طلقها ليها بواحد تخنزيرة وهي كلاتها القرصة من تما بغات تحك وبغات تشوفو وتيخنزر تدعقات وبغات تهضر وتفتح معاه الموضوع حيث بصح خاصها تشوف اشنو غادير وتحدد مسارها قبل ماتدخل تقرا وعاد قدامهم العرس الي مقرر يدار بعد انتهاء الدراسة فالصيف ...والى حملات غاتبرزط وهي كتقرا وخا منها عدد دخلو وهما والدين ولا ولدو وسط القرايا ولا وهما حوامل الخ...واش هي غايوقع ليها هادشي ؟ كي غادير ؟ والعرس غزدي تبرز وهي حاملة ولا وهي عاد والدة ...
نوار : وانا كنقرا وعاد كاين العرس فالصيف ياك واعدتيني بيه وهاكا مقررين ..."شافت فيه وهضرات بشجاعة داكشي الي علماتها راوية تقول وخا معطل ماعليش الريزو عندها تقيل شوي عاد وصلتها تقولها " ...
ياسين "ناض من فوق منها ووقف مخليها ومشا جيهة العين جبد كارو من جيبو والبريكة شعلو بدا كيكمي مهضرش مزال موراها ولا نطق بكلمة " ناضت هي قادت حوايجها وحالتها وقفات كتشوف فيه عرفاتو بغا يتكالما بالكارو عاد باش تقدر تحاور معاه ...حتى قرب يكملو عاد تشجعات وقربات ليه جات وقفات حداه كتشوف فالعين كتجرييي صافية وبااردة ...
ياسين "كيشوف قدامو ويسوط فدخان ونطق " : ملي وعيت على الدنيا وانا في بالي وعقلي نهار نكون راسي وندير مستقبلي ونرجع من برا ندير داري ...تكون مرتي من اختياري انا وعليها ومعاها وبيها يكونو ولادي وتكون عندي عائلة صغيرة تعمر عليا "هز ايديه لفوق " فحالي فحال اي راجل فهاد دنيا من اوليوياتو فزواج التفاهم وبنت الناس تكون معاه فالحلوة والمرةيتقاسمو همومهم بجوج يتقاسمو حياتهم اقل حاجة بيناتهم يتقاسموها وهادي هي الحياة الزوجية ديالك ديالي وديالي ديالك ونتي الى بغا الله مزلتي غاتدي كلشي فيا كتر من الي ديتي ولادك يكونو من صلبي الى ما فديتهم بحياتي نعطيهم ما كثر ومانفرط ابنت الناس ...كون بغيتك ماتولديش قبل مانحط عليك صبعي غادي نهضرو عليهم ....ماشي نتي اللولة ولا الاخرة الي غاتولدي وسط قرايتك وماشي نتي لولة ولاخرة الي غاتولدي وعادتك منديرهاش ليك نديرها ونزيدك بلا ميحتاج نعرفها ولا تقوليها ليا ...نهزك بسناني… ومنخليكش تغمضي عينيك من حر الوجع والمرض ونخليك ونتي هازا طرف من لحمي ولحمك ودمي ودمك ؟"ضار
شاف فيها وميل راسو حدرو عندها " فهمتيني ؟
نوار "سكتات شحااال تاهي وهزات راسها شافت فيه وشدات ليه فدراعو وقالت " : انا ماشي مبغيتش نولد ياسين انا فاش كنت كنقرا الى غير جاتني سخانة كنغيب ونبقا عيانة حتى كنولي قادرة نفكر انا من نوع دغيا كتاثر عليا الحاجة ونقص من مستوى قرايتي وانا فاش جلست عام مورا الباك حيث عييت فورصيت فاش كنت كنقرا فالباك وخليت تركيزي غير فالقرايا باش قدرت نجيب النقطة الي بغيت ...ماشي مبغيتش انا بغيييت واي وحدة فحالي بغات دارها وراجلها وولاد حداها حتى انا فحالك غير هو ...
ياسين : غادي تفقدي تركيزك فالقرايا ومغادي ديري والو ..."تنهد "...يلاه غايهضر حتى صونا ليه تيليفون كانو الي وصاهم باش يجيبو ليه شنو وصاهم وكيسولوه واش يدخلو عندهم تما ويدخلو ليه داكشي ...مابقاش جبد هاد الموضوع عطا وجهة نضره وحتى هي عطاتها واشنو غايوقع ؟ ديك ساعة غادي يكون حدييييث ..
دخلو ليهم داكشي الي وصا حتى قادوه وحطوه اما هي مشات جلسات حدا العين وحطات رجليها فالما باااارررد حتى كملو ومشاو عيط ليها وضارت مشات عندو قادو داكشي وصايباتو حتى هو كيعاون فيها داكشي متخمميش فيه ناضي فيه بحكم تازوفرييت الي دوز كلشي كيعرفو والبلاصة فين كبر البادية والاسواق فين خدم وداكشي الي دوز عطاوه خبرة كبيييرة ...شعل الفاخر خلاه يزند قادو اللحم وكفتة فالشواية وداكشي
الي تشهاتو حضرو ليها وهي فرحانة وخا ناقشت معاه الهضرة حتى هو ولا نعل الشيطان وكل قال اش بغا واش باغي والتفاهم اجلو هو حتى يدوزو ساعتهم بنشاط بلا مينكدوها على بعضياتهم وتخسر الخرجة
شرقات صباح يوم جديد من بعد ما دازت يومين على اخر خرجة ليهم ويومين على اخر فحص دار الي هو ليريم وشي تحاليل اخرين طلباتهم منهم الطبيبة كانو تحاليل دقيقة يعني الاصح فلاوه وعرفو كي فلاوه فهاد اليومين عيا بزاااف ولا غير مريض وسخانة كتقتل فيه ومع الاسف مينة عرفات بالمرض ديالو غير بالصدفة سمعاتهم فاش كانت داخلة فوقت مبكر على غير عادتها ...بزز باش سكتات من البكا وبزز باش شدات فمها حتى هي حتى يتاكدو ....
يامنة رجعات هي وفؤاد لازرو واسامة رجع لفيرما فتوقيت الي قاليه خوه يجي معاودهاش معاه ...
يسرى "سدات عليه البيت بزز باش هبطات ليه سخانة وجهو ولا ضعييف وصفر وحالتو تشفي العدو حتى من البنية ديالو ضعافت بزاف ...خرجات كانو فدار صهيب ب فاس ...لقات صهيب والياس فالصالون جاو بجوج " : جيتو ...
صهيب : الحاجة "نجود" كتسول عليه بزاف فالتيليفون على غير عادتها "حيث نجود مشات لالمانيا مع علي ونجوى على قبل الطبيب عندمن كانت " ...
يسرى "زهقات ليها دمعة مسحتها دغيا. " : عاافاك ماشي دابا غير حتى نشوفو شنو غايقول لينا ف ليريم ...م م ب "شدات فمها مبقاتش صبرت " اهى اهى عيا عيا بزااااف اخويا البارح عيا بزااااف ...اهى اهى تخيل كيوصيني وهو كيتهتهت بسخانة ...
الياس"عاض صباعو بسنانو حابس عينيه من دموع لا ينزلو ولكن اش خلاه دموع خانوه حتى هو ...ناض بزربة مشا لبالكون الي فالكوزينة مابقاش قدر يهضر غير يهضر كيضرو خاطرو عليه ...واحد المرحلة فهاد الثلاث ايام دازت عليهم وخصوصا بين البارح واليوم مرض بجهد ...
صهيب "ناض عندها طبطب ليها على كتفها بدون شعور باس ليها راسها وقال " : غادي يكون الخير ان شاء الله غذا نتبشرو بالخير ماعرفتي اش كاين ايسرى ختي ...واش غاتوريني فالفردة راني نعرفو ...
يسرى"هزات راسها لسما " : ياااااااربي ياااربي .."كتمسح فدموعها وعينيهاومناخرها وشافت فيه " فؤاد سول عليه ؟
صهيب : قلت ليه سافرتي نتي وياه سياحة ونتي عارفاه مكيتدخلش غير الى بنتو ليه مكاينينش كيسول ...
يسرى : منضنش ميعرفش فؤاد ومن ميعرفوش ..
صهيب : شنو غادي نديرو هو الي كيوصي ماتقولهاش ليه غايهز همي وهو مريض صحتو على قد الحال "هز ايديه وحطهم وتنهد." بغيت ندخل نشوفو ماعليش ؟
يسرى : دخل الى طلعات ليه سخانة قولها ليا حيث هضرت مع طبيبة قالت ليا نبقا نعطيه خافض الحرارة حتى لغذا نعرفو النتيجة ونبداو العلاج ...
حرك راسو ومشا دخل لعندو البيت ...طل عليه كان نااعس وجهو صفررر وتحت عينيه كحل وضيعاان اصلا الوزن الي بان فيه هو الي خلاهم يسافرو لفاس ريتما يبانو النتائج حيث لحد الان باقي متشخصش ليهم اشنو بالضبط والنتيجة ديال الغذ هي الي عليها القرار النهائي ...عض فمو باسف عليه ....
صهيب من الداخل ديالو كيبكي دم على صاحبو وشريكو والفردة ديالو ...عينيه تجغم فيهم الدم بالدموع الي حابس دغيا بانت فيه ...
صهيب "جلس حداه قاس ليه ايديه كانو دافيين " ...شحال وهو جالس حداه وكيشوف فيه ديك الكسدة الي ربي كتب عليها المكتاب وبلاها بالمرض الفتاك ...حتى بدا يحل فعينيه شوي بشوي وضورهم شاف فيه ...
يوسف "حط ايدو على راسو وهضر ببحة النوم والمرض " : العشييير ...
صهيب : ما عيقتيش بنعاس الفردة ؟ تنوض تگعد لا ؟
يوسف"ابتاسم " : ههه والله اخويي الى نعسة سانك سانك ماشهيتك فيها ...
صهيب : ايوى نوض الله يجعل شي بركة نوض نتحركو لعند نص بلاصة ديال بنتك ياك قلتي توحشتيها وبغيتي تشوف فحم الفعايل واش مهلي فيها ...
يوسف : وااا ههه ماكرهت توحشتها فحالااااش اخويا قلبي واكلني عليها معمرها طولت عليا هاد المدة كنقول نمشي نجيبها "نفس كتقطع فيه وكيتخنق كيهضر غير بزز " و و ك نسى راها تزوجت ليا ...انااا الي والد البنات
صهيب : البنات همهم حتى الممات ..."حدر راسو ضحك " تعقل اش كنت بغيت نسميها ؟
يوسف "ضحك وهز راسو كيشوف فسقف وكيهضر باغي يقلب على النفس " : هههههه اييييه نعقاااال على زينة سميات وكون غير مولاتها تفرح غا سمح ليا ولكن مشرارة ديك سيدة ...
مشات بيهم الذاكرة لاول ساعة فاش تولدات نوار وجابوها ليسرى ويوسف يشوفوها
نسميوها على سمية جدة الله يرحمها باقي نعقل عليها واحد نهار عندي عام
سارة"حبسات من ترماش" : عام !!
صهيب : تحكريش نتي ...
يسرى : ايه ؟
صهيب : قرصتني حيث صبحت داك احم
سارة : خهههه صبحتي دايرها فالفراش ...
الياس : البوال "نزل عليه لقرفادة " جمع ايديك ا
يسرى : مزيان واش سميتها ؟ "شادة نوار لحيمة صغيرة بين ايديها وسط مانطة غوز عااد خرجات هي وياها من الولادة " ...
صهيب : عيدة ..
يوسف : عيدة عييييدة ديك عيدة جداك ؟ وتسمي بنتي عيدة ؟ كنت كنتسناك غيييير تنطقها عرفتي علاش ؟
صهيب "ناض وقف " : اصافي هاني غادي ..."مشا هرب "
يوسف : تعالى نعيد بموك الكلب ...
كاع ذكريات ديك الساعة رجعات عليهم غير بالضحك وعلى السمية الي كان بغا يسمي بيها نوار فاول ساعة ليها مسكينة وكانو معجبييين بيها وكل مرة تبات عند شي حد مكيعطيوها ليسرى ترضعها غير بالكشايف ولكن اغلبيتها كانت عند يامنة وفاش كبرات كل مرة مع واحد وحاجتهم ديالها والي بغاتها تحضر كلشي كيخاف عليها وداير ليها الخاطر الي فوق خاطرو من صغرها كانت عندهم مميزة بزاااف ...
صهيب : ههههه ايييي على الكريمة المخفوقة بنتي هاديك ...
يوسف : ورد ليها البال اصهيب ديرها فعينيك كيف كنتي وتهلى فيها ومتخليهاش تحس بجناح طار من عليها تهلاو فيها اصحبي تهلاااو ...
صهيب "ناض ووقف ضار هنا وهنا محاملوووش يقول هاد الهضرة " : يوسف خويا نخليك ترتاح وبراكة من هاد الهضرة الله يستر عليك ...عرفتي اشنو انا نمشي ندير قهيوة ونرجع عندك فيك شي جوع ؟
يوسف "رجع ضور راسو ديك جيه " : وصيت غير على بناتك اصهيب بناتي بناتك وولادك ولادي غااا وصيتك وكان عيب نوصيو ؟
صهيب : اسيدي ميحتاج توصي راهم بناتي قلتيها بفمك كاين شي حد كيتوصى على ولادو ؟
بقاو فالبيت يتقاشحو ويهضرو وفبرا رجع الياس حطات ليه يسرى بلاطو كاس الما والقرعة وحطات صينية اتاي ودوازو جالسيت بجوج كيهضرو حاولات يسرى تهدن الياس حيث بصح ما صبرش حتى صونا الباب ...
