نور الياسين الجزء 34

الحبيب يعود براني والبراني يستوطن كل اوطاني ...مع قال هاد الجملة هز فيه فؤاد عينيه متكي حنكو على صباع ايدو وصبع الاخير مقربو لفمو ...شاف فيه بتمعن وعمق لجملة الي نطق شحال ...

فؤاد"هزهز راسو بثقالة ونطق " : والمعنى ثقيل ووازن والفاهم يفهم...

ياسين : وربي يرحم ...

بقاو واحد سويعة وهما كيهضرو هضرة ثقيلة اب وابن ديالو نسر والهيثم ديالو داخلين فنقاش بعقلو وثقيييل وبمعاني بيناتهم كلمات قلال بمعنى عميق وجامع شلااا ...هز تيليفون خشاه فجيبو من بعد ما شاف الاشعار(النوتيف بوصول بريد لايمايل ديالو شاف الرسالة شنو مفادها فواجهة الهاتف الشي الي خلاه دخل يشوف من عندمن بضبط حتى بان ليه الايمايل ورسالة "سمح ليا غلطت " فالبلاصة مسحو ...

بكل برودة لانه كان غالط وترسل ليه ضوصي خاص بالغلاط ف مسحو مخلاهش عندو فالايمايل احتراما للخصوصية ...ناض هو وفؤاد مشا معاه تا وصلو لمطار ودعو ورجع ادراجو لفيرما اول حاجة دخل دوز لخط لسعودية نيشان لهااتف ديال جدو هضر معاه براكة مدة كافية اطمأن عليه وعلى صحتو وكيفا ماشي مع العمرة وتاكد من السيد الي معاه فلوطيل فنفس شومبر على صحتو وعلى السكري الي عند ووصاه عليه يرد ليه البال مرات عديدة بحيث ياسين الي تكلف بيه تاهو انسان مفحالوش وتكلف بيه على حسابو رسلو مع جدو العمرة ليهم بزوج وواعدو بالتكاليف ديال الحج مورا هاد العمرة ....حط الفون وناض لاشغالو الي فالفيرما وهكا كيدوز نهارو ....

هزات حوايجها لبساتهم وجمعات شعرها من بعد ايام وهي فالبيت الصدمة والهضرة الي قاليها قصحاتها بجهد خاطرها مرض ...كتر من يومين وهي معتاكفة فالبيت بزز باش كتاكل ملي خرج ايساف من دار وهي سادة عليها فبيتها الولااااني بزز باش كتاكل بطلب من راوية وايلاف هاد الاخيرين الي وقفو معاه فوجه ايساف ...

"فلاش باك"....

ايلاف "مشا شنق عليه " : ولك معندك احساس انت ؟؟ حرااام عليك ليش الاجهاض لييييييش ...

ايساف"شد ايدو وبعدها ليه " : هادشي الوليد بيني وبينها يفضل بيني وبينها ...

راوية "غوتات عليه " : انسان فكرشها بغيتي تطيحو !!! حرام عليك را روح هاديك بغيتي تقتلها اشمن تفكير ااااااش الانسانية انعادمات فيك ؟

ايساف "خنزر فيهم " : عرفتي اشنو ؟ غادي نتحرك نطلع لفاس نجمع حوايجي ونمشي تما تايوصل وقت طيازة ديالي الغذ ليه ...الي عليا قلتو ملي نجي نبغي الامور تكون كيف قلت ...

صفية "غوتات بجهد " : مااااغانطيحوووش والله منطيحو ومعندكش الحق مادام انا مبغيتش ...مابغيتيهش ؟ قلتي نتحمل مسؤليتو ؟ من دابا من هاد ساعة مانتا باه ماهو ولدك "نزلو دموعها يجريو وعينيها الخضرين خارجين فيه تاهو عينيه مخنزرين بنضرات نارية ...

ايساف : ماقلتي عيب ...وتانا قلتها تحملي مسؤليتو ...

ايلاف : اسمهااااش تحملي نحنا بنتحمل مسؤليتو معاها حفيدي غصبا عن رقبتك وال بدك ياه عملو ...حفيدي بيكبر بين عيني ...

راوية : حنا مسؤلين عليه معاها ونتا خرج سوقو ما نتا باه ماهو ولدك ...

ايساف"غوت بحر جهدو صعر تا قبس واحد الفاز قداااش كبيييييير تشتت تا شدات كرشها بالخلعة وجلسات فوق الكرسي " : وااااا ربحو بيه ربحو بيييييه "مشا منير ليها عند وجهها " درتي الي قاليك راسك ياك ...

صفية "هزات فيه عينيها تا هي مشربنين " : شوف اولد الناس هزيت من جيهتك ماااا فيه الكفاية خاطري مرضتيه من نهار دخلتك لقلبي مرضتيه ليا حلمت بيك ومرضتيه لقيتك فطريق ومرضتيه هنتيني من اول صدقة مديتيها ليا عند البنك عطيتيها ليا ووجهك كيشوف فيها (ريم ) مرمدتيني فالخلا

خليتيني مرمية كي الكلبة لا رحمة لا شفقة ...بردتي فيا غدايدك ضربتيني خصريت الهضرة قدامي ماخليتي مادرتي ليا وختمتيها باعز حاجة فكرشي بغيتي تقتلها ومن فوق هضرة جارحة عطيتي الفضل ليها وانا طيحتي بيا ...."غززات سنانها " شوف اولد ناس هادي اخر مرة نكون ليك امراة وعمرك

مزال تشوف مني شي حاجة لا رحمة لا شفقة لا حب لا انسانية ...نتا كيفك كيف داك الفاز الي كان محطوط وتهرس ...

ايساف : شنو زعما ؟؟

راوية دارت ايدها على عينيها جابت ليها البكية ايلاف بقا كيشوف كيتسنا فيها شنو تقول ...

صفية : عمر وجهك نشوف فيه ولا عمرك تكون ليا وخا ينوضو واليديا من القبر ..."حطات ايدها على كرشها كتوريه " هذا وخا نعرف نشدو بسناني نخدم فديور نصبن ومنفرطش فيه ...سير عيش حياتك اولد ناس

ناضت من بلاصتها وقفات وضارت مشات جيهة الدروج وكتهضر ...

بزااااف عليك نتا تكون ليك لا انا لا ديك ريم ...وبزاف عليك تكون مرتك هي الي عبرات عطاتك جوابك وخلاتك وتزوجات بسيدك ...

ايساف "تقولي تخوات عليه العافية " : شنو شنووووووو"تم غادي ليها تا شدو ايلاف كيتركل ليه بغا يطير عليها اما هي طلعات فدروج ودخلات لبيت سدات عليها ....مشات لواحد البيت هزات فاليز حطتها فوق ناموسية تا حسات بوجعة تحت كرشها تقولي الوالدة عامرة ليها بغات طرطق تا تحنات مزيرة ...

صفية "كمشات عينيها" : اممممممم اهى اهى خااااااالتييييي ...وممممممم وااااااااااا ...

تحنات شادة تحت كرشها تا بدات تنين وتلالي ووجع كيحسك فيها وهي كتبكي وتعيط لراوية تجي ولا الي كان يسمعها تا هبطات لارض كتغوت وتغوت ...تحل باب البيت ودخلات راوية طلات عليها حتى لقاتها طايحة كتبكي وشادة كرشها وتغوت مشات ليها كتجرييي شداتها ...

راوية : بسم الله عليك ...مالك باش كتحسي ...

صفية : اهى اهى عتقينييييي كرشي كتقطع بغات طرطق ماعرفتش شنو هادشيييييي اهى اهى ...

راوية : نوضي نوضي تسرحي فوق ناموسية "عوناتها تا تسرحات خشات ليها مخدة تحت ضهرها وهي كتعيط لايلاف الي جاوبها بعد محاولات الاتصال بلغات باش ييجي يعاونها يديوها سبيطار ...

صفية : اهى اهى بغيت نمشي طواليط عااافاك ...

راوية : نوضي "عوناتها تا ناضت دخلاتها طواليط جا ايلاف بقا قدام الباب ديال البيت تا تخرج من طواليط ..." بنتي ياك لباس خلعتيني عليك ؟

صفية "الصمت هبطات سروال حسات بشكل بولة بغات تنزل ليها يلاه هبطاتو وجلسات فطواليط حتى سمعات بااااق فلاشاص حدرات عينيها بانت ليها ضاية ديال دم هبطات ليها ...حلات عينيها بشهقة مخلطة ببكية وقلبها بدا يضرب " : اويلي اهى اهى اويلي اويليييييي ....خاااااااااااالتيييييييييييسسي اهى اهى ...

