جوهر الروح الجزء السادس والأخير

الأيام كايمرو نهار ورا نهار ، بعد مشي وجي من المحكمة ! ، مكايحضرش الجلسات شيبها بالمزيان ، حتى عيات و فقدات الأمل حضر الجلسة وتم طلاقهم بالتراضي من كلا الطرفين ، رجعات للدار معلنة عن الحرب مع سناء اللي قربات تفقد اعصابها معاها ، كانت هناء جالسة فالصالون حتى سمعات الصونيت ، ناضت حلات الباب ، كانت جارتها ديال ديك المرة..

هناء:{بابتسامة صفراء} اهلا و سهلا..

نجية:{سلمات عليها}كي دايرة لباس عليك..

هناء:الحمد الله ، زيدي دخلي مرحبا بيك..

نجية:{مشات جلسات فالصالون} ترحب بيك الجنة الحبيبة

هناء:اوا شنو كاتعاودي كي دايرة مع الصحة ، الميمة كلشي مزيان..

نجية:اللهم الحمد يسقسي فيك الخير..

هناء:اوا مزيان ، شي جديد..

نجية:غا هو ، ومانكديش عليك ، كاين شي حس فالحومة..

هناء:{باستفسار} كيفاش؟!

نجية:قالك نتي وختك طلقتو دقة وحدة..

هناء: وشنو العيب فهادشي ، الطلاق خلقو الله..

نجية:تاانا ماقولتش ، راني براسي مطلقة ، ولايني راك عارفة ناس و كلامهم..

هناء: شمن هضرة مافهمتش!

نجية؛اوا قالك كيفاش تا طلقو بزوج ، وورا موت باهم ، علم الله اش كايديرو من تحت الدف..

هناء:{خرجات عينيها}هاي هاي هاي !! ، وريهم ليا والله وماجبدت ليهم العينين ماني هناء بنت عبد الله !!

نجية:تهدني احبيبة اويلي ، تا نتي ديها فكلام الناس!!

هناء:اوا شغانقولك ! ، الله ياخد الحق وكان..!

نجية:{بحسرة زائفة}اوا هادا ما كان ، اجي بعدا واش كنتي مشيتي عند ديك المرة ، قضات ليك شي شغل !!

هناء:سكتي اختي ماتفكرينيش ! ، ماعرفتش كي درت تبعت كلامك..

نجية:{حركات راسها} اييه يا ودي ، راك ماشفتيش الشوهة اللي عملو ليها..

هناء:اويلي علاش!!

نجية:اوا يا قالك كاع داكشي اللي كادير كذوب فكذوب مكاين منو والو ،غير كاتسرق ناس!!

هناء:{ندبات وجهها} ويلي ويلي ، رزقناااا ضااااع ! يعني كاع داكشي اللي قالت واللي كاتشوف كدوب فكدووب !

نجية: ايه الآلة ، على ماوصلاتكش الخبار ، دارو ليهاا الشووهة ديال بصح ، و تلاحت فالموااقيع كاع ناس داو خبارها..

هناء:{بحرقة} الله ياخد الحق ! ، ولكن صبري نقولك {بتردد} عرفتي عطاتني شي ما ، و بالغلط شربو ليا دري كان غايموت..

نجية:لا تا نتي ، دوك لعيبات اللي كادير كاينين ، ولكن مكاينفعو بوالو غير كايضرو ، كثرة الحروز على الخوا الخاوي ، وراه داكشي كايكون فيه طلاميس و داكشي علاش غايكون ولدك مرض ، اما بنسبة لداكشي اللي كاتشوف غا كذوب فكذوب مكاين منو والو..

هناء:الله ينعلها الكدابة لوخرااا..

نجية:اوا ماقلتيش ليا اش باقي درتي مع راجلك!!

هناء:صافي اختي سالينا ، كلا شد طريقو..

نجية:ولايني راك هبيلة ، غير طلقتي ربعتي يديك..

هناء:وشغاندير !

نجية:توكضي وفيقي .. وندميه عليك..

هناء:كيفاش غاندمو؟ صافي الله يجعل البراكة مابغيت نرجع ليه..

نجية:واش انا قلت ليك رجعي معاه ، ها نتي الآلة سيري ليك لشي صالون قادي ليك الحالة ، وسكسفي على راسك ، وحيدي دوك الجلاقل لي كاتلبسي..

هناء:اويلي اختي بعد هاد العمر نحيد هادشي لالا!

نجية:تبتي اديك الهبيلة ، بغيتي الراجل تمرمديه وتخليه حال فمو ولالا ؟ ، وزيد انا ماقلتش حيديه غير ولي تلبسي كسيوات سراول وقوامج ، و الفولار على راسك محجبة..

هناء:والله ما عرفت..

نجية:يا ودي زييدي وكان..

هناء:اوا اختي الفلوس مكاينش!

نجية:{غمزاتها}اوا زعما المرحوم ماعندو اراضي ما عندو..

هناء:كاين غير الحق باقي ماتفرق..

نجية:اوا فيقي وعيقي ، جايين جايين الفلوس ، على الاقل قضي باش عندك وتهلاي فراسك..

هناء:اوا واخا ان شاء الله..

نجية: اوا نوضي هي دابا..

هناء:مكاين والو هاد ساعة !!

نجية:يا ودي غير نوضي ، نبيلة الكوافورة تصبر عليك تا تعطيها رزقها..

هناء:اوا لا كان هاكا واخا..

نجية:سيري بدلي انا نستناك..

دخلات للبيت تبدل ، وناضت نجية كاتسلت وتشوف فالدار وديكورات وتحرك راسها ، خولة كانت كاتعشق شي حاجة سميتها ديكورات ، ودار عامرة غير بيهم ، حتى سمعات حسها كاتقرب عاد جلسات بحالا مكاين والو ..

خرجات من الصالون الشعبي ، بعدما صبغات شعرها وقطعاتو حتى وصل لكتافها ، و دارت سوان لوجهها ، عاد جات للدار عندها ثقة فالنفس زايدة ، مشات لماريوها كاتشوف فحوايجها ماقنعوهاش ، و هو يطيح فبالها بيت خولة ، طلعات الفوق فين كاتكون و حاولات تحل الباب والو ، عوجات فمها ، و جات ليها فكرة فبالها ، طلعات للسطح اللي فيه واحد البيت وحلاتو ، فيه كراطن و داكشي القديم ، ومشات كاتقلب حتى لقات الضوبل ديال السوارت ديال الدار كاملة ، هزاتهم فيديها كاتشوف فيهم و تقلب ، وهبطات التحت راجعة لبيت خولة ، وبقات كاتجرب حتى فتحاتو ، ضحكات حيت واخا دا ليها الوقت بزاف تحل ، دخلات ليه و حلات الريدو كاتلولب عينيها ، ومشات كاتشوف ، خولة مخلية النص ديال حوايجها ، و ماكياجها باقي على الكوافوز ، حلات الماريو حتى الحوايج باقيين ، بانو ليها بعض ليتخوس وبدات تحل ، شي كريمات باقي عمرهم تستعملو ، و الانواع ديال العكاكر ، بقات غير حالة عينيها..

هناء:هاي هاي هاي عطاتك اليام ا بنت ميمتي..

هزات ليها من حوايجها شلا لباسي ، و ماكياجات وروايح ، حتى من حوايج الدار هزاتهم ، وهبطاات لبيتها فرحانة كاتقلب فيهم ، هزات واحد البيجامة ديالها ، ولبساتها وحيت هي عااامرة و سمينة عكس خولة اللي رقيقة ، جاتها مزيرة كاتطلب التسليم ، كلشي فرزاتو للجنب ، و الكرش حتى هي خارجة ، وطلقات داك الشعر اللي قادات ومشات كاتشوف فالمرايا فرحانة براسها ، وهزات تيليفون ، كانت نجية قيدات ليها نمرتها ، وصيفطاات ليها اوديو..

هناء 📲:شوفي اصاحبتي ، درت داكشي اللي قلتي لبست واحد البيجامة واعرة ، واش نصيفطها ليه ؟! ونقوليه بالغلط ؟!

نجية 📲:لا الهبيلة ماتكونيش خفيفة ، نتي غير صوني ليه كاميرة ، وعطي ولدك التيليفون وبقاي دوزي حداه بالعاني..

هناء:والله ماعرفت..

نجية:هاد البيجامة اللي لبستي ياك بعدا عازلة الطرف..

هناء:اويلي اختي حشمي شوية..

نجية:يا ودي ما فيه والو غير بين العيالات..

هناء:اوا المهم ..

نجية:عرفتي شنو انا نصوني ليك بالكاميرا..

هناء:الا اصاحبتي بلاش..

نجية:اوا الله يهديك مالي غاناكلك ، عارفاك بلا عقل ، حنا مانديرو والو حتى نقادو الامور!!

هناء:واخا انا نصوني ليك..

بصح فيها القباحة وتخراج العينين و السم ، لكنها غشيمة وحدة تزوجات فسن صغير ، مكاتفوت باب الزنقة ، حتى من تيليفون عندها نوكيا بيل مكاتشارجي فيه من شهر لشهر ، كيفاش غاتفيق و تعيق ، صونات ليها أبيل فيديو ، و شكرات و مدحات فيها ، و شجعاتها تصوني ليه ، بقات كاتفكر فدماغها مزيان..

"لاش غادي نرخص راسي "

"ماعندي لاش نصوني ليه"

"ماعندي بيه غرض"

"عيشة الويل كانت معاه ، اش غانستافد منو"

حطات تيليفون وحيدات ديك البيجامة رافضة الفكرة اللي طرحات عليها..

_أما عند سناء فبيتها ، قدامها عدة أوراق ، و أقلام و أخيرا بعد سنين رجعات لموهبتها ، و داكشي اللي كاتعشق ، كاترسم بشغف ، كاترسم لبيسات و قفاطن مختلفين و تلونهم ، كانت فعلا مبدعة و كاتتقن الرسم ، دخل عندها ولدها الكبير اللي قريب ليها بزاااف بحال الصحاب ، حيت حتى هو كبير فدماغو واخا صغير فسنه..

عثمان:كااتعرفي ترسمييي واااو.

سناء:{بتاسمات}ياك بعدا..

عثمان:والله آ ماما ، دابا كون كملتي قرايتك كنتي غاتكوني رسامة..

سناء:{تنهدات} الخير فما ختاره الله..

عثمان:قولي ليا آ ماما ، واش غانبقاو هاكا..

سناء:كيفاش؟!

عثمان:منين غانجيبو الفلوس باش نعيشو؟ ، و من اش كاتصرفي..

سناء:نتا غير ديها فقرايتك ماتهز الهم لوالو..

عثمان:التاسعة حرة صعيبة ، كون غي كنت كانحضر الدروس..

سناء:زير راسك أملي فيك..

عثمان:مجاوبتينيش آماما..