يسرى "ناضت " : ياكما مينة هادي ؟
الياس : غالبا هي هي الي عارفة كاينين هنا ...
يسرى : انا نشوف ...
مشات لباب حلاتو مع حلاتو تكاونسات ...اييييييي علامن ومعامن وفيمن ؟ هههه هااايهااات ثم هيهات راه نسر مسكو الدبانة متزهق ليه والى زهقت راه غييير ميك وعارف ومخلي الانسان على خاااطر خاطرو ...
يسرى : خ خويا فؤاد ؟؟
فؤاد"بتخنزيرته المعهودة " : فين ناعس يوسف ؟؟
يسرى "حدرات راسها معاودتهاش الهيبة والاحترام ضروري كحازت عليه " : البيت اخويا فالبيت ...
دخل نيشان حتى حل عليهم الباب ضارو بجوج صهيب حل فمو ...
يوسف : خويا ؟؟
فؤاد "قرب ليه شاف فصهيب الي ورجع حدر راسو وخلاه وخرج وقرب هو جلس حداه " : علاش ايوسف ؟؟؟
يوسف "حدر عينيه حاول ياخذ النفس حيث تخنق هز الاكسجين حتى خدا نفس وحيدو " : غاا سمح ليا خويا وكان ...
فؤاد : خوتي وولادي مرضهم مرضي وعرضهم عرضي ومشاكيلهم انا حلالها كيفاش ولدي الكبير "على يوسف " وثيقتي من صغر مكلفو بمالي ومرتي وولادي وارضي وبلادي نخليه فالمرض وفوقت شدة ؟ كيفاش نخلي ولدي اللول ايوسف مريض وانا ناشط فجيهة اخرى ؟ الى مرضتي نتاا "ضرب فكتفو " مرض ليا هذا ...
هاد ليام ضرني وحسيت بيك وتاحاجة متخفا عليا اخويا تاحاجة ...نهار طيح يطيح هذا "عاود ضرب على كتفو " ...
في داك الصباح واقف وهي حداه عطاتو الكرافاط حتى قادها وزريها شوي بكومبلي كحل فكحل مقاد الحالة ومرجع شعرو لور منفوخ مقاد لحية مطراسيها والمسطاج طويل شوي ...رش بارفانو واضر شاف فيها وجرها عندو عنقها وباسها فشفايفها ...
ياسين : شافنا الله هاد اليومين ماحشوماش ؟
نوار "حطات راسها فكرشو مزنگة" : حتى يخرجو تحاليل الى مكانش حمل عاد تعطيني الفنيد ...
ياسين "بقج ليها شنايفها ..." : والى حنتك الله ؟
نوار : ياسيييين ههههه
ياسين : يكون خير ماعليش ..الصبر زين
نوار "شافت فالساعة كانت سبعة ونص تالصباح " : مغاتعطلش ؟
ياسين : لا مزال ساعتين ...شنو ميفطرش راجلك عاد يمشي لخدمة ؟
لابسة تاهي جليليبة خفيفة فالصومو جامعة شعرها لور وهازا صاكها جنب كلشي فيه الي تحتاج ...
ياسين : و ماتفطريش وياك ...
نوار : واخا ...
ياسين "باس ليها راسها وحنيكاتها " : الله يرضي عليك "ضارت تمشي وهو يشحطها لترمتها تا غوتات خلاتو عاض شنايفو مكرهش يتكيها تما ياكلها وينعس معاها لانه من داك النهار وهو محروم ماقاصهاش حتى دير تحاليل اختبار الحمل كيف قالت ليها يسرى حتى تشوف لا يكون حمل اولا وتاكد ان رحمها نقي من اي احتمال لشي حمل جاي وتديهم عند الاخصائية صديقة ليها فمراكش حيث هي مغاديش تكون تما اللهم توصي عليها ...وتبع معاها حتى تشوف اش كاين ...عاد تعطيها مانع حمل . …احتمال لا يكون حمل الى لا غادي تعطيها الفنيد الي غادي تبع وكان السبت والاحد ديك الوقيتة مكانتش طبيبة واتافقو باش ليوم يمشيو ديرهم ويرجعها عاد هو يمشي يشوف الخدمة ويزگي فالاجتماع مع الكادر والموضفين الي عندو …هبطات لقات نعيمة جات كتوجد دخلات وجدات معاها وحطات اتاي عاد
هبط هو كيقاد فساعتو نازل بديك التگضيرة والكلاس الي ضارب وريحتو تعطي دخلات ليها مع النيوف ..ودوك الكتاف العراض هابط بكل تباتة تقولي احسنها راجل فيك يا دنيا ...بقاو غير هما بزوج فالدار واسامة الي فاق بكرييي ومشا مع سالم كيف العادة ...شرب اتاي هو واقف غير باش يفيق ويكمي عاد وصا نعيمة توجد ليها فطورها فاش تجي حيث مورا تحاليل كتجي سخفانة خاصها تاكل ....
الوجهة هاد المرة غييير الوجهات الي دازت وغير الدولة الي دازت هاد المرة الوجهة افريقيا والضبط في دولة اثيوبيا ...دولة او بلاذ المجاعة ...وبمكان ادق فابعد بلاصة فين كاينين الناس الي ملاقيين مياكلو واكثر البلدان من حيث المجاعة في القرن الافريقي ...عاصمتها اديس ابابا...من اكثر البلدان مجاعة الي مواصلهاش مساعدات انسانية تما في فواحد المكان مع عائلة متكونة من اب وام وست اطفال صغار ...الي لقاوه كياكلوه الي ضبرو عليه كيجيبوه فواحد البلاد شبه منفية تما حطو ليه الرحال ...بانيين غيير خيمة ...تما جلس وتما لاحوه كيف وصلوه من الي هزوه لاحوه تم ورجعو ادراجهم ماعرف راسو باش تبلى حتى لقا راسو تما حل عينيه من بعد ما فكو ليه وثاقو كان مغيب فطيارة حتى حلهم فداك المكان كيفاش وعلاش وصل تما تما فين غايبدا مشواره راسو يقلب على مياكل ولا شنو يدير تما يتحمل مسؤليتو حتى فكو غير رب هاديك الاسرة الي تما ...
ليه اكثر من يومين معاهم ...بحوايجو باش بقا هما الي باقي بيهم لدابا جالس ومافاهم والو اش كيدير تما كيفاش غايتعامل اش غايدير بغا غير تيليفون باش يفهم بغا يتصطى ...
لقا راسو وسط قرية بعييييييييييدة بزاااف مواصلها والو سوى الي جنا شي حاجة كيجيبها ياكلها الي ماجناش راه مواكلش حتى تنفخو ليهم كروشهم بكترة جوع والي عاش عمره عاش والي مات راه ماااات ...جا عندو واحد الراجل وقف عليه ...من ديك الاسرة الي منعازلة تما وعطاه طاسة فيها الما باش يشرب ...غيييير بانت ليه بالما الي فيها فحال شاف كنز من كنوز الدنيا واشنو غلا من الما في هاد الحياة ...شدها من عندو باللهفة والعطش طاح عليها حتى بدا يلحس فيها تا نشفت
جاه اتصال فداك الوقت وجاوب ...
ايلاف : كلشي هو هذاك ؟
هو : فين قلتي حطيناه ...
ايلاف : بعدو عليه دابا خليوه يعيش حياته تما راسو ...
هو : ماقصحناش معاه ؟
ايلاف : ولدي هذاك ماشي ولدك ...كل حاجة كتبغي التربية من جديد الى ماتعلمش وما حمدش الله ..."قطع معاه " ...
عيناكِ يا حُلوتي من الله أجملُ هديه
عيناكِ قصةُ حُبٍ لن تُكرِرها البشريه ،،…عيناكِ سيدتي رمزُ البراءةِ والعفويةة عيناكِ.؟ نعم!! أنتي يا صاحبة العيونِ العسلي…
عينين شهلة العياني الي غرامها مضاني طول الطريق وهما كيشوفو الطريق مسافة نصف ساعة تقريبا او اقل حتى كانو فدخلة د مراكش ...خذاو طريق المختبر الي متواجد امام صومعة الكتبية ...بلاصا سيارة فالباركينغ الي في واحد واحد البلاصة قريبة تما كيقولو ليها فحل الزفريتي بالضبط متواجدين باركينغات فين كيصفو سيارات الناس بالعساس نضرا لكثرة الزوار لديك المنطقة حيث جات فيها جامع الفنا والكتبية وحتى السمارين ...نزلو بزوج خارج كيكمي عنقها بجنب ومشاو على رجليهم شوي حتى وصلو المختبر كانت الساعة ثمنية ونصف كانو تما ...
نوار "وركات على دراع ياسين بجهد حتى شاف فيها لقا وجهها صفر "
نوار : تحاليل دم ادق واحسن باش نعرفو اش كاين واش غايكون من هنا لقدام ...
ياسين : يعني شنو احسن هما هادو ...معمرك درتي تحاليل ؟
نوار : اه درتهم فاش كنت بغيت ندير عملية على رجلي ومبقيتش كملت راك عارف "حدرات عينيها كتلعب بصمطة صاك بتوتر حتى عضات شنيفاتها وعوجات فمها " ...
ياسين "زاد عنقها بجنب وباس ليها راسها ...كانو جالسين كيتسناو باش دخل دير تحاليل كاع الي جالسات تما حاضينو وحاضين كيفاش كيتصرف معاها الي شافو يقول هذا مشبعها عصا حيث شخصيتو ونضراته ومشيتو تقولي نهضر معاه ينطحني عندو شوفات واعرين ومجهدين مخلين اغلب ناس الي قراب وبعاد كيهابوه ..شي حسدها وشي تمنى يكون بلاصتها خصوصا فاش غمرها بتعنيقتو وهضر ليها فوذنها كيطمنها اي وحدة تبغي تكون بلاصتها مايخصها خير مزال " : دابا نتي غادي ديريهم لحاجة مكتعذبش ومكتقصحش الي قصحك حيدتيه عليك "شافت فيه وغمزها "
نوار : ياسيييين هههه صافي ...
ياسين : وااخا ...
حتى خرجات البنت نادات باسمها ودخلات هي وياها تقريبا عشرة دقايق من بعد ما طمنها بعينيه ...وخرج يتسناها برا بينما كما وهضر فالتيليفون ...حتى سالات وخرجات هازا كمايم ايدها وتانية دراعها الي فيه سبارادرا وجهها تقطع منو الدم حتى خلعاتو وفمها ولا بيض ...
ياسين "عقد حجبانو حط ايديه على حناكها " : نوار !! مالك ؟
نوار "كتخشي في فمها " : هاني كناكل ...هههه هههه جبتي حتى شيبس على صباح ...
ياسين "هز ايدو وحطها بمعنى شنو عرفني انا " : غير الي بان ليا تما شنو غانعرف انا ..."دار مرفقو على شرجم وصباع ايدو في فمو ...ضار شاف فيها دوز بايدو على حنكها كيتلمس فيه " وجهك ماعاجبني هاد ليام وحتى حالتك ...مزيان تحاليل درتيهم باش نعرفو شنو كاين ...درت ليك خاطرك وماديتكش عند طبيب تشوفي شنو كاين من قبل ...
نوار : اعادي والله غير هاد ايام ولات فيا اما قبل كانت ومبقاتش كتجي ...
ياسين : مكايناااش شي حاجة سميتها كانت ومشات راسها ...صحتك انوار صحتك هاديك شنو تنسمعو الي ميعجبش ؟ الله يرضي عليك ماتبقايش تعاندي فصحتك ...
نوار : واخا ان شاء الله ...
ياسين : تت ...زاد كسيرا حتى خرجو على مراكش خداو طريق مسافة حتى كان حطها قدام دار كيف دخل نزلات ودخل معاها تاتاكد ولات لباس عاد سلم عليها وودعها بزز باش حبسات راسها ماتبكيش حيث ولفاتو بزاف ودابا غايغيب نهار كلو بسباب الخدمة الجديد وهي ادارة البنك ...
في احدى اهم البنوك بمدينة مراكش واحد فروعها الرئيسية ...بنك كبيييير من ناحية البناية ....الموضفين الي فيه هما الي بقاو وكاين الي خرج تقاعد وكاين الي عاد ترسم وكاين الي عاد غادي يتوضف ...الكل فانتظار وصول المدير الشاب الجديد باش يعرفو البقية شكون هو حيث نصهم ماتعرضوش لحفلة وماحضروش ...ومنهم واحد زوج بنات واقفات وحدة بلباس كلاس فالاسود بجيپ فوق ركبة وليبا فالاسود مشبكة وصباط بوردو وگرافاط صغيرة فوق قميجة كحلة تاهي بوردو ...وجهها بيض وهي بيضة كلها وشعرها كحل وحتى حجبانها مقادين وعراض وكحلييين عينيها كباار ومشفرين وزييينة وحتى فورمتها زوينة ...كتضحك كتبان ليها الغمازة فحنيكاتها بزوج ....ومعاها وحدة زعرة بالحق هي مزعرة شعرها بلون ذهبي جا مع وجهها تاهي بيضة ولكن ملامحها باهتين ...تاهي بلباس قميجة بيضة وسروال كحل سليم جامعة شعرها بفيليل وهازاه مهمل لفوق نازلين خصلاتو باهمال ووجهها الي كل نهار ميكاب فشكل وخا مكتكترش لكن باينة بروفيسيونيل فالميكاب خفيف ...
