جوهر الروح الجزء الخامس

بعد أيام فاقت فالصباح شافت حداها كان جاهد ناعس ، طولات فيه الشوفة وناضت ، دخلات للحمام غسلات وجهها وسنانها ، و شافت فالمرايا مطولة ، زادت ضعافت على الاول وعينيها تغرقو ، شدات المشطة كاتمشط فشعرها ساهية ، حتى خرجات عينيها فاش شافت فالمشطة شعرها كايطيح ، عينيها تحجرو بالدموع ، هزات الزغبات اللي كاينين فالمشطة وبقات كاتجبد فيهم حتى عمرات يديها ، طاحو دموعها كاتشوف فشعرها وقاست وجهها الشاحب ، زيرات على عينيها ، حابسة شهقاتها ، جلسات فالارض كاتبكي و تعاود قلبها تزير عليها كلشي تجمع دقة وحدة ، تعيا تقسح قلبها وتجمع و تخبي لكن فالاخير كاتبقى بنادم يعيا يقساح كايرجع لطبيعته فين هي خولة ديال شحال هادي ، مقابلة غير راسها و باها داخلة خارجة ، مرتاحة دابا كلشي مشا حتى من باها داتو الموت وها هي بدات تفقد صحتها و جمالها ، ناضت غسلات وجهها و برداتو ما أمكن ، عاد خرجات لقاتو فايق كايمسح على شعرو حاولات ماتشوفش فيه ، و افكار كايدورو فراسها..

"وليت خايبة "

"ها هو غايملني"

"غاتكوت مراتو حسن مني"

كاع هاد الافكار كلاوها ، هو حضاها بعينيه حسها ماشي حتى لهيه ، حاول يناديها لكن ماتلقاش الرد حيت ساهية ، حتى جر الغطا وناض لابس كلاكيطة ، وحط يديه على كتفها بشوية..

جاهد:{بقلق} خولة..

خولة:{قفزات}ااه..

جاهد:لباس ؟! حاس بيك ماشي حتى لهيه..

خولة:{دورات وجهها لجيهة اخرى} لا ما بيا والو..

جاهد:توريني فيك ؟ قلقتك فشي حاجة !

خولة:لا مادرتي ليا والو..

جاهد:إذن مالك !!

خولة:{ساطت}بغيت نبقى بوحدي..

جاهد:ماعندك ماتبقاي بوحدك حتى تشرحي ليا اش كاين ، ديما ساكتة و ساهية !!..

خولة:نتا مغاديش تفهمني !

جاهد:اوا شرحي لينا الآلة نفهمووك !

خولة:{شدات راسها} عافاك ما فيا اللي يدوي..

جاهد:{شد يديها عندو بلطف}خولة من قبل قلت ليك مشاكلنا وحدة ، وانا وياك واحد ، مانبغيش نشوفك مغبونة و لا كاتخممي ، مابغيتش كل مرة تبكي فالحمام و تمسحي عينيك ، ضانة انني مغانشوفكش ، و انا حافظ كل تفصيلة فيك ، عينيك فيهم خيط غامق ، فمك كايحمار {دوز عليه بصبعو} و نيفك حتى هو{جبدو ليها} وباقي باغية تخبي عليا ؟!

زيرات على عينيها بقوة كاتفكر ، مابغات تقوليه والو ، و أصلا شنو عندها ماتقوليه ..

"واش تقوليه مابقيتش تايقة فراسي ؟"

"ولا تقوليه حاسة براسها بوحدها فهاد الدنيا"

"ولا تقوليه مابقى فيا مايتشاف"

ماتقدرش ماتقدرش وهي غرورها مانعها من انها تبين شنو عندها ، ماتقدرش تبين ضعفها ، كبريائها قوي بزاف ، مالقات شنو دير ، بغات غير يخرج هو ولا هي اللي تخرج ، باش تنعازل مع راسها رغم ان هضرتو حركات فيها شي حاجة الداخل ، لكن غرورها يبقى أقوى..

خولة:{بحدة}جاهد انا قلت ليك ما فيا اللي يدوي ، علاش مصر تبزز عليا ؟!! ، مابغيتش هي مابغيتش ماعندي والو ، مالي شنو عندي !!!

جاهد:{حمر فيها}صوتك ينخفظ !! هي دابا انا اللي غالط؟!

خولة:اه نتا اللي غالط {محاساش براسها المهم هو تبرد العافية اللي فيها} نتااا اناني ، و كاتحس غير برااسك وكاتبغي غير رااسك..

جاهد:{شير لراسو}انا اناني !!

خولة:اه أنااني ، وبزاااف كاااع..

جاهد:اه انااني ، اناااني حيت سااامح فخدمتيي وجيت نبقى معاااك و نوااسيك ، اناااني حيت عمري ضريتك بهضرتي اناااني حيت كانفضل راااحتك على رااحتي اناااني حيت أناااا مزوج قريب شهر وقربت مرة وحدة من مرااتي ، مكاااينش الأنانية قدك آ خولة مكااينش ، واش عمرك فكرتي لرااحتي ؟ عمرك قلتي عيقت ياله نمشي لدااري اللي عمري مشيت ليهااا ، عمرك تفكرتي واجباتك ليا كزوجة ؟

خولة:دابا علااش كاتقلب عليا الݣفة ، وااااش بخااطري ، انااا راه بااا مااات ماااات كيفاااش بغيتيني نفكر فشي حد..