سناء:{بتاسمات} كانستنى تجي خالتك خولة ، أبي كان عندو شي اراضي نقسموهم ، وانا اللي جاني فحقي نبيعو و نحل شي محل صغير ، نبدا من والو وان شاء الله المشروع يكبر..

عثمان:بغيت نخدم و نعاونك حتى أنا راه مابقيتش صغير..

سناء:نتا اولدي ديها غير فقرايتك..

عثمان:صراحة اماما والو منها ، بغيت ندفع لتاسعة حرة كيما تافقنا ديك النهار ولكن وراقي بقاو تما راك عارفة..

سناء:اوا شنو ناوي دير..

عثمان: واحد الدري صاحبي ، قالي غايدخل التكوين يتعلم شي حرفة ، و غير عماين كايشدو ديبلوم ، وتانا بغيت ندخل..

سناء:من بعد نشوفو هادشي ، كانواعدك احبيبي حياتنا غاتبدل كثر ان شاء الله ، و نبدا تانا خدمتي و مانخصصكم من والو..

عثمان:{باس ليها يديها}تانا كانواعدك اماما ، باللي غانكبر ونتي غاترتاحي مغاتحتاجي لا خدمة لا والو..

سناء:الله يخليك ليا المرضي ديالي..

شد كونجي واحد السيمانة ، كل مرة خارجين مساريين ، كايديها للريسطوات و اللي حلات عليه فمها تلقاه ، فاقت فالصباح كاتوجد الفطور ، وحطات كلشي على الطبلة ، عاد خرج هو من بيتهم بتاسم ليها ، وجلسو يفطرو..

خولة:جاهد..

جاهد: آ الياقوتة..

خولة:بغيت نمشي لدارنا..

جاهد:{هز فيها عينيه}علاش؟!..

خولة:البارح صونيت لختي ، خاص الورث يتقسم كلا يدي حقو ، باش حتى هي تشوف باش تخدم على راسها..

جاهد: شنو ناويين ديرو مافهمتش!!

خولة:انا براسي مفاهماش، باغيين يفرقو الورث...

جاهد:شنو غادي ديري نتي بالورث آ خولة؟ مخصصك من شي حاجة..

خولة:شنو نتخلا على حقي..

جاهد:وي خليه لخواتاتك!! على قد الحال..

خولة:{بجدية} هادشي اللي عمرو غايكون ، كون كانو يستاهلو..

جاهد:علاش شنو دارو معاك!!

خولة:مداوياش على سناء ، الاخرى ماصرفات فيا غير العيب..

جاهد:هي آش ؟!

خولة:غانمشي نشوف ، كل وحدة تدي نصيبها ، ونيت ختي ياله طلقات من راجلها وعندها وليدات بغاات تخدم عليهم..

جاهد:{بآسف}فيها خير ، ولكن داوي معاك ، حقك ماتقيسيهش..

خولة:وشنو نسمح فيه..

جاهد:ماتسمحيش فيه الآلة ! غير هو خلي كل حاجة بلاصتها ، اش خاصك نتي من داكشي انا موفر ليك كلشي...

خولة:ماشي قضية موفر ليا ، غير بغيت نخليهم لدواير زمان..

جاهد:ديري بيه اللي عجبك! ولكن على الاقل ماتبيعيش ، تفكري بيه باك..

خولة:دابا و نشوف..

جاهد:هي دابا غانمشيو؟!

خولة:اه ديني الا جات على خاطرك..

جاهد:ولكن غانقولها ليك من هنا ، مغانتعطلوش الكونجي مابقى ليا فيه والو..

خولة: كون هاني..

جاهد:{باس ليها يديها}الله يرضي عليك..

بادلاتو الابتسامة وكملو فطورهم ، بطبيعته مكايدخلش فشؤون عائلتها نهائيا ، وماشي من النوع الفضولي ، مكايسولها على والو حتى الا قالتها ليه هي ، جمعات الطبلة ودارت المواعن فالماكينة ديالهم ، عاد مشات لبيتها تجمع حوايجها..

بعد ساعات من الطريق ، تركنات السيارة أمام الباب ، و نزل هو وحل ليها الباب ، طلبات منو يخلي الحوايج فالطموبيل من بعد ويجيبوهم ، هزات غير صاكها ، جبدات منو الساروت وحلات الباب ، و دخلات الداخل عاد شدات فيديه وهو زير عليها مبتاسم ، و دخلو الصالون ، ياله غاتجلس وهي تسمع صوت وراها..

هناء:فين غادية بالسلامة؟!

خولة:{مابغاتش تتحط فشي موقف ماشي هو هاداك قدام جاهد} شنو كاين آ هناء..

هناء:{توجهات عندها ممسوقاش}طلعي الفوق هاد البلاصة ماشي ديالك..

خولة:{خرجات فيها عينيها وزيرات على سنانها}هنااء واش حماقيتي..

هناء:لا احبيبة ماحماقيتش هاد الطبقة ديالي ! ماعندك ما ديري فيها..

خولة:{عضات على فمها} من بعد و ندويو فهادشي..

هناء:لا هي دابا..

خولة:{وجهها حمار بالاعصاب} هنااااء..

جاهد:{حنحن بصوت رجولي} احم ، كانضن ان الاخت ديالك ياله وصلات من السفر ! مكاين لاش تزيديها عيا !

هناء:{هزات عينيها فيه كاتشوف وطلع و تنزل ، عاد هبطات عينيها ليديهم المشابكين النار شعلات فيها} لا لا غير سوء فهم و صافي ماتفهمش غلط ، رتاحي اختي من بعد و ندويو..

غمضات على عينيها بعدم صبر مراقبة حركاتها ، ومعاوداتش شافت جيهتها هزات صاكها وطلعات الفوق معصبة ، وهو تبعها كايحرك راسه بتعجب..

هناء:{تمتمات} من ديما قلبي اللي يتحرق ! علاش مانتبادلوش الشمتة و العافية ، وكلا يخلص ، الضيف مايتشرط و مول الدار مايفرط!!

دخلات للبيت فطبقة الفوقية كاع ، وجهها حمر طلعو ليها اعصاب الدنيا و الدين ، تبعها البيت ما فاهم والو ، كاتقلب خفة زربة ، اللي فهم ان كاين مشاكل كبيرة بينها وبين ختها..

جاهد:شنو كاين آ خولة ! علاش ماخلاتكش تجلسي التحت..

خولة:{زيرات على سنانها} حيت حمارة !..

جاهد:خولة !!!!

خولة:{زيرات على راسها}كانكرهها ، كانكرهها..

جاهد:{زير على يديها اللي كايرجفو بالاعصاب}كاالم ! شنو وقع كاع ، وهادي دار باك جلسي فين ما بغيتي ، غير هو مافهمتش واش جاتها فالورث..

خولة:منييين جااهاااا منيين ، دااارت شرع يديها ، هاااديك أقرب دار لقلبي ، ماامنحقهااااش تمنعنييي ممنحقهاااااش..

جاهد:{بهدوء}شش لاش مكبرة الموضوع ! بما انه مجاهاش فالورث ، ممنحقهاش طبعا ، وكلا يدي اللي يستاهل..

خولة:{جلسات على السرير كاتنفس بزز}الله يلݣيها ليها ، كاتعصبني..

جاهد:نقدر نفهم الموضوع! وعلاش هاد المشاحنات كاملين ، ونتوما خوت جمعاتكم كرش وحدة و دمكم واحد..

خولة:{تنهدات كاتحاول تهدي راسها}هي من صغرها هاكا ، أي حاجة كاتعجبها واخا ماتكونش ديالها ، مكاتقنعش عينيها كبيرة ، وهي مكاتحملنيش ، و من نهار ماتت ماما فاش كنت صغيرة ، كانت كاتقسح معايا بزاف حيت كنت انا الصغيرة عند با و المفششة ديالو ، مكانش كايخسر ليا كاع. وهو كان فديك الوقت متشدد بزاااف كثر من القياس ، و فسن صغير فرض عليهم الخمار ، و ما وصلو للباك حتى كان زوجهم بزوج ، بلا خاطرهم ، سناء اللي تزرفات بزاف فالتزويجة حيت راجلها مريض فراسو ، ومكانش كايخليها تجي لهنا ، ولكن هناء شوية حيت راجلها ماشي متشدد لديك الدرجة كاع ، كان شوية راخف ليها ، ولكن هي من صغرها كاتطير ، فقسح معاها و حتى هي مكانش كايخليها تخرج وكان كايضربها الكيدار ، من بعدها ابي بحالا تنادم عليه الحال ، حيت كايشوف بنات الجيران وصلو وكملو قرايتهم ولات عندهم واحد المكانة وكلشي محتارهم ، فكنت انا مفششة عندو ، ومكانش كايخسر ليا خلاني على خاطري ، درت الفولار وصافي ، مابززش عليا شي حاجة وخلاني نكمل قرايتي ، ولكن غي وصلت ل 18 طلبو مني ، ولبيت ليه الطلب حيت مانقدرش نقول لا ، واخا صراحة ماكنتش باغياه ، من بعد هادشي شديت إجازتي ، وباقي عاقلة ديك المرة جات معصبة بزاف ، ناس كايباركو وهي تشادات مع أبي ، شفتي هي على شان داير ليها وشفتي و شفتي ، درتيلي فعلتيلي من ديك المرة ، مابقاش عندي معاها ومؤخرا خرجات ليها طاي طاي ، كانت كاتحرش أبي عليا ولكن عاطيها الودن الصمكة ، ودابا ها نتا تشوف..

جاهد:ماخلاقش اللي يعصبك ويغبنك ، االله كايجازي كل واحد على فعايلو ، بما أنها غير كاتعصبك عتابري كلامها بحال شي حجرة عكلاتك فالطريق ، رميها برجلك وكملي طريقك ، حيت الحجرة ماعندهاش رجلين باش تبعك ، والا خليتيها وراك كون أكيدة ديما غاتبقى اللور ، ولكن الا بقيتي كادفعيها برجليك غاتبقى تعكلك كل مرة ، {جر ليها نيفها بصبعو}

فالصباح الموالي خرجات خولة من الحمام كاتنشف وجهها ، نعسوو فالطبقة الفوقية ، وهبطات البيت اللي كان ديالها على اساس تجيب الحوايج اللي خلات تما ، نسات ماهزاتش الساروت ، ولكن تحلات ليها ديريكت عاد تفكرات وعقدات حواجبها ، متأكدة انها سداتو بالساروت حسات بشي حاجة ماهياش ، خصوصا الريدو محلول ، التشاش طلع ليها الراس ومشات الكوافوز كاتشوف ، خولة كاااتعشق شي حاجة سميتها حوايجها ، الكبيرة ولا الصغيرة كاتلاحظها ، غززات فمها نيت ، وبقات كاتقلب وحلات الماريو ديالها ، كلشي ناقص ، هزات داكشي اللي باقي ليها من تما وهبطات فالدرووج ناوية على خزيت، كاتردد سميتها ، حتى خرجات من الكوزينة ، شمنك يا بيجامة مزيرة ديالها عاد ، و الريحة كاتعطي مناين ، و الوجه مطلس وطالقة زغيباتها فرحانة بيهم..

