جوهر الروح الجزء الثالث

دازو أيام وجاو وايام ، واخيرا وصل اليوم المنتظر ، وبعد غياب طويل ، واقف عبد الله عند باب المطار ، كايشوف فالساعة فيدو ويعاود يهز راسو هنا ولهيه كاينتاظر يلمحها بأعين كلها شوق ، بنتو المتوسطة لي زوجها الخاريج ماشبعش منها ، ولي تيزيد يزير علة ديك العقدة فقلبو من جهتها هيا ظروفها لي تتعيش ماعندو مايدير ، قرب لامن المطار واقف فالباب سولو ! خبرو أن الطيارة نزلات ، شكرو وبقى كايشوف بعينيه حيت عندهم ممنوع يدخلو الداخل ، حتى قربات تخوا الطيارة عاد نزلو ، تقريبا بقاو هما الاخيرين بسبب التقل وايضا انهم خلصو البلاصة الأخيرة كاع حيت اقل تكلفة مع اجرائات تمت خارجة قلبها تيضرب دموع ضببو لها شوفة ، اما هو لمحاتها عينو وتسمر كايشوف فيها كيفاش تبدلات وولات وحدة خرا جاية بلباسها المجرجر ، كاتبان رقيقة بحال العود الريح اللي داز يدفعها ، مابقاتش كيف كانت عطاها بحال شي وريدة وولات ذابلة ، تحركو مشاعره كأب وهو مراقبها مرادش البال لأحد غيرها ، حتى وصلات عندو ، وهي تضحك عينيها مدمعيين ممتيقااش واخيرااا ، زربات فمشيتها حتى قربات ليه وتحنات كاتبوس يديه وتضحك وهو باس ليها جبهتها كايطبطب عليها ..

سناء:{تفركعات بالبكا} أبيييي أبيييي ..

عبد الله:على سلامتك آ المرضية على سلامتك ابنتي .

سناء:{زادت باست يديه تتنخصص} الله يسلمك ، توحشتكم توحشتكم

عبد الله:{دوز يدو على راسها} القلب على قلب ابنتي

أحمد: ( مد ليه يديه ) الحاج الصحيحة؟ .

عبد الله:{تمحات ابتسامته وومى ليه} أهلا اولدي! على سلامتكم

أحمد: الله يسلمك .

بعدما سولو على الاحوال عاد سلم عبد الله على حفاده وقلبه كاينبض بالفرحة ببنتو اللي سنين مشافها ، و خولة فالدار كاتوجد وتعاود فرحاانة بختهااا واقفة فالكوزينة ما خلات ما وجدات بابتسامة وخاطر واسع ، حتى سمعات الباب تيتفتح صوت طاكسي نزلات تتجري بشووق وشافت أولادها الصغار لي كبرو نزلت تتعنقهم تبوس ! حتى لمحت ختها بحالتها ضعيفة ، طارت معنقاهاا بالجههد وسناء مبادلاها كاتبكي و تبكي ، الشوق غالب عليهم سنين مازارو بعضهم ، هضرة قليلة كانت كاتضور بيناتهم ، مكايشبعووش من بعضياتهم نهائيا ، ووصل الوقت فين يفديو شوقهم ..

خولة:ختييي ختييي...علل سلامتك و على سلااامتك

سناء:{ كاتبوس فيها تتبكي } الخوخة ديالي ..كبرتي مشاء الله

خولة: على سلااامتتك توحشتتتك توحشتتتك..

سناء:{عاصراها بين يديها كاتبكي } حبيبتييي تااناااا

خولة:{باستها بقووة} ، دخلي دخلي ماتبقايش فالباب ..!

تسمع صوتو مع اباها سلمت عليه بدون للمس و عيونها تترمقو برود

خولة:{شافت فيه و قالت ببرود} السلام عليكم تفضل ..

احمد: الله يزيد فضلك

دخلاتهم الداخل وهي كاتنهد براحة وتجر الشال تخبي زغيبات كايبانو عارفاه مريض فعقلو ، جلسو فالصالون وهي شادة فيد سناء حالفة لا تطلقها حيت هي اللي كاتفهمها رغم كلشي شيء ،..

سناء: ( بلهفة ) هناء مكايناش ؟

خولة:{تحنحنات تتغطي كذبة } دبا تجي! اولاد بمدرسة

سناء: ( تتنخصص تبكي ) عيطو لها! نموت ونشوفها

خولة:{بابتسامة صفراء} ضروري اتجي

عبد الله:{شاف فأحمد ممرتاحش وقال} نمشيو لهيه حسن ..

أحمد: مرحبا الحاج

عبد الله: زيد اولدي هاني جاي ..

أحمد:واخا ..

عبد الله:{شاف فخولة} قولي لهناء تجي !!

خولة:{عقدات حواجبها بانزعاج} أبي دوي نتا حسن معاها ..

عبد الله:{مطول فيها الشوفة} من بعد نهضرو على هادشي ..

هز تيليفونو مدوز الخط لسمير ، دقائق عاد جاوبو وشد معاه الهضرة بعد أخذ وعطاء حشم منو ..

سمير:صافي آ عمي اللي بغيتي غانجيبها عندكم ..

عبد الله:اوا الله يرضي عليك ..

سمير:ويفوت هادشي عندي هضرة معاك اعمي ان شاء الله ..

عبد الله: واخا ان شاء الله ..

كانت طالقة ودنيها كاتسمع وقلبها كايضرب ضريب داخلاهاا الخلعة ديال بصح ، حتى خرج عندها وشاف فيها وهي دارت راسها ماسمعات ما شافت ملهية مع ولدها دوا بنفخة وقال :

سمير:غاتهزي راسك وتمشي لدار باك ،

هناء:{وجهها صفار} كيفاش ؟

سمير: جات ختك وباك معيط عليك .. تفوتي المغرب ماتحتاجيش ترجعي مفهوم ؟

هناء:{تدعقات} اا ..

سمير:مانحتاجش نعاود الهضرة الدراري غانديهم معايا المحل!يوذن المغرب تكوني هنا ..

هناء:{حركات راسها حادراه} اولادي مايشوفو خالتهم ؟ انا مانجلس براحتي؟ اختي سنين ماشفتها..

سمير : المشعوذات بحالك؟ و اللفعات بحالك بزاف عليهم اولاد و العائلة ! هضرتي مع باك

وصلها الباب وحذرها بعينيه وهي نزلات حادرة الراس الدموع مجموعين فعينيها ، هضرتو باقي كاتعاود فودنيها حاسة براسها فمتاهة ماعندهاش طريق الخروج الى وصل الأمر لباها ، فغتكون نهايتها دقات الباب كاتفيبري برجليها ، حتى تحلات من طرف خولة اللي طلعات وهبطات فيها وفسحات ليها الطريق والاخرى غير لمحات ختها زربات فالمشية حتى تلااحت عليها كاتبكي ، و بكاتها معاها معانقييين بحرارة ، الشوق هو اللي غالب عليها والقلوب عامرة ...

هناء:الحنينة ديالليي ..

سناء:{كاتبوس فيها وتعاود ببكاء} توحشتتك آزينييي توحشتتتك ..

هناء:{عطاتها للبكا ماقاداش تحبس} على سلااامتك علىىى سلامتك ..

سناء:الله يسلمك اكبييدة ..

هناء:{هزات فيها راسها} كاين شي خبار على عثمان ..

سناء:{جبدات ليها المواجيع طلقات دموعها} باااقي أختي ماعرفنااه لااا حي لاااا ميت باااقي قلبي كايتشوى عليه ..

خولة:{قربات عنقاتها} صااافي شش ان شاء الله نلقاااوه بسلامتووو ..

سناء:{عضات على فمها دموعها نازلين} يااا ربييي ، حتى ميمتي على من نحط الراااس مابقااات ليااا

هناء:ربييي بغااهااا اختي ربي بغاها..

سناء:{زيرات على خولة} نعيااااو نقاااوموو الرااس كايبقى مهرس

خولة:{تخشات فيها كأنها عطاتها إنذاار باش تطلق دموعها} عمريييي نساااهاااا آ ختي عمرييي ..

سناء:{كاتحاول تمسح دموعها} راهااا عايشة عاايشة فقلوبنا .. الله يرحمها بلا مانحرقوها بدموعنا ..

خولة:{زادت عنقاتها دموعها هوادين} الناار شاعلة فيااا من جيهتها بعداا نتوما عشتوو معاها كثر منييي ..

سناء:{بحزن} نتي العزيزة عليها كثر ..

خولة:{حركات راسها بالنفي} لا كنا بحال بحال ..

سناء:{بابتسامة ذابلة} الله يرحمها يا ربي ..

هناء:{هزات راسها كاتمسح دموعها} ولينا بحال الدراري الصغار ..

سناء:بهدوء} ههه والله ما كذبتي ، السلاك وصافي

خولة:{شدات يديها مزيرة عليها} غاتكوني عييتي ، ياله معايا نسخن ليك دوش تكمدي عضيماتك ..

سناء:يخليك ليلي الخوخة ..

هناء: فين هو با ؟!

سناء:يسمعك تقولي ليه با ، راه الفوق مع حمد ..

هناء: تا داك السووني دراجلك كاين ؟

خولة:{بتمياق} نتي مطفرااه ..

سناء:{تدخلات} صافي ، ياله آ خولة قادي ليا ندوش ..

ناضت خولة وتبعوها بزوج ، وهناء كاتشوف بفضول ، دخلات سخنات الدوش ومشات لبيتها جايبة لاتخوس عامرة ، بكاع داكشي اللي تحتاج وبيجامة جديدة ، وهناء قلبها تقرص وهي كاتشوفها ، كاتمد ليها وتضحك معاها ، بغات تعاون ولكن ماعندها باش هادشي خلا فجوة داخلها لكنها مابيناتش أكيد ، دخلات سناء دوش ، وزادت خولة الكوزينة تكمل على ما بدات وتسخن الغدا ، و هناء تركنات فالصالون كاتخمم على ما بيها ، مرت نصف ساعة خرجات سناء من الدوش كاتشعل ببيجامة جاية معاها ، خصوصا انها رقييقة ، وهادشي كايبينها صغر من هناء اللي عامرة عليها ، واخا هي الكبيرة ، خرجات خولة من الكوزينة فرحانة ..

خولة:{باستها} بصحتووو ..

سناء: الله يعطيك الصحة ..

خولة:نحط لغدا ؟!

سناء: اللي بان ليك ..

خولة:اوا طلعي عيطي لراجلك ..

سناء:{شدات فيديها} عطيهم هو و أبي ياكلو بوحدهم تما راك عارفة ..

خولة:افف باقي معقد ..

سناء:خاولة ..

خولة:صافي ما قلت واالو غير بقاي على خاطرك ..

سناء:الله يرضي عليك ..

حطات خولة الغدا على الطبلة حتى عمراتها ، شمنك يا شلايض وعواصر ، ما خلات ما حطات ، وكلشي بالتاويل وحطات حتى لباها وراجل ختها بوحدهم فالصالون حتى هما بحال بحال مانقصات والو ، مع يديها خفيفة وكاتتقن الحاجة ، تغداو فجو من الضحك والتقشاب ، وسناء عاطية غير الخاطر ، كل شوية تسهى حتى يفيقوها حتى سالاو وناضت تجمع الطبلة وهي تنوض هناء..

هناء:{وقفات} نجمع معاك..

خولة: {بابتسامة صفراء} لا آ حبيبة بلا ماتعذبي راسك ..

هناء:{جلسات معاجبها حال} اللي بغيتي..

خولة:{كاتشوف فسناء باغية تفوج عليها} رقاقيتي ، الرشاقة يا لالة ..

سناء:{بحزن} الهم هادا ماشي الرشاقة

خولة:ماتقوليش هاكا ربي يفرجها من عندو ، مالك تتهبلي

سناء:{تنهدات} اودي آ خولة شري صحتك ، انا الهموم رجعوني هاكا ..

خولة:{حطات الطباسل وشدات فيديها} خوي راسك آ سناء ، شحال قدك ماتعيشي .

سناء: خليها على الله ..

سالاو الجميع وغسلات خولة مواعنها ، حتى سمعات ميساجات فتيليفونها ماتسوقاتش ، بدات تجبد من الثلاجة وتسخن كاتقاد كاسكروط ناشطة حتى سمعات الباب كايدق ، طلات من شرجم الكوزينة وهي تشوف عݣوزتها ولوستها ، خرجات عينيها مغددة ، وهزات تيليفون عاد صرات معاها قضية ميساجات ولقات ..

محسن: حبيبة الواليدة وسامية راه جايين يزوروك على قبل مجية ختك ..

خولة:{طلعات Vu وقالت} يتبعكم البلا نتوما اللي بقيتو ليا ، دار باكم جايين فنهارها الله يخليها قاعيدة ..

حطات كلشي على الطبلة فصمت ، وهما جالسات مع خواتاتها فالصالون ، مفقوصة كاتشوف ختها نفسيتها ما ديال الضياف ، الضحكة وبزز كاترسمها على فمها بقى ليها غير تدي وتجيب فالهضرة ، تحط السخون و البارد ، ورات نيت دارعها الحارة والقادة ، وجلسات حتى هي كاتخوي ليهم القهوة ، كاتسمعهم كايدويو مع سناء ..

مغنية: الله يسمعك خبار الخير من جيهة ولدك ، ان شاء الله يتلقى بصحيحتو ..

سناء:{بتاسمات بحزن} أمين..

سامية:{طبطبات على يديها} الله يكون معاك ، ربي مايخيبكش ..

سناء: امين اختي لهلا يخطيكم شكرا ..

سامية:{شافت فخولة} تبارك الله وعليك و خلاص ..

خولة:{بابتسامة ماعندها خاطر} ربي يخليك ..

سامية: نيت توحشنا ماكلة البلاد ..

خولة:بالصحة والراحة ..

هناء:{تحنحنات} نتي كاتسكني تما ؟

سامية: وي ..

هناء: ما شاء الله ، خدامة شي ولا والو ؟!

سامية:حاليا لا ، مع عندي بنية ياله غانبدا فواحد الفورماسيون ..

هناء:{بتاسمات بصفورية} إوا مزيان الله يكمل ..

سامية:{شافت فخولة} ونتي اش كاديري فحياتك ؟!..

خولة:{جاوبات بثقالة} ياله شديت الإجازة ، الخدمة مجابش الله ..

مغنية:{تكلمات بختورية} اوا ماعندك ماديري بيها ..

خولة:{هزات حاجبها فصمت} ...

سامية:{رجعات شعرها ورا ظهرها} وهي تعرف ، ولكن حقيقةً حتى تما مكاين ما يدار غير بنادم وزهرو..

هناء: اوا بصح ، ولكن خولة ماتبغيش تجلس ..

خولة:{شافت فيها وقلبات عينيها} ..

مغنية: اييه ويانا شكون يونسني ..

هناء:{مخبية ابتسامتها} على ولدكم مغايديهاش معاه لتما ؟!

مغنية: اوا باقي شوية بشوية ، تونسيني شويش ومن بعد يكون خير ..

هناء:والله حتى عندك الحق صراحةً ، تانا فالاول سكنت مع عݣوزتي ..

سامية:، فين كاتكون عجوزتك ؟!

هناء: هي كاتسكن فالعروبية وكنت بقيت معاها مدة عاد جيت مع راجلي للمدينة ..

مغنية: اوا ها العيالات الصبارات الله يرضي عليك ..

سامية: هه زدت رتاحيت على ماما ، حيت متأكدة حتى خولة تنوسها ..

مغنية: اوا ضروري ، عݣوزتها ما تاخد رضاتي ..

هناء:{شربات من كاسها} الا ماخدمات ..

مغنية: شمن خدمة الله يهديك ، ها هي عندها راجل كامل مكمول ، يوفر ليها اللي تشهات خاطرها ..

هناء: وي بصح ، المرا ماعندها لاين من غير دار راجلها ، ماعندناش ما دير بشي خدمة تخالط غير مع الرجال ، والرجال عينيهم زياغة وعيبهم واحد ..

سناء:{شافت فخولة اللي كاتغزز شفايفها} احم ، ربي يدير اللي فيها الخير وصافي ..

سامية: وي ڤغي ، حنا غير داويين..

مغنية:{شافت فخولة} شوفي آ بنتي ، محسن قريب يتسالا ليه الكونجي ، خاصكم تسرعو شوية الأمور ..

خولة:{بهدوء} شوية بشوية ..

