قصة مشعوذة الملك

من تأليف Victoria Kaelin
2021قصة كاملة

محتوى القصة

 رواية مشعوذة الملك

عدددت من جديييد و هاد المرة برعاية عائلة الفارسي و بطلناا الملك لي هو شخصية جديدة عليكوم غتعرفو عليه كتر داخل أسطر القصة 🤭

حكايتناا من نسج خيالي مع لمسة من واقعناا تتحكي على بطلتناا ابنة الأمير التمثال "بيجاد الإسلام الفارسي" و النصف مشعوذة "هاجر آل سعدان" لي عشتو قصة حبهوم العجيبة ✨...

جايبة ليكوم شخصيتين مختلفتين تماماااا الشرق و الغرب و كلها و همو...

🪔🪔🪔

كبرات مع إعجابها و تأثرها بقصة حب واليديها لي حكاتها ليها امها و كيفاش جدتها الأولى "الباتول" كانت خيط متين بيناتهوم جمعهوم فالمستقبل هادشي لي ولد فيها رغبة و فضوول كبييير تستكشف اصولها القديمة المتعلقة بالمشعوذين حتى تتصدق متعمقة فعالمهوم الغريب ولكن شغيوقع الى جمعها القدر بملك ربط قدرو مع قدرها و ماضيه مع حاضرها؟؟؟...

الخيال، الفنتازيا، الشعوذة، الحب، الرومانسية، التاريخ، التضحية، الطقوس، الكوميديا

في:
👑🕯 مشعوذة الملك 🕯👑
🤴🗿 أمير في عصرنا2 🗿🤴

▪ Victoria Kaelin ▪

🔥ملاحظة مهمة: ماشي بالضرورة تقراو أمير في عصرنا باش تفهمو مشعوذة الملك ولكن بيني و بينكم قراوها 3 أجزاء كي والو🙄

▪▪▪

كانت مليوحة عند رجليه و جلايل ردائها الأسود متناثرين فوق أرضية عرشو..يديها ضاماهوم لعندها بخوف و عويناتها المسحوبين المكحلين مهبطاهوم متيتهزوش فوق من جبروتو الطاغي و هالتو القوية القاتمة تتسناه بجسدها المتوتر يجاوب على الكلام لي قالت ليه و الطلب لي جات على قبلو..دازو دقائق من السكوت بلا ماتسمع لا رد لا جواب هادشي لي خلا قلبها يزيد فخفقانو و خوفها يكبر اكتر حتى حسات بيه قاد جلستو الملكية بعدما كان مسند على يدو غارق فتفكيرو...

.....: و شنو المقابل؟

زادت حدرات راسها تتلعب بأصابعها المتوترة: شنو تقدر وحدة بحالي تعطيه لفخامتك و نتا كنوز الدنيا و حكمتها كلهوم عندك
و للحظة مفاجئة استوعب الأمر استوعب حاجة مهمة بزاااااف ضايرة وسط من كلمات طلبها ليه بالضبط..هز بؤبؤ عينيه الأخضر القاتم فيها و بكل شموخ و جدية لاح ليها المقابل لي بغا و لي تسلل لمسامعها مخليها مصدومة فالأرض و تتبلع فريقها من كلامو....

🕯🕯🕯🕯🕯🕯🕯🕯

فمكان بل فزمن اخر تماما..زمننا الحالي...

فبيت صغير ريحتو خاايبة..حيوطوو ضيقة كولو حيوانات مييتة معلق فروهاا فالسقف..حصاير و هيضورات موسخة فالأرض و فقنييت فيه جالسة امرأة كبيييرة فالعمر شعرها نصو مضفور نصو مشعكك ريحتها خاااايبة باينة مادوشااتش من شحال هادي..كانت جامعة رجليها لعندها و بين يديها تتفرق فالكارطة و تحطها فالأرض حدا كانون طالق بخور ريحتو فشكل..قدامها كانت جالسة بنت شابة ب رداء اسود حريري مطرز بحال السلهام كان شعرها البني الغامق مغطي بقبو و يديها الصغار الرقاق جامعاهوم لعندها تتشوف فالشوافة باهتمام كبير و تتسنا فيها شغتصنع قدام لمعة عينيها القهويين المفتوحين و المسحوبين...

الشوافة هزات فيها عينيها بعدما ستفات ليها الكارطة كاملة قدامها: جاااييياك ابنتي مرررض (هزات وحدة تتوريها ليها) و عندك واااحد مولاتي بنت عمتك ماحاملاكش حيت حسن منها و ناوية ليك الشر..(سدات عينيها و بدات تقلب فيهوم و هي تتردد كلام مامفهومش حتى هزات الورقة الثانية)و ماباغياكش تزوجي حيت نتي زوينة عليها...

البنت ربعات يديها بنفور و جمعات شفتها التحتانية بشكل طفولي مخنزرة: نتي شنو تتخربقي! اشمن مرض ولا بنت عمتي! فين عندي شي بنت عمتي اصلا؟!

الشوافة بدات تبلع فريقها و عينيها على واحد القنييت فالبيت: و و ولكن ه هو قال لي...

البنت تلفتات تتشوف فداك القنييت حتى هي و رجعات شافت فيها:اااه رثوك كنت عارفاك غتجري ليه لسانو داكشي علاش روضتو وخليتو يقول ليك غير لي بغيت انا باش نعرفك واش مشعوذة صحيحة ولا غير تتستحمري فالناس!

الشوافة شافت فيها بخوف: ش شكون نتي؟؟م مايكنش! تتشوفي قرينك؟؟ و من الفوق مروضاه؟!!

البنت ناضت هازة خنافرها لسما بافتخار: انا كوثر آل سعدان و مايشرفنيش نسميك مشعوذة ابداا(عطاتها بالضهر) يالاه ا رثوك (شافت فساعة يديها)قرب بابا يجي من الخدمة

تحل باب البيت بوحدو و تسمعو خطوات غير مرئية خارجين و تبعاتو حتى هي جارة داك السلهام فالأرض بحال شي أميرة من العصر المغربي القديم مخليية الشوافة مخرجة عينيهاا بصدمة بحكم انه القرين عبارة على شيطان مسلط علينا من عند الله تيتزاد معانا و هو لي تيآمرنا بالفحشاء و ينهانا عن المعروف كما انه شكلو مطابق لينا من غير اختلاف واحد لي هو العينين و اسمو هو عكس اسمنا (كوثر/رثوك) فا كيفاش قدرات وحدة بصغر سنها انها تروض قرين؟!!كان الأمر صدمة بالنسبة للشوافة..في حين مشعوذتنا الصغيرة على برا تتسناها سيارة خاصة بشيفورها هي لي جابتها باش ترجع لقصرهوم...
لمحها الشيفور من الزاج يالاه غيخرج يحل ليها الباب كيف العادة حتى تيتحل بوحدو و هي باقة عاد جاية!سو شكون حلو؟!رغم هادشي خرج مستغرب من هاد التصرف لي ديما تيوقع حتى وقف و تأكد انها دخلات جلسات و هو يتخبط الباب مخليه مشوكي..هز عينيه تيشوف فالزاج لقاها تتبسم ليه و هو يجمع الوقفة و دخل يرجعها للدار..حدرات راسها فوق ركابيها كان فكرون(سلحفاة)داخل فقوقعتو و بابتسامة حضناتو: رثوك
الشيفور سمعها: بغيتي شي حاجة ا لالة كوثر؟
كوثر معنقة الفكرون: لا ماشي نتا...

حطات الفكرون حداها و بدات تحييد فالرداء حتى طواتو و خباتو فصاكها..فجأة تسمع صوت تيليفونها تيصوني..جبداتو لقاتها امها...
هاجر: فيينك سربي واش تسطيتي قرب باك يجي من الخدمة!
كوثر: راني فالطريق ا ماما دابا نكونو تما
هاجر تنهدات: ربي يصبرني معااك
قطعات عليها و هي تقلب وجهها تتشوف فالزااج و تتفكر فالنهار لي تبدلات فيه حياتها و تعرفات على إرث الشعوذة لي خلاتو ليها جدتها القديمة...

"فلاش باك"

