ما اتعسها حياة فاش كتحس بالشمتة وما بعدها شمتة ...كتحس بكلشي خياب فعينيك وضلام وتاحاجة مكتحلا ليك باعتبار داك الشخص الي كنتي كتشوف فيه هو شريكك حب قلبك العشق كلشي كنتي دايرو وسنين ونتا معاه بزوج كتخططو لحياتكم المستقبلية الي غاتكونو فيها بزوج تحت سقف واحد الشخص الي مكانش نهارك يدوز الى ما هضرتي معاه عاد يحلى ليك نهارك ...فجأة تكتاشف كنتي مجرد صفر على الشمال او سوكور محطوط الى مصدقش هذا تصدق انت ...امثال ريم منها بزااف ...
ممكن يكون السبب ان منهم مكايثيقوش فالرجال فكدير واحد فالجيب ولاخور احتياط حتى الى مصدقش هذاك يصدق لاخور ....ممكن تفكيرها انها تكون مع زوج وتمتع بيهم ...فالاخير وفهاد الحالة ديال ايساف وريم ...صدق ايساف الي مشموت وخا نيتو كانت صادقة وكان كيبغيها بزاف وباني احلامو وطموحاتو المستقبلية معاها ...
ياسين "غير سمع سميتو وشنو علاقته والي طرا لايساف كون لقاه قدامو يطحنو بدون رحمة ولا شفقة وها العار يشفي غليلو ..." : عدو ربو فهاد النهار هاد"خبط فوق بارشوك ديال طوموبيل ثلاثة الخبطات بجهد متتالية " ولد العطااااية ...
ايساف"شدو " : شش تهدن ...
ياسين "بقا صدرو يطلع ويهبط عصبو عض لسانو شوي دوز على وجهو باعصاب ورجع شاف فيه من بعد ما هدن راسو ...جبد كارو من جيبو وشعلو " : شنو بغيتي دير نتا ؟؟
ايساف "شاف جيهة العرس وضحك باستهزاء " : هههه الشمتة هي هادي شنو غاندير ؟ غانبكي على امراة ؟على بنت القحبة ؟ مالي وليك حتى ندير مندبة ...لهلا يقلب ...
ياسين : ماعليش مزال صغير تشوف وتشوف وتعرف بزاف ...
ايساف : الي دار ذنب يستاهل العقوبة ...يمكن الوقت هو هذا نصلح غلطي ونفكر فيه ...
ياسين : المعنى ؟
ايساف "ربت ليه على كتفو " : من هنا لتما تعرف ...لهلا يخطيك اولد خالي بحثي وريتيني النور فين كاين ووريتيني خبث البشر واش كيسوى ...
ياسين : هادشي درتو مع خويا ماشي ولد عمتي حنا خوت كبرنا فدار وحدة ...الي ضرك ضرني ...نصيحتي ليك رد بالك ...
ايساف : ههههه بالي نردو غير من جيهة العيالات هاد ساعة هما الي تخاف منهم ههههه
ياسين : مشينا ؟
ايساف : مشينا الله يسمح لينا ...ضار ياسين ركب جيهتو وايساف بقا واحد شوي ضار شاف جيهة الفيلا دار واحد النضرة فشكاااال نضرة فيها معاني بزاف واولها الشمتة الي تشمت من جيهتها والسنين الي ضيع معاها وشوف اش كان تحت راسها ...خلاه ياسين على راحتو حتى ضار وركب حداه ...
قلب ضورة وكسيرا بيه ماشي لازرو وانما زاد بيه لفاس نيشان كانو تما في احد النوادي اليلية ...
ايساف "شاف فين ركن سيارة " : جايبنا نشربو وانا بسباب شراب درت منكرات هما ومن وراهم شمتات ومصايب كحلة ...
ياسين : انا الي جبتك ليه عمري شربت ؟
ايساف : اعوذ بالله ونعم التربية ...غا انا الي مسخوط ...
ياسين : تحرك نزل هنا ماشي غير لشراب الله يهديك ...
نزلو من سيارة عطا ساروت لكارد دوز ليه سيارة لبارك وهما دخلو مع دخلة صوت زدحة هو صحيح نادي ليلي لكن ماشي لشراب انما فيه حتى بلايص لناس محترمة الي بغا يشرب الخمر او يزهى ويقصر كاين جوايه وركن خاص بيهم ...مع دخلة ضور عينيه وهو يبان ليه اركان ومعاه صاحبهم عصام ...
اركان : ياك اعشيري الوحيد ..."شاف ف ايساف " الوحش الشامي جا ...
ايساف : ليخليك انا من ازرو هاد ساعة ...عيشك تتحسسني راني ماعندي حق فالمغريب ...
اركان : غا من هاد عيشك مغريبي قح ...
ياسين "تسالم مع عصام بارك ليه وجلس تشتح فالبلاصة بجلسة مفرق رجليه هز عينيه فاركان " : شنو الجديد ؟
اركان : والو هاد ساعة ...شنو درتي لقيتي دار بن زيدان ؟
ياسين "شير ليه بعينيه جيهة ايساف الي حدر راسو كيضحك " : شنو بان ليك غانتعطل ؟
اركان "غمض عينيه باسف وقال ليه بشوي زعما واش عرف " : عرف ؟
ياسين "جاوب ب اه براسو " ..
ايساف : خهههه لاش تتغامزو راني عرفت اخويا عاادي جدا ...
اركان : وشنو ناوي دير دابا ..
ايساف : ناوي نشرب فنيدة تاع الفار ...
اركان : اححح غاتطحن ليك المصارن ماتصبرش ليها ...نهار يغسلوك خنز الفنيدة يعطي بلاش شوف ليك جبل الي كيمشي ليه ياسين طالع طالع يطلعك معاه ويلوحك من تم بلا متسميه انتحار موت شهيد حدا خوتك ...انا دمي فلسطيني على عهدي على ديني ...
قلبوها طنز تما خلاهم ياسين يضحكو وجبد تيليفونو رسل ميساج ليها ...بسؤاله عليها شنو كدير دابا ...جاوباتو فالحين حيث كانت داخلة ...
نوار : بغينا نتعشاو ...غادي تعطل ؟
ياسين : شي شوية انا في فاس مع ايساف يفوج شوية ونجي ...
نوار : واخا ...ياسين ...
ياسين : المفششة ديالو ...
نوار : هههههه
ياسين : شنو بغيتي ؟
نوار : بغيت نسولك ...
ياسين : سولي ...خاصاك شي حاجة نجيبها ليك معايا ،
نوار : لا لا بغيت غير نسولك "زعمات حيث المحادثة ورا سلوكة مكتشوفش فيه هههه " جمعت ليك حوايجك وحتى داخلية مهم درت غي شوية ف فاليز وماعرفتش شنو غاتحتاج اخور ؟
ياسين : حوايجي الي تما كيبقاو مكنديهمش عندي لهيه ولكن مزيان فاش جمعتيهم محتاجهم نيت ...
نوار : صافي واخا ...
ياسين : الى عييتي نعسي حتى نجي ...
نوار : واخا تهلى فراسك ...
ياسين : تهلاي حتى نتي فراسك ...
ايساف واركان وعصام كانو يهضرو ويتقاشحو داخلين فالمود جاو بغاو يسولو صاحبهم لقاوه عاقد حجبانو ومركز فالتيليفون ومرة مرة يحك بسنانو شفايفو تحتانية ولا يعضهم ...
ايساف : ولد عمتي فورورو. دابا ...
اركان : عيط لاص ...
عصام : شبابو ضاع لقا حبابو نسا صحابو ...نسا ايامات كنت نعطيه ستيلو زرق فاش كان مكيبغيش يكتب ليه يقسمو على جوج بالفقصة...
اركان : تا راه ملي تزوج نسا حليب مو
ايساف : وتقول مينساش حليب حنانتو ...
عصام : لا جينا نشوفو تسولو المدام على شي سر يقد يعتارف ليها باول بنت كوا ...
ايساف : سكت يعطيك الويل يسمعك يجخلط الحزاق كامل راه عاد كان صاعر ...
اركان : مالو ؟
ايساف : داك الولد عيسى صاحبكم ...
اركان : ولد الخضخاضة (القح**) ...
ياسين "هز فيهم راسو " : شنو كاين ؟
اوكان : شنو واقع مع زا***
ياسين "قلبها تخنزيرة " : نسا عليا ولد زوادة هاد ساعة ولا نديرو بناقص من هاد الجلسة ...