مغنية: ايه بصح ، ولكن هو ما باغي يطلع تايكون عقد ، وجابك لدارك ..

هناء:{نقزات} ايه بصح ، الخطبة اللي تطوال مكايبقى ليها معنى ...

مغنية:ها المعقول ، اش قلتي آبنتي جمعتي شي وراق ؟!

خولة:{كاتصبر راسها} باقي ..

مغنية: اياو واش كاتسناي ؟!

خولة:{محنية كاتاكل بشوية} دابا نجمعهم ..

مغنية: اوا سربي شوية الله يرضي عليك مقالكش محسن ؟!

خولة:{بنكران} الا ..

مغنية: اوا ها هي فبالك ، هو قريب يطلع لفرانسا ، باغي يرشمك هو الاول باش تمشيو فراحتكم ..

خولة:{فنفسها: غريبة انا يرشمني} واخا ان شاء الله ..

بقاو هما دودودو كايقررو فحياتها ، وهي ساكتة وكاتعبر بعينيها كاتعيا تلعن الشيطان ولكن بنادم مكايوقرهاش ، حسات بالدغل اللي فيهم كايوصلها وهي بكل هدوء كاتشرب فالقهوة وتنخوا عليها ، ومخها خداام شغلو مزيان ..شربو قهوتهم ، وسناء أولادها ناضو وراجلها تيعيط لها استأذنت منهم طلعات ، اما خولة عاطية صواب بسيف حتى ناضو مشاو و بقات هي و هناء جالسين

خولة: ( حسبت هضرة و طلقاتها ) شوفي نقول لك واحد هضرة! انا راه مازوجتك بسيف لسمير؟ ماقطعت عليك الخلصة ؟ ما خرجتك من مدرسة! حتى حاجة فهادشي لي تتعشيه مانا سبابو ، ويلا فنظرك هاد نفاق ديالك مع عائلة خطيبي ايبيعني العجل فهاد زواج ؟ راكي غالطة و هااااا عار بزولة اللي رضعنا مافرقي جرتي الله يعفو عليك

هناء : ( قلبها كايتعصر ) محيت جلست معاهم و كبرت بيك قدامهم !

خولة: انهضر نتسمى خايية ! ولكن ربي راه كايشوف وكاين لي اكثر من هادشي هو دماغ لي عندي حامدة عليه الله يخطاني غير كحل راس

مع قرب آذان المغرب هزات هناء جلايلها وخرجات ، وداز الوقت ودخلات خولة الكوزينة كاتقاد العشا ، وسناء فبيتها كاترتاح بعدما نعسات ولادها حيت عياااو ، جاو من الجامع بعد صلاة العشاء ، وحيت مكايبغيش يجلس معاها حطات ليهم هو و باها للجنب بحال قبيلة وهي وختها وولادها الجنب ، كلاو وحطات ليهم الديسير بقلب صافي من جيهتها ، طلعات سناء لبيتها توضات و صلات صلاتها ، طولات فالسجدة كتافها كايتهزو كايدلو على بكائها سلمات وبدات كاتدعي ودموعها كايهبطو بحال الشلال ، قلبها محروق ديال بصح حاسة براسها وصلات لواحد المرحلة ديال الانهيار كبيرة ، كاتخمم هنا ولهيه كاع تفكيرها على ولدها وحالتو وقلبها مقطع من جيهتو ، حتى دخلات خولة ، شافتها بديك الحالة تنهدات وطاح عليها الضيم ، جمعات هناء السجادة ، ووقفات ودموعها نازلين كاتحاول تحبسهم عنقاتها خولة وقالت ..

خولة:{دوزات يديها على راسها} خوي خوي ، ماتخلي عندك والو .

سناء:{بدات كاتبكي بحرقة} عيييت آ خولة عيييت قلبي كاايتحررق علييه كاايتحررق ، ماااعرفتو حي ولا ميت ، غير يبااااان غير يبااان قلبي يهنااا من جيهتووو ..

خولة:شش شوفي ، الجثة مكايناش يعني راه كااين كااين ..

سناء:{حركات راسها بالنفي منهااارة} لااا آ خولة لااا ، الاا كان حي معذب ، انا قلبيي حاس وحاس باللي بيه شي حاجة ..

خولة: نعلي الشيطان آ حبيبتي ، ربي يفرجها عليك ..

سناء:{طاحت على ركابيها كاتبكيي} انااا اناا اللي درتها بيدي دفننت راسي فالتزوييجة دالوييل ، وهاااني كانخلص ..

خولة:{نزلات حداها} ماتقوليش هاكا كلشي بالمكتااب ، كلشي غايتصلح ان شاء الله كلشيي ..

سناء:اش غايتصلح اش اش ، معذببةة وعذبت معاايا ولااادي ..

خولة:{طبطبات عليها} الله يفرجها من عندو ، عليك غير بالصبر ..

سناء:شحاال قدييي ، {شدات يديها مزيرة عليها} بقاااي كيمااا نتييي عمرك تتبدللي فهمتيي عمرك تحني راسك ..

خولة:{تنهدات} الدنيا غدارة آ ختي غدارة ، الوجوه كايتبدلو بين ليلة ونهار ..

سناء:{حركات راسها بلا كاتمسح دموعها} الا كنتي ذيبة ماتديرش بيك ، عنداك و عندااك تعقدي وتخلي الراجل لهيه وتضربي الجفاف ..

خولة:تانا مابانليش آسناء مابانليش ، الناس فيهم الدغل ..

سناء:تعشاي بيهم قبل لايفطرو بيك ..

خولة:ماعندي مانتعشا ، كانشوف بعيني ونوزن ..

_صوت من الخارج:سناااااء سناااااء ..

خولة:{شافت فيها} اش بغا ..

سناء:{خرجات عينيها} ششت ، خرجي عندو ڨولي ليه شربات الدوا و نعسات ..

شافت فيها بقلة حيلة وناضت كاتجر الشال على شعرها وبقاو زغيبات خارجين ، وحلات الباب لقاتو قدامها طلعات فيه وهبطات وهو شاف فيها ودور وجهه كايستغفر الله ، باغي غير سناء اللي مولف وجودها معاه ، خايف تبات مع خولة وتقلب ليها الراس.. !

خولة: شنو بغيتي ؟!

أحمد: عيطي لسناء..

خولة:سناء ناعسة !!

أحمد:فيقيها!

خولة:{تأفأفات} افف خليها راه شربات الدوا ..

أحمد:{باصرار} لا غير عيطي ليها ..

خولة:{خرجات عينيها} قلت ليك ناعسة حتى لغدا ..

سدات عليه الباب فالوجه ، وخلاتو كايتقلا ، لقات ختها جلسات على الناموسية مغطية كاتلعب فيديها ، عرفاتها ممرتاحاش معاه ، طلعات حداها وتخشات فيها حاطة راسها على صدرها ..

خولة:سمحي ليا ولكن سيفتو كاتخلعني ..

سناء:على غا نتي .. !!

خولة:{بعد صمت} ماللي ممرتاحاش لاش باقية معاه ..

سناء:على قبل ولادي آ خولة على قبلهم حساب ليك بخاطري ..

خولة:درتيها راسك ، علاش مكاتشربيش البيلول ؟؟

سناء: راه تانشربو ممفلتاهش ولكن دوا الاعصاب قهرني كايبطل المفعول

خولة:طلقي منو آ سناء ورجعي للدار أبي راه يهزك فوق الراس ..

سناء:ولادي آ خولة واش نجي ونفرقهم على باهم ..

خولة:{تݣعدات} هاد الهضرة اللي كاتقولي فيها هي اللي خلات ولدك يهرب منك قاسح حسن من كذاب ، ها هو أيمن يكبر حتى هو ويتحلو ليه العينين !!

سناء:{قلبها تهز} الله يحفظ ، عثمان هرب بسبب الداخلية علم الله اش كانو مدوزين عليه { دموعها هبطو} ..

خولة:ولاش مدخلينو الداخلية ؟! ناقصاكم شي حاجة ياك غا ماكلة اش تزيد ..

سناء:كاتضحكي عليا ، واش انا اللي مدخلاه ، فعايل باه الله ياخد الحق ، جغمة الما لا هبطات فالحلق ، كايتحاسب عليها ، فراش عݣوزتي فاش عايشين !! وحسبي معايا من فوقاش وهي توفات الله يرحمها ..

خولة: لا حول ولا قوه الا بالله ، الحبس هادا ، سناء توݣضي وديري حل لراسك من الاخر ، الحل فيديك دابا تحافظي على ولادك وتبقاي فدار باك واكلة شاربة ، مزيان ماباغياش ها نتي ها العافية ..

سكتات سناء كاتنهد عارفة باللي ما قالت في الحق ، دماغها مشتت كاتخمم ، وهو خولة عاقدة حواجبها من داكشي اللي سمعات ، مكاتحملش الحكرة نهائيا ، تنهدات وتقادات فالفراش وطفات الضو ..تسمع صوت مساجات طلت خولة لقاتهم من محسن هبطت شاشة من فوق قرات لي طلع لها وحطت تلفون و تتخمم و تخمم اشمن طريقة لي تفك منو !! طريقة لي تخلي لعيب يجي منو ! طريقة لي تقول هدا السيد مايصلاحش ليا ! طريقة لي اباها مايلومهاش ويقول كولشي قسمة و نصيب ، فتحت انسطا طالعة نازلة ضربت فمنشور جاهد حاط صورة قرآن وكاتب عليها كلام تيريح القلب دارت ليه جادوغ و فالبلاصة رسل لها مساج

جاهد : منورة يا خولة

خولة ببرود عاقدة غوباشتها ،و حطت تلفون تتهضر بهمس

خولة : فدانمارك و داير للحية و متدين انت الا تبعتك تسكني فقفص ولا تجيب عليا الضرة بحجة تعدد

دازو ثلاثة ايام الحال على حالو ، واقفة خولة فالكوزينة كاتوجد الغدا ، وسناء فبيتها مع راجلها ، رتاحت كثر فدار باها و تهنات شوية من التمارة ، جالسة على السرير كاتلعب فواحد الخيط فيه وهو جالس حداها ..

حمد:مكاتشوفيش راسك عيقتي شوية ..

سناء:{تنهدات} مالك آ حمد آش بغيتي ؟!

حمد:كيفاش اش بغيتي ، من نهار جينا ونتي قاطعة معايا الفراش ! كانعيا نلمح ليك والو ..

سناء: واش وقت هادشي ؟! ولا بلاصتو ولا حتى گانتو ؟ مكاتشوفنيش مكوية على ولدي ونتا كاتقول ليا لاش فارقة معايا الفراش ..

حمد:ولدك دارها بيدو ماشي انا اللي قلت ليه قطع البحر ..

سناء:{عينيها تحقنوا بالدموع} اللي عايش ديك العيشة مغاديش غير يقطع البحر يلوح راسو من السطح ..

حمد:ياك الآلة اش ناقصكم بالسلامة ؟! شاربين مكسيين ..

سناء:{باستهزاء} اه بصح نسيت سمح ليا..

حمد:{ساط} افف ، ياك شفتي باك وشبعتي منو مناوياش ترجعي لدارك ؟!

سناء:{بعدم تصديق} هههه شنو ، نرجع واش أنا أبي 5 سنين ماشفتو فالاخر نجي ف 3 ايام ونرجع ..

حمد:اوا سكني هنا حسن !

سناء:{بهدوء كاتلعب فالخيط} نتا تواصل مع البوليس اللي تما على قبل ولدي ، وكانحلف ليك لو كان يكون بصح مات ، {مسحات طرف عينيها} مغاتهمني لا نتا لا غيرك ، ماتطمعش بيا مزال ..

حمد: اش هاد الهضرة الولد الا مات بغاه الله ، وانا لاش باغية تدخليني فحساباتك ..

سناء:{بصوت هادئ} يمكن تكون عارف باللي صابرة على على ولادي ؟ مانحتاجش نقولها ..

حمد:وعلاش هما ؟! كيما كاتبغي ولادك بغي حتى باهم ..

سناء: باهم مايستاهلش ..

بلع ريقه ووقف تزير ، وجهه تبدل فيه اللون حرك راسه بالايجاب وخرج ، وهي تسرحات تما كاتنهد كثير من 15 عام ديال العشرة وقلبها بارد من جيهته ، عكسه هو اللي يقسى عليها حتى يعيا كاتبقى ليها مكانة خاصة فقلبو ، مكاينش اللي صبرات معاه قدها هي ، عيطات ليها خولة تتغدا ودازت عند ولادها كانو كايلعبو وهبطاتهم معاها ، تغداو فجو صامت وطلع احمد الفوق مع ولدو ، وهو يتوجه عبد الله جيهتهم كانو جالسات وخولة هازة رقية فحجرها كاتلعب ليها فشعرها ..

عبد الله: آ بناتي ، انا غانشد الطريق البلاد ضروري ...

خولة:ياك لباس ؟!

عبد الله:عندهم تما شي مشكل على الارض دغيا غادي نرجع في نزور نشوف

سناء:الله يعاونك ..

عبد الله: اللهم أمين ، نتوما جلسو هنا بزوج توانسو ، و سناء هادي دارك مانحتاجش نوصيك كلشي ديالك آ بنتي ..

سناء:لهلا يخطيك أبي عارفة اللي كاين ..

خولة:فوقاش غاتجي ؟!

عبد الله:نشد الطريق مع الفجر ..

خولة: واخا الله يوصلك بالسلامة ..

عبد الله:{حرك راسه} أمين ..

خرج من تما ، وهي تحط خولة بنت ختها على الكرسي وتبعاته للباب كاتلعب بيديها وقالت ...

خولة: أبي ..

عبد الله: نعام آ بنتي ..

خولة:تاصلات بيا ماين محسن بغات نخرجو نختارو خاتم ..

عبد الله:ماعندك فين تمشي فغيابي ، وهاد خيطي بيطي عارفاني ماعنديش معاها ، وعلى هاد الخاتم حتى تعقدو وسيرو ديك الساعة ..

خولة: واخا أبي اللي بغيتي ..

دخلات الداخل ابتسامة على وجهها ، جمعات الطبلة وغسلات مواعنها ، وهي تسمع التيليفون كايصوني هزاتو من جيب الطابلية شافت نمرتو وهي تقلب عينيها وجاوبات ..

خولة:آلو ..

محسن:الزين الصافي ..

خولة: وي محسن ..

محسن:مالك البارح عييت نصوني ليك والو ، كاينة شي حاجة معارفهاش ..

خولة: لا آ محسن راك عارف الضروف عندنا شوية وصافي ..

محسن:{تنهد} واخا الالة .. مانتشاوفوش ..راه واليدة مصدعاني نخرجو نتقضاو

خولة:أبي مكاينش !! مايصلاحش

محسن:هادي هي الفرصة ، ناخدو راحتنا ..اش قلتي ؟

خولة:{دوراتها براسها} و الله ماعرفت ! ولكن تجي تهزني من الباب دار

محسن:واخا احبيبة شوية تلقايني عندك ..

قطعات عاقدة حواجبها ناوية على خزيت ، وطلعات لبيتها كان راجل ختها ناعس فوق ومشات عند ختها شادين الحديث ، حتى سمعات صوت سيارة و صونيت فالباب ..

سناء:{بإستغراب} شكون يكون ؟؟

خولة:{ببرود طلت} هدا محسن! ابي خارج تيوصي منشوفوش ، شوفي هو باغي يخسر ليا وجهي مع ابا ! اش بيني بينو

سناء: ابا راه مايبغييييش !

خولة: عرفتي اش ديري طلعي عند احمد! قوليه راه جا قلل علينا العفة

سناء: متاكدة ؟ خلي الما يدوز اخولة

خولة : راجل لي مايحترمش غيبة ابا ماعندي ماندير بيه ! راه قالها لهم فخطوبة هاد ولاد خاريج باسلين قولي راجلك يهبط عندو ندير عليه شاهد! هادشي ماعدناش فعائلتنا

الجيران كايطلو من الشراج وهو رافع جلايلو شانق عليه ، مخرج فيه عينين كايخلعوو ، حتى سيفته ولحيته الطويلة ماتعرفو علاش طاوي، كايحاول يحيد ليه يديه من عنقو باش يتفاهمو باللاتي هي احسن ..

محسن:حييد آ صااحبي من نييتك ..

حمد:{مخرج فيه عينيه} آش كاادير هناااا حساب ليك مكاينش الرجااال فهاد الدار ولا شنو ...