كانت كوثر ذات الإثنا عشر سنة تتجري فأرجاء القصر و مرة مرة تتلفت ياكما تابعها شي واحد حتى سمعات خطوات جايين لعندها بسرعة تخبات مورا واحد الحيط تماا حتى بان ليها خوها ذو الخامسة عشر سنة دايز من تما...
سالار تيعييط عليها: فيييين حطيتييي كتااابي سربي ولا نقولها للواليد!!
سدات فمها كاتمة انفاسها و ناضت بشوية عليها باغية تسلت منو يالاه خرجات من مورا الحيط و هو يلمحها من بعيد..جراا لعندها بغا يشدها و هي تطلق رجليها للريح تتجري بكل قوتها و جهدها ماباغياش ابدا توريه فين مخبياه(تيعجبها تلعب معاه هاكا)و فنفس الوقت ماراضياش تخسر و تشد فهاد المطاردة لي بالنسبة ليها هي لعبة كاش كاش..بقات تتجري حتى قادوها رجليها للسلالم الأرضية لي تيأديو للقبو الخفي لي بقا كيفما هوو ماتقااصش ابداا فاش عاود بناا بيجاد(الأب ديالها)أنقاض قصر عائلتو الملكية القديم من جديد..سالار غير شافها هابطة لتما بقا واقف عند الدروج ماهبطش حتى تسمعات شي ساقتة تتحل...
سالار عقد حجبانو: خرجي من تما و براكة! غنقولها للواليد سمعتي!
كوثر من حدا باب القبو: الى بغيتي كتابك نردو ليك هي الى هبطتي دابا
سالار بقا تيشوف فالدريجات الهابطين للتحت و تيتفكر فنفس الوقت قداش باباه صارم و متيحملش ابداا يكون داك الإبن الطائش قدامو هو باغي يزيد يحافظ على صورتو قدامو ماشي يخسرها و مغيخليش البرهوشة د ختو تهبطو لعندها..فنفس الوقت كوثر واقفة قدام الباب تتشوف فالساقتة ديالو لي حلات بقات ليها دفيعة و يتحل..ترددات فالأول حيت كانت بوحدها ولكن سرعان ما تفكرات بلي باقي غيكون خوها تيتسنا فيها فالفوق جمعات القوة و دفعات الباب..قربات بكل فضول فاش تحل تيبان ليها غير الظلام فالداخل رغم انه النهاار طالع و الشمس مضوية! بلعات ريقها مدخلة يديها تتقلب على منين تشعل الضو(بحالا كاين اصلا)و هوما يبانو ليها الفوانيس المعلقة شعلو شموعهوم فالبلاصة من تلقاء نفسهوم..هزات عويناتها مندهشة و بشوية عليها دخلات تتستكشف القبو لي كان عبارة على غرفة واسعة حيوطها عبارة على رفوف كتب بحال شي مكتبة و قووة الصناديق القديمة و الاشياء القديمة بحال الزينة و الديكورات كان كلشي مغبر و قديم ماشي ابداا د عصرناا..و بينما الفتاة الصغيرة تتصفح المكان تعكلات فجأة بشي حاجة فالأرض و هي تجي طايحة عليها..طلعات راسها بألم تيبان ليها مكتب بكرسي ديالو..ناضت تتسوس فستانها الثمين من الغبرة و قربات تتفحصو و تدوز يديها على كتبو المغلقة و من بين هاد الكتب كان كتاب فشكل عليهوم من شكلو تيبان مميز عليهوم..كان غلافو مصنوع من الجلد الأسود و فوسطو دائرة محفورين فيها رموز غريبة..وقفات قدامو تتقاد فخصلات شعرها المتناثرة و بيديها الصغيرة هزاتو فجأة! بداو الحروف الغريبة تيلمعو باللون الأخضر و وسط الدائرة تحلات عين خضراء كأنها عين سحلية أو تنين حقيقي..و بصرخة منها طلقاتو حتى طاح فوق البيرو و بعدات تتلتاقط انفاسها مامصدقااش اش شافت ابداا واش غير داباا شافت عين خضرةة و كتااب تيضوي؟؟؟..بلعات ريقهاا بخووف و بدات تطل عليه لقاتو باقي كيفماا هو و بحذر بدات تتقرب منو و تتمعن فالرموز الخضراء الغريبة لي تتلمع..فواحد اللحظة دوك الرموز الغريبة بداو تيتقلبو بشكل مضبب قدام رؤية عينيها حتى بداو يبانو ليها على شكل حروف عربية بسيطة و كانت ترجمتهوم هي "الباتول آل سعدان" رمشات بعويناتها و بدات تحك فيهوم بدهشة فاش قدرات تقرا شنو مكتوب فالغلاف و لي استنتجو عقلها انه هدا اسم و غالبااا غيكون ديال مولات الكتاب بحال كيف تتكتب هي اسمها الكامل فالصفحة الأولى من دفاتر دراستها..للحظة زال خوفها من ديك العين المحلولة و شدات الكتاب بين يديها باغية تحلو و المفاجأة انه وزنو ولا اخف على قبل كأنه خفاف باش تقدر تهزو هي بالضبط و صفحاتو تحلو بسهولة كأنه تعرف عليها و سمح بلمس شخص اخر ليه من غير مالكتو الأصلية..لقات صفحتو الأولى عبارة على كتابة و رموز و دوائر غريبة و رسوم لمخلوقات عجيبة و وسط من استكشافها سمعات حس شي واحد..هزات راسها لقاتها امها...
هاجر داخلة تتفحص المكان: بنتي شنو تديري هنا!!
كوثر جمعات الكتاب و جات تتجري عند مها: مامااا شوفي شنووو لقيت كتاااب سحريي بحاال داكشي د الرسووم المتحركة!
هاجر شدات من عندها الكتاب لي غير لامسوه يديها حتى هي تحلات العين الخضراء لي وسطو: ش ش شنو هادشي!!!
كوثر: ماعرفتش ا ماماا ولكن مكتوب فيه "الباتول آل سعدان" ماعرفتش شكون هادي
هاجر غير سمعات الباتول استغربت: كيفاش؟؟اجي معايا اجي(شداتها فيديها)

كوثر هازة فيها راسها و هي مجرورة: ماماا فين غادية بياا و واش تتعرفي الباتول؟؟
هاجر: اول حاجة غتديريها هي تردي لخوك كتابو قبل مايجي باباك و نحلو هادشي بيناتنا بلا خبارو واخا؟
كوثر: واخا ماما
طلعو مع الدريجات و دازو فالممرات حتى خرجو فقاعة كبيرة الدنيا كلها مديكورية بالديكورات المغربية التقليدية بحال شي رياض ضخم اما المكان عبارة على قصر..الخدامات دايزين من تما هازين افرشة نظيفة يوزعوهوم فالغرف حركو راسهوم لمولات الدار و كملو طريقهوم بابتسامة..اما هاجر و كوثر دخلو لجناح هاد الأخيرة لي كان بحال شي دار مخصصة لبنت فسنها فيها اي حاجة تمناها فداك العمر و تحت واحد نونوس تما على شكل فكرون جبدات كتاب صغير ديال اللغة الفرنسية ملصقة فيه تيكيت مكتوب عليها "سالار الفارسي" مداتو لمها و رجعات خطوات للوراء مرجعة يديها مورا ضهرها و تتحرك فراسها بابتسامة...
كوثر: و دابا غتقولي ليا شكون الباتول؟
هاجر بابتسامة: غنقول ليك ولكن حتى تبغي تنعسي حيت القصة طوييلة (مدات ليها الكتاب العجيب) خبي هدا انا عارفاك تتعرفي تخبي غنمشي نرجع لخوك كتابو مرة خرى ماتبقايش تدخلي لجناحو و تخبي اغراضو عندك واخا؟
كوثر خرجات شفتها التحتانية بشكل طفولي: واخا ماما
هاجر تمات غادية حتى تفكرات واحد الحاجة مهمة: ااه و ماتجبدي لحتى واحد هادشي خصوصا باباك
كوثر باستغراب: علاش؟
هاجر: الليلة غتعرفي علاش
مشات سادة الباب موراها مخلياها تتشوف فالكتاب لي تسدات عينو الخضراء..شوية داز خيال اسود صغير من حداها و هي تقفز معنقة الكتاب تتقلب بعينيها...
كوثر بلعات ريقها: غنكون غير تنتخييل
بينما فقنييت البيت كان مراقبها خيال اسود قصير و هي عاطياه بالضهر..ضارت و هو يختفي تماما..جلسات فوق ناموسييتها و تكات شاعلة التلفزة تتفرج...
النهار داز و الليل طااح لاقي كوثر ففراشها متكية تتسنا ف مها و الكتاب فوق الكوافوزة لي حدا راسها حتى تسمع باب بيتها تحل و دخلات هاجر بابتسامة هازة فيديها مخطوطة ملوية...
كوثر تكعدات فرحانة: و اخيرااا
هاجر جرات كرسي و جلسات حداها: مستعدة نعاود ليك القصة لي قلت ليك؟
كوثر بحماس: اكيييييد ا ماما
هاجر: ولكن قبل من هادشي بغيتك تعرفي انه كاع لي غنقولو وقع بصاح و القصة حقيقية 100%
كوثر حركات ليها راسها بالإيجاب: اكيد ا ماما انا تايقة فيك و عارفاك متتكدبيش عليا
هاجر بتاسمات مرتاحة و بدات فسرد القصة...

~~فسنة 1606 كانو 3 ديال الأمراء مغاربة مترشحين باش يستلمو العرش و من بين هاد الأمراء كان الأصغر فيهوم هو المرشح الأعلى كونو محبووب عند الشعب ببطولاتو و تعاملو الطيب هادشي خلا الأخ الأكبر الحقود يبغي يبعدو من طريقو ولكن بأقل طريقة تلفت الشبوهات فا لجأ ل آل سعدان لي هوما المشعوذين الكبار لي تيخدمو السلالة الملكية ديالهوم و بالضبط مشا عند كبيرتهوم الباتول كانت اقوى مشعوذة من سلالتها فديك الوقت و طلب منها تغبر خوه بشي طريقة سوا بتعاويذها ولا بشي شعوذة منها..ترددات فالأول ولكن هددها و ماقدراتش ترفض الطلب دوزات ايام بلا نعاس تتقلب على هاد الطريقة لي غتهني الأمير الكبير من خوه ولكن فنفس الوقت بلا ماتأدي الأمير الأصغر و لقات انه الحل الوحيد هو يتم تجميدو على شكل تمثال بهاكا غيتوقف تدفق الزمن على حياتو و تحميه حتى يفوتو العصور و يكون فعصر لي مايكونش فيه خوه..استدرجات المشعوذة الأمير و حولاتو لتمثال ولكن قبل ماتحولو علماتو انه حفيدتها حاملة دمائها فالقرن 21 هي مفتاح فك تعويذتو المتحجرة و تحول الأمير الى تمثال..دازو سنوااات و قرووون حتى تكتاشف التمثال من قبل علماء اثار و تحط فمتحف كبير و هنا القدر لي نسجاتو المشعوذة بداو خيوطو تيتلاقاو بحيث حفيدتها الموعودة كانت فالمتحف و وقع تواصل بينها و بين التمثال بطريقة عجيبة حتى ماحسات براسها الا و حاطة يديها عليه فجأة رجع التمثاال أميير و فزمن غير زمنوو القرن 21!
كوثر حالة فيها فمها بدهشة: وااااو ا مامااا هادشييي زوييين بزاااااف و شنو وقع للأمير التمثال فاش تلاقا مع حفيدة المشعوذة؟
هاجر شداتها الضحكة: ههه وقعو طرائف و مواقف مضحكة بيناتهوم حيت كان عصرنا فشكل عليه و لقا صعوبة فالتأقلم ولكن الحفيدة دارت جهدها كولو باش تخليه يولف بينما هو باغي شي طريقة باش يرجع لزمنو و لكن القدر تاني حرك خيوطو و وقع لي مكانش على البال فاش الحفيدة بدات تتسمع صوت امرأة تيدوي فراسها و لي كل مرة تتعاونها و تلمح ليها لشي اشياء خفية فالأخير قابلو الباتول..المشعوذة لي نسجات قدرهوم و ربطاتهوم مع بعض بشكل أبدي!