راوية دخلات تجري تطل عليها لقاتها واقفة وكطل على لاشاص وكترعد تا مشات حداها بان ليها داكشي دغيا عاوناتها هزات سروالها وعيطات لايلاف دخلاتو بزز الحالة مستعجلة هزها بين دراعو مسكين وطارو بيها من تما نزل كيجري بيها وهي كتبكي هزات راوية صاك ولوازم وتبعاتو تا دخلها طوموبيل ركبو وطار بيها بزربة لكلينيك وفطريقها عيطات ليسرى تلحق عليهم حيث كانت فدار ...

دخلوها نيشان من بعد ما شرحات ليهم الحالة تا جات يسرى ودخلات معاها باش تكون هي الي مشرفة عليها...

ايلاف "جالس متكي على ايديه " : لا حول ولا قوة الا بالله ...

راوية "طلقات نفس سخووونة كتمشي وتجي " : حسبي الله ونعم الوكيل هاد اليتيمة من نهار عرفتنا وهي مضرورة من كاع جوايه ...رااا هادشي علاش عارضت زواجهم بصح ...را ولد كرشي وعارفاه كيفكر غيييير فراسو ...

ايلاف : بدو يروح يتربى من جديد ؟ ولك صرت استحي عيد تربيتو صار قد جنتير (شحط) لك صار لثلاثين سنة الا شوي ويوصلها ...

راوية : العقل ماعندو عمر ...عمرو عمر ولد عامين مخرتي ليه لعبة ...مبرهش اناني خايب معندوش حس تربية ...حماااار ...

واحد شوية حتى خرجات يسرى عندهم باقي دايرة بافيط هبطاتها فعنقها ...

يسرى: راوية ماعندك مناش تخافي دابا راها مزيانة ....

راوية "قربات ليها " : الي فكرشها ؟

يسرى : مزياان تاهو ولكن را كترة الانفعالات وضغوطات را مغاديش يبقى ليها فكرشها هو دابا كياخذ كلشي من الام ديالو ...خليك واقفة معاها متخليهاش خاصها تبقا مراقبة ومتحركش هاد شهر كاااع من فراشها تايكمل شهر ...

راوية : كاااع ...

يسرى : كاااع هاني وصيتك ...دوك التحاليل الي طلبت منها راني درتهم دابا ...مهم كنت بغيت غير نطمن على صحتها دابا مزيانة نمو ديالو عادي كيف قلت ليكم ...من بعد غادي نعاود نفس تحاليل باش نتاكد اكثر ...

ايلاف : غادي تبقى هنا ؟

يسرى : من احسن تبقى هاد ليلة عطيتها مقويات يكمل سيروم ونعاود ليها واحد اخور وترتاااح تنعس تالغذا فالعشية عاد تخرج خاصها ربعة وعشرين ساعة متحركش باش يبقى زاگي...

ايلاف : تمام الله يحفضك ...

يسرى "شافت فراوية " : من احسن بعديها منو مغاديش نافقكم ولكن را ايساف ماغاديش يعاونها تخطى هادشي ...من احسن بعديها عليه هاد فترة ...وسمحي ليا نقولها ليك نيشان تاهو تزاد على ايدي وولدي فمو مبري منو ...

راوية "تنهدات " : عاارفة غير تهناي ...

ايلاف : كيف هو ابني ابنك ولا يهمك ...

يسرى : انا نرجع عندها غادي نبقى معاها هاد ليلة ...

راوية : شغلناك معانا ونتي ممسالياش مع توجاد مينة ...

يسرى : هي مرات ايساف يعني مرات ولدي وفوق من هادشي كتبقى يتيمة الى مالقات الانسانية فدارهم والي ليها تلقاها فينا حنا ونكسبو لاجر ...

ايلاف : الله يكملك بعقلك ...

راوية : نقدر نطلع عندها ؟

يسرى : تا ترتاح من احسن غيير سيري صباح بكري وجي عندها ....دابا ناعسة هي ...

راوية : واخا ...

بقات هاديك الليلة تاوصل الغد ليه ورتاحت زال الخطر تقريبا وقدرات تخرج داتها نيشان لفيلا باصرار من راوية الي عطاتها وعد انه مغايكونش وفعلا كيف قال مابقاش جا مشا من تم لفاس ...طلعاتها ترتاح بقات اكثر من ثلاث ايام وهي ناعسة الي ...

"عودة" ...

جمعات شعرها ولبسات سورفيت دافية شوي وخا صيف ...هزات صاكها فيه لوازم ديالها وسدات الفاليز الي جمعات فيها الي تحتاج مبدئيا حطاتها وقفاتها وشادة تحت كرشها وجهها بيض وفمها بيض عيااانة بجهد ...تا شوي بدات تشم وتخسر سيفتها ...

صفية "حطات ايدها على فمها " : اممم اففف شهاد ريحة ..."كتدور وجهها وتشمشم " يخخخخ ...ففف "سدات منخرها وتمات جارا لفاليز وخرجات من بيت جاب الله سفلي ...حتى وقفها صوت راوية ...

راوية "عاقدة حجبانها " : صفية !!! فين غاديا ؟

صفية "هزات فيها راسها " : عافاك خليني نمشي الله يرحم ليك الواليدين راني عمري منفرقك على الي فكرشي جي وقت مابغيتي فين مابغيتي وجي عندي وانا حاملة كل نهار نشوفك غير نبقا هنا مستحييييل ...

راوية : هادي داري وداري هي دار حفيدي كيبقا حفيدي ابنتي وانا عطيت العاهد منتفرقش عليه وعليك مبقيتيش مرت ولدي راكي بنتي دابا هازا فكرشك طرف مني ومن دمي ... ليه ...

صفية "غمضات عينيها بغات تبكي " : عااافاك مابغيتش نبقا هنا عاافاك ...

راوية : مغاتمشي فين غاتبقاي هنا خاصك راحة حتى تولدي وديك ساعة الي عجبك ديريه ممنوع عليك تحركي من فراشك الى بغيتي ولدك يبقا ليك فكرشك رجعي رتاحي فبيتك متنوضيش من فراش ...مكاينش الي غايقابلك من غيري انا فحال ميمتك الله يرحمها ...الى خرجتي من هنا عمري نسمح ليك ...قلب دار ليك والعتبة ليه ...هاد الفترة كلها مغايدخلش لدار ونتي فيها

ماخلات ليها ماتقول اصلا معندها تا حل سوا انها ترجع ترتاح وتنعس كيف وصاتها يسرى فهاد الفترة الي هي فيها حساسة وحرجة مزال الجنين مزعزع من اخر فترة ف صعب عليها تحرك وتكون عادية ...وهضرة راوية فالصميم مكاينش الي غايقابلها من غيرها طالما باغية الي فكرشها ومتشبتة بيه ماعليها غير تصبر تايجي لدنيا ...

صفية "كمشات عينيها وشدات فكرشها حسات براسها عيانة " : داك البيت فيه شي ريحة خانزة ...

راوية : نبدلو البيت تقدري طلعي بينك لفوق ...

صفية "مكرهاتش حاسا براسها ملهوفة لبيت الي لفوق ..ولكن مسكينة بزز متقدرش " : هااا ...لا لا ...

راوية : واش مرتاحة لبيت الفوق ؟ غير قولي را مغاديش يجي تا الى بغا شي حاجة غانجيبها ليه ولا رسلها ليه مع خوه ...

صفية "حطات راسها على كتف راوية " : واخا نطلع ...

عاوناتها تا طلعات وحلات ليها الباب لقات بيت مجموووع مبدل ليه الفراش وفيه ريحة هي رتاحت ليها حتى تنهدات بصوت مجهد تقولي جبل تحيد عليها ...

صفية : الله ..."كتشم وتدخل ريحة تقولي اكسجين عاد لقاتو " ...

راوية : رتاحي انا نجيب ليك متاكلي راكي مفاطراش ...

صفية "خسرات وجهها " : لا لا غير الما ونشرب دوا ماقادراش غايضرني فمعدتي ...

راوية : غيير بززي شوي شويييكيك تا تشربي دواك بعدا ماتشربيهش على معدة خاوية ...

بقات حتى قنعاتها وخلاتها حطات راسها على مخدة ترتاح وهبطات توجد ليها الفطور ...

هاكا دازو ليام ايام قلييييلة في مدينة فاس العاصمة العلمية ...فكرسي الخاص ديالو جالس وعلى جنابو صهيب والحبيب وجانب لاخور حسن الي كان كيهضر ويشرح عبر داطاشو ...