محسن:واش من نييتك آ الزبل حييد {دفعو} ..

حمد:{رجع شنق عليه}ماغاااديش نحييد ، مكااتحتاارم حرمة دار حد هااا حساب ليك السييبة هنااا ولا كيفاااش ..

محسن:{كايشوف الناس كايطلو ماحملش راسو} واش انا جاي نشوف خطيبتي وصلنا لهنااا ..

حمد:خطيببتك شنووو هي خطيببتك ، عااقد علييها هاا دوي ؟{ضربو لوجهو} ..

محسن:افف شيييت ، جمع يديك عنددك أسااط لا نخربوهاا هنااا ، وعيط ليا لخولة ..

حمد:{نطحو بالراس} بااااقي زاايد فيييه ، اليوم نعاااود ليك التربية ..

محسن:{شد راسو} مرييض نتاااا اللل..{عض على فمو} دابا خلينا نتفاهمو غير بالعقل هاد الطريقة ما خداماش ..

حمد:ماتقولش لياااا انا هااد الهضرة ، اش جااي ديير هناااا ..

محسن:{تعصب وشنق عليه حتى هو} مابغينااش نديرو فعاايل ولاد الزنقة ولكن نتااا مخليتيي لياااا فين ندير الوقااار ..

حمد:جممع يديييك لعنة الله واااعلييك الكاافر ، جاااي لووسط الداااار بااغي تشووف ولية منااا ، حساب ليييك كاع الناس ديووثيين بحالك ولااا كيفااش ..

محسن:{بغا يجمعها معاه وهو يتدخل واحد السيد جرو} طللقق طلقققق نوريييه الديووث شكووون هووو طلاااق ..

الجار: الله يلعن الشيطاااان ، اش هااادشي ..

الجار 2: عمر هادشي كاان هناااياا ..

حمد:شهدووو الناااس شهدووو جااي حتى لباااب الداااار ..

محسن:وااش نتااااا مريييض آ صاااحبييي ، شكون دواااك ، خااااولة خااااولة اجي شرحييي ليهم ..

حمد:{كايتفك من يدين هاداك اللي شادو} باااقيي زااايد فيييه ...

الجار:{جروو بعيد} صااافي آسيدي ، الله يهديك نعل الشيطان ..

حمد:{كايدوز يدو على راسو} أستغفر الله العظيم ..

فالدار وورا الباب سناء شادة على راسها كاتولول ، و خولة شادة الضحكة بزز ، دايرة راسها مقلقة ، و حاطة يديها على فمها ..

سناء:ويلي ويلي اليوووم يقتلوو ..

خولة:لا ماتخافيش تا نتي ها الناس كايفكووهم ..

سناء:اففف واش هاداك من نيتو جاي لهنااا ..

خولة:باغي يكسر كلمة أبي البسالة والله صدمني ..

سناء:بزاف على قلة الحيا يجي ابي دوي معاه ساليو هادشي ..

خولة: غا خليها على الله ،{مصطنعة القلق} عندك يضرب حمد ؟!

سناء: اش غايضرب فيه وهو كي الغول ..

خولة:{شدات الضحكة} الله يخرجها على خير وصافي ..

سناء:ماتقلقيش راسك ربي يدير اللي فيها الخير {طبطبات عليها} ..

خولة:{بحزن} آمين آ ختي ، كثرو ولاد الحرام ..

سناء:الله يهدي ما خلق ..

دخل حمد الدار طالع ليه الدم ديال بصح ، كل شوية كايستغفر الله ، تلقات ليه سناء شار ليها تبعوو، تنهدات بلا خاطر وناضت وراه كاتتنهد ، داكشي اللي بقى ليها غايكمل ..

حمد: هاد ختك مكاتحشمش جاية راجل تا لباب الدار ..

سناء:اش قلت ليك آ حمد ، ماشي هي اللي جابتو راه هادا خطبها و ابي قاليها ماتخرج معاك تاتعقدو وهو ستاغل الفرصة وهي مابغات تخرج عندو ..

حمد:الله ينعل بوه الحمار ، عصبني ..

سناء:{شدات يديه} صافي غير تهدن مايستاهلش ، مابغيتش ندخلك فمشاكل عائلتي ..

حمد:{شاف فيديها شادة فيه وهو يحط يديه عليهم} تا انا عائلتك ..

سناء:{جمعات يديها} اححم المهم نخليك نمشي نشوف خولة ..

حمد:خليك معايا ..

سناء:{دارت راسها ماسمعاتوش} ..

حمد:سنااء ..

خرجات وسدات الباب ، قلبها بارد من جيهتو ، ماللي شافت راسها فدار باها محمية ها هي كاتصرف كي بغات ، وراسها غايطرطق بشلا مطارق كل حاجة تجرها من جيه والجهد اللي تكافح بيه قريب يسالي ..

جلسات مع ختها فالصالون كايديو ويجيبو فالهضرة ، حتى تسمع الدقان فالباب عقدو حواجبهم كايشوفو فبعضياتهم ناضت خولة ياله غاتحل الباب وهي تسمع صوت الغوات وهي تخلط عليها سناء كايسمعو ..

مغنية: حلووو علياا البااااب ، فيينك فيينك الخلااطة ، اللي طاامعة فالخاارييج ، الااا كنتي مرا مأصلة خرجييي عندي نوريييك ، يااا اللي باغااا تقلب ولدييي ، يااا اللي تطلب وترغب بااش يجيييي يخطبها ، ااارباااعة السحااارين ، ياااا اللي عينييهم كبييررة وهمااا مكحطييين ، خرجيييي والله لاااا بقااااات فيييك والله لااا بقااااات تضحكي ليااااا على ولدي ..

أمينة:{جات كاتلهث جراتها} نعلليي الشيطان الحاااجة ..

مغنية:{كشاكشها خارجين} شييطااان هو بناااادم ، تررد لياااا الدري دمدوومة اش كاتحساب فراااسهااا ، وااا هو راااجل رااااجل وسيد الرجااال رااااجل علييك وعلى باااك وعلى تريكتتك ، آ الطماااااعة ، آ اللي نييفهاااا فالسماااا حااسبة راااسها نعاامة وهيي غااا فرووج ، {هزات يديها كاتحلف} ماااتبقاااش فيييك والله ماتبقى ، الااا خليتها فيك راني مااشي مغنية الفاكناسية ..

أمينة:آ ختي مغنية الله يهديييك ، وجهك ماا دياال هادشي ..

مغنية: وجههم همااا اللي ديااال هااادشي ، تضحك ليااااا على الدري ، حسااب لييك شااايط ولااا ماعندو موو بحااالك ...

خولة:{تحركات معصبة باااغية تخرج وهي تشدها ختها} طلقيييي نمشييي نورييي لااصل مها ماعندي ميي طلقييي ..

سنااء:{شاداها} خولةة ، تركنيي ،اصااحبتييي ديري عقللك فيها ..

خولة:{دوزات يديها على وجهها} مصيفطها دااك ولد موو غير بلاتتي علييه ، الحْمااااار ، تفووو ..

آمينة:{جراتها} زييدي برااااكة الناس كاايطلووو ..

مغنية:{كاتلهث} كاايطلووو مزيااان ، مزيااان يعرفو وجهها ، بنت الحراام مقططرة هااديك ..

آمينة:شوفي الحاجة سيري نتي دابا الدار ، ماتعصبيش رااسك ونتي فيك السكار ، انا جاية ورااك تفهميني ..

مغنية:{ضحكات مغددة} غااانمشي ، شفتي كاع ماعندهم النفس كون كانت عندهم تخرج عندي ..

آمينة: يا ودي غا زيدي ..

مشات مغنية كاتعکز على عودها ، وتݣمݣم كاتحلف عليها ، وهو كايستناها فراس الدرب بطوموبيل آخرى ، كل مرة يبدل حيت ماشي ديالو غير كايكريهم ، رجعات أمينة للباب كاتستغفر الله ودقات ..

أمينة: بنتي خولة ، حلي الباب هادي انا ...

خولة:{حلات ليها الباب وجهها حمر} مرحبا بيك آ خالتي ..

أمينة:{دخلات الداخل} شرحي ليا آ بنتي اش واقع ..

خولة:آ ودي بنادم مريض وصافي ..

أمينة:{جلسات فالصالون} لا حول ولا قوه الا بالله ، يجي باك وفكو الصداع ..

خولة:ماعندنا ما نفكو ، كلشي سالا دابا يعطيوني التيساع ..

أمينة:دابا غير قولي اش وقع باش نعرف ..

خولة:اللي كاين آ خالتي با شارط مكاين خروج قبل العقد وهادا هو المعقول ، السيد لقى الغفلة با مكاينش جا بطوموبيلتو تا الباب ! مافكر ليا ولا لبا باغي يغفلو عيني فعينك ، ونزل ليه راجل ختي ، وها نتي تشوفي دابا جاية مو كاتعاير ..

أمينة:{تنهدات} اوا اش غانقوليك ، اللا مغنية هادي طبيعتها اللي مايعرفها مرا حارة وصعيبة ، ماتصرطش ليا راجل ختك ينزل قالك سبو وضربو ..

خولة:لواه ، شوفي آ خالتي نجيك نيشان حنا هادشي كاع ماعندنا فالعائلة ، عمر تسمع حسنا منوضينها مع حد ، حتى جاو هادو حنا نوينا الحلال وحلينا ليهم باب الدار ، شركنا الطعام ، ماعندي مانقول سوا حسبي الله ونعم الوكيل ..

أمينة:الله يهدي ما خلق , درتي خير ماللي ماخرجتيش ، غير داوية خاوي وكان ..

خولة:{تنهدات باسى} كون كانت عندي ميمتي هي اللي تخرج تدافع عليا ..

أمينة:{طبطبات عليها} حسبيني ميمتك ، ربي يحاسب كل واحد ..

خولة:هادشي اللي كاين اخالتي ..

أمينة:{شافت فسناء} سمحيلي آ بنيتي تلهيت عليك ..

سناء:لا هانية عارفة اللي كاين ..

أمينة:الله يطفي نارك من جيهة ولدك ويسمعك خبار الخير ..

سناء: اللهم أمين لهلا يخطيك شكرا ..

أمينة:{وقفات} نخليكم دابا مشا الحال ..

خولة:لا لا جلسي تشربي معانا غير كويس دأتاي وسيري ..

أمينة: مرة أخرى ان شاء الله ..

خولة:{ناضت موصلاها للباب} ان شاء الله ، واحد سهيلة اش خبارها ..

أمينة: مسافرة هاد ساعة مشات تفوج شوية ..

خولة: اوا واخا مزيان الله يسهل ..

بعد مرور أيام قليلة ، داخل للدار مهلوك مخو مشتت ، ماشي بزاف باش مشا للرباط دا ولدو تما دارو ليها غسيل المعدة ورجع ، واخا هاكا باقي مريض ، وماحيتو لهناء الله مابقى مرتاح معاها نهائيا حتى ماكلتها مكايقيسها، وها هي مو طاحت فالصبيطار مرييضة ياله جا من عندها ..

سمير:هناااء هنااااء ..

هناء:{بقلب كايخفق شحال ما دوا معاها} نعام ..

سمير:{بلا مايشوف فيها} تهزي جمعي حوايجك غاتمشي تقابلي مي ..

هناء: مالها؟!

سمير: عيانة وخاص اللي يقابلها ..

هناء:{خرجات عينيها} فالعروبية ؟

سمير:{باستهزاء} الا فالميريكان ، تهزي من الهضرة خودي معاك دراري الحبيب يبقى معايا ..

هناء:{حطات يديها على نصها} نعاام ههه زوينة هادي بنت ليك خدامة ؟

سمير:وباقي ليك الوجه اللي يتقابح ؟

هناء:شووف اسمير صابرة ليك على النخاال وحشيان الهضرة وكلشي ، ولكن باش تخيلي زوج عيالات خوك وتجي عندي انا نهز ليك مك ، راك زدتي فيه ..

سمير:{خرج فيها عينيه} غاتمشي ويدييك فوق راسك مزيانة هادي ؟

هناء:مغاادااش هي مغاادااش ..

سمير:{هز يديه} شوف ليك السحاارة كاتقابح مابقيتي تحشميي ..

هناء:{خبات وجهها} بزاااف عليك قالك سحاارة ، كوون ما كنت بنت الناااس كااع مانصبر لواحد بحالك على فعايلو الكحلين كي وجهوو ..

سمير:{ضحك مغدد} اما لاكانو فعايلي كحلين نتي شنوو ؟ نسيتي راسك ..

هناء:كيما كنت نكون ، قولباتك المرا الولة وجاي تفديهم فياا ..

سمير:هه مرتي اللولة ؟ نتي شوية لبااس مطلق هادي كثر من 15 عام ، وجاية تعايريني بيها ..

هناء:{بسم} اااه تستاااهل ، تباارك الله عليهااا ، كون بقات تابعااك تخرج عليهاااا ..

سمير:غاانضربك آ هناااء ماتجبديهاااش على فمك ..

هناء:اووو بصصح ، مابغيتيش نفكرك فيهااا.

سمير:هناااء جمعييي رااااسك ...

هناء:الاااا حساااب لييك غانخليييك تضربني رااااك غااااالط بزاااااف وغاااالط ، انا مابقييتش ديك الحمااارة اللي ساكتة لييك ، باااقي تقيسني نوصل معاك المحكمة ..

سمير:{باستهزاء} طلقي زعما ؟!

هناء:{بتحدي} اااه غانطلق ..

سمير: اوا هي دابا اش كاتستناي ..

هناء:{دموعها تحجرو فعينيها} ياك آ سمير ..

سمير:باش نكونو مفاهمين نتي راك طلعتيي ليااا فراسي وفتي لهيه كون ما على وجه الدراري كون سالينا من زمان ..

هناء:هي داباا مانبقاش عاايشة مع صننم ..

سمير:تتنازلي ليا على المستحقات من غدا اللي بدا يسالي ..

هناء:نتنازل ؟ وشكون يصرف على الولااد ؟

سمير: ماللي باغية الطلاق اذن قادة بولادك ..

هناء:هاادشي حيت مابغيتش نقاابل مك ؟!

سمير: هادشي حيت نتي ماشي مرااا كون كنتي مراا وراضية باللي قسم الله ، ماكنتيش غاتمشي عند سحارات ، كون كنتي مراا عمرك تقارني راسك بمراا غيرك ، وكون كنتي بنت الناس وقلبك صافي كاع ماتغيري من ختك اللي كانت غاتكون قد بنتك ، الهضرة بيناتنا سالات ، عندك زوج حلول من هنا العشية ، مانلقاكش هناا وسيري وخلي لياا ولادي ولا جمعي حوايجك نديك عندك عكوزتك على الله يغفر ليك الله من طريقها والسلام عليكم آ بنت الناس خسارة تربية باك فيك ..

دخل الداخل وخلاها واقفة حالة عينيها مدمعين اللي بداو يتسرسبو بالدمووع ، بدا يرجع معاها حالها ، بدات تفكر شنو دارت فحياتها ، الندم كاينهش فيها ، شهقات بصوت عالي كأنها فاقت من دوامة كبيرة كانت فيها ..

هناء:{حركات راسها بالنفي دموعها هابطين بغزارة} نتي ماشي هاكا آ هناء ماشي هاكاا ، ماشي هاكا رباك باباك ، ماشي على هادشي اللي وصاتك ماماك ...

مسحات دموعها واثار الندم ختافاو ، رسمات نظرة قوية وزادت للبيت كاتجمع حوايجها حوايج ولادها ، جمعات كلشي ما خلات حتى حاجة كاضور ، وبدلات ليهم حوايجهم وهزات الباليزة ، وجلسات فالصالون. ، حتى خرج من البيت ..

سمير: هي درتي عقلك ..

هناء: ديني لدار با !

سمير:{باستهزاء} صافي دغيا هانت عليك العشرة ؟؟

هناء: نتا اللي بغيتي !

سمير:الما و الشطابة لقاع البحر ! خليو ليا ولادي !

هناء: قادة بيهم و الحمد الله !

سمير:واخا الآلة ماقلتي عيب تتنازلي ليا على الحقوق ؟!

هناء:{بتحدي} تا مانكون هناء بنت فاضمة بغيتي طلق حط ليا فلوس النفقة ..

سمير: ما غانحط سانتيم لاا ! خليك معلقة تما ..

هناء:ديني لداااار بااا ..