خولة:شنووو قربك لبيتيييي !!!

هناء:مالنا على الغوات ياك لباس !!

خولة:قلت ليييك شنووو قربك لبيتيييي..

هناء:شمن بيت انا مافهمتش..

خولة:وااااش كاااتسطااااي علياااا آ زمررررر ، منييين جبتييي حواايجي !!!

هناء:عافاك غير بشوية كاين هنا ناس ناعسين ، حشومة زعما ، وانا ماهزيت ليك والو براكة ماطيحي عليا بالباطل.

خولة:{جراتها من البيجامة} وهاااادي منين جبتيهااااا ، زمريييي اش قربك ليه..

هناء:سمعي جوج كلمات دخليهم لداك الراس ! ، هاد البيجامة ماخرجوش منها غير وحدة لالة خولة ديريها فبالك ، و الا تفقدتي شي حاجة شوفي ختك اللي كبر منك ، هي اللي كاينة تما دابا ! انا مكانطلعش..

خولة: سنااء ماااتقربش للي ماااشي ديااالها واخاا نحطووو ليهاااا فحجرهااااا ، بغيتي الحوايج هاااك {هزات هادوك اللي جابت ورماتهم عليها} هااااكي كووليهم صرطييهم ، غير عطينيي تيساااع ، واااش اعباااد الله طلبت شي حاجة كبييرة ، وااا تيقاااار تيقااااار آ عباد الله..

هناء:{مارضاتش} يحساب ليك ناقصيني الدرابل ولا كيفاش ! الحمد الله مخاصني والو..

خولة:اوا ماللي مخاصك والو ، عطيني تيساع ، لاش باغية تمرضيني فصحتي !!

هناء: واااش على جوج شراااوط دااايرة هاد الحااالة ، رااعي لياااا شوية {بدات تدمع} انا نفسيتي محطمة وياله طلقت ، وجيت لا حوايج لا ريال ، وبثلاثة ديال الولاد ، شنو بغيتيني ندير اختي شنووو {كاتبكي} قلت حوايج ختي مافيها باس ، ساعة مابقى خير فهاد الدنيا..

رفعات فيها حواجبها بتعجب ، كيف تسيفات فرمشة عين حتى سمعات تحنحينة منو ، عاد عقداتهم بقووة كاتحلل تصرفااتها ، عضات على فمها مغددة ، أما هو ماتسوقش ليها كاع حدو وقف حدا خولة ، وهز يديها قبلها أمام أنظارها الحارقة..

جاهد:{بهمس بينها وبينو}كون ستنيني نهبطو بزوج..

خولة:مرة أخرى..

جاهد:ياله طلعي لبسي حوايجك !

خولة:فين ؟!

جاهد:نفطرو برا..

خولة:راك عارف اش تابعنا مابقيت بغيت نزيد هنا دقيقة..

جاهد:مابقى قد ما فات ، نفطرو ونرجعو..

خولة:واخا {تحنحنات}ماتبقاش هنا طلع معايا..

جاهد:هاني برا..

حركات راسها بالايجاب ، و طلعات الفوق وهو ياله غايتحرك جاه ميساج فالتيليفون حلو وقراه وبتاسم ، وهي غي كاطلع فيه وتهبط عينيها شاعلين بالغيرة ، ياله رد التيليفون فالجيب ناوي يخرج وهو يسمع صوتها..

هناء:{كادوي بخفووت} تشرب قهيوة؟ دايراها دايراها ، ماتخرجش هاكا..

جاهد:لا شكرا آ ختي يكثر خيرك ، غانشربها مع مراتي برا..

وجهها تلون وهو حرك راسو بلا حول وخرج برا ، دوز مكالمة مدة وهو كايدوي باللغة الأجنبية ، حتى سمع صوتها ، لتفت وقطع وبتاسم ليها..

جاهد:ديما كاتكرمي علينا بنورك..

خولة:{بتاسمات عاجبها راسها}ههه شكرا...

جاهد:مشينا الياقوتة..

خولة: مشينا..

حل ليها الباب ركبات عاد ركب هو ونطالقواا ، كل مرة يتبادلو أطراف الحديث..

جاهد:قولي ليا ماشي قلتي ختك كادير الخيمار..

خولة:امممم..

جاهد:و مالها على ديك الحالة! حطاتني فموقف محرج..

خولة:{بجدية}هي غير بغات تعصبني وصافي آ جاهد ، مكاين والو من داكشي..

جاهد:خاصكي تعرفي واحد الحاجة!

خولة:واللي هي !!

جاهد:{عض على فمو مدة} شادية جاية المغرب !

الحمورية طلعات معاها ، هاكا كايوقع ليها فاش كاتعصب ، رفعات فيه حاجب ، اكثر حاجة منوغشاها هي هاد الضرة ، غززات فمها كاتحاول تهدن راسها وماديرش شي ردة فعل ماهياش..

خولة:كيفاش هادي تاني!!

جاهد:{بجدية} دوا معايا الطبيب اللي مراقب حالتها ، و نيت صاحبي ، كان صيفط ليا ميساج كايقول باللي استاجبات للعلاج ، ولات كاتخرج شي كلمات ، حتى كانتعجب ماللي تاصل بيا باها كايقول أنها طلبات منو تجي لهنا !!

خولة:هي جات تحررها عليا!!

جاهد:حيدي هادي من راسك ، هي مكاتعرفكش !!

خولة:مااتقووليش هاد الهضرة آ خويا !!! ياك قلتي غير تتحسن حالتها النفسية طلقها !!

جاهد:بيه فيه ! تلاقينا بعدا !

خولة:مغااااديش تتلااااقى بيهاا فهمتي!!

جاهد:خولة هدي راسك ! كلشي يتحل بالعقل..

خولة:مكاااينش العقل ! انا هااادي مااتتلاقى بيهااا مايجي وجهك فوجهها..

جاهد:هي حاليا كاتعتبر باقي مراتي !

خولة:مراااا وحدة اللي عندك ، وهي هادي {شيرات لراسها} من غيري مكاااينش ، وهااادشي بفمك قلتييه ليا..

جاهد:فعلاً ماختلفناااش !!

خولة:ولكن مبااانليييش مبااانليييش ، علااش تقول ليااااا مراااتك..

جاهد:خفضي صوتك ، مكايناش شي حاجة اللي تخليك تتعصبي ، كلشي ليه حل..

خولة:{زفراات بغضب}واخ واخ ، هاني هديت..

جاهد:دابا شنو المشكل اللي عندك ! ، انا مابغيتش نخبي عليك شي حاجة ، ولكن بان ليا تسرعت مااللي خبرتك..

خولة:{خرجات عينيها}مشكلتيييي علاااش تقول ليااا باللي مرااتك..

جاهد:{شداتو الضحكة حرك راسو بغرابة}وشنو ماشي مراتي !..

خولة:{تجننات} هااانااا تاااني ، وماااشي مرتك ، انا بوحدي اللي مراااتك..

جاهد:{شاد فيها}نشوفو مع العدول يقول واش مراتي ولا لا..

خولة:ياك! كلشي كان كدوب صافي ، باغي ترجعها ، اوا مبروك عليكم من دابا الله يكمل بالخير.. {ضورات راسها للشرجم}

جاهد:دابا شنو !

خولة:رجعني لداارنا آخويا وها نتا ها مراتك..

جاهد:{وقف حدا ريسطو ، وهز يديها باسها}خوي راسك من هادشي ، مرتي بالسمية وكان ، شنو جامعني بيها من غير هادشي !! ، ونتي هي اللي كاينة وغاتكوني ، من غيرك مكاينش ، خاصني ضروري نتلاقاها فاش تجي ، باش نرصيو الأمور ، وكلا يشد طريقو ، ونديك كاع الدنمارك غير بقاي ليا على خاطرك..

خولة:{هضرتو دخلات من ودن وخرجات من ختها ، مدورة راسها منفخة} والله لا حطيت رجلي ففاس دابا ماشي سوقي ، نجلسو فدار ابي..

مجاوبهاش حدو حل الباب ونزلو ، وهي نزلات هازة صاكها ، ونيفها الفوق ، طالع ليها الدم ، وحنوكها حوومر غايطرطقو ، حرك راسو بهداوة ، وقرب ليها شد ليها يديها كأن شيء لم يكن ، حاولات تفلت ولكن زيرها عندو ، وغمض عينيه وكلهم بمعنى تركني ، عضات فمها معصبة ، مانطقاتش ودخلو الداخل ، ريسطو عائلية ، مخلطة بين الرجال و النساء ، شدو طابلتهم..

جاهد:شنو تشربي الياقوتة!!

خولة:{تمتمات} السم ان شاء الله..

جاهد:{سمعها} الله ينجيك ويعافيك..

طلب ليهم فطور ، وربع يديه كايشوف فيها شنو كاتصنع ، وهي كاتحاول تفلت نظراتها ، ولكن ماتقدرش تخفي التوتر اللي حاسة بيه قدامو ، حركاتو كايخربقوها..

جاهد:اوا زيدي شنو تما !

خولة:شنو..

جاهد:اولا هاد النفخة نحيدوها ، ثانيا كادخلي لراسك شي حوايج اللي أصلا مكاينينش..

خولة:شنو زعما كانتوهم من راسي...

جاهد: تقريبا!!

خولة: بالعكس ، كانقول غير اللي كاين..

جاهد:واخا نفتارضو كلامك صحيح ، وانا باغي رجع شادية ، واش غادي نحير فيك..

خولة:{عقدات حواجبها}اش هاد الهضرة مافهمتش!!

جاهد:شادية قانونيا كاتبقى مراتي ، وانا نهار تزوجت بيك ، كنتي عارفة انني مزوج..

خولة:مااتخلطش الامور ، نجبدو داكشي القديم!!

جاهد:مكانخلطش ، بغض النظر على الطريقة باش تم زواجنا ، وقبل كاع نتي ماكنتيش عارفة علاش تزوجت عليها ، كان بإمكاني مانقوليك والو..

خولة:نتا قلتي ليا حيت هي كانت باقي حالتها ماتحسنات ، وبحال والو رجعو عليك ايام زمان ، عشر سنين ماشي ساهلة تتمحى من الذاكرة ، شكون انا اللي ياله 3 شهور باش تزوجنا ، ماتوصلش معزتي لمعزتها..

جاهد:{بهداوة}طبعا مغاتوصلش حيت فرق كبير..

خولة:{عينيها تحقنوا بالدموع وهازة نيفها السما}اوا مزيان الله يكمل..

