها و ماداتهاش فيه ...دازت بحال البرق من حدا بسباس و نجلاء خرجو منين سمعو صوتها و تبعوها لبيتها داخلين)

نجلاء: اهئ اهئ عشق سمحيلي عفاك

عشق: نسمح لييييك؟؟؟ عطيتيه ولديييي و شريتيلي المشاااكيييل و كتقووولي نسمح ليييك

نجلاء: ماقصدتش ماكنتش عارفاه تايغر و لعب لي بعقلي اهئ اهئ

عشق: بسبابك رميت راسي للعافية و غير باش ماتحرقيش نتي انسكت و مانقول لنيروز وااالو

بسباس: كيفاش عطاك ولدك اعشق

عشق: مااااشي شغلكم نعووم بحري صااافي خرجو عليا خرجو

...خرجو لبرا و تلاقاو مع نيروز داخل لعندها عاطياه بظهر كتراري ب فراس...قرب منها كيكتم غضبو

نيروز: ماقصدتش نغوت عليك انا مابغيتكش تآذاي

عشق: قنطت تخنقت فداااار تخنقت

نيروز: انسافرو غدا لباريس كيما درنا

عشق: و من بعد شنو؟؟ انرجع و نتحبس فهاد الدااار واش انااا مجرمة باش نتحبس

نيروز:(ضورها عندو) علاااش كتقولي هاكا

عشق: واااش انا مراااتك مرااات نيروز فارس و ماقادرتش تأمن ليا حماية برا داااار علااااش

نيروز:(خسر تعابير وجهو) واخا نأمن عليك الف واحد مكنقدرش نتيييق انااا بووووحدي لي كنحافظ عليييك

عشق: مخنوووقة مخنووقة مابقيتش قادرة نجلس هنا بغيت نخرج بغيت نتسارا على خاطري نشوف الناس و يشوفوني حتى من خدمتي خرجت منها بغيت ندير شيحاجا (كتمشي و تجي بلاصتها)

نيروز:(كيشوف رجفتها و توترها و شدها ) عشق مالك؟؟؟

عشق: مخنوووقة

نيروز:(ضمها ليه منين شاف عينيها تغرغرو ب دموع) مال الحبيبة ديالي لي بغاتها تحضر عندها

عشق: بغيت نبقا نخرج

نيروز: واخا غير ماتبقايش مقلقة (بعدها منو و قرب باغي يبوسها و هي تبعد)

عشق: انا عيااانة و حتى فراس نعس (حطاتو بلاصتو) ايبقا ينعس هنا ماغايرجعش لبيتو

نيروز: رتاحي غدا انمشيو نسافرو

عشق: احم واخا …

...مشات لدريسينغ و خلاتو حطات راسها على الحيط شادة فقلبها كيضرب و كتفكر احداثها مع تايغر و ضمانتها ليه باش اعطيها ولدها

"فلاش باك"

عشق: (كطيح دموع و كتشوف ولدها بين لحيا و لموت و كتفكر كيفاش اتنقذو و تنقذ راسها) نتا باغي تعذبني و تحكم بيا كيما بغيتي ياك و نفذ ليك طلباتك بلا مانعااارضك

تايغر:(قربها ليه) باااغيك نتي

عشق: انعطيك ضمانة

تايغر:(طلق منها) اشمن ضمانة

عشق: نتا باااغي تعذبني ياك باااغي تندمني و تتحكم فيا كيف بغيتي

تايغر: اناااا باااغي ناخدك معااايااا

عشق: الى خديتيني معاك نيروز ايقلب عليا و يرجعني عمرو يتخلا عليا و لكن الى خليتوو يكرهني و مشيت ماغاااديش يقلب علياااا

تايغر: ماغرااانيييش عرضك اديااابلا عارف فاش اتخرجي منهنا اتعاوديلو كولشي

عشق: لا لا (كتشوف ف ولدها مخلوعة)

تايغر:(كيشوف ف فراس) قتلو

عشق: لااااا صبر صبر كاينة واحد لحاجا انضمن بيها راااسي (جلسات على ركابيها كتشوف ف ولدها خايفة) انا لي قتلت محسن و لسقت كولشي ف ختي عافاك ماتعاقبش ولدي على غلطتي مابغيتش دعوة شفق تحقق

تايغر: و باش انتيقك انا؟؟

عشق: الدليل كاين عند خويا نزااااار و هو اغلى ماعندي مانبغيهش يتآذى و يتضر

تايغر:(ابتاسم) كيف داير هاد الدليل؟

عشق:(بعينين مظلمين كتشوف ف بلاصة وحدة) تسجيلات كان محسن كيتحرش بيا فصغري

تايغر: مزياااان دابا هضرتي

عشق: عطيييني ولديييي

تايغر: خوديه

...مشات كتزرب شداتو ضاماه ليها و كتسكتو و تبوسو خايفة ماهمهاش راسها فقط فكرت ف ولدها حتى قرب منها تايغر كينطق ب استفزاز

تايغر: انلعبو مزياااان اديابلا

عشق:(كتشوف فيه بكره) اتبقا خواف و كتخبع مور ناس دييييما

تايغر: الى كان هادشي ايضمن ليا تكوني ليا و معايا داكشي لي

بغيت (قرب منها) اتنفذي اي حاجا كنقولها و لا غادي نفضح جريمتك و كولشي ايعرفها و حتى خوك ايمشي فيها حيت تستر علييييك (ضارلها من جهة الأخرى) نيروز منين ايعرف جريمتك ايكرهك و اياخد ليك ولدك المسكينة

عشق: (تملكها الخوف) عمرووو يديرها

تايغر: تغداااي بيه قبل مايتعشا بيييك و كيما تافقنا اتكرهيه فييييييك و ماتنساااايش فوقما نبغيك عندي تحضري كتفهمي

عشق:(الصمت)

تايغر: (علا نبرتو) واااااش كتفهمي؟؟؟

عشق : اه

تايغر: سيري دابا حتى ترشقلي و نعيطلك

"نهاية فلاش باك"

نفضات الافكار من راسها و مشات لبسات بيجامة و خرجات لقاتو فالبالكون كيكمي ...تخشات فبلاصتها ناعسة ...حتى سمعاتو تخشا حداها معنقها لور و زادت ضماتو لعندها خايفة من الحاضر و المستقبل حضنو هو الوحيد لي كيشعرها بالارتياح معاه و رغم ذلك مابغاتش تعاودلو او تعارف ليه ظنا منها ايكرهها او يبعد منها تملكها الخوف و زادت تخشات فيه ...صبح صباح جديد على تجهيزات السفر ...هابطة هي و ياه هازة فراس و الخدم مهبطين ليهم ليفاليز ...جلسو فطرو و نيروز ناض اهضر فالتيليفون ...خرجات عشق ايضا للجردة كتنفس بصعوبة حتى لحقاتها زمرد بخوف