كوثر باستغراب: و كيفاش هادشي؟ لي فهمتو انه الباتول كانت فقرن بعييد ولكن حنا متنعيشوش كتر من 100عام ماشي بزاف باش تلاقا بيهوم؟؟؟
هاجر: الباتول طبقات تعويذة خطييرة و لي هي تعويذة ختم ختمات نفسها أو بالأحرى روحها فوثيقة ملكية تتثبت ملكية هاد القصر لعائلة الفارسي باش تقول للأمير الحقيقة الى طاح فحب حفيدتها
كوثر بدهشة: كنية بابا هادي و و كنيتي؟!
هاجر: ااه ا بنتي و الأمير الأصغر اسمو بيجاد الإسلام..بيجاد الإسلام الفارسي و الحفيدة النصف مشعوذة اسمها هاجر..هاجر آل سعدان
كوثر حطات يديها على فمها بصدمة: ب ب بابا و م ماما؟؟؟
هاجر: ااه و الباتول تتعتابر جدتي القديمة..جدتنا بجوج و حنا باختصار من سلالتها داكشي علاش يمكن(شافت فالكتاب) كتابها تفاعل معانا بجوج
كوثر بان واحد الحماس فعينيهاا: لي فهمتو ا ماما بلي جداااتي الباتوول هي لي جمعااتك مع باباا ياكي هي لي خلاتكوم مع بعضياتكووم؟؟
هاجر بابتسامة: ااه
كوثر بإعجاب: اوووه حبيتهاااا تمنيت كون قدرت نتلاقا بيها عندي فضول نعرف كيف دايرة
هاجر: باباك تيقول بلي شريفة مراة عمك يونس تتشبه ليها تمامااا فالشكل
كوثر: يعنيي غزااااالة
هاجر ضحكات: حتى نتي غزالة(عنقاتها)يخلي لياا أميرتي و صافي
كوثر معنقاها عاجبها الحال: بغيت حتى انا نتعلم للشعوذة و نحيي إرث الجدة الباتول ا ماما
هاجر جمعات ضحكتها: باباك مغيبغيش ا بنتي تيكره هادشي
كوثر تترجاها بعينيها: مانقدروش نخبيوها عليه يكون هدا سرنا الصغير؟؟
هاجر تنهدات: بنتي انا نصف مشعوذة يعني نفس الحاجة بالنسبة ليك اما الباتول كانت مشعوذة كاملة
كوثر: انا غنعوض داك النصف الآخر بالتعلم ا ماماا عفاااك
هاجر: كوثر بنتي عندك غير 12عام هادشي راه كبير علييك و الكتاب كونما قستيه و كونما حليتي داك القبو عمرو يكتاشفك ولا تكتاشفيه
كوثر هبطات حجبانها بقلق: انا غنبرهن ليك بلي غنكون مشعوذة حقيقية و غنحيي زمن المشعوذيين فالقرن 21 واخاا نكون انا الوحيدة لي عايشة!
هاجر ناضت: تصبحي على خير دابا من بعد و ندويو فهادشي
كوثر لمحات المخطوطة: شنو هاديك بعدا؟
هاجر تلفتات: هادي هي الوثيقة لي تتبين ملكية العائلة الملكية لهاد القصر و لي نفسها ختمات فيها الباتول راسها حتى قالت لينا الحقيقة
كوثر: واخا نشوفها؟
هاجر قربات منها مداتها ليها غير شداتها كوثر و هي تضرب فعقلها كومة من الأحداث العابرة بسرعة بحال شي شريط سنمائي سرييييع و اخر حاجة قدرات تلتاقطها ذاكرتها منهوم هي عيوون رجل خضرااء قااتمة..شهقاات مبعدة لايحة المخطوطة و هاجر قربات منها بتسائل: مالكي؟؟
كوثر: والوو عياانة بغيت نعسس
هاجر: نعسيي داز على عقلك الصغير بزااف اليوم رتاحي
خرجات هاجر من الجناح مخلية كوثر مكمشة فغطاها تتحاول تنساا عيون الرجل المخيفة حتى داها النعاس ماحاساش بشريكها الجديد فالجناح لي تينبش فأغراضها...
فلغد ليه و على طاولة الفطور...
كانو مجموعين العائلة..بيجاد..هاجر..سالار..كوثر..يونس(خو بيجاد د هاد الزمن) و مرتو شريفة النسخة المطابقة فالشكل للباتول...
بيجاد هز عينيه لقا بنتو ساهية: مال أميرتي ساهية؟
كوثر تهزات: و والو غير عيانة شوية
بيجاد شاف فهاجر: ياكما مريضة؟
هاجر بابتسامة: لا غير شوية د العياا
سالار مخنزر فيها: بسيف تعياا و هي ديما تتجري و تخبي فأغراضي
كوثر عقدات حجبانها: تنآمرك تخليني بحالي!
سالار عقد حجبانو: انا لي تنآمرك تعطي تيساع لأغراضي و زايداها ب متترضايش!
بيجاد: هيييه!! انا لي تنآمر هناايا!!!
هاجر حطات يديها على فمها بضحكة: ههه ورثو منك غير الأوامر
يونس و شريفة تيبتاسمو موالفين هاد الجو العائلي بيناتهوم..كملو فطورهوم و خرج بيجاد لخدمتو و مشا معاه سالار يوصلو للمدرسة اما كوثر مامشاتش حيت كان تيبان عليها التعب..رجعات لجناحها لقاتو كولو مروون و حوايجها مجبوديين استغربت مايمكنشش يكون سالار مول الفعلة و انتاقم منها على ود الكتاب ديالو!!فجأة بانو ليها كسيوات تيخرجو من الدريسينغ بوحدهوم مهزوزين فالهوا و هي تصدم راجعة بخطوات للوراء...
كوثر بخوف: ش شكوون تمااا
طل عليها خيال كحل و هي تنقز مخلووعة حاطة يديها على قلبها قرب منهاا كان قدها نيشاان فالطوول...
كوثر سدات عينيها تتعوذ من الشيطاان و حلاتهوم تصحابليها غيمشي ساعة كيفما هو و فلمح البصر تحول الخيال الى فتاة صغيرة بنفس عمرها...
كوثر: ش شكوون نتييي؟؟
الخيال: رثوك..انا قرينك(تحولات لفوطوكوبي د كوثر)
كوثر حلات فمها بدهشة: ت ت تويميتي؟؟؟

رثوك: لا قرينك!
كوثر: ماعرفتش شناهوا القرين تاني ولكن حاسة بحالا تنعرفك و مامشكلاش عليا حتى خطر
رثوك: حيت انا قرينك انا معاك من ولادتك
كوثر: و علاش عاد بنتي ليا؟
رثوك: نتي نصف مشعوذة لي عاد فعلات هادشي فاش تواصلتي مع كتاب جدتك و المخطوطة..القرين هو خادم المشعوذ و انا خادمك
كوثر: ولكن عندنا بزاف د الخدم فالقصر ماكاين لاش
رثوك: هادو هوما القوانين خصني نخدمك فتعاويذك و شعوذتك
كوثر: عيواض تكون خادمي(بتاسمات)بغيتك تكون صديقي
رثوك: لي بغيتي
كوثر: و داباا قول ليااا كيفاش غنتعلم و نكوون مشعوذة حقيقية بحال جدتي الباتول!...
رثوك: اول حاجة كتاب تعاويذها ولا ديالك دابا و غتستعملي تعاويذها الأولية اما الصعبة فمتقدريش عليهوم ابدا و القبو عامر بكتبها العادية لي كتبات فيهوم على الشعوذة غتاخدي معلومات عليهوم من تما...
كوثر لمعو عينيها و متحمسة بزااف لفكرة تعلم الشعوذة: ولكن كيفاش غنخبيك على بابا و ماما؟اكيد هوما ماولدوش توأم بحالي!
رثوك شاف فالأرض لمح نونوسها لي كان على شكل فكرون و هو يتحول لفكرون حقيقي...
كوثر بتاسمات: اوووه فكرة ذكيييية!!...
"نهاية الفلاشباك"
حل ليها الشيفور الباب و هبطات هازة صاكها و فكرونها فوق كتفها حتى عبرات من البوابة الكبيرة قدام الحراس و دخلات من البوابة الداخلية..لقات هاجر واقفة تتسنا فيهااا و تغمززز بلي باها كاين فالداار..دخلات كوثر و تبعاتها هاجر كان بيجاد جالس فوق الفوتوي تيقرا فالجورنال و حداه سالار جالس هاز تيليفونو تيتفقد إيمايلات خاصة بالعمل..وقفات عليهوم الخدامة و قالت ليهوم بلي الغدا واجد و انساحبات..ناضو بجوج حتى دخلو لقاعة الأكل الكبيرة لقاو هاجر و كوثر جالسين تما..جر بيجاد كرسيه لي مترأس الطاولة و جلس..و سالار جلس حدا مو و مقابل مع كوثر...
بيجاد شاف فيها بنص عين: فين كنتي؟
كوثر: والوو غيير خرجت نشم الهوا شوية
بيجاد: جردة القصر تيجريو فيهاا الخيول ماشي غير غتشمي فيها الهوا!
كوثر بلعات ريقها: دير ليا خاطري ا بابا
هاجر: احمم الماكلة غتبرد
سالار غير تيشوف فيها بنص عين...
بيجاد ضار لعندها تاني: و شحال من مرة قلت ليك هاد الفكرون مايتحطش فوق الطبلة! و من الفوق حاطة ليه خس و مزاحمنا فالطبلة! شحال من مرة خصني نقول ليك بلي نتي أميررة و الأميراات متيديروش من فكرون حيواان أليف!!(شاف فطبسيلو)تتفكريني غير فالمشعوذات بهاد الفعايل
هاجر: هيهيهي شتتقول ا بيجاد شحال بقيتي عليا مشعوذة ما مشعوذة دابا دزتي لبنتك
بيجاد شاف فيها: تتبقاو جذر الباتول لي مافيها ثقة
سالار: شفت عمي يونس و خالتي شريفة ماهبطوش يتغداو معانا؟
هاجر: لا راه سافرو مع ديك ال10 يديهاا تشوف عائلتها
بيجاد: حسن نيت يتهناو عينيا من ديك الباتول النمرة 21(زعمة ديال القرن 21)
هاجر حدرات عينيها فطبسيلها ماعارفش بلي والد بااتول نمرة 36 كاع ماخلات شوافات ماخلات فقهة...
كوثر: ماماا حكاا فين غندير عيد ميلادي هاد العام
بيجاد:واش ضروري تاني؟! من امتى كان شي عيد ميلاد تيحتافلو بيه الأمراء القدام!!
كوثر: وا باباا عفاااك راه غير حفلة
سالار: عمرك غتكبري بقاي ديما هكاك
كوثر: وا عندي غير 19عاام
سالار: 20عام قولي لي غتكمليها هاد ليامات
هاجر بابتسامة: تبارك الله الوقت دغيا دااز و وليداتو كبرو
بيجاد: مهم حفلة ولا عيد ميلاد مانشوف حتى دري من لي تيقراو معاك تيضورو ليا هنا سمعتي!
كوثر خرجات عينيها بدهشة: ا اصلا من امتى و انا تندوي معاهوم اصلا علاه يقدروو و نتا بابا و هدا خويا!
هاجر: غنقاد لبنتي حفلة زوينة كيف بغاتها
كوثر بتاسمات: شكرا ماما فرحتيني

و بينماا هاد العائلة تتغذااا فهاد الجوو العائلي كانوو مراقبين تحت انظاار ثاقبة طوول الوقت لي تتشوفهوم من وراااء بلورة سحرية..عيون خضرااء قاتمة و اصابع فوق قلادة حمرااء تتسناا فاللحظة المناااسبة و اليووم الموعود...