جاهد:{بابتسامة} آمين ، عرفتي دابا شنو ؟ بحالا كاتقولي ليا سنين ديال الحبس حسن من 3 شهور ديال الحرية ، {حرك راسو} خولة يا خولة ، الله يهديك على راسك ، ديري فبالك ان الراجل يسمع على كلشي الا ثلاثة ديال الحوايج ، كرامتو،عرضو،وشرفو ، حاجة من هادي الا تقاست وتسامح عليها ، مكااتبقاش من الرجال ، عارفة شنو هي الخيانة الزوجية؟! ، هي كاتآذي هاد الثلاثة ، وانا كلشي نسمح عليه الا هادي ، فعلا كانقدر ونوقف ونرجع الخير ، ولكن عمري كاننسى الحاجة الخايبة ،

خولة:واخا هادشي تقدر تشوفها وتضعف {كاتجر ليه لسانو} حيت باينة غاتكون زوينة بزاف..

جاهد:كل واحد وحقو فالزين ، ولكن ديري فبالك أن شادية كبيرة فالعمر ، باش نكونو مفاهمين السيدة داخلة على 44 ، ماتقارنيش راسك بيها ونتي فبداية شبابك وبيناتكم فرق ديال عشرين عام ، كون تزوجات فداك الوقت تولد قدك..

خولة:هاد الهضرة ماتقولهاش ليا ، نتوما الرجال كايعجبوكم النسا الكبار..

جاهد:لا حول ولا قوة الا بالله ، غاتحمقيني يا هاد البنت..

خولة:{كاتشرب فالقهوة}كانقول اللي كاين..

جاهد:واخا نتفاهمو على واحد الحاجة...

خولة:شنو!!

جاهد:باش تهدا نفسك من جيهتي ، حسبيني راسك ونحسبك راسي..

خولة:كيفاش!!

جاهد:كايقولو كما تدين تدان ، نهار تشوفي نتي فراجل من غيري ، كوني أكيدة غانكون درت نفس الشيء ، انا ثايق فيك وماعنديش فيك شك ، دابا دوزي هاد اليومين فداركم وياله نمشيو لفاس ، ولا غانظطر نمشي بوحدي ، حيت مايمكنش نبقى..

خولة:ياك باش تتلاقى بيها..

جاهد:{حط يديه على جبهته بعياء}لا إله إلا الله

فالدار منشورة فالصالون ، كاتطلع وتهبط فالتيليفون ، وتقلب وتشوف ، حتى سمعات الصونيت ، قلبات عينيها كاتأفأف ، وناضت حلات الباب..

نجية:السلام الزين..

هناء:اهلا ، مرحبا دخلي..

نجية:اوا يا ختي قنطت فالدار وجيت نشوفك..

هناء:درتي خير..

نجية:{جلسات فالصالون} هاي هاي هاي ، غبرت عليك يومين زيانيتي العفريتة..

هناء:ربي يخليك آ حبيبة ههه..

نجية:اوا اش كاتعاودي كاين شي جديد..

هناء:والو هاد ساعة غير غاديين على الله..

نجية:كلنا هاكا ، اوا قولي ليا ولادك كايشوفو شي باهم..

هناء:والو يا ختي ، مكايسول عليهم ما والو..

نجية:اوا بسيف ، تلقاه مشغول مع المرا الجديدة..

هناء:{تصرفقات}اشمن مرا!!

نجية:مافخباركش {ضربات فمها}هاك افمي هاك..

هناء:شرحي لياا شنو كاااين ، كيفاش مرا..

نجية:اوا يا الحبيبة قالك غايتزوج ، ودار البارح عاد واحد الخطووبة مطرطقة ، كلشي جابوه لينا الناس اللي حضرو ، قالك ما خلا شكون عرض ، والعروسة صغيرة و مزييونة..

هناء:{العافية شعلات فيها}اويلي مايمكنش ، مايمكنش..

نجية:والله آ ختي بحالا كاتشوفي بعينيك..

هناء:بهاد الزربة هادي وانا مخلي ليا ولادووو، وغادي يعيش حياتو..

نجية:هادو هما الرجال...

هناء:غا بلاتي لما ندمتو..{ناضت}..

نجية:اويلي فين غادية..

مشات دغيا للبيت خشات فراسها عباية ، والصباط اللي لقات قدامها دارتو فرجليها ، وخرجات بحال الحمقة ، ممتقبلاهاش ، كيفاش غايتزوج عاد سرات معاها أن هاد المرة ماشي بحال اللي فاتو ، مجاياش غضبانة جاية مطلقة ، وها هو راجلها غايتزوج ، شدات الطريق على رجليها ، ونجية ماقدراتش تتبعها ، الطريق بعيدة وهي كاتمشى ، حتى وصلات للدار ، عقلها بغا يخرج ، بقات كادق ودق..

هناء:وااااا حل الباااااب حل ، واااا حل ، نسيتيييي العشرة ، ونسيييتيي للياااام ، حل الغدااااار وااااااا حل ، حاااااال البااب ، {طاحت حدا الباب كاتبكي}قتلتيييييينيييي ، واااا قتلتيييييينيييي ، خليييي غير يدوز شهر بعداااا شهر ، وااااا الله ياااخد فيك الحق..

بقات كااتغووت قدام الباب مدة ، وتبكي وتنووح ، والجيران كايطلو حد ما قرب ، بقات حتى بردااات قلبها وناضت ، الضبااابة بين عينيها ، كاتمشي فالطريق وساهية ، ايييه لهاد الدرجة ، مرااعاااش ليهااااا و جااب غيرها ، سمح فولاادو وفكلشي ، محاسة بوالوا حواليها ، دازت من الشانطي بلا ماترد البال للطموبيلاات اللي غاديين جاييين ، من بينهم وحدة جاية طاايرة كاتكلااكصوني عليهااا تبعد ، ولكن وااللو ، ثواااني قبل ماااتدخل فيهااا حتى طارت من بلاصتها وعاودات تردخات مع الارض ، عينيها بقاو محلولين و الدمايااات كاتشرشر....!

الخبار توصل توصل ، فعلا خبرو عائلتها ، دخلات سناء الصبيطار كاتبكي ، بزز خلاهم الحارس يدخلو ، وراها خولة اللي ملامحها جامدين ، ماتقدرش تفسر مشاعرها تجاه الحادث ، وجاهد دخل وراهم ، كالعادة ضروري يوقف معاها فالصغيرة و الكبيرة ، ما دخلو حتى قال ليهم ان الطبيب اللي تكلف بيها خرج من عندها ، ومسموح فقط 10 دقائق ، قلبو عليه حتى لقاوه ياله خارج من أحد الغرف...

جاهد:المكلف بالحالة اللي جات دايرة كسيدة !!

الطبيب:من عائلة المريضة ؟

جاهد:وي !!

الطبيب:المدام للاسف تعرضات لكسر على مستوى ظهرها !!

جاهد:{غمض عينيه متأسف} لا حول ولا قوة الا بالله !!

الطبيب:هادا ما كان اسيدي ، ودابا على حسب العملية هي اللي تحدد حالتها ، لكن على حسب الفحص الأولي حطينا احتمالية ان النخاع الشوكي تقاس !

جاهد:غاتشلل !!

الطبيب:بنسبة 90٪ فالمية ، ناهيك عن الضربة اللي جاتها فراسها..

جاهد:ديرو جهدكم ، تحتاج تتنقل لكلينييك خاص !!

الطبيب؛هنا كايولي بحال تما !! الا تجازاو بنفس الطريقة..

جاهد:{فهم المعنى} كون هاني من هاد الناحية !!

قلب الضورة عندهم اللي كانو واقفين اللور شوية ، وسناء غير كاتبكي ، وهو مكايشوفش جيهتها وعاطي مساحة الأمان ، قال اللي قال ليه الطبيب موجه هضرتو لخولة ، ولكن حتى سناء كاتسمع.

جاهد:هادا ما كان ، نتمناو ليها خير ، دعيو معاها وحطو املكم ف الله..

خولة:{بنظرة مطولة} ياله نمشيو للدار..

جاهد:متاكدة مابغيتيش تبقاي !!

خولة:{بنبرة باردة} حتى الا بقيت مغاديش نفيدها !! ، ومكتاب الله كايتصرف..

جاهد:ونعم بالله !!

خولة:سناء زيدي نمشيو..

سناء:{كاتبكي}مانمشيش آ ختي ونخليها كي غادي ندير ليها..

خولة:اصلا ممنوع زيارة ! سوا بقيتي ولا مشيتي اللي بغاها الله تكون..

{سبقهم جاهد ، وخولة شدات فختها اللي دموعها هابطين بحرقة ، قلبها هشيش و دغيا كاتنسى مكاتشدش فيه ، عكس خولة اللي كاتخزن عندها}

سناء:ماتستاهلش اختي اللي وقع ليها والله ما تستاهل..

خولة:الله يشافي كل مريض..

سنااء:{زيرات على يديها}عافاك دعي معاها ، دعي معاها من كل قلبك وسامحيها ، عافاك على وجه المرحوم و المرحومة..

خولة:الله يسامح كل واحد ! ولكن عمري ننسى واخا غير نقطة كحلة دارها بنادم..

سناء:الله غايجازي كل واحد اختي ، غير وقفي معاها غير فهادي الله يرحم الواليدين..

خولة:منها نيت دير عقلها ! بقاو فيا ولادها بوحدهم ! انا اللي عليا ندير ليك وكالة ، بيعو شريو حرقو سوقكم هاداك ! انا مرجوعي فاس..

سناء:لا خولة عافاااااك ، ماتقسحيش قلبك لهاد الدرجة ، الله وكايسامح شكون حنا مانسامحوش...

خولة:علاش كاطلبي مني نسامحها ! على هي شنو دارت {ببرودة}بجوج اذينا بعضياتنا ، فالله الا عاقب غايعاقبني معاها...

سناء:مانعرف ماندير بلا بيك ، لمن نعطي الراس اختي ، وانا بهاد النقاب اللي نقرب ليه كايهرب..

خولة:{وقفو حدا الطوموبيل}النقاب مكانش بإرادتك ، والا ماحيدتيهش غايبقى عائق ليك ، وماتلقاي ما تاكلي ، اللي عندي من نصيحة ليك هي حيديه ، وكتافاي بالخمار ، أبي كان عندو اراضي كثيرة فالبلاد ، شوفي حقك وبيعي شحال تحتاجي وديري مشروعك ، لا انا لا غيري غايدوم ليك ، تعلمي تعتامدي على راسك ، راسك وصاافي حيت حتى واحد مغادي يعاونك بلا مقابل شكون ما كان يكون ، ماتخليش الواحد يمن عليك خير صرفو فيك ، وماتخليش الواحد يتحكم فيك تحت خير دارو عليك.. {ياله غاتجاوبها قاطعاتها بجفاء؛}طلعي تابعاني طريق..

فبيتها كاتجمع فصاكها ، كاع داكشي ديالها جمعاتو ما خلات والو كايدور البيت كايصفر ، كأنها ناوية عمرها ترجع لتما ، هبطات التحت و حلات الباب كان واقف حدا طموبيلتو ، كايدوي بلغة أجنبية مافهمات منها والو ، غير شافها قطع و طلع ونزل فيها..