زمرد: عشق كيبقيتي؟

عشق: سولييي بنتك

زمرد: عااارفة مادارت فيها مايصلاح او واخا هكك مافضحتيهاش

عشق: و شنو بغيتيني ندير نقولها لنيروز باش اقتلها؟؟

زمرد: لي بغيت نعرفو هو شنو درتي باش تفكي من تايغر

عشق: (بتوتر) كان غير بغا يخلعني

زمرد: الله ياخد فيه الحق يالاه ندخلو

عشق: انبقا شوية هنا

...دخلات زمرد و خرجات نجلاء لعندها و الندم على وجهها

نجلاء: عارفة مابغيتيش تشوفي وجهي و بلي مادرت فيها مايصلاح معاك و لكن غير سمحيلي

عشق: بسبابك الجلاء حياتي تحولاااات لجحيم (ضارت عندها) فخبارك بلي تايغر ايبقا يتحكم فيا بحال اللعبة دابا و ماعندي ماندير

نجلاء: و الى عرف نيروز ايقتلنييي اهئ اهئ

عشق: كتفكري غير فراااااسك

نجلاء: انا والله حتى نعاونك ف أي حاجا

عشق:(بعصبية ) بعدي مني و من ولدي و ماتقربيييش لييينا

...دخلات خلاتها واقفة كتبوس فولدها ولات خايفة تغفل عليه و توقعليه شيحاجا ..لكن فلحظة رن هاتفها شافت النمرة و عبسات...عطات ولدها لبسباس و مشات للقنت كتهضر

عشق: شنووو بغيييتي

تايغر: سمعت اتسافري فين بسلامة؟

عشق: ماشي شغلك نسافر انا و راجلي فينما بغينا

تايغر: واش ايبقا راجلك نهار يعرف شنو درتي همم ؟ و كيفاش اتسامحي راسك نهار خوك حبيبك يدخل للحبس بسبابك

عشق: دابا من لخر شنو بغيتي ؟

تايغر: لغي الرحلة

عشق: مانقدرش نلغيييهااا

تايغر: لغيييها ولا مايعجبك حااال فهمتيها

قطع عليها التليفون تحت كرهها و غضبها و ماعليها غير تنفذ..توجهات لعند نيروز لي كان سالا الابيل …

نيروز:(ابتاسم ليها) مشينا ؟

عشق: مابغيتش نسافر ...

نيروز: كيفاش؟؟؟

عشق:(كتصطانع التعب) مكنحسش براسي مزيان

نيروز: (شدها فيها) ماالك؟

...سخفات بين يديه كتصطانع الاغماء و هو شدها خايف عليها و مالين دار واقفين ليها فراس خايفين...هزها بين يديه طلعها للفوق و كيغوت

نيروز: عيطو لطبيب

...دخلها لبيتها و حطها فوق النموسية كيطبطب على وجهها و هي سخفانة و فداخلها كتلعن راسها ...حتى بدات كتحل عينيها شوية بشوية

نيروز: حبيبتي

عشق:(عضات شفتها لتحتانية على أثر هاد لكلمة و نطقات) عفاك سمحلي انيروز

نيروز: (كيقيس جبهتها) كيفاش كتحسي؟؟ طبيب ايجي يفحصك

عشق: بقا معايا ماتخلينيش بوحدي (مزيرة على يديه)

نيروز:(عنقها) انا معاك ديما عمرني نتخلى عليك عاوديلي اعشق شنو مقلقك و معصبك من لبارح ماعاجبانيش

عشق: مخنوقة بزاف مابغيتش نسافر بغيت نبقا هنا

نيروز: لي بغيتيها هي لي تكون

زمرد: (دخلات و ابتاسمات) تقدر تكون شيحاجا زوينة جايا فطريق

نيروز:(ابتاسم) كنتمنى

...دخل طبيب لعندهم و ألقى التحية و بدا كيفحصها لعشق قدامهم و يعبر ليها طونسيون و نطق

طبيب: اعصابها متوترة شوية خصها راحة

نيروز: ماكايناش شيحاجا اخرى؟

طبيب: هادشي لي كاين

...خرج طبيب معاه علي و زمرد و بقاو بجوج كيشوف فيها

نيروز: رتاحي

عشق: واخا

...باس على راسها و خرج خلاها ترتاح غير سد الباب ناضت عينيها تحولو للحمر و بدات كتغدد و تحلف و تلعن راسها

عشق: كنقسم ليك بالله أ تايغر الى ماندمتكش و خليت حياتك جحيم انا مااااشي ديااابلا كنواعدك طال زمان و لا قصار اندمك و نكرهك فحياااااتك غييير صبر

...حلفات فيه و اطبق المقولة ديال تمسكن حتى تمكن و يا بيه يا بيها حتى تشوف شكون يعيى...طاح ظلام و كان كولشي ناعس و هي كما العادة ناعسة ف أحضانو حتى بدات كتحلم

شفق:(شادة فراس) أنا رجعت أختي و أنفضح كاع فعايلك

عشق: شنووو كديري طلقيلي ولدي نتي ميتا ميتااا

شفق: اتعاقبي اعشق على فعايلك و حتى واحد ماغادي يبقا معاك حتى نيروز ايسمح فيك

عشق: سكتيييي سكتي نتي ميتااا ميتاااا

...غوتات مع اخر كلمة و ناضت كترجف و العرق هابط منها ...ناض معاها نيروز شعل ضو و كيشد فيها

نيروز: غييير حلمة ماتخافيش انا معاااك

عشق: انا ماشي قتالة انا ماااادرت وااالو انا ندمت والله ندمت (مكمشة بلاصتها كتهضر بلا وعي) انا مادرت والو

نيروز: شششش ماوقع والو غير كتحلمي

ضمها ليه و خايف على حالتها و اكيد من لبارح داخلو الشك فيها و من تصرفاتها لي تبدلو و لكن ماعندو مايدير غير يسايس معاها و يوقف ف جنبها ...نعسات عندو مكمشة و هو كيدوز على شعرها و كيهدنها بصوتو بشوية بشوية حتى رجعات غفات ….أما فروسيا كان جالس فالمكتب ديالو هو الاخير لي بقا كيحقق فالجرائم و بين يديه ملفات ...كيحك فعينيه بتعب و كيتفوه يالاه بغا ينوض و هو يلقاها قدامو واقفة مبتاسمة و كتشوف فيه

عمر: عشق؟

شفق: (ابتاسمات) أنا شفق سقراط و محتاجاك تسمعني

ليلة كاملها دازت جالس بين يديه كارو و كيتبع معاها بكل تركيز و بلا كايقاطعها أما هي عاوداتلو كولشي بلا ماتخبي او تكدب...طفا الكارو بيديه و شاف فيها

عمر: شنو ايخليني نتيقك؟

شفق: ماكاينش شي مجرم كيجي برجليه لعند البوليس

عمر: شنو المطلوب مني؟

شفق: تعاوني نبينو لحق و نجمع شمل عائلتي

عمر: اناخد معاك الريسك و انعطيك شهر تبيني فيه الحقيقة

شفق: و انا كنواعدك انبينها

عمر:جا لوقت فين خاص ختك تعاقب على فعايلها …

...صبح صباح جديد على رنين الهاتف ديال نزار لي كان جالس كيفطر مع عائلتو و جاوب فتيليفونو لكن سرعان ماتبدلو ملامحو و بلع ريقو حتى لاحظات سارة توتر ولدها