هي : نسرييين امتا غايجي هذاك زين الي قلتو ولا مدير ...
نسرين "هي الي شعرها كحل وعندها غمازات ...شافت فساعتها " : اش نقوليك اختي مونيا ...غادي تكون هادي رجلو ياختي الحاج كنا تنعرفو توقيت معاش كيتعطل ولا مغايجيش هذا منعرف كيفاش داير ...
مونيا "الزعرة " : بغينا نشوفو زين ...
نسرين : مونيا يهديك الله خليه ليا انا نطمع فيه نتي راكي بولادك زوج تويميين يحمقو وراجلك خلاص مال ومنصب وزين ...خليني انا الي قربت نقفل سبعة وعشرين على مشارف ثلاثة البيضات ونكمل بلاطو (تلاتين ) ...
كانو واقفات وحدة شادة قهوة امبوغطي فايدها ولاخرا شي وراق عاد دارت ليهم كوپي ...حتى خرج ليهم واحد الولد كانو فالطابق الفوقي فيه مكاتب تا الزاج وهو نفسو الطابق الي فواحد الممر طويييل فيه كيدي المكتب الكبير تما الي هو ديال المدير ...اسميتو عماد ...
عماد "طويييل وضعيف كي سفود العيد هه " : اهيااا دوك اشاوا بيتو بالسيد راه مزوج ...
عماد : وراه تيقول الحاج وااعر وانا عاقل عليه كان كيسطاجي معانا غيييير عاقدهم ولكن اساطة اش بينقوليك راه دماااااغ فالجيستيون والكونطا الخدمة هي الخدمة معندوش ياما رحميني تا مع راسو ..."صونا ليه الفون كان سيكيريتي كيبلغو بالي راه وصل باش ينادي على الموضفين يستقبلوه ....
عماد : اهياوين الخوت تحركو راه سي رمسيس جا ...
حتى تحل الباب سلم عليه سيكيريتي لقا غير سلام ورد ليه السلام براسو ...مشا لسانسور وطلع فيه عاقد ميتين وحداش واااكواك على نضرة داخل داير تخافي غا تقولي سلام يجمعها مع طاسيلتك ...حتى تحل عليه فالطابق الي فيه هز عينيه بانو ليه واقفين مصافين فاستقبالو واولهم عماد الي قرب جيهتو ...
عماد : سي ياسين ...
ياسين "وقف تگردف ليهم كيباركو ليه ويسلمو من بعيد وهو كيهز فراسو بلا ميضحك شاف ف عماد ..." : اجتماع من دابا عشرة دقايق غير غير الكوادر الكبيرة ...
عماد : هي اللولة نعماس ...
ياسين "ضار شاف فيهم " : كل لبلاصتو "ومشا خلاهم شي رجع وشي دخل فشي والي هما البنات الي تما خصوصا نسرين الي بغات تسخف ...
نسرين : واااربيييي الحبيب على مزوج هذا مستحيييل يتزوج راه خاصو مراة الي تناااسبو فيييين يلقاها اناااااا ...ويلي ويلي ويليييييييييييي على زين وشخصية وهضرة حدها قدها يا سيدي ياربييييي...والله مايلقا ما حسن من كازاوية يتناسب مع كازا ...
مونيا : ايييه وخا بنتي زيدي اححح كون ما راجلي كنبغي وولد ناس كون بان ليا فهذا ...
دخل المكتب ديالو الي عارفو وحافضو حيث كان قبل كيسطاجي فهاد البنك الي كان فيه غير متدرب وهاهو بدماغو رالعزيمة وصل ليه مدير ...جلس فالكرسي وضار تقابل مع زاج الي كيطل على برا من فووووق..."شاف فساعتو كان باقي الحال ...دوز ليها الخط مستغل الفرصة وهي تجاوبو " ...
ياسين : المفششة ديالي شوية ؟
نوار "ضحكات تا بانو سنيناتها بالفرحة والخجل وداك شعور ديال الحب سرا فذاتها " : هههه شوية شوية ...
ياسين : فطرتي ؟
نوار : اه فطرت مزيان والله ...
ياسين : دابا نشوف ...شنو كديري ؟
نوار : وااالو ..."حدرات راسها وهزاتو ونطقات بدون شعور " ...بقيت غيير بوحدي هنا ...
ياسين : ولفي انوارة الفيرما ولفي ...
والقصد عندو هنا هو انها خاصها تولف على غيابو فاي لحضة ...
من بعد ما دخل عندو فؤاد ديك ساعة جات حتى مينة من خدمتها لعندهم ودخلات جلسات فصالون ...وصلات العشية لداخل فالبيت بقا معاه فؤاد كيشوف فحالتو المرض دغيا رد حالتو تدهورات وبان فيه المرض بصح ...
فؤاد"شاد ليه فايدو " : كون مع الله يكون معاك ...
يوسف "نزلات دمعة كتجرييي على خدو خلات عينين فؤاد يغرغرو حيث حسك ليه قلبو ماشي هذا هو يوسف الي كيعرف ...ماشي هو الرجل الثقة الصنديد ...شد على ايدو الي شادا ليه ايدو لاخرا وقال " : دعي معايا خويا دعييي ...الى جات عليا مبغيت لا نتعذب ولا نعذبكم ولا نموت ...دعي معايا يدير ربي خير ...بناتي فؤاد ومرتي ماشي ديال تكرفيص ...
فؤاد : بنتك مع راجلها جناحها ثاني متبتة البنات ولالاهم فرزانة مولانا يرعاها واقفة على حياتها ومستقبلها بقلب رجال ...مولات دارك عندها نتا والله وحنا ...ربي يطول فعمرك اخويا شد فراسك ...
يوسف "بغا يهضر معاه حتى غاااب على الوعي "
فؤاد "جمع حجبانو فيه كيقلب فيه " : يوسف ؟ يوسف ؟ خويااا الحنييين ...يوسف ..."غوت على يسرى " يسرااااااااا "بداك صوت المهيب الغليض ماعرفو باش تبلاو حتى طارو كلهم نقزو لبيت ودخلو وقفات يسرى حالا فمها وقلبها وصل عند كرشها ....
يسرى : مم مالو ...
مينة : بب باباااا ...
صهيب : خويا مالو ؟
الياس "جاتو ساكتة هذاك قرب يهبل " ...
فؤاد : مالو ماااالو ..."قرب ليه هو ويسرى الي قاستو لقاتو طايب بجهد ..."
يسرى : عيطي مينة لمروة داااابا ...
مشات كتررعد هزات الجهاز ديال قياس الضغط دارتو ليه ...
يسرى : طاح ليه ..."شافت ف الياس " ...مشات كتجري جبدات شوكة كانت كلشي موجداه حيث عارفة ان سخانة كطيح الضغط او ممكن يطلع ليه فاي لحضة مكانتش ذاتو متوازنة من ديك الليلة فاش هضر مع نوار وياسين شداتو سخانة جايا لثلاث ايام وهو مهلوك بيها ما كلا ماشرب ...دارت ليه سيروم وضربتها ليه ...
يسرى "قربات لعندو كتحسس نفس ديال بالمراية ضببات يعني مزيان ...عاود تسناو تا بذا يفيق شوي ..." : يوسف كتسمعني ؟
يوسف "بدا يحل فعينيه غيير شوي حرك راسو واحد شوي كمش عينيه بغا ينوض وفمو كيحل فيه كيدير ايدو على فمو " ...
يسرى : مالك ؟؟
مزال كيدير ليها فايديه حتى تهز شوي وهو يرجع وبدا يكحب فالدم طلا المخدة وايزار ديالو حتى خرج فؤاد عينيه بصدمة وجع بلور كان بغا يطيح كون ما صهيب الي دموعو على طرف شدو ...
فؤاد"صرط ريقو عاد وعا حول نضر ديالو لمينة ونطق " : مينة ديري شنو قالت ليك يلاااه ...
جرها الياس كتبكي وخرجها لبرا لصالون ...لگات ليه واحد طاسة تما كيرجع وهي كتمسح ليه حتى عمرات تاهي مع كيكحب ويرش فدم ويرجع ويقول مارجعت ...حتى ولا يوجع فالمرار فالاخير صافي مبقاش قدر ولا حال فمو وتخنق ...وسخانة رجعات طلعات ليه ...
فؤاد : شنووو غايبقى هنااا ؟؟؟
يسرى : حتى نشوفو نتيجة ليريم ...
فؤاد "غوت بجهد تا طارو ونزلو " : حتى يموت ليا خوياااااااا اااااا ؟؟؟ "صوته المجهد صمك ليهم وذنيهم الحيوط حسو بيهم مشاو وجاو " يتحاااااارك شي قواد عليا هنا "ضار عند صهيب شنق عليه وخرج فيه عينيه كون كانو قرطاس كون قتلووو " ...خوووووووك خووووووك يعييييش سمعتي ....
صهيب "كيدي فيه ويجيب حتى نزلو دموعو " : واخا واخا ...
يسرى "عند يوسف كتقلب فيه وتقلب فسيروم ودايرة وذنها فتيليفون كتعيط لطبيبة حيث حالتو ماتبشرش بالخير " : يووووسف عاافاك توگض معايا ...
يوسف "بدا يكحب بشوي ويهز فايديه كيقوليها اجي حيث عيا سخانة والدم الي كيكحب استمر بتتابع ومواكلش والمرض هلكو صافي ...قربات لعندو "
يسرى "عطاتو وذنها " : هاني حبيبي هااني ...
يوسف "نطق بشووووييييي بالكاد كتسمعو بززز باش تتفرز الحروف الي نطق " : خوويا فؤاااادددد بب بغييييتو ...
يسرى "شافت فؤاد " : خويا فؤاد تكلم ليه ...
فؤاد "طلق من صهيب ومشا لعندو تحنى عليه " : شوية ؟
يوسف "قرب عند ودنيه ونطق وياريتو ما نطق " : خويا الحاج بيت الله خويا الحنين ومول العقل والقلب الكبير العارف بينك وبين الله ..."قال هاد الكلام بزز باش سمعو " لا وصل وقتي قطر ليا خويا وشهد ليا ...
هاد الهضرة من قالها ،،قالها بدون وعي سخانة كتقتل فيه وتهتهت فيه السيروم فقط رجع ليه الوعي ...وغييير نطق هاد الكلام فحال شديتي موس ماضي دوزتيه على قلب فؤاد ...كانت ديك الساعة الخمسة ديال لعشية طول النهار وهو معاه ومتفرقش عليه كيخرج يكمي ولا يهضر فتيليفون يطمن يامنة عليه الي دارت ليه حالة باش تجي تشوفو غير بزز باش بقات لكن سرعان ما انتاشر الخبر حتى عرفو الي فالفيلا كلهم حتى اتاصلو بياسين .الي كان جاي فطريق راجع من الخدمة من بعد ما دوز الاجتماع الاول بالكوادر الكبيرة غير خفيف عرفوه عليهم ...
ياسين : ماشي كان خاصها تعرف ؟ مريض هاذ المدة ومفراس حد ؟ شنو هادشي ؟؟؟؟
يامنة : ولدي غير ساعف الله يرضي عليك شوف كيف دير قولها ليها وجيو اليوم الى قدرتي ...ولا رسلها فطيارة ...
يامنة : هو الي مابغاش فلول حتى اليوم فالصباح عاذ عرفنا من صباح وباك معاه ..
ياسين "مالقا ميقول ماشي وقت اللوم هذا ولا العتاب الحالة مكتسمحش ...ايام وهو كيعاني فصمت وهما ناشطين وهو كيعاني وممبينش حتى هلكو وووصل بيه لهاد المواصل عاد اضطرو يعرفو ..." : يكون خير الليلة نشد طريق عندكم ولا نشوفو طيارة ...
يامنة "تنهدات حيث كانت فالصالون معاهم جابها شيفور وجالسة سارة واشرف حتى هو " : طيارة حسن طيارة حسن احنينة ...شوف كيف دير الله يدير تاويل دالخير ...
ياسين من كلامها حس ان الوضع مكيطمنش بزاف يعني خاصو يفهم وكيفاش غايقولها ليها وهي روحها وعقلها هو باها وصاحبها وعشيرها وعلاقتها بيه فشكل كيفاش غادي تقبل. ؟؟ غادي مكسيري عينيه حمريييين حتى وصل الفيرما وبلاصا كانت قريبة المغرب فطريقو عيط لصاحبو فواحد لاجونص فالمطار شاف ليه بيي طيارة نيشان لفاس بزز باش لقا ربعة البلايص ليوم الغذ فالرابعة فجرا ...غير بلاصا السيارة وهي تم خارجة لاوية عليها كابها سخون شوي حيث البرد ومشات كتزرب لعندو حل ليها دراعو وهي توصل عندو تلاحت عليه عنقها وكررررز عليها بين ضلوعو حتى طرطقو عضامها وهي عاد تنفسات تقولي عاد رجعات روحها ...
ياسين "جرها عنقها وباسها فشفايفها " : لا لا منسخاش بيك ...
نوار : ههههه وعلاش بغيتي نمشيو ....