جاهد:فين غادية !!

خولة:مغانمشيوش لفاس !!

جاهد:{بتفاجئ}وختك!!

خولة:{بهدوء} مالها! الله يشافيها..

جاهد: تخليها فهاد الحالة وتمشي..

خولة:سناء معاها !!

جاهد:ماشي جات حشومة..

خولة:{زيرات على فمها معصبة}ماتظغطش عليا عافاك، ياله نمشيو...

جاهد:{حيد نظاظر ومسح على عينيه} لا إله إلا الله ، ركبي..

خولة:{ركبات فالطوموبيل}..

جاهد:{ركب حتى هو وديمارا اللوطو} مابقيتش فاهمك ، علاش هاد الحالة كاملة !! ، الا غلطات فالماضي جا الوقت اللي تكفر على اغلاطها والله غفور رحيم..

خولة:مالي هزيت عليها الحجر ولا لمتها! كانبقى حرة فأنني نبقى معاها ولالا..

جاهد:ماشي مسألة الحرية ، ولكن ختك هاديك ، كبري عقلك شوية ورطبي قلبك..

خولة:هاد القلب مغاديش يرطاب ،واش اللي جا نسامحو !! عارف شحال من مرة طيحات عليا الباطل! عارف شحال من دمعة هبطات من عيني بسبابها ، وانا دموعي مارخاصش حيت ماشي أي وحدة انا خولة !! اللي عمر شي بنت المرا تقدر توصلني ولو قد هاكا {جمعات صباعها} تجي هي تكون سباب بكايا ونسمح ليها..

جاهد:{معجب منها} خولة واش كادوي من نيتك! عمر شي واحد فهاد الدنيا كان حسن من حد..

خولة؛هضرة خاوية ، ها نتا كاتشوف بعينيك ، واش عمر شفتي شي وحدة فحياتك عندها بحال بشرتي ؟ ولا لون عيني !! ، انا مختالفة على الجميع حتى واحد ما يوصلني..

جاهد:خلق من الشبه أربعين..

خولة:وكانبقى وغانبقى الوحيدة اللي مميزة !!

جاهد:خولة راك ماشي نورمال ، هادشي مافيه خير ليك..

خولة:عارفة مصلاحتي..

جاهد:ماشي هادشي اللي كانشوف..

خولة:{مبدلة الموضوع}مني غانصولو الفاس غانمشيوو ديريكت عند ديك ختنا طلقها..

جاهد:{هز حاجب كايسمعها بحالا كاتأمر فيه} بيه فيه! لاش زربة..

خولة:{بأعين مشتعلة} ماشي سوقي ، وانا غانمشي معاك رجلي برجليك..

جاهد؛هادشي عمرو مايكون آ خولة دخليها لداك الراس القاسح اللي عطاك الله ، التيقار ثم التيقار..

خولة:هادشي ماخدامش معايا ، انااا غااانمشي معاااك ماانصيفطكش عندها بوحدك..

جاهد:دابا نشوفو..

وصلو للدار ومع الوقفة داللوطو حلات الباب و نزلات ، كاتزدح فرجليها ، دخلات للبيت وسورتات الباب ، عاضة على فمها معصبة غير بوحدها..

خولة:أنااااني كايفكر غير لراااسو..

سمعات الدقان فالباب ، مابغاتش تحل عيا يعيط ليها والو..

جاهد:خولة حلي الله يهديك ، نهز غير وراقي !؛

خولة:{لا رد}...

جاهد:{كايحاول ما أمكن مايخرجش على طبيعتو} خولة ! بلا فعايل ديال الدراري الصغار..!

خولة:تا تطلقها...

جاهد:ماللي ولينا فهادي ، كلمة وحدة داكشي بعيد عليك نطلقها ولا مانطلقهاش !!

خولة:ما قلتي عيب ، تانا هاد الباب محالاهش..

مجاوبهاش عدوه التبرهيش ، خرج من تما ، ركب طموبيلتو وزاد مع الطريق ، طلات من الشرجم كاتشوف بعينيها بشروود ، دخلات للدوش بردات عظامها ومخها خدام ، عاد خرجات كاتنشف شعرها ، من بعدها دخلات لفراشها وغمضات عينيها ، حتى غلبها النعاس...!

.

.

.

على صوت الهاتف حلات عينيها بخموول ، ضرباتها بنعسة نيت ، تأفافات وناضت كاتعكز ، هزاتو من فوق الكوافوز كاتفوه ، عاد رجعات لسريرها وجاوباات..

خولة:آلو !

...............

{كمشات ملامحها مكاتفرزش الهضرة ، كاتسمع غير صوت البكا وكلمات ممفهومينش}

خولة:سنااء ! مالك شنو واقع ..

.....................

خولة:حبسي البكا مافهمت والو !

سناء:{كاتحبس شهقاتها} ختنااا ضااعت ضاااعت...

خولة:شنو وقع ليها !!..

سناء:مشى ليهاااا الشووف اختييي ، تعمااات حبيبتييي تعمااااات..

خولة:{غمضات عينيها مدة وحلاتهم} قدر الله وما شاء فعل ، ماتقهريش راسك..

سناء:مااانقدرش اختي مااانقدرش ، شكووون غايهزهاااا شكووون..

خولة:{بجدية} شوفي ليها شي جمعية ؛!

سناء:{تصدمات}من نيتك داوية!! حنا خواتاتها الا ماهزيناها شكون يهزها !!

خولة:داوية عليك نتي باش تنقصي عليك ، اما انا بعيدة كل البعد طبعا ماشي حمقة نضيع صحتي على وحدة عاشت وشافت و تشوفات ودارت وليدات !!

سناء:{تلفات ليها الهضرة} واش عارفة اش كاتقولي..

خولة:شوفي مكانقولش ليك ديري بزز، نتي وراسك ، ولكن الا كنتي قادرة تهزي 8 ديال النفوس هزيهم ! تردي البال لراسك ولولادك الثلاثة ولا ليها ولولادها ، صحتك غاتمشي..

سناء:{تنهدات} باهم ساق الخبار ، وقبيلة جا داهم..

خولة:احسن حاجة واخا حمار ولكن عندو دماغ بعدا..

سناء:الله يهديك واش وقت هاد الهضرة..

خولة:صافي خليني عليك هاد الساعة ، اللي مريض الله يشافيه وحتى اللي هبيل

وصل الليل ، باقي ماتسمع حسو فالدار ، رغم قسوحية وجهها وتخراج العينين ، ولكن باين القلق على ملامحها ، كادور وتمشي وتجي ، مابغاتش تصوني ليه ، كبريائها كايبقى أقوى ، لكن قلبها واكلها بقات كاتمشي وتجي معصبة ، وكاتسوووط..

"غااايكوون مشى عندهاااا"

"والله ما باقي ندوي معاه"

"مدايرليش قيمة"

"زعما غايبات معاها ؟"

"لا لا ياك مشللة"

عدة أسئلة دارو فراسها ، وهي بقى ليها شوية وتطرطق ، آخرتها غلبها النعاس ، ومشات لبيتها تكات ، وضرباتها بنعيسة حتى تسللات بعض الوشوشات لمسامعها ، حلات عينيها قافزة ، ردات نفس عميق فاش شافتو حداها كايصلي الفجر ، شافت فيه مدة ، فعلا من بعد هاد المدة اللي دوزات معاه ، ولات عاطية وقت كثر لصلاتها ، يا إما كايدعيها كل مرة الصلاة ، ولا كاتشوفو كايصلي وكايدير فيها النفس ، تقادات فالجلسة و جمعات شعرها الفوق ، مربعة يديها كاتستناه يسالي ، وهو كايصلي بخشوووع تااام ، حتى سالاا وسلم عاد ناض طوا السجادة..

جاهد:{بصوت هادئ ذو بحة}صباح الخير..

خولة:{مصغرة عينيها} صباح النواور والياسمين!!

جاهد:نعستي مزيان !!

خولة:اممم..

جاهد:{قرب جلس حداها} تعطلت البارح ، ياكما تخلعتي حيت بقيتي بوحدك..

خولة:لا..

جاهد:بردتي شوية ؟..

خولة:{دورات عينيها}..

جاهد:{دور ليها وجهها بلطف} فاش يكون اي واحد كايدوي معاك من الاحسن تشوفي فيه..

خولة:{ركزات النظر فعيونو} كنتي عندها!

جاهد:شكون ؟!

خولة:{باستهزاء}ضرتي الزوينة!!

جاهد:{بصراحة}اه مشيت تعشيت عندهم..

خولة:{بصوت بارد}ومقالش ليك عقلك ، راك مخلي كلبة بوحدها بلا كلمة ولا زواج..

جاهد:{باس يديها بهدوء} حاشة تكوني كلبة ، نتي مابغيتيش تحلي الباب اما كنت غانقول ليك اللي كاين..

خولة:علاش مشيتي عندها بلا بيا!!

جاهد:خولة المرا كاتبقى مرا ديريها فراسك ، مايمكنش انا نجرح مرا بمرا حيت يوقع اللي يوقع كاين واحد الحاجة بيناتنا سميتها الزواج ، والزواج ماشي اللعب فعلا ماحتارماتش حرمة زواجنا ، وجرحاتني ولكن انا ماشي ولد الحرام باش نجرحها ولا نجرحك..

خولة:شنو قررتو! غاطلقو ياك..

جاهد:{عض على فمو} الطلاق لا مهرب منه ديريها فبالك، ولكن طلبات مني طلب راجع ليك نتي من حقك توافقي ولا ترفضي..

خولة:فهمني كثر !

جاهد:عاد قلت ليك اانني مابغيتش نجرحها ولا نجرحك ، ورافض كليا لقائكم ، لكنها بغات تشوفك وأصرات ، ولكن كلامك هو الأول اللي بغيتيه يكون الياقوتة..

شافت فيه مدة طويلة ، و المطارق كايضربو فراسها ، ملامحها جامدة ولكن هي كاتفكر فاش تكون بغاتها ، شافت فيه بجموود وقالت...

خولة: جيبها!!

جاهد:نمشيو عندها احسن؛؛

خولة:{هزات نيفها}ماشي خولة اللي تمشي عند شي وحدة ! هي اللي تجي لهنا!!

جاهد: واخا الآلة !! ، واجي نتفاهمو على النفخة {قرب ليها كثر مركز على عينيها}

خولة:{هربات عينيها بتوتر} شمن نفخة الله يهديك..

جاهد:خولة يا خولة ، غاتسطيني معاك ، شنو ديك الهضرة ديال مكاينش بحالي..

خولة:شنو واش مكايناش..

جاهد:{حط يديه على صدرو}قلبي وعيني موافقينك الرأي..

خولة:{شادة إبتسامتها} حيت هادا هو الصح..

جاهد:{بجدية} عندك كامل الحق تثيقي فراسك ، ولكن الثقة فالنفس زيادة على اللزووم كايوصل لمواصل ماهماش..

خولة: شنوو زعما!!