جاهد:باك الله يرحمو ماختالفنااش فيهااا ، ولكن شووفي حياااتك واللي دااير بييك..

خولة: آ سيدي الا طلعت ليك فراسك عطيني برااتي ، و الله يسهل !!

جاهد:عطيني برااتي كوليها آ خولة !! فيقي على راسك الفراق عمرو يكون ..

خرج و زدح الباب و هي بقات مزيرة على يديها ، كاتغزز فمها طالع ليها الدم ، مارضاتش يصارحها بشنو فيهااا ، تنفسااات بزز و جلسات على السرير ، كاترد النفس شاداها الدووخة

واقفة حدا باليزات ، ملبسة ولادها حداها وقفات كاتقاد شالها ، حتى دخل هو من الخدمة وطلع فيها وهبط وشاف فالشناطي اللي حداها باستفسار..

سمير:فين غادية ؟!

هناء:غادية بحالي آ خويا !!

سمير:كيفاش غادية بحالك ! جديدة هادي..

هناء:مابقى عندي ما ندير معاك ، اللي كان شادني الله يرحمو !..

سمير:اوا حطي ولادي وسيري بحالك!!

هناء:ولادي هادو! انا دار با غانمشي ليها ، و الحمد الله ماخلانا وراه بلا والو..

سمير:خلينا نتفاهمو بالعقل ! هاد الولاد ماشي ديال التكرفيص ، و مشادين حتى راسهم !

هناء:ولادي قادة بيهم ، حساب ليك مقارياش فراه صافي ؟ الحمد الله على نعمة العقل و الدراع !

سمير:شنو الآلة تكون هاد الخدمة بلا قراية! ميناج ؟ تكرفيص تخدمي عند لالايااتك ؟! داكشي اللي خاص..

هناء:هادي راه لالاك هناء ! قالك نخدم فالميناج ! مانحتاجش اصلا نخدم..

سمير:{زير على دراعها} داك تنوعير ديالك خليه عندك، بغيتي تمشي الما والشطابة! ولكن ولادي هنا يبقاو معايا !!

هناء:بيناتنا المحكمة ! الا عطاتهم ليك ها نتا ها هما ، كانحمد ربي ونشكرو غانتهنى من هاد القهرة اللي عايشة فيها ، وسير شوف ليك الخدامة اللي تقابل ليك مك!!

سمير:حساب ليك الخدمات مخصوصين ؟!

هناء:كون درتيها من قبل ! مانوصلوش لهنا..

سمير:شكون وصلنا لهاد المواصل انا ولا نتي ! شكون بدا كايخروض ورا ظهر لاخر.

هناء:ماخروضت وراك ما آذيتك !!

سمير:آذيتي ولدك ! حساب ليك ناعس على ودني !!

هناء:{تزيرات}مآذيتووش!!

سمير:واخا دليل مكاينش ولكن الفاعل واضح ، صبرت على ود ولادي مابغيتش يعيشو مشتتين ومفارقين ولكن حيت نتي ختاريتي ، كون ما داك الراقي فين نوصلو دابا فين ، كون رزيتيني فيه!!

هناء:علاااش باااقي مصر باللي انااا علاااش مادرت وااالو فهمتييي !!

سمير:ماشي غير درتي الله شاهد ، وربي يفضحك حسبي الله ونعم الوكيل فيك هادا ما عندي ، ها نتي ها دار آ بنت الناس اللي بيننا سالا والقاضي يحكم بيناتنا ، وولادي مرجوعهم ليا..

هناء:بقى تحلم..

جرات ولادها وخرجات ، وهو بقى جالس شاد راسو ، كايتفكر ، كون ما داك السيدة اللي لقى فطريقو ونصحاتو فاش كان فالرباط كون راه ولدو في خبر كان..

"فلاش باك"..

جالس فالحديقة مزير على راسو ولدو حداه بوجه صغير شاحب ، رغم مرور ايام عديدة على غسيل المعدة مكاين حتى نتيجة ، واللي زاد كمل عليه باللي تسمم بقى فبلاصتو ، وماتحددش شنو عندو ، دازت مرا كبيرة فالسن ظهرها مقوس ، و حوايجها حالتهم ، ونطقات بصوت ثقيل..

المرآة:شي صدقة فشي سبيل الله..

سمير:{بلا مايرد دار يديه فالجيب وعطاها اللي كتب الله}..

المرآة:{شداتها بقناعة فرحانة}الله يسهل عليك وينقي طريقك من الشوك ، الله يعطيك شي فرحة دائمة..

سمير:{بتاسم بذبول} دعيلي غير مع ولدي بالشفاء..

المرآة:{شافت فيه} الله الله ، مسكين باش مريض..

سمير:والله الخالة ما عرفنا باش بلانا الله ، داز على الاطباء و باقي مجاب الله الشفاء..

المرآة:{قربات ليه بشوية مركزة عليه} عينيه مغورين وصوفر ، وفمو غادي الكحولية ، سير لشي فقيه ، ماعند طبيب باش ينفعك..