داز النهار عادي كل واحد فمشاغلو حتى وصل وقت العشاء..تعشاو العائلة مجموعين و كل واحد ناض لجناحو ينعس...
فجناح كوثر كانت هاد الأخيرة تتجمع فشي قشاوش و تخشي فالحقيبة الجلدية الخاصة ديالها بهاد النوع د المسائل(الشعوذة) حتى تحول الفكرون ديالها لشكلها لي هو شكل القرين نفسو...
كوثر طلعات فيه راسها: جيب ليا معاك زيت عرقسوس(المسواك)
رثوك اختفى مثل البخار و ولا فالقبو لي كان عامر بأدوات و مواد الشعوذة..جاب طلبها و رجع لعندها...
كوثر شدات من عندو القريعة و خشاتها فالصاك: مزيااان دابا مستاعدين
رثوك: ااه طليت على مالين الدار قبل كلشي فجناحو
كوثر قادات ردائها الأسود و لاحت قبو على راسها: صافي مزياان غنسلتو كيف العادة
رثوك: الحراس راه نعسو حتى هوما فاش كلاو عشاهوم
كوثر: ااه دار المنوم لي قاديتو خدمتو زيد مانضييعوش الوقت
خرجات كوثر من الجناح تتضور و تلفت بداك الرداء الأسود فأرجاء القصر معنقة حقيبتها د الكتف و رثوك ولا فكرون تاني لاصق فوق راسها..خرجو من البوابة بكل أمان و كملو طريقهوم خارجين من أسوار القصر كان القصر فمنطقة معزولة على المدينة الارض رملية شوية و الربيع قليل هنا...
كوثر تتلفت: رثوك تحول لحصان
رثوك تبدل من فكرون الى حصان و ركبات عليه بخفة كونها متعلمة من باها لي عندو شركة خاصة بالأحصنة و انطلقو من تماا بخطواات كااتمة للصوت بفعل تعويذة منهاا...
بعد مدة من الوقت وقف رثوك قدام المكان و هبطات تتشوف هنا و لهيه مهبطة القب على وجهها..تحول رثوك لفكرون تاني و دخلو للمكان لي اتضح انه مقبرة..بقات كوثر تتمشا و تشوف بعينيها حتى بانو ليها جوج عيالات محنيين على واحد القبر جابدين يد الجثة و تيقطعو فضفار الميت و يخبيوهوم..عقدات حجبانها و وقفات عليهوم غير شافوها تصدمو ماعرفو باش تبلاو...
المرأة1: ياك خلصتي العساس مايصدعنا حد
المرأة2 ناضت لكوثر: شكون نتي؟؟!!
كوثر: شنو غاديرو بضفار الميت؟؟
المرأة1: ماشي شغلك و دخلي سوق راسك
المرأة2: غبري يالاه غبري البراهش لي خاصينا هنا
كوثر شدات طرف من ردائها جراتو حتى عرات على الحقيبة لي كانت عند فخدها معلقة من الكتف...
كوثر: حطو داكشي انا عارفاكوم باغيين تسحرو لشي واحد يا تسطيوه يا تقتلوه بهاد الضفار
المرأة1 يالاه بغات تلاح عليها و هي تحس بشي حاجة غير مرئية جراتها حتى تكركبات فالتراب..فرقعات كوثر صباعها تتردد فكلمات غريبة بالهمس حتى بدات المرأة2 تتهز من الأرض و ولات معلقة فالهوا...
المرأة2مخرجة عينيها بخوف: هبطييينييي شنووو هادشيييي
كوثر حركات اصبعها و هي تهز الميكة الصغيرة و مقص الضفار حتى هو فالهوا جاراهوم لعندها حتى شداتهوم..تحنات فالأرض و خرجات واحد وعاء حديدي صغير من صاكها حطاتو فالأرض..لاحت فيه داكشي و بدات تتزيد عليه مكونات من حقيبتها حتى شعلات العافية فيهوم و تبخرو الضفار مع المقص..طلعات راسها فالمرأة المعلقة لي غتموت بالخوف و لمحات بعينيها لي ممرمدة فالأرض ماقاداش تنوض...
كوثر: شنو غندير فيكوم دابا؟ بغيتو يوقع ليكوم لي كنتو باغيين ديروه بهاد الضفار؟
نفااو الأمر بقووة....
كوثر: كنت عارفة باغيين تديرو بيهوم غير الخايب باغيين الخايب لبنادم و نتوما زعمة لا؟ اينا شوافة عند من مشيتو؟
المرأة1: السبتيية لي فحي القروي
كوثر: رثوك ضرب عندها طليلة كاع
رثوك تبخر و اختفى من تما...
كوثر هبطات لي معلقة و جرات لي ممرمدة حتى توكضو قدامها: غادي تردو هاد القبر كيفما هو بينما فكرت شنو ندير ليكوم
تحدرو بالخوف تيرجعو التراب لبلاصتو خايفين منها مابقاو عارفينها واش من الجن ولا الإنس و هي عاطياهوم بالضهر تتفكر حتى جبدات وعاء صغير خشبي من حقيبتها خلطات فيه شوية د الحنة غبرة مع مكونات خرى غير بالخف و ضارت لعندهوم لقاتهوم تيفينيو القبر بيديهوم...
كوثر قربات منهوم فغفلة منهوم حتى هزات بجوج صباع من تخليطة الحنة و طلات سطر فجبهة كل وحدة فيهوم سخفو ليها فالبلاصة...
كوثر: و دابا غتنساو شي سحور لبقية حياتكوم
رثوك رجع: كلشي هو هاداك
كوثر: خلعتيها مزيان؟
رثوك: حتى قربات تسطا
كوثر شافت فالعيالات السخفانات و بعدات من تما ضاربة بسلهامها: مشعوذاات مزوراات قرين و تيخلعهوم! تنظن عمرني غنلقا شي مشعوذة حقيقية بحالي و بحال جدتي الباتول مهم خصنا نديرو داكشي لي جينا على قبلو و نرجعو للقصر
جبدات زيت عرقسوس و بدات تقطرها فوق حدود سور المقبرة و ترش فالملحة المدقوقة على يديها حتى سالات السور كامل و خرجات من تما...
كوثر: و دابا اي طاقة سلبية مغتقدرش تعتب حتى هاد المقبرة...

فلغد ليه...
فاقت كوثر من النعاس وجدات راسها و هبطات تفطر مع العائلة...
هاجر: واش ماشبعتيش نعاس؟
كوثر تتفوه: غير شوية د العيا قووة الحفاضة(اه د التشعويذ)
بيجاد: رخفي على راسك شوية صحتك اهم
كوثر تضور فعينيها: غنحاول
سالار: سبحان الله تتعيا غير بالحفاضة
كوثر: مافيا مايدوي معاك
بيجاد: جمعو و طويو نتوما دايرين ليا كي المش و الفار هنا!
سالار سكت تيكمل فطورو و كوثر ساهية فطبسيلها تتفكر فالمقبرة الموالية لي بغات تحصنا الليلة من القوى الشيطانية و الطاقات السلبية...
هاجر لاحظات سهوها: بنتي كولي ليك مابقيتيش تتاكلي مزيان
بيجاد: بعدا فين داك الفكرون ديالك؟
كوثر: ا ااه رثوك فالبيت
بيجاد بملامح د لا حول: دابا حتى رثوك سمية!؟ (شاف فهاجر) ولكن ها لمن طلعتي تزوجت بحمقة و ولدات ليا حمقة خرى
هاجر: ههه يااك ا مولاي السلطان انا دابا وليت حمقة شرفتي و هترتي
بيجاد مسح فمو بالسريبتة: تنآمرك تردي ليها لبال كتر ماعاجبانيش هاد ليامات
سالار دار نفس الشيء و ناض باس راس مو: نتلاقاو فالغداء ان شاء الله
هاجر حركات ليه راسها و ناضت توصلهوم لعند الباب..سبق سالار للطونوبيل و بقا بيجاد عند الباب حتى باس يدين هاجر بجوج: هاجر بنتنا بيها شي حاجة انا حاس بهادشي
هاجر بابتسامة: ماتخافش عليها كوثر متتخبي عليا حتى حاجة غتكون غير مستريسية مع امتحاناتها
بيجاد حط صبعو تحت ذقنها و طلع ليها راسها بشوية: واخا طهلاي فراسك حتال الغداء ان شاء الله و نتشاوفو
عطاتو ابتسامة اطمئنان و ودعاتو بتعنيقة غير سدات الباب موراه و هي ترجع لعند كوثر...
هاجر جرات الكرسي قدامها: كوثر واش حماقيتي! من التشعويذ للسهير!!؟ باباك بدا يشك و فاش بداا يشك كوني متيقنة قرب يكتاشف فعايلك و ديك الساعة غيخلطنا انا ويااك!
كوثر: علاش ا ماماا ياك هو تعرف عليك بفضل هاد الشعوذة؟ و نتي نصف مشعوذة فالأصل؟!
هاجر: انا نصف مشعوذة بالوراثة فقط عمرني قست ولا قربت لشي شعوذة! كاين فرق كبيير بين ورااثة و بين ممارسة!
كوثر: ولكن ا ماماا اناا مشعوذة خيير تندير الخيير و تنسخر شعوذتي فحمااية الأمواات و كشف وجوه المشعوذات المزييفات(ناضت شدات فيديها)بغيت الدعم ديالك انا محتاجااه ماتخلايش عليا من بعد هاد السنين كاملة
هاجر: راه باباك مامعاهش اللعب عرفتي شنو هي يكتاشف بنتو لي رباها و كبرها على تربية الأمراء تخرج ليه عوجة و تشعوذ هنا و لهيه! حتى من ستييلك تبدل فين دوك الكسيواات و الشعر المسرح كيف كنتي؟! انغامستي فهاد العالم بزااف
كوثر: ماما عفاااك هدا راه أصلي بل اصولنا!
هاجر: مابقاااش فاش تزوجت بباك! باباك كان أمير فزمانو أمير فواحد الزمن لي كانو فيه المشعوذين عبيييد عند العائلات الملكية و خدمهوم المطيعين(شدات راسها) اول حاجة غيشوفها فيك هي انك عبدة! لا لا نتي باغية تسكتي ليه القلب
كوثر: اشمن عبدة ا ماماا هاداك زمن و فاااات انا مشعوذة القرن 21 المشعوذة الوحييدة لي بقاات تتمارس الشعوذة بجميع حذافرهاا و طقوسها الأصلية ضييعت سنوات من حيااتي باش نتعلم و نتقن هادشيي حتى محييت حاجة سميتهاا نصف مشعوذة و وليت مشعوذة كااملة و عووضت داك النصف المفقود بتمرسيي كاان دعمك لياا زايد بياا للقداام علاش غتخلاي عليا دابا؟؟!! الى خايفة لهاد الدرجة من بابا نهار يكتاشف شنو تندير و شنوو هي حقيقة بنتو مغنجبدش سميتك اصلا اناا ماشي نكاارة الخيير عييد ميلادي قرييب و تنسمع فبحال هاد الهضرة(عطاتها بالضهر)نتي طلبتي المستحيل حيت وليناا اناا و هاد الشعوذة كياان واااحد و رثووك سلسلة متينة زادت ربطااتني بهاد العالم حيت خادمي و الحل الوحيد الى بغيتينيي نبعد من هادشيي هيي تقتلوووني باش تقتلوو رثوك!!!
هاجر ناضت بصدمة: كووثر!! تهدني!!!شنو هاد المواصل كاملييين!!
كوثر تترعد عليها: مغتفرقينيش على هاادشي سمعتييي يا تدعميني كيف ديماا في صمت ياا تخرجي من اللعبة فهدووء و باباا خليني منيي ليه!
هاجر: سمعيني!
كوثر: غنمشي نعس مانعستش مزياان
خلاتها و مشات لجناحها لقات رثوك جالس فوق الناموسية على هيئتو الحقيقية...
كوثر غير شافتو غرغرو عينيها: ماماا لي كانت عندي مابقاتش تتفهمني!
رثوك ناض لعندها عنقها: ماتخافيش الموت بوحدها لي غتفرقنا انا وياك و حتى واحد فيهوم ماقادرش يفرقنا(شاف قدامو و قال فخاطرو "من غيرو هو")...