شاف فيها شحاااال وجرها من ايدها داها وراه وطلعو
جايين فالطريق بربعة بيهم مصطفى واسامة ونوار وياسين الي جا ليه الحبيب وخداهم من المطار ...جالسة لور حاطا راسها على شرجم ودموعها ماحابسينش صوت تنخصيصها كيتسمع تاحد فيهم ما قدر يقوليها سكتي عارفينها عندها الحق وقلبها كلاها على باها الي مريض ليها اسبوعين وزيادة ما شافتو ...
في هاد الاثناء جالسين فالصالون شي حدا شي وشي دار ايديه على حنكو وشي جامع ايديه وحاط عليهم جبهتو وحادر راسو وشي خارج لبالكون ...حتى وصل الليل ويسرى لداخل معاه و فؤاد مرة مرة يدخل يقرا عليه القران وهو سخانة تهلك فيه والكحبة جهلاتو حتى صوته مشا ليه ....
شكون جاه النعاس ؟ تاحد ؟ شكون صابر ؟ تااا حد ومااا اصعبها من لحضات ...بقاو على داك الحال حتى صبح الصباح وهما يسمعو صوت الصونيط محبسسسسشششش ...
يامنة : ياسين هذا ؟
مشات سارة كتزرب حلات وهي تلقاها الدكتورة مروة واقفة ...
مروة : يسرى فين ؟؟
سارة : لداخل اختي ...
يسرى "خرجات من البيت كتمسح دموعها شافتها وهي تجي تجري عندها " : مم مروة مم مالك ؟ د دخلي
مروة "دخلات " : جيت كنزرب ا يسرى عاد خديت نتائج ليريم ديك ساعة وجيت بنفسي اختي
يسرى : ق قريتيهم ؟
مروة "مدات ليها الملف " : قراي ...
شداتو يسرى وحلاتو كتررعد مبغاش يتفتح ليها تا فتحاتو مروة كلشي كيطل من صالون جات حداها يامنة وفؤاد تاهو ...
يسرى "طاحت لارض على وقفتها " : الله ياربييييي ...
مروة : يسرى؟ ...ماشي مولفة ليك شنو خاصك تفرحي او لا ...؟؟
فؤاد "جا تاهو " : شنو كاين ؟؟؟
مروة "شافت فيه حيث تتعرفو " : سي فؤاد نتائج كتبين انه عندو السل المزمن ومع عندو نفس الاعراض ديييما حنا فاختصاصنا كنقولو راه سرطان حيث حتى هو كيهلك فحالو وكيعذب حتى كيقول المريض راه غايموت ويرجع الوعي ديالو ...
فؤاد : اذن ؟؟؟
مروة : خاصنا نخضعوه تحت مراقبة وتريتمون قااااصحة باش يتبعها خاصو يجي ل مستشفى سيدي سعيد بمكناس ممنوع يدخل عندو شي حد حتى يكمل العلاج ..جبت معايا الاسعاف الي غاتهزو دابا "شافت فيسرى " وجديه باش يمشي "ابتاسمات ليها " الحمد لله على سلامتو ....
(حالة يوسف مستوحاة من حالة واحد سيد من عائلتنا هكا وقع ليه شكو فيه سرطان ونفس الاعراض حتى لقاو عندو السل المزمن لا غير ولكن وخا هكاك ما تستاهنوش باي مرض كان الصحة مهمة بزاف وحمدو الله على ما عطاكم ...كان خاصني ندوزكم من
هاد المراحل الي دازو منها ناس حتى كانو على مشارف الموت ...)
نقولو تنفسو الصعداء او مزال ؟ لحد الان مادام يوسف في مرحلة جد حرجة وهي السل ومرحلة علاج شاقة حتى يسترجع صحتو عاد نشوفو يوسف الي كنعرفو عاد ترجع لينا ضحكة والبسمة ...في انتظار يهبطوه الاسعاف والتدخل الفوري ...
مروة : كل ما اسرعنا كل ما احسن والعلاج يكون ففترة اقل ...
يسرى : السل الكامن ...
مروة : Tuberculosis dormant (السل الكامن ) mais عاد فمرحلة النشاط ...(السل الكامن وكاين السل النشط هو الي واعر وعلاجو طويل وقاصح )...كيف ماكان خاصو تدخل سريع ويصبر لعلاج ماحد مزال مابدا يعادي حتى واحد فيكم لكن هذا ميعنيش انكم كلكم الي تخالطتو معاه ماديروش فحص ...
يسرى : الي شفت هنا تدقيق جاكم من اللعاب يعني التنخيمة باللغة العامية ..."فهاد اللحضة طالعين مالين الاسعاف كيقادو فيه وهي كتهضر مع مروة فالصالون من بعد مادخلات كيتسناو باش يهبطوه وينقلوه على وجه السرعة لمكناس ..."
مروة : جرثومة السل صعيب باش تفرزها دغيا اعراضها هي والصدر وسرطان الرئة نفسهم الشي الي خلانا كنزيدو فالفحوصات الدقيقة اكثر ...
يسرى : العلاج طويل غادي نبقا معاه تما ...
مروة : ممكن يعاديك ممكن لا فاش كان فمرحلة الكمون مابانوش عليه الاعراض نهائيا في مرحلة الكمون مكيبانو لا اعراض ومكيعاديش ...حتى بدا فاولى مراحل النشاط عاد بداو يبانو فيه...هو على حسب ماقاليا تاحد عندكم مامريض بيه ولا تعادا من الخدمة او شي حد دونك هو فالقديم ماضربش الفاكسان ديالو فالصغر ....
فؤاد "عاقد حجبانو نطق بلا ميشوف فيها " : الفاكسان ديال 15 حتى هي ما ضربهاش من صغرو معندوش مع هادشي بزز باش كان كيضربهم الى اضطر ...
يسرى : عندو خوف وفوبيا …"فحال نوار"
مروة : في بعض الاحيان او غالبا حاجات الي كنضنوهم مالايقينش هما الي كيكونو سباب فاعراض مستقبلية من بعد هادشي باش خاصنا ابدا ابدا منتهاونوش على صحتنا ونهملو ابسط الحاجات...المهم العلاج راكي عارفة الصرامة ديالو ...الشهرين اللولة خاصو يصبر معانا فيها عاد انتاقل لمرحلة الثانية ...
فؤاد : شحال غادي يبقى تما ؟
مروة : ستة الشهور وعلى حسب صحتو لكن العلاج من ستة شهور الفوق وفحالتو هو "شافت فيسرى " غادي نراقبوه مزيان حتى ياخذ العلاج على اكمل وجه ...من بعد على حسب الحالة الى تحسن يقدر يرجع من بعد شهرين يكمل علاجه هنا فالدار لكن بشروط صارمة ...العلاج فالشهرين لولة ضروري جدا …
تسمع دقان ديال الباب ومشا الياس حل الباب وهي دخل كتجري عينيها حمرييين ومنفوخين بدموع حتى وقفات على ماماها عياااانة بالبكا وشافت فيها بانكسار ...
نوار"طلقات العنان لتنخصيص كتبكي بحرقة بمجرد فكرة انها تخسرو كتجيب ليها الهيستييرية وتشعل فيها العافية " : علاش ماقلهاش ليا علااااش اهى علاش خبيتي عليا ماما علاااش ...
يسرى : باباك الي ذار هادشي ابنتي ولينين متخافيش معندوش هذاك المرض وخا مرض اخور لكن علاجو كاين وغايولي بيخير الحمد لله الي فالبداية وخا غايتمحن فالعلاج شويييي لكن باباك ثااايقة فيه غادي يصبر على قبلنا ...
نوار"مزال مخشية فحضنها دخلو ياسين ولاخرين الي معاه واقف مربع ايديه كيشوف فيها ومرة مرة يدوز على راسو ويضور وجهو لديك جيه " : بغيت نشوفو اخى اهى ...
يسرى : دخلي راهم كيوجدو فيه باش يمشي
نوار "هزات راسها " : فييين ؟
يسرى : غادي نطلعو لمكناس ابنتي تما غايبقى حتى يكمل العلاج ....
مروة : من احسن ماتدخلش عندو ولا تخالط بيه ...
يسرى "شافت فيها " : ماما شوفيه من بعيد شوي ويخرجو عطيه وقت يتعالج باش يرجع لينا واخا ...
نوار : بغيت نشووووفوووو اهى ...
ياسين : نواااار كوني تسمعي ...
صهيب : نوار بنتي كوني مع الله يكون معاك دعي معاه بالشفاء شوفي بنتي الجانب المزيان حمدي الله الي معندوش مرض خطير وخا حتى حاجة منستاهنو بيها فالمرض المهم كاين امل وكبير بزاف ...
فؤاد"جرها عندو وداها بعدها عليهم مشات يسرى لعند يوسف كتشوف فيهم دايرين الكمامات وعاوناتو الفرملية حتى قادت ليه سيروم عطاتو شي دوا وصفاتو طبيبة يبداو بيه بينما نقلوه على وجه السرعة لمكناس ..." : نوار !! شنو فنضرك البكا غادي يقضي ليه شي حاجة ؟
نوار : بغيت نشوفو عمو فؤاد عافاك ...
فؤاد : كلنا شفناه وبغينا نشوفوه وشوف ما يبرد الجوف ابنتي تشوفيه وتزيدي تمرضي خليه يتعالج ويرجع صحتو حسن الى شافك بهاد البكا وشكا ماحنا فخير المرض هو النفسية عاد الجسدية بنتي ...ماتقلقينيش منك وسمعي الله يرضي عليك واخا ؟
نوار "مالقات ماتقول سوى انها تسمع ليه حيث كتحشم منو وكتخاف كلمتو مكطيحش لارض داكشي باش خلاوه جرها هو يهضر معاها " : و اهى واخا اهى ...
بين يوم كيمر وساعات كدوز ولحضات فاتت وقلوب مرضات ونفسية تعباات وعينين ذبلات ...غياب يوسف خلا فراغ كبيييير فالدار والشركة وفقلوب الكل ...شكون الي ماعزيزش عليه يوسف ؟ شكون الي غايهز هم شي حد ويكون قد مسؤلية اي اسرة تكلف بيها ومحتاج عاونو من الصغير الكبير من الي وعا وهو مكلف باشغال خوه الكبير هز مسؤلية الدار فغيابو كلها هز السركة قد سخط على كتافو بمشاكيلها وارباحها وخسائر ديالها ....جا الوقت الي يحسو بيه بالي راه انسان دم ولحم جا الوقت الي يعرفو ان حتى يوسف انسان كيعيا ويمرض وخاصو الراحة من كلشي ...وهذا هو الوقت ...
خيم الحزن على الدار واصوات البكا هنا وهنا الي واقف كيشوف ويتحسر ...ناعسة فوق الفراش مغطية ودموعها على خدها ماحابسينش كيتسرسرو كي الحجر وتتكمممششش فالغطا ...حتى ناضت من الفراش مسحات دموعها لاحت عليها جلابة وشال وخشات رجليها فبانطوفة عينيها حمريييين ومنفوخين ...هبطات فدوك الدروج بالحس حتى ضارت جيهة لاخرا وخرجات مخليا الرجال لداخل كيستقبلو تعازي والنسا بدورهم تاهما كيستقبلو تعازي فالجيهة لاخرى من جردة ....
خرجات من الباب لوراني حلاتو بالكشيفة حتى جا العساس حلو ليها وهي تخرج خلاتو كيعيط ليها واش تبغي طوموبيل ولا يقولها لشي حد ومشات كتزرب وتعرج ملابساش صباطها الطبي ديالها ...دموعها على خدها دايرة نضاضر شمس وكيتزلو حتى كيضببو ...بقات غاديا تا بان ليها طاكسي وقف شي حد وشيرات ليه جا وقف عند رجليها وركبات .....
نوار"بصوت مغنغن بالبكا" : المقبرة ...
حرك راسو وكسيرا نيشان لروضة…
داخل ياسين لدار لداخل بانو ليه شي عيالات جاييين حدر عينيه وعطا تيساع حتى دازو وجهو مغوبش ومزير قلبو معصوووور من جيهة عمو الي هو نسيبو وباه فنفس الوقت الشخص الي حتى هو كيوقف معاه
حتى هو صاحبو فوقت الشدة والفرح ويكفي انه عطاه اغلى مايملك وخلاها زوجة ديالو ونص دينو الي كمل ونصو الثاني والنور ديالو عطاه طرف من كبدتو ...حجبانو راسمين حداش بكثرة الحزن عليه يكفي ان عينيه مغرغرين حاملين بكااا كبيييييير الي كاتمو من جيهتو ...حتى دخل لواحد البيت بعيد تما وعيط فتيليفون ليامنة الي مسحات منخرها ودموعها وجاوبت ...
العساس : نوار اولدي (تيقولو سميات حيث صغر منهم معلمينهم ميخليوش راجل كبير يقوليهم سي ولا لالة وهما صغر منو " خرجات دابا من الباب الي تما وشدات طاكسي ...
نزلات ومشات ديريكت لقبر ديالو كان باقي فاازگ بالما وفوقو غراف تراب عامر بالما وشاهد حجرة غند راسو مكتوب فيه "كل نفس دائقة الموت ...قبر المرحوم يوسف رمسيس المزداد بتاريخ *\*\* والمتوفي يوم ....انا لله وانا اليه راجعون …عاد الصباح تدفن ...غير وصلات ليه وهي تنزل على ركابيها وكتجمع شفايفها ببكية ...
نوار : واااااالعافية العااافياااااا اهى ...وباااااااابااااااا "كتغوووت ربي الي خلقها وتعصر فعينيها بحرقة وتغوت وتفوت حتى شدها كيفيق فيها ...