سمير:علاش راه الطبيب يعرف حسن من الفقيه..

المرآة:مرض الطبيب راه باين ومرض آخر راه باين ، دير النية و الله يجيب الشيفاا من عندو..

سمير:اللهم امين ندير بالنصيحة..

🔙🔙🔙🔙

فعلا سول و مشى عند واحد الراقي معروف ، كايستخدم فقط القرآن ، بعيد كل البعد على أعمال الشرك ، وقرا عليه ما تيسر وعاود حتى كايتفاجى بيه كايتقياااا ، ماا كحل حتى كانت قرجوطتو غاتتجبد ، و بعد حصص من القرآن الكريم ، فعلا بدات تظهر النتيجة والولد ولا يلعب وياكل بحال اي طفل طبيعي ، وصحتو ترجع ليه ، لكن ماقدرش يعرف السبب ، لانه مشا عند راقي ماشي ساحر

دازو ايام كثيرة وهو ماليه آثار ، مشا مارجع وهادشي اللي مريحها ، واقفة فالكوزينة الضحكة على وجهها ، ولادها ضايرين بيها ، كاتطيب ليهم و تقشب معاهم ، وجهها زاد تنور وعماار ، ونور عينيها اللي كان مطفي رجع..

عثمان:مغانرجعوش لتما ياك آ ماما..

سناء:يكون خير..

أيمن:ماما مالها طاتي خولة..

سناء:{تزيرات} علاش مالها ؟!

أيمن:مابقاتش كاتبغي دوي معاك..

سناء:مكاين والو من هادشي غير جاب ليك الله..

عثمان:{بتاكيد} بالعكس آ ماما تبدلات بزاف ، مابقاتش تا كاتشوف فيك..

سناء:ماتديوهاش نتوما فهاد الخرايف ، {بدات تحط ليهم على الطبلة}كولو وسكتو..

حطات ليهم على الطبلة ، وبقات كاتشوف فيهم مدة ، فعلا خولة مابقاتش كادوي معاها من ديك المرة ، حيت هي بطبيعتها اللي عطاها تعطيه ، خرجات من الكوزينة طالعة الفوق عندها ، دقات الباب عدة طرقات عاد دخلات ، لقاتها متكية السرير ، ومغمضة عينيها ، نطقات بصوت هادئ..

سناء:واخا ندخل !!

خولة:{ماهزاتش راسها}راك دخلتي أصلا..

سناء:{تنهدات و توجهات عندها} ممكن نهضرو شوية!!

خولة:ماعندي ما نهضر معاك..

سناء:خولة عافاك لما سمعيني!!

خولة:{تݣعدات} سناء شنو كاين وعلاياش كاتقلبي؟ درت معاك اللي عمري درتو مع شي حد ! فالاخر راداني بلا قلب..

سناء:خولة فهميني ، انا كنت مصدومة وممتيقاش وماتقبلتش موت ابي ، ونتي جيتي طريقي..

خولة:غير نتي اللي مات ليك باك ؟ انا جاري ؟!

سناء:عافاك فهميني اختي مابغيتكش تبقاي مقلقة!

خولة:ممقلقاش هادي اولا ! ثانيا علاش غادي نفهمك نتي فهمتيني بعدا!!

سناء:{شدات يديها مزيرة عليها عينيها مغرغرين} على وجه المرحوم اللي عمر يبغينا مخاصمين..

خولة:{تنهدات} صاافي آ سناء ، اللي وقع وقع ! لكن ماتنتاظريش تعامل كيما لول..

سناء:نتي ختي و ماعندي حد من غيرك..

خولة:{الصمت}...

سناء:فوقاش غاتمشي مع راجلك؟!

خولة:جالسة ليك على قلبك!!

سناء:لا لا حاشا ! غير سولتك..

خولة:حتى كلا ياخد حقو!!

سناء:واش من نيتك ! ديتي على هضرة هناء ؟

خولة:مكاين لا هناء لا والو! انا ختي بغيت حقي ، والله يعاون كل واحد..

سناء:عارفة هادشي غايشتتنا ولالا!!

خولة:واخا نبقاو مع بعضياتنا ! القلوب مشتتين..

سناء:ماتقسحيش راسك!!

خولة:اللي عندي قلتو ! نشوفو شي واحد مسؤول على هادشي..

سناء:والدار؟

خولة:دار تبقى فبلاصتها ! هنا كبرنا و هاد دار طلعها ابي بعرق كتافو! وتبارك الله ثلاثة دليطاج مع سطح و ݣاراج ، كلا تتدي اش جاها فالنصيب..

ياله غادي تجاوبها وهي تصوني ليها واحد النمرة ممقيداهاش ، بقات كاتشوف فيها مدة مابغاتش تجاوب فالاول مي فضولها دفعها ، وجاوباات ، وخولة غير كاتشوف فيها ، حتى صفااارت وعينيها خرجووو..

سناء:اويليييي كيفااااااش تشد فالحبس !!!

بقات مدة كاتستوعب حالة عينيها ، و خولة غير كاتشوف فيها ، قطعات وحطات تيليفون حاطة يديها على فمها ..

خولة:اش كاين ؟؛

سناء:حمد شدووه فالحبس..