اما هاجر كانت فالتحت تتفكر فهاد الموصيبة و بنتها لي ولات مبلية بهادشيي عمرها دوات معاها بهاد الطريقة هادشي خطير و الى مشا حتى كتاشفو بيجاد غتنوض القربالة..تنهدات نايضة تخلي الخادمات يجمعو الطبلة و مشات للجردة تشم شوية د الهواا...

داز النهار بشكل عادي كوثر نعسات فحضن رثوك حتى فييقها فاش وصلات وقيتة الغدا هبطات تغدات معاهوم و رجعات سادة عليها فجناحها...
كوثر: خصنا نظمو القبو و نقيوه وليت ماقادراش نمارس فيه طقوسي بخاطري من كترة الروينة
رثوك: واخا
جمعات شعرها الفوق و خرجات و هو تابعها فالممرات بشكل خفي حتى هبطو للقبو و دخلات سادة عليها...
كوثر كمشات تعابير وجهها: تزادت الغبرة هنا ماكرهتش كون زدنا شي شرجم باش تهواا
رثوك واقف حداها: الى مشا حتى هبط باباك لهنا ماشي غادي يدير ليك شرجم غادي يهدمو علينا
كوثر ربعات يديها: ماكرهتش نجيب خدامة تجمع هادشي ولكن حتال القبو متنحملش لي يدخل ليه من غيرنا
رثوك: انا غنعاونك عارفاك متتعرفيش تنظفي
كوثر قربات اول حاجة من البيرو لي كان عامر بالكتب و المخطوطات الملوية و الحبر و اقلام الريش: متنعرفش نظف حيت ماتعلمتش هادشي كأميرة ولكن كمشعوذة(حركات يديها حتى تهز كاع داكشي لي فوق البيرو فالهوا)قادرة ندير شحال من حاجة
رثوك: انا غنرتب الكتب على حسب تسلسلهوم و مواضيعهوم
كوثر: و عزل معاك د السحر الاسود فرف خاص مابغيتش يتخالطو مع لخرين
تحرك رثوك و هي بدات تتمسح البيرو..حركات اصابعها و تنظم كاع داكشي فوقو و قادات الكرسي..مشات لواحد الصندوق فالأرض حلاتو كان عامر بالحوايج القدام...
رثوك ضار لعندها: هادو حوايج جداك الباتول
كوثر جبدات فساتين المشعوذات القدام بعينيها لي تيلمعو و بدات تحطهوم فوق جسمها: غيجيو قدي يااك؟
رثوك: غتلبسي بحال هادشي؟و بالخصوص قدام باباك؟(طلعها و هبطها)راك بحالا تتقولي ليه شووفنيي انا مشعوذة بهاد اللباس ماتنسايش بلي فزمانو كانو تيلبسو هادشي
كوثر تنهدات: واش ديما باااباا بااباا انا عجبوني غنعطي للخدامة تديرهوم فالغسالة و نحتافظ بيهوم
حطاتهوم على جنب و مشات للصناديق الصغيرة لي كانت عامرة بالمجوهرات و الحلي ها النقرة ها اللوباان ها الاحجار الكريمة كان كلشي تيخص الباتول فأياماتها فاش كانت عايشة و هدا قبوها لي كانت تتمارس فيه طقوسها فالقصر الملكي..بقات كوثر غير تتقييس و تشوف و تجمع كلشي حمقهاا جمعات داكشي فصندوق كبير و هزاتو فالهواا حتى ترجع لجناحها و تديه معاها..و بينما رثوك تيستف فكتب السحر الأسود لمح كتاب خااص بالأرواح...
رثوك:شوفي هدا كتاب تيدوي على الأرواح
كوثر محنية تتبقشش فالصنادق: حاولنا شحال من مرة نستحضرو روح ولكن ماصدقاتش معانا تنظن مزال ماوصلت لداك المستوى
رثوك هز حاجبو: كنتي تتحاولي تستحضري روك الباتول! روح مشعوذة قوية! ماشي روح عادية داكشي علاش ماصدقاتش
كوثر: ايوا شغنحضر مزال؟ماعندي حتى اهتمام بالأرواح من غير تحصين المقابر يكفي انني وليت تنشوفهوم بعينيا
رثوك: التواصل مع الأرواح عادي فاش تم فتح عينك المجردة فاش كنتي صغيرة باش تولي تشوفيني و اكيد غتشوفي حتى كائنات خرى غير مرئية بحال الأرواح و الجن و الطاقات السلبية...
كوثر: بصراحة عالم الأرواح مثير للإهتمام كيفاش البشر كانو على شكل ارواح من قبل فعالم الأرواح و تبثو فأجساد آدمية مادية
رثوك مد ليها الكتاب: شوفيه بعدا ماتعرفي نلقاو فيه كيفاش ختمات الباتول روحها فوثيقة القصر الملكية
مدات كوثر ليه يديها حتى شدات الكتاب لي غير قاسوه اصابعها ضرب بحال الضو فراسها و سدات عينيها بألم و فذاكرتهااا تتشوف غير العيون الخضراء القاتمة لي اخر مرة شافتهوم فاش لامسات الوثيقة الملكية فصغرها...
رثوك شدها من كتافها و حييد ليها الكتاب: كووثر كوووثر
كوثر طلعات فيه راسها بتعب: ماعرفتش علاش حاسة براسي هاد ليامات فشكل(حطات راسها على كتفو) الشعوذة تتزيد تستنزف جسدي بقوة الطقوس و التعاويذ
رثوك: خصك ترتاحي ماشي بالضرورة هادشي يكون بشكل يومي اصلا!
كوثر هزات فيه عينيها العيانين: ماشي لخاطري وصلت لمرحلة الإدمان على هادشي
رثوك: هاد الحالة ماشي طبيعية كلنا عارفين انه قوة الشعوذة لي تتحكم فمالكها ماشي العكس ولكن نتي بإرادتك القوية وصلتي لهنا
كوثر: بغيت نرتاح الليلة حصن مقبرة هاد الليلة على قبلي
رثوك: واخا...

كمل رثوك جميع القبو حتى ولا نقي و تحييدات منو ديك الغبرة و قووة الاشياء لي غير مرتبة ترتبات..رجع هو و كوثر لجناحها و داز النهار عادي...
فالليل..قبل العشاء كانت كوثر جالسة فالبيرو ديالها خدامة قدام البيسي لي ضارب الضو ديالو فنضاضرها الخاصين بحماية عينيها من أشعتو..حداها دفتر و ستيلو تتقاد شي تمارين باغية هاد الليلة لي ترتاح فيها تديها شوية فقرايتها و تحس براسها ولو غير للحظة انها بنت عادية غنية عايشة فقصر و تتقرا فأحسن جامعة فالمغرب..بقات تطقطق فالكلافيي و تكتب حتال واحد اللحظة ضرها راسها..ناضت لدريسينغ و حلات خزانة صغيرة فيه عامرة بقراعي د الأعشاب..هزات وحدة مكتوب فيها "شاي تهدئة الأعصاب" و هبطات لمطبخ القصر تقادو ليها ف فنجان..دخلات لتما لقات الخدامات و الطباخين منغمسين فخدمتهوم و تيكملو فتحضيرات العشاء..سلمو معاها بتحريك راسهوم مبتسمين عزيزة عليهوم بتواضعها كيفما عزاز عليهوم مالين الدار كاملين بالتعامل المزيان ليهوم ماشي بحال شي عائلات غنية تيعاملو الخدم بحال العبيد..جرات لعندها خادمة تتسولها شنو حب خاطرها..طلبات منها الما السخون و مشات سخناتو ليها فالإبريق لي تيسخن الما بالضو..جابت ليها فنجانها المفضل و الما و قادات الشاي ديالها..شكرات الخادمة و رجعات لجناحها تتنفخ فالشاي و تحتاسي منو شوية حتى جلسات فالبيرو و حطاتو على جنب...
كوثر شادة راسها: تنتمنى يخف هاد الصداع
بقات خدامة فالبيسي و تحتاسي فالشاي مرة مرة حتى كملاتو..واحد اللحظة داها النعاس فوق البيرو غاطسة فنووم عمييييق لي فتح بااب الأحلااام و الرؤى...
حلات كوثر عينيها فقصر كبييير قصر ماشي بحال قصرهوم ابداا..هالة قوووية محيطة بييه هالة غير عادية ابدااا..بقات تتستكشف ممراتو حيوطوو العامرين باللوحات الفنية لعدة وجوه بملابس ملكيية و لي تيزيد يبيين هادشي نفس التاج محطوط على ريوسهوم كاملين..بقات غادية بخطواتها المسموعة حتى قادوها الى قاعة واااسعة..ضورات عينيها فالمكان الكبيير تتلمح كرسي العرش و فنافذة طويييلة حداه كان واقف رجل طويييل عاطي بضهرو و جامع يديه موراه..بدات تتقرب بحذر منو و رجليها ثقالين عليها تتزيد تقرب و تقوول واش وصلات ليه مدات يديها باغية تزيد من جهدها و تقاوم عجزها من الإقترااب و هو بعيد عليهاا و تتحااول تعييط باش يضور لعندها على الأقل و تشوف وجهوو سرعان ما ضار لعندها بنص عين ب بؤبؤها الأخضر القاتم جمعات يديها لعندها بخوف و هي تفيق شاهقة بقوووة و صدرها تيطلع و ينزل..بلعات ريقها تضور عينيها فالمكان كان جناحها و باقي البيسي مشعول قدامها...
رثوك لي كان جالس فوق الناموسية: راني حصنت المقبرة لقيتك ناعسة مابغيتش نصدعك و حتى ماماك كانت هنا مافييقاتكش باش تعشاي ولكن جابت ليك حقك
كوثر ناضت بجسمها المرتعش متتفكر فحتى عشا هاد الساعة و قربات من رثوك: رثووووك واش عمرك شفتي شي واحد عينيه خضريين وااحد الخضر غاااامق واحد اللووون قااااتم بالغموووض(شدات راسها)هادي ثااالث مرة نشوفهووم
رثوك هرب عينيه منها: لا عمرني ياكما وقعتي فحب شي واحد؟
كوثر جلسات حداه: اويلي اشمن حب! هدا راه تيخلع قالك حب
رثوك: راني قرينك زعمة و عارفة نوعك المفضل من الرجال
كوثر ربعات يديها مخرجة شفتها التحتانية بشكل طفولي: والاااا ماعجبونيش عينيه
رثوك: سالار عندو الحق متترضايش
كوثر: وا صافي دير ليا بلاصة نعس
رثوك حط يد على يد: الناموسية قدها قداش
كوثر حييدات دوك النضاضر و تكات: مافيا ماياكل..بفف بعد غدا عيد ميلادي!
رثوك: قصدك عيد ميلادنا بجوج
كوثر: ااااه عندك الحق خصني شي كادو ليك
رثوك: الى شي سلسلة ولا كسوة ولا مانعرف تاني راني قرين ماشي صاحبتك!
كوثر عقدات حجبانها: و شنو بغيتي كهدية؟
رثوك: هديتي جاياني بشكل طبيعي
كوثر باستغراب: كيفاش اش تتقصد؟
رثوك: والو خصك تنعسي ايوا قابليني انا لي متنعسش
كوثر: وليتي تتخبي عليا؟
رثوك: ماشي قضية تنخبي فالأخير تنبقا الخادم المطيع
كوثر: ااه و خادمي انا
رثوك: تصبحي على خير
اختفى رثوك قدام عينيها مخليها مستغربة مالوو هدا و شنو سر هاد الهدية ديالو!..غطات راسها و تكمشات ففراشها تتفكر فهاد مول العينين الخضرين لي من صغرها تابعها و دابا حتى فشبابها خصها تعرف بأي طريقة شكون هو ولكن المشكلة الكبيرة كيفاش؟حتى من وجهو ماشايفاهش كامل بقا غير تعرف اسمو..تقادات فالنعسة حتى غطسات فنوم عميق بكترة التفكير...