عصام : الا صافي لبدها اركان من بعد ...اسيدي شنو تشربو ...
ياسين "حدر راسو فتيليفون " : الي كان ...
عصام : ربعة فودكا مهرسة اخويا ...
ياسين "هز فيه عينيه " ...
عصام : وتا براد اتاي تا مالك منونخ ...براد اتاي فنادي ليلي على شرف ياسين رمسيس ...
اركان : هههههه تخاف ماتحشم ...
بقاو مجمعين تما سهرانين والغرض من سهرة هو ايساف يفوج شوية وخا عارفو مغايبكيش على مراة وانما شمتة قاصحة عليه ف حب انه ينسيه شوية يندامج مع دراري صحابو ولانه كيعرف اركان فكان سهل عليه يندامج دغيا ...
وصلات الوحدة ديال ليل شدو طريقهم لازرو مشا وصل ايساف لدارهم وهو زاد لدار مع دخل بلاصا سيارة ودخل طلع نيشان لبيت حلو بشوييي دخل حيد حوايجو بقا غير ببوكسر وشعل لفيوز لقاها ناعسة طالقة لكليما باردة بزااف زاد شوي فدرجة الحرارة وحط تيليفونو عند الكومدينو وضار تخشا حداها بشويييي لقاها ناعسة ببيجامتها بسروالها ...مع نعاسها ثقيل حيد ليها لفوق
ياسين : وعلاش كاع هاد الوقت كلو ...عام انوار!! ...
نوار : واصبر ...هنن
ياسين : نوار !!!
نوار فينهي الي تجاوبك صافي سالات مدة الهضرة ...
ياسين : تت كتحلمي ..."جرها من كرشها لصق ضهرها مع كرشو خشا وجهو باسها فعنقها ومشا تاهو نعس ...
مع شروق شمس يوم جديد ...ضربتها الفيقة نيشان شافت هنا وهنا عاد استوعبات انها ماشي فبيتها اول مرة مكتنعسش فيه وهي فدارهم وانما فبيت لحفيذ الكبير الي هي الان مراتو والي غاتكون ام ولادو ...ضورات راسها مالقاتوش شافت فساعة لقاتها تمنية ونص يعني فاقت بكري عرفاتو مشا يدير لامارش مع فؤاد كيف العادة ...ومخلي تيليفونو عند راسها حدا تيليفونها ...ناضت لدوش قضات حاجتها وغسلات… وغسلات وجهها وخرجات لبيتها جبدات ما تلبس بدلات ملابسها داخلية وبدلات حوايجها ...عاد خرجات من بيتها لقات الكل فاق ماعادا اشرف ....
شوي وهو يدخل فؤاد وياسين الي اصلا تعطلو باش وجعو صبحو عليهم يامنة تبعات فؤاد لفوق تعطيه يبدل بينما دوش وياسين جا سلم عليهم وباس راس نوار قدامهم ...وخا هي عادية لكن مع اول مرة ليها وحدا باها ابتاسمت بخجل وحنيكاتها تزنگو ...تم غادي طالع حتى هو باش يدوش ويبدل وهو ينغزها باها تبعو ...
معطلاتوش كيف قالها ليها طلعات تبعاتو كان طلع بزربة لقاتو دخل لدوش طالق رشاشة وحاط لفوطة فوق ناموسية ووحدة صغيرة باش كينشف شعرو ...
نوار"كتهضر مع راسها " : يمكن نساها ..."تفكرات غايخرج عريان وهي طير مشات لماريو بزربة كتزرب وتقول ما زربت باش ميخرجش عريان كلو بغات تحط ليه مايلبس تما وتخرج هههههه بدعقة تلفو ليها لحوايج مبقات عرفات اش تحط ليه حتى صدقت معطلة ولات جبدات غالي لقاتو ...حطات ليه بيل سماطي وشورط ديال لبحر ماشي ديال دار ...وداكشي مناش خافت هو الي وقع ...
ياسين"حنحن" : نوار ...
نوار"مضارتش بقات تقلب فالحوايج " : ن نعام ...
ياسين : شنو بغيتي من تما ...
نوار : بغيت نجبد ليك ماتلبس ...
ياسين "حك حنكو بشوي ضار شاف جنبو ورجع شاف فيها داير ايديه على نصو راه خرج ولبس فوطة لواها عليه ودار لاخرا على عنقو " : يهديك الله هاديك راها بلاصة لوراق ديالي شنو غالبس فيهم ...
نوار"طارت عليه باستو من حنكو ومشات كتزرب وتعكل " ..
ياسين "غوت عليها " : نواااااار بشويييييي
شكون سمعو طارت من حداه ومشات تزرب وتضحك على راسها وحناكها بغاو يطرطقو مهم اول بوسة منها بعدا هاهي دارتها وخا فالحنك ماشي مشكيل حتى هبطات عندهم لقاتهم صهيب خرج والياس بقا غير يوسف وفؤاد فجردة كيهضرو واشرف باقي كيفطر جلسات حداه كتلهت ووجها مزنگ...
اشرف "بقا يشوف فيها " : هادي مالها هربت ليها الحقيقة ....
نزل هو توجه لجردة نيشان جلس مع باه ونسيبو ...حتى جابو ليه الفطور اما نوار عيطات لماماها بلغاتها بالي غاتجي بكري باش تسلم عليها قبل متمشي هي ومينة ...حتى هبط علي لحق عليهم تاهو جابو ليه الفطور مع ياسين نيت فطر معاه ...
علي : ولد العم مرحب بينا عندك شي يومين ولا من بعد ...
ياسين "كيهضر بثقالة كيكمي وداير رجل فوق فخدو طاويها " : مرحبا فاي وقت هاديك دار خوك ..
علي : يحفضااك ...تاتسالي الحفلة الي عندك الغذ ليه نجي ...ماعنديش الوقت وبغيت نضرب تال تما ...
يوسف : شحال عندك ؟
علي : غااا سويمينة (سيمانة ) العميم ...
يوسف : ماعندكش الوقت نيت ...ماعليش ياسين دار الكبيرة ماشي حيث ولد خويا ونسيبي وليني نقول الحق ...
ياسين "حط ايدو على صدرو " : يعمر دارك ايوسف ...
في هاد الوقت وفي جيهة اخرى بضبط في فاس في احد الفيلات ب ميموزة ...كتهز مع المعلم واحد البلاكار صغير باش يحطو فين بغات بضبط ...ماعرفاتش كيفاش حتى دفع بيها وتضربت ايدها مع الحايط ضغط عليها البلاكار ...
مينة : اااااي ...بلاتي بلاتي افففف "شدات ايدها الي تضربت من المعصم "
المعلم : بنتي ياك ما تقصحتي والله ما شفتك ...
مينة "مكمشة عينيها تقصحات " : ففف لا لا ماوقع والو مدرتيهاش بلعاني ...
رياض "كان كيصوني لمهدي مجاوبوش تاني وهو يقشع البلان وقطع جا بزربة لقاها شادة فمعصمها وكتوجع " : شنو مالك ؟
الوقت كيدوز والحياة مستمرة ...والدنيا هي هاذي ...شحال ما تقلقتي فالاخير ربي كيفرجها عليك وشحال ما ضحكتي لازم يجي الوقت وتغبن فيه والحياة ماهي الا تجارب واختبار من رب العالمين ...
من بعد ما وصل وقت الرجوع كانت تقريبا العشرة تاع الليل ...لقاتهم شدو طريق بزوج اول طريق ليهم وهما عاد عرسان جداد ...تسالمت معاهم على امل ترجع بعد ايام غير فقط باش تحضر مع راجلها فاول عشاء عمل على شرفو هو وعشاء احتفال لاستلام منصب مدير البنك ...مخلين يامنة وفؤاد الي غايجيو موراه طبعا ولازم حضورهم لنيل شرف حضور حفل استلام المنصب بكل فخر بابنهم البكر الي اصبح شخصية خدم بدراعو وقرا بدماغو وعرف دنيا اش كتسوا ومزال كيتعلم فيها ....
قرب يصبح الحال كانت ناعسة محاساش براسها متكية على كتفو بجليليبتها المخزانيج المسكية وصاكها فوق حجرها حاطا عليه ايديها المنقوشة وصبعها الي متوسطو الخاتم الي جامعها بحب قلبها الشخص الي حداها ...والي طول طريق وهو مركز باش يوصلو لدارو الي ولات دارها حتى هي ...حتى دخلو لدوار ...