خولة:{ببرود} اوا مزيان منها نيت تهناي منو..

سناء:{عينيها دامعين} واش اختي كاتضحكي عليا ، ويلي ويلي يا سيدي ربي شمن مصيبة غايكون دااار ، اويلي ميي..

خولة:{شدات على راسها كاتأفاف} دابا غير فهميني شكون صونا ليك ؟..

سناء:{يديها كايترعدو} اختي صوناو ليا من الكوميسارية ، قالو ليا باللي حمد تشد عندهم ، الا بغيت ندير ليه محامي..

خولة:وأصلا منين جاتهم نمرتك؟؟!!

سناء:غايكون هو عطاها ليهم!!

خولة: ماتقوليش ليا ناوية تمشي ؟!!

سناء:{ضربات على فخاضها} اوا اختي اش ندير اش اش...

خولة:شوية لباس؟! ياله يتربى شوية!!

سناء:اش غايتربى اختي كايبقى بو ولادي !

خولة: نوضي اختي خرجي عليا سيري عندو ، ماعنديش انا مع هاد دل ديالكم..

سناء:تا طيحي فهاد الموقف عاد تحسي بيا..

خولة:الله ينجيني أختي!!

سناء:العااار مييمتك لما نوضي معايا!!

خولة:{ضحكات}واش داوية من نيتك!!

سناء:{دموعها هابطين} الله يستر عليك ، ويعطيك ما تمنيتي فخاطرك..

خولة:واش نتي مريضة ولا ! حساب ليك ديال راسي ، راني مرات الراجل..

سناء:عافاك اختي ، راجلك ضريف وولد ناس مايخسرش ليك..

خولة:ضريف كنتي معاه ؟ عطيني تيقار ، انا ماندخلش راجلي فهاد المشاكل اللي ماعندو بيهم علاقة..

سناء:{وقفات كاتبكي} ياك آ ختي ياك ، هادي هي ديالك ، فينك آ با الحنين ، فيينك يااا اللي تهز همي ، فينك مشيتي وديتي معاااك المحبة و الخاوة..

خولة:{ماحساتش براسها تجننات} عطييينييي تيسااااع آ زمر مكااتفهمييش ، ضبرييي رااااسك اختي الا كان حتى هاداك رااجل يبكييو عليه..

سناء:واش انااا كانبكي عليه ، انااا ماعرفت شمن مصيبة لاح فيها راااسو ، واش قتل واش سرق واش واش !! غانحمااق آ ختي..

خولة:سنااء ، سيري تجلسي ، يا ربي يعطيه شي 40 عام على الله تتهناي منو..

سناء:واش انا باغية نبقى معاه واش كرهت نتفرق عليه وعمري نشوف كمارتو ، ولكن خاص نعرف شنو كاين وشنو عندو ، ماشي عليا على وجه ولادي..

خولة:وشنو يشدك ماتتفرقي عليه ؟!

سناء:وهاني تفرقت ! فين غانعيش وباش ؟!

خولة:{بهدوء} دار باك واسعة!

سناء:كون كان عايش!

خولة:مكاين تا شي فرق كل وحدة تهز شنو غايجيها ! وها نتي سكنتي ، وكاين بعض الفلوس خلاهم فالبنكة وراه كلا يدي رزقو و حلي محالك!!

سناء:كون تدي عليا مانفرقو والو..

خولة:هادشي دوينا فيه من قبل! وقراري لا رجع فيه..

سناء:واش دابا مغاتمشيش معايا!

خولة:مانحتاجش نعاود الهضرة!..

سناء:{حدرات راسها بتنهيدة طويلة} واخا على خاطرك..

خرجات وسدات الباب وراها ، وخولة تبعااتها بعينيها ببرود ، ورجعات تكات كاتشوف فقنت واحد و عقلها خدام كايخمم ، دخلات للبيت لقات ولدها شاد تيليفونها كايلعب فيه..

سناء:عثمان نوض احبيبي ياله معايا!!

عثمان:{هز عينيه} فين آماما ؟!

سناء:غير زيد دابا تشوف!

عثمان؛لا غير قولي ليا!!

سناء:{بلعات ريقها} باك آولدي تشد فالحبس !!

عثمان:شنوو اش دار..

سناء:باقي ماعرفتش ياله نشوفو..

عثمان:{ببرود} مغانمشي فين آماما خليه ياله يدير عقلو..

سناء:عثمااان عافاااك اولدي الله يرضي عليك لما دير ليا خاطري..

عثمان:ل..

سناء:{عينيها دامعين} واش تخسر لماماك ؛ حنا غير نشوفو شنو كاين ماشي نخرجوه..

شاف حتى عيا وناض معاها ، لبسات نقابها و خرجو من الدار ، شدو طاكسي بصعووبة ، حيت هي منقبة ونظرة الناس ليها غريبة ، كلشي كايشوف فيها ويطلع و يهبط ، وكايبعدو منها للاسف هادا حال بلادنا ، خبراتو يوصلها الكوميسارية اللي خبرها داك السيد اللي صونا ليها وفعلا نزلو ، كانو فيها بعض الناس كايستناو برا ، دخلات الداخل و بقات غير كاتضور راسها و شاف فيها واحد السيد باينة فيه خدام تما..