صبااح جديد عند عائلة الفارسي لي صبحو على تحضيرات هاجر لعيد ميلاد أميرتها الوحيدة..فقاعة واسعة من قاعات القصر كانو الخدم خدامين فالزينة و الترتيب لهاد الحفلة المهمة بالنسبة للأم و الإبنة اما الأب و الإبن مامسوقينش ابدا..اما العائلة فكانو على طاولة الفطور تيفطرو...
بيجاد: على من عرضتي مزال؟
كوثر تتنقب بالفورشيط: ماعرضت على حتى واحد اصلا ماعنديش صحابات لي نعرض عليهوم
هاجر: و وجدان ماشي صاحبتك؟!
كوثر هزات فيها راسها مخرجة عينيها: ديك السحاارة المتكبببرة!انا؟و هي؟صحابات؟!!علاش عرضتيها؟
بيجاد تنهد: اشمن سحارة تاني؟
هاجر شافت بنص عين فسالار لي حداها: سالار عرض عليها
كوثر عقدات حجبانها و صوبات انضارها على سالار هازة عليه صبعها: عييد ميلااادي هدااا اش دااك تعرض على ديك السحاارة حتى يكون ديالك و عرض نتا على المسرح كولوو ولا داك الفندق فين عايشة!!
سالار عقد حجبانو ماسك اعصابو قدام باه: الواليدة لي بغات هادشي انا لبيت غير الدعوة!
بيجاد ناض معصب: كوثررر الفااارسييي تنآاامرك تهبطيي داك الصببع و تردي البااال لأسلووبك فالكلاام لي لا علاقة بالأميرات!!!
هاجر تنهدات ب لا حول هاهوما غيقلبو الطبلة عاوتاني و كوثر تكمشات حادرة راسها ففطورها...
مشا بيجاد مخنزر و يالاه غتبعو هاجر توصلو لعند الباب و هو يوقفها بيديه: غير جلسي تيباان ليااا خصها تعااود حصص الآدااب الملكي من أول و جديد!
جلسات هاجر شادة حنكها و سالار ناض تبعو...
هاجر شافت فيها و تنهدات: الوضع بدا تيخرج على السيطرة معاك مابقيتي تتشدي راسك حتى قدام باك!
كوثر يديها تيترعدو و الدموع بداو تيتكونو فعينيها: خ خليونيي نتوما متتفهمونيش حتى واحد مابغاني فيكوم كيفماا اناا بغييت نتي خايفة من بابا و غير مسايراني و هو بغااني نكون ديك الأميرة لي كانت غتكون فزمانوو فهاد الزمن لي مابقاش فيه أمير اصلا! سالار متيحملنييش و بلعااني جايب لياا المسمومة د صااحبتتووو باش يفقصني حيت متنحملهاااش!!(ناضت)حتى من رثوك لي هو قريني و انعكاسي حاساه مخبي عليا شي حاجة(تضور عينيها فالمكان بارتباك)وليت هازة الهم للعيشة معاكوم فهاد القصر
هاجر بدهشة: كوثر! شهادشي تتقولي!!؟
كوثر: هدا غيكون اخر عيد ميلاد ليااا مابغيت حتى حاجة مزال
ناضت من الطبلة و مشات لجناحها مخلية هاجر تتعيط عليها و والووو البنت مالهاا تبدلاات و ولات هكا مؤخراا شهاد الهالة الكئيبة لي ولات محيطة بها!؟واش بسبب الشعوذة لي نغامسات فيها لهاد الدرجة؟ولا يكون شي واحد فحياتها مرون ليها نفسيتها بلا خبار حتى واحد؟...
اما كوثر دخلات لجناحها و تلاحت فوق ناموسييتها تتبكي شحال هادي مابكات هاكا من فاش كانت صغيرة كونها كانت ديما خالقة السعادة بالشعوذة و كل نهار تتزيد تعلم حاجة جديدة و مشوقة فيها دابا فاش تعلمات لي بغات تعلمو بدات تتحس بشنو فائدة هادشي الى هي الوحيدة لي متمكنة منو و كلشي مزووور و غير تيضحكو على الناس بتاشوافت..تفكرات الساحرة وجدان و هي تعقد حجبانها هوما فنفس العمر و لكن وحدة متتحملش لوخرا بسبب الغريزة لي كاينة فكل وحدة فيهوم كون ان المشعوذين منذ الأزل متيتحاملوش مع السحرة فالأصل و السبب انه كل واحد فيهوم تيشوف لاخور هو لي خايب..من المعروف فهاد العالم الخيالي انه المشعوذين شعوذتهوم مبازية على السحر الأسود و تاقنينو بجميع حذافرو أبا عن جد اما السحرة فهاد السحر محرم عندهوم تماماااا و اي واحد تيمارسو تيكون مصيرو المووت حيت تيشكل خطر كبير على مجتمعهم زيادة على هادشي شخصيات كوثر و وجدان مختلفين و كل وحدة و طريقة عيشها كيف دايرة بحيث كوثر مابقاتش مسوقة للحياة الملكية و تعاليم الأمراء بعدما كتاشفات الشعوذة و بقات غادية حتى ولات بحالهوم نيت اما وجدان بنت كلاسيكية و أنيقة فلباسها و هادشي مساهم فيه مهنتها كممثلة مسرحية...
و بينما المشعوذة غارقة فدموعها كان رثوك طول الوقت جالس تيشوف فيها بحزن اليوم عيد ميلادهوم بجوج..النهار لي تزادت فيه أميرة عند بيجاد و هاجر شحال حتاافلو و فرحوو و تصدقو داك النهار اليوم نفسوو بعد 20عام ولكن الأجواء و المشاعر فيه متضاربة و شي قالب على شي و تختمات ببكاء مولات العيد ميلاد..تنهد بعمق حتى فجأة سمع شي واحد تيعييط ليه خرج من الجناح و هبط للتحت لقاها هاجر فجناحها فآستغرب لأنه طول هاد السنين عمر وقع هادشي...

هاجر لي متيبان ليها والو: رثووك بغيت ندوي معاك راني عارفاك تتسمعني
رثوك تحول لشكل فكرون فالأرض عاد بان ليها...
هاجر: بغيت ندوي معاك
رثوك تحول لشكل بنت باش تقدر تشوفو هاجر و يقدر يدوي معاها: تنسمعك
هاجر: قول ليا مال كوثر؟؟
رثوك: ماعرفتش
هاجر: كيفاش ماعرفتيش و نتا قرينها و ديما مزاديين الريوس؟!
رثوك: ماخصنيش ندوي ابدا و نقول اسرار مالكتي لشي واحد اخور
هاجر: ياك؟و القرين شنو هو فالاصل؟؟ياك نتوماا لي تيستحضروكوم الشوافاات باش تقولو ليهوم على اسرار و مااضي و حاضر الناس لي نتوما قرين ليهوم!
رثوك: انا قرين مروض من طرف بنتك و مقيد بتعويذة فكتاب الباتول لي تتخلي القرين خاضع و عمرو يفكر يخون مالكو..هادشي كان فالأول اما دابا انا ولفت كوثر بزاف و ولو تبطل التعويذة مايمكنش نخونها!
هاجر شدات راسها: واش عندها شي دري فحياتها و مخبياه عليا؟
رثوك: لا ماعندها حتى واحد و متتعرف حتى واحد
هاجر على الأقل بعدا عرفات انه السبب ماشي الحب أو الإعجاب: واخاا اهم حاجة انه اليوم عيد ميلادها و غنحاول تنسا فيه شوية
رثوك عطاها بضهرو: واخا
تبخر من تما و رجع لجناح كوثر لقاها ناعسة..تنهد حاط يدو على راسو بتعب من هاد الحالة و شاف فالسماء الصافية...
رثوك: اليوم ليلة القمر الجديد(شاف فكوثر النائمة)و بداية جديدة...