جاهد:{لوا خصلة من شعرها على صبعو}ثيقي فراسك ، و كبري براسك ، وماتخلي الفرصة لحد فين يستصغرك ، ولكن ماتشوفيش فقمة الجبل ونتي طالعة حيت تقدري تتعثري و طيحي..

خولة:بغيتي تقصد انني متكبرة وومغرورة !

جاهد؛مانطقتهاش ، لكن تسائلي غير بينك وبين نفسك واش كاينة ولالا..

خولة:كتاشفت ان تا واحد مكايفهمني..

جاهد:وعلاش..

خولة:كون على يقين كون ما هاد النفخة و الاستعلاء كون بلاصتي من بلاصة خواتاتي!!

جاهد:شرحي كثر

خولة:ديما كانشوف راسي الفوق ، وديما كانشوف لراسي الاحسن ، وديما كنت كانشوف انني حسن من كلشي ، وغانبقى هاكا وعمري مغادي نتغير ، كون بقيت عادية كان حالي غايكون كأي وحدة ، نتعجب بهادا ونفكر فهادا ، عاقلة فأيام المراهقة ، كانشوف أغلبية البنات عينيهم محلولين ، وطامعين فشخص ما ، ربما باش يتزوجهم او غير يتكلم معاهم ، ولكن ماكنتش بحالهم ، حيت ديما كنت كانطمح الفووووق و الفووق وتا واحد مكايستهويني حيت كانشوف راسي الافضل ، ونستحق الاحسن، جاو خطاب ومشاو وانا عمر نال رضايا شي حد فيهم ، حيت كانشوف راسي لعيشة حسن ، وفعلا داكشي اللي وقع..

جاهد؛{بابتسامة} كاتقولي بشكل مباشرة كانك لقيتي الشخص اللي تشوفيه كايستاهلك!!

خولة:{بصراحة} تماماً ! حين كون كان واحد اخر عمر يبغيني كيما انا ولا يحتارمني ، ولا يعاملني بحالك ، واخا فيا صفات خايبين..

جاهد:باغيك كيما نتي ، وبداكشي اللي نتي عليه !

تبلاصاات الطوموبيل قدام الدار ، نزل الشيفور حل الكوفر منزل كرسي متحرك ، عاد حل الباب وتقاتل حتى حطها فيه ، عاد نزل راجل كبير فالعمر شوية ، رن الجرس ، دقائق معدودة كان نزل جاهد يديه فجيابه وحل ليهم الباب بعدما قبل رأس الرجل باحترام..

جاهد:دخلو مرحبا بيكم !

الرجل:الله يكبر بيك ا ولدي

دخلهم الداخل ، وهي غير كاتشوف بعينيها وترمش ، إمرأة أربعينية ، كاتبان كبر من سنها ، حيت ذبالت و ضعافت والتجاعيد حول أعينها ، كاتشوف فنقطة وحدة ، عاد ولات تقدر تدوي شوية واخا دغيا كاتعيا وأصراات ، تقابل زوجة زوجها الثانية..

جاهد:{تحنحن}تفضل السي الحاج للصالون ، خلي شادية هنا المدام هايا غاتجي..

الحاج: على الراس والعين..

هبطات خولة من البيت ، هازة النويف السما فقمة أناقتها ، طلعات وهبطات فيها ، وضحكات بينها وبين راسها ، انا نغير من هادي..

خولة:صبري نتحنى شوية {تحنات وسلمات عليها} كي دايرة أحبيبة لباس..

شادية:{لسانها ثقيل} الححمد الله..

خولة:داكشي اللي بغينا..

شادية:نتتي ممررتو؟

خولة:{باستعلاء}وي مرات جاهد..

شادية:{بنظرة حزينة} الله يكمل..

خولة:نقدر نعرف علاش بغيتي تشوفيني..

شادية:ديروووننجيتك؟

خولة:شوية وكان ، ماعندها تا معنى ، ونتوما غاطلقو.

شادية:ططلاق مكاييعننيش العدااوة.

خولة:{هزات حاجبها}وي مي كايعني كلا يمشي فطريقو..

شادية:ععارفة ماتتخافيش ماشي ديما تشوفيني..

خولة:{بجدية} شنو كاين!!

شادية؛{عينيها عمرو بالدموع} تيقيني الا قلت ليك اكثر انسان، مزيان قابلتو فحياتي هو جاهد ، مايستاهلش وحدة بحالي تيقيني..

خولة:علاش غدرتيه..

شادية:{بلعات ريقها بصعوبة} حيت كنت أغبى وحدة فهاد الدنيا ، يستاهل حسن مني..

خولة:لقى اللي يستاهل!

شادية:كانتمنى من كل قلبي..

خولة؛ من المفترض نتيقك !!

شادية:{دموعها نازلين} تقدري ماتيقينيش ، ولكن والله ما كاين اللي فقلبو مكااينش ، حنييين بزاااااف ورااااجل ، عمروو خسر ليااا..

خولة:{تعصبات} ولاش تتعاودي ليا هادشي ! تانا داير ليا كي الما القليل..

شادية:ماقصصدتش شي حاجة خايبة تيقيني ، اللي بغيت نوصل ليك ان الحاجة مكانعرفو قيمتها حتى كانفقدوها ، مابغيتش ديري بحالي..

خولة:{زفراات}ماشي نتي اللي توصيني ازين ، راجلي وعارفة قيمتو ومهلية فيه..

شادية: يستاهل كل خير ، كون ندفع حياتي كاملة مانديرش معاه نص داكشي اللي دار ليا ، وكانقسم ليك كون كان بيدي نبيع حياتي ويرجع ليا غير نهار واحد {دموعها هابطين بحرقة} كنت طايشة بزاااف بزااف ، تصدمت صدمة العمر وقطعت الهضرة لسنين ، ماشي غير بسبب الحادث ولكن تانيب الضمير كان كاينهش فيا كل ليلة كنحلم بيه ، كانبغي نموووت ، ندمت و ندمت والندم مانفعنييش..

خولة:{سهات لمدة طويلة ، شوية ناضت} سمحي ليا غانطلع..

مشات قدامها بلا ماتجاوبها الاخرى ، اللي دموعها ماحبسوش ، حاول جاهد يقنعهم يبقاو يتغداو لكن رفضو ، وقررو يديرو طلاق بتراضي بلا طلوع وهبوط..

.

.

.

صباح جديد طلع واقفة فالطواليط ، كاتحل عينيها وتسدهم ممصدقاش داكشي اللي كاتشوف ، شعوور غريييب تسلل دااخلها ، ماتقدرش توصفو ، يديها رجفو عليها زيرات عليهم بقوة ، وقلبها كايضرب..

خولة:{تمتمات ممصدقاش}حاملة !!

خرجات من الطواليط ، وعينيها محلولين كاترمش ببطء ، كل شوية كاتنزل عينيها جيهة كرشها ممصدقاش ، عضات على فمها وجلسات على السرير ، حطات يديها على كرشها وجمعاتها بحال الا ضربها الضو {حاملة} ، كلمة جد غريبة ، قلبات كاع حواسها ، هزات يديها للمرة الثانية كاترجف ، وحطاتها عليها ، غمضات عينيها بدون شعور ، وزيرات عليها بيديها بشوية ، عضات على فمها حاسة بعينيها كايتغرغرو ، كأنها عاد بدات كاتستوعب..! ، تنفسات بعمق كاتهدن راسها ، هزات تيليفون شافت فالساعة كانت العشرة دالصباح ، قبل ماتفطر كاع ، ديجا شكات فراسها ، وشرات التيست بلا مايرد ليها جاهد البال ، وفعلا صدقو شكوكها في محلهم..

جاهد:خاااولة !!

خولة:{خرجها من شرودها} نعاام

جاهد: مغاتجيش تفطري..

خولة:{تنفسات بعمق} هاني جاية..

بردات راسها وهبطات كاتحاول ما تبين والو ، لقاتو جالس كايستنى فيها على طبلة الفطور اللي قادات هي عاد طلعات تجرب التيست ، وجلسات حداه كاتكب ليهم القهوة ، وبداو كياكلو فصمت هو هضرتو قليلة ، وهي غير ساهية كاتخمم ، رفع فيها عينيه كايشوفها ماشي حتى لهيه ، وكاسها باقي عامر ، وكان حاط ليها طووست بالكونفتير اللي كان عندها ضروري فالفطور ، حدها ضربات فيه عضيضة وحطاتو، حط يديه على يديها حتى قفزات..

جاهد:هانية ؟!!

خولة:{حركات راسها}اممم..

جاهد:فين ساهية !!

خولة:والو غير كانخمم...

جاهد:كولي بعدا ماكليتي والو..

خولة:مافياش ، جاهد..

جاهد:وي !

خولة:بغيت نخرج !

جاهد:فين ؟

خولة:غانمشي لطبيبة ، نشوف واش باقي فيا فقر الدم ، وانا من شحال كانتبع دوايات..

جاهد:خير ان شاء الله ، اللي بغيتي ، كملي ونوضي بدلي نوصلك..

خولة:خاصني ضروري ندير پيرمي ، مانبقاش كل مرة معذباك..

جاهد:عذابك راحة آ مدام ، ديريه علاش لا ، تاخدي راحتك كثر..

خولة:{بتاسمات بدلع} وتاخد ليا طموبيل..

جاهد:ان شاء الله علاش لا..

خولة:{ناضت}هاني نبدل ونجي..

جاهد: واخا..

طلعات الفوق وناض هو ، شاف فالطبلة شحال وجمعها هو ، هبطات من البيت مبدلة حوايجها ومأنقة ، بتاسم ليها باعجاب وقبل يديها عاد خرجو ، وصلها للعيادة وقلب الدورة لخدمتو ، دخلات الداخل شدات النوبة حتى وصلاتها..

خولة:السلام عليكم..

الطبيبة:وعليكم السلام !

خولة:{تحنحنات} جيت ندير فحص..

الطبيبة:مرحبا شنو المشكل اللي عندك!!

خولة:درت تيست منزلي ديال الحمل وطلع إيجابي بغيت نتأكد..

الطبيبة: مرحبا !

خولة:واش يقدر يكون غالط!

الطبيبة:طبعا ماشي ديما كايكون صحيح !!

خولة:حيت بصراحة شاكة ، واخا انقاطعات الدورة الشهرية ومجاتش فوقتها ولكن كنت متبعة البيلول !!

الطبيبة:الا غلطتي غير مرة وحدة فيه يقدر تهزي ، حيت هو ناجح بنسبة 99٪ فالمية وكاتبقى 1٪ فالمية..

خولة:نتمنى خير..

الطبيبة:باغية تكوني حاملة ولالا !

خولة:الزوج ديالي باغي ، مي صراحةً مكانشوفش راسي قادة من دابا على المسؤولية..

الطبيبة:يكون خير ان شاء الله..