السيد:اش كاين آ شريفة ؟!

سناء:{بتوتر}انا مرات واحد السيد تشد ياله دابا ، وجيت نشوف شنو كاين..

السيد:لاكارط ناسيونال الله يخليك..

سناء:{حلات بصطامها جبداتها} ها هي..

السيد:{شاف فيها شحال ورجعها ليها} سمية المعتقل !

سناء:حمد *****..

السيد:دوزي ندخلك عند الظابط..

سناء:شكرا الله يرحم ليك الواليدين..

جرات ولدها تابعاه دخل هو الاول مدة عاد خرج وومى ليها ودخلات ، كان تما راجل كبير شوية يكون فالاربعينيات ، شاف فيها باستفسار..

الظابط:الزوجة ديال أحمد ***** !!

سناء:{حركات راسها بإيجاب} اه اسيدي هي انا ، ممكن نعرف علاش تشد !!

الظابط:اللي كاين هو ان الزوج ديالك تشد بتهمة الفسااد ! ناس ديال ديك العمارة تشكاو ! قالك ما مرة ما زوج كايدخل معاه عيالات !!

دخل للدار وتوجه ديريكت الفوق كايجمع حوايجو ، وهز البيسي ديالو و داكشي كامل ديالو ، وخرج مع الباب هابط مع الدروج ، وهي تلقى ليه خولة ، بقات كاتشوف فيه..

خولة:فين غادي !!

جاهد:{بجدية} غادي نمشي لفاس!!

خولة:وشفتك كاع ماعلمتيني!

جاهد:على حتى نعلمك! ستنيت المبادرة تجي منك، مي شفتك مناوياش وانا خدمتي تابعاني !!

خولة:{مغددة} دابا مغاتقولي حتى بالضحك ياله زيدي تمشي!!

جاهد:هاديك دارك آ خولة والمُستَقَر ديالك ، ماشي حتى نقولها ليك انا !!

خولة:وشنو دابا!!

جاهد:بغيتي تمشي هاني فطموبيل!!

خولة:{زيرات على عينيها معصبة} واخا ستنى..

طلعات الفوق كاتنتر ، مكاتقدرش تزايد معاه كثر فالهضرة هادا اللي كايغددها ويجننها ، جمعات حوايج خفاف و لبسات حوايجها..

"يضرب على جيبو مالي على حالتي ، يشريهم لي بزز"

و بشوية عليها كاتعطل بالعاني ، سدات باب بيتها بالساروت هادا اللي عمر دارتو ، وهزاتو معاها و هبطات ، ركبات فالطوموبيل وزدحات الباب ، حرك راسو و شد الطريق ، و كولها وهما ساكتين ، وهي غير كاتغزز فمها ..

"فين هو الاهتمام؟"

"فين واش مرتاحة شنو خاصك"

ماهضرها ماكلمها ، وهي حابسة راسها بزز ، الوحدانية كملات عليها كثر و كثر ، و سهات لثواني شكون بقى ليها ؟ ، حتى حد ...

"هناء و هي بحال العافية و الما"

"باها ماات وخلاها"

"سناء جرحاتها "

"وراجلها مقاطعها"

غمضات عينيها وحطات راسها على الزاج ، و ردات الشال على وجهها بحالا مغطياه من الشمس ، لكن فالحقيقة مخلية دمعات خفاف يهبطو ليها عاد حسات بمرارة اليتم ديال بصح ، وعاد حسات براسها ماعندها حد ، هو حاس بيها ، و عارفها ماشي على طبيعتها ، لكن مخليها على خاطرها ..

.

.

.

بعد ساعات من الطريق ، وصلو لمدينة فاس العريقة كان باقي ليهم شوية ديال طريق لان الدار مجاتش فاس بالظبط لا منعازلة شوية ، حلات خولة عينيها بعد نوم عميق ، هزات راسها عنقها ضارها ، كمشات ملامحها ، وشافت جيهتو ، مركز مع طريقو ، وحسات بكرشها ضراتها بجوع ، قطبات حواجبها ، مقال حتى يجيب ليها غير عصير تشربو ، رددات بسخرية بينها وبين راسها..

"سبعيام دالباكور دازت آ خولة"

ياله غادور راسها تحطات ليها شي حاجة على فخاضها ، نزلات راسها كاتشوف ، صاشية كبيرة ، عضات على فمها من داخل ، بغات دير فيها عزة نفسي ، لكن جوعها غالب جايب ليها ساندويتشات عامرين بالكفتة و فريت ، و بعد المحليات ، بدات كتاكل عاد حسات براحة على الاقل مانساهاش ، كلات ماكلتها المعتادة اللي مكاتكثرش و شافت فيه بتردد خايفة من شي قمعة..

خولة:تاكل ؟

جاهد:{بتاسم ليها} غير كولي بصحتك..

خولة:لا صافي شبعت!!

جاهد:{شاف فيها مطول}من بعد نشوفو هادشي..