الساعات بداو يدوزو و كوثر غارقة فالنعااس بحال المسحورة بينما فالقاعة لي وجدو للعيد ميلاد كلشي مقاد فبلاصتو و واجد لليلة..العائلة تغدات و هاد المرة بلا كوثر فكلشي خداها على اساس انها مقلقة من لي وقع فالفطور داكشي علاش خلاوها بخاطرها و حقها راه موجود...
فالعشية...
حلات كوثر عينيها فجأة و ناضت دغيا للحمام توجهات نيشان للجاكوزي ديالها و حلات الماا..تلفتات ديريكت للخزانة الكبيرة لي عندها تما و لي كانت عامرة بمكوناات الشعوذة و احجار كريمة خاصة بالطقوس..جبدات نصف كاس ملح إبسوم(ملح إنجليزي)..ربع كاس من ملح الهيمالايا الوردي..3 معالق كبار خزامة جافة..بعض القطع من حجر الكوارتز الوردي..4 القطرات من زيت أساسي من اي اختيار هي ختارت زيت البرتقال الأساسي و إضافة لي هي اوراق ازهار جافة...(الوصفة راه حقيقية)
حلات علبة زجاجية كبيرة جبدات منها الاحجار و الكريستالات لي هوما: اللابرادوريت..حجر القمر و الكوارتز الدخاني..ستفاتهوم فوق جوانب الجاكوزي و بيناتهوم حطات شمع أبيض مشعول..هزات السايدج و لي هي مجموعة من الأعشاب مجموعة بشكل صغير تيبخروها المشعوذين و حتى السحرة لتنظيف الجو من اي طاقة سلبية و داكشي لي دارت كوثر عاد حييدات حوايجها و دخلات وسط الماا تتحاول ترولاكسااا..دازت 20دقيقة بالحساب و هي مرقدة فداك الما و هي تنوض تتقطر منو الماكس تبقا فيه هي نص ساعة..جبدات الفوطة ديالها لواتها عليها و تقابلات مع المرايا ملامحها ذابلة بالبكاا و عياانة بالحزن اش هادشي تيوقع ليها؟؟هي عمرها كانت هاكا!!إحساس داخلي تيدفعها فقط للبكاء ولو حتى المووت ولكن طاقة أقووى منوو باغياهاا تكمل و تحتافل بعيد ميلادها...
نشفات شعرها مزيان و خرجات من الدوش بالبانطوفات ديالها حتى دخلات للدريسينغ بانو ليها فساتين الباتول لي تصبنو معلقين تما و هي تنجاذب ديريكت لواحد فيهوم بحال المغناطيس..كان فالبيج بسلهامو مطرز و مزوق بالقهوي..هزاتو من العلاقة و هزات ملابسها الداخلية حتى هوما و لبسات داكشي..خرجات من الدريسينغ جارة جلايل الفستان حتى جلسات قدام الكوافوز و بدات تسرح فشعرها و تجرر فييه حتى نشف و زاد تسبسب جبدات المايكاب و بدات طلس لكماارتهاا و تزيد تجبد عينيها بالأيلاينر حتى كملاات عاد هزات سلسلة من مجوهرات الباتول بطوانكها و لبساتهوم...
كوثر تتحاول تبتاسم قدام المرايا: اليووم يووم مهم بالنسبة ليا يوم فرحي (شدات راسها باستغراب) قصدي يوم عيد ميلادي عندي رغبة كبيرة نكتب اهدافي للعام الجديد من عمري
جبدات كتابها د الشعوذة و بدات تدون أهدافها و من بينهوم كان تعرف شكون هو مول العينين الخضرين الغامقين الغامض..سدات الكتاب و عينيها و بدات تخييل هاد الأهداف و هي تتردد التأكيد: " أنا مفتوحة..غنستالم لي تنستاحقو" (تأكيد حقيقي)..حتى تحل الباب و دخلات منو بنت طويلة شعرها بني طوييل لابسة لباس أنيق و هازة فيديها ورد...
كوثر عقدات حجبانها: شتديييير السحارة فجناحي؟!!

وجدان دخلات تتقرقب بطالونها حتى حطات ليها الورد فوق البيرو: واش عندك عيد ميلاد ولا عرس؟شنو هاد الحالة كلها؟
كوثر مخنزرة: واش سوقك؟؟!!دخلي سوق راسك!!
وجدان ربعات يديها: راني بصاح داوية معاك هاد الفستان راه ديال العريسات
كوثر هزات حاجبها: هداا فستان من فساتين جدة و لبستو حيت عجبني مكاين لا عروسة لا عريس
وجدان باستغراب: هي فستان عرسها هدا
كوثر ناضت قدامها: ماعرفتش! اش جابك لهنا؟!
وجدان جمعات يديها مورا ضهرها تتمنضر فحيوط الجناح: جيت نبارك ليك العيد ميلاد واخا جاني موافق لمناسبة مهمة عندي
كوثر عوجات عينيها: شي مسرحية تاني
وجدان: لا اليوم ليلة القمر الجديد
كوثر: بفف ماعندي ماندير بقمرك
وجدان: عارفاك ا المشعوذة متحتاجيش للقمر حيت يديك غارقين فالسحر الأسود
كوثر خنزرات فيها: حدك تما عمرني ستعملت السحر الأسود!
وجدان: اه تيقتك (تقدمات بخطوات) فين الحمام نحط هاد الورد فشي فاز فيه الما واخا ماتستاهليش الجمالية ديالهوم و الطاقة الإجابية لي تيضفيوها فالأماكن لي تيتحطو فيها
كوثر بالنفخة شييرات ليها لفين كاين و هي تمشي وجدان ليه بعدما خدات فاز خاوي تما خواتو من الورد اليابس..سدات عليها فالحمام حتى عمرات الفاز بالما فجأة حسات بطاقة قمرية فالمكان..دخلات لفين كاين الجاكوزي و هي تلقا طقس حمام القمر الجديد تم تما و بملامحها المصدومة حلات الباب بقوة حتى تلاحت عند كوثر بهلع: شنووو داكشي لي فالطواااليت؟؟؟؟
كوثر تخلعات: ش ش شنو؟ ياكما شي طاقة سلبية؟؟؟
وجدان شداتها من كتافها: شنووو تدير مشعوذة بطقووس القمر الجدييد؟؟!!لاش باغااا توصلي؟؟؟!!!
كوثر بارتباك: ك كيفاااش اينا قمر جديد انا اول مرة نسمع بهادشي!
وجدان: اليوووم ليلة القمر الجديد كيف قلت ليك و فالدووش تشييد اول طقس من طقووس هاد الليلة(قربات منها تتشمها و هي تبعد بصدمة) فيك ريحة مكونات الطقس!!!دوشتي فيه!!!
كوثر عقلها مروون: شوووفي دي علياا سحرك القمرري و المرض دياالك انا متنعرف حتى قمر جديد و داك الدوش جاني على كانتي و قاديتو
وجدان شافت فيها بواحد الشوفة ديال واش من نيتك: هادشيي رااه مافيهش على كاانتك!(مامستوعباش الأمر)حتى من السحرة الخرين رااه انواااع و مغيعرفوش ليه..بوحدهوم سحرة القمر أو السحرة القمريين بحالي انا و عائلتي لي عارفين بمراحل القمر و طقوس كل مرحلة و مشعوذة بحاالك مايمكنش تطيح على هادشي!
كوثر شدات راسها لي بدا تيضرها بقوة الهضرة: خليني عليك دابا و جيني من لخر لاش صالح هاد الدوش باش مصدعاني؟
وجدان تنهدات: القمر الجديد أو المسمى أيضا بالقمر المظلم معناه بدايات جديدة..علاقات جديدة..مغامرات جديدة..تغييرات إجابية..و أفضل وقت للفت الإنتباه
كوثر باستغراب: بداية جديدة؟علاقة جديدة؟افضل وقت للفت الإنتباه؟
وجدان: تماما انا و عائلتي مستعدين لهاد الطقس الليلة بغيت غير هو الاول نشوف هاد عيد ميلادك و سالار لي عرضني و نرجع لعندهوم
كوثر: واش كلشي واجد فالتحت؟
وجدان: ماعرفتش شفت غير ماماك و رحبات بيا
كوثر شافت فيها بواحد النضرات فشكل: بغيت نكمل طقوس القمر الجديد
وجدان: تضحكي عليا؟؟!!
كوثر: لا مادام بديتهوم بديتهوم نكملهوم
وجدان: دابا المشعوذة مدخلة راسها فالسحر القمري بغيت نعرف غير علاش من بين جميع انواع السحر مابانش ليك غير النوع لي تيجري فدمائي؟
كوثر: مانعرف القدر بغاني نشد معاك الضد حتى فهادشي
وجدان: اوكي زيدي معايا لفين تتديري طقوسك و انا غنجيب صاكي لي فيه كتاب تعاويذي و نوريك كيفاش تكمليه
كوثر: اول مرة فحياتك تديريها مزيانة
عطاتها وجدان بالضهر و خرجات من الجناح حاسة بإحساس غريب و مابغاش ابدا راسها يتقبل ليها بلي ديك المشعوذة لي تضل تجري ورا المقابر و مبلية بالتعاويذ تخشي راسها و تزاحم معاها فحاجة لا علاقة بيها ولكن غتسايرها تشوفها فين باغية توصل بهادشي اما كوثر جلسات بديك الحالة تقول عروسة من زمن المشعوذين حاسة بشوية د الألم فراسها و الدوخة واش غير دابا غتحط يد فيد مع ديك السحارة و باغية تكمل معاها الطقس؟لا اكيد بيها شي حاجة!...