ركبات على الباياص ، وعرات ليها الطبيبة على كرشها ، دارت ليها جيل على كرشها كادوز عليها وتشوف فالتلفزة ، حتى صغرات عينيها كاتأكد

خارجة من العيادة دموع فطرف عينيها ، ورقة بين يديها ، تنهدات رادة نفس طويل ، كاتكالمي راسها ، ومشات للدار ، مالقات باش تلف الوقت هزات التيليفون كاتصوني لسناء تسول عليها..

سناء:خولة كي دايرة آ حبيبتي لباس..

خولة:الحمد الله ، ونتي اش كاتعاودي..

سناء:كلشي هو هاداك اللهم الحمد..

خولة:كي غادية مع المحل ديالك..

سناء:{بصوت بهيج} كلشي غادي مزيان ، كانحمد ربي ونشكرو المحل تقاد ، مابقى والو نحل..

خولة:بالخير ان شاء الله ، كاين شي تحسن !!

سناء:{فهمات قصدها} اش غانقول ليك ، فالاول ماتقبلاتش الأمر ولكن دابا شوية الحمد الله على كل حال..

خولة:مقابلاها نتي !!

سناء:شحال قدي ، بنت حليمة الله يكثر خيرها كانعطيها بركة قليلة ، وتقابلها ليا..

خولة:امممم مزيان ، بصح داك خينا تزوج..

سناء:ها نتي يا ختي كان يحساب لي غير داويين خاوي ، طلع بصح تزوج..

خولة: و الولاد ؟!

سناء:باقيين معاه ، من غير البنية مابغاتش تبقى ، ماضنيتش يهزهم..

خولة:ولادو الا ماهزهم هو شكون يهزهم..

سناء: هادا ما كان..

خولة:ديك ختنا تهدات شي..

سناء:خولة الله يهديك ، اللي فيها كافيها..

خولة:تانا ما قلت والو!!

سناء:مهدنة وشادة ركنة ، الله معاها صعيب الحال بلا رجلين ولا عينين...

خولة:الله كايجازي كل واحد على قد نيتو..

سناء:خولة !..

خولة:صافي هاني سكت..

هضرة تجبد هضرة ، داك الجليد اللي كان بيناتهم شوية بشوية بدا كايتحيد ، وصلات العشية وخولة جمعات الدار وعقلها مشتت ، حتى سمحات حسو جا ، سلمات عليه كالعادة..

جاهد:{شافها كادور عينيها بحالا بغات تقول شي حاجة} اش كاين..

خولة: والو!!

جاهد:شنو قالت ليك الطبيبة !!

خولة:مزيان..

جاهد:باقي فيك فقر الدم..

خولة:بدلات ليا دوا..

جاهد:غير هادشي ؟!

خولة:كاينة حاجة خرا !

جاهد:شنو هي؟!

خولة: بلاتي..

شافت حتى عيات وخرجات من بيتها ، وهو مراقبها باستفسار ، حطات ليه واحد الورقة ، ورجعات للبيت سدات الباب بالساروت وجلسات الأمر ، وجهها حمر ، بإستغراب هز ديك الورقة ، وحلها بقى كايرمش بعينيه ممصدقش

بعد تأكدات من حملها ، ما كان عليها الا تتقبلو ، ففي الاخير كايبقى ابنها من لحمها ودمها ، لكن بقات واحلة فطريقة اللي تقولها ليه بيها ، ماعرفاتش علاش ولكن حشمات منو ، اما هو حال عينيه ممصدقش كايشوف فالتقرير اللي قدامو ، ظهرات ابتسامة عريضة على فمو ، وعينيه لامعين ، احساس غريب راودووو ، توجه للباب يحلو لقاه مسدود..

جاهد:{بصوت مبحوح الهضرة مشات ليه} خولة حلي..

خولة:{لا رد}..

جاهد: خولة هداك الله لما حلي..

بقا عليها حتى حلات الباب ، طلات براسها ، وهو يجبدو بيدو تا تحل ، كايشوف فيها ببريق خاص ، ويرجع يشوف فكرشها ، ماحساتش بيه إمتى عنقها بقووة ، دافن رااسه فعنقها ، حساب بشعور فشكل خلا دموعها يهبطو بدون سبب..

جاهد:{بعد عليها كايشوف فيها بحب و مودة} ماعرفتش كيفاش نوصل ليك احساسي ، ولكن هاد نهااار أحسن نهار فحياتي..

خولة:{غير دموعها اللي هابطين}...

جاهد:{مسح عينيها وحط جبهته على جبهتها}ماتبكيش دموعك غاليين عليا..

خولة:غايكون عندنا وليد ولا بنيتة..

جاهد:{بتاسم بتأثر} الحمد لله الذي بنعمته تتم الصالحات ، الله يكمل حملك بيخير ، وينزل مولودنا بصحتوو هادي دنيا ومافيها..

خولة:{شافت فعينيه مطولة} فرحان..

جاهد:اقل حاجة تعبر على احساسي..

خولة:مجاتكش زربنا !!

جاهد:{كشر ملامحو} كيفاش هادي تاني..

خولة؛{كاتلعب بصباعها} غير قلت ليك ، حنا ياله تزوجنا والحياة باقية قدامنا..

جاهد: ما عارفين السابق من اللاحق اللهما نخليو نسخة من ورانا تترحم علينا..

خولة:{دورات راسها كاتحبس دموعها} ماعرفت..

جاهد:دابا مالك..

خولة:{عنقاتو من كرشو كاتبكي من نيتها} غادي نسماااااااان وتمشي ليا لاطاي ديالي..

تهز بالضحك حتى دمعوو عينيه ، وهي غير كاتشوف فيه ، حتى بدات كاتضحك حتى هي..

.

.

.

الأيام غادة وجاية كلا وحالو مع الدنيا ، دخلات الدار كاتمشى بزز عيانة ، تبدلات فهاد الشهور القليلة اللي فاتت ، فين هي الاشراقة و الرشاقة كلشي مشا ولات وحدة خرا ، غلاضت على قبل دارت الفورمة ، ولكن معاجبهاش الحال نهائيا كاتظل تبكي عليه ، اما وجهها حالة خاصة ، خصوصا فاش ظهرو بقع ديال الكلف بغات تتسطى ، جلسات فالصالون كاتسوط عيانة ، حتى دخل هو هاز التقدية ، قبل حنكها وداعب كرشها بحنان..

جاهد:عيانة ؟!

خولة:علاش تتسول علاش ، شكون دارها ليا من غيرك ، شوووف شوووووف وجهي كي ولا ..

جاهد:غير مع الحمل دابا يفوتك..

خولة:ماتقوليش انا هاكا ، عرفتي باقي تجبد ليا حسن الولاد ، مانتفاهموش واخا نعرف نسد عليه بالساروت كاتشوفو..

جاهد:{هز حاجبه} شنو هو !

خولة:{تلفات ليها الهضرة} ل ا لا والو..

حالتها ولات حالة ، حتى أنها مابقاتش كاتبغي تخرج ، كاع ديك الثقة فالنفس اللي كانت عندها تبخرات ، عاطياها غير البكا فالحس ، والنݣير طيباتو وهو صابر عليها ، غير سادة عليها فالبيت ، الكلف مغطي وجهها ، وشعرها ولا خفيف ، واللي مكمل عليها هو الغلض مشات الرشاقة ، ولاو عندها حنيكات كثر ، و عمرات على الاول هادشي معقداها ، كانبغي دير ريجيم ولكن كايبزز عليها تاكل ، اليوم جاية عندها سناء مع ولادها ، اللي حياتها استقرات كثر ، والبهجة دخلات لحياتها ، ظطرات تحيد النقاب وتبقى بالخمار فقط ، حيت صعيب تتعامل بيه ، وحلات محلها ديال الخياطة ، من كليان بزوج لتلاتة ولكثر ، دخلوها الفلوس ، وجايبة خدامة لختها ، خرجات من بيتها ، لابسة كسوة بيتية ، وشعرها جامعاه الفوق ، كاتنادي البنت اللي كاتعاونها فالدار..

خولة:زينب زيينب..

زينب:{خرجات من الكوزينة} نعام آ لالة !!

خولة:وجدتي كلشي !!

زينب:كلشي هو هاداك كيما طلبتي..

خولة:واخا !! صافي غير سيري بحالك..

زينب: مغانبقاش حتى العشية !!

خولة:لا !! مول الدار جاي بكري مايلقاكش لهنا..

حركات راسها ودخلات للبيت اللي كاتبدل فيه حوايجها معجبة منها ، كاتجي فالوقت اللي مكايكونش وتخرجها قبل لايجي ، ماعرفاتش السبب..

زينب:ولايني معقدة هادي ، باينة مافخباروش جايبة خدامة..

خرجات من الدار بعدما بدلات حوايجها ، وخولة جلسات فالصالون شادة على كرشها اللي كبرات ، حتى سمعات الصونيت ، ناضت بشوية حتى وصلات الباب وحلاتوو، كانت سناء مع ولادها ، بتاسمات وسلمات عليها بالاعماق وباست ولادها ، شوية وهي تعقد حواجبها فاش بانت ليها جاية وارهم جاراها واحد البنت تكون فالثلاثينيات ، جالسة على كرسي متحرك ، مطات شفايفها وسناء كاترجاها بعينيها ، فسحات ليهم الطريق ودخلو للصالون..

سناء:كي دايرة اختي لباس عليك..

خولة:{عينيها على هناء} الحمد الله..

سناء:كي غادية مع الحمل بيخير

خولة:شوية وكان...

سناء:اوا مزيان الله يفك وحايلك على خير..

خولة:شنو درتي مع داك خينا ، خرج من الحبس..

سناء؛مابغاش يخلص ، ورفض حتى ينفق ، ما فيا اللي يدير ليه تنازل ، خليه على الله يدير عقلو..

خولة:مزيان احسن ما درتي..

سناء:ونتي كي غادية مع الزواج ، كاتشوفي شي الضرة ؟!

خولة:{بابتسامة انتصار} شمن ضرة !! ..

سناء:ماتقوليش ليا.. !

خولة:{حركات راسها بالايجاب} ااه..

سناء:مزيان اختي فرحت ليك..

خولة:{ناضت} هاني جاية..

سناء:جلسي اختي فين غادية الله يهديك..

خولة:شوية ونجي..

سناء:غانمشي معاك ، مثقلة وتتسخري علينا ، مجاتش..

خولة:بخاطرك..

ناضو الكوزينة كان كلشي محطوط على الرخامة ، وصلات معاها للطبلة ، وهوما كايدويو بيناتهم ، تغداو فجو هادئ ، غير سناء اللي كادوي وخولة كاتجاوب ، اما عن هناء كاتشوف جيهة وحدة عينيها مغرغرين ، كاتوكلها السيدة اللي معاها..

هناء:خخولة..

خولة:{هزات فيها عينيها} وي..