نوار : باابااااا حتى ضرباتها الفيقة وهي تشهق لقات ياسين شادها وكيفيق فيها خلعاتو كانت غاتجهل كون ما فيقها كون هبلت ضارت هنا وهنا صوت تنخصيصتها كيتسمع عرفات راسها انه مجرد كابوس وفاقت منو ...
ياسين "حك ليها على درعانها " : ششش غيير عمرو طويل ان شاء الله ...الله يشافيه ..
بقا كيحك ليها فدراعها حتى قرب حداها وجرها تكاها عليه شاف فساعة ايدو كانت السبعة ونص ديال صباح... كان لابس حوايجو وكيقاد فلوازم ديالو ...بقا معاها حتى تنفسات ...
ياسين "هز راسو لسما عذباتو اسبوع وهي على هاد الحال ملي مشا باها وهي على هاد الحال ومينة كتمشي لخدمة كتبقا نهار كلو مكتجي حتى كتبغي تنعس باش تنسى وتعود حتى لهادي يومين بدات كترجع عادي ...وياسين دفع اسبوع شهادة طبية واليوم غاتسالي كيخصو يرجع يبدا الخدمة مباشرة ..." : نوار بعد غذا غادي تبداي قرايتك مبغيتكش تبقاي هاكا
البكا كل نهار ؟ ماشي بزاف ؟ خليتك على خاطرك درتي الي بغيتي تقلقتي خليتك وحدك حيث باك هذاك ولكن هنا وبراكة ...شنو دابا الى رجع ولقاك هاكا ؟ وعلاش هاذشي حيث مشا يتعالج ؟ بغيتيه يبقا حداك حتى يموت وتقولي كون غير مشا كون كون ؟ نوار جمعي راسك الله يرضي عليك ...
نوار "حدرات عينيها فعلا عيقات سيمانة كلها وهي حازنة عليه شيمانة من نهار مشا وهي هاكا مقلقة وغير كتبكي كتهضر معاهم غير يسرى هي الي كتطمنهم عليه وكتقطع ..." : غاذي تمشيي وتخليني ...
ياسين : فينما لقيت وقت نجي عندك عندك قرايتك نتي فداركم هاني هاني عليك معاك الحنانة والوليد معاك مينة وخويا معاك صهيب والياس تاهما صابرين حتى يرجع ...كلشي معاك ...
نوار "نطقاتها بلا متحس " : مشا بابا وماما وهانتا غادي مغايبقا ليا تاحد "حطات راسها على صدرو." ...
ياسين : نوار شنو دابا تخرجي من قرايتك وتجي عندي ؟ تخرجي على مستقبلك باش تبقاي معايا ؟ تقلقي باك منك الي رباك وكبرك باش تقراي وتكوني راسك باش نبقا انا ؟ نخلي الخدمة والفيرما ومستقبل ديالنا بجوج باش نبقا حداك ؟ فكري بعقلك ...
كون جات عليا متحيديش من جنبي ...الله غالب انوار راني كتر منك غير صابر الله يرضي عليك ماتشغليش بالي عليك بزاف ...
نوار"مسحات دموعها" : واخا ...
ياسين : يلاه رجعي نعسي ولا تهبطي معايا ؟
نوار : غادي نلبس باش نعاود التحاليل تاني ...
ياسين : بلا متعاوديهم هضرت مع طبيبة خذاتهم ...
نوار : شنو فيهم ؟ حاملة ؟
ياسين : حاملة ونخبي عليك ؟
نوار : وشنو ؟
ياسين"باسها فراسها" : مكاين والو ...هضري مع الحنانة ليوم هي تعطيك شنو تاخذي ...
نوار"حركات راسها بالايجاب وناضت هو نزل وهي دخلات لدوش غسلات حالتها كلها وخرجات لبسات حوايج جداد جمعات شعرها ونزلات لتحت لقاتهم كيحطو فالفطور يامنة خذات الصينية ديال قهوة كحلة لفؤاد لمكتب جالس فيه هو وياسين ...
اشرف : هااا لالة ومالي هبطااااات ...
نوار: صباح الخير ...
مينة : صباح النور على سلامتك ...
نوار "بابتسامة باهتة " : الله يسلمك ...
الياس : ايوى هاكا ديري هبطي ورجعي كي كنتي عطيه غا شهرين يجيك كي العود ...
صهيب : شمن عود قول بغل فردتي ونعرفو ...
نجود "جات من المانيا فديك اليومين دارت ليهم طنطينة والبكا تا رجعات دارت بناقص من شي طبيب " : واش نقول البغل الي كنعرف راني والداه ...
الحبيب "عض فمو حابس الضحكة حيث جا حدا صهيب عارف الى ضحك غاتجي دقة وسط الراس "
الياس : كتقصدي صهيب ياك ؟
نجود : شكون من غيرو توحمت على الحمار نضل نشوف فيه الى لقيتو نبقا غا حاضياه (تطنز)
صهيب : هااا باش ضحكي نص كيلو ديال لحم رديتيني حمار ...
الياس : طنطناتك الخو ههههه
اشرف "ضار عند نوار " : تعالي حدايا تعالي وعنقيني تعالي حدايا زيدي ومرمديني تعالي حدايا راه ليل طويل وروج قليل ..."حس بخيال عند راسو هز عينيه لقا ياسين " انوووض انا احم سيري مع رجلك اختي راه غايمشي بقاي معاه ووسعي خاطرك دنيا فايتة وانا الى ما حشمت نجيبها ف ك...احم فراسي ...وزدي ياسين بدقة يهرب ليا الحقيقة…
ناض مسكين لكرسي لاخور حدا الياس ومينة وياسين جا حدا نوار نوضها باش تمشي معاه لجردة وصاهم يجيبو ليهم فطور تما باش يبقى معاها بينما وصل الوقت الي يمشي ...جلسو بزوج فديك الجليسة حتى جابو ليهم الفطور حطوه ليهم ومشاو خلاوهم على انفراد واخذين راحتهم ...
ياسين : اجي قربي حدايا ..."قربات حداه حتى عنقها جنبو تكا لور وتكاها عليه كيدوز على حنكها ويبوس فراسها مشابعش منها وماساخيش يخليها ولفها بزاااف حدا عينيه ودابا جا وقت الفراق المؤقت ...معارفش كيفاش يدير واش يدير بناقص ويجيبها حداه ولكن قرايتها شنو غادير فيها وشنو غايدير هو تنهد وشحال وهما على داك الوضعية حتى
تگعد وتگدات تاهي تقادو فالجلسة " فطري فطري ...
كبات ليه اتاي ديالو جبد كارو شعلو وكبات ليها تاهي اتاي معاه لكن برادها بوحدو اتاي عادي ماشي قاصح فحالو هو كيف كيعضقو ومن غيرو ميشربش حتى من قهوة كحلة معندوش معاها ...كحز ليها الفطور وحمر فيها باش تفطر حيث شاذاها نغصة انه غايمشي وهي غادي تبقا ومغادي تشوفو على شحال كلات غي شوي او نقول نقبات ...
ياسين : هضري مع الحنانة اليوم متعطليش ...
نوار : واخا بغيت نسول نيت على بابا ...
ياسين : مزياان ..."شاف فساعتو وهو ينوض جمع الوقفة ناضت حتى هي " نوار تهلاي فراسك تيليفونك حداك والي بغيتيها ماتخلينيش تنسولك قوليها وماتخلينيش نتقلق عليك ...الى بغيتي تمشي شي بلاصة بعيدة تشاوري معايا راكي عارفة بلا منهضر ...تهلاي فصحتك ...
نوار "غرغرو عينيها بدموع "
ياسين"حط صبعو على فمو وخرج عينيه بشوي " : ششش البكا مابقاش دابا سمعتيني مابغيتش نشوف دمعة طاحت من عينيك لا دابا لا ورايا الله يرضي عليك ...نلقا وقت ونجي عندك فاي غفلة كانت
نوار : ماتعطلش عليا عاافااك ...بقا تجي ...
ياسين "جرها عنقها ودفن وجهو فعنقها حتى تبورشات وغمضات عينيها حيث غادي توحشو بزاف ...باسها ونطق " : غير هنا من هاد جيهة ...
بقاو شحال معانقين حتى جا محمد الحبيب شافهم وبعد حدا طوموبيل وصلات عليه يامنة اما فؤاد بقا فالمكتب تسالم معاه تما ...صهيب والياس واشرف والبقية سلم عليهم قبل باش يبقى على خاطرو مع نوار ...حتى فصل العناق وجرها غادين حتى وصلو لعند الحبيب ويامنة ..بالنسبة لاسامة ومصطفى سبقوه فالايام الي فاتت ....
تسالم مع يامنة باس راسها وايديها وركب فالسيارة حدا الحبيب هضر من شرجم مد ايدو لايد نوار كمش فيها وشاف فمو ...
داز الوقت كل مشا خرج الي طلع لفوق الي مشا لخدمتو وهنا بالخصوص مينة الي كيف وصلات طلعات المكتب ديالها حطات لوازمها خلات لابتوب يشعل ومشات لطابلو فين كترسم ديزاين او ادتصاميم ديالها ديال ديكورات البيوت مطابخ الخ....جمعات شعرها بستيلو وهزات قلم رصاص خاص حطاتو على فمها وبداتما يقارب ساعة وهي خدامة ...
حتى تحل الباب ودخلات واحد البنت خدامة معاها ...
مينة : تورية شنو واقع ؟
تورية : ختي واحد سيد بغا يشوفك
مينة : كليان ؟ خليه يدخل ...
تورية : اا ؟ واخا
مشات خرجات حتى دخل هو عاقد سبعة وعشرين فتمنمية وستين ...اتقولي حجبانو مشانقين اصلا غلاض وعينيه كحلين غااا غوبش ولا فحال شيطان ههههه ...شافتو وهي تنوض من الكرسي ووقفات ....
مينة : رياض !!! شنو محتاج ؟ مالك ؟؟؟
رياض : نتوما هادي هي عادتكم ادار رمسيس ؟ شنو دار عمك لمهدي ؟؟؟ اااا فين كتعرفي نتي مهدي حتى مشا ليه عمك ودار ليه ديك الحالة ؟ واش يحساب ليكم عايشين فغابة تعداو على ولاد ناس ؟
مينة : اش كتخربق انتا ؟ مهدي.؟ شكون هاد مهدي ....
رياض : مهدي ؟ "حك لحيتو وضحك بجنب " خههههه مهدي الي مرضيتيش حيث خلاك الي كان خاطبك حتى ليلة عرسك حصل عليك الخيانة مع واحد كنتي بغيتي ضحكي عليه ساعاك صدق ولد ناس تغذا بيك قبل ماتعشاي بيه…خلاك درتي مندبة اااه خلاني نهار عرسي والحالة ..."ماحس حتى جاتو طرشة لحنك بجهد تا بان ليه ضو ووجهو ضار لجيهة لاخرا ...
مينة : خراااااااااااااااااااااج براااااااااااااا الحماااااااار اشماااااااااتة لا نتا لا هو ...
كمش ايديه بعصبية حتى تسقط منهم الدم وسنانو عضهم حتى كانو غايطرطقو ليه غمض عينيه كيتنفس بجهد ...خرجات عيطات لسيكيريتي جاو ليه غوتات عليهم بغاو يشدوه ...
رياض "هز ايديه صاعر " : تااا قواد ميقرب ليا "غوت تا طلو الموضفين وشي خرج مع صوته مجهد فاش غوت خلاااص " تقاااااودو عليا ...
ضار مشا دفع برجليه ديك پوبيل الي فيها زبل "حاشاكم" حتى تشتتات وداز من حداها طلقها ليها بتخنزيرة ديال القرطاس ...
مينة "بغاو يجمعو داكشي الي مشتت وهي تحبسهم " : غيير خرجو انا نجمعو "جامعة فمها مابغاتش تبين البكية حتى خرجو وهي تمشي لمتكتب طاحت على الكرسي بجهد بطيحتها بدموعها الي دازو حتى غمضات عينيها واستسلمات لدموعها ربعات ايديها وخشات راسها وسطهم تتبكي وتتخرج ديك الحرقة الي حسات بيها فصدرها ...الضلم الضلم خايب والباطل كيحرق....
خيوط شمس تسللات لتعلن بداية يوم جديد هاد النهار غير النهارات الي فاتو اليوم يوم صارم بداية الخدمة بشكل صارم بدون عقد او مشاكل الي تخليه يغيب ...داخل بهيبة كبيرة كيشوف فساعتو وحاضي شكون الي جا وشكون ماحاش بتخنزيرك منزوجة بتغوبيشة حاااارة غيييير فؤاد فديك الوقفة والمشية وديك تخنزيرة فالخدمة كلشي بالعيار والحساب ...حتى وقف على واحد المكتب كيحساب ليهم مكيشوفش حيث كيشوف قدامو وهو راه شاااف المكتب قدامو قبل ميوصل ليه حتى وقف ...دخل تما بان ليه مكتب خاوي ....
ياسين "شاف فعماد " : شكون هنا ؟؟
عماد : هنا خاوي يمكن ليوم بايبدا مول هاد البوسط ...
ياسين : علاش مافخباريش ؟؟؟
عماد "حنحن" : احم ر راه خ خلينا ليك ملف الناس الي نجحو فكونكور ديال هاد البنك ووزعوهم على حسب الفروع ...