سمير:شيفور انا ؟!

هناء: على قبل هاد الدري المريض ، أما مانحاشيها لخليقتك ..

سمير: هاد الدري المريض نتي اللي مرضتيه..

هناء:{غوتات} ماتعصبنيش كثر من هاكااا ..

سمير:{هز يديه} الله ينعل طوواسل مك ، انا ترفعي علياااا صوووتك التريكة الناقصة ..

هناء: بااااغي تضرب تاني ضررب زيييد ضرب هادشي فااش حاادگ ، لقيتييني كنت لييك مدلولةة وصااابرة لييك على فعااايلك وهضرتك اللي كي السم وصااابرة على الجووع اللي معيشيني فيه ..

سمير:انا انا معيشك فالجووع انااا ؟؟؟!

هناء:اااه نتااا اللي تاتعااايرني بختي ، نتااا اللي كون كنتي رااجل عمررك تخيلييي مرااتك تغير من شي مرااا خرااا ، عمرررك تخليني نشوف فحاااجة غيري ..

سمير:أناااا رااه كانحيد من لحمي ونعطيك ..

هناء: اش كاتعطيني اش اش عطيتيني فهاد الدنيااااا ؟ الاا كانو الر•جال فيهم خصايلك ف الله انعل الر ••جال ومايجي منهممم ..

مني منك وولادهم وسطهم كايشوفو بذعر ، خرج هو الاول عاد تبعاتو حتى هي طالع ليها الدم ، ركبو فالطوموبيل ونطاالقو ، حتى وصلها للدار ونزلاات ، وهو كسيرا ، دقات الباب وقلبها ضارها حتى تحل ليها من طرف خولة ..

خولة:و عليكم السلام ..

هناء:بعديي منيي آ خولة ماناقصاكش ..

دخلات الداخل وتبعاتها كاتضحك بتشفي فهمات البلان وهناء طلعات ديريكت الفوق عاد رجعات خولة وجلسات فالصالون فين كان جالس باها وختها ..

سناء:مالها ؟

خولة:{همسات ليها} هاكا كاتقيل غادية جاية غضبانة الله يصبر داك الراجل ..

عبد الله:مالها طلعات ديريكت ؟!

سناء: تقدر تكون عيانة ..

عبد الله: اوا الله يفرجها ..

خولة: أبي خاصني ندوي معاك فواحد الموضوع ..

عبد الله: مرحبا آ بنتي ..

خولة: على قبل دوك الناس ..

عبد الله:{عقد حواجبه} عاود ليا السي عبد الرحمان !! الخبار ماخلات فين وصلات !

خولة:{بتمسكين} أبي راه هما السباب ! ماكفاش ولدها اللي جاي تا لباب الدار بالطوموبيل مافكرش باللي غايدير ليا الشوهة, كملاتها هي اللي تبعاتو كاتسب و تعاير فيا ، وجبدات ليا المرحومة ..

عبد الله: لا حول ولا قوه الا بالله ، الحمد الله مازربنا ، عرفناهم على وجههم .. ياكما نزلتي عندها ؟!

خولة:لا مالي حماقيت ماخرجتش عندها كاع ..

عبد الله: الله يرضي عليك خير ما درتي ..

خولة: نحط الغدا ؟!

عبد الله: الا جات على خاطرك ..

خولة:{وقفات} واخا انا نمشي نسخنو ..

سناء:وانا غانطلع نشوف هناء ..

حطات خولة الغدا على طبلة وحدة ، وطلعات الفوق مابغاتش تاكل لا هي لا هناء من غير ولادها اللي كايلعبو مع ولاد سناء خالقينها مكايتسمع غير الضحك و التكركير، سماو الله وبداو كياكلو فصمت ، حتى سالاو ، السكات مخيم عليهم ، و الجو مشحون ، مع أن عبد الله انسان كتوم ، ولكن جاتو حشومة يبقى ساكت ، و فتاتح النقاش ..

عبد الله: اوا اسي حمد كاين شي خبار !!

حمد: والو عاد ساعة ، غير على الله ..

عبد الله: ما كاين تا آثر ؟؟

حمد: لا والو ، ما خلاو ماقلبو ..

عبد الله: الدري راه كاين كاين ، ماللي ماتلقى فالبحر يكون فالارض !! ..

حمد: نتمناو خير آ عمي ، الدري راه حرݣ فحال والو يكون لهيه ..

عبد الله: لا حول ولا قوه الا بالله ، هاد الجيل راسو قاسح ..

حمد: كثر من القياس ، وراه صوناو ليا من الخدمة خاصنا نرجعو قريب ..

عبد الله: الله يا ولدي ! ياله جيتو فين راجعين ..

حمد: هادا الجهد ، شفناكم جلسنا معاكم الله يجعل البراكة ..

عبد الله: ماتزيدوش شي سيمانة ؟

حمد: والله مانكذب عليك ، من الاحسن نرجعو بحالنا ، نبقاو نطلو مرة مرة ..

عبد الله: اوا ماللي هاكا ، مانزيدكم غير الله يوصلكم على خير ..

حمد: ربي يخليك الحاج ، اش قلتي آسناء ؟!

سناء:{حادرة راسها} اللي بغيتي ..

حمد:{ابتاسم} العشية جمعي الحوايج !

سناء: صافي واخا ..

ناضت كاتجمع الطبلة ، عينيها مدمعين حابساهم بزز ، ياله قالت رتاحت خرج ليها بهاد الهضرة ، كملات جميع الطبلة ، وطلعات الفوق كاتزرب ديريكت البيت عند خولة ، اللي كانت جالسة كاتشاطي ، مع شخص شغل بالها هاد الايام ، غير شافت حالتها ، كمشات ملامحها وحطات تيليفون نايضة ؟!..

خولة: سناء مالك؟؟!!

سناء:{عنقاتها كاتبكي} ماسخيتش آ ختي ماسخيتش ..

خولة:ويلييي الشيطان مااالك ؟! دوي ..

سناء:{بعدات منها شوية} صافي غانرجعو ؟!

خولة:{خرجات عينيها} غاترجعو؟ من نيتك ياله جيتوو ؟

سناء:{حدرات راسها بعيون حزينة} آختي ما عندي ما ندير ..

خولة:{شدات يديها} كيفاش ما عندك ما ديري ، نسيتي ما قلت ليك داك نهار ، لحتي هضرتي وراك ..

سناء:ماشي لحتها آ خولة ماشي لحتها ، انا آ خولة مقيدة بسناسل و هاد السناسل هما ولادي ..

خولة: عمرهم يكونو سناسل ، بالعكس ولادك هما الساروت اللي غايعتقك ويزيدك عزيمة امكع تحاربي على ودهم ، غير بقاي معانا آ سناء وخليه يعوم بحرو ..

سناء: {بتنهيدة طويلة} آااه آ خولة آااه ، كلشي كايبان ليك ساهل انا اللي كانشوف ، واش عارفة معنى تطلقي بثلاثة دالولاد ؟ أبي راه على قدو فلوس التقاعد ياله معيشينكم كي بغيتو ..

خولة:{زيرات على يديها} انا نخدم عليكم ..

سناء: شغاتخدمي آخولة شحال قدك دابا ديري دارك ..

خولة:{عينيها غرغرو} وتبقاي على هاد الحال ؟!

سناء: عسى ان تكرهو شيئاً وهو خيرا لكم ..

خولة:{تنهدات} صدق الله العظيم ..

سناء: {بابتسامة باهتة} كوني هانية هاد المرة كاع مغانطول غير نلقى ولدي و نرجع نطل عليكم ..

خولة: نتمنى نتمنى ..

سناء: و نتي احبيبتي بقاي ديما كيما هاكا ، ماتبدلي ماتتغيري ، ان شاء الله تلقاي الراجل اللي تستاهلي ومايكون زهرك بحال ديالنا ..

خولة: ان شاء الله ..

سناء: دابا غانجمع حوايجي ..

خولة: انا نعاونك ..

سناء: لهلا يخطيك الخوخة ..

بدات تجمع حوايجها وهي تمشي خولة لماريوها كاتجبد ، مع هي عشاقة الحوايج ، العجب الكحل عندها ، بدات تجبد بيجامات جداد و ماركة ، و الروايح و مستحضرات التجميل و تحط ليها ، هاكي هادي زيدي هاكي شوفي هادي ، بقلب صافي ونية نظيفة من جيهتها ، هي مكاتحقد مكاتكره غير هاكا ، عندها فقاموسها عطيني نعطيك ، لا لقات المحبة و المودة كاتبادل بالمثل والى لقات الحسد و السم كاتبادل بالمثل ، جمعات معاها كاع حوايجها ..

دازو يومين ، ملهيين مع توجاد و سناء باغية تشري حويجات من البلاد ، و حمد بزز منو كايحط الفلوس ولا غير معصب يدور و يسوط مقاد يدوي ، وهناء ديما سادة عليها فبيتها قليل فين كايشوفوها عايشة فهدنة غريبة ، بعدما جا راجلها هز ولدو الكبير يقابلو هو نيت ، ممأنش عليه ، فالصباح قادات خولة الفطور كالعادة كلاو وكلها مشا لبلاصتو و لالة خولة كاتجمع الطبلة كالعادة ، سالات كلشي ومسحات يديها فالطابلية مكرهة ، حتى صونا ليها التيليفون عقدات حواجبها باستغراب حتى شافت النمرة و جاوبات ..

خولة: آلو ..

حنان:آلو الزيونات صافا ..

خولة:الحمد الله الزين ونتي ..

حنان: الحمد الله ، اش خبارك اش كاتعاودي ..

خولة: هاني غادة مع الدنيا ههه ..

حنان:إوا مزيان الالة ، شحال ما دوينا ..

خولة: وي ههه ..

حنان: ههه وراه مانسيتكش ، على قبل ديك الموضوع ..

خولة: شمن موضوع ؟!

حنان: اويلي اصاحبتي ، هههه المهم نفكرك ماعليش ، كنتي قلتي ليا لا شميت شي ريحة فشي مدرسة و لا صونطر ، اوا يا لالة هاد اليامات سمعت طالبين شي أستاذة تزيد سوايع لتلامذ فصونطر ..

خولة: واايلي و شنو طالبين

حنان: اوا يا لالة طالبين استاذة ديال الماط ..

خولة: و بصح ؟

حنان: ومالي كانتفلا فيقي معايا ..

خولة: وشحال يعطيو ؟!

حنان: مانكذبش عليك ، داكشي اللي قريت فالاعلان هو اللي قلت ليك ..

خولة: والله ما عرفت ..

حنان: ماتلقاي حسن منها غير زعمي ..

خولة:شمن مستوى ؟!

حنان: تبقاي مني منك ، عرفتي اش ديري لبسي حويجاتك واجي تلقايني كانستناك ..

خولة: هي دابا ..

حنان: ياله سيري آ زين بيزوو..

مشات للبيت ، ماللي ماعندها ما يدار وملات من الدار و الشقى قالت تلقى فين تخرج طاقتها وترتاح ، حيت بانت ليها هناء مطولة و الكانة اللي تلاقى يوميا بكمارتها ماعندهاش ، لبسات حوايجها وقادات الحالة ، و خبرات سناء باش ماتشوش عليها ، وشاورات باها عاد خرجات شدات طاكسي وصلها لواحد الصونطر فوسط المدينة كايديرو فيه دعم و يزيدو السوايع للطلاب ، ونيت عندها ما تقول فالماط وكانت كاتجيب فيه نقاط هما ، دخلات الداخل و صونات لصاحبتها حتى خرجات عندها ، بنت فريعان شبابها فنفس سن خولة قراو بزوج من الثانوية وهما كايتعارفو ، مكايتلاقاوش بزاف بسبب ضروف عمل حنان ..

حنان:{سلمات عليها بابتسامة} اهلا اهلا ، نورتينا ...

خولة: بنورك الحب ..

حنان: ياله زيدي دخلي ..

خولة: فين ؟؛

حنان: اويلي على فين عند المسؤول ..

خولة:{تنهدات} واخ الآلة نتبعوك تا نشوفو فين نوصلو ..

حنان: غير زيدي ..

دخلو عند المسؤول اللي كان حاني على شي وراق ، دقو هو الاول عاد دخلو ، شاف فيهم بعينيه وشار ليهم يجلسو ، بما انه كايعرف حنان اللي كاتشتاغل تما ..

خولة:السلام ..

المسؤول: وعليكم السلام ، كاين مايتقضى ..

خولة:{تشجعات ودوات بصوت جدي} جيت على قبل الاعلان ، سمعت باللي طالبين أستاذة الماط !!

المسؤول: وي !! الا كان عندك المؤهلات مرحبا ..!

خولة:كانتمنى ..

المسؤول: غادي تعمري السيڤي ديالك وتجيبيه ليا ويكون خير ان شاء الله ..!

خولة:{ناضت} واخا ..

المسؤول:ساعة سعيدة ..

خولة:{خرجو من تما} ناري اصاحبتي ، على الله يقبلو مانتعذب على والو ..

حنان: يكون خير ، زيدي نخرجو !

خولة: وايلي اصاحبتي ياك خدامة ؟!

حنان: الا تا نتي ساليت بقيت كانستناك ..

خولة: الله يحفظك ..

حنان؛ نطلعو المدينة ؟!

خولة: واخا الالة غير زيدي ..

طلعو المدينة مقشبين بيناتهم ، و كايدويو حتى دازت قدامهم طوموبيل خرجات خولة عينيها كاتأكد ماللي كاتشوف ، ودارت حاضية منين دازو ..

خولة:والله حتى هي !!

حنان: شكون ؟!

خولة: الطوموبيل اللي دازت مابانتش ليك فيها سهيلة ؟

حنان: الا ماشفتش ..!

خولة: وا هي اصاحبتي والطوموبيل دالخاريج

حنان: خليها تزهى مع راسهاههه

خولة:وهانتي تشوفي اختي {رددات فنفسها: هاي هاي على السي محسن ولالة سهيلة ، تلاقيتو بغل وحمارتو}

جا نهار جديد ، فاقت خولة بكري فيه ، تافقو هي و سناء يمشيو للحمام ، وجدات حوايجها و سطولاتها ، و سناء مابقى ليها والو و تمشي ، وجدات خولة كلشي و هبطات كانت سناء فالصالون معاها بنتها بغات تديها معاها ، بقاو داويين بيناتهم حتى هبطات هناء قالبة سيفتها منفوخة غير بوحدها ..

سناء:{شافتها ما هضرات ما تكلمات} صباح الخير ..

هناء:{هبطات ونزلات} صباح النور ، فين غاديين ؟!

سناء: الحمام تمشي معانا ؟!

هناء:لاا ..

سناء: اوا جيبي آية تمشي معانا توانس مع رقية ..

هناء: لااا ..

سناء:{بقلة حيلة} اللي بغيتي آ ختي !

حمد:{هبط فالدروج} صافي ساليتو ؟!

سناء: اه !

حمد: زيدو نوصلكم .. !

خولة:{همسات ليها} اويلي ناوي يوصلنا الحمام وهو غير مع الدورة السيد هتر ..

سناء:(خرجات عينيها} اويلي سكتينا ايسمعك ..

خولة: هاني ساكنة ..

خرجو مرة وصلهم الحمام وقلب الدورة ، غا حشم اما يبقى تما كايستنى حتى يخرجو ، دخلو للحمام فركو عظاهم نيت كانو محتاجينو شحال ما جاو ليه خصوصا سناء ، أزيد من جوج السوايع وهما تما ، حتى رجعو كايضويرو وخرجو كايضربو على الشعا ، جا وراهم حمد و داهم مع الطريق دازو لباتيسري دخل هو شرا حلوة دلاكريم وخرجو مكملين الطريق ، دخلو الدار سخفانين نيت ، حمد خلاهم وطلع الفوق يرتاح حيت تابعهم سفر ، جلسو فالصالون حاطين ديك الحلوى قدامهم و فرقوها وهناء فالقنت مع ولادها كاتشوف غير بعينيها ، و البنيتة غير كاتشوف بعينيها فالحلوة ..

خولة:{بهمس لسناء} عيطي البنت تاكل ، راك عارفة هضرتي مسوسة ..

سناء:{تنهدات وقالت} آية اجي حبيبة تاكلي ..

هناء:{بغات تجي شداتها} لا بلاش ..

خولة:{طلع ليها الدم} واش من نيتك طلقي البنت تدي ذنوبها ، راك شرفتي على التبرهيش ..