هناء:فاش نساليو بغيت ندوي معاك

حركات ليها راسها فصمت ، سالاو وناضو جمعو الطبلة ، سناء بقات مع ولادها فالصالون ، وهناء جرااتها البنت اللي معاها للصالة ، ودخلات حتى خولة ، عاد خرجات البنت ، وجلسات خولة كاتشوف فهناء دون ماتنطق..

هناء:شفتي فين وصلت..

خولة:{شافت فيها بدون ماتنطق}...

هناء:شكون كان كايقول غانوصل لهنا !!

خولة:{كتافات بكلمة وحدة} المكتاب..

هناء:{هبطو دموعها} انا درتها بيدي ، طغيت بزاف وظلمت وحݣرت..

خولة:{مكتافية بالصمت}..

هناء: يمكن غاتقولي هادي هاد فايقة ، وفين كانت شحال هادي ، من حقك ، قولي اللي بغيتي ، سمحييليييي بزااااااف ، سمحييليييي {صوتها مقطع كاتبكي} سمحييليييي على كل كلمة ضرااتك ، سمحييي لياااا على كل باطل نزلتوو عليك ، فكرت فالدنيا ، ومافكرتش فنهار اللي ربي يعاقبني فيه على فعايلي ، ندمتت بزاااف اختي ندمت ، والله حتى ندمت وكل مرت قبل ماننعس كاطيحي فبالي ، واخا وليت عمية صورتك بين عيني لحد الان..

خولة:اللي فات مات والكاس اللي تهرس مكايرجعش..

هناء:لااا اختي عافاااااك الله يخلي ليك ماعز ليك لاما حني ، الله يستر عليك ، شوفي غير حالتي ربي جازاني كفيت و وفيت ماعندي فين نزيد..

خولة:{غمضات عينيها} الصمت..

هناء:{كاتمد يديها فالخوا} نبووس ليك يديك لما سمحي ليااااا ، على وجه واليدينا اللي تحت التراب..

خولة:هناء صافي نساي

هناء: مغاديش ننسى مغاديش ، عارفة ماردتها زوينة ، ولكن والله حتى ندمت ، بلاصة مانكون مك الثانية بعدما ماتت منا طغيت عليك ، لعبات عليا الغيرة والحسد ، وتعماو ليا العينين ، سمحي ليااااا ، اليوم حيين غدا ميتين ، مابغيتش ندي ذنوبك للقبر..

خولة:{تنفسات بعمق كاتفكر}..

"سمحي ليها آخولة شنو دارت كاع"

"اليوم عليك وغدا عليك واللي كبرات تصغار"

"بنادم كايخطئ ، شكون اللي عمرو ظلم"

"المرا الحاملة رجل فالدنيا ورجل فالاخرة ، ليني قلبك

{الله يسامح}

نطقاتها بدون وعي ، وهي كاتجمع شتات افكارها ، مدات ليها يديها فالخوا ، عينيها دمعو وغمضااتهم، وقربات ليها بتردد ، وعنقاااتها وهبطوو دمووعهم بزوووج ..

الأيام غادية جاية ، والحال على حالو ، دازو شهور كثاار ، وصل اليوم المنتظر عندهم ، فكلينيك خاص ، كثر من 4 سوايع وهي تما مابغات تولد ، غير كاتعصر والحريق قاتلها ، وهو فالكولوار كايستنى ويحك لحيته ، خرجات الفرملية وللمرة الالف كايسولها نفس السؤال..

جاهد:واش باقي معطلة !!

الفرملية:الوالدة عندها محلولة ، ولكن ماشي بالحد اللي تقدر تولد بيه..

جاهد:كثر من ربعة دالسوايع ماشي بزاف..

الفرملية: لا اسيدي كاين اللي كاتبقى نهار كامل وكثر ، عليك غير بالصبر..

جاهد: شكرا.

فالبلوك ناعسة على الباياص كاتنهج ، والدموع نازلين من جنب عينيها ، كاتلهث العرق هابط معاها ، بكثرة الالم اللي كاتحس بيه ، وعاضة على فمها كاتعصر ، شوية وروحها تزهق ليها..

خولة:{عضات يديها} يااا ربي ياااا ربي ، صبرك ياااا ربي يااا ربيي اعععع..

غواتها زاد جهاد حتى وصل لمسامع جاهد اللي وجهو مشى منو اللون ، دخلات عندها الطبيبة قلباتها ، لقاتها مستعدة الوالدة ، وفعلا باشرات كاتورك ليها فكرشها ، وهي عينيها محلولين كااتغووت بجهدهااا..

خولة:امييييييييي ااااااااااييي ، اااا ربي اااااربيييييي..

الطبيبة:زيدي زحمي ابنتي زيدي..

خولة:ماقدرتش مااااقدرتش ااااعععع ، ياااااااا ربي الحببيييب يااااا ربي..

الطبيبة:زيييدي زيدي زحمي ، مابقاش مابقاش..

خولة:اعععععععععععع..

زحمة أخيرة خرج البيبي بأكملو ، وهزاتو الممرضة الفوق كاتعطيه شحيطات لمؤخرته ، حتى تسمع صوت غواته فالبلووك..

.

.

.

بعدما تنقات وتنقلات لغرفة خاصة ، وفاقت شوية متكية ، باقي فيها شوية ديال الألم وجهها صفر ، وهو جالس حداها شاد فيديها..

خولة:دازت عليا ، عمري نعاود..

جاهد:{باس يديها} الله يسمح لينا من الوالدين..

خولة:مغايجيبوهش ليا ؟!

جاهد:طبعا غايجيبوه ، ها هي الكونة ديالو شوية ويحطوه حداك ترضعيه..

ياله غاتجاوب دخلات الممرضة هازة فيديها بيبي ملوي فمالطة زرقة ، لمعو عينيها كاتشوف ممصدقاتش انه طرف منها صغيور ، حطاتو ليها وقالت ليها ترضعو يديها كايترعدو شادة يديدتو الصغيورة ، خايفة عليه لا تعطبو ، هبطات قبلاتها وعينيها غرغرو..

جاهد:{كايشوف فيه بلهفة} رضعيه..

خولة:{حركات راسها} اممم..

حلات الصدايف وجبدات بزولتها ، ماعرفات منين تبدا ليه ، قرب ليها هو ، ووراها منين تشد ، وقرباتو لفمو غير بدا كايمص خرجات عينيها..

خولة:ايييي امييييي ،.مااااقدرتش هووووف {كمشات ملامحها مزيرة عليهم وعينيها دمعو من الألم} ا ربييييي الحببيييب احححح..

مراقبها بآسف وهي غير كاتلوا بوحدها بالالم ، معصرة على وجهها حتى ولا حمر ، وعينيها دامعين من كثرة الحريق اللي كاتحس بيه..

أجمل وأروع هندسة في العالم أن تبني جسراً من الأمل على نهر من اليأس.

أيام ، اسابيع ، شهور ، ثم أعوام ، سنين عديدة دازت ، تبدلو فيها عدة أشياء ، على رأسهم خولة ، فين هي الإنسانة الأنانية اللي كاتفكر لنفسها فقط ، فين هي المغرورة بجمالها ، إنسانة اخرى جات بلاصتها "خولة الزوجة" ثم "خولة الأم" ، نضجات اكثر وتعلمات تحمل المسؤولية ، ختفى داك الغرور بعد الأزمة ديال الاكتئاب اللي مرات منها ، رغم ان وجهها رجع اشراقته ، وبسبب الرياضة رجعات لياقتها ، فهاد السنين ولدات بنية ورا "إسماعيل" وسماتها "حسناء" ، اسم على مسمى ، بعيدة كليا عليهم بزوج ، جمالها بوحدها ، و ختارت ليها هاد الاسم الذي لا يليق الا بالجميلات ..

خولة:إسماااعييل !!

إسماعيل:{خرج من البيت} نعام آ ماما..

خولة:{حطات يديها على خسرها} شنو قلت ليك..

إسماعيل:شنو؟

خولة: التمارين..

إسماعيل: واخا واخا غير نسيت..

خولة:فين هي ختك ؟!

إسماعيل؛ كاتلعب فالمونيكة..

خولة:مكااتسمعوووش والو ، حسنااااااء...

{لا رد}

خولة:{معصبة} مكااايسمع ليااااا حد فهاد الداااار والو..

جاهد:{داخل} تهدني شنو كاين..

خولة:دوي مع ولادك ، ماابغاوش يديرو التمارين..

جاهد:كلشي بالخاطر..

حسناء:{خرجات كاتجري} بااابااا..

جاهد:{هزها} زينة البنااات..

حسناء: خوخة مابغاتش دير معايا التمارين..

خولة: خاااوخة ؟؟ قدك انا والداك ولا والداني ..

جاهد:{بتاسم ليها} صافي نقصي شوية ماوقع باااس..

خولة:ها نتا ها هما ضبر معاهم ، انا عييت الشيب الزرق ناض ليا..

جاهد:{جبد ليها نيفها بكل حنان} اشنو قلنا ابنتي..

حسناء:مادرت وااالو آ بابا..

جاهد:عارف بنتي درويشة غير كايظلموها..

تخشات فيه كاتضحك ، وهو كايطبطب عليها ، حطات ليهم خولة لغدا وجلسو ياكلو..

جاهد:ماردااتش عليك ختك والو..

خولة:غير عذبتي راسك ، قول للسيد الله يسهل عليه ، ختي ماشي ديال راسها ، عندها تلاتة دلوليدات الكبير راه صيفطاتو لهولاندا يكمل قرايتو ، ولا طول منها ، عاد ولادها لآخرين ، الحمد الله استثمرات فمشروعها وكبراتو ها هي مبرعة ومبرعة معاها هناء..

جاهد:فيها خير ، مكاتفكرش دير عملية والو ؟

خولة: هناء ولا ؟ ، من ديك المرة اللي مانجحاتش مابغاتش تتحبط مرة أخرى..

جاهد:الخير فما ختاره الله ، علاش مانعاودش تجرب..

خولة:دابا ندوي معاها..

جاهد:اش بان ليك نمشيو الدنمارك !!

خولة:نتساراو ؟

جاهد:نستاقرو تما..

خولة:داوي بصح !

جاهد:طبعا بصح..

خولة:علاش لا مكاين ما حسن من تما..

جاهد: اوا صافي وجدي راسك ، عندك باسبور ديالك وديال الولاد القضية ساهلة..

خولة:{قربات عنقاتو} الله يخليك لينا..

جاهد:{باس راسها بحب} وليا..

حسناء:تانا غانعنقكم ..

خولة:{خربقات ليها شعرها بشقاوة} يخليلي الحنينة ، اجي احبيبي..

{قرب ولدهم حتى هو عنقهم ، عائلة صغيرة مندمجة مع بعضياتها بكل حب ، داز شحال و شحال ، و شحال من واحد غيراتو ليام ، كملو ما تبقى من حياتهم مجموعين ، وكان جاهد هو عموودهم الفقري ، والساااس ديالهم بالتربية الحسنة ، و "جوهر الروح" ديالو زرعو حتى فولااادو ..}

تمت والحمد لله