ياسين "خنزر فيه " : وشنو يجي على حسب ماقالها ليه راسو ؟
عماد : م ماعرفتش ...ول...
ياسين"هز ايدو معصب كيشوف لتحت " : اول مايجي يدوز عند المكتب ...ومشا خلاه غي كيشوف ...
داز لمكتب ديالو حلو ودخل حل صدايف القميجة البيضة لابس كوملي كحل وقميجة بيضة بلا كرافاط جبد الفون حطو وتلاح فىق الكرسي شعل لابتوب شاف الملفات الي حاطين ليه وبريد خاص يسنيه عاد يجمعوه باش يرسلوه لبوسطة منهم وراق فيهم كودات ليكارط گيشي منهم حسابات الزبناء اكثرية الحسابات الكبرى ديال رجال اعمال كبار ...هز تيليفونو ...ودوز ليها الخط ...
ياسين : فالخدمة ..."تگعد " يلاه كاندي نسالي ونعيط ليك الي خصاتك "دق الباب برك على البوطون تحل الباب عطا الاذن باش يدخل الي جا فديك اللحضة ...بمشية نسائية مميزة من صوت حذاء الكعب العالي لابسة كسوة مارون حد ركبة وصباط طالون كحل طالقة شعرها وريحتها فايحة زوينة وخفيفة ...
ياسين : تهلاي فراسك ...
ما هزش عينيه ابدا فالي جا ولا حتى ريحة اثارتو ابدا كانت ريحة نسائية كقااااودة وهو جدي فالعمل ديالو وسيد نيشان دغري مكتيرو تاحاجة الا اذا كانت مميزة يكون شم عادي باش تخليه يهز راسو ابدا وقت الجد جد ...
هي غير شافتو كتصغر عينيها وتفكر تفكر تفكر حتى شرعاتهم وهي تشهق ...
غزلان : نن نتا ؟ فايت شايفاك نتا الي صاربتي مع خويا ديك نهار ...
ياسين : شكون نتي ؟؟؟
غزلان : انا غزلان المنصوري ...
ياسين "مع شاد تيليفون زيررر عليه تا كان غايعوجو فايدو حطو فوق المكتب " : شنو كديري هنا ؟؟؟
غزلان "مدات ايدها " : غزلان المنصوري Chef du département des opérations bancaires رئيسة قسم العمليات المصرفية الجديد من الي نجحو فالكونكور ديال هاد الفرع ....
غزلان "حسات بثلج تخوا عليها واحد البلاكة خلاها فيها وجهها ولاو فيه لوان " : و واخا موسيو لو ديغيكتوغ ...
خرجات بغات تبكي مرضااااتش اول تصبينة ليها بالفن خذاتها ومزال فاش غاتمشي عندو يعلم الله اشمن تصبينة غاتاخذ بالبارد تاين ...قاصح بزاف فتعامل ديالو ولا رطب المهم الغربي ديال قصوحية عطاها من دابا ...غزلان بنت المنصور اخت عيسى العدو اللدود ديالو الي عاطيه تيساع يضرر ضورة يلقاه لاصق ليه فخنشوشو فاي زمان او ضرف كان ...
ياسين : نوار ...
نوار"كتبتاسم " : نعاااام ...
ياسين : تهلاي فراسك سيري متعطليش ...
نوار : ياسين...
ياسين "عرفها اش باغا تقول" : ماعندك بيها غراض لا انا لا نتي …الي قلل الادب كيتربى الي قليل الادب ما شغلنا فيه الي كاين دابا غير انا ونتي ...خدامة هنا كدير خدمتها وتمشي فحالها ...شنو نزيدك ؟
نوار "ضحكها " : ههههههه والو والو ...انا غانمشي مينة كتسنا فيا بغات توصلني انا واشرف عاد تمشي هي لخدمتها معطلة ليوم حيث عندها خدمة فازرو هنا نيت ...
ياسين : ماعليش ...
قطع معاها ورجع لخدمتو صونا فالفيكس ...
ياسين"عيط لعماد" : chef lmansouri تكون عندي هنا ...
عماد : راه الفيكس ديال مكتبها عندك تما سي ياس...."مكملش هضرتو سمع غير انفاسو زن طق هههههه ما قرقبهاش دغيا فهمو ولا يتفتف " و واخا موسيو ...
اما لالة ومالي شهلة العياني راها لبسات وتقادت ف سروال دجين زرق غامق سليم و تيشرت بيض فيه رسومات فالازرق طويل حد ركبة لبسات فوقو فيست دجين قصيرة فحال سروال فلون ...جمعات شعرها شفيرة خفيفة لور رشات بارفانها الي خذا ليها هو نيت سكاندال ...حطات صاكها فيه تيليفون واربودز ديالها فيه ومشات جلسات لبسات سبرديلة بيضة عالية شوي وحتى هي مصاوبة ليها سوميلتها على ود رجلها جات تلبسها وهي تلوى ليها رجلها الي كانت مهرسة منها بحركة غير مقصودة بزربة ماعرفاتش كيفاش ...
نزلات عليه دقة حتى كان غايجي وجهو فطبسيل ...غيييير مينة الي نزلات عليه اما كون سمعو شي حد من دراري ولا رجال كون تعلق من شفارو على هاد قلة الحيا ...
نوار "وجهها ولا مطيشة " : حماااار ...
مينة : قليل الادب فطر ويالاه نوصلكم حتى يجي عمي فؤاد ...
اشرف "شاد راسو " : غاتقولي ليه اش قلت بالتفصيل ولا تلوحيها ليه بالمعاني ديالو والفاهم يفهم عههههه قولي ليه حاجيتك ماجيتك على ط ولد الطا الى تلاقا مع الزااا ولد الزا كيديرو زيزا هههههههه "ناض قبل متشير عليه بالي قدامها " ...
كل مشا لخدمتو والي مشا لاشغالو والي مشا لقضاياه وخدمتو نيت كل فين تدها يامنة مشات هي وفؤاد لعند طبيب الي بدات معاه هو نفسو كيجي لكلينيك في فاس ديالو وعيادتو فمراكش الي مشات عندو ...اما مينة كملات وناضت هزات لوازمها وتيليفونها مساكتش كيصوني حتى خرجات تجاوب بينما خرجات نوار واشرف باش توصلهم فطريقها ...
مينة : وي كوثر حبيبة ...
كوثر : الزيين صباح الخير ...
مينة : صباح النوور
كوثر : عيطت ليك الليلة فالعشية مع سبعة ونص كاين عشا جامعين الفريق ديالنا وكاين الباطرون ضروري تحضري حيث غايتلاقا بداك السيد الي عندو الشركة كتبنى ف الخرجة طريق رباط ...
مينة : وييي الحاج برادة ...
كوثر : قاليك سي عز الدين (الباطرون) ضروري كاملين تحضرو الي خدامين على الشركة ديالو داير عشا فيه حتى شي رجال عندهم بغاو يبنيو وحتى هما بغاو يشوفو كيفاش الخدمة وتعامل ...راكي عارفة...
مينة : سيي فهمت ...وخا ان شاء الله ...ندوز نهزك معايا ؟
نوار : اويلي مالك معاها حشومة عليك فحال بغات ترجع ليك ...على من زويناتها ...
اشرف : وتقوووووووووووول واش نرجع ليها وتقووول ...لااا يغرك الزين الزين من هاد خيتي وليت مامن الى زين الفعل والنقا شفتي نلقا رابحة الحولة تكون نقية منفوتهاش والى فحال هادي وخا تكون ايرينا شايك لا حطيت فيها صبعي ...
نوار : علاش مسخة ؟
اشرف : خلييي الوسخ وبغيت غا نعنقها ضربتني ريحة صنان فحال المرقة بايتة برا ضاربتها شمش من تم منخري مابقاش كيعرفني سيمانة وهو مخاصم معايا ....
نوار"كمشات ملامح وجهها " : ايييييففف ...
وقفو حتى شافو فين جاو واشمن كروب وقفو مع الاصحاب الا نوار كيف عادتها مشات وقفات بعيد تا سالا اشرف فالجناح لاخور وكملات هي شافو لي بروف والاقسام والتوقيت ...عاد علقو ليهم اعلان ببداية الدخول والدراسة الفعلة الي غاتكون اليوم الموالي فالتوقيت الي محطوط ليهم ...
هز شي ملفات منهم ملف واحد من اكبر رجال الاعمال واكبر الزبائن حسابات في البنك ...حل الملف وقرا السمية بنسودة عقل عليه كان كيتدرب عندو فالشركة قسم الحسابات وفي فترات اخرى قسم ادارة الاعمال ...يلاه غايدوز ليه التيليفون حتى تدق الباب ...بلا ميشوف ورك على البوطون تسمع ززززز معلن على السماح بالدخول وهي دخل بخطى بطييئة عاضا شنايفها بتوتر وداخلة غير شوفة فيه جابت ليها الرهبة والخوف وتوتر مجموعين ...
غزلان "وقفات " : موسيو ...
ياسين "كيشوف فالملف " : معاش دخلتي لخدمة ؟؟؟
غزلان : سمح ليا ت تعطلت و خسر ليا سوينغ...
ياسين : معااااش دخلتي ؟؟؟
غزلان : تسعود ونص "كتلعب بصباعها "
ياسين : هادشي غادي يتكتب فالتقرير
غزلان "خرجات عينيها اويلي من اول ساعة بدات بتقرير ؟" : علااااش ؟؟؟
ياسين : خدمتك ..
غزلان : ولكن بغيت...
ياسين "جهد صوته " : يلااااه ...
ضارت بغات تبكي تترعد ناااري ومن خيبو اول نهار مقابلة مع مدير ديالك اش شاف ديالك يكون معصب منك بخصوص الخدمة ومن اولك تقرير والتقرير كيتكتب غير الى كان كيجمع استهتارات كثيييرة او غلط فااادح قادر يرجع على البنك بخسائر او مشاكل ...مشات لمكتب ديالها بلا ميهز فيها راس تا ديك شوفة مشافهاش ...دوز الخط لسيد الي كان هاز الملف ديالو دوا معاه من تيليفونو الشخصي وبقا معاه على اتصال ...
كان الهدف من الاتصال السؤال عن الاحوال بما انه تفكرو وكان الملف قدامو لما لا تكون حتى فرصة فكسب زبون لبنك ...
كيف وصلتهم مينة خذات الطريق لواحد الفيلا فازرو تما نيييت وقفات على اشغالها شي ثلاثة سوايع وهي تما حتى قادات الامور وطلعات لفاس لشركة وصلات فوقيتة الغذا خذات غذا من زنقة اونپوغطي معاها لخدمة طلعات دخلات لبيرو ديالها باش تكمل الرسم الي بادية فيه حتى دخلات عليها واحد البنت خدامة معاها اسمها اسمهان ...
اسمهان : ويالاااه اصحبتي مالك راكي غاتصايبي لراسك اولا ماشي لشي حد غادي تصايبي منها بدلي لوك ديالك باش تبدل نفسيتك ديما الجديد وتكوني مرتاحة مغاديش نقوليك تصايبي باش تعجبي شي حد ابدا صايبي حالتك باش تعجبي راسك وتحسي براسك كتخدمي وفلوسك كتصرفيهم على راسك وتبان فيك راكي كونتي راسك ومستقبلك اما الى صايبتي على شي راجل مني وجبد يقطعهم عليا على ما داز عليا بناقص ...اجي تصايبي راكي فعمل ديالك منها بجيوك عروض ونكسبو زبون ونطمحو لافضل ماعرفتي يشوفو الكفاءة ديالنا حتى المصهر كيلعب دور ازين وفهمك كفاية ....
مينة "كانت كتسمع ليها وعجبتها هضرتها وداكشي نيت الي كتبغي مينة سوا راسها وعائلتها سوا الشخصية الي صنعاتها وتكونات عليها ..." : واخا تغذاي بعدا تغذاااي ...
فعلا كيف تغذاو جمعات دنيا طلات على ديزاين زادت فيه شي روتوشات ومن بعد جمعات لوازمها وخرجات من المكتب تلاقات بالباطرون اكد عليها وخرجات شدتها نيشان لازرو هضرات مع ماماها سولات فيوسف طمنتها عليه وصلات لدار طلعات دوشت وخرجات لابسة غير سورفيت وشعرها فازگ حتى تلاقات بنوار فالطريق ...
مينة : جيتي ختي الزوينة ...
نوار : جيت قبيييلة هضرت مع ماما ...
مينة ؛ حتى انا هضرت معاهم ...اجي تمشي معايا ؟
نوار ؛ فين ؟
مينة : غاديا لكوافورة نصايب شعري عندي شي عشا فالعشية على ود الخدمة يلاه ناحق مع الوقت ...
نوار"كتفكر " : بغييييت ندير لشعري كوپ جديدة ...
مينة ؛ وصبغيه نتي ...
نوار"عينيها لمعو " : اه اه دابا تزوجت مغايقولو ليا والو "حيث كانت كتقوليها يسرى ماتصبغيهش حتى تزوجي " ...
مينة : ههههه ايه زيدي وقوليها لياسين اختي زوينة تهنيتي من ماما جاك ما كرف ...
نوار : لا بلاش هو مكيديهاش فهذاكشي ...
مينة : والله واعلم اختي ...يلاه دغيا راني عيطت ليها وباش منتعطلش على العشية ...
فيلا راوية وايلاف ...