حسن "طوا كمايم القميجة وحل زوج صدفات فوقيين من بعد ما حيد فيستة وناض وقف كيشرح بواحد الطريقة ممزوجة بكاريزما وشخصية القوية ..." : الى دمجناهم غادي نربحو بنسبة خمسة فالمية زيادة على ربح سابق ...شنو رأيكم ؟

يوسف"متكي داير صباعو على فمو مركز معاه ...سرح ايدو " : فكرة منطقية خاصها تدرس من جيمع الجوانب ...متنساش ضرائب ممكن ينقصو لينا نسبة ربح ...

الحبيب : هادي خاص نشوفها انا ..

حسن "بابتسامة جانبية " : طبعا ضروري ومؤكد ...

صهيب : من ناحية القانونية مافيهاش مشكيل ...

حسن "شاف فالحبيب " : اذن شوف لينا ضرائب ونقدرو نبداوها ؟"شاف فيوسف "

يوسف "ابتاسم " : اكيييد مبدئيا موافق ...

حسن : خاصنا موافقة العم فؤاد ياك ؟

صهيب : ضروري ...

يوسف : هو لول الى ماوافقش اذن معندنا غير نشوفو فكرة غيرها ...

حسن : ديك ساعة نفكرو فوحدة اخرا ...

صهيب :الى درس لينا الحبيب قضية ضريبة ديك ساعة منضنش يرفض حيث فكرة ممتازة ...

يوسف "ناض " : انا نهضر معاه يجي لهنا باش تقولها ليه نتا "لحسن "

حسن : مرحبا ...

يوسف : يلاه انا فالمكتب نكمل واحد الاتصال فالبرتغال نشوف فين وصل ايساف ...

مشا خرج خلاهم ناض صهيب ...

صهيب : بلميييين الى نزق نتا ...

حسن"ضحك تا تسدو عينيه واحد الابتسامة عندو فشكل بشوشة " : هاد الفكرة اقسم بالله الى كانت فبالي الى درت بروجي ديالي لكن من دخلت هنا شريك غير بالزهر قلت نطبقها هنا احسن ...

الحبيب "خبطو لكتفو ببونية " : تا راك عشير اساط ...

صهيب : كون جابها ماهياش تبلوكيه ياك ...

الحبيب"هزهز ليه حجبانو بطريقة طفولية " : نبلوكيك نتا ...

حسن "طرطق بضحك" : هههههههه

صهيب "طلعو وهبطو " : تبلوكيك سالمة ...مناويش تزوج نتا ؟

الحبيب : مالقيتش بغيت نبقا باير درت بناقص شهوتي فزواج حيدوها ليا ...

صهيب : ها عقد مينة اضبر ليك على شي بنت ناس ...

الحبيب : ماشي فنية ديالي نقلب ومبغيتش نتزوج ...هااا ايه تاني ...

صهيب "جاب ليه ضحك " ههههه والله يستر ..

بقاو يضحكو خرج صهيب من تما كمل حسن جميع طفا لابتوب وتم غادي خارج من القاعة ديال الاجتماعات تا دخل مكتب ديالو تلاح فوق كرسي دوز الخط لاقرب الاحباب عندو ...الام ديالو ...

حسن : حبيب قلبي انا ...لالة غيتة ....

غيتة : الولد الحنين وخا عصبي ههههه

حسن : حنين معاك وعصبي على الي اذاك ...اش كديري ؟

غيتة : كنجمع حوايجي باش غذا نجي عندك فالصباح ...

حسن : معاش طيارة بضبط باش نجيبك ...

غيتة : عندي مع ربعة صباح غادي نركب من بيرگامو "مطار ميلانو " ...

حسن : انا غادي نسبق باش نكون بكري مهم وقت الي وصلتي غادي تلقايني تما ...

غيتة : الله يرضي عليك ...

حسن : الوليد لباس عليه ؟

غيتة : بيييخير ماهضرتيش معاه ؟

حسن : يومين هادي مهضرت معاه صراحة نخلص الحق ولكن غير يعذرني كانو عندي اجتماعات يلاه سالينا ليوم كنوصل دار مهدود ...

غيتة : كتاكل ماكلة زنقة ياك ؟ من نهار مشيتي من هنا "ميلانو " ونتا ماكلة زنقة معدتك هلكتيها ...

حسن : ماعليش غير تا قاديت بلاصتي فشركة وولفت على لخدمة ودرت بلاصتي راكي عارفة عاد بديت فمشوار المهني ديالي ...

غيتة : الله يسهل عليك وكان ...ايوى ماعليش انا جايا ندير ولدي الي بغا من دار ...

حسن : توحشت ماكلة ايديك وايديك نبوسهم وداك راس نبوسو وهضرتك معايا نشكي ليك ...

غيتة : شكيييي شكي اولدي ...باقي فيك شقيقة ؟

حسن : لا هاد ليام مزيان اميمتي ...

غيتة : مزيان بقا هاكا الله يرضي عليك باش ميضركش راسك تاني ...

حسن : غير داك صداع ديال شقيقة الي كانت فيا الي كيعصبني ...دابا شوي مرتاااح مبقاش كيضرني ...

غيتة : وهي شقيقة سهلتيها مزيان ...يلاه منشدكش نكمل توجاد باش يلاه يديني باك يوصلني مطار ...

حسن : في امان الله تنتشاوفو ...

غيتة : الله يرضي عليك ...

قطع معاها وضار حط تيليفون واحد عشرة دقايق حتى دق عليه يوسف الباب ...

يوسف : ماخارجش ؟ "شاف فساعة " وقت خروج هذا ...

حسن : يقدر نبقا واحد شوي باش نمشي لدار ندوش ونتكا شوية عندي مشية لمطار صباح بكري ...ويقدر منجيش صباح داكشي باش نخدم خدمة نحيدها عليا ليوم ...

يوسف : جايا الوليدة !!

حسن : جايا صباح بكري يلاه نجيبها ونبقا معاها شوي ...

يوسف : الحاجة غيتة من لا يعرفها مرات الحاج صالح زياني ...ههههه خيرة ناس والله ...

حسن : الله يكبر بيك ...

يوسف : ايوى بلاش متجيش غذا كاع تا يكون جاي فؤاد نعيط ليك حضر اجتماع ورجع بقا معاها نهار كلو ...

حسن : زعما !!

يوسف : مافيها باس ...تادوز شي يومين ومرحبا بيكم الغذا عندنا فازرو ان شاء الله ..

حسن : الله يكبر بيك ...ربي يحفضك ان شاء الله ...

ابتاسم ليه وخرج من عندو داز نيشان المكتب ديالو جلس فالكرسي تا يكمل شي خدمة باقا ودار اتصال كان باقي ليه ..."شاف فساعة بقات ليه شي نص ساعة ويخرج ...فهاد اللحضة ركنات سيارة رينج اخر مكاين سوداء فالبارك ...تهز زاج ديالها وسكتها هز تيليفون دارو فجيبو وخرج منها داير كاسكيط كحلة وجاي غير بسورفيت كحلة حيد

نضاضر شمس لاحهم فطوموبيل وسدها ومشا لسانسور دخل ليه وطلع لطااااج الفوقي مربع ايديه كيشوف بنضرة باردة وصباعو كينقرو فوق دراعو ريتما يوصل بيه سانسور حتى تحل الباب ومشا فاتجاه المكتب حتى وقف على المساعدة ...

ياسين : يوسف !!

هي "تصدمات حيث شحال مشافتو كيجي مرة فعامين هههه تبهضات بنضرة ديالو وديك تگضيرة وزين ديالو ديما عندو هبة وكاريزما سابقينو وحروشية تا فوقفتو ونضرته ..." : سي ياسيين ههه كااين دخل عندو ...

ياسين : وحدو ؟؟

هي : وحدو ...

ياسين هز راسو وحطو وتمشا فاتجاه المكتب حتى دق ...

يوسف : دخل ...

ياسين "حل الباب ودخل حنحن بصوته المبحوح المشحرج " : سي يوسف ...

يوسف "كان خاشي راسو فواحد الملف تا هزو مصدوم " : ياسين !!!

ياسين "قرب باس ليه راسو وايدو ويوسف مزال مصدوم " : هو هذا ...

يوسف "مبدئيا راه مصدوم من مجيتو المفاجئة ماعرف مايقول "

ياسين : نجلس ولا نمشي ؟

يوسف : الله اودي يحتاج تسول "حط الملف عاد رجع ليه عقلو واستوعب انه فعلا جا ...رجع نضرة ديالو من صدمة لعتاب ولومة قدر ياسين يفرزها ..." عالسلامة ولدي ...

ياسين"رجع جلس قدامو" : الله يسلمك ...

يوسف : بحرا تفكرتي عندك عم ...

ياسين "سرح ايدو " : ضروف نتا عارف وانا عارف الله يحسن العوان ...