سارة: نزار ولدي مالك؟؟؟

نزار: لقاو شفق

سارة:(ناضت طافجة) فييين لقاااوها؟؟؟ هي بيخير قولي

نزار: عيطو لينا نجيو لمركز التحقيق

سارة: نوض نمشيو نوووض و عيط لباباك

نزار: راه وصلاتو لخبار (شاف ف مانفال و باس ولدو) ماغانتعطلوش

مانفال: علموني بأي حاجا

...خرج هو و مو ركبو فطوموبيل متوجهين لمركز التحقيقات...لي كان وصل ليه كل من نيار و قصي و صخر و جسور ...دخلو كاملهم و كيتسناو حتى خرج عندهم عمر و ناداهم باش اجيو معاه ...دخلو للبيرو لقاو شفق جالسة كتشوف فيهم ب طريقة مبهمة و راسها فيه فاصمة و شوي شوية كتوسع ابتسامتها حتى نقزات على جسور عنقاتو

شفق: فييين كنتيييي كنت كنتسناك

جسور:(بصدمة) شفق؟

سارة:(جبداتها عنقاتها) بنتييي (كتبكي و تبوسها)

نيار:(عنقها حتى هو و كيتفقدها) شفق نتي بيخير

شفق: انا بيخير علاش خليتوني بوحدي فقت مالقيت حتى واحد

سارة: مالك فراااسك

شفق: ماوقع والو صافي يالاه نمشيييو للقصر خصنا نوجدو بزاف د لحاجات للعرس

نيار:(بريبة) اشمن عرس؟

شفق: عرسي انا و جسور اويلي نسيتو

عمر:(تنهد و قرب منهم ) شفق شنو بان ليك تبقاي مع خوك برا انا انهضر مع وليديك و رجعي دخلي

شفق: و من بعد انمشي ياااك؟

عمر: اه (شاف ف نزار)

نزار: يالاه اختي (عنقها مخرجها)

...شاف عمر فيهم لي كانو مصدومين كيشوفو فشفق خارجة و مافاهمين والو حتى نطق عمر

عمر: انا عارفكم مافاهمين حتى حاجا و حتى انا كنت بحالكم

نيار: شنو واقع لبنتي ؟

عمر: فاش لقيناها فسبيطار فشمال روسيا مافهمناش الامر

سارة: كيييفاش ؟؟؟

صخر: كيفاش حتى لقيتوها ؟

عمر: قلبنا فالسجلات ديال ناس لي بلا هوية ف سبيطارات و كانت هي منهم

نيار: صبر و علاش كانت فسبيطار

عمر: سي نيار مادام سارة بنتكم دارت حادثة و فقدات الذاكرة او بالاحرى ولات عندها ذاكرة رجعية و كتعقل غير على عرسها من جسور

لحظة صمت سادت تبعها بكاء سارة على بنتها و الكل مافاهمين والو

سارة: كيييفاااش انا بنتي فقدااات الذاكرة

صخر: يعني دابا هي ماغادي تعقل على حتى حاجا؟؟؟

عمر: (عطاهم ملف من طبيب) درنا ليها الفحوصات باش نتأكدو لقينا بلي بصح فقدات ذاكرتها

جسور: و شنو انديرو دابا؟؟؟

عمر: المشكلة ماشي هنا (وراهم سنسلة طبق الأصل لهاديك لي كان عطاها جسور) السنسلة كانت عندها

جسور: (شدها بيدو) اذن ديك سنسلة لي لقينا ماشي ديالها؟؟؟

عمر: لا و فهاد الحالة كنستبعدوها من التهمة

نيار: بطبيعة الحال بنتي ماشي مجرمة و ماااشيي هي ليي قتلات محسن

سارة: شنووو خصنا نديرو داباا؟؟

عمر: الحل هو تقولولها بلي فقدات الذاكرة و تحاولو تفكروها ب شنو وقع من عرسها بجسور و الاهم خصها تلاقا ب ختها عشق ربما تفكر شيحاجا

جسور:(كيمسح على وجهو) مصيبة هادي

سارة: يعني دابا بنتي بريئة تقدر تبقا معانا

عمر: طبعا لكن التحقيق ايبقا لأنه حنا ماعارفينش كيفاش تعرضات للحادث و معامن كانت و فين كانت لذلك هادشي كيجيب الشك

نيار: اوك

...خرجو كاملهم و شافو نزار لي ملامحو باينين مصدومين و كيشوف ف واليديه بعدم فهم ...حتى قربو ليهم و شدو ف شفق

شفق: انمشيو للقصر دابا؟

سارة:(شافت ف نيار)

نيار: اه ابنتي انمشيو يالاه

...خرجو لبرا و ركبو فطوموبيلات ...قرب قصي من نيار و همسلو

قصي: انرجعو للقصر حتى نتوما ماغاديش نخليوكم فهاد الشدة

نيار: شكرا بزاااف

نزار: حتى انا انمشي نجيب مانفال و نلحقوكم

نيار : واخا اولدي

...ركبو متوجهين للقصر أما فالمغرب كانت جالسة فالجردة شادة ولدها و كتشرب دوا ديال صداع الراس و كتشوف ف تيليفونها بغيض حتى جلس حداها مبتاسم

نيروز: كيبقيتي

عشق: (حطات تيليفونها بسرعة) مزيان

نيروز: لبارح حلمتي شي حلمة خايبة ؟

عشق: ااه (سهات) نفس لحلمة كتعاود

نيروز: خففي ذنوبك

عشق: (شافت فيه) ماتبداش

نيروز: مابديتش كنتسنى تجي تقولي كولشي بفمك

عشق: ماعندي مانقول

نيروز: ماتفيضيش الكاس و لي فراس جمل فراس جمالة (ناض و باسها فجبهتها) رتاحي احبيبة

عشق:(شافتو غادي و هي تنطق) بغيت نخرج

نيروز:(ضار عندها) فين؟

عشق: عندي رونديفو مع طبيبة

نيروز: اوك خرجي

...ناضت مشات عند زمرد عطاتها الولد ...توجهات بسرعة لبيتها بدلات حوايجها و هي مخززة ...خدات صاكها و خرجات من لقصر ..توجهات عند شيفور خدات منو سوارت طوموبيل ..تحت انظار نيروز لي كيشوف فيها من بالكون البيرو ديالو ..و جبد تيليفونو

نيروز: تبعوها

...استقلات طوموبيلتها و نطالقات طول طريق و هي كتشوف و ساهية بدرع باش كطلع النفس حتى صونا ليها تيليفون و جاوبات

تايغر: شنو لي شاغلك لدرجة مانتابهتيش لرجال نيروز لي تابعينك من لور؟ واش كتفكري فيا (باستهزاء) خديت عقلك لهاد الدرجة

عشق:(شافت فالمراية و فعلا كانو تابعينها) انتلفهم

تايغر: سيري ل بوتيك*** اتلقاي طوموبيل فيراري تماك

...قطعات بلا ماتكمل معاه و توجهات ديريكت لداك لبوتيك ...دخلات و دارت راسها كتشري خدات حوايج جداد و طربوش خلصاتهم و دخلات بدلات حوايجها دارت نظاظر و تخفات كاملها ...خرجات لبرا كتشوف ف رجال نيروز لي كانو كيتسناوها دازت من حداهم و ماعقلوهاش...ركبات فالفيراري و نطالقات لفيلا تايغر …مدة مسافة وصلات و نزلات ..حيدات داك طربوش حتى تطلق شعرها الاشقر و دخلات عندو لقاتو كيتسناها