نوار "كتحس بطوموبيل كتهز مع البيست دايز منها وهي ضربها لفيقة هزات راسها وعينيها شبه مسدودين مع طريق كلها وهي ناعسة بالسيف ...
نوار "كتفوه " : وصلنا ...
ياسين : وصلنا ...
نوار : نعست هههه
ياسين : ماعليش رتاحي نوصلو وطلعي نعسي ...
نوار : حتى نتا رتاح طريق كلها وانتا كتسوق مارتاحيتيش ...
ياسين : مولف مولف ...
وصلو لفيرما حلو ليهم الباب ودخلو كانت ستة صباح لقاو كلشي فايق طبعا البادية هي هادي ...مع دخلة تلقات ليهم المراة الي مخدمها ياسين لغرض الفيرما طياب وميناج بزغاريت وصلاة وسلام سلمات على نوار وباركات لياسين ...ومصطفى تاهو بدوره سلم عليه وسلمات عليه نوار ...
نوار عرفاتو تعصب من خوه ماعاودتهاش معاه مشات طلعات هي لفوق وهو داز لبيت الي وجد لخوه دخل عليه لقاه ناعس مشبح فوق ناموسية غير بشورط ومكرشخ بنعاس ....ويحساب ليكم فيقو بالخاطر ؟ ابدا ...مشا لدوش الي حداه عمر سطيلة ديال الما ومشا ليه خواها عليه حتى ناض شاهق روحو كانت غاتخرج ...ماعرف باش تبلى حتى ناض وقف ....
اسامة "كيلتاقط انفاسو " : ا نن ي ياسين !!
ياسين "مخنزر فيه واحد تخنزيرة عينيه بغاو يتقبو اسامة " : شحال هادي ؟؟
ياسين : مشيت نوصي على شي خرفان ملي يجي الوليذ يذبحوهم جاي علي ولد صهيب غانديرو شي عشا بيناتنا ... وشي وحدين صدقة لزواجنا ...
نوار : ااه ...امتا الحفلة الي غانمشيو ليها ؟
ياسين : بعد غذا ..."هز ليها ذقنها وباسها فشفايفها حتى بدا يتعمق غا سمعو دقان برا كان مصطفى جاي يفطر معاهم حيث ياسين قاليه يدوز فاش يرسل الفطور لاسامة مع سالم الي جابو " ...
في المكتب ديالو جالس كيطابي فلابتوب ويجمع فالحساب ومرة كيشوف صيانة الكاميرات وحواسيب الشركة باعتبار هذا هو الضومين ديالو تخصص المعلوميات ...حتى دخل عليه مدرم هاز فايدو ملف لا سلام لا كلام وصل وجلس ولاااا من هادشي كلو هز ليه كاسو ديال لقهوة الي طالبها بالعشق ....خلاه كيرمش ...
بزز باش ناضت لدوش غاديا وشادة فالحايط وحاسا بسخفة بداك صداع الي شدها الم حاااد ...مشات لفارمسيان الي تما وبقات تقلب تقلب حتى طاحت فمسكن شرباتو بالما من روبيني لافابو العار غاتسلك ....حتى جلسات لارض وحطات راسها على لحايط ...
يامنة : يااااربي الى غاتجي لموت ماشي دابا ياربي ياااربي ...الموت هي هادي ياااربييييي ...
......واقف حدا سالم كيشد فالفلوس من عند الناس الي كيتقداو من عندهم الخرفان ويحسب داير ستيلو ورا وذنيه ولاستيك شمع فايديه فنما يحسب ماصو دالفلوس مليون يجمعو بلاستيك من لوسط ....
اسامة "حس بنخصة على غفلة ذبحاتو فحال لموس ماضي تا بان ليه ضو وهو يتحنى على ركابيه " : سالم ...
سالم "ضار شاف فيه " : تا مالك دغيا عييتي ياودي يا ودي يا رجلاااو ...ههههه
واقف هو وسالم حس بسخفة حتى جاب ليه قرعة الما باردة تكا عليها كلها سكحها دقة وحدة عروقاتو تكب وشمس حارة مع فصل صيف وفهاد البلايص حرارتهم تتوصل ل 46 درجة واكثر ...
سالم : شوية وكان ؟
اسامة "حادر راسو محني داير ايديه على ركابيه حتى هز فيه راسو وكمش عينيه وحلهم نفخ بفمو شوي " : شوي شوي الحرارة قاصحة هنا الخو ...
سالم : ايوى شنو!! "دار ايديه وراه " هاد جهنم راه خوك يوميا كان يخرج فيها يخدم مع الشناقة ولا يطلع مع مالين البال (الي كيهزو تبن او فصة فالكاميو ) مايوگف (مايوقف) تال گلميم ولا طنطان بعالمراات(بعض المرات ) ماويوگف تال داخلة ...عزيز عليه يتحرك يسافر يخدم يدمر مهم ميبقاش جالس ...شحال من مرة بوك خاصم عليه ويحساب ليك تسوق داكشي الي قالت ليه منغيغتو ديال راسو دارها ...وتا بوك
خلاه على خاطرو عارفو باغي يخدم يدمر ماحكر شاي عليه ...بقا يدمر ويخدم فاش مكان وخا عندكم الي يتم ما يتحرق حتى دخل شريك مع جدو كبر ليه دار تا ردها فيرما وشرا كل حاجة شوي بشوي حتى وصل وقت يكمل قرايتو ومشا غبر لميريكان ...
اسامة : وهادشي عارفو شتك تعاود ليا فيه ...
سالم : وااا تحزم كيفو وعري على كتافك ...يحساب ليك تبقا فيا وصية فحم العينين مانخونها ...تگعد تحرك هز هاد الخرفان الي بقاو رجعهم وخلينا نتيسرو لعند سيد الي وصا عليهم ...
اسامة : اجي نطحني ...
سالم : ولا ساليت نديرها ونفوتها ..."جهد صوته " تا طلع تحرك ...
اسامة "عارفو عندو صلاحية وعاطيها ليه خوه والى تعاند معاه داكشي الي غايعطيه سالم يديرو ليه خوه مضوبل على عشرة اللهم يقصر شر ...برك على نفسه بزز باش ميتعصبش لانه ملي تعالج العصبية ولابد منها ماشي ساهل يكون انسان كالم ...شاف تا عيا ومشا لواحد جوج خرفان وبدا يهز ويطلع فالكاميو " ...
سالم : طلق راسك تعطلناش ...
في هاد الاثناء سالا مع ايلاف خدمتهم واجتماعهم بزوج هضرو شوي على قضية ايساف وبقا شوي وخرج رجع لفيلا كيف وصل دخل لقا الياس عاد دخل حتى هو ....
الياس : خويا ...
فؤاد "خرج من سيارة بتغوبيشتو " : جيتي وحدك !!
الياس : يوسف وصهيب بقاو تما خدامين مع واحد سيد على شي سلعة كيتسناو حتى يعمر داكشي الي خاصو كاينين فديبو هما دابا ...
فؤاد : صهيب سالا خدمتو فالمحكمة ؟
الياس : وقال كمل هاد سيمانة عندو خاوية اغلب القضايا تاجلو ...
فؤاد : مزيااان ...يلاه يرتاح شوية ...
دخلو بزوج لقاو نجود جالسة كتسبح مشاو سلمو عليها ...
فؤاد : يامنة !!
نجود : ولدي من قبيييلة وهي طالعة قالت توجد الحوايج ...
فؤاد "عقد حجبانو " : منزلاتش !!
نجود : عاد لقيتي سارة طلع عندها ونتا دخل ...
فؤاد مجاوبهاش مشا طلع نيشان لبيت ملقاهاش
فؤاد : عمارة داري !!
يامنة "غمضات عينيها بغات تنوض باش تجاوبو باقي فيها صداع وخا بدا ينقص على كي قبل ...جاوبات بصوت عيان " : فؤااد هاني ...