يوسف : ضروف كيما كانت متغيبكش على عمك ...ضروف خليها لماليها ووقتها وسول المقربين صلة الرحم ...

ياسين : من حقك وعندك الحق ...

يوسف : واحد الوقت كنتي نسيبي وهادشي ميمنعكش وعمرو يمحي انك كنتي ولدي قبل وولد خويا ...

ياسين : ولد خوك الي ميعقل على حد ويوصل عندك ويحدر راس ...

يوسف : الاحترام عندك مع كلشي معايا انا زايد ...

ياسين : العقل مرة مرة كيغيب ضروف كتحكم والقلب كيمرض والساعة الله ...

يوسف : تانا قلبي مرض وعقلي مرض يمكن بدوبل عليك ...انا جيت من جميع جوايه ...

ياسين : تهرست وهرست ...غلطت وغلطو فيا ...ضيعت وضاع ليا ...

يوسف : كنتي تصبر كنتي تكافح والصبور والمومن عند ربي مصاب ...نتا ضرك خاطرك انا ضرني خاطري من تلاتة جوايه ...

ياسين : نتا دابا عمي وجاي طالب منك سماحة ماهضرنا ماتكلمنا قاطعنا بعضياتنا بلا مباشر ...

يوسف : مضنش انني نوقف فصفك وخا عندك الحق ولكن كنبقى اب والاب غايجي من جيهة كبدتو كيف جيتي من جيهة كبدتك واحد الوقت ...

ياسين : بلا مندخلو فهادشي انا جاي نشوفك ونطلب منك سماح حيث فرطت فحقك ...الحياة غاديا مخاصهاش توقف على حاجة ونفس نقطة الي النقاش فيها عقيم مغايجيب غير صداع بلا فايدة ...

يوسف "شاف فيه بنضرة فشكل يضرك خاطرك ونتا كتشوف فعينيه الي ولاو كي الالماس بالدموع يقسم ليك قلبك ونتا كتشوف فديك النضرة الي بصح خرجات من قلبو المكسور من جيهة بنتو ..." : قلت ليك هي نور عينيا قلتي ليا هي عينيا ...فين مشا هاذشي ؟ علاش !!

ياسين"حك نيفو وسكت ماقال والو ماعاتب ما تاحاجة ...باش يحد اللغا تاني على نفس الهضرة خلاه قال مابغا ...وناض على وقفتو قاد سورفيت " نشوفك فازرو ؟

يوسف "هزهز راسو " : ان شاء الله ...

ياسين : انا مشيت سبقتك يلاه نوصل نرتاح ونتشاوفو ...

يوسف "الصمت مجاوبوش "

خرج ياسين من عندو مخلي الجو مشحون نوعا ما بيناتهم خلاه هضر ولكن باقي ديك الشحنة بينو وبين يوسف المليئة بتوتر وخصام وعتاب ...نزل لبارك دخل لطوموبيل قبل ميكسيري …

ياسين "حدر عينيه " : عينيا تقبوهم عينيا ..."صونا ليه تيليفون بسميتها جاوب " شنو درتي ؟ غذا فالعشية نجيبك ونطلعو لفاس نيشان ..."قطع معاها ولاح تيليفون حداه وكسيرا ...

هذا هو الحال وهذا هو اللقاء الاول بين وبين يوسف ...لقاء شبه بارد خالي ...فقط عبارات اللوم الغير المباشرة الي كانت حاضرة ىنوع من الاشتياق من عم لابن اخيه ومن ابن اخ لعمو فقط ...من بعد ما قفل تيليفون شدها طريقة وحدة لازرو لاول مرة غايحط فيها رجلو من بعد غياب دام عام وصرف ...

من بعد مدة مسافة طريق حتى وصل الباب ديال الفيلا حيد نضاضر دشمس هز عينيه بانو ليه شراجم من بعيد محلولين ديال لفوق الا البيت ديالو مسدود كان روحو خرجات من داك البيت ...وقف عليه العساس ..

العساس : واسي ياسين هذا ...

ياسين "ضور راسو جيهتو " : عمي محمد "باس ايدو " صحة مزيان ؟

العساس : اللهم لك الحمد ...على سلامة نورتي الفيلا ...

ياسين : بنورك العم ...الوليد كاين ؟

العساس : كااين ...

دخل من الباب حتى لداخل بلاصا سيارة بقا واقف شحااال تا هز لواز ديالو وخرج قصد دار لداخل ...

نجود"كانت واقفة كتشرب الما الي مداتو ليها رميساء رجعت ليها الكاس داتو الكوزينة جات دور حتى سمعات صوته كينادي عليها ...هزات فيه عينيها " : ياسييين هذا ولا ؟ "كتكمش فعينيها تاكد "

ياسين "مشا لعندها عنقها وباس على راسها وايديها " : هو هذا هو هذا ...

نجود : الله يا ربي وعاش من شاف هاد الوجه اولدي وعاش من شمع هاد صوت ...

ياسين"عاود باس راسها" : كااع ...

نجود : واخا كنت نجي عندك وليني ولدي وحشتك بشوفتك هنا غير اولدي ...

ياسين : هاني جيت اميمتي عاد كتاب ...

يامنة جايا هي ومينة من زنقة دخلات كتزرب هي وياها من شافو طوموبيلتو حطات كاع دوك الميكات فايديها فلارض ومشات كتزرب ...

يامنة : ولديييييي الحبيييييييب هههههههه "تلاحت عليه عنقاتو تا مشا وجا "

ياسين : الحنانة "عنقها بجهد كيبوس في حنكها وراسها وايديها وهي تعنق وتبوس "

مينة "من بعد ما طلق من يامنة مشات عندو عنقاتو بجهههد فرحانا بزاااف انه ما خسرش ليها بالعكس جا على ودها يحضر ليها وكبر بيها فوق القياس " : ياسييين فرحتييني ملي جيتي

ياسين : نجي نهار قلت ليك نكون مسالي نتي لولة علاش الي منجي ؟

مينة "هزات كتافها كتبتاسم " : مهم جيتي ...الله يكبر بيك شكرا بزااف على الكادو "خلا ليها كادو عطاتو ليها يامنة كان كوليي ديال ذهب مصمم على ودها بذوقها هي "

ياسين : مايغلاش عليك مزال الخير هذاك غير ديال لخطبة ...الله يكمل بالخير ...

يامنة : على سلامتك بحرا وصلتي ...

ياسين : تت دزت لفاس هضرت مع يوسف وجيت ...

مينة"حنحنت ": غايجي هنا ؟

ياسين : هادشي الي قال ...

نجود : وطلع اولدي ترتاح باينة نهار كلو ضارب طريق ...

ياسين "حك عينيه " : عياان شوي نصلي العصر والمغرب ونتكا رتاح ...الوليد ؟!

يامنة : كاين "شافت فنجود " لفوق ولا المكتب ؟

تمات جايا سارة لاحقة عليهم سلمات على ياسين تاهي بجهد كلشي توحشو فدار بزاااف ...

سارة : على سلامتك اولدي ..."شافت فيامنة " فالمكتب عندو شي خدمة قاليك متعيطوش ليه تايخرج هو ...

ياسين : ماعليش بينما دوشت ورتاحيت قولي ليه انا لفوق الى منعستش نهبط عندو ...

يامنة : واخا ولدي ...

تم غادي ضاير باش يمشي لدروج يطلع لبيتو حتى صوتها جايا وتعيط ليه وتجري تا كانت غاطيح على فمها ...

يامنة : ارسول الله ...

مينة : ابشوية البنت ...

رميساء"كتجري وتغوت بسميتو جايا وتجري لابسة فحال بيجامة نوار حد ركبة ونص كم فالحمر وشعرها يطاير " : ياسيييييييييييييييييينوووووس ..."تلاحت عليه كي الگرادة كيف مكني عليها اشرف (حشرة تتكون فالكلاب ومشاش خهخخ) عنقاتو من كرشو ماعرف باش تبلى تا شكون هي بعدا هه

ياسين : رميساء ؟!!

رميساء"هزات غا عويناتها تترمش فيه " : شكون جن من غيري ...

ياسين"رفع حاجبو " : ياك بعدا ؟ "عنكش ليها شعرها وباسها فراسها" كبرتي ...

سارة : مكبرت والو العقل لاروب ...

مينة : ههههه هبيلة ...

ياسين : ماعليش .."عاود باس راسها" نرتاح ونشوفك ونهضرو ...علي هنا فالمغريب ؟

يامنة : علي وهي وحتى الياس جا يومين هادي وسليمان غذا جاي فالعشية مع اسلام خوه ...

ياسين : على خير ان شاء الله ...