تايغر: مرحبا بيك

عشق: ماعنديش لوقت شنو بغيتيني؟

تايغر: و انا عندي بزاف د الوقت ا ديابلا انستمتعو انا و ياك

عشق:(سمعات صوت موراها و ضارت كتشوف باب قصرو كيتسد) شنوو ناوي دير ؟

تايغر:(كيطلعها و كيهبطها) عزيز عليك تبدلي حوايجك؟ (رما عليها كسوة قصيرة) لبسيه

...في روسيا وصلو للقصر و هبطو ...قرب نيار من لباب لقاه مسدود بقفل كبير ...رجع لطوموبيلتو و جبد الساروت من مجر طوموبيل و رجع حلو تحت نظرات الجميع ...لي دخلو لقاو كولشي مظلم و كاع الاثاث مغطي ...كل واحد كيتفكر ذكريات فكل قنت و ساكت حتى نطقات شفق

شفق: بابا علاش هادشي مغطي؟؟؟

نيار:احم مابقيناش هنا

شفق: كيفاش مااابقيتوووش؟؟ (قربات من الاثاث كتشوف الغبرة) هادشي كيبان مغطي من شحال هادي ولكن انا غبت عليكم غير يوماين

سارة:(تدخلات) كنا مسافرين ابنتي كلنا و غطينا الاثاث و حيت خلينا شراجم محلولين دخلات الغبرة

شفق: اااه فهمت

نزار: انا نعيط للخدم يقادو كولشي (جبد تيليفونو)

نيار:(قرب من سارة) حتى واحد مايغلبك فلكدوب (مشا لعند شفق) اجي معايا ابنتي نجلسو فجردة

...جرها و خرجو تحت نظرات سارة في كانت ملامحها حزينة جراء هضرة نيار

جالسة فلبيت لي وراتها لخدامة بين يديها الكسوة كتشوف فيها و نغصة فقلبها كتخنقها بغات تغوت بغات تبكي بغات دير شحال من حاجا ولكن ماقادرا دير والو حكمات على راسها بالإعدام و حكمات على نيروز بالظلم ...ناضت مكسور ليها لخاطر حيدات حوايجها و لبسات ديك لكسوة لي بارزة مافاتينها ..تنهدات و خرجات لعندو ..هبطات لتحت عندو لقاتو فبيت اخر فيه موسيقى هادئة و دخاخن ..شاف فيها و ابتاسم

تايغر: جاتك لبسة زوينة

عشق: بيضة بحال لكفن

تايغر: تمشاي قدامي نشوفك

عشق: عمرك شفتيني؟

تايغر: بلا ماتناقشيني

جالس لايح يديه فوق الفوتوي و شاد شيشة بيديه كيشيش و يشوف فيها كيفاش كتحرك بديك اللبسة لي عطاها عارفها ماحاملاهش و لي كديرو فوق طاقتها و هادشي لي معصبو و مكرهو فراسو بصوت عصبي نطق

تايغر: جبيلي كاس

...بلا ماتشوف فيه مشات لطبلة صغيرة محطوط فيها انواع و اشكال د شراب هزات كاس حطاتليه مكعبات الثلج و خلطات ليه جوج انواع الشراب و مشات لعندو مداتوليه

تايغر:(خداه من عندها و جرها من يدها بزعاف جلسات فوق حجرو) طلقي البشرة (ضاغط عليها بيديه) ماجابكش باش تنكديها علييييا

عشق:(كتنتر منو) طلق مني ا ايهم لي بغيتيه كنديرو شنو باغي مازال؟

تايغر:(قرب من عنقها كيشم و يتنهد) بغيتك نتي حسي بيا (طبع قبلة)

عشق:(كارهة راسها من نفسو و ملامسة شفايفو لعنقها بغات تقتلو و تقتل راسها ...كتحس ب قبلاتو بمثابة سم ليها لكن فلحظة غاب عقلها و ترخات من بين يديه و بلا شعور نطقات) نيروز

تايغر:(لاحها من فوقو فالارض و ناض صاعر) سمييييتييي ايهم

عشق:(كتزحف بلور و هي كتشوف فيه ) كنعرف نطق سمية نيروز بوحدها

تايغر:(هزها من شعرها مقربها ليه) اتولي تعلمي تنطقيييها فهمتي

عشق: (غوتات فوجهو) لي ماتجيبو محبة ماتجيبو حزاااارة

تايغر: شنو بغيييتي تقوليلي كتبغيييه؟؟؟!!

عشق: مااااشي شغلك هو راااجل عليك كان ديما معايا عمرو سمح فيا يستاااهلني

تايغر: رجااال مكيقتلوووش عائلة على قدها كنكرهووو حيت خدا مني كل حاجا زوينة خدا عائلتي و خداااك نتي

عشق: عااائلتك مجرمة هوما سباب فاعدام باااه يستاااهلو لموت

تايغر: و نتي ماشي مجرمة؟ هاااا قتلتي محسن و سبيتيها فختك نتي عائلتك كاع مايخافو من لبراني حيت بنتهم اكبر عدوة ليهم

عشق: طلااق مني

تايغر: غااااادي تنفذي شنو كنقولك بالحرف ولا انرجع حياتك جحيييم كثر من هاكا و الناس لي كتبغيهم ايدفعو ثمن اخطاءك (طلق منها)

عشق: كثر من هااااكا مكنظنش

تايغر: اتكرهيييه فيييك بغييتك تعيشيه فلعذاااب

عشق: كنقسم ليك بالله اضور سمطة و اندمك على كوووولشي عقل على هضرتي و ديابلا فاش كتواعد كتوفي

دفعها بكتفو خارج و هي مكرهة من راسها و ماعاجبهاش الحال ...رجعات طلعات لبيت لبسات حوايجها و خرجات من الفيلا ...رجعات لنفس لبوتيك استقلات طوموبيلتها و لاحظات ان دوك رجال ماكاينينش..جبدات تيليفونها لقاتو ايطرطق بليزابيل د نيروز عضات على شفايفها و عارفة راسها قفراتها ...و انطالقات للقصر ...أما فالمغرب كانت جالسة هي و باها و مها حتى نطق باها كيشوف فيها

نيار: شفق بنتي سمعيني شنو انقوليك

شفق: وي بابا؟

نيار: بنتي نتي وقعات ليك حادثة ماعارفينش كيفاش ولكن ولات عند ذاكرة رجعية و فقدتي نص ذاكرتك

شفق:(كتشوف ف مها و باها) كيفاش ؟؟!