هناء:{خرجات عينيها} دخلي سوق راسك آ لالة بنتي و ندير اللي بغيت ، ولديهم وحكمي فيهم ..

سناء:{شدات فيد خولة} صافي غير ساعفي ..

خولة:مريضة فمخها والله تا مريضة ،تفو على گنس ..

سناء: صافي آ خولة الله يهديك ..

خولة: يحساب ليها انا معشاقة فالدراري كون بغيت كو راه عندي فرقة دياال الكورة ..

سناء: واش تدي عليها ، راك عارفاها كي دايرة ..

خولة:{ودنيها كايسوطو حالفة لا حبسات} دابا كاتحساب راسها مطفراه هي بدوك الدراري ، ها هي مجرجراهم معاها ..

سناء:{شدات راسها كايطبخ}و خاولة ..

خولة:{ساطت ودفعات الطبلة} انا نطلع الفوق ..

سناء: واخا تكايسي على راسك ..

طلعات لبيتها مفقوصة ، فالواقع ماشي هى هناء ، بل ماسخاتش حتى بختها تمشي بهاد السرعة وهي سنين ما شافتها ، ياله حسات بطعم الاخوة والحنان ، وهي تمشي ، هزات تيلفونها تنسى همها ، ودخلات الانستغرام اللي كاتعمر فيه بزاف حتى لمحات ميساج ، منو بالظبط ..

جاهد:خولة راك هنا ؟!

خولة: وي ؟!

جاهد: صافا ؟!

خولة:نحمدو الله ..

جاهد: اوا مزيان الآلة ، نقولك واحد الحاجة ماتيقينيش ؟! ..

خولة: شنو ؟!

جاهد:انا هبطت المغرب راني فمدينتك ..

خولة:{بعدم تصديق} كاتضحك معايا ؟!

جاهد: لا والله تا داوي بصح !

خولة:{ببرود} اوا مزيان مرحبا بيك ..

جاهد: مانشوفكش ؟!

خولة: كيفاش تشوفني مافهمتش ؟!

جاهد: بغيت نشوفك فيها شي حاجة ؟! مع تابعيني شي شغال وندوز عند موالين الدار..

خولة: دوز عندهم ! انا مافياش

جاهد: شوفي آ خولة يمكن كانبان ليك كانتفلا ولا شي حاجة ولكن نيتي صافية ، وناوي المعقول ماشي كدوب ..

خولة: ماعرفتش !

جاهد: آ خولة فهميني ، انا باغي الحلاال و ضروري نتلاقاو نتعارفو ندويو ديك ساعة نقصدو الدار !!

خولة:{بعد تفكير} واخا صافي ..

جاهد:هي آش ؟!

خولة:نتلاقاو غدا

في اليوم التالي ، فالصباح بكري خرجات سناء بكري مع راجلها وولادها يتقداو حاجات الدار مايلقاوهم تما ، وصل وقت فياق باها هبطات للكوزينة ، كاتوجد الفطور وتخمم فالموعد اللي عندها ، حطات كلشي فوق الطبلة ودقات على باها ، وخرج شافها غير بوحدها جالسة وقال ..

عبد الله: فين هي هناء ؟!

خولة:{بلا مبالاة} يمكن ناعسة ..

عبد الله: اوا عيطي ليها تفطر ..

خولة: أبي ، انا ماعندي ما نعيط ليها !!

عبد الله: ولفوقاش تبقاو على هاد الحال ؟!

خولة:{بدات كتاكل} انا ماعليا والو هي اللي ماعرفت مالها ..

عبد الله:{تنهد} لا حول ولا قوة إلا بالله ..

خولة:{تحنحنات} أبي بديت مع واحد المركز نعطي فيه دروس

عبد الله: شكون مولاه؟

خولة: واحد استادة متقاعدة

عبد الله: كتبي ليا عنوان نسول بنفسي الا لقيت شي شبهة ديري بحسابك ماكاينة خدمة..

خولة:{باستسلام} واخا

بعد ساعة كانت خولة جمعات الدنيا ، هبطات هناء كاتمختر بشوية عليها ، ودخلات الكوزينة كاتقلب ، حطات الفطور لراسها ولولادها وخولة غير كاتشوف بعينيها ، غير سالات مشات تجلس فالصالون مخلية الطبلة مفرشة ، عضات خولة فمها كاتصبر راسها اللي بدا يزند ، ستناتها تنوض و ستناات واالو و تقول خدامة كاتلعب فالتيليفون ، ماصبرااتش ووقفات عليها..

خولة:{بطنز} بصحتو الفطور..

هناء: الله يعطيك الصحة ..

خولة وديك الطبلة تبقى هاكا تا تنوض راسها ولا كيفاش ؟!

هناء:{باستفزاز} و نتي شنو كاديري هنا ؟!

خولة: كاتستنايني نجمع وسخك ؟!

هناء:الطعام كاتقولي ليه وسخ ؟!!

خولة: حاشة ولله !! نوضي شوفي الروينة اللي خالقين تما و تعرفي شنو هو الوسخ .. !!

هناء: الآلة انا منايضاش ! جاية لدار با نرتاح ماشي نشقى عليك ..

خولة:{شدات راسها معصبة} تشقاي عليا ؟! على بالسلامة شكون كايشقى على لاخر انا ولا نتي ؟! حسابت ليك انا خدامة عندك ولا شنو ؟!

هناء: بحال داكشي ، ضربي راسك مع الحيط انا منايضاش ..

خولة: ولاايني ماسماوك مدلولة الا وراك مغطسة فالدل ، ترضاي اللي يجمع ليك ونتي جالسة وباز آ ختي على قلبك والله حتى باز ..

هناء:{ناضت} نتي راك زدتي فيه شوية لا ؟! هادي دار با الآلة نتصرف كي بغيت ..

خولة: كوووني مسؤوولة وجمعيي وراااك ،تانا راه بنادم وكانعيا ، وطلع ليا هادشي فالراس ..

هناء: عاوديها راسك جيبي خدامة تشكي عليا انا !!

خولة:{قربات ليها كثر طالع ليها الدم} نتي راااك عيقتيي وزدتي لهيه ، واش نتوما توغلو مع رجالكم وحنا نهزوكم بولادكم ، تي كوني تحشمي ولقاي حل لراسك ، أبي ماخدامش مع الوزارة المالية ، وانا ماعنديش هنا خيرية ..

هناء:{هزات يديها ونزلات عليها بطرشة} الله يقلل حياااك الحماااارة ..

خولة:{خرجات عينيها بعدم تصديق} انا صرفقتيني ، انا ؟!!

هناء:{بزقات} ها ماتسواي ، قلة الحيا عشرة لزيرو ...

عبد الله:{دخل مع اللقطة نيشان} هنااااء ..

هناء:{تفعفات} ااا أبي انا والله حتى انا ..

عبد الله:{وقف عليها مغلغل} واش آ بنتي ما حشمتي ما راعيتي ؟!

هناء: والله تا هي اللي جبداتني ..

عبد الله: قدك قدها يا حسرة ختها الكبيرة ، هادشي غير وانا فالحياة الا مت اش ديري ..

هناء:{بدات كاتبكي} هي اللي جبداتني ، عايراتني بالطلاق ..

عبد الله: على مالك مطلقة ؟!

هناء:{بدات تعصر} انا انا ..

قلبات عينيها وسخفات ، جابت ليها خولة الما والسكر على طلب باها ، وهي عايقة بيها ، كاتشوفها كاتجبد و تلهث كاتمثل ، وباها من نيتو كايقرا عليها القرآن ، قلبات عينيها وستغفرات الله وطلعات لبيتها كاتوجد راسها باش تمشي الموعد ..

تنهيدة طوويلة خداتها هيا تتعمل آخر لمساتها ، متيقنة ان عيشتها مع ختها ترجع جحيم ، هزات صاكها و تتميل راسها تشوف فالمرايا واش مناسب مع للبسة ، تأكدت من الفلوس و تلفون ونزلت بسرعة ، هاربة من البيت و صداعو ، بعض الأحيان تتقول زهري مذفون او لي دعا فيا مات !! مرات تتقول عزري تكعد و دنيا ضحكت ليا، لكن بشخصياها قوية تتحارب و تتقلب على مصلحتها اولا ، ماعقلت على راسها الا موقف طاكسي و ركبت و تبلوكات من سؤالو ..

شيفور : فين الالة

خاولة : ( عينيها على تلفون ) الشاريع ****

نزلت راسها تتكمل مراسلتها مع جاهد ، هزت راسها فمرآة شيفور تتاكد من وجها ، دائما راضية عن جمالها ، وصلت بعد دقائق و خلصت ونزلت ، وقلبها تيضرب تيضرب ، توتر غريب ، انك تلقى انسان اول مرة من الانترنيت ، معارفة واش تلقى نفس الشخص اللي شافت فالصور ولا والوو، واش بصح هضرتو ولا كدب شلا مطارق كايدقو فراسها مخليين قلبها يضرب و يقول ما ضربت ، خايبة ومتوترة و مرعودة ، خرجات نفس سخونة من نيفها ، مابغاتش تدخل من الاول ، للحظة كانت غاتتراجع ادراجها لكن الصوني ديالو فيقها ، مابغاتش تجاوب فالاول ولكن من بعد تنهدات وجاوبات ..

خولة: آلو ..

جاهد: ( بصوت خاتر رجولي ) السلام عليكم خولة واش بقاي معطلة ؟!

خولة:{بتوتر} سمحلي تعطلت شوية ! راني فدخلة قهوة

جاهد: فيها الخير ! خليك معايا على الخط

خولة: ( منزلة راسها تتحس جها سخن بحشمة دخلت هازة راسها حتى لمحت شخص واقف ) صمت

جاهد: ( بطولتو شامخة و البنية رجولية هز لها يديه كإشارة ) شفتيني ياك؟

بصدمة نزلت هاتف قطعت الخط نزلت راسها تترتب خطواتها و قلبها تيضرب ، و صورتو فمخيلتها تتعاد صوت داخلي تيتكلم

زووووين ! زويييين ! زوووين اعباد الله

وصلت الطبلة مزال واقف لها كنوع من الاحترام ، توترها زاد و قلبها كايخبط ويعااود ، وهو مركز شوفاته عليها ، ركابيها فاشلين وهي كاتشوف فيه ،آشار لها بابتسامة تجلس ، وجهها حمر و التوتر غالب عليها ،

جاهد: ( مد يديه ليها ) السلام عليكم

خولة:{بابتسامة متوترة حطت يديها على صدرها} سمحلي ماتنسلمش

جاهد:{بنظرات تاقبة حرك لها راسو بتحية } مرحبا

خولة:{بلعات ريقها} سمح ليا مكانسلمش ..

جاهد: ( تنحنح بصوتو شجي ) شنو تشربي اخولة ؟!

خولة: كافي كريم ..

جاهد: ( بابتسامة و طلب لها طلبها ) مرحبا !! مرتاحة ياك ؟

خولة: الحمد الله

جاهد: و لله الحمد! داكشي لي بغينا ، الراحة و طمأنينة

خولة:{بابتسامة مظطربة} صمت

ياله غايهضر جاه ميساج فتيليفونو..

جاهد: سمحي ليا واحد الدقيقة ضروري نجاوب على واحد الميساج ..

خولة:هانية خود راحتك ..

ابتاسم ليها . حدر راسو كايجاوب ، وهي سهات فيه كاتشوف بخاطرها ، ماشي فقمة الجمال ولكن ذو كاريزما خاصة ، شعرو كحل فيه شيبات قلال ، عندو لحية كحلة على ذقنه ، حاط نظاظر الشوف على عينيه ، و ملامحه مبشورة ، حط التيليفون ورفع راسو ،للحظة تلاقاو عينيهم ، وهي بتاسمات ليه بلا ماتحس ..

جاهد:{بادلها الابتسامة} هه شفتك متوترة ياك ممرتاحاش ! خير انشاء الله

خولة:{قلبها كايضرب} باش نحطك فصورة ! وقتي قليل ، وهاد اللقاء فخذ ذاتو مغامرة ، الله يتجاوز علينا

جاهد: ( عاطيها خاطر تيسمع ) مايكون غير الخير ! لاتكرهو شيئا هو خير لكم ، و العكس صحيح، كلامنا كان قليل ، او نقولو ؟ ماكسبتش ثقتك

خولة: باش نكونو واقعين ! سوشيل ميديا! كذوب و نفاق و قليل و قليل فين تلقى انسان صريح مع نفسو ولا صورو ولا معلوماتو

جاهد:{تكا بيديه على الطبلة} متافق معاك ! ولكن لله الحمد طلعت انا هو انا !! ونتي هيا نتي

خولة:{حكات يديها بخجل } هه تماما

جاهد:{تحنحن ودوا بجدية} آلوغ ماللي مامرتاحاش ما نضيعش لك الوقتك ، خولة نكون معاك صريح ، ماعينيش فالتفلية ولا تدواز الوقت ، و اصلا فهاد السن ماشي ديال التبرهيش و للقاءات و خرجات {حك لحيته} هاد للقاء بالنسبة ليا كافي موفي ! تأكدت شخصيا و القلوب تتبقى فعلم الله

خولة:{تكلمات هي الاخرى بجدية} ما قلتي حتى عيب ، انا تاني ماعنديش مع التفلية ولا تدواز الوقت ، ونهائيا واش سبق ليا وافقت نتلاقى بشي حد {سكتات شوية وكملات كلامها بنبرة صريحة} ولكن ماللي بنتي ليا السيد المعقول ، ماعليش نتعارفو والا كتاب نكملو نكملو ماكتابش الله يسهل عليك وعليا فما حسن .. !

جاهد:{بابتسامة خفيفة} هادا هو المعقول ، تبداي ولا نبدا ؟!

خولة:{حاسة بالحرارة طالعة معاها} اللي بغيتي ..

جاهد:{ضحك بشوية} واخا آ لالة ، معاك جاهد داخل فالربعين ، من مدينة فاس ولكن مدة طويلة وانا مستقر فالدنمارك ، و حاليا انا فالبلاد حتى يسير الله الامور ..

خولة: الله يوفق ..

جاهد: اللهم آمين .

خولة:( بتباث و تقل } انا خولة 24 سنة ، حاصلة على ايجازة و مثل اي شباب البلاد تنبحثو على عمل !

جاهد: تبارك الله ! الله يسهل ، ( بنظرة عتاب حبية ) وشنو بلان المدينة الالة خولة؟

خولة:{تزنݣات} ماكنتش تانعرفك مزيان وصافي ..نعتذر

جاهد:{شرب من كاسو} الله اودي! منين شرفتينا بشوفتك كل كذبات بيضاء تلغى !احم !! الحالة الاجتماعية؟

خولة؛{دارت راسها مافهماتش} كيفاش زعما ..

جاهد:{بجدية } ماسبقش لك تزوجتي ؟

خولة:{بلعات ريقها} الزواج الا! كان كلام لكن النصيب

جاهد: الخير فيما اختاره الله!

خولة:{بقات ساكتة} ..

جاهد:عايشة مع واليديك آخولة ؟!

خولة: عايشة مع أبي ! الوليدة فذمة الله.

جاهد: الله يرحمها و يجدد عليها رحمات

خولة: آمين ..

_كان صمت ! او راحة من الحوار ، تتشرب قهوتها هو عينيه عليها ، ماينكرش ، عجباتو ، الزين بغاه مولانا و خاولة تتمتاز بالجمال و مع حضورها كتملت الصورة ، منزلة راسها حشمانة من نظراتو و تنحنح مكلمها

جاهد : مرتاحة ؟

خولة : {حركت ليه راسها} ههه اش بان ليك

جاهد : ههه كل الخير

دورت وجها تتبحث عن منظر يخلي خجلها يزول ، ادا بيها تتشوفهم داخلين اليد فاليد ، ماحركوش فيها ولو ذرة غضب ، رجعت منزلة راسها وعاودت دورت وجها تتشوف فيهم و لمحاتو رسل لها ابتسامة مستفزة ماجات تفهم الضحكة و تبادر بالوقوف لان اكيد مجيئهم ماشي صدفة! و حضورهم ماشي ميعاد الاحباء ، تتحس برأسها كايتزير و ريقها تسرط و هي كاتحلل الفخ لي يقدرو ينصبو ليها

_جاو يصوروني ؟ يشوهووني ؟

جاهد : خاااولة !!