ضار دورة ومشا طلع لبيت ديالو وصل ودخل نيشان ماشاف لا هكا لا هكا عارف ديما كينضفوه ومهوي ميحتاجش مشا نيشان حل البالكون مخلي هواء طبيعي يدخل ...حيد حوايجو ومشا نيشان لدوش يخفف عضامو من تعب الطريق ...

يامنة"تنهدات وحدرات راسها" : الله يحنن القلوب ...

نجود : اميييين ياربي ...الي فالمكتاب را كتبو ربي معندنا منديرو ...خليو الامور تمشي كيف ماهي الحساسيات نقصو منهم ...

"هامبورغ" ...

دايرة الايربودز فوذنيها وصاكادو فضهرها دايرة جاكيط سورفيت محزمة بيها نصها بتيشرت كحل ديال سورفيت لفوق لابسة وجهها غلاض على كيف كان وعينيها تگعدو تا فورمتها غلاضت على كيف كانت قبل عام وغاديا وكتغلاض اكثر وجهها دم بغا يخرج منو من بعد اخر كونطرول دارت الاسبوع الي فات نقصات ليها طبيبة لادوز ديال دوا الفقر دم ...تاصل بيها سليمان فطريقها لدار ...جاوباتو كتلهت ...

سليمان : قربتي ؟

نوار"كتنهج " : فففف شوي شوي ونوصل ...

سليمان : يلاه ومتفورصيش على راسك بزاف ...

نوار : تت لا غير تهنى انا شوي ونوصل ...

قطع معاها وشداتها بجرية ضربات مساااافة نييييت تا طاح الليل وهي ترجع ادراجها لدار دخلات كلها عرقانة مشات كتجري دوشات وخرجات من بيت شعرها فازگ لابسة تيشرت عريض وسروال تاهو عريض تلاحت حداه ...

نوار"حطات راسها على الاريكة وغمضات عينها " : ااااففففف ...

سليمان"قرب بشويي تال وذنيها وغوت بجهد بسميتها تا قفزات وغوتت " : اااااااااا فيقي ...

نوار"خنزرات فيه " : مالك مالك ؟

سليمان : توگضي ااااا ختي ...

نوار"ضرباتو بمخدة صغيرة " : راني غير حداك يخ ...

سليمان"جرها من شعكاكتها" : عاودي ؟

نوار : يييييييخخخ اااااي ..."شداتو من ايدو وطواتها ليه تا تكا راسو مبهوض وحطات مرفقها على عنقو " حيد ايدك ..

اسلام : ناااري قودتيها ...

سليمان"خرج عينيه" : هاي هاي هاي ...لقيتيني مرخي ليماك ..تمجهدتي ...

نوار"رجعات بلاصتها " : خلعتيني ...

سليمان : وهذا رد فعل ؟ رد فعل ديريه قبل منتصرف اي تصرف ديما كوني على اهبة الاستعداد لاي هجوم ...سوا هجوم جسدي او لفضي ...

نوار: كيفاش جسدي ولفضي "بقات تشوف فيه " ااه زعما الهجوم الي كيجي من الجسد ولا من الهضرة ..."هزات كتافها " عادي الهضرة ولفتها ...

سليمان : مزيااان معاك انك ضربي دنيا بركلة وتولفي الهضرة القاصحة ...لكن مع تعلم فنون الرد …شوي بشوي تكتاسبيه ...

نوار" : امتا عندك الطيارة غذا ؟

سليمان : غذا بنهار ...مهم نتي هنا من ورانا غادي تجي ...مابغيتش نكتر عليك قطعت ليك من ورانا بربعيام هي هاديك مزيان ؟

نوار "تنهدات وحدرت راسها " : مزيااان ...

سليمان : نوضي نديرو مناكلو باش نكمل اشنو غانجمع ونسد ونمشي نعس "شاف فاسلام " تحرك نتا كمل حوايجك ...

اسلام : اوكاااي "ناض "

ناضو تاهما مشاو كوزينة وجدات ليهم كراتان ببطاطا وكفتة خلاتها طيب فالفران ومشات لبيت تجمعو ...

اما في مدينة ازرو اذان العشاء عليه حل عينيه من بعد ما صلى عصر والمغرب وغط فالنوم من تعب سفر مابغاش فؤاد يفيقو خلاه يرتاح ...كيف سمعو ناض من فراشو تا جلس عينيه شبه مسدوذين مكان لابس والو من غير شورط قصير ...بقا شحال تا توگض ومشا لدوش توضى وخرج لبس تيشرت وسروال سورفيت قطن بباندة عند رجلين تحت وجاي سليم من عند ركبة لتحت مكتوب ببيض فجناب لبس تقاشر ومشا جاب صلاية فرشها استغفر الله واقام صلاة ....حتى صلا العشا وتبعو شفع والوتر عاد ناض كيجمع فصلايةخشا رجليه فكلاكيط مشا كوافوز هز مشطة رجع شعرو لور وفيكساه وهز لفون وخرج من البيت هبط لتحت

ياسين"جاي عاقدهم مه نعس فديك الوقت راسو تخربق ...لقا فؤاد ويوسف وصهيب والحبيب واسامة واشرف جالسين جاي خاشي ايديه فجيابو " : سلام عليكم ...

يوسف "هز فيه عينيه" : عليكم سلام ...

صهيب "بفرحة " :اهلاااا وسهلا اهلا اهلا"ناض تسالم معاه ..." عالسلامة عاش من شافك اولدي ...

ياسين : لهلا يخطيك صهيب .."سلم على الحبيب واسامة "

اشرف"ضار من ديك جيه كيزرب فرحان وخا مشا عندو فيرما واحد الايام لكن بشوفته فالفيلا غير...عنقو مزياان " : على سلامة خويا ...

ياسين"طبطب عليه وعنقو تاهو " : الله يسلمك صحتك مزيان ؟

اشرف : الحمد لله ...

ياسين"ضار عند باه سلم عليه تاهو " : الوليد ..

فؤاد "طبطب عليه" : البكر ...رتاحيتي ؟

ياسين : شوي "كيتفوه " نعست بزاف ...

يوسف : ملي وصلتي ونتا ناعس ...

ياسين "حرك راسو " : لا صليت عصر ومغرب ونعست ...

الحبيب : غادي يتخربق ليك المود ...

ياسين : وكان مخربق من شحال هادي ...

علي "لحق عليهم " : ياسييين هذا ولا ..."تحنى تسالم معاه." عاش من شافك ...على سلامتك اخويا ..."حادر راسو "

ياسين : الله يسلمك .."هز فيه عينيه " شفت رميساء قبيلة نتا مكنتيش ...

علي : مشيت تقديت شي غراض مع الخالة يسرى ...

يوسف : فين هي جات ؟

يسرى"تمات جايا لعندهم تا وقفات " : هااني خذيت شي حوايج بغاهم تريتور مسبقا وخلصتو فتسبيق ...

ياسين"ناض وقف وضار لعندها شافتو ورجعات بلور حيث ملي وصلت مقالوش ليها را جا يلاه دخلت هي وعلي .." : الخالة يسرى ...

يسرى"حلات عينيها الي غرغرو لا اراديا حيث را يوقع الي يوقع يتناساو تا يتناساو الاسباب رئيسية لمشكيل مكيتنساوش " : يااس ياسين !!

ياسين "قرب قبط ليها ايديها وباسهم وعاود باسهم تاني وتالت تا حدر يوسف عينيه نزلات منهم واحد دمعة دغيا بالخف مسحها مبينش " : الخالة ديالي ...

يسرى : جيتي ..على سلامتك .. " ..

ياسين : الله يسلمك عقد مينة ختي ومنجيش ؟

يسرى "حنحنت..." : احم هههه ا تجي تجي الله يكبر بيك اولدي الله يرضي عليك .."شافت فيوسف " خاصكم اتاي ؟

يوسف "حرك راسو " : ايييه ولابد .."شاف ف فؤاد " اتاي خويا ؟

فؤاد : ضروري مع اتاي لمة تحلى ...

غير غمزها يوسف حيث عرفها تزيرات يوقع الي يوقع سواء قرار منها سواء تكون بنتها خايبة الواليدين فهاد الحالة وبطبع يسوف ويسرى او الي عندهم الكبدة غايوقفو فجنب ولادهم هذا هو اللوجيك ...دغيا ضارت كتزرب مشات دخلات نيشان بلغاتهم يوجدو اتاي ليهم ومشات طلعات لبيت سدات عليها وجلسات تبكي وتبكي عزو عليها بزوج فراقهم جا فحال صاعقة خلات كلشي مرض فخاطرو من جيهتهم وعليهم وكيبقاو العائلتين فالوسط ...بقات تا بكات وتنفسات رسلات لنوار ميساج كتسول عليها وناضت لدوش غسلات وجهها وبقات تا نقص منها البكا وتنفس وجهها عاد بدلات حوايجها ولبسات ديال دار عاد نزلات عندهم ....