جالس فجردة مع فؤاد كيشربو فالقهوة ويهضرو على الخدمة واشنو غايديرو ...
ايلاف : بديش شوفو ولا احكي معو فؤاد ...بدي اعرف اش حالتو من بعيد ...
فؤاد : شنو قلت انا ؟؟؟ "هز فيه عينيه مخرجهم "
ايلاف "دار ايديه على وجهو دوزهم عليه وطلق تنهيدة " : اففففف خلص خلص رفيقي ...
فؤاد : دير شنو قلت ليك زگي معاهم شوف شنو كاين وكيفاش حتى نجي انا ...
ايلاف : خلص تمام ...
واقفة فهاد اللحضة صفية كتشوف فالحوايج الي عزلات ليها راوية حطاتهم باش تلبس واحد فيهم منهم كسوة بيضة وفيست كحلة معاها ولبسة لاخرا فيها سروال دجين وتيشرت طويل فالاسود حد ركبة ...بقات تشوف حتى هزات داك تيشرت وسروال لبساتهم ولبسات معاهم سبادري بيضة ايرماكس جمعات شعرها لور بفيليل وهزات صاك بجنب فيه واحد دفتر وستيلويات وتيليفون جديد خذاتو ليها ...حتى دخلات عليها ...
راوية : صافي وجدتي غادي ناخذك انا ومن بعد ياخذك الشيفور واخا ...
خرجات هي وياها كانت ساعة قريبة لخمسة العشية ...مسات راوية على فؤاد وايلاف من بعيذ وخرجات هي وياها شدوها نيشان حتى لواحد العمارة فيها بلايك كتار ...ووقفات قدامها ...
راوية : صافي راك عرفتي ياك ...هانتي غادي دوزي معاهم ستة شهور ابتداء من هاد شهر نيت راهم كيبداو فيه خودي اطيسطاسيون ومن بعد زيدي لفورماسيون لاخرا حتى لشهر سبعة عاد دفعي لسيت ديال لافاك باش تسجلي فيه ايلاف ولا فؤاد يدخلوك ولكن من احسن ديري شي فورماسيون ...
صفية : صافي واخا احسن ..انا ندخل باش منتعطلش ...
راوية : الله يسر احبيبتي ...
خرجات من سيارة وطلعات لفوق دخلات لفين غادي فورماسيون ستة اشهر ديال بيروتيك ومعاهم عام ديال اللغة الفرنسية تاهي دافعة ليها تخرج من هادي ودخل ليها ثلاثة سوايع واليوم كانت البداية ديالهم بزوج ...
ربي كتب عليها هاذ ولاد ناس وخا دفعات الثمن غاالي لكن ربي فالاخير كيجازي كل واحد على قد نيتو ....
اما فجيهة ديال الصالون فين جالسة لالة ومالي ومينة الي قطعات شعرها نقصات منو باش رجعوه ليها ديگرادي صايباتو وبوكلاتو جات خطيييرة صايبات ضفارها وضارت بالحالة حتى نفسيتها حساتها تحسنات ...
نوار : معمرو هضر ليا على شعري كيقوليا على شي حاجة داكشي ديال العيالات اش غانعرف ليه فاش كنسولو على شي كسوة واش لبس حدو كيقوليا ماتلبسيش عريان ومزير ...
مينة : وماااعرفت ...كون غير عيطتي ليه ...
نوار : قاليا حتى نعيط ليك رسليا ميساج بالي فاجتماع فاش صونيت ليه ...واصلا درت ليه غير شاتان هاد لون كيعجبني ...
مينة : شاتان ؟ شاتان وصبغيه بالمارون ولا شي لون ممعيقش ...
الكوافورة : صافي اختي راه تصبغ ...مبقا منبدلو فيه حتى يخرج ويتصايب وديك ساعة من بعد تغمقو ...ومن احسن مادير والو غادي تكرفص عليه تبدال صباغة فنفس الوقت عالاقل تباعذ الايام ولا شهور عاد تبدل ..
دازت ساعتين غسلوه ليها ونشفوه ودارو ليه بروشينغ ...هادشي كامل مكانتش غاديرو كانت نفسية مريضة لو ما سمعات صوت باباها وقاليها بالي غايتقلق منها الى بقات كتبكي مكانتش غادير هاذشي ...وحتى يسرى اصرات عليها تخرج وتضحك باش يرجعو يلقاهم كيف بغاهم حتى نفسية الى كانت زوينة كتعاون الواحد وهما عندهم فالعائلة مكيبغيوش الواحد يستسلم للحزن كل ينفس على لاخور....
قطعات وصبغاتو جاها خطيييير ...خارجين من الصالون حلات مينة السيارة بالكونطاكت من بعيد صونا تيليفون نوار كان ياسين ...
نوار : ياسيييين ...ساليتي ؟
ياسين "كايحل فربطة العنق ..." : ساليييت "شاف فالمراية طلق سينيال وخرج من البارك شد الطريق حتى شدو البوليسي فطريق عند الدورة ..." تت فاااك ...نوار تسناي شوي ونعيط ليك ..."كان ناسي سمطة وكيهضر فالفون فوذنو ...اييييييوى يا هلا بواحد البروصي نعماس دايزو الكلام ....
قطع معاه وركبات حدا اختها اما هو شدو البوليسي بروصي حيث مكانش داير سمطة وتيليفون فوذنو نسا مابرونشاه بلوتوت ...
طبعا قيد المعلومات ولبق ليه بروصي فيه 300dh ...عطاه ليه ودار سمطة وزاد حتى يخلصو جاب الله ماخداش ليه رخصة السياقة وتنقصو ليه نقط ...
دخلو لفيلا طلعات مينة بزربة لبيتها تبدل لبسات كسوة فالاسود بالفيست ديالها تحت الركبة جات على طايتها ووساعت من لتحت …خلات شعرها كيف صاوباتو على راحتو دارت عكر خفييييييف بزاف بالكاد كيبان ومنو مرطب شفايف خلات وجهها هكاك مع حجبانها زوينين وحرشين وزادتها لاكوب اول مرة ديرها وقادتها جات كتحمق مع شخصيتها السادة نيييت رشات بارفانها ولبسات صباطها طالون فالاسود ...
هزات بوشيط جنب دارت فيها تيليفونها والي تحتاج جبدات كونطاكت ونزلات ...لقاتهم كيهضرو مع نوار طلعات نيشان لبيتها ماشافها حد مشات تبدل حويجها بينما هضر معاها ياسين وتهضر مع امها ثاني تسول على باها ...حتى نزلات سلمات على الي لقات قدامها ومشات كتزرب كلشي كيشوف فداك النيولوك الي دارت جاها خطيييير ...
شداتها طيارة وحدة حتى لفاس حيث تعطلات كيف وصلات لقات شي دراري معاها عاد وصلو تاهما ...وقفات معاهم ودخلات ....
مينة : تعطلنا لا ؟
لولد : لا ها عز الدين عاد وصل ...
مينة "ضارت لقات الباطرون عاد وصل بسيارتو " : سييي هاهو يلاه نسبقوه قبل ميدخل هو ...
تابطات دراعو كضحك وهما داخلين دخلو لجردة من لور فين نعتو ليهم سرباية ودخلات حتى لقاو طابلة طويييييييلة فيها طوابل مقادين على شكل طابلة طويلة مانتكة مزوقة اشيك ما يكون ...
مينة "كتشوف فين يجلسو ما غيييير تجي عينها عليه الي كان هاز كاس فايدو كيشرب حتى تكوانسا كيطلعها ويهبطها " : تفووووووو ...
اما واحد نوار خرجات من صالون دايرة شال على شعرها دخلات سلمات وطلعات تبدل حيداتو وهو يتطلق وطلقات الگصة الي دارت جات تاهي كيوووت بديك الگصة تاهي تبدلات وحسات براسها فشكل ...صونا تيليفونها كان ياسين من بعد ما وصل ..
نوار : وصلتي ...
ياسين "كيبدل فحوايجو وطالق سپيكر " : وصلت وصلت ...
نوار : شنو وقع قبيلة ...
ياسين : ماشي شي حاجة الي دار ذنب كيستاهل العقوبة ..."عاود ليها شنو وقع والبروصي الي عطاه البوليسي " ...
نوار "دعقها" : الا اه لا تتت ههههه "حكات جبهتها حيدت الگصة رجعتها لور وردتها " ...هههه دعقتييني ...
ياسين : ماعليش ماعليش …شنو كديري دابا ؟
نوار : فاش هضرتي معايا كنت مع مينة مشيت لصالون صاوبات وقطعات شعرها عندها شي عشا ليوم ديال لخدمة ....
ياسين : مزياان ...ونتي شنو درتي ...
نوار : ههههه حتى انا صاوبتو حتى تجي وتشوفو ...
ياسين : شعرك زوين مايحتاجش تصايبيه مصايب من عند الله ...غير الله يرضي عليك ماتقلقينيش منك واخا داكشي شغل العيالات ولكن مانبغيييكش وياااك تبدلي ليه لونه مانتي فخير معايا وبلا ماتجربيني راكي عارفاني خايب…تفاهمنا ؟؟؟
نوار"صرطات ريقها جوج مرات حتى وحلت ليها وشهقت ": اويلي لا م صبغ توووش ...
كيف ما الزوجة ليها حق فراجلها بكلشي ليه حتى ليه الحق فيها بكلشي ليه ...كيف ما محترمها مكيشوفش فجنس النساء من غيرها كيدقق فيها الشوف فتفاصيلها فشعرها لباسها جسمها هضرتها صوتها على باقي النساء كيدير غشاء كيجمعهم غير الكلام ان اضطر الامر ...الحياة زوجية تشارك لاي حاجة في اطار التفاهم وماشي كل واحد يدير شنو بغا فقط تحت ما يسمى راني دايرة مابغيت ...كيف محتارمني وداير بحسابي تانا داير بحسابك كيف ممخصصني من والو حتى انا حقي بسيط فانني نشوفك كيف بغيتك وخا مافيها باس الى خذيتي الراي او تشاورتي كتحسسيه راه راجلك مشاركك فكلشي ماشي ديري مابغيتي وهو كانه مكاينش وكتلغب وجوده وشخصيته ....
نوار "ولات تصرط فالريق ابدا ماقالتش راه غايديها فشعري وخاصة لون ماشي معيق يعني غير تغيير ..." : اممم لا غي قطعت الگصة ...
ياسين : مزيااان بالصحة لالة ...
نوار : يعطيك الصحة ...
ياسين : سيري من بعد ونهضرو عندي منقضي دابا برا مع الخدامة ...
نوار : الله يعاونك ...واخا ان شاء الله ...
قطعات معاه وناضت وقفت شوي رجعت جلست كتندب وتحندب وناااري اش غادي مادير ...ناضت بجرا هبطات لتحت كتقلب عليها فينما كانت مهم تحضر وتعتقها وشكون من غيرها الي عارفاه كيداير قبل منها وعارفاها كيدايرة وترباات على ايديها كيما رباتو هو وشكون الحنينة الي غاتحن فيها وتعاونها من غير لالة يامنة ....
مشات كتزرب حتى ضارت لور فين كاين بيت كيصبنو فيه وحاطين فيه الماكينات ديال صابون ونشافة حتى وقفات عليها كتلهت كانت واقفة مع واحدة من البنات كتوريها اش تصبن وشنو تسبق والي فيهم الوان مهم كلشي تتوقف عليه يامنة وحتى سارة ...لكن يامنة تتوقف اكثرية على حوايج فؤاد وتوقف على صليح فيما يخص القوامج والي خاصهم يمشي لصبان راه كيمشيو الي كيعرف ليهم باش ميخسروش ...
واخا لباس عليهم ولكن راهم ناس عاااديين ماشي غير لباس عليهم الي توسخت تلاح ويشريو وحدة اخرا لاااا هادشي غير فالخيال ولا الي عندو فلوس شاطت عليه ملاقي مايدير بيها ...
نوار : خالتو يامنة ..."جمعات النفس وطلقتها "
يامنة "ضارت شافت فيها " : ابنتي ...مالك ؟
نوار : الى ساليتي بغيتك عافاك ...
يامنة : واخا بنتي "شافت فالبنت " هادشي الي قلت ليك وصافي ملي ينشفو الله يرضي عليك طلعيهم ليا لبيت ..."وصاتها وزادت تتمشى مع نوار حتى طلعو لبيتها هي وياسين ...وعاودات ليها شنو طرا فالمكالمة "
يامنة : ماشي ميبغيش هو حاجة عجباتو فيك كيبغيها تبقى باغيك ابنتي كيفما نتي نهار تبغي تبدلي تشاوري معاه خودي رأيو وشوارو يعطيك شنو بغا وعطي شنو بغيتي وتفاهمو هو كيبغي الي تكون تشاورو تحسسو راه راجلها جناحها قد ما طرتي طيري مرجوعك لراجل يحميك ابنتي وراااجل بمعنى الكلمة ....
نوار : اهااا نقووووووليه راني صبغتو كاع ميخليني حتى نشرح ليه غادي لقاه عند وجهيييييي اهى ...
يامنة : هههههههههههه غا قوليها ليه ومتخافي من والو الى غوت عليك ولا شي حاجة انا نتفاهم معاه ...