سارة: بنتي سمعيني هادشي مكيخلعش نتي اتبراي و ترجعي كاع داكرتك

شفق:(ناضت ) بغيتو تقولولي بلي كولشي تنسااااا لياااا؟؟؟

نيار:(ناض عنقها) عارف هادشي صعيب و لكن حنا معاك

شفق: شنو وقع شنو لي نسيييتوو

سارة: غير جلسي حنا انشرحولك كولشي

...جلسوها و بداو كيعاودولها من نهار عرسها بجسور كأنها ماعاقلاش لكن هادشي غير زاد حفزها على الانتقام...كملو ليها كاع الأحداث من غير المخاصمة ديال سارة و نيار

شفق: هادشي كااملو نسييتو؟

سارة: غادي تردي ذاكرتك تيقي بيا

نيار: اه حنا انعاونوك و هاد لقصر ايرجع كيما خليتيه و كولنا مجموعين

شفق: بغيت نشوف عشق خصني نمشي عندها للمغرب

سارة: علااااش ابنتي؟

شفق: ديك ليلة فاش غبرت كنت معاها بغيت نعرف كثر شنو وقع و ياكما لاحظات شيحاجا غريبة (شدات فيد باها و مها) انا ماشي مجرمة ماقتلش محسن

نيار: حنا متيقينك ابنتي

نزار: غدا اناخدك للمغرب عند عشق

شفق: ان شاء الله

نيار: وقت النعاس هادا يالاه ترتاحي فبيتك

...كل واحد مشا لبيتو و سارة بقات مع شفق حتى طمنات انها نعسات و عاد مشات لبيتها ..دخلات كتشوف نيار كيفرش فراشو فالارض و هي حاضياه بحزن قلبها كيتقطع عليه ..مشات خرجات جايبة ليه قهوة كيما كيبغيها فالفنجان و قربات ليه

سارة: القهوة لي كتعجبك

نيار:(شدها من عندها) درتي فيها السم؟

سارة: (بحزن ) ماشي لهاد الدرجة انيار

نيار: لي عطا الله عطاه قتلتيني

سارة: ايجي نهار لي اتعرف فيه كولشي و ديك ساعة منك لضميرك

نيار:(شدها من عنقها زدحها فالحيط و كيهضر تحت سنانو) انا عارف و نتي عااارفة شكون ظلم لاااااخر اتيييريزااا كنتعجب واش ضميرك نتي ماحشماااانش من رااااسوو ؟؟؟

سارة: اوا قتلنيييي قتلني علااااش كتعذبني بحاااال هاكااا

نيار: لي فيييك كااافيك صابر عليك على قبل شفق غير حيت محتاجة لينا خلي مسااافة بيني و بينك برا انا راجلك و هنا انا غريييب عليك

دفعها على النموسية كتبكي و تقطع و هو كره راسو و خرج مخليها ….

خرج تحت نظرات بنتو لي ماكانتش ناعسة و سمعات كاع حديثهم و هي متحسرة على حالتهم...تنهدات بعمق راجعة لبيتها كتشوف حال عائلتها لي تفككات بسبب طيش عشق نطقات بصوت عازم و مقررة ف نفسها

شفق: غادي نبين الحق و كولشي ايرجع لبلاصتو (تنهدات) جا لوقت فين تعاقبي على فعايلك اعشق

...في روسيا كانو مجموعين فصالة العائلة كيتعشاو و دايرين صواب مع خالد و فرح لي كانو غادي يمشيو بحالهم...كان خارج ربيع من بيتو من بعد ما عيطوليه يتعشا و باينة فيه باقي متأثر و ايدخلو اكتئاب...هبط لعندهم و جلس حداهم تحت نظرات فرح لي فرحانة بوجودو عكسو هو لي ساكت و غير كيخمم أما عشق كانت يالاه دخلات للقصر متوجهة لبيتها و بخطوات هادئة حتى وقفها بصوتو خارج من الصالة

نيروز: على سلامة

عشق:(ضغطات على قبضة يدها و عاد ضارت جاوبات) الله اسلمك

نيروز: نقدر نعرف فين كنتي ؟ (جبد تيليفونو) كنصوني ليك مكتجاوبيش

عشق: (ربعات يديها) دوك لفيران لي صيفطتيهم يتبعوني ماداروش خدمتهم؟

نيروز: دوك لفيران صيفطتهم يردو ليك لبال

عشق: ماتكدبش على راسك صيفطتيهم يعرفو فين غادي نمشي بانلي قللتي من قيمتي بزااااف اهيولا

نيروز: (قرب منها كيغلي و كيحاول يبقا مهدن) فين كنتي؟

عشق: نكون فين ما بغيت نكون انا مسؤولة على راسي و عارفة مزيان نحضي راسي (ضارت تمشي)

نيروز:(جرها من شعرها لعندو ) رخيتلك بزاف كيبانلي هااا

عشق:(كتوجع) طلق مني

نيروز: هضريييي فييين كنتي

عشق: علااااه ماتايقش فياااا

نيروز: كووون ماكنتيش ساكتا على موصيبة ماغاديش تلفي رجااال لي تابعينك

عشق: حيت داااك زياااار مكيعجبنيييش

نيروز:(طلق منها دافعها) كفتك تقااااالت اديابلا ماتخلينيش نهضر و نجبدلك زبايلك

عشق: واش حتى لي تخنق مااايخرجش؟؟؟ نتا كتخرج فوقما بغيتي كتسافر كدير لي عجبك و انا نبقا محبوسة ؟؟

نيروز: الى عاودتي عتبتيها راني ماشي راااجل

عشق: (عضات على شفايفها و كتنطق بزز منها) اصلا منين كديرلي هاكا كلمة راجل بزاف عليك

نيروز:(ماحسش براسو غير و هو نازل عليها بتصرفيقة للوجه حتى تغطا وجهها بشعرها) مانشوووفكش قدااااامي **** لبيتك

عشق:(شافت فيه بنظرة كتغلي و نطقات) بينتي ليا بلي بصح مكتسواش

نيروز:(غوت فوجهها) بيييتك

عشق:(غوتات ليه فوجهو) ماغاااااداش

خرجو من صالة كاملهم من بعد ما سمعو صداعهم و بقاو واقفين كيشوفو

زمرد: ولدي اشواقع مالكم؟

نيروز: ماواقع والو الوليدة

عشق: واقعين بزاف د لحوايج

نيروز:(كيمسح على وجهو) مابغيتش نغلط فيك كثر من هاكا سيري لبيتك

عشق: باارااكا ماتبقا تحكم فياااا واش نتا مريييض فعقلك

نيروز: عشق وااااش حاسة براسك كيفاش كتصرفي راه انا لي خصني نكون معصب مااااشي نتييي

عشق: نخرج فينما بغيت مااااشي سووووقك

نيروز: كيفاااااش ماااشي سوووقي باااااغاااا تحمقييييني عارفة بلي الخطر تااابعك و كون وقعااات ليك شيحاجا؟؟؟؟

عشق: توقعلي شيحاجا؟؟ هههه اصلا برا راني ف أمان على هنا(شافت ف ربيع) ولا نفكرك كيفاش خوك كان ايغتاصبني

زمرد:(بحزن) عشق حرام عليك ربيع راه طلب منك سماحة و تعاقب

عشق: الى نتوما نسيتو انا مكنساااااش حاطين بيناتنا مجرم فأي لحظة يقدر يعاودها

نيروز:(شدلها فكها و لقرودة كيشطحو فراسو) لزمييي حدك و مااااتغلطيييش كثر

عشق: شداتك نفس على خووووك كون غير قتلتيه داااك نهار باش مانبقاش نشوف ف كمارتو هنااااا