يوسف "فالجردة " : خويا غذا غايكون اجتماع خاصك تحضر ضروري ...

فؤاد : مرحبا ...شنو واقع ؟

يوسف : الشريك حسن عطا فكرة راك عارف على ود سيولة بموافقة منك والفكرة مزياانة مدروسة ولكن خاصك تحضر تشوفها وتعطينا رأيك ...

فؤاد : مرحبا ...

صهيب : كنفكرو نعرضو عليه لغذا شي نهار شنو بان ليك ؟

فؤاد : الله اودي مرحبا ...شوفو الوقت وعطيوني الخبار ...

الحبيب : المهم الوليد انا كندرس من ناحية ضرائب باش نشوفو واش نطبقوها سي نو غادي نشوفو فكرة غير ...

فؤاد"طبطب عليه" : ثايق فيك اولدي ثايق فيك ...

ياسين : شكون هذا شريك جديد ياك ؟

صهيب "حرك راسو " : ايييه هو را تعقل عليه صاحب الحبيب قديييم كان كيجي هنا بزاف وجا بات عندنا شي يامات كنتي واحد نهار جيتي غير نهار ورجعتي لقيتيه ...

الحبيب : الاسم ديالو الاصلي الحسن الزياني ...

ياسين"كيتفكر " : الي مشا لميلانو من بعد ماكمل قراية ياك.؟

الحبيب : اييييه هو هذاك ...

ياسين : خيرة ناس هادوك العائلة ...

فؤاد : دار زياني شكون ميعرفهمش تربية ودين ...

بقاو يهضرو وناض اشرف هو واسامة فقصتهم الهضرة على الخدمة جابو ليهم الملل والخلعة خصوصا من كيشوفو نضرات يوسف الحزينة ونضرات ياسين الباردة مبقاوش كيف كانو ...

اشرف "من بعد ما مشاو جيهة لاخرا الي قدام لابيسين " : حق ربي تزيد شوي نقول غاينوضو يضاربو ...

اسامة : مايديروهاش اصحبي مالهم هبلو ياسين يعايرو يوسف العميم تايعيا ميهزش فيه راس ...اغا جابو ليا بات مات ملل وجالس حدا الوليد خفت يسولني ولا نبان ليه فالبلان يزيدني نخدم فالصيف وانا باغي رتاح ونسافر نضور ...

اشرف : من حقك كمواطن ..."جات رميساء عندهم لابسة بيجامة صفية مستورة حيث كاين فؤاد "

رميساء : هااااي ...

اسامة : عليكم الهاي "طلعها وهبطها " تسترتي بان ليك الوليد ههخخ ...

رميساء"ميقت فيه " : كيشتي نتا متتخافش ...

اشرف : شوف ليك الگرادة تاهي ..وجدتي شي تكشيطة لعرس ؟

رميساء : كنوجد ...ونتا وجدتي تكشيطتك هاااء"حطات ايديها على فمها وضارت ورا اسامة هاربة "

اسامة : ههههههههههههع تخاف متحشم ...

اشرف : والله يا مك تنكويك من ودنك ...

رميساء : اااا كنضحك معاك ..."مدات ليه فمها " اجي نبوس خويا اج ...

اشرف"قربات ليه بغات تعنقو وهو يبعد فيها " : سيري سيري الفارة سيري فحالك حشي لديلمي الهضرة واجي نبوسك ..."كيبعد " حيدي اعيشة البواسة وااااكوااااك صافي صافي مسامح وااا قاودااااي ...

اسامة : تي صافي انا قهرتيني ...سيري جيبي لينا منقرقشو بينما تحط العشا ...

رميساء : فخباركم سليمانو جاي غذا هو واسلام ...

اشرف : فراااسنا وفراس جمالة ...هااا ايه تاااني ...

رميساء : غاتبقا نوار بوحدها ..."بحزن "

اسامة : وايلي ...كنبغي نهضر معاها وكنخاف متجاوبش ...

رميساء : مابقاتش كيف كانت فاش كنا سيمانة الي فاتت عندهم ولات كتهضر وتجاوب ولكن غيييير بالقد ماشي كيف لول كتهضر بزاف و ضحك تزبلها ...

اشرف : كنهضر معاها وتانا مبقاتش معايا كيف كانت ..."حدر راسو بغا يبكي " توحشتها بزاف ...

اسامة "تنهد" : شي نهار تجي ...عالله تجي قالعرس الفرحة تكمل ...

اشرف : زعما تجي ؟

اسامة : وحتى لامتا ؟ راهم ولاد العم بغيتي ولا كرهتي ضروري يتشاوفو وخا كل فين صد ...لا فعلا عندهم العقل را طلاق ماشي نهاية العالم ومتنساش هي الي جا منها وجهلت الى مفرقهاش تدير شي حاجة فراسها ...هي جا منها قرار ...نسيتي شحال طلب يوسف وشحال طلب الوليد الوليييد اصاحبي ومگرش فيها ...

رميساء : ودابا تبدلااات تقادت ومبقاتش ضعيفة غلاضت على كيف كانت ولات احسن ...

اسامة : هذا هو الفضل مهم تكون صحتها مزيانة ...كتبقا ختي تربات معايا وكبرات معايا خلي عليك راها بنت عمي ..."جلس فوق فوطوي الي تم " الله يدير ليهم الخير ...

تحط العشا تعشاو من بعد غياب العائلات تجمعو تاني الا الياس ونجوى الي كانو باقيين فالدوار عند نسابو بينما جا سليمان الي غاينزلو فمراكش ويجيو معاه ...العشا داز تقريبا ماشي كيف كان كيكون فالذي مضى شوي مشحون من جهة النفوس والنظرات وكل واش هاز ...كلا معاهم ياسين غي شوي واستاذن خرج لجردة يكمي ويدير تيليفون لفيرما لسالم على حسب الفيرما ...تا كمل اشغالو داز الوقت وطلع لبيت ينعس ...

صباح يوم جديد اليوم صبح سليمان مكاينش هو وخوه وصبحات دار خاوية عليها ...دوزات وقتها بين مدرسة ولاصال وهاكا دازو اوقاتها هذاك النهار اما ياسين فا مشا لفاس المحطة قضا الغراض مع الهام وقبل ميرجع ازرو ...

ياسين : باش مكان علميني شنو درتي ...

الهام : صافي واخا ...

ياسين : دار لقاها صاحبي (اركان ) هو الي تافق مع سيد ملي تسالي امورك وترجعي سيمانة جايا علميني باش نشوف ليك كاميو الي يهز ليك رحيل ...

الهام : نجيب معايا خويا تاهو ...

ياسين : ضروري ماتخليهش ...

الهام "بابتسامة " : لهلا يخطيك اياسين ...

ياسين : دنيا هاانيا من الخير من الخير ...يلاه نزلي دابا قضي وباتي فيها ليوم.… اركان يوصلك غذا باليل لمحطة ديك ساعة صوني ليا نهضر معاك ...

الهام : واخا ان شاء الله ...انا مشيت"ابتاسمات ليه ونزلات دخلات لدار الي كرا ليها وعفط هو عالكسيراتور شدها طريق وحدة لازرو ...

هاكا دازت يوميييين بالحساب ...يومين على الجميع تحضيرات العقد قايمة عرضو على ناس مقربين فقط واخا فالجردة وشبه عرس لكن كان عدد محدود من ناس حيث غير عقد ماشي عرس الكبير ...جايا هي وياه فالطريق حتى حط ايدو على ايدها كمشها ليها وهزها باسها بوسات متتالية ...

رياض : مال زين ساهي ...

مينة "كانت كتشوف فزاج تا ضارت عندو " : كنفكر فختي ...

رياض : خليها على خاطرها هي دابا ولات مسؤلة على راسها وزادت وعات هي عارفة فين الي يسلكها ...

مينة : ماتجيش لعقد ديالي !! ماشي ختها انا ؟ راني كنت فبلاصة مها ميمكنش ندوز عقد ومنحسش بنقص كبيييير من جيهتها...

رياض : وماتعرفي اش كاين من هنا لعقد تقدر تجي ...

مينة : نتمنى ...

رياض : ضروري تجي مغاديش تخليك غير خليها على راحتها ومضغطيش عليها ...

مينة "تنهدات" : واااخا ...

طلق سينيال جنب وركن قدام الفيلا ...نزلو بزوج ضار عنقها جنب ودخلو لفيلا حتى بداو يشمو ريحة طياب تعطعط ...

رياض : هااح هادي طنجية واقيلا ...والله تاهي طنجية ميمتي ونعرفها ...