ما جات دور تجاوبو حتى نظرها نزاح الباب مقهى هيا تكاتشوفو داخل بجلبابو و وجهو الغاضب ، بشحمو و للحمووو

خولة: {بصوت مرعووود} ابااا ! بااااا

جاهد: ( مد يديه شد فيها محاول يفلت انتباهها ) خاااولة

خولة : {جرت يديها بسرعة تتهز صاكها } طلللق مني! اولاد الحراااام

عبد الله : {لمحها بسرعة برق خلط عليها تاوقف قدامها هيا جاية وجاهد ورائها} هاااادي { كايلهث محروق} هااادي ثقتي ؟

كاتنفس بصعوووبة وجهها مشا منو اللون ودموووع بعينيها مثل انهار ، قلبها كايضرب ويضرب كاتقول شوية وتسخف ، ممصدقاااش حالة عينيها على وسعهم ، وهو مقرب عندها بأعين غاضبة و خيبة أمل محاطة بيها ، حركات راسها بالنفي وعينيها كايتغرغرو و تتشوف فمحسن و سهيلة لي منتشين من المشهد ، و تتحس بجسم جاهد جنبها كايشوف فيها ويشوف فباها ، وقف قدامها كايحرك راسه بالشمتة تيضرب فصدرو باحرف مبعثرة مع الريقو

عبد الله : هادي هي ثقتي ؟ هادي هي اللي فضلتها على خواتاتها ودرت ليها عيشة اللي ماكرهوها اللي سبقوها ؟ شمتيني و طيحتيى بكرامتي الارض تا رجعو يوصلوني اخبارك فتلفونات ، ( هز يديه الفوق و نزل عليها للوجه) صرااااي ...مكمل سخطو

_ لعنة الله وعليك ، هادي هي تربيتي ..

الكل اتجه انظارو عليهم ! كانت تتمنى تشق الارض و تبلعها ، كانت تتمنى تمووووت قبل ماطيح فهاد الموقف! كانت تتمنى يضربها طوبيييس يطحنها ولا يطحنها اباها قدام لي يسوا ولي مايسوااش ، نزات راسها تتنخصص و مسؤول المقهى قرب و جاهد قرر يدخل..

عبد الله:{شدها من زيفها } نتي شنووو شنووو ؟! جالسة ليااا مع الصلاݣط فالقهاااوي ياك آ خولة ..

جاهد:{عقد حواجبه و تحنحن} الحاج الله يجازيك بخير الامور ابدا ماتتفتحش على هاد النحو

مسؤول المقهى : شريف ديالي ! السترة مزيانة و السقف لي عندكم يشهد لكم خير من قوم الناس

عبد الله: ( جا يجرها فلتت ليه ) بيمااااني و باااش يحلفو الرجالة يا انا يانتي فهاد نهار ، الا واحد فينا فالقبر ولاخر فالحبس ..

جاهد:{بصوت هادئ} الحاج! الله يهديك و يكبر بيك ، الامور راه ماشي كما كاتخيل !

عبد الله:{شنق عليه} انت بعداا شكووون ؟ انت لي لاعب ليها بعقلها ؟ انت لي معمر لها راسها ؟

جاهد: ( ساط فسما ماتفادي يرد ليه شنقة ) آ سيدي الله يهديك ، غير تهدن نفهمك ..بنتك اول مرة نشوفها ربي شاهد

عبد الله: اش غاتفهمني اش ، جالس ليا مع بنتي فالخلوة وتقولي تهدن ، ولكن العيب ماشي عليك ، العيب عليا اللي ماربيتهاااش ..

خولة:{دموعها نزلو} صمت...( تمتمت ) ويلي على شوهة

عبد الله:{غوت معصب} الشووهة هااه خايفة نشووهك ؟! ونتي ماحشمتيش على عرضي ، مااقلتيييش غانشوه بأبي خسااارة خسااارة تربيتيي فييك خسااارة { رفع يديه باغي يزيد يضربها} ..

جاهد:{جرها مبعدها منو وهو كايساوي معاه بتفهم} الله يخليك خلينا نهضرو راجل لراجل ..

عبد الله: راجل ؟! نتاياا رااجل بعدااا اللي كتزلل على بنات الناس! ضاحك عليها و مخرجها لقهاوي

جاهد:{غوبش شوية} أعوذ بالله ، الحاج!! نهاك الله واش وجهي بان لك ديال الضسارة

عبد الله:{جر خولة مزير عليها} ماعندي ما نتفاهم معاااك نتاا ، زيدي قدااامي ..والله كون ما بغيت نزيد فيه يا المخزن اليوم يهزونا ولي عليه شي حق يخلصوو ..

جاهد: {تابعو} الحااج ! وااا الحاااج

عبد الله:{جرها وراه} آسيدي فرق جررتي {جر خولة تاكانت تجي على فمها} سير بحالك راه نديك فين تربى

جاهد: ( رجع خلص مول قهوة ) سمحلنا اشريف

_ تحرك خارج بسرعة لمحهم شدو طاكسي و بشرعة ركب سيارتو ديمارا تابعهم ، مافهم والو ! ماعرف باش تبلى ، حياتو كاملة ابدا واش طرا ليه هاد البلان تضهشر ، خلاو الناس فالكافي كلها وشكايقول ..

_ تستاهل مابقى حد يحشم ..

_مسكينة بقات فيا ..

_اليوم طيح الروح ..

_ لا حول ولا قوه الا بالله ..

من غير واحد الجوج اللي كايضحكو ويعاودو ، سهيلة كاتنقز غير بوحدها و حتى هو ، ضربو يد فيد ، حيت و اخيرا رجعو ليها الصرف ، شافو فبعضياتهم مبتاسمين بانتصار راجعة بيهم الذاكرة للوراء ..

"فــلاش بــاك"

"قبل أيام"

عمر تصرط ليه ولا يتصرط ليه تدار بيه ، فكرة انها قولباتو وساستو ، شعلات فيه النار ، تعصب و تكره ، و حلفها فيها حلوف ، عقرب سامة لدغاتو و دقتو ناوي يرجعها طال الزمان ولا قصار ، خرج من الدار كايحك لحيته ، حتى بانت ليه جاية من بعيد طالقة الشعر وكاتحرك خصرها يمين شمال لابسة سروال مطرطق وخاشية فيه تريكو ، وطايتها كاتجذب ، عض على فمو بنظرة شهوانية ، وهي وقفات حداه كاتلوي فشعرها ..

سهيلة:{بصوت محلون} مساء الخير ..

محسن: مساء النور ..

سهيلة:{غمزات ليه} مبروك ما درتي ..

محسن: اشمن مبروك الله يهديك ...

سهيلة{ضحكات بمياعة} قصدت العزوبية ..

محسن:{حك راسه} ماتزيديش تفكريني دارتها بيا الإخوانية ..

سهيلة: اوا اخويا اش غانقوليك نتا درتيها راسك ، نصحت وعاودت ..

محسن:واش عليا انا؟! المظاهر خداعة شفت الزيف و العينين فالارض قلت هادي اللي تصلاح ليا مرا وتقابل ليا مي ..

سهيلة: واش بقات فالزيف ، هاني بلا بيه {حركات شعرها} عمري درت ولا ندير داك المصايب اللي كادير حسي مسي ..

محسن: واش بصح نيت داكشي ؟! كاتمشى مع شي واحد ؟!

سهيلة:{باستهزاء} على هو واحد ؟! وحدين هما ..

محسن: كنت غانتزرف ..

سهيلة: ربي هناك ..

محسن: ماتبقاش فيها آ سهيلة ، عارفها صاحبتك وكدا ، ولكن ماندوزهاش بالساهل ..

سهيلة: الله يهديك شمن صاحبتي ، من زمان عطيتها التيساع ريحتها عطات ..

محسن: الله ياخد الحق ..

سهيلة:{بثقة} حقك تاخدو بيديك ..

محسن: كيفاش زعما ؟

سهيلة:كايقولو تبع الكداب تا لباب الدار !!

محسن: هي آش ؟!

سهيلة:من اليوم بدل زوج عينين عشرة ، نتا حضي وانا نحضي حتى تحصل !!

محسن:وصعيبة القضية !!

سهيلة:صعيبة ولكن ماشي مستحيل ، والا بغيتي ترجع حقك مابغيتيش ماقلناش !!

محسن:{حرك راسه} صافي مشات ..

من يومها وعينيهم عليها حاضيين الكبيرة والصغيرة وسهيلة تضل فالشرجم كاتجيب الخبارات ، فين ما حطات رجليها تابعينها ، من نهار جات سناء وهما عينيهم على الباب و حتى نهار كانت غاتمشي الحمام تبعوها نيت وكانو ناويين يخربوها عليها تما ، ولكن وصلهم راجل ختها وجابهم ، و يوم مشات للصونطر شافوها وتبعوها حتى لتما ، مالقاو ليها جهد وخروجها قليل كاتجيب السخرة وترجع خفة زربة ، حتى لنهار اللي دارت فيه مع جاهد ، جلسات سهيلة فالشرجم بحال كل صباح كاتشوف هنا ولهيه و تحضيها ما كاملة ربع ساعة حتى لمحاتها دايزة ، مأنقة نيت ، خرجات عينيها كاتطلع وتهبط وهزات تيليفون كاتزرب ..

سهيلة: محسن عتق عتق ..

محسن:{دعقاتو} مالنا اش كاين ؟!

سهيلة: ختنا خارجة ضاربة الحطة ..

محسن: تكون مشات للخدمة ؟!..

سهيلة: ويلي تا نتا انا عاجناها ، واش لباس الخدمة هو لباس التمعشيق ؟!

محسن:نزلي وتبعيها تا نوصل عليك ..

سهيلة: صافي طير طير ..

هبطات كاتطير ، ونزلات كاتزرب كاتشوف هنا وهنا حتى لمحاتها راكبة فطاكسي ، فيبرات برجليها حتى وقف عليها محسن ، وركبات معاه تابعين الطاكسي ..

محسن:ناري ويصدق لينا البلان ..

سهيلة:{بثقة} غايصدق متأكدة..

محسن: نشوفو بعدا فين غادية ..

سهيلة:دور دور دازت من تما ..

محسن: راني حاضي غير هنينا ..

سهيلة: راك مبعد بزاف ..

محسن:بغيتيها تشوفني ؟!

سهيلة: غير سربينا لا تفلت ليك ..

تبعوها ووقفو بعيد فاش شافوها نزلات من الطاكسي كادور فراسها وتمشي وتجي ، عرفوها متوترة من حركاتها ، غير حطات رجليها تما وهما يقربو كثر وخرجو عينيهم كايشوفوها واقفة حدا راجل هز التيليفون ..

محسن:ورقناااهااااا ..

سهيلة: ياااس يااااس ..

محسن:ششش ..

سهيلة: اش تادير ؟!

محسن: قطعي الحس كانصوني لباها يجي يشوف تربيتو ..

دوز الخط ففمه ابتسامة لعوبة ، كأنه وصل لمبتغاه وعينيه عليها كايشوفها جلسات معاه ، طلع ونزل فيه غير بعينيه كايعبرو او بمعنى اصح كايشوف الفرق بيناتهم شنو اللي فيه خلاها تتخلا عليه ، حتى قاطع سهوته صوت ...

عبد الله: الو ..

محسن:{تحنحن} السلام عليكم الشريف ..

عبد الله:وعليكم السلام ورحمة الله ، شكون معايا ؟!

محسن:{سكت شوية} انا محسن السيد اللي كان خاطب بنتك ..

عبد الله: بشمن وجه كاتصوني ليا ماكفاكش اش درتي ؟! وتاقيت فيك الله ..

محسن:تظلمت آ عمي تظلمت ، ماصونيتش غير هاكاك ، بغيت نشرح ليك بعض الحاجات..

عبد الله: ماعندك ما تشرح ليا ماضيعش ليا وقتي ..

محسن:{قاطعو بالزربة} الموضوع مهم بزاف ، كايخص بنتك ..

عبد الله:{الصمت} ..

محسن:{فهم انه غايسمع ليه} اللي واقع آ عمي ان خولة دابا خارجة مع واحد السيد ..

عبد الله:شنو عارف اش كاتخرج من فمك ؟!

محسن: كانقسم ليك بالله الا كانقول الحق ، وعلى داكشي سرسباتني ، السيد باينة كبير عليها ولعب ليها بعقلها ، انا ماقتاحمت حرمة دار حد ، دارت هادشي باش تفاريها معايا وترجع ليه ..

عبد الله:{تزير} سير تلعب على تيساع ...

محسن: تبغي تشوف بعينيك ؟! نعطيك العنوان ..

عبد الله: نوقفو على هضرتك !!

محسن:{بانتصار} اجي ل ****

قطع عليه بلا مايجاوبو وهو شاف فسهيلة وضحك ، الفرحة كاتنقز من عينيه ، جرها وباسها من حنكها بكل جرأة وبقى حاط فمو ، وهي قلبها طاح بين رجليها كايضرب ويقول ماضربت ممتيقاش ..

محسن: واخا تبرهشنا معاها المهم هو النتيجة ، ماكرهناش كون كان فشي برتوش ولا شي اوطيل دوز زاهية ..

سهيلة:مع داك باها قهوة تقضي الغراض ، سرها عارفاه كي داير وخارجة ترندف فالقهاوي

محسن:{كايشوف فعينيها} شكرا على وقفتك معايا آ سهيلة ، شكرا بزاف بينتي ليا انك مرا ونص ..

سهيلة:{نزلات راسها} مابيناتناش هادشي ..

محسن:{قرب ليها بجرأة} ماكنتيش مظطرة ..

سهيلة:{دوخها} المهم تدي حقك ..

محسن: تبغي تكون بيناتنا شي حاجة ..

سهيلة: بحالاش ؟! ..

محسن:شي حاجة زوينة غاتعجبك ..!

سهيلة:{بادلاتو نظرة جريئة} نتمنى تعجبني ..

محسن: شفتي نتي والله تا كاينة ..

سهيلة:{ضحكات} ههه ..

محسن:{فنفسو: مافيها باس ناكلو حلوة البلاد قبل مانمشيو} ..

بقاو جالسين كايستناو حتى خرجو بعض الناس وهما يدخلو يد فيد ناويين يفقصوها غير جلسو شوية وهو يبان ليهم جاي ، وجهه مبدل فيه اللون ، باينة معصب ، كايتخايلو وجهها كي غايولي ، يشبعو قلبهم نيت ، حتى وقع اللي وقع وصدقو رابحين المعركة ..!

"نهاية الفلاش باك"

وصلو الدار وجرها وراه كي الجرتيلة ، ومول الطاكسي غي كايشوف ويستغفر الله ، وصل جاهد حتى هو نزل تالف كايشوفو دخلها الدار وتبعهم كايدق ، اما عنه لاحها فالصالة بعدما جمع معاها بتصرفيقة كاينهج ، معصب عينيه حمرين بالغضب و خيبة الأمل ..

عبد الله: فاش آذيتك اش نقصت ليك؟ فاااش تعديت عليك حتى تخوني ثيقتي فيك..

خولة:{كاتحرك راسها بالنفي كاتبكي} أبي عافاك والله مادرت شي حاجة خااايبة والله تيقني ..

عبد الله:{جرها من الزيف كايلهث} اش قلنااا على الحلووف اااش قلناااااا ..

خولة:{مخبية وجهها} الله يرحم ليك الواليدين ماتضربنيش ، والله ما نويت فيها حاجة خايبة ...

عبد الله:{غوت حتى زلزلها} سكتييي سكتييييي باااقيي زاايدة فيه ياااا خسااارة تربيتي فيييك ..

دفعها بالجهد تاني حتى طاحت مقسحة ، حتى تسمع غواتها ، خرجات سناء هي الأولى وراها راجلها ، قربو من تما عاد نزلات هناء مع اولادها مفزوعيين، جرات سناء كاتحامي عليها ..

سناء:اش واقع اويلي ..اعووذ بالله من شيطان الرجيم ااابي

عبد الله:{باغي يدوز ليها} بعدييي آ سناااء بعدييي غااندووز فييك ..هدا هو مضموووني فيك

سناء:{دايراها ورا ظهرها} الله يا ربي الله قولو لي غا اش واقع ..

عبد الله:{عروقو خارجين} بغيتيي تعرفييي اش وااقع اوااا الاااالة ختك الشريييفة اللي حطيت دم جووفي عليهاااا حصلتها كاتصلگط فالقهاااوي مع وااحد خيناااا ..