ربيع:(بهدوء كيشوف ف الارض) بصح كون غير مت

زمرد:(شداتو من يديه) ماتسمعش ليها هي معصبة

ربيع: ديما اتبقا تابعاني هاد لحاجا و نتوما ماكاتشوفوش كولشي كتشوفو غير لي بغيتو

علي: ربيع شنو كتقول مافهمناكش

ربيع: ربيع لي داير المشكلة غادي تهناو منو

...مشا بسرعة لبرا و داز للقبو خدا ليصانص و رجع خرج للجردة و العائلة غير شافوه تبعوه كيشوفو فيه بصدمة

زمرد: ولدييي شنووو كديير

ربيع:(كيشوف ف عشق) عندها لحق كااااان خصني نمووووت علااااش انا باقي حي كولشي اصلا كيسمح فيا خليوني نموووت (كيكب على راسو ليصانص و جابد بريكة )

نيروز:(بصدمة) ربيع حط داكشي من يديك هي راه معصبة مني ماشي منك ماقصدااااتش تقوليك ديك لهضرة

نجلاء: خوويااا عفااااك حط من يديك لبريكة

ربيع: (كيشوف ف نيروز) من ديما كنحس بالفرق بيني و بينك من نهار دخلتي لدارنا ديما واليديا كيبغيوك كثر مني و كيحنو فيك و لي طلبتيها كتجيك حتى من بابا كيقول ليك ولد قلبي

علي: ماتقولش هاكا اولدي نتا راك ولدنا و كنبغيوك

ربيع: كرهتك انيروز حيت خدييييتي كوووولشيييي مني و تعاملك القاسح معايا خلاني نزيد نتمرد و نكره اي حاااجااا فيكم

نيروز: نتا راك خويا اربيع خويا صغير عارف بلي عمرك حسبتيني خوك حيت غير تبناوني ولكن كنتي ديما عزيز عليا و كنحاول نحميك

ربيع: حتى من لبنت لي كنت كنبغي تزوجات و سمحااااات فيااااا حيت ماقدراتش تسناني درت المستحيل على قبلها و حتى واحد فيكم ما وقف معايا علااااش خصني نبقاااا عاااايش

زمرد:(كتبكي و تشهق) عفاك ا ربيع حط من يديك لبريييكة

ربيع: انا ماشي خايب عمرني كنت مجرم ماقصدتش نآذيك (كيشوف ف عشق و دموعو سالو) بغيت نرتاح غادي نمووت

عشق: خصك تعيش (قربات منو ) خوك كيبغيك بزاف اذن خصك تعيش

ربيع: حتى واحد مكيبغيني

عشق: لا بالعكس كولشي كيبغيك حتى انا كنبغيك و عزيز عليااا (كتقرب منو و تهدنو) كون غير كنت كنبغي ختي كيما كيبغيك نيروز كون غير حميتها و بقيت معاها حيت كانت شخصيتها ضعيفة بزااف كانت محتاجاني و لكن انا كنت ديما كنكرهها و كنآذيها و كنضربها كانو وليدينا كيديرو لفرق بيني و بينها كيبغيوها كثر مني و كيحميوها حيت كتمرض بزاف و بسباب اهمالهم ليا وليت هاكا و راه نفس الشيء بالنسبة لنيروز حيت هو ماعندوش عائلتو كيتهلاو فيه زمرد و علي باش مايحسش بالنقص من صغر لي داز عليه ماشي ساهل اربيع (هزات كتافها) شتي شحال كنتشابهو انا و ياك

ربيع: و لكن درت بزاف د لحاجات خايبين و آذيتك و انبقا مجرم

عشق:(كيطيحو دموعها) حتى انا درت بزاف د الحاجات كندفع ثمنهم دابا غااالي و خايفة واحد نهار ولدي يقيسوه ذنوبي فكل ليلة كنشوف ختي و مي و با و عائلتي ف أحلامي ديما كنفيق مفزوعة و كنبغي نغوت كنحس بالخوف لي عمرني حسيت بيه فحياتي نتا اربيع كتبغي خوك بزاف لدرجة ماقدرتيش تسمح فيه ف أفغانيستان و قلتيلو بلي دايرين ليه خطة باش اموت (كتحرك راسها ب لا) عفاك ماتآذيش راسك ماتخلينيش نكره راسي كثر و نهز ذنبك فرقبتي حتى نتا سمحلييي بزااااف سمحليييي ماكانش خاصني نقول ديك لهضرة ليييك عفاك ماتآذيش راسك و عائلتك

ربيع: (كيرجف ) ماقادرش نعيش بلا بيها كنشوفها فينما مشيت مشات و هرساتني

عشق: عرفتي شحال من مرة تهرست انا؟؟؟ بزاف كان جسور سمح فيا و انا حاملة ب فراس و بسبابو تنفيت لأفغانيستان خسرت خدمتي لي كنحماق عليها كاع لبواب تسدو فوجهي حتى جا خوك كان بحال نور فالظلام لي كنعيش فيه و نور ليا حيااااتي..(.قربات منو كثر ) مازال غادي تلقا لي تستاهل و ماشي بعيد تكون بيناتنا (كتشوف ف فرح) نتا قوي ا ربيع و حنا كلنا انتجاوزو هادشي

ربيع:(بعد منها كيغوت) لا انا باغي نموووت خصني نموت

عشق: (شدات ليصانص و كتكبو عليها) حتى انا نستاهل الموت على فعايلي

زمرد: اشكااااديييروووو رصااااو اهئ اهئ

عشق : شعل لبريكة و خلينا نموتو بجوج و لكن عمرنا انرتاحو اربيع و كاين حل اخر هو تشد فيدي و نعيشو عائلتك باغيينك

...طيح لبريكة من يديه و هبط على ركابيه كيبكي و هي غمضات عينيها بارتياح و هبطات عندو عنقاتو لكن فصراحة هي لي محتاجة لعناق

عشق: ششش كولشي ايكون مزياااان

نيروز:(قرب لربيع ضمو ليه بالخلعة) ماتعاودهاااش نتا خويا صغير و عمرني نفرط فيييك

فرح:(قربات من ربيع شادة فيديه بعلامات حزن فوجهها) يالاه نمشيو لبيتك ترتاح (أومألها براسو و مشا معاها مرفوع و هي جاراه من يديه )

...اما العائلة ضارو كيشوفو فعشق لقاوها غبرات من حداهم ...مشات ديريكت لبيتها لقات فراس ناعس و حداه سلوى طلعات حاجبها بتساؤل

عشق: فوقاش جيتي؟

سلوى:(بخوف عمرها تنسى قتلة د العصا لي عطاتها) ليوم

عشق: داكشي لي وقع داك نهار مابغيتك تقوليه حتى لواحد فهمتي؟

سلوى: واخا

عشق: سيري بحالك

..تسناتها حتى مشات و بقات واقفة كتشوف ففراس شحال عاد مشات لدوش حيدات حوايجها و بدات كتغسل صحتها ..مدة و الما كيهبط عليها و هي ساهية عاد كملات و لوات عليها فوطة و خرجات لقات نيروز واقف قدامها كيشوف فيها ..هبطات راسها و بغات تخطاه و هو يرجعها عندو من كتافها بحنية