مينة : ههههه داك منخر عندك كيجيب غا روايح هما ...

رياض : وريحة طياب ميمتي ونعرفها ..."وقفو عليها قدام الكوزينة "

مينة : واحد سلااام "مشات باستها" خالتي ...

ماجدة "عنقتها من ضهرها " : بنتي عاش من شافك ...كون ماعرضت عليك ماتجي ياك ...

مينة : نجيييي نجي ههههه "باست راسها ومع مينة طويلة تحدرات "

رياض"متكي على بوطاجي درخام جا لوسط وهو من جيهة لاخرا حيث كوزينة مفتوحة على صالة فين كيجلسو الي كتشوف فجردة" : درتي طنجية درتي خييير ...فيا جوع نيييت ...

رياض : كرشك اولدي كرشك ومن بعدها طوفان ...

مينة "حبست ضحكة "

رياض "شاف فمينة وشاف فمو " : وهنينا تحرجي فينا ...

ماجدة : سير اولدي سير هاني جايا نوجد اتاي ...

مينة : انا نحط صاكي وتيليفون ونعاونك ...

رياض : اااااا تعاوني اش تعاوني اجي معايا نوريك بيت نعاس شنو نزيد فيه ؟

مينة : والو بغيتو كيما هو ديرو ليا مفاجئة ...

رياض"خرج فيها عينيه " : مينة تحركي قدامي نشوفو البيت ...

مينة : رياااض ...

ماجدة : سيري شوفي البيت شنو ديري فيه هادشي خدمتك ...سيري متعكسيش

رياض"حبس ضحكة حيث شافها تزنگات وحشمت من مو " كخخم .."ضور وجهو لهيه"

مينة : ها واخا ...احم ...ترددات شحال وهي ضور خرجات وطلعات خلاتو تابعها وميت بضحك بالحس ...حيد فيستة بقا غير بقميجة طوا كمايمها وحل صدافي تنفس ...غير دخلات البيت وهو يضورها جابها قدامو محاوط ضهرها بايديه وزيرها عندها تا صدرها لصق مع صدرو ....

مينة "فمها بدا يترعد " : ر رياض شهادشي ؟

رياض : شنو ؟

مينة : رياض م ماشي دابا ...

رياض : وامتا اختي ؟

مينة : شتييي انا ختك اش كدير هادشي را حرام ...

رياض : عشقت زنى المحارم معاك ازين ...هااا "كيهضر ويقرب وجهو لوجهها ..." بوسة اخاا غانصبر راسي تانديرو العقد عاااايشك ...

مينة "جاب ليها ضحك " : ويل شيطان اش "حط شفايفو بالخف جنب شفايفها حتى غمضات عينيها حسات بقلبها نزل على شوي طيح ليه كون ماحكم فيها دغيا هز راسو " هاااح بوسة ديال ام بي سي تري ...ههه "باس ليها راسها " …

من بعد هاد اليومين الي دازت جا سليمان هو والياس ونجوى واسلام بدات الفيلا تعمر او قول عمرات جات راوية وايلاف وجاد من بعد ما داز عندهم ياسين سلم عليهم ...تجمعات العائلة كلها الا شخص واحد الي كان ناقص شخص الي كان واحد الوقت خالق ليهم لومبيونص بزبايلو ببكاه بشكاه كان معمر عليهم باش ما عطا الله وكان هو محور الاهتمام حتى ولا محور المشاك حتى ولا محور واهم محور ناقص ...شووووفدنيا اش كتخبي ليك وباش تصدمك وباش تفرحك وباش تغدرك ...

دخل بسيارة من بعد ما كان في فاس ورجع ...نزل منها بان ليه سليمان جالس كيقرا فواحد رواية وقدامو براد اتاي وجالس غييير وحدو مستغل الهدوء برا وقيتة المغرب ...حتى وقف عليه ...

ياسين : سليمان ...

سليمان"هز فيه عينيه وطوا رواية حطها " : ياسين ..."بابتسامة " جلس نهضرو شحال ماهضرت معاك جيت لقيتك مشغول ...

ياسين"حط ساروت وجلس " : مشاغيل دنيا فرقاتنا ..

سليمان : حنا الي بلينا راسنا بيها ...

ياسين : نقلبو على رزقنا ...

سليمان : رزقنا ماشي عيب نقلبو عليه ...لازم نضمو وقتنا ونخليو مساحة فين يرتاح راسنا ..لا خطاتنا صحة فين يبان رزقنا ...

ياسين : كلام حكيم لازم نعيد تفكير ...

سليمان : قلب على راحتك وراحة قلبك ...قلب على راحة دماغك هو لول شوف صحتك موراها تعرف كيفاش تنضم وقتك ..شغلتي عقلك بتمارة والحسابات ومساعدة ناس ونسيتي الحاجة باش تحرك وباش تعرف فين تحط رجلك ...

ياسين : الخاطر مرض والي عطا الله عطاااه ...

سليمان : قلب على الدوا الى حطيتي هادشي فراسك تيق بيا غاتلقاه ...خاصك تخوي قلبك الي عمر قبل ما صحتك تضر ...

ياسين "الصمت "

سليمان : فاش كتفكر ؟

ياسين : شنو تخدم معايا طب نفسي "غمزو "

سليمان : انا هنا ولد عمك منك وفيك واخا صغر منك نقدر نفعك ...طب نفسي خليه لمجانين هههه

ياسين : الي قلبو عمر كتبان عليه ؟

سليمان : على حسب الشخص وطبعو ...

ياسين : شنو بان ليك فيا ؟

سليمان : كلمة تقدر تعطيني الجواب الى سولتك ...

ياسين : سول ...

سليمان : ياسين لباس عليك ؟

ياسين "تقاد معاه تااا تقاد " : هاد تواخير عاد وليت لباس من قبل خاطري كان مريض وضارني وجرحي كبير وميتنسا ..ودابا انا عايش فطاعة ربي ورضاة الواليدين ...

سليمان"حرك راسو " : مزياان هادشي الي بغينا ....نكب ليك اتاي ؟

ياسين : كب معاك كب ...

كب ليه كاس اتاي ورجعو يهضرو غير امور عاادية جدا ...بين سؤال الاحوال فين وصل فالقرايا لا غير ...حتى انضم ليهم الحبيب وعلي واسامة واشرف ناض ياسين طلع يبدل ويصلي وينزل فهاد اللحضة دخلات سيارة ديالو نزل منها هو والام ديالو بلباس جلابة مخزانية

فالبيج وشال ذهبي شادة بيه ونضاضر شوف ابتسامة بشوشة فحال حسن الي واقف حداها بطقم كلاس الفريييع قميجة بيضة وسروال فصالة كحل صباط كحل لماع هاز فايدو ساشيات ...حتى تم جاي عندو يوسف ...

يوسف : مرحبااا وسهلا ...

حسن "تسالم معاه" : بارك الله فيك ...

يوسف "شاف ف غيتة وحدر راسو وهزو بدون ميسلم عليها احتراما " : الحاجة مرحبا عاش من شافكم ..

غيتة : ترحب بيك جنة دار الكبيرة هادي ...

يوسف : الله يكبر بيك ..تفضلو تفضلو ..."عنق حسن " كان حسن العشا نيييت كاين فؤاد وكلشي ونتوما تكونو قراب ماتعذب تجي من فاس تالهنا وتعاود ترجع ...

حسن : داكشي وقت ما جا الخير ينفع ...

دخلو لقاو فؤاد واقف سلمو عليه ...

حسن"حادر عينيه قدامو كيحشم منو بزااف ومع هيبتو طاغية كمل " : الله يكبر بيك سي الحاج ...

فؤاد "مشافش جيهة غيتة " : مرحبا الحاجة تفضلو ...

داوهم لصالون من بعد ماسلمو عليهم كاملين داتها يامنة معاهم الصالون لاخور مع العيالات وخلات حسن مع رجال ...تا تم نازل ياسين لابس مسكسف عالحالة قميجة كحلة وسروال فصالة مرجع شعرو بجيل ومقاد لحية ريحتو تعطي مع ديك طولة الملفتة عندو ...تا وقف على يامنة غاديا لمطبخ ...

ياسين"حنحن " : الحنانة ....

يامنة "ضارت لقاتو هاز فايدو تيليفون وباكية الكارو " : ااولدي ...غادي خارج ؟ وضياف ؟

ياسين : لا لا غير نمشي نكمي وندخل منخرج تانتعشاو ...انا ندخل نسلم ونخرج تانكمي ونرجع .."حركات ليه راسها وتم غادي فاتجاه صالون ...

ياسين : سلام عليكم ...