هناء : ( خوف حركها لها ) بالتي هيا احسن

سناء:{خرجات عينيها} الضرب ماشي الحل ! و جيران تيسمعو اعباد الله

عبد الله: ( تيضرب يد فاليد ) شيطاااان هو بناااادم ! كان عندي ششششك و تنقول لالالا خولة بنت اباها ! كنت نكذب كلامي مع نفسي ونقووول وسوسة شيطااان ! شحال من خطيب رجعت ! و شحال من شروط حطت وصدق لي صرفت فيه العيب هووو لي مشوفني العيب

سناء: ( تتبكي بصدمة ) الانسان خطاااء

عبد الله: ذبحااتنيي الكاافرة بالله ذبحاتني ..

كايغوت لربي اللي خلقووو بقلب مجروح ، كايفكر ويعاود فاش غلطت اسيدي ربي ، فاش اذيتها فاش وفاش ، الاجابة والو ،الباب كايصوني و يعاود ، حمد غير كايشوف بعينيه و مباغيش يدخل تاجه للباب من باب فضول يشوف جيران وحلو بلا مايرد ليه البال ، بان ليه راجل واقف تما طلع ة دور وجهو حتى شافة قاصدو

جاهد: السلام عليكم

فقط حرك ليه راسو! كانه علمو قلبو انه هو شخص لي نايض عليه صداع

جاهد : الا ممكن كلم ليا الحاج! ولا كاع نقدر ندخل؟

حمد: الا مايمكنش !! شكون نتا بعدا ..

سمع صوت غواتهم و بكاء أطفال! واضح ان عائلة خولة متشددة تنهد و حاول يرطب مع أحمد

جاهد: واش نت خوها ؟

حمد : نسيبهم ! ولي نصحك بيه هو بدل ساعة بختها

جاهد : راني قاصد الدار و باغي الحاج

احمد: عاد طفات عليك شمعة! قيل هاد هايلالة قصد الدار

جاهد : المكتاب تيتصرف ! و من هادشي كلو كلامي مع الحاج

_طلعو و هبطو ! بلاش احمد عمرو عجبو شي احد ولا تفاهم مع شي احد ! دخل عند حاج نادا عليه و خبرو بشي احد برا ، عبد الله كان متاكد انه هو و خرج شاعل اكثر

عبد الله:{غير شافو زاد زند} ااااش كااادير هنااا فداااري دوييي ..

جاهد:{بهدوء} الحااج ! راه معاك واحد بعقلو ماشي برهوش، غوتي ! خاصمتي درتي لي فخاطرك ، جا وقت الكلام

عبد الله: حسبي الله ونعم الوكيل فيك..الكلام عاد بان ليك دبا؟

جاهد:{زفر} الحاج راك غي كاتأول من راسك ..راه بنتك ربي شاهد شنو ناوي معاها

عبد الله: ياك آ سيدي ..ربي شاهد؟ اوا شهدتو عليكم الا يوم الدين

جاهد: خاصك تسمع لياا بعدا ونتفاهمو باش نلقاو الحل الهضرة الخاوية مكاين باش تفيد

عبد الله: جوج كلمات! ياك نيتك صافية ؟ و ناوي لي حللو الله؟ يلاه والديك صبح عندي

جاهد: هانت قلتيها بطرف لسانك! والديا و لي حلل الله ؟ هادشي خاصو وقت

عبد الله:{مكايشوفش فوجهو} انت و جهدك ! حسب خطاويك

_غلق باب الحوار و باب دارو !! ماخلاو ليه ذرة عقل !! دخل الدار مع أحمد يسب و يلعن و احمد تيهدن فيه ، احس براسو كانبو و ملعول عليه، وحدة كل مرة غضبانة و ماقادر حتى ياخد قرار معاها وحدة تيشوفها مرة فخمس سنين و الصغيرة لي قال نعوضها بيهم خلاتو ضحكة

احمد : الا كان معقول توكل عالله

عبد الله : عطيتك عهد الله ! الا رجع مسبتها مزوجاه والا مارجعش اول واحد يطرق بابي يديها! ماعرفتش نكون واللي ليها اوا تمشي عند لي يحكمها

بعد صلاة العشاء ، دخل عبد الله للدار هو و حمد ، وجهه مغير على العادة ، مابقاش داك الشخص اللي كايدخل لدارو بوجه بشوش ، قلبو كاينزف دم ، و مخو شوية و يطرطق بالتفكير ، طلع حمد الفوق وهو توجه للصالون لقى هناء جالسة شادة تيليفون فيديها ..

عبد الله: ما زالك هنا !!

هناء:اا أبي شنو واقع ..

عبد الله: دابا نتي مزوجة وبراجلك !! بلاصة ماتقابليه جاية تقابلينا حنا ؟!

هناء:{حدرات راسها} وقعو شوية مشاكل وو..

عبد الله: ماتقوليش ليااا مشاااكل اللي عندو مشاكل كايقصد المحكمة ديريكت !! دابا غانقولك زوج كلمات يا تهزي راسك وولادك وتمشي لدار راجلك ، يا من غدا ها نتي ها المحكمة !!

هناء:{تغرغرو عينيها} ممنحقيش نغضب فدار ابا ؟!

عبد الله:{بصرامة} لا ممنحقكش ، انا زوجتك باش نتهنى عليك ماشي باش نزيد همك ، المرا الحرة نهار تغضب تغضب فدارها الزواج ماشي تفلية ..

هناء:{بدات تدمع} دابا واش هي غلطات وانا نسمعهم ؟؛؛

عبد الله: اش جابها ليك ؟! ولكن الفشوش خرج عليكم انا اللي طلقت السمطة كثر من القياس ، ودابا دارت عليا ولكن كلشي هنا يتحد ، اللي عندها شي راجل تتبعو ..

هناء: هو جرا عليا نمشي نرجع ؟!

عبد الله: مشاكلكم يا يتحلو با يساليو !! والسلام عليكم ، ولكن هضرتي ماشي معاك معاه هو

هناء: ولكن انا شنو ذنبي ؟!

عبد الله: انا اللي شنو ذنبي حيدت راسي وعطيتكم ، ماتت مكم وانا فعز شبابي و مابغيت ندخل عليكم مرات باكم بوحدي تقاتلت على ودكم فالاخر ها النتيجة وها باش كاتجازيوني .

داز مشا لبيتو خلاها مسمرة بلاصتها دموع مجموعين فعينيها ، وشافت فسناء اللي جالسة فالقنت غير كاتشوف بعينيها وبدات تدمع ومشات للبيت كاتبكي مراضياش ، وهو هز تيليفونو مدوز الخط لنسيبو ...

سمير: السلام عليكم آ الحاج ..

عبد الله:{بصوت جدي} وعليكم السلام...

سمير: آش خبارك الصحيحة كلشي بيخير ..

عبد الله: ولله الحمد !! فينك ؟!

سمير:{بإستغراب} فالدار !!

عبد الله: وفين مخلي مرتك ؟!

سمير:{وجهه صفار} على ما كاينش معاكم ؟!

عبد الله:تبارك الله على الراجل بو ولادو ! انا عاطيك بنتي آمانة عليها ماشي باش تجري عليها ..

سمير: جريت عليها ؟! أعوذ بالله الحاج ما جريت عليها ما والو بخاطرها جات ، وقالك بغات الطلاق !!

عبد الله: اجي وطلق ؟! ، ماعندكم عقل خاديين كلشي لعب ودوك الدراري اللي بيناتكم شنو حالهم ؟ فين غايوليو وفين غايوصلو !!

سمير:{تنهد} آ عمي انا مابغيت طلاق لا بغات ترجع ها دارها ..

عبد الله:{بصرامة} غاترجع اجي خودها !!

سمير:واخا ان شاء الله ..

حط تيليفون كايماصي جبهته ويزفر ، كان متكي ناض لبس حوايجو وهز السوارت ونزل ..

سمير: علم الله اش دارت ديك المصيبة تاني مكاتتهدش ..

حرك طموبيلته شاد الطريق ، حتى وصل ودق الباب تفتح ليه من طرف حمد اللي طلع فيه وهبط مفاتوش سلام سلام ، ودخل الداخل كان باها جالس فالصالون كايتفرج فالجزيرة حتى دخل عليه ..

سمير:{باس يديه} السلام عليكم الحاج ..

عبد الله: وعليكم السلام !!

سمير:{جلس حداه} قولي اعمي شنو واقع ؟!

عبد الله: نتا اللي تقولي اش كاين ماشي ماشي انا ..

سمير:{تنهد} اودي آ عمي منين نبدا ليك ..

عبد الله: منين ما بغيتي !!

سمير: آ الحاج مانكذبش عليك ، هناء ممصباراش باش ندوي على حق ، انا صبرت عليها ما خلات ما دارت ، خرجات ورايا جات لهنا و صلاتني شي هضرة كانعيا نميك وندير راسي ماشفتش ولكن الغالب الله ..

عبد الله: شنو كاين ؟! شنو وصلو ليك ..

سمير: دابا بلا ماندخل معاك فتفاصيل من الاحسن نحلوها بيناتنا ،. دابا باش كملاتها طلبت منها تقابل ليا مي ، طاحت فالكرسي ناضت هزات راسها وجات لهنا !!

عبد الله:{عقد حواجبه} هناااااااء هناااااء .. نشوفو تا هي اش تقول..

حمد بقى كيشوف بعينيه وطلع بحالو مباغي يدخل بين حد ، ونزلات هناء كاتشطح بالخلعة ، وجهها صفر فاش عرفاتو جا كاتقول دابا يحطني بوجهي توجهات عندهم كاتبلع ريقها تا وقفات عليهم ..

هناء: أبي عيطتي ليا ؟!

عبد الله:{بجدية} جلسي..

هناء:{جلسات مكاتشوفش جيهتو} الله يسمعنا خبار الخير ..

عبد الله: علاش مابغيتيش تقابلي عجوزتك ؟!

هناء:{بعصبية} ههه شكا ليك ؟!

سمير:{بتحذير} هناااء ..

هناء:{ناضت كاتغوت} هناء هناء شنو هي هناااء ، مملزومش علياااا نقابل مك ، فهمتييي كاين عرايسات خرين ، وعندها بناتها ونمشي انا على بالسلامة جبتيني خدااااامة عندك ولاااا شنووو مكم هززوووها راااسكم انااا مملزوماااااش اعبااااد الله مملزوماااش

سمير:{بحدة} ماجبتكش خدامة ، ولكن كون كنتي بنت الاصل بلا مانقولها ليك ..

هناء:{شافت فباها اللي ساكت} شفتي شفتي على اسلوب كايكلمني بيه ، باغي يفقصني ويطرطق مرارتي ..

عبد الله: هنااء حتاااارمي رااجلك ..

هناء: اش غااادي نحتااارم فيه على زييين فعااايلو ، مكرفصيين معااااه عاايش فزماان الجااهلية مانخرج ما ندرج مانلبس ما نفرح ، حياتي كلها صدااااع ، ااسييدييي تعطيينييي تيسااااع وبراااتي ونفاااقتي وتصرف على ولادك..

سمير: ياااااك الاااالة يااااك ، أناااا هااكا ماشفتيش رااااسك نتي ولاااا كيفاااش ؟! الطلااااق ممطلقش..

هناء:{كاتنهج} اش غانشوف فراااسي اش ، كاع فعايلي بسبب تزماااتك، ماطلقش دير ليا حل..

سمير:تاااقي الله يا هاد المرااا مباااغيش ندوي قبل مانجيب الدليل ..

هناء:{بلعات ريقها} شمن دليل ..

سمير: بلا مانشرح !!

عبد الله: انا ماعندي ما نقول !! مغانتدخل بيناتكم !! ولكن زواج مسؤولية ماشي لعب ، هناء طلعي جيبي ولادك وزيدي لدارك ..

هناء:أبي أن...

عبد الله:{بصوت قاطع} مغاديش نزيد نهضر !!

ناضت معصبة كاتضرب برجليها طالعة فالدروج خلاتهم جالسين ، ودخلات ديريكت لبيت خولة حلاتو بجهالة ، لقاتها جالسة كاتبكي وسناء حداها كاتواسيها ..

هناء:{بالغوات} الله ياااااخد فيييك الحق ، الله يرزيييك فصحتتتك ، يااا بنت الحرااام نتي تغلطي حناااا تجريينااا ورااااك ..

سناء:{خرجات عينيها} هناااء هداااي ...

هناء:{مكشكشة} ماغااديش نهداااااا ، شوهتينا ما مخلية ليناااا وجه ، حسبي الله ونعم الوكيل فيك ، يااااا الطماااااعة خرجتيييي على رااااسك وخرجتيي علياااا آ بنت الحرااااام ، بغييتك تولي هجااالة من نهاااارك ، لهلااااا يخلي فيييك شي عظم صحيييح ..

خولة:{صدرها طالع هااابط توجهات بغات تجبد ليها وجهها وهي تشدها سناء} طلقييييي نورييي للكلبببة طلقيييي لعنة الله وعليييك ، أناااا بزاااف عليييك فهمتيي ..

هناء:{كاتنهج} بااااش بزااااف علياااا ، جريتييينييي ورااااك مدااايرة لا بيدي ولاااا رجليااااا ، انااا اللي كنت ننصح فيييك ونقوول الذهوبااات وتبدااال الحوااايج ما هواااش ، صدقووو شكوكي فمحلللهم ، وخرجتيي عليناااااا ...

خولة:{بغات تطير عليها وشداتها سناء وبدات كاتغوت وجهها حمار} بعدييييي مناااااااااي بعدييي بعدييييي بعدييي طلقييييي نوريييييهااااا طلقيييي .. شووووفي حاااالتك نتييي نتييي المدلوووولة ..

تسمعو خطوات فالدروج وخرجات هناء كاتجري للبيت تجمع حوايجها وخولة بقات كاتردد وتغووت اللي خلقها وباهااا فالباااب ..

خولة: علاااااااش ماطلقتيييش علاااااااش ، اااااا ربييييي {كاتنتف راسها وتغوت} اااااااش درت اسيدييي ربييي ااااش درررت يعاااقبني هااكاااا اش درتتتت {كاتبكي بصوت عااالي وتغوت ساااعرة} ماااالقاااانيش فاااوطيييل مالقااااانيش ، وااااش أناااا نديرهااا وااااش نديرها ..

سناء:{شاداها كاتبكي معاها} أعوذ بالله من الشيطان الرجيم ، لا حول ولا قوه الا بالله ، مااتديرييش فراااسك هاااكاا اختييي ، اش داااك اااش دااااك واش القهوة قليلة على باااك ...

خولة: ياااا ربي نمووووت ياااا ربيييي ياااا ربي نتبع ميمتييي ياااا ربي خووودني يااااا ربي اااععع {كاتضرب ففخاضها وتغوت باعلى صوت}

_جرات سناء خارجة تجيب ما الزهر ولقات باها واقف تما مخنزر ..

عبد الله: يا غادي تسكتيها ولا اليوم ندير فيها شي مصيبة ..

سناء: راها سخفانة !!

عبد الله: الله يجعلها تكون ميتة !!

_كملات طريقها الكوزينة كاتبكي ، محروقة على حالتها وهزات قرعة ماء الزهر خواتها عليها كاملة وهي سخفانة كاتهلوس ، عاوناتها تكاتها على السرير ، وجلسات حداها كاتشوفها سخفانة و كاتدوي ..

سناء : الله اربي آش هاد المكتوب ؟ {تتمسح على وجه خولة لي تننخصص} عين طرطقت فيك اختي

.. من الجلسة العائلية ، امامهم صينية اتاي مع دواز اتاي ، متبادلين اطراف الحديث و كلها كابحاول يتوصل معاه للراس الخيط ، لكن مثل ما معروف عن جاهد كايعيطي المفيد و الخلاصة ، شخص بعيد عن كثرة الحكي و الملاغة ، امامو عمو و زوجته اللي هما عائلتو الحالية و الحضن لي محتاويه ، جاهد شخص فقد الاب ديالو فصغره موتة الله ، و الام ديالو كانت فعز شبابها تزوجت و رزقت باختين ليه ، قليل القليل فاش كايزورهم ، كبر و ترعرع مع عمو زوجة عمو لي كايناديها بالخالة رشيدة ..

رشيدة : اوا يا ولدي فعلا خير البر عاجله ولكن تاني راه زواج هدا !