هز من عندها داكشي وحطو للور و هزات كلينيكش كاتمسح يديها و فمها ، بعد مدة وجيزة وصلو لواحد الحي رااقي وهااادئ ، مكاينش حس بنادم كايدور فقط سيارات ، بلاصا طموبيلتو قدام واحد الدار ، و نزل حل ليها الباب نزلات كادور عينيها ، وهو هز الحوايج من الكوفر و دخلو الداخل ، الاعجاب بان على ملامحها بوضوح ، خصوصا لديكوراتها دار كاتبعث الراحة فالانفس ، غالب عليها اللون الأبيض ، وديكور عصري بقات كاتشوف فيها مدة..

جاهد:عجباتك ؟!

خولة؛ وي زوينة بزااف..

جاهد:ياله نوريها ليك كاملة..

ورا ليها بيت بيت وهي غير كاتعجب بكل قنت فيها ، وكايدوي معاها ، هو قلبو صافي ونظييف ، دغيا كاينسا ومكايشدش فقلبو ، و بكلمة او ابتسامة بنسبة ليه المشكل تحل ، عكسها هي اللي كاتشد فقلبها وكاتبغي نقاشاات همااا عاد تشوف واش تسامح ولالا..

بعد مرور شهر بحلوه ومره ، طراو مفاجآت و اللي فرحان فرحان و اللي عايش فالهم مهموم , قدام المحكمة وقفات بلباسها المعتاد ، ودخلات الداخل ذاتها كاتنمل عليها ، جلسات فالكولوار كاتشوف قدامها وتنهد ، ماعرفااتش كيفاش جاتها ديك القوة ديال أنها ترفع عليه دعوة قضائية ، ولكن ولادها عطاوها قوة اكثر ، داز الوقت بان ليها جاي مكبلين ليه يديه ، غير شافها بقى كايتجبد ليهم..

حمد: سناااااء سناااااء ، سمحييي لياااا ا سنااء سمحيي ليااا على وجه المرحوم..

سناء:{الصمت}..

حمد:الشيطااان غرني ، والله عافاااك ديري عقلك..

البوليسي: سكتناااا..

فركات يديها كاتستنى غير فوقاش يعيطو ليها ، بغات تتهنى من هاد المنامة وتشوف حياتها مع ولادها ، بعض دقائق قليلة عيطو ليهم بسمياتهم ، ودخلو الداخل كلا شد بلاصتو..

_حمد **** شنو كاتقول فالمنسوب إليك ؟!

حمد:مكاين والو من هادشي ، فقط سوء تفاهم..

_بغيتي تقول انك ماخنتيش الزوجة ديالك!!

حمد:انا ندمان وعمرها تتعاود..

_سنااء **** شنو كاتقولي فهادشي ؟!

سناء:{بصوت منخفض} انا بغيت نطلق..

حمد:مااامطلقش مااامطلقش عطييينييي فرصة غيير نشرح ليك..

سناء:ماتشرحش ليا ، انا مابغيت والو بغيت غير نطلق..

_و بنسبة للدعوة للرفضتي مفادها الخيانة الزوجية !!

سناء:فحالة اذا عطاني طلاقي غانسقط الدعوة ، لكن الا رفض انا ممسامحاش ليه !!

حمد:اش هااادشي كااتقولي !!!

_{ضرب المطرقة بصرامة} كلمة وحدة بدون إذن غاتأجل الجلسة !! ، غاطلق و لالا!!

حمد:{عض على فمو كايترعد} واخا ، انا موافق !!

_إذن رمي عليها الطلاق !!

حمد:{بزز} نتي طالق !!

_إذن حكمت المحكمة حضوريا ، طلاق سناء ***** من حمد ***** ، والافصاح عنه بعد تقديم تعويض بقيمة ***** لزوجة !!

خرجات من المحكمة ، عينيها كايتسرسبو بالدموع ، و أخيراا تفكاااات ، واخيرا تحررات ولات حرة ، مابقات عندها حتى علاقة بيه ، شدات طاكسي ديريكت لدارها ، حلات الباب و دخلات الداخل فرحانة ، حتى جمعات ابتسامتها كاتشوف داكشي اللي قدامها..

سناء:اش هادشي !!

هناء:{شافت فيها} شنو كاين !!

سناء:واش من نيتك ؟؟ اش هادشي دايرة هنااا !!

هناء:{ببرود} شرحي ليا كثر !!

سناء:{توجهات عندها ساعرة} لاااش مخرجة فراااش ديال أبي ؟!!

هناء:أبي مات الله يرحمو ويوسع عليه !! مكاين لاش يبقى هادشي هنااا !!

سناء:واااااش من نيتك ، لاااااش مقربة لبيتووو !!!

هناء:واش ازمر سوقك؟!! ، ديجا قلتها هاد طبقة ولات ديال ونتي عندك التانية وخولة الثالثة اش كاين كثر !!!

سناء:ماااتقوليش لياااا هاد الهضرة ، دااباااا هادشي يرجع..

هناء:{بتحدي} مغايرجعش ، هادا غايولي بيت ولدي !! دحاس اصلاا ! وباقي غانشوفو داك البيت اللي فالدرووج شكون تشدو!!

سناء:ويليي ويلييي ، والله وتسيق ليك خولة الخبااار !!

هناء:على خولة هي مولات الدار ! هاديك نديرها تحت مني مايبقى فيها تا عظم صحيح..