رجعات وجدان بصاكها و هبطو بجوجات للقبو...
وجدان هزات حاجبها: دابا هنا فين غنديرو الطقس القمري؟!حتى من الشرجم منين يدخل ضو القمر مكاينش!
كوثر عوجات عينيها: قلتي ليا فين تندير طقوسيي راه هو هنا!!
وجدان: عرفتي شنو زيدي نرجعو لجناحك بعدا هو فيه بالكون و تما غنتقابلو مع ضوء القمر نيشان
تنهدات كوثر و خرجو من تما راجعين لجناحها..دخلو للبالكون لي كان كبييير و مفرش و جلسو فوق فوتويات الجرادي لي محطوطين فيه...
وجدان جبدات كتاب تعاويذها لي كانو اوراقو وردية..غلافو جلدي اسود و فوسطو شارة القمر..قلبات صفحاتو حتى وقفات فالجانب الخاص بالقمر الجديد: غادي ترددي معايا فهاد الدعاء الخاص..سدي عينيك
كوثر سدات عينيها و بدات تتقول فالدعاء عن ضهر قلب قبل حتى ماتنطق بيه وجدان: أنا أتخلى عن شكوك ذاتي..معتقداتي المقيدة..خوفي من الفشل..صوتي الحرج..ألمي من الماضي..كفاحاتي..التي لم تعد كلها تخدمني...(دعاء حقيقي)
وجدان حالة فمها فإتقانها للدعاء لدرجة خلات جسمها يرتاعش من قوة الإيمان لي حساتوو منهاا إيماان انها بغات تولي وحدة جديدة: لا حتال هنا و حبس لا لا باش تنطقي بدعااء مزال حتى ماقلتو!!
كوثر ناضت: واقيلة بديت تنتعلم للسحر بلا خباري
وجدان تبعاتها: هادشي مابغاش يتقبلو عقلي!
تسمع الدقان فالباب و هي تدخل هاجر غير شافت كوثر و هي تصدم: شهادشي لابسة؟؟!!
كوثر: والو غير حوايج عجبووني نهبطو؟؟
هاجر: لفييين بهاكا؟؟بدلي هادشي بدلي واش عندك عيد ميلاد ولا غادية لحفلة الهالويين!
كوثر: ماماا صافي انا لبست حوايجي و هادشي باش غنهبط من امتى حتى لباسي تتعلقي عليه هكا؟؟
وجدان نساحبات في هدوء سابقة و كوثر تبعاتها...
هاجر: شهاد الحاالة ا عيباااد الله(تبعاتها)
هبطات كوثر فالدروج حتى وصلات للتحت و تمات داخلة مع القاعة كانو غير الخدم و العائلة لي متكونة من باها و خوها..عمها يونس و شريفة مرتو..غير هز بيجاد راسو فيها تصعععق بدوك الحوايج...
بيجاد بدهشة: كوثر؟!شنو داكشي لابسة؟؟!!
كوثر ماجاوباتوش مشات ديريكت للطاولة الكبيرة المليئة بالحلويات و لي متوسطها قالب الكايك
ديال عيد ميلادها المضور بالشموع..جات هاجر حدا بيجاد تتهدنو...
بيجاد: واش شفتيها شنو لابسة!!!هادو راه حوايج المشعوذات!!
هاجر تتسكت فيه بالفن: قالت لياا واحد نووع د الفساتين هدا خرج داارج فالسووق و ختارتو كلباس لعيد ميلادهاا غير دير عين ميكة عفااك موضة اليوم ولاو تيقتابسو من القدييم بزاف
بيجاد شاد فراسو الدوخة شداتو غير و هو تيشوفها بدوك الحوايج ماحساك كون عرفها فغيمون مشعوذة!..اما وجدان كانت واقفة حدا سالار تيدويو و يتبادلو اطراف الحديث بشكل هادئ و مبتسمين لبعض...
هزات هاجر عينيها فالفرقة الموسيقية لي جابتها و بداو فالعزف بالآلات كان لحن رائع و لكن وسط من نغماتو كاين واحد الحزن ماحاسينش بيه ابدااا..هزات كوثر عينيها فالساعة الكبيرة القديمة المحطوطة تماا دقائق فقط لي بقات ل منتصف الليل 00:00 و تكمل 20عام..حدرات عينيها فالكايك لي باقي ماشعلوش شموعو باش مايذوبوش عليه حتال للحظة المناسبة و هي تقرب خادمة تشعلهوم و قبل ماتشعل تشعلو بوحدهووم مخليينها مستغربة..انساحبات الخادمة فهدوء تتحاول تقنع راسها انها هي لي شعلاتهووم واخاا مزال ماضغطات ما والو اما كوثر تنهدات يمكن رثوك مول الفعلة ماعرفاتو فين غابر هاد العشية..جرات هاجر بيجاد حتى داروها بيناتهوم و بداو تيلتاقطو ليهوم صور...
هزات كوثر عينيها فالساعة ها العقرب دابا يكون نيشاان و هي تحدر رادة خصلة من شعرها للوراء حتى نفخاات فالشمع كاامل حتى طفااا و طلق دخااانو الخفيف و هي تبخر معاااه بشكل كاامل فنفس الثانية بالضضببط لي ضربات فيها 12 د الليل..خرجات هاجر عينيها بصدمة حاطة يديها على فمها و بيجاد و البقية بحالها مصدوومين من هادشي لي داز قدام عينيهوم فثواني معدووودة فقط بنت بطولها و عرضها اختفت بحال الريح قدام عينيهوم!!!...
هاجر بهلع: ب بنتييي بنتييي(شدات فبيجاد)فين مشااات بنتي؟!!!
بيجاد لي ترفع ماعرف اش وااقع ولكن لي متأكد منو 100% انه عاد دابا شهدو عينيه على شعوذة!!!..حتى قربات منهوم وجدان باهتمام: خالتيي..موسيو الفارسي ماعرفتش شنو وقع لبنتكوم ولكن حسييت بظهوور قوي و هالة قوية بااانت فاش بغات تنفخ فالكايك...

فنفس الوقت فمكان بعييييييد.......
بدات تتحل كوثر عينيها بتعب تتبان ليها الضبابة و شي خيال واقف عليها..حلات عينيها مزيان عاد وضاحت ليها الصورة و الخيال صدق رجل طويييل واقف عليها بفخاامة هاز راسو للسماا بشكل عااالي و جامع يدو موراه بملابسو الملكية النادرة...
كوثر خرجات عينيها بصدمة فاش صوب عليها عيوونوو الخضراء القااتمة المحاطة بالغمووض و الظلام: م مووول العينييين خضرييين!!!!(بغات تحرك عاد قشعات راسها مكبلة بالسلاسل الحديدية مع الحيط من يديها و رجليها)شنوو هادشي؟؟!!(تتحاول تفك)شكوون نتااا و شنو بااغي منيي؟؟و فين عاائلتيي!!
هز حاجبو و نطق بكل خشوونة و تضخيم: نتي فحضرة الملك شااه الياامن الثالث..ملك المشعوذين(هز عليها صبعو المزين بخاتم حجر كريم ناطق بقوة) و نتي هناا تحققي لاش خلاقيتي اصلا!

كوثر: كيفااش اناا هنا باش نحقق لاش خلاقيت اصلا؟؟لااش معلقنييي؟؟فكنييي!!!
شاه عقد حجبانو: اناا لي تنآمررررر هنايا لزمي حدك!!
كوثر طلعات حجبانها لا صافي هادشي لي خاصها نسخة خرى من باها: بابااا هو الوحيد لي عندو الحق يآمر فياا سمعتي!!و دابا فكنييي بغيت نعرف لاش مخسر ليا حفلتي و معلقني هنايا بحال الطابلو!
شاه زيير على يدو بعصبية اعدى حاجة عندووو هي لي يتعاااند معاه و من الفووق امرأة لي خااصها تحدررر عينيهاا و تهبط راسهاا فحضرتوو اما هي مخرجاهووم فيه بداك الكحل و التجبييدة د العينين و تقول واش بغات تسكت من الأسئلة...
شاه حرك يدو فالهوا و هو يخرج كتاب تعاويذو حال صفحاتو لي تتقلب و الضو خارج منو حتى حبس فواحد الصفحة..حرك يدو الثانية و هو يبان قدامو ثابوت ذهبي بحال ديال الفراعنة محلول و فداخلو مستلقية بنت جمييلة سادة عينيها و جسدها متيتململش ابداا...
كوثر خرجات فيها عينيها: شكوون هادي حتى هي؟؟؟
شاه ماجاوبهاش حدر أنضارو المنقضة فالكتاب و بدا تيردد فالتعويذة الغريبة لي فيه..فجأة بداو السلاسل باش مشدودة كوثر تيتزييرو اكترر حتى جروها لصقوها مع الحيط بقوة و هي تخرج عينيها بخوف تتشوف فيه و فنفس الوقت تتحاول تفك: شنوو تدير؟؟؟(قلبها زاد فخفقانو و هي تضور عنقها فالمكان كولووو تتجمع ملاحظاتها حتى توصلات للإستنتاج) ه ه هدااا طقسسس!!!(شافت فالبنت لي تتبان جثة هامدة) طققققققققس!!!!!!(مقاتلة مع السلاسل بالجهد و تتغوت) طلقنيييييييي هبطنيييييي واا حببببببببس (تتشوف حولها و صدرها تيطلع و ينزل بالخوف حتى سدات عينيها بقوة و غوتاااات زعزعاااات حيوط المكاان) رثوووووووووك فيييييييننننننك
شاه هز فيها راسو مخرج فيها عينوو لي بانو شعيراتهوم الحمرااء بشكل واااضح مزير على شفاهو بعصبيية حيت فغيمووووون دارت ليه الطيارة بالغوات و ودنييه غيصماااكو...
شاه ضاغط على كلمات التعويذة بواحد العصب: أسود كالليل..أبيض كالضوء..امحو الموت..أسود كاللي...
كوثر بالغوات قاطعاتو: رثووووووووك فيناااااااااااااك
شاه زيير على يدو لي عامرة بخواتم الأحجار الكريمة بعصبية: سكتييييي!!!!خليني نكممممل!!!!
كوثر تتركل ليه تما باغية تفك و تغووت تقول واش عيات: وااا طلقنيييي رثووووك واخاااا عليييك عاااد بان ليييك تغبرررر تنآمرررررك بصيفتييي ماااالكتك تحضضضررررررر
رثوك بان مورا الملك جالس على ركبتو و حاني راسو فحضرة الملك...
كوثر و اخيرا حبسات من الغوات فاش شافتو: رثوووك عاونيي هبطنيي لشي سبب ماقادراش ندير حتى شعوذة بهاد السلاسل و هي مكبلاني..(بان الإستغراب على وجهها)رثوك؟واش ماسمعتينيش؟
شاه تلفت بنص عين شاف فقرينها و رجع مطلع فيها راسو و نافخ صدرو: مغنعاودش كلامي لي هو انني ملك المشعوذين!!!
كوثر هازة حاجبها: يعني؟؟؟
شاه عاقد حجبانو: يعنيي اناا ملك علييك و عليه!!(تلفت عند رثوك بتعالي)شكون انا؟
رثوك لي بدا جسمو تيترعد بلا هواه: نت نتا فخاامة الملك شاه اليامن الثالث..ملك الملووك حاكم قبائل المشعوذيين و حاميي مملكة كينتاريا
كوثر تلعثمات فالكلام: كيفاش ا رثوك ملك و قبائل مشعوذين؟ياك انا هي المشعوذة الوحيدة لي كاينة فهاد القرن؟!
تلفت عندها شاه هاز حاجبو: نتي الوحيدة؟ الحاجة لي نتي الوحيدة فيها هي الواااجب ديالك لي خلاقيتي على قبلو! (زيير على قبضتو) و لي خسرتييه داباا بغواااتك و صبيانيتك!!
كوثر: اينا وااجب؟؟راني مافاهمة حتى حاجة و فكني نرجع لعند عائلتي بابا غيقلب الدنيا عليا
شاه: نساي شي حاجة سميتها عائلتك! ابتداءا من اليوم نتي مكبلة فأسوار قصري و مغتخرجي منو الا على شكل روح قامت بالواجب ديالها!!
حدر عينيه فتابوث البنت بواحد الأمل..فرقع اصابعو حتى اختفى من تما و خرج جامع يديه مورا ضهرو...
كوثر بصدمة: صبررر صبرررر فين غادي فييين؟؟اش تتقووول؟!رجعنيي داباااا
رثوك حدر راسو فالأرض حتى بان ليه ظل الملك مابقاش فالمكان عاد ناض: كوثر ماتزيديش تعصبيه انا تنترجاك
كوثر خنزرات فيه: كنتي عارفووو طووول الوقت و مخبي عليا!!كنت حاسة بهادشي!!!
رثوك حدر عينيه حشمان من الموقف: عرفت مادرت فيها مايصلاح ولكن راه ماشي لخاطري واش عرفتي شكون هاداك راه ملك المشعوذين يخلطنا انا وياك و قبيلتنا من جذرها! انا كنت خايف و تنترعد بلاصتك و نتي تتقابحي معاه و تردي فالهضور!
كوثر: واش عرفتيه اينا واجب تيدوي عليه؟؟؟
رثوك: لا هاد الواجب غير فخامته لي عارفو بوحدو انا لي فراسي هو نتي حاجة مهمة عندو فقط

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.