نيروز:(بصوت هادئ) عارفة بلي لي آذاك آذاني و بلي عمرني نفرط فيك و ندير المستحيل باش تبقاي فرحانة

عشق:(مهبطة راسها) اه

نيروز:(طلعلها راسها عندو) عاوديلي لي ضارك فخاطرك انعاونك و عمرني نتخلى عليك

عشق: ماواقعة حتى حاجا انيروز

نيروز: علاش كتكدبي؟

عشق: مكنكدبش مشاكيلي انا قادرة نحلهم راسي

نيروز: (بقا ساكت عاد نطق) الى سقت لخبار درتي شيحاجا بلا ماتقوليها ليا عمرني نسمح ليك و ماغانعقلش عليك

عشق:(ابتاسمات بزز ) ماواقع والو

نيروز:(ضغط على قبضة يدو عارفها كتكدب من عينيها و لكن مابغاش ابزز عليها مازال كيتسناها تعاودليه بخاطرها) على خاطرك

بقا كيساري عينيه على جسمها الفازك و قرب منها باش ابوسها و هي تبعد وجهها و مشات ..طلع حاجبو فيها ثاني مرة كديرهالو ...مشات لدريسينغ لبسات بيجامة قطنية و خرجات تكمشات فبلاصتها و نعسات أما فبيت ربيع كانت معاه فرح جالسين و الصمت سيد الموقف بيناتهم حتى نطقات

فرح: غدا انرجعو للبرازيل انا و بابا

ربيع: اتمشي بهاد السرعة؟

فرح: بابا بغانا نمشيو

ربيع: انبقاو نهضرو؟

فرح: اه ديما و تبقا تجي عندي و نجي عندك

ربيع:(ابتاسم) ان شاءالله

فرح: (شداتلو فيديه) نسا كولشي انا معاك ديما ماغانخليكش الماضي لوحو وراك

ربيع: ميمكنش نساو الماضي ولكن انبنيو مستقبل جديد

فرح: اه خليتلك الراحة دابا

ناضت خرجات من بيتو و مشات لبيتها تنعس...باش أصبح صباح جديد تحطات فيه طائرة فيها نزار و شفق وصلو للمغرب ...استقلو طوموبيلتهم و غاديين لقصر اخنوش ...فهاد لقصر لي كانو كيودعو فيه فرح و الاب ديالها خالد

فرح:(كتشوف ف ربيع) ماتنسانيش

ربيع:(التاسم) مانقدرش

علي: عاودو زورونا اسي خالد

خالد : ان شاء الله و كنتسناوكم حتى نتوما تجيو عندنا

زمرد: لهلا اخطيك

نيروز: انوصلكم للمطار

...خرجو ركبو فطوموبيل و نطالقو فاتجاه المطار فنفس الوقت كانت دخلات طوموبيل نزار و شفق ووقفو قدام لقصر ...نزلات منها شفق هي و نزار و دخلو للداخل كيتمشاو حتى لمحو العائلة جالسين فالصالة و شفق كتشوف ف ختها هازة ولدها و ساهية كتخمم ...طلعات عشق عينيها باش تصدم ف شفق و يتبدل اللون فوجهها ..ناضت بصعوبة كتشوف فيها و فلباسها و ملامحها و مامتيقاش راسها حتى نطقات

شفق: (ابتسامة) ختي توحشتك

الاحاسيس كاملهم تكبو عليها فديك اللحظة و رجليها خواو عليها لدرجة قربات منها بلهفة و عنقاتها مزيرة عليها ...شفق كانت مصدومة بردة فعلها كانت كتوقع ردة فعل اخرى من غير هادي ...نطقات عشق بصوت مغنغن بلبكا و برجفة كتفحص فيها و كتشوف

عشق: شفق نتي قدااامي ياك نتي قدااامي مامتيش سمحيييلي على كولشي انا تسرعت تعميت سمحيلي

شفق:(حالة فمها فيها) شنو كتقولي؟

عشق: نتي مامتيش نتي حية ياك

نزار:(شافها بدات كتحماض و قرب من عشق ) عشق اجي معايا

عشق: هي عايشة انزار واقفة قدامي قولي مكنحلمش قولي مكنحلمش اخويا

بسباس: كنشوفوها كااااملين الله اشفق و فين كنتي

نزار: خود معاك شفق ابسباس (كيجر عشق) اجي معايا

...خرجها للجردة و بدا كيهدن فيها

نزار: عشق راه شفق فقدات الذاكرة

عشق:(كتشوف ف شفق) كييفاااش فقداتها

نزار: هادشي لي قال لينا طبيب هي فقدات الذاكرة كتعقل على اللحظة فاش كانت اتزوج بجسور

عشق:(كتشوف فيه) داز عام و نص على داكشي انزار

نزار: هادشي لي عارفو

عشق:(التاسمات) انا فرحانة انزار حيت شفق ماماتتش ماعرفتش كيفاش ولكن حيدت الذنب من رقبتي انا ماقتلتهاش ماغانبقاش نشوف الكوابيس ف نعاسي و ولدي ماغايتعاقبش

نزار: الحمد لله ماقتلتيش ختك حيت حتى أنا كنت كنحس بذنب كبير ا عشق و لكن الى رجعاتلها الذاكرة شنو اديري ؟؟؟

عشق: غادي تسامحني

نزار: انا خايف عليك غادي يتفضح السر اعشق

عشق: انا عارفة شنو ندير ماتخممش

نزار: مابقيتش عارف باش نصحك

عشق: (تنهدات) المهم انها ماماتتش

...دخل نيروز مع الباب و هو يشوف ف عشق و كسائر العائلة تصدم بوجودها و نطق

نيروز: شفق

شفق: شكون نتا؟

نزار:(قرب منها ) شفق هادا نيروز راجل عشق

شفق: هه متشرفين

نزار: راها فاقدة الذاكرة

نيروز: فين لقيتوها؟

نزار: ف سبيطار مليوحة حتى واحد ماعارف هويتها

نيروز: ماشدوهاش لبوليس؟

نزار: ماكاين حتى شي دليل يدينها

عشق:(بشك ) كاينة سنسلتها

نزار: لقاوها عندها و ديك سنسلة لي كانت مع جثة محسن ماشي سنسلتها

عشق:(بهمس) مايمكنش

نيروز:(ابتاسم) مرحبا بيك اشفق بقاي فضيافتنا

شفق: شكرا بزاف انبقا مع ختي

نزار: و انا خاصني نرجع لروسيا

نيروز: بقا معانا و غدا سير

نزار: ان شاء الله

نيروز:(تخطاهم غادي لبيتو حتى داز من حدا عشق و رجع عندها بجوج خطوات ) كنتمنى مايبقاوش اجيوك الكوابيس ..