حسن "هز فيه راسو ووقف قرب عندو ياسين ...خبط ليه على ايدو ": ياسييين ...

ياسين : سي الحسن .."تسالم معاه " مرحبا بيك ...

حسن : بارك الله وفيك ...عاد سولت عليك الحبيب ...

ياسين : يسول فيك الخير ..."رجعو جلسو وياسين دار مخدة فوق حجرو مسرح حدا باه .."

حسن " : ههههه "ضحك لحبيب وضار عند يوسف حداه وهضر بشوي " ختي نوار الصغيورة (كان كيقولها ليها) ماجاتش ؟ ...

يوسف"حنحن" : لا لا ...احم كاس اتاي ياك...

فؤاد "رفع حاجبو " : ختو نوار !!

ياسين"حك لحيتو " : ...طلق سهامك الوليد (زعما هضر ) يوسف تحرج ...

فؤاد "كان متكي عالمخدة ...تگعد وحنحن ": كتر لغا (قوات الهضرة ) …

ياسين "مسند عالمخدة ومتبت فالهضرة كمل على هضرة باه " : ولْغا بلا ماكلة ما فيه فايدة ...

فؤاد : نجددو الملح وطعام …

ياسين : والغايب حجتو معاه ...

حسن بسؤالو على نوار يمكن هو كتجيه عادي بحكم كان كيعرفها فصغرها بزاااف وكانت عزيزة عليه لدرجة كان كيدير ليها خاطر بزاف واخا كانت غي مدة قليلة الي كان كيجي فيها لعندهم بقات مرسخة ليه فبالو ومعزتها كبيرة ...وان سول عليها فانه سول فقط بعفوية لا غير وهكاك طبعو ...يوسف تحرج من سؤالو وخا معندو حتى ذنب الشي الي لاحضو ياسين وفؤاد ...

كتر اللغا (قوات الهضرة ) طلق سهامك الوليد (بمعنى هضر بكلامك الموزون الي يسكت ومايحرج ) كترة لغا بلاماكلة (كترة الهضرة بلا ماكلة وهنا قصد بانه وصل وقت العشا يتحط والمقصود ب نجددو الملحة وطعام المعنى انه حسن فايت مشارك معاهم ملحة وطعام فالقدييييم ووصل وقت يتحط العشا ونجددو القديم ...والغايب حجتو معاه هنا المقصود بنوار بشكل غير مباشر لسؤال حسن عليها وهاكا استاطعو ينقذو يوسف من الاحراج الي تسبب فيه حسن بدون ما يقصد فقط منفرط عفويته ...

يوسف "ابتاسم " : نتعشاو عاد نديرو دكة دايزها الكلام ...

حسن : نتوما مالين الخير الي جا مرحبا ...

هي هاديك خرج يوسف عطاهم تعليمات باش يبداو يسربيو العشا الي اصلا كان وااجد على حقو وطريقو ...مشاو دراري شباب الي تكلفو بتسربايت (تسربية زعما ) وجدو طابلة وتقادو رجال فيها مترأسهم فؤاد وبداو يسربيو العشا الي كان على حقو وطريقو كبرو بيه بالمزيان

الي يليق بيه ويليق بال رمسيس بالاخص ...عشا كان من داكشي الشي الي خلاه فرحان وطول العشا وهو يشكر فيهم ...وهاكا داز اول عشا تعرض فيه فانتظار قدومه لعقد مينة الي كان من ضمن المعروضين ...

في الصباح الباكر كيف صلى صلاته لبس سبرديلا فرجليه ودار كاسكيط على راسو وخرج من البيت تلاقا بفؤاد تاهو جاي كيف العادة ونزلو شدوها جرية وحدة فديك الغابة حتى بداو ينقصو وخففو الوتيرة عاد تمو راجعين مشي وحدث فنفس الوقت ...

فؤاد : شنو الجديذ ؟

ياسين : بنت الناس الي كنت قلت ليك غادي نعاود ليك عليها ...

فؤاد : ايه ؟

ياسين : جبتها ولبارح لفاس حتى قادات امورها تما باش تبدا بداية جديدة فبلاد بعيدة على بلادها ...

فؤاد : مولات الفقيه بن صالح ؟

ياسين : هي هاديك ...

فؤاد : شنو قصتها ؟

ياسين"شاف قدامو وبدا يعاود "

"فلاش باك" ...

واحد من الايام تقريبا مع دخول شهر ماي كان واحد اليوم ممطر بزااااف فمدينة مراكش ونواحي واحد رعدة صباات بغزاااارة ...جاي بالليل ومخدم سويگلاص حتى وقف عند البراج ديال البوليس الي فدخلة كيتسنا يعطيوه اشارة باش يدوز ...وهو يوقفو واحد البوليسي وركن جنب ...

شرطي "من بعد ما نزل زاج " : واحد البولة عندك ماشعلاش ...

ياسين "نزل من سيارة فديك الشتا تا طل عليها " : وقع فيها مشكيل كنتسنا توصل "تحدر تا جبد شي وراق وعطاه توصيل " هذا بون باش خذيتها وهذا توصيل باش توصل "شير ليه " رينج لاخرة مزال شي بياس مداخلش ...

شرطي : شنو وقع ليها ؟

ياسين : واحد الحادث بغير قصد من واحد سيد ...

شرطي "بقا كيشوف فالوراق حتى مدهم ليه " : رد بالك ليل هذا وشتا ..."يلاه غايدور شرطي تا جات عندو واحد البنت كلها فازگة بشتا هي وخوها وحالتها حالة ...

هي : اسيدي واخا نبقا هنا حداكم تتبان شوي شمش راني وحلت وملقتي كيف نتحرك حتى بنتو ليا "كتقفقف بالبرد "

شرطي : ماعندك فين تمشي ؟ اش واقع ليك ؟

هي : واجرا عليا مول المحل والدار الي كارية راني غا يتيمة انا وخويا صغير كتاب عليا المكتاب بغيت غير يبان ضو ونمشي لمحطة ...

شرطي : فين غاديا ؟

هي : نمشي لفقيه بن صالح عند عمتي نقلب عليها هي الي بقات ليا ...

شرطي : سيري جلسي ولكن را حنا حدنا ربعة صباح ونطلقو سيرفيس ...

هي : ماشي مشكيل غييير نبقا حداكم خفت بزاف هنا ...

ياسين"شاف فيها " : نتي وخوك وحدكم ؟

هي "شافت فيه مع دخل طوموبيل " : وااه ...

ياسين : انا غادي لفقيه بن صالح دابا "شاف خوها كيتجمد بالبرد فمو ولا زرق وسنانو من طيارة باينين عاض عليهم عزو عليه وهي باينة حالتها ماشي طلابة ولا متشردة ..." تمشي معايا ؟

شرطي : عطيني لاكارط ديالك ...

هي "جبدتها من عنقها ومدتها ليه " : هاهي ...

شرطي : مقاديا ليك ...

هي : واه وغاديا لفقيه بن صالح تما بلادي نجمع وراقها ...

شرطي "شاف فياسين " : الى ديتيها تحمل مسؤليتك ...

ياسين : نوي الخير والي بغاه الله مرحبا ..."شاف فيها " ركبي تمشي فالامان اختي دخلي داك الولد يدفا شوفي حالتو ...

هي : الله يرحم ليك الواليدين ...

ضارت مسكينة ركبات اصلا باينة عليه ولد ناس من طيارة وبحضور شرطي خلاها ا

تطمأن ركب خوها لور مسكين عاد حس بعضامو كيرجعو وهي ركبات حداه طلق ليهم لاكليم دفيعم شير لشرطي وكسيرا شد طريق من محاسن الصدف انه كان اصلا غادي لفقيه بن صالح لغرض ما عندو ..

هي : الله يرحم ليك الواليدين ويوقف فطريقك ولاد الحلال ...درتي فيا خير ...

ياسين : هذا الي جرا عليك مكانش يصبر تال صباح ؟

هي "حدرت عينيها " : اصلا صبر عليا بزاف وهو را جرا عليا بنهار ومول المحل سد بمرة ومشا سافر وانا فلوسي مبقاوش الي كنت خازناه حطيتو عند واحد سيدة ايوا هي مجات تال ليل هادشي علاش مالقيت كيف ندير نمشي لمحطة ...

ياسين : فين كنتي بضبط ...

هي : واحد فيلاج حدا فين البراج فين وقفت ...

ياسين : شنو كنتي كتخدمي "كيهضر ويشوف قدامو "...

هي : عند مول القهوة كنخبز ليه انا مسمن وملوي ومسمن شحمة ...جاتو كونطرا لصبليون (اسبانيا ) وسد ومشا ...

ياسين "هز راسو وحطو وسكت مابقاش سولها "

يتبع...