جاهد : {بتنهيدة تقاد فالجلسة} داكشي اللي كاين الخالة ! الزواج هدا، كما كان الحال طولنا فالمعرفة ولا قللنا راه لي مكتوب لازم تشوفو العين ..

العم : ياك تكلمتي مع باها ؟ عطاك موافقة للزيارة ؟ صافي آسيدي توكلو على الله

جاهد:{وقف بهدوء} الله يطول لينا فعمرك العموم و دعي معانا الله يسر الامور ولا يعسرها ..

العم : {وقف معاه تيحك راسو} الله يسهل اولدي ! و يجعلها من زوجات صالحات و يرزقكم الذرية و يعوضك الخير ..!

جاهد : { بحسرة } اللهم آمين! الخالة تفقنا ؟

رشيدة: اوا ولدي لي بغيتي! مزال حتى ماشبعنا منك ههه اليوم صبحت كانقي القنارية لي كاتعجبك ساعة ماكتابش..

جاهد : الله ! مزال ايام الله طويلة ، نطرقو هاد المسمار و يضبر فيها حكيم {شاف ساعة} انا واحد ربع ساعة نريكل شي امور فالبنكة و لقاكم واجدين ..

رشيدة: {قربت ليه مخلية راجلها تيشوف فتلفون} اوليدي و مك ؟

جاهد : ( بهدوء ) ان جنة تحت أقدام الامهات! نديرو الخطوة اولى اللي هي الخطبة الا تيسرت الامور ان شاء الله تحضر! تمارة طريق و السفر وصافي ..

رشيدة : الله يرضي عليك اوليدي ! اهم حاجة صفا القلب و راحة البال

جاهد : ربي لي عالم بالقلوب ! راحة البال بيد الخالق و الصفا هو لي فاتح لنا ابواب الخير و الرزق ..

خرج من الدار هو تيستغفر و يوكل الله فكل خطوة ! هاد المدة قليلة لي مرت خلات عقلو يتخربق ، ماكانش ضارب حساب ديك شوهة فالقهوة ، ولكن كيآمن بالقدر و بما انه قطع الكلمة مع عبد الله لازمو يثبث الخطوة الأولى و مايضيعش معاه خولة، مسافة طريق كان فالبنك خلص مسائلو و رجع من نفس طريق بقى فطموبيل عطاهم كلاكصون حتى نزلو على خاطرهم ، و شدو طريق

العم : على بركة الله ! اوا كولشي هو هداك؟

رشيدة:{ مأنقة بجلباب} اوا ولدي لازم نتقضاو شنو ندخلو فيدينا

جاهد : {طأطأ راسو بقبول} نتقضاو انشاء الله ، دبا تتاخدو دوك الحوايج و مسائل العروسة؟

رشيدة: اوا لواه ! غير البياض و مرجوعنا فالعقد عاد تكبيرة

جاهد : لهلا يخطيك الخالة ! تكبيرة و الكرم من شيم المسلمين ..

هي تتحط يديها هو تيخلص ، تقضاو لوازم الخطبة و شدو طريق، طول الحديث اما القرآن مطلوق أو كلامهم بين الدين و الشريعة لي منغمين بيه آذانهم ، كل مرة يشوف فتلفون ، ماتجرأش يتصل بيها ولو عارف مليون فالمية انه يتصل بيها ماتجاوبوش ، بعد ساعات وصلو و قف طموبيل جنب طريق و نزل رابط اتصال مع عبد الله لي حصل رقمو اخر مرة من احمد ..

جاهد : السلام عليكم

عبد الله: عليكم السلام ورحمة الله وبركاته ! شكون معايا اسيدي

جاهد: انا جاهد اسي عبد الله لي متافق معاك على النهار ضيافة للخطبة بنتك

عبد الله : ( بصرامة) اياه انعام اسي جاهد ! كاين شي مانقضيو ؟

جاهد : كل الخير الا بغى الله ! معايا مالين الدار و قاصدين دارك

عبد الله: دارنا فديك الدار كلنا! مرحبا اسي جاهد توصلو الدار اتصلو بيا ..!

فبيتها جالسة بذهن شارد ، صحتها زادت قلالت و ضعافت كثر من لول وجهها شحاب ، تحت عينيها كحل من السهير مكاتذوقش طعم النعاس ، تفكيرها كامل مع ولدها واش شارب واش ناعس ، ودابا تزادتها حتى خولة ، جالسة فبيتها شادة فيديها واحد تصويرة صغيرة ليه كاتشوف فيها ، ودوز يديها بهدوء و عينيها دامعين ، مألمة و روحها كاتتمزق ، حتى تحلات الباب ورفعات عينيها ببطئ ولمحاته متوجه عندها عاقد حواجبه ، تنهدات تنهييدة طويلة ..

حمد: شفتك الآلة مشبحة ليا هنا ؟؛

سناء: علاش شنو كاين ؟!

حمد: عاد كاتسولي ؟ هادشي علاياش دوينا ؟ رجعتي فكلمتك صافي ..

سناء: علاياش تافقنا شرح كثر !

حمد: ماعوالاش ترجعي لدارك ؟!

سناء: حتى هادي داري ..

حمد:{خرج فيها عينيه} لا الآلة لا هادي دار باك ..

سناء:{ببرود} مالك على حالتك ؟ مكاتشوفش صداع اللي نايض ..

حمد: شمن صداع داوية عليه ؟ ختك ضبر راسها ، انا بغيت مرتي ترجع لدارها صافي براكة راك عيقتي ..

سناء: نتااا ديمااا اناااني كاتفكر غير فراسك {عينيها تغرغرو} واش عندك قلب ولا حجر ؟ راعي شوية آ بنادم رااااعي راااه عييت منك عييت ..

حمد:{تزير} صافي آ سناء بدلوك عليا ؟ وشوشو ليك وعمرو ليك راسك ؟!

سناء:{شدات راسها مقهورة} شكون غايعمرني شكوون ؟! ، واش اللي عايش فهاد الظغط مغايملش ..

حمد: شمن ظغط شمن ، نتي عزيز عليك تحزني وديري حالة فراسك ..

سناء؛{بنظرة مطولة} انا اللي بغيت ياك ؟ انا اللي بغيت ولدي يضيع مني بلا مانعرف تا خبار عليه ..

حمد: ضوري تا تعياي وقولي ولدك ! الآلة جمعي حوايجك وتحركي ..

سناء:{غمضات عينيها} حمد بلا ماتحاول مغانتحركش من هنا ...

حمد: كيفاااش مغاتحركيش ؟ كانلعبو هنا ولاا والبيي؟!

سناء:قطعهم ولا سرطهم ماكايهمونيش. .

حمد:{شدها من دراعها مزير عليها} وانا اللي مضيع فلوسي ..

سناء:{دفعاته معصبة} فلووسي فلووسي الله يحرقهم ، بعد مني فهمتي بعد ، مغانمشي حتى لبلاصة ..

حمد: غاتمشي غاتمشي آ سناء ويدك فوق راسك !!

سناء:{باستهزاء} الا لا كنتي غاتخطفني كيما كايديرو الهنود ..

حمد: {بتحدي} غاتمشي و بخاطرك ولا. ..

سناء: ولا شنو تضربني زعما ؟!

حمد:{بمكر} حاشة غير هو ولادي معايا فين ما خطيت !!

سناء: على نتا والد ومافخباريش ؟!

حمد:{بغضب} سناااااء جمعي رااااسك ..

سناء: شوف ا حمد عييت من الكاسيطة الحافية ! ، بغيتي تمشي الما و الشطابة ولكن طول ما راسي مقالش ليا على لهيه مغانمشي معاك لحتى بلاصة واللي فجهدك ديرو .

حمد: لحد الان باقي مراعي ليك مريضة ، ولكن الصبر قرب يتقاضى بغيتي نرجعو لايام زمان رجعو !!

سناء: {يديها كايرجفو} مابقيتش كانخاف فهمتي ، بغيتي تضرب ضرب تقتل قتل ، اصلا انا ميتة من نهار مابقى لودي آثر ، ولكن مغانرجعش مغااااديش نرجع حتى نلقااااه قداااامي. .

حمد:{شاد راسو بزز} نتي مابقيتيش تحشمي ! ولكن هضرتي مع باك ، هو اللي يعرف ل تريكتو ..

سناء:{مسحات عينيها} أبي مابقى كيف زمان ، يحساب ليك بحال فاش عطاني ليك ، راك غالط ، تا واحد مغايحبسني تاا واااحد ، نهار تجيب ليا ولدي ، ديك ساعة نمشي معاك ..

حمد:{معارف منين يدوز ليها} دااباا واش كاضحكي علياااا ، ياك لبيي وقطعتهم كانلعبو هنا !

سناء:{شدات ودنيها} مابغيتش نسمعك ، و الا ظطريت با انا ندوي معاه ..

حمد:{شد راسو تا عيا ولكن ستفزاته هز يديه ونزل عليها بتصرفيقة تا رجعات باللور} ياله تا هادي قوليها لداااك باااك ..

سناء:{مخرجة عينيها دموع محجرين فيهم} رجعتي لعواايدك ..

حمد:{هز يديه} ونزيييدك ..

_سنااااء .. ! سناااااء ..

جمع يديه فاش سمع صوت باها كايعيط وهي دموع شاداهم بزز ، وحنكها كايوزوز ، خرجات من تما كاتجري شادة على وجهها، تشوف باها اش بغا ، وهي كاتقاوم تبقى صامدة ..

سناء:{بهمس وقهرة} الله ياخد فيك الحق الظالم ، الله ياخد الحق

نزلات عند باها جارة على وجهها شحال باش مايبانش الطابع الحممر ، لقاته واقف فنص الدروج عاقد حواجبه ..

سناء: أبي عيطتي ليا ؟! ..

عبد الله: جاو شي ناس على ود الخطبة ، هبطو شوفو شنو توجدو وقولي لختك توجد راسها ..

سناء:{بحسرة} واخا أبي

طلعات عند خولة وهي كاتتنهد فحسرة ، حتى واحد مالقاها كي بغاها ، دخلات عندها للبيت ورفعات الريدو كالعادة خاشية وجهها فالمخدة ، غير حسات بيها راسها وجهها صفر وعينيها منفوخين وحمرين ، لحد الان باقي ماتصرطات ليها الشمتة اللي وقعات ليها ..

خولة: ها العار لا ما سدي داك الريدو..

سناء:{جلسات حداها} وقت النعاس هادا ؟! ..

خولة:{باستهزاء} اممم والا مانعستش ننش الذبان ..

سناء:{تنهدات باسى} خولة يا خولة ، نوضي غسلي وجهك نهبطو التحت ..

خولة: ماعندي فين نهبط ما فيا اللي يتلاقى بشي واحد ..

سناء:أبي هو اللي طلب مني نقوليك توجدي راسك !!

خولة: علاش ؟!

سناء:{حدرات راسها} جاو دوك الناس على قبل الخطبة..

خولة:{بقات كاتضحك ممتيقاش} الخطبة ؟ خطبة كاع ههه ، بغا يتهنى مني صاافي ..

سناء:{مسحات على شعرها} المكتاب هادا تحاربيه ..

خولة:{جمعات ضحكتها عينيها بداو يتسرسبو بالدموع} علاااش اختي علااش بااغي يدير فيااا هاكا شنوو ذنبي ، اش درت ليه كااع ..

سناء: ا خولة الله يرضي عليك ، نتي عارفة ابي مزيان ، اللي شاف مساهلش ..

خولة:{بانفعال كاتبكي} ااش شااف اش واخا يكون لقاني معاه فالفراش مايدير كاع ديك الشوهة والحالة زاد بغا يتزوجني ..

سناء:{عينيها دمعو} خاولة عافاك احبيبتي لا تهدني ، نتي عارفة ابي دقة قديمة ، و مكانش عليك تتلاقاي بيه ..

خولة:(ضربات على فخضها كاتبكي} داااروها بيااا ولاد الحرام دااروها الله يلݣييهااا لييهم ، ماابغيتش نتزوج مااابغيتش مااابغيتش علااش جاا علاااش .

سناء: على نتي مكاتعرفيهش ..

خولة:{كاتشهق} كون غير كنت كانعرفوو مانديررش هااكاا مانديرووش ، اقسم بالله اختي مكانعرفو ، ماضنيتهااش منوو كاااع ، كنت ديما منخلااه ومطلعة ليه Vu مرة نقمعو مرة نتجااهلو واول مرة نتلاقاو ، وقعااات لياااا ديك الشووهة معاااه وداابااا بااغي زوااج امييي {جبدات وجهها} امييي امييي ..

سناء:{شدات يديها كاتبكي معاها} آ ختي آ ختي ، أعوذ بالله من الشيطان الرجيم ،ماديريش فرااسك هااد الحااالة ، المكتاااب مااا منوو هرووب ..

خولة:{حركات راسها بالدموع} الااا الااا ، ماايديييرش هااكااا باااغي يذبحنييي بيدييه ، ماانتزوجش واااخااا نمووووت ..

سناء:آ ختي عافااااك الله يرضي عليك منااقصين صداااع زييدي وجدي رااااسك ..

خولة:{خرجات عينيها} غاانوجد ؟ هه مغااااديش نوجد والو اللي بغا يطرا يطرا ، بغاا يعطيني ليهم ؟ يعطيني ولكن مغانجلس معااهم مانشوف وجههم ..

سناء:{تنهدات بقلة حيلة} واخا ختي واخا ، ولكن هبطي وجدي معايا نعطيوهم صوابهم مكاين اللي يعاوني ؟!

خولة: وديك ختك فين هي ؟!

سناء: عاد كنا داويين ، هي اللي جاية غضبانة صيفطها لدار راجلها ..

خولة: عبر عليها تستاهل ميكروبة ..

سناء: خاولة ختك الكبيرة زعماا ..

خولة: ديك ختي الكبيرة اكبر لفعة فحياتي ، راس المصايب ، آسناء سيري دوي ليا مع باك يعطيني تيساع مايزوجنيش ..

سناء:{شدات على راسها} آميي واا خاولة واا حبيبتي ، نتي شريتيها راسك اش ندير ليك انا ؟! شادة ليا الهضرة مع زوافرية وعطيتيها التخلاط ها السعودي ها العسكري و ها خطيبك اللي سمحتي فيه ..

خولة: واش عاودت ليك باش تندميني ، الآلة ديك سعودي ميت عليا من غدا كايستناني غانقول اه ! داك العسكري عاد كنا داويين جاي من جيهة ديك ختنا واللي تجي من جيهتها حرام نحط عليها يدي ! وداك خطيبي ولد مو الآلة باغيين يردوني خدامة عندهم !! ، انا مخلاطااش انا بحالي بحال كاع البنااااات ، باغية راجلي نختارو بيدي بين مية راجل ساعة شكون خلاك ..

سناء:الخير فيما ختاره الله ، عسى ان تكرهوا شيئا وهو خير لكم ..

خولة:{وقفات شاداها الدوخة} زيدي نعاونك من الهضرة ، وداك با عمري نسمح ليه ..

سناء: لا حول ولا قوه الا بالله ، براكة من هاد الهضرة الله يهديك وزيدي معايا ، لبسي شي حاجة مقادة ، ووغطي الصفورية اللي فوجهك ..

خولة:{بالحلوف} والله لاا حطيت شي حاجة على هاد الكماارة هااكا غااادي نهبط ونلبس عبايتي مزيان تبارك الله ..

سناء: احح اخولة احح غير زيدي اختي شهمتيني.

رمات عليها عبايتها بالفولار ، وهبطو التحت ، ودخلو الكوزينة يوجدو باش يضايفو ضيافهم ، وخولة غير كاتخمم وتعاود ملاقية جهد ، حتى سمعو الصونيت وحل ليهم باها كايسمعو غير الهضرة ، وخولة جلسات على الطبلة شادة راسها، تتحس بقلبها تيضرب ، نفس احساس توتر و الخوف، كفاش هادي نهاية؟ هادي هيا الخطبة ، هدا هو زواج ؟ تزوج واحد ماتتعرف عليه والو من غير اسمو و المكان فين ساكن ..مر نص ساعة غير احمد كايدخل يهز صينية اتاي و حلويات

سناء: خولة !! اا خولة

خولة :{كاتمسح دموعها} شتي ابا شنو داير فيا ؟ يخلي غير فترة خطوبة على الاقل !

سناء : لي عطا الله عطاه ! صبري

خولة: شتي ديك صبري ؟ انا كانكرهااا كانكرهاااا

يتبع...