سناء:{باستهزاء}بحال ديك المرة! شوفي اهناء فوتي ساحتي اختي الله يرحم بيها الواليدين ، وحتارمي حرمة باك و رجعي هادشي لبيتوو !!

هناء:مغانرجع والو !! وشوفي راسك فين كاظلي نهار كامل دالعة ! مخلية راجلك و تابعة ماعرفت شكون !!

سناء:شنو كاتقصدي آ هناء ؟!

هناء: مانحتاجش نوضح كثر !

استفزاتها لدرجة كبيرة ، ماحساتش براسها حتى جراتها عندها كاتضرب وتنتف فيها ، والآخرى مبادلاها نفس الشيء ، حتى دخل ولد سناء كايحاول يفكهم ، لكن بدون جدوى غير كايضربووو فبعضيااتهم بقوة..

مر عليهم شهر ، بسلام و هدوء و شي مرات نقاشات خفيفة كاتنتاهي بتراضي الطرفين بزوج ، عايشين حياتهم هو بين الخدمة و الدار ، وهي مكاتخرجش نهائيا معزولة بوحدها ، حتى كايجي هو يحاول يهضرها ويخرجها المود عاد كاتنسى شوية ، مدللها لأقصى درجة وممخليها مخصوصة من والو ، و ديما الكلمة الزوينة ففمو ، فعلا كاتحاول تبدل تعاملها معاه ، وتحيد داك الراس القاسح لكن هي هي ، وزادت مرضات كثر ، وضعافت و شعرها مستمر كايطيح ، وهي كل زغبة طاحت ليها كاطيح عليها دموع ، قرب الوقت اللي كايدخل فيه ، فكرات مع راسها انه ديما كايدير بزاف على قبلها علاش ماتفرحوش اليوم بشي حاجة ، ناضت بشوية كاتفوح ، جمعات شعرها الفوق و دخلات الكوزينة دايرة طابلية ، وبدات توجد كاسكروط ، عازمة دير كل جهدها باش ترضيه ، وجدات كاسكروط على حقو وطريقو ، ومشات لبيتها دارت تدويشة خفيفة ، وخرجات وقفات حدا الماريو كاتشوف شنو تلبس ، ديما لابسة حداه الطويل واخا كاتهلا فراسها ، بقات كاتشوف شنو تلبس ، شافت واحد الكسوة عمرها لبساتها وبتيكي ديالها ، كانت حد الركابي ، وفيها صميطات من الفوق وبلون فاتح ، منزلية وزويونة ، بقات كاتشوف مدة وزعمات لبساتها ، وشافت فراسها ، فعلا جات غزالة واتاتها ، ومع بشرتها البيضاء جات فتنة ، شافت فشعرها اللي ممرضها مابغاتش يكمل عليها ، شداتو ضفراتو ، ودارت الكحل فعينيها ، وشوية ديال الكلوزز ديال الخوخ ، ولبسات كلاكيطة وخرجات تقاد الطبلة ، فعلا قاداتها حتى سمعات صوت الساروت كايدور ، قربات بشوية متوترة ، رغم أنه فهاد الشهر اللي داز داك الجدار اللي كان بيناتهم كان كايتهدم شوية بشوية ، ومابقاتش كاتحس بتوتر حداه بزاف و مبينة كل عيبوها قدامو ، توجهات ليه كان هاز حقيبة جلدية فيديه ، غير شافها طلع وهبط فيها باعجاب مبتاسم ليها ، وتوجهات عندو ترفعات على صباح رجليها وسلمات عليه بلابيز..

خولة:{بدلع}على السلامة..

جاهد:{رجع ليها القبلة ففمها} الله يسلمك..

خولة:كي دوزتي نهارك..

جاهد:الحمد الله على كل حال..

خولة:فيك جوع ؟!

جاهد: شوية و صافي..

خولة:واخا وجدت كاسكروط..

جاهد:{بتاسم بإعجاب وجر ليها نيفها} تبارك الله على الياقوتة..

ضحكات ليه ، وهو دخل لبيتهم دار تدويشة خفيفة ولبس شورط و تيشورت وخرج عندها ، لقاها حدا الطبلة جر الكرسي وجلس وهي بدات تخوي ليه القهوة وحطاتها قدامو..

جاهد:{تذوقها} عمري قلت ليك ، قهوتك كاتاخد العقل..

خولة:{سهات} حتى أبي كانت كاتعجبو بزاف..

جاهد:الله يرحمو ويوسع عليه..

خولة:{بابتسامة ذابلة}آمين يا ربي..

جاهد:غاتبقاي تفرجي فيا متاكليش !

خولة:هاني تانشرب القهوة !!

جاهد:غدا غانمشيو لشي طبيب ، حالتك معاجبانيش..

خولة: خلاص ، مافيا والو..

جاهد:شوفي شحال ضعافيتي !

خولة:عارفة مابقى فيا مايتشاف !!

جاهد:شكون قاليك هاد الهضرة!!

خولة:{عينيها تحجرو بالدموع} ماتحتاجش تقولها ! حيت باينة أصلا ! شوف كي وليت ، رقيقة وجهي صفر..