جملة زلزلاتها خلاتها تبع ليه العين و تبلع ريقها و الشك ساورها ياكما عارف شيحاجا و مخبي عليها و لا ياكما عايق بشنو دارت و ساكت ...نفضات الافكار من راسها و رجعات كتشوف ف ختها و كب تفكيرها مع قصة السنسلة….أما فروسيا كانت فدوش جالسة و كتشوف ف اختبار الحمل لي طلع إيجابي...دموع تجمعولها فعينيها و بدات ترجف خايفة مانواتش تحمل دابا و حتى نفسيتها مامستاعداش و باقا كتعالج ...ناضت خاطرها مروع و شاداها دوخة بدرع باش لبسات حوايجها و قادات راسها و هبطات لتحت لقات فتيحة كتفطر و جلسات معاها

هبة: صباح الخير

فتيحة: صباح النور ابنتي فين هو صخر؟

هبة: خرج بكري قالي عندو اجتماع

فتيحة: لبارح كان ساهي و كيخمم فالقضية د باه

هبة: خصوصا منين شفق ماشي هي لي قتلاتو اذن شكون اقدر اكون

فتيحة: الله و اعلم ابنتي خلينا منهم نتي اتمشي مع باباك دابا؟

هبة: اه انمشي دابا (ناضت)

فتيحة: ماكليتي والو

هبة: مافياش والله

...خرجات و ركبات طوموبيلتها غادية عند باها ل دارهم ..دخلات لقاتو ف جردة كيقرا كتاب و قربات منو سلمات عليه و جلسات

هبة: ماما ماكايناش ؟

هارون: كاينة عند نيار

هبة: فرحت منين سمعت بلي خالتي شيماء و خالي قصي رجعو يسكنو فلقصر

هارون: اه كولشي على قبل شفق مسكينة

هبة: اه

هارون: مالك كنحس بيك ماعاجبكش لحال؟ ولا مافرحاناش اتبقاي معايا

هبة: لا بالعكس ابابا راك عارف كنبقا معاك بزاف د الوقت

هارون: الاهم هو يكون العلاج كيمشي مزيان

هبة: اه احم بابا قولي كون مارجعاتش معاك ماما واش كنتي اتبقا تسناها؟

هارون: بطبيعة الحال اه كنت انتسناها ديما حيت كنبغيها و ماحلاتلي حتى وحدة من غيرها

هبة: صخر قالي ايتسناني

هارون: حيت كيبغيك

هبة: ماعرفتش انا خايفة نكون كنظلمو

هارون: واش الى تحط فنفس الموقف ديالك كنتي اتخلاي عليه

هبة: لا

هارون: اذن حتى نتي كتبغيه ابنتي بلا ماتكدبي على راسك

هبة: كنعذبو معايا

هارون: ماضيعيش الوقت ابنتي الوقت كيجري بزاااف و فرمشة عين اتخسري كولشي دوام الحال من المحال داكشي علاش خصك تستاغلي كل لحظة

هبة: (ناضت ) عندك الحق ابابا ماغانبقاش نكدب على راسي كنبغيه هو ديما كيوقف معايا فالمحنة و ماخلاش باه اكدب عليا ديما كيهتم بيا و كون ماشي مرضي انبغيه من لول

هارون : و شنو كتسناي سيري عندو

...مشات كتزرب تحت نظرات باها لي مبتاسمة ...ركبات طوموبيلتها و متوجهة لمركز...هبطات و حبسوها البوليس لكن سرعان ماخلاوها دوز منين قالتلهم شكون هي ...و بدون مقدمات دخلات عندو للاجتماع لي كان مترأسو و كولشي ضار كيشوف فيها كتلهث و نطقات بصوت مرتافع

هبة: صخر كنبغيك

...كولشي بقا ساكت و هو كيحنحن و يشوف فالرجال و نطق

صخر: الاجتماع سالا تقدرو تمشيو

..ناض كولشي مشا خرج و بقا هو و ياها قرب منها بدون تعابير

هبة: ماسمعتينيش شنو قلت؟

صخر: مامتيقش وذنيا

هبة: كنبغيك

صخر: عاوديها

هبة: كنبغيييييك كنحماق عليك باغا نكمل حياتي معاك ا صخر

صخر:(هز يدها و تحنى باسهم) عرفتي شحال تسنيت هاد نهار احبيبة ههههه مامتيقش

هبة: (عنقاتو) عمرك تخليني

صخر: كنتسطاااا عليك عرفتي شناهي قرب اخرجلي عقلي غير باش نسمعها منك

هبة: و خصني نقولك حاجا اخرى

صخر: شنو

هبة: انا حاملة

صخر: كيفاش

هبة: هاء كيف كيحملو كاع لبنات

صخر: (حط يدو على كرشها باقي مصدوم) هنا كاين ولدي ولا بنتي؟

هبة: اه ههه عرفتها هاد صباح

صخر: هبة باقا مخبيا عليا شيحاجا قوليلي جمعيلي كولشي فخطرة

هبة: لا غير هادشي ههههه

صخر:(هزها كيضور بيها) هههههه كنموووت عليييك اتهبليييني شكرا شكرااا بزاف على هاد لحاجا زوينة لي عطيتيني كنبغييك

هبة: حتى انا اصخر كنبغيك بزااف

صخر: فين تبغي نمشيو همم قوليلي

هبة: فين مابغيتي بغيت نكون غير معاك

صخر: يالاه

...شبك يدو مع يدها غاديين يحتافلو بالخبر و فرحانين ك شوية و يعاود يسولها واش بصح كتبغيه باغي يسمعها بزاف د ألمرآت من فمها ...أما فالمغرب كان طاح ليل و كل واحد فبيتو ..دقات عشق على شفق فبيتها و دخلات عندها مبتاسمة

عشق: كيجاتك بيتك

شفق:(ابتاسمات) زوينة بزااف

عشق: حسن من الحبس ياك؟

شفق: شنو؟

عشق: قتلتي محسن اشفق مكيأنبكش ضميرك ؟

شفق: لا انا مقتلتوش هوما قالولي ماقتلتوش

عشق: كتكدبي نتي لي قتلتيه واش ماعقلتيش؟؟؟

شفق: (كتبكي و تعصر) لا ماقتلتوووش ماااقتلتش اعشق والله ماقتلت ماعاقلاش (شادة فراسها) راسي كيضرني

عشق: (شافتها فديك لحالة و هي تراجع) صااافي صااافي تهدني غير كنضحك معاك راكي عارفاني عزيز عليا لعب

شفق: ماتقوليليش هاكا انا ماعارفة والو

عشق: صافي نعسي ترتاحي ماتفكري فوالو

...خرجات من عندها بعدما حاولات تجربها و باغا تستافزها باش تخليها تنطق بلي هي لي قتلاتو لكن منين شافتها فديك لحالة تراجعات و نفضات الافكار من راسها لكن هادشي مامخليهاش تقطع الشك باليقين ..أما شفق غير خرجات عشق من عندها قلبات ملامحها لابتسامة خبيثة عرفاتها اتجربها لكن دغيا تصرفات و هزات تيليفونها صونات لشهاب

شفق: الو شهاب الخطة نجحات و انا فوسط دارها اندفعها الثمن غالي و نزرع السوسة فعائلتها (بصوت لاذع و كاره) كنواعد راسي اندمرهااا

يتبع...