الصدفة خير من الف ميعاد ...ولكن ماذا لو كانت الصدفة اكفس من اي ميعاد ؟ ماذا لو كان الميعاد اهون من الصدفة ؟ ماذا لو كانت الصدفة ابشع من انك تكون على ميعاد مع شخص نتا مباغيش تشوفو ولا كيشكل ليك شي حاجز فحياتك او بداية مشكيل فنهارك الي غايدوز بشوفتو مكفس مزفت ؟ ولكن باش تلاقاه صدفة فليلة عشاء نتا بدلتي من راسك ووجدتي باش تكمل حياتك حتى تلقا داك المشكيل فيها ...هادشي الي وقع لالة مينة رمسيس من بعد تسكسيفة على الحالة وتحليق ولوك الجديد هاهي لقاتو فوجهها ....
مينة : تفووووو
شاف فيها الولد واستغرب لاش دفلت حتى سولها ...
الولد : شنو مالك ؟
مينة : هادو الي فطابلة هما رجال الاعمال الي حضرنا على قبلهم ...
الولد ؛ من اهم من احد اهم رجال الاعمال سي عز الدين راه كيوصي ويعاود ...كتعرفي فيهم شي حد ؟
مينة : ااا ؟ لا لا اجي نجلسو ...
مشاو بزوج قربو لطابلة حتى وقف عز الدين وشير ليها ...
عز الدين : مينة ...
مينة "مشات لعندو " : وي موسيو ...
عزالدين : بنتي جبتي معاك داك الديزاين الي خدمتي عليه الي عطيتك بيني وبينك تخدميه ؟
مينة : اكيد جبتو هاهو عندي ف ولابتوب راه فطوموبيل وقت الي بغيتي نوريه ليك ...
عزالدين : الله يرضي عليك ...خليه دابا حتى نتعشاو ونقولها ليك ...
مينة : وعليه ...
توزعو كلهم كل شد بلاصتو اما هي مابقاتش شافت فرياض ابدا الي كان جالس وعينيه مرة مخنزرين فيها مرة كيوشوفو فقنت اخور متفاديينها ...جا الحاج الي داير العشا رحب بيهم وجلس بجنب عزالدين وبقية الفريق حدا بعضياتهم ....بداو المشاريب كيتوزعو على حسب الي كيشرب العصير ولا صودا ...
ممنوع الشراب يكون اولا من مبادئ كاع الي حاضرين كلهم من الرجال الي تقريبا ملتزمين من ناحية الدين ...وخاصة الحاج الي عارض عليهم ....
الحاج : اسيدي مرحبا وهلا بيكم ...
الكل : بارك الله فيك ...
الحاج : تفضلو مرحبا كلشي ديالكم ...قبل منتعشاو بغيت نوريكم الشباب المكافح وليداتنا الي قراو ووصلو الي مهندس الي محاسب الي مدير العلاقات ...فريق مجموع من مهندسين الديكور منهم شبان وشابات الله يرضي عليهم الخدمة متقونة بدون اضرار مادية كلشي على لغتنا العامية ناضي مافيهش تخرشيش ....جمعتكم هنا فالعشا منها نتعرفو عليهم وتعرفوعلى الي كيقادو فديكور الشركة الي مشاركينها انا والحاج الكراتي والحاج سعدي وسي رياض المرابط حتى هو دخل معانا فاسهم الشركة ..
مينة "ضورات راسها لهيه " : تت ...
الحاج : التصميم الي هضرت ليكم عليه والي كان بيني وبين السي عز الدين وهو التصميم الداخلي لشركة الثانية الي الفرع ديالها فازمور الجديدة ...
رياض "حنحن" : الي قرب يكمل فالبني وغادي نتكلف بيه ؟
مينة "خرجات عينيها " ...
الحاج : هههه ايه اولدي الي تافقنا بالاجماع تكلف بيه ريتما يكمل ونبداو ديك ساعة نعقدو اجتماع على رئاسة مجلس الادارة ديالو ...
الحاج السعدي : ايه الحاج التصميم ديالو كنا كنفكرو باش نشوفو الي يعطينا تصميم اولي ونختارو المصممين ديال ديكور داخلي ديك ساعة نقررو ...
الحاج"حط ايدو على عز الدين " : وانا وعز الدين كلفنا واحدة من امهر المهندسين عندهم طبعا منكروش كاع شباب عندو تبارك الله عليهم فريق كفء وقاد بكاع الخدمة الي كتعطاه ...هي بنت شابة مينة رمسيس مهندسة ديكور كلفناها تخدم على التصميم حتى هي ...واليوم جات الفرصة انها توريه لينا وديك ساعة حتى هو يتخاذ من ضمن التصاميم الاولية الي غانختارو ...شابة بصح تستاهل …تفضلي بنتي ...
مينة "حسات بسطل ديال التوتر تخوا عليها باش تجمع ركابيها تنوض ولاو تيخبطو فبعضياتهم خصوثا عينين رياض الي كيسوفو فيها حتى هو تصدم بدوره مكانش عارف انها غاتخدم على تصميم شركة الي هو غايكون مسؤل عليها ...حتى هو تصدم فحالها كيف تصدمات فاش عرفات انها فالغالب غاترجع تخدم معاه وهي بحرا ماتهنات منو ...."
مينة "وقفات ونطقات لكن صوت خانها وهرب حتى حنحنات ومد ليها الولد كاس الما شداتو وسد ليها فايدها دوز عليها هي حركة باش تخفف عليها توتر ولكن فنضر رياض جاتو حركة ماشي تال لهيه خصوصا فاش شافها جايا معاه وضحك وشووووف اشنو عرف عليها حتى ولا هاكا " : احم س س سي الحاج شكرا على شهادتك ....
الحاج كراتي : بنتي نتي بنت سي يوسف رمسيس ؟
مينة "ابتاسمت ليه بافتخار" : هي اناا الحاج ...
الحاج السعدي : تبارك الله ونعم التربية ونعم الاب شهادتنا فيهم مجروحة ال رمسيس ...
سمعو صحكة صغيرة شوي ضحكة نيت شوي صحكة كبييييرة حتى ضارو شافو فيه ...
...خنزرات فيه بالفن بلا ميحسو هو هاد النظرة شافها وعرفها صور راسو كيضحك كان تاهو مانتك بكوملي كحل وداك شعر الي موقفو بجيل عادي لعين غير البنات حشمو تما اما ميخزوش عليه العين وهو اصغر واحد فدوك رجال الاعمال الي تما ...كان جالس مقابل معاها نيشان فطابلة ...نعلات شيطان ورجعات حنحنات حتى لقات الكلمة ديالها عطات لمحة على التصميم عاد جلسات ....
الحاج : نتعشاو وديك ساعة بنتي جيبي التصميم نشوفوه جميع ...
مينة : مرحبا سي الحاج ...
داز الوقت وقرب العشا بقات هي ونوار حتى هضرات معاها و من بعد ما عطاتها يامنة النصيحة الي ياربي تسمع ليها وديرها ومطبزش ليها العين ...هبطو لجردة يتبردو ويكملو حديثهم…
نوار : نعيط ليه دابا ؟
يامنة : عيطي غايكون جا لدار ضلام الحال ماعادا الى تدها فشي كوري ...هضري ورطبي هضرتك وقاديها متخافيش تصدقي بنتي مفاوتة فهضرتك ويبكيك ومانبغي نشوفك كتبكي حنينة ديالي ...
نوار : واخا ...
يلاه اتهز التيليفون حتى صونا ليها اپيل ....جاوبات فالحين ناصت يامنة غمزاتها ومشات خلاتها منها ليه يهضرو وتفك حريرتها ...
نوار : عاد كنت بغيت نعيط ليك ...
ياسين : توحشتيني ؟
نوار"ضحكات " : ههههه اه و احم بزاااف ...
ياسين : زعما ؟
نوار : علاش ؟
ياسين : هاد الزعامة الي زعمتي شنو وراها ؟
نوار "جمعات ضحكة " : و والو مكاين والو ...
ياسين : زعما ؟؟؟
نوار : علاش كتقول هاكا ..."قلبها كيضرب"
ياسين : العجب "تنهد كيمسح على راسو " العجب وكان ابنت ناس ...تعشيتي ولا مزال ؟
نوار : مازال بينما يجي عمو فؤاد ونتعشاو ...
ياسين : مزيان تعشاي مزيان وكولي مزيان وخا هكاك مزال غانجي باش تعاودي تحاليل شاملين ديك دوخة عندك ماعاجبانيش درت ليك الخاطر هاد اليام الي كنت معاك مكنتيش تقدري ديري
شي حاجة من جيهة باك ...نرجع ولا ديريهم النهار الي عندك خاوي ومتعطليش ...
نوار "قفزت " : ص صبغت شعري هانتا والله ما معيق فحال لون شعري تقريبا عااااافاك مادير والو ...والله والله حتى زوين مامعيقش غير بغيت نبدل لوك قلت متديهاش فهادشي عافاك ...شوف
"غمضات عينيها وطلقاتها " باش ندير ليك واحد الحاجة زوينة ...حتى سمعات الحس تقطع حدرات تيليفون شافت فيه..كان قطع عليها الخط ههههههه...
تحط العشا الي كان شبه ملكي كلو متول من طقطق تال سلام عليكم اشمنك يا شوا فثلاثة صواني بخضرتوه مصوطيا ومزوقة على حقها وفوقو عواد الفرماج حمر وكورنيشو وشيبس مزوقاه من الفوق وليصوص فحناب شلايض الخضرة جردة مزوقة …الكيسان مقادين… المونادا عالجهد فالاول تحط مع اتاي عاد موراه دجاج معمر ومحمر بشلايض والفريت وكلشي مقاد مزوق بتريتور عاد ديسير بريستيج ....تعشاو وسالاو وتجمعات دنيا فانتظار اتاي والحلوة ...
مينة : سي عز الدين انا غادي نجيب لابتوب ...
عز الدين : واخا بنتي ...
مينة : دابا نكون هنا ...
ناضت هزات صاكها جبدات منو كونطاكت ومشات والحاج وصا الي تما يقاد داطاشو مقابلة معاهم بينما جات ...اما واحد رياض جالس داير صباعو على فمو ورجل فوق رجل كيشوف واحد الحاجب مطلعو وثاني مهبطو وداير واحد ابتسامة خفيفة ديال استهزاء ...جهد شي عشرة دقايق حتى كانت جايا ....
عزالدين "قرب ليها بشوي" : بنتي هذا راه هو الي غادي يحدد ليك مستقبلك لا من هنا القدام ولا معانا فالشركة الله يجيب التيسير ...
مينة : جهد شهر ديال خدمة ليل ونهار ان شاء الله مغاديش يضيع اسي عز الدين كون هاني كيف قلتي راه خدمتي حتى انا ...
عزالدين : واخا بنتي الله يسر ليك ...
هزات الكلي من شكارة لابتوب الي حطاتو وشعلاتو وبرونشاتو مع داطاشو خلات الولد كيقاد فيه وهزات الكلي ...
مينة : نتمنى يعجبكم والى كان شي استفسار انا رهن الاشارة يقدر فلول يجيكم فشكل من بعد ماتكملو فيدو غادي توضح ليكم الصورة والتصميم فالاخير… شوية الصبر وغادي تعرفو ...
الحاج : ان شاء الله ..."شير لسرباية باش يبداو فتفريق الشاي بينما قادت هي ويشوفوه جيمع " ...
تفرق اتاي وعطات لدري الكلي يديرو تما جلسات حداه مد ليها سرباي كاس اتاي ...بدات تشرب وهي تغمز الولد بركات على البرطون حتى تطلق الفيديو ويااااريتو ماتطلق ...
كانت كتبتاسم فرحانا بسهر الليالي شهر وهي مضاربة معاه خلي عليك الالتزامات ديال تصاميم خدامي لاخرين تاهما تعب وجهد جد كبير حتى وصلات فين وصلت بيه ....فرحة فعينيها الي لمعو حتى بدات كتختافي كل مكتشوف شنو فالكلي ....
الحاج "وقف " : اعوذ بالله شنو هذا ؟؟؟
عزالدين : مينة ؟ هذا هو التصميم ؟
مينة "ضارت عينيها مغرغرين " : م ماشي ديالي ...
الحاج : كيفاش ماشي ديالك وتقديم فيه سميتك وكنيتك ؟
عزالدين : فيه سينياتور فجنب ديالك ...هذا تصميم الشركة المنافسة لينا ؟؟؟؟
مينة : لا لا ماشي هذا ديالي كان فهاد الكلي اهى "طاحو دموعها مسحاتهم باش توريهم " هاهو هنا فهاد ضوصي هاهو شوف ...
عزالدين "دار ايدو على جبهتو وجلس لارض "
الحاج : عرفتي ابنتي هادشي الى تعرف راه تشفر ؟ وهو باقي غير تقديم اولي ونتي ضفتي عليه راه باين بالي مشفور ...هادي ماشي عادة رمسيس الي كنعرف ماعمرنا شفناهم مخرو عرق شي حد ولا داو ليه رزقو ...
مينة "طاحت على وقفتها لسان باش تشرح تشل ليها " ...
باش تفهمو هي متهمة انها شفرت تصميم وضافت عليه باش تغطي ولكن هما قشعوه حيث الحاج فايت شايف هاد تصميم ديال احد المهندسين من شركة اخرى قبل ميشوف تصميم مينة ...هي ماشي هادشي الي ضرها الي ضرها انها قلبات على المشروع ديالها لقاتو ممسوح كان لارض تشقات وبلعاتو يعني جهدها مشا كلو وحتى باش تبين برائتها مشا ليها
نور الياسين الجزء 19
محتوى القصة
التنقل بين الأجزاء