فؤاد "دخل لدوش لقاها جالسة متكية عالحايط ووجهها صفر شادة كرشها ..." : يامنة !!!! مالك ؟؟
تحنى لعندها وجهو هرب منو لون عينيه خرجو منضرها طيح منو النص ...تدعق ولا غير كيحط فايديه على حنكها ويدوز عليه ....قاصها لقاها كتغلييي بسخانة طلعات ليها ...ماجا فين يفهم حتى تقيات ليه عند رجليه تقيات تقيات وصداع ربي الي عالم بيها قلبو بغا يخرج من بلاصتو ...حتى مبقاتش قدرات تزيد تكمل …
يامنة : ضرتنييي كرشيييي اهى اهى مبقيتش قدرت ...
فؤاد : و واااخا بشوية عليك ..."جمع راسو بزز ونوضها هزها بين دراعو صافي هي مبقاتش قدرات حدها شادا غير كرشها من جنب لتحت فين استقر الالم ...هازها بين ايديه متسوقش لشعرها واش عريان هبطها لتحت غادي بيها فطريقو تلقاو ليه مفهمو والو ...
الياس "شاف في فؤاد من مرايا …و زاد كسيرا فسرعة حتى وصلو لكلينيك الي علمو يسرى فدار لقاوها كتسناهم عند الباب هي وفراملية موجدين بياص الي حطوها فيه ودخلوها كيجريو ...
كيف نقلو الخرفان الي بقاو رجعو لدوار حط اسامة لقا جدو تاهو عاد جاي داخل ودخلو بزوج مع دخلة لقاو نوار جالسة تما شادا تيليفون وجالسة كتشوف وحاطا حداها الماكلة او گوتي مفرشة ومقادا تما ...
اسامة : ااايه هاني غانشوف غذا غاتجي الحنانة وديرو ليا كي شهد من ايدياتها زوينين ...سكتيييي الخراجة سكتييي ..."دخل خلاها كتغدد "
نوار "هزات مخدة بغات تعضها " : اععننههن...تفوووو
شوية دخل ياسين بطوموبيل كان خرج من عند لفطور مرجع حتى دابا ورا العصر ...عيط لشي حد من لخدامة هز شي سلعة من الكوف ...
ياسين "داير نضاضرو دشمس " : معاش غادي داويو ؟؟؟؟
مبارك : مع الفجر نبداو انا وسعيد ودراري ...
ياسين : قضيو بهذا الى خصكم مزال علم سالم ..."خلاه وتم جاي جبد تيليفونو كيصوني ليامنة مكتجاوبوش ونفس شيء فؤاد والو ...وصل لعندها وتحنى باسها فراسها " ...
ياسين : شنو عجبك تجلسي هنا ؟
نوار"ابتاسمت ليه " : زوين هنا مقابل مع شاريج وشجر زيتون ...
ياسين "جلس مبعد منها وجبد گارو شعلو كيكمي " : ماعليش واخا هكاك ردي بالك زيتون حبوب لقاح الي فيه غايديرو ليك حساسية متكتريش جلسة هنا ..."شافها شنو لابسة كانت مستورة بعدا بكاب طويل وبيجامة خفيفة بسروالها " با كاين ؟
نوار : اه جا هو واسامة دابا مشا يدوش ...
ياسين : مزياان ...هضرتي مع يوسف ؟
نوار : صونيت ليه مكيجاوبش وماما دابا خدامة هضرت غير مع مينة باقا خدامة ...
ياسين "عوج فمو مستغرب شي حاجة فخاطرو ممهنياهش تنهد واحد تنهيدة خرجات طويلة وشاف بعيد " : كان خاصهم يشدو طريق دابا ...
ضحكات بخجل ومشات جلسات حداه عنقها بجنب باس ليها راسها حتى خرج مصطفى واسامة جلسو حداهم كبات ليهم شنو بغاو وجلسو تما مجمعين الا ياسين الي كل مرة يصوني حتى بدا يتعصب ...لاح تيليفون بزعفة تا قفزو وناض جبد كارو تاني بدا يكمي فيه ويمشي ويجي ...
مصطفى : ولدي ياك شي باس مكاين ...
ياسين : مااعرفتش مكايجاوبني حد ...
مصطفى : وتا كون را شادين طريق ولا مشاو عند شي حد ...
مصطفى : وغااا برد نتا كنتي مكتجاوبش ولا طافي تيليفونك حيث مكتساليش ايوى تاهما هكاك مادير فبالك والو "شاف فنوار غمزها تنوض عندو " ...
نوار "ناضت لعندو " : غير تهدن غانبقا نعيط انا حتى يجاوبو ...متعصبش ...
اسامة "صاقل مكهضرش حتى هو كيصوني ومقادرش يدوي عارفو كيفاش داير فاش كيتعصب " ...
بقاو ازيد من ساعتين وهما كيتسناو كل من الياس وفؤاد اما الي فدار مقدروش يجيو وبقاو على نار ...تيليفون فؤاد فجيبو كيصوني ومحاسش بيه واش كيصوني ولا لا خرج برا كما الكارو ووالو دنيا ضايقة بيه الي لداخل روحو والعينين باش كيشوف معرفش حتى مالها ولا اش جاري ليها ..الي فالفيلا تيليفوناتهم مكيجاوبوش عليهم مقدرو يقولو لياسين والو تلفت بيهم دنيا ولارض وعقلهم ترفع حتى جات راوية وقالو ليها شنو كاين دغيا هزات طوموبيلتها ولحقات عليهم هي. و ايلاف لكلينيك ...
فؤاد : شنو هادو غايبقاو ليا هنا ؟؟؟
الياس : تهدن اخويا ميكون غير الخير راك عارف يسرى توقف عليهم حتى يفليوها ويعرفو شنو كاين ...
فؤاد "واصل لاخر ديالو عياا وهو يتسنى راه هذا الله ...حتى بدا يضرب بايديه ويتنخد وينفت وينفخ ...ويكدد سنانو دنيا ضاقت بيه على وشك ينوض يدخل لعندهم يعرف غي اش كاين حتى خرجات يسرى عندهم هي لولة حيدات لكمامة ...وقف لعندها عينيه مكيرمشوش " : شنووو مالها ؟؟؟
يسرى : تهدن ا خويا يكون خير ...درنا ليها فحوصات داكشي مناش كنا شاكين هي كان جنبها ليمن هطاها صداع بزاااف فلول فاش كنتي كتقوليها دوزي ومبغاتش مداتهاش فيه ديك ساعة كان عادي ممكن تبع دوا عاد نشوفو العملية ...وهادشي تاكدنا منو بفحوصات اشعة x-ray والفحوصات لاخرى …
الياس : سلامة شمن عملية ؟
يسرى : مصرانة زايدة الياس وتنقخات ليها بزاف كون تعطلت غير ساعة كانت غادي طرطق ...داكشي علاش شدها صداع فكرشها كلها ...
فؤاد "على طولته تخبط فوق الكرسي حتى جا الياس عندو " : ش شنو غادي دير دابا ؟؟؟ "غوت بجهد " هضري دغيا ؟؟
يسرى : الله يخليك غير تهدن راه مكلفين بيها دابا شي شوي وغادخل لعملية نيشان ...والى تعطلنا هادشي غايهدد حياتها مغانزيدو نتعطلو حتى دقيقة مزال ...
فؤاد : بغيت نشوفها ...
يسرى "بقات شحااال كتفكر " : تت واخا دخل ولكن دغيا باش نحيدو علينا هادشي متعطلش معاها عافاك ....
ناض بسرعة تبعها لداخل لقاهم كيوجدو ومشاو باش يعقمو غرفة العمليات وهي حيدو ليها حوايجها وكيلبسوها فلباس باش دخل لعملية مغطين ليها راسها ومغطة فالبياص وجهها بيض مسكينة وعينيها ساداهم بالعيا ....حتى قرب ليها وقبط ايديها باسها ...
فؤاد : عمارة داري وحياتي ورفيقة دربي الي هازا همي وهبالي ...شنو ضارك يضرني معاك وبالي يهنى من جيهتك ...
فؤاد "عصباتو ولات غير كتخربق ...شاف فيسرى غمضات ليه عينيها باش يسلك معاها جبد تيليفونو ودوز رقمو نيشان حتى كان غايقطع وهي تقبط ليه ايدو زيرات عليها ....
صونا ليه وصونا والو مكيجاوبش حتى هو ....حتى عاود صونا تاني باصرار منها عاد جاوبو ....
ياسين : الوليييد !! شنووو واقع مالكم حتى واحد ما بغا يجاوبني جهلتو ملتي ؟؟؟
فؤاد : مكاين والو غير تهدن ...
ياسين : ماعند جدري ما يتهدن شنو واقع ؟؟؟
فؤاد : مكاين والو غير ماساليتش كان عندي اجتماع سري معندك لاش تعرف داكشي ...
يامنة : بييخير غير عييت احنينة ضرتني ديك نخصة تاني غادي نمشي ندوز عليها ...
ياسين : هضرتي مكتسمعيهاش راسك قاصح اميمتي ...ماااعليش ردي لبال راسك حتى نتشاوفو ...ماجات فين تجاوب قطع عليها ...
يسرى : يامنة يلاه خاصك دخلي دابا ...
فؤاد : غزالي ماتخافيش انا معاك ...
يامنة "نزلو دموعها يجريييييو " : شوف ليا ولادي الحبيب عافاك وسول فاسامة خاطري كيبقا مشوش عليه ..."جروها غادين بيها وهو شاد ليها فايدها تابعهم وهي توصي وتهضر حتى حلو باب البلوك والايدين الي تجمعو كانو ضامين بعضياتهم تفرقو ...
يسرى : فؤاد خويا ميكون غير الخير غير مصرانة زايدة تحيد دغيا ميتعطلوش فيها ...
فؤاد : وقفي معاهم ردي ليها البال راها درويشة ما ديال عذاب ...
يسرى : كون هاني ..."خلاتو ودخلات معاهم مغادير والو فقط غير غادي تراقب وتشوف بحكم ماشي اختصاصها وغير طلبات طبيب المختص فالجراحة العامة باش دخل معاه ....اما هو بقا تما واقف حتى تمو جايين كل من يسوف وصهيب والياس وعيالاتهم ونجوى وراوية ونجود والكل ...لقاوه واقف كيمشي ويجي تاحد ماهضر معاه فات يوسف ....
يوسف : امضرا خويا ...
فؤاد "كيمشي ويجي هز ايدو ومد صبعو لفوق " : في رعاية الله ا يوسف دعي معاها ...
صهيب : الله يكون معاها ...
واحد شوي حتى تم جاي محمد الحبيب معاه مينة وايساف واشرف وعلي جايين كيجريو واشرف عينيه مغرغرين بدموع ...
الحبيب"حابس دموعو " : الوليد ...حنانتي ...
فؤاد "جرو وعنقو بجنب طبطب عليه " : دعي مع ميمتك ميكون غير الخير عاوني اولدي عاوني ...
الحبيب "دار ايديه على راسو وتكا عالحايط " : ياااربي شافي ليا الحنانة ورضايا ياربي بلا بيها مكاين لا دنيا لا غيرها ...
اشرف غير حادر راسو وعينيه لارض ....
بقاو شحال وهما جالسين نجود شادا القران وتقرا وفؤاد هاديك وقفتو ملي دخلوها وهو عند باب البلوك الي لداخل ديالو خدامين كيتقاتلو معاها ...
يسرى "دايرة الكمامة وكتهضر مقابلة مع شاشة الي كتبين شنو كيدير طبيب ...ويامنة خاشين ليها تيو في فمها مشااات غابت بفعل البنج ..." : شنو واقع ؟
طبيب "شاف فيها عرقان " : منفوخة بزاااف ...مشكيل ماشي هنا ؟
يسرى : هزات ماهزات بلاد كاملة فقلبها عمرها شكات ولا قالت اش ضرني ...
طبيب : هادشي اثر عليها وعلى صحتها ها علاش كنقولو الخاطر يكون متيسع ابنتي ...العامل النفسي هو الي كيلعب على صحتنا ...
يسرى : شنو الوضع دابا دكتور ؟
دكتور : حنا كنديرو الي علينا …"عوج فمو " بون ...دكتور رمسيس اولا هي مصايماش تمنية سوايع قبل عندها cas ايغجون …c'est une appendicite sévére.pfff donc il faut l'opérer sans attendre (حالة التهاب زائدة دابا حنا بحاجة نجريو العملية على الفور ) وزيد منفوخة بزاف كنتسايس معاها ابنتي "واحد شوي سكت وجهو تزير .."
يسرى "كتشوف فشاشة مقدراتش تهضر باش متزيدش تزعجو " ...
دكتور : تت mais noooooon ...
يسرى : ش شنو ؟؟؟
ازيد من ساعتين وهما جالسين شي كيقرا القران شي كيردد الاذكار ويسبح وشي كيدعي وشي كيمشي ويجي وشي مشا يشوف الفيلا ودراري وهنا يخص الذكر جا ومروان ...شكون الي قاد يصبر والصبر كيضبر على قولة فؤاد الي هو بنفسو قهرو صبر من جيهتها ...حتى مشا جلس فواحد الكرسي بعيييد دار ايديه جامعهم وحطهم على جبهتو مغمض عينيه ...كيفكر وعقلو فتفكيرو غير مع حب حياتو مرته الي عشقها وهي فسن خمسطاش لسنة لقاها مرته بدون علمو والي ناض صداع بسباب حطوه امام الامر الواقع الا انه اعتابرها هدية
من عند الله جابها ليه ...بقا يفكر ويفكر حتى لقا راسو كيردد ادعية من فمو ...
فؤاد"بصوت منخفض شوي وبعيد عليهم ....
" : يا ودود يا مجيد يا ذا العرش المجيد يامن يرجى لكل عظيم أن تكشف ضر زوجتي وترحم ضعفها وقر بها عين ابنائها ياحي ياقيوم اللهم انت الشافي المعافي إنك على كل شيء قدير اشفها ومرضى المسلمين. زوجتي اللهم أشفها وعافها وارفع عنها ما ألم بها وأجعل ما أصابها في ميزان حسناتها."هز عينيه لفووق ..." ...ياااارب ...
حتى وقف قدامو يوسف بقا فيه وعز عليه عمر يامنة ماوصلات العملية والمشفى من غير لولادة ولا فاش تهرساات كانو مجرد حاجات خفيفة ماشي بين الحياة والموت ...اول مرة كيشوفو منكسر وخايف بزاااف لهاد درجة ...
يوسف "تحنى على ركابيه لعندو وشاف فيه حط ايديه على ركبتو " : خويا كون مع الله يكون معاك ...يامنة ختنا وحنانتنا وصبارة فينا مزال صغيرة ربي يطول عمرها ...
فؤاد "شاف فيه بشوفة طوييييلة هازة وهازة وهاازة ونطق بدون شعور كيهضر" : الحنانة الي هزات هبالي وهزات همي كلو ما تقاسماتو معايا ما خلاتو يضرني ...هزات الهم على كتافها وهي صغيرة لا طفولة عاشتها لا شباب عاشتو عادي ...غصبوها بزواج وهي سنان الحليب ...بكرها لول هزاتو هزات معاه
المشاكيل والمرض والقهرة تابعة قهرة وهي تسنا فيا نرجع من الموت (كان فاش كانت حاملة بياسين وقعت ليه كسيدة فموسكو بسباب المافيا بقا شحاال غابر ) صبرات لهمو الي زادها هم ...هموم وهموم هزاتهم على كتافها ولربي حامدة وشاكرة ...قبل منهضر تعرف اش بغيت واش بيا واش ضارني واشمن هم شادني ...
.....في هاد الاثناء كيشوف ومركز وحداه نوار بجنبو معارفة واش تهضر معاه ولا شنو دير ولا شنو تصرف ...بقات غير جالسة جامعة ايديها عندها حتى ضار شاف فيها ولاحض توترها وخوفها عليه ...
يوسف كيشوف فيه كيعاود وعينيه غرغرو بجهد ...كيسمع لكل كلمة كينطق من اعماق قلبو كاتخرج ...
فؤاد : ربي يسمح ليا ويغفر ليا الى نطقت هاد الحروف من فمي ومرادي نبغيه يوصل ويقبل خالقي دعائي ...يامنة بلا بيها حياتي معندي بيها غراض كيف عايش كيف لا ...بغيت ربي يومي قبل يومها ...جاتني بنت صغيرة ربيتها على ايدي حطوني امام الامر الواقع حتى لقيتها على ذمتي ...."شاف فيه ونزلات دمعة كتجريييي من عينو ليمنى " ...احلى واغلى امر واقع تحطيت فيه ...هي يامنة جنتي انا ودنيتي مغاتبقا ليا تاحاجة الى مشات غاليتي ....
العملية الي كتستغرق مدة بسيطة لاستئصال الزائدة الدودية هاهي دابا في حالة يامنة جلسو فيها اكثر ...الطبيب وجهو تزير وعروقاتو كتكب ولفرملية حداه كتمسح ليه واحد حاضي الضغط ولاخور دقات القلب والفرمليات مزاكينش بالمشي والمجي جاب الله مكيدخلوش ويخرجو قدامهم كيخرجو من الباب المخصص لاطباء والفراملية والاطر الطبية بلا ميشوفهم حد ...
يسرى : شنو الحالة ؟؟
دكتور "الصمت عروقاتو تكب مبقاش كيهضر معاها ولا تركيزو مع يامنة وحالتها ..."
يسرى ولات تصرط فريق شافت فشاشة وعرفات شنو كاين ...
يسرى"جمعات ايديها على فمها ونطقات بصوت شبه مسموع منخفض نضرا لتوثر الوضع " : يااربي سلامة ...يااربي شوف من حالها ياارب ...
في هاد اللحضة الصبر ضبرهم فؤاد بقا جالس شاد ديك الركنة فين جلس فين بقا عينيه كيشوفو لارض تاحد ما قرب ليه من غير يوسف قاليه ديك الهضرة ضرو قلبو عليه حدو طبطب عليه ودعا معاه هاد ساعة مكاين غير دعاء ثم الدعاء لان الله وحده هو الي بيده كل شيء الشفاء او الموت ...
نجود : يااربي عجل الشيفاء من عندك يااا رحمن نزل الرحمة على عبدك ياارب ...
صهيب "جالس حدا يوسف ..ضار شاف فيه ونطق " : شوف حالتو كيدايرة ...
يوسف "ضحك بجنب " : وايلي راه يامنة هاديك اصهيب ...نسيتي ولا نفكرك ...
صهيب : منكذبش عليك اول مرة نشوفو بهاد الحالة ويا جبل ما يهزك ريح ...
الياس"كيكدد فصبعو بالتفكير والسهو وتنهد " : اودييي صبر ديك السيدة فاش يتقادا راه خاطرك يضرك عليها ...الله يجيب شفاء...
يوسف : نورمالمون المصرانة زايدة مكيجلسوش فيها قد هادشي علاش تعطلو ؟
صهيب : شش عنداك يسمعك راه كيبان ليا على نقشة غير من جلستو ...
الياس : متشوفش كيفاش تهضر مع يسرى ا يوسف ؟
يوسف : يسرى داخلة معاها ...انوض نشوف معتز دكتور معاها هنا كنعرفو هو يجيب لينا الخبار "ناض "
صهيب : احسن مغادير ،..
مشا من الجناح الي فيه البلوك وعيط ليه فتيليفون جاوبو فالحين ومن محاسن صدف لقاه مسالي ديك اللحضة ...
يوسف : لا والو خويا نعرفو غير اش كاين. راجلها لحد الان صابر وساكت واستغربنا وصحتو على قد الحال راك عارف شنو واقع ليه اخر مرة مبغيناهش يتنكس اخويا ...
معتز : وخا اجي معايا نطلعو لعندهم وندخل ديك ساعة نشوف الوضع ...
طلعو فالمصعد لطابق ديال لبلوك ودخل هو وياه من جيهة لاخرى خلاه ودخل لعندهم غير تما لداخل مدخلش لغرفة العمليات وطقس على حالتها شي عشرة دقايق حتى خرج لعندو ...
يوسف : امضرا خويا ...
معتز : وشنو نقوليك هي نورمالمون عملية استئصال زايدة عادية ولكن الي عرفت انها منفوخة بزااف لدرجة خاص يتسايس معاها باش مطرطقش ليه على باقي الاعضاء والا غاتهدد حياتها ...
يوسف "خرج عينيه " : و وايلي ؟؟ و شنو دابا ...
معتز"طبطب ليه على كتفو " : في يد الله اخويا ف يد الله ...
يوسف "لسانو نمل عليه وريقو نشف في حلقو " : ك كيفاش ؟
معتز : الي عليه راه كيديرو ا يوسف مركز معاها بزاف باش مطرطقش عرفتي يمكن ربي بغا يطول ليها عمرها انها جات فوقت مناسب على حسب ماعرفت بالفحوصات منفوخة بزاف وفي هاد الحالة الى طرطقات الله يحفض مابغيناهاش ...
يوسف : و واخا يحفضك خويا معتز ...
معتز : مرحبا راه وصيت يسرى تخرج طمنكم متعطلش نضرا لحالة الانتظار الي نتوما فيها عالالقل غير تعطيكم الجديد ...
نص ساعة تقريبا الي دازت جا يوسف غمز صهيب مقدرش يقوليهم اش كاين باش ميزيدش يوترهم اكثر ...وهما جالسين واحد اللحضة حتى تهز فؤاد وقف على طولته حتى هزو فيه عينيهم ...
فؤاد : شنو شنوووو غانبقااو نتسنااااو ؟؟؟؟
م.الحبيب "مشا لعندو قرب ليه " : الوليد تهدن ..
فؤاد "ضار خنزر فيه " : شحال من ساعة وانا مهدن ...اااا ؟؟؟ هضاااااااار شحال من ساعة ...هاديك الي لداخل شكون ؟؟؟ شكوووون"وجهو تجيف بالاعصاب " ...
يسرى "خرجات من البلوك " : خويا فؤااااد...
اغلب الي جالسين كيشوفو فيه ومقدروش يلوموه ولا يعاتبوه عارفين يامنة شنو هي عندو شنو بالنسبة ليه اش داز واش دوزات معاه من حب مشاكل عشق وصبرات ليه ومرض الي داز عليه وتمارة الي دوزات مع ولادها بثلاثة ...صهيب وقف هو ويوسف والياس كيشوفو فيه كيتسناو لا يدير شي رد فعل مجهد باش يتحاماو عليه بثلاثة يهدنوه ...الحبيب واقف معاه شادو
الحبيب "عينيه حمرين تاهو غير واقف بزز " : الوليد الله يطول عمرك تهدن عاارفين كلنا على اعصابنا راه كون كانت شي حاجة كان غيقولوها ...صحتك الوليد واش بغيتي حتى نتا طيح ؟ تزيدونا تانتوما بجوج ؟
فؤاد "شاف فيها وطلق من محمد الحبيب نضراتو تحولو لنضرة سؤال " : ش شنووو ؟؟؟
يوسف "قرب " : يسرى امضرا ...
يسرى "تنهدات " : ففف سمحو ليا تعطلنا عليكم وشغلنا ليكم بالكم ...حالتها كانت غير مع الحالات الي مصرانة زايدة منفوخة بزاف لدرجة الى طرطقات كانت غاتهدد حياتها باش نحطكم فالصورة ...والشي الي خلانا تعطلنا بشوي بشوي مسايس باش متنفاجرش هذاكشي علاش وقع تاخير ....يعني راها الحمد لله هاد ساعة بخير خليتهم كيخيطو ليها وينضفو باش نقلوها لانعاش غاتبقا فيه حتى يحيد البنج وتفيق ..."مساحات دموعها وضحكات " دازت منها الحمد لله ياربي ....
فؤاد "جلس لارض على طولته وفمو محلول باقي مصدوم مسكين قلبو بدا يضرب بجههددد حتى شدو غير الحبيب وعلي الي كانو حداه شاف فيها وعينيه فيهم لمعان " : شنو مزيانة ؟؟
يسرى : الحمد لله ...باقي الهضرة حتى تفيق ونهضرو فيها ونوصيك على شحال من حاجة ديرها ...
الحبيب : ههههه الخالة يعني هي مزيانة دابا ؟؟ "نزلت دمعة كتجري من عينيه ممسحهاش بقا غير يضحك ويبوس فراس باه " ...
يسرى : الحمد لله "دموعها مبغاوش يحبسو كتضحك وتمسح فيهم حتى قرب ليها يوسف عنقها وباس راسها وخلاها في حضنو كتبكيييي خلاتهم كلهم كيبكيو ونجود تدعي وتشكر الله ...اشرف ضرب دوزة ومشا خرج خلاهم تاحد ما داها فيه ...يمكن مع انشغالهم وفرحتهم ....
فؤاد : راكي شفتي كلشي شنو وقع ...غادي نقولها ليه ضروري ميمتو هاديك ...
يسرى : واخا ...
مشات يسرى هبطات لتحت عندها لانعاش وبقاو هما جاو عندو سلمو عليه وطلب منهم اغلب يمشيو لديورهم حتى لصباح ويجيو يشوفوها بقا غير يوسف وصهيب والياس والحبيب وعلي اما ايساف هز راوية ونجود وباه مشاو لفيلا الكبيرة حتى يوجعو الغذ ليه فالصباح ....
فؤاد "خرج برا بينما وصل وقت باش يدخل عندها خرج يضربو برد شوي يتنفس ويكمي يتهدن ليه شوي ...واقف كيكمي وحجبانو معقودين ...كيشوف حتى قشع اشرف جالس فواحد القنيتة وحدة حادر راسو وكيمسح عينيه بطرف كمايمو وكتافو كتيهزو ويتحطو ....قوس حجبانو وزگا فيه شوفة ...مشا لعندو قرب ليه وحنحن حتى ناض اشرف ضار شاف فيه ....
اشرف "هز كتافو وصوته كيغلب عليه البكا" : واااالو "طولها باش ميبكيش " ...
فؤاد : شنو كتبكييي ؟؟؟
اشرف "مقدرش يصبر مزال حتى بدا يبكي ويتنخصص تلاح ليه على صدرو وعنقو كيبكيييييييييي ويقول مبكيت ...مهضرش معاه فؤاد خلاه حتى بكا على خاطرو حط ايدو على ضهرو ودوز عليه "
فؤاد"قابلو معاه وهو مزياال كيبكي " : عليها ؟؟
اشرف : وشكووون من غيرها ؟؟
فؤاد : شفتي الحبيب ؟ عينيه مسحهم ودعا لله سبحانه وشكرو على نعمة طول العمر الي عطاها لميمتو ...وشفاها ليه ...شنو الفرق بينك ولين الحبيب ؟ حتى هي ميمتك حتى نتا دير فحالو وشكر الله ودعي معاها بطول العمر ...
اشرف : ماا صبرتش حيث هي ميمتي الي رباتني والي دارتني بحالي بحال ولادها ...الي سهرات ليالي فاش كنمرض والي هزات همي ...اااااش كاين من غيرها ؟
فؤاد : ماشي فحالك فحال ولادها راك واحد من ولادها مكاين فرق بيناتكم ...من حقك تبقا فيك وتبكي عليها "هز صبعو " دابا ماشي وقت البكا دابا وقت شكر لله وحده ودعاء ..."باس ليه جبهتو " الله يرضي عليك اولدي والحمد لله على سلامة حنانتك حتى انت ...
دازت نصف ساعة ودخلو بزوج من بعد ما كان كيبكي ومشافو حد داها فيه باه الشخص الي رباه من وهو لحمة بمصارنها مليوحة قدام باب دارو هو الي رجع ليه ضحكة وطمنو على يامنة الي كيعتابرها ماشي غير انسانة رباتو حتى هي من بعد نجود وانما كان ليها الفضل الاكبر فرعايته وتربيته دارتو فحالو فحال ولادها وكبراتو معاهم ....دخل لحق على الي جالسين تما اما فؤاد دخل لبلاصة الانعاش لبساتو يسرى لباس معقم باش يدخل والكمامة وراسو حتى هو ...وتبعها فاتو اشخاص ناعسين حتى هما فالانعاش وصوت الالات بوحد الي خدام وسط سهيييييط والكاالم ....بقا تابعها حتى داتو لواحد الركنة هما بيوتة كل بيت ضاير بيه زاج كيدخل ليه غير طبيب ولا فرملية الي كيراقبو ....حيدات ليه ستائر الي ضايرين وهي تبان ليه حس بقلبو داز عليه موس ماضي كيف البرق ضرب ليه تما ...حتى غمض عينيه ...فييينهيا مزال غايبة والبنج باقي محيدش ...جامعين ليها شعرها ف طاقية معقمة حالا فمها خاشين ليها تيو وانبوب الاكسجين فنيفها ...
دايرة ايد فوق ايد على كرشها مغطينها بايزار بيض وعريانة كلها من تحت ليزار ...وجهها بيض مسكينة وعينيها تقولي غير ناعسة كيرمشو مرة مرة ...حتى وقف كيشوف فيها من بعيد تفهم الوضع انه ميقدرش يدخل عندها ...كيشوف غييير فديك الملاك الي قدامو كيفاش مددة على داك سرير الي ربي شاف من حالها ونجاها لوليداتها ....
فؤاد "شاف فيها بجنب وحرك راسو بمعنى واخا مشات هي وخلاتو بقا كيشوف فيها شوية وخرج من الانعاش تبعها لمكتب ديالها دق وهو يدخل ...لقا طبيب معاها جالس سلم عليه وجلس مقابل ليها "
يسرى : الحمد لله على سلامتها ...احم ندخل فالموضوع حيث عارفاك مكتبغيش لف ودوران هههه ...مهم خويا فؤاد الي نوصيك هو الحمد لله هي حاليا مزيانة ...مهم نخلي دكتور هو الي يشرح ليك حيث هو الي دار ليها لاوپيغاسيون ...
دكتور : سي فؤاد على سلامة المدام ...كيف قالت ليك دكتور رمسيس يسرى دازت منها سالمة بحكم كانت منفوخة بزاف لدرجة الانفجار فاي لحضة الي كان ممكن يسبب ليها الموت لا سامح الله ...
فؤاد : كمل ...
طبيب : بحفض الله ورعايته كان معانا ...الي مهم دابا هو الي غانقوليك بالنسبة لمرارة عندها طايبة بزاف ...غادي نكتب ليها على دوا وتحاليل ديرهم اصلا غايديروهم ليها ماحدها هنا فالكلينيك ...والي اهم
هو متبقاش تقلق بزاف وتمرض صحتها النفسية ...غادي ونعطيك موعد مع اختصاصي باش يتابع حالتها ومايكون غير الخير ...الي عليا درتو والحمد لله على سلامتها ...
فؤاد : مكاينش شي خطر ؟؟؟؟؟
طبيب : لا لا دير غير شنو قلت ليك وضروري ماتابع عند اختصاصي خصوصا المرارة ...هذا هو الي بغيناك تعرف ...
فؤاد : ان شاء الله ...
ناض من عندهم وخرج لحق على الي جالسين تما طمنهم عليها كاين الي بقا معاه وكاين الي مشا حتى فالاخير بقا غير هو من بعد ما اصر عليهم يمشيو بكلمة وحدة معاودوهاش ...
الثلاثة ديال صباح ...جالسين دراري فجردة مجاهمش نعاس بحكم بقاو معطلين فالكلينيك حتى لاش من وقت فالليل ...مينة والحبيب وعلي و يوسف والياس وايساف حتى هو معاهم واشرف....
مينة : دابا هي مزيانة بابا نقدرو نشوفوها غذا ؟
يوسف : مزيانة حتى تفيق من البنج وشوفوها حتى تطلع لشومبر عادي حسن ...
مزال كيعاود فيها حتى دخلات سيارته حل ليه العساس وفرانا قدااامهم ....حتى وقفو كلهم شافوه هبط هو ونوار من طوموبيل ....
ايساف : لاي لاي لاي لااااي ....
ماعرفو باااش تبلاو واصلا كان متوقع نضرا لطبع ديالو الى شم فيك ريحة الزيگزاگ ولا الغدر يطيرك فسما الى شك يقطعو ليك باليقين ويهني راسو ...وداكشي الي تبغيه يديرو والله لا دارو ليك ...حتى تمو جايين فاش شافهم فهاد الوقيتة مجمعين فجردة شاف فساعتو وعقد غوباشتو ...وتم جاي لعندهم حتى وقف عليهم وهما واقفين اصلا ولا شي يشوف فشي ...
ياسين : شنو هاد ساعة ونتوما هنا ؟ كاينة شي حاجة ؟
يوسف : على سلامتك اولدي مالك ماقلتي راك جاي ؟
مشات نوار لعند يوسف عنقاتو وسلمات عليه ...
ياسين "صغر عينيه " : شنو واقع ا يوسف ؟
الحبيب : خويا ...م "شاف فيوسف " ...
نوار "شافت ف باها " : واش كاينة شي حاجة بابا ؟ حتى سهرانين لدابا ؟
ياسين : شنوو كاين ؟؟؟ "حدر عينيه كيهضر وحجبانو مرفوعين بعصبية " شي واحد يهضر بلا دوران فالهضرة ؟؟ طلقووني ...
الحبيب : خويا غا تهدن مكاين باس غير الوليدة عيانة شوية داكشي باش دارت عملية زايدة راك عارف كتجي على غفلة وهي دابا دازت منها دوزتها بيخير وعلى خير جا على غفلة كلنا مفهمنا وا....
ياسين : بلاتي بلاتي ....دارت عملية على غفلة ؟ ايه وامتا كنتو ناوين تقولوها ليا بسلامة ؟؟؟؟؟
يوسف : اولدي راه هي ال....
مكيخليهمش حتى يكملو هضرتهم كطلع ليه القردة لسما ...
ياسين : واااااااااااااا مييييييمتي بين الحياة والموت وقاليك ما كاين بااااس ؟؟؟ واش شوية لبااااس ؟؟؟ ااااا ؟؟؟ "كيغوت وكشاشكو بدات تخرج ...
يوسف : ا ولدي يهديك الله ...
ياسين "هز ايدو وقفو وحد صبعو على فمو مبقاش كيعقل شنو كيقول " : شششش مااااا تقووووول تا حاجة ..."خرج عينيه " ...بانت ليه طابلة قبسها حتى تردخات كلها تشتات ..."
نوار "غوتات بالخلعة وتخشات ف باها " ...
الحبيب : ياسييين ..."بغا يقرب ليه هز ايدو على شكل بونية وعطاها ليه لوجه حتى جابو لارض مشبح منخرو بدا يدوز بدم ..." اشرف دار ايديه على راسو وعلي بغا يمشي لعند الحبيب وهو يضور ياسين خنزر فيه حتى رجع بلور ...غواتو وصل لداخل لفيلا كانو ناعسين فاق صهيب كانت سارة بغات طل رجعها حيث كانو متوقعين هزد ردة الفعل ...
يوسف : الاطييييف "غوت " ياسين ؟؟؟
الياس "تاهو غوت عليه " : ياسييييين ...
ياسين "هز صبعو وجهو تزير " : شي واحد يوصل عدو ربي منعقل لا على كبير لا صغير ..تقاااودو عليا جملة ."ضار دورة ومشا لطوموبيل ركب فيها وكسيرا حتى تهزات ودارت صوت تسمع فارجاء الفيلا كلها ....
نوار "كترعد وسط حضن باها الي كمش عليها " ...
مينة "تحنات عند الحبيب " : تت الحبيب خويا ؟؟
الحبيب "وقفها بايدو " : ماوقع باس عارفو غايديرها حمدي الله مفرشخ دنيا كلها ...
يوسف : وعبر عليك تانت مالك ماتقولها لخوك ؟ لاش سكتو كلكم ؟
الحبيب "مد ليه ايساف كلينيكس يمسح بيه دم " : اش غانقول وقاليك الوليدة مبغاتوش يعرف. را هي الي دارت هادشي ...
ايساف : كون فكيتيه كان غاخربق ليك سلوكة فقنت اخور تانت هههه
اشرف : ارا نقادهم ليك راني اختصاصي فصيانة 🌚...
واقف حدا واحد شرجم كيطل على برا جردة لاكلينيك...داخل منو الهواء واقف قريب لجناح ديال الانعاش عاد قطع تيليفون وواقف مربع ايديه بديك الوقفة رجولية الي ما دا منها زمان والو وديك طولة حدو شعر راسو كساه بعض شعيرات شيب ونضرته الحادة الي شافها يخاف وهيبته تسبق الضحكة الي غايبة لكن بلاصتها تغوبيشة الهيبة كيشوف فجردة لتحت ...عينو مغمضاتش وهو كيتسنى وقتاش تفيق عمارة دارو ...الي هي دابا فغرفة الانعاش مرة مرة يسرى كطل عليها لا تفيق فاي لحضة ...
يسرى : داكوغ انا دابا غادي نمشي لمكتب ديالي ونرجع دغيا ...غانبقا معاها دابا حتى تفيق غير شوفي بقايا الحالات لي تما "ضارت باش تخرج حتى بان ليها جاي لابس لباس الانعاش وداخل داير الكمامة حجبانو بكترت ما كحلين وطوال عاقدهم حتى تلاصقو ...وعينيه حمرييين " ...ياسين !!!
ياسين : فين الوليدة !!!
يسرى : اا ؟ اه ولدي اجي معايا ...
ياسين : بغيت ندخل نشوفها مابغيتش نشوف من زاج ...
يسرى : تت ...واخا ولدي واخا اجي ...
تبعها حتى داتو لعندها ...دخل كيسمع صوت الالة عند راسها هز عينيه فيها فوق السرير مغطة ومغطينها ولايزار فوق صدرها كتافها كانو عريانين غطاتهم غير يسرى باش سترتها حيدو ليها الانبوب من فمها خلاو غير انبوب الاكسجين دايز ...قرب لعندها اكثر حتى حط ايديه على ايدها وكمش عليها كانت بااردة ...وجهها بيض وفمها تاهو بيض ...
ياسين "باس ليها ايدها " : حنانة ديالي !! اش وصلك لهاد الحالة وبلاصتك ما ديال هنا ميمتي بلاصتك مااا ديال هنا ...علاش خبيتي عليا ونتي مهلوكة فصحتك !! ...
بقاو عينيها كيرمشو يرمشو وكتر فيهم ترماش بزاف حتى كمشتهم وهي تحلهم ...
ياسين "غوبش وهو يصور عيط ليسرى الي جات لعندو " : شنو مالها ؟؟
يسرى : هههه والو غير فاقت من البنج هكا كيوقع ليهم شوية بشوية يحيد وتهضر ...خليها دابا حتى نطلعوها لفوق وطلع عندها ولدي واخا ؟
ياسين "باس ليها ايدها " : واخا نطلعو لفوق ونشوفك واخا ؟ "كمشات ليه عينيها وهي تبتاسم ديك الابتسامة الي كيحس بيها راضية عليه " ...
خرج من عندها حيد اللباس وخرج طلع لفوق وهو يلقا نوار جالسة قدام باب الغرفة كتسنى فيه باقي بحوايجها باش جات معاه ...غير وحدها جالسة فوق كراسا تما الشومبر ...غير شافتو وهي توقف كترمش فيه ...
ياسين : شكون جابك ؟؟؟
نوار : بابا قاليا حتى لصباح ولكن مابغيتش نخليك وحدك هو دابا مع عمو فؤاد وانا قالو ليا غاتجي خالتو يامنة هنا قالتها ليا ماما وجيت نيشان ...
من بعد شوية …صوت خطوات قرب لعندها اكثر شاف فيها وصغر عينيه كيقول هي ولا ماشي هي ...
هو : اوو نوار !!
وقف عليها وهو يحنحن ...سلام عليكم ...
ياسين "ضار شاف فيه "
هو : نوار !!!
نوار "شافت فيه وهي تخرج عينيها كانت كتعرفو غير كتهضر معاه كان من دوك الي تعرفت عليهم باش تنسا حب ياسين الي كبر معاها لكن كانت مكتكملش سيمانة وتكركبهم كانو كلهم غير هضرة فالفيس لا غير الا هذا خدام فصيانة تقني فالكلينيك ...هو الوحيد الي جا شافها واحد نهار ولكن مقدراتش على تصاحيب ولا شي علاقة خصوصا باها شخص محافض بزاف من هاد ناحية وخا كول وضحوكي ..." : شكون انت ؟ "ضربتها ليه بنكرة ههههع"
هو : وايلي نوار ؟ "ماعرفش واش ياسين راجلها وميحسابش ليه معاها ...اصلا كانو فصلو العناق وياسين كان واقف بعيد عليها ..." انا سعيد ...نسيتيني دغيا ...وقع عطب فسانسور هنا ديال المستعجلات وجيت نصايبو فهاد الوقت … ههههه واه على صدفة والله حتى توحشتك انوار "مد ليها ايدو يسلم عليها "
ياسين "خرج عينيه ورفع حاجبو " : عاود عاود "لقاه على سبة طوا كمايم قميجتو حتى لفوق ...عوج راسو وصغر عينيه مكزز على سنانو وتم جاي ليه " ..عاود القواد بوك شنو قلتي دابا؟؟؟
نور الياسين الجزء 13
محتوى القصة
التنقل بين الأجزاء