جاهد:{ناض من بلاصتو جلس حداها شاد يديها عندو} هادشي مامنو والو ، باقية كيما نتي ، انا داوي على قبل صحتك اما زينك ديما طاغي..

خولة:{لاول مرة تطيح دموع قدامو}لا نتا غير كاتقولي هاكا ، غاتكون مليتيني مابقى فيا مايتشاف كاع..

جاهد:{كايمسح ليها دموعها بحنية} هبيلة ، واش كاين شي واحد يمل هاد الجمال كامل ؟ كاين شي واحد عندو بحال هاد العينين الملونين ، ولا هاد الضحيكة اللي كتاخد العقل ؟! ، هادشي كاملو عند خولة..

خولة:مراتك غاتكون حسن مني..

جاهد:اه حسن منك!!

خولة:{حلات عينيها} كاتقولها لي فوجهي !!

جاهد: اه ومالها !

خولة:{بغات تنوض وهو شادها} صافي طلق مني..

جاهد:رصااي بلاصتك ، غير ضاحك معاك ! ، اصلا عندي مرا وحدة هي نتي..

خولة:{باستفسار} كيفاش ! كيفاش مراا وحدة ؟!

جاهد:شادية بدات كاتستاجب للعلاج النفسي ، بقاو ليها حصص قلال ، و انا بديت نوجد الوراق اللي خاصين ، غير ترجع عافيتها غاتكوني نتي هي المرا الوحيدة و الدائمة اللي عندي..

خولة:مغانبقاش ضرة؟! غاتولي ديال بوحدي..

جاهد:{غمض عينيه بإيجاب مبتاسم ليها}..

عنقاتوو بقوة فرحانة كاتضحك ، وهو حاط يديه على شعرها كايبتاسم على ردات فعلها الغير متوقعة ، هي محساتش براسها ، غير وهي مقبلاه فمو بقوة ، حتى تجمد مكانه ، لاول مرة كاتزعم وديرها

هاد المرة كانت غير كل المرات ، مختلفة تماما ، علاقة حميمية جامحة ، مكانش غير هو اللي كايعطي بل تبادلو المشاعر ، بكل حب و عفوية ورغبة ، انتهت بيهم فوق الفراش ، حاطة راسها على صدرو العاري ، وهو كايدوز يديه على شعرها ، مغطيين غير بالليزار ، هي كايبانو كتافها ونص صدرها اللي حمر..

جاهد:باقي كتاخدي البيلول ؟!

خولة:امممم..

جاهد:مكاتشوفيش جا الوقت اللي نديرو فيه ولادنا..

خولة: باقي الحال ياله تزوجنا..

جاهد:واخا هاكاك آخولة ، العمر كايفوت ، بغيت ولادي يكبرو معايا..

خولة:{تݣدات شوية} ولكن باقي مادوزناش بزاف..

جاهد:واش باقي ماعرفتيني ولا عرفت طبعك؟!

خولة:زواج مسؤولية وكان كايخوفني كثر على قبل الولاد..

جاهد:علاش غاتخافي! من الولادة ؟!

خولة:خايفاهم يتعذبو فحياتهم ، تخيل معايا مانتفاهموش ونتفارقو!

جاهد:{بهدوء}هادشي عمر مايكون ، الا كنت انا ضد الطلاق في حالة الزواج ، فأنا ضدو مليون مرة في حالة الا كانو الولاد، والفراق معايا عمرو مايكون..

خولة:ماعرفتش!

جاهد:متايقاش فيا ! خايفة مانكونش أب مزيان!

خولة:بالعكس ماعنديش شك فهادشي ، لكن خايفة انا مانقدرش على المسؤولية..

جاهد:{دوز يديه مع كرشها} نتي غير هزيهم ليا فهاد الكريشة ، انا نربيهم معاك..

خولة:{بعد صمت} ان شاء الله..

جاهد:اوا شنو تقطعيها ؟!

خولة: واخا..

جاهد:{باس جبهتها برضى} الله يكملك بعقلك..!

.

.

.

فالصباح نوضها من النعاس بزز ، باش يديها الطبيب واخا هي رافضة ، قادات الفطور وفطرو عاد خرجو ، تمشاو ديريكت لواحد العيادة معروفة ديال واحد الطبيب ، وجلسو شادين النوبة حتى وصلاتهم ، ودخل معاها حتى الداخل ، جلسو قدام الطبيب وعطاتو كاع الاعراض اللي عندها ، وكشف عليها..

الطبيب:عندك نقص فبعض الڤيتامينات ! وهادشي ناتج عن قلة التغذية !

خولة:مكايجينيش الجوع!

الطبيب:بالعكس هادا استهتار ، خاصك ديري بعض التحاليل و تجيبيهم ليا ، كانضن عندك فقر الدم !!

جاهد:{شاف فيها بلوم ورجع شاف فالدكتور} ياك ما خطير عليها!!

الطبيب:هي خاصها تعالجو وكان ! وتبع دوايات اللي غانعطي ليها برترتيب ، من بعد نشوفو التحاليل وشنو غايعطيو لينا !!

بعد بعض النصائح مهمة ، كتب ليها الدوا اللي تحتاج وخرجوا ، مشا خدا ليها الدوا متاجهين ديريكت للدار..